꧑. ꦗꦺꦤ꧀ꦠꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ

ꦢꦸꦥ꧀ꦥꦧ꧀ꦧꦗ꧀ꦗꦁ ꦮꦺ ꦢꦸꦫꦣꦶꦮꦴꦱꦴ ꦒꦺꦲꦴꦠꦶ ꦄꦴꦪꦱ꧀ꦩꦠꦺꦴ ꦗꦺꦤ꧀ꦠꦠ꧀ꦡꦺꦫꦱ꧀ꦱ ꦒꦴꦡꦴ. ꦏꦴ ꦈꦥ꧀ꦥꦠ꧀ꦠꦶ? ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦁ ꦏꦸꦱꦭꦁ ꦈꦥꦕꦶꦤꦤ꧀ꦠꦺꦴ ꦱꦶꦑꦶꦱ꧀ꦱ ꦨꦒꦮꦠꦺꦴ ꦏꦴꦭꦺ ꦢꦺꦮꦥꦸꦠ꧀ꦠꦺꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶ. ꦱꦺꦴ ꦌꦏꦢꦶꦮꦱꦁ ꦱꦠ꧀ꦡꦴꦫꦁ ꦢꦶꦱ꧀ꦮꦴ ꦥꦱꦤ꧀ꦤꦕꦶꦠ꧀ꦠꦺꦴ ꦏꦶꦁꦏꦶꦫꦴꦠꦥꦸꦥ꧀ꦦꦺꦲꦶ ꦥꦹꦗꦁ ꦄꦏꦴꦱꦶ. ꦱꦺꦴ ꦠꦺꦤ ꦥꦸꦚ꧀ꦚꦏꦩ꧀ꦩꦺꦤ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦩꦒꦣꦫꦛ꧀ꦜꦺ ꦗꦺꦤ꧀ꦠꦒꦴꦩꦺ ꦌꦏꦱ꧀ꦱ ꦩꦟ꧀ꦝꦭꦶꦏꦫꦴꦗꦱ꧀ꦱ ꦥꦸꦠ꧀ꦠꦺꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶ, ꦗꦺꦤ꧀ꦠꦺꦴꦠꦶꦱ꧀ꦱ ꦤꦴꦩꦁ ꦄꦲꦺꦴꦱꦶ. ꦱꦺꦴ ꦮꦶꦚ꧀ꦚꦸꦠꦁ ꦥꦠ꧀ꦠꦺꦴ ꦢꦲꦫꦏꦴꦭꦺꦪꦺꦮ ꦲꦺꦠꦸꦱꦩ꧀ꦥꦠ꧀ꦠꦶꦪꦴ ꦕꦺꦴꦢꦶꦪꦩꦴꦤꦺꦴ ꦥꦧ꧀ꦧꦗ꧀ꦗꦴꦤꦶꦤ꧀ꦤꦩꦴꦤꦱꦺꦴ ꦲꦸꦠ꧀ꦮꦴ ꦥꦸꦤ ꦕꦶꦤ꧀ꦠꦺꦱꦶ – ‘‘ꦥꦧ꧀ꦧꦗ꧀ꦗꦴ ꦤꦴꦩ ꦢꦸꦏ꧀ꦏꦫꦴ, ꦓꦫꦴꦥꦶ ꦢꦸꦫꦴꦮꦴꦱꦴ, ꦣꦩ꧀ꦩꦺꦴ ꦕ ꦒꦩ꧀ꦨꦷꦫꦺꦴ, ꦨꦺꦴꦒꦴ ꦕ ꦢꦸꦫꦣꦶꦒꦩꦴ, ꦏꦶꦁ ꦤꦸ ꦑꦺꦴ ꦏꦠ꧀ꦠꦧ꧀ꦧ’’ꦤ꧀ꦠꦶ ꦌꦮꦁ ꦥꦤ ꦕꦶꦤ꧀ꦠꦴꦧꦲꦸꦭꦺꦴ ꦲꦸꦠ꧀ꦮꦴ ꦮꦶꦕꦫꦤ꧀ꦠꦺꦴ ꦌꦏꦢꦶꦮꦱꦁ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦣꦩ꧀ꦩꦁ ꦱꦸꦟꦶ. ꦱꦸꦠꦏꦴꦭꦠꦺꦴ ꦥꦛ꧀ꦜꦴꦪ ꦥꦧ꧀ꦧꦗ꧀ꦗꦴꦨꦶꦫꦠꦺꦴ ꦲꦸꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦺ ꦥꦧ꧀ꦧꦗꦶꦠ꧀ꦮꦴ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦱꦸꦑꦴꦪ ꦥꦛꦶꦥꦢꦴꦪ ꦑꦶꦥ꧀ꦥꦴꦨꦶꦚ꧀ꦚꦴꦪ ꦄꦫꦲꦠ꧀ꦠꦁ ꦱꦕ꧀ꦖꦴꦏꦴꦱꦶ. ꦠꦺꦤ ꦮꦸꦠ꧀ꦠꦁ ꦄꦥꦢꦴꦤꦺ (ꦄꦥ. ꦡꦺꦫ ꧑.꧑꧖.꧒꧑-꧒꧔) –

‘‘ꦢꦺꦮꦥꦸꦠ꧀ꦠꦺꦴ ꦄꦲꦁ ꦱꦤ꧀ꦠꦺꦴ, ꦥꦹꦗꦪꦶꦁ ꦱꦶꦑꦶꦤꦴꦪꦏꦁ;

ꦏꦏ꧀ꦏꦴꦫꦸꦥꦸꦥ꧀ꦦꦁ ꦥꦒ꧀ꦒꦪ꧀ꦲ, ꦧꦸꦢ꧀ꦣꦱ꧀ꦱ ꦄꦨꦶꦫꦺꦴꦥꦪꦶꦁ.

‘‘ꦌꦏꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦩꦨꦶꦫꦺꦴꦥꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

‘‘ꦆꦠꦺꦴ ꦕ ꦤꦮꦩꦺ ꦏꦥ꧀ꦥꦺ, ꦫꦴꦗꦴ ꦱꦠ꧀ꦠꦸꦠ꧀ꦠꦩꦺꦴ ꦄꦲꦸꦁ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ.

ꦄꦫꦲꦠ꧀ꦠꦁ ꦥꦤ ꦥꦠ꧀ꦮꦴ ꦄꦠ꧀ꦠꦤꦺꦴ ꦥꦛꦶꦥꦠ꧀ꦠꦶꦁ ꦥꦕ꧀ꦕꦮꦺꦏ꧀ꦑꦤ꧀ꦠꦺꦴ, ‘‘ꦄꦱꦏ꧀ꦑꦶꦁ ꦮꦠꦴꦲꦁ ꦄꦴꦢꦶꦠꦺꦴ ꦩꦪ꧀ꦲꦁ ꦈꦥ꧀ꦥꦤ꧀ꦤꦮꦶꦠꦏ꧀ꦏꦁ ꦖꦶꦤ꧀ꦢꦶꦠꦸ’’ꦤ꧀ꦠꦶ ꦱꦺꦴꦩꦤꦱ꧀ꦱꦗꦴꦠꦺꦴ ꦮꦶꦠꦏ꧀ꦏꦱ꧀ꦱ ꦈꦥ꧀ꦥꦤ꧀ꦤꦴꦏꦴꦫꦁ ꦠꦱ꧀ꦱ ꦕ ꦱꦩ꧀ꦩꦢꦺꦮ ꦖꦶꦤ꧀ꦤꦠꦁ ꦢꦱ꧀ꦱꦺꦤ꧀ꦠꦺꦴ –

꧑꧑꧑. ‘‘ꦢꦸꦥ꧀ꦥꦧ꧀ꦧꦗ꧀ꦗꦁ ꦮꦺ ꦢꦸꦫꦣꦶꦮꦴꦱꦴ ꦒꦺꦲꦴ, ꦣꦩ꧀ꦩꦺꦴ ꦒꦩ꧀ꦨꦷꦫꦺꦴ ꦢꦸꦫꦣꦶꦒꦩꦴ ꦨꦺꦴꦒꦴ;

ꦏꦶꦕ꧀ꦖꦴ ꦮꦸꦠ꧀ꦠꦶ ꦤꦺꦴ ꦆꦠꦫꦷꦠꦫꦺꦤꦺꦮ, ꦪꦸꦠ꧀ꦠꦁ ꦕꦶꦤ꧀ꦠꦺꦠꦸꦁ ꦱꦠꦠꦩꦤꦶꦕ꧀ꦕꦠ’’ꦤ꧀ꦠꦶ. –

ꦒꦴꦡꦁ ꦄꦨꦴꦱꦶ.

ꦠꦠ꧀ꦡ ꦢꦸꦥ꧀ꦥꦧ꧀ꦧꦗ꧀ꦗꦤ꧀ꦠꦶ ꦄꦥ꧀ꦥꦁ ꦮꦴ ꦩꦲꦤ꧀ꦠꦁ ꦮꦴ ꦨꦺꦴꦒꦏ꧀ꦑꦤ꧀ꦣꦚ꧀ꦕꦺꦮ ꦚꦴꦠꦶꦥꦫꦶꦮꦛ꧀ꦛꦚ꧀ꦕ ꦥꦲꦴꦪ ꦆꦩꦱ꧀ꦩꦶꦁ ꦱꦴꦱꦤꦺ ꦈꦫꦁ ꦢꦠ꧀ꦮꦴ ꦥꦧ꧀ꦧꦗꦤꦱ꧀ꦱ ꦢꦸꦏ꧀ꦏꦫꦠ꧀ꦠꦴ ꦢꦸꦏ꧀ꦑꦁ ꦥꦧ꧀ꦧꦗꦤꦁ, ꦢꦸꦏ꧀ꦏꦫꦴ ꦥꦧ꧀ꦧꦗ꧀ꦗꦴꦠꦶ ꦢꦸꦥ꧀ꦥꦧ꧀ꦧꦗ꧀ꦗꦁ. ꦮꦺꦠꦶ ꦤꦶꦥꦴꦠꦩꦠ꧀ꦠꦁ, ꦢꦭ꦳꧀ꦲꦠ꧀ꦡꦺꦴ ꦮꦴ ‘‘ꦥꦧ꧀ꦧꦗ꧀ꦗꦴ ꦢꦸꦏ꧀ꦑꦴ’’ꦠꦶ. ꦒꦺꦲꦚ꧀ꦕꦺ ꦄꦴꦮꦱꦺꦪ꧀ꦪꦁ, ꦢꦸꦫꦣꦶꦮꦴꦱꦴ ꦒꦺꦲꦴ, ꦪꦱ꧀ꦩꦴ ꦒꦺꦲꦁ ꦄꦣꦶꦮꦱꦤ꧀ꦠꦺꦤ ꦫꦚ꧀ꦚꦴ ꦫꦴꦗꦏꦶꦕ꧀ꦕꦁ, ꦆꦱ꧀ꦱꦫꦺꦤ ꦆꦱ꧀ꦱꦫꦏꦶꦕ꧀ꦕꦁ, ꦒꦲꦥꦠꦶꦤꦴ ꦒꦲꦥꦠꦶꦏꦶꦕ꧀ꦕꦁ ꦏꦠ꧀ꦠꦧ꧀ꦧꦁ ꦲꦺꦴꦠꦶ, ꦥꦫꦶꦗꦤꦺꦴ ꦕꦺꦮ ꦱꦩꦟꦧ꧀ꦫꦴꦲ꧀ꦩꦟꦴ ꦕ ꦱꦔ꧀ꦒꦲꦺꦠꦧ꧀ꦧꦴ, ꦠꦱ꧀ꦩꦶꦁ ꦠꦱ꧀ꦩꦶꦚ꧀ꦕ ꦏꦠ꧀ꦠꦧ꧀ꦧꦺ ꦏꦫꦶꦪꦩꦴꦤꦺꦥꦶ ꦓꦫꦴꦮꦴꦱꦺꦴ ꦖꦶꦢ꧀ꦢꦓꦛꦺꦴ ꦮꦶꦪ ꦩꦲꦴꦱꦩꦸꦢ꧀ꦢꦺꦴ ꦮꦶꦪ ꦕ ꦢꦸꦥ꧀ꦥꦹꦫꦺꦴ, ꦠꦱ꧀ꦩꦴ ꦒꦺꦲꦴ ꦤꦴꦩꦺꦠꦺ ꦄꦣꦶꦮꦱꦶꦠꦸꦁ ꦄꦴꦮꦱꦶꦠꦸꦁ ꦢꦸꦏ꧀ꦑꦴ ꦢꦸꦏ꧀ꦏꦫꦴꦠꦶ ꦏꦠ꧀ꦮꦴ ꦢꦸꦫꦣꦶꦮꦴꦱꦴ ꦢꦸꦫꦴꦮꦴꦱꦴꦠꦶ. ꦥꦧ꧀ꦧꦗ꧀ꦗꦚ꧀ꦕꦺ ꦄꦤꦸꦠꦶꦛ꧀ꦜꦺꦪ꧀ꦪꦁ ꦣꦩ꧀ꦩꦺꦴ ꦒꦩ꧀ꦨꦷꦫꦺꦴ, ꦪꦢꦠ꧀ꦡꦴ ꦥꦧ꧀ꦧꦗ꧀ꦗꦴ, ꦱꦺꦴ ꦥꦧ꧀ꦧꦗꦶꦠꦺꦤ ꦄꦣꦶꦒꦤ꧀ꦠꦧ꧀ꦧꦺꦴ ꦥꦛꦶꦮꦺꦣꦱꦢ꧀ꦣꦩ꧀ꦩꦺꦴ ꦒꦩ꧀ꦨꦷꦫꦺꦴ, ꦒꦩ꧀ꦨꦷꦫꦚꦴꦟꦒꦺꦴꦕꦫꦠ꧀ꦠꦴ ꦢꦸꦢ꧀ꦢꦱꦺꦴ, ꦢꦸꦥ꧀ꦥꦛꦶꦮꦶꦗ꧀ꦙꦺꦴ ꦣꦩ꧀ꦩꦱ꧀ꦱ ꦒꦩ꧀ꦨꦷꦫꦨꦴꦮꦺꦤ ꦢꦸꦥ꧀ꦥꦛꦶꦮꦶꦗ꧀ꦙꦠ꧀ꦠꦴ. ꦒꦺꦲꦚ꧀ꦕꦺ ꦄꦴꦮꦱꦺꦪ꧀ꦪꦁ, ꦢꦸꦫꦣꦶꦒꦩꦴ ꦨꦺꦴꦒꦴ ꦪꦺꦲꦶ ꦮꦶꦤꦴ ꦤ ꦱꦏ꧀ꦏꦴ ꦒꦺꦲꦁ ꦄꦴꦮꦱꦶꦠꦸꦁ, ꦠꦺ ꦨꦺꦴꦒꦴ ꦢꦸꦏ꧀ꦑꦺꦤ ꦏꦱꦶꦫꦺꦤ ꦄꦣꦶꦒꦤ꧀ꦠꦧ꧀ꦧꦠꦴꦪ ꦢꦸꦫꦣꦶꦒꦩꦴ. ꦌꦮꦁ ꦱꦤ꧀ꦠꦺ ꦓꦫꦴꦮꦴꦱꦁ ꦥꦲꦴꦪ ꦥꦧ꧀ꦧꦗ꧀ꦗꦁꦪꦺꦮ ꦄꦤꦸꦠꦶꦛ꧀ꦜꦺꦪ꧀ꦪꦁ, ꦌꦮꦩ꧀ꦥꦶ ꦏꦶꦕ꧀ꦖꦴ ꦮꦸꦠ꧀ꦠꦶ ꦤꦺꦴ ꦆꦠꦫꦷꦠꦫꦺꦤ ꦆꦣ ꦆꦩꦱ꧀ꦩꦶꦁ ꦧꦸꦢ꧀ꦣꦱꦴꦱꦤꦺ ꦆꦠꦫꦷꦠꦫꦺꦤ ꦪꦡꦴꦭꦢ꧀ꦣꦺꦤ ꦥꦕ꧀ꦕꦪꦺꦤ ꦄꦩ꧀ꦲꦴꦏꦁ ꦮꦸꦠ꧀ꦠꦶ ꦗꦷꦮꦶꦏꦴ ꦏꦶꦕ꧀ꦖꦴ ꦢꦸꦏ꧀ꦑꦴ, ꦓꦫꦴꦮꦴꦱꦴꦤꦁ ꦢꦸꦫꦣꦶꦮꦴꦱꦠꦴꦪ ꦨꦺꦴꦒꦴꦤꦚ꧀ꦕ ꦢꦸꦫꦣꦶꦒꦩꦠꦴꦪ ꦒꦺꦲꦺ ꦆꦠꦫꦷꦠꦫꦺꦤ ꦥꦕ꧀ꦕꦪꦺꦤ ꦪꦴꦥꦺꦠꦧ꧀ꦧꦠꦴꦪ ꦏꦶꦕ꧀ꦖꦴ ꦏꦱꦶꦫꦴ ꦮꦸꦠ꧀ꦠꦶ ꦄꦩ꧀ꦲꦴꦏꦁ, ꦠꦠ꧀ꦡ ꦏꦶꦁ ꦏꦴꦠꦸꦁ ꦮꦛ꧀ꦛꦠꦷꦠꦶ? ꦪꦸꦠ꧀ꦠꦁ ꦕꦶꦤ꧀ꦠꦺꦠꦸꦁ ꦱꦠꦠꦩꦤꦶꦕ꧀ꦕꦠꦁ ꦱꦏꦭꦁ ꦢꦶꦮꦱꦁ ꦥꦸꦧ꧀ꦧꦫꦠ꧀ꦠꦴꦥꦫꦫꦠ꧀ꦠꦚ꧀ꦕ ꦠꦺꦨꦹꦩꦏꦣꦩ꧀ꦩꦗꦴꦠꦁ ꦄꦤꦶꦕ꧀ꦕꦠꦤ꧀ꦠꦶ, ꦠꦠꦺꦴ ꦈꦥ꧀ꦥꦴꦢꦮꦪꦮꦤ꧀ꦠꦠꦺꦴ ꦄꦴꦢꦶꦄꦤ꧀ꦠꦮꦤ꧀ꦠꦠꦺꦴ ꦠꦴꦮꦏꦴꦭꦶꦏꦠꦺꦴ ꦕ ꦤ ꦤꦶꦕ꧀ꦕꦤ꧀ꦠꦶ ‘‘ꦄꦤꦶꦕ꧀ꦕ’’ꦤ꧀ꦠꦶ ꦕꦶꦤ꧀ꦠꦺꦠꦸꦁ ꦮꦶꦥꦱ꧀ꦱꦶꦠꦸꦁ ꦪꦸꦠ꧀ꦠꦁ. ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦪ ꦱꦶꦢ꧀ꦣꦴꦪ ꦆꦠꦫꦴꦤꦸꦥꦱ꧀ꦱꦤꦴ ꦱꦸꦑꦺꦤꦺꦮ ꦱꦶꦗ꧀ꦙꦤ꧀ꦠꦷꦠꦶ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦮ ꦌꦠ꧀ꦡ ꦮꦸꦠ꧀ꦠꦴ, ꦄꦤꦶꦕ꧀ꦕꦱ꧀ꦱ ꦢꦸꦏ꧀ꦑꦴꦤꦠ꧀ꦠꦠꦴꦤꦁ ꦄꦧ꧀ꦪꦨꦶꦕꦫꦟꦠꦺꦴ ꦱꦴꦱꦤꦶꦏꦱ꧀ꦱ ꦱꦸꦑꦒ꧀ꦒꦲꦟꦠꦺꦴ ꦕ. ꦠꦺꦤꦴꦲ – ‘‘ꦪꦢꦤꦶꦕ꧀ꦕꦁ ꦠꦁ ꦢꦸꦏ꧀ꦑꦁ, ꦪꦁ ꦢꦸꦏ꧀ꦑꦁ ꦠꦢꦤꦠ꧀ꦠꦴ’’ꦠꦶ (ꦱꦁ. ꦤꦶ. ꧓.꧑꧕), ‘‘ꦪꦁ ꦏꦶꦚ꧀ꦕꦶ ꦱꦩꦸꦢꦪꦣꦩ꧀ꦩꦁ, ꦱꦧ꧀ꦧꦁ ꦠꦁ ꦤꦶꦫꦺꦴꦣꦣꦩ꧀ꦩꦁ’’ (ꦩꦲꦴꦮ. ꧑꧖; ꦢꦷ. ꦤꦶ. ꧒.꧓꧗꧑; ꦱꦁ. ꦤꦶ. ꧕.꧑꧐꧘꧑), ‘‘ꦮꦪꦣꦩ꧀ꦩꦴ ꦱꦔ꧀ꦑꦴꦫꦴ’’ꦠꦶ (ꦢꦷ. ꦤꦶ. ꧒.꧒꧑꧘) ꦕ ꦠꦢꦩꦶꦤꦴ ꦌꦮꦁ ꦄꦚ꧀ꦚꦩꦚ꧀ꦚꦁ ꦥꦛꦶꦥꦏ꧀ꦑꦮꦱꦺꦤ ꦄꦥꦫꦴꦥꦫꦁ ꦈꦥ꧀ꦥꦤ꧀ꦤꦺ ꦮꦶꦠꦏ꧀ꦏꦺ ꦤꦶꦒ꧀ꦒꦲꦺꦠ꧀ꦮꦴ ꦄꦤꦶꦕ꧀ꦕꦠꦴꦩꦸꦑꦺꦤ ꦮꦶꦥꦱ꧀ꦱꦤꦁ ꦄꦴꦫꦨꦶꦠ꧀ꦮꦴ ꦆꦢꦴꦤꦶ ꦏꦠꦏꦶꦕ꧀ꦕꦺꦴ ꦗꦴꦠꦺꦴꦠꦶ ꦢꦱ꧀ꦱꦺꦠꦶ. ꦠꦺꦤ ꦮꦸꦠ꧀ꦠꦁ ‘‘ꦄꦠ꧀ꦠꦤꦺꦴ ꦥꦛꦶꦥꦠ꧀ꦠꦶ’’ꦤ꧀ꦠꦶꦄꦴꦢꦶ. ꦆꦢꦩꦺꦮ ꦡꦺꦫꦱ꧀ꦱ ꦄꦚ꧀ꦚꦴꦧ꧀ꦪꦴꦏꦫꦟꦁ ꦄꦲꦺꦴꦱꦶ.

ꦗꦺꦤ꧀ꦠꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.