꧙. ꦲꦺꦩꦮꦠꦱꦸꦠ꧀ꦠꦮꦟ꧀ꦟꦤꦴ

ꦄꦗ꧀ꦗ ꦥꦤ꧀ꦤꦫꦱꦺꦴꦠꦶ ꦲꦺꦩꦮꦠꦱꦸꦠ꧀ꦠꦁ. ꦏꦴ ꦈꦥ꧀ꦥꦠ꧀ꦠꦶ? ꦥꦸꦕ꧀ꦖꦴꦮꦱꦶꦏꦴ ꦈꦥ꧀ꦥꦠ꧀ꦠꦶ. ꦲꦺꦩꦮꦠꦺꦤ ꦲꦶ ꦥꦸꦛ꧀ꦜꦺꦴ ꦨꦒꦮꦴ ‘‘ꦖꦱꦸ ꦭꦺꦴꦏꦺꦴ ꦱꦩꦸꦥ꧀ꦥꦤ꧀ꦤꦺꦴ’’ꦠꦶꦄꦴꦢꦷꦤꦶ ꦄꦨꦴꦱꦶ. ꦠꦠ꧀ꦡ ‘‘ꦄꦗ꧀ꦗ ꦥꦤ꧀ꦤꦫꦱꦺꦴ’’ꦠꦶꦄꦴꦢꦶ ꦱꦴꦠꦴꦒꦶꦫꦺꦤ ꦮꦸꦠ꧀ꦠꦁ, ‘‘ꦆꦠꦶ ꦱꦴꦠꦴꦒꦶꦫꦺꦴ’’ꦠꦶꦄꦴꦢꦶ ꦱꦔ꧀ꦒꦷꦠꦶꦏꦴꦫꦺꦲꦶ, ‘‘ꦏꦕ꧀ꦕꦶꦩꦤꦺꦴ’’ꦠꦶꦄꦴꦢꦶ ꦲꦺꦩꦮꦠꦺꦤ, ‘‘ꦖꦱꦸ ꦭꦺꦴꦏꦺꦴ’’ꦠꦶꦄꦴꦢꦶ ꦨꦒꦮꦠꦴ, ꦠꦁ ꦱꦧ꧀ꦧꦩ꧀ꦥꦶ ꦱꦩꦺꦴꦣꦴꦤꦺꦠ꧀ꦮꦴ ‘‘ꦲꦺꦩꦮꦠꦱꦸꦠ꧀ꦠ’’ꦤ꧀ꦠꦶ ꦮꦸꦕ꧀ꦕꦠꦶ. ‘‘ꦱꦴꦠꦴꦒꦶꦫꦶꦱꦸꦠ꧀ꦠ’’ꦤ꧀ꦠꦶ ꦌꦏꦕ꧀ꦕꦺꦲꦶ.

ꦠꦠ꧀ꦡ ꦪꦴꦪꦁ ‘‘ꦄꦗ꧀ꦗ ꦥꦤ꧀ꦤꦫꦱꦺꦴ’’ꦠꦶꦄꦴꦢꦶ ꦒꦴꦡꦴ. ꦠꦱ꧀ꦱꦴ ꦈꦥ꧀ꦥꦠ꧀ꦠꦶ – ꦆꦩꦱ꧀ꦩꦶꦁꦪꦺꦮ ꦨꦢ꧀ꦢꦏꦥ꧀ꦥꦺ ꦮꦷꦱꦠꦶꦮꦱ꧀ꦱꦱꦲꦱ꧀ꦱꦴꦪꦸꦏꦺꦱꦸ ꦥꦸꦫꦶꦱꦺꦱꦸ ꦈꦥ꧀ꦥꦗ꧀ꦗꦶꦠ꧀ꦮꦴ ꦱꦺꦴꦭ꦳ꦱꦮꦱ꧀ꦱꦱꦲꦱ꧀ꦱꦴꦪꦸꦏꦴꦤꦶ ꦜꦠ꧀ꦮꦴ ꦥꦫꦶꦤꦶꦧ꧀ꦧꦸꦠꦱ꧀ꦱ ꦨꦒꦮꦠꦺꦴ ꦏꦱ꧀ꦱꦥꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦩꦲꦠꦶꦪꦴ ꦥꦹꦗꦴꦪ ꦱꦫꦷꦫꦏꦶꦕ꧀ꦕꦁ ꦄꦏꦁꦱꦸ. ꦠꦱ꧀ꦱ ꦣꦴꦠꦸꦪꦺꦴ ꦄꦮꦶꦏꦶꦫꦶꦠ꧀ꦮꦴ ꦱꦸꦮꦟ꧀ꦟꦏ꧀ꦑꦤ꧀ꦣꦺꦴ ꦮꦶꦪ ꦌꦏꦒ꧀ꦓꦤꦴ ꦲꦸꦠ꧀ꦮꦴ ꦄꦛ꧀ꦜꦁꦱꦸ. ꦢꦷꦓꦴꦪꦸꦏꦧꦸꦢ꧀ꦣꦴꦤꦚ꧀ꦲꦶ ꦌꦱꦴ ꦣꦩ꧀ꦩꦠꦴ. ꦄꦥ꧀ꦥꦴꦪꦸꦏꦧꦸꦢ꧀ꦣꦴ ꦥꦤ ꦪꦱ꧀ꦩꦴ ꦧꦲꦸꦠꦫꦺꦤ ꦗꦤꦺꦤ ꦄꦢꦶꦛ꧀ꦜꦴ ꦌꦮ ꦥꦫꦶꦤꦶꦧ꧀ꦧꦴꦪꦤ꧀ꦠꦶ, ꦠꦱ꧀ꦩꦴ ꦣꦴꦠꦸꦥꦹꦗꦩ꧀ꦥꦶ ꦏꦠ꧀ꦮꦴ ‘‘ꦠꦠ꧀ꦡ ꦠꦠ꧀ꦡ ꦗꦤꦴ ꦥꦸꦚ꧀ꦚꦁ ꦥꦱꦮꦶꦱ꧀ꦱꦤ꧀ꦠꦷ’’ꦠꦶ ꦄꦤꦸꦏꦩ꧀ꦥꦴꦪ ‘‘ꦣꦴꦠꦸꦪꦺꦴ ꦮꦶꦏꦶꦫꦤ꧀ꦠꦹ’’ꦠꦶ ꦄꦣꦶꦛ꧀ꦜꦲꦤ꧀ꦠꦶ. ꦠꦺꦤ ꦠꦺꦱꦁ ꦱꦸꦮꦟ꧀ꦟꦕꦸꦟ꧀ꦟꦴꦤꦶ ꦮꦶꦪ ꦣꦴꦠꦸꦪꦺꦴ ꦮꦶꦏꦶꦫꦤ꧀ꦠꦶ, ꦱꦺꦪ꧀ꦪꦡꦴꦥꦶ ꦄꦩ꧀ꦲꦴꦏꦁ ꦨꦒꦮꦠꦺꦴ.

ꦩꦤꦸꦱ꧀ꦱꦴ ꦠꦱ꧀ꦱ ꦨꦒꦮꦠꦺꦴ ꦌꦏꦁꦪꦺꦮ ꦣꦴꦠꦸꦓꦫꦁ ꦏꦠ꧀ꦮꦴ ꦕꦺꦠꦶꦪꦁ ꦥꦠꦶꦛ꧀ꦜꦴꦥꦺꦱꦸꦁ ꦪꦺꦴꦗꦤꦁ ꦈꦧ꧀ꦧꦺꦣꦺꦤ ꦥꦫꦶꦏ꧀ꦑꦺꦥꦺꦤ ꦕ. ꦠꦱ꧀ꦱ ꦌꦏꦺꦏꦒꦴꦮꦸꦠꦤ꧀ꦠꦫꦴꦤꦶ ꦕꦠ꧀ꦠꦴꦫꦶ ꦢ꧀ꦮꦴꦫꦴꦤꦶ ꦄꦲꦺꦱꦸꦁ. ꦌꦏꦁ ꦢ꧀ꦮꦴꦫꦁ ꦏꦶꦏꦷ ꦫꦴꦗꦴ ꦄꦒ꧀ꦒꦲꦺꦱꦶ; ꦌꦏꦁ ꦠꦱ꧀ꦱꦺꦮ ꦥꦸꦠ꧀ꦠꦺꦴ ꦥꦡꦮꦶꦤ꧀ꦣꦫꦺꦴ ꦤꦴꦩ; ꦌꦏꦁ ꦱꦺꦤꦴꦥꦠꦶꦥꦩꦸꦑꦴ ꦄꦩꦕ꧀ꦕꦴ; ꦌꦏꦁ ꦱꦺꦛ꧀ꦜꦶꦥꦩꦸꦑꦴ ꦗꦴꦤꦥꦢꦴ ꦫꦠ꧀ꦠꦱꦸꦮꦟ꧀ꦟꦩꦪꦴ ꦌꦏꦒ꧀ꦓꦤꦴ ꦱꦸꦮꦟ꧀ꦟꦫꦱꦥꦛꦶꦨꦴꦒꦴ ꦕ ꦤꦴꦤꦴꦫꦠꦤꦩꦪꦴ ꦆꦛ꧀ꦜꦏꦴ ꦄꦲꦺꦱꦸꦁ ꦌꦏꦺꦏꦴ ꦱꦠꦱꦲꦱ꧀ꦱꦒ꧀ꦓꦤꦶꦏꦴ. ꦠꦺ ꦲꦫꦶꦠꦴꦭꦩꦤꦺꦴꦱꦶꦭꦴꦲꦶ ꦩꦠ꧀ꦠꦶꦏꦴꦏꦶꦕ꧀ꦕꦁ ꦱꦸꦫꦨꦶꦠꦺꦭꦺꦤ ꦈꦢꦏꦏꦶꦕ꧀ꦕꦚ꧀ꦕ ꦏꦠ꧀ꦮꦴ ꦠꦁ ꦕꦺꦠꦶꦪꦁ ꦥꦠꦶꦛ꧀ꦜꦴꦥꦺꦱꦸꦁ.

ꦌꦮꦁ ꦥꦠꦶꦛ꧀ꦜꦶꦠꦺ ꦕꦺꦠꦶꦪꦺ ꦢ꧀ꦮꦺ ꦏꦸꦭꦥꦸꦠ꧀ꦠꦴ ꦱꦲꦴꦪꦏꦴ ꦤꦶꦏ꧀ꦑꦩꦶꦠ꧀ꦮꦴ ꦱꦩ꧀ꦩꦸꦑꦱꦴꦮꦏꦴꦤꦁ ꦡꦺꦫꦴꦤꦁ ꦱꦤ꧀ꦠꦶꦏꦺ ꦥꦧ꧀ꦧꦗꦶꦁꦱꦸ. ꦢꦷꦓꦴꦪꦸꦏꦧꦸꦢ꧀ꦣꦴꦤꦚ꧀ꦲꦶ ꦱꦩ꧀ꦩꦸꦑꦱꦴꦮꦏꦴꦪꦺꦮ ꦥꦧ꧀ꦧꦴꦗꦺꦤ꧀ꦠꦶ, ꦈꦥꦱꦩ꧀ꦥꦴꦢꦺꦤ꧀ꦠꦶ, ꦤꦶꦱ꧀ꦱꦪꦁ ꦢꦺꦤ꧀ꦠꦶ, ꦆꦠꦫꦺ ꦤ ꦭꦨꦤ꧀ꦠꦶ. ꦠꦠꦺꦴ ꦠꦺ ꦏꦸꦭꦥꦸꦠ꧀ꦠꦴ ‘‘ꦱꦴꦱꦤꦺ, ꦨꦤ꧀ꦠꦺ, ꦏꦠꦶ ꦣꦸꦫꦴꦤꦷ’’ꦠꦶ ꦥꦸꦕ꧀ꦖꦶꦁꦱꦸ. ꦡꦺꦫꦴ ‘‘ꦢ꧀ꦮꦺ ꦣꦸꦫꦴꦤꦷ’’ꦠꦶ ꦏꦡꦺꦱꦸꦁ – ‘‘ꦮꦴꦱꦣꦸꦫꦁ, ꦥꦫꦶꦪꦠ꧀ꦠꦶꦣꦸꦫꦚ꧀ꦕꦴ’’ꦠꦶ. ꦠꦠ꧀ꦡ ꦥꦧ꧀ꦧꦗꦶꦠꦺꦤ ꦏꦸꦭꦥꦸꦠ꧀ꦠꦺꦤ ꦄꦴꦕꦫꦶꦪꦸꦥꦗ꧀ꦙꦴꦪꦴꦤꦁ ꦱꦤ꧀ꦠꦶꦏꦺ ꦥꦚ꧀ꦕ ꦮꦱ꧀ꦱꦴꦤꦶ ꦮꦱꦶꦠ꧀ꦮꦴ, ꦮꦠ꧀ꦠꦥꦛꦶꦮꦠ꧀ꦠꦁ ꦥꦹꦫꦺꦠ꧀ꦮꦴ, ꦥꦴꦠꦶꦩꦺꦴꦏ꧀ꦑꦁ ꦢ꧀ꦮꦺ ꦠꦷꦟꦶ ꦨꦴꦟꦮꦴꦫꦱꦸꦠ꧀ꦠꦤ꧀ꦠꦴꦤꦶ ꦕ ꦥꦒꦸꦟꦁ ꦏꦠ꧀ꦮꦴ, ꦏꦩ꧀ꦩꦛ꧀ꦜꦴꦤꦁ ꦈꦒ꧀ꦒꦲꦺꦠ꧀ꦮꦴ, ꦏꦸꦭꦺ ꦮꦴ ꦒꦟꦺ ꦮꦴ ꦤꦶꦫꦴꦭꦪꦺꦤ ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ, ꦄꦫꦲꦠ꧀ꦠꦱꦕ꧀ꦖꦶꦏꦶꦫꦶꦪꦴꦪ ꦓꦛꦶꦠꦧ꧀ꦧꦁ ꦮꦴꦪꦩꦶꦠꦧ꧀ꦧꦁ, ꦌꦠꦁ ꦮꦴꦱꦣꦸꦫꦁ. ꦄꦠ꧀ꦠꦤꦺꦴ ꦡꦴꦩꦺꦤ ꦥꦤ ꦌꦏꦁ ꦮꦴ ꦤꦶꦏꦴꦪꦁ ꦥꦫꦶꦪꦴꦥꦸꦟꦶꦠ꧀ꦮꦴ ꦢ꧀ꦮꦺ ꦮꦴ ꦥꦚ꧀ꦕ ꦮꦴ ꦤꦶꦏꦴꦪꦺ ꦥꦫꦶꦪꦠ꧀ꦠꦶꦠꦺꦴ ꦕ ꦄꦠ꧀ꦡꦠꦺꦴ ꦕ ꦱꦸꦮꦶꦱꦢꦁ ꦱꦴꦱꦤꦁ ꦄꦤꦸꦪꦸꦚ꧀ꦗꦶꦠꦧ꧀ꦧꦁ, ꦌꦠꦁ ꦥꦫꦶꦪꦠ꧀ꦠꦶꦣꦸꦫꦤ꧀ꦠꦶ. ꦄꦡ ꦠꦺ ꦏꦸꦭꦥꦸꦠ꧀ꦠꦴ ‘‘ꦢ꧀ꦮꦶꦤ꧀ꦤꦁ ꦣꦸꦫꦴꦤꦁ ꦮꦴꦱꦣꦸꦫꦩꦺꦮ ꦱꦺꦛ꧀ꦜ’’ꦤ꧀ꦠꦶ ꦮꦠ꧀ꦮꦴ ‘‘ꦩꦪꦁ ꦥꦤꦩ꧀ꦲꦴ ꦢꦲꦫꦴ, ꦮꦸꦝ꧀ꦞꦏꦴꦭꦺ ꦮꦴꦱꦣꦸꦫꦁ ꦥꦫꦶꦥꦹꦫꦺꦱ꧀ꦱꦴꦩ, ꦥꦫꦶꦪꦠ꧀ꦠꦶꦣꦸꦫꦁ ꦠꦴꦮ ꦥꦹꦫꦺꦩꦴ’’ꦠꦶ ꦥꦫꦶꦪꦠ꧀ꦠꦶꦁ ꦄꦴꦫꦨꦶꦁꦱꦸ. ꦠꦺ ꦥꦏꦠꦶꦪꦴꦮ ꦥꦚ꧀ꦚꦮꦤ꧀ꦠꦺꦴ ꦤꦕꦶꦫꦱ꧀ꦱꦺꦮ ꦱꦏꦭꦺ ꦧꦸꦢ꧀ꦣꦮꦕꦤꦺ ꦥꦏꦠꦚ꧀ꦚꦤꦺꦴ ꦮꦶꦤꦪꦺ ꦕ ꦄꦠꦶꦮꦶꦪ ꦮꦶꦤꦶꦕ꧀ꦖꦪꦏꦸꦱꦭꦴ ꦄꦲꦺꦱꦸꦁ. ꦠꦺꦱꦁ ꦥꦫꦶꦪꦠ꧀ꦠꦶꦁ ꦤꦶꦱ꧀ꦱꦴꦪ ꦥꦫꦶꦮꦴꦫꦺꦴ ꦈꦥ꧀ꦥꦗ꧀ꦗꦶ, ꦥꦫꦶꦮꦴꦫꦁ ꦤꦶꦱ꧀ꦱꦴꦪ ꦭꦴꦨꦺꦴ, ꦌꦏꦩꦺꦏꦱ꧀ꦱ ꦥꦚ꧀ꦕꦱꦠꦥꦚ꧀ꦕꦱꦠꦴ ꦨꦶꦏ꧀ꦑꦹ ꦥꦫꦶꦮꦴꦫꦴ ꦄꦲꦺꦱꦸꦁ. ꦠꦺ ꦱꦠ꧀ꦡꦸꦱꦴꦱꦤꦁ ꦢꦷꦥꦺꦤ꧀ꦠꦴ ꦮꦶꦲꦫꦶꦁꦱꦸ, ꦥꦸꦤ ꦧꦸꦢ꧀ꦣꦏꦴꦭꦺꦴ ꦮꦶꦪ ꦄꦲꦺꦴꦱꦶ.

ꦠꦢꦴ ꦢ꧀ꦮꦺ ꦨꦶꦏ꧀ꦑꦹ ꦒꦴꦩꦏꦴꦮꦴꦱꦺ ꦮꦶꦲꦫꦤ꧀ꦠꦶ ꦣꦩ꧀ꦩꦮꦴꦢꦷ ꦕ ꦄꦣꦩ꧀ꦩꦮꦴꦢꦷ ꦕ. ꦄꦣꦩ꧀ꦩꦮꦴꦢꦷ ꦕꦟ꧀ꦝꦺꦴ ꦲꦺꦴꦠꦶ ꦦꦫꦸꦱꦺꦴ, ꦩꦸꦑꦫꦺꦴ, ꦠꦱ꧀ꦱ ꦄꦗ꧀ꦙꦴꦕꦴꦫꦺꦴ ꦆꦠꦫꦱ꧀ꦱ ꦥꦴꦏꦛꦺꦴ ꦲꦺꦴꦠꦶ. ꦠꦠꦺꦴ ꦤꦁ ‘‘ꦆꦢꦁ ꦠꦺ, ꦄꦴꦮꦸꦱꦺꦴ, ꦏꦩ꧀ꦩꦁ ꦱꦴꦱꦤꦱ꧀ꦱ ꦄꦥ꧀ꦥꦠꦶꦫꦹꦥ’’ꦤ꧀ꦠꦶ ꦕꦺꦴꦢꦺꦱꦶ. ꦱꦺꦴ ‘‘ꦏꦶꦁ ꦠꦺ ꦢꦶꦛ꧀ꦜꦁ, ꦏꦶꦁ ꦱꦸꦠ’’ꦤ꧀ꦠꦶ ꦮꦶꦏ꧀ꦑꦶꦥꦠꦶ. ꦆꦠꦫꦺꦴ ‘‘ꦮꦶꦤꦪꦣꦫꦴ ꦗꦴꦤꦶꦱ꧀ꦱꦤ꧀ꦠꦷ’’ꦠꦶ ꦄꦴꦲ. ꦠꦠꦺꦴ ꦄꦣꦩ꧀ꦩꦮꦴꦢꦷ ‘‘ꦱꦕꦺ ꦆꦩꦁ ꦮꦠ꧀ꦡꦸꦁ ꦮꦶꦤꦪꦣꦫꦴ ꦮꦶꦤꦶꦕ꧀ꦖꦶꦤꦶꦱ꧀ꦱꦤ꧀ꦠꦶ, ꦄꦢ꧀ꦣꦴ ꦩꦺ ꦱꦴꦱꦤꦺ ꦥꦠꦶꦛ꧀ꦜꦴ ꦤ ꦨꦮꦶꦱ꧀ꦱꦠꦷ’’ꦠꦶ ꦚꦠ꧀ꦮꦴ ꦄꦠ꧀ꦠꦤꦺꦴ ꦥꦏ꧀ꦑꦁ ꦏꦴꦠꦸꦏꦴꦩꦺꦴ ꦠꦴꦮꦢꦺꦮ ꦥꦫꦶꦏ꧀ꦑꦴꦫꦺ ꦄꦴꦢꦴꦪ ꦠꦺ ꦢ꧀ꦮꦺ ꦡꦺꦫꦺ ꦈꦥꦱꦔ꧀ꦏꦩꦶꦠ꧀ꦮꦴ ꦱꦩꦟꦥꦫꦶꦏ꧀ꦑꦴꦫꦺ ꦢꦠ꧀ꦮꦴ ꦠꦺꦱꦁ ꦤꦶꦱ꧀ꦱꦪꦺꦤ ꦮꦶꦲꦫꦶꦠꦸꦩꦴꦫꦢ꧀ꦣꦺꦴ. ꦱꦧ꧀ꦧꦚ꧀ꦕ ꦤꦺꦱꦁ ꦈꦥꦛ꧀ꦜꦴꦤꦁ ꦏꦫꦺꦴꦤ꧀ꦠꦺꦴ ꦱꦏ꧀ꦏꦕ꧀ꦕꦁ ꦮꦠ꧀ꦠꦥꦛꦶꦮꦠ꧀ꦠꦁ ꦥꦹꦫꦺꦠꦸꦏꦴꦩꦺꦴ ꦮꦶꦪ ꦄꦏꦴꦱꦶ. ꦠꦠꦺꦴ ꦌꦏꦢꦶꦮꦱꦁ ꦈꦥꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦠꦺꦲꦶ ꦮꦶꦱ꧀ꦱꦗ꧀ꦗꦶꦪꦩꦴꦤꦺꦴꦥꦶ ꦄꦛ꧀ꦜꦴꦱꦶꦪꦺꦮ. ꦡꦺꦫꦴ ‘‘ꦏꦶꦚ꧀ꦕꦶ ꦮꦠ꧀ꦠꦧ꧀ꦧꦩꦠ꧀ꦡꦷ’’ꦠꦶ ꦠꦁ ꦥꦸꦕ꧀ꦖꦶꦁꦱꦸ. ꦱꦺꦴ ‘‘ꦄꦴꦩ, ꦨꦤ꧀ꦠꦺ, ꦌꦏꦺꦤ ꦩꦺ ꦨꦶꦏ꧀ꦑꦸꦤꦴ ꦱꦲ ꦄꦗ꧀ꦙꦴꦕꦴꦫꦁ ꦥꦛꦶꦕ꧀ꦕ ꦮꦶꦮꦴꦢꦺꦴ ꦄꦠ꧀ꦡꦶ. ꦱꦺꦴ ꦪꦢꦶ ꦠꦁ ꦮꦠ꧀ꦡꦸꦁ ꦆꦣꦴꦒꦤ꧀ꦠ꧀ꦮꦴ ꦄꦴꦫꦺꦴꦕꦺꦠꦶ, ꦪꦡꦴꦮꦶꦤꦶꦕ꧀ꦖꦪꦁ ꦤ ꦮꦶꦤꦶꦕ꧀ꦖꦶꦤꦶꦠꦧ꧀ꦧ’’ꦤ꧀ꦠꦶ. ꦡꦺꦫꦴ ‘‘ꦎꦱꦛꦁ ꦮꦠ꧀ꦡꦸꦁ ꦪꦡꦴꦮꦶꦤꦶꦕ꧀ꦖꦪꦁ ꦤ ꦮꦶꦤꦶꦕ꧀ꦖꦶꦤꦶꦠꦸꦁ ꦤ ꦮꦛ꧀ꦛꦠꦷ’’ꦠꦶ ꦄꦴꦲꦁꦱꦸ. ꦱꦺꦴ ‘‘ꦌꦮꦁ ꦏꦫꦶꦪꦩꦴꦤꦺ, ꦨꦤ꧀ꦠꦺ, ꦩꦩ ꦱꦴꦱꦤꦺ ꦥꦠꦶꦛ꧀ꦜꦴ ꦤꦠ꧀ꦡꦶ, ꦩꦪ꧀ꦲꦺꦠꦁ ꦥꦴꦥꦁ ꦲꦺꦴꦠꦸ, ꦩꦴ ꦠꦸꦩ꧀ꦲꦺ ꦮꦶꦤꦶꦕ꧀ꦖꦶꦤꦡꦴ’’ꦠꦶ. ꦠꦺ ꦠꦺꦤ ꦤꦶꦥ꧀ꦥꦷꦭ꦳ꦶꦪꦩꦴꦤꦴ ꦱꦩ꧀ꦥꦛꦶꦕ꧀ꦖꦶꦁꦱꦸ. ꦱꦺꦴ ꦠꦺꦱꦁ ꦥꦛꦶꦚ꧀ꦚꦁ ꦒꦲꦺꦠ꧀ꦮꦴ ꦥꦸꦤ ꦠꦁ ꦄꦴꦮꦴꦱꦁ ꦒꦤ꧀ꦠ꧀ꦮꦴ ‘‘ꦱꦧ꧀ꦧꦁ ꦮꦶꦤꦪꦣꦫꦴꦤꦁ ꦱꦤ꧀ꦠꦶꦏꦺ ꦤꦶꦛ꧀ꦜꦶꦠ’’ꦤ꧀ꦠꦶ ꦠꦁ ꦣꦩ꧀ꦩꦮꦴꦢꦶꦁ ꦱꦸꦛ꧀ꦜꦸꦠꦫꦁ ꦄꦮꦩꦚ꧀ꦚꦤ꧀ꦠꦺꦴ ꦦꦫꦸꦱꦺꦤ ꦱꦩꦸꦢꦴꦕꦫꦠꦶ. ꦣꦩ꧀ꦩꦮꦴꦢꦷ ‘‘ꦤꦶꦱ꧀ꦱꦔ꧀ꦏꦺꦴ ꦄꦪꦁ ꦗꦴꦠꦺꦴ’’ꦠꦶ ꦠꦴꦮꦢꦺꦮ ꦤꦶꦏ꧀ꦑꦩꦶꦠ꧀ꦮꦴ ꦡꦺꦫꦴꦤꦁ ꦥꦫꦶꦮꦴꦫꦁ ꦨꦶꦏ꧀ꦑꦸꦱꦲꦱ꧀ꦱꦁ ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦲ – ‘‘ꦤꦤꦸ, ꦄꦴꦮꦸꦱꦺꦴ, ꦎꦱꦛꦁ ꦮꦠ꧀ꦡꦸ ꦪꦡꦴꦣꦩ꧀ꦩꦁ ꦮꦶꦤꦶꦕ꧀ꦖꦶꦤꦶꦠꦧ꧀ꦧꦁ, ꦄꦤꦺꦴꦱꦫꦴꦥꦺꦠ꧀ꦮꦴ ꦌꦮ ꦮꦴ ꦄꦚ꧀ꦚꦩꦚ꧀ꦚꦁ ꦄꦕ꧀ꦕꦪꦁ ꦢꦺꦱꦴꦥꦺꦠ꧀ꦮꦴ ꦱꦴꦩꦒ꧀ꦒꦷ ꦏꦴꦠꦧ꧀ꦧꦴ. ꦆꦩꦺ ꦥꦤ ꦡꦺꦫꦴ ꦤꦺꦮ ꦮꦠ꧀ꦡꦸꦁ ꦮꦶꦤꦶꦕ꧀ꦖꦶꦤꦶꦁꦱꦸ, ꦤ ꦱꦴꦩꦒ꧀ꦒꦶꦁ ꦄꦏꦁꦱꦸ. ꦏꦶꦁ ꦤꦴꦩꦺꦠ’’ꦤ꧀ꦠꦶ? ꦠꦺꦥꦶ ꦱꦸꦠ꧀ꦮꦴ ꦠꦸꦟ꧀ꦲꦷ ꦄꦲꦺꦱꦸꦁ – ‘‘ꦤꦹꦤ ꦏꦶꦚ꧀ꦕꦶ ꦄꦴꦕꦫꦶꦪꦺꦲꦶ ꦚꦴꦠ’’ꦤ꧀ꦠꦶ. ꦠꦠꦺꦴ ꦄꦣꦩ꧀ꦩꦮꦴꦢꦷ ꦎꦏꦴꦱꦁ ꦭꦨꦶꦠ꧀ꦮꦴ ‘‘ꦠ꧀ꦮꦁ ꦥꦸꦧ꧀ꦧꦺ ‘ꦮꦶꦤꦪꦣꦫꦴ ꦗꦴꦤꦶꦱ꧀ꦱꦤ꧀ꦠꦷ’ꦠꦶ ꦨꦟꦱꦶ. ꦆꦢꦴꦤꦶ ꦠꦺꦱꦁ ꦮꦶꦤꦪꦣꦫꦴꦤꦁ ꦄꦴꦫꦺꦴꦕꦺꦲꦶ ꦠꦁ ꦮꦠ꧀ꦡꦸ’’ꦤ꧀ꦠꦶ ꦣꦩ꧀ꦩꦮꦴꦢꦶꦁ ꦥꦷꦭ꦳ꦺꦠ꧀ꦮꦴ ‘‘ꦄꦗ꧀ꦗꦠꦒ꧀ꦒꦺ ꦥꦫꦴꦗꦶꦠꦺꦴ ꦠ꧀ꦮꦁ, ꦩꦴ ꦠꦁ ꦄꦴꦮꦴꦱꦁ ꦄꦴꦒꦕ꧀ꦖꦷ’’ꦠꦶ ꦮꦠ꧀ꦮꦴ ꦥꦏ꧀ꦏꦴꦩꦶ. ꦠꦠꦺꦴ ꦣꦩ꧀ꦩꦮꦴꦢꦷ ꦡꦺꦫꦺ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦠꦸꦩ꧀ꦲꦺ ꦱꦴꦱꦤꦁ ꦄꦤꦥꦺꦏ꧀ꦑꦶꦠ꧀ꦮꦴ ‘ꦄꦩ꧀ꦲꦺ ꦈꦥꦛ꧀ꦜꦺꦱꦶ ꦥꦫꦶꦠꦺꦴꦱꦺꦱꦷ’ꦠꦶ ꦥꦸꦒ꧀ꦒꦭꦩꦺꦮ ꦄꦥꦺꦏ꧀ꦑꦶꦠ꧀ꦡ, ꦱꦴꦱꦤꦁ ꦄꦫꦏ꧀ꦑꦶꦠ꧀ꦮꦴ ꦥꦸꦒ꧀ꦒꦭꦁ ꦫꦏ꧀ꦑꦶꦠ꧀ꦡ, ꦄꦗ꧀ꦗꦠꦒ꧀ꦒꦺ ꦢꦴꦤꦶ ꦠꦸꦩ꧀ꦲꦴꦏꦁ ꦮꦶꦤꦶꦕ꧀ꦖꦪꦁ ꦮꦶꦤꦶꦕ꧀ꦖꦶꦤꦶꦠꦸꦁ ꦤ ꦮꦛ꧀ꦛꦠꦶ, ꦄꦗ꧀ꦗ ꦥꦫꦶꦤꦶꦧ꧀ꦧꦸꦠꦺꦴ ꦏꦱ꧀ꦱꦥꦺꦴ ꦨꦒꦮꦴ’’ꦠꦶ ꦩꦲꦴꦱꦢ꧀ꦢꦺꦤ ꦏꦤ꧀ꦢꦶꦠ꧀ꦮꦴ ‘‘ꦤꦛ꧀ꦜꦁ ꦱꦠ꧀ꦡꦸ ꦱꦴꦱꦤ’’ꦤ꧀ꦠꦶ ꦥꦫꦶꦢꦺꦮꦩꦴꦤꦺꦴ ꦥꦏ꧀ꦏꦴꦩꦶ.

ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦱꦁꦮꦶꦒ꧀ꦒꦩꦴꦤꦱꦴ ‘‘ꦩꦪꦁ ꦥꦸꦒ꧀ꦒꦭꦩꦤꦸꦫꦏ꧀ꦑꦤ꧀ꦠꦴ ꦱꦴꦱꦤꦫꦠꦤꦁ ꦱꦺꦴꦧ꧀ꦨꦺ ꦥꦏ꧀ꦑꦶꦥꦶꦩ꧀ꦲꦴ’’ꦠꦶ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦴꦢꦺꦱꦸꦁ. ꦠꦺ ꦠꦺꦤꦺꦮ ꦏꦸꦏ꧀ꦏꦸꦕ꧀ꦕꦺꦤ ꦈꦥꦲꦠꦴꦱꦪꦠ꧀ꦠꦴ ꦏꦴꦭꦁ ꦏꦠ꧀ꦮꦴ ꦱꦒ꧀ꦒꦺ ꦤꦶꦧ꧀ꦧꦠ꧀ꦠꦶꦠꦸꦩꦱꦏ꧀ꦏꦺꦴꦤ꧀ꦠꦴ ꦌꦏꦴꦕꦫꦶꦪꦺꦴ ꦲꦶꦩꦮꦠꦶ ꦲꦺꦩꦮꦠꦺ ꦥꦧ꧀ꦧꦠꦺ ꦤꦶꦧ꧀ꦧꦠ꧀ꦠꦶ ꦲꦺꦩꦮꦠꦺꦴ ꦪꦏ꧀ꦑꦺꦴꦠꦶ ꦤꦴꦩꦺꦤ. ꦢꦸꦠꦶꦪꦴꦕꦫꦶꦪꦺꦴ ꦩꦗ꧀ꦙꦶꦩꦢꦺꦱꦺ ꦱꦴꦠꦥꦧ꧀ꦧꦠꦺ ꦱꦴꦠꦴꦒꦶꦫꦺꦴꦠꦶ ꦤꦴꦩꦺꦤ. ꦠꦺꦥꦶ ꦤꦺꦱꦁ ꦥꦫꦶꦮꦴꦫꦴ ꦨꦶꦏ꧀ꦑꦹ ꦠꦺꦱꦁꦪꦺꦮ ꦄꦤꦸꦮꦠ꧀ꦠꦶꦠ꧀ꦮꦴ ꦱꦒ꧀ꦒꦺ ꦤꦶꦧ꧀ꦧꦠ꧀ꦠꦶꦠꦸꦩꦱꦏ꧀ꦏꦺꦴꦤ꧀ꦠꦴ ꦠꦺꦱꦁ ꦥꦫꦶꦮꦴꦫꦴ ꦪꦏ꧀ꦑꦴꦮ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶꦁꦱꦸ. ꦠꦺꦱꦁ ꦥꦤ ꦥꦕ꧀ꦕꦪꦢꦴꦪꦏꦴ ꦒꦲꦛ꧀ꦜꦴ ꦢꦺꦮꦭꦺꦴꦏꦺ ꦤꦶꦧ꧀ꦧꦠꦶꦁꦱꦸ. ꦲꦺꦩꦮꦠꦱꦴꦠꦴꦒꦶꦫꦴ ꦄꦛ꧀ꦜꦮꦷꦱꦠꦶꦪꦏ꧀ꦑꦱꦺꦤꦴꦥꦠꦷꦤꦩꦧ꧀ꦨꦤ꧀ꦠꦫꦴ ꦩꦲꦴꦤꦸꦨꦴꦮꦴ ꦪꦏ꧀ꦑꦫꦴꦗꦴꦤꦺꦴ ꦄꦲꦺꦱꦸꦁ.

ꦪꦏ꧀ꦑꦱꦺꦤꦴꦥꦠꦷꦤꦚ꧀ꦕ ꦄꦪꦁ ꦣꦩ꧀ꦩꦠꦴ – ꦩꦴꦱꦺ ꦩꦴꦱꦺ ꦄꦛ꧀ꦜ ꦢꦶꦮꦱꦴꦤꦶ ꦣꦩ꧀ꦩꦮꦶꦤꦶꦕ꧀ꦖꦪꦠ꧀ꦡꦁ ꦲꦶꦩꦮꦠꦶ ꦩꦤꦺꦴꦱꦶꦭꦴꦠꦭꦺ ꦤꦴꦒꦮꦠꦶꦩꦟ꧀ꦝꦥꦺ ꦢꦺꦮꦠꦴꦤꦁ ꦱꦤ꧀ꦤꦶꦥꦴꦠꦺꦴ ꦲꦺꦴꦠꦶ, ꦠꦠ꧀ꦡ ꦱꦤ꧀ꦤꦶꦥꦠꦶꦠꦧ꧀ꦧꦤ꧀ꦠꦶ. ꦄꦡ ꦱꦴꦠꦴꦒꦶꦫꦲꦺꦩꦮꦠꦴ ꦠꦱ꧀ꦩꦶꦁ ꦱꦩꦴꦒꦩꦺ ꦄꦚ꧀ꦚꦩꦚ꧀ꦚꦁ ꦢꦶꦱ꧀ꦮꦴ ꦱꦚ꧀ꦗꦴꦤꦶꦁꦱꦸ – ‘‘ꦠ꧀ꦮꦁ, ꦱꦩ꧀ꦩ, ꦏꦸꦲꦶꦁ ꦈꦥ꧀ꦥꦤ꧀ꦤꦺꦴ, ꦠ꧀ꦮꦁ ꦏꦸꦲꦶ’’ꦤ꧀ꦠꦶ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦈꦥ꧀ꦥꦠ꧀ꦠꦶꦛ꧀ꦜꦴꦤꦚ꧀ꦕ ꦥꦸꦕ꧀ꦖꦶꦠ꧀ꦮꦴ ꦮꦶꦥ꧀ꦥꦛꦶꦱꦴꦫꦶꦤꦺꦴ ꦄꦲꦺꦱꦸꦁ. ‘‘ꦤꦛ꧀ꦜꦴ ꦩꦪꦁ, ꦱꦩ꧀ꦩ, ꦥꦸꦧ꧀ꦧꦺ ꦮꦷꦱꦠꦶ ꦮꦱ꧀ꦱꦱꦲꦱ꧀ꦱꦴꦤꦶ ꦱꦩꦟꦣꦩ꧀ꦩꦁ ꦏꦠ꧀ꦮꦴ ꦌꦏꦁ ꦥꦴꦥꦱꦲꦴꦪꦁ ꦤꦶꦱ꧀ꦱꦴꦪ ꦪꦏ꧀ꦑꦪꦺꦴꦤꦶꦪꦁ ꦈꦥ꧀ꦥꦤ꧀ꦤꦴ, ꦄꦩ꧀ꦲꦴꦏꦁ ꦥꦤ ꦥꦕ꧀ꦕꦪꦢꦴꦪꦏꦴ ꦏꦴꦩꦴꦮꦕꦫꦢꦺꦮꦺꦱꦸ ꦤꦶꦧ꧀ꦧꦠ꧀ꦠꦴ’’ꦠꦶ. ꦄꦡ ꦱꦴꦠꦴꦒꦶꦫꦺꦴ ꦄꦴꦲ – ‘‘ꦩꦴꦫꦶꦱ, ꦲꦶꦩꦮꦴ ꦤꦴꦩ ꦄꦕ꧀ꦖꦫꦶꦪꦧ꧀ꦨꦸꦠꦱꦩ꧀ꦩꦠꦺꦴ, ꦏꦶꦚ꧀ꦕꦶ ꦄꦕ꧀ꦖꦫꦶꦪꦁ ꦢꦶꦱ꧀ꦮꦴ ꦮꦴ ꦱꦸꦠ꧀ꦮꦴ ꦮꦴ ꦩꦩꦴꦥꦶ ꦄꦴꦫꦺꦴꦕꦺꦪ꧀ꦪꦴꦱꦷ’’ꦠꦶ. ꦲꦺꦩꦮꦠꦺꦴꦥꦶ ꦄꦴꦲ – ‘‘ꦩꦴꦫꦶꦱ, ꦩꦗ꧀ꦙꦶꦩꦢꦺꦱꦺꦴ ꦤꦴꦩ ꦄꦕ꧀ꦖꦫꦶꦪꦧ꧀ꦨꦸꦠꦱꦩ꧀ꦩꦠꦺꦴ, ꦏꦶꦚ꧀ꦕꦶ ꦄꦕ꧀ꦖꦫꦶꦪꦁ ꦢꦶꦱ꧀ꦮꦴ ꦮꦴ ꦱꦸꦠ꧀ꦮꦴ ꦮꦴ ꦩꦩꦴꦥꦶ ꦄꦴꦫꦺꦴꦕꦺꦪ꧀ꦪꦴꦱꦷ’’ꦠꦶ. ꦌꦮꦁ ꦠꦺꦱꦸ ꦢ꧀ꦮꦷꦱꦸ ꦱꦲꦴꦪꦺꦱꦸ ꦄꦚ꧀ꦚꦩꦚ꧀ꦚꦁ ꦏꦠꦶꦏꦁ ꦏꦠ꧀ꦮꦴ, ꦠꦩꦺꦮ ꦈꦥ꧀ꦥꦠ꧀ꦠꦶꦁ ꦄꦮꦶꦮꦗ꧀ꦗꦺꦠ꧀ꦮꦴ ꦮꦱꦩꦴꦤꦺꦱꦸ ꦌꦏꦁ ꦧꦸꦢ꧀ꦣꦤ꧀ꦠꦫꦁ ꦮꦷꦠꦶꦮꦠ꧀ꦠꦁ, ꦩꦲꦴꦥꦡꦮꦷ ꦌꦏꦪꦺꦴꦗꦤꦠꦶꦒꦴꦮꦸꦠꦩꦠ꧀ꦠꦁ ꦈꦱ꧀ꦱꦢꦴ.

ꦄꦡꦩ꧀ꦲꦴꦏꦁ ꦧꦺꦴꦣꦶꦱꦠ꧀ꦠꦺꦴ ꦢꦷꦥꦔ꧀ꦏꦫꦥꦴꦢꦩꦹꦭꦺ ꦏꦠꦥꦟꦶꦣꦴꦤꦺꦴ ꦪꦴꦮ ꦮꦺꦱ꧀ꦱꦤ꧀ꦠꦫꦗꦴꦠꦏꦁ, ꦠꦴꦮ ꦥꦴꦫꦩꦶꦪꦺꦴ ꦥꦹꦫꦺꦠ꧀ꦮꦴ, ꦠꦸꦱꦶꦠꦨꦮꦤꦺ ꦈꦥ꧀ꦥꦗ꧀ꦗꦶꦠ꧀ꦮꦴ, ꦠꦠ꧀ꦡ ꦪꦴꦮꦠꦴꦪꦸꦏꦁ ꦜꦠ꧀ꦮꦴ, ꦣꦩ꧀ꦩꦥꦢꦤꦶꦢꦴꦤꦺ ꦮꦸꦠ꧀ꦠꦤꦪꦺꦤ ꦢꦺꦮꦠꦴꦲꦶ ꦄꦴꦪꦴꦕꦶꦠꦺꦴ ꦥꦚ꧀ꦕ ꦩꦲꦴꦮꦶꦭꦺꦴꦏꦤꦴꦤꦶ ꦮꦶꦭꦺꦴꦏꦺꦠ꧀ꦮꦴ, ꦢꦺꦮꦠꦴꦤꦁ ꦄꦴꦫꦺꦴꦕꦺꦠ꧀ꦮꦴ, ꦢ꧀ꦮꦠ꧀ꦠꦶꦁꦱꦴꦪ ꦥꦸꦧ꧀ꦧꦤꦶꦩꦶꦠ꧀ꦠꦺꦱꦸ ꦮꦠ꧀ꦠꦩꦴꦤꦺꦱꦸ ꦆꦣ ꦥꦛꦶꦱꦤ꧀ꦣꦶꦁ ꦄꦒ꧀ꦒꦲꦺꦱꦶ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦁ ꦏꦩ꧀ꦥꦺꦠ꧀ꦮꦴ. ꦠꦴꦤꦶ ꦢꦶꦱ꧀ꦮꦴꦥꦶ ꦆꦩꦺ ꦫꦴꦗꦪꦏ꧀ꦑꦴ ‘‘ꦆꦩꦶꦤꦴ ꦏꦴꦫꦟꦺꦤ ꦤꦶꦧ꧀ꦧꦠ꧀ꦠꦴꦤꦷ’’ꦠꦶ ꦤ ꦗꦴꦤꦶꦁꦱꦸ. ‘‘ꦑꦶꦝ꧀ꦝꦴꦥꦱꦸꦠꦠ꧀ꦠꦴ ꦤꦺꦮꦴꦢ꧀ꦢꦱꦁꦱꦹ’’ꦠꦶ ꦌꦏꦺ. ꦌꦱ ꦤꦪꦺꦴ ꦗꦴꦠꦶꦪꦁ ꦄꦨꦶꦤꦶꦏ꧀ꦑꦩꦤꦺ ꦧꦺꦴꦣꦶꦪꦚ꧀ꦕ. ꦣꦩ꧀ꦩꦕꦏ꧀ꦏꦥ꧀ꦥꦮꦠ꧀ꦠꦤꦺ ꦥꦤ ꦥꦚ꧀ꦕꦮꦒ꧀ꦒꦶꦪꦺ ꦄꦴꦩꦤ꧀ꦠꦺꦠ꧀ꦮꦴ ꦨꦒꦮꦠꦶ ꦠꦶꦥꦫꦶꦮꦛ꧀ꦛꦁ ꦢ꧀ꦮꦴꦢꦱꦴꦏꦴꦫꦁ ꦮꦫꦣꦩ꧀ꦩꦕꦏ꧀ꦏꦁ ꦥꦮꦠ꧀ꦠꦺꦤ꧀ꦠꦺ ꦩꦲꦴꦨꦹꦩꦶꦕꦴꦭꦁ ꦥꦸꦧ꧀ꦧꦤꦶꦩꦶꦠ꧀ꦠꦁ ꦥꦴꦛꦶꦲꦴꦫꦶꦪꦴꦤꦶ ꦕ ꦌꦠꦺꦱꦁ ꦌꦏꦺꦴ ꦱꦴꦠꦴꦒꦶꦫꦺꦴꦪꦺꦮ ꦥꦜꦩꦁ ꦄꦢ꧀ꦢꦱ. ꦤꦶꦧ꧀ꦧꦠ꧀ꦠꦶꦏꦴꦫꦟꦚ꧀ꦕ ꦠꦺꦱꦁ ꦚꦠ꧀ꦮꦴ ꦱꦥꦫꦶꦱꦺꦴ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩ꧀ꦩ ꦣꦩ꧀ꦩꦢꦺꦱꦤꦁ ꦄꦱ꧀ꦱꦺꦴꦱꦶ, ꦤ ꦕ ꦏꦶꦚ꧀ꦕꦶ ꦮꦶꦱꦺꦱꦁ ꦄꦣꦶꦒꦕ꧀ꦖꦶ. ꦏꦱ꧀ꦩꦴ? ꦱꦺꦴ ꦲꦶ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦲꦺꦩꦮꦠꦁ ꦄꦤꦸꦱ꧀ꦱꦫꦶꦠ꧀ꦮꦴ ‘‘ꦄꦴꦒꦠꦺꦴ ꦤꦸ ꦑꦺꦴ ꦩꦺ ꦱꦲꦴꦪꦏꦺꦴ, ꦤꦺꦴ’’ꦠꦶ ꦥꦫꦶꦱꦁ ꦎꦭꦺꦴꦏꦺꦠ꧀ꦮꦴ ꦠꦁ ꦄꦥꦱ꧀ꦱꦤ꧀ꦠꦺꦴ ‘‘ꦮꦚ꧀ꦕꦶꦠꦺꦴ ꦩꦺ ꦱꦲꦴꦪꦺꦴ, ꦪꦺꦴ ꦌꦮꦁ ꦮꦶꦕꦶꦠ꧀ꦫꦥꦛꦶꦨꦴꦤꦁ ꦨꦒꦮꦠꦺꦴ ꦣꦩ꧀ꦩꦢꦺꦱꦤꦁ ꦤ ꦱꦸꦟꦴꦠꦷ’’ꦠꦶ ꦮꦶꦏ꧀ꦑꦶꦠ꧀ꦠꦕꦶꦠ꧀ꦠꦺꦴ ꦄꦲꦺꦴꦱꦶ. ꦨꦒꦮꦴ ꦕ ꦄꦠ꧀ꦡꦔ꧀ꦒꦠꦺꦥꦶ ꦕ ꦱꦹꦫꦶꦪꦺ ꦢꦺꦱꦤꦁ ꦤ ꦤꦶꦛ꧀ꦜꦴꦥꦺꦱꦶ.

ꦄꦡ ꦱꦴꦠꦴꦒꦶꦫꦺꦴ ‘‘ꦱꦲꦴꦪꦁ ꦒꦲꦺꦠ꧀ꦮꦴ ꦠꦺꦤ ꦱꦲꦴꦒꦩ꧀ꦩ ꦣꦩ꧀ꦩꦢꦺꦱꦤꦁ ꦱꦺꦴꦱ꧀ꦱꦴꦩꦷ’’ꦠꦶ ꦲꦠ꧀ꦡꦶꦪꦴꦤꦄꦱ꧀ꦱꦪꦴꦤꦒꦫꦸꦭ꦳ꦪꦴꦤꦴꦢꦷꦤꦶ ꦩꦴꦥꦺꦠ꧀ꦮꦴ ꦥꦚ꧀ꦕꦲꦶ ꦪꦏ꧀ꦑꦱꦠꦺꦲꦶ ꦥꦫꦶꦮꦸꦠꦺꦴ ꦲꦶꦩꦮꦤ꧀ꦠꦴꦨꦶꦩꦸꦑꦺꦴ ꦥꦴꦪꦴꦱꦶ, ꦠꦢꦴ ꦲꦺꦩꦮꦠꦺꦴꦥꦶ. ꦪꦱ꧀ꦩꦴ ꦥꦛꦶꦱꦤ꧀ꦣꦶꦗꦴꦠꦶ-ꦄꦨꦶꦤꦶꦏ꧀ꦑꦩꦤ-ꦧꦺꦴꦣꦶꦥꦫꦶꦤꦶꦧ꧀ꦧꦴꦤꦺꦱ꧀ꦮꦺꦮ ꦢ꧀ꦮꦠ꧀ꦠꦶꦁꦱ ꦥꦸꦧ꧀ꦧꦤꦶꦩꦶꦠ꧀ꦠꦴꦤꦶ ꦲꦸꦠ꧀ꦮꦴꦮ ꦥꦠꦶꦮꦶꦒꦕ꧀ꦖꦤ꧀ꦠꦶ, ꦤ ꦕꦶꦫꦛ꧀ꦜꦶꦠꦶꦏꦴꦤꦶ ꦲꦺꦴꦤ꧀ꦠꦶ, ꦣꦩ꧀ꦩꦕꦏ꧀ꦏꦥꦮꦠ꧀ꦠꦤꦺ ꦥꦤ ꦠꦴꦤꦶ ꦱꦮꦶꦱꦺꦱꦴꦤꦶ ꦲꦸꦠ꧀ꦮꦴ, ꦕꦶꦫꦠꦫꦁ ꦜꦠ꧀ꦮꦴ ꦤꦶꦫꦸꦗ꧀ꦙꦤ꧀ꦠꦶ, ꦠꦱ꧀ꦩꦴ ꦲꦶꦩꦮꦠꦶ ꦠꦁ ꦄꦕ꧀ꦖꦫꦶꦪꦥꦴꦠꦸꦨꦴꦮꦁ ꦢꦶꦱ꧀ꦮꦴ ‘‘ꦪꦠꦺꦴ ꦄꦲꦁ ꦗꦴꦠꦺꦴ, ꦤ ꦏꦢꦴꦕꦶ ꦄꦪꦁ ꦥꦧ꧀ꦧꦠꦺꦴ ꦌꦮꦁ ꦄꦨꦶꦫꦴꦩꦺꦴ ꦨꦹꦠꦥꦸꦧ꧀ꦧꦺꦴ, ꦲꦤ꧀ꦢ ꦢꦴꦤꦶ ꦩꦩ ꦱꦲꦴꦪꦁ ꦒꦲꦺꦠ꧀ꦮꦴ ꦄꦴꦒꦩ꧀ꦩ ꦠꦺꦤ ꦱꦲ ꦆꦩꦁ ꦥꦸꦥ꧀ꦦꦱꦶꦫꦶꦁ ꦄꦤꦸꦨꦮꦶꦱ꧀ꦱꦴꦩꦷ’’ꦠꦶ ꦠꦡꦺꦮ ꦩꦗ꧀ꦙꦶꦩꦢꦺꦱꦴꦨꦶꦩꦸꦑꦺꦴ ꦄꦴꦒꦕ꧀ꦖꦠꦶ. ꦠꦺ ꦈꦨꦺꦴꦥꦶ ꦫꦴꦗꦒꦲꦱ꧀ꦱ ꦈꦥꦫꦶ ꦱꦩꦴꦒꦤ꧀ꦠ꧀ꦮꦴ ꦄꦚ꧀ꦚꦩꦚ꧀ꦚꦱ꧀ꦱ ꦄꦴꦒꦩꦤꦏꦴꦫꦟꦁ ꦥꦸꦕ꧀ꦖꦶꦁꦱꦸ. ꦲꦺꦩꦮꦠꦺꦴ ꦄꦴꦲ – ‘‘ꦪꦠꦺꦴ ꦄꦲꦁ, ꦩꦴꦫꦶꦱ, ꦗꦴꦠꦺꦴ, ꦤꦴꦪꦁ ꦥꦧ꧀ꦧꦠꦺꦴ ꦌꦮꦁ ꦄꦏꦴꦭꦏꦸꦱꦸꦩꦶꦠꦺꦲꦶ ꦫꦸꦏ꧀ꦑꦺꦲꦶ ꦄꦨꦶꦫꦴꦩꦺꦴ ꦨꦹꦠꦥꦸꦧ꧀ꦧꦺꦴ, ꦠꦱ꧀ꦩꦴ ꦌꦠꦁ ꦥꦸꦥ꧀ꦦꦱꦶꦫꦶꦁ ꦠꦪꦴ ꦱꦢ꧀ꦣꦶꦁ ꦄꦤꦸꦨꦮꦶꦱ꧀ꦱꦴꦩꦷꦠꦶ ꦄꦴꦒꦠꦺꦴꦩ꧀ꦲꦷ’’ꦠꦶ. ꦱꦴꦠꦴꦒꦶꦫꦺꦴ ꦄꦴꦲ – ‘‘ꦗꦴꦤꦴꦱꦶ, ꦥꦤ, ꦠ꧀ꦮꦁ ꦩꦴꦫꦶꦱ, ꦪꦺꦤ ꦏꦴꦫꦟꦺꦤ ꦆꦩꦁ ꦄꦏꦴꦭꦥꦸꦥ꧀ꦦꦥꦴꦛꦶꦲꦴꦫꦶꦪꦁ ꦗꦴꦠ’’ꦤ꧀ꦠꦶ? ‘‘ꦤ ꦗꦴꦤꦴꦩꦶ, ꦩꦴꦫꦶꦱꦴ’’ꦠꦶ. ‘‘ꦆꦩꦁ, ꦩꦴꦫꦶꦱ, ꦥꦴꦛꦶꦲꦴꦫꦶꦪꦁ ꦤ ꦏꦺꦮꦭ ꦲꦶꦩꦮꦤ꧀ꦠꦺꦪꦺꦮ, ꦄꦥꦶꦕ ꦑꦺꦴ ꦥꦤ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦹꦱꦸ ꦤꦶꦧ꧀ꦧꦠ꧀ꦠꦁ, ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ, ꦄꦗ꧀ꦗ ꦣꦩ꧀ꦩꦕꦏ꧀ꦏꦁ ꦥꦮꦠ꧀ꦠꦺꦱꦶ, ꦠꦺꦤ ꦏꦴꦫꦟꦺꦤꦴ’’ꦠꦶ. ꦌꦮꦁ ꦱꦴꦠꦴꦒꦶꦫꦺꦴ ꦲꦺꦩꦮꦠꦱ꧀ꦱ ꦧꦸꦢ꧀ꦣꦸꦥ꧀ꦥꦴꦢꦁ ꦏꦡꦺꦠ꧀ꦮꦴ, ꦠꦁ ꦨꦒꦮꦠꦺꦴ ꦱꦤ꧀ꦠꦶꦏꦁ ꦄꦴꦤꦺꦠꦸꦏꦴꦩꦺꦴ ꦆꦩꦁ ꦒꦴꦡꦩꦴꦲ. ꦏꦺꦕꦶ ꦥꦤ ꦒꦺꦴꦠꦩꦏꦺ ꦕꦺꦠꦶꦪꦺ ꦮꦶꦲꦫꦤ꧀ꦠꦺ ꦨꦒꦮꦠꦶ ꦄꦪꦩꦺꦮꦩꦴꦲꦴꦠꦶ ꦨꦟꦤ꧀ꦠꦶ ‘‘ꦄꦗ꧀ꦗ ꦥꦤ꧀ꦤꦫꦱꦺꦴ’’ꦠꦶ.

꧑꧕꧓. ꦠꦠ꧀ꦡ ꦄꦗ꧀ꦗꦴꦠꦶ ꦄꦪꦁ ꦫꦠ꧀ꦠꦶꦤ꧀ꦢꦶꦮꦺꦴ ꦥꦏ꧀ꦑꦒꦟꦤꦠꦺꦴ ꦥꦤ꧀ꦤꦫꦱꦺꦴ, ꦈꦥꦮꦱꦶꦠꦧ꧀ꦧꦠꦺꦴ ꦈꦥꦺꦴꦱꦡꦺꦴ. ꦠꦷꦱꦸ ꦮꦴ ꦈꦥꦺꦴꦱꦡꦺꦱꦸ ꦄꦗ꧀ꦗ ꦥꦤ꧀ꦤꦫꦱꦺꦴ ꦈꦥꦺꦴꦱꦡꦺꦴ, ꦤ ꦕꦴꦠꦸꦢ꧀ꦢꦱꦷ ꦈꦥꦺꦴꦱꦡꦺꦴ, ꦤ ꦱꦴꦩꦒ꧀ꦒꦷꦈꦥꦺꦴꦱꦡꦺꦴ. ꦪꦱ꧀ꦩꦴ ꦮꦴ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦄꦛ꧀ꦜꦔ꧀ꦒꦈꦥꦮꦴꦱꦥꦚ꧀ꦚꦠ꧀ꦠꦶꦢꦶꦮꦱꦴꦢꦷꦱꦸ ꦱꦩ꧀ꦧꦲꦸꦭꦺꦱꦸ ꦄꦠ꧀ꦡꦺꦱꦸ ꦈꦥꦺꦴꦱꦡꦱꦢ꧀ꦢꦺꦴ ꦮꦠ꧀ꦠꦠꦶ. ‘‘ꦄꦴꦪꦴꦩꦴꦮꦸꦱꦺꦴ, ꦏꦥ꧀ꦥꦶꦤ, ꦈꦥꦺꦴꦱꦡꦁ ꦒꦩꦶꦱ꧀ꦱꦴꦩꦴ’’ꦠꦶꦄꦴꦢꦷꦱꦸ ꦲꦶ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦺ ꦈꦥꦺꦴꦱꦡꦱꦢ꧀ꦢꦺꦴ. ‘‘ꦌꦮꦁ ꦄꦛ꧀ꦜꦔ꧀ꦒꦱꦩꦤ꧀ꦤꦴꦒꦠꦺꦴ ꦑꦺꦴ ꦮꦶꦱꦴꦑꦺ ꦈꦥꦺꦴꦱꦡꦺꦴ ꦈꦥꦮꦸꦠ꧀ꦡꦺꦴ’’ꦠꦶꦄꦴꦢꦷꦱꦸ (ꦄ. ꦤꦶ. ꧘.꧔꧓) ꦥꦴꦟꦴꦠꦶꦥꦴꦠꦴ ꦮꦺꦫꦩꦟꦶꦄꦴꦢꦶꦏꦺꦱꦸ ꦄꦛ꧀ꦜꦔ꧀ꦒꦺꦱꦸ. ‘‘ꦱꦸꦢ꧀ꦣꦱ꧀ꦱ ꦮꦺ ꦱꦢꦴ ꦦꦒ꧀ꦒꦸ, ꦱꦸꦢ꧀ꦣꦱ꧀ꦱꦸꦥꦺꦴꦱꦡꦺꦴ ꦱꦢꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧗꧙) ꦈꦥꦮꦴꦱꦺ. ‘‘ꦈꦥꦺꦴꦱꦡꦺꦴ ꦤꦴꦩ ꦤꦴꦒꦫꦴꦗꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧒꧔꧖; ꦩ. ꦤꦶ. ꧓.꧒꧕꧘) ꦥꦚ꧀ꦚꦠ꧀ꦠꦶꦪꦁ. ‘‘ꦠꦢꦲꦸꦥꦺꦴꦱꦡꦺ ꦥꦤ꧀ꦤꦫꦱꦺ ꦱꦷꦱꦁꦤ꧀ꦲꦴꦠꦱ꧀ꦱꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧓.꧘꧕; ꦩ. ꦤꦶ. ꧓.꧒꧕꧖) ꦢꦶꦮꦱꦺ. ꦠꦱ꧀ꦩꦴ ꦄꦮꦱꦺꦱꦠ꧀ꦡꦁ ꦥꦛꦶꦏ꧀ꦑꦶꦥꦶꦠ꧀ꦮꦴ ꦄꦴꦱꦴꦭ꦳꧀ꦲꦷꦥꦸꦟ꧀ꦟꦩꦢꦶꦮꦱꦁꦪꦺꦮ ꦤꦶꦪꦴꦩꦺꦤ꧀ꦠꦺꦴ ꦄꦴꦲ – ‘‘ꦄꦗ꧀ꦗ ꦥꦤ꧀ꦤꦫꦱꦺꦴ ꦈꦥꦺꦴꦱꦡꦺꦴ’’ꦠꦶ. ꦥꦴꦛꦶꦥꦢꦺꦴ ꦢꦸꦠꦶꦪꦺꦴꦠꦶ ꦌꦮꦁ ꦒꦟꦶꦪꦩꦴꦤꦺ ꦄꦗ꧀ꦗ ꦥꦤ꧀ꦤꦫꦱꦺꦴ ꦢꦶꦮꦱꦺꦴꦠꦶ ꦄꦠ꧀ꦡꦺꦴ.

ꦢꦶꦮꦶ ꦨꦮꦴꦤꦶ ꦢꦶꦧ꧀ꦧꦴꦤꦶ, ꦢꦶꦧ꧀ꦧꦴꦤꦶ ꦌꦠ꧀ꦡ ꦄꦠ꧀ꦡꦷꦠꦶ ꦢꦶꦧ꧀ꦧꦴ. ꦏꦴꦤꦶ ꦠꦴꦤꦶ? ꦫꦹꦥꦴꦤꦶ. ꦠꦚ꧀ꦲꦶ ꦫꦠ꧀ꦠꦶꦁ ꦢꦺꦮꦴꦤꦁ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦠꦺꦴ ꦱꦤ꧀ꦤꦶꦥꦠꦶꦠꦴꦤꦁ ꦱꦫꦷꦫꦮꦠ꧀ꦡꦴꦨꦫꦟꦮꦶꦩꦴꦤꦥ꧀ꦥꦨꦴꦲꦶ ꦄꦧ꧀ꦨꦴꦢꦶꦈꦥꦏ꧀ꦏꦶꦭꦺꦱꦮꦶꦫꦲꦶꦠꦴꦪ ꦕꦤ꧀ꦢꦥ꧀ꦥꦨꦴꦪ ꦕ ꦱꦏꦭꦗꦩ꧀ꦧꦸꦢꦷꦥꦺꦴ ꦄꦭꦔ꧀ꦏꦠꦺꦴ ꦄꦲꦺꦴꦱꦶ. ꦮꦶꦱꦺꦱꦴꦭꦔ꧀ꦏꦠꦺꦴ ꦕ ꦥꦫꦩꦮꦶꦱꦸꦢ꧀ꦣꦶꦢꦺꦮꦱ꧀ꦱ ꦨꦒꦮꦠꦺꦴ ꦱꦫꦷꦫꦥ꧀ꦥꦨꦴꦪ. ꦠꦺꦤꦴꦲ ‘‘ꦢꦶꦧ꧀ꦧꦴ ꦫꦠ꧀ꦠꦶ ꦈꦥꦛ꧀ꦜꦶꦠꦴ’’ꦠꦶ.

ꦌꦮꦁ ꦫꦠ꧀ꦠꦶꦒꦸꦟꦮꦟ꧀ꦟꦤꦴꦥꦢꦺꦱꦺꦤꦴꦥꦶ ꦱꦲꦴꦪꦱ꧀ꦱ ꦕꦶꦠ꧀ꦠꦥ꧀ꦥꦱꦴꦢꦁ ꦗꦤꦺꦤ꧀ꦠꦺꦴ ꦧꦸꦢ꧀ꦣꦸꦥ꧀ꦥꦴꦢꦁ ꦏꦡꦺꦠ꧀ꦮꦴ ꦄꦴꦲ ‘‘ꦄꦤꦺꦴꦩꦤꦴꦩꦁ ꦱꦠ꧀ꦡꦴꦫꦁ, ꦲꦤ꧀ꦢ ꦥꦱ꧀ꦱꦴꦩ ꦒꦺꦴꦠꦩ’’ꦤ꧀ꦠꦶ. ꦠꦠ꧀ꦡ ꦄꦤꦺꦴꦩꦺꦲꦶ ꦄꦭꦴꦩꦏꦺꦲꦶ ꦱꦧ꧀ꦧꦴꦏꦴꦫꦥꦫꦶꦥꦹꦫꦺꦲꦶ ꦒꦸꦟꦺꦲꦶ ꦤꦴꦩꦁ ꦄꦱ꧀ꦱꦴꦠꦶ ꦄꦤꦺꦴꦩꦤꦴꦩꦺꦴ. ꦠꦡꦴ ꦲꦶꦱ꧀ꦱ ‘‘ꦧꦸꦗ꧀ꦙꦶꦠꦴ ꦱꦕ꧀ꦕꦴꦤꦷꦠꦶ ꦧꦸꦢ꧀ꦣꦺꦴ, ꦧꦺꦴꦣꦺꦠꦴ ꦥꦗꦴꦪꦴꦠꦶ ꦧꦸꦢ꧀ꦣꦺꦴ’’ꦠꦶꦄꦴꦢꦶꦤꦴ (ꦩꦲꦴꦤꦶ. ꧑꧙꧒; ꦕꦹꦭ꦳ꦤꦶ. ꦥꦴꦫꦴꦪꦤꦠ꧀ꦡꦸꦠꦶꦒꦴꦡꦴꦤꦶꦢ꧀ꦢꦺꦱ ꧙꧗; ꦥꦛꦶ. ꦩ. ꧑.꧑꧖꧒) ꦤꦪꦺꦤ ꦧꦸꦢ꧀ꦣꦺꦴꦠꦶ ꦄꦤꦺꦴꦩꦺꦲꦶ ꦒꦸꦟꦺꦲꦶ ꦤꦴꦩꦁ, ‘‘ꦨꦒ꧀ꦒꦫꦴꦒꦺꦴꦠꦶ ꦨꦒꦮꦴ, ꦨꦒ꧀ꦒꦢꦺꦴꦱꦺꦴꦠꦶ ꦨꦒꦮꦴ’’ꦠꦶꦄꦴꦢꦶꦤꦴ (ꦩꦲꦴꦤꦶ. ꧘꧔) ꦤꦪꦺꦤ ꦕ ꦄꦤꦺꦴꦩꦺꦲꦶ ꦒꦸꦟꦺꦲꦶ ꦤꦴꦩꦁ. ꦌꦱ ꦤꦪꦺꦴ ‘‘ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ’’ꦠꦶꦄꦴꦢꦷꦱꦸ. ꦢꦶꦛ꧀ꦜꦣꦩ꧀ꦩꦶꦏꦴꦢꦷꦱꦸ ꦄꦠ꧀ꦡꦺꦱꦸ ꦢꦺꦮꦩꦤꦸꦱ꧀ꦱꦺ ꦄꦤꦸꦱꦴꦱꦠꦶ ‘‘ꦆꦩꦁ ꦥꦗꦲꦡ, ꦆꦩꦁ ꦱꦩꦴꦢꦴꦪ ꦮꦠ꧀ꦠꦡꦴ’’ꦠꦶ ꦱꦠ꧀ꦡꦴ. ꦄꦥꦶꦕ ‘‘ꦱꦠ꧀ꦡꦴ ꦨꦒꦮꦴ ꦱꦠ꧀ꦡꦮꦴꦲꦺꦴ, ꦪꦡꦴ ꦱꦠ꧀ꦡꦮꦴꦲꦺꦴ ꦱꦠ꧀ꦠꦺ ꦏꦤ꧀ꦠꦴꦫꦁ ꦠꦴꦫꦺꦠꦷ’’ꦠꦶꦄꦴꦢꦶꦤꦴ (ꦩꦲꦴꦤꦶ. ꧑꧙꧐) ꦤꦶꦢ꧀ꦢꦺꦱꦺ ꦮꦸꦠ꧀ꦠꦤꦪꦺꦤꦴꦥꦶ ꦱꦠ꧀ꦡꦴ. ꦠꦁ ꦄꦤꦺꦴꦩꦤꦴꦩꦁ ꦱꦠ꧀ꦡꦴꦫꦁ. ꦲꦤ꧀ꦢꦴꦠꦶ ꦧ꧀ꦪꦮꦱꦴꦤꦠ꧀ꦡꦺ ꦤꦶꦥꦴꦠꦺꦴ. ꦥꦱ꧀ꦱꦴꦩꦴꦠꦶ ꦠꦺꦤ ꦄꦠ꧀ꦠꦴꦤꦁ ꦱꦲ ꦱꦔ꧀ꦒꦲꦺꦠ꧀ꦮꦴ ꦥꦕ꧀ꦕꦸꦥ꧀ꦥꦤ꧀ꦤꦮꦕꦤꦁ. ꦒꦺꦴꦠꦩꦤ꧀ꦠꦶ ꦒꦺꦴꦠꦩꦒꦺꦴꦠ꧀ꦠꦁ. ꦏꦶꦁ ꦮꦸꦠ꧀ꦠꦁ ꦲꦺꦴꦠꦶ? ‘‘ꦱꦠ꧀ꦡꦴ, ꦤ ꦱꦠ꧀ꦡꦴ’’ꦠꦶ ꦩꦴ ꦮꦶꦩꦠꦶꦁ ꦄꦏꦴꦱꦶ, ꦌꦏꦤ꧀ꦠꦧ꧀ꦪꦮꦱꦶꦠꦺꦴ ꦲꦸꦠ꧀ꦮꦴꦮ ꦌꦲꦶ ꦥꦱ꧀ꦱꦴꦩ ꦒꦺꦴꦠꦩꦤ꧀ꦠꦶ.

꧑꧕꧔. ꦌꦮꦁ ꦮꦸꦠ꧀ꦠꦺ ꦲꦺꦩꦮꦠꦺꦴ ‘‘ꦄꦪꦁ ꦱꦴꦠꦴꦒꦶꦫꦺꦴ ‘ꦄꦤꦺꦴꦩꦤꦴꦩꦁ ꦱꦠ꧀ꦡꦴꦫ’ꦤ꧀ꦠꦶ ꦨꦟꦤ꧀ꦠꦺꦴ ꦠꦱ꧀ꦱ ꦱꦧ꧀ꦧꦚ꧀ꦚꦸꦠꦁ ꦥꦏꦴꦱꦺꦠꦶ, ꦱꦧ꧀ꦧꦚ꧀ꦚꦸꦤꦺꦴ ꦕ ꦢꦸꦭ꧀ꦭꦨꦴ ꦭꦺꦴꦏꦺ, ꦱꦧ꧀ꦧꦚ꧀ꦚꦸꦥꦛꦶꦚ꧀ꦚꦺꦲꦶ ꦥꦹꦫꦟꦴꦢꦶꦱꦢꦶꦱꦺꦲꦺꦮ ꦭꦺꦴꦏꦺꦴ ꦈꦥꦢ꧀ꦢꦸꦠꦺꦴ. ꦱꦺꦴ ꦥꦤ ꦪꦢꦶ ꦱꦧ꧀ꦧꦚ꧀ꦚꦹ, ꦄꦢ꧀ꦣꦴ ꦠꦴꦢꦶꦭꦏ꧀ꦑꦟꦥ꧀ꦥꦠ꧀ꦠꦺꦴ ꦨꦮꦶꦱ꧀ꦱꦠꦶ, ꦠꦺꦤ ꦠꦁ ꦌꦮꦁ ꦥꦫꦶꦒ꧀ꦒꦟ꧀ꦲꦶꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦠꦴꦢꦶꦭꦏ꧀ꦑꦟꦁ ꦥꦸꦕ꧀ꦖꦤ꧀ꦠꦺꦴ ꦄꦴꦲ – ‘‘ꦏꦕ꧀ꦕꦶ ꦩꦤꦺꦴ’’ꦠꦶ.

ꦠꦠ꧀ꦡ ꦏꦕ꧀ꦕꦷꦠꦶ ꦥꦸꦕ꧀ꦖꦴ. ꦩꦤꦺꦴꦠꦶ ꦕꦶꦠ꧀ꦠꦁ. ꦱꦸꦥꦟꦶꦲꦶꦠꦺꦴꦠꦶ ꦱꦸꦛ꧀ꦜꦸ ꦜꦥꦶꦠꦺꦴ, ꦄꦕꦭꦺꦴ ꦄꦱꦩ꧀ꦥꦮꦺꦣꦷ. ꦱꦧ꧀ꦧꦺꦱꦸ ꦨꦹꦠꦺꦱꦸ ꦱꦧ꧀ꦧꦨꦹꦠꦺꦱꦸ. ꦠꦴꦢꦶꦤꦺꦴꦠꦶ ꦠꦴꦢꦶꦭꦏ꧀ꦑꦟꦥ꧀ꦥꦠ꧀ꦠꦱ꧀ꦱꦺꦮ ꦱꦠꦺꦴ. ꦥꦸꦕ꧀ꦖꦴ ꦌꦮ ꦮꦴ ꦄꦪꦁ ‘‘ꦱꦺꦴ ꦠꦺ ꦱꦠ꧀ꦡꦴ ꦱꦧ꧀ꦧꦨꦹꦠꦺꦱꦸ ꦠꦴꦢꦷ, ꦈꦢꦴꦲꦸ ꦤꦺꦴ’’ꦠꦶ. ꦆꦛ꧀ꦜꦺ ꦄꦤꦶꦛ꧀ꦜꦺ ꦕꦴꦠꦶ ꦌꦮꦫꦹꦥꦺ ꦄꦴꦫꦩ꧀ꦩꦟꦺ. ꦱꦔ꧀ꦏꦥ꧀ꦥꦴꦠꦶ ꦮꦶꦠꦏ꧀ꦏꦴ. ꦮꦱꦷꦏꦠꦴꦠꦶ ꦮꦱꦁ ꦒꦩꦶꦠꦴ. ꦏꦶꦁ ꦮꦸꦠ꧀ꦠꦁ ꦲꦺꦴꦠꦶ? ꦪꦁ ꦠ꧀ꦮꦁ ꦱꦠ꧀ꦡꦴꦫꦁ ꦮꦢꦱꦶ, ꦠꦱ꧀ꦱ ꦠꦺ ꦱꦠ꧀ꦡꦸꦤꦺꦴ ꦏꦕ꧀ꦕꦶ ꦠꦴꦢꦶꦭꦏ꧀ꦑꦟꦥ꧀ꦥꦠ꧀ꦠꦱ꧀ꦱ ꦱꦠꦺꦴ ꦱꦧ꧀ꦧꦨꦹꦠꦺꦱꦸ ꦩꦤꦺꦴ ꦱꦸꦥꦟꦶꦲꦶꦠꦺꦴ, ꦈꦢꦴꦲꦸ ꦪꦴꦮ ꦕꦭꦤꦥꦕ꧀ꦕꦪꦁ ꦤ ꦭꦨꦠꦶ, ꦠꦴꦮ ꦱꦸꦥꦟꦶꦲꦶꦠꦺꦴ ꦮꦶꦪ ꦑꦴꦪꦠꦶ. ꦱꦺꦴ ꦮꦴ ꦠꦺ ꦱꦠ꧀ꦡꦴ ꦏꦕ꧀ꦕꦶ ꦱꦧ꧀ꦧꦨꦹꦠꦺꦱꦸ ꦱꦩꦕꦶꦠ꧀ꦠꦺꦤ ꦠꦴꦢꦷ, ꦈꦢꦴꦲꦸ ꦤꦺꦴ, ꦪꦺ ꦕ ꦑꦺꦴ ꦆꦛ꧀ꦜꦴꦤꦶꦛ꧀ꦜꦺꦱꦸ ꦄꦴꦫꦩ꧀ꦩꦟꦺꦱꦸ ꦫꦴꦒꦢꦺꦴꦱꦮꦱꦺꦤ ꦱꦔ꧀ꦏꦥ꧀ꦥꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ, ꦠ꧀ꦪꦴꦱ꧀ꦱ ꦏꦕ꧀ꦕꦶ ꦮꦱꦷꦏꦠꦴ, ꦈꦢꦴꦲꦸ ꦏꦢꦴꦕꦶ ꦠꦺꦱꦩ꧀ꦥꦶ ꦮꦱꦺꦤ ꦮꦠ꧀ꦠꦠꦷꦠꦶ.

꧑꧕꧕. ꦠꦠꦺꦴ ꦱꦴꦠꦴꦒꦶꦫꦺꦴ ꦨꦒꦮꦠꦺꦴ ꦱꦧ꧀ꦧꦚ꧀ꦚꦸꦨꦴꦮꦺ ꦧ꧀ꦪꦮꦱꦶꦠꦠ꧀ꦠꦴ ꦱꦧ꧀ꦧꦺ ꦱꦧ꧀ꦧꦚ꧀ꦚꦸꦒꦸꦟꦺ ꦄꦤꦸꦗꦴꦤꦤ꧀ꦠꦺꦴ ꦄꦴꦲ ‘‘ꦩꦤꦺꦴ ꦕꦱ꧀ꦱ ꦱꦸꦥꦟꦶꦲꦶꦠꦺꦴ’’ꦠꦶꦄꦴꦢꦶ. ꦠꦠ꧀ꦡ ꦱꦸꦥꦟꦶꦲꦶꦠꦺꦴꦠꦶ ꦱꦸꦛ꧀ꦜꦸ ꦜꦥꦶꦠꦺꦴ, ꦥꦡꦮꦷꦱꦩꦺꦴ ꦄꦮꦶꦫꦸꦗ꧀ꦙꦤꦛ꧀ꦜꦺꦤ, ꦱꦶꦤꦺꦫꦸꦱꦩꦺꦴ ꦱꦸꦥ꧀ꦥꦠꦶꦛ꧀ꦜꦶꦠꦴꦕꦭꦤꦛ꧀ꦜꦺꦤ, ꦆꦤ꧀ꦢꦑꦷꦭꦱꦩꦺꦴ ꦕꦠꦸꦧ꧀ꦧꦶꦣꦩꦴꦫꦥꦫꦮꦴꦢꦶꦒꦟꦺꦲꦶ ꦄꦏꦩ꧀ꦥꦶꦪꦛ꧀ꦜꦺꦤ. ꦄꦤꦕ꧀ꦖꦫꦶꦪꦚ꧀ꦕꦺꦠꦁ, ꦨꦒꦮꦠꦺꦴ ꦆꦢꦴꦤꦶ ꦱꦧ꧀ꦧꦴꦏꦴꦫꦱꦩ꧀ꦥꦤ꧀ꦤꦠ꧀ꦠꦴ ꦱꦧ꧀ꦧꦚ꧀ꦚꦸꦨꦴꦮꦺ ꦜꦶꦠꦱ꧀ꦱ ꦩꦤꦺꦴ ꦱꦸꦥꦟꦶꦲꦶꦠꦺꦴ ꦄꦕꦭꦺꦴ ꦨꦮꦺꦪ꧀ꦪ. ꦪꦱ꧀ꦱ ꦠꦶꦫꦕ꧀ꦖꦴꦤꦨꦹꦠꦱ꧀ꦱꦴꦥꦶ ꦱꦫꦴꦒꦴꦢꦶꦏꦴꦭꦺ ꦖꦢ꧀ꦢꦤ꧀ꦠꦤꦴꦒꦏꦸꦭꦺ ꦈꦥ꧀ꦥꦤ꧀ꦤꦱ꧀ꦱ ꦱꦮꦶꦱꦺꦤ ꦱꦭ꧀ꦭꦺꦤ ꦮꦶꦢ꧀ꦣꦱ꧀ꦱ ꦄꦕꦭꦺꦴ ꦄꦲꦺꦴꦱꦶ, ꦮꦣꦏꦺꦥꦶ ꦠꦱ꧀ꦩꦶꦁ ꦤꦥ꧀ꦥꦢꦸꦱ꧀ꦱꦶ, ꦄꦚ꧀ꦚꦢꦠ꧀ꦡꦸ ꦠꦱ꧀ꦱꦺꦮ ꦄꦠ꧀ꦠꦤꦺꦴ ꦢꦤ꧀ꦠꦺ ꦖꦺꦠ꧀ꦮꦴ ꦄꦢꦴꦱꦶ; ꦠꦡꦴ ꦩꦲꦴꦏꦥꦶꦨꦹꦠꦱ꧀ꦱ ꦩꦲꦠꦶꦪꦴ ꦱꦶꦭꦴꦪ ꦱꦷꦱꦺ ꦥꦲꦛꦱ꧀ꦱꦴꦥꦶ ꦠꦱ꧀ꦱꦺꦮ ꦕ ꦩꦒ꧀ꦒꦁ ꦢꦱ꧀ꦱꦺꦱꦶ; ꦠꦡꦴ ꦮꦶꦣꦸꦫꦥꦟ꧀ꦝꦶꦠꦨꦹꦠꦱ꧀ꦱ ꦥꦴꦢꦺꦱꦸ ꦒꦲꦺꦠ꧀ꦮꦴ ꦱꦛ꧀ꦜꦶꦪꦺꦴꦗꦤꦺ ꦏꦴꦭ꦳ꦥꦧ꧀ꦧꦠꦥꦥꦴꦠꦺ ꦥꦏ꧀ꦑꦶꦠ꧀ꦠꦱ꧀ꦱꦴꦥꦶ ꦄꦚ꧀ꦚꦢꦠ꧀ꦡꦸ ꦠꦱ꧀ꦱꦺꦮ ꦪꦏ꧀ꦑꦱ꧀ꦱꦠ꧀ꦡꦴꦪ ꦣꦩ꧀ꦩꦁ ꦢꦺꦱꦺꦱꦶ. ꦠꦱ꧀ꦩꦴ ꦱꦩ꧀ꦩꦢꦺꦮ ꦄꦴꦲ ꦱꦴꦠꦴꦒꦶꦫꦺꦴ – ‘‘ꦩꦤꦺꦴ ꦕꦱ꧀ꦱ ꦱꦸꦥꦟꦶꦲꦶꦠꦺꦴ’’ꦠꦶ.

ꦱꦧ꧀ꦧꦨꦹꦠꦺꦱꦸ ꦠꦴꦢꦶꦤꦺꦴꦠꦶ ꦱꦧ꧀ꦧꦱꦠ꧀ꦠꦺꦱꦸ ꦠꦴꦢꦶꦭꦏ꧀ꦑꦟꦥ꧀ꦥꦠ꧀ꦠꦱ꧀ꦱꦺꦮ ꦱꦠꦺꦴ ꦩꦤꦺꦴ ꦱꦸꦥꦟꦶꦲꦶꦠꦺꦴ, ꦤ ꦪꦴꦮ ꦥꦕ꧀ꦕꦪꦁ ꦤ ꦭꦨꦠꦷꦠꦶ ꦄꦠ꧀ꦡꦺꦴ. ꦠꦠ꧀ꦡ ꦨꦒꦮꦠꦺꦴ ꦠꦴꦢꦶꦭꦏ꧀ꦑꦟꦁ ꦥꦚ꧀ꦕꦣꦴ ꦮꦺꦢꦶꦠꦧ꧀ꦧꦁ. ꦪꦡꦴꦲ –

‘‘ꦨꦒꦮꦴ ꦥꦚ꧀ꦕꦲꦴꦏꦴꦫꦺꦲꦶ ꦠꦴꦢꦷ, ꦆꦛ꧀ꦜꦴꦤꦶꦛ꧀ꦜꦺ ꦠꦴꦢꦷ, ꦕꦠ꧀ꦠꦴꦮꦷꦠꦶ ꦠꦴꦢꦷ, ꦩꦸꦠ꧀ꦠꦴꦮꦷꦠꦶ ꦠꦴꦢꦷ, ꦠꦶꦟ꧀ꦟꦴꦮꦷꦠꦶ ꦠꦴꦢꦷ, ꦠꦤ꧀ꦤꦶꦢ꧀ꦢꦺꦱꦴꦠꦶ ꦠꦴꦢꦷ. ꦏꦡꦁ ꦨꦒꦮꦴ ꦆꦛ꧀ꦜꦴꦤꦶꦛ꧀ꦜꦺ ꦠꦴꦢꦷ? ꦨꦒꦮꦴ ꦭꦴꦨꦺꦥꦶ ꦠꦴꦢꦷ’’ꦠꦶ (ꦩꦲꦴꦤꦶ. ꧓꧘).

ꦌꦮꦩꦴꦢꦶ ꦱꦧ꧀ꦧꦁ ꦤꦶꦢ꧀ꦢꦺꦱꦺ ꦮꦸꦠ꧀ꦠꦤꦪꦺꦤꦺꦮ ꦒꦲꦺꦠꦧ꧀ꦧꦁ. ꦭꦴꦨꦴꦢꦪꦺꦴ ꦕ ꦠꦱ꧀ꦱ ꦩꦲꦴꦄꦛ꧀ꦜꦏꦡꦴꦪꦁ ꦮꦶꦠ꧀ꦡꦴꦫꦶꦠꦤꦪꦺꦤ ꦮꦺꦢꦶꦠꦧ꧀ꦧꦴ. ‘‘ꦥꦸꦕ꧀ꦖꦴ ꦌꦮ ꦮꦴ ꦄꦪꦁ. ꦱꦺꦴ ꦠꦺ ꦱꦠ꧀ꦡꦴ ꦱꦧ꧀ꦧꦨꦹꦠꦺꦱꦸ ꦠꦴꦢꦷ, ꦈꦢꦴꦲꦸ ꦤꦺꦴ’’ꦠꦶ ꦆꦩꦱ꧀ꦩꦶꦩ꧀ꦥꦶ ꦮꦶꦏꦥ꧀ꦥꦺ ꦱꦧ꧀ꦧꦨꦹꦠꦺꦱꦸ ꦱꦩꦕꦶꦠ꧀ꦠꦠꦴꦪ ꦠꦴꦢꦷ ꦄꦩ꧀ꦲꦴꦏꦁ ꦱꦠ꧀ꦡꦴꦠꦶ ꦄꦠ꧀ꦡꦺꦴ. ꦄꦪꦚ꧀ꦲꦶ ꦨꦒꦮꦴ ꦱꦸꦑꦹꦥꦱꦁꦲꦴꦫꦏꦴꦩꦠꦴꦪ ꦢꦸꦏ꧀ꦑꦴꦥꦤꦪꦤꦏꦴꦩꦠꦴꦪ ꦕ ꦱꦧ꧀ꦧꦱꦠ꧀ꦠꦺꦱꦸ ꦱꦩꦕꦶꦠ꧀ꦠꦺꦴ, ꦪꦴꦢꦶꦱꦺꦴ ꦄꦠ꧀ꦠꦤꦶ, ꦠꦴꦢꦶꦱꦺꦴ ꦥꦫꦺꦱꦸ, ꦪꦴꦢꦶꦱꦺꦴ ꦩꦴꦠꦫꦶ ꦩꦲꦴꦩꦴꦪꦴꦪ, ꦠꦴꦢꦶꦱꦺꦴ ꦕꦶꦚ꧀ꦕꦩꦴꦟꦮꦶꦏꦴꦪ, ꦪꦴꦢꦶꦱꦺꦴ ꦥꦶꦠꦫꦶ ꦱꦸꦢ꧀ꦣꦺꦴꦢꦤꦺ, ꦠꦴꦢꦶꦱꦺꦴ ꦱꦸꦥ꧀ꦥꦧꦸꦢ꧀ꦣꦺ, ꦪꦴꦢꦶꦱꦺꦴ ꦥꦸꦠ꧀ꦠꦺ ꦫꦴꦲꦸꦭꦺ, ꦠꦴꦢꦶꦱꦺꦴ ꦮꦣꦏꦺꦱꦸ ꦢꦺꦮꦢꦠ꧀ꦠꦣꦤꦥꦴꦭꦏꦄꦔ꧀ꦒꦸꦭꦶꦩꦴꦭꦴꦢꦷꦱꦸ. ꦱꦢꦺꦮꦏꦺ ꦭꦺꦴꦏꦺꦥꦶ ꦠꦴꦢꦷ. ꦠꦱ꧀ꦩꦴ ꦱꦩ꧀ꦩꦢꦺꦮꦴꦲ ꦱꦴꦠꦴꦒꦶꦫꦺꦴ – ‘‘ꦱꦧ꧀ꦧꦨꦹꦠꦺꦱꦸ ꦠꦴꦢꦶꦤꦺꦴ’’ꦠꦶ.

ꦄꦡꦺꦴ ꦆꦛ꧀ꦜꦺ ꦄꦤꦶꦛ꧀ꦜꦺ ꦕꦴꦠꦶ. ꦌꦠ꧀ꦡ ꦥꦤ ꦌꦮꦁ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ – ꦪꦁ ꦏꦶꦚ꧀ꦕꦶ ꦆꦛ꧀ꦜꦁ ꦮꦴ ꦄꦤꦶꦛ꧀ꦜꦁ ꦮꦴ ꦄꦴꦫꦩ꧀ꦩꦟꦁ, ꦱꦧ꧀ꦧꦥ꧀ꦥꦏꦴꦫꦺꦲꦶ ꦠꦠ꧀ꦡ ꦪꦺ ꦫꦴꦒꦢꦺꦴꦱꦮꦱꦺꦤ ꦱꦔ꧀ꦏꦥ꧀ꦥꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ, ꦠ꧀ꦪꦴꦱ꧀ꦱ ꦄꦤꦸꦠ꧀ꦠꦫꦺꦤ ꦩꦒ꧀ꦒꦺꦤ ꦫꦴꦒꦴꦢꦷꦤꦁ ꦥꦲꦷꦤꦠ꧀ꦠꦴ ꦮꦱꦷꦏꦠꦴ, ꦤ ꦏꦢꦴꦕꦶ ꦠꦺꦱꦁ ꦮꦱꦺ ꦮꦠ꧀ꦠꦠꦶ. ꦱꦺꦴ ꦲꦶ ꦨꦒꦮꦴ ꦄꦤꦴꦮꦶꦭꦱꦔ꧀ꦏꦥ꧀ꦥꦺꦴ ꦱꦸꦮꦶꦩꦸꦠ꧀ꦠꦕꦶꦠ꧀ꦠꦺꦴ ꦱꦸꦮꦶꦩꦸꦠ꧀ꦠꦥꦚ꧀ꦚꦺꦴꦠꦶ. ꦌꦠ꧀ꦡ ꦕ ꦱꦸꦥꦟꦶꦲꦶꦠꦩꦤꦠꦴꦪ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦴꦨꦴꦮꦺꦴ ꦮꦸꦠ꧀ꦠꦺꦴ. ꦱꦧ꧀ꦧꦨꦹꦠꦺꦱꦸ ꦆꦛ꧀ꦜꦴꦤꦶꦛ꧀ꦜꦺꦲꦶ ꦱꦺꦴ ꦪꦠ꧀ꦡ ꦨꦮꦺꦪ꧀ꦪ, ꦠꦁ ꦱꦠ꧀ꦠꦱꦔ꧀ꦑꦴꦫꦨꦺꦢꦠꦺꦴ ꦢꦸꦮꦶꦣꦩꦴꦫꦩ꧀ꦩꦟꦁ ꦮꦸꦠ꧀ꦠꦁ. ꦱꦔ꧀ꦏꦥ꧀ꦥꦮꦱꦷꦨꦴꦮꦺꦤ ꦠꦱ꧀ꦩꦶꦁ ꦄꦴꦫꦩ꧀ꦩꦟꦺ ꦠꦱ꧀ꦱ ꦩꦤꦱꦶꦏꦴꦫꦴꦨꦴꦮꦠꦺꦴ ꦏꦶꦭꦺꦱꦥ꧀ꦥꦲꦴꦤꦁ ꦮꦸꦠ꧀ꦠꦁ. ꦱꦸꦥꦟꦶꦲꦶꦠꦩꦤꦠꦴꦪ ꦕ ꦩꦤꦺꦴꦱꦩꦴꦕꦴꦫꦱꦸꦢ꧀ꦣꦶ, ꦱꦧ꧀ꦧꦨꦹꦠꦺꦱꦸ ꦠꦴꦢꦶꦠꦴꦪ ꦏꦴꦪꦱꦩꦴꦕꦴꦫꦱꦸꦢ꧀ꦣꦶ, ꦱꦔ꧀ꦏꦥ꧀ꦥꦮꦱꦷꦨꦴꦮꦺꦤ ꦮꦶꦠꦏ꧀ꦏꦩꦹꦭꦏꦠ꧀ꦠꦴ ꦮꦴꦕꦴꦪ ꦮꦕꦷꦱꦩꦴꦕꦴꦫꦱꦸꦢ꧀ꦣꦶ. ꦠꦡꦴ ꦱꦸꦥꦟꦶꦲꦶꦠꦩꦤꦠꦴꦪ ꦭꦺꦴꦨꦴꦢꦶꦱꦧ꧀ꦧꦢꦺꦴꦱꦴꦨꦴꦮꦺꦴ, ꦱꦧ꧀ꦧꦨꦹꦠꦺꦱꦸ ꦠꦴꦢꦶꦠꦴꦪ ꦩꦺꦠ꧀ꦠꦴꦢꦶꦒꦸꦟꦱꦧ꧀ꦨꦴꦮꦺꦴ, ꦱꦔ꧀ꦏꦥ꧀ꦥꦮꦱꦷꦨꦴꦮꦺꦤ ꦥꦛꦶꦏꦹꦭꦺ ꦄꦥ꧀ꦥꦛꦶꦏꦹꦭꦱꦚ꧀ꦚꦶꦠꦴꦢꦶꦨꦺꦢꦴ ꦄꦫꦶꦪꦶꦢ꧀ꦣꦶ, ꦠꦴꦪ ꦕꦱ꧀ꦱ ꦱꦧ꧀ꦧꦚ꧀ꦚꦸꦨꦴꦮꦺꦴ ꦮꦸꦠ꧀ꦠꦺꦴ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦺꦴ.

꧑꧕꧖. ꦌꦮꦁ ꦲꦺꦩꦮꦠꦺꦴ ꦥꦸꦧ꧀ꦧꦺ ꦩꦤꦺꦴꦢ꧀ꦮꦴꦫꦮꦱꦺꦤꦺꦮ ꦠꦴꦢꦶꦨꦴꦮꦁ ꦥꦸꦕ꧀ꦖꦶꦠ꧀ꦮꦴ ꦠꦚ꧀ꦕ ꦥꦛꦶꦗꦴꦤꦤ꧀ꦠꦩꦶꦩꦁ ꦱꦸꦠ꧀ꦮꦴ ꦢꦭ꦳꧀ꦲꦷꦏꦩ꧀ꦩꦠ꧀ꦡꦁ ꦆꦢꦴꦤꦶ ꦢ꧀ꦮꦴꦫꦠ꧀ꦠꦪꦮꦱꦺꦤꦴꦥꦶ, ꦥꦸꦧ꧀ꦧꦺ ꦮꦴ ꦱꦔ꧀ꦑꦺꦥꦺꦤ ꦏꦴꦪꦮꦕꦷꦩꦤꦺꦴꦢ꧀ꦮꦴꦫꦱꦸꦢ꧀ꦣꦶꦁ ꦥꦸꦕ꧀ꦖꦶꦠ꧀ꦮꦴ ꦠꦚ꧀ꦕ ꦥꦛꦶꦗꦴꦤꦤ꧀ꦠꦩꦶꦩꦁ ꦱꦸꦠ꧀ꦮꦴ ꦢꦭ꦳꧀ꦲꦷꦏꦩ꧀ꦩꦠ꧀ꦡꦩꦺꦮ ꦮꦶꦠ꧀ꦡꦴꦫꦺꦤꦴꦥꦶ ꦥꦸꦕ꧀ꦖꦤ꧀ꦠꦺꦴ ꦄꦴꦲ ‘‘ꦏꦕ꧀ꦕꦶ ꦄꦢꦶꦤ꧀ꦤ’’ꦤ꧀ꦠꦶ. ꦠꦠ꧀ꦡ ꦒꦴꦡꦴꦧꦤ꧀ꦣꦱꦸꦑꦠ꧀ꦡꦴꦪ ꦥꦜꦩꦁ ꦄꦢꦶꦤ꧀ꦤꦴꦢꦴꦤꦮꦶꦫꦠꦶꦁ ꦥꦸꦕ꧀ꦖꦠꦶ. ꦄꦴꦫꦴ ꦥꦩꦴꦢꦩ꧀ꦲꦴꦠꦶ ꦥꦚ꧀ꦕꦱꦸ ꦏꦴꦩꦒꦸꦟꦺꦱꦸ ꦕꦶꦠ꧀ꦠꦮꦺꦴꦱ꧀ꦱꦒ꧀ꦒꦠꦺꦴ ꦢꦹꦫꦷꦨꦴꦮꦺꦤ ꦄꦧ꧀ꦫꦲ꧀ꦩꦕꦫꦶꦪꦮꦶꦫꦠꦶꦁ ꦥꦸꦕ꧀ꦖꦠꦶ. ‘‘ꦄꦴꦫꦴ ꦥꦩꦢꦩ꧀ꦲꦴ’’ꦠꦶꦥꦶ ꦥꦜꦤ꧀ꦠꦶ, ꦄꦴꦫꦴ ꦩꦴꦠꦸꦒꦴꦩꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦙꦴꦤꦁ ꦤ ꦫꦶꦚ꧀ꦕꦠꦷꦠꦶ ꦆꦩꦶꦤꦴ ꦥꦤ ꦠꦱ꧀ꦱꦴꦪꦺꦮ ꦠꦶꦮꦶꦣꦴꦪ ꦏꦴꦪꦢꦸꦕ꧀ꦕꦫꦶꦠꦮꦶꦫꦠꦶꦪꦴ ꦧꦭꦮꦨꦴꦮꦁ ꦥꦸꦕ꧀ꦖꦠꦶ. ꦙꦴꦤꦪꦸꦠ꧀ꦠꦱ꧀ꦱ ꦲꦶ ꦮꦶꦫꦠꦶ ꦧꦭꦮꦠꦷ ꦲꦺꦴꦠꦷꦠꦶ.

꧑꧕꧗. ꦄꦡ ꦱꦴꦠꦴꦒꦶꦫꦺꦴ ꦪꦱ꧀ꦩꦴ ꦨꦒꦮꦴ ꦤ ꦏꦺꦮꦭꦁ ꦌꦠꦫꦲꦶ, ꦄꦠꦷꦠꦺꦥꦶ ꦄꦢ꧀ꦣꦴꦤꦺ ꦢꦷꦓꦫꦠ꧀ꦠꦁ ꦄꦢꦶꦤ꧀ꦤꦴꦢꦴꦤꦴꦢꦷꦲꦶ ꦥꦛꦶꦮꦶꦫꦠꦺꦴ, ꦠꦱ꧀ꦱꦴ ꦠꦱ꧀ꦱꦴꦪꦺꦮ ꦕ ꦮꦶꦫꦠꦶꦪꦴ ꦄꦴꦤꦸꦨꦴꦮꦺꦤ ꦠꦁ ꦠꦁ ꦩꦲꦴꦥꦸꦫꦶꦱꦭꦏ꧀ꦑꦟꦁ ꦥꦛꦶꦭꦨꦶ, ꦱꦢꦺꦮꦏꦺꦴ ꦕꦱ꧀ꦱ ꦭꦺꦴꦏꦺꦴ ‘‘ꦄꦢꦶꦤ꧀ꦤꦴꦢꦴꦤꦴ ꦥꦛꦶꦮꦶꦫꦠꦺꦴ ꦱꦩꦟꦺꦴ ꦒꦺꦴꦠꦩꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦮꦟ꧀ꦟꦁ ꦨꦴꦱꦠꦶ. ꦠꦱ꧀ꦩꦴ ꦮꦶꦱ꧀ꦱꦛ꧀ꦜꦴꦪ ꦮꦴꦕꦴꦪ ꦱꦷꦲꦤꦴꦢꦁ ꦤꦢꦤ꧀ꦠꦺꦴ ꦄꦴꦲ ‘‘ꦤ ꦱꦺꦴ ꦄꦢꦶꦤ꧀ꦤꦁ ꦄꦴꦢꦶꦪꦠꦷ’’ꦠꦶ. ꦠꦁ ꦄꦠ꧀ꦡꦠꦺꦴ ꦥꦴꦏꦛꦩꦺꦮ. ꦆꦩꦶꦱ꧀ꦱꦴꦥꦶ ꦒꦴꦡꦴꦪ ꦠꦠꦶꦪꦥꦴꦢꦺ ‘‘ꦥꦩꦴꦢꦩ꧀ꦲꦴ ꦥꦩꦢꦩ꧀ꦲꦴ’’ꦠꦶ ꦢ꧀ꦮꦶꦣꦴ ꦥꦴꦜꦺꦴ. ꦕꦠꦸꦠ꧀ꦡꦥꦴꦢꦺ ꦕ ꦙꦴꦤꦁ ꦤ ꦫꦶꦚ꧀ꦕꦠꦷꦠꦶ ꦙꦴꦤꦁ ꦫꦶꦠ꧀ꦠꦏꦁ ꦱꦸꦚ꧀ꦚꦏꦁ ꦤ ꦏꦫꦺꦴꦠꦶ, ꦤ ꦥꦫꦶꦕ꧀ꦕꦗꦠꦷꦠꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

꧑꧕꧘. ꦌꦮꦁ ꦏꦴꦪꦢ꧀ꦮꦴꦫꦺ ꦱꦸꦢ꧀ꦣꦶꦁ ꦱꦸꦠ꧀ꦮꦴ ꦆꦢꦴꦤꦶ ꦮꦕꦷꦢ꧀ꦮꦴꦫꦺ ꦱꦸꦢ꧀ꦣꦶꦁ ꦥꦸꦕ꧀ꦖꦤ꧀ꦠꦺꦴ ꦄꦴꦲ – ‘‘ꦏꦕ꧀ꦕꦶ ꦩꦸꦱꦴ ꦤ ꦨꦟꦠꦷ’’ꦠꦶ. ꦌꦠ꧀ꦡ ꦑꦷꦟꦴꦠꦷꦠꦶ ꦑꦷꦟꦺꦴ, ꦮꦶꦲꦶꦁꦱꦠꦶ ꦧꦣꦠꦷꦠꦶ ꦄꦠ꧀ꦡꦺꦴ. ꦮꦴꦕꦴꦪ ꦥꦡꦺꦴ ꦧ꧀ꦪꦥ꧀ꦥꦡꦺꦴ, ꦑꦷꦟꦺꦴ ꦧ꧀ꦪꦥ꧀ꦥꦡꦺꦴ ꦄꦱ꧀ꦱꦴꦠꦶ ꦑꦷꦟꦧ꧀ꦪꦥ꧀ꦥꦡꦺꦴ. ꦠꦁ ꦤ-ꦏꦴꦫꦺꦤ ꦥꦛꦶꦱꦺꦣꦺꦠ꧀ꦮꦴ ꦥꦸꦕ꧀ꦖꦠꦶ ‘‘ꦤ ꦑꦷꦟꦧ꧀ꦪꦥ꧀ꦥꦡꦺꦴ’’ꦠꦶ, ꦤ ꦦꦫꦸꦱꦮꦴꦕꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ‘‘ꦤꦴꦑꦷꦟꦧ꧀ꦪꦥ꧀ꦥꦡꦺꦴ’’ꦠꦶꦥꦶ ꦥꦴꦜꦺꦴ, ꦤ ꦄꦑꦷꦟꦮꦕꦤꦺꦴꦠꦶ ꦄꦠ꧀ꦡꦺꦴ. ꦦꦫꦸꦱꦮꦕꦤꦚ꧀ꦲꦶ ꦥꦫꦺꦱꦁ ꦲꦢꦪꦺ ꦄꦑꦷꦪꦩꦴꦤꦁ ꦠꦶꦛ꧀ꦜꦠꦶ. ꦠꦴꦢꦶꦱꦮꦕꦤꦺꦴ ꦏꦕ꧀ꦕꦶ ꦤ ꦱꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦮꦶꦨꦹꦠꦷꦠꦶ ꦮꦶꦤꦴꦱꦺꦴ, ꦮꦶꦨꦹꦠꦶꦁ ꦏꦴꦱꦠꦶ ꦏꦫꦺꦴꦠꦶ ꦮꦴꦠꦶ ꦮꦶꦨꦹꦠꦶꦏꦁ, ꦮꦶꦨꦹꦠꦶꦏꦩꦺꦮ ꦮꦺꦨꦹꦠꦶꦏꦁ, ꦮꦺꦨꦹꦠꦶꦪꦤ꧀ꦠꦶꦥꦶ ꦮꦸꦕ꧀ꦕꦠꦶ, ꦥꦺꦱꦸꦚ꧀ꦚꦱ꧀ꦱꦺꦠꦁ ꦄꦣꦶꦮꦕꦤꦁ. ꦠꦚ꧀ꦲꦶ ꦱꦠ꧀ꦠꦴꦤꦁ ꦄꦚ꧀ꦚꦩꦚ꧀ꦚꦠꦺꦴ ꦨꦺꦢꦤꦺꦤ ꦮꦶꦤꦴꦱꦁ ꦏꦫꦺꦴꦠꦶ. ꦱꦺꦱꦁ ꦈꦠ꧀ꦠꦴꦤꦠ꧀ꦡꦩꦺꦮ.

꧑꧕꧙. ꦄꦡ ꦱꦴꦠꦴꦒꦶꦫꦺꦴ ꦪꦱ꧀ꦩꦴ ꦨꦒꦮꦴ ꦤ ꦏꦺꦮꦭꦁ ꦌꦠꦫꦲꦶ, ꦄꦠꦷꦠꦺꦥꦶ ꦄꦢ꧀ꦣꦴꦤꦺ ꦢꦷꦓꦫꦠ꧀ꦠꦁ ꦩꦸꦱꦴꦮꦴꦢꦴꦢꦷꦲꦶ ꦥꦛꦶꦮꦶꦫꦠꦺꦴ, ꦠꦱ꧀ꦱꦴ ꦠꦱ꧀ꦱꦴꦪꦺꦮ ꦕ ꦮꦶꦫꦠꦶꦪꦴ ꦄꦴꦤꦸꦨꦴꦮꦺꦤ ꦠꦁ ꦠꦁ ꦩꦲꦴꦥꦸꦫꦶꦱꦭꦏ꧀ꦑꦟꦁ ꦥꦛꦶꦭꦨꦶ, ꦱꦢꦺꦮꦏꦺꦴ ꦕꦱ꧀ꦱ ꦭꦺꦴꦏꦺꦴ ‘‘ꦩꦸꦱꦴꦮꦴꦢꦴ ꦥꦛꦶꦮꦶꦫꦠꦺꦴ ꦱꦩꦟꦺꦴ ꦒꦺꦴꦠꦩꦺꦴ’’ꦠꦶ ꦮꦟ꧀ꦟꦁ ꦨꦴꦱꦠꦶ. ꦠꦱ꧀ꦩꦴ ꦮꦶꦱ꧀ꦱꦛ꧀ꦜꦴꦪ ꦮꦴꦕꦴꦪ ꦱꦷꦲꦤꦴꦢꦁ ꦤꦢꦤ꧀ꦠꦺꦴ ꦄꦴꦲ, ‘‘ꦩꦸꦱꦴ ꦕ ꦱꦺꦴ ꦤ ꦨꦟꦠꦷ’’ꦠꦶ. ꦠꦠ꧀ꦡ ꦩꦸꦱꦴꦠꦶ ꦮꦶꦤꦶꦣꦴꦪ ꦢꦶꦛ꧀ꦜꦴꦢꦷꦤꦶ ꦥꦫꦮꦶꦱꦁꦮꦴꦢꦤꦮꦕꦤꦁ. ꦠꦁ ꦱꦺꦴ ꦤ ꦨꦟꦠꦶ. ꦢꦸꦠꦶꦪꦥꦴꦢꦺ ꦥꦤ ꦥꦜꦩꦠ꧀ꦡꦮꦱꦺꦤ ꦤ ꦑꦷꦟꦧ꧀ꦪꦥ꧀ꦥꦡꦺꦴꦠꦶ, ꦢꦸꦠꦶꦪꦠ꧀ꦡꦮꦱꦺꦤ ꦤꦴꦑꦷꦟꦧ꧀ꦪꦥ꧀ꦥꦡꦺꦴꦠꦶ ꦥꦴꦜꦺꦴ. ꦕꦠꦸꦠ꧀ꦡꦥꦴꦢꦺ ꦩꦤ꧀ꦠꦴꦠꦶ ꦥꦚ꧀ꦚꦴ ꦮꦸꦕ꧀ꦕꦠꦶ. ꦨꦒꦮꦴ ꦪꦱ꧀ꦩꦴ ꦠꦴꦪ ꦩꦤ꧀ꦠꦴꦪ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦄꦠ꧀ꦡꦩꦺꦮ ꦨꦴꦱꦠꦶ ꦄꦠ꧀ꦡꦠꦺꦴ ꦄꦤꦥꦺꦠꦮꦕꦤꦁ, ꦤ ꦱꦩ꧀ꦦꦁ. ꦄꦚ꧀ꦚꦴꦟꦥꦸꦫꦺꦏ꧀ꦑꦴꦫꦚ꧀ꦲꦶ ꦤꦶꦫꦠ꧀ꦡꦏꦮꦕꦤꦁ ꦧꦸꦢ꧀ꦣꦴꦤꦁ ꦤꦠ꧀ꦡꦶ. ꦠꦱ꧀ꦩꦴ ꦄꦴꦲ – ‘‘ꦩꦤ꧀ꦠꦴ ꦄꦠ꧀ꦡꦁ ꦱꦺꦴ ꦨꦴꦱꦠꦷ’’ꦠꦶ. ꦱꦺꦱꦩꦺꦠ꧀ꦡ ꦥꦴꦏꦛꦩꦺꦮ.

꧑꧖꧐. ꦌꦮꦁ ꦮꦕꦷꦢ꧀ꦮꦴꦫꦱꦸꦢ꧀ꦣꦶꦩ꧀ꦥꦶ ꦱꦸꦠ꧀ꦮꦴ ꦆꦢꦴꦤꦶ ꦩꦤꦺꦴꦢ꧀ꦮꦴꦫꦱꦸꦢ꧀ꦣꦶꦁ ꦥꦸꦕ꧀ꦖꦤ꧀ꦠꦺꦴ ꦄꦴꦲ ‘‘ꦏꦕ꧀ꦕꦶ ꦤ ꦫꦗ꧀ꦗꦠꦶ ꦏꦴꦩꦺꦱꦹ’’ꦠꦶ. ꦠꦠ꧀ꦡ ꦏꦴꦩꦴꦠꦶ ꦮꦠ꧀ꦡꦸꦏꦴꦩꦴ. ꦠꦺꦱꦸ ꦏꦶꦭꦺꦱꦏꦴꦩꦺꦤ ꦤ ꦫꦗ꧀ꦗꦠꦷꦠꦶ ꦥꦸꦕ꧀ꦖꦤ꧀ꦠꦺꦴ ꦄꦤꦨꦶꦗ꧀ꦙꦴꦭꦸꦠꦁ ꦥꦸꦕ꧀ꦖꦠꦶ. ꦄꦤꦴꦮꦶꦭꦤ꧀ꦠꦶ ꦥꦸꦕ꧀ꦖꦤ꧀ꦠꦺꦴ ꦧ꧀ꦪꦴꦥꦴꦢꦺꦤ ꦄꦴꦮꦶꦭꦨꦴꦮꦁ ꦱꦤ꧀ꦣꦴꦪ ꦄꦧ꧀ꦪꦴꦥꦴꦢꦠꦁ ꦥꦸꦕ꧀ꦖꦠꦶ. ꦩꦺꦴꦲꦁ ꦄꦠꦶꦏ꧀ꦏꦤ꧀ꦠꦺꦴꦠꦶ ꦥꦸꦕ꧀ꦖꦤ꧀ꦠꦺꦴ ꦪꦺꦤ ꦩꦺꦴꦲꦺꦤ ꦩꦹꦭ꦳꧀ꦲꦺꦴ ꦩꦶꦕ꧀ꦖꦴꦢꦶꦛ꧀ꦜꦶꦁ ꦒꦟ꧀ꦲꦴꦠꦶ, ꦠꦱ꧀ꦱꦴꦠꦶꦏ꧀ꦏꦩꦺꦤ ꦱꦩ꧀ꦩꦴꦢꦶꦛ꧀ꦜꦶꦠꦁ ꦥꦸꦕ꧀ꦖꦠꦶ. ꦣꦩ꧀ꦩꦺꦱꦸ ꦕꦏ꧀ꦑꦸꦩꦴꦠꦶ ꦥꦸꦕ꧀ꦖꦤ꧀ꦠꦺꦴ ꦱꦧ꧀ꦧꦣꦩ꧀ꦩꦺꦱꦸ ꦄꦥ꧀ꦥꦛꦶꦲꦠꦱ꧀ꦱ ꦚꦴꦟꦕꦏ꧀ꦑꦸꦤꦺꦴ, ꦥꦚ꧀ꦕꦕꦏ꧀ꦑꦸꦮꦶꦱꦪꦺꦱꦸ ꦮꦴ ꦣꦩ꧀ꦩꦺꦱꦸ ꦥꦚ꧀ꦕꦤ꧀ꦤꦩ꧀ꦥꦶ ꦕꦏ꧀ꦑꦹꦤꦁ ꦮꦱꦺꦤ ꦱꦧ꧀ꦧꦚ꧀ꦚꦸꦠꦁ ꦥꦸꦕ꧀ꦖꦠꦶ ‘‘ꦢ꧀ꦮꦴꦫꦠ꧀ꦠꦪꦥꦴꦫꦶꦱꦸꦢ꧀ꦣꦶꦪꦴꦥꦶ ꦱꦧ꧀ꦧꦚ꧀ꦚꦹ ꦤ ꦲꦺꦴꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ.

꧑꧖꧑. ꦄꦡ ꦱꦴꦠꦴꦒꦶꦫꦺꦴ ꦪꦱ꧀ꦩꦴ ꦨꦒꦮꦴ ꦄꦥ꧀ꦥꦠ꧀ꦮꦴꦮ ꦄꦫꦲꦠ꧀ꦠꦁ ꦄꦤꦴꦒꦴꦩꦶꦩꦒ꧀ꦒꦺꦤ ꦏꦴꦩꦫꦴꦒꦧ꧀ꦪꦴꦥꦴꦢꦴꦤꦁ ꦥꦲꦷꦤꦠ꧀ꦠꦴ ꦤꦺꦮ ꦏꦴꦩꦺꦱꦸ ꦫꦗ꧀ꦗꦠꦶ, ꦤ ꦧ꧀ꦪꦴꦥꦴꦢꦺꦤ ꦄꦴꦮꦶꦭꦕꦶꦠ꧀ꦠꦺꦴ, ꦱꦺꦴꦠꦴꦥꦠ꧀ꦠꦶꦩꦒ꧀ꦒꦺꦤꦺꦮ ꦕ ꦩꦶꦕ꧀ꦖꦴꦢꦶꦛ꧀ꦜꦶꦥꦕ꧀ꦕꦪꦱ꧀ꦱ ꦱꦕ꧀ꦕꦥꦛꦶꦕ꧀ꦖꦴꦢꦏꦩꦺꦴꦲꦱ꧀ꦱ ꦥꦲꦷꦤꦠ꧀ꦠꦴ ꦩꦺꦴꦲꦁ ꦄꦠꦶꦏ꧀ꦏꦤ꧀ꦠꦺꦴ, ꦱꦴꦩꦚ꧀ꦕ ꦱꦕ꧀ꦕꦴꦤꦶ ꦄꦨꦶꦱꦩ꧀ꦧꦸꦗ꧀ꦙꦶꦠ꧀ꦮꦴ ꦧꦸꦢ꧀ꦣꦺꦴꦠꦶ ꦮꦶꦩꦺꦴꦏ꧀ꦑꦤ꧀ꦠꦶꦏꦁ ꦤꦴꦩꦁ ꦪꦡꦴꦮꦸꦠ꧀ꦠꦴꦤꦶ ꦕ ꦕꦏ꧀ꦑꦹꦤꦶ ꦥꦛꦶꦭꦨꦶ, ꦠꦱ꧀ꦩꦴ ꦠꦱ꧀ꦱ ꦩꦤꦺꦴꦢ꧀ꦮꦴꦫꦱꦸꦢ꧀ꦣꦶꦁ ꦱꦧ꧀ꦧꦚ꧀ꦚꦸꦠꦚ꧀ꦕ ꦈꦒ꧀ꦓꦺꦴꦱꦺꦤ꧀ꦠꦺꦴ ꦄꦴꦲ ‘‘ꦤ ꦱꦺꦴ ꦫꦗ꧀ꦗꦠꦶ ꦏꦴꦩꦺꦱꦹ’’ꦠꦶ.

꧑꧖꧒. ꦌꦮꦁ ꦲꦺꦩꦮꦠꦺꦴ ꦨꦒꦮꦠꦺꦴ ꦢ꧀ꦮꦴꦫꦠ꧀ꦠꦪꦥꦴꦫꦶꦱꦸꦢ꧀ꦣꦶꦁ ꦱꦧ꧀ꦧꦚ꧀ꦚꦸꦠꦚ꧀ꦕ ꦱꦸꦠ꧀ꦮꦴ ꦲꦛ꧀ꦜꦺꦴ ꦈꦢꦒ꧀ꦒꦺꦴ ꦄꦠꦷꦠꦗꦴꦠꦶꦪꦁ ꦧꦴꦲꦸꦱꦕ꧀ꦕꦮꦶꦱꦢꦴꦪ ꦥꦚ꧀ꦚꦴꦪ ꦄꦱꦗ꧀ꦗꦩꦴꦤꦮꦕꦤꦥ꧀ꦥꦡꦺꦴ ꦲꦸꦠ꧀ꦮꦴ ꦄꦕ꧀ꦖꦫꦶꦪꦧ꧀ꦨꦸꦠꦫꦹꦥꦺ ꦱꦧ꧀ꦧꦚ꧀ꦚꦸꦒꦸꦟꦺ ꦱꦺꦴꦠꦸꦏꦴꦩꦺꦴ ꦄꦴꦲ ‘‘ꦏꦕ꧀ꦕꦶ ꦮꦶꦗ꧀ꦗꦴꦪ ꦱꦩ꧀ꦥꦤ꧀ꦤꦺꦴ’’ꦠꦶ. ꦠꦠ꧀ꦡ ꦮꦶꦗ꧀ꦗꦴꦪ ꦱꦩ꧀ꦥꦤ꧀ꦤꦺꦴꦠꦶ ꦆꦩꦶꦤꦴ ꦢꦱ꧀ꦱꦤꦱꦩ꧀ꦥꦠ꧀ꦠꦶꦁ ꦥꦸꦕ꧀ꦖꦠꦶ, ꦱꦁꦱꦸꦢ꧀ꦣꦕꦴꦫꦟꦺꦴꦠꦶ ꦆꦩꦶꦤꦴ ꦒꦩꦤꦱꦩ꧀ꦥꦠ꧀ꦠꦶꦁ. ꦖꦤ꧀ꦢꦮꦱꦺꦤ ꦕꦺꦠ꧀ꦡ ꦢꦷꦓꦁ ꦏꦠ꧀ꦮꦴ ꦕꦴꦏꦴꦫꦩꦴꦲ, ꦱꦁꦱꦸꦢ꧀ꦣꦕꦫꦟꦺꦴꦠꦶ ꦄꦠ꧀ꦡꦺꦴ. ꦄꦴꦱꦮꦴ ꦑꦷꦟꦴꦠꦶ ꦆꦩꦶꦤꦴ ꦌꦠꦴꦪ ꦢꦱ꧀ꦱꦤꦒꦩꦤꦱꦩ꧀ꦥꦠ꧀ꦠꦶꦪꦴ ꦥꦠ꧀ꦠꦧ꧀ꦧꦴꦪ ꦄꦴꦱꦮꦏ꧀ꦑꦪꦱꦚ꧀ꦚꦶꦠꦴꦪ ꦥꦜꦩꦤꦶꦧ꧀ꦧꦴꦤꦣꦴꦠꦸꦪꦴ ꦥꦠ꧀ꦠꦶꦁ ꦥꦸꦕ꧀ꦖꦠꦶ, ꦤꦠ꧀ꦡꦶ ꦥꦸꦤꦧ꧀ꦨꦮꦺꦴꦠꦶ ꦆꦩꦶꦤꦴ ꦢꦸꦠꦶꦪꦤꦶꦧ꧀ꦧꦴꦤꦣꦴꦠꦸꦥꦠ꧀ꦠꦶꦱꦩꦠ꧀ꦡꦠꦁ, ꦥꦕ꧀ꦕꦮꦺꦏ꧀ꦑꦟꦚꦴꦟꦺꦤ ꦮꦴ ꦥꦫꦩꦱ꧀ꦱꦴꦱꦥ꧀ꦥꦠ꧀ꦠꦶꦁ ꦚꦠ꧀ꦮꦴ ꦜꦶꦠꦨꦴꦮꦁ.

꧑꧖꧓. ꦠꦠꦺꦴ ꦪꦴ ꦌꦱꦴ ‘‘ꦱꦺꦴ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱ’’ꦤ꧀ꦠꦶꦄꦴꦢꦶꦤꦴ (ꦩ. ꦤꦶ. ꧑.꧕꧒) ꦤꦪꦺꦤ ꦨꦪꦨꦺꦫꦮꦴꦢꦷꦱꦸ ꦠꦶꦮꦶꦣꦴ, ‘‘ꦱꦺꦴ ꦌꦮꦁ ꦱꦩꦴꦲꦶꦠꦺ ꦕꦶꦠ꧀ꦠꦺ…ꦥꦺ… ꦄꦴꦤꦺꦚ꧀ꦗꦥ꧀ꦥꦠ꧀ꦠꦺ ꦚꦴꦟꦢꦱ꧀ꦱꦤꦴꦪ ꦕꦶꦠ꧀ꦠꦁ ꦄꦨꦶꦤꦷꦲꦫꦠꦷ’’ꦠꦶꦄꦴꦢꦶꦤꦴ (ꦢꦷ. ꦤꦶ. ꧑.꧒꧗꧙) ꦤꦪꦺꦤ ꦄꦩ꧀ꦧꦛ꧀ꦜꦴꦢꦷꦱꦸ ꦄꦛ꧀ꦜꦮꦶꦣꦴ ꦮꦶꦗ꧀ꦗꦴ ꦮꦸꦠ꧀ꦠꦴ, ꦠꦴꦪ ꦪꦱ꧀ꦩꦴ ꦱꦧ꧀ꦧꦴꦪꦥꦶ ꦱꦧ꧀ꦧꦴꦏꦴꦫꦱꦩ꧀ꦥꦤ꧀ꦤꦴꦪ ꦨꦒꦮꦴ ꦈꦥꦺꦠꦺꦴ. ꦪꦚ꧀ꦕꦺꦠꦁ ‘‘ꦆꦣ, ꦩꦲꦴꦤꦴꦩ, ꦄꦫꦶꦪꦱꦴꦮꦏꦺꦴ ꦱꦷꦭꦱꦩ꧀ꦥꦤ꧀ꦤꦺꦴ ꦲꦺꦴꦠꦶ, ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦺꦴ ꦲꦺꦴꦠꦶ, ꦨꦺꦴꦗꦤꦺ ꦩꦠ꧀ꦠꦚ꧀ꦚꦹ ꦲꦺꦴꦠꦶ, ꦗꦴꦒꦫꦶꦪꦁ ꦄꦤꦸꦪꦸꦠ꧀ꦠꦺꦴ ꦲꦺꦴꦠꦶ, ꦱꦠ꧀ꦠꦲꦶ ꦱꦢ꧀ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ, ꦕꦠꦸꦤ꧀ꦤꦁ ꦙꦴꦤꦴꦤꦁ ꦄꦴꦨꦶꦕꦺꦠꦱꦶꦏꦴꦤꦁ ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦴꦤꦁ ꦤꦶꦏꦴꦩꦭꦴꦨꦷ ꦲꦺꦴꦠꦷ’’ꦠꦶ ꦌꦮꦁ ꦈꦢ꧀ꦢꦶꦱꦶꦠ꧀ꦮꦴ ‘‘ꦏꦡꦚ꧀ꦕ, ꦩꦲꦴꦤꦴꦩ, ꦄꦫꦶꦪꦱꦴꦮꦏꦺꦴ ꦱꦷꦭꦱꦩ꧀ꦥꦤ꧀ꦤꦺꦴ ꦲꦺꦴꦠꦷ’’ꦠꦶꦄꦴꦢꦶꦤꦴ (ꦩ. ꦤꦶ. ꧒.꧒꧔) ꦤꦪꦺꦤ ꦱꦺꦑꦱꦸꦠ꧀ꦠꦺ ꦤꦶꦢ꧀ꦢꦶꦛ꧀ꦜꦁ ꦥꦤ꧀ꦤꦫꦱꦥ꧀ꦥꦨꦺꦢꦁ ꦕꦫꦟꦁ. ꦠꦚ꧀ꦕ ꦪꦱ꧀ꦩꦴ ꦱꦧ꧀ꦧꦹꦥꦏ꧀ꦏꦶꦭꦺꦱꦥ꧀ꦥꦲꦴꦤꦺꦤ ꦨꦒꦮꦠꦺꦴ ꦄꦠꦶꦮꦶꦪ ꦱꦁꦱꦸꦢ꧀ꦣꦁ. ꦪꦺꦥꦶꦩꦺ ꦏꦴꦩꦴꦱꦮꦴꦢꦪꦺꦴ ꦕꦠ꧀ꦠꦴꦫꦺꦴ ꦄꦴꦱꦮꦴ, ꦠꦺꦥꦶ ꦪꦱ꧀ꦩꦴ ꦱꦧ꧀ꦧꦺ ꦱꦥꦫꦶꦮꦴꦫꦴ ꦱꦮꦴꦱꦤꦴ ꦨꦒꦮꦠꦺꦴ ꦑꦷꦟꦴ. ꦪꦱ꧀ꦩꦴ ꦕ ꦆꦩꦴꦪ ꦮꦶꦗ꧀ꦗꦴꦕꦫꦟꦱꦩ꧀ꦥꦢꦴꦪ ꦑꦷꦟꦴꦱꦮꦺꦴ ꦲꦸꦠ꧀ꦮꦴ ꦠꦢꦴ ꦨꦒꦮꦴ ‘‘ꦤꦠ꧀ꦡꦶ ꦢꦴꦤꦶ ꦥꦸꦤꦧ꧀ꦨꦮꦺꦴ’’ꦠꦶ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ ꦜꦶꦠꦺꦴ, ꦠꦱ꧀ꦩꦴ ꦱꦴꦠꦴꦒꦶꦫꦺꦴ ꦨꦒꦮꦠꦺꦴ ꦱꦧ꧀ꦧꦚ꧀ꦚꦸꦨꦴꦮꦺ ꦧ꧀ꦪꦮꦱꦴꦪꦺꦤ ꦱꦩꦸꦱ꧀ꦱꦴꦲꦶꦠꦲꦢꦪꦺꦴ ꦱꦧ꧀ꦧꦺꦥꦶ ꦒꦸꦟꦺ ꦄꦤꦸꦗꦴꦤꦤ꧀ꦠꦺꦴ ꦄꦴꦲ ‘‘ꦮꦶꦗ꧀ꦗꦴꦪ ꦕꦺꦮ ꦱꦩ꧀ꦥꦤ꧀ꦤꦺꦴ’’ꦠꦶ.

꧑꧖꧔. ꦠꦠꦺꦴ ꦲꦺꦩꦮꦠꦺꦴ ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦨꦒꦮꦴ’’ꦠꦶ ꦨꦒꦮꦠꦶ ꦤꦶꦏ꧀ꦏꦔ꧀ꦑꦺꦴ ꦲꦸꦠ꧀ꦮꦴ ꦄꦴꦏꦴꦱꦺ ꦜꦶꦠꦺꦴꦪꦺꦮ ꦨꦒꦮꦤ꧀ꦠꦁ ꦥꦱꦁꦱꦤ꧀ꦠꦺꦴ ꦱꦴꦠꦴꦒꦶꦫꦚ꧀ꦕ ꦄꦴꦫꦴꦣꦺꦤ꧀ꦠꦺꦴ ꦄꦴꦲ ‘‘ꦱꦩ꧀ꦥꦤ꧀ꦤꦁ ꦩꦸꦤꦶꦤꦺꦴ ꦕꦶꦠ꧀ꦠ’’ꦤ꧀ꦠꦶ. ꦠꦱ꧀ꦱꦠ꧀ꦡꦺꦴ – ꦱꦩ꧀ꦥꦤ꧀ꦤꦁ ꦩꦸꦤꦶꦤꦺꦴ ꦕꦶꦠ꧀ꦠꦁ, ‘‘ꦩꦤꦺꦴ ꦕꦱ꧀ꦱ ꦱꦸꦥꦟꦶꦲꦶꦠꦺꦴ’’ꦠꦶ ꦌꦠ꧀ꦡ ꦮꦸꦠ꧀ꦠꦠꦴꦢꦶꦨꦴꦮꦺꦤ ꦥꦸꦟ꧀ꦟꦁ ꦱꦩ꧀ꦥꦸꦟ꧀ꦟꦁ, ‘‘ꦤ ꦱꦺꦴ ꦄꦢꦶꦤ꧀ꦤꦁ ꦄꦴꦢꦶꦪꦠꦷ’’ꦠꦶ ꦌꦠ꧀ꦡ ꦮꦸꦠ꧀ꦠꦏꦴꦪꦏꦩ꧀ꦩꦸꦤꦴ, ‘‘ꦤ ꦱꦺꦴ ꦫꦗ꧀ꦗꦠꦶ ꦏꦴꦩꦺꦱꦹ’’ꦠꦶ ꦌꦠ꧀ꦡ ꦮꦸꦠ꧀ꦠꦩꦤꦺꦴꦏꦩ꧀ꦩꦸꦤꦴ ꦕ ꦥꦸꦟ꧀ꦟꦁ ꦱꦩ꧀ꦥꦸꦟ꧀ꦟꦁ, ‘‘ꦩꦸꦱꦴ ꦕ ꦱꦺꦴ ꦤ ꦨꦟꦠꦷ’’ꦠꦶ ꦌꦠ꧀ꦡ ꦮꦸꦠ꧀ꦠꦧ꧀ꦪꦥ꧀ꦥꦡꦺꦤ ꦕ ꦮꦕꦷꦏꦩ꧀ꦩꦸꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦌꦮꦁ ꦱꦩ꧀ꦥꦤ꧀ꦤꦕꦶꦠ꧀ꦠꦚ꧀ꦕ ꦄꦤꦸꦠ꧀ꦠꦫꦴꦪ ꦮꦶꦗ꧀ꦗꦴꦕꦫꦟꦱꦩ꧀ꦥꦢꦴꦪ ꦱꦩ꧀ꦥꦤ꧀ꦤꦠ꧀ꦠꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦚ꧀ꦕ ꦆꦩꦺꦲꦶ ꦒꦸꦟꦺꦲꦶ ‘‘ꦩꦤꦺꦴ ꦕꦱ꧀ꦱ ꦱꦸꦥꦟꦶꦲꦶꦠꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦣꦩ꧀ꦩꦠꦺꦴ ꦤꦁ ꦥꦱꦁꦱꦱꦶ, ꦱꦨꦴꦮꦠꦺꦴ ꦠꦕ꧀ꦖꦠꦺꦴ ꦨꦹꦠꦠꦺꦴ ꦌꦮ ꦤꦁ ꦥꦱꦁꦱꦱꦶ, ꦤ ꦏꦺꦮꦭꦁ ꦱꦢ꧀ꦣꦴꦩꦠ꧀ꦠꦏꦺꦤꦴꦠꦶ ꦢꦱ꧀ꦱꦺꦠꦶ.

꧑꧖꧕-꧑꧖꧖. ꦠꦠꦺꦴ ꦱꦴꦠꦴꦒꦶꦫꦺꦴꦥꦶ ‘‘ꦌꦮꦩꦺꦠꦁ, ꦩꦴꦫꦶꦱ, ꦱꦸꦛ꧀ꦜꦸ ꦠꦪꦴ ꦚꦴꦠꦚ꧀ꦕ ꦄꦤꦸꦩꦺꦴꦢꦶꦠꦚ꧀ꦕꦴ’’ꦠꦶ ꦄꦣꦶꦥ꧀ꦥꦴꦪꦺꦤ ꦠꦩꦺꦮ ꦱꦁꦫꦴꦣꦺꦤ꧀ꦠꦺꦴ ꦄꦴꦲ – ‘‘ꦱꦩ꧀ꦥꦤ꧀ꦤꦁ ꦩꦸꦤꦶꦤꦺꦴ…ꦥꦺ… ꦣꦩ꧀ꦩꦠꦺꦴ ꦄꦤꦸꦩꦺꦴꦢꦱꦷ’’ꦠꦶ. ꦌꦮꦚ꧀ꦕ ꦥꦤ ꦮꦠ꧀ꦮꦴ ꦥꦸꦤ ꦨꦒꦮꦠꦺꦴ ꦢꦱ꧀ꦱꦤꦺ ꦠꦁ ꦄꦨꦶꦠ꧀ꦡꦮꦪꦩꦴꦤꦺꦴ ꦄꦴꦲ ‘‘ꦱꦩ꧀ꦥꦤ꧀ꦤꦁ…ꦥꦺ… ꦲꦤ꧀ꦢ ꦥꦱ꧀ꦱꦴꦩ ꦒꦺꦴꦠꦩ’’ꦤ꧀ꦠꦶ.

꧑꧖꧗. ꦄꦡ ꦲꦺꦩꦮꦠꦺꦴ ꦄꦠ꧀ꦠꦤꦺꦴ ꦄꦨꦶꦫꦸꦕꦶꦠꦒꦸꦟꦺꦲꦶ ꦥꦸꦫꦶꦩꦗꦴꦠꦶꦧꦴꦲꦸꦱꦕ꧀ꦕꦧꦭꦺꦤ ꦨꦒꦮꦤ꧀ꦠꦁ ꦄꦨꦶꦠ꧀ꦡꦸꦤꦤ꧀ꦠꦺꦴ ꦱꦴꦠꦴꦒꦶꦫꦁ ꦄꦴꦲ – ‘‘ꦌꦟꦶꦗꦔ꧀ꦓꦁ…ꦥꦺ… ꦌꦲꦶ ꦥꦱ꧀ꦱꦴꦩ ꦒꦺꦴꦠꦩ’’ꦤ꧀ꦠꦶ. ꦠꦱ꧀ꦱꦠ꧀ꦡꦺꦴ – ꦌꦟꦶꦩꦶꦒꦱ꧀ꦱꦺꦮ ꦗꦔ꧀ꦓꦴ ꦄꦱ꧀ꦱꦴꦠꦶ ꦌꦟꦶꦗꦔ꧀ꦓꦺꦴ. ꦧꦸꦢ꧀ꦣꦴꦤꦚ꧀ꦲꦶ ꦌꦟꦶꦩꦶꦒꦱ꧀ꦱꦺꦮ ꦄꦤꦸꦥꦸꦧ꧀ꦧꦮꦛ꧀ꦛꦴ ꦗꦔ꧀ꦓꦴ ꦲꦺꦴꦤ꧀ꦠꦶ, ꦤ ꦥꦸꦫꦠꦺꦴ ꦤꦶꦩ꧀ꦩꦁꦱꦴ ꦥꦕ꧀ꦖꦠꦺꦴ ꦱꦸꦱꦸꦩꦴꦫꦏꦸꦕ꧀ꦖꦶ ꦮꦶꦪ ꦈꦢ꧀ꦣꦸꦩꦴꦠꦴ. ꦏꦶꦱꦴ ꦕ ꦧꦸꦢ꧀ꦣꦴ ꦲꦺꦴꦤ꧀ꦠꦶ ꦢꦷꦓꦫꦱ꧀ꦱꦱꦩꦮꦛ꧀ꦛꦶꦠꦪꦸꦠ꧀ꦠꦛ꧀ꦜꦴꦤꦺꦱꦸ ꦠꦡꦴꦫꦹꦥꦴꦪ ꦄꦔ꧀ꦒꦥꦕ꧀ꦕꦔ꧀ꦒꦱꦩ꧀ꦥꦠ꧀ꦠꦶꦪꦴ, ꦤ ꦮꦜꦫꦥꦸꦫꦶꦱꦴ ꦮꦶꦪ ꦡꦹꦭꦴ. ꦥꦚ꧀ꦚꦴꦪ ꦮꦶꦭꦶꦑꦶꦠꦏꦶꦭꦺꦱꦠ꧀ꦠꦴ ꦮꦴ ꦏꦶꦱꦴ. ꦄꦗ꧀ꦙꦠ꧀ꦠꦶꦏꦧꦴꦲꦶꦫꦱꦥꦠ꧀ꦠꦮꦶꦢ꧀ꦣꦁꦱꦤꦠꦺꦴ ꦮꦷꦫꦴ. ꦌꦏꦴꦱꦤꦨꦺꦴꦗꦶꦠꦴꦪ ꦥꦫꦶꦩꦶꦠꦨꦺꦴꦗꦶꦠꦴꦪ ꦕ ꦄꦥ꧀ꦥꦴꦲꦴꦫꦴ, ꦤ ꦢ꧀ꦮꦠ꧀ꦠꦶꦩꦠ꧀ꦠꦴꦭꦺꦴꦥꦨꦺꦴꦗꦶꦠꦴꦪ. ꦪꦡꦴꦲ –

‘‘ꦄꦲꦁ ꦑꦺꦴ ꦥꦤ, ꦈꦢꦴꦪꦶ, ꦄꦥ꧀ꦥꦺꦏꦢꦴ ꦆꦩꦶꦤꦴ ꦥꦠ꧀ꦠꦺꦤ ꦱꦩꦠꦶꦠ꧀ꦠꦶꦏꦩ꧀ꦥꦶ ꦨꦸꦚ꧀ꦗꦴꦩꦶ, ꦨꦶꦪ꧀ꦪꦺꦴꦥꦶ ꦨꦸꦚ꧀ꦗꦴꦩꦶ. ‘ꦄꦥ꧀ꦥꦴꦲꦴꦫꦺꦴ ꦱꦩꦟꦺꦴ ꦒꦺꦴꦠꦩꦺꦴ ꦄꦥ꧀ꦥꦴꦲꦴꦫꦠꦴꦪ ꦕ ꦮꦟ꧀ꦟꦮꦴꦢꦷ’ꦠꦶ ꦆꦠꦶ ꦕꦺ ꦩꦁ, ꦈꦢꦴꦪꦶ, ꦱꦴꦮꦏꦴ ꦱꦏ꧀ꦏꦫꦺꦪ꧀ꦪꦸꦁ, ꦒꦫꦸꦁ ꦏꦫꦺꦪ꧀ꦪꦸꦁ, ꦩꦴꦤꦺꦪ꧀ꦪꦸꦁ, ꦥꦹꦗꦺꦪ꧀ꦪꦸꦁ, ꦱꦏ꧀ꦏꦠ꧀ꦮꦴ, ꦒꦫꦸꦁ ꦏꦠ꧀ꦮꦴ, ꦈꦥꦤꦶꦱ꧀ꦱꦴꦪ ꦮꦶꦲꦫꦺꦪ꧀ꦪꦸꦁ. ꦪꦺ ꦠꦺ, ꦈꦢꦴꦪꦶ, ꦩꦩ ꦱꦴꦮꦏꦴ ꦏꦺꦴꦱꦏꦴꦲꦴꦫꦴꦥꦶ ꦄꦝ꧀ꦞꦏꦺꦴꦱꦏꦴꦲꦴꦫꦴꦥꦶ ꦧꦺꦭꦸꦮꦴꦲꦴꦫꦴꦥꦶ ꦄꦝ꧀ꦞꦧꦺꦭꦸꦮꦴꦲꦴꦫꦴꦥꦶ, ꦤ ꦩꦁ ꦠꦺ ꦆꦩꦶꦤꦴ ꦣꦩ꧀ꦩꦺꦤ ꦱꦏ꧀ꦏꦫꦺꦪ꧀ꦪꦸꦁ…ꦥꦺ… ꦈꦥꦤꦶꦱ꧀ꦱꦴꦪ ꦮꦶꦲꦫꦺꦪ꧀ꦪꦸ’’ꦤ꧀ꦠꦶ (ꦩ. ꦤꦶ. ꧒.꧒꧔꧒).

ꦄꦴꦲꦴꦫꦺ ꦖꦤ꧀ꦢꦫꦴꦒꦴꦨꦴꦮꦺꦤ ꦄꦭꦺꦴꦭꦸꦥꦴ ꦄꦛ꧀ꦜꦔ꧀ꦒꦱꦩꦤ꧀ꦤꦴꦒꦠꦁ ꦄꦴꦲꦴꦫꦁ ꦄꦴꦲꦴꦫꦺꦤ꧀ꦠꦶ ꦩꦺꦴꦤꦺꦪ꧀ꦪꦱꦩ꧀ꦥꦠ꧀ꦠꦶꦪꦴ ꦩꦸꦤꦶꦤꦺꦴ. ꦄꦤꦒꦴꦫꦶꦏꦠꦴꦪ ꦮꦶꦮꦺꦏꦤꦶꦤ꧀ꦤꦩꦴꦤꦱꦠꦴꦪ ꦕ ꦮꦤꦺ ꦙꦴꦪꦤ꧀ꦠꦶ. ꦠꦺꦤꦴꦲ ꦲꦺꦩꦮꦠꦺꦴ ꦪꦏ꧀ꦑꦺꦴ ‘‘ꦌꦟꦶꦗꦔ꧀ꦓꦁ…ꦥꦺ… ꦌꦲꦶ ꦥꦱ꧀ꦱꦴꦩ ꦒꦺꦴꦠꦩ’’ꦤ꧀ꦠꦶ.

꧑꧖꧘. ꦌꦮꦚ꧀ꦕ ꦮꦠ꧀ꦮꦴ ꦥꦸꦤ ꦠꦱ꧀ꦱ ꦨꦒꦮꦠꦺꦴ ꦱꦤ꧀ꦠꦶꦏꦺ ꦣꦩ꧀ꦩꦁ ꦱꦺꦴꦠꦸꦏꦴꦩꦠꦴꦪ ‘‘ꦱꦷꦲꦁꦮꦺꦏꦕꦫ’’ꦤ꧀ꦠꦶ ꦆꦩꦁ ꦒꦴꦡꦩꦴꦲ. ꦠꦱ꧀ꦱꦠ꧀ꦡꦺꦴ – ꦱꦷꦲꦁꦮꦴꦠꦶ ꦢꦸꦫꦴꦱꦢꦛ꧀ꦜꦺꦤ ꦑꦩꦤꦛ꧀ꦜꦺꦤ ꦤꦶꦧ꧀ꦨꦪꦛ꧀ꦜꦺꦤ ꦕ ꦏꦺꦱꦫꦱꦷꦲꦱꦢꦶꦱꦁ. ꦪꦴꦪ ꦠꦟ꧀ꦲꦴꦪ ‘‘ꦠꦟ꧀ꦲꦴꦢꦸꦠꦶꦪꦺꦴ ꦥꦸꦫꦶꦱꦺꦴ’’ꦠꦶ ꦮꦸꦕ꧀ꦕꦠꦶ, ꦠꦱ꧀ꦱꦴ ꦄꦨꦴꦮꦺꦤ ꦌꦏꦕꦫꦁ, ꦌꦏꦶꦱ꧀ꦱꦴ ꦭꦺꦴꦏꦣꦴꦠꦸꦪꦴ ꦢ꧀ꦮꦶꦤ꧀ꦤꦁ ꦧꦸꦢ꧀ꦣꦴꦤꦁ ꦄꦤꦸꦥ꧀ꦥꦠ꧀ꦠꦶꦠꦺꦴꦥꦶ ꦌꦏꦕꦫꦁ. ꦑꦒ꧀ꦒꦮꦶꦱꦴꦟꦱꦸꦠ꧀ꦠꦺ ꦮꦸꦠ꧀ꦠꦤꦪꦺꦤꦴꦥꦶ ꦕꦺꦠ꧀ꦡ ꦠꦁ ꦠꦁ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦤꦴꦒꦤ꧀ꦠꦶ ꦥꦸꦤꦧ꧀ꦨꦮꦁ ꦤꦺꦮ ꦒꦤ꧀ꦠꦴꦫꦁ ꦤꦴꦒꦤ꧀ꦠꦴꦫꦁ. ꦄꦡ ꦮꦴ ꦄꦴꦒꦸꦁ ꦤ ꦏꦫꦺꦴꦠꦷꦠꦶꦥꦶ ꦤꦴꦒꦺꦴ. ꦧꦭꦮꦴꦠꦶꦥꦶ ꦤꦴꦒꦺꦴ. ꦠꦁ ꦤꦴꦒꦁ. ꦏꦴꦩꦺꦱꦸ ꦄꦤꦥꦺꦏ꧀ꦑꦶꦤꦤ꧀ꦠꦶ ꦢ꧀ꦮꦷꦱꦸꦥꦶ ꦏꦴꦩꦺꦱꦸ ꦖꦤ꧀ꦢꦫꦴꦒꦴꦨꦴꦮꦺꦤ ꦄꦤꦥꦺꦏ꧀ꦑꦶꦤꦁ. ꦈꦥꦱꦔ꧀ꦏꦩ꧀ꦩ ꦥꦸꦕ꧀ꦖꦴꦩ, ꦩꦕ꧀ꦕꦸꦥꦴꦱꦥ꧀ꦥꦩꦺꦴꦕꦤꦤ꧀ꦠꦶ ꦠꦁ ꦌꦮꦫꦹꦥꦁ ꦩꦲꦺꦱꦶꦁ ꦈꦥꦱꦔ꧀ꦏꦩꦶꦠ꧀ꦮꦴ ꦠꦺꦨꦹꦩꦏꦮꦛ꧀ꦛꦱ꧀ꦱ ꦩꦕ꧀ꦕꦸꦥꦴꦱꦱ꧀ꦱ ꦥꦩꦺꦴꦕꦤꦁ ꦮꦶꦮꦛ꧀ꦛꦁ ꦤꦶꦧ꧀ꦧꦴꦤꦁ ꦥꦸꦕ꧀ꦖꦴꦩ. ꦪꦺꦤ ꦮꦴ ꦈꦥꦴꦪꦺꦤ ꦢꦸꦏ꧀ꦑꦱꦩꦸꦢꦪꦱꦔ꧀ꦑꦴꦠꦴ ꦩꦕ꧀ꦕꦸꦥꦴꦱꦴ ꦥꦩꦸꦕ꧀ꦕꦠꦶ, ꦠꦁ ꦩꦕ꧀ꦕꦸꦥꦴꦱꦥ꧀ꦥꦩꦺꦴꦕꦤꦁ ꦥꦸꦕ꧀ꦖꦴꦩꦴꦠꦶ. ꦆꦩꦁ ꦒꦴꦡꦁ ꦲꦺꦩꦮꦠꦺꦴ ꦱꦴꦠꦴꦒꦶꦫꦚ꧀ꦕ ꦱꦴꦠꦴꦒꦶꦫꦥꦫꦶꦱꦚ꧀ꦕ ꦄꦠ꧀ꦠꦤꦺꦴ ꦥꦫꦶꦱꦚ꧀ꦕ ꦱꦤ꧀ꦣꦴꦪ ꦄꦴꦲ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦱꦴꦭ꦳꧀ꦲꦷꦤꦏ꧀ꦑꦠ꧀ꦠꦁ ꦓꦺꦴꦱꦶꦠꦁ ꦄꦲꦺꦴꦱꦶ. ꦄꦡ ꦱꦩꦤ꧀ꦠꦠꦺꦴ ꦄꦭꦔ꧀ꦏꦠꦥꦛꦶꦪꦠ꧀ꦠꦺ ꦢꦺꦮꦤꦒꦫꦺ ꦱꦶꦫꦶꦁ ꦥꦕ꧀ꦕꦤꦸꦨꦺꦴꦤ꧀ꦠꦷ ꦮꦶꦪ ꦫꦴꦗꦒꦲꦺ ꦏꦴꦭ꦳ꦷ ꦤꦴꦩ ꦏꦸꦫꦫꦓꦫꦶꦏꦴ ꦈꦥꦴꦱꦶꦏꦴ ꦥꦴꦱꦴꦢꦩꦴꦫꦸꦪ꧀ꦲ ꦱꦷꦲꦥꦚ꧀ꦗꦫꦁ ꦮꦶꦮꦫꦶꦠ꧀ꦮꦴ ꦒꦧ꧀ꦨꦥꦫꦶꦱ꧀ꦱꦩꦁ ꦮꦶꦤꦺꦴꦢꦺꦤ꧀ꦠꦷ ꦱꦮꦴꦠꦥ꧀ꦥꦢꦺꦱꦺ ꦈꦠꦸꦒ꧀ꦒꦲꦟꦠ꧀ꦡꦁ ꦜꦶꦠꦴ ꦠꦺꦱꦁ ꦪꦏ꧀ꦑꦱꦺꦤꦴꦥꦠꦷꦤꦁ ꦠꦁ ꦧꦸꦢ꧀ꦣꦒꦸꦟꦥꦛꦶꦱꦁꦪꦸꦠ꧀ꦠꦁ ꦏꦡꦁ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦠꦺꦴ ꦄꦱ꧀ꦱꦺꦴꦱꦶ. ꦱꦸꦠ꧀ꦮꦴ ꦕ ‘‘ꦌꦮꦁ ꦮꦶꦮꦶꦣꦒꦸꦟꦱꦩꦤ꧀ꦤꦴꦒꦠꦴ ꦧꦸꦢ꧀ꦣꦴ’’ꦠꦶ ꦧꦸꦢ꧀ꦣꦴꦫꦩ꧀ꦩꦟꦁ ꦥꦷꦠꦶꦁ ꦈꦥ꧀ꦥꦴꦢꦺꦠ꧀ꦮꦴ ꦠꦴꦪ ꦤꦷꦮꦫꦟꦴꦤꦶ ꦮꦶꦏ꧀ꦑꦩ꧀ꦨꦺꦠ꧀ꦮꦴ ꦠꦠ꧀ꦡꦺꦮ ꦜꦶꦠꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦱꦶ. ꦠꦠꦺꦴ ꦌꦮ ꦨꦒꦮꦠꦴ ‘‘ꦌꦠꦢꦒ꧀ꦒꦁ, ꦨꦶꦏ꧀ꦑꦮꦺ, ꦩꦩ ꦱꦴꦮꦶꦏꦴꦤꦁ ꦈꦥꦴꦱꦶꦏꦴꦤꦁ ꦄꦤꦸꦱ꧀ꦱꦮꦥ꧀ꦥꦱꦤ꧀ꦤꦴꦤꦁ, ꦪꦢꦶꦢꦁ ꦏꦴꦭ꦳ꦷ ꦈꦥꦴꦱꦶꦏꦴ ꦏꦸꦫꦫꦓꦫꦶꦏꦴ’’ꦠꦶ (ꦄ. ꦤꦶ. ꧑.꧒꧖꧗) ꦌꦠꦢꦒ꧀ꦒꦺ ꦜꦥꦶꦠꦴ.

꧑꧖꧙. ꦠꦺꦥꦶ ꦪꦏ꧀ꦑꦱꦺꦤꦴꦥꦠꦪꦺꦴ ꦱꦲꦱ꧀ꦱꦪꦏ꧀ꦑꦥꦫꦶꦮꦴꦫꦴ ꦩꦗ꧀ꦙꦶꦩꦪꦴꦩꦱꦩꦪꦺ ꦆꦱꦶꦥꦠꦤꦁ ꦥꦠ꧀ꦮꦴ, ꦣꦩ꧀ꦩꦕꦏ꧀ꦏꦥ꧀ꦥꦮꦠ꧀ꦠꦶꦠꦥꦭ꧀ꦭꦔ꧀ꦏꦺꦤꦺꦮ ꦤꦶꦱꦶꦤ꧀ꦤꦁ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩ꧀ꦩ ꦮꦤ꧀ꦢꦶꦠ꧀ꦮꦴ, ꦆꦩꦴꦪ ꦒꦴꦡꦴꦪ ꦨꦒꦮꦤ꧀ꦠꦁ ꦄꦨꦶꦠ꧀ꦡꦮꦶꦠ꧀ꦮꦴ ꦎꦏꦴꦱꦩꦏꦴꦫꦪꦶꦁꦱꦸ ‘‘ꦄꦏ꧀ꦑꦴꦠꦴꦫꦁ ꦥꦮꦠ꧀ꦠꦴꦫ’’ꦤ꧀ꦠꦶ. ꦠꦱ꧀ꦱꦠ꧀ꦡꦺꦴ – ꦜꦥꦺꦠ꧀ꦮꦴ ꦠꦟ꧀ꦲꦁ ꦠꦺꦨꦹꦩꦏꦺ ꦣꦩ꧀ꦩꦺ ‘‘ꦆꦢꦁ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦢꦸꦏ꧀ꦑꦁ ꦄꦫꦶꦪꦱꦕ꧀ꦕ’’ꦤ꧀ꦠꦶꦄꦴꦢꦶꦤꦴ (ꦱꦁ. ꦤꦶ. ꧕.꧑꧐꧘꧑; ꦩꦲꦴꦮ. ꧑꧔) ꦤꦪꦺꦤ ꦱꦕ꧀ꦕꦴꦤꦁ ꦮꦮꦠ꧀ꦡꦴꦤꦏꦡꦴꦪ ꦄꦏ꧀ꦑꦴꦠꦴꦫꦁ, ‘‘‘ꦠꦁ ꦑꦺꦴ ꦥꦤꦶꦢꦁ ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦁ ꦥꦫꦶꦚ꧀ꦚꦺꦪ꧀ꦪ’ꦤ꧀ꦠꦶ ꦩꦺ ꦨꦶꦏ꧀ꦑꦮꦺ’’ꦠꦶꦄꦴꦢꦶꦤꦴ ꦤꦪꦺꦤ ꦠꦺꦱꦸ ꦏꦶꦕ꧀ꦕꦚꦴꦟꦏꦠꦚꦴꦟꦥ꧀ꦥꦮꦠ꧀ꦠꦤꦺꦤ ꦥꦮꦠ꧀ꦠꦴꦫꦁ. ꦪꦺ ꦮꦴ ꦣꦩ꧀ꦩꦴ ꦪꦡꦴ ꦮꦺꦴꦲꦫꦶꦠꦧ꧀ꦧꦴ, ꦠꦺꦱꦸ ꦠꦡꦴ ꦮꦺꦴꦲꦴꦫꦏꦡꦤꦺꦤ ꦄꦏ꧀ꦑꦴꦠꦴꦫꦁ, ꦠꦺꦱꦁꦪꦺꦮ ꦣꦩ꧀ꦩꦴꦤꦁ ꦱꦠ꧀ꦠꦴꦤꦸꦫꦹꦥꦠꦺꦴ ꦥꦮꦠ꧀ꦠꦴꦫꦁ. ꦈꦒ꧀ꦓꦛꦶꦠꦚ꧀ꦚꦸꦮꦶꦥꦚ꧀ꦕꦶꦠꦚ꧀ꦚꦹꦤꦁ ꦮꦴ ꦢꦺꦱꦤꦴꦪ ꦄꦏ꧀ꦑꦴꦠꦴꦫꦁ, ꦤꦺꦪ꧀ꦪꦴꦤꦁ ꦥꦛꦶꦥꦴꦢꦤꦺꦤ ꦥꦮꦠ꧀ꦠꦴꦫꦁ. ꦈꦢ꧀ꦢꦺꦱꦺꦤ ꦮꦴ ꦄꦏ꧀ꦑꦴꦠꦴꦫꦁ, ꦮꦶꦨꦔ꧀ꦒꦺꦤ ꦠꦺꦲꦶ ꦠꦺꦲꦶ ꦥꦏꦴꦫꦺꦲꦶ ꦮꦕꦤꦠꦺꦴ ꦥꦮꦠ꧀ꦠꦴꦫꦁ. ꦧꦺꦴꦣꦶꦥꦏ꧀ꦑꦶꦪꦴꦤꦁ ꦮꦴ ꦱꦭꦏ꧀ꦑꦟꦏꦡꦤꦺꦤ ꦄꦏ꧀ꦑꦴꦠꦴꦫꦁ, ꦱꦠ꧀ꦠꦴꦤꦁ ꦕꦶꦠ꧀ꦠꦱꦤ꧀ꦠꦴꦤꦺ ꦥꦮꦠ꧀ꦠꦤꦺꦤ ꦥꦮꦠ꧀ꦠꦴꦫꦁ. ꦱꦔ꧀ꦑꦺꦥꦠꦺꦴ ꦮꦴ ꦠꦷꦲꦶ ꦥꦫꦶꦮꦛ꧀ꦛꦺꦲꦶ ꦱꦕ꧀ꦕꦴꦤꦁ ꦏꦡꦤꦺꦤ ꦄꦏ꧀ꦑꦴꦠꦴꦫꦁ, ꦮꦶꦠ꧀ꦡꦴꦫꦠꦺꦴ ꦥꦮꦠ꧀ꦠꦴꦫꦁ. ‘‘ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦣꦩ꧀ꦩꦺꦴ, ꦠꦁ ꦣꦩ꧀ꦩꦁ ꦥꦮꦠ꧀ꦠꦺꦠꦷꦠꦶ ꦣꦩ꧀ꦩꦕꦏ꧀ꦏ’’ꦤ꧀ꦠꦶ (ꦥꦛꦶ. ꦩ. ꧒.꧔꧐) ꦌꦮꦩꦴꦢꦶꦤꦴ ꦥꦛꦶꦱꦩ꧀ꦨꦶꦢꦴꦤꦪꦺꦤ ꦮꦶꦠ꧀ꦡꦴꦫꦶꦠꦱ꧀ꦱ ꦣꦩ꧀ꦩꦕꦏ꧀ꦏꦱ꧀ꦱ ꦥꦮꦠ꧀ꦠꦤꦠꦺꦴ ꦥꦮꦠ꧀ꦠꦴꦫꦁ.

ꦱꦧ꧀ꦧꦣꦩ꧀ꦩꦴꦤꦤ꧀ꦠꦶ ꦕꦠꦸꦨꦹꦩꦏꦣꦩ꧀ꦩꦴꦤꦁ. ꦥꦴꦫꦒꦸꦤ꧀ꦠꦶ ꦖꦲꦴꦏꦴꦫꦺꦲꦶ ꦥꦴꦫꦁ ꦒꦠꦁ ꦄꦨꦶꦚ꧀ꦚꦴꦪ, ꦥꦫꦶꦚ꧀ꦚꦴꦪ, ꦥꦲꦴꦤꦺꦤ, ꦨꦴꦮꦤꦴꦪ, ꦱꦕ꧀ꦖꦶꦏꦶꦫꦶꦪꦴꦪ, ꦱꦩꦴꦥꦠ꧀ꦠꦶꦪꦴ. ꦱꦺꦴ ꦲꦶ ꦨꦒꦮꦴ ꦱꦧ꧀ꦧꦣꦩ꧀ꦩꦺ ꦄꦨꦶꦗꦴꦤꦤ꧀ꦠꦺꦴ ꦒꦠꦺꦴꦠꦶ ꦄꦨꦶꦚ꧀ꦚꦴꦥꦴꦫꦒꦹ, ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦺ ꦥꦫꦶꦗꦴꦤꦤ꧀ꦠꦺꦴ ꦒꦠꦺꦴꦠꦶ ꦥꦫꦶꦚ꧀ꦚꦴꦥꦴꦫꦒꦹ, ꦱꦧ꧀ꦧꦏꦶꦭꦺꦱꦺ ꦥꦗꦲꦤ꧀ꦠꦺꦴ ꦒꦠꦺꦴꦠꦶ ꦥꦲꦴꦤꦥꦴꦫꦒꦹ, ꦕꦠ꧀ꦠꦴꦫꦺꦴ ꦩꦒ꧀ꦒꦺ ꦨꦴꦮꦺꦤ꧀ꦠꦺꦴ ꦒꦠꦺꦴꦠꦶ ꦨꦴꦮꦤꦴꦥꦴꦫꦒꦹ, ꦤꦶꦫꦺꦴꦣꦁ ꦱꦕ꧀ꦖꦶꦏꦫꦺꦴꦤ꧀ꦠꦺꦴ ꦒꦠꦺꦴꦠꦶ ꦱꦕ꧀ꦖꦶꦏꦶꦫꦶꦪꦴꦥꦴꦫꦒꦹ, ꦱꦧ꧀ꦧꦴ ꦱꦩꦴꦥꦠ꧀ꦠꦶꦪꦺꦴ ꦱꦩꦴꦥꦗ꧀ꦗꦤ꧀ꦠꦺꦴ ꦒꦠꦺꦴꦠꦶ ꦱꦩꦴꦥꦠ꧀ꦠꦶꦥꦴꦫꦒꦹ. ꦌꦮꦁ ꦱꦧ꧀ꦧꦣꦩ꧀ꦩꦴꦤꦁ ꦥꦴꦫꦒꦸꦁ. ꦧꦸꦢ꧀ꦣꦁ ꦮꦺꦫꦨꦪꦴꦠꦷꦠꦤ꧀ꦠꦶ ꦄꦚ꧀ꦚꦴꦟꦱꦪꦤꦠꦺꦴ ꦥꦛꦶꦧꦸꦢ꧀ꦣꦠ꧀ꦠꦴ ꦧꦸꦢ꧀ꦣꦁ, ꦱꦧ꧀ꦧꦺꦤ ꦮꦴ ꦱꦫꦟꦮꦟ꧀ꦟꦤꦴꦪꦁ ꦮꦸꦠ꧀ꦠꦺꦤꦠ꧀ꦡꦺꦤ ꦧꦸꦢ꧀ꦣꦁ, ꦥꦚ꧀ꦕꦮꦺꦫꦨꦪꦴꦤꦁ ꦄꦠꦷꦠꦠ꧀ꦠꦴ ꦮꦺꦫꦨꦪꦴꦠꦷꦠꦁ. ꦌꦮꦁ ꦨꦒꦮꦤ꧀ꦠꦁ ꦄꦠꦶꦠ꧀ꦡꦮꦤ꧀ꦠꦴ ‘‘ꦩꦪꦁ ꦥꦸꦕ꧀ꦖꦴꦩ ꦒꦺꦴꦠꦩ’’ꦤ꧀ꦠꦶ ꦎꦏꦴꦱꦩꦏꦴꦫꦪꦶꦁꦱꦸ.

꧑꧗꧐. ꦄꦡ ꦤꦺꦱꦁ ꦪꦏ꧀ꦑꦴꦤꦁ ꦠꦺꦗꦺꦤ ꦕ ꦥꦚ꧀ꦚꦴꦪ ꦕ ꦄꦒ꧀ꦒꦺꦴ ꦲꦺꦩꦮꦠꦺꦴ ꦪꦡꦴꦣꦶꦥ꧀ꦥꦺꦠꦁ ꦥꦸꦕ꧀ꦖꦶꦠꦧ꧀ꦧꦁ ꦥꦸꦕ꧀ꦖꦤ꧀ꦠꦺꦴ ‘‘ꦏꦶꦱ꧀ꦩꦶꦁ ꦭꦺꦴꦏꦺꦴ’’ꦠꦶ ꦆꦩꦁ ꦒꦴꦡꦩꦴꦲ. ꦠꦱ꧀ꦱꦴꦢꦶꦥꦴꦢꦺ ꦏꦶꦱ꧀ꦩꦶꦤ꧀ꦠꦶ ꦨꦴꦮꦺꦤꦨꦴꦮꦭꦏ꧀ꦑꦟꦺ ꦨꦸꦩ꧀ꦩꦮꦕꦤꦁ, ꦏꦶꦱ꧀ꦩꦶꦁ ꦈꦥ꧀ꦥꦤ꧀ꦤꦺ ꦭꦺꦴꦏꦺꦴ ꦱꦩꦸꦥ꧀ꦥꦤ꧀ꦤꦺꦴ ꦲꦺꦴꦠꦷꦠꦶ ꦄꦪꦚ꧀ꦲꦺꦠ꧀ꦡ ꦄꦣꦶꦥ꧀ꦥꦴꦪꦺꦴ. ꦱꦠ꧀ꦠꦭꦺꦴꦏꦱꦔ꧀ꦑꦴꦫꦭꦺꦴꦏꦺ ꦱꦤ꧀ꦣꦴꦪ ꦥꦸꦕ꧀ꦖꦠꦶ. ꦏꦶꦱ꧀ꦩꦶꦁ ꦏꦸꦧ꧀ꦧꦠꦶ ꦱꦤ꧀ꦡꦮꦤ꧀ꦠꦶ ꦄꦲꦤ꧀ꦠꦶ ꦮꦴ ꦩꦩꦤ꧀ꦠꦶ ꦮꦴ ꦠꦟ꧀ꦲꦴꦢꦶꦛ꧀ꦜꦶꦱꦤ꧀ꦡꦮꦁ ꦏꦶꦱ꧀ꦩꦶꦁ ꦏꦸꦧ꧀ꦧꦠꦶ, ꦄꦣꦶꦏꦫꦟꦠ꧀ꦡꦺ ꦨꦸꦩ꧀ꦩꦮꦕꦤꦁ. ꦏꦶꦱ꧀ꦱ ꦭꦺꦴꦏꦺꦴꦠꦶ ꦈꦥꦪꦺꦴꦒꦠ꧀ꦡꦺ ꦱꦴꦩꦶꦮꦕꦤꦁ, ꦏꦶꦁ ꦈꦥꦴꦢꦴꦪ ꦭꦺꦴꦏꦺꦴꦠꦶ ꦱꦔ꧀ꦑ꧀ꦪꦁ ꦒꦕ꧀ꦖꦠꦷꦠꦶ ꦄꦪꦚ꧀ꦲꦺꦠ꧀ꦡ ꦄꦣꦶꦥ꧀ꦥꦴꦪꦺꦴ. ꦏꦶꦱ꧀ꦩꦶꦁ ꦭꦺꦴꦏꦺꦴꦠꦶ ꦨꦴꦮꦺꦤꦨꦴꦮꦭꦏ꧀ꦑꦟꦏꦴꦫꦟꦠ꧀ꦡꦺꦱꦸ ꦨꦸꦩ꧀ꦩꦮꦕꦤꦁ. ꦏꦶꦱ꧀ꦩꦶꦁ ꦱꦠꦶ ꦏꦺꦤ ꦏꦴꦫꦟꦺꦤ ꦭꦺꦴꦏꦺꦴ ꦮꦶꦲꦚ꧀ꦚꦠꦶ ꦥꦷꦭ꦳ꦷꦪꦠꦶ ꦧꦴꦣꦷꦪꦠꦷꦠꦶ ꦄꦪꦚ꧀ꦲꦺꦠ꧀ꦡ ꦄꦣꦶꦥ꧀ꦥꦴꦪꦺꦴ.

꧑꧗꧑. ꦄꦡ ꦨꦒꦮꦴ ꦪꦱ꧀ꦩꦴ ꦖꦱꦸ ꦄꦗ꧀ꦙꦠ꧀ꦠꦶꦏꦧꦴꦲꦶꦫꦺꦱꦸ ꦄꦴꦪꦠꦤꦺꦱꦸ ꦈꦥ꧀ꦥꦤ꧀ꦤꦺꦱꦸ ꦱꦠ꧀ꦠꦭꦺꦴꦏꦺꦴ ꦕ ꦣꦤꦣꦚ꧀ꦚꦴꦢꦶꦮꦱꦺꦤ ꦱꦔ꧀ꦑꦴꦫꦭꦺꦴꦏꦺꦴ ꦕ ꦈꦥ꧀ꦥꦤ꧀ꦤꦺꦴ ꦲꦺꦴꦠꦶ, ꦪꦱ꧀ꦩꦴ ꦕꦺꦠ꧀ꦡ ꦱꦠ꧀ꦠꦭꦺꦴꦏꦺꦴ ꦠꦺꦱ꧀ꦮꦺꦮ ꦖꦱꦸ ꦢꦸꦮꦶꦣꦩ꧀ꦥꦶ ꦱꦤ꧀ꦡꦮꦁ ꦏꦫꦺꦴꦠꦶ. ꦕꦏ꧀ꦑꦴꦪꦠꦤꦁ ꦮꦴ ꦲꦶ ‘‘ꦄꦲꦁ ꦩꦩ’’ꦤ꧀ꦠꦶ ꦒꦟ꧀ꦲꦴꦠꦶ ꦄꦮꦱꦺꦱꦺꦱꦸ ꦮꦴ ꦄꦚ꧀ꦚꦠꦫꦁ. ꦪꦡꦴꦲ – ‘‘ꦕꦏ꧀ꦑꦸ ꦄꦠ꧀ꦠꦴꦠꦶ ꦪꦺꦴ ꦮꦢꦺꦪ꧀ꦪ, ꦠꦁ ꦤ ꦈꦥꦥꦗ꧀ꦗꦠꦷ’’ꦠꦶꦄꦴꦢꦶ (ꦩ. ꦤꦶ. ꧓.꧔꧒꧒). ꦪꦱ꧀ꦩꦴ ꦕ ꦌꦠꦴꦤꦶꦪꦺꦮ ꦖ ꦈꦥꦴꦢꦴꦪ ꦢꦸꦮꦶꦣꦺꦴꦥꦶ ꦭꦺꦴꦏꦺꦴꦠꦶ ꦱꦔ꧀ꦑ꧀ꦪꦁ ꦒꦕ꧀ꦖꦠꦶ, ꦪꦱ꧀ꦩꦴ ꦕ ꦠꦺꦱ꧀ꦮꦺꦮ ꦖꦱꦸ ꦱꦠꦶ ꦱꦠ꧀ꦠꦭꦺꦴꦏꦺꦴ ꦢꦸꦏ꧀ꦑꦥꦴꦠꦸꦨꦴꦮꦺꦤ ꦮꦶꦲꦚ꧀ꦚꦠꦶ. ꦪꦡꦴꦲ –

‘‘ꦲꦠ꧀ꦡꦺꦱꦸ, ꦨꦶꦏ꧀ꦑꦮꦺ, ꦱꦠꦶ ꦄꦴꦢꦴꦤꦤꦶꦏ꧀ꦑꦺꦥꦤꦁ ꦲꦺꦴꦠꦶ, ꦥꦴꦢꦺꦱꦸ ꦱꦠꦶ ꦄꦨꦶꦏ꧀ꦏꦩꦥꦛꦶꦏ꧀ꦏꦩꦺꦴ ꦲꦺꦴꦠꦶ, ꦥꦧ꧀ꦧꦺꦱꦸ ꦱꦠꦶ ꦱꦩꦶꦚ꧀ꦗꦤꦥꦱꦴꦫꦟꦁ ꦲꦺꦴꦠꦶ, ꦏꦸꦕ꧀ꦖꦶꦱ꧀ꦩꦶꦁ ꦱꦠꦶ ꦗꦶꦓꦕ꧀ꦖꦴꦥꦶꦥꦴꦱꦴ ꦲꦺꦴꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦕꦏ꧀ꦑꦸꦱ꧀ꦩꦶꦁ ꦱꦠꦶ ꦕꦏ꧀ꦑꦸꦱꦩ꧀ꦦꦱ꧀ꦱꦥꦕ꧀ꦕꦪꦴ ꦈꦥ꧀ꦥꦗ꧀ꦗꦠꦶ ꦄꦗ꧀ꦙꦠ꧀ꦠꦁ ꦱꦸꦑꦁ ꦢꦸꦏ꧀ꦑ’’ꦤ꧀ꦠꦶꦄꦴꦢꦶ (ꦱꦁ. ꦤꦶ. ꧔.꧒꧓꧗).

ꦠꦡꦴ ꦠꦺꦱꦸ ꦄꦴꦣꦴꦫꦨꦹꦠꦺꦱꦸ ꦥꦛꦶꦲꦠꦺꦴ ꦱꦔ꧀ꦑꦴꦫꦭꦺꦴꦏꦺꦴ ꦮꦶꦲꦚ꧀ꦚꦠꦶ. ꦪꦡꦴꦲ –

‘‘ꦕꦏ꧀ꦑꦸꦱ꧀ꦩꦶꦁ ꦄꦤꦶꦢꦱ꧀ꦱꦤꦺ ꦱꦥ꧀ꦥꦛꦶꦓꦺ ꦥꦛꦶꦲꦚ꧀ꦚꦶ ꦮꦴ’’ꦆꦠꦶ (ꦣ. ꦱ. ꧕꧙꧗-꧘) ꦕ.

‘‘ꦕꦏ꧀ꦑꦸ, ꦨꦶꦏ꧀ꦑꦮꦺ, ꦥꦛꦶꦲꦚ꧀ꦚꦠꦶ ꦩꦤꦴꦥꦴꦩꦤꦴꦥꦺꦱꦸ ꦫꦹꦥꦺꦱꦹ’’ꦠꦶ (ꦱꦁ. ꦤꦶ. ꧔.꧒꧓꧘) ꦌꦮꦩꦴꦢꦶ.

ꦠꦡꦴ ꦠꦺꦲꦶꦪꦺꦮ ꦏꦴꦫꦟꦨꦹꦠꦺꦲꦶ ꦢꦸꦮꦶꦣꦺꦴꦥꦶ ꦭꦺꦴꦏꦺꦴ ꦮꦶꦲꦚ꧀ꦚꦠꦶ. ꦪꦡꦴꦲ –

‘‘ꦕꦏ꧀ꦑꦸ ꦮꦶꦲꦚ꧀ꦚꦠꦶ ꦩꦤꦴꦥꦴꦩꦤꦴꦥꦺꦱꦸ ꦫꦹꦥꦺꦱꦹ’’ꦠꦶ (ꦱꦁ. ꦤꦶ. ꧔.꧒꧓꧘) ꦕ.

‘‘ꦕꦏ꧀ꦑꦸ, ꦨꦶꦏ꧀ꦑꦮꦺ, ꦄꦴꦢꦶꦠ꧀ꦠꦁ, ꦫꦹꦥꦴ ꦄꦴꦢꦶꦠ꧀ꦠꦴ. ꦏꦺꦤ ꦄꦴꦢꦶꦠ꧀ꦠꦁ? ꦫꦴꦒꦒ꧀ꦒꦶꦤꦴ’’ꦠꦶ (ꦱꦁ. ꦤꦶ. ꧔.꧒꧘; ꦩꦲꦴꦮ. ꧕꧔) ꦌꦮꦩꦴꦢꦶ.

ꦠꦱ꧀ꦩꦴ ꦖꦄꦗ꧀ꦙꦠ꧀ꦠꦶꦏꦧꦴꦲꦶꦫꦴꦪꦠꦤꦮꦱꦺꦤ ꦠꦁ ꦥꦸꦕ꧀ꦖꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦄꦴꦲ ‘‘ꦖꦱꦸ ꦭꦺꦴꦏꦺꦴ ꦱꦩꦸꦥ꧀ꦥꦤ꧀ꦤꦺꦴ’’ꦠꦶ.

꧑꧗꧒. ꦄꦡ ꦱꦺꦴ ꦪꦏ꧀ꦑꦺꦴ ꦄꦠ꧀ꦠꦤꦴ ꦮꦛ꧀ꦛꦮꦱꦺꦤ ꦥꦸꦛ꧀ꦜꦥꦚ꧀ꦲꦁ ꦨꦒꦮꦠꦴ ꦢ꧀ꦮꦴꦢꦱꦴꦪꦠꦤꦮꦱꦺꦤ ꦱꦔ꧀ꦑꦶꦥꦶꦠ꧀ꦮꦴ ꦮꦶꦱ꧀ꦱꦗ꧀ꦗꦶꦠꦁ ꦤ ꦱꦸꦛ꧀ꦜꦸ ꦈꦥꦭꦏ꧀ꦑꦺꦠ꧀ꦮꦴ ꦠꦚ꧀ꦕ ꦄꦠ꧀ꦡꦁ ꦠꦥ꧀ꦥꦛꦶꦥꦏ꧀ꦑꦚ꧀ꦕ ꦚꦴꦠꦸꦏꦴꦩꦺꦴ ꦱꦔ꧀ꦑꦺꦥꦺꦤꦺꦮ ꦮꦛ꧀ꦛꦮꦶꦮꦛ꧀ꦛꦁ ꦥꦸꦕ꧀ꦖꦤ꧀ꦠꦺꦴ ꦄꦴꦲ ‘‘ꦏꦠꦩꦁ ꦠ’’ꦤ꧀ꦠꦶ. ꦠꦠ꧀ꦡ ꦈꦥꦴꦢꦴꦠꦧ꧀ꦧꦛ꧀ꦜꦺꦤ ꦈꦥꦴꦢꦴꦤꦁ, ꦢꦸꦏ꧀ꦑꦱꦕ꧀ꦕꦱ꧀ꦱꦺꦠꦁ ꦄꦣꦶꦮꦕꦤꦁ. ꦪꦠ꧀ꦡ ꦭꦺꦴꦏꦺꦴ ꦮꦶꦲꦚ꧀ꦚꦠꦷꦠꦶ ‘‘ꦖꦱꦸ ꦭꦺꦴꦏꦺꦴ ꦮꦶꦲꦚ꧀ꦚꦠꦷ’’ꦠꦶ ꦌꦮꦁ ꦨꦒꦮꦠꦴ ꦪꦠ꧀ꦡ ꦖꦧ꧀ꦧꦶꦣꦺ ꦈꦥꦴꦢꦴꦤꦺ ꦭꦺꦴꦏꦺꦴ ꦮꦶꦲꦚ꧀ꦚꦠꦷꦠꦶ ꦮꦸꦠ꧀ꦠꦺꦴ, ꦠꦁ ꦏꦠꦩꦁ ꦈꦥꦴꦢꦴꦤꦤ꧀ꦠꦶ? ꦌꦮꦁ ꦈꦥꦝ꧀ꦞꦒꦴꦡꦴꦪ ꦱꦫꦹꦥꦺꦤꦺꦮ ꦢꦸꦏ꧀ꦑꦱꦕ꧀ꦕꦁ ꦥꦸꦕ꧀ꦖꦶ. ꦱꦩꦸꦢꦪꦱꦕ꧀ꦕꦁ ꦥꦤ ꦠꦱ꧀ꦱ ꦏꦴꦫꦟꦨꦴꦮꦺꦤ ꦒꦲꦶꦠꦩꦺꦮ ꦲꦺꦴꦠꦶ. ꦤꦶꦪ꧀ꦪꦴꦤꦁ ꦥꦸꦕ꧀ꦖꦶꦠꦺꦴꦠꦶ ꦆꦩꦴꦪ ꦥꦤ ꦈꦥꦝ꧀ꦞꦒꦴꦡꦴꦪ ꦩꦒ꧀ꦒꦱꦕ꧀ꦕꦁ ꦥꦸꦕ꧀ꦖꦶ. ꦩꦒ꧀ꦒꦱꦕ꧀ꦕꦺꦤ ꦲꦶ ꦄꦫꦶꦪꦱꦴꦮꦏꦺꦴ ꦢꦸꦏ꧀ꦑꦁ ꦥꦫꦶꦗꦴꦤꦤ꧀ꦠꦺꦴ, ꦱꦩꦸꦢꦪꦁ ꦥꦗꦲꦤ꧀ꦠꦺꦴ, ꦤꦶꦫꦺꦴꦣꦁ ꦱꦕ꧀ꦖꦶꦏꦫꦺꦴꦤ꧀ꦠꦺꦴ, ꦩꦒ꧀ꦒꦁ ꦨꦴꦮꦺꦤ꧀ꦠꦺꦴ ꦭꦺꦴꦏꦩ꧀ꦲꦴ ꦤꦶꦪ꧀ꦪꦴꦠꦶ, ꦠꦱ꧀ꦩꦴ ꦤꦶꦪ꧀ꦪꦴꦤꦤ꧀ꦠꦶ ꦮꦸꦕ꧀ꦕꦠꦶ. ꦏꦡꦤ꧀ꦠꦶ ꦏꦺꦤ ꦥꦏꦴꦫꦺꦤ. ꦢꦸꦏ꧀ꦑꦴ ꦥꦩꦸꦕ꧀ꦕꦠꦷꦠꦶ ‘‘ꦈꦥꦴꦢꦴꦤ’’ꦤ꧀ꦠꦶ ꦮꦸꦠ꧀ꦠꦴ ꦮꦛ꧀ꦛꦢꦸꦏ꧀ꦑꦴ ꦥꦩꦺꦴꦏ꧀ꦑꦁ ꦥꦴꦥꦸꦟꦴꦠꦶ. ꦌꦮꦩꦺꦠ꧀ꦡ ꦱꦫꦹꦥꦺꦤꦺꦮ ꦩꦒ꧀ꦒꦱꦕ꧀ꦕꦁ ꦥꦸꦕ꧀ꦖꦶ, ꦤꦶꦫꦺꦴꦣꦱꦕ꧀ꦕꦁ ꦥꦤ ꦠꦱ꧀ꦱ ꦮꦶꦱꦪꦨꦴꦮꦺꦤ ꦒꦲꦶꦠꦩꦺꦮ ꦲꦺꦴꦠꦶ.

꧑꧗꧓. ꦌꦮꦁ ꦪꦏ꧀ꦑꦺꦤ ꦱꦫꦹꦥꦺꦤ ꦢꦱ꧀ꦱꦺꦠ꧀ꦮꦴ ꦕ ꦄꦢꦱ꧀ꦱꦺꦠ꧀ꦮꦴ ꦕ ꦕꦠꦸꦱꦕ꧀ꦕꦮꦱꦺꦤ ꦥꦚ꧀ꦲꦁ ꦥꦸꦛ꧀ꦜꦺꦴ ꦨꦒꦮꦴ ꦠꦺꦤꦺꦮ ꦤꦪꦺꦤ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦄꦴꦲ ‘‘ꦥꦚ꧀ꦕ ꦏꦴꦩꦒꦸꦟꦴ’’ꦠꦶ. ꦠꦠ꧀ꦡ ꦥꦚ꧀ꦕꦏꦴꦩꦒꦸꦟꦱꦔ꧀ꦑꦴꦠꦒꦺꦴꦕꦫꦒ꧀ꦒꦲꦟꦺꦤ ꦠꦒ꧀ꦒꦺꦴꦕꦫꦴꦤꦶ ꦥꦚ꧀ꦕꦴꦪꦠꦤꦴꦤꦶ ꦒꦲꦶꦠꦴꦤꦺꦮ ꦲꦺꦴꦤ꧀ꦠꦶ. ꦩꦤꦺꦴ ꦖꦛ꧀ꦜꦺꦴ ꦌꦠꦺꦱꦤ꧀ꦠꦶ ꦩꦤꦺꦴꦖꦛ꧀ꦜꦴ. ꦥꦮꦺꦢꦶꦠꦴꦠꦶ ꦥꦏꦴꦱꦶꦠꦴ. ꦌꦠ꧀ꦡ ꦄꦗ꧀ꦙꦠ꧀ꦠꦶꦏꦺꦱꦸ ꦖꦛ꧀ꦜꦱ꧀ꦱ ꦩꦤꦴꦪꦠꦤꦱ꧀ꦱ ꦒꦲꦟꦺꦤ ꦠꦱ꧀ꦱ ꦮꦶꦱꦪꦨꦹꦠꦁ ꦣꦩ꧀ꦩꦴꦪꦠꦤꦁ ꦒꦲꦶꦠꦩꦺꦮ ꦲꦺꦴꦠꦶ. ꦌꦮꦁ ‘‘ꦏꦠꦩꦁ ꦠꦁ ꦈꦥꦴꦢꦴꦤ’’ꦤ꧀ꦠꦶ ꦆꦩꦁ ꦥꦚ꧀ꦲꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦥꦸꦤꦥꦶ ꦢ꧀ꦮꦴꦢꦱꦴꦪꦠꦤꦴꦤꦁ ꦮꦱꦺꦤꦺꦮ ꦢꦸꦏ꧀ꦑꦱꦕ꧀ꦕꦁ ꦥꦏꦴꦱꦺꦱꦶ. ꦩꦤꦺꦴꦒꦲꦟꦺꦤ ꦮꦴ ꦱꦠ꧀ꦠꦤ꧀ꦤꦁ ꦮꦶꦚ꧀ꦚꦴꦟꦣꦴꦠꦹꦤꦁ ꦒꦲꦶꦠꦠ꧀ꦠꦴ ꦠꦴꦱꦸ ꦥꦸꦫꦶꦩꦥꦚ꧀ꦕꦮꦶꦚ꧀ꦚꦴꦟꦣꦴꦠꦸꦒ꧀ꦒꦲꦟꦺꦤ ꦠꦴꦱꦁ ꦮꦠ꧀ꦡꦹꦤꦶ ꦥꦚ꧀ꦕ ꦕꦏ꧀ꦑꦴꦢꦷꦤꦶ ꦄꦴꦪꦠꦤꦴꦤꦶ, ꦩꦤꦺꦴꦣꦴꦠꦸꦩꦤꦺꦴꦮꦶꦚ꧀ꦚꦴꦟꦣꦴꦠꦸꦒ꧀ꦒꦲꦟꦺꦤ ꦠꦴꦱꦁ ꦮꦠ꧀ꦡꦸꦒꦺꦴꦕꦫꦨꦺꦢꦁ ꦣꦩ꧀ꦩꦴꦪꦠꦤꦁ ꦒꦲꦶꦠꦩꦺꦮꦴꦠꦶ ꦌꦮꦩ꧀ꦥꦶ ꦢ꧀ꦮꦴꦢꦱꦴꦪꦠꦤꦮꦱꦺꦤ ꦢꦸꦏ꧀ꦑꦱꦕ꧀ꦕꦁ ꦥꦏꦴꦱꦺꦱꦶ. ꦭꦺꦴꦏꦸꦠ꧀ꦠꦫꦩꦤꦴꦪꦠꦤꦣꦩ꧀ꦩꦴꦪꦠꦤꦺꦏꦢꦺꦱꦺꦴ ꦥꦤꦺꦠ꧀ꦡ ꦪꦠ꧀ꦡ ꦭꦺꦴꦏꦺꦴ ꦮꦶꦲꦚ꧀ꦚꦠꦶ, ꦠꦁ ꦱꦤ꧀ꦣꦴꦪ ꦤꦶꦢ꧀ꦢꦶꦛ꧀ꦜꦠ꧀ꦠꦴ ꦤ ꦱꦔ꧀ꦒꦪ꧀ꦲꦠꦶ.

ꦌꦠ꧀ꦡ ꦖꦤ꧀ꦢꦁ ꦮꦶꦫꦴꦗꦺꦠ꧀ꦮꦴꦠꦶ ꦌꦠ꧀ꦡ ꦢ꧀ꦮꦴꦢꦱꦴꦪꦠꦤꦨꦺꦢꦺ ꦢꦸꦏ꧀ꦑꦱꦕ꧀ꦕꦺ ꦠꦴꦤꦺꦮꦴꦪꦠꦤꦴꦤꦶ ꦑꦤ꧀ꦣꦠꦺꦴ ꦣꦴꦠꦸꦠꦺꦴ ꦤꦴꦩꦫꦹꦥꦠꦺꦴꦠꦶ ꦠꦡꦴ ꦠꦡꦴ ꦮꦮꦠ꧀ꦡꦥꦺꦠ꧀ꦮꦴ, ꦠꦶꦭꦏ꧀ꦑꦟꦁ ꦄꦴꦫꦺꦴꦥꦺꦠ꧀ꦮꦴ, ꦮꦶꦥꦱ꧀ꦱꦤ꧀ꦠꦺꦴ ꦄꦫꦲꦠ꧀ꦠꦩꦒ꧀ꦒꦥꦫꦶꦪꦺꦴꦱꦴꦤꦴꦪ ꦮꦶꦥꦱ꧀ꦱꦤꦴꦪ ꦠꦟ꧀ꦲꦴꦱꦔ꧀ꦑꦴꦠꦁ ꦖꦤ꧀ꦢꦁ ꦱꦧ꧀ꦧꦱꦺꦴ ꦮꦶꦫꦴꦗꦺꦠ꧀ꦮꦴ ꦮꦶꦤꦺꦠ꧀ꦮꦴ ꦮꦶꦢ꧀ꦣꦁꦱꦺꦠ꧀ꦮꦴꦠꦶ ꦄꦠ꧀ꦡꦺꦴ. ꦌꦮꦁ ꦢꦸꦏ꧀ꦑꦴ ꦥꦩꦸꦕ꧀ꦕꦠꦷꦠꦶ ꦆꦩꦶꦤꦴ ꦥꦏꦴꦫꦺꦤ ꦌꦠꦱ꧀ꦩꦴ ꦮꦛ꧀ꦛꦢꦸꦏ꧀ꦑꦴ ꦥꦩꦸꦕ꧀ꦕꦠꦷꦠꦶ. ꦌꦮꦩꦶꦩꦴꦪ ꦈꦥꦝ꧀ꦞꦒꦴꦡꦴꦪ ‘‘ꦤꦶꦪ꧀ꦪꦴꦤꦁ ꦥꦸꦕ꧀ꦖꦶꦠꦺꦴ ꦧ꧀ꦫꦹꦲꦶ, ꦏꦡꦁ ꦢꦸꦏ꧀ꦑꦴ ꦥꦩꦸꦕ꧀ꦕꦠꦷ’’ꦠꦶ ꦄꦪꦁ ꦥꦚ꧀ꦲꦺꦴ ꦮꦶꦱ꧀ꦱꦗ꧀ꦗꦶꦠꦺꦴ ꦲꦺꦴꦠꦶ, ꦩꦒ꧀ꦒꦱꦕ꧀ꦕꦚ꧀ꦕ ꦥꦏꦴꦱꦶꦠꦁ ꦱꦩꦸꦢꦪꦤꦶꦫꦺꦴꦣꦱꦕ꧀ꦕꦴꦤꦶ ꦥꦤꦺꦠ꧀ꦡ ꦥꦸꦫꦶꦩꦤꦪꦺꦤꦺꦮ ꦱꦔ꧀ꦒꦲꦶꦠꦠ꧀ꦠꦴ ꦥꦏꦴꦱꦶꦠꦴꦤꦺꦮ ꦲꦺꦴꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦴꦤꦶ. ꦈꦥꦝ꧀ꦞꦒꦴꦡꦴꦪ ꦮꦴ ꦢꦸꦏ꧀ꦑꦱꦕ꧀ꦕꦁ, ꦖꦤ꧀ꦢꦺꦤ ꦱꦩꦸꦢꦪꦱꦕ꧀ꦕꦁ, ‘‘ꦮꦶꦫꦴꦗꦺꦠ꧀ꦮꦴ’’ꦠꦶ ꦌꦠ꧀ꦡ ꦮꦶꦫꦴꦒꦺꦤ ꦤꦶꦫꦺꦴꦣꦱꦕ꧀ꦕꦁ, ‘‘ꦮꦶꦫꦴꦒꦴꦮꦶꦩꦸꦕ꧀ꦕꦠꦷ’’ꦠꦶ ꦮꦕꦤꦠꦺꦴ ꦮꦴ ꦩꦒ꧀ꦒꦱꦕ꧀ꦕꦁ. ‘‘ꦌꦮ’’ꦤ꧀ꦠꦶ ꦈꦥꦴꦪꦤꦶꦢꦱ꧀ꦱꦤꦺꦤ ꦩꦒ꧀ꦒꦱꦕ꧀ꦕꦁ, ꦢꦸꦏ꧀ꦑꦤꦶꦫꦺꦴꦣꦤ꧀ꦠꦶ ꦮꦕꦤꦠꦺꦴ ꦮꦴ. ‘‘ꦢꦸꦏ꧀ꦑꦴ ꦥꦩꦸꦕ꧀ꦕꦠꦷ’’ꦠꦶ ꦢꦸꦏ꧀ꦑꦥꦩꦺꦴꦏ꧀ꦑꦺꦤ ꦤꦶꦫꦺꦴꦣꦱꦕ꧀ꦕꦤ꧀ꦠꦶ ꦌꦮꦩꦺꦠ꧀ꦡ ꦕꦠ꧀ꦠꦴꦫꦶ ꦱꦕ꧀ꦕꦴꦤꦶ ꦥꦏꦴꦱꦶꦠꦴꦤꦶ ꦲꦺꦴꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦴꦤꦶ.

꧑꧗꧔. ꦌꦮꦁ ꦕꦠꦸꦱꦕ꧀ꦕꦒꦧ꧀ꦨꦴꦪ ꦒꦴꦡꦴꦪ ꦭꦏ꧀ꦑꦟꦠꦺꦴ ꦤꦶꦪ꧀ꦪꦴꦤꦁ ꦥꦏꦴꦱꦺꦠ꧀ꦮꦴ ꦥꦸꦤ ꦠꦢꦺꦮ ꦱꦏꦺꦤ ꦤꦶꦫꦸꦠ꧀ꦠꦴꦨꦶꦭꦴꦥꦺꦤ ꦤꦶꦒꦩꦺꦤ꧀ꦠꦺꦴ ꦄꦴꦲ ‘‘ꦌꦠꦁ ꦭꦺꦴꦏꦱ꧀ꦱ ꦤꦶꦪ꧀ꦪꦴꦤ’’ꦤ꧀ꦠꦶ. ꦌꦠ꧀ꦡ ꦌꦠꦤ꧀ꦠꦶ ꦥꦸꦧ꧀ꦧꦺ ꦮꦸꦠ꧀ꦠꦱ꧀ꦱ ꦤꦶꦢ꧀ꦢꦺꦱꦺꦴ, ꦭꦺꦴꦏꦱ꧀ꦱꦴꦠꦶ ꦠꦺꦣꦴꦠꦸꦏꦭꦺꦴꦏꦱ꧀ꦱ. ꦪꦡꦴꦠꦡꦤ꧀ꦠꦶ ꦄꦮꦶꦥꦫꦷꦠꦁ. ꦌꦠꦁ ꦮꦺꦴ ꦄꦲꦩꦏ꧀ꦑꦴꦩꦷꦠꦶ ꦱꦕꦺꦥꦶ ꦩꦁ ꦱꦲꦱ꧀ꦱꦏ꧀ꦑꦠ꧀ꦠꦸꦁ ꦥꦸꦕ꧀ꦖꦺꦪ꧀ꦪꦴꦡ, ꦌꦠꦁ ꦮꦺꦴ ꦄꦲꦩꦏ꧀ꦑꦴꦩꦶ, ꦤ ꦄꦚ꧀ꦚꦁ. ꦏꦱ꧀ꦩꦴ? ꦪꦱ꧀ꦩꦴ ꦌꦮꦁ ꦢꦸꦏ꧀ꦑꦴ ꦥꦩꦸꦕ꧀ꦕꦠꦶ, ꦤ ꦄꦚ꧀ꦚꦡꦴꦠꦶ ꦄꦣꦶꦥ꧀ꦥꦴꦪꦺꦴ. ꦄꦡ ꦮꦴ ꦌꦠꦺꦤ ꦤꦶꦪ꧀ꦪꦴꦤꦺꦤ ꦌꦏꦢ꧀ꦮꦠ꧀ꦠꦶꦏ꧀ꦑꦠꦸꦁ ꦤꦶꦒ꧀ꦒꦠꦴꦤꦩ꧀ꦥꦶ ꦌꦠꦁ ꦮꦺꦴ ꦄꦲꦩꦏ꧀ꦑꦴꦩꦶ, ꦈꦥꦫꦶꦮꦶꦱꦺꦱꦴꦣꦶꦒꦩꦴꦪꦥꦶ ꦌꦠꦢꦺꦮ ꦄꦲꦩꦏ꧀ꦑꦴꦩꦷꦠꦶ ꦄꦠ꧀ꦡꦺꦴ. ꦏꦱ꧀ꦩꦴ? ꦪꦱ꧀ꦩꦴ ꦌꦮꦁ ꦢꦸꦏ꧀ꦑꦴ ꦥꦩꦸꦕ꧀ꦕꦠꦶ ꦄꦱꦺꦱꦤꦶꦱ꧀ꦱꦺꦱꦴꦠꦶ ꦄꦫꦲꦠ꧀ꦠꦤꦶꦏꦹꦛꦺꦤ ꦢꦺꦱꦤꦁ ꦤꦶꦛ꧀ꦜꦴꦥꦺꦱꦶ. ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦢ꧀ꦮꦺꦥꦶ ꦪꦏ꧀ꦑꦱꦺꦤꦴꦥꦠꦪꦺꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶꦁꦱꦸ ꦱꦢ꧀ꦣꦶꦁ ꦪꦏ꧀ꦑꦱꦲꦱ꧀ꦱꦺꦤ.

꧑꧗꧕. ꦄꦡ ꦲꦺꦩꦮꦠꦺꦴ ꦥꦏꦠꦶꦪꦴꦥꦶ ꦣꦩ꧀ꦩꦒꦫꦸ ꦆꦢꦴꦤꦶ ꦄꦫꦶꦪꦨꦹꦩꦶꦪꦁ ꦥꦠꦶꦛ꧀ꦜꦴꦪ ꦱꦸꦛ꧀ꦜꦸꦠꦫꦁ ꦄꦠꦶꦠ꧀ꦠꦺꦴ ꦨꦒꦮꦠꦺꦴ ꦮꦶꦕꦶꦠ꧀ꦫꦥꦛꦶꦨꦴꦤꦴꦪ ꦢꦺꦱꦤꦴꦪ ꦨꦒꦮꦤ꧀ꦠꦁ ꦱꦺꦏ꧀ꦑꦴꦱꦺꦏ꧀ꦑꦨꦹꦩꦶꦁ ꦥꦸꦕ꧀ꦖꦤ꧀ꦠꦺꦴ ‘‘ꦏꦺꦴ ꦱꦹꦣ ꦠꦫꦠꦷ’’ꦠꦶ ꦒꦴꦡꦩꦨꦴꦱꦶ. ꦠꦠ꧀ꦡ ꦏꦺꦴ ꦱꦹꦣ ꦠꦫꦠꦶ ꦎꦓꦤ꧀ꦠꦶ ꦆꦩꦶꦤꦴ ꦕꦠꦸꦫꦺꦴꦓꦁ ꦏꦺꦴ ꦠꦫꦠꦷꦠꦶ ꦱꦺꦏ꧀ꦑꦨꦹꦩꦶꦁ ꦥꦸꦕ꧀ꦖꦠꦶ ꦄꦮꦶꦱꦺꦱꦺꦤ. ꦪꦱ꧀ꦩꦴ ꦄꦟ꧀ꦟꦮꦤ꧀ꦠꦶ ꦤ ꦮꦶꦠ꧀ꦡꦠꦩꦠ꧀ꦠꦁ ꦤꦴꦥꦶ ꦒꦩ꧀ꦨꦷꦫꦩꦠ꧀ꦠꦁ ꦄꦥꦶꦕ ꦥꦤ ꦪꦁ ꦮꦶꦠ꧀ꦡꦠꦠꦫꦚ꧀ꦕ ꦒꦩ꧀ꦨꦷꦫꦠꦫꦚ꧀ꦕ, ꦠꦁ ꦮꦸꦕ꧀ꦕꦠꦶ. ꦠꦴꦢꦶꦱꦺꦴ ꦕ ꦱꦁꦱꦴꦫꦟ꧀ꦟꦮꦺꦴ. ꦄꦪꦚ꧀ꦲꦶ ꦱꦩꦤ꧀ꦠꦠꦺꦴ ꦥꦫꦶꦪꦤ꧀ꦠꦴꦨꦴꦮꦺꦤ ꦮꦶꦠ꧀ꦡꦠꦺꦴ, ꦲꦺꦛ꧀ꦜꦴ ꦥꦠꦶꦛ꧀ꦜꦴꦨꦴꦮꦺꦤ ꦈꦥꦫꦶ ꦄꦴꦭꦩ꧀ꦧꦤꦴꦨꦴꦮꦺꦤ ꦕ ꦒꦩ꧀ꦨꦷꦫꦺꦴ, ꦠꦱ꧀ꦩꦴ ‘‘ꦏꦺꦴ ꦆꦣ ꦠꦫꦠꦶ ꦄꦟ꧀ꦟꦮꦁ, ꦠꦱ꧀ꦩꦶꦚ꧀ꦕ ꦄꦥ꧀ꦥꦠꦶꦛ꧀ꦜꦺ ꦄꦤꦴꦭꦩ꧀ꦧꦺ ꦒꦩ꧀ꦨꦷꦫꦺ ꦄꦟ꧀ꦟꦮꦺ ꦏꦺꦴ ꦤ ꦱꦷꦢꦠꦷ’’ꦠꦶ ꦄꦱꦺꦏ꧀ꦑꦨꦹꦩꦶꦁ ꦥꦸꦕ꧀ꦖꦠꦶ.

꧑꧗꧖. ꦄꦡ ꦨꦒꦮꦴ ꦪꦺꦴ ꦨꦶꦏ꧀ꦑꦸ ꦗꦷꦮꦶꦠꦲꦺꦠꦸꦥꦶ ꦮꦷꦠꦶꦏ꧀ꦏꦩꦁ ꦄꦏꦫꦺꦴꦤ꧀ꦠꦺꦴ ꦱꦧ꧀ꦧꦢꦴ ꦱꦷꦭꦱꦩ꧀ꦥꦤ꧀ꦤꦺꦴ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴꦪ ꦕ ꦥꦚ꧀ꦚꦴꦪ ꦥꦚ꧀ꦚꦮꦴ, ꦈꦥꦕꦴꦫꦥ꧀ꦥꦤꦴꦱꦩꦴꦣꦶꦤꦴ ꦆꦫꦶꦪꦴꦥꦡꦲꦺꦛ꧀ꦜꦶꦩꦩꦒ꧀ꦒꦦꦭꦺꦲꦶ ꦕ ꦱꦸꦱꦩꦴꦲꦶꦠꦺꦴ, ꦠꦶꦭꦏ꧀ꦑꦟꦁ ꦄꦴꦫꦺꦴꦥꦺꦠ꧀ꦮꦴ ꦮꦶꦥꦱ꧀ꦱꦤꦴꦪ ꦤꦶꦪꦏꦗ꧀ꦙꦠ꧀ꦠꦕꦶꦤ꧀ꦠꦤꦱꦷꦭꦺꦴ, ꦱꦴꦠꦕ꧀ꦕꦏꦶꦫꦶꦪꦴꦮꦲꦴꦪ ꦄꦥ꧀ꦥꦩꦴꦢꦱꦠꦶꦪꦴ ꦕ ꦱꦩꦤ꧀ꦤꦴꦒꦠꦺꦴ. ꦪꦱ꧀ꦩꦴ ꦱꦺꦴ ꦕꦠꦸꦠ꧀ꦡꦺꦤ ꦩꦒ꧀ꦒꦺꦤ ꦆꦩꦁ ꦱꦸꦢꦸꦠ꧀ꦠꦫꦁ ꦎꦓꦁ ꦄꦤꦮꦱꦺꦱꦁ ꦠꦫꦠꦶ, ꦠꦱ꧀ꦩꦴ ꦱꦺꦏ꧀ꦑꦨꦹꦩꦶꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ‘‘ꦱꦧ꧀ꦧꦢꦴ ꦱꦷꦭꦱꦩ꧀ꦥꦤ꧀ꦤꦺꦴ’’ꦠꦶ ꦆꦩꦁ ꦠꦶꦱꦶꦏ꧀ꦑꦴꦒꦧ꧀ꦨꦁ ꦒꦴꦡꦩꦴꦲ. ꦌꦠ꧀ꦡ ꦲꦶ ꦱꦷꦭꦱꦩ꧀ꦥꦢꦴꦪ ꦄꦣꦶꦱꦷꦭꦱꦶꦏ꧀ꦑꦴ, ꦱꦠꦶꦱꦩꦴꦣꦷꦲꦶ ꦄꦣꦶꦕꦶꦠ꧀ꦠꦱꦶꦏ꧀ꦑꦴ, ꦄꦗ꧀ꦙꦠ꧀ꦠꦕꦶꦤ꧀ꦠꦶꦠꦴꦥꦚ꧀ꦚꦴꦲꦶ ꦄꦣꦶꦥꦚ꧀ꦚꦴꦱꦶꦏ꧀ꦑꦴꦠꦶ ꦠꦶꦱ꧀ꦱꦺꦴ ꦱꦶꦏ꧀ꦑꦴ ꦱꦈꦥꦏꦴꦫꦴ ꦱꦴꦤꦶꦱꦁꦱꦴ ꦕ ꦮꦸꦠ꧀ꦠꦴ. ꦈꦥꦏꦴꦫꦺꦴ ꦲꦶ ꦱꦶꦏ꧀ꦑꦴꦤꦁ ꦭꦺꦴꦏꦶꦪꦥꦚ꧀ꦚꦴ ꦱꦠꦶ ꦕ, ꦄꦤꦶꦱꦁꦱꦺꦴ ꦱꦴꦩꦚ꧀ꦚꦦꦭꦴꦤꦷꦠꦶ.

꧑꧗꧗. ꦌꦮꦁ ꦥꦜꦩꦒꦴꦡꦴꦪ ꦱꦺꦏ꧀ꦑꦨꦹꦩꦶꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦄꦱꦺꦏ꧀ꦑꦨꦹꦩꦶꦁ ꦢꦱ꧀ꦱꦺꦤ꧀ꦠꦺꦴ ꦢꦸꦠꦶꦪꦒꦴꦡꦩꦴꦲ. ꦠꦱ꧀ꦱꦠ꧀ꦡꦺꦴ ꦮꦶꦫꦠꦺꦴ ꦏꦴꦩꦱꦚ꧀ꦚꦴꦪꦴꦠꦶ ꦪꦴ ꦏꦴꦕꦶ ꦏꦴꦩꦱꦚ꧀ꦚꦴ, ꦠꦠꦺꦴ ꦱꦧ꧀ꦧꦠꦺꦴ ꦕꦠꦸꦠ꧀ꦡꦩꦒ꧀ꦒꦱꦩ꧀ꦥꦪꦸꦠ꧀ꦠꦴꦪ ꦱꦩꦸꦕ꧀ꦖꦺꦢꦮꦶꦫꦠꦶꦪꦴ ꦮꦶꦫꦠꦺꦴ. ‘‘ꦮꦶꦫꦠ꧀ꦠꦺꦴ’’ꦠꦶꦥꦶ ꦥꦴꦜꦺꦴ. ꦠꦢꦴ ‘‘ꦏꦴꦩꦱꦚ꧀ꦚꦴꦪꦴ’’ꦠꦶ ꦨꦸꦩ꧀ꦩꦮꦕꦤꦁ ꦲꦺꦴꦠꦶ, ꦱꦒꦴꦡꦴꦮꦒ꧀ꦒꦺ ꦥꦤ ‘‘ꦏꦴꦩꦱꦚ꧀ꦚꦴꦱꦹ’’ꦠꦶꦥꦶ (ꦱꦁ. ꦤꦶ. ꧑.꧙꧖) ꦥꦴꦜꦺꦴ. ꦕꦠꦹꦲꦶꦥꦶ ꦩꦒ꧀ꦒꦺꦲꦶ ꦢꦱꦤ꧀ꦤꦁ ꦱꦁꦪꦺꦴꦗꦤꦴꦤꦁ ꦄꦠꦷꦠꦠ꧀ꦠꦴ ꦱꦧ꧀ꦧꦱꦁꦪꦺꦴꦗꦤꦴꦠꦶꦒꦺꦴ, ꦕꦠꦸꦠ꧀ꦡꦺꦤꦺꦮ ꦮꦴ ꦈꦢ꧀ꦣꦩ꧀ꦨꦴꦒꦶꦪꦱꦧ꧀ꦧꦱꦁꦪꦺꦴꦗꦤꦴꦠꦶꦒꦺꦴ, ꦠꦠ꧀ꦫꦠꦠ꧀ꦫꦴꦨꦶꦤꦤ꧀ꦢꦶꦤꦷꦠꦟ꧀ꦲꦴꦱꦔ꧀ꦑꦴꦠꦴꦪ ꦤꦤ꧀ꦢꦶꦪꦴ ꦠꦶꦟ꧀ꦟꦚ꧀ꦕ ꦨꦮꦴꦤꦁ ꦥꦫꦶꦏ꧀ꦑꦷꦟꦠ꧀ꦠꦴ ꦤꦤ꧀ꦢꦷꦨꦮꦥꦫꦶꦏ꧀ꦑꦷꦟꦺꦴ ꦱꦺꦴ ꦠꦴꦢꦶꦱꦺꦴ ꦑꦷꦟꦴꦱꦮꦺꦴ ꦨꦶꦏ꧀ꦑꦸ ꦒꦩ꧀ꦨꦷꦫꦺ ꦱꦁꦱꦴꦫꦟ꧀ꦟꦮꦺ ꦤ ꦱꦷꦢꦠꦶ ꦤꦤ꧀ꦢꦷꦥꦫꦶꦏ꧀ꦑꦪꦺꦤ ꦱꦈꦥꦴꦢꦶꦱꦺꦱꦁ, ꦨꦮꦥꦫꦶꦏ꧀ꦑꦪꦺꦤ ꦕ ꦄꦤꦸꦥꦴꦢꦶꦱꦺꦱꦁ ꦤꦶꦧ꧀ꦧꦴꦤꦡꦭꦁ ꦱꦩꦴꦥꦗ꧀ꦗ ꦥꦫꦩꦱ꧀ꦱꦴꦱꦥ꧀ꦥꦠ꧀ꦠꦶꦪꦴꦠꦶ.

꧑꧗꧘. ꦄꦡ ꦲꦺꦩꦮꦠꦺꦴ ꦱꦲꦴꦪꦚ꧀ꦕ ꦪꦏ꧀ꦑꦥꦫꦶꦱꦚ꧀ꦕ ꦎꦭꦺꦴꦏꦺꦠ꧀ꦮꦴ ꦥꦷꦠꦶꦱꦺꦴꦩꦤꦱ꧀ꦱꦗꦴꦠꦺꦴ ‘‘ꦒꦩ꧀ꦨꦷꦫꦥꦚ꧀ꦚ’’ꦤ꧀ꦠꦶ ꦌꦮꦩꦴꦢꦷꦲꦶ ꦒꦴꦡꦴꦲꦶ ꦨꦒꦮꦤ꧀ꦠꦁ ꦄꦨꦶꦠ꧀ꦡꦮꦶꦠ꧀ꦮꦴ ꦱꦧ꧀ꦧꦴꦮꦠꦶꦪꦴ ꦥꦫꦶꦱꦴꦪ ꦱꦲꦴꦪꦺꦤ ꦕ ꦱꦢ꧀ꦣꦶꦁ ꦄꦨꦶꦮꦴꦢꦺꦠ꧀ꦮꦴ, ꦥꦢꦏ꧀ꦑꦶꦟꦁ ꦏꦠ꧀ꦮꦴ, ꦄꦠ꧀ꦠꦤꦺꦴ ꦮꦱꦤꦛ꧀ꦜꦴꦤꦁ ꦄꦒꦩꦴꦱꦶ.

ꦠꦴꦱꦁ ꦥꦤ ꦒꦴꦡꦴꦤꦁ ꦄꦪꦁ ꦄꦠ꧀ꦡꦮꦟ꧀ꦟꦤꦴ – ꦒꦩ꧀ꦨꦷꦫꦥꦚ꧀ꦚꦤ꧀ꦠꦶ ꦒꦩ꧀ꦨꦷꦫꦴꦪ ꦥꦚ꧀ꦚꦴꦪ ꦱꦩꦤ꧀ꦤꦴꦒꦠꦁ. ꦠꦠ꧀ꦡ ꦥꦛꦶꦱꦩ꧀ꦨꦶꦢꦴꦪꦁ ꦮꦸꦠ꧀ꦠꦤꦪꦺꦤ ꦒꦩ꧀ꦨꦷꦫꦥꦚ꧀ꦚꦴ ꦮꦺꦢꦶꦠꦧ꧀ꦧꦴ. ꦮꦸꦠ꧀ꦠꦚ꧀ꦲꦶ ꦠꦠ꧀ꦡ ‘‘ꦒꦩ꧀ꦨꦷꦫꦺꦱꦸ ꦑꦤ꧀ꦣꦺꦱꦸ ꦚꦴꦟꦁ ꦥꦮꦠ꧀ꦠꦠꦷꦠꦶ ꦒꦩ꧀ꦨꦷꦫꦥꦚ꧀ꦚꦴ’’ꦠꦶꦄꦴꦢꦶ (ꦥꦛꦶ. ꦩ. ꧓.꧔). ꦤꦶꦥꦸꦟꦠ꧀ꦡꦢꦱ꧀ꦱꦶꦤ꧀ꦠꦶ ꦤꦶꦥꦸꦟꦺꦲꦶ ꦑꦠ꧀ꦠꦶꦪꦥꦟ꧀ꦝꦶꦠꦴꦢꦷꦲꦶ ꦄꦨꦶꦱꦔ꧀ꦑꦠꦴꦤꦁ ꦥꦚ꧀ꦲꦴꦤꦁ ꦄꦠ꧀ꦡꦢꦱ꧀ꦱꦶꦁ ꦄꦠ꧀ꦡꦴꦤꦁ ꦮꦴ ꦪꦴꦤꦶ ꦤꦶꦥꦸꦟꦴꦤꦶ ꦏꦴꦫꦟꦴꦤꦶ ꦢꦸꦥ꧀ꦥꦛꦶꦮꦶꦗ꧀ꦙꦴꦤꦶ ꦄꦚ꧀ꦚꦺꦲꦶ ꦠꦺꦱꦁ ꦢꦱ꧀ꦱꦤꦺꦤ ꦤꦶꦥꦸꦟꦠ꧀ꦡꦢꦱ꧀ꦱꦶꦁ. ꦫꦴꦒꦴꦢꦶꦏꦶꦚ꧀ꦕꦤꦴꦨꦴꦮꦺꦤ ꦄꦏꦶꦚ꧀ꦕꦤꦁ. ꦢꦸꦮꦶꦣꦺ ꦏꦴꦩꦺ ꦠꦶꦮꦶꦣꦺ ꦕꦺ ꦨꦮꦺ ꦄꦭꦒ꧀ꦒꦤꦺꦤ ꦏꦴꦩꦨꦮꦺ ꦄꦱꦠ꧀ꦠꦁ. ꦑꦤ꧀ꦣꦴꦢꦶꦨꦺꦢꦺꦱꦸ ꦱꦧ꧀ꦧꦴꦫꦩ꧀ꦩꦟꦺꦱꦸ ꦖꦤ꧀ꦢꦫꦴꦒꦧꦤ꧀ꦣꦤꦴꦨꦴꦮꦺꦤ ꦱꦧ꧀ꦧꦣꦶ ꦮꦶꦥ꧀ꦥꦩꦸꦠ꧀ꦠꦁ. ꦢꦶꦧ꧀ꦧꦺ ꦥꦡꦺ ꦏꦩꦩꦴꦤꦤ꧀ꦠꦶ ꦄꦛ꧀ꦜꦱꦩꦴꦥꦠ꧀ꦠꦶꦨꦺꦢꦺ ꦢꦶꦧ꧀ꦧꦺ ꦥꦡꦺ ꦱꦩꦴꦥꦗ꧀ꦗꦤꦮꦱꦺꦤ ꦕꦔ꧀ꦏꦩꦤ꧀ꦠꦁ. ꦠꦠ꧀ꦡ ꦏꦶꦚ꧀ꦕꦴꦥꦶ ꦤ ꦠꦴꦪ ꦮꦺꦭꦴꦪ ꦨꦒꦮꦴ ꦢꦶꦧ꧀ꦧꦺ ꦥꦡꦺ ꦏꦩꦠꦶ, ꦄꦥꦶꦕ ꦑꦺꦴ ꦥꦸꦧ꧀ꦧꦺ ꦏꦩꦤꦁ ꦈꦥꦴꦢꦴꦪ ꦏꦩꦤꦱꦠ꧀ꦠꦶꦱꦧ꧀ꦨꦴꦮꦺꦤ ꦠꦠ꧀ꦡ ꦭꦢ꧀ꦣꦮꦱꦷꦨꦴꦮꦠꦴꦪ ꦌꦮꦁ ꦮꦸꦕ꧀ꦕꦠꦶ. ꦄꦡ ꦮꦴ ꦪꦺ ꦠꦺ ꦮꦶꦱꦸꦢ꧀ꦣꦶꦢꦺꦮꦴ ꦄꦫꦲꦤ꧀ꦠꦺꦴ, ꦠꦺꦱꦁ ꦥꦡꦺ ꦱꦤ꧀ꦠꦮꦶꦲꦴꦫꦺ ꦏꦩꦤꦺꦤꦴꦥꦺꦠꦁ ꦮꦸꦠ꧀ꦠꦁ. ꦩꦲꦤ꧀ꦠꦴꦤꦁ ꦒꦸꦟꦴꦤꦁ ꦌꦱꦤꦺꦤ ꦩꦲꦺꦱꦶꦁ.

꧑꧗꧙. ꦢꦸꦠꦶꦪꦒꦴꦡꦴꦪ ꦄꦥꦫꦺꦤ ꦥꦫꦶꦪꦴꦪꦺꦤ ꦡꦸꦠꦶ ꦄꦴꦫꦢ꧀ꦣꦴꦠꦶ ꦏꦠ꧀ꦮꦴ ꦥꦸꦤ ꦤꦶꦥꦸꦟꦠ꧀ꦡꦢꦱ꧀ꦱꦶꦒ꧀ꦒꦲꦟꦁ ꦤꦶꦢꦱ꧀ꦱꦺꦠꦶ. ꦄꦡ ꦮꦴ ꦤꦶꦥꦸꦟꦠ꧀ꦡꦺ ꦢꦱ꧀ꦱꦺꦠꦴꦫꦤ꧀ꦠꦶ ꦄꦠ꧀ꦡꦺꦴ. ꦥꦚ꧀ꦚꦴꦢꦢꦤ꧀ꦠꦶ ꦥꦚ꧀ꦚꦴꦥꦛꦶꦭꦴꦨꦱꦁꦮꦠ꧀ꦠꦤꦶꦏꦴꦪ ꦥꦛꦶꦥꦠ꧀ꦠꦶꦪꦴ ꦏꦡꦤꦺꦤ ꦥꦚ꧀ꦚꦴꦢꦴꦪꦏꦁ. ꦏꦴꦩꦴꦭꦪꦺ ꦄꦱꦠ꧀ꦠꦤ꧀ꦠꦶ ꦪ꧀ꦮꦴꦪꦁꦏꦴꦩꦺꦱꦸ ꦠꦟ꧀ꦲꦴꦢꦶꦛ꧀ꦜꦶꦮꦱꦺꦤ ꦢꦸꦮꦶꦣꦺꦴ ꦄꦴꦭꦪꦺꦴ, ꦠꦠ꧀ꦡ ꦄꦱꦠ꧀ꦠꦁ. ꦱꦧ꧀ꦧꦮꦶꦢꦸꦤ꧀ꦠꦶ ꦱꦧ꧀ꦧꦣꦩ꧀ꦩꦮꦶꦢꦸꦁ, ꦱꦧ꧀ꦧꦚ꧀ꦚꦸꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱꦸꦩꦺꦣꦤ꧀ꦠꦶ ꦠꦱ꧀ꦱ ꦱꦧ꧀ꦧꦚ꧀ꦚꦸꦨꦴꦮꦱ꧀ꦱ ꦩꦒ꧀ꦒꦨꦹꦠꦴꦪ ꦥꦴꦫꦩꦷꦥꦚ꧀ꦚꦴꦱꦔ꧀ꦑꦴꦠꦴꦪ ꦩꦺꦣꦴꦪ ꦱꦩꦤ꧀ꦤꦴꦒꦠꦁ. ꦄꦫꦶꦪꦺ ꦥꦡꦺꦠꦶ ꦄꦛ꧀ꦜꦔ꧀ꦒꦶꦏꦺ ꦩꦒ꧀ꦒꦺ, ꦦꦭꦱꦩꦴꦥꦠ꧀ꦠꦶꦪꦁ ꦮꦴ. ꦏꦩꦩꦴꦤꦤ꧀ꦠꦶ ꦥꦚ꧀ꦚꦴꦪ ꦄꦗ꧀ꦙꦺꦴꦒꦴꦲꦩꦴꦤꦁ ꦩꦒ꧀ꦒꦭꦏ꧀ꦑꦟꦁ ꦚꦠ꧀ꦮꦴ ꦢꦺꦱꦤꦠꦺꦴ, ꦥꦮꦶꦱꦩꦴꦤꦁ ꦮꦴ ꦑꦟꦺ ꦑꦟꦺ ꦦꦭꦱꦩꦴꦥꦠ꧀ꦠꦶꦱꦩꦴꦥꦗ꧀ꦗꦤꦠꦺꦴ, ꦕꦠꦸꦧ꧀ꦧꦶꦣꦩꦒ꧀ꦒꦨꦴꦮꦤꦴꦱꦔ꧀ꦑꦴꦠꦴꦪ ꦏꦩꦤꦱꦠ꧀ꦠꦶꦪꦴ ꦏꦩꦶꦠꦥꦸꦧ꧀ꦧꦁ ꦮꦴ.

꧑꧘꧐. ꦱꦸꦢꦶꦛ꧀ꦜꦁ ꦮꦠ ꦤꦺꦴ ꦄꦗ꧀ꦗꦴꦠꦶ. ꦄꦗ꧀ꦗ ꦄꦩ꧀ꦲꦺꦲꦶ ꦱꦸꦤ꧀ꦢꦫꦁ ꦢꦶꦛ꧀ꦜꦁ, ꦄꦗ꧀ꦗ ꦮꦴ ꦄꦩ꧀ꦲꦴꦏꦁ ꦱꦸꦤ꧀ꦢꦫꦁ ꦢꦶꦛ꧀ꦜꦁ, ꦢꦱ꧀ꦱꦤꦤ꧀ꦠꦶ ꦄꦠ꧀ꦡꦺꦴ. ꦱꦸꦥ꧀ꦥꦨꦴꦠꦁ ꦱꦸꦲꦸꦛ꧀ꦜꦶꦠꦤ꧀ꦠꦶ ꦄꦗ꧀ꦗ ꦄꦩ꧀ꦲꦴꦏꦁ ꦱꦸꦛ꧀ꦜꦸ ꦥꦨꦴꦠꦁ ꦱꦺꦴꦨꦤꦁ ꦮꦴ ꦥꦨꦴꦠꦁ ꦄꦲꦺꦴꦱꦶ. ꦄꦗ꧀ꦗ ꦕ ꦤꦺꦴ ꦱꦸꦤ꧀ꦢꦫꦁ ꦈꦛ꧀ꦜꦶꦠꦁ ꦄꦲꦺꦴꦱꦶ, ꦄꦤꦸꦥꦫꦺꦴꦣꦺꦤ ꦱꦪꦤꦠꦺꦴ ꦈꦛ꧀ꦜꦶꦠꦁ. ꦏꦶꦁ ꦏꦴꦫꦟꦁ? ꦪꦁ ꦄꦢ꧀ꦢꦱꦴꦩ ꦱꦩ꧀ꦧꦸꦢ꧀ꦣꦁ, ꦪꦱ꧀ꦩꦴ ꦱꦩ꧀ꦧꦸꦢ꧀ꦣꦁ ꦄꦢ꧀ꦢꦱꦴꦩꦴꦠꦶ ꦄꦠ꧀ꦠꦤꦺꦴ ꦭꦴꦨꦱꦩ꧀ꦥꦠ꧀ꦠꦶꦁ ꦄꦴꦫꦧ꧀ꦨ ꦥꦴꦩꦺꦴꦗ꧀ꦗꦁ ꦥꦮꦺꦢꦺꦠꦶ.

꧑꧘꧑. ꦆꦢ꧀ꦣꦶꦩꦤ꧀ꦠꦺꦴꦠꦶ ꦏꦩ꧀ꦩꦮꦶꦥꦴꦏꦗꦶꦢ꧀ꦣꦶꦪꦴ ꦱꦩꦤ꧀ꦤꦴꦒꦠꦴ. ꦪꦱꦱ꧀ꦱꦶꦤꦺꦴꦠꦶ ꦭꦴꦨꦒ꧀ꦒꦥꦫꦶꦮꦴꦫꦒ꧀ꦒꦱꦩ꧀ꦥꦤ꧀ꦤꦴ. ꦱꦫꦟꦁ ꦪꦤ꧀ꦠꦷꦠꦶ ꦏꦶꦚ꧀ꦕꦴꦥꦶ ꦩꦒ꧀ꦒꦺꦤꦺꦮ ꦒꦠꦴ, ꦠꦡꦴꦥꦶ ꦱꦺꦴꦠꦴꦥꦤ꧀ꦤꦨꦴꦮꦥꦫꦶꦢꦷꦥꦤꦠ꧀ꦡꦁ ꦥꦱꦴꦢꦢꦱ꧀ꦱꦤꦠ꧀ꦡꦚ꧀ꦕ ꦮꦴꦕꦁ ꦨꦶꦤ꧀ꦢꦠꦶ.

꧑꧘꧒. ꦒꦴꦩꦴ ꦒꦴꦩꦤ꧀ꦠꦶ ꦢꦺꦮꦒꦴꦩꦴ ꦢꦺꦮꦒꦴꦩꦁ. ꦤꦒꦴ ꦤꦒꦤ꧀ꦠꦶ ꦢꦺꦮꦥꦧ꧀ꦧꦠꦴ ꦢꦺꦮꦥꦧ꧀ꦧꦠꦁ. ꦤꦩꦱ꧀ꦱꦩꦴꦤꦴ ꦱꦩ꧀ꦧꦸꦢ꧀ꦣꦁ, ꦣꦩ꧀ꦩꦱ꧀ꦱ ꦕ ꦱꦸꦣꦩ꧀ꦩꦠꦤ꧀ꦠꦶ ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦠ ꦨꦒꦮꦴ, ꦱ꧀ꦮꦴꦏ꧀ꦑꦴꦠꦺꦴ ꦮꦠ ꦨꦒꦮꦠꦺꦴ ꦣꦩ꧀ꦩꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦧꦸꦢ꧀ꦣꦱꦸꦧꦺꦴꦣꦶꦠꦚ꧀ꦕ ꦣꦩ꧀ꦩꦱꦸꦣꦩ꧀ꦩꦠꦚ꧀ꦕ. ‘‘ꦱꦸꦥ꧀ꦥꦛꦶꦥꦤ꧀ꦤꦺꦴ ꦮꦠ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ’’ꦠꦶꦄꦴꦢꦶꦤꦴ ꦱꦔ꧀ꦓ-ꦱꦸꦥ꧀ꦥꦛꦶꦥꦠ꧀ꦠꦶꦚ꧀ꦕ ꦄꦨꦶꦠ꧀ꦡꦮꦶꦠ꧀ꦮꦴ ꦄꦨꦶꦠ꧀ꦡꦮꦶꦠ꧀ꦮꦴ ꦤꦩꦱ꧀ꦱꦩꦴꦤꦴ ꦣꦩ꧀ꦩꦓꦺꦴꦱꦏꦴ ꦲꦸꦠ꧀ꦮꦴ ꦮꦶꦕꦫꦶꦱ꧀ꦱꦴꦩꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮꦴꦠꦶ.

ꦥꦫꦩꦠ꧀ꦡꦗꦺꦴꦠꦶꦏꦴꦪ ꦑꦸꦢ꧀ꦢꦏ-ꦄꦛ꧀ꦜꦏꦡꦴꦪ

ꦱꦸꦠ꧀ꦠꦤꦶꦥꦴꦠ-ꦄꦛ꧀ꦜꦏꦡꦴꦪ ꦲꦺꦩꦮꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.