꧗. ꦣꦩ꧀ꦩꦱꦮꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ

ꦥꦧ꧀ꦧꦗꦶꦁ ꦠꦸꦭꦪꦶꦠ꧀ꦮꦴꦤꦴꦠꦶ ꦄꦴꦪꦱ꧀ꦩꦠꦺꦴ ꦣꦩ꧀ꦩꦱꦮꦠ꧀ꦡꦺꦫꦱ꧀ꦱ ꦒꦴꦡꦴ. ꦏꦴ ꦈꦥ꧀ꦥꦠ꧀ꦠꦶ? ꦄꦪꦁ ꦏꦶꦫ ꦥꦢꦸꦩꦸꦠ꧀ꦠꦫꦱ꧀ꦱ ꦨꦒꦮꦠꦺꦴ ꦏꦴꦭꦺ ꦱꦸꦮꦕ꧀ꦖꦺꦴ ꦤꦴꦩ ꦧ꧀ꦫꦴꦲ꧀ꦩꦟꦺꦴ ꦲꦸꦠ꧀ꦮꦴ ꦠꦶꦟ꧀ꦟꦁ ꦮꦺꦢꦴꦤꦁ ꦥꦴꦫꦒꦹ ꦓꦫꦴꦮꦴꦱꦺ ꦢꦺꦴꦱꦁ ꦢꦶꦱ꧀ꦮꦴ ꦠꦴꦥꦱꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦄꦫꦚ꧀ꦚꦴꦪꦠꦤꦺ ꦥꦧ꧀ꦧꦠꦤ꧀ꦠꦫꦺ ꦄꦱ꧀ꦱꦩꦁ ꦏꦴꦫꦺꦠ꧀ꦮꦴ ꦧꦲꦹꦲꦶ ꦠꦴꦥꦱꦺꦲꦶ ꦱꦢ꧀ꦣꦶꦁ ꦮꦱꦶ. ꦄꦡꦱ꧀ꦱ ꦏꦸꦱꦭꦧꦷꦗꦁ ꦫꦺꦴꦥꦺꦠꦸꦏꦴꦩꦺꦴ ꦥꦢꦸꦩꦸꦠ꧀ꦠꦫꦺꦴ ꦨꦒꦮꦴ ꦄꦱ꧀ꦱꦩꦱꦩꦷꦥꦺ ꦄꦴꦏꦴꦱꦺ ꦜꦠ꧀ꦮꦴ ꦆꦢ꧀ꦣꦶꦥꦴꦛꦶꦲꦴꦫꦶꦪꦁ ꦢꦱ꧀ꦱꦺꦱꦶ. ꦱꦺꦴ ꦠꦁ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ꦥꦹꦗꦺꦠꦸꦏꦴꦩꦺꦴ ꦤꦴꦒꦥꦸꦥ꧀ꦦꦴꦤꦶ ꦎꦕꦶꦤꦴꦥꦺꦱꦶ. ꦱꦠ꧀ꦡꦴ, ‘‘ꦄꦭꦁ ꦆꦩꦱ꧀ꦱ ꦠꦴꦥꦱꦱ꧀ꦱ ꦌꦠ꧀ꦠꦏꦁ ꦏꦸꦱꦭꦧꦷꦗ’’ꦤ꧀ꦠꦶ ꦥꦏ꧀ꦏꦴꦩꦶ. ꦱꦺꦴ ꦥꦸꦥ꧀ꦦꦴꦤꦶ ꦒꦲꦺꦠ꧀ꦮꦴ ꦱꦠ꧀ꦡꦸ ꦒꦩꦤꦩꦒ꧀ꦒꦁ ꦎꦏꦶꦫꦶꦠ꧀ꦮꦴ ꦕꦶꦠ꧀ꦠꦁ ꦥꦱꦴꦢꦺꦤ꧀ꦠꦺꦴ ꦄꦚ꧀ꦗꦭꦶꦁ ꦥꦒ꧀ꦒꦪ꧀ꦲ ꦄꦛ꧀ꦜꦴꦱꦶ. ꦱꦺꦴ ꦠꦺꦤ ꦥꦸꦚ꧀ꦚꦏꦩ꧀ꦩꦺꦤ ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦄꦥꦫꦴꦥꦫꦁ ꦱꦸꦒꦠꦷꦱꦸꦪꦺꦮ ꦱꦁꦱꦫꦤ꧀ꦠꦺꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦩꦒꦣꦫꦛ꧀ꦜꦺ ꦧ꧀ꦫꦴꦲ꧀ꦩꦟꦏꦸꦭꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦣꦩ꧀ꦩꦱꦮꦺꦴꦠꦶ ꦭꦢ꧀ꦣꦤꦴꦩꦺꦴ ꦮꦶꦚ꧀ꦚꦸꦠꦁ ꦥꦠ꧀ꦠꦺꦴ ꦲꦺꦠꦸꦱꦩ꧀ꦥꦠ꧀ꦠꦶꦪꦴ ꦕꦺꦴꦢꦶꦪꦩꦴꦤꦺꦴ ꦓꦫꦴꦮꦴꦱꦺ ꦄꦴꦢꦷꦤꦮꦁ ꦥꦧ꧀ꦧꦗ꧀ꦗꦴꦪ ꦄꦴꦤꦶꦱꦁꦱꦚ꧀ꦕ ꦢꦶꦱ꧀ꦮꦴ ꦢꦏ꧀ꦑꦶꦟꦴꦒꦶꦫꦶꦱ꧀ꦩꦶꦁ ꦮꦶꦲꦫꦤ꧀ꦠꦁ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦣꦩ꧀ꦩꦁ ꦱꦸꦠ꧀ꦮꦴ ꦥꦛꦶꦭꦢ꧀ꦣꦱꦢ꧀ꦣꦺꦴ ꦥꦧ꧀ꦧꦗꦶꦠ꧀ꦮꦴ ꦮꦶꦥꦱ꧀ꦱꦤꦴꦪ ꦏꦩ꧀ꦩꦁ ꦏꦫꦺꦴꦤ꧀ꦠꦺꦴ ꦤꦕꦶꦫꦱ꧀ꦱꦺꦮ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦺꦤ ꦮꦸꦠ꧀ꦠꦁ ꦄꦥꦢꦴꦤꦺ (ꦄꦥ. ꦡꦺꦫ ꧑.꧑꧖.꧓꧙-꧔꧕) –

‘‘ꦱꦸꦮꦕ꧀ꦖꦺꦴ ꦤꦴꦩ ꦤꦴꦩꦺꦤ, ꦧ꧀ꦫꦴꦲ꧀ꦩꦟꦺꦴ ꦩꦤ꧀ꦠꦥꦴꦫꦒꦹ;

ꦥꦸꦫꦏ꧀ꦑꦠꦺꦴ ꦱꦱꦶꦱ꧀ꦱꦺꦲꦶ, ꦮꦱꦠꦺ ꦥꦧ꧀ꦧꦠꦤ꧀ꦠꦫꦺ.

‘‘ꦥꦢꦸꦩꦸꦠ꧀ꦠꦫꦺꦴ ꦤꦴꦩ ꦗꦶꦤꦺꦴ, ꦄꦴꦲꦸꦠꦷꦤꦁ ꦥꦛꦶꦒ꧀ꦒꦲꦺꦴ;

ꦩꦩꦸꦢ꧀ꦣꦫꦶꦠꦸꦏꦴꦩꦺꦴ ꦱꦺꦴ, ꦄꦴꦒꦕ꧀ꦖꦶ ꦩꦩ ꦱꦤ꧀ꦠꦶꦏꦁ.

‘‘ꦮꦺꦲꦴꦱꦩ꧀ꦲꦶ ꦕꦔ꧀ꦏꦩꦠꦶ, ꦣꦹꦥꦴꦪꦠꦶ ꦗꦭꦠꦺ ꦠꦡꦴ;

ꦲꦴꦱꦁ ꦩꦩꦁ ꦮꦶꦢꦶꦠ꧀ꦮꦴꦤ, ꦥꦏ꧀ꦏꦴꦩꦶ ꦥꦴꦕꦶꦤꦴꦩꦸꦑꦺꦴ.

‘‘ꦠꦚ꧀ꦕ ꦄꦕ꧀ꦖꦫꦶꦪꦁ ꦢꦶꦱ꧀ꦮꦴ, ꦄꦧ꧀ꦨꦸꦠꦁ ꦭꦺꦴꦩꦲꦁꦱꦤꦁ;

ꦤꦴꦒꦥꦸꦥ꧀ꦦꦁ ꦒꦲꦺꦠ꧀ꦮꦴꦤ, ꦒꦠꦩꦒ꧀ꦒꦩ꧀ꦲꦶ ꦎꦏꦶꦫꦶꦁ.

‘‘ꦱꦠꦱꦲꦱ꧀ꦱꦶꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦁ ꦎꦏꦶꦫꦶꦁ ꦄꦲꦁ;

ꦠꦺꦤ ꦕꦶꦠ꧀ꦠꦥ꧀ꦥꦱꦴꦢꦺꦤ, ꦢꦸꦒ꧀ꦒꦠꦶꦁ ꦤꦸꦥꦥꦗ꧀ꦗꦲꦁ.

‘‘ꦌꦏꦠꦶꦁꦱꦺ ꦏꦥ꧀ꦥꦱꦠꦺ, ꦫꦴꦗꦴ ꦄꦴꦱꦶ ꦩꦲꦴꦫꦲꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ.

ꦄꦫꦲꦠ꧀ꦠꦁ ꦥꦤ ꦥꦠ꧀ꦮꦴ ꦄꦠ꧀ꦠꦤꦺꦴ ꦥꦛꦶꦥꦠ꧀ꦠꦶꦁ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ ꦱꦺꦴꦩꦤꦱ꧀ꦱꦥ꧀ꦥꦠ꧀ꦠꦺꦴ ꦈꦢꦴꦤꦮꦱꦺꦤ –

꧑꧐꧗. ‘‘ꦥꦧ꧀ꦧꦗꦶꦁ ꦠꦸꦭꦪꦶꦠ꧀ꦮꦴꦤ, ꦄꦒꦴꦫꦱ꧀ꦩꦴꦤꦒꦴꦫꦶꦪꦁ;

ꦠꦶꦱ꧀ꦱꦺꦴ ꦮꦶꦗ꧀ꦗꦴ ꦄꦤꦸꦥ꧀ꦥꦠ꧀ꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ. – ꦒꦴꦡꦁ ꦄꦨꦴꦱꦶ;

ꦠꦠ꧀ꦡ ꦥꦧ꧀ꦧꦗꦶꦁ ꦠꦸꦭꦪꦶꦠ꧀ꦮꦴꦤꦴꦠꦶ ‘‘ꦱꦩ꧀ꦧꦴꦣꦺꦴ ꦓꦫꦴꦮꦴꦱꦺꦴ ꦫꦗꦴꦥꦡꦺꦴ’’ꦠꦶꦄꦴꦢꦶꦤꦴ (ꦢꦷ. ꦤꦶ. ꧑.꧑꧙꧑; ꦩ. ꦤꦶ. ꧒.꧑꧐; ꦱꦁ. ꦤꦶ. ꧒.꧑꧕꧔) ꦓꦫꦴꦮꦴꦱꦺ, ‘‘ꦄꦥ꧀ꦥꦱ꧀ꦱꦴꦢꦴ ꦏꦴꦩꦴ ꦧꦲꦸꦢꦸꦏ꧀ꦑꦴ ꦧꦲꦸꦥꦴꦪꦴꦱꦴ’’ꦠꦶꦄꦴꦢꦶꦤꦴ (ꦥꦴꦕꦶ. ꧔꧑꧗; ꦩ. ꦤꦶ. ꧑.꧑꧗꧗) ꦏꦴꦩꦺꦱꦸ ꦄꦴꦢꦷꦤꦮꦁ ꦠꦥ꧀ꦥꦛꦶꦥꦏ꧀ꦑꦠꦺꦴ ꦤꦺꦏ꧀ꦑꦩ꧀ꦩꦺ ꦕ ꦄꦴꦤꦶꦱꦁꦱꦁ ꦠꦸꦭꦨꦹꦠꦴꦪ ꦥꦚ꧀ꦚꦴꦪ ꦮꦶꦕꦴꦫꦺꦠ꧀ꦮꦴ ꦮꦷꦩꦁꦱꦶꦠ꧀ꦮꦴꦠꦶ ꦄꦠ꧀ꦡꦺꦴ. ꦱꦺꦱꦁ ꦲꦺꦛ꧀ꦜꦴ ꦮꦸꦠ꧀ꦠꦤꦪꦩꦺꦮ. ꦆꦢꦩꦺꦮ ꦕ ꦡꦺꦫꦱ꧀ꦱ ꦄꦚ꧀ꦚꦴꦧ꧀ꦪꦴꦏꦫꦟꦁ ꦄꦲꦺꦴꦱꦷꦠꦶ.

ꦣꦩ꧀ꦩꦱꦮꦠ꧀ꦡꦺꦫꦒꦴꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.