꧑. ꦑꦺꦠ꧀ꦠꦹꦥꦩꦥꦺꦠꦮꦠ꧀ꦡꦸꦮꦟ꧀ꦟꦤꦴ

ꦠꦁ ꦥꦤꦺꦠꦁ ꦮꦠ꧀ꦡꦸꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦤ꧀ꦠꦺꦴ ꦮꦺꦭ꦳ꦸꦮꦤꦺ ꦏꦭꦤ꧀ꦢꦏꦤꦶꦮꦴꦥꦺ ꦄꦚ꧀ꦚꦠꦫꦁ ꦱꦺꦛ꧀ꦜꦶꦥꦸꦠ꧀ꦠꦥꦺꦠꦁ ꦄꦴꦫꦧ꧀ꦨ ꦏꦡꦺꦱꦶ. ꦫꦴꦗꦒꦲꦺ ꦏꦶꦫ ꦄꦚ꧀ꦚꦠꦫꦺꦴ ꦄꦝ꧀ꦞꦺꦴ ꦩꦲꦢ꧀ꦣꦤꦺꦴ ꦩꦲꦴꦨꦺꦴꦒꦺꦴ ꦥꦲꦹꦠꦮꦶꦠ꧀ꦠꦹꦥꦏꦫꦟꦺꦴ ꦄꦤꦺꦏꦏꦺꦴꦛꦶꦣꦤꦱꦤ꧀ꦤꦶꦕꦪꦺꦴ ꦱꦺꦛ꧀ꦜꦶ ꦄꦲꦺꦴꦱꦶ. ꦠꦱ꧀ꦱ ꦩꦲꦴꦣꦤꦱꦩ꧀ꦥꦤ꧀ꦤꦠꦴꦪ ‘‘ꦩꦲꦴꦣꦤꦱꦺꦛ꧀ꦜꦶ’’ꦠ꧀ꦮꦺꦮ ꦱꦩꦚ꧀ꦚꦴ ꦄꦲꦺꦴꦱꦶ. ꦌꦏꦺꦴꦮ ꦥꦸꦠ꧀ꦠꦺꦴ ꦄꦲꦺꦴꦱꦶ, ꦥꦶꦪꦺꦴ ꦩꦤꦴꦥꦺꦴ. ꦠꦱ꧀ꦩꦶꦁ ꦮꦶꦚ꧀ꦚꦸꦠꦁ ꦥꦠ꧀ꦠꦺ ꦩꦴꦠꦴꦥꦶꦠꦫꦺꦴ ꦌꦮꦁ ꦕꦶꦤ꧀ꦠꦺꦱꦸꦁ – ‘‘ꦄꦩ꧀ꦲꦴꦏꦁ ꦥꦸꦠ꧀ꦠꦱ꧀ꦱ ꦢꦶꦮꦱꦺ ꦢꦶꦮꦱꦺ ꦱꦲꦱ꧀ꦱꦁ ꦱꦲꦱ꧀ꦱꦁ ꦥꦫꦶꦧ꧀ꦧꦪꦁ ꦏꦫꦺꦴꦤ꧀ꦠꦱ꧀ꦱ ꦮꦱ꧀ꦱꦱꦠꦺꦤꦴꦥꦶ ꦄꦪꦁ ꦣꦤꦱꦤ꧀ꦤꦶꦕꦪꦺꦴ ꦥꦫꦶꦏ꧀ꦑꦪꦁ ꦤ ꦒꦩꦶꦱ꧀ꦱꦠꦶ, ꦏꦶꦁ ꦆꦩꦱ꧀ꦱ ꦱꦶꦥ꧀ꦥꦸꦒ꧀ꦒꦲꦟꦥꦫꦶꦱ꧀ꦱꦩꦺꦤ, ꦄꦏꦶꦭꦤ꧀ꦠꦏꦴꦪꦕꦶꦠ꧀ꦠꦺꦴ ꦪꦡꦴꦱꦸꦑꦁ ꦨꦺꦴꦒꦺ ꦥꦫꦶꦨꦸꦚ꧀ꦗꦠꦹ’’ꦠꦶ ꦱꦶꦥ꧀ꦥꦁ ꦤ ꦱꦶꦏ꧀ꦑꦴꦥꦺꦱꦸꦁ. ꦮꦪꦥ꧀ꦥꦠ꧀ꦠꦺ ꦥꦤ ꦏꦸꦭꦫꦹꦥꦪꦺꦴꦧ꧀ꦧꦤꦮꦶꦭꦴꦱꦱꦩ꧀ꦥꦤ꧀ꦤꦁ ꦏꦴꦩꦴꦨꦶꦩꦸꦑꦁ ꦣꦩ꧀ꦩꦱꦚ꧀ꦚꦴꦮꦶꦩꦸꦑꦁ ꦏꦚ꧀ꦚꦁ ꦄꦴꦤꦺꦱꦸꦁ. ꦱꦺꦴ ꦠꦴꦪ ꦱꦢ꧀ꦣꦶꦁ ꦄꦨꦶꦫꦩꦤ꧀ꦠꦺꦴ ꦣꦩ꧀ꦩꦺ ꦕꦶꦠ꧀ꦠꦩꦠ꧀ꦠꦩ꧀ꦥꦶ ꦄꦤꦸꦥ꧀ꦥꦴꦢꦺꦠ꧀ꦮꦴ, ꦱꦩꦟꦧ꧀ꦫꦴꦲ꧀ꦩꦟꦒꦸꦫꦸꦗꦤꦺꦱꦸ ꦄꦤꦴꦢꦫꦺꦴ ꦲꦸꦠ꧀ꦮꦴ, ꦣꦸꦠ꧀ꦠꦗꦤꦥꦫꦶꦮꦸꦠꦺꦴ ꦫꦗ꧀ꦗꦩꦴꦤꦺꦴ ꦥꦚ꧀ꦕꦏꦴꦩꦒꦸꦟꦺ ꦫꦠꦺꦴ ꦒꦶꦢ꧀ꦣꦺꦴ ꦩꦺꦴꦲꦺꦤ ꦄꦤ꧀ꦣꦺꦴ ꦲꦸꦠ꧀ꦮꦴ ꦏꦴꦭꦁ ꦮꦷꦠꦶꦤꦴꦩꦺꦠ꧀ꦮꦴ, ꦩꦴꦠꦴꦥꦶꦠꦹꦱꦸ ꦏꦴꦭꦏꦠꦺꦱꦸ ꦤꦛꦤꦴꦛꦏꦒꦴꦪꦏꦴꦢꦷꦤꦁ ꦪꦡꦶꦕ꧀ꦖꦶꦠꦁ ꦢꦺꦤ꧀ꦠꦺꦴ ꦣꦤꦁ ꦮꦶꦤꦴꦱꦺꦠ꧀ꦮꦴ ꦤꦕꦶꦫꦱ꧀ꦱꦺꦮ ꦥꦴꦫꦶꦗꦸꦚ꧀ꦚꦥ꧀ꦥꦠ꧀ꦠꦺꦴ ꦲꦸꦠ꧀ꦮꦴ, ꦆꦟꦁ ꦒꦲꦺꦠ꧀ꦮꦴ ꦗꦷꦮꦶꦏꦁ ꦏꦥ꧀ꦥꦺꦤ꧀ꦠꦺꦴ ꦥꦸꦤ ꦆꦟꦩ꧀ꦥꦶ ꦄꦭꦨꦶꦠ꧀ꦮꦴ ꦆꦟꦴꦪꦶꦏꦺꦲꦶ ꦕꦺꦴꦢꦶꦪꦩꦴꦤꦺꦴ ꦠꦺꦱꦁ ꦄꦠ꧀ꦠꦤꦺꦴ ꦑꦺꦠ꧀ꦠꦮꦠ꧀ꦡꦸꦓꦫꦴꦢꦷꦤꦶ ꦢꦠ꧀ꦮꦴ, ꦏꦥꦴꦭꦲꦠ꧀ꦡꦺꦴ ꦨꦶꦏ꧀ꦑꦁ ꦕꦫꦶꦠ꧀ꦮꦴ ꦨꦸꦚ꧀ꦗꦤ꧀ꦠꦺꦴ ꦠꦱ꧀ꦩꦶꦁꦪꦺꦮ ꦤꦒꦫꦺ ꦄꦤꦴꦡꦱꦴꦭꦴꦪꦁ ꦮꦱꦠꦶ.

ꦄꦡ ꦤꦁ ꦌꦏꦢꦶꦮꦱꦁ ꦕꦺꦴꦫꦴ ꦱꦩꦴꦒꦠꦴ ꦌꦮꦩꦴꦲꦁꦱꦸ – ‘‘ꦄꦩ꧀ꦨꦺꦴ ꦥꦸꦫꦶꦱ, ꦏꦶꦁ ꦠꦸꦪ꧀ꦲꦁ ꦆꦩꦶꦤꦴ ꦢꦸꦗ꧀ꦗꦷꦮꦶꦠꦺꦤ, ꦠꦫꦸꦟꦺꦴ ꦠ꧀ꦮꦩꦱꦶ ꦡꦴꦩꦗꦮꦧꦭꦱꦩ꧀ꦥꦤ꧀ꦤꦺꦴ, ꦏꦱ꧀ꦩꦴ ꦲꦠ꧀ꦡꦥꦴꦢꦮꦶꦏꦭꦺꦴ ꦮꦶꦪ ꦄꦕ꧀ꦖꦱꦶ? ꦌꦲꦶ ꦄꦩ꧀ꦲꦺꦲꦶ ꦱꦲ ꦕꦺꦴꦫꦶꦏꦴꦪ ꦥꦫꦺꦱꦁ ꦱꦤ꧀ꦠꦏꦁ ꦒꦲꦺꦠ꧀ꦮꦴ ꦱꦸꦑꦺꦤ ꦗꦷꦮꦶꦏꦁ ꦏꦥ꧀ꦥꦺꦲꦷ’’ꦠꦶ. ꦱꦺꦴ ‘‘ꦤꦴꦲꦁ ꦕꦺꦴꦫꦶꦏꦁ ꦏꦴꦠꦸꦁ ꦗꦴꦤꦴꦩꦷ’’ꦠꦶ ꦄꦴꦲ. ꦕꦺꦴꦫꦴ ‘‘ꦩꦪꦁ ꦠꦁ ꦱꦶꦏ꧀ꦑꦴꦥꦺꦩ, ꦏꦺꦮꦭꦁ ꦠ꧀ꦮꦁ ꦄꦩ꧀ꦲꦴꦏꦁ ꦮꦕꦤꦁ ꦏꦫꦺꦴꦲꦷ’’ꦠꦶ ꦄꦴꦲꦁꦱꦸ. ꦱꦺꦴ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦠꦺꦲꦶ ꦱꦢ꧀ꦣꦶꦁ ꦄꦒꦩꦴꦱꦶ. ꦄꦡ ꦠꦺ ꦕꦺꦴꦫꦴ ꦠꦱ꧀ꦱ ꦲꦠ꧀ꦡꦺ ꦩꦲꦤ꧀ꦠꦁ ꦩꦸꦒ꧀ꦒꦫꦁ ꦢꦠ꧀ꦮꦴ ꦱꦤ꧀ꦣꦶꦁ ꦖꦶꦤ꧀ꦢꦶꦠ꧀ꦮꦴ ꦓꦫꦁ ꦥꦮꦶꦱꦤ꧀ꦠꦺꦴ ꦠꦁ ꦱꦤ꧀ꦣꦶꦩꦸꦑꦺ ꦜꦥꦺꦠ꧀ꦮꦴ ꦄꦴꦲꦁꦱꦸ – ‘‘ꦱꦕꦺ ꦆꦣ ꦄꦚ꧀ꦚꦺꦴ ꦏꦺꦴꦕꦶ ꦄꦴꦒꦕ꧀ꦖꦠꦶ, ꦠꦁ ꦆꦩꦶꦤꦴ ꦩꦸꦒ꧀ꦒꦫꦺꦤ ꦥꦲꦫꦶꦠ꧀ꦮꦴ ꦌꦏꦥ꧀ꦥꦲꦴꦫꦺꦤꦺꦮ ꦩꦴꦫꦺꦲꦷ’’ꦠꦶ. ꦱꦺꦴ ꦄꦤ꧀ꦣꦧꦴꦭꦺꦴ ꦲꦶꦠꦴꦲꦶꦠꦁ ꦄꦗꦴꦤꦤ꧀ꦠꦺꦴ ꦥꦫꦺꦱꦁ ꦄꦴꦒꦩꦤꦩꦺꦮ ꦎꦭꦺꦴꦏꦺꦤ꧀ꦠꦺꦴ ꦠꦠ꧀ꦡ ꦄꦛ꧀ꦜꦴꦱꦶ. ꦕꦺꦴꦫꦴ ꦥꦤ ꦓꦫꦁ ꦥꦮꦶꦱꦶꦠ꧀ꦮꦴ ꦒꦪ꧀ꦲꦹꦥꦒꦁ ꦨꦟ꧀ꦝꦁ ꦒꦲꦺꦠ꧀ꦮꦴ ꦓꦫꦩꦤꦸꦱ꧀ꦱꦺꦲꦶ ꦚꦴꦠꦩꦠ꧀ꦠꦴꦮ ꦆꦠꦺꦴ ꦕꦶꦠꦺꦴ ꦕ ꦥꦭꦴꦪꦶꦁꦱꦸ. ꦓꦫꦩꦤꦸꦱ꧀ꦱꦴ ꦈꦛ꧀ꦜꦲꦶꦠ꧀ꦮꦴ ꦱꦷꦓꦁ ꦱꦷꦓꦁ ꦣꦴꦮꦤ꧀ꦠꦴ ꦆꦠꦺꦴ ꦕꦶꦠꦺꦴ ꦕ ꦎꦭꦺꦴꦏꦺꦤ꧀ꦠꦴ ꦠꦁ ꦥꦸꦫꦶꦱꦁ ꦱꦤ꧀ꦣꦶꦢ꧀ꦮꦴꦫꦺ ꦜꦶꦠꦁ ꦢꦶꦱ꧀ꦮꦴ ‘‘ꦲꦫꦺ ꦢꦸꦛ꧀ꦜꦕꦺꦴꦫꦴ’’ꦠꦶ ꦒꦲꦺꦠ꧀ꦮꦴ ꦲꦠ꧀ꦡꦥꦴꦢꦺ ꦩꦸꦒ꧀ꦒꦫꦴꦢꦷꦲꦶ ꦥꦺꦴꦡꦺꦠ꧀ꦮꦴ ꦫꦚ꧀ꦚꦺꦴ ꦢꦱ꧀ꦱꦺꦱꦸꦁ – ‘‘ꦄꦪꦁ, ꦢꦺꦮ, ꦕꦺꦴꦫꦺꦴ ꦱꦤ꧀ꦣꦶꦱꦸꦑꦺ ꦒꦲꦶꦠꦺꦴ’’ꦠꦶ. ꦫꦴꦗꦴ ‘‘ꦆꦩꦱ꧀ꦱ ꦱꦷꦱꦁ ꦖꦶꦤ꧀ꦢꦴꦥꦺꦲꦷ’’ꦠꦶ ꦤꦒꦫꦒꦸꦠ꧀ꦠꦶꦏꦁ ꦄꦴꦟꦴꦥꦺꦱꦶ. ‘‘ꦱꦴꦣꦸ, ꦢꦺꦮꦴ’’ꦠꦶ ꦤꦒꦫꦒꦸꦠ꧀ꦠꦶꦏꦺꦴ ꦠꦁ ꦒꦴꦲꦴꦥꦺꦠ꧀ꦮꦴ ꦥꦕ꧀ꦖꦴꦧꦴꦲꦁ ꦒꦴꦭ꦳꧀ꦲꦧꦤ꧀ꦣꦤꦁ ꦧꦤ꧀ꦣꦴꦥꦺꦠ꧀ꦮꦴ ꦫꦠ꧀ꦠꦮꦟ꧀ꦟꦮꦶꦫꦭ꦳ꦩꦴꦭꦴꦧꦤ꧀ꦣꦏꦟ꧀ꦜꦁ ꦆꦛ꧀ꦜꦏꦕꦸꦟ꧀ꦟꦩꦏ꧀ꦑꦶꦠꦱꦷꦱꦁ ꦮꦗ꧀ꦙꦥꦲꦛꦨꦺꦫꦶꦢꦺꦱꦶꦠꦩꦒ꧀ꦒꦁ ꦫꦡꦶꦏꦴꦪ ꦫꦡꦶꦏꦁ ꦱꦶꦔ꧀ꦓꦴꦛꦏꦺꦤ ꦱꦶꦔ꧀ꦓꦴꦛꦏꦁ ꦮꦶꦕꦫꦴꦥꦺꦠ꧀ꦮꦴ ꦏꦱꦴꦲꦶ ꦠꦴꦭ꦳ꦺꦤ꧀ꦠꦺꦴ ꦄꦴꦓꦴꦠꦤꦴꦨꦶꦩꦸꦑꦁ ꦤꦺꦠꦶ. ‘‘ꦄꦪꦁ ꦆꦩꦱ꧀ꦩꦶꦁ ꦤꦒꦫꦺ ꦮꦶꦭꦸꦩ꧀ꦥꦩꦴꦤꦏꦕꦺꦴꦫꦺꦴ ꦒꦲꦶꦠꦺꦴ’’ꦠꦶ ꦏꦺꦴꦭꦴꦲꦭꦁ ꦄꦲꦺꦴꦱꦶ.

ꦠꦺꦤ ꦕ ꦱꦩꦪꦺꦤ ꦠꦱ꧀ꦩꦶꦁ ꦤꦒꦫꦺ ꦱꦸꦭꦱꦴ ꦤꦴꦩ ꦤꦒꦫꦱꦺꦴꦨꦶꦤꦷ ꦥꦴꦱꦴꦢꦺ ꦜꦶꦠꦴ ꦮꦴꦠꦥꦴꦤꦤ꧀ꦠꦫꦺꦤ ꦎꦭꦺꦴꦏꦺꦤ꧀ꦠꦷ ꦠꦁ ꦠꦡꦴ ꦤꦷꦪꦩꦴꦤꦁ ꦢꦶꦱ꧀ꦮꦴ ꦥꦸꦧ꧀ꦧꦺ ꦠꦺꦤ ꦏꦠꦥꦫꦶꦕꦪꦴ ‘‘ꦄꦪꦁ ꦥꦸꦫꦶꦱꦺꦴ ꦆꦩꦱ꧀ꦩꦶꦁꦪꦺꦮ ꦤꦒꦫꦺ ꦩꦲꦠꦶꦁ ꦱꦩ꧀ꦥꦠ꧀ꦠꦶꦁ ꦄꦤꦸꦨꦮꦶꦠ꧀ꦮꦴ ꦆꦢꦴꦤꦶ ꦌꦮꦫꦹꦥꦁ ꦄꦤꦠ꧀ꦡꦁ ꦄꦤꦪꦧ꧀ꦪꦱꦤꦁ ꦥꦠ꧀ꦠꦺꦴ’’ꦠꦶ ꦠꦱ꧀ꦱ ꦏꦴꦫꦸꦚ꧀ꦚꦁ ꦈꦥ꧀ꦥꦴꦢꦺꦠ꧀ꦮꦴ ꦕꦠ꧀ꦠꦴꦫꦺꦴ ꦩꦺꦴꦢꦏꦺ ꦥꦴꦤꦷꦪꦚ꧀ꦕ ꦥꦺꦱꦺꦱꦶ. ꦤꦒꦫꦒꦸꦠ꧀ꦠꦶꦏꦱ꧀ꦱ ꦕ ꦄꦴꦫꦺꦴꦕꦴꦥꦺꦱꦶ – ‘‘ꦠꦴꦮ ꦄꦪ꧀ꦪꦺꦴ ꦄꦴꦒꦩꦺꦠꦸ, ꦪꦴꦮꦴꦪꦁ ꦥꦸꦫꦶꦱꦺꦴ ꦆꦩꦺ ꦩꦺꦴꦢꦏꦺ ꦑꦴꦢꦶꦠ꧀ꦮꦴ ꦥꦴꦤꦷꦪꦁ ꦥꦶꦮꦶꦱ꧀ꦱꦠꦷ’’ꦠꦶ.

ꦄꦡꦺꦠꦱ꧀ꦩꦶꦁ ꦄꦤ꧀ꦠꦫꦺ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦎꦭꦺꦴꦏꦺꦤ꧀ꦠꦺꦴ ꦠꦱ꧀ꦱ ꦧ꧀ꦪꦱꦤꦥ꧀ꦥꦠ꧀ꦠꦶꦁ ꦢꦶꦱ꧀ꦮꦴ ꦏꦫꦸꦟꦴꦪ ꦱꦚ꧀ꦕꦺꦴꦢꦶꦠꦩꦴꦤꦱꦺꦴ – ‘‘ꦄꦪꦁ ꦥꦸꦫꦶꦱꦺꦴ ꦄꦏꦠꦥꦸꦚ꧀ꦚꦺꦴ ꦏꦠꦥꦴꦥꦺꦴ, ꦠꦺꦤꦴꦪꦁ ꦤꦶꦫꦪꦺ ꦤꦶꦧ꧀ꦧꦠ꧀ꦠꦶꦱ꧀ꦱꦠꦶ, ꦩꦪꦶ ꦥꦤ ꦒꦠꦺ ꦩꦺꦴꦢꦏꦺ ꦕ ꦥꦴꦤꦷꦪꦚ꧀ꦕ ꦢꦠ꧀ꦮꦴ ꦨꦸꦩ꧀ꦩꦢꦺꦮꦺꦱꦸ ꦈꦥ꧀ꦥꦗ꧀ꦗꦶꦱ꧀ꦱꦠꦶ, ꦪꦁꦤꦹꦤꦴꦲꦁ ꦆꦩꦱ꧀ꦱ ꦄꦮꦱ꧀ꦱꦪꦺꦴ ꦨꦮꦺꦪ꧀ꦪ’’ꦤ꧀ꦠꦶ ꦕꦶꦤ꧀ꦠꦺꦠ꧀ꦮꦴ ꦥꦴꦤꦷꦪꦩꦺꦴꦢꦏꦺꦱꦸ ꦈꦥꦤꦷꦪꦩꦴꦤꦺꦱꦸ ꦠꦱ꧀ꦱ ꦥꦸꦫꦶꦱꦱ꧀ꦱ ꦥꦸꦫꦠꦺꦴ ꦥꦴꦠꦸꦫꦲꦺꦴꦱꦶ. ꦱꦺꦴ ꦡꦺꦫꦁ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ‘‘ꦏꦶꦁ ꦩꦺ ꦆꦢꦴꦤꦺꦮ ꦆꦩꦺꦲꦶ ꦩꦴꦫꦶꦪꦩꦴꦤꦱ꧀ꦱ ꦩꦺꦴꦢꦏꦺꦲꦶ ꦑꦴꦢꦶꦠꦺꦲꦶ, ꦆꦢꦁ ꦥꦤ ꦥꦫꦭꦺꦴꦏꦁ ꦒꦕ꧀ꦖꦤ꧀ꦠꦱ꧀ꦱ ꦥꦴꦡꦺꦪ꧀ꦪꦁ ꦨꦮꦶꦱ꧀ꦱꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦩꦺꦴꦢꦏꦺ ꦕ ꦥꦴꦤꦷꦪꦚ꧀ꦕ ꦡꦺꦫꦱ꧀ꦱ ꦢꦴꦥꦺꦱꦶ. ꦡꦺꦫꦺꦴ ꦠꦱ꧀ꦱ ꦥꦱꦴꦢꦱꦁꦮꦝ꧀ꦞꦤꦠ꧀ꦡꦁ ꦠꦱ꧀ꦱ ꦥꦱ꧀ꦱꦤ꧀ꦠꦱ꧀ꦱꦺꦮ ꦠꦡꦴꦫꦹꦥꦺ ꦜꦴꦤꦺ ꦤꦶꦱꦷꦢꦶꦠ꧀ꦮꦴ ꦩꦺꦴꦢꦏꦺ ꦥꦫꦶꦨꦸꦚ꧀ꦗꦶꦠ꧀ꦮꦴ ꦥꦴꦤꦷꦪꦚ꧀ꦕ ꦥꦶꦮꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ. ꦱꦺꦴ ꦥꦤ ꦥꦸꦫꦶꦱꦺꦴ ꦕꦺꦴꦫꦓꦴꦠꦏꦺꦲꦶ ꦄꦴꦓꦴꦠꦤꦁ ꦤꦺꦠ꧀ꦮꦴ ꦱꦷꦱꦕ꧀ꦖꦺꦢꦁ ꦥꦴꦥꦶꦠꦺꦴ ꦄꦤꦸꦠ꧀ꦠꦫꦺ ꦥꦸꦚ꧀ꦚꦏ꧀ꦑꦺꦠ꧀ꦠꦺ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦠ꧀ꦡꦺꦫꦺ ꦏꦠꦺꦤ ꦥꦸꦚ꧀ꦚꦺꦤ ꦈꦭ꦳ꦴꦫꦺ ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦤꦴꦫꦲꦺꦴꦥꦶ ꦪꦱ꧀ꦩꦴ ‘‘ꦱꦸꦭꦱꦁ ꦄꦴꦒꦩ꧀ꦩ ꦩꦪꦴ ꦄꦪꦁ ꦢꦺꦪ꧀ꦪꦣꦩ꧀ꦩꦺꦴ ꦭꦢ꧀ꦣꦺꦴ’’ꦠꦶ ꦱꦸꦭꦱꦴꦪ ꦒꦠꦺꦤ ꦱꦶꦤꦺꦲꦺꦤ ꦩꦫꦟꦏꦴꦭꦺ ꦕꦶꦠ꧀ꦠꦁ ꦈꦥꦏ꧀ꦏꦶꦭꦶꦛ꧀ꦜꦁ ꦄꦲꦺꦴꦱꦶ. ꦠꦱ꧀ꦩꦴ ꦲꦷꦤꦏꦴꦪꦁ ꦈꦥꦥꦗ꧀ꦗꦤ꧀ꦠꦺꦴ ꦥꦧ꧀ꦧꦠꦒꦲꦤꦱꦩ꧀ꦨꦹꦠꦺ ꦱꦤ꧀ꦢꦕ꧀ꦖꦴꦪꦺ ꦩꦲꦴꦤꦶꦒ꧀ꦫꦺꦴꦣꦫꦸꦏ꧀ꦑꦺ ꦫꦸꦏ꧀ꦑꦢꦺꦮꦠꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶ.

ꦱꦺꦴ ꦏꦶꦫ ꦱꦕꦺ ꦥꦜꦩꦮꦪꦺ ꦏꦸꦭꦮꦁꦱꦛ꧀ꦜꦥꦤꦺ ꦈꦱ꧀ꦱꦸꦏ꧀ꦏꦁ ꦄꦏꦫꦶꦱ꧀ꦱ, ꦠꦱ꧀ꦩꦶꦁꦪꦺꦮ ꦤꦒꦫꦺ ꦱꦺꦛ꧀ꦜꦷꦤꦁ ꦄꦒ꧀ꦒꦺꦴ ꦄꦨꦮꦶꦱ꧀ꦱ, ꦩꦗ꧀ꦙꦶꦩꦮꦪꦺ ꦩꦗ꧀ꦙꦶꦩꦺꦴ, ꦥꦕ꧀ꦖꦶꦩꦮꦪꦺ ꦥꦕ꧀ꦖꦶꦩꦺꦴ. ꦱꦕꦺ ꦥꦤ ꦥꦜꦩꦮꦪꦺ ꦥꦧ꧀ꦧꦗꦶꦠꦺꦴ ꦄꦨꦮꦶꦱ꧀ꦱ, ꦄꦫꦲꦴ ꦄꦨꦮꦶꦱ꧀ꦱ, ꦩꦗ꧀ꦙꦶꦩꦮꦪꦺ ꦱꦏꦢꦴꦒꦴꦩꦷ ꦄꦤꦴꦒꦴꦩꦷ ꦮꦴ ꦄꦨꦮꦶꦱ꧀ꦱ, ꦥꦕ꧀ꦖꦶꦩꦮꦪꦺ ꦱꦺꦴꦠꦴꦥꦤ꧀ꦤꦺꦴ ꦄꦨꦮꦶꦱ꧀ꦱ. ꦥꦴꦥꦩꦶꦠ꧀ꦠꦱꦁꦱꦒ꧀ꦒꦺꦤ ꦥꦤ ꦆꦠ꧀ꦡꦶꦣꦸꦠ꧀ꦠꦺꦴ ꦱꦸꦫꦴꦣꦸꦠ꧀ꦠꦺꦴ ꦢꦸꦕ꧀ꦕꦫꦶꦠꦤꦶꦫꦠꦺꦴ ꦄꦤꦴꦢꦫꦶꦏꦺꦴ ꦲꦸꦠ꧀ꦮꦴ ꦄꦤꦸꦏ꧀ꦏꦩꦺꦤ ꦱꦧ꧀ꦧꦱꦩ꧀ꦥꦠ꧀ꦠꦶꦠꦺꦴ ꦥꦫꦶꦲꦴꦪꦶꦠ꧀ꦮꦴ ꦩꦲꦴꦧ꧀ꦪꦱꦤꦁ ꦥꦠ꧀ꦠꦺꦴꦠꦶ ꦮꦢꦤ꧀ꦠꦶ.

ꦄꦡ ꦱꦺꦴ ꦄꦥꦫꦺꦤ ꦱꦩꦪꦺꦤ ꦱꦸꦭꦱꦁ ꦈꦪ꧀ꦪꦴꦤꦒꦠꦁ ꦢꦶꦱ꧀ꦮꦴ ꦱꦚ꧀ꦗꦴꦠꦏꦴꦩꦫꦴꦒꦺꦴ ꦄꦤ꧀ꦣꦏꦴꦫꦁ ꦩꦴꦥꦺꦠ꧀ꦮꦴ ꦠꦁ ꦄꦠ꧀ꦠꦤꦺꦴ ꦨꦮꦤꦁ ꦤꦺꦠ꧀ꦮꦴ ꦱꦠ꧀ꦠꦴꦲꦁ ꦠꦴꦪ ꦱꦢ꧀ꦣꦶꦁ ꦱꦁꦮꦴꦱꦁ ꦏꦥ꧀ꦥꦺꦱꦶ, ꦄꦠ꧀ꦠꦴꦤꦚ꧀ꦕꦱ꧀ꦱꦴ ꦄꦴꦫꦺꦴꦕꦺꦱꦶ. ꦠꦱ꧀ꦱꦴ ꦩꦴꦠꦴ ꦠꦁ ꦄꦥꦱ꧀ꦱꦤ꧀ꦠꦷ ꦫꦺꦴꦢꦩꦴꦤꦴ ꦆꦠꦺꦴ ꦕꦶꦠꦺꦴ ꦕ ꦥꦫꦶꦧ꧀ꦨꦩꦠꦶ. ꦠꦁ ꦢꦶꦱ꧀ꦮꦴ ꦩꦲꦴꦗꦤꦺꦴ ‘‘ꦄꦪ꧀ꦪꦺꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦩꦲꦶꦢ꧀ꦣꦶꦏꦺꦴ ꦩꦲꦴꦤꦸꦨꦴꦮꦺꦴ ꦠꦱ꧀ꦱꦴ ꦒꦠꦶꦁ ꦗꦴꦤꦺꦪ꧀ꦪ, ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦸꦕ꧀ꦖꦺꦪ꧀ꦪꦴꦱꦷ’’ꦠꦶ ꦄꦴꦲ. ꦱꦴ ‘‘ꦱꦴꦣꦸ ꦄꦪ꧀ꦪꦺꦴ’’ꦠꦶ ꦡꦺꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ꦠꦩꦠ꧀ꦡꦁ ꦥꦸꦕ꧀ꦖꦶ. ꦡꦺꦫꦺꦴ ‘‘ꦆꦠꦺꦴ ꦱꦠ꧀ꦠꦩꦺ ꦢꦶꦮꦱꦺ ꦮꦺꦭ꦳ꦸꦮꦤꦩꦲꦴꦮꦶꦲꦴꦫꦺ ꦨꦒꦮꦠꦶ ꦣꦩ꧀ꦩꦁ ꦢꦺꦱꦺꦤ꧀ꦠꦺ ꦥꦫꦶꦱꦥꦫꦶꦪꦤ꧀ꦠꦺ ꦥꦱ꧀ꦱꦶꦱ꧀ꦱꦱꦷ’’ꦠꦶ ꦄꦴꦲ. ꦄꦡ ꦱꦸꦭꦱꦴ ꦠꦁ ꦢꦺꦮꦥꦸꦠ꧀ꦠꦁ ꦄꦮꦺꦴꦕ – ‘‘ꦄꦪꦸꦠ꧀ꦠꦁ ꦩꦪ꧀ꦲꦁ ꦠꦮ ꦨꦮꦤꦺ ꦮꦱꦤ꧀ꦠꦶꦪꦴ, ꦄꦗ꧀ꦗ ꦱꦠ꧀ꦠꦩꦺꦴ ꦢꦶꦮꦱꦺꦴ, ꦩꦩ ꦩꦴꦠꦴ ꦩꦁ ꦄꦥꦱ꧀ꦱꦤ꧀ꦠꦷ ꦥꦫꦶꦢꦺꦮꦱꦺꦴꦏꦱꦩꦴꦥꦤ꧀ꦤꦴ ꦨꦮꦶꦱ꧀ꦱꦠꦶ, ꦱꦴꦣꦸ ꦩꦁ, ꦢꦺꦮ, ꦠꦠ꧀ꦡꦺꦮ ꦤꦺꦲꦷ’’ꦠꦶ. ꦱꦺꦴ ꦠꦁ ꦤꦺꦠ꧀ꦮꦴ ꦮꦺꦭ꦳ꦸꦮꦤꦺ ꦨꦒꦮꦠꦶ ꦣꦩ꧀ꦩꦁ ꦢꦺꦱꦺꦤ꧀ꦠꦺ ꦥꦫꦶꦱꦥꦫꦶꦪꦤ꧀ꦠꦺ ꦜꦥꦺꦤ꧀ꦠ꧀ꦮꦴ ꦄꦢꦶꦱ꧀ꦱꦩꦴꦤꦫꦹꦥꦺꦴ ꦄꦛ꧀ꦜꦴꦱꦶ.

ꦠꦠꦺꦴ ꦩꦲꦴꦗꦤꦺꦴ ꦱꦸꦭꦱꦁ ꦢꦶꦱ꧀ꦮꦴ ꦌꦮꦩꦴꦲ – ‘‘ꦄꦩ꧀ꦩ ꦱꦸꦭꦱꦺ, ꦠ꧀ꦮꦁ ꦌꦠ꧀ꦠꦏꦁ ꦢꦶꦮꦱꦁ ꦏꦸꦲꦶꦁ ꦒꦠꦴ? ꦠꦮ ꦩꦴꦠꦴ ꦠ꧀ꦮꦁ ꦄꦥꦱ꧀ꦱꦤ꧀ꦠꦷ ꦥꦫꦶꦢꦺꦮꦱꦺꦴꦏꦱꦩꦴꦥꦤ꧀ꦤꦴ ꦈꦩ꧀ꦩꦴꦢꦥ꧀ꦥꦠ꧀ꦠꦴ ꦮꦶꦪ ꦗꦴꦠꦴ’’ꦠꦶ. ꦱꦴ ꦠꦁ ꦥꦮꦠ꧀ꦠꦶꦁ ꦩꦲꦴꦗꦤꦱ꧀ꦱ ꦄꦴꦕꦶꦏ꧀ꦑꦶ. ꦩꦲꦴꦗꦤꦺꦤ ꦕ ‘‘ꦏꦡꦁ ꦱꦺꦴ ꦥꦸꦫꦶꦱꦺꦴ ꦠꦡꦴꦥꦴꦥꦥꦱꦸꦠꦺꦴ ꦄꦏꦠꦏꦸꦱꦭꦺꦴ ꦢꦺꦮꦹꦥꦥꦠ꧀ꦠꦶꦁ ꦥꦛꦶꦭꦨꦠꦷ’’ꦠꦶ ꦮꦸꦠ꧀ꦠꦺ ꦱꦸꦭꦱꦴ ‘‘ꦩꦪꦴ ꦢꦴꦥꦶꦠꦺ ꦩꦺꦴꦢꦏꦺ ꦥꦴꦤꦷꦪꦚ꧀ꦕ ꦄꦪ꧀ꦪꦱ꧀ꦱ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦠ꧀ꦡꦺꦫꦱ꧀ꦱ ꦢꦠ꧀ꦮꦴ ꦠꦺꦤ ꦥꦸꦚ꧀ꦚꦺꦤ ꦢꦺꦮꦹꦥꦥꦠ꧀ꦠꦶꦁ ꦥꦛꦶꦭꦨꦠꦷ’’ꦠꦶ ꦄꦴꦲ. ꦠꦁ ꦱꦸꦠ꧀ꦮꦴ ꦩꦲꦴꦗꦤꦺꦴ ꦄꦕ꧀ꦖꦫꦶꦪꦧ꧀ꦨꦸꦠꦕꦶꦠ꧀ꦠꦗꦴꦠꦺꦴ ꦄꦲꦺꦴꦱꦶ – ‘‘ꦄꦫꦲꦤ꧀ꦠꦺꦴ ꦤꦴꦩ ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱ, ꦪꦺꦱꦸ ꦄꦥ꧀ꦥꦏꦺꦴꦥꦶ ꦏꦠꦺꦴ ꦏꦴꦫꦺꦴ ꦱꦠ꧀ꦠꦴꦤꦁ ꦢꦺꦮꦹꦥꦥꦠ꧀ꦠꦶꦁ ꦄꦴꦮꦲꦠꦷ’’ꦠꦶ ꦈꦭ꦳ꦴꦫꦁ ꦥꦷꦠꦶꦱꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦱꦶ. ꦨꦶꦏ꧀ꦑꦹ ꦠꦩꦠ꧀ꦡꦁ ꦨꦒꦮꦠꦺꦴ ꦄꦴꦫꦺꦴꦕꦺꦱꦸꦁ. ꦠꦠꦺꦴ ꦨꦒꦮꦴ ꦆꦩꦶꦱ꧀ꦱꦴ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴ –

꧑. ‘‘ꦑꦺꦠ꧀ꦠꦹꦥꦩꦴ ꦄꦫꦲꦤ꧀ꦠꦺꦴ, ꦢꦴꦪꦏꦴ ꦏꦱ꧀ꦱꦏꦹꦥꦩꦴ;

ꦧꦷꦗꦹꦥꦩꦁ ꦢꦺꦪ꧀ꦪꦣꦩ꧀ꦩꦁ, ꦌꦠ꧀ꦠꦺꦴ ꦤꦶꦧ꧀ꦧꦠ꧀ꦠꦠꦺ ꦦꦭꦁ.

꧒. ‘‘ꦌꦠꦁ ꦧꦷꦗꦁ ꦏꦱꦷ ꦑꦺꦠ꧀ꦠꦁ, ꦥꦺꦠꦴꦤꦁ ꦢꦴꦪꦏꦱ꧀ꦱ ꦕ;

ꦠꦁ ꦥꦺꦠꦴ ꦥꦫꦶꦨꦸꦚ꧀ꦗꦤ꧀ꦠꦶ, ꦢꦴꦠꦴ ꦥꦸꦚ꧀ꦚꦺꦤ ꦮꦝ꧀ꦞꦠꦶ.

꧓. ‘‘ꦆꦣꦺꦮ ꦏꦸꦱꦭꦁ ꦏꦠ꧀ꦮꦴ, ꦥꦺꦠꦺ ꦕ ꦥꦛꦶꦥꦹꦗꦶꦪ;

ꦱꦒ꧀ꦒꦚ꧀ꦕ ꦏꦩꦠꦶꦛ꧀ꦜꦴꦤꦁ, ꦏꦩ꧀ꦩꦁ ꦏꦠ꧀ꦮꦴꦤ ꦨꦢ꧀ꦢꦏ’’ꦤ꧀ꦠꦶ. – ꦆꦩꦴ ꦒꦴꦡꦴ ꦄꦨꦴꦱꦶ;

꧑. ꦠꦠ꧀ꦡ ꦑꦺꦠ꧀ꦠꦹꦥꦩꦴꦠꦶ ꦑꦶꦠ꧀ꦠꦁ ꦮꦸꦠ꧀ꦠꦁ ꦧꦷꦗꦁ ꦠꦴꦪꦠꦶ ꦩꦲꦥ꧀ꦦꦭꦨꦴꦮꦏꦫꦟꦺꦤ ꦫꦏ꧀ꦑꦠꦷꦠꦶ ꦑꦺꦠ꧀ꦠꦁ, ꦱꦴꦭꦶꦧꦷꦗꦴꦢꦷꦤꦁ ꦮꦶꦫꦸꦲꦤꦛ꧀ꦜꦴꦤꦁ. ꦠꦁ ꦈꦥꦩꦴ ꦌꦠꦺꦱꦤ꧀ꦠꦶ ꦑꦺꦠ꧀ꦠꦹꦥꦩꦴ, ꦏꦺꦢꦴꦫꦱꦢꦶꦱꦴꦠꦶ ꦄꦠ꧀ꦡꦺꦴ. ꦄꦫꦲꦤ꧀ꦠꦺꦴꦠꦶ ꦑꦷꦟꦴꦱꦮꦴ. ꦠꦺ ꦲꦶ ꦏꦶꦭꦺꦱꦴꦫꦷꦤꦁ ꦱꦁꦱꦴꦫꦕꦏ꧀ꦏꦱ꧀ꦱ ꦄꦫꦴꦤꦚ꧀ꦕ ꦲꦠꦠ꧀ꦠꦴ, ꦠꦠꦺꦴ ꦌꦮ ꦄꦴꦫꦏꦠ꧀ꦠꦴ, ꦥꦕ꧀ꦕꦪꦴꦢꦷꦤꦁ ꦄꦫꦲꦠ꧀ꦠꦴ, ꦥꦴꦥꦏꦫꦟꦺ ꦫꦲꦴꦨꦴꦮꦴ ꦕ ‘‘ꦄꦫꦲꦤ꧀ꦠꦺꦴ’’ꦠꦶ ꦮꦸꦕ꧀ꦕꦤ꧀ꦠꦶ. ꦠꦠ꧀ꦡ ꦪꦡꦴ ꦑꦺꦠꦚ꧀ꦲꦶ ꦠꦶꦟꦴꦢꦶꦢꦺꦴꦱꦫꦲꦶꦠꦁ ꦱ꧀ꦮꦴꦨꦶꦱꦔ꧀ꦑꦠꦧꦷꦗꦩ꧀ꦲꦶ ꦮꦸꦠ꧀ꦠꦺ ꦈꦠꦸꦱꦭꦶꦭꦴꦢꦶꦥꦕ꧀ꦕꦪꦤ꧀ꦠꦫꦹꦥꦺꦠꦁ ꦏꦱ꧀ꦱꦏꦱ꧀ꦱ ꦩꦲꦥ꧀ꦦꦭꦁ ꦲꦺꦴꦠꦶ, ꦌꦮꦁ ꦑꦷꦟꦴꦱꦮꦱꦤ꧀ꦠꦴꦤꦺꦴ ꦭꦺꦴꦨꦴꦢꦶꦢꦺꦴꦱꦫꦲꦶꦠꦺꦴ ꦱ꧀ꦮꦴꦨꦶꦱꦔ꧀ꦑꦠꦺ ꦢꦺꦪ꧀ꦪꦣꦩ꧀ꦩꦧꦷꦗꦺ ꦮꦸꦠ꧀ꦠꦺ ꦏꦴꦭꦴꦢꦶꦥꦕ꧀ꦕꦪꦤ꧀ꦠꦫꦱꦲꦶꦠꦺꦴ ꦢꦴꦪꦏꦱ꧀ꦱ ꦩꦲꦥ꧀ꦦꦭꦺꦴ ꦲꦺꦴꦠꦶ. ꦠꦺꦤꦴꦲ ꦨꦒꦮꦴ ‘‘ꦑꦺꦠ꧀ꦠꦹꦥꦩꦴ ꦄꦫꦲꦤ꧀ꦠꦺꦴ’’ꦠꦶ. ꦈꦏ꧀ꦏꦛ꧀ꦜꦤꦶꦢ꧀ꦢꦺꦱꦺꦴ ꦄꦪꦁ ꦠꦱ꧀ꦱ ꦱꦺꦑꦴꦢꦷꦤꦩ꧀ꦥꦶ ꦑꦺꦠ꧀ꦠꦨꦴꦮꦴꦥꦛꦶꦏ꧀ꦑꦺꦥꦠꦺꦴ.

ꦢꦴꦪꦏꦴꦠꦶ ꦕꦷꦮꦫꦴꦢꦷꦤꦁ ꦥꦕ꧀ꦕꦪꦴꦤꦁ ꦢꦴꦠꦴꦫꦺꦴ ꦥꦫꦶꦕ꧀ꦕꦗꦤꦏꦴ, ꦠꦺꦱꦁ ꦥꦫꦶꦕ꧀ꦕꦴꦒꦺꦤ ꦄꦠ꧀ꦠꦤꦺꦴ ꦱꦤ꧀ꦠꦴꦤꦺ ꦭꦺꦴꦨꦴꦢꦷꦤꦁ ꦥꦫꦶꦕ꧀ꦕꦗꦤꦏꦴ ꦖꦺꦢꦤꦏꦴ, ꦠꦠꦺꦴ ꦮꦴ ꦄꦠ꧀ꦠꦤꦺꦴ ꦱꦤ꧀ꦠꦴꦤꦱ꧀ꦱ ꦱꦺꦴꦣꦏꦴ, ꦫꦏ꧀ꦑꦏꦴ ꦕꦴꦠꦶ ꦄꦠ꧀ꦡꦺꦴ. ꦏꦱ꧀ꦱꦏꦹꦥꦩꦴꦠꦶ ꦏꦱ꧀ꦱꦏꦱꦢꦶꦱꦴ. ꦪꦡꦴ ꦏꦱ꧀ꦱꦏꦺꦴ ꦱꦴꦭꦶꦑꦺꦠ꧀ꦠꦴꦢꦷꦤꦶ ꦏꦱꦶꦠ꧀ꦮꦴ ꦪꦡꦴꦏꦴꦭꦚ꧀ꦕ ꦮꦸꦠ꧀ꦠꦸꦢꦏꦢꦴꦤꦤꦷꦲꦫꦟꦤꦶꦣꦴꦤꦫꦏ꧀ꦑꦟꦴꦢꦷꦲꦶ ꦄꦥ꧀ꦥꦩꦗ꧀ꦗꦤ꧀ꦠꦺꦴ ꦈꦭ꦳ꦴꦫꦁ ꦮꦶꦥꦸꦭꦚ꧀ꦕ ꦱꦱ꧀ꦱꦦꦭꦁ ꦥꦛꦶꦭꦨꦠꦶ, ꦌꦮꦁ ꦢꦴꦪꦏꦺꦴꦥꦶ ꦄꦫꦲꦤ꧀ꦠꦺꦱꦸ ꦢꦺꦪ꧀ꦪꦣꦩ꧀ꦩꦥꦫꦶꦕ꧀ꦕꦴꦒꦺꦤ ꦥꦴꦫꦶꦕꦫꦶꦪꦴꦪ ꦕ ꦄꦥ꧀ꦥꦩꦗ꧀ꦗꦤ꧀ꦠꦺꦴ ꦈꦭ꦳ꦴꦫꦁ ꦮꦶꦥꦸꦭꦚ꧀ꦕ ꦢꦴꦤꦦꦭꦁ ꦥꦛꦶꦭꦨꦠꦶ. ꦠꦺꦤ ꦮꦸꦠ꧀ꦠꦁ ‘‘ꦢꦴꦪꦏꦴ ꦏꦱ꧀ꦱꦏꦹꦥꦩꦴ’’ꦠꦶ.

ꦧꦷꦗꦹꦥꦩꦁ ꦢꦺꦪ꧀ꦪꦣꦩ꧀ꦩꦤ꧀ꦠꦶ ꦭꦶꦔ꧀ꦒꦮꦶꦥꦭ꧀ꦭꦴꦱꦺꦤ ꦮꦸꦠ꧀ꦠꦁ, ꦧꦷꦗꦱꦢꦶꦱꦺꦴ ꦢꦺꦪ꧀ꦪꦣꦩ꧀ꦩꦺꦴꦠꦶ ꦄꦠ꧀ꦡꦺꦴ. ꦄꦤ꧀ꦤꦥꦴꦤꦴꦢꦶꦏꦱ꧀ꦱ ꦲꦶ ꦢꦱꦮꦶꦣꦱ꧀ꦱ ꦢꦴꦠꦧ꧀ꦧꦮꦠ꧀ꦡꦸꦤꦺꦴ ꦌꦠꦁ ꦤꦴꦩꦁ. ꦌꦠ꧀ꦠꦺꦴ ꦤꦶꦧ꧀ꦧꦠ꧀ꦠꦠꦺ ꦦꦭꦤ꧀ꦠꦶ ꦌꦠꦱ꧀ꦩꦴ ꦢꦴꦪꦏꦥꦛꦶꦒ꧀ꦒꦴꦲꦏꦢꦺꦪ꧀ꦪꦣꦩ꧀ꦩꦥꦫꦶꦕ꧀ꦕꦴꦒꦠꦺꦴ ꦢꦴꦤꦦꦭꦁ ꦤꦶꦧ꧀ꦧꦠ꧀ꦠꦠꦶ ꦕꦺꦮ ꦈꦥ꧀ꦥꦗ꧀ꦗꦠꦶ ꦕ, ꦕꦶꦫꦠꦫꦥꦧꦤ꧀ꦣꦮꦱꦺꦤ ꦥꦮꦠ꧀ꦠꦠꦶ ꦕꦴꦠꦶ ꦄꦠ꧀ꦡꦺꦴ. ꦌꦠ꧀ꦡ ꦕ ꦪꦱ꧀ꦩꦴ ꦥꦫꦶꦕ꧀ꦕꦴꦒꦕꦺꦠꦤꦴꦨꦶꦱꦔ꧀ꦑꦠꦱ꧀ꦱ ꦄꦤ꧀ꦤꦥꦴꦤꦴꦢꦶꦮꦠ꧀ꦡꦸꦤꦺꦴ ꦨꦴꦮꦺꦴ, ꦤ ꦆꦠꦫꦱ꧀ꦱ, ꦠꦱ꧀ꦩꦴ ‘‘ꦧꦷꦗꦹꦥꦩꦁ ꦢꦺꦪ꧀ꦪꦣꦩ꧀ꦩ’’ꦤ꧀ꦠꦶ ꦢꦺꦪ꧀ꦪꦣꦩ꧀ꦩꦒ꧀ꦒꦲꦟꦁ ꦏꦠꦁ. ꦠꦺꦤ ꦢꦺꦪ꧀ꦪꦣꦩ꧀ꦩꦴꦥꦢꦺꦱꦺꦤ ꦢꦺꦪ꧀ꦪꦣꦩ꧀ꦩꦮꦠ꧀ꦡꦸꦮꦶꦱꦪꦴꦪ ꦥꦫꦶꦕ꧀ꦕꦴꦒꦕꦺꦠꦤꦴꦪꦪꦺꦮ ꦧꦷꦗꦨꦴꦮꦺꦴ ꦢꦛ꧀ꦜꦧ꧀ꦧꦺꦴ. ꦱꦴ ꦲꦶ ꦥꦛꦶꦱꦤ꧀ꦣꦶꦄꦴꦢꦶꦥ꧀ꦥꦨꦺꦢꦱ꧀ꦱ ꦠꦱ꧀ꦱ ꦤꦶꦱ꧀ꦱꦪꦴꦫꦩ꧀ꦩꦟꦥ꧀ꦥꦨꦺꦢꦱ꧀ꦱ ꦕ ꦦꦭꦱ꧀ꦱ ꦤꦶꦥ꧀ꦦꦴꦢꦶꦏꦴ, ꦤ ꦢꦺꦪ꧀ꦪꦣꦩ꧀ꦩꦺꦴꦠꦶ.

꧒. ꦌꦠꦁ ꦧꦷꦗꦁ ꦏꦱꦷ ꦑꦺꦠ꧀ꦠꦤ꧀ꦠꦶ ꦪꦡꦴꦮꦸꦠ꧀ꦠꦁ ꦧꦷꦗꦁ, ꦪꦡꦴꦮꦸꦠ꧀ꦠꦚ꧀ꦕ ꦑꦺꦠ꧀ꦠꦁ, ꦠꦱ꧀ꦱ ꦧꦷꦗꦱ꧀ꦱ ꦠꦱ꧀ꦩꦶꦁ ꦑꦺꦠ꧀ꦠꦺ ꦮꦥꦤꦥꦪꦺꦴꦒꦱꦔ꧀ꦑꦴꦠꦴ ꦏꦱꦶ ꦕꦴꦠꦶ ꦄꦠ꧀ꦡꦺꦴ. ꦌꦠꦁ ꦠꦪꦁ ꦏꦺꦱꦁ ꦆꦕ꧀ꦖꦶꦠꦧ꧀ꦧꦤ꧀ꦠꦶ ꦄꦴꦲ ‘‘ꦥꦺꦠꦴꦤꦁ ꦢꦴꦪꦏꦱ꧀ꦱ ꦕꦴ’’ꦠꦶ. ꦪꦢꦶ ꦢꦴꦪꦏꦺꦴ ꦥꦺꦠꦺ ꦈꦢ꧀ꦢꦶꦱ꧀ꦱ ꦢꦴꦤꦁ ꦢꦺꦠꦶ, ꦥꦺꦠꦴꦤꦚ꧀ꦕ ꦢꦴꦪꦏꦱ꧀ꦱ ꦕ, ꦪꦢꦶ ꦤ ꦥꦺꦠꦺ ꦈꦢ꧀ꦢꦶꦱ꧀ꦱ ꦢꦴꦤꦁ ꦢꦺꦠꦶ, ꦢꦴꦪꦏꦱ꧀ꦱꦺꦮ ꦌꦠꦁ ꦧꦷꦗꦁ ꦌꦱꦴ ꦏꦱꦶ ꦌꦠꦁ ꦑꦺꦠ꧀ꦠꦁ ꦈꦥꦏꦴꦫꦴꦪ ꦲꦺꦴꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦆꦢꦴꦤꦶ ꦠꦁ ꦈꦥꦏꦴꦫꦁ ꦢꦱ꧀ꦱꦺꦠꦸꦁ ‘‘ꦠꦁ ꦥꦺꦠꦴ ꦥꦫꦶꦨꦸꦚ꧀ꦗꦤ꧀ꦠꦶ, ꦢꦴꦠꦴ ꦥꦸꦚ꧀ꦚꦺꦤ ꦮꦝ꧀ꦞꦠꦷ’’ꦠꦶ ꦮꦸꦠ꧀ꦠꦁ. ꦠꦠ꧀ꦡ ꦠꦁ ꦥꦺꦠꦴ ꦥꦫꦶꦨꦸꦚ꧀ꦗꦤ꧀ꦠꦷꦠꦶ ꦢꦴꦪꦏꦺꦤ ꦥꦺꦠꦺ ꦈꦢ꧀ꦢꦶꦱ꧀ꦱ ꦢꦴꦤꦺ ꦢꦶꦤ꧀ꦤꦺ ꦪꦡꦴꦮꦸꦠ꧀ꦠꦑꦺꦠ꧀ꦠꦏꦱꦶꦧꦷꦗꦱꦩ꧀ꦥꦠ꧀ꦠꦶꦪꦴ ꦄꦤꦸꦩꦺꦴꦢꦤꦴꦪ ꦕ ꦪꦁ ꦥꦺꦠꦴꦤꦁ ꦈꦥꦏꦥ꧀ꦥꦠꦶ, ꦠꦁ ꦢꦴꦤꦦꦭꦁ ꦥꦺꦠꦴ ꦥꦫꦶꦨꦸꦚ꧀ꦗꦤ꧀ꦠꦶ. ꦢꦴꦠꦴ ꦥꦸꦚ꧀ꦚꦺꦤ ꦮꦝ꧀ꦞꦠꦷꦠꦶ ꦢꦴꦠꦴ ꦥꦤ ꦄꦠ꧀ꦠꦤꦺꦴ ꦢꦴꦤꦩꦪꦥꦸꦚ꧀ꦚꦤꦶꦩꦶꦠ꧀ꦠꦁ ꦢꦺꦮꦩꦤꦸꦱ꧀ꦱꦺꦱꦸ ꦨꦺꦴꦒꦱꦩ꧀ꦥꦠ꧀ꦠꦶꦄꦴꦢꦶꦤꦴ ꦥꦸꦚ꧀ꦚꦦꦭꦺꦤ ꦄꦨꦶꦮꦝ꧀ꦞꦠꦶ. ꦥꦸꦚ꧀ꦚꦦꦭꦩ꧀ꦥꦶ ꦲꦶ ‘‘ꦏꦸꦱꦭꦴꦤꦁ, ꦨꦶꦏ꧀ꦑꦮꦺ, ꦣꦩ꧀ꦩꦴꦤꦁ ꦱꦩꦴꦢꦴꦤꦲꦺꦠꦸ ꦌꦮꦩꦶꦢꦁ ꦥꦸꦚ꧀ꦚꦁ ꦥꦮꦝ꧀ꦞꦠꦷ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧓.꧘꧐) ꦥꦸꦚ꧀ꦚꦤ꧀ꦠꦶ ꦮꦸꦕ꧀ꦕꦠꦶ.

꧓. ꦆꦣꦺꦮ ꦏꦸꦱꦭꦁ ꦏꦠ꧀ꦮꦴꦠꦶ ꦄꦤꦮꦗ꧀ꦗꦱꦸꦑꦮꦶꦥꦴꦏꦛ꧀ꦜꦺꦤ ꦏꦸꦱꦭꦁ ꦥꦺꦠꦴꦤꦁ ꦈꦢ꧀ꦢꦶꦱꦤꦮꦱꦺꦤ ꦢꦴꦤꦩꦪꦁ ꦥꦸꦚ꧀ꦚꦁ ꦈꦥꦕꦶꦤꦶꦠ꧀ꦮꦴ ꦆꦣꦺꦮ ꦆꦩꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ. ꦥꦺꦠꦺ ꦕ ꦥꦛꦶꦥꦹꦗꦶꦪꦴꦠꦶ ꦥꦺꦠꦺ ꦈꦢ꧀ꦢꦶꦱ꧀ꦱ ꦢꦴꦤꦺꦤ ꦱꦩ꧀ꦩꦴꦤꦺꦠ꧀ꦮꦴ ꦄꦤꦸꦨꦸꦪ꧀ꦪꦩꦴꦤꦢꦸꦏ꧀ꦑꦠꦺꦴ ꦠꦺ ꦩꦺꦴꦕꦺꦠ꧀ꦮꦴ. ꦥꦺꦠꦺ ꦲꦶ ꦈꦢ꧀ꦢꦶꦱ꧀ꦱ ꦢꦶꦪ꧀ꦪꦩꦴꦤꦁ ꦢꦴꦤꦁ ꦠꦺꦱꦁ ꦥꦹꦗꦴ ꦤꦴꦩ ꦲꦺꦴꦠꦶ. ꦠꦺꦤꦴꦲ – ‘‘ꦄꦩ꧀ꦲꦴꦏꦚ꧀ꦕ ꦏꦠꦴ ꦥꦹꦗꦴ’’ꦠꦶ (ꦥꦺ. ꦮ. ꧑꧘), ‘‘ꦥꦺꦠꦴꦤꦁ ꦥꦹꦗꦴ ꦕ ꦏꦠꦴ ꦈꦭ꦳ꦴꦫꦴ’’ꦠꦶ (ꦥꦺ. ꦮ. ꧒꧕) ꦕ. ‘‘ꦥꦺꦠꦺ ꦕꦴ’’ꦠꦶ ꦕ-ꦱꦢ꧀ꦢꦺꦤ ‘‘ꦥꦶꦪꦺꦴ ꦕ ꦲꦺꦴꦠꦶ ꦩꦤꦴꦥꦺꦴ, ꦄꦨꦶꦒꦩꦤꦷꦪꦺꦴ ꦕ ꦲꦺꦴꦠꦶ ꦮꦶꦱ꧀ꦱꦴꦱꦤꦷꦪꦺꦴ, ꦨꦴꦮꦤꦷꦪꦺꦴ ꦕ ꦲꦺꦴꦠꦶ ꦒꦫꦸꦏꦴꦠꦧ꧀ꦧꦺꦴ, ꦥꦴꦱꦁꦱꦺꦴ ꦕ ꦲꦺꦴꦠꦶ ꦏꦶꦠ꧀ꦠꦤꦷꦪꦺꦴ ꦮꦶꦚ꧀ꦚꦹꦤ’’ꦤ꧀ꦠꦶ ꦌꦮꦩꦴꦢꦶꦏꦺ ꦢꦶꦛ꧀ꦜꦣꦩ꧀ꦩꦶꦏꦺ ꦢꦴꦤꦴꦤꦶꦱꦁꦱꦺ ꦱꦔ꧀ꦒꦟ꧀ꦲꦴꦠꦶ. ꦱꦒ꧀ꦒꦚ꧀ꦕ ꦏꦩꦠꦶ ꦜꦴꦤꦁ, ꦏꦩ꧀ꦩꦁ ꦏꦠ꧀ꦮꦴꦤ ꦨꦢ꧀ꦢꦏꦤ꧀ꦠꦶ ꦏꦭ꧀ꦪꦴꦟꦁ ꦏꦸꦱꦭꦏꦩ꧀ꦩꦁ ꦏꦠ꧀ꦮꦴ ꦢꦶꦧ꧀ꦧꦺꦲꦶ ꦄꦴꦪꦸꦄꦴꦢꦷꦲꦶ ꦢꦱꦲꦶ ꦜꦴꦤꦺꦲꦶ ꦱꦸꦛ꧀ꦜꦸ ꦄꦒ꧀ꦒꦠ꧀ꦠꦴ ‘‘ꦱꦒ꧀ꦒ’’ꦤ꧀ꦠꦶ ꦭꦢ꧀ꦣꦤꦴꦩꦁ ꦏꦠꦥꦸꦚ꧀ꦚꦴꦤꦁ ꦤꦶꦧ꧀ꦧꦠ꧀ꦠꦤꦛ꧀ꦜꦴꦤꦁ ꦢꦺꦮꦭꦺꦴꦏꦁ ꦏꦩꦠꦶ ꦈꦥꦥꦗ꧀ꦗꦤꦮꦱꦺꦤ ꦈꦥꦒꦕ꧀ꦖꦠꦶ.

ꦌꦠ꧀ꦡ ꦕ ‘‘ꦏꦸꦱꦭꦁ ꦏꦠ꧀ꦮꦴ’’ꦠꦶ ꦮꦠ꧀ꦮꦴ ꦥꦸꦤ ‘‘ꦏꦩ꧀ꦩꦁ ꦏꦠ꧀ꦮꦴꦤ ꦨꦢ꧀ꦢꦏ’’ꦤ꧀ꦠꦶ ꦮꦕꦤꦁ ‘‘ꦢꦺꦪ꧀ꦪꦣꦩ꧀ꦩꦥꦫꦶꦕ꧀ꦕꦴꦒꦺꦴ ꦮꦶꦪ ꦥꦠ꧀ꦠꦶꦢꦴꦤꦮꦱꦺꦤ ꦢꦴꦤꦣꦩ꧀ꦩꦥꦫꦶꦕ꧀ꦕꦴꦒꦺꦴꦥꦶ ꦢꦴꦤꦩꦪꦏꦸꦱꦭꦏꦩ꧀ꦩꦩꦺꦮꦴ’’ꦠꦶ ꦢꦱ꧀ꦱꦤꦠ꧀ꦡꦤ꧀ꦠꦶ ꦢꦛ꧀ꦜꦧ꧀ꦧꦁ. ꦏꦺꦕꦶ ꦥꦤꦺꦠ꧀ꦡ ‘‘ꦥꦺꦠꦴꦠꦶ ꦄꦫꦲꦤ꧀ꦠꦺꦴ ꦄꦣꦶꦥ꧀ꦥꦺꦠꦴ’’ꦠꦶ ꦮꦢꦤ꧀ꦠꦶ, ꦠꦁ ꦠꦺꦱꦁ ꦩꦠꦶꦩꦠ꧀ꦠꦁ ‘‘ꦥꦺꦠꦴ’’ꦠꦶ ꦑꦷꦟꦴꦱꦮꦴꦤꦁ ꦄꦴꦒꦠꦛ꧀ꦜꦴꦤꦱ꧀ꦱꦺꦮ ꦄꦨꦴꦮꦠꦺꦴ, ꦧꦷꦗꦴꦢꦶꦨꦴꦮꦱ꧀ꦱ ꦕ ꦢꦴꦪꦏꦱ꧀ꦱ ꦮꦶꦪ ꦠꦺꦱꦁ ꦄꦪꦸꦗ꧀ꦗꦩꦴꦤꦠ꧀ꦠꦴ, ꦥꦺꦠꦪꦺꦴꦤꦶꦏꦴꦤꦁ ꦪꦸꦗ꧀ꦗꦩꦴꦤꦠ꧀ꦠꦴ ꦕ. ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦢꦺꦮꦥꦸꦠ꧀ꦠꦁ ꦱꦸꦭꦱꦚ꧀ꦕ ꦄꦴꦢꦶꦁ ꦏꦠ꧀ꦮꦴ ꦕꦠꦸꦫꦴꦱꦷꦠꦶꦪꦴ ꦥꦴꦟꦱꦲꦱ꧀ꦱꦴꦤꦁ ꦣꦩ꧀ꦩꦴꦨꦶꦱꦩꦪꦺꦴ ꦄꦲꦺꦴꦱꦷꦠꦶ.

ꦑꦺꦠ꧀ꦠꦹꦥꦩꦥꦺꦠꦮꦠ꧀ꦡꦸꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.