꧘. ꦄꦨꦪꦩꦴꦠꦸꦡꦺꦫꦷꦒꦴꦡꦴꦮꦟ꧀ꦟꦤꦴ

ꦈꦢ꧀ꦣꦁ ꦥꦴꦢꦠꦭꦴꦠꦶꦄꦴꦢꦶꦏꦴ ꦄꦨꦪꦩꦴꦠꦴꦪ ꦡꦺꦫꦶꦪꦴ ꦒꦴꦡꦴ. ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦷ ꦠꦶꦱ꧀ꦱꦱ꧀ꦱ ꦨꦒꦮꦠꦺꦴ ꦏꦴꦭꦺ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦶꦚ꧀ꦚꦸꦠꦁ ꦥꦠ꧀ꦮꦴ ꦌꦏꦢꦶꦮꦱꦁ ꦱꦠ꧀ꦡꦴꦫꦁ ꦥꦶꦟ꧀ꦝꦴꦪ ꦕꦫꦤ꧀ꦠꦁ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦏꦛꦕ꧀ꦖꦸꦩꦠ꧀ꦠꦁ ꦨꦶꦏ꧀ꦑꦁ ꦄꦢꦴꦱꦶ. ꦱꦴ ꦠꦺꦤ ꦥꦸꦚ꧀ꦚꦏꦩ꧀ꦩꦺꦤ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦷ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦠꦴꦢꦶꦱꦺꦤ ꦏꦩ꧀ꦩꦤꦶꦱ꧀ꦱꦤ꧀ꦢꦺꦤ ꦈꦗ꧀ꦗꦺꦤꦶꦪꦁ ꦥꦢꦸꦩꦮꦠꦷ ꦤꦴꦩ ꦤꦒꦫꦱꦺꦴꦨꦶꦟꦷ ꦄꦲꦺꦴꦱꦶ. ꦫꦴꦗꦴ ꦧꦶꦩ꧀ꦧꦶꦱꦴꦫꦺꦴ ꦠꦱ꧀ꦱꦴ ꦫꦹꦥꦱꦩ꧀ꦥꦠ꧀ꦠꦶꦄꦴꦢꦶꦏꦺ ꦒꦸꦟꦺ ꦱꦸꦠ꧀ꦮꦴ ꦥꦸꦫꦺꦴꦲꦶꦠꦱ꧀ꦱ ꦄꦴꦕꦶꦏ꧀ꦑꦶ – ‘‘ꦈꦗ꧀ꦗꦺꦤꦶꦪꦁ ꦏꦶꦫ ꦥꦢꦸꦩꦮꦠꦷ ꦤꦴꦩ ꦒꦟꦶꦏꦴ ꦄꦲꦺꦴꦱꦶ, ꦠꦩꦲꦁ ꦢꦛ꧀ꦜꦸꦏꦴꦩꦺꦴꦩ꧀ꦲꦷ’’ꦠꦶ. ꦥꦸꦫꦺꦴꦲꦶꦠꦺꦴ ‘‘ꦱꦴꦣꦸ, ꦢꦺꦮꦴ’’ꦠꦶ ꦩꦤ꧀ꦠꦧꦭꦺꦤ ꦏꦸꦩ꧀ꦨꦷꦫꦁ ꦤꦴꦩ ꦪꦏ꧀ꦑꦁ ꦄꦴꦮꦲꦺꦠ꧀ꦮꦴ ꦪꦏ꧀ꦑꦴꦤꦸꦨꦴꦮꦺꦤ ꦫꦴꦗꦴꦤꦁ ꦠꦴꦮꦢꦺꦮ ꦈꦗ꧀ꦗꦺꦤꦷꦤꦒꦫꦁ ꦤꦺꦱꦶ. ꦫꦴꦗꦴ ꦠꦴꦪ ꦱꦢ꧀ꦣꦶꦁ ꦌꦏꦫꦠ꧀ꦠꦶꦁ ꦱꦁꦮꦴꦱꦁ ꦏꦥ꧀ꦥꦺꦱꦶ. ꦱꦴ ꦠꦺꦤ ꦒꦧ꧀ꦨꦁ ꦒꦟ꧀ꦲꦶ. ꦫꦚ꧀ꦚꦺꦴ ꦕ ꦄꦴꦫꦺꦴꦕꦺꦱꦶ – ‘‘ꦩꦩ ꦏꦸꦕ꧀ꦖꦶꦪꦁ ꦒꦧ꧀ꦨꦺꦴ ꦥꦠꦶꦛ꧀ꦜꦲꦷ’’ꦠꦶ. ꦠꦁ ꦱꦸꦠ꧀ꦮꦴ ꦫꦴꦗꦴ ꦤꦁ ‘‘ꦱꦕꦺ ꦥꦸꦠ꧀ꦠꦺꦴ ꦨꦮꦺꦪ꧀ꦪ, ꦮꦝ꧀ꦞꦺꦠ꧀ꦮꦴ ꦩꦩꦁ ꦢꦱ꧀ꦱꦺꦲꦷ’’ꦠꦶ ꦮꦠ꧀ꦮꦴ ꦤꦴꦩꦩꦸꦢ꧀ꦢꦶꦏꦁ ꦢꦠ꧀ꦮꦴ ꦄꦒꦩꦴꦱꦶ. ꦱꦴ ꦢꦱꦩꦴꦱꦕ꧀ꦕꦪꦺꦤ ꦥꦸꦠ꧀ꦠꦁ ꦮꦶꦗꦴꦪꦶꦠ꧀ꦮꦴ ꦤꦴꦩꦒ꧀ꦒꦲꦟꦢꦶꦮꦱꦺ ꦄꦨꦪꦺꦴꦠꦶ ꦤꦴꦩꦁ ꦄꦏꦴꦱꦶ. ꦥꦸꦠ꧀ꦠꦚ꧀ꦕ ꦱꦠ꧀ꦠꦮꦱ꧀ꦱꦶꦏꦏꦴꦭꦺ ‘‘ꦠꦮ ꦥꦶꦠꦴ ꦧꦶꦩ꧀ꦧꦶꦱꦴꦫꦩꦲꦴꦫꦴꦗꦴ’’ꦠꦶ ꦫꦚ꧀ꦚꦺꦴ ꦱꦤ꧀ꦠꦶꦏꦁ ꦥꦲꦶꦟꦶ. ꦫꦴꦗꦴ ꦠꦁ ꦥꦸꦠ꧀ꦠꦁ ꦥꦱ꧀ꦱꦶꦠ꧀ꦮꦴ ꦥꦸꦠ꧀ꦠꦱꦶꦤꦺꦲꦁ ꦥꦛꦶꦭꦨꦶꦠ꧀ꦮꦴ ꦏꦸꦩꦴꦫꦏꦥꦫꦶꦲꦴꦫꦺꦤ ꦮꦝ꧀ꦞꦺꦱꦶ. ꦠꦱ꧀ꦱ ꦱꦢ꧀ꦣꦴꦥꦛꦶꦭꦴꦨꦺꦴ ꦥꦧ꧀ꦧꦗ꧀ꦗꦴ ꦮꦶꦱꦺꦱꦴꦣꦶꦒꦩꦺꦴ ꦕ ꦲꦺꦛ꧀ꦜꦴ ꦄꦴꦒꦠꦺꦴꦪꦺꦮ. ꦠꦱ꧀ꦱ ꦩꦴꦠꦴ ꦄꦥꦫꦨꦴꦒꦺ ꦥꦸꦠ꧀ꦠꦱ꧀ꦱ ꦄꦨꦪꦠ꧀ꦡꦺꦫꦱ꧀ꦱ ꦱꦤ꧀ꦠꦶꦏꦺ ꦣꦩ꧀ꦩꦁ ꦱꦸꦠ꧀ꦮꦴ ꦥꦛꦶꦭꦢ꧀ꦣꦱꦢ꧀ꦣꦴ ꦨꦶꦏ꧀ꦑꦸꦤꦷꦱꦸ ꦥꦧ꧀ꦧꦗꦶꦠ꧀ꦮꦴ ꦮꦶꦥꦱ꧀ꦱꦤꦴꦪ ꦏꦩ꧀ꦩꦁ ꦏꦫꦺꦴꦤ꧀ꦠꦷ ꦤꦕꦶꦫꦱ꧀ꦱꦺꦮ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦺꦤ ꦮꦸꦠ꧀ꦠꦁ ꦄꦥꦢꦴꦤꦺ (ꦄꦥ. ꦡꦺꦫꦷ ꧒.꧑.꧖꧐-꧗꧐) –

‘‘ꦥꦶꦟ꧀ꦝꦕꦴꦫꦁ ꦕꦫꦤ꧀ꦠꦱ꧀ꦱ, ꦠꦶꦱ꧀ꦱꦤꦴꦩꦱ꧀ꦱ ꦱꦠ꧀ꦡꦸꦤꦺꦴ;

ꦏꦛꦕ꧀ꦖꦸꦨꦶꦏ꧀ꦑꦁ ꦥꦒ꧀ꦒꦪ꧀ꦲ, ꦧꦸꦢ꧀ꦣꦱꦺꦛ꧀ꦜꦱ꧀ꦱꦢꦴꦱꦲꦁ.

‘‘ꦥꦛꦶꦒ꧀ꦒꦲꦺꦠ꧀ꦮꦴ ꦱꦩ꧀ꦧꦸꦢ꧀ꦣꦺꦴ, ꦠꦶꦱ꧀ꦱꦺꦴ ꦭꦺꦴꦏꦒ꧀ꦒꦤꦴꦪꦏꦺꦴ;

ꦮꦷꦡꦶꦪꦴ ꦱꦟ꧀ꦜꦶꦠꦺꦴ ꦱꦠ꧀ꦡꦴ, ꦄꦏꦴ ꦩꦺ ꦄꦤꦸꦩꦺꦴꦢꦤꦁ.

‘‘ꦏꦛꦕ꧀ꦖꦸꦨꦶꦏ꧀ꦑꦁ ꦢꦠ꧀ꦮꦴꦤ, ꦠꦴꦮꦠꦶꦁꦱꦁ ꦒꦩꦶꦱ꧀ꦱꦱꦶ;

ꦖꦠ꧀ꦠꦶꦁꦱꦢꦺꦮꦫꦴꦗꦹꦤꦁ, ꦩꦲꦺꦱꦶꦠ꧀ꦠꦁ ꦏꦫꦶꦱ꧀ꦱꦱꦶ.

‘‘ꦥꦚ꧀ꦚꦴꦱꦁ ꦕꦏ꧀ꦏꦮꦠ꧀ꦠꦷꦤꦁ, ꦩꦲꦺꦱꦶꦠ꧀ꦠꦁ ꦏꦫꦶꦱ꧀ꦱꦱꦶ;

ꦩꦤꦱꦴ ꦥꦠ꧀ꦡꦶꦠꦁ ꦱꦧ꧀ꦧꦁ, ꦥꦛꦶꦭꦕ꧀ꦖꦱꦶ ꦱꦧ꧀ꦧꦢꦴ.

‘‘ꦱꦩ꧀ꦥꦠ꧀ꦠꦶꦁ ꦄꦤꦸꦨꦺꦴꦠ꧀ꦮꦴꦤ, ꦥꦧ꧀ꦧꦗꦶꦱ꧀ꦱꦱꦶ ꦏꦶꦚ꧀ꦕꦤꦴ;

ꦱꦧ꧀ꦧꦴꦱꦮꦺ ꦥꦫꦶꦚ꧀ꦚꦴꦪ, ꦤꦶꦧ꧀ꦧꦴꦪꦶꦱ꧀ꦱꦱꦶꦤꦴꦱꦮꦴ.

‘‘ꦆꦢꦁ ꦮꦠ꧀ꦮꦴꦤ ꦱꦩ꧀ꦧꦸꦢ꧀ꦣꦺꦴ, ꦠꦶꦱ꧀ꦱꦺꦴ ꦭꦺꦴꦏꦒ꧀ꦒꦤꦴꦪꦏꦺꦴ;

ꦤꦨꦁ ꦄꦧ꧀ꦨꦸꦒ꧀ꦒꦩꦷ ꦮꦷꦫꦺꦴ, ꦲꦁꦱꦫꦴꦗꦴꦮ ꦄꦩ꧀ꦧꦫꦺ.

‘‘ꦱꦸꦢꦶꦤ꧀ꦤꦁ ꦩꦺ ꦢꦴꦤꦮꦫꦁ, ꦱꦸꦪꦶꦛ꧀ꦜꦴ ꦪꦴꦒꦱꦩ꧀ꦥꦢꦴ;

ꦏꦛꦕ꧀ꦖꦸꦨꦶꦏ꧀ꦑꦁ ꦢꦠ꧀ꦮꦴꦤ, ꦥꦠ꧀ꦠꦴꦲꦁ ꦄꦕꦭꦁ ꦥꦢꦁ.

‘‘ꦢ꧀ꦮꦺꦤꦮꦸꦠꦺ ꦆꦠꦺꦴ ꦏꦥ꧀ꦥꦺ, ꦪꦁ ꦢꦴꦤꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦨꦶꦏ꧀ꦑꦴꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ.

ꦄꦫꦲꦠ꧀ꦠꦁ ꦥꦤ ꦥꦠ꧀ꦮꦴ ꦄꦠ꧀ꦠꦤꦺꦴ ꦥꦸꦠ꧀ꦠꦺꦤ ꦄꦨꦪꦠ꧀ꦡꦺꦫꦺꦤ ꦣꦩ꧀ꦩꦁ ꦏꦡꦺꦤ꧀ꦠꦺꦤ ꦎꦮꦴꦢꦮꦱꦺꦤ ꦪꦴ ꦒꦴꦡꦴ ꦨꦴꦱꦶꦠꦴ, ꦈꦢꦴꦤꦮꦱꦺꦤ ꦱꦪꦩ꧀ꦥꦶ ꦠꦴ ꦌꦮ ꦥꦕ꧀ꦕꦸꦢꦴꦲꦫꦤ꧀ꦠꦷ –

꧓꧓. ‘‘ꦈꦢ꧀ꦣꦁ ꦥꦴꦢꦠꦭꦴ ꦄꦩ꧀ꦩ, ꦄꦣꦺꦴ ꦮꦺ ꦏꦺꦱꦩꦠ꧀ꦡꦏꦴ;

ꦥꦕ꧀ꦕꦮꦺꦏ꧀ꦑꦱ꧀ꦱꦸꦩꦁ ꦏꦴꦪꦁ, ꦄꦱꦸꦕꦶꦁ ꦥꦹꦠꦶꦒꦤ꧀ꦣꦶꦏꦁ.

꧓꧔. ‘‘ꦌꦮꦁ ꦮꦶꦲꦫꦩꦴꦤꦴꦪ, ꦱꦧ꧀ꦧꦺꦴ ꦫꦴꦒꦺꦴ ꦱꦩꦹꦲꦠꦺꦴ;

ꦥꦫꦶꦭ꦳ꦴꦲꦺꦴ ꦱꦩꦸꦕ꧀ꦖꦶꦤ꧀ꦤꦺꦴ, ꦱꦷꦠꦶꦨꦹꦠꦴꦩ꧀ꦲꦶ ꦤꦶꦧ꧀ꦧꦸꦠꦴ’’ꦠꦶ. – ꦄꦴꦲ;

ꦠꦠ꧀ꦡ ꦥꦜꦩꦒꦴꦡꦴꦪ ꦠꦴꦮ ꦄꦪꦁ ꦱꦔ꧀ꦑꦺꦥꦠ꧀ꦡꦺꦴ – ꦄꦩ꧀ꦩ ꦥꦢꦸꦩꦮꦠꦶ, ꦥꦴꦢꦠꦭꦠꦺꦴ ꦈꦢ꧀ꦣꦁ ꦏꦺꦱꦩꦠ꧀ꦡꦏꦠꦺꦴ ꦄꦣꦺꦴ ꦤꦴꦤꦥ꧀ꦥꦏꦴꦫꦄꦱꦸꦕꦶꦥꦹꦫꦶꦠꦴꦪ ꦄꦱꦸꦕꦶꦁ ꦱꦧ꧀ꦧꦏꦴꦭꦁ ꦥꦹꦠꦶꦒꦤ꧀ꦣꦮꦴꦪꦤꦠꦺꦴ ꦥꦹꦠꦶꦒꦤ꧀ꦣꦶꦏꦁ, ꦆꦩꦁ ꦏꦸꦕ꧀ꦖꦶꦠꦴꦤꦁ ꦄꦴꦪꦠꦤꦠꦴꦪ ꦏꦴꦪꦁ ꦱꦫꦷꦫꦁ ꦚꦴꦟꦕꦏ꧀ꦑꦸꦤꦴ ꦥꦕ꧀ꦕꦮꦺꦏ꧀ꦑꦱ꧀ꦱꦹꦠꦶ. ꦄꦪꦚ꧀ꦲꦶ ꦠꦱ꧀ꦱꦴ ꦥꦸꦠ꧀ꦠꦺꦤ ꦎꦮꦴꦢꦢꦴꦤꦮꦱꦺꦤ ꦨꦴꦱꦶꦠꦴ ꦒꦴꦡꦴ.

ꦱꦴ ꦠꦁ ꦱꦸꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦈꦢꦴꦤꦺꦤ꧀ꦠꦷ ꦄꦴꦕꦫꦶꦪꦥꦹꦗꦴꦮꦱꦺꦤ ꦠꦩꦺꦮ ꦒꦴꦡꦁ ꦥꦜꦩꦁ ꦮꦠ꧀ꦮꦴ ꦄꦠ꧀ꦠꦤꦺꦴ ꦥꦛꦶꦥꦠ꧀ꦠꦶꦁ ꦏꦡꦺꦤ꧀ꦠꦷ ‘‘ꦌꦮꦁ ꦮꦶꦲꦫꦩꦴꦤꦴꦪꦴ’’ꦠꦶ ꦢꦸꦠꦶꦪꦁ ꦒꦴꦡꦩꦴꦲ.

ꦠꦠ꧀ꦡ ꦌꦮꦁ ꦮꦶꦲꦫꦩꦴꦤꦴꦪꦴꦠꦶ ꦌꦮꦁ ꦩꦩ ꦥꦸꦠ꧀ꦠꦺꦤ ꦄꦨꦪꦠ꧀ꦡꦺꦫꦺꦤ ‘‘ꦈꦢ꧀ꦣꦁ ꦥꦴꦢꦠꦭꦴ’’ꦠꦶꦄꦴꦢꦶꦤꦴ ꦢꦶꦤ꧀ꦤꦺ ꦎꦮꦴꦢꦺ ꦜꦠ꧀ꦮꦴ ꦱꦧ꧀ꦧꦏꦴꦪꦁ ꦄꦱꦸꦨꦠꦺꦴ ꦢꦶꦱ꧀ꦮꦴ ꦌꦏꦒ꧀ꦒꦕꦶꦠ꧀ꦠꦴ ꦠꦠ꧀ꦡ ꦨꦹꦠꦸꦥꦴꦢꦴꦪꦨꦺꦢꦺ ꦫꦹꦥꦣꦩ꧀ꦩꦺ ꦠꦥ꧀ꦥꦛꦶꦧꦢ꧀ꦣꦺ ꦮꦺꦢꦤꦴꦢꦶꦏꦺ ꦄꦫꦹꦥꦣꦩ꧀ꦩꦺ ꦥꦫꦶꦒ꧀ꦒꦲꦺꦠ꧀ꦮꦴ ꦠꦠ꧀ꦡ ꦠꦶꦭꦏ꧀ꦑꦟꦁ ꦄꦴꦫꦺꦴꦥꦺꦠ꧀ꦮꦴ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦢꦶꦮꦱꦺꦤ ꦮꦶꦲꦫꦩꦴꦤꦴꦪ. ꦱꦧ꧀ꦧꦺꦴ ꦫꦴꦒꦺꦴ ꦱꦩꦹꦲꦠꦺꦴꦠꦶ ꦮꦸꦛ꧀ꦜꦴꦤꦒꦴꦩꦶꦤꦶꦮꦶꦥꦱ꧀ꦱꦤꦴꦪ ꦩꦒ꧀ꦒꦺꦤ ꦓꦛꦶꦠꦴꦪ ꦩꦒ꧀ꦒꦥꦛꦶꦥꦴꦛꦶꦪꦴ ꦄꦒ꧀ꦒꦩꦒ꧀ꦒꦺꦤ ꦱꦧ꧀ꦧꦺꦴ ꦫꦴꦒꦺꦴ ꦩꦪꦴ ꦱꦩꦹꦲꦠꦺꦴ ꦱꦩꦸꦒ꧀ꦓꦴꦛꦶꦠꦺꦴ. ꦥꦫꦶꦭ꦳ꦴꦲꦺꦴ ꦱꦩꦸꦕ꧀ꦖꦶꦤ꧀ꦤꦺꦴꦠꦶ ꦠꦠꦺꦴ ꦌꦮ ꦱꦧ꧀ꦧꦺꦴ ꦏꦶꦭꦺꦱꦥꦫꦶꦭ꦳ꦴꦲꦺꦴ ꦱꦩ꧀ꦩꦢꦺꦮ ꦈꦕ꧀ꦖꦶꦤ꧀ꦤꦺꦴ, ꦠꦱ꧀ꦱ ꦕ ꦱꦩꦸꦕ꧀ꦖꦶꦤ꧀ꦤꦠ꧀ꦠꦴ ꦌꦮ ꦱꦷꦠꦶꦨꦹꦠꦴ ꦱꦈꦥꦴꦢꦶꦱꦺꦱꦴꦪ ꦤꦶꦧ꧀ꦧꦴꦤꦣꦴꦠꦸꦪꦴ ꦤꦶꦧ꧀ꦧꦸꦠꦴ ꦄꦩ꧀ꦲꦷꦠꦶ.

ꦄꦨꦪꦩꦴꦠꦸꦡꦺꦫꦷꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.