꧒. ꦒꦸꦲꦛ꧀ꦜꦏꦱꦸꦠ꧀ꦠꦮꦟ꧀ꦟꦤꦴ

꧗꧗꧙. ꦱꦠ꧀ꦠꦺꦴ ꦒꦸꦲꦴꦪꦤ꧀ꦠꦶ ꦒꦸꦲꦛ꧀ꦜꦏꦱꦸꦠ꧀ꦠꦁ. ꦏꦴ ꦈꦥ꧀ꦥꦠ꧀ꦠꦶ? ꦨꦒꦮꦠꦶ ꦏꦶꦫ ꦱꦴꦮꦠ꧀ꦡꦶꦪꦁ ꦮꦶꦲꦫꦤ꧀ꦠꦺ ꦄꦴꦪꦱ꧀ꦩꦴ ꦥꦶꦟ꧀ꦝꦺꦴꦭꦨꦴꦫꦢ꧀ꦮꦴꦗꦺꦴ ꦏꦺꦴꦱꦩ꧀ꦧꦶꦪꦁ ꦒꦁꦔ꧀ꦒꦴꦠꦷꦫꦺ ꦄꦴꦮꦛ꧀ꦛꦏꦁ ꦤꦴꦩ ꦈꦠꦺꦤꦱ꧀ꦱ ꦈꦪ꧀ꦪꦴꦤꦁ, ꦠꦠ꧀ꦡ ꦄꦒꦩꦴꦱꦶ ꦱꦷꦠꦭꦺ ꦥꦢꦺꦱꦺ ꦢꦶꦮꦴꦮꦶꦲꦴꦫꦁ ꦤꦶꦱꦷꦢꦶꦠꦸꦏꦴꦩꦺꦴ. ꦄꦚ꧀ꦚꦢꦴꦥꦶ ꦕꦴꦪꦁ ꦒꦕ꧀ꦖꦠꦺꦮ ꦠꦠ꧀ꦡ ꦥꦸꦧ꧀ꦧꦴꦱꦺꦮꦤꦺꦤ ꦪꦡꦴ ꦒꦮꦩ꧀ꦥꦠꦶꦠ꧀ꦡꦺꦫꦺꦴ ꦠꦴꦮꦠꦶꦁꦱꦨꦮꦤꦤ꧀ꦠꦶ ꦮꦸꦠ꧀ꦠꦤꦪꦩꦺꦠꦁ ꦮꦔ꧀ꦒꦷꦱꦱꦸꦠ꧀ꦠꦮꦟ꧀ꦟꦤꦴꦪꦁ. ꦱꦺꦴ ꦠꦠ꧀ꦡ ꦒꦔ꧀ꦒꦴꦠꦷꦫꦺ ꦱꦷꦠꦭꦺ ꦫꦸꦏ꧀ꦑꦩꦹꦭꦺ ꦱꦩꦴꦥꦠ꧀ꦠꦶꦁ ꦄꦥ꧀ꦥꦺꦠ꧀ꦮꦴ ꦢꦶꦮꦴꦮꦶꦲꦴꦫꦁ ꦤꦶꦱꦷꦢꦶ. ꦫꦴꦗꦴꦥꦶ ꦑꦺꦴ ꦈꦠꦺꦤꦺꦴ ꦠꦁ ꦢꦶꦮꦱꦁꦪꦺꦮ ꦈꦪ꧀ꦪꦴꦤꦏꦷꦭ꦳ꦶꦏꦁ ꦒꦤ꧀ꦠ꧀ꦮꦴ ꦧꦲꦸꦢꦺꦮ ꦢꦶꦮꦱꦨꦴꦒꦁ ꦤꦕ꧀ꦕꦒꦷꦠꦴꦢꦷꦲꦶ ꦈꦪ꧀ꦪꦴꦤꦺ ꦏꦷꦭ꦳ꦶꦠ꧀ꦮꦴ ꦥꦴꦤꦩꦢꦩꦠ꧀ꦠꦺꦴ ꦌꦏꦶꦱ꧀ꦱꦴ ꦆꦠ꧀ꦡꦶꦪꦴ ꦄꦔ꧀ꦏꦺ ꦱꦷꦱꦁ ꦏꦠ꧀ꦮꦴ ꦱꦪꦶ. ꦱꦺꦱꦶꦠ꧀ꦡꦶꦪꦺꦴ ‘‘ꦱꦸꦠ꧀ꦠꦺꦴ ꦫꦴꦗꦴ’’ꦠꦶ ꦈꦛ꧀ꦜꦲꦶꦠ꧀ꦮꦴ ꦈꦪ꧀ꦪꦴꦤꦺ ꦥꦸꦥ꧀ꦦꦦꦭꦴꦢꦷꦤꦶ ꦒꦟ꧀ꦲꦤ꧀ꦠꦶꦪꦺꦴ ꦡꦺꦫꦁ ꦢꦶꦱ꧀ꦮꦴ ꦲꦶꦫꦺꦴꦠ꧀ꦠꦥ꧀ꦥꦁ ꦈꦥꦛ꧀ꦜꦴꦥꦺꦠ꧀ꦮꦴ ‘‘ꦩꦴ ꦱꦢ꧀ꦢꦁ ꦄꦏꦠ꧀ꦡꦴ’’ꦠꦶ ꦄꦚ꧀ꦚꦩꦚ꧀ꦚꦁ ꦤꦶꦮꦴꦫꦺꦠ꧀ꦮꦴ ꦄꦥ꧀ꦥꦱꦢ꧀ꦢꦴ ꦈꦥꦱꦔ꧀ꦏꦩꦶꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦡꦺꦫꦁ ꦱꦩ꧀ꦥꦫꦶꦮꦴꦫꦺꦠ꧀ꦮꦴ ꦤꦶꦱꦷꦢꦶꦁꦱꦸ. ꦡꦺꦫꦺꦴ ꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦪ ꦠꦴꦱꦁ ꦣꦩ꧀ꦩꦁ ꦢꦺꦱꦺꦱꦶ, ꦠꦴ ꦠꦸꦛ꧀ꦜꦴ ‘‘ꦱꦴꦣꦸ ꦱꦴꦣꦹ’’ꦠꦶ ꦮꦠ꧀ꦮꦴ ꦱꦸꦟꦤ꧀ꦠꦶ.

ꦫꦚ꧀ꦚꦺꦴ ꦱꦷꦱꦁ ꦄꦔ꧀ꦏꦺꦤꦴꦢꦴꦪ ꦤꦶꦱꦶꦤ꧀ꦤꦶꦠ꧀ꦡꦷ ‘‘ꦆꦩꦴ ꦩꦁ ꦎꦲꦴꦪ ꦏꦷꦭ꦳ꦤ꧀ꦠꦷ’’ꦠꦶ ꦠꦴꦱꦸ ꦆꦱ꧀ꦱꦴꦥꦏꦠꦴ ꦈꦴꦫꦸꦁ ꦕꦴꦭꦺꦠ꧀ꦮꦴ ꦫꦴꦗꦴꦤꦁ ꦥꦧꦺꦴꦣꦺꦱꦶ. ꦫꦴꦗꦴ ꦥꦛꦶꦧꦸꦗ꧀ꦙꦶꦠ꧀ꦮꦴ ꦆꦠ꧀ꦡꦴꦒꦴꦫꦁ ꦄꦥꦱ꧀ꦱꦤ꧀ꦠꦺꦴ ‘‘ꦏꦸꦲꦶꦁ ꦆꦩꦴ ꦮꦱꦭꦶꦪꦺꦴ’’ꦠꦶ ꦄꦴꦲ. ꦱꦴ ꦄꦴꦲ – ‘‘ꦠꦸꦩ꧀ꦲꦺꦱꦸ ꦄꦧꦲꦸꦏꦠꦴ ‘ꦱꦩꦟꦁ ꦫꦩꦪꦶꦱ꧀ꦱꦴꦩꦴ’ꦠꦶ ꦒꦠꦴ’’ꦠꦶ. ꦱꦺꦴ ꦏꦸꦢ꧀ꦣꦺꦴ ꦡꦺꦫꦴꦨꦶꦩꦸꦑꦺꦴ ꦄꦒꦩꦴꦱꦶ. ꦠꦴ ꦆꦠ꧀ꦡꦶꦪꦺꦴ ꦫꦴꦗꦴꦤꦁ ꦢꦶꦱ꧀ꦮꦴ ꦌꦏꦕ꧀ꦕꦴ ꦈꦛ꧀ꦜꦲꦶꦁꦱꦸ, ꦌꦏꦕ꧀ꦕꦴ ‘‘ꦩꦲꦴꦫꦴꦗ, ꦥꦧ꧀ꦧꦗꦶꦠꦱ꧀ꦱ ꦱꦤ꧀ꦠꦶꦏꦺ ꦣꦩ꧀ꦩꦁ ꦱꦸꦟꦴꦩꦴ’’ꦠꦶ ꦤ ꦈꦛ꧀ꦜꦲꦶꦁꦱꦸ. ꦱꦺꦴ ꦠꦺꦤ ꦨꦶꦪ꧀ꦪꦺꦴꦱꦺꦴꦩꦠ꧀ꦠꦴꦪ ꦏꦸꦢ꧀ꦣꦺꦴ ꦡꦺꦫꦁ ꦄꦮꦤ꧀ꦢꦶꦠ꧀ꦮꦴꦮ ‘‘ꦏꦶꦩꦠ꧀ꦡꦁ ꦄꦴꦒꦠꦺꦴꦱꦷ’’ꦠꦶ ꦄꦴꦲ. ‘‘ꦮꦶꦮꦺꦏꦠ꧀ꦡꦁ ꦩꦲꦴꦫꦴꦗꦴ’’ꦠꦶ. ꦱꦺꦴ ‘‘ꦮꦶꦮꦺꦏꦠ꧀ꦡꦴꦪ ꦄꦴꦒꦠꦴ ꦌꦮꦁ ꦆꦠ꧀ꦡꦴꦒꦴꦫꦥꦫꦶꦮꦸꦠꦴ ꦤꦶꦱꦷꦢꦤ꧀ꦠꦷ’’ꦠꦶ ꦮꦠ꧀ꦮꦴ ‘‘ꦠꦮ ꦮꦶꦮꦺꦏꦁ ꦏꦡꦺꦲꦷ’’ꦠꦶ ꦄꦴꦲ. ꦡꦺꦫꦺꦴ ꦮꦶꦱꦴꦫꦢꦺꦴꦥꦶ ꦮꦶꦮꦺꦏꦏꦡꦴꦪ ‘‘ꦤꦴꦪꦁ ꦄꦚ꧀ꦚꦴꦠꦸꦏꦴꦩꦺꦴ ꦥꦸꦕ꧀ꦖꦠꦷ’’ꦠꦶ ꦠꦸꦟ꧀ꦲꦷ ꦄꦲꦺꦴꦱꦶ. ꦫꦴꦗꦴ ‘‘ꦱꦕꦺ ꦤ ꦏꦡꦺꦱꦶ, ꦠꦩ꧀ꦧꦏꦶꦥꦶꦭ꧀ꦭꦶꦏꦺꦲꦶ ꦠꦁ ꦑꦴꦢꦴꦥꦺꦱ꧀ꦱꦴꦩꦷ’’ꦠꦶ ꦄꦚ꧀ꦚꦠꦫꦱ꧀ꦩꦶꦁ ꦄꦱꦺꦴꦏꦫꦸꦏ꧀ꦑꦺ ꦠꦩ꧀ꦧꦏꦶꦥꦶꦭ꧀ꦭꦶꦏꦥꦸꦛꦁ ꦒꦟ꧀ꦲꦤ꧀ꦠꦺꦴ ꦄꦠ꧀ꦠꦤꦺꦴꦮ ꦈꦥꦫꦶ ꦮꦶꦏꦶꦫꦶ. ꦱꦺꦴ ꦱꦫꦷꦫꦁ ꦥꦸꦚ꧀ꦖꦶꦠ꧀ꦮꦴ ꦄꦚ꧀ꦚꦁ ꦥꦸꦛꦁ ꦒꦲꦺꦠ꧀ꦮꦴ ꦡꦺꦫꦴꦨꦶꦩꦸꦑꦺꦴ ꦄꦒꦩꦴꦱꦶ. ꦡꦺꦫꦺꦴ ‘‘ꦱꦕꦴꦪꦁ ꦫꦴꦗꦴ ꦩꦪꦶ ꦄꦥꦫꦗ꧀ꦙꦺꦪ꧀ꦪ, ꦄꦥꦴꦪꦴꦨꦶꦩꦸꦑꦺꦴ ꦨꦮꦺꦪ꧀ꦪꦴ’’ꦠꦶ ꦠꦁ ꦄꦤꦸꦏꦩ꧀ꦥꦩꦴꦤꦺꦴ ꦆꦢ꧀ꦣꦶꦪꦴ ꦄꦴꦏꦴꦱꦁ ꦄꦧ꧀ꦨꦸꦒ꧀ꦒꦤ꧀ꦠ꧀ꦮꦴ ꦒꦠꦺꦴ.

ꦠꦠꦺꦴ ꦆꦠ꧀ꦡꦶꦪꦺꦴ ꦄꦴꦲꦁꦱꦸ – ‘‘ꦩꦲꦴꦫꦴꦗ, ꦄꦚ꧀ꦚꦺ ꦫꦴꦗꦴꦤꦺꦴ ꦇꦢꦶꦱꦁ ꦥꦧ꧀ꦧꦗꦶꦠꦁ ꦢꦶꦱ꧀ꦮꦴ ꦥꦸꦥ꧀ꦦꦒꦤ꧀ꦣꦴꦢꦷꦲꦶ ꦥꦹꦗꦺꦤ꧀ꦠꦶ, ꦠ꧀ꦮꦁ ꦠꦩ꧀ꦧꦏꦶꦥꦶꦭ꧀ꦭꦶꦏꦥꦸꦛꦺꦤ ꦄꦴꦱꦴꦢꦺꦠꦸꦁ ꦄꦴꦫꦢ꧀ꦣꦺꦴ ꦄꦲꦺꦴꦱꦶ, ꦏꦸꦭꦮꦁꦱꦁ ꦤꦴꦱꦺꦠꦸꦁ ꦈꦛ꧀ꦜꦶꦠꦺꦴ’’ꦠꦶ. ꦱꦺꦴ ꦄꦠ꧀ꦠꦤꦺꦴ ꦢꦺꦴꦱꦁ ꦚꦠ꧀ꦮꦴ ꦠꦸꦟ꧀ꦲꦷ ꦲꦸꦠ꧀ꦮꦴ ꦈꦪ꧀ꦪꦴꦤꦥꦴꦭꦁ ꦥꦸꦕ꧀ꦖꦶ – ‘‘ꦄꦚ꧀ꦚꦩ꧀ꦥꦶ ꦢꦶꦮꦱꦁ ꦡꦺꦫꦺꦴ ꦆꦣꦴꦒꦕ꧀ꦖꦠꦷ’’ꦠꦶ? ‘‘ꦄꦴꦩ, ꦩꦲꦴꦫꦴꦗꦴ’’ꦠꦶ. ꦠꦺꦤ ꦲꦶ ꦪꦢꦴ ꦄꦴꦒꦕ꧀ꦖꦠꦶ, ꦠꦢꦴ ꦩꦺ ꦄꦴꦫꦺꦴꦕꦺꦪ꧀ꦪꦴꦱꦷꦠꦶ. ꦱꦺꦴ ꦌꦏꦢꦶꦮꦱꦁ ꦡꦺꦫꦺ ꦄꦴꦒꦠꦺ ꦄꦴꦫꦺꦴꦕꦺꦱꦶ. ꦫꦴꦗꦴꦥꦶ ꦡꦺꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦲꦁ ꦥꦸꦕ꧀ꦖꦶꦠ꧀ꦮꦴ ꦥꦴꦟꦺꦲꦶ ꦱꦫꦟꦁ ꦒꦠꦺꦴ ꦄꦲꦺꦴꦱꦶ. ꦠꦩ꧀ꦧꦏꦶꦥꦶꦭ꧀ꦭꦶꦏꦥꦸꦛꦺꦤ ꦄꦴꦱꦴꦢꦶꦠꦢꦶꦮꦱꦺ ꦥꦤ ꦡꦺꦫꦺꦴ ꦄꦴꦏꦴꦱꦺꦤꦴꦒꦤ꧀ꦠ꧀ꦮꦴ ꦥꦸꦤ ꦥꦡꦮꦶꦪꦁ ꦤꦶꦩꦸꦗ꧀ꦗꦶꦠ꧀ꦮꦴ ꦨꦒꦮꦠꦺꦴ ꦒꦤ꧀ꦣꦏꦸꦛꦶꦪꦁ ꦈꦩ꧀ꦩꦸꦗ꧀ꦗꦶ. ꦨꦒꦮꦴꦥꦶ ꦑꦺꦴ ꦢꦏ꧀ꦑꦶꦟꦺꦤ ꦥꦱ꧀ꦱꦺꦤ ꦱꦠꦺꦴ ꦱꦩ꧀ꦥꦗꦴꦤꦺꦴ ꦱꦷꦲꦱꦺꦪ꧀ꦪꦁ ꦏꦥ꧀ꦥꦪꦩꦴꦤꦺꦴ ꦡꦺꦫꦁ ꦢꦶꦱ꧀ꦮꦴ ‘‘ꦏꦶꦁ, ꦨꦴꦫꦢ꧀ꦮꦴꦗ, ꦄꦏꦴꦭꦺ ꦄꦴꦒꦠꦺꦴꦱꦷ’’ꦠꦶ ꦄꦴꦲ. ꦡꦺꦫꦺꦴ ‘‘ꦄꦴꦩ ꦨꦒꦮꦴ’’ꦠꦶ ꦮꦠ꧀ꦮꦴ ꦱꦧ꧀ꦧꦁ ꦠꦁ ꦥꦮꦠ꧀ꦠꦶꦁ ꦄꦴꦫꦺꦴꦕꦺꦱꦶ. ꦠꦁ ꦱꦸꦠ꧀ꦮꦴ ꦨꦒꦮꦴ ‘‘ꦏꦶꦁ ꦏꦫꦶꦱ꧀ꦱꦠꦶ ꦠꦱ꧀ꦱ ꦮꦶꦮꦺꦏꦏꦡꦴ ꦏꦴꦩꦒꦸꦟꦒꦶꦢ꧀ꦣꦱ꧀ꦱꦴ’’ꦠꦶ ꦮꦠ꧀ꦮꦴ ꦢꦏ꧀ꦑꦶꦟꦺꦤ ꦥꦱ꧀ꦱꦺꦤ ꦤꦶꦥꦤ꧀ꦤꦺꦴ ꦌꦮ ꦡꦺꦫꦱ꧀ꦱ ꦣꦩ꧀ꦩꦢꦺꦱꦤꦠ꧀ꦡꦁ ꦆꦩꦁ ꦱꦸꦠ꧀ꦠꦩꦨꦴꦱꦶ.

ꦠꦠ꧀ꦡ ꦱꦠ꧀ꦠꦺꦴꦠꦶ ꦭꦒ꧀ꦒꦺꦴ. ꦒꦸꦲꦴꦪꦤ꧀ꦠꦶ ꦏꦴꦪꦺ. ꦏꦴꦪꦺꦴ ꦲꦶ ꦫꦴꦒꦴꦢꦷꦤꦁ ꦮꦴꦭ꦳ꦴꦤꦁ ꦮꦱꦤꦺꦴꦏꦴꦱꦠꦺꦴ ‘‘ꦒꦸꦲꦴ’’ꦠꦶ ꦮꦸꦕ꧀ꦕꦠꦶ. ꦧꦲꦸꦤꦴꦨꦶꦖꦤ꧀ꦤꦺꦴꦠꦶ ꦧꦲꦸꦤꦴ ꦫꦴꦒꦴꦢꦶꦏꦶꦭꦺꦱꦗꦴꦭꦺꦤ ꦄꦨꦶꦕ꧀ꦖꦤ꧀ꦤꦺꦴ. ꦌꦠꦺꦤ ꦄꦗ꧀ꦙꦠ꧀ꦠꦧꦤ꧀ꦣꦤꦁ ꦮꦸꦠ꧀ꦠꦁ. ꦠꦶꦛ꧀ꦜꦤ꧀ꦠꦶ ꦫꦴꦒꦴꦢꦶꦮꦱꦺꦤ ꦠꦶꦛ꧀ꦜꦤ꧀ꦠꦺꦴ. ꦤꦫꦺꦴꦠꦶ ꦱꦠ꧀ꦠꦺꦴ. ꦩꦺꦴꦲꦤꦱ꧀ꦩꦶꦁ ꦥꦒꦴꦭ꦳꧀ꦲꦺꦴꦠꦶ ꦩꦺꦴꦲꦤꦁ ꦮꦸꦕ꧀ꦕꦠꦶ ꦏꦴꦩꦒꦸꦟꦴ. ꦌꦠ꧀ꦡ ꦲꦶ ꦢꦺꦮꦩꦤꦸꦱ꧀ꦱꦴ ꦩꦸꦪ꧀ꦲꦤ꧀ꦠꦶ, ꦠꦺꦱꦸ ꦄꦗ꧀ꦙꦺꦴꦒꦴꦭ꦳꧀ꦲꦺꦴ ꦲꦸꦠ꧀ꦮꦴ. ꦌꦠꦺꦤ ꦧꦲꦶꦢ꧀ꦣꦴꦧꦤ꧀ꦣꦤꦁ ꦮꦸꦠ꧀ꦠꦁ. ꦢꦹꦫꦺ ꦮꦶꦮꦺꦏꦴ ꦲꦶ ꦠꦡꦴꦮꦶꦣꦺꦴ ꦱꦺꦴꦠꦶ ꦱꦺꦴ ꦠꦡꦴꦫꦹꦥꦺꦴ ꦤꦫꦺꦴ ꦠꦶꦮꦶꦣꦴꦥꦶ ꦏꦴꦪꦮꦶꦮꦺꦏꦴꦢꦶꦏꦴ ꦮꦶꦮꦺꦏꦴ ꦢꦹꦫꦺ ꦄꦤꦴꦱꦤ꧀ꦤꦺ. ꦏꦶꦁꦏꦴꦫꦟꦴ? ꦏꦴꦩꦴ ꦲꦶ ꦭꦺꦴꦏꦺ ꦤ ꦲꦶ ꦱꦸꦥ꧀ꦥꦲꦴꦪꦴ, ꦪꦱ꧀ꦩꦴ ꦭꦺꦴꦏꦺ ꦏꦴꦩꦴ ꦱꦸꦥ꧀ꦥꦲꦴꦪꦴ ꦤ ꦲꦺꦴꦤ꧀ꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ.

꧗꧘꧐. ꦌꦮꦁ ꦥꦜꦩꦒꦴꦡꦴꦪ ‘‘ꦢꦹꦫꦺ ꦮꦶꦮꦺꦏꦴ ꦠꦡꦴꦮꦶꦣꦺꦴ’’ꦠꦶ ꦱꦴꦣꦺꦠ꧀ꦮꦴ ꦥꦸꦤ ꦠꦡꦴꦮꦶꦣꦴꦤꦁ ꦱꦠ꧀ꦠꦴꦤꦁ ꦣꦩ꧀ꦩꦠꦁ ꦄꦴꦮꦶꦏꦫꦺꦴꦤ꧀ꦠꦺꦴ ‘‘ꦆꦕ꧀ꦖꦴꦤꦶꦢꦴꦤꦴ’’ꦠꦶ ꦒꦴꦡꦩꦴꦲ. ꦠꦠ꧀ꦡ ꦆꦕ꧀ꦖꦴꦤꦶꦢꦴꦤꦴꦠꦶ ꦠꦟ꧀ꦲꦴꦲꦺꦠꦸꦏꦴ. ꦨꦮꦱꦴꦠꦧꦢ꧀ꦣꦴꦠꦶ ꦱꦸꦑꦮꦺꦢꦤꦴꦢꦶꦩ꧀ꦲꦶ ꦨꦮꦱꦴꦠꦺ ꦧꦢ꧀ꦣꦴ. ꦠꦺ ꦢꦸꦥ꧀ꦥꦩꦸꦚ꧀ꦕꦴꦠꦶ ꦠꦺ ꦨꦮꦱꦴꦠꦮꦠ꧀ꦡꦸꦨꦹꦠꦴ ꦣꦩ꧀ꦩꦴ, ꦠꦺ ꦮꦴ ꦠꦠ꧀ꦡ ꦧꦢ꧀ꦣꦴ ꦆꦕ꧀ꦖꦴꦤꦶꦢꦴꦤꦴ ꦱꦠ꧀ꦠꦴ ꦢꦸꦥ꧀ꦥꦩꦺꦴꦕꦪꦴ. ꦤ ꦲꦶ ꦄꦚ꧀ꦚꦩꦺꦴꦏ꧀ꦑꦴꦠꦶ ꦄꦚ꧀ꦚꦺꦤ ꦕ ꦩꦺꦴꦕꦺꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ. ꦏꦴꦫꦟꦮꦕꦤꦁ ꦮꦴ ꦌꦠꦁ, ꦠꦺ ꦱꦠ꧀ꦠꦴ ꦢꦸꦥ꧀ꦥꦩꦸꦚ꧀ꦕꦴ. ꦏꦱ꧀ꦩꦴ? ꦪꦱ꧀ꦩꦴ ꦄꦚ꧀ꦚꦺꦤ ꦩꦺꦴꦕꦺꦠꦧ꧀ꦧꦴ ꦤ ꦲꦺꦴꦤ꧀ꦠꦶ. ꦪꦢꦶ ꦥꦤ ꦩꦸꦚ꧀ꦕꦺꦪ꧀ꦪꦸꦁ, ꦱꦏꦺꦤ ꦡꦴꦩꦺꦤ ꦩꦸꦚ꧀ꦕꦺꦪ꧀ꦪꦸꦤ꧀ꦠꦶ ꦄꦪꦩꦱ꧀ꦱ ꦄꦠ꧀ꦡꦺꦴ. ꦥꦕ꧀ꦖꦴ ꦥꦸꦫꦺ ꦮꦴꦥꦶ ꦄꦥꦺꦏ꧀ꦑꦩꦴꦤꦴꦠꦶ ꦄꦤꦴꦒꦠꦺ ꦄꦠꦷꦠꦺ ꦮꦴ ꦏꦴꦩꦺ ꦄꦥꦺꦏ꧀ꦑꦩꦴꦤꦴ. ꦆꦩꦺꦮ ꦏꦴꦩꦺ ꦥꦸꦫꦶꦩꦺꦮ ꦗꦥ꧀ꦥꦤ꧀ꦠꦶ ꦆꦩꦺ ꦮꦴ ꦥꦕ꧀ꦕꦸꦥ꧀ꦥꦤ꧀ꦤꦺ ꦏꦴꦩꦺ ꦥꦸꦫꦶꦩꦺ ꦮꦴ ꦢꦸꦮꦶꦣꦺꦥꦶ ꦄꦠꦷꦠꦴꦤꦴꦒꦠꦺ ꦧꦭꦮꦠꦟ꧀ꦲꦴꦪ ꦥꦠ꧀ꦡꦪꦩꦴꦤꦴ. ꦆꦩꦺꦱꦚ꧀ꦕ ꦢ꧀ꦮꦶꦤ꧀ꦤꦁ ꦥꦢꦴꦤꦁ ‘‘ꦠꦺ ꦢꦸꦥ꧀ꦥꦩꦸꦚ꧀ꦕꦴ ꦤ ꦲꦶ ꦄꦚ꧀ꦚꦩꦺꦴꦏ꧀ꦑꦴ’’ꦠꦶ ꦆꦩꦶꦤꦴ ꦱꦲ ꦱꦩ꧀ꦧꦤ꧀ꦣꦺꦴ ꦮꦺꦢꦶꦠꦧ꧀ꦧꦺꦴ, ꦆꦠꦫꦡꦴ ‘‘ꦄꦥꦺꦏ꧀ꦑꦩꦴꦤꦴ ꦗꦥ꧀ꦥꦁ ꦏꦶꦁ ꦏꦫꦺꦴꦤ꧀ꦠꦶ ꦏꦶꦁ ꦮꦴ ꦏꦠꦴ’’ꦠꦶ ꦤ ꦥꦚ꧀ꦚꦴꦪꦺꦪ꧀ꦪꦸꦁ.

꧗꧘꧑-꧒. ꦌꦮꦁ ꦥꦜꦩꦒꦴꦡꦴꦪ ‘‘ꦢꦹꦫꦺ ꦮꦶꦮꦺꦏꦴ ꦠꦡꦴꦮꦶꦣꦺꦴ’’ꦠꦶ ꦱꦴꦣꦺꦠ꧀ꦮꦴ ꦢꦸꦠꦶꦪꦒꦴꦡꦴꦪ ꦕ ꦠꦡꦴꦮꦶꦣꦴꦤꦁ ꦱꦠ꧀ꦠꦴꦤꦁ ꦣꦩ꧀ꦩꦠꦁ ꦄꦴꦮꦶꦏꦠ꧀ꦮꦴ ꦆꦢꦴꦤꦶ ꦤꦺꦱꦁ ꦥꦴꦥꦏꦩ꧀ꦩꦏꦫꦟꦁ ꦄꦴꦮꦶꦏꦫꦺꦴꦤ꧀ꦠꦺꦴ ‘‘ꦏꦴꦩꦺꦱꦸ ꦒꦶꦢ꧀ꦣꦴ’’ꦠꦶ ꦒꦴꦡꦩꦴꦲ. ꦠꦱ꧀ꦱꦠ꧀ꦡꦺꦴ – ꦠꦺ ꦱꦠ꧀ꦠꦴ ꦏꦴꦩꦺꦱꦸ ꦥꦫꦶꦨꦺꦴꦒꦠꦟ꧀ꦲꦴꦪ ꦒꦶꦢ꧀ꦣꦴ ꦥꦫꦶꦪꦺꦱꦤꦴꦢꦶꦩꦤꦸꦪꦸꦠ꧀ꦠꦠ꧀ꦠꦴ ꦥꦱꦸꦠꦴ ꦱꦩ꧀ꦩꦺꦴꦲꦩꦴꦥꦤ꧀ꦤꦠ꧀ꦠꦴ ꦥꦩꦹꦭ꦳꧀ꦲꦴ ꦄꦮꦒꦩꦤꦠꦴꦪ ꦩꦕ꧀ꦖꦫꦶꦠꦴꦪ ꦧꦸꦢ꧀ꦣꦴꦢꦷꦤꦁ ꦮꦕꦤꦁ ꦄꦤꦴꦢꦶꦪꦤꦠꦴꦪ ꦕ ꦄꦮꦢꦴꦤꦶꦪꦴ. ꦏꦴꦪꦮꦶꦱꦩꦴꦢꦶꦩ꧀ꦲꦶ ꦮꦶꦱꦩꦺ ꦤꦶꦮꦶꦛ꧀ꦜꦴ ꦄꦤ꧀ꦠꦏꦴꦭꦺ ꦩꦫꦟꦢꦸꦏ꧀ꦑꦹꦥꦤꦷꦠꦴ ‘‘ꦏꦶꦁꦱꦹ ꦨꦮꦶꦱ꧀ꦱꦴꦩ ꦆꦠꦺꦴ ꦕꦸꦠꦴꦱꦺ’’ꦠꦶ ꦥꦫꦶꦢꦺꦮꦪꦤ꧀ꦠꦷꦠꦶ. ꦪꦱ꧀ꦩꦴ ꦌꦠꦢꦺꦮ, ꦠꦱ꧀ꦩꦴ ꦲꦶ ꦱꦶꦏ꧀ꦑꦺꦡ…ꦥꦺ… ꦩꦴꦲꦸ ꦣꦷꦫꦴꦠꦶ. ꦠꦠ꧀ꦡ ꦱꦶꦏ꧀ꦑꦺꦡꦴꦠꦶ ꦠꦶꦱ꧀ꦱꦺꦴ ꦱꦶꦏ꧀ꦑꦴ ꦄꦴꦥꦗ꧀ꦗꦺꦪ꧀ꦪ. ꦆꦣꦺꦮꦴꦠꦶ ꦆꦩꦱ꧀ꦩꦶꦁꦪꦺꦮ ꦱꦴꦱꦤꦺ. ꦱꦺꦱꦩꦸꦠ꧀ꦠꦴꦤꦩꦺꦮ.

꧗꧘꧓. ꦆꦢꦴꦤꦶ ꦪꦺ ꦠꦡꦴ ꦤ ꦏꦫꦺꦴꦤ꧀ꦠꦶ, ꦠꦺꦱꦁ ꦧ꧀ꦪꦱꦤꦥ꧀ꦥꦠ꧀ꦠꦶꦁ ꦢꦱ꧀ꦱꦺꦤ꧀ꦠꦺꦴ ‘‘ꦥꦱ꧀ꦱꦴꦩꦷ’’ꦠꦶ ꦒꦴꦡꦩꦴꦲ. ꦠꦠ꧀ꦡ ꦥꦱ꧀ꦱꦴꦩꦷꦠꦶ ꦩꦁꦱꦕꦏ꧀ꦑꦸꦄꦴꦢꦷꦲꦶ ꦥꦺꦏ꧀ꦑꦴꦩꦶ. ꦭꦺꦴꦏꦺꦠꦶ ꦄꦥꦴꦪꦴꦢꦶꦩ꧀ꦲꦶ. ꦥꦫꦶꦦꦤ꧀ꦢꦩꦴꦤꦤ꧀ꦠꦶ ꦆꦠꦺꦴ ꦕꦶꦠꦺꦴ ꦕ ꦦꦤ꧀ꦢꦩꦴꦤꦁ. ꦥꦗꦁ ꦆꦩꦤ꧀ꦠꦶ ꦆꦩꦁ ꦱꦠ꧀ꦠꦏꦴꦪꦁ. ꦠꦟ꧀ꦲꦒꦠꦤ꧀ꦠꦶ ꦠꦟ꧀ꦲꦴꦪ ꦒꦠꦁ ꦄꦨꦶꦨꦹꦠꦁ, ꦤꦶꦥꦴꦠꦶꦠꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦨꦮꦺꦱꦹꦠꦶ ꦏꦴꦩꦨꦮꦴꦢꦷꦱꦸ. ꦲꦷꦤꦴ ꦤꦫꦴꦠꦶ ꦲꦷꦤꦏꦩ꧀ꦩꦤ꧀ꦠꦴ ꦤꦫꦴ. ꦩꦕ꧀ꦕꦸꦩꦸꦑꦺ ꦭꦥꦤ꧀ꦠꦷꦠꦶ ꦄꦤ꧀ꦠꦏꦴꦭꦺ ꦱꦩ꧀ꦥꦠ꧀ꦠꦺ ꦩꦫꦟꦩꦸꦑꦺ ꦥꦫꦶꦢꦺꦮꦤ꧀ꦠꦶ. ꦄꦮꦷꦠꦠꦟ꧀ꦲꦴꦱꦺꦠꦶ ꦄꦮꦶꦒꦠꦠꦟ꧀ꦲꦴ. ꦨꦮꦴꦨꦮꦺꦱꦹꦠꦶ ꦏꦴꦩꦨꦮꦴꦢꦷꦱꦸ. ꦄꦡ ꦮꦴ ꦨꦮꦴꦨꦮꦺꦱꦹꦠꦶ ꦨꦮꦨꦮꦺꦱꦸ, ꦥꦸꦤꦥ꧀ꦥꦸꦤꦨꦮꦺꦱꦹꦠꦶ ꦮꦸꦠ꧀ꦠꦁ ꦲꦺꦴꦠꦶ.

꧗꧘꧔. ꦆꦢꦴꦤꦶ ꦪꦱ꧀ꦩꦴ ꦄꦮꦷꦠꦠꦟ꧀ꦲꦴ ꦌꦮꦁ ꦦꦤ꧀ꦢꦤ꧀ꦠꦶ ꦕ ꦭꦥꦤ꧀ꦠꦶ ꦕ, ꦠꦱ꧀ꦩꦴ ꦠꦟ꧀ꦲꦴꦮꦶꦤꦪꦺ ꦱꦩꦴꦢꦥꦺꦤ꧀ꦠꦺꦴ ‘‘ꦩꦩꦴꦪꦶꦠꦺ’’ꦠꦶ ꦒꦴꦡꦩꦴꦲ. ꦠꦠ꧀ꦡ ꦩꦩꦴꦪꦶꦠꦺꦠꦶ ꦠꦟ꧀ꦲꦴꦢꦶꦛ꧀ꦜꦶꦩꦩꦠ꧀ꦠꦺꦲꦶ ‘‘ꦩꦩ’’ꦤ꧀ꦠꦶ ꦥꦫꦶꦒ꧀ꦒꦲꦶꦠꦺ ꦮꦠ꧀ꦡꦸꦱ꧀ꦩꦶꦁ. ꦥꦱ꧀ꦱꦡꦴꦠꦶ ꦱꦺꦴꦠꦴꦫꦺ ꦄꦴꦭꦥꦤ꧀ꦠꦺꦴ ꦄꦴꦲ. ꦌꦠꦩ꧀ꦥꦷꦠꦶ ꦌꦠꦩ꧀ꦥꦶ ꦄꦴꦢꦷꦤꦮꦁ. ꦱꦺꦱꦁ ꦥꦴꦏꦛꦩꦺꦮ.

꧗꧘꧕. ꦌꦮꦩꦺꦠ꧀ꦡ ꦥꦜꦩꦒꦴꦡꦴꦪ ꦄꦱ꧀ꦱꦴꦢꦁ, ꦠꦠꦺꦴ ꦥꦫꦴꦲꦶ ꦕꦠꦹꦲꦶ ꦄꦴꦢꦷꦤꦮꦚ꧀ꦕ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦱꦈꦥꦴꦪꦁ ꦤꦶꦱ꧀ꦱꦫꦟꦁ ꦤꦶꦱ꧀ꦱꦫꦟꦴꦤꦶꦱꦁꦱꦚ꧀ꦕ ꦢꦱ꧀ꦱꦺꦠꦸꦁ ꦱꦧ꧀ꦧꦴꦲꦶ ꦮꦴ ꦌꦠꦴꦲꦶ ꦏꦴꦩꦴꦤꦁ ꦄꦴꦢꦷꦤꦮꦁ ꦎꦏꦴꦫꦁ ꦱꦁꦏꦶꦭꦺꦱꦚ꧀ꦕ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦤꦺꦏ꧀ꦑꦩ꧀ꦩꦺ ꦄꦴꦤꦶꦱꦁꦱꦁ ꦢꦱ꧀ꦱꦺꦠꦸꦁ ‘‘ꦈꦨꦺꦴꦱꦸ ꦄꦤ꧀ꦠꦺꦱꦹ’’ꦠꦶ ꦒꦴꦡꦴꦢ꧀ꦮꦪꦩꦴꦲ. ꦠꦠ꧀ꦡ ꦈꦨꦺꦴꦱꦸ ꦄꦤ꧀ꦠꦺꦱꦹꦠꦶ ꦦꦱ꧀ꦱꦦꦱ꧀ꦱꦱꦩꦸꦢꦪꦴꦢꦷꦱꦸ ꦢ꧀ꦮꦷꦱꦸ ꦥꦫꦶꦕ꧀ꦖꦺꦢꦺꦱꦸ. ꦮꦶꦤꦺꦪ꧀ꦪ ꦖꦤ꧀ꦢꦤ꧀ꦠꦶ ꦖꦤ꧀ꦢꦫꦴꦒꦁ ꦮꦶꦤꦺꦠ꧀ꦮꦴ. ꦦꦱ꧀ꦱꦁ ꦥꦫꦶꦚ꧀ꦚꦴꦪꦴꦠꦶ ꦕꦏ꧀ꦑꦸꦱꦩ꧀ꦦꦱ꧀ꦱꦴꦢꦶꦦꦱ꧀ꦱꦁ, ꦦꦱ꧀ꦱꦴꦤꦸꦱꦴꦫꦺꦤ ꦮꦴ ꦠꦁꦱꦩ꧀ꦥꦪꦸꦠ꧀ꦠꦺ ꦱꦧ꧀ꦧꦺꦥꦶ ꦄꦫꦹꦥꦣꦩ꧀ꦩꦺ, ꦠꦺꦱꦁ ꦮꦠ꧀ꦡꦸꦢ꧀ꦮꦴꦫꦴꦫꦩ꧀ꦩꦟꦮꦱꦺꦤ ꦫꦹꦥꦣꦩ꧀ꦩꦺ ꦕꦴꦠꦶ ꦱꦏꦭꦩ꧀ꦥꦶ ꦤꦴꦩꦫꦹꦥꦁ ꦠꦷꦲꦶ ꦥꦫꦶꦚ꧀ꦚꦴꦲꦶ ꦥꦫꦶꦗꦴꦤꦶꦠ꧀ꦮꦴ. ꦄꦤꦴꦤꦸꦒꦶꦢ꧀ꦣꦺꦴꦠꦶ ꦫꦹꦥꦴꦢꦷꦱꦸ ꦱꦧ꧀ꦧꦣꦩ꧀ꦩꦺꦱꦸ ꦄꦒꦶꦢ꧀ꦣꦺꦴ. ꦪꦢꦠ꧀ꦠꦒꦫꦲꦷ ꦠꦢꦏꦸꦧ꧀ꦧꦩꦴꦤꦺꦴꦠꦶ ꦪꦁ ꦄꦠ꧀ꦠꦤꦴ ꦒꦫꦲꦠꦶ, ꦠꦁ ꦄꦏꦸꦫꦸꦩꦴꦤꦺꦴ. ꦤꦭꦶꦥ꧀ꦥꦠꦷ ꦢꦶꦛ꧀ꦜꦱꦸꦠꦺꦱꦸ ꦣꦷꦫꦺꦴꦠꦶ ꦱꦺꦴ ꦌꦮꦫꦹꦥꦺꦴ ꦣꦶꦠꦶꦱꦩ꧀ꦥꦤ꧀ꦤꦺꦴ ꦣꦷꦫꦺꦴ ꦢꦶꦛ꧀ꦜꦺꦱꦸ ꦕ ꦱꦸꦠꦺꦱꦸ ꦕ ꦣꦩ꧀ꦩꦺꦱꦸ ꦢ꧀ꦮꦶꦤ꧀ꦤꦁ ꦭꦺꦥꦴꦤꦁ ꦌꦏꦺꦤꦥꦶ ꦭꦺꦥꦺꦤ ꦤ ꦭꦶꦥ꧀ꦥꦠꦶ. ꦄꦴꦏꦴꦱꦩꦶꦮ ꦤꦶꦫꦸꦥꦭꦶꦠ꧀ꦠꦺꦴ ꦄꦕ꧀ꦕꦤ꧀ꦠꦮꦺꦴꦢꦴꦤꦥ꧀ꦥꦠ꧀ꦠꦺꦴ ꦲꦺꦴꦠꦶ.

꧗꧘꧖. ꦱꦚ꧀ꦚꦁ ꦥꦫꦶꦚ꧀ꦚꦴꦠꦶ ꦒꦴꦡꦴꦪ ꦥꦤ ꦄꦪꦁ ꦱꦔ꧀ꦑꦺꦥꦠ꧀ꦡꦺꦴ – ꦤ ꦏꦺꦮꦭꦚ꧀ꦕ ꦦꦱ꧀ꦱꦩꦺꦮ, ꦄꦥꦶꦕ ꦑꦺꦴ ꦥꦤ ꦏꦴꦩꦱꦚ꧀ꦚꦴꦢꦶꦨꦺꦢꦁ ꦱꦚ꧀ꦚꦩ꧀ꦥꦶ, ꦱꦚ꧀ꦚꦴꦤꦸꦱꦴꦫꦺꦤ ꦮꦴ ꦥꦸꦧ꧀ꦧꦺ ꦮꦸꦠ꧀ꦠꦤꦪꦺꦤꦺꦮ ꦤꦴꦩꦫꦹꦥꦁ ꦠꦷꦲꦶ ꦥꦫꦶꦚ꧀ꦚꦴꦲꦶ ꦥꦫꦶꦗꦴꦤꦶꦠ꧀ꦮꦴ ꦆꦩꦴꦪ ꦥꦛꦶꦥꦢꦴꦪ ꦕꦠꦸꦧ꧀ꦧꦶꦣꦩ꧀ꦥꦶ ꦮꦶꦠꦫꦺꦪ꧀ꦪ ꦎꦓꦁ, ꦠꦠꦺꦴ ꦱꦺꦴ ꦠꦶꦟ꧀ꦟꦺꦴꦓꦺꦴ ꦠꦟ꧀ꦲꦴꦢꦶꦛ꧀ꦜꦶꦥꦫꦶꦒ꧀ꦒꦲꦺꦱꦸ ꦠꦟ꧀ꦲꦴꦢꦶꦛ꧀ꦜꦶꦭꦺꦥꦥ꧀ꦥꦲꦴꦤꦺꦤ ꦤꦺꦴꦥꦭꦶꦠ꧀ꦠꦺꦴ ꦑꦷꦟꦴꦱꦮꦩꦸꦤꦶ ꦫꦴꦒꦴꦢꦶꦱꦭ꧀ꦭꦴꦤꦁ ꦄꦧ꧀ꦧꦹꦭ꦳꧀ꦲꦠ꧀ꦠꦴ ꦄꦧ꧀ꦧꦹꦭ꦳꧀ꦲꦱꦭ꧀ꦭꦺꦴ ꦱꦠꦶꦮꦺꦥꦸꦭ꧀ꦭꦥ꧀ꦥꦠ꧀ꦠꦶꦪꦴ ꦄꦥ꧀ꦥꦩꦠ꧀ꦠꦺꦴ ꦕꦫꦁ, ꦥꦸꦧ꧀ꦧꦨꦴꦒꦺ ꦮꦴ ꦄꦥ꧀ꦥꦩꦠ꧀ꦠꦺꦴ ꦕꦫꦁ ꦠꦺꦤ ꦄꦥ꧀ꦥꦩꦴꦢꦕꦴꦫꦺꦤ ꦄꦧ꧀ꦧꦹꦭ꦳꧀ꦲꦱꦭ꧀ꦭꦺꦴ ꦲꦸꦠ꧀ꦮꦴ ꦱꦏꦥꦫꦠ꧀ꦠꦨꦴꦮꦴꦢꦶꦨꦺꦢꦁ ꦤꦴꦱꦷꦱꦠꦷ ꦭꦺꦴꦏꦩꦶꦩꦁ ꦥꦫꦚ꧀ꦕ, ꦄꦚ꧀ꦚꦢꦠ꧀ꦡꦸ ꦕꦫꦶꦩꦕꦶꦠ꧀ꦠꦤꦶꦫꦺꦴꦣꦴ ꦤꦶꦫꦸꦥꦴꦢꦴꦤꦺꦴ ꦗꦴꦠꦮꦺꦢꦺꦴꦮ ꦥꦫꦶꦤꦶꦧ꧀ꦧꦴꦠꦷꦠꦶ ꦄꦫꦲꦠ꧀ꦠꦤꦶꦏꦹꦛꦺꦤ ꦢꦺꦱꦤꦁ ꦤꦶꦛ꧀ꦜꦴꦥꦺꦱꦶ ꦣꦩ꧀ꦩꦤꦺꦠ꧀ꦠꦶꦛ꧀ꦜꦥꦤꦩꦺꦮ ꦏꦫꦺꦴꦤ꧀ꦠꦺꦴ, ꦤ ꦈꦠ꧀ꦠꦫꦶꦁ ꦆꦩꦴꦪ ꦢꦺꦱꦤꦴꦪ ꦩꦒ꧀ꦒꦁ ꦮꦴ ꦦꦭꦁ ꦮꦴ ꦈꦥ꧀ꦥꦴꦢꦺꦱꦶ ꦑꦷꦟꦴꦱꦮꦱ꧀ꦱ ꦢꦺꦱꦶꦠꦠ꧀ꦠꦴꦠꦶ.

ꦥꦫꦩꦠ꧀ꦡꦗꦺꦴꦠꦶꦏꦴꦪ ꦑꦸꦢ꧀ꦢꦏ-ꦄꦛ꧀ꦜꦏꦡꦴꦪ

ꦱꦸꦠ꧀ꦠꦤꦶꦥꦴꦠ-ꦄꦛ꧀ꦜꦏꦡꦴꦪ ꦒꦸꦲꦛ꧀ꦜꦏꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.