꧒. ꦮꦶꦕꦪꦲꦴꦫꦱꦩ꧀ꦥꦴꦠꦮꦟ꧀ꦟꦤꦴ

꧕꧓. ꦌꦮꦁ ꦢꦺꦱꦤꦴꦲꦴꦫꦱꦩ꧀ꦥꦴꦠꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦮꦶꦕꦪꦲꦴꦫꦱꦩ꧀ꦥꦴꦠꦁ ꦢꦱ꧀ꦱꦺꦤ꧀ꦠꦺꦴ ꦪꦱ꧀ꦩꦴ ꦢꦺꦱꦤꦴꦲꦴꦫꦥꦢꦠ꧀ꦡꦮꦶꦕꦪꦺꦴ ꦮꦶꦕꦪꦲꦴꦫꦺꦴ, ꦠꦱ꧀ꦩꦴ ꦢꦺꦱꦤꦴꦲꦴꦫꦺ ꦮꦶꦥꦭ꧀ꦭꦴꦱꦲꦺꦠꦸꦨꦴꦮꦺꦤ ꦤꦶꦢ꧀ꦣꦴꦫꦶꦠꦴꦪ ꦠꦟ꧀ꦲꦴꦪ ꦏꦸꦱꦭꦴꦢꦶꦮꦶꦨꦴꦒꦥꦮꦶꦕꦪꦩꦸꦑꦺꦤ ꦮꦶꦕꦪꦲꦴꦫꦱꦩ꧀ꦥꦴꦠꦁ ꦢꦱ꧀ꦱꦺꦠꦸꦁ ‘‘ꦠꦠ꧀ꦡ ꦠꦟ꧀ꦲꦴ ꦢꦸꦮꦶꦣꦴ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦠꦠ꧀ꦡ ꦏꦸꦱꦭꦴꦠꦶ ꦏꦸꦱꦭꦣꦩ꧀ꦩꦴꦫꦩ꧀ꦩꦟꦴ. ꦏꦸꦱꦭ-ꦱꦢ꧀ꦢꦺꦴ ꦕꦺꦠ꧀ꦡ ꦧꦴꦲꦶꦠꦶꦏꦱꦸꦠ꧀ꦠꦺ (ꦩ. ꦤꦶ. ꧒.꧓꧕꧘ ꦄꦴꦢꦪꦺꦴ) ꦮꦶꦪ ꦄꦤꦮꦗ꧀ꦗꦠ꧀ꦡꦺ ꦢꦛ꧀ꦜꦧ꧀ꦧꦺꦴ. ꦏꦱ꧀ꦩꦴ ꦥꦤꦺꦠ꧀ꦡ ꦠꦟ꧀ꦲꦴ ꦏꦸꦱꦭꦥꦫꦶꦪꦴꦪꦺꦤ ꦈꦢ꧀ꦣꦛꦴ? ꦲꦺꦛ꧀ꦜꦴ ꦢꦺꦱꦤꦴꦲꦴꦫꦺ ꦮꦶꦥꦭ꧀ꦭꦴꦱꦲꦺꦠꦸꦨꦴꦮꦺꦤ ꦠꦟ꧀ꦲꦁ ꦈꦢ꧀ꦣꦫꦶꦠ꧀ꦮꦴ ꦠꦱ꧀ꦱꦴ ꦮꦱꦺꦤ ꦱꦁꦏꦶꦭꦺꦱꦥꦏ꧀ꦑꦺꦴ ꦢꦱ꧀ꦱꦶꦠꦺꦴ. ꦮꦶꦕꦶꦠ꧀ꦠꦥꦛꦶꦨꦴꦤꦠꦴꦪ ꦥꦤ ꦆꦣꦴꦥꦶ ꦠꦟ꧀ꦲꦴꦩꦸꦑꦺꦤꦺꦮ ꦮꦺꦴꦢꦴꦤꦥꦏ꧀ꦑꦁ ꦢꦱ꧀ꦱꦺꦠꦸꦁ ꦏꦸꦱꦭꦥꦫꦶꦪꦴꦪꦺꦤ ꦠꦟ꧀ꦲꦴ ꦈꦢ꧀ꦣꦛꦴ. ꦠꦠ꧀ꦡ ꦱꦁꦱꦴꦫꦁ ꦒꦩꦺꦠꦷꦠꦶ ꦱꦁꦱꦴꦫꦒꦴꦩꦶꦤꦷ, ꦱꦁꦱꦴꦫꦤꦴꦪꦶꦏꦴꦠꦶ ꦄꦠ꧀ꦡꦺꦴ. ꦄꦥꦕꦪꦁ ꦤꦶꦧ꧀ꦧꦴꦤꦁ ꦒꦩꦺꦠꦷꦠꦶ ꦄꦥꦕꦪꦒꦴꦩꦶꦤꦷ. ꦏꦡꦁ ꦥꦤ ꦠꦟ꧀ꦲꦴ ꦄꦥꦕꦪꦒꦴꦩꦶꦤꦷꦠꦶ? ꦄꦴꦲ ‘‘ꦥꦲꦴꦤꦠꦟ꧀ꦲꦴ’’ꦠꦶ. ꦠꦢꦔ꧀ꦒꦴꦢꦶꦥ꧀ꦥꦲꦴꦤꦱ꧀ꦱ ꦲꦺꦠꦸꦨꦹꦠꦴ ꦠꦟ꧀ꦲꦴ. ꦏꦡꦁ ꦥꦤ ꦌꦏꦤ꧀ꦠꦱꦴꦮꦗ꧀ꦗꦴꦪ ꦠꦟ꧀ꦲꦴꦪ ꦏꦸꦱꦭꦨꦴꦮꦺꦴꦠꦶ? ꦱꦺꦮꦶꦠꦧ꧀ꦧꦨꦴꦮꦠꦺꦴ. ꦪꦡꦴ ꦠꦟ꧀ꦲꦴ, ꦌꦮꦁ ꦩꦴꦤꦺꦴꦥꦶ ꦢꦸꦮꦶꦣꦺꦴ ꦏꦸꦱꦭꦺꦴꦥꦶ ꦄꦏꦸꦱꦭꦺꦴꦥꦶ, ꦤ ꦠꦟ꧀ꦲꦴ ꦌꦮꦴꦠꦶ ꦠꦟ꧀ꦲꦴꦪ ꦤꦶꦢꦱ꧀ꦱꦤꦨꦴꦮꦺꦤ ꦩꦴꦤꦺꦴ ꦮꦸꦠ꧀ꦠꦺꦴ.

ꦠꦠ꧀ꦡ ꦩꦴꦤꦱ꧀ꦱ ꦪꦡꦴꦣꦶꦥ꧀ꦥꦺꦠꦁ ꦏꦸꦱꦭꦴꦢꦶꦨꦴꦮꦁ ꦢꦱ꧀ꦱꦺꦠꦸꦁ ‘‘ꦪꦁ ꦩꦴꦤꦁ ꦤꦶꦱ꧀ꦱꦴꦪꦴ’’ꦠꦶꦄꦴꦢꦶꦩꦴꦲ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ – ‘‘ꦩꦴꦤꦩꦲꦁ, ꦢꦺꦮꦴꦤꦩꦶꦤ꧀ꦢ, ꦢꦸꦮꦶꦣꦺꦤ ꦮꦢꦴꦩꦶ ꦱꦺꦮꦶꦠꦧ꧀ꦧꦩ꧀ꦥꦶ ꦄꦱꦺꦮꦶꦠꦧ꧀ꦧꦩ꧀ꦥꦷ’’ꦠꦶꦄꦴꦢꦶ. ꦪꦁ ꦤꦺꦏ꧀ꦑꦩ꧀ꦩꦱ꧀ꦱꦶꦠꦁ ꦢꦺꦴꦩꦤꦱ꧀ꦱꦤ꧀ꦠꦶꦄꦴꦢꦶ ‘‘ꦏꦸꦱꦭꦴ’’ꦠꦶ ꦮꦸꦠ꧀ꦠꦠꦟ꧀ꦲꦴꦪ ꦱꦫꦹꦥꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ. ꦠꦠ꧀ꦡ ꦤꦺꦏ꧀ꦑꦩ꧀ꦩꦱ꧀ꦱꦶꦠꦁ ꦢꦺꦴꦩꦤꦱ꧀ꦱꦁ ꦤꦴꦩ –

‘‘ꦠꦠ꧀ꦡ ꦏꦠꦩꦴꦤꦶ ꦖ ꦤꦺꦏ꧀ꦑꦩ꧀ꦩꦱ꧀ꦱꦶꦠꦴꦤꦶ ꦢꦺꦴꦩꦤꦱ꧀ꦱꦴꦤꦶ? ꦫꦹꦥꦴꦤꦁꦠ꧀ꦮꦺꦮ ꦄꦤꦶꦕ꧀ꦕꦠꦁ ꦮꦶꦢꦶꦠ꧀ꦮꦴ ꦮꦶꦥꦫꦶꦟꦴꦩꦮꦶꦫꦴꦒꦤꦶꦫꦺꦴꦣꦁ ‘ꦥꦸꦧ꧀ꦧꦺ ꦕꦺꦮ ꦫꦹꦥꦴ ꦌꦠꦫꦲꦶ ꦕ, ꦱꦧ꧀ꦧꦺꦠꦺ ꦫꦹꦥꦴ ꦄꦤꦶꦕ꧀ꦕꦴ ꦢꦸꦏ꧀ꦑꦴ ꦮꦶꦥꦫꦶꦟꦴꦩꦣꦩ꧀ꦩꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦶꦱ꧀ꦮꦴ ꦄꦤꦸꦠ꧀ꦠꦫꦺꦱꦸ ꦮꦶꦩꦺꦴꦏ꧀ꦑꦺꦱꦸ ꦥꦶꦲꦁ ꦈꦥꦛ꧀ꦜꦴꦥꦺꦠꦶ ‘ꦏꦸꦢꦴꦱ꧀ꦱꦸ ꦤꦴꦩꦴꦲꦁ ꦠꦢꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦱ꧀ꦱꦴꦩꦶ, ꦪꦢꦫꦶꦪꦴ ꦌꦠꦫꦲꦶ ꦄꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦷ’ꦠꦶ. ꦆꦠꦶ ꦄꦤꦸꦠ꧀ꦠꦫꦺꦱꦸ ꦮꦶꦩꦺꦴꦏ꧀ꦑꦺꦱꦸ ꦥꦶꦲꦁ ꦈꦥꦛ꧀ꦜꦴꦥꦪꦠꦺꦴ ꦈꦥ꧀ꦥꦗ꧀ꦗꦠꦶ ꦥꦶꦲꦴ, ꦥꦶꦲꦴꦥꦕ꧀ꦕꦪꦴ ꦢꦺꦴꦩꦤꦱ꧀ꦱꦁ. ꦪꦁ ꦌꦮꦫꦹꦥꦁ ꦢꦺꦴꦩꦤꦱ꧀ꦱꦁ, ꦆꦢꦁ ꦮꦸꦕ꧀ꦕꦠꦶ ꦤꦺꦏ꧀ꦑꦩ꧀ꦩꦱ꧀ꦱꦶꦠꦁ ꦢꦺꦴꦩꦤꦱ꧀ꦱ’’ꦤ꧀ꦠꦶ (ꦩ. ꦤꦶ. ꧓.꧓꧐꧗) –

ꦌꦮꦁ ꦖꦱꦸ ꦢ꧀ꦮꦴꦫꦺꦱꦸ ꦆꦛ꧀ꦜꦴꦫꦩ꧀ꦩꦟꦺ ꦄꦴꦥꦴꦡꦒꦠꦺ ꦄꦤꦸꦠ꧀ꦠꦫꦮꦶꦩꦺꦴꦏ꧀ꦑꦱꦔ꧀ꦑꦴꦠꦄꦫꦶꦪꦦꦭꦣꦩ꧀ꦩꦺꦱꦸ ꦥꦶꦲꦁ ꦈꦥꦛ꧀ꦜꦴꦥꦺꦠ꧀ꦮꦴ ꦠꦢꦣꦶꦒꦩꦴꦪ ꦄꦤꦶꦕ꧀ꦕꦴꦢꦶꦮꦱꦺꦤ ꦮꦶꦥꦱ꧀ꦱꦤꦁ ꦈꦥꦛ꧀ꦜꦴꦥꦺꦠ꧀ꦮꦴ ꦈꦱ꧀ꦱꦸꦏ꧀ꦏꦴꦥꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦱ꧀ꦱ ‘‘ꦆꦩꦩ꧀ꦥꦶ ꦥꦏ꧀ꦑꦁ ꦆꦩꦩ꧀ꦥꦶ ꦩꦴꦱꦁ, ꦆꦩꦩ꧀ꦥꦶ ꦱꦁꦮꦕ꧀ꦖꦫꦁ, ꦮꦶꦥꦱ꧀ꦱꦤꦁ ꦈꦱ꧀ꦱꦸꦏ꧀ꦏꦴꦥꦺꦠ꧀ꦮꦴ ꦄꦫꦶꦪꦨꦹꦩꦶꦁ ꦱꦩ꧀ꦥꦴꦥꦸꦟꦶꦠꦸꦁ ꦤꦴꦱꦏ꧀ꦑꦶ’’ꦤ꧀ꦠꦶ ꦄꦤꦸꦱꦺꦴꦕꦠꦺꦴ ꦈꦥ꧀ꦥꦤ꧀ꦤꦁ ꦢꦺꦴꦩꦤꦱ꧀ꦱꦁ ꦤꦺꦏ꧀ꦑꦩ꧀ꦩꦮꦱꦺꦤ ꦮꦶꦥꦱ꧀ꦱꦤꦴꦮꦱꦺꦤ ꦄꦤꦸꦱ꧀ꦱꦠꦶꦮꦱꦺꦤ ꦥꦜꦩꦗ꧀ꦙꦴꦤꦴꦢꦶꦮꦱꦺꦤ ꦥꦛꦶꦥꦠ꧀ꦠꦶꦪꦴ ꦲꦺꦠꦸꦨꦴꦮꦺꦤ ꦈꦥ꧀ꦥꦗ꧀ꦗꦤꦠꦺꦴ ꦤꦺꦏ꧀ꦑꦩ꧀ꦩꦱ꧀ꦱꦶꦠꦁ ꦢꦺꦴꦩꦤꦱ꧀ꦱꦁ ꦤꦴꦩ. ꦄꦪꦁ ꦠꦟ꧀ꦲꦴ ꦏꦸꦱꦭꦴꦠꦶ ꦄꦪꦁ ‘‘ꦥꦶꦲꦴ’’ꦠꦶ ꦮꦸꦠ꧀ꦠꦴ ꦠꦟ꧀ꦲꦴ ꦏꦸꦱꦭꦴ. ꦏꦡꦁ? ꦫꦴꦒꦮꦶꦫꦴꦒꦴ ꦕꦺꦠꦺꦴꦮꦶꦩꦸꦠ꧀ꦠꦶ, ꦠꦢꦴꦫꦩ꧀ꦩꦟꦴ ꦏꦸꦱꦭꦴꦠꦶ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦫꦴꦒꦮꦶꦫꦴꦒꦴ ꦕꦺꦠꦺꦴꦮꦶꦩꦸꦠ꧀ꦠꦶ, ꦤ ꦱꦨꦴꦮꦺꦤ ꦏꦸꦱꦭꦴ, ꦄꦤꦮꦗ꧀ꦗꦛ꧀ꦜꦺꦤ ꦏꦸꦱꦭꦴ. ꦠꦁ ꦈꦢ꧀ꦢꦶꦱ꧀ꦱ ꦥꦮꦠ꧀ꦠꦶꦪꦴ ꦠꦢꦴꦫꦩ꧀ꦩꦟꦴ ꦥꦤ ꦠꦟ꧀ꦲꦴ ꦏꦸꦱꦭꦴꦫꦩ꧀ꦩꦟꦠꦴꦪ ꦏꦸꦱꦭꦴꦠꦶ. ꦄꦮꦶꦗ꧀ꦗꦴꦮꦶꦫꦴꦒꦴ ꦥꦚ꧀ꦚꦴꦮꦶꦩꦸꦠ꧀ꦠꦶ ꦄꦤꦮꦗ꧀ꦗꦛ꧀ꦜꦺꦤ ꦏꦸꦱꦭꦴ. ꦠꦱ꧀ꦱꦴꦠꦶ ꦥꦚ꧀ꦚꦴꦮꦶꦩꦸꦠ꧀ꦠꦶꦪꦴ. ꦪꦴꦪ ꦮꦱꦺꦤ ‘‘ꦠꦱ꧀ꦩꦴ ꦫꦏ꧀ꦑꦶꦠꦕꦶꦠ꧀ꦠꦱ꧀ꦱꦴ’’ꦠꦶ ꦒꦴꦡꦴꦪꦁ ‘‘ꦱꦧ꧀ꦧꦴ ꦢꦸꦒ꧀ꦒꦠꦶꦪꦺꦴ ꦗꦲꦺ’’ꦠꦶ ꦮꦸꦠ꧀ꦠꦁ.

ꦆꦠꦶ ꦕꦶꦫꦠꦫꦁ ꦮꦶꦥꦱ꧀ꦱꦤꦴꦥꦫꦶꦮꦴꦱꦁ ꦥꦫꦶꦮꦱꦶꦠ꧀ꦮꦴ ꦢꦸꦏ꧀ꦑꦴꦥꦛꦶꦥꦢꦴꦢꦤ꧀ꦣꦴꦨꦶꦚ꧀ꦚꦴꦪ ꦄꦣꦶꦒꦠꦴꦪ ꦥꦚ꧀ꦚꦴꦮꦶꦩꦸꦠ꧀ꦠꦶꦪꦴ ꦮꦱꦺꦤ ꦮꦶꦕꦪꦲꦴꦫꦱꦩ꧀ꦥꦴꦠꦁ ꦢꦱ꧀ꦱꦺꦠꦸꦁ ‘‘ꦠꦱ꧀ꦱꦴ ꦏꦺꦴ ꦥꦮꦶꦕꦪꦺꦴ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦠꦠ꧀ꦡ ꦪꦱ꧀ꦩꦴ ꦥꦚ꧀ꦚꦴꦮꦶꦩꦸꦠ꧀ꦠꦶ ꦄꦫꦶꦪꦩꦒ꧀ꦒꦩꦹꦭꦶꦏꦴ, ꦠꦱ꧀ꦩꦴ ꦕꦠꦸꦠ꧀ꦡꦗ꧀ꦙꦴꦤꦥꦴꦢꦏꦺ ꦄꦫꦶꦪꦩꦒ꧀ꦒꦣꦩ꧀ꦩꦺ ꦈꦢ꧀ꦢꦶꦱꦶꦠ꧀ꦮꦴ ꦠꦺꦱꦁ ꦄꦴꦒꦩꦤꦥꦛꦶꦥꦢꦁ ꦢꦱ꧀ꦱꦺꦠꦸꦁ ‘‘ꦏꦠ꧀ꦡ ꦢꦛ꧀ꦜꦧ꧀ꦧꦺꦴ, ꦕꦠꦸꦠ꧀ꦡꦺ ꦙꦴꦤꦺ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦥꦴꦫꦩꦶꦠꦴꦪꦴꦠꦶ ꦈꦏ꧀ꦏꦁꦱꦒꦠꦴꦪ ꦕꦠꦸꦠ꧀ꦡꦗ꧀ꦙꦴꦤꦨꦴꦮꦤꦴꦪ. ꦪꦺꦲꦶ ꦄꦛ꧀ꦜꦲꦶ ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦁ ꦕꦠꦸꦠ꧀ꦡꦗ꧀ꦙꦴꦤꦕꦶꦠ꧀ꦠꦁ ꦮꦸꦠ꧀ꦠꦁ, ꦠꦴꦤꦶ ꦄꦔ꧀ꦒꦴꦤꦶ ꦢꦱ꧀ꦱꦺꦠꦸꦁ ‘‘ꦥꦫꦶꦱꦸꦢ꧀ꦣ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ.

ꦠꦠ꧀ꦡ ꦈꦥꦺꦏ꧀ꦑꦴꦱꦠꦶꦥꦴꦫꦶꦱꦸꦢ꧀ꦣꦶꦨꦴꦮꦺꦤ ꦥꦫꦶꦱꦸꦢ꧀ꦣꦁ. ꦥꦫꦶꦱꦸꦢ꧀ꦣꦠ꧀ꦠꦴ ꦌꦮ ꦥꦫꦶꦪꦺꦴꦢꦴꦠꦁ, ꦥꦨꦱ꧀ꦱꦫꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱꦸꦑꦴꦢꦷꦤꦁ ꦥꦕ꧀ꦕꦪꦓꦴꦠꦺꦤ ꦮꦷꦠꦫꦴꦒꦴꦢꦶꦄꦔ꧀ꦒꦟꦠ꧀ꦠꦴ ꦄꦤꦔ꧀ꦒꦟꦁ. ꦄꦤꦔ꧀ꦒꦟꦠ꧀ꦠꦴ ꦌꦮ ꦮꦶꦒꦠꦹꦥꦏ꧀ꦏꦶꦭꦺꦱꦁ, ꦄꦔ꧀ꦒꦟꦺꦤ ꦲꦶ ꦕꦶꦠ꧀ꦠꦁ ꦈꦥꦏ꧀ꦏꦶꦭꦶꦱ꧀ꦱꦠꦶ, ꦱꦸꦨꦴꦮꦶꦠꦠ꧀ꦠꦴ ꦩꦸꦢꦸꦨꦹꦠꦁ ꦮꦱꦶꦨꦴꦮꦥ꧀ꦥꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦮꦱꦺ ꦮꦠ꧀ꦠꦩꦴꦤꦚ꧀ꦲꦶ ꦕꦶꦠ꧀ꦠꦁ ‘‘ꦩꦸꦢꦹ’’ꦠꦶ ꦮꦸꦕ꧀ꦕꦠꦶ. ꦩꦸꦢꦸꦠ꧀ꦠꦴ ꦌꦮ ꦕ ꦏꦩ꧀ꦩꦤꦶꦪꦁ, ꦏꦩ꧀ꦩꦏ꧀ꦑꦩꦁ ꦏꦩ꧀ꦩꦪꦺꦴꦒ꧀ꦒꦤ꧀ꦠꦶ ꦄꦠ꧀ꦡꦺꦴ. ꦩꦸꦢꦸꦚ꧀ꦲꦶ ꦕꦶꦠ꧀ꦠꦁ ꦏꦩ꧀ꦩꦤꦶꦪꦁ ꦲꦺꦴꦠꦶ, ꦌꦮꦁ ꦨꦴꦮꦶꦠꦁ ꦩꦸꦢꦸꦚ꧀ꦕ ꦲꦺꦴꦠꦶ ꦏꦩ꧀ꦩꦤꦶꦪꦚ꧀ꦕ, ꦪꦡꦪꦶꦢꦁ, ꦨꦶꦏ꧀ꦑꦮꦺ, ꦕꦶꦠ꧀ꦠ’’ꦤ꧀ꦠꦶ (ꦄ. ꦤꦶ. ꧑.꧒꧒). ꦌꦠꦺꦱꦸ ꦥꦫꦶꦱꦸꦢ꧀ꦣꦨꦴꦮꦴꦢꦷꦱꦸ ꦜꦶꦠꦠ꧀ꦠꦴ ꦜꦶꦠꦁ. ꦜꦶꦠꦠ꧀ꦠꦴꦪꦺꦮ ꦄꦴꦤꦺꦚ꧀ꦗꦥ꧀ꦥꦠ꧀ꦠꦁ, ꦄꦕꦭꦁ ꦤꦶꦫꦶꦚ꧀ꦗꦤꦤ꧀ꦠꦶ ꦄꦠ꧀ꦡꦺꦴ. ꦩꦸꦢꦸꦏꦩ꧀ꦩꦚ꧀ꦚꦨꦴꦮꦺꦤ ꦮꦴ ꦄꦠ꧀ꦠꦤꦺꦴ ꦮꦱꦺ ꦜꦶꦠꦠ꧀ꦠꦴ ꦜꦶꦠꦁ. ꦱꦢ꧀ꦣꦴꦢꦷꦲꦶ ꦥꦫꦶꦒ꧀ꦒꦲꦶꦠꦠ꧀ꦠꦴ ꦄꦴꦤꦺꦚ꧀ꦗꦥ꧀ꦥꦠ꧀ꦠꦁ. ꦱꦢ꧀ꦣꦴꦥꦫꦶꦒ꧀ꦒꦲꦶꦠꦚ꧀ꦲꦶ ꦕꦶꦠ꧀ꦠꦁ ꦄꦱ꧀ꦱꦢ꧀ꦣꦶꦪꦺꦤ ꦤ ꦆꦚ꧀ꦗꦠꦶ, ꦮꦷꦫꦶꦪꦥꦫꦶꦒ꧀ꦒꦲꦶꦠꦁ ꦏꦺꦴꦱꦗ꧀ꦗꦺꦤ ꦤ ꦆꦚ꧀ꦗꦠꦶ, ꦱꦠꦶꦥꦫꦶꦒ꧀ꦒꦲꦶꦠꦁ ꦥꦩꦴꦢꦺꦤ ꦤ ꦆꦚ꧀ꦗꦠꦶ, ꦱꦩꦴꦣꦶꦥꦫꦶꦒ꧀ꦒꦲꦶꦠꦁ ꦈꦢ꧀ꦣꦕ꧀ꦕꦺꦤ ꦤ ꦆꦚ꧀ꦗꦠꦶ, ꦥꦚ꧀ꦚꦴꦥꦫꦶꦒ꧀ꦒꦲꦶꦠꦁ ꦄꦮꦶꦗ꧀ꦗꦴꦪ ꦤ ꦆꦚ꧀ꦗꦠꦶ, ꦎꦨꦴꦱꦒꦠꦁ ꦏꦶꦭꦺꦱꦤ꧀ꦣꦏꦴꦫꦺꦤ ꦤ ꦆꦚ꧀ꦗꦠꦶ. ꦆꦩꦺꦲꦶ ꦖꦲꦶ ꦣꦩ꧀ꦩꦺꦲꦶ ꦥꦫꦶꦒ꧀ꦒꦲꦶꦠꦁ ꦄꦴꦤꦺꦚ꧀ꦗꦥ꧀ꦥꦠ꧀ꦠꦁ ꦲꦺꦴꦠꦶ. ꦌꦮꦁ ꦄꦛ꧀ꦜꦔ꧀ꦒꦱꦩꦤ꧀ꦤꦴꦒꦠꦁ ꦕꦶꦠ꧀ꦠꦁ ꦄꦨꦶꦤꦷꦲꦴꦫꦏ꧀ꦑꦩꦁ ꦲꦺꦴꦠꦶ. ꦄꦨꦶꦚ꧀ꦚꦴꦱꦕ꧀ꦖꦶꦏꦫꦟꦷꦪꦴꦤꦁ ꦣꦩ꧀ꦩꦴꦤꦁ ꦄꦨꦶꦚ꧀ꦚꦴꦱꦕ꧀ꦖꦶꦏꦶꦫꦶꦪꦴꦪ.

ꦄꦥꦫꦺꦴ ꦤꦪꦺꦴ – ꦕꦠꦸꦠ꧀ꦡꦗ꧀ꦙꦴꦤꦱꦩꦴꦣꦶꦤꦴ ꦱꦩꦴꦲꦶꦠꦁ ꦕꦶꦠ꧀ꦠꦁ ꦤꦷꦮꦫꦟꦢꦹꦫꦷꦨꦴꦮꦺꦤ ꦥꦫꦶꦱꦸꦢ꧀ꦣꦁ. ꦮꦶꦠꦏ꧀ꦏꦴꦢꦶꦱꦩꦠꦶꦏ꧀ꦏꦩꦺꦤ ꦥꦫꦶꦪꦺꦴꦢꦴꦠꦁ. ꦙꦴꦤꦥꦛꦶꦭꦴꦨꦥꦕ꧀ꦕꦤꦷꦏꦴꦤꦁ ꦥꦴꦥꦏꦴꦤꦁ ꦆꦕ꧀ꦖꦴꦮꦕꦫꦴꦤꦁ ꦄꦨꦴꦮꦺꦤ ꦄꦤꦔ꧀ꦒꦟꦁ. ꦆꦕ꧀ꦖꦴꦮꦕꦫꦴꦤꦤ꧀ꦠꦶ ꦆꦕ꧀ꦖꦴꦪ ꦄꦮꦕꦫꦴꦤꦁ ꦆꦕ꧀ꦖꦴꦮꦱꦺꦤ ꦎꦠꦶꦟ꧀ꦟꦴꦤꦁ ꦥꦮꦠ꧀ꦠꦴꦤꦁ ꦤꦴꦤꦥ꧀ꦥꦏꦴꦫꦴꦤꦁ ꦏꦺꦴꦥꦄꦥꦕ꧀ꦕꦪꦴꦤꦤ꧀ꦠꦶ ꦄꦠ꧀ꦡꦺꦴ. ꦄꦨꦶꦗ꧀ꦙꦴꦢꦷꦤꦁ ꦕꦶꦠ꧀ꦠꦸꦥꦏ꧀ꦏꦶꦭꦺꦱꦴꦤꦁ ꦮꦶꦒꦩꦺꦤ ꦮꦶꦒꦠꦹꦥꦏ꧀ꦏꦶꦭꦺꦱꦁ. ꦈꦨꦪꦩ꧀ꦥꦶ ꦕꦺꦠꦁ ꦄꦤꦔ꧀ꦒꦟꦱꦸꦠ꧀ꦠꦮꦠ꧀ꦡꦱꦸꦠ꧀ꦠꦴꦤꦁ (ꦩ. ꦤꦶ. ꧑.꧕꧗ ꦄꦴꦢꦪꦺꦴ; ꧗꧐ ꦄꦴꦢꦪꦺꦴ) ꦮꦱꦺꦤ ꦮꦺꦢꦶꦠꦧ꧀ꦧꦁ. ꦮꦱꦶꦥ꧀ꦥꦠ꧀ꦠꦶꦪꦴ ꦩꦸꦢꦸꦨꦹꦠꦁ. ꦆꦢ꧀ꦣꦶꦥꦴꦢꦨꦴꦮꦹꦥꦒꦩꦺꦤ ꦏꦩ꧀ꦩꦤꦶꦪꦁ. ꦨꦴꦮꦤꦴꦥꦴꦫꦶꦥꦹꦫꦶꦪꦴ ꦥꦟꦷꦠꦨꦴꦮꦹꦥꦒꦩꦺꦤ ꦜꦶꦠꦁ ꦄꦴꦤꦺꦚ꧀ꦗꦥ꧀ꦥꦠ꧀ꦠꦁ. ꦪꦡꦴ ꦄꦴꦤꦺꦚ꧀ꦗꦨꦴꦮꦥ꧀ꦥꦠ꧀ꦠꦁ ꦄꦴꦤꦺꦚ꧀ꦗꦥ꧀ꦥꦠ꧀ꦠꦁ ꦲꦺꦴꦠꦶ, ꦌꦮꦁ ꦜꦶꦠꦤ꧀ꦠꦶ ꦄꦠ꧀ꦡꦺꦴ. ꦌꦮꦩ꧀ꦥꦶ ꦄꦛ꧀ꦜꦔ꧀ꦒꦱꦩꦤ꧀ꦤꦴꦒꦠꦁ ꦕꦶꦠ꧀ꦠꦁ ꦄꦨꦶꦤꦷꦲꦴꦫꦏ꧀ꦑꦩꦁ ꦲꦺꦴꦠꦶ. ꦄꦨꦶꦚ꧀ꦚꦴꦱꦕ꧀ꦖꦶꦏꦫꦟꦷꦪꦴꦤꦁ ꦣꦩ꧀ꦩꦴꦤꦁ ꦄꦨꦶꦚ꧀ꦚꦴꦱꦕ꧀ꦖꦶꦏꦶꦫꦶꦪꦴꦪ ꦥꦴꦢꦏꦁ ꦥꦢꦛ꧀ꦜꦴꦤꦨꦹꦠꦁ. ꦠꦺꦤꦺꦮꦴꦲ – ‘‘ꦱꦺꦴ ꦠꦠ꧀ꦡ ꦄꦛ꧀ꦜꦮꦶꦣꦁ ꦄꦣꦶꦒꦕ꧀ꦖꦠꦶ ꦖ ꦄꦨꦶꦚ꧀ꦚꦴ ꦢ꧀ꦮꦺ ꦕ ꦮꦶꦱꦺꦱꦺ’’ꦠꦶ.

ꦠꦠ꧀ꦡ ꦱꦺꦴꦠꦶ ꦄꦣꦶꦒꦠꦕꦠꦸꦠ꧀ꦡꦗ꧀ꦙꦴꦤꦺꦴ ꦪꦺꦴꦒꦷ. ꦠꦠ꧀ꦡꦴꦠꦶ ꦠꦱ꧀ꦩꦶꦁ ꦕꦠꦸꦠ꧀ꦡꦗ꧀ꦙꦴꦤꦺ ꦄꦣꦶꦛ꧀ꦜꦴꦤꦨꦹꦠꦺ. ꦄꦛ꧀ꦜꦮꦶꦣꦁ ꦄꦣꦶꦒꦕ꧀ꦖꦠꦷꦠꦶ ꦄꦛ꧀ꦜꦮꦶꦣꦁ ꦒꦸꦟꦁ ꦄꦣꦶꦒꦕ꧀ꦖꦠꦶ. ꦏꦺꦴ ꦥꦤ ꦱꦺꦴ ꦄꦛ꧀ꦜꦮꦶꦣꦺꦴ ꦒꦸꦟꦺꦴꦠꦶ? ꦄꦴꦲ ‘‘ꦖ ꦄꦨꦶꦚ꧀ꦚꦴ ꦢ꧀ꦮꦺ ꦕ ꦮꦶꦱꦺꦱꦺ’’ꦠꦶ. ꦩꦤꦺꦴꦩꦪꦶꦢ꧀ꦣꦶ ꦮꦶꦥꦱ꧀ꦱꦤꦴꦚꦴꦟꦚ꧀ꦕ. ꦠꦁ ꦕꦶꦠ꧀ꦠꦤ꧀ꦠꦶ ꦕꦠꦸꦠ꧀ꦡꦗ꧀ꦙꦴꦤꦕꦶꦠ꧀ꦠꦁ. ‘‘ꦪꦠꦺꦴ ꦥꦫꦶꦱꦸꦢ꧀ꦣꦁ, ꦠꦠꦺꦴ ꦥꦫꦶꦪꦺꦴꦢꦴꦠ’’ꦤ꧀ꦠꦶꦄꦴꦢꦶꦤꦴ ꦥꦸꦫꦶꦩꦁ ꦥꦸꦫꦶꦩꦁ ꦥꦕ꧀ꦖꦶꦩꦱ꧀ꦱ ꦥꦕ꧀ꦖꦶꦩꦱ꧀ꦱ ꦏꦴꦫꦟꦮꦕꦤꦤ꧀ꦠꦶ ꦢꦱ꧀ꦱꦺꦠꦶ. ꦠꦢꦸꦨꦪꦤ꧀ꦠꦶ ꦪꦺꦱꦁ ꦫꦴꦒꦴꦢꦶꦄꦔ꧀ꦒꦟꦴꦤꦁ ꦄꦨꦶꦗ꧀ꦙꦴꦢꦶꦈꦥꦏ꧀ꦏꦶꦭꦺꦱꦴꦤꦚ꧀ꦕ ꦄꦨꦴꦮꦺꦤ ‘‘ꦄꦤꦔ꧀ꦒꦟꦁ ꦮꦶꦒꦠꦹꦥꦏ꧀ꦏꦶꦭꦺꦱ’’ꦤ꧀ꦠꦶ ꦕ ꦮꦸꦠ꧀ꦠꦁ. ꦠꦴꦤꦶ ꦄꦔ꧀ꦒꦟꦴꦤꦶ ꦈꦥꦏ꧀ꦏꦶꦭꦺꦱꦴ ꦕꦴꦠꦶ ꦠꦁ ꦈꦨꦪꦁ. ꦠꦢꦸꦨꦪꦁ ꦠꦟ꧀ꦲꦴꦱꦨꦴꦮꦠ꧀ꦠꦴ ꦠꦟ꧀ꦲꦴꦪ ꦄꦤꦸꦭꦺꦴꦩꦤꦠꦺꦴ ꦕ ꦠꦟ꧀ꦲꦴꦥꦏ꧀ꦑꦺꦴ. ꦪꦴ ꦕ ꦆꦚ꧀ꦗꦤꦴꦠꦶ ꦪꦴ ꦕ ꦕꦶꦠ꧀ꦠꦱ꧀ꦱ ꦄꦱꦩꦴꦢꦴꦤꦺꦤ ꦦꦤ꧀ꦢꦤꦴ. ꦄꦛ꧀ꦜꦶꦠꦷꦠꦶ ꦄꦤꦮꦛ꧀ꦜꦴꦤꦁ. ꦄꦪꦁ ꦢꦶꦛ꧀ꦜꦶꦥꦏ꧀ꦑꦺꦴꦠꦶ ꦪꦴ ꦆꦚ꧀ꦗꦤꦴ ꦄꦛ꧀ꦜꦶꦠꦶ ꦕ, ꦄꦪꦁ ꦩꦶꦕ꧀ꦖꦴꦨꦶꦤꦶꦮꦺꦱꦲꦺꦠꦸꦠꦴꦪ ꦢꦶꦛ꧀ꦜꦶꦥꦏ꧀ꦑꦺꦴ.

‘‘ꦕꦠ꧀ꦠꦴꦫꦶ ꦆꦤ꧀ꦢ꧀ꦫꦶꦪꦴꦤꦷ’’ꦠꦶꦄꦴꦢꦶꦤꦴ ꦮꦺꦢꦤꦴꦠꦺꦴꦥꦶ ꦕꦠꦸꦠ꧀ꦡꦗ꧀ꦙꦴꦤꦁ ꦮꦶꦨꦴꦮꦺꦠꦶ. ꦌꦮꦁ ꦄꦛ꧀ꦜꦔ꧀ꦒꦱꦩꦤ꧀ꦤꦴꦒꦠꦁ ꦕꦠꦸꦠ꧀ꦡꦗ꧀ꦙꦴꦤꦕꦶꦠ꧀ꦠꦁ ꦈꦥꦫꦶ ꦄꦨꦶꦚ꧀ꦚꦴꦣꦶꦒꦩꦴꦪ ꦄꦨꦶꦤꦷꦲꦴꦫꦏ꧀ꦑꦩꦁ ꦲꦺꦴꦠꦶ. ꦱꦴ ꦕ ꦄꦨꦶꦤꦷꦲꦴꦫꦏ꧀ꦑꦩꦠꦴ ꦕꦸꦢ꧀ꦢꦱꦲꦶ ꦄꦴꦏꦴꦫꦺꦲꦶ ꦕꦶꦟ꧀ꦟꦮꦱꦶꦨꦴꦮꦱ꧀ꦱꦺꦮ ꦲꦺꦴꦠꦶ. ꦱꦺꦴ ꦕ ꦮꦱꦶꦨꦴꦮꦺꦴ ꦄꦛ꧀ꦜꦱꦩꦴꦥꦠ꧀ꦠꦶꦭꦴꦨꦶꦤꦺꦴ, ꦤ ꦫꦹꦥꦴꦮꦕꦫꦗ꧀ꦙꦴꦤꦩꦠ꧀ꦠꦭꦴꦨꦶꦤꦺꦴꦠꦶ ꦄꦴꦫꦸꦥ꧀ꦥꦱꦩꦴꦥꦠ꧀ꦠꦶꦪꦴ ꦩꦤꦱꦶꦏꦴꦫꦮꦶꦣꦶꦁ ꦢꦱ꧀ꦱꦺꦤ꧀ꦠꦺꦴ ‘‘ꦱꦺꦴ ꦈꦥꦫꦶꦩꦁ ꦱꦩꦴꦥꦠ꧀ꦠꦶꦁ ꦱꦤ꧀ꦠꦠꦺꦴ ꦩꦤꦱꦶꦏꦫꦺꦴꦠꦷ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦈꦥꦫꦶꦩꦁ ꦱꦩꦴꦥꦠ꧀ꦠꦶꦤ꧀ꦠꦶ ꦄꦴꦏꦴꦱꦴꦤꦚ꧀ꦕꦴꦪꦠꦤꦱꦩꦴꦥꦠ꧀ꦠꦶꦁ. ꦱꦤ꧀ꦠꦠꦺꦴ ꦩꦤꦱꦶꦏꦫꦺꦴꦠꦷꦠꦶ ꦄꦔ꧀ꦒꦱꦤ꧀ꦠꦠꦴꦪꦥꦶ ꦄꦴꦫꦩ꧀ꦩꦟꦱꦤ꧀ꦠꦠꦴꦪꦥꦶ ‘‘ꦱꦤ꧀ꦠꦴ’’ꦠꦶ ꦩꦤꦱꦶꦏꦫꦺꦴꦠꦶ. ꦪꦠꦺꦴ ꦪꦠꦺꦴ ꦲꦶ ꦄꦴꦫꦸꦥ꧀ꦥꦱꦩꦴꦥꦠ꧀ꦠꦶꦁ ꦱꦤ꧀ꦠꦠꦺꦴ ꦩꦤꦱꦶꦏꦫꦺꦴꦠꦶ, ꦠꦠꦺꦴ ꦠꦠꦺꦴ ꦫꦹꦥꦴꦮꦕꦫꦗ꧀ꦙꦴꦤꦁ ꦄꦮꦹꦥꦱꦤ꧀ꦠꦁ ꦲꦸꦠ꧀ꦮꦴ ꦈꦥꦛ꧀ꦜꦴꦠꦶ. ꦠꦺꦤꦺꦮꦴꦲ – ‘‘ꦠꦱ꧀ꦱ ꦈꦥꦫꦶꦩꦁ…ꦥꦺ… ꦱꦟ꧀ꦜꦲꦠꦷ’’ꦠꦶ. ꦈꦏ꧀ꦏꦟ꧀ꦜꦴ ꦕ ꦥꦛꦶꦓꦱꦚ꧀ꦚꦴꦠꦶ ꦥꦛꦶꦓꦱꦚ꧀ꦚꦴꦱꦔ꧀ꦑꦴꦠꦴꦱꦸ ꦥꦚ꧀ꦕꦮꦶꦚ꧀ꦚꦴꦟꦱꦚ꧀ꦚꦴꦱꦸ ꦄꦤꦨꦶꦫꦠꦶ ꦱꦟ꧀ꦜꦲꦠꦶ. ‘‘ꦱꦺꦴ ꦱꦧ꧀ꦧꦱꦺꦴ’’ꦠꦶꦄꦴꦢꦶꦤꦴ ꦌꦏꦢꦺꦱꦺꦤ ꦄꦴꦫꦸꦥ꧀ꦥꦱꦩꦴꦥꦠ꧀ꦠꦶꦁ ꦢꦱ꧀ꦱꦺꦠꦶ. ꦄꦨꦶꦚ꧀ꦚꦴꦨꦶꦤꦷꦲꦴꦫꦺꦴ ꦫꦹꦥꦱꦚ꧀ꦚꦴꦠꦶ ꦫꦹꦥꦴꦮꦕꦫꦱꦚ꧀ꦚꦴ ꦤꦴꦩꦺꦠꦴ ꦪꦴꦮꦢꦺꦮ ꦄꦨꦶꦚ꧀ꦚꦠ꧀ꦡꦴꦨꦶꦤꦷꦲꦴꦫꦩꦠ꧀ꦠꦁ, ꦤ ꦥꦤ ꦄꦫꦹꦥꦴꦮꦕꦫꦱꦩꦴꦥꦠ꧀ꦠꦶꦪꦺꦴ ꦮꦶꦪ ꦱꦤ꧀ꦠꦴꦠꦶ ꦄꦣꦶꦥ꧀ꦥꦴꦪꦺꦴ. ꦮꦺꦴꦏꦴꦫꦺꦴ ꦤꦴꦤꦠ꧀ꦠꦱꦚ꧀ꦚꦴꦠꦶ ꦤꦴꦤꦠ꧀ꦠꦱꦚ꧀ꦚꦴ ꦤꦴꦩꦺꦠꦴ ꦤꦴꦤꦴꦫꦩ꧀ꦩꦟꦺꦱꦸ ꦮꦺꦴꦏꦴꦫꦺꦴ, ꦠꦠ꧀ꦡ ꦕꦶꦠ꧀ꦠꦱ꧀ꦱ ꦄꦴꦏꦸꦭꦥ꧀ꦥꦮꦠ꧀ꦠꦷꦠꦶ ꦄꦠ꧀ꦡꦺꦴ. ꦱꦩꦠꦶꦏ꧀ꦏꦩꦠꦷꦠꦶ ꦌꦮꦁ ꦠꦠ꧀ꦡ ꦄꦴꦢꦷꦤꦮꦢꦱ꧀ꦱꦷ ꦲꦸꦠ꧀ꦮꦴ ꦠꦴ ꦱꦩꦠꦶꦏ꧀ꦏꦩꦠꦶ. ꦥꦛꦶꦓꦱꦚ꧀ꦚꦴ ꦕꦱ꧀ꦱ ꦄꦧ꧀ꦨꦠ꧀ꦡꦁ ꦒꦕ꧀ꦖꦠꦷꦠꦶ ꦄꦱ꧀ꦱ ꦄꦴꦏꦴꦱꦴꦤꦚ꧀ꦕꦴꦪꦠꦤꦱꦩꦴꦥꦠ꧀ꦠꦶꦁ ꦄꦣꦶꦒꦕ꧀ꦖꦤ꧀ꦠꦱ꧀ꦱ ꦪꦺꦴꦒꦶꦤꦺꦴ ꦢꦱꦥꦶ ꦥꦛꦶꦓꦱꦚ꧀ꦚꦴ ꦮꦶꦒꦕ꧀ꦖꦤ꧀ꦠꦶ. ꦆꦩꦶꦤꦴ ꦥꦜꦩꦴꦫꦸꦥ꧀ꦥꦱꦩꦴꦥꦠ꧀ꦠꦶꦩꦴꦲ.

ꦌꦮꦁ ꦱꦩꦴꦲꦶꦠꦱ꧀ꦱꦴꦠꦶ ꦌꦮꦁ ꦆꦩꦶꦤꦴ ꦮꦸꦠ꧀ꦠꦤꦪꦺꦤ ꦫꦹꦥꦴꦮꦕꦫꦗ꧀ꦙꦴꦤꦺ ꦕꦶꦠ꧀ꦠꦺꦏꦒ꧀ꦒꦠꦴꦪꦥꦶ ꦱꦩꦠꦶꦏ꧀ꦏꦩꦺꦤ ꦱꦩꦴꦲꦶꦠꦱ꧀ꦱ. ꦱꦩꦴꦲꦶꦠꦱ꧀ꦱꦴꦠꦶ ꦄꦴꦫꦸꦥ꧀ꦥꦱꦩꦴꦣꦶꦤꦴ ꦱꦤ꧀ꦠꦮꦸꦠ꧀ꦠꦶꦤꦴ ꦱꦩꦴꦲꦶꦠꦱ꧀ꦱ. ꦎꦨꦴꦱꦺꦴꦠꦶ ꦪꦺꦴ ꦥꦸꦫꦺ ꦫꦹꦥꦴꦮꦕꦫꦗ꧀ꦙꦴꦤꦺꦴꦨꦴꦱꦺꦴ. ꦄꦤ꧀ꦠꦫꦣꦴꦪꦠꦷꦠꦶ ꦱꦺꦴ ꦫꦹꦥꦴꦮꦕꦫꦗ꧀ꦙꦴꦤꦺꦴꦨꦴꦱꦺꦴ ꦄꦫꦹꦥꦴꦮꦕꦫꦗ꧀ꦙꦴꦤꦱꦩꦴꦥꦗ꧀ꦗꦤꦏꦴꦭꦺ ꦮꦶꦒꦕ꧀ꦖꦠꦶ. ꦢꦱ꧀ꦱꦤꦚ꧀ꦕꦴꦠꦶ ꦫꦹꦥꦴꦮꦕꦫꦗ꧀ꦙꦴꦤꦕꦏ꧀ꦑꦸꦤꦴ ꦢꦱ꧀ꦱꦤꦚ꧀ꦕ ꦄꦤ꧀ꦠꦫꦣꦴꦪꦠꦶ. ꦱꦺꦴ ꦱꦩꦴꦣꦷꦠꦶ ꦱꦺꦴ ꦪꦡꦴꦮꦸꦠ꧀ꦠꦺꦴ ꦫꦹꦥꦴꦫꦹꦥꦱꦩꦴꦣꦶ. ꦖꦭ꦳ꦔ꧀ꦒꦱꦩꦤ꧀ꦤꦴꦒꦠꦺꦴꦠꦶ ꦈꦥꦏꦴꦫꦏꦥꦫꦶꦏ꧀ꦑꦴꦫꦱꦨꦴꦮꦨꦹꦠꦺꦲꦶ ꦖꦲꦶ ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ. ꦥꦕ꧀ꦕꦮꦺꦏ꧀ꦑꦶꦠꦧ꧀ꦧꦺꦴꦠꦶ ꦥꦠꦶ ꦄꦮꦺꦏ꧀ꦑꦶꦠꦧ꧀ꦧꦺꦴ, ꦥꦸꦤꦥ꧀ꦥꦸꦤꦁ ꦕꦶꦤ꧀ꦠꦺꦠꦧ꧀ꦧꦺꦴꦠꦶ ꦄꦠ꧀ꦡꦺꦴ. ꦥꦕ꧀ꦕꦮꦺꦏ꧀ꦑꦟꦴꦏꦴꦫꦁ ꦱꦲ ꦮꦶꦱꦪꦺꦤ ꦢꦱ꧀ꦱꦺꦠꦸꦁ ‘‘ꦄꦤꦨꦶꦗ꧀ꦙꦴꦱꦲꦒꦠ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦧ꧀ꦧꦭꦺꦴꦏꦺꦠꦶ ꦱꦧ꧀ꦧꦱ꧀ꦩꦶꦁ ꦥꦶꦪꦫꦹꦥꦺ ꦱꦴꦠꦫꦹꦥꦺ ꦱꦠ꧀ꦠꦭꦺꦴꦏꦺ ꦱꦔ꧀ꦑꦴꦫꦭꦺꦴꦏꦺ ꦕ. ꦠꦺꦤ ꦏꦴꦩꦕ꧀ꦖꦤ꧀ꦢꦱ꧀ꦱ ꦥꦲꦴꦤꦩꦴꦲ. ꦠꦡꦴ ‘‘ꦄꦧ꧀ꦪꦴꦥꦤ꧀ꦤ’’ꦤ꧀ꦠꦶꦄꦴꦢꦶꦤꦴ ꦧ꧀ꦪꦴꦥꦴꦢꦏꦺꦴꦱꦗ꧀ꦗꦱꦴꦫꦩ꧀ꦨꦱꦴꦜꦺꦪ꧀ꦪꦮꦶꦏ꧀ꦑꦺꦥꦱꦩ꧀ꦩꦺꦴꦱꦴꦤꦁ ꦥꦲꦴꦤꦁ. ꦥꦸꦤ ꦠꦴꦤꦶ ꦖ ꦄꦔ꧀ꦒꦴꦤꦶ ꦱꦩꦡꦮꦶꦥꦱ꧀ꦱꦤꦴꦮꦱꦺꦤ ꦮꦶꦨꦗꦶꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦪꦚ꧀ꦕ ꦄꦤꦨꦶꦗ꧀ꦙꦴꦱꦲꦒꦠ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦠꦁ ꦱꦧ꧀ꦧꦁ ꦱꦸꦮꦶꦚ꧀ꦚꦺꦪ꧀ꦪꦁ.

꧕꧔. ꦌꦠ꧀ꦠꦴꦮꦠꦴ ‘‘ꦥꦚ꧀ꦚꦴꦮꦶꦩꦸꦠ꧀ꦠꦷ’’ꦠꦶ ꦮꦸꦠ꧀ꦠꦱ꧀ꦱ ꦄꦫꦲꦠ꧀ꦠꦦꦭꦱ꧀ꦱ ꦱꦩꦴꦣꦶꦩꦸꦑꦺꦤ ꦥꦸꦧ꧀ꦧꦨꦴꦒꦥꦛꦶꦥꦢꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦄꦫꦲꦠ꧀ꦠꦦꦭꦱꦩꦴꦣꦶꦁ ꦢꦱ꧀ꦱꦺꦠꦸꦁ ‘‘ꦱꦺꦴ ꦱꦩꦴꦣꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦺꦴ ꦱꦩꦴꦣꦷꦠꦶ ꦪꦺꦴ ꦱꦺꦴ ꦱꦩ꧀ꦩꦴꦱꦩꦴꦣꦶ. ꦥꦸꦧ꧀ꦧꦺ ꦮꦸꦠ꧀ꦠꦱ꧀ꦱ ꦄꦫꦶꦪꦩꦒ꧀ꦒꦱꦩꦴꦣꦶꦱ꧀ꦱ ꦦꦭꦨꦹꦠꦺꦴ ꦱꦩꦴꦣꦶ ꦥꦚ꧀ꦕꦮꦶꦣꦺꦤ ꦮꦺꦢꦶꦠꦧ꧀ꦧꦺꦴ ꦆꦢꦴꦤꦶ ꦮꦸꦕ꧀ꦕꦩꦴꦤꦺꦲꦶ ꦥꦚ꧀ꦕꦲꦶ ꦥꦕ꧀ꦕꦮꦺꦏ꧀ꦑꦟꦚꦴꦟꦺꦲꦶ ꦄꦠ꧀ꦠꦤꦺꦴ ꦥꦕ꧀ꦕꦮꦺꦏ꧀ꦑꦶꦠꦧ꧀ꦧꦴꦏꦴꦫꦱꦔ꧀ꦑꦴꦠꦺꦤ ꦥꦚ꧀ꦕꦮꦶꦣꦺꦤ ꦮꦺꦢꦶꦠꦧ꧀ꦧꦺꦴ. ‘‘ꦄꦪꦁ ꦱꦩꦴꦣꦶ ꦥꦕ꧀ꦕꦸꦥ꧀ꦥꦤ꧀ꦤꦱꦸꦑꦺꦴ’’ꦠꦶꦄꦴꦢꦷꦱꦸ ꦄꦫꦲꦠ꧀ꦠꦦꦭꦱꦩꦴꦣꦶ ꦄꦥ꧀ꦥꦶꦠꦥ꧀ꦥꦶꦠꦏ꧀ꦑꦟꦺ ꦱꦸꦑꦠ꧀ꦠꦴ ꦥꦕ꧀ꦕꦸꦥ꧀ꦥꦤ꧀ꦤꦱꦸꦑꦺꦴ. ꦥꦸꦫꦶꦩꦺꦴ ꦥꦸꦫꦶꦩꦺꦴ ꦥꦕ꧀ꦖꦶꦩꦱ꧀ꦱ ꦥꦕ꧀ꦖꦶꦩꦱ꧀ꦱ ꦱꦩꦴꦣꦶꦱꦸꦑꦱ꧀ꦱ ꦥꦕ꧀ꦕꦪꦠ꧀ꦠꦴ ꦄꦴꦪꦠꦶꦁ ꦱꦸꦑꦮꦶꦥꦴꦏꦺꦴ. ꦏꦶꦭꦺꦱꦺꦲꦶ ꦄꦴꦫꦏꦠ꧀ꦠꦴ ꦄꦫꦶꦪꦺꦴ. ꦏꦴꦩꦴꦩꦶꦱꦮꦛ꧀ꦛꦴꦩꦶꦱꦭꦺꦴꦏꦴꦩꦶꦱꦴꦤꦁ ꦄꦨꦴꦮꦴ ꦤꦶꦫꦴꦩꦶꦱꦺꦴ. ꦧꦸꦢ꧀ꦣꦴꦢꦷꦲꦶ ꦩꦲꦴꦥꦸꦫꦶꦱꦺꦲꦶ ꦱꦺꦮꦶꦠꦠ꧀ꦠꦴ ꦄꦏꦴꦥꦸꦫꦶꦱꦱꦺꦮꦶꦠꦺꦴ. ꦄꦔ꧀ꦒꦱꦤ꧀ꦠꦠꦴꦪ ꦱꦧ꧀ꦧꦏꦶꦭꦺꦱꦢꦫꦡꦱꦤ꧀ꦠꦠꦴꦪ ꦕ ꦱꦤ꧀ꦠꦺꦴ. ꦄꦠꦶꦠ꧀ꦠꦶꦏꦫꦛ꧀ꦜꦺꦤ ꦥꦟꦷꦠꦺꦴ. ꦏꦶꦭꦺꦱꦥꦛꦶꦥ꧀ꦥꦱ꧀ꦱꦢ꧀ꦣꦶꦪꦴ ꦭꦢ꧀ꦣꦠ꧀ꦠꦴ, ꦏꦶꦭꦺꦱꦥꦛꦶꦥ꧀ꦥꦱ꧀ꦱꦢ꧀ꦣꦶꦨꦴꦮꦺꦤ ꦮꦴ ꦭꦢ꧀ꦣꦠ꧀ꦠꦴ ꦥꦛꦶꦥ꧀ꦥꦱ꧀ꦱꦢ꧀ꦣꦶꦭꦢ꧀ꦣꦺꦴ. ꦥꦱ꧀ꦱꦢ꧀ꦣꦁ ꦥꦱ꧀ꦱꦢ꧀ꦣꦷꦠꦶ ꦲꦶ ꦆꦢꦁ ꦄꦠ꧀ꦡꦠꦺꦴ ꦌꦏꦁ. ꦥꦛꦶꦥ꧀ꦥꦱ꧀ꦱꦢ꧀ꦣꦶꦏꦶꦭꦺꦱꦺꦤ ꦮꦴ ꦄꦫꦲꦠꦴ ꦭꦢ꧀ꦣꦠ꧀ꦠꦴꦥꦶ ꦥꦛꦶꦥ꧀ꦥꦱ꧀ꦱꦢ꧀ꦣꦶꦭꦢ꧀ꦣꦺꦴ. ꦌꦏꦺꦴꦢꦶꦨꦴꦮꦺꦤ ꦄꦣꦶꦒꦠꦠ꧀ꦠꦴ, ꦌꦏꦺꦴꦢꦶꦨꦴꦮꦩꦺꦮ ꦮꦴ ꦄꦣꦶꦒꦠꦠ꧀ꦠꦴ ꦌꦏꦺꦴꦢꦶꦨꦴꦮꦴꦣꦶꦒꦠꦺꦴ. ꦄꦥ꧀ꦥꦒꦸꦟꦱꦴꦱꦮꦱꦩꦴꦣꦶ ꦮꦶꦪ ꦱꦱꦔ꧀ꦑꦴꦫꦺꦤ ꦱꦥ꧀ꦥꦪꦺꦴꦒꦺꦤ ꦥꦕ꧀ꦕꦤꦷꦏꦣꦩ꧀ꦩꦺ ꦤꦶꦒ꧀ꦒꦪ꧀ꦲ ꦏꦶꦭꦺꦱꦺ ꦮꦴꦫꦺꦠ꧀ꦮꦴ ꦄꦤꦣꦶꦒꦠꦠ꧀ꦠꦴ ꦤꦱꦱꦔ꧀ꦑꦴꦫꦤꦶꦒ꧀ꦒꦪ꧀ꦲꦮꦴꦫꦶꦠꦒꦠꦺꦴꦠꦶ.

ꦪꦠꦺꦴ ꦪꦠꦺꦴ ꦨꦴꦒꦠꦺꦴ ꦠꦚ꧀ꦕ ꦱꦩꦴꦣꦶꦁ ꦱꦩꦴꦥꦗ꧀ꦗꦤ꧀ꦠꦺꦴ, ꦠꦠꦺꦴ ꦮꦴ ꦮꦸꦛ꧀ꦜꦲꦤ꧀ꦠꦺꦴ ꦱꦠꦶꦮꦺꦥꦸꦭ꧀ꦭꦥ꧀ꦥꦠ꧀ꦠꦺꦴ ꦱꦠꦺꦴꦮ ꦱꦩꦴꦥꦗ꧀ꦗꦠꦶ ꦱꦠꦺꦴꦮ ꦮꦸꦛ꧀ꦜꦲꦠꦶ, ꦪꦡꦴꦥꦫꦶꦕ꧀ꦖꦶꦤ꧀ꦤꦏꦴꦭꦮꦱꦺꦤ ꦮꦴ ꦱꦠꦺꦴ ꦱꦩꦴꦥꦗ꧀ꦗꦠꦶ ꦱꦠꦺꦴ ꦮꦸꦛ꧀ꦜꦲꦠꦶ. ꦠꦱ꧀ꦩꦴ ꦪꦢꦺꦠ꧀ꦡ ‘‘ꦄꦪꦁ ꦱꦩꦴꦣꦶ ꦥꦕ꧀ꦕꦸꦥ꧀ꦥꦤ꧀ꦤꦱꦸꦑꦺꦴ ꦕꦺꦮ ꦄꦴꦪꦠꦶꦚ꧀ꦕ ꦱꦸꦑꦮꦶꦥꦴꦏꦺꦴ’’ꦠꦶ ꦌꦮꦁ ꦥꦕ꧀ꦕꦮꦺꦏ꧀ꦑꦤ꧀ꦠꦱ꧀ꦱ ꦥꦕ꧀ꦕꦠ꧀ꦠꦩꦺꦮ ꦄꦥꦫꦥ꧀ꦥꦕ꧀ꦕꦪꦚꦴꦟꦁ ꦈꦥ꧀ꦥꦗ꧀ꦗꦠꦶ, ꦄꦪꦩꦺꦏꦺꦴ ꦄꦴꦏꦴꦫꦺꦴ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ. ꦌꦮꦩꦺꦠꦺꦱꦁ ꦥꦚ꧀ꦕꦤ꧀ꦤꦁ ꦥꦕ꧀ꦕꦮꦺꦏ꧀ꦑꦶꦠꦧ꧀ꦧꦴꦏꦴꦫꦴꦤꦁ ꦮꦱꦺꦤ ꦱꦩꦴꦣꦶ ꦥꦚ꧀ꦕꦮꦶꦣꦺꦤ ꦮꦺꦢꦶꦠꦧ꧀ꦧꦺꦴ.

ꦥꦸꦤ ‘‘ꦪꦺꦴ ꦕ ꦱꦩꦴꦣꦷ’’ꦠꦶꦄꦴꦢꦶꦤꦴ ꦄꦫꦲꦠ꧀ꦠꦦꦭꦺ ꦱꦩꦡꦮꦶꦥꦱ꧀ꦱꦤꦴꦮꦶꦨꦴꦒꦁ ꦢꦱ꧀ꦱꦺꦠꦶ. ꦠꦠ꧀ꦡ ꦱꦩꦴꦣꦶꦱꦸꦑꦱ꧀ꦱ ‘‘ꦱꦸꦑ’’ꦤ꧀ꦠꦶ ꦄꦣꦶꦥ꧀ꦥꦺꦠꦠ꧀ꦠꦴ ‘‘ꦪꦺꦴ ꦕ ꦱꦩꦴꦣꦶ ꦥꦕ꧀ꦕꦸꦥ꧀ꦥꦤ꧀ꦤꦱꦸꦑꦺꦴ, ꦪꦺꦴ ꦕ ꦱꦩꦴꦣꦶ ꦄꦴꦪꦠꦶꦁ ꦱꦸꦑꦮꦶꦥꦴꦏꦺꦴ, ꦄꦪꦁ ꦱꦩꦡꦺꦴ’’ꦠꦶ ꦮꦸꦠ꧀ꦠꦁ. ꦄꦫꦶꦪꦤꦶꦫꦴꦩꦶꦱꦴꦢꦶꦨꦴꦮꦺꦴ ꦥꦤ ꦥꦚ꧀ꦚꦴꦤꦸꦨꦴꦮꦺꦤ ꦤꦶꦥ꧀ꦦꦗ꧀ꦗꦠꦷꦠꦶ ꦄꦴꦲ – ‘‘ꦪꦺꦴ ꦕ ꦱꦩꦴꦣꦶ ꦄꦫꦶꦪꦺꦴ…ꦥꦺ… ꦄꦪꦁ ꦮꦶꦥꦱ꧀ꦱꦤꦴ’’ꦠꦶ.

ꦌꦮꦁ ꦄꦫꦲꦠ꧀ꦠꦦꦭꦱꦩꦴꦣꦶꦁ ꦮꦶꦨꦴꦒꦺꦤ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦠꦱ꧀ꦱ ꦥꦸꦧ꧀ꦧꦨꦴꦒꦥꦛꦶꦥꦢꦁ ꦱꦩꦴꦣꦶꦮꦶꦨꦴꦒꦺꦤ ꦢꦱ꧀ꦱꦺꦠꦸꦁ ‘‘ꦱꦺꦴ ꦱꦩꦴꦣꦷ’’ꦠꦶ ꦮꦸꦠ꧀ꦠꦁ. ꦠꦠ꧀ꦡ ꦱꦺꦴ ꦱꦩꦴꦣꦷꦠꦶ ꦪꦺꦴ ꦱꦺꦴ ꦄꦫꦲꦠ꧀ꦠꦦꦭꦱꦩꦴꦣꦶꦱ꧀ꦱ ꦥꦸꦧ꧀ꦧꦨꦴꦒꦥꦛꦶꦥꦢꦴꦪꦁ ꦮꦸꦠ꧀ꦠꦺꦴ ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦱꦩꦴꦣꦶ, ꦱꦺꦴ ꦱꦩꦴꦣꦶ. ꦥꦚ꧀ꦕꦮꦶꦣꦺꦤꦴꦠꦶ ꦮꦏ꧀ꦑꦩꦴꦤꦺꦤ ꦥꦚ꧀ꦕꦥ꧀ꦥꦏꦴꦫꦺꦤ ꦮꦺꦢꦶꦠꦧ꧀ꦧꦺꦴ. ‘‘ꦥꦷꦠꦶꦦꦫꦟꦠꦴ’’ꦠꦶꦄꦴꦢꦷꦱꦸ ꦥꦷꦠꦶꦁ ꦦꦫꦩꦴꦤꦴ ꦈꦥ꧀ꦥꦗ꧀ꦗꦠꦷꦠꦶ ꦢ꧀ꦮꦷꦱꦸ ꦙꦴꦤꦺꦱꦸ ꦥꦚ꧀ꦚꦴ ꦥꦷꦠꦶꦦꦫꦟꦠꦴ ꦤꦴꦩ. ꦱꦸꦑꦁ ꦦꦫꦩꦴꦤꦴ ꦈꦥ꧀ꦥꦗ꧀ꦗꦠꦷꦠꦶ ꦠꦷꦱꦸ ꦙꦴꦤꦺꦱꦸ ꦥꦚ꧀ꦚꦴ ꦱꦸꦑꦦꦫꦟꦠꦴ ꦤꦴꦩ. ꦥꦫꦺꦱꦁ ꦕꦺꦠꦺꦴ ꦦꦫꦩꦴꦤꦴ ꦈꦥ꧀ꦥꦗ꧀ꦗꦠꦷꦠꦶ ꦕꦺꦠꦺꦴꦥꦫꦶꦪꦥꦚ꧀ꦚꦴ ꦕꦺꦠꦺꦴꦦꦫꦟꦠꦴ ꦤꦴꦩ. ꦄꦴꦭꦺꦴꦏꦦꦫꦟꦺ ꦈꦥ꧀ꦥꦗ꧀ꦗꦠꦷꦠꦶ ꦢꦶꦧ꧀ꦧꦕꦏ꧀ꦑꦸꦥꦚ꧀ꦚꦴ ꦄꦴꦭꦺꦴꦏꦦꦫꦟꦠꦴ ꦤꦴꦩ. ꦥꦕ꧀ꦕꦮꦺꦏ꧀ꦑꦟꦚꦴꦟꦁ ꦥꦕ꧀ꦕꦮꦺꦏ꧀ꦑꦟꦴꦤꦶꦩꦶꦠ꧀ꦠꦁ ꦤꦴꦩ. ꦮꦸꦠ꧀ꦠꦩ꧀ꦥꦶ ꦕꦺꦠꦁ ‘‘ꦢ꧀ꦮꦷꦱꦸ ꦙꦴꦤꦺꦱꦸ ꦥꦚ꧀ꦚꦴ ꦥꦷꦠꦶꦦꦫꦟꦠꦴ, ꦠꦷꦱꦸ ꦙꦴꦤꦺꦱꦸ ꦥꦚ꧀ꦚꦴ ꦱꦸꦑꦦꦫꦟꦠꦴ, ꦥꦫꦕꦶꦠ꧀ꦠꦺ ꦚꦴꦟꦁ ꦕꦺꦠꦺꦴꦦꦫꦟꦠꦴ, ꦢꦶꦧ꧀ꦧꦕꦏ꧀ꦑꦸ ꦄꦴꦭꦺꦴꦏꦦꦫꦟꦠꦴ, ꦠꦩ꧀ꦲꦴ ꦠꦩ꧀ꦲꦴ ꦱꦩꦴꦣꦶꦩ꧀ꦲꦴ ꦮꦸꦛ꧀ꦜꦶꦠꦱ꧀ꦱ ꦥꦕ꧀ꦕꦮꦺꦏ꧀ꦑꦟꦚꦴꦟꦁ ꦥꦕ꧀ꦕꦮꦺꦏ꧀ꦑꦟꦤꦶꦩꦶꦠ꧀ꦠ’’ꦤ꧀ꦠꦶ (ꦮꦶꦨ. ꧘꧐꧔).

ꦆꦣ ꦱꦩꦡꦮꦶꦥꦱ꧀ꦱꦤꦴꦮꦶꦨꦴꦒꦁ ꦢꦱ꧀ꦱꦺꦠꦸꦁ ‘‘ꦪꦺꦴ ꦕ ꦥꦷꦠꦶꦦꦫꦟꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦌꦠ꧀ꦡ ꦕ ꦥꦚ꧀ꦚꦴꦱꦷꦱꦺꦤ ꦢꦺꦱꦤꦴ ꦏꦠꦴꦠꦶ ꦥꦚ꧀ꦚꦴꦮꦱꦺꦤ ꦱꦁꦮꦟ꧀ꦟꦤꦴ ꦏꦠꦴ. ꦥꦚ꧀ꦚꦴ ꦥꦷꦠꦶꦦꦫꦟꦠꦴꦠꦶꦄꦴꦢꦷꦱꦸ ꦱꦩꦴꦣꦶꦱꦲꦒꦠꦴ ꦌꦮꦴꦠꦶ ꦠꦠ꧀ꦡ ꦱꦩꦴꦣꦶꦮꦱꦺꦤ ꦱꦩꦡꦺꦴ ꦈꦢ꧀ꦣꦛꦺꦴ. ꦠꦱ꧀ꦩꦴ ꦥꦷꦠꦶꦱꦸꦑꦕꦺꦠꦺꦴꦦꦫꦟꦠꦴ ꦮꦶꦱꦺꦱꦠꦺꦴ ꦱꦩꦴꦣꦶꦮꦶꦥ꧀ꦦꦴꦫꦮꦱꦺꦤ ꦆꦗ꧀ꦙꦤ꧀ꦠꦷꦠꦶ ꦠꦴ ‘‘ꦱꦩꦡꦺꦴ’’ꦠꦶ ꦮꦸꦠ꧀ꦠꦴ. ꦆꦠꦫꦴꦤꦶ ꦚꦴꦟꦮꦶꦥ꧀ꦦꦴꦫꦮꦱꦺꦤꦴꦠꦶ ꦠꦴꦤꦶ ‘‘ꦮꦶꦥꦱ꧀ꦱꦤꦴ’’ꦠꦶ ꦮꦸꦠ꧀ꦠꦴꦤꦶ.

꧕꧕. ꦆꦢꦴꦤꦶ ꦠꦁ ꦱꦩꦴꦣꦶꦁ ꦄꦴꦫꦩ꧀ꦩꦟꦮꦱꦺꦤ ꦮꦶꦨꦗꦶꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦢꦱ ꦏꦱꦶꦟꦴꦪꦠꦤꦴꦤꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦏꦱꦶꦟꦗ꧀ꦙꦴꦤꦱꦔ꧀ꦑꦴꦠꦴꦤꦶ ꦏꦱꦶꦟꦴꦤꦶ ꦕ ꦠꦴꦤꦶ ꦪꦺꦴꦒꦶꦤꦺꦴ ꦱꦸꦑꦮꦶꦱꦺꦱꦴꦤꦁ ꦄꦣꦶꦛ꧀ꦜꦴꦤꦨꦴꦮꦠꦺꦴ, ꦩꦤꦴꦪꦠꦤꦣꦩ꧀ꦩꦴꦪꦠꦤꦨꦴꦮꦠꦺꦴ ꦕ ꦄꦴꦪꦠꦤꦴꦤꦶ ꦕꦴꦠꦶ ꦏꦱꦶꦟꦴꦪꦠꦤꦴꦤꦶ. ꦥꦡꦮꦷꦏꦱꦶꦟꦤ꧀ꦠꦶ ꦏꦠꦥꦫꦶꦏꦩ꧀ꦩꦁ ꦥꦡꦮꦷꦩꦟ꧀ꦝꦭꦩ꧀ꦥꦶ, ꦠꦠ꧀ꦡ ꦥꦮꦠ꧀ꦠꦁ ꦈꦒ꧀ꦒꦲꦥꦛꦶꦨꦴꦒꦤꦶꦩꦶꦠ꧀ꦠꦩ꧀ꦥꦶ, ꦠꦱ꧀ꦩꦶꦁ ꦤꦶꦩꦶꦠ꧀ꦠꦺ ꦈꦥ꧀ꦥꦤ꧀ꦤꦗ꧀ꦙꦴꦤꦩ꧀ꦥꦶ ꦮꦸꦕ꧀ꦕꦠꦶ. ꦠꦺꦱꦸ ꦙꦴꦤꦁ ꦆꦣꦴꦣꦶꦥ꧀ꦥꦺꦠꦁ. ꦄꦴꦏꦴꦱꦏꦱꦶꦟꦤ꧀ꦠꦶ ꦏꦱꦶꦟꦸꦒ꧀ꦓꦴꦛꦶꦩꦴꦏꦴꦱꦺ ꦥꦮꦠ꧀ꦠꦥꦜꦩꦴꦫꦸꦥ꧀ꦥꦗ꧀ꦙꦴꦤꦁ. ꦮꦶꦚ꧀ꦚꦴꦟꦏꦱꦶꦟꦤ꧀ꦠꦶ ꦥꦜꦩꦴꦫꦸꦥ꧀ꦥꦮꦶꦚ꧀ꦚꦴꦟꦴꦫꦩ꧀ꦩꦟꦁ ꦢꦸꦠꦶꦪꦴꦫꦸꦥ꧀ꦥꦗ꧀ꦙꦴꦤꦁ. ꦥꦡꦮꦷꦏꦱꦶꦟꦴꦢꦶꦏꦺ ꦱꦸꦢ꧀ꦣꦱꦩꦡꦨꦴꦮꦤꦴꦮꦱꦺꦤ ꦥꦮꦠ꧀ꦠꦶꦠꦺ ꦱꦤ꧀ꦣꦴꦪ ‘‘ꦆꦩꦴꦤꦶ ꦄꦛ꧀ꦜ ꦏꦱꦶꦟꦴꦤꦶ ꦱꦩꦡꦺꦴ’’ꦠꦶ ꦮꦸꦠ꧀ꦠꦁ. ꦱꦺꦱꦏꦱꦶꦟꦢ꧀ꦮꦪꦁ ꦮꦶꦥꦱ꧀ꦱꦤꦴꦣꦶꦛ꧀ꦜꦴꦤꦨꦴꦮꦺꦤ ꦥꦮꦠ꧀ꦠꦁ ‘‘ꦮꦶꦥꦱ꧀ꦱꦤꦴ’’ꦠꦶ ꦮꦸꦠ꧀ꦠꦁ.

ꦌꦮꦤ꧀ꦠꦶ ꦆꦩꦶꦤꦴ ꦤꦪꦺꦤ. ꦱꦧ꧀ꦧꦺꦴ ꦄꦫꦶꦪꦩꦒ꧀ꦒꦺꦴꦠꦶ ꦱꦩ꧀ꦩꦴꦢꦶꦛ꧀ꦜꦶꦄꦴꦢꦶꦨꦴꦮꦺꦤ ꦄꦨꦶꦤ꧀ꦤꦺꦴꦥꦶ ꦄꦫꦶꦪꦩꦒ꧀ꦒꦺꦴ ꦱꦠꦶꦥꦛ꧀ꦜꦴꦤꦴꦢꦶꦥꦸꦧ꧀ꦧꦨꦴꦒꦥꦛꦶꦥꦢꦴꦨꦺꦢꦺꦤ ꦄꦤꦺꦏꦨꦺꦢꦨꦶꦤ꧀ꦤꦺꦴ ꦤꦶꦫꦮꦱꦺꦱꦺꦴ ꦄꦫꦶꦪꦩꦒ꧀ꦒꦺꦴ. ꦪꦺꦤ ꦪꦺꦤ ꦄꦴꦏꦴꦫꦺꦤꦴꦠꦶ ꦄꦤꦨꦶꦗ꧀ꦙꦴꦢꦷꦱꦸ, ꦥꦕ꧀ꦕꦸꦥ꧀ꦥꦤ꧀ꦤꦱꦸꦑꦠꦴꦢꦷꦱꦸ ꦕ ꦄꦴꦏꦴꦫꦺꦱꦸ ꦪꦺꦤ ꦪꦺꦤ ꦄꦴꦏꦴꦫꦺꦤ ꦮꦸꦠ꧀ꦠꦺꦴ. ꦠꦺꦤ ꦠꦺꦤꦴꦠꦶ ꦠꦺꦱꦸ ꦠꦺꦱꦸ ꦄꦴꦏꦴꦫꦺꦱꦸ ꦪꦺ ꦪꦺ ꦱꦩꦡꦮꦱꦺꦤ, ꦪꦺ ꦕ ꦪꦺ ꦕ ꦮꦶꦥꦱ꧀ꦱꦤꦴꦮꦱꦺꦤ ꦪꦺꦴꦗꦺꦠꦸꦁ ꦱꦩ꧀ꦨꦮꦤ꧀ꦠꦶ, ꦠꦺꦤ ꦠꦺꦤ ꦄꦴꦏꦴꦫꦺꦤ ꦱꦩꦡꦮꦶꦥꦱ꧀ꦱꦤꦴꦲꦶ ꦄꦫꦶꦪꦩꦒ꧀ꦒꦺꦴ ꦮꦶꦕꦶꦤꦶꦠ꧀ꦮꦴ ꦪꦺꦴꦗꦺꦠꦧ꧀ꦧꦺꦴ. ꦠꦺꦠꦶ ꦱꦩꦡꦴꦣꦶꦛ꧀ꦜꦴꦤꦮꦶꦥꦱ꧀ꦱꦤꦴꦣꦩ꧀ꦩꦴ. ꦠꦷꦲꦶ ꦣꦩ꧀ꦩꦺꦲꦶ ꦱꦔ꧀ꦒꦲꦶꦠꦴꦠꦶ ꦠꦷꦲꦶ ꦄꦤꦸꦥꦱ꧀ꦱꦤꦴꦣꦩ꧀ꦩꦺꦲꦶ ꦱꦔ꧀ꦒꦲꦶꦠꦴ, ꦒꦟꦤꦁ ꦒꦠꦴꦠꦶ ꦄꦠ꧀ꦡꦺꦴ. ꦏꦠꦩꦺꦲꦶ ꦠꦷꦲꦷꦠꦶ? ꦄꦴꦲ ‘‘ꦄꦤꦶꦕ꧀ꦕꦠꦴꦪ ꦢꦸꦏ꧀ꦑꦠꦴꦪ ꦄꦤꦠ꧀ꦠꦠꦴꦪꦴ’’ꦠꦶ. ꦄꦤꦶꦕ꧀ꦕꦠꦴꦪ ꦱꦲꦕꦫꦟꦠꦺꦴ ꦮꦶꦥꦱ꧀ꦱꦤꦴ ‘‘ꦄꦤꦶꦕ꧀ꦕꦠꦴ’’ꦠꦶ ꦮꦸꦠ꧀ꦠꦴ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ.

ꦱꦺꦴ ꦱꦩꦡꦮꦶꦥꦱ꧀ꦱꦤꦁ ꦨꦴꦮꦪꦩꦴꦤꦺꦴ ꦠꦷꦟꦶ ꦮꦶꦩꦺꦴꦏ꧀ꦑꦩꦸꦑꦴꦤꦶ ꦨꦴꦮꦪꦠꦷꦠꦶ ꦱꦺꦴ ꦄꦫꦶꦪꦩꦒ꧀ꦒꦴꦣꦶꦒꦩꦴꦪ ꦪꦸꦠ꧀ꦠꦥ꧀ꦥꦪꦸꦠ꧀ꦠꦺꦴ ꦪꦺꦴꦒꦷ ꦏꦴꦭꦺꦤ ꦱꦩꦡꦁ ꦱꦩꦴꦥꦗ꧀ꦗꦤꦮꦱꦺꦤ ꦏꦴꦭꦺꦤ ꦮꦶꦥꦱ꧀ꦱꦤꦁ ꦱꦩ꧀ꦩꦱꦤꦮꦱꦺꦤ ꦮꦝ꧀ꦞꦪꦩꦴꦤꦺꦴ ꦄꦤꦶꦩꦶꦠ꧀ꦠꦮꦶꦩꦺꦴꦏ꧀ꦑꦩꦸꦑꦴꦢꦶꦱꦔ꧀ꦑꦴꦠꦴ ꦠꦶꦱ꧀ꦱꦺꦴ ꦄꦤꦸꦥꦱ꧀ꦱꦤꦴ ꦧ꧀ꦫꦹꦲꦺꦠꦶ. ꦠꦪꦺꦴ ꦑꦤ꧀ꦣꦺ ꦨꦴꦮꦪꦠꦷꦠꦶ ꦠꦶꦱ꧀ꦱꦺꦴ ꦄꦤꦸꦥꦱ꧀ꦱꦤꦴ ꦈꦥꦫꦹꦥꦫꦶꦮꦶꦱꦺꦱꦁ ꦥꦴꦥꦺꦤ꧀ꦠꦺꦴ ꦱꦷꦭꦏ꧀ꦑꦤ꧀ꦣꦺꦴ ꦱꦩꦴꦣꦶꦏ꧀ꦑꦤ꧀ꦣꦺꦴ ꦥꦚ꧀ꦚꦴꦏ꧀ꦑꦤ꧀ꦣꦺꦴꦠꦶ ꦌꦠꦺ ꦠꦪꦺꦴ ꦑꦤ꧀ꦣꦺ ꦮꦝ꧀ꦞꦺꦠꦶ. ꦪꦱ꧀ꦩꦴ ꦥꦤ ꦠꦷꦲꦶ ꦑꦤ꧀ꦣꦺꦲꦶ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦱꦔ꧀ꦒꦲꦶꦠꦺꦴ, ꦠꦱ꧀ꦩꦴ ‘‘ꦠꦪꦺꦴ ꦑꦤ꧀ꦣꦺ ꦨꦴꦮꦪꦤ꧀ꦠꦺꦴ ꦄꦫꦶꦪꦁ ꦄꦛ꧀ꦜꦔ꧀ꦒꦶꦏꦁ ꦩꦒ꧀ꦒꦁ ꦨꦴꦮꦪꦠꦷ’’ꦠꦶ ꦮꦸꦠ꧀ꦠꦁ.

ꦆꦢꦴꦤꦶ ꦪꦺꦱꦁ ꦥꦸꦒ꧀ꦒꦭꦴꦤꦁ ꦪꦠ꧀ꦡ ꦱꦶꦏ꧀ꦑꦤ꧀ꦠꦴꦤꦁ ꦮꦶꦱꦺꦱꦠꦺꦴ ꦤꦶꦪ꧀ꦪꦴꦤꦩꦸꦑꦴꦤꦶ ꦪꦺꦱꦚ꧀ꦕ ꦏꦶꦭꦺꦱꦴꦤꦁ ꦥꦛꦶꦥꦏ꧀ꦑꦨꦹꦠꦴꦤꦶ ꦠꦷꦟꦶ ꦮꦶꦩꦺꦴꦏ꧀ꦑꦩꦸꦑꦴꦤꦶ, ꦠꦺꦲꦶ ꦱꦢ꧀ꦣꦶꦁ ꦠꦴꦤꦶ ꦢꦱ꧀ꦱꦺꦠꦸꦁ ‘‘ꦫꦴꦒꦕꦫꦶꦠꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦤꦶꦩꦶꦠ꧀ꦠꦺꦤ ꦮꦶꦩꦺꦴꦏ꧀ꦑꦩꦸꦑꦺꦤꦴꦠꦶ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦪ. ꦱꦴ ꦲꦶ ꦤꦶꦕ꧀ꦕꦤꦶꦩꦶꦠ꧀ꦠꦴꦢꦶꦱꦩꦸꦒ꧀ꦓꦴꦛꦤꦺꦤ ꦄꦤꦶꦩꦶꦠ꧀ꦠꦺꦴ, ꦫꦴꦒꦴꦢꦷꦤꦁ ꦱꦩꦸꦕ꧀ꦖꦺꦢꦮꦶꦩꦸꦠ꧀ꦠꦶꦪꦴ ꦮꦶꦩꦺꦴꦏ꧀ꦑꦺꦴꦠꦶ ꦭꦢ꧀ꦣꦤꦴꦩꦱ꧀ꦱ ꦄꦫꦶꦪꦩꦒ꧀ꦒꦱ꧀ꦱ ꦩꦸꦑꦨꦴꦮꦠꦺꦴ ꦢ꧀ꦮꦴꦫꦨꦴꦮꦠꦺꦴ ‘‘ꦄꦤꦶꦩꦶꦠ꧀ꦠꦮꦶꦩꦺꦴꦏ꧀ꦑꦩꦸꦑ’’ꦤ꧀ꦠꦶ ꦮꦸꦕ꧀ꦕꦠꦶ. ꦄꦣꦶꦕꦶꦠ꧀ꦠꦱꦶꦏ꧀ꦑꦴꦪꦴꦠꦶ ꦱꦩꦴꦣꦶꦱ꧀ꦩꦶꦁ. ꦱꦸꦑꦮꦺꦢꦤꦷꦪꦁ ꦦꦱ꧀ꦱꦁ ꦄꦤꦸꦥꦒꦕ꧀ꦖꦤ꧀ꦠꦺꦴꦠꦶ ꦱꦸꦑꦮꦺꦢꦤꦴꦪ ꦲꦶꦠꦁ ꦱꦸꦑꦮꦺꦢꦤꦴꦏꦴꦫꦟꦠꦺꦴ ꦦꦱ꧀ꦱꦁ ꦠꦟ꧀ꦲꦴꦪ ꦄꦤꦸꦥꦒꦕ꧀ꦖꦤ꧀ꦠꦺꦴ. ꦱꦸꦑꦁ ꦮꦺꦢꦤꦁ ꦥꦫꦶꦗꦴꦤꦤ꧀ꦠꦺꦴꦠꦶ ‘‘ꦄꦪꦁ ꦱꦸꦑꦴ ꦮꦺꦢꦤꦴ ꦮꦶꦥꦫꦶꦟꦴꦩꦴꦢꦶꦤꦴ ꦢꦸꦏ꧀ꦑꦴ’’ꦠꦶ ꦥꦫꦶꦗꦴꦤꦤ꧀ꦠꦺꦴ, ꦱꦮꦶꦱꦪꦁ ꦫꦴꦒꦁ ꦱꦩꦠꦶꦏ꧀ꦏꦤ꧀ꦠꦺꦴ. ‘‘ꦫꦴꦒꦩꦭꦁ ꦥꦮꦴꦲꦺꦤ꧀ꦠꦺꦴ’’ꦠꦶꦄꦴꦢꦶꦤꦴ ꦠꦺꦲꦶ ꦥꦫꦶꦪꦴꦪꦺꦲꦶ ꦫꦴꦒꦱ꧀ꦱꦺꦮ ꦥꦲꦴꦤꦩꦴꦲ. ‘‘ꦢꦺꦴꦱꦕꦫꦶꦠꦺꦴ ꦥꦸꦒ꧀ꦒꦭꦺꦴ’’ꦠꦶꦄꦴꦢꦷꦱꦸꦥꦶ ꦮꦸꦠ꧀ꦠꦤꦪꦴꦤꦸꦱꦴꦫꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦥꦚ꧀ꦚꦴꦣꦶꦏꦱ꧀ꦱ ꦱꦤ꧀ꦠꦠꦶꦱꦩꦹꦲꦏꦶꦕ꧀ꦕꦴꦫꦩ꧀ꦩꦟꦴꦢꦶꦓꦤꦮꦶꦤꦶꦧ꧀ꦨꦺꦴꦒꦺꦤ ꦱꦔ꧀ꦑꦴꦫꦺꦱꦸ ꦄꦠ꧀ꦠꦱꦸꦚ꧀ꦚꦠꦴ ꦥꦴꦏꦛꦴ ꦲꦺꦴꦠꦷꦠꦶ ꦮꦶꦱꦺꦱꦠꦺꦴ ꦄꦤꦠ꧀ꦠꦴꦤꦸꦥꦱ꧀ꦱꦤꦴ ꦥꦚ꧀ꦚꦴꦥꦣꦴꦤꦴꦠꦶ ꦄꦴꦲ – ‘‘ꦱꦸꦚ꧀ꦚꦠꦮꦶꦩꦺꦴꦏ꧀ꦑꦩꦸꦑꦁ ꦥꦚ꧀ꦚꦴꦏ꧀ꦑꦤ꧀ꦣꦺꦴ’’ꦠꦶ. ꦠꦡꦴ ꦱꦔ꧀ꦑꦴꦫꦴꦤꦁ ꦱꦫꦱꦥꦨꦔ꧀ꦒꦸꦠꦴꦪ ꦆꦠ꧀ꦠꦫꦑꦟꦠ꧀ꦠꦴ ꦈꦥ꧀ꦥꦤ꧀ꦤꦴꦤꦁ ꦠꦠ꧀ꦡ ꦠꦠ꧀ꦡꦺꦮ ꦨꦶꦗ꧀ꦗꦤꦁ ꦱꦩ꧀ꦩꦴ ꦱꦩꦴꦲꦶꦠꦱ꧀ꦱꦺꦮ ꦥꦴꦏꦛꦁ ꦲꦺꦴꦠꦷꦠꦶ ꦮꦶꦱꦺꦱꦠꦺꦴ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ ꦱꦩꦴꦣꦶꦥ꧀ꦥꦣꦴꦤꦴꦠꦶ ꦄꦴꦲ – ‘‘ꦄꦤꦶꦩꦶꦠ꧀ꦠꦮꦶꦩꦺꦴꦏ꧀ꦑꦩꦸꦑꦁ ꦱꦩꦴꦣꦶꦏ꧀ꦑꦤ꧀ꦣꦺꦴ’’ꦠꦶ. ꦠꦡꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦶꦤꦺꦴ ꦑꦤ꧀ꦠꦶꦧꦲꦸꦭꦱ꧀ꦱ ꦈꦥ꧀ꦥꦤ꧀ꦤꦁ ꦢꦸꦏ꧀ꦑꦁ ꦄꦫꦠꦶꦚ꧀ꦕ ꦄꦨꦶꦨꦸꦪ꧀ꦪ ꦮꦶꦲꦫꦠꦺꦴ ꦱꦔ꧀ꦑꦴꦫꦴꦤꦁ ꦢꦸꦏ꧀ꦑꦠꦴ ꦮꦶꦨꦹꦠꦴ ꦲꦺꦴꦠꦷꦠꦶ ꦢꦸꦏ꧀ꦑꦴꦤꦸꦥꦱ꧀ꦱꦤꦴ ꦱꦷꦭꦥ꧀ꦥꦣꦴꦤꦴꦠꦶ ꦄꦴꦲ – ‘‘ꦄꦥ꧀ꦥꦟꦶꦲꦶꦠꦮꦶꦩꦺꦴꦏ꧀ꦑꦩꦸꦑꦁ ꦱꦷꦭꦏ꧀ꦑꦤ꧀ꦣꦺꦴ’’ꦠꦶ. ꦆꦠꦶ ꦠꦷꦲꦶ ꦮꦶꦩꦺꦴꦏ꧀ꦑꦩꦸꦑꦺꦲꦶ ꦠꦶꦟ꧀ꦟꦁ ꦑꦤ꧀ꦣꦴꦤꦁ ꦱꦔ꧀ꦒꦲꦶꦠꦠ꧀ꦠꦴ ꦮꦸꦠ꧀ꦠꦁ – ‘‘ꦱꦺꦴ ꦠꦷꦟꦶ ꦮꦶꦩꦺꦴꦏ꧀ꦑꦩꦸꦑꦴꦤꦶ ꦨꦴꦮꦪꦤ꧀ꦠꦺꦴ ꦠꦪꦺꦴ ꦑꦤ꧀ꦣꦺ ꦨꦴꦮꦪꦠꦷ’’ꦠꦶ. ꦪꦱ꧀ꦩꦴ ꦕ ꦠꦷꦲꦶ ꦕ ꦑꦤ꧀ꦣꦺꦲꦶ ꦄꦫꦶꦪꦱ꧀ꦱ ꦄꦛ꧀ꦜꦔ꧀ꦒꦶꦏꦱ꧀ꦱ ꦩꦒ꧀ꦒꦱ꧀ꦱ ꦱꦔ꧀ꦒꦲꦶꦠꦠ꧀ꦠꦴ ꦠꦪꦺꦴ ꦑꦤ꧀ꦣꦺ ꦨꦴꦮꦪꦤ꧀ꦠꦺꦴ ‘‘ꦄꦫꦶꦪꦁ ꦄꦛ꧀ꦜꦔ꧀ꦒꦶꦏꦁ ꦩꦒ꧀ꦒꦁ ꦨꦴꦮꦪꦠꦷ’’ꦠꦶ ꦮꦸꦠ꧀ꦠꦁ. ꦠꦱ꧀ꦩꦴ ꦠꦺꦲꦶ ꦠꦱ꧀ꦱ ꦱꦔ꧀ꦒꦲꦁ ꦢꦱ꧀ꦱꦺꦤ꧀ꦠꦺꦴ ‘‘ꦪꦴ ꦕ ꦱꦩ꧀ꦩꦴꦮꦴꦕꦴ’’ꦠꦶꦄꦴꦢꦶꦩꦴꦲ.

ꦥꦸꦤ ꦠꦶꦟ꧀ꦟꦁ ꦑꦤ꧀ꦣꦴꦤꦁ ꦱꦩꦡꦮꦶꦥꦱ꧀ꦱꦤꦴꦨꦴꦮꦁ ꦢꦱ꧀ꦱꦺꦠꦸꦁ ‘‘ꦱꦷꦭꦏ꧀ꦑꦤ꧀ꦣꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦷꦭꦏ꧀ꦑꦤ꧀ꦣꦱ꧀ꦱ ꦑꦤ꧀ꦠꦶꦥꦣꦴꦤꦠ꧀ꦠꦴ, ꦱꦩꦴꦣꦶꦱ꧀ꦱ ꦧꦲꦹꦥꦏꦴꦫꦠ꧀ꦠꦴ ꦕ ꦱꦩꦡꦥꦏ꧀ꦑꦨꦗꦤꦁ ꦢꦛ꧀ꦜꦧ꧀ꦧꦁ. ꦨꦮꦔ꧀ꦒꦴꦤꦷꦠꦶ ꦈꦥꦥꦠ꧀ꦠꦶꦨꦮꦱ꧀ꦱ ꦄꦔ꧀ꦒꦴꦤꦶ. ꦢ꧀ꦮꦺ ꦥꦢꦴꦤꦷꦠꦶ ꦢ꧀ꦮꦺ ꦥꦴꦢꦴ. ꦪꦺꦨꦸꦪ꧀ꦪꦺꦤ ꦲꦶ ꦥꦚ꧀ꦕꦢꦱ ꦕꦫꦟꦣꦩ꧀ꦩꦴ ꦱꦷꦭꦱꦩꦴꦣꦶꦱꦔ꧀ꦒꦲꦶꦠꦴꦠꦶ. ꦨꦴꦮꦶꦠꦏꦴꦪꦺꦴꦠꦶ ꦄꦴꦨꦶꦱꦩꦴꦕꦴꦫꦶꦏꦱꦷꦭꦱ꧀ꦱ ꦥꦴꦫꦶꦥꦹꦫꦶꦪꦴ ꦨꦴꦮꦶꦠꦏꦴꦪꦺꦴ. ꦄꦴꦢꦶꦧ꧀ꦫꦲ꧀ꦩꦕꦫꦶꦪꦏꦱꦷꦭꦱ꧀ꦱ ꦥꦴꦫꦶꦥꦹꦫꦶꦪꦴ ꦨꦴꦮꦶꦠꦱꦷꦭꦺꦴ. ꦄꦡ ꦮꦴ ꦨꦴꦮꦶꦠꦏꦴꦪꦺꦴꦠꦶ ꦆꦤ꧀ꦢ꧀ꦫꦶꦪꦱꦁꦮꦫꦺꦤ ꦨꦴꦮꦶꦠꦥꦚ꧀ꦕꦢ꧀ꦮꦴꦫꦏꦴꦪꦺꦴ. ꦨꦴꦮꦶꦠꦱꦷꦭꦺꦴꦠꦶ ꦄꦮꦱꦶꦛ꧀ꦜꦱꦷꦭꦮꦱꦺꦤ ꦨꦴꦮꦶꦠꦱꦷꦭꦺꦴ. ꦱꦩ꧀ꦩꦴ ꦏꦴꦪꦨꦴꦮꦤꦴꦪ ꦱꦠꦶ ꦄꦕ꧀ꦕꦤ꧀ꦠꦁ ꦏꦴꦪꦢꦸꦕ꧀ꦕꦫꦶꦠꦥ꧀ꦥꦲꦴꦤꦁ ꦄꦤꦮꦗ꧀ꦗꦚ꧀ꦕ ꦈꦛ꧀ꦜꦴꦤꦁ ꦱꦩ꧀ꦥꦗ꧀ꦗꦠꦶ. ꦠꦡꦴ ꦄꦤꦸꦠ꧀ꦠꦫꦺ ꦱꦷꦭꦺ ꦱꦶꦗ꧀ꦙꦩꦴꦤꦺ ꦄꦤꦮꦱꦺꦱꦠꦺꦴ ꦩꦶꦕ꧀ꦖꦴꦮꦴꦕꦴꦪ ꦩꦶꦕ꧀ꦖꦴꦗꦷꦮꦱ꧀ꦱ ꦕ ꦥꦲꦴꦤꦁ ꦱꦩ꧀ꦥꦗ꧀ꦗꦠꦶ. ꦕꦶꦠ꧀ꦠꦥꦚ꧀ꦚꦴꦱꦸ ꦕ ꦨꦴꦮꦶꦠꦴꦱꦸ ꦱꦩ꧀ꦩꦴꦱꦠꦶꦱꦩ꧀ꦩꦴꦱꦩꦴꦣꦶꦱꦩ꧀ꦩꦴꦢꦶꦛ꧀ꦜꦶꦱꦩ꧀ꦩꦴꦱꦔ꧀ꦏꦥ꧀ꦥꦴ ꦨꦴꦮꦤꦴꦥꦴꦫꦶꦥꦹꦫꦶꦁ ꦒꦠꦴ ꦌꦮ ꦲꦺꦴꦤ꧀ꦠꦶ ꦠꦁꦱꦨꦴꦮꦠ꧀ꦠꦴ ꦠꦢꦸꦨꦪꦏꦴꦫꦟꦠ꧀ꦠꦴ ꦕꦴꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦶ ‘‘ꦏꦴꦪꦺ ꦨꦴꦮꦶꦪꦩꦴꦤꦺ’’ꦠꦶꦄꦴꦢꦶꦤꦴ.

ꦥꦚ꧀ꦕꦮꦶꦣꦁ ꦄꦣꦶꦒꦩꦁ ꦒꦕ꧀ꦖꦠꦷꦠꦶ ꦄꦫꦶꦪꦩꦒ꧀ꦒꦴꦣꦶꦒꦩꦩꦺꦮ ꦄꦮꦠ꧀ꦡꦴꦮꦶꦱꦺꦱꦮꦱꦺꦤ ꦥꦚ꧀ꦕꦣꦴ ꦮꦶꦨꦗꦶꦠ꧀ꦮꦴ ꦢꦱ꧀ꦱꦺꦠꦶ. ꦄꦫꦶꦪꦩꦒ꧀ꦒꦺꦴ ꦲꦶ ꦑꦶꦥ꧀ꦥꦁ ꦱꦏꦶꦁ ꦌꦏꦕꦶꦠ꧀ꦠꦏ꧀ꦑꦟꦺꦤꦺꦮ ꦕꦠꦹꦱꦸ ꦱꦕ꧀ꦕꦺꦱꦸ ꦄꦠ꧀ꦠꦤꦴ ꦄꦣꦶꦒꦤ꧀ꦠꦧ꧀ꦧꦁ ꦄꦣꦶꦒꦕ꧀ꦖꦠꦷꦠꦶ ꦤ ꦠꦱ꧀ꦱ ꦭꦺꦴꦏꦶꦪꦱꦩꦴꦥꦠ꧀ꦠꦶꦪꦴ ꦮꦶꦪ ꦮꦱꦶꦨꦴꦮꦤꦴꦏꦶꦕ꧀ꦕꦁ ꦄꦠ꧀ꦡꦷꦠꦶ ꦑꦶꦥ꧀ꦥꦴꦣꦶꦒꦩꦺꦴ ꦕ ꦲꦺꦴꦠꦶ. ꦥꦗꦲꦶꦠꦧ꧀ꦧꦴꦤꦁ ꦄꦕ꧀ꦕꦤ꧀ꦠꦮꦶꦩꦸꦠ꧀ꦠꦶꦮꦱꦺꦤ ꦥꦗꦲꦤꦠꦺꦴ ꦮꦶꦩꦸꦠ꧀ꦠꦴꦣꦶꦒꦩꦺꦴ ꦕ. ꦭꦺꦴꦏꦶꦪꦺꦲꦶ ꦩꦲꦤ꧀ꦠꦴꦤꦁ ꦱꦷꦭꦏ꧀ꦑꦤ꧀ꦣꦴꦢꦷꦤꦁ ꦄꦣꦶꦒꦩꦤꦨꦴꦮꦠꦺꦴ ꦩꦲꦴꦣꦶꦒꦩꦺꦴ ꦕ. ꦠꦺꦱꦁꦪꦺꦮ ꦮꦶꦥꦸꦭꦦꦭꦴꦤꦁ ꦄꦣꦶꦒꦩꦤꦠꦺꦴ ꦮꦶꦥꦸꦭꦴꦣꦶꦒꦩꦺꦴ ꦕ. ꦄꦠ꧀ꦠꦤꦴ ꦏꦠ꧀ꦠꦧ꧀ꦧꦱ꧀ꦱ ꦏꦱ꧀ꦱꦕꦶ ꦄꦤꦮꦱꦺꦱꦠꦺꦴ ꦄꦤꦮꦱꦺꦱꦴꦣꦶꦒꦩꦺꦴ ꦕ ꦲꦺꦴꦠꦷꦠꦶ. ꦏꦺ ꦥꦤꦺꦠꦺ ꦄꦣꦶꦒꦩꦴ? ꦏꦺꦕꦶ ꦱꦩꦡꦴꦤꦸꦨꦴꦮꦺꦤ, ꦏꦺꦕꦶ ꦮꦶꦥꦱ꧀ꦱꦤꦴꦤꦸꦨꦴꦮꦺꦤꦴꦠꦶ ꦆꦩꦁ ꦮꦶꦨꦴꦒꦁ ꦢꦱ꧀ꦱꦺꦠꦸꦁ ‘‘ꦠꦠ꧀ꦡ ꦱꦩꦡꦺꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

꧕꧖. ꦆꦠꦶ ꦩꦲꦴꦡꦺꦫꦺꦴ ‘‘ꦠꦱ꧀ꦩꦴ ꦫꦏ꧀ꦑꦶꦠꦕꦶꦠ꧀ꦠꦱ꧀ꦱꦴ’’ꦠꦶ ꦒꦴꦡꦴꦪ ꦮꦱꦺꦤ ꦄꦫꦲꦠ꧀ꦠꦦꦭꦮꦶꦩꦸꦠ꧀ꦠꦶꦩꦸꦑꦺꦤ ꦮꦶꦕꦪꦲꦴꦫꦱꦩ꧀ꦥꦴꦠꦁ ꦤꦶꦢ꧀ꦢꦶꦱꦤ꧀ꦠꦺꦴ ꦢꦺꦱꦤꦴꦏꦸꦱꦭꦠꦴꦪ ꦄꦤꦺꦏꦺꦲꦶ ꦱꦸꦠ꧀ꦠꦥ꧀ꦥꦢꦺꦱꦺꦲꦶ ꦠꦱ꧀ꦱꦴ ꦥꦸꦧ꧀ꦧꦨꦴꦒꦥꦛꦶꦥꦢꦴꦪ ꦨꦴꦮꦤꦴꦮꦶꦱꦺꦱꦴꦤꦁ ꦨꦴꦮꦤꦴꦤꦶꦱꦁꦱꦴꦤꦚ꧀ꦕ ꦮꦶꦨꦗꦤꦮꦱꦺꦤ ꦤꦴꦤꦥ꧀ꦥꦏꦴꦫꦠꦺꦴ ꦮꦶꦕꦪꦲꦴꦫꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦢꦱꦤ꧀ꦤꦁ ꦠꦡꦴꦒꦠꦧꦭꦴꦤꦩ꧀ꦥꦶ ꦮꦱꦺꦤ ꦠꦁ ꦢꦱ꧀ꦱꦺꦠꦸꦁ ‘‘ꦠꦠ꧀ꦡ ꦪꦺꦴ ꦢꦺꦱꦪꦠꦷ’’ꦠꦶꦄꦴꦢꦶꦩꦴꦲ. ꦎꦮꦴꦢꦺꦤ ꦱꦴꦮꦏꦺ ꦤ ꦮꦶꦱꦁꦮꦴꦢꦪꦠꦷꦠꦶ ꦄꦠ꧀ꦠꦤꦺꦴ ꦄꦤꦸꦱꦶꦛ꧀ꦜꦶꦪꦴ ꦣꦩ꧀ꦩꦱ꧀ꦱ ꦱꦮꦤꦠꦺꦴ ‘‘ꦱꦴꦮꦏꦴ’’ꦠꦶ ꦭꦢ꧀ꦣꦤꦴꦩꦺ ꦮꦺꦤꦺꦪ꧀ꦪꦺ ꦤ ꦮꦶꦥ꧀ꦥꦭꦩ꧀ꦨꦺꦠꦶ ꦤ ꦮꦚ꧀ꦕꦺꦠꦶ, ꦮꦶꦱꦁꦮꦴꦢꦤꦲꦺꦠꦹꦤꦁ ꦥꦴꦥꦣꦩ꧀ꦩꦴꦤꦁ ꦄꦫꦶꦪꦩꦒ꧀ꦒꦺꦤ ꦧꦺꦴꦣꦶꦩꦹꦭꦺ ꦌꦮ ꦱꦸꦥ꧀ꦥꦲꦷꦤꦠ꧀ꦠꦴ. ꦠꦶꦮꦶꦣꦤ꧀ꦠꦶ ꦠꦶꦥ꧀ꦥꦏꦴꦫꦁ, ꦠꦷꦲꦶ ꦄꦴꦏꦴꦫꦺꦲꦷꦠꦶ ꦄꦠ꧀ꦡꦺꦴ. ꦆꦢꦁ ꦏꦫꦺꦴꦡꦴꦠꦶ ꦆꦩꦁ ꦱꦫꦟꦒꦩꦤꦁ ꦱꦷꦭꦴꦢꦶꦚ꧀ꦕ ꦈꦥꦱꦩ꧀ꦥꦗ꧀ꦗ ꦮꦶꦲꦫꦡ. ꦆꦩꦶꦤꦴ ꦈꦥꦴꦪꦺꦤ ꦏꦫꦺꦴꦡꦴꦠꦶ ꦄꦤꦺꦤꦥꦶ ꦮꦶꦣꦶꦤꦴ ꦱꦫꦟꦴꦤꦶ ꦱꦺꦴꦣꦺꦤ꧀ꦠꦴ ꦱꦷꦭꦴꦢꦷꦤꦶ ꦥꦫꦶꦥꦹꦫꦺꦤ꧀ꦠꦴ ꦱꦩ꧀ꦥꦴꦢꦺꦡ. ꦆꦢꦁ ꦮꦺꦴ ꦏꦸꦫꦸꦩꦴꦤꦴꦤꦤ꧀ꦠꦶ ꦆꦢꦁ ꦱꦫꦟꦒꦩꦤꦁ ꦱꦷꦭꦴꦢꦶꦚ꧀ꦕ ꦠꦸꦩ꧀ꦲꦴꦏꦁ ꦄꦤꦸꦠꦶꦛ꧀ꦜꦤ꧀ꦠꦴꦤꦁ ꦢꦶꦛ꧀ꦜꦣꦩ꧀ꦩꦱꦩ꧀ꦥꦫꦴꦪꦤꦶꦧ꧀ꦧꦴꦤꦴꦤꦁ ꦮꦱꦺꦤ ꦲꦶꦠꦴꦪ ꦱꦸꦑꦴꦪ ꦕ ꦨꦮꦶꦱ꧀ꦱꦠꦶ, ꦠꦴꦤꦶ ꦱꦩ꧀ꦥꦴꦢꦺꦡꦴꦠꦶ ꦄꦠ꧀ꦡꦺꦴ.

ꦌꦮꦁ ꦎꦮꦢꦤꦴꦏꦴꦫꦁ ꦢꦱ꧀ꦱꦺꦠ꧀ꦮꦴ ꦪꦁ ꦮꦸꦠ꧀ꦠꦁ – ‘‘ꦎꦮꦴꦢꦺꦤ ꦱꦴꦮꦏꦺ ꦤ ꦮꦶꦱꦁꦮꦴꦢꦪꦠꦷ’’ꦠꦶ, ꦠꦁ ꦠꦡꦴꦒꦠꦧꦭꦺꦲꦶ ꦮꦶꦨꦗꦶꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦱꦺꦴ ꦠꦡꦴ ꦎꦮꦢꦶꦠꦺꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦠꦡꦴꦠꦶ ꦠꦺꦤ ꦥꦏꦴꦫꦺꦤ ‘‘ꦆꦢꦁ ꦏꦫꦺꦴꦡ, ꦆꦩꦶꦤꦴ ꦈꦥꦴꦪꦺꦤ ꦏꦫꦺꦴꦡꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦥ꧀ꦥꦏꦴꦫꦺꦤ. ꦎꦮꦢꦶꦠꦺꦴꦠꦶ ꦣꦩ꧀ꦩꦢꦺꦱꦤꦴꦪ ꦱꦴꦱꦶꦠꦺꦴ. ꦄꦤꦸꦱꦶꦛ꧀ꦜꦺꦴꦠꦶ ꦠꦱ꧀ꦱꦺꦮ ꦮꦺꦮꦕꦤꦁ. ꦠꦡꦴ ꦏꦫꦺꦴꦤ꧀ꦠꦺꦴꦠꦶ ꦪꦡꦴꦤꦸꦱꦶꦛ꧀ꦜꦁ ꦠꦡꦴ ꦏꦫꦺꦴꦤ꧀ꦠꦺꦴ. ꦠꦁ ꦨꦹꦩꦶꦤ꧀ꦠꦶ ꦪꦱ꧀ꦱꦴ ꦨꦹꦩꦶꦪꦴ ꦄꦣꦶꦒꦩꦠ꧀ꦡꦴꦪ ꦎꦮꦢꦶꦠꦺꦴ, ꦠꦁ ꦢꦱ꧀ꦱꦤꦨꦹꦩꦶꦚ꧀ꦕ ꦨꦴꦮꦤꦴꦨꦹꦩꦶꦚ꧀ꦕ. ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦷꦠꦶ ꦌꦠꦁ ꦏꦴꦫꦟꦁ ꦤ ꦮꦶꦗ꧀ꦗꦠꦶ. ꦏꦴꦫꦟꦚ꧀ꦲꦶ ꦠꦶꦛ꧀ꦜꦠꦶ ꦌꦠ꧀ꦡ ꦦꦭꦁ ꦠꦢꦴꦪꦠ꧀ꦠꦮꦸꦠ꧀ꦠꦶꦠꦴꦪꦴꦠꦶ ‘‘ꦜꦴꦤ’’ꦤ꧀ꦠꦶ ꦮꦸꦕ꧀ꦕꦠꦶ. ꦢꦸꦠꦶꦪꦮꦴꦫꦺ ꦨꦹꦩꦶꦤ꧀ꦠꦶ ꦱꦷꦭꦏ꧀ꦑꦤ꧀ꦣꦺꦤ ꦥꦠ꧀ꦠꦧ꧀ꦧꦁ ꦱꦩ꧀ꦥꦠ꧀ꦠꦶꦨꦮꦱꦔ꧀ꦑꦴꦠꦁ ꦨꦹꦩꦶꦁ.

ꦆꦢꦴꦤꦶ ꦪꦱ꧀ꦩꦴ ꦨꦒꦮꦠꦺꦴ ꦕꦠꦸꦮꦺꦱꦴꦫꦗ꧀ꦗꦴꦤꦶꦥꦶ ꦄꦮꦶꦥꦫꦷꦠꦱꦨꦴꦮꦠꦴꦪ ꦥꦜꦩꦦꦭꦚꦴꦟꦱ꧀ꦱ ꦮꦶꦱꦪꦮꦶꦱꦺꦱꦺꦴ ꦲꦺꦴꦠꦶ, ꦠꦱ꧀ꦩꦴ ꦠꦴꦤꦶꦥꦶ ꦠꦱ꧀ꦱ ꦮꦶꦱꦪꦨꦴꦮꦺꦤ ꦢꦱ꧀ꦱꦺꦠꦸꦁ ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦠꦺ ꦱꦠꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦠꦺ ꦱꦠꦺꦴꦠꦶ ꦄꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ, ꦩꦪꦴ ꦱꦧ꧀ꦧꦺ ꦣꦩ꧀ꦩꦴ ꦄꦨꦶꦱꦩ꧀ꦧꦸꦢ꧀ꦣꦴꦠꦶ ꦥꦛꦶꦗꦴꦤꦤꦺꦤ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦠꦺ ꦱꦠꦺꦴ. ꦆꦩꦺ ꦣꦩ꧀ꦩꦴ ꦄꦤꦨꦶꦱꦩ꧀ꦧꦸꦢ꧀ꦣꦴꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦷꦠꦶ ‘‘ꦆꦩꦺ ꦤꦴꦩ ꦠꦪꦴ ꦣꦩ꧀ꦩꦴ ꦄꦤꦨꦶꦱꦩ꧀ꦧꦸꦢ꧀ꦣꦴ’’ꦠꦶ ꦏꦺꦴꦕꦶ ꦱꦲꦣꦩ꧀ꦩꦺꦤ ꦱꦲꦺꦠꦸꦤꦴ ꦱꦏꦴꦫꦟꦺꦤ ꦮꦕꦤꦺꦤ, ꦱꦸꦤꦏ꧀ꦑꦠ꧀ꦠꦺꦴ (ꦢꦷ. ꦤꦶ. ꧓.꧑ ꦄꦴꦢꦪꦺꦴ; ꦩ. ꦤꦶ. ꧑.꧑꧔꧖ ꦄꦴꦢꦪꦺꦴ) ꦮꦶꦪ ꦮꦶꦥ꧀ꦥꦭꦥꦤ꧀ꦠꦴ ꦥꦤ ꦄꦥ꧀ꦥꦩꦴꦟꦁ. ꦠꦱ꧀ꦩꦴ ꦱꦲꦣꦩ꧀ꦩꦺꦤ ꦥꦛꦶꦕꦺꦴꦢꦺꦱ꧀ꦱꦠꦷꦠꦶ ꦌꦠꦁ ꦏꦴꦫꦟꦁ ꦤ ꦮꦶꦗ꧀ꦗꦠꦶ. ꦌꦱ ꦤꦪꦺꦴ ꦱꦺꦱꦥꦢꦺꦱꦸꦥꦶ. ꦪꦱ꧀ꦱ ꦠꦺ ꦄꦠ꧀ꦡꦴꦪ ꦣꦩ꧀ꦩꦺꦴ ꦢꦺꦱꦶꦠꦺꦴꦠꦶ ꦫꦴꦒꦴꦢꦷꦱꦸ ꦪꦱ꧀ꦱ ꦪꦱ꧀ꦱ ꦥꦲꦴꦤꦠ꧀ꦡꦴꦪ ꦄꦱꦸꦨꦨꦴꦮꦤꦴꦢꦶꦣꦩ꧀ꦩꦺꦴ ꦏꦡꦶꦠꦺꦴ. ꦠꦏ꧀ꦏꦫꦱ꧀ꦱꦴꦠꦶ ꦠꦡꦴ ꦥꦛꦶꦥꦤ꧀ꦤꦱ꧀ꦱ. ꦮꦶꦱꦺꦱꦴꦣꦶꦒꦩꦤ꧀ꦠꦶ ꦄꦨꦶꦚ꧀ꦚꦴꦥꦛꦶꦱꦩ꧀ꦨꦶꦢꦴꦢꦶꦮꦶꦱꦺꦱꦴꦣꦶꦒꦩꦁ.

ꦄꦤ꧀ꦠꦫꦴꦪꦶꦏꦴꦠꦶ ꦄꦤ꧀ꦠꦫꦴꦪꦏꦫꦟꦁ ꦄꦤ꧀ꦠꦫꦴꦪꦺꦴ, ꦱꦺꦴ ꦱꦷꦭꦁ ꦌꦠꦺꦱꦤ꧀ꦠꦶ ꦄꦤ꧀ꦠꦫꦴꦪꦶꦏꦴ. ꦄꦤ꧀ꦠꦫꦴꦪꦺ ꦤꦶꦪꦸꦠ꧀ꦠꦴ, ꦄꦤ꧀ꦠꦫꦴꦪꦁ ꦮꦴ ꦦꦭꦁ ꦄꦫꦲꦤ꧀ꦠꦶ, ꦄꦤ꧀ꦠꦫꦴꦪꦥ꧀ꦥꦪꦺꦴꦗꦤꦴꦠꦶ ꦮꦴ ꦄꦤ꧀ꦠꦫꦴꦪꦶꦏꦴ. ꦠꦺ ꦥꦤ ꦏꦩ꧀ꦩꦏꦶꦭꦺꦱꦴꦢꦶꦨꦺꦢꦺꦤ ꦥꦚ꧀ꦕꦮꦶꦣꦴ. ꦄꦤꦶꦪ꧀ꦪꦴꦤꦶꦏꦴꦠꦶ ꦄꦫꦶꦪꦩꦒ꧀ꦒꦮꦗ꧀ꦗꦴ ꦱꦧ꧀ꦧꦺ ꦣꦩ꧀ꦩꦴ.

ꦢꦶꦛ꧀ꦜꦶꦱꦩ꧀ꦥꦤ꧀ꦤꦺꦴꦠꦶ ꦩꦒ꧀ꦒꦢꦶꦛ꧀ꦜꦶꦪꦴ ꦱꦩ꧀ꦥꦤ꧀ꦤꦺꦴ ꦱꦺꦴꦠꦴꦥꦤ꧀ꦤꦺꦴ ꦄꦫꦶꦪꦱꦴꦮꦏꦺꦴ. ꦱꦸꦲꦠꦤ꧀ꦠꦶ ꦄꦠꦶꦮꦣꦶꦠꦁ. ꦆꦢꦩ꧀ꦥꦶ ꦌꦏꦢꦺꦱꦏꦡꦤꦩꦺꦮ. ꦩꦠꦏꦥꦺꦠꦴꦢꦶꦢꦴꦤꦩ꧀ꦥꦶ ꦱꦺꦴ ꦤ ꦏꦫꦺꦴꦠꦶ ꦌꦮ. ꦥꦸꦡꦸꦗ꧀ꦗꦤꦺꦴꦠꦶ ꦥꦸꦡꦹꦤꦁ ꦏꦶꦭꦺꦱꦴꦨꦶꦱꦔ꧀ꦑꦴꦫꦴꦢꦷꦤꦁ ꦗꦤꦤꦴꦢꦷꦲꦶ ꦏꦴꦫꦟꦺꦲꦶ ꦥꦸꦡꦸꦗ꧀ꦗꦤꦺꦴ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦥꦸꦡꦹꦤꦁ ꦗꦤꦤꦴꦢꦷꦲꦶ, ꦏꦴꦫꦟꦺꦲꦶ ꦥꦸꦡꦸꦗ꧀ꦗꦤꦺꦴ;

ꦥꦸꦡꦸꦗ꧀ꦗꦤꦤ꧀ꦠꦺꦴꦒꦣꦠ꧀ꦠꦴ, ꦥꦸꦡꦸꦮꦴꦪꦁ ꦗꦤꦺꦴ ꦆꦠꦷ’’ꦠꦶ. (ꦢꦷ. ꦤꦶ. ꦄꦛ꧀ꦜ. ꧑.꧗; ꦩ. ꦤꦶ. ꦄꦛ꧀ꦜ. ꧑.꧒; ꦄ. ꦤꦶ. ꦄꦛ꧀ꦜ. ꧑.꧑.꧕꧑; ꦣ. ꦱ. ꦄꦛ꧀ꦜ. ꧑꧐꧐꧗; ꦥꦛꦶ. ꦩ. ꦄꦛ꧀ꦜ. ꧒.꧑.꧑꧓꧐);

‘‘ꦩꦴꦠꦫ’’ꦤ꧀ꦠꦶꦄꦴꦢꦷꦱꦸ ꦗꦤꦶꦏꦴ ꦩꦴꦠꦴ. ꦗꦤꦏꦺꦴ ꦕ ꦥꦶꦠꦴ. ꦩꦤꦸꦱ꧀ꦱꦨꦹꦠꦺꦴ ꦑꦷꦟꦴꦱꦮꦺꦴ ꦄꦫꦲꦴꦠꦶ ꦄꦣꦶꦥ꧀ꦥꦺꦠꦺꦴ. ꦏꦶꦁ ꦥꦤ ꦄꦫꦶꦪꦱꦴꦮꦏꦺꦴ ꦄꦚ꧀ꦚꦺ ꦗꦷꦮꦶꦠꦴ ꦮꦺꦴꦫꦺꦴꦥꦺꦪ꧀ꦪꦴꦠꦶ? ꦌꦠꦩ꧀ꦥꦶ ꦄꦛ꧀ꦜꦴꦤꦁ. ꦱꦕꦺꦥꦶ ꦨꦮꦤ꧀ꦠꦫꦒꦠꦁ ꦄꦫꦶꦪꦱꦴꦮꦏꦁ ꦄꦠ꧀ꦠꦤꦺꦴ ꦄꦫꦶꦪꦱꦴꦮꦏꦨꦴꦮꦁ ꦄꦗꦴꦤꦤ꧀ꦠꦩ꧀ꦥꦶ ꦏꦺꦴꦕꦶ ꦌꦮꦁ ꦮꦢꦺꦪ꧀ꦪ ‘‘ꦆꦢꦁ ꦏꦸꦤ꧀ꦡꦏꦶꦥꦶꦭ꧀ꦭꦶꦏꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦠ꧀ꦮꦴ ꦱꦏꦭꦕꦏ꧀ꦏꦮꦴꦭ꦳ꦒꦧ꧀ꦨꦺ ꦕꦏ꧀ꦏꦮꦠ꧀ꦠꦶꦫꦗ꧀ꦗꦁ ꦥꦛꦶꦥꦗ꧀ꦗꦴꦲꦷ’’ꦠꦶ, ꦤꦺꦮ ꦱꦺꦴ ꦤꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦪ꧀ꦪ. ꦄꦡꦴꦥꦶ ꦌꦮꦁ ꦮꦢꦺꦪ꧀ꦪꦸꦁ – ‘‘ꦱꦕꦺ ꦆꦩꦁ ꦤ ꦓꦴꦠꦺꦱ꧀ꦱꦱꦶ, ꦱꦷꦱꦁ ꦠꦺ ꦖꦶꦤ꧀ꦢꦶꦱ꧀ꦱꦴꦩꦴ’’ꦠꦶ, ꦱꦷꦱꦩꦺꦮꦱ꧀ꦱ ꦖꦶꦤ꧀ꦢꦺꦪ꧀ꦪꦸꦁ, ꦤꦺꦮ ꦱꦺꦴ ꦠꦁ ꦓꦴꦠꦺꦪ꧀ꦪ. ꦥꦸꦡꦸꦗ꧀ꦗꦤꦨꦴꦮꦱ꧀ꦱ ꦥꦤ ꦩꦲꦴꦱꦴꦮꦗ꧀ꦗꦨꦴꦮꦢꦱ꧀ꦱꦤꦠ꧀ꦡꦁ ꦄꦫꦶꦪꦨꦴꦮꦱ꧀ꦱ ꦕ ꦧꦭꦢꦷꦥꦤꦠ꧀ꦡꦁ ꦌꦮꦁ ꦮꦸꦠ꧀ꦠꦁ. ꦄꦪꦚ꧀ꦲꦺꦠ꧀ꦡ ꦄꦣꦶꦥ꧀ꦥꦴꦪꦺꦴ – ꦱꦴꦮꦗ꧀ꦗꦺꦴ ꦮꦠ ꦥꦸꦡꦸꦗ꧀ꦗꦤꦨꦴꦮꦺꦴ. ꦪꦠ꧀ꦫ ꦲꦶ ꦤꦴꦩ ꦩꦴꦠꦸꦓꦴꦏꦴꦢꦷꦤꦶꦥꦶ ꦄꦴꦤꦤ꧀ꦠꦫꦶꦪꦴꦤꦶ ꦏꦫꦶꦱ꧀ꦱꦠꦶ, ꦩꦲꦴꦧꦭꦺꦴꦮ ꦕ ꦄꦫꦶꦪꦨꦴꦮꦺꦴ, ꦪꦺꦴ ꦌꦠꦴꦤꦶ ꦏꦩ꧀ꦩꦴꦤꦶ ꦤ ꦏꦫꦺꦴꦠꦷꦠꦶ.

ꦱꦔ꧀ꦓꦁ ꦨꦶꦤ꧀ꦢꦺꦪ꧀ꦪꦴꦠꦶ ꦱꦩꦴꦤꦱꦁꦮꦴꦱꦏꦁ ꦱꦩꦴꦤꦱꦷꦩꦴꦪꦁ ꦜꦶꦠꦁ ꦥꦚ꧀ꦕꦲꦶ ꦏꦴꦫꦟꦺꦲꦶ ꦱꦔ꧀ꦓꦁ ꦨꦶꦤ꧀ꦢꦺꦪ꧀ꦪ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦥꦚ꧀ꦕꦲꦸꦥꦴꦭꦶ, ꦄꦴꦏꦴꦫꦺꦲꦶ ꦱꦔ꧀ꦓꦺꦴ ꦨꦶꦗ꧀ꦗꦠꦶ ꦏꦩ꧀ꦩꦺꦤ ꦈꦢ꧀ꦢꦺꦱꦺꦤ ꦮꦺꦴꦲꦫꦤ꧀ꦠꦺꦴ ꦄꦤꦸꦱ꧀ꦱꦴꦮꦤꦺꦤ ꦱꦭꦴꦏꦒ꧀ꦒꦴꦲꦺꦤꦴ’’ꦠꦶ (ꦥꦫꦶ. ꧔꧕꧘).

ꦠꦠ꧀ꦡ ꦏꦩ꧀ꦩꦺꦤꦴꦠꦶ ꦄꦥꦭꦺꦴꦏꦤꦴꦢꦷꦱꦸ ꦕꦠꦹꦱꦸ ꦏꦩ꧀ꦩꦺꦱꦸ ꦄꦚ꧀ꦚꦠꦫꦏꦩ꧀ꦩꦺꦤ. ꦈꦢ꧀ꦢꦺꦱꦺꦤꦴꦠꦶ ꦥꦚ꧀ꦕꦱꦸ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦺꦱꦸ ꦄꦚ꧀ꦚꦠꦫꦺꦤ ꦈꦢ꧀ꦢꦺꦱꦺꦤ. ꦮꦺꦴꦲꦫꦤ꧀ꦠꦺꦴꦠꦶ ꦏꦡꦪꦤ꧀ꦠꦺꦴ, ꦠꦴꦲꦶ ꦠꦴꦲꦶ ꦈꦥꦥꦠ꧀ꦠꦷꦲꦶ ‘‘ꦄꦣꦩ꧀ꦩꦁ ꦣꦩ꧀ꦩꦺꦴ’’ꦠꦶꦄꦴꦢꦷꦤꦶ ꦄꦛ꧀ꦜꦴꦫꦱꦨꦺꦢꦏꦫꦮꦠ꧀ꦡꦹꦤꦶ ꦢꦷꦥꦪꦤ꧀ꦠꦺꦴ. ꦄꦤꦸꦱ꧀ꦱꦴꦮꦤꦺꦤꦴꦠꦶ ‘‘ꦤꦤꦸ ꦠꦸꦩ꧀ꦲꦺ ꦗꦴꦤꦴꦡ ꦩꦪ꧀ꦲꦁ ꦈꦕ꧀ꦕꦏꦸꦭꦴ ꦥꦧ꧀ꦧꦗꦶꦠꦨꦴꦮꦁ ꦧꦲꦸꦱ꧀ꦱꦸꦠꦨꦴꦮꦚ꧀ꦕ, ꦩꦴꦢꦶꦱꦺꦴ ꦤꦴꦩ ꦈꦢ꧀ꦣꦩ꧀ꦩꦁ ꦈꦧ꧀ꦧꦶꦤꦪꦁ ꦱꦠ꧀ꦡꦸꦱꦴꦱꦤꦁ ꦒꦴꦲꦺꦪ꧀ꦪꦴꦠꦶ ꦏꦶꦁ ꦠꦸꦩ꧀ꦲꦴꦏꦁ ꦕꦶꦠ꧀ꦠꦩ꧀ꦥꦶ ꦈꦥ꧀ꦥꦴꦢꦺꦠꦸꦁ ꦪꦸꦠ꧀ꦠꦁ, ꦏꦶꦩꦲꦁ ꦄꦥꦴꦪꦠꦺꦴ ꦤ ꦨꦴꦪꦴꦩꦷ’’ꦠꦶꦄꦴꦢꦶꦤꦴ ꦤꦪꦺꦤ ꦏꦟ꧀ꦟꦩꦹꦭꦺ ꦮꦕꦷꦨꦺꦢꦁ ꦏꦠ꧀ꦮꦴ ꦄꦤꦸꦱ꧀ꦱꦴꦮꦤꦺꦤ. ꦱꦭꦴꦏꦒ꧀ꦒꦴꦲꦺꦤꦴꦠꦶ ꦌꦮꦁ ꦄꦤꦸꦱ꧀ꦱꦴꦮꦺꦠ꧀ꦮꦴ ꦠꦺꦱꦁ ꦕꦶꦠ꧀ꦠꦁ ꦈꦥꦠ꧀ꦡꦩ꧀ꦨꦺꦠ꧀ꦮꦴ ꦄꦤꦶꦮꦠ꧀ꦠꦶꦣꦩ꧀ꦩꦁ ꦏꦠ꧀ꦮꦴ ‘‘ꦒꦟ꧀ꦲꦡ ꦆꦩꦁ ꦱꦭꦴꦏ’’ꦤ꧀ꦠꦶ ꦱꦭꦴꦏꦒ꧀ꦒꦴꦲꦺꦤ.

ꦌꦠ꧀ꦡ ꦕ ꦏꦩ꧀ꦩꦩꦺꦮ ꦈꦢ꧀ꦢꦺꦱꦺꦴ ꦮꦴ ꦥꦩꦴꦟꦁ, ꦮꦺꦴꦲꦴꦫꦴꦤꦸꦱ꧀ꦱꦴꦮꦤꦱꦭꦴꦏꦒ꧀ꦒꦴꦲꦴꦥꦤꦁ ꦥꦤ ꦥꦸꦧ꧀ꦧꦨꦴꦒꦺꦴ. ꦄꦛ꧀ꦜꦴꦫꦱꦮꦠ꧀ꦡꦸꦢꦷꦥꦤꦮꦱꦺꦤ ꦲꦶ ꦮꦺꦴꦲꦫꦤ꧀ꦠꦺꦤ ꦠꦠ꧀ꦡ ꦫꦸꦕꦶꦗꦤꦤꦠ꧀ꦡꦁ ꦄꦤꦸꦱ꧀ꦱꦴꦮꦺꦠ꧀ꦮꦴ ꦱꦭꦴꦏꦴꦪ ꦒꦴꦲꦶꦠꦴꦪꦥꦶ ꦄꦨꦶꦤ꧀ꦤꦺꦴ ꦌꦮ ꦲꦺꦴꦠꦶ ꦱꦔ꧀ꦓꦺꦴ. ꦪꦢꦴ ꦥꦤ ꦌꦮꦁ ꦕꦠ꧀ꦠꦴꦫꦺꦴ ꦮꦴ ꦄꦠꦶꦫꦺꦏꦴ ꦮꦴ ꦱꦭꦴꦏꦁ ꦒꦴꦲꦺꦠ꧀ꦮꦴ ꦄꦴꦮꦺꦟꦶꦏꦁ ꦏꦩ꧀ꦩꦁ ꦮꦴ ꦈꦢ꧀ꦢꦺꦱꦁ ꦮꦴ ꦏꦫꦺꦴꦤ꧀ꦠꦶ, ꦠꦢꦴ ꦱꦔ꧀ꦓꦺꦴ ꦨꦶꦤ꧀ꦤꦺꦴ ꦤꦴꦩ ꦲꦺꦴꦠꦶ. ꦌꦮꦁ ꦢꦶꦛ꧀ꦜꦶꦱꦩ꧀ꦥꦤ꧀ꦤꦺꦴ ꦥꦸꦒ꧀ꦒꦭꦺꦴ ꦱꦔ꧀ꦓꦁ ꦨꦶꦤ꧀ꦢꦺꦪ꧀ꦪ ꦱꦔ꧀ꦓꦫꦴꦗꦶꦁ ꦮꦴ ꦗꦤꦺꦪ꧀ꦪꦴꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦷꦠꦶ.

ꦢꦸꦛ꧀ꦜꦕꦶꦠ꧀ꦠꦺꦴꦠꦶ ꦮꦣꦏꦕꦶꦠ꧀ꦠꦺꦤ ꦥꦢꦸꦛ꧀ꦜꦕꦶꦠ꧀ꦠꦺꦴ. ꦭꦺꦴꦲꦶꦠꦁ ꦈꦥ꧀ꦥꦴꦢꦺꦪ꧀ꦪꦴꦠꦶ ꦗꦷꦮꦩꦴꦤꦏꦱꦫꦷꦫꦺ ꦑꦸꦢ꧀ꦢꦏꦩꦏ꧀ꦑꦶꦏꦴꦪ ꦥꦶꦮꦤꦩꦠ꧀ꦠꦩ꧀ꦥꦶ ꦭꦺꦴꦲꦶꦠꦁ ꦈꦥ꧀ꦥꦴꦢꦺꦪ꧀ꦪ. ꦌꦠ꧀ꦠꦴꦮꦠꦴ ꦲꦶ ꦩꦴꦠꦸꦓꦴꦠꦴꦢꦷꦤꦶ ꦥꦚ꧀ꦕꦴꦤꦤ꧀ꦠꦫꦶꦪꦏꦩ꧀ꦩꦴꦤꦶ ꦢꦱ꧀ꦱꦶꦠꦴꦤꦶ ꦲꦺꦴꦤ꧀ꦠꦶ. ꦪꦴꦤꦶ ꦥꦸꦡꦸꦗ꧀ꦗꦤꦺꦴ ꦏꦫꦺꦴꦠꦶ, ꦤ ꦄꦫꦶꦪꦱꦴꦮꦏꦺꦴ. ꦢꦸꦛ꧀ꦜꦕꦶꦠ꧀ꦠꦺꦴꦠꦶ ꦮꦶꦤꦴꦱꦕꦶꦠ꧀ꦠꦺꦤ ꦥꦢꦸꦛ꧀ꦜꦕꦶꦠ꧀ꦠꦺꦴ. ꦡꦹꦥꦤ꧀ꦠꦶ ꦕꦺꦠꦶꦪꦁ. ꦨꦶꦤ꧀ꦢꦺꦪ꧀ꦪꦴꦠꦶ ꦤꦴꦱꦺꦪ꧀ꦪ.

ꦄꦚ꧀ꦚꦁ ꦱꦠ꧀ꦡꦴꦫꦤ꧀ꦠꦶ ‘‘ꦄꦪꦁ ꦩꦺ ꦱꦠ꧀ꦡꦴ ꦱꦠ꧀ꦡꦸ ꦏꦶꦕ꧀ꦕꦁ ꦏꦴꦠꦸꦁ ꦱꦩꦠ꧀ꦡꦺꦴ’’ꦠꦶ ꦨꦮꦤ꧀ꦠꦫꦺꦥꦶ ꦄꦚ꧀ꦚꦁ ꦠꦶꦠ꧀ꦡꦏꦫꦁ. ꦄꦥꦢꦶꦱꦺꦪ꧀ꦪꦴꦠꦶ ‘‘ꦄꦪꦁ ꦩꦺ ꦱꦠ꧀ꦡꦴ’’ꦠꦶ ꦌꦮꦁ ꦒꦟ꧀ꦲꦺꦪ꧀ꦪꦴꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦆꦠꦺꦴ ꦧꦲꦶꦢ꧀ꦣꦴ ꦄꦚ꧀ꦚꦁ ꦢꦏ꧀ꦑꦶꦟꦺꦪ꧀ꦪꦁ ꦥꦫꦶꦪꦺꦱꦺꦪ꧀ꦪꦴꦠꦶ ꦱꦴꦱꦤꦠꦺꦴ ꦧꦲꦶꦢ꧀ꦣꦴ ꦄꦚ꧀ꦚꦁ ꦧꦴꦲꦶꦫꦏꦁ ꦱꦩꦟꦁ ꦮꦴ ꦧ꧀ꦫꦴꦲ꧀ꦩꦟꦁ ꦮꦴ ‘‘ꦄꦪꦁ ꦢꦏ꧀ꦑꦶꦟꦴꦫꦲꦺꦴ, ꦆꦩꦱ꧀ꦩꦶꦁ ꦏꦠꦴ ꦏꦴꦫꦴ ꦩꦲꦥ꧀ꦦꦭꦴ ꦨꦮꦶꦱ꧀ꦱꦤ꧀ꦠꦷ’’ꦠꦶ ꦄꦣꦶꦥ꧀ꦥꦴꦪꦺꦤ ꦠꦱ꧀ꦩꦶꦁ ꦥꦛꦶꦥꦗ꧀ꦗꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦏꦸꦠꦹꦲꦭꦩꦔ꧀ꦒꦭꦺꦤ ꦱꦸꦢ꧀ꦣꦶꦁ ꦥꦕ꧀ꦕꦺꦪ꧀ꦪꦴꦠꦶ ‘‘ꦆꦩꦶꦤꦴ ꦆꦢꦁ ꦨꦮꦶꦱ꧀ꦱꦠꦷ’’ꦠꦶ ꦌꦮꦁ ꦥꦮꦠ꧀ꦠꦠ꧀ꦠꦴ ꦏꦸꦠꦹꦲꦭꦱꦔ꧀ꦑꦴꦠꦺꦤ ꦢꦶꦛ꧀ꦜꦱꦸꦠꦩꦸꦠꦩꦔ꧀ꦒꦭꦺꦤ ꦄꦠ꧀ꦠꦤꦺꦴ ꦱꦸꦢ꧀ꦣꦶꦁ ꦮꦺꦴꦢꦴꦤꦁ ꦱꦢ꧀ꦢꦲꦺꦪ꧀ꦪ.

꧕꧗. ꦆꦠ꧀ꦡꦷ ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦱꦶꦪꦴꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦷꦠꦶ ꦪꦱ꧀ꦩꦴ ꦆꦠ꧀ꦡꦶꦪꦴ ꦏꦺꦴꦱꦺꦴꦲꦶꦠꦮꦠ꧀ꦡꦒꦸꦪ꧀ꦲꦴꦢꦷꦤꦁ ꦄꦨꦴꦮꦺꦤ ꦭꦏ꧀ꦑꦟꦴꦤꦶ ꦤ ꦥꦫꦶꦥꦹꦫꦤ꧀ꦠꦶ, ꦆꦠ꧀ꦡꦶꦫꦠꦤꦴꦨꦴꦮꦺꦤ ꦕ ꦱꦠ꧀ꦠꦫꦠꦤꦱꦩꦔ꧀ꦒꦶꦠꦴ ꦤ ꦱꦩ꧀ꦥꦗ꧀ꦗꦠꦶ. ꦱꦧ꧀ꦧꦩꦤꦸꦱ꧀ꦱꦴꦤꦩ꧀ꦥꦶ ꦕ ꦤ ꦄꦣꦶꦏꦺꦴ ꦄꦠ꧀ꦠꦨꦴꦮꦺꦴ ꦲꦺꦴꦠꦶ, ꦠꦱ꧀ꦩꦴ ‘‘ꦆꦠ꧀ꦡꦷ…ꦥꦺ… ꦮꦶꦗ꧀ꦗꦠꦷ’’ꦠꦶ ꦮꦸꦠ꧀ꦠꦁ. ꦪꦱ꧀ꦩꦴ ꦱꦏ꧀ꦏꦠ꧀ꦠꦴꦢꦷꦤꦶ ꦠꦷꦟꦶ ꦜꦴꦤꦴꦤꦶ ꦈꦠ꧀ꦠꦩꦴꦤꦶ, ꦆꦠ꧀ꦡꦶꦭꦶꦔ꧀ꦒꦚ꧀ꦕ ꦲꦷꦤꦁ, ꦠꦱ꧀ꦩꦴ ꦠꦱ꧀ꦱꦴ ꦱꦏ꧀ꦏꦠ꧀ꦠꦴꦢꦷꦤꦶꦥꦶ ꦥꦛꦶꦱꦶꦢ꧀ꦣꦴꦤꦷꦠꦶ. ꦤꦤꦸ ꦕ ꦪꦡꦴ ꦆꦠ꧀ꦡꦶꦭꦶꦔ꧀ꦒꦁ, ꦌꦮꦁ ꦥꦸꦫꦶꦱꦭꦶꦔ꧀ꦒꦩ꧀ꦥꦶ ꦧ꧀ꦫꦲ꧀ꦩꦭꦺꦴꦏꦺ ꦤꦠ꧀ꦡꦶ, ꦠꦱ꧀ꦩꦴ ꦥꦸꦫꦶꦱꦺꦴ ꦩꦲꦴꦧ꧀ꦫꦲ꧀ꦩꦴ ꦱꦶꦪꦴꦠꦶ ꦤ ꦮꦠ꧀ꦠꦧ꧀ꦧꦤ꧀ꦠꦶ? ꦤꦺꦴ ꦤ ꦮꦠ꧀ꦠꦧ꧀ꦧꦁ. ꦏꦱ꧀ꦩꦴ? ꦆꦣ ꦥꦸꦫꦶꦱꦱ꧀ꦱ ꦠꦠ꧀ꦡ ꦤꦶꦧ꧀ꦧꦠ꧀ꦠꦤꦠꦺꦴ. ꦆꦠ꧀ꦡꦶꦪꦺꦴ ꦲꦶ ꦆꦣ ꦙꦴꦤꦁ ꦨꦴꦮꦺꦠ꧀ꦮꦴ ꦏꦴꦭꦁ ꦏꦠ꧀ꦮꦴ ꦧ꧀ꦫꦲ꧀ꦩꦥꦴꦫꦶꦱꦗ꧀ꦗꦴꦤꦁ ꦱꦲꦧ꧀ꦪꦠꦁ ꦈꦥꦥꦗ꧀ꦗꦤ꧀ꦠꦶ, ꦤ ꦩꦲꦴꦧ꧀ꦫꦲ꧀ꦩꦴꦤꦁ. ꦥꦸꦫꦶꦱꦺꦴ ꦥꦤ ꦏꦠ꧀ꦡꦕꦶ ꦤ ꦈꦥ꧀ꦥꦗ꧀ꦗꦠꦷꦠꦶ ꦤ ꦮꦠ꧀ꦠꦧ꧀ꦧꦺꦴ. ꦱꦩꦴꦤꦺꦥꦶ ꦠꦠ꧀ꦡ ꦈꦨꦪꦭꦶꦔ꧀ꦒꦴꦨꦴꦮꦺ ꦥꦸꦫꦶꦱꦱꦟ꧀ꦜꦴꦤꦴꦮ ꦠꦠ꧀ꦡ ꦧ꧀ꦫꦲ꧀ꦩꦴꦤꦺꦴ, ꦤ ꦆꦠ꧀ꦡꦶꦱꦟ꧀ꦜꦴꦤꦴ, ꦠꦱ꧀ꦩꦴ ꦱꦸꦮꦸꦠ꧀ꦠꦩꦺꦠꦁ. ꦆꦠ꧀ꦡꦷ ꦠꦡꦴꦒꦠꦺꦴꦠꦶ ꦌꦠ꧀ꦡ ꦠꦶꦛ꧀ꦜꦠꦸ ꦠꦴꦮ ꦱꦧ꧀ꦧꦚ꧀ꦚꦸꦒꦸꦟꦺ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦭꦺꦴꦏꦴꦤꦁ ꦠꦴꦫꦟꦱꦩꦠ꧀ꦡꦺꦴ ꦧꦸꦢ꧀ꦣꦨꦴꦮꦺꦴ, ꦥꦟꦶꦣꦴꦤꦩꦠ꧀ꦠꦩ꧀ꦥꦶ ꦆꦠ꧀ꦡꦶꦪꦴ ꦤ ꦱꦩ꧀ꦥꦗ꧀ꦗꦠꦶ.

‘‘ꦩꦤꦸꦱ꧀ꦱꦠ꧀ꦠꦁ ꦭꦶꦔ꧀ꦒꦱꦩ꧀ꦥꦠ꧀ꦠꦶ, ꦲꦺꦠꦸ ꦱꦠ꧀ꦡꦴꦫꦢꦱ꧀ꦱꦤꦁ;

ꦥꦧ꧀ꦧꦗ꧀ꦗꦴ ꦒꦸꦟꦱꦩ꧀ꦥꦠ꧀ꦠꦶ, ꦄꦣꦶꦏꦴꦫꦺꦴ ꦕ ꦖꦤ꧀ꦢꦠꦴ;

ꦄꦛ꧀ꦜꦣꦩ꧀ꦩꦱꦩꦺꦴꦣꦴꦤꦴ, ꦄꦨꦶꦤꦷꦲꦴꦫꦺꦴ ꦱꦩꦶꦗ꧀ꦙꦠꦷ’’ꦠꦶ. (ꦧꦸ. ꦮꦁ. ꧒.꧕꧙) –

ꦆꦩꦴꦤꦶ ꦲꦶ ꦥꦟꦶꦣꦴꦤꦱꦩ꧀ꦥꦠ꧀ꦠꦶꦏꦴꦫꦟꦴꦤꦶ. ꦆꦠꦶ ꦥꦟꦶꦣꦴꦤꦩꦠ꧀ꦠꦩ꧀ꦥꦶ ꦱꦩ꧀ꦥꦴꦢꦺꦠꦸꦁ ꦄꦱꦩꦠ꧀ꦡꦴꦪ ꦆꦠ꧀ꦡꦶꦪꦴ ꦏꦸꦠꦺꦴ ꦧꦸꦢ꧀ꦣꦨꦴꦮꦺꦴꦠꦶ ‘‘ꦆꦠ꧀ꦡꦷ ꦠꦡꦴꦒꦠꦺꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦱꦶꦪꦴꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦷ’’ꦠꦶ ꦮꦸꦠ꧀ꦠꦁ. ꦱꦧ꧀ꦧꦴꦏꦴꦫꦥꦫꦶꦥꦹꦫꦺꦴ ꦥꦸꦚ꧀ꦚꦸꦱ꧀ꦱꦪꦺꦴ ꦱꦧ꧀ꦧꦴꦏꦴꦫꦥꦫꦶꦥꦹꦫꦩꦺꦮ ꦄꦠ꧀ꦠꦨꦴꦮꦁ ꦤꦶꦧ꧀ꦧꦠ꧀ꦠꦺꦠꦷꦠꦶ ꦥꦸꦫꦶꦱꦺꦴꦮ ꦄꦫꦲꦁ ꦲꦺꦴꦠꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ.

ꦌꦏꦶꦱ꧀ꦱꦴ ꦭꦺꦴꦏꦣꦴꦠꦸꦪꦴꦠꦶ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦪꦴ, ꦪꦴ ꦗꦴꦠꦶꦑꦺꦠ꧀ꦠꦤ꧀ꦠꦶ ꦮꦸꦕ꧀ꦕꦠꦶ. ꦱꦴ ꦲꦶ ꦠꦡꦴꦒꦠꦱ꧀ꦱ ꦒꦧ꧀ꦨꦺꦴꦏ꧀ꦏꦤ꧀ꦠꦶꦏꦴꦭꦴꦢꦷꦱꦸ ꦏꦩ꧀ꦥꦠꦶ. ꦄꦴꦟꦴꦑꦺꦠ꧀ꦠꦁ ꦥꦤ ꦏꦺꦴꦛꦶꦱꦠꦱꦲꦱ꧀ꦱꦕꦏ꧀ꦏꦮꦴꦭ꦳ꦁ. ꦪꦴ ꦌꦏꦠꦺꦴ ꦱꦁꦮꦛ꧀ꦛꦠꦶ ꦕ ꦮꦶꦮꦛ꧀ꦛꦠꦶ ꦕ, ꦪꦠ꧀ꦡ ꦕ ꦄꦴꦛꦴꦤꦴꦛꦶꦪꦥꦫꦶꦠ꧀ꦠꦴꦢꦷꦤꦁ (ꦢꦷ. ꦤꦶ. ꧓.꧒꧗꧗ ꦄꦴꦢꦪꦺꦴ) ꦄꦴꦟꦴ ꦥꦮꦠ꧀ꦠꦠꦶ. ꦮꦶꦱꦪꦑꦺꦠ꧀ꦠꦱ꧀ꦱ ꦥꦫꦶꦩꦴꦟꦁ ꦤꦠ꧀ꦡꦶ. ꦧꦸꦢ꧀ꦣꦴꦤꦚ꧀ꦲꦶ ‘‘ꦪꦴꦮꦠꦏꦁ ꦚꦴꦟꦁ ꦠꦴꦮꦠꦏꦁ ꦤꦺꦪ꧀ꦪꦁ, ꦪꦴꦮꦠꦏꦁ ꦤꦺꦪ꧀ꦪꦁ ꦠꦴꦮꦠꦏꦁ ꦚꦴꦟꦁ, ꦤꦺꦪ꧀ꦪꦥꦫꦶꦪꦤ꧀ꦠꦶꦏꦁ ꦚꦴꦟꦁ, ꦚꦴꦟꦥꦫꦶꦪꦤ꧀ꦠꦶꦏꦁ ꦤꦺꦪ꧀ꦪ’’ꦤ꧀ꦠꦶ (ꦩꦲꦴꦤꦶ. ꧖꧙; ꦕꦹꦭ꦳ꦤꦶ. ꦩꦺꦴꦓꦫꦴꦗꦩꦴꦟꦮꦥꦸꦕ꧀ꦖꦴꦤꦶꦢ꧀ꦢꦺꦱ ꧘꧕; ꦥꦛꦶ. ꦩ. ꧓.꧕) ꦮꦕꦤꦠꦺꦴ ꦄꦮꦶꦱꦪꦺꦴ ꦤꦴꦩ ꦤꦠ꧀ꦡꦶ. ꦆꦠꦶ ꦆꦩꦺꦱꦸ ꦠꦷꦱꦸ ꦑꦺꦠ꧀ꦠꦺꦱꦸ ꦠꦶꦱ꧀ꦱꦺꦴ ꦱꦔ꧀ꦒꦷꦠꦶꦪꦺꦴ ꦄꦴꦫꦸꦭ꦳꧀ꦲꦺ ꦠꦺꦥꦶꦛꦏꦺ ꦧꦸꦢ꧀ꦣꦮꦕꦤꦺ ‘‘ꦜꦥꦺꦠ꧀ꦮꦴ ꦆꦩꦁ ꦕꦏ꧀ꦏꦮꦴꦭ꦳ꦁ ꦄꦚ꧀ꦚꦱ꧀ꦩꦶꦁ ꦕꦏ꧀ꦏꦮꦴꦭ꦳ꦺ ꦧꦸꦢ꧀ꦣꦴ ꦈꦥ꧀ꦥꦗ꧀ꦗꦤ꧀ꦠꦷ’’ꦠꦶ ꦱꦸꦠ꧀ꦠꦁ ꦤꦠ꧀ꦡꦶ, ꦤ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦥꦤ ꦄꦠ꧀ꦡꦶ.

ꦄꦥꦸꦧ꧀ꦧꦁ ꦄꦕꦫꦶꦩꦤ꧀ꦠꦶ ꦄꦥꦸꦫꦺ ꦄꦥꦕ꧀ꦖꦴ ꦌꦏꦠꦺꦴ ꦤ ꦈꦥ꧀ꦥꦗ꧀ꦗꦤ꧀ꦠꦶ, ꦥꦸꦫꦺ ꦮꦴ ꦥꦕ꧀ꦖꦴ ꦮꦴ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦠꦠ꧀ꦡ ꦒꦧ꧀ꦨꦺꦴꦏ꧀ꦏꦤ꧀ꦠꦶꦠꦺꦴ ꦥꦸꦧ꧀ꦧꦺ ꦥꦸꦫꦺꦠꦶ ꦮꦺꦢꦶꦠꦧ꧀ꦧꦁ. ꦠꦠꦺꦴ ꦥꦛ꧀ꦜꦴꦪ ꦲꦶ ꦢꦱꦱꦲꦱ꧀ꦱꦶꦕꦏ꧀ꦏꦮꦴꦭ꦳ꦏꦩ꧀ꦥꦤꦺꦤ ꦑꦺꦠ꧀ꦠꦥꦫꦶꦒ꧀ꦒꦲꦺꦴ ꦏꦠꦺꦴ ꦤꦴꦩ ꦲꦺꦴꦠꦶ, ꦄꦚ꧀ꦚꦱ꧀ꦱ ꦧꦸꦢ꧀ꦣꦱ꧀ꦱ ꦈꦥ꧀ꦥꦠ꧀ꦠꦶ ꦤꦠ꧀ꦡꦶ. ꦣꦴꦠꦸꦥꦫꦶꦤꦶꦧ꧀ꦧꦴꦤꦠꦺꦴ ꦥꦫꦁ ꦥꦤ ꦥꦕ꧀ꦖꦴ, ꦠꦠꦺꦴ ꦲꦺꦛ꧀ꦜꦴꦥꦶ ꦄꦚ꧀ꦚꦱ꧀ꦱ ꦧꦸꦢ꧀ꦣꦱ꧀ꦱ ꦈꦥ꧀ꦥꦠ꧀ꦠꦶ ꦤꦠ꧀ꦡꦶ, ꦈꦢ꧀ꦣꦁ ꦤ ꦮꦴꦫꦶꦠꦴ.

ꦏꦱ꧀ꦩꦴ ꦥꦤ ꦄꦥꦸꦧ꧀ꦧꦁ ꦄꦕꦫꦶꦩꦁ ꦤ ꦈꦥ꧀ꦥꦗ꧀ꦗꦤ꧀ꦠꦷꦠꦶ? ꦄꦤꦕ꧀ꦖꦫꦶꦪꦠ꧀ꦠꦴ. ꦄꦕ꧀ꦖꦫꦶꦪꦩꦤꦸꦱ꧀ꦱꦴ ꦲꦶ ꦧꦸꦢ꧀ꦣꦴ ꦨꦒꦮꦤ꧀ꦠꦺꦴ. ꦪꦡꦴꦲ – ‘‘ꦌꦏꦥꦸꦒ꧀ꦒꦭꦺꦴ, ꦨꦶꦏ꧀ꦑꦮꦺ, ꦭꦺꦴꦏꦺ ꦈꦥ꧀ꦥꦗ꧀ꦗꦩꦴꦤꦺꦴ ꦈꦥ꧀ꦥꦗ꧀ꦗꦠꦶ ꦄꦕ꧀ꦖꦫꦶꦪꦩꦤꦸꦱ꧀ꦱꦺꦴ’’ꦠꦶꦄꦴꦢꦶ (ꦄ. ꦤꦶ. ꧑.꧑꧗꧑). ꦪꦢꦶ ꦕ ꦄꦤꦺꦏꦺ ꦧꦸꦢ꧀ꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ, ꦄꦤꦕ꧀ꦖꦫꦶꦪꦴ ꦨꦮꦺꦪ꧀ꦪꦸꦁ. ꦢꦺꦱꦤꦴꦪ ꦕ ꦮꦶꦱꦺꦱꦴꦨꦴꦮꦠꦺꦴ. ꦪꦚ꧀ꦲꦶ ꦱꦠꦶꦥꦛ꧀ꦜꦴꦤꦴꦢꦶꦨꦺꦢꦁ ꦣꦩ꧀ꦩꦁ ꦌꦏꦺꦴ ꦢꦺꦱꦺꦠꦶ, ꦄꦚ꧀ꦚꦺꦤꦥꦶ ꦱꦺꦴ ꦌꦮ ꦢꦺꦱꦺꦠꦧ꧀ꦧꦺꦴ ꦱꦶꦪꦴ, ꦮꦶꦮꦴꦢꦨꦴꦮꦠꦺꦴ ꦕ. ꦧꦲꦹꦱꦸ ꦲꦶ ꦧꦸꦢ꧀ꦣꦺꦱꦸ ꦌꦏꦠꦺꦴ ꦈꦥ꧀ꦥꦤ꧀ꦤꦺꦱꦸ ꦧꦲꦹꦤꦁ ꦄꦴꦕꦫꦶꦪꦴꦤꦁ ꦄꦤ꧀ꦠꦺꦮꦴꦱꦶꦏꦴ ꦮꦶꦪ ‘‘ꦄꦩ꧀ꦲꦴꦏꦁ ꦧꦸꦢ꧀ꦣꦺꦴ ꦥꦴꦱꦴꦢꦶꦏꦺꦴ’’ꦠꦶꦄꦴꦢꦶꦤꦴ ꦠꦺꦱꦁ ꦱꦴꦮꦏꦴ ꦮꦶꦮꦢꦺꦪ꧀ꦪꦸꦁ. ꦏꦶꦁ ꦮꦴ ꦌꦠꦺꦤ ꦏꦴꦫꦟꦒꦮꦺꦱꦤꦺꦤ, ꦣꦩ꧀ꦩꦠꦴꦮꦺꦱꦴ ꦪꦁ ꦌꦏꦶꦱ꧀ꦱꦴ ꦭꦺꦴꦏꦣꦴꦠꦸꦪꦴ ꦢ꧀ꦮꦺ ꦠꦡꦴꦒꦠꦴ ꦌꦏꦠꦺꦴ ꦤ ꦈꦥ꧀ꦥꦗ꧀ꦗꦤ꧀ꦠꦷꦠꦶ (ꦩꦶ. ꦥ. ꧕.꧑.꧑).

ꦪꦡꦴ ꦤꦶꦩ꧀ꦧꦧꦷꦗꦏꦺꦴꦱꦴꦠꦏꦶꦧꦷꦗꦴꦢꦷꦤꦶ ꦩꦣꦸꦫꦁ ꦦꦭꦁ ꦤ ꦤꦶꦧ꧀ꦧꦠ꧀ꦠꦺꦤ꧀ꦠꦶ, ꦄꦱꦴꦠꦁ ꦄꦩꦣꦸꦫꦩꦺꦮ ꦦꦭꦁ ꦤꦶꦧ꧀ꦧꦠ꧀ꦠꦺꦤ꧀ꦠꦶ, ꦌꦮꦁ ꦏꦴꦪꦢꦸꦕ꧀ꦕꦫꦶꦠꦴꦢꦷꦤꦶ ꦩꦣꦸꦫꦮꦶꦥꦴꦏꦁ ꦤ ꦤꦶꦧ꧀ꦧꦠ꧀ꦠꦺꦤ꧀ꦠꦶ ꦄꦩꦣꦸꦫꦩꦺꦮ ꦤꦶꦧ꧀ꦧꦠ꧀ꦠꦺꦤ꧀ꦠꦶ. ꦪꦡꦴ ꦕ ꦈꦕ꧀ꦖꦸꦧꦷꦗꦱꦴꦭꦶꦧꦷꦗꦴꦢꦷꦤꦶ ꦩꦣꦸꦫꦁ ꦱꦴꦢꦸꦫꦱꦩꦺꦮ ꦦꦭꦁ ꦤꦶꦧ꧀ꦧꦠ꧀ꦠꦺꦤ꧀ꦠꦶ ꦤ ꦄꦱꦴꦠꦁ ꦏꦛꦸꦏꦁ. ꦌꦮꦁ ꦏꦴꦪꦱꦸꦕꦫꦶꦠꦴꦢꦷꦤꦶ ꦩꦣꦸꦫꦩꦺꦮ ꦮꦶꦥꦴꦏꦁ ꦤꦶꦧ꧀ꦧꦠ꧀ꦠꦺꦤ꧀ꦠꦶ ꦤ ꦄꦩꦣꦸꦫꦁ. ꦮꦸꦠ꧀ꦠꦩ꧀ꦥꦶ ꦕꦺꦠꦁ –

‘‘ꦪꦴꦢꦶꦱꦁ ꦮꦥꦠꦺ ꦧꦷꦗꦁ, ꦠꦴꦢꦶꦱꦁ ꦲꦫꦠꦺ ꦦꦭꦁ;

ꦏꦭ꧀ꦪꦴꦟꦏꦴꦫꦷ ꦏꦭ꧀ꦪꦴꦟꦁ, ꦥꦴꦥꦏꦴꦫꦷ ꦕ ꦥꦴꦥꦏ’’ꦤ꧀ꦠꦶ. (ꦱꦁ. ꦤꦶ. ꧑.꧒꧕꧖; ꦤꦺꦠ꧀ꦠꦶ. ꧑꧒꧒);

ꦠꦱ꧀ꦩꦴ ‘‘ꦠꦶꦟ꧀ꦟꦁ ꦢꦸꦕ꧀ꦕꦫꦶꦠꦴꦤ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ.

ꦄꦚ꧀ꦚꦠꦫꦺꦴ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴꦠꦶ ꦪꦺꦴ ꦏꦺꦴꦕꦶ ꦥꦧ꧀ꦧꦗ꧀ꦗꦴꦩꦠ꧀ꦠꦺꦤ ꦱꦩꦟꦺꦴ ꦮꦴ ꦗꦴꦠꦶꦩꦠ꧀ꦠꦺꦤ ꦧ꧀ꦫꦴꦲ꧀ꦩꦟꦺꦴ ꦮꦴ. ꦥꦴꦥꦶꦕ꧀ꦖꦺꦴ ꦱꦩ꧀ꦨꦴꦮꦤꦴꦣꦶꦥ꧀ꦥꦴꦪꦺꦤ ꦮꦶꦩ꧀ꦲꦴꦥꦤꦠꦺꦴ ꦏꦸꦲꦏꦺꦴ. ꦥꦕ꧀ꦕꦪꦱꦤ꧀ꦤꦶꦱ꧀ꦱꦶꦠꦴꦪ ꦥꦪꦸꦠ꧀ꦠꦮꦴꦕꦴꦪ ꦮꦱꦺꦤ ꦭꦥꦏꦺꦴ. ꦥꦕ꧀ꦕꦪꦤꦶꦧ꧀ꦧꦠ꧀ꦠꦏꦤꦶꦩꦶꦠ꧀ꦠꦴꦮꦕꦫꦠꦺꦴ ꦤꦺꦩꦶꦠ꧀ꦠꦏꦺꦴ. ꦏꦸꦲꦤꦭꦥꦤꦤꦺꦩꦶꦠ꧀ꦠꦏꦠ꧀ꦠꦁ ꦥꦸꦧ꧀ꦧꦔ꧀ꦒꦩꦁ ꦏꦠ꧀ꦮꦴꦠꦶ ꦏꦸꦲꦤꦴꦢꦶꦨꦴꦮꦩꦺꦮ ꦥꦸꦫꦏ꧀ꦑꦠ꧀ꦮꦴ ꦱꦤ꧀ꦠꦶꦤ꧀ꦢ꧀ꦫꦶꦪꦺꦴ ꦱꦤ꧀ꦠꦩꦴꦤꦱꦺꦴ ꦮꦶꦪ ꦕꦫꦤ꧀ꦠꦺꦴ. ꦥꦚ꧀ꦕ ꦤꦷꦮꦫꦟꦺꦠꦶ ꦏꦴꦩꦕ꧀ꦖꦤ꧀ꦢꦴꦢꦶꦏꦺ ꦥꦚ꧀ꦕ ꦤꦷꦮꦫꦟꦺ. ꦄꦥ꧀ꦥꦲꦴꦪ ꦄꦱꦩꦸꦕ꧀ꦖꦶꦤ꧀ꦢꦶꦠ꧀ꦮꦴ, ꦕꦺꦠꦱꦺꦴ ꦈꦥꦏ꧀ꦏꦶꦭꦺꦱꦺꦠꦶ ꦤꦷꦮꦫꦟꦺ. ꦤꦷꦮꦫꦟꦴ ꦲꦶ ꦕꦶꦠ꧀ꦠꦁ ꦈꦥꦏ꧀ꦏꦶꦭꦺꦱꦺꦤ꧀ꦠꦶ ꦏꦶꦭꦶꦛ꧀ꦜꦁ ꦏꦫꦺꦴꦤ꧀ꦠꦶ ꦮꦶꦧꦴꦣꦺꦤ꧀ꦠꦶ ꦈꦥꦠꦴꦥꦺꦤ꧀ꦠꦶ ꦕ. ꦠꦱ꧀ꦩꦴ ‘‘ꦕꦺꦠꦱꦺꦴ ꦈꦥꦏ꧀ꦏꦶꦭꦺꦱꦴ’’ꦠꦶ ꦮꦸꦕ꧀ꦕꦤ꧀ꦠꦶ. ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺꦠꦶ ꦤꦷꦮꦫꦟꦺ. ꦤꦷꦮꦫꦟꦴ ꦲꦶ ꦈꦥ꧀ꦥꦗ꧀ꦗꦩꦴꦤꦴ ꦄꦤꦸꦥ꧀ꦥꦤ꧀ꦤꦴꦪ ꦥꦚ꧀ꦚꦴꦪ ꦈꦥ꧀ꦥꦗ꧀ꦗꦶꦠꦸꦁ ꦤ ꦢꦺꦤ꧀ꦠꦶ. ꦠꦱ꧀ꦩꦴ ‘‘ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦴ’’ꦠꦶ ꦮꦸꦕ꧀ꦕꦤ꧀ꦠꦶ. ꦄꦤꦸꦥꦛ꧀ꦜꦶꦠꦱ꧀ꦱꦠꦷꦠꦶ ꦕꦠꦹꦱꦸ ꦱꦠꦶꦥꦛ꧀ꦜꦴꦤꦺꦱꦸ ꦤ ꦈꦥꦛ꧀ꦜꦶꦠꦱ꧀ꦱꦠꦶ. ꦄꦨꦴꦮꦪꦶꦠ꧀ꦮꦴꦠꦶ ꦄꦮꦝ꧀ꦞꦪꦶꦠ꧀ꦮꦴ. ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦤ꧀ꦠꦶ ꦄꦫꦲꦠ꧀ꦠꦥꦢꦛ꧀ꦜꦴꦤꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ.

ꦥꦕ꧀ꦖꦶꦩꦮꦴꦫꦺ ꦄꦚ꧀ꦚꦠꦫꦺꦴ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴꦠꦶ ꦱꦧ꧀ꦧꦚ꧀ꦚꦸꦧꦺꦴꦣꦶꦱꦠ꧀ꦠꦁ ꦱꦤ꧀ꦣꦴꦪ ꦮꦢꦠꦶ. ꦠꦠ꧀ꦡ ꦱꦧ꧀ꦧꦢꦺꦴꦱꦴꦥꦒꦠꦺꦴꦠꦶ ꦱꦧ꧀ꦧꦺꦲꦶ ꦥꦴꦫꦩꦶꦠꦴꦥꦛꦶꦥꦏ꧀ꦑꦨꦹꦠꦺꦲꦶ ꦢꦺꦴꦱꦺꦲꦶ ꦄꦥꦒꦠꦺꦴ. ꦌꦠꦺꦤ ꦥꦫꦶꦥꦹꦫꦶꦠꦥꦴꦫꦩꦶꦨꦴꦮꦁ ꦢꦱ꧀ꦱꦺꦠꦶ. ꦱꦠꦶꦥꦛ꧀ꦜꦴꦤꦴꦤꦶ ꦮꦶꦥꦱ꧀ꦱꦤꦴ, ꦧꦺꦴꦗ꧀ꦙꦔ꧀ꦒꦺꦴ ꦩꦒ꧀ꦒꦺꦴ, ꦄꦤꦸꦠ꧀ꦠꦫꦴ ꦱꦩ꧀ꦩꦴꦱꦩ꧀ꦧꦺꦴꦣꦶ ꦄꦫꦲꦠ꧀ꦠꦁ. ꦱꦠꦶꦥꦛ꧀ꦜꦴꦤꦴꦤꦶ ꦮꦴ ꦮꦶꦥꦱ꧀ꦱꦤꦴ, ꦧꦺꦴꦗ꧀ꦙꦔ꧀ꦒꦴ ꦩꦶꦱ꧀ꦱꦏꦴ, ꦱꦩ꧀ꦩꦴꦱꦩ꧀ꦧꦺꦴꦣꦶ ꦄꦫꦲꦠ꧀ꦠꦩꦺꦮ. ꦱꦺꦱꦁ ꦄꦤꦤ꧀ꦠꦫꦮꦴꦫꦺ ꦮꦸꦠ꧀ꦠꦥꦛꦶꦥꦏ꧀ꦑꦠꦺꦴ ꦮꦺꦢꦶꦠꦧ꧀ꦧꦁ. ꦪꦁ ꦌꦠ꧀ꦡ ꦚꦴꦟꦤ꧀ꦠꦶ ꦪꦁ ꦌꦠꦱ꧀ꦩꦶꦁ ꦪꦡꦴꦮꦸꦠ꧀ꦠꦺ ꦜꦴꦤꦺ ꦕ ꦜꦴꦤꦁ, ꦄꦛ꧀ꦜꦴꦤꦺ ꦕ ꦄꦛ꧀ꦜꦴꦤꦤ꧀ꦠꦶ ꦥꦮꦠ꧀ꦠꦁ ꦚꦴꦟꦁ. ꦲꦺꦠꦸꦱꦺꦴꦠꦶ ꦠꦱ꧀ꦱ ꦜꦴꦤꦱ꧀ꦱ ꦄꦛ꧀ꦜꦴꦤꦱ꧀ꦱ ꦕ ꦲꦺꦠꦸꦠꦺꦴ. ꦜꦴꦤꦱꦺꦴꦠꦶ ꦠꦔ꧀ꦑꦟꦺ ꦌꦮ ꦄꦴꦮꦗ꧀ꦗꦤꦱꦩꦤꦤ꧀ꦠꦫꦁ. ꦄꦤꦺꦴꦣꦶꦱꦺꦴꦠꦶ ꦎꦣꦶꦄꦨꦴꦮꦺꦤ, ꦏꦶꦚ꧀ꦕꦶ ꦄꦤꦮꦱꦺꦱꦺꦠ꧀ꦮꦴꦠꦶ ꦄꦠ꧀ꦡꦺꦴ.

ꦆꦠꦶ ꦜꦴꦤꦴꦛ꧀ꦜꦴꦤꦒꦠꦴꦠꦶꦄꦴꦢꦷꦱꦸ ꦌꦮꦁ ꦜꦴꦤꦴꦛ꧀ꦜꦴꦤꦨꦴꦮꦁ ꦒꦠꦴ. ꦱꦧ꧀ꦧꦺꦠꦶ ꦑꦪꦮꦪꦮꦶꦫꦗ꧀ꦗꦤꦤꦶꦫꦸꦗ꧀ꦙꦤꦱꦨꦴꦮꦴ ꦱꦔ꧀ꦑꦠꦣꦩ꧀ꦩꦴ, ꦠꦺ ꦌꦮ ꦕ ꦱꦠ꧀ꦠꦥꦚ꧀ꦚꦠ꧀ꦠꦶꦪꦴ ꦈꦥꦴꦢꦴꦤꦨꦹꦠꦴ ꦏꦺꦕꦶ ꦱꦒ꧀ꦒꦹꦥꦒꦴ ꦪꦺ ꦣꦩ꧀ꦩꦕꦴꦫꦶꦤꦺꦴ, ꦏꦺꦕꦶ ꦄꦥꦴꦪꦹꦥꦒꦴ ꦪꦺ ꦄꦣꦩ꧀ꦩꦕꦴꦫꦶꦤꦺꦴ, ꦏꦺꦕꦶ ꦤꦶꦧ꧀ꦧꦴꦤꦹꦥꦒꦴ ꦪꦺ ꦏꦩ꧀ꦩꦏ꧀ꦑꦪꦏꦫꦁ ꦄꦫꦶꦪꦩꦒ꧀ꦒꦁ ꦥꦛꦶꦥꦤ꧀ꦤꦴ.

꧕꧘. ꦆꦢꦴꦤꦶ ꦪꦡꦴꦮꦸꦠ꧀ꦠꦩꦠ꧀ꦡꦁ ꦮꦶꦮꦫꦤ꧀ꦠꦺꦴ ‘‘ꦱꦧ꧀ꦧꦺ ꦱꦠ꧀ꦠꦴ ꦩꦫꦶꦱ꧀ꦱꦤ꧀ꦠꦷ’’ꦠꦶ ꦒꦴꦡꦴꦢ꧀ꦮꦪꦩꦴꦲ. ꦠꦱ꧀ꦱ ꦄꦠ꧀ꦡꦁ ‘‘ꦱꦧ꧀ꦧꦺ ꦱꦠ꧀ꦠꦴꦠꦶ ꦄꦫꦶꦪꦴ ꦕ ꦄꦤꦫꦶꦪꦴ ꦕꦴ’’ꦠꦶꦄꦴꦢꦶꦤꦴ ꦱꦪꦩꦺꦮ ꦤꦶꦢ꧀ꦢꦶꦱꦠꦶ. ꦠꦠ꧀ꦡ ꦗꦷꦮꦶꦠꦥꦫꦶꦪꦤ꧀ꦠꦺꦴ ꦩꦫꦟꦥꦫꦶꦪꦤ꧀ꦠꦺꦴꦠꦶ ꦗꦷꦮꦶꦠꦱ꧀ꦱ ꦥꦫꦶꦪꦤ꧀ꦠꦺꦴ ꦤꦴꦩ ꦩꦫꦟꦱꦔ꧀ꦑꦴꦠꦺꦴ ꦄꦤ꧀ꦠꦺꦴ. ꦪꦡꦴꦏꦩ꧀ꦩꦁ ꦒꦩꦶꦱ꧀ꦱꦤ꧀ꦠꦷꦠꦶ ꦌꦠ꧀ꦡ ꦪꦢꦺꦠꦁ ꦱꦠ꧀ꦠꦴꦤꦁ ꦪꦡꦴꦏꦩ꧀ꦩꦁ ꦒꦩꦤꦁ, ꦄꦪꦁ ꦏꦩ꧀ꦩꦱ꧀ꦱꦏꦠꦴꦠꦶ ꦄꦠ꧀ꦡꦺꦴ. ꦏꦩ꧀ꦩꦴꦤꦁ ꦦꦭꦢꦱ꧀ꦱꦴꦮꦶꦠꦴ ꦕ ꦄꦮꦶꦥ꧀ꦥꦮꦴꦱꦺꦴ ꦕꦴꦠꦶ ‘‘ꦥꦸꦚ꧀ꦚꦥꦴꦥꦦꦭꦹꦥꦒꦴ’’ꦠꦶ ꦆꦩꦶꦤꦴ ꦮꦕꦤꦺꦤ ꦏꦩ꧀ꦩꦴꦤꦁ ꦦꦭꦱ꧀ꦱ ꦥꦕ꧀ꦕꦏ꧀ꦑꦏꦴꦫꦶꦠꦴ, ꦏꦠꦹꦥꦕꦶꦠꦴꦤꦁ ꦏꦩ꧀ꦩꦴꦤꦁ ꦄꦠ꧀ꦠꦤꦺꦴ ꦦꦭꦱ꧀ꦱ ꦄꦥ꧀ꦥꦢꦴꦤꦴꦨꦴꦮꦺꦴ ꦕ ꦢꦱ꧀ꦱꦶꦠꦺꦴꦠꦶ ꦄꦠ꧀ꦡꦺꦴ.

ꦏꦩ꧀ꦩꦩꦺꦮ ꦏꦩ꧀ꦩꦤ꧀ꦠꦁ, ꦥꦴꦥꦁ ꦏꦩ꧀ꦩꦤ꧀ꦠꦁ ꦌꦠꦺꦱꦤ꧀ꦠꦶ ꦥꦴꦥꦏꦩ꧀ꦩꦤ꧀ꦠꦴ, ꦠꦱ꧀ꦱ ꦄꦠ꧀ꦡꦁ ꦢꦱ꧀ꦱꦺꦠꦸꦁ ‘‘ꦄꦥꦸꦚ꧀ꦚꦱꦔ꧀ꦑꦴꦫꦴ’’ꦠꦶ ꦮꦸꦠ꧀ꦠꦁ. ꦄꦥꦸꦚ꧀ꦚꦺꦴ ꦱꦔ꧀ꦑꦴꦫꦺꦴ ꦌꦠꦺꦱꦤ꧀ꦠꦶ ꦄꦥꦸꦚ꧀ꦚꦱꦔ꧀ꦑꦴꦫꦴ. ꦥꦴꦥꦏꦩ꧀ꦩꦤ꧀ꦠꦴꦠꦶ ꦮꦴ ꦤꦶꦱ꧀ꦱꦏ꧀ꦏꦮꦕꦤꦁ, ꦥꦴꦥꦏꦩ꧀ꦩꦤ꧀ꦠꦲꦺꦠꦹꦠꦶ ꦄꦠ꧀ꦡꦺꦴ. ꦠꦡꦴ ꦥꦸꦚ꧀ꦚꦱꦔ꧀ꦑꦴꦫꦴꦠꦶꦄꦴꦢꦷꦱꦸꦥꦶ. ꦥꦸꦤ ‘‘ꦤꦶꦫꦪꦁ ꦥꦴꦥꦏꦩ꧀ꦩꦤ꧀ꦠꦴ’’ꦠꦶꦄꦴꦢꦶꦤꦴ ꦄꦤ꧀ꦠꦢ꧀ꦮꦪꦺꦤ ꦱꦢ꧀ꦣꦶꦁ ꦩꦗ꧀ꦙꦶꦩꦥꦛꦶꦥꦢꦁ ꦢꦱ꧀ꦱꦺꦠꦶ. ꦠꦡꦴ ‘‘ꦄꦪꦁ ꦱꦁꦏꦶꦭꦺꦱꦺꦴ’’ꦠꦶꦄꦴꦢꦶꦤꦴ ꦮꦛ꧀ꦛꦮꦶꦮꦛ꧀ꦛꦮꦱꦺꦤ ꦄꦴꦢꦷꦤꦮꦱ꧀ꦱꦴꦢꦤꦶꦱ꧀ꦱꦫꦟꦮꦱꦺꦤ ꦲꦺꦠꦸꦦꦭꦮꦱꦺꦤ ꦕ ꦒꦴꦡꦴꦪꦁ ꦠꦪꦺꦴ ꦄꦠ꧀ꦡꦮꦶꦏꦥ꧀ꦥꦴ ꦢꦱ꧀ꦱꦶꦠꦴ. ꦥꦸꦤ ‘‘ꦤꦶꦫꦪꦁ ꦥꦴꦥꦏꦩ꧀ꦩꦤ꧀ꦠꦴꦠꦶ ꦄꦪꦁ ꦱꦁꦏꦶꦭꦺꦱꦺꦴ’’ꦠꦶꦄꦴꦢꦶꦤꦴ ꦮꦺꦴꦢꦴꦤꦮꦱꦺꦤ ꦒꦴꦡꦴꦪ ꦄꦠ꧀ꦡꦁ ꦢꦱ꧀ꦱꦺꦠꦶ.

꧕꧙. ꦠꦺꦤ ꦠꦺꦤꦴꦠꦶ ꦠꦺꦤ ꦠꦺꦤ ꦄꦗ꧀ꦙꦺꦴꦱꦶꦠꦮꦠ꧀ꦡꦸꦤꦴ ꦫꦹꦥꦨꦮꦄꦫꦹꦥꦨꦮꦴꦢꦶꦤꦴ. ꦖꦠ꧀ꦠꦶꦁꦱꦴꦠꦶ ꦏꦴꦩꦠꦟ꧀ꦲꦴ ꦠꦴꦮ ꦫꦹꦥꦴꦢꦶꦮꦶꦱꦪꦨꦺꦢꦺꦤ ꦖ, ꦠꦡꦴ ꦨꦮꦠꦟ꧀ꦲꦴ ꦮꦶꦨꦮꦠꦟ꧀ꦲꦴ ꦕꦴꦠꦶ ꦄꦛ꧀ꦜꦴꦫꦱ. ꦠꦴ ꦌꦮ ꦄꦗ꧀ꦙꦠ꧀ꦠꦶꦏꦺꦱꦸ ꦫꦹꦥꦴꦢꦷꦱꦸ ꦄꦛ꧀ꦜꦴꦫꦱ, ꦧꦴꦲꦶꦫꦺꦱꦸ ꦫꦹꦥꦴꦢꦷꦱꦸ ꦄꦛ꧀ꦜꦴꦫꦱꦴꦠꦶ ꦌꦮꦁ ꦖꦠ꧀ꦠꦶꦁꦱ. ꦪꦺꦤ ꦪꦺꦤꦴꦠꦶ ‘‘ꦱꦸꦨꦁ ꦱꦸꦑ’’ꦤ꧀ꦠꦶꦄꦴꦢꦶꦤꦴ.

ꦮꦺꦴꦢꦴꦤꦁ ꦠꦶꦮꦶꦣꦁ ꦑꦤ꧀ꦣꦠ꧀ꦠꦪꦮꦱꦺꦤꦴꦠꦶ ꦠꦁ ꦢꦱ꧀ꦱꦺꦠꦸꦁ ‘‘ꦠꦟ꧀ꦲꦴꦱꦁꦏꦶꦭꦺꦱꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦸꦤ ‘‘ꦱꦧ꧀ꦧꦺ ꦱꦠ꧀ꦠꦴ ꦩꦫꦶꦱ꧀ꦱꦤ꧀ꦠꦷ’’ꦠꦶꦄꦴꦢꦶ ꦥꦛꦶꦥꦢꦴꦮꦶꦨꦴꦒꦺꦤ ꦒꦴꦡꦴꦤꦩꦠ꧀ꦡꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ. ꦠꦠ꧀ꦡ ꦠꦠ꧀ꦡ ꦒꦴꦩꦶꦤꦷꦠꦶ ꦠꦠ꧀ꦡ ꦠꦠ꧀ꦡꦺꦮ ꦤꦶꦧ꧀ꦧꦴꦤꦺ ꦒꦴꦩꦶꦤꦷ, ꦤꦶꦧ꧀ꦧꦴꦤꦱ꧀ꦱ ꦒꦩꦤꦱꦷꦭꦴꦠꦶ ꦄꦠ꧀ꦡꦺꦴ.

ꦥꦸꦤ ꦠꦠ꧀ꦡꦠꦠ꧀ꦡꦒꦴꦩꦶꦤꦷꦱꦧ꧀ꦧꦠ꧀ꦡꦒꦴꦩꦶꦤꦷꦤꦁ ꦥꦛꦶꦥꦢꦴꦤꦁ ꦮꦶꦨꦴꦒꦁ ꦢꦱ꧀ꦱꦺꦠꦸꦁ ‘‘ꦠꦪꦺꦴ ꦫꦴꦱꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦪꦤ꧀ꦠꦶ ꦪꦁ ꦤꦶꦫꦪꦴꦢꦶ. ꦠꦁ ꦠꦁ ꦜꦴꦤꦁ ꦪꦡꦴꦫꦲꦁ ꦒꦩꦺꦠꦷꦠꦶ ꦱꦧ꧀ꦧꦠ꧀ꦡꦒꦴꦩꦶꦤꦷ. ꦥꦛꦶꦥꦢꦴꦱꦔ꧀ꦑꦴꦠꦺ ꦄꦥꦸꦚ꧀ꦚꦏꦩ꧀ꦩꦺ ꦥꦸꦚ꧀ꦚꦏꦩ꧀ꦩꦺ ꦕ ꦏꦩ꧀ꦩꦏ꧀ꦑꦪꦏꦫꦟꦏꦩ꧀ꦩꦺ ꦕ ꦮꦶꦨꦴꦒꦱꦺꦴ ꦨꦒꦮꦠꦺꦴ ꦥꦮꦠ꧀ꦠꦤꦚꦴꦟꦁ. ꦆꦢꦁ ꦱꦧ꧀ꦧꦠ꧀ꦡꦒꦴꦩꦶꦤꦷ ꦥꦛꦶꦥꦢꦴꦚꦴꦟꦁ ꦤꦴꦩ ꦠꦡꦴꦒꦠꦧꦭꦁ. ꦆꦩꦶꦤꦴ ꦲꦶ ꦚꦴꦟꦺꦤ ꦨꦒꦮꦴ ꦱꦧ꧀ꦧꦩ꧀ꦥꦶ ꦥꦛꦶꦥꦢꦁ ꦪꦡꦴꦨꦹꦠꦁ ꦥꦗꦴꦤꦴꦠꦶ.

ꦏꦡꦁ? ꦱꦏꦭꦒꦴꦩꦮꦴꦱꦶꦏꦺꦱꦸꦥꦶ ꦌꦏꦁ ꦱꦹꦏꦫꦁ ꦮꦴ ꦩꦶꦒꦁ ꦮꦴ ꦩꦴꦫꦺꦤ꧀ꦠꦺꦱꦸ ꦱꦧ꧀ꦧꦺꦱꦁ ꦕꦺꦠꦤꦴ ꦥꦫꦱ꧀ꦱ ꦗꦷꦮꦶꦠꦶꦤ꧀ꦢ꧀ꦫꦶꦪꦴꦫꦩ꧀ꦩꦟꦴꦮ ꦲꦺꦴꦠꦶ, ꦠꦁ ꦥꦤ ꦏꦩ꧀ꦩꦁ ꦠꦺꦱꦁ ꦄꦴꦪꦹꦲꦤꦏ꧀ꦑꦟꦺꦪꦺꦮ ꦤꦴꦤꦴ ꦲꦺꦴꦠꦶ. ꦠꦺꦱꦸ ꦲꦶ ꦌꦏꦺꦴ ꦄꦴꦢꦫꦺꦤ ꦏꦫꦺꦴꦠꦶ, ꦌꦏꦺꦴ ‘‘ꦠ꧀ꦮꦩ꧀ꦥꦶ ꦏꦫꦺꦴꦲꦷ’’ꦠꦶ ꦥꦫꦺꦲꦶ ꦤꦶꦥ꧀ꦥꦷꦭ꦳ꦶꦠꦺꦴ ꦏꦫꦺꦴꦠꦶ, ꦌꦏꦺꦴ ꦱꦩꦴꦤꦕ꧀ꦖꦤ꧀ꦢꦺꦴ ꦮꦶꦪ ꦲꦸꦠ꧀ꦮꦴ ꦄꦥ꧀ꦥꦛꦶꦧꦴꦲꦩꦴꦤꦺꦴ ꦮꦶꦕꦫꦠꦶ. ꦠꦺꦱꦸ ꦌꦏꦺꦴ ꦠꦺꦤꦺꦮ ꦏꦩ꧀ꦩꦺꦤ ꦤꦶꦫꦪꦺ ꦤꦶꦧ꧀ꦧꦠ꧀ꦠꦠꦶ, ꦌꦏꦺꦴ ꦠꦶꦫꦕ꧀ꦖꦴꦤꦪꦺꦴꦤꦶꦪꦁ, ꦌꦏꦺꦴ ꦥꦺꦠ꧀ꦠꦶꦮꦶꦱꦪꦺ, ꦠꦁ ꦠꦡꦴꦒꦠꦺꦴ ꦄꦴꦪꦹꦲꦤꦏ꧀ꦑꦟꦺ ꦌꦮ ‘‘ꦆꦩꦶꦤꦴ ꦤꦷꦲꦴꦫꦺꦤ ꦄꦴꦪꦹꦲꦶꦠꦠ꧀ꦠꦴ ꦌꦱ ꦤꦶꦫꦪꦺ ꦤꦶꦧ꧀ꦧꦠ꧀ꦠꦶꦱ꧀ꦱꦠꦶ, ꦌꦱ ꦠꦶꦫꦕ꧀ꦖꦴꦤꦪꦺꦴꦤꦶꦪꦁ, ꦌꦱ ꦥꦺꦠ꧀ꦠꦶꦮꦶꦱꦪꦺ’’ꦠꦶ ꦗꦴꦤꦴꦠꦶ. ꦤꦶꦫꦪꦺ ꦤꦶꦧ꧀ꦧꦠ꧀ꦠꦤꦏꦩ꧀ꦥꦶ ‘‘ꦌꦱ ꦄꦛ꧀ꦜꦱꦸ ꦩꦲꦴꦤꦶꦫꦪꦺꦱꦸ ꦤꦶꦧ꧀ꦧꦠ꧀ꦠꦶꦱ꧀ꦱꦠꦶ, ꦌꦱ ꦱꦺꦴꦭ꦳ꦱꦱꦸ ꦈꦱ꧀ꦱꦢꦺꦱꦹ’’ꦠꦶ ꦗꦴꦤꦴꦠꦶ. ꦠꦶꦫꦕ꧀ꦖꦴꦤꦪꦺꦴꦤꦶꦪꦁ ꦤꦶꦧ꧀ꦧꦠ꧀ꦠꦤꦏꦩ꧀ꦥꦶ ‘‘ꦌꦱ ꦄꦥꦴꦢꦏꦺꦴ ꦨꦮꦶꦱ꧀ꦱꦠꦶ, ꦌꦱ ꦢ꧀ꦮꦶꦥꦴꦢꦏꦺꦴ, ꦌꦱ ꦕꦠꦸꦥ꧀ꦥꦴꦢꦏꦺꦴ, ꦌꦱ ꦧꦲꦸꦥ꧀ꦥꦴꦢꦏꦺꦴ’’ꦠꦶ ꦗꦴꦤꦴꦠꦶ. ꦥꦺꦠ꧀ꦠꦶꦮꦶꦱꦪꦺ ꦤꦶꦧ꧀ꦧꦠ꧀ꦠꦤꦏꦩ꧀ꦥꦶ ‘‘ꦌꦱ ꦤꦶꦗ꧀ꦙꦴꦩꦠꦟ꧀ꦲꦶꦏꦺꦴ ꦨꦮꦶꦱ꧀ꦱꦠꦶ, ꦌꦱ ꦑꦸꦥ꧀ꦥꦶꦥꦴꦱꦶꦏꦺꦴ, ꦌꦱ ꦥꦫꦢꦠ꧀ꦠꦹꦥꦗꦷꦮꦷ’’ꦠꦶ ꦗꦴꦤꦴꦠꦶ.

‘‘ꦠꦺꦱꦸ ꦕ ꦏꦩ꧀ꦩꦺꦱꦸ ꦆꦢꦁ ꦏꦩ꧀ꦩꦁ ꦥꦛꦶꦱꦤ꧀ꦣꦶꦁ ꦄꦴꦏꦝ꧀ꦞꦶꦱ꧀ꦱꦠꦶ, ꦆꦢꦁ ꦤꦴꦏꦝ꧀ꦞꦶꦱ꧀ꦱꦠꦶ ꦢꦸꦧ꧀ꦧꦭꦁ ꦢꦶꦤ꧀ꦤꦴꦪ ꦥꦛꦶꦱꦤ꧀ꦣꦶꦪꦴ ꦈꦥꦣꦶꦮꦺꦥꦏ꧀ꦏꦩꦠ꧀ꦠꦁ ꦨꦮꦶꦱ꧀ꦱꦠꦷ’’ꦠꦶ ꦗꦴꦤꦴꦠꦶ. ꦠꦡꦴ ꦱꦏꦭꦒꦴꦩꦮꦴꦱꦶꦏꦺꦱꦸ ꦌꦏꦠꦺꦴ ꦢꦴꦤꦁ ꦢꦢꦩꦴꦤꦺꦱꦸ ꦱꦧ꧀ꦧꦺꦱꦩ꧀ꦥꦶ ꦕꦺꦠꦤꦴ ꦢꦺꦪ꧀ꦪꦣꦩ꧀ꦩꦴꦫꦩ꧀ꦩꦟꦴꦮ ꦲꦺꦴꦠꦶ, ꦠꦁ ꦥꦤ ꦏꦩ꧀ꦩꦁ ꦠꦺꦱꦁ ꦄꦴꦪꦹꦲꦤꦏ꧀ꦑꦟꦺ ꦌꦮ ꦤꦴꦤꦁ ꦲꦺꦴꦠꦶ. ꦠꦺꦱꦸ ꦲꦶ ꦏꦺꦕꦶ ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦤ꧀ꦠꦶ, ꦏꦺꦕꦶ ꦩꦤꦸꦱ꧀ꦱꦭꦺꦴꦏꦺ, ꦠꦁ ꦠꦡꦴꦒꦠꦺꦴ ꦄꦴꦪꦹꦲꦤꦏ꧀ꦑꦟꦺ ꦌꦮ ‘‘ꦆꦩꦶꦤꦴ ꦤꦷꦲꦴꦫꦺꦤ ꦄꦴꦪꦹꦲꦶꦠꦠ꧀ꦠꦴ ꦌꦱ ꦩꦤꦸꦱ꧀ꦱꦭꦺꦴꦏꦺ ꦤꦶꦧ꧀ꦧꦠ꧀ꦠꦶꦱ꧀ꦱꦠꦶ, ꦌꦱ ꦢꦺꦮꦭꦺꦴꦏꦺ’’ꦠꦶ ꦗꦴꦤꦴꦠꦶ. ꦠꦠ꧀ꦡꦥꦶ ‘‘ꦌꦱ ꦥꦫꦤꦶꦩ꧀ꦩꦶꦠꦮꦱꦮꦠ꧀ꦠꦷꦱꦸ ꦤꦶꦧ꧀ꦧꦠ꧀ꦠꦶꦱ꧀ꦱꦠꦶ, ꦌꦱ ꦨꦸꦩ꧀ꦩꦢꦺꦮꦺꦱꦸ ꦤꦶꦧ꧀ꦧꦠ꧀ꦠꦶꦱ꧀ꦱꦠꦶ, ꦌꦱ ꦗꦺꦛ꧀ꦜꦏꦢꦺꦮꦫꦴꦗꦴ ꦲꦸꦠ꧀ꦮꦴ, ꦌꦱ ꦠꦱ꧀ꦱ ꦢꦸꦠꦶꦪꦁ ꦠꦠꦶꦪꦁ ꦮꦴ ꦜꦴꦤꦤ꧀ꦠꦫꦁ ꦏꦫꦺꦴꦤ꧀ꦠꦺꦴ ꦥꦫꦶꦕꦴꦫꦏꦺꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶꦱ꧀ꦱꦠꦷ’’ꦠꦶ ꦗꦴꦤꦴꦠꦶ.

‘‘ꦠꦺꦱꦸ ꦕ ꦏꦩ꧀ꦩꦺꦱꦸ ꦆꦢꦁ ꦥꦛꦶꦱꦤ꧀ꦣꦶꦁ ꦄꦴꦏꦝ꧀ꦞꦶꦠꦸꦁ ꦱꦏ꧀ꦑꦶꦱ꧀ꦱꦠꦶ, ꦆꦢꦁ ꦤ ꦱꦏ꧀ꦑꦶꦱ꧀ꦱꦠꦶ ꦢꦸꦧ꧀ꦧꦭꦁ ꦢꦶꦤ꧀ꦤꦴꦪ ꦥꦛꦶꦱꦤ꧀ꦣꦶꦪꦴ ꦈꦥꦣꦶꦮꦺꦥꦏ꧀ꦏꦩꦠ꧀ꦠꦁ ꦨꦮꦶꦱ꧀ꦱꦠꦷ’’ꦠꦶ ꦗꦴꦤꦴꦠꦶ. ꦠꦡꦴ ‘‘ꦮꦶꦥꦱ꧀ꦱꦤꦁ ꦥꦛ꧀ꦜꦥꦺꦤ꧀ꦠꦺꦱꦸ ꦕ ꦌꦱ ꦆꦩꦶꦤꦴ ꦤꦷꦲꦴꦫꦺꦤ ꦮꦶꦥꦱ꧀ꦱꦤꦴꦪ ꦄꦴꦫꦢ꧀ꦣꦠ꧀ꦠꦴ ꦄꦫꦲꦴ ꦨꦮꦶꦱ꧀ꦱꦠꦶ, ꦌꦱ ꦄꦤꦴꦒꦴꦩꦷ, ꦌꦱ ꦱꦏꦢꦴꦒꦴꦩꦷ, ꦌꦱ ꦱꦺꦴꦠꦴꦥꦤ꧀ꦤꦺꦴ, ꦌꦏꦧꦷꦗꦷ ꦏꦺꦴꦭꦁꦏꦺꦴꦭꦺꦴ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦺꦴ, ꦌꦱ ꦩꦒ꧀ꦒꦁ ꦥꦠ꧀ꦠꦸꦁ ꦤ ꦱꦏ꧀ꦑꦶꦱ꧀ꦱꦠꦶ ꦭꦏ꧀ꦑꦟꦴꦫꦩ꧀ꦩꦟꦶꦏꦮꦶꦥꦱ꧀ꦱꦤꦴꦪꦩꦺꦮ ꦜꦱ꧀ꦱꦠꦶ, ꦌꦱ ꦥꦕ꧀ꦕꦪꦥꦫꦶꦒ꧀ꦒꦲꦺ, ꦌꦱ ꦤꦴꦩꦫꦹꦥꦥꦫꦶꦒ꧀ꦒꦲꦺ, ꦄꦫꦹꦥꦥꦫꦶꦒ꧀ꦒꦲꦺ ꦕ ꦜꦱ꧀ꦱꦠꦶ, ꦌꦱ ꦩꦲꦴꦨꦹꦠꦩꦠ꧀ꦠꦩꦺꦮ ꦮꦮꦠ꧀ꦡꦥꦺꦱ꧀ꦱꦠꦶ, ꦌꦱ ꦏꦶꦚ꧀ꦕꦶ ꦱꦭ꧀ꦭꦏ꧀ꦑꦺꦠꦸꦁ ꦤ ꦱꦏ꧀ꦑꦶꦱ꧀ꦱꦠꦷ’’ꦠꦶ ꦗꦴꦤꦴꦠꦶ. ‘‘ꦏꦱꦶꦟꦥꦫꦶꦏꦩ꧀ꦩꦁ ꦏꦫꦺꦴꦤ꧀ꦠꦺꦱꦸꦥꦶ ꦌꦱ ꦥꦫꦶꦏꦩ꧀ꦩꦩꦠ꧀ꦠꦺ ꦌꦮ ꦜꦱ꧀ꦱꦠꦶ, ꦌꦱ ꦤꦶꦩꦶꦠ꧀ꦠꦁ ꦈꦥ꧀ꦥꦴꦢꦺꦠꦸꦁ ꦱꦏ꧀ꦑꦶꦱ꧀ꦱꦠꦶ, ꦤ ꦄꦥ꧀ꦥꦤꦁ. ꦌꦱ ꦄꦥ꧀ꦥꦤꦩ꧀ꦥꦶ ꦈꦥ꧀ꦥꦴꦢꦺꦱ꧀ꦱꦠꦶ, ꦌꦱ ꦙꦴꦤꦁ ꦄꦣꦶꦒꦩꦶꦱ꧀ꦱꦠꦶ, ꦤ ꦈꦥꦫꦶꦮꦶꦱꦺꦱꦁ. ꦌꦱ ꦈꦥꦫꦶꦮꦶꦱꦺꦱꦩ꧀ꦥꦶ ꦄꦣꦶꦒꦩꦶꦱ꧀ꦱꦠꦷ’’ꦠꦶ ꦗꦴꦤꦴꦠꦶ.

ꦄꦤꦺꦏꦣꦴꦠꦹꦠꦶ ꦄꦤꦺꦏꦴ ꦕꦏ꧀ꦑꦴꦢꦪꦺꦴ ꦥꦡꦮꦴꦢꦪꦺꦴ ꦕ ꦣꦴꦠꦸꦪꦺꦴ ꦌꦠꦱ꧀ꦱꦴꦠꦶ ꦄꦤꦺꦏꦣꦴꦠꦸ, ꦧꦲꦸꦣꦴꦠꦹꦠꦶ ꦄꦠ꧀ꦡꦺꦴ. ꦭꦺꦴꦏꦺꦴꦠꦶ ꦑꦤ꧀ꦣꦴꦪꦠꦤꦴꦢꦶꦭꦺꦴꦏꦺꦴ. ꦕꦏ꧀ꦑꦸꦣꦴꦠꦹꦠꦶꦄꦴꦢꦶ ꦪꦴꦲꦶ ꦣꦴꦠꦹꦲꦶ ‘‘ꦄꦤꦺꦏꦣꦴꦠꦹ’’ꦠꦶ ꦭꦺꦴꦏꦺꦴ ꦮꦸꦠ꧀ꦠꦺꦴ, ꦠꦴꦱꦁ ꦱꦫꦹꦥꦠꦺꦴ ꦢꦱ꧀ꦱꦤꦁ. ꦠꦠ꧀ꦡ ꦱꦨꦴꦮꦛ꧀ꦜꦺꦤ ꦤꦶꦱ꧀ꦱꦠ꧀ꦠꦛ꧀ꦜꦺꦤ ꦕ ꦣꦴꦠꦸ. ꦕꦏ꧀ꦑꦸ ꦌꦮ ꦣꦴꦠꦸ ꦕꦏ꧀ꦑꦸꦣꦴꦠꦸ. ꦱꦺꦱꦥꦢꦺꦱꦸꦥꦶ ꦌꦱꦺꦮ ꦤꦪꦺꦴ. ꦏꦴꦩꦣꦴꦠꦹꦠꦶ ꦌꦠ꧀ꦡ ꦢ꧀ꦮꦺ ꦏꦴꦩꦴ ꦏꦶꦭꦺꦱꦏꦴꦩꦺꦴ ꦕ ꦮꦠ꧀ꦡꦸꦏꦴꦩꦺꦴ ꦕ. ꦏꦶꦭꦺꦱꦏꦴꦩꦥꦏ꧀ꦑꦺ ꦏꦴꦩꦥꦛꦶꦱꦁꦪꦸꦠ꧀ꦠꦺꦴ ꦣꦴꦠꦸ ꦏꦴꦩꦣꦴꦠꦸ, ꦏꦴꦩꦮꦶꦠꦏ꧀ꦏꦱ꧀ꦱꦺꦠꦁ ꦤꦴꦩꦁ. ꦮꦠ꧀ꦡꦸꦏꦴꦩꦥꦏ꧀ꦑꦺ ꦥꦤ ꦏꦴꦩꦴꦮꦕꦫꦣꦩ꧀ꦩꦴ ꦏꦴꦩꦺꦴ ꦈꦠ꧀ꦠꦫꦥꦢꦭꦺꦴꦥꦺꦤ, ꦏꦴꦩꦺꦴ ꦕ ꦱꦺꦴ ꦣꦴꦠꦸ ꦕꦴꦠꦶ ꦏꦴꦩꦣꦴꦠꦸ. ꦧ꧀ꦪꦴꦥꦴꦢꦥꦛꦶꦱꦁꦪꦸꦠ꧀ꦠꦺꦴ ꦣꦴꦠꦸ ꦧ꧀ꦪꦴꦥꦴꦢꦣꦴꦠꦸ, ꦧ꧀ꦪꦴꦥꦴꦢꦮꦶꦠꦏ꧀ꦏꦱ꧀ꦱꦺꦠꦁ ꦤꦴꦩꦁ. ꦧ꧀ꦪꦴꦥꦴꦢꦺꦴꦮ ꦣꦴꦠꦸ ꦧ꧀ꦪꦴꦥꦴꦢꦣꦴꦠꦸ, ꦢꦱꦄꦴꦓꦴꦠꦮꦠ꧀ꦡꦸꦮꦶꦱꦪꦱ꧀ꦱ ꦥꦛꦶꦓꦱ꧀ꦱꦺꦠꦁ ꦤꦴꦩꦁ. ꦮꦶꦲꦶꦁꦱꦴꦥꦛꦶꦱꦁꦪꦸꦠ꧀ꦠꦺꦴ ꦣꦴꦠꦸ ꦮꦶꦲꦶꦁꦱꦴꦣꦴꦠꦸ, ꦮꦶꦲꦶꦁꦱꦴꦮꦶꦠꦏ꧀ꦏꦺꦴ. ꦮꦶꦲꦶꦁꦱꦴ ꦌꦮ ꦮꦴ ꦣꦴꦠꦸ ꦮꦶꦲꦶꦁꦱꦴꦣꦴꦠꦸ, ꦥꦫꦱꦠ꧀ꦠꦮꦶꦲꦺꦱꦤꦱ꧀ꦱꦺꦠꦁ ꦤꦴꦩꦁ. ꦤꦺꦏ꧀ꦑꦩ꧀ꦩꦄꦧ꧀ꦪꦴꦥꦴꦢꦄꦮꦶꦲꦶꦁꦱꦴꦣꦴꦠꦸꦪꦺꦴ ꦤꦺꦏ꧀ꦑꦩ꧀ꦩꦮꦶꦠꦏ꧀ꦏꦴꦢꦪꦺꦴ ꦱꦧ꧀ꦧꦏꦸꦱꦭꦣꦩ꧀ꦩꦴ ꦩꦺꦠ꧀ꦠꦴꦏꦫꦸꦟꦴ ꦕꦴꦠꦶ ꦮꦺꦢꦶꦠꦧ꧀ꦧꦁ. ꦫꦹꦥꦣꦴꦠꦹꦠꦶ ꦫꦹꦥꦨꦮꦺꦴ, ꦱꦧ꧀ꦧꦺ ꦮꦴ ꦫꦹꦥꦣꦩ꧀ꦩꦴ. ꦄꦫꦹꦥꦣꦴꦠꦹꦠꦶ ꦄꦫꦹꦥꦨꦮꦺꦴ, ꦄꦫꦹꦥꦣꦩ꧀ꦩꦴ ꦮꦴ. ꦤꦶꦫꦺꦴꦣꦣꦴꦠꦹꦠꦶ ꦤꦶꦫꦺꦴꦣꦠꦟ꧀ꦲꦴ. ꦱꦔ꧀ꦑꦴꦫꦣꦴꦠꦹꦠꦶ ꦱꦧ꧀ꦧꦺ ꦱꦔ꧀ꦑꦠꦣꦩ꧀ꦩꦴ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦁ.

ꦄꦚ꧀ꦚꦩꦚ꧀ꦚꦮꦶꦭꦏ꧀ꦑꦟꦠ꧀ꦠꦴ ꦤꦴꦤꦥ꧀ꦥꦏꦴꦫꦴ ꦣꦴꦠꦸꦪꦺꦴ ꦌꦠꦱ꧀ꦩꦶꦤ꧀ꦠꦶ ꦤꦴꦤꦴꦣꦴꦠꦸ, ꦭꦺꦴꦏꦺꦴ. ꦠꦺꦤꦺꦮꦴꦲ – ‘‘ꦄꦚ꧀ꦚꦴ ꦕꦏ꧀ꦑꦸꦣꦴꦠꦸ ꦪꦴꦮ ꦄꦚ꧀ꦚꦴ ꦤꦶꦧ꧀ꦧꦴꦤꦣꦴꦠꦹ’’ꦠꦶ, ꦪꦡꦴ ꦕ ꦆꦢꦁ ꦚꦴꦟꦁ ꦕꦏ꧀ꦑꦸꦣꦴꦠꦸꦄꦴꦢꦶꦨꦺꦢꦺꦤ ꦈꦥꦴꦢꦶꦤ꧀ꦤꦏꦱꦔ꧀ꦑꦴꦫꦭꦺꦴꦏꦱ꧀ꦱ ꦮꦱꦺꦤ ꦄꦤꦺꦏꦣꦴꦠꦸꦤꦴꦤꦴꦣꦴꦠꦸꦭꦺꦴꦏꦁ ꦥꦗꦴꦤꦴꦠꦶ, ꦌꦮꦁ ꦄꦤꦸꦥꦴꦢꦶꦤ꧀ꦤꦏꦱꦔ꧀ꦑꦴꦫꦭꦺꦴꦏꦱ꧀ꦱꦥꦶ ꦮꦱꦺꦤ ꦠꦁ ꦥꦗꦴꦤꦴꦠꦶ. ꦥꦕ꧀ꦕꦺꦏꦧꦸꦢ꧀ꦣꦴ ꦲꦶ ꦢ꧀ꦮꦺ ꦕ ꦄꦒ꧀ꦒꦱꦴꦮꦏꦴ ꦈꦥꦴꦢꦶꦤ꧀ꦤꦏꦱꦔ꧀ꦑꦴꦫꦭꦺꦴꦏꦱ꧀ꦱꦺꦮ ꦤꦴꦤꦠ꧀ꦠꦁ ꦗꦴꦤꦤ꧀ꦠꦶ, ꦠꦩ꧀ꦥꦶ ꦌꦏꦢꦺꦱꦺꦤꦺꦮ, ꦤ ꦤꦶꦥ꧀ꦥꦢꦺꦱꦠꦺꦴ. ꦄꦤꦸꦥꦴꦢꦶꦤ꧀ꦤꦏꦱꦔ꧀ꦑꦴꦫꦭꦺꦴꦏꦱ꧀ꦱ ꦥꦤ ꦤꦴꦤꦠ꧀ꦠꦁ ꦤ ꦗꦴꦤꦤ꧀ꦠꦶ. ꦨꦒꦮꦴ ꦥꦤ ‘‘ꦆꦩꦴꦪ ꦤꦴꦩ ꦣꦴꦠꦸꦪꦴ ꦈꦱ꧀ꦱꦤ꧀ꦤꦴꦪ ꦆꦩꦱ꧀ꦱ ꦫꦸꦏ꧀ꦑꦱ꧀ꦱ ꦑꦤ꧀ꦣꦺꦴ ꦱꦺꦠꦺꦴ ꦲꦺꦴꦠꦶ, ꦆꦩꦱ꧀ꦱ ꦏꦴꦭ꦳ꦺꦴ, ꦆꦩꦱ꧀ꦱ ꦩꦛ꧀ꦜꦺꦴ, ꦆꦩꦱ꧀ꦱ ꦦꦫꦸꦱꦺꦴ, ꦆꦩꦱ꧀ꦱ ꦧꦲꦭꦺꦴ, ꦆꦩꦱ꧀ꦱ ꦠꦤꦸꦠ꧀ꦠꦕꦺꦴ. ꦆꦩꦴꦪ ꦤꦴꦩ ꦣꦴꦠꦸꦪꦴ ꦈꦱ꧀ꦱꦤ꧀ꦤꦴꦪ ꦆꦩꦱ꧀ꦱ ꦫꦸꦏ꧀ꦑꦱ꧀ꦱ ꦥꦠ꧀ꦠꦁ ꦮꦟ꧀ꦟꦱꦟ꧀ꦜꦴꦤꦴꦢꦶꦮꦱꦺꦤ ꦌꦮꦫꦹꦥꦁ ꦤꦴꦩ ꦲꦺꦴꦠꦶ, ꦆꦩꦴꦪ ꦤꦴꦩ ꦣꦴꦠꦸꦪꦴ ꦈꦱ꧀ꦱꦤ꧀ꦤꦠ꧀ꦠꦴ ꦆꦩꦱ꧀ꦱ ꦫꦸꦏ꧀ꦑꦱ꧀ꦱ ꦥꦸꦥ꧀ꦦꦁ ꦤꦷꦭꦁ ꦲꦺꦴꦠꦶ ꦥꦷꦠꦏꦁ ꦭꦺꦴꦲꦶꦠꦏꦁ ꦎꦢꦴꦠꦁ ꦱꦸꦒꦤ꧀ꦣꦁ ꦢꦸꦒ꧀ꦒꦤ꧀ꦣꦁ, ꦆꦩꦴꦪ ꦤꦴꦩ ꦣꦴꦠꦸꦪꦴ ꦈꦱ꧀ꦱꦤ꧀ꦤꦴꦪ ꦦꦭꦁ ꦑꦸꦢ꧀ꦢꦏꦁ ꦩꦲꦤ꧀ꦠꦁ ꦢꦷꦓꦁ ꦮꦛ꧀ꦛꦁ ꦱꦸꦱꦟ꧀ꦜꦴꦤꦁ ꦢꦸꦱ꧀ꦱꦟ꧀ꦜꦴꦤꦁ ꦩꦛ꧀ꦜꦁ ꦦꦫꦸꦱꦁ ꦱꦸꦒꦤ꧀ꦣꦁ ꦢꦸꦒ꧀ꦒꦤ꧀ꦣꦁ ꦠꦶꦠ꧀ꦠꦁ ꦩꦣꦸꦫꦁ ꦏꦛꦸꦏꦁ ꦄꦩ꧀ꦧꦶꦭꦁ ꦏꦱꦴꦮꦁ ꦲꦺꦴꦠꦶ, ꦆꦩꦴꦪ ꦤꦴꦩ ꦣꦴꦠꦸꦪꦴ ꦈꦱ꧀ꦱꦤ꧀ꦤꦴꦪ ꦆꦩꦱ꧀ꦱ ꦫꦸꦏ꧀ꦑꦱ꧀ꦱ ꦏꦟ꧀ꦛꦏꦺꦴ ꦠꦶꦑꦶꦟꦺꦴ ꦲꦺꦴꦠꦶ, ꦄꦠꦶꦑꦶꦟꦺꦴ ꦈꦗꦸꦏꦺꦴ ꦏꦸꦛꦶꦭꦺꦴ ꦏꦟ꧀ꦲꦺꦴ ꦤꦷꦭꦺꦴ ꦎꦢꦴꦠꦺꦴ ꦲꦺꦴꦠꦷ’’ꦠꦶ ꦌꦮꦁ ꦄꦤꦸꦥꦴꦢꦶꦤ꧀ꦤꦱꦔ꧀ꦑꦴꦫꦭꦺꦴꦏꦱ꧀ꦱꦴꦥꦶ ꦮꦱꦺꦤ ꦄꦤꦺꦏꦣꦴꦠꦸꦤꦴꦤꦴꦣꦴꦠꦸꦨꦴꦮꦁ ꦗꦴꦤꦴꦠꦶ. ꦱꦧ꧀ꦧꦚ꧀ꦚꦸꦧꦸꦢ꧀ꦣꦴꦤꦁ ꦌꦮ ꦲꦶ ꦌꦠꦁ ꦧꦭꦁ, ꦤ ꦄꦚ꧀ꦚꦺꦱꦁ.

꧖꧐. ꦪꦁ ꦪꦢꦺꦮ ꦣꦴꦠꦸꦤ꧀ꦠꦶ ꦪꦁ ꦏꦶꦚ꧀ꦕꦶ ꦲꦷꦤꦴꦢꦶꦱꦨꦴꦮꦁ. ꦪꦱ꧀ꦩꦴ ꦄꦣꦶꦩꦸꦠ꧀ꦠꦶ ꦤꦴꦩ ꦄꦗ꧀ꦙꦴꦱꦪꦣꦴꦠꦸ, ꦠꦱ꧀ꦩꦴ ꦄꦣꦶꦩꦸꦕ꧀ꦕꦤꦁ ꦄꦗ꧀ꦙꦴꦱꦪꦱ꧀ꦱ ꦲꦷꦤꦴꦢꦶꦱꦨꦴꦮꦺꦤ ꦥꦮꦠ꧀ꦠꦤꦁ. ꦠꦁ ꦥꦤ ꦠꦱ꧀ꦱ ꦠꦁ ꦠꦁ ꦄꦣꦶꦛ꧀ꦜꦲꦤꦁ ꦄꦨꦶꦤꦶꦮꦶꦱꦤꦚ꧀ꦕ ꦲꦺꦴꦠꦷꦠꦶ ꦄꦴꦲ – ‘‘ꦄꦣꦶꦩꦸꦕ꧀ꦕꦤ꧀ꦠꦶ, ꦠꦁ ꦠꦢꦺꦮ ꦄꦣꦶꦛ꧀ꦜꦲꦤ꧀ꦠꦶ ꦄꦨꦶꦤꦶꦮꦶꦱꦤ꧀ꦠꦷ’’ꦠꦶ. ꦄꦣꦶꦩꦸꦕ꧀ꦕꦤꦱ꧀ꦱ ꦮꦶꦱꦪꦁ ꦮꦶꦨꦴꦒꦺꦤ ꦢꦱ꧀ꦱꦺꦠꦸꦁ ‘‘ꦏꦺꦕꦶ ꦫꦹꦥꦴꦣꦶꦩꦸꦠ꧀ꦠꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ. ꦤꦴꦤꦴꦣꦶꦩꦸꦠ꧀ꦠꦶꦏꦠꦴꦚꦴꦟꦤ꧀ꦠꦶ ꦲꦷꦤꦴꦢꦶꦮꦱꦺꦤ ꦤꦴꦤꦴꦣꦶꦩꦸꦠ꧀ꦠꦶꦏꦠꦴꦪ ꦚꦴꦟꦁ.

ꦠꦺ ꦪꦡꦴꦣꦶꦩꦸꦠ꧀ꦠꦴ ꦕ ꦨꦮꦤ꧀ꦠꦷꦠꦶ ꦠꦺ ꦲꦷꦤꦴꦣꦶꦩꦸꦠ꧀ꦠꦶꦏꦴ ꦥꦟꦷꦠꦴꦣꦶꦩꦸꦠ꧀ꦠꦶꦏꦴ ꦱꦠ꧀ꦠꦴ ꦪꦡꦴ ꦪꦡꦴ ꦄꦣꦶꦩꦸꦠ꧀ꦠꦴ ꦲꦺꦴꦤ꧀ꦠꦶ. ꦠꦁ ꦠꦁ ꦏꦩ꧀ꦩꦱꦩꦴꦢꦴꦤꦁ ꦱꦩꦴꦢꦶꦪꦤ꧀ꦠꦷꦠꦶ ꦄꦣꦶꦩꦸꦠ꧀ꦠꦶꦄꦤꦸꦫꦹꦥꦁ ꦠꦁ ꦠꦁ ꦄꦠ꧀ꦠꦤꦴ ꦱꦩꦴꦢꦶꦪꦶꦠꦧ꧀ꦧꦁ ꦏꦠ꧀ꦠꦧ꧀ꦧꦁ ꦏꦩ꧀ꦩꦁ ꦏꦫꦺꦴꦤ꧀ꦠꦶ, ꦠꦴꦤꦶ ꦏꦩ꧀ꦩꦱꦩꦴꦢꦴꦤꦴꦤꦶ ꦱꦩꦸꦛ꧀ꦜꦴꦤꦮꦱꦺꦤ ꦮꦶꦨꦗꦤ꧀ꦠꦺꦴ ‘‘ꦠꦺ ꦖꦧ꧀ꦧꦶꦣꦁ ꦏꦩ꧀ꦩ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦏꦺꦕꦶ ꦭꦺꦴꦨꦮꦱꦺꦤ ꦏꦩ꧀ꦩꦁ ꦱꦩꦴꦢꦶꦪꦤ꧀ꦠꦷꦠꦶ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ. ꦠꦁ ꦮꦶꦨꦗ꧀ꦗꦩꦴꦤꦤ꧀ꦠꦶ ꦠꦁ ꦱꦩꦸꦛ꧀ꦜꦴꦤꦮꦱꦺꦤ ꦖꦧ꧀ꦧꦶꦣꦁ ꦥꦸꦤ ꦥꦮꦠ꧀ꦠꦶꦤꦶꦮꦠ꧀ꦠꦶꦮꦱꦺꦤ ꦮꦶꦨꦗ꧀ꦗꦩꦴꦤꦁ ꦢꦸꦮꦶꦣꦁ.

ꦪꦁ ꦭꦺꦴꦨꦮꦱꦺꦤ ꦢꦺꦴꦱꦮꦱꦺꦤ ꦩꦺꦴꦲꦮꦱꦺꦤ ꦕ ꦏꦩ꧀ꦩꦁ ꦏꦫꦺꦴꦠꦷꦠꦶ ꦢꦱꦄꦏꦸꦱꦭꦏꦩ꧀ꦩꦥꦡꦏꦩ꧀ꦩꦁ ꦱꦤ꧀ꦣꦴꦪ ꦮꦢꦠꦶ. ꦠꦚ꧀ꦲꦶ ꦱꦁꦏꦶꦭꦶꦛ꧀ꦜꦠꦴꦪ ꦏꦴꦭ꦳ꦏꦤ꧀ꦠꦶ ꦏꦟ꧀ꦲꦁ. ꦄꦥꦴꦪꦺꦱꦸ ꦤꦶꦧ꧀ꦧꦠ꧀ꦠꦴꦥꦤꦠꦺꦴ ꦏꦴꦭ꦳ꦏꦮꦶꦥꦴꦏꦤ꧀ꦠꦶ ꦏꦟ꧀ꦲꦮꦶꦥꦴꦏꦁ. ꦪꦁ ꦱꦢ꧀ꦣꦴꦮꦱꦺꦤ ꦏꦩ꧀ꦩꦁ ꦏꦫꦺꦴꦠꦷꦠꦶ ꦢꦱꦏꦸꦱꦭꦏꦩ꧀ꦩꦥꦡꦏꦩ꧀ꦩꦁ. ꦠꦚ꧀ꦲꦶ ꦄꦱꦁꦏꦶꦭꦶꦛ꧀ꦜꦠ꧀ꦠꦴ ꦥꦟ꧀ꦝꦫꦤ꧀ꦠꦶ ꦱꦸꦏ꧀ꦏꦁ. ꦱꦒ꧀ꦒꦺ ꦤꦶꦧ꧀ꦧꦠ꧀ꦠꦴꦥꦤꦠꦺꦴ ꦥꦟ꧀ꦝꦫꦮꦶꦥꦴꦏꦠ꧀ꦠꦴ ꦱꦸꦏ꧀ꦏꦮꦶꦥꦴꦏꦁ. ꦪꦁ ꦭꦺꦴꦨꦮꦱꦺꦤ ꦢꦺꦴꦱꦮꦱꦺꦤ ꦩꦺꦴꦲꦮꦱꦺꦤ ꦱꦢ꧀ꦣꦴꦮꦱꦺꦤ ꦕ ꦏꦩ꧀ꦩꦁ ꦏꦫꦺꦴꦠꦶ, ꦆꦢꦁ ꦏꦟ꧀ꦲꦱꦸꦏ꧀ꦏꦤ꧀ꦠꦶ ꦮꦺꦴꦩꦶꦱ꧀ꦱꦏꦏꦩ꧀ꦩꦁ. ꦏꦟ꧀ꦲꦱꦸꦏ꧀ꦏꦮꦶꦥꦴꦏꦤ꧀ꦠꦶ ꦱꦸꦑꦢꦸꦏ꧀ꦑꦮꦶꦥꦴꦏꦁ. ꦩꦶꦱ꧀ꦱꦏꦏꦩ꧀ꦩꦚ꧀ꦲꦶ ꦏꦠ꧀ꦮꦴ ꦄꦏꦸꦱꦭꦮꦭꦺꦤ ꦠꦶꦫꦕ꧀ꦖꦴꦤꦪꦺꦴꦤꦶꦪꦁ ꦩꦔ꧀ꦒꦭꦲꦠ꧀ꦡꦶꦨꦴꦮꦁ ꦈꦥꦥꦤ꧀ꦤꦺꦴ ꦏꦸꦱꦭꦺꦤ ꦥꦮꦠ꧀ꦠꦺ ꦱꦸꦑꦁ ꦄꦤꦸꦨꦮꦠꦶ, ꦏꦸꦱꦭꦺꦤ ꦫꦴꦗꦏꦸꦭꦺ ꦤꦶꦧ꧀ꦧꦠ꧀ꦠꦺꦴꦥꦶ ꦄꦏꦸꦱꦭꦺꦤ ꦢꦸꦏ꧀ꦑꦁ ꦮꦺꦢꦪꦠꦶ. ꦪꦁ ꦮꦷꦫꦶꦪꦮꦱꦺꦤ ꦥꦚ꧀ꦚꦴꦮꦱꦺꦤ ꦕ ꦏꦩ꧀ꦩꦁ ꦏꦫꦺꦴꦠꦶ, ꦆꦢꦁ ꦏꦩ꧀ꦩꦁ ꦄꦏꦟ꧀ꦲꦁ ꦄꦱꦸꦏ꧀ꦏꦁ ꦄꦏꦟ꧀ꦲꦄꦱꦸꦏ꧀ꦏꦮꦶꦥꦴꦏꦤ꧀ꦠꦶ ꦏꦩ꧀ꦩꦏ꧀ꦑꦪꦏꦫꦴ ꦕꦠꦸꦩꦒ꧀ꦒꦕꦺꦠꦤꦴ. ꦠꦚ꧀ꦲꦶ ꦪꦢꦶ ꦏꦟ꧀ꦲꦁ ꦨꦮꦺꦪ꧀ꦪ, ꦏꦟ꧀ꦲꦮꦶꦥꦴꦏꦁ ꦢꦢꦺꦪ꧀ꦪ. ꦪꦢꦶ ꦱꦸꦏ꧀ꦏꦁ ꦨꦮꦺꦪ꧀ꦪ, ꦱꦸꦏ꧀ꦏꦈꦥꦥꦠ꧀ꦠꦶꦥꦫꦶꦪꦴꦥꦤ꧀ꦤꦁ ꦮꦶꦥꦴꦏꦁ ꦢꦢꦺꦪ꧀ꦪ. ꦈꦨꦪꦮꦶꦥꦴꦏꦱ꧀ꦱ ꦥꦤ ꦄꦥ꧀ꦥꦢꦴꦤꦠꦺꦴ ꦄꦏꦟ꧀ꦲꦄꦱꦸꦏ꧀ꦏꦮꦶꦥꦴꦏꦤ꧀ꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴ.

ꦏꦩ꧀ꦩꦱꦩꦴꦢꦴꦤꦺ ꦥꦜꦩꦁ ꦄꦕꦺꦭꦏꦥꦛꦶꦥꦢꦴ ꦏꦴꦩꦺꦱꦸ ꦥꦴꦠꦧ꧀ꦪꦠꦴ, ꦢꦸꦠꦶꦪꦁ ꦠꦶꦧ꧀ꦧꦏꦶꦭꦺꦱꦱ꧀ꦱ ꦄꦱ꧀ꦱꦸꦩꦸꦑꦱ꧀ꦱꦴꦥꦶ ꦫꦸꦢꦠꦺꦴ ꦥꦫꦶꦱꦸꦢ꧀ꦣꦧ꧀ꦫꦲ꧀ꦩꦕꦫꦶꦪꦕꦫꦟꦁ, ꦠꦠꦶꦪꦁ ꦏꦴꦩꦺꦱꦸ ꦄꦥꦴꦠꦧ꧀ꦪꦠꦴ ꦄꦕꦺꦭꦏꦥꦛꦶꦥꦢꦴ, ꦕꦠꦸꦠ꧀ꦡꦁ ꦥꦕ꧀ꦕꦪꦺ ꦄꦭꦨꦩꦴꦤꦱ꧀ꦱꦴꦥꦶ ꦙꦴꦤꦮꦶꦥꦱ꧀ꦱꦤꦴꦱꦸꦑꦱꦩꦔ꧀ꦒꦶꦤꦺꦴ ꦱꦴꦱꦤꦧ꧀ꦫꦲ꧀ꦩꦕꦫꦶꦪꦕꦫꦟꦁ. ꦪꦁ ꦌꦮꦁ ꦗꦴꦠꦶꦪꦁ ꦏꦩ꧀ꦩꦱꦩꦴꦢꦴꦤꦤ꧀ꦠꦶ ꦪꦁ ꦄꦚ꧀ꦚꦩ꧀ꦥꦶ ꦌꦮꦁꦥꦏꦴꦫꦁ ꦏꦩ꧀ꦩꦁ. ꦆꦩꦶꦤꦴ ꦥꦸꦒ꧀ꦒꦭꦺꦤꦴꦠꦶꦄꦴꦢꦶ ꦠꦱ꧀ꦩꦶꦁ ꦏꦩ꧀ꦩꦮꦶꦥꦴꦏꦺ ꦨꦒꦮꦠꦺꦴ ꦚꦴꦟꦱ꧀ꦱ ꦥꦮꦠ꧀ꦠꦤꦴꦏꦴꦫꦢꦱ꧀ꦱꦤꦁ. ꦠꦠ꧀ꦡ ꦈꦥꦕꦶꦠꦤ꧀ꦠꦶ ꦪꦡꦴ ꦏꦠꦁ ꦏꦩ꧀ꦩꦁ ꦦꦭꦢꦴꦤꦱꦩꦠ꧀ꦡꦁ ꦲꦺꦴꦠꦶ, ꦠꦡꦴ ꦏꦠꦁ ꦈꦥꦕꦶꦠꦁ. ꦄꦮꦶꦥꦏ꧀ꦏꦤ꧀ꦠꦶ ꦤ ꦮꦶꦥꦏ꧀ꦏꦮꦶꦥꦴꦏꦁ. ꦮꦶꦥꦴꦏꦴꦪ ꦥꦕ꧀ꦕꦸꦥꦛ꧀ꦜꦶꦠꦤ꧀ꦠꦶ ꦮꦶꦥꦴꦏꦢꦴꦤꦴꦪ ꦏꦠꦺꦴꦏꦴꦱꦁ. ꦤ ꦕ ꦨꦧ꧀ꦧꦺꦴ ꦄꦨꦶꦤꦶꦧ꧀ꦧꦶꦣꦴ ꦒꦤ꧀ꦠꦸꦤ꧀ꦠꦶ ꦏꦶꦭꦺꦱꦴꦨꦶꦱꦔ꧀ꦑꦴꦫꦴꦤꦁ ꦄꦨꦶꦤꦶꦧ꧀ꦧꦶꦗ꧀ꦙꦤꦠꦺꦴ ꦄꦨꦶꦤꦶꦧ꧀ꦧꦶꦣꦴꦱꦔ꧀ꦑꦴꦠꦁ ꦄꦫꦶꦪꦩꦒ꧀ꦒꦁ ꦄꦣꦶꦒꦤ꧀ꦠꦸꦁ ꦤ ꦕ ꦨꦧ꧀ꦧꦺꦴ. ꦠꦁ ꦨꦒꦮꦴ ꦤ ꦎꦮꦢꦠꦷꦠꦶ ꦠꦁ ꦮꦶꦥꦴꦏꦴꦮꦫꦟꦺꦤ ꦤꦶꦮꦸꦠꦁ ꦥꦸꦒ꧀ꦒꦭꦁ ꦨꦒꦮꦴ ꦱꦕ꧀ꦕꦥꦛꦶꦮꦺꦣꦁ ꦥꦸꦫꦏ꧀ꦑꦠ꧀ꦮꦴ ꦤ ꦎꦮꦢꦠꦶ, ꦮꦴꦱꦤꦠ꧀ꦡꦁ ꦥꦤ ꦠꦴꦢꦶꦱꦴꦤꦩ꧀ꦥꦶ ꦣꦩ꧀ꦩꦁ ꦢꦺꦱꦺꦠꦶ ꦌꦮ, ꦄꦗꦴꦠꦱꦠ꧀ꦠꦸꦄꦴꦢꦷꦤꦁ ꦮꦶꦪ.

ꦈꦥꦕꦶꦠꦤ꧀ꦠꦶ ꦏꦴꦠꦸꦁ ꦄꦴꦫꦢ꧀ꦣꦁ. ꦠꦺꦤꦺꦮꦴꦲ – ‘‘ꦤ ꦕ ꦠꦴꦮ ꦥꦴꦫꦶꦥꦹꦫꦶꦁ ꦒꦠ’’ꦤ꧀ꦠꦶ. ꦠꦺꦤ ꦩꦶꦕ꧀ꦖꦠ꧀ꦠꦤꦶꦪꦴꦩꦱ꧀ꦱ ꦄꦱꦩꦠ꧀ꦡꦠꦁ ꦢꦱ꧀ꦱꦺꦠꦶ. ꦥꦸꦫꦴ ꦥꦴꦫꦶꦥꦹꦫꦶꦁ ꦒꦕ꧀ꦖꦠꦷꦠꦶ ꦥꦴꦫꦶꦥꦹꦫꦶꦁ ꦦꦭꦤꦶꦥ꧀ꦦꦴꦢꦤꦱꦩꦠ꧀ꦡꦠꦁ ꦒꦕ꧀ꦖꦠꦶ ꦥꦸꦫꦴ ꦄꦣꦶꦒꦕ꧀ꦖꦺꦪ꧀ꦪ. ꦩꦶꦕ꧀ꦖꦠ꧀ꦠꦤꦶꦪꦠꦠꦴꦪ ꦱꦗ꧀ꦗꦸꦏꦁ ꦦꦭꦣꦩ꧀ꦩꦱ꧀ꦱ ꦄꦨꦴꦗꦤꦨꦴꦮꦁ ꦤꦶꦧ꧀ꦧꦠ꧀ꦠꦪꦠꦶ ꦥꦸꦫꦴ. ꦠꦺꦤꦺꦮꦴꦲ – ‘‘ꦥꦸꦫꦴ ꦮꦺꦤꦺꦪ꧀ꦪꦠ꧀ꦠꦁ ꦱꦩꦠꦶꦏ꧀ꦏꦩꦠꦷ’’ꦠꦶ. ‘‘ꦥꦸꦫꦴ ꦄꦤꦶꦪꦠꦁ ꦱꦩꦠꦶꦏ꧀ꦏꦩꦠꦷ’’ꦠꦶꦥꦶ ꦥꦴꦜꦺꦴ, ꦱꦺꦴ ꦌꦮꦠ꧀ꦡꦺꦴ. ꦄꦱꦩꦠ꧀ꦠꦺꦠꦶ ꦏꦩ꧀ꦩꦺ ꦄꦱꦩ꧀ꦥꦸꦟ꧀ꦟꦺ, ꦠꦺ ꦄꦱꦩ꧀ꦥꦸꦟ꧀ꦟꦺ ꦮꦴ.

꧖꧑. ꦌꦮꦁ ꦏꦶꦭꦺꦱꦤ꧀ꦠꦫꦴꦪꦩꦶꦱ꧀ꦱꦏꦁ ꦏꦩ꧀ꦩꦤ꧀ꦠꦫꦴꦪꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦄꦩꦶꦱ꧀ꦱꦏꦁ ꦏꦩ꧀ꦩꦤ꧀ꦠꦫꦴꦪꦁ ꦢꦱ꧀ꦱꦺꦠꦸꦁ ‘‘ꦆꦩꦱ꧀ꦱ ꦕ ꦥꦸꦒ꧀ꦒꦭꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦁ ꦮꦸꦠ꧀ꦠꦤꦪꦩꦺꦮ.

ꦱꦧ꧀ꦧꦺꦱꦤ꧀ꦠꦶ ꦆꦩꦱ꧀ꦩꦶꦁ ꦧꦭꦤꦶꦢ꧀ꦢꦺꦱꦺ ꦮꦸꦠ꧀ꦠꦴꦤꦁ ꦱꦧ꧀ꦧꦺꦱꦁ ꦏꦩ꧀ꦩꦴꦤꦁ. ꦩꦸꦢꦸꦩꦗ꧀ꦙꦴꦣꦶꦩꦠ꧀ꦠꦠꦴꦠꦶ ꦩꦸꦢꦸꦩꦗ꧀ꦙꦠꦶꦧ꧀ꦧꦨꦴꦮꦺꦴ. ꦏꦩ꧀ꦩꦴꦤꦚ꧀ꦲꦶ ꦩꦸꦢꦸꦄꦴꦢꦶꦨꦴꦮꦺꦤ ꦠꦁꦮꦶꦥꦴꦏꦴꦤꦁ ꦩꦸꦢꦸꦩꦗ꧀ꦙꦠꦶꦏ꧀ꦑꦨꦴꦮꦺꦴ ꦮꦶꦚ꧀ꦚꦴꦪꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦢꦶꦛ꧀ꦜꦣꦩ꧀ꦩꦮꦺꦢꦤꦷꦪꦤ꧀ꦠꦶꦄꦴꦢꦷꦱꦸ ꦢꦶꦛ꧀ꦜꦣꦩ꧀ꦩꦺ ꦆꦩꦱ꧀ꦩꦶꦁ ꦄꦠ꧀ꦠꦨꦴꦮꦺ ꦮꦺꦢꦶꦠꦧ꧀ꦧꦁ ꦦꦭꦁ ꦢꦶꦛ꧀ꦜꦣꦩ꧀ꦩꦮꦺꦢꦤꦷꦪꦁ. ꦈꦥꦥꦗ꧀ꦗꦺ ꦄꦤꦤ꧀ꦠꦫꦺ ꦄꦠ꧀ꦠꦨꦴꦮꦺ ꦮꦺꦢꦶꦠꦧ꧀ꦧꦁ ꦦꦭꦁ ꦈꦥꦥꦗ꧀ꦗꦮꦺꦢꦤꦷꦪꦁ. ꦄꦥꦫꦱ꧀ꦩꦶꦁ ꦄꦠ꧀ꦠꦨꦴꦮꦺ ꦆꦠꦺꦴ ꦄꦚ꧀ꦚꦱ꧀ꦩꦶꦁ ꦪꦱ꧀ꦩꦶꦁ ꦏꦱ꧀ꦩꦶꦚ꧀ꦕꦶ ꦄꦠ꧀ꦠꦨꦴꦮꦺ ꦮꦺꦢꦶꦠꦧ꧀ꦧꦁ ꦦꦭꦁ ꦄꦥꦫꦴꦥꦫꦶꦪꦮꦺꦢꦤꦷꦪꦁ. ꦌꦏꦗꦮꦤꦮꦴꦫꦱ꧀ꦩꦶꦚ꧀ꦲꦶ ꦱꦠ꧀ꦠꦱꦸ ꦕꦺꦠꦤꦴꦱꦸ ꦥꦜꦩꦕꦺꦠꦤꦴ ꦢꦶꦛ꧀ꦜꦣꦩ꧀ꦩꦮꦺꦢꦤꦷꦪꦁ ꦤꦴꦩ. ꦥꦫꦶꦪꦺꦴꦱꦴꦤꦕꦺꦠꦤꦴ ꦈꦥꦥꦗ꧀ꦗꦮꦺꦢꦤꦷꦪꦁ ꦤꦴꦩ. ꦩꦗ꧀ꦙꦺ ꦥꦚ꧀ꦕ ꦕꦺꦠꦤꦴ ꦄꦥꦫꦴꦥꦫꦶꦪꦮꦺꦢꦤꦷꦪꦁ ꦤꦴꦩ. ꦮꦶꦥꦴꦏꦮꦺꦩꦠ꧀ꦠꦠꦴꦚꦴꦟꦤ꧀ꦠꦶ ꦮꦶꦥꦴꦏꦮꦺꦩꦠ꧀ꦠꦠꦴꦪ ꦮꦶꦥꦴꦏꦮꦶꦱꦺꦱꦺ ꦚꦴꦟꦁ. ꦆꦩꦱ꧀ꦱ ꦥꦤ ꦏꦩ꧀ꦩꦮꦶꦥꦴꦏꦱ꧀ꦱ ꦒꦠꦶꦱꦩ꧀ꦥꦠ꧀ꦠꦶ ꦒꦠꦶꦮꦶꦥꦠ꧀ꦠꦶ, ꦈꦥꦣꦶꦱꦩ꧀ꦥꦠ꧀ꦠꦶ ꦈꦥꦣꦶꦮꦶꦥꦠ꧀ꦠꦶ, ꦏꦴꦭꦱꦩ꧀ꦥꦠ꧀ꦠꦶ ꦏꦴꦭꦮꦶꦥꦠ꧀ꦠꦶ, ꦥꦪꦺꦴꦒꦱꦩ꧀ꦥꦠ꧀ꦠꦶ ꦥꦪꦺꦴꦒꦮꦶꦥꦠ꧀ꦠꦶꦪꦺꦴ ꦏꦴꦫꦟꦁ. ꦱꦺꦴ ꦕ ꦤꦺꦱꦁ ꦏꦴꦫꦟꦨꦴꦮꦺꦴ ‘‘ꦄꦠ꧀ꦡꦺꦏꦕ꧀ꦕꦴꦤꦶ ꦥꦴꦥꦏꦴꦤꦶ ꦏꦩ꧀ꦩꦱꦩꦴꦢꦴꦤꦴꦤꦶ ꦒꦠꦶꦱꦩ꧀ꦥꦠ꧀ꦠꦶꦥꦛꦶꦧꦴꦭ꦳꧀ꦲꦴꦤꦶ ꦤ ꦮꦶꦥꦕ꧀ꦕꦤ꧀ꦠꦷ’’ꦠꦶꦄꦴꦢꦶꦥꦴꦭ꦳ꦶꦮꦱꦺꦤ (ꦮꦶꦨ. ꧘꧑꧐) ꦮꦺꦢꦶꦠꦧ꧀ꦧꦺꦴ.

꧖꧒. ꦄꦤꦤ꧀ꦠꦫꦧꦭꦤꦶꦢ꧀ꦢꦺꦱꦺ ꦮꦸꦠ꧀ꦠꦏꦩ꧀ꦩꦱꦩꦴꦢꦴꦤꦥꦢꦺꦤꦺꦮ ꦙꦴꦤꦴꦢꦷꦤꦶ ꦱꦔ꧀ꦒꦲꦺꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦠꦡꦴ ꦱꦩꦴꦢꦶꦤ꧀ꦤꦴꦤꦁ ꦏꦩ꧀ꦩꦴꦤ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦱꦺꦏ꧀ꦑꦥꦸꦡꦸꦗ꧀ꦗꦤꦱꦤ꧀ꦠꦴꦤꦺꦱꦸ ꦥꦮꦠ꧀ꦠꦴꦤꦶ ꦙꦴꦤꦴꦢꦷꦤꦶ ꦏꦩ꧀ꦩꦁ ꦲꦺꦴꦤ꧀ꦠꦶ. ꦠꦠ꧀ꦡ ꦠꦡꦴ ꦱꦩꦴꦢꦶꦤ꧀ꦤꦴꦤꦤ꧀ꦠꦶ ‘‘ꦱꦸꦏ꧀ꦏꦁ ꦱꦸꦏ꧀ꦏꦮꦶꦥꦴꦏꦁ ꦥꦕ꧀ꦕꦸꦥ꧀ꦥꦤ꧀ꦤꦱꦸꦑꦁ, ꦄꦴꦪꦠꦶꦁ ꦱꦸꦑꦮꦶꦥꦴꦏ’’ꦤ꧀ꦠꦶ ꦌꦮꦩꦴꦢꦶꦥ꧀ꦥꦏꦴꦫꦺꦲꦶ ꦱꦩꦴꦢꦶꦤ꧀ꦤꦺꦱꦸ ꦏꦩ꧀ꦩꦺꦱꦸ. ꦱꦁꦏꦶꦭꦺꦱꦺꦴꦠꦶ ꦥꦛꦶꦥꦏ꧀ꦑꦣꦩ꧀ꦩꦮꦱꦺꦤ ꦏꦶꦭꦶꦛ꧀ꦜꦨꦴꦮꦺꦴ. ꦮꦺꦴꦢꦴꦤꦁ ꦥꦛꦶꦥꦏ꧀ꦑꦣꦩ꧀ꦩꦺꦲꦶ ꦮꦶꦱꦸꦗ꧀ꦙꦤꦁ. ꦮꦸꦛ꧀ꦜꦴꦤꦁ ꦥꦒꦸꦟꦮꦺꦴꦢꦴꦤꦁ ꦨꦮꦔ꧀ꦒꦮꦸꦛ꧀ꦜꦴꦤꦚ꧀ꦕ. ꦌꦮꦁ ꦱꦁꦏꦶꦭꦶꦱ꧀ꦱꦠꦷꦠꦶꦄꦴꦢꦷꦱꦸ ꦄꦪꦩꦺꦮꦠ꧀ꦡꦺꦴ – ꦆꦩꦶꦤꦴ ꦄꦴꦏꦴꦫꦺꦤ ꦙꦴꦤꦴꦢꦶ ꦱꦁꦏꦶꦭꦶꦱ꧀ꦱꦠꦶ ꦮꦺꦴꦢꦴꦪꦠꦶ ꦮꦸꦛ꧀ꦜꦲꦠꦷꦠꦶ ꦗꦴꦤꦤꦚꦴꦟꦁ ꦨꦒꦮꦠꦺꦴ ꦄꦤꦴꦮꦫꦟꦚꦴꦟꦁ, ꦤ ꦠꦱ꧀ꦱ ꦄꦴꦮꦫꦟꦁ ꦄꦠ꧀ꦡꦷꦠꦶ.

ꦏꦠꦶ ꦙꦴꦤꦴꦤꦷꦠꦶꦄꦴꦢꦶ ꦙꦴꦤꦴꦢꦪꦺꦴ ꦮꦶꦨꦴꦒꦺꦤ ꦢꦱ꧀ꦱꦺꦠꦸꦁ ꦄꦴꦫꦢ꧀ꦣꦁ. ꦕꦠ꧀ꦠꦴꦫꦶ ꦙꦴꦤꦴꦤꦷꦠꦶ ꦕꦠꦸꦏ꧀ꦏꦤꦪꦮꦱꦺꦤ ꦫꦹꦥꦴꦮꦕꦫꦗ꧀ꦙꦴꦤꦴꦤꦶ ꦱꦤ꧀ꦣꦴꦪꦴꦲ. ꦌꦏꦴꦢꦱꦴꦠꦶ ‘‘ꦫꦹꦥꦷ ꦫꦹꦥꦴꦤꦶ ꦥꦱ꧀ꦱꦠꦷ’’ꦠꦶꦄꦴꦢꦶꦤꦴ (ꦢꦷ. ꦤꦶ. ꧒.꧑꧒꧙, ꧑꧗꧔; ꧓.꧓꧓꧙, ꧓꧕꧘; ꦩ. ꦤꦶ. ꧒.꧒꧔꧘; ꧓.꧓꧑꧒) ꦄꦛ꧀ꦜꦤ꧀ꦤꦁ ꦠꦶꦟ꧀ꦟꦚ꧀ꦕ ꦱꦸꦚ꧀ꦚꦠꦮꦶꦩꦺꦴꦏ꧀ꦑꦴꦢꦷꦤꦁ ꦮꦱꦺꦤ ꦮꦸꦠ꧀ꦠꦁ. ꦄꦛ꧀ꦜꦴꦠꦶ ꦠꦺꦱꦸ ꦜꦥꦺꦠ꧀ꦮꦴ ꦭꦺꦴꦏꦸꦠ꧀ꦠꦫꦺ ꦮꦶꦩꦺꦴꦏ꧀ꦑꦺ ꦄꦛ꧀ꦜ. ꦱꦠ꧀ꦠꦴꦠꦶ ꦠꦺꦱꦸ ꦌꦮ ꦤꦶꦫꦺꦴꦣꦱꦩꦴꦥꦠ꧀ꦠꦶꦁ ꦜꦥꦺꦠ꧀ꦮꦴ ꦱꦠ꧀ꦠ. ꦠꦪꦺꦴꦠꦶ ꦱꦸꦠ꧀ꦠꦤ꧀ꦠꦥꦫꦶꦪꦴꦪꦺꦤ ꦱꦸꦚ꧀ꦚꦠꦮꦶꦩꦺꦴꦏ꧀ꦑꦴꦢꦪꦺꦴ ꦠꦪꦺꦴ. ꦢ꧀ꦮꦺꦠꦶ ꦄꦨꦶꦣꦩ꧀ꦩꦥꦫꦶꦪꦴꦪꦺꦤ ꦄꦤꦶꦩꦶꦠ꧀ꦠꦮꦶꦩꦺꦴꦏ꧀ꦑꦱ꧀ꦱꦴꦱꦩ꧀ꦨꦮꦠꦺꦴ ꦄꦮꦱꦺꦱꦴ ꦢ꧀ꦮꦺ. ꦌꦠ꧀ꦡ ꦕ ꦥꦛꦶꦥꦴꦛꦶꦪꦴ ꦱꦠ꧀ꦠ ꦄꦥ꧀ꦥꦶꦠꦥ꧀ꦥꦶꦠꦏ꧀ꦑꦟꦺ ꦮꦶꦏ꧀ꦑꦩ꧀ꦨꦤꦮꦱꦺꦤ ꦥꦕ꧀ꦕꦤꦷꦏꦣꦩ꧀ꦩꦺꦲꦶ ꦮꦶꦩꦸꦕ꧀ꦕꦤꦠꦺꦴ, ꦄꦴꦫꦩ꧀ꦩꦟꦺ ꦄꦣꦶꦩꦸꦕ꧀ꦕꦤꦠꦺꦴ ꦕ ꦮꦶꦩꦺꦴꦏ꧀ꦑꦴ. ꦤꦶꦫꦺꦴꦣꦱꦩꦴꦥꦠ꧀ꦠꦶ ꦥꦤ ꦱꦧ꧀ꦧꦱꦺꦴ ꦱꦚ꧀ꦚꦴꦮꦺꦢꦪꦶꦠꦺꦲꦶ ꦮꦶꦩꦸꦠ꧀ꦠꦠ꧀ꦠꦴ ꦄꦥꦒꦩꦮꦶꦩꦺꦴꦏ꧀ꦑꦺꦴ ꦤꦴꦩ. ꦭꦺꦴꦏꦸꦠ꧀ꦠꦫꦴ ꦕ ꦠꦁꦠꦁꦩꦒ꧀ꦒꦮꦗ꧀ꦙꦏꦶꦭꦺꦱꦺꦲꦶ ꦱꦩꦸꦕ꧀ꦖꦺꦢꦮꦱꦺꦤ ꦮꦶꦩꦸꦠ꧀ꦠꦠ꧀ꦠꦴ ꦮꦶꦩꦺꦴꦏ꧀ꦑꦺꦴꦠꦶ ꦄꦪꦁ ꦮꦶꦱꦺꦱꦺꦴ ꦮꦺꦢꦶꦠꦧ꧀ꦧꦺꦴ.

ꦱꦩꦴꦣꦷꦱꦸ ꦕꦠꦸꦏ꧀ꦏꦤꦪꦥꦚ꧀ꦕꦏꦤꦪꦺꦱꦸ ꦥꦜꦩꦗ꧀ꦙꦴꦤꦱꦩꦴꦣꦶ ꦱꦮꦶꦠꦏ꧀ꦏꦺꦴ ꦱꦮꦶꦕꦴꦫꦺꦴ ꦱꦩꦴꦣꦶ ꦤꦴꦩ. ꦥꦚ꧀ꦕꦏꦤꦪꦺ ꦢꦸꦠꦶꦪꦗ꧀ꦙꦴꦤꦱꦩꦴꦣꦶ ꦄꦮꦶꦠꦏ꧀ꦏꦺꦴ ꦮꦶꦕꦴꦫꦩꦠ꧀ꦠꦺꦴ ꦱꦩꦴꦣꦶ ꦤꦴꦩ. ꦕꦠꦸꦏ꧀ꦏꦤꦪꦺ ꦥꦚ꧀ꦕꦏꦤꦪꦺꦥꦶ ꦱꦺꦱꦙꦴꦤꦺꦱꦸ ꦱꦩꦴꦣꦶ ꦄꦮꦶꦠꦏ꧀ꦏꦺꦴ ꦄꦮꦶꦕꦴꦫꦺꦴ ꦱꦩꦴꦣꦶ ꦤꦴꦩ.

ꦱꦩꦴꦥꦠ꧀ꦠꦷꦱꦸ ꦥꦛꦶꦥꦴꦛꦶꦪꦴ ꦄꦛ꧀ꦜꦤ꧀ꦤꦁ ꦱꦩꦴꦥꦠ꧀ꦠꦷꦤꦁ ‘‘ꦱꦩꦴꦣꦷ’’ꦠꦶꦥꦶ ꦤꦴꦩꦁ ‘‘ꦱꦩꦴꦥꦠ꧀ꦠꦷ’’ꦠꦶꦥꦶ. ꦏꦱ꧀ꦩꦴ? ꦕꦶꦠ꧀ꦠꦺꦏꦒ꧀ꦒꦠꦴꦱꦧ꧀ꦨꦴꦮꦠꦺꦴ. ꦤꦶꦫꦺꦴꦣꦱꦩꦴꦥꦠ꧀ꦠꦶꦪꦴ ꦠꦢꦨꦴꦮꦠꦺꦴ ꦤ ‘‘ꦱꦩꦴꦣꦷ’’ꦠꦶ ꦤꦴꦩꦁ. ꦱꦚ꧀ꦚꦴꦱꦩꦴꦥꦠ꧀ꦠꦶꦄꦴꦢꦶ ꦲꦺꦛ꧀ꦜꦴ ꦮꦸꦠ꧀ꦠꦩꦺꦮ.

ꦲꦴꦤꦨꦴꦒꦶꦪꦺꦴ ꦱꦩꦴꦣꦷꦠꦶ ꦄꦥ꧀ꦥꦒꦸꦟꦺꦲꦶ ꦥꦜꦩꦗ꧀ꦙꦴꦤꦴꦢꦷꦲꦶ ꦮꦸꦛ꧀ꦜꦶꦠꦱ꧀ꦱ ꦱꦚ꧀ꦚꦴꦩꦤꦱꦶꦏꦴꦫꦴꦤꦁ ꦏꦴꦩꦴꦢꦶꦄꦤꦸꦥꦏ꧀ꦑꦤ꧀ꦢꦤꦁ ꦥꦜꦩꦗ꧀ꦙꦴꦤꦴꦢꦶꦱꦩꦴꦣꦶꦱ꧀ꦱ ꦲꦴꦤꦨꦴꦒꦶꦪꦠꦴ. ‘‘ꦥꦜꦩꦗ꧀ꦙꦴꦤꦱ꧀ꦱ ꦏꦴꦩꦫꦴꦒꦧ꧀ꦪꦴꦥꦴꦢꦴ ꦱꦁꦏꦶꦭꦺꦱꦺꦴ’’ꦠꦶ ꦮꦸꦠ꧀ꦠꦠ꧀ꦠꦴ ꦢꦸꦠꦶꦪꦗ꧀ꦙꦴꦤꦴꦢꦶꦮꦱꦺꦤ ꦪꦺꦴꦗꦺꦠꦧ꧀ꦧꦁ. ꦏꦸꦏ꧀ꦏꦸꦛꦁ ꦮꦸꦕ꧀ꦕꦠꦶ ꦄꦗꦚ꧀ꦚꦴꦗꦶꦒꦸꦕ꧀ꦖꦤꦩꦸꦑꦺꦤ ꦠꦥ꧀ꦥꦫꦩꦠꦴ. ꦏꦸꦏ꧀ꦏꦸꦛꦙꦴꦪꦷꦠꦶ ꦥꦸꦒ꧀ꦒꦭꦴꦣꦶꦛ꧀ꦜꦴꦤꦺꦤ ꦙꦴꦤꦴꦤꦶ ꦮꦸꦠ꧀ꦠꦴꦤꦶ, ꦢ꧀ꦮꦺ ꦥꦜꦩꦢꦸꦠꦶꦪꦗ꧀ꦙꦴꦤꦴꦤꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦪꦺꦴ ꦥꦜꦩꦁ ꦢꦸꦠꦶꦪꦁ ꦮꦴ ꦙꦴꦤꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ‘‘ꦄꦭꦩꦺꦠ꧀ꦠꦴꦮꦠꦴ’’ꦠꦶ ꦱꦔ꧀ꦏꦺꦴꦕꦁ ꦄꦴꦥꦗ꧀ꦗꦠꦶ, ꦈꦠ꧀ꦠꦫꦶ ꦤ ꦮꦴꦪꦩꦠꦶ, ꦠꦱ꧀ꦱ ꦠꦴꦤꦶ ꦙꦴꦤꦴꦤꦶ ꦕꦠ꧀ꦠꦴꦫꦶꦥꦶ ‘‘ꦏꦸꦏ꧀ꦏꦸꦛꦙꦴꦤꦴꦤꦷ’’ꦠꦶ ꦮꦸꦕ꧀ꦕꦤ꧀ꦠꦶ, ꦠꦁꦱꦩꦔ꧀ꦒꦶꦤꦺꦴ ꦕ ꦏꦸꦏ꧀ꦏꦸꦛꦙꦴꦪꦷ. ꦠꦺꦱꦸ ꦥꦸꦫꦶꦩꦴꦤꦶ ꦢ꧀ꦮꦺ ꦄꦴꦱꦤ꧀ꦤꦧꦭꦮꦥꦕ꧀ꦕꦠ꧀ꦡꦶꦏꦠ꧀ꦠꦴ ꦮꦶꦱꦺꦱꦨꦴꦒꦶꦪꦠꦴꦨꦴꦮꦠꦺꦴ ꦕ ꦱꦁꦏꦶꦭꦺꦱꦨꦴꦮꦺꦤ ꦮꦸꦠ꧀ꦠꦴꦤꦶ. ꦆꦠꦫꦴꦤꦶ ꦥꦤ ꦮꦶꦱꦺꦱꦨꦴꦒꦶꦪꦠꦴꦨꦴꦮꦺꦥꦶ ꦩꦤ꧀ꦢꦥꦕ꧀ꦕꦠ꧀ꦡꦶꦏꦠ꧀ꦠꦴ ꦮꦺꦴꦢꦴꦤꦨꦴꦮꦺꦤ ꦮꦸꦠ꧀ꦠꦴꦤꦷꦠꦶ ꦢꦛ꧀ꦜꦧ꧀ꦧꦁ.

ꦮꦶꦱꦺꦱꦨꦴꦒꦶꦪꦺꦴ ꦱꦩꦴꦣꦷꦠꦶ ꦥꦒꦸꦟꦺꦲꦶ ꦥꦜꦩꦗ꧀ꦙꦴꦤꦴꦢꦷꦲꦶ ꦮꦸꦛ꧀ꦜꦶꦠꦱ꧀ꦱ ꦱꦚ꧀ꦚꦴꦩꦤꦱꦶꦏꦴꦫꦴꦤꦁ ꦢꦸꦠꦶꦪꦗ꧀ꦙꦴꦤꦴꦢꦶꦥꦏ꧀ꦑꦤ꧀ꦢꦤꦁ, ꦥꦒꦸꦟꦮꦺꦴꦢꦴꦤꦁ ꦨꦮꦔ꧀ꦒꦮꦸꦛ꧀ꦜꦴꦤꦚ꧀ꦕ ‘‘ꦮꦸꦛ꧀ꦜꦴꦤ’’ꦤ꧀ꦠꦶ ꦮꦸꦠ꧀ꦠꦁ. ꦲꦺꦛ꧀ꦜꦶꦩꦁ ꦲꦺꦛ꧀ꦜꦶꦩꦚ꧀ꦲꦶ ꦥꦒꦸꦟꦗ꧀ꦙꦴꦤꦁ ꦈꦥꦫꦶꦩꦱ꧀ꦱ ꦈꦥꦫꦶꦩꦱ꧀ꦱ ꦥꦢꦛ꧀ꦜꦴꦤꦁ ꦲꦺꦴꦠꦶ. ꦠꦱ꧀ꦩꦴ ꦮꦺꦴꦢꦴꦤꦩ꧀ꦥꦶ ‘‘ꦮꦸꦛ꧀ꦜꦴꦤ’’ꦤ꧀ꦠꦶ ꦮꦸꦠ꧀ꦠꦁ. ꦨꦮꦔ꧀ꦒꦮꦱꦺꦤ ꦱꦧ꧀ꦧꦙꦴꦤꦺꦲꦶ ꦮꦸꦛ꧀ꦜꦴꦤꦁ ꦲꦺꦴꦠꦷꦠꦶ ꦨꦮꦔ꧀ꦒꦚ꧀ꦕ ꦮꦺꦴꦢꦴꦤꦁ ꦮꦸꦛ꧀ꦜꦴꦤꦁ. ꦪꦱ꧀ꦩꦴ ꦥꦤ ꦮꦸꦛ꧀ꦜꦴꦤꦮꦱꦶꦨꦴꦮꦺꦤ ꦪꦡꦴꦥꦫꦶꦕ꧀ꦖꦶꦤ꧀ꦤꦏꦴꦭꦁ ꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦤꦁ ꦲꦺꦴꦠꦶ, ꦠꦱ꧀ꦩꦴ ꦱꦩꦴꦥꦠ꧀ꦠꦶꦮꦸꦛ꧀ꦜꦴꦤꦏꦺꦴꦱꦭ꧀ꦭꦁ ꦆꦣ ‘‘ꦮꦸꦛ꧀ꦜꦴꦤ’’ꦤ꧀ꦠꦶ ꦮꦸꦠ꧀ꦠꦁ.

꧖꧓. ꦠꦱ꧀ꦱꦺꦮ ꦱꦩꦴꦣꦶꦱ꧀ꦱꦴꦠꦶ ꦠꦱ꧀ꦱ ꦄꦤꦤ꧀ꦠꦫꦧꦭꦤꦶꦢ꧀ꦢꦺꦱꦺ ꦙꦴꦤꦴꦢꦶꦥꦫꦶꦪꦴꦪꦺꦲꦶ ꦮꦸꦠ꧀ꦠꦱꦩꦴꦣꦶꦱ꧀ꦱ. ꦥꦫꦶꦮꦴꦫꦴꦠꦶ ꦥꦫꦶꦏ꧀ꦑꦴꦫꦴ. ꦆꦤ꧀ꦢ꧀ꦫꦶꦪꦴꦤꦷꦠꦶ ꦱꦢ꧀ꦣꦴꦱꦠꦶꦥꦚ꧀ꦚꦶꦤ꧀ꦢ꧀ꦫꦶꦪꦴꦤꦶ. ꦧꦭꦴꦤꦷꦠꦶ ꦲꦶꦫꦺꦴꦠ꧀ꦠꦥ꧀ꦥꦺꦲꦶ ꦱꦢ꧀ꦣꦶꦁ ꦠꦴꦤꦶꦪꦺꦮ. ꦮꦷꦫꦶꦪꦱ꧀ꦱ ꦮꦶꦱꦸꦁ ꦒꦲꦟꦁ ꦧꦭꦴꦤꦁ ꦧꦲꦹꦥꦏꦴꦫꦢꦱ꧀ꦱꦤꦠ꧀ꦡꦁ. ꦮꦷꦫꦶꦪꦸꦥꦠ꧀ꦡꦩ꧀ꦨꦺꦤ ꦲꦶ ꦱꦢ꧀ꦣꦴꦢꦪꦺꦴ ꦥꦛꦶꦥꦏ꧀ꦑꦺꦤ ꦄꦏꦩ꧀ꦥꦤꦷꦪꦴ ꦲꦺꦴꦤ꧀ꦠꦶ. ꦠꦺꦤꦺꦮꦴꦲ – ‘‘ꦮꦷꦫꦶꦪꦮꦱꦺꦤ ꦧꦭꦴꦤꦶ ꦨꦮꦤ꧀ꦠꦷ’’ꦠꦶ. ꦠꦺꦱꦤ꧀ꦠꦶ ꦆꦤ꧀ꦢ꧀ꦫꦶꦪꦴꦤꦁ. ꦩꦸꦢꦸꦩꦗ꧀ꦙꦴꦣꦶꦩꦠ꧀ꦠꦠꦴꦠꦶ ꦄꦮꦶꦱꦢꦁ ꦩꦸꦢꦸ. ꦤꦴꦠꦶꦮꦶꦱꦢꦁ ꦩꦗ꧀ꦙꦁ. ꦄꦠꦶꦮꦶꦱꦢꦁ ꦄꦣꦶꦩꦠ꧀ꦠꦁ ꦧꦭꦮꦁ ‘‘ꦠꦶꦏ꧀ꦑ’’ꦤ꧀ꦠꦶ ꦮꦸꦕ꧀ꦕꦠꦶ.

ꦮꦺꦤꦺꦪ꧀ꦪꦴꦤꦁ ꦆꦤ꧀ꦢ꧀ꦫꦶꦪꦴꦤꦸꦫꦹꦥꦁ ꦨꦒꦮꦠꦺꦴ ꦢꦺꦱꦤꦴꦥꦮꦠ꧀ꦠꦷꦠꦶ ꦢꦱ꧀ꦱꦺꦠꦸꦁ ‘‘ꦠꦠ꧀ꦡ ꦨꦒꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦁꦑꦶꦠ꧀ꦠꦮꦶꦠ꧀ꦡꦴꦫꦺꦤꦴꦠꦶ ꦱꦁꦑꦶꦠ꧀ꦠꦱ꧀ꦱ ꦮꦶꦠ꧀ꦡꦴꦫꦺꦤ. ꦄꦡ ꦮꦴ ꦱꦁꦑꦶꦠ꧀ꦠꦺꦤꦴꦠꦶ ꦈꦢ꧀ꦢꦶꦛ꧀ꦜꦩꦠ꧀ꦠꦺꦤ. ꦱꦁꦑꦶꦠ꧀ꦠꦮꦶꦠ꧀ꦡꦴꦫꦺꦤꦴꦠꦶ ꦈꦢ꧀ꦢꦺꦱꦺꦤ ꦤꦶꦢ꧀ꦢꦺꦱꦺꦤ ꦕ. ꦮꦶꦠ꧀ꦡꦴꦫꦺꦤꦴꦠꦶ ꦈꦢ꧀ꦢꦺꦱꦤꦶꦢ꧀ꦢꦺꦱꦥꦛꦶꦤꦶꦢ꧀ꦢꦺꦱꦺꦲꦶ. ꦩꦸꦢꦸꦏꦤ꧀ꦠꦶ ꦭꦲꦸꦏꦁ ꦄꦥꦴꦪꦨꦪꦮꦛ꧀ꦛꦨꦪꦴꦢꦷꦲꦶ ꦱꦤ꧀ꦠꦗ꧀ꦗꦤꦮꦱꦺꦤ ꦨꦴꦫꦶꦪꦁ ꦄꦏꦠ꧀ꦮꦴ. ꦩꦸꦢꦸꦠꦶꦏ꧀ꦑꦤ꧀ꦠꦶ ꦤꦴꦠꦶꦠꦶꦏ꧀ꦑꦁ. ꦱꦁꦮꦺꦒꦮꦠ꧀ꦡꦹꦲꦶ ꦱꦁꦮꦺꦒꦗꦤꦤꦴꦢꦶꦮꦱꦺꦤ ꦨꦴꦫꦶꦪꦁ ꦏꦠ꧀ꦮꦴ. ꦱꦩꦡꦁ ꦈꦥꦢꦶꦱꦠꦷꦠꦶ ꦱꦩꦡꦁ ꦄꦣꦶꦏꦁ ꦏꦠ꧀ꦮꦴ ꦈꦥꦢꦶꦱꦠꦶ, ꦤ ꦠꦡꦴ ꦮꦶꦥꦱ꧀ꦱꦤꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦤ ꦲꦶ ꦏꦺꦮꦭꦺꦤ ꦱꦩꦡꦺꦤ ꦱꦕ꧀ꦕꦥ꧀ꦥꦛꦶꦮꦺꦣꦺꦴ ꦱꦩ꧀ꦨꦮꦠꦶ. ꦱꦩꦡꦮꦶꦥꦱ꧀ꦱꦤꦤ꧀ꦠꦶ ꦱꦩꦣꦸꦫꦁ ꦱꦩꦡꦮꦶꦥꦱ꧀ꦱꦤꦁ. ꦮꦶꦥꦱ꧀ꦱꦤꦤ꧀ꦠꦶ ꦱꦴꦠꦶꦱꦪꦁ ꦮꦶꦥꦱ꧀ꦱꦤꦁ ꦈꦥꦢꦶꦱꦠꦶ. ꦪꦱ꧀ꦩꦴ ꦕꦺꦠ꧀ꦡ ꦠꦶꦏ꧀ꦑꦶꦤ꧀ꦢ꧀ꦫꦶꦪꦴꦢꦪꦺꦴ ꦈꦒ꧀ꦓꦛꦶꦠꦚ꧀ꦚꦸꦄꦴꦢꦪꦺꦴꦮ, ꦠꦱ꧀ꦩꦴ ‘‘ꦠꦶꦏ꧀ꦑꦶꦤ꧀ꦢ꧀ꦫꦶꦪꦱ꧀ꦱ ꦤꦶꦱ꧀ꦱꦫꦟꦁ ꦈꦥꦢꦶꦱꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦣꦶꦥꦚ꧀ꦚꦴꦱꦶꦏ꧀ꦑꦴꦪꦴꦠꦶ ꦄꦣꦶꦥꦚ꧀ꦚꦴꦱꦶꦏ꧀ꦑꦁ.

ꦪꦁ ꦌꦠ꧀ꦡ ꦚꦴꦟꦤ꧀ꦠꦶ ꦌꦠ꧀ꦡ ꦆꦤ꧀ꦢ꧀ꦫꦶꦪꦴꦤꦁ ꦩꦸꦢꦸꦩꦗ꧀ꦙꦴꦣꦶꦩꦠ꧀ꦠꦠꦴꦪ ꦪꦁ ꦚꦴꦟꦁ, ꦆꦢꦁ ꦮꦸꦕ꧀ꦕꦠꦶ ꦥꦫꦱꦠ꧀ꦠꦴꦤꦁ ꦥꦫꦥꦸꦒ꧀ꦒꦭꦴꦤꦁ ꦆꦤ꧀ꦢ꧀ꦫꦶꦪꦥꦫꦺꦴꦥꦫꦶꦪꦠ꧀ꦠꦮꦺꦩꦠ꧀ꦠꦠꦴꦚꦴꦟꦤ꧀ꦠꦶ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦠꦱ꧀ꦱ ꦚꦴꦟꦱ꧀ꦱ ꦥꦮꦠ꧀ꦠꦤꦴꦏꦴꦫꦁ ꦢꦱ꧀ꦱꦺꦠꦸꦁ ‘‘ꦄꦪꦁ ꦆꦩꦁ ꦨꦹꦩꦶ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦪꦁ ꦆꦩꦁ ꦨꦹꦩꦶꦁ ꦨꦴꦮꦤꦚ꧀ꦕ ꦒꦠꦺꦴꦠꦶ ꦄꦪꦁ ꦥꦸꦒ꧀ꦒꦭꦺꦴ ꦌꦮꦩꦶꦩꦁ ꦱꦁꦏꦶꦭꦺꦱꦮꦴꦱꦤꦁ ꦮꦺꦴꦢꦴꦤꦁ ꦨꦮꦔ꧀ꦒꦚ꧀ꦕ ꦒꦠꦺꦴ ꦒꦕ꧀ꦖꦠꦶ ꦒꦩꦶꦱ꧀ꦱꦠꦶ ꦕ, ꦏꦴꦭꦮꦕꦤꦶꦕ꧀ꦖꦴꦪ ꦄꦨꦴꦮꦠꦺꦴ, ꦪꦡꦴ ꦢꦸꦢ꧀ꦣꦤ꧀ꦠꦶ. ꦆꦩꦴꦪ ꦮꦺꦭꦴꦪ ꦆꦩꦱ꧀ꦩꦶꦁ ꦱꦩꦪꦺ ꦆꦩꦴꦪ ꦩꦸꦢꦸꦩꦗ꧀ꦙꦠꦶꦏ꧀ꦑꦨꦺꦢꦴꦪ ꦄꦤꦸꦱꦴꦱꦤꦶꦪꦴ. ꦌꦮꦁꦣꦴꦠꦸꦏꦺꦴꦠꦶ ꦲꦷꦤꦴꦢꦶꦮꦱꦺꦤ ꦌꦮꦁꦄꦗ꧀ꦙꦴꦱꦪꦺꦴ ꦌꦮꦁꦄꦣꦶꦩꦸꦠ꧀ꦠꦶꦏꦺꦴ. ꦄꦪꦚ꧀ꦕꦱ꧀ꦱ ꦄꦴꦱꦪꦺꦴꦠꦶ ꦆꦩꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦱꦱ꧀ꦱꦠꦸꦕ꧀ꦖꦺꦢꦥ꧀ꦥꦏꦴꦫꦺꦴ, ꦪꦡꦴꦨꦹꦠꦚꦴꦟꦴꦤꦸꦭꦺꦴꦩꦑꦤ꧀ꦠꦶꦥ꧀ꦥꦏꦴꦫꦺꦴ ꦮꦴ ꦄꦴꦱꦪꦺꦴ. ꦆꦢꦚ꧀ꦲꦶ ꦕꦠꦸꦧ꧀ꦧꦶꦣꦁ ꦄꦴꦱꦪꦤ꧀ꦠꦶ ꦌꦠ꧀ꦡ ꦱꦠ꧀ꦠꦴ ꦮꦱꦤ꧀ꦠꦷꦠꦶ ꦄꦴꦱꦪꦺꦴꦠꦶ ꦮꦸꦕ꧀ꦕꦠꦶ. ꦆꦩꦁ ꦥꦤ ꦨꦒꦮꦴ ꦱꦠ꧀ꦠꦴꦤꦁ ꦄꦴꦱꦪꦁ ꦗꦴꦤꦤ꧀ꦠꦺꦴ ꦠꦺꦱꦁ ꦢꦶꦛ꧀ꦜꦶꦒꦠꦴꦤꦁ ꦮꦶꦥꦱ꧀ꦱꦤꦴꦚꦴꦟꦏꦩ꧀ꦩꦱ꧀ꦱꦏꦠꦚ꧀ꦚꦴꦟꦴꦤꦚ꧀ꦕ ꦄꦥ꧀ꦥꦮꦠ꧀ꦠꦶꦏ꧀ꦑꦟꦺꦥꦶ ꦗꦴꦤꦴꦠꦶ ꦌꦮ. ꦮꦸꦠ꧀ꦠꦩ꧀ꦥꦶ ꦕꦺꦠꦁ – ‘‘ꦏꦴꦩꦁ ꦱꦺꦮꦤ꧀ꦠꦚ꧀ꦚꦺꦮ ꦗꦴꦤꦴꦠꦶ ‘ꦄꦪꦁ ꦥꦸꦒ꧀ꦒꦭꦺꦴ ꦏꦴꦩꦒꦫꦸꦏꦺꦴ ꦏꦴꦩꦴꦱꦪꦺꦴ ꦏꦴꦩꦴꦣꦶꦩꦸꦠ꧀ꦠꦺꦴ’ꦠꦶ. ꦏꦴꦩꦁ ꦱꦺꦮꦤ꧀ꦠꦚ꧀ꦚꦺꦮ ꦗꦴꦤꦴꦠꦶ ‘ꦄꦪꦁ ꦥꦸꦒ꧀ꦒꦭꦺꦴ ꦤꦺꦏ꧀ꦑꦩ꧀ꦩꦒꦫꦸꦏꦺꦴ ꦤꦺꦏ꧀ꦑꦩ꧀ꦩꦴꦱꦪꦺꦴ ꦤꦺꦏ꧀ꦑꦩ꧀ꦩꦴꦣꦶꦩꦸꦠ꧀ꦠꦺꦴ’ꦠꦶ. ꦤꦺꦏ꧀ꦑꦩ꧀ꦩꦁ ꦱꦺꦮꦤ꧀ꦠꦚ꧀ꦚꦺꦮ ꦗꦴꦤꦴꦠꦶ… ꦧ꧀ꦪꦴꦥꦴꦢꦁ… ꦄꦧ꧀ꦪꦴꦥꦴꦢꦁ… ꦡꦶꦤꦩꦶꦢ꧀ꦣꦁ… ꦄꦴꦭꦺꦴꦏꦱꦚ꧀ꦚꦁ ꦱꦺꦮꦤ꧀ꦠꦚ꧀ꦚꦺꦮ ꦗꦴꦤꦴꦠꦶ ‘ꦄꦪꦁ ꦥꦸꦒ꧀ꦒꦭꦺꦴ ꦡꦶꦤꦩꦶꦢ꧀ꦣꦒꦫꦸꦏꦺꦴ ꦡꦶꦤꦩꦶꦢ꧀ꦣꦴꦱꦪꦺꦴ ꦡꦶꦤꦩꦶꦢ꧀ꦣꦴꦣꦶꦩꦸꦠ꧀ꦠꦺꦴ’’’ꦠꦶ (ꦥꦛꦶ. ꦩ. ꧑.꧑꧑꧓).

ꦄꦪꦁ ꦄꦤꦸꦱꦪꦺꦴꦠꦶ ꦄꦪꦁ ꦆꦩꦱ꧀ꦱ ꦥꦸꦒ꧀ꦒꦭꦱ꧀ꦱ ꦏꦴꦩꦫꦴꦒꦴꦢꦶꦏꦺꦴ ꦄꦥ꧀ꦥꦲꦷꦤꦺꦴꦪꦺꦮ ꦄꦤꦸꦱꦪꦶꦠꦏꦶꦭꦺꦱꦺꦴ. ꦄꦥ꧀ꦥꦲꦷꦤꦺꦴꦪꦺꦮ ꦲꦶ ꦡꦴꦩꦒꦠꦺꦴ ꦏꦶꦭꦺꦱꦺꦴ ꦄꦤꦸꦱꦪꦺꦴ. ꦥꦫꦱꦠ꧀ꦠꦴꦤꦤ꧀ꦠꦶ ꦥꦣꦴꦤꦱꦠ꧀ꦠꦴꦤꦁ. ꦥꦫꦥꦸꦒ꧀ꦒꦭꦴꦤꦤ꧀ꦠꦶ ꦠꦠꦺꦴ ꦥꦫꦺꦱꦁ ꦱꦠ꧀ꦠꦴꦤꦁ, ꦲꦷꦤꦱꦠ꧀ꦠꦴꦤꦤ꧀ꦠꦶ ꦄꦠ꧀ꦡꦺꦴ. ꦌꦏꦠ꧀ꦡꦩꦺꦮ ꦮꦴ ꦌꦠꦁ ꦥꦢꦢ꧀ꦮꦪꦁ ꦮꦺꦤꦺꦪ꧀ꦪꦮꦱꦺꦤ ꦢ꧀ꦮꦶꦣꦴ ꦮꦸꦠ꧀ꦠꦁ. ꦆꦤ꧀ꦢ꧀ꦫꦶꦪꦥꦫꦺꦴꦥꦫꦶꦪꦠ꧀ꦠꦮꦺꦩꦠ꧀ꦠꦠꦴꦚꦴꦟꦤ꧀ꦠꦶ ꦥꦫꦨꦴꦮꦺꦴ ꦕ ꦄꦥꦫꦨꦴꦮꦺꦴ ꦕ ꦥꦫꦺꦴꦥꦫꦶꦪꦠ꧀ꦠꦁ ꦄ-ꦏꦴꦫꦱ꧀ꦱ ꦎꦏꦴꦫꦁ ꦏꦠ꧀ꦮꦴ, ꦠꦱ꧀ꦱ ꦮꦺꦩꦠ꧀ꦠꦠꦴ ꦥꦫꦺꦴꦥꦫꦶꦪꦠ꧀ꦠꦮꦺꦩꦠ꧀ꦠꦠꦴ. ꦱꦢ꧀ꦣꦴꦢꦷꦤꦁ ꦆꦤ꧀ꦢ꧀ꦫꦶꦪꦴꦤꦁ ꦥꦫꦺꦴꦥꦫꦶꦪꦠ꧀ꦠꦮꦺꦩꦠ꧀ꦠꦠꦴꦪ ꦚꦴꦟꦁ ꦆꦤ꧀ꦢ꧀ꦫꦶꦪꦥꦫꦺꦴꦥꦫꦶꦪꦠ꧀ꦠꦮꦺꦩꦠ꧀ꦠꦠꦴꦚꦴꦟꦤ꧀ꦠꦶ ꦥꦢꦮꦶꦨꦴꦒꦺꦴ ꦮꦺꦢꦶꦠꦧ꧀ꦧꦺꦴ.

ꦠꦠ꧀ꦡ ꦪꦤ꧀ꦠꦶ ꦪꦁ ꦄꦤꦺꦏꦮꦶꦲꦶꦠꦱ꧀ꦱ ꦥꦸꦧ꧀ꦧꦺꦤꦶꦮꦴꦱꦱ꧀ꦱ ꦄꦤꦸꦱ꧀ꦱꦫꦟꦮꦱꦺꦤ ꦨꦒꦮꦠꦺꦴ ꦚꦴꦟꦁ, ꦆꦢꦁ ꦄꦛ꧀ꦜꦩꦁ ꦠꦡꦴꦒꦠꦧꦭꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦄꦤꦺꦏꦮꦶꦲꦶꦠꦤ꧀ꦠꦶ ꦄꦤꦺꦏꦮꦶꦣꦁ, ꦄꦤꦺꦏꦺꦲꦶ ꦮꦴ ꦥꦏꦴꦫꦺꦲꦶ ꦥꦮꦠ꧀ꦠꦶꦠꦁ. ꦥꦸꦧ꧀ꦧꦺꦤꦶꦮꦴꦱꦤ꧀ꦠꦶ ꦄꦤꦸꦱ꧀ꦱꦫꦶꦠꦸꦁ ꦆꦕ꧀ꦖꦶꦠꦁ ꦄꦠ꧀ꦠꦤꦺꦴ ꦥꦫꦺꦱꦚ꧀ꦕ ꦱꦩꦤꦤ꧀ꦠꦫꦴꦠꦷꦠꦁ ꦨꦮꦁ ꦄꦴꦢꦶꦁ ꦏꦠ꧀ꦮꦴ ꦠꦠ꧀ꦡ ꦠꦠ꧀ꦡ ꦤꦶꦮꦸꦠ꧀ꦡꦱꦤ꧀ꦠꦴꦤꦁ. ꦄꦤꦸꦱ꧀ꦱꦫꦠꦷꦠꦶ ‘‘ꦌꦏꦩ꧀ꦥꦶ ꦗꦴꦠꦶꦁ ꦢ꧀ꦮꦺꦥꦶ ꦗꦴꦠꦶꦪꦺꦴ’’ꦠꦶ ꦌꦮꦁ ꦗꦴꦠꦶꦥꦛꦶꦥꦴꦛꦶꦪꦴ ꦄꦤꦸꦒꦤ꧀ꦠ꧀ꦮꦴ ꦱꦫꦠꦶ, ꦄꦤꦸꦢꦺꦮ ꦮꦴ ꦱꦫꦠꦶ, ꦕꦶꦠ꧀ꦠꦺ ꦄꦨꦶꦤꦶꦤ꧀ꦤꦴꦩꦶꦠꦩꦠ꧀ꦠꦺ ꦌꦮ ꦱꦫꦠꦷꦠꦶ ꦄꦠ꧀ꦡꦺꦴ. ꦨꦒꦮꦠꦺꦴ ꦲꦶ ꦥꦫꦶꦏꦩ꧀ꦩꦏꦶꦕ꧀ꦕꦁ ꦤꦠ꧀ꦡꦶ, ꦄꦴꦮꦗ꧀ꦗꦤꦩꦠ꧀ꦠꦺꦤꦺꦮ ꦱꦫꦠꦶ. ꦱꦺꦪ꧀ꦪꦡꦶꦢꦤ꧀ꦠꦶ ꦄꦴꦫꦢ꧀ꦣꦥ꧀ꦥꦏꦴꦫꦤꦶꦢꦱ꧀ꦱꦤꦠ꧀ꦡꦺ ꦤꦶꦥꦴꦠꦺꦴ. ꦌꦏꦩ꧀ꦥꦶ ꦗꦴꦠꦶꦤ꧀ꦠꦶ ꦌꦏꦩ꧀ꦥꦶ ꦥꦛꦶꦱꦤ꧀ꦣꦶꦩꦹꦭꦁ ꦕꦸꦠꦶꦥꦫꦶꦪꦺꦴꦱꦴꦤꦁ ꦌꦏꦨꦮꦥꦫꦶꦪꦴꦥꦤ꧀ꦤꦁ ꦑꦤ꧀ꦣꦱꦤ꧀ꦠꦴꦤꦁ. ꦌꦱ ꦤꦪꦺꦴ ꦢ꧀ꦮꦺꦥꦶ ꦗꦴꦠꦶꦪꦺꦴꦠꦶꦄꦴꦢꦷꦱꦸꦥꦶ.

ꦄꦤꦺꦏꦺꦥꦶ ꦱꦁꦮꦛ꧀ꦛꦏꦥ꧀ꦥꦺꦠꦶꦄꦴꦢꦷꦱꦸ ꦥꦤ ꦥꦫꦶꦲꦴꦪꦩꦴꦤꦺꦴ ꦏꦥ꧀ꦥꦺꦴ ꦱꦁꦮꦛ꧀ꦛꦏꦥ꧀ꦥꦺꦴ, ꦮꦝ꧀ꦞꦩꦴꦤꦺꦴ ꦮꦶꦮꦛ꧀ꦛꦏꦥ꧀ꦥꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦠꦠ꧀ꦡ ꦱꦁꦮꦛ꧀ꦛꦺꦤ ꦱꦁꦮꦛ꧀ꦛꦛ꧀ꦜꦴꦪꦷ ꦒꦲꦶꦠꦺꦴ ꦠꦁꦩꦹꦭꦠ꧀ꦠꦴ, ꦮꦶꦮꦛ꧀ꦛꦺꦤ ꦕ ꦮꦶꦮꦛ꧀ꦛꦛ꧀ꦜꦴꦪꦷ. ꦌꦮꦚ꧀ꦲꦶ ꦱꦠꦶ ꦪꦴꦤꦶ ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦏꦥ꧀ꦥꦱ꧀ꦱ ꦄꦱꦔ꧀ꦑ꧀ꦪꦺꦪ꧀ꦪꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦱꦁꦮꦛ꧀ꦛꦺꦴ ꦱꦁꦮꦛ꧀ꦛꦛ꧀ꦜꦴꦪꦷ ꦮꦶꦮꦛ꧀ꦛꦺꦴ ꦮꦶꦮꦛ꧀ꦛꦛ꧀ꦜꦴꦪꦷ’’ꦠꦶ (ꦄ. ꦤꦶ. ꧔.꧑꧕꧖) ꦮꦸꦠ꧀ꦠꦴꦤꦶ, ꦠꦴꦤꦶ ꦱꦧ꧀ꦧꦴꦤꦶ ꦥꦫꦶꦒ꧀ꦒꦲꦶꦠꦴꦤꦶ ꦲꦺꦴꦤ꧀ꦠꦶ. ꦄꦩꦸꦠ꧀ꦫꦴꦱꦶꦤ꧀ꦠꦶꦄꦴꦢꦶ ꦱꦫꦟꦴꦏꦴꦫꦢꦱ꧀ꦱꦤꦁ. ꦠꦠ꧀ꦡ ꦄꦩꦸꦠ꧀ꦫꦴꦱꦶꦤ꧀ꦠꦶ ꦄꦩꦸꦩ꧀ꦲꦶ ꦱꦁꦮꦛ꧀ꦛꦏꦥ꧀ꦥꦺ, ꦄꦩꦸꦩ꧀ꦲꦶ ꦨꦮꦺ ꦮꦴ ꦪꦺꦴꦤꦶꦪꦁ ꦮꦴ ꦒꦠꦶꦪꦁ ꦮꦴ ꦮꦶꦚ꧀ꦚꦴꦟꦛ꧀ꦜꦶꦠꦶꦪꦁ ꦮꦴ ꦱꦠ꧀ꦠꦴꦮꦴꦱꦺ ꦮꦴ ꦱꦠ꧀ꦠꦤꦶꦏꦴꦪꦺ ꦮꦴ. ꦌꦮꦁꦤꦴꦩꦺꦴꦠꦶ ꦠꦶꦱ꧀ꦱꦺꦴ ꦮꦴ ꦦꦸꦱ꧀ꦱꦺꦴ ꦮꦴ. ꦌꦮꦁꦒꦺꦴꦠ꧀ꦠꦺꦴꦠꦶ ꦨꦒ꧀ꦒꦮꦺꦴ ꦮꦴ ꦒꦺꦴꦠꦩꦺꦴ ꦮꦴ. ꦌꦮꦁꦮꦟ꧀ꦟꦺꦴꦠꦶ ꦎꦢꦴꦠꦺꦴ ꦮꦴ ꦱꦴꦩꦺꦴ ꦮꦴ. ꦌꦮꦩꦴꦲꦴꦫꦺꦴꦠꦶ ꦱꦴꦭꦶꦩꦁꦱꦺꦴꦢꦤꦴꦲꦴꦫꦺꦴ ꦮꦴ ꦥꦮꦠ꧀ꦠꦦꦭꦨꦺꦴꦗꦤꦺꦴ ꦮꦴ. ꦌꦮꦁꦱꦸꦑꦢꦸꦏ꧀ꦑꦥ꧀ꦥꦛꦶꦱꦁꦮꦺꦢꦷꦠꦶ ꦄꦤꦺꦏꦥ꧀ꦥꦏꦴꦫꦺꦤ ꦏꦴꦪꦶꦏꦕꦺꦠꦱꦶꦏꦴꦤꦁ ꦱꦴꦩꦶꦱꦤꦶꦫꦴꦩꦶꦱꦥ꧀ꦥꦨꦺꦢꦴꦤꦁ ꦮꦴ ꦱꦸꦑꦢꦸꦏ꧀ꦑꦴꦤꦁ ꦥꦛꦶꦱꦁꦮꦺꦢꦷ. ꦌꦮꦩꦴꦪꦸꦥꦫꦶꦪꦤ꧀ꦠꦺꦴꦠꦶ ꦌꦮꦁ ꦮꦱ꧀ꦱꦱꦠꦥꦫꦩꦴꦪꦸꦥꦫꦶꦪꦤ꧀ꦠꦺꦴ ꦮꦴ ꦕꦠꦸꦫꦴꦱꦷꦠꦶꦏꦥ꧀ꦥꦱꦲꦱ꧀ꦱꦥꦫꦩꦴꦪꦸꦥꦫꦶꦪꦤ꧀ꦠꦺꦴ ꦮꦴ. ꦱꦺꦴ ꦠꦠꦺꦴ ꦕꦸꦠꦺꦴ ꦄꦩꦸꦠ꧀ꦫ ꦈꦢꦥꦴꦢꦶꦤ꧀ꦠꦶ ꦱꦺꦴ ꦠꦠꦺꦴ ꦨꦮꦠꦺꦴ, ꦱꦠ꧀ꦠꦤꦶꦏꦴꦪꦠꦺꦴ ꦮꦴ ꦕꦸꦠꦺꦴ ꦥꦸꦤ ꦄꦩꦸꦏꦱ꧀ꦩꦶꦁ ꦤꦴꦩ ꦱꦠ꧀ꦠꦤꦶꦏꦴꦪꦺ ꦈꦢꦥꦴꦢꦶꦁ. ꦄꦡ ꦮꦴ ꦠꦠ꧀ꦫꦴꦥꦶ ꦨꦮꦺ ꦮꦴ ꦱꦠ꧀ꦠꦤꦶꦏꦴꦪꦺ ꦮꦴ ꦄꦲꦺꦴꦱꦶꦁ. ꦌꦮꦁꦤꦴꦩꦺꦴꦠꦶꦄꦴꦢꦶ ꦮꦸꦠ꧀ꦠꦠ꧀ꦡꦩꦺꦮ.

꧖꧔. ꦢꦶꦧ꧀ꦧꦺꦤꦴꦠꦶꦄꦴꦢꦷꦱꦸ ꦢꦶꦧ꧀ꦧꦱꦢꦶꦱꦠ꧀ꦠꦴ ꦢꦶꦧ꧀ꦧꦁ. ꦢꦺꦮꦠꦴꦤꦚ꧀ꦲꦶ ꦱꦸꦕꦫꦶꦠꦏꦩ꧀ꦩꦤꦶꦧ꧀ꦧꦠ꧀ꦠꦩ꧀ꦥꦶ ꦥꦶꦠ꧀ꦠꦱꦺꦩ꧀ꦲꦫꦸꦲꦶꦫꦴꦢꦷꦲꦶ ꦄꦥꦭꦶꦧꦸꦢ꧀ꦣꦁ ꦈꦥꦏ꧀ꦏꦶꦭꦺꦱꦮꦶꦩꦸꦠ꧀ꦠꦠ꧀ꦠꦴ ꦢꦹꦫꦺꦥꦶ ꦄꦴꦫꦩ꧀ꦩꦟꦒ꧀ꦒꦲꦟꦱꦩꦠ꧀ꦡꦁ ꦢꦶꦧ꧀ꦧꦁ ꦥꦱꦴꦢꦕꦏ꧀ꦑꦸ ꦲꦺꦴꦠꦶ. ꦆꦢꦩ꧀ꦥꦶ ꦮꦷꦫꦶꦪꦨꦴꦮꦤꦴꦧꦭꦤꦶꦧ꧀ꦧꦠ꧀ꦠꦁ ꦚꦴꦟꦕꦏ꧀ꦑꦸ ꦠꦴꦢꦶꦱꦩꦺꦮꦴꦠꦶ ꦢꦶꦧ꧀ꦧꦱꦢꦶꦱꦠ꧀ꦠꦴ ꦢꦶꦧ꧀ꦧꦁ, ꦢꦶꦧ꧀ꦧꦮꦶꦲꦴꦫꦮꦱꦺꦤ ꦮꦴ ꦥꦛꦶꦭꦢ꧀ꦣꦠ꧀ꦠꦴ, ꦄꦠ꧀ꦠꦤꦴ ꦕ ꦢꦶꦧ꧀ꦧꦮꦶꦲꦴꦫꦱꦤ꧀ꦤꦶꦱ꧀ꦱꦶꦠꦠ꧀ꦠꦴꦥꦶ ꦢꦶꦧ꧀ꦧꦁ, ꦄꦴꦭꦺꦴꦏꦥꦫꦶꦒ꧀ꦒꦲꦺꦤ ꦩꦲꦴꦗꦸꦠꦶꦏꦠ꧀ꦠꦴꦥꦶ ꦢꦶꦧ꧀ꦧꦁ, ꦠꦶꦫꦺꦴꦏꦸꦛ꧀ꦛꦴꦢꦶꦒꦠꦫꦹꦥꦢꦱ꧀ꦱꦤꦺꦤ ꦩꦲꦴꦒꦠꦶꦏꦠ꧀ꦠꦴꦥꦶ ꦢꦶꦧ꧀ꦧꦁ. ꦠꦁ ꦱꦧ꧀ꦧꦁ ꦱꦢ꧀ꦢꦱꦠ꧀ꦡꦴꦤꦸꦱꦴꦫꦺꦤ ꦮꦺꦢꦶꦠꦧ꧀ꦧꦁ. ꦢꦱ꧀ꦱꦤꦛ꧀ꦜꦺꦤ ꦕꦏ꧀ꦑꦸ. ꦕꦏ꧀ꦑꦸꦏꦶꦕ꧀ꦕꦏꦫꦟꦺꦤ ꦕꦏ꧀ꦑꦸꦩꦶꦮꦴꦠꦶꦥꦶ ꦕꦏ꧀ꦑꦸ. ꦕꦸꦠꦹꦥꦥꦴꦠꦢꦱ꧀ꦱꦤꦺꦤ ꦢꦶꦛ꧀ꦜꦶꦮꦶꦱꦸꦢ꧀ꦣꦶꦲꦺꦠꦸꦠ꧀ꦠꦴ ꦮꦶꦱꦸꦢ꧀ꦣꦁ. ꦪꦺꦴ ꦲꦶ ꦕꦸꦠꦶꦩꦠ꧀ꦠꦩꦺꦮ ꦥꦱ꧀ꦱꦠꦶ, ꦤ ꦈꦥꦥꦴꦠꦁ, ꦱꦺꦴ ꦈꦕ꧀ꦖꦺꦢꦢꦶꦛ꧀ꦜꦶꦁ ꦒꦟ꧀ꦲꦴꦠꦶ. ꦪꦺꦴ ꦈꦥꦥꦴꦠꦩꦠ꧀ꦠꦩꦺꦮ ꦥꦱ꧀ꦱꦠꦶ ꦤ ꦕꦸꦠꦶꦁ, ꦱꦺꦴ ꦤꦮꦱꦠ꧀ꦠꦥꦴꦠꦸꦨꦴꦮꦢꦶꦛ꧀ꦜꦶꦁ ꦒꦟ꧀ꦲꦴꦠꦶ. ꦪꦺꦴ ꦥꦤ ꦠꦢꦸꦨꦪꦁ ꦥꦱ꧀ꦱꦠꦶ, ꦱꦺꦴ ꦪꦱ꧀ꦩꦴ ꦢꦸꦮꦶꦣꦩ꧀ꦥꦶ ꦠꦁ ꦢꦶꦛ꧀ꦜꦶꦒꦠꦁ ꦄꦠꦶꦮꦠ꧀ꦠꦠꦶ. ꦠꦱ꧀ꦩꦴꦱ꧀ꦱ ꦠꦁ ꦢꦱ꧀ꦱꦤꦁ ꦢꦶꦛ꧀ꦜꦶꦮꦶꦱꦸꦢ꧀ꦣꦶꦲꦺꦠꦸ ꦲꦺꦴꦠꦶ. ꦠꦢꦸꦨꦪꦚ꧀ꦕ ꦨꦒꦮꦴ ꦥꦱ꧀ꦱꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦕꦸꦠꦹꦥꦥꦴꦠꦢꦱ꧀ꦱꦤꦺꦤ ꦢꦶꦛ꧀ꦜꦶꦮꦶꦱꦸꦢ꧀ꦣꦶꦲꦺꦠꦸꦠ꧀ꦠꦴ ꦮꦶꦱꦸꦢ꧀ꦣ’’ꦤ꧀ꦠꦶ.

ꦌꦏꦴꦢꦱꦈꦥꦏ꧀ꦏꦶꦭꦺꦱꦮꦶꦫꦲꦠꦺꦴ ꦮꦴ ꦮꦶꦱꦸꦢ꧀ꦣꦁ. ꦪꦡꦴꦲ –

‘‘ꦱꦺꦴ ꦑꦺꦴ ꦄꦲꦁ ꦄꦤꦸꦫꦸꦢ꧀ꦣꦴ ‘ꦮꦶꦕꦶꦏꦶꦕ꧀ꦖꦴ ꦕꦶꦠ꧀ꦠꦱ꧀ꦱ ꦈꦥꦏ꧀ꦏꦶꦭꦺꦱꦺꦴ’ꦠꦶ ꦆꦠꦶ ꦮꦶꦢꦶꦠ꧀ꦮꦴ ꦮꦶꦕꦶꦏꦶꦕ꧀ꦖꦁ ꦕꦶꦠ꧀ꦠꦱ꧀ꦱ ꦈꦥꦏ꧀ꦏꦶꦭꦺꦱꦁ ꦥꦗꦲꦶꦁ. ‘ꦄꦩꦤꦱꦶꦏꦴꦫꦺꦴ ꦕꦶꦠ꧀ꦠꦱ꧀ꦱ ꦈꦥꦏ꧀ꦏꦶꦭꦺꦱꦺꦴ… ꦡꦶꦤꦩꦶꦢ꧀ꦣꦁ… ꦖꦩ꧀ꦨꦶꦠꦠ꧀ꦠꦁ… ꦈꦥ꧀ꦥꦶꦭꦁ… ꦢꦸꦛ꧀ꦜꦸꦭ꧀ꦭꦁ… ꦄꦕ꧀ꦕꦴꦫꦢ꧀ꦣꦮꦷꦫꦶꦪꦁ… ꦄꦠꦶꦭꦷꦤꦮꦷꦫꦶꦪꦁ… ꦄꦨꦶꦗꦥ꧀ꦥꦴ… ꦤꦴꦤꦠ꧀ꦠꦱꦚ꧀ꦚꦴ… ꦄꦠꦶꦤꦶꦗ꧀ꦙꦴꦪꦶꦠꦠ꧀ꦠꦁ ꦫꦹꦥꦴꦤꦁ ꦕꦶꦠ꧀ꦠꦱ꧀ꦱ ꦈꦥꦏ꧀ꦏꦶꦭꦺꦱꦺꦴ’ꦠꦶ ꦆꦠꦶ ꦮꦶꦢꦶꦠ꧀ꦮꦴ ꦄꦠꦶꦤꦶꦗ꧀ꦙꦴꦪꦶꦠꦠ꧀ꦠꦁ ꦫꦹꦥꦴꦤꦁ ꦕꦶꦠ꧀ꦠꦱ꧀ꦱ ꦈꦥꦏ꧀ꦏꦶꦭꦺꦱꦁ ꦥꦗꦲꦶ’’ꦤ꧀ꦠꦶ (ꦩ. ꦤꦶ. ꧓.꧒꧔꧒) ꦌꦮꦩꦴꦢꦶ.

ꦠꦢꦺꦮꦁ ꦌꦏꦴꦢꦱꦈꦥꦏ꧀ꦏꦶꦭꦺꦱꦮꦶꦫꦲꦠꦺꦴ ꦮꦴ ꦮꦶꦱꦸꦢ꧀ꦣꦁ. ꦩꦤꦸꦱ꧀ꦱꦹꦥꦕꦴꦫꦁ ꦄꦠꦶꦏ꧀ꦏꦩꦶꦠ꧀ꦮꦴ ꦫꦹꦥꦢꦱ꧀ꦱꦤꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦁ, ꦩꦁꦱꦕꦏ꧀ꦑꦸꦁ ꦄꦠꦶꦏ꧀ꦏꦤ꧀ꦠꦠ꧀ꦠꦴ ꦮꦴ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦁ. ꦠꦺꦤ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ.

ꦱꦠ꧀ꦠꦺ ꦥꦱ꧀ꦱꦠꦷꦠꦶ ꦩꦤꦸꦱ꧀ꦱꦺꦴ ꦩꦤꦸꦱ꧀ꦱꦁ ꦩꦁꦱꦕꦏ꧀ꦑꦸꦤꦴ ꦮꦶꦪ ꦱꦠ꧀ꦠꦺ ꦥꦱ꧀ꦱꦠꦶ ꦎꦭꦺꦴꦏꦺꦠꦶ. ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺꦠꦶ ꦌꦠ꧀ꦡ ꦕꦸꦠꦶꦏ꧀ꦑꦟꦺ ꦈꦥꦥꦠ꧀ꦠꦶꦏ꧀ꦑꦟꦺ ꦮꦴ ꦢꦶꦧ꧀ꦧꦕꦏ꧀ꦑꦸꦤꦴꦥꦶ ꦢꦛ꧀ꦜꦸꦁ ꦤ ꦱꦏ꧀ꦏꦴ. ꦪꦺ ꦥꦤ ꦄꦴꦱꦤ꧀ꦤꦕꦸꦠꦶꦏꦴ ꦆꦢꦴꦤꦶ ꦕꦮꦶꦱ꧀ꦱꦤ꧀ꦠꦶ, ꦪꦺ ꦕ ꦒꦲꦶꦠꦥꦛꦶꦱꦤ꧀ꦣꦶꦏꦴ ꦱꦩ꧀ꦥꦠꦶ ꦤꦶꦧ꧀ꦧꦠ꧀ꦠꦴ, ꦠꦺ ‘‘ꦕꦮꦩꦴꦤꦴ ꦈꦥꦥꦗ꧀ꦗꦩꦴꦤꦴ’’ꦠꦶ ꦄꦣꦶꦥ꧀ꦥꦺꦠꦴ. ꦠꦺ ꦌꦮꦫꦹꦥꦺ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ. ꦲꦷꦤꦺꦠꦶ ꦩꦺꦴꦲꦤꦶꦱ꧀ꦱꦤ꧀ꦢꦪꦸꦠ꧀ꦠꦠ꧀ꦠꦴ ꦲꦷꦤꦗꦴꦠꦶꦏꦸꦭꦨꦺꦴꦒꦴꦢꦶꦮꦱꦺꦤ ꦲꦷꦭ꦳ꦶꦠꦺ ꦥꦫꦶꦨꦹꦠꦺ. ꦥꦟꦷꦠꦺꦠꦶ ꦄꦩꦺꦴꦲꦤꦶꦱ꧀ꦱꦤ꧀ꦢꦪꦸꦠ꧀ꦠꦠ꧀ꦠꦴ ꦠꦧ꧀ꦧꦶꦥꦫꦷꦠꦺ. ꦱꦸꦮꦟ꧀ꦟꦺꦠꦶ ꦄꦢꦺꦴꦱꦤꦶꦱ꧀ꦱꦤ꧀ꦢꦪꦸꦠ꧀ꦠꦠ꧀ꦠꦴ ꦆꦛ꧀ꦜꦏꦤ꧀ꦠꦩꦤꦴꦥꦮꦟ꧀ꦟꦪꦸꦠ꧀ꦠꦺ. ꦢꦸꦧ꧀ꦧꦟ꧀ꦟꦺꦠꦶ ꦢꦺꦴꦱꦤꦶꦱ꧀ꦱꦤ꧀ꦢꦪꦸꦠ꧀ꦠꦠ꧀ꦠꦴ ꦄꦤꦶꦛ꧀ꦜꦴꦏꦤ꧀ꦠꦴꦩꦤꦴꦥꦮꦟ꧀ꦟꦪꦸꦠ꧀ꦠꦺ ꦄꦨꦶꦫꦹꦥꦺ ꦮꦶꦫꦹꦥꦺ ꦮꦴꦠꦶ ꦄꦠ꧀ꦡꦺꦴ. ꦱꦸꦒꦠꦺꦠꦶ ꦱꦸꦒꦠꦶꦒꦠꦺ, ꦄꦭꦺꦴꦨꦤꦶꦱ꧀ꦱꦤ꧀ꦢꦪꦸꦠ꧀ꦠꦠ꧀ꦠꦴ ꦮꦴ ꦄꦝ꧀ꦞꦺ ꦩꦲꦢ꧀ꦣꦤꦺ. ꦢꦸꦒ꧀ꦒꦠꦺꦠꦶ ꦢꦸꦒ꧀ꦒꦠꦶꦒꦠꦺ, ꦭꦺꦴꦨꦤꦶꦱ꧀ꦱꦤ꧀ꦢꦪꦸꦠ꧀ꦠꦠ꧀ꦠꦴ ꦮꦴ ꦢꦭꦶꦢ꧀ꦢꦺ ꦄꦥ꧀ꦥꦤ꧀ꦤꦥꦴꦤꦨꦺꦴꦗꦤꦺ. ꦪꦡꦴꦏꦩ꧀ꦩꦹꦥꦒꦺꦠꦶ ꦪꦁ ꦪꦁ ꦏꦩ꧀ꦩꦁ ꦈꦥꦕꦶꦠꦁ, ꦠꦺꦤ ꦠꦺꦤ ꦈꦥꦒꦠꦺ. ꦠꦠ꧀ꦡ ꦥꦸꦫꦶꦩꦺꦲꦶ ‘‘ꦕꦮꦩꦴꦤꦺ’’ꦠꦶꦄꦴꦢꦷꦲꦶ ꦢꦶꦧ꧀ꦧꦕꦏ꧀ꦑꦸꦏꦶꦕ꧀ꦕꦁ ꦮꦸꦠ꧀ꦠꦁ. ꦆꦩꦶꦤꦴ ꦥꦤ ꦥꦢꦺꦤ ꦪꦡꦴꦏꦩ꧀ꦩꦹꦥꦒꦚꦴꦟꦏꦶꦕ꧀ꦕꦁ. ꦪꦡꦴꦏꦩ꧀ꦩꦹꦥꦒꦚꦴꦟꦄꦤꦴꦒꦠꦁꦱꦚꦴꦟꦴꦤꦶ ꦕ ꦢꦶꦧ꧀ꦧꦕꦏ꧀ꦑꦸꦥꦴꦢꦏꦴꦤꦺꦮ ꦢꦶꦧ꧀ꦧꦕꦏ꧀ꦑꦸꦤꦴ ꦱꦲꦺꦮ ꦆꦗ꧀ꦙꦤ꧀ꦠꦶ.

ꦏꦴꦪꦢꦸꦕ꧀ꦕꦫꦶꦠꦺꦤꦴꦠꦶꦄꦴꦢꦷꦱꦸ ꦢꦸꦛ꧀ꦜꦸ ꦕꦫꦶꦠꦁ, ꦢꦸꦛ꧀ꦜꦁ ꦮꦴ ꦕꦫꦶꦠꦁ ꦏꦶꦭꦺꦱꦥꦹꦠꦶꦏꦠ꧀ꦠꦴ ꦢꦸꦕ꧀ꦕꦫꦶꦠꦁ. ꦏꦴꦪꦺꦤ ꦢꦸꦕ꧀ꦕꦫꦶꦠꦁ, ꦏꦴꦪꦠꦺꦴ ꦮꦴ ꦥꦮꦠ꧀ꦠꦁ ꦢꦸꦕ꧀ꦕꦫꦶꦠꦁ ꦏꦴꦪꦢꦸꦕ꧀ꦕꦫꦶꦠꦁ. ꦌꦮꦁ ꦮꦕꦷꦩꦤꦺꦴꦢꦸꦕ꧀ꦕꦫꦶꦠꦴꦤꦶꦥꦶ ꦢꦛ꧀ꦜꦧ꧀ꦧꦴꦤꦶ. ꦱꦩꦤ꧀ꦤꦴꦒꦠꦴꦠꦶ ꦱꦩꦔ꧀ꦒꦷꦨꦹꦠꦴ. ꦄꦫꦶꦪꦴꦤꦁ ꦈꦥꦮꦴꦢꦏꦴꦠꦶ ꦧꦸꦢ꧀ꦣꦴꦢꦷꦤꦁ ꦄꦫꦶꦪꦴꦤꦁ, ꦄꦤ꧀ꦠꦩꦱꦺꦴ ꦒꦶꦲꦶꦱꦺꦴꦠꦴꦥꦤ꧀ꦤꦴꦤꦩ꧀ꦥꦶ ꦄꦤ꧀ꦠꦶꦩꦮꦠ꧀ꦡꦸꦤꦴ ꦮꦴ ꦒꦸꦟꦥꦫꦶꦣꦁꦱꦤꦺꦤ ꦮꦴ ꦈꦥꦮꦴꦢꦏꦴ ꦄꦏ꧀ꦏꦺꦴꦱꦏꦴ ꦒꦫꦲꦏꦴ. ꦩꦶꦕ꧀ꦖꦴꦢꦶꦛ꧀ꦜꦶꦏꦴꦠꦶ ꦮꦶꦥꦫꦷꦠꦢꦱ꧀ꦱꦤꦴ. ꦩꦶꦕ꧀ꦖꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴꦠꦶ ꦩꦶꦕ꧀ꦖꦴꦢꦶꦛ꧀ꦜꦶꦲꦺꦠꦸꦨꦹꦠꦱꦩꦴꦢꦶꦤ꧀ꦤꦤꦴꦤꦴꦮꦶꦣꦏꦩ꧀ꦩꦴ. ꦪꦺ ꦕ ꦩꦶꦕ꧀ꦖꦴꦢꦶꦛ꧀ꦜꦶꦩꦹꦭꦏꦺꦱꦸ ꦏꦴꦪꦏꦩ꧀ꦩꦴꦢꦷꦱꦸ ꦄꦚ꧀ꦚꦺꦥꦶ ꦱꦩꦴꦢꦥꦺꦤ꧀ꦠꦶ. ꦠꦠ꧀ꦡ ꦮꦕꦷꦩꦤꦺꦴꦢꦸꦕ꧀ꦕꦫꦶꦠꦒ꧀ꦒꦲꦟꦺꦤ ꦄꦫꦶꦪꦹꦥꦮꦴꦢꦩꦶꦕ꧀ꦖꦴꦢꦶꦛ꧀ꦜꦷꦱꦸ ꦒꦲꦶꦠꦴꦱꦸꦥꦶ ꦠꦺꦱꦁ ꦥꦸꦤ ꦮꦕꦤꦁ ꦩꦲꦴꦱꦴꦮꦗ꧀ꦗꦨꦴꦮꦢꦱ꧀ꦱꦤꦠ꧀ꦡꦁ. ꦩꦲꦴꦱꦴꦮꦗ꧀ꦗꦺꦴ ꦲꦶ ꦄꦫꦶꦪꦹꦥꦮꦴꦢꦺꦴ ꦄꦴꦤꦤ꧀ꦠꦫꦶꦪꦱꦢꦶꦱꦺꦴ. ꦪꦡꦴꦲ –

‘‘ꦱꦺꦪ꧀ꦪꦡꦴꦥꦶ, ꦱꦴꦫꦶꦥꦸꦠ꧀ꦠ, ꦨꦶꦏ꧀ꦑꦸ ꦱꦷꦭꦱꦩ꧀ꦥꦤ꧀ꦤꦺꦴ ꦱꦩꦴꦣꦶꦱꦩ꧀ꦥꦤ꧀ꦤꦺꦴ ꦥꦚ꧀ꦚꦴꦱꦩ꧀ꦥꦤ꧀ꦤꦺꦴ ꦢꦶꦛ꧀ꦜꦺꦮ ꦣꦩ꧀ꦩꦺ ꦄꦚ꧀ꦚꦁ ꦄꦴꦫꦴꦣꦺꦪ꧀ꦪ, ꦌꦮꦁꦱꦩ꧀ꦥꦢꦩꦶꦢꦁ, ꦱꦴꦫꦶꦥꦸꦠ꧀ꦠ, ꦮꦢꦴꦩꦶ ꦠꦁ ꦮꦴꦕꦁ ꦄꦥ꧀ꦥꦲꦴꦪ ꦠꦁ ꦕꦶꦠ꧀ꦠꦁ ꦄꦥ꧀ꦥꦲꦴꦪ ꦠꦁ ꦢꦶꦛ꧀ꦜꦶꦁ ꦄꦥ꧀ꦥꦛꦶꦤꦶꦱ꧀ꦱꦗ꧀ꦗꦶꦠ꧀ꦮꦴ ꦪꦡꦴꦨꦠꦁ ꦤꦶꦏ꧀ꦑꦶꦠ꧀ꦠꦺꦴ ꦌꦮꦁ ꦤꦶꦫꦪꦺ’’ꦠꦶ (ꦩ. ꦤꦶ. ꧑.꧑꧔꧙).

ꦩꦶꦕ꧀ꦖꦴꦢꦶꦛ꧀ꦜꦶꦠꦺꦴ ꦕ ꦩꦲꦴꦱꦴꦮꦗ꧀ꦗꦠꦫꦁ ꦤꦴꦩ ꦄꦚ꧀ꦚꦁ ꦤꦠ꧀ꦡꦶ. ꦪꦡꦴꦲ –

‘‘ꦤꦴꦲꦁ, ꦨꦶꦏ꧀ꦑꦮꦺ, ꦄꦚ꧀ꦚꦁ ꦌꦏꦣꦩ꧀ꦩꦩ꧀ꦥꦶ ꦱꦩꦤꦸꦥꦱ꧀ꦱꦴꦩꦶ ꦌꦮꦁ ꦩꦲꦴꦱꦴꦮꦗ꧀ꦗꦠꦫꦁ, ꦪꦡꦪꦶꦢꦁ, ꦨꦶꦏ꧀ꦑꦮꦺ, ꦩꦶꦕ꧀ꦖꦴꦢꦶꦛ꧀ꦜꦶ. ꦩꦶꦕ꧀ꦖꦴꦢꦶꦛ꧀ꦜꦶꦥꦫꦩꦴꦤꦶ, ꦨꦶꦏ꧀ꦑꦮꦺ, ꦮꦗ꧀ꦗꦴꦤꦷ’’ꦠꦶ (ꦄ. ꦤꦶ. ꧑.꧓꧑꧐).

ꦏꦴꦪꦱ꧀ꦱ ꦨꦺꦢꦴꦠꦶ ꦈꦥꦴꦢꦶꦤ꧀ꦤꦏ꧀ꦑꦤ꧀ꦣꦥꦫꦶꦕ꧀ꦕꦴꦒꦴ. ꦥꦫꦁ ꦩꦫꦟꦴꦠꦶ ꦠꦢꦤꦤ꧀ꦠꦫꦁ ꦄꦨꦶꦤꦶꦧ꧀ꦧꦠ꧀ꦠꦏ꧀ꦑꦤ꧀ꦣꦒ꧀ꦒꦲꦟꦺ. ꦄꦡ ꦮꦴ ꦏꦴꦪꦱ꧀ꦱ ꦨꦺꦢꦴꦠꦶ ꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ ꦈꦥꦕ꧀ꦖꦺꦢꦴ. ꦥꦫꦁ ꦩꦫꦟꦴꦠꦶ ꦕꦸꦠꦶꦠꦺꦴ ꦈꦢ꧀ꦣꦁ. ꦄꦥꦴꦪꦤ꧀ꦠꦶꦄꦴꦢꦶ ꦱꦧ꧀ꦧꦁ ꦤꦶꦫꦪꦮꦺꦮꦕꦤꦁ. ꦤꦶꦫꦪꦺꦴ ꦲꦶ ꦱꦒ꧀ꦒꦩꦺꦴꦏ꧀ꦑꦲꦺꦠꦸꦨꦹꦠꦴ ꦥꦸꦚ꧀ꦚꦱꦩ꧀ꦩꦠꦴ ꦄꦪꦴ ꦄꦥꦺꦠꦠ꧀ꦠꦴ, ꦱꦸꦑꦴꦤꦁ ꦮꦴ ꦄꦴꦪꦱ꧀ꦱ ꦄꦨꦴꦮꦴ ꦄꦥꦴꦪꦺꦴ. ꦢꦸꦏ꧀ꦑꦱ꧀ꦱ ꦒꦠꦶ ꦥꦛꦶꦱꦫꦟꦤ꧀ꦠꦶ ꦢꦸꦒ꧀ꦒꦠꦶ, ꦢꦺꦴꦱꦧꦲꦸꦭꦠꦴꦪ ꦮꦴ ꦢꦸꦛ꧀ꦜꦺꦤ ꦏꦩ꧀ꦩꦸꦤꦴ ꦤꦶꦧ꧀ꦧꦠ꧀ꦠꦴ ꦒꦠꦶ ꦢꦸꦒ꧀ꦒꦠꦶ. ꦮꦶꦮꦱꦴ ꦤꦶꦥꦠꦤ꧀ꦠꦶ ꦠꦠ꧀ꦡ ꦢꦸꦏ꧀ꦏꦛꦏꦴꦫꦶꦤꦺꦴꦠꦶ ꦮꦶꦤꦶꦥꦴꦠꦺꦴ. ꦤꦠ꧀ꦡꦶ ꦌꦠ꧀ꦡ ꦄꦱ꧀ꦱꦴꦢꦱꦚ꧀ꦚꦶꦠꦺꦴ ꦄꦪꦺꦴꦠꦶ ꦤꦶꦫꦪꦺꦴ.

ꦄꦡ ꦮꦴ ꦄꦥꦴꦪꦒ꧀ꦒꦲꦟꦺꦤ ꦠꦶꦫꦕ꧀ꦖꦴꦤꦪꦺꦴꦤꦶꦁ ꦢꦷꦥꦺꦠꦶ, ꦠꦶꦫꦕ꧀ꦖꦴꦤꦪꦺꦴꦤꦶ ꦲꦶ ꦄꦥꦴꦪꦺꦴ, ꦱꦸꦒꦠꦶꦠꦺꦴ ꦄꦥꦺꦠꦠ꧀ꦠꦴ. ꦤ ꦢꦸꦒ꧀ꦒꦠꦶ, ꦩꦲꦺꦱꦏ꧀ꦑꦴꦤꦁ ꦤꦴꦒꦫꦴꦗꦴꦢꦷꦤꦁ ꦱꦩ꧀ꦨꦮꦠꦺꦴ. ꦢꦸꦒ꧀ꦒꦠꦶꦒ꧀ꦒꦲꦟꦺꦤ ꦥꦺꦠ꧀ꦠꦶꦮꦶꦱꦪꦁ ꦢꦷꦥꦺꦠꦶ, ꦱꦺꦴ ꦲꦶ ꦄꦥꦴꦪꦺꦴ ꦕꦺꦮ ꦢꦸꦒ꧀ꦒꦠꦶ ꦕ ꦱꦸꦒꦠꦶꦠꦺꦴ ꦄꦥꦺꦠꦠ꧀ꦠꦴ, ꦢꦸꦏ꧀ꦑꦱ꧀ꦱ ꦕ ꦒꦠꦶꦨꦹꦠꦠ꧀ꦠꦴ. ꦤ ꦠꦸ ꦮꦶꦤꦶꦥꦴꦠꦺꦴ ꦄꦱꦸꦫꦱꦢꦶꦱꦁ ꦄꦮꦶꦤꦶꦥꦠꦶꦠꦠ꧀ꦠꦴ. ꦥꦺꦠꦩꦲꦶꦢ꧀ꦣꦶꦏꦴꦤꦚ꧀ꦲꦶ ꦮꦶꦩꦴꦤꦴꦤꦶꦥꦶ ꦤꦶꦧ꧀ꦧꦠ꧀ꦠꦤ꧀ꦠꦶ. ꦮꦶꦤꦶꦥꦴꦠꦒ꧀ꦒꦲꦟꦺꦤ ꦄꦱꦸꦫꦏꦴꦪꦁ ꦢꦷꦥꦺꦠꦶ, ꦱꦺꦴ ꦲꦶ ꦪꦡꦴꦮꦸꦠ꧀ꦠꦺꦤꦠ꧀ꦡꦺꦤ ꦄꦥꦴꦪꦺꦴ ꦕꦺꦮ ꦢꦸꦒ꧀ꦒꦠꦶ ꦕ ꦱꦸꦑꦱꦩꦸꦱ꧀ꦱꦪꦺꦲꦶ ꦮꦶꦤꦶꦥꦴꦠꦠ꧀ꦠꦴ ꦮꦶꦤꦶꦥꦴꦠꦺꦴꦠꦶ ꦮꦸꦕ꧀ꦕꦠꦶ. ꦤꦶꦫꦪꦒ꧀ꦒꦲꦟꦺꦤ ꦄꦮꦷꦕꦶꦄꦴꦢꦶꦄꦤꦺꦏꦥ꧀ꦥꦏꦴꦫꦁ ꦤꦶꦫꦪꦩꦺꦮ ꦢꦷꦥꦺꦠꦶ. ꦈꦥꦥꦤ꧀ꦤꦴꦠꦶ ꦈꦥꦒꦠꦴ, ꦠꦠ꧀ꦡ ꦄꦨꦶꦤꦶꦧ꧀ꦧꦠ꧀ꦠꦴꦠꦶ ꦄꦣꦶꦥ꧀ꦥꦴꦪꦺꦴ. ꦮꦸꦠ꧀ꦠꦮꦶꦥꦫꦶꦪꦴꦪꦺꦤ ꦱꦸꦏ꧀ꦏꦥꦏ꧀ꦑꦺꦴ ꦮꦺꦢꦶꦠꦧ꧀ꦧꦺꦴ.

ꦄꦪꦁ ꦥꦤ ꦮꦶꦱꦺꦱꦺꦴ – ꦌꦠ꧀ꦡ ꦱꦸꦒꦠꦶꦒ꧀ꦒꦲꦟꦺꦤ ꦩꦤꦸꦱ꧀ꦱꦒꦠꦶꦩ꧀ꦥꦶ ꦱꦔ꧀ꦒꦟ꧀ꦲꦴꦠꦶ. ꦱꦒ꧀ꦒꦒ꧀ꦒꦲꦟꦺꦤ ꦢꦺꦮꦒꦠꦶꦁ ꦌꦮ. ꦠꦠ꧀ꦡ ꦱꦸꦤ꧀ꦢꦫꦴ ꦒꦠꦷꦠꦶ ꦱꦸꦒꦠꦶ. ꦫꦹꦥꦴꦢꦷꦲꦶ ꦮꦶꦱꦪꦺꦲꦶ ꦱꦸꦛ꧀ꦜꦸ ꦄꦒ꧀ꦒꦺꦴꦠꦶ ꦱꦒ꧀ꦒꦺꦴ. ꦱꦺꦴ ꦱꦧ꧀ꦧꦺꦴꦥꦶ ꦭꦸꦗ꧀ꦗꦤꦥꦭꦸꦗ꧀ꦗꦤꦛ꧀ꦜꦺꦤ ꦭꦺꦴꦏꦺꦴꦠꦶ ꦄꦪꦁ ꦮꦕꦤꦠ꧀ꦡꦺꦴ. ꦄꦩꦸꦏꦴꦪ ꦏꦥ꧀ꦥꦏꦺꦴꦛꦶꦪꦁ ꦈꦥꦕꦶꦠꦁ ꦠꦺꦤꦴꦪꦁ ꦌꦠꦫꦲꦶ, ꦄꦤꦴꦒꦠꦺ ꦮꦴ ꦱꦒ꧀ꦒꦹꦥꦒꦺꦴ ꦄꦥꦴꦪꦹꦥꦒꦺꦴ ꦕꦴꦠꦶ ꦄꦛ꧀ꦜꦩꦤꦮꦩꦧꦭꦚꦴꦟꦏꦶꦕ꧀ꦕꦁ ꦌꦏꦗ꧀ꦙꦁ ꦏꦠ꧀ꦮꦴ ꦢꦱ꧀ꦱꦶꦠꦁ. ꦠꦡꦴ ꦏꦥ꧀ꦥꦱꦠꦱꦲꦱ꧀ꦱꦺꦮꦴꦠꦶꦄꦴꦢꦷꦱꦸꦥꦶ. ꦠꦺꦤꦺꦮꦴꦲ – ‘‘ꦆꦩꦴꦤꦶ ꦨꦒꦮꦠꦺꦴ ꦢ꧀ꦮꦺ ꦚꦴꦟꦴꦤꦷ’’ꦠꦶ.

ꦤꦶꦲꦠꦺꦴ ꦩꦴꦫꦺꦴ ꦧꦺꦴꦣꦶꦩꦹꦭꦺꦠꦶ ꦤꦶꦲꦠꦺꦴ ꦱꦩꦸꦕ꧀ꦖꦶꦤ꧀ꦤꦺꦴ ꦏꦶꦭꦺꦱꦩꦴꦫꦺꦴ ꦧꦺꦴꦣꦶꦫꦸꦏ꧀ꦑꦩꦹꦭꦺ. ꦆꦢꦁ ꦨꦒꦮꦠꦺꦴ ꦢꦱꦩꦁ ꦧꦭꦤ꧀ꦠꦶ ꦆꦢꦁ ꦏꦶꦭꦺꦱꦩꦴꦫꦱ꧀ꦱ ꦲꦤꦤꦁ ꦱꦩꦸꦕ꧀ꦖꦶꦤ꧀ꦢꦤꦁ ꦨꦒꦮꦠꦺꦴ ꦢꦱꦩꦁ ꦧꦭꦁ. ꦠꦺꦤꦺꦮꦴꦲ – ‘‘ꦱꦧ꧀ꦧꦴꦱꦮꦥꦫꦶꦏ꧀ꦑꦪꦁ ꦚꦴꦟ’’ꦤ꧀ꦠꦶ. ꦪꦱ꧀ꦩꦴ ꦥꦤ ꦪꦢꦴ ꦄꦫꦲꦠ꧀ꦠꦩꦒ꧀ꦒꦺꦤ ꦱꦮꦴꦱꦤꦴ ꦱꦧ꧀ꦧꦺ ꦄꦴꦱꦮꦴ ꦑꦺꦥꦶꦠꦴ, ꦠꦢꦴ ꦨꦒꦮꦠꦴ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦄꦣꦶꦒꦠꦁ ꦤꦴꦩ, ꦠꦱ꧀ꦩꦴ ‘‘ꦪꦁ ꦱꦧ꧀ꦧꦚ꧀ꦚꦸꦠꦴ ꦥꦠ꧀ꦠꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦄꦪꦁ ꦠꦴꦮꦺꦠ꧀ꦡ ꦄꦴꦕꦫꦶꦪꦴꦤꦁ ꦱꦩꦴꦤꦠ꧀ꦡꦏꦡꦴ. ꦥꦫꦮꦴꦢꦷ ꦥꦤꦴꦲ – ‘‘ꦢꦱꦧꦭꦚꦴꦟꦁ ꦤꦴꦩ ꦥꦴꦛꦶꦌꦏ꧀ꦏꦁ ꦤꦠ꧀ꦡꦶ, ꦪꦱ꧀ꦩꦴ ‘ꦱꦧ꧀ꦧꦚ꧀ꦚꦸꦠꦴ ꦥꦠ꧀ꦠꦴ ꦮꦶꦢꦶꦠꦴ ꦱꦧ꧀ꦧꦣꦩ꧀ꦩꦴ’ꦠꦶ ꦮꦸꦠ꧀ꦠꦁ, ꦠꦱ꧀ꦩꦴ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦱ꧀ꦱꦺꦮꦴꦪꦁ ꦥꦨꦺꦢꦺꦴ’’ꦠꦶ, ꦠꦁ ꦤ ꦠꦡꦴ ꦢꦛ꧀ꦜꦧ꧀ꦧꦁ. ꦄꦚ꧀ꦚꦩꦺꦮ ꦲꦶ ꦢꦱꦧꦭꦚꦴꦟꦁ, ꦄꦚ꧀ꦚꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ. ꦢꦱꦧꦭꦚꦴꦟꦚ꧀ꦲꦶ ꦱꦏꦱꦏꦏꦶꦕ꧀ꦕꦩꦺꦮ ꦗꦴꦤꦴꦠꦶ, ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦠꦩ꧀ꦥꦶ ꦠꦠꦺꦴ ꦄꦮꦱꦺꦱꦩ꧀ꦥꦶ ꦗꦴꦤꦴꦠꦶ. ꦢꦱꦧꦭꦚꦴꦟꦺꦱꦸ ꦲꦶ ꦥꦜꦩꦁ ꦏꦴꦫꦟꦴꦏꦴꦫꦟꦩꦺꦮ ꦗꦴꦤꦴꦠꦶ. ꦢꦸꦠꦶꦪꦁ ꦏꦩ꧀ꦩꦥꦫꦶꦕ꧀ꦖꦺꦢꦩꦺꦮ, ꦠꦠꦶꦪꦁ ꦣꦴꦠꦸꦤꦴꦤꦠ꧀ꦠꦏꦴꦫꦟꦩꦺꦮ, ꦕꦠꦸꦠ꧀ꦡꦁ ꦄꦗ꧀ꦙꦴꦱꦪꦴꦣꦶꦩꦸꦠ꧀ꦠꦶꦩꦺꦮ, ꦥꦚ꧀ꦕꦩꦁ ꦏꦩ꧀ꦩꦮꦶꦥꦴꦏꦤ꧀ꦠꦫꦩꦺꦮ, ꦖꦛ꧀ꦜꦁ ꦙꦴꦤꦴꦢꦷꦲꦶ ꦱꦢ꧀ꦣꦶꦁ ꦠꦺꦱꦁ ꦱꦁꦏꦶꦭꦺꦱꦴꦢꦶꦩꦺꦮ, ꦱꦠ꧀ꦠꦩꦁ ꦆꦤ꧀ꦢ꧀ꦫꦶꦪꦴꦤꦁ ꦠꦶꦏ꧀ꦑꦩꦸꦢꦸꦨꦴꦮꦩꦺꦮ, ꦄꦛ꧀ꦜꦩꦁ ꦥꦸꦧ꧀ꦧꦺꦤꦶꦮꦸꦠ꧀ꦡꦏ꧀ꦑꦤ꧀ꦣꦱꦤ꧀ꦠꦠꦶꦩꦺꦮ, ꦤꦮꦩꦁ ꦱꦠ꧀ꦠꦴꦤꦁ ꦕꦸꦠꦹꦥꦥꦴꦠꦩꦺꦮ, ꦢꦱꦩꦁ ꦱꦕ꧀ꦕꦥꦫꦶꦕ꧀ꦖꦺꦢꦩꦺꦮ. ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦥꦤ ꦌꦠꦺꦲꦶ ꦗꦴꦤꦶꦠꦧ꧀ꦧꦚ꧀ꦕ ꦠꦠꦺꦴ ꦈꦠ꧀ꦠꦫꦶꦚ꧀ꦕ ꦥꦗꦴꦤꦴꦠꦶ. ꦌꦠꦺꦱꦁ ꦥꦤ ꦏꦶꦕ꧀ꦕꦁ ꦱꦧ꧀ꦧꦁ ꦤ ꦏꦫꦺꦴꦠꦶ. ꦠꦚ꧀ꦲꦶ ꦙꦴꦤꦁ ꦲꦸꦠ꧀ꦮꦴ ꦄꦥ꧀ꦥꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦆꦢ꧀ꦣꦶ ꦲꦸꦠ꧀ꦮꦴ ꦮꦶꦏꦸꦧ꧀ꦧꦶꦠꦸꦁ ꦤ ꦱꦏ꧀ꦏꦺꦴꦠꦶ, ꦩꦒ꧀ꦒꦺꦴ ꦲꦸꦠ꧀ꦮꦴ ꦏꦶꦭꦺꦱꦺ ꦑꦺꦥꦺꦠꦸꦁ ꦤ ꦱꦏ꧀ꦏꦺꦴꦠꦶ.

ꦄꦥꦶꦕ ꦥꦫꦮꦴꦢꦷ ꦌꦮꦁ ꦥꦸꦕ꧀ꦖꦶꦠꦧ꧀ꦧꦺꦴ ‘‘ꦢꦱꦧꦭꦚꦴꦟꦁ ꦤꦴꦩꦺꦠꦁ ꦱꦮꦶꦠꦏ꧀ꦏꦱꦮꦶꦕꦴꦫꦁ ꦄꦮꦶꦠꦏ꧀ꦏꦮꦶꦕꦴꦫꦩꦠ꧀ꦠꦁ ꦄꦮꦶꦠꦏ꧀ꦏꦄꦮꦶꦕꦴꦫꦁ ꦏꦴꦩꦴꦮꦕꦫꦁ ꦫꦹꦥꦴꦮꦕꦫꦁ ꦄꦫꦹꦥꦴꦮꦕꦫꦁ ꦭꦺꦴꦏꦶꦪꦁ ꦭꦺꦴꦏꦸꦠ꧀ꦠꦫ’’ꦤ꧀ꦠꦶ. ꦗꦴꦤꦤ꧀ꦠꦺꦴ ‘‘ꦥꦛꦶꦥꦴꦛꦶꦪꦴ ꦱꦠ꧀ꦠ ꦱꦮꦶꦠꦏ꧀ꦏꦱꦮꦶꦕꦴꦫꦴꦤꦷ’’ꦠꦶ ꦮꦏ꧀ꦑꦠꦶ, ꦠꦠꦺꦴ ꦥꦫꦴꦤꦶ ꦢ꧀ꦮꦺ ꦄꦮꦶꦠꦏ꧀ꦏꦄꦮꦶꦕꦴꦫꦴꦤꦷꦠꦶ, ꦄꦴꦱꦮꦏ꧀ꦑꦪꦚꦴꦟꦁ ꦱꦶꦪꦴ ꦱꦮꦶꦠꦏ꧀ꦏꦱꦮꦶꦕꦴꦫꦁ, ꦱꦶꦪꦴ ꦄꦮꦶꦠꦏ꧀ꦏꦮꦶꦕꦴꦫꦩꦠ꧀ꦠꦁ, ꦱꦶꦪꦴ ꦄꦮꦶꦠꦏ꧀ꦏꦄꦮꦶꦕꦴꦫꦤ꧀ꦠꦶ. ꦠꦡꦴ ꦥꦛꦶꦥꦴꦛꦶꦪꦴ ꦱꦠ꧀ꦠ ꦏꦴꦩꦴꦮꦕꦫꦴꦤꦶ, ꦠꦠꦺꦴ ꦢ꧀ꦮꦺ ꦫꦹꦥꦴꦮꦕꦫꦴꦤꦶ, ꦄꦮꦱꦴꦤꦺ ꦌꦏꦁ ꦭꦺꦴꦏꦸꦠ꧀ꦠꦫꦤ꧀ꦠꦶ ꦮꦏ꧀ꦑꦠꦶ. ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦥꦤ ꦱꦮꦶꦠꦏ꧀ꦏꦱꦮꦶꦕꦴꦫꦩꦺꦮ ꦏꦴꦩꦴꦮꦕꦫꦩꦺꦮ ꦭꦺꦴꦏꦶꦪꦩꦺꦮꦴꦠꦶ ꦤꦶꦛ꧀ꦜꦩꦺꦠ꧀ꦡ ꦒꦤ꧀ꦠꦧ꧀ꦧꦁ.

ꦮꦶꦕꦪꦲꦴꦫꦱꦩ꧀ꦥꦴꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.