꧔. ꦏꦱꦶꦨꦴꦫꦢ꧀ꦮꦴꦗꦱꦸꦠ꧀ꦠꦮꦟ꧀ꦟꦤꦴ

ꦌꦮꦁ ꦩꦺ ꦱꦸꦠꦤ꧀ꦠꦶ ꦏꦱꦶꦨꦴꦫꦢ꧀ꦮꦴꦗꦱꦸꦠ꧀ꦠꦁ. ꦏꦴ ꦈꦥ꧀ꦥꦠ꧀ꦠꦶ? ꦨꦒꦮꦴ ꦩꦒꦣꦺꦱꦸ ꦮꦶꦲꦫꦤ꧀ꦠꦺꦴ ꦢꦏ꧀ꦑꦶꦟꦴꦒꦶꦫꦶꦱ꧀ꦩꦶꦁ ꦌꦏꦤꦴꦭꦴꦪꦁ ꦧ꧀ꦫꦴꦲ꧀ꦩꦟꦒꦴꦩꦺ ꦥꦸꦫꦺꦨꦠ꧀ꦠꦏꦶꦕ꧀ꦕꦁ ꦥꦕ꧀ꦖꦴꦨꦠ꧀ꦠꦏꦶꦕ꧀ꦕꦤ꧀ꦠꦶ ꦆꦩꦺꦱꦸ ꦢ꧀ꦮꦷꦱꦸ ꦧꦸꦢ꧀ꦣꦏꦶꦕ꧀ꦕꦺꦱꦸ ꦥꦸꦫꦺꦨꦠ꧀ꦠꦏꦶꦕ꧀ꦕꦁ ꦤꦶꦛ꧀ꦜꦴꦥꦺꦠ꧀ꦮꦴ ꦥꦕ꧀ꦖꦴꦨꦠ꧀ꦠꦏꦶꦕ꧀ꦕꦴꦮꦱꦴꦤꦺ ꦧꦸꦢ꧀ꦣꦕꦏ꧀ꦑꦸꦤꦴ ꦭꦺꦴꦏꦁ ꦮꦺꦴꦭꦺꦴꦏꦺꦤ꧀ꦠꦺꦴ ꦏꦱꦶꦨꦴꦫꦢ꧀ꦮꦴꦗꦁ ꦧ꧀ꦫꦴꦲ꧀ꦩꦟꦁ ꦄꦫꦲꦠ꧀ꦠꦱ꧀ꦱ ꦈꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦁ ꦢꦶꦱ꧀ꦮꦴ ‘‘ꦠꦠ꧀ꦡ ꦩꦪꦶ ꦒꦠꦺ ꦪꦡꦴ ꦥꦮꦠ꧀ꦠꦶꦱ꧀ꦱꦠꦶ, ꦠꦠꦺꦴ ꦏꦡꦴꦮꦱꦴꦤꦺ ꦣꦩ꧀ꦩꦢꦺꦱꦤꦁ ꦱꦸꦠ꧀ꦮꦴ ꦌꦱ ꦧ꧀ꦫꦴꦲ꧀ꦩꦟꦺꦴ ꦥꦧ꧀ꦧꦗꦶꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦶꦱ꧀ꦱꦠꦷ’’ꦠꦶ ꦕ ꦚꦠ꧀ꦮꦴ, ꦠꦠ꧀ꦡ ꦒꦤ꧀ꦠ꧀ꦮꦴ, ꦏꦡꦁ ꦱꦩꦸꦛ꧀ꦜꦴꦥꦺꦠ꧀ꦮꦴ, ꦆꦩꦁ ꦱꦸꦠ꧀ꦠꦁ ꦄꦨꦴꦱꦶ.

ꦠꦠ꧀ꦡ ꦱꦶꦪꦴ ‘‘ꦏꦠꦩꦁ ꦧꦸꦢ꧀ꦣꦴꦤꦁ ꦥꦸꦫꦺꦨꦠ꧀ꦠꦏꦶꦕ꧀ꦕꦁ, ꦏꦠꦩꦁ ꦥꦕ꧀ꦖꦴꦨꦠ꧀ꦠꦏꦶꦕ꧀ꦕ’’ꦤ꧀ꦠꦶ? ꦮꦸꦕ꧀ꦕꦠꦺ – ꦧꦸꦢ꧀ꦣꦺꦴ ꦨꦒꦮꦴ ꦥꦴꦠꦺꦴ ꦌꦮ ꦈꦛ꧀ꦜꦴꦪ ꦈꦥꦛ꧀ꦜꦴꦏꦴꦤꦸꦒ꧀ꦒꦲꦠ꧀ꦡꦁ ꦱꦫꦷꦫꦦꦴꦱꦸꦏꦠ꧀ꦡꦚ꧀ꦕ ꦩꦸꦑꦣꦺꦴꦮꦤꦴꦢꦶꦱꦫꦷꦫꦥꦫꦶꦏꦩ꧀ꦩꦁ ꦏꦠ꧀ꦮꦴ ꦪꦴꦮ ꦨꦶꦏ꧀ꦑꦴꦕꦴꦫꦮꦺꦭꦴ, ꦠꦴꦮ ꦮꦶꦮꦶꦠ꧀ꦠꦴꦱꦤꦺ ꦮꦷꦠꦶꦤꦴꦩꦺꦠ꧀ꦮꦴ, ꦨꦶꦏ꧀ꦑꦴꦕꦴꦫꦮꦺꦭꦴꦪ ꦤꦶꦮꦴꦱꦺꦠ꧀ꦮꦴ, ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ, ꦕꦷꦮꦫꦁ ꦥꦴꦫꦸꦥꦶꦠ꧀ꦮꦴ, ꦥꦠ꧀ꦠꦩꦴꦢꦴꦪ ꦏꦢꦴꦕꦶ ꦌꦏꦏꦺꦴꦮ ꦏꦢꦴꦕꦶ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ ꦒꦴꦩꦁ ꦮꦴ ꦤꦶꦒꦩꦁ ꦮꦴ ꦥꦶꦟ꧀ꦝꦴꦪ ꦥꦮꦶꦱꦠꦶ, ꦏꦢꦴꦕꦶ ꦥꦏꦠꦶꦪꦴ, ꦏꦢꦴꦕꦶ ꦄꦤꦺꦏꦺꦲꦶ ꦥꦴꦛꦶꦲꦴꦫꦶꦪꦺꦲꦶ ꦮꦠ꧀ꦠꦩꦴꦤꦺꦲꦶ. ꦱꦺꦪ꧀ꦪꦡꦶꦢꦁ – ꦥꦶꦟ꧀ꦝꦴꦪ ꦥꦮꦶꦱꦠꦺꦴ ꦭꦺꦴꦏꦤꦴꦡꦱ꧀ꦱ ꦥꦸꦫꦠꦺꦴ ꦥꦸꦫꦠꦺꦴ ꦒꦤ꧀ꦠ꧀ꦮꦴ ꦩꦸꦢꦸꦒꦠꦶꦪꦺꦴ ꦮꦴꦠꦴ ꦥꦡꦮꦶꦁ ꦱꦺꦴꦣꦺꦤ꧀ꦠꦶ; ꦮꦭꦴꦲꦏꦴ ꦈꦢꦏꦦꦸꦱꦶꦠꦴꦤꦶ ꦩꦸꦚ꧀ꦕꦤ꧀ꦠꦴ ꦩꦒ꧀ꦒꦺ ꦫꦺꦟꦸꦁ ꦮꦹꦥꦱꦩꦺꦠ꧀ꦮꦴ ꦈꦥꦫꦶ ꦮꦶꦠꦴꦤꦁ ꦲꦸꦠ꧀ꦮꦴ ꦠꦶꦛ꧀ꦜꦤ꧀ꦠꦶ. ꦄꦥꦫꦺ ꦮꦴꦠꦴ ꦥꦸꦥ꧀ꦦꦴꦤꦶ ꦈꦥꦱꦁꦲꦫꦶꦠ꧀ꦮꦴ ꦩꦒ꧀ꦒꦺ ꦎꦏꦶꦫꦤ꧀ꦠꦶ, ꦈꦤ꧀ꦤꦠꦴ ꦨꦹꦩꦶꦥ꧀ꦥꦢꦺꦱꦴ ꦎꦤꦩꦤ꧀ꦠꦶ, ꦎꦤꦠꦴ ꦈꦤ꧀ꦤꦩꦤ꧀ꦠꦶ, ꦥꦴꦢꦤꦶꦏ꧀ꦑꦺꦥꦱꦩꦪꦺ ꦱꦩꦴꦮ ꦨꦹꦩꦶ ꦲꦺꦴꦠꦶ, ꦱꦸꦑꦱꦩ꧀ꦦꦱ꧀ꦱꦴꦤꦶ ꦫꦡꦕꦏ꧀ꦏꦩꦠ꧀ꦠꦴꦤꦶ ꦥꦢꦸꦩꦥꦸꦥ꧀ꦦꦴꦤꦶ ꦮꦴ ꦥꦴꦢꦺ ꦱꦩ꧀ꦥꦛꦶꦕ꧀ꦖꦤ꧀ꦠꦶ, ꦆꦤ꧀ꦢꦑꦷꦭꦱ꧀ꦱ ꦄꦤ꧀ꦠꦺꦴ ꦜꦥꦶꦠꦩꦠ꧀ꦠꦺ ꦢꦏ꧀ꦑꦶꦟꦥꦴꦢꦺ ꦱꦫꦷꦫꦴ ꦖꦧ꧀ꦧꦟ꧀ꦟꦫꦱ꧀ꦩꦶꦪꦺꦴ ꦤꦶꦕ꧀ꦖꦫꦶꦠ꧀ꦮꦴ ꦱꦸꦮꦟ꧀ꦟꦫꦱꦥꦶꦚ꧀ꦗꦫꦴꦤꦶ ꦮꦶꦪ ꦕꦶꦠ꧀ꦫꦥꦛꦥꦫꦶꦏ꧀ꦑꦶꦠ꧀ꦠꦴꦤꦶ ꦮꦶꦪ ꦕ ꦥꦴꦱꦴꦢꦏꦹꦛꦴꦒꦴꦫꦴꦢꦷꦤꦶ ꦏꦫꦺꦴꦤ꧀ꦠꦶꦪꦺꦴ ꦆꦠꦺꦴ ꦕꦶꦠꦺꦴ ꦕ ꦮꦶꦣꦴꦮꦤ꧀ꦠꦶ, ꦲꦠ꧀ꦡꦶꦄꦱ꧀ꦱꦮꦶꦲꦔ꧀ꦒꦴꦢꦪꦺꦴ ꦱꦏꦱꦏꦛ꧀ꦜꦴꦤꦺꦱꦸ ꦜꦶꦠꦴꦪꦺꦮ ꦩꦣꦸꦫꦺꦤꦴꦏꦴꦫꦺꦤ ꦱꦢ꧀ꦢꦁ ꦏꦫꦺꦴꦤ꧀ꦠꦶ, ꦠꦡꦴ ꦨꦺꦫꦶꦮꦷꦟꦴꦢꦷꦤꦶ ꦠꦹꦫꦶꦪꦴꦤꦶ ꦩꦤꦸꦱ꧀ꦱꦴꦤꦁ ꦏꦴꦪꦹꦥꦒꦴꦤꦶ ꦕ ꦄꦴꦨꦫꦟꦴꦤꦶ, ꦠꦺꦤ ꦱꦚ꧀ꦚꦴꦟꦺꦤ ꦩꦤꦸꦱ꧀ꦱꦴ ꦗꦴꦤꦤ꧀ꦠꦶ ‘‘ꦄꦗ꧀ꦗ ꦨꦒꦮꦴ ꦆꦣ ꦥꦶꦟ꧀ꦝꦴꦪ ꦥꦮꦶꦛ꧀ꦜꦺꦴ’’ꦠꦶ. ꦠꦺ ꦱꦸꦤꦶꦮꦠ꧀ꦡꦴ ꦱꦸꦥꦴꦫꦸꦠꦴ ꦒꦤ꧀ꦣꦥꦸꦥ꧀ꦦꦴꦢꦷꦤꦶ ꦄꦴꦢꦴꦪ ꦓꦫꦴ ꦤꦶꦏ꧀ꦑꦩꦶꦠ꧀ꦮꦴ ꦄꦤ꧀ꦠꦫꦮꦷꦡꦶꦁ ꦥꦛꦶꦥꦗ꧀ꦗꦶꦠ꧀ꦮꦴ ꦨꦒꦮꦤ꧀ꦠꦁ ꦒꦤ꧀ꦣꦥꦸꦥ꧀ꦦꦴꦢꦷꦲꦶ ꦱꦏ꧀ꦏꦕ꧀ꦕꦁ ꦥꦹꦗꦺꦠ꧀ꦮꦴ ꦮꦤ꧀ꦢꦶꦠ꧀ꦮꦴ – ‘‘ꦄꦩ꧀ꦲꦴꦏꦁ, ꦨꦤ꧀ꦠꦺ, ꦢꦱ ꦨꦶꦏ꧀ꦑꦹ, ꦄꦩ꧀ꦲꦴꦏꦁ ꦮꦷꦱꦠꦶ, ꦄꦩ꧀ꦲꦴꦏꦁ ꦨꦶꦏ꧀ꦑꦸꦱꦠꦁ ꦢꦺꦡꦴ’’ꦠꦶ ꦪꦴꦕꦶꦠ꧀ꦮꦴ ꦨꦒꦮꦠꦺꦴꦥꦶ ꦥꦠ꧀ꦠꦁ ꦒꦲꦺꦠ꧀ꦮꦴ, ꦄꦴꦱꦤꦁ ꦥꦚ꧀ꦚꦴꦥꦺꦠ꧀ꦮꦴ ꦱꦏ꧀ꦏꦕ꧀ꦕꦁ ꦥꦶꦟ꧀ꦝꦥꦴꦠꦺꦤ ꦥꦛꦶꦩꦴꦤꦺꦤ꧀ꦠꦶ.

ꦨꦒꦮꦴ ꦏꦠꦨꦠ꧀ꦠꦏꦶꦕ꧀ꦕꦺꦴ ꦠꦺꦱꦁ ꦱꦤ꧀ꦠꦴꦤꦴꦤꦶ ꦎꦭꦺꦴꦏꦺꦠ꧀ꦮꦴ ꦠꦡꦴ ꦣꦩ꧀ꦩꦁ ꦢꦺꦱꦺꦠꦶ, ꦪꦡꦴ ꦏꦺꦕꦶ ꦱꦫꦟꦒꦩꦤꦺ ꦥꦠꦶꦛ꧀ꦜꦲꦤ꧀ꦠꦶ, ꦏꦺꦕꦶ ꦥꦚ꧀ꦕꦱꦸ ꦱꦷꦭꦺꦱꦸ, ꦏꦺꦕꦶ ꦱꦺꦴꦠꦴꦥꦠ꧀ꦠꦶꦱꦏꦢꦴꦒꦴꦩꦶꦄꦤꦴꦒꦴꦩꦶꦦꦭꦴꦤꦁ ꦄꦚ꧀ꦚꦠꦫꦱ꧀ꦩꦶꦁ, ꦏꦺꦕꦶ ꦥꦧ꧀ꦧꦗꦶꦠ꧀ꦮꦴ ꦄꦒ꧀ꦒꦦꦭꦺ ꦄꦫꦲꦠ꧀ꦠꦺꦠꦶ. ꦌꦮꦁ ꦠꦡꦴ ꦠꦡꦴ ꦗꦤꦁ ꦄꦤꦸꦒ꧀ꦒꦲꦺꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦮꦶꦲꦴꦫꦁ ꦒꦕ꧀ꦖꦠꦶ. ꦠꦠ꧀ꦡ ꦩꦟ꧀ꦝꦭꦩꦴꦭ꦳ꦺ ꦥꦚ꧀ꦚꦠ꧀ꦠꦮꦫꦧꦸꦢ꧀ꦣꦴꦱꦤꦺ ꦤꦶꦱꦷꦢꦠꦶ ꦨꦶꦏ꧀ꦑꦹꦤꦁ ꦨꦠ꧀ꦠꦏꦶꦕ꧀ꦕꦥꦫꦶꦪꦺꦴꦱꦴꦤꦁ ꦄꦴꦒꦩꦪꦩꦴꦤꦺꦴ. ꦠꦠꦺꦴ ꦨꦶꦏ꧀ꦑꦹꦤꦁ ꦨꦠ꧀ꦠꦏꦶꦕ꧀ꦕꦥꦫꦶꦪꦺꦴꦱꦴꦤꦺ ꦈꦥꦛ꧀ꦜꦴꦏꦺꦴ ꦨꦒꦮꦠꦺꦴ ꦤꦶꦮꦺꦢꦺꦠꦶ. ꦄꦡ ꦨꦒꦮꦴ ꦒꦤ꧀ꦣꦏꦸꦛꦶꦁ ꦥꦮꦶꦱꦠꦶ. ꦆꦢꦁ ꦠꦴꦮ ꦥꦸꦫꦺꦨꦠ꧀ꦠꦏꦶꦕ꧀ꦕꦁ. ꦪꦚ꧀ꦕꦺꦠ꧀ꦡ ꦤ ꦮꦸꦠ꧀ꦠꦁ, ꦠꦁ ꦧ꧀ꦫꦲ꧀ꦩꦴꦪꦸꦱꦸꦠ꧀ꦠꦺ ꦮꦸꦠ꧀ꦠꦤꦪꦺꦤꦺꦮ ꦒꦲꦺꦠꦧ꧀ꦧꦁ.

ꦄꦡ ꦨꦒꦮꦴ ꦌꦮꦁ ꦏꦠꦥꦸꦫꦺꦨꦠ꧀ꦠꦏꦶꦕ꧀ꦕꦺꦴ ꦒꦤ꧀ꦣꦏꦸꦛꦶꦪꦴ ꦈꦥꦛ꧀ꦜꦴꦤꦺ ꦤꦶꦱꦷꦢꦶꦠ꧀ꦮꦴ, ꦥꦴꦢꦺ ꦥꦏ꧀ꦑꦴꦭꦺꦠ꧀ꦮꦴ, ꦥꦴꦢꦥꦷꦜꦺ ꦜꦠ꧀ꦮꦴ, ꦨꦶꦏ꧀ꦑꦸꦱꦔ꧀ꦓꦁ ꦎꦮꦢꦠꦶ – ‘‘ꦨꦶꦏ꧀ꦑꦮꦺ, ꦄꦥ꧀ꦥꦩꦴꦢꦺꦤ ꦱꦩ꧀ꦥꦴꦢꦺꦡ, ꦧꦸꦢ꧀ꦣꦸꦥ꧀ꦥꦴꦢꦺꦴ ꦢꦸꦭ꧀ꦭꦨꦺꦴ ꦭꦺꦴꦏꦱ꧀ꦩꦶꦁ, ꦩꦤꦸꦱ꧀ꦱꦥꦛꦶꦭꦴꦨꦺꦴ ꦢꦸꦭ꧀ꦭꦨꦺꦴ, ꦱꦢ꧀ꦣꦴꦱꦩ꧀ꦥꦠ꧀ꦠꦶ ꦢꦸꦭ꧀ꦭꦨꦴ, ꦥꦧ꧀ꦧꦗ꧀ꦗꦴ ꦢꦸꦭ꧀ꦭꦨꦴ, ꦱꦢ꧀ꦣꦩ꧀ꦩꦱ꧀ꦱꦮꦤꦁ ꦢꦸꦭ꧀ꦭꦨꦁ ꦭꦺꦴꦏꦱ꧀ꦩꦶ’’ꦤ꧀ꦠꦶ. ꦠꦠꦺꦴ ꦨꦶꦏ꧀ꦑꦹ ꦨꦒꦮꦤ꧀ꦠꦁ ꦮꦤ꧀ꦢꦶꦠ꧀ꦮꦴ ꦏꦩ꧀ꦩꦛ꧀ꦜꦴꦤꦁ ꦥꦸꦕ꧀ꦖꦤ꧀ꦠꦶ. ꦄꦡ ꦨꦒꦮꦴ ꦨꦶꦏ꧀ꦑꦹꦤꦁ ꦕꦫꦶꦪꦮꦱꦺꦤ ꦏꦩ꧀ꦩꦛ꧀ꦜꦴꦤꦁ ꦢꦺꦠꦶ. ꦠꦺ ꦏꦩ꧀ꦩꦛ꧀ꦜꦴꦤꦁ ꦈꦒ꧀ꦒꦲꦺꦠ꧀ꦮꦴ, ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ, ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦮꦱꦤꦛ꧀ꦜꦴꦤꦁ ꦒꦕ꧀ꦖꦤ꧀ꦠꦶ; ꦏꦺꦕꦶ ꦄꦫꦚ꧀ꦚꦁ, ꦏꦺꦕꦶ ꦫꦸꦏ꧀ꦑꦩꦹꦭꦁ, ꦏꦺꦕꦶ ꦥꦧ꧀ꦧꦠꦴꦢꦷꦤꦁ ꦄꦚ꧀ꦚꦠꦫꦁ, ꦏꦺꦕꦶ ꦕꦴꦠꦸꦩꦲꦴꦫꦴꦗꦶꦏꦨꦮꦤꦁ…ꦥꦺ… ꦏꦺꦕꦶ ꦮꦱꦮꦠ꧀ꦠꦶꦨꦮꦤꦤ꧀ꦠꦶ. ꦠꦠꦺꦴ ꦨꦒꦮꦴ ꦒꦤ꧀ꦣꦏꦸꦛꦶꦁ ꦥꦮꦶꦱꦶꦠ꧀ꦮꦴ ꦱꦕꦺ ꦄꦴꦏꦔ꧀ꦑꦠꦶ, ꦢꦏ꧀ꦑꦶꦟꦺꦤ ꦥꦱ꧀ꦱꦺꦤ ꦱꦠꦺꦴ ꦱꦩ꧀ꦥꦗꦴꦤꦺꦴ ꦩꦸꦲꦸꦠ꧀ꦠꦁ ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦠꦶ. ꦄꦡ ꦱꦩꦱ꧀ꦱꦴꦱꦶꦠꦏꦴꦪꦺꦴ ꦈꦛ꧀ꦜꦲꦶꦠ꧀ꦮꦴ ꦢꦸꦠꦶꦪꦨꦴꦒꦺ ꦭꦺꦴꦏꦁ ꦮꦺꦴꦭꦺꦴꦏꦺꦠꦶ. ꦠꦠꦶꦪꦨꦴꦒꦺ ꦪꦁ ꦒꦴꦩꦁ ꦮꦴ ꦤꦶꦒꦩꦁ ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦠꦶ, ꦠꦠ꧀ꦡ ꦗꦤꦺꦴ ꦥꦸꦫꦺꦨꦠ꧀ꦠꦁ ꦢꦴꦤꦁ ꦢꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦱꦸꦤꦶꦮꦠ꧀ꦡꦺꦴ ꦱꦸꦥꦴꦫꦸꦠꦺꦴ ꦒꦤ꧀ꦣꦥꦸꦥ꧀ꦦꦴꦢꦷꦤꦶ ꦄꦴꦢꦴꦪ ꦮꦶꦲꦴꦫꦺ ꦱꦤ꧀ꦤꦶꦥꦠꦠꦶ. ꦠꦠꦺꦴ ꦨꦒꦮꦴ ꦱꦩ꧀ꦥꦠ꧀ꦠꦥꦫꦶꦱꦴꦪ ꦄꦤꦸꦫꦹꦥꦺꦤ ꦥꦴꦛꦶꦲꦴꦫꦶꦪꦺꦤ ꦒꦤ꧀ꦠ꧀ꦮꦴ ꦣꦩ꧀ꦩꦱꦨꦴꦪꦁ ꦥꦚ꧀ꦚꦠ꧀ꦠꦮꦫꦧꦸꦢ꧀ꦣꦴꦱꦤꦺ ꦤꦶꦱꦗ꧀ꦗ ꦣꦩ꧀ꦩꦁ ꦢꦺꦱꦺꦠꦶ ꦏꦴꦭꦪꦸꦠ꧀ꦠꦁ ꦥꦩꦴꦟꦪꦸꦠ꧀ꦠꦁ. ꦄꦡ ꦏꦴꦭꦁ ꦮꦶꦢꦶꦠ꧀ꦮꦴ ꦥꦫꦶꦱꦁ ꦈꦪ꧀ꦪꦺꦴꦗꦺꦠꦶ.

ꦠꦠꦺꦴ ꦱꦕꦺ ꦒꦠ꧀ꦠꦴꦤꦶ ꦎꦱꦶꦚ꧀ꦕꦶꦠꦸꦏꦴꦩꦺꦴ ꦲꦺꦴꦠꦶ. ꦄꦡ ꦧꦸꦢ꧀ꦣꦴꦱꦤꦴ ꦈꦛ꧀ꦜꦴꦪ ꦈꦥꦛ꧀ꦜꦴꦏꦺꦤ ꦈꦢꦏꦥꦛꦶꦪꦴꦢꦶꦠꦺꦴꦏꦴꦱꦁ ꦒꦤ꧀ꦠ꧀ꦮꦴ, ꦈꦥꦛ꧀ꦜꦴꦏꦲꦠ꧀ꦡꦠꦺꦴ ꦈꦢꦏꦱꦴꦛꦶꦏꦁ ꦒꦲꦺꦠ꧀ꦮꦴ, ꦤ꧀ꦲꦴꦤꦏꦺꦴꦛ꧀ꦜꦏꦁ ꦥꦮꦶꦱꦠꦶ. ꦈꦥꦛ꧀ꦜꦴꦏꦺꦴꦥꦶ ꦧꦸꦢ꧀ꦣꦴꦱꦤꦁ ꦄꦴꦤꦺꦠ꧀ꦮꦴ ꦒꦤ꧀ꦣꦏꦸꦛꦶꦥꦫꦶꦮꦺꦟꦺ ꦥꦚ꧀ꦚꦴꦥꦺꦠꦶ. ꦨꦒꦮꦴ ꦒꦠ꧀ꦠꦴꦤꦶ ꦎꦱꦶꦚ꧀ꦕꦶꦠ꧀ꦮꦴ, ꦱꦸꦫꦠ꧀ꦠꦢꦸꦥꦛ꧀ꦛꦁ ꦤꦶꦮꦴꦱꦺꦠ꧀ꦮꦴ, ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ, ꦈꦠ꧀ꦠꦫꦴꦱꦔ꧀ꦒꦁ ꦏꦠ꧀ꦮꦴ, ꦠꦠ꧀ꦡ ꦄꦴꦒꦤ꧀ꦠ꧀ꦮꦴ, ꦤꦶꦱꦷꦢꦠꦶ ꦌꦏꦏꦺꦴꦮ ꦩꦸꦲꦸꦠ꧀ꦠꦁ ꦥꦛꦶꦱꦭ꧀ꦭꦷꦤꦺꦴ. ꦄꦡ ꦨꦶꦏ꧀ꦑꦹ ꦠꦠꦺꦴ ꦠꦠꦺꦴ ꦄꦴꦒꦩ꧀ꦩ ꦨꦒꦮꦠꦺꦴ ꦈꦥꦛ꧀ꦜꦴꦤꦁ ꦒꦕ꧀ꦖꦤ꧀ꦠꦶ. ꦠꦠ꧀ꦡ ꦌꦏꦕ꧀ꦕꦺ ꦥꦚ꧀ꦲꦁ ꦥꦸꦕ꧀ꦖꦤ꧀ꦠꦶ, ꦌꦏꦕ꧀ꦕꦺ ꦏꦩ꧀ꦩꦛ꧀ꦜꦴꦤꦁ, ꦌꦏꦕ꧀ꦕꦺ ꦣꦩ꧀ꦩꦱ꧀ꦱꦮꦤꦁ ꦪꦴꦕꦤ꧀ꦠꦶ. ꦨꦒꦮꦴ ꦠꦺꦱꦁ ꦄꦣꦶꦥ꧀ꦥꦴꦪꦁ ꦱꦩ꧀ꦥꦴꦢꦺꦤ꧀ꦠꦺꦴ ꦥꦜꦩꦁ ꦪꦴꦩꦁ ꦮꦷꦠꦶꦤꦴꦩꦺꦠꦶ.

ꦩꦗ꧀ꦙꦶꦩꦪꦴꦩꦺ ꦱꦏꦭꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦢꦺꦮꦠꦴꦪꦺꦴ ꦎꦏꦴꦱꦁ ꦭꦨꦩꦴꦤꦴ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦲꦁ ꦥꦸꦕ꧀ꦖꦤ꧀ꦠꦶ ꦪꦡꦴꦨꦶꦱꦔ꧀ꦑꦠꦁ ꦄꦤ꧀ꦠꦩꦱꦺꦴ ꦕꦠꦸꦫꦏ꧀ꦑꦫꦩ꧀ꦥꦶ. ꦨꦒꦮꦴ ꦠꦴꦱꦁ ꦢꦺꦮꦠꦴꦤꦁ ꦥꦚ꧀ꦲꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦩꦗ꧀ꦙꦶꦩꦪꦴꦩꦁ ꦮꦷꦠꦶꦤꦴꦩꦺꦠꦶ. ꦠꦠꦺꦴ ꦥꦕ꧀ꦖꦶꦩꦪꦴꦩꦁ ꦕꦠ꧀ꦠꦴꦫꦺꦴ ꦨꦴꦒꦺ ꦏꦠ꧀ꦮꦴ ꦌꦏꦁ ꦨꦴꦒꦁ ꦕꦔ꧀ꦏꦩꦁ ꦄꦣꦶꦛ꧀ꦜꦴꦠꦶ, ꦢꦸꦠꦶꦪꦨꦴꦒꦁ ꦒꦤ꧀ꦣꦏꦸꦛꦶꦁ ꦥꦮꦶꦱꦶꦠ꧀ꦮꦴ ꦢꦏ꧀ꦑꦶꦟꦺꦤ ꦥꦱ꧀ꦱꦺꦤ ꦱꦠꦺꦴ ꦱꦩ꧀ꦥꦗꦴꦤꦺꦴ ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦠꦶ, ꦠꦠꦶꦪꦨꦴꦒꦁ ꦦꦭꦱꦩꦴꦥꦠ꧀ꦠꦶꦪꦴ ꦮꦷꦠꦶꦤꦴꦩꦺꦠꦶ, ꦕꦠꦸꦠ꧀ꦡꦨꦴꦒꦁ ꦩꦲꦴꦏꦫꦸꦟꦴꦱꦩꦴꦥꦠ꧀ꦠꦶꦁ ꦥꦮꦶꦱꦶꦠ꧀ꦮꦴ ꦧꦸꦢ꧀ꦣꦕꦏ꧀ꦑꦸꦤꦴ ꦭꦺꦴꦏꦁ ꦮꦺꦴꦭꦺꦴꦏꦺꦠꦶ ꦄꦥ꧀ꦥꦫꦗꦏ꧀ꦑꦩꦲꦴꦫꦗꦏ꧀ꦑꦴꦢꦶꦱꦠ꧀ꦠꦢꦱ꧀ꦱꦤꦠ꧀ꦡꦁ. ꦆꦢꦁ ꦥꦕ꧀ꦖꦴꦨꦠ꧀ꦠꦏꦶꦕ꧀ꦕꦁ.

ꦌꦮꦩꦶꦩꦱ꧀ꦱ ꦥꦕ꧀ꦖꦴꦨꦠ꧀ꦠꦏꦶꦕ꧀ꦕꦱ꧀ꦱ ꦭꦺꦴꦏꦮꦺꦴꦭꦺꦴꦏꦤꦱꦔ꧀ꦑꦴꦠꦺ ꦕꦠꦸꦠ꧀ꦡꦨꦴꦒꦴꦮꦱꦴꦤꦺ ꦧꦸꦢ꧀ꦣꦣꦩ꧀ꦩꦱꦔ꧀ꦓꦺꦱꦸ ꦢꦴꦤꦱꦷꦭꦈꦥꦺꦴꦱꦡꦏꦩ꧀ꦩꦴꦢꦷꦱꦸ ꦕ ꦄꦏꦠꦴꦣꦶꦏꦴꦫꦺ ꦏꦠꦴꦣꦶꦏꦴꦫꦺ ꦕ ꦄꦤꦸꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦺ ꦈꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦺ ꦕ ꦱꦠ꧀ꦠꦺ ꦥꦱ꧀ꦱꦶꦠꦸꦁ ꦧꦸꦢ꧀ꦣꦕꦏ꧀ꦑꦸꦤꦴ ꦭꦺꦴꦏꦁ ꦮꦺꦴꦭꦺꦴꦏꦺꦤ꧀ꦠꦺꦴ ꦏꦱꦶꦨꦴꦫꦢ꧀ꦮꦴꦗꦁ ꦧ꧀ꦫꦴꦲ꧀ꦩꦟꦁ ꦄꦫꦲꦠ꧀ꦠꦱ꧀ꦱ ꦈꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦁ ꦢꦶꦱ꧀ꦮꦴ ‘‘ꦠꦠ꧀ꦡ ꦩꦪꦶ ꦒꦠꦺ ꦏꦡꦴ ꦥꦮꦠ꧀ꦠꦶꦱ꧀ꦱꦠꦶ, ꦠꦠꦺꦴ ꦏꦡꦴꦮꦱꦴꦤꦺ ꦣꦩ꧀ꦩꦢꦺꦱꦤꦁ ꦱꦸꦠ꧀ꦮꦴ ꦌꦱ ꦧ꧀ꦫꦴꦲ꧀ꦩꦟꦺꦴ ꦥꦧ꧀ꦧꦗꦶꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦶꦱ꧀ꦱꦠꦷ’’ꦠꦶ ꦕ ꦚꦠ꧀ꦮꦴ, ꦠꦠ꧀ꦡ ꦒꦤ꧀ꦠ꧀ꦮꦴ, ꦏꦡꦁ ꦱꦩꦸꦛ꧀ꦜꦴꦥꦺꦠ꧀ꦮꦴ ꦆꦩꦁ ꦱꦸꦠ꧀ꦠꦩꦨꦴꦱꦶ.

ꦠꦠ꧀ꦡ ꦌꦮꦁ ꦩꦺ ꦱꦸꦠꦤ꧀ꦠꦶꦄꦴꦢꦶ ꦄꦴꦪꦱ꧀ꦩꦠꦴ ꦄꦴꦤꦤ꧀ꦢꦺꦤ ꦥꦜꦩꦩꦲꦴꦱꦔ꧀ꦒꦷꦠꦶꦏꦴꦭꦺ ꦣꦩ꧀ꦩꦱꦔ꧀ꦒꦷꦠꦶꦁ ꦏꦫꦺꦴꦤ꧀ꦠꦺꦤ ꦄꦴꦪꦱ꧀ꦩꦠꦴ ꦩꦲꦴꦏꦱ꧀ꦱꦥꦠ꧀ꦡꦺꦫꦺꦤ ꦥꦸꦛ꧀ꦜꦺꦤ ꦥꦚ꧀ꦕꦤ꧀ꦤꦁ ꦄꦫꦲꦤ꧀ꦠꦱꦠꦴꦤꦁ ꦮꦸꦠ꧀ꦠꦁ, ‘‘ꦄꦲꦁ, ꦑꦺꦴ, ꦱꦩꦟ ꦏꦱꦴꦩꦶ ꦕ ꦮꦥꦴꦩꦶ ꦕꦴ’’ꦠꦶ ꦏꦱꦶꦨꦴꦫꦢ꧀ꦮꦴꦗꦺꦤ ꦮꦸꦠ꧀ꦠꦁ, ‘‘ꦄꦲꦩ꧀ꦥꦶ ꦑꦺꦴ ꦧ꧀ꦫꦴꦲ꧀ꦩꦟ ꦏꦱꦴꦩꦶ ꦕ ꦮꦥꦴꦩꦶ ꦕꦴ’’ꦠꦶꦄꦴꦢꦶ ꦨꦒꦮꦠꦴ ꦮꦸꦠ꧀ꦠꦁ. ꦠꦢꦺꦠꦁ ꦱꦧ꧀ꦧꦩ꧀ꦥꦶ ꦱꦩꦺꦴꦣꦴꦤꦺꦠ꧀ꦮꦴ ‘‘ꦏꦱꦶꦨꦴꦫꦢ꧀ꦮꦴꦗꦱꦸꦠ꧀ꦠ’’ꦤ꧀ꦠꦶ ꦮꦸꦕ꧀ꦕꦠꦶ.

ꦠꦠ꧀ꦡ ꦌꦮꦤ꧀ꦠꦶ ꦄꦪꦁ ꦄꦴꦏꦴꦫꦤꦶꦢꦱ꧀ꦱꦤꦴꦮꦣꦴꦫꦟꦠ꧀ꦡꦺꦴ ꦌꦮꦁ-ꦱꦢ꧀ꦢꦺꦴ. ꦄꦴꦏꦴꦫꦠ꧀ꦡꦺꦤ ꦲꦶ ꦌꦠꦺꦤ ꦌꦠꦩꦠ꧀ꦡꦁ ꦢꦷꦥꦺꦠꦶ – ꦤꦴꦤꦴꦤꦪꦤꦶꦥꦸꦟꦩꦤꦺꦏꦗ꧀ꦙꦴꦱꦪꦱꦩꦸꦛ꧀ꦜꦴꦤꦁ ꦄꦠ꧀ꦡꦧ꧀ꦪꦚ꧀ꦗꦤꦱꦩ꧀ꦥꦤ꧀ꦤꦁ ꦮꦶꦮꦶꦣꦥꦴꦛꦶꦲꦴꦫꦶꦪꦁ ꦣꦩ꧀ꦩꦠ꧀ꦡꦢꦺꦱꦤꦴꦥꦛꦶꦮꦺꦣꦒꦩ꧀ꦨꦷꦫꦁ ꦱꦧ꧀ꦧꦱꦠ꧀ꦠꦺꦲꦶ ꦱꦏꦱꦏꦨꦴꦱꦴꦤꦸꦫꦹꦥꦩꦸꦥꦭꦏ꧀ꦑꦟꦶꦪꦱꦨꦴꦮꦁ ꦠꦱ꧀ꦱ ꦨꦒꦮꦠꦺꦴ ꦮꦕꦤꦁ, ꦠꦁ ꦱꦧ꧀ꦧꦴꦏꦴꦫꦺꦤ ꦏꦺꦴ ꦱꦩꦠ꧀ꦡꦺꦴ ꦮꦶꦚ꧀ꦚꦴꦠꦸꦁ; ꦄꦡ, ꦑꦺꦴ, ‘‘ꦌꦮꦁ ꦩꦺ ꦱꦸꦠꦁ, ꦩꦪꦴꦥꦶ ꦌꦏꦺꦤꦴꦏꦴꦫꦺꦤ ꦱꦸꦠ’’ꦤ꧀ꦠꦶ. ꦤꦶꦢꦱ꧀ꦱꦤꦠ꧀ꦡꦺꦤ ‘‘ꦤꦴꦲꦁ ꦱꦪꦩ꧀ꦨꦹ, ꦤ ꦩꦪꦴ ꦆꦢꦁ ꦱꦕ꧀ꦖꦶꦏꦠ’’ꦤ꧀ꦠꦶ ꦄꦠ꧀ꦠꦴꦤꦁ ꦥꦫꦶꦩꦺꦴꦕꦺꦤ꧀ꦠꦺꦴ ‘‘ꦌꦮꦁ ꦩꦺ ꦱꦸꦠꦁ, ꦩꦪꦴ ꦌꦮꦁ ꦱꦸꦠ’’ꦤ꧀ꦠꦶ ꦆꦢꦴꦤꦶ ꦮꦠ꧀ꦠꦧ꧀ꦧꦁ ꦱꦏꦭꦱꦸꦠ꧀ꦠꦁ ꦤꦶꦢꦱ꧀ꦱꦺꦠꦶ. ꦄꦮꦣꦴꦫꦟꦠ꧀ꦡꦺꦤ ‘‘ꦌꦠꦢꦒ꧀ꦒꦁ, ꦨꦶꦏ꧀ꦑꦮꦺ, ꦩꦩ ꦱꦴꦮꦏꦴꦤꦁ ꦨꦶꦏ꧀ꦑꦹꦤꦁ ꦧꦲꦸꦱ꧀ꦱꦸꦠꦴꦤꦁ ꦪꦢꦶꦢꦁ ꦄꦴꦤꦤ꧀ꦢꦺꦴ, ꦒꦠꦶꦩꦤ꧀ꦠꦴꦤꦁ, ꦱꦠꦶꦩꦤ꧀ꦠꦴꦤꦁ, ꦣꦶꦠꦶꦩꦤ꧀ꦠꦴꦤꦁ, ꦈꦥꦛ꧀ꦜꦴꦏꦴꦤꦁ ꦪꦢꦶꦢꦁ ꦄꦴꦤꦤ꧀ꦢꦺꦴ’’ꦠꦶ (ꦄ. ꦤꦶ. ꧑.꧒꧑꧙-꧒꧒꧓) ꦌꦮꦁ ꦨꦒꦮꦠꦴ ꦥꦱꦠ꧀ꦡꦨꦴꦮꦴꦤꦸꦫꦹꦥꦁ ꦄꦠ꧀ꦠꦤꦺꦴ ꦣꦴꦫꦟꦧꦭꦁ ꦢꦱ꧀ꦱꦺꦤ꧀ꦠꦺꦴ ꦱꦠ꧀ꦠꦴꦤꦁ ꦱꦺꦴꦠꦸꦏꦩ꧀ꦪꦠꦁ ꦗꦤꦺꦠꦶ ‘‘ꦌꦮꦁ ꦩꦺ ꦱꦸꦠꦁ ꦠꦚ꧀ꦕ ꦄꦠ꧀ꦡꦠꦺꦴ ꦮꦴ ꦧ꧀ꦪꦚ꧀ꦗꦤꦠꦺꦴ ꦮꦴ ꦄꦤꦹꦤꦩꦤꦣꦶꦏꦁ, ꦌꦮꦩꦺꦮ, ꦤ ꦄꦚ꧀ꦚꦡꦴ ꦢꦛ꧀ꦜꦧ꧀ꦧ’’ꦤ꧀ꦠꦶ. ꦩꦺ ꦱꦸꦠꦤ꧀ꦠꦶ ꦌꦠ꧀ꦡ ꦩꦪꦴꦱꦢ꧀ꦢꦠ꧀ꦡꦺꦴ ꦩꦺ-ꦱꦢ꧀ꦢꦺꦴ, ꦱꦺꦴꦠꦢ꧀ꦮꦴꦫꦮꦶꦚ꧀ꦚꦴꦟꦠ꧀ꦡꦺꦴ ꦱꦸꦠꦱꦢ꧀ꦢꦺꦴ. ꦠꦱ꧀ꦩꦴ ꦌꦮꦁ ꦩꦺ ꦱꦸꦠꦤ꧀ꦠꦶ ꦌꦮꦁ ꦩꦪꦴ ꦱꦺꦴꦠꦮꦶꦚ꧀ꦚꦴꦟꦥꦸꦧ꧀ꦧꦔ꧀ꦒꦩꦴꦪ ꦮꦶꦚ꧀ꦚꦴꦟꦮꦷꦡꦶꦪꦴ ꦈꦥꦣꦴꦫꦶꦠꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦌꦏꦁ ꦱꦩꦪꦤ꧀ꦠꦶ ꦌꦏꦁ ꦏꦴꦭꦁ. ꦨꦒꦮꦴꦠꦶ ꦨꦴꦒ꧀ꦪꦮꦴ, ꦨꦒ꧀ꦒꦮꦴ, ꦨꦠ꧀ꦠꦮꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦩꦒꦣꦺꦱꦸ ꦮꦶꦲꦫꦠꦷꦠꦶ ꦩꦒꦣꦴ ꦤꦴꦩ ꦗꦤꦥꦢꦶꦤꦺꦴ ꦫꦴꦗꦏꦸꦩꦴꦫꦴ, ꦠꦺꦱꦁ ꦤꦶꦮꦴꦱꦺꦴ ꦌꦏꦺꦴꦥꦶ ꦗꦤꦥꦢꦺꦴ ꦫꦸꦭ꦳꧀ꦲꦷꦱꦢ꧀ꦢꦺꦤ ‘‘ꦩꦒꦣꦴ’’ꦠꦶ ꦮꦸꦕ꧀ꦕꦠꦶ. ꦠꦱ꧀ꦩꦶꦁ ꦩꦒꦣꦺꦱꦸ ꦗꦤꦥꦢꦺ. ꦏꦺꦕꦶ ꦥꦤ ‘‘ꦪꦱ꧀ꦩꦴ ꦕꦺꦠꦶꦪꦫꦴꦗꦴ ꦩꦸꦱꦴꦮꦴꦢꦁ ꦨꦟꦶꦠ꧀ꦮꦴ ꦨꦹꦩꦶꦁ ꦥꦮꦶꦱꦤ꧀ꦠꦺꦴ ‘ꦩꦴ ꦒꦣꦁ ꦥꦮꦶꦱꦴ’ꦠꦶ ꦮꦸꦠ꧀ꦠꦺꦴ, ꦪꦱ꧀ꦩꦴ ꦮꦴ ꦠꦁ ꦫꦴꦗꦴꦤꦁ ꦩꦒ꧀ꦒꦤ꧀ꦠꦴ ꦨꦹꦩꦶꦁ ꦑꦤꦤ꧀ꦠꦴ ꦥꦸꦫꦶꦱꦴ ‘ꦩꦴ ꦒꦣꦁ ꦏꦫꦺꦴꦡꦴ’ꦠꦶ ꦮꦸꦠ꧀ꦠꦴ, ꦠꦱ꧀ꦩꦴ ꦩꦒꦣꦴ’’ꦠꦶ ꦌꦮꦩꦴꦢꦷꦲꦶ ꦤꦪꦺꦲꦶ ꦧꦲꦸꦣꦴ ꦥꦥꦚ꧀ꦕꦺꦤ꧀ꦠꦶ. ꦪꦁ ꦫꦸꦕ꧀ꦕꦠꦶ, ꦠꦁ ꦒꦲꦺꦠꦧ꧀ꦧꦤ꧀ꦠꦶ. ꦮꦶꦲꦫꦠꦷꦠꦶ ꦌꦏꦁ ꦆꦫꦶꦪꦴꦥꦡꦧꦴꦣꦤꦁ ꦄꦥꦫꦺꦤ ꦆꦫꦶꦪꦴꦥꦡꦺꦤ ꦮꦶꦕ꧀ꦖꦶꦤ꧀ꦢꦶꦠ꧀ꦮꦴ ꦄꦥꦫꦶꦥꦠꦤ꧀ꦠꦁ ꦄꦠ꧀ꦠꦨꦴꦮꦁ ꦲꦫꦠꦶ, ꦥꦮꦠ꧀ꦠꦺꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦢꦶꦧ꧀ꦧꦧ꧀ꦫꦲ꧀ꦩꦄꦫꦶꦪꦮꦶꦲꦴꦫꦺꦲꦶ ꦮꦴ ꦱꦠ꧀ꦠꦴꦤꦁ ꦮꦶꦮꦶꦣꦁ ꦲꦶꦠꦁ ꦲꦫꦠꦷꦠꦶ ꦮꦶꦲꦫꦠꦶ. ꦲꦫꦠꦷꦠꦶ ꦈꦥꦱꦁꦲꦫꦠꦶ, ꦈꦥꦤꦺꦠꦶ, ꦗꦤꦺꦠꦶ, ꦈꦥ꧀ꦥꦴꦢꦺꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠꦡꦴ ꦲꦶ ꦪꦢꦴ ꦱꦠ꧀ꦠꦴ ꦏꦴꦩꦺꦱꦸ ꦮꦶꦥ꧀ꦥꦛꦶꦥꦗ꧀ꦗꦤ꧀ꦠꦶ, ꦠꦢꦴ ꦏꦶꦫ ꦨꦒꦮꦴ ꦢꦶꦧ꧀ꦧꦺꦤ ꦮꦶꦲꦴꦫꦺꦤ ꦮꦶꦲꦫꦠꦶ ꦠꦺꦱꦁ ꦄꦭꦺꦴꦨꦏꦸꦱꦭꦩꦹꦭꦸꦥ꧀ꦥꦴꦢꦤꦠ꧀ꦡꦁ – ‘‘ꦄꦥ꧀ꦥꦺꦮ ꦤꦴꦩ ꦆꦩꦁ ꦥꦛꦶꦥꦠ꧀ꦠꦶꦁ ꦢꦶꦱ꧀ꦮꦴ ꦌꦠ꧀ꦡ ꦫꦸꦕꦶꦁ ꦈꦥ꧀ꦥꦴꦢꦺꦠ꧀ꦮꦴ ꦏꦴꦩꦺꦱꦸ ꦮꦶꦫꦗ꧀ꦗꦺꦪ꧀ꦪꦸ’’ꦤ꧀ꦠꦶ. ꦪꦢꦴ ꦥꦤ ꦆꦱ꧀ꦱꦫꦶꦪꦠ꧀ꦡꦁ ꦱꦠ꧀ꦠꦺꦱꦸ ꦮꦶꦥ꧀ꦥꦛꦶꦥꦗ꧀ꦗꦤ꧀ꦠꦶ, ꦠꦢꦴ ꦧ꧀ꦫꦲ꧀ꦩꦮꦶꦲꦴꦫꦺꦤ ꦮꦶꦲꦫꦠꦶ ꦠꦺꦱꦁ ꦄꦢꦺꦴꦱꦏꦸꦱꦭꦩꦹꦭꦸꦥ꧀ꦥꦴꦢꦤꦠ꧀ꦡꦁ – ‘‘ꦄꦥ꧀ꦥꦺꦮ ꦤꦴꦩ ꦆꦩꦁ ꦥꦛꦶꦥꦠ꧀ꦠꦶꦁ ꦢꦶꦱ꧀ꦮꦴ ꦌꦠ꧀ꦡ ꦫꦸꦕꦶꦁ ꦈꦥ꧀ꦥꦴꦢꦺꦠ꧀ꦮꦴ ꦄꦢꦺꦴꦱꦺꦤ ꦢꦺꦴꦱꦁ ꦮꦹꦥꦱꦩꦺꦪ꧀ꦪꦸ’’ꦤ꧀ꦠꦶ. ꦪꦢꦴ ꦥꦤ ꦥꦧ꧀ꦧꦗꦶꦠꦴ ꦣꦩ꧀ꦩꦴꦣꦶꦏꦫꦟꦁ ꦮꦶꦮꦢꦤ꧀ꦠꦶ, ꦠꦢꦴ ꦄꦫꦶꦪꦮꦶꦲꦴꦫꦺꦤ ꦮꦶꦲꦫꦠꦶ ꦠꦺꦱꦁ ꦄꦩꦺꦴꦲꦏꦸꦱꦭꦩꦹꦭꦸꦥ꧀ꦥꦴꦢꦤꦠ꧀ꦡꦁ – ‘‘ꦄꦥ꧀ꦥꦺꦮ ꦤꦴꦩ ꦆꦩꦁ ꦥꦛꦶꦥꦠ꧀ꦠꦶꦁ ꦢꦶꦱ꧀ꦮꦴ ꦌꦠ꧀ꦡ ꦫꦸꦕꦶꦁ ꦈꦥ꧀ꦥꦴꦢꦺꦠ꧀ꦮꦴ ꦄꦩꦺꦴꦲꦺꦤ ꦩꦺꦴꦲꦁ ꦮꦹꦥꦱꦩꦺꦪ꧀ꦪꦸ’’ꦤ꧀ꦠꦶ. ꦆꦫꦶꦪꦴꦥꦡꦮꦶꦲꦴꦫꦺꦤ ꦥꦤ ꦤ ꦏꦢꦴꦕꦶ ꦤ ꦮꦶꦲꦫꦠꦶ ꦠꦁ ꦮꦶꦤꦴ ꦄꦠ꧀ꦠꦨꦴꦮꦥꦫꦶꦲꦫꦟꦴꦨꦴꦮꦠꦺꦴꦠꦶ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ, ꦮꦶꦠ꧀ꦡꦴꦫꦁ ꦥꦤ ꦩꦔ꧀ꦒꦭꦱꦸꦠ꧀ꦠꦮꦟ꧀ꦟꦤꦴꦪꦁ ꦮꦏ꧀ꦑꦴꦩ.

ꦢꦏ꧀ꦑꦶꦟꦴꦒꦶꦫꦶꦱ꧀ꦩꦶꦤ꧀ꦠꦶ ꦪꦺꦴ ꦱꦺꦴ ꦫꦴꦗꦒꦲꦁ ꦥꦫꦶꦮꦴꦫꦺꦠ꧀ꦮꦴ ꦜꦶꦠꦺꦴ ꦒꦶꦫꦶ, ꦠꦱ꧀ꦱ ꦢꦏ꧀ꦑꦶꦟꦥꦱ꧀ꦱꦺ ꦗꦤꦥꦢꦺꦴ ‘‘ꦢꦏ꧀ꦑꦶꦟꦴꦒꦶꦫꦷ’’ꦠꦶ ꦮꦸꦕ꧀ꦕꦠꦶ, ꦠꦱ꧀ꦩꦶꦁ ꦗꦤꦥꦢꦺꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠꦠ꧀ꦡ ꦮꦶꦲꦴꦫꦱ꧀ꦱꦴꦥꦶ ꦠꦢꦺꦮ ꦤꦴꦩꦁ. ꦌꦏꦤꦴꦭ꦳ꦴꦪꦁ ꦧ꧀ꦫꦴꦲ꧀ꦩꦟꦒꦴꦩꦺꦠꦶ ꦌꦏꦤꦴꦭ꦳ꦴꦠꦶ ꦠꦱ꧀ꦱ ꦒꦴꦩꦱ꧀ꦱ ꦤꦴꦩꦁ. ꦧ꧀ꦫꦴꦲ꧀ꦩꦟꦴ ꦕꦺꦠ꧀ꦡ ꦱꦩ꧀ꦧꦲꦸꦭꦴ ꦥꦛꦶꦮꦱꦤ꧀ꦠꦶ, ꦧ꧀ꦫꦴꦲ꧀ꦩꦟꦨꦺꦴꦒꦺꦴ ꦮꦴ ꦱꦺꦴ, ꦠꦱ꧀ꦩꦴ ‘‘ꦧ꧀ꦫꦴꦲ꧀ꦩꦟꦒꦴꦩꦺꦴ’’ꦠꦶ ꦮꦸꦕ꧀ꦕꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤꦴꦠꦶ ꦪꦁ ꦱꦩꦪꦁ ꦨꦒꦮꦴ ꦄꦥꦫꦴꦗꦶꦠꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦗ꧀ꦙꦶꦠ꧀ꦮꦴ ꦥꦮꦠ꧀ꦠꦶꦠꦮꦫꦣꦩ꧀ꦩꦕꦏ꧀ꦏꦺꦴ ꦩꦒꦣꦫꦛ꧀ꦜꦺ ꦌꦏꦤꦴꦭ꦳ꦁ ꦧ꧀ꦫꦴꦲ꧀ꦩꦟꦒꦴꦩꦁ ꦈꦥꦤꦶꦱ꧀ꦱꦴꦪ ꦢꦏ꧀ꦑꦶꦟꦴꦒꦶꦫꦶꦩꦲꦴꦮꦶꦲꦴꦫꦺ ꦧ꧀ꦫꦴꦲ꧀ꦩꦟꦱ꧀ꦱ ꦆꦤ꧀ꦢ꧀ꦫꦶꦪꦥꦫꦶꦥꦴꦏꦁ ꦄꦴꦒꦩꦪꦩꦴꦤꦺꦴ ꦮꦶꦲꦫꦠꦶ, ꦠꦺꦤ ꦱꦩꦪꦺꦤ ꦏꦫꦟꦨꦹꦠꦺꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦑꦺꦴ ꦥꦤꦴꦠꦶ ꦆꦢꦁ ꦥꦤꦺꦠ꧀ꦡ ꦤꦶꦥꦴꦠꦢ꧀ꦮꦪꦁ ꦥꦢꦥꦹꦫꦟꦩꦠ꧀ꦠꦁ, ꦄꦣꦶꦏꦴꦫꦤ꧀ꦠꦫꦢꦱ꧀ꦱꦤꦠ꧀ꦡꦁ ꦮꦴꦠꦶ ꦢꦛ꧀ꦜꦧ꧀ꦧꦁ. ꦏꦱꦶꦨꦴꦫꦢ꧀ꦮꦴꦗꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱꦴꦠꦶ ꦱꦺꦴ ꦧ꧀ꦫꦴꦲ꧀ꦩꦟꦺꦴ ꦏꦱꦶꦪꦴ ꦗꦷꦮꦠꦶ, ꦨꦴꦫꦢ꧀ꦮꦴꦗꦺꦴꦠꦶ ꦕꦱ꧀ꦱ ꦒꦺꦴꦠ꧀ꦠꦁ, ꦠꦱ꧀ꦩꦴ ꦌꦮꦁ ꦮꦸꦕ꧀ꦕꦠꦶ. ꦥꦚ꧀ꦕꦩꦠ꧀ꦠꦴꦤꦷꦠꦶ ꦪꦡꦴ – ‘‘ꦨꦺꦴꦗꦤꦺ ꦩꦠ꧀ꦠꦚ꧀ꦚꦹ’’ꦠꦶ ꦌꦠ꧀ꦡ ꦩꦠ꧀ꦠꦱꦢ꧀ꦢꦺꦴ ꦥꦩꦴꦟꦺ ꦮꦠ꧀ꦠꦠꦶ, ꦌꦮꦩꦶꦣꦴꦥꦶ, ꦠꦱ꧀ꦩꦴ ꦥꦚ꧀ꦕꦥꦩꦴꦟꦴꦤꦶ ꦄꦤꦹꦤꦴꦤꦶ ꦄꦤꦣꦶꦏꦴꦤꦶ, ꦥꦚ꧀ꦕꦤꦔ꧀ꦒꦭꦱꦠꦴꦤꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦥꦪꦸꦠ꧀ꦠꦴꦤꦷꦠꦶ ꦥꦪꦺꦴꦗꦶꦠꦴꦤꦶ, ꦧꦭꦶꦧꦢ꧀ꦢꦴꦤꦁ ꦑꦤ꧀ꦣꦺꦱꦸ ꦜꦥꦺꦠ꧀ꦮꦴ ꦪꦸꦒꦺ ꦪꦺꦴꦠ꧀ꦠꦺꦲꦶ ꦪꦺꦴꦗꦶꦠꦴꦤꦶ ꦲꦺꦴꦤ꧀ꦠꦷꦠꦶ ꦄꦠ꧀ꦡꦺꦴ.

ꦮꦥ꧀ꦥꦏꦴꦭꦺꦠꦶ ꦮꦥꦤꦏꦴꦭꦺ, ꦧꦷꦗꦤꦶꦏ꧀ꦑꦶꦥꦏꦴꦭꦺꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠꦠ꧀ꦡ ꦢ꧀ꦮꦺ ꦮꦥ꧀ꦥꦴꦤꦶ ꦏꦭꦭꦮꦥ꧀ꦥꦚ꧀ꦕ, ꦥꦁꦱꦸꦮꦥ꧀ꦥꦚ꧀ꦕ. ꦥꦁꦱꦸꦮꦥ꧀ꦥꦁ ꦆꦣ ꦄꦣꦶꦥ꧀ꦥꦺꦠꦁ. ꦠꦚ꧀ꦕ ꦑꦺꦴ ꦥꦜꦩꦢꦶꦮꦱꦺ ꦩꦔ꧀ꦒꦭꦮꦥ꧀ꦥꦁ. ꦠꦠ꧀ꦡꦴꦪꦁ ꦈꦥꦏꦫꦟꦱꦩ꧀ꦥꦢꦴ – ꦠꦷꦟꦶ ꦧꦭꦶꦧꦢ꧀ꦢꦱꦲꦱ꧀ꦱꦴꦤꦶ ꦈꦥꦛ꧀ꦜꦴꦥꦶꦠꦴꦤꦶ ꦲꦺꦴꦤ꧀ꦠꦶ, ꦱꦧ꧀ꦧꦺꦱꦁ ꦱꦸꦮꦟ꧀ꦟꦩꦪꦴꦤꦶ ꦱꦶꦔ꧀ꦒꦴꦤꦶ ꦥꦛꦶꦩꦸꦏ꧀ꦏꦴꦤꦶ, ꦫꦗꦠꦩꦪꦴ ꦑꦸꦫꦴ, ꦱꦧ꧀ꦧꦺ ꦱꦺꦠꦩꦴꦭꦴꦲꦶ ꦱꦧ꧀ꦧꦒꦤ꧀ꦣꦱꦸꦒꦤ꧀ꦣꦺꦲꦶ ꦥꦚ꧀ꦕꦔ꧀ꦒꦸꦭꦶꦏꦺꦲꦶ ꦕ ꦄꦭꦔ꧀ꦏꦠꦴ ꦥꦫꦶꦥꦸꦟ꧀ꦟꦔ꧀ꦒꦥꦕ꧀ꦕꦔ꧀ꦒꦴ ꦱꦧ꧀ꦧꦭꦏ꧀ꦑꦟꦱꦩ꧀ꦥꦤ꧀ꦤꦴ, ꦌꦏꦕ꧀ꦕꦺ ꦏꦴꦭ꦳ꦴ ꦄꦚ꧀ꦗꦤꦮꦟ꧀ꦟꦴꦪꦺꦮ, ꦌꦏꦕ꧀ꦕꦺ ꦱꦺꦠꦴ ꦦꦭꦶꦏꦮꦟ꧀ꦟꦴ, ꦌꦏꦕ꧀ꦕꦺ ꦫꦠ꧀ꦠꦴ ꦥꦮꦴꦭ꦳ꦮꦟ꧀ꦟꦴ, ꦌꦏꦕ꧀ꦕꦺ ꦏꦩ꧀ꦩꦴꦱꦴ ꦩꦱꦴꦫꦒꦭ꧀ꦭꦮꦟ꧀ꦟꦴ. ꦥꦚ꧀ꦕꦱꦠꦴ ꦏꦱ꧀ꦱꦏꦥꦸꦫꦶꦱꦴ ꦱꦧ꧀ꦧꦺ ꦄꦲꦠꦱꦺꦠꦮꦠ꧀ꦡꦤꦶꦮꦠ꧀ꦡꦴ ꦩꦴꦭꦴꦭꦔ꧀ꦏꦠꦴ ꦢꦏ꧀ꦑꦶꦟꦄꦁꦱꦏꦹꦛꦺꦱꦸ ꦜꦥꦶꦠꦥꦸꦥ꧀ꦦꦕꦸꦩ꧀ꦧꦛꦏꦴ ꦲꦫꦶꦠꦴꦭꦩꦤꦺꦴꦱꦶꦭꦴꦭꦚ꧀ꦖꦤꦸꦗ꧀ꦗꦭꦶꦠꦒꦠ꧀ꦠꦨꦴꦒꦴ ꦢꦱ ꦢꦱ ꦤꦔ꧀ꦒꦭꦴ ꦌꦏꦺꦏꦒꦸꦩ꧀ꦧꦴ ꦲꦸꦠ꧀ꦮꦴ ꦒꦕ꧀ꦖꦤ꧀ꦠꦶ. ꦤꦔ꧀ꦒꦭꦴꦤꦁ ꦱꦷꦱꦚ꧀ꦕ ꦪꦸꦒꦚ꧀ꦕ ꦥꦠꦺꦴꦢꦴ ꦕ ꦱꦸꦮꦟ꧀ꦟꦮꦶꦤꦢ꧀ꦣꦴ. ꦥꦜꦩꦤꦔ꧀ꦒꦭꦺ ꦄꦛ꧀ꦜ ꦧꦭꦶꦧꦢ꧀ꦢꦴ ꦪꦸꦠ꧀ꦠꦴ, ꦱꦺꦱꦺꦱꦸ ꦕꦠ꧀ꦠꦴꦫꦺꦴ ꦕꦠ꧀ꦠꦴꦫꦺꦴ, ꦄꦮꦱꦺꦱꦴ ꦏꦶꦭꦤ꧀ꦠꦥꦫꦶꦮꦠ꧀ꦠꦤꦠ꧀ꦡꦁ ꦄꦴꦤꦷꦠꦴ. ꦌꦏꦺꦏꦒꦸꦩ꧀ꦧꦺ ꦌꦏꦩꦺꦏꦁ ꦧꦷꦗꦱꦏꦛꦁ ꦌꦏꦺꦏꦺꦴ ꦏꦱꦠꦶ, ꦌꦏꦺꦏꦺꦴ ꦮꦥꦠꦶ.

ꦧ꧀ꦫꦴꦲ꧀ꦩꦟꦺꦴ ꦥꦤ ꦥꦒꦺꦮ ꦩꦱ꧀ꦱꦸꦏꦩ꧀ꦩꦁ ꦏꦴꦫꦴꦥꦺꦠ꧀ꦮꦴ ꦤ꧀ꦲꦠ꧀ꦮꦴ ꦱꦸꦒꦤ꧀ꦣꦒꦤ꧀ꦣꦺꦲꦶ ꦮꦶꦭꦶꦠ꧀ꦠꦺꦴ ꦥꦚ꧀ꦕꦱꦠꦒ꧀ꦓꦤꦏꦁ ꦮꦠ꧀ꦡꦁ ꦤꦶꦮꦴꦱꦺꦠ꧀ꦮꦴ ꦱꦲꦱ꧀ꦱꦒ꧀ꦓꦤꦏꦁ ꦌꦏꦁꦱꦁ ꦏꦫꦶꦠ꧀ꦮꦴ ꦌꦏꦩꦺꦏꦶꦱ꧀ꦱꦴ ꦄꦔ꧀ꦒꦸꦭꦶꦪꦴ ꦢ꧀ꦮꦺ ꦢ꧀ꦮꦺ ꦏꦠ꧀ꦮꦴ ꦮꦷꦱꦠꦶ ꦄꦔ꧀ꦒꦸꦭꦶꦩꦸꦢ꧀ꦢꦶꦏꦴꦪꦺꦴ, ꦏꦟ꧀ꦟꦺꦱꦸ ꦱꦷꦲꦏꦸꦟ꧀ꦝꦭꦴꦤꦶ, ꦱꦷꦱꦺ ꦕ ꦧ꧀ꦫꦲ꧀ꦩꦮꦺꦜꦤꦁ ꦥꦛꦶꦩꦸꦚ꧀ꦕꦶꦠ꧀ꦮꦴ ꦱꦸꦮꦟ꧀ꦟꦩꦴꦭꦁ ꦏꦟ꧀ꦜꦺ ꦏꦠ꧀ꦮꦴ ꦧ꧀ꦫꦴꦲ꧀ꦩꦟꦒꦟꦥꦫꦶꦮꦸꦠꦺꦴ ꦏꦩ꧀ꦩꦤ꧀ꦠꦁ ꦮꦺꦴꦱꦴꦱꦠꦶ. ꦄꦡꦱ꧀ꦱ ꦧ꧀ꦫꦴꦲ꧀ꦩꦟꦷ ꦄꦤꦺꦏꦱꦠꦨꦴꦗꦤꦺꦱꦸ ꦥꦴꦪꦴꦱꦁ ꦥꦕꦴꦥꦺꦠ꧀ꦮꦴ ꦩꦲꦴꦱꦏꦛꦺꦱꦸ ꦄꦴꦫꦺꦴꦥꦺꦠ꧀ꦮꦴ ꦒꦤ꧀ꦣꦺꦴꦢꦏꦺꦤ ꦤ꧀ꦲꦴꦪꦶꦠ꧀ꦮꦴ ꦱꦧ꧀ꦧꦴꦭꦔ꧀ꦏꦴꦫꦮꦶꦨꦹꦱꦶꦠꦴ ꦧ꧀ꦫꦴꦲ꧀ꦩꦟꦷꦒꦟꦥꦫꦶꦮꦸꦠꦴ ꦏꦩ꧀ꦩꦤ꧀ꦠꦁ ꦄꦒꦩꦴꦱꦶ. ꦒꦺꦲꦩ꧀ꦥꦶꦱ꧀ꦱ ꦱꦧ꧀ꦧꦠ꧀ꦡ ꦒꦤ꧀ꦣꦺꦲꦶ ꦱꦸꦮꦶꦭꦶꦠ꧀ꦠꦁ ꦥꦸꦥ꧀ꦦꦺꦲꦶ ꦱꦸꦏꦠꦧꦭꦶꦏꦩ꧀ꦩꦁ, ꦑꦺꦠ꧀ꦠꦚ꧀ꦕ ꦠꦺꦱꦸ ꦠꦺꦱꦸ ꦜꦴꦤꦺꦱꦸ ꦱꦩꦸꦱ꧀ꦱꦶꦠꦥꦛꦴꦏꦁ ꦄꦲꦺꦴꦱꦶ. ꦥꦫꦶꦗꦤꦏꦩ꧀ꦩꦏꦴꦫꦺꦲꦶ ꦱꦲ ꦏꦩ꧀ꦩꦤ꧀ꦠꦁ ꦎꦱꦛꦥꦫꦶꦱꦴ ꦄꦝ꧀ꦞꦠꦺꦪ꧀ꦪꦱꦲꦱ꧀ꦱꦴ ꦄꦲꦺꦴꦱꦶ. ꦱꦧ꧀ꦧꦺ ꦄꦲꦠꦮꦠ꧀ꦡꦤꦶꦮꦠ꧀ꦡꦴ, ꦱꦧ꧀ꦧꦺꦱꦚ꧀ꦕ ꦥꦴꦪꦴꦱꦨꦺꦴꦗꦤꦁ ꦥꦛꦶꦪꦠ꧀ꦠꦁ ꦄꦲꦺꦴꦱꦶ.

ꦄꦡ ꦧ꧀ꦫꦴꦲ꧀ꦩꦟꦺꦴ ꦪꦠ꧀ꦡ ꦱꦴꦩꦁ ꦨꦸꦚ꧀ꦗꦠꦶ, ꦠꦁ ꦱꦸꦮꦟ꧀ꦟꦥꦴꦠꦶꦁ ꦣꦺꦴꦮꦴꦥꦺꦠ꧀ꦮꦴ ꦥꦴꦪꦴꦱꦱ꧀ꦱ ꦥꦹꦫꦺꦠ꧀ꦮꦴ ꦱꦥ꧀ꦥꦶꦩꦣꦸꦦꦴꦟꦶꦠꦴꦢꦷꦤꦶ ꦄꦨꦶꦱꦔ꧀ꦑꦫꦶꦠ꧀ꦮꦴ ꦤꦔ꧀ꦒꦭꦧꦭꦶꦏꦩ꧀ꦩꦁ ꦏꦴꦫꦴꦥꦺꦱꦶ. ꦧ꧀ꦫꦴꦲ꧀ꦩꦟꦷ ꦥꦚ꧀ꦕ ꦏꦱ꧀ꦱꦏꦱꦠꦴꦤꦶ ꦱꦸꦮꦟ꧀ꦟꦫꦗꦠꦏꦁꦱꦠꦩ꧀ꦧꦩꦪꦴꦤꦶ ꦨꦴꦗꦤꦴꦤꦶ ꦒꦲꦺꦠ꧀ꦮꦴ ꦤꦶꦱꦶꦤ꧀ꦤꦴꦤꦶ ꦱꦸꦮꦟ꧀ꦟꦏꦛꦕ꧀ꦖꦸꦁ ꦒꦲꦺꦠ꧀ꦮꦴ ꦥꦴꦪꦴꦱꦺꦤ ꦥꦫꦶꦮꦶꦱꦤ꧀ꦠꦷ ꦒꦕ꧀ꦖꦠꦶ. ꦧ꧀ꦫꦴꦲ꧀ꦩꦟꦺꦴ ꦥꦤ ꦧꦭꦶꦏꦩ꧀ꦩꦁ ꦏꦴꦫꦴꦥꦺꦠ꧀ꦮꦴ ꦫꦠ꧀ꦠꦱꦸꦮꦟ꧀ꦟꦧꦤ꧀ꦣꦹꦥꦴꦲꦤꦴꦪꦺꦴ ꦄꦴꦫꦺꦴꦲꦶꦠ꧀ꦮꦴ ꦫꦠ꧀ꦠꦱꦸꦮꦟ꧀ꦟꦢꦟ꧀ꦝꦁ ꦒꦲꦺꦠ꧀ꦮꦴ ‘‘ꦆꦣ ꦥꦴꦪꦴꦱꦁ ꦢꦺꦡ, ꦆꦣ ꦱꦥ꧀ꦥꦶꦁ, ꦆꦣ ꦱꦏ꧀ꦑꦫꦁ ꦢꦺꦡꦴ’’ꦠꦶ ꦮꦺꦴꦱꦴꦱꦩꦴꦤꦺꦴ ꦮꦶꦕꦫꦠꦶ. ꦄꦡ ꦨꦒꦮꦴ ꦒꦤ꧀ꦣꦏꦸꦛꦶꦪꦁ ꦤꦶꦱꦶꦤ꧀ꦤꦺꦴꦮ ꦧ꧀ꦫꦴꦲ꧀ꦩꦟꦱ꧀ꦱ ꦥꦫꦶꦮꦺꦱꦤꦁ ꦮꦠ꧀ꦠꦩꦴꦤꦁ ꦚꦠ꧀ꦮꦴ ‘‘ꦄꦪꦁ ꦏꦴꦭꦺꦴ ꦧ꧀ꦫꦴꦲ꧀ꦩꦟꦁ ꦢꦩꦺꦠꦸ’’ꦤ꧀ꦠꦶ ꦤꦶꦮꦴꦱꦺꦠ꧀ꦮꦴ, ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ, ꦱꦔ꧀ꦓꦴꦛꦶꦁ ꦥꦴꦫꦸꦥꦶꦠ꧀ꦮꦴ, ꦥꦠ꧀ꦠꦁ ꦒꦲꦺꦠ꧀ꦮꦴ, ꦒꦤ꧀ꦣꦏꦸꦛꦶꦠꦺꦴ ꦤꦶꦏ꧀ꦑꦩꦶ ꦪꦡꦴ ꦠꦁ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ. ꦠꦺꦤꦴꦲ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ‘‘ꦄꦡ ꦑꦺꦴ ꦨꦒꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ’’ꦠꦶ.

ꦠꦠ꧀ꦡ ꦄꦡ ꦆꦠꦶ ꦤꦶꦥꦴꦠꦺꦴ ꦄꦚ꧀ꦚꦴꦣꦶꦏꦴꦫꦮꦕꦤꦴꦫꦩ꧀ꦨꦺ ꦑꦺꦴꦠꦶ ꦥꦢꦥꦹꦫꦟꦺ. ꦨꦒꦮꦴꦠꦶ ꦮꦸꦠ꧀ꦠꦤꦪꦩꦺꦮ. ꦥꦸꦧ꧀ꦧꦟ꧀ꦲꦱꦩꦪꦤ꧀ꦠꦶ ꦢꦶꦮꦱꦱ꧀ꦱ ꦥꦸꦧ꧀ꦧꦨꦴꦒꦱꦩꦪꦁ, ꦥꦸꦧ꧀ꦧꦟ꧀ꦲꦱꦩꦪꦺꦠꦶ ꦄꦠ꧀ꦡꦺꦴ, ꦥꦸꦧ꧀ꦧꦟ꧀ꦲꦺ ꦮꦴ ꦱꦩꦪꦁ ꦥꦸꦧ꧀ꦧꦟ꧀ꦲꦱꦩꦪꦁ, ꦥꦸꦧ꧀ꦧꦟ꧀ꦲꦺ ꦌꦏꦁ ꦑꦟꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦌꦮꦁ ꦄꦕ꧀ꦕꦤ꧀ꦠꦱꦁꦪꦺꦴꦒꦺ ꦈꦥꦪꦺꦴꦒꦮꦕꦤꦁ ꦭꦧ꧀ꦨꦠꦶ. ꦤꦶꦮꦴꦱꦺꦠ꧀ꦮꦴꦠꦶ ꦥꦫꦶꦢꦲꦶꦠ꧀ꦮꦴ, ꦮꦶꦲꦴꦫꦤꦶꦮꦴꦱꦤꦥꦫꦶꦮꦠ꧀ꦠꦤꦮꦱꦺꦤꦺꦠꦁ ꦮꦺꦢꦶꦠꦧ꧀ꦧꦁ. ꦤ ꦲꦶ ꦨꦒꦮꦴ ꦠꦠꦺꦴ ꦥꦸꦧ꧀ꦧꦺ ꦄꦤꦶꦮꦠ꧀ꦡꦺꦴ ꦄꦴꦱꦶ. ꦥꦠ꧀ꦠꦕꦷꦮꦫꦩꦴꦢꦴꦪꦴꦠꦶ ꦥꦠ꧀ꦠꦁ ꦲꦠ꧀ꦡꦺꦲꦶ, ꦕꦷꦮꦫꦁ ꦏꦴꦪꦺꦤ ꦄꦴꦢꦶꦪꦶꦠ꧀ꦮꦴ, ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦣꦴꦫꦺꦠ꧀ꦮꦴꦠꦶ ꦄꦠ꧀ꦡꦺꦴ. ꦨꦒꦮꦠꦺꦴ ꦏꦶꦫ ꦥꦶꦟ꧀ꦝꦴꦪ ꦥꦮꦶꦱꦶꦠꦸꦏꦴꦩꦱ꧀ꦱ ꦨꦩꦫꦺꦴ ꦮꦶꦪ ꦮꦶꦏꦱꦶꦠꦥꦢꦸꦩꦢ꧀ꦮꦪꦩꦗ꧀ꦙꦁ, ꦆꦤ꧀ꦢꦤꦷꦭꦩꦟꦶꦮꦟ꧀ꦟꦁ ꦱꦺꦭꦩꦪꦁ ꦥꦠ꧀ꦠꦁ ꦲꦠ꧀ꦡꦢ꧀ꦮꦪꦩꦗ꧀ꦙꦁ ꦄꦴꦒꦕ꧀ꦖꦠꦶ. ꦠꦱ꧀ꦩꦴ ꦌꦮꦩꦴꦒꦠꦁ ꦥꦠ꧀ꦠꦁ ꦲꦠ꧀ꦡꦺꦲꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦕꦷꦮꦫꦚ꧀ꦕ ꦥꦫꦶꦩꦟ꧀ꦝꦭꦁ ꦥꦴꦫꦸꦠꦁ ꦏꦴꦪꦺꦤ ꦣꦴꦫꦺꦠ꧀ꦮꦴꦠꦶ ꦌꦮꦩꦱ꧀ꦱ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦪꦺꦤ ꦮꦴ ꦠꦺꦤ ꦮꦴ ꦲꦶ ꦥꦏꦴꦫꦺꦤ ꦒꦟ꧀ꦲꦤ꧀ꦠꦺꦴ ꦄꦴꦢꦴꦪ ꦆꦕ꧀ꦕꦺꦮ ꦮꦸꦕ꧀ꦕꦠꦶ ꦪꦡꦴ ‘‘ꦱꦩꦴꦢꦴꦪꦺꦮ ꦥꦏ꧀ꦏꦩꦠꦷ’’ꦠꦶ.

ꦪꦺꦤꦴꦠꦶ ꦪꦺꦤ ꦩꦒ꧀ꦒꦺꦤ. ꦏꦩ꧀ꦩꦤ꧀ꦠꦺꦴꦠꦶ ꦏꦩ꧀ꦩꦏꦫꦟꦺꦴꦏꦴꦱꦺꦴ. ꦠꦺꦤꦴꦠꦶ ꦠꦺꦤ ꦩꦒ꧀ꦒꦺꦤ. ꦈꦥꦱꦔ꧀ꦏꦩꦷꦠꦶ ꦒꦠꦺꦴ, ꦪꦺꦤ ꦩꦒ꧀ꦒꦺꦤ ꦏꦱꦶꦨꦴꦫꦢ꧀ꦮꦴꦗꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦏꦩ꧀ꦩꦤ꧀ꦠꦺꦴ ꦒꦩ꧀ꦩꦠꦶ, ꦠꦺꦤ ꦩꦒ꧀ꦒꦺꦤ ꦒꦠꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦡ ꦏꦱ꧀ꦩꦴ, ꦨꦶꦏ꧀ꦑꦹ, ꦨꦒꦮꦤ꧀ꦠꦁ ꦤꦴꦤꦸꦧꦤ꧀ꦣꦶꦁꦱꦹꦠꦶ? ꦮꦸꦕ꧀ꦕꦠꦺ – ꦪꦢꦴ ꦨꦒꦮꦴ ꦌꦏꦏꦺꦴꦮ ꦏꦠ꧀ꦡꦕꦶ ꦈꦥꦱꦔ꧀ꦏꦩꦶꦠꦸꦏꦴꦩꦺꦴ ꦲꦺꦴꦠꦶ, ꦨꦶꦏ꧀ꦑꦴꦕꦴꦫꦮꦺꦭꦴꦪꦁ ꦢ꧀ꦮꦴꦫꦁ ꦥꦶꦢꦲꦶꦠ꧀ꦮꦴ ꦄꦤ꧀ꦠꦺꦴꦒꦤ꧀ꦣꦏꦸꦛꦶꦁ ꦥꦮꦶꦱꦠꦶ. ꦠꦠꦺꦴ ꦨꦶꦏ꧀ꦑꦹ ꦠꦴꦪ ꦱꦚ꧀ꦚꦴꦪ ꦗꦴꦤꦤ꧀ꦠꦶ – ‘‘ꦄꦗ꧀ꦗ ꦨꦒꦮꦴ ꦌꦏꦏꦺꦴꦮ ꦒꦴꦩꦁ ꦥꦮꦶꦱꦶꦠꦸꦏꦴꦩꦺꦴ, ꦄꦢ꧀ꦣꦴ ꦏꦚ꧀ꦕꦶ ꦌꦮ ꦮꦶꦤꦺꦠꦧ꧀ꦧꦥꦸꦒ꧀ꦒꦭꦁ ꦄꦢ꧀ꦢꦱꦴ’’ꦠꦶ. ꦠꦺ ꦄꦠ꧀ꦠꦤꦺꦴ ꦥꦠ꧀ꦠꦕꦷꦮꦫꦁ ꦒꦲꦺꦠ꧀ꦮꦴ, ꦒꦤ꧀ꦣꦏꦸꦛꦶꦁ ꦥꦢꦏ꧀ꦑꦶꦟꦁ ꦏꦠ꧀ꦮꦴ, ꦨꦶꦏ꧀ꦑꦴꦕꦴꦫꦁ ꦒꦕ꧀ꦖꦤ꧀ꦠꦶ. ꦠꦢꦴ ꦕ ꦨꦒꦮꦴ ꦌꦮꦩꦏꦴꦱꦶ. ꦠꦱ꧀ꦩꦴ ꦨꦶꦏ꧀ꦑꦹ ꦨꦒꦮꦤ꧀ꦠꦁ ꦤꦴꦤꦸꦧꦤ꧀ꦣꦶꦁꦱꦹꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤꦴꦠꦶ ꦪꦺꦤ ꦱꦩꦪꦺꦤ ꦨꦒꦮꦴ ꦏꦩ꧀ꦩꦤ꧀ꦠꦁ ꦈꦥꦱꦔ꧀ꦏꦩꦶ, ꦠꦺꦤ ꦱꦩꦪꦺꦤ ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦥꦫꦶꦮꦺꦱꦤꦴ ꦮꦠ꧀ꦠꦠꦶ, ꦨꦠ꧀ꦠꦮꦶꦱ꧀ꦱꦒ꧀ꦒꦺꦴ ꦮꦠ꧀ꦠꦠꦷꦠꦶ ꦄꦠ꧀ꦡꦺꦴ. ꦪꦁ ꦥꦸꦧ꧀ꦧꦺ ꦄꦮꦺꦴꦕꦸꦩ꧀ꦲ – ‘‘ꦧ꧀ꦫꦴꦲ꧀ꦩꦟꦷ ꦥꦚ꧀ꦕ ꦏꦱ꧀ꦱꦏꦱꦠꦴꦤꦶ ꦱꦸꦮꦟ꧀ꦟꦫꦗꦠꦏꦁꦱꦠꦩ꧀ꦧꦩꦪꦴꦤꦶ ꦨꦴꦗꦤꦴꦤꦶ ꦒꦲꦺꦠ꧀ꦮꦴ ꦤꦶꦱꦶꦤ꧀ꦤꦴꦤꦶ ꦱꦸꦮꦟ꧀ꦟꦏꦛꦕ꧀ꦖꦸꦁ ꦒꦲꦺꦠ꧀ꦮꦴ ꦥꦴꦪꦴꦱꦺꦤ ꦥꦫꦶꦮꦶꦱꦤ꧀ꦠꦷ ꦒꦕ꧀ꦖꦠꦷ’’ꦠꦶ. ꦄꦡ ꦑꦺꦴ ꦨꦒꦮꦴ ꦪꦺꦤ ꦥꦫꦶꦮꦺꦱꦤꦴ ꦠꦺꦤꦸꦥꦱꦔ꧀ꦏꦩꦶ. ꦏꦶꦁ ꦏꦴꦫꦟꦴꦠꦶ? ꦧ꧀ꦫꦴꦲ꧀ꦩꦟꦱ꧀ꦱ ꦄꦤꦸꦒ꧀ꦒꦲꦏꦫꦟꦠ꧀ꦡꦁ. ꦤ ꦲꦶ ꦨꦒꦮꦴ ꦏꦥꦟꦥꦸꦫꦶꦱꦺꦴ ꦮꦶꦪ ꦨꦺꦴꦠ꧀ꦠꦸꦏꦴꦩꦠꦴꦪ ꦥꦫꦶꦮꦺꦱꦤꦁ ꦈꦥꦱꦔ꧀ꦏꦩꦠꦶ. ꦨꦒꦮꦠꦺꦴ ꦲꦶ ꦢ꧀ꦮꦺ ꦄꦱꦷꦠꦶꦱꦲꦱ꧀ꦱꦱꦔ꧀ꦑ꧀ꦪꦴ ꦱꦏ꧀ꦪꦏꦺꦴꦭꦶꦪꦫꦴꦗꦴꦤꦺꦴ ꦚꦴꦠꦪꦺꦴ, ꦠꦺ ꦄꦠ꧀ꦠꦤꦺꦴ ꦱꦩ꧀ꦥꦠ꧀ꦠꦶꦪꦴ ꦤꦶꦧꦢ꧀ꦣꦨꦠ꧀ꦠꦁ ꦢꦴꦠꦸꦁ ꦈꦱ꧀ꦱꦲꦤ꧀ꦠꦶ. ꦤ ꦥꦤ ꦨꦒꦮꦴ ꦨꦠ꧀ꦠꦠ꧀ꦡꦴꦪ ꦥꦧ꧀ꦧꦗꦶꦠꦺꦴ, ꦄꦥꦶꦕ ꦑꦺꦴ ꦥꦤ ‘‘ꦄꦤꦺꦏꦴꦤꦶ ꦄꦱꦔ꧀ꦑ꧀ꦪꦺꦪ꧀ꦪꦴꦤꦶ ꦥꦚ꧀ꦕ ꦩꦲꦴꦥꦫꦶꦕ꧀ꦕꦴꦒꦺ ꦥꦫꦶꦕ꧀ꦕꦗꦤ꧀ꦠꦺꦴ ꦥꦴꦫꦩꦶꦪꦺꦴ ꦥꦹꦫꦺꦠ꧀ꦮꦴ ꦩꦸꦠ꧀ꦠꦺꦴ ꦩꦺꦴꦕꦺꦱ꧀ꦱꦴꦩꦶ, ꦢꦤ꧀ꦠꦺꦴ ꦢꦩꦺꦱ꧀ꦱꦴꦩꦶ; ꦱꦤ꧀ꦠꦺꦴ ꦱꦩꦺꦱ꧀ꦱꦴꦩꦶ, ꦥꦫꦶꦤꦶꦧ꧀ꦧꦸꦠꦺꦴ ꦥꦫꦶꦤꦶꦧ꧀ꦧꦴꦥꦺꦱ꧀ꦱꦴꦩꦷ’’ꦠꦶ ꦥꦧ꧀ꦧꦗꦶꦠꦺꦴ. ꦠꦱ꧀ꦩꦴ ꦄꦠ꧀ꦠꦤꦺꦴ ꦩꦸꦠ꧀ꦠꦠ꧀ꦠꦴ…ꦥꦺ… ꦥꦫꦶꦤꦶꦧ꧀ꦧꦸꦠꦠ꧀ꦠꦴ ꦕ ꦥꦫꦁ ꦩꦺꦴꦕꦺꦤ꧀ꦠꦺꦴ…ꦥꦺ… ꦥꦫꦶꦤꦶꦧ꧀ꦧꦴꦥꦺꦤ꧀ꦠꦺꦴ ꦕ ꦭꦺꦴꦏꦺ ꦮꦶꦕꦫꦤ꧀ꦠꦺꦴ ꦧ꧀ꦫꦴꦲ꧀ꦩꦟꦱ꧀ꦱ ꦄꦤꦸꦒ꧀ꦒꦲꦏꦫꦟꦠ꧀ꦡꦁ ꦪꦺꦤ ꦥꦫꦶꦮꦺꦱꦤꦴ ꦠꦺꦤꦸꦥꦱꦔ꧀ꦏꦩꦷꦠꦶ ꦮꦺꦢꦶꦠꦧ꧀ꦧꦁ.

ꦈꦥꦱꦔ꧀ꦏꦩꦶꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦴꦱꦷꦠꦶ ꦌꦮꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕ ꦌꦏꦩꦤ꧀ꦠꦁ ꦄꦛ꧀ꦜꦴꦱꦶ. ꦌꦏꦩꦤ꧀ꦠꦤ꧀ꦠꦶ ꦨꦴꦮꦤꦥꦸꦁꦱꦏꦤꦶꦢ꧀ꦢꦺꦱꦺꦴ, ꦌꦏꦺꦴꦏꦴꦱꦁ ꦌꦏꦥꦱ꧀ꦱꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦨꦸꦩ꧀ꦩꦠ꧀ꦡꦺ ꦮꦴ ꦈꦥꦪꦺꦴꦒꦮꦕꦤꦁ, ꦠꦱ꧀ꦱ ꦢꦱ꧀ꦱꦤꦹꦥꦕꦴꦫꦺ ꦏꦡꦴꦱꦮꦤꦛ꧀ꦜꦴꦤꦺ, ꦪꦠ꧀ꦡ ꦜꦶꦠꦁ ꦧ꧀ꦫꦴꦲ꧀ꦩꦟꦺꦴ ꦥꦱ꧀ꦱꦠꦶ, ꦠꦠ꧀ꦡ ꦈꦕ꧀ꦕꦛ꧀ꦜꦴꦤꦺ ꦄꦛ꧀ꦜꦴꦱꦶ. ꦜꦠ꧀ꦮꦴ ꦕ ꦱꦸꦮꦟ꧀ꦟꦫꦱꦥꦶꦚ꧀ꦗꦫꦁ ꦱꦲꦱ꧀ꦱꦕꦤ꧀ꦢꦱꦹꦫꦶꦪꦺꦴꦨꦴꦱꦴꦠꦶꦨꦴꦱꦪꦩꦴꦤꦁ ꦱꦫꦷꦫꦴꦨꦁ ꦩꦸꦚ꧀ꦕꦶ ꦱꦩꦤ꧀ꦠꦠꦺꦴ ꦄꦱꦷꦠꦶꦲꦠ꧀ꦡꦥꦫꦶꦩꦴꦟꦁ, ꦪꦴꦪ ꦄꦗ꧀ꦙꦺꦴꦠ꧀ꦡꦫꦶꦠꦠ꧀ꦠꦴ ꦧ꧀ꦫꦴꦲ꧀ꦩꦟꦱ꧀ꦱ ꦏꦩ꧀ꦩꦤ꧀ꦠꦱꦴꦭꦴꦨꦶꦠ꧀ꦠꦶꦫꦸꦏ꧀ꦑꦏꦱꦶꦠꦩꦠ꧀ꦠꦶꦏꦴꦥꦶꦟ꧀ꦝꦴꦢꦪꦺꦴ ꦱꦸꦮꦟ꧀ꦟꦩꦪꦴ ꦮꦶꦪ ꦄꦲꦺꦱꦸꦁ. ꦄꦡ ꦩꦤꦸꦱ꧀ꦱꦴ ꦥꦴꦪꦴꦱꦁ ꦨꦸꦠ꧀ꦠꦴ ꦄꦱꦷꦠꦶꦄꦤꦸꦧ꧀ꦪꦚ꧀ꦗꦤꦥꦫꦶꦮꦴꦫꦢ꧀ꦮꦠ꧀ꦠꦶꦁꦱꦮꦫꦭꦏ꧀ꦑꦟꦥꦛꦶꦩꦟ꧀ꦝꦶꦠꦱꦫꦷꦫꦁ ꦧ꧀ꦪꦴꦩꦥ꧀ꦥꦨꦴꦥꦫꦶꦏ꧀ꦑꦺꦥꦮꦶꦨꦹꦱꦶꦠꦧꦴꦲꦸꦪꦸꦒꦭ꦳ꦁ ꦏꦺꦠꦸꦩꦴꦭꦴꦱꦩꦸꦗ꧀ꦗꦭꦶꦠꦱꦱ꧀ꦱꦶꦫꦶꦏꦢꦱ꧀ꦱꦤꦁ ꦗꦔ꧀ꦒꦩꦩꦶꦮ ꦥꦢꦸꦩꦱ꧀ꦱꦫꦁ, ꦫꦁꦱꦶꦗꦴꦭꦸꦗ꧀ꦗꦭꦶꦠꦠꦴꦫꦴꦒꦟꦩꦶꦮ ꦒꦒꦤꦠꦭꦁ, ꦄꦴꦢꦶꦠ꧀ꦠꦩꦶꦮ ꦕ ꦏꦤꦏꦒꦶꦫꦶꦱꦶꦑꦫꦁ ꦱꦶꦫꦶꦪꦴ ꦗꦭꦩꦴꦤꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦁ ꦌꦏꦩꦤ꧀ꦠꦁ ꦜꦶꦠꦁ ꦢꦶꦱ꧀ꦮꦴ ꦲꦠ꧀ꦡꦥꦴꦢꦺ ꦣꦺꦴꦮꦶꦠ꧀ꦮꦴ ꦄꦚ꧀ꦗꦭꦶꦁ ꦥꦒ꧀ꦒꦪ꧀ꦲ ꦱꦩ꧀ꦥꦫꦶꦮꦴꦫꦺꦠ꧀ꦮꦴ ꦄꦛ꧀ꦜꦁꦱꦸ. ꦌꦮꦁ ꦠꦺꦲꦶ ꦱꦩ꧀ꦥꦫꦶꦮꦴꦫꦶꦠꦁ ꦄꦢ꧀ꦢꦱ ꦑꦺꦴ ꦏꦱꦶꦨꦴꦫꦢ꧀ꦮꦴꦗꦺꦴ ꦧ꧀ꦫꦴꦲ꧀ꦩꦟꦺꦴ ꦨꦒꦮꦤ꧀ꦠꦁ ꦥꦶꦟ꧀ꦝꦴꦪ ꦜꦶꦠꦁ. ꦢꦶꦱ꧀ꦮꦴꦤ ꦨꦒꦮꦤ꧀ꦠꦁ ꦌꦠꦢꦮꦺꦴꦕ ‘‘ꦄꦲꦁ ꦑꦺꦴ, ꦱꦩꦟ, ꦏꦱꦴꦩꦶ ꦕ ꦮꦥꦴꦩꦶ ꦕꦴ’’ꦠꦶ.

ꦏꦱ꧀ꦩꦴ ꦥꦤꦴꦪꦁ ꦌꦮꦩꦴꦲ? ꦏꦶꦁ ꦱꦩꦤ꧀ꦠꦥꦴꦱꦴꦢꦶꦏꦺ ꦥꦱꦴꦢꦤꦷꦪꦺ ꦈꦠ꧀ꦠꦩꦢꦩꦡꦱꦩꦡꦩꦤꦸꦥ꧀ꦥꦠ꧀ꦠꦺꦥꦶ ꦨꦒꦮꦠꦶ ꦄꦥ꧀ꦥꦱꦴꦢꦺꦤ, ꦈꦢꦴꦲꦸ ꦄꦝ꧀ꦞꦠꦺꦪ꧀ꦪꦴꦤꦁ ꦗꦤꦱꦲꦱ꧀ꦱꦴꦤꦁ ꦥꦴꦪꦴꦱꦁ ꦥꦛꦶꦪꦴꦢꦺꦠ꧀ꦮꦴꦥꦶ ꦏꦛꦕ꧀ꦖꦸꦨꦶꦏ꧀ꦑꦴꦪ ꦩꦕ꧀ꦖꦺꦫꦺꦤꦴꦠꦶ? ꦈꦨꦪꦡꦴꦥꦶ ꦤꦺꦴ, ꦄꦥꦶꦕ ꦑ꧀ꦮꦴꦱ꧀ꦱ ꦨꦒꦮꦠꦺꦴ ꦢꦱ꧀ꦱꦤꦺꦤ ꦄꦠꦶꦠ꧀ꦠꦁ ꦤꦶꦏ꧀ꦑꦶꦠ꧀ꦠꦏꦩ꧀ꦩꦤ꧀ꦠꦁ ꦗꦤꦁ ꦢꦶꦱ꧀ꦮꦴ ‘‘ꦏꦩ꧀ꦩꦨꦔ꧀ꦒꦁ ꦩꦺ ꦏꦴꦠꦸꦁ ꦄꦴꦒꦠꦺꦴ’’ꦠꦶ ꦄꦤꦠ꧀ꦠꦩꦤꦠꦴ ꦄꦲꦺꦴꦱꦶ. ꦠꦱ꧀ꦩꦴ ꦌꦮꦩꦴꦲ. ꦨꦒꦮꦠꦺꦴ ꦕ ꦭꦏ꧀ꦑꦟꦱꦩ꧀ꦥꦠ꧀ꦠꦶꦁ ꦢꦶꦱ꧀ꦮꦴ ‘‘ꦱꦕꦴꦪꦁ ꦏꦩ꧀ꦩꦤ꧀ꦠꦺ ꦥꦪꦺꦴꦗꦪꦶꦱ꧀ꦱ, ꦱꦏꦭꦗꦩ꧀ꦧꦸꦢꦷꦥꦺ ꦩꦤꦸꦱ꧀ꦱꦴꦤꦁ ꦱꦷꦱꦺ ꦕꦹꦭ꦳ꦴꦩꦟꦶ ꦮꦶꦪ ꦄꦨꦮꦶꦱ꧀ꦱ, ꦏꦺꦴ ꦤꦴꦩꦱ꧀ꦱ ꦄꦠ꧀ꦡꦺꦴ ꦤ ꦱꦩ꧀ꦥꦗ꧀ꦗꦶꦱ꧀ꦱ, ꦌꦮꦩꦺꦮꦁ ꦄꦭꦱꦠꦴꦪ ꦏꦩ꧀ꦩꦤ꧀ꦠꦺ ꦄꦥ꧀ꦥꦪꦺꦴꦗꦺꦠ꧀ꦮꦴ ꦮꦥ꧀ꦥꦩꦔ꧀ꦒꦭꦴꦢꦷꦱꦸ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦨꦸꦚ꧀ꦗꦤ꧀ꦠꦺꦴ ꦏꦴꦪꦢꦭ꦳꧀ꦲꦷꦧꦲꦸꦭꦺꦴ ꦮꦶꦕꦫꦠꦷ’’ꦠꦶꦥꦶꦱ꧀ꦱ ꦄꦲꦺꦴꦱꦶ. ꦠꦺꦤꦴꦲ – ‘‘ꦄꦲꦁ ꦑꦺꦴ, ꦱꦩꦟ, ꦏꦱꦴꦩꦶ ꦕ ꦮꦥꦴꦩꦶ ꦕ, ꦏꦱꦶꦠ꧀ꦮꦴ ꦕ ꦮꦥꦶꦠ꧀ꦮꦴ ꦕ ꦨꦸꦚ꧀ꦗꦴꦩꦷ’’ꦠꦶ. ꦤ ꦩꦺ ꦏꦩ꧀ꦩꦤ꧀ꦠꦴ ꦧ꧀ꦪꦴꦥꦗ꧀ꦗꦤ꧀ꦠꦶ, ꦤ ꦕꦩ꧀ꦲꦶ ꦪꦡꦴ ꦠ꧀ꦮꦁ ꦌꦮꦁ ꦭꦏ꧀ꦑꦟꦱꦩ꧀ꦥꦤ꧀ꦤꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦠ꧀ꦮꦩ꧀ꦥꦶ ꦱꦩꦟ…ꦥꦺ… ꦨꦸꦚ꧀ꦗꦱ꧀ꦱꦸ, ꦏꦺꦴ ꦠꦺ ꦄꦠ꧀ꦡꦺꦴ ꦤ ꦱꦩ꧀ꦥꦗ꧀ꦗꦺꦪ꧀ꦪ ꦌꦮꦁ ꦭꦏ꧀ꦑꦟꦱꦩ꧀ꦥꦤ꧀ꦤꦱ꧀ꦱꦴꦠꦶ ꦄꦣꦶꦥ꧀ꦥꦴꦪꦺꦴ.

ꦄꦥꦶꦕꦴꦪꦁ ꦄꦱ꧀ꦱꦺꦴꦱꦶ – ‘‘ꦱꦏ꧀ꦪꦫꦴꦗꦏꦸꦭꦺ ꦏꦶꦫ ꦏꦸꦩꦴꦫꦺꦴ ꦈꦥ꧀ꦥꦤ꧀ꦤꦺꦴ, ꦱꦺꦴ ꦕꦏ꧀ꦏꦮꦠ꧀ꦠꦶꦫꦗ꧀ꦗꦁ ꦥꦲꦴꦪ ꦥꦧ꧀ꦧꦗꦶꦠꦺꦴ’’ꦠꦶ. ꦠꦱ꧀ꦩꦴ ‘‘ꦆꦢꦴꦤꦶ ꦄꦪꦁ ꦱꦺꦴ’’ꦠꦶ ꦚꦠ꧀ꦮꦴ ‘‘ꦕꦏ꧀ꦏꦮꦠ꧀ꦠꦶꦫꦗ꧀ꦗꦁ ꦏꦶꦫ ꦥꦲꦴꦪ ꦏꦶꦭꦤ꧀ꦠꦺꦴꦱꦷ’’ꦠꦶ ꦈꦥꦴꦫꦩ꧀ꦨꦁ ꦏꦫꦺꦴꦤ꧀ꦠꦺꦴ ꦄꦴꦲ ‘‘ꦄꦲꦁ ꦑꦺꦴ ꦱꦩꦟꦴ’’ꦠꦶ. ꦄꦥꦶꦕꦴꦪꦁ ꦠꦶꦏ꧀ꦑꦥꦚ꧀ꦚꦺꦴ ꦧ꧀ꦫꦴꦲ꧀ꦩꦟꦺꦴ, ꦤ ꦨꦒꦮꦤ꧀ꦠꦁ ꦄꦮꦏ꧀ꦑꦶꦥꦤ꧀ꦠꦺꦴ ꦨꦟꦠꦶ, ꦨꦒꦮꦠꦺꦴ ꦥꦤ ꦫꦹꦥꦱꦩ꧀ꦥꦠ꧀ꦠꦶꦁ ꦢꦶꦱ꧀ꦮꦴ ꦥꦚ꧀ꦚꦴꦱꦩ꧀ꦥꦠ꧀ꦠꦶꦁ ꦱꦩ꧀ꦨꦴꦮꦪꦩꦴꦤꦺꦴ ꦏꦡꦴꦥꦮꦠ꧀ꦠꦤꦠ꧀ꦡꦩ꧀ꦥꦶ ꦌꦮꦩꦴꦲ – ‘‘ꦄꦲꦁ ꦑꦺꦴ ꦱꦩꦟꦴ’’ꦠꦶ. ꦠꦠꦺꦴ ꦨꦒꦮꦴ ꦮꦺꦤꦺꦪ꧀ꦪꦮꦱꦺꦤ ꦱꦢꦺꦮꦏꦺ ꦭꦺꦴꦏꦺ ꦄꦒ꧀ꦒꦏꦱ꧀ꦱꦏꦮꦥ꧀ꦥꦏꦨꦴꦮꦁ ꦄꦠ꧀ꦠꦤꦺꦴ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦲꦩ꧀ꦥꦶ ꦑꦺꦴ ꦧ꧀ꦫꦴꦲ꧀ꦩꦟꦴ’’ꦠꦶ.

ꦄꦡ ꦧ꧀ꦫꦴꦲ꧀ꦩꦟꦱ꧀ꦱ ꦕꦶꦤ꧀ꦠꦴ ꦈꦢꦥꦴꦢꦶ – ‘‘ꦄꦪꦁ ꦱꦩꦟꦺꦴ ‘ꦏꦱꦴꦩꦶ ꦕ ꦮꦥꦴꦩꦶ ꦕꦴ’ꦠꦶ ꦄꦴꦲ. ꦤ ꦕꦱ꧀ꦱ ꦎꦭ꦳ꦴꦫꦶꦏꦴꦤꦶ ꦪꦸꦒꦤꦔ꧀ꦒꦭꦴꦢꦷꦤꦶ ꦏꦱꦶꦨꦟ꧀ꦝꦴꦤꦶ ꦥꦱ꧀ꦱꦴꦩꦶ, ꦱꦺꦴ ꦩꦸꦱꦴ ꦤꦸ ꦑꦺꦴ ꦨꦟꦠꦶ, ꦤꦺꦴ’’ꦠꦶ ꦨꦒꦮꦤ꧀ꦠꦁ ꦥꦴꦢꦠꦭꦴ ꦥꦛ꧀ꦜꦴꦪ ꦪꦴꦮ ꦈꦥꦫꦶ ꦏꦺꦱꦤ꧀ꦠꦴ ꦱꦩ꧀ꦩꦴꦭꦺꦴꦏꦪꦩꦴꦤꦺꦴ ꦄꦔ꧀ꦒꦮꦶꦗ꧀ꦗꦴꦪ ꦏꦠꦴꦣꦶꦏꦴꦫꦠ꧀ꦠꦴ ꦢ꧀ꦮꦠ꧀ꦠꦶꦁꦱꦮꦫꦭꦏ꧀ꦑꦟꦱꦩ꧀ꦥꦠ꧀ꦠꦶꦩꦱ꧀ꦱ ꦚꦠ꧀ꦮꦴ ‘‘ꦄꦛ꧀ꦜꦴꦤꦩꦺꦠꦁ ꦄꦤꦮꦏꦴꦱꦺꦴ, ꦪꦁ ꦌꦮꦫꦹꦥꦺꦴ ꦩꦸꦱꦴ ꦨꦟꦺꦪ꧀ꦪꦴ’’ꦠꦶ ꦠꦴꦮꦢꦺꦮ ꦱꦚ꧀ꦗꦴꦠꦧꦲꦸꦩꦴꦤꦺꦴ ꦨꦒꦮꦠꦶ ꦱꦩꦟꦮꦴꦢꦁ ꦥꦲꦴꦪ ꦒꦺꦴꦠ꧀ꦠꦺꦤ ꦨꦒꦮꦤ꧀ꦠꦁ ꦱꦩꦸꦢꦴꦕꦫꦩꦴꦤꦺꦴ ꦄꦴꦲ ‘‘ꦤ ꦑꦺꦴ ꦥꦤ ꦩꦪꦁ ꦥꦱ꧀ꦱꦴꦩ ꦨꦺꦴꦠꦺꦴ ꦒꦺꦴꦠꦩꦱ꧀ꦱꦴ’’ꦠꦶ.

ꦌꦮꦚ꧀ꦕ ꦥꦤ ꦮꦠ꧀ꦮꦴ ꦠꦶꦏ꧀ꦑꦥꦚ꧀ꦚꦺꦴ ꦧ꧀ꦫꦴꦲ꧀ꦩꦟꦺꦴ ‘‘ꦒꦩ꧀ꦨꦷꦫꦠ꧀ꦡꦁ ꦱꦤ꧀ꦣꦴꦪ ꦆꦩꦶꦤꦴ ꦌꦠꦁ ꦮꦸꦠ꧀ꦠ’’ꦤ꧀ꦠꦶ ꦚꦠ꧀ꦮꦴ ꦥꦸꦕ꧀ꦖꦶꦠ꧀ꦮꦴ ꦠꦩꦠ꧀ꦡꦁ ꦚꦴꦠꦸꦏꦴꦩꦺꦴ ꦨꦒꦮꦤ꧀ꦠꦁ ꦒꦴꦡꦴꦪ ꦄꦗ꧀ꦙꦨꦴꦱꦶ. ꦠꦺꦤꦴꦲ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ‘‘ꦄꦡ ꦑꦺꦴ ꦏꦱꦶꦨꦴꦫꦢ꧀ꦮꦴꦗꦺꦴ ꦧ꧀ꦫꦴꦲ꧀ꦩꦟꦺꦴ ꦨꦒꦮꦤ꧀ꦠꦁ ꦒꦴꦡꦴꦪ ꦄꦗ꧀ꦙꦨꦴꦱꦷ’’ꦠꦶ. ꦠꦠ꧀ꦡ ꦒꦴꦡꦴꦪꦴꦠꦶ ꦄꦏ꧀ꦑꦫꦥꦢꦤꦶꦪꦩꦶꦠꦺꦤ ꦮꦕꦤꦺꦤ. ꦄꦗ꧀ꦙꦨꦴꦱꦷꦠꦶ ꦄꦨꦴꦱꦶ.

꧗꧖-꧗꧗. ꦠꦠ꧀ꦡ ꦧ꧀ꦫꦴꦲ꧀ꦩꦟꦺꦴ ‘‘ꦏꦱꦶ’’ꦤ꧀ꦠꦶ ꦪꦸꦒꦤꦔ꧀ꦒꦭꦴꦢꦶꦏꦱꦶꦱꦩ꧀ꦨꦴꦫꦱꦩꦴꦪꦺꦴꦒꦁ ꦮꦢꦠꦶ. ꦨꦒꦮꦴ ꦥꦤ ꦪꦱ꧀ꦩꦴ ꦥꦸꦧ꧀ꦧꦣꦩ꧀ꦩꦱꦨꦴꦒꦺꦤ ꦫꦺꦴꦥꦺꦠ꧀ꦮꦴ ꦏꦡꦤꦁ ꦤꦴꦩ ꦧꦸꦢ꧀ꦣꦴꦤꦁ ꦄꦴꦤꦸꦨꦴꦮꦺꦴ, ꦠꦱ꧀ꦩꦴ ꦧꦸꦢ꧀ꦣꦴꦤꦸꦨꦴꦮꦁ ꦢꦷꦥꦺꦤ꧀ꦠꦺꦴ ꦥꦸꦧ꧀ꦧꦣꦩ꧀ꦩꦱꦨꦴꦒꦺꦤ ꦫꦺꦴꦥꦺꦤ꧀ꦠꦺꦴ ꦄꦴꦲ – ‘‘ꦱꦢ꧀ꦣꦴ ꦧꦷꦗ’’ꦤ꧀ꦠꦶ. ꦏꦺꦴ ꦥꦤꦺꦠ꧀ꦡ ꦥꦸꦧ꧀ꦧꦣꦩ꧀ꦩꦱꦨꦴꦒꦺꦴ, ꦤꦤꦸ ꦧ꧀ꦫꦴꦲ꧀ꦩꦟꦺꦤ ꦨꦒꦮꦴ ꦪꦸꦒꦤꦔ꧀ꦒꦭꦴꦢꦶꦏꦱꦶꦱꦩ꧀ꦨꦴꦫꦱꦩꦴꦪꦺꦴꦒꦁ ꦥꦸꦕ꧀ꦖꦶꦠꦺꦴ ꦄꦡ ꦕ ꦥꦤ ꦄꦥꦸꦕ꧀ꦖꦶꦠꦱ꧀ꦱ ꦧꦷꦗꦱ꧀ꦱ ꦱꦨꦴꦒꦺꦤ ꦫꦺꦴꦥꦺꦤ꧀ꦠꦺꦴ ꦄꦴꦲ – ‘‘ꦱꦢ꧀ꦣꦴ ꦧꦷꦗ’’ꦤ꧀ꦠꦶ, ꦌꦮꦚ꧀ꦕ ꦱꦠꦶ ꦄꦤꦤꦸꦱꦤ꧀ꦣꦶꦏꦴꦮ ꦄꦪꦁ ꦏꦡꦴ ꦲꦺꦴꦠꦷꦠꦶ? ꦮꦸꦕ꧀ꦕꦠꦺ – ꦤ ꦧꦸꦢ꧀ꦣꦴꦤꦁ ꦄꦤꦤꦸꦱꦤ꧀ꦣꦶꦏꦴ ꦤꦴꦩ ꦏꦡꦴ ꦄꦠ꧀ꦡꦶ, ꦤꦴꦥꦶ ꦧꦸꦢ꧀ꦣꦴ ꦥꦸꦧ꧀ꦧꦣꦩ꧀ꦩꦱꦨꦴꦒꦁ ꦄꦤꦴꦫꦺꦴꦥꦺꦠ꧀ꦮꦴ ꦏꦡꦺꦤ꧀ꦠꦶ. ꦌꦮꦚ꧀ꦕꦺꦠ꧀ꦡ ꦄꦤꦸꦱꦤ꧀ꦣꦶ ꦮꦺꦢꦶꦠꦧ꧀ꦧꦴ – ꦄꦤꦺꦤ ꦲꦶ ꦧ꧀ꦫꦴꦲ꧀ꦩꦟꦺꦤ ꦨꦒꦮꦴ ꦪꦸꦒꦤꦔ꧀ꦒꦭꦴꦢꦶꦏꦱꦶꦱꦩ꧀ꦨꦴꦫꦮꦱꦺꦤ ꦏꦱꦶꦁ ꦥꦸꦕ꧀ꦖꦶꦠꦺꦴ. ꦱꦺꦴ ꦠꦱ꧀ꦱ ꦄꦤꦸꦏꦩ꧀ꦥꦴꦪ ‘‘ꦆꦢꦁ ꦄꦥꦸꦕ꧀ꦖꦶꦠ’’ꦤ꧀ꦠꦶ ꦄꦥꦫꦶꦲꦴꦥꦺꦠ꧀ꦮꦴ ꦱꦩꦹꦭꦁ ꦱꦈꦥꦏꦴꦫꦁ ꦱꦱꦩ꧀ꦨꦴꦫꦁ ꦱꦦꦭꦁ ꦏꦱꦶꦁ ꦚꦴꦥꦺꦠꦸꦁ ꦩꦹꦭꦠꦺꦴ ꦥꦛ꧀ꦜꦴꦪ ꦏꦱꦶꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ – ‘‘ꦱꦢ꧀ꦣꦴ ꦧꦷꦗ’’ꦤ꧀ꦠꦶ. ꦧꦷꦗꦚ꧀ꦲꦶ ꦏꦱꦶꦪꦴ ꦩꦹꦭꦁ ꦠꦱ꧀ꦩꦶꦁ ꦱꦠꦶ ꦏꦠ꧀ꦠꦧ꧀ꦧꦠꦺꦴ, ꦄꦱꦠꦶ ꦄꦏꦠ꧀ꦠꦧ꧀ꦧꦠꦺꦴ, ꦠꦥ꧀ꦥꦩꦴꦟꦺꦤ ꦕ ꦏꦠ꧀ꦠꦧ꧀ꦧꦠꦺꦴ. ꦧꦷꦗꦺ ꦲꦶ ꦱꦠꦶ ꦏꦱꦶꦁ ꦏꦫꦺꦴꦤ꧀ꦠꦶ, ꦄꦱꦠꦶ ꦤ ꦏꦫꦺꦴꦤ꧀ꦠꦶ. ꦧꦷꦗꦥ꧀ꦥꦩꦴꦟꦺꦤ ꦕ ꦏꦸꦱꦭꦴ ꦏꦱ꧀ꦱꦏꦴ ꦑꦺꦠ꧀ꦠꦁ ꦏꦱꦤ꧀ꦠꦶ, ꦤ ꦈꦴꦤꦁ ‘‘ꦩꦴ ꦤꦺꦴ ꦱꦱ꧀ꦱꦁ ꦥꦫꦶꦲꦴꦪꦷ’’ꦠꦶ, ꦤ ꦄꦣꦶꦏꦁ ‘‘ꦩꦴ ꦤꦺꦴ ꦩꦺꦴꦓꦺꦴ ꦮꦴꦪꦴꦩꦺꦴ ꦄꦲꦺꦴꦱꦷ’’ꦠꦶ. ꦪꦱ꧀ꦩꦴ ꦕ ꦧꦷꦗꦩꦺꦮ ꦩꦹꦭꦁ, ꦠꦱ꧀ꦩꦴ ꦨꦒꦮꦴ ꦩꦹꦭꦠꦺꦴ ꦥꦛ꧀ꦜꦴꦪ ꦏꦱꦶꦁ ꦢꦱ꧀ꦱꦺꦤ꧀ꦠꦺꦴ ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦏꦱꦶꦪꦴ ꦥꦸꦧ꧀ꦧꦣꦩ꧀ꦩꦱ꧀ꦱ ꦧꦷꦗꦱ꧀ꦱ ꦱꦨꦴꦒꦺꦤ ꦄꦠ꧀ꦠꦤꦺꦴ ꦏꦱꦶꦪꦴ ꦥꦸꦧ꧀ꦧꦣꦩ꧀ꦩꦁ ꦫꦺꦴꦥꦺꦤ꧀ꦠꦺꦴ ꦄꦴꦲ – ‘‘ꦱꦢ꧀ꦣꦴ ꦧꦷꦗ’’ꦤ꧀ꦠꦶ. ꦌꦮꦩꦺꦠ꧀ꦡ ꦥꦸꦧ꧀ꦧꦣꦩ꧀ꦩꦱꦨꦴꦒꦺꦴ ꦮꦺꦢꦶꦠꦧ꧀ꦧꦺꦴ.

ꦥꦸꦕ꧀ꦖꦶꦠꦁꦪꦺꦮ ꦮꦠ꧀ꦮꦴ ꦄꦥꦸꦕ꧀ꦖꦶꦠꦁ ꦥꦕ꧀ꦖꦴ ꦏꦶꦁ ꦤ ꦮꦸꦠ꧀ꦠꦤ꧀ꦠꦶ ꦕꦺ? ꦠꦱ꧀ꦱ ꦈꦥꦏꦴꦫꦨꦴꦮꦠꦺꦴ ꦣꦩ꧀ꦩꦱꦩ꧀ꦧꦤ꧀ꦣꦱꦩꦠ꧀ꦡꦨꦴꦮꦠꦺꦴ ꦕ. ꦄꦪꦚ꧀ꦲꦶ ꦧ꧀ꦫꦴꦲ꧀ꦩꦟꦺꦴ ꦥꦚ꧀ꦚꦮꦴ, ꦩꦶꦕ꧀ꦖꦴꦢꦶꦛ꧀ꦜꦶꦏꦸꦭꦺ ꦥꦤ ꦗꦴꦠꦠ꧀ꦠꦴ ꦱꦢ꧀ꦣꦴꦮꦶꦫꦲꦶꦠꦺꦴ. ꦱꦢ꧀ꦣꦴꦮꦶꦫꦲꦶꦠꦺꦴ ꦕ ꦥꦚ꧀ꦚꦮꦴ ꦥꦫꦺꦱꦁ ꦱꦢ꧀ꦣꦴꦪ ꦄꦠ꧀ꦠꦤꦺꦴ ꦮꦶꦱꦪꦺ ꦄꦥꦛꦶꦥꦗ꧀ꦗꦩꦴꦤꦺꦴ ꦮꦶꦱꦺꦱꦁ ꦤꦴꦣꦶꦒꦕ꧀ꦖꦠꦶ, ꦏꦶꦭꦺꦱꦏꦴꦭꦸꦱ꧀ꦱꦶꦪꦨꦴꦮꦴꦥꦒꦩꦥ꧀ꦥꦱꦴꦢꦩꦠ꧀ꦠꦭꦏ꧀ꦑꦟꦴꦥꦶ ꦕꦱ꧀ꦱ ꦢꦸꦧ꧀ꦧꦭꦴ ꦱꦢ꧀ꦣꦴ ꦧꦭꦮꦠꦶꦪꦴ ꦥꦚ꧀ꦚꦴꦪ ꦱꦲ ꦮꦠ꧀ꦠꦩꦴꦤꦴ ꦄꦠ꧀ꦡꦱꦶꦢ꧀ꦣꦶꦁ ꦤ ꦏꦫꦺꦴꦠꦶ, ꦲꦠ꧀ꦡꦶꦤꦴ ꦱꦲ ꦌꦏꦣꦸꦫꦺ ꦪꦸꦠ꧀ꦠꦒꦺꦴꦟꦺꦴ ꦮꦶꦪ. ꦠꦱ꧀ꦩꦴ ꦠꦱ꧀ꦱ ꦱꦢ꧀ꦣꦴ ꦈꦥꦏꦴꦫꦶꦏꦴ. ꦌꦮꦁ ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦱꦈꦥꦏꦴꦫꦨꦴꦮꦠꦺꦴ ꦠꦁ ꦧ꧀ꦫꦴꦲ꧀ꦩꦟꦁ ꦱꦢ꧀ꦣꦴꦪ ꦥꦠꦶꦛ꧀ꦜꦴꦥꦺꦤ꧀ꦠꦺꦤ ꦥꦕ꧀ꦖꦴꦥꦶ ꦮꦠ꧀ꦠꦧ꧀ꦧꦺꦴ ꦄꦪꦩꦠ꧀ꦡꦺꦴ ꦥꦸꦧ꧀ꦧꦺ ꦮꦸꦠ꧀ꦠꦺꦴ ꦢꦺꦱꦤꦴꦏꦸꦱꦭꦠꦴꦪ ꦪꦡꦴ ꦄꦚ꧀ꦚꦠ꧀ꦫꦴꦥꦶ ‘‘ꦱꦢ꧀ꦣꦴ ꦧꦤ꧀ꦣꦠꦶ ꦥꦴꦡꦺꦪ꧀ꦪ’’ꦤ꧀ꦠꦶ (ꦱꦁ. ꦤꦶ. ꧑.꧗꧙) ꦕ, ‘‘ꦱꦢ꧀ꦣꦴ ꦢꦸꦠꦶꦪꦴ ꦥꦸꦫꦶꦱꦱ꧀ꦱ ꦲꦺꦴꦠꦷ’’ꦠꦶ (ꦱꦁ. ꦤꦶ. ꧑.꧕꧙) ꦕ, ‘‘ꦱꦢ꧀ꦣꦷꦣ ꦮꦶꦠ꧀ꦠꦁ ꦥꦸꦫꦶꦱꦱ꧀ꦱ ꦱꦺꦛ꧀ꦜ’’ꦤ꧀ꦠꦶ (ꦱꦁ. ꦤꦶ. ꧑.꧗꧓, ꧒꧔꧖; ꦱꦸ. ꦤꦶ. ꧑꧘꧔) ꦕ, ‘‘ꦱꦢ꧀ꦣꦴꦪ ꦠꦫꦠꦶ ꦎꦓ’’ꦤ꧀ꦠꦶ (ꦱꦁ. ꦤꦶ. ꧑.꧒꧔꧖) ꦕ, ‘‘ꦱꦢ꧀ꦣꦴꦲꦠ꧀ꦡꦺꦴ ꦩꦲꦴꦤꦴꦒꦺꦴ’’ꦠꦶ (ꦄ. ꦤꦶ. ꧖.꧔꧓; ꦡꦺꦫꦒꦴ. ꧖꧙꧔) ꦕ, ‘‘ꦱꦢ꧀ꦣꦺꦱꦶꦏꦺꦴ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦺꦴꦠꦶ ꦕꦴ’’ꦠꦶ (ꦄ. ꦤꦶ. ꧗.꧖꧗). ꦧꦷꦗꦱ꧀ꦱ ꦕ ꦈꦥꦏꦴꦫꦶꦏꦴ ꦮꦸꦛ꧀ꦜꦶ, ꦱꦴ ꦠꦢꦤꦤ꧀ꦠꦫꦚ꧀ꦚꦺꦮ ꦮꦸꦕ꧀ꦕꦩꦴꦤꦴ ꦱꦩꦠ꧀ꦡꦴ ꦲꦺꦴꦠꦶ. ꦌꦮꦁ ꦣꦩ꧀ꦩꦱꦩ꧀ꦧꦤ꧀ꦣꦱꦩꦠ꧀ꦡꦨꦴꦮꦠꦺꦴ ꦥꦕ꧀ꦖꦴꦥꦶ ꦮꦠ꧀ꦠꦧ꧀ꦧꦺꦴ ꦄꦪꦩꦠ꧀ꦡꦺꦴ ꦥꦸꦧ꧀ꦧꦺ ꦮꦸꦠ꧀ꦠꦺꦴ, ꦄꦚ꧀ꦚꦺꦴ ꦕ ꦌꦮꦁꦮꦶꦣꦺꦴ ꦇꦱꦴꦪꦺꦴꦠ꧀ꦠꦴꦢꦶ.

ꦠꦠ꧀ꦡ ꦱꦩ꧀ꦥꦱꦴꦢꦤꦭꦏ꧀ꦑꦟꦴ ꦱꦢ꧀ꦣꦴ, ꦎꦏꦥ꧀ꦥꦤꦭꦏ꧀ꦑꦟꦴ ꦮꦴ, ꦥꦏ꧀ꦑꦤ꧀ꦢꦤꦫꦱꦴ, ꦄꦣꦶꦩꦸꦠ꧀ꦠꦶꦥꦕ꧀ꦕꦸꦥꦛ꧀ꦜꦴꦤꦴ, ꦄꦏꦴꦭꦸꦱ꧀ꦱꦶꦪꦥꦕ꧀ꦕꦸꦥꦛ꧀ꦜꦴꦤꦴ ꦮꦴ, ꦱꦺꦴꦠꦴꦥꦠ꧀ꦠꦶꦪꦔ꧀ꦒꦥꦢꦛ꧀ꦜꦴꦤꦴ, ꦱꦢ꧀ꦢꦲꦶꦠꦧ꧀ꦧꦣꦩ꧀ꦩꦥꦢꦛ꧀ꦜꦴꦤꦴ ꦮꦴ, ꦄꦴꦢꦴꦱꦗꦭꦠꦭꦴꦢꦷꦤꦁ ꦥꦱꦴꦢꦺꦴ ꦮꦶꦪ ꦕꦺꦠꦱꦺꦴ ꦥꦱꦴꦢꦨꦹꦠꦴ, ꦈꦢꦏꦥ꧀ꦥꦱꦴꦢꦏꦩꦟꦶ ꦮꦶꦪ ꦈꦢꦏꦱ꧀ꦱ, ꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦤꦁ ꦥꦱꦴꦢꦶꦏꦴ. ꦧꦷꦗꦤ꧀ꦠꦶ ꦥꦚ꧀ꦕꦮꦶꦣꦁ – ꦩꦹꦭꦧꦷꦗꦁ, ꦑꦤ꧀ꦣꦧꦷꦗꦁ, ꦦꦭꦸꦧꦷꦗꦁ, ꦄꦒ꧀ꦒꦧꦷꦗꦁ, ꦧꦷꦗꦧꦷꦗꦩꦺꦮ ꦥꦚ꧀ꦕꦩꦤ꧀ꦠꦶ. ꦠꦁ ꦱꦧ꧀ꦧꦩ꧀ꦥꦶ ꦮꦶꦫꦸꦲꦤꦛ꧀ꦜꦺꦤ ꦧꦷꦗꦁꦠ꧀ꦮꦺꦮ ꦱꦔ꧀ꦑꦁ ꦒꦕ꧀ꦖꦠꦶ. ꦪꦡꦴꦲ – ‘‘ꦧꦷꦗꦚ꧀ꦕꦺꦠꦁ ꦮꦶꦫꦸꦲꦤꦛ꧀ꦜꦺꦤꦴ’’ꦠꦶ.

ꦠꦠ꧀ꦡ ꦪꦡꦴ ꦧ꧀ꦫꦴꦲ꧀ꦩꦟꦱ꧀ꦱ ꦏꦱꦶꦪꦴ ꦩꦹꦭꦨꦹꦠꦁ ꦧꦷꦗꦁ ꦢ꧀ꦮꦺ ꦏꦶꦕ꧀ꦕꦴꦤꦶ ꦏꦫꦺꦴꦠꦶ, ꦲꦺꦛ꧀ꦜꦴ ꦩꦹꦭꦺꦤ ꦥꦠꦶꦛ꧀ꦜꦴꦠꦶ, ꦈꦥꦫꦶ ꦄꦔ꧀ꦏꦸꦫꦁ ꦈꦛ꧀ꦜꦴꦥꦺꦠꦶ; ꦌꦮꦁ ꦨꦒꦮꦠꦺꦴ ꦏꦱꦶꦪꦴ ꦩꦹꦭꦨꦹꦠꦴ ꦱꦢ꧀ꦣꦴ ꦲꦺꦛ꧀ꦜꦴ ꦱꦷꦭꦩꦹꦭꦺꦤ ꦥꦠꦶꦛ꧀ꦜꦴꦠꦶ, ꦈꦥꦫꦶ ꦱꦩꦡꦮꦶꦥꦱ꧀ꦱꦤꦔ꧀ꦏꦸꦫꦁ ꦈꦛ꧀ꦜꦴꦥꦺꦠꦶ. ꦪꦡꦴ ꦕ ꦠꦁ ꦩꦹꦭꦺꦤ ꦥꦡꦮꦶꦫꦱꦁ ꦄꦴꦥꦺꦴꦫꦱꦁ ꦒꦲꦺꦠ꧀ꦮꦴ ꦤꦴꦭ꦳ꦺꦤ ꦣꦚ꧀ꦚꦥꦫꦶꦥꦴꦏꦒꦲꦟꦠ꧀ꦡꦁ ꦮꦝ꧀ꦞꦠꦶ; ꦌꦮꦩꦪꦁ ꦱꦷꦭꦩꦹꦭꦺꦤ ꦱꦩꦡꦮꦶꦥꦱ꧀ꦱꦤꦴꦫꦱꦁ ꦒꦲꦺꦠ꧀ꦮꦴ ꦄꦫꦶꦪꦩꦒ꧀ꦒꦤꦴꦭ꦳ꦺꦤ ꦄꦫꦶꦪꦦꦭꦣꦚ꧀ꦚꦥꦫꦶꦥꦴꦏꦒꦲꦟꦠ꧀ꦡꦁ ꦮꦝ꧀ꦞꦠꦶ. ꦪꦡꦴ ꦕ ꦠꦁ ꦱꦸꦨꦹꦩꦶꦪꦁ ꦥꦠꦶꦛ꧀ꦜꦲꦶꦠ꧀ꦮꦴ ꦩꦹꦭꦔ꧀ꦏꦸꦫꦥꦟ꧀ꦟꦤꦴꦭ꦳ꦏꦟ꧀ꦝꦥ꧀ꦥꦱꦮꦺꦲꦶ ꦮꦸꦝ꧀ꦞꦶꦁ ꦮꦶꦫꦹꦭ꦳꧀ꦲꦶꦁ ꦮꦺꦥꦸꦭ꧀ꦭꦁ ꦥꦠ꧀ꦮꦴ, ꦑꦷꦫꦁ ꦗꦤꦺꦠ꧀ꦮꦴ, ꦄꦤꦺꦏꦱꦴꦭꦶꦦꦭꦨꦫꦶꦠꦁ ꦱꦴꦭꦶꦱꦷꦱꦁ ꦤꦶꦥ꧀ꦦꦴꦢꦺꦠꦶ; ꦌꦮꦩꦪꦁ ꦕꦶꦠ꧀ꦠꦱꦤ꧀ꦠꦴꦤꦺ ꦥꦠꦶꦛ꧀ꦜꦲꦶꦠ꧀ꦮꦴ ꦱꦷꦭꦕꦶꦠ꧀ꦠꦢꦶꦛ꧀ꦜꦶꦏꦔ꧀ꦑꦴꦮꦶꦠꦫꦟꦩꦒ꧀ꦒꦴꦩꦒ꧀ꦒꦚꦴꦟꦢꦱ꧀ꦱꦤꦥꦛꦶꦥꦢꦴꦚꦴꦟꦢꦱ꧀ꦱꦤꦮꦶꦱꦸꦢ꧀ꦣꦷꦲꦶ ꦮꦸꦝ꧀ꦞꦶꦁ ꦮꦶꦫꦹꦭ꦳꧀ꦲꦶꦁ ꦮꦺꦥꦸꦭ꧀ꦭꦁ ꦥꦠ꧀ꦮꦴ ꦚꦴꦟꦢꦱ꧀ꦱꦤꦮꦶꦱꦸꦢ꧀ꦣꦶꦑꦷꦫꦁ ꦗꦤꦺꦠ꧀ꦮꦴ ꦄꦤꦺꦏꦥꦛꦶꦱꦩ꧀ꦨꦶꦢꦴꦨꦶꦚ꧀ꦚꦴꦨꦫꦶꦠꦁ ꦄꦫꦲꦠ꧀ꦠꦦꦭꦁ ꦤꦶꦥ꧀ꦦꦴꦢꦺꦠꦶ. ꦠꦺꦤꦴꦲ ꦨꦒꦮꦴ – ‘‘ꦱꦢ꧀ꦣꦴ ꦧꦷꦗ’’ꦤ꧀ꦠꦶ.

ꦠꦠ꧀ꦡ ꦱꦶꦪꦴ ‘‘ꦥꦫꦺꦴꦥꦚ꧀ꦚꦴꦱꦏꦸꦱꦭꦣꦩ꧀ꦩꦺꦱꦸ ꦌꦏꦠꦺꦴ ꦈꦥ꧀ꦥꦗ꧀ꦗꦩꦴꦤꦺꦱꦸ ꦏꦱ꧀ꦩꦴ ꦱꦢ꧀ꦣꦴꦮ ꦧꦷꦗꦤ꧀ꦠꦶ ꦮꦸꦠ꧀ꦠꦴ’’ꦠꦶ? ꦮꦸꦕ꧀ꦕꦠꦺ – ꦧꦷꦗꦏꦶꦕ꧀ꦕꦏꦫꦟꦠꦺꦴ. ꦪꦡꦴ ꦲꦶ ꦠꦺꦱꦸ ꦮꦶꦚ꧀ꦚꦴꦟꦁꦪꦺꦮ ꦮꦶꦗꦴꦤꦤꦏꦶꦕ꧀ꦕꦁ ꦏꦫꦺꦴꦠꦶ, ꦌꦮꦁ ꦱꦢ꧀ꦣꦴ ꦧꦷꦗꦏꦶꦕ꧀ꦕꦁ, ꦱꦴ ꦕ ꦱꦧ꧀ꦧꦏꦸꦱꦭꦴꦤꦁ ꦩꦹꦭꦨꦹꦠꦴ. ꦪꦡꦴꦲ –

‘‘ꦱꦢ꧀ꦣꦴꦗꦴꦠꦺꦴ ꦈꦥꦱꦔ꧀ꦏꦩꦠꦶ, ꦈꦥꦱꦔ꧀ꦏꦩꦤ꧀ꦠꦺꦴ ꦥꦪꦶꦫꦸꦥꦴꦱꦠꦶ, ꦥꦪꦶꦫꦸꦥꦴꦱꦤ꧀ꦠꦺꦴ ꦱꦺꦴꦠꦁ ꦎꦢꦲꦠꦶ, ꦎꦲꦶꦠꦱꦺꦴꦠꦺꦴ ꦣꦩ꧀ꦩꦁ ꦱꦸꦟꦴꦠꦶ, ꦱꦸꦠ꧀ꦮꦴ ꦣꦩ꧀ꦩꦁ ꦣꦴꦫꦺꦠꦶ, ꦣꦠꦴꦤꦁ ꦣꦩ꧀ꦩꦴꦤꦁ ꦄꦠ꧀ꦡꦁ ꦈꦥꦥꦫꦶꦏ꧀ꦑꦠꦶ, ꦄꦠ꧀ꦡꦁ ꦈꦥꦥꦫꦶꦏ꧀ꦑꦠꦺꦴ ꦣꦩ꧀ꦩꦴ ꦤꦶꦗ꧀ꦙꦴꦤꦁ ꦑꦩꦤ꧀ꦠꦶ, ꦣꦩ꧀ꦩꦤꦶꦗ꧀ꦙꦴꦤꦏ꧀ꦑꦤ꧀ꦠꦶꦪꦴ ꦱꦠꦶ ꦖꦤ꧀ꦢꦺꦴ ꦗꦴꦪꦠꦶ, ꦖꦤ꧀ꦢꦗꦴꦠꦺꦴ ꦈꦱ꧀ꦱꦲꦠꦶ, ꦈꦱ꧀ꦱꦴꦲꦺꦠ꧀ꦮꦴ ꦠꦸꦭꦪꦠꦶ, ꦠꦸꦭꦪꦶꦠ꧀ꦮꦴ ꦥꦢꦲꦠꦶ, ꦥꦲꦶꦠꦠ꧀ꦠꦺꦴ ꦱꦩꦴꦤꦺꦴ ꦏꦴꦪꦺꦤ ꦕꦺꦮ ꦥꦫꦩꦱꦕ꧀ꦕꦁ ꦱꦕ꧀ꦖꦶꦏꦫꦺꦴꦠꦶ, ꦥꦚ꧀ꦚꦴꦪ ꦕ ꦤꦁ ꦄꦠꦶꦮꦶꦗ꧀ꦙꦥꦱ꧀ꦱꦠꦷ’’ꦠꦶ (ꦩ. ꦤꦶ. ꧒.꧑꧘꧓, ꧔꧓꧒).

ꦠꦥꦠꦶ ꦄꦏꦸꦱꦭꦺ ꦣꦩ꧀ꦩꦺ ꦏꦴꦪꦚ꧀ꦕꦴꦠꦶ ꦠꦥꦺꦴ; ꦆꦤ꧀ꦢ꧀ꦫꦶꦪꦱꦁꦮꦫꦮꦷꦫꦶꦪꦣꦸꦠꦔ꧀ꦒꦢꦸꦏ꧀ꦏꦫꦏꦴꦫꦶꦏꦴꦤꦁ ꦌꦠꦁ ꦄꦣꦶꦮꦕꦤꦁ. ꦆꦣ ꦥꦤ ꦆꦤ꧀ꦢ꧀ꦫꦶꦪꦱꦁꦮꦫꦺꦴ ꦄꦣꦶꦥ꧀ꦥꦺꦠꦺꦴ. ꦮꦸꦛ꧀ꦜꦷꦠꦶ ꦮꦱ꧀ꦱꦮꦸꦛ꧀ꦜꦶꦮꦴꦠꦮꦸꦛ꧀ꦜꦷꦠꦶꦄꦴꦢꦶꦤꦴ ꦄꦤꦺꦏꦮꦶꦣꦴ. ꦆꦣ ꦮꦱ꧀ꦱꦮꦸꦛ꧀ꦜꦶ ꦄꦣꦶꦥ꧀ꦥꦺꦠꦴ. ꦪꦡꦴ ꦲꦶ ꦧ꧀ꦫꦴꦲ꧀ꦩꦟꦱ꧀ꦱ ꦮꦱ꧀ꦱꦮꦸꦛ꧀ꦜꦶꦱꦩꦤꦸꦒ꧀ꦒꦲꦶꦠꦁ ꦧꦷꦗꦁ ꦧꦷꦗꦩꦹꦭꦏꦚ꧀ꦕ ꦱꦱ꧀ꦱꦁ ꦮꦶꦫꦸꦲꦠꦶ ꦤ ꦩꦶꦭꦴꦪꦠꦶ ꦤꦶꦥ꧀ꦦꦠ꧀ꦠꦶꦁ ꦒꦕ꧀ꦖꦠꦶ, ꦌꦮꦁ ꦨꦒꦮꦠꦺꦴ ꦆꦤ꧀ꦢ꧀ꦫꦶꦪꦱꦁꦮꦫꦱꦩꦤꦸꦒ꧀ꦒꦲꦶꦠꦴ ꦱꦢ꧀ꦣꦴ ꦱꦢ꧀ꦣꦴꦩꦹꦭꦴ ꦕ ꦱꦷꦭꦴꦢꦪꦺꦴ ꦣꦩ꧀ꦩꦴ ꦮꦶꦫꦸꦲꦤ꧀ꦠꦶ ꦤ ꦩꦶꦭꦴꦪꦤ꧀ꦠꦶ ꦤꦶꦥ꧀ꦦꦠ꧀ꦠꦶꦁ ꦒꦕ꧀ꦖꦤ꧀ꦠꦶ. ꦠꦺꦤꦴꦲ – ‘‘ꦠꦥꦺꦴ ꦮꦸꦛ꧀ꦜꦷ’’ꦠꦶ. ‘‘ꦥꦚ꧀ꦚꦴ ꦩꦺ’’ꦠꦶ ꦌꦠ꧀ꦡ ꦕ ꦮꦸꦠ꧀ꦠꦺꦴ ꦩꦺ-ꦱꦢ꧀ꦢꦺꦴ ꦆꦩꦺꦱꦸꦥꦶ ꦥꦢꦺꦱꦸ ꦪꦺꦴꦗꦺꦠꦧ꧀ꦧꦺꦴ ‘‘ꦱꦢ꧀ꦣꦴ ꦩꦺ ꦧꦷꦗꦁ, ꦠꦥꦺꦴ ꦩꦺ ꦮꦸꦛ꧀ꦜꦷ’’ꦠꦶ. ꦠꦺꦤ ꦏꦶꦁ ꦢꦷꦥꦺꦠꦶ? ꦪꦡꦴ, ꦧ꧀ꦫꦴꦲ꧀ꦩꦟ, ꦠꦪꦴ ꦮꦥꦶꦠꦺ ꦧꦷꦗꦺ ꦱꦕꦺ ꦮꦸꦛ꧀ꦜꦶ ꦄꦠ꧀ꦡꦶ, ꦱꦴꦣꦸ, ꦤꦺꦴ ꦕꦺ ꦄꦠ꧀ꦡꦶ, ꦈꦢꦏꦩ꧀ꦥꦶ ꦢꦴꦠꦧ꧀ꦧꦁ ꦲꦺꦴꦠꦶ, ꦠꦡꦴ ꦩꦪꦴ ꦲꦶꦫꦶ-ꦇꦱꦺ ꦥꦚ꧀ꦚꦴꦪꦸꦒꦤꦔ꧀ꦒꦭꦺ ꦩꦤꦺꦴꦪꦺꦴꦠ꧀ꦠꦺꦤ ꦌꦏꦴꦧꦢ꧀ꦣꦺ ꦏꦠꦺ ꦮꦷꦫꦶꦪꦧꦭꦶꦧꦢ꧀ꦢꦺ ꦪꦺꦴꦗꦺꦠ꧀ꦮꦴ ꦱꦠꦶꦥꦴꦕꦤꦺꦤ ꦮꦶꦗ꧀ꦙꦶꦠ꧀ꦮꦴ ꦄꦠ꧀ꦠꦤꦺꦴ ꦕꦶꦠ꧀ꦠꦱꦤ꧀ꦠꦴꦤꦑꦺꦠ꧀ꦠꦺ ꦱꦢ꧀ꦣꦴꦧꦷꦗꦺ ꦮꦥꦶꦠꦺ ꦮꦸꦛ꧀ꦜꦶ-ꦄꦨꦴꦮꦺꦴ ꦤꦴꦩ ꦤꦠ꧀ꦡꦶ. ꦄꦪꦁ ꦥꦤ ꦩꦺ ꦱꦠꦠꦁ ꦱꦩꦶꦠꦁ ꦠꦥꦺꦴ ꦮꦸꦛ꧀ꦜꦷꦠꦶ.

ꦥꦗꦴꦤꦴꦠꦶ ꦌꦠꦴꦪ ꦥꦸꦒ꧀ꦒꦭꦺꦴ, ꦱꦪꦁ ꦮꦴ ꦥꦗꦴꦤꦴꦠꦷꦠꦶ ꦥꦚ꧀ꦚꦴ, ꦱꦴ ꦏꦴꦩꦴꦮꦕꦫꦴꦢꦶꦨꦺꦢꦠꦺꦴ ꦄꦤꦺꦏꦮꦶꦣꦴ. ꦆꦣ ꦥꦤ ꦱꦲ ꦮꦶꦥꦱ꧀ꦱꦤꦴꦪ ꦩꦒ꧀ꦒꦥꦚ꧀ꦚꦴ ꦄꦣꦶꦥ꧀ꦥꦺꦠꦴ. ꦪꦸꦒꦤꦔ꧀ꦒꦭꦤ꧀ꦠꦶ ꦪꦸꦒꦚ꧀ꦕ ꦤꦔ꧀ꦒꦭꦚ꧀ꦕ. ꦪꦡꦴ ꦲꦶ ꦧ꧀ꦫꦴꦲ꧀ꦩꦟꦱ꧀ꦱ ꦪꦸꦒꦤꦔ꧀ꦒꦭꦁ, ꦌꦮꦁ ꦨꦒꦮꦠꦺꦴ ꦢꦸꦮꦶꦣꦴꦥꦶ ꦥꦚ꧀ꦚꦴ. ꦠꦠ꧀ꦡ ꦪꦡꦴ ꦪꦸꦒꦁ ꦇꦱꦴꦪ ꦈꦥꦤꦶꦱ꧀ꦱꦪꦁ ꦲꦺꦴꦠꦶ, ꦥꦸꦫꦠꦺꦴ ꦲꦺꦴꦠꦶ, ꦇꦱꦴꦧꦢ꧀ꦣꦁ ꦲꦺꦴꦠꦶ, ꦪꦺꦴꦠ꧀ꦠꦴꦤꦁ ꦤꦶꦱ꧀ꦱꦪꦁ ꦲꦺꦴꦠꦶ, ꦧꦭꦶꦧꦢ꧀ꦢꦴꦤꦁ ꦌꦏꦠꦺꦴ ꦒꦩꦤꦁ ꦣꦴꦫꦺꦠꦶ, ꦌꦮꦁ ꦥꦚ꧀ꦚꦴ ꦲꦶꦫꦶꦥꦩꦸꦑꦴꦤꦁ ꦣꦩ꧀ꦩꦴꦤꦁ ꦈꦥꦤꦶꦱ꧀ꦱꦪꦴ ꦲꦺꦴꦠꦶ. ꦪꦡꦴꦲ – ‘‘ꦥꦚ꧀ꦚꦸꦠ꧀ꦠꦫꦴ ꦱꦧ꧀ꦧꦺ ꦏꦸꦱꦭꦴ ꦣꦩ꧀ꦩꦴ’’ꦠꦶ (ꦄ. ꦤꦶ. ꧘.꧘꧓) ꦕ, ‘‘ꦥꦚ꧀ꦚꦴ ꦲꦶ ꦱꦺꦛ꧀ꦜꦴ ꦏꦸꦱꦭꦴ ꦮꦢꦤ꧀ꦠꦶ, ꦤꦏ꧀ꦑꦠ꧀ꦠꦫꦴꦗꦴꦫꦶꦮ ꦠꦴꦫꦏꦴꦤ’’ꦤ꧀ꦠꦶ (ꦗꦴ. ꧒.꧑꧗.꧘꧑) ꦕ. ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦸꦧ꧀ꦧꦔ꧀ꦒꦩꦛ꧀ꦜꦺꦤ ꦥꦸꦫꦠꦺꦴ ꦕ ꦲꦺꦴꦠꦶ. ꦪꦡꦴꦲ – ‘‘ꦱꦷꦭꦁ ꦲꦶꦫꦷ ꦕꦴꦥꦶ ꦱꦠꦚ꧀ꦕ ꦣꦩ꧀ꦩꦺꦴ, ꦄꦤ꧀ꦮꦴꦪꦶꦏꦴ ꦥꦚ꧀ꦚꦮꦠꦺꦴ ꦨꦮꦤ꧀ꦠꦷ’’ꦠꦶ. ꦲꦶꦫꦶꦮꦶꦥ꧀ꦥꦪꦺꦴꦒꦺꦤ ꦄꦤꦸꦥ꧀ꦥꦠ꧀ꦠꦶꦠꦺꦴ ꦇꦱꦴꦧꦢ꧀ꦣꦴ ꦲꦺꦴꦠꦶ, ꦩꦤꦺꦴꦱꦔ꧀ꦑꦴꦠꦱ꧀ꦱ ꦱꦩꦴꦣꦶꦪꦺꦴꦠ꧀ꦠꦱ꧀ꦱ ꦤꦶꦱ꧀ꦱꦪꦥꦕ꧀ꦕꦪꦠꦺꦴ ꦪꦺꦴꦠ꧀ꦠꦴꦤꦁ ꦤꦶꦱ꧀ꦱꦪꦺꦴ ꦲꦺꦴꦠꦶ, ꦄꦕ꧀ꦕꦴꦫꦢ꧀ꦣꦴꦠꦶꦭꦷꦤꦨꦴꦮꦥꦛꦶꦱꦺꦣꦤꦠꦺꦴ ꦮꦷꦫꦶꦪꦧꦭꦶꦧꦢ꧀ꦢꦴꦤꦁ ꦌꦏꦠꦺꦴ ꦒꦩꦤꦁ ꦣꦴꦫꦺꦠꦶ. ꦪꦡꦴ ꦕ ꦤꦔ꧀ꦒꦭꦁ ꦦꦴꦭꦪꦸꦠ꧀ꦠꦁ ꦏꦱꦤꦏꦴꦭꦺ ꦥꦡꦮꦶꦓꦤꦁ ꦨꦶꦤ꧀ꦢꦠꦶ, ꦩꦹꦭꦱꦤ꧀ꦠꦴꦤꦏꦴꦤꦶ ꦥꦢꦴꦭꦺꦠꦶ, ꦌꦮꦁ ꦱꦠꦶꦪꦸꦠ꧀ꦠꦴ ꦥꦚ꧀ꦚꦴ ꦮꦶꦥꦱ꧀ꦱꦤꦴꦏꦴꦭꦺ ꦣꦩ꧀ꦩꦴꦤꦁ ꦱꦤ꧀ꦠꦠꦶꦱꦩꦹꦲꦏꦶꦕ꧀ꦕꦴꦫꦩ꧀ꦩꦟꦓꦤꦁ ꦨꦶꦤ꧀ꦢꦠꦶ, ꦱꦧ꧀ꦧꦏꦶꦭꦺꦱꦩꦹꦭꦱꦤ꧀ꦠꦴꦤꦏꦴꦤꦶ ꦥꦢꦴꦭꦺꦠꦶ. ꦱꦴ ꦕ ꦑꦺꦴ ꦭꦺꦴꦏꦸꦠ꧀ꦠꦫꦴꦮ ꦆꦠꦫꦴ ꦥꦤ ꦭꦺꦴꦏꦶꦪꦴꦥꦶ ꦱꦶꦪꦴ. ꦠꦺꦤꦴꦲ – ‘‘ꦥꦚ꧀ꦚꦴ ꦩꦺ ꦪꦸꦒꦤꦔ꧀ꦒꦭ’’ꦤ꧀ꦠꦶ.

ꦲꦶꦫꦷꦪꦠꦶ ꦌꦠꦴꦪ ꦥꦸꦒ꧀ꦒꦭꦺꦴ, ꦱꦪꦁ ꦮꦴ ꦲꦶꦫꦷꦪꦠꦶ ꦄꦏꦸꦱꦭꦥ꧀ꦥꦮꦠ꧀ꦠꦶꦁ ꦗꦶꦒꦸꦕ꧀ꦖꦠꦷꦠꦶ ꦲꦶꦫꦷ. ꦠꦒ꧀ꦒꦲꦟꦺꦤ ꦱꦲꦕꦫꦟꦨꦴꦮꦠꦺꦴ ꦎꦠ꧀ꦠꦥ꧀ꦥꦁ ꦒꦲꦶꦠꦁꦪꦺꦮ ꦲꦺꦴꦠꦶ. ꦇꦱꦴꦠꦶ ꦪꦸꦒꦤꦔ꧀ꦒꦭꦱꦤ꧀ꦣꦴꦫꦶꦏꦴ ꦢꦴꦫꦸꦪꦛ꧀ꦜꦶ. ꦪꦡꦴ ꦲꦶ ꦧ꧀ꦫꦴꦲ꧀ꦩꦟꦱ꧀ꦱ ꦇꦱꦴ ꦪꦸꦒꦤꦔ꧀ꦒꦭꦁ ꦱꦤ꧀ꦣꦴꦫꦺꦠꦶ, ꦌꦮꦁ ꦨꦒꦮꦠꦺꦴꦥꦶ ꦲꦶꦫꦷ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦥꦚ꧀ꦚꦴꦱꦔ꧀ꦑꦴꦠꦁ ꦪꦸꦒꦤꦔ꧀ꦒꦭꦁ ꦱꦤ꧀ꦣꦴꦫꦺꦠꦶ ꦲꦶꦫꦶꦪꦴ ꦄꦱꦠꦶ ꦥꦚ꧀ꦚꦴꦪ ꦄꦨꦴꦮꦠꦺꦴ. ꦪꦡꦴ ꦕ ꦇꦱꦴꦥꦛꦶꦧꦢ꧀ꦣꦁ ꦪꦸꦒꦤꦔ꧀ꦒꦭꦁ ꦏꦶꦕ꧀ꦕꦏꦫꦁ ꦲꦺꦴꦠꦶ ꦄꦕꦭꦁ ꦄꦱꦶꦡꦶꦭꦁ, ꦌꦮꦁ ꦲꦶꦫꦶꦥꦛꦶꦧꦢ꧀ꦣꦴ ꦕ ꦥꦚ꧀ꦚꦴ ꦏꦶꦕ꧀ꦕꦏꦴꦫꦷ ꦲꦺꦴꦠꦶ ꦄꦕꦭꦴ ꦄꦱꦶꦡꦶꦭꦴ ꦄꦧ꧀ꦧꦺꦴꦏꦶꦟ꧀ꦟꦴ ꦄꦲꦶꦫꦶꦏꦺꦤ. ꦠꦺꦤꦴꦲ ‘‘ꦲꦶꦫꦷ ꦇꦱꦴ’’ꦠꦶ.

ꦩꦸꦤꦴꦠꦷꦠꦶ ꦩꦤꦺꦴ, ꦕꦶꦠ꧀ꦠꦱ꧀ꦱꦺꦠꦁ ꦄꦣꦶꦮꦕꦤꦁ. ꦆꦣ ꦥꦤ ꦩꦤꦺꦴꦱꦷꦱꦺꦤ ꦠꦁꦱꦩ꧀ꦥꦪꦸꦠ꧀ꦠꦺꦴ ꦱꦩꦴꦣꦶ ꦄꦣꦶꦥ꧀ꦥꦺꦠꦺꦴ. ꦪꦺꦴꦠ꧀ꦠꦤ꧀ꦠꦶ ꦫꦗ꧀ꦗꦸꦧꦤ꧀ꦣꦤꦁ. ꦠꦁ ꦠꦶꦮꦶꦣꦁ ꦇꦱꦴꦪ ꦱꦲ ꦪꦸꦒꦱ꧀ꦱ ꦧꦤ꧀ꦣꦤꦁ, ꦪꦸꦒꦺꦤ ꦱꦲ ꦧꦭꦶꦧꦢ꧀ꦢꦴꦤꦁ ꦧꦤ꧀ꦣꦤꦁ, ꦱꦴꦫꦡꦶꦤꦴ ꦱꦲ ꦧꦭꦶꦧꦢ꧀ꦢꦴꦤꦁ ꦧꦤ꧀ꦣꦤꦤ꧀ꦠꦶ. ꦠꦠ꧀ꦡ ꦪꦡꦴ ꦧ꧀ꦫꦴꦲ꧀ꦩꦟꦱ꧀ꦱ ꦪꦺꦴꦠ꧀ꦠꦁ ꦇꦱꦴꦪꦸꦒꦧꦭꦶꦧꦢ꧀ꦢꦺ ꦌꦏꦴꦧꦢ꧀ꦣꦺ ꦏꦠ꧀ꦮꦴ ꦱꦏꦏꦶꦕ꧀ꦕꦺ ꦥꦛꦶꦥꦴꦢꦺꦠꦶ, ꦌꦮꦁ ꦨꦒꦮꦠꦺꦴ ꦱꦩꦴꦣꦶ ꦱꦧ꧀ꦧꦺꦮ ꦠꦺ ꦲꦶꦫꦶꦥꦚ꧀ꦚꦴꦮꦷꦫꦶꦪꦣꦩ꧀ꦩꦺ ꦌꦏꦴꦫꦩ꧀ꦩꦟꦺ ꦄꦮꦶꦏ꧀ꦑꦺꦥꦨꦴꦮꦺꦤ ꦧꦤ꧀ꦣꦶꦠ꧀ꦮꦴ ꦱꦏꦏꦶꦕ꧀ꦕꦺ ꦥꦛꦶꦥꦴꦢꦺꦠꦶ. ꦠꦺꦤꦴꦲ – ‘‘ꦩꦤꦺꦴ ꦪꦺꦴꦠ꧀ꦠ’’ꦤ꧀ꦠꦶ.

ꦱꦫꦠꦶ ꦌꦠꦴꦪ ꦕꦶꦫꦏꦠꦴꦢꦶꦩꦠ꧀ꦡꦁ ꦥꦸꦒ꧀ꦒꦭꦺꦴ, ꦱꦪꦁ ꦮꦴ ꦱꦫꦠꦷꦠꦶ ꦱꦠꦶ, ꦱꦴ ꦄꦱꦩ꧀ꦩꦸꦱ꧀ꦱꦤꦭꦏ꧀ꦑꦟꦴ. ꦦꦴꦭꦺꦠꦷꦠꦶ ꦦꦴꦭꦺꦴ. ꦥꦴꦗꦺꦠꦶ ꦌꦠꦺꦤꦴꦠꦶ ꦥꦴꦗꦤꦁ. ꦠꦁ ꦆꦣ ‘‘ꦥꦴꦕꦤ’’ꦤ꧀ꦠꦶ ꦮꦸꦕ꧀ꦕꦠꦶ, ꦥꦠꦺꦴꦢꦱ꧀ꦱꦺꦠꦁ ꦄꦣꦶꦮꦕꦤꦁ. ꦦꦴꦭꦺꦴ ꦕ ꦥꦴꦕꦤꦚ꧀ꦕ ꦦꦴꦭꦥꦴꦕꦤꦁ. ꦪꦡꦴ ꦲꦶ ꦧ꧀ꦫꦴꦲ꧀ꦩꦟꦱ꧀ꦱ ꦦꦴꦭꦥꦴꦕꦤꦁ, ꦌꦮꦁ ꦨꦒꦮꦠꦺꦴ ꦮꦶꦥꦱ꧀ꦱꦤꦴꦪꦸꦠ꧀ꦠꦴ ꦩꦒ꧀ꦒꦪꦸꦠ꧀ꦠꦴ ꦕ ꦱꦠꦶ. ꦠꦠ꧀ꦡ ꦪꦡꦴ ꦦꦴꦭꦺꦴ ꦤꦔ꧀ꦒꦭꦩꦤꦸꦫꦏ꧀ꦑꦠꦶ, ꦥꦸꦫꦠꦺꦴ ꦕꦱ꧀ꦱ ꦒꦕ꧀ꦖꦠꦶ, ꦌꦮꦁ ꦱꦠꦶ ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦒꦠꦶꦪꦺꦴ ꦱꦩꦤ꧀ꦮꦺꦱꦩꦴꦤꦴ ꦄꦴꦫꦩ꧀ꦩꦟꦺ ꦮꦴ ꦈꦥꦛ꧀ꦜꦴꦥꦪꦩꦴꦤꦴ ꦥꦚ꧀ꦚꦴꦤꦔ꧀ꦒꦭꦁ ꦫꦏ꧀ꦑꦠꦶ, ꦠꦡꦴ ꦲꦶ ‘‘ꦱꦠꦴꦫꦏ꧀ꦑꦺꦤ ꦕꦺꦠꦱꦴ ꦮꦶꦲꦫꦠꦷ’’ꦠꦶꦄꦴꦢꦷꦱꦸ (ꦄ. ꦤꦶ. ꧑꧐.꧒꧐) ‘‘ꦄꦴꦫꦏ꧀ꦑꦴ’’ꦠꦶ ꦮꦸꦠ꧀ꦠꦴ. ꦄꦱꦩ꧀ꦩꦸꦱ꧀ꦱꦤꦮꦱꦺꦤ ꦕꦱ꧀ꦱ ꦥꦸꦫꦠꦺꦴ ꦲꦺꦴꦠꦶ. ꦱꦠꦶꦥꦫꦶꦕꦶꦠꦺ ꦲꦶ ꦣꦩ꧀ꦩꦺ ꦥꦚ꧀ꦚꦴ ꦥꦗꦴꦤꦴꦠꦶ, ꦤꦺꦴ ꦱꦩ꧀ꦩꦸꦛ꧀ꦜꦺ. ꦪꦡꦴ ꦕ ꦥꦴꦕꦤꦁ ꦧꦭꦶꦧꦢ꧀ꦢꦴꦤꦁ ꦮꦶꦗ꧀ꦙꦤꦨꦪꦁ ꦢꦱ꧀ꦱꦺꦤ꧀ꦠꦁ ꦱꦁꦱꦷꦢꦤꦁ ꦤ ꦢꦺꦠꦶ, ꦈꦥ꧀ꦥꦡꦒꦩꦤꦚ꧀ꦕ ꦮꦴꦫꦺꦠꦶ, ꦌꦮꦁ ꦱꦠꦶ ꦮꦷꦫꦶꦪꦧꦭꦶꦧꦢ꧀ꦢꦴꦤꦁ ꦄꦥꦴꦪꦨꦪꦁ ꦢꦱ꧀ꦱꦺꦤ꧀ꦠꦷ ꦏꦺꦴꦱꦗ꧀ꦗꦱꦁꦱꦷꦢꦤꦁ ꦤ ꦢꦺꦠꦶ, ꦏꦴꦩꦒꦸꦟꦱꦔ꧀ꦑꦴꦠꦺ ꦄꦒꦺꦴꦕꦫꦺ ꦕꦴꦫꦁ ꦤꦶꦮꦴꦫꦺꦠ꧀ꦮꦴ ꦏꦩ꧀ꦩꦛ꧀ꦜꦴꦤꦺ ꦤꦶꦪꦺꦴꦗꦺꦤ꧀ꦠꦷ ꦈꦥ꧀ꦥꦡꦒꦩꦤꦚ꧀ꦕ ꦮꦴꦫꦺꦠꦶ. ꦠꦺꦤꦴꦲ – ‘‘ꦱꦠꦶ ꦩꦺ ꦦꦴꦭꦥꦴꦕꦤ’’ꦤ꧀ꦠꦶ.

꧗꧘. ꦏꦴꦪꦒꦸꦠ꧀ꦠꦺꦴꦠꦶ ꦠꦶꦮꦶꦣꦺꦤ ꦏꦴꦪꦱꦸꦕꦫꦶꦠꦺꦤ ꦒꦸꦠ꧀ꦠꦺꦴ. ꦮꦕꦷꦒꦸꦠ꧀ꦠꦺꦴꦠꦶ ꦕꦠꦸꦧ꧀ꦧꦶꦣꦺꦤ ꦮꦕꦷꦱꦸꦕꦫꦶꦠꦺꦤ ꦒꦸꦠ꧀ꦠꦺꦴ. ꦌꦠ꧀ꦠꦴꦮꦠꦴ ꦥꦴꦠꦶꦩꦺꦴꦏ꧀ꦑꦱꦁꦮꦫꦱꦷꦭꦁ ꦮꦸꦠ꧀ꦠꦁ. ꦄꦴꦲꦴꦫꦺ ꦈꦢꦫꦺ ꦪꦠꦺꦴꦠꦶ ꦌꦠ꧀ꦡ ꦄꦴꦲꦴꦫꦩꦸꦑꦺꦤ ꦱꦧ꧀ꦧꦥꦕ꧀ꦕꦪꦴꦤꦁ ꦱꦔ꧀ꦒꦲꦶꦠꦠ꧀ꦠꦴ ꦕꦠꦸꦧ꧀ꦧꦶꦣꦺꦥꦶ ꦥꦕ꧀ꦕꦪꦺ ꦪꦠꦺꦴ ꦱꦁꦪꦠꦺꦴ ꦤꦶꦫꦸꦥꦏ꧀ꦏꦶꦭꦺꦱꦺꦴꦠꦶ ꦄꦠ꧀ꦡꦺꦴ. ꦆꦩꦶꦤꦴ ꦄꦴꦗꦷꦮꦥꦴꦫꦶꦱꦸꦢ꧀ꦣꦶꦱꦷꦭꦁ ꦮꦸꦠ꧀ꦠꦁ. ꦈꦢꦫꦺ ꦪꦠꦺꦴꦠꦶ ꦈꦢꦫꦺ ꦪꦠꦺꦴ ꦱꦁꦪꦠꦺꦴ ꦩꦶꦠꦨꦺꦴꦗꦷ, ꦄꦴꦲꦴꦫꦺ ꦩꦠ꧀ꦠꦚ꧀ꦚꦹꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦆꦩꦶꦤꦴ ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦠꦴꦩꦸꦑꦺꦤ ꦥꦕ꧀ꦕꦪꦥꦛꦶꦱꦺꦮꦤꦱꦷꦭꦁ ꦮꦸꦠ꧀ꦠꦁ. ꦠꦺꦤ ꦏꦶꦁ ꦢꦷꦥꦺꦠꦶ? ꦪꦡꦴ ꦠ꧀ꦮꦁ, ꦧ꧀ꦫꦴꦲ꧀ꦩꦟ, ꦧꦷꦗꦁ ꦮꦥꦶꦠ꧀ꦮꦴ ꦱꦱ꧀ꦱꦥꦫꦶꦥꦴꦭꦤꦠ꧀ꦡꦁ ꦏꦟ꧀ꦛꦏꦮꦠꦶꦁ ꦮꦴ ꦫꦸꦏ꧀ꦑꦮꦠꦶꦁ ꦮꦴ ꦥꦴꦏꦴꦫꦥꦫꦶꦏ꧀ꦑꦺꦥꦁ ꦮꦴ ꦏꦫꦺꦴꦱꦶ, ꦠꦺꦤ ꦠꦺ ꦒꦺꦴꦩꦲꦶꦁꦱꦩꦶꦒꦒꦟꦴ ꦥꦮꦺꦱꦁ ꦄꦭꦨꦤ꧀ꦠꦴ ꦱꦱ꧀ꦱꦁ ꦤ ꦮꦶꦭꦸꦩ꧀ꦥꦤ꧀ꦠꦶ, ꦌꦮꦩꦲꦩ꧀ꦥꦶ ꦱꦢ꧀ꦣꦴꦧꦷꦗꦁ ꦮꦥꦶꦠ꧀ꦮꦴ ꦤꦴꦤꦥ꧀ꦥꦏꦴꦫꦏꦸꦱꦭꦱꦱ꧀ꦱꦥꦫꦶꦥꦴꦭꦤꦠ꧀ꦡꦁ ꦏꦴꦪꦮꦕꦷꦄꦴꦲꦴꦫꦒꦸꦠ꧀ꦠꦶꦩꦪꦁ ꦠꦶꦮꦶꦣꦥꦫꦶꦏ꧀ꦑꦺꦥꦁ ꦏꦫꦺꦴꦩꦶ. ꦠꦺꦤ ꦩꦺ ꦫꦴꦒꦴꦢꦶꦄꦏꦸꦱꦭꦣꦩ꧀ꦩꦒꦺꦴꦩꦲꦶꦁꦱꦩꦶꦒꦒꦟꦴ ꦥꦮꦺꦱꦁ ꦄꦭꦨꦤ꧀ꦠꦴ ꦤꦴꦤꦥ꧀ꦥꦏꦴꦫꦏꦸꦱꦭꦱꦱ꧀ꦱꦁ ꦤ ꦮꦶꦭꦸꦩ꧀ꦥꦤ꧀ꦠꦷꦠꦶ.

ꦱꦕ꧀ꦕꦁ ꦏꦫꦺꦴꦩꦶ ꦤꦶꦢ꧀ꦢꦴꦤꦤ꧀ꦠꦶ ꦌꦠ꧀ꦡ ꦢ꧀ꦮꦷꦲꦶ ꦢ꧀ꦮꦴꦫꦺꦲꦶ ꦄꦮꦶꦱꦁꦮꦴꦢꦤꦁ ꦱꦕ꧀ꦕꦁ. ꦤꦶꦢ꧀ꦢꦴꦤꦤ꧀ꦠꦶ ꦖꦺꦢꦤꦁ ꦭꦸꦤꦤꦁ ꦈꦥ꧀ꦥꦴꦛꦤꦁ, ꦏꦫꦟꦠ꧀ꦡꦺ ꦕꦺꦠꦁ ꦈꦥꦪꦺꦴꦒꦮꦕꦤꦁ ꦮꦺꦢꦶꦠꦧ꧀ꦧꦁ. ꦄꦪꦚ꧀ꦲꦶ ꦌꦠ꧀ꦡ ꦄꦠ꧀ꦡꦺꦴ ‘‘ꦱꦕ꧀ꦕꦺꦤ ꦏꦫꦺꦴꦩꦶ ꦤꦶꦢ꧀ꦢꦴꦤ’’ꦤ꧀ꦠꦶ. ꦏꦶꦁ ꦮꦸꦠ꧀ꦠꦁ ꦲꦺꦴꦠꦶ? ꦪꦡꦴ ꦠ꧀ꦮꦁ ꦧꦴꦲꦶꦫꦁ ꦏꦱꦶꦁ ꦏꦱꦶꦠ꧀ꦮꦴ ꦱꦱ꧀ꦱꦢꦹꦱꦏꦴꦤꦁ ꦠꦶꦟꦴꦤꦁ ꦲꦠ꧀ꦡꦺꦤ ꦮꦴ ꦄꦱꦶꦠꦺꦤ ꦮꦴ ꦤꦶꦢ꧀ꦢꦴꦤꦁ ꦏꦫꦺꦴꦱꦶ; ꦌꦮꦩꦲꦩ꧀ꦥꦶ ꦄꦗ꧀ꦙꦠ꧀ꦠꦶꦏꦁ ꦏꦱꦶꦁ ꦏꦱꦶꦠ꧀ꦮꦴ ꦏꦸꦱꦭꦱꦱ꧀ꦱꦢꦹꦱꦏꦴꦤꦁ ꦮꦶꦱꦁꦮꦴꦢꦤꦠꦶꦟꦴꦤꦁ ꦱꦕ꧀ꦕꦺꦤ ꦤꦶꦢ꧀ꦢꦴꦤꦁ ꦏꦫꦺꦴꦩꦶ. ꦚꦴꦟꦱꦕ꧀ꦕꦁ ꦮꦴ ꦌꦠ꧀ꦡ ꦱꦕ꧀ꦕꦤ꧀ꦠꦶ ꦮꦺꦢꦶꦠꦧ꧀ꦧꦁ, ꦪꦁ ꦠꦁ ꦪꦡꦴꦨꦹꦠꦚꦴꦟꦤ꧀ꦠꦶ ꦮꦸꦕ꧀ꦕꦠꦶ. ꦠꦺꦤ ꦄꦠ꧀ꦠꦱꦚ꧀ꦚꦴꦢꦷꦤꦁ ꦠꦶꦟꦴꦤꦁ ꦤꦶꦢ꧀ꦢꦴꦤꦁ ꦏꦫꦺꦴꦩꦷꦠꦶ ꦌꦮꦁ ꦪꦺꦴꦗꦺꦠꦧ꧀ꦧꦁ. ꦄꦡ ꦮꦴ ꦤꦶꦢ꧀ꦢꦴꦤꦤ꧀ꦠꦶ ꦖꦺꦢꦏꦁ ꦭꦴꦮꦏꦁ, ꦈꦥ꧀ꦥꦴꦛꦏꦤ꧀ꦠꦶ ꦄꦠ꧀ꦡꦺꦴ. ꦌꦮꦁ ꦱꦤ꧀ꦠꦺ ꦪꦡꦴ ꦠ꧀ꦮꦁ ꦢꦴꦱꦁ ꦮꦴ ꦏꦩ꧀ꦩꦏꦫꦁ ꦮꦴ ꦤꦶꦢ꧀ꦢꦴꦤꦁ ꦏꦫꦺꦴꦱꦶ, ‘‘ꦤꦶꦢ꧀ꦢꦺꦲꦶ ꦠꦶꦟꦴꦤꦷ’’ꦠꦶ ꦠꦶꦟꦴꦤꦁ ꦖꦺꦢꦏꦁ ꦭꦴꦮꦏꦁ ꦈꦥ꧀ꦥꦴꦛꦏꦁ ꦏꦫꦺꦴꦱꦶ; ꦌꦮꦩꦲꦁ ꦱꦕ꧀ꦕꦁ ꦏꦫꦺꦴꦩꦷꦠꦶ ꦈꦥꦪꦺꦴꦒꦮꦕꦤꦺꦤꦺꦮ ꦮꦠ꧀ꦠꦸꦁ ꦪꦸꦗ꧀ꦗꦠꦶ. ꦄꦡ ꦮꦴ ꦱꦕ꧀ꦕꦤ꧀ꦠꦶ ꦢꦶꦛ꧀ꦜꦶꦱꦕ꧀ꦕꦁ. ꦠꦩꦲꦁ ꦤꦶꦢ꧀ꦢꦴꦤꦁ ꦏꦫꦺꦴꦩꦶ, ꦖꦶꦤ꧀ꦢꦶꦠꦧ꧀ꦧꦁ ꦭꦸꦤꦶꦠꦧ꧀ꦧꦁ ꦈꦥ꧀ꦥꦴꦛꦺꦠꦧ꧀ꦧꦁ ꦏꦫꦺꦴꦩꦷꦠꦶ ꦌꦮꦩ꧀ꦥꦶ ꦈꦥꦪꦺꦴꦒꦮꦕꦤꦺꦤꦺꦮ ꦮꦠ꧀ꦠꦸꦁ ꦪꦸꦗ꧀ꦗꦠꦶ.

ꦱꦺꦴꦫꦕ꧀ꦕꦁ ꦩꦺ ꦥꦩꦺꦴꦕꦤꦤ꧀ꦠꦶ ꦌꦠ꧀ꦡ ꦪꦁ ꦠꦁ ‘‘ꦏꦴꦪꦶꦏꦺꦴ ꦄꦮꦷꦠꦶꦏ꧀ꦏꦩꦺꦴ, ꦮꦴꦕꦱꦶꦏꦺꦴ ꦄꦮꦷꦠꦶꦏ꧀ꦏꦩꦺꦴ’’ꦠꦶ, ꦌꦮꦁ ꦱꦷꦭꦩꦺꦮ ‘‘ꦱꦺꦴꦫꦕ꧀ꦕ’’ꦤ꧀ꦠꦶ ꦮꦸꦠ꧀ꦠꦁ, ꦤ ꦠꦁ ꦆꦣ ꦄꦣꦶꦥ꧀ꦥꦺꦠꦁ, ꦮꦸꦠ꧀ꦠꦩꦺꦮ ꦌꦠꦁ ‘‘ꦏꦴꦪꦒꦸꦠ꧀ꦠꦺꦴ’’ꦠꦶꦄꦴꦢꦶꦤꦴ ꦤꦪꦺꦤ, ꦄꦫꦲꦠ꧀ꦠꦦꦭꦁ ꦥꦤ ꦄꦣꦶꦥ꧀ꦥꦺꦠꦁ. ꦠꦩ꧀ꦥꦶ ꦲꦶ ꦱꦸꦤ꧀ꦢꦫꦺ ꦤꦶꦧ꧀ꦧꦴꦤꦺ ꦫꦠꦨꦴꦮꦠꦺꦴ ‘‘ꦱꦺꦴꦫꦕ꧀ꦕ’’ꦤ꧀ꦠꦶ ꦮꦸꦕ꧀ꦕꦠꦶ. ꦥꦩꦺꦴꦕꦤꦤ꧀ꦠꦶ ꦪꦺꦴꦒ꧀ꦒꦮꦶꦱ꧀ꦱꦗ꧀ꦗꦤꦁ. ꦏꦶꦁ ꦮꦸꦠ꧀ꦠꦁ ꦲꦺꦴꦠꦶ? ꦪꦡꦴ ꦠꦮ ꦥꦩꦺꦴꦕꦤꦁ ꦥꦸꦤꦥꦶ ꦱꦴꦪꦤ꧀ꦲꦺ ꦮꦴ ꦢꦸꦠꦶꦪꦢꦶꦮꦱꦺ ꦮꦴ ꦄꦤꦴꦒꦠꦱꦁꦮꦕ꧀ꦖꦫꦺ ꦮꦴ ꦪꦺꦴꦗꦺꦠꦧ꧀ꦧꦠꦺꦴ ꦄꦥ꧀ꦥꦩꦺꦴꦕꦤꦩꦺꦮ ꦲꦺꦴꦠꦶ, ꦤ ꦩꦩ ꦌꦮꦁ. ꦤ ꦲꦶ ꦩꦩ ꦄꦤ꧀ꦠꦫꦴ ꦩꦺꦴꦕꦤꦁ ꦤꦴꦩ ꦄꦠ꧀ꦡꦶ. ꦄꦲꦚ꧀ꦲꦶ ꦢꦷꦥꦔ꧀ꦏꦫꦢꦱꦧꦭꦏꦴꦭꦠꦺꦴ ꦥꦨꦸꦠꦶ ꦥꦚ꧀ꦚꦴꦤꦔ꧀ꦒꦭꦺ ꦮꦷꦫꦶꦪꦧꦭꦶꦧꦢ꧀ꦢꦺ ꦪꦺꦴꦗꦺꦠ꧀ꦮꦴ ꦕꦠ꧀ꦠꦴꦫꦶ ꦄꦱꦔ꧀ꦑ꧀ꦪꦺꦪ꧀ꦪꦴꦤꦶ ꦏꦥ꧀ꦥꦱꦠꦱꦲꦱ꧀ꦱꦚ꧀ꦕ ꦩꦲꦴꦏꦱꦶꦁ ꦏꦱꦤ꧀ꦠꦺꦴ ꦠꦴꦮ ꦤ ꦩꦸꦚ꧀ꦕꦶꦁ, ꦪꦴꦮ ꦤ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦗ꧀ꦙꦶ. ꦪꦢꦴ ꦕ ꦩꦺ ꦱꦧ꧀ꦧꦁ ꦠꦁ ꦏꦴꦭꦁ ꦑꦺꦥꦺꦠ꧀ꦮꦴ ꦧꦺꦴꦣꦶꦫꦸꦏ꧀ꦑꦩꦹꦭꦺ ꦄꦥꦫꦴꦗꦶꦠꦥꦭ꧀ꦭꦔ꧀ꦏꦺ ꦤꦶꦱꦶꦤ꧀ꦤꦱ꧀ꦱ ꦱꦧ꧀ꦧꦒꦸꦟꦥꦫꦶꦮꦴꦫꦁ ꦄꦫꦲꦠ꧀ꦠꦦꦭꦁ ꦈꦢꦥꦴꦢꦶ, ꦠꦢꦴ ꦩꦪꦴ ꦠꦁ ꦱꦧ꧀ꦧꦸꦱ꧀ꦱꦸꦏ꧀ꦏꦥꦛꦶꦥ꧀ꦥꦱ꧀ꦱꦢ꧀ꦣꦶꦥ꧀ꦥꦠ꧀ꦠꦶꦪꦴ ꦥꦩꦸꦠ꧀ꦠꦁ, ꦤ ꦢꦴꦤꦶ ꦥꦸꦤ ꦪꦺꦴꦗꦺꦠꦧ꧀ꦧꦁ ꦨꦮꦶꦱ꧀ꦱꦠꦷꦠꦶ. ꦌꦠꦩꦠ꧀ꦡꦁ ꦱꦤ꧀ꦣꦴꦪꦴꦲ ꦨꦒꦮꦴ – ‘‘ꦱꦺꦴꦫꦕ꧀ꦕꦁ ꦩꦺ ꦥꦩꦺꦴꦕꦤ’’ꦤ꧀ꦠꦶ.

꧗꧙. ꦮꦷꦫꦶꦪꦁ ꦩꦺ ꦣꦸꦫꦣꦺꦴꦫꦪ꧀ꦲꦤ꧀ꦠꦶ ꦌꦠ꧀ꦡ ꦮꦷꦫꦶꦪꦤ꧀ꦠꦶ ‘‘ꦏꦴꦪꦶꦏꦺꦴ ꦮꦴ, ꦕꦺꦠꦱꦶꦏꦺꦴ ꦮꦴ ꦮꦷꦫꦶꦪꦴꦫꦩ꧀ꦨꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦥꦣꦴꦤꦁ. ꦣꦸꦫꦴꦪꦁ ꦣꦺꦴꦫꦪ꧀ꦲꦁ ꦣꦸꦫꦣꦺꦴꦫꦪ꧀ꦲꦁ, ꦣꦸꦫꦁ ꦮꦲꦠꦷꦠꦶ ꦄꦠ꧀ꦡꦺꦴ. ꦪꦡꦴ ꦲꦶ ꦧ꧀ꦫꦴꦲ꧀ꦩꦟꦱ꧀ꦱ ꦣꦸꦫꦴꦪꦁ ꦣꦺꦴꦫꦪ꧀ꦲꦴꦏꦝ꧀ꦞꦶꦠꦁ ꦤꦔ꧀ꦒꦭꦁ ꦨꦹꦩꦶꦓꦤꦁ ꦨꦶꦤ꧀ꦢꦠꦶ, ꦩꦹꦭꦱꦤ꧀ꦠꦴꦤꦏꦴꦤꦶ ꦕ ꦥꦢꦴꦭꦺꦠꦶ, ꦌꦮꦁ ꦨꦒꦮꦠꦺꦴ ꦮꦷꦫꦶꦪꦴꦏꦝ꧀ꦞꦶꦠꦁ ꦥꦚ꧀ꦚꦴꦤꦔ꧀ꦒꦭꦁ ꦪꦡꦴꦮꦸꦠ꧀ꦠꦁ ꦓꦤꦁ ꦨꦶꦤ꧀ꦢꦠꦶ, ꦏꦶꦭꦺꦱꦱꦤ꧀ꦠꦴꦤꦏꦴꦤꦶ ꦕ ꦥꦢꦴꦭꦺꦠꦶ. ꦠꦺꦤꦴꦲ – ‘‘ꦮꦷꦫꦶꦪꦁ ꦩꦺ ꦣꦸꦫꦣꦺꦴꦫꦪ꧀ꦲ’’ꦤ꧀ꦠꦶ. ꦄꦡ ꦮꦴ ꦥꦸꦫꦶꦩꦣꦸꦫꦁ ꦮꦲꦤ꧀ꦠꦴ ꦣꦸꦫꦴ, ꦩꦹꦭꦣꦸꦫꦁ ꦮꦲꦤ꧀ꦠꦴ ꦣꦺꦴꦫꦪ꧀ꦲꦴ; ꦣꦸꦫꦴ ꦕ ꦣꦺꦴꦫꦪ꧀ꦲꦴ ꦕ ꦣꦸꦫꦣꦺꦴꦫꦪ꧀ꦲꦴ. ꦠꦠ꧀ꦡ ꦪꦡꦴ ꦧ꧀ꦫꦴꦲ꧀ꦩꦟꦱ꧀ꦱ ꦌꦏꦩꦺꦏꦱ꧀ꦩꦶꦁ ꦤꦔ꧀ꦒꦭꦺ ꦕꦠꦸꦧꦭꦶꦧꦢ꧀ꦢꦥ꧀ꦥꦨꦺꦢꦁ ꦣꦸꦫꦣꦺꦴꦫꦪ꧀ꦲꦁ ꦮꦲꦤ꧀ꦠꦁ ꦈꦥ꧀ꦥꦤ꧀ꦤꦴꦤꦸꦥ꧀ꦥꦤ꧀ꦤꦠꦶꦟꦩꦹꦭꦓꦴꦠꦁ ꦱꦱ꧀ꦱꦱꦩ꧀ꦥꦠ꧀ꦠꦶꦚ꧀ꦕ ꦱꦴꦣꦺꦠꦶ, ꦌꦮꦁ ꦨꦒꦮꦠꦺꦴ ꦕꦠꦸꦱꦩ꧀ꦩꦥ꧀ꦥꦣꦴꦤꦮꦷꦫꦶꦪꦥ꧀ꦥꦨꦺꦢꦁ ꦣꦸꦫꦣꦺꦴꦫꦪ꧀ꦲꦁ ꦮꦲꦤ꧀ꦠꦁ ꦈꦥ꧀ꦥꦤ꧀ꦤꦴꦤꦸꦥ꧀ꦥꦤ꧀ꦤꦴꦏꦸꦱꦭꦩꦹꦭꦓꦴꦠꦁ ꦏꦸꦱꦭꦱꦩ꧀ꦥꦠ꧀ꦠꦶꦚ꧀ꦕ ꦱꦴꦣꦺꦠꦶ. ꦠꦺꦤꦴꦲ – ‘‘ꦮꦷꦫꦶꦪꦁ ꦩꦺ ꦣꦸꦫꦣꦺꦴꦫꦪ꧀ꦲ’’ꦤ꧀ꦠꦶ.

ꦪꦺꦴꦒꦏ꧀ꦑꦺꦩꦴꦣꦶꦮꦴꦲꦤꦤ꧀ꦠꦶ ꦌꦠ꧀ꦡ ꦪꦺꦴꦒꦺꦲꦶ ꦑꦺꦩꦠ꧀ꦠꦴ ‘‘ꦪꦺꦴꦒꦏ꧀ꦑꦺꦩ’’ꦤ꧀ꦠꦶ ꦤꦶꦧ꧀ꦧꦴꦤꦁ ꦮꦸꦕ꧀ꦕꦠꦶ, ꦠꦁ ꦄꦣꦶꦏꦠ꧀ꦮꦴ ꦮꦴꦲꦷꦪꦠꦶ, ꦄꦨꦶꦩꦸꦑꦁ ꦮꦴ ꦮꦴꦲꦷꦪꦠꦷꦠꦶ ꦄꦣꦶꦮꦴꦲꦤꦁ. ꦪꦺꦴꦒꦏ꧀ꦑꦺꦩꦱ꧀ꦱ ꦄꦣꦶꦮꦴꦲꦤꦁ ꦪꦺꦴꦒꦏ꧀ꦑꦺꦩꦴꦣꦶꦮꦴꦲꦤꦁ. ꦠꦺꦤ ꦏꦶꦁ ꦢꦷꦥꦺꦠꦶ? ꦪꦡꦴ ꦠꦮ ꦣꦸꦫꦣꦺꦴꦫꦪ꧀ꦲꦁ ꦥꦸꦫꦠ꧀ꦡꦶꦩꦁ ꦢꦶꦱꦁ ꦥꦕ꧀ꦖꦶꦩꦴꦢꦷꦱꦸ ꦮꦴ ꦄꦚ꧀ꦚꦠꦫꦁ ꦄꦨꦶꦩꦸꦑꦁ ꦮꦴꦲꦷꦪꦠꦶ, ꦠꦡꦴ ꦩꦩ ꦣꦸꦫꦣꦺꦴꦫꦪ꧀ꦲꦁ ꦤꦶꦧ꧀ꦧꦴꦤꦴꦨꦶꦩꦸꦑꦁ ꦮꦴꦲꦷꦪꦠꦶ.

ꦌꦮꦁ ꦮꦴꦲꦶꦪꦩꦴꦤꦚ꧀ꦕ ꦒꦕ꧀ꦖꦠꦶ ꦄꦤꦶꦮꦠ꧀ꦠꦤ꧀ꦠꦁ. ꦪꦡꦴ ꦠꦮ ꦤꦔ꧀ꦒꦭꦁ ꦮꦲꦤ꧀ꦠꦁ ꦣꦸꦫꦣꦺꦴꦫꦪ꧀ꦲꦁ ꦑꦺꦠ꧀ꦠꦏꦺꦴꦛꦶꦁ ꦥꦠ꧀ꦮꦴ ꦥꦸꦤ ꦤꦶꦮꦠ꧀ꦠꦠꦶ, ꦌꦮꦁ ꦄꦤꦶꦮꦠ꧀ꦠꦤ꧀ꦠꦁ ꦢꦷꦥꦔ꧀ꦏꦫꦏꦴꦭꦠꦺꦴ ꦥꦨꦸꦠꦶ ꦒꦕ꧀ꦖꦠꦺꦮ. ꦪꦱ꧀ꦩꦴ ꦮꦴ ꦠꦺꦤ ꦠꦺꦤ ꦩꦒ꧀ꦒꦺꦤ ꦥꦲꦷꦤꦴ ꦏꦶꦭꦺꦱꦴ ꦥꦸꦤꦥ꧀ꦥꦸꦤꦁ ꦥꦲꦴꦠꦧ꧀ꦧꦴ ꦤ ꦲꦺꦴꦤ꧀ꦠꦶ, ꦪꦡꦴ ꦠꦮ ꦤꦔ꧀ꦒꦭꦺꦤ ꦖꦶꦤ꧀ꦤꦴꦤꦶ ꦠꦶꦟꦴꦤꦶ ꦥꦸꦤꦥꦶ ꦄꦥꦫꦱ꧀ꦩꦶꦁ ꦱꦩꦪꦺ ꦖꦶꦤ꧀ꦢꦶꦠꦧ꧀ꦧꦴꦤꦶ ꦲꦺꦴꦤ꧀ꦠꦶ, ꦠꦱ꧀ꦩꦴꦥꦶ ꦌꦠꦁ ꦥꦜꦩꦩꦒ꧀ꦒꦮꦱꦺꦤ ꦢꦶꦛ꧀ꦜꦺꦏꦛ꧀ꦜꦺ ꦏꦶꦭꦺꦱꦺ, ꦢꦸꦠꦶꦪꦮꦱꦺꦤ ꦎꦭ꦳ꦴꦫꦶꦏꦺ, ꦠꦠꦶꦪꦮꦱꦺꦤ ꦄꦤꦸꦱꦲꦒꦠꦺ ꦏꦶꦭꦺꦱꦺ, ꦕꦠꦸꦠ꧀ꦡꦮꦱꦺꦤ ꦱꦧ꧀ꦧꦏꦶꦭꦺꦱꦺ ꦥꦗꦲꦤ꧀ꦠꦁ ꦒꦕ꧀ꦖꦠꦶ ꦄꦤꦶꦮꦠ꧀ꦠꦤ꧀ꦠꦁ. ꦄꦡ ꦮꦴ ꦒꦕ꧀ꦖꦠꦶ ꦄꦤꦶꦮꦠ꧀ꦠꦤ꧀ꦠꦶ ꦤꦶꦮꦠ꧀ꦠꦤꦫꦲꦶꦠꦁ ꦲꦸꦠ꧀ꦮꦴ ꦒꦕ꧀ꦖꦠꦷꦠꦶ ꦄꦠ꧀ꦡꦺꦴ. ꦤ꧀ꦠꦶ ꦠꦁ ꦣꦸꦫꦣꦺꦴꦫꦪ꧀ꦲꦁ. ꦌꦮꦩ꧀ꦥꦺꦠ꧀ꦡ ꦥꦢꦕ꧀ꦖꦺꦢꦺꦴ ꦮꦺꦢꦶꦠꦧ꧀ꦧꦺꦴ. ꦌꦮꦁ ꦒꦕ꧀ꦖꦤ꧀ꦠꦚ꧀ꦕ ꦪꦡꦴ ꦠꦮ ꦣꦸꦫꦣꦺꦴꦫꦪ꧀ꦲꦁ ꦤ ꦠꦁ ꦜꦴꦤꦁ ꦒꦕ꧀ꦖꦠꦶ, ꦪꦠ꧀ꦡ ꦒꦤ꧀ꦠ꧀ꦮꦴ ꦏꦱ꧀ꦱꦏꦺꦴ ꦄꦱꦺꦴꦏꦺꦴ ꦤꦶꦱ꧀ꦱꦺꦴꦏꦺꦴ ꦮꦶꦫꦗꦺꦴ ꦲꦸꦠ꧀ꦮꦴ ꦤ ꦱꦺꦴꦕꦠꦶ, ꦌꦠꦁ ꦥꦤ ꦠꦁ ꦜꦴꦤꦁ ꦒꦕ꧀ꦖꦠꦶ, ꦪꦠ꧀ꦡ ꦒꦤ꧀ꦠ꧀ꦮꦴ ꦤ ꦱꦺꦴꦕꦠꦶ. ꦪꦠ꧀ꦡ ꦱꦠꦶꦥꦴꦕꦤꦺꦤ ꦌꦠꦁ ꦮꦷꦫꦶꦪꦣꦸꦫꦣꦺꦴꦫꦪ꧀ꦲꦁ ꦕꦺꦴꦢꦺꦤ꧀ꦠꦺꦴ ꦒꦤ꧀ꦠ꧀ꦮꦴ ꦩꦴꦢꦶꦱꦺꦴ ꦏꦱ꧀ꦱꦏꦺꦴ ꦄꦱꦺꦴꦏꦺꦴ ꦤꦶꦱ꧀ꦱꦺꦴꦏꦺꦴ ꦮꦶꦫꦗꦺꦴ ꦲꦸꦠ꧀ꦮꦴ ꦤ ꦱꦺꦴꦕꦠꦶ, ꦠꦁ ꦱꦧ꧀ꦧꦱꦺꦴꦏꦱꦭ꧀ꦭꦱꦩꦸꦒ꧀ꦓꦴꦠꦨꦹꦠꦁ ꦤꦶꦧ꧀ꦧꦴꦤꦴꦩꦠꦱꦔ꧀ꦑꦴꦠꦁ ꦜꦴꦤꦁ ꦒꦕ꧀ꦖꦠꦷꦠꦶ.

꧘꧐. ꦆꦢꦴꦤꦶ ꦤꦶꦒꦩꦤꦁ ꦏꦫꦺꦴꦤ꧀ꦠꦺꦴ ꦨꦒꦮꦴ ꦆꦩꦁ ꦒꦴꦡꦩꦴꦲ –

‘‘ꦌꦮꦩꦺꦱꦴ ꦏꦱꦷ ꦏꦛ꧀ꦜꦴ, ꦱꦴ ꦲꦺꦴꦠꦶ ꦄꦩꦠꦥ꧀ꦦꦭꦴ;

ꦌꦠꦁ ꦏꦱꦶꦁ ꦏꦱꦶꦠ꧀ꦮꦴꦤ, ꦱꦧ꧀ꦧꦢꦸꦏ꧀ꦑꦴ ꦥꦩꦸꦕ꧀ꦕꦠꦷ’’ꦠꦶ.

ꦠꦱ꧀ꦱꦴꦪꦁ ꦱꦔ꧀ꦑꦺꦥꦠ꧀ꦡꦺꦴ – ꦩꦪꦴ ꦧ꧀ꦫꦴꦲ꧀ꦩꦟ ꦌꦱꦴ ꦱꦢ꧀ꦣꦴꦧꦷꦗꦴ ꦠꦥꦺꦴꦮꦸꦛ꧀ꦜꦶꦪꦴ ꦄꦤꦸꦒ꧀ꦒꦲꦶꦠꦴ ꦏꦱꦶ, ꦥꦚ꧀ꦚꦴꦩꦪꦁ ꦪꦸꦒꦤꦔ꧀ꦒꦭꦁ, ꦲꦶꦫꦶꦩꦪꦚ꧀ꦕ ꦇꦱꦁ, ꦩꦤꦺꦴꦩꦪꦺꦤ ꦪꦺꦴꦠ꧀ꦠꦺꦤ, ꦌꦏꦴꦧꦢ꧀ꦣꦁ ꦏꦠ꧀ꦮꦴ, ꦥꦚ꧀ꦚꦴꦤꦔ꧀ꦒꦭꦺ ꦱꦠꦶꦦꦴꦭꦁ ꦄꦴꦏꦺꦴꦛꦺꦠ꧀ꦮꦴ, ꦱꦠꦶꦥꦴꦕꦤꦁ ꦒꦲꦺꦠ꧀ꦮꦴ, ꦏꦴꦪꦮꦕꦷꦄꦴꦲꦴꦫꦒꦸꦠ꧀ꦠꦶꦪꦴ ꦒꦺꦴꦥꦺꦠ꧀ꦮꦴ, ꦱꦕ꧀ꦕꦁ ꦤꦶꦢ꧀ꦢꦴꦤꦁ ꦏꦠ꧀ꦮꦴ, ꦱꦺꦴꦫꦕ꧀ꦕꦁ ꦥꦩꦺꦴꦕꦤꦁ ꦮꦷꦫꦶꦪꦁ ꦣꦸꦫꦣꦺꦴꦫꦪ꧀ꦲꦁ ꦪꦺꦴꦒꦏ꧀ꦑꦺꦩꦴꦨꦶꦩꦸꦑꦁ ꦄꦤꦶꦮꦠ꧀ꦠꦤ꧀ꦠꦁ ꦮꦴꦲꦺꦤ꧀ꦠꦺꦤ ꦏꦛ꧀ꦜꦴ, ꦏꦱꦶꦏꦩ꧀ꦩꦥꦫꦶꦪꦺꦴꦱꦴꦤꦁ ꦕꦠꦸꦧ꧀ꦧꦶꦣꦁ ꦱꦴꦩꦚ꧀ꦚꦦꦭꦁ ꦥꦴꦥꦶꦠꦴ, ꦱꦴ ꦲꦺꦴꦠꦶ ꦄꦩꦠꦥ꧀ꦦꦭꦴ, ꦱꦴ ꦌꦱꦴ ꦏꦱꦶ ꦄꦩꦠꦥ꧀ꦦꦭꦴ ꦲꦺꦴꦠꦶ. ꦄꦩꦠꦁ ꦮꦸꦕ꧀ꦕꦠꦶ ꦤꦶꦧ꧀ꦧꦴꦤꦁ, ꦤꦶꦧ꧀ꦧꦴꦤꦴꦤꦶꦱꦁꦱꦴ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦱꦴ ꦑꦺꦴ ꦥꦤꦺꦱꦴ ꦏꦱꦶ ꦤ ꦩꦩꦺꦮꦺꦏꦱ꧀ꦱ ꦄꦩꦠꦥ꧀ꦦꦭꦴ ꦲꦺꦴꦠꦶ, ꦄꦥꦶꦕ, ꦑꦺꦴ, ꦥꦤ ꦪꦺꦴ ꦏꦺꦴꦕꦶ ꦑꦠ꧀ꦠꦶꦪꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦮꦺꦱ꧀ꦱꦺꦴ ꦮꦴ ꦱꦸꦢ꧀ꦢꦺꦴ ꦮꦴ ꦒꦲꦛ꧀ꦜꦺꦴ ꦮꦴ ꦥꦧ꧀ꦧꦗꦶꦠꦺꦴ ꦮꦴ ꦌꦠꦁ ꦏꦱꦶꦁ ꦏꦱꦠꦶ, ꦱꦺꦴ ꦱꦧ꧀ꦧꦺꦴꦥꦶ ꦌꦠꦁ ꦏꦱꦶꦁ ꦏꦱꦶꦠ꧀ꦮꦴꦤ, ꦱꦧ꧀ꦧꦢꦸꦏ꧀ꦑꦴ ꦥꦩꦸꦕ꧀ꦕꦠꦶ, ꦱꦧ꧀ꦧꦱ꧀ꦩꦴ ꦮꦛ꧀ꦛꦢꦸꦏ꧀ꦑꦢꦸꦏ꧀ꦑꦢꦸꦏ꧀ꦑꦱꦔ꧀ꦑꦴꦫꦢꦸꦏ꧀ꦑꦮꦶꦥꦫꦶꦟꦴꦩꦢꦸꦏ꧀ꦑꦴ ꦥꦩꦸꦕ꧀ꦕꦠꦷꦠꦶ. ꦌꦮꦁ ꦨꦒꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦄꦫꦲꦠ꧀ꦠꦤꦶꦏꦹꦛꦺꦤ ꦤꦶꦧ꧀ꦧꦴꦤꦥꦫꦶꦪꦺꦴꦱꦴꦤꦁ ꦏꦠ꧀ꦮꦴ ꦢꦺꦱꦤꦁ ꦤꦶꦛ꧀ꦜꦴꦥꦺꦱꦶ.

ꦠꦠꦺꦴ ꦧ꧀ꦫꦴꦲ꧀ꦩꦟꦺꦴ ꦒꦩ꧀ꦨꦷꦫꦠ꧀ꦡꦁ ꦢꦺꦱꦤꦁ ꦱꦸꦠ꧀ꦮꦴ ‘‘ꦩꦩ ꦏꦱꦶꦦꦭꦁ ꦨꦸꦚ꧀ꦗꦶꦠ꧀ꦮꦴ ꦄꦥꦫꦗ꧀ꦗꦸ ꦌꦮ ꦖꦴꦠꦺꦴ ꦲꦺꦴꦠꦶ, ꦆꦩꦱ꧀ꦱ ꦥꦤ ꦏꦱꦶ ꦄꦩꦠꦥ꧀ꦦꦭꦴ, ꦠꦱ꧀ꦱꦴ ꦦꦭꦁ ꦨꦸꦚ꧀ꦗꦶꦠ꧀ꦮꦴ ꦱꦧ꧀ꦧꦢꦸꦏ꧀ꦑꦴ ꦥꦩꦸꦕ꧀ꦕꦠꦷ’’ꦠꦶ ꦕ ꦮꦶꦢꦶꦠ꧀ꦮꦴ ꦥꦱꦤ꧀ꦤꦺꦴ ꦥꦱꦤ꧀ꦤꦴꦏꦴꦫꦁ ꦏꦴꦠꦸꦁ ꦥꦴꦪꦴꦱꦁ ꦢꦴꦠꦸꦩꦴꦫꦢ꧀ꦣꦺꦴ. ꦠꦺꦤꦴꦲ ‘‘ꦄꦡ ꦑꦺꦴ ꦏꦱꦶꦨꦴꦫꦢ꧀ꦮꦴꦗꦺꦴ’’ꦠꦶ. ꦠꦠ꧀ꦡ ꦩꦲꦠꦶꦪꦴꦠꦶ ꦩꦲꦠꦶꦪꦤ꧀ꦠꦶ ꦄꦠ꧀ꦡꦺꦴ. ꦏꦁꦱꦥꦴꦠꦶꦪꦴꦠꦶ ꦱꦸꦮꦟ꧀ꦟꦥꦴꦠꦶꦪꦁ, ꦱꦠꦱꦲꦱ꧀ꦱꦒ꧀ꦓꦤꦏꦺ ꦄꦠ꧀ꦠꦤꦺꦴ ꦱꦸꦮꦟ꧀ꦟꦡꦴꦭꦺ. ꦮꦝ꧀ꦞꦺꦠ꧀ꦮꦴꦠꦶ ꦖꦸꦥꦶꦠ꧀ꦮꦴ, ꦄꦴꦏꦶꦫꦶꦠ꧀ꦮꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦨꦒꦮꦠꦺꦴ ꦈꦥꦤꦴꦩꦺꦱꦷꦠꦶ ꦱꦥ꧀ꦥꦶꦩꦣꦸꦦꦴꦟꦶꦠꦴꦢꦷꦲꦶ ꦮꦶꦕꦶꦠ꧀ꦫꦁ ꦏꦠ꧀ꦮꦴ, ꦢꦸꦏꦹꦭꦮꦶꦠꦴꦤꦺꦤ ꦥꦛꦶꦕ꧀ꦖꦴꦢꦺꦠ꧀ꦮꦴ, ꦈꦏ꧀ꦑꦶꦥꦶꦠ꧀ꦮꦴ, ꦱꦏ꧀ꦏꦕ꧀ꦕꦁ ꦠꦡꦴꦒꦠꦱ꧀ꦱ ꦄꦨꦶꦲꦫꦶ. ꦏꦶꦤ꧀ꦠꦶ? ‘‘ꦨꦸꦚ꧀ꦗꦠꦸ ꦨꦮꦁ ꦒꦺꦴꦠꦩꦺꦴ ꦥꦴꦪꦴꦱꦁ, ꦏꦱ꧀ꦱꦏꦺꦴ ꦨꦮ’’ꦤ꧀ꦠꦶ. ꦠꦠꦺꦴ ꦏꦱ꧀ꦱꦏꦨꦴꦮꦱꦴꦣꦏꦁ ꦏꦴꦫꦟꦩꦴꦲ ‘‘ꦪꦚ꧀ꦲꦶ…ꦥꦺ… ꦏꦱꦠꦷ’’ꦠꦶ, ꦪꦱ꧀ꦩꦴ ꦨꦮꦁ…ꦥꦺ… ꦏꦱꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦡ ꦨꦒꦮꦴ ‘‘ꦒꦴꦡꦴꦨꦶꦒꦷꦠꦁ ꦩꦺ’’ꦠꦶ ꦄꦴꦲ.

꧘꧑. ꦠꦠ꧀ꦡ ꦒꦴꦡꦴꦨꦶꦒꦷꦠꦤ꧀ꦠꦶ ꦒꦴꦡꦴꦲꦶ ꦄꦨꦶꦒꦷꦠꦁ, ꦒꦴꦡꦴꦪꦺꦴ ꦨꦴꦱꦶꦠ꧀ꦮꦴ ꦭꦢ꧀ꦣꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦩꦺꦠꦶ ꦩꦪꦴ. ꦄꦨꦺꦴꦗꦤꦺꦪ꧀ꦪꦤ꧀ꦠꦶ ꦨꦸꦚ꧀ꦗꦤꦴꦫꦲꦁ ꦤ ꦲꦺꦴꦠꦶ. ꦱꦩ꧀ꦥꦱ꧀ꦱꦠꦤ꧀ꦠꦶ ꦱꦩ꧀ꦩꦴ ꦄꦴꦗꦷꦮꦱꦸꦢ꧀ꦣꦶꦁ ꦥꦱ꧀ꦱꦠꦁ, ꦱꦩꦤ꧀ꦠꦴ ꦮꦴ ꦥꦱ꧀ꦱꦠꦁ ꦱꦩ꧀ꦥꦱ꧀ꦱꦠꦁ, ꦧꦸꦢ꧀ꦣꦴꦤꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦤꦺꦱ ꦣꦩ꧀ꦩꦺꦴꦠꦶ ‘‘ꦒꦴꦡꦴꦨꦶꦒꦷꦠꦁ ꦨꦸꦚ꧀ꦗꦶꦠꦧ꧀ꦧ’’ꦤ꧀ꦠꦶ ꦌꦱ ꦣꦩ꧀ꦩꦺꦴ ꦌꦠꦁ ꦕꦴꦫꦶꦠ꧀ꦠꦁ ꦤ ꦲꦺꦴꦠꦶ, ꦠꦱ꧀ꦩꦴ ꦒꦴꦡꦴꦨꦶꦒꦷꦠꦁ ꦥꦤꦸꦢꦤ꧀ꦠꦶ ꦧꦸꦢ꧀ꦣꦴ ꦥꦛꦶꦏ꧀ꦑꦶꦥꦤ꧀ꦠꦶ ꦤ ꦨꦸꦚ꧀ꦗꦤ꧀ꦠꦷꦠꦶ. ꦏꦶꦁ ꦥꦤ ꦨꦒꦮꦠꦴ ꦥꦴꦪꦴꦱꦠ꧀ꦡꦁ ꦒꦴꦡꦴ ꦄꦨꦶꦒꦷꦠꦴ, ꦪꦺꦤ ꦌꦮꦩꦴꦲꦴꦠꦶ? ꦤ ꦌꦠꦢꦠ꧀ꦡꦁ ꦄꦨꦶꦒꦷꦠꦴ, ꦄꦥꦶꦕ, ꦑꦺꦴ, ꦥꦤ ꦥꦴꦠꦺꦴ ꦥꦛ꧀ꦜꦴꦪ ꦑꦺꦠ꧀ꦠꦱꦩꦷꦥꦺ ꦜꦠ꧀ꦮꦴ ꦏꦛꦕ꧀ꦖꦸꦨꦶꦏ꧀ꦑꦩ꧀ꦥꦶ ꦄꦭꦨꦶꦠ꧀ꦮꦴ ꦥꦸꦤ ꦱꦏꦭꦧꦸꦢ꧀ꦣꦒꦸꦟꦺ ꦥꦏꦴꦱꦺꦠ꧀ꦮꦴ ꦭꦢ꧀ꦣꦁ ꦠꦢꦺꦠꦁ ꦤꦛꦤꦕ꧀ꦕꦏꦴꦢꦷꦲꦶ ꦤꦕ꧀ꦕꦶꦠ꧀ꦮꦴ ꦒꦴꦪꦶꦠ꧀ꦮꦴ ꦕ ꦭꦢ꧀ꦣꦱꦢꦶꦱꦁ ꦲꦺꦴꦠꦶ, ꦠꦺꦤ ‘‘ꦒꦴꦡꦴꦨꦶꦒꦷꦠ’’ꦤ꧀ꦠꦶ ꦮꦸꦠ꧀ꦠꦁ. ꦠꦴꦢꦶꦱꦚ꧀ꦕ ꦪꦱ꧀ꦩꦴ ꦧꦸꦢ꧀ꦣꦴꦤꦁ ꦤ ꦏꦥ꧀ꦥꦠꦶ, ꦠꦱ꧀ꦩꦴ ‘‘ꦄꦨꦺꦴꦗꦤꦺꦪ꧀ꦪ’’ꦤ꧀ꦠꦶ ꦮꦸꦠ꧀ꦠꦁ. ꦄꦥ꧀ꦥꦶꦕ꧀ꦖꦠꦴꦤꦸꦫꦹꦥꦚ꧀ꦕꦺꦠꦁ ꦤ ꦲꦺꦴꦠꦶ, ꦠꦱ꧀ꦩꦴꦥꦶ ꦥꦕ꧀ꦖꦶꦩꦁ ꦗꦤꦠꦁ ꦄꦤꦸꦏꦩ꧀ꦥꦩꦴꦤꦺꦤ ꦕ ꦌꦮꦁ ꦮꦸꦠ꧀ꦠꦁ. ꦪꦠ꧀ꦫ ꦕ ꦤꦴꦩ ꦥꦫꦥ꧀ꦥꦏꦴꦱꦶꦠꦺꦤꦴꦥꦶ ꦄꦠ꧀ꦠꦤꦺꦴ ꦒꦸꦟꦺꦤ ꦈꦥ꧀ꦥꦤ꧀ꦤꦁ ꦭꦴꦨꦁ ꦥꦛꦶꦏ꧀ꦑꦶꦥꦤ꧀ꦠꦶ ꦱꦺꦪ꧀ꦪꦡꦴꦥꦶ ꦄꦥ꧀ꦥꦶꦕ꧀ꦖꦺꦴ ꦓꦛꦶꦏꦴꦫꦺꦴ ꦏꦸꦩ꧀ꦨꦏꦴꦫꦺꦴ, ꦠꦠ꧀ꦫ ꦏꦡꦁ ꦏꦺꦴꦛꦶꦥ꧀ꦥꦠ꧀ꦠꦴꦪ ꦄꦥ꧀ꦥꦶꦕ꧀ꦖꦠꦴꦪ ꦱꦩꦤ꧀ꦤꦴꦒꦠꦺꦴ ꦨꦒꦮꦴ ꦄꦠ꧀ꦠꦤꦴꦮ ꦄꦠ꧀ꦠꦤꦺꦴ ꦒꦸꦟꦥ꧀ꦥꦏꦴꦱꦤꦺꦤ ꦈꦥ꧀ꦥꦤ꧀ꦤꦁ ꦭꦴꦨꦁ ꦱꦴꦢꦶꦪꦶꦱ꧀ꦱꦠꦶ, ꦪꦠꦺꦴ ꦪꦸꦠ꧀ꦠꦩꦺꦮ ꦌꦠꦁ ꦨꦒꦮꦠꦺꦴ ꦮꦠ꧀ꦠꦸꦤ꧀ꦠꦶ.

ꦌꦠ꧀ꦠꦴꦮꦠꦴ ‘‘ꦄꦥ꧀ꦥꦱꦤ꧀ꦤꦁ ꦄꦢꦴꦠꦸꦏꦴꦩꦁ ꦧ꧀ꦫꦴꦲ꧀ꦩꦟꦁ ꦒꦴꦡꦴꦒꦴꦪꦤꦺꦤ ꦢꦴꦠꦸꦏꦴꦩꦁ ꦏꦠ꧀ꦮꦴ, ꦱꦩꦟꦺꦴ ꦒꦺꦴꦠꦩꦺꦴ ꦨꦺꦴꦗꦤꦁ ꦥꦛꦶꦒ꧀ꦒꦲꦺꦱꦶ, ꦄꦴꦩꦶꦱꦏꦴꦫꦟꦴ ꦆꦩꦱ꧀ꦱ ꦢꦺꦱꦤꦴ’’ꦠꦶ ꦆꦩꦩ꧀ꦲꦴ ꦭꦺꦴꦏꦴꦥꦮꦴꦢꦴ ꦄꦠ꧀ꦠꦴꦤꦁ ꦩꦺꦴꦕꦺꦤ꧀ꦠꦺꦴ ꦢꦺꦱꦤꦴꦥꦴꦫꦶꦱꦸꦢ꧀ꦣꦶꦁ ꦢꦷꦥꦺꦠ꧀ꦮꦴ, ꦆꦢꦴꦤꦶ ꦄꦴꦗꦷꦮꦥꦴꦫꦶꦱꦸꦢ꧀ꦣꦶꦁ ꦢꦷꦥꦺꦤ꧀ꦠꦺꦴ ꦄꦴꦲ ‘‘ꦣꦩ꧀ꦩꦺ ꦱꦠꦷ ꦧ꧀ꦫꦴꦲ꧀ꦩꦟ ꦮꦸꦠ꧀ꦠꦶꦫꦺꦱꦴ’’ꦠꦶ ꦠꦱ꧀ꦱꦠ꧀ꦡꦺꦴ – ꦄꦴꦗꦷꦮꦥꦴꦫꦶꦱꦸꦢ꧀ꦣꦶꦣꦩ꧀ꦩꦺ ꦮꦴ ꦢꦱꦮꦶꦣꦱꦸꦕꦫꦶꦠꦣꦩ꧀ꦩꦺ ꦮꦴ ꦧꦸꦢ꧀ꦣꦴꦤꦁ ꦕꦴꦫꦶꦠ꧀ꦠꦣꦩ꧀ꦩꦺ ꦮꦴ ꦱꦠꦶ ꦱꦁꦮꦶꦗ꧀ꦗꦩꦴꦤꦺ ꦄꦤꦸꦥꦲꦠꦺ ꦮꦠ꧀ꦠꦩꦴꦤꦺ ꦮꦸꦠ꧀ꦠꦶꦫꦺꦱꦴ ꦌꦏꦤ꧀ꦠꦮꦺꦴꦢꦴꦠꦴ ꦄꦴꦏꦴꦱꦺ ꦥꦴꦟꦶꦥ꧀ꦥꦱꦴꦫꦟꦏꦥ꧀ꦥꦴ ꦌꦱꦤꦴ ꦥꦫꦶꦪꦺꦱꦤꦴ ꦗꦷꦮꦶꦠꦮꦸꦠ꧀ꦠꦶ ꦧꦸꦢ꧀ꦣꦴꦤꦁ ꦧ꧀ꦫꦴꦲ꧀ꦩꦟꦴꦠꦶ.

꧘꧒. ꦌꦮꦁ ꦮꦸꦠ꧀ꦠꦺ ꦧ꧀ꦫꦴꦲ꧀ꦩꦟꦺꦴ ‘‘ꦥꦴꦪꦴꦱꦁ ꦩꦺ ꦥꦛꦶꦏ꧀ꦑꦶꦥꦠꦶ, ꦄꦏꦥ꧀ꦥꦶꦪꦁ ꦏꦶꦫꦺꦠꦁ ꦨꦺꦴꦗꦤꦁ, ꦄꦣꦚ꧀ꦚꦺꦴ ꦮꦠꦱ꧀ꦩꦶꦁ, ꦢꦴꦤꦁ ꦢꦴꦠꦸꦁ ꦤ ꦭꦨꦴꦩꦷ’’ꦠꦶ ꦢꦺꦴꦩꦤꦱ꧀ꦱꦁ ꦈꦥ꧀ꦥꦴꦢꦺꦠ꧀ꦮꦴ ‘‘ꦄꦥ꧀ꦥꦺꦮ ꦤꦴꦩ ꦄꦚ꧀ꦚꦁ ꦥꦛꦶꦒ꧀ꦒꦟ꧀ꦲꦺꦪ꧀ꦪꦴ’’ꦠꦶ ꦕ ꦕꦶꦤ꧀ꦠꦺꦱꦶ. ꦠꦁ ꦚꦠ꧀ꦮꦴ ꦨꦒꦮꦴ ‘‘ꦄꦲꦁ ꦨꦶꦏ꧀ꦑꦴꦕꦴꦫꦮꦺꦭꦁ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦄꦴꦒꦠꦺꦴ – ‘ꦌꦠ꧀ꦠꦏꦺꦤ ꦏꦴꦭꦺꦤ ꦆꦩꦁ ꦧ꧀ꦫꦴꦲ꧀ꦩꦟꦁ ꦥꦱꦴꦢꦺꦱ꧀ꦱꦴꦩꦷ’ꦠꦶ, ꦧ꧀ꦫꦴꦲ꧀ꦩꦟꦺꦴ ꦕ ꦢꦺꦴꦩꦤꦱ꧀ꦱꦁ ꦄꦏꦴꦱꦶ. ꦆꦢꦴꦤꦶ ꦠꦺꦤ ꦢꦺꦴꦩꦤꦱ꧀ꦱꦺꦤ ꦩꦪꦶ ꦕꦶꦠ꧀ꦠꦁ ꦥꦏꦺꦴꦥꦺꦠ꧀ꦮꦴ ꦄꦩꦠꦮꦫꦣꦩ꧀ꦩꦁ ꦥꦛꦶꦮꦶꦗ꧀ꦙꦶꦠꦸꦁ ꦤ ꦱꦏ꧀ꦑꦶꦱ꧀ꦱꦠꦷ’’ꦠꦶ ꦧ꧀ꦫꦴꦲ꧀ꦩꦟꦱ꧀ꦱ ꦥꦱꦴꦢꦗꦤꦤꦠ꧀ꦡꦁ ꦠꦺꦤ ꦥꦠ꧀ꦡꦶꦠꦩꦤꦺꦴꦫꦡꦁ ꦥꦹꦫꦺꦤ꧀ꦠꦺꦴ ꦄꦴꦲ ‘‘ꦄꦚ꧀ꦚꦺꦤ ꦕ ꦏꦺꦮꦭꦶꦤ’’ꦤ꧀ꦠꦶ. ꦠꦠ꧀ꦡ ꦏꦺꦮꦭꦶꦤꦤ꧀ꦠꦶ ꦱꦧ꧀ꦧꦒꦸꦟꦥꦫꦶꦥꦸꦟ꧀ꦟꦁ, ꦱꦧ꧀ꦧꦪꦺꦴꦒꦮꦶꦱꦁꦪꦸꦠ꧀ꦠꦁ ꦮꦴꦠꦶ ꦄꦠ꧀ꦡꦺꦴ. ꦩꦲꦤ꧀ꦠꦴꦤꦁ ꦱꦷꦭꦏ꧀ꦑꦤ꧀ꦣꦴꦢꦷꦤꦁ ꦒꦸꦟꦴꦤꦁ ꦌꦱꦤꦠꦺꦴ ꦩꦲꦺꦱꦶꦁ. ꦥꦫꦶꦏ꧀ꦑꦷꦟꦱꦧ꧀ꦧꦴꦱꦮꦠ꧀ꦠꦴ ꦑꦷꦟꦴꦱꦮꦁ. ꦲꦠ꧀ꦡꦥꦴꦢꦏꦸꦏ꧀ꦏꦸꦕ꧀ꦕꦩꦴꦢꦶꦁ ꦏꦠ꧀ꦮꦴ ꦮꦹꦥꦱꦤ꧀ꦠꦱꦧ꧀ꦧꦏꦸꦏ꧀ꦏꦸꦕ꧀ꦕꦠ꧀ꦠꦴ ꦏꦸꦏ꧀ꦏꦸꦕ꧀ꦕꦮꦹꦥꦱꦤ꧀ꦠꦁ. ꦈꦥꦛ꧀ꦜꦲꦱ꧀ꦱꦹꦠꦶ ꦥꦫꦶꦮꦶꦱꦱ꧀ꦱꦸ ꦥꦛꦶꦩꦴꦤꦪꦱ꧀ꦱꦸ. ꦌꦮꦁ ꦧ꧀ꦫꦴꦲ꧀ꦩꦟꦺꦤ ꦕꦶꦠ꧀ꦠꦺ ꦈꦥ꧀ꦥꦴꦢꦶꦠꦺꦥꦶ ꦥꦫꦶꦪꦴꦪꦩꦺꦮ ꦨꦟꦠꦶ, ꦤ ꦠꦸ ꦨꦟꦠꦶ ‘‘ꦢꦺꦲꦶ, ꦄꦴꦲꦫꦴꦲꦷ’’ꦠꦶ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦩꦺꦮ.

ꦄꦡ ꦧ꧀ꦫꦴꦲ꧀ꦩꦟꦺꦴ ‘‘ꦄꦪꦁ ꦥꦴꦪꦴꦱꦺꦴ ꦨꦒꦮꦠꦺꦴ ꦄꦴꦤꦷꦠꦺꦴ ꦤꦴꦲꦁ ꦄꦫꦲꦴꦩꦶ ꦠꦁ ꦄꦠ꧀ꦠꦤꦺꦴ ꦖꦤ꧀ꦢꦺꦤ ꦏꦱ꧀ꦱꦕꦶ ꦢꦴꦠꦸ’’ꦤ꧀ꦠꦶ ꦕꦶꦤ꧀ꦠꦺꦠ꧀ꦮꦴ ꦄꦴꦲ ‘‘ꦄꦡ ꦏꦱ꧀ꦱ ꦕꦴꦲ’’ꦤ꧀ꦠꦶ. ꦠꦠꦺꦴ ꦨꦒꦮꦴ ‘‘ꦠꦁ ꦥꦴꦪꦴꦱꦁ ꦜꦥꦺꦠ꧀ꦮꦴ ꦠꦡꦴꦒꦠꦁ ꦠꦡꦴꦒꦠꦱꦴꦮꦏꦚ꧀ꦕ ꦄꦚ꧀ꦚꦱ꧀ꦱ ꦄꦗꦷꦫꦟꦣꦩ꧀ꦩꦺꦴ’’ꦠꦶ ꦚꦠ꧀ꦮꦴ ꦄꦴꦲ – ‘‘ꦤ ꦑ꧀ꦮꦴꦲꦁ ꦠ’’ꦤ꧀ꦠꦶ. ꦠꦠ꧀ꦡ ꦱꦢꦺꦮꦏꦮꦕꦤꦺꦤ ꦥꦚ꧀ꦕꦏꦴꦩꦴꦮꦕꦫꦢꦺꦮꦒ꧀ꦒꦲꦟꦁ, ꦱꦩꦴꦫꦏꦮꦕꦤꦺꦤ ꦖꦛ꧀ꦜꦏꦴꦩꦴꦮꦕꦫꦢꦺꦮꦒ꧀ꦒꦲꦟꦁ, ꦱꦧ꧀ꦫꦲ꧀ꦩꦏꦮꦕꦤꦺꦤ ꦫꦹꦥꦴꦮꦕꦫꦧ꧀ꦫꦲ꧀ꦩꦒ꧀ꦒꦲꦟꦁ ꦄꦫꦹꦥꦴꦮꦕꦫꦴ ꦥꦤ ꦨꦸꦚ꧀ꦗꦺꦪ꧀ꦪꦸꦤ꧀ꦠꦶ ꦄꦱꦩ꧀ꦨꦴꦮꦤꦺꦪ꧀ꦪꦴ. ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦮꦕꦤꦺꦤ ꦱꦴꦱꦤꦥꦕ꧀ꦕꦠ꧀ꦡꦶꦏꦥꦕ꧀ꦕꦴꦩꦶꦠ꧀ꦠꦱꦩꦟꦧ꧀ꦫꦴꦲ꧀ꦩꦟꦒ꧀ꦒꦲꦟꦁ ꦱꦩꦶꦠꦥꦴꦥꦧꦴꦲꦶꦠꦥꦴꦥꦱꦩꦟꦧ꧀ꦫꦴꦲ꧀ꦩꦟꦒ꧀ꦒꦲꦟꦚ꧀ꦕ. ꦥꦗꦴꦮꦕꦤꦺꦤ ꦱꦠ꧀ꦠꦭꦺꦴꦏꦒ꧀ꦒꦲꦟꦁ, ꦱꦢꦺꦮꦩꦤꦸꦱ꧀ꦱꦮꦕꦤꦺꦤ ꦱꦩ꧀ꦩꦸꦠꦶꦢꦺꦮꦄꦮꦱꦺꦱꦩꦤꦸꦱ꧀ꦱꦒ꧀ꦒꦲꦟꦁ. ꦌꦮꦩꦺꦠ꧀ꦡ ꦠꦷꦲꦶ ꦮꦕꦤꦺꦲꦶ ꦎꦏꦴꦱꦭꦺꦴꦏꦺꦴ, ꦢ꧀ꦮꦷꦲꦶ ꦥꦗꦴꦮꦱꦺꦤ ꦱꦠ꧀ꦠꦭꦺꦴꦏꦺꦴ ꦒꦲꦶꦠꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦌꦱ ꦱꦔ꧀ꦑꦺꦥꦺꦴ, ꦮꦶꦠ꧀ꦡꦴꦫꦁ ꦥꦤ ꦄꦴꦭ꦳ꦮꦏꦱꦸꦠ꧀ꦠꦺ ꦮꦟ꧀ꦟꦪꦶꦱ꧀ꦱꦴꦩ.

ꦏꦱ꧀ꦩꦴ ꦥꦤ ꦱꦢꦺꦮꦏꦴꦢꦷꦱꦸ ꦏꦱ꧀ꦱꦕꦶ ꦤ ꦱꦩ꧀ꦩꦴ ꦥꦫꦶꦟꦴꦩꦁ ꦒꦕ꧀ꦖꦺꦪ꧀ꦪꦴꦠꦶ? ꦎꦭ꦳ꦴꦫꦶꦏꦺ ꦱꦸꦑꦸꦩꦺꦴꦗꦴꦥꦏ꧀ꦑꦶꦥꦤꦠꦺꦴ. ꦆꦩꦱ꧀ꦩꦶꦚ꧀ꦲꦶ ꦥꦴꦪꦴꦱꦺ ꦨꦒꦮꦤ꧀ꦠꦁ ꦈꦢ꧀ꦢꦶꦱ꧀ꦱ ꦒꦲꦶꦠꦩꦠ꧀ꦠꦺꦪꦺꦮ ꦢꦺꦮꦠꦴꦲꦶ ꦎꦗꦴ ꦥꦏ꧀ꦑꦶꦠ꧀ꦠꦴ ꦪꦡꦴ ꦱꦸꦗꦴꦠꦴꦪ ꦥꦴꦪꦴꦱꦺ, ꦕꦸꦤ꧀ꦢꦱ꧀ꦱ ꦕ ꦱꦹꦏꦫꦩꦢ꧀ꦢꦮꦺ ꦥꦕ꧀ꦕꦩꦴꦤꦺ, ꦮꦺꦫꦚ꧀ꦗꦴꦪꦚ꧀ꦕ ꦨꦒꦮꦠꦴ ꦒꦲꦶꦠꦒꦲꦶꦠꦴꦭꦺꦴꦥꦺ, ꦨꦺꦱꦗ꧀ꦗꦏ꧀ꦑꦤ꧀ꦣꦏꦺ ꦕ ꦏꦕ꧀ꦕꦴꦤꦱ꧀ꦱ ꦒꦸꦭ꦳꧀ꦲꦏꦸꦩ꧀ꦨꦱ꧀ꦩꦶꦁ ꦄꦮꦱꦶꦛ꧀ꦜꦒꦸꦭ꦳꧀ꦲꦺ. ꦱꦺꦴ ꦎꦭ꦳ꦴꦫꦶꦏꦺ ꦱꦸꦑꦸꦩꦺꦴꦗꦴꦥꦏ꧀ꦑꦶꦥꦤꦠꦺꦴ ꦢꦺꦮꦴꦤꦁ ꦤ ꦥꦫꦶꦟꦩꦠꦶ. ꦢꦺꦮꦴ ꦲꦶ ꦱꦸꦑꦸꦩꦱꦫꦷꦫꦴ, ꦠꦺꦱꦁ ꦎꦭ꦳ꦴꦫꦶꦏꦺꦴ ꦩꦤꦸꦱ꧀ꦱꦴꦲꦴꦫꦺꦴ ꦤ ꦱꦩ꧀ꦩꦴ ꦥꦫꦶꦟꦩꦠꦶ. ꦩꦤꦸꦱ꧀ꦱꦴꦤꦩ꧀ꦥꦶ ꦤ ꦥꦫꦶꦟꦩꦠꦶ. ꦩꦤꦸꦱ꧀ꦱꦴ ꦲꦶ ꦎꦭ꦳ꦴꦫꦶꦏꦱꦫꦷꦫꦴ, ꦠꦺꦱꦁ ꦱꦸꦑꦸꦩꦴ ꦢꦶꦧ꧀ꦧꦺꦴꦗꦴ ꦤ ꦱꦩ꧀ꦩꦴ ꦥꦫꦶꦟꦩꦠꦶ. ꦠꦡꦴꦒꦠꦱ꧀ꦱ ꦥꦤ ꦥꦏꦠꦶꦄꦒ꧀ꦒꦶꦤꦴꦮ ꦥꦫꦶꦟꦩꦠꦶ, ꦱꦩ꧀ꦩꦴ ꦗꦷꦫꦠꦶ. ꦏꦴꦪꦧꦭꦚꦴꦟꦧꦭꦥ꧀ꦥꦨꦴꦮꦺꦤꦴꦠꦶ ꦌꦏꦺ ꦠꦡꦴꦒꦠꦱꦴꦮꦏꦱ꧀ꦱ ꦑꦷꦟꦴꦱꦮꦱ꧀ꦱꦺꦠꦁ ꦱꦩꦴꦣꦶꦧꦭꦺꦤ ꦩꦠ꧀ꦠꦚ꧀ꦚꦸꦠꦴꦪ ꦕ ꦥꦫꦶꦟꦩꦠꦶ, ꦆꦠꦫꦺꦱꦁ ꦆꦢ꧀ꦣꦶꦩꦤ꧀ꦠꦴꦤꦩ꧀ꦥꦶ ꦤ ꦥꦫꦶꦟꦩꦠꦶ. ꦄꦕꦶꦤ꧀ꦠꦤꦷꦪꦁ ꦮꦴ ꦌꦠ꧀ꦡ ꦏꦴꦫꦟꦁ, ꦧꦸꦢ꧀ꦣꦮꦶꦱꦪꦺꦴ ꦌꦱꦺꦴꦠꦶ.

ꦠꦺꦤ ꦲꦶ ꦠ꧀ꦮꦤ꧀ꦠꦶ ꦪꦱ꧀ꦩꦴ ꦄꦚ꧀ꦚꦁ ꦤ ꦥꦱ꧀ꦱꦴꦩꦶ, ꦩꦩ ꦤ ꦏꦥ꧀ꦥꦠꦶ, ꦩꦩ ꦄꦏꦥ꧀ꦥꦤ꧀ꦠꦁ ꦱꦴꦮꦏꦱ꧀ꦱꦴꦥꦶ ꦩꦺ ꦤ ꦏꦥ꧀ꦥꦠꦶ, ꦠꦱ꧀ꦩꦴ ꦠ꧀ꦮꦁ ꦧ꧀ꦫꦴꦲ꧀ꦩꦟꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦥ꧀ꦥꦲꦫꦶꦠꦺꦠꦶ ꦥꦫꦶꦠ꧀ꦠꦲꦫꦶꦠꦠꦶꦟꦺ, ꦄꦥ꧀ꦥꦫꦸꦭ꦳꧀ꦲꦫꦶꦠꦠꦶꦟꦺ ꦮꦴ ꦥꦴꦱꦴꦟꦥꦶꦛ꧀ꦜꦶꦱꦢꦶꦱꦺ. ꦄꦥ꧀ꦥꦴꦟꦏꦺꦠꦶ ꦤꦶꦥ꧀ꦥꦴꦟꦏꦺ, ꦥꦴꦪꦴꦱꦗ꧀ꦙꦺꦴꦠ꧀ꦡꦫꦟꦏꦴꦫꦟꦺꦤ ꦩꦫꦶꦠꦧ꧀ꦧꦥꦴꦟꦫꦲꦶꦠꦺ ꦮꦴ ꦩꦲꦴꦈꦢꦏꦏ꧀ꦑꦤ꧀ꦣꦺ. ꦱꦲ ꦠꦶꦟꦤꦶꦱ꧀ꦱꦶꦠꦺꦲꦶ ꦥꦴꦟꦺꦲꦶ ꦠꦶꦟꦴꦤꦁ ꦥꦴꦟꦏꦴꦤꦚ꧀ꦕ ꦄꦤꦸꦫꦏ꧀ꦑꦟꦠ꧀ꦡꦴꦪ ꦌꦠꦁ ꦮꦸꦠ꧀ꦠꦁ. ꦕꦶꦕ꧀ꦕꦶꦛꦴꦪꦠꦶ ꦕꦶꦛꦶꦕꦶꦛꦴꦪꦠꦷꦠꦶ ꦌꦮꦁ ꦱꦢ꧀ꦢꦁ ꦏꦫꦺꦴꦠꦶ. ꦱꦁꦣꦹꦥꦴꦪꦠꦷꦠꦶ ꦱꦩꦤ꧀ꦠꦴ ꦣꦹꦥꦴꦪꦠꦶ. ꦱꦩ꧀ꦥꦣꦹꦥꦴꦪꦠꦷꦠꦶ ꦠꦡꦺꦮ ꦄꦣꦶꦩꦠ꧀ꦠꦁ ꦣꦹꦥꦴꦪꦠꦶ. ꦏꦱ꧀ꦩꦴ ꦌꦮꦁ ꦄꦲꦺꦴꦱꦷꦠꦶ? ꦨꦒꦮꦠꦺꦴ ꦄꦴꦤꦸꦨꦴꦮꦺꦤ, ꦤ ꦈꦢꦏꦱ꧀ꦱ, ꦤ ꦥꦴꦪꦴꦱꦱ꧀ꦱ, ꦤ ꦧ꧀ꦫꦴꦲ꧀ꦩꦟꦱ꧀ꦱ, ꦤ ꦄꦚ꧀ꦚꦺꦱꦁ ꦢꦺꦮꦪꦏ꧀ꦑꦴꦢꦷꦤꦁ. ꦨꦒꦮꦴ ꦲꦶ ꦧ꧀ꦫꦴꦲ꧀ꦩꦟꦱ꧀ꦱ ꦣꦩ꧀ꦩꦱꦁꦮꦺꦒꦠ꧀ꦡꦁ ꦠꦡꦴ ꦄꦣꦶꦛ꧀ꦜꦴꦱꦶ. ꦱꦺꦪ꧀ꦪꦡꦴꦥꦶ ꦤꦴꦩꦴꦠꦶ ꦎꦥꦩ꧀ꦩꦤꦶꦢꦱ꧀ꦱꦤꦩꦠ꧀ꦠꦩꦺꦠꦁ, ꦪꦡꦴ ꦦꦴꦭꦺꦴꦠꦶ ꦌꦠ꧀ꦠꦏꦩꦺꦮ ꦮꦸꦠ꧀ꦠꦁ ꦲꦺꦴꦠꦶ. ꦱꦁꦮꦶꦒ꧀ꦒꦺꦴ ꦕꦶꦠ꧀ꦠꦺꦤ, ꦭꦺꦴꦩꦲꦛ꧀ꦜꦗꦴꦠꦺꦴ ꦱꦫꦷꦫꦺꦤ. ꦱꦫꦷꦫꦺ ꦏꦶꦫꦱ꧀ꦱ ꦤꦮꦤꦮꦸꦠꦶꦭꦺꦴꦩꦏꦹꦥꦱꦲꦱ꧀ꦱꦴꦤꦶ ꦱꦸꦮꦟ꧀ꦟꦨꦶꦠ꧀ꦠꦶꦪꦴ ꦄꦴꦲꦠꦩꦟꦶꦤꦴꦒꦢꦤ꧀ꦠꦴ ꦮꦶꦪ ꦈꦢ꧀ꦣꦒ꧀ꦒꦴ ꦄꦲꦺꦱꦸꦁ. ꦱꦺꦱꦁ ꦥꦴꦏꦛꦩꦺꦮ.

ꦥꦴꦢꦺꦱꦸ ꦥꦤ ꦤꦶꦥꦠꦶꦠ꧀ꦮꦴ ꦨꦒꦮꦠꦺꦴ ꦣꦩ꧀ꦩꦢꦺꦱꦤꦁ ꦄꦧ꧀ꦨꦤꦸꦩꦺꦴꦢꦩꦴꦤꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ ‘‘ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ, ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩꦴ’’ꦠꦶ. ꦄꦧ꧀ꦨꦤꦸꦩꦺꦴꦢꦤꦺ ꦲꦶ ꦄꦪꦩꦶꦣ ꦄꦨꦶꦏ꧀ꦏꦤ꧀ꦠ ꦱꦢ꧀ꦢꦺꦴ. ꦮꦶꦠ꧀ꦡꦴꦫꦠꦺꦴ ꦥꦤꦱ꧀ꦱ ꦩꦔ꧀ꦒꦭꦱꦸꦠ꧀ꦠꦮꦟ꧀ꦟꦤꦴꦪꦁ ꦄꦠ꧀ꦡꦮꦟ꧀ꦟꦤꦴ ꦄꦴꦮꦶ ꦨꦮꦶꦱ꧀ꦱꦠꦶ. ꦪꦱ꧀ꦩꦴ ꦕ ꦄꦧ꧀ꦨꦤꦸꦩꦺꦴꦢꦤꦠ꧀ꦡꦺ, ꦠꦱ꧀ꦩꦴ ꦱꦴꦣꦸ ꦱꦴꦣꦸ ꦨꦺꦴ ꦒꦺꦴꦠꦩꦴꦠꦶ ꦮꦸꦠ꧀ꦠꦁ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦁ.

‘‘ꦨꦪꦺ ꦏꦺꦴꦣꦺ ꦥꦱꦁꦱꦴꦪꦁ, ꦠꦸꦫꦶꦠꦺ ꦏꦺꦴꦠꦹꦲꦭꦕ꧀ꦖꦫꦺ;

ꦲꦴꦱꦺ ꦱꦺꦴꦏꦺ ꦥꦱꦴꦢꦺ ꦕ, ꦏꦫꦺ ꦄꦴꦩꦺꦝꦶꦠꦁ ꦧꦸꦣꦺꦴ’’ꦠꦶ. –

ꦆꦩꦶꦤꦴ ꦕ ꦭꦏ꧀ꦑꦟꦺꦤ ꦆꦣ ꦥꦱꦴꦢꦮꦱꦺꦤ ꦥꦱꦁꦱꦴꦮꦱꦺꦤ ꦕꦴꦪꦁ ꦢ꧀ꦮꦶꦏ꧀ꦑꦠ꧀ꦠꦸꦁ ꦮꦸꦠ꧀ꦠꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦄꦡ ꦮꦴ ꦄꦨꦶꦏ꧀ꦏꦤ꧀ꦠꦤ꧀ꦠꦶ ꦄꦨꦶꦏꦤ꧀ꦠꦁ ꦄꦠꦶꦆꦛ꧀ꦜꦁ, ꦄꦠꦶꦩꦤꦴꦥꦁ, ꦄꦠꦶꦱꦸꦤ꧀ꦢꦫꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦠꦠ꧀ꦡ ꦌꦏꦺꦤ ꦄꦨꦶꦏ꧀ꦏꦤ꧀ꦠꦱꦢ꧀ꦢꦺꦤ ꦢꦺꦱꦤꦁ ꦡꦺꦴꦩꦺꦠꦶ, ꦌꦏꦺꦤ ꦄꦠ꧀ꦠꦤꦺꦴ ꦥꦱꦴꦢꦁ. ꦄꦪꦚ꧀ꦲꦶ ꦌꦠ꧀ꦡ ꦄꦣꦶꦥ꧀ꦥꦴꦪꦺꦴ – ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ, ꦪꦢꦶꦢꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦣꦩ꧀ꦩꦢꦺꦱꦤꦴ, ꦄꦨꦶꦏ꧀ꦏꦤ꧀ꦠꦁ ꦪꦢꦶꦢꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦣꦩ꧀ꦩꦢꦺꦱꦤꦁ ꦄꦴꦒꦩ꧀ꦩ ꦩꦩ ꦥꦱꦴꦢꦺꦴꦠꦶ. ꦨꦒꦮꦠꦺꦴ ꦌꦮ ꦮꦴ ꦮꦕꦤꦁ ꦢ꧀ꦮꦺ ꦢ꧀ꦮꦺ ꦄꦠ꧀ꦡꦺ ꦱꦤ꧀ꦣꦴꦪ ꦡꦺꦴꦩꦺꦠꦶ – ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦮꦕꦤꦁ ꦄꦨꦶꦏ꧀ꦏꦤ꧀ꦠꦁ ꦢꦺꦴꦱꦤꦴꦱꦤꦠꦺꦴ, ꦄꦨꦶꦏ꧀ꦏꦤ꧀ꦠꦁ ꦒꦸꦟꦴꦣꦶꦒꦩꦤꦠꦺꦴ, ꦠꦡꦴ ꦱꦢ꧀ꦣꦴꦗꦤꦤꦠꦺꦴ, ꦥꦚ꧀ꦚꦴꦗꦤꦤꦠꦺꦴ, ꦱꦴꦠ꧀ꦡꦠꦺꦴ, ꦱꦧ꧀ꦪꦚ꧀ꦗꦤꦠꦺꦴ, ꦈꦠ꧀ꦠꦴꦤꦥꦢꦠꦺꦴ, ꦒꦩ꧀ꦨꦷꦫꦠ꧀ꦡꦠꦺꦴ, ꦏꦟ꧀ꦟꦱꦸꦑꦠꦺꦴ, ꦲꦢꦪꦔ꧀ꦒꦩꦠꦺꦴ, ꦄꦤꦠ꧀ꦠꦸꦏ꧀ꦏꦁꦱꦤꦠꦺꦴ, ꦄꦥꦫꦮꦩ꧀ꦨꦤꦠꦺꦴ, ꦏꦫꦸꦟꦴꦱꦷꦠꦭꦠꦺꦴ, ꦥꦚ꧀ꦚꦴꦮꦢꦴꦠꦠꦺꦴ, ꦄꦴꦥꦴꦡꦫꦩꦟꦷꦪꦠꦺꦴ, ꦮꦶꦩꦢ꧀ꦢꦏ꧀ꦑꦩꦠꦺꦴ, ꦱꦸꦪ꧀ꦪꦩꦴꦤꦱꦸꦑꦠꦺꦴ, ꦮꦷꦩꦁꦱꦶꦪꦩꦴꦤꦲꦶꦠꦠꦺꦴꦠꦶ ꦌꦮꦩꦴꦢꦷꦲꦶ ꦪꦺꦴꦗꦺꦠꦧ꧀ꦧꦁ.

ꦠꦠꦺꦴ ꦥꦫꦩ꧀ꦥꦶ ꦕꦠꦹꦲꦶ ꦈꦥꦩꦴꦲꦶ ꦢꦺꦱꦤꦁꦪꦺꦮ ꦡꦺꦴꦩꦺꦠꦶ. ꦠꦠ꧀ꦡ ꦤꦶꦏ꧀ꦏꦸꦗ꧀ꦗꦶꦠꦤ꧀ꦠꦶ ꦄꦣꦺꦴꦩꦸꦑꦛ꧀ꦜꦥꦶꦠꦁ, ꦲꦺꦛ꧀ꦜꦴ ꦩꦸꦑꦗꦴꦠꦁ ꦮꦴ. ꦈꦏ꧀ꦏꦸꦗ꧀ꦗꦺꦪ꧀ꦪꦴꦠꦶ ꦈꦥꦫꦶꦩꦸꦑꦁ ꦏꦫꦺꦪ꧀ꦪ. ꦥꦛꦶꦕ꧀ꦖꦤ꧀ꦤꦤ꧀ꦠꦶ ꦠꦶꦟꦥꦟ꧀ꦟꦴꦢꦶꦕ꧀ꦖꦴꦢꦶꦠꦁ. ꦮꦶꦮꦫꦺꦪ꧀ꦪꦴꦠꦶ ꦈꦒ꧀ꦓꦴꦛꦺꦪ꧀ꦪ. ꦩꦹꦭ꦳꧀ꦲꦱ꧀ꦱꦴꦠꦶ ꦢꦶꦱꦴꦩꦹꦭ꦳꧀ꦲꦱ꧀ꦱ. ꦩꦒ꧀ꦒꦁ ꦄꦴꦕꦶꦏ꧀ꦑꦺꦪ꧀ꦪꦴꦠꦶ ꦲꦠ꧀ꦡꦺ ꦒꦲꦺꦠ꧀ꦮꦴ ‘‘ꦌꦱ ꦩꦒ꧀ꦒꦺꦴ’’ꦠꦶ ꦮꦢꦺꦪ꧀ꦪ. ꦄꦤ꧀ꦣꦏꦴꦫꦺꦠꦶ ꦏꦴꦭ꦳ꦥꦏ꧀ꦑꦕꦴꦠꦸꦢ꧀ꦢꦱꦷꦄꦝ꧀ꦞꦫꦠ꧀ꦠꦓꦤꦮꦤꦱꦟ꧀ꦝꦩꦺꦓꦥꦛꦭꦺꦲꦶ ꦕꦠꦸꦫꦔ꧀ꦒꦺ ꦠꦩꦱꦶ. ꦄꦪꦁ ꦠꦴꦮ ꦥꦢꦠ꧀ꦡꦺꦴ.

ꦄꦪꦁ ꦥꦤ ꦄꦣꦶꦥ꧀ꦥꦴꦪꦪꦺꦴꦗꦤꦴ – ꦪꦡꦴ ꦏꦺꦴꦕꦶ ꦤꦶꦏ꧀ꦏꦸꦗ꧀ꦗꦶꦠꦁ ꦈꦏ꧀ꦏꦸꦗ꧀ꦗꦺꦪ꧀ꦪ, ꦌꦮꦁ ꦱꦢ꧀ꦣꦩ꧀ꦩꦮꦶꦩꦸꦑꦁ ꦄꦱꦢ꧀ꦣꦩ꧀ꦩꦥꦠꦶꦠꦁ ꦩꦁ ꦄꦱꦢ꧀ꦣꦩ꧀ꦩꦴ ꦮꦸꦛ꧀ꦜꦴꦥꦺꦤ꧀ꦠꦺꦤ, ꦪꦡꦴ ꦥꦛꦶꦕ꧀ꦖꦤ꧀ꦤꦁ ꦮꦶꦮꦫꦺꦪ꧀ꦪ; ꦌꦮꦁ ꦏꦱ꧀ꦱꦥꦱ꧀ꦱ ꦨꦒꦮꦠꦺꦴ ꦱꦴꦱꦤꦤ꧀ꦠꦫꦣꦴꦤꦴ ꦥꦨꦸꦠꦶ ꦩꦶꦕ꧀ꦖꦴꦢꦶꦛ꧀ꦜꦶꦒꦲꦤꦥꦛꦶꦕ꧀ꦖꦤ꧀ꦤꦁ ꦱꦴꦱꦤꦁ ꦮꦶꦮꦫꦤ꧀ꦠꦺꦤ, ꦪꦡꦴ ꦩꦹꦭ꦳꧀ꦲꦱ꧀ꦱ ꦩꦒ꧀ꦒꦁ ꦄꦴꦕꦶꦏ꧀ꦑꦺꦪ꧀ꦪ, ꦌꦮꦁ ꦏꦸꦩ꧀ꦩꦒ꧀ꦒꦩꦶꦕ꧀ꦖꦴꦩꦒ꧀ꦒꦥꦛꦶꦥꦤ꧀ꦤꦱ꧀ꦱ ꦩꦺ ꦱꦒ꧀ꦒꦩꦺꦴꦏ꧀ꦑꦩꦒ꧀ꦒꦁ ꦄꦴꦕꦶꦏ꧀ꦑꦤ꧀ꦠꦺꦤ, ꦪꦡꦴ ꦄꦤ꧀ꦣꦏꦴꦫꦺ ꦠꦺꦭꦥꦗ꧀ꦗꦺꦴꦠꦁ ꦣꦴꦫꦺꦪ꧀ꦪ, ꦌꦮꦁ ꦩꦺꦴꦲꦤ꧀ꦣꦏꦴꦫꦤꦶꦩꦸꦒ꧀ꦒꦱ꧀ꦱ ꦩꦺ ꦧꦸꦢ꧀ꦣꦴꦢꦶꦫꦠꦤꦫꦹꦥꦴꦤꦶ ꦄꦥꦱ꧀ꦱꦠꦺꦴ ꦠꦥ꧀ꦥꦛꦶꦕ꧀ꦖꦴꦢꦏꦩꦺꦴꦲꦤ꧀ꦣꦏꦴꦫꦮꦶꦢ꧀ꦣꦁꦱꦏꦢꦺꦱꦤꦴꦥꦗ꧀ꦗꦺꦴꦠꦣꦴꦫꦟꦺꦤ ꦩꦪ꧀ꦲꦁ ꦨꦺꦴꦠꦴ ꦒꦺꦴꦠꦩꦺꦤ ꦌꦠꦺꦲꦶ ꦥꦫꦶꦪꦴꦪꦺꦲꦶ ꦢꦺꦱꦶꦠꦠ꧀ꦠꦴ ꦄꦤꦺꦏꦥꦫꦶꦪꦴꦪꦺꦤ ꦣꦩ꧀ꦩꦺꦴ ꦥꦏꦴꦱꦶꦠꦺꦴ.

ꦄꦡ ꦮꦴ ꦌꦏꦕ꧀ꦕꦶꦪꦺꦤ ꦩꦠ꧀ꦠꦺꦤ ꦪꦱ꧀ꦩꦴ ꦄꦪꦁ ꦣꦩ꧀ꦩꦺꦴ ꦢꦸꦏ꧀ꦑꦢꦱ꧀ꦱꦤꦺꦤ ꦄꦱꦸꦨꦺ ‘‘ꦱꦸꦨ’’ꦤ꧀ꦠꦶ ꦮꦶꦥꦭ꧀ꦭꦴꦱꦥ꧀ꦥꦲꦴꦤꦺꦤ ꦕ ꦤꦶꦏ꧀ꦏꦸꦗ꧀ꦗꦶꦠꦸꦏ꧀ꦏꦸꦗ꧀ꦗꦶꦠꦱꦢꦶꦱꦺꦴ, ꦱꦩꦸꦢꦪꦢꦱ꧀ꦱꦤꦺꦤ ꦢꦸꦏ꧀ꦑꦺ ‘‘ꦱꦸꦑ’’ꦤ꧀ꦠꦶ ꦮꦶꦥꦭ꧀ꦭꦴꦱꦥ꧀ꦥꦲꦴꦤꦺꦤ ꦕ ꦥꦛꦶꦕ꧀ꦖꦤ꧀ꦤꦮꦶꦮꦫꦟꦱꦢꦶꦱꦺꦴ, ꦤꦶꦫꦺꦴꦣꦢꦱ꧀ꦱꦤꦺꦤ ꦄꦤꦶꦕ꧀ꦕꦺ ‘‘ꦤꦶꦕ꧀ꦕ’’ꦤ꧀ꦠꦶ ꦮꦶꦥꦭ꧀ꦭꦴꦱꦥ꧀ꦥꦲꦴꦤꦺꦤ ꦕ ꦩꦹꦭ꦳꧀ꦲꦱ꧀ꦱ ꦩꦒ꧀ꦒꦴꦕꦶꦏ꧀ꦑꦟꦱꦢꦶꦱꦺꦴ, ꦩꦒ꧀ꦒꦢꦱ꧀ꦱꦤꦺꦤ ꦄꦤꦠ꧀ꦠꦤꦶ ‘‘ꦄꦠ꧀ꦠꦴ’’ꦠꦶ ꦮꦶꦥꦭ꧀ꦭꦴꦱꦥ꧀ꦥꦲꦴꦤꦺꦤ ꦕ ꦄꦤ꧀ꦣꦏꦴꦫꦺ ꦥꦗ꧀ꦗꦺꦴꦠꦱꦢꦶꦱꦺꦴ, ꦠꦱ꧀ꦩꦴ ꦱꦺꦪ꧀ꦪꦡꦴꦥꦶ ꦤꦴꦩ ꦤꦶꦏ꧀ꦏꦸꦗ꧀ꦗꦶꦠꦁ ꦮꦴ ꦈꦏ꧀ꦏꦸꦗ꧀ꦗꦺꦪ꧀ꦪ…ꦥꦺ… ꦥꦗ꧀ꦗꦺꦴꦠꦁ ꦣꦴꦫꦺꦪ꧀ꦪ ‘‘ꦕꦏ꧀ꦑꦸꦩꦤ꧀ꦠꦺꦴ ꦫꦹꦥꦴꦤꦶ ꦢꦏ꧀ꦑꦤ꧀ꦠꦷ’’ꦠꦶ, ꦌꦮꦁ ꦥꦏꦴꦱꦶꦠꦺꦴ ꦲꦺꦴꦠꦶ.

ꦪꦱ꧀ꦩꦴ ꦥꦤꦺꦠ꧀ꦡ ꦱꦢ꧀ꦣꦴꦠꦥꦏꦴꦪꦒꦸꦠ꧀ꦠꦠꦴꦢꦷꦲꦶ ꦱꦷꦭꦏ꧀ꦑꦤ꧀ꦣꦺꦴ ꦥꦏꦴꦱꦶꦠꦺꦴ ꦲꦺꦴꦠꦶ, ꦥꦚ꧀ꦚꦴꦪ ꦥꦚ꧀ꦚꦴꦏ꧀ꦑꦤ꧀ꦣꦺꦴ, ꦲꦶꦫꦶꦩꦤꦴꦢꦷꦲꦶ ꦱꦩꦴꦣꦶꦏ꧀ꦑꦤ꧀ꦣꦺꦴ, ꦪꦺꦴꦒꦏ꧀ꦑꦺꦩꦺꦤ ꦤꦶꦫꦺꦴꦣꦺꦴꦠꦶ ꦌꦮꦁ ꦠꦶꦏ꧀ꦑꦤ꧀ꦣꦺꦴ ꦄꦫꦶꦪꦩꦒ꧀ꦒꦺꦴ ꦤꦶꦫꦺꦴꦣꦺꦴ ꦕꦴꦠꦶ ꦱꦫꦹꦥꦺꦤꦺꦮ ꦢ꧀ꦮꦺ ꦄꦫꦶꦪꦱꦕ꧀ꦕꦴꦤꦶ ꦥꦏꦴꦱꦶꦠꦴꦤꦶ. ꦠꦠ꧀ꦡ ꦩꦒ꧀ꦒꦺꦴ ꦥꦛꦶꦥꦏ꧀ꦑꦺꦴ ꦱꦩꦸꦢꦪꦱ꧀ꦱ, ꦤꦶꦫꦺꦴꦣꦺꦴ ꦢꦸꦏ꧀ꦑꦱ꧀ꦱꦴꦠꦶ ꦥꦛꦶꦥꦏ꧀ꦑꦺꦤ ꦢ꧀ꦮꦺ. ꦆꦠꦶ ꦆꦩꦶꦤꦴ ꦥꦫꦶꦪꦴꦪꦺꦤ ꦕꦠ꧀ꦠꦴꦫꦶ ꦱꦕ꧀ꦕꦴꦤꦶ ꦥꦏꦴꦱꦶꦠꦴꦤꦶ. ꦠꦱ꧀ꦩꦴ ꦄꦤꦺꦏꦥꦫꦶꦪꦴꦪꦺꦤ ꦥꦏꦴꦱꦶꦠꦺꦴ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦺꦴ.

ꦌꦱꦴꦲꦤ꧀ꦠꦶꦄꦴꦢꦷꦱꦸ ꦌꦱꦺꦴ ꦄꦲꦤ꧀ꦠꦶ ꦌꦱꦴꦲꦁ. ꦱꦫꦟꦁ ꦒꦕ꧀ꦖꦴꦩꦷꦠꦶ ꦥꦴꦢꦺꦱꦸ ꦤꦶꦥꦠꦶꦠ꧀ꦮꦴ ꦥꦟꦶꦥꦴꦠꦺꦤ ꦱꦫꦟꦒꦩꦤꦺꦤ ꦒꦠꦺꦴꦥꦶ ꦆꦢꦴꦤꦶ ꦮꦴꦕꦴꦪ ꦱꦩꦴꦢꦶꦪꦤ꧀ꦠꦺꦴ ꦄꦴꦲ. ꦄꦡ ꦮꦴ ꦥꦟꦶꦥꦴꦠꦺꦤ ꦧꦸꦢ꧀ꦣꦁꦪꦺꦮ ꦱꦫꦟꦁ ꦒꦠꦺꦴꦠꦶ ꦆꦢꦴꦤꦶ ꦠꦁ ꦄꦴꦢꦶꦁ ꦏꦠ꧀ꦮꦴ ꦱꦺꦱꦺ ꦣꦩ꧀ꦩꦱꦔ꧀ꦓꦺꦥꦶ ꦒꦤ꧀ꦠꦸꦁ ꦄꦴꦲ. ꦄꦗ꧀ꦗꦠꦒ꧀ꦒꦺꦠꦶ ꦄꦗ꧀ꦗꦠꦁ ꦄꦴꦢꦶꦁ ꦏꦠ꧀ꦮꦴ, ꦄꦗ꧀ꦗꦢꦒ꧀ꦒꦺꦠꦶ ꦮꦴ ꦥꦴꦜꦺꦴ, ꦢ-ꦏꦴꦫꦺꦴ ꦥꦢꦱꦤ꧀ꦣꦶꦏꦫꦺꦴ, ꦄꦗ꧀ꦗ ꦄꦒ꧀ꦒꦁ ꦏꦠ꧀ꦮꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦥꦴꦟꦺꦲꦶ ꦈꦥꦺꦠꦁ ꦥꦴꦟꦸꦥꦺꦠꦁ, ꦪꦴꦮ ꦩꦺ ꦗꦷꦮꦶꦠꦁ ꦥꦮꦠ꧀ꦠꦠꦶ, ꦠꦴꦮ ꦈꦥꦺꦠꦁ, ꦄꦤꦚ꧀ꦚꦱꦠ꧀ꦡꦸꦏꦁ ꦠꦷꦲꦶ ꦱꦫꦟꦒꦩꦤꦺꦲꦶ ꦱꦫꦟꦁ ꦒꦠꦁ ꦩꦁ ꦨꦮꦁ ꦒꦺꦴꦠꦩꦺꦴ ꦣꦴꦫꦺꦠꦸ ꦗꦴꦤꦴꦠꦹꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦌꦠ꧀ꦠꦴꦮꦠꦴ ꦄꦤꦺꦤ ꦱꦸꦠꦴꦤꦸꦫꦹꦥꦴ ꦥꦛꦶꦥꦠ꧀ꦠꦶ ꦢꦱ꧀ꦱꦶꦠꦴ ꦲꦺꦴꦠꦶ. ꦤꦶꦏ꧀ꦏꦸꦗ꧀ꦗꦶꦠꦴꦢꦷꦲꦶ ꦮꦴ ꦱꦠ꧀ꦡꦸꦱꦩ꧀ꦥꦠ꧀ꦠꦶꦁ ꦢꦱ꧀ꦱꦺꦠ꧀ꦮꦴ ꦆꦩꦶꦤꦴ ‘‘ꦌꦱꦴꦲ’’ꦤ꧀ꦠꦶꦄꦴꦢꦶꦤꦴ ꦱꦶꦱ꧀ꦱꦱꦩ꧀ꦥꦠ꧀ꦠꦶ ꦢꦱ꧀ꦱꦶꦠꦴ. ꦠꦺꦤ ꦮꦴ ꦥꦚ꧀ꦚꦴꦥꦛꦶꦭꦴꦨꦁ ꦢꦱ꧀ꦱꦺꦠ꧀ꦮꦴ ꦆꦩꦶꦤꦴ ꦱꦢ꧀ꦣꦴꦥꦛꦶꦭꦴꦨꦺꦴ ꦢꦱ꧀ꦱꦶꦠꦺꦴ. ꦆꦢꦴꦤꦶ ꦌꦮꦁ ꦥꦛꦶꦭꦢ꧀ꦣꦱꦢ꧀ꦣꦺꦤ ꦥꦚ꧀ꦚꦮꦠꦴ ꦪꦁ ꦏꦠ꧀ꦠꦧ꧀ꦧꦁ, ꦠꦁ ꦏꦠ꧀ꦠꦸꦏꦴꦩꦺꦴ ꦨꦒꦮꦤ꧀ꦠꦁ ꦪꦴꦕꦠꦶ ‘‘ꦭꦨꦺꦪ꧀ꦪꦴꦲ’’ꦤ꧀ꦠꦶ. ꦠꦠ꧀ꦡ ꦨꦒꦮꦠꦺꦴ ꦆꦢ꧀ꦣꦶꦪꦴꦢꦷꦲꦶ ꦄꦨꦶꦥ꧀ꦥꦱꦴꦢꦶꦠꦕꦶꦠ꧀ꦠꦺꦴ ‘‘ꦨꦒꦮꦴꦥꦶ ꦕꦏ꧀ꦏꦮꦠ꧀ꦠꦶꦫꦗ꧀ꦗꦁ ꦥꦲꦴꦪ ꦥꦧ꧀ꦧꦗꦶꦠꦺꦴ, ꦏꦶꦩꦔ꧀ꦒꦁ ꦥꦤꦴꦲ’’ꦤ꧀ꦠꦶ ꦱꦢ꧀ꦣꦴꦪ ꦥꦧ꧀ꦧꦗ꧀ꦗꦁ ꦪꦴꦕꦠꦶ, ꦠꦠ꧀ꦡ ꦥꦫꦶꦥꦹꦫꦏꦴꦫꦶꦠꦁ ꦥꦠ꧀ꦡꦺꦤ꧀ꦠꦺꦴ ꦥꦚ꧀ꦚꦴꦪ ꦈꦥꦱꦩ꧀ꦥꦢꦁ. ꦱꦺꦱꦁ ꦥꦴꦏꦛꦩꦺꦮ.

ꦌꦏꦺꦴ ꦮꦹꦥꦏꦛ꧀ꦜꦺꦴꦠꦶꦄꦴꦢꦷꦱꦸ ꦥꦤ ꦌꦏꦺꦴ ꦏꦴꦪꦮꦶꦮꦺꦏꦺꦤ, ꦮꦹꦥꦏꦛ꧀ꦜꦺꦴ ꦕꦶꦠ꧀ꦠꦮꦶꦮꦺꦏꦺꦤ, ꦄꦥ꧀ꦥꦩꦠ꧀ꦠꦺꦴ ꦏꦩ꧀ꦩꦛ꧀ꦜꦴꦤꦺ ꦱꦠꦶꦄꦮꦶꦗꦲꦤꦺꦤ, ꦄꦴꦠꦴꦥꦷ ꦏꦴꦪꦶꦏꦕꦺꦠꦱꦶꦏꦮꦷꦫꦶꦪꦱꦔ꧀ꦑꦴꦠꦺꦤ ꦄꦴꦠꦴꦥꦺꦤ, ꦥꦲꦶꦠꦠ꧀ꦠꦺꦴ ꦏꦴꦪꦺ ꦕ ꦗꦷꦮꦶꦠꦺ ꦕ ꦄꦤꦥꦺꦏ꧀ꦑꦠꦴꦪ ꦮꦶꦲꦫꦤ꧀ꦠꦺꦴ ꦄꦚ꧀ꦚꦠꦫꦆꦫꦶꦪꦴꦥꦡꦮꦶꦲꦴꦫꦺꦤ. ꦤ ꦕꦶꦫꦱ꧀ꦱꦺꦮꦴꦠꦶ ꦥꦧ꧀ꦧꦗ꧀ꦗꦁ ꦈꦥꦴꦢꦴꦪ ꦮꦸꦕ꧀ꦕꦠꦶ. ꦏꦸꦭꦥꦸꦠ꧀ꦠꦴꦠꦶ ꦢꦸꦮꦶꦣꦴ ꦏꦸꦭꦥꦸꦠ꧀ꦠꦴ, ꦗꦴꦠꦶꦏꦸꦭꦥꦸꦠ꧀ꦠꦴ, ꦄꦴꦕꦴꦫꦏꦸꦭꦥꦸꦠ꧀ꦠꦴ ꦕ. ꦄꦪꦁ ꦥꦤ ꦈꦨꦪꦡꦴꦥꦶ ꦏꦸꦭꦥꦸꦠ꧀ꦠꦺꦴ. ꦄꦒꦴꦫꦱ꧀ꦩꦴꦠꦶ ꦓꦫꦴ. ꦄꦒꦴꦫꦴꦤꦁ ꦲꦶꦠꦁ ꦄꦒꦴꦫꦶꦪꦁ ꦏꦱꦶꦒꦺꦴꦫꦏ꧀ꦑꦴꦢꦶꦏꦸꦛꦸꦩ꧀ꦧꦥꦺꦴꦱꦤꦏꦩ꧀ꦩꦁ ꦮꦸꦕ꧀ꦕꦠꦶ. ꦤꦠ꧀ꦡꦶ ꦌꦠ꧀ꦡ ꦄꦒꦴꦫꦶꦪꦤ꧀ꦠꦶ ꦄꦤꦒꦴꦫꦶꦪꦁ, ꦥꦧ꧀ꦧꦗ꧀ꦗꦴꦪꦺꦠꦁ ꦄꦣꦶꦮꦕꦤꦁ ꦥꦧ꧀ꦧꦗꦤ꧀ꦠꦷꦠꦶ ꦈꦥꦒꦕ꧀ꦖꦤ꧀ꦠꦶ ꦈꦥꦱꦔ꧀ꦏꦩꦤ꧀ꦠꦶ. ꦠꦢꦤꦸꦠ꧀ꦠꦫꦤ꧀ꦠꦶ ꦠꦁ ꦄꦤꦸꦠ꧀ꦠꦫꦁ. ꦧ꧀ꦫꦲ꧀ꦩꦕꦫꦶꦪꦥꦫꦶꦪꦺꦴꦱꦴꦤꦤ꧀ꦠꦶ ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦱ꧀ꦱ ꦥꦫꦶꦪꦺꦴꦱꦴꦤꦁ, ꦄꦫꦲꦠ꧀ꦠꦦꦭꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠꦱ꧀ꦱ ꦲꦶ ꦄꦠ꧀ꦡꦴꦪ ꦏꦸꦭꦥꦸꦠ꧀ꦠꦴ ꦥꦧ꧀ꦧꦗꦤ꧀ꦠꦶ. ꦢꦶꦛ꧀ꦜꦺꦮ ꦣꦩ꧀ꦩꦺꦠꦶ ꦠꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ. ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴꦠꦶ ꦄꦠ꧀ꦠꦤꦴꦪꦺꦮ ꦥꦚ꧀ꦚꦴꦪ ꦥꦕ꧀ꦕꦏ꧀ꦑꦁ ꦏꦠ꧀ꦮꦴ, ꦄꦥꦫꦥ꧀ꦥꦕ꧀ꦕꦪꦁ ꦚꦠ꧀ꦮꦴꦠꦶ ꦄꦠ꧀ꦡꦺꦴ. ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦷꦠꦶ ꦥꦴꦥꦸꦟꦶꦠ꧀ꦮꦴ ꦱꦩ꧀ꦥꦴꦢꦺꦠ꧀ꦮꦴ ꦮꦴ ꦮꦶꦲꦴꦱꦶ. ꦌꦮꦁ ꦮꦶꦲꦫꦤ꧀ꦠꦺꦴ ꦕ ꦑꦷꦟꦴ ꦗꦴꦠꦶ…ꦥꦺ… ꦄꦧ꧀ꦨꦚ꧀ꦚꦴꦱꦶ. ꦌꦠꦺꦤꦱ꧀ꦱ ꦥꦕ꧀ꦕꦮꦺꦏ꧀ꦑꦟꦨꦹꦩꦶꦁ ꦢꦱ꧀ꦱꦺꦠꦶ.

ꦏꦠꦩꦴ ꦥꦤꦱ꧀ꦱ ꦗꦴꦠꦶ ꦑꦷꦟꦴ, ꦏꦡꦚ꧀ꦕ ꦤꦁ ꦄꦧ꧀ꦨꦚ꧀ꦚꦴꦱꦷꦠꦶ? ꦮꦸꦕ꧀ꦕꦠꦺ – ꦤ ꦠꦴꦮꦱ꧀ꦱ ꦄꦠꦷꦠꦴ ꦗꦴꦠꦶ ꦑꦷꦟꦴ ꦥꦸꦧ꧀ꦧꦺꦮ ꦑꦷꦟꦠ꧀ꦠꦴ, ꦤ ꦄꦤꦴꦒꦠꦴ ꦄꦤꦴꦒꦠꦺ ꦮꦴꦪꦴꦩꦴꦨꦴꦮꦠꦺꦴ, ꦤ ꦥꦕ꧀ꦕꦸꦥ꧀ꦥꦤ꧀ꦤꦴ ꦮꦶꦗ꧀ꦗꦩꦴꦤꦠ꧀ꦠꦴ. ꦪꦴ ꦥꦤ ꦩꦒ꧀ꦒꦱ꧀ꦱ ꦄꦨꦴꦮꦶꦠꦠ꧀ꦠꦴ ꦈꦥ꧀ꦥꦗ꧀ꦗꦺꦪ꧀ꦪ ꦌꦏꦕꦠꦸꦥꦚ꧀ꦕꦮꦺꦴꦏꦴꦫꦨꦮꦺꦱꦸ ꦌꦏꦕꦠꦸꦥꦚ꧀ꦕꦏ꧀ꦑꦤ꧀ꦣꦥ꧀ꦥꦨꦺꦢꦴ ꦗꦴꦠꦶ, ꦱꦴ ꦩꦒ꧀ꦒꦱ꧀ꦱ ꦨꦴꦮꦶꦠꦠ꧀ꦠꦴ ꦄꦤꦸꦥ꧀ꦥꦴꦢꦣꦩ꧀ꦩꦠꦁ ꦄꦴꦥꦗ꧀ꦗꦤꦺꦤ ꦑꦷꦟꦴ. ꦠꦁ ꦱꦺꦴ ꦩꦒ꧀ꦒꦨꦴꦮꦤꦴꦪ ꦥꦲꦷꦤꦏꦶꦭꦺꦱꦺ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ ꦏꦶꦭꦺꦱꦴꦨꦴꦮꦺ ꦮꦶꦗ꧀ꦗꦩꦴꦤꦩ꧀ꦥꦶ ꦏꦩ꧀ꦩꦁ ꦄꦴꦪꦠꦶꦁ ꦄꦥꦛꦶꦱꦤ꧀ꦣꦶꦏꦁ ꦲꦺꦴꦠꦷꦠꦶ ꦗꦴꦤꦤ꧀ꦠꦺꦴ ꦗꦴꦤꦴꦠꦶ.

ꦮꦸꦱꦶꦠꦤ꧀ꦠꦶ ꦮꦸꦠ꧀ꦡꦁ ꦥꦫꦶꦮꦸꦠ꧀ꦡꦁ, ꦏꦠꦁ ꦕꦫꦶꦠꦁ ꦤꦶꦛ꧀ꦜꦴꦥꦶꦠꦤ꧀ꦠꦶ ꦄꦠ꧀ꦡꦺꦴ. ꦧ꧀ꦫꦲ꧀ꦩꦕꦫꦶꦪꦤ꧀ꦠꦶ ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦁ. ꦏꦠꦁ ꦏꦫꦟꦷꦪꦤ꧀ꦠꦶ ꦕꦠꦹꦱꦸ ꦱꦕ꧀ꦕꦺꦱꦸ ꦕꦠꦹꦲꦶ ꦩꦒ꧀ꦒꦺꦲꦶ ꦥꦫꦶꦚ꧀ꦚꦴꦥꦲꦴꦤꦱꦕ꧀ꦖꦶꦏꦶꦫꦶꦪꦨꦴꦮꦤꦴꦮꦱꦺꦤ ꦱꦺꦴꦭ꦳ꦱꦮꦶꦣꦩ꧀ꦥꦶ ꦏꦶꦕ꧀ꦕꦁ ꦤꦶꦛ꧀ꦜꦴꦥꦶꦠꦤ꧀ꦠꦶ ꦄꦠ꧀ꦡꦺꦴ. ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴꦠꦶ ꦆꦢꦴꦤꦶ ꦥꦸꦤ ꦆꦠ꧀ꦡꦨꦴꦮꦴꦪ ꦌꦮꦁ ꦱꦺꦴꦭ꦳ꦱꦏꦶꦕ꧀ꦕꦨꦴꦮꦴꦪ ꦏꦶꦭꦺꦱꦏ꧀ꦑꦪꦴꦪ ꦮꦴ ꦩꦒ꧀ꦒꦨꦴꦮꦤꦴ ꦤꦠ꧀ꦡꦷꦠꦶ. ꦄꦡ ꦮꦴ ꦆꦠ꧀ꦡꦠ꧀ꦠꦴꦪꦴꦠꦶ ꦆꦠ꧀ꦡꦨꦴꦮꦠꦺꦴ, ꦆꦩꦱ꧀ꦩꦴ ꦌꦮꦁꦥꦏꦴꦫꦴ ꦆꦢꦴꦤꦶ ꦮꦠ꧀ꦠꦩꦴꦤꦏ꧀ꦑꦤ꧀ꦣꦱꦤ꧀ꦠꦴꦤꦴ ꦄꦥꦫꦁ ꦑꦤ꧀ꦣꦱꦤ꧀ꦠꦴꦤꦁ ꦤꦠ꧀ꦡꦶ. ꦆꦩꦺ ꦥꦤ ꦥꦚ꧀ꦕꦏ꧀ꦑꦤ꧀ꦣꦴ ꦥꦫꦶꦚ꧀ꦚꦴꦠꦴ ꦠꦶꦛ꧀ꦜꦤ꧀ꦠꦶ ꦖꦶꦤ꧀ꦤꦩꦹꦭꦏꦺꦴ ꦫꦸꦏ꧀ꦑꦺꦴ ꦮꦶꦪꦴꦠꦶ ꦄꦧ꧀ꦨꦚ꧀ꦚꦴꦱꦶ. ꦄꦚ꧀ꦚꦠꦫꦺꦴꦠꦶ ꦌꦏꦺꦴ. ꦄꦫꦲꦠꦤ꧀ꦠꦶ ꦄꦫꦲꦤ꧀ꦠꦴꦤꦁ. ꦩꦲꦴꦱꦴꦮꦏꦴꦤꦁ ꦄꦧ꧀ꦨꦤ꧀ꦠꦫꦺꦴ ꦄꦴꦪꦱ꧀ꦩꦴ ꦨꦴꦫꦢ꧀ꦮꦴꦗꦺꦴ ꦄꦲꦺꦴꦱꦷꦠꦶ ꦄꦪꦁ ꦏꦶꦫꦺꦠ꧀ꦡ ꦄꦣꦶꦥ꧀ꦥꦴꦪꦺꦴꦠꦶ.

ꦥꦫꦩꦠ꧀ꦡꦗꦺꦴꦠꦶꦏꦴꦪ ꦑꦸꦢ꧀ꦢꦏ-ꦄꦛ꧀ꦜꦏꦡꦴꦪ

ꦱꦸꦠ꧀ꦠꦤꦶꦥꦴꦠ-ꦄꦛ꧀ꦜꦏꦡꦴꦪ ꦏꦱꦶꦨꦴꦫꦢ꧀ꦮꦴꦗꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.