꧙. ꦖꦤ꧀ꦤꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ

ꦱꦸꦠ꧀ꦮꦴꦤ ꦣꦩ꧀ꦩꦁ ꦩꦲꦠꦺꦴ ꦩꦲꦴꦫꦱꦤ꧀ꦠꦶ ꦄꦴꦪꦱ꧀ꦩꦠꦺꦴ ꦖꦤ꧀ꦤꦠ꧀ꦡꦺꦫꦱ꧀ꦱ ꦒꦴꦡꦴ. ꦏꦴ ꦈꦥ꧀ꦥꦠ꧀ꦠꦶ? ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦁ ꦥꦸꦚ꧀ꦚꦁ ꦈꦥꦕꦶꦤꦤ꧀ꦠꦺꦴ ꦱꦶꦢ꧀ꦣꦠ꧀ꦡꦱ꧀ꦱ ꦨꦒꦮꦠꦺꦴ ꦏꦴꦭꦺ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦶꦚ꧀ꦚꦸꦠꦁ ꦥꦠ꧀ꦠꦺꦴ ꦌꦏꦢꦶꦮꦱꦁ ꦱꦶꦢ꧀ꦣꦠ꧀ꦡꦁ ꦨꦒꦮꦤ꧀ꦠꦁ ꦄꦚ꧀ꦚꦠꦫꦁ ꦫꦸꦏ꧀ꦑꦩꦹꦭꦁ ꦈꦥꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ꦥꦱꦤ꧀ꦤꦕꦶꦠ꧀ꦠꦺꦴ ꦩꦸꦢꦸꦱꦩ꧀ꦦꦱ꧀ꦱꦁ ꦥꦟ꧀ꦟꦱꦤ꧀ꦡꦫꦁ ꦱꦤ꧀ꦡꦫꦶꦠ꧀ꦮꦴ ꦄꦢꦴꦱꦶ. ꦥꦸꦥ꧀ꦦꦺꦲꦶ ꦕ ꦱꦩꦤ꧀ꦠꦠꦺꦴ ꦎꦏꦶꦫꦶꦠ꧀ꦮꦴ ꦥꦹꦗꦁ ꦄꦏꦴꦱꦶ. ꦱꦺꦴ ꦠꦺꦤ ꦥꦸꦚ꧀ꦚꦏꦩ꧀ꦩꦺꦤ ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦥꦸꦤꦥꦶ ꦄꦥꦫꦴꦥꦫꦁ ꦥꦸꦚ꧀ꦚꦴꦤꦶ ꦏꦠ꧀ꦮꦴ ꦱꦸꦒꦠꦷꦱꦸꦪꦺꦮ ꦱꦁꦱꦫꦤ꧀ꦠꦺꦴ ꦄꦩ꧀ꦲꦴꦏꦁ ꦨꦒꦮꦠꦺꦴ ꦏꦴꦭꦺ ꦱꦸꦢ꧀ꦣꦺꦴꦢꦤꦩꦲꦴꦫꦴꦗꦱ꧀ꦱ ꦒꦺꦲꦺ ꦢꦴꦱꦶꦪꦴ ꦏꦸꦕ꧀ꦖꦶꦩ꧀ꦲꦶ ꦤꦶꦧ꧀ꦧꦠ꧀ꦠꦶ, ꦖꦤ꧀ꦤꦺꦴꦠꦶꦱ꧀ꦱ ꦤꦴꦩꦁ ꦄꦲꦺꦴꦱꦶ, ꦧꦺꦴꦣꦶꦱꦠ꧀ꦠꦺꦤ ꦱꦲꦗꦴꦠꦺꦴ. ꦱꦺꦴ ꦱꦠ꧀ꦡꦸ ꦚꦴꦠꦶꦱꦩꦴꦒꦩꦺ ꦥꦛꦶꦭꦢ꧀ꦣꦱꦢ꧀ꦣꦺꦴ ꦥꦧ꧀ꦧꦗꦶꦠ꧀ꦮꦴ ꦨꦒꦮꦠꦶ ꦥꦺꦩꦺꦤ, ‘‘ꦄꦩ꧀ꦲꦴꦏꦁ ꦧꦸꦢ꧀ꦣꦺꦴ, ꦄꦩ꧀ꦲꦴꦏꦁ ꦣꦩ꧀ꦩꦺꦴ’’ꦠꦶ ꦩꦩꦠ꧀ꦠꦁ ꦈꦥ꧀ꦥꦴꦢꦺꦠ꧀ꦮꦴ ꦱꦶꦤꦺꦲꦁ ꦖꦶꦤ꧀ꦢꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦱꦩꦟꦣꦩ꧀ꦩꦁ ꦄꦏꦠ꧀ꦮꦴ ꦱꦠ꧀ꦡꦫꦶ ꦥꦫꦶꦤꦶꦧ꧀ꦧꦸꦠꦺ ꦱꦠ꧀ꦡꦴꦫꦴ ꦄꦴꦟꦠ꧀ꦠꦮꦶꦣꦶꦤꦴ ꦏꦠꦺꦤ ꦧ꧀ꦫꦲ꧀ꦩꦢꦟ꧀ꦝꦺꦤ ꦱꦤ꧀ꦠꦗ꧀ꦗꦶꦠꦺꦴ ꦱꦁꦮꦺꦒꦥ꧀ꦥꦠ꧀ꦠꦺꦴ ꦲꦸꦠ꧀ꦮꦴ ꦱꦶꦤꦺꦲꦁ ꦖꦶꦤ꧀ꦢꦶꦠ꧀ꦮꦴ ꦮꦶꦥꦱ꧀ꦱꦤ꧀ꦠꦺꦴ ꦤꦕꦶꦫꦺꦤꦺꦮ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦺꦤ ꦮꦸꦠ꧀ꦠꦁ ꦄꦥꦢꦴꦤꦺ (ꦄꦥ. ꦡꦺꦫ ꧑.꧑꧐.꧔꧕-꧕꧐) –

‘‘ꦱꦶꦢ꧀ꦣꦠ꧀ꦡꦱ꧀ꦱ ꦨꦒꦮꦠꦺꦴ, ꦄꦢꦴꦱꦶꦁ ꦥꦟ꧀ꦟꦱꦤ꧀ꦡꦫꦁ;

ꦱꦩꦤ꧀ꦠꦴ ꦈꦥꦲꦴꦫꦚ꧀ꦕ, ꦏꦸꦱꦸꦩꦁ ꦎꦏꦶꦫꦶꦁ ꦄꦲꦁ.

‘‘ꦥꦴꦱꦴꦢꦺꦮꦁ ꦒꦸꦟꦁ ꦫꦩ꧀ꦩꦁ, ꦄꦤꦸꦨꦺꦴꦩꦶ ꦩꦲꦴꦫꦲꦁ;

ꦩꦲꦒ꧀ꦓꦴꦤꦶ ꦕ ꦥꦸꦥ꧀ꦦꦴꦤꦶ, ꦱꦪꦤꦺꦨꦶꦱꦮꦤ꧀ꦠꦶ ꦩꦺ.

‘‘ꦱꦪꦤꦺꦲꦁ ꦠꦸꦮꦛ꧀ꦛꦴꦩꦶ, ꦮꦶꦕꦶꦠ꧀ꦠꦺ ꦥꦸꦥ꧀ꦦꦱꦤ꧀ꦡꦠꦺ;

ꦥꦸꦥ꧀ꦦꦮꦸꦛ꧀ꦜꦶ ꦕ ꦱꦪꦤꦺ, ꦄꦨꦶꦮꦱ꧀ꦱꦠꦶ ꦠꦴꦮꦢꦺ.

‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦄꦢꦴꦱꦶꦁ ꦥꦟ꧀ꦟꦱꦤ꧀ꦡꦫꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦱꦤ꧀ꦡꦫꦱ꧀ꦱ ꦆꦢꦁ ꦦꦭꦁ.

‘‘ꦠꦶꦟꦱꦤ꧀ꦡꦫꦏꦴ ꦤꦴꦩ, ꦱꦠ꧀ꦠꦺꦠꦺ ꦕꦏ꧀ꦏꦮꦠ꧀ꦠꦶꦤꦺꦴ;

ꦆꦠꦺꦴ ꦠꦺ ꦥꦚ꧀ꦕꦩꦺ ꦏꦥ꧀ꦥꦺ, ꦈꦥ꧀ꦥꦗ꧀ꦗꦶꦁꦱꦸ ꦗꦤꦴꦣꦶꦥꦴ.

‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ.

ꦄꦫꦲꦠ꧀ꦠꦁ ꦥꦤ ꦥꦠ꧀ꦮꦴ ꦮꦶꦩꦸꦠ꧀ꦠꦶꦱꦸꦑꦱꦤ꧀ꦠꦥ꧀ꦥꦶꦠꦺꦴ ꦥꦷꦠꦶꦮꦺꦒꦮꦶꦱ꧀ꦱꦛ꧀ꦜꦁ ꦈꦢꦴꦤꦁ ꦈꦢꦴꦤꦺꦤ꧀ꦠꦺꦴ –

꧖꧙. ‘‘ꦱꦸꦠ꧀ꦮꦴꦤ ꦣꦩ꧀ꦩꦁ ꦩꦲꦠꦺꦴ ꦩꦲꦴꦫꦱꦁ,

ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦮꦫꦺꦤ ꦢꦺꦱꦶꦠꦁ;

ꦩꦒ꧀ꦒꦁ ꦥꦥꦗ꧀ꦗꦶꦁ ꦄꦩꦠꦱ꧀ꦱ ꦥꦠ꧀ꦠꦶꦪꦴ,

ꦱꦺꦴ ꦪꦺꦴꦒꦏ꧀ꦑꦺꦩꦱ꧀ꦱ ꦥꦡꦱ꧀ꦱ ꦏꦺꦴꦮꦶꦢꦺꦴ’’ꦠꦶ. – ꦒꦴꦡꦁ ꦄꦨꦴꦱꦶ;

ꦠꦠ꧀ꦡ ꦱꦸꦠ꧀ꦮꦴꦤꦴꦠꦶ ꦱꦸꦟꦶꦠ꧀ꦮꦴ, ꦱꦺꦴꦠꦺꦤ ꦒꦲꦺꦠ꧀ꦮꦴ ꦎꦲꦶꦠꦱꦺꦴꦠꦺꦴ ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦺꦤ ꦈꦥꦣꦴꦫꦺꦠ꧀ꦮꦴ. ꦣꦩ꧀ꦩꦤ꧀ꦠꦶ ꦕꦠꦸꦱꦕ꧀ꦕꦣꦩ꧀ꦩꦁ. ꦩꦲꦠꦺꦴꦠꦶ ꦨꦒꦮꦠꦺꦴ. ꦨꦒꦮꦴ ꦲꦶ ꦩꦲꦤ꧀ꦠꦺꦲꦶ ꦈꦭ꦳ꦴꦫꦠꦩꦺꦲꦶ ꦱꦷꦭꦴꦢꦶꦒꦸꦟꦺꦲꦶ ꦱꦩꦤ꧀ꦤꦴꦒꦠꦠ꧀ꦠꦴ, ꦱꦢꦺꦮꦏꦺꦤ ꦭꦺꦴꦏꦺꦤ ꦮꦶꦱꦺꦱꦠꦺꦴ ꦩꦲꦤꦷꦪꦠꦴꦪ ꦕ ‘‘ꦩꦲꦴ’’ꦠꦶ ꦮꦸꦕ꧀ꦕꦠꦶ, ꦪꦴ ꦠꦱ꧀ꦱ ꦩꦲꦴꦱꦩꦟꦺꦴꦠꦶ ꦱꦩꦚ꧀ꦚꦴ ꦗꦴꦠꦴ. ꦤꦶꦱ꧀ꦱꦏ꧀ꦏꦮꦕꦤꦚ꧀ꦕꦺꦠꦁ ‘‘ꦩꦲꦠꦺꦴ ꦣꦩ꧀ꦩꦁ ꦱꦸꦠ꧀ꦮꦴꦤꦴ’’ꦠꦶ. ꦩꦲꦴꦫꦱꦤ꧀ꦠꦶ ꦮꦶꦩꦸꦠ꧀ꦠꦶꦫꦱꦱ꧀ꦱ ꦢꦴꦪꦏꦠ꧀ꦠꦴ ꦈꦭ꦳ꦴꦫꦫꦱꦁ. ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦮꦫꦺꦤ ꦢꦺꦱꦶꦠꦤ꧀ꦠꦶ ꦱꦧ꧀ꦧꦁ ꦗꦴꦤꦴꦠꦷꦠꦶ ꦱꦧ꧀ꦧꦚ꧀ꦚꦹ, ꦠꦱ꧀ꦱ ꦨꦴꦮꦺꦴ ꦱꦧ꧀ꦧꦚ꧀ꦚꦸꦠꦴ. ꦚꦴꦟꦩꦺꦮ ꦮꦫꦁ, ꦚꦴꦟꦺꦱꦸ ꦮꦴ ꦮꦫꦤ꧀ꦠꦶ ꦚꦴꦟꦮꦫꦁ, ꦱꦧ꧀ꦧꦚ꧀ꦚꦸꦠꦴ ꦚꦴꦟꦮꦫꦁ ꦌꦠꦱ꧀ꦱꦴꦠꦶ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦮꦫꦺꦴ, ꦨꦒꦮꦴ. ꦠꦺꦤ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦱꦔ꧀ꦑꦴꦠꦄꦒ꧀ꦒꦚꦴꦟꦺꦤ ꦮꦴ ꦏꦫꦟꦨꦹꦠꦺꦤ ꦢꦺꦱꦶꦠꦁ ꦏꦡꦶꦠꦁ ꦣꦩ꧀ꦩꦁ ꦱꦸꦠ꧀ꦮꦴꦤꦴꦠꦶ ꦪꦺꦴꦗꦤꦴ. ꦪꦁ ꦥꦤꦺꦠ꧀ꦡ ꦮꦠ꧀ꦠꦧ꧀ꦧꦁ, ꦠꦁ ꦥꦫꦩꦠ꧀ꦡꦢꦷꦥꦤꦶꦪꦁ ꦆꦠꦶꦮꦸꦠ꧀ꦠꦏꦮꦟ꧀ꦟꦤꦴꦪꦁ ꦮꦸꦠ꧀ꦠꦤꦪꦺꦤ ꦮꦺꦢꦶꦠꦧ꧀ꦧꦁ. ꦩꦒ꧀ꦒꦤ꧀ꦠꦶ ꦄꦛ꧀ꦜꦔ꧀ꦒꦶꦏꦁ ꦄꦫꦶꦪꦩꦒ꧀ꦒꦁ. ꦥꦥꦗ꧀ꦗꦶꦤ꧀ꦠꦶ ꦥꦛꦶꦥꦗ꧀ꦗꦶꦁ. ꦄꦩꦠꦱ꧀ꦱ ꦥꦠ꧀ꦠꦶꦪꦴꦠꦶ ꦤꦶꦧ꧀ꦧꦴꦤꦱ꧀ꦱ ꦄꦣꦶꦒꦩꦴꦪ ꦈꦥꦴꦪꦨꦹꦠꦁ ꦥꦛꦶꦥꦗ꧀ꦗꦶꦤ꧀ꦠꦶ ꦪꦺꦴꦗꦤꦴ. ꦱꦺꦴꦠꦶ ꦱꦺꦴ ꦨꦒꦮꦴ. ꦪꦺꦴꦒꦏ꧀ꦑꦺꦩꦱ꧀ꦱ ꦥꦡꦱ꧀ꦱ ꦏꦺꦴꦮꦶꦢꦺꦴꦠꦶ ꦕꦠꦹꦲꦶ ꦪꦺꦴꦒꦺꦲꦶ ꦄꦤꦸꦥꦢ꧀ꦢꦸꦠꦱ꧀ꦱ ꦤꦶꦧ꧀ꦧꦴꦤꦱ꧀ꦱ ꦪꦺꦴ ꦥꦡꦺꦴ, ꦠꦱ꧀ꦱ ꦏꦺꦴꦮꦶꦢꦺꦴ ꦠꦠ꧀ꦡ ꦱꦸꦏꦸꦱꦭꦺꦴ. ꦄꦪꦚ꧀ꦲꦺꦠ꧀ꦡ ꦄꦠ꧀ꦡꦺꦴ – ꦨꦒꦮꦠꦺꦴ ꦕꦠꦸꦱꦕ꧀ꦕꦢꦺꦱꦤꦁ ꦱꦸꦠ꧀ꦮꦴ ꦄꦩꦠꦴꦣꦶꦒꦩꦹꦥꦴꦪꦩꦒ꧀ꦒꦁ ꦄꦲꦁ ꦥꦛꦶꦥꦗ꧀ꦗꦶꦁ ꦥꦛꦶꦥꦗ꧀ꦗꦤꦩꦒ꧀ꦒꦁ ꦩꦪꦴ ꦏꦠꦁ, ꦱꦺꦴ ꦌꦮ ꦥꦤ ꦨꦒꦮꦴ ꦱꦧ꧀ꦧꦡꦴ ꦪꦺꦴꦒꦏ꧀ꦑꦺꦩꦱ꧀ꦱ ꦥꦡꦱ꧀ꦱ ꦏꦺꦴꦮꦶꦢꦺꦴ, ꦥꦫꦱꦤ꧀ꦠꦴꦤꦺ ꦮꦴ ꦥꦫꦩꦤꦺꦱꦸ ꦏꦸꦱꦭꦺꦴ, ꦪꦱ꧀ꦱ ꦱꦁꦮꦶꦣꦴꦤꦩꦴꦒꦩ꧀ꦩ ꦄꦲꦩ꧀ꦥꦶ ꦩꦒ꧀ꦒꦁ ꦥꦛꦶꦥꦗ꧀ꦗꦶꦤ꧀ꦠꦶ. ꦄꦪꦩꦺꦮ ꦕ ꦡꦺꦫꦱ꧀ꦱ ꦄꦚ꧀ꦚꦴꦧ꧀ꦪꦴꦏꦫꦟꦒꦴꦡꦴ ꦄꦲꦺꦴꦱꦷꦠꦶ.

ꦖꦤ꧀ꦤꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.