꧓. ꦥꦏ꧀ꦑꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ

ꦕꦸꦠꦴ ꦥꦠꦤ꧀ꦠꦷꦠꦶ ꦄꦴꦪꦱ꧀ꦩꦠꦺꦴ ꦥꦏ꧀ꦑꦠ꧀ꦡꦺꦫꦱ꧀ꦱ ꦒꦴꦡꦴ. ꦏꦴ ꦈꦥ꧀ꦥꦠ꧀ꦠꦶ? ꦱꦺꦴꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦥꦸꦚ꧀ꦚꦴꦤꦶ ꦏꦫꦺꦴꦤ꧀ꦠꦺꦴ ꦆꦠꦺꦴ ꦌꦏꦤꦮꦸꦠꦺ ꦏꦥ꧀ꦥꦺ ꦪꦏ꧀ꦑꦱꦺꦤꦴꦥꦠꦶ ꦲꦸꦠ꧀ꦮꦴ ꦮꦶꦥꦱ꧀ꦱꦶꦁ ꦨꦒꦮꦤ꧀ꦠꦁ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ꦢꦶꦧ꧀ꦧꦮꦠ꧀ꦡꦺꦤ ꦥꦹꦗꦁ ꦄꦏꦴꦱꦶ. ꦱꦺꦴ ꦠꦺꦤ ꦥꦸꦚ꧀ꦚꦏꦩ꧀ꦩꦺꦤ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦱꦏ꧀ꦏꦺꦱꦸ ꦢꦺꦮꦢꦲꦤꦶꦒꦩꦺ ꦱꦴꦏꦶꦪꦫꦴꦗꦏꦸꦭꦺ ꦤꦶꦧ꧀ꦧꦠ꧀ꦠꦶ, ‘‘ꦱꦩ꧀ꦩꦺꦴꦢꦏꦸꦩꦴꦫꦺꦴ’’ꦠꦶꦱ꧀ꦱ ꦤꦴꦩꦁ ꦄꦲꦺꦴꦱꦶ. ꦄꦡꦱ꧀ꦱ ꦢꦲꦫꦏꦴꦭꦺ ꦮꦴꦠꦫꦺꦴꦒꦺꦤ ꦥꦴꦢꦴ ꦤ ꦮꦲꦶꦁꦱꦸ. ꦱꦺꦴ ꦏꦠꦶꦥꦪꦁ ꦏꦴꦭꦁ ꦥꦷꦜꦱꦥ꧀ꦥꦷ ꦮꦶꦪ ꦮꦶꦕꦫꦶ. ꦠꦺꦤꦱ꧀ꦱ ꦥꦏ꧀ꦑꦺꦴꦠꦶ ꦱꦩꦚ꧀ꦚꦴ ꦗꦴꦠꦴ. ꦥꦕ꧀ꦖꦴ ꦄꦫꦺꦴꦒꦏꦴꦭꦺꦥꦶ ꦠꦡꦺꦮ ꦤꦁ ꦱꦚ꧀ꦗꦴꦤꦤ꧀ꦠꦶ, ꦱꦺꦴ ꦨꦒꦮꦠꦺꦴ ꦚꦴꦠꦶꦱꦩꦴꦒꦩꦺ ꦥꦴꦛꦶꦲꦴꦫꦶꦪꦁ ꦢꦶꦱ꧀ꦮꦴ ꦥꦛꦶꦭꦢ꧀ꦣꦱꦢ꧀ꦣꦺꦴ ꦥꦧ꧀ꦧꦗꦶꦠ꧀ꦮꦴ ꦏꦠꦥꦸꦧ꧀ꦧꦏꦶꦕ꧀ꦕꦺꦴ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦄꦫꦚ꧀ꦚꦺ ꦮꦶꦲꦫꦠꦶ. ꦄꦡꦺꦏꦢꦶꦮꦱꦁ ꦒꦴꦩꦁ ꦥꦶꦟ꧀ꦝꦴꦪ ꦥꦮꦶꦱꦶꦠꦸꦁ ꦒꦕ꧀ꦖꦤ꧀ꦠꦺꦴ ꦄꦤ꧀ꦠꦫꦴꦩꦒ꧀ꦒꦺ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦤꦶꦱꦷꦢꦶ. ꦠꦱ꧀ꦩꦶꦚ꧀ꦕ ꦱꦩꦪꦺ ꦄꦚ꧀ꦚꦠꦫꦺꦴ ꦏꦸꦭꦭꦺꦴ ꦩꦁꦱꦥꦺꦱꦶꦁ ꦄꦴꦢꦴꦪ ꦄꦴꦏꦴꦱꦺꦤ ꦒꦕ꧀ꦖꦠꦶ, ꦠꦁ ꦧꦲꦹ ꦏꦸꦭꦭꦴ ꦄꦤꦸꦥꦠꦶꦠ꧀ꦮꦴ ꦥꦴꦠꦺꦱꦸꦁ. ꦥꦴꦠꦶꦠꦁ ꦩꦁꦱꦥꦺꦱꦶꦁ ꦌꦏꦺꦴ ꦏꦸꦭꦭꦺꦴ ꦄꦒ꧀ꦒꦲꦺꦱꦶ. ꦠꦁ ꦄꦚ꧀ꦚꦺꦴ ꦄꦕ꧀ꦖꦶꦤ꧀ꦢꦶꦠ꧀ꦮꦴ ꦒꦟ꧀ꦲꦶ, ꦠꦁ ꦢꦶꦱ꧀ꦮꦴ ꦡꦺꦫꦺꦴ ‘‘ꦪꦡꦴꦪꦁ ꦩꦁꦱꦥꦺꦱꦶ, ꦌꦮꦁ ꦏꦴꦩꦴ ꦤꦴꦩ ꦧꦲꦸꦱꦴꦣꦴꦫꦟꦴ ꦧꦲꦸꦢꦸꦏ꧀ꦑꦴ ꦧꦲꦸꦥꦴꦪꦴꦱꦴ’’ꦠꦶ – ꦏꦴꦩꦺꦱꦸ ꦄꦴꦢꦷꦤꦮꦁ ꦤꦺꦏ꧀ꦑꦩ꧀ꦩꦺ ꦕ ꦄꦴꦤꦶꦱꦁꦱꦁ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ ꦮꦶꦥꦱ꧀ꦱꦤꦁ ꦥꦛ꧀ꦜꦥꦺꦠ꧀ꦮꦴ ‘‘ꦄꦤꦶꦕ꧀ꦕ’’ꦤ꧀ꦠꦶꦄꦴꦢꦶꦤꦴ ꦩꦤꦱꦶꦏꦫꦺꦴꦤ꧀ꦠꦺꦴ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦏꦠꦨꦠ꧀ꦠꦏꦶꦕ꧀ꦕꦺꦴ ꦢꦶꦮꦴꦛ꧀ꦜꦴꦤꦺ ꦤꦶꦱꦷꦢꦶꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦺꦤ ꦮꦸꦠ꧀ꦠꦁ ꦄꦥꦢꦴꦤꦺ (ꦄꦥ. ꦡꦺꦫ ꧑.꧑꧒.꧑-꧑꧐) –

‘‘ꦮꦶꦥꦱ꧀ꦱꦷ ꦤꦴꦩ ꦨꦒꦮꦴ, ꦭꦺꦴꦏꦗꦺꦛ꧀ꦜꦺꦴ ꦤꦫꦴꦱꦨꦺꦴ;

ꦄꦛ꧀ꦜꦱꦛ꧀ꦜꦶꦱꦲꦱ꧀ꦱꦺꦲꦶ, ꦥꦴꦮꦶꦱꦶ ꦧꦤ꧀ꦣꦸꦩꦁ ꦠꦢꦴ.

‘‘ꦤꦒꦫꦴ ꦄꦨꦶꦤꦶꦏ꧀ꦑꦩ꧀ꦩ, ꦄꦒꦩꦁ ꦢꦷꦥꦕꦺꦠꦶꦪꦁ;

ꦄꦢ꧀ꦢꦱꦁ ꦮꦶꦫꦗꦁ ꦧꦸꦢ꧀ꦣꦁ, ꦄꦴꦲꦸꦠꦷꦤꦁ ꦥꦛꦶꦒ꧀ꦒꦲꦁ.

‘‘ꦕꦸꦭ꧀ꦭꦴꦱꦷꦠꦶꦱꦲꦱ꧀ꦱꦴꦤꦶ, ꦪꦏ꧀ꦑꦴ ꦩꦪ꧀ꦲꦁ ꦈꦥꦤ꧀ꦠꦶꦏꦺ;

ꦈꦥꦛ꧀ꦜꦲꦤ꧀ꦠꦶ ꦱꦏ꧀ꦏꦕ꧀ꦕꦁ, ꦆꦤ꧀ꦢꦁꦮ ꦠꦶꦢꦱꦴ ꦒꦟꦴ.

‘‘ꦨꦮꦤꦴ ꦄꦨꦶꦤꦶꦏ꧀ꦑꦩ꧀ꦩ, ꦢꦸꦱ꧀ꦱꦁ ꦥꦒ꧀ꦒꦪ꧀ꦲꦲꦁ ꦠꦢꦴ;

ꦱꦶꦫꦱꦴ ꦄꦨꦶꦮꦴꦢꦺꦱꦶꦁ, ꦠꦚ꧀ꦕꦴꦢꦴꦱꦶꦁ ꦩꦲꦺꦱꦶꦤꦺꦴ.

‘‘ꦄꦲꦺꦴ ꦧꦸꦢ꧀ꦣꦺꦴ ꦄꦲꦺꦴ ꦣꦩ꧀ꦩꦺꦴ, ꦄꦲꦺꦴ ꦤꦺꦴ ꦱꦠ꧀ꦡꦸ ꦱꦩ꧀ꦥꦢꦴ;

ꦧꦸꦢ꧀ꦣꦱ꧀ꦱ ꦄꦴꦤꦸꦨꦴꦮꦺꦤ, ꦮꦱꦸꦣꦴꦪꦁ ꦥꦏꦩ꧀ꦥꦡ.

‘‘ꦠꦚ꧀ꦕ ꦄꦕ꧀ꦖꦫꦶꦪꦁ ꦢꦶꦱ꧀ꦮꦴ, ꦄꦧ꧀ꦨꦸꦠꦁ ꦭꦺꦴꦩꦲꦁꦱꦤꦁ;

ꦧꦸꦢ꧀ꦣꦺ ꦕꦶꦠ꧀ꦠꦁ ꦥꦱꦴꦢꦺꦩꦶ, ꦢ꧀ꦮꦶꦥꦢꦶꦤ꧀ꦢꦩ꧀ꦲꦶ ꦠꦴꦢꦶꦤꦺ.

‘‘ꦱꦺꦴꦲꦁ ꦕꦶꦠ꧀ꦠꦁ ꦥꦱꦴꦢꦺꦠ꧀ꦮꦴ, ꦢꦸꦱ꧀ꦱꦁ ꦢꦠ꧀ꦮꦴꦤ ꦱꦠ꧀ꦡꦸꦤꦺꦴ;

ꦱꦫꦟꦚ꧀ꦕ ꦈꦥꦴꦒꦕ꧀ꦖꦶꦁ, ꦱꦴꦩꦕ꧀ꦕꦺꦴ ꦱꦥꦫꦶꦗ꧀ꦗꦤꦺꦴ.

‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

‘‘ꦆꦠꦺꦴ ꦥꦤ꧀ꦤꦫꦱꦺ ꦏꦥ꧀ꦥꦺ, ꦱꦺꦴꦭ꦳ꦱꦴꦱꦸꦁ ꦱꦸꦮꦴꦲꦤꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦴ.

‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ.

ꦄꦫꦲꦠ꧀ꦠꦁ ꦥꦤ ꦥꦠ꧀ꦮꦴ ꦪꦢꦺꦮ ꦱꦁꦮꦺꦒꦮꦠ꧀ꦡꦸꦁ ꦄꦔ꧀ꦏꦸꦱꦁ ꦏꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦚ꧀ꦚꦴ ꦄꦣꦶꦒꦠꦴ, ꦠꦱ꧀ꦱ ꦱꦁꦏꦶꦠ꧀ꦠꦤꦩꦸꦑꦺꦤ ꦄꦚ꧀ꦚꦁ ꦧ꧀ꦪꦴꦏꦫꦺꦴꦤ꧀ꦠꦺꦴ ‘‘ꦕꦸꦠꦴ ꦥꦠꦤ꧀ꦠꦷ’’ꦠꦶ ꦒꦴꦡꦁ ꦄꦨꦴꦱꦶ.

꧖꧓. ꦠꦠ꧀ꦡ ꦕꦸꦠꦴꦠꦶ ꦨꦛ꧀ꦜꦴ. ꦥꦠꦤ꧀ꦠꦷꦠꦶ ꦄꦤꦸꦥꦠꦤ꧀ꦠꦶ. ꦥꦠꦶꦠꦴꦠꦶ ꦕꦮꦤꦮꦱꦺꦤ ꦨꦹꦩꦶꦪꦁ ꦥꦠꦶꦠꦴ, ꦄꦴꦏꦴꦱꦺ ꦮꦴ ꦱꦩ꧀ꦥꦠꦤꦮꦱꦺꦤ ꦥꦠꦶꦠꦴ. ꦒꦶꦢ꧀ꦣꦴꦠꦶ ꦒꦺꦣꦁ ꦄꦴꦥꦤ꧀ꦤꦴ. ꦥꦸꦤꦫꦴꦒꦠꦴꦠꦶ ꦥꦸꦤꦢꦺꦮ ꦈꦥꦒꦠꦴ. ꦕ-ꦱꦢ꧀ꦢꦺꦴ ꦱꦧ꧀ꦧꦠ꧀ꦡ ꦪꦺꦴꦗꦺꦠꦧ꧀ꦧꦺꦴ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦥꦠꦤ꧀ꦠꦶ ꦄꦤꦸꦥꦠꦤ꧀ꦠꦶ ꦕ ꦆꦣ ꦏꦸꦭꦭꦴ, ꦆꦠꦫꦱ꧀ꦱ ꦩꦸꦑꦠꦺꦴ ꦕꦸꦠꦴ ꦕ ꦩꦁꦱꦥꦺꦱꦶ, ꦕꦸꦠꦴ ꦥꦤ ꦱꦴ ꦨꦹꦩꦶꦪꦁ ꦥꦠꦶꦠꦴ ꦕ, ꦒꦶꦢ꧀ꦣꦴ ꦒꦺꦣꦁ ꦄꦴꦥꦤ꧀ꦤꦴ ꦱꦧ꧀ꦧꦺꦮ ꦏꦸꦭꦭꦴ ꦥꦸꦤꦫꦴꦒꦠꦴ. ꦪꦡꦴ ꦕꦶꦩꦺ ꦏꦸꦭꦭꦴ, ꦌꦮꦁ ꦱꦁꦱꦴꦫꦺ ꦥꦫꦶꦧ꧀ꦨꦩꦤ꧀ꦠꦴ ꦱꦠ꧀ꦠꦴ ꦪꦺ ꦏꦸꦱꦭꦣꦩ꧀ꦩꦠꦺꦴ ꦕꦸꦠꦴ, ꦠꦺ ꦥꦠꦤ꧀ꦠꦶ ꦤꦶꦫꦪꦴꦢꦷꦱꦸ, ꦌꦮꦁ ꦥꦠꦶꦠꦴ ꦕ, ꦱꦩ꧀ꦥꦠ꧀ꦠꦶꦨꦮꦺ ꦜꦶꦠꦴ ꦠꦠ꧀ꦡ ꦏꦴꦩꦱꦸꦑꦴꦤꦸꦪꦺꦴꦒꦮꦱꦺꦤ ꦏꦴꦩꦨꦮꦺ ꦫꦹꦥꦴꦫꦹꦥꦨꦮꦺꦱꦸ ꦕ ꦨꦮꦤꦶꦏꦤ꧀ꦠꦶꦮꦱꦺꦤ ꦒꦶꦢ꧀ꦣꦴ ꦕ ꦥꦸꦤꦫꦴꦒꦠꦴ ꦨꦮꦠꦺꦴ ꦄꦥꦫꦶꦩꦸꦠ꧀ꦠꦠ꧀ꦠꦴ ꦠꦺꦤ ꦠꦺꦤ ꦨꦮꦒꦴꦩꦶꦤꦴ ꦏꦩ꧀ꦩꦺꦤ ꦠꦁ ꦠꦁ ꦨꦮꦱꦚ꧀ꦚꦶꦠꦁ ꦢꦸꦏ꧀ꦑꦁ ꦄꦴꦒꦠꦴ ꦌꦮ, ꦌꦮꦁꦨꦹꦠꦴ ꦆꦩꦺ ꦱꦠ꧀ꦠꦴ. ꦩꦪꦴ ꦥꦤ ꦏꦠꦁ ꦏꦶꦕ꧀ꦕꦁ ꦥꦫꦶꦚ꧀ꦚꦴꦢꦶꦨꦺꦢꦁ ꦱꦺꦴꦭ꦳ꦱꦮꦶꦣꦩ꧀ꦥꦶ ꦏꦶꦕ꧀ꦕꦁ ꦏꦠꦁ, ꦤ ꦢꦴꦤꦶ ꦠꦁ ꦏꦴꦠꦧ꧀ꦧꦁ ꦄꦠ꧀ꦡꦶ. ꦫꦠꦁ ꦫꦩ꧀ꦩꦁ ꦫꦩꦶꦠꦧ꧀ꦧꦁ ꦄꦫꦶꦪꦺꦲꦶ ꦱꦧ꧀ꦧꦱꦔ꧀ꦑꦠꦮꦶꦤꦶꦱ꧀ꦱꦛꦁ ꦤꦶꦧ꧀ꦧꦴꦤꦁ ꦫꦠꦁ ꦄꦨꦶꦫꦠꦁ ꦫꦩ꧀ꦩꦁ. ꦠꦺꦤ ꦕ ꦱꦸꦑꦺꦤꦤ꧀ꦮꦴꦒꦠꦁ ꦱꦸꦑꦁ ꦦꦭꦱꦩꦴꦥꦠ꧀ꦠꦶꦱꦸꦑꦺꦤ ꦄꦤꦸꦄꦴꦒꦠꦁ ꦈꦥꦒꦠꦁ ꦄꦕ꧀ꦕꦤ꧀ꦠꦱꦸꦑꦁ ꦤꦶꦧ꧀ꦧꦴꦤꦁ, ꦱꦸꦑꦺꦤ ꦮꦴ ꦱꦸꦑꦴꦥꦛꦶꦥꦢꦴꦨꦹꦠꦺꦤ ꦮꦶꦥꦱ꧀ꦱꦤꦴꦱꦸꦑꦺꦤ ꦩꦒ꧀ꦒꦱꦸꦑꦺꦤ ꦕ ꦄꦤ꧀ꦮꦴꦒꦠꦁ ꦦꦭꦱꦸꦑꦁ ꦤꦶꦧ꧀ꦧꦴꦤꦱꦸꦑꦚ꧀ꦕꦴꦠꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦥꦏ꧀ꦑꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.