꧒. ꦱꦸꦥ꧀ꦥꦶꦪꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ

ꦄꦗꦫꦁ ꦗꦷꦫꦩꦴꦤꦺꦤꦴꦠꦶ ꦄꦴꦪꦱ꧀ꦩꦠꦺꦴ ꦱꦸꦥ꧀ꦥꦶꦪꦠ꧀ꦡꦺꦫꦱ꧀ꦱ ꦒꦴꦡꦴ. ꦏꦴ ꦈꦥ꧀ꦥꦠ꧀ꦠꦶ? ꦱꦺꦴ ꦏꦶꦫ ꦥꦢꦸꦩꦸꦠ꧀ꦠꦫꦱ꧀ꦱ ꦨꦒꦮꦠꦺꦴ ꦏꦴꦭꦺ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦠꦴꦥꦱꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦄꦫꦚ꧀ꦚꦴꦪꦠꦤꦺ ꦮꦱꦤ꧀ꦠꦺꦴ ꦠꦠ꧀ꦡ ꦨꦒꦮꦤ꧀ꦠꦁ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ꦦꦭꦴꦦꦭꦁ ꦄꦢꦴꦱꦶ, ꦠꦡꦴ ꦨꦶꦏ꧀ꦑꦸꦱꦔ꧀ꦓꦱ꧀ꦱ. ꦱꦺꦴ ꦠꦺꦤ ꦥꦸꦚ꧀ꦚꦏꦩ꧀ꦩꦺꦤ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦏꦱ꧀ꦱꦥꦱ꧀ꦱ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦏꦴꦭꦺ ꦑꦠ꧀ꦠꦶꦪꦏꦸꦭꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦄꦤꦸꦏ꧀ꦏꦩꦺꦤ ꦮꦶꦚ꧀ꦚꦸꦠꦁ ꦥꦠ꧀ꦠꦺꦴ ꦏꦭ꧀ꦪꦴꦟꦩꦶꦠ꧀ꦠꦱꦤ꧀ꦤꦶꦱ꧀ꦱꦪꦺꦤ ꦭꦢ꧀ꦣꦱꦁꦮꦺꦒꦺꦴ ꦱꦴꦱꦤꦺ ꦥꦧ꧀ꦧꦗꦶꦠ꧀ꦮꦴ ꦧꦲꦸꦱ꧀ꦱꦸꦠꦺꦴ ꦄꦲꦺꦴꦱꦶ. ꦗꦴꦠꦶꦩꦢꦺꦤ ꦱꦸꦠꦩꦢꦺꦤ ꦕ ꦄꦠ꧀ꦠꦴꦤꦁ ꦈꦏ꧀ꦏꦁꦱꦺꦤ꧀ꦠꦺꦴ ꦥꦫꦺ ꦕ ꦮꦩ꧀ꦨꦺꦤ꧀ꦠꦺꦴ ꦮꦶꦲꦴꦱꦶ. ꦱꦺꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦠꦱ꧀ꦱ ꦏꦩ꧀ꦩꦱ꧀ꦱ ꦤꦶꦱ꧀ꦱꦤ꧀ꦢꦺꦤ ꦱꦴꦮꦠ꧀ꦡꦶꦪꦁ ꦥꦫꦶꦨꦹꦠꦫꦹꦥꦺ ꦱꦸꦱꦴꦤꦒꦺꦴꦥꦏꦏꦸꦭꦺ ꦤꦶꦧ꧀ꦧꦠ꧀ꦠꦶ. ꦱꦸꦥ꧀ꦥꦶꦪꦺꦴꦠꦶꦱ꧀ꦱ ꦤꦴꦩꦁ ꦄꦲꦺꦴꦱꦶ. ꦄꦡ ꦮꦶꦚ꧀ꦚꦸꦠꦁ ꦥꦠ꧀ꦠꦺꦴ ꦄꦠ꧀ꦠꦤꦺꦴ ꦱꦲꦴꦪꦨꦹꦠꦁ ꦱꦺꦴꦥꦴꦏꦠ꧀ꦡꦺꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ꦠꦱ꧀ꦱ ꦱꦤ꧀ꦠꦶꦏꦺ ꦣꦩ꧀ꦩꦁ ꦱꦸꦠ꧀ꦮꦴ ꦥꦛꦶꦭꦢ꧀ꦣꦱꦁꦮꦺꦒꦺꦴ ꦥꦧ꧀ꦧꦗꦶꦠ꧀ꦮꦴ ꦱꦩ꧀ꦩꦴꦥꦛꦶꦥꦠ꧀ꦠꦶꦁ ꦥꦹꦫꦺꦠ꧀ꦮꦴ ‘‘ꦄꦗꦫꦁ ꦗꦷꦫꦩꦴꦤꦺꦤꦴ’’ꦠꦶ ꦒꦴꦡꦁ ꦄꦨꦴꦱꦶ.

꧓꧒. ꦠꦠ꧀ꦡ ꦄꦗꦫꦤ꧀ꦠꦶ ꦗꦫꦴꦫꦲꦶꦠꦁ, ꦤꦶꦧ꧀ꦧꦴꦤꦁ ꦱꦤ꧀ꦣꦴꦪꦴꦲ. ꦠꦚ꧀ꦲꦶ ꦄꦗꦴꦠꦠ꧀ꦠꦴ ꦤꦠ꧀ꦡꦶ ꦌꦠ꧀ꦡ ꦗꦫꦴ, ꦌꦠꦱ꧀ꦩꦶꦁ ꦮꦴ ꦄꦣꦶꦒꦠꦺ ꦥꦸꦒ꧀ꦒꦭꦱ꧀ꦱ ꦱꦴ ꦤꦠ꧀ꦡꦷꦠꦶ ꦗꦫꦴꦨꦴꦮꦲꦺꦠꦸꦠꦺꦴꦥꦶ ꦄꦗꦫꦁ ꦤꦴꦩ. ꦗꦷꦫꦩꦴꦤꦺꦤꦴꦠꦶ ꦗꦷꦫꦤ꧀ꦠꦺꦤ, ꦑꦟꦺ ꦑꦟꦺ ꦗꦫꦁ ꦥꦴꦥꦸꦟꦤ꧀ꦠꦺꦤ. ꦠꦥ꧀ꦥꦩꦴꦤꦺꦤꦴꦠꦶ ꦱꦤ꧀ꦠꦥ꧀ꦥꦩꦴꦤꦺꦤ, ꦫꦴꦒꦴꦢꦷꦲꦶ ꦌꦏꦴꦢꦱꦲꦶ ꦄꦒ꧀ꦒꦷꦲꦶ ꦢꦪ꧀ꦲꦩꦴꦤꦺꦤ. ꦤꦶꦧ꧀ꦧꦸꦠꦶꦤ꧀ꦠꦶ ꦪꦡꦴꦮꦸꦠ꧀ꦠꦱꦤ꧀ꦠꦴꦥꦴꦨꦴꦮꦠꦺꦴ ꦤꦶꦧ꧀ꦧꦸꦠꦱꦨꦴꦮꦁ ꦤꦶꦧ꧀ꦧꦴꦤꦁ. ꦤꦶꦩꦶꦪꦤ꧀ꦠꦶ ꦥꦫꦶꦮꦠ꧀ꦠꦺꦪ꧀ꦪꦁ ꦕꦺꦠꦴꦥꦺꦪ꧀ꦪꦁ. ꦥꦫꦩꦁ ꦱꦤ꧀ꦠꦶꦤ꧀ꦠꦶ ꦄꦤꦮꦱꦺꦱꦏꦶꦭꦺꦱꦴꦨꦶꦱꦔ꧀ꦑꦴꦫꦥꦫꦶꦭ꦳ꦴꦲꦮꦹꦥꦱꦩꦣꦩ꧀ꦩꦠꦴꦪ ꦈꦠ꧀ꦠꦩꦁ ꦱꦤ꧀ꦠꦶꦁ. ꦕꦠꦹꦲꦶ ꦪꦺꦴꦒꦺꦲꦶ ꦄꦤꦤꦸꦧꦤ꧀ꦣꦠ꧀ꦠꦴ ꦪꦺꦴꦒꦏ꧀ꦑꦺꦩꦁ. ꦄꦠ꧀ꦠꦤꦺꦴ ꦈꦠ꧀ꦠꦫꦶꦠꦫꦱ꧀ꦱ ꦏꦱ꧀ꦱꦕꦶ ꦄꦨꦴꦮꦠꦺꦴ ꦄꦤꦸꦠ꧀ꦠꦫꦁ. ꦄꦪꦚ꧀ꦲꦺꦠ꧀ꦡ ꦱꦔ꧀ꦑꦺꦥꦠ꧀ꦡꦺꦴ – ꦑꦟꦺ ꦑꦟꦺ ꦗꦫꦴꦪ ꦄꦨꦶꦨꦸꦪ꧀ꦪꦩꦴꦤꦠ꧀ꦠꦴ ꦗꦷꦫꦩꦴꦤꦺꦤ, ꦠꦡꦴ ꦫꦴꦒꦒ꧀ꦒꦶꦄꦴꦢꦷꦲꦶ ꦱꦤ꧀ꦠꦥ꧀ꦥꦩꦴꦤꦺꦤ ꦒꦠꦺꦴ ꦌꦮꦁ ꦄꦤꦶꦕ꧀ꦕꦺꦤ ꦢꦸꦏ꧀ꦑꦺꦤ ꦄꦱꦴꦫꦺꦤ ꦱꦧ꧀ꦧꦡꦴꦥꦶ ꦄꦤꦸꦥꦱꦤ꧀ꦠꦱꦨꦴꦮꦺꦤ ꦱꦈꦥꦢ꧀ꦢꦮꦺꦤ, ꦠꦥ꧀ꦥꦛꦶꦥꦏ꧀ꦑꦨꦴꦮꦠꦺꦴ ꦄꦗꦫꦁ ꦥꦫꦩꦸꦥꦱꦩꦨꦹꦠꦁ ꦏꦺꦤꦕꦶ ꦄꦤꦸꦥꦢ꧀ꦢꦸꦠꦁ ꦄꦤꦸꦠ꧀ꦠꦫꦁ ꦤꦶꦧ꧀ꦧꦴꦤꦁ ꦤꦶꦩꦶꦪꦁ ꦥꦫꦶꦮꦠ꧀ꦠꦺꦪ꧀ꦪꦁ ‘‘ꦩꦲꦴ ꦮꦠ ꦩꦺ ꦭꦴꦨꦺꦴ ꦩꦲꦴ ꦈꦢꦪꦺꦴ ꦲꦠ꧀ꦡꦒꦠꦺꦴ’’ꦠꦶ. ꦪꦡꦴ ꦲꦶ ꦩꦤꦸꦱ꧀ꦱꦴ ꦪꦁ ꦏꦶꦚ꧀ꦕꦶ ꦨꦟ꧀ꦝꦁ ꦥꦫꦶꦮꦠ꧀ꦠꦺꦤ꧀ꦠꦴ ꦤꦶꦫꦥꦺꦏ꧀ꦑꦴ ꦒꦪ꧀ꦲꦩꦴꦤꦺꦤ ꦱꦩ꧀ꦧꦲꦸꦩꦴꦤꦴ ꦲꦺꦴꦤ꧀ꦠꦶ, ꦌꦮꦩꦪꦁ ꦡꦺꦫꦺꦴ ꦥꦲꦶꦠꦠ꧀ꦠꦺꦴ ꦮꦶꦲꦫꦤ꧀ꦠꦺꦴ ꦄꦠ꧀ꦠꦤꦺꦴ ꦏꦴꦪꦺ ꦕ ꦗꦷꦮꦶꦠꦺ ꦕ ꦤꦶꦫꦥꦺꦏ꧀ꦑꦠꦁ, ꦤꦶꦧ꧀ꦧꦴꦤꦁ ꦥꦛꦶꦥꦺꦱꦶꦠꦠ꧀ꦠꦚ꧀ꦕ ꦥꦏꦴꦱꦺꦤ꧀ꦠꦺꦴ ‘‘ꦤꦶꦩꦶꦪꦁ ꦥꦫꦩꦁ ꦱꦤ꧀ꦠꦶꦁ, ꦪꦺꦴꦒꦏ꧀ꦑꦺꦩꦁ ꦄꦤꦸꦠ꧀ꦠꦫ’’ꦤ꧀ꦠꦶ ꦮꦠ꧀ꦮꦴ ꦠꦩꦺꦮ ꦥꦛꦶꦥꦠ꧀ꦠꦶꦁ ꦥꦫꦶꦧ꧀ꦫꦹꦲꦪꦤ꧀ꦠꦺꦴ ꦮꦶꦥꦱ꧀ꦱꦤꦁ ꦈꦱ꧀ꦱꦸꦏ꧀ꦏꦴꦥꦺꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦺꦤ ꦮꦸꦠ꧀ꦠꦁ ꦄꦥꦢꦴꦤꦺ (ꦄꦥ. ꦡꦺꦫ ꧒.꧕꧒.꧕꧑-꧗꧗) –

‘‘ꦮꦫꦸꦟꦺꦴ ꦤꦴꦩ ꦤꦴꦩꦺꦤ, ꦧ꧀ꦫꦴꦲ꧀ꦩꦟꦺꦴ ꦩꦤ꧀ꦠꦥꦴꦫꦒꦹ;

ꦖꦝ꧀ꦝꦺꦠ꧀ꦮꦴ ꦢꦱ ꦥꦸꦠ꧀ꦠꦴꦤꦶ, ꦮꦤꦩꦗ꧀ꦙꦺꦴꦒꦲꦶꦁ ꦠꦢꦴ.

‘‘ꦄꦱ꧀ꦱꦩꦁ ꦱꦸꦏꦠꦁ ꦏꦠ꧀ꦮꦴ, ꦱꦸꦮꦶꦨꦠ꧀ꦠꦁ ꦩꦤꦺꦴꦫꦩꦁ;

ꦥꦟ꧀ꦟꦱꦴꦭꦁ ꦏꦫꦶꦠ꧀ꦮꦴꦤ, ꦮꦱꦴꦩꦶ ꦮꦶꦥꦶꦤꦺ ꦄꦲꦁ.

‘‘ꦥꦢꦸꦩꦸꦠ꧀ꦠꦫꦺꦴ ꦭꦺꦴꦏꦮꦶꦢꦹ, ꦄꦴꦲꦸꦠꦷꦤꦁ ꦥꦛꦶꦒ꧀ꦒꦲꦺꦴ;

ꦩꦩꦸꦢ꧀ꦣꦫꦶꦠꦸꦏꦴꦩꦺꦴ ꦱꦺꦴ, ꦄꦴꦒꦕ꧀ꦖꦶ ꦩꦩ ꦄꦱ꧀ꦱꦩꦁ.

‘‘ꦪꦴꦮꦠꦴ ꦮꦤꦱꦟ꧀ꦝꦩ꧀ꦲꦶ, ꦎꦨꦴꦱꦺꦴ ꦮꦶꦥꦸꦭꦺꦴ ꦄꦲꦸ;

ꦧꦸꦢ꧀ꦣꦱ꧀ꦱ ꦄꦴꦤꦸꦨꦴꦮꦺꦤ, ꦥꦗ꧀ꦗꦭꦷ ꦮꦶꦥꦶꦤꦁ ꦠꦢꦴ.

‘‘ꦢꦶꦱ꧀ꦮꦴꦤ ꦠꦁ ꦥꦴꦛꦶꦲꦷꦫꦁ, ꦧꦸꦢ꧀ꦣꦱꦺꦛ꧀ꦜꦱ꧀ꦱ ꦠꦴꦢꦶꦤꦺꦴ;

ꦥꦠ꧀ꦠꦥꦸꦛꦁ ꦒꦲꦺꦠ꧀ꦮꦴꦤ, ꦦꦭꦺꦤ ꦥꦹꦗꦪꦶꦁ ꦄꦲꦁ.

‘‘ꦈꦥꦒꦤ꧀ꦠ꧀ꦮꦴꦤ ꦱꦩ꧀ꦧꦸꦢ꧀ꦣꦁ, ꦱꦲꦑꦴꦫꦶꦩꦢꦴꦱꦲꦁ;

ꦄꦤꦸꦏꦩ꧀ꦥꦴꦪ ꦩꦺ ꦧꦸꦢ꧀ꦣꦺꦴ, ꦆꦢꦁ ꦮꦕꦤꦩꦧ꧀ꦫꦮꦶ.

‘‘ꦑꦴꦫꦶꦨꦴꦫꦁ ꦒꦲꦺꦠ꧀ꦮꦴꦤ, ꦥꦕ꧀ꦖꦠꦺꦴ ꦌꦲꦶ ꦩꦺ ꦠꦸꦮꦁ;

ꦥꦫꦶꦨꦸꦠ꧀ꦠꦺ ꦕ ꦱꦔ꧀ꦓꦩ꧀ꦲꦶ, ꦥꦸꦚ꧀ꦚꦁ ꦠꦮ ꦨꦮꦶꦱ꧀ꦱꦠꦶ.

‘‘ꦥꦸꦛꦏꦁ ꦠꦁ ꦒꦲꦺꦠ꧀ꦮꦴꦤ, ꦨꦶꦏ꧀ꦑꦸꦱꦔ꧀ꦓꦱ꧀ꦱꦢꦴꦱꦲꦁ;

ꦠꦠ꧀ꦡ ꦕꦶꦠ꧀ꦠꦁ ꦥꦱꦴꦢꦺꦠ꧀ꦮꦴ, ꦠꦸꦱꦶꦠꦁ ꦈꦥꦥꦗ꧀ꦗꦲꦁ.

‘‘ꦠꦠ꧀ꦡ ꦢꦶꦧ꧀ꦧꦺꦲꦶ ꦤꦕ꧀ꦕꦺꦲꦶ, ꦒꦷꦠꦺꦲꦶ ꦮꦴꦢꦶꦠꦺꦲꦶ ꦕ;

ꦥꦸꦚ꧀ꦚꦏꦩ꧀ꦩꦺꦤ ꦱꦁꦪꦸꦠ꧀ꦠꦁ, ꦄꦤꦸꦨꦺꦴꦩꦶ ꦱꦢꦴ ꦱꦸꦑꦁ.

‘‘ꦪꦁ ꦪꦁ ꦪꦺꦴꦤꦸꦥꦥꦗ꧀ꦗꦴꦩꦶ, ꦢꦺꦮꦠ꧀ꦠꦁ ꦄꦡ ꦩꦴꦤꦸꦱꦁ;

ꦨꦺꦴꦒꦺ ꦩꦺ ꦈꦴꦤꦠꦴ ꦤꦠ꧀ꦡꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦪꦴꦮꦠꦴ ꦕꦠꦸꦫꦺꦴ ꦢꦷꦥꦴ, ꦱꦱꦩꦸꦢ꧀ꦢꦴ ꦱꦥꦧ꧀ꦧꦠꦴ;

ꦦꦭꦁ ꦧꦸꦢ꧀ꦣꦱ꧀ꦱ ꦢꦠ꧀ꦮꦴꦤ, ꦆꦱ꧀ꦱꦫꦁ ꦏꦴꦫꦪꦴꦩꦲꦁ.

‘‘ꦪꦴꦮꦠꦴ ꦪꦺ ꦥꦏ꧀ꦑꦶꦒꦟꦴ, ꦄꦴꦏꦴꦱꦺ ꦈꦥ꧀ꦥꦠꦤ꧀ꦠꦶ ꦕꦺ;

ꦠꦺꦥꦶ ꦩꦺ ꦮꦱꦩꦤ꧀ꦮꦺꦤ꧀ꦠꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦪꦴꦮꦠꦴ ꦮꦤꦱꦟ꧀ꦝꦩ꧀ꦲꦶ, ꦪꦏ꧀ꦑꦴ ꦨꦹꦠꦴ ꦕ ꦫꦏ꧀ꦑꦱꦴ;

ꦏꦸꦩ꧀ꦨꦟ꧀ꦝꦴ ꦒꦫꦸꦭ꦳ꦴ ꦕꦴꦥꦶ, ꦥꦴꦫꦶꦕꦫꦶꦪꦁ ꦈꦥꦺꦤ꧀ꦠꦶ ꦩꦺ.

‘‘ꦏꦸꦩ꧀ꦩꦴ ꦱꦺꦴꦟꦴ ꦩꦣꦸꦏꦴꦫꦴ, ꦝꦁꦱꦴ ꦕ ꦩꦏꦱꦴ ꦈꦨꦺꦴ;

ꦠꦺꦥꦶ ꦩꦁ ꦮꦱꦩꦤ꧀ꦮꦺꦤ꧀ꦠꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦱꦸꦥꦟ꧀ꦟꦴ ꦤꦴꦩ ꦱꦏꦸꦟꦴ, ꦥꦏ꧀ꦑꦶꦗꦴꦠꦴ ꦩꦲꦧ꧀ꦧꦭꦴ;

ꦠꦺꦥꦶ ꦩꦁ ꦱꦫꦟꦁ ꦪꦤ꧀ꦠꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦪꦺꦥꦶ ꦢꦷꦓꦴꦪꦸꦏꦴ ꦤꦴꦒꦴ, ꦆꦢ꧀ꦣꦶꦩꦤ꧀ꦠꦺꦴ ꦩꦲꦴꦪꦱꦴ;

ꦠꦺꦥꦶ ꦩꦁ ꦮꦱꦩꦤ꧀ꦮꦺꦤ꧀ꦠꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦱꦷꦲꦴ ꦧ꧀ꦪꦒ꧀ꦓꦴ ꦕ ꦢꦷꦥꦷ ꦕ, ꦄꦕ꧀ꦖꦏꦺꦴꦏꦠꦫꦕ꧀ꦖꦏꦴ;

ꦠꦺꦥꦶ ꦩꦁ ꦮꦱꦩꦤ꧀ꦮꦺꦤ꧀ꦠꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦎꦱꦣꦷ ꦠꦶꦟꦮꦴꦱꦷ ꦕ, ꦪꦺ ꦕ ꦄꦴꦏꦴꦱꦮꦴꦱꦶꦤꦺꦴ;

ꦱꦧ꧀ꦧꦺ ꦩꦁ ꦱꦫꦟꦁ ꦪꦤ꧀ꦠꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦱꦸꦢꦸꦢ꧀ꦢꦱꦁ ꦱꦸꦤꦶꦥꦸꦟꦁ, ꦒꦩ꧀ꦨꦷꦫꦁ ꦱꦸꦥ꧀ꦥꦏꦴꦱꦶꦠꦁ;

ꦦꦱ꧀ꦱꦪꦶꦠ꧀ꦮꦴ ꦮꦶꦲꦫꦴꦩꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦮꦶꦩꦺꦴꦏ꧀ꦑꦺ ꦄꦛ꧀ꦜ ꦦꦸꦱꦶꦠ꧀ꦮꦴ, ꦮꦶꦲꦫꦴꦩꦶ ꦄꦤꦴꦱꦮꦺꦴ;

ꦄꦴꦠꦴꦥꦷ ꦤꦶꦥꦏꦺꦴ ꦕꦴꦲꦁ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦪꦺ ꦦꦭꦛ꧀ꦜꦴ ꦧꦸꦢ꧀ꦣꦥꦸꦠ꧀ꦠꦴ, ꦑꦷꦟꦢꦺꦴꦱꦴ ꦩꦲꦴꦪꦱꦴ;

ꦄꦲꦩꦚ꧀ꦚꦠꦫꦺꦴ ꦠꦺꦱꦁ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦄꦨꦶꦚ꧀ꦚꦴꦥꦴꦫꦩꦶꦁ ꦒꦤ꧀ꦠ꧀ꦮꦴ, ꦱꦸꦏ꧀ꦏꦩꦹꦭꦺꦤ ꦕꦺꦴꦢꦶꦠꦺꦴ;

ꦱꦧ꧀ꦧꦴꦱꦮꦺ ꦥꦫꦶꦚ꧀ꦚꦴꦪ, ꦮꦶꦲꦫꦴꦩꦶ ꦄꦤꦴꦱꦮꦺꦴ.

‘‘ꦠꦺꦮꦶꦗ꧀ꦗꦴ ꦆꦢ꧀ꦣꦶꦥꦠ꧀ꦠꦴ ꦕ, ꦧꦸꦢ꧀ꦣꦥꦸꦠ꧀ꦠꦴ ꦩꦲꦴꦪꦱꦴ;

ꦢꦶꦧ꧀ꦧꦱꦺꦴꦠꦁ ꦱꦩꦴꦥꦤ꧀ꦤꦴ, ꦠꦺꦱꦁ ꦄꦚ꧀ꦚꦠꦫꦺꦴ ꦄꦲꦁ.

‘‘ꦱꦠꦱꦲꦱ꧀ꦱꦶꦠꦺꦴ ꦏꦥ꧀ꦥꦺ, ꦪꦁ ꦦꦭꦁ ꦄꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦦꦭꦢꦴꦤꦱ꧀ꦱꦶꦢꦁ ꦦꦭꦁ.

‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ.

ꦄꦫꦲꦠ꧀ꦠꦁ ꦥꦤ ꦥꦠ꧀ꦮꦴꦥꦶ ꦠꦩꦺꦮ ꦒꦴꦡꦁ ꦄꦚ꧀ꦚꦴꦧ꧀ꦪꦴꦏꦫꦟꦮꦱꦺꦤ ꦄꦨꦴꦱꦶ.

ꦱꦸꦥ꧀ꦥꦶꦪꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.