꧑. ꦥꦜꦩꦧꦺꦴꦣꦶꦱꦸꦠ꧀ꦠꦮꦟ꧀ꦟꦤꦴ

꧑. ꦪꦁ ꦥꦤꦺꦠ꧀ꦡ ‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶꦄꦴꦢꦶꦏꦁ ꦤꦶꦢꦴꦤꦁ, ꦠꦠ꧀ꦡ ꦌꦮꦤ꧀ꦠꦶ ꦤꦶꦥꦴꦠꦥꦢꦁ. ꦩꦺꦠꦶꦄꦴꦢꦷꦤꦶ ꦤꦴꦩꦥꦢꦴꦤꦶ. ꦈꦫꦸꦮꦺꦭꦴꦪꦁ ꦮꦶꦲꦫꦠꦷꦠꦶ ꦌꦠ꧀ꦡ ꦮꦷꦠꦶ ꦈꦥꦱꦒ꧀ꦒꦥꦢꦁ, ꦲꦫꦠꦷꦠꦶ ꦄꦴꦑ꧀ꦪꦴꦠꦥꦢꦤ꧀ꦠꦶ ꦆꦩꦶꦤꦴꦮ ꦤꦪꦺꦤ ꦱꦧ꧀ꦧꦠ꧀ꦡ ꦥꦢꦮꦶꦨꦴꦒꦺꦴ ꦮꦺꦢꦶꦠꦧ꧀ꦧꦺꦴ.

ꦄꦠ꧀ꦡꦠꦺꦴ ꦥꦤ ꦌꦮꦁꦱꦢ꧀ꦢꦺꦴ ꦠꦴꦮ ꦈꦥꦩꦹꦥꦢꦺꦱꦱꦩ꧀ꦥꦲꦁꦱꦤꦒꦫꦲꦟꦮꦕꦤꦱꦩ꧀ꦥꦛꦶꦒ꧀ꦒꦲꦴꦏꦴꦫ- ꦤꦶꦢꦱ꧀ꦱꦤꦴꦮꦣꦴꦫꦟꦥꦸꦕ꧀ꦖꦴꦆꦢꦩꦠ꧀ꦡꦥꦫꦶꦩꦴꦟꦴꦢꦶ ꦄꦤꦺꦏꦠ꧀ꦡꦥ꧀ꦥꦨꦺꦢꦺꦴ. ꦠꦡꦴ ꦲꦺꦱ ‘‘ꦌꦮꦁ ꦗꦴꦠꦺꦤ ꦩꦕ꧀ꦕꦺꦤ, ꦏꦠ꧀ꦠꦧ꧀ꦧꦁ ꦏꦸꦱꦭꦁ ꦧꦲꦸ’’ꦤ꧀ꦠꦶ ꦌꦮꦩꦴꦢꦷꦱꦸ (ꦣ. ꦥ. ꧕꧓) ꦈꦥꦩꦴꦪꦁ ꦄꦴꦒꦠꦺꦴ. ‘‘ꦌꦮꦁ ꦠꦺ ꦄꦨꦶꦏ꧀ꦏꦩꦶꦠꦧ꧀ꦧꦁ, ꦌꦮꦁ ꦠꦺ ꦥꦛꦶꦏ꧀ꦏꦩꦶꦠꦧ꧀ꦧ’’ꦤ꧀ꦠꦶꦄꦴꦢꦷꦱꦸ (ꦄ. ꦤꦶ. ꧔.꧑꧒꧒) ꦈꦥꦢꦺꦱꦺ. ‘‘ꦌꦮꦩꦺꦠꦁ ꦨꦒꦮꦴ, ꦌꦮꦩꦺꦠꦁ ꦱꦸꦒꦠꦴ’’ꦠꦶꦄꦴꦢꦷꦱꦸ (ꦄ. ꦤꦶ. ꧓.꧖꧖) ꦱꦩ꧀ꦥꦲꦁꦱꦤꦺ. ‘‘ꦌꦮꦩꦺꦮꦁ ꦥꦤꦴꦪꦁ ꦮꦱꦭꦷ ꦪꦱ꧀ꦩꦶꦁ ꦮꦴ ꦠꦱ꧀ꦩꦶꦁ ꦮꦴ ꦠꦱ꧀ꦱ ꦩꦸꦟ꧀ꦝꦏꦱ꧀ꦱ ꦱꦩꦟꦏꦱ꧀ꦱ ꦮꦟ꧀ꦟꦁ ꦨꦴꦱꦠꦷ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧑.꧑꧘꧗) ꦒꦫꦲꦟꦺ. ‘‘ꦌꦮꦁ, ꦨꦤ꧀ꦠꦺꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧓; ꦩ. ꦤꦶ. ꧑.꧑) ꦮꦕꦤꦱꦩ꧀ꦥꦛꦶꦒ꧀ꦒꦲꦺ. ‘‘ꦌꦮꦁ ꦧ꧀ꦪꦴ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦴ ꦣꦩ꧀ꦩꦁ ꦢꦺꦱꦶꦠꦁ ꦄꦴꦗꦴꦤꦴꦩꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧓꧙꧘) ꦄꦴꦏꦴꦫꦺ. ‘‘ꦌꦲꦶ ꦠ꧀ꦮꦁ, ꦩꦴꦟꦮꦏ, ꦪꦺꦤ ꦱꦩꦟꦺꦴ ꦄꦴꦤꦤ꧀ꦢꦺꦴ ꦠꦺꦤꦸꦥꦱꦔ꧀ꦏꦩ, ꦈꦥꦱꦔ꧀ꦏꦩꦶꦠ꧀ꦮꦴ ꦩꦩ ꦮꦕꦤꦺꦤ ꦱꦩꦟꦁ ꦄꦴꦤꦤ꧀ꦢꦁ ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ ꦥꦸꦕ꧀ꦖ ‘ꦱꦸꦨꦺꦴ ꦩꦴꦟꦮꦺꦴ ꦠꦺꦴꦢꦺꦪ꧀ꦪꦥꦸꦠ꧀ꦠꦺꦴ ꦨꦮꦤ꧀ꦠꦁ ꦄꦴꦤꦤ꧀ꦢꦁ ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ ꦥꦸꦕ꧀ꦖꦠꦷ’ꦠꦶ, ꦌꦮꦚ꧀ꦕ ꦮꦢꦺꦲꦶ ‘ꦱꦴꦣꦸ ꦏꦶꦫ ꦨꦮꦁ ꦄꦴꦤꦤ꧀ꦢꦺꦴ ꦪꦺꦤ ꦱꦸꦨꦱ꧀ꦱ ꦩꦴꦟꦮꦱ꧀ꦱ ꦠꦺꦴꦢꦺꦪ꧀ꦪꦥꦸꦠ꧀ꦠꦱ꧀ꦱ ꦤꦶꦮꦺꦱꦤꦁ, ꦠꦺꦤꦸꦥꦱꦔ꧀ꦏꦩꦠꦸ ꦄꦤꦸꦏꦩ꧀ꦥꦁ ꦈꦥꦴꦢꦴꦪꦴ’ꦠꦶ’’ꦄꦴꦢꦷꦱꦸ (ꦢꦷ. ꦤꦶ. ꧑.꧔꧔꧕) ꦤꦶꦢꦱ꧀ꦱꦤꦺ. ‘‘‘ꦠꦁ ꦏꦶꦁ ꦩꦚ꧀ꦚꦡ, ꦏꦴꦭꦴꦩꦴ, ꦆꦩꦺ ꦣꦩ꧀ꦩꦴ ꦏꦸꦱꦭꦴ ꦮꦴ ꦄꦏꦸꦱꦭꦴ ꦮꦴ’ꦠꦶ? ‘ꦄꦏꦸꦱꦭꦴ, ꦨꦤ꧀ꦠꦺ’. ‘ꦱꦴꦮꦗ꧀ꦗꦴ ꦮꦴ ꦄꦤꦮꦗ꧀ꦗꦴ ꦮꦴ’ꦠꦶ? ‘ꦱꦴꦮꦗ꧀ꦗꦴ, ꦨꦤ꧀ꦠꦺ’. ‘ꦮꦶꦚ꧀ꦚꦹꦒꦫꦲꦶꦠꦴ ꦮꦴ ꦮꦶꦚ꧀ꦚꦸꦥ꧀ꦥꦱꦠ꧀ꦡꦴ ꦮꦴ’ꦠꦶ? ‘ꦮꦶꦚ꧀ꦚꦹꦒꦫꦲꦶꦠꦴ, ꦨꦤ꧀ꦠꦺ’. ‘ꦱꦩꦠ꧀ꦠꦴ ꦱꦩꦴꦢꦶꦤ꧀ꦤꦴ ꦄꦲꦶꦠꦴꦪ ꦢꦸꦏ꧀ꦑꦴꦪ ꦱꦁꦮꦠ꧀ꦠꦤ꧀ꦠꦶ, ꦤꦺꦴ’ꦮꦴ? ‘ꦏꦡꦁ ꦮꦺꦴ ꦌꦠ꧀ꦡ ꦲꦺꦴꦠꦷ’ꦠꦶ? ‘ꦱꦩꦠ꧀ꦠꦴ, ꦨꦤ꧀ꦠꦺ, ꦱꦩꦴꦢꦶꦤ꧀ꦤꦴ ꦄꦲꦶꦠꦴꦪ ꦢꦸꦏ꧀ꦑꦴꦪ ꦱꦁꦮꦠ꧀ꦠꦤ꧀ꦠꦶ, ꦌꦮꦁ ꦤꦺꦴ ꦌꦠ꧀ꦡ ꦲꦺꦴꦠꦷꦠꦶ’’’ꦄꦴꦢꦷꦱꦸ (ꦄ. ꦤꦶ. ꧓.꧖꧖) ꦄꦮꦣꦴꦫꦟꦺ. ‘‘ꦌꦮꦩꦺꦠꦺ ꦱꦸꦤ꧀ꦲꦴꦠꦴ ꦱꦸꦮꦶꦭꦶꦠ꧀ꦠꦴ ꦏꦥ꧀ꦥꦶꦠꦏꦺꦱꦩꦱ꧀ꦱꦹ ꦄꦴꦩꦸꦠ꧀ꦠꦩꦴꦭꦴꦨꦫꦟꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧒꧘꧖) ꦥꦸꦕ꧀ꦖꦴꦪꦁ. ‘‘ꦌꦮꦁꦒꦠꦴꦤꦶ ꦥꦸꦡꦸꦱꦶꦥ꧀ꦥꦴꦪꦠꦤꦴꦤꦶ (ꦢꦷ. ꦤꦶ. ꧑.꧑꧘꧒), ꦌꦮꦁꦮꦶꦣꦺꦴ ꦌꦮꦩꦴꦏꦴꦫꦺꦴ’’ꦠꦶꦄꦴꦢꦷꦱꦸ ꦆꦢꦁꦱꦢ꧀ꦢꦱ꧀ꦱ ꦄꦠ꧀ꦡꦺ. ꦒꦠꦱꦢ꧀ꦢꦺꦴ ꦲꦶ ꦥꦏꦴꦫꦥꦫꦶꦪꦴꦪꦺꦴ, ꦠꦡꦴ ꦮꦶꦣꦴꦏꦴꦫꦱꦢ꧀ꦢꦴ. ꦠꦡꦴ ꦲꦶ ꦮꦶꦣꦪꦸꦠ꧀ꦠꦒꦠꦱꦢ꧀ꦢꦺ ꦭꦺꦴꦏꦶꦪꦴ ꦥꦏꦴꦫꦠ꧀ꦡꦺ ꦮꦢꦤ꧀ꦠꦶ. ‘‘ꦌꦮꦁ ꦭꦲꦸꦥꦫꦶꦮꦠ꧀ꦠꦁ ꦌꦮꦩꦴꦪꦸꦥꦫꦶꦪꦤ꧀ꦠꦺꦴ’’ꦠꦶꦄꦴꦢꦷꦱꦸ (ꦄ. ꦤꦶ. ꧑.꧔꧘) ꦥꦫꦶꦩꦴꦟꦺ.

ꦤꦤꦸ ꦕ ‘‘ꦌꦮꦁ ꦮꦶꦠꦏ꧀ꦏꦶꦠꦁ ꦤꦺꦴ ꦠꦸꦩ꧀ꦲꦺꦲꦶ, ꦌꦮꦩꦴꦪꦸꦥꦫꦶꦪꦤ꧀ꦠꦺꦴ’’ꦠꦶ ꦕꦺꦠ꧀ꦡ ꦌꦮꦁꦱꦢ꧀ꦢꦺꦤ ꦥꦸꦕ꧀ꦖꦤꦴꦏꦴꦫꦥꦫꦶꦩꦴꦟꦴꦏꦴꦫꦴꦤꦁ ꦮꦸꦠ꧀ꦠꦠ꧀ꦠꦴ ꦄꦴꦏꦴꦫꦠ꧀ꦡꦺꦴ ꦌꦮ ꦌꦮꦁꦱꦢ꧀ꦢꦺꦴꦠꦶ. ꦤ, ꦮꦶꦱꦺꦱꦱꦧ꧀ꦨꦴꦮꦠꦺꦴ. ꦄꦴꦏꦴꦫꦩꦠ꧀ꦠꦮꦴꦕꦏꦺꦴ ꦲꦺꦠ꧀ꦡ ꦌꦮꦁꦱꦢ꧀ꦢꦺꦴ ꦄꦴꦏꦴꦫꦠ꧀ꦡꦺꦴꦠꦶ ꦄꦣꦶꦥ꧀ꦥꦺꦠꦺꦴ. ‘‘ꦌꦮꦁ ꦧ꧀ꦪꦴ ꦑꦺꦴ’’ꦠꦶꦄꦴꦢꦷꦱꦸ ꦥꦤ ꦄꦴꦏꦴꦫꦮꦶꦱꦺꦱꦮꦕꦤꦺꦴ. ꦄꦴꦏꦴꦫꦮꦶꦱꦺꦱꦮꦴꦕꦶꦤꦺꦴ ꦕꦺꦠꦺ ꦌꦮꦁꦱꦢ꧀ꦢꦴ ꦥꦸꦕ꧀ꦖꦤꦴꦏꦴꦫꦥꦫꦶꦩꦴꦟꦴꦏꦴꦫꦴꦤꦁ ꦮꦴꦕꦏꦠ꧀ꦠꦴ. ꦌꦮꦚ꧀ꦕ ꦏꦠ꧀ꦮꦴ ‘‘ꦌꦮꦁ ꦗꦴꦠꦺꦤ ꦩꦕ꧀ꦕꦺꦤꦴ’’ꦠꦶꦄꦴꦢꦷꦤꦶ ꦈꦥꦩꦴꦤꦈꦢꦴꦲꦫꦟꦴꦤꦶ ꦪꦸꦗ꧀ꦗꦤ꧀ꦠꦶ. ꦠꦠ꧀ꦡ ꦲꦶ –

‘‘ꦪꦡꦴꦥꦶ ꦥꦸꦥ꧀ꦦꦫꦴꦱꦶꦩ꧀ꦲꦴ, ꦏꦪꦶꦫꦴ ꦩꦴꦭꦴꦒꦸꦟꦺ ꦧꦲꦹ;

ꦌꦮꦁ ꦗꦴꦠꦺꦤ ꦩꦕ꧀ꦕꦺꦤ, ꦏꦠ꧀ꦠꦧ꧀ꦧꦁ ꦏꦸꦱꦭꦁ ꦧꦲꦸ’’ꦤ꧀ꦠꦶ. –

ꦌꦠ꧀ꦡ ꦥꦸꦥ꧀ꦦꦫꦴꦱꦶꦛ꧀ꦜꦴꦤꦷꦪꦠꦺꦴ ꦩꦤꦸꦱ꧀ꦱꦸꦥ꧀ꦥꦠ꧀ꦠꦶ ꦱꦥ꧀ꦥꦸꦫꦶꦱꦹꦥꦤꦶꦱ꧀ꦱꦪꦱꦢ꧀ꦣꦩ꧀ꦩꦱ꧀ꦱꦮꦤꦪꦺꦴꦤꦶꦱꦺꦴꦩꦤꦱꦶꦏꦴꦫꦨꦺꦴꦒꦱꦩ꧀ꦥꦠ꧀ꦠꦶꦄꦴꦢꦶꦠꦺꦴ ꦢꦴꦤꦴꦢꦶꦥꦸꦚ꧀ꦚꦏꦶꦫꦶꦪꦴꦲꦺꦠꦸꦱꦩꦸꦢꦴꦪꦠꦺꦴ ꦱꦺꦴꦨꦴꦱꦸꦒꦤ꧀ꦣꦠꦴꦢꦶꦒꦸꦟꦮꦶꦱꦺꦱꦪꦺꦴꦒꦠꦺꦴ ꦩꦴꦭꦴꦒꦸꦟꦱꦢꦶꦱꦶꦪꦺꦴ ꦧꦲꦸꦏꦴ ꦥꦸꦚ꧀ꦚꦏꦶꦫꦶꦪꦴ ꦩꦫꦶꦠꦧ꧀ꦧꦱꦨꦴꦮꦠꦴꦪ ꦩꦕ꧀ꦕꦺꦤ ꦏꦠ꧀ꦠꦧ꧀ꦧꦴꦠꦶ ꦄꦨꦺꦢꦠꦴꦪ ꦥꦸꦥ꧀ꦦꦫꦴꦱꦶ ꦩꦴꦭꦴꦒꦸꦟꦴ ꦕ ꦈꦥꦩꦴ, ꦠꦺꦱꦁ ꦈꦥꦩꦴꦤꦴꦏꦴꦫꦺꦴ ꦪꦡꦴꦱꦢ꧀ꦢꦺꦤ ꦄꦤꦶꦪꦩꦠꦺꦴ ꦮꦸꦠ꧀ꦠꦺꦴ. ꦥꦸꦤ ꦌꦮꦁꦱꦢ꧀ꦢꦺꦤ ꦤꦶꦪꦩꦤꦮꦱꦺꦤ ꦮꦸꦠ꧀ꦠꦺꦴ. ꦱꦺꦴ ꦥꦤ ꦈꦥꦩꦴꦏꦴꦫꦺꦴ ꦤꦶꦪꦩꦶꦪꦩꦴꦤꦺꦴ ꦄꦠ꧀ꦡꦠꦺꦴ ꦈꦥꦩꦴ ꦌꦮ ꦲꦺꦴꦠꦷꦠꦶ ꦮꦸꦠ꧀ꦠꦁ ‘‘ꦈꦥꦩꦴꦪꦁ ꦄꦴꦒꦠꦺꦴ’’ꦠꦶ.

ꦠꦡꦴ ‘‘ꦌꦮꦁ ꦆꦩꦶꦤꦴ ꦄꦴꦏꦴꦫꦺꦤ ꦄꦨꦶꦏ꧀ꦏꦩꦶꦠꦧ꧀ꦧ’’ꦤ꧀ꦠꦶꦄꦴꦢꦶꦤꦴ ꦈꦥꦢꦶꦱꦶꦪꦩꦴꦤꦴꦪ ꦱꦩꦟꦱꦴꦫꦸꦥ꧀ꦥꦴꦪ ꦄꦴꦏꦥ꧀ꦥꦱꦩ꧀ꦥꦠ꧀ꦠꦶꦪꦴ ꦪꦺꦴ ꦠꦠ꧀ꦡ ꦈꦥꦢꦺꦱꦴꦏꦴꦫꦺꦴ, ꦱꦺꦴ ꦄꦠ꧀ꦡꦠꦺꦴ ꦈꦥꦢꦺꦱꦺꦴꦪꦺꦮꦴꦠꦶ ꦮꦸꦠ꧀ꦠꦁ – ‘‘ꦌꦮꦁ ꦠꦺ ꦄꦨꦶꦏ꧀ꦏꦩꦶꦠꦧ꧀ꦧꦁ, ꦌꦮꦁ ꦠꦺ ꦥꦛꦶꦏ꧀ꦏꦩꦶꦠꦧ꧀ꦧꦤ꧀ꦠꦶꦄꦴꦢꦷꦱꦸ ꦈꦥꦢꦺꦱꦺ’’ꦠꦶ.

‘‘ꦌꦮꦩꦺꦠꦁ ꦨꦒꦮꦴ, ꦌꦮꦩꦺꦠꦁ ꦱꦸꦒꦠꦴ’’ꦠꦶ ꦌꦠ꧀ꦡ ꦨꦒꦮꦠꦴ ꦪꦡꦴꦮꦸꦠ꧀ꦠꦩꦠ꧀ꦡꦁ ꦄꦮꦶꦥꦫꦷꦠꦠꦺꦴ ꦗꦴꦤꦤ꧀ꦠꦺꦲꦶ ꦏꦠꦁ ꦪꦁ ꦠꦠ꧀ꦡ ꦮꦶꦗ꧀ꦗꦩꦴꦤꦒꦸꦟꦴꦤꦁ ꦥꦏꦴꦫꦺꦲꦶ ꦲꦁꦱꦤꦁ ꦈꦢꦒ꧀ꦒꦠꦴꦏꦫꦟꦁ ꦱꦩ꧀ꦥꦲꦁꦱꦤꦁ, ꦱꦺꦴ ꦠꦠ꧀ꦡ ꦥꦲꦁꦱꦤꦴꦏꦴꦫꦺꦴꦠꦶ ꦮꦸꦠ꧀ꦠꦤꦪꦺꦤ ꦪꦺꦴꦗꦺꦠꦧ꧀ꦧꦁ.

‘‘ꦌꦮꦩꦺꦮꦁ ꦥꦤꦴꦪ’’ꦤ꧀ꦠꦶ ꦌꦠ꧀ꦡ ꦒꦫꦲꦟꦴꦏꦴꦫꦺꦴꦠꦶ ꦮꦸꦠ꧀ꦠꦤꦪꦺꦤ ꦪꦺꦴꦗꦺꦠꦧ꧀ꦧꦁ. ꦱꦺꦴ ꦕ ꦒꦫꦲꦟꦴꦏꦴꦫꦺꦴ ‘‘ꦮꦱꦭꦷ’’ꦠꦶꦄꦴꦢꦶꦑꦸꦁꦱꦤꦱꦢ꧀ꦢꦱꦤ꧀ꦤꦶꦣꦴꦤꦠꦺꦴ ꦆꦣ ꦌꦮꦁꦱꦢ꧀ꦢꦺꦤ ꦥꦏꦴꦱꦶꦠꦺꦴꦠꦶ ꦮꦶꦚ꧀ꦚꦴꦪꦠꦶ. ꦪꦡꦴ ꦕꦺꦠ꧀ꦡ, ꦌꦮꦁ ꦈꦥꦩꦴꦏꦴꦫꦴꦢꦪꦺꦴꦥꦶ ꦈꦥꦩꦴꦢꦶꦮꦱꦺꦤ ꦮꦸꦠ꧀ꦠꦴꦤꦁ ꦥꦸꦥ꧀ꦦꦫꦴꦱꦶꦄꦴꦢꦶꦱꦢ꧀ꦢꦴꦤꦁ ꦱꦤ꧀ꦤꦶꦣꦴꦤꦠꦺꦴ ꦮꦸꦠ꧀ꦠꦴꦠꦶ ꦮꦺꦢꦶꦠꦧ꧀ꦧꦁ.

‘‘ꦌꦮꦁ ꦤꦺꦴ’’ꦠꦶ ꦌꦠ꧀ꦡꦴꦥꦶ ꦠꦺꦱꦁ ꦪꦡꦴꦮꦸꦠ꧀ꦠꦣꦩ꧀ꦩꦴꦤꦁ ꦄꦲꦶꦠꦢꦸꦏ꧀ꦑꦴꦮꦲꦨꦴꦮꦺꦤ ꦱꦤ꧀ꦤꦶꦛ꧀ꦜꦴꦤꦗꦤꦤꦠ꧀ꦡꦁ ꦄꦤꦸꦩꦠꦶꦒ꧀ꦒꦲꦟꦮꦱꦺꦤ ‘‘ꦤꦺꦴ ꦮꦴ ꦏꦡꦁ ꦮꦺꦴ ꦌꦠ꧀ꦡ ꦲꦺꦴꦠꦷ’’ꦠꦶ ꦥꦸꦕ꧀ꦖꦴꦪ ꦏꦠꦴꦪ ‘‘ꦌꦮꦁ ꦤꦺꦴ ꦌꦠ꧀ꦡ ꦲꦺꦴꦠꦷ’’ꦠꦶ ꦮꦸꦠ꧀ꦠꦠ꧀ꦠꦴ ꦠꦢꦴꦏꦴꦫꦱꦤ꧀ꦤꦶꦛ꧀ꦜꦴꦤꦁ ꦌꦮꦁꦱꦢ꧀ꦢꦺꦤ ꦄꦴꦮꦶꦏꦠꦁ. ꦱꦺꦴ ꦥꦤ ꦠꦺꦱꦁ ꦣꦩ꧀ꦩꦴꦤꦁ ꦄꦲꦶꦠꦴꦪ ꦢꦸꦏ꧀ꦑꦴꦪ ꦱꦁꦮꦠ꧀ꦠꦤꦴꦏꦴꦫꦺꦴ ꦤꦶꦪꦩꦶꦪꦩꦴꦤꦺꦴ ꦄꦮꦣꦴꦫꦟꦠ꧀ꦡꦺꦴ ꦲꦺꦴꦠꦷꦠꦶ ꦮꦸꦠ꧀ꦠꦁ – ‘‘ꦌꦮꦁ ꦤꦺꦴ ꦌꦠ꧀ꦡ ꦲꦺꦴꦠꦷꦠꦶꦄꦴꦢꦷꦱꦸ ꦄꦮꦣꦴꦫꦟꦺ’’ꦠꦶ.

‘‘ꦌꦮꦚ꧀ꦕ ꦮꦢꦺꦲꦷ’’ꦠꦶ ꦪꦡꦴꦲꦁ ꦮꦢꦴꦩꦶ ꦌꦮꦁ ꦱꦩꦟꦁ ꦄꦴꦤꦤ꧀ꦢꦁ ꦮꦢꦺꦲꦷꦠꦶ ꦮꦢꦤꦴꦏꦴꦫꦺꦴ ꦆꦢꦴꦤꦶ ꦮꦠ꧀ꦠꦧ꧀ꦧꦺꦴ ꦌꦮꦁꦱꦢ꧀ꦢꦺꦤ ꦤꦶꦢꦱ꧀ꦱꦷꦪꦠꦷꦠꦶ ‘‘ꦤꦶꦢꦱ꧀ꦱꦤꦠ꧀ꦡꦺꦴ’’ꦠꦶ ꦮꦸꦠ꧀ꦠꦁ.

ꦌꦮꦩꦴꦏꦴꦫꦮꦶꦱꦺꦱꦮꦴꦕꦷꦤꦩ꧀ꦥꦶ ꦌꦠꦺꦱꦁ ꦌꦮꦁꦱꦢ꧀ꦢꦴꦤꦁ ꦈꦥꦩꦴꦢꦶꦮꦶꦱꦺꦱꦠ꧀ꦡꦮꦸꦠ꧀ꦠꦶꦠꦴꦪ ꦈꦥꦩꦴꦢꦶꦄꦠ꧀ꦡꦠꦴ ꦮꦸꦠ꧀ꦠꦴ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦥꦤ ꦣꦩ꧀ꦩꦱ꧀ꦱ ꦱꦴꦣꦸꦏꦁ ꦱꦮꦤꦩꦤꦱꦶꦏꦴꦫꦺ ꦤꦶꦪꦺꦴꦗꦶꦠꦺꦲꦶ ꦨꦶꦏ꧀ꦑꦹꦲꦶ ꦠꦠ꧀ꦡ ꦥꦠꦶꦛ꧀ꦜꦶꦠꦨꦴꦮꦱ꧀ꦱ ꦥꦛꦶꦗꦴꦤꦤꦮꦱꦺꦤ ꦮꦸꦠ꧀ꦠꦠ꧀ꦠꦴ ꦠꦠ꧀ꦡ ꦌꦮꦁꦱꦢ꧀ꦢꦺꦴ ꦮꦕꦤꦱꦩ꧀ꦥꦛꦶꦒ꧀ꦒꦲꦠ꧀ꦡꦺꦴ. ꦠꦺꦤ ꦌꦮꦁ, ꦨꦤ꧀ꦠꦺꦠꦶ ꦱꦴꦣꦸ, ꦨꦤ꧀ꦠꦺ, ꦱꦸꦛ꧀ꦜꦸ, ꦨꦤ꧀ꦠꦺꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱ꧀ꦮꦴꦪꦩꦶꦣ ꦄꦴꦏꦴꦫꦤꦶꦢꦱ꧀ꦱꦤꦴꦮꦣꦴꦫꦟꦺꦱꦸ ꦢꦛ꧀ꦜꦧ꧀ꦧꦺꦴ.

ꦠꦠ꧀ꦡ ꦄꦴꦏꦴꦫꦠ꧀ꦡꦺꦤ ꦌꦮꦁꦱꦢ꧀ꦢꦺꦤ ꦌꦠꦩꦠ꧀ꦡꦁ ꦢꦷꦥꦺꦠꦶ – ꦤꦴꦤꦴꦤꦪꦤꦶꦥꦸꦟꦩꦤꦺꦏꦗ꧀ꦙꦴꦱꦪꦱꦩꦸꦛ꧀ꦜꦴꦤꦁ ꦄꦠ꧀ꦡꦧ꧀ꦪꦚ꧀ꦗꦤꦱꦩ꧀ꦥꦤ꧀ꦤꦁ ꦮꦶꦮꦶꦣꦥꦴꦛꦶꦲꦴꦫꦶꦪꦁ ꦣꦩ꧀ꦩꦠ꧀ꦡꦢꦺꦱꦤꦴꦥꦛꦶꦮꦺꦣꦒꦩ꧀ꦨꦷꦫꦁ ꦱꦧ꧀ꦧꦱꦠ꧀ꦠꦴꦤꦁ ꦱꦏꦱꦏꦨꦴꦱꦴꦤꦸꦫꦹꦥꦠꦺꦴ ꦱꦺꦴꦠꦥꦡꦩꦴꦒꦕ꧀ꦖꦤ꧀ꦠꦁ ꦠꦱ꧀ꦱ ꦨꦒꦮꦠꦺꦴ ꦮꦕꦤꦁ ꦱꦧ꧀ꦧꦥ꧀ꦥꦏꦴꦫꦺꦤ ꦏꦺꦴ ꦱꦩꦠ꧀ꦡꦺꦴ ꦮꦶꦚ꧀ꦚꦴꦠꦸꦁ, ꦱꦧ꧀ꦧꦡꦴꦩꦺꦤ ꦥꦤ ꦱꦺꦴꦠꦸꦏꦴꦩꦠꦁ ꦗꦤꦺꦠ꧀ꦮꦴꦥꦶ ꦌꦮꦁ ꦩꦺ ꦱꦸꦠꦁ, ꦩꦪꦴꦥꦶ ꦌꦏꦺꦤꦴꦏꦴꦫꦺꦤ ꦱꦸꦠꦤ꧀ꦠꦶ.

ꦌꦠ꧀ꦡ ꦕ ꦌꦏꦠ꧀ꦠꦤꦴꦤꦠ꧀ꦠꦄꦧ꧀ꦪꦴꦥꦴꦫꦌꦮꦁꦣꦩ꧀ꦩꦠꦴꦱꦔ꧀ꦑꦴꦠꦴ ꦤꦤ꧀ꦢꦶꦪꦴꦮꦠ꧀ꦠꦠꦶꦥꦸꦏ꧀ꦑꦭꦱꦷꦲꦮꦶꦏ꧀ꦏꦷꦭ꦳ꦶꦠꦢꦶꦱꦴꦭꦺꦴꦕꦤꦄꦔ꧀ꦏꦸꦱꦱꦔ꧀ꦑꦴꦠꦴ ꦕ ꦄꦱ꧀ꦱꦴꦢꦴꦢꦶꦮꦶꦱꦪꦴꦢꦶꦨꦺꦢꦺꦤ ꦤꦴꦤꦴꦮꦶꦣꦴ ꦤꦪꦴ ꦤꦴꦤꦴꦤꦪꦴ. ꦤꦪꦴ ꦮꦴ ꦥꦴꦭ꦳ꦶꦒꦠꦶꦪꦺꦴ, ꦠꦴ ꦕ ꦥꦚ꧀ꦚꦠ꧀ꦠꦶꦄꦤꦸꦥꦚ꧀ꦚꦠ꧀ꦠꦴꦢꦶꦮꦱꦺꦤ ꦱꦁꦏꦶꦭꦺꦱꦨꦴꦒꦶꦪꦴꦢꦶꦭꦺꦴꦏꦶꦪꦴꦢꦶꦠꦢꦸꦨꦪꦮꦺꦴꦩꦶꦱ꧀ꦱꦏꦴꦢꦶꦮꦱꦺꦤ ꦏꦸꦱꦭꦴꦢꦶꦮꦱꦺꦤ ꦑꦤ꧀ꦣꦴꦢꦶꦮꦱꦺꦤ, ꦱꦔ꧀ꦒꦲꦴꦢꦶꦮꦱꦺꦤ, ꦱꦩꦪꦮꦶꦩꦸꦠ꧀ꦠꦴꦢꦶꦮꦱꦺꦤ, ꦜꦥꦤꦴꦢꦶꦮꦱꦺꦤ, ꦏꦸꦱꦭꦩꦹꦭꦴꦢꦶꦮꦱꦺꦤ, ꦠꦶꦏꦥꦛ꧀ꦜꦴꦤꦴꦢꦶꦮꦱꦺꦤ ꦕ ꦤꦴꦤꦥ꧀ꦥꦏꦴꦫꦴꦠꦶ ꦤꦴꦤꦴꦤꦪꦴ, ꦠꦺꦲꦶ ꦤꦶꦥꦸꦟꦁ ꦱꦟ꧀ꦲꦁ ꦱꦸꦑꦸꦩꦤ꧀ꦠꦶ ꦤꦴꦤꦴꦤꦪꦤꦶꦥꦸꦟꦁ.

ꦄꦴꦱꦪꦺꦴꦮ ꦄꦗ꧀ꦙꦴꦱꦪꦺꦴ, ꦱꦺꦴ ꦕ ꦱꦱ꧀ꦱꦠꦴꦢꦶꦨꦺꦢꦺꦤ ꦄꦥ꧀ꦥꦫꦗꦏ꧀ꦑꦠꦴꦢꦶꦨꦺꦢꦺꦤ ꦕ ꦄꦤꦺꦏꦮꦶꦣꦺꦴ. ꦄꦠ꧀ꦠꦗ꧀ꦙꦴꦱꦪꦴꦢꦶꦏꦺꦴ ꦌꦮ ꦮꦴ ꦄꦤꦺꦏꦺꦴ ꦄꦗ꧀ꦙꦴꦱꦪꦺꦴ ꦄꦤꦺꦏꦗ꧀ꦙꦴꦱꦪꦺꦴ. ꦱꦺꦴ ꦱꦩꦸꦛ꧀ꦜꦴꦤꦁ ꦈꦥ꧀ꦥꦠ꧀ꦠꦶꦲꦺꦠꦸ ꦌꦠꦱ꧀ꦱꦴꦠꦶ ꦄꦤꦺꦏꦗ꧀ꦙꦴꦱꦪꦱꦩꦸꦛ꧀ꦜꦴꦤꦁ.

ꦱꦷꦭꦴꦢꦶꦄꦠ꧀ꦡꦱꦩ꧀ꦥꦠ꧀ꦠꦶꦪꦴ ꦠꦧ꧀ꦧꦶꦨꦴꦮꦤꦧ꧀ꦪꦚ꧀ꦗꦤꦱꦩ꧀ꦥꦠ꧀ꦠꦶꦪꦴ ꦱꦔ꧀ꦏꦴꦱꦤꦥꦏꦴꦱꦤꦮꦶꦮꦫꦟꦮꦶꦨꦗꦤꦈꦠ꧀ꦠꦴꦤꦷꦏꦫꦟꦥꦚ꧀ꦚꦠ꧀ꦠꦶꦮꦱꦺꦤ ꦖꦲꦶ ꦄꦠ꧀ꦡꦥꦢꦺꦲꦶ ꦄꦏ꧀ꦑꦫꦥꦢꦧ꧀ꦪꦚ꧀ꦗꦤꦴꦏꦴꦫꦤꦶꦫꦸꦠ꧀ꦠꦶꦤꦶꦢ꧀ꦢꦺꦱꦮꦱꦺꦤ ꦖꦲꦶ ꦧ꧀ꦪꦚ꧀ꦗꦤꦥꦢꦺꦲꦶ ꦕ ꦱꦩꦤ꧀ꦤꦴꦒꦠꦠ꧀ꦠꦴ ꦄꦠ꧀ꦡꦧ꧀ꦪꦚ꧀ꦗꦤꦱꦩ꧀ꦥꦤ꧀ꦤꦁ.

ꦆꦢ꧀ꦣꦶꦄꦴꦢꦺꦱꦤꦴꦤꦸꦱꦴꦱꦤꦷꦨꦺꦢꦺꦤ ꦠꦺꦱꦸ ꦕ ꦌꦏꦺꦏꦱ꧀ꦱ ꦮꦶꦱꦪꦴꦢꦶꦨꦺꦢꦺꦤ ꦮꦶꦮꦶꦣꦁ ꦧꦲꦸꦮꦶꦣꦁ ꦮꦴ ꦥꦴꦛꦶꦲꦴꦫꦶꦪꦁ ꦌꦠꦱ꧀ꦱꦴꦠꦶ ꦮꦶꦮꦶꦣꦥꦴꦛꦶꦲꦴꦫꦶꦪꦁ. ꦠꦠ꧀ꦡ ꦥꦛꦶꦥꦏ꧀ꦑꦲꦫꦟꦠꦺꦴ ꦫꦴꦒꦴꦢꦶꦏꦶꦭꦺꦱꦴꦥꦤꦪꦤꦠꦺꦴ ꦥꦴꦛꦶꦲꦴꦫꦶꦪꦤ꧀ꦠꦶ ꦄꦠ꧀ꦡꦺ ꦱꦠꦶ ꦨꦒꦮꦠꦺꦴ ꦤ ꦥꦛꦶꦥꦏ꧀ꦑꦴ ꦫꦴꦒꦴꦢꦪꦺꦴ ꦱꦤ꧀ꦠꦶ ꦪꦺ ꦲꦫꦶꦠꦧ꧀ꦧꦴ, ꦥꦸꦡꦸꦗ꧀ꦗꦤꦴꦤꦩ꧀ꦥꦶ ꦮꦶꦒꦠꦹꦥꦏ꧀ꦏꦶꦭꦺꦱꦺ ꦄꦛ꧀ꦜꦒꦸꦟꦱꦩꦤ꧀ꦤꦴꦒꦠꦺ ꦕꦶꦠ꧀ꦠꦺ ꦲꦠꦥꦛꦶꦥꦏ꧀ꦑꦺ ꦆꦢ꧀ꦣꦶꦮꦶꦣꦁ ꦥꦮꦠ꧀ꦠꦠꦶ, ꦠꦱ꧀ꦩꦴ ꦠꦠ꧀ꦡ ꦥꦮꦠ꧀ꦠꦮꦺꦴꦲꦴꦫꦺꦤ ꦕ ꦤ ꦱꦏ꧀ꦏꦴ ꦆꦣ ꦥꦴꦛꦶꦲꦴꦫꦶꦪꦤ꧀ꦠꦶ ꦮꦠ꧀ꦠꦸꦁ. ꦱꦕꦺ ꦥꦤ ꦩꦲꦴꦏꦴꦫꦸꦟꦶꦏꦱ꧀ꦱ ꦨꦒꦮꦠꦺꦴ ꦮꦺꦤꦺꦪ꧀ꦪꦒꦠꦴ ꦕ ꦏꦶꦭꦺꦱꦴ ꦥꦛꦶꦥꦏ꧀ꦑꦴ, ꦠꦺꦱꦁ ꦲꦫꦟꦠꦺꦴ ꦥꦴꦛꦶꦲꦴꦫꦶꦪꦤ꧀ꦠꦶ ꦮꦸꦠ꧀ꦠꦁ, ꦌꦮꦁ ꦱꦠꦶ ꦪꦸꦠ꧀ꦠꦩꦺꦠꦁ. ꦄꦡ ꦮꦴ ꦨꦒꦮꦠꦺꦴ ꦕꦺꦮ ꦱꦴꦱꦤꦱ꧀ꦱ ꦕ ꦥꦛꦶꦥꦏ꧀ꦑꦴ ꦠꦶꦠ꧀ꦡꦶꦪꦴ, ꦠꦺꦱꦁ ꦲꦫꦟꦠꦺꦴ ꦥꦴꦛꦶꦲꦴꦫꦶꦪꦁ. ꦠꦺ ꦲꦶ ꦢꦶꦛ꧀ꦜꦶꦲꦫꦟꦮꦱꦺꦤ ꦢꦶꦛ꧀ꦜꦶꦥ꧀ꦥꦏꦴꦱꦤꦺ ꦄꦱꦩꦠ꧀ꦡꦨꦴꦮꦺꦤ ꦕ ꦆꦢ꧀ꦣꦶꦄꦴꦢꦺꦱꦤꦴꦤꦸꦱꦴꦱꦤꦷꦲꦶ ꦲꦫꦶꦠꦴ ꦄꦥꦤꦷꦠꦴ ꦲꦺꦴꦤ꧀ꦠꦶ. ꦥꦛꦷꦠꦶ ꦮꦴ ꦄꦪꦁ ꦱꦢ꧀ꦢꦺꦴ ꦥꦕ꧀ꦖꦴꦠꦶ ꦌꦠꦱ꧀ꦱ ꦄꦠ꧀ꦡꦁ ꦧꦺꦴꦣꦺꦠꦶ ‘‘ꦠꦱ꧀ꦩꦶꦁ ꦥꦛꦶꦥꦮꦶꦛ꧀ꦜꦩ꧀ꦲꦶ, ꦄꦚ꧀ꦚꦺꦴ ꦄꦴꦒꦚ꧀ꦖꦶ ꦧ꧀ꦫꦴꦲ꧀ꦩꦟꦺꦴ’’ꦠꦶꦄꦴꦢꦷꦱꦸ (ꦕꦹꦭ꦳ꦤꦶ. ꦥꦴꦫꦴꦪꦤꦮꦒ꧀ꦒ, ꦮꦠ꧀ꦡꦸꦒꦴꦡꦴ ꧔) ꦮꦶꦪ. ꦠꦱ꧀ꦩꦴ ꦱꦩꦴꦲꦶꦠꦺ ꦕꦶꦠ꧀ꦠꦺ ꦮꦶꦒꦠꦹꦥꦏ꧀ꦏꦶꦭꦺꦱꦺ ꦏꦠꦏꦶꦕ꧀ꦕꦺꦤ ꦥꦕ꧀ꦖꦴ ꦲꦫꦶꦠꦧ꧀ꦧꦁ ꦥꦮꦠ꧀ꦠꦺꦠꦧ꧀ꦧꦤ꧀ꦠꦶ ꦥꦛꦶꦲꦴꦫꦶꦪꦁ. ꦄꦠ꧀ꦠꦤꦺꦴ ꦮꦴ ꦈꦥꦏ꧀ꦏꦶꦭꦺꦱꦺꦱꦸ ꦕꦠꦸꦠ꧀ꦡꦗ꧀ꦙꦴꦤꦩꦒ꧀ꦒꦺꦲꦶ ꦲꦫꦶꦠꦺꦱꦸ ꦥꦕ꧀ꦖꦴ ꦲꦫꦟꦁ ꦥꦛꦶꦲꦴꦫꦶꦪꦁ. ꦆꦢ꧀ꦣꦶꦄꦴꦢꦺꦱꦤꦴꦤꦸꦱꦴꦱꦤꦶꦪꦺꦴ ꦮꦶꦒꦠꦹꦥꦏ꧀ꦏꦶꦭꦺꦱꦺꦤ ꦏꦠꦏꦶꦕ꧀ꦕꦺꦤ ꦱꦠ꧀ꦠꦲꦶꦠꦠ꧀ꦡꦁ ꦥꦸꦤ ꦥꦮꦠ꧀ꦠꦺꦠꦧ꧀ꦧꦴ, ꦲꦫꦶꦠꦺꦱꦸ ꦕ ꦄꦠ꧀ꦠꦤꦺꦴ ꦈꦥꦏ꧀ꦏꦶꦭꦺꦱꦺꦱꦸ ꦥꦫꦱꦠ꧀ꦠꦴꦤꦁ ꦈꦥꦏ꧀ꦏꦶꦭꦺꦱꦲꦫꦟꦴꦤꦶ ꦲꦺꦴꦤ꧀ꦠꦷꦠꦶ ꦥꦛꦶꦲꦴꦫꦶꦪꦴꦤꦶ ꦨꦮꦤ꧀ꦠꦶ. ꦥꦛꦶꦲꦴꦫꦶꦪꦩꦺꦮ ꦥꦴꦛꦶꦲꦴꦫꦶꦪꦁ, ꦥꦛꦶꦲꦴꦫꦶꦪꦺ ꦮꦴ ꦆꦢ꧀ꦣꦶꦄꦴꦢꦺꦱꦤꦴꦤꦸꦱꦴꦱꦤꦷꦱꦩꦸꦢꦴꦪꦺ ꦨꦮꦁ ꦌꦏꦺꦏꦁ ꦥꦴꦛꦶꦲꦴꦫꦶꦪꦤ꧀ꦠꦶ ꦮꦸꦕ꧀ꦕꦠꦶ. ꦥꦛꦶꦲꦴꦫꦶꦪꦁ ꦮꦴ ꦕꦠꦸꦠ꧀ꦡꦗ꧀ꦙꦴꦤꦁ ꦩꦒ꧀ꦒꦺꦴ ꦕ ꦥꦛꦶꦥꦏ꧀ꦑꦲꦫꦟꦠꦺꦴ. ꦠꦠ꧀ꦡ ꦗꦴꦠꦁ ꦤꦶꦩꦶꦠ꧀ꦠꦨꦹꦠꦠꦺꦴ ꦠꦠꦺꦴ ꦮꦴ ꦄꦴꦒꦠꦤ꧀ꦠꦶ ꦥꦴꦛꦶꦲꦴꦫꦶꦪꦤ꧀ꦠꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦪꦱ꧀ꦩꦴ ꦥꦤ ꦠꦤ꧀ꦠꦶꦄꦠ꧀ꦡꦢꦺꦱꦤꦴ ꦠꦧ꧀ꦧꦺꦴꦲꦴꦫꦴꦨꦶꦱꦩꦪꦱꦔ꧀ꦑꦴꦠꦴ ꦲꦺꦠꦸꦲꦺꦠꦸꦦꦭꦠꦢꦸꦨꦪꦥꦚ꧀ꦚꦠ꧀ꦠꦶꦥꦛꦶꦮꦺꦣꦱꦔ꧀ꦑꦴꦠꦴ ꦮꦴ ꦣꦩ꧀ꦩꦠ꧀ꦡꦢꦺꦱꦤꦴꦥꦛꦶꦮꦺꦣꦴ ꦒꦩ꧀ꦨꦷꦫꦴ, ꦱꦱꦴꦢꦷꦲꦶ ꦮꦶꦪ ꦩꦲꦴꦱꦩꦸꦢ꧀ꦢꦺꦴ ꦄꦤꦸꦥꦕꦶꦠꦏꦸꦱꦭꦱꦩ꧀ꦨꦴꦫꦺꦲꦶ ꦄꦭꦧ꧀ꦨꦤꦺꦪ꧀ꦪꦥ꧀ꦥꦠꦶꦛ꧀ꦜꦴ ꦢꦸꦥ꧀ꦥꦫꦶꦪꦺꦴꦒꦴꦲꦴ ꦕ, ꦠꦱ꧀ꦩꦴ ꦠꦺꦲꦶ ꦕꦠꦹꦲꦶ ꦒꦩ꧀ꦨꦷꦫꦨꦴꦮꦺꦲꦶ ꦪꦸꦠ꧀ꦠꦤ꧀ꦠꦶ ꦨꦒꦮꦠꦺꦴ ꦮꦕꦤꦁ ꦣꦩ꧀ꦩꦠ꧀ꦡꦢꦺꦱꦤꦴꦥꦛꦶꦮꦺꦣꦒꦩ꧀ꦨꦷꦫꦁ.

ꦌꦏꦺꦴ ꦌꦮ ꦨꦒꦮꦠꦺꦴ ꦣꦩ꧀ꦩꦢꦺꦱꦤꦴꦓꦺꦴꦱꦺꦴ, ꦌꦏꦱ꧀ꦩꦶꦁ ꦑꦟꦺ ꦥꦮꦠ꧀ꦠꦩꦴꦤꦺꦴ ꦤꦴꦤꦴꦨꦴꦱꦴꦤꦁ ꦱꦠ꧀ꦠꦴꦤꦁ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦨꦴꦱꦴꦮꦱꦺꦤ ꦄꦥꦸꦧ꧀ꦧꦁ ꦄꦕꦫꦶꦩꦁ ꦒꦲꦟꦹꦥꦒꦺꦴ ꦲꦺꦴꦠꦶ. ꦄꦕꦶꦤ꧀ꦠꦺꦪ꧀ꦪꦺꦴ ꦲꦶ ꦧꦸꦢ꧀ꦣꦴꦤꦁ ꦧꦸꦢ꧀ꦣꦴꦤꦸꦨꦴꦮꦺꦴꦠꦶ ꦱꦧ꧀ꦧꦱꦠ꧀ꦠꦴꦤꦁ ꦱꦏꦱꦏꦨꦴꦱꦴꦤꦸꦫꦹꦥꦠꦺꦴ ꦱꦺꦴꦠꦥꦡꦁ ꦄꦴꦒꦕ꧀ꦖꦠꦷꦠꦶ ꦮꦺꦢꦶꦠꦧ꧀ꦧꦁ.

ꦤꦶꦢꦱ꧀ꦱꦤꦠ꧀ꦡꦺꦤ ‘‘ꦤꦴꦲꦁ ꦱꦪꦩ꧀ꦨꦹ, ꦤ ꦩꦪꦴ ꦆꦢꦁ ꦱꦕ꧀ꦖꦶꦏꦠ’’ꦤ꧀ꦠꦶ ꦄꦠ꧀ꦠꦴꦤꦁ ꦥꦫꦶꦩꦺꦴꦕꦺꦤ꧀ꦠꦺꦴ ‘‘ꦌꦮꦁ ꦩꦺ ꦱꦸꦠꦁ, ꦩꦪꦴꦥꦶ ꦌꦮꦁ ꦱꦸꦠ’’ꦤ꧀ꦠꦶ ꦆꦢꦴꦤꦶ ꦮꦠ꧀ꦠꦧ꧀ꦧꦁ ꦱꦏꦭꦁ ꦱꦸꦠ꧀ꦠꦁ ꦤꦶꦢꦱ꧀ꦱꦺꦠꦶ.

ꦄꦮꦣꦴꦫꦟꦠ꧀ꦡꦺꦤ ‘‘ꦌꦠꦢꦒ꧀ꦒꦁ, ꦨꦶꦏ꧀ꦑꦮꦺ, ꦩꦩ ꦱꦴꦮꦏꦴꦤꦁ ꦨꦶꦏ꧀ꦑꦹꦤꦁ ꦧꦲꦸꦱ꧀ꦱꦸꦠꦴꦤꦁ ꦪꦢꦶꦢꦁ ꦄꦴꦤꦤ꧀ꦢꦺꦴ, ꦒꦠꦶꦩꦤ꧀ꦠꦴꦤꦁ, ꦱꦠꦶꦩꦤ꧀ꦠꦴꦤꦁ, ꦣꦶꦠꦶꦩꦤ꧀ꦠꦴꦤꦁ, ꦈꦥꦛ꧀ꦜꦴꦏꦴꦤꦁ ꦪꦢꦶꦢꦁ ꦄꦴꦤꦤ꧀ꦢꦺꦴ’’ꦠꦶ (ꦄ. ꦤꦶ. ꧑.꧒꧑꧙-꧒꧒꧓) ꦌꦮꦁ ꦨꦒꦮꦠꦴ, ‘‘ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦄꦠ꧀ꦡꦏꦸꦱꦭꦺꦴ, ꦣꦩ꧀ꦩꦏꦸꦱꦭꦺꦴ, ꦧ꧀ꦪꦚ꧀ꦗꦤꦏꦸꦱꦭꦺꦴ, ꦤꦶꦫꦸꦠ꧀ꦠꦶꦏꦸꦱꦭꦺꦴ, ꦥꦸꦧ꧀ꦧꦴꦥꦫꦏꦸꦱꦭꦺꦴ’’ꦠꦶ (ꦄ. ꦤꦶ. ꧕.꧑꧖꧙) ꦌꦮꦁ ꦣꦩ꧀ꦩꦱꦺꦤꦴꦥꦠꦶꦤꦴ ꦕ ꦥꦱꦠ꧀ꦡꦨꦴꦮꦴꦤꦸꦫꦹꦥꦁ ꦄꦠ꧀ꦠꦤꦺꦴ ꦣꦴꦫꦟꦧꦭꦁ ꦢꦱ꧀ꦱꦺꦤ꧀ꦠꦺꦴ ꦱꦠ꧀ꦠꦴꦤꦁ ꦱꦺꦴꦠꦸꦏꦴꦩꦠꦁ ꦗꦤꦺꦠꦶ. ‘‘ꦌꦮꦁ ꦩꦺ ꦱꦸꦠꦁ, ꦠꦚ꧀ꦕ ꦑꦺꦴ ꦄꦠ꧀ꦡꦠꦺꦴ ꦮꦴ ꦧ꧀ꦪꦚ꧀ꦗꦤꦠꦺꦴ ꦮꦴ ꦄꦤꦹꦤꦩꦤꦣꦶꦏꦁ, ꦌꦮꦩꦺꦮ ꦤ ꦄꦚ꧀ꦚꦡꦴ ꦢꦛ꧀ꦜꦧ꧀ꦧ’’ꦤ꧀ꦠꦶ. ꦄꦚ꧀ꦚꦡꦴꦠꦶ ꦨꦒꦮꦠꦺꦴ ꦱꦩ꧀ꦩꦸꦑꦴ ꦱꦸꦠꦴꦏꦴꦫꦠꦺꦴ ꦄꦚ꧀ꦚꦡꦴ ꦤ ꦥꦤ ꦨꦒꦮꦠꦴ ꦢꦺꦱꦶꦠꦴꦏꦴꦫꦠꦺꦴ. ꦄꦕꦶꦤ꧀ꦠꦺꦪ꧀ꦪꦴꦤꦸꦨꦴꦮꦴ ꦲꦶ ꦨꦒꦮꦠꦺꦴ ꦢꦺꦱꦤꦴ, ꦱꦴ ꦤꦺꦮ ꦱꦧ꧀ꦧꦴꦏꦴꦫꦺꦤ ꦱꦏ꧀ꦏꦴ ꦮꦶꦚ꧀ꦚꦴꦠꦸꦤ꧀ꦠꦶ ꦮꦸꦠ꧀ꦠꦺꦴꦮꦴꦪꦩꦠ꧀ꦡꦺꦴ. ꦱꦸꦠꦴꦏꦴꦫꦴꦮꦶꦫꦸꦗ꧀ꦙꦤꦩꦺꦮ ꦲꦶ ꦣꦴꦫꦟꦧꦭꦁ.

ꦩꦺꦱꦢ꧀ꦢꦺꦴ ꦠꦷꦱꦸ ꦄꦠ꧀ꦡꦺꦱꦸ ꦢꦶꦱ꧀ꦱꦠꦶ. ꦠꦡꦴ ꦲꦶꦱ꧀ꦱ ‘‘ꦒꦴꦡꦴꦨꦶꦒꦷꦠꦁ ꦩꦺ ꦄꦨꦺꦴꦗꦤꦺꦪ꧀ꦪ’’ꦤ꧀ꦠꦶꦄꦴꦢꦷꦱꦸ (ꦱꦁ. ꦤꦶ. ꧑.꧑꧙꧔; ꦱꦸ. ꦤꦶ. ꧘꧑) ꦩꦪꦴꦠꦶ ꦄꦠ꧀ꦡꦺꦴ. ‘‘ꦱꦴꦣꦸ ꦩꦺ, ꦨꦤ꧀ꦠꦺ, ꦨꦒꦮꦴ ꦱꦁꦑꦶꦠ꧀ꦠꦺꦤ ꦣꦩ꧀ꦩꦁ ꦢꦺꦱꦺꦠꦹ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧔.꧘꧘; ꧕.꧓꧘꧒; ꦄ. ꦤꦶ. ꧔.꧒꧕꧗) ꦩꦪ꧀ꦲꦤ꧀ꦠꦶ ꦄꦠ꧀ꦡꦺꦴ. ‘‘ꦣꦩ꧀ꦩꦢꦴꦪꦴꦢꦴ ꦩꦺ, ꦨꦶꦏ꧀ꦑꦮꦺ, ꦨꦮꦡꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧒꧙) ꦩꦩꦴꦠꦶ ꦄꦠ꧀ꦡꦺꦴ. ꦆꦣ ꦥꦤ ‘‘ꦩꦪꦴ ꦱꦸꦠꦁ, ꦩꦩ ꦱꦸꦠ’’ꦤ꧀ꦠꦶ ꦕ ꦄꦠ꧀ꦡꦢ꧀ꦮꦪꦺ ꦪꦸꦗ꧀ꦗꦠꦶ.

ꦌꦠ꧀ꦡ ꦕ ꦪꦺꦴ ꦥꦫꦺꦴ ꦤ ꦲꦺꦴꦠꦶ, ꦱꦺꦴ ꦄꦠ꧀ꦠꦴꦠꦶ ꦌꦮꦁ ꦮꦠ꧀ꦠꦧ꧀ꦧꦺ ꦤꦶꦪꦏꦗ꧀ꦙꦠ꧀ꦠꦱꦔ꧀ꦑꦴꦠꦺ ꦱꦱꦤ꧀ꦠꦴꦤꦺ ꦮꦠ꧀ꦠꦤꦠꦺꦴ ꦠꦶꦮꦶꦣꦺꦴꦥꦶ ꦩꦺꦱꦢ꧀ꦢꦺꦴ ꦏꦶꦚ꧀ꦕꦴꦥꦶ ꦌꦏꦱ꧀ꦩꦶꦁꦪꦺꦮ ꦄꦠ꧀ꦡꦺ ꦢꦶꦱ꧀ꦱꦠꦶ, ꦏꦫꦟꦱꦩ꧀ꦥꦢꦴꦤꦴꦢꦶꦮꦶꦱꦺꦱꦱꦔ꧀ꦑꦴꦠꦺꦴ ꦥꦤ ꦮꦶꦚ꧀ꦚꦴꦪꦠꦺꦮꦴꦪꦁ ꦄꦠ꧀ꦡꦨꦺꦢꦺꦴꦠꦶ ‘‘ꦩꦺ-ꦱꦢ꧀ꦢꦺꦴ ꦠꦷꦱꦸ ꦄꦠ꧀ꦡꦺꦱꦸ ꦢꦶꦱ꧀ꦱꦠꦷ’’ꦠꦶ ꦮꦸꦠ꧀ꦠꦺꦴꦠꦶ ꦢꦛ꧀ꦜꦧ꧀ꦧꦁ.

ꦱꦸꦠꦤ꧀ꦠꦶ ꦄꦪꦁ ꦱꦸꦠꦱꦢ꧀ꦢꦺꦴ ꦱꦈꦥꦱꦒ꧀ꦒꦺꦴ ꦄꦤꦸꦥꦱꦒ꧀ꦒꦺꦴ ꦕ ꦒꦩꦤꦮꦶꦱ꧀ꦱꦸꦠꦏꦶꦭꦶꦤ꧀ꦤꦹꦥꦕꦶꦠꦴꦤꦸꦪꦺꦴꦒꦱꦺꦴꦠꦮꦶꦚ꧀ꦚꦺꦪ꧀ꦪ ꦱꦺꦴꦠꦢ꧀ꦮꦴꦫꦴꦤꦸꦱꦴꦫ ꦮꦶꦚ꧀ꦚꦴꦠꦴꦢꦶꦄꦤꦺꦏꦠ꧀ꦡꦥ꧀ꦥꦨꦺꦢꦺꦴ. ꦏꦶꦚ꧀ꦕꦴꦥꦶ ꦲꦶ ꦈꦥꦱꦒ꧀ꦒꦺꦴ ꦏꦶꦫꦶꦪꦁ ꦮꦶꦱꦺꦱꦺꦠꦶ, ꦗꦺꦴꦠꦏꦨꦴꦮꦠꦺꦴ ꦥꦤ ꦱꦠꦶꦥꦶ ꦠꦱ꧀ꦩꦶꦁ ꦱꦸꦠꦱꦢ꧀ꦢꦺꦴ ꦌꦮ ꦠꦁ ꦠꦩꦠ꧀ꦡꦁ ꦮꦢꦠꦷꦠꦶ ꦄꦤꦸꦥꦱꦒ꧀ꦒꦱ꧀ꦱ ꦱꦸꦠꦱꦢ꧀ꦢꦱ꧀ꦱ ꦄꦠ꧀ꦡꦸꦢ꧀ꦣꦴꦫꦺ ꦱꦈꦥꦱꦒ꧀ꦒꦱ꧀ꦱ ꦒꦲꦟꦁ ꦤ ꦮꦶꦫꦸꦗ꧀ꦙꦠꦶ.

ꦠꦠ꧀ꦡ ‘‘ꦱꦺꦤꦴꦪ ꦥꦱꦸꦠꦺꦴ’’ꦠꦶꦄꦴꦢꦷꦱꦸ ꦒꦕ꧀ꦖꦤ꧀ꦠꦺꦴꦠꦶ ꦄꦠ꧀ꦡꦺꦴ. ‘‘ꦱꦸꦠꦣꦩ꧀ꦩꦱ꧀ꦱ ꦥꦱ꧀ꦱꦠꦺꦴ’’ꦠꦶꦄꦴꦢꦷꦱꦸ (ꦈꦢꦴ. ꧑꧑) ꦮꦶꦱ꧀ꦱꦸꦠꦣꦩ꧀ꦩꦱ꧀ꦱꦴꦠꦶ ꦄꦠ꧀ꦡꦺꦴ. ‘‘ꦄꦮꦱ꧀ꦱꦸꦠꦴ ꦄꦮꦱ꧀ꦱꦸꦠꦱ꧀ꦱꦴ’’ꦠꦶꦄꦴꦢꦷꦱꦸ (ꦥꦴꦕꦶ. ꧖꧕꧗) ꦏꦶꦭꦺꦱꦺꦤ ꦏꦶꦭꦶꦤ꧀ꦤꦴ ꦏꦶꦭꦶꦤ꧀ꦤꦱ꧀ꦱꦴꦠꦶ ꦄꦠ꧀ꦡꦺꦴ. ‘‘ꦠꦸꦩ꧀ꦲꦺꦲꦶ ꦥꦸꦚ꧀ꦚꦁ ꦥꦱꦸꦠꦁ ꦄꦤꦥ꧀ꦥꦏ’’ꦤ꧀ꦠꦶꦄꦴꦢꦷꦱꦸ (ꦑꦸ. ꦥꦴ. ꧗.꧑꧒) ꦈꦥꦕꦶꦠꦤ꧀ꦠꦶ ꦄꦠ꧀ꦡꦺꦴ. ‘‘ꦪꦺ ꦙꦴꦤꦥ꧀ꦥꦱꦸꦠꦴ ꦣꦷꦫꦴ’’ꦠꦶꦄꦴꦢꦷꦱꦸ (ꦣ. ꦥ. ꧑꧘꧑) ꦙꦴꦤꦴꦤꦸꦪꦸꦠ꧀ꦠꦴꦠꦶ ꦄꦠ꧀ꦡꦺꦴ. ‘‘ꦢꦶꦛ꧀ꦜꦁ ꦱꦸꦠꦁ ꦩꦸꦠ’’ꦤ꧀ꦠꦶꦄꦴꦢꦷꦱꦸ (ꦩ. ꦤꦶ. ꧑.꧒꧔꧑) ꦱꦺꦴꦠꦮꦶꦚ꧀ꦚꦺꦪ꧀ꦪꦤ꧀ꦠꦶ ꦄꦠ꧀ꦡꦺꦴ. ‘‘ꦱꦸꦠꦣꦫꦺꦴ ꦱꦸꦠꦱꦤ꧀ꦤꦶꦕꦪꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧓꧓꧙) ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦮꦶꦚ꧀ꦚꦴꦠꦣꦫꦺꦴꦠꦶ ꦄꦠ꧀ꦡꦺꦴ. ꦆꦣ ꦥꦤꦱ꧀ꦱ ‘‘ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦺꦤ ꦈꦥꦣꦴꦫꦶꦠ’’ꦤ꧀ꦠꦶ ꦮꦴ ‘‘ꦈꦥꦣꦴꦫꦟ’’ꦤ꧀ꦠꦶ ꦮꦴ ꦄꦠ꧀ꦡꦺꦴ. ꦩꦺ-ꦱꦢ꧀ꦢꦱ꧀ꦱ ꦲꦶ ꦩꦪꦴꦠꦶ ꦄꦠ꧀ꦡꦺ ꦱꦠꦶ ‘‘ꦌꦮꦁ ꦩꦪꦴ ꦱꦸꦠꦁ ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦺꦤ ꦈꦥꦣꦴꦫꦶꦠ’’ꦤ꧀ꦠꦶ ꦪꦸꦗ꧀ꦗꦠꦶ. ꦩꦩꦴꦠꦶ ꦄꦠ꧀ꦡꦺ ꦱꦠꦶ ‘‘ꦌꦮꦁ ꦩꦩ ꦱꦸꦠꦁ ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦺꦤ ꦈꦥꦣꦴꦫꦟ’’ꦤ꧀ꦠꦶ ꦪꦸꦗ꧀ꦗꦠꦶ.

ꦌꦮꦩꦺꦠꦺꦱꦸ ꦠꦷꦱꦸ ꦥꦢꦺꦱꦸ ꦪꦱ꧀ꦩꦴ ꦱꦸꦠꦱꦢ꧀ꦢꦱꦤ꧀ꦤꦶꦣꦴꦤꦺ ꦥꦪꦸꦠ꧀ꦠꦺꦤ ꦌꦮꦁꦱꦢ꧀ꦢꦺꦤ ꦱꦮꦤꦏꦶꦫꦶꦪꦴꦗꦺꦴꦠꦏꦺꦤ ꦨꦮꦶꦠꦧ꧀ꦧꦁ, ꦠꦱ꧀ꦩꦴ ꦌꦮꦤ꧀ꦠꦶ ꦱꦺꦴꦠꦮꦶꦚ꧀ꦚꦴꦟꦱꦩ꧀ꦥꦛꦶꦕ꧀ꦖꦤꦴꦢꦶꦱꦺꦴꦠꦢ꧀ꦮꦴꦫꦶꦏꦮꦶꦚ꧀ꦚꦴꦟꦴꦤꦤ꧀ꦠꦫꦁ ꦈꦥ꧀ꦥꦤ꧀ꦤꦩꦤꦺꦴꦢ꧀ꦮꦴꦫꦶꦏꦮꦶꦚ꧀ꦚꦴꦟꦏꦶꦕ꧀ꦕꦤꦶꦢꦱ꧀ꦱꦤꦁ. ꦩꦺꦠꦶ ꦮꦸꦠ꧀ꦠꦮꦶꦚ꧀ꦚꦴꦟꦱꦩꦔ꧀ꦒꦷꦥꦸꦒ꧀ꦒꦭꦤꦶꦢꦱ꧀ꦱꦤꦁ. ꦱꦧ꧀ꦧꦴꦤꦶ ꦲꦶ ꦮꦴꦏ꧀ꦪꦴꦤꦶ ꦌꦮꦏꦴꦫꦠ꧀ꦡꦱꦲꦶꦠꦴꦤꦶꦪꦺꦮ ꦄꦮꦣꦴꦫꦟꦦꦭꦠ꧀ꦠꦴ ꦠꦺꦱꦁ. ꦱꦸꦠꦤ꧀ꦠꦶ ꦄꦱ꧀ꦱꦮꦤꦨꦴꦮꦥ꧀ꦥꦛꦶꦏ꧀ꦑꦺꦥꦠꦺꦴ ꦄꦤꦹꦤꦴꦤꦣꦶꦏꦴꦮꦶꦥꦫꦷꦠꦒ꧀ꦒꦲꦟꦤꦶꦢꦱ꧀ꦱꦤꦁ. ꦪꦡꦴ ꦲꦶ ꦱꦸꦠꦁ ꦱꦸꦠꦩꦺꦮꦴꦠꦶ ꦮꦠ꧀ꦠꦧ꧀ꦧꦠꦁ ꦄꦫꦲꦠꦶ ꦠꦡꦴ ꦠꦁ ꦱꦩ꧀ꦩꦴ ꦱꦸꦠꦁ ꦄꦤꦹꦤꦒ꧀ꦒꦲꦟꦁ ꦄꦤꦣꦶꦏꦒ꧀ꦒꦲꦟꦁ ꦄꦮꦶꦥꦫꦷꦠꦒ꧀ꦒꦲꦟꦚ꧀ꦕ ꦲꦺꦴꦠꦷꦠꦶ. ꦄꦡ ꦮꦴ ꦱꦢ꧀ꦢꦤ꧀ꦠꦫꦠ꧀ꦡꦴꦥꦺꦴꦲꦤꦮꦱꦺꦤ ꦱꦢ꧀ꦢꦺꦴ ꦄꦠ꧀ꦡꦁ ꦮꦢꦠꦷꦠꦶ ꦌꦠꦱ꧀ꦩꦶꦁ ꦥꦏ꧀ꦑꦺ ꦪꦱ꧀ꦩꦴ ꦱꦸꦠꦤ꧀ꦠꦶ ꦌꦠꦱ꧀ꦱ ꦄꦱꦸꦠꦁ ꦤ ꦲꦺꦴꦠꦷꦠꦶ ꦄꦪꦩꦠ꧀ꦡꦺꦴ ꦮꦸꦠ꧀ꦠꦺꦴ, ꦠꦱ꧀ꦩꦴ ꦱꦸꦠꦤ꧀ꦠꦶ ꦄꦱ꧀ꦱꦮꦤꦨꦴꦮꦥ꧀ꦥꦛꦶꦏ꧀ꦑꦺꦥꦠꦺꦴ ꦄꦤꦹꦤꦴꦤꦣꦶꦏꦴꦮꦶꦥꦫꦷꦠꦒ꧀ꦒꦲꦟꦤꦶꦢꦱ꧀ꦱꦤꦁ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦌꦮꦁ ꦩꦺ ꦱꦸꦠꦁ, ꦤ ꦩꦪꦴ ꦆꦢꦁ ꦢꦶꦛ꧀ꦜꦁ, ꦤ ꦱꦪꦩ꧀ꦨꦹꦚꦴꦟꦺꦤ ꦱꦕ꧀ꦖꦶꦏꦠꦁ, ꦤ ꦄꦚ꧀ꦚꦡꦴ ꦮꦴ ꦈꦥꦭꦢ꧀ꦣꦁ. ꦄꦥꦶ ꦕ ꦱꦸꦠꦁꦮ, ꦠꦚ꧀ꦕ ꦑꦺꦴ ꦱꦩ꧀ꦩꦢꦺꦮꦴꦠꦶ. ꦄꦮꦣꦴꦫꦟꦠ꧀ꦡꦺ ꦮꦴ ꦌꦮꦁꦱꦢ꧀ꦢꦺ ꦄꦪꦩꦠ꧀ꦡꦪꦺꦴꦗꦤꦴ, ꦠꦢꦥꦺꦏ꧀ꦑꦱ꧀ꦱ ꦱꦸꦠꦱꦢ꧀ꦢꦱ꧀ꦱ ꦤꦶꦪꦩꦠ꧀ꦡꦺꦴ ꦱꦩ꧀ꦨꦮꦠꦷꦠꦶ ꦠꦢꦥꦺꦏ꧀ꦑꦱ꧀ꦱ ꦱꦸꦠꦱꦢ꧀ꦢꦱ꧀ꦱ ꦄꦱ꧀ꦱꦮꦤꦨꦴꦮꦥ꧀ꦥꦛꦶꦏ꧀ꦑꦺꦥꦺꦴ ꦄꦤꦹꦤꦴꦤꦣꦶꦏꦴꦮꦶꦥꦫꦷꦠꦒ꧀ꦒꦲꦟꦤꦶꦢꦱ꧀ꦱꦤꦠꦴ ꦕ ꦮꦺꦢꦶꦠꦧ꧀ꦧꦴ. ꦆꦠꦶ ꦱꦮꦤꦲꦺꦠꦸꦱꦮꦤꦮꦶꦱꦺꦱꦮꦱꦺꦤꦥꦶ ꦱꦸꦠꦱꦢ꧀ꦢꦱ꧀ꦱ ꦄꦠ꧀ꦡꦪꦺꦴꦗꦤꦴ ꦏꦠꦴꦠꦶ ꦢꦛ꧀ꦜꦧ꧀ꦧꦁ.

ꦠꦡꦴ ꦌꦮꦤ꧀ꦠꦶ ꦠꦱ꧀ꦱꦴ ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦺꦤ ꦥꦮꦠ꧀ꦠꦴꦪ ꦮꦶꦚ꧀ꦚꦴꦟꦮꦷꦡꦶꦪꦴ ꦤꦴꦤꦠ꧀ꦡꦧ꧀ꦪꦚ꧀ꦗꦤꦒ꧀ꦒꦲꦟꦠꦺꦴ ꦤꦴꦤꦥ꧀ꦥꦏꦴꦫꦺꦤ ꦄꦴꦫꦩ꧀ꦩꦟꦺ ꦥꦮꦠ꧀ꦠꦶꦨꦴꦮꦥ꧀ꦥꦏꦴꦱꦤꦁ ꦄꦴꦏꦴꦫꦠ꧀ꦡꦺꦴ ꦌꦮꦁꦱꦢ꧀ꦢꦺꦴꦠꦶ ꦏꦫꦶꦠ꧀ꦮꦴ. ꦩꦺꦠꦶ ꦄꦠ꧀ꦠꦥ꧀ꦥꦏꦴꦱꦤꦁ. ꦱꦸꦠꦤ꧀ꦠꦶ ꦣꦩ꧀ꦩꦥ꧀ꦥꦏꦴꦱꦤꦁ ꦪꦡꦴꦮꦸꦠ꧀ꦠꦴꦪ ꦮꦶꦚ꧀ꦚꦴꦟꦮꦷꦡꦶꦪꦴ ꦥꦫꦶꦪꦠ꧀ꦠꦶꦣꦩ꧀ꦩꦴꦫꦩ꧀ꦩꦟꦠ꧀ꦠꦴ. ꦄꦪꦚ꧀ꦲꦺꦠ꧀ꦡ ꦱꦔ꧀ꦑꦺꦥꦺꦴ – ꦤꦴꦤꦥ꧀ꦥꦏꦴꦫꦺꦤ ꦄꦴꦫꦩ꧀ꦩꦟꦺ ꦥꦮꦠ꧀ꦠꦴꦪ ꦮꦶꦚ꧀ꦚꦴꦟꦮꦷꦡꦶꦪꦴ ꦏꦫꦟꦨꦹꦠꦴꦪ ꦩꦪꦴ ꦤ ꦄꦚ꧀ꦚꦁ ꦏꦠꦁ, ꦆꦢꦁ ꦥꦤ ꦏꦠꦁ, ꦄꦪꦁ ꦣꦩ꧀ꦩꦺꦴ ꦱꦸꦠꦺꦴꦠꦶ.

ꦠꦡꦴ ꦌꦮꦤ꧀ꦠꦶ ꦤꦶꦢꦱ꧀ꦱꦶꦠꦧ꧀ꦧꦥ꧀ꦥꦏꦴꦱꦤꦁ ꦤꦶꦢꦱ꧀ꦱꦤꦠ꧀ꦡꦺꦴ ꦌꦮꦁꦱꦢ꧀ꦢꦺꦴꦠꦶ ꦏꦠ꧀ꦮꦴ ꦤꦶꦢꦱ꧀ꦱꦺꦠꦧ꧀ꦧꦱ꧀ꦱ ꦤꦶꦢ꧀ꦢꦶꦱꦶꦠꦧ꧀ꦧꦨꦴꦮꦠꦺꦴ. ꦠꦱ꧀ꦩꦴ ꦌꦮꦁꦱꦢ꧀ꦢꦺꦤ ꦱꦏꦭꦩ꧀ꦥꦶ ꦱꦸꦠ꧀ꦠꦁ ꦥꦕ꧀ꦕꦴꦩꦛ꧀ꦜꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦩꦺꦠꦶ ꦥꦸꦒ꧀ꦒꦭꦥ꧀ꦥꦏꦴꦱꦤꦁ. ꦱꦸꦠꦤ꧀ꦠꦶ ꦥꦸꦒ꧀ꦒꦭꦏꦶꦕ꧀ꦕꦥ꧀ꦥꦏꦴꦱꦤꦁ. ꦱꦸꦠꦱꦢ꧀ꦢꦺꦤ ꦲꦶ ꦭꦧ꧀ꦨꦩꦴꦤꦴ ꦱꦮꦤꦏꦶꦫꦶꦪꦴ ꦱꦮꦤꦮꦶꦚ꧀ꦚꦴꦟꦥ꧀ꦥꦧꦤ꧀ꦣꦥ꧀ꦥꦛꦶꦧꦢ꧀ꦣꦴ, ꦠꦠ꧀ꦡ ꦕ ꦥꦸꦒ꧀ꦒꦭꦮꦺꦴꦲꦴꦫꦺꦴ, ꦤ ꦕ ꦥꦸꦒ꧀ꦒꦭꦮꦺꦴꦲꦴꦫꦫꦲꦶꦠꦺ ꦣꦩ꧀ꦩꦥ꧀ꦥꦧꦤ꧀ꦣꦺ ꦱꦮꦤꦏꦶꦫꦶꦪꦴ ꦭꦧ꧀ꦨꦠꦶ. ꦠꦱ꧀ꦱꦴꦪꦁ ꦱꦔ꧀ꦑꦺꦥꦠ꧀ꦡꦺꦴ – ꦪꦁ ꦱꦸꦠ꧀ꦠꦁ ꦤꦶꦢ꧀ꦢꦶꦱꦶꦱ꧀ꦱꦴꦩꦶ, ꦠꦁ ꦩꦪꦴ ꦌꦮꦁ ꦱꦸꦠꦤ꧀ꦠꦶ.

ꦠꦡꦴ ꦌꦮꦤ꧀ꦠꦶ ꦪꦱ꧀ꦱ ꦕꦶꦠ꧀ꦠꦱꦤ꧀ꦠꦴꦤꦱ꧀ꦱ ꦤꦴꦤꦴꦫꦩ꧀ꦩꦟꦥ꧀ꦥꦮꦠ꧀ꦠꦶꦪꦴ ꦤꦴꦤꦠ꧀ꦡꦧ꧀ꦪꦚ꧀ꦗꦤꦒ꧀ꦒꦲꦟꦁ ꦲꦺꦴꦠꦶ, ꦠꦱ꧀ꦱ ꦤꦴꦤꦴꦏꦴꦫꦤꦶꦢ꧀ꦢꦺꦱꦺꦴ ꦄꦴꦏꦴꦫꦠ꧀ꦡꦺꦴ ꦌꦮ ꦌꦮꦁꦱꦢ꧀ꦢꦺꦴꦠꦶ ꦏꦠ꧀ꦮꦴ. ꦌꦮꦤ꧀ꦠꦶ ꦲꦶ ꦄꦪꦩꦴꦏꦴꦫꦥꦚ꧀ꦚꦠ꧀ꦠꦶ ꦣꦩ꧀ꦩꦴꦤꦁ ꦠꦁ ꦠꦁ ꦥꦮꦠ꧀ꦠꦶꦄꦴꦏꦴꦫꦁ ꦈꦥꦴꦢꦴꦪ ꦥꦚ꧀ꦚꦥꦺꦠꦧ꧀ꦧꦱꦨꦴꦮꦠ꧀ꦠꦴ. ꦩꦺꦠꦶ ꦏꦠ꧀ꦠꦸꦤꦶꦢ꧀ꦢꦺꦱꦺꦴ. ꦱꦸꦠꦤ꧀ꦠꦶ ꦮꦶꦱꦪꦤꦶꦢ꧀ꦢꦺꦱꦺꦴ, ꦱꦺꦴꦠꦧ꧀ꦧꦺꦴ ꦲꦶ ꦣꦩ꧀ꦩꦺꦴ ꦱꦮꦤꦏꦶꦫꦶꦪꦴꦏꦠ꧀ꦠꦸꦥꦸꦒ꧀ꦒꦭꦱ꧀ꦱ ꦱꦮꦤꦏꦶꦫꦶꦪꦴꦮꦱꦺꦤ ꦥꦮꦠ꧀ꦠꦶꦛ꧀ꦜꦴꦤꦁ ꦲꦺꦴꦠꦶ. ꦌꦠ꧀ꦠꦴꦮꦠꦴ ꦤꦴꦤꦥ꧀ꦥꦏꦴꦫꦺꦤ ꦥꦮꦠ꧀ꦠꦺꦤ ꦕꦶꦠ꧀ꦠꦱꦤ꧀ꦠꦴꦤꦺꦤ ꦠꦁꦱꦩꦔ꧀ꦒꦶꦤꦺꦴ ꦏꦠ꧀ꦠꦸ ꦮꦶꦱꦪꦺ ꦒꦲꦟꦱꦤ꧀ꦤꦶꦛ꧀ꦜꦴꦤꦁ ꦢꦱ꧀ꦱꦶꦠꦁ ꦲꦺꦴꦠꦶ.

ꦄꦡ ꦮꦴ ꦌꦮꦤ꧀ꦠꦶ ꦥꦸꦒ꧀ꦒꦭꦏꦶꦕ꧀ꦕꦤꦶꦢ꧀ꦢꦺꦱꦺꦴ, ꦱꦸꦠꦴꦤꦚ꧀ꦲꦶ ꦣꦩ꧀ꦩꦴꦤꦁ ꦒꦲꦶꦠꦴꦏꦴꦫꦱ꧀ꦱ ꦤꦶꦢꦱ꧀ꦱꦤꦱ꧀ꦱ ꦄꦮꦣꦴꦫꦟꦱ꧀ꦱ ꦮꦴ ꦥꦏꦴꦱꦤꦱꦨꦴꦮꦺꦤ ꦌꦮꦁꦱꦢ꧀ꦢꦺꦤ ꦠꦢꦴꦏꦴꦫꦴꦢꦶꦣꦴꦫꦟꦱ꧀ꦱ ꦥꦸꦒ꧀ꦒꦭꦮꦺꦴꦲꦴꦫꦸꦥꦴꦢꦴꦤꦣꦩ꧀ꦩꦧ꧀ꦪꦴꦥꦴꦫꦨꦴꦮꦠꦺꦴ ꦥꦸꦒ꧀ꦒꦭꦏꦶꦕ꧀ꦕꦁꦤꦴꦩ ꦤꦶꦢ꧀ꦢꦶꦛ꧀ꦜꦁ ꦲꦺꦴꦠꦷꦠꦶ. ꦱꦸꦠꦤ꧀ꦠꦶ ꦮꦶꦚ꧀ꦚꦴꦟꦏꦶꦕ꧀ꦕꦤꦶꦢ꧀ꦢꦺꦱꦺꦴ, ꦥꦸꦒ꧀ꦒꦭꦮꦴꦢꦶꦤꦺꦴꦥꦶ ꦲꦶ ꦱꦮꦤꦏꦶꦫꦶꦪꦴ ꦮꦶꦚ꧀ꦚꦴꦟꦤꦶꦫꦥꦺꦏ꧀ꦑꦴ ꦤ ꦲꦺꦴꦠꦷꦠꦶ. ꦩꦺꦠꦶ ꦈꦨꦪꦏꦶꦕ꧀ꦕꦪꦸꦠ꧀ꦠꦥꦸꦒ꧀ꦒꦭꦤꦶꦢ꧀ꦢꦺꦱꦺꦴ. ꦩꦺꦠꦶ ꦲꦶ ꦱꦢ꧀ꦢꦥ꧀ꦥꦮꦠ꧀ꦠꦶ ꦌꦏꦤ꧀ꦠꦺꦤꦺꦮ ꦱꦠ꧀ꦠꦮꦶꦱꦺꦱꦮꦶꦱꦪꦴ ꦮꦶꦚ꧀ꦚꦴꦟꦏꦶꦕ꧀ꦕꦚ꧀ꦕ ꦠꦠ꧀ꦡꦺꦮ ꦱꦩꦺꦴꦢꦲꦶꦠꦧ꧀ꦧꦤ꧀ꦠꦶ. ꦄꦪꦁ ꦥꦤꦺꦠ꧀ꦡ ꦱꦔ꧀ꦑꦺꦥꦺꦴ – ꦩꦪꦴ ꦱꦮꦤꦏꦶꦕ꧀ꦕꦮꦶꦚ꧀ꦚꦴꦟꦱꦩꦔ꧀ꦒꦶꦤꦴ ꦥꦸꦒ꧀ꦒꦭꦺꦤ ꦮꦶꦚ꧀ꦚꦴꦟꦮꦱꦺꦤ ꦭꦢ꧀ꦣꦱꦮꦤꦏꦶꦕ꧀ꦕꦮꦺꦴꦲꦴꦫꦺꦤ ꦱꦸꦠꦤ꧀ꦠꦶ.

ꦠꦡꦴ ꦌꦮꦤ꧀ꦠꦶ ꦕ ꦩꦺꦠꦶ ꦕ ꦱꦕ꧀ꦕꦶꦏꦛ꧀ꦜꦥꦫꦩꦠ꧀ꦡꦮꦱꦺꦤ ꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ. ꦱꦧ꧀ꦧꦱ꧀ꦱ ꦲꦶ ꦱꦢ꧀ꦢꦴꦣꦶꦒꦩꦤꦷꦪꦱ꧀ꦱ ꦄꦠ꧀ꦡꦱ꧀ꦱ ꦥꦚ꧀ꦚꦠ꧀ꦠꦶꦩꦸꦑꦺꦤꦺꦮ ꦥꦛꦶꦥꦗ꧀ꦗꦶꦠꦧ꧀ꦧꦠ꧀ꦠꦴ ꦱꦧ꧀ꦧꦥꦚ꧀ꦚꦠ꧀ꦠꦷꦤꦚ꧀ꦕ ꦮꦶꦗ꧀ꦗꦩꦴꦤꦴꦢꦷꦱꦸ ꦖꦱꦸ ꦥꦚ꧀ꦚꦠ꧀ꦠꦷꦱꦸ ꦄꦮꦫꦺꦴꦣꦺꦴ, ꦠꦱ꧀ꦩꦴ ꦪꦺꦴ ꦩꦴꦪꦴꦩꦫꦷꦕꦶꦄꦴꦢꦪꦺꦴ ꦮꦶꦪ ꦄꦨꦹꦠꦠ꧀ꦡꦺꦴ ꦄꦤꦸꦱ꧀ꦱꦮꦴꦢꦷꦲꦶ ꦒꦲꦺꦠꦧ꧀ꦧꦺꦴ ꦮꦶꦪ ꦄꦤꦸꦠ꧀ꦠꦩꦠ꧀ꦡꦺꦴꦥꦶ ꦤ ꦲꦺꦴꦠꦶ. ꦱꦺꦴ ꦫꦹꦥꦱꦢ꧀ꦢꦴꦢꦶꦏꦺꦴ ꦫꦸꦥ꧀ꦥꦤꦴꦤꦸꦨꦮꦤꦴꦢꦶꦏꦺꦴ ꦕ ꦥꦫꦩꦠ꧀ꦡꦱꦨꦴꦮꦺꦴ ꦱꦕ꧀ꦕꦶꦏꦛ꧀ꦜꦥꦫꦩꦠ꧀ꦡꦮꦱꦺꦤ ꦮꦶꦗ꧀ꦗꦠꦶ. ꦪꦺꦴ ꦥꦤ ꦌꦮꦤ꧀ꦠꦶ ꦕ ꦩꦺꦠꦶ ꦕ ꦮꦸꦕ꧀ꦕꦩꦴꦤꦺꦴ ꦄꦴꦏꦴꦫꦠ꧀ꦡꦺꦴ, ꦱꦺꦴ ꦄꦥꦫꦩꦠ꧀ꦡꦱꦨꦴꦮꦺꦴ ꦱꦕ꧀ꦕꦶꦏꦛ꧀ꦜꦥꦫꦩꦠ꧀ꦡꦮꦱꦺꦤ ꦄꦤꦸꦥꦭꦧ꧀ꦨꦩꦴꦤꦺꦴ ꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦤꦴꦩ. ꦠꦱ꧀ꦩꦴ ꦏꦶꦚ꧀ꦲꦺꦠ꧀ꦡ ꦠꦁ ꦥꦫꦩꦠ꧀ꦡꦠꦺꦴ ꦄꦠ꧀ꦡꦶ, ꦪꦁ ꦌꦮꦤ꧀ꦠꦶ ꦮꦴ ꦩꦺꦠꦶ ꦮꦴ ꦤꦶꦢ꧀ꦢꦺꦱꦁ ꦭꦨꦺꦡ? ꦱꦸꦠꦤ꧀ꦠꦶ ꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ, ꦪꦚ꧀ꦲꦶ ꦠꦁ ꦌꦠ꧀ꦡ ꦱꦺꦴꦠꦺꦤ ꦈꦥꦭꦢ꧀ꦣꦁ, ꦠꦁ ꦥꦫꦩꦠ꧀ꦡꦠꦺꦴ ꦮꦶꦗ꧀ꦗꦩꦴꦤꦤ꧀ꦠꦶ.

ꦠꦡꦴ ꦌꦮꦤ꧀ꦠꦶ ꦱꦺꦴꦠꦥꦡꦩꦴꦒꦠꦺ ꦣꦩ꧀ꦩꦺ ꦈꦥꦴꦢꦴꦪ ꦠꦺꦱꦁ ꦈꦥꦣꦴꦫꦶꦠꦴꦏꦴꦫꦴꦢꦷꦤꦁ ꦥꦕ꧀ꦕꦴꦩꦱꦤꦮꦱꦺꦤ. ꦩꦺꦠꦶ ꦱꦱꦤ꧀ꦠꦠꦶꦥꦫꦶꦪꦴꦥꦤ꧀ꦤꦺ ꦑꦤ꧀ꦣꦺ ꦏꦫꦟꦴꦢꦶꦮꦶꦱꦺꦱꦮꦶꦱꦶꦛ꧀ꦜꦺ ꦈꦥꦴꦢꦴꦪ ꦮꦠ꧀ꦠꦧ꧀ꦧꦠꦺꦴ ꦈꦥꦴꦢꦴꦥꦚ꧀ꦚꦠ꧀ꦠꦶ. ꦱꦸꦠꦤ꧀ꦠꦶ ꦢꦶꦛ꧀ꦜꦴꦢꦷꦤꦶ ꦈꦥꦤꦶꦣꦴꦪ ꦮꦠ꧀ꦠꦧ꧀ꦧꦠꦺꦴ ꦈꦥꦤꦶꦣꦴꦥꦚ꧀ꦚꦠ꧀ꦠꦶ. ꦢꦶꦛ꧀ꦜꦴꦢꦶꦱꦨꦴꦮꦫꦲꦶꦠꦺ ꦱꦢ꧀ꦢꦴꦪꦠꦤꦺ ꦥꦮꦠ꧀ꦠꦩꦴꦤꦺꦴꦥꦶ ꦱꦸꦠꦮꦺꦴꦲꦴꦫꦺꦴ ꦢꦸꦠꦶꦪꦁ ꦠꦠꦶꦪꦤ꧀ꦠꦶꦄꦴꦢꦶꦏꦺꦴ ꦮꦶꦪ ꦥꦜꦩꦴꦢꦷꦤꦶ, ꦢꦶꦛ꧀ꦜꦩꦸꦠꦮꦶꦚ꧀ꦚꦴꦠꦺ ꦄꦥꦺꦏ꧀ꦑꦶꦠ꧀ꦮꦴ ꦱꦸꦠꦤ꧀ꦠꦶ ꦮꦶꦚ꧀ꦚꦺꦪ꧀ꦪꦠ꧀ꦠꦴ ꦢꦶꦛ꧀ꦜꦴꦢꦷꦤꦶ ꦈꦥꦤꦶꦣꦴꦪ ꦮꦠ꧀ꦠꦧ꧀ꦧꦺꦴ ꦲꦺꦴꦠꦶ. ꦄꦱꦸꦠꦁ ꦤ ꦲꦺꦴꦠꦷꦠꦶ ꦲꦶ ꦱꦸꦠꦤ꧀ꦠꦶ ꦥꦏꦴꦱꦶꦠꦺꦴꦪꦩꦠ꧀ꦡꦺꦴꦠꦶ.

ꦌꦠ꧀ꦡ ꦕ ꦌꦮꦤ꧀ꦠꦶꦮꦕꦤꦺꦤ ꦄꦱꦩ꧀ꦩꦺꦴꦲꦁ ꦢꦷꦥꦺꦠꦶ. ꦥꦛꦶꦮꦶꦢ꧀ꦣꦴ ꦲꦶ ꦄꦠ꧀ꦠꦤꦴ ꦱꦸꦠꦱ꧀ꦱ ꦥꦏꦴꦫꦮꦶꦱꦺꦱꦴ ꦌꦮꦤ꧀ꦠꦶ ꦆꦣ ꦄꦴꦪꦱ꧀ꦩꦠꦴ ꦄꦴꦤꦤ꧀ꦢꦺꦤ ꦥꦕ꧀ꦕꦴꦩꦛ꧀ꦜꦴ, ꦠꦺꦤꦱ꧀ꦱ ꦄꦱꦩ꧀ꦩꦺꦴꦲꦺꦴ ꦢꦷꦥꦶꦠꦺꦴ ꦲꦺꦴꦠꦶ. ꦤ ꦲꦶ ꦱꦩ꧀ꦩꦹꦭ꦳꧀ꦲꦺꦴ ꦤꦴꦤꦥ꧀ꦥꦏꦴꦫꦥꦛꦶꦮꦺꦣꦱꦩꦠ꧀ꦡꦺꦴ ꦲꦺꦴꦠꦶ, ꦥꦕ꧀ꦕꦪꦴꦏꦴꦫꦮꦱꦺꦤ ꦤꦴꦤꦥ꧀ꦥꦏꦴꦫꦴ ꦢꦸꦥ꧀ꦥꦛꦶꦮꦶꦢ꧀ꦣꦴ ꦕ ꦱꦸꦠ꧀ꦠꦤ꧀ꦠꦴꦠꦶ ꦢꦷꦥꦶꦠꦤ꧀ꦠꦶ. ꦱꦸꦠꦤ꧀ꦠꦶꦮꦕꦤꦺꦤ ꦱꦸꦠꦱ꧀ꦱ ꦄꦱꦩ꧀ꦩꦺꦴꦱꦁ ꦢꦷꦥꦺꦠꦶ, ꦱꦸꦠꦴꦏꦴꦫꦱ꧀ꦱ ꦪꦴꦡꦴꦮꦠꦺꦴ ꦢꦱ꧀ꦱꦶꦪꦩꦴꦤꦠ꧀ꦠꦴ. ꦪꦱ꧀ꦱ ꦲꦶ ꦱꦸꦠꦁ ꦱꦩ꧀ꦩꦸꦛ꧀ꦜꦁ ꦲꦺꦴꦠꦶ, ꦤ ꦱꦺꦴ ꦏꦴꦭꦤ꧀ꦠꦫꦺ ꦩꦪꦴ ꦱꦸꦠꦤ꧀ꦠꦶ ꦥꦛꦶꦗꦴꦤꦴꦠꦶ. ꦆꦕ꧀ꦕꦱ꧀ꦱ ꦄꦱꦩ꧀ꦩꦺꦴꦲꦺꦤ ꦥꦚ꧀ꦚꦴꦱꦶꦢ꧀ꦣꦶ, ꦱꦩ꧀ꦩꦺꦴꦲꦴꦨꦴꦮꦺꦤ ꦥꦚ꧀ꦚꦴꦪ ꦌꦮ ꦮꦴ ꦱꦮꦤꦏꦴꦭꦱꦩ꧀ꦨꦹꦠꦴꦪ ꦠꦢꦸꦠ꧀ꦠꦫꦶꦏꦴꦭꦥꦚ꧀ꦚꦴꦱꦶꦢ꧀ꦣꦶ, ꦠꦡꦴ ꦄꦱꦩ꧀ꦩꦺꦴꦱꦺꦤ ꦱꦠꦶꦱꦶꦢ꧀ꦣꦶ. ꦠꦠ꧀ꦡ ꦥꦚ꧀ꦚꦴꦥꦸꦧ꧀ꦧꦔ꧀ꦒꦩꦴꦪ ꦱꦠꦶꦪꦴ ꦧ꧀ꦪꦚ꧀ꦗꦤꦴꦮꦣꦴꦫꦟꦱꦩꦠ꧀ꦡꦠꦴ. ꦧ꧀ꦪꦚ꧀ꦗꦤꦴꦤꦚ꧀ꦲꦶ ꦥꦛꦶꦮꦶꦗ꧀ꦙꦶꦠꦧ꧀ꦧꦺꦴ ꦄꦴꦏꦴꦫꦺꦴ ꦤꦴꦠꦶꦒꦩ꧀ꦨꦷꦫꦺꦴ, ꦪꦡꦴꦱꦸꦠꦁ ꦣꦴꦫꦟꦩꦺꦮ ꦠꦠ꧀ꦡ ꦏꦫꦟꦷꦪꦤ꧀ꦠꦶ ꦱꦠꦶꦪꦴ ꦧ꧀ꦪꦴꦥꦴꦫꦺꦴ ꦄꦣꦶꦏꦺꦴ, ꦥꦚ꧀ꦚꦴ ꦠꦠ꧀ꦡ ꦒꦸꦟꦷꦨꦹꦠꦴ ꦲꦺꦴꦠꦶ ꦥꦚ꧀ꦚꦴꦪ ꦥꦸꦧ꧀ꦧꦔ꧀ꦒꦩꦴꦠꦶ ꦏꦠ꧀ꦮꦴ. ꦱꦠꦶꦥꦸꦧ꧀ꦧꦔ꧀ꦒꦩꦴꦪ ꦥꦚ꧀ꦚꦴꦪ ꦄꦠ꧀ꦡꦥ꧀ꦥꦛꦶꦮꦺꦣꦱꦩꦠ꧀ꦡꦠꦴ. ꦄꦠ꧀ꦡꦱ꧀ꦱ ꦲꦶ ꦥꦛꦶꦮꦶꦗ꧀ꦙꦶꦠꦧ꧀ꦧꦺꦴ ꦄꦴꦏꦴꦫꦺꦴ ꦒꦩ꧀ꦨꦷꦫꦺꦴꦠꦶ ꦥꦚ꧀ꦚꦴꦪ ꦧ꧀ꦪꦴꦥꦴꦫꦺꦴ ꦄꦣꦶꦏꦺꦴ, ꦱꦠꦶ ꦠꦠ꧀ꦡ ꦒꦸꦟꦷꦨꦹꦠꦴꦪꦺꦮꦴꦠꦶ ꦱꦠꦶꦪꦴ ꦥꦸꦧ꧀ꦧꦔ꧀ꦒꦩꦴꦪꦴꦠꦶ ꦏꦠ꧀ꦮꦴ. ꦠꦢꦸꦨꦪꦱꦩꦠ꧀ꦡꦠꦴꦪꦺꦴꦒꦺꦤ ꦄꦠ꧀ꦡꦧ꧀ꦪꦚ꧀ꦗꦤꦱꦩ꧀ꦥꦤ꧀ꦤꦱ꧀ꦱ ꦣꦩ꧀ꦩꦏꦺꦴꦱꦱ꧀ꦱ ꦄꦤꦸꦥꦴꦭꦤꦱꦩꦠ꧀ꦡꦠꦴꦪ ꦣꦩ꧀ꦩꦨꦟ꧀ꦝꦴꦒꦴꦫꦶꦏꦠ꧀ꦠꦱꦶꦢ꧀ꦣꦶ.

ꦄꦥꦫꦺꦴ ꦤꦪꦺꦴ – ꦌꦮꦤ꧀ꦠꦶꦮꦕꦤꦺꦤ ꦪꦺꦴꦤꦶꦱꦺꦴꦩꦤꦱꦶꦏꦴꦫꦁ ꦢꦷꦥꦺꦠꦶ, ꦠꦺꦤ ꦕ ꦮꦸꦕ꧀ꦕꦩꦴꦤꦴꦤꦁ ꦄꦴꦏꦴꦫꦤꦶꦢꦱ꧀ꦱꦤꦴꦮꦣꦴꦫꦟꦠ꧀ꦡꦴꦤꦁ ꦈꦥꦫꦶ ꦮꦏ꧀ꦑꦩꦴꦤꦴꦤꦁ ꦤꦴꦤꦥ꧀ꦥꦏꦴꦫꦥ꧀ꦥꦛꦶꦮꦺꦣꦗꦺꦴꦠꦏꦴꦤꦁ ꦄꦮꦶꦥꦫꦷꦠꦱꦶꦢ꧀ꦣꦶ ꦣꦩ꧀ꦩꦮꦶꦱꦪꦠ꧀ꦠꦴ. ꦤ ꦲꦶ ꦄꦪꦺꦴꦤꦶꦱꦺꦴ ꦩꦤꦱꦶꦏꦫꦺꦴꦠꦺꦴ ꦤꦴꦤꦥ꧀ꦥꦏꦴꦫꦥ꧀ꦥꦛꦶꦮꦺꦣꦺꦴ ꦱꦩ꧀ꦨꦮꦠꦶ. ꦱꦸꦠꦤ꧀ꦠꦶꦮꦕꦤꦺꦤ ꦄꦮꦶꦏ꧀ꦑꦺꦥꦁ ꦢꦷꦥꦺꦠꦶ, ‘‘ꦥꦜꦩꦧꦺꦴꦣꦶꦱꦸꦠ꧀ꦠꦁ ꦏꦠ꧀ꦡ ꦨꦴꦱꦶꦠ’’ꦤ꧀ꦠꦶꦄꦴꦢꦶꦥꦸꦕ꧀ꦖꦴꦮꦱꦺꦤ ꦥꦏꦫꦟꦥꦠ꧀ꦠꦱ꧀ꦱ ꦮꦏ꧀ꦑꦩꦴꦤꦱ꧀ꦱ ꦱꦸꦠ꧀ꦠꦱ꧀ꦱ ꦱꦮꦤꦁ ꦱꦩꦴꦣꦴꦤꦩꦤ꧀ꦠꦫꦺꦤ ꦤ ꦱꦩ꧀ꦨꦮꦠꦶ ꦮꦶꦏ꧀ꦑꦶꦠ꧀ꦠꦕꦶꦠ꧀ꦠꦱ꧀ꦱ ꦱꦮꦤꦴꦨꦴꦮꦠꦺꦴ. ꦠꦡꦴ ꦲꦶ ꦮꦶꦏ꧀ꦑꦶꦠ꧀ꦠꦕꦶꦠ꧀ꦠꦺꦴ ꦥꦸꦒ꧀ꦒꦭꦺꦴ ꦱꦧ꧀ꦧꦱꦩ꧀ꦥꦠ꧀ꦠꦶꦪꦴ ꦮꦸꦕ꧀ꦕꦩꦴꦤꦺꦴꦥꦶ ‘‘ꦤ ꦩꦪꦴ ꦱꦸꦠꦁ, ꦥꦸꦤ ꦨꦟꦡꦴ’’ꦠꦶ ꦨꦟꦠꦶ. ꦪꦺꦴꦤꦶꦱꦺꦴꦩꦤꦱꦶꦏꦴꦫꦺꦤ ꦕꦺꦠ꧀ꦡ ꦄꦠ꧀ꦠꦱꦩ꧀ꦩꦴꦥꦟꦶꦣꦶꦁ ꦥꦸꦧ꧀ꦧꦺ ꦕ ꦏꦠꦥꦸꦚ꧀ꦚꦠꦁ ꦱꦴꦣꦺꦠꦶ ꦱꦩ꧀ꦩꦴ ꦄꦥ꧀ꦥꦟꦶꦲꦶꦠꦠ꧀ꦠꦱ꧀ꦱ ꦥꦸꦧ꧀ꦧꦺ ꦄꦏꦠꦥꦸꦚ꧀ꦚꦱ꧀ꦱ ꦮꦴ ꦠꦢꦨꦴꦮꦠꦺꦴ. ꦄꦮꦶꦏ꧀ꦑꦺꦥꦺꦤ ꦱꦢ꧀ꦣꦩ꧀ꦩꦱ꧀ꦱꦮꦤꦁ ꦱꦥ꧀ꦥꦸꦫꦶꦱꦹꦥꦤꦶꦱ꧀ꦱꦪꦚ꧀ꦕ ꦱꦴꦣꦺꦠꦶ ꦄꦱ꧀ꦱꦸꦠꦮꦠꦺꦴ ꦱꦥ꧀ꦥꦸꦫꦶꦱꦹꦥꦤꦶꦱ꧀ꦱꦪꦮꦶꦫꦲꦶꦠꦱ꧀ꦱ ꦕ ꦠꦢꦨꦴꦮꦠꦺꦴ. ꦤ ꦲꦶ ꦮꦶꦏ꧀ꦑꦶꦠ꧀ꦠꦺꦴ ꦱꦺꦴꦠꦸꦁ ꦱꦏ꧀ꦏꦺꦴꦠꦶ, ꦤ ꦕ ꦱꦥ꧀ꦥꦸꦫꦶꦱꦺ ꦄꦤꦸꦥꦤꦶꦱ꧀ꦱꦪꦩꦴꦤꦱ꧀ꦱ ꦱꦮꦤꦁ ꦄꦠ꧀ꦡꦷꦠꦶ.

ꦄꦥꦫꦺꦴ ꦤꦪꦺꦴ – ‘‘ꦪꦱ꧀ꦱ ꦕꦶꦠ꧀ꦠꦱꦤ꧀ꦠꦴꦤꦱ꧀ꦱ ꦤꦴꦤꦥ꧀ꦥꦏꦴꦫꦥ꧀ꦥꦮꦠ꧀ꦠꦶꦪꦴ ꦤꦴꦤꦠ꧀ꦡꦧ꧀ꦪꦚ꧀ꦗꦤꦒ꧀ꦒꦲꦟꦁ ꦲꦺꦴꦠꦶ, ꦠꦱ꧀ꦱ ꦤꦴꦤꦴꦏꦴꦫꦤꦶꦢ꧀ꦢꦺꦱꦺꦴ’’ꦠꦶ ꦮꦸꦠ꧀ꦠꦁ. ꦪꦱ꧀ꦩꦴ ꦕ ꦱꦺꦴ ꦨꦒꦮꦠꦺꦴ ꦮꦕꦤꦱ꧀ꦱ ꦄꦠ꧀ꦡꦧ꧀ꦪꦚ꧀ꦗꦤꦥ꧀ꦥꦨꦺꦢꦥꦫꦶꦕ꧀ꦖꦺꦢꦮꦱꦺꦤ ꦱꦏꦭꦱꦴꦱꦤꦱꦩ꧀ꦥꦠ꧀ꦠꦶꦎꦒꦴꦲꦤꦺꦤ ꦤꦶꦫꦮꦱꦺꦱꦁ ꦥꦫꦲꦶꦠꦥꦴꦫꦶꦥꦹꦫꦷꦏꦫꦟꦨꦹꦠꦺꦴ ꦌꦮꦁ ꦨꦢ꧀ꦢꦏꦺꦴ ꦄꦴꦏꦴꦫꦺꦴ ꦤ ꦱꦩ꧀ꦩꦴ ꦄꦥ꧀ꦥꦟꦶꦲꦶꦠꦠ꧀ꦠꦱ꧀ꦱ ꦥꦸꦧ꧀ꦧꦺ ꦄꦏꦠꦥꦸꦚ꧀ꦚꦱ꧀ꦱ ꦮꦴ ꦲꦺꦴꦠꦶ. ꦠꦱ꧀ꦩꦴ ꦌꦮꦤ꧀ꦠꦶ ꦆꦩꦶꦤꦴ ꦨꦢ꧀ꦢꦏꦺꦤ ꦄꦴꦏꦴꦫꦺꦤ ꦥꦕ꧀ꦖꦶꦩꦕꦏ꧀ꦏꦢ꧀ꦮꦪꦱꦩ꧀ꦥꦠ꧀ꦠꦶꦩꦠ꧀ꦠꦤꦺꦴ ꦢꦷꦥꦺꦠꦶ, ꦱꦸꦠꦤ꧀ꦠꦶ ꦱꦮꦤꦪꦺꦴꦒꦺꦤ ꦥꦸꦫꦶꦩꦕꦏ꧀ꦏꦢ꧀ꦮꦪꦱꦩ꧀ꦥꦠ꧀ꦠꦶꦁ. ꦤ ꦲꦶ ꦄꦥ꧀ꦥꦠꦶꦫꦹꦥꦺ ꦢꦺꦱꦺ ꦮꦱꦠꦺꦴ ꦱꦥ꧀ꦥꦸꦫꦶꦱꦹꦥꦤꦶꦱ꧀ꦱꦪꦮꦶꦫꦲꦶꦠꦱ꧀ꦱ ꦕ ꦱꦮꦤꦁ ꦄꦠ꧀ꦡꦶ. ꦆꦕ꧀ꦕꦱ꧀ꦱ ꦥꦕ꧀ꦖꦶꦩꦕꦏ꧀ꦏꦢ꧀ꦮꦪꦱꦶꦢ꧀ꦣꦶꦪꦴ ꦄꦴꦱꦪꦱꦸꦢ꧀ꦣꦶ ꦱꦶꦢ꧀ꦣꦴ ꦲꦺꦴꦠꦶ. ꦱꦩ꧀ꦩꦴ ꦥꦟꦶꦲꦶꦠꦕꦶꦠ꧀ꦠꦺꦴ ꦥꦸꦧ꧀ꦧꦺ ꦕ ꦏꦠꦥꦸꦚ꧀ꦚꦺꦴ ꦮꦶꦱꦸꦢ꧀ꦣꦴꦱꦪꦺꦴ ꦲꦺꦴꦠꦶ ꦠꦢꦱꦸꦢ꧀ꦣꦶꦲꦺꦠꦹꦤꦁ ꦏꦶꦭꦺꦱꦴꦤꦁ ꦢꦹꦫꦷꦨꦴꦮꦠꦺꦴ. ꦠꦡꦴ ꦲꦶ ꦮꦸꦠ꧀ꦠꦁ ‘‘ꦱꦩ꧀ꦩꦴ ꦥꦟꦶꦲꦶꦠꦁ ꦕꦶꦠ꧀ꦠꦁ, ꦱꦺꦪ꧀ꦪꦱꦺꦴ ꦤꦁ ꦠꦠꦺꦴ ꦏꦫꦺ’’ꦠꦶ (ꦣ. ꦥ. ꧔꧓) ‘‘ꦏꦠꦥꦸꦚ꧀ꦚꦺꦴꦱꦶ ꦠ꧀ꦮꦁ, ꦄꦴꦤꦤ꧀ꦢ, ꦥꦣꦴꦤꦩꦤꦸꦪꦸꦚ꧀ꦗ, ꦑꦶꦥ꧀ꦥꦁ ꦲꦺꦴꦲꦶꦱꦶ ꦄꦤꦴꦱꦮꦺꦴ’’ꦠꦶ (ꦢꦷ. ꦤꦶ. ꧒.꧒꧐꧗) ꦕ. ꦥꦸꦫꦶꦩꦕꦏ꧀ꦏꦢ꧀ꦮꦪꦱꦶꦢ꧀ꦣꦶꦪꦴ ꦥꦪꦺꦴꦒꦱꦸꦢ꧀ꦣꦶ. ꦥꦠꦶꦫꦹꦥꦢꦺꦱꦮꦴꦱꦺꦤ ꦲꦶ ꦱꦥ꧀ꦥꦸꦫꦶꦱꦹꦥꦤꦶꦱ꧀ꦱꦪꦺꦤ ꦕ ꦱꦴꦣꦹꦤꦁ ꦢꦶꦛ꧀ꦜꦴꦤꦸꦒꦠꦶꦄꦴꦥꦗ꧀ꦗꦤꦺꦤ ꦥꦫꦶꦱꦸꦢ꧀ꦣꦥ꧀ꦥꦪꦺꦴꦒꦺꦴ ꦲꦺꦴꦠꦶ. ꦠꦴꦪ ꦕ ꦄꦴꦱꦪꦱꦸꦢ꧀ꦣꦶꦪꦴ ꦄꦣꦶꦒꦩꦧ꧀ꦪꦠ꧀ꦠꦶꦱꦶꦢ꧀ꦣꦶ, ꦥꦸꦧ꧀ꦧꦺꦪꦺꦮ ꦠꦟ꧀ꦲꦴꦢꦶꦛ꧀ꦜꦶꦱꦁꦏꦶꦭꦺꦱꦴꦤꦁ ꦮꦶꦱꦺꦴꦣꦶꦠꦠ꧀ꦠꦴ ꦥꦪꦺꦴꦒꦱꦸꦢ꧀ꦣꦶꦪꦴ ꦄꦴꦒꦩꦧ꧀ꦪꦠ꧀ꦠꦶꦱꦶꦢ꧀ꦣꦶ. ꦱꦸꦥꦫꦶꦱꦸꦢ꧀ꦣꦏꦴꦪꦮꦕꦷꦥꦪꦺꦴꦒꦺꦴ ꦲꦶ ꦮꦶꦥ꧀ꦥꦛꦶꦱꦴꦫꦴꦨꦴꦮꦠꦺꦴ ꦄꦮꦶꦏ꧀ꦑꦶꦠ꧀ꦠꦕꦶꦠ꧀ꦠꦺꦴ ꦥꦫꦶꦪꦠ꧀ꦠꦶꦪꦁ ꦮꦶꦱꦴꦫꦢꦺꦴ ꦲꦺꦴꦠꦶ. ꦆꦠꦶ ꦥꦪꦺꦴꦒꦴꦱꦪꦱꦸꦢ꧀ꦣꦱ꧀ꦱ ꦄꦴꦒꦩꦴꦣꦶꦒꦩꦱꦩ꧀ꦥꦤ꧀ꦤꦱ꧀ꦱ ꦮꦕꦤꦁ ꦄꦫꦸꦟꦸꦒ꧀ꦒꦩꦤꦁ ꦮꦶꦪ ꦱꦹꦫꦶꦪꦱ꧀ꦱ ꦈꦢꦪꦠꦺꦴ ꦪꦺꦴꦤꦶꦱꦺꦴꦩꦤꦱꦶꦏꦴꦫꦺꦴ ꦮꦶꦪ ꦕ ꦏꦸꦱꦭꦏꦩ꧀ꦩꦱ꧀ꦱ ꦄꦫꦲꦠꦶ ꦨꦒꦮꦠꦺꦴ ꦮꦕꦤꦱ꧀ꦱ ꦥꦸꦧ꧀ꦧꦔ꧀ꦒꦩꦁ ꦨꦮꦶꦠꦸꦤ꧀ꦠꦶ ꦜꦴꦤꦺ ꦤꦶꦢꦴꦤꦁ ꦜꦥꦺꦤ꧀ꦠꦺꦴ ꦌꦮꦁ ꦩꦺ ꦱꦸꦠꦤ꧀ꦠꦶꦄꦴꦢꦶꦩꦴꦲ.

ꦄꦥꦫꦺꦴ ꦤꦪꦺꦴ – ꦌꦮꦤ꧀ꦠꦶ ꦆꦩꦶꦤꦴ ꦥꦸꦧ꧀ꦧꦺ ꦮꦸꦠ꧀ꦠꦤꦪꦺꦤꦺꦮ ꦤꦴꦤꦥ꧀ꦥꦏꦴꦫꦥ꧀ꦥꦛꦶꦮꦺꦣꦢꦷꦥꦏꦺꦤ ꦮꦕꦤꦺꦤ ꦄꦠ꧀ꦠꦤꦺꦴ ꦄꦠ꧀ꦡꦥꦛꦶꦨꦴꦤꦥꦛꦶꦱꦩ꧀ꦨꦶꦢꦴꦱꦩ꧀ꦥꦠ꧀ꦠꦶꦱꦧ꧀ꦨꦴꦮꦁ ꦢꦷꦥꦺꦠꦶ. ꦱꦸꦠꦤ꧀ꦠꦶ ꦆꦩꦶꦤꦴ ꦌꦮꦁꦱꦢ꧀ꦢꦱꦤ꧀ꦤꦶꦣꦴꦤꦠꦺꦴ ꦮꦏ꧀ꦑꦩꦴꦤꦴꦥꦺꦏ꧀ꦑꦴꦪ ꦮꦴ ꦱꦺꦴꦠꦧ꧀ꦧꦨꦺꦢꦥ꧀ꦥꦛꦶꦮꦺꦣꦢꦷꦥꦏꦺꦤ ꦣꦩ꧀ꦩꦤꦶꦫꦸꦠ꧀ꦠꦶꦥꦛꦶꦱꦩ꧀ꦨꦶꦢꦴꦱꦩ꧀ꦥꦠ꧀ꦠꦶꦱꦧ꧀ꦨꦴꦮꦁ ꦢꦷꦥꦺꦠꦶ. ꦌꦮꦤ꧀ꦠꦶ ꦕ ꦆꦢꦁ ꦮꦸꦠ꧀ꦠꦤꦪꦺꦤꦺꦮ ꦪꦺꦴꦤꦶꦱꦺꦴꦩꦤꦱꦶꦏꦴꦫꦢꦷꦥꦏꦮꦕꦤꦁ ꦨꦴꦱꦩꦴꦤꦺꦴ ‘‘ꦌꦠꦺ ꦣꦩ꧀ꦩꦴ ꦩꦪꦴ ꦩꦤꦱꦴꦤꦸꦥꦺꦏ꧀ꦑꦶꦠꦴ ꦢꦶꦛ꧀ꦜꦶꦪꦴ ꦱꦸꦥ꧀ꦥꦛꦶꦮꦶꦢ꧀ꦣꦴ’’ꦠꦶ ꦢꦷꦥꦺꦠꦶ. ꦥꦫꦶꦪꦠ꧀ꦠꦶꦣꦩ꧀ꦩꦺꦴ ꦲꦶ ‘‘ꦆꦣ ꦱꦷꦭꦁ ꦏꦡꦶꦠꦁ, ꦆꦣ ꦱꦩꦴꦣꦶ, ꦆꦣ ꦥꦚ꧀ꦚꦴ, ꦌꦠ꧀ꦠꦏꦴ ꦌꦠ꧀ꦡ ꦄꦤꦸꦱꦤ꧀ꦣꦶꦪꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦩꦤꦱꦴ ꦄꦤꦸꦥꦺꦏ꧀ꦑꦶꦠꦺꦴ ꦄꦤꦸꦱ꧀ꦱꦮꦴꦏꦴꦫꦥꦫꦶꦮꦶꦠꦏ꧀ꦏꦱꦲꦶꦠꦴꦪ ꦣꦩ꧀ꦩꦤꦶꦗ꧀ꦙꦴꦤꦏ꧀ꦑꦤ꧀ꦠꦶꦨꦹꦠꦴꦪ ꦚꦴꦠꦥꦫꦶꦚ꧀ꦚꦴꦱꦔ꧀ꦑꦴꦠꦴꦪ ꦮꦴ ꦢꦶꦛ꧀ꦜꦶꦪꦴ ꦠꦠ꧀ꦡ ꦠꦠ꧀ꦡ ꦮꦸꦠ꧀ꦠꦫꦹꦥꦴꦫꦹꦥꦣꦩ꧀ꦩꦺ ‘‘ꦆꦠꦶ ꦫꦹꦥꦁ, ꦌꦠ꧀ꦠꦏꦁ ꦫꦹꦥ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦱꦸꦛ꧀ꦜꦸ ꦮꦮꦠ꧀ꦡꦥꦺꦠ꧀ꦮꦴ ꦥꦛꦶꦮꦶꦢ꧀ꦣꦺꦴ ꦄꦠ꧀ꦠꦤꦺꦴ ꦕ ꦥꦫꦺꦱꦚ꧀ꦕ ꦲꦶꦠꦱꦸꦑꦴꦮꦲꦺꦴ ꦲꦺꦴꦠꦷꦠꦶ. ꦱꦸꦠꦤ꧀ꦠꦶ ꦆꦢꦁ ꦱꦮꦤꦪꦺꦴꦒꦢꦷꦥꦏꦮꦕꦤꦁ ꦨꦴꦱꦩꦴꦤꦺꦴ ‘‘ꦧꦲꦹ ꦩꦪꦴ ꦣꦩ꧀ꦩꦴ ꦱꦸꦠꦴ ꦣꦴꦠꦴ ꦮꦕꦱꦴ ꦥꦫꦶꦕꦶꦠꦴ’’ꦠꦶ ꦢꦷꦥꦺꦠꦶ. ꦱꦺꦴꦠꦴꦮꦣꦴꦤꦥ꧀ꦥꦛꦶꦧꦢ꧀ꦣꦴ ꦲꦶ ꦥꦫꦶꦪꦠ꧀ꦠꦶꦣꦩ꧀ꦩꦱ꧀ꦱ ꦱꦮꦤꦣꦴꦫꦟꦥꦫꦶꦕꦪꦴ. ꦠꦢꦸꦨꦪꦺꦤꦥꦶ ꦣꦩ꧀ꦩꦱ꧀ꦱ ꦱ꧀ꦮꦴꦏ꧀ꦑꦴꦠꦨꦴꦮꦺꦤ, ꦄꦠ꧀ꦡꦧ꧀ꦪꦚ꧀ꦗꦤꦥꦴꦫꦶꦥꦹꦫꦶꦁ ꦢꦷꦥꦺꦤ꧀ꦠꦺꦴ ꦱꦮꦤꦺ ꦄꦴꦢꦫꦁ ꦗꦤꦺꦠꦶ. ꦄꦠ꧀ꦡꦧ꧀ꦪꦚ꧀ꦗꦤꦥꦫꦶꦥꦸꦟ꧀ꦟꦚ꧀ꦲꦶ ꦣꦩ꧀ꦩꦁ ꦄꦴꦢꦫꦺꦤ ꦄꦱ꧀ꦱꦸꦟꦤ꧀ꦠꦺꦴ ꦩꦲꦠꦴ ꦲꦶꦠꦴ ꦥꦫꦶꦧꦴꦲꦶꦫꦺꦴ ꦲꦺꦴꦠꦷꦠꦶ ꦄꦴꦢꦫꦁ ꦗꦤꦺꦠ꧀ꦮꦴ ꦱꦏ꧀ꦏꦕ꧀ꦕꦁ ꦣꦩ꧀ꦩꦺꦴ ꦱꦺꦴꦠꦧ꧀ꦧꦺꦴ.

‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶ ꦆꦩꦶꦤꦴ ꦥꦤ ꦱꦏꦭꦺꦤ ꦮꦕꦤꦺꦤ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦡꦴꦒꦠꦥ꧀ꦥꦮꦺꦢꦶꦠꦁ ꦣꦩ꧀ꦩꦁ ꦄꦠ꧀ꦠꦤꦺꦴ ꦄꦢꦲꦤ꧀ꦠꦺꦴ ꦄꦱꦥ꧀ꦥꦸꦫꦶꦱꦨꦹꦩꦶꦁ ꦄꦠꦶꦏ꧀ꦏꦩꦠꦶ, ꦱꦴꦮꦏꦠ꧀ꦠꦁ ꦥꦛꦶꦗꦴꦤꦤ꧀ꦠꦺꦴ ꦱꦥ꧀ꦥꦸꦫꦶꦱꦨꦹꦩꦶꦁ ꦎꦏ꧀ꦏꦩꦠꦶ. ꦠꦡꦴ ꦄꦱꦢ꧀ꦣꦩ꧀ꦩꦴ ꦕꦶꦠ꧀ꦠꦁ ꦮꦸꦛ꧀ꦜꦴꦥꦺꦠꦶ, ꦱꦢ꧀ꦣꦩ꧀ꦩꦺ ꦕꦶꦠ꧀ꦠꦁ ꦥꦠꦶꦛ꧀ꦜꦴꦥꦺꦠꦶ. ‘‘ꦏꦺꦮꦭꦁ ꦱꦸꦠꦩꦺꦮꦺꦠꦁ ꦩꦪꦴ, ꦠꦱ꧀ꦱꦺꦮ ꦥꦤ ꦨꦒꦮꦠꦺꦴ ꦮꦕꦤ’’ꦤ꧀ꦠꦶ ꦢꦷꦥꦺꦤ꧀ꦠꦺꦴ ꦄꦠ꧀ꦠꦴꦤꦁ ꦥꦫꦶꦩꦺꦴꦕꦺꦠꦶ, ꦱꦠ꧀ꦡꦴꦫꦁ ꦄꦥꦢꦶꦱꦠꦶ, ꦗꦶꦤꦮꦕꦤꦁ ꦄꦥ꧀ꦥꦺꦠꦶ, ꦣꦩ꧀ꦩꦤꦺꦠ꧀ꦠꦶꦁ ꦥꦠꦶꦛ꧀ꦜꦴꦥꦺꦠꦶ.

ꦄꦥꦶꦕ ‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶ ꦄꦠ꧀ꦠꦤꦴ ꦈꦥ꧀ꦥꦴꦢꦶꦠꦨꦴꦮꦁ ꦄꦥ꧀ꦥꦛꦶꦗꦴꦤꦤ꧀ꦠꦺꦴ ꦥꦸꦫꦶꦩꦱ꧀ꦱꦮꦤꦁ ꦮꦶꦮꦫꦤ꧀ꦠꦺꦴ ‘‘ꦱꦩ꧀ꦩꦸꦑꦴ ꦥꦛꦶꦒ꧀ꦒꦲꦶꦠꦩꦶꦢꦁ ꦩꦪꦴ ꦠꦱ꧀ꦱ ꦨꦒꦮꦠꦺꦴ ꦕꦠꦸꦮꦺꦱꦴꦫꦗ꧀ꦗꦮꦶꦱꦴꦫꦢꦱ꧀ꦱ ꦢꦱꦧꦭꦣꦫꦱ꧀ꦱ ꦄꦴꦱꦨꦛ꧀ꦜꦴꦤꦛ꧀ꦜꦴꦪꦶꦤꦺꦴ ꦱꦷꦲꦤꦴꦢꦤꦴꦢꦶꦤꦺꦴ ꦱꦧ꧀ꦧꦱꦠ꧀ꦠꦸꦠ꧀ꦠꦩꦱ꧀ꦱ ꦣꦩ꧀ꦩꦶꦱ꧀ꦱꦫꦱ꧀ꦱ ꦣꦩ꧀ꦩꦫꦴꦗꦱ꧀ꦱ ꦣꦩ꧀ꦩꦴꦣꦶꦥꦠꦶꦤꦺꦴ ꦣꦩ꧀ꦩꦢꦷꦥꦱ꧀ꦱ ꦣꦩ꧀ꦩꦱꦫꦟꦱ꧀ꦱ ꦱꦢ꧀ꦣꦩ꧀ꦩꦮꦫꦕꦏ꧀ꦏꦮꦠ꧀ꦠꦶꦤꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ, ꦤ ꦌꦠ꧀ꦡ ꦄꦠ꧀ꦡꦺ ꦮꦴ ꦣꦩ꧀ꦩꦺ ꦮꦴ ꦥꦢꦺ ꦮꦴ ꦧ꧀ꦪꦚ꧀ꦗꦤꦺ ꦮꦴ ꦏꦔ꧀ꦑꦴ ꦮꦴ ꦮꦶꦩꦠꦶ ꦮꦴ ꦏꦠ꧀ꦠꦧ꧀ꦧꦴ’’ꦠꦶ ꦱꦧ꧀ꦧꦢꦺꦮꦩꦤꦸꦱ꧀ꦱꦴꦤꦁ ꦆꦩꦱ꧀ꦩꦶꦁ ꦣꦩ꧀ꦩꦺ ꦄꦱ꧀ꦱꦢ꧀ꦣꦶꦪꦁ ꦮꦶꦤꦴꦱꦺꦠꦶ, ꦱꦢ꧀ꦣꦴꦱꦩ꧀ꦥꦢꦁ ꦈꦥ꧀ꦥꦴꦢꦺꦠꦶ. ꦠꦺꦤꦺꦠꦁ ꦮꦸꦕ꧀ꦕꦠꦶ –

‘‘ꦮꦶꦤꦴꦱꦪꦠꦶ ꦄꦱ꧀ꦱꦢ꧀ꦣꦁ, ꦱꦢ꧀ꦣꦁ ꦮꦝ꧀ꦞꦺꦠꦶ ꦱꦴꦱꦤꦺ;

ꦌꦮꦁ ꦩꦺ ꦱꦸꦠꦩꦶꦕ꧀ꦕꦺꦮꦁ, ꦮꦢꦁ ꦒꦺꦴꦠꦩꦱꦴꦮꦏꦺꦴ’’ꦠꦶ.

ꦌꦏꦤ꧀ꦠꦶ ꦒꦟꦤꦥꦫꦶꦕ꧀ꦖꦺꦢꦤꦶꦢ꧀ꦢꦺꦱꦺꦴ. ꦄꦪꦚ꧀ꦲꦶ ꦌꦏꦱꦢ꧀ꦢꦺꦴ ꦄꦚ꧀ꦚꦱꦺꦛ꧀ꦜꦴꦱꦲꦴꦪꦱꦔ꧀ꦑ꧀ꦪꦴꦢꦷꦱꦸ ꦢꦶꦱ꧀ꦱꦠꦶ. ꦠꦡꦴ ꦲꦶ ꦄꦪꦁ ‘‘ꦱꦱ꧀ꦱꦠꦺꦴ ꦄꦠ꧀ꦠꦴ ꦕ ꦭꦺꦴꦏꦺꦴ ꦕ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ ꦆꦠ꧀ꦡꦺꦏꦺ ꦄꦨꦶꦮꦢꦤ꧀ꦠꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧓.꧒꧗; ꦈꦢꦴ. ꧕꧕) ꦄꦚ꧀ꦚꦺ ꦢꦶꦱ꧀ꦱꦠꦶ. ‘‘ꦕꦺꦠꦱꦺꦴ ꦌꦏꦺꦴꦢꦶꦨꦴꦮ’’ꦤ꧀ꦠꦶꦄꦴꦢꦷꦱꦸ (ꦥꦴꦫꦴ. ꧑꧑; ꦢꦷ. ꦤꦶ. ꧑.꧒꧒꧘) ꦱꦺꦛ꧀ꦜꦺ. ‘‘ꦌꦏꦺꦴ ꦮꦹꦥꦏꦛ꧀ꦜꦺꦴ’’ꦠꦶꦄꦴꦢꦷꦱꦸ (ꦕꦹꦭ꦳ꦮ. ꧔꧔꧕; ꦢꦷ. ꦤꦶ. ꧑.꧔꧐꧕) ꦄꦱꦲꦴꦪꦺ. ‘‘ꦌꦏꦺꦴꦮ ꦑꦺꦴ, ꦨꦶꦏ꧀ꦑꦮꦺ, ꦑꦟꦺꦴ ꦕ ꦱꦩꦪꦺꦴ ꦕ ꦧ꧀ꦫꦲ꧀ꦩꦕꦫꦶꦪꦮꦴꦱꦴꦪꦴ’’ꦠꦶꦄꦴꦢꦷꦱꦸ (ꦄ. ꦤꦶ. ꧘.꧒꧙) ꦱꦔ꧀ꦑ꧀ꦪꦴꦪꦁ, ꦆꦣꦴꦥꦶ ꦱꦔ꧀ꦑ꧀ꦪꦴꦪꦩꦺꦮ ꦢꦛ꧀ꦜꦧ꧀ꦧꦺꦴ. ꦠꦺꦤ ꦮꦸꦠ꧀ꦠꦁ – ‘‘ꦌꦏꦤ꧀ꦠꦶ ꦒꦟꦤꦥꦫꦶꦕ꧀ꦖꦺꦢꦤꦶꦢ꧀ꦢꦺꦱꦺꦴ’’ꦠꦶ.

ꦱꦩꦪꦤ꧀ꦠꦶ ꦥꦫꦶꦕ꧀ꦖꦶꦤ꧀ꦤꦤꦶꦢ꧀ꦢꦺꦱꦺꦴ. ꦌꦏꦁ ꦱꦩꦪꦤ꧀ꦠꦶ ꦄꦤꦶꦪꦩꦶꦠꦥꦫꦶꦢꦷꦥꦤꦁ. ꦠꦠ꧀ꦡ ꦱꦩꦪꦱꦢ꧀ꦢꦺꦴ –

‘‘ꦱꦩꦮꦴꦪꦺ ꦑꦟꦺ ꦏꦴꦭꦺ, ꦱꦩꦹꦲꦺ ꦲꦺꦠꦸꦢꦶꦛ꧀ꦜꦶꦱꦸ;

ꦥꦛꦶꦭꦴꦨꦺ ꦥꦲꦴꦤꦺ ꦕ, ꦥꦛꦶꦮꦺꦣꦺ ꦕ ꦢꦶꦱ꧀ꦱꦠꦶ’’.

ꦠꦡꦴ ꦲꦶꦱ꧀ꦱ ‘‘ꦄꦥ꧀ꦥꦺꦮ ꦤꦴꦩ ꦱ꧀ꦮꦺꦥꦶ ꦈꦥꦱꦔ꧀ꦏꦩꦺꦪ꧀ꦪꦴꦩ ꦏꦴꦭꦚ꧀ꦕ ꦱꦩꦪꦚ꧀ꦕ ꦈꦥꦴꦢꦴꦪꦴ’’ꦠꦶ ꦌꦮꦩꦴꦢꦷꦱꦸ (ꦢꦷ. ꦤꦶ. ꧑.꧔꧔꧗) ꦱꦩꦮꦴꦪꦺꦴ ꦄꦠ꧀ꦡꦺꦴ, ꦪꦸꦠ꧀ꦠꦏꦴꦭꦚ꧀ꦕ ꦥꦕ꧀ꦕꦪꦱꦴꦩꦒ꧀ꦒꦶꦚ꧀ꦕ ꦭꦨꦶꦠ꧀ꦮꦴꦠꦶ ꦲꦶ ꦄꦣꦶꦥ꧀ꦥꦴꦪꦺꦴ, ꦠꦱ꧀ꦩꦴ ꦥꦕ꧀ꦕꦪꦱꦩꦮꦴꦪꦺꦴꦠꦶ ꦮꦺꦢꦶꦠꦧ꧀ꦧꦺꦴ. ‘‘ꦌꦏꦺꦴꦮ ꦑꦺꦴ, ꦨꦶꦏ꧀ꦑꦮꦺ, ꦑꦟꦺꦴ ꦕ ꦱꦩꦪꦺꦴ ꦕ ꦧ꧀ꦫꦲ꧀ꦩꦕꦫꦶꦪꦮꦴꦱꦴꦪꦴ’’ꦠꦶꦄꦴꦢꦷꦱꦸ (ꦄ. ꦤꦶ. ꧘.꧒꧙) ꦑꦟꦺꦴ, ꦎꦏꦴꦱꦺꦴꦠꦶ ꦄꦠ꧀ꦡꦺꦴ. ꦠꦡꦴꦒꦠꦸꦥ꧀ꦥꦴꦢꦴꦢꦶꦏꦺꦴ ꦲꦶ ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦱ꧀ꦱ ꦎꦏꦴꦱꦺꦴ ꦠꦥ꧀ꦥꦕ꧀ꦕꦪꦥ꧀ꦥꦛꦶꦭꦴꦨꦲꦺꦠꦸꦠ꧀ꦠꦴ, ꦑꦟꦺꦴ ꦌꦮ ꦕ ꦱꦩꦪꦺꦴ, ꦪꦺꦴ ꦑꦟꦺꦴꦠꦶ ꦕ ꦱꦩꦪꦺꦴꦠꦶ ꦕ ꦮꦸꦕ꧀ꦕꦠꦶ, ꦱꦺꦴ ꦌꦏꦺꦴ ꦪꦺꦮꦴꦠꦶ ꦲꦶ ꦄꦠ꧀ꦡꦺꦴ. ‘‘ꦈꦟ꧀ꦲꦱꦩꦪꦺꦴ ꦥꦫꦶꦭ꦳ꦴꦲꦱꦩꦪꦺꦴ’’ꦠꦶꦄꦴꦢꦷꦱꦸ (ꦥꦴꦕꦶ. ꧓꧕꧘) ꦏꦴꦭꦺꦴ. ‘‘ꦩꦲꦴꦱꦩꦪꦺꦴ ꦥꦮꦤꦱ꧀ꦩꦶ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧓꧓꧒) ꦱꦩꦹꦲꦺꦴ. ꦩꦲꦴꦱꦩꦪꦺꦴꦠꦶ ꦲꦶ ꦨꦶꦏ꧀ꦑꦹꦤꦁ ꦢꦺꦮꦠꦴꦤꦚ꧀ꦕ ꦩꦲꦴꦱꦤ꧀ꦤꦶꦥꦴꦠꦺꦴꦠꦶ ꦄꦠ꧀ꦡꦺꦴ. ‘‘ꦱꦩꦪꦺꦴꦥꦶ ꦑꦺꦴ ꦠꦺ, ꦨꦢ꧀ꦢꦴꦭꦶ, ꦄꦥ꧀ꦥꦛꦶꦮꦶꦢ꧀ꦣꦺꦴ ꦄꦲꦺꦴꦱꦶ, ꦨꦒꦮꦴ ꦑꦺꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ, ꦨꦒꦮꦴꦥꦶ ꦩꦁ ꦗꦴꦤꦶꦱ꧀ꦱꦠꦶ ‘ꦨꦢ꧀ꦢꦴꦭꦶ ꦤꦴꦩ ꦨꦶꦏ꧀ꦑꦸ ꦱꦠ꧀ꦡꦸꦱꦴꦱꦤꦺ ꦱꦶꦏ꧀ꦑꦴꦪ ꦤ ꦥꦫꦶꦥꦹꦫꦏꦴꦫꦷ’ꦠꦶ, ꦄꦪꦩ꧀ꦥꦶ ꦑꦺꦴ ꦠꦺ, ꦨꦢ꧀ꦢꦴꦭꦶ, ꦱꦩꦪꦺꦴ ꦄꦥ꧀ꦥꦛꦶꦮꦶꦢ꧀ꦣꦺꦴ ꦄꦲꦺꦴꦱꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧑꧓꧕) ꦲꦺꦠꦸ. ꦱꦶꦏ꧀ꦑꦴꦥꦢꦱ꧀ꦱ ꦏꦴꦫꦟꦚ꧀ꦲꦶ ꦆꦣ ꦱꦩꦪꦺꦴꦠꦶ ꦄꦣꦶꦥ꧀ꦥꦺꦠꦁ. ‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦈꦒ꧀ꦒꦴꦲꦩꦴꦤꦺꦴ ꦥꦫꦶꦧ꧀ꦧꦴꦗꦏꦺꦴ ꦱꦩꦟꦩꦸꦟ꧀ꦝꦶꦏꦴꦥꦸꦠ꧀ꦠꦺꦴ ꦱꦩꦪꦥ꧀ꦥꦮꦴꦢꦏꦺ ꦠꦶꦤ꧀ꦢꦸꦏꦴꦕꦷꦫꦺ ꦌꦏꦱꦴꦭꦏꦺ ꦩꦭ꧀ꦭꦶꦏꦴꦪ ꦄꦴꦫꦴꦩꦺ ꦥꦛꦶꦮꦱꦠꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧒꧖꧐) ꦢꦶꦛ꧀ꦜꦶ. ꦠꦠ꧀ꦡ ꦲꦶ ꦤꦶꦱꦶꦤ꧀ꦤꦴ ꦠꦶꦠ꧀ꦡꦶꦪꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦢꦶꦛ꧀ꦜꦶꦱꦔ꧀ꦑꦴꦠꦁ ꦱꦩꦪꦁ ꦥꦮꦢꦤ꧀ꦠꦷꦠꦶ ꦱꦺꦴ ꦥꦫꦶꦧ꧀ꦧꦴꦗꦏꦴꦫꦴꦩꦺꦴ ‘‘ꦱꦩꦪꦥ꧀ꦥꦮꦴꦢꦏꦺꦴ’’ꦠꦶ ꦮꦸꦕ꧀ꦕꦠꦶ.

‘‘ꦢꦶꦛ꧀ꦜꦺ ꦣꦩ꧀ꦩꦺ ꦕ ꦪꦺꦴ ꦄꦠ꧀ꦡꦺꦴ, ꦪꦺꦴ ꦕꦠ꧀ꦡꦺꦴ ꦱꦩ꧀ꦥꦫꦴꦪꦶꦏꦺꦴ;

ꦄꦠ꧀ꦡꦴꦨꦶꦱꦩꦪꦴ ꦣꦷꦫꦺꦴ, ꦥꦟ꧀ꦝꦶꦠꦺꦴꦠꦶ ꦥꦮꦸꦕ꧀ꦕꦠꦷ’’ꦠꦶ. (ꦱꦁ. ꦤꦶ. ꧑.꧑꧒꧙) –

ꦄꦴꦢꦷꦱꦸ ꦥꦛꦶꦭꦴꦨꦺꦴ. ꦄꦠ꧀ꦡꦴꦨꦶꦱꦩꦪꦴꦠꦶ ꦲꦶ ꦄꦠ꧀ꦡꦱ꧀ꦱ ꦄꦣꦶꦒꦩꦴꦠꦶ ꦄꦠ꧀ꦡꦺꦴ. ‘‘ꦱꦩ꧀ꦩꦴ ꦩꦴꦤꦴꦨꦶꦱꦩꦪꦴ ꦄꦤ꧀ꦠꦩꦏꦴꦱꦶ ꦢꦸꦏ꧀ꦑꦱ꧀ꦱꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧒꧘) ꦥꦲꦴꦤꦁ. ꦄꦣꦶꦏꦫꦟꦁ ꦱꦩꦪꦁ ꦮꦹꦥꦱꦩꦤꦁ ꦄꦥꦒꦩꦺꦴꦠꦶ ꦄꦨꦶꦱꦩꦪꦺꦴ ꦥꦲꦴꦤꦁ. ‘‘ꦢꦸꦏ꧀ꦑꦱ꧀ꦱ ꦥꦷꦭ꦳ꦤꦛ꧀ꦜꦺꦴ ꦱꦔ꧀ꦑꦠꦛ꧀ꦜꦺꦴ ꦱꦤ꧀ꦠꦴꦥꦛ꧀ꦜꦺꦴ ꦮꦶꦥꦫꦶꦟꦴꦩꦛ꧀ꦜꦺꦴ ꦄꦨꦶꦱꦩꦪꦛ꧀ꦜꦺꦴ’’ꦠꦶꦄꦴꦢꦷꦱꦸ (ꦥꦛꦶ. ꦩ. ꧒.꧘) ꦥꦛꦶꦮꦺꦣꦺꦴ. ꦥꦛꦶꦮꦺꦣꦺꦴꦠꦶ ꦲꦶ ꦄꦨꦶꦱꦩꦺꦠꦧ꧀ꦧꦠꦺꦴ ꦄꦨꦶꦱꦩꦪꦺꦴ, ꦄꦨꦶꦱꦩꦪꦺꦴꦮ ꦄꦠ꧀ꦡꦺꦴ ꦄꦨꦶꦱꦩꦪꦛ꧀ꦜꦺꦴꦠꦶ ꦥꦷꦭ꦳ꦤꦴꦢꦷꦤꦶ ꦄꦨꦶꦱꦩꦺꦠꦧ꧀ꦧꦨꦴꦮꦺꦤ ꦌꦏꦷꦨꦴꦮꦁ ꦈꦥꦤꦺꦠ꧀ꦮꦴ ꦮꦸꦠ꧀ꦠꦴꦤꦶ, ꦄꦨꦶꦱꦩꦪꦱ꧀ꦱ ꦮꦴ ꦥꦛꦶꦮꦺꦣꦱ꧀ꦱ ꦮꦶꦱꦪꦨꦹꦠꦺꦴ ꦄꦠ꧀ꦡꦺꦴ ꦄꦨꦶꦱꦩꦪꦛ꧀ꦜꦺꦴꦠꦶ ꦠꦴꦤꦺꦮ ꦠꦡꦴ ꦌꦏꦤ꧀ꦠꦺꦤ ꦮꦸꦠ꧀ꦠꦴꦤꦶ. ꦠꦠ꧀ꦡ ꦥꦷꦭ꦳ꦤꦁ ꦢꦸꦏ꧀ꦑꦱꦕ꧀ꦕꦱ꧀ꦱ ꦠꦁꦱꦩꦔ꧀ꦒꦶꦤꦺꦴ ꦲꦶꦁꦱꦤꦁ ꦄꦮꦶꦥ꧀ꦦꦴꦫꦶꦏꦠꦴꦏꦫꦟꦁ. ꦱꦤ꧀ꦠꦴꦥꦺꦴ ꦢꦸꦏ꧀ꦑꦢꦸꦏ꧀ꦑꦠꦴꦢꦶꦮꦱꦺꦤ ꦱꦤ꧀ꦠꦥ꧀ꦥꦤꦁ ꦥꦫꦶꦢꦲꦤꦁ.

ꦌꦠ꧀ꦡ ꦕ ꦱꦲꦏꦴꦫꦷꦏꦴꦫꦟꦱꦤ꧀ꦤꦶꦗ꧀ꦙꦁ ꦱꦩꦺꦠꦶ ꦱꦩꦮꦺꦠꦷꦠꦶ ꦱꦩꦮꦴꦪꦺꦴ ꦱꦩꦪꦺꦴ. ꦱꦩꦺꦠꦶ ꦱꦩꦴꦒꦕ꧀ꦖꦠꦶ ꦌꦠ꧀ꦡ ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦁ ꦠꦢꦴꦣꦴꦫꦥꦸꦒ꧀ꦒꦭꦺꦲꦷꦠꦶ ꦑꦟꦺꦴ ꦱꦩꦪꦺꦴ. ꦱꦩꦺꦠꦶ ꦌꦠ꧀ꦡ ꦌꦠꦺꦤ ꦮꦴ ꦱꦁꦒꦕ꧀ꦖꦠꦶ ꦱꦠ꧀ꦠꦺꦴ ꦱꦨꦴꦮꦣꦩ꧀ꦩꦺꦴ ꦮꦴ ꦈꦥ꧀ꦥꦴꦢꦴꦢꦷꦲꦶ ꦱꦲꦗꦴꦠꦴꦢꦷꦲꦶ ꦮꦴꦠꦶ ꦏꦴꦭꦺꦴ ꦱꦩꦪꦺꦴ. ꦣꦩ꧀ꦩꦥ꧀ꦥꦮꦠ꧀ꦠꦶꦩꦠ꧀ꦠꦠꦴꦪ ꦄꦠ꧀ꦡꦠꦺꦴ ꦄꦨꦹꦠꦺꦴꦥꦶ ꦲꦶ ꦏꦴꦭꦺꦴ ꦣꦩ꧀ꦩꦥ꧀ꦥꦮꦠ꧀ꦠꦶꦪꦴ ꦄꦣꦶꦏꦫꦟꦁ ꦏꦫꦟꦁ ꦮꦶꦪ ꦕ ꦏꦥ꧀ꦥꦤꦴꦩꦠ꧀ꦠꦱꦶꦢ꧀ꦣꦺꦤꦴꦤꦸꦫꦹꦥꦺꦤ ꦮꦺꦴꦲꦫꦷꦪꦠꦷꦠꦶ. ꦱꦩꦁ, ꦱꦲ ꦮꦴ ꦄꦮꦪꦮꦴꦤꦁ ꦄꦪꦤꦁ ꦥꦮꦠ꧀ꦠꦶ ꦄꦮꦛ꧀ꦜꦴꦤꦤ꧀ꦠꦶ ꦱꦩꦹꦲꦺꦴ ꦱꦩꦪꦺꦴ ꦪꦡꦴ ꦱꦩꦸꦢꦴꦪꦺꦴꦠꦶ. ꦄꦮꦪꦮꦱꦲꦴꦮꦛ꧀ꦜꦴꦤꦩꦺꦮ ꦲꦶ ꦱꦩꦹꦲꦺꦴ. ꦄꦮꦱꦺꦱꦥꦕ꧀ꦕꦪꦴꦤꦁ ꦱꦩꦴꦒꦩꦺ ꦱꦠꦶ ꦌꦠꦶ ꦦꦭꦩꦺꦠꦱ꧀ꦩꦴ ꦈꦥ꧀ꦥꦗ꧀ꦗꦠꦶ ꦥꦮꦠ꧀ꦠꦠꦷꦠꦶ ꦱꦩꦪꦺꦴ ꦲꦺꦠꦸ ꦪꦡꦴ ꦱꦩꦸꦢꦪꦺꦴꦠꦶ. ꦱꦩꦺꦠꦶ ꦱꦁꦪꦺꦴꦗꦤꦨꦴꦮꦠꦺꦴ ꦱꦩ꧀ꦧꦤ꧀ꦣꦺꦴ ꦌꦠꦶ ꦄꦠ꧀ꦠꦤꦺꦴ ꦮꦶꦱꦪꦺ ꦥꦮꦠ꧀ꦠꦠꦶ, ꦢꦭ꦳꧀ꦲꦒ꧀ꦒꦲꦟꦨꦴꦮꦠꦺꦴ ꦮꦴ ꦱꦁꦪꦸꦠ꧀ꦠꦴ ꦄꦪꦤ꧀ꦠꦶ ꦥꦮꦠ꧀ꦠꦤ꧀ꦠꦶ ꦱꦠ꧀ꦠꦴ ꦪꦡꦴꦨꦶꦤꦶꦮꦺꦱꦁ ꦌꦠꦺꦤꦴꦠꦶ ꦱꦩꦪꦺꦴ ꦢꦶꦛ꧀ꦜꦶ. ꦢꦶꦛ꧀ꦜꦶꦱꦁꦪꦺꦴꦗꦤꦺꦤ ꦲꦶ ꦱꦠ꧀ꦠꦴ ꦄꦠꦶꦮꦶꦪ ꦧꦗ꧀ꦙꦤ꧀ꦠꦷꦠꦶ. ꦱꦩꦶꦠꦶ ꦱꦔ꧀ꦒꦠꦶ ꦱꦩꦺꦴꦣꦴꦤꦤ꧀ꦠꦶ ꦱꦩꦪꦺꦴ ꦥꦛꦶꦭꦴꦨꦺꦴ. ꦱꦩꦪꦤꦁ ꦈꦥꦱꦩꦪꦤꦁ ꦄꦥꦒꦩꦺꦴꦠꦶ ꦱꦩꦪꦺꦴ ꦥꦲꦴꦤꦁ. ꦱꦩꦸꦕ꧀ꦖꦺꦢꦥ꧀ꦥꦲꦴꦤꦨꦴꦮꦠꦺꦴ ꦥꦤ ꦄꦣꦶꦏꦺꦴ ꦱꦩꦪꦺꦴꦠꦶ ꦄꦨꦶꦱꦩꦪꦺꦴ ꦪꦡꦴ ꦄꦨꦶꦣꦩ꧀ꦩꦺꦴꦠꦶ. ꦄꦨꦶꦩꦸꦑꦁ ꦚꦴꦟꦺꦤ ꦱꦩ꧀ꦩꦴ ꦌꦠꦧ꧀ꦧꦺꦴ ꦄꦨꦶꦱꦩꦺꦠꦧ꧀ꦧꦺꦴꦠꦶ ꦄꦨꦶꦱꦩꦪꦺꦴ, ꦣꦩ꧀ꦩꦴꦤꦁ ꦄꦮꦶꦥꦫꦷꦠꦱꦨꦴꦮꦺꦴ. ꦄꦨꦶꦩꦸꦑꦨꦴꦮꦺꦤ ꦱꦩ꧀ꦩꦴ ꦌꦠꦶ ꦒꦕ꧀ꦖꦠꦶ ꦧꦸꦗ꧀ꦙꦠꦷꦠꦶ ꦄꦨꦶꦱꦩꦪꦺꦴ, ꦣꦩ꧀ꦩꦴꦤꦁ ꦪꦡꦴꦨꦹꦠꦱꦨꦴꦮꦴꦮꦧꦺꦴꦣꦺꦴ. ꦌꦮꦁ ꦠꦱ꧀ꦩꦶꦁ ꦠꦱ꧀ꦩꦶꦁ ꦄꦠ꧀ꦡꦺ ꦱꦩꦪꦱꦢ꧀ꦢꦱ꧀ꦱ ꦥꦮꦠ꧀ꦠꦶ ꦮꦺꦢꦶꦠꦧ꧀ꦧꦴ.

ꦱꦩꦪꦱꦢ꧀ꦢꦱ꧀ꦱ ꦄꦠ꧀ꦡꦸꦢ꧀ꦣꦴꦫꦺ ꦄꦨꦶꦱꦩꦪꦱꦢ꧀ꦢꦱ꧀ꦱ ꦒꦲꦟꦺ ꦏꦴꦫꦟꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦆꦣ ꦥꦤꦱ꧀ꦱ ꦏꦴꦭꦺꦴ ꦄꦠ꧀ꦡꦺꦴ ꦱꦩꦮꦴꦪꦴꦢꦷꦤꦁ ꦄꦱꦩ꧀ꦨꦮꦠꦺꦴ. ꦢꦺꦱꦢꦺꦱꦏꦥꦫꦶꦱꦴ ꦮꦶꦪ ꦲꦶ ꦢꦺꦱꦤꦴꦪ ꦤꦶꦢꦴꦤꦨꦴꦮꦺ ꦏꦴꦭꦺꦴ ꦌꦮ ꦆꦕ꧀ꦖꦶꦠꦧ꧀ꦧꦺꦴꦠꦶ. ꦪꦱ꧀ꦩꦴ ꦥꦤꦺꦠ꧀ꦡ ꦱꦩꦪꦺꦴꦠꦶ ꦏꦴꦭꦺꦴ ꦄꦣꦶꦥ꧀ꦥꦺꦠꦺꦴ, ꦠꦱ꧀ꦩꦴ ꦱꦁꦮꦕ꧀ꦖꦫꦈꦠꦸꦩꦴꦱꦢ꧀ꦣꦩꦴꦱꦫꦠ꧀ꦠꦶꦢꦶꦮꦱꦥꦸꦧ꧀ꦧꦟ꧀ꦲꦩꦗ꧀ꦙꦤ꧀ꦲꦶꦏꦱꦴꦪꦤ꧀ꦲꦥꦜꦩꦪꦴꦩ- ꦩꦗ꧀ꦙꦶꦩꦪꦴꦩꦥꦕ꧀ꦖꦶꦩꦪꦴꦩꦩꦸꦲꦸꦠ꧀ꦠꦴꦢꦷꦱꦸ ꦏꦴꦭꦨꦺꦢꦨꦹꦠꦺꦱꦸ ꦱꦩꦪꦺꦱꦸ ꦌꦏꦁ ꦱꦩꦪꦤ꧀ꦠꦶ ꦢꦷꦥꦺꦠꦶ.

ꦏꦱ꧀ꦩꦴ ꦥꦤꦺꦠ꧀ꦡ ꦄꦤꦶꦪꦩꦶꦠꦮꦱꦺꦤꦺꦮ ꦏꦴꦭꦺꦴ ꦤꦶꦢ꧀ꦢꦶꦛ꧀ꦜꦺꦴ, ꦤ ꦈꦠꦸꦱꦁꦮꦕ꧀ꦖꦫꦴꦢꦶꦮꦱꦺꦤ ꦤꦶꦪꦩꦺꦠ꧀ꦮꦴ ꦤꦶꦢ꧀ꦢꦶꦛ꧀ꦜꦺꦴꦠꦶ ꦕꦺ? ꦏꦶꦚ꧀ꦕꦴꦥꦶ ꦌꦠꦺꦱꦸ ꦱꦁꦮꦕ꧀ꦖꦫꦴꦢꦷꦱꦸ ꦱꦩꦪꦺꦱꦸ ꦪꦁ ꦪꦁ ꦱꦸꦠ꧀ꦠꦁ ꦪꦱ꧀ꦩꦶꦁ ꦪꦱ꧀ꦩꦶꦁ ꦱꦁꦮꦕ꧀ꦖꦫꦺ ꦈꦠꦸꦩ꧀ꦲꦶ ꦩꦴꦱꦺ ꦥꦏ꧀ꦑꦺ ꦫꦠ꧀ꦠꦶꦨꦴꦒꦺ ꦢꦶꦮꦱꦨꦴꦒꦺ ꦮꦴ ꦮꦸꦠ꧀ꦠꦁ, ꦱꦧ꧀ꦧꦩ꧀ꦥꦶ ꦠꦁ ꦡꦺꦫꦱ꧀ꦱ ꦱꦸꦮꦶꦢꦶꦠꦁ ꦱꦸꦮꦮꦠ꧀ꦡꦴꦥꦶꦠꦁ ꦥꦚ꧀ꦚꦴꦪ. ꦪꦱ꧀ꦩꦴ ꦥꦤ ‘‘ꦌꦮꦁ ꦩꦺ ꦱꦸꦠꦁ ꦄꦱꦸꦏꦱꦁꦮꦕ꧀ꦖꦫꦺ ꦄꦱꦸꦏꦈꦠꦸꦩ꧀ꦲꦶ ꦄꦱꦸꦏꦩꦴꦱꦺ ꦄꦱꦸꦏꦥꦏ꧀ꦑꦺ ꦄꦱꦸꦏꦫꦠ꧀ꦠꦶꦨꦴꦒꦺ ꦄꦱꦸꦏꦢꦶꦮꦱꦨꦴꦒꦺ ꦮꦴ’’ꦠꦶ ꦌꦮꦁ ꦮꦸꦠ꧀ꦠꦺ ꦤ ꦱꦏ꧀ꦏꦴ ꦱꦸꦑꦺꦤ ꦣꦴꦫꦺꦠꦸꦁ ꦮꦴ ꦈꦢ꧀ꦢꦶꦱꦶꦠꦸꦁ ꦮꦴ ꦈꦢ꧀ꦢꦶꦱꦴꦥꦺꦠꦸꦁ ꦮꦴ, ꦧꦲꦸ ꦕ ꦮꦠ꧀ꦠꦧ꧀ꦧꦁ ꦲꦺꦴꦠꦶ, ꦠꦱ꧀ꦩꦴ ꦌꦏꦺꦤꦺꦮ ꦥꦢꦺꦤ ꦠꦩꦠ꧀ꦡꦁ ꦱꦩꦺꦴꦣꦴꦤꦺꦠ꧀ꦮꦴ ‘‘ꦌꦏꦁ ꦱꦩꦪ’’ꦤ꧀ꦠꦶ ꦄꦴꦲ.

ꦪꦺ ꦮꦴ ꦆꦩꦺ ꦒꦧ꧀ꦨꦺꦴꦏ꧀ꦏꦤ꧀ꦠꦶꦱꦩꦪꦺꦴ ꦗꦴꦠꦶꦱꦩꦪꦺꦴ ꦱꦁꦮꦺꦒꦱꦩꦪꦺꦴ ꦄꦨꦶꦤꦶꦏ꧀ꦑꦩꦤꦱꦩꦪꦺꦴ ꦢꦸꦏ꧀ꦏꦫꦏꦴꦫꦶꦏꦱꦩꦪꦺꦴ ꦩꦴꦫꦮꦶꦗꦪꦱꦩꦪꦺꦴ ꦄꦨꦶꦱꦩ꧀ꦧꦺꦴꦣꦶꦱꦩꦪꦺꦴ ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦱꦩꦪꦺꦴ ꦢꦺꦱꦤꦴꦱꦩꦪꦺꦴ ꦥꦫꦶꦤꦶꦧ꧀ꦧꦴꦤꦱꦩꦪꦺꦴꦠꦶ ꦌꦮꦩꦴꦢꦪꦺꦴ ꦨꦒꦮꦠꦺꦴ ꦢꦺꦮꦩꦤꦸꦱ꧀ꦱꦺꦱꦸ ꦄꦠꦶꦮꦶꦪ ꦥꦏꦴꦱꦴ ꦄꦤꦺꦏꦏꦴꦭꦥ꧀ꦥꦨꦺꦢꦴ ꦌꦮ ꦱꦩꦪꦴ, ꦠꦺꦱꦸ ꦱꦩꦪꦺꦱꦸ ꦢꦺꦱꦤꦴꦱꦩꦪꦱꦔ꧀ꦑꦴꦠꦁ ꦌꦏꦁ ꦱꦩꦪꦤ꧀ꦠꦶ ꦢꦷꦥꦺꦠꦶ. ꦪꦺꦴ ꦮꦴꦪꦁ ꦚꦴꦟꦏꦫꦸꦟꦴꦏꦶꦕ꧀ꦕꦱꦩꦪꦺꦱꦸ ꦏꦫꦸꦟꦴꦏꦶꦕ꧀ꦕꦱꦩꦪꦺꦴ, ꦄꦠ꧀ꦠꦲꦶꦠꦥꦫꦲꦶꦠꦥ꧀ꦥꦛꦶꦥꦠ꧀ꦠꦶꦱꦩꦪꦺꦱꦸ ꦥꦫꦲꦶꦠꦥ꧀ꦥꦛꦶꦥꦠ꧀ꦠꦶꦱꦩꦪꦺꦴ, ꦱꦤ꧀ꦤꦶꦥꦠꦶꦠꦴꦤꦁ ꦏꦫꦟꦷꦪꦢ꧀ꦮꦪꦱꦩꦪꦺꦱꦸ ꦣꦩ꧀ꦩꦏꦡꦴꦱꦩꦪꦺꦴ, ꦢꦺꦱꦤꦴꦥꦛꦶꦥꦠ꧀ꦠꦶꦱꦩꦪꦺꦱꦸ ꦢꦺꦱꦤꦴꦱꦩꦪꦺꦴ, ꦠꦺꦱꦸ ꦱꦩꦪꦺꦱꦸ ꦄꦚ꧀ꦚꦠꦫꦱꦩꦪꦁ ꦱꦤ꧀ꦣꦴꦪ ‘‘ꦌꦏꦁ ꦱꦩꦪ’’ꦤ꧀ꦠꦶ ꦄꦴꦲ.

ꦏꦱ꧀ꦩꦴ ꦥꦤꦺꦠ꧀ꦡ ꦪꦡꦴ ꦄꦨꦶꦣꦩ꧀ꦩꦺ ‘‘ꦪꦱ꧀ꦩꦶꦁ ꦱꦩꦪꦺ ꦏꦴꦩꦴꦮꦕꦫꦁ ꦏꦸꦱꦭꦁ ꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦷ’’ꦠꦶ (ꦣ. ꦱ. ꧑) ꦕ ꦆꦠꦺꦴ ꦄꦚ꧀ꦚꦺꦱꦸ ꦱꦸꦠ꧀ꦠꦥꦢꦺꦱꦸ ‘‘ꦪꦱ꧀ꦩꦶꦁ ꦱꦩꦪꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦷ’’ꦠꦶ (ꦄ. ꦤꦶ. ꧔.꧒꧐꧐) ꦕ ꦨꦸꦩ꧀ꦩꦮꦕꦤꦺꦤ ꦤꦶꦢ꧀ꦢꦺꦱꦺꦴ ꦏꦠꦺꦴ, ꦮꦶꦤꦪꦺ ꦕ ‘‘ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ’’ꦠꦶ (ꦥꦴꦫꦴ. ꧑) ꦏꦫꦟꦮꦕꦤꦺꦤ ꦤꦶꦢ꧀ꦢꦺꦱꦺꦴ ꦏꦠꦺꦴ, ꦠꦡꦴ ꦄꦏꦠ꧀ꦮꦴ ‘‘ꦌꦏꦁ ꦱꦩꦪ’’ꦤ꧀ꦠꦶ ꦄꦕ꧀ꦕꦤ꧀ꦠꦱꦁꦪꦺꦴꦒꦠ꧀ꦡꦺ ꦈꦥꦪꦺꦴꦒꦮꦕꦤꦺꦤ ꦤꦶꦢ꧀ꦢꦺꦱꦺꦴ ꦏꦠꦺꦴꦠꦶ? ꦠꦠ꧀ꦡ ꦠꦡꦴ, ꦆꦣ ꦕ ꦄꦚ꧀ꦚꦡꦴ ꦄꦠ꧀ꦡꦱꦩ꧀ꦨꦮꦠꦺꦴ. ꦠꦠ꧀ꦡ ꦲꦶ ꦄꦨꦶꦣꦩ꧀ꦩꦺ ꦆꦠꦺꦴ ꦄꦚ꧀ꦚꦺꦱꦸ ꦕ ꦱꦸꦠ꧀ꦠꦤ꧀ꦠꦺꦱꦸ ꦄꦴꦣꦴꦫꦮꦶꦱꦪꦱꦔ꧀ꦑꦴꦠꦺꦴ ꦄꦣꦶꦏꦫꦟꦠ꧀ꦡꦺꦴ ꦏꦶꦫꦶꦪꦴꦪ ꦏꦶꦫꦶꦪꦤ꧀ꦠꦫꦭꦏ꧀ꦑꦟꦱꦔ꧀ꦑꦴꦠꦺꦴ ꦨꦴꦮꦺꦤꦨꦴꦮꦭꦏ꧀ꦑꦟꦠ꧀ꦡꦺꦴ ꦕ ꦱꦩ꧀ꦨꦮꦠꦷꦠꦶ. ꦄꦣꦶꦏꦫꦟꦚ꧀ꦲꦶ ꦏꦴꦭꦠ꧀ꦡꦺꦴ ꦱꦩꦹꦲꦠ꧀ꦡꦺꦴ ꦕ ꦱꦩꦪꦺꦴ ꦠꦠ꧀ꦡ ꦮꦸꦠ꧀ꦠꦴꦤꦁ ꦦꦱ꧀ꦱꦴꦢꦶꦣꦩ꧀ꦩꦴꦤꦁ, ꦠꦡꦴ ꦏꦴꦭꦺꦴ ꦱꦨꦴꦮꦣꦩ꧀ꦩꦥ꧀ꦥꦮꦠ꧀ꦠꦶꦩꦠ꧀ꦠꦠꦴꦪ ꦥꦫꦩꦠ꧀ꦡꦠꦺꦴ ꦄꦮꦶꦗ꧀ꦗꦩꦴꦤꦺꦴꦥꦶ ꦄꦴꦣꦴꦫꦨꦴꦮꦺꦤ ꦥꦚ꧀ꦚꦴꦠꦺꦴ ꦠꦔ꧀ꦑꦟꦥ꧀ꦥꦮꦠ꧀ꦠꦴꦤꦁ ꦠꦠꦺꦴ ꦥꦸꦧ꧀ꦧꦺ ꦥꦫꦠꦺꦴ ꦕ ꦄꦨꦴꦮꦠꦺꦴ ꦪꦡꦴ ‘‘ꦥꦸꦧ꧀ꦧꦟ꧀ꦲꦺ ꦗꦴꦠꦺꦴ ꦱꦴꦪꦤ꧀ꦲꦺ ꦗꦴꦠꦺꦴ’’ꦠꦶꦄꦴꦢꦷꦱꦸ. ꦱꦩꦹꦲꦺꦴꦠꦶꦥꦶ ꦄꦮꦪꦮꦮꦶꦤꦶꦩꦸꦠ꧀ꦠꦺꦴ ꦥꦫꦩꦠ꧀ꦡꦠꦺꦴ ꦄꦮꦶꦗ꧀ꦗꦩꦴꦤꦺꦴꦥꦶ ꦏꦥ꧀ꦥꦤꦴꦩꦠ꧀ꦠꦱꦶꦢ꧀ꦣꦺꦤ ꦫꦹꦥꦺꦤ ꦄꦮꦪꦮꦴꦤꦁ ꦄꦴꦣꦴꦫꦨꦴꦮꦺꦤ ꦥꦚ꧀ꦚꦴꦥꦷꦪꦠꦶ, ꦪꦡꦴ ‘‘ꦫꦸꦏ꧀ꦑꦺ ꦱꦴꦑꦴ, ꦪꦮꦺꦴ ꦪꦮꦫꦴꦱꦶꦩ꧀ꦲꦶ ꦱꦩꦸꦛ꧀ꦜꦶꦠꦺꦴ’’ꦠꦶꦄꦴꦢꦷꦱꦸ. ꦪꦱ꧀ꦩꦶꦁ ꦏꦴꦭꦺ ꦣꦩ꧀ꦩꦥꦸꦚ꧀ꦗꦺ ꦕ ꦏꦴꦩꦴꦮꦕꦫꦁ ꦏꦸꦱꦭꦁ ꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦠꦱ꧀ꦩꦶꦁꦪꦺꦮ ꦏꦴꦭꦺ ꦣꦩ꧀ꦩꦥꦸꦚ꧀ꦗꦺ ꦕ ꦦꦱ꧀ꦱꦴꦢꦪꦺꦴꦥꦶ ꦲꦺꦴꦤ꧀ꦠꦷꦠꦶ ꦄꦪꦚ꧀ꦲꦶ ꦠꦠ꧀ꦡ ꦄꦠ꧀ꦡꦺꦴ. ꦠꦡꦴ ꦑꦟꦱꦩꦮꦴꦪꦲꦺꦠꦸꦱꦔ꧀ꦑꦴꦠꦱ꧀ꦱ ꦱꦩꦪꦱ꧀ꦱ ꦨꦴꦮꦺꦤ ꦠꦠ꧀ꦡ ꦮꦸꦠ꧀ꦠꦴꦤꦁ ꦦꦱ꧀ꦱꦴꦢꦶꦣꦩ꧀ꦩꦴꦤꦁ ꦨꦴꦮꦺꦴ ꦭꦏ꧀ꦑꦷꦪꦠꦶ. ꦪꦡꦴ ꦲꦶ ‘‘ꦒꦴꦮꦷꦱꦸ ꦢꦸꦪ꧀ꦲꦩꦴꦤꦴꦱꦸ ꦒꦠꦺꦴ, ꦢꦸꦢ꧀ꦣꦴꦱꦸ ꦄꦴꦒꦠꦺꦴ’’ꦠꦶ ꦌꦠ꧀ꦡ ꦒꦴꦮꦷꦤꦁ ꦢꦺꦴꦲꦤꦏꦶꦫꦶꦪꦴꦪ ꦒꦩꦤꦏꦶꦫꦶꦪꦴ ꦭꦏ꧀ꦑꦷꦪꦠꦶ, ꦌꦮꦁ ꦆꦣꦴꦥꦶ ꦪꦱ꧀ꦩꦶꦁ ꦱꦩꦪꦺꦠꦶ ꦮꦸꦠ꧀ꦠꦺ ꦕ ꦥꦢꦠ꧀ꦡꦱ꧀ꦱ ꦱꦠ꧀ꦠꦴꦮꦶꦫꦲꦴꦨꦴꦮꦠꦺꦴ ꦱꦠꦷꦠꦶ ꦄꦪꦩꦠ꧀ꦡꦺꦴ ꦮꦶꦚ꧀ꦚꦴꦪꦩꦴꦤꦺꦴ ꦌꦮ ꦲꦺꦴꦠꦷꦠꦶ ꦱꦩꦪꦱ꧀ꦱ ꦱꦠ꧀ꦠꦴꦏꦶꦫꦶꦪꦴꦪ ꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏꦶꦫꦶꦪꦴ ꦦꦱ꧀ꦱꦴꦢꦷꦤꦁ ꦨꦮꦤꦏꦶꦫꦶꦪꦴ ꦕ ꦭꦏ꧀ꦑꦷꦪꦠꦶ. ꦠꦡꦴ ꦪꦱ꧀ꦩꦶꦁ ꦱꦩꦪꦺ ꦪꦱ꧀ꦩꦶꦁ ꦤꦮꦩꦺ ꦑꦟꦺ ꦪꦱ꧀ꦩꦶꦁ ꦪꦺꦴꦤꦶꦱꦺꦴꦩꦤꦱꦶꦏꦴꦫꦴꦢꦶꦲꦺꦠꦸꦩ꧀ꦲꦶ ꦥꦕ꧀ꦕꦪꦱꦩꦮꦴꦪꦺ ꦮꦴ ꦱꦠꦶ ꦏꦴꦩꦴꦮꦕꦫꦁ ꦏꦸꦱꦭꦁ ꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦠꦱ꧀ꦩꦶꦁ ꦱꦩꦪꦺ ꦑꦟꦺ ꦲꦺꦠꦸꦩ꧀ꦲꦶ ꦥꦕ꧀ꦕꦪꦱꦩꦮꦴꦪꦺ ꦕ ꦦꦱ꧀ꦱꦴꦢꦪꦺꦴꦥꦶ ꦲꦺꦴꦤ꧀ꦠꦷꦠꦶ. ꦠꦱ꧀ꦩꦴ ꦠꦢꦠ꧀ꦡꦗꦺꦴꦠꦤꦠ꧀ꦡꦁ ꦨꦸꦩ꧀ꦩꦮꦕꦤꦺꦤ ꦤꦶꦢ꧀ꦢꦺꦱꦺꦴ ꦏꦠꦺꦴ.

ꦮꦶꦤꦪꦺ ꦕ ‘‘ꦄꦤ꧀ꦤꦺꦤ ꦮꦱꦠꦶ, ꦄꦗ꧀ꦙꦺꦤꦺꦤ ꦮꦱꦠꦷ’’ꦠꦶꦄꦴꦢꦷꦱꦸ ꦮꦶꦪ ꦲꦺꦠꦸꦄꦠ꧀ꦡꦺꦴ, ‘‘ꦦꦫꦱꦸꦤꦴ ꦖꦶꦤ꧀ꦢꦠꦶ, ꦏꦸꦢꦴꦭꦺꦤ ꦑꦟꦠꦷ’’ꦠꦶꦄꦴꦢꦷꦱꦸ ꦮꦶꦪ ꦏꦫꦟꦠ꧀ꦡꦺꦴ ꦕ ꦱꦩ꧀ꦨꦮꦠꦶ. ꦪꦺꦴ ꦲꦶ ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦱꦩꦪꦺꦴ ꦣꦩ꧀ꦩꦱꦺꦤꦴꦥꦠꦶꦄꦴꦢꦷꦲꦶꦥꦶ ꦢꦸꦧ꧀ꦧꦶꦚ꧀ꦚꦺꦪ꧀ꦪꦺꦴ, ꦠꦺꦤ ꦱꦩꦪꦺꦤ ꦏꦫꦟꦨꦹꦠꦺꦤ ꦲꦺꦠꦸꦨꦹꦠꦺꦤ ꦕ ꦮꦷꦠꦶꦏ꧀ꦏꦩꦁ ꦱꦸꦠ꧀ꦮꦴ ꦨꦶꦏ꧀ꦑꦸꦱꦔ꧀ꦓꦁ ꦱꦤ꧀ꦤꦶꦥꦴꦠꦴꦥꦺꦠ꧀ꦮꦴ ꦎꦠꦶꦟ꧀ꦟꦮꦠ꧀ꦡꦸꦏꦁ ꦥꦸꦒ꧀ꦒꦭꦁ ꦥꦛꦶꦥꦸꦕ꧀ꦖꦶꦠ꧀ꦮꦴ ꦮꦶꦒꦫꦲꦶꦠ꧀ꦮꦴ ꦕ ꦠꦁ ꦠꦁ ꦮꦠ꧀ꦡꦸꦁ ꦎꦠꦶꦟ꧀ꦟꦱꦩꦪꦱꦔ꧀ꦑꦴꦠꦁ ꦏꦴꦭꦁ ꦄꦤꦠꦶꦏ꧀ꦏꦩꦶꦠ꧀ꦮꦴ ꦱꦶꦏ꧀ꦑꦴꦥꦢꦴꦤꦶ ꦥꦚ꧀ꦚꦴꦥꦺꦤ꧀ꦠꦺꦴ ꦠꦠꦶꦪꦥꦴꦫꦴꦗꦶꦏꦴꦢꦷꦤꦁ ꦮꦶꦪ ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦪꦴ ꦲꦺꦠꦸꦁ ꦄꦥꦺꦏ꧀ꦑꦩꦴꦤꦺꦴ ꦠꦠ꧀ꦡ ꦠꦠ꧀ꦡ ꦮꦶꦲꦴꦱꦶ, ꦠꦱ꧀ꦩꦴ ꦠꦢꦠ꧀ꦡꦗꦺꦴꦠꦤꦠ꧀ꦡꦁ ꦮꦶꦤꦪꦺ ꦏꦫꦟꦮꦕꦤꦺꦤ ꦤꦶꦢ꧀ꦢꦺꦱꦺꦴ ꦏꦠꦺꦴ.

ꦆꦣ ꦥꦤ ꦄꦚ꧀ꦚꦱ꧀ꦩꦶꦚ꧀ꦕ ꦌꦮꦁꦗꦴꦠꦶꦏꦺ ꦄꦕ꧀ꦕꦤ꧀ꦠꦱꦁꦪꦺꦴꦒꦠ꧀ꦡꦺꦴ ꦱꦩ꧀ꦨꦮꦠꦶ. ꦪꦱ꧀ꦩꦶꦚ꧀ꦲꦶ ꦱꦩꦪꦺ ꦱꦲ ꦱꦩꦸꦛ꧀ꦜꦴꦤꦲꦺꦠꦸꦤꦴ ꦆꦢꦁ ꦈꦢꦴꦤꦁ ꦈꦥ꧀ꦥꦤ꧀ꦤꦁ, ꦄꦕ꧀ꦕꦤ꧀ꦠꦩꦺꦮ ꦠꦁ ꦱꦩꦪꦁ ꦄꦫꦶꦪꦮꦶꦲꦴꦫꦥꦸꦧ꧀ꦧꦔ꧀ꦒꦩꦴꦪ ꦣꦩ꧀ꦩꦥꦕ꧀ꦕꦮꦺꦏ꧀ꦑꦟꦴꦪ ꦨꦒꦮꦴ ꦮꦶꦲꦴꦱꦶ, ꦠꦱ꧀ꦩꦴ ‘‘ꦩꦴꦱꦁ ꦄꦗ꧀ꦙꦺꦠꦷ’’ꦠꦶꦄꦴꦢꦷꦱꦸ ꦮꦶꦪ ꦈꦥꦪꦺꦴꦒꦠ꧀ꦡꦗꦺꦴꦠꦤꦠ꧀ꦡꦁ ꦆꦣ ꦈꦥꦪꦺꦴꦒꦮꦕꦤꦺꦤ ꦤꦶꦢ꧀ꦢꦺꦱꦺꦴ ꦏꦠꦺꦴ. ꦠꦺꦤꦺꦠꦁ ꦮꦸꦕ꧀ꦕꦠꦶ –

‘‘ꦠꦁ ꦠꦁ ꦄꦠ꧀ꦡꦩꦥꦺꦏ꧀ꦑꦶꦠ꧀ꦮꦴ, ꦨꦸꦩ꧀ꦩꦺꦤ ꦏꦫꦟꦺꦤ ꦕ;

ꦄꦚ꧀ꦚꦠ꧀ꦫ ꦱꦩꦪꦺꦴ ꦮꦸꦠ꧀ꦠꦺꦴ, ꦈꦥꦪꦺꦴꦒꦺꦤ ꦱꦺꦴ ꦆꦣꦴ’’ꦠꦶ.

ꦥꦺꦴꦫꦴꦟꦴ ꦥꦤ ꦮꦟ꧀ꦟꦪꦤ꧀ꦠꦶ – ‘‘ꦪꦱ꧀ꦩꦶꦁ ꦱꦩꦪꦺ’’ꦠꦶ ꦮꦴ ‘‘ꦠꦺꦤ ꦱꦩꦪꦺꦤꦴ’’ꦠꦶ ꦮꦴ ‘‘ꦌꦏꦁ ꦱꦩꦪ’’ꦤ꧀ꦠꦶ ꦮꦴ ꦄꦨꦶꦭꦴꦥꦩꦠ꧀ꦠꦨꦺꦢꦺꦴ ꦌꦱ ꦤꦶꦢ꧀ꦢꦺꦱꦺꦴ, ꦱꦧ꧀ꦧꦠ꧀ꦡ ꦨꦸꦩ꧀ꦩꦩꦺꦮ ꦄꦠ꧀ꦡꦺꦴꦠꦶ. ꦠꦱ꧀ꦩꦴ ‘‘ꦌꦏꦁ ꦱꦩꦪ’’ꦤ꧀ꦠꦶ ꦮꦸꦠ꧀ꦠꦺꦥꦶ ꦌꦏꦱ꧀ꦩꦶꦁ ꦱꦩꦪꦺꦠꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦨꦒꦮꦴꦠꦶ ꦒꦫꦸ. ꦒꦫꦸꦚ꧀ꦲꦶ ꦭꦺꦴꦏꦺ ‘‘ꦨꦒꦮꦴ’’ꦠꦶ ꦮꦢꦤ꧀ꦠꦶ. ꦄꦪꦚ꧀ꦕ ꦱꦧ꧀ꦧꦒꦸꦟꦮꦶꦱꦶꦛ꧀ꦜꦠꦴꦪ ꦱꦧ꧀ꦧꦱꦠ꧀ꦠꦴꦤꦁ ꦒꦫꦸ, ꦠꦱ꧀ꦩꦴ ꦨꦒꦮꦴꦠꦶ ꦮꦺꦢꦶꦠꦧ꧀ꦧꦺꦴ. ꦥꦺꦴꦫꦴꦟꦺꦲꦶꦥꦶ ꦮꦸꦠ꧀ꦠꦁ –

‘‘ꦨꦒꦮꦴꦠꦶ ꦮꦕꦤꦁ ꦱꦺꦛ꧀ꦜꦁ, ꦨꦒꦮꦴꦠꦶ ꦮꦕꦤꦩꦸꦠ꧀ꦠꦩꦁ;

ꦒꦫꦸ ꦒꦴꦫꦮꦪꦸꦠ꧀ꦠꦺꦴ ꦱꦺꦴ, ꦨꦒꦮꦴ ꦠꦺꦤ ꦮꦸꦕ꧀ꦕꦠꦷ’’ꦠꦶ.

ꦠꦠ꧀ꦡ ꦱꦺꦛ꧀ꦜꦮꦴꦕꦏꦮꦕꦤꦁ ꦱꦺꦛ꧀ꦜꦤ꧀ꦠꦶ ꦮꦸꦠ꧀ꦠꦁ ꦱꦺꦛ꧀ꦜꦒꦸꦟꦱꦲꦕꦫꦟꦠꦺꦴ. ꦄꦡ ꦮꦴ ꦮꦸꦕ꧀ꦕꦠꦷꦠꦶ ꦮꦕꦤꦁ, ꦄꦠ꧀ꦡꦺꦴ. ꦨꦒꦮꦴꦠꦶ ꦮꦕꦤꦁ ꦱꦺꦛ꧀ꦜꦤ꧀ꦠꦶ ꦨꦒꦮꦴꦠꦶ ꦆꦩꦶꦤꦴ ꦮꦕꦤꦺꦤ ꦮꦕꦤꦷꦪꦺꦴ ꦪꦺꦴ ꦄꦠ꧀ꦡꦺꦴ, ꦱꦺꦴ ꦱꦺꦛ꧀ꦜꦺꦴꦠꦶ ꦄꦠ꧀ꦡꦺꦴ. ꦨꦒꦮꦴꦠꦶ ꦮꦕꦤꦩꦸꦠ꧀ꦠꦩꦤ꧀ꦠꦶ ꦌꦠ꧀ꦡꦴꦥꦶ ꦮꦸꦠ꧀ꦠꦤꦪꦺꦤꦺꦮ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦒꦴꦫꦮꦪꦸꦠ꧀ꦠꦺꦴꦠꦶ ꦒꦫꦸꦨꦴꦮꦪꦸꦠ꧀ꦠꦺꦴ ꦒꦫꦸꦒꦸꦟꦪꦺꦴꦒꦠꦺꦴ ꦮꦶꦱꦺꦱꦒꦫꦸꦏꦫꦟꦴꦫꦲꦠꦴꦪ ꦮꦴ ꦒꦴꦫꦮꦪꦸꦠ꧀ꦠꦺꦴ. ꦌꦮꦁ ꦒꦸꦟꦮꦶꦱꦶꦛ꧀ꦜꦱꦠ꧀ꦠꦸꦠ꧀ꦠꦩꦒꦫꦸꦒꦴꦫꦮꦴꦣꦶꦮꦕꦤꦁ ꦨꦒꦮꦴꦠꦶ ꦆꦢꦁ ꦮꦕꦤꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦄꦥꦶꦕ –

‘‘ꦨꦒꦷ ꦨꦗꦷ ꦨꦴꦒꦷ ꦮꦶꦨꦠ꧀ꦠꦮꦴ ꦆꦠꦶ,

ꦄꦏꦴꦱꦶ ꦨꦒ꧀ꦒꦤ꧀ꦠꦶ ꦒꦫꦹꦠꦶ ꦨꦴꦒ꧀ꦪꦮꦴ;

ꦧꦲꦹꦲꦶ ꦚꦴꦪꦺꦲꦶ ꦱꦸꦨꦴꦮꦶꦠꦠ꧀ꦠꦤꦺꦴ,

ꦨꦮꦤ꧀ꦠꦒꦺꦴ ꦱꦺꦴ ꦨꦒꦮꦴꦠꦶ ꦮꦸꦕ꧀ꦕꦠꦷ’’ꦠꦶ. –

ꦤꦶꦢ꧀ꦢꦺꦱꦺ (ꦩꦲꦴꦤꦶ. ꧘꧔) ꦄꦴꦒꦠꦤꦪꦺꦤ –

‘‘ꦨꦴꦒ꧀ꦪꦮꦴ ꦨꦒ꧀ꦒꦮꦴ ꦪꦸꦠ꧀ꦠꦺꦴ, ꦨꦒꦺꦲꦶ ꦕ ꦮꦶꦨꦠ꧀ꦠꦮꦴ;

ꦨꦠ꧀ꦠꦮꦴ ꦮꦤ꧀ꦠꦒꦩꦤꦺꦴ, ꦨꦮꦺꦱꦸ ꦨꦒꦮꦴ ꦠꦠꦺꦴ’’ꦠꦶ. –

ꦆꦩꦴꦪ ꦒꦴꦡꦴꦪ ꦕ ꦮꦱꦺꦤ ꦨꦒꦮꦴꦠꦶ ꦥꦢꦱ꧀ꦱ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦱꦺꦴ ꦥꦤꦴꦪꦁ ꦄꦠ꧀ꦡꦺꦴ ꦱꦧ꧀ꦧꦴꦏꦴꦫꦺꦤ ꦮꦶꦱꦸꦢ꧀ꦣꦶꦩꦒ꧀ꦒꦺ (ꦮꦶꦱꦸꦢ꧀ꦣꦶ. ꧑.꧑꧔꧒) ꦮꦸꦠ꧀ꦠꦺꦴ, ꦠꦱ꧀ꦩꦴ ꦠꦠ꧀ꦡ ꦮꦸꦠ꧀ꦠꦤꦪꦺꦤꦺꦮ ꦮꦶꦮꦫꦶꦠꦧ꧀ꦧꦺꦴ.

ꦄꦥꦶꦕ ꦨꦴꦒꦺ ꦮꦤꦶ, ꦨꦒꦺ ꦮꦴ ꦮꦩꦷꦠꦶ ꦨꦒꦮꦴ. ꦠꦡꦴꦒꦠꦺꦴ ꦲꦶ ꦢꦴꦤꦱꦷꦭꦴꦢꦶꦥꦴꦫꦩꦶꦣꦩ꧀ꦩꦺ ꦙꦴꦤꦮꦶꦩꦺꦴꦏ꧀ꦑꦴꦢꦶꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺ ꦮꦤꦶ ꦨꦗꦶ ꦱꦺꦮꦶ ꦧꦲꦸꦭꦩꦏꦴꦱꦶ, ꦠꦱ꧀ꦩꦴ ꦨꦒꦮꦴ. ꦄꦡ ꦮꦴ ꦠꦺꦪꦺꦮ ‘‘ꦮꦺꦤꦺꦪ꧀ꦪꦱꦠ꧀ꦠꦱꦤ꧀ꦠꦴꦤꦺꦱꦸ ꦏꦡꦁ ꦤꦸ ꦑꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸ’’ꦤ꧀ꦠꦶ ꦮꦤꦶ ꦄꦨꦶꦥꦠ꧀ꦡꦪꦷꦠꦶ ꦨꦒꦮꦴ. ꦄꦡ ꦮꦴ ꦨꦒꦱꦔ꧀ꦑꦴꦠꦁ ꦆꦱ꧀ꦱꦫꦶꦪꦁ ꦪꦱꦚ꧀ꦕ ꦮꦩꦶ ꦈꦒ꧀ꦒꦶꦫꦶ ꦑꦺꦭ꦳ꦥꦶꦟ꧀ꦝꦁ ꦮꦶꦪ ꦄꦤꦥꦺꦏ꧀ꦑꦺꦴ ꦖꦝ꧀ꦝꦪꦷꦠꦶ ꦨꦒꦮꦴ. ꦠꦡꦴ ꦲꦶ ꦠꦡꦴꦒꦠꦺꦴ ꦲꦠ꧀ꦡꦒꦠꦁ ꦕꦏ꧀ꦏꦮꦠ꧀ꦠꦶꦱꦶꦫꦶꦁ ꦢꦺꦮꦭꦺꦴꦏꦴꦣꦶꦥꦕ꧀ꦕꦱꦢꦶꦱꦁ ꦕꦴꦠꦸꦢ꧀ꦢꦷꦥꦶꦱ꧀ꦱꦫꦶꦪꦁ, ꦕꦏ꧀ꦏꦮꦠ꧀ꦠꦶꦱꦩ꧀ꦥꦠ꧀ꦠꦶꦱꦤ꧀ꦤꦶꦱ꧀ꦱꦪꦚ꧀ꦕ ꦱꦠ꧀ꦠꦫꦠꦤꦱꦩꦸꦗ꧀ꦗꦭꦁ ꦪꦱꦁ ꦠꦶꦟꦴꦪꦥꦶ ꦄꦩꦚ꧀ꦚꦩꦴꦤꦺꦴ ꦤꦶꦫꦥꦺꦏ꧀ꦑꦺꦴ ꦥꦲꦴꦪ ꦄꦨꦶꦤꦶꦏ꧀ꦑꦩꦶꦠ꧀ꦮꦴ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴ, ꦠꦱ꧀ꦩꦴ ꦆꦩꦺ ꦱꦶꦫꦶꦄꦴꦢꦶꦏꦺ ꦨꦒꦺ ꦮꦩꦷꦠꦶ ꦨꦒꦮꦴ. ꦄꦡ ꦮꦴ ꦨꦴꦤꦶ ꦤꦴꦩ ꦤꦏ꧀ꦑꦠ꧀ꦠꦴꦤꦶ, ꦠꦺꦲꦶ ꦱꦩꦁ ꦒꦕ꧀ꦖꦤ꧀ꦠꦶ ꦥꦮꦠ꧀ꦠꦤ꧀ꦠꦷꦠꦶ ꦨꦒꦴ. ꦱꦶꦤꦺꦫꦸꦪꦸꦒꦤ꧀ꦣꦫꦈꦠ꧀ꦠꦫꦏꦸꦫꦸꦲꦶꦩꦮꦤ꧀ꦠꦴꦢꦶꦨꦴꦗꦤꦭꦺꦴꦏꦮꦶꦱꦺꦱꦱꦤ꧀ꦤꦶꦱ꧀ꦱꦪꦱꦺꦴꦨꦴ ꦏꦥ꧀ꦥꦛ꧀ꦜꦶꦠꦶꦨꦴꦮꦠꦺꦴ, ꦠꦺꦥꦶ ꦨꦒꦺ ꦮꦩꦶ, ꦠꦤ꧀ꦤꦶꦮꦴꦱꦶꦱꦠ꧀ꦠꦴꦮꦴꦱꦱꦩꦠꦶꦏ꧀ꦏꦩꦤꦠꦺꦴ ꦠꦥ꧀ꦥꦛꦶꦧꦢ꧀ꦣꦖꦤ꧀ꦢꦫꦴꦒꦥ꧀ꦥꦲꦴꦤꦺꦤ ꦥꦗꦲꦷꦠꦶ. ꦌꦮꦩ꧀ꦥꦶ ꦨꦒꦺ ꦮꦩꦷꦠꦶ ꦨꦒꦮꦴꦠꦶ ꦌꦮꦩꦴꦢꦶꦤꦴ ꦤꦪꦺꦤ ꦨꦒꦮꦴꦠꦶ ꦥꦢꦱ꧀ꦱ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦌꦠ꧀ꦠꦴꦮꦠꦴ ꦕꦺꦠ꧀ꦡ ꦌꦮꦁ ꦩꦺ ꦱꦸꦠꦤ꧀ꦠꦶ ꦮꦕꦤꦺꦤ ꦪꦡꦴꦱꦸꦠꦁ ꦣꦩ꧀ꦩꦁ ꦱꦮꦤꦮꦱꦺꦤ ꦨꦴꦱꦤ꧀ꦠꦺꦴ ꦨꦒꦮꦠꦺꦴ ꦣꦩ꧀ꦩꦱꦫꦷꦫꦁ ꦥꦕ꧀ꦕꦏ꧀ꦑꦁ ꦏꦫꦺꦴꦠꦶ, ꦠꦺꦤ ‘‘ꦤꦪꦶꦢꦁ ꦄꦠꦶꦏ꧀ꦏꦤ꧀ꦠꦱꦠ꧀ꦡꦸꦏꦁ ꦥꦴꦮꦕꦤꦁ, ꦄꦪꦁ ꦮꦺꦴ ꦱꦠ꧀ꦡꦴ’’ꦠꦶ ꦱꦠ꧀ꦡꦸ ꦄꦢꦱ꧀ꦱꦤꦺꦤ ꦈꦏ꧀ꦏꦟ꧀ꦜꦶꦠꦁ ꦗꦤꦁ ꦱꦩꦱ꧀ꦱꦴꦱꦺꦠꦶ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ ‘‘ꦪꦺꦴ ꦑꦺꦴ, ꦄꦴꦤꦤ꧀ꦢ, ꦩꦪꦴ ꦣꦩ꧀ꦩꦺꦴ ꦕ ꦮꦶꦤꦪꦺꦴ ꦕ ꦢꦺꦱꦶꦠꦺꦴ ꦥꦚ꧀ꦚꦠ꧀ꦠꦺꦴ, ꦱꦺꦴ ꦮꦺꦴ ꦩꦩꦕ꧀ꦕꦪꦺꦤ ꦱꦠ꧀ꦡꦴ’’ꦠꦶ (ꦢꦷ. ꦤꦶ. ꧒.꧒꧑꧖; ꦩꦶ. ꦥ. ꧔.꧑.꧑). ꦌꦏꦁ ꦱꦩꦪꦁ ꦨꦒꦮꦴꦠꦶ ꦮꦕꦤꦺꦤ ꦠꦱ꧀ꦩꦶꦁ ꦱꦩꦪꦺ ꦨꦒꦮꦠꦺꦴ ꦄꦮꦶꦗ꧀ꦗꦩꦴꦤꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ꦫꦹꦥꦏꦴꦪꦥꦫꦶꦤꦶꦧ꧀ꦧꦴꦤꦁ ꦱꦴꦣꦺꦠꦶ, ꦠꦺꦤ ‘‘ꦌꦮꦁꦮꦶꦣꦱ꧀ꦱ ꦤꦴꦩ ꦣꦩ꧀ꦩꦱ꧀ꦱ ꦢꦺꦱꦺꦠꦴ ꦢꦱꦧꦭꦣꦫꦺꦴ ꦮꦗꦶꦫꦱꦔ꧀ꦓꦴꦠꦱꦩꦴꦤꦏꦴꦪꦺꦴ ꦱꦺꦴꦥꦶ ꦨꦒꦮꦴ ꦥꦫꦶꦤꦶꦧ꧀ꦧꦸꦠꦺꦴ, ꦏꦺꦤꦚ꧀ꦚꦺꦤ ꦗꦷꦮꦶꦠꦺ ꦄꦴꦱꦴ ꦗꦤꦺꦠꦧ꧀ꦧꦴ’’ꦠꦶ ꦗꦷꦮꦶꦠꦩꦢꦩꦠ꧀ꦠꦁ ꦗꦤꦁ ꦱꦁꦮꦺꦗꦺꦠꦶ, ꦱꦢ꧀ꦣꦩ꧀ꦩꦺ ꦕꦱ꧀ꦱ ꦈꦱ꧀ꦱꦴꦲꦁ ꦗꦤꦺꦠꦶ.

ꦌꦮꦤ꧀ꦠꦶ ꦕ ꦨꦟꦤ꧀ꦠꦺꦴ ꦢꦺꦱꦤꦴꦱꦩ꧀ꦥꦠ꧀ꦠꦶꦁ ꦤꦶꦢ꧀ꦢꦶꦱꦠꦶ, ꦮꦏ꧀ꦑꦩꦴꦤꦱ꧀ꦱ ꦱꦏꦭꦱꦸꦠ꧀ꦠꦱ꧀ꦱ ꦌꦮꦤ꧀ꦠꦶ ꦤꦶꦢꦱ꧀ꦱꦤꦠꦺꦴ. ꦩꦺ ꦱꦸꦠꦤ꧀ꦠꦶ ꦱꦴꦮꦏꦱꦩ꧀ꦥꦠ꧀ꦠꦶꦁ ꦱꦮꦤꦱꦩ꧀ꦥꦠ꧀ꦠꦶꦚ꧀ꦕ ꦤꦶꦢ꧀ꦢꦶꦱꦠꦶ, ꦥꦛꦶꦱꦩ꧀ꦨꦶꦢꦴꦥꦠ꧀ꦠꦺꦤ ꦥꦚ꧀ꦕꦱꦸ ꦜꦴꦤꦺꦱꦸ ꦨꦒꦮꦠꦴ ꦌꦠꦢꦒ꧀ꦒꦺ ꦜꦥꦶꦠꦺꦤ ꦣꦩ꧀ꦩꦨꦟ꧀ꦝꦴꦒꦴꦫꦶꦏꦺꦤ ꦱꦸꦠꦨꦴꦮꦢꦷꦥꦤꦠꦺꦴ ‘‘ꦠꦚ꧀ꦕ ꦑꦺꦴ ꦩꦪꦴꦮ ꦱꦸꦠꦁ, ꦤ ꦄꦤꦸꦱ꧀ꦱꦸꦠꦶꦏꦁ, ꦤ ꦥꦫꦩ꧀ꦥꦫꦴꦨꦠ’’ꦤ꧀ꦠꦶ ꦆꦩꦱ꧀ꦱ ꦕꦠ꧀ꦡꦱ꧀ꦱ ꦢꦷꦥꦤꦠꦺꦴ. ꦌꦏꦁ ꦱꦩꦪꦤ꧀ꦠꦶ ꦏꦴꦭꦱꦩ꧀ꦥꦠ꧀ꦠꦶꦁ ꦤꦶꦢ꧀ꦢꦶꦱꦠꦶ ꦨꦒꦮꦠꦺꦴ ꦈꦫꦸꦮꦺꦭꦴꦪꦁ ꦮꦶꦲꦫꦟꦱꦩꦪꦨꦴꦮꦺꦤ ꦧꦸꦢ꧀ꦣꦸꦥ꧀ꦥꦴꦢꦥ꧀ꦥꦛꦶꦩꦟ꧀ꦝꦶꦠꦨꦴꦮꦢꦷꦥꦤꦠꦺꦴ. ꦧꦸꦢ꧀ꦣꦸꦥ꧀ꦥꦴꦢꦥꦫꦩꦴ ꦲꦶ ꦏꦴꦭꦱꦩ꧀ꦥꦢꦴ. ꦨꦒꦮꦴꦠꦶ ꦢꦺꦱꦏꦱꦩ꧀ꦥꦠ꧀ꦠꦶꦁ ꦤꦶꦢ꧀ꦢꦶꦱꦠꦶ ꦒꦸꦟꦮꦶꦱꦶꦛ꧀ꦜꦱꦠ꧀ꦠꦸꦠ꧀ꦠꦩꦒꦫꦸꦨꦴꦮꦢꦷꦥꦤꦠꦺꦴ.

ꦈꦫꦸꦮꦺꦭꦴꦪꦤ꧀ꦠꦶ ꦩꦲꦴꦮꦺꦭꦴꦪꦁ, ꦩꦲꦤ꧀ꦠꦺ ꦮꦴꦭꦸꦏꦴꦫꦴꦱꦶꦩ꧀ꦲꦷꦠꦶ ꦄꦠ꧀ꦡꦺꦴ. ꦄꦡ ꦮꦴ ꦈꦫꦹꦠꦶ ꦮꦴꦭꦸꦏꦴ ꦮꦸꦕ꧀ꦕꦠꦶ, ꦮꦺꦭꦴꦠꦶ ꦩꦫꦶꦪꦴꦢꦴ. ꦮꦺꦭꦴꦠꦶꦏ꧀ꦏꦩꦤꦲꦺꦠꦸ ꦄꦴꦨꦠꦴ ꦈꦫꦸ ꦈꦫꦸꦮꦺꦭꦴꦠꦶ ꦌꦮꦩ꧀ꦥꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ.

ꦄꦠꦷꦠꦺ ꦏꦶꦫ ꦄꦤꦸꦥ꧀ꦥꦤ꧀ꦤꦺ ꦧꦸꦢ꧀ꦣꦺ ꦢꦱꦱꦲꦱ꧀ꦱꦠꦴꦥꦱꦴ ꦠꦱ꧀ꦩꦶꦁ ꦥꦢꦺꦱꦺ ꦮꦶꦲꦫꦤ꧀ꦠꦴ ‘‘ꦏꦴꦪꦏꦩ꧀ꦩꦮꦕꦷꦏꦩ꧀ꦩꦴꦤꦶ ꦥꦫꦺꦱꦩ꧀ꦥꦶ ꦥꦴꦏꦛꦴꦤꦶ ꦲꦺꦴꦤ꧀ꦠꦶ, ꦩꦤꦺꦴꦏꦩ꧀ꦩꦁ ꦥꦤ ꦄꦥꦴꦏꦛꦁ. ꦠꦱ꧀ꦩꦴ ꦪꦺꦴ ꦩꦶꦕ꧀ꦖꦴꦮꦶꦠꦏ꧀ꦏꦁ ꦮꦶꦠꦏ꧀ꦏꦺꦠꦶ, ꦱꦺꦴ ꦄꦠ꧀ꦠꦤꦴꦮ ꦄꦠ꧀ꦠꦴꦤꦁ ꦕꦺꦴꦢꦺꦠ꧀ꦮꦴ ꦥꦠ꧀ꦠꦥꦸꦛꦺꦤ ꦮꦴꦭꦸꦏꦁ ꦄꦴꦲꦫꦶꦠ꧀ꦮꦴ ꦆꦩꦱ꧀ꦩꦶꦁ ꦜꦴꦤꦺ ꦄꦴꦏꦶꦫꦠꦸ, ꦆꦢꦩꦱ꧀ꦱ ꦢꦟ꧀ꦝꦏꦩ꧀ꦩ’’ꦤ꧀ꦠꦶ ꦏꦠꦶꦏꦮꦠ꧀ꦠꦁ ꦏꦠ꧀ꦮꦴ ꦠꦠꦺꦴ ꦥꦛ꧀ꦜꦴꦪ ꦪꦺꦴ ꦠꦴꦢꦶꦱꦁ ꦮꦶꦠꦏ꧀ꦏꦁ ꦮꦶꦠꦏ꧀ꦏꦺꦠꦶ, ꦱꦺꦴ ꦠꦠ꧀ꦡ ꦥꦠ꧀ꦠꦥꦸꦛꦺꦤ ꦮꦴꦭꦸꦏꦁ ꦄꦴꦲꦫꦶꦠ꧀ꦮꦴ ꦄꦴꦏꦶꦫꦠꦶ. ꦌꦮꦁ ꦠꦠ꧀ꦡ ꦄꦤꦸꦏ꧀ꦏꦩꦺꦤ ꦩꦲꦴꦮꦴꦭꦸꦏꦴꦫꦴꦱꦶ ꦗꦴꦠꦺꦴ, ꦠꦠꦺꦴ ꦤꦁ ꦥꦕ꧀ꦖꦶꦩꦴ ꦗꦤꦠꦴ ꦥꦫꦶꦏ꧀ꦑꦶꦥꦶꦠ꧀ꦮꦴ ꦕꦺꦠꦶꦪꦛ꧀ꦜꦴꦤꦩꦏꦴꦱꦶ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ – ‘‘ꦈꦫꦸꦮꦺꦭꦴꦪꦤ꧀ꦠꦶ ꦩꦲꦴꦮꦺꦭꦴꦪꦁ, ꦩꦲꦤ꧀ꦠꦺ ꦮꦴꦭꦸꦏꦴꦫꦴꦱꦶꦩ꧀ꦲꦷꦠꦶ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ’’ꦠꦶ.

ꦮꦶꦲꦫꦠꦷꦠꦶ ꦄꦮꦶꦱꦺꦱꦺꦤ ꦆꦫꦶꦪꦴꦥꦡꦢꦶꦧ꧀ꦧꦧ꧀ꦫꦲ꧀ꦩꦄꦫꦶꦪꦮꦶꦲꦴꦫꦺꦱꦸ ꦄꦚ꧀ꦚꦠꦫꦮꦶꦲꦴꦫꦱꦩꦔ꧀ꦒꦶꦠꦴꦥꦫꦶꦢꦷꦥꦤꦁ. ꦆꦣ ꦥꦤ ꦜꦴꦤꦤꦶꦱꦗ꧀ꦗꦴꦒꦩꦤꦱꦪꦤꦥ꧀ꦥꦨꦺꦢꦺꦱꦸ ꦆꦫꦶꦪꦴꦥꦡꦺꦱꦸ ꦄꦴꦱꦤꦱꦔ꧀ꦑꦴꦠꦆꦫꦶꦪꦴꦥꦡꦱꦩꦴꦪꦺꦴꦒꦥꦫꦶꦢꦷꦥꦤꦁ ꦄꦫꦶꦪꦮꦶꦲꦴꦫꦱꦩꦔ꧀ꦒꦶꦠꦴꦥꦫꦶꦢꦷꦥꦤꦚ꧀ꦕꦴꦠꦶ ꦮꦺꦢꦶꦠꦧ꧀ꦧꦁ. ꦠꦠ꧀ꦡ ꦪꦱ꧀ꦩꦴ ꦌꦏꦁ ꦆꦫꦶꦪꦴꦥꦡꦧꦴꦣꦤꦁ ꦄꦚ꧀ꦚꦺꦤ ꦆꦫꦶꦪꦴꦥꦡꦺꦤ ꦮꦶꦕ꧀ꦖꦶꦤ꧀ꦢꦶꦠ꧀ꦮꦴ ꦄꦥꦫꦶꦥꦠꦤ꧀ꦠꦁ ꦄꦠ꧀ꦠꦨꦴꦮꦁ ꦲꦫꦠꦶ ꦥꦮꦠ꧀ꦠꦺꦠꦶ, ꦠꦱ꧀ꦩꦴ ꦮꦶꦲꦫꦠꦷꦠꦶ ꦥꦢꦱ꧀ꦱ ꦆꦫꦶꦪꦴꦥꦡꦮꦶꦲꦴꦫꦮꦱꦺꦤꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦪꦱ꧀ꦩꦴ ꦥꦤ ꦨꦒꦮꦴ ꦢꦶꦧ꧀ꦧꦮꦶꦲꦴꦫꦴꦢꦷꦲꦶ ꦱꦠ꧀ꦠꦴꦤꦁ ꦮꦶꦮꦶꦣꦁ ꦲꦶꦠꦁ ꦲꦫꦠꦶ ꦈꦥꦲꦫꦠꦶ ꦈꦥꦤꦺꦠꦶ ꦈꦥ꧀ꦥꦴꦢꦺꦠꦶ, ꦠꦱ꧀ꦩꦴ ꦠꦺꦱꦩ꧀ꦥꦶ ꦮꦱꦺꦤ ꦮꦶꦮꦶꦣꦁ ꦲꦫꦠꦷꦠꦶ ꦌꦮꦩꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦤꦗ꧀ꦗꦴꦠꦶ ꦤꦢꦠꦶ ꦱꦤ꧀ꦢꦠꦷꦠꦶ ꦤꦢꦷ, ꦠꦱ꧀ꦱꦴ ꦤꦗ꧀ꦗꦴ, ꦤꦢꦶꦪꦴ ꦤꦶꦤ꧀ꦤꦒꦴꦪꦴꦠꦶ ꦄꦠ꧀ꦡꦺꦴ. ꦤꦺꦫꦚ꧀ꦗꦫꦴꦪꦴꦠꦶ ꦤꦺꦭꦁ ꦗꦭꦩꦱ꧀ꦱꦴꦠꦶ ‘‘ꦤꦺꦭꦚ꧀ꦗꦭꦴꦪꦴ’’ꦠꦶ ꦮꦠ꧀ꦠꦧ꧀ꦧꦺ ꦭꦏꦴꦫꦱ꧀ꦱ ꦫꦏꦴꦫꦁ ꦏꦠ꧀ꦮꦴ ‘‘ꦤꦺꦫꦚ꧀ꦗꦫꦴꦪꦴ’’ꦠꦶ ꦮꦸꦠ꧀ꦠꦁ, ꦏꦢ꧀ꦢꦩꦱꦺꦮꦴꦭꦥꦟꦏꦴꦢꦶꦢꦺꦴꦱꦫꦲꦶꦠꦱꦭꦶꦭꦴꦪꦴꦠꦶ ꦄꦠ꧀ꦡꦺꦴ. ꦏꦺꦕꦶ ‘‘ꦤꦷꦭꦗꦭꦴꦪꦴꦠꦶ ꦮꦠ꧀ꦠꦧ꧀ꦧꦺ ꦤꦺꦫꦚ꧀ꦗꦫꦴꦪꦴꦠꦶ ꦮꦸꦠ꧀ꦠ’’ꦤ꧀ꦠꦶ ꦮꦢꦤ꧀ꦠꦶ. ꦤꦴꦩꦩꦺꦮ ꦮꦴ ꦌꦠꦁ ꦌꦠꦶꦱ꧀ꦱꦴ ꦤꦢꦶꦪꦴꦠꦶ ꦮꦺꦢꦶꦠꦧ꧀ꦧꦁ. ꦠꦱ꧀ꦱꦴ ꦤꦢꦶꦪꦴ ꦠꦷꦫꦺ ꦪꦠ꧀ꦡ ꦨꦒꦮꦴ ꦮꦶꦲꦴꦱꦶ, ꦠꦁ ꦢꦱ꧀ꦱꦺꦠꦸꦁ ‘‘ꦧꦺꦴꦣꦶꦫꦸꦏ꧀ꦑꦩꦹꦭꦺ’’ꦠꦶ ꦮꦸꦠ꧀ꦠꦁ. ꦠꦠ꧀ꦡ ‘‘ꦧꦺꦴꦣꦶ ꦮꦸꦕ꧀ꦕꦠꦶ ꦕꦠꦹꦱꦸ ꦩꦒ꧀ꦒꦺꦱꦸ ꦚꦴꦟ’’ꦤ꧀ꦠꦶ ꦌꦠ꧀ꦡ (ꦕꦹꦭ꦳ꦤꦶ. ꦑꦒ꧀ꦒꦮꦶꦱꦴꦟꦱꦸꦠ꧀ꦠꦤꦶꦢ꧀ꦢꦺꦱ ꧑꧒꧑) ꦩꦒ꧀ꦒꦚꦴꦟꦁ ꦧꦺꦴꦣꦷꦠꦶ ꦮꦸꦠ꧀ꦠꦁ. ‘‘ꦥꦥ꧀ꦥꦺꦴꦠꦶ ꦧꦺꦴꦣꦶꦁ ꦮꦫꦨꦹꦫꦶꦩꦺꦣꦱꦺꦴ’’ꦠꦶ ꦌꦠ꧀ꦡ (ꦢꦷ. ꦤꦶ. ꧓.꧒꧑꧗) ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ. ꦠꦢꦸꦨꦪꦩ꧀ꦥꦶ ꦧꦺꦴꦣꦶꦁ ꦨꦒꦮꦴ ꦌꦠ꧀ꦡ ꦥꦠ꧀ꦠꦺꦴꦠꦶ ꦫꦸꦏ꧀ꦑꦺꦴꦥꦶ ꦧꦺꦴꦣꦶꦫꦸꦏ꧀ꦑꦺꦴꦠ꧀ꦮꦺꦮ ꦤꦴꦩꦁ ꦭꦨꦶ. ꦄꦡ ꦮꦴ ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦺ ꦧꦸꦗ꧀ꦙꦷꦠꦶ ꦨꦒꦮꦴ ꦧꦺꦴꦣꦶ, ꦠꦺꦤ ꦧꦸꦗ꧀ꦙꦤ꧀ꦠꦺꦤ ꦱꦤ꧀ꦤꦶꦱ꧀ꦱꦶꦠꦠ꧀ꦠꦴ ꦱꦺꦴ ꦫꦸꦏ꧀ꦑꦺꦴꦥꦶ ꦧꦺꦴꦣꦶꦫꦸꦏ꧀ꦑꦺꦴꦠꦶ ꦤꦴꦩꦁ ꦭꦨꦶ, ꦠꦱ꧀ꦱ ꦧꦺꦴꦣꦶꦫꦸꦏ꧀ꦑꦱ꧀ꦱ. ꦩꦹꦭꦺꦠꦶ ꦱꦩꦷꦥꦺ. ꦄꦪꦚ꧀ꦲꦶ ꦩꦹꦭꦱꦢ꧀ꦢꦺꦴ ‘‘ꦩꦹꦭꦴꦤꦶ ꦈꦢ꧀ꦣꦫꦺꦪ꧀ꦪ ꦄꦤ꧀ꦠꦩꦱꦺꦴ ꦈꦱꦷꦫꦤꦴꦭ꦳ꦩꦠ꧀ꦠꦴꦤꦶꦥꦷ’’ꦠꦶꦄꦴꦢꦷꦱꦸ (ꦄ. ꦤꦶ. ꧔.꧑꧙꧕) ꦩꦹꦭꦩꦹꦭꦺ ꦢꦶꦱ꧀ꦱꦠꦶ. ‘‘ꦭꦺꦴꦨꦺꦴ ꦄꦏꦸꦱꦭꦩꦹꦭ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧓.꧓꧐꧕) ꦄꦱꦴꦣꦴꦫꦟꦲꦺꦠꦸꦩ꧀ꦲꦶ. ‘‘ꦪꦴꦮꦠꦴ ꦩꦗ꧀ꦙꦤ꧀ꦲꦶꦏꦺ ꦏꦴꦭꦺ ꦖꦴꦪꦴ ꦦꦫꦠꦶ, ꦤꦶꦮꦴꦠꦺ ꦥꦟ꧀ꦟꦴꦤꦶ ꦥꦠꦤ꧀ꦠꦶ, ꦌꦠ꧀ꦠꦴꦮꦠꦴ ꦫꦸꦏ꧀ꦑꦩꦹꦭ’’ꦤ꧀ꦠꦶꦄꦴꦢꦷꦱꦸ ꦱꦩꦷꦥꦺ. ꦆꦣꦴꦥꦶ ꦱꦩꦷꦥꦺ ꦄꦣꦶꦥ꧀ꦥꦺꦠꦺꦴ, ꦠꦱ꧀ꦩꦴ ꦧꦺꦴꦣꦶꦫꦸꦏ꧀ꦑꦱ꧀ꦱ ꦩꦹꦭꦺ ꦱꦩꦷꦥꦺꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ.

ꦥꦜꦩꦴꦨꦶꦱꦩ꧀ꦧꦸꦢ꧀ꦣꦺꦴꦠꦶ ꦥꦜꦩꦁ ꦄꦨꦶꦱꦩ꧀ꦧꦸꦢ꧀ꦣꦺꦴ ꦲꦸꦠ꧀ꦮꦴ, ꦱꦧ꧀ꦧꦥꦜꦩꦁꦪꦺꦮꦴꦠꦶ ꦄꦠ꧀ꦡꦺꦴ. ꦌꦠ꧀ꦠꦴꦮꦠꦴ ꦣꦩ꧀ꦩꦨꦟ꧀ꦝꦴꦒꦴꦫꦶꦏꦺꦤ ꦈꦢꦴꦤꦢꦺꦱꦤꦴꦪ ꦤꦶꦢꦴꦤꦁ ꦜꦥꦺꦤ꧀ꦠꦺꦤ ꦏꦴꦭꦢꦺꦱꦢꦺꦱꦏꦴꦥꦢꦺꦱꦴ ꦱꦲ ꦮꦶꦱꦺꦱꦺꦤ ꦥꦏꦴꦱꦶꦠꦴ ꦲꦺꦴꦤ꧀ꦠꦶ.

ꦌꦠ꧀ꦡꦴꦲ ‘‘ꦏꦱ꧀ꦩꦴ ꦣꦩ꧀ꦩꦮꦶꦤꦪꦱꦔ꧀ꦒꦲꦺ ꦏꦪꦶꦫꦩꦴꦤꦺ ꦤꦶꦢꦴꦤꦮꦕꦤꦁ ꦮꦸꦠ꧀ꦠꦁ, ꦤꦤꦸ ꦨꦒꦮꦠꦴ ꦨꦴꦱꦶꦠꦮꦕꦤꦱ꧀ꦱꦺꦮ ꦱꦔ꧀ꦒꦲꦺꦴ ꦏꦴꦠꦧ꧀ꦧꦺꦴ’’ꦠꦶ? ꦮꦸꦕ꧀ꦕꦠꦺ – ꦢꦺꦱꦤꦴꦪ ꦕꦶꦫꦛ꧀ꦜꦶꦠꦶꦄꦱꦩ꧀ꦩꦺꦴꦱꦱꦢ꧀ꦣꦺꦪ꧀ꦪꦨꦴꦮꦱꦩ꧀ꦥꦴꦢꦤꦠ꧀ꦡꦁ. ꦏꦴꦭꦢꦺꦱꦢꦺꦱꦏꦮꦠ꧀ꦡꦸꦄꦴꦢꦷꦲꦶ ꦈꦥꦤꦶꦧꦤ꧀ꦣꦶꦠ꧀ꦮꦴ ꦜꦥꦶꦠꦴ ꦲꦶ ꦢꦺꦱꦤꦴ ꦕꦶꦫꦛ꧀ꦜꦶꦠꦶꦏꦴ ꦲꦺꦴꦠꦶ ꦄꦱꦩ꧀ꦩꦺꦴꦱꦴ ꦱꦢ꧀ꦣꦺꦪ꧀ꦪꦴ ꦕ ꦢꦺꦱꦏꦴꦭꦏꦠ꧀ꦠꦸꦲꦺꦠꦸꦤꦶꦩꦶꦠ꧀ꦠꦺꦲꦶ ꦈꦥꦤꦶꦧꦢ꧀ꦣꦺꦴ ꦮꦶꦪ ꦮꦺꦴꦲꦴꦫꦮꦶꦤꦶꦕ꧀ꦖꦪꦺꦴ. ꦠꦺꦤꦺꦮ ꦕ ꦄꦴꦪꦱ꧀ꦩꦠꦴ ꦩꦲꦴꦏꦱ꧀ꦱꦥꦺꦤ ‘‘ꦥꦜꦩꦁ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦈꦢꦴꦤꦁ ꦏꦠ꧀ꦡ ꦨꦴꦱꦶꦠ’’ꦤ꧀ꦠꦶꦄꦴꦢꦶꦤꦴ ꦢꦺꦱꦴꦢꦷꦱꦸ ꦥꦸꦕ꧀ꦖꦴꦪ ꦏꦠꦴꦪ ꦮꦶꦱ꧀ꦱꦗ꧀ꦗꦤꦁ ꦏꦫꦺꦴꦤ꧀ꦠꦺꦤ ꦣꦩ꧀ꦩꦨꦟ꧀ꦝꦴꦒꦴꦫꦶꦏꦺꦤ ‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶꦄꦴꦢꦶꦤꦴ ꦈꦢꦴꦤꦱ꧀ꦱ ꦤꦶꦢꦴꦤꦁ ꦨꦴꦱꦶꦠꦤ꧀ꦠꦶ.

ꦄꦥꦶꦕ ꦱꦠ꧀ꦡꦸ ꦱꦩ꧀ꦥꦠ꧀ꦠꦶꦥꦏꦴꦱꦤꦠ꧀ꦡꦁ ꦤꦶꦢꦴꦤꦮꦕꦤꦁ. ꦠꦡꦴꦒꦠꦱ꧀ꦱ ꦲꦶ ꦨꦒꦮꦠꦺꦴ ꦥꦸꦧ꧀ꦧꦫꦕꦤꦴꦤꦸꦩꦴꦤꦴꦒꦩꦠꦏ꧀ꦏꦴꦨꦴꦮꦠꦺꦴ ꦱꦩ꧀ꦧꦸꦢ꧀ꦣꦠ꧀ꦠꦱꦶꦢ꧀ꦣꦶ. ꦤ ꦲꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦥꦸꦧ꧀ꦧꦫꦕꦤꦴꦢꦷꦲꦶ ꦄꦠ꧀ꦡꦺꦴ ꦄꦠ꧀ꦡꦶ ꦱꦧ꧀ꦧꦠ꧀ꦡ ꦄꦥ꧀ꦥꦛꦶꦲꦠꦚꦴꦟꦕꦴꦫꦠꦴꦪ ꦌꦏꦥ꧀ꦥꦩꦴꦟꦠ꧀ꦠꦴ ꦚꦺꦪ꧀ꦪꦣꦩ꧀ꦩꦺꦱꦸ. ꦠꦡꦴ ꦄꦴꦕꦫꦶꦪꦩꦸꦛ꧀ꦜꦶꦣꦩ꧀ꦩꦩꦕ꧀ꦖꦫꦶꦪꦱꦴꦱꦤꦱꦴꦮꦏꦴꦤꦸꦫꦴꦒꦴꦨꦴꦮꦠꦺꦴ ꦑꦷꦟꦴꦱꦮꦠ꧀ꦠꦱꦶꦢ꧀ꦣꦶ. ꦤ ꦲꦶ ꦱꦧ꧀ꦧꦱꦺꦴ ꦥꦫꦶꦏ꧀ꦑꦷꦟꦴꦱꦮꦱ꧀ꦱ ꦏꦠ꧀ꦡꦕꦶꦥꦶ ꦄꦴꦕꦫꦶꦪꦩꦸꦛ꧀ꦜꦶꦄꦴꦢꦷꦤꦁ ꦱꦩ꧀ꦨꦮꦺꦴꦠꦶ ꦱꦸꦮꦶꦱꦸꦢ꧀ꦣꦱ꧀ꦱ ꦥꦫꦴꦤꦸꦒ꧀ꦒꦲꦥ꧀ꦥꦮꦠ꧀ꦠꦶ. ꦆꦠꦶ ꦢꦺꦱꦏꦢꦺꦴꦱꦨꦹꦠꦴꦤꦁ ꦢꦶꦛ꧀ꦜꦶꦱꦷꦭꦱꦩ꧀ꦥꦠ꧀ꦠꦶꦢꦹꦱꦏꦴꦤꦁ ꦄꦕ꧀ꦕꦤ꧀ꦠꦁ ꦄꦮꦶꦗ꧀ꦗꦴꦠꦟ꧀ꦲꦴꦤꦁ ꦄꦨꦴꦮꦱꦁꦱꦹꦕꦏꦺꦲꦶ ꦚꦴꦟꦱꦩ꧀ꦥꦢꦴꦥꦲꦴꦤꦱꦩ꧀ꦥꦢꦴꦨꦶꦧ꧀ꦪꦚ꧀ꦗꦏꦺꦲꦶ ꦕ ꦱꦩ꧀ꦧꦸꦢ꧀ꦣꦮꦶꦱꦸꦢ꧀ꦣꦨꦴꦮꦺꦲꦶ ꦥꦸꦫꦶꦩꦮꦺꦱꦴꦫꦗ꧀ꦗꦢ꧀ꦮꦪꦱꦶꦢ꧀ꦣꦶ, ꦠꦠꦺꦴ ꦕ ꦄꦤ꧀ꦠꦫꦴꦪꦶꦏꦤꦶꦪ꧀ꦪꦴꦤꦶꦏꦣꦩ꧀ꦩꦺꦱꦸ ꦱꦩ꧀ꦩꦺꦴꦲꦴꦨꦴꦮꦱꦶꦢ꧀ꦣꦶꦠꦺꦴ ꦥꦕ꧀ꦖꦶꦩꦮꦺꦱꦴꦫꦗ꧀ꦗꦢ꧀ꦮꦪꦱꦶꦢ꧀ꦣꦷꦠꦶ ꦨꦒꦮꦠꦺꦴ ꦕꦠꦸꦮꦺꦱꦴꦫꦗ꧀ꦗꦱꦩꦤ꧀ꦤꦴꦒꦩꦺꦴ ꦄꦠ꧀ꦠꦲꦶꦠꦥꦫꦲꦶꦠꦥ꧀ꦥꦛꦶꦥꦠ꧀ꦠꦶ ꦕ ꦤꦶꦢꦴꦤꦮꦕꦤꦺꦤ ꦥꦏꦴꦱꦶꦠꦴ ꦲꦺꦴꦤ꧀ꦠꦶ, ꦠꦠ꧀ꦡ ꦠꦠ꧀ꦡ ꦱꦩ꧀ꦥꦠ꧀ꦠꦥꦫꦶꦱꦴꦪ ꦄꦗ꧀ꦙꦴꦱꦪꦴꦤꦸꦫꦹꦥꦁ ꦜꦴꦤꦸꦥ꧀ꦥꦠ꧀ꦠꦶꦏꦥ꧀ꦥꦛꦶꦨꦴꦤꦺꦤ ꦣꦩ꧀ꦩꦢꦺꦱꦤꦴꦢꦷꦥꦤꦠꦺꦴ. ꦆꦣ ꦥꦤ ꦮꦶꦩꦸꦠ꧀ꦠꦶꦱꦸꦑꦥ꧀ꦥꦛꦶꦱꦁꦮꦺꦢꦤꦥꦛꦶꦕ꧀ꦕꦱꦩꦸꦥ꧀ꦥꦴꦢꦩꦤꦱꦶꦏꦴꦫꦥꦏꦴꦱꦤꦺꦤꦴꦠꦶ ꦪꦺꦴꦗꦺꦠꦧ꧀ꦧꦁ. ꦠꦺꦤ ꦮꦸꦠ꧀ꦠꦁ – ‘‘ꦱꦠ꧀ꦡꦸ ꦱꦩ꧀ꦥꦠ꧀ꦠꦶꦥꦏꦴꦱꦤꦠ꧀ꦡꦁ ꦤꦶꦢꦴꦤꦮꦕꦤ’’ꦤ꧀ꦠꦶ.

ꦠꦡꦴ ꦱꦴꦱꦤꦱꦩ꧀ꦥꦠ꧀ꦠꦶꦥꦏꦴꦱꦤꦠ꧀ꦡꦁ ꦤꦶꦢꦴꦤꦮꦕꦤꦁ. ꦚꦴꦟꦏꦫꦸꦟꦴꦥꦫꦶꦒ꧀ꦒꦲꦶꦠꦱꦧ꧀ꦧꦏꦶꦫꦶꦪꦱ꧀ꦱ ꦲꦶ ꦨꦒꦮꦠꦺꦴ ꦤꦠ꧀ꦡꦶ ꦤꦶꦫꦠ꧀ꦡꦏꦴ ꦥꦛꦶꦥꦠ꧀ꦠꦶ ꦄꦠ꧀ꦠꦲꦶꦠꦴ ꦮꦴ. ꦠꦱ꧀ꦩꦴ ꦥꦫꦺꦱꦁꦪꦺꦮ ꦄꦠ꧀ꦡꦴꦪ ꦥꦮꦠ꧀ꦠꦱꦧ꧀ꦧꦏꦶꦫꦶꦪꦱ꧀ꦱ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦱꦏꦭꦩ꧀ꦥꦶ ꦏꦴꦪꦮꦕꦷꦩꦤꦺꦴꦏꦩ꧀ꦩꦁ ꦪꦡꦴꦥꦮꦠ꧀ꦠꦁ ꦮꦸꦕ꧀ꦕꦩꦴꦤꦁ ꦢꦶꦛ꧀ꦜꦣꦩ꧀ꦩꦶꦏꦱꦩ꧀ꦥꦫꦴꦪꦶꦏꦥꦫꦩꦠ꧀ꦡꦺꦲꦶ ꦪꦡꦴꦫꦲꦁ ꦱꦠ꧀ꦠꦴꦤꦁ ꦄꦤꦸꦱꦴꦱꦤꦛ꧀ꦜꦺꦤ ꦱꦴꦱꦤꦁ, ꦤ ꦏꦧ꧀ꦧꦫꦕꦤꦴ. ꦠꦪꦶꦢꦁ ꦱꦠ꧀ꦡꦸ ꦕꦫꦶꦠꦁ ꦏꦴꦭꦢꦺꦱꦢꦺꦱꦏꦥꦫꦶꦱꦴꦥꦢꦺꦱꦴꦢꦷꦲꦶ ꦱꦢ꧀ꦣꦶꦁ ꦠꦠ꧀ꦡ ꦠꦠ꧀ꦡ ꦤꦶꦢꦴꦤꦮꦕꦤꦺꦤ ꦪꦡꦴꦫꦲꦁ ꦥꦏꦴꦱꦷꦪꦠꦶ, ꦆꦣ ꦥꦤ ꦄꦨꦶꦱꦩ꧀ꦧꦺꦴꦣꦶꦮꦶꦩꦸꦠ꧀ꦠꦶꦱꦸꦑꦥ꧀ꦥꦛꦶꦱꦁꦮꦺꦢꦤꦥꦛꦶꦕ꧀ꦕꦱꦩꦸꦥ꧀ꦥꦴꦢꦩꦤꦱꦶꦏꦴꦫꦺꦤꦴꦠꦶ ꦪꦺꦴꦗꦺꦠꦧ꧀ꦧꦁ. ꦠꦺꦤ ꦮꦸꦠ꧀ꦠꦁ – ‘‘ꦱꦴꦱꦤꦱꦩ꧀ꦥꦠ꧀ꦠꦶꦥꦏꦴꦱꦤꦠ꧀ꦡꦁ ꦤꦶꦢꦴꦤꦮꦕꦤ’’ꦤ꧀ꦠꦶ.

ꦄꦥꦶꦕ ꦱꦠ꧀ꦡꦸꦤꦺꦴ ꦥꦩꦴꦟꦨꦴꦮꦥ꧀ꦥꦏꦴꦱꦤꦺꦤ ꦱꦴꦱꦤꦱ꧀ꦱ ꦥꦩꦴꦟꦨꦴꦮꦢꦱ꧀ꦱꦤꦠ꧀ꦡꦁ ꦤꦶꦢꦴꦤꦮꦕꦤꦁ. ꦱꦴ ꦕꦱ꧀ꦱ ꦥꦩꦴꦟꦨꦴꦮꦢꦱ꧀ꦱꦤꦠꦴ ꦲꦺꦛ꧀ꦜꦴ ꦮꦸꦠ꧀ꦠꦤꦪꦴꦤꦸꦱꦴꦫꦺꦤ ꦮꦺꦢꦶꦠꦧ꧀ꦧꦴ. ꦨꦒꦮꦴꦠꦶ ꦲꦶ ꦆꦩꦶꦤꦴ ꦠꦡꦴꦒꦠꦱ꧀ꦱ ꦫꦴꦒꦢꦺꦴꦱꦩꦺꦴꦲꦴꦢꦶꦱꦧ꧀ꦧꦏꦶꦭꦺꦱꦩꦭꦢꦸꦕ꧀ꦕꦫꦶꦠꦴꦢꦶꦢꦺꦴꦱꦥ꧀ꦥꦲꦴꦤꦢꦷꦥꦤꦺꦤ, ꦱꦧ꧀ꦧꦱꦠ꧀ꦠꦸꦠ꧀ꦠꦩꦨꦴꦮꦢꦷꦥꦤꦺꦤ ꦕ ꦄꦤꦚ꧀ꦚꦱꦴꦣꦴꦫꦟꦚꦴꦟꦏꦫꦸꦟꦴꦢꦶꦒꦸꦟꦮꦶꦱꦺꦱꦪꦺꦴꦒꦥꦫꦶꦢꦷꦥꦤꦺꦤ, ꦄꦪꦩꦠ꧀ꦡꦺꦴ ꦱꦧ꧀ꦧꦡꦴ ꦥꦏꦴꦱꦶꦠꦺꦴ ꦲꦺꦴꦠꦷꦠꦶ ꦆꦢꦩꦺꦠ꧀ꦡ ꦤꦶꦢꦴꦤꦮꦕꦤꦥ꧀ꦥꦪꦺꦴꦗꦤꦱ꧀ꦱ ꦩꦸꦑꦩꦠ꧀ꦠꦢꦱ꧀ꦱꦤꦁ.

ꦠꦁ ꦥꦤꦺꦠꦁ ‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶ ꦄꦴꦫꦨꦶꦠ꧀ꦮꦴ ꦪꦴꦮ ‘‘ꦆꦩꦁ ꦈꦢꦴꦤꦁ ꦈꦢꦴꦤꦺꦱꦷ’’ꦠꦶ ꦥꦢꦁ, ꦠꦴꦮ ꦆꦩꦱ꧀ꦱ ꦈꦢꦴꦤꦱ꧀ꦱ ꦤꦶꦢꦴꦤꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦠꦡꦴ ꦲꦶ ꦠꦁ ꦪꦡꦴ ꦥꦛꦶꦥꦤ꧀ꦤꦺꦴ ꦨꦒꦮꦴ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦶ, ꦄꦴꦢꦶꦠꦺꦴ ꦥꦛ꧀ꦜꦴꦪ ꦠꦱ꧀ꦱ ꦏꦴꦪꦶꦏꦕꦺꦠꦱꦶꦏꦥ꧀ꦥꦛꦶꦥꦠ꧀ꦠꦶꦪꦴ ꦥꦏꦴꦱꦤꦠ꧀ꦡꦁ ꦱꦔ꧀ꦒꦷꦠꦶꦏꦴꦫꦺꦲꦶ ꦱꦔ꧀ꦒꦷꦠꦶꦏꦴꦭꦺ ꦨꦴꦱꦶꦠꦮꦕꦤꦁ.

ꦤꦤꦸ ꦕ ‘‘ꦆꦩꦱ꧀ꦩꦶꦁ ꦱꦠꦶ ꦆꦢꦁ ꦲꦺꦴꦠꦷ’’ꦠꦶꦄꦴꦢꦶ ꦨꦒꦮꦠꦺꦴ ꦌꦮ ꦮꦕꦤꦁ ꦨꦮꦶꦠꦸꦁ ꦄꦫꦲꦠꦶ, ꦤ ꦲꦶ ꦱꦠ꧀ꦡꦴꦫꦁ ꦩꦸꦚ꧀ꦕꦶꦠ꧀ꦮꦴ ꦄꦚ꧀ꦚꦺꦴ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦁ ꦢꦺꦱꦺꦠꦸꦁ ꦱꦩꦠ꧀ꦡꦺꦴ ꦲꦺꦴꦠꦷꦠꦶ? ꦱꦕ꧀ꦕꦩꦺꦠꦁ, ꦪꦡꦴ ꦥꦤ ꦨꦒꦮꦴ ꦧꦺꦴꦣꦶꦫꦸꦏ꧀ꦑꦩꦹꦭꦺ ꦣꦩ꧀ꦩꦱꦨꦴꦮꦥꦕ꧀ꦕꦮꦺꦏ꧀ꦑꦟꦮꦱꦺꦤ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦁ ꦩꦤꦱꦴꦏꦴꦱꦶ, ꦠꦡꦺꦮ ꦤꦁ ꦧꦺꦴꦣꦤꦺꦪ꧀ꦪꦧꦤ꧀ꦣꦮꦴꦤꦁ ꦧꦺꦴꦣꦤꦠ꧀ꦡꦁ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦱꦷꦲꦤꦴꦢꦱꦸꦠ꧀ꦠꦴꦢꦷꦱꦸ ꦢꦺꦱꦶꦠꦱ꧀ꦱ ꦕ ꦮꦕꦤꦴꦤꦁ ꦢꦺꦱꦶꦠꦴꦏꦴꦫꦱ꧀ꦱ ꦄꦤꦸꦏꦫꦟꦮꦱꦺꦤ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦱ꧀ꦱ ꦩꦤꦱꦶꦏꦴꦫꦁ ꦄꦛ꧀ꦜꦸꦥ꧀ꦥꦠ꧀ꦠꦶꦁ ꦏꦠ꧀ꦮꦴ ꦨꦒꦮꦠꦴ ꦨꦴꦱꦶꦠꦱ꧀ꦱ ꦆꦩꦱ꧀ꦱ ꦈꦢꦴꦤꦱ꧀ꦱ ꦣꦩ꧀ꦩꦱꦔ꧀ꦒꦴꦲꦏꦴ ꦩꦲꦴꦡꦺꦫꦴ ꦤꦶꦢꦴꦤꦁ ꦱꦔ꧀ꦒꦴꦪꦶꦁꦱꦹꦠꦶ ꦪꦡꦴꦮꦸꦠ꧀ꦠꦮꦕꦤꦁ ꦱꦔ꧀ꦒꦷꦠꦶꦏꦴꦫꦴꦤꦩꦺꦮ ꦮꦕꦤꦤ꧀ꦠꦶ ꦤꦶꦛ꧀ꦜꦩꦺꦠ꧀ꦡ ꦒꦤ꧀ꦠꦧ꧀ꦧꦁ. ꦆꦠꦺꦴ ꦥꦫꦺꦱꦸꦥꦶ ꦱꦸꦠ꧀ꦠꦤ꧀ꦠꦺꦱꦸ ꦌꦱꦺꦮ ꦤꦪꦺꦴ.

ꦌꦠ꧀ꦡ ꦕ ꦄꦠ꧀ꦠꦗ꧀ꦙꦴꦱꦪꦺꦴ ꦥꦫꦗ꧀ꦙꦴꦱꦪꦺꦴ ꦥꦸꦕ꧀ꦖꦴꦮꦱꦶꦏꦺꦴ ꦄꦛ꧀ꦜꦸꦥ꧀ꦥꦠ꧀ꦠꦶꦏꦺꦴꦠꦶ ꦕꦠ꧀ꦠꦴꦫꦺꦴ ꦱꦸꦠ꧀ꦠꦤꦶꦏ꧀ꦑꦺꦥꦴ ꦮꦺꦢꦶꦠꦧ꧀ꦧꦴ. ꦪꦡꦴ ꦲꦶ ꦄꦤꦺꦏꦱꦠꦄꦤꦺꦏꦱꦲꦱ꧀ꦱꦨꦺꦢꦴꦤꦶꦥꦶ ꦱꦸꦠ꧀ꦠꦴꦤꦶ ꦱꦁꦏꦶꦭꦺꦱꦨꦴꦒꦶꦪꦴꦢꦶꦥꦛ꧀ꦜꦴꦤꦤꦪꦺꦤ ꦱꦺꦴꦭ꦳ꦱꦮꦶꦣꦠꦁ ꦤꦴꦠꦶꦮꦠ꧀ꦠꦤ꧀ꦠꦶ, ꦌꦮꦁ ꦠꦴꦤꦶ ꦱꦧ꧀ꦧꦴꦤꦶꦥꦶ ꦄꦠ꧀ꦠꦗ꧀ꦙꦴꦱꦪꦴꦢꦶꦱꦸꦠ꧀ꦠꦤꦶꦏ꧀ꦑꦺꦥꦮꦱꦺꦤ ꦕꦠꦸꦧ꧀ꦧꦶꦣꦨꦴꦮꦁ ꦤꦴꦠꦶꦮꦠ꧀ꦠꦤ꧀ꦠꦶ. ꦏꦴꦩꦚ꧀ꦕꦺꦠ꧀ꦡ ꦄꦠ꧀ꦠꦗ꧀ꦙꦴꦱꦪꦱ꧀ꦱ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴ ꦕ ꦥꦫꦗ꧀ꦙꦴꦱꦪꦥꦸꦕ꧀ꦖꦴꦮꦱꦶꦏꦺꦲꦶ ꦱꦢ꧀ꦣꦶꦁ ꦱꦁꦱꦒ꧀ꦒꦨꦺꦢꦺꦴ ꦱꦩ꧀ꦨꦮꦠꦶ ꦄꦗ꧀ꦙꦴꦱꦪꦴꦤꦸꦱꦤ꧀ꦣꦶꦥꦸꦕ꧀ꦖꦴꦤꦸꦱꦤ꧀ꦣꦶꦱꦩ꧀ꦨꦮꦠꦺꦴ, ꦄꦠ꧀ꦠꦗ꧀ꦙꦴꦱꦪꦄꦛ꧀ꦜꦸꦥ꧀ꦥꦠ꧀ꦠꦷꦤꦁ ꦄꦚ꧀ꦚꦩꦚ꧀ꦚꦁ ꦱꦁꦱꦒ꧀ꦒꦺꦴ ꦤꦠ꧀ꦡꦷꦠꦶ ꦤꦶꦫꦮꦱꦺꦱꦺꦴ ꦥꦛ꧀ꦜꦴꦤꦤꦪꦺꦴ ꦤ ꦱꦩ꧀ꦨꦮꦠꦶ. ꦠꦢꦤ꧀ꦠꦺꦴꦒꦣꦠ꧀ꦠꦴ ꦮꦴ ꦱꦩ꧀ꦨꦮꦤ꧀ꦠꦴꦤꦁ ꦱꦺꦱꦤꦶꦏ꧀ꦑꦺꦥꦴꦤꦁ ꦩꦹꦭꦤꦶꦏ꧀ꦑꦺꦥꦮꦱꦺꦤ ꦕꦠ꧀ꦠꦴꦫꦺꦴ ꦱꦸꦠ꧀ꦠꦤꦶꦏ꧀ꦑꦺꦥꦴꦠꦶ ꦮꦸꦠ꧀ꦠꦁ.

ꦠꦠ꧀ꦫꦴꦪꦁ ꦮꦕꦤꦠ꧀ꦡꦺꦴ – ꦤꦶꦏ꧀ꦑꦶꦥꦤꦁ ꦤꦶꦏ꧀ꦑꦺꦥꦺꦴ, ꦱꦸꦠ꧀ꦠꦱ꧀ꦱ ꦤꦶꦏ꧀ꦑꦺꦥꦺꦴ ꦱꦸꦠ꧀ꦠꦤꦶꦏ꧀ꦑꦺꦥꦺꦴ, ꦱꦸꦠ꧀ꦠꦢꦺꦱꦤꦴꦠꦶ ꦄꦠ꧀ꦡꦺꦴ. ꦤꦶꦏ꧀ꦑꦶꦥꦷꦪꦠꦷꦠꦶ ꦮꦴ ꦤꦶꦏ꧀ꦑꦺꦥꦺꦴ, ꦱꦸꦠ꧀ꦠꦁ ꦌꦮ ꦤꦶꦏ꧀ꦑꦺꦥꦺꦴ ꦱꦸꦠ꧀ꦠꦤꦶꦏ꧀ꦑꦺꦥꦺꦴ. ꦄꦠ꧀ꦠꦤꦺꦴ ꦄꦗ꧀ꦙꦴꦱꦪꦺꦴ ꦄꦠ꧀ꦠꦗ꧀ꦙꦴꦱꦪꦺꦴ, ꦱꦺꦴ ꦄꦱ꧀ꦱ ꦄꦠ꧀ꦡꦶ ꦏꦴꦫꦟꦨꦹꦠꦺꦴꦠꦶ ꦄꦠ꧀ꦠꦗ꧀ꦙꦴꦱꦪꦺꦴ, ꦄꦠ꧀ꦠꦤꦺꦴ ꦄꦗ꧀ꦙꦴꦱꦪꦺꦴ ꦌꦠꦱ꧀ꦱꦴꦠꦶ ꦮꦴ ꦄꦠ꧀ꦠꦗ꧀ꦙꦴꦱꦪꦺꦴ. ꦥꦫꦗ꧀ꦙꦴꦱꦪꦺꦥꦶ ꦌꦱꦺꦮ ꦤꦪꦺꦴ. ꦥꦸꦕ꧀ꦖꦴꦪ ꦮꦱꦺꦴ ꦥꦸꦕ꧀ꦖꦴꦮꦱꦺꦴ, ꦱꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦥꦸꦕ꧀ꦖꦴꦮꦱꦶꦏꦺꦴ. ꦱꦸꦠ꧀ꦠꦢꦺꦱꦤꦴꦪ ꦮꦠ꧀ꦡꦸꦨꦹꦠꦱ꧀ꦱ ꦄꦠ꧀ꦡꦱ꧀ꦱ ꦈꦥ꧀ꦥꦠ꧀ꦠꦶ ꦄꦠ꧀ꦡꦸꦥ꧀ꦥꦠ꧀ꦠꦶ, ꦄꦠ꧀ꦡꦸꦥ꧀ꦥꦠ꧀ꦠꦶ ꦌꦮ ꦄꦛ꧀ꦜꦸꦥ꧀ꦥꦠ꧀ꦠꦶ, ꦱꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦄꦛ꧀ꦜꦸꦥ꧀ꦥꦠ꧀ꦠꦶꦏꦺꦴ. ꦄꦡ ꦮꦴ ꦤꦶꦏ꧀ꦑꦶꦥꦷꦪꦠꦶ ꦱꦸꦠ꧀ꦠꦁ ꦌꦠꦺꦤꦴꦠꦶ ꦤꦶꦏ꧀ꦑꦺꦥꦺꦴ, ꦄꦠ꧀ꦠꦗ꧀ꦙꦴꦱꦪꦴꦢꦶ ꦌꦮ. ꦌꦠꦱ꧀ꦩꦶꦁ ꦥꦤ ꦄꦠ꧀ꦡꦮꦶꦏꦥ꧀ꦥꦺ ꦄꦠ꧀ꦠꦤꦺꦴ ꦄꦗ꧀ꦙꦴꦱꦪꦺꦴ ꦄꦠ꧀ꦠꦗ꧀ꦙꦴꦱꦪꦺꦴ. ꦥꦫꦺꦱꦁ ꦄꦗ꧀ꦙꦴꦱꦪꦺꦴ ꦥꦫꦗ꧀ꦙꦴꦱꦪꦺꦴ. ꦥꦸꦕ꧀ꦖꦷꦪꦠꦷꦠꦶ ꦥꦸꦕ꧀ꦖꦴ, ꦥꦸꦕ꧀ꦖꦶꦠꦧ꧀ꦧꦺꦴ ꦄꦠ꧀ꦡꦺꦴ. ꦥꦸꦕ꧀ꦖꦤꦮꦱꦺꦤ ꦥꦮꦠ꧀ꦠꦁ ꦣꦩ꧀ꦩꦥ꧀ꦥꦛꦶꦒ꧀ꦒꦴꦲꦏꦴꦤꦁ ꦮꦕꦤꦁ ꦥꦸꦕ꧀ꦖꦴꦮꦱꦁ, ꦠꦢꦺꦮ ꦤꦶꦏ꧀ꦑꦺꦥꦱꦢ꧀ꦢꦴꦥꦺꦏ꧀ꦑꦴꦪ ꦥꦸꦕ꧀ꦖꦴꦮꦱꦶꦏꦺꦴꦠꦶ ꦥꦸꦭ꧀ꦭꦶꦔ꧀ꦒꦮꦱꦺꦤ ꦮꦸꦠ꧀ꦠꦁ. ꦠꦡꦴ ꦄꦠ꧀ꦡꦸꦥ꧀ꦥꦠ꧀ꦠꦶꦪꦺꦮ ꦄꦛ꧀ꦜꦸꦥ꧀ꦥꦠ꧀ꦠꦶꦏꦺꦴꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦌꦠ꧀ꦡ ꦕ ꦥꦫꦺꦱꦁ ꦆꦤ꧀ꦢ꧀ꦫꦶꦪꦥꦫꦶꦥꦴꦏꦴꦢꦶꦏꦴꦫꦟꦤꦶꦫꦥꦺꦏ꧀ꦑꦠ꧀ꦠꦴ ꦄꦠ꧀ꦠꦗ꧀ꦙꦴꦱꦪꦱ꧀ꦱ ꦮꦶꦱꦸꦁ ꦱꦸꦠ꧀ꦠꦤꦶꦏ꧀ꦑꦺꦥꦨꦴꦮꦺꦴ ꦪꦸꦠ꧀ꦠꦺꦴ ꦏꦺꦮꦭꦁ ꦄꦠ꧀ꦠꦤꦺꦴ ꦄꦗ꧀ꦙꦴꦱꦪꦺꦤꦺꦮ ꦣꦩ꧀ꦩꦠꦤ꧀ꦠꦶꦜꦥꦤꦠ꧀ꦡꦁ ꦥꦮꦠ꧀ꦠꦶꦠꦢꦺꦱꦤꦠ꧀ꦠꦴ, ꦥꦫꦗ꧀ꦙꦴꦱꦪꦥꦸꦕ꧀ꦖꦴꦮꦱꦶꦏꦴꦤꦁ ꦥꦤ ꦥꦫꦺꦱꦁ ꦄꦗ꧀ꦙꦴꦱꦪꦥꦸꦕ꧀ꦖꦴꦤꦁ ꦢꦺꦱꦤꦴꦥꦮꦠ꧀ꦠꦶꦲꦺꦠꦸꦨꦹꦠꦴꦤꦁ ꦈꦥ꧀ꦥꦠ꧀ꦠꦶꦪꦁ ꦥꦮꦠ꧀ꦠꦶꦠꦴꦤꦁ ꦏꦡꦩꦛ꧀ꦜꦸꦥ꧀ꦥꦠ꧀ꦠꦶꦪꦴ ꦄꦤꦮꦫꦺꦴꦣꦺꦴ, ꦥꦸꦕ꧀ꦖꦴꦮꦱꦶꦏꦄꦛ꧀ꦜꦸꦥ꧀ꦥꦠ꧀ꦠꦶꦥꦸꦧ꧀ꦧꦏꦴꦤꦁ ꦮꦴ ꦥꦫꦗ꧀ꦙꦴꦱꦪꦴꦤꦸꦫꦺꦴꦣꦺꦤ ꦥꦮꦠ꧀ꦠꦶꦠꦴꦤꦁ ꦏꦡꦁ ꦥꦫꦗ꧀ꦙꦴꦱꦪꦺ ꦄꦤꦮꦫꦺꦴꦣꦺꦴꦠꦶ? ꦤ ꦕꦺꦴꦢꦺꦠꦧ꧀ꦧꦩꦺꦠꦁ. ꦥꦫꦺꦱꦚ꧀ꦲꦶ ꦄꦨꦶꦤꦷꦲꦴꦫꦥꦫꦶꦥꦸꦕ꧀ꦖꦴꦢꦶꦮꦶꦤꦶꦕ꧀ꦖꦪꦴꦢꦶꦮꦶꦤꦶꦩꦸꦠ꧀ꦠꦱ꧀ꦱꦺꦮ ꦱꦸꦠ꧀ꦠꦤ꧀ꦠꦢꦺꦱꦤꦴꦏꦴꦫꦟꦸꦥ꧀ꦥꦴꦢꦱ꧀ꦱ ꦄꦛ꧀ꦜꦸꦥ꧀ꦥꦠ꧀ꦠꦶꦨꦴꦮꦺꦤ ꦒꦲꦶꦠꦠ꧀ꦠꦴ ꦥꦫꦗ꧀ꦙꦴꦱꦪꦥꦸꦕ꧀ꦖꦴꦮꦱꦶꦏꦴꦤꦁ ꦮꦶꦱꦸꦁ ꦒꦲꦟꦁ. ꦠꦡꦴ ꦲꦶ ꦧ꧀ꦫꦲ꧀ꦩꦗꦴꦭꦣꦩ꧀ꦩꦢꦴꦪꦴꦢꦱꦸꦠ꧀ꦠꦴꦢꦷꦤꦁ ꦮꦟ꧀ꦟꦴꦮꦟ꧀ꦟꦄꦴꦩꦶꦱꦸꦥ꧀ꦥꦴꦢꦴꦢꦶꦢꦺꦱꦤꦴꦤꦶꦩꦶꦠ꧀ꦠꦁ ꦄꦛ꧀ꦜꦸꦥ꧀ꦥꦠ꧀ꦠꦶ ꦮꦸꦕ꧀ꦕꦠꦶ, ꦥꦫꦺꦱꦁ ꦥꦸꦕ꧀ꦖꦴꦪ ꦮꦶꦤꦴ ꦄꦗ꧀ꦙꦴꦱꦪꦩꦺꦮ ꦤꦶꦩꦶꦠ꧀ꦠꦁ ꦏꦠ꧀ꦮꦴ ꦢꦺꦱꦶꦠꦺꦴ ꦥꦫꦗ꧀ꦙꦴꦱꦪꦺꦴ, ꦥꦸꦕ꧀ꦖꦴꦮꦱꦺꦤ ꦢꦺꦱꦶꦠꦺꦴ ꦥꦸꦕ꧀ꦖꦴꦮꦱꦶꦏꦺꦴꦠꦶ ꦥꦴꦏꦛꦺꦴꦪꦩꦠ꧀ꦡꦺꦴꦠꦶ.

ꦠꦠ꧀ꦡ ꦥꦜꦩꦴꦢꦷꦤꦶ ꦠꦷꦟꦶ ꦧꦺꦴꦣꦶꦱꦸꦠ꧀ꦠꦴꦤꦶ ꦩꦸꦕꦭꦶꦤ꧀ꦢꦱꦸꦠ꧀ꦠꦁ, ꦄꦴꦪꦸꦱꦔ꧀ꦑꦴꦫꦺꦴꦱ꧀ꦱꦗ꧀ꦗꦤꦱꦸꦠ꧀ꦠꦁ, ꦥꦕ꧀ꦕꦮꦺꦏ꧀ꦑꦟꦱꦸꦠ꧀ꦠꦁ, ꦥꦥꦚ꧀ꦕꦱꦚ꧀ꦚꦴꦱꦸꦠ꧀ꦠꦤ꧀ꦠꦶ ꦆꦩꦺꦱꦁ ꦈꦢꦴꦤꦴꦤꦁ ꦄꦠ꧀ꦠꦗ꧀ꦙꦴꦱꦪꦺꦴ ꦤꦶꦏ꧀ꦑꦺꦥꦺꦴ. ꦲꦸꦲꦸꦔ꧀ꦏꦱꦸꦠ꧀ꦠꦁ, ꦧ꧀ꦫꦴꦲ꧀ꦩꦟꦗꦴꦠꦶꦏꦱꦸꦠ꧀ꦠꦁ, ꦧꦴꦲꦶꦪꦱꦸꦠ꧀ꦠꦤ꧀ꦠꦶ ꦆꦩꦺꦱꦁ ꦈꦢꦴꦤꦴꦤꦁ ꦥꦸꦕ꧀ꦖꦴꦮꦱꦶꦏꦺꦴ ꦤꦶꦏ꧀ꦑꦺꦥꦺꦴ. ꦫꦴꦗꦱꦸꦠ꧀ꦠꦁ, ꦱꦏ꧀ꦏꦴꦫꦱꦸꦠ꧀ꦠꦁ, ꦈꦕ꧀ꦖꦴꦢꦤꦱꦸꦠ꧀ꦠꦁ, ꦥꦶꦟ꧀ꦝꦥꦴꦠꦶꦏꦱꦸꦠ꧀ꦠꦁ, ꦱꦶꦥ꧀ꦥꦱꦸꦠ꧀ꦠꦁ, ꦒꦺꦴꦥꦴꦭꦱꦸꦠ꧀ꦠꦁ, ꦱꦸꦤ꧀ꦢꦫꦶꦏꦱꦸꦠ꧀ꦠꦁ, ꦩꦴꦠꦸꦱꦸꦠ꧀ꦠꦁ, ꦱꦔ꧀ꦓꦨꦺꦢꦏꦱꦸꦠ꧀ꦠꦁ, ꦈꦢꦥꦴꦤꦱꦸꦠ꧀ꦠꦁ, ꦠꦡꦴꦒꦠꦸꦥ꧀ꦥꦴꦢꦱꦸꦠ꧀ꦠꦁ, ꦩꦺꦴꦤꦺꦪ꧀ꦪꦱꦸꦠ꧀ꦠꦁ, ꦥꦴꦛꦭꦶꦒꦴꦩꦶꦪꦱꦸꦠ꧀ꦠꦁ, ꦢ꧀ꦮꦺꦥꦶ ꦢꦧ꧀ꦧꦱꦸꦠ꧀ꦠꦴꦤꦷꦠꦶ ꦌꦠꦺꦱꦁ ꦈꦢꦴꦤꦴꦤꦁ ꦄꦛ꧀ꦜꦸꦥ꧀ꦥꦠ꧀ꦠꦶꦏꦺꦴ ꦤꦶꦏ꧀ꦑꦺꦥꦺꦴ. ꦥꦴꦭꦶꦭꦺꦪ꧀ꦪꦱꦸꦠ꧀ꦠꦁ, ꦥꦶꦪꦱꦸꦠ꧀ꦠꦁ, ꦤꦴꦒꦱꦩꦴꦭꦱꦸꦠ꧀ꦠꦁ, ꦮꦶꦱꦴꦑꦴꦱꦸꦠ꧀ꦠꦚ꧀ꦕꦴꦠꦶ ꦆꦩꦺꦱꦁ ꦈꦢꦴꦤꦴꦤꦁ ꦄꦠ꧀ꦠꦗ꧀ꦙꦴꦱꦪꦺꦴ ꦥꦫꦗ꧀ꦙꦴꦱꦪꦺꦴ ꦕ ꦤꦶꦏ꧀ꦑꦺꦥꦺꦴ. ꦱꦺꦱꦴꦤꦁ ꦌꦏꦥꦚ꧀ꦚꦴꦱꦴꦪ ꦱꦸꦠ꧀ꦠꦴꦤꦁ ꦥꦫꦗ꧀ꦙꦴꦱꦪꦺꦴ ꦤꦶꦏ꧀ꦑꦺꦥꦺꦴ. ꦌꦮꦩꦺꦠꦺꦱꦁ ꦈꦢꦴꦤꦴꦤꦁ ꦄꦠ꧀ꦠꦗ꧀ꦙꦴꦱꦪꦴꦢꦶꦮꦱꦺꦤ ꦤꦶꦏ꧀ꦑꦺꦥꦮꦶꦱꦺꦱꦺꦴ ꦮꦺꦢꦶꦠꦧ꧀ꦧꦺꦴ.

ꦌꦠ꧀ꦡ ꦕ ꦪꦴꦤꦶ ꦈꦢꦴꦤꦴꦤꦶ ꦨꦒꦮꦠꦴ ꦨꦶꦏ꧀ꦑꦹꦤꦁ ꦱꦩ꧀ꦩꦸꦑꦴ ꦨꦴꦱꦶꦠꦴꦤꦶ, ꦠꦴꦤꦶ ꦠꦺꦲꦶ ꦪꦡꦴꦨꦴꦱꦶꦠꦱꦸꦠ꧀ꦠꦴꦤꦶ ꦮꦕꦱꦴ ꦥꦫꦶꦕꦶꦠꦴꦤꦶ ꦩꦤꦱꦴꦤꦸꦥꦺꦏ꧀ꦑꦶꦠꦴꦤꦶ ꦣꦩ꧀ꦩꦨꦟ꧀ꦝꦴꦒꦴꦫꦶꦏꦱ꧀ꦱ ꦏꦡꦶꦠꦴꦤꦶ. ꦪꦴꦤꦶ ꦥꦤ ꦨꦒꦮꦠꦴ ꦨꦶꦏ꧀ꦑꦹꦤꦁ ꦄꦱꦩ꧀ꦩꦸꦑꦴ ꦨꦴꦱꦶꦠꦴꦤꦶ, ꦠꦴꦤꦶꦥꦶ ꦄꦥꦫꦨꦴꦒꦺ ꦨꦒꦮꦠꦴ ꦣꦩ꧀ꦩꦨꦟ꧀ꦝꦴꦒꦴꦫꦶꦏꦱ꧀ꦱ ꦥꦸꦤ ꦨꦴꦱꦶꦠꦴꦤꦶ. ꦌꦮꦁ ꦱꦧ꧀ꦧꦴꦤꦶꦥꦶ ꦠꦴꦤꦶ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦌꦏꦗ꧀ꦙꦁ ꦏꦠ꧀ꦮꦴ ꦣꦴꦫꦺꦤ꧀ꦠꦺꦴ ꦨꦶꦏ꧀ꦑꦹꦤꦚ꧀ꦕ ꦮꦴꦕꦺꦤ꧀ꦠꦺꦴ ꦄꦥꦫꦨꦴꦒꦺ ꦥꦜꦩꦩꦲꦴꦱꦔ꧀ꦒꦷꦠꦶꦏꦴꦭꦺ ꦈꦢꦴꦤꦤ꧀ꦠ꧀ꦮꦺꦮ ꦱꦔ꧀ꦒꦲꦁ ꦄꦴꦫꦺꦴꦥꦺꦱꦷꦠꦶ ꦮꦺꦢꦶꦠꦧ꧀ꦧꦁ.

ꦠꦺꦤ ꦑꦺꦴ ꦥꦤ ꦱꦩꦪꦺꦤꦴꦠꦶꦄꦴꦢꦷꦱꦸ ꦠꦺꦤ ꦱꦩꦪꦺꦤꦴꦠꦶ ꦕ ꦨꦸꦩ꧀ꦩꦠ꧀ꦡꦺ ꦏꦫꦟꦮꦕꦤꦁ, ꦑꦺꦴ ꦥꦤꦴꦠꦶ ꦤꦶꦥꦴꦠꦺꦴ, ꦠꦱ꧀ꦩꦶꦁ ꦱꦩꦪꦺꦠꦶ ꦄꦠ꧀ꦡꦺꦴ. ꦏꦱ꧀ꦩꦶꦁ ꦥꦤ ꦱꦩꦪꦺ? ꦪꦁ ꦱꦩꦪꦁ ꦨꦒꦮꦴ ꦈꦫꦸꦮꦺꦭꦴꦪꦁ ꦮꦶꦲꦫꦠꦶ ꦤꦗ꧀ꦗꦴ ꦤꦺꦫꦚ꧀ꦗꦫꦴꦪ ꦠꦷꦫꦺ ꦧꦺꦴꦣꦶꦫꦸꦏ꧀ꦑꦩꦹꦭꦺ ꦥꦜꦩꦴꦨꦶꦱꦩ꧀ꦧꦸꦢ꧀ꦣꦺꦴ. ꦠꦱ꧀ꦩꦶꦁ ꦱꦩꦪꦺ. ꦱꦠ꧀ꦠꦴꦲꦤ꧀ꦠꦶ ꦱꦠ꧀ꦠ ꦄꦲꦴꦤꦶ ꦱꦠ꧀ꦠꦴꦲꦁ, ꦄꦕ꧀ꦕꦤ꧀ꦠꦱꦁꦪꦺꦴꦒꦠ꧀ꦡꦺ ꦌꦠꦁ ꦈꦥꦪꦺꦴꦒꦮꦕꦤꦁ. ꦪꦱ꧀ꦩꦴ ꦨꦒꦮꦴ ꦠꦁ ꦱꦠ꧀ꦠꦴꦲꦁ ꦤꦶꦫꦤ꧀ꦠꦫꦠꦴꦪ ꦄꦕ꧀ꦕꦤ꧀ꦠꦩꦺꦮ ꦦꦭꦱꦩꦴꦥꦠ꧀ꦠꦶꦱꦸꦑꦺꦤ ꦮꦶꦲꦴꦱꦶ, ꦠꦱ꧀ꦩꦴ ꦱꦠ꧀ꦠꦴꦲꦤ꧀ꦠꦶ ꦄꦕ꧀ꦕꦤ꧀ꦠꦱꦁꦪꦺꦴꦒꦮꦱꦺꦤ ꦈꦥꦪꦺꦴꦒꦮꦕꦤꦁ ꦮꦸꦠ꧀ꦠꦁ. ꦌꦏꦥꦭ꧀ꦭꦔ꧀ꦏꦺꦤꦴꦠꦶ ꦮꦶꦱꦴꦑꦴꦥꦸꦟ꧀ꦟꦩꦴꦪ ꦄꦤꦠ꧀ꦡꦔ꧀ꦒꦠꦺꦪꦺꦮ ꦱꦹꦫꦶꦪꦺ ꦄꦥꦫꦴꦗꦶꦠꦥꦭ꧀ꦭꦔ꧀ꦏꦮꦫꦺ ꦮꦗꦶꦫꦴꦱꦤꦺ ꦤꦶꦱꦶꦤ꧀ꦤꦏꦴꦭꦠꦺꦴ ꦥꦛ꧀ꦜꦴꦪ ꦱꦏꦶꦩ꧀ꦥꦶ ꦄꦤꦸꦛ꧀ꦜꦲꦶꦠ꧀ꦮꦴ ꦪꦡꦴꦄꦴꦨꦸꦗꦶꦠꦺꦤ ꦌꦏꦺꦤꦺꦮ ꦥꦭ꧀ꦭꦔ꧀ꦏꦺꦤ.

ꦮꦶꦩꦸꦠ꧀ꦠꦶꦱꦸꦑꦥꦛꦶꦱꦁꦮꦺꦢꦷꦠꦶ ꦮꦶꦩꦸꦠ꧀ꦠꦶꦱꦸꦑꦁ ꦦꦭꦱꦩꦴꦥꦠ꧀ꦠꦶꦱꦸꦑꦁ ꦥꦛꦶꦱꦁꦮꦺꦢꦶꦪꦩꦴꦤꦺꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦠꦠ꧀ꦡ ꦮꦶꦩꦸꦠ꧀ꦠꦷꦠꦶ ꦠꦢꦔ꧀ꦒꦮꦶꦩꦸꦠ꧀ꦠꦶ, ꦮꦶꦏ꧀ꦑꦩ꧀ꦨꦤꦮꦶꦩꦸꦠ꧀ꦠꦶ, ꦱꦩꦸꦕ꧀ꦖꦺꦢꦮꦶꦩꦸꦠ꧀ꦠꦶ, ꦥꦛꦶꦥ꧀ꦥꦱ꧀ꦱꦢ꧀ꦣꦶꦮꦶꦩꦸꦠ꧀ꦠꦶ, ꦤꦶꦱ꧀ꦱꦫꦟꦮꦶꦩꦸꦠ꧀ꦠꦷꦠꦶ ꦥꦚ꧀ꦕ ꦮꦶꦩꦸꦠ꧀ꦠꦶꦪꦺꦴ. ꦠꦴꦱꦸ ꦪꦁ ꦢꦺꦪ꧀ꦪꦣꦩ꧀ꦩꦥꦫꦶꦕ꧀ꦕꦴꦒꦴꦢꦷꦲꦶ ꦠꦺꦲꦶ ꦠꦺꦲꦶ ꦒꦸꦟꦔ꧀ꦒꦺꦲꦶ ꦤꦴꦩꦫꦹꦥꦥꦫꦶꦕ꧀ꦖꦺꦢꦴꦢꦷꦲꦶ ꦮꦶꦥꦱ꧀ꦱꦤꦔ꧀ꦒꦺꦲꦶ ꦕ ꦪꦴꦮ ꦠꦱ꧀ꦱ ꦠꦱ꧀ꦱ ꦄꦔ꧀ꦒꦱ꧀ꦱ ꦄꦥꦫꦶꦲꦴꦤꦶꦮꦱꦺꦤ ꦥꦮꦠ꧀ꦠꦶ, ꦠꦴꦮ ꦠꦁꦠꦁꦥꦛꦶꦥꦏ꧀ꦑꦠꦺꦴ ꦮꦶꦩꦸꦕ꧀ꦕꦤꦠꦺꦴ ꦮꦶꦩꦸꦕ꧀ꦕꦤꦁ ꦥꦲꦴꦤꦁ. ꦱꦺꦪ꧀ꦪꦡꦶꦢꦁ? ꦢꦴꦤꦺꦤ ꦩꦕ꧀ꦖꦫꦶꦪꦭꦺꦴꦨꦴꦢꦶꦠꦺꦴ, ꦱꦷꦭꦺꦤ ꦥꦴꦟꦴꦠꦶꦥꦴꦠꦴꦢꦶꦠꦺꦴ, ꦤꦴꦩꦫꦹꦥꦮꦮꦠ꧀ꦡꦴꦤꦺꦤ ꦱꦏ꧀ꦏꦴꦪꦢꦶꦛ꧀ꦜꦶꦠꦺꦴ, ꦥꦕ꧀ꦕꦪꦥꦫꦶꦒ꧀ꦒꦲꦺꦤ ꦄꦲꦺꦠꦸꦮꦶꦱꦩꦲꦺꦠꦸꦢꦶꦛ꧀ꦜꦷꦲꦶ, ꦠꦱ꧀ꦱꦺꦮ ꦄꦥꦫꦨꦴꦒꦺꦤ ꦏꦔ꧀ꦑꦴꦮꦶꦠꦫꦟꦺꦤ ꦏꦡꦁꦏꦡꦷꦨꦴꦮꦠꦺꦴ, ꦏꦭꦴꦥꦱꦩ꧀ꦩꦱꦤꦺꦤ ‘‘ꦄꦲꦁ ꦩꦩꦴ’’ꦠꦶ ꦒꦴꦲꦠꦺꦴ, ꦩꦒ꧀ꦒꦴꦩꦒ꧀ꦒꦮꦮꦠ꧀ꦡꦴꦤꦺꦤ ꦄꦩꦒ꧀ꦒꦺ ꦩꦒ꧀ꦒꦱꦚ꧀ꦚꦴꦪ, ꦈꦢꦪꦢꦱ꧀ꦱꦤꦺꦤ ꦈꦕ꧀ꦖꦺꦢꦢꦶꦛ꧀ꦜꦶꦪꦴ, ꦮꦪꦢꦱ꧀ꦱꦤꦺꦤ ꦱꦱ꧀ꦱꦠꦢꦶꦛ꧀ꦜꦶꦪꦴ, ꦨꦪꦢꦱ꧀ꦱꦤꦺꦤ ꦱꦨꦪꦺ ꦄꦨꦪꦱꦚ꧀ꦚꦴꦪ, ꦄꦴꦢꦷꦤꦮꦢꦱ꧀ꦱꦤꦺꦤ ꦄꦱ꧀ꦱꦴꦢꦱꦚ꧀ꦚꦴꦪ, ꦤꦶꦧ꧀ꦧꦶꦢꦴꦤꦸꦥꦱ꧀ꦱꦤꦺꦤ ꦄꦨꦶꦫꦠꦶꦱꦚ꧀ꦚꦴꦪ, ꦩꦸꦕ꧀ꦕꦶꦠꦸꦏꦩ꧀ꦪꦠꦴꦚꦴꦟꦺꦤ ꦄꦩꦸꦕ꧀ꦕꦶꦠꦸꦏꦩ꧀ꦪꦠꦴꦪ, ꦈꦥꦺꦏ꧀ꦑꦴꦚꦴꦟꦺꦤ ꦄꦤꦸꦥꦺꦏ꧀ꦑꦴꦪ, ꦄꦤꦸꦭꦺꦴꦩꦺꦤ ꦣꦩ꧀ꦩꦛ꧀ꦜꦶꦠꦶꦪꦁ ꦤꦶꦧ꧀ꦧꦴꦤꦺ ꦕ ꦥꦛꦶꦭꦺꦴꦩꦨꦴꦮꦠꦺꦴ, ꦒꦺꦴꦠ꧀ꦫꦨꦸꦤꦴ ꦱꦔ꧀ꦑꦴꦫꦤꦶꦩꦶꦠ꧀ꦠꦨꦴꦮꦠꦺꦴ ꦮꦶꦩꦸꦕ꧀ꦕꦤꦁ, ꦄꦪꦁ ꦠꦢꦔ꧀ꦒꦮꦶꦩꦸꦠ꧀ꦠꦶ ꦤꦴꦩ. ꦪꦁ ꦥꦤ ꦈꦥꦕꦴꦫꦥ꧀ꦥꦤꦴꦨꦺꦢꦺꦤ ꦱꦩꦴꦣꦶꦤꦴ ꦪꦴꦮꦱ꧀ꦱ ꦄꦥꦫꦶꦲꦴꦤꦶꦮꦱꦺꦤ ꦥꦮꦠ꧀ꦠꦶ, ꦠꦴꦮ ꦏꦴꦩꦕ꧀ꦖꦤ꧀ꦢꦴꦢꦷꦤꦁ ꦤꦷꦮꦫꦟꦴꦤꦚ꧀ꦕꦺꦮ, ꦮꦶꦠꦏ꧀ꦏꦴꦢꦷꦤꦚ꧀ꦕ ꦥꦕ꧀ꦕꦤꦷꦏꦣꦩ꧀ꦩꦴꦤꦁ, ꦄꦤꦸꦥ꧀ꦥꦠ꧀ꦠꦶꦱꦚ꧀ꦚꦶꦠꦁ ꦮꦶꦩꦸꦕ꧀ꦕꦤꦁ, ꦄꦪꦁ ꦮꦶꦏ꧀ꦑꦩ꧀ꦨꦤꦮꦶꦩꦸꦠ꧀ꦠꦶ ꦤꦴꦩ. ꦪꦁ ꦕꦠꦸꦤ꧀ꦤꦁ ꦄꦫꦶꦪꦩꦒ꧀ꦒꦴꦤꦁ ꦨꦴꦮꦶꦠꦠ꧀ꦠꦴ ꦠꦁꦠꦁꦩꦒ꧀ꦒꦮꦠꦺꦴ ꦄꦫꦶꦪꦱ꧀ꦱ ꦱꦤ꧀ꦠꦴꦤꦺ ꦪꦡꦴꦫꦲꦁ ‘‘ꦢꦶꦛ꧀ꦜꦶꦒꦠꦴꦤꦁ ꦥꦲꦴꦤꦴꦪꦴ’’ꦠꦶꦄꦴꦢꦶꦤꦴ (ꦣ. ꦱ. ꧒꧗꧗; ꦮꦶꦨ. ꧖꧒꧘) ꦤꦪꦺꦤ ꦮꦸꦠ꧀ꦠꦱ꧀ꦱ ꦱꦩꦸꦢꦪꦥꦏ꧀ꦑꦶꦪꦱ꧀ꦱ ꦏꦶꦭꦺꦱꦒꦟꦱ꧀ꦱ ꦥꦸꦤ ꦄꦕ꧀ꦕꦤ꧀ꦠꦁ ꦄꦥ꧀ꦥꦮꦠ꧀ꦠꦶꦨꦴꦮꦺꦤ ꦱꦩꦸꦕ꧀ꦖꦺꦢꦥ꧀ꦥꦲꦴꦤꦮꦱꦺꦤ ꦮꦶꦩꦸꦕ꧀ꦕꦤꦁ, ꦄꦪꦁ ꦱꦩꦸꦕ꧀ꦖꦺꦢꦮꦶꦩꦸꦠ꧀ꦠꦶ ꦤꦴꦩ. ꦪꦁ ꦥꦤ ꦦꦭꦏ꧀ꦑꦟꦺ ꦥꦛꦶꦥ꧀ꦥꦱ꧀ꦱꦢ꧀ꦣꦠ꧀ꦠꦁ ꦏꦶꦭꦺꦱꦴꦤꦁ, ꦄꦪꦁ ꦥꦛꦶꦥ꧀ꦥꦱ꧀ꦱꦢ꧀ꦣꦶꦮꦶꦩꦸꦠ꧀ꦠꦶ ꦤꦴꦩ. ꦱꦧ꧀ꦧꦱꦔ꧀ꦑꦠꦤꦶꦱ꧀ꦱꦛꦠ꧀ꦠꦴ ꦥꦤ ꦱꦧ꧀ꦧꦱꦔ꧀ꦑꦴꦫꦮꦶꦩꦸꦠ꧀ꦠꦁ ꦤꦶꦧ꧀ꦧꦴꦤꦁ, ꦄꦪꦁ ꦤꦶꦱ꧀ꦱꦫꦟꦮꦶꦩꦸꦠ꧀ꦠꦶ ꦤꦴꦩ. ꦆꦣ ꦥꦤ ꦨꦒꦮꦠꦺꦴ ꦤꦶꦧ꧀ꦧꦴꦤꦴꦫꦩ꧀ꦩꦟꦴ ꦦꦭꦮꦶꦩꦸꦠ꧀ꦠꦶ ꦄꦣꦶꦥ꧀ꦥꦺꦠꦴ. ꦠꦺꦤ ꦮꦸꦠ꧀ꦠꦁ – ‘‘ꦮꦶꦩꦸꦠ꧀ꦠꦶꦱꦸꦑꦥꦛꦶꦱꦁꦮꦺꦢꦷꦠꦶ ꦮꦶꦩꦸꦠ꧀ꦠꦶꦱꦸꦑꦁ ꦦꦭꦱꦩꦴꦥꦠ꧀ꦠꦶꦱꦸꦑꦁ ꦥꦛꦶꦱꦁꦮꦺꦢꦶꦪꦩꦴꦤꦺꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦷꦠꦶ ꦄꦠ꧀ꦡꦺꦴ’’ꦠꦶ.

ꦮꦶꦩꦸꦠ꧀ꦠꦷꦠꦶ ꦕ ꦈꦥꦏ꧀ꦏꦶꦭꦺꦱꦺꦲꦶ ꦥꦛꦶꦥ꧀ꦥꦱ꧀ꦱꦢ꧀ꦣꦶꦮꦱꦺꦤ ꦕꦶꦠ꧀ꦠꦱ꧀ꦱ ꦮꦶꦩꦸꦠ꧀ꦠꦨꦴꦮꦺꦴ, ꦕꦶꦠ꧀ꦠꦩꦺꦮ ꦮꦴ ꦠꦡꦴ ꦮꦶꦩꦸꦠ꧀ꦠꦁ ꦮꦺꦢꦶꦠꦧ꧀ꦧꦁ, ꦠꦴꦪ ꦮꦶꦩꦸꦠ꧀ꦠꦶꦪꦴ ꦗꦴꦠꦁ ꦱꦩ꧀ꦥꦪꦸꦠ꧀ꦠꦁ ꦮꦴ ꦱꦸꦑꦁ ꦮꦶꦩꦸꦠ꧀ꦠꦶꦱꦸꦑꦁ. ‘‘ꦪꦴꦪꦁ, ꦨꦤ꧀ꦠꦺ, ꦈꦥꦺꦏ꧀ꦑꦴ ꦱꦤ꧀ꦠꦺ ꦱꦸꦑꦺ ꦮꦸꦠ꧀ꦠꦴ ꦨꦒꦮꦠꦴ’’ꦠꦶ (ꦩ. ꦤꦶ. ꧒.꧘꧘) ꦮꦕꦤꦠꦺꦴ ꦈꦥꦺꦏ꧀ꦑꦴꦥꦶ ꦕꦺꦠ꧀ꦡ ꦱꦸꦑꦩꦶꦕ꧀ꦕꦺꦮ ꦮꦺꦢꦶꦠꦧ꧀ꦧꦴ. ꦠꦡꦴ ꦕ ꦮꦸꦠ꧀ꦠꦁ ꦱꦩ꧀ꦩꦺꦴꦲꦮꦶꦤꦺꦴꦢꦤꦶꦪꦁ ‘‘ꦈꦥꦺꦏ꧀ꦑꦴ ꦥꦤ ꦱꦤ꧀ꦠꦠ꧀ꦠꦴ, ꦱꦸꦑꦩꦶꦕ꧀ꦕꦺꦮ ꦨꦴꦱꦶꦠꦴ’’ꦠꦶ (ꦮꦶꦨ. ꦄꦛ꧀ꦜ. ꧒꧓꧒). ꦨꦒꦮꦴ ꦲꦶ ꦕꦠꦸꦠ꧀ꦡꦗ꧀ꦙꦴꦤꦶꦏꦁ ꦄꦫꦲꦠ꧀ꦠꦱꦩꦴꦥꦠ꧀ꦠꦶꦁ ꦱꦩꦴꦥꦗ꧀ꦗꦠꦶ, ꦤ ꦆꦠꦫꦁ. ꦄꦡ ꦮꦴ ‘‘ꦠꦺꦱꦁ ꦮꦹꦥꦱꦩꦺꦴ ꦱꦸꦑꦺꦴ’’ꦠꦶꦄꦴꦢꦷꦱꦸ ꦪꦡꦴ ꦱꦔ꧀ꦑꦴꦫꦢꦸꦏ꧀ꦑꦹꦥꦱꦩꦺꦴ ꦱꦸꦑꦺꦴꦠꦶ ꦮꦸꦕ꧀ꦕꦠꦶ, ꦌꦮꦁ ꦱꦏꦭꦏꦶꦭꦺꦱꦢꦸꦏ꧀ꦑꦹꦥꦱꦩꦨꦴꦮꦠꦺꦴ ꦄꦒ꧀ꦒꦦꦭꦺ ꦭꦧ꧀ꦨꦩꦴꦤꦴ ꦥꦛꦶꦥ꧀ꦥꦱ꧀ꦱꦢ꧀ꦣꦶꦮꦶꦩꦸꦠ꧀ꦠꦶ ꦌꦮ ꦆꦣ ꦱꦸꦑꦤ꧀ꦠꦶ ꦮꦺꦢꦶꦠꦧ꧀ꦧꦴ. ꦠꦪꦶꦢꦁ ꦮꦶꦩꦸꦠ꧀ꦠꦶꦱꦸꦑꦁ ꦩꦒ꧀ꦒꦮꦷꦡꦶꦪꦁ ꦏꦴꦭꦤ꧀ꦠꦫꦺꦠꦶ ꦦꦭꦕꦶꦠ꧀ꦠꦱ꧀ꦱ ꦥꦮꦠ꧀ꦠꦶꦮꦶꦨꦴꦒꦺꦤ ꦢꦸꦮꦶꦣꦁ ꦲꦺꦴꦠꦶ. ꦌꦏꦺꦏꦱ꧀ꦱ ꦲꦶ ꦄꦫꦶꦪꦩꦒ꧀ꦒꦱ꧀ꦱ ꦄꦤꦤ꧀ꦠꦫꦴ ꦠꦱ꧀ꦱ ꦠꦱ꧀ꦱꦺꦮ ꦮꦶꦥꦴꦏꦨꦹꦠꦴꦤꦶ ꦤꦶꦧ꧀ꦧꦴꦤꦴꦫꦩ꧀ꦩꦟꦴꦤꦶ ꦠꦷꦟꦶ ꦢ꧀ꦮꦺ ꦮꦴ ꦦꦭꦕꦶꦠ꧀ꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ ꦄꦤꦤ꧀ꦠꦫꦮꦶꦥꦴꦏꦠ꧀ꦠꦴ ꦭꦺꦴꦏꦸꦠ꧀ꦠꦫꦏꦸꦱꦭꦴꦤꦁ. ꦪꦱ꧀ꦩꦶꦚ꧀ꦲꦶ ꦗꦮꦤꦮꦴꦫꦺ ꦄꦫꦶꦪꦩꦒ꧀ꦒꦺꦴ ꦈꦥ꧀ꦥꦗ꧀ꦗꦠꦶ, ꦠꦠ꧀ꦡ ꦪꦢꦴ ꦢ꧀ꦮꦺ ꦄꦤꦸꦭꦺꦴꦩꦴꦤꦶ, ꦠꦢꦴ ꦠꦠꦶꦪꦁ ꦒꦺꦴꦠ꧀ꦫꦨꦸ, ꦕꦠꦸꦠ꧀ꦡꦁ ꦩꦒ꧀ꦒꦕꦶꦠ꧀ꦠꦁ, ꦠꦠꦺꦴ ꦥꦫꦁ ꦠꦷꦟꦶ ꦦꦭꦕꦶꦠ꧀ꦠꦴꦤꦶ ꦲꦺꦴꦤ꧀ꦠꦶ. ꦪꦢꦴ ꦥꦤ ꦠꦷꦟꦶ ꦄꦤꦸꦭꦺꦴꦩꦴꦤꦶ, ꦠꦢꦴ ꦕꦠꦸꦠ꧀ꦡꦁ ꦒꦺꦴꦠ꧀ꦫꦨꦸ, ꦥꦚ꧀ꦕꦩꦁ ꦩꦒ꧀ꦒꦕꦶꦠ꧀ꦠꦁ, ꦠꦠꦺꦴ ꦥꦫꦁ ꦢ꧀ꦮꦺ ꦦꦭꦕꦶꦠ꧀ꦠꦴꦤꦶ ꦲꦺꦴꦤ꧀ꦠꦶ. ꦌꦮꦁ ꦕꦠꦸꦠ꧀ꦡꦁ ꦥꦚ꧀ꦕꦩꦁ ꦄꦥ꧀ꦥꦤꦴꦮꦱꦺꦤ ꦥꦮꦠ꧀ꦠꦠꦶ, ꦤ ꦠꦠꦺꦴ ꦥꦫꦁ ꦨꦮꦔ꧀ꦒꦱ꧀ꦱ ꦄꦴꦱꦤ꧀ꦤꦠ꧀ꦠꦴ. ꦏꦺꦕꦶ ꦥꦤ ‘‘ꦖꦛ꧀ꦜꦩ꧀ꦥꦶ ꦕꦶꦠ꧀ꦠꦁ ꦄꦥ꧀ꦥꦺꦠꦷ’’ꦠꦶ ꦮꦢꦤ꧀ꦠꦶ, ꦠꦁ ꦄꦛ꧀ꦜꦏꦡꦴꦱꦸ (ꦮꦶꦱꦸꦢ꧀ꦣꦶ. ꧒.꧘꧑꧑) ꦥꦛꦶꦏ꧀ꦑꦶꦠ꧀ꦠꦁ. ꦌꦮꦁ ꦩꦒ꧀ꦒꦮꦷꦡꦶꦪꦁ ꦦꦭꦁ ꦮꦺꦢꦶꦠꦧ꧀ꦧꦁ. ꦏꦴꦭꦤ꧀ꦠꦫꦺ ꦦꦭꦁ ꦥꦤ ꦦꦭꦱꦩꦴꦥꦠ꧀ꦠꦶꦮꦱꦺꦤ ꦥꦮꦠ꧀ꦠꦁ, ꦤꦶꦫꦺꦴꦣꦴ ꦮꦸꦛ꧀ꦜꦲꦤ꧀ꦠꦱ꧀ꦱ ꦈꦥ꧀ꦥꦗ꧀ꦗꦩꦴꦤꦚ꧀ꦕ ꦌꦠꦺꦤꦺꦮ ꦱꦔ꧀ꦒꦲꦶꦠꦁ. ꦱꦴ ꦥꦤꦴꦪꦁ ꦦꦭꦱꦩꦴꦥꦠ꧀ꦠꦶ ꦄꦠ꧀ꦡꦠꦺꦴ ꦭꦺꦴꦏꦸꦠ꧀ꦠꦫꦏꦸꦱꦭꦴꦤꦁ ꦮꦶꦥꦴꦏꦨꦹꦠꦴ ꦤꦶꦧ꧀ꦧꦴꦤꦴꦫꦩ꧀ꦩꦟꦴ ꦄꦥ꧀ꦥꦤꦴꦠꦶ ꦢꦛ꧀ꦜꦧ꧀ꦧꦴ.

ꦏꦺ ꦠꦁ ꦱꦩꦴꦥꦗ꧀ꦗꦤ꧀ꦠꦶ, ꦏꦺ ꦤ ꦱꦩꦴꦥꦗ꧀ꦗꦤ꧀ꦠꦷꦠꦶ? ꦱꦧ꧀ꦧꦺꦥꦶ ꦥꦸꦡꦸꦗ꧀ꦗꦤꦴ ꦤ ꦱꦩꦴꦥꦗ꧀ꦗꦤ꧀ꦠꦶ ꦄꦤꦣꦶꦒꦠꦠ꧀ꦠꦴ. ꦠꦡꦴ ꦲꦺꦛ꧀ꦜꦶꦩꦴ ꦄꦫꦶꦪꦴ ꦈꦥꦫꦶꦩꦁ, ꦈꦥꦫꦶꦩꦴꦥꦶ ꦄꦫꦶꦪꦴ ꦲꦺꦛ꧀ꦜꦶꦩꦁ ꦤ ꦱꦩꦴꦥꦗ꧀ꦗꦤ꧀ꦠꦶꦪꦺꦮ ꦥꦸꦒ꧀ꦒꦭꦤ꧀ꦠꦫꦨꦴꦮꦹꦥꦒꦩꦤꦺꦤ ꦥꦛꦶꦥ꧀ꦥꦱ꧀ꦱꦢ꧀ꦣꦨꦴꦮꦠꦺꦴ. ꦄꦠ꧀ꦠꦤꦺꦴ ꦌꦮ ꦦꦭꦁ ꦠꦺ ꦠꦺ ꦄꦫꦶꦪꦴ ꦱꦩꦴꦥꦗ꧀ꦗꦤ꧀ꦠꦶ. ꦏꦺꦕꦶ ꦥꦤ ‘‘ꦱꦺꦴꦠꦴꦥꦤ꧀ꦤꦱꦏꦢꦴꦒꦴꦩꦶꦤꦺꦴ ꦦꦭꦱꦩꦴꦥꦠ꧀ꦠꦶꦁ ꦤ ꦱꦩꦴꦥꦗ꧀ꦗꦤ꧀ꦠꦶ, ꦈꦥꦫꦶꦩꦴ ꦢ꧀ꦮꦺꦪꦺꦮ ꦱꦩꦴꦥꦗ꧀ꦗꦤ꧀ꦠꦶ ꦱꦩꦴꦣꦶꦱ꧀ꦩꦶꦁ ꦥꦫꦶꦥꦹꦫꦏꦴꦫꦶꦨꦴꦮꦠꦺꦴ’’ꦠꦶ ꦮꦢꦤ꧀ꦠꦶ. ꦠꦁ ꦄꦏꦴꦫꦟꦁ ꦥꦸꦡꦸꦗ꧀ꦗꦤꦱ꧀ꦱꦴꦥꦶ ꦄꦠ꧀ꦠꦤꦴ ꦥꦛꦶꦭꦢ꧀ꦣꦭꦺꦴꦏꦶꦪꦱꦩꦴꦣꦶꦱꦩꦴꦥꦗ꧀ꦗꦤꦠꦺꦴ. ꦏꦶꦁ ꦮꦴ ꦌꦠ꧀ꦡ ꦏꦴꦫꦟꦕꦶꦤ꧀ꦠꦴꦪ? ꦮꦸꦠ꧀ꦠꦚ꧀ꦲꦺꦠꦁ ꦥꦛꦶꦱꦩ꧀ꦨꦶꦢꦴꦪꦁ ‘‘ꦏꦠꦩꦴ ꦢꦱ ꦱꦔ꧀ꦑꦴꦫꦸꦥꦺꦏ꧀ꦑꦴ ꦮꦶꦥꦱ꧀ꦱꦤꦴꦮꦱꦺꦤ ꦈꦥ꧀ꦥꦗ꧀ꦗꦤ꧀ꦠꦶ (ꦥꦛꦶ. ꦩ. ꧑.꧕꧗), ꦏꦠꦩꦺ ꦢꦱ ꦒꦺꦴꦠ꧀ꦫꦨꦸꦣꦩ꧀ꦩꦴ ꦮꦶꦥꦱ꧀ꦱꦤꦴꦮꦱꦺꦤ ꦈꦥ꧀ꦥꦗ꧀ꦗꦤ꧀ꦠꦷ’’ꦠꦶ (ꦥꦛꦶ. ꦩ. ꧑.꧖꧐) ꦆꦩꦺꦱꦁ ꦥꦚ꧀ꦲꦴꦤꦁ ꦮꦶꦱ꧀ꦱꦗ꧀ꦗꦤꦺ ꦱꦺꦴꦠꦴꦥꦠ꧀ꦠꦶꦦꦭꦱꦩꦴꦥꦠ꧀ꦠꦠ꧀ꦡꦴꦪ ꦱꦏꦢꦴꦒꦴꦩꦶꦦꦭꦱꦩꦴꦥꦠ꧀ꦠꦠ꧀ꦡꦴꦪꦴꦠꦶ ꦠꦺꦱꦩ꧀ꦥꦶ ꦄꦫꦶꦪꦴꦤꦁ ꦦꦭꦱꦩꦴꦥꦠ꧀ꦠꦶꦱꦩꦴꦥꦗ꧀ꦗꦤꦁ ꦮꦸꦠ꧀ꦠꦁ. ꦠꦱ꧀ꦩꦴ ꦱꦧ꧀ꦧꦺꦥꦶ ꦄꦫꦶꦪꦴ ꦪꦡꦴꦱꦏꦁ ꦦꦭꦁ ꦱꦩꦴꦥꦗ꧀ꦗꦤ꧀ꦠꦷꦠꦶ ꦤꦶꦛ꧀ꦜꦩꦺꦠ꧀ꦡ ꦒꦤ꧀ꦠꦧ꧀ꦧꦁ.

ꦏꦱ꧀ꦩꦴ ꦥꦤ ꦠꦺ ꦱꦩꦴꦥꦗ꧀ꦗꦤ꧀ꦠꦷꦠꦶ? ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦠ꧀ꦡꦁ. ꦪꦡꦴ ꦲꦶ ꦫꦴꦗꦴꦤꦺꦴ ꦫꦗ꧀ꦗꦱꦸꦑꦁ, ꦢꦺꦮꦠꦴ ꦢꦶꦧ꧀ꦧꦱꦸꦑꦁ ꦄꦤꦸꦨꦮꦤ꧀ꦠꦶ, ꦌꦮꦁ ꦄꦫꦶꦪꦴ ‘‘ꦭꦺꦴꦏꦸꦠ꧀ꦠꦫꦱꦸꦑꦁ ꦄꦤꦸꦨꦮꦶꦱ꧀ꦱꦴꦩꦴ’’ꦠꦶ ꦄꦢ꧀ꦣꦴꦤꦥꦫꦶꦕ꧀ꦖꦺꦢꦁ ꦏꦠ꧀ꦮꦴ ꦆꦕ꧀ꦖꦶꦠꦏ꧀ꦑꦟꦺ ꦦꦭꦱꦩꦴꦥꦠ꧀ꦠꦶꦁ ꦱꦩꦴꦥꦗ꧀ꦗꦤ꧀ꦠꦶ.

ꦏꦡꦚ꧀ꦕꦱ꧀ꦱꦴ ꦱꦩꦴꦥꦗ꧀ꦗꦤꦁ, ꦏꦡꦁ ꦜꦴꦤꦁ, ꦏꦡꦁ ꦮꦸꦛ꧀ꦜꦴꦤꦤ꧀ꦠꦶ? ꦢ꧀ꦮꦷꦲꦶ ꦠꦴꦮ ꦄꦴꦏꦴꦫꦺꦲꦶ ꦄꦱ꧀ꦱꦴ ꦱꦩꦴꦥꦗ꧀ꦗꦤꦁ ꦲꦺꦴꦠꦶ ꦤꦶꦧ꧀ꦧꦴꦤꦠꦺꦴ ꦄꦚ꧀ꦚꦱ꧀ꦱ ꦄꦴꦫꦩ꧀ꦩꦟꦱ꧀ꦱ ꦄꦩꦤꦱꦶꦏꦴꦫꦴ, ꦤꦶꦧ꧀ꦧꦴꦤꦱ꧀ꦱ ꦕ ꦩꦤꦱꦶꦏꦴꦫꦴ. ꦪꦡꦴꦲ –

‘‘ꦢ꧀ꦮꦺ ꦑꦺꦴ, ꦄꦴꦮꦸꦱꦺꦴ, ꦥꦕ꧀ꦕꦪꦴ ꦄꦤꦶꦩꦶꦠ꧀ꦠꦴꦪ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦱꦩꦴꦥꦠ꧀ꦠꦶꦪꦴ, ꦱꦧ꧀ꦧꦤꦶꦩꦶꦠ꧀ꦠꦴꦤꦚ꧀ꦕ ꦄꦩꦤꦱꦶꦏꦴꦫꦺꦴ, ꦄꦤꦶꦩꦶꦠ꧀ꦠꦴꦪ ꦕ ꦣꦴꦠꦸꦪꦴ ꦩꦤꦱꦶꦏꦴꦫꦺꦴ’’ꦠꦶ (ꦩ. ꦤꦶ. ꧑.꧔꧕꧘).

ꦄꦪꦁ ꦥꦤꦺꦠ꧀ꦡ ꦱꦩꦴꦥꦗ꧀ꦗꦤꦏ꧀ꦏꦩꦺꦴ – ꦦꦭꦱꦩꦴꦥꦠ꧀ꦠꦶꦠ꧀ꦡꦶꦏꦺꦤ ꦄꦫꦶꦪꦱꦴꦮꦏꦺꦤ ꦫꦲꦺꦴꦒꦠꦺꦤ ꦥꦛꦶꦱꦭ꧀ꦭꦷꦤꦺꦤ ꦈꦢꦪꦧ꧀ꦧꦪꦴꦢꦶꦮꦱꦺꦤ ꦱꦔ꧀ꦑꦴꦫꦴ ꦮꦶꦥꦱ꧀ꦱꦶꦠꦧ꧀ꦧꦴ. ꦠꦱ꧀ꦱꦺꦮꦁ ꦥꦮꦠ꧀ꦠꦴꦤꦸꦥꦸꦧ꧀ꦧꦮꦶꦥꦱ꧀ꦱꦤꦱ꧀ꦱꦺꦮ ꦱꦔ꧀ꦑꦴꦫꦴꦫꦩ꧀ꦩꦟꦒꦺꦴꦠ꧀ꦫꦨꦸꦚꦴꦟꦴꦤꦤ꧀ꦠꦫꦁ ꦦꦭꦱꦩꦴꦥꦠ꧀ꦠꦶꦮꦱꦺꦤ ꦤꦶꦫꦺꦴꦣꦺ ꦕꦶꦠ꧀ꦠꦩꦥ꧀ꦥꦺꦠꦶ, ꦦꦭꦱꦩꦴꦥꦠ꧀ꦠꦶꦤꦶꦤ꧀ꦤꦨꦴꦮꦺꦤ ꦕ ꦱꦺꦏ꧀ꦑꦱ꧀ꦱꦴꦥꦶ ꦦꦭꦩꦺꦮ ꦈꦥ꧀ꦥꦗ꧀ꦗꦠꦶ, ꦤ ꦩꦒ꧀ꦒꦺꦴ. ꦪꦺ ꦥꦤ ꦮꦢꦤ꧀ꦠꦶ ‘‘ꦱꦺꦴꦠꦴꦥꦤ꧀ꦤꦺꦴ ꦄꦠ꧀ꦠꦤꦺꦴ ꦦꦭꦱꦩꦴꦥꦠ꧀ꦠꦶꦁ ꦱꦩꦴꦥꦗ꧀ꦗꦶꦱ꧀ꦱꦴꦩꦷꦠꦶ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦱꦏꦢꦴꦒꦴꦩꦷ ꦲꦺꦴꦠꦶ, ꦱꦏꦢꦴꦒꦴꦩꦷ ꦕ ꦄꦤꦴꦒꦴꦩꦷ’’ꦠꦶ. ꦠꦺ ꦮꦠ꧀ꦠꦧ꧀ꦧꦴ – ꦌꦮꦁ ꦱꦤ꧀ꦠꦺ ꦄꦤꦴꦒꦴꦩꦷ ꦄꦫꦲꦴ ꦨꦮꦶꦱ꧀ꦱꦠꦶ, ꦄꦫꦲꦴ ꦕ ꦥꦕ꧀ꦕꦺꦏꦧꦸꦢ꧀ꦣꦺꦴ, ꦥꦕ꧀ꦕꦺꦏꦧꦸꦢ꧀ꦣꦺꦴ ꦕ ꦱꦩ꧀ꦧꦸꦢ꧀ꦣꦺꦴꦠꦶ ꦄꦴꦥꦗ꧀ꦗꦺꦪ꧀ꦪ, ꦠꦱ꧀ꦩꦴ ꦪꦡꦴꦨꦶꦤꦶꦮꦺꦱꦁ ꦪꦡꦴꦗ꧀ꦙꦴꦱꦪꦁ ꦮꦶꦥꦱ꧀ꦱꦤꦴ ꦄꦠ꧀ꦡꦁ ꦱꦴꦣꦺꦠꦷꦠꦶ ꦱꦺꦏ꧀ꦑꦱ꧀ꦱꦴꦥꦶ ꦦꦭꦩꦺꦮ ꦈꦥ꧀ꦥꦗ꧀ꦗꦠꦶ, ꦤ ꦩꦒ꧀ꦒꦺꦴ. ꦦꦭꦩ꧀ꦥꦶ ꦠꦱ꧀ꦱ ꦱꦕꦺ ꦄꦤꦺꦤ ꦥꦜꦩꦗ꧀ꦙꦴꦤꦶꦏꦺꦴ ꦩꦒ꧀ꦒꦺꦴ ꦄꦣꦶꦒꦠꦺꦴ, ꦥꦜꦩꦗ꧀ꦙꦴꦤꦶꦏꦩꦺꦮ ꦈꦥ꧀ꦥꦗ꧀ꦗꦠꦶ. ꦱꦕꦺ ꦢꦸꦠꦶꦪꦴꦢꦷꦱꦸ ꦄꦚ꧀ꦚꦠꦫꦗ꧀ꦙꦴꦤꦶꦏꦺꦴ, ꦢꦸꦠꦶꦪꦴꦢꦷꦱꦸ ꦄꦚ꧀ꦚꦠꦫꦗ꧀ꦙꦴꦤꦶꦏꦩꦺꦮꦴꦠꦶ.

ꦏꦱ꧀ꦩꦴ ꦥꦤꦺꦠ꧀ꦡ ꦒꦺꦴꦠ꧀ꦫꦨꦸꦚꦴꦟꦁ ꦩꦒ꧀ꦒꦚꦴꦟꦥꦸꦫꦺꦕꦴꦫꦶꦏꦁ ꦮꦶꦪ ꦤꦶꦧ꧀ꦧꦴꦤꦴꦫꦩ꧀ꦩꦟꦁ ꦤ ꦲꦺꦴꦠꦷꦠꦶ? ꦦꦭꦚꦴꦟꦴꦤꦁ ꦄꦤꦶꦪ꧀ꦪꦴꦤꦶꦏꦨꦴꦮꦠꦺꦴ. ꦄꦫꦶꦪꦩꦒ꧀ꦒꦣꦩ꧀ꦩꦴꦪꦺꦮ ꦲꦶ ꦤꦶꦪ꧀ꦪꦴꦤꦶꦏꦴ. ꦮꦸꦠ꧀ꦠꦚ꧀ꦲꦺꦠꦁ ‘‘ꦏꦠꦩꦺ ꦣꦩ꧀ꦩꦴ ꦤꦶꦪ꧀ꦪꦴꦤꦶꦏꦴ? ꦕꦠ꧀ꦠꦴꦫꦺꦴ ꦄꦫꦶꦪꦩꦒ꧀ꦒꦴ ꦄꦥꦫꦶꦪꦴꦥꦤ꧀ꦤꦴ’’ꦠꦶ (ꦣ. ꦱ. ꧑꧒꧙꧕). ꦠꦱ꧀ꦩꦴ ꦌꦏꦤ꧀ꦠꦺꦤꦺꦮ ꦤꦶꦪ꧀ꦪꦴꦤꦶꦏꦨꦴꦮꦱ꧀ꦱ ꦈꦨꦠꦺꦴ ꦮꦸꦛ꧀ꦜꦴꦤꦨꦴꦮꦺꦤ ꦥꦮꦠ꧀ꦠꦩꦴꦤꦱ꧀ꦱ ꦄꦤꦤ꧀ꦠꦫꦥꦕ꧀ꦕꦪꦨꦹꦠꦺꦤ ꦚꦴꦟꦺꦤ ꦤꦶꦩꦶꦠ꧀ꦠꦠꦺꦴ ꦮꦸꦛ꧀ꦜꦶꦠꦺꦤꦺꦮ ꦨꦮꦶꦠꦧ꧀ꦧꦤ꧀ꦠꦶ ꦠꦱ꧀ꦱ ꦤꦶꦧ꧀ꦧꦴꦤꦴꦫꦩ꧀ꦩꦟꦠꦴ ꦪꦸꦠ꧀ꦠꦴ, ꦤ ꦥꦤ ꦄꦫꦶꦪꦩꦒ꧀ꦒꦱ꧀ꦱ ꦨꦴꦮꦶꦠꦠ꧀ꦠꦴ ꦠꦱ꧀ꦱ ꦮꦶꦥꦴꦏꦨꦴꦮꦺꦤ ꦥꦮꦠ꧀ꦠꦩꦴꦤꦴꦤꦁ ꦏꦶꦭꦺꦱꦴꦤꦁ ꦄꦱꦩꦸꦕ꧀ꦖꦶꦤ꧀ꦢꦤꦠꦺꦴ ꦄꦤꦶꦪ꧀ꦪꦴꦤꦶꦏꦠ꧀ꦠꦴ ꦄꦮꦸꦛ꧀ꦜꦴꦤꦱꦨꦴꦮꦴꦤꦁ ꦦꦭꦚꦴꦟꦴꦤꦁ ꦥꦸꦫꦺꦕꦴꦫꦶꦏꦚꦴꦟꦱ꧀ꦱ ꦏꦢꦴꦕꦶꦥꦶ ꦤꦶꦧ꧀ꦧꦴꦤꦴꦫꦩ꧀ꦩꦟꦠꦴ ꦈꦨꦪꦠ꧀ꦡ ꦄꦤꦸꦭꦺꦴꦩꦚꦴꦟꦴꦤꦁ ꦄꦠꦸꦭ꧀ꦪꦴꦏꦴꦫꦠꦺꦴ. ꦄꦫꦶꦪꦩꦒ꧀ꦒꦮꦷꦡꦶꦪꦚ꧀ꦲꦶ ꦄꦤꦸꦭꦺꦴꦩꦚꦴꦟꦴꦤꦶ ꦄꦤꦶꦧ꧀ꦧꦶꦢ꧀ꦣꦥꦸꦧ꧀ꦧꦴꦤꦁ ꦡꦹꦭꦡꦹꦭꦴꦤꦁ ꦭꦺꦴꦨꦏ꧀ꦑꦤ꧀ꦣꦴꦢꦷꦤꦁ ꦱꦴꦠꦶꦱꦪꦁ ꦥꦢꦴꦭꦤꦺꦤ ꦭꦺꦴꦏꦶꦪꦚꦴꦟꦺꦤ ꦈꦏ꧀ꦏꦁꦱꦥꦴꦫꦩꦶꦥ꧀ꦥꦠ꧀ꦠꦴꦤꦶ ꦩꦒ꧀ꦒꦚꦴꦟꦴꦤꦸꦏꦹꦭꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ, ꦦꦭꦱꦩꦴꦥꦠ꧀ꦠꦶꦮꦷꦡꦶꦪꦁ ꦥꦤ ꦠꦴꦤꦶ ꦠꦴꦤꦶ ꦠꦺꦤ ꦠꦺꦤ ꦩꦒ꧀ꦒꦺꦤ ꦠꦺꦱꦁ ꦠꦺꦱꦁ ꦏꦶꦭꦺꦱꦴꦤꦁ ꦱꦩꦸꦕ꧀ꦖꦶꦤ꧀ꦤꦠ꧀ꦠꦴ ꦠꦠ꧀ꦡ ꦤꦶꦫꦸꦱ꧀ꦱꦸꦏ꧀ꦏꦴꦤꦶ ꦏꦺꦮꦭꦁ ꦄꦫꦶꦪꦴꦤꦁ ꦦꦭꦱꦩꦴꦥꦠ꧀ꦠꦶꦱꦸꦑꦱꦩꦔ꧀ꦒꦶꦨꦴꦮꦱ꧀ꦱ ꦥꦫꦶꦏꦩ꧀ꦩꦩꦠ꧀ꦠꦴꦤꦶ ꦲꦸꦠ꧀ꦮꦴ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦤ ꦠꦺꦱꦁ ꦏꦸꦠꦺꦴꦕꦶ ꦮꦸꦛ꧀ꦜꦴꦤꦱꦩ꧀ꦨꦮꦺꦴ, ꦪꦠꦺꦴ ꦠꦺꦱꦁ ꦥꦫꦶꦪꦺꦴꦱꦴꦤꦺ ꦚꦴꦟꦁ ꦱꦔ꧀ꦑꦴꦫꦤꦶꦩꦶꦠ꧀ꦠꦁ ꦮꦸꦛ꧀ꦜꦴꦤꦠꦺꦴ ꦤꦶꦧ꧀ꦧꦴꦤꦴꦫꦩ꧀ꦩꦟꦁ ꦱꦶꦪꦴ. ꦌꦮꦚ꧀ꦕ ꦏꦠ꧀ꦮꦴ ꦱꦺꦏ꧀ꦑꦱ꧀ꦱ ꦄꦠ꧀ꦠꦤꦺꦴ ꦦꦭꦱꦩꦴꦥꦠ꧀ꦠꦶꦮꦭ꦳ꦚ꧀ꦗꦤꦠ꧀ꦡꦴꦪ ꦈꦢꦪꦧ꧀ꦧꦪꦴꦢꦶꦮꦱꦺꦤ ꦱꦔ꧀ꦑꦴꦫꦺ ꦱꦩ꧀ꦩꦱꦤ꧀ꦠꦱ꧀ꦱ ꦮꦶꦥꦱ꧀ꦱꦤꦴꦚꦴꦟꦴꦤꦸꦥꦸꦧ꧀ꦧꦴꦪ ꦦꦭꦩꦺꦮ ꦈꦥ꧀ꦥꦗ꧀ꦗꦠꦶ, ꦤ ꦩꦒ꧀ꦒꦺꦴꦠꦶ ꦄꦪꦚ꧀ꦕ ꦄꦠ꧀ꦡꦺꦴ ꦱꦩꦠ꧀ꦡꦶꦠꦺꦴ ꦲꦺꦴꦠꦶ. ꦌꦮꦁ ꦠꦴꦮ ꦦꦭꦱꦩꦴꦥꦠ꧀ꦠꦶꦪꦴ ꦱꦩꦴꦥꦗ꧀ꦗꦤꦁ ꦮꦺꦢꦶꦠꦧ꧀ꦧꦁ.

‘‘ꦠꦪꦺꦴ ꦑꦺꦴ, ꦄꦴꦮꦸꦱꦺꦴ, ꦥꦕ꧀ꦕꦪꦴ ꦄꦤꦶꦩꦶꦠ꧀ꦠꦴꦪ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦜꦶꦠꦶꦪꦴ, ꦱꦧ꧀ꦧꦤꦶꦩꦶꦠ꧀ꦠꦴꦤꦁ ꦄꦩꦤꦱꦶꦏꦴꦫꦺꦴ, ꦄꦤꦶꦩꦶꦠ꧀ꦠꦴꦪ ꦕ ꦣꦴꦠꦸꦪꦴ ꦩꦤꦱꦶꦏꦴꦫꦺꦴ, ꦥꦸꦧ꧀ꦧꦺ ꦕ ꦄꦨꦶꦱꦔ꧀ꦑꦴꦫꦺꦴ’’ꦠꦶ (ꦩ. ꦤꦶ. ꧑.꧔꧕꧘) –

ꦮꦕꦤꦠꦺꦴ ꦥꦤꦱ꧀ꦱꦴ ꦠꦷꦲꦴꦏꦴꦫꦺꦲꦶ ꦜꦴꦤꦁ ꦲꦺꦴꦠꦶ. ꦠꦠ꧀ꦡ ꦥꦸꦧ꧀ꦧꦺ ꦕ ꦄꦨꦶꦱꦔ꧀ꦑꦴꦫꦺꦴꦠꦶ ꦱꦩꦴꦥꦠ꧀ꦠꦶꦠꦺꦴ ꦥꦸꦧ꧀ꦧꦺ ꦏꦴꦭꦥꦫꦶꦕ꧀ꦖꦺꦢꦺꦴ. ‘‘ꦄꦱꦸꦏꦱ꧀ꦩꦶꦁ ꦤꦴꦩ ꦏꦴꦭꦺ ꦮꦸꦛ꧀ꦜꦲꦶꦱ꧀ꦱꦴꦩꦷ’’ꦠꦶ ꦥꦫꦶꦕ꧀ꦖꦶꦤ꧀ꦤꦠ꧀ꦠꦴ ꦲꦶꦱ꧀ꦱꦴ ꦪꦴꦮ ꦱꦺꦴ ꦏꦴꦭꦺꦴ ꦤꦴꦒꦕ꧀ꦖꦠꦶ, ꦠꦴꦮ ꦮꦸꦛ꧀ꦜꦴꦤꦁ ꦤ ꦲꦺꦴꦠꦶ.

‘‘ꦢ꧀ꦮꦺ ꦑꦺꦴ, ꦄꦴꦮꦸꦱꦺꦴ, ꦥꦕ꧀ꦕꦪꦴ ꦄꦤꦶꦩꦶꦠ꧀ꦠꦴꦪ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦮꦸꦛ꧀ꦜꦴꦤꦱ꧀ꦱ, ꦱꦧ꧀ꦧꦤꦶꦩꦶꦠ꧀ꦠꦴꦤꦚ꧀ꦕ ꦩꦤꦱꦶꦏꦴꦫꦺꦴ, ꦄꦤꦶꦩꦶꦠ꧀ꦠꦴꦪ ꦕ ꦣꦴꦠꦸꦪꦴ ꦄꦩꦤꦱꦶꦏꦴꦫꦺꦴ’’ꦠꦶ (ꦩ. ꦤꦶ. ꧑.꧔꧕꧘) –

ꦮꦕꦤꦠꦺꦴ ꦥꦤꦱ꧀ꦱꦴ ꦢ꧀ꦮꦷꦲꦴꦏꦴꦫꦺꦲꦶ ꦮꦸꦛ꧀ꦜꦴꦤꦁ ꦲꦺꦴꦠꦶ. ꦠꦠ꧀ꦡ ꦱꦧ꧀ꦧꦤꦶꦩꦶꦠ꧀ꦠꦴꦤꦤ꧀ꦠꦶ ꦫꦹꦥꦤꦶꦩꦶꦠ꧀ꦠꦮꦺꦢꦤꦴꦱꦚ꧀ꦚꦴꦱꦔ꧀ꦑꦴꦫꦮꦶꦚ꧀ꦚꦴꦟꦤꦶꦩꦶꦠ꧀ꦠꦴꦤꦁ. ꦏꦴꦩꦚ꧀ꦕ ꦤ ꦱꦧ꧀ꦧꦴꦤꦺꦮꦺꦠꦴꦤꦶ ꦌꦏꦠꦺꦴ ꦩꦤꦱꦶ ꦏꦫꦺꦴꦠꦶ, ꦱꦧ꧀ꦧꦱꦔ꧀ꦒꦴꦲꦶꦏꦮꦱꦺꦤ ꦥꦤꦺꦮꦁ ꦮꦸꦠ꧀ꦠꦁ. ꦠꦱ꧀ꦩꦴ ꦪꦁ ꦨꦮꦔ꧀ꦒꦱ꧀ꦱ ꦄꦴꦫꦩ꧀ꦩꦟꦁ, ꦠꦱ꧀ꦱ ꦩꦤꦱꦶꦏꦫꦟꦺꦤ ꦦꦭꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦤꦁ ꦲꦺꦴꦠꦷꦠꦶ ꦌꦮꦁ ꦄꦱ꧀ꦱꦴ ꦮꦸꦛ꧀ꦜꦴꦤꦁ ꦮꦺꦢꦶꦠꦧ꧀ꦧꦁ. ꦠꦪꦶꦢꦁ ꦌꦮꦩꦶꦣ ꦱꦩꦴꦥꦗ꧀ꦗꦤꦮꦸꦛ꧀ꦜꦴꦤꦁ ꦄꦫꦲꦠ꧀ꦠꦦꦭꦨꦹꦠꦁ –

‘‘ꦥꦛꦶꦥ꧀ꦥꦱ꧀ꦱꦢ꧀ꦣꦢꦫꦡꦁ, ꦄꦩꦠꦴꦫꦩ꧀ꦩꦟꦁ ꦱꦸꦨꦁ;

ꦮꦤ꧀ꦠꦭꦺꦴꦏꦴꦩꦶꦱꦁ ꦱꦤ꧀ꦠꦁ, ꦱꦴꦩꦚ꧀ꦚꦦꦭꦩꦸꦠ꧀ꦠꦩꦁ’’.

ꦆꦠꦶ ꦮꦸꦠ꧀ꦠꦁ ꦱꦴꦠꦴꦠꦶꦱꦴꦠꦁ ꦮꦶꦩꦸꦠ꧀ꦠꦶꦱꦸꦑꦁ ꦥꦛꦶꦱꦁꦮꦺꦢꦺꦱꦶ. ꦠꦺꦤ ꦮꦸꦠ꧀ꦠꦁ – ‘‘ꦮꦶꦩꦸꦠ꧀ꦠꦶꦱꦸꦑꦥꦛꦶꦱꦁꦮꦺꦢꦷꦠꦶ ꦮꦶꦩꦸꦠ꧀ꦠꦶꦱꦸꦑꦁ ꦦꦭꦱꦩꦴꦥꦠ꧀ꦠꦶꦱꦸꦑꦁ ꦥꦛꦶꦱꦁꦮꦺꦢꦶꦪꦩꦴꦤꦺꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦷꦠꦶ ꦄꦠ꧀ꦡꦺꦴ’’ꦠꦶ.

ꦄꦡꦴꦠꦶ ꦄꦣꦶꦏꦴꦫꦠ꧀ꦡꦺ ꦤꦶꦥꦴꦠꦺꦴ. ꦑꦺꦴꦠꦶ ꦥꦢꦥꦹꦫꦟꦺ. ꦠꦺꦱꦸ ꦄꦣꦶꦏꦴꦫꦠ꧀ꦡꦺꦤ ꦄꦡꦴꦠꦶ ꦆꦩꦶꦤꦴ ꦮꦶꦩꦸꦠ꧀ꦠꦶꦱꦸꦑꦥꦛꦶꦱꦁꦮꦺꦢꦤꦠꦺꦴ ꦄꦚ꧀ꦚꦁ ꦄꦣꦶꦏꦴꦫꦁ ꦢꦱ꧀ꦱꦺꦠꦶ. ꦏꦺꦴ ꦥꦤꦺꦱꦺꦴꦠꦶ? ꦥꦛꦶꦕ꧀ꦕꦱꦩꦸꦥ꧀ꦥꦴꦢꦩꦤꦱꦶꦏꦴꦫꦺꦴ. ꦄꦡꦴꦠꦶ ꦮꦴ ꦥꦕ꧀ꦖꦴꦠꦶ ꦌꦠꦱ꧀ꦩꦶꦁ ꦄꦠ꧀ꦡꦺ ꦤꦶꦥꦴꦠꦺꦴ, ꦠꦺꦤ ‘‘ꦠꦱ꧀ꦱ ꦱꦠ꧀ꦠꦴꦲꦱ꧀ꦱ ꦄꦕ꧀ꦕꦪꦺꦤꦴ’’ꦠꦶ ꦮꦏ꧀ꦑꦩꦴꦤꦩꦺꦮ ꦄꦠ꧀ꦡꦁ ꦗꦺꦴꦠꦺꦠꦶ. ꦠꦱ꧀ꦱ ꦱꦠ꧀ꦠꦴꦲꦱ꧀ꦱꦴꦠꦶ ꦥꦭ꧀ꦭꦔ꧀ꦏꦱꦠ꧀ꦠꦴꦲꦱ꧀ꦱ. ꦄꦕ꧀ꦕꦪꦺꦤꦴꦠꦶ ꦄꦥꦒꦩꦺꦤ. ꦠꦩ꧀ꦲꦴ ꦱꦩꦴꦣꦶꦩ꧀ꦲꦴꦠꦶ ꦄꦫꦲꦠ꧀ꦠꦦꦭꦱꦩꦴꦣꦶꦠꦺꦴ. ꦆꦣ ꦥꦤ ꦜꦠ꧀ꦮꦴ ꦥꦛꦶꦥꦴꦛꦶꦪꦴ ꦱꦠ꧀ꦠ ꦱꦠ꧀ꦠꦴꦲꦴꦤꦶ ꦢꦱ꧀ꦱꦺꦠꦧ꧀ꦧꦴꦤꦷꦠꦶ ꦏꦺꦕꦶ ꦠꦴꦤꦶ ꦮꦶꦠ꧀ꦡꦴꦫꦪꦶꦁꦱꦸ. ꦩꦪꦁ ꦥꦤ ꦠꦴꦤꦶ ꦑꦤ꧀ꦣꦏꦥꦴꦜꦺꦤ ꦆꦩꦶꦱ꧀ꦱꦴ ꦈꦢꦴꦤꦥꦴꦭ꦳ꦶꦪꦴ ꦄꦮꦶꦫꦺꦴꦣꦢꦱ꧀ꦱꦤꦩꦸꦑꦺꦤ ꦥꦫꦠꦺꦴ ꦮꦟ꧀ꦟꦪꦶꦱ꧀ꦱꦴꦩ. ꦫꦠ꧀ꦠꦶꦪꦴꦠꦶ ꦄꦮꦪꦮꦱꦩ꧀ꦧꦤ꧀ꦣꦺ ꦱꦴꦩꦶꦮꦕꦤꦁ. ꦥꦜꦩꦤ꧀ꦠꦶ ꦄꦕ꧀ꦕꦤ꧀ꦠꦱꦁꦪꦺꦴꦒꦠ꧀ꦡꦺ ꦈꦥꦪꦺꦴꦒꦮꦕꦤꦁ. ꦨꦒꦮꦴ ꦲꦶ ꦠꦱ꧀ꦱꦴ ꦫꦠ꧀ꦠꦶꦪꦴ ꦱꦏꦭꦩ꧀ꦥꦶ ꦥꦜꦩꦁ ꦪꦴꦩꦁ ꦠꦺꦤꦺꦮ ꦩꦤꦱꦶꦏꦴꦫꦺꦤ ꦪꦸꦠ꧀ꦠꦺꦴ ꦄꦲꦺꦴꦱꦷꦠꦶ.

ꦥꦛꦶꦕ꧀ꦕꦱꦩꦸꦥ꧀ꦥꦴꦢꦤ꧀ꦠꦶ ꦥꦕ꧀ꦕꦪꦣꦩ꧀ꦩꦁ. ꦄꦮꦶꦗ꧀ꦗꦴꦢꦪꦺꦴ ꦲꦶ ꦥꦕ꧀ꦕꦪꦣꦩ꧀ꦩꦴ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦺꦴ. ꦏꦡꦩꦶꦢꦁ ꦗꦴꦤꦶꦠꦧ꧀ꦧꦤ꧀ꦠꦶ ꦕꦺ? ꦨꦒꦮꦠꦺꦴ ꦮꦕꦤꦺꦤ. ꦨꦒꦮꦠꦴ ꦲꦶ ‘‘ꦠꦱ꧀ꦩꦴꦠꦶꦲꦴꦤꦤ꧀ꦢ, ꦌꦱꦺꦮ ꦲꦺꦠꦸ, ꦌꦠꦁ ꦤꦶꦢꦴꦤꦁ, ꦌꦱ ꦱꦩꦸꦢꦪꦺꦴ, ꦌꦱ ꦥꦕ꧀ꦕꦪꦺꦴ ꦗꦫꦴꦩꦫꦟꦱ꧀ꦱ, ꦪꦢꦶꦢꦁ ꦗꦴꦠꦶ…ꦥꦺ… ꦱꦔ꧀ꦑꦴꦫꦴꦤꦁ, ꦪꦢꦶꦢꦁ ꦄꦮꦶꦗ꧀ꦗꦴ’’ꦠꦶ (ꦢꦷ. ꦤꦶ. ꧒.꧑꧐꧕ ꦄꦴꦢꦪꦺꦴ) ꦌꦮꦁ ꦄꦮꦶꦗ꧀ꦗꦴꦢꦪꦺꦴ ꦲꦺꦠꦹꦠꦶ ꦮꦸꦠ꧀ꦠꦴ. ꦪꦡꦴ ꦢ꧀ꦮꦴꦢꦱ ꦥꦕ꧀ꦕꦪꦴ ꦢ꧀ꦮꦴꦢꦱ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦴꦠꦶ.

ꦠꦠ꧀ꦫꦴꦪꦁ ꦮꦕꦤꦠ꧀ꦡꦺꦴ – ꦄꦚ꧀ꦚꦩꦚ꧀ꦚꦁ ꦥꦛꦶꦕ꧀ꦕ ꦥꦛꦶꦩꦸꦑꦁ ꦏꦠ꧀ꦮꦴ ꦏꦴꦫꦟꦱꦩꦮꦴꦪꦁ ꦄꦥ꧀ꦥꦛꦶꦏ꧀ꦑꦶꦥꦶꦠ꧀ꦮꦴ ꦱꦲꦶꦠꦺ ꦈꦥ꧀ꦥꦴꦢꦺꦠꦷꦠꦶ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦺꦴ. ꦄꦡ ꦮꦴ ꦥꦛꦶꦕ꧀ꦕ ꦥꦕ꧀ꦕꦺꦠꦧ꧀ꦧꦁ ꦥꦕ꧀ꦕꦪꦴꦫꦲꦠꦁ ꦥꦕ꧀ꦕꦪꦁ ꦥꦛꦶꦒꦤ꧀ꦠ꧀ꦮꦴ ꦤ ꦮꦶꦤꦴ ꦠꦺꦤ ꦱꦩ꧀ꦧꦤ꧀ꦣꦱ꧀ꦱ ꦈꦥ꧀ꦥꦴꦢꦺꦴ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦺꦴ. ꦥꦛꦶꦕ꧀ꦕꦱꦩꦸꦥ꧀ꦥꦴꦢꦺꦴꦠꦶ ꦕꦺꦠ꧀ꦡ ꦱꦩꦸꦥ꧀ꦥꦴꦢꦥꦢꦛ꧀ꦜꦴꦤꦮꦕꦤꦮꦶꦚ꧀ꦚꦺꦪ꧀ꦪꦺꦴ ꦦꦭꦱ꧀ꦱ ꦈꦥ꧀ꦥꦴꦢꦤꦱꦩꦠ꧀ꦡꦠꦴꦪꦸꦠ꧀ꦠꦺꦴ ꦲꦺꦠꦸ, ꦤ ꦥꦛꦶꦕ꧀ꦕꦱꦩꦸꦥ꧀ꦥꦠ꧀ꦠꦶꦩꦠ꧀ꦠꦁ ꦮꦺꦢꦶꦠꦧ꧀ꦧꦁ. ꦄꦡ ꦮꦴ ꦥꦕ꧀ꦕꦺꦠꦸꦁ ꦄꦫꦲꦤ꧀ꦠꦶ ꦤꦁ ꦥꦟ꧀ꦝꦶꦠꦴꦠꦶ ꦥꦛꦶꦕ꧀ꦕꦺꦴ, ꦱꦩ꧀ꦩꦴ ꦱꦪꦩꦺꦮ ꦮꦴ ꦈꦥ꧀ꦥꦴꦢꦺꦠꦷꦠꦶ ꦱꦩꦸꦥ꧀ꦥꦴꦢꦺꦴ, ꦥꦛꦶꦕ꧀ꦕꦺꦴ ꦕ ꦱꦺꦴ ꦱꦩꦸꦥ꧀ꦥꦴꦢꦺꦴ ꦕꦴꦠꦶ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦺꦴꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ.

ꦄꦤꦸꦭꦺꦴꦩꦤ꧀ꦠꦶ ‘‘ꦄꦮꦶꦗ꧀ꦗꦴꦥꦕ꧀ꦕꦪꦴ ꦱꦔ꧀ꦑꦴꦫꦴ’’ꦠꦶꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦺꦴ ꦄꦮꦶꦗ꧀ꦗꦴꦢꦶꦏꦺꦴ ꦥꦕ꧀ꦕꦪꦴꦏꦴꦫꦺꦴ ꦄꦠ꧀ꦠꦤꦴ ꦏꦠ꧀ꦠꦧ꧀ꦧꦏꦶꦕ꧀ꦕꦏꦫꦟꦠꦺꦴ ꦄꦤꦸꦭꦺꦴꦩꦺꦴꦠꦶ ꦮꦸꦕ꧀ꦕꦠꦶ. ꦄꦡ ꦮꦴ ꦄꦴꦢꦶꦠꦺꦴ ꦥꦛ꧀ꦜꦴꦪ ꦄꦤ꧀ꦠꦁ ꦥꦴꦥꦺꦠ꧀ꦮꦴ ꦮꦸꦠ꧀ꦠꦠ꧀ꦠꦴ ꦥꦮꦠ꧀ꦠꦶꦪꦴ ꦮꦴ ꦄꦤꦸꦭꦺꦴꦩꦠꦺꦴ ꦄꦤꦸꦭꦺꦴꦩꦺꦴ, ꦠꦁ ꦄꦤꦸꦭꦺꦴꦩꦁ. ꦱꦴꦣꦸꦏꦁ ꦩꦤꦱꦴꦏꦴꦱꦷꦠꦶ ꦱꦏ꧀ꦏꦕ꧀ꦕꦁ ꦩꦤꦱꦶ ꦄꦏꦴꦱꦶ. ꦪꦺꦴ ꦪꦺꦴ ꦥꦕ꧀ꦕꦪꦣꦩ꧀ꦩꦺꦴ ꦪꦱ꧀ꦱ ꦪꦱ꧀ꦱ ꦥꦕ꧀ꦕꦪꦸꦥ꧀ꦥꦤ꧀ꦤꦣꦩ꧀ꦩꦱ꧀ꦱ ꦪꦡꦴ ꦪꦡꦴ ꦲꦺꦠꦸꦥꦕ꧀ꦕꦪꦴꦢꦶꦤꦴ ꦥꦕ꧀ꦕꦪꦨꦴꦮꦺꦤ ꦥꦕ꧀ꦕꦪꦺꦴ ꦲꦺꦴꦠꦶ, ꦠꦁ ꦱꦧ꧀ꦧꦁ ꦄꦮꦶꦥꦫꦷꦠꦁ ꦄꦥꦫꦶꦲꦴꦥꦺꦠ꧀ꦮꦴ ꦄꦤꦮꦱꦺꦱꦠꦺꦴ ꦥꦕ꧀ꦕꦮꦺꦏ꧀ꦑꦟꦮꦱꦺꦤ ꦕꦶꦠ꧀ꦠꦺ ꦄꦏꦴꦱꦷꦠꦶ ꦄꦠ꧀ꦡꦺꦴ. ꦪꦡꦴ ꦥꦤ ꦨꦒꦮꦴ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦴꦤꦸꦭꦺꦴꦩꦁ ꦩꦤꦱꦴꦏꦴꦱꦶ, ꦠꦁ ꦱꦔ꧀ꦑꦺꦥꦺꦤ ꦠꦴꦮ ꦢꦱ꧀ꦱꦺꦠꦸꦁ ‘‘ꦆꦠꦶ ꦆꦩꦱ꧀ꦩꦶꦁ ꦱꦠꦶ ꦆꦢꦁ ꦲꦺꦴꦠꦶ, ꦆꦩꦱ꧀ꦱꦸꦥ꧀ꦥꦴꦢꦴ ꦆꦢꦁ ꦈꦥ꧀ꦥꦗ꧀ꦗꦠꦷ’’ꦠꦶ ꦮꦸꦠ꧀ꦠꦁ.

ꦠꦠ꧀ꦡ ꦆꦠꦷꦠꦶ ꦌꦮꦁ, ꦄꦤꦺꦤ ꦥꦏꦴꦫꦺꦤꦴꦠꦶ ꦄꦠ꧀ꦡꦺꦴ. ꦆꦩꦱ꧀ꦩꦶꦁ ꦱꦠꦶ ꦆꦢꦁ ꦲꦺꦴꦠꦷꦠꦶ ꦆꦩꦱ꧀ꦩꦶꦁ ꦄꦮꦶꦗ꧀ꦗꦴꦢꦶꦏꦺ ꦥꦕ꧀ꦕꦪꦺ ꦱꦠꦶ ꦆꦢꦁ ꦱꦔ꧀ꦑꦴꦫꦴꦢꦶꦏꦁ ꦦꦭꦁ ꦲꦺꦴꦠꦶ. ꦆꦩꦱ꧀ꦱꦸꦥ꧀ꦥꦴꦢꦴ ꦆꦢꦁ ꦈꦥ꧀ꦥꦗ꧀ꦗꦠꦷꦠꦶ ꦆꦩꦱ꧀ꦱ ꦄꦮꦶꦗ꧀ꦗꦴꦢꦶꦏꦱ꧀ꦱ ꦥꦕ꧀ꦕꦪꦱ꧀ꦱ ꦈꦥ꧀ꦥꦴꦢꦴ ꦆꦢꦁ ꦱꦔ꧀ꦑꦴꦫꦴꦢꦶꦏꦁ ꦦꦭꦁ ꦈꦥ꧀ꦥꦗ꧀ꦗꦠꦷꦠꦶ ꦄꦠ꧀ꦡꦺꦴ. ꦆꦩꦱ꧀ꦩꦶꦁ ꦄꦱꦠꦶ ꦆꦢꦁ ꦤ ꦲꦺꦴꦠꦶ, ꦆꦩꦱ꧀ꦱ ꦤꦶꦫꦺꦴꦣꦴ ꦆꦢꦁ ꦤꦶꦫꦸꦗ꧀ꦙꦠꦷꦠꦶ ꦄꦮꦶꦗ꧀ꦗꦴꦢꦷꦤꦁ ꦄꦨꦴꦮꦺ ꦱꦔ꧀ꦑꦴꦫꦴꦢꦷꦤꦁ ꦄꦨꦴꦮꦱ꧀ꦱ ꦄꦮꦶꦗ꧀ꦗꦴꦢꦷꦤꦁ ꦤꦶꦫꦺꦴꦣꦺ ꦱꦔ꧀ꦑꦴꦫꦴꦢꦷꦤꦁ ꦤꦶꦫꦺꦴꦣꦱ꧀ꦱ ꦕ ꦢꦸꦠꦶꦪꦠꦠꦶꦪꦱꦸꦠ꧀ꦠꦮꦕꦤꦺꦤ ꦌꦠꦱ꧀ꦩꦶꦁ ꦥꦕ꧀ꦕꦪꦭꦏ꧀ꦑꦟꦺ ꦤꦶꦪꦩꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ – ꦆꦩꦱ꧀ꦩꦶꦁ ꦱꦠꦶ ꦌꦮ, ꦤꦴꦱꦠꦶ. ꦆꦩꦱ꧀ꦱꦸꦥ꧀ꦥꦴꦢꦴ ꦌꦮ, ꦤꦴꦤꦸꦥ꧀ꦥꦴꦢꦴ. ꦄꦤꦶꦫꦺꦴꦣꦴ ꦌꦮ, ꦤ ꦤꦶꦫꦺꦴꦣꦴꦠꦶ. ꦠꦺꦤꦺꦠꦁ ꦭꦏ꧀ꦑꦟꦁ ꦄꦤ꧀ꦠꦺꦴꦒꦣꦤꦶꦪꦩꦁ ꦆꦣ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦱ꧀ꦱ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦤꦶꦫꦺꦴꦣꦺꦴꦠꦶ ꦕ ꦄꦮꦶꦗ꧀ꦗꦴꦢꦷꦤꦁ ꦮꦶꦫꦴꦒꦴꦣꦶꦒꦩꦺꦤ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦺꦴ ꦄꦥ꧀ꦥꦮꦠ꧀ꦠꦶ. ꦠꦡꦴ ꦲꦶ ꦮꦸꦠ꧀ꦠꦁ – ‘‘ꦄꦮꦶꦗ꧀ꦗꦴꦪ ꦠ꧀ꦮꦺꦮ ꦄꦱꦺꦱꦮꦶꦫꦴꦒꦤꦶꦫꦺꦴꦣꦴ ꦱꦔ꧀ꦑꦴꦫꦤꦶꦫꦺꦴꦣꦺꦴ’’ꦠꦶꦄꦴꦢꦶ. ꦤꦶꦫꦺꦴꦣꦤꦶꦫꦺꦴꦣꦷ ꦕ ꦈꦥ꧀ꦥꦴꦢꦤꦶꦫꦺꦴꦣꦷꦨꦴꦮꦺꦤ ꦮꦸꦠ꧀ꦠꦺꦴ ‘‘ꦆꦩꦱ꧀ꦱ ꦤꦶꦫꦺꦴꦣꦴ ꦆꦢꦁ ꦤꦶꦫꦸꦗ꧀ꦙꦠꦷ’’ꦠꦶ.

ꦠꦺꦤꦺꦠꦁ ꦢꦱ꧀ꦱꦺꦠꦶ – ꦄꦤꦶꦫꦺꦴꦣꦺꦴ ꦈꦥ꧀ꦥꦴꦢꦺꦴ ꦤꦴꦩ, ꦱꦺꦴ ꦕꦺꦠ꧀ꦡ ꦄꦠ꧀ꦡꦶꦨꦴꦮꦺꦴꦠꦶꦥꦶ ꦮꦸꦕ꧀ꦕꦠꦷꦠꦶ. ‘‘ꦆꦩꦱ꧀ꦩꦶꦁ ꦱꦠꦶ ꦆꦢꦁ ꦲꦺꦴꦠꦷ’’ꦠꦶ ꦆꦢꦩꦺꦮ ꦲꦶ ꦭꦏ꧀ꦑꦟꦁ ꦥꦫꦶꦪꦴꦪꦤ꧀ꦠꦫꦺꦤ ‘‘ꦆꦩꦱ꧀ꦱ ꦈꦥ꧀ꦥꦴꦢꦴ ꦆꦢꦁ ꦈꦥ꧀ꦥꦗ꧀ꦗꦠꦷ’’ꦠꦶ ꦮꦢꦤ꧀ꦠꦺꦤ ꦥꦫꦺꦤ ꦥꦸꦫꦶꦩꦁ ꦮꦶꦱꦺꦱꦶꦠꦁ ꦲꦺꦴꦠꦶ. ꦠꦱ꧀ꦩꦴ ꦤ ꦣꦫꦩꦴꦤꦠꦁꦪꦺꦮ ꦱꦤ꧀ꦣꦴꦪ ‘‘ꦆꦩꦱ꧀ꦩꦶꦁ ꦱꦠꦷ’’ꦠꦶ ꦮꦸꦠ꧀ꦠꦁ, ꦄꦡ ꦑꦺꦴ ꦩꦒ꧀ꦒꦺꦤ ꦄꦤꦶꦫꦸꦢ꧀ꦣꦨꦴꦮꦚ꧀ꦕꦴꦠꦶ ꦮꦶꦚ꧀ꦚꦴꦪꦠꦶ. ꦪꦱ꧀ꦩꦴ ꦕ ‘‘ꦆꦩꦱ꧀ꦩꦶꦁ ꦄꦱꦠꦶ ꦆꦢꦁ ꦤ ꦲꦺꦴꦠꦶ, ꦆꦩꦱ꧀ꦱ ꦤꦶꦫꦺꦴꦣꦴ ꦆꦢꦁ ꦤꦶꦫꦸꦗ꧀ꦙꦠꦷ’’ꦠꦶ ꦢ꧀ꦮꦶꦣꦴꦥꦶ ꦈꦢ꧀ꦢꦶꦛ꧀ꦜꦱ꧀ꦱ ꦭꦏ꧀ꦑꦟꦱ꧀ꦱ ꦤꦶꦢ꧀ꦢꦺꦱꦁ ꦮꦢꦤ꧀ꦠꦺꦤ ‘‘ꦄꦮꦶꦗ꧀ꦗꦴꦪ ꦠ꧀ꦮꦺꦮ ꦄꦱꦺꦱꦮꦶꦫꦴꦒꦤꦶꦫꦺꦴꦣꦴ ꦱꦔ꧀ꦑꦴꦫꦤꦶꦫꦺꦴꦣꦺꦴ’’ꦠꦶꦄꦴꦢꦶꦤꦴ ꦤꦶꦫꦺꦴꦣꦺꦴ ꦌꦮ ꦮꦸꦠ꧀ꦠꦺꦴ, ꦠꦱ꧀ꦩꦴ ꦤꦠ꧀ꦡꦶꦨꦴꦮꦺꦴꦥꦶ ꦤꦶꦫꦺꦴꦣꦺꦴ ꦌꦮꦴꦠꦶ ꦤꦠ꧀ꦡꦶꦨꦴꦮꦮꦶꦫꦸꦢ꧀ꦣꦺꦴ ꦄꦠ꧀ꦡꦶꦨꦴꦮꦺꦴ ꦄꦤꦶꦫꦺꦴꦣꦺꦴꦠꦶ ꦢꦱ꧀ꦱꦶꦠꦁ ꦲꦺꦴꦠꦶ. ꦠꦺꦤ ꦄꦤꦶꦫꦺꦴꦣꦱꦔ꧀ꦑꦴꦠꦺꦤ ꦄꦠ꧀ꦡꦶꦨꦴꦮꦺꦤ ꦈꦥ꧀ꦥꦴꦢꦁ ꦮꦶꦱꦺꦱꦺꦠꦶ. ꦠꦠꦺꦴ ꦤ ꦆꦣ ꦄꦠ꧀ꦡꦶꦨꦴꦮꦩꦠ꧀ꦠꦁ ꦈꦥ꧀ꦥꦴꦢꦺꦴꦠꦶ ꦄꦠ꧀ꦡꦺꦴ ꦄꦣꦶꦥ꧀ꦥꦺꦠꦺꦴ, ꦄꦡ ꦑꦺꦴ ꦄꦤꦶꦫꦺꦴꦣꦱꦔ꧀ꦑꦴꦠꦺꦴ ꦄꦠ꧀ꦡꦶꦨꦴꦮꦺꦴ ꦕꦴꦠꦶ ꦄꦪꦩꦠ꧀ꦡꦺꦴ ꦮꦶꦨꦴꦮꦶꦠꦺꦴꦠꦶ. ꦌꦮꦩꦺꦠꦁ ꦭꦏ꧀ꦑꦟꦢ꧀ꦮꦪꦮꦕꦤꦁ ꦄꦚ꧀ꦚꦩꦚ꧀ꦚꦮꦶꦱꦺꦱꦤꦮꦶꦱꦺꦱꦶꦠꦧ꧀ꦧꦨꦴꦮꦺꦤ ꦱꦴꦠ꧀ꦡꦏꦤ꧀ꦠꦶ ꦮꦺꦢꦶꦠꦧ꧀ꦧꦁ.

ꦏꦺꦴ ꦥꦤꦴꦪꦁ ꦄꦤꦶꦫꦺꦴꦣꦺꦴ ꦤꦴꦩ, ꦪꦺꦴ ‘‘ꦄꦠ꧀ꦡꦶꦨꦴꦮꦺꦴ, ꦈꦥ꧀ꦥꦴꦢꦺꦴ’’ꦠꦶ ꦕ ꦮꦸꦕ꧀ꦕꦠꦷꦠꦶ? ꦄꦥ꧀ꦥꦲꦷꦤꦨꦴꦮꦺꦴ ꦕ, ꦄꦤꦶꦧ꧀ꦧꦠ꧀ꦠꦶꦠꦦꦭꦴꦫꦲꦠꦴꦥꦲꦴꦤꦺꦲꦶ ꦦꦭꦴꦤꦸꦥ꧀ꦥꦴꦢꦤꦴꦫꦲꦠꦴ ꦕ. ꦪꦺ ꦲꦶ ꦥꦲꦴꦠꦧ꧀ꦧꦴ ꦄꦏꦸꦱꦭꦴ ꦣꦩ꧀ꦩꦴ, ꦠꦺꦱꦁ ꦄꦫꦶꦪꦩꦒ꧀ꦒꦺꦤ ꦄꦱꦩꦸꦒ꧀ꦓꦴꦛꦶꦠꦨꦴꦮꦺꦴ ꦕ. ꦪꦺ ꦥꦤ ꦤ ꦥꦲꦴꦠꦧ꧀ꦧꦴ ꦏꦸꦱꦭꦴꦧ꧀ꦪꦴꦏꦠꦴ ꦣꦩ꧀ꦩꦴ, ꦪꦴꦤꦶ ꦠꦺꦱꦸ ꦱꦁꦪꦺꦴꦗꦤꦴꦤꦶ ꦄꦑꦷꦟꦴꦱꦮꦴꦤꦁ ꦠꦺꦱꦁ ꦄꦥꦫꦶꦏ꧀ꦑꦷꦟꦠꦴ ꦕ. ꦄꦱꦩꦸꦒ꧀ꦓꦴꦛꦶꦠꦴꦤꦸꦱꦪꦠꦴꦪ ꦲꦶ ꦱꦱꦁꦪꦺꦴꦗꦤꦴ ꦑꦤ꧀ꦣꦥ꧀ꦥꦮꦠ꧀ꦠꦶ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦺꦴ. ꦠꦡꦴ ꦕ ꦮꦸꦠ꧀ꦠꦁ –

‘‘ꦪꦴꦪ ꦕ, ꦨꦶꦏ꧀ꦑꦮꦺ, ꦄꦮꦶꦗ꧀ꦗꦴꦪ ꦤꦶꦮꦸꦠꦱ꧀ꦱ ꦧꦴꦭꦱ꧀ꦱ ꦪꦴꦪ ꦕ ꦠꦟ꧀ꦲꦴꦪ ꦱꦩ꧀ꦥꦪꦸꦠ꧀ꦠꦱ꧀ꦱ ꦄꦪꦁ ꦏꦴꦪꦺꦴ ꦱꦩꦸꦢꦴꦒꦠꦺꦴ, ꦱꦴ ꦕꦺꦮ ꦄꦮꦶꦗ꧀ꦗꦴ ꦧꦴꦭꦱ꧀ꦱ ꦄꦥ꧀ꦥꦲꦷꦤꦴ, ꦱꦴ ꦕ ꦠꦟ꧀ꦲꦴ ꦄꦥꦫꦶꦏ꧀ꦑꦷꦟꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦤ, ꦨꦶꦏ꧀ꦑꦮꦺ, ꦧꦴꦭꦺꦴ ꦄꦕꦫꦶ ꦧ꧀ꦫꦲ꧀ꦩꦕꦫꦶꦪꦁ ꦱꦩ꧀ꦩꦴ ꦢꦸꦏ꧀ꦑꦏ꧀ꦑꦪꦴꦪ, ꦠꦱ꧀ꦩꦴ ꦧꦴꦭꦺꦴ ꦏꦴꦪꦱ꧀ꦱ ꦨꦺꦢꦴ ꦏꦴꦪꦹꦥꦒꦺꦴ ꦲꦺꦴꦠꦶ, ꦱꦺꦴ ꦏꦴꦪꦹꦥꦒꦺꦴ ꦱꦩꦴꦤꦺꦴ ꦤ ꦥꦫꦶꦩꦸꦕ꧀ꦕꦠꦶ ꦗꦴꦠꦶꦪꦴ ꦗꦫꦴꦩꦫꦟꦺꦤꦴ’’ꦠꦶꦄꦴꦢꦶ (ꦱꦁ. ꦤꦶ. ꧒.꧑꧙).

ꦑꦷꦟꦱꦁꦪꦺꦴꦗꦤꦴꦤꦁ ꦥꦤ ꦄꦮꦶꦗ꧀ꦗꦴꦪ ꦄꦨꦴꦮꦠꦺꦴ ꦱꦔ꧀ꦑꦴꦫꦴꦤꦁ, ꦠꦟ꧀ꦲꦸꦥꦴꦢꦴꦤꦴꦤꦁ ꦄꦨꦴꦮꦠꦺꦴ ꦈꦥꦴꦢꦴꦤꦨꦮꦴꦤꦁ ꦄꦱꦩ꧀ꦨꦮꦺꦴꦠꦶ ꦮꦛ꧀ꦛꦱ꧀ꦱ ꦈꦥꦕ꧀ꦖꦺꦢꦺꦴ ꦥꦚ꧀ꦚꦴꦪꦶꦱ꧀ꦱꦠꦷꦠꦶ. ꦠꦺꦤꦺꦮꦴꦲ –

‘‘ꦖꦤ꧀ꦤꦁ ꦠ꧀ꦮꦺꦮ, ꦦꦒ꧀ꦒꦸꦟ, ꦦꦱ꧀ꦱꦴꦪꦠꦤꦴꦤꦁ ꦄꦱꦺꦱꦮꦶꦫꦴꦒꦤꦶꦫꦺꦴꦣꦴ ꦦꦱ꧀ꦱꦤꦶꦫꦺꦴꦣꦺꦴ, ꦦꦱ꧀ꦱꦤꦶꦫꦺꦴꦣꦴ ꦮꦺꦢꦤꦴꦤꦶꦫꦺꦴꦣꦺꦴ’’ꦠꦶꦄꦴꦢꦶ (ꦱꦁ. ꦤꦶ. ꧒.꧑꧒).

ꦤ ꦲꦶ ꦄꦒ꧀ꦒꦩꦒ꧀ꦒꦴꦣꦶꦒꦩꦠꦺꦴ ꦈꦢ꧀ꦣꦁ ꦪꦴꦮ ꦥꦫꦶꦤꦶꦧ꧀ꦧꦴꦤꦴ ꦱꦭ꦳ꦴꦪꦠꦤꦴꦢꦷꦤꦁ ꦄꦥ꧀ꦥꦮꦠ꧀ꦠꦶ. ꦄꦡ ꦑꦺꦴ ꦤꦠ꧀ꦡꦶꦠꦴ ꦤꦶꦫꦺꦴꦣꦱꦢ꧀ꦢꦮꦕꦤꦷꦪꦠꦴ ꦑꦷꦟꦱꦁꦪꦺꦴꦗꦤꦠꦴꦠꦶ ꦤꦶꦫꦺꦴꦣꦺꦴ ꦮꦸꦠ꧀ꦠꦺꦴ. ꦄꦥꦶꦕ ꦕꦶꦫꦏꦠꦩ꧀ꦥꦶ ꦏꦩ꧀ꦩꦁ ꦄꦤꦶꦧ꧀ꦧꦠ꧀ꦠꦶꦠꦦꦭꦠꦴꦪ ꦄꦥ꧀ꦥꦲꦷꦤꦴꦲꦴꦫꦠꦴꦪ ꦕ ꦦꦭꦴꦫꦲꦁ ꦱꦤ꧀ꦠꦁ ꦌꦮ ꦤꦴꦩ ꦲꦺꦴꦠꦶ, ꦤ ꦤꦶꦧ꧀ꦧꦠ꧀ꦠꦶꦠꦦꦭꦁ, ꦤꦴꦥꦶ ꦥꦲꦷꦤꦴꦲꦴꦫꦤ꧀ꦠꦶ. ꦦꦭꦸꦥ꧀ꦥꦠ꧀ꦠꦶꦥꦕ꧀ꦕꦪꦴꦤꦁ ꦄꦮꦶꦗ꧀ꦗꦴꦱꦔ꧀ꦑꦴꦫꦴꦢꦷꦤꦁ ꦮꦸꦠ꧀ꦠꦤꦪꦺꦤꦺꦮ ꦦꦭꦴꦫꦲꦨꦴꦮꦺꦴ ꦄꦤꦶꦫꦺꦴꦣꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦌꦮꦁ ꦄꦤꦶꦫꦸꦢ꧀ꦣꦨꦴꦮꦺꦤꦺꦮ ꦲꦶ ꦪꦺꦤ ꦮꦶꦤꦴ ꦦꦭꦁ ꦤ ꦱꦩ꧀ꦨꦮꦠꦶ, ꦠꦁ ꦏꦴꦫꦟꦁ ꦄꦠꦷꦠꦤ꧀ꦠꦶꦥꦶ ꦆꦩꦱ꧀ꦩꦶꦁ ꦱꦠꦷꦠꦶ ꦆꦩꦶꦤꦴ ꦮꦕꦤꦺꦤ ꦮꦸꦠ꧀ꦠꦁ. ꦠꦠꦺꦴꦪꦺꦮ ꦕ ꦄꦮꦸꦱꦶꦠꦧ꧀ꦫꦲ꧀ꦩꦕꦫꦶꦪꦱ꧀ꦱ ꦄꦥ꧀ꦥꦮꦠ꧀ꦠꦶꦣꦩ꧀ꦩꦠꦁ ꦄꦤꦴꦥꦤ꧀ꦤꦺꦴ ꦥꦕ꧀ꦕꦪꦸꦥ꧀ꦥꦴꦢꦺꦴ ꦏꦴꦭꦨꦺꦢꦁ ꦄꦤꦴꦩꦱꦶꦠ꧀ꦮꦴ ꦄꦤꦶꦮꦠ꧀ꦠꦤꦴꦪ ꦌꦮ ꦆꦩꦱ꧀ꦱ ꦈꦥ꧀ꦥꦴꦢꦴꦠꦶ ꦮꦸꦠ꧀ꦠꦺꦴ. ꦄꦡ ꦮꦴ ꦄꦮꦱꦺꦱꦥꦕ꧀ꦕꦪꦱꦩꦮꦴꦪꦺ ꦄꦮꦶꦗ꧀ꦗꦩꦴꦤꦱ꧀ꦱꦥꦶ ꦮꦶꦗ꧀ꦗꦩꦴꦤꦱ꧀ꦱ ꦮꦶꦪ ꦥꦒꦺꦮ ꦮꦶꦗ꧀ꦗꦩꦴꦤꦱ꧀ꦱ ꦪꦴ ꦦꦭꦸꦥ꧀ꦥꦠ꧀ꦠꦶꦄꦨꦶꦩꦸꦑꦠꦴ, ꦱꦴ ꦆꦩꦱ꧀ꦱ ꦈꦥ꧀ꦥꦴꦢꦴꦠꦶ ꦮꦸꦠ꧀ꦠꦴ. ꦠꦡꦴ ꦲꦶ ꦠꦠꦺꦴ ꦦꦭꦁ ꦈꦥ꧀ꦥꦗ꧀ꦗꦠꦷꦠꦶ ꦠꦢꦮꦠ꧀ꦡꦁ ꦏꦴꦫꦟꦁ ꦦꦭꦱ꧀ꦱ ꦈꦥ꧀ꦥꦴꦢꦤꦨꦴꦮꦺꦤ ꦈꦛ꧀ꦜꦶꦠꦁ ꦈꦥ꧀ꦥꦠꦶꦠꦁ ꦤꦴꦩ ꦲꦺꦴꦠꦶ, ꦤ ꦮꦶꦗ꧀ꦗꦩꦴꦤꦩ꧀ꦥꦶ ꦄꦠꦢꦮꦠ꧀ꦡꦤ꧀ꦠꦶ ꦠꦢꦮꦠ꧀ꦡꦠꦴ ꦈꦥ꧀ꦥꦴꦢꦺꦴꦠꦶ ꦮꦺꦢꦶꦠꦧ꧀ꦧꦺꦴ.

ꦠꦠ꧀ꦡ ꦱꦠꦷꦠꦶ ꦆꦩꦶꦤꦴ ꦮꦶꦗ꧀ꦗꦩꦴꦤꦠꦴꦩꦠ꧀ꦠꦺꦤ ꦥꦕ꧀ꦕꦪꦨꦴꦮꦁ ꦮꦢꦤ꧀ꦠꦺꦴ ꦄꦧ꧀ꦪꦴꦥꦴꦫꦠꦁ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦱ꧀ꦱ ꦢꦱ꧀ꦱꦺꦠꦶ. ꦈꦥ꧀ꦥꦴꦢꦴꦠꦶ ꦈꦥ꧀ꦥꦠ꧀ꦠꦶꦣꦩ꧀ꦩꦠꦁ ꦄꦱꦧ꧀ꦧꦏꦴꦭꦨꦴꦮꦶꦠꦁ ꦦꦭꦸꦥ꧀ꦥꦠ꧀ꦠꦶꦄꦨꦶꦩꦸꦑꦠꦚ꧀ꦕ ꦢꦷꦥꦺꦤ꧀ꦠꦺꦴ ꦄꦤꦶꦕ꧀ꦕꦠꦁ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦱ꧀ꦱ ꦢꦱ꧀ꦱꦺꦠꦶ. ‘‘ꦱꦠꦶ, ꦤꦴꦱꦠꦶ, ꦈꦥ꧀ꦥꦴꦢꦴ, ꦤ ꦤꦶꦫꦺꦴꦣꦴ’’ꦠꦶ ꦥꦤ ꦲꦺꦠꦸꦄꦠ꧀ꦡꦺꦲꦶ ꦨꦸꦩ꧀ꦩꦤꦶꦱ꧀ꦱꦏ꧀ꦏꦮꦕꦤꦺꦲꦶ ꦱꦩꦠ꧀ꦡꦶꦠꦁ ꦤꦶꦢꦴꦤꦱꦩꦸꦢꦪꦗꦴꦠꦶꦥꦨꦮꦨꦴꦮꦁ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦱ꧀ꦱ ꦢꦱ꧀ꦱꦺꦠꦶ. ꦲꦺꦠꦸꦄꦠ꧀ꦡꦠꦴ ꦕꦺꦠ꧀ꦡ ꦨꦸꦩ꧀ꦩꦮꦕꦤꦺ ꦪꦱ꧀ꦱ ꦨꦴꦮꦺ ꦠꦢꦮꦶꦤꦴꦨꦴꦮꦶꦦꦭꦱ꧀ꦱ ꦨꦴꦮꦺꦴ ꦭꦏ꧀ꦑꦷꦪꦠꦶ, ꦠꦠ꧀ꦡ ꦥꦮꦠ꧀ꦠꦶꦪꦴ ꦮꦺꦢꦶꦠꦧ꧀ꦧꦴ ꦪꦡꦴ ‘‘ꦄꦣꦤꦴꦤꦁ ꦣꦤꦺ ꦄꦤꦤꦸꦥ꧀ꦥꦢꦷꦪꦩꦴꦤꦺ ꦢꦴꦭꦶꦢ꧀ꦢꦶꦪꦁ ꦮꦺꦥꦸꦭ꧀ꦭꦁ ꦄꦒꦩꦴꦱꦷ’’ꦠꦶ (ꦢꦷ. ꦤꦶ. ꧓.꧙꧑) ꦕ ‘‘ꦤꦶꦥ꧀ꦦꦤ꧀ꦤꦺꦱꦸ ꦱꦱ꧀ꦱꦺꦱꦸ ꦱꦸꦨꦶꦏ꧀ꦑꦁ ꦗꦴꦪꦠꦷ’’ꦠꦶ ꦕ. ꦤꦶꦱ꧀ꦱꦏ꧀ꦏꦮꦕꦤꦱ꧀ꦱꦴꦥꦶ ꦲꦺꦠꦸꦄꦠ꧀ꦡꦠꦴ ꦦꦭꦱ꧀ꦱ ꦥꦨꦮꦺ ꦥꦏꦠꦶꦪꦚ꧀ꦕ ꦥꦮꦠ꧀ꦠꦶꦠꦺꦴ ꦪꦡꦴ ‘‘ꦏꦭꦭꦴ ꦲꦺꦴꦠꦶ ꦄꦧ꧀ꦧꦸꦢꦁ, ꦄꦧ꧀ꦧꦸꦢꦴ ꦗꦴꦪꦠꦷ ꦥꦺꦱꦷ’’ꦠꦶ (ꦱꦁ. ꦤꦶ. ꧑.꧒꧓꧕) ꦕ ‘‘ꦲꦶꦩꦮꦠꦴ ꦒꦔ꧀ꦒꦴ ꦥꦨꦮꦤ꧀ꦠꦶ, ꦱꦶꦔ꧀ꦒꦠꦺꦴ ꦱꦫꦺꦴ ꦗꦴꦪꦠꦷ’’ꦠꦶ ꦕ. ꦄꦮꦶꦗ꧀ꦗꦴꦢꦶꦨꦴꦮꦺ ꦕ ꦠꦢꦮꦶꦤꦴꦨꦴꦮꦺꦤ ꦱꦔ꧀ꦑꦴꦫꦴꦢꦶꦨꦴꦮꦺꦴ ꦭꦏ꧀ꦑꦷꦪꦠꦶ, ꦄꦮꦶꦗ꧀ꦗꦴꦢꦷꦲꦶ ꦕ ꦱꦔ꧀ꦑꦴꦫꦴꦢꦪꦺꦴ ꦥꦨꦮꦤ꧀ꦠꦶ ꦥꦏꦫꦶꦪꦤ꧀ꦠꦶ ꦕꦴꦠꦶ ꦠꦺ ꦠꦺꦱꦁ ꦥꦨꦮꦺꦴ ꦥꦏꦠꦶ ꦕ, ꦠꦱ꧀ꦩꦴ ꦠꦢꦠ꧀ꦡꦢꦷꦥꦤꦠ꧀ꦡꦁ ‘‘ꦆꦩꦱ꧀ꦩꦶꦁ ꦱꦠꦶ ꦆꦩꦱ꧀ꦱ ꦈꦥ꧀ꦥꦴꦢꦴ’’ꦠꦶ ꦲꦺꦠꦸꦄꦠ꧀ꦡꦺ ꦨꦸꦩ꧀ꦩꦤꦶꦱ꧀ꦱꦏ꧀ꦏꦤꦶꦢ꧀ꦢꦺꦱꦴ ꦏꦠꦴꦠꦶ.

ꦪꦱ꧀ꦩꦴ ꦕꦺꦠ꧀ꦡ ‘‘ꦆꦩꦱ꧀ꦩꦶꦁ ꦱꦠꦶ ꦆꦢꦁ ꦲꦺꦴꦠꦶ, ꦆꦩꦱ꧀ꦱꦸꦥ꧀ꦥꦴꦢꦴ ꦆꦢꦁ ꦈꦥ꧀ꦥꦗ꧀ꦗꦠꦷ’’ꦠꦶ ꦱꦔ꧀ꦑꦺꦥꦺꦤ ꦈꦢ꧀ꦢꦶꦛ꧀ꦜꦱ꧀ꦱ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦱ꧀ꦱ ‘‘ꦄꦮꦶꦗ꧀ꦗꦴꦥꦕ꧀ꦕꦪꦴ ꦱꦔ꧀ꦑꦴꦫꦴ’’ꦠꦶꦄꦴꦢꦶꦏꦺꦴ ꦤꦶꦢ꧀ꦢꦺꦱꦺꦴ, ꦠꦱ꧀ꦩꦴ ꦪꦡꦴꦮꦸꦠ꧀ꦠꦺꦴ ꦄꦠ꧀ꦡꦶꦨꦴꦮꦺꦴ ꦈꦥ꧀ꦥꦴꦢꦺꦴ ꦕ ꦠꦺꦱꦁ ꦠꦺꦱꦁ ꦥꦕ꧀ꦕꦪꦸꦥ꧀ꦥꦤ꧀ꦤꦣꦩ꧀ꦩꦴꦤꦁ ꦥꦕ꧀ꦕꦪꦨꦴꦮꦺꦴꦠꦶ ꦮꦶꦚ꧀ꦚꦴꦪꦠꦶ. ꦤ ꦲꦶ ꦄꦤꦶꦫꦸꦢ꧀ꦣꦠꦴꦱꦔ꧀ꦑꦴꦠꦁ ꦄꦠ꧀ꦡꦶꦨꦴꦮꦁ ꦈꦥ꧀ꦥꦴꦢꦚ꧀ꦕ ꦄꦤꦶꦮꦠ꧀ꦠꦱꦨꦴꦮꦠꦴꦱꦔ꧀ꦑꦴꦠꦁ ꦈꦢꦪꦴꦮꦠ꧀ꦡꦠꦴꦱꦔ꧀ꦑꦴꦠꦁ ꦮꦴ ‘‘ꦱꦠꦶ ꦌꦮ, ꦤꦴꦱꦠꦶ, ꦈꦥ꧀ꦥꦴꦢꦴ ꦌꦮ, ꦤ ꦤꦶꦫꦺꦴꦣꦴ’’ꦠꦶ ꦄꦤ꧀ꦠꦺꦴꦒꦣꦤꦶꦪꦩꦺꦲꦶ ꦮꦕꦤꦺꦲꦶ ꦄꦨꦶꦲꦶꦠꦁ ꦩꦸꦚ꧀ꦕꦶꦠ꧀ꦮꦴ ꦄꦚ꧀ꦚꦺꦴ ꦥꦕ꧀ꦕꦪꦨꦴꦮꦺꦴ ꦤꦴꦩ ꦄꦠ꧀ꦡꦶ, ꦠꦱ꧀ꦩꦴ ꦪꦡꦴꦮꦸꦠ꧀ꦠꦺꦴ ꦄꦠ꧀ꦡꦶꦨꦴꦮꦺꦴ ꦈꦥ꧀ꦥꦴꦢꦺꦴ ꦕ ꦥꦕ꧀ꦕꦪꦨꦴꦮꦺꦴꦠꦶ ꦮꦺꦢꦶꦠꦧ꧀ꦧꦁ. ꦪꦺꦥꦶ ꦥꦛ꧀ꦜꦴꦤꦺ ꦄꦴꦒꦠꦴ ꦲꦺꦠꦸꦄꦴꦢꦪꦺꦴ ꦕꦠꦸꦮꦷꦱꦠꦶ ꦥꦕ꧀ꦕꦪꦴ, ꦠꦺꦥꦶ ꦌꦠꦱ꧀ꦱꦺꦮ ꦥꦕ꧀ꦕꦪꦨꦴꦮꦱ꧀ꦱ ꦮꦶꦱꦺꦱꦴꦠꦶ ꦮꦺꦢꦶꦠꦧ꧀ꦧꦴ. ꦆꦠꦶ ꦪꦡꦴ ꦮꦶꦠ꧀ꦡꦴꦫꦺꦤ ꦄꦤꦸꦭꦺꦴꦩꦁ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦁ ꦩꦤꦱꦶ ꦄꦏꦴꦱꦶ, ꦠꦁ ꦢꦱ꧀ꦱꦺꦠꦸꦁ, ‘‘ꦪꦢꦶꦢꦁ ꦄꦮꦶꦗ꧀ꦗꦴꦥꦕ꧀ꦕꦪꦴ ꦱꦔ꧀ꦑꦴꦫꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦠꦠ꧀ꦡ ꦪꦢꦶꦢꦤ꧀ꦠꦶ ꦤꦶꦥꦴꦠꦺꦴ, ꦠꦱ꧀ꦱ ꦪꦺꦴ ꦄꦪꦤ꧀ꦠꦶ ꦄꦠ꧀ꦡꦺꦴ. ꦄꦮꦶꦗ꧀ꦗꦴꦥꦕ꧀ꦕꦪꦴꦠꦶꦄꦴꦢꦷꦱꦸ ꦄꦮꦶꦤ꧀ꦢꦶꦪꦁ ꦏꦴꦪꦢꦸꦕ꧀ꦕꦫꦶꦠꦴꦢꦶꦁ ꦮꦶꦤ꧀ꦢꦠꦷꦠꦶ ꦄꦮꦶꦗ꧀ꦗꦴ, ꦮꦶꦤ꧀ꦢꦶꦪꦁ ꦏꦴꦪꦱꦸꦕꦫꦶꦠꦴꦢꦶꦁ ꦤ ꦮꦶꦤ꧀ꦢꦠꦷꦠꦶ ꦄꦮꦶꦗ꧀ꦗꦴ, ꦣꦩ꧀ꦩꦴꦤꦁ ꦄꦮꦶꦥꦫꦷꦠꦱꦨꦴꦮꦁ ꦄꦮꦶꦢꦶꦠꦁ ꦏꦫꦺꦴꦠꦷꦠꦶ ꦄꦮꦶꦗ꧀ꦗꦴ, ꦄꦤ꧀ꦠꦮꦶꦫꦲꦶꦠꦺ ꦱꦁꦱꦴꦫꦺ ꦨꦮꦴꦢꦷꦱꦸ ꦱꦠ꧀ꦠꦺ ꦗꦮꦴꦥꦺꦠꦷꦠꦶ ꦄꦮꦶꦗ꧀ꦗꦴ, ꦄꦮꦶꦗ꧀ꦗꦩꦴꦤꦺꦱꦸ ꦗꦮꦠꦶ ꦮꦶꦗ꧀ꦗꦩꦴꦤꦺꦱꦸ ꦤ ꦗꦮꦠꦷꦠꦶ ꦄꦮꦶꦗ꧀ꦗꦴ, ꦮꦶꦗ꧀ꦗꦴꦪ ꦥꦛꦶꦥꦏ꧀ꦑꦴꦠꦶ ꦄꦮꦶꦗ꧀ꦗꦴ, ꦱꦴ ‘‘ꦢꦸꦏ꧀ꦑꦺ ꦄꦚ꧀ꦚꦴꦟ’’ꦤ꧀ꦠꦶꦄꦴꦢꦶꦤꦴ ꦕꦠꦸꦧ꧀ꦧꦶꦣꦴ ꦮꦺꦢꦶꦠꦧ꧀ꦧꦴ. ꦥꦛꦶꦕ꧀ꦕ ꦤ ꦮꦶꦤꦴ ꦦꦭꦁ ꦌꦠꦶ ꦈꦥ꧀ꦥꦗ꧀ꦗꦠꦶ ꦕꦺꦮ ꦥꦮꦠ꧀ꦠꦠꦶ ꦕꦴꦠꦶ ꦥꦕ꧀ꦕꦪꦺꦴ, ꦈꦥꦏꦴꦫꦏꦠ꧀ꦡꦺꦴ ꦮꦴ ꦥꦕ꧀ꦕꦪꦺꦴ. ꦄꦮꦶꦗ꧀ꦗꦴ ꦕ ꦱꦴ ꦥꦕ꧀ꦕꦪꦺꦴ ꦕꦴꦠꦶ ꦄꦮꦶꦗ꧀ꦗꦴꦥꦕ꧀ꦕꦪꦺꦴ, ꦠꦱ꧀ꦩꦴ ꦄꦮꦶꦗ꧀ꦗꦴꦥꦕ꧀ꦕꦪꦴ. ꦱꦔ꧀ꦑꦫꦺꦴꦤ꧀ꦠꦷꦠꦶ ꦱꦔ꧀ꦑꦴꦫꦴ, ꦭꦺꦴꦏꦶꦪꦏꦸꦱꦭꦴꦏꦸꦱꦭꦕꦺꦠꦤꦴ, ꦱꦴ ꦥꦸꦚ꧀ꦚꦴꦥꦸꦚ꧀ꦚꦴꦤꦺꦚ꧀ꦗꦴꦨꦶꦱꦔ꧀ꦑꦴꦫꦮꦱꦺꦤ ꦠꦶꦮꦶꦣꦴ ꦮꦺꦢꦶꦠꦧ꧀ꦧꦴ. ꦮꦶꦗꦴꦤꦴꦠꦷꦠꦶ ꦮꦶꦚ꧀ꦚꦴꦟꦁ, ꦠꦁ ꦭꦺꦴꦏꦶꦪꦮꦶꦥꦴꦏꦮꦶꦚ꧀ꦚꦴꦟꦮꦱꦺꦤ ꦢ꧀ꦮꦠ꧀ꦠꦶꦁꦱꦮꦶꦣꦁ. ꦤꦩꦠꦷꦠꦶ ꦤꦴꦩꦁ, ꦮꦺꦢꦤꦴꦢꦶꦏ꧀ꦑꦤ꧀ꦣꦠ꧀ꦠꦪꦁ. ꦫꦸꦥ꧀ꦥꦠꦷꦠꦶ ꦫꦹꦥꦁ, ꦨꦹꦠꦫꦹꦥꦁ ꦕꦏ꧀ꦑꦴꦢꦶꦈꦥꦴꦢꦴꦫꦹꦥꦚ꧀ꦕ. ꦄꦴꦪꦠꦠꦶ ꦄꦴꦪꦠꦚ꧀ꦕ ꦱꦁꦱꦴꦫꦢꦸꦏ꧀ꦑꦁ ꦤꦪꦠꦷꦠꦶ ꦄꦴꦪꦠꦤꦁ. ꦦꦸꦱꦠꦷꦠꦶ ꦦꦱ꧀ꦱꦺꦴ. ꦮꦺꦢꦪꦠꦷꦠꦶ ꦮꦺꦢꦤꦴ. ꦆꦢꦩ꧀ꦥꦶ ꦢ꧀ꦮꦪꦁ ꦢ꧀ꦮꦴꦫꦮꦱꦺꦤ ꦖꦧ꧀ꦧꦶꦣꦁ, ꦮꦶꦥꦴꦏꦮꦱꦺꦤ ꦒꦲꦟꦺ ꦖꦠ꧀ꦠꦶꦁꦱꦮꦶꦣꦁ. ꦥꦫꦶꦠꦱ꧀ꦱꦠꦷꦠꦶ ꦠꦟ꧀ꦲꦴ, ꦱꦴ ꦏꦴꦩꦠꦟ꧀ꦲꦴꦢꦶꦮꦱꦺꦤ ꦱꦔ꧀ꦑꦺꦥꦠꦺꦴ ꦠꦶꦮꦶꦣꦴ, ꦮꦶꦠ꧀ꦡꦴꦫꦠꦺꦴ ꦄꦛ꧀ꦜꦸꦠ꧀ꦠꦫꦱꦠꦮꦶꦣꦴ ꦕ. ꦈꦥꦴꦢꦷꦪꦠꦷꦠꦶ ꦈꦥꦴꦢꦴꦤꦁ, ꦠꦁ ꦏꦴꦩꦸꦥꦴꦢꦴꦤꦴꦢꦶꦮꦱꦺꦤ ꦕꦠꦸꦧ꧀ꦧꦶꦣꦁ. ꦨꦮꦠꦶ ꦨꦴꦮꦪꦠꦶ ꦕꦴꦠꦶ ꦨꦮꦺꦴ, ꦱꦺꦴ ꦏꦩ꧀ꦩꦹꦥꦥꦠ꧀ꦠꦶꦨꦺꦢꦠꦺꦴ ꦢꦸꦮꦶꦣꦺꦴ. ꦗꦤꦤꦁ ꦗꦴꦠꦶ. ꦗꦷꦫꦟꦁ ꦗꦫꦴ. ꦩꦫꦤ꧀ꦠꦶ ꦠꦺꦤꦴꦠꦶ ꦩꦫꦟꦁ. ꦱꦺꦴꦕꦤꦁ ꦱꦺꦴꦏꦺꦴ. ꦥꦫꦶꦢꦺꦮꦤꦁ ꦥꦫꦶꦢꦺꦮꦺꦴ. ꦢꦸꦏ꧀ꦑꦪꦠꦷꦠꦶ ꦢꦸꦏ꧀ꦑꦁ, ꦈꦥ꧀ꦥꦴꦢꦛ꧀ꦜꦶꦠꦶꦮꦱꦺꦤ ꦢ꧀ꦮꦺꦣꦴ ꦑꦟꦠꦷꦠꦶ ꦢꦸꦏ꧀ꦑꦁ. ꦢꦸꦩꦤꦱ꧀ꦱ ꦨꦴꦮꦺꦴ ꦢꦺꦴꦩꦤꦱ꧀ꦱꦁ. ꦨꦸꦱꦺꦴ ꦄꦴꦪꦴꦱꦺꦴ ꦈꦥꦴꦪꦴꦱꦺꦴ. ꦱꦩ꧀ꦨꦮꦤ꧀ꦠꦷꦠꦶ ꦤꦶꦧ꧀ꦧꦠ꧀ꦠꦤ꧀ꦠꦶ. ꦤ ꦏꦺꦮꦭꦚ꧀ꦕ ꦱꦺꦴꦏꦴꦢꦷꦲꦶꦪꦺꦮ, ꦄꦡ ꦑꦺꦴ ꦱꦧ꧀ꦧꦥꦢꦺꦲꦶ ‘‘ꦱꦩ꧀ꦨꦮꦤ꧀ꦠꦷ’’ꦠꦶ ꦥꦢꦱ꧀ꦱ ꦪꦺꦴꦗꦤꦴ ꦏꦴꦠꦧ꧀ꦧꦴ. ꦌꦮꦚ꧀ꦲꦶ ‘‘ꦄꦮꦶꦗ꧀ꦗꦴꦥꦕ꧀ꦕꦪꦴ ꦱꦔ꧀ꦑꦴꦫꦴ ꦱꦩ꧀ꦨꦮꦤ꧀ꦠꦷ’’ꦠꦶ ꦥꦕ꧀ꦕꦪꦥꦕ꧀ꦕꦪꦸꦥ꧀ꦥꦤ꧀ꦤꦮꦮꦠ꧀ꦡꦴꦤꦁ ꦢꦱ꧀ꦱꦶꦠꦁ ꦲꦺꦴꦠꦶ. ꦌꦱ ꦤꦪꦺꦴ ꦱꦧ꧀ꦧꦠ꧀ꦡ.

ꦠꦠ꧀ꦡ ꦄꦚ꧀ꦚꦴꦟꦭꦏ꧀ꦑꦟꦴ ꦄꦮꦶꦗ꧀ꦗꦴ, ꦱꦩ꧀ꦩꦺꦴꦲꦤꦫꦱꦴ, ꦖꦴꦢꦤꦥꦕ꧀ꦕꦸꦥꦛ꧀ꦜꦴꦤꦴ, ꦄꦴꦱꦮꦥꦢꦛ꧀ꦜꦴꦤꦴ. ꦄꦨꦶꦱꦔ꧀ꦑꦫꦟꦭꦏ꧀ꦑꦟꦴ ꦱꦔ꧀ꦑꦴꦫꦴ, ꦄꦴꦪꦹꦲꦤꦫꦱꦴ, ꦱꦁꦮꦶꦢꦲꦤꦥꦕ꧀ꦕꦸꦥꦛ꧀ꦜꦴꦤꦴ, ꦄꦮꦶꦗ꧀ꦗꦴꦥꦢꦛ꧀ꦜꦴꦤꦴ. ꦮꦶꦗꦴꦤꦤꦭꦏ꧀ꦑꦟꦁ ꦮꦶꦚ꧀ꦚꦴꦟꦁ, ꦥꦸꦧ꧀ꦧꦔ꧀ꦒꦩꦫꦱꦁ, ꦥꦛꦶꦱꦤ꧀ꦣꦶꦥꦕ꧀ꦕꦸꦥꦛ꧀ꦜꦴꦤꦁ, ꦱꦔ꧀ꦑꦴꦫꦥꦢꦛ꧀ꦜꦴꦤꦁ, ꦮꦠ꧀ꦡꦴꦫꦩ꧀ꦩꦟꦥꦢꦛ꧀ꦜꦴꦤꦁ ꦮꦴ. ꦤꦩꦤꦭꦏ꧀ꦑꦟꦁ ꦤꦴꦩꦁ, ꦱꦩ꧀ꦥꦪꦺꦴꦒꦫꦱꦁ, ꦄꦮꦶꦤꦶꦧ꧀ꦨꦺꦴꦒꦥꦕ꧀ꦕꦸꦥꦛ꧀ꦜꦴꦤꦁ, ꦮꦶꦚ꧀ꦚꦴꦟꦥꦢꦛ꧀ꦜꦴꦤꦁ. ꦫꦸꦥ꧀ꦥꦤꦭꦏ꧀ꦑꦟꦁ ꦫꦹꦥꦁ, ꦮꦶꦏꦶꦫꦟꦫꦱꦁ, ꦄꦥ꧀ꦥꦲꦺꦪ꧀ꦪꦨꦴꦮꦥꦕ꧀ꦕꦸꦥꦛ꧀ꦜꦴꦤꦁ, ꦮꦶꦚ꧀ꦚꦴꦟꦥꦢꦛ꧀ꦜꦴꦤꦁ. ꦄꦴꦪꦠꦤꦭꦏ꧀ꦑꦟꦁ ꦱꦭ꦳ꦴꦪꦠꦤꦁ, ꦢꦱ꧀ꦱꦤꦴꦢꦶꦫꦱꦁ, ꦮꦠ꧀ꦡꦸꦢ꧀ꦮꦴꦫꦨꦴꦮꦥꦕ꧀ꦕꦸꦥꦛ꧀ꦜꦴꦤꦁ, ꦤꦴꦩꦫꦹꦥꦥꦢꦛ꧀ꦜꦴꦤꦁ. ꦦꦸꦱꦤꦭꦏ꧀ꦑꦟꦺꦴ ꦦꦱ꧀ꦱꦺꦴ, ꦱꦔ꧀ꦓꦛ꧀ꦛꦤꦫꦱꦺꦴ, ꦱꦔ꧀ꦒꦠꦶꦥꦕ꧀ꦕꦸꦥꦛ꧀ꦜꦴꦤꦺꦴ, ꦱꦭ꦳ꦴꦪꦠꦤꦥꦢꦛ꧀ꦜꦴꦤꦺꦴ. ꦄꦤꦸꦨꦮꦤꦭꦏ꧀ꦑꦟꦴ ꦮꦺꦢꦤꦴ, ꦮꦶꦱꦪꦫꦱꦱꦩ꧀ꦨꦺꦴꦒꦫꦱꦴ, ꦱꦸꦑꦢꦸꦏ꧀ꦑꦥꦕ꧀ꦕꦸꦥꦛ꧀ꦜꦴꦤꦴ, ꦦꦱ꧀ꦱꦥꦢꦛ꧀ꦜꦴꦤꦴ. ꦲꦺꦠꦸꦨꦴꦮꦭꦏ꧀ꦑꦟꦴ ꦠꦟ꧀ꦲꦴ, ꦄꦨꦶꦤꦤ꧀ꦢꦤꦫꦱꦴ, ꦄꦠꦶꦠ꧀ꦠꦶꦨꦴꦮꦥꦕ꧀ꦕꦸꦥꦛ꧀ꦜꦴꦤꦴ, ꦮꦺꦢꦤꦴꦥꦢꦛ꧀ꦜꦴꦤꦴ. ꦒꦲꦟꦭꦏ꧀ꦑꦟꦁ ꦈꦥꦴꦢꦴꦤꦁ, ꦄꦩꦸꦚ꧀ꦕꦤꦫꦱꦁ, ꦠꦟ꧀ꦲꦴꦢꦭ꦳꧀ꦲꦠ꧀ꦠꦢꦶꦛ꧀ꦜꦶꦥꦕ꧀ꦕꦸꦥꦛ꧀ꦜꦴꦤꦁ, ꦠꦟ꧀ꦲꦴꦥꦢꦛ꧀ꦜꦴꦤꦁ. ꦏꦩ꧀ꦩꦏꦩ꧀ꦩꦦꦭꦭꦏ꧀ꦑꦟꦺꦴ ꦨꦮꦺꦴ, ꦨꦮꦤꦨꦴꦮꦤꦫꦱꦺꦴ, ꦏꦸꦱꦭꦴꦏꦸꦱꦭꦴꦧ꧀ꦪꦴꦏꦠꦥꦕ꧀ꦕꦸꦥꦛ꧀ꦜꦴꦤꦺꦴ, ꦈꦥꦴꦢꦴꦤꦥꦢꦛ꧀ꦜꦴꦤꦺꦴ. ꦠꦠ꧀ꦡ ꦠꦠ꧀ꦡ ꦨꦮꦺ ꦥꦜꦩꦴꦨꦶꦤꦶꦧ꧀ꦧꦠ꧀ꦠꦶꦭꦏ꧀ꦑꦟꦴ ꦗꦴꦠꦶ, ꦤꦶꦪ꧀ꦪꦴꦠꦤꦫꦱꦴ, ꦄꦠꦷꦠꦨꦮꦠꦺꦴ ꦆꦣꦸꦥ꧀ꦥꦤ꧀ꦤꦥꦕ꧀ꦕꦸꦥꦛ꧀ꦜꦴꦤꦴ, ꦢꦸꦏ꧀ꦑꦮꦶꦕꦶꦠ꧀ꦠꦠꦴꦥꦕ꧀ꦕꦸꦥꦛ꧀ꦜꦴꦤꦴ ꦮꦴ. ꦑꦤ꧀ꦣꦥꦫꦶꦥꦴꦏꦭꦏ꧀ꦑꦟꦴ ꦗꦫꦴ, ꦩꦫꦟꦹꦥꦤꦪꦤꦫꦱꦴ, ꦪꦺꦴꦧ꧀ꦧꦤꦮꦶꦤꦴꦱꦥꦕ꧀ꦕꦸꦥꦛ꧀ꦜꦴꦤꦴ. ꦕꦸꦠꦶꦭꦏ꧀ꦑꦟꦁ ꦩꦫꦟꦁ, ꦮꦶꦱꦁꦪꦺꦴꦒꦫꦱꦁ, ꦒꦠꦶꦮꦶꦥ꧀ꦥꦮꦴꦱꦥꦕ꧀ꦕꦸꦥꦛ꧀ꦜꦴꦤꦁ. ꦄꦤ꧀ꦠꦺꦴꦤꦶꦗ꧀ꦙꦴꦤꦭꦏ꧀ꦑꦟꦺꦴ ꦱꦺꦴꦏꦺꦴ, ꦕꦺꦠꦱꦺꦴ ꦤꦶꦗ꧀ꦙꦴꦤꦫꦱꦺꦴ, ꦄꦤꦸꦱꦺꦴꦕꦤꦥꦕ꧀ꦕꦸꦥꦛ꧀ꦜꦴꦤꦺꦴ. ꦭꦴꦭꦥ꧀ꦥꦤꦭꦏ꧀ꦑꦟꦺꦴ ꦥꦫꦶꦢꦺꦮꦺꦴ, ꦒꦸꦟꦢꦺꦴꦱꦥꦫꦶꦏꦶꦠ꧀ꦠꦤꦫꦱꦺꦴ, ꦱꦩ꧀ꦨꦩꦥꦕ꧀ꦕꦸꦥꦛ꧀ꦜꦴꦤꦺꦴ. ꦏꦴꦪꦥꦷꦭ꦳ꦤꦭꦏ꧀ꦑꦟꦁ ꦢꦸꦏ꧀ꦑꦁ, ꦢꦸꦥ꧀ꦥꦚ꧀ꦚꦴꦤꦁ ꦢꦺꦴꦩꦤꦱ꧀ꦱꦏꦫꦟꦫꦱꦁ, ꦏꦴꦪꦶꦏꦴꦧꦴꦣꦥꦕ꧀ꦕꦸꦥꦛ꧀ꦜꦴꦤꦁ. ꦕꦶꦠ꧀ꦠꦥꦷꦭ꦳ꦤꦭꦏ꧀ꦑꦟꦁ ꦢꦺꦴꦩꦤꦱ꧀ꦱꦁ, ꦩꦤꦺꦴꦮꦶꦓꦴꦠꦤꦫꦱꦁ, ꦩꦴꦤꦱꦧ꧀ꦪꦴꦣꦶꦥꦕ꧀ꦕꦸꦥꦛ꧀ꦜꦴꦤꦁ. ꦕꦶꦠ꧀ꦠꦥꦫꦶꦢꦲꦤꦭꦏ꧀ꦑꦟꦺꦴ ꦈꦥꦴꦪꦴꦱꦺꦴ, ꦤꦶꦠ꧀ꦡꦸꦤꦤꦫꦱꦺꦴ, ꦮꦶꦱꦴꦢꦥꦕ꧀ꦕꦸꦥꦛ꧀ꦜꦴꦤꦺꦴ. ꦌꦮꦩꦺꦠꦺ ꦄꦮꦶꦗ꧀ꦗꦴꦢꦪꦺꦴ ꦭꦏ꧀ꦑꦟꦴꦢꦶꦠꦺꦴꦥꦶ ꦮꦺꦢꦶꦠꦧ꧀ꦧꦴꦠꦶ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ, ꦮꦶꦠ꧀ꦡꦴꦫꦺꦴ ꦥꦤ ꦱꦧ꧀ꦧꦴꦏꦴꦫꦱꦩ꧀ꦥꦤ꧀ꦤꦁ ꦮꦶꦤꦶꦕ꧀ꦖꦪꦁ ꦆꦕ꧀ꦖꦤ꧀ꦠꦺꦤ ꦱꦩ꧀ꦩꦺꦴꦲꦮꦶꦤꦺꦴꦢꦤꦶꦪꦴ (ꦮꦶꦨ. ꦄꦛ꧀ꦜ. ꧒꧒꧕) ꦮꦶꦨꦔ꧀ꦒꦛ꧀ꦜꦏꦡꦴꦪ ꦒꦲꦺꦠꦧ꧀ꦧꦺꦴ.

ꦌꦮꦤ꧀ꦠꦶ ꦤꦶꦢ꧀ꦢꦶꦛ꧀ꦜꦱ꧀ꦱ ꦤꦶꦢꦱ꧀ꦱꦤꦁ, ꦠꦺꦤ ꦄꦮꦶꦗ꧀ꦗꦴꦢꦷꦲꦺꦮ ꦏꦴꦫꦟꦺꦲꦶ, ꦤ ꦆꦱ꧀ꦱꦫꦤꦶꦩ꧀ꦩꦴꦤꦴꦢꦷꦲꦷꦠꦶ ꦢꦱ꧀ꦱꦺꦠꦶ. ꦌꦠꦱ꧀ꦱꦴꦠꦶ ꦪꦡꦴꦮꦸꦠ꧀ꦠꦱ꧀ꦱ. ꦏꦺꦮꦭꦱ꧀ꦱꦴꦠꦶ ꦄꦱꦩ꧀ꦩꦶꦱ꧀ꦱꦱ꧀ꦱ ꦱꦏꦭꦱ꧀ꦱ ꦮꦴ. ꦢꦸꦏ꧀ꦑꦏ꧀ꦑꦤ꧀ꦣꦱ꧀ꦱꦴꦠꦶ ꦢꦸꦏ꧀ꦑꦱꦩꦹꦲꦱ꧀ꦱ, ꦤ ꦱꦠ꧀ꦠꦱ꧀ꦱ, ꦤꦴꦥꦶ ꦗꦷꦮꦱ꧀ꦱ, ꦤꦴꦥꦶ ꦱꦸꦨꦱꦸꦑꦴꦢꦷꦤꦁ. ꦱꦩꦸꦢꦪꦺꦴ ꦲꦺꦴꦠꦷꦠꦶ ꦤꦶꦧ꧀ꦧꦠ꧀ꦠꦶ ꦱꦩ꧀ꦨꦮꦠꦶ.

ꦌꦠꦩꦠ꧀ꦡꦁ ꦮꦶꦢꦶꦠ꧀ꦮꦴꦠꦶ ꦪ꧀ꦮꦴꦪꦁ ꦄꦮꦶꦗ꧀ꦗꦴꦢꦶꦮꦱꦺꦤ ꦱꦔ꧀ꦑꦴꦫꦴꦢꦶꦏꦱ꧀ꦱ ꦢꦸꦏ꧀ꦑꦏ꧀ꦑꦤ꧀ꦣꦱ꧀ꦱ ꦱꦩꦸꦢꦪꦺꦴ ꦲꦺꦴꦠꦷꦠꦶ ꦮꦸꦠ꧀ꦠꦺꦴ, ꦱꦧ꧀ꦧꦴꦏꦴꦫꦺꦤ ꦌꦠꦩꦠ꧀ꦡꦁ ꦮꦶꦢꦶꦠ꧀ꦮꦴ. ꦠꦴꦪꦁ ꦮꦺꦭꦴꦪꦤ꧀ꦠꦶ ꦠꦴꦪꦁ ꦠꦱ꧀ꦱ ꦄꦠ꧀ꦡꦱ꧀ꦱ ꦮꦶꦢꦶꦠꦮꦺꦭꦴꦪꦁ. ꦆꦩꦁ ꦈꦢꦴꦤꦁ ꦈꦢꦴꦤꦺꦱꦷꦠꦶ ꦆꦩꦁ ꦠꦱ꧀ꦩꦶꦁ ꦄꦠ꧀ꦡꦺ ꦮꦶꦢꦶꦠꦺ ꦲꦺꦠꦸꦤꦺꦴ ꦕ ꦲꦺꦠꦸꦱꦩꦸꦥ꧀ꦥꦤ꧀ꦤꦣꦩ꧀ꦩꦱ꧀ꦱ ꦕ ꦥꦗꦴꦤꦤꦴꦪ ꦄꦴꦤꦸꦨꦴꦮꦢꦷꦥꦏꦁ ‘‘ꦪꦢꦴ ꦲꦮꦺ ꦥꦴꦠꦸꦨꦮꦤ꧀ꦠꦷ’’ꦠꦶꦄꦴꦢꦶꦏꦁ ꦱꦺꦴꦩꦤꦱ꧀ꦱꦱꦩ꧀ꦥꦪꦸꦠ꧀ꦠꦚꦴꦟꦱꦩꦸꦛ꧀ꦜꦴꦤꦁ ꦈꦢꦴꦤꦁ ꦈꦢꦴꦤꦺꦱꦶ, ꦄꦠ꧀ꦠꦩꦤꦮꦴꦕꦁ ꦤꦶꦕ꧀ꦖꦴꦫꦺꦱꦷꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦠꦱ꧀ꦱꦠ꧀ꦡꦺꦴ – ꦪꦢꦴꦠꦶ ꦪꦱ꧀ꦩꦶꦁ ꦏꦴꦭꦺ. ꦲꦮꦺꦠꦶ ꦧ꧀ꦪꦠ꧀ꦠꦤ꧀ꦠꦶ ꦆꦩꦱ꧀ꦩꦶꦁ ꦄꦠ꧀ꦡꦺ ꦤꦶꦥꦴꦠꦺꦴ. ꦏꦺꦕꦶ ꦥꦤ ‘‘ꦲꦮꦺꦠꦶ ꦄꦴꦲꦮꦺ ꦪꦸꦢ꧀ꦣꦺ’’ꦠꦶ ꦄꦠ꧀ꦡꦁ ꦮꦢꦤ꧀ꦠꦶ, ‘‘ꦪꦺꦴꦣꦺꦡ ꦩꦴꦫꦁ ꦥꦚ꧀ꦚꦴꦮꦸꦣꦺꦤꦴ’’ꦠꦶ (ꦣ. ꦥ. ꧔꧐) ꦮꦕꦤꦠꦺꦴ ꦏꦶꦭꦺꦱꦩꦴꦫꦺꦤ ꦪꦸꦗ꧀ꦙꦤꦱꦩꦪꦺꦠꦶ ꦠꦺꦱꦁ ꦄꦣꦶꦥ꧀ꦥꦴꦪꦺꦴ. ꦥꦴꦠꦸꦨꦮꦤ꧀ꦠꦷꦠꦶ ꦈꦥ꧀ꦥꦗ꧀ꦗꦤ꧀ꦠꦶ. ꦣꦩ꧀ꦩꦴꦠꦶ ꦄꦤꦸꦭꦺꦴꦩꦥꦕ꧀ꦕꦪꦴꦏꦴꦫꦥꦛꦶꦮꦺꦣꦱꦴꦣꦏꦴ ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴ. ꦄꦡ ꦮꦴ ꦥꦴꦠꦸꦨꦮꦤ꧀ꦠꦷꦠꦶ ꦥꦏꦴꦱꦺꦤ꧀ꦠꦶ, ꦄꦨꦶꦱꦩꦪꦮꦱꦺꦤ ꦧ꧀ꦪꦠ꧀ꦠꦴ ꦥꦴꦏꦛꦴ ꦲꦺꦴꦤ꧀ꦠꦶ. ꦣꦩ꧀ꦩꦴꦠꦶ ꦕꦠꦸꦄꦫꦶꦪꦱꦕ꧀ꦕꦣꦩ꧀ꦩꦴ, ꦄꦴꦠꦴꦥꦺꦴ ꦮꦸꦕ꧀ꦕꦠꦶ ꦏꦶꦭꦺꦱꦱꦤ꧀ꦠꦴꦥꦤꦛ꧀ꦜꦺꦤ ꦮꦷꦫꦶꦪꦁ. ꦄꦴꦠꦴꦥꦶꦤꦺꦴꦠꦶ ꦱꦩ꧀ꦩꦥ꧀ꦥꦣꦴꦤꦮꦷꦫꦶꦪꦮꦠꦺꦴ. ꦙꦴꦪꦠꦺꦴꦠꦶ ꦄꦴꦫꦩ꧀ꦩꦟꦹꦥꦤꦶꦗ꧀ꦙꦴꦤꦺꦤ ꦭꦏ꧀ꦑꦟꦹꦥꦤꦶꦗ꧀ꦙꦴꦤꦺꦤ ꦙꦴꦪꦤ꧀ꦠꦱ꧀ꦱ. ꦧ꧀ꦫꦴꦲ꧀ꦩꦟꦱ꧀ꦱꦴꦠꦶ ꦧꦴꦲꦶꦠꦥꦴꦥꦱ꧀ꦱ ꦑꦷꦟꦴꦱꦮꦱ꧀ꦱ. ꦄꦡꦱ꧀ꦱ ꦏꦔ꧀ꦑꦴ ꦮꦥꦪꦤ꧀ꦠꦶ ꦱꦧ꧀ꦧꦴꦠꦶ ꦄꦡꦱ꧀ꦱ ꦌꦮꦁ ꦥꦴꦠꦸꦨꦹꦠꦣꦩ꧀ꦩꦱ꧀ꦱ ꦪꦴ ꦌꦠꦴ ‘‘ꦏꦺꦴ ꦤꦸ ꦑꦺꦴ, ꦨꦤ꧀ꦠꦺ, ꦦꦸꦱꦠꦷꦠꦶ. ꦤꦺꦴ ꦏꦭ꧀ꦭꦺꦴ ꦥꦚ꧀ꦲꦺꦴꦠꦶ ꦨꦒꦮꦴ ꦄꦮꦺꦴꦕꦴ’’ꦠꦶꦄꦴꦢꦶꦤꦴ (ꦱꦁ. ꦤꦶ. ꧒.꧑꧒) ꦤꦪꦺꦤ, ‘‘ꦏꦠꦩꦁ ꦤꦸ ꦑꦺꦴ, ꦨꦤ꧀ꦠꦺ, ꦗꦫꦴꦩꦫꦟꦁ, ꦏꦱ꧀ꦱ ꦕ ꦥꦤꦶꦢꦁ ꦗꦫꦴꦩꦫꦟꦤ꧀ꦠꦶ. ꦤꦺꦴ ꦏꦭ꧀ꦭꦺꦴ ꦥꦚ꧀ꦲꦺꦴꦠꦶ ꦨꦒꦮꦴ ꦄꦮꦺꦴꦕꦴ’’ꦠꦶꦄꦴꦢꦶꦤꦴ (ꦱꦁ. ꦤꦶ. ꧒.꧓꧕) ꦤꦪꦺꦤ ꦥꦕ꧀ꦕꦪꦴꦏꦴꦫꦺ ꦏꦔ꧀ꦑꦴ ꦮꦸꦠ꧀ꦠꦴ, ꦪꦴ ꦕ ꦥꦕ꧀ꦕꦪꦴꦏꦴꦫꦱ꧀ꦱꦺꦮ ꦄꦥ꧀ꦥꦛꦶꦮꦶꦢ꧀ꦣꦠ꧀ꦠꦴ ‘‘ꦄꦲꦺꦴꦱꦶꦁ ꦤꦸ ꦑꦺꦴ ꦄꦲꦁ ꦄꦠꦷꦠꦩꦢ꧀ꦣꦴꦤ’’ꦤ꧀ꦠꦶꦄꦴꦢꦶꦤꦴ (ꦩ. ꦤꦶ. ꧑.꧑꧘; ꦱꦁ. ꦤꦶ. ꧒.꧒꧐) ꦱꦺꦴꦭ꦳ꦱ ꦏꦔ꧀ꦑꦴ ꦄꦴꦒꦠꦴ. ꦠꦴ ꦱꦧ꧀ꦧꦴ ꦮꦥꦪꦤ꧀ꦠꦶ ꦄꦥꦒꦕ꧀ꦖꦤ꧀ꦠꦶ ꦤꦶꦫꦸꦗ꧀ꦙꦤ꧀ꦠꦶ. ꦏꦱ꧀ꦩꦴ? ꦪꦠꦺꦴ ꦥꦗꦴꦤꦴꦠꦶ ꦱꦲꦺꦠꦸꦣꦩ꧀ꦩꦁ, ꦪꦱ꧀ꦩꦴ ꦄꦮꦶꦗ꧀ꦗꦴꦢꦶꦏꦺꦤ ꦲꦺꦠꦸꦤꦴ ꦱꦲꦺꦠꦸꦏꦁ ꦆꦩꦁ ꦱꦔ꧀ꦑꦴꦫꦴꦢꦶꦏꦁ ꦏꦺꦮꦭꦁ ꦢꦸꦏ꧀ꦑꦏ꧀ꦑꦤ꧀ꦣꦣꦩ꧀ꦩꦁ ꦥꦗꦴꦤꦴꦠꦶ ꦄꦚ꧀ꦚꦴꦱꦶ ꦥꦛꦶꦮꦶꦗ꧀ꦙꦷꦠꦶ.

ꦏꦢꦴ ꦥꦤꦱ꧀ꦱ ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴ ꦕꦠꦸꦱꦕ꧀ꦕꦣꦩ꧀ꦩꦴ ꦮꦴ ꦥꦴꦠꦸꦨꦮꦤ꧀ꦠꦶ ꦈꦥ꧀ꦥꦗ꧀ꦗꦤ꧀ꦠꦶ ꦥꦏꦴꦱꦺꦤ꧀ꦠꦶ ꦮꦴ? ꦮꦶꦥꦱ꧀ꦱꦤꦴꦩꦒ꧀ꦒꦚꦴꦟꦺꦱꦸ. ꦠꦠ꧀ꦡ ꦮꦶꦥꦱ꧀ꦱꦤꦴꦚꦴꦟꦱꦩ꧀ꦥꦪꦸꦠ꧀ꦠꦴ ꦱꦠꦶꦄꦴꦢꦪꦺꦴ ꦮꦶꦥꦱ꧀ꦱꦤꦴꦚꦴꦟꦚ꧀ꦕ ꦪꦡꦴꦫꦲꦁ ꦄꦠ꧀ꦠꦤꦺꦴ ꦮꦶꦱꦪꦺꦱꦸ ꦠꦢꦔ꧀ꦒꦥ꧀ꦥꦲꦴꦤꦮꦱꦺꦤ ꦱꦸꦨꦱꦚ꧀ꦚꦴꦢꦶꦏꦺ ꦥꦗꦲꦤ꧀ꦠꦴ ꦏꦴꦪꦴꦤꦸꦥꦱ꧀ꦱꦤꦴꦢꦶꦮꦱꦺꦤ ꦮꦶꦱꦸꦁ ꦮꦶꦱꦸꦁ ꦈꦥ꧀ꦥꦗ꧀ꦗꦤ꧀ꦠꦶ, ꦩꦒ꧀ꦒꦏ꧀ꦑꦟꦺ ꦥꦤ ꦠꦺ ꦤꦶꦧ꧀ꦧꦴꦤꦩꦴꦭꦩ꧀ꦧꦶꦠ꧀ꦮꦴ ꦱꦩꦸꦕ꧀ꦖꦺꦢꦮꦱꦺꦤ ꦥꦛꦶꦥꦏ꧀ꦑꦺ ꦥꦗꦲꦤ꧀ꦠꦴ ꦕꦠꦹꦱꦸꦥꦶ ꦄꦫꦶꦪꦱꦕ꧀ꦕꦺꦱꦸ ꦄꦱꦩ꧀ꦩꦺꦴꦲꦥ꧀ꦥꦛꦶꦮꦺꦣꦱꦴꦣꦤꦮꦱꦺꦤ ꦱꦏꦶꦢꦺꦮ ꦈꦥ꧀ꦥꦗ꧀ꦗꦤ꧀ꦠꦶ. ꦌꦮꦁ ꦠꦴꦮꦺꦠ꧀ꦡ ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴꦤꦁ ꦈꦥ꧀ꦥꦗ꧀ꦗꦤꦛ꧀ꦜꦺꦤ ꦥꦴꦠꦸꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ.

ꦄꦫꦶꦪꦱꦕ꧀ꦕꦣꦩ꧀ꦩꦴꦤꦁ ꦥꦤ ꦭꦺꦴꦏꦶꦪꦴꦤꦁ ꦮꦶꦥꦱ꧀ꦱꦤꦴꦏ꧀ꦑꦟꦺ ꦮꦶꦥꦱ꧀ꦱꦤꦴꦪ ꦄꦴꦫꦩ꧀ꦩꦟꦏꦫꦟꦮꦱꦺꦤ, ꦭꦺꦴꦏꦸꦠ꧀ꦠꦫꦴꦤꦁ ꦠꦢꦣꦶꦩꦸꦠ꧀ꦠꦠꦴꦮꦱꦺꦤ, ꦩꦒ꧀ꦒꦏ꧀ꦑꦟꦺ ꦤꦶꦫꦺꦴꦣꦱꦕ꧀ꦕꦱ꧀ꦱ ꦄꦴꦫꦩ꧀ꦩꦟꦴꦨꦶꦱꦩꦪꦮꦱꦺꦤ, ꦱꦧ꧀ꦧꦺꦱꦩ꧀ꦥꦶ ꦏꦶꦕ꧀ꦕꦴꦨꦶꦱꦩꦪꦮꦱꦺꦤ ꦥꦴꦏꦛꦨꦴꦮꦠꦺꦴ ꦥꦏꦴꦱꦤꦛ꧀ꦜꦺꦤ ꦥꦴꦠꦸꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ.

ꦆꦠꦶ ꦨꦒꦮꦴ ꦱꦠꦶꦥꦶ ꦱꦧ꧀ꦧꦴꦏꦴꦫꦺꦤ ꦱꦧ꧀ꦧꦣꦩ꧀ꦩꦴꦤꦁ ꦄꦠ꧀ꦠꦤꦺꦴ ꦚꦴꦟꦱ꧀ꦱ ꦥꦴꦏꦛꦨꦴꦮꦺ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦩꦸꦑꦺꦤ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦱ꧀ꦱ ꦏꦠꦠ꧀ꦠꦴ ꦤꦶꦥꦸꦟꦒꦩ꧀ꦨꦷꦫꦱꦸꦢꦸꦢ꧀ꦢꦱꦠꦴꦪ ꦥꦕ꧀ꦕꦪꦴꦏꦴꦫꦱ꧀ꦱ ꦠꦁ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ ꦈꦥ꧀ꦥꦤ꧀ꦤꦧꦭꦮꦱꦺꦴꦩꦤꦱ꧀ꦱꦺꦴ ꦥꦛꦶꦥꦏ꧀ꦑꦱꦩꦸꦕ꧀ꦖꦺꦢꦮꦶꦨꦴꦮꦤꦺꦤ ꦱꦢ꧀ꦣꦶꦁ ꦄꦠ꧀ꦠꦤꦺꦴ ꦠꦢꦨꦶꦱꦩꦪꦴꦤꦸꦨꦴꦮꦢꦷꦥꦏꦩꦺꦮꦺꦠ꧀ꦡ ꦈꦢꦴꦤꦁ ꦈꦢꦴꦤꦺꦱꦷꦠꦶ.

ꦄꦪꦩ꧀ꦥꦶ ꦈꦢꦴꦤꦺꦴ ꦮꦸꦠ꧀ꦠꦺꦴ ꦨꦒꦮꦠꦴ ꦆꦠꦶ ꦩꦺ ꦱꦸꦠꦤ꧀ꦠꦶ ꦄꦪꦁ ꦥꦴꦭ꦳ꦶ ꦏꦺꦱꦸꦕꦶꦪꦺꦮ ꦥꦺꦴꦠ꧀ꦡꦏꦺꦱꦸ ꦢꦶꦱ꧀ꦱꦠꦶ. ꦠꦠ꧀ꦡ ꦄꦪꦩ꧀ꦥꦷꦠꦶ ꦥꦶꦱꦢ꧀ꦢꦺꦴ ‘‘ꦆꦢꦩ꧀ꦥꦶ ꦧꦸꦢ꧀ꦣꦺ ꦫꦠꦤꦁ ꦥꦟꦷꦠꦁ, ꦄꦪꦩ꧀ꦥꦶ ꦥꦴꦫꦴꦗꦶꦏꦺꦴ ꦲꦺꦴꦠꦷ’’ꦠꦶꦄꦴꦢꦷꦱꦸ ꦮꦶꦪ ꦱꦩ꧀ꦥꦶꦟ꧀ꦝꦤꦠ꧀ꦡꦺꦴ, ꦠꦺꦤ ꦈꦥꦫꦶꦩꦁ ꦱꦩ꧀ꦥꦶꦟ꧀ꦝꦺꦠꦶ. ꦮꦸꦠ꧀ꦠꦺꦴꦠꦶ ꦄꦪꦁ ꦮꦸꦠ꧀ꦠꦱꦢ꧀ꦢꦺꦴ ꦏꦺꦱꦺꦴꦲꦴꦫꦟꦮꦥ꧀ꦥꦤꦮꦴꦥꦱꦩꦷꦏꦫꦟꦗꦷꦮꦶꦠꦮꦸꦠ꧀ꦠꦶꦥꦩꦸꦠ꧀ꦠꦨꦴꦮꦥꦴꦮꦕꦤꦨꦴꦮꦺꦤ ꦥꦮꦠ꧀ꦠꦤ ꦄꦗ꧀ꦙꦺꦤꦏꦡꦤꦴꦢꦷꦱꦸ ꦢꦶꦱ꧀ꦱꦠꦶ. ꦠꦡꦴ ꦲꦺꦱ ‘‘ꦏꦴꦥꦛꦶꦏꦺꦴ ꦩꦴꦟꦮꦺꦴ ꦢꦲꦫꦺꦴ ꦮꦸꦠ꧀ꦠꦱꦶꦫꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧔꧒꧖) ꦏꦺꦱꦺꦴꦲꦴꦫꦟꦺ ꦄꦴꦒꦠꦺꦴ.

‘‘ꦒꦴꦮꦺꦴ ꦠꦱ꧀ꦱ ꦥꦗꦴꦪꦤ꧀ꦠꦶ, ꦑꦺꦠ꧀ꦠꦺ ꦮꦸꦠ꧀ꦠꦁ ꦮꦶꦫꦹꦲꦠꦶ;

ꦮꦸꦠ꧀ꦠꦴꦤꦁ ꦦꦭꦩꦱ꧀ꦤꦴꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦷ’’ꦠꦶ. –

ꦄꦴꦢꦷꦱꦸ (ꦗꦴ. ꧒.꧒꧒.꧑꧙) ꦮꦥ꧀ꦥꦤꦺ. ‘‘ꦤꦺꦴ ꦕ ꦑꦺꦴ ꦥꦛꦶꦮꦸꦠ꧀ꦠ’’ꦤ꧀ꦠꦶꦄꦴꦢꦷꦱꦸ (ꦥꦴꦫꦴ. ꧒꧘꧙) ꦄꦛ꧀ꦜꦢꦟ꧀ꦝꦏꦴꦢꦷꦲꦶ ꦮꦴꦥꦱꦩꦷꦏꦫꦟꦺ. ‘‘ꦥꦤ꧀ꦤꦭꦺꦴꦩꦺꦴ ꦥꦫꦢꦠ꧀ꦠꦮꦸꦠ꧀ꦠꦺꦴ ꦩꦶꦒꦨꦹꦠꦺꦤ ꦕꦺꦠꦱꦴ ꦮꦶꦲꦫꦴꦩꦷ’’ꦠꦶꦄꦴꦢꦷꦱꦸ (ꦕꦹꦭ꦳ꦮ. ꧓꧓꧒) ꦗꦷꦮꦶꦠꦮꦸꦠ꧀ꦠꦶꦪꦁ. ‘‘ꦥꦟ꧀ꦝꦸꦥꦭꦴꦱꦺꦴ ꦧꦤ꧀ꦣꦤꦴ ꦥꦮꦸꦠ꧀ꦠꦺꦴ ꦄꦨꦧ꧀ꦧꦺꦴ ꦲꦫꦶꦠꦠ꧀ꦠꦴꦪꦴ’’ꦠꦶꦄꦴꦢꦷꦱꦸ (ꦥꦴꦫꦴ. ꧙꧒) ꦧꦤ꧀ꦣꦤꦠꦺꦴ ꦥꦩꦸꦠ꧀ꦠꦨꦴꦮꦺ. ‘‘ꦒꦷꦠꦁ ꦮꦸꦠ꧀ꦠꦁ ꦱꦩꦷꦲꦶꦠ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧒꧘꧕) ꦥꦴꦮꦕꦤꦨꦴꦮꦺꦤ ꦥꦮꦠ꧀ꦠꦶꦠꦺ. ‘‘ꦮꦸꦠ꧀ꦠꦺꦴ ꦥꦴꦫꦴꦪꦟꦺꦴ’’ꦠꦶꦄꦴꦢꦷꦱꦸ ꦄꦗ꧀ꦙꦺꦤꦺ. ‘‘ꦮꦸꦠ꧀ꦠꦁ ꦑꦺꦴ ꦥꦤꦺꦠꦁ ꦨꦒꦮꦠꦴ ‘ꦣꦩ꧀ꦩꦢꦴꦪꦴꦢꦴ ꦩꦺ, ꦨꦶꦏ꧀ꦑꦮꦺ, ꦨꦮꦡ, ꦩꦴ ꦄꦴꦩꦶꦱꦢꦴꦪꦴꦢꦴ’’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧓꧐) ꦏꦡꦤꦺ. ꦆꦣꦴꦥꦶ ꦏꦡꦤꦺ ꦌꦮ ꦢꦛ꧀ꦜꦧ꧀ꦧꦺꦴ, ꦠꦺꦤ ꦄꦪꦩ꧀ꦥꦶ ꦈꦢꦴꦤꦺꦴ ꦨꦴꦱꦶꦠꦺꦴꦠꦶ ꦄꦠ꧀ꦡꦺꦴ. ꦆꦠꦷꦠꦶ ꦌꦮꦁ. ꦩꦺ ꦱꦸꦠꦤ꧀ꦠꦶ ꦥꦢꦢ꧀ꦮꦪꦱ꧀ꦱ ꦄꦠ꧀ꦡꦺꦴ ꦤꦶꦢꦴꦤꦮꦟ꧀ꦟꦤꦴꦪꦁ ꦱꦧ꧀ꦧꦴꦏꦴꦫꦠꦺꦴ ꦮꦸꦠ꧀ꦠꦺꦴꦪꦺꦮ. ꦥꦸꦧ꧀ꦧꦺ ‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶ ꦤꦶꦢꦴꦤꦮꦱꦺꦤ ꦮꦸꦠ꧀ꦠꦺꦴꦪꦺꦮ ꦲꦶ ꦄꦠ꧀ꦡꦺꦴ ꦆꦣ ꦤꦶꦒꦩꦤꦮꦱꦺꦤ ‘‘ꦆꦠꦶ ꦩꦺ ꦱꦸꦠ’’ꦤ꧀ꦠꦶ ꦥꦸꦤ ꦮꦸꦠ꧀ꦠꦺꦴ. ꦮꦸꦠ꧀ꦠꦱ꧀ꦱꦺꦮ ꦲꦶ ꦄꦠ꧀ꦡꦱ꧀ꦱ ꦥꦸꦤ ꦮꦕꦤꦁ ꦤꦶꦒꦩꦤꦤ꧀ꦠꦶ. ꦆꦠꦶꦱꦢ꧀ꦢꦱ꧀ꦱ ꦄꦠ꧀ꦡꦸꦢ꧀ꦣꦴꦫꦺꦴ ꦌꦮꦁ-ꦱꦢ꧀ꦢꦺꦤ ꦱꦩꦴꦤꦠ꧀ꦡꦠꦴꦪ ‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶ ꦌꦠ꧀ꦡ ꦮꦶꦪ, ꦄꦠ꧀ꦡꦪꦺꦴꦗꦤꦴ ꦕ ꦆꦠꦶꦮꦸꦠ꧀ꦠꦏꦮꦟ꧀ꦟꦤꦴꦪ ꦄꦩ꧀ꦲꦺꦲꦶ ꦥꦏꦴꦱꦶꦠꦴꦪꦺꦮꦴꦠꦶ ꦠꦠ꧀ꦡ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴꦠꦶ.

ꦥꦫꦩꦠ꧀ꦡꦢꦷꦥꦤꦶꦪꦴ ꦑꦸꦢ꧀ꦢꦏꦤꦶꦏꦴꦪꦛ꧀ꦜꦏꦡꦴꦪ

ꦈꦢꦴꦤꦱꦁꦮꦟ꧀ꦟꦤꦴꦥꦜꦩꦧꦺꦴꦣꦶꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.