꧕. ꦄꦥꦫꦭꦏꦸꦟ꧀ꦝꦏꦨꦢ꧀ꦢꦶꦪꦱꦸꦠ꧀ꦠꦮꦟ꧀ꦟꦤꦴ

꧖꧕. ꦥꦚ꧀ꦕꦩꦺ ꦱꦩ꧀ꦧꦲꦸꦭꦴꦤꦁ ꦨꦶꦏ꧀ꦑꦹꦤꦁ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴꦠꦶ ꦄꦴꦪꦱ꧀ꦩꦴ ꦭꦏꦸꦟ꧀ꦝꦏꦨꦢ꧀ꦢꦶꦪꦺꦴ ꦌꦏꦢꦶꦮꦱꦁ ꦱꦩ꧀ꦧꦲꦸꦭꦺꦲꦶ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦒꦴꦩꦤ꧀ꦠꦫꦺꦤ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦏꦠꦨꦠ꧀ꦠꦏꦶꦕ꧀ꦕꦺꦴ ꦥꦠ꧀ꦠꦁ ꦮꦺꦴꦢꦏꦁ ꦏꦠ꧀ꦮꦴ ꦡꦮꦶꦏꦴꦪ ꦥꦏ꧀ꦑꦶꦥꦶꦠ꧀ꦮꦴ ꦄꦁꦱꦺ ꦭꦒ꧀ꦒꦺꦠ꧀ꦮꦴ ꦕꦷꦮꦫꦁ ꦱꦔ꧀ꦓꦫꦶꦠ꧀ꦮꦴ ꦠꦩ꧀ꦥꦶ ꦮꦴꦩꦁꦱꦺ ꦜꦥꦺꦠ꧀ꦮꦴ ꦥꦴꦱꦴꦢꦶꦏꦺꦤ ꦄꦨꦶꦏ꧀ꦏꦤ꧀ꦠꦺꦤ ꦥꦛꦶꦏ꧀ꦏꦤ꧀ꦠꦺꦤ ꦄꦴꦭꦺꦴꦏꦶꦠꦺꦤ ꦮꦶꦭꦺꦴꦏꦶꦠꦺꦤ ꦱꦩꦶꦚ꧀ꦗꦶꦠꦺꦤ ꦥꦱꦴꦫꦶꦠꦺꦤ ꦎꦏ꧀ꦑꦶꦠ꧀ꦠꦕꦏ꧀ꦑꦸ ꦆꦫꦶꦪꦴꦥꦡꦱꦩ꧀ꦥꦤ꧀ꦤꦺꦴ ꦄꦠ꧀ꦠꦤꦺꦴ ꦱꦠꦶꦥꦚ꧀ꦚꦴꦮꦺꦥꦸꦭ꧀ꦭꦁ ꦥꦏꦴꦱꦺꦤ꧀ꦠꦺꦴ ꦮꦶꦪ ꦱꦠꦶꦱꦩ꧀ꦥꦗꦚ꧀ꦚꦁ ꦱꦹꦥꦛ꧀ꦜꦶꦠꦁ ꦏꦠ꧀ꦮꦴ ꦱꦩꦴꦲꦶꦠꦺꦤ ꦕꦶꦠ꧀ꦠꦺꦤ ꦥꦢꦺ ꦥꦢꦁ ꦤꦶꦏ꧀ꦑꦶꦥꦤ꧀ꦠꦺꦴ ꦒꦕ꧀ꦖꦠꦶ, ꦒꦕ꧀ꦖꦤ꧀ꦠꦺꦴ ꦕ ꦨꦶꦏ꧀ꦑꦹꦤꦁ ꦥꦕ꧀ꦖꦠꦺꦴ ꦥꦕ꧀ꦖꦠꦺꦴ ꦒꦕ꧀ꦖꦠꦶ ꦠꦺꦲꦶ ꦨꦶꦏ꧀ꦑꦹꦲꦶ ꦄꦱꦁꦩꦶꦱ꧀ꦱꦺꦴ. ꦏꦱ꧀ꦩꦴ? ꦄꦱꦁꦱꦛ꧀ꦜꦮꦶꦲꦴꦫꦶꦠꦴꦪ. ꦄꦥꦶꦕ ꦠꦱ꧀ꦱꦴꦪꦱ꧀ꦩꦠꦺꦴ ꦫꦹꦥꦁ ꦥꦫꦶꦨꦹꦠꦁ ꦥꦫꦶꦨꦮꦛ꧀ꦜꦴꦤꦷꦪꦁ ꦥꦸꦡꦸꦗ꧀ꦗꦤꦴ ꦎꦲꦷꦭ꦳ꦺꦤ꧀ꦠꦶ. ꦡꦺꦫꦺꦴ ꦠꦁ ꦗꦴꦤꦶꦠ꧀ꦮꦴ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦒꦕ꧀ꦖꦠꦶ ‘‘ꦩꦴ ꦆꦩꦺ ꦩꦁ ꦤꦶꦱ꧀ꦱꦴꦪ ꦄꦥꦸꦚ꧀ꦚꦁ ꦥꦱꦮꦶꦁꦱꦹ’’ꦠꦶ. ꦌꦮꦁ ꦠꦺ ꦨꦶꦏ꧀ꦑꦹ ꦕ ꦡꦺꦫꦺꦴ ꦕ ꦱꦴꦮꦠ꧀ꦡꦶꦁ ꦥꦠ꧀ꦮꦴ ꦮꦶꦲꦴꦫꦁ ꦥꦮꦶꦱꦶꦠ꧀ꦮꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦤ꧀ꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦭꦏꦸꦟ꧀ꦝꦏꦨꦢ꧀ꦢꦶꦪꦺꦴ’’ꦠꦶꦄꦴꦢꦶ.

ꦠꦠ꧀ꦡ ꦢꦸꦧ꧀ꦧꦟ꧀ꦟꦤ꧀ꦠꦶ ꦮꦶꦫꦹꦥꦁ. ꦠꦺꦤꦱ꧀ꦱ ꦮꦟ꧀ꦟꦱꦩ꧀ꦥꦠ꧀ꦠꦶꦪꦴ ꦱꦟ꧀ꦜꦴꦤꦱꦩ꧀ꦥꦠ꧀ꦠꦶꦪꦴ ꦕ ꦄꦨꦴꦮꦁ ꦢꦱ꧀ꦱꦺꦠꦶ. ꦢꦸꦢ꧀ꦢꦱꦶꦏꦤ꧀ꦠꦶ ꦄꦥꦴꦱꦴꦢꦶꦏꦢꦱ꧀ꦱꦤꦁ. ꦠꦺꦤꦱ꧀ꦱ ꦄꦤꦸꦧ꧀ꦪꦚ꧀ꦗꦤꦱꦩ꧀ꦥꦠ꧀ꦠꦶꦪꦴ ꦄꦴꦏꦴꦫꦱꦩ꧀ꦥꦠ꧀ꦠꦶꦪꦴ ꦕ ꦄꦨꦴꦮꦁ ꦢꦱ꧀ꦱꦺꦠꦶ. ꦎꦏꦺꦴꦛꦶꦩꦏꦤ꧀ꦠꦶ ꦫꦱ꧀ꦱꦁ. ꦆꦩꦶꦤꦴ ꦄꦴꦫꦺꦴꦲꦱꦩ꧀ꦥꦠ꧀ꦠꦶꦪꦴ ꦄꦨꦴꦮꦁ ꦢꦱ꧀ꦱꦺꦠꦶ. ꦪꦺꦨꦸꦪ꧀ꦪꦺꦤ ꦨꦶꦏ꧀ꦑꦹꦤꦁ ꦥꦫꦶꦨꦹꦠꦫꦹꦥꦤ꧀ꦠꦶ ꦥꦸꦡꦸꦗ꧀ꦗꦤꦨꦶꦏ꧀ꦑꦹꦲꦶ ꦎꦲꦷꦭ꦳ꦶꦠꦫꦹꦥꦁ. ꦥꦸꦡꦸꦗ꧀ꦗꦤꦴ ꦌꦏꦕ꧀ꦕꦺ ꦖꦧ꧀ꦧꦒ꧀ꦒꦶꦪꦴꦢꦪꦺꦴ ꦠꦱ꧀ꦱꦴꦪꦱ꧀ꦩꦠꦺꦴ ꦒꦸꦟꦁ ꦄꦗꦴꦤꦤ꧀ꦠꦴ ꦲꦠ꧀ꦡꦏꦟ꧀ꦟꦕꦹꦭ꦳ꦶꦏꦴꦢꦷꦱꦸ ꦒꦟ꧀ꦲꦤ꧀ꦠꦴ ꦥꦫꦴꦩꦱꦤ꧀ꦠꦴ ꦏꦷꦭ꦳ꦤ꧀ꦠꦴ ꦥꦫꦶꦨꦮꦤ꧀ꦠꦶ, ꦤ ꦄꦫꦶꦪꦴ, ꦏꦭ꧀ꦪꦴꦟꦥꦸꦡꦸꦗ꧀ꦗꦤꦴ ꦮꦴ.

ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦷꦠꦶ ꦏꦱ꧀ꦩꦴ ꦄꦴꦩꦤ꧀ꦠꦺꦱꦶ? ꦡꦺꦫꦱ꧀ꦱ ꦒꦸꦟꦁ ꦥꦏꦴꦱꦺꦠꦸꦁ. ꦌꦮꦁ ꦏꦶꦫ ꦨꦒꦮꦠꦺꦴ ꦄꦲꦺꦴꦱꦶ ‘‘ꦆꦩꦺ ꦨꦶꦏ꧀ꦑꦹ ꦩꦩ ꦥꦸꦠ꧀ꦠꦱ꧀ꦱ ꦩꦲꦴꦤꦸꦨꦴꦮꦠꦁ ꦤ ꦗꦴꦤꦤ꧀ꦠꦶ, ꦠꦺꦤ ꦠꦁ ꦥꦫꦶꦨꦮꦤ꧀ꦠꦶ, ꦠꦁ ꦤꦺꦱꦁ ꦢꦷꦓꦫꦠ꧀ꦠꦁ ꦄꦲꦶꦠꦴꦪ ꦢꦸꦏ꧀ꦑꦴꦪ ꦨꦮꦶꦱ꧀ꦱꦠꦶ, ꦲꦤ꧀ꦢꦴꦲꦁ ꦆꦩꦱ꧀ꦱ ꦒꦸꦟꦺ ꦨꦶꦏ꧀ꦑꦹꦤꦁ ꦥꦏꦴꦱꦺꦠ꧀ꦮꦴ ꦥꦫꦶꦨꦮꦠꦺꦴ ꦤꦁ ꦩꦺꦴꦕꦺꦱ꧀ꦱꦴꦩꦷ’’ꦠꦶ.

ꦥꦱ꧀ꦱꦡ ꦤꦺꦴꦠꦶ ꦥꦱ꧀ꦱꦡ ꦤꦸ. ꦤ ꦕ ꦱꦴ ꦱꦩꦴꦥꦠ꧀ꦠꦶ ꦱꦸꦭꦨꦫꦹꦥꦴ, ꦪꦴ ꦠꦺꦤ ꦨꦶꦏ꧀ꦑꦸꦤꦴ ꦄꦱꦩꦴꦥꦤ꧀ꦤꦥꦸꦧ꧀ꦧꦴꦠꦶ ꦫꦹꦥꦱꦩꦴꦥꦠ꧀ꦠꦶ ꦄꦫꦹꦥꦱꦩꦴꦥꦠ꧀ꦠꦶ ꦧ꧀ꦫꦲ꧀ꦩꦮꦶꦲꦴꦫꦱꦩꦴꦥꦠ꧀ꦠꦶ ꦤꦶꦫꦺꦴꦣꦱꦩꦴꦥꦠ꧀ꦠꦶ ꦦꦭꦱꦩꦴꦥꦠ꧀ꦠꦷꦠꦶ ꦌꦮꦁ ꦥꦨꦺꦢꦴ ꦱꦴꦮꦏꦱꦴꦣꦴꦫꦟꦴ ꦪꦴ ꦏꦴꦕꦶ ꦱꦩꦴꦥꦠ꧀ꦠꦶꦪꦺꦴ ꦤꦴꦩ, ꦠꦴꦱꦸ ꦌꦏꦴꦥꦶ ꦱꦩꦴꦥꦠ꧀ꦠꦶ ꦤ ꦱꦸꦭꦨꦫꦹꦥꦴ, ꦢꦸꦭ꧀ꦭꦨꦴ, ꦤꦠ꧀ꦡꦶꦪꦺꦮ ꦱꦴ ꦠꦺꦤ ꦭꦏꦸꦟ꧀ꦝꦏꦨꦢ꧀ꦢꦶꦪꦺꦤ ꦨꦶꦏ꧀ꦑꦸꦤꦴ ꦄꦱꦩꦴꦥꦤ꧀ꦤꦥꦸꦧ꧀ꦧꦴ. ꦌꦠꦺꦤꦱ꧀ꦱ ꦪꦁ ꦮꦸꦠ꧀ꦠꦁ. ‘‘ꦩꦲꦶꦢ꧀ꦣꦶꦏꦺꦴ ꦩꦲꦴꦤꦸꦨꦴꦮꦺꦴ’’ꦠꦶ, ꦠꦠ꧀ꦡ ꦩꦲꦶꦢ꧀ꦣꦶꦏꦠꦁ ꦥꦏꦴꦱꦺꦠ꧀ꦮꦴ ꦆꦢꦴꦤꦶ ꦩꦲꦴꦤꦸꦨꦴꦮꦠꦁ ꦢꦱ꧀ꦱꦺꦠꦸꦁ ‘‘ꦪꦱ꧀ꦱ ꦕꦠ꧀ꦡꦴꦪꦴ’’ꦠꦶꦄꦴꦢꦶꦩꦴꦲ. ꦠꦁ ꦲꦺꦛ꧀ꦜꦴ ꦮꦸꦠ꧀ꦠꦤꦪꦩꦺꦮ. ꦌꦠ꧀ꦡ ꦕ ꦨꦒꦮꦴ ‘‘ꦌꦱꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ’’ꦠꦶꦄꦴꦢꦶꦤꦴ, ‘‘ꦨꦶꦏ꧀ꦑꦮꦺ, ꦄꦪꦁ ꦨꦶꦏ꧀ꦑꦸ ꦤ ꦪꦺꦴ ꦮꦴ ꦱꦺꦴ ꦮꦴ ꦢꦸꦧ꧀ꦧꦟ꧀ꦟꦺꦴ ꦢꦸꦢ꧀ꦢꦱꦶꦏꦺꦴ ꦎꦏꦺꦴꦛꦶꦩꦏꦺꦴꦠꦶ ꦨꦶꦏ꧀ꦑꦹꦤꦁ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦄꦴꦒꦕ꧀ꦖꦠꦷꦠꦶ ꦕ ꦌꦠ꧀ꦠꦏꦺꦤ ꦤ ꦎꦚ꧀ꦚꦴꦠꦧ꧀ꦧꦺꦴ, ꦄꦡ ꦑꦺꦴ ꦩꦲꦶꦢ꧀ꦣꦶꦏꦺꦴ ꦩꦲꦴꦤꦸꦨꦴꦮꦺꦴ, ꦪꦁꦏꦶꦚ꧀ꦕꦶ ꦱꦴꦮꦏꦺꦤ ꦥꦠ꧀ꦠꦧ꧀ꦧꦁ, ꦱꦧ꧀ꦧꦁ ꦠꦁ ꦠꦺꦤ ꦄꦤꦸꦥ꧀ꦥꦠ꧀ꦠꦁ, ꦠꦱ꧀ꦩꦴ ꦠꦁ ꦥꦴꦱꦴꦟꦕ꧀ꦖꦠ꧀ꦠꦁ ꦮꦶꦪ ꦒꦫꦸꦁ ꦏꦠ꧀ꦮꦴ ꦎꦭꦺꦴꦏꦺꦡ, ꦠꦁ ꦮꦺꦴ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪ ꦨꦮꦶꦱ꧀ꦱꦠꦷ’’ꦠꦶ ꦢꦱ꧀ꦱꦺꦠꦶ.

ꦌꦠꦩꦠ꧀ꦡꦁ ꦮꦶꦢꦶꦠ꧀ꦮꦴꦠꦶ ꦌꦠꦁ ꦄꦴꦪꦱ꧀ꦩꦠꦺꦴ ꦭꦏꦸꦟ꧀ꦝꦏꦨꦢ꧀ꦢꦶꦪꦱ꧀ꦱ ꦩꦲꦶꦢ꧀ꦣꦶꦏꦠꦴꦩꦲꦴꦤꦸꦨꦴꦮꦠꦴꦢꦶꦨꦺꦢꦁ ꦒꦸꦟꦫꦴꦱꦶꦁ ꦱꦧ꧀ꦧꦴꦏꦴꦫꦠꦺꦴ ꦗꦴꦤꦶꦠ꧀ꦮꦴ ꦠꦢꦠ꧀ꦡꦢꦷꦥꦤꦁ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦶ.

ꦠꦠ꧀ꦡ ꦤꦺꦭꦔ꧀ꦒꦺꦴꦠꦶ ꦌꦭꦁ ꦮꦸꦕ꧀ꦕꦠꦶ ꦢꦺꦴꦱꦺꦴ, ꦤꦴꦱ꧀ꦱ ꦌꦭꦤ꧀ꦠꦶ ꦤꦺꦭꦁ. ꦏꦶꦁ ꦥꦤ ꦠꦁ? ꦱꦸꦥꦫꦶꦱꦸꦢ꧀ꦣꦱꦷꦭꦁ. ꦠꦚ꧀ꦲꦶ ꦤꦶꦢ꧀ꦢꦺꦴꦱꦛ꧀ꦜꦺꦤ ꦆꦣ ‘‘ꦤꦺꦭ’’ꦤ꧀ꦠꦶ ꦄꦣꦶꦥ꧀ꦥꦺꦠꦁ. ꦠꦁ ꦤꦺꦭꦁ ꦥꦣꦴꦤꦨꦹꦠꦁ ꦄꦔ꧀ꦒꦁ ꦌꦠꦱ꧀ꦱꦴꦠꦶ ꦤꦺꦭꦔ꧀ꦒꦺꦴ. ꦱꦺꦴ ꦪꦁ ‘‘ꦫꦡꦺꦴ’’ꦠꦶ ꦮꦏ꧀ꦑꦠꦶ, ꦠꦺꦤ ꦱꦩ꧀ꦧꦤ꧀ꦣꦺꦴ, ꦠꦱ꧀ꦩꦴ ꦱꦸꦥꦫꦶꦱꦸꦢ꧀ꦣꦱꦷꦭꦔ꧀ꦒꦺꦴꦠꦶ ꦄꦠ꧀ꦡꦺꦴ. ꦄꦫꦲꦠ꧀ꦠꦦꦭꦱꦷꦭꦚ꧀ꦲꦶ ꦆꦣꦴꦣꦶꦥ꧀ꦥꦺꦠꦁ. ꦱꦺꦠꦺꦴ ꦥꦕ꧀ꦖꦴꦢꦺꦴ ꦌꦠꦱ꧀ꦱꦴꦠꦶ ꦱꦺꦠꦥꦕ꧀ꦖꦴꦢꦺꦴ. ꦥꦕ꧀ꦖꦴꦢꦺꦴꦠꦶ ꦫꦡꦱ꧀ꦱ ꦈꦥꦫꦶ ꦄꦠ꧀ꦡꦫꦶꦠꦧ꧀ꦧꦏꦩ꧀ꦧꦭꦴꦢꦶ. ꦱꦺꦴ ꦥꦤ ꦱꦸꦥꦫꦶꦱꦸꦢ꧀ꦣꦣꦮꦭꦨꦴꦮꦺꦤ ꦱꦺꦠꦺꦴ ꦮꦴ ꦲꦺꦴꦠꦶ ꦫꦠ꧀ꦠꦤꦷꦭꦴꦢꦷꦱꦸ ꦮꦴ ꦄꦚ꧀ꦚꦠꦫꦺꦴ. ꦆꦣ ꦥꦤ ꦄꦫꦲꦠ꧀ꦠꦦꦭꦮꦶꦩꦸꦠ꧀ꦠꦶꦪꦴ ꦄꦣꦶꦥ꧀ꦥꦺꦠꦠ꧀ꦠꦴ ꦱꦸꦥꦫꦶꦱꦸꦢ꧀ꦣꦨꦴꦮꦁ ꦈꦥꦴꦢꦴꦪ ‘‘ꦱꦺꦠꦥꦕ꧀ꦖꦴꦢꦺꦴ’’ꦠꦶ ꦮꦸꦠ꧀ꦠꦁ ꦪꦡꦴ ꦄꦚ꧀ꦚꦠ꧀ꦫꦴꦥꦶ ‘‘ꦫꦡꦺꦴ ꦱꦷꦭꦥꦫꦶꦏ꧀ꦑꦴꦫꦺꦴ’’ꦠꦶ. ꦌꦏꦺꦴ ꦱꦠꦶꦱꦔ꧀ꦑꦴꦠꦺꦴ ꦄꦫꦺꦴ ꦌꦠꦱ꧀ꦱꦴꦠꦶ ꦌꦏꦴꦫꦺꦴ. ꦮꦠ꧀ꦠꦠꦷꦠꦶ ꦥꦮꦠ꧀ꦠꦠꦶ. ꦫꦡꦺꦴꦠꦶ ꦡꦺꦫꦱ꧀ꦱ ꦄꦠ꧀ꦠꦨꦴꦮꦁ ꦱꦤ꧀ꦣꦴꦪ ꦮꦢꦠꦶ.

ꦄꦤꦷꦓꦤ꧀ꦠꦶ ꦤꦶꦢ꧀ꦢꦸꦏ꧀ꦑꦁ, ꦑꦺꦴꦨꦮꦶꦫꦲꦶꦠꦁ ꦪꦴꦤꦁ ꦮꦶꦪ ꦏꦶꦭꦺꦱꦥꦫꦶꦑꦺꦴꦨꦮꦶꦫꦲꦶꦠꦤ꧀ꦠꦶ ꦄꦠ꧀ꦡꦺꦴ. ꦄꦴꦪꦤ꧀ꦠꦤ꧀ꦠꦶ ꦱꦩ꧀ꦧꦲꦸꦭꦴꦤꦁ ꦨꦶꦏ꧀ꦑꦹꦤꦁ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦄꦴꦒꦕ꧀ꦖꦤ꧀ꦠꦁ. ꦖꦶꦤ꧀ꦤꦱꦺꦴꦠꦤ꧀ꦠꦶ ꦥꦕ꧀ꦖꦶꦤ꧀ꦤꦱꦺꦴꦠꦁ. ꦥꦏꦠꦶꦫꦡꦱ꧀ꦱ ꦲꦶ ꦱꦸꦑꦥꦮꦠ꧀ꦠꦤꦠ꧀ꦡꦁ ꦄꦏ꧀ꦑꦱꦷꦱꦺꦱꦸ ꦤꦴꦨꦶꦪꦚ꧀ꦕ ꦈꦥꦭꦶꦠ꧀ꦠꦴꦤꦁ ꦱꦥ꧀ꦥꦶꦠꦺꦭꦴꦢꦷꦤꦁ ꦱꦺꦴꦠꦺꦴ ꦱꦮꦤꦁ ꦱꦤ꧀ꦢꦤꦁ ꦲꦺꦴꦠꦶ, ꦠꦺꦤ ꦱꦺꦴ ꦄꦕ꧀ꦖꦶꦤ꧀ꦤꦱꦺꦴꦠꦺꦴ ꦤꦴꦩ ꦲꦺꦴꦠꦶ. ꦄꦪꦁ ꦥꦤ ꦖꦠ꧀ꦠꦶꦁꦱꦠꦶꦪꦴ ꦱꦺꦴꦠꦴꦤꦁ ꦄꦤꦮꦱꦺꦱꦠꦺꦴ ꦥꦲꦷꦤꦠ꧀ꦠꦴ ꦖꦶꦤ꧀ꦤꦱꦺꦴꦠꦺꦴ ꦤꦴꦩ ꦲꦺꦴꦠꦶ, ꦠꦁ ꦖꦶꦤ꧀ꦤꦱꦺꦴꦠꦁ. ꦤꦠ꧀ꦡꦶ ꦌꦠꦱ꧀ꦱ ꦧꦤ꧀ꦣꦤꦤ꧀ꦠꦶ ꦄꦧꦤ꧀ꦣꦤꦺꦴ. ꦫꦡꦹꦥꦠ꧀ꦡꦫꦱ꧀ꦱ ꦲꦶ ꦄꦏ꧀ꦑꦺꦤ ꦱꦢ꧀ꦣꦶꦁ ꦤꦶꦕ꧀ꦕꦭꦨꦴꦮꦏꦫꦟꦠ꧀ꦡꦁ ꦧꦲꦹꦤꦶ ꦧꦤ꧀ꦣꦤꦴꦤꦶ ꦲꦺꦴꦤ꧀ꦠꦶ, ꦠꦺꦤ ꦱꦺꦴ ꦱꦧꦤ꧀ꦣꦤꦺꦴ. ꦄꦪꦁ ꦥꦤ ꦱꦧ꧀ꦧꦱꦁꦪꦺꦴꦗꦤꦧꦤ꧀ꦣꦤꦴꦤꦁ ꦄꦤꦮꦱꦺꦱꦠꦺꦴ ꦥꦫꦶꦏ꧀ꦑꦷꦟꦠ꧀ꦠꦴ ꦄꦧꦤ꧀ꦣꦤꦺꦴ, ꦠꦁ ꦄꦧꦤ꧀ꦣꦤꦁ. ꦥꦱ꧀ꦱꦴꦠꦶ ꦨꦒꦮꦴ ꦡꦺꦫꦱ꧀ꦱ ꦒꦸꦟꦺꦲꦶ ꦱꦺꦴꦩꦤꦱ꧀ꦱꦥ꧀ꦥꦠ꧀ꦠꦺꦴ ꦲꦸꦠ꧀ꦮꦴ ꦄꦠ꧀ꦠꦴꦤꦁ ꦮꦢꦠꦶ.

ꦆꦠꦶ ꦱꦠ꧀ꦡꦴ ꦄꦴꦪꦱ꧀ꦩꦤ꧀ꦠꦁ ꦭꦏꦸꦟ꧀ꦝꦏꦨꦢ꧀ꦢꦶꦪꦁ ꦄꦫꦲꦠ꧀ꦠꦦꦭꦱꦷꦱꦺꦤ ꦱꦸꦕꦏ꧀ꦏꦁ, ꦄꦫꦲꦠ꧀ꦠꦦꦭꦮꦶꦩꦸꦠ꧀ꦠꦶꦪꦴ ꦱꦸꦈꦠ꧀ꦠꦫꦕ꧀ꦖꦢꦁ, ꦱꦹꦥꦛ꧀ꦜꦶꦠꦴꦪ ꦱꦠꦶꦪꦴ ꦱ꧀ꦮꦴꦫꦁ, ꦏꦶꦭꦺꦱꦥꦫꦶꦑꦺꦴꦨꦴꦨꦴꦮꦺꦤ ꦄꦥꦫꦶꦑꦺꦴꦨꦁ, ꦠꦟ꧀ꦲꦹꦥꦭꦺꦥꦴꦨꦴꦮꦺꦤ ꦄꦤꦸꦥꦭꦺꦥꦁ, ꦱꦁꦪꦺꦴꦗꦤꦴꦢꦷꦤꦁ ꦄꦨꦴꦮꦺꦤ ꦄꦧꦤ꧀ꦣꦤꦁ ꦱꦸꦥꦫꦶꦏ꧀ꦑꦶꦠ꧀ꦠꦁ ꦱꦸꦪꦸꦠ꧀ꦠꦁ ꦄꦴꦗꦚ꧀ꦚꦫꦡꦁ ꦏꦠ꧀ꦮꦴ ꦢꦱ꧀ꦱꦺꦠꦶ.

ꦥꦚ꧀ꦕꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.