꧒. ꦮꦶꦩꦭꦴꦡꦺꦫꦷꦒꦴꦡꦴꦮꦟ꧀ꦟꦤꦴ

ꦩꦠ꧀ꦠꦴ ꦮꦟ꧀ꦟꦺꦤ ꦫꦹꦥꦺꦤꦴꦠꦶꦄꦴꦢꦶꦏꦴ ꦮꦶꦩꦭꦴꦪ ꦡꦺꦫꦶꦪꦴ ꦒꦴꦡꦴ. ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦁ ꦏꦸꦱꦭꦁ ꦈꦥꦕꦶꦤꦶꦠ꧀ꦮꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦮꦺꦱꦴꦭꦶꦪꦁ ꦄꦚ꧀ꦚꦠꦫꦴꦪ ꦫꦹꦥꦹꦥꦗꦷꦮꦶꦤꦶꦪꦴ ꦆꦠ꧀ꦡꦶꦪꦴ ꦣꦷꦠꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶ. ꦮꦶꦩꦭꦴꦠꦶꦱ꧀ꦱꦴ ꦤꦴꦩꦁ ꦄꦲꦺꦴꦱꦶ. ꦱꦴ ꦮꦪꦥ꧀ꦥꦠ꧀ꦠꦴ ꦠꦡꦺꦮ ꦗꦷꦮꦶꦏꦁ ꦏꦥ꧀ꦥꦺꦤ꧀ꦠꦷ ꦌꦏꦢꦶꦮꦱꦁ ꦄꦴꦪꦱ꧀ꦩꦤ꧀ꦠꦁ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦁ ꦮꦺꦱꦴꦭꦶꦪꦁ ꦥꦶꦟ꧀ꦝꦴꦪ ꦕꦫꦤ꧀ꦠꦁ ꦢꦶꦱ꧀ꦮꦴ ꦥꦛꦶꦧꦢ꧀ꦣꦕꦶꦠ꧀ꦠꦴ ꦲꦸꦠ꧀ꦮꦴ ꦡꦺꦫꦱ꧀ꦱ ꦮꦱꦤꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦡꦺꦫꦁ ꦈꦢ꧀ꦢꦶꦱ꧀ꦱ ꦥꦭꦺꦴꦨꦤꦏꦩ꧀ꦩꦁ ꦏꦴꦠꦸꦁ ꦄꦴꦫꦨꦶ. ‘‘ꦠꦶꦠ꧀ꦡꦶꦪꦺꦲꦶ ꦈꦪ꧀ꦪꦺꦴꦗꦶꦠꦴ ꦠꦡꦴ ꦄꦏꦴꦱꦷ’’ꦠꦶ ꦏꦺꦕꦶ ꦮꦢꦤ꧀ꦠꦶ. ꦡꦺꦫꦺꦴ ꦠꦱ꧀ꦱꦴ ꦄꦱꦸꦨꦮꦶꦨꦴꦮꦤꦩꦸꦑꦺꦤ ꦱꦤ꧀ꦠꦗ꧀ꦗꦤꦁ ꦏꦠ꧀ꦮꦴ ꦎꦮꦴꦢꦩꦢꦴꦱꦶ. ꦠꦁ ꦲꦺꦛ꧀ꦜꦴ ꦡꦺꦫꦒꦴꦡꦴꦪ ꦄꦴꦒꦠꦩꦺꦮ, ꦠꦡꦴ ꦥꦤ ꦡꦺꦫꦺꦤ ꦎꦮꦴꦢꦺ ꦢꦶꦤ꧀ꦤꦺ ꦱꦴ ꦱꦁꦮꦺꦒꦗꦴꦠꦴ ꦲꦶꦫꦺꦴꦠ꧀ꦠꦥ꧀ꦥꦁ ꦥꦕ꧀ꦕꦸꦥꦛ꧀ꦜꦥꦺꦠ꧀ꦮꦴ ꦱꦴꦱꦤꦺ ꦥꦛꦶꦭꦢ꧀ꦣꦱꦢ꧀ꦣꦴ ꦈꦥꦴꦱꦶꦏꦴ ꦲꦸꦠ꧀ꦮꦴ ꦄꦥꦫꦨꦴꦒꦺ ꦨꦶꦏ꧀ꦑꦸꦤꦷꦱꦸ ꦥꦧ꧀ꦧꦗꦶꦠ꧀ꦮꦴ ꦓꦛꦺꦤ꧀ꦠꦷ ꦮꦴꦪꦩꦤ꧀ꦠꦷ ꦲꦺꦠꦸꦱꦩ꧀ꦥꦤ꧀ꦤꦠꦴꦪ ꦤ ꦕꦶꦫꦱ꧀ꦱꦺꦮ ꦄꦫꦲꦠ꧀ꦠꦁ ꦥꦠ꧀ꦮꦴ ꦄꦠ꧀ꦠꦤꦺꦴ ꦥꦛꦶꦥꦠ꧀ꦠꦶꦁ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ ꦈꦢꦴꦤꦮꦱꦺꦤ –

꧗꧒. ‘‘ꦩꦠ꧀ꦠꦴ ꦮꦟ꧀ꦟꦺꦤ ꦫꦹꦥꦺꦤ, ꦱꦺꦴꦨꦒ꧀ꦒꦺꦤ ꦪꦱꦺꦤ ꦕ;

ꦪꦺꦴꦧ꧀ꦧꦤꦺꦤ ꦕꦸꦥꦠ꧀ꦡꦢ꧀ꦣꦴ, ꦄꦚ꧀ꦚꦴꦱꦩꦠꦶꦩꦚ꧀ꦚꦶꦲꦁ.

꧗꧓. ‘‘ꦮꦶꦨꦹꦱꦺꦠ꧀ꦮꦴ ꦆꦩꦁ ꦏꦴꦪꦁ, ꦱꦸꦕꦶꦠ꧀ꦠꦁ ꦧꦴꦭꦭꦴꦥꦤꦁ;

ꦄꦛ꧀ꦜꦴꦱꦶꦁ ꦮꦺꦱꦶꦢ꧀ꦮꦴꦫꦩ꧀ꦲꦶ, ꦭꦸꦢ꧀ꦢꦺꦴ ꦥꦴꦱꦩꦶꦮꦺꦴꦝ꧀ꦝꦶꦪ.

꧗꧔. ‘‘ꦥꦶꦭ꦳ꦤ꧀ꦣꦤꦁ ꦮꦶꦢꦁꦱꦺꦤ꧀ꦠꦷ, ꦒꦸꦪ꧀ꦲꦁ ꦥꦏꦴꦱꦶꦏꦁ ꦧꦲꦸꦁ;

ꦄꦏꦴꦱꦶꦁ ꦮꦶꦮꦶꦣꦁ ꦩꦴꦪꦁ, ꦈꦗ꧀ꦙꦒ꧀ꦓꦤ꧀ꦠꦷ ꦧꦲꦸꦁ ꦗꦤꦁ.

꧗꧕. ‘‘ꦱꦴꦗ꧀ꦗ ꦥꦶꦟ꧀ꦝꦁ ꦕꦫꦶꦠ꧀ꦮꦴꦤ, ꦩꦸꦟ꧀ꦝꦴ ꦱꦔ꧀ꦓꦴꦛꦶꦥꦴꦫꦸꦠꦴ;

ꦤꦶꦱꦶꦤ꧀ꦤꦴ ꦫꦸꦏ꧀ꦑꦩꦹꦭꦩ꧀ꦲꦶ, ꦄꦮꦶꦠꦏ꧀ꦏꦱ꧀ꦱ ꦭꦴꦨꦶꦤꦷ.

꧗꧖. ‘‘ꦱꦧ꧀ꦧꦺ ꦪꦺꦴꦒꦴ ꦱꦩꦸꦕ꧀ꦖꦶꦤ꧀ꦤꦴ, ꦪꦺ ꦢꦶꦧ꧀ꦧꦴ ꦪꦺ ꦕ ꦩꦴꦤꦸꦱꦴ;

ꦑꦺꦥꦺꦠ꧀ꦮꦴ ꦄꦴꦱꦮꦺ ꦱꦧ꧀ꦧꦺ, ꦱꦷꦠꦶꦨꦹꦠꦴꦩ꧀ꦲꦶ ꦤꦶꦧ꧀ꦧꦸꦠꦴ’’ꦠꦶ. –

ꦆꦩꦴ ꦒꦴꦡꦴ ꦄꦨꦴꦱꦶ.

ꦠꦠ꧀ꦡ ꦩꦠ꧀ꦠꦴ ꦮꦟ꧀ꦟꦺꦤ ꦫꦹꦥꦺꦤꦴꦠꦶ ꦒꦸꦟꦮꦟ꧀ꦟꦺꦤ ꦕꦺꦮ ꦫꦹꦥꦱꦩ꧀ꦥꦠ꧀ꦠꦶꦪꦴ ꦕ. ꦱꦺꦴꦨꦒ꧀ꦒꦺꦤꦴꦠꦶ ꦱꦸꦨꦒꦨꦴꦮꦺꦤ. ꦪꦱꦺꦤꦴꦠꦶ ꦥꦫꦶꦮꦴꦫꦱꦩ꧀ꦥꦠ꧀ꦠꦶꦪꦴ. ꦩꦠ꧀ꦠꦴ ꦮꦟ꧀ꦟꦩꦢꦫꦹꦥꦩꦢꦱꦺꦴꦨꦒ꧀ꦒꦩꦢꦥꦫꦶꦮꦴꦫꦩꦢꦮꦱꦺꦤ ꦩꦢꦁ ꦄꦴꦥꦤ꧀ꦤꦴꦠꦶ ꦄꦠ꧀ꦡꦺꦴ. ꦪꦺꦴꦧ꧀ꦧꦤꦺꦤ ꦕꦸꦥꦠ꧀ꦡꦢ꧀ꦣꦴꦠꦶ ꦪꦺꦴꦧ꧀ꦧꦤꦩꦢꦺꦤ ꦈꦥꦫꦹꦥꦫꦶ ꦡꦢ꧀ꦣꦴ ꦪꦺꦴꦧ꧀ꦧꦤꦤꦶꦩꦶꦠ꧀ꦠꦺꦤ ꦄꦲꦔ꧀ꦏꦴꦫꦺꦤ ꦈꦥꦠ꧀ꦡꦢ꧀ꦣꦕꦶꦠ꧀ꦠꦴ ꦄꦤꦸꦥꦱꦤ꧀ꦠꦩꦴꦤꦱꦴ. ꦄꦚ꧀ꦚꦴꦱꦩꦠꦶꦩꦚ꧀ꦚꦶꦲꦤ꧀ꦠꦶ ꦄꦚ꧀ꦚꦴ ꦆꦠ꧀ꦡꦶꦪꦺꦴ ꦄꦠ꧀ꦠꦤꦺꦴ ꦮꦟ꧀ꦟꦴꦢꦶꦒꦸꦟꦺꦲꦶ ꦱꦧ꧀ꦧꦡꦴꦥꦶ ꦄꦠꦶꦏ꧀ꦏꦩꦶꦠ꧀ꦮꦴ ꦩꦚ꧀ꦚꦶꦁ ꦄꦲꦁ. ꦄꦚ꧀ꦚꦴꦱꦁ ꦮꦴ ꦆꦠ꧀ꦡꦷꦤꦁ ꦮꦟ꧀ꦟꦴꦢꦶꦒꦸꦟꦺ ꦄꦠꦶꦩꦚ꧀ꦚꦶꦁ ꦄꦠꦶꦏ꧀ꦏꦩꦶꦠ꧀ꦮꦴ ꦄꦩꦚ꧀ꦚꦶꦁ ꦄꦮꦩꦴꦤꦁ ꦄꦏꦴꦱꦶꦁ.

ꦮꦶꦨꦹꦱꦶꦠ꧀ꦮꦴ ꦆꦩꦁ ꦏꦴꦪꦁ, ꦱꦸꦕꦶꦠ꧀ꦠꦁ ꦧꦴꦭꦭꦴꦥꦤꦤ꧀ꦠꦶ ꦆꦩꦁ ꦤꦴꦤꦴꦮꦶꦣꦄꦱꦸꦕꦶꦨꦫꦶꦠꦁ ꦗꦺꦒꦸꦕ꧀ꦖꦁ ꦄꦲꦁ ꦩꦩꦴꦠꦶ ꦧꦴꦭꦴꦤꦁ ꦭꦴꦥꦤꦠꦺꦴ ꦮꦴꦕꦤꦠꦺꦴ ꦧꦴꦭꦭꦴꦥꦤꦁ ꦩꦩ ꦏꦴꦪꦁ ꦖꦮꦶꦫꦴꦒꦏꦫꦟꦏꦺꦱꦛ꧀ꦜꦥꦤꦴꦢꦶꦤꦴ ꦱꦸꦕꦶꦠ꧀ꦠꦁ ꦮꦠ꧀ꦡꦴꦨꦫꦟꦺꦲꦶ ꦮꦶꦨꦹꦱꦶꦠ꧀ꦮꦴ ꦱꦸꦩꦟ꧀ꦝꦶꦠꦥꦱꦴꦢꦶꦠꦁ ꦏꦠ꧀ꦮꦴ. ꦄꦛ꧀ꦜꦴꦱꦶꦁ ꦮꦺꦱꦶꦢ꧀ꦮꦴꦫꦩ꧀ꦲꦶ, ꦭꦸꦢ꧀ꦢꦺꦴ ꦥꦴꦱꦩꦶꦮꦺꦴꦝ꧀ꦝꦶꦪꦴꦠꦶ ꦩꦶꦒꦭꦸꦢ꧀ꦢꦺꦴ ꦮꦶꦪ ꦩꦶꦒꦴꦤꦁ ꦧꦤ꧀ꦣꦤꦠ꧀ꦡꦴꦪ ꦢꦟ꧀ꦝꦮꦴꦏꦸꦫꦴꦢꦶꦩꦶꦒꦥꦴꦱꦁ, ꦩꦴꦫꦱ꧀ꦱ ꦥꦴꦱꦨꦹꦠꦁ ꦪꦡꦴꦮꦸꦠ꧀ꦠꦁ ꦩꦩ ꦏꦴꦪꦁ ꦮꦺꦱꦶꦢ꧀ꦮꦴꦫꦩ꧀ꦲꦶ ꦮꦺꦱꦶꦪꦴ ꦓꦫꦢ꧀ꦮꦴꦫꦺ ꦎꦝ꧀ꦝꦶꦪꦶꦠ꧀ꦮꦴ ꦄꦛ꧀ꦜꦴꦱꦶꦁ.

ꦥꦶꦭ꦳ꦤ꧀ꦣꦤꦁ ꦮꦶꦢꦁꦱꦺꦤ꧀ꦠꦷ, ꦒꦸꦪ꧀ꦲꦁ ꦥꦏꦴꦱꦶꦏꦁ ꦧꦲꦸꦤ꧀ꦠꦶ ꦈꦴꦫꦸꦗꦓꦤꦡꦤꦢꦱ꧀ꦱꦤꦴꦢꦶꦏꦁ ꦒꦸꦪ꧀ꦲꦚ꧀ꦕꦺꦮ ꦥꦴꦢꦗꦴꦟꦸꦱꦶꦫꦴꦢꦶꦏꦁ ꦥꦏꦴꦱꦚ꧀ꦕꦴꦠꦶ ꦒꦸꦪ꧀ꦲꦁ ꦥꦏꦴꦱꦶꦏꦚ꧀ꦕ ꦧꦲꦸꦁ ꦤꦴꦤꦥ꧀ꦥꦏꦴꦫꦁ ꦥꦶꦭ꦳ꦤ꧀ꦣꦤꦁ ꦄꦴꦨꦫꦟꦁ ꦢꦱ꧀ꦱꦺꦤ꧀ꦠꦷ. ꦄꦏꦴꦱꦶꦁ ꦮꦶꦮꦶꦣꦁ ꦩꦴꦪꦁ, ꦈꦗ꧀ꦙꦒ꧀ꦓꦤ꧀ꦠꦷ ꦧꦲꦸꦁ ꦗꦤꦤ꧀ꦠꦶ ꦪꦺꦴꦧ꧀ꦧꦤꦩꦢꦩꦠ꧀ꦠꦁ ꦧꦲꦸꦁ ꦧꦴꦭꦗꦤꦁ ꦮꦶꦥ꧀ꦥꦭꦩ꧀ꦨꦺꦠꦸꦁ ꦲꦱꦤ꧀ꦠꦷ ꦒꦤ꧀ꦣꦩꦴꦭꦴꦮꦠ꧀ꦡꦴꦨꦫꦟꦴꦢꦷꦲꦶ ꦱꦫꦷꦫꦱꦨꦴꦮꦥꦛꦶꦕ꧀ꦖꦴꦢꦤꦺꦤ ꦲꦱꦮꦶꦭꦴꦱꦨꦴꦮꦴꦢꦷꦲꦶ ꦠꦺꦲꦶ ꦕ ꦮꦶꦮꦶꦣꦁ ꦤꦴꦤꦥ꧀ꦥꦏꦴꦫꦁ ꦮꦚ꧀ꦕꦤꦁ ꦄꦏꦴꦱꦶꦁ.

ꦱꦴꦗ꧀ꦗ ꦥꦶꦟ꧀ꦝꦁ ꦕꦫꦶꦠ꧀ꦮꦴꦤ…ꦥꦺ… ꦄꦮꦶꦠꦏ꧀ꦏꦱ꧀ꦱ ꦭꦴꦨꦶꦤꦷꦠꦶ ꦱꦴ ꦄꦲꦁ ꦌꦮꦁ ꦥꦩꦴꦢꦮꦶꦲꦴꦫꦶꦤꦷ ꦱꦩꦴꦤꦴ ꦄꦗ꧀ꦗ ꦆꦢꦴꦤꦶ ꦄꦪ꧀ꦪꦱ꧀ꦱ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦠ꧀ꦡꦺꦫꦱ꧀ꦱ ꦎꦮꦴꦢꦺ ꦜꦠ꧀ꦮꦴ ꦱꦴꦱꦤꦺ ꦥꦧ꧀ꦧꦗꦶꦠ꧀ꦮꦴ ꦩꦸꦟ꧀ꦝꦴ ꦱꦔ꧀ꦓꦴꦛꦶꦥꦴꦫꦸꦠꦴ ꦲꦸꦠ꧀ꦮꦴ ꦥꦶꦟ꧀ꦝꦁ ꦕꦫꦶꦠ꧀ꦮꦴꦤ ꦨꦶꦏ꧀ꦑꦴꦲꦴꦫꦁ ꦨꦸꦚ꧀ꦗꦶꦠ꧀ꦮꦴ ꦤꦶꦱꦶꦤ꧀ꦤꦴ ꦫꦸꦏ꧀ꦑꦩꦹꦭꦩ꧀ꦲꦶ ꦫꦸꦏ꧀ꦑꦩꦹꦭꦺ ꦮꦶꦮꦶꦠ꧀ꦠꦴꦱꦤꦺ ꦤꦶꦱꦶꦤ꧀ꦤꦴ ꦢꦸꦠꦶꦪꦗ꧀ꦙꦴꦤꦥꦴꦢꦏꦱ꧀ꦱ ꦄꦒ꧀ꦒꦦꦭꦱ꧀ꦱ ꦄꦣꦶꦒꦩꦺꦤ ꦄꦮꦶꦠꦏ꧀ꦏꦱ꧀ꦱ ꦭꦴꦨꦶꦤꦷ ꦄꦩ꧀ꦲꦷꦠꦶ ꦪꦺꦴꦗꦤꦴ.

ꦱꦧ꧀ꦧꦺ ꦪꦺꦴꦒꦴꦠꦶ ꦏꦴꦩꦪꦺꦴꦒꦴꦢꦪꦺꦴ ꦕꦠ꧀ꦠꦴꦫꦺꦴꦥꦶ ꦪꦺꦴꦒꦴ. ꦱꦩꦸꦕ꧀ꦖꦶꦤ꧀ꦤꦴꦠꦶ ꦥꦜꦩꦩꦒ꧀ꦒꦴꦢꦶꦤꦴ ꦪꦡꦴꦫꦲꦁ ꦱꦩ꧀ꦩꦢꦺꦮ ꦈꦕ꧀ꦖꦶꦤ꧀ꦤꦴ ꦥꦲꦷꦤꦴ. ꦱꦺꦱꦁ ꦮꦸꦠ꧀ꦠꦤꦪꦩꦺꦮ.

ꦮꦶꦩꦭꦴꦡꦺꦫꦷꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.