꧑꧖. ꦱꦴꦫꦶꦥꦸꦠ꧀ꦠꦱꦸꦠ꧀ꦠꦮꦟ꧀ꦟꦤꦴ

꧙꧖꧒. ꦤ ꦩꦺ ꦢꦶꦛ꧀ꦜꦺꦴꦠꦶ ꦱꦴꦫꦶꦥꦸꦠ꧀ꦠꦱꦸꦠ꧀ꦠꦁ, ‘‘ꦡꦺꦫꦥꦚ꧀ꦲꦱꦸꦠ꧀ꦠ’’ꦤ꧀ꦠꦶꦥꦶ ꦮꦸꦕ꧀ꦕꦠꦶ. ꦏꦴ ꦈꦥ꧀ꦥꦠ꧀ꦠꦶ? ꦆꦩꦱ꧀ꦱ ꦱꦸꦠ꧀ꦠꦱ꧀ꦱ ꦈꦥ꧀ꦥꦠ꧀ꦠꦶ – ꦫꦴꦗꦒꦲꦏꦱ꧀ꦱ ꦱꦺꦛ꧀ꦜꦶꦱ꧀ꦱ ꦕꦤ꧀ꦢꦤꦓꦛꦶꦏꦴꦪ ꦥꦛꦶꦭꦴꦨꦁ ꦄꦴꦢꦶꦁ ꦏꦠ꧀ꦮꦴ ꦠꦴꦪ ꦕꦤ꧀ꦢꦤꦓꦛꦶꦏꦴꦪ ꦏꦠꦱ꧀ꦱ ꦥꦠ꧀ꦠꦱ꧀ꦱ ꦄꦴꦏꦴꦱꦺ ꦈꦱ꧀ꦱꦴꦥꦤꦁ ꦄꦴꦪꦱ꧀ꦩꦠꦺꦴ ꦥꦶꦟ꧀ꦝꦺꦴꦭꦨꦴꦫꦢ꧀ꦮꦴꦗꦱ꧀ꦱ ꦆꦢ꧀ꦣꦶꦪꦴ ꦥꦠ꧀ꦠꦒ꧀ꦒꦲꦟꦁ, ꦠꦱ꧀ꦩꦶꦁ ꦮꦠ꧀ꦡꦸꦱ꧀ꦩꦶꦁ ꦱꦴꦮꦏꦴꦤꦁ ꦆꦢ꧀ꦣꦶꦥꦛꦶꦏ꧀ꦑꦺꦥꦺꦴ, ꦠꦶꦠ꧀ꦡꦶꦪꦴꦤꦁ ꦨꦒꦮꦠꦴ ꦱꦢ꧀ꦣꦶꦁ ꦥꦴꦛꦶꦲꦴꦫꦶꦪꦁ ꦏꦠ꧀ꦠꦸꦏꦴꦩꦠꦴ, ꦥꦴꦛꦶꦲꦴꦫꦶꦪꦏꦫꦟꦁ, ꦨꦒꦮꦠꦺꦴ ꦱꦴꦮꦠ꧀ꦡꦶꦒꦩꦤꦁ, ꦠꦶꦠ꧀ꦡꦶꦪꦴꦤꦸꦧꦤ꧀ꦣꦤꦁ, ꦱꦴꦮꦠ꧀ꦡꦶꦪꦁ ꦥꦱꦺꦤꦢꦶꦤꦺꦴ ꦧꦸꦢ꧀ꦣꦹꦥꦒꦩꦤꦁ ꦏꦟ꧀ꦝꦩ꧀ꦧꦥꦴꦠꦸꦨꦴꦮꦺꦴ, ꦕꦠꦸꦤ꧀ꦤꦁ ꦥꦫꦶꦱꦴꦤꦁ ꦠꦶꦠ꧀ꦡꦶꦪꦗꦪꦠ꧀ꦡꦁ ꦥꦴꦛꦶꦲꦴꦫꦶꦪꦏꦫꦟꦸꦱ꧀ꦱꦸꦏ꧀ꦏꦤꦶꦮꦴꦫꦟꦁ, ꦪꦩꦏꦥꦴꦛꦶꦲꦴꦫꦶꦪꦏꦫꦟꦁ, ꦏꦠꦥꦴꦛꦶꦲꦴꦫꦶꦪꦱ꧀ꦱ ꦨꦒꦮꦠꦺꦴ ꦠꦴꦮꦠꦶꦁꦱꦨꦮꦤꦒꦩꦤꦁ, ꦠꦠ꧀ꦡ ꦠꦺꦩꦴꦱꦁ ꦣꦩ꧀ꦩꦢꦺꦱꦤꦴ, ꦄꦴꦪꦱ꧀ꦩꦠꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦠ꧀ꦡꦺꦫꦺꦤ ꦪꦴꦕꦶꦠꦱ꧀ꦱ ꦢꦺꦮꦭꦺꦴꦏꦠꦺꦴ ꦱꦔ꧀ꦏꦱ꧀ꦱꦤꦒꦫꦺ ꦎꦫꦺꦴꦲꦟꦤ꧀ꦠꦶ ꦆꦩꦴꦤꦶ ꦮꦠ꧀ꦡꦹꦤꦶ ꦄꦤ꧀ꦠꦫꦤ꧀ꦠꦫꦺ ꦕ ꦗꦴꦠꦏꦴꦤꦶ ꦮꦶꦠ꧀ꦡꦴꦫꦺꦠ꧀ꦮꦴ ꦪꦴꦮ ꦢꦱꦱꦲꦱ꧀ꦱꦕꦏ꧀ꦏꦮꦴꦭ꦳ꦢꦺꦮꦠꦴꦲꦶ ꦥꦹꦗꦶꦪꦩꦴꦤꦺꦴ ꦨꦒꦮꦴ ꦩꦗ꧀ꦙꦺ ꦩꦟꦶꦩꦪꦺꦤ ꦱꦺꦴꦥꦴꦤꦺꦤ ꦱꦔ꧀ꦏꦱ꧀ꦱꦤꦒꦫꦺ ꦎꦫꦸꦪ꧀ꦲ ꦱꦺꦴꦥꦴꦤꦏꦭ꦳ꦺꦮꦫꦺ ꦄꦛ꧀ꦜꦴꦱꦶ –

‘‘ꦪꦺ ꦙꦴꦤꦥ꧀ꦥꦱꦸꦠꦴ ꦣꦷꦫꦴ, ꦤꦺꦏ꧀ꦑꦩ꧀ꦩꦹꦥꦱꦩꦺ ꦫꦠꦴ;

ꦢꦺꦮꦴꦥꦶ ꦠꦺꦱꦁ ꦥꦶꦲꦪꦤ꧀ꦠꦶ, ꦱꦩ꧀ꦧꦸꦢ꧀ꦣꦴꦤꦁ ꦱꦠꦷꦩꦠ’’ꦤ꧀ꦠꦶ. (ꦣ. ꦥ. ꧑꧘꧑) –

ꦆꦩꦶꦱ꧀ꦱꦴ ꦣꦩ꧀ꦩꦥꦢꦒꦴꦡꦴꦪ ꦮꦸꦕ꧀ꦕꦩꦴꦤꦴꦪ ꦮꦸꦠ꧀ꦠꦴ. ꦱꦺꦴꦥꦴꦤꦏꦭ꦳ꦺꦮꦫꦺ ꦜꦶꦠꦁ ꦥꦤ ꦨꦒꦮꦤ꧀ꦠꦁ ꦱꦧ꧀ꦧꦥꦜꦩꦁ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦮꦤ꧀ꦢꦶ, ꦠꦠꦺꦴ ꦈꦥ꧀ꦥꦭꦮꦟ꧀ꦟꦴ ꦨꦶꦏ꧀ꦑꦸꦤꦷ, ꦄꦡꦴꦥꦫꦺꦴ ꦗꦤꦏꦴꦪꦺꦴ. ꦠꦠ꧀ꦫ ꦨꦒꦮꦴ ꦕꦶꦤ꧀ꦠꦺꦱꦶ – ‘‘ꦆꦩꦶꦱ꧀ꦱꦁ ꦥꦫꦶꦱꦠꦶ ꦩꦺꦴꦒ꧀ꦒꦭ꧀ꦭꦴꦤꦺꦴ ꦆꦢ꧀ꦣꦶꦪꦴ ꦄꦒ꧀ꦒꦺꦴꦠꦶ ꦥꦴꦏꦛꦺꦴ, ꦄꦤꦸꦫꦸꦢ꧀ꦣꦺꦴ ꦢꦶꦧ꧀ꦧꦕꦏ꧀ꦑꦸꦤꦴ, ꦥꦸꦟ꧀ꦟꦺꦴ ꦣꦩ꧀ꦩꦏꦡꦶꦏꦠ꧀ꦠꦺꦤ, ꦱꦴꦫꦶꦥꦸꦠ꧀ꦠꦁ ꦥꦤꦴꦪꦁ ꦥꦫꦶꦱꦴ ꦤ ꦏꦺꦤꦕꦶ ꦒꦸꦟꦺꦤ ꦌꦮꦁ ꦄꦒ꧀ꦒꦺꦴꦠꦶ ꦗꦴꦤꦴꦠꦶ, ꦪꦁꦤꦹꦤꦴꦲꦁ ꦱꦴꦫꦶꦥꦸꦠ꧀ꦠꦁ ꦥꦚ꧀ꦚꦴꦒꦸꦟꦺꦤ ꦥꦏꦴꦱꦺꦪ꧀ꦪ’’ꦤ꧀ꦠꦶ. ꦄꦡ ꦡꦺꦫꦁ ꦥꦚ꧀ꦲꦁ ꦥꦸꦕ꧀ꦖꦶ. ꦡꦺꦫꦺꦴ ꦨꦒꦮꦠꦴ ꦥꦸꦕ꧀ꦖꦶꦠꦁ ꦥꦸꦕ꧀ꦖꦶꦠꦁ ꦥꦸꦡꦸꦗ꧀ꦗꦤꦥꦚ꧀ꦲꦁ, ꦱꦺꦏ꧀ꦑꦥꦚ꧀ꦲꦁ, ꦄꦱꦺꦏ꧀ꦑꦥꦚ꧀ꦲꦚ꧀ꦕ, ꦱꦧ꧀ꦧꦁ ꦮꦶꦱ꧀ꦱꦗ꧀ꦗꦺꦱꦶ. ꦠꦢꦴ ꦤꦁ ꦗꦤꦺꦴ ‘‘ꦥꦚ꧀ꦚꦴꦪ ꦄꦒ꧀ꦒꦺꦴ’’ꦠꦶ ꦄꦚ꧀ꦚꦴꦱꦶ. ꦄꦡ ꦨꦒꦮꦴ ‘‘ꦱꦴꦫꦶꦥꦸꦠ꧀ꦠꦺꦴ ꦤ ꦆꦢꦴꦤꦺꦮ ꦥꦚ꧀ꦚꦴꦪ ꦄꦒ꧀ꦒꦺꦴ, ꦄꦠꦷꦠꦺꦥꦶ ꦥꦚ꧀ꦚꦴꦪ ꦄꦒ꧀ꦒꦺꦴ’’ꦠꦶ ꦗꦴꦠꦏꦁ ꦄꦴꦤꦺꦱꦶ.

ꦄꦠꦷꦠꦺ ꦥꦫꦺꦴꦱꦲꦱ꧀ꦱꦴ ꦆꦱꦪꦺꦴ ꦮꦤꦩꦹꦭꦦꦭꦴꦲꦴꦫꦴ ꦥꦧ꧀ꦧꦠꦥꦴꦢꦺ ꦮꦱꦤ꧀ꦠꦶ. ꦠꦺꦱꦁ ꦄꦴꦕꦫꦶꦪꦱ꧀ꦱ ꦄꦴꦧꦴꦣꦺꦴ ꦈꦥ꧀ꦥꦗ꧀ꦗꦶ, ꦈꦥꦛ꧀ꦜꦴꦤꦴꦤꦶ ꦮꦠ꧀ꦠꦤ꧀ꦠꦶ. ꦗꦺꦛ꧀ꦜꦤ꧀ꦠꦺꦮꦴꦱꦷ ‘‘ꦱꦥ꧀ꦥꦴꦪꦨꦺꦱꦗ꧀ꦗꦁ ꦄꦴꦲꦫꦶꦱ꧀ꦱꦴꦩꦶ, ꦄꦴꦕꦫꦶꦪꦁ ꦄꦥ꧀ꦥꦩꦠ꧀ꦠꦴ ꦈꦥꦛ꧀ꦜꦲꦡꦴ’’ꦠꦶ ꦮꦠ꧀ꦮꦴ ꦩꦤꦸꦱ꧀ꦱꦥꦡꦁ ꦄꦒꦩꦴꦱꦶ. ꦠꦱ꧀ꦩꦶꦁ ꦄꦤꦴꦒꦠꦺꦪꦺꦮ ꦄꦴꦕꦫꦶꦪꦺꦴ ꦏꦴꦭꦩꦏꦴꦱꦶ. ꦠꦁ ‘‘ꦆꦢꦴꦤꦶ ꦏꦴꦭꦁ ꦏꦫꦶꦱ꧀ꦱꦠꦷ’’ꦠꦶ ꦄꦤ꧀ꦠꦺꦮꦴꦱꦶꦏꦴ ꦱꦩꦴꦥꦠ꧀ꦠꦶꦩꦴꦫꦧ꧀ꦨ ꦥꦸꦕ꧀ꦖꦶꦁꦱꦸ. ꦱꦺꦴ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦱꦩꦴꦥꦠ꧀ꦠꦶꦁ ꦱꦤ꧀ꦣꦴꦪꦴꦲ – ‘‘ꦤꦠ꧀ꦡꦶ ꦏꦶꦚ꧀ꦕꦷ’’ꦠꦶ, ꦄꦤ꧀ꦠꦺꦮꦴꦱꦶꦤꦺꦴ ‘‘ꦤꦠ꧀ꦡꦶ ꦄꦴꦕꦫꦶꦪꦱ꧀ꦱ ꦄꦣꦶꦒꦩꦺꦴ’’ꦠꦶ ꦄꦒ꧀ꦒꦲꦺꦱꦸꦁ. ꦄꦡ ꦗꦺꦛ꧀ꦜꦤ꧀ꦠꦺꦮꦴꦱꦷ ꦨꦺꦱꦗ꧀ꦗꦁ ꦄꦴꦢꦴꦪ ꦄꦴꦒꦤ꧀ꦠ꧀ꦮꦴ ꦠꦁ ꦏꦴꦭꦏꦠꦁ ꦢꦶꦱ꧀ꦮꦴ ꦄꦴꦕꦫꦶꦪꦁ ‘‘ꦏꦶꦚ꧀ꦕꦶ ꦥꦸꦕ꧀ꦖꦶꦠ꧀ꦡꦴ’’ꦠꦶ ꦄꦴꦲ. ꦄꦴꦩ ꦥꦸꦕ꧀ꦖꦶꦩ꧀ꦲꦴ, ‘‘ꦤꦠ꧀ꦡꦶ ꦏꦶꦚ꧀ꦕꦷ’’ꦠꦶ ꦄꦴꦲ, ꦤ ꦏꦶꦚ꧀ꦕꦶ ꦄꦴꦕꦫꦶꦪꦺꦤ ꦄꦣꦶꦒꦠꦤ꧀ꦠꦶ. ꦤꦠ꧀ꦡꦶ ꦏꦶꦚ꧀ꦕꦷꦠꦶ ꦮꦢꦤ꧀ꦠꦺꦴ ꦄꦴꦕꦫꦶꦪꦺꦴ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦥꦮꦺꦢꦺꦱꦶ, ꦱꦏ꧀ꦏꦴꦠꦧ꧀ꦧꦺꦴ ꦄꦴꦕꦫꦶꦪꦺꦴꦠꦶ.

‘‘ꦥꦫꦺꦴꦱꦲꦱ꧀ꦱꦩ꧀ꦥꦶ ꦱꦩꦴꦒꦠꦴꦤꦁ,

ꦏꦤ꧀ꦢꦺꦪ꧀ꦪꦸꦁ ꦠꦺ ꦮꦱ꧀ꦱꦱꦠꦁ ꦄꦥꦚ꧀ꦚꦴ;

ꦌꦏꦺꦴꦥꦶ ꦱꦺꦪ꧀ꦪꦺꦴ ꦥꦸꦫꦶꦱꦺꦴ ꦱꦥꦚ꧀ꦚꦺꦴ,

ꦪꦺꦴ ꦨꦴꦱꦶꦠꦱ꧀ꦱ ꦮꦶꦗꦴꦤꦴꦠꦶ ꦄꦠ꧀ꦡ’’ꦤ꧀ꦠꦶ. (ꦗꦴ. ꧑.꧑.꧙꧙);

ꦏꦡꦶꦠꦺ ꦕ ꦥꦤ ꦨꦒꦮꦠꦴ ꦗꦴꦠꦏꦺ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦄꦠ꧀ꦠꦤꦺꦴ ꦱꦢ꧀ꦣꦶꦮꦶꦲꦴꦫꦶꦏꦴꦤꦁ ꦥꦚ꧀ꦕꦤ꧀ꦤꦁ ꦨꦶꦏ꧀ꦑꦸꦱꦠꦴꦤꦩꦠ꧀ꦡꦴꦪ ꦱꦥ꧀ꦥꦴꦪꦱꦺꦤꦴꦱꦤꦒꦺꦴꦕꦫꦱꦷꦭꦮꦠꦴꦢꦷꦤꦶ ꦥꦸꦕ꧀ꦖꦶꦠꦸꦁ ‘‘ꦤ ꦩꦺ ꦢꦶꦛ꧀ꦜꦺꦴ ꦆꦠꦺꦴ ꦥꦸꦧ꧀ꦧꦺ’’ꦠꦶ ꦆꦩꦁ ꦡꦸꦠꦶꦒꦴꦡꦁ ꦄꦴꦢꦶꦁ ꦏꦠ꧀ꦮꦴ ꦄꦛ꧀ꦜ ꦒꦴꦡꦴꦪꦺꦴ ꦄꦨꦴꦱꦶ. ꦠꦩꦠ꧀ꦡꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦨꦒꦮꦴ ꦠꦠꦺꦴ ꦥꦫꦴ ꦱꦺꦱꦒꦴꦡꦴꦠꦶ.

ꦠꦠ꧀ꦡ ꦆꦠꦺꦴ ꦥꦸꦧ꧀ꦧꦺꦠꦶ ꦆꦠꦺꦴ ꦱꦔ꧀ꦏꦱ꧀ꦱꦤꦒꦫꦺ ꦎꦠꦫꦟꦠꦺꦴ ꦥꦸꦧ꧀ꦧꦺ. ꦮꦒ꧀ꦒꦸꦮꦢꦺꦴꦠꦶ ꦱꦸꦤ꧀ꦢꦫꦮꦢꦺꦴ. ꦠꦸꦱꦶꦠꦴ ꦒꦟꦶꦩꦴꦒꦠꦺꦴꦠꦶ ꦠꦸꦱꦶꦠꦏꦴꦪꦴ ꦕꦮꦶꦠ꧀ꦮꦴ ꦩꦴꦠꦸꦏꦸꦕ꧀ꦖꦶꦁ ꦄꦴꦒꦠꦠ꧀ꦠꦴ ꦠꦸꦱꦶꦠꦴ ꦄꦴꦒꦠꦺꦴ, ꦒꦟꦴꦕꦫꦶꦪꦠ꧀ꦠꦴ ꦒꦟꦷ. ꦱꦤ꧀ꦠꦸꦛ꧀ꦜꦛ꧀ꦜꦺꦤ ꦮꦴ ꦠꦸꦱꦶꦠꦱꦔ꧀ꦑꦴꦠꦴ ꦢꦺꦮꦭꦺꦴꦏꦴ ꦒꦟꦶꦁ ꦄꦴꦒꦠꦺꦴ ꦠꦸꦱꦶꦠꦴꦤꦁ ꦮꦴ ꦄꦫꦲꦤ꧀ꦠꦴꦤꦁ ꦒꦟꦶꦁ ꦄꦴꦒꦠꦺꦴꦠꦶ.

꧙꧖꧓. ꦢꦸꦠꦶꦪꦒꦴꦡꦴꦪ ꦱꦢꦺꦮꦏꦱ꧀ꦱ ꦭꦺꦴꦏꦱ꧀ꦱ ꦪꦡꦴ ꦢꦶꦱ꧀ꦱꦠꦷꦠꦶ ꦱꦢꦺꦮꦏꦱ꧀ꦱ ꦭꦺꦴꦏꦱ꧀ꦱ ꦮꦶꦪ ꦩꦤꦸꦱ꧀ꦱꦴꦤꦩ꧀ꦥꦶ ꦢꦶꦱ꧀ꦱꦠꦶ. ꦪꦡꦴ ꦮꦴ ꦢꦶꦱ꧀ꦱꦠꦷꦠꦶ ꦠꦕ꧀ꦖꦠꦺꦴ ꦄꦮꦶꦥꦫꦷꦠꦠꦺꦴ ꦢꦶꦱ꧀ꦱꦠꦶ ꦕꦏ꧀ꦑꦸꦩꦴꦠꦶ ꦈꦠ꧀ꦠꦩꦕꦏ꧀ꦑꦸ. ꦌꦏꦺꦴꦠꦶ ꦥꦧ꧀ꦧꦗ꧀ꦗꦴꦱꦔ꧀ꦑꦴꦠꦴꦢꦷꦲꦶ ꦌꦏꦺꦴ. ꦫꦠꦶꦤ꧀ꦠꦶ ꦤꦺꦏ꧀ꦑꦩ꧀ꦩꦫꦠꦶꦄꦴꦢꦶꦁ.

꧙꧖꧔. ꦠꦠꦶꦪꦒꦴꦡꦴꦪ ꦧꦲꦹꦤꦩꦶꦣ ꦧꦢ꧀ꦣꦴꦤꦤ꧀ꦠꦶ ꦆꦣ ꦧꦲꦹꦤꦁ ꦑꦠ꧀ꦠꦶꦪꦴꦢꦷꦤꦁ ꦱꦶꦱ꧀ꦱꦴꦤꦁ. ꦱꦶꦱ꧀ꦱꦴ ꦲꦶ ꦄꦴꦕꦫꦶꦪꦺ ꦥꦛꦶꦧꦢ꧀ꦣꦮꦸꦠ꧀ꦠꦶꦠ꧀ꦠꦴ ‘‘ꦧꦢ꧀ꦣꦴ’’ꦠꦶ ꦮꦸꦕ꧀ꦕꦤ꧀ꦠꦶ ꦄꦠ꧀ꦡꦶ ꦥꦚ꧀ꦲꦺꦤ ꦄꦴꦒꦩꦤ꧀ꦠꦶ ꦄꦠ꧀ꦡꦶꦏꦺꦴ ꦥꦚ꧀ꦲꦺꦤ ꦄꦴꦒꦠꦺꦴꦩ꧀ꦲꦶ, ꦄꦠ꧀ꦡꦶꦏꦴꦤꦁ ꦮꦴ ꦥꦚ꧀ꦲꦺꦤ ꦄꦴꦒꦩꦤꦁ, ꦥꦚ꧀ꦲꦺꦤ ꦄꦠ꧀ꦡꦶ ꦄꦴꦒꦩꦤꦁ ꦮꦴꦠꦶ.

꧙꧖꧕. ꦕꦠꦸꦠ꧀ꦡꦒꦴꦡꦴꦪ ꦮꦶꦗꦶꦒꦸꦕ꧀ꦖꦠꦺꦴꦠꦶ ꦗꦴꦠꦶꦄꦴꦢꦷꦲꦶ ꦄꦛ꧀ꦛꦷꦪꦠꦺꦴ ꦫꦶꦠ꧀ꦠꦩꦴꦱꦤꦤ꧀ꦠꦶ ꦮꦶꦮꦶꦠ꧀ꦠꦁ ꦩꦚ꧀ꦕꦥꦷꦜꦁ. ꦥꦧ꧀ꦧꦠꦴꦤꦁ ꦒꦸꦲꦴꦱꦸ ꦮꦴꦠꦶ ꦥꦧ꧀ꦧꦠꦒꦸꦲꦴꦱꦸ ꦮꦴ ꦫꦶꦠ꧀ꦠꦩꦴꦱꦤꦁ ꦨꦗꦠꦺꦴꦠꦶ ꦱꦩ꧀ꦧꦤ꧀ꦣꦶꦠꦧ꧀ꦧꦁ.

꧙꧖꧖. ꦥꦚ꧀ꦕꦩꦒꦴꦡꦴꦪ ꦈꦕ꧀ꦕꦴꦮꦕꦺꦱꦹꦠꦶ ꦲꦷꦤꦥꦟꦷꦠꦺꦱꦸ. ꦱꦪꦤꦺꦱꦹꦠꦶ ꦮꦶꦲꦴꦫꦴꦢꦷꦱꦸ ꦱꦺꦤꦴꦱꦤꦺꦱꦸ. ꦏꦷꦮꦤ꧀ꦠꦺꦴ ꦠꦠ꧀ꦡ ꦨꦺꦫꦮꦴꦠꦶ ꦏꦶꦠ꧀ꦠꦏꦴ ꦠꦠ꧀ꦡ ꦨꦪꦏꦴꦫꦟꦴ. ‘‘ꦏꦸꦮꦤ꧀ꦠꦺꦴ’’ꦠꦶꦥꦶ ꦥꦴꦜꦺꦴ, ꦏꦹꦗꦤ꧀ꦠꦺꦴꦠꦶ ꦕꦱ꧀ꦱ ꦄꦠ꧀ꦡꦺꦴ. ꦤ ꦥꦤ ꦥꦸꦧ꧀ꦧꦺꦤꦴꦥꦫꦁ ꦱꦤ꧀ꦣꦶꦪꦠꦶ.

꧙꧖꧗. ꦖꦛ꧀ꦜꦒꦴꦡꦴꦪ ꦏꦠꦷ ꦥꦫꦶꦱ꧀ꦱꦪꦴꦠꦶ ꦏꦶꦠ꧀ꦠꦏꦴ ꦈꦥꦢ꧀ꦢꦮꦴ. ꦄꦒꦠꦁ ꦢꦶꦱꦤ꧀ꦠꦶ ꦤꦶꦧ꧀ꦧꦴꦤꦁ. ꦠꦚ꧀ꦲꦶ ꦄꦒꦠꦥꦸꦧ꧀ꦧꦠ꧀ꦠꦴ ꦄꦒꦠꦁ ꦠꦡꦴ ꦤꦶꦢ꧀ꦢꦶꦱꦶꦠꦧ꧀ꦧꦠꦺꦴ ꦢꦶꦱꦴ ꦕꦴꦠꦶ. ꦠꦺꦤ ꦮꦸꦠ꧀ꦠꦁ ‘‘ꦄꦒꦠꦁ ꦢꦶꦱ’’ꦤ꧀ꦠꦶ. ꦄꦨꦶꦱꦩ꧀ꦨꦮꦺꦠꦶ ꦄꦨꦶꦨꦮꦺꦪ꧀ꦪ. ꦥꦤ꧀ꦠꦩ꧀ꦲꦷꦠꦶ ꦥꦫꦶꦪꦤ꧀ꦠꦺ.

꧙꧖꧘-꧙. ꦱꦠ꧀ꦠꦩꦒꦴꦡꦴꦪ ꦏ꧀ꦪꦴꦱ꧀ꦱ ꦧ꧀ꦪꦥ꧀ꦥꦡꦪꦺꦴ ꦄꦱ꧀ꦱꦹꦠꦶ ꦏꦷꦢꦶꦱꦴꦤꦶ ꦠꦱ꧀ꦱ ꦮꦕꦤꦴꦤꦶ ꦄꦱ꧀ꦱꦸ. ꦄꦛ꧀ꦜꦩꦒꦴꦡꦴꦪ ꦌꦏꦺꦴꦢꦶ ꦤꦶꦥꦏꦺꦴꦠꦶ ꦌꦏꦒ꧀ꦒꦕꦶꦠ꧀ꦠꦺꦴ ꦥꦟ꧀ꦝꦶꦠꦺꦴ.

꧙꧗꧐. ꦌꦮꦁ ꦄꦴꦪꦱ꧀ꦩꦠꦴ ꦱꦴꦫꦶꦥꦸꦠ꧀ꦠꦺꦤ ꦠꦷꦲꦶ ꦒꦴꦡꦴꦲꦶ ꦨꦒꦮꦤ꧀ꦠꦁ ꦡꦺꦴꦩꦺꦠ꧀ꦮꦴ ꦥꦚ꧀ꦕꦲꦶ ꦒꦴꦡꦴꦲꦶ – ꦥꦚ꧀ꦕꦱꦠꦴꦤꦁ ꦱꦶꦱ꧀ꦱꦴꦤꦩꦠ꧀ꦡꦴꦪ ꦱꦺꦤꦴꦱꦤꦒꦺꦴꦕꦫꦱꦷꦭꦮꦠꦴꦢꦷꦤꦶ ꦥꦸꦕ꧀ꦖꦶꦠꦺꦴ ꦨꦒꦮꦴ ꦠꦩꦠ꧀ꦡꦁ ꦥꦏꦴꦱꦺꦠꦸꦁ ‘‘ꦮꦶꦗꦶꦒꦸꦕ꧀ꦖꦩꦴꦤꦱ꧀ꦱꦴ’’ꦠꦶꦄꦴꦢꦶꦤꦴ ꦤꦪꦺꦤ ꦮꦶꦱ꧀ꦱꦗ꧀ꦗꦤꦩꦴꦫꦢ꧀ꦣꦺꦴ. ꦠꦠ꧀ꦡ ꦥꦜꦩꦒꦴꦡꦴꦪ ꦠꦴꦮꦠ꧀ꦡꦺꦴ – ꦗꦴꦠꦶꦄꦴꦢꦷꦲꦶ ꦮꦶꦗꦶꦒꦸꦕ꧀ꦖꦩꦴꦤꦱ꧀ꦱ ꦫꦶꦠ꧀ꦠꦴꦱꦤꦁ ꦱꦪꦤꦁ ꦱꦺꦮꦠꦺꦴ ꦕꦺ ꦱꦩ꧀ꦧꦺꦴꦣꦶꦏꦴꦩꦱ꧀ꦱ ꦱꦴꦫꦶꦥꦸꦠ꧀ꦠ, ꦨꦶꦏ꧀ꦑꦸꦤꦺꦴ ꦪꦢꦶꦢꦁ ꦦꦴꦱꦸ ꦪꦺꦴ ꦦꦴꦱꦸꦮꦶꦲꦴꦫꦺꦴ ꦪꦡꦴꦤꦸꦣꦩ꧀ꦩꦁ ꦪꦺꦴ ꦕ ꦄꦤꦸꦣꦩ꧀ꦩꦺꦴ, ꦠꦁ ꦠꦺ ꦥꦮꦏ꧀ꦑꦴꦩꦶ ꦪꦡꦴ ꦥꦗꦴꦤꦁ ꦪꦡꦴ ꦥꦗꦴꦤꦤ꧀ꦠꦺꦴ ꦮꦢꦺꦪ꧀ꦪ, ꦌꦮꦁ ꦮꦢꦴꦩꦷꦠꦶ.

꧙꧗꧑. ꦢꦸꦠꦶꦪꦒꦴꦡꦴꦪ ꦥꦫꦶꦪꦤ꧀ꦠꦕꦴꦫꦷꦠꦶ ꦱꦷꦭꦴꦢꦷꦱꦸ ꦕꦠꦹꦱꦸ ꦥꦫꦶꦪꦤ꧀ꦠꦺꦱꦸ ꦕꦫꦩꦴꦤꦺꦴ. ꦝꦁꦱꦴꦣꦶꦥꦴꦠꦴꦤꦤ꧀ꦠꦶ ꦥꦶꦔ꧀ꦒꦭꦩꦏ꧀ꦑꦶꦏꦴꦤꦚ꧀ꦕ ꦱꦺꦱꦩꦏ꧀ꦑꦶꦏꦴꦤꦚ꧀ꦕ. ꦱꦺꦱꦩꦏ꧀ꦑꦶꦏꦴ ꦲꦶ ꦠꦠꦺꦴ ꦠꦠꦺꦴ ꦄꦣꦶꦥꦠꦶꦠ꧀ꦮꦴ ꦑꦴꦢꦤ꧀ꦠꦶ, ꦠꦱ꧀ꦩꦴ ‘‘ꦄꦣꦶꦥꦴꦠꦴ’’ꦠꦶ ꦮꦸꦕ꧀ꦕꦤ꧀ꦠꦶ. ꦩꦤꦸꦱ꧀ꦱꦦꦱ꧀ꦱꦴꦤꦤ꧀ꦠꦶ ꦕꦺꦴꦫꦴꦢꦶꦦꦱ꧀ꦱꦴꦤꦁ.

꧙꧗꧒. ꦠꦠꦶꦪꦒꦴꦡꦴꦪ ꦥꦫꦣꦩ꧀ꦩꦶꦏꦴ ꦤꦴꦩ ꦱꦠ꧀ꦠ ꦱꦲꦣꦩ꧀ꦩꦶꦏꦮꦗ꧀ꦗꦴ ꦱꦧ꧀ꦧꦺꦥꦶ ꦧꦴꦲꦶꦫꦏꦴ. ꦏꦸꦱꦭꦴꦤꦸꦌꦱꦷꦠꦶ ꦏꦸꦱꦭꦣꦩ꧀ꦩꦺ ꦄꦤ꧀ꦮꦺꦱꦩꦴꦤꦺꦴ.

꧙꧗꧓. ꦕꦠꦸꦠ꧀ꦡꦒꦴꦡꦴꦪ ꦄꦴꦠꦔ꧀ꦏꦦꦱ꧀ꦱꦺꦤꦴꦠꦶ ꦫꦺꦴꦒꦦꦱ꧀ꦱꦺꦤ. ꦱꦷꦠꦁ ꦄꦠꦸꦟ꧀ꦲꦤ꧀ꦠꦶ ꦱꦷꦠꦚ꧀ꦕ ꦈꦟ꧀ꦲꦚ꧀ꦕ. ꦱꦺꦴ ꦠꦺꦲꦶ ꦦꦸꦛ꧀ꦜꦺꦴ ꦧꦲꦸꦣꦴꦠꦶ ꦱꦺꦴ ꦠꦺꦲꦶ ꦄꦴꦠꦔ꧀ꦏꦴꦢꦷꦲꦶ ꦄꦤꦺꦏꦺꦲꦶ ꦄꦴꦏꦴꦫꦺꦲꦶ ꦦꦸꦛ꧀ꦜꦺꦴ ꦱꦩꦴꦤꦺꦴꦥꦶ. ꦄꦤꦺꦴꦏꦺꦴꦠꦶ ꦄꦨꦶꦱꦔ꧀ꦑꦴꦫꦮꦶꦚ꧀ꦚꦴꦟꦴꦢꦷꦤꦁ ꦄꦤꦺꦴꦏꦴꦱꦨꦹꦠꦺꦴ.

꧙꧗꧔. ꦌꦮꦁ ‘‘ꦨꦶꦏ꧀ꦑꦸꦤꦺꦴ ꦮꦶꦗꦶꦒꦸꦕ꧀ꦖꦠꦺꦴ’’ꦠꦶꦄꦴꦢꦷꦲꦶ ꦠꦷꦲꦶ ꦒꦴꦡꦴꦲꦶ ꦥꦸꦛ꧀ꦜꦩꦠ꧀ꦡꦁ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦆꦢꦴꦤꦶ ‘‘ꦏ꧀ꦪꦴꦱ꧀ꦱ ꦧ꧀ꦪꦥ꧀ꦥꦡꦪꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦥꦸꦛ꧀ꦜꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ‘‘ꦡꦺꦪ꧀ꦪꦁ ꦤ ꦏꦴꦫꦺ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦦꦱ꧀ꦱꦺꦠꦶ ꦦꦫꦺꦪ꧀ꦪ. ꦪꦢꦴꦮꦶꦭꦠ꧀ꦠꦁ ꦩꦤꦱꦺꦴ ꦮꦶꦗꦚ꧀ꦚꦴꦠꦶ ꦪꦁ ꦕꦶꦠ꧀ꦠꦱ꧀ꦱ ꦄꦴꦮꦶꦭꦠ꧀ꦠꦁ ꦮꦶꦗꦴꦤꦺꦪ꧀ꦪ, ꦠꦁ ꦱꦧ꧀ꦧꦁ ‘‘ꦏꦟ꧀ꦲꦱ꧀ꦱ ꦥꦏ꧀ꦑꦺꦴ’’ꦠꦶ ꦮꦶꦤꦺꦴꦢꦪꦺꦪ꧀ꦪ.

꧙꧗꧕. ꦩꦹꦭꦩ꧀ꦥꦶ ꦠꦺꦱꦁ ꦥꦭꦶꦑꦚ꧀ꦚ ꦠꦶꦛ꧀ꦜꦺꦠꦶ ꦠꦺꦱꦁ ꦏꦺꦴꦣꦴꦠꦶꦩꦴꦤꦴꦤꦁ ꦪꦁ ꦄꦮꦶꦗ꧀ꦗꦴꦢꦶꦏꦁ ꦩꦹꦭꦁ, ꦠꦩ꧀ꦥꦶ ꦥꦭꦶꦑꦟꦶꦠ꧀ꦮꦴ ꦠꦶꦛ꧀ꦜꦺꦪ꧀ꦪ. ꦄꦢ꧀ꦣꦴ ꦨꦮꦤ꧀ꦠꦺꦴ ꦄꦨꦶꦱꦩ꧀ꦨꦮꦺꦪ꧀ꦪꦴꦠꦶ ꦌꦮꦁ ꦥꦶꦪꦥ꧀ꦥꦶꦪꦁ ꦄꦨꦶꦨꦮꦤ꧀ꦠꦺꦴ ꦌꦏꦁꦱꦺꦤꦺꦮ ꦄꦨꦶꦨꦮꦺꦪ꧀ꦪ, ꦤ ꦠꦠ꧀ꦫ ꦱꦶꦡꦶꦭꦁ ꦥꦫꦏ꧀ꦏꦩꦺꦪ꧀ꦪꦴꦠꦶ ꦄꦣꦶꦥ꧀ꦥꦴꦪꦺꦴ.

꧙꧗꧖. ꦥꦚ꧀ꦚꦁ ꦥꦸꦫꦏ꧀ꦑꦠ꧀ꦮꦴꦠꦶ ꦥꦚ꧀ꦚꦁ ꦥꦸꦧ꧀ꦧꦔ꧀ꦒꦩꦁ ꦏꦠ꧀ꦮꦴ. ꦏꦭ꧀ꦪꦴꦟꦥꦷꦠꦷꦠꦶ ꦏꦭ꧀ꦪꦴꦟꦴꦪ ꦥꦷꦠꦶꦪꦴ ꦱꦩꦤ꧀ꦤꦴꦒꦠꦺꦴ. ꦕꦠꦸꦫꦺꦴ ꦱꦲꦺꦡ ꦥꦫꦶꦢꦺꦮꦣꦩ꧀ꦩꦺꦠꦶ ꦄꦤꦤ꧀ꦠꦫꦒꦴꦡꦴꦪ ꦮꦸꦕ꧀ꦕꦩꦴꦤꦺ ꦥꦫꦶꦢꦺꦮꦤꦷꦪꦣꦩ꧀ꦩꦺ ꦱꦲꦺꦪ꧀ꦪ.

꧙꧗꧗. ꦏꦶꦁꦱꦹ ꦄꦱꦶꦱ꧀ꦱꦴꦩꦷꦠꦶ ꦏꦶꦁ ꦨꦸꦚ꧀ꦗꦶꦱ꧀ꦱꦴꦩꦶ. ꦏꦸꦮꦁ ꦮꦴ ꦄꦱꦶꦱ꧀ꦱꦤ꧀ꦠꦶ ꦏꦸꦲꦶꦁ ꦮꦴ ꦄꦱꦶꦱ꧀ꦱꦴꦩꦶ. ꦢꦸꦏ꧀ꦑꦁ ꦮꦠ ꦱꦺꦠ꧀ꦡ ꦏ꧀ꦮꦗ꧀ꦗ ꦱꦺꦱ꧀ꦱꦤ꧀ꦠꦶ ꦆꦩꦁ ꦫꦠ꧀ꦠꦶꦁ ꦢꦸꦏ꧀ꦑꦁ ꦱꦪꦶꦁ, ꦄꦗ꧀ꦗ ꦄꦴꦒꦩꦤꦫꦠ꧀ꦠꦶꦁ ꦏꦠ꧀ꦡ ꦱꦪꦶꦱ꧀ꦱꦁ. ꦌꦠꦺ ꦮꦶꦠꦏ꧀ꦏꦺꦠꦶ ꦌꦠꦺ ꦥꦶꦟ꧀ꦝꦥꦴꦠꦤꦶꦱ꧀ꦱꦶꦠꦺ ꦢ꧀ꦮꦺ, ꦱꦺꦤꦴꦱꦤꦤꦶꦱ꧀ꦱꦶꦠꦺ ꦢ꧀ꦮꦺꦠꦶ ꦕꦠ꧀ꦠꦴꦫꦺꦴ ꦮꦶꦠꦏ꧀ꦏꦺ. ꦄꦤꦶꦏꦺꦠꦕꦴꦫꦷꦠꦶ ꦄꦥꦭꦶꦧꦺꦴꦣꦕꦴꦫꦷ ꦤꦶꦠ꧀ꦠꦟ꧀ꦲꦕꦴꦫꦷ.

꧙꧗꧘. ꦏꦴꦭꦺꦠꦶ ꦥꦶꦟ꧀ꦝꦥꦴꦠꦏꦴꦭꦺ ꦥꦶꦟ꧀ꦝꦥꦴꦠꦱꦔ꧀ꦑꦴꦠꦁ ꦄꦤ꧀ꦤꦁ ꦮꦴ ꦕꦷꦮꦫꦏꦴꦭꦺ ꦕꦷꦮꦫꦱꦔ꧀ꦑꦴꦠꦁ ꦮꦱꦤꦁ ꦮꦴ ꦭꦢ꧀ꦣꦴ ꦣꦩ꧀ꦩꦺꦤ ꦱꦩꦺꦤꦴꦠꦶ ꦄꦣꦶꦥ꧀ꦥꦴꦪꦺꦴ. ꦩꦠ꧀ꦠꦁ ꦱꦺꦴ ꦗꦚ꧀ꦚꦴꦠꦶ ꦥꦛꦶꦒ꧀ꦒꦲꦟꦺ ꦕ ꦥꦫꦶꦨꦺꦴꦒꦺ ꦕ ꦱꦺꦴ ꦥꦩꦴꦟꦁ ꦗꦴꦤꦺꦪ꧀ꦪ. ꦆꦣꦴꦠꦶ ꦱꦴꦱꦤꦺ, ꦤꦶꦥꦴꦠꦩꦠ꧀ꦠꦩꦺꦮ ꦮꦴ ꦌꦠꦁ. ꦠꦺꦴꦱꦤꦠ꧀ꦡꦤ꧀ꦠꦶ ꦱꦤ꧀ꦠꦺꦴꦱꦠ꧀ꦡꦁ, ꦌꦠꦢꦠ꧀ꦡꦁ ꦩꦠ꧀ꦠꦁ ꦗꦴꦤꦺꦪ꧀ꦪꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱꦺꦴ ꦠꦺꦱꦸ ꦒꦸꦠ꧀ꦠꦺꦴꦠꦶ ꦱꦺꦴ ꦨꦶꦏ꧀ꦑꦸ ꦠꦺꦱꦸ ꦥꦕ꧀ꦕꦪꦺꦱꦸ ꦒꦸꦠ꧀ꦠꦺꦴ. ꦪꦠꦕꦴꦫꦷꦠꦶ ꦱꦁꦪꦠꦮꦶꦲꦴꦫꦺꦴ, ꦫꦏ꧀ꦑꦶꦠꦶꦫꦶꦪꦴꦥꦡꦺꦴ ꦫꦏ꧀ꦑꦶꦠꦏꦴꦪꦮꦕꦷꦩꦤꦺꦴꦢ꧀ꦮꦴꦫꦺꦴ ꦕꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ‘‘ꦪꦠꦶꦕꦴꦫꦷ’’ꦠꦶꦥꦶ ꦥꦴꦜꦺꦴ, ꦱꦺꦴꦪꦺꦮꦠ꧀ꦡꦺꦴ. ꦫꦸꦱꦶꦠꦺꦴꦠꦶ ꦫꦺꦴꦱꦶꦠꦺꦴ, ꦓꦛ꧀ꦛꦶꦠꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ.

꧙꧗꧙. ꦙꦴꦤꦴꦤꦸꦪꦸꦠ꧀ꦠꦺꦴꦠꦶ ꦄꦤꦸꦥꦤ꧀ꦤꦸꦥ꧀ꦥꦴꦢꦤꦺꦤ ꦈꦥ꧀ꦥꦤ꧀ꦤꦴꦱꦺꦮꦤꦺꦤ ꦕ ꦙꦴꦤꦺ ꦄꦤꦸꦪꦸꦠ꧀ꦠꦺꦴ. ꦈꦥꦺꦏ꧀ꦑꦩꦴꦫꦧ꧀ꦨ ꦱꦩꦴꦲꦶꦠꦠ꧀ꦠꦺꦴꦠꦶ ꦕꦠꦸꦠ꧀ꦡꦗ꧀ꦙꦴꦤꦸꦥꦺꦏ꧀ꦑꦁ ꦈꦥ꧀ꦥꦴꦢꦺꦠ꧀ꦮꦴ ꦱꦩꦴꦲꦶꦠꦕꦶꦠ꧀ꦠꦺꦴ. ꦠꦏ꧀ꦏꦴꦱꦪꦁ ꦏꦸꦏ꧀ꦏꦸꦕ꧀ꦕꦶꦪꦹꦥꦖꦶꦤ꧀ꦢꦺꦠꦶ ꦏꦴꦩꦮꦶꦠꦏ꧀ꦏꦴꦢꦶꦁ ꦠꦏ꧀ꦏꦚ꧀ꦕ, ꦏꦴꦩꦱꦚ꧀ꦚꦴꦢꦶꦁ ꦠꦱ꧀ꦱ ꦠꦏ꧀ꦏꦱ꧀ꦱ ꦄꦴꦱꦪꦚ꧀ꦕ, ꦲꦠ꧀ꦡꦏꦸꦏ꧀ꦏꦸꦕ꧀ꦕꦴꦢꦶꦁ ꦏꦸꦏ꧀ꦏꦸꦕ꧀ꦕꦶꦪꦚ꧀ꦕ ꦈꦥꦕ꧀ꦖꦶꦤ꧀ꦢꦺꦪ꧀ꦪ.

꧙꧘꧐. ꦕꦸꦢꦶꦠꦺꦴ ꦮꦕꦷꦨꦶ ꦱꦠꦶꦩꦴꦨꦶꦤꦤ꧀ꦢꦺꦠꦶ ꦈꦥꦗ꧀ꦙꦴꦪꦴꦢꦷꦲꦶ ꦮꦴꦕꦴꦲꦶ ꦕꦺꦴꦢꦶꦠꦺꦴ ꦱꦩꦴꦤꦺꦴ ꦱꦠꦶꦩꦴ ꦲꦸꦠ꧀ꦮꦴ ꦠꦁ ꦕꦺꦴꦢꦤꦁ ꦄꦨꦶꦤꦤ꧀ꦢꦺꦪ꧀ꦪ. ꦮꦴꦕꦁ ꦥꦩꦸꦚ꧀ꦕꦺ ꦏꦸꦱꦭꦤ꧀ꦠꦶ ꦚꦴꦟꦱꦩꦸꦛ꧀ꦜꦶꦠꦁ ꦮꦴꦕꦁ ꦥꦩꦸꦚ꧀ꦕꦺꦪ꧀ꦪ. ꦤꦴꦠꦶꦮꦺꦭꦤ꧀ꦠꦶ ꦄꦠꦶꦮꦺꦭꦁ ꦥꦤ ꦮꦴꦕꦁ ꦏꦴꦭꦮꦺꦭꦚ꧀ꦕ ꦱꦷꦭꦮꦺꦭꦚ꧀ꦕ ꦄꦠꦶꦏ꧀ꦏꦤ꧀ꦠꦁ ꦤꦥ꧀ꦥꦩꦸꦚ꧀ꦕꦺꦪ꧀ꦪ. ꦗꦤꦮꦴꦢꦣꦩ꧀ꦩꦴꦪꦴꦠꦶ ꦗꦤꦮꦴꦢꦏꦡꦴꦪ. ꦤ ꦕꦺꦠꦪꦺꦪ꧀ꦪꦴꦠꦶ ꦕꦺꦠꦤꦁ ꦤ ꦈꦥ꧀ꦥꦴꦢꦺꦪ꧀ꦪ.

꧙꧘꧑. ꦄꦡꦴꦥꦫꦤ꧀ꦠꦶ ꦄꦡ ꦆꦢꦴꦤꦶ ꦆꦠꦺꦴ ꦥꦫꦩ꧀ꦥꦶ. ꦥꦚ꧀ꦕ ꦫꦗꦴꦤꦷꦠꦶ ꦫꦹꦥꦫꦴꦒꦴꦢꦷꦤꦶ ꦥꦚ꧀ꦕ ꦫꦗꦴꦤꦶ. ꦪꦺꦱꦁ ꦱꦠꦷꦩꦴ ꦮꦶꦤꦪꦴꦪ ꦱꦶꦏ꧀ꦑꦺꦠꦶ ꦪꦺꦱꦁ ꦈꦥꦛ꧀ꦜꦶꦠꦱ꧀ꦱꦠꦶ ꦲꦸꦠ꧀ꦮꦴ ꦮꦶꦤꦪꦤꦠ꧀ꦡꦁ ꦠꦶꦱ꧀ꦱꦺꦴ ꦱꦶꦏ꧀ꦑꦴ ꦱꦶꦏ꧀ꦑꦺꦪ꧀ꦪ. ꦌꦮꦁ ꦱꦶꦏ꧀ꦑꦤ꧀ꦠꦺꦴ ꦲꦶ ꦫꦹꦥꦺꦱꦸ…ꦥꦺ… ꦦꦱ꧀ꦱꦺꦱꦸ ꦱꦲꦺꦡ ꦫꦴꦒꦁ, ꦤ ꦄꦚ꧀ꦚꦺꦠꦶ.

꧙꧘꧒. ꦠꦠꦺꦴ ꦱꦺꦴ ꦠꦺꦱꦁ ꦮꦶꦤꦪꦴꦪ ꦱꦶꦏ꧀ꦑꦤ꧀ꦠꦺꦴ ꦄꦤꦸꦏ꧀ꦏꦩꦺꦤ – ꦌꦠꦺꦱꦸ ꦣꦩ꧀ꦩꦺꦱꦹꦠꦶ ꦒꦴꦡꦴ. ꦠꦠ꧀ꦡ ꦌꦠꦺꦱꦹꦠꦶ ꦫꦹꦥꦴꦢꦷꦱꦸ. ꦏꦴꦭꦺꦤ ꦱꦺꦴ ꦱꦩ꧀ꦩꦴ ꦣꦩ꧀ꦩꦁ ꦥꦫꦶꦮꦷꦩꦁꦱꦩꦴꦤꦺꦴꦠꦶ ꦱꦺꦴ ꦨꦶꦏ꧀ꦑꦸ ꦪ꧀ꦮꦴꦪꦁ ‘‘ꦈꦢ꧀ꦣꦠꦺ ꦕꦶꦠ꧀ꦠꦺ ꦱꦩꦴꦣꦶꦱ꧀ꦱ ꦏꦴꦭꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦏꦴꦭꦺꦴ ꦮꦸꦠ꧀ꦠꦺꦴ, ꦠꦺꦤ ꦏꦴꦭꦺꦤ ꦱꦧ꧀ꦧꦁ ꦱꦔ꧀ꦑꦠꦣꦩ꧀ꦩꦁ ꦄꦤꦶꦕ꧀ꦕꦴꦢꦶꦤꦪꦺꦤ ꦥꦫꦶꦮꦷꦩꦁꦱꦩꦴꦤꦺꦴ. ꦌꦏꦺꦴꦢꦶꦨꦹꦠꦺꦴ ꦮꦶꦲꦤꦺ ꦠꦩꦁ ꦱꦺꦴꦠꦶ ꦱꦺꦴ ꦌꦏꦒ꧀ꦒꦕꦶꦠ꧀ꦠꦺꦴ ꦱꦧ꧀ꦧꦁ ꦩꦺꦴꦲꦴꦢꦶꦠꦩꦁ ꦮꦶꦲꦤꦺꦪ꧀ꦪ. ꦤꦠ꧀ꦡꦶ ꦌꦠ꧀ꦡ ꦱꦁꦱꦪꦺꦴ. ꦱꦺꦱꦁ ꦱꦧ꧀ꦧꦠ꧀ꦡ ꦥꦴꦏꦛꦩꦺꦮ.

ꦌꦮꦁ ꦨꦒꦮꦴ ꦄꦫꦲꦠ꧀ꦠꦤꦶꦏꦹꦛꦺꦤ ꦢꦺꦱꦤꦁ ꦤꦶꦛ꧀ꦜꦴꦥꦺꦱꦶ. ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦥꦚ꧀ꦕꦱꦠꦴ ꦨꦶꦏ꧀ꦑꦹ ꦄꦫꦲꦠ꧀ꦠꦁ ꦥꦠ꧀ꦠꦴ, ꦠꦶꦁꦱꦏꦺꦴꦛꦶꦱꦔ꧀ꦑ꧀ꦪꦴꦤꦚ꧀ꦕ ꦢꦺꦮꦩꦤꦸꦱ꧀ꦱꦴꦤꦁ ꦣꦩ꧀ꦩꦴꦨꦶꦱꦩꦪꦺꦴ ꦄꦲꦺꦴꦱꦷꦠꦶ.

ꦥꦫꦩꦠ꧀ꦡꦗꦺꦴꦠꦶꦏꦴꦪ ꦑꦸꦢ꧀ꦢꦏ-ꦄꦛ꧀ꦜꦏꦡꦴꦪ

ꦱꦸꦠ꧀ꦠꦤꦶꦥꦴꦠ-ꦄꦛ꧀ꦜꦏꦡꦴꦪ ꦱꦴꦫꦶꦥꦸꦠ꧀ꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦤꦶꦛ꧀ꦜꦶꦠꦺꦴ ꦕ ꦕꦠꦸꦠ꧀ꦡꦺꦴ ꦮꦒ꧀ꦒꦺꦴ ꦄꦠ꧀ꦡꦮꦟ꧀ꦟꦤꦴꦤꦪꦠꦺꦴ, ꦤꦴꦩꦺꦤ

ꦄꦛ꧀ꦜꦏꦮꦒ꧀ꦒꦺꦴꦠꦶ.