꧘. ꦒꦟꦶꦏꦴꦱꦸꦠ꧀ꦠꦮꦟ꧀ꦟꦤꦴ

꧕꧘. ꦄꦛ꧀ꦜꦩꦺ ꦢ꧀ꦮꦺ ꦥꦹꦒꦴꦠꦶ ꦢ꧀ꦮꦺ ꦒꦟꦴ. ꦄꦚ꧀ꦚꦠꦫꦶꦱ꧀ꦱꦴ ꦒꦟꦶꦏꦴꦪꦴꦠꦶ ꦄꦚ꧀ꦚꦠꦫꦴꦪ ꦤꦒꦫꦱꦺꦴꦨꦶꦤꦶꦪꦴ. ꦱꦴꦫꦠ꧀ꦠꦴꦠꦶ ꦱꦸꦛ꧀ꦜꦸ ꦫꦠ꧀ꦠꦴ. ꦥꦛꦶꦧꦢ꧀ꦣꦕꦶꦠ꧀ꦠꦴꦠꦶ ꦏꦶꦭꦺꦱꦮꦱꦺꦤ ꦧꦢ꧀ꦣꦕꦶꦠ꧀ꦠꦴ. ꦫꦴꦗꦒꦲꦺ ꦏꦶꦫ ꦌꦏꦱ꧀ꦩꦶꦁ ꦖꦟꦢꦶꦮꦱꦺ ꦧꦲꦹ ꦣꦸꦠ꧀ꦠꦥꦸꦫꦶꦱꦴ ꦒꦟꦧꦤ꧀ꦣꦤꦺꦤ ꦮꦶꦕꦫꦤ꧀ꦠꦴ ꦌꦏꦩꦺꦏꦱ꧀ꦱ ꦌꦏꦩꦺꦏꦁ ꦮꦺꦱꦶꦁ ꦄꦴꦤꦺꦠ꧀ꦮꦴ ꦈꦪ꧀ꦪꦴꦤꦁ ꦥꦮꦶꦱꦶꦠ꧀ꦮꦴ ꦖꦟꦏꦷꦭ꦳ꦁ ꦏꦷꦭ꦳ꦶꦁꦱꦸ. ꦠꦠꦺꦴ ꦥꦫꦩ꧀ꦥꦶ ꦢ꧀ꦮꦺ ꦠꦪꦺꦴ ꦖꦟꦢꦶꦮꦱꦺ ꦠꦁ ꦠꦁꦪꦺꦮ ꦮꦺꦱꦶꦁ ꦄꦴꦤꦺꦠ꧀ꦮꦴ ꦖꦟꦏꦷꦭ꦳ꦁ ꦏꦷꦭ꦳ꦶꦁꦱꦸ. ꦄꦡꦴꦥꦫꦱ꧀ꦩꦶꦁ ꦖꦟꦢꦶꦮꦱꦺ ꦄꦚ꧀ꦚꦺꦥꦶ ꦣꦸꦠ꧀ꦠꦴ ꦠꦡꦺꦮ ꦖꦟꦏꦷꦭ꦳ꦁ ꦏꦷꦭ꦳ꦶꦠꦸꦏꦴꦩꦴ ꦮꦺꦱꦶꦪꦺꦴ ꦄꦴꦤꦺꦤ꧀ꦠꦴ ꦥꦸꦫꦶꦩꦣꦸꦠ꧀ꦠꦺꦲꦶ ꦥꦸꦧ꧀ꦧꦺ ꦄꦴꦤꦷꦠꦁ ꦌꦏꦁ ꦮꦺꦱꦶꦁ ꦄꦴꦤꦺꦤ꧀ꦠꦶ. ꦆꦠꦫꦺ ꦠꦁ ꦢꦶꦱ꧀ꦮꦴ ‘‘ꦄꦪꦁ ꦄꦩ꧀ꦲꦴꦏꦁ ꦥꦫꦶꦒ꧀ꦒꦲꦺꦴ’’ꦠꦶ ꦄꦴꦲꦁꦱꦸ. ꦠꦺꦥꦶ ꦠꦡꦺꦮ ꦄꦴꦲꦁꦱꦸ. ‘‘ꦌꦮꦁ ꦄꦩ꧀ꦲꦴꦏꦁ ꦥꦫꦶꦒ꧀ꦒꦲꦺꦴ, ꦄꦩ꧀ꦲꦴꦏꦁ ꦥꦫꦶꦒ꧀ꦒꦲꦺꦴ’’ꦠꦶ ꦏꦭꦲꦁ ꦮꦝ꧀ꦞꦺꦠ꧀ꦮꦴ ꦥꦴꦟꦶꦥ꧀ꦥꦲꦴꦫꦴꦢꦷꦤꦶ ꦄꦏꦁꦱꦸ. ꦠꦺꦤ ꦮꦸꦠ꧀ꦠꦁ – ‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦫꦴꦗꦒꦲꦺ ꦢ꧀ꦮꦺ ꦥꦹꦒꦴ’’ꦠꦶꦄꦴꦢꦶ. ꦠꦠ꧀ꦡ ꦈꦥꦏ꧀ꦏꦩꦤ꧀ꦠꦷꦠꦶ ꦥꦲꦫꦤ꧀ꦠꦶ. ꦩꦫꦟꦩ꧀ꦥꦶ ꦤꦶꦒꦕ꧀ꦖꦤ꧀ꦠꦷꦠꦶ ꦧꦭꦮꦹꦥꦏ꧀ꦏꦩꦺꦲꦶ ꦩꦫꦟꦁ ꦈꦥꦒꦕ꧀ꦖꦤ꧀ꦠꦶ, ꦆꦠꦫꦺꦥꦶ ꦩꦫꦟꦩꦠ꧀ꦠꦁ ꦩꦫꦟꦥ꧀ꦥꦩꦴꦟꦢꦸꦏ꧀ꦑꦁ ꦥꦴꦥꦸꦟꦤ꧀ꦠꦶ.

ꦌꦠꦩꦠ꧀ꦡꦁ ꦮꦶꦢꦶꦠ꧀ꦮꦴꦠꦶ ꦌꦠꦁ ꦏꦴꦩꦺꦱꦸ ꦒꦺꦣꦁ ꦮꦶꦮꦴꦢꦩꦹꦭꦁ ꦱꦧ꧀ꦧꦴꦤꦠ꧀ꦡꦩꦹꦭꦤ꧀ꦠꦶ ꦱꦧ꧀ꦧꦴꦏꦴꦫꦠꦺꦴ ꦮꦶꦢꦶꦠ꧀ꦮꦴ. ꦆꦩꦁ ꦈꦢꦴꦤꦤ꧀ꦠꦶ ꦄꦤ꧀ꦠꦢ꧀ꦮꦪꦺ ꦕ ꦩꦗ꧀ꦙꦶꦩꦴꦪ ꦥꦛꦶꦥꦠ꧀ꦠꦶꦪꦴ ꦄꦴꦢꦷꦤꦮꦴꦤꦶꦱꦁꦱꦮꦶꦨꦴꦮꦤꦁ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦶ.

ꦠꦠ꧀ꦡ ꦪꦚ꧀ꦕ ꦥꦠ꧀ꦠꦤ꧀ꦠꦶ ꦪꦁ ꦫꦹꦥꦴꦢꦶꦥꦚ꧀ꦕꦏꦴꦩꦒꦸꦟꦗꦴꦠꦁ ꦥꦠ꧀ꦠꦁ ‘‘ꦤꦠ꧀ꦡꦶ ꦏꦴꦩꦺꦱꦸ ꦢꦺꦴꦱꦺꦴ’’ꦠꦶ ꦢꦶꦛ꧀ꦜꦶꦁ ꦥꦸꦫꦏ꧀ꦑꦠ꧀ꦮꦴ ꦮꦴ ꦄꦥꦸꦫꦏ꧀ꦑꦠ꧀ꦮꦴ ꦮꦴ ꦌꦠꦫꦲꦶ ꦭꦢ꧀ꦣꦁ ꦄꦤꦸꦨꦸꦪ꧀ꦪꦩꦴꦤꦁ. ꦪꦚ꧀ꦕ ꦥꦠ꧀ꦠꦧ꧀ꦧꦤ꧀ꦠꦶ ꦪꦚ꧀ꦕ ꦏꦴꦩꦒꦸꦟꦗꦴꦠꦩꦺꦮ ‘‘ꦨꦸꦚ꧀ꦗꦶꦠꦧ꧀ꦧꦴ ꦏꦴꦩꦴ, ꦥꦫꦶꦨꦸꦚ꧀ꦗꦶꦠꦧ꧀ꦧꦴ ꦏꦴꦩꦴ, ꦄꦴꦱꦺꦮꦶꦠꦧ꧀ꦧꦴ ꦏꦴꦩꦴ, ꦥꦛꦶꦱꦺꦮꦶꦠꦧ꧀ꦧꦴ ꦏꦴꦩꦴ, ꦪꦺꦴ ꦏꦴꦩꦺ ꦥꦫꦶꦨꦸꦚ꧀ꦗꦠꦶ, ꦱꦺꦴ ꦭꦺꦴꦏꦁ ꦮꦝ꧀ꦞꦺꦠꦶ, ꦪꦺꦴ ꦭꦺꦴꦏꦁ ꦮꦝ꧀ꦞꦺꦠꦶ, ꦱꦺꦴ ꦧꦲꦸꦁ ꦥꦸꦚ꧀ꦚꦁ ꦥꦱꦮꦠꦷ’’ꦠꦶ ꦢꦶꦛ꧀ꦜꦶꦁ ꦈꦥꦤꦶꦱ꧀ꦱꦴꦪ ꦠꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦏꦠꦺꦤ ꦏꦩ꧀ꦩꦸꦤꦴ ꦄꦤꦴꦒꦠꦺ ꦥꦠ꧀ꦠꦧ꧀ꦧꦁ ꦄꦤꦸꦨꦮꦶꦠꦧ꧀ꦧꦚ꧀ꦕ. ꦈꦨꦪꦩꦺꦠꦁ ꦫꦗꦴꦤꦸꦏꦶꦟ꧀ꦟꦤ꧀ꦠꦶ ꦌꦠꦁ ꦈꦨꦪꦁ ꦥꦠ꧀ꦠꦁ ꦥꦠ꧀ꦠꦧ꧀ꦧꦚ꧀ꦕ ꦫꦴꦒꦫꦗꦴꦢꦷꦲꦶ ꦄꦤꦸꦏꦶꦟ꧀ꦟꦁ. ꦱꦩ꧀ꦥꦠ꧀ꦠꦺ ꦲꦶ ꦮꦠ꧀ꦡꦸꦏꦴꦩꦺ ꦄꦤꦸꦨꦮꦤ꧀ꦠꦺꦴ ꦫꦴꦒꦫꦗꦺꦤ ꦮꦺꦴꦏꦶꦟ꧀ꦟꦺꦴ ꦲꦺꦴꦠꦶ, ꦠꦠ꧀ꦡ ꦥꦤ ꦱꦁꦏꦶꦭꦶꦛ꧀ꦜꦕꦶꦠ꧀ꦠꦱ꧀ꦱ ꦦꦭꦺ ꦄꦴꦪꦠꦶꦁ ꦄꦴꦥꦤ꧀ꦤꦺ ꦢꦺꦴꦩꦤꦱ꧀ꦱꦸꦥ꧀ꦥꦠ꧀ꦠꦶꦪꦴ ꦢꦺꦴꦱꦫꦗꦺꦤ ꦮꦺꦴꦏꦶꦟ꧀ꦟꦺꦴ ꦲꦺꦴꦠꦶ, ꦈꦨꦪꦠ꧀ꦡꦴꦥꦶ ꦩꦺꦴꦲꦫꦗꦺꦤ ꦮꦺꦴꦏꦶꦟ꧀ꦟꦺꦴ ꦲꦺꦴꦠꦶ. ꦏꦱ꧀ꦱ ꦥꦤꦺꦠꦁ ꦫꦗꦴꦤꦸꦏꦶꦟ꧀ꦟꦤ꧀ꦠꦶ ꦄꦴꦲ – ‘‘ꦄꦴꦠꦸꦫꦱ꧀ꦱꦴꦤꦸꦱꦶꦏ꧀ꦑꦠꦺꦴ’’ꦠꦶ ꦏꦴꦩꦥꦠ꧀ꦡꦤꦴꦮꦱꦺꦤ ꦏꦶꦭꦺꦱꦴꦠꦸꦫꦱ꧀ꦱ, ꦠꦱ꧀ꦱ ꦕ ꦦꦭꦺꦤ ꦢꦸꦏ꧀ꦑꦴꦠꦸꦫꦱ꧀ꦱ ꦕ ꦈꦨꦪꦠ꧀ꦡꦴꦥꦶ ꦥꦛꦶꦏꦴꦫꦴꦨꦶꦭꦴꦱꦴꦪ ꦏꦶꦭꦺꦱꦦꦭꦺ ꦄꦤꦸꦱꦶꦏ꧀ꦑꦠꦺꦴ.

ꦠꦡꦴ ꦪꦚ꧀ꦕ ꦥꦠ꧀ꦠꦤ꧀ꦠꦶ ꦪꦁ ꦄꦕꦺꦭꦏꦮꦠꦴꦢꦶꦮꦱꦺꦤ ꦥꦠ꧀ꦠꦁ ꦄꦠ꧀ꦠꦥꦫꦶꦠꦴꦥꦤꦁ. ꦪꦚ꧀ꦕ ꦥꦠ꧀ꦠꦧ꧀ꦧꦤ꧀ꦠꦶ ꦪꦁ ꦩꦶꦕ꧀ꦖꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦲꦺꦠꦸ ꦄꦥꦴꦪꦺꦱꦸ ꦥꦠ꧀ꦠꦧ꧀ꦧꦁ ꦦꦭꦁ. ꦈꦨꦪꦩꦺꦠꦁ ꦫꦗꦴꦤꦸꦏꦶꦟ꧀ꦟꦤ꧀ꦠꦶ ꦠꦢꦸꦨꦪꦁ ꦢꦸꦏ꧀ꦑꦫꦗꦴꦤꦸꦏꦶꦟ꧀ꦟꦁ. ꦄꦴꦠꦸꦫꦱ꧀ꦱꦴꦠꦶ ꦏꦴꦪꦏꦶꦭꦩꦡꦺꦤ ꦢꦸꦏ꧀ꦑꦴꦠꦸꦫꦱ꧀ꦱ. ꦄꦤꦸꦱꦶꦏ꧀ꦑꦠꦺꦴꦠꦶ ꦩꦶꦕ꧀ꦖꦴꦢꦶꦛ꧀ꦜꦶꦁ, ꦠꦱ꧀ꦱꦴ ꦱꦩꦴꦢꦴꦪꦏꦺ ꦥꦸꦒ꧀ꦒꦭꦺ ꦕ ꦄꦤꦸꦱꦶꦏ꧀ꦑꦠꦺꦴ.

ꦪꦺ ꦕ ꦱꦶꦏ꧀ꦑꦴꦱꦴꦫꦴꦠꦶ ꦪꦺꦲꦶ ꦪꦡꦴꦱꦩꦴꦢꦶꦤ꧀ꦤꦁ ꦱꦷꦭꦧ꧀ꦧꦠꦴꦢꦶꦱꦔ꧀ꦑꦴꦠꦁ ꦱꦶꦏ꧀ꦑꦁ ꦱꦴꦫꦠꦺꦴ ꦒꦲꦺꦠ꧀ꦮꦴ ‘‘ꦆꦩꦶꦤꦴ ꦱꦁꦱꦴꦫꦱꦸꦢ꧀ꦣꦷ’’ꦠꦶ ꦏꦡꦶꦠꦴ. ꦠꦺꦤꦴꦲ – ꦱꦷꦭꦧ꧀ꦧꦠꦁ ꦗꦷꦮꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ꦈꦥꦛ꧀ꦜꦴꦤꦱꦴꦫꦴꦠꦶ. ꦠꦠ꧀ꦡ ꦪꦁ ‘‘ꦤ ꦏꦫꦺꦴꦩꦷ’’ꦠꦶ ꦎꦫꦩꦠꦶ, ꦠꦁ ꦱꦷꦭꦁ, ꦮꦶꦱꦨꦺꦴꦗꦤꦏꦶꦕ꧀ꦖꦴꦕꦫꦟꦴꦢꦶꦏꦁ ꦮꦠꦁ, ꦱꦴꦏꦨꦏ꧀ꦑꦠꦴꦢꦶꦗꦷꦮꦶꦏꦴ ꦗꦷꦮꦶꦠꦁ, ꦩꦺꦡꦸꦤꦮꦶꦫꦠꦶ ꦧ꧀ꦫꦲ꧀ꦩꦕꦫꦶꦪꦁ, ꦌꦠꦺꦱꦁ ꦄꦤꦸꦠꦶꦛ꧀ꦜꦤꦁ ꦈꦥꦛ꧀ꦜꦴꦤꦁ, ꦨꦹꦠꦥꦶꦟ꧀ꦝꦏꦥꦫꦶꦨꦟ꧀ꦝꦴꦢꦶꦮꦱꦺꦤ ꦑꦤ꧀ꦣꦢꦺꦮꦱꦶꦮꦴꦢꦶꦥꦫꦶꦕꦫꦟꦁ ꦮꦴ ꦈꦥꦛ꧀ꦜꦴꦤꦁ, ꦌꦮꦩꦺꦠꦺꦲꦶ ꦪꦡꦴꦮꦸꦠ꧀ꦠꦺꦲꦶ ꦱꦷꦭꦴꦢꦷꦲꦶ ꦱꦁꦱꦴꦫꦱꦸꦢ꧀ꦣꦶ ꦲꦺꦴꦠꦷꦠꦶ ꦠꦴꦤꦶ ꦱꦴꦫꦠꦺꦴ ꦒꦲꦺꦠ꧀ꦮꦴ ꦜꦶꦠꦴ ꦱꦩꦟꦧ꧀ꦫꦴꦲ꧀ꦩꦟꦴ ꦱꦶꦏ꧀ꦑꦴꦱꦴꦫꦴ ꦱꦷꦭꦧ꧀ꦧꦠꦁ ꦗꦷꦮꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ‘‘ꦈꦥꦛ꧀ꦜꦴꦤꦱꦴꦫꦴ’’ꦠꦶ ꦮꦺꦢꦶꦠꦧ꧀ꦧꦴ. ꦄꦪꦩꦺꦏꦺꦴ ꦄꦤ꧀ꦠꦺꦴꦠꦶ ꦄꦪꦁ ꦱꦷꦭꦧ꧀ꦧꦠꦥꦫꦴꦩꦴꦱꦮꦱꦺꦤ ꦄꦠ꧀ꦠꦏꦶꦭꦩꦡꦴꦤꦸꦪꦺꦴꦒꦱꦔ꧀ꦑꦴꦠꦺꦴ ꦩꦗ꧀ꦙꦶꦩꦴꦪ ꦥꦛꦶꦥꦠ꧀ꦠꦶꦪꦴ ꦈꦥ꧀ꦥꦡꦨꦹꦠꦺꦴ ꦭꦴꦩꦏꦛ꧀ꦜꦺꦤ ꦕ ꦌꦏꦺꦴ ꦄꦤ꧀ꦠꦺꦴ. ꦄꦪꦁ ꦢꦸꦠꦶꦪꦺꦴ ꦄꦤ꧀ꦠꦺꦴꦠꦶ ꦄꦪꦁ ꦏꦴꦩꦱꦸꦑꦭ꧀ꦭꦶꦏꦴꦤꦸꦪꦺꦴꦒꦺꦴ ꦏꦴꦩꦺꦱꦸ ꦥꦴꦠꦧ꧀ꦪꦠꦴꦥꦠ꧀ꦠꦶꦱꦔ꧀ꦑꦴꦠꦺꦴ ꦢꦸꦠꦶꦪꦺꦴ ꦮꦸꦠ꧀ꦠꦤꦪꦺꦤ ꦄꦤ꧀ꦠꦺꦴ.

ꦆꦕ꧀ꦕꦺꦠꦺ ꦈꦨꦺꦴ ꦄꦤ꧀ꦠꦴꦠꦶ ꦏꦴꦩꦱꦸꦑꦭ꧀ꦭꦶꦏꦴꦤꦸꦪꦺꦴꦒꦺꦴ ꦄꦠ꧀ꦠꦏꦶꦭꦩꦡꦴꦤꦸꦪꦺꦴꦒꦺꦴ ꦕ ꦆꦠꦶ ꦌꦠꦺ ꦈꦨꦺꦴ ꦄꦤ꧀ꦠꦴ. ꦠꦺ ꦕ ꦑꦺꦴ ꦌꦠꦫꦲꦶ ꦥꦠ꧀ꦠꦺ, ꦄꦴꦪꦠꦶꦁ ꦥꦠ꧀ꦠꦧ꧀ꦧꦺ ꦕ ꦏꦶꦭꦺꦱꦢꦸꦏ꧀ꦑꦫꦗꦴꦤꦸꦏꦶꦟ꧀ꦟꦺ ꦏꦴꦩꦒꦸꦟꦺ ꦄꦠ꧀ꦠꦥꦫꦶꦠꦴꦥꦤꦺ ꦕ ꦄꦭ꧀ꦭꦷꦤꦺꦲꦶ ꦏꦶꦭꦺꦱꦢꦸꦏ꧀ꦑꦴꦠꦸꦫꦴꦤꦁ ꦄꦤꦸꦱꦶꦏ꧀ꦑꦤ꧀ꦠꦺꦲꦶ, ꦱꦪꦚ꧀ꦕ ꦏꦶꦭꦺꦱꦢꦸꦏ꧀ꦑꦴꦠꦸꦫꦺꦲꦶ ꦥꦛꦶꦥꦗ꧀ꦗꦶꦠꦧ꧀ꦧꦠ꧀ꦠꦴ ꦭꦴꦩꦏꦴ ꦈꦥ꧀ꦥꦡꦨꦹꦠꦴ ꦕꦴꦠꦶ ꦄꦤ꧀ꦠꦴ. ꦏꦛꦱꦶꦮꦝ꧀ꦞꦤꦴꦠꦶ ꦄꦤ꧀ꦣꦥꦸꦡꦸꦗ꧀ꦗꦤꦺꦲꦶ ꦄꦨꦶꦏꦔ꧀ꦑꦶꦠꦧ꧀ꦧꦛ꧀ꦜꦺꦤ ꦏꦛꦱꦶꦱꦔ꧀ꦑꦴꦠꦴꦤꦁ ꦠꦟ꧀ꦲꦴꦄꦮꦶꦗ꧀ꦗꦴꦤꦁ ꦄꦨꦶꦮꦝ꧀ꦞꦤꦴ. ꦏꦛꦱꦶꦪꦺꦴ ꦢꦶꦛ꧀ꦜꦶꦁ ꦮꦝ꧀ꦞꦺꦤ꧀ꦠꦷꦠꦶ ꦠꦴ ꦥꦤ ꦏꦛꦱꦶꦪꦺꦴ ꦤꦴꦤꦥ꧀ꦥꦏꦴꦫꦢꦶꦛ꧀ꦜꦶꦁ ꦮꦝ꧀ꦞꦺꦤ꧀ꦠꦶ. ꦮꦠ꧀ꦡꦸꦏꦴꦩꦺꦱꦸ ꦄꦱ꧀ꦱꦴꦢꦴꦤꦸꦥꦱ꧀ꦱꦶꦤꦺꦴ ꦲꦶ ꦠꦺ ꦥꦗꦲꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦱ꧀ꦱ ꦠꦟ꧀ꦲꦴꦄꦮꦶꦗ꧀ꦗꦴꦱꦲꦏꦴꦫꦷꦏꦴꦫꦟꦁ ꦭꦨꦶꦠ꧀ꦮꦴ ‘‘ꦤꦠ꧀ꦡꦶ ꦢꦶꦤ꧀ꦤ’’ꦤ꧀ꦠꦶꦄꦴꦢꦶꦤꦴ (ꦣ. ꦱ. ꧑꧒꧒꧑; ꦮꦶꦨ. ꧙꧓꧘) ꦤꦠ꧀ꦡꦶꦏꦢꦶꦛ꧀ꦜꦶꦁ ꦄꦏꦶꦫꦶꦪꦢꦶꦛ꧀ꦜꦶꦁ ꦄꦲꦺꦠꦸꦏꦢꦶꦛ꧀ꦜꦶꦚ꧀ꦕ ꦒꦟ꧀ꦲꦴꦥꦺꦤ꧀ꦠꦶ, ꦄꦠ꧀ꦠꦥꦫꦶꦠꦴꦥꦤꦁ ꦄꦤꦸꦪꦸꦠ꧀ꦠꦱ꧀ꦱ ꦥꦤ ꦄꦮꦶꦗ꧀ꦗꦴꦠꦟ꧀ꦲꦴꦱꦲꦏꦴꦫꦷꦏꦴꦫꦟꦁ ꦭꦨꦶꦠ꧀ꦮꦴ ‘‘ꦱꦷꦭꦺꦤ ꦱꦸꦢ꧀ꦣꦶ ꦮꦠꦺꦤ ꦱꦸꦢ꧀ꦣꦷ’’ꦠꦶꦄꦴꦢꦶꦤꦴ ꦄꦠ꧀ꦠꦱꦸꦢ꧀ꦣꦶꦄꦨꦶꦭꦴꦱꦺꦤ ꦱꦷꦭꦧ꧀ꦧꦠꦥꦫꦴꦩꦴꦱꦢꦶꦛ꧀ꦜꦶꦁ ꦒꦟ꧀ꦲꦴꦥꦺꦤ꧀ꦠꦶ. ꦱꦏ꧀ꦏꦴꦪꦢꦶꦛ꧀ꦜꦶꦪꦴ ꦥꦤ ꦠꦺꦱꦁ ꦥꦕ꧀ꦕꦪꦨꦴꦮꦺꦴ ꦥꦴꦏꦛꦺꦴꦪꦺꦮ. ꦌꦮꦁ ꦄꦤ꧀ꦠꦢ꧀ꦮꦪꦹꦥꦤꦶꦱ꧀ꦱꦪꦺꦤ ꦠꦟ꧀ꦲꦴꦄꦮꦶꦗ꧀ꦗꦴꦤꦁ ꦢꦶꦛ꧀ꦜꦶꦮꦝ꧀ꦞꦏꦠꦴ ꦮꦺꦢꦶꦠꦧ꧀ꦧꦴ. ꦏꦺꦕꦶ ꦥꦤ ‘‘ꦏꦛꦱꦷꦠꦶ ꦥꦚ꧀ꦕꦤ꧀ꦤꦁ ꦑꦤ꧀ꦣꦴꦤꦁ ꦄꦣꦶꦮꦕꦤ’’ꦤ꧀ꦠꦶ ꦮꦢꦤ꧀ꦠꦶ. ꦠꦺꦱꦁ ꦪꦢꦒ꧀ꦒꦺꦤ ꦠꦠꦺꦴ ꦄꦤ꧀ꦠꦢ꧀ꦮꦪꦠꦺꦴ ꦱꦁꦱꦴꦫꦱꦸꦢ꧀ꦣꦶ ꦤ ꦲꦺꦴꦠꦶ, ꦠꦢꦒ꧀ꦒꦺꦤ ꦠꦺ ꦈꦥꦴꦢꦴꦤꦏ꧀ꦑꦤ꧀ꦣꦺ ꦄꦨꦶꦮꦝ꧀ꦞꦺꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦄꦥꦫꦺ ꦥꦤ ‘‘ꦏꦛꦱꦶꦮꦝ꧀ꦞꦤꦴ’’ꦠꦶ ꦥꦢꦱ꧀ꦱ ‘‘ꦄꦥꦫꦴꦥꦫꦁ ꦗꦫꦴꦩꦫꦟꦺꦲꦶ ꦱꦶꦮꦡꦶꦏꦮꦝ꧀ꦞꦤꦴ’’ꦠꦶ ꦄꦠ꧀ꦡꦁ ꦮꦢꦤ꧀ꦠꦶ. ꦠꦺꦲꦶꦥꦶ ꦄꦤ꧀ꦠꦢ꧀ꦮꦪꦱ꧀ꦱ ꦱꦁꦱꦴꦫꦱꦸꦢ꧀ꦣꦶꦲꦺꦠꦸꦨꦴꦮꦴꦨꦴꦮꦺꦴꦪꦺꦮ ꦮꦸꦠ꧀ꦠꦺꦴ, ꦏꦛꦱꦶꦪꦴ ꦥꦤ ꦢꦶꦛ꧀ꦜꦶꦮꦝ꧀ꦞꦤꦏꦴꦫꦟꦨꦴꦮꦺꦴ ꦮꦠ꧀ꦠꦧ꧀ꦧꦺꦴ.

ꦌꦠꦺ ꦠꦺ ꦈꦨꦺꦴ ꦄꦤ꧀ꦠꦺ ꦄꦤꦨꦶꦚ꧀ꦚꦴꦪꦴꦠꦶ ꦠꦺ ꦌꦠꦺ ꦪꦡꦴꦮꦸꦠ꧀ꦠꦺ ꦈꦨꦺꦴꦥꦶ ꦄꦤ꧀ꦠꦺ ꦄꦗꦴꦤꦶꦠ꧀ꦮꦴ ‘‘ꦆꦩꦺ ꦄꦤ꧀ꦠꦴ ꦠꦺ ꦕ ꦌꦮꦁꦒꦲꦶꦠꦴ ꦌꦮꦁꦄꦤꦸꦛ꧀ꦜꦶꦠꦴ ꦌꦮꦁꦒꦠꦶꦏꦴ ꦌꦮꦁꦄꦨꦶꦱꦩ꧀ꦥꦫꦴꦪꦴ’’ꦠꦶ ꦌꦮꦁ ꦄꦗꦴꦤꦤꦲꦺꦠꦸ ꦄꦗꦴꦤꦤꦏꦴꦫꦟꦴ. ‘‘ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦄꦴꦱꦮꦴ ꦥꦫꦶꦏ꧀ꦑꦷꦟꦴ’’ꦠꦶꦄꦴꦢꦷꦱꦸ (ꦥꦸ. ꦥ. ꧒꧐꧘; ꦄ. ꦤꦶ. ꧙.꧔꧓) ꦮꦶꦪꦱ꧀ꦱ ꦲꦺꦠꦸꦄꦠ꧀ꦡꦠꦴ ꦢꦛ꧀ꦜꦧ꧀ꦧꦴ. ꦎꦭꦷꦪꦤ꧀ꦠꦶ ꦌꦏꦺꦠꦶ ꦌꦏꦺ ꦏꦴꦩꦱꦸꦑꦴꦤꦸꦪꦺꦴꦒꦮꦱꦺꦤ ꦱꦔ꧀ꦏꦺꦴꦕꦁ ꦄꦴꦥꦗ꧀ꦗꦤ꧀ꦠꦶ. ꦄꦠꦶꦣꦴꦮꦤ꧀ꦠꦶ ꦌꦏꦺꦠꦶ ꦌꦏꦺ ꦄꦠ꧀ꦠꦏꦶꦭꦩꦡꦴꦤꦸꦪꦺꦴꦒꦮꦱꦺꦤ ꦄꦠꦶꦏ꧀ꦏꦩꦤ꧀ꦠꦶ. ꦏꦴꦩꦱꦸꦑꦩꦤꦸꦪꦸꦠ꧀ꦠꦴ ꦲꦶ ꦮꦷꦫꦶꦪꦱ꧀ꦱ ꦄꦏꦫꦟꦠꦺꦴ ꦏꦺꦴꦱꦗ꧀ꦗꦮꦱꦺꦤ ꦱꦩ꧀ꦩꦴꦥꦛꦶꦥꦠ꧀ꦠꦶꦠꦺꦴ ꦱꦔ꧀ꦏꦺꦴꦕꦩꦴꦥꦤ꧀ꦤꦠꦴ ꦎꦭꦷꦪꦤ꧀ꦠꦶ ꦤꦴꦩ, ꦄꦠ꧀ꦠꦥꦫꦶꦠꦴꦥꦤꦩꦤꦸꦪꦸꦠ꧀ꦠꦴ ꦥꦤ ꦏꦺꦴꦱꦗ꧀ꦗꦁ ꦥꦲꦴꦪ ꦄꦤꦸꦥꦴꦪꦺꦤ ꦮꦷꦫꦶꦪꦴꦫꦩ꧀ꦨꦁ ꦏꦫꦺꦴꦤ꧀ꦠꦴ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ ꦄꦠꦶꦏ꧀ꦏꦩꦤꦠꦺꦴ ꦄꦠꦶꦣꦴꦮꦤ꧀ꦠꦶ ꦤꦴꦩ, ꦠꦢꦸꦨꦪꦁ ꦥꦤ ꦠꦠ꧀ꦡ ꦄꦴꦢꦷꦤꦮꦴꦢꦱ꧀ꦱꦤꦠꦺꦴ. ꦠꦺꦤ ꦮꦸꦠ꧀ꦠꦁ – ‘‘ꦈꦨꦺꦴ ꦄꦤ꧀ꦠꦺ ꦄꦤꦨꦶꦚ꧀ꦚꦴꦪ ꦎꦭꦷꦪꦤ꧀ꦠꦶ ꦌꦏꦺ ꦄꦠꦶꦣꦴꦮꦤ꧀ꦠꦶ ꦌꦏꦺ’’ꦠꦶ. ꦠꦠ꧀ꦡ ꦠꦟ꧀ꦲꦴꦨꦶꦤꦤ꧀ꦢꦤꦮꦱꦺꦤ ꦎꦭꦷꦪꦤ꧀ꦠꦶ, ꦢꦶꦛ꧀ꦜꦴꦨꦶꦤꦤ꧀ꦢꦤꦮꦱꦺꦤ ꦄꦠꦶꦣꦴꦮꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦁ.

ꦄꦡ ꦮꦴ ꦱꦱ꧀ꦱꦠꦴꦨꦶꦤꦶꦮꦺꦱꦮꦱꦺꦤ ꦎꦭꦷꦪꦤ꧀ꦠꦶ ꦌꦏꦺ, ꦈꦕ꧀ꦖꦺꦢꦴꦨꦶꦤꦶꦮꦺꦱꦮꦱꦺꦤ ꦄꦠꦶꦣꦴꦮꦤ꧀ꦠꦶ ꦌꦏꦺ. ꦒꦺꦴꦱꦷꦭꦴꦢꦶꦮꦱꦺꦤ ꦲꦶ ꦄꦠ꧀ꦠꦥꦫꦶꦠꦴꦥꦤꦩꦤꦸꦪꦸꦠ꧀ꦠꦴ ꦌꦏꦕ꧀ꦕꦺ ‘‘ꦆꦩꦶꦤꦴꦲꦁ ꦱꦷꦭꦺꦤ ꦮꦴ ꦮꦠꦺꦤ ꦮꦴ ꦠꦥꦺꦤ ꦮꦴ ꦧ꧀ꦫꦲ꧀ꦩꦕꦫꦶꦪꦺꦤ ꦮꦴ ꦢꦺꦮꦺꦴ ꦮꦴ ꦨꦮꦶꦱ꧀ꦱꦴꦩꦶ ꦢꦺꦮꦚ꧀ꦚꦠꦫꦺꦴ ꦮꦴ, ꦠꦠ꧀ꦡ ꦤꦶꦕ꧀ꦕꦺꦴ ꦣꦸꦮꦺꦴ ꦱꦱ꧀ꦱꦠꦺꦴ ꦄꦮꦶꦥꦫꦶꦟꦴꦩꦣꦩ꧀ꦩꦺꦴ ꦱꦱ꧀ꦱꦠꦶꦱꦩꦁ ꦠꦡꦺꦮ ꦜꦱ꧀ꦱꦴꦩꦷ’’ꦠꦶ ꦱꦱ꧀ꦱꦠꦢꦱ꧀ꦱꦤꦁ ꦄꦨꦶꦤꦶꦮꦶꦱꦤ꧀ꦠꦴ ꦱꦁꦱꦴꦫꦺ ꦎꦭꦷꦪꦤ꧀ꦠꦶ ꦤꦴꦩ, ꦏꦴꦩꦱꦸꦑꦩꦤꦸꦪꦸꦠ꧀ꦠꦴ ꦥꦤ ꦌꦏꦕ꧀ꦕꦺ ꦪꦁꦏꦶꦚ꧀ꦕꦶ ꦏꦠ꧀ꦮꦴ ꦆꦤ꧀ꦢ꧀ꦫꦶꦪꦴꦤꦶ ꦱꦤ꧀ꦠꦥ꧀ꦥꦺꦠꦸꦏꦴꦩꦴ ꦭꦺꦴꦏꦴꦪꦠꦶꦏꦴ ꦮꦶꦪ ꦠꦢꦤꦸꦒꦸꦟꦁ ꦈꦕ꧀ꦖꦺꦢꦢꦱ꧀ꦱꦤꦁ ꦄꦨꦶꦤꦶꦮꦶꦱꦤ꧀ꦠꦴ ꦄꦤꦸꦥꦴꦪꦺꦤ ꦮꦛ꧀ꦛꦸꦥꦕ꧀ꦖꦺꦢꦱ꧀ꦱ ꦥꦫꦶꦪꦺꦱꦤꦠꦺꦴ ꦄꦠꦶꦣꦴꦮꦤ꧀ꦠꦶ ꦤꦴꦩ. ꦌꦮꦁ ꦱꦱ꧀ꦱꦠꦸꦕ꧀ꦖꦺꦢꦮꦱꦺꦤꦥꦶ ꦎꦭꦷꦪꦤꦴꦠꦶꦣꦴꦮꦤꦴꦤꦶ ꦮꦺꦢꦶꦠꦧ꧀ꦧꦴꦤꦶ.

ꦪꦺ ꦕ ꦑꦺꦴ ꦠꦺ ꦄꦨꦶꦚ꧀ꦚꦴꦪꦴꦠꦶ ꦪꦺ ꦕ ꦑꦺꦴ ꦥꦤ ꦄꦫꦶꦪꦥꦸꦒ꧀ꦒꦭꦴ ꦠꦺ ꦪꦡꦴꦮꦸꦠ꧀ꦠꦺ ꦈꦨꦺꦴ ꦄꦤ꧀ꦠꦺ ‘‘ꦆꦩꦺ ꦄꦤ꧀ꦠꦴ ꦌꦮꦁꦒꦲꦶꦠꦴ ꦌꦮꦁꦄꦤꦸꦛ꧀ꦜꦶꦠꦴ ꦌꦮꦁꦒꦠꦶꦏꦴ ꦌꦮꦁꦄꦨꦶꦱꦩ꧀ꦥꦫꦴꦪꦴ’’ꦠꦶ ꦄꦨꦶꦮꦶꦱꦶꦛ꧀ꦜꦺꦤ ꦚꦴꦟꦺꦤ ꦮꦶꦥꦱ꧀ꦱꦤꦴꦱꦲꦶꦠꦴꦪ ꦩꦒ꧀ꦒꦥꦚ꧀ꦚꦴꦪ ꦗꦴꦤꦶꦠ꧀ꦮꦴ ꦩꦗ꧀ꦙꦶꦩꦥꦛꦶꦥꦢꦁ ꦱꦩ꧀ꦩꦴꦥꦛꦶꦥꦤ꧀ꦤꦴ, ꦠꦴꦪ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ. ꦠꦠ꧀ꦫ ꦕ ꦤꦴꦲꦺꦱꦸꦤ꧀ꦠꦶ ꦠꦠ꧀ꦫ ꦠꦱ꧀ꦩꦶꦁ ꦄꦤ꧀ꦠꦢ꧀ꦮꦪꦺ ꦥꦠꦶꦠꦴ ꦤ ꦄꦲꦺꦱꦸꦁ, ꦠꦁ ꦄꦤ꧀ꦠꦢ꧀ꦮꦪꦁ ꦥꦗꦲꦶꦁꦱꦹꦠꦶ ꦄꦠ꧀ꦡꦺꦴ. ꦠꦺꦤ ꦕ ꦤꦴꦩꦚ꧀ꦚꦶꦁꦱꦹꦠꦶ ꦠꦺꦤ ꦄꦤ꧀ꦠꦢ꧀ꦮꦪꦥꦲꦴꦤꦺꦤ ‘‘ꦩꦩ ꦆꦢꦁ ꦄꦤ꧀ꦠꦢ꧀ꦮꦪꦥꦲꦴꦤꦁ, ꦄꦲꦁ ꦄꦤ꧀ꦠꦢ꧀ꦮꦪꦁ ꦥꦲꦴꦱꦶꦁ, ꦆꦩꦶꦤꦴ ꦄꦤ꧀ꦠꦢ꧀ꦮꦪꦥꦲꦴꦤꦺꦤ ꦱꦺꦪ꧀ꦪꦺꦴ’’ꦠꦶꦄꦴꦢꦶꦤꦴ ꦠꦟ꧀ꦲꦴꦢꦶꦛ꧀ꦜꦶꦩꦴꦤꦩꦚ꧀ꦚꦤꦴꦮꦱꦺꦤ ꦤ ꦄꦩꦚ꧀ꦚꦶꦁꦱꦸ ꦱꦧ꧀ꦧꦩꦚ꧀ꦚꦤꦴꦤꦁ ꦱꦩ꧀ꦩꦢꦺꦮ ꦥꦲꦷꦤꦠ꧀ꦠꦴ. ꦌꦠ꧀ꦡ ꦕ ꦄꦒ꧀ꦒꦦꦭꦺ ꦜꦶꦠꦺ ꦄꦫꦶꦪꦥꦸꦒ꧀ꦒꦭꦺ ꦱꦤ꧀ꦣꦴꦪ ‘‘ꦠꦠ꧀ꦫ ꦕ ꦤꦴꦲꦺꦱꦸꦁ, ꦠꦺꦤ ꦕ ꦤꦴꦩꦚ꧀ꦚꦶꦁꦱꦹ’’ꦠꦶ ꦄꦠꦷꦠꦏꦴꦭꦮꦱꦺꦤ ꦄꦪꦁ ꦢꦺꦱꦤꦴ ꦥꦮꦠ꧀ꦠꦴ, ꦩꦒ꧀ꦒꦏ꧀ꦑꦟꦺ ꦥꦤ ꦄꦣꦶꦥ꧀ꦥꦺꦠꦺ ꦮꦠ꧀ꦠꦩꦴꦤꦏꦴꦭꦮꦱꦺꦤꦺꦮ ꦮꦠ꧀ꦠꦧ꧀ꦧꦁ ꦱꦶꦪꦴ. ꦮꦛ꧀ꦛꦁ ꦠꦺꦱꦁ ꦤꦠ꧀ꦡꦶ ꦥꦚ꧀ꦚꦴꦥꦤꦴꦪꦴꦠꦶ ꦪꦺ ꦌꦮꦁ ꦥꦲꦷꦤꦱꦧ꧀ꦧꦩꦚ꧀ꦚꦤꦴ ꦈꦠ꧀ꦠꦩꦥꦸꦫꦶꦱꦴ, ꦠꦺꦱꦁ ꦄꦤꦸꦥꦴꦢꦴꦥꦫꦶꦤꦶꦧ꧀ꦧꦸꦠꦴꦤꦁ ꦏꦩ꧀ꦩꦮꦶꦥꦴꦏꦏꦶꦭꦺꦱꦮꦱꦺꦤ ꦠꦶꦮꦶꦣꦩ꧀ꦥꦶ ꦮꦛ꧀ꦛꦁ ꦤꦠ꧀ꦡꦶ ꦥꦚ꧀ꦚꦴꦥꦤꦴꦪ, ꦮꦠ꧀ꦠꦩꦴꦤꦏ꧀ꦑꦤ꧀ꦣꦨꦺꦢꦠꦺꦴ ꦈꦢ꧀ꦣꦁ ꦄꦤꦸꦥꦴꦢꦴꦤꦺꦴ ꦮꦶꦪ ꦗꦴꦠꦮꦺꦢꦺꦴ ꦄꦥꦚ꧀ꦚꦠ꧀ꦠꦶꦏꦨꦴꦮꦩꦺꦮ ꦒꦕ꧀ꦖꦠꦷꦠꦶ ꦄꦠ꧀ꦡꦺꦴ.

ꦄꦛ꧀ꦜꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.