꧔. ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ

ꦢꦤ꧀ꦣꦴ ꦩꦪ꧀ꦲꦁ ꦒꦠꦷꦠꦶꦄꦴꦢꦶꦏꦴ ꦄꦴꦪꦱ꧀ꦩꦠꦺꦴ ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦱ꧀ꦱ ꦒꦴꦡꦴ. ꦏꦴ ꦈꦥ꧀ꦥꦠ꧀ꦠꦶ? ꦪꦢꦺꦠ꧀ꦡ ꦄꦛ꧀ꦜꦸꦥ꧀ꦥꦠ꧀ꦠꦶꦮꦱꦺꦤ ꦮꦠ꧀ꦠꦧ꧀ꦧꦁ, ꦠꦁ ꦄꦛ꧀ꦜꦏꦤꦶꦥꦴꦠꦺ ꦩꦲꦴꦥꦤ꧀ꦡꦏꦮꦠ꧀ꦡꦸꦱ꧀ꦩꦶꦁ (ꦡꦺꦫꦒꦴ. ꦄꦛ꧀ꦜ. ꧒.ꦩꦲꦴꦥꦤ꧀ꦡꦏꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ) ꦮꦸꦠ꧀ꦠꦩꦺꦮ. ꦄꦪꦁ ꦥꦤ ꦮꦶꦱꦺꦱꦺꦴ – ꦩꦲꦴꦥꦤ꧀ꦡꦏꦠ꧀ꦡꦺꦫꦺꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦄꦒ꧀ꦒꦦꦭꦱꦸꦑꦺꦤ ꦮꦷꦠꦶꦤꦴꦩꦺꦤ꧀ꦠꦺꦴ ꦕꦶꦤ꧀ꦠꦺꦱꦶ – ‘‘ꦏꦡꦁ ꦤꦸ ꦑꦺꦴ ꦱꦏ꧀ꦏꦴ ꦕꦹꦭ꦳ꦥꦤ꧀ꦡꦏꦩ꧀ꦥꦶ ꦆꦩꦱ꧀ꦩꦶꦁ ꦱꦸꦑꦺ ꦥꦠꦶꦛ꧀ꦜꦥꦺꦠꦸ’’ꦤ꧀ꦠꦶ? ꦱꦺꦴ ꦄꦠ꧀ꦠꦤꦺꦴ ꦄꦪ꧀ꦪꦏꦁ ꦣꦤꦱꦺꦛ꧀ꦜꦶꦁ ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦲ – ‘‘ꦱꦕꦺ, ꦩꦲꦴꦱꦺꦛ꧀ꦜꦶ, ꦄꦤꦸꦗꦴꦤꦴꦡ, ꦄꦲꦁ ꦕꦹꦭ꦳ꦥꦤ꧀ꦡꦏꦁ ꦥꦧ꧀ꦧꦴꦗꦺꦪ꧀ꦪ’’ꦤ꧀ꦠꦶ. ‘‘ꦥꦧ꧀ꦧꦴꦗꦺꦡ, ꦨꦤ꧀ꦠꦺ’’ꦠꦶ. ꦡꦺꦫꦺꦴ ꦠꦁ ꦥꦧ꧀ꦧꦴꦗꦺꦱꦶ. ꦱꦺꦴ ꦢꦱꦱꦸ ꦱꦷꦭꦺꦱꦸ ꦥꦠꦶꦛ꧀ꦜꦶꦠꦺꦴ ꦨꦴꦠꦸ ꦱꦤ꧀ꦠꦶꦏꦺ –

‘‘ꦥꦢꦸꦩꦁ ꦪꦡꦴ ꦏꦺꦴꦏꦤꦢꦁ ꦱꦸꦒꦤ꧀ꦣꦁ, ꦥꦴꦠꦺꦴ ꦱꦶꦪꦴ ꦦꦸꦭ꧀ꦭꦩꦮꦷꦠꦒꦤ꧀ꦣꦁ;

ꦄꦔ꧀ꦒꦷꦫꦱꦁ ꦥꦱ꧀ꦱ ꦮꦶꦫꦺꦴꦕꦩꦴꦤꦁ, ꦠꦥꦤ꧀ꦠꦩꦴꦢꦶꦕ꧀ꦕꦩꦶꦮꦤ꧀ꦠꦭꦶꦏ꧀ꦑꦺ’’ꦠꦶ. (ꦱꦁ. ꦤꦶ. ꧑.꧑꧒꧓; ꦄ. ꦤꦶ. ꧕.꧑꧙꧕) –

ꦒꦴꦡꦁ ꦈꦒ꧀ꦒꦟ꧀ꦲꦤ꧀ꦠꦺꦴ ꦕꦠꦹꦲꦶ ꦩꦴꦱꦺꦲꦶ ꦒꦲꦺꦠꦸꦁ ꦤꦴꦱꦏ꧀ꦑꦶ, ꦒꦲꦶꦠꦒꦲꦶꦠꦁ ꦥꦢꦁ ꦲꦢꦪꦺ ꦤ ꦠꦶꦛ꧀ꦜꦠꦶ. ꦄꦡ ꦤꦁ ꦩꦲꦴꦥꦤ꧀ꦡꦏꦺꦴ ꦄꦴꦲ – ‘‘ꦥꦤ꧀ꦡꦏ, ꦠ꧀ꦮꦁ ꦆꦩꦱ꧀ꦩꦶꦁ ꦱꦴꦱꦤꦺ ꦄꦨꦧ꧀ꦧꦺꦴ, ꦕꦠꦹꦲꦶ ꦩꦴꦱꦺꦲꦶ ꦌꦏꦒꦴꦡꦩ꧀ꦥꦶ ꦒꦲꦺꦠꦸꦁ ꦤ ꦱꦏ꧀ꦏꦺꦴꦱꦶ. ꦥꦧ꧀ꦧꦗꦶꦠꦏꦶꦕ꧀ꦕꦁ ꦥꦤ ꦠ꧀ꦮꦁ ꦏꦡꦁ ꦩꦠ꧀ꦡꦏꦁ ꦥꦴꦥꦺꦱ꧀ꦱꦱꦶ? ꦤꦶꦏ꧀ꦑꦩ ꦆꦠꦺꦴ’’ꦠꦶ. ꦱꦺꦴ ꦡꦺꦫꦺꦤ ꦥꦟꦴꦩꦶꦠꦺꦴ ꦢ꧀ꦮꦴꦫꦏꦺꦴꦛ꧀ꦜꦏꦱꦩꦷꦥꦺ ꦫꦺꦴꦢꦩꦴꦤꦺꦴ ꦄꦛ꧀ꦜꦴꦱꦶ.

ꦠꦺꦤ ꦕ ꦱꦩꦪꦺꦤ ꦱꦠ꧀ꦡꦴ ꦗꦷꦮꦏꦩ꧀ꦧꦮꦤꦺ ꦮꦶꦲꦫꦠꦶ. ꦄꦡ ꦗꦷꦮꦏꦺꦴ ꦥꦸꦫꦶꦱꦁ ꦥꦺꦱꦺꦱꦶ, ‘‘ꦥꦚ꧀ꦕꦲꦶ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦲꦷ’’ꦠꦶ. ꦠꦺꦤ ꦕ ꦱꦩꦪꦺꦤ ꦄꦴꦪꦱ꧀ꦩꦴ ꦩꦲꦴꦥꦤ꧀ꦡꦏꦺꦴ ꦨꦠ꧀ꦠꦸꦢ꧀ꦢꦺꦱꦏꦺꦴ ꦲꦺꦴꦠꦶ. ꦱꦺꦴ ‘‘ꦥꦚ꧀ꦕꦤ꧀ꦤꦁ ꦨꦶꦏ꧀ꦑꦸꦱꦠꦴꦤꦁ ꦨꦶꦏ꧀ꦑꦁ ꦥꦛꦶꦕ꧀ꦖꦡ, ꦨꦤ꧀ꦠꦺ’’ꦠꦶ ꦮꦸꦠ꧀ꦠꦺꦴ ‘‘ꦕꦹꦭ꦳ꦥꦤ꧀ꦡꦏꦁ ꦜꦥꦺꦠ꧀ꦮꦴ ꦱꦺꦱꦴꦤꦁ ꦥꦛꦶꦕ꧀ꦖꦴꦩꦷ’’ꦠꦶ ꦄꦴꦲ. ꦠꦁ ꦱꦸꦠ꧀ꦮꦴ ꦕꦹꦭ꦳ꦥꦤ꧀ꦡꦏꦺꦴ ꦨꦶꦪ꧀ꦪꦺꦴꦱꦺꦴꦩꦠ꧀ꦠꦴꦪ ꦢꦺꦴꦩꦤꦱ꧀ꦱꦥ꧀ꦥꦠ꧀ꦠꦺꦴ ꦄꦲꦺꦴꦱꦶ. ꦱꦠ꧀ꦡꦴ ꦠꦱ꧀ꦱ ꦕꦶꦠ꧀ꦠꦏ꧀ꦑꦺꦢꦁ ꦚꦠ꧀ꦮꦴ, ‘‘ꦕꦹꦭ꦳ꦥꦤ꧀ꦡꦏꦺꦴ ꦩꦪꦴ ꦏꦠꦺꦤ ꦈꦥꦴꦪꦺꦤ ꦧꦸꦗ꧀ꦙꦶꦱ꧀ꦱꦠꦷ’’ꦠꦶ ꦠꦱ꧀ꦱ ꦄꦮꦶꦢꦹꦫꦺ ꦜꦴꦤꦺ ꦄꦠ꧀ꦠꦴꦤꦁ ꦢꦱ꧀ꦱꦺꦠ꧀ꦮꦴ ‘‘ꦏꦶꦁ, ꦥꦤ꧀ꦡꦏ, ꦫꦺꦴꦢꦱꦷ’’ꦠꦶ ꦥꦸꦕ꧀ꦖꦶ. ‘‘ꦨꦴꦠꦴ ꦩꦁ, ꦨꦤ꧀ꦠꦺ, ꦥꦟꦴꦩꦺꦠꦷ’’ꦠꦶ ꦄꦴꦲ. ‘‘ꦥꦤ꧀ꦡꦏ, ꦩꦴ ꦕꦶꦤ꧀ꦠꦪꦶ, ꦩꦩ ꦱꦴꦱꦤꦺ ꦠꦸꦪ꧀ꦲꦁ ꦥꦧ꧀ꦧꦗ꧀ꦗꦴ, ꦌꦲꦶ, ꦆꦩꦁ ꦒꦲꦺꦠ꧀ꦮꦴ ‘ꦫꦗꦺꦴꦲꦫꦟꦁ, ꦫꦗꦺꦴꦲꦫꦟ’ꦤ꧀ꦠꦶ ꦩꦤꦱꦶ ꦏꦫꦺꦴꦲꦷ’’ꦠꦶ ꦆꦢ꧀ꦣꦶꦪꦴ ꦱꦸꦢ꧀ꦣꦁ ꦕꦺꦴꦭ꦳ꦏ꧀ꦑꦟ꧀ꦝꦁ ꦄꦨꦶꦱꦔ꧀ꦑꦫꦶꦠ꧀ꦮꦴ ꦄꦢꦴꦱꦶ. ꦱꦺꦴ ꦱꦠ꧀ꦡꦴꦫꦴ ꦢꦶꦤ꧀ꦤꦁ ꦕꦺꦴꦭ꦳ꦏ꧀ꦑꦟ꧀ꦝꦁ ‘‘ꦫꦗꦺꦴꦲꦫꦟꦁ, ꦫꦗꦺꦴꦲꦫꦟ’’ꦤ꧀ꦠꦶ ꦲꦠ꧀ꦡꦺꦤ ꦥꦫꦶꦩꦗ꧀ꦗꦤ꧀ꦠꦺꦴ ꦤꦶꦱꦷꦢꦶ. ꦠꦱ꧀ꦱ ꦠꦁ ꦥꦫꦶꦩꦗ꧀ꦗꦤ꧀ꦠꦱ꧀ꦱ ꦏꦶꦭꦶꦛ꧀ꦜꦣꦴꦠꦸꦏꦁ ꦗꦴꦠꦁ, ꦥꦸꦤ ꦥꦫꦶꦩꦗ꧀ꦗꦤ꧀ꦠꦱ꧀ꦱ ꦈꦏ꧀ꦑꦭꦶꦥꦫꦶꦥꦸꦚ꧀ꦖꦤꦱꦢꦶꦱꦁ ꦗꦴꦠꦁ. ꦱꦺꦴ ꦚꦴꦟꦱ꧀ꦱ ꦥꦫꦶꦥꦏ꧀ꦏꦠ꧀ꦠꦴ ꦌꦮꦁ ꦕꦶꦤ꧀ꦠꦺꦱꦶ – ‘‘ꦆꦢꦁ ꦕꦺꦴꦭ꦳ꦏ꧀ꦑꦟ꧀ꦝꦁ ꦥꦏꦠꦶꦪꦴ ꦥꦫꦶꦱꦸꦢ꧀ꦣꦁ, ꦆꦩꦁ ꦈꦥꦴꦢꦶꦟ꧀ꦟꦏꦱꦫꦷꦫꦁ ꦤꦶꦱ꧀ꦱꦴꦪ ꦏꦶꦭꦶꦛ꧀ꦜꦁ ꦄꦚ꧀ꦚꦡꦴ ꦗꦴꦠꦁ, ꦠꦱ꧀ꦩꦴ ꦄꦤꦶꦕ꧀ꦕꦁ ꦪꦡꦴꦥꦺꦠꦁ, ꦌꦮꦁ ꦕꦶꦠ꧀ꦠꦩ꧀ꦥꦷ’’ꦠꦶ ꦑꦪꦮꦪꦁ ꦥꦛ꧀ꦜꦥꦺꦠ꧀ꦮꦴ ꦠꦱ꧀ꦩꦶꦁꦪꦺꦮ ꦤꦶꦩꦶꦠ꧀ꦠꦺ ꦙꦴꦤꦴꦤꦶ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦙꦴꦤꦥꦴꦢꦏꦁ ꦮꦶꦥꦱ꧀ꦱꦤꦁ ꦥꦛ꧀ꦜꦥꦺꦠ꧀ꦮꦴ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦺꦤ ꦮꦸꦠ꧀ꦠꦁ ꦄꦥꦢꦴꦤꦺ (ꦄꦥ. ꦡꦺꦫ ꧑.꧒.꧓꧕-꧕꧔) –

‘‘ꦥꦢꦸꦩꦸꦠ꧀ꦠꦫꦺꦴ ꦤꦴꦩ ꦗꦶꦤꦺꦴ, ꦄꦴꦲꦸꦠꦷꦤꦁ ꦥꦛꦶꦒ꧀ꦒꦲꦺꦴ;

ꦒꦟꦩ꧀ꦲꦴ ꦮꦹꦥꦏꦛ꧀ꦜꦺꦴ ꦱꦺꦴ, ꦲꦶꦩꦮꦤ꧀ꦠꦺ ꦮꦱꦷ ꦠꦢꦴ.

‘‘ꦄꦲꦩ꧀ꦥꦶ ꦲꦶꦩꦮꦤ꧀ꦠꦩ꧀ꦲꦶ, ꦮꦱꦴꦩꦶ ꦄꦱ꧀ꦱꦩꦺ ꦠꦢꦴ;

ꦄꦕꦶꦫꦴꦒꦠꦁ ꦩꦲꦴꦮꦷꦫꦁ, ꦈꦥꦺꦱꦶꦁ ꦭꦺꦴꦏꦤꦴꦪꦏꦁ.

‘‘ꦥꦸꦥ꧀ꦦꦕ꧀ꦖꦠ꧀ꦠꦁ ꦒꦲꦺꦠ꧀ꦮꦴꦤ, ꦈꦥꦒꦕ꧀ꦖꦶꦁ ꦤꦫꦴꦱꦨꦁ;

ꦱꦩꦴꦣꦶꦁ ꦱꦩꦴꦥꦗ꧀ꦗꦤ꧀ꦠꦁ, ꦄꦤ꧀ꦠꦫꦴꦪꦩꦏꦴꦱꦲꦁ.

‘‘ꦈꦨꦺꦴ ꦲꦠ꧀ꦡꦺꦲꦶ ꦥꦒ꧀ꦒꦪ꧀ꦲ, ꦥꦸꦥ꧀ꦦꦕ꧀ꦖꦠ꧀ꦠꦁ ꦄꦢꦴꦱꦲꦁ;

ꦥꦛꦶꦒ꧀ꦒꦲꦺꦱꦶ ꦨꦒꦮꦴ, ꦥꦢꦸꦩꦸꦠ꧀ꦠꦫꦺꦴ ꦩꦲꦴꦩꦸꦤꦶ.

‘‘ꦱꦧ꧀ꦧꦺ ꦢꦺꦮꦴ ꦄꦠ꧀ꦠꦩꦤꦴ, ꦲꦶꦩꦮꦤ꧀ꦠꦁ ꦈꦥꦺꦤ꧀ꦠꦶ ꦠꦺ;

ꦱꦴꦣꦸꦏꦴꦫꦁ ꦥꦮꦠ꧀ꦠꦺꦱꦸꦁ, ꦄꦤꦸꦩꦺꦴꦢꦶꦱ꧀ꦱꦠꦶ ꦕꦏ꧀ꦑꦸꦩꦴ.

‘‘ꦆꦢꦁ ꦮꦠ꧀ꦮꦴꦤ ꦠꦺ ꦢꦺꦮꦴ, ꦈꦥꦒꦕ꧀ꦖꦸꦁ ꦤꦫꦸꦠ꧀ꦠꦩꦁ;

ꦄꦴꦏꦴꦱꦺ ꦣꦴꦫꦪꦤ꧀ꦠꦱ꧀ꦱ, ꦥꦢꦸꦩꦕ꧀ꦖꦠ꧀ꦠꦩꦸꦠ꧀ꦠꦩꦁ.

‘‘ꦱꦠꦥꦠ꧀ꦠꦖꦠ꧀ꦠꦁ ꦥꦒ꧀ꦒꦪ꧀ꦲ, ꦄꦢꦴꦱꦶ ꦠꦴꦥꦱꦺꦴ ꦩꦩ;

ꦠꦩꦲꦁ ꦏꦶꦠ꧀ꦠꦪꦶꦱ꧀ꦱꦴꦩꦶ, ꦱꦸꦟꦴꦡ ꦩꦩ ꦨꦴꦱꦠꦺꦴ.

‘‘ꦥꦚ꧀ꦕꦮꦷꦱꦠꦶꦏꦥ꧀ꦥꦴꦤꦶ, ꦢꦺꦮꦫꦗ꧀ꦗꦁ ꦏꦫꦶꦱ꧀ꦱꦠꦶ;

ꦕꦠꦸꦠ꧀ꦠꦶꦁꦱꦠꦶꦏ꧀ꦑꦠ꧀ꦠꦸꦚ꧀ꦕ, ꦕꦏ꧀ꦏꦮꦠ꧀ꦠꦷ ꦨꦮꦶꦱ꧀ꦱꦠꦶ.

‘‘ꦪꦁ ꦪꦁ ꦪꦺꦴꦤꦶꦁ ꦱꦁꦱꦫꦠꦶ, ꦢꦺꦮꦠ꧀ꦠꦁ ꦄꦡ ꦩꦴꦤꦸꦱꦁ;

ꦄꦧ꧀ꦨꦺꦴꦏꦴꦱꦺ ꦥꦠꦶꦛ꧀ꦜꦤ꧀ꦠꦁ, ꦥꦢꦸꦩꦁ ꦣꦴꦫꦪꦶꦱ꧀ꦱꦠꦶ.

‘‘ꦏꦥ꧀ꦥꦱꦠꦱꦲꦱ꧀ꦱꦩ꧀ꦲꦶ, ꦎꦏ꧀ꦏꦴꦏꦏꦸꦭꦱꦩ꧀ꦨꦮꦺꦴ;

ꦒꦺꦴꦠꦩꦺꦴ ꦤꦴꦩ ꦒꦺꦴꦠ꧀ꦠꦺꦤ, ꦱꦠ꧀ꦡꦴ ꦭꦺꦴꦏꦺ ꦨꦮꦶꦱ꧀ꦱꦠꦶ.

‘‘ꦥꦏꦴꦱꦶꦠꦺ ꦥꦴꦮꦕꦤꦺ, ꦩꦤꦸꦱ꧀ꦱꦠ꧀ꦠꦁ ꦭꦨꦶꦱ꧀ꦱꦠꦶ;

ꦩꦤꦺꦴꦩꦪꦩ꧀ꦲꦶ ꦏꦴꦪꦩ꧀ꦲꦶ, ꦈꦠ꧀ꦠꦩꦺꦴ ꦱꦺꦴ ꦨꦮꦶꦱ꧀ꦱꦠꦶ.

‘‘ꦢ꧀ꦮꦺ ꦨꦴꦠꦫꦺꦴ ꦨꦮꦶꦱ꧀ꦱꦤ꧀ꦠꦶ, ꦈꦨꦺꦴꦥꦶ ꦥꦤ꧀ꦡꦏꦮ꧀ꦲꦪꦴ;

ꦄꦤꦸꦨꦺꦴꦠ꧀ꦮꦴ ꦈꦠ꧀ꦠꦩꦠ꧀ꦡꦁ, ꦗꦺꦴꦠꦪꦶꦱ꧀ꦱꦤ꧀ꦠꦶ ꦱꦴꦱꦤꦁ.

‘‘ꦱꦺꦴꦲꦁ ꦄꦛ꧀ꦜꦴꦫꦱꦮꦱ꧀ꦱꦺꦴ, ꦥꦧ꧀ꦧꦗꦶꦁ ꦄꦤꦒꦴꦫꦶꦪꦁ;

ꦮꦶꦱꦺꦱꦴꦲꦁ ꦤ ꦮꦶꦤ꧀ꦢꦴꦩꦶ, ꦱꦏ꧀ꦪꦥꦸꦠ꧀ꦠꦱ꧀ꦱ ꦱꦴꦱꦤꦺ.

‘‘ꦢꦤ꧀ꦣꦴ ꦩꦪ꧀ꦲꦁ ꦒꦠꦷ ꦄꦴꦱꦶ, ꦥꦫꦶꦨꦹꦠꦺꦴ ꦥꦸꦫꦺ ꦄꦲꦸꦁ;

ꦨꦴꦠꦴ ꦕ ꦩꦁ ꦥꦟꦴꦩꦺꦱꦶ, ꦒꦕ꧀ꦖ ꦢꦴꦤꦶ ꦱꦏꦁ ꦓꦫꦁ.

‘‘ꦱꦺꦴꦲꦁ ꦥꦟꦴꦩꦶꦠꦺꦴ ꦱꦤ꧀ꦠꦺꦴ, ꦱꦔ꧀ꦓꦴꦫꦴꦩꦱ꧀ꦱ ꦏꦺꦴꦛ꧀ꦜꦏꦺ;

ꦢꦸꦩ꧀ꦩꦤꦺꦴ ꦠꦠ꧀ꦡ ꦄꦛ꧀ꦜꦴꦱꦶꦁ, ꦱꦴꦩꦚ꧀ꦚꦱ꧀ꦩꦶꦁ ꦄꦥꦺꦏ꧀ꦑꦮꦴ.

‘‘ꦨꦒꦮꦴ ꦠꦠ꧀ꦡ ꦄꦴꦒꦕ꧀ꦖꦶ, ꦱꦷꦱꦁ ꦩꦪ꧀ꦲꦁ ꦥꦫꦴꦩꦱꦶ;

ꦧꦴꦲꦴꦪ ꦩꦁ ꦒꦲꦺꦠ꧀ꦮꦴꦤ, ꦱꦔ꧀ꦓꦴꦫꦴꦩꦁ ꦥꦮꦺꦱꦪꦶ.

‘‘ꦄꦤꦸꦏꦩ꧀ꦥꦴꦪ ꦩꦺ ꦱꦠ꧀ꦡꦴ, ꦄꦢꦴꦱꦶ ꦥꦴꦢꦥꦸꦚ꧀ꦖꦤꦶꦁ;

ꦌꦮꦁ ꦱꦸꦢ꧀ꦣꦁ ꦄꦣꦶꦛ꧀ꦜꦺꦲꦶ, ꦌꦏꦩꦤ꧀ꦠꦩꦣꦶꦛ꧀ꦜꦲꦁ.

‘‘ꦲꦠ꧀ꦡꦺꦲꦶ ꦠꦩꦲꦁ ꦒꦪ꧀ꦲ, ꦱꦫꦶꦁ ꦏꦺꦴꦏꦤꦢꦁ ꦄꦲꦁ;

ꦠꦠ꧀ꦡ ꦕꦶꦠ꧀ꦠꦁ ꦮꦶꦩꦸꦕ꧀ꦕꦶ ꦩꦺ, ꦄꦫꦲꦠ꧀ꦠꦁ ꦄꦥꦴꦥꦸꦟꦶꦁ.

‘‘ꦩꦤꦺꦴꦩꦪꦺꦱꦸ ꦏꦴꦪꦺꦱꦸ, ꦱꦧ꧀ꦧꦠ꧀ꦡ ꦥꦴꦫꦩꦶꦁ ꦒꦠꦺꦴ;

ꦱꦧ꧀ꦧꦴꦱꦮꦺ ꦥꦫꦶꦚ꧀ꦚꦴꦪ, ꦮꦶꦲꦫꦴꦩꦶ ꦄꦤꦴꦱꦮꦺꦴ.

‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ.

ꦄꦫꦲꦠ꧀ꦠꦩꦒ꧀ꦒꦺꦤꦺꦮꦱ꧀ꦱ ꦠꦺꦥꦶꦛꦏꦁ ꦥꦚ꧀ꦕꦴꦨꦶꦚ꧀ꦚꦴ ꦕ ꦄꦴꦒꦩꦶꦁꦱꦸ. ꦱꦠ꧀ꦡꦴ ꦌꦏꦺꦤ ꦈꦴꦤꦺꦲꦶ ꦥꦚ꧀ꦕꦲꦶ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦒꦤ꧀ꦠ꧀ꦮꦴ ꦗꦷꦮꦏꦱ꧀ꦱ ꦤꦶꦮꦺꦱꦤꦺ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦕꦹꦭ꦳ꦥꦤ꧀ꦡꦏꦺꦴ ꦥꦤ ꦄꦠ꧀ꦠꦤꦺꦴ ꦨꦶꦏ꧀ꦑꦴꦪ ꦄꦥ꧀ꦥꦛꦶꦕ꧀ꦖꦶꦠꦠ꧀ꦠꦴ ꦌꦮ ꦤ ꦒꦠꦺꦴ. ꦗꦷꦮꦏꦺꦴ ꦪꦴꦒꦸꦁ ꦢꦴꦠꦸꦁ ꦄꦴꦫꦨꦶ, ꦱꦠ꧀ꦡꦴ ꦥꦠ꧀ꦠꦁ ꦲꦠ꧀ꦡꦺꦤ ꦥꦶꦢꦲꦶ. ‘‘ꦏꦱ꧀ꦩꦴ, ꦨꦤ꧀ꦠꦺ, ꦤ ꦒꦟ꧀ꦲꦡꦴ’’ꦠꦶ ꦮꦸꦠ꧀ꦠꦺ – ‘‘ꦮꦶꦲꦴꦫꦺ ꦌꦏꦺꦴ ꦨꦶꦏ꧀ꦑꦸ ꦄꦠ꧀ꦡꦶ, ꦗꦷꦮꦏꦴ’’ꦠꦶ. ꦱꦺꦴ ꦥꦸꦫꦶꦱꦁ ꦥꦲꦶꦟꦶ, ‘‘ꦒꦕ꧀ꦖ, ꦨꦟꦺ, ꦮꦶꦲꦴꦫꦺ ꦤꦶꦱꦶꦤ꧀ꦤꦁ ꦄꦪ꧀ꦪꦁ ꦒꦲꦺꦠ꧀ꦮꦴ ꦌꦲꦷ’’ꦠꦶ. ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦺꦴꦥꦶ ꦫꦹꦥꦺꦤ ꦏꦶꦫꦶꦪꦴꦪ ꦕ ꦌꦏꦩ꧀ꦥꦶ ꦌꦏꦺꦤ ꦄꦱꦢꦶꦱꦁ ꦨꦶꦏ꧀ꦑꦸꦱꦲꦱ꧀ꦱꦁ ꦤꦶꦩ꧀ꦩꦶꦤꦶꦠ꧀ꦮꦴ ꦤꦶꦱꦷꦢꦶ. ꦱꦺꦴ ꦥꦸꦫꦶꦱꦺꦴ ꦮꦶꦲꦴꦫꦺ ꦨꦶꦏ꧀ꦑꦹꦤꦁ ꦧꦲꦸꦨꦴꦮꦁ ꦢꦶꦱ꧀ꦮꦴ ꦒꦤ꧀ꦠ꧀ꦮꦴ ꦗꦷꦮꦏꦱ꧀ꦱ ꦏꦡꦺꦱꦶ – ‘‘ꦆꦩꦱ꧀ꦩꦴ ꦨꦶꦏ꧀ꦑꦸꦱꦔ꧀ꦓꦴ ꦮꦶꦲꦴꦫꦺ ꦨꦶꦏ꧀ꦑꦸꦱꦔ꧀ꦓꦺꦴ ꦧꦲꦸꦠꦫꦺꦴ, ꦥꦏ꧀ꦏꦺꦴꦱꦶꦠꦧ꧀ꦧꦁ ꦄꦪ꧀ꦪꦁ ꦤ ꦗꦴꦤꦴꦩꦷ’’ꦠꦶ. ꦗꦷꦮꦏꦺꦴ ꦱꦠ꧀ꦡꦴꦫꦁ ꦥꦛꦶꦥꦸꦕ꧀ꦖꦶ – ‘‘ꦏꦺꦴꦤꦴꦩꦺꦴ, ꦨꦤ꧀ꦠꦺ, ꦮꦶꦲꦴꦫꦺ ꦤꦶꦱꦶꦤ꧀ꦤꦺꦴ ꦨꦶꦏ꧀ꦑꦹ’’ꦠꦶ? ‘‘ꦕꦹꦭ꦳ꦥꦤ꧀ꦡꦏꦺꦴ ꦤꦴꦩ, ꦗꦷꦮꦏꦴ’’ꦠꦶ. ‘‘ꦒꦕ꧀ꦖ, ꦨꦟꦺ, ‘ꦕꦹꦭ꦳ꦥꦤ꧀ꦡꦏꦺꦴ ꦤꦴꦩ ꦏꦠꦫꦺꦴ’ꦠꦶ ꦥꦸꦕ꧀ꦖꦶꦠ꧀ꦮꦴ ꦠꦁ ꦄꦴꦤꦺꦲꦷ’’ꦠꦶ. ꦱꦺꦴ ꦮꦶꦲꦴꦫꦁ ꦒꦤ꧀ꦠ꧀ꦮꦴ ‘‘ꦕꦹꦭ꦳ꦥꦤ꧀ꦡꦏꦺꦴ ꦤꦴꦩ ꦏꦠꦫꦺꦴ, ꦨꦤ꧀ꦠꦺ’’ꦠꦶ ꦥꦸꦕ꧀ꦖꦶ. ‘‘ꦄꦲꦁ ꦕꦹꦭ꦳ꦥꦤ꧀ꦡꦏꦺꦴ’’,‘‘ꦄꦲꦁ ꦕꦹꦭ꦳ꦥꦤ꧀ꦡꦏꦺꦴ’’ꦠꦶ ꦌꦏꦥꦲꦴꦫꦺꦤꦺꦮ ꦨꦶꦏ꧀ꦑꦸꦱꦲꦱ꧀ꦱꦩ꧀ꦥꦶ ꦏꦡꦺꦱꦶ. ꦱꦺꦴ ꦥꦸꦤꦴꦒꦤ꧀ꦠ꧀ꦮꦴ ꦠꦁ ꦥꦮꦠ꧀ꦠꦶꦁ ꦗꦷꦮꦏꦱ꧀ꦱ ꦄꦴꦫꦺꦴꦕꦺꦱꦶ. ꦗꦷꦮꦏꦺꦴ ꦥꦛꦶꦮꦶꦢ꧀ꦣꦱꦕ꧀ꦕꦠ꧀ꦠꦴ ‘‘ꦆꦢ꧀ꦣꦶꦩꦴ ꦩꦚ꧀ꦚꦺ, ꦄꦪ꧀ꦪꦺꦴ’’ꦠꦶ ꦤꦪꦠꦺꦴ ꦚꦠ꧀ꦮꦴ ‘‘ꦒꦕ꧀ꦖ, ꦨꦟꦺ, ꦥꦜꦩꦁ ꦏꦡꦤꦏꦩꦪ꧀ꦪꦩꦺꦮ ‘ꦠꦸꦩ꧀ꦲꦺ ꦱꦠ꧀ꦡꦴ ꦥꦏ꧀ꦏꦺꦴꦱꦠꦷ’ꦠꦶ ꦮꦠ꧀ꦮꦴ ꦕꦷꦮꦫꦏꦟ꧀ꦟꦺ ꦒꦟ꧀ꦲꦴ’’ꦠꦶ ꦄꦴꦲ. ꦱꦺꦴ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦠꦡꦴ ꦄꦏꦴꦱꦶ, ꦠꦴꦮꦢꦺꦮ ꦤꦶꦩ꧀ꦩꦶꦠꦨꦶꦏ꧀ꦑꦹ ꦄꦤ꧀ꦠꦫꦣꦴꦪꦶꦁꦱꦸ. ꦱꦺꦴ ꦡꦺꦫꦁ ꦒꦲꦺꦠ꧀ꦮꦴ ꦄꦒꦩꦴꦱꦶ.

ꦱꦠ꧀ꦡꦴ ꦠꦱ꧀ꦩꦶꦁ ꦑꦟꦺ ꦪꦴꦒꦸꦚ꧀ꦕ ꦑꦗ꧀ꦗꦏꦴꦢꦶꦨꦺꦢꦚ꧀ꦕ ꦥꦛꦶꦒ꧀ꦒꦟ꧀ꦲꦶ. ꦢꦱꦧꦭꦺ ꦨꦠ꧀ꦠꦏꦶꦕ꧀ꦕꦁ ꦏꦠ꧀ꦮꦴ ꦮꦶꦲꦴꦫꦁ ꦒꦠꦺ ꦣꦩ꧀ꦩꦱꦨꦴꦪꦁ ꦏꦡꦴ ꦈꦢꦥꦴꦢꦶ – ‘‘ꦄꦲꦺꦴ ꦧꦸꦢ꧀ꦣꦴꦤꦁ ꦄꦴꦤꦸꦨꦴꦮꦺꦴ, ꦪꦠ꧀ꦫ ꦲꦶ ꦤꦴꦩ ꦕꦠ꧀ꦠꦴꦫꦺꦴ ꦩꦴꦱꦺ ꦌꦏꦒꦴꦡꦁ ꦒꦲꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦩ꧀ꦥꦶ ꦭꦲꦸꦏꦺꦤ ꦑꦟꦺꦤꦺꦮ ꦌꦮꦁ ꦩꦲꦶꦢ꧀ꦣꦶꦏꦁ ꦄꦏꦁꦱꦹ’’ꦠꦶ. ꦱꦠ꧀ꦡꦴ ꦠꦺꦱꦁ ꦨꦶꦏ꧀ꦑꦹꦤꦁ ꦏꦡꦴꦱꦭ꧀ꦭꦴꦥꦁ ꦱꦸꦠ꧀ꦮꦴ ꦄꦴꦒꦤ꧀ꦠ꧀ꦮꦴ ꦧꦸꦢ꧀ꦣꦴꦱꦤꦺ ꦤꦶꦱꦗ꧀ꦗ, ‘‘ꦏꦶꦁ ꦮꦢꦺꦡ, ꦨꦶꦏ꧀ꦑꦮꦺ’’ꦠꦶ ꦥꦸꦕ꧀ꦖꦶꦠ꧀ꦮꦴ, ‘‘ꦆꦩꦁ ꦤꦴꦩ, ꦨꦤ꧀ꦠꦺ’’ꦠꦶ ꦮꦸꦠ꧀ꦠꦺ, ‘‘ꦨꦶꦏ꧀ꦑꦮꦺ, ꦕꦹꦭ꦳ꦥꦤ꧀ꦡꦏꦺꦤ ꦆꦢꦴꦤꦶ ꦩꦪ꧀ꦲꦁ ꦎꦮꦴꦢꦺ ꦜꦠ꧀ꦮꦴ ꦭꦺꦴꦏꦸꦠ꧀ꦠꦫꦢꦴꦪꦗ꧀ꦗꦁ ꦭꦢ꧀ꦣꦁ, ꦥꦸꦧ꧀ꦧꦺ ꦥꦤ ꦭꦺꦴꦏꦶꦪꦢꦴꦪꦗ꧀ꦗ’’ꦤ꧀ꦠꦶ ꦮꦠ꧀ꦮꦴ ꦠꦺꦲꦶ ꦪꦴꦕꦶꦠꦺꦴ ꦕꦹꦭ꦳ꦱꦺꦛ꧀ꦜꦶꦗꦴꦠꦏꦁ (ꦗꦴ. ꧑.꧑.꧔) ꦏꦡꦺꦱꦶ. ꦄꦥꦫꦨꦴꦒꦺ ꦠꦁ ꦱꦠ꧀ꦡꦴ ꦄꦫꦶꦪꦒꦟꦥꦫꦶꦮꦸꦠꦺꦴ ꦣꦩ꧀ꦩꦴꦱꦤꦺ ꦤꦶꦱꦶꦤ꧀ꦤꦺꦴ ꦩꦤꦺꦴꦩꦪꦁ ꦏꦴꦪꦁ ꦄꦨꦶꦤꦶꦩ꧀ꦩꦶꦤꦤ꧀ꦠꦴꦤꦁ ꦨꦶꦏ꧀ꦑꦹꦤꦁ ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦴꦤꦚ꧀ꦕ ꦄꦒ꧀ꦒꦛ꧀ꦜꦴꦤꦺ ꦜꦥꦺꦱꦶ. ꦱꦺꦴ ꦄꦥꦫꦺꦤ ꦱꦩꦪꦺꦤ ꦨꦶꦏ꧀ꦑꦹꦲꦶ ‘‘ꦠꦡꦴ ꦢꦤ꧀ꦣꦣꦴꦠꦸꦏꦺꦤ ꦏꦡꦁ ꦠꦪꦴ ꦱꦕ꧀ꦕꦴꦤꦶ ꦥꦛꦶꦮꦶꦢ꧀ꦣꦴꦤꦷ’’ꦠꦶ ꦥꦸꦛ꧀ꦜꦺꦴ ꦨꦴꦠꦸ ꦥꦟꦴꦩꦤꦠꦺꦴ ꦥꦛ꧀ꦜꦴꦪ ꦄꦠ꧀ꦠꦤꦺꦴ ꦥꦛꦶꦥꦠ꧀ꦠꦶꦁ ꦥꦏꦴꦱꦺꦤ꧀ꦠꦺꦴ –

꧕꧕꧗. ‘‘ꦢꦤ꧀ꦣꦴ ꦩꦪ꧀ꦲꦁ ꦒꦠꦷ ꦄꦴꦱꦶ, ꦥꦫꦶꦨꦹꦠꦺꦴ ꦥꦸꦫꦺ ꦄꦲꦁ;

ꦨꦴꦠꦴ ꦕ ꦩꦁ ꦥꦟꦴꦩꦺꦱꦶ, ꦒꦕ꧀ꦖ ꦢꦴꦤꦶ ꦠꦸꦮꦁ ꦓꦫꦁ.

꧕꧕꧘. ‘‘ꦱꦺꦴꦲꦁ ꦥꦟꦴꦩꦶꦠꦺꦴ ꦱꦤ꧀ꦠꦺꦴ, ꦱꦔ꧀ꦓꦴꦫꦴꦩꦱ꧀ꦱ ꦏꦺꦴꦛ꧀ꦜꦏꦺ;

ꦢꦸꦩ꧀ꦩꦤꦺꦴ ꦠꦠ꧀ꦡ ꦄꦛ꧀ꦜꦴꦱꦶꦁ, ꦱꦴꦱꦤꦱ꧀ꦩꦶꦁ ꦄꦥꦺꦏ꧀ꦑꦮꦴ.

꧕꧕꧙. ‘‘ꦨꦒꦮꦴ ꦠꦠ꧀ꦡ ꦄꦴꦒꦕ꧀ꦖꦶ, ꦱꦷꦱꦁ ꦩꦪ꧀ꦲꦁ ꦥꦫꦴꦩꦱꦶ;

ꦧꦴꦲꦴꦪ ꦩꦁ ꦒꦲꦺꦠ꧀ꦮꦴꦤ, ꦱꦔ꧀ꦓꦴꦫꦴꦩꦁ ꦥꦮꦺꦱꦪꦶ.

꧕꧖꧐. ‘‘ꦄꦤꦸꦏꦩ꧀ꦥꦴꦪ ꦩꦺ ꦱꦠ꧀ꦡꦴ, ꦥꦴꦢꦴꦱꦶ ꦥꦴꦢꦥꦸꦚ꧀ꦖꦤꦶꦁ;

ꦌꦠꦁ ꦱꦸꦢ꧀ꦣꦁ ꦄꦣꦶꦛ꧀ꦜꦺꦲꦶ, ꦌꦏꦩꦤ꧀ꦠꦁ ꦱ꧀ꦮꦣꦶꦛ꧀ꦜꦶꦠꦁ.

꧕꧖꧑. ‘‘ꦠꦱ꧀ꦱꦴꦲꦁ ꦮꦕꦤꦁ ꦱꦸꦠ꧀ꦮꦴ, ꦮꦶꦲꦴꦱꦶꦁ ꦱꦴꦱꦤꦺ ꦫꦠꦺꦴ;

ꦱꦩꦴꦣꦶꦁ ꦥꦛꦶꦥꦴꦢꦺꦱꦶꦁ, ꦈꦠ꧀ꦠꦩꦠ꧀ꦡꦱ꧀ꦱ ꦥꦠ꧀ꦠꦶꦪꦴ.

꧕꧖꧒. ‘‘ꦥꦸꦧ꧀ꦧꦺꦤꦶꦮꦴꦱꦁ ꦗꦴꦤꦴꦩꦶ, ꦢꦶꦧ꧀ꦧꦕꦏ꧀ꦑꦸ ꦮꦶꦱꦺꦴꦣꦶꦠꦁ;

ꦠꦶꦱ꧀ꦱꦺꦴ ꦮꦶꦗ꧀ꦗꦴ ꦄꦤꦸꦥ꧀ꦥꦠ꧀ꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧕꧖꧓. ‘‘ꦱꦲꦱ꧀ꦱꦏ꧀ꦑꦠ꧀ꦠꦸꦩꦠ꧀ꦠꦴꦤꦁ, ꦤꦶꦩ꧀ꦩꦶꦤꦶꦠ꧀ꦮꦴꦤ ꦥꦤ꧀ꦡꦏꦺꦴ;

ꦤꦶꦱꦷꦢꦩ꧀ꦧꦮꦤꦺ ꦫꦩ꧀ꦩꦺ, ꦪꦴꦮ ꦏꦴꦭꦥ꧀ꦥꦮꦺꦢꦤꦴ.

꧕꧖꧔. ‘‘ꦠꦠꦺꦴ ꦩꦺ ꦱꦠ꧀ꦡꦴ ꦥꦴꦲꦺꦱꦶ, ꦢꦹꦠꦁ ꦏꦴꦭꦥ꧀ꦥꦮꦺꦢꦏꦁ;

ꦥꦮꦺꦢꦶꦠꦩ꧀ꦲꦶ ꦏꦴꦭꦩ꧀ꦲꦶ, ꦮꦺꦲꦴꦱꦴꦢꦸꦥꦱꦔ꧀ꦏꦩꦶꦁ.

꧕꧖꧕. ‘‘ꦮꦤ꧀ꦢꦶꦠ꧀ꦮꦴ ꦱꦠ꧀ꦡꦸꦤꦺꦴ ꦥꦴꦢꦺ, ꦌꦏꦩꦤ꧀ꦠꦁ ꦤꦶꦱꦷꦢꦲꦁ;

ꦤꦶꦱꦶꦤ꧀ꦤꦁ ꦩꦁ ꦮꦶꦢꦶꦠ꧀ꦮꦴꦤ, ꦄꦠ꧀ꦡ ꦱꦠ꧀ꦡꦴ ꦥꦛꦶꦒ꧀ꦒꦲꦶ.

꧕꧖꧖. ‘‘ꦄꦴꦪꦴꦒꦺꦴ ꦱꦧ꧀ꦧꦭꦺꦴꦏꦱ꧀ꦱ, ꦄꦴꦲꦸꦠꦷꦤꦁ ꦥꦛꦶꦒ꧀ꦒꦲꦺꦴ;

ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦩꦤꦸꦱ꧀ꦱꦴꦤꦁ, ꦥꦛꦶꦒ꧀ꦒꦟ꧀ꦲꦶꦠ꧀ꦡ ꦢꦏ꧀ꦑꦶꦟ’’ꦤ꧀ꦠꦶ. –

ꦆꦩꦴ ꦒꦴꦡꦴ ꦄꦨꦴꦱꦶ.

ꦠꦠ꧀ꦡ ꦢꦤ꧀ꦣꦴꦠꦶ, ꦩꦤ꧀ꦢꦴ, ꦕꦠꦸꦥ꧀ꦥꦢꦶꦏꦁ ꦒꦴꦡꦁ ꦕꦠꦹꦲꦶ ꦩꦴꦱꦺꦲꦶ ꦒꦲꦺꦠꦸꦁ ꦄꦱꦩꦠ꧀ꦡꦨꦴꦮꦺꦤ ꦢꦸꦧ꧀ꦧꦭꦴ. ꦒꦠꦷꦠꦶ ꦚꦴꦟꦒꦠꦶ. ꦄꦴꦱꦷꦠꦶ, ꦄꦲꦺꦴꦱꦶ. ꦥꦫꦶꦨꦹꦠꦺꦴꦠꦶ, ꦠꦠꦺꦴ ꦌꦮ ‘‘ꦩꦸꦛ꧀ꦜꦱ꧀ꦱꦠꦶ ꦄꦱꦩ꧀ꦥꦗꦴꦤꦺꦴ’’ꦠꦶ ꦲꦷꦭ꦳ꦶꦠꦺꦴ. ꦥꦸꦫꦺꦠꦶ, ꦥꦸꦧ꧀ꦧꦺ ꦥꦸꦡꦸꦗ꧀ꦗꦤꦏꦴꦭꦺ. ꦨꦴꦠꦴ ꦕꦴꦠꦶ ꦱꦩꦸꦕ꧀ꦕꦪꦠ꧀ꦡꦺꦴ ꦕ-ꦱꦢ꧀ꦢꦺꦴ, ꦤ ꦏꦺꦮꦭꦁ ꦥꦫꦶꦨꦹꦠꦺꦴꦮ, ꦄꦡ ꦑꦺꦴ ꦨꦴꦠꦴꦥꦶ ꦩꦁ ꦥꦟꦴꦩꦺꦱꦶ, ‘‘ꦥꦤ꧀ꦡꦏ, ꦠ꧀ꦮꦁ ꦢꦸꦥ꧀ꦥꦚ꧀ꦚꦺꦴ ꦄꦲꦺꦠꦸꦏꦺꦴ ꦩꦚ꧀ꦚꦺ, ꦠꦱ꧀ꦩꦴ ꦥꦧ꧀ꦧꦗꦶꦠꦏꦶꦕ꧀ꦕꦁ ꦩꦠ꧀ꦡꦏꦁ ꦥꦴꦥꦺꦠꦸꦁ ꦄꦱꦩꦠ꧀ꦡꦺꦴ, ꦤ ꦆꦩꦱ꧀ꦱ ꦱꦴꦱꦤꦱ꧀ꦱ ꦄꦤꦸꦕ꧀ꦖꦮꦶꦏꦺꦴ, ꦒꦕ꧀ꦖ ꦢꦴꦤꦶ ꦠꦸꦪ꧀ꦲꦁ ꦄꦪ꧀ꦪꦏꦓꦫ’’ꦤ꧀ꦠꦶ ꦤꦶꦏ꧀ꦏꦝ꧀ꦞꦺꦱꦶ. ꦨꦴꦠꦴꦠꦶ, ꦨꦴꦠꦫꦴ.

ꦏꦺꦴꦛ꧀ꦜꦏꦺꦠꦶ, ꦢ꧀ꦮꦴꦫꦏꦺꦴꦛ꧀ꦜꦏꦱꦩꦷꦥꦺ. ꦢꦸꦩ꧀ꦩꦤꦺꦴꦠꦶ, ꦢꦺꦴꦩꦤꦱ꧀ꦱꦶꦠꦺꦴ. ꦱꦴꦱꦤꦱ꧀ꦩꦶꦁ ꦄꦥꦺꦏ꧀ꦑꦮꦴꦠꦶ, ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦱꦴꦥꦺꦏ꧀ꦑꦺꦴ ꦄꦮꦶꦧ꧀ꦨꦩꦶꦠꦸꦏꦴꦩꦺꦴ.

ꦨꦒꦮꦴ ꦠꦠ꧀ꦡ ꦄꦴꦒꦕ꧀ꦖꦷꦠꦶ, ꦩꦲꦴꦏꦫꦸꦟꦴꦱꦚ꧀ꦕꦺꦴꦢꦶꦠꦩꦴꦤꦱꦺꦴ ꦩꦁ ꦄꦤꦸꦒ꧀ꦒꦟ꧀ꦲꦤ꧀ꦠꦺꦴ ꦨꦒꦮꦴ ꦪꦠ꧀ꦡꦴꦲꦁ ꦜꦶꦠꦺꦴ, ꦠꦠ꧀ꦡ ꦄꦴꦒꦕ꧀ꦖꦶ. ꦄꦴꦒꦤ꧀ꦠ꧀ꦮꦴ ꦕ, ‘‘ꦥꦤ꧀ꦡꦏ, ꦄꦲꦁ ꦠꦺ ꦱꦠ꧀ꦡꦴ, ꦤ ꦩꦲꦴꦥꦤ꧀ꦡꦏꦺꦴ, ꦩꦁ ꦈꦢ꧀ꦢꦶꦱ꧀ꦱ ꦠꦮ ꦥꦧ꧀ꦧꦗ꧀ꦗꦴ’’ꦠꦶ ꦱꦩꦱ꧀ꦱꦴꦱꦺꦤ꧀ꦠꦺꦴ ꦱꦷꦱꦁ ꦩꦪ꧀ꦲꦁ ꦥꦫꦴꦩꦱꦶ ꦗꦴꦭꦴꦧꦤ꧀ꦣꦤꦩꦸꦢꦸꦠꦭꦸꦤꦥꦷꦟꦮꦫꦴꦪꦠꦔ꧀ꦒꦸꦭꦶꦱꦩꦸꦥꦱꦺꦴꦨꦶꦠꦺꦤ ꦮꦶꦏꦱꦶꦠꦥꦢꦸꦩꦱꦱ꧀ꦱꦶꦫꦷꦏꦺꦤ ꦕꦏ꧀ꦏꦔ꧀ꦏꦶꦠꦺꦤ ꦲꦠ꧀ꦡꦠꦭꦺꦤ ‘‘ꦆꦢꦴꦤꦶꦪꦺꦮ ꦩꦩ ꦥꦸꦠ꧀ꦠꦺꦴ ꦨꦮꦶꦱ꧀ꦱꦠꦷ’’ꦠꦶ ꦢꦷꦥꦺꦤ꧀ꦠꦺꦴ ꦩꦪ꧀ꦲꦁ ꦱꦷꦱꦁ ꦥꦫꦴꦩꦱꦶ. ꦧꦴꦲꦴꦪ ꦩꦁ ꦒꦲꦺꦠ꧀ꦮꦴꦤꦴꦠꦶ, ‘‘ꦏꦱ꧀ꦩꦴ ꦠ꧀ꦮꦁ, ꦆꦣ ꦠꦶꦛ꧀ꦜꦱꦷ’’ꦠꦶ ꦕꦤ꧀ꦢꦤꦒꦤ꧀ꦣꦒꦤ꧀ꦣꦶꦤꦴ ꦄꦠ꧀ꦠꦤꦺꦴ ꦲꦠ꧀ꦡꦺꦤ ꦩꦁ ꦨꦸꦗꦺ ꦒꦲꦺꦠ꧀ꦮꦴ ꦄꦤ꧀ꦠꦺꦴꦱꦔ꧀ꦓꦴꦫꦴꦩꦁ ꦥꦮꦺꦱꦺꦱꦶ. ꦥꦴꦢꦴꦱꦶ ꦥꦴꦢꦥꦸꦚ꧀ꦖꦤꦶꦤ꧀ꦠꦶ ꦥꦴꦢꦥꦸꦚ꧀ꦖꦤꦶꦁ ꦏꦠ꧀ꦮꦴ ꦥꦴꦢꦴꦱꦶ ‘‘ꦫꦗꦺꦴꦲꦫꦟꦤ꧀ꦠꦶ ꦩꦤꦱꦶ ꦏꦫꦺꦴꦲꦷ’’ꦠꦶ ꦄꦢꦴꦱꦷꦠꦶ ꦄꦠ꧀ꦡꦺꦴ. ‘‘ꦄꦢꦴꦱꦷ’’ꦠꦶ ‘‘ꦥꦴꦢꦥꦸꦚ꧀ꦖꦤꦶ’’ꦤ꧀ꦠꦶ ꦕ ꦥꦜꦤ꧀ꦠꦶ. ꦏꦺꦕꦶ ꦥꦤ ‘‘ꦥꦴꦢꦥꦸꦚ꧀ꦖꦤꦶ’’ꦤ꧀ꦠꦶ ꦥꦴꦢꦥꦸꦚ꧀ꦖꦤꦕꦺꦴꦭ꦳ꦏ꧀ꦑꦟ꧀ꦝꦁ ꦥꦴꦢꦴꦱꦷ’’ꦠꦶ ꦮꦢꦤ꧀ꦠꦶ. ꦠꦢꦪꦸꦠ꧀ꦠꦁ ꦆꦢ꧀ꦣꦶꦪꦴ ꦄꦨꦶꦱꦔ꧀ꦑꦫꦶꦠ꧀ꦮꦴ ꦕꦺꦴꦭ꦳ꦏ꧀ꦑꦟ꧀ꦝꦱ꧀ꦱ ꦢꦶꦤ꧀ꦤꦠ꧀ꦠꦴ. ꦌꦠꦁ ꦱꦸꦢ꧀ꦣꦁ ꦄꦣꦶꦛ꧀ꦜꦺꦲꦶ, ꦌꦏꦩꦤ꧀ꦠꦁ ꦱ꧀ꦮꦣꦶꦛ꧀ꦜꦶꦠꦤ꧀ꦠꦶ, ꦌꦠꦁ ꦱꦸꦢ꧀ꦣꦁ ꦕꦺꦴꦭ꦳ꦏ꧀ꦑꦟ꧀ꦝꦁ ‘‘ꦫꦗꦺꦴꦲꦫꦟꦁ, ꦫꦗꦺꦴꦲꦫꦟ’’ꦤ꧀ꦠꦶ ꦩꦤꦱꦶꦏꦴꦫꦺꦤ ꦱ꧀ꦮꦣꦶꦛ꧀ꦜꦶꦠꦁ ꦏꦠ꧀ꦮꦴ ꦌꦏꦩꦤ꧀ꦠꦁ ꦌꦏꦩꦤ꧀ꦠꦺ ꦮꦶꦮꦶꦠ꧀ꦠꦺ ꦒꦤ꧀ꦣꦏꦸꦛꦶꦥꦩꦸꦑꦺ ꦤꦶꦱꦶꦤ꧀ꦤꦺꦴ ꦄꦣꦶꦛ꧀ꦜꦺꦲꦶ ꦠꦡꦴ ꦕꦶꦠ꧀ꦠꦁ ꦱꦩꦴꦲꦶꦠꦁ ꦏꦠ꧀ꦮꦴ ꦥꦮꦠ꧀ꦠꦺꦲꦶ.

ꦠꦱ꧀ꦱꦴꦲꦁ ꦮꦕꦤꦁ ꦱꦸꦠ꧀ꦮꦴꦠꦶ, ꦠꦱ꧀ꦱ ꦨꦒꦮꦠꦺꦴ ꦮꦕꦤꦁ ꦎꦮꦴꦢꦁ ꦄꦲꦁ ꦱꦸꦠ꧀ꦮꦴ ꦠꦱ꧀ꦩꦶꦁ ꦱꦴꦱꦤꦺ ꦎꦮꦴꦢꦺ ꦫꦠꦺꦴ ꦄꦨꦶꦫꦠꦺꦴ ꦲꦸꦠ꧀ꦮꦴ ꦮꦶꦲꦴꦱꦶꦁ ꦪꦡꦴꦤꦸꦱꦶꦛ꧀ꦜꦁ ꦥꦛꦶꦥꦗ꧀ꦗꦶꦁ. ꦥꦛꦶꦥꦗ꧀ꦗꦤ꧀ꦠꦺꦴ ꦕ ꦱꦩꦴꦣꦶꦁ ꦥꦛꦶꦥꦴꦢꦺꦱꦶꦁ, ꦈꦠ꧀ꦠꦩꦠ꧀ꦡꦱ꧀ꦱ ꦥꦠ꧀ꦠꦶꦪꦴꦠꦶ, ꦈꦠ꧀ꦠꦩꦠ꧀ꦡꦺꦴ ꦤꦴꦩ ꦄꦫꦲꦠ꧀ꦠꦁ, ꦠꦱ꧀ꦱ ꦄꦣꦶꦒꦩꦴꦪ ꦏꦱꦶꦟꦥꦫꦶꦏꦩ꧀ꦩꦮꦱꦺꦤ ꦫꦹꦥꦗ꧀ꦙꦴꦤꦴꦤꦶ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦙꦴꦤꦥꦴꦢꦏꦁ ꦮꦶꦥꦱ꧀ꦱꦤꦁ ꦥꦛ꧀ꦜꦥꦺꦠ꧀ꦮꦴ ꦩꦒ꧀ꦒꦥꦛꦶꦥꦴꦛꦶꦪꦴ ꦄꦒ꧀ꦒꦩꦒ꧀ꦒꦱꦩꦴꦣꦶꦁ ꦱꦩ꧀ꦥꦴꦢꦺꦱꦶꦤ꧀ꦠꦶ ꦄꦠ꧀ꦡꦺꦴ. ꦌꦠ꧀ꦡ ꦲꦶ ꦱꦩꦴꦣꦷꦠꦶ ꦈꦥꦕꦴꦫꦱꦩꦴꦣꦶꦠꦺꦴ ꦥꦛ꧀ꦜꦴꦪ ꦪꦴꦮ ꦕꦠꦸꦠ꧀ꦡꦩꦒ꧀ꦒꦱꦩꦴꦣꦶ, ꦠꦴꦮ ꦱꦩꦴꦣꦶꦱꦴꦩꦚ꧀ꦚꦺꦤ ꦒꦲꦶꦠꦺꦴ, ꦄꦒ꧀ꦒꦦꦭꦱꦩꦴꦣꦶ ꦥꦤ ꦈꦠ꧀ꦠꦩꦠ꧀ꦡꦒ꧀ꦒꦲꦟꦺꦤ, ꦱꦴꦠꦶꦱꦪꦁ ꦕꦺꦮꦴꦪꦁ ꦱꦩꦴꦣꦶꦏꦸꦱꦭꦺꦴ, ꦠꦱ꧀ꦩꦴ ‘‘ꦱꦩꦴꦣꦶꦁ ꦥꦛꦶꦥꦴꦢꦺꦱꦶ’’ꦤ꧀ꦠꦶ ꦄꦴꦲ. ꦱꦩꦴꦣꦶꦏꦸꦱꦭꦠꦴꦪ ꦲꦶ ꦄꦪꦩꦴꦪꦱ꧀ꦩꦴ ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦺꦴ ꦤꦴꦩ ꦗꦴꦠꦺꦴ, ꦩꦲꦴꦥꦤ꧀ꦡꦏꦠ꧀ꦡꦺꦫꦺꦴ ꦥꦤ ꦮꦶꦥꦱ꧀ꦱꦤꦴꦏꦸꦱꦭꦠꦴꦪ ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦺꦴ ꦤꦴꦩ. ꦌꦏꦺꦴ ꦕꦺꦠ꧀ꦡ ꦱꦩꦴꦣꦶꦭꦏ꧀ꦑꦟꦺ ꦖꦺꦏꦺꦴ, ꦌꦏꦺꦴ ꦮꦶꦥꦱ꧀ꦱꦤꦴꦭꦏ꧀ꦑꦟꦺ, ꦌꦏꦺꦴ ꦱꦩꦴꦣꦶꦒꦴꦭ꦳꧀ꦲꦺꦴ, ꦌꦏꦺꦴ ꦮꦶꦥꦱ꧀ꦱꦤꦴꦒꦴꦭ꦳꧀ꦲꦺꦴ ꦌꦏꦺꦴ ꦄꦔ꧀ꦒꦱꦁꦑꦶꦠ꧀ꦠꦺ ꦖꦺꦏꦺꦴ, ꦌꦏꦺꦴ ꦄꦴꦫꦩ꧀ꦩꦟꦱꦁꦑꦶꦠ꧀ꦠꦺ, ꦌꦏꦺꦴ ꦄꦔ꧀ꦒꦮꦮꦠ꧀ꦡꦴꦤꦺ, ꦌꦏꦺꦴ ꦄꦴꦫꦩ꧀ꦩꦟꦮꦮꦠ꧀ꦡꦴꦤꦺꦠꦶ ꦮꦟ꧀ꦟꦺꦤ꧀ꦠꦶ. ꦄꦥꦶꦕ ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦺꦴ ꦱꦴꦠꦶꦱꦪꦁ ꦕꦠꦸꦤ꧀ꦤꦁ ꦫꦹꦥꦴꦮꦕꦫꦗ꧀ꦙꦴꦤꦴꦤꦁ ꦭꦴꦨꦶꦠꦴꦪ ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦺꦴ ꦮꦸꦠ꧀ꦠꦺꦴ, ꦩꦲꦴꦥꦤ꧀ꦡꦏꦠ꧀ꦡꦺꦫꦺꦴ ꦱꦴꦠꦶꦱꦪꦁ ꦕꦠꦸꦤ꧀ꦤꦁ ꦄꦫꦹꦥꦴꦮꦕꦫꦗ꧀ꦙꦴꦤꦴꦤꦁ ꦭꦴꦨꦶꦠꦴꦪ ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦺꦴ. ꦥꦜꦩꦺꦴ ꦮꦴ ꦫꦹꦥꦴꦮꦕꦫꦗ꧀ꦙꦴꦤꦭꦴꦨꦷ ꦲꦸꦠ꧀ꦮꦴ ꦙꦴꦤꦔ꧀ꦒꦺꦲꦶ ꦮꦸꦛ꧀ꦜꦴꦪ ꦄꦫꦲꦠ꧀ꦠꦁ ꦥꦠ꧀ꦠꦺꦴꦠꦶ ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦺꦴ, ꦆꦠꦫꦺꦴ ꦄꦫꦹꦥꦴꦮꦕꦫꦗ꧀ꦙꦴꦤꦭꦴꦨꦷ ꦲꦸꦠ꧀ꦮꦴ ꦙꦴꦤꦔ꧀ꦒꦺꦲꦶ ꦮꦸꦛ꧀ꦜꦴꦪ ꦄꦫꦲꦠ꧀ꦠꦁ ꦥꦠ꧀ꦠꦺꦴꦠꦶ ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦺꦴ. ꦩꦤꦺꦴꦩꦪꦁ ꦥꦤ ꦏꦴꦪꦁ ꦤꦶꦧ꧀ꦧꦠ꧀ꦠꦺꦤ꧀ꦠꦺꦴ ꦄꦚ꧀ꦚꦺ ꦠꦪꦺꦴ ꦮꦴ ꦕꦠ꧀ꦠꦴꦫꦺꦴ ꦮꦴ ꦤꦶꦧ꧀ꦧꦠ꧀ꦠꦤ꧀ꦠꦶ, ꦤ ꦧꦲꦸꦏꦺ, ꦌꦏꦱꦢꦶꦱꦺꦪꦺꦮ ꦕ ꦏꦠ꧀ꦮꦴ ꦤꦶꦧ꧀ꦧꦠ꧀ꦠꦺꦤ꧀ꦠꦶ, ꦌꦏꦮꦶꦣꦩꦺꦮ ꦏꦩ꧀ꦩꦁ ꦏꦸꦫꦸꦩꦴꦤꦺ. ꦄꦪꦁ ꦥꦤ ꦡꦺꦫꦺꦴ ꦌꦏꦴꦮꦗ꧀ꦗꦤꦺꦤ ꦱꦩꦟꦱꦲꦱ꧀ꦱꦁ ꦩꦴꦥꦺꦱꦶ, ꦢ꧀ꦮꦺꦥꦶ ꦤ ꦏꦴꦪꦺꦤ ꦌꦏꦱꦢꦶꦱꦺ ꦄꦏꦴꦱꦶ, ꦤ ꦌꦏꦮꦶꦣꦁ ꦏꦩ꧀ꦩꦁ ꦏꦸꦫꦸꦩꦴꦤꦺ. ꦠꦱ꧀ꦩꦴ ꦩꦤꦺꦴꦩꦪꦁ ꦏꦴꦪꦁ ꦄꦨꦶꦤꦶꦩ꧀ꦩꦶꦤꦤ꧀ꦠꦴꦤꦁ ꦄꦒ꧀ꦒꦺꦴ ꦤꦴꦩ ꦗꦴꦠꦺꦴ.

ꦆꦢꦴꦤꦶ ꦄꦠ꧀ꦠꦤꦺꦴ ꦄꦣꦶꦒꦠꦮꦶꦱꦺꦱꦁ ꦢꦱ꧀ꦱꦺꦠꦸꦁ ‘‘ꦥꦸꦧ꧀ꦧꦺꦤꦶꦮꦴꦱꦁ ꦗꦴꦤꦴꦩꦷ’’ꦠꦶꦄꦴꦢꦶꦩꦴꦲ. ꦏꦴꦩꦚ꧀ꦕꦴꦪꦁ ꦡꦺꦫꦺꦴ ꦖꦭ꦳ꦨꦶꦚ꧀ꦚꦺꦴ, ꦪꦴ ꦥꦤ ꦄꦨꦶꦚ꧀ꦚꦴ ꦄꦴꦱꦮꦏ꧀ꦑꦪꦚꦴꦟꦴꦣꦶꦒꦩꦱ꧀ꦱ ꦧꦲꦹꦥꦏꦴꦫꦴ, ꦠꦁ ꦢꦱ꧀ꦱꦤꦠ꧀ꦡꦁ ‘‘ꦥꦸꦧ꧀ꦧꦺꦤꦶꦮꦴꦱꦁ ꦗꦴꦤꦴꦩꦶ, ꦢꦶꦧ꧀ꦧꦕꦏ꧀ꦑꦸ ꦮꦶꦱꦺꦴꦣꦶꦠ’’ꦤ꧀ꦠꦶ ꦮꦠ꧀ꦮꦴ ‘‘ꦠꦶꦱ꧀ꦱꦺꦴ ꦮꦶꦗ꧀ꦗꦴ ꦄꦤꦸꦥ꧀ꦥꦠ꧀ꦠꦴ’’ꦠꦶ ꦮꦸꦠ꧀ꦠꦁ. ꦥꦸꦧ꧀ꦧꦺꦤꦶꦮꦴꦱꦪꦡꦴꦏꦩ꧀ꦩꦸꦥꦒꦄꦤꦴꦒꦠꦁꦱꦚꦴꦟꦴꦤꦶ ꦲꦶ ꦮꦶꦥꦱ꧀ꦱꦤꦴꦕꦴꦫꦱ꧀ꦱ ꦧꦲꦹꦥꦏꦴꦫꦴꦤꦶ, ꦤ ꦠꦡꦴ ꦆꦠꦫꦚꦴꦟꦴꦤꦶ.

ꦱꦲꦱ꧀ꦱꦏ꧀ꦑꦠ꧀ꦠꦸꦤ꧀ꦠꦶ ꦱꦲꦱ꧀ꦱꦁ. ‘‘ꦱꦲꦱ꧀ꦱꦮꦴꦫ’’ꦤ꧀ꦠꦶ ꦏꦺꦕꦶ ꦮꦢꦤ꧀ꦠꦶ. ꦌꦏꦴꦮꦗ꧀ꦗꦤꦺꦤ ꦥꦤ ꦡꦺꦫꦺꦴ ꦱꦲꦱ꧀ꦱꦺ ꦩꦤꦺꦴꦩꦪꦺ ꦏꦴꦪꦺ ꦤꦶꦩ꧀ꦩꦶꦤꦶ, ꦤ ꦮꦴꦫꦺꦤ. ꦠꦺ ꦕ ꦑꦺꦴ ꦄꦚ꧀ꦚꦩꦚ꧀ꦚꦩꦱꦢꦶꦱꦺ ꦮꦶꦮꦶꦣꦚ꧀ꦕ ꦏꦩ꧀ꦩꦁ ꦏꦫꦺꦴꦤ꧀ꦠꦺ. ‘‘ꦏꦶꦁ ꦥꦤ ꦱꦴꦮꦏꦴꦤꦩ꧀ꦥꦶ ꦌꦮꦫꦹꦥꦁ ꦆꦢ꧀ꦣꦶꦤꦶꦩ꧀ꦩꦴꦤꦁ ꦱꦩ꧀ꦨꦮꦠꦷ’’ꦠꦶ? ꦤ ꦱꦩ꧀ꦨꦮꦠꦶ ꦱꦧ꧀ꦧꦺꦱꦁ, ꦄꦨꦶꦤꦷꦲꦴꦫꦱꦩ꧀ꦥꦠ꧀ꦠꦶꦪꦴ ꦥꦤ ꦄꦪꦩꦺꦮ ꦡꦺꦫꦺꦴ ꦌꦮꦩꦏꦴꦱꦶ, ꦠꦡꦴ ꦲꦺꦱ ꦆꦩꦶꦤꦴ ꦄꦔ꧀ꦒꦺꦤ ꦌꦠꦢꦒ꧀ꦒꦺ ꦜꦥꦶꦠꦺꦴ. ꦥꦤ꧀ꦡꦏꦺꦴ ꦤꦶꦱꦷꦢꦷꦠꦶ ꦄꦠ꧀ꦠꦴꦤꦩꦺꦮ ꦥꦫꦁ ꦮꦶꦪ ꦮꦢꦠꦶ. ꦄꦩ꧀ꦧꦮꦤꦺꦠꦶ, ꦄꦩ꧀ꦧꦮꦤꦺ ꦗꦷꦮꦏꦺꦤ ꦏꦠꦮꦶꦲꦴꦫꦺ. ꦮꦺꦲꦴꦱꦴꦢꦸꦥꦱꦔ꧀ꦏꦩꦶꦤ꧀ꦠꦶ ꦮꦺꦲꦴꦱꦴꦠꦶ ꦏꦫꦟꦺ ꦤꦶꦱ꧀ꦱꦏ꧀ꦏꦮꦕꦤꦁ, ꦮꦺꦲꦴꦱꦺꦤꦴꦠꦶ ꦄꦠ꧀ꦡꦺꦴ, ꦢ-ꦏꦴꦫꦺꦴ ꦥꦢꦱꦤ꧀ꦣꦶꦏꦫꦺꦴ. ꦄꦡꦴꦠꦶ, ꦩꦩ ꦤꦶꦱꦗ꧀ꦗꦴꦪ ꦥꦕ꧀ꦖꦴ. ꦥꦛꦶꦒ꧀ꦒꦲꦷꦠꦶ ꦢꦏ꧀ꦑꦶꦟꦺꦴꦢꦏꦁ ꦥꦛꦶꦒ꧀ꦒꦟ꧀ꦲꦶ. ꦄꦴꦪꦴꦒꦺꦴ ꦱꦧ꧀ꦧꦭꦺꦴꦏꦱ꧀ꦱꦴꦠꦶ, ꦱꦧ꧀ꦧꦱ꧀ꦱ ꦱꦢꦺꦮꦏꦱ꧀ꦱ ꦭꦺꦴꦏꦱ꧀ꦱ ꦄꦒ꧀ꦒꦢꦏ꧀ꦑꦶꦟꦺꦪ꧀ꦪꦠꦴꦪ ꦢꦺꦪ꧀ꦪꦣꦩ꧀ꦩꦁ ꦄꦴꦤꦺꦠ꧀ꦮꦴ ꦪꦗꦶꦠꦧ꧀ꦧꦛ꧀ꦜꦴꦤꦨꦹꦠꦺꦴ. ꦄꦴꦲꦸꦠꦷꦤꦁ ꦥꦛꦶꦒ꧀ꦒꦲꦺꦴꦠꦶ, ꦩꦲꦴꦦꦭꦨꦴꦮꦏꦫꦟꦺꦤ ꦢꦏ꧀ꦑꦶꦟꦴꦲꦸꦠꦷꦤꦁ ꦥꦛꦶꦒ꧀ꦒꦟ꧀ꦲꦏꦺꦴ. ꦥꦛꦶꦒ꧀ꦒꦟ꧀ꦲꦶꦠ꧀ꦡ ꦢꦏ꧀ꦑꦶꦟꦤ꧀ꦠꦶ ꦗꦷꦮꦏꦺꦤ ꦈꦥꦤꦷꦠꦁ ꦪꦴꦒꦸꦑꦗ꧀ꦗꦴꦢꦶꦨꦺꦢꦁ ꦢꦏ꧀ꦑꦶꦟꦁ ꦥꦛꦶꦒ꧀ꦒꦲꦺꦱꦶ.

ꦄꦡ ꦑꦺꦴ ꦨꦒꦮꦴ ꦏꦠꦨꦠ꧀ꦠꦏꦶꦕ꧀ꦕꦺꦴ ꦄꦴꦪꦱ꧀ꦩꦤ꧀ꦠꦁ ꦕꦹꦭ꦳ꦥꦤ꧀ꦡꦏꦁ ꦄꦴꦟꦴꦥꦺꦱꦶ – ‘‘ꦄꦤꦸꦩꦺꦴꦢꦤꦁ ꦏꦫꦺꦴꦲꦷ’’ꦠꦶ. ꦱꦺꦴ ꦱꦶꦤꦺꦫꦸꦁ ꦒꦲꦺꦠ꧀ꦮꦴ ꦩꦲꦴꦱꦩꦸꦢ꧀ꦢꦁ ꦩꦤ꧀ꦡꦺꦤ꧀ꦠꦺꦴ ꦮꦶꦪ ꦥꦨꦶꦤ꧀ꦤꦥꦛꦶꦱꦩ꧀ꦨꦶꦢꦴꦥ꧀ꦥꦠ꧀ꦠꦠꦴꦪ ꦠꦺꦥꦶꦛꦏꦁ ꦧꦸꦢ꧀ꦣꦮꦕꦤꦁ ꦱꦔ꧀ꦑꦺꦴꦨꦺꦤ꧀ꦠꦺꦴ ꦱꦠ꧀ꦡꦸ ꦄꦗ꧀ꦙꦴꦱꦪꦁ ꦒꦟ꧀ꦲꦤ꧀ꦠꦺꦴ ꦄꦤꦸꦩꦺꦴꦢꦤꦁ ꦄꦏꦴꦱꦶ. ꦠꦡꦴ ꦈꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦺꦴꦥꦶ ꦕꦴꦪꦩꦴꦪꦱ꧀ꦩꦴ ꦠꦡꦴꦫꦹꦥꦴꦪ ꦏꦩ꧀ꦩꦥꦶꦭꦺꦴꦠꦶꦏꦴꦪ ꦥꦫꦶꦧꦴꦣꦶꦠꦺꦴ ꦕꦠꦸꦥ꧀ꦥꦢꦶꦏꦁ ꦒꦴꦡꦁ ꦕꦠꦹꦲꦶꦥꦶ ꦩꦴꦱꦺꦲꦶ ꦒꦲꦺꦠꦸꦁ ꦤꦴꦱꦏ꧀ꦑꦶ. ꦠꦁ ꦥꦤꦱ꧀ꦱ ꦈꦥꦤꦶꦱ꧀ꦱꦪꦱꦩ꧀ꦥꦠ꧀ꦠꦶꦁ ꦎꦭꦺꦴꦏꦺꦠ꧀ꦮꦴ ꦱꦠ꧀ꦡꦴ ꦥꦸꦧ꧀ꦧꦕꦫꦶꦪꦴꦤꦸꦫꦹꦥꦁ ꦪꦺꦴꦤꦶꦱꦺꦴꦩꦤꦱꦶꦏꦴꦫꦺ ꦤꦶꦪꦺꦴꦗꦺꦱꦶ. ꦠꦡꦴ ꦲꦶ ꦨꦒꦮꦴ ꦠꦢꦴ ꦗꦷꦮꦏꦱ꧀ꦱ ꦤꦶꦮꦺꦱꦤꦺ ꦤꦶꦱꦶꦤ꧀ꦤꦺꦴ ꦌꦮ ‘‘ꦕꦹꦭ꦳ꦥꦤ꧀ꦡꦏꦱ꧀ꦱ ꦕꦶꦠ꧀ꦠꦁ ꦱꦩꦴꦲꦶꦠꦁ, ꦮꦷꦡꦶꦥꦛꦶꦥꦤ꧀ꦤꦴ ꦮꦶꦥꦱ꧀ꦱꦤꦴ’’ꦠꦶ ꦚꦠ꧀ꦮꦴ ꦪꦡꦴꦤꦶꦱꦶꦤ꧀ꦤꦺꦴꦮ ꦄꦠ꧀ꦠꦴꦤꦁ ꦢꦱ꧀ꦱꦺꦠ꧀ꦮꦴ, ‘‘ꦥꦤ꧀ꦡꦏ, ꦪꦢꦶꦥꦴꦪꦁ ꦥꦶꦭꦺꦴꦠꦶꦏꦴ ꦱꦁꦏꦶꦭꦶꦛ꧀ꦜꦴ ꦫꦗꦴꦤꦸꦏꦶꦟ꧀ꦟꦴ, ꦆꦠꦺꦴ ꦥꦤ ꦄꦚ꧀ꦚꦺꦴ ꦌꦮ ꦄꦫꦶꦪꦱ꧀ꦱ ꦮꦶꦤꦪꦺ ꦱꦁꦏꦶꦭꦺꦱꦺꦴ ꦫꦗꦺꦴ ꦕꦴꦠꦶ ꦢꦱ꧀ꦱꦺꦤ꧀ꦠꦺꦴ –

‘‘ꦫꦴꦒꦺꦴ ꦫꦗꦺꦴ ꦤ ꦕ ꦥꦤ ꦫꦺꦟꦸ ꦮꦸꦕ꧀ꦕꦠꦶ, ꦫꦴꦒꦱ꧀ꦱꦺꦠꦁ ꦄꦣꦶꦮꦕꦤꦁ ꦫꦗꦺꦴꦠꦶ;

ꦌꦠꦁ ꦫꦗꦁ ꦮꦶꦥ꧀ꦥꦗꦲꦶꦠ꧀ꦮꦴ ꦨꦶꦏ꧀ꦑꦮꦺꦴ, ꦮꦶꦲꦫꦤ꧀ꦠꦶ ꦠꦺ ꦮꦷꦠꦫꦗꦱ꧀ꦱ ꦱꦴꦱꦤꦺ.

‘‘ꦢꦺꦴꦱꦺꦴ ꦫꦗꦺꦴ…ꦥꦺ… ꦱꦴꦱꦤꦺ.

‘‘ꦩꦺꦴꦲꦺꦴ ꦫꦗꦺꦴ…ꦥꦺ… ꦮꦷꦠꦫꦗꦱ꧀ꦱ ꦱꦴꦱꦤꦺ’’ꦠꦶ. –

ꦆꦩꦴ ꦠꦶꦱ꧀ꦱꦺꦴ ꦎꦨꦴꦱꦒꦴꦡꦴ ꦄꦨꦴꦱꦶ. ꦒꦴꦡꦴꦥꦫꦶꦪꦺꦴꦱꦴꦤꦺ ꦕꦹꦭ꦳ꦥꦤ꧀ꦡꦏꦺꦴ ꦄꦨꦶꦚ꧀ꦚꦴꦥꦛꦶꦱꦩ꧀ꦨꦶꦢꦴꦥꦫꦶꦮꦴꦫꦁ ꦄꦫꦲꦠ꧀ꦠꦁ ꦥꦴꦥꦸꦟꦷꦠꦶ.

ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.