꧑꧕. ꦮꦠ꧀ꦡꦸꦤꦴꦤꦠ꧀ꦠꦚꦴꦟꦤꦶꦢ꧀ꦢꦺꦱꦮꦟ꧀ꦟꦤꦴ

꧖꧖. ꦮꦠ꧀ꦡꦸꦤꦴꦤꦠ꧀ꦠꦚꦴꦟꦤꦶꦢ꧀ꦢꦺꦱꦺ ꦕꦏ꧀ꦑꦸꦁ ꦄꦗ꧀ꦙꦠ꧀ꦠꦁ ꦮꦮꦠ꧀ꦡꦺꦠꦷꦠꦶ ꦄꦗ꧀ꦙꦠ꧀ꦠꦨꦹꦠꦁ ꦕꦏ꧀ꦑꦸꦁ ꦮꦮꦠ꧀ꦡꦥꦺꦠꦶ. ꦪꦡꦴ ꦱꦺꦴ ꦕꦏ꧀ꦑꦸꦁ ꦮꦮꦠ꧀ꦡꦥꦺꦠꦶ, ꦠꦡꦴ ꦮꦠ꧀ꦠꦸꦏꦴꦩꦺꦴ ꦏꦡꦁ ꦕꦏ꧀ꦑꦸꦁ ꦄꦗ꧀ꦙꦠ꧀ꦠꦁ ꦮꦮꦠ꧀ꦡꦺꦠꦷꦠꦶ ꦥꦸꦕ꧀ꦖꦶꦠ꧀ꦮꦴ ꦥꦸꦤ ꦕꦏ꧀ꦑꦸ ꦄꦮꦶꦗ꧀ꦗꦴꦱꦩ꧀ꦨꦹꦠꦤ꧀ꦠꦶ ꦮꦮꦠ꧀ꦡꦺꦠꦷꦠꦶꦄꦴꦢꦶꦤꦴ ꦮꦮꦠ꧀ꦡꦴꦥꦤꦴꦏꦴꦫꦁ ꦢꦱ꧀ꦱꦺꦠꦶ. ꦠꦠ꧀ꦡ ꦄꦮꦶꦗ꧀ꦗꦴꦠꦟ꧀ꦲꦴ ꦄꦠꦷꦠꦴ ꦈꦥꦠ꧀ꦡꦩ꧀ꦨꦏꦲꦺꦠꦸꦪꦺꦴ, ꦏꦩ꧀ꦩꦁ ꦄꦠꦷꦠꦁ ꦗꦤꦏꦲꦺꦠꦸ, ꦄꦴꦲꦴꦫꦺꦴ ꦆꦢꦴꦤꦶ ꦈꦥꦠ꧀ꦡꦩ꧀ꦨꦏꦲꦺꦠꦸ. ꦌꦠꦺꦤ ꦕꦏ꧀ꦑꦹꦥꦠ꧀ꦡꦩ꧀ꦨꦏꦴꦤꦶ ꦈꦠꦸꦕꦶꦠ꧀ꦠꦴꦤꦶ ꦒꦲꦶꦠꦴꦤꦺꦮ ꦲꦺꦴꦤ꧀ꦠꦶ. ꦕꦠꦸꦤ꧀ꦤꦁ ꦩꦲꦴꦨꦹꦠꦴꦤꦁ ꦈꦥꦴꦢꦴꦪꦴꦠꦶ ꦈꦥꦪꦺꦴꦒꦠ꧀ꦡꦺ ꦱꦴꦩꦶꦮꦕꦤꦁ, ꦕꦠ꧀ꦠꦴꦫꦶ ꦩꦲꦴꦨꦹꦠꦴꦤꦶ ꦈꦥꦴꦢꦶꦪꦶꦠ꧀ꦮꦴ ꦥꦮꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦌꦠꦺꦤ ꦥꦱꦴꦢꦕꦏ꧀ꦑꦸꦨꦴꦮꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ, ꦱꦱꦩ꧀ꦨꦴꦫꦨꦴꦮꦺꦴ ꦥꦛꦶꦏ꧀ꦑꦶꦠ꧀ꦠꦺꦴ. ꦈꦥ꧀ꦥꦤ꧀ꦤꦤ꧀ꦠꦶ ꦄꦢ꧀ꦣꦴꦮꦱꦺꦤ, ꦱꦤ꧀ꦠꦠꦶꦑꦟꦮꦱꦺꦤ ꦮꦴ ꦥꦕ꧀ꦕꦸꦥ꧀ꦥꦤ꧀ꦤꦁ. ꦱꦩꦸꦢꦴꦒꦠꦤ꧀ꦠꦶ ꦲꦺꦠꦸꦠꦺꦴ ꦱꦩꦸꦛ꧀ꦜꦶꦠꦁ. ꦌꦠ꧀ꦠꦴꦮꦠꦴ ꦮꦶꦥꦱ꧀ꦱꦤꦴꦥꦸꦧ꧀ꦧꦨꦴꦒꦺ ꦕꦏ꧀ꦑꦸꦮꦮꦠ꧀ꦡꦴꦤꦁ ꦢꦱ꧀ꦱꦶꦠꦁ. ꦄꦲꦸꦠ꧀ꦮꦴ ꦱꦩ꧀ꦨꦹꦠꦤ꧀ꦠꦶꦄꦴꦢꦷꦲꦶ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ. ꦥꦸꦧ꧀ꦧꦺ ꦈꦢꦪꦴ ꦄꦮꦶꦗ꧀ꦗꦩꦴꦤꦠꦺꦴ ꦄꦲꦸꦠ꧀ꦮꦴ ꦱꦩ꧀ꦨꦹꦠꦁ, ꦈꦢ꧀ꦣꦁ ꦮꦪꦴ ꦄꦨꦴꦮꦠꦺꦴ ꦲꦸꦠ꧀ꦮꦴ ꦤ ꦨꦮꦶꦱ꧀ꦱꦠꦶ. ꦄꦤ꧀ꦠꦮꦤ꧀ꦠꦠꦺꦴꦠꦶ ꦄꦤ꧀ꦠꦺꦴ ꦄꦱ꧀ꦱ ꦄꦠ꧀ꦡꦷꦠꦶ ꦄꦤ꧀ꦠꦮꦴ, ꦄꦤ꧀ꦠꦮꦴ ꦌꦮ ꦄꦤ꧀ꦠꦮꦤ꧀ꦠꦺꦴ ꦪꦡꦴ ‘‘ꦱꦠꦶꦩꦤ꧀ꦠꦺꦴ, ꦒꦠꦶꦩꦤ꧀ꦠꦺꦴ, ꦣꦶꦠꦶꦩꦤ꧀ꦠꦺꦴ ꦕ ꦪꦺꦴ ꦆꦱꦷ’’ꦠꦶ (ꦡꦺꦫꦒꦴ. ꧑꧐꧕꧒). ꦠꦠꦺꦴ ꦄꦤ꧀ꦠꦮꦤ꧀ꦠꦠꦺꦴ, ꦨꦔ꧀ꦒꦮꦶꦗ꧀ꦗꦩꦴꦤꦠꦺꦴꦠꦶ ꦄꦠ꧀ꦡꦺꦴ. ꦄꦢ꧀ꦣꦸꦮꦤ꧀ꦠꦶ ꦱꦧ꧀ꦧꦴꦮꦠ꧀ꦡꦴꦤꦶꦥꦴꦠꦶꦠꦴꦪ, ꦡꦶꦫꦨꦴꦮꦱ꧀ꦱ ꦕ ꦄꦨꦴꦮꦠꦴꦪ ꦤ ꦡꦶꦫꦁ. ꦄꦱꦱ꧀ꦱꦠꦤ꧀ꦠꦶ ꦤ ꦤꦶꦕ꧀ꦕꦁ. ꦮꦶꦥꦫꦶꦟꦴꦩꦣꦩ꧀ꦩꦤ꧀ꦠꦶ ꦗꦫꦴꦪ ꦕꦺꦮ ꦩꦫꦟꦺꦤ ꦕꦴꦠꦶ ꦢ꧀ꦮꦺꦣꦴ ꦮꦶꦥꦫꦶꦟꦴꦩꦥꦏꦠꦶꦏꦁ. ꦕꦏ꧀ꦑꦸ ꦄꦤꦶꦕ꧀ꦕꦤ꧀ꦠꦶꦄꦴꦢꦷꦤꦶ ꦕꦏ꧀ꦑꦸꦁ ꦄꦤꦶꦕ꧀ꦕꦠꦺꦴꦠꦶꦄꦴꦢꦷꦤꦶ ꦕ ꦮꦸꦠ꧀ꦠꦠ꧀ꦡꦴꦤꦶ. ꦩꦤꦺꦴꦠꦶ ꦆꦣ ꦨꦮꦔ꧀ꦒꦩꦤꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ ꦄꦮꦶꦗ꧀ꦗꦴꦱꦩ꧀ꦨꦹꦠꦺꦴꦠꦶꦄꦴꦢꦶ ꦪꦸꦗ꧀ꦗꦠꦶꦪꦺꦮ. ꦄꦴꦲꦴꦫꦱꦩ꧀ꦨꦹꦠꦺꦴꦠꦶ ꦌꦠ꧀ꦡ ꦱꦩ꧀ꦥꦪꦸꦠ꧀ꦠꦦꦱ꧀ꦱꦴꦲꦴꦫꦩꦤꦺꦴꦱꦚ꧀ꦕꦺꦠꦤꦴꦲꦴꦫꦮꦱꦺꦤ ꦮꦺꦢꦶꦠꦧ꧀ꦧꦁ. ꦈꦥ꧀ꦥꦤ꧀ꦤꦺꦴꦠꦶ ꦕ ꦄꦢ꧀ꦣꦴꦱꦤ꧀ꦠꦠꦶꦮꦱꦺꦤ.

ꦮꦠ꧀ꦡꦸꦤꦴꦤꦠ꧀ꦠꦚꦴꦟꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.