꧘. ꦥꦶꦟ꧀ꦝꦥꦴꦠꦶꦏꦱꦸꦠ꧀ꦠꦮꦟ꧀ꦟꦤꦴ

꧒꧘. ꦄꦛ꧀ꦜꦩꦺ ꦥꦕ꧀ꦖꦴꦨꦠ꧀ꦠꦤ꧀ꦠꦶ ꦌꦏꦴꦱꦤꦶꦏꦑꦭꦸꦥꦕ꧀ꦖꦴꦨꦠ꧀ꦠꦶꦏꦴꦤꦁ ꦥꦴꦠꦺꦴꦮ ꦨꦸꦠ꧀ꦠꦴꦤꦁ ꦄꦤ꧀ꦠꦺꦴꦩꦗ꧀ꦙꦤ꧀ꦲꦶꦏꦺꦴꦥꦶ ꦥꦕ꧀ꦖꦴꦨꦠ꧀ꦠꦩꦺꦮ, ꦆꦣ ꦥꦤ ꦥꦏꦠꦶꦨꦠ꧀ꦠꦱ꧀ꦱꦺꦮ ꦥꦕ꧀ꦖꦠꦺꦴ ꦥꦕ꧀ꦖꦴꦨꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦴꦤꦤ꧀ꦠꦶ ꦥꦶꦟ꧀ꦝꦥꦴꦠꦠꦺꦴ ꦥꦛꦶꦏ꧀ꦏꦤ꧀ꦠꦴꦤꦁ, ꦥꦶꦟ꧀ꦝꦥꦴꦠꦁ ꦥꦫꦶꦪꦺꦱꦶꦠ꧀ꦮꦴ ꦨꦠ꧀ꦠꦏꦶꦕ꧀ꦕꦱ꧀ꦱ ꦤꦶꦛ꧀ꦜꦴꦥꦤꦮꦱꦺꦤ ꦠꦠꦺꦴ ꦤꦶꦮꦠ꧀ꦠꦴꦤꦁ. ꦏꦫꦺꦫꦶꦩꦟ꧀ꦝꦭꦩꦴꦭ꦳ꦺꦠꦶ ꦌꦠ꧀ꦡ ꦏꦫꦺꦫꦷꦠꦶ ꦮꦫꦸꦟꦫꦸꦏ꧀ꦑꦱ꧀ꦱ ꦤꦴꦩꦁ. ꦱꦺꦴ ꦏꦶꦫ ꦒꦤ꧀ꦣꦏꦸꦛꦶꦪꦴ ꦩꦟ꧀ꦝꦥꦱ꧀ꦱ ꦱꦴꦭꦴꦪ ꦕ ꦄꦤ꧀ꦠꦫꦺ ꦲꦺꦴꦠꦶ, ꦠꦺꦤ ꦒꦤ꧀ꦣꦏꦸꦛꦷꦥꦶ ‘‘ꦏꦫꦺꦫꦶꦏꦸꦛꦶꦏꦴ’’ꦠꦶ ꦮꦸꦕ꧀ꦕꦠꦶ, ꦩꦟ꧀ꦝꦥꦺꦴꦥꦶ ꦱꦴꦭꦴꦥꦶ ‘‘ꦏꦫꦺꦫꦶꦩꦟ꧀ꦝꦭꦩꦴꦭ꦳ꦺꦴ’’ꦠꦶ. ꦠꦱ꧀ꦩꦴ ꦏꦫꦺꦫꦶꦫꦸꦏ꧀ꦑꦱ꧀ꦱ ꦄꦮꦶꦢꦹꦫꦺ ꦏꦠꦺ ꦤꦶꦱꦷꦢꦤꦱꦴꦭꦱꦔ꧀ꦑꦴꦠꦺ ꦩꦟ꧀ꦝꦭꦩꦴꦭ꦳ꦺ. ꦠꦶꦟꦥꦟ꧀ꦟꦕ꧀ꦖꦢꦤꦁ ꦄꦤꦺꦴꦮꦱ꧀ꦱꦏꦁ ‘‘ꦩꦟ꧀ꦝꦭꦩꦴꦭ꦳ꦺꦴ’’ꦠꦶ ꦮꦢꦤ꧀ꦠꦶ, ꦄꦠꦶꦩꦸꦠ꧀ꦠꦏꦴꦢꦶꦭꦠꦴꦩꦟ꧀ꦝꦥꦺꦴ ‘‘ꦩꦟ꧀ꦝꦭꦩꦴꦭ꦳ꦺꦴ’’ꦠꦶ ꦄꦥꦫꦺ.

ꦏꦴꦭꦺꦤ ꦏꦴꦭꦤ꧀ꦠꦶ ꦏꦴꦭꦺ ꦏꦴꦭꦺ ꦄꦤ꧀ꦠꦫꦤ꧀ꦠꦫꦴ, ꦠꦱ꧀ꦩꦶꦁ ꦠꦱ꧀ꦩꦶꦁ ꦱꦩꦪꦺꦠꦶ ꦄꦠ꧀ꦡꦺꦴ. ꦩꦤꦴꦥꦶꦏꦺꦠꦶ ꦩꦤꦮꦝ꧀ꦞꦏꦺ, ꦥꦶꦪꦫꦹꦥꦺ ꦆꦛ꧀ꦜꦺꦠꦶ ꦄꦠ꧀ꦡꦺꦴ. ꦆꦛ꧀ꦜꦴꦤꦶꦛ꧀ꦜꦨꦴꦮꦺꦴ ꦕ ꦥꦸꦒ꧀ꦒꦭꦮꦱꦺꦤ ꦕ ꦢ꧀ꦮꦴꦫꦮꦱꦺꦤ ꦕ ꦒꦲꦺꦠꦧ꧀ꦧꦺꦴ. ꦌꦏꦕ꧀ꦕꦱ꧀ꦱ ꦲꦶ ꦆꦛ꧀ꦜꦴꦨꦶꦩꦠꦺꦴ ꦌꦏꦕ꧀ꦕꦱ꧀ꦱ ꦄꦤꦶꦛ꧀ꦜꦺꦴ ꦲꦺꦴꦠꦶ, ꦌꦏꦕ꧀ꦕꦱ꧀ꦱ ꦄꦤꦶꦛ꧀ꦜꦴꦨꦶꦩꦠꦺꦴ ꦌꦏꦕ꧀ꦕꦱ꧀ꦱ ꦆꦛ꧀ꦜꦺꦴ. ꦠꦡꦴ ꦌꦏꦱ꧀ꦱ ꦢ꧀ꦮꦴꦫꦱ꧀ꦱ ꦆꦛ꧀ꦜꦺꦴ ꦄꦚ꧀ꦚꦱ꧀ꦱ ꦄꦤꦶꦛ꧀ꦜꦺꦴ. ꦮꦶꦥꦴꦏꦮꦱꦺꦤ ꦥꦤꦺꦠ꧀ꦡ ꦮꦶꦤꦶꦕ꧀ꦖꦪꦺꦴ ꦮꦺꦢꦶꦠꦧ꧀ꦧꦺꦴ. ꦏꦸꦱꦭꦮꦶꦥꦴꦏꦺꦴ ꦲꦶ ꦌꦏꦤ꧀ꦠꦺꦤ ꦆꦛ꧀ꦜꦺꦴ, ꦄꦏꦸꦱꦭꦮꦶꦥꦴꦏꦺꦴ ꦄꦤꦶꦛ꧀ꦜꦺꦴ ꦌꦮꦴꦠꦶ. ꦕꦏ꧀ꦑꦸꦤꦴ ꦫꦹꦥꦺ ꦥꦱ꧀ꦱꦶꦠꦸꦤ꧀ꦠꦶ ꦒꦴꦩꦁ ꦥꦶꦟ꧀ꦝꦴꦪ ꦥꦮꦶꦛ꧀ꦜꦺꦴ ꦈꦥꦴꦱꦏꦺꦲꦶ ꦒꦺꦲꦁ ꦥꦮꦺꦱꦺꦠ꧀ꦮꦴ ꦥꦹꦗꦴꦱꦏ꧀ꦏꦴꦫꦏꦫꦟꦠ꧀ꦡꦁ ꦈꦥꦤꦷꦠꦺꦱꦸ ꦄꦴꦱꦤꦮꦶꦠꦴꦤꦴꦢꦷꦱꦸ ꦤꦴꦤꦴꦮꦶꦫꦴꦒꦱꦩꦸꦗ꧀ꦗꦭꦮꦟ꧀ꦟꦱꦔ꧀ꦑꦴꦠꦺ ꦫꦗꦤꦷꦪꦺ ꦄꦚ꧀ꦚꦺ ꦕ ꦱꦮꦶꦚ꧀ꦚꦴꦟꦏꦫꦹꦥꦺ ꦕꦏ꧀ꦑꦸꦢ꧀ꦮꦴꦫꦶꦏꦮꦶꦚ꧀ꦚꦴꦟꦺꦲꦶ ꦥꦱ꧀ꦱꦶꦠꦸꦁ. ꦱꦢ꧀ꦢꦺꦠꦶ ꦠꦡꦺꦮ ꦆꦱ꧀ꦱꦫꦗꦤꦴꦤꦁ ꦒꦺꦲꦁ ꦥꦮꦶꦛ꧀ꦜꦺꦴ ꦠꦺꦱꦁ ꦥꦪꦸꦠ꧀ꦠꦺ ꦒꦷꦠꦮꦴꦢꦶꦠꦱꦢ꧀ꦢꦺ ꦱꦺꦴꦠꦸꦁ. ꦒꦤ꧀ꦣꦺꦠꦶ ꦠꦡꦴ ꦠꦺꦲꦶ ꦥꦹꦗꦴꦱꦏ꧀ꦏꦴꦫꦮꦱꦺꦤ ꦈꦥꦤꦷꦠꦺ ꦥꦸꦥ꧀ꦦꦣꦹꦩꦴꦢꦶꦒꦤ꧀ꦣꦺ ꦓꦴꦪꦶꦠꦸꦁ. ꦫꦱꦺꦠꦶ ꦠꦺꦲꦶ ꦢꦶꦤ꧀ꦤꦴꦲꦴꦫꦥꦫꦶꦨꦺꦴꦒꦺ ꦤꦴꦤꦒ꧀ꦒꦫꦱꦺ ꦱꦴꦪꦶꦠꦸꦁ. ꦦꦺꦴꦛ꧀ꦜꦧ꧀ꦧꦺꦠꦶ ꦩꦲꦒ꧀ꦓꦥꦕ꧀ꦕꦠ꧀ꦡꦫꦟꦺꦱꦸ ꦄꦴꦱꦤꦺꦱꦸ ꦤꦶꦱꦶꦤ꧀ꦤꦏꦴꦭꦺ ꦱꦸꦑꦱꦩ꧀ꦦꦱ꧀ꦱꦺ ꦦꦺꦴꦛ꧀ꦜꦧ꧀ꦧꦺ ꦦꦸꦱꦶꦠꦸꦁ. ꦌꦮꦚ꧀ꦕ ꦥꦚ꧀ꦕꦢ꧀ꦮꦴꦫꦶꦏꦆꦛ꧀ꦜꦴꦫꦩ꧀ꦩꦟꦥ꧀ꦥꦛꦶꦭꦴꦨꦁ ꦏꦶꦠ꧀ꦠꦺꦠ꧀ꦮꦴ ꦆꦢꦴꦤꦶ ꦩꦤꦺꦴꦢ꧀ꦮꦴꦫꦶꦏꦆꦛ꧀ꦜꦴꦫꦩ꧀ꦩꦟꦥ꧀ꦥꦛꦶꦭꦴꦨꦁ ꦢꦱ꧀ꦱꦺꦠꦸꦁ ‘‘ꦱꦏ꧀ꦏꦠꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦁ ꦲꦺꦛ꧀ꦜꦴ ꦮꦸꦠ꧀ꦠꦠ꧀ꦡꦩꦺꦮ.

ꦏꦶꦁ ꦥꦤ ꦄꦥꦶꦟ꧀ꦝꦥꦴꦠꦶꦏꦴꦤꦁ ꦄꦪꦁ ꦤꦪꦺꦴ ꦤ ꦭꦧ꧀ꦨꦠꦷꦠꦶ? ꦭꦧ꧀ꦨꦠꦶ. ꦠꦺꦱꦩ꧀ꦥꦶ ꦲꦶ ꦤꦶꦩꦤ꧀ꦠꦤꦱꦭꦴꦏꦨꦠ꧀ꦠꦴꦢꦶꦄꦠ꧀ꦡꦁ ꦒꦴꦩꦁ ꦒꦠꦏꦴꦭꦺ ꦈꦭ꦳ꦴꦫꦮꦶꦨꦮꦴ ꦈꦥꦴꦱꦏꦴ ꦠꦡꦴ ꦱꦏ꧀ꦏꦴꦫꦱꦩ꧀ꦩꦴꦤꦁ ꦏꦫꦺꦴꦤ꧀ꦠꦶꦪꦺꦮ, ꦠꦁ ꦥꦤ ꦄꦤꦶꦪꦠꦁ. ꦥꦶꦟ꧀ꦝꦥꦴꦠꦶꦏꦴꦤꦁ ꦥꦤ ꦠꦢꦴ ꦤꦶꦕ꧀ꦕꦩꦺꦮ ꦠꦠ꧀ꦡ ꦥꦹꦗꦴꦱꦏ꧀ꦏꦴꦫꦁ ꦏꦫꦶꦪꦩꦴꦤꦁ ꦢꦶꦱ꧀ꦮꦴ, ꦱꦏ꧀ꦏꦴꦫꦒꦫꦸꦠꦴꦪ ꦄꦤꦶꦱ꧀ꦱꦫꦟꦩꦒ꧀ꦒꦺ ꦜꦠ꧀ꦮꦴ, ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦮꦱꦺꦤ ꦠꦺ ꦨꦶꦏ꧀ꦑꦹ ꦌꦮꦩꦴꦲꦁꦱꦸ. ꦠꦺꦤꦺꦮꦴꦲ – ‘‘ꦲꦤ꧀ꦢꦴꦮꦸꦱꦺꦴ, ꦩꦪꦩ꧀ꦥꦶ ꦥꦶꦟ꧀ꦝꦥꦴꦠꦶꦏꦴ ꦲꦺꦴꦩꦴ’’ꦠꦶꦄꦴꦢꦶ.

ꦠꦠ꧀ꦡ ꦲꦤ꧀ꦢꦴꦠꦶ ꦮꦺꦴꦱ꧀ꦱꦒ꧀ꦒꦠ꧀ꦡꦺ ꦤꦶꦥꦴꦠꦺꦴ. ꦭꦕ꧀ꦖꦴꦩꦴꦠꦶ ꦭꦨꦶꦱ꧀ꦱꦴꦩ. ꦠꦺꦤꦸꦥꦱꦔ꧀ꦏꦩꦷꦠꦶ ꦠꦠ꧀ꦡ ꦱꦸꦫꦨꦶꦒꦤ꧀ꦣꦏꦸꦛꦶꦪꦁ ꦤꦶꦱꦶꦤ꧀ꦤꦺꦴ ꦠꦺꦱꦁ ꦠꦁ ꦏꦡꦴꦱꦭ꧀ꦭꦴꦥꦁ ꦱꦸꦠ꧀ꦮꦴ ‘‘ꦆꦩꦺ ꦨꦶꦏ꧀ꦑꦹ ꦩꦴꦢꦶꦱꦱ꧀ꦱ ꦤꦴꦩ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦥꦧ꧀ꦧꦗꦶꦠ꧀ꦮꦴ ꦩꦪꦴ ꦱꦢ꧀ꦣꦶꦁ ꦌꦏꦮꦶꦲꦴꦫꦺ ꦮꦱꦤ꧀ꦠꦴꦥꦶ ꦌꦮꦁ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦮꦱꦺꦤ ꦏꦡꦁ ꦥꦮꦠ꧀ꦠꦺꦤ꧀ꦠꦶ, ꦱꦭ꧀ꦭꦺꦑꦺ ꦤ ꦮꦠ꧀ꦠꦤ꧀ꦠꦶ, ꦲꦤ꧀ꦢ ꦠꦺ ꦠꦠꦺꦴ ꦤꦶꦮꦴꦫꦺꦠ꧀ꦮꦴ ꦱꦭ꧀ꦭꦺꦑꦮꦶꦲꦴꦫꦺ ꦤꦶꦪꦺꦴꦗꦺꦱ꧀ꦱꦴꦩꦷ’’ꦠꦶ ꦩꦟ꧀ꦝꦭꦩꦴꦭ꦳ꦁ ꦈꦥꦱꦔ꧀ꦏꦩꦶ. ꦱꦺꦱꦁ ꦲꦺꦛ꧀ꦜꦴ ꦮꦸꦠ꧀ꦠꦤꦪꦩꦺꦮ.

ꦌꦠꦩꦠ꧀ꦡꦁ ꦮꦶꦢꦶꦠ꧀ꦮꦴꦠꦶ ‘‘ꦄꦥ꧀ꦥꦶꦕ꧀ꦖꦠꦴꦱꦤ꧀ꦠꦸꦛ꧀ꦜꦶꦠꦴꦱꦭ꧀ꦭꦺꦑꦴꦤꦁ ꦮꦱꦺꦤ ꦏꦶꦭꦺꦱꦺ ꦣꦸꦤꦶꦠꦸꦁ ꦠꦟ꧀ꦲꦁ ꦮꦶꦱꦺꦴꦱꦺꦠꦸꦁ ꦥꦛꦶꦥꦤ꧀ꦤꦺꦴꦠꦶ ꦥꦶꦟ꧀ꦝꦥꦴꦠꦶꦏꦱ꧀ꦱ ꦱꦠꦺꦴ ꦢꦺꦮꦴ ꦥꦶꦲꦪꦤ꧀ꦠꦶ, ꦠꦱ꧀ꦱ ꦥꦛꦶꦥꦠ꧀ꦠꦶꦪꦴ ꦄꦴꦢꦫꦗꦴꦠꦴ ꦥꦶꦪꦴꦪꦤ꧀ꦠꦶ, ꦤ ꦆꦠꦺꦴ ꦄꦚ꧀ꦚꦡꦴ’’ꦠꦶ ꦆꦩꦩꦠ꧀ꦡꦁ ꦮꦶꦢꦶꦠ꧀ꦮꦴ ꦠꦢꦠ꧀ꦡꦢꦷꦥꦤꦁ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦶ.

ꦠꦠ꧀ꦡ ꦤꦺꦴ ꦕꦺ ꦱꦢ꧀ꦢꦱꦶꦭꦺꦴꦏꦤꦶꦱ꧀ꦱꦶꦠꦺꦴꦠꦶ ‘‘ꦄꦲꦺꦴ ꦄꦪ꧀ꦪꦺꦴ ꦄꦥ꧀ꦥꦶꦕ꧀ꦖꦺꦴ ꦱꦤ꧀ꦠꦸꦛ꧀ꦜꦺꦴ ꦥꦫꦩꦱꦭ꧀ꦭꦺꦑꦮꦸꦠ꧀ꦠꦷ’’ꦠꦶꦄꦴꦢꦶꦤꦴ ꦥꦫꦺꦲꦶ ꦏꦶꦠ꧀ꦠꦶꦠꦧ꧀ꦧꦱꦢ꧀ꦢꦱꦔ꧀ꦑꦴꦠꦁ ꦱꦶꦭꦺꦴꦏꦁ. ꦠꦟ꧀ꦲꦴꦪ ꦤꦶꦱ꧀ꦱꦶꦠꦺꦴ ꦤ ꦲꦺꦴꦠꦶ ꦕꦺꦠꦶ ꦄꦠ꧀ꦡꦺꦴ. ꦱꦢ꧀ꦢꦺꦴ ꦮꦴ ꦱꦩ꧀ꦩꦸꦑꦴ ꦮꦟ꧀ꦟꦨꦟꦤꦡꦸꦠꦶꦓꦺꦴꦱꦺꦴ, ꦱꦶꦭꦺꦴꦏꦺꦴ ꦥꦫꦩ꧀ꦩꦸꦑꦨꦹꦠꦴ ꦥꦱꦁꦱꦴ ꦥꦠ꧀ꦡꦛꦪꦱꦠꦴ ꦮꦴ. ꦱꦺꦱꦁ ꦄꦤꦤ꧀ꦠꦫꦱꦸꦠ꧀ꦠꦺ ꦮꦸꦠ꧀ꦠꦤꦪꦩꦺꦮ.

ꦄꦛ꧀ꦜꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.