꧑꧖. ꦥꦶꦔ꧀ꦒꦶꦪꦩꦴꦟꦮꦱꦸꦠ꧀ꦠꦤꦶꦢ꧀ꦢꦺꦱꦮꦟ꧀ꦟꦤꦴ

꧘꧙. ꦱꦺꦴꦭ꦳ꦱꦩꦺ ꦥꦶꦔ꧀ꦒꦶꦪꦱꦸꦠ꧀ꦠꦤꦶꦢ꧀ꦢꦺꦱꦺ – ꦗꦶꦟ꧀ꦟꦺꦴꦲꦩꦱ꧀ꦩꦶ ꦄꦧꦭꦺꦴ ꦮꦷꦠꦮꦟ꧀ꦟꦺꦴꦠꦶ ꦱꦺꦴ ꦏꦶꦫ ꦧ꧀ꦫꦴꦲ꧀ꦩꦟꦺꦴ ꦗꦫꦴꦨꦶꦨꦹꦠꦺꦴ ꦮꦷꦱꦮꦱ꧀ꦱꦱꦠꦶꦏꦺꦴ ꦗꦴꦠꦶꦪꦴ, ꦢꦸꦧ꧀ꦧꦭꦺꦴ ꦕ ‘‘ꦆꦣ ꦥꦴꦢꦁ ꦏꦫꦶꦱ꧀ꦱꦴꦩꦷ’’ꦠꦶ ꦄꦚ꧀ꦚꦠ꧀ꦫꦺꦮ ꦏꦫꦺꦴꦠꦶ, ꦮꦶꦤꦛ꧀ꦜꦥꦸꦫꦶꦩꦖꦮꦶꦮꦟ꧀ꦟꦺꦴ ꦕ. ꦠꦺꦤꦴꦲ – ‘‘ꦗꦶꦟ꧀ꦟꦺꦴꦲꦩꦱ꧀ꦩꦶ ꦄꦧꦭꦺꦴ ꦮꦷꦠꦮꦟ꧀ꦟꦺꦴ’’ꦠꦶ. ꦩꦴꦲꦁ ꦤꦱ꧀ꦱꦁ ꦩꦺꦴꦩꦸꦲꦺꦴ ꦄꦤ꧀ꦠꦫꦴꦮꦴꦠꦶ ꦩꦴꦲꦁ ꦠꦸꦪ꧀ꦲꦁ ꦣꦩ꧀ꦩꦁ ꦄꦱꦕ꧀ꦖꦶꦏꦠ꧀ꦮꦴ ꦄꦤ꧀ꦠꦫꦴ ꦌꦮ ꦄꦮꦶꦢ꧀ꦮꦴ ꦲꦸꦠ꧀ꦮꦴ ꦄꦤꦱ꧀ꦱꦶꦁ. ꦗꦴꦠꦶꦗꦫꦴꦪ ꦆꦣ ꦮꦶꦥ꧀ꦥꦲꦴꦤꦤ꧀ꦠꦶ ꦆꦣꦺꦮ ꦠꦮ ꦥꦴꦢꦩꦹꦭꦺ ꦥꦴꦱꦴꦟꦏꦺ ꦕꦺꦠꦶꦪꦺ ꦮꦴ ꦗꦴꦠꦶꦗꦫꦴꦪ ꦮꦶꦥ꧀ꦥꦲꦴꦤꦁ ꦤꦶꦧ꧀ꦧꦴꦤꦁ ꦣꦩ꧀ꦩꦫꦱꦁ ꦄꦲꦁ ꦮꦶꦗꦚ꧀ꦚꦁ, ꦠꦁ ꦩꦺ ꦄꦴꦕꦶꦏ꧀ꦑ.

ꦄꦧꦭꦺꦴꦠꦶ ꦧꦭꦮꦶꦫꦲꦶꦠꦺꦴ. ꦢꦸꦧ꧀ꦧꦭꦺꦴꦠꦶ ꦢꦸꦧ꧀ꦧꦭꦧꦭꦺꦴ. ꦄꦥ꧀ꦥꦧꦭꦺꦴꦠꦶ ꦥꦫꦶꦠ꧀ꦠꦧꦭꦺꦴ. ꦄꦥ꧀ꦥꦡꦴꦩꦺꦴꦠꦶ ꦥꦫꦶꦠ꧀ꦠꦮꦷꦫꦶꦪꦺꦴ. ꦮꦷꦠꦮꦟ꧀ꦟꦺꦴꦠꦶ ꦥꦫꦶꦮꦠ꧀ꦠꦶꦠꦖꦮꦶꦮꦟ꧀ꦟꦺꦴ. ꦮꦶꦒꦠꦮꦟ꧀ꦟꦺꦴꦠꦶ ꦄꦥꦒꦠꦖꦮꦶꦮꦟ꧀ꦟꦺꦴ. ꦮꦶꦒꦕ꧀ꦖꦶꦠꦮꦟ꧀ꦟꦺꦴꦠꦶ ꦢꦹꦫꦷꦨꦹꦠꦖꦮꦶꦮꦟ꧀ꦟꦺꦴ. ꦪꦴ ꦱꦴ ꦥꦸꦫꦶꦩꦴ ꦱꦸꦨꦴ ꦮꦟ꧀ꦟꦤꦶꦨꦴꦠꦶ ꦪꦴ ꦱꦴ ꦱꦸꦨꦴ ꦱꦸꦤ꧀ꦢꦫꦴ ꦥꦸꦫꦶꦩꦏꦴꦭꦺ ꦱꦠꦶ, ꦱꦴ ꦮꦟ꧀ꦟꦤꦶꦨꦴ ꦌꦠꦫꦲꦶ ꦄꦤ꧀ꦠꦫꦲꦶꦠꦴ ꦮꦶꦒꦠꦴ. ꦄꦴꦢꦷꦤꦮꦺꦴ ꦥꦴꦠꦸꦨꦹꦠꦺꦴꦠꦶ ꦈꦥꦢ꧀ꦢꦮꦺꦴ ꦥꦴꦠꦸꦫꦲꦺꦴꦱꦶ. ‘‘ꦪꦴ ꦱꦴ ꦥꦸꦫꦶꦩꦴ ꦱꦸꦨꦴ ꦮꦟ꧀ꦟꦤꦶꦨꦴ’’ꦠꦶ ꦥꦴꦜꦁ ꦜꦥꦺꦠ꧀ꦮꦴ ‘‘ꦪꦴ ꦱꦸꦨꦴ ꦄꦱ꧀ꦱꦴ’’ꦠꦶ ꦌꦏꦺ ꦮꦟ꧀ꦟꦪꦤ꧀ꦠꦶ.

ꦄꦱꦸꦢ꧀ꦣꦴꦠꦶ ꦥꦛꦭꦴꦢꦷꦲꦶ ꦄꦱꦸꦢ꧀ꦣꦴ. ꦄꦮꦶꦱꦸꦢ꧀ꦣꦴꦠꦶ ꦠꦶꦩꦶꦫꦴꦢꦷꦲꦶ ꦄꦮꦶꦱꦸꦢ꧀ꦣꦴ. ꦄꦥꦫꦶꦱꦸꦢ꧀ꦣꦴꦠꦶ ꦱꦩꦤ꧀ꦠꦠꦺꦴ ꦦꦺꦴꦛꦥꦛꦭꦴꦢꦷꦲꦶ ꦥꦫꦶꦪꦺꦴꦤꦢ꧀ꦣꦠ꧀ꦠꦴ ꦄꦥꦫꦶꦱꦸꦢ꧀ꦣꦴ. ꦄꦮꦺꦴꦢꦴꦠꦴꦠꦶ ꦤꦥ꧀ꦥꦱꦤ꧀ꦤꦴ ꦥꦱꦤ꧀ꦤꦱꦢꦶꦱꦴ. ꦤꦺꦴ ꦠꦡꦴ ꦕꦏ꧀ꦑꦸꦤꦴ ꦫꦹꦥꦺ ꦥꦱ꧀ꦱꦴꦩꦷꦠꦶ ꦪꦡꦴ ꦥꦺꦴꦫꦴꦟꦕꦏ꧀ꦑꦸꦤꦴ ꦫꦹꦥꦴꦫꦩ꧀ꦩꦟꦁ ꦥꦱ꧀ꦱꦴꦩꦶ ꦎꦭꦺꦴꦏꦺꦩꦶ, ꦠꦡꦴ ꦠꦺꦤ ꦥꦏꦴꦫꦺꦤ ꦆꦢꦴꦤꦶ ꦤ ꦥꦱ꧀ꦱꦴꦩꦶ. ꦱꦺꦴꦠꦁ ꦄꦱꦸꦢ꧀ꦣꦤ꧀ꦠꦶꦄꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦩꦴꦲꦁ ꦤꦱ꧀ꦱꦤ꧀ꦠꦶ ꦄꦲꦁ ꦩꦴ ꦮꦶꦤꦱ꧀ꦱꦁ.

꧙꧐. ꦆꦢꦴꦤꦶ ꦪꦱ꧀ꦩꦴ ꦥꦶꦔ꧀ꦒꦶꦪꦺꦴ ꦏꦴꦪꦺ ꦱꦴꦥꦺꦏ꧀ꦑꦠꦴꦪ ‘‘ꦗꦶꦟ꧀ꦟꦺꦴꦲꦩꦱ꧀ꦩꦷ’’ꦠꦶꦄꦴꦢꦶꦩꦴꦲ. ꦠꦺꦤꦱ꧀ꦱ ꦨꦒꦮꦴ ꦏꦴꦪꦺ ꦱꦶꦤꦺꦲꦥ꧀ꦥꦲꦴꦤꦠ꧀ꦡꦁ ‘‘ꦢꦶꦱ꧀ꦮꦴꦤ ꦫꦹꦥꦺꦱꦸ ꦮꦶꦲꦚ꧀ꦚꦩꦴꦤꦺ’’ꦠꦶ ꦒꦴꦡꦩꦴꦲ. ꦠꦠ꧀ꦡ ꦫꦹꦥꦺꦱꦹꦠꦶ ꦫꦹꦥꦲꦺꦠꦸ ꦫꦹꦥꦥꦕ꧀ꦕꦪꦴ. ꦮꦶꦲꦚ꧀ꦚꦩꦴꦤꦺꦠꦶ ꦏꦩ꧀ꦩꦏꦴꦫꦟꦴꦢꦷꦲꦶ ꦈꦥꦲꦚ꧀ꦚꦩꦴꦤꦺ. ꦫꦸꦥ꧀ꦥꦤ꧀ꦠꦶ ꦫꦹꦥꦺꦱꦹꦠꦶ ꦕꦏ꧀ꦑꦸꦫꦺꦴꦒꦴꦢꦷꦲꦶ ꦕ ꦫꦹꦥꦲꦺꦠꦸꦪꦺꦮ ꦗꦤꦴ ꦫꦸꦥ꧀ꦥꦤ꧀ꦠꦶ ꦧꦴꦣꦶꦪꦤ꧀ꦠꦶ.

ꦲꦚ꧀ꦚꦤ꧀ꦠꦷꦠꦶ ꦓꦛꦷꦪꦤ꧀ꦠꦶ. ꦮꦶꦲꦚ꧀ꦚꦤ꧀ꦠꦷꦠꦶ ꦮꦶꦲꦺꦱꦶꦪꦤ꧀ꦠꦶ. ꦈꦥꦮꦶꦲꦚ꧀ꦚꦤ꧀ꦠꦷꦠꦶ ꦲꦠ꧀ꦡꦥꦴꦢꦕ꧀ꦖꦺꦢꦴꦢꦶꦁ ꦭꦨꦤ꧀ꦠꦶ. ꦈꦥꦓꦴꦠꦶꦪꦤ꧀ꦠꦷꦠꦶ ꦩꦫꦟꦁ ꦭꦨꦤ꧀ꦠꦶ. ꦏꦸꦥ꧀ꦥꦤ꧀ꦠꦷꦠꦶ ꦥꦫꦶꦮꦠ꧀ꦠꦤ꧀ꦠꦶ. ꦥꦷꦭ꦳ꦪꦤ꧀ꦠꦷꦠꦶ ꦮꦶꦓꦴꦠꦁ ꦄꦴꦥꦗ꧀ꦗꦤ꧀ꦠꦶ. ꦓꦛ꧀ꦛꦪꦤ꧀ꦠꦷꦠꦶ ꦓꦛ꧀ꦛꦤꦁ ꦥꦴꦥꦸꦟꦤ꧀ꦠꦶ. ꦧ꧀ꦪꦴꦣꦶꦠꦴꦠꦶ ꦨꦷꦠꦴ. ꦢꦺꦴꦩꦤꦱ꧀ꦱꦶꦠꦴꦠꦶ ꦕꦶꦠ꧀ꦠꦮꦶꦓꦴꦠꦁ ꦥꦠ꧀ꦠꦴ. ꦮꦺꦩꦴꦤꦺꦠꦶ ꦤꦱ꧀ꦱꦩꦴꦤꦺ.

꧙꧑. ꦌꦮꦁ ꦨꦒꦮꦠꦴ ꦪꦴꦮ ꦄꦫꦲꦠ꧀ꦠꦁ, ꦠꦴꦮ ꦏꦡꦶꦠꦁ ꦥꦛꦶꦥꦠ꧀ꦠꦶꦁ ꦱꦸꦠ꧀ꦮꦴ ꦥꦶꦔ꧀ꦒꦶꦪꦺꦴ ꦗꦫꦴꦢꦸꦧ꧀ꦧꦭꦠꦴꦪ ꦮꦶꦱꦺꦱꦁ ꦄꦤꦣꦶꦒꦤ꧀ꦠ꧀ꦮꦴ ꦕ ꦥꦸꦤ ‘‘ꦢꦶꦱꦴ ꦕꦠꦱ꧀ꦱꦺꦴ’’ꦠꦶ ꦆꦩꦴꦪ ꦒꦴꦡꦴꦪ ꦨꦒꦮꦤ꧀ꦠꦁ ꦡꦺꦴꦩꦺꦤ꧀ꦠꦺꦴ ꦢꦺꦱꦤꦁ ꦪꦴꦕꦠꦶ.

꧙꧒. ꦄꦡꦱ꧀ꦱ ꦨꦒꦮꦴ ꦥꦸꦤꦥꦶ ꦪꦴꦮ ꦄꦫꦲꦠ꧀ꦠꦁ, ꦠꦴꦮ ꦥꦛꦶꦥꦢꦁ ꦢꦱ꧀ꦱꦺꦤ꧀ꦠꦺꦴ ‘‘ꦠꦟ꧀ꦲꦴꦣꦶꦥꦤ꧀ꦤꦺ’’ꦠꦶ ꦒꦴꦡꦩꦴꦲ.

ꦠꦟ꧀ꦲꦴꦣꦶꦥꦤ꧀ꦤꦺꦠꦶ ꦠꦟ꧀ꦲꦴꦪ ꦮꦶꦩꦸꦕ꧀ꦕꦶꦠ꧀ꦮꦴ ꦜꦶꦠꦺ. ꦠꦟ꧀ꦲꦴꦤꦸꦒꦺꦠꦶ ꦠꦟ꧀ꦲꦴꦪ ꦱꦲ ꦒꦕ꧀ꦖꦤ꧀ꦠꦺ. ꦠꦟ꧀ꦲꦴꦤꦸꦒꦠꦺꦠꦶ ꦠꦟ꧀ꦲꦴꦪ ꦄꦤꦸꦧꦤ꧀ꦣꦤ꧀ꦠꦺ. ꦠꦟ꧀ꦲꦴꦤꦸꦱꦛꦺꦠꦶ ꦠꦟ꧀ꦲꦴꦪ ꦱꦲ ꦣꦴꦮꦤ꧀ꦠꦺ. ꦠꦟ꧀ꦲꦴꦪ ꦥꦤ꧀ꦤꦺꦠꦶ ꦠꦟ꧀ꦲꦴꦪ ꦤꦶꦩꦸꦒ꧀ꦒꦺ. ꦥꦛꦶꦥꦤ꧀ꦤꦺꦠꦶ ꦠꦟ꧀ꦲꦴꦪ ꦄꦮꦠ꧀ꦡꦛꦺ. ꦄꦨꦶꦨꦹꦠꦺꦠꦶ ꦩꦢ꧀ꦢꦶꦠꦺ. ꦥꦫꦶꦪꦴꦢꦶꦤ꧀ꦤꦕꦶꦠ꧀ꦠꦺꦠꦶ ꦥꦫꦶꦪꦴꦢꦶꦪꦶꦠ꧀ꦮꦴ ꦒꦲꦶꦠꦏꦸꦱꦭꦕꦶꦠ꧀ꦠꦺ.

ꦱꦤ꧀ꦠꦴꦥꦗꦴꦠꦺꦠꦶ ꦱꦚ꧀ꦗꦴꦠꦕꦶꦠ꧀ꦠꦱꦤ꧀ꦠꦴꦥꦺ. ꦇꦠꦶꦗꦴꦠꦺꦠꦶ ꦫꦺꦴꦒꦸꦥ꧀ꦥꦤ꧀ꦤꦺ. ꦈꦥꦢ꧀ꦢꦮꦗꦴꦠꦺꦠꦶ ꦄꦴꦢꦷꦤꦮꦗꦴꦠꦺ. ꦈꦥꦱꦒ꧀ꦒꦗꦴꦠꦺꦠꦶ ꦈꦥ꧀ꦥꦤ꧀ꦤꦢꦸꦏ꧀ꦑꦗꦴꦠꦺ.

ꦮꦶꦫꦗꦁ ꦮꦷꦠꦩꦭꦤ꧀ꦠꦶ ꦌꦠ꧀ꦡ ꦮꦶꦫꦗꦤ꧀ꦠꦶ ꦮꦶꦒꦠꦫꦴꦒꦴꦢꦶꦫꦗꦁ. ꦮꦷꦠꦩꦭꦤ꧀ꦠꦶ ꦮꦷꦠꦫꦴꦒꦴꦢꦶꦩꦭꦁ. ꦫꦴꦒꦴꦢꦪꦺꦴ ꦲꦶ ꦄꦗ꧀ꦙꦺꦴꦠ꧀ꦡꦫꦟꦛ꧀ꦜꦺꦤ ꦫꦗꦺꦴ ꦤꦴꦩ, ꦢꦹꦱꦛ꧀ꦜꦺꦤ ꦩꦭꦁ ꦤꦴꦩ. ꦣꦩ꧀ꦩꦕꦏ꧀ꦑꦸꦤ꧀ꦠꦶ ꦏꦠ꧀ꦡꦕꦶ ꦥꦜꦩꦩꦒ꧀ꦒꦚꦴꦟꦁ, ꦏꦠ꧀ꦡꦕꦶ ꦄꦴꦢꦷꦤꦶ ꦠꦷꦟꦶ ꦩꦒ꧀ꦒꦚꦴꦟꦴꦤꦶ, ꦏꦠ꧀ꦡꦕꦶ ꦕꦠꦸꦠ꧀ꦡꦩꦒ꧀ꦒꦚꦴꦟꦩ꧀ꦥꦶ. ꦆꦣ ꦥꦤ ꦗꦛꦶꦭꦱꦲꦱ꧀ꦱꦱ꧀ꦱ ꦕꦠꦸꦠ꧀ꦡꦩꦒ꧀ꦒꦚꦴꦟꦁ. ꦥꦶꦔ꧀ꦒꦶꦪꦱ꧀ꦱ ꦠꦠꦶꦪꦩꦒ꧀ꦒꦚꦴꦟꦩꦺꦮ. ꦪꦁ ꦏꦶꦚ꧀ꦕꦶ ꦱꦩꦸꦢꦪꦣꦩ꧀ꦩꦁ, ꦱꦧ꧀ꦧꦁ ꦠꦁ ꦤꦶꦫꦺꦴꦣꦣꦩ꧀ꦩꦤ꧀ꦠꦶ ꦮꦶꦥꦱ꧀ꦱꦤꦴꦮꦱꦺꦤ ꦌꦮꦁ ꦥꦮꦠ꧀ꦠꦱ꧀ꦱ ꦣꦩ꧀ꦩꦕꦏ꧀ꦑꦸꦁ ꦈꦢꦥꦴꦢꦷꦠꦶ ꦄꦠ꧀ꦡꦺꦴ. ꦱꦺꦱꦁ ꦱꦧ꧀ꦧꦠ꧀ꦡ ꦥꦴꦏꦛꦩꦺꦮ.

ꦌꦮꦁ ꦆꦢꦩ꧀ꦥꦶ ꦱꦸꦠ꧀ꦠꦁ ꦨꦒꦮꦴ ꦄꦫꦲꦠ꧀ꦠꦤꦶꦏꦹꦛꦺꦤꦺꦮ ꦢꦺꦱꦺꦱꦶ, ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦕ ꦥꦶꦔ꧀ꦒꦶꦪꦺꦴ ꦄꦤꦴꦒꦴꦩꦶꦦꦭꦺ ꦥꦠꦶꦛ꧀ꦜꦴꦱꦶ. ꦱꦺꦴ ꦏꦶꦫ ꦄꦤ꧀ꦠꦫꦤ꧀ꦠꦫꦴ ꦕꦶꦤ꧀ꦠꦺꦱꦶ – ‘‘ꦌꦮꦁ ꦮꦶꦕꦶꦠ꧀ꦫꦥꦛꦶꦨꦴꦤꦁ ꦤꦴꦩ ꦢꦺꦱꦤꦁ ꦤ ꦭꦨꦠꦶ ꦩꦪ꧀ꦲꦁ ꦩꦴꦠꦸꦭꦺꦴ ꦧꦴꦮꦫꦷ ꦱꦮꦤꦴꦪꦴ’’ꦠꦶ. ꦠꦺꦤ ꦱꦶꦤꦺꦲꦮꦶꦏ꧀ꦑꦺꦥꦺꦤ ꦄꦫꦲꦠ꧀ꦠꦁ ꦥꦴꦥꦸꦟꦶꦠꦸꦁ ꦤꦴꦱꦏ꧀ꦑꦶ. ꦄꦤ꧀ꦠꦺꦮꦴꦱꦶꦏꦴ ꦥꦤꦱ꧀ꦱ ꦱꦲꦱ꧀ꦱꦗꦛꦶꦭꦴ ꦄꦫꦲꦠ꧀ꦠꦁ ꦥꦴꦥꦸꦟꦶꦁꦱꦸ. ꦱꦧ꧀ꦧꦺꦮ ꦆꦢ꧀ꦣꦶꦩꦪꦥꦠ꧀ꦠꦕꦷꦮꦫꦣꦫꦴ ꦌꦲꦶꦨꦶꦏ꧀ꦑꦸꦤꦺꦴ ꦄꦲꦺꦱꦸꦤ꧀ꦠꦶ.

ꦱꦢ꧀ꦣꦩ꧀ꦩꦥ꧀ꦥꦗ꧀ꦗꦺꦴꦠꦶꦏꦴꦪ ꦕꦹꦭ꦳ꦤꦶꦢ꧀ꦢꦺꦱ-ꦄꦛ꧀ꦜꦏꦡꦴꦪ

ꦥꦶꦔ꧀ꦒꦶꦪꦩꦴꦟꦮꦱꦸꦠ꧀ꦠꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.