꧖. ꦕꦹꦭ꦳ꦏꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ

ꦤꦢꦤ꧀ꦠꦶ ꦩꦺꦴꦫꦴ ꦱꦸꦱꦶꦑꦴ ꦱꦸꦥꦺꦑꦸꦟꦴꦠꦶ ꦄꦴꦪꦱ꧀ꦩꦠꦺꦴ ꦕꦹꦭ꦳ꦏꦠ꧀ꦡꦺꦫꦱ꧀ꦱ ꦒꦴꦡꦴ. ꦏꦴ ꦈꦥ꧀ꦥꦠ꧀ꦠꦶ? ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦁ ꦏꦸꦱꦭꦁ ꦈꦥꦕꦶꦤꦤ꧀ꦠꦺꦴ ꦆꦠꦺꦴ ꦌꦏꦠꦶꦁꦱꦺ ꦏꦥ꧀ꦥꦺ ꦱꦶꦑꦶꦱ꧀ꦱ ꦨꦒꦮꦠꦺꦴ ꦏꦴꦭꦺ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦶꦚ꧀ꦚꦸꦠꦁ ꦥꦠ꧀ꦠꦺꦴ ꦌꦏꦢꦶꦮꦱꦁ ꦱꦠ꧀ꦡꦴꦫꦁ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ꦖꦠ꧀ꦠꦥꦟ꧀ꦟꦶꦦꦭꦁ ꦄꦢꦴꦱꦶ. ꦱꦺꦴ ꦠꦺꦤ ꦥꦸꦚ꧀ꦚꦏꦩ꧀ꦩꦺꦤ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦫꦴꦗꦒꦲꦺ ꦧ꧀ꦫꦴꦲ꧀ꦩꦟꦏꦸꦭꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦕꦹꦭ꦳ꦏꦺꦴꦠꦶ ꦭꦢ꧀ꦣꦤꦴꦩꦺꦴ ꦮꦪꦥ꧀ꦥꦠ꧀ꦠꦺꦴ ꦣꦤꦥꦴꦭꦢꦩꦤꦺ ꦱꦠ꧀ꦡꦫꦶ ꦭꦢ꧀ꦣꦥ꧀ꦥꦱꦴꦢꦺꦴ ꦥꦧ꧀ꦧꦗꦶꦠ꧀ꦮꦴ ꦱꦩꦟꦣꦩ꧀ꦩꦁ ꦏꦫꦺꦴꦤ꧀ꦠꦺꦴ ꦆꦤ꧀ꦢꦱꦴꦭꦒꦸꦲꦴꦪꦁ ꦮꦱꦠꦶ, ꦱꦺꦴ ꦌꦏꦢꦶꦮꦱꦁ ꦒꦸꦲꦴꦢ꧀ꦮꦴꦫꦺ ꦤꦶꦱꦶꦤ꧀ꦤꦺꦴ ꦩꦒꦣꦏ꧀ꦑꦺꦠ꧀ꦠꦁ ꦎꦭꦺꦴꦏꦺꦱꦶ. ꦠꦱ꧀ꦩꦶꦁ ꦑꦟꦺ ꦥꦴꦮꦸꦱꦏꦴꦭꦩꦺꦓꦺꦴ ꦒꦩ꧀ꦨꦷꦫꦩꦣꦸꦫꦤꦶꦒ꧀ꦓꦺꦴꦱꦺꦴ ꦱꦠꦥꦛꦭꦱꦲꦱ꧀ꦱꦥꦛꦭꦺꦴ ꦄꦚ꧀ꦗꦤ ꦱꦶꦑꦫꦱꦤ꧀ꦤꦶꦏꦴꦱꦺꦴ ꦤꦨꦁ ꦥꦹꦫꦺꦠ꧀ꦮꦴ ꦥꦮꦱ꧀ꦱꦠꦶ, ꦩꦪꦹꦫꦱꦔ꧀ꦓꦴ ꦕ ꦩꦺꦓꦒꦗ꧀ꦗꦶꦠꦁ ꦱꦸꦠ꧀ꦮꦴ ꦲꦛ꧀ꦜꦠꦸꦛ꧀ꦜꦴ ꦏꦺꦏꦴꦱꦢ꧀ꦢꦁ ꦩꦸꦚ꧀ꦕꦶꦠ꧀ꦮꦴ ꦠꦠ꧀ꦡ ꦠꦠ꧀ꦡ ꦥꦢꦺꦱꦺ ꦤꦕ꧀ꦕꦤ꧀ꦠꦴ ꦮꦶꦕꦫꦤ꧀ꦠꦶ. ꦡꦺꦫꦱ꧀ꦱꦥꦶ ꦄꦴꦮꦴꦱꦒꦧ꧀ꦨꦺ ꦩꦺꦓꦮꦴꦠꦦꦱ꧀ꦱꦺꦲꦶ ꦄꦥꦒꦠꦣꦩ꧀ꦩꦠ꧀ꦠꦴ ꦥꦱ꧀ꦱꦢ꧀ꦣꦏꦫꦗꦏꦴꦪꦺ ꦏꦭ꧀ꦭꦠꦁ ꦥꦠ꧀ꦠꦺ ꦈꦠꦸꦱꦥ꧀ꦥꦴꦪꦭꦴꦨꦺꦤ ꦕꦶꦠ꧀ꦠꦁ ꦌꦏꦒ꧀ꦒꦁ ꦄꦲꦺꦴꦱꦶ, ꦏꦩ꧀ꦩꦛ꧀ꦜꦴꦤꦮꦷꦡꦶꦁ ꦎꦠꦫꦶ, ꦱꦺꦴ ꦠꦁ ꦚꦠ꧀ꦮꦴ ꦏꦴꦭꦱꦩ꧀ꦥꦢꦴꦢꦶꦏꦶꦠ꧀ꦠꦤꦩꦸꦑꦺꦤ ꦄꦠ꧀ꦠꦴꦤꦁ ꦨꦴꦮꦤꦴꦪ ꦈꦱ꧀ꦱꦴꦲꦺꦤ꧀ꦠꦺꦴ –

꧒꧑꧑. ‘‘ꦤꦢꦤ꧀ꦠꦶ ꦩꦺꦴꦫꦴ ꦱꦸꦱꦶꦑꦴ ꦱꦸꦥꦺꦑꦸꦟꦴ, ꦱꦸꦤꦷꦭꦒꦷꦮꦴ ꦱꦸꦩꦸꦑꦴ ꦱꦸꦒꦗ꧀ꦗꦶꦤꦺꦴ;

ꦱꦸꦱꦢ꧀ꦢꦭꦴ ꦕꦴꦥꦶ ꦩꦲꦴꦩꦲꦷ ꦄꦪꦁ, ꦱꦸꦧ꧀ꦪꦴꦥꦶꦠꦩ꧀ꦧꦸ ꦱꦸꦮꦭꦴꦲꦏꦁ ꦤꦨꦁ.

꧒꧑꧒. ‘‘ꦱꦸꦏꦭ꧀ꦭꦫꦹꦥꦺꦴ ꦱꦸꦩꦤꦱ꧀ꦱ ꦙꦴꦪꦠꦁ, ꦱꦸꦤꦶꦏ꧀ꦏꦩꦺꦴ ꦱꦴꦣꦸ ꦱꦸꦧꦸꦢ꧀ꦣꦱꦴꦱꦤꦺ;

ꦱꦸꦱꦸꦏ꧀ꦏꦱꦸꦏ꧀ꦏꦁ ꦤꦶꦥꦸꦟꦁ ꦱꦸꦢꦸꦢ꧀ꦢꦱꦁ, ꦦꦸꦱꦴꦲꦶ ꦠꦁ ꦈꦠ꧀ꦠꦩꦩꦕ꧀ꦕꦸꦠꦁ ꦥꦢ’’ꦤ꧀ꦠꦶ. –

ꦢ꧀ꦮꦺ ꦒꦴꦡꦴ ꦄꦨꦴꦱꦶ.

ꦠꦠ꧀ꦡ ꦤꦢꦤ꧀ꦠꦶ ꦩꦺꦴꦫꦴ ꦱꦸꦱꦶꦑꦴ ꦱꦸꦥꦺꦑꦸꦟꦴ, ꦱꦸꦤꦷꦭꦒꦷꦮꦴ ꦱꦸꦩꦸꦑꦴ ꦱꦸꦒꦗ꧀ꦗꦶꦤꦺꦴꦠꦶ ꦌꦠꦺ ꦩꦠ꧀ꦡꦏꦺ ꦈꦛ꧀ꦜꦶꦠꦴꦲꦶ ꦱꦸꦤ꧀ꦢꦫꦴꦲꦶ ꦱꦶꦑꦴꦲꦶ ꦱꦩꦤ꧀ꦤꦴꦒꦠꦠ꧀ꦠꦴ ꦱꦸꦱꦶꦑꦴ, ꦤꦴꦤꦴꦮꦟ꧀ꦟꦺꦲꦶ ꦄꦤꦺꦏꦺꦲꦶ ꦱꦺꦴꦨꦤꦺꦲꦶ ꦨꦢ꧀ꦢꦏꦥꦶꦚ꧀ꦖꦺꦲꦶ ꦱꦩꦤ꧀ꦤꦴꦒꦠꦠ꧀ꦠꦴ ꦱꦸꦥꦺꦑꦸꦟꦴ, ꦫꦴꦗꦷꦮꦮꦟ꧀ꦟꦱꦔ꧀ꦏꦴꦱꦴꦪ ꦱꦸꦤ꧀ꦢꦫꦴꦪ ꦤꦷꦭꦮꦟ꧀ꦟꦴꦪ ꦒꦷꦮꦴꦪ ꦱꦩꦤ꧀ꦤꦴꦒꦠꦠ꧀ꦠꦴ ꦱꦸꦤꦷꦭꦒꦷꦮꦴ, ꦱꦸꦤ꧀ꦢꦫꦩꦸꦑꦠꦴꦪ ꦱꦸꦩꦸꦑꦴ, ꦩꦤꦸꦚ꧀ꦚꦮꦴꦢꦶꦠꦴꦪ ꦱꦸꦒꦗ꧀ꦗꦶꦤꦺꦴ, ꦩꦺꦴꦫꦴ ꦱꦶꦑꦟ꧀ꦝꦶꦤꦺꦴ ꦖꦗ꧀ꦗꦱꦁꦮꦴꦢꦷ ꦏꦺꦏꦴꦱꦢ꧀ꦢꦁ ꦩꦸꦚ꧀ꦕꦤ꧀ꦠꦴ ꦤꦢꦤ꧀ꦠꦶ ꦫꦮꦤ꧀ꦠꦶ. ꦱꦸꦱꦢ꧀ꦢꦭꦴ ꦕꦴꦥꦶ ꦩꦲꦴꦩꦲꦷ ꦄꦪꦤ꧀ꦠꦶ ꦄꦪꦚ꧀ꦕ ꦩꦲꦴꦥꦡꦮꦷ ꦱꦸꦱꦢ꧀ꦢꦭꦴ ꦱꦸꦤ꧀ꦢꦫꦲꦫꦶꦠꦠꦶꦟꦴ. ꦱꦸꦧ꧀ꦪꦴꦥꦶꦠꦩ꧀ꦧꦹꦠꦶ ꦄꦨꦶꦤꦮꦮꦸꦛ꧀ꦜꦶꦪꦴ ꦠꦲꦁ ꦠꦲꦁ ꦮꦶꦱ꧀ꦱꦤ꧀ꦢꦩꦴꦤꦱꦭꦶꦭꦠꦴꦪ ꦱꦸꦛ꧀ꦜꦸ ꦧ꧀ꦪꦴꦥꦶꦠꦗꦭꦴ ꦮꦶꦠꦠꦗꦭꦴ. ‘‘ꦱꦸꦱꦸꦏ꧀ꦏꦠꦩ꧀ꦧꦹ’’ꦠꦶꦥꦶ ꦥꦴꦜꦺꦴ, ꦱꦸꦮꦶꦱꦸꦢ꧀ꦣꦗꦭꦴꦠꦶ ꦄꦠ꧀ꦡꦺꦴ. ꦱꦸꦮꦭꦴꦲꦏꦁ ꦤꦨꦤ꧀ꦠꦶ ꦆꦢꦚ꧀ꦕ ꦤꦨꦁ ꦄꦴꦏꦴꦱꦁ ꦤꦷꦭꦸꦥ꧀ꦥꦭꦢꦭꦱꦤ꧀ꦤꦶꦨꦺꦲꦶ ꦱꦩꦤ꧀ꦠꦠꦺꦴ ꦥꦹꦫꦺꦠ꧀ꦮꦴ ꦜꦶꦠꦺꦲꦶ ꦱꦸꦤ꧀ꦢꦫꦺꦲꦶ ꦮꦭꦴꦲꦏꦺꦲꦶ ꦩꦺꦓꦺꦲꦶ ꦱꦸꦮꦭꦴꦲꦏꦁ.

ꦱꦸꦏꦭ꧀ꦭꦫꦹꦥꦺꦴ ꦱꦸꦩꦤꦱ꧀ꦱ ꦙꦴꦪꦠꦤ꧀ꦠꦶ ꦆꦢꦴꦤꦶ ꦈꦠꦸꦱꦥ꧀ꦥꦴꦪꦭꦴꦨꦺꦤ ꦱꦸꦛ꧀ꦜꦸ ꦏꦭ꧀ꦭꦫꦹꦥꦺꦴ ꦏꦩ꧀ꦩꦤꦶꦪꦱꦨꦴꦮꦺꦴ ꦠ꧀ꦮꦁ, ꦤꦷꦮꦫꦟꦺꦲꦶ ꦄꦤꦗ꧀ꦙꦴꦫꦹꦭ꦳꧀ꦲꦕꦶꦠ꧀ꦠꦠꦴꦪ ꦱꦸꦤ꧀ꦢꦫꦩꦤꦱ꧀ꦱ ꦪꦺꦴꦒꦴꦮꦕꦫꦱ꧀ꦱ ꦪꦁ ꦄꦴꦫꦩ꧀ꦩꦟꦹꦥꦤꦶꦗ꧀ꦙꦴꦤꦮꦱꦺꦤ ꦭꦏ꧀ꦑꦟꦹꦥꦤꦶꦗ꧀ꦙꦴꦤꦮꦱꦺꦤ ꦕ ꦙꦴꦪꦠꦁ. ꦱꦸꦤꦶꦏ꧀ꦏꦩꦺꦴ…ꦥꦺ… ꦄꦕ꧀ꦕꦸꦠꦁ ꦥꦢꦤ꧀ꦠꦶ ꦌꦮꦁ ꦙꦴꦪꦤ꧀ꦠꦺꦴ ꦕ ꦱꦴꦣꦸ ꦱꦸꦧꦸꦢ꧀ꦣꦱ꧀ꦱ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦱꦸꦤ꧀ꦢꦫꦤꦶꦏ꧀ꦏꦩꦺꦴ ꦲꦸꦠ꧀ꦮꦴ ꦱꦸꦥꦫꦶꦱꦸꦢ꧀ꦣꦱꦷꦭꦠꦴꦪ ꦱꦸꦱꦸꦏ꧀ꦏꦁ, ꦮꦶꦱꦸꦢ꧀ꦣꦱꦨꦴꦮꦠꦴꦪ ꦱꦧ꧀ꦧꦱ꧀ꦱꦥꦶ ꦱꦁꦏꦶꦭꦺꦱꦱ꧀ꦱ ꦒꦺꦴꦕꦫꦨꦴꦮꦴꦤꦸꦥꦒꦩꦤꦠꦺꦴ ꦱꦸꦏ꧀ꦏꦁ, ꦤꦶꦥꦸꦟꦚꦴꦟꦒꦺꦴꦕꦫꦠꦴꦪ ꦤꦶꦥꦸꦟꦁ, ꦥꦫꦩꦒꦩ꧀ꦨꦷꦫꦠꦴꦪ ꦱꦸꦢꦸꦢ꧀ꦢꦱꦁ, ꦥꦟꦷꦠꦨꦴꦮꦺꦤ ꦱꦺꦛ꧀ꦜꦨꦴꦮꦺꦤ ꦕ ꦈꦠ꧀ꦠꦩꦁ, ꦤꦶꦕ꧀ꦕꦱꦨꦴꦮꦠꦴꦪ ꦄꦕ꧀ꦕꦸꦠꦁ ꦥꦢꦁ ꦠꦁ ꦤꦶꦧ꧀ꦧꦴꦤꦁ ꦦꦸꦱꦴꦲꦶ ꦄꦠ꧀ꦠꦥꦕ꧀ꦕꦏ꧀ꦑꦏꦫꦟꦺꦤ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ ꦱꦕ꧀ꦖꦶꦏꦫꦺꦴꦲꦷꦠꦶ.

ꦌꦮꦁ ꦡꦺꦫꦺꦴ ꦄꦠ꧀ꦠꦴꦤꦁ ꦎꦮꦢꦤ꧀ꦠꦺꦴꦮ ꦈꦠꦸꦱꦥ꧀ꦥꦴꦪꦭꦴꦨꦺꦤ ꦱꦩꦴꦲꦶꦠꦕꦶꦠ꧀ꦠꦺꦴ ꦮꦶꦥꦱ꧀ꦱꦤꦁ ꦈꦱ꧀ꦱꦸꦏ꧀ꦏꦴꦥꦺꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦺꦤ ꦮꦸꦠ꧀ꦠꦁ ꦄꦥꦢꦴꦤꦺ (ꦄꦥ. ꦡꦺꦫ ꧑.꧓꧙.꧓꧗-꧔꧒) –

‘‘ꦏꦟꦶꦏꦴꦫꦁꦮ ꦗꦭꦶꦠꦁ, ꦥꦸꦟ꧀ꦟꦩꦴꦪꦺꦮ ꦕꦤ꧀ꦢꦶꦩꦁ;

ꦗꦭꦤ꧀ꦠꦁ ꦢꦷꦥꦫꦸꦏ꧀ꦑꦁꦮ, ꦄꦢ꧀ꦢꦱꦁ ꦭꦺꦴꦏꦤꦴꦪꦏꦁ.

‘‘ꦏꦢꦭꦶꦦꦭꦁ ꦥꦒ꧀ꦒꦪ꧀ꦲ, ꦄꦢꦴꦱꦶꦁ ꦱꦠ꧀ꦡꦸꦤꦺꦴ ꦄꦲꦁ;

ꦥꦱꦤ꧀ꦤꦕꦶꦠ꧀ꦠꦺꦴ ꦱꦸꦩꦤꦺꦴ, ꦮꦤ꧀ꦢꦶꦠ꧀ꦮꦴꦤ ꦄꦥꦏ꧀ꦏꦩꦶꦁ.

‘‘ꦌꦏꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦦꦭꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ.

ꦄꦫꦲꦠ꧀ꦠꦁ ꦥꦤ ꦥꦠ꧀ꦮꦴ ꦡꦺꦫꦺꦴ ꦄꦠ꧀ꦠꦤꦺꦴ ꦥꦛꦶꦥꦠ꧀ꦠꦶꦁ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ ꦥꦷꦠꦶꦱꦺꦴꦩꦤꦱ꧀ꦱꦗꦴꦠꦺꦴ ‘‘ꦤꦢꦤ꧀ꦠꦶ ꦩꦺꦴꦫꦴ’’ꦠꦶꦄꦴꦢꦶꦤꦴ ꦠꦴꦪꦺꦮ ꦒꦴꦡꦴ ꦥꦕ꧀ꦕꦸꦢꦴꦲꦴꦱꦶ. ꦠꦺꦤꦱ꧀ꦱ ꦆꦢꦩꦺꦮ ꦄꦚ꧀ꦚꦴꦧ꧀ꦪꦴꦏꦫꦟꦁ ꦄꦲꦺꦴꦱꦷꦠꦶ.

ꦕꦹꦭ꦳ꦏꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.