꧗. ꦧꦷꦫꦟꦡꦩ꧀ꦨꦮꦒ꧀ꦒꦺꦴ

[꧒꧑꧑] ꧑. ꦱꦺꦴꦩꦢꦠ꧀ꦠꦗꦴꦠꦏꦮꦟ꧀ꦟꦤꦴ

ꦄꦏꦴꦱꦶ ꦪꦺꦴꦒ꧀ꦒꦤ꧀ꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦭꦴꦭ꦳ꦸꦢꦴꦪꦶꦠ꧀ꦡꦺꦫꦁ ꦄꦴꦫꦧ꧀ꦨ ꦏꦡꦺꦱꦶ. ꦱꦺꦴ ꦲꦶ ꦢ꧀ꦮꦶꦤ꧀ꦤꦁ ꦠꦶꦟ꧀ꦟꦁ ꦗꦤꦴꦤꦁ ꦄꦤ꧀ꦠꦫꦺ ꦌꦏꦮꦕꦤꦩ꧀ꦥꦶ ꦱꦩ꧀ꦥꦴꦢꦺꦠ꧀ꦮꦴ ꦏꦡꦺꦱꦸꦁ ꦤ ꦱꦏ꧀ꦏꦺꦴꦠꦶ, ꦱꦴꦫꦗ꧀ꦗꦧꦲꦸꦭꦺꦴ ‘‘ꦄꦚ꧀ꦚꦁ ꦏꦡꦺꦱ꧀ꦱꦴꦩꦷ’’ꦠꦶ ꦄꦚ꧀ꦚꦩꦺꦮ ꦏꦡꦺꦱꦶ. ꦠꦱ꧀ꦱ ꦠꦁ ꦥꦮꦠ꧀ꦠꦶꦁ ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦺꦤ꧀ꦠꦴ ꦤꦶꦱꦷꦢꦶꦁꦱꦸ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ ‘‘ꦤ, ꦨꦶꦏ꧀ꦑꦮꦺ, ꦭꦴꦭ꦳ꦸꦢꦴꦪꦷ ꦆꦢꦴꦤꦺꦮ ꦱꦴꦫꦗ꧀ꦗꦧꦲꦸꦭꦺꦴ, ꦥꦸꦧ꧀ꦧꦺꦥꦶ ꦱꦴꦫꦗ꧀ꦗꦧꦲꦸꦭꦺꦴꦪꦺꦮꦴ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦧꦺꦴꦣꦶꦱꦠ꧀ꦠꦺꦴ ꦏꦴꦱꦶꦫꦛ꧀ꦜꦺ ꦄꦚ꧀ꦚꦠꦫꦱ꧀ꦩꦶꦁ ꦧ꧀ꦫꦴꦲ꧀ꦩꦟꦏꦸꦭꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦪꦥ꧀ꦥꦠ꧀ꦠꦺꦴ ꦠꦏ꧀ꦏꦱꦶꦭꦴꦪꦁ ꦱꦶꦥ꧀ꦥꦁ ꦈꦒ꧀ꦒꦟ꧀ꦲꦶꦠ꧀ꦮꦴ ꦥꦸꦤ ꦒꦺꦲꦁ ꦄꦴꦒꦤ꧀ꦠ꧀ꦮꦴ ꦩꦴꦠꦴꦥꦶꦠꦹꦤꦁ ꦢꦸꦒ꧀ꦒꦠꦨꦴꦮꦁ ꦚꦠ꧀ꦮꦴ ‘‘ꦥꦫꦶꦲꦷꦤꦏꦸꦭꦠꦺꦴ ꦱꦺꦛ꧀ꦜꦶꦏꦸꦭꦁ ꦥꦠꦶꦛ꧀ꦜꦥꦺꦱ꧀ꦱꦴꦩꦷ’’ꦠꦶ ꦩꦴꦠꦴꦥꦶꦠꦫꦺꦴ ꦄꦴꦥꦸꦕ꧀ꦖꦶꦠ꧀ꦮꦴ ꦧꦴꦫꦴꦟꦱꦶꦁ ꦒꦤ꧀ꦠ꧀ꦮꦴ ꦫꦴꦗꦴꦤꦁ ꦈꦥꦛ꧀ꦜꦴꦱꦶ. ꦱꦺꦴ ꦫꦚ꧀ꦚꦴ ꦥꦶꦪꦺꦴ ꦄꦲꦺꦴꦱꦶ ꦩꦤꦴꦥꦺꦴ. ꦄꦡꦱ꧀ꦱ ꦥꦶꦠꦸꦤꦺꦴ ‘‘ꦢ꧀ꦮꦷꦲꦶꦪꦺꦮ ꦒꦺꦴꦟꦺꦲꦶ ꦏꦱꦶꦁ ꦏꦠ꧀ꦮꦴ ꦗꦷꦮꦶꦏꦁ ꦏꦥ꧀ꦥꦺꦤ꧀ꦠꦱ꧀ꦱ ꦌꦏꦺꦴ ꦒꦺꦴꦟꦺꦴ ꦩꦠꦺꦴ. ꦱꦺꦴ ꦧꦺꦴꦣꦶꦱꦠ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦠꦴꦠ, ꦌꦏꦺꦴ ꦒꦺꦴꦟꦺꦴ ꦩꦠꦺꦴ, ꦏꦱꦶꦏꦩ꧀ꦩꦁ ꦤ ꦥꦮꦠ꧀ꦠꦠꦶ, ꦫꦴꦗꦴꦤꦁ ꦌꦏꦁ ꦒꦺꦴꦟꦁ ꦪꦴꦕꦴꦲꦷ’’ꦠꦶ ꦄꦴꦲ. ‘‘ꦠꦴꦠ, ꦤꦕꦶꦫꦱ꧀ꦱꦺꦮ ꦩꦺ ꦫꦴꦗꦴ ꦢꦶꦛ꧀ꦜꦺꦴ, ꦆꦢꦴꦤꦺꦮ ꦒꦺꦴꦟꦁ ꦪꦴꦕꦶꦠꦸꦁ ꦤ ꦪꦸꦠ꧀ꦠꦁ, ꦠꦸꦩ꧀ꦲꦺ ꦪꦴꦕꦡꦴ’’ꦠꦶ. ‘‘ꦠꦴꦠ, ꦠ꧀ꦮꦁ ꦩꦪ꧀ꦲꦁ ꦱꦴꦫꦗ꧀ꦗꦧꦲꦸꦭꦨꦴꦮꦁ ꦤ ꦗꦴꦤꦴꦱꦶ, ꦄꦲꦚ꧀ꦲꦶ ꦢ꧀ꦮꦶꦤ꧀ꦤꦁ ꦠꦶꦟ꧀ꦟꦁ ꦱꦩ꧀ꦩꦸꦑꦺ ꦏꦡꦁ ꦱꦩ꧀ꦥꦴꦢꦺꦠꦸꦁ ꦤ ꦱꦏ꧀ꦏꦺꦴꦩꦶ. ꦱꦕꦺ ꦄꦲꦁ ꦫꦚ꧀ꦚꦺꦴ ꦱꦤ꧀ꦠꦶꦏꦁ ꦒꦺꦴꦟꦁ ꦪꦴꦕꦶꦠꦸꦁ ꦒꦩꦶꦱ꧀ꦱꦴꦩꦶ, ꦆꦩꦩ꧀ꦥꦶ ꦢꦠ꧀ꦮꦴ ꦄꦴꦒꦩꦶꦱ꧀ꦱꦴꦩꦷ’’ꦠꦶ. ‘‘ꦠꦴꦠ, ꦪꦁ ꦲꦺꦴꦠꦶ, ꦠꦁ ꦲꦺꦴꦠꦸ, ꦤ ꦱꦏ꧀ꦏꦴ ꦩꦪꦴ ꦫꦴꦗꦴꦤꦁ ꦪꦴꦕꦶꦠꦸꦁ, ꦄꦥꦶꦕ ꦑꦺꦴ ꦥꦤꦴꦲꦁ ꦠꦸꦩ꧀ꦲꦺ ꦪꦺꦴꦒ꧀ꦒꦁ ꦏꦴꦫꦺꦱ꧀ꦱꦴꦩꦷ’’ꦠꦶ. ‘‘ꦠꦺꦤ ꦲꦶ ꦱꦴꦣꦸ ꦩꦁ ꦪꦺꦴꦒ꧀ꦒꦁ ꦏꦴꦫꦺꦲꦷ’’ꦠꦶ.

ꦧꦺꦴꦣꦶꦱꦠ꧀ꦠꦺꦴ ꦥꦶꦠꦫꦁ ꦄꦴꦢꦴꦪ ꦧꦷꦫꦟꦠ꧀ꦡꦩ꧀ꦨꦏꦱꦸꦱꦴꦤꦁ ꦒꦤ꧀ꦠ꧀ꦮꦴ ꦠꦠ꧀ꦡ ꦠꦠ꧀ꦡ ꦠꦶꦟꦏꦭꦴꦥꦺ ꦧꦤ꧀ꦣꦶꦠ꧀ꦮꦴ ‘‘ꦄꦪꦁ ꦫꦴꦗꦴ, ꦄꦪꦁ ꦈꦥꦫꦴꦗꦴ, ꦄꦪꦁ ꦱꦺꦤꦴꦥꦠꦷ’’ꦠꦶ ꦤꦴꦩꦴꦤꦶ ꦏꦠ꧀ꦮꦴ ꦥꦛꦶꦥꦴꦛꦶꦪꦴ ꦥꦶꦠꦸ ꦢꦱ꧀ꦱꦺꦠ꧀ꦮꦴ ‘‘ꦠꦴꦠ, ꦠ꧀ꦮꦁ ꦫꦚ꧀ꦚꦺꦴ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ‘ꦗꦪꦠꦸ, ꦩꦲꦴꦫꦴꦗꦴ’ꦠꦶ ꦌꦮꦁ ꦆꦩꦁ ꦒꦴꦡꦁ ꦮꦠ꧀ꦮꦴ ꦒꦺꦴꦟꦁ ꦪꦴꦕꦺꦪ꧀ꦪꦴꦱꦷ’’ꦠꦶ ꦒꦴꦡꦁ ꦈꦒ꧀ꦒꦟ꧀ꦲꦴꦥꦺꦱꦶ –

‘‘ꦢ꧀ꦮꦺ ꦩꦺ ꦒꦺꦴꦟꦴ ꦩꦲꦴꦫꦴꦗ, ꦪꦺꦲꦶ ꦑꦺꦠ꧀ꦠꦁ ꦏꦱꦴꦩꦱꦺ;

ꦠꦺꦱꦸ ꦌꦏꦺꦴ ꦩꦠꦺꦴ ꦢꦺꦮ, ꦢꦸꦠꦶꦪꦁ ꦢꦺꦲꦶ ꦑꦠ꧀ꦠꦶꦪꦴ’’ꦠꦶ.

ꦧ꧀ꦫꦴꦲ꧀ꦩꦟꦺꦴ ꦌꦏꦺꦤ ꦱꦁꦮꦕ꧀ꦖꦫꦺꦤ ꦆꦩꦁ ꦒꦴꦡꦁ ꦥꦒꦸꦟꦁ ꦏꦠ꧀ꦮꦴ ꦧꦺꦴꦣꦶꦱꦠ꧀ꦠꦁ ꦄꦴꦲ – ‘‘ꦠꦴꦠ, ꦱꦺꦴꦩꦢꦠ꧀ꦠ, ꦒꦴꦡꦴ ꦩꦺ ꦥꦒꦸꦟꦴ ꦗꦴꦠꦴ, ꦆꦢꦴꦤꦶ ꦄꦲꦁ ꦪꦱ꧀ꦱ ꦏꦱ꧀ꦱꦕꦶ ꦱꦤ꧀ꦠꦶꦏꦺ ꦮꦠ꧀ꦠꦸꦁ ꦱꦏ꧀ꦏꦺꦴꦩꦶ, ꦩꦁ ꦫꦚ꧀ꦚꦺꦴ ꦱꦤ꧀ꦠꦶꦏꦁ ꦤꦺꦲꦷ’’ꦠꦶ. ꦱꦺꦴ ‘‘ꦱꦴꦣꦸ, ꦠꦴꦠꦴ’’ꦠꦶ ꦠꦡꦴꦫꦹꦥꦁ ꦥꦟ꧀ꦟꦴꦏꦴꦫꦁ ꦒꦴꦲꦴꦥꦺꦠ꧀ꦮꦴ ꦥꦶꦠꦫꦁ ꦫꦚ꧀ꦚꦺꦴ ꦱꦤ꧀ꦠꦶꦏꦁ ꦤꦺꦱꦶ. ꦧ꧀ꦫꦴꦲ꧀ꦩꦟꦺꦴ ‘‘ꦗꦪꦠꦸ, ꦩꦲꦴꦫꦴꦗꦴ’’ꦠꦶ ꦮꦠ꧀ꦮꦴ ꦥꦟ꧀ꦟꦴꦏꦴꦫꦁ ꦄꦢꦴꦱꦶ. ꦫꦴꦗꦴ ‘‘ꦄꦪꦁ ꦠꦺ ꦱꦺꦴꦩꦢꦠ꧀ꦠ ꦧ꧀ꦫꦴꦲ꧀ꦩꦟꦺꦴ ꦏꦶꦁ ꦲꦺꦴꦠꦷ’’ꦠꦶ ꦄꦴꦲ. ‘‘ꦥꦶꦠꦴ ꦩꦺ, ꦩꦲꦴꦫꦴꦗꦴ’’ꦠꦶ. ‘‘ꦏꦺꦤꦛ꧀ꦜꦺꦤꦴꦒꦠꦺꦴ’’ꦠꦶ? ꦠꦱ꧀ꦩꦶꦁ ꦑꦟꦺ ꦧ꧀ꦫꦴꦲ꧀ꦩꦟꦺꦴ ꦒꦺꦴꦟꦪꦴꦕꦤꦠ꧀ꦡꦴꦪ ꦒꦴꦡꦁ ꦮꦢꦤ꧀ꦠꦺꦴ –

‘‘ꦢ꧀ꦮꦺ ꦩꦺ ꦒꦺꦴꦟꦴ ꦩꦲꦴꦫꦴꦗ, ꦪꦺꦲꦶ ꦑꦺꦠ꧀ꦠꦁ ꦏꦱꦴꦩꦱꦺ;

ꦠꦺꦱꦸ ꦌꦏꦺꦴ ꦩꦠꦺꦴ ꦢꦺꦮ, ꦢꦸꦠꦶꦪꦁ ꦒꦟ꧀ꦲ ꦑꦠ꧀ꦠꦶꦪꦴ’’ꦠꦶ. – ꦄꦴꦲ;

ꦫꦴꦗꦴ ꦧ꧀ꦫꦴꦲ꧀ꦩꦟꦺꦤ ꦮꦶꦫꦗ꧀ꦙꦶꦠ꧀ꦮꦴ ꦏꦡꦶꦠꦨꦴꦮꦁ ꦚꦠ꧀ꦮꦴ ꦱꦶꦠꦁ ꦏꦠ꧀ꦮꦴ ‘‘ꦱꦺꦴꦩꦢꦠ꧀ꦠ, ꦠꦸꦩ꧀ꦲꦴꦏꦁ ꦒꦺꦲꦺ ꦧꦲꦹ ꦩꦚ꧀ꦚꦺ ꦒꦺꦴꦟꦴ’’ꦠꦶ ꦄꦴꦲ. ‘‘ꦠꦸꦩ꧀ꦲꦺꦲꦶ ꦢꦶꦤ꧀ꦤꦴ ꦨꦮꦶꦱ꧀ꦱꦤ꧀ꦠꦶ, ꦩꦲꦴꦫꦴꦗꦴ’’ꦠꦶ. ꦫꦴꦗꦴ ꦧꦺꦴꦣꦶꦱꦠ꧀ꦠꦱ꧀ꦱ ꦠꦸꦱ꧀ꦱꦶꦠ꧀ꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦱꦺꦴꦭ꦳ꦱ ꦒꦺꦴꦟꦺ ꦄꦭꦔ꧀ꦏꦴꦫꦨꦟ꧀ꦝꦏꦺ ꦤꦶꦮꦴꦱꦤꦒꦴꦩꦚ꧀ꦕꦱ꧀ꦱ ꦧ꧀ꦫꦲ꧀ꦩꦢꦺꦪ꧀ꦪꦁ ꦢꦠ꧀ꦮꦴ ꦩꦲꦤ꧀ꦠꦺꦤ ꦪꦱꦺꦤ ꦧ꧀ꦫꦴꦲ꧀ꦩꦟꦁ ꦈꦪ꧀ꦪꦺꦴꦗꦺꦱꦶ. ꦧ꧀ꦫꦴꦲ꧀ꦩꦟꦺꦴ ꦱꦧ꧀ꦧꦱꦺꦠꦱꦶꦤ꧀ꦣꦮꦪꦸꦠ꧀ꦠꦁ ꦫꦡꦁ ꦄꦨꦶꦫꦸꦪ꧀ꦲ ꦩꦲꦤ꧀ꦠꦺꦤ ꦥꦫꦶꦮꦴꦫꦺꦤ ꦒꦴꦩꦁ ꦄꦒꦩꦴꦱꦶ. ꦧꦺꦴꦣꦶꦱꦠ꧀ꦠꦺꦴ ꦥꦶꦠꦫꦴ ꦱꦢ꧀ꦣꦶꦁ ꦫꦡꦺ ꦤꦶꦱꦷꦢꦶꦠ꧀ꦮꦴ ꦒꦕ꧀ꦖꦤ꧀ꦠꦺꦴ ‘‘ꦠꦴꦠ, ꦄꦲꦁ ꦠꦸꦩ꧀ꦲꦺ ꦱꦏꦭꦱꦁꦮꦕ꧀ꦖꦫꦁ ꦪꦺꦴꦒ꧀ꦒꦁ ꦏꦴꦫꦺꦱꦶꦁ, ꦱꦤ꧀ꦤꦶꦛ꧀ꦜꦴꦤꦏꦴꦭꦺ ꦥꦤ ꦠꦸꦩ꧀ꦲꦴꦏꦁ ꦒꦺꦴꦟꦁ ꦫꦚ꧀ꦚꦺꦴ ꦄꦢꦠ꧀ꦡꦴ’’ꦠꦶ ꦮꦠ꧀ꦮꦴ ꦥꦜꦩꦁ ꦒꦴꦡꦩꦴꦲ –

꧑꧒꧑. ‘‘ꦄꦏꦴꦱꦶ ꦪꦺꦴꦒ꧀ꦒꦁ ꦣꦸꦮꦩꦥ꧀ꦥꦩꦠ꧀ꦠꦺꦴ, ꦱꦁꦮꦕ꧀ꦖꦫꦁ ꦧꦷꦫꦟꦡꦩ꧀ꦨꦏꦱ꧀ꦩꦶꦁ;

ꦧ꧀ꦪꦴꦏꦴꦱꦶ ꦱꦚ꧀ꦚꦁ ꦥꦫꦶꦱꦁ ꦮꦶꦒꦪ꧀ꦲ, ꦤ ꦤꦶꦪ꧀ꦪꦩꦺꦴ ꦠꦴꦪꦠꦶ ꦄꦥ꧀ꦥꦥꦚ꧀ꦚ’’ꦤ꧀ꦠꦶ.

ꦠꦠ꧀ꦡ ꦄꦏꦴꦱꦶ ꦪꦺꦴꦒ꧀ꦒꦁ ꦣꦸꦮꦩꦥ꧀ꦥꦩꦠ꧀ꦠꦺꦴ, ꦱꦁꦮꦕ꧀ꦖꦫꦁ ꦧꦷꦫꦟꦡꦩ꧀ꦨꦏꦱ꧀ꦩꦶꦤ꧀ꦠꦶ, ꦠꦴꦠ, ꦠ꧀ꦮꦁ ꦤꦶꦕ꧀ꦕꦁ ꦄꦥ꧀ꦥꦩꦠ꧀ꦠꦺꦴ ꦧꦷꦫꦟꦠ꧀ꦡꦩ꧀ꦨꦩꦪꦺ ꦱꦸꦱꦴꦤꦺ ꦪꦺꦴꦒ꧀ꦒꦁ ꦄꦏꦴꦱꦶ. ꦧ꧀ꦪꦴꦏꦴꦱꦶ ꦱꦚ꧀ꦚꦁ ꦥꦫꦶꦱꦁ ꦮꦶꦒꦪ꧀ꦲꦴꦠꦶ ꦄꦡ ꦕ ꦥꦤ ꦥꦫꦶꦱꦁ ꦮꦶꦒꦴꦲꦶꦠ꧀ꦮꦴ ꦠꦁ ꦱꦚ꧀ꦚꦁ ꦮꦶꦄꦏꦴꦱꦶ ꦮꦶꦏꦴꦫꦁ ꦄꦴꦥꦴꦢꦺꦱꦶ, ꦥꦫꦶꦮꦠ꧀ꦠꦺꦱꦷꦠꦶ ꦄꦠ꧀ꦡꦺꦴ. ꦤ ꦤꦶꦪ꧀ꦪꦩꦺꦴ ꦠꦴꦪꦠꦶ ꦄꦥ꧀ꦥꦥꦚ꧀ꦚꦤ꧀ꦠꦶ ꦄꦥ꧀ꦥꦲꦚ꧀ꦚꦁ ꦤꦴꦩ ꦥꦸꦒ꧀ꦒꦭꦁ ꦤꦶꦪ꧀ꦪꦩꦺꦴ ꦪꦺꦴꦒ꧀ꦒꦴꦕꦶꦟ꧀ꦟꦁ ꦕꦫꦟꦁ ꦤ ꦠꦴꦪꦠꦶ ꦤ ꦫꦏ꧀ꦑꦠꦷꦠꦶ.

ꦄꦡꦱ꧀ꦱ ꦮꦕꦤꦁ ꦱꦸꦠ꧀ꦮꦴ ꦧ꧀ꦫꦴꦲ꧀ꦩꦟꦺꦴ ꦢꦸꦠꦶꦪꦁ ꦒꦴꦡꦩꦴꦲ –

꧑꧒꧒. ‘‘ꦢ꧀ꦮꦪꦁ ꦪꦴꦕꦤꦏꦺꦴ ꦠꦴꦠ, ꦱꦺꦴꦩꦢꦠ꧀ꦠ ꦤꦶꦒꦕ꧀ꦖꦠꦶ;

ꦄꦭꦴꦨꦁ ꦣꦤꦭꦴꦨꦁ ꦮꦴ, ꦌꦮꦁꦣꦩ꧀ꦩꦴ ꦲꦶ ꦪꦴꦕꦤꦴ’’ꦠꦶ.

ꦠꦠ꧀ꦡ ꦌꦮꦁꦣꦩ꧀ꦩꦴ ꦲꦶ ꦪꦴꦕꦤꦴꦠꦶ ꦪꦴꦕꦤꦴ ꦲꦶ ꦌꦮꦁꦱꦨꦴꦮꦴꦠꦶ.

ꦱꦠ꧀ꦡꦴ ‘‘ꦤ, ꦨꦶꦏ꧀ꦑꦮꦺ, ꦭꦴꦭ꦳ꦸꦢꦴꦪꦷ ꦆꦢꦴꦤꦺꦮ ꦱꦴꦫꦗ꧀ꦗꦧꦲꦸꦭꦺꦴ, ꦥꦸꦧ꧀ꦧꦺꦥꦶ ꦱꦴꦫꦗ꧀ꦗꦧꦲꦸꦭꦺꦴꦪꦺꦮꦴ’’ꦠꦶ ꦮꦠ꧀ꦮꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ – ‘‘ꦠꦢꦴ ꦫꦴꦗꦴ ꦄꦴꦤꦤ꧀ꦢꦺꦴ, ꦱꦺꦴꦩꦢꦠ꧀ꦠꦱ꧀ꦱ ꦥꦶꦠꦴ ꦭꦴꦭ꦳ꦸꦢꦴꦪꦷ ꦄꦲꦺꦴꦱꦶ, ꦱꦺꦴꦩꦢꦠ꧀ꦠꦺꦴ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦱꦺꦴꦩꦢꦠ꧀ꦠꦗꦴꦠꦏꦮꦟ꧀ꦟꦤꦴ ꦥꦜꦩꦴ.

[꧒꧑꧒] ꧒. ꦈꦕ꧀ꦖꦶꦛ꧀ꦜꦨꦠ꧀ꦠꦗꦴꦠꦏꦮꦟ꧀ꦟꦤꦴ

ꦄꦚ꧀ꦚꦺꦴ ꦈꦥꦫꦶꦩꦺꦴ ꦮꦟ꧀ꦟꦺꦴꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦥꦸꦫꦴꦟꦢꦸꦠꦶꦪꦶꦏꦴꦥꦭꦺꦴꦨꦤꦁ ꦄꦴꦫꦧ꧀ꦨ ꦏꦡꦺꦱꦶ. ꦱꦺꦴ ꦲꦶ ꦨꦶꦏ꧀ꦑꦸ ꦱꦠ꧀ꦡꦴꦫꦴ ‘‘ꦱꦕ꧀ꦕꦁ ꦏꦶꦫ, ꦠ꧀ꦮꦁ ꦨꦶꦏ꧀ꦑꦸ, ꦈꦏ꧀ꦏꦟ꧀ꦜꦶꦠꦺꦴꦱꦷ’’ꦠꦶ ꦥꦸꦛ꧀ꦜꦺꦴ ‘‘ꦱꦕ꧀ꦕ’’ꦤ꧀ꦠꦶ ꦮꦠ꧀ꦮꦴ ‘‘ꦏꦺꦴ ꦠꦁ ꦈꦏ꧀ꦏꦟ꧀ꦜꦴꦥꦺꦱꦷ’’ꦠꦶ ꦮꦸꦠ꧀ꦠꦺ ‘‘ꦥꦸꦫꦴꦟꦢꦸꦠꦶꦪꦶꦏꦴ’’ꦠꦶ ꦄꦴꦲ. ꦄꦡ ꦤꦁ ꦱꦠ꧀ꦡꦴ ‘‘ꦨꦶꦏ꧀ꦑꦸ ꦄꦪꦁ ꦠꦺ ꦆꦠ꧀ꦡꦷ ꦄꦤꦠ꧀ꦡꦏꦴꦫꦶꦏꦴ, ꦥꦸꦧ꧀ꦧꦺꦥꦶ ꦄꦠ꧀ꦠꦤꦺꦴ ꦗꦴꦫꦱ꧀ꦱ ꦈꦕ꧀ꦖꦶꦛ꧀ꦜꦏꦁ ꦨꦺꦴꦗꦺꦱꦷ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦧꦺꦴꦣꦶꦱꦠ꧀ꦠꦺꦴ ꦌꦏꦱ꧀ꦩꦶꦁ ꦜꦴꦤꦺ ꦨꦶꦏ꧀ꦑꦁ ꦕꦫꦶꦠ꧀ꦮꦴ ꦗꦷꦮꦶꦏꦏꦥ꧀ꦥꦏꦺ ꦏꦥꦟꦺ ꦤꦛꦏꦏꦸꦭꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦪꦥ꧀ꦥꦠ꧀ꦠꦺꦴ ꦢꦸꦒ꧀ꦒꦠꦺꦴ ꦢꦸꦫꦹꦥꦏꦺꦴ ꦲꦸꦠ꧀ꦮꦴ ꦨꦶꦏ꧀ꦑꦁ ꦕꦫꦶꦠ꧀ꦮꦴ ꦗꦷꦮꦶꦏꦁ ꦏꦥ꧀ꦥꦺꦱꦶ. ꦠꦢꦴ ꦏꦴꦱꦶꦫꦛ꧀ꦜꦺ ꦌꦏꦱ꧀ꦩꦶꦁ ꦒꦴꦩꦏꦺ ꦌꦏꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦧ꧀ꦫꦴꦲ꧀ꦩꦟꦷ ꦢꦸꦱ꧀ꦱꦷꦭꦴ ꦥꦴꦥꦣꦩ꧀ꦩꦴ ꦄꦠꦶꦕꦴꦫꦁ ꦕꦫꦠꦶ. ꦄꦡꦺꦏꦢꦶꦮꦱꦁ ꦧ꧀ꦫꦴꦲ꧀ꦩꦟꦺ ꦏꦺꦤꦕꦶꦢꦺꦮ ꦏꦫꦟꦷꦪꦺꦤ ꦧꦲꦶ ꦒꦠꦺ ꦠꦱ꧀ꦱꦴ ꦗꦴꦫꦺꦴ ꦠꦁ ꦑꦟꦁ ꦎꦭꦺꦴꦏꦺꦠ꧀ꦮꦴ ꦠꦁ ꦒꦺꦲꦁ ꦥꦴꦮꦶꦱꦶ. ꦱꦴ ꦠꦺꦤ ꦱꦢ꧀ꦣꦶꦁ ꦄꦠꦶꦕꦫꦶꦠ꧀ꦮꦴ ‘‘ꦩꦸꦲꦸꦠ꧀ꦠꦁ ꦄꦕ꧀ꦖ, ꦨꦸꦚ꧀ꦗꦶꦠ꧀ꦮꦴꦮ ꦒꦩꦶꦱ꧀ꦱꦱꦷ’’ꦠꦶ ꦨꦠ꧀ꦠꦁ ꦱꦩ꧀ꦥꦴꦢꦺꦠ꧀ꦮꦴ ꦱꦹꦥꦧ꧀ꦪꦚ꧀ꦗꦤꦱꦩ꧀ꦥꦤ꧀ꦤꦁ ꦈꦟ꧀ꦲꦨꦠ꧀ꦠꦁ ꦮꦝ꧀ꦞꦺꦠ꧀ꦮꦴ ‘‘ꦠ꧀ꦮꦁ ꦨꦸꦚ꧀ꦗꦴ’’ꦠꦶ ꦠꦱ꧀ꦱ ꦢꦠ꧀ꦮꦴ ꦱꦪꦁ ꦧ꧀ꦫꦴꦲ꧀ꦩꦟꦱ꧀ꦱ ꦄꦴꦒꦩꦤꦁ ꦎꦭꦺꦴꦏꦪꦩꦴꦤꦴ ꦢ꧀ꦮꦴꦫꦺ ꦄꦛ꧀ꦜꦴꦱꦶ. ꦧꦺꦴꦣꦶꦱꦠ꧀ꦠꦺꦴ ꦧ꧀ꦫꦴꦲ꧀ꦩꦟꦶꦪꦴ ꦗꦴꦫꦱ꧀ꦱ ꦨꦸꦚ꧀ꦗꦤꦛ꧀ꦜꦴꦤꦺ ꦥꦶꦟ꧀ꦝꦁ ꦥꦕ꧀ꦕꦴꦱꦷꦱꦤ꧀ꦠꦺꦴ ꦄꦛ꧀ꦜꦴꦱꦶ.

ꦠꦱ꧀ꦩꦶꦁ ꦑꦟꦺ ꦧ꧀ꦫꦴꦲ꧀ꦩꦟꦺꦴ ꦒꦺꦲꦴꦨꦶꦩꦸꦑꦺꦴ ꦄꦴꦒꦕ꧀ꦖꦠꦶ. ꦧ꧀ꦫꦴꦲ꧀ꦩꦟꦷ ꦠꦁ ꦄꦴꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ꦮꦺꦒꦺꦤ ꦥꦮꦶꦱꦶꦠ꧀ꦮꦴ ‘‘ꦈꦛ꧀ꦜꦺꦲꦶ, ꦧ꧀ꦫꦴꦲ꧀ꦩꦟꦺꦴ ꦄꦴꦒꦕ꧀ꦖꦠꦷ’’ꦠꦶ ꦗꦴꦫꦁ ꦏꦺꦴꦛ꧀ꦜꦺ ꦎꦠꦴꦫꦺꦠ꧀ꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦥꦮꦶꦱꦶꦠ꧀ꦮꦴ ꦤꦶꦱꦶꦤ꧀ꦤꦏꦴꦭꦺ ꦦꦭꦏꦁ ꦈꦥꦤꦺꦠ꧀ꦮꦴ ꦲꦠ꧀ꦡꦣꦺꦴꦮꦤꦁ ꦢꦠ꧀ꦮꦴ ꦆꦠꦫꦺꦤ ꦨꦸꦠ꧀ꦠꦴꦮꦱꦶꦛ꧀ꦜꦱ꧀ꦱ ꦱꦷꦠꦨꦠ꧀ꦠꦱ꧀ꦱ ꦈꦥꦫꦶ ꦈꦟ꧀ꦲꦨꦠ꧀ꦠꦁ ꦮꦝ꧀ꦞꦺꦠ꧀ꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦄꦢꦴꦱꦶ. ꦱꦺꦴ ꦨꦠ꧀ꦠꦺ ꦲꦠ꧀ꦡꦁ ꦎꦠꦴꦫꦺꦠ꧀ꦮꦴ ꦈꦥꦫꦶ ꦈꦟ꧀ꦲꦁ ꦲꦺꦛ꧀ꦜꦴ ꦕ ꦨꦠ꧀ꦠꦁ ꦱꦷꦠꦭꦁ ꦢꦶꦱ꧀ꦮꦴ ꦕꦶꦤ꧀ꦠꦺꦱꦶ – ‘‘ꦆꦩꦶꦤꦴ ꦄꦚ꧀ꦚꦱ꧀ꦱ ꦨꦸꦠ꧀ꦠꦴꦣꦶꦏꦺꦤ ꦈꦕ꧀ꦖꦶꦛ꧀ꦜꦨꦠ꧀ꦠꦺꦤ ꦨꦮꦶꦠꦧ꧀ꦧ’’ꦤ꧀ꦠꦶ. ꦱꦺꦴ ꦧ꧀ꦫꦴꦲ꧀ꦩꦟꦶꦁ ꦥꦸꦕ꧀ꦖꦤ꧀ꦠꦺꦴ ꦥꦜꦩꦁ ꦒꦴꦡꦩꦴꦲ –

꧑꧒꧓. ‘‘ꦄꦚ꧀ꦚꦺꦴ ꦈꦥꦫꦶꦩꦺꦴ ꦮꦟ꧀ꦟꦺꦴ, ꦄꦚ꧀ꦚꦺꦴ ꦮꦟ꧀ꦟꦺꦴ ꦕ ꦲꦺꦛ꧀ꦜꦶꦩꦺꦴ;

ꦧ꧀ꦫꦴꦲ꧀ꦩꦟꦷ ꦠ꧀ꦮꦺꦮ ꦥꦸꦕ꧀ꦖꦴꦩꦶ, ꦏꦶꦁ ꦲꦺꦛ꧀ꦜꦴ ꦏꦶꦚ꧀ꦕ ꦈꦥ꧀ꦥꦫꦷ’’ꦠꦶ.

ꦠꦠ꧀ꦡ ꦮꦟ꧀ꦟꦺꦴꦠꦶ ꦄꦴꦏꦴꦫꦺꦴ. ꦄꦪꦚ꧀ꦲꦶ ꦈꦥꦫꦶꦩꦱ꧀ꦱ ꦈꦟ꧀ꦲꦨꦴꦮꦁ ꦲꦺꦛ꧀ꦜꦶꦩꦱ꧀ꦱ ꦕ ꦱꦷꦠꦨꦴꦮꦁ ꦥꦸꦕ꧀ꦖꦤ꧀ꦠꦺꦴ ꦌꦮꦩꦴꦲ. ꦏꦶꦁ ꦲꦺꦛ꧀ꦜꦴ ꦏꦶꦚ꧀ꦕ ꦈꦥ꧀ꦥꦫꦷꦠꦶ ꦮꦸꦝ꧀ꦞꦶꦠꦨꦠ꧀ꦠꦺꦤ ꦤꦴꦩ ꦈꦥꦫꦶ ꦱꦷꦠꦭꦺꦤ, ꦲꦺꦛ꧀ꦜꦴ ꦈꦟ꧀ꦲꦺꦤ ꦨꦮꦶꦠꦧ꧀ꦧꦁ, ꦆꦢꦚ꧀ꦕ ꦥꦤ ꦤ ꦠꦴꦢꦶꦱꦁ, ꦠꦺꦤ ꦠꦁ ꦥꦸꦕ꧀ꦖꦴꦩꦶ – ‘‘ꦏꦺꦤ ꦏꦴꦫꦟꦺꦤ ꦈꦥꦫꦶ ꦨꦠ꧀ꦠꦁ ꦈꦟ꧀ꦲꦁ, ꦲꦺꦛ꧀ꦜꦶꦩꦁ ꦱꦷꦠꦭ’’ꦤ꧀ꦠꦶ.

ꦧ꧀ꦫꦴꦲ꧀ꦩꦟꦷ ꦄꦠ꧀ꦠꦤꦴ ꦏꦠꦏꦩ꧀ꦩꦱ꧀ꦱ ꦈꦠ꧀ꦠꦴꦤꦨꦴꦮꦨꦪꦺꦤ ꦧ꧀ꦫꦴꦲ꧀ꦩꦟꦺ ꦥꦸꦤꦥ꧀ꦥꦸꦤꦁ ꦏꦡꦺꦤ꧀ꦠꦺꦥꦶ ꦠꦸꦟ꧀ꦲꦷꦪꦺꦮ ꦄꦲꦺꦴꦱꦶ. ꦠꦱ꧀ꦩꦶꦁ ꦑꦟꦺ ꦤꦛꦥꦸꦠ꧀ꦠꦱ꧀ꦱ ꦌꦠꦢꦲꦺꦴꦱꦶ – ‘‘ꦏꦺꦴꦛ꧀ꦜꦺ ꦤꦶꦱꦷꦢꦴꦥꦶꦠꦥꦴꦥꦥꦸꦫꦶꦱꦺꦤ ꦗꦴꦫꦺꦤ ꦨꦮꦶꦠꦧ꧀ꦧꦁ, ꦆꦩꦶꦤꦴ ꦒꦺꦲꦱ꧀ꦱꦴꦩꦶꦏꦺꦤ, ꦧ꧀ꦫꦴꦲ꧀ꦩꦟꦷ ꦥꦤ ꦄꦠ꧀ꦠꦤꦴ ꦏꦠꦏꦩ꧀ꦩꦱ꧀ꦱ ꦥꦴꦏꦛꦨꦴꦮꦨꦪꦺꦤ ꦏꦶꦚ꧀ꦕꦶ ꦤ ꦏꦡꦺꦠꦶ, ꦲꦤ꧀ꦢꦴꦲꦁ ꦆꦩꦶꦱ꧀ꦱꦴ ꦏꦠꦏꦩ꧀ꦩꦁ ꦥꦏꦴꦱꦺꦠ꧀ꦮꦴ ꦗꦴꦫꦱ꧀ꦱ ꦏꦺꦴꦛ꧀ꦜꦏꦺ ꦤꦶꦱꦷꦢꦴꦥꦶꦠꦨꦴꦮꦁ ꦧ꧀ꦫꦴꦲ꧀ꦩꦟꦱ꧀ꦱ ꦏꦡꦺꦩꦷ’’ꦠꦶ. ꦱꦺꦴ ꦧ꧀ꦫꦴꦲ꧀ꦩꦟꦱ꧀ꦱ ꦒꦺꦲꦴ ꦤꦶꦏ꧀ꦑꦤ꧀ꦠꦏꦴꦭꦠꦺꦴ ꦥꦛ꧀ꦜꦴꦪ ꦆꦠꦫꦱ꧀ꦱ ꦒꦺꦲꦥꦮꦺꦱꦤꦁ ꦄꦠꦶꦕꦫꦟꦁ ꦄꦒ꧀ꦒꦨꦠ꧀ꦠꦨꦸꦚ꧀ꦗꦤꦁ ꦧ꧀ꦫꦴꦲ꧀ꦩꦟꦶꦪꦴ ꦢ꧀ꦮꦴꦫꦺ ꦜꦠ꧀ꦮꦴ ꦩꦒ꧀ꦒꦁ ꦎꦭꦺꦴꦏꦤꦁ ꦆꦠꦫꦱ꧀ꦱ ꦏꦺꦴꦛ꧀ꦜꦺ ꦎꦠꦴꦫꦶꦠꦨꦴꦮꦤ꧀ꦠꦶ ꦱꦧ꧀ꦧꦁ ꦠꦁ ꦥꦮꦠ꧀ꦠꦶꦁ ꦄꦴꦕꦶꦏ꧀ꦑꦶꦠ꧀ꦮꦴ ꦢꦸꦠꦶꦪꦁ ꦒꦴꦡꦩꦴꦲ –

꧑꧒꧔. ‘‘ꦄꦲꦁ ꦤꦛꦺꦴꦱ꧀ꦩꦶ ꦨꦢ꧀ꦢꦤ꧀ꦠꦺ, ꦨꦶꦏ꧀ꦑꦏꦺꦴꦱ꧀ꦩꦶ ꦆꦣꦴꦒꦠꦺꦴ;

ꦄꦪꦚ꧀ꦲꦶ ꦏꦺꦴꦛ꧀ꦜꦩꦺꦴꦠꦶꦟ꧀ꦟꦺꦴ, ꦄꦪꦁ ꦱꦺꦴ ꦪꦁ ꦒꦮꦺꦱꦱꦷ’’ꦠꦶ.

ꦠꦠ꧀ꦡ ꦄꦲꦁ ꦤꦛꦺꦴꦱ꧀ꦩꦶ, ꦨꦢ꧀ꦢꦤ꧀ꦠꦺꦠꦶ, ꦱꦴꦩꦶ, ꦄꦲꦁ ꦤꦛꦗꦴꦠꦶꦏꦺꦴ. ꦨꦶꦏ꧀ꦑꦏꦺꦴꦱ꧀ꦩꦶ ꦆꦣꦴꦒꦠꦺꦴꦠꦶ ꦱ꧀ꦮꦴꦲꦁ ꦆꦩꦁ ꦜꦴꦤꦁ ꦨꦶꦏ꧀ꦑꦏꦺꦴ ꦨꦶꦏ꧀ꦑꦁ ꦥꦫꦶꦪꦺꦱꦩꦴꦤꦺꦴ ꦄꦴꦒꦠꦺꦴꦱ꧀ꦩꦶ. ꦄꦪꦚ꧀ꦲꦶ ꦏꦺꦴꦛ꧀ꦜꦩꦺꦴꦠꦶꦟ꧀ꦟꦺꦴꦠꦶ ꦄꦪꦁ ꦥꦤ ꦌꦠꦶꦱ꧀ꦱꦴ ꦗꦴꦫꦺꦴ ꦆꦩꦁ ꦨꦠ꧀ꦠꦁ ꦨꦸꦚ꧀ꦗꦤ꧀ꦠꦺꦴ ꦠꦮ ꦨꦪꦺꦤ ꦏꦺꦴꦛ꧀ꦜꦁ ꦎꦠꦶꦟ꧀ꦟꦺꦴ. ꦄꦪꦁ ꦱꦺꦴ ꦪꦁ ꦒꦮꦺꦱꦱꦷꦠꦶ ꦪꦁ ꦠ꧀ꦮꦁ ꦏꦱ꧀ꦱ ꦤꦸ ꦑꦺꦴ ꦆꦩꦶꦤꦴ ꦈꦕ꧀ꦖꦶꦛ꧀ꦜꦏꦺꦤ ꦨꦮꦶꦠꦧ꧀ꦧꦤ꧀ꦠꦶ ꦒꦮꦺꦱꦱꦶ, ꦄꦪꦁ ꦱꦺꦴ. ꦕꦹꦭ꦳ꦴꦪ ꦤꦁ ꦒꦲꦺꦠ꧀ꦮꦴ ꦏꦺꦴꦛ꧀ꦜꦴ ꦤꦷꦲꦫꦶꦠ꧀ꦮꦴ ꦪꦡꦴ ꦤ ꦥꦸꦤꦺꦮꦫꦹꦥꦁ ꦥꦴꦥꦁ ꦏꦫꦺꦴꦠꦶ, ꦠꦡꦴ ꦄꦱ꧀ꦱ ꦱꦠꦶꦁ ꦗꦤꦺꦲꦷꦠꦶ ꦮꦠ꧀ꦮꦴ ꦥꦏ꧀ꦏꦴꦩꦶ. ꦧ꧀ꦫꦴꦲ꧀ꦩꦟꦺꦴ ꦈꦨꦺꦴꦥꦶ ꦠꦺ ꦪꦡꦴ ꦤꦁ ꦤ ꦥꦸꦤꦺꦮꦫꦹꦥꦁ ꦥꦴꦥꦁ ꦏꦫꦺꦴꦤ꧀ꦠꦶ, ꦠꦗ꧀ꦗꦤꦥꦺꦴꦡꦤꦺꦲꦶ ꦠꦡꦴ ꦱꦶꦏ꧀ꦑꦴꦥꦺꦠ꧀ꦮꦴ ꦪꦡꦴꦏꦩ꧀ꦩꦁ ꦒꦠꦺꦴ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ꦱꦕ꧀ꦕꦴꦤꦶ ꦥꦏꦴꦱꦺꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ, ꦱꦕ꧀ꦕꦥꦫꦶꦪꦺꦴꦱꦴꦤꦺ ꦈꦏ꧀ꦏꦟ꧀ꦜꦶꦠꦺꦴ ꦨꦶꦏ꧀ꦑꦸ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶ. ‘‘ꦠꦢꦴ ꦧ꧀ꦫꦴꦲ꧀ꦩꦟꦷ ꦥꦸꦫꦴꦟꦢꦸꦠꦶꦪꦶꦏꦴ ꦄꦲꦺꦴꦱꦶ, ꦧ꧀ꦫꦴꦲ꧀ꦩꦟꦺꦴ ꦈꦏ꧀ꦏꦟ꧀ꦜꦶꦠꦺꦴ ꦨꦶꦏ꧀ꦑꦸ, ꦤꦛꦥꦸꦠ꧀ꦠꦺꦴ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦈꦕ꧀ꦖꦶꦛ꧀ꦜꦨꦠ꧀ꦠꦗꦴꦠꦏꦮꦟ꧀ꦟꦤꦴ ꦢꦸꦠꦶꦪꦴ.

[꧒꧑꧓] ꧓. ꦨꦫꦸꦗꦴꦠꦏꦮꦟ꧀ꦟꦤꦴ

ꦆꦱꦷꦤꦩꦤ꧀ꦠꦫꦁ ꦏꦠ꧀ꦮꦴꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦏꦺꦴꦱꦭꦫꦴꦗꦴꦤꦁ ꦄꦴꦫꦧ꧀ꦨ ꦏꦡꦺꦱꦶ. ꦨꦒꦮꦠꦺꦴ ꦲꦶ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦕ ꦭꦴꦨꦱꦏ꧀ꦏꦴꦫꦺꦴ ꦩꦲꦴ ꦄꦲꦺꦴꦱꦶ. ꦪꦡꦴꦲ –

‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦒꦮꦴ ꦱꦏ꧀ꦏꦠꦺꦴ ꦲꦺꦴꦠꦶ ꦒꦫꦸꦏꦠꦺꦴ ꦩꦴꦤꦶꦠꦺꦴ ꦥꦹꦗꦶꦠꦺꦴ ꦄꦥꦕꦶꦠꦺꦴ ꦭꦴꦨꦷ ꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦴꦤꦁ. ꦨꦶꦏ꧀ꦑꦸꦱꦔ꧀ꦓꦺꦴꦥꦶ ꦑꦺꦴ ꦱꦏ꧀ꦏꦠꦺꦴ ꦲꦺꦴꦠꦶ…ꦥꦺ… ꦥꦫꦶꦏ꧀ꦑꦴꦫꦴꦤꦁ. ꦄꦚ꧀ꦚꦠꦶꦠ꧀ꦡꦶꦪꦴ ꦥꦤ ꦥꦫꦶꦧ꧀ꦧꦴꦗꦏꦴ ꦄꦱꦏ꧀ꦏꦠꦴ ꦲꦺꦴꦤ꧀ꦠꦶ…ꦥꦺ… ꦥꦫꦶꦏ꧀ꦑꦴꦫꦴꦤ’’ꦤ꧀ꦠꦶ (ꦈꦢꦴ. ꧑꧔).

ꦠꦺ ꦌꦮꦁ ꦥꦫꦶꦲꦷꦤꦭꦴꦨꦱꦏ꧀ꦏꦴꦫꦴ ꦄꦲꦺꦴꦫꦠ꧀ꦠꦁ ꦒꦸꦭ꦳꧀ꦲꦱꦤ꧀ꦤꦶꦥꦴꦠꦁ ꦏꦠ꧀ꦮꦴ ꦩꦤ꧀ꦠꦪꦤ꧀ꦠꦶ ‘‘ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦈꦥ꧀ꦥꦤ꧀ꦤꦏꦴꦭꦠꦺꦴ ꦥꦛ꧀ꦜꦴꦪ ꦩꦪꦁ ꦲꦠꦭꦴꦨꦱꦏ꧀ꦏꦴꦫꦴ ꦗꦴꦠꦴ, ꦱꦩꦟꦺꦴ ꦒꦺꦴꦠꦩꦺꦴ ꦭꦴꦨꦒ꧀ꦒꦪꦱꦒ꧀ꦒꦥ꧀ꦥꦠ꧀ꦠꦺꦴ ꦗꦴꦠꦺꦴ, ꦏꦺꦤ ꦤꦸ ꦑꦺꦴ ꦏꦴꦫꦟꦺꦤꦱ꧀ꦱ ꦌꦱꦴ ꦱꦩ꧀ꦥꦠ꧀ꦠꦷ’’ꦠꦶ. ꦠꦠ꧀ꦫꦺꦏꦺ ꦌꦮꦩꦴꦲꦁꦱꦸ – ‘‘ꦱꦩꦟꦺꦴ ꦒꦺꦴꦠꦩꦺꦴ ꦱꦏꦭꦗꦩ꧀ꦧꦸꦢꦷꦥꦱ꧀ꦱ ꦈꦠ꧀ꦠꦩꦛ꧀ꦜꦴꦤꦺ ꦨꦹꦩꦶꦱꦷꦱꦺ ꦮꦱꦠꦶ. ꦠꦺꦤꦱ꧀ꦱ ꦭꦴꦨꦱꦏ꧀ꦏꦴꦫꦺꦴ ꦈꦥ꧀ꦥꦗ꧀ꦗꦠꦷ’’ꦠꦶ, ꦱꦺꦱꦴ ‘‘ꦄꦠ꧀ꦡꦺꦠꦁ ꦏꦴꦫꦟꦁ, ꦩꦪꦩ꧀ꦥꦶ ꦗꦺꦠꦮꦤꦥꦶꦛ꧀ꦜꦺ ꦠꦶꦠ꧀ꦡꦶꦪꦴꦫꦴꦩꦁ ꦏꦴꦫꦺꦩꦸ, ꦌꦮꦁ ꦭꦴꦨꦶꦤꦺꦴ ꦨꦮꦶꦱ꧀ꦱꦴꦩꦴ’’ꦠꦶ ꦄꦴꦲꦁꦱꦸ. ꦠꦺ ꦱꦧ꧀ꦧꦺꦥꦶ ‘‘ꦌꦮꦩꦺꦠ’’ꦤ꧀ꦠꦶ ꦱꦤ꧀ꦤꦶꦛ꧀ꦜꦴꦤꦁ ꦏꦠ꧀ꦮꦴ ‘‘ꦱꦕꦺꦥꦶ ꦩꦪꦁ ꦫꦚ꧀ꦚꦺꦴ ꦄꦤꦴꦫꦺꦴꦕꦺꦠ꧀ꦮꦴ ꦄꦴꦫꦴꦩꦁ ꦏꦴꦫꦺꦱ꧀ꦱꦴꦩ, ꦨꦶꦏ꧀ꦑꦹ ꦮꦴꦫꦺꦱ꧀ꦱꦤ꧀ꦠꦶ, ꦭꦚ꧀ꦗꦁ ꦭꦨꦶꦠ꧀ꦮꦴ ꦄꦨꦶꦗ꧀ꦗꦤꦏꦺꦴ ꦤꦴꦩ ꦤꦠ꧀ꦡꦶ, ꦠꦱ꧀ꦩꦴ ꦫꦚ꧀ꦚꦺꦴ ꦭꦚ꧀ꦗꦁ ꦢꦠ꧀ꦮꦴ ꦄꦴꦫꦴꦩꦛ꧀ꦜꦴꦤꦁ ꦒꦟ꧀ꦲꦶꦱ꧀ꦱꦴꦩꦴ’’ꦠꦶ ꦱꦩ꧀ꦩꦤ꧀ꦠꦺꦠ꧀ꦮꦴ ꦈꦥꦛ꧀ꦜꦴꦏꦺ ꦪꦴꦕꦶꦠ꧀ꦮꦴ ꦫꦚ꧀ꦚꦺꦴ ꦱꦠꦱꦲꦱ꧀ꦱꦁ ꦢꦠ꧀ꦮꦴ ‘‘ꦩꦲꦴꦫꦴꦗ, ꦩꦪꦁ ꦗꦺꦠꦮꦤꦥꦶꦛ꧀ꦜꦶꦪꦁ ꦠꦶꦠ꧀ꦡꦶꦪꦴꦫꦴꦩꦁ ꦏꦫꦶꦱ꧀ꦱꦴꦩ, ꦱꦕꦺ ꦨꦶꦏ꧀ꦑꦹ ‘ꦏꦴꦠꦸꦁ ꦤ ꦢꦱ꧀ꦱꦴꦩꦴ’ꦠꦶ ꦠꦸꦩ꧀ꦲꦴꦏꦁ ꦄꦴꦫꦺꦴꦕꦺꦤ꧀ꦠꦶ, ꦤꦺꦱꦁ ꦥꦛꦶꦮꦕꦤꦁ ꦤ ꦢꦴꦠꦧ꧀ꦧ’’ꦤ꧀ꦠꦶ ꦄꦴꦲꦁꦱꦸ. ꦫꦴꦗꦴ ꦭꦚ꧀ꦗꦭꦺꦴꦨꦺꦤ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶ.

ꦠꦶꦠ꧀ꦡꦶꦪꦴ ꦫꦴꦗꦴꦤꦁ ꦱꦔ꧀ꦒꦟ꧀ꦲꦶꦠ꧀ꦮꦴ ꦮꦝ꧀ꦞꦏꦶꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦏꦩ꧀ꦩꦁ ꦥꦛ꧀ꦜꦥꦺꦱꦸꦁ, ꦩꦲꦴꦱꦢ꧀ꦢꦺꦴ ꦄꦲꦺꦴꦱꦶ. ꦱꦠ꧀ꦡꦴ ‘‘ꦏꦺ ꦥꦤꦺꦠꦺ, ꦄꦴꦤꦤ꧀ꦢ, ꦈꦕ꧀ꦕꦴꦱꦢ꧀ꦢꦩꦲꦴꦱꦢ꧀ꦢꦴ’’ꦠꦶ ꦥꦸꦕ꧀ꦖꦶ. ‘‘ꦄꦚ꧀ꦚꦠꦶꦠ꧀ꦡꦶꦪꦴ, ꦨꦤ꧀ꦠꦺ, ꦗꦺꦠꦮꦤꦥꦶꦛ꧀ꦜꦶꦪꦁ ꦠꦶꦠ꧀ꦡꦶꦪꦴꦫꦴꦩꦁ ꦏꦴꦫꦺꦤ꧀ꦠꦶ, ꦠꦠ꧀ꦡꦺꦱꦺꦴ ꦱꦢ꧀ꦢꦺꦴ’’ꦠꦶ. ‘‘ꦄꦴꦤꦤ꧀ꦢ, ꦤꦺꦠꦁ ꦜꦴꦤꦁ ꦠꦶꦠ꧀ꦡꦶꦪꦴꦫꦴꦩꦱ꧀ꦱ ꦄꦤꦸꦕ꧀ꦖꦮꦶꦏꦁ, ꦠꦶꦠ꧀ꦡꦶꦪꦴ ꦈꦕ꧀ꦕꦴꦱꦢ꧀ꦢꦏꦴꦩꦴ, ꦤ ꦱꦏ꧀ꦏꦴ ꦠꦺꦲꦶ ꦱꦢ꧀ꦣꦶꦁ ꦮꦱꦶꦠꦸ’’ꦤ꧀ꦠꦶ ꦮꦠ꧀ꦮꦴ ꦨꦶꦏ꧀ꦑꦸꦱꦔ꧀ꦓꦁ ꦱꦤ꧀ꦤꦶꦥꦴꦠꦺꦠ꧀ꦮꦴ ‘‘ꦒꦕ꧀ꦖꦡ, ꦨꦶꦏ꧀ꦑꦮꦺ, ꦫꦚ꧀ꦚꦺꦴ ꦄꦴꦕꦶꦏ꧀ꦑꦶꦠ꧀ꦮꦴ ꦠꦶꦠ꧀ꦡꦶꦪꦴꦫꦴꦩꦏꦫꦟꦁ ꦤꦶꦮꦴꦫꦺꦡꦴ’’ꦠꦶ ꦄꦴꦲ. ꦨꦶꦏ꧀ꦑꦸꦱꦔ꧀ꦓꦺꦴ ꦒꦤ꧀ꦠ꧀ꦮꦴ ꦫꦚ꧀ꦚꦺꦴ ꦤꦶꦮꦺꦱꦤꦢ꧀ꦮꦴꦫꦺ ꦄꦛ꧀ꦜꦴꦱꦶ. ꦫꦴꦗꦴ ꦱꦔ꧀ꦓꦱ꧀ꦱ ꦄꦴꦒꦠꦨꦴꦮꦁ ꦱꦸꦠ꧀ꦮꦴꦥꦶ ‘‘ꦠꦶꦠ꧀ꦡꦶꦪꦴꦫꦴꦩꦁ ꦤꦶꦱ꧀ꦱꦴꦪ ꦄꦴꦒꦠꦴ ꦨꦮꦶꦱ꧀ꦱꦤ꧀ꦠꦷ’’ꦠꦶ ꦭꦚ꧀ꦗꦱ꧀ꦱ ꦒꦲꦶꦠꦠ꧀ꦠꦴ ‘‘ꦫꦴꦗꦴ ꦒꦺꦲꦺ ꦤꦠ꧀ꦡꦷ’’ꦠꦶ ꦮꦢꦴꦥꦺꦱꦶ. ꦨꦶꦏ꧀ꦑꦹ ꦒꦤ꧀ꦠ꧀ꦮꦴ ꦱꦠ꧀ꦡꦸ ꦄꦴꦫꦺꦴꦕꦺꦱꦸꦁ. ꦱꦠ꧀ꦡꦴ ‘‘ꦭꦚ꧀ꦗꦁ ꦤꦶꦱ꧀ꦱꦴꦪ ꦌꦮꦁ ꦏꦫꦺꦴꦠꦷ’’ꦠꦶ ꦢ꧀ꦮꦺ ꦄꦒ꧀ꦒꦱꦴꦮꦏꦺ ꦥꦺꦱꦺꦱꦶ. ꦫꦴꦗꦴ ꦠꦺꦱꦩ꧀ꦥꦶ ꦄꦴꦒꦠꦨꦴꦮꦁ ꦱꦸꦠ꧀ꦮꦴ ꦠꦡꦺꦮ ꦮꦢꦴꦥꦺꦱꦶ. ꦠꦺꦥꦶ ꦄꦴꦒꦤ꧀ꦠ꧀ꦮꦴ ꦱꦠ꧀ꦡꦸ ꦄꦴꦫꦴꦕꦺꦱꦸꦁ. ꦱꦠ꧀ꦡꦴ ‘‘ꦤ ꦆꦢꦴꦤꦶ, ꦱꦴꦫꦶꦥꦸꦠ꧀ꦠ, ꦫꦴꦗꦴ ꦒꦺꦲꦺ ꦤꦶꦱꦷꦢꦶꦠꦸꦁ ꦭꦨꦶꦱ꧀ꦱꦠꦶ, ꦧꦲꦶ ꦤꦶꦏ꧀ꦑꦩꦶꦱ꧀ꦱꦠꦷ’’ꦠꦶ ꦥꦸꦤꦢꦶꦮꦱꦺ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦥꦚ꧀ꦕꦲꦶ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦫꦚ꧀ꦚꦺꦴ ꦤꦶꦮꦺꦱꦤꦢ꧀ꦮꦴꦫꦁ ꦄꦒꦩꦴꦱꦶ. ꦫꦴꦗꦴ ꦱꦸꦠ꧀ꦮꦴ ꦥꦴꦱꦴꦢꦴ ꦎꦠꦫꦶꦠ꧀ꦮꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦱꦠ꧀ꦡꦴꦫꦁ ꦥꦮꦺꦱꦺꦠ꧀ꦮꦴ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦱꦔ꧀ꦓꦱ꧀ꦱ ꦪꦴꦒꦸꦑꦗ꧀ꦗꦏꦁ ꦢꦠ꧀ꦮꦴ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦱꦠ꧀ꦡꦴ ꦫꦚ꧀ꦚꦺꦴ ꦌꦏꦁ ꦥꦫꦶꦪꦴꦪꦣꦩ꧀ꦩꦢꦺꦱꦤꦁ ꦄꦴꦫꦨꦤ꧀ꦠꦺꦴ ‘‘ꦩꦲꦴꦫꦴꦗ, ꦥꦺꦴꦫꦴꦟꦏꦫꦴꦗꦴꦤꦺꦴ ꦭꦚ꧀ꦗꦁ ꦒꦲꦺꦠ꧀ꦮꦴ ꦱꦷꦭꦮꦤ꧀ꦠꦺ ꦄꦚ꧀ꦚꦩꦚ꧀ꦚꦁ ꦏꦭꦲꦁ ꦏꦴꦫꦺꦠ꧀ꦮꦴ ꦄꦠ꧀ꦠꦤꦺꦴ ꦫꦛ꧀ꦜꦱ꧀ꦱ ꦄꦱ꧀ꦱꦴꦩꦶꦤꦺꦴ ꦲꦸꦠ꧀ꦮꦴ ꦩꦲꦴꦮꦶꦤꦴꦱꦁ ꦥꦴꦥꦸꦟꦶꦁꦱꦹ’’ꦠꦶ ꦮꦠ꧀ꦮꦴ ꦠꦺꦤ ꦪꦴꦕꦶꦠꦺꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦨꦫꦸꦫꦛ꧀ꦜꦺ ꦨꦫꦸꦫꦴꦗꦴ ꦤꦴꦩ ꦫꦗ꧀ꦗꦁ ꦏꦴꦫꦺꦱꦶ. ꦠꦢꦴ ꦧꦺꦴꦣꦶꦱꦠ꧀ꦠꦺꦴ ꦥꦚ꧀ꦕꦴꦨꦶꦚ꧀ꦚꦺꦴ ꦄꦛ꧀ꦜꦱꦩꦴꦥꦠ꧀ꦠꦶꦭꦴꦨꦷ ꦒꦟꦱꦠ꧀ꦡꦴ ꦠꦴꦥꦱꦺꦴ ꦲꦸꦠ꧀ꦮꦴ ꦲꦶꦩꦮꦤ꧀ꦠꦥꦢꦺꦱꦺ ꦕꦶꦫꦁ ꦮꦱꦶꦠ꧀ꦮꦴ ꦭꦺꦴꦟꦩ꧀ꦧꦶꦭꦱꦺꦮꦤꦠ꧀ꦡꦴꦪ ꦥꦚ꧀ꦕꦱꦠꦠꦴꦥꦱꦥꦫꦶꦮꦸꦠꦺꦴ ꦲꦶꦩꦮꦤ꧀ꦠꦴ ꦎꦠꦫꦶꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦨꦫꦸꦤꦒꦫꦁ ꦥꦠ꧀ꦮꦴ ꦠꦠ꧀ꦡ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦤꦒꦫꦴ ꦤꦶꦏ꧀ꦑꦩꦶꦠ꧀ꦮꦴ ꦈꦠ꧀ꦠꦫꦢ꧀ꦮꦴꦫꦺ ꦱꦴꦑꦴꦮꦶꦛꦥꦱꦩ꧀ꦥꦤ꧀ꦤꦱ꧀ꦱ ꦮꦛꦫꦸꦏ꧀ꦑꦱ꧀ꦱ ꦩꦹꦭꦺ ꦤꦶꦱꦷꦢꦶꦠ꧀ꦮꦴ ꦨꦠ꧀ꦠꦏꦶꦕ꧀ꦕꦁ ꦏꦠ꧀ꦮꦴ ꦠꦠ꧀ꦡꦺꦮ ꦫꦸꦏ꧀ꦑꦩꦹꦭꦺ ꦮꦴꦱꦁ ꦏꦥ꧀ꦥꦺꦱꦶ. ꦌꦮꦁ ꦠꦱ꧀ꦩꦶꦁ ꦆꦱꦶꦒꦟꦺ ꦠꦠ꧀ꦡ ꦮꦱꦤ꧀ꦠꦺ ꦄꦝ꧀ꦞꦩꦴꦱꦕ꧀ꦕꦪꦺꦤ ꦄꦚ꧀ꦚꦺꦴ ꦒꦟꦱꦠ꧀ꦡꦴ ꦥꦚ꧀ꦕꦱꦠꦥꦫꦶꦮꦴꦫꦺꦴ ꦄꦴꦒꦤ꧀ꦠ꧀ꦮꦴ ꦤꦒꦫꦺ ꦨꦶꦏ꧀ꦑꦴꦪ ꦕꦫꦶꦠ꧀ꦮꦴ ꦤꦒꦫꦴ ꦤꦶꦏ꧀ꦑꦩꦶꦠ꧀ꦮꦴ ꦢꦏ꧀ꦑꦶꦟꦢ꧀ꦮꦴꦫꦺ ꦠꦴꦢꦶꦱꦱ꧀ꦱꦺꦮ ꦮꦛꦫꦸꦏ꧀ꦑꦱ꧀ꦱ ꦩꦹꦭꦺ ꦤꦶꦱꦷꦢꦶꦠ꧀ꦮꦴ ꦨꦠ꧀ꦠꦏꦶꦕ꧀ꦕꦁ ꦏꦠ꧀ꦮꦴ ꦠꦠ꧀ꦡ ꦫꦸꦏ꧀ꦑꦩꦹꦭꦺ ꦮꦴꦱꦁ ꦏꦥ꧀ꦥꦺꦱꦶ. ꦆꦠꦶ ꦠꦺ ꦢ꧀ꦮꦺꦥꦶ ꦆꦱꦶꦒꦟꦴ ꦠꦠ꧀ꦡ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦲꦶꦩꦮꦤ꧀ꦠꦩꦺꦮ ꦄꦒꦩꦁꦱꦸ.

ꦠꦺꦱꦁ ꦒꦠꦏꦴꦭꦺ ꦢꦏ꧀ꦑꦶꦟꦢ꧀ꦮꦴꦫꦺ ꦮꦛꦫꦸꦏ꧀ꦑꦺꦴ ꦱꦸꦏ꧀ꦑꦺꦴ. ꦥꦸꦤꦮꦴꦫꦺ ꦠꦺꦱꦸ ꦄꦴꦒꦕ꧀ꦖꦤ꧀ꦠꦺꦱꦸ ꦢꦏ꧀ꦑꦶꦟꦢ꧀ꦮꦴꦫꦺ ꦮꦛꦫꦸꦏ꧀ꦑꦮꦴꦱꦶꦤꦺꦴ ꦥꦜꦩꦠꦫꦁ ꦄꦴꦒꦤ꧀ꦠ꧀ꦮꦴ ꦄꦠ꧀ꦠꦤꦺꦴ ꦮꦛꦫꦸꦏ꧀ꦑꦱ꧀ꦱ ꦱꦸꦏ꧀ꦑꦨꦴꦮꦁ ꦚꦠ꧀ꦮꦴ ꦨꦶꦏ꧀ꦑꦴꦪ ꦕꦫꦶꦠ꧀ꦮꦴ ꦤꦒꦫꦴ ꦤꦶꦏ꧀ꦑꦩꦶꦠ꧀ꦮꦴ ꦈꦠ꧀ꦠꦫꦢ꧀ꦮꦴꦫꦺ ꦮꦛꦫꦸꦏ꧀ꦑꦩꦹꦭꦁ ꦒꦤ꧀ꦠ꧀ꦮꦴ ꦨꦠ꧀ꦠꦏꦶꦕ꧀ꦕꦁ ꦏꦠ꧀ꦮꦴ ꦠꦠ꧀ꦡ ꦮꦴꦱꦁ ꦏꦥ꧀ꦥꦺꦱꦸꦁ. ꦆꦠꦫꦺ ꦥꦤ ꦆꦱꦪꦺꦴ ꦥꦕ꧀ꦖꦴ ꦄꦴꦒꦤ꧀ꦠ꧀ꦮꦴ ꦤꦒꦫꦺ ꦨꦶꦏ꧀ꦑꦴꦪ ꦕꦫꦶꦠ꧀ꦮꦴ ꦄꦠ꧀ꦠꦤꦺꦴ ꦫꦸꦏ꧀ꦑꦩꦹꦭꦩꦺꦮ ꦒꦤ꧀ꦠ꧀ꦮꦴ ꦨꦠ꧀ꦠꦏꦶꦕ꧀ꦕꦁ ꦏꦠ꧀ꦮꦴ ꦮꦴꦱꦁ ꦏꦥ꧀ꦥꦺꦱꦸꦁ. ꦠꦺ ‘‘ꦤ ꦱꦺꦴ ꦠꦸꦩ꧀ꦲꦴꦏꦁ ꦫꦸꦏ꧀ꦑꦺꦴ, ꦄꦩ꧀ꦲꦴꦏꦁ ꦫꦸꦏ꧀ꦑꦺꦴ’’ꦠꦶ ꦫꦸꦏ꧀ꦑꦁ ꦤꦶꦱ꧀ꦱꦴꦪ ꦄꦚ꧀ꦚꦩꦚ꧀ꦚꦁ ꦏꦭꦲꦁ ꦏꦫꦶꦁꦱꦸ, ꦏꦭꦲꦺꦴ ꦩꦲꦴ ꦄꦲꦺꦴꦱꦶ. ꦌꦏꦺ ‘‘ꦄꦩ꧀ꦲꦴꦏꦁ ꦥꦜꦩꦁ ꦮꦱꦶꦠꦛ꧀ꦜꦴꦤꦁ ꦠꦸꦩ꧀ꦲꦺ ꦤ ꦭꦨꦶꦱ꧀ꦱꦡꦴ’’ꦠꦶ ꦮꦢꦤ꧀ꦠꦶ. ꦌꦏꦺ ‘‘ꦩꦪꦁ ꦆꦩꦱ꧀ꦩꦶꦁ ꦮꦴꦫꦺ ꦥꦜꦩꦠꦫꦁ ꦆꦣꦴꦒꦠꦴ, ꦠꦸꦩ꧀ꦲꦺ ꦤ ꦭꦨꦶꦱ꧀ꦱꦡꦴ’’ꦠꦶ ꦮꦢꦤ꧀ꦠꦶ. ꦆꦠꦶ ꦠꦺ ‘‘ꦩꦪꦁ ꦱꦴꦩꦶꦤꦺꦴ, ꦩꦪꦁ ꦱꦴꦩꦶꦤꦺꦴ’’ꦠꦶ ꦏꦭꦲꦁ ꦏꦫꦺꦴꦤ꧀ꦠꦴ ꦫꦸꦏ꧀ꦑꦩꦹꦭꦱ꧀ꦱꦠ꧀ꦡꦴꦪ ꦫꦴꦗꦏꦸꦭꦁ ꦄꦒꦩꦁꦱꦸ. ꦫꦴꦗꦴ ꦥꦜꦩꦁ ꦮꦸꦠ꧀ꦡꦆꦱꦶꦒꦟꦚ꧀ꦚꦺꦮ ꦱꦴꦩꦶꦏꦁ ꦄꦏꦴꦱꦶ. ꦆꦠꦫꦺ ‘‘ꦤ ꦢꦴꦤꦶ ꦩꦪꦁ ꦆꦩꦺꦲꦶ ꦥꦫꦴꦗꦶꦠꦴꦠꦶ ꦄꦠ꧀ꦠꦴꦤꦁ ꦮꦢꦴꦥꦺꦱ꧀ꦱꦴꦩꦴ’’ꦠꦶ ꦢꦶꦧ꧀ꦧꦕꦏ꧀ꦑꦸꦤꦴ ꦎꦭꦺꦴꦏꦺꦠ꧀ꦮꦴ ꦌꦏꦁ ꦕꦏ꧀ꦏꦮꦠ꧀ꦠꦶꦥꦫꦶꦨꦺꦴꦒꦁ ꦫꦡꦥꦚ꧀ꦗꦫꦁ ꦢꦶꦱ꧀ꦮꦴ ꦄꦴꦲꦫꦶꦠ꧀ꦮꦴ ꦫꦚ꧀ꦚꦺꦴ ꦭꦚ꧀ꦗꦁ ꦢꦠ꧀ꦮꦴ ‘‘ꦩꦲꦴꦫꦴꦗ, ꦄꦩ꧀ꦲꦺꦥꦶ ꦱꦴꦩꦶꦏꦺ ꦏꦫꦺꦴꦲꦷ’’ꦠꦶ ꦄꦴꦲꦁꦱꦸ.

ꦫꦴꦗꦴ ꦭꦚ꧀ꦗꦁ ꦒꦲꦺꦠ꧀ꦮꦴ ‘‘ꦢ꧀ꦮꦺꦥꦶ ꦒꦟꦴ ꦮꦱꦤ꧀ꦠꦹ’’ꦠꦶ ꦢ꧀ꦮꦺꦥꦶ ꦱꦴꦩꦶꦏꦺ ꦄꦏꦴꦱꦶ. ꦆꦠꦫꦺ ꦆꦱꦪꦺꦴ ꦠꦱ꧀ꦱ ꦫꦡꦥꦚ꧀ꦗꦫꦱ꧀ꦱ ꦫꦡꦕꦏ꧀ꦏꦴꦤꦶ ꦤꦷꦲꦫꦶꦠ꧀ꦮꦴ ꦭꦚ꧀ꦗꦁ ꦢꦠ꧀ꦮꦴ ‘‘ꦩꦲꦴꦫꦴꦗ, ꦄꦩ꧀ꦲꦺꦪꦺꦮ ꦱꦴꦩꦶꦏꦺ ꦏꦫꦺꦴꦲꦷ’’ꦠꦶ ꦄꦴꦲꦁꦱꦸ. ꦫꦴꦗꦴ ꦠꦡꦴ ꦄꦏꦴꦱꦶ. ꦆꦱꦶꦒꦟꦴ ‘‘ꦄꦩ꧀ꦲꦺꦲꦶ ꦮꦠ꧀ꦡꦸꦏꦴꦩꦺ ꦕ ꦏꦶꦭꦺꦱꦏꦴꦩꦺ ꦕ ꦥꦲꦴꦪ ꦥꦧ꧀ꦧꦗꦶꦠꦺꦲꦶ ꦫꦸꦏ꧀ꦑꦩꦹꦭꦱ꧀ꦱ ꦏꦴꦫꦟꦴ ꦏꦭꦲꦁ ꦏꦫꦺꦴꦤ꧀ꦠꦺꦲꦶ ꦭꦚ꧀ꦗꦁ ꦢꦢꦤ꧀ꦠꦺꦲꦶ ꦄꦪꦸꦠ꧀ꦠꦁ ꦏꦠ’’ꦤ꧀ꦠꦶ ꦮꦶꦥ꧀ꦥꦛꦶꦱꦴꦫꦶꦤꦺꦴ ꦲꦸꦠ꧀ꦮꦴ ꦮꦺꦒꦺꦤ ꦥꦭꦴꦪꦶꦠ꧀ꦮꦴ ꦲꦶꦩꦮꦤ꧀ꦠꦩꦺꦮ ꦄꦒꦩꦁꦱꦸ. ꦱꦏꦭꦨꦫꦸꦫꦛ꧀ꦜꦮꦴꦱꦶꦤꦺꦴ ꦢꦺꦮꦠꦴ ꦌꦏꦠꦺꦴ ꦲꦸꦠ꧀ꦮꦴ ‘‘ꦱꦷꦭꦮꦤ꧀ꦠꦺ ꦏꦭꦲꦁ ꦏꦫꦺꦴꦤ꧀ꦠꦺꦤ ꦫꦚ꧀ꦚꦴ ꦄꦪꦸꦠ꧀ꦠꦁ ꦏꦠ’’ꦤ꧀ꦠꦶ ꦨꦫꦸꦫꦚ꧀ꦚꦺꦴ ꦏꦸꦗ꧀ꦙꦶꦠ꧀ꦮꦴ ꦠꦶꦪꦺꦴꦗꦤꦱꦠꦶꦏꦁ ꦨꦫꦸꦫꦛ꧀ꦜꦁ ꦱꦩꦸꦢ꧀ꦢꦁ ꦈꦧ꧀ꦧꦠ꧀ꦠꦺꦠ꧀ꦮꦴ ꦄꦫꦛ꧀ꦜꦩꦏꦁꦱꦸ. ꦆꦠꦶ ꦌꦏꦁ ꦨꦫꦸꦫꦴꦗꦴꦤꦁ ꦤꦶꦱ꧀ꦱꦴꦪ ꦱꦏꦭꦫꦛ꧀ꦜꦮꦴꦱꦶꦤꦺꦴꦥꦶ ꦮꦶꦤꦴꦱꦁ ꦥꦠ꧀ꦠꦴꦠꦶ.

ꦱꦠ꧀ꦡꦴ ꦆꦩꦁ ꦄꦠꦷꦠꦁ ꦄꦴꦲꦫꦶꦠ꧀ꦮꦴ ꦄꦨꦶꦱꦩ꧀ꦧꦸꦢ꧀ꦣꦺꦴ ꦲꦸꦠ꧀ꦮꦴ ꦆꦩꦴ ꦒꦴꦡꦴ ꦄꦮꦺꦴꦕ –

꧑꧒꧕. ‘‘ꦆꦱꦷꦤꦩꦤ꧀ꦠꦫꦁ ꦏꦠ꧀ꦮꦴ, ꦨꦫꦸꦫꦴꦗꦴꦠꦶ ꦩꦺ ꦱꦸꦠꦁ;

ꦈꦕ꧀ꦖꦶꦤ꧀ꦤꦺꦴ ꦱꦲ ꦫꦛ꧀ꦜꦺꦲꦶ, ꦱ ꦫꦴꦗꦴ ꦮꦶꦨꦮꦔ꧀ꦒꦠꦺꦴ.

꧑꧒꧖. ‘‘ꦠꦱ꧀ꦩꦴ ꦲꦶ ꦖꦤ꧀ꦢꦴꦒꦩꦤꦁ, ꦤꦥ꧀ꦥꦱꦁꦱꦤ꧀ꦠꦶ ꦥꦟ꧀ꦝꦶꦠꦴ;

ꦄꦢꦸꦛ꧀ꦜꦕꦶꦠ꧀ꦠꦺꦴ ꦨꦴꦱꦺꦪ꧀ꦪ, ꦒꦶꦫꦁ ꦱꦕ꧀ꦕꦸꦥꦱꦁꦲꦶꦠ’’ꦤ꧀ꦠꦶ.

ꦠꦠ꧀ꦡ ꦄꦤ꧀ꦠꦫꦁ ꦏꦠ꧀ꦮꦴꦠꦶ ꦖꦤ꧀ꦢꦴꦒꦠꦶꦮꦱꦺꦤ ꦮꦶꦮꦫꦁ ꦏꦠ꧀ꦮꦴ. ꦨꦫꦸꦫꦴꦗꦴꦠꦶ ꦨꦫꦸꦫꦛ꧀ꦜꦺ ꦫꦴꦗꦴ. ꦆꦠꦶ ꦩꦺ ꦱꦸꦠꦤ꧀ꦠꦶ ꦆꦠꦶ ꦩꦪꦴ ꦥꦸꦧ꧀ꦧꦺ ꦌꦠꦁ ꦱꦸꦠꦁ. ꦠꦱ꧀ꦩꦴ ꦲꦶ ꦖꦤ꧀ꦢꦴꦒꦩꦤꦤ꧀ꦠꦶ ꦪꦱ꧀ꦩꦴ ꦲꦶ ꦖꦤ꧀ꦢꦴꦒꦩꦤꦁ ꦒꦤ꧀ꦠ꧀ꦮꦴ ꦨꦫꦸꦫꦴꦗꦴ ꦱꦲ ꦫꦛ꧀ꦜꦺꦤ ꦈꦕ꧀ꦖꦶꦤ꧀ꦤꦺꦴ, ꦠꦱ꧀ꦩꦴ ꦖꦤ꧀ꦢꦴꦒꦩꦤꦁ ꦥꦟ꧀ꦝꦶꦠꦴ ꦤꦥ꧀ꦥꦱꦁꦱꦤ꧀ꦠꦶ. ꦄꦢꦸꦛ꧀ꦜꦕꦶꦠ꧀ꦠꦺꦴꦠꦶ ꦏꦶꦭꦺꦱꦺꦲꦶ ꦄꦢꦹꦱꦶꦠꦕꦶꦠ꧀ꦠꦺꦴ ꦲꦸꦠ꧀ꦮꦴ. ꦨꦴꦱꦺꦪ꧀ꦪ ꦒꦶꦫꦁ ꦱꦕ꧀ꦕꦸꦥꦱꦁꦲꦶꦠꦤ꧀ꦠꦶ ꦱꦨꦴꦮꦤꦶꦱ꧀ꦱꦶꦠꦁ ꦄꦠ꧀ꦡꦤꦶꦱ꧀ꦱꦶꦠꦁ ꦏꦴꦫꦟꦤꦶꦱ꧀ꦱꦶꦠꦩꦺꦮ ꦒꦶꦫꦁ ꦨꦴꦱꦺꦪ꧀ꦪ. ꦪꦺ ꦲꦶ ꦠꦠ꧀ꦡ ꦨꦫꦸꦫꦚ꧀ꦚꦺꦴ ꦭꦚ꧀ꦗꦁ ꦒꦟ꧀ꦲꦤ꧀ꦠꦱ꧀ꦱ ꦄꦪꦸꦠ꧀ꦠꦁ ꦌꦠꦤ꧀ꦠꦶ ꦥꦛꦶꦏ꧀ꦏꦺꦴꦱꦤ꧀ꦠꦴ ꦱꦕ꧀ꦕꦸꦥꦱꦁꦲꦶꦠꦁ ꦒꦶꦫꦁ ꦨꦴꦱꦶꦁꦱꦸ, ꦠꦺꦱꦁ ꦜꦶꦠꦛ꧀ꦜꦴꦤꦁ ꦤꦴꦭ꦳ꦶꦏꦺꦫꦢꦷꦥꦺ ꦄꦗ꧀ꦗꦴꦥꦶ ꦢꦷꦥꦏꦱꦲꦱ꧀ꦱꦁ ꦥꦚ꧀ꦚꦴꦪꦠꦷꦠꦶ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ‘‘ꦩꦲꦴꦫꦴꦗ, ꦖꦤ꧀ꦢꦮꦱꦶꦏꦺꦤ ꦤꦴꦩ ꦤ ꦨꦮꦶꦠꦧ꧀ꦧꦁ, ꦢ꧀ꦮꦺ ꦥꦧ꧀ꦧꦗꦶꦠꦒꦟꦺ ꦏꦭꦲꦁ ꦏꦴꦫꦺꦠꦸꦁ ꦤ ꦮꦛ꧀ꦛꦠꦷ’’ꦠꦶ ꦮꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ – ‘‘ꦄꦲꦁ ꦠꦺꦤ ꦱꦩꦪꦺꦤ ꦗꦺꦛ꧀ꦜꦏꦆꦱꦶ ꦄꦲꦺꦴꦱꦶ’’ꦤ꧀ꦠꦶ, ꦫꦴꦗꦴ ꦠꦡꦴꦒꦠꦱ꧀ꦱ ꦨꦠ꧀ꦠꦏꦶꦕ꧀ꦕꦁ ꦏꦠ꧀ꦮꦴ ꦒꦠꦏꦴꦭꦺ ꦩꦤꦸꦱ꧀ꦱꦺ ꦥꦺꦱꦺꦠ꧀ꦮꦴ ꦠꦶꦠ꧀ꦡꦶꦪꦴꦫꦴꦩꦁ ꦮꦶꦢ꧀ꦣꦁꦱꦴꦥꦺꦱꦶ, ꦠꦶꦠ꧀ꦡꦶꦪꦴ ꦄꦥ꧀ꦥꦠꦶꦛ꧀ꦜꦴ ꦄꦲꦺꦱꦸꦁ.

ꦨꦫꦸꦗꦴꦠꦏꦮꦟ꧀ꦟꦤꦴ ꦠꦠꦶꦪꦴ.

[꧒꧑꧔] ꧔. ꦥꦸꦟ꧀ꦟꦤꦢꦷꦗꦴꦠꦏꦮꦟ꧀ꦟꦤꦴ

ꦥꦸꦟ꧀ꦟꦁ ꦤꦢꦶꦤ꧀ꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦥꦚ꧀ꦚꦴꦥꦴꦫꦩꦶꦁ ꦄꦴꦫꦧ꧀ꦨ ꦏꦡꦺꦱꦶ. ꦌꦏꦱ꧀ꦩꦶꦚ꧀ꦲꦶ ꦢꦶꦮꦱꦺ ꦣꦩ꧀ꦩꦱꦨꦴꦪꦁ ꦨꦶꦏ꧀ꦑꦹ ꦠꦡꦴꦒꦠꦱ꧀ꦱ ꦥꦚ꧀ꦚꦁ ꦄꦴꦫꦧ꧀ꦨ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ – ‘‘ꦄꦴꦮꦸꦱꦺꦴ, ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦩꦲꦴꦥꦚ꧀ꦚꦺꦴ ꦥꦸꦡꦸꦥꦚ꧀ꦚꦺꦴ ꦲꦴꦱꦥꦚ꧀ꦚꦺꦴ ꦗꦮꦤꦥꦚ꧀ꦚꦺꦴ ꦠꦶꦏ꧀ꦑꦥꦚ꧀ꦚꦺꦴ ꦒꦩ꧀ꦨꦷꦫꦥꦚ꧀ꦚꦺꦴ ꦤꦶꦧ꧀ꦧꦺꦣꦶꦏꦥꦚ꧀ꦚꦺꦴ ꦈꦥꦴꦪꦥꦚ꧀ꦚꦴꦪ ꦱꦩꦤ꧀ꦤꦴꦒꦠꦺꦴ’’ꦠꦶ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ ‘‘ꦤ, ꦨꦶꦏ꧀ꦑꦮꦺ, ꦆꦢꦴꦤꦺꦮ, ꦥꦸꦧ꧀ꦧꦺꦥꦶ ꦠꦡꦴꦒꦠꦺꦴ ꦥꦚ꧀ꦚꦮꦴ ꦈꦥꦴꦪꦏꦸꦱꦭꦺꦴꦪꦺꦮꦴ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦧꦺꦴꦣꦶꦱꦠ꧀ꦠꦺꦴ ꦥꦸꦫꦺꦴꦲꦶꦠꦏꦸꦭꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦪꦥ꧀ꦥꦠ꧀ꦠꦺꦴ ꦠꦏ꧀ꦏꦱꦶꦭꦴꦪꦁ ꦱꦧ꧀ꦧꦱꦶꦥ꧀ꦥꦴꦤꦶ ꦈꦒ꧀ꦒꦟ꧀ꦲꦶꦠ꧀ꦮꦴ ꦥꦶꦠꦸ ꦄꦕ꧀ꦕꦪꦺꦤ ꦥꦸꦫꦺꦴꦲꦶꦠꦛ꧀ꦜꦴꦤꦁ ꦭꦨꦶꦠ꧀ꦮꦴ ꦧꦴꦫꦴꦟꦱꦶꦫꦚ꧀ꦚꦺꦴ ꦄꦠ꧀ꦡꦣꦩ꧀ꦩꦴꦤꦸꦱꦴꦱꦏꦺꦴ ꦄꦲꦺꦴꦱꦶ. ꦄꦥꦫꦨꦴꦒꦺ ꦫꦴꦗꦴ ꦥꦫꦶꦨꦺꦢꦏꦴꦤꦁ ꦏꦡꦁ ꦒꦲꦺꦠ꧀ꦮꦴ ꦧꦺꦴꦣꦶꦱꦠ꧀ꦠꦱ꧀ꦱ ꦏꦸꦢ꧀ꦣꦺꦴ ‘‘ꦩꦴ ꦩꦩ ꦱꦤ꧀ꦠꦶꦏꦺ ꦮꦱꦷ’’ꦠꦶ ꦧꦺꦴꦣꦶꦱꦠ꧀ꦠꦁ ꦧꦴꦫꦴꦟꦱꦶꦠꦺꦴ ꦥꦧ꧀ꦧꦴꦗꦺꦱꦶ. ꦧꦺꦴꦣꦶꦱꦠ꧀ꦠꦺꦴ ꦥꦸꦠ꧀ꦠꦢꦴꦫꦁ ꦒꦲꦺꦠ꧀ꦮꦴ ꦌꦏꦱ꧀ꦩꦶꦁ ꦏꦴꦱꦶꦏꦒꦴꦩꦏꦺ ꦮꦴꦱꦁ ꦏꦥ꧀ꦥꦺꦱꦶ. ꦄꦥꦫꦨꦴꦒꦺ ꦫꦴꦗꦴ ꦠꦱ꧀ꦱ ꦒꦸꦟꦁ ꦱꦫꦶꦠ꧀ꦮꦴ ‘‘ꦩꦪ꧀ꦲꦁ ꦏꦚ꧀ꦕꦶ ꦥꦺꦱꦺꦠ꧀ꦮꦴ ꦄꦴꦕꦫꦶꦪꦁ ꦥꦏ꧀ꦏꦺꦴꦱꦶꦠꦸꦁ ꦤ ꦪꦸꦠ꧀ꦠꦁ, ꦌꦏꦁ ꦥꦤ ꦒꦴꦡꦁ ꦧꦤ꧀ꦣꦶꦠ꧀ꦮꦴ ꦥꦟ꧀ꦟꦁ ꦭꦶꦑꦶꦠ꧀ꦮꦴ ꦏꦴꦏꦩꦁꦱꦁ ꦥꦕꦴꦥꦺꦠ꧀ꦮꦴ ꦥꦟ꧀ꦟꦚ꧀ꦕ ꦩꦁꦱꦚ꧀ꦕ ꦱꦺꦠꦮꦠ꧀ꦡꦺꦤ ꦥꦭꦶꦮꦺꦜꦺꦠ꧀ꦮꦴ ꦫꦴꦗꦩꦸꦢ꧀ꦢꦶꦏꦴꦪ ꦭꦚ꧀ꦖꦺꦠ꧀ꦮꦴ ꦥꦺꦱꦺꦱ꧀ꦱꦴꦩꦶ. ꦪꦢꦶ ꦥꦟ꧀ꦝꦶꦠꦺꦴ ꦨꦮꦶꦱ꧀ꦱꦠꦶ, ꦥꦟ꧀ꦟꦁ ꦮꦴꦕꦺꦠ꧀ꦮꦴ ꦏꦴꦏꦩꦁꦱꦨꦴꦮꦁ ꦚꦠ꧀ꦮꦴ ꦄꦴꦒꦩꦶꦱ꧀ꦱꦠꦶ, ꦤꦺꦴ ꦕꦺ, ꦤꦴꦒꦩꦶꦱ꧀ꦱꦠꦷ’’ꦠꦶ ‘‘ꦥꦸꦟ꧀ꦟꦁ ꦤꦢꦶ’’ꦤ꧀ꦠꦶ ꦆꦩꦁ ꦒꦴꦡꦁ ꦥꦟ꧀ꦟꦺ ꦭꦶꦑꦶ –

꧑꧒꧗. ‘‘ꦥꦸꦟ꧀ꦟꦁ ꦤꦢꦶꦁ ꦪꦺꦤ ꦕ ꦥꦺꦪ꧀ꦪꦩꦴꦲꦸ, ꦗꦴꦠꦁ ꦪꦮꦁ ꦪꦺꦤ ꦕ ꦒꦸꦪ꧀ꦲꦩꦴꦲꦸ;

ꦢꦹꦫꦁ ꦒꦠꦁ ꦪꦺꦤ ꦕ ꦄꦮ꧀ꦲꦪꦤ꧀ꦠꦶ, ꦱꦺꦴ ꦠ꧀ꦪꦴꦒꦠꦺꦴ ꦲꦤ꧀ꦢ ꦕ ꦨꦸꦚ꧀ꦗ ꦧ꧀ꦫꦴꦲ꧀ꦩꦟꦴ’’ꦠꦶ.

ꦠꦠ꧀ꦡ ꦥꦸꦟ꧀ꦟꦁ ꦤꦢꦶꦁ ꦪꦺꦤ ꦕ ꦥꦺꦪ꧀ꦪꦩꦴꦲꦹꦠꦶ ꦏꦴꦏꦥꦺꦪ꧀ꦪꦴ ꦤꦢꦷꦲꦶ ꦮꦢꦤ꧀ꦠꦴ ꦪꦺꦤ ꦥꦸꦟ꧀ꦟꦁ ꦤꦢꦶꦁ ꦏꦴꦏꦥꦺꦪ꧀ꦪꦩꦴꦲꦸ, ꦤ ꦲꦶ ꦄꦥꦸꦟ꧀ꦟꦴ ꦤꦢꦷ ‘‘ꦏꦴꦏꦥꦺꦪ꧀ꦪꦴ’’ꦠꦶ ꦮꦸꦕ꧀ꦕꦠꦶ. ꦪꦢꦴꦥꦶ ꦤꦢꦷꦠꦷꦫꦺ ꦜꦠ꧀ꦮꦴ ꦒꦷꦮꦁ ꦥꦱꦴꦫꦺꦠ꧀ꦮꦴ ꦏꦴꦏꦺꦤ ꦥꦴꦠꦸꦁ ꦱꦏ꧀ꦏꦴ ꦲꦺꦴꦠꦶ, ꦠꦢꦴ ꦤꦁ ‘‘ꦏꦴꦏꦥꦺꦪ꧀ꦪꦴ’’ꦠꦶ ꦮꦢꦤ꧀ꦠꦶ. ꦗꦴꦠꦁ ꦪꦮꦁ ꦪꦺꦤ ꦕ ꦒꦸꦪ꧀ꦲꦩꦴꦲꦹꦠꦶ ꦪꦮꦤ꧀ꦠꦶ ꦢꦺꦱꦤꦴꦱꦷꦱꦩꦠ꧀ꦠꦁ, ꦆꦣ ꦥꦤ ꦱꦧ꧀ꦧꦩ꧀ꦥꦶ ꦗꦴꦠꦁ ꦈꦒ꧀ꦒꦠꦁ ꦱꦩ꧀ꦥꦤ꧀ꦤꦠꦫꦸꦟꦱꦱ꧀ꦱꦁ ꦄꦣꦶꦥ꧀ꦥꦺꦠꦁ. ꦠꦚ꧀ꦲꦶ ꦪꦢꦴ ꦄꦤ꧀ꦠꦺꦴ ꦥꦮꦶꦛ꧀ꦜꦏꦴꦏꦁ ꦥꦛꦶꦕ꧀ꦖꦴꦢꦺꦠꦸꦁ ꦱꦏ꧀ꦏꦺꦴꦠꦶ, ꦠꦢꦴ ꦒꦸꦪ꧀ꦲꦠꦷꦠꦶ ꦒꦸꦪ꧀ꦲꦁ. ꦏꦶꦁ ꦒꦸꦪ꧀ꦲꦠꦶ? ꦏꦴꦏꦁ. ꦆꦠꦶ ꦏꦴꦏꦱ꧀ꦱ ꦒꦸꦪ꧀ꦲꦁ ꦏꦴꦏꦒꦸꦪ꧀ꦲꦤ꧀ꦠꦶ ꦠꦁ ꦮꦢꦩꦴꦤꦴ ꦏꦴꦏꦺꦤ ꦒꦸꦪ꧀ꦲꦮꦕꦤꦱ꧀ꦱ ꦏꦴꦫꦟꦨꦹꦠꦺꦤ ‘‘ꦒꦸꦪ꧀ꦲ’’ꦤ꧀ꦠꦶ ꦮꦢꦤ꧀ꦠꦶ. ꦠꦺꦤ ꦮꦸꦠ꧀ꦠꦁ ‘‘ꦪꦺꦤ ꦕ ꦒꦸꦪ꧀ꦲꦩꦴꦲꦹ’’ꦠꦶ. ꦢꦹꦫꦁ ꦒꦠꦁ ꦪꦺꦤ ꦕ ꦄꦮ꧀ꦲꦪꦤ꧀ꦠꦷꦠꦶ ꦢꦹꦫꦁ ꦒꦠꦁ ꦮꦶꦥ꧀ꦥꦮꦸꦠ꧀ꦡꦁ ꦥꦶꦪꦥꦸꦒ꧀ꦒꦭꦁ ꦪꦁ ꦄꦴꦒꦤ꧀ꦠ꧀ꦮꦴ ꦤꦶꦱꦶꦤ꧀ꦤꦁ ꦢꦶꦱ꧀ꦮꦴ ꦱꦕꦺ ꦆꦠ꧀ꦡꦤ꧀ꦤꦴꦩꦺꦴ ꦄꦴꦒꦕ꧀ꦖꦠꦶ, ꦮꦱ꧀ꦱ ꦏꦴꦏꦴꦠꦶ ꦮꦴ ꦮꦱ꧀ꦱꦤ꧀ꦠꦚ꧀ꦚꦺꦮ ꦮꦴ ꦱꦸꦠ꧀ꦮꦴ ‘‘ꦪꦡꦴ ꦏꦴꦏꦺꦴ ꦮꦱ꧀ꦱꦠꦶ, ꦆꦠ꧀ꦡꦤ꧀ꦤꦴꦩꦺꦴ ꦄꦴꦒꦩꦶꦱ꧀ꦱꦠꦷ’’ꦠꦶ ꦌꦮꦁ ꦮꦢꦤ꧀ꦠꦴ ꦪꦺꦤ ꦕ ꦄꦮ꧀ꦲꦪꦤ꧀ꦠꦶ ꦏꦡꦺꦤ꧀ꦠꦶ ꦩꦤ꧀ꦠꦺꦤ꧀ꦠꦶ, ꦈꦢꦴꦲꦫꦤ꧀ꦠꦷꦠꦶ ꦄꦠ꧀ꦡꦺꦴ. ꦱꦺꦴ ꦠ꧀ꦪꦴꦒꦠꦺꦴꦠꦶ ꦱꦺꦴ ꦠꦺ ꦄꦴꦤꦷꦠꦺꦴ. ꦲꦤ꧀ꦢ ꦕ ꦨꦸꦚ꧀ꦗ, ꦧ꧀ꦫꦴꦲ꧀ꦩꦟꦴꦠꦶ ꦒꦟ꧀ꦲ, ꦧ꧀ꦫꦴꦲ꧀ꦩꦟ, ꦨꦸꦚ꧀ꦗꦱ꧀ꦱꦸ ꦤꦁ, ꦑꦴꦢ ꦆꦢꦁ ꦏꦴꦏꦩꦁꦱꦤ꧀ꦠꦶ ꦄꦠ꧀ꦡꦺꦴ.

ꦆꦠꦶ ꦫꦴꦗꦴ ꦆꦩꦁ ꦒꦴꦡꦁ ꦥꦟ꧀ꦟꦺ ꦭꦶꦑꦶꦠ꧀ꦮꦴ ꦧꦺꦴꦣꦶꦱꦠ꧀ꦠꦱ꧀ꦱ ꦥꦺꦱꦺꦱꦶ. ꦱꦺꦴ ꦥꦟ꧀ꦟꦁ ꦮꦴꦕꦺꦠ꧀ꦮꦴ ‘‘ꦫꦴꦗꦴ ꦩꦁ ꦢꦛ꧀ꦜꦸꦏꦴꦩꦺꦴ’’ꦠꦶ ꦚꦠ꧀ꦮꦴ ꦢꦸꦠꦶꦪꦁ ꦒꦴꦡꦩꦴꦲ –

꧑꧒꧘. ‘‘ꦪꦠꦺꦴ ꦩꦁ ꦱꦫꦠꦷ ꦫꦴꦗꦴ, ꦮꦴꦪꦱꦩ꧀ꦥꦶ ꦥꦲꦺꦠꦮꦺ;

ꦲꦁꦱꦴ ꦏꦺꦴꦚ꧀ꦕꦴ ꦩꦪꦹꦫꦴ ꦕ, ꦄꦱꦠꦷꦪꦺꦮ ꦥꦴꦥꦶꦪꦴ’’ꦠꦶ.

ꦠꦠ꧀ꦡ ꦪꦠꦺꦴ ꦩꦁ ꦱꦫꦠꦷ ꦫꦴꦗꦴ, ꦮꦴꦪꦱꦩ꧀ꦥꦶ ꦥꦲꦺꦠꦮꦺꦠꦶ ꦪꦢꦴ ꦫꦴꦗꦴ ꦮꦴꦪꦱꦩꦁꦱꦁ ꦭꦨꦶꦠ꧀ꦮꦴ ꦠꦩ꧀ꦥꦶ ꦥꦲꦺꦠꦸꦁ ꦩꦁ ꦱꦫꦠꦶ. ꦲꦁꦱꦴ ꦏꦺꦴꦚ꧀ꦕꦴ ꦩꦪꦹꦫꦴ ꦕꦴꦠꦶ ꦪꦢꦴ ꦥꦤꦱ꧀ꦱ ꦌꦠꦺ ꦲꦁꦱꦴꦢꦪꦺꦴ ꦈꦥꦤꦷꦠꦴ ꦨꦮꦶꦱ꧀ꦱꦤ꧀ꦠꦶ, ꦌꦏꦴꦤꦶ ꦲꦁꦱꦩꦁꦱꦴꦢꦷꦤꦶ ꦭꦕ꧀ꦖꦠꦶ, ꦠꦢꦴ ꦩꦁ ꦏꦱ꧀ꦩꦴ ꦤ ꦱꦫꦶꦱ꧀ꦱꦠꦷꦠꦶ ꦄꦠ꧀ꦡꦺꦴ? ꦄꦛ꧀ꦜꦏꦡꦴꦪꦁ ꦥꦤ ‘‘ꦲꦁꦱꦏꦺꦴꦚ꧀ꦕꦩꦪꦹꦫꦴꦤ’’ꦤ꧀ꦠꦶ ꦥꦴꦜꦺꦴ. ꦱꦺꦴ ꦱꦸꦤ꧀ꦢꦫꦠꦫꦴ, ꦆꦩꦺꦱꦁ ꦲꦁꦱꦴꦢꦷꦤꦁ ꦩꦁꦱꦁ ꦭꦨꦶꦠ꧀ꦮꦴ ꦏꦱ꧀ꦩꦴ ꦩꦁ ꦤ ꦱꦫꦶꦱ꧀ꦱꦠꦶ, ꦱꦫꦶꦱ꧀ꦱꦠꦶꦪꦺꦮꦴꦠꦶ ꦄꦠ꧀ꦡꦺꦴ. ꦄꦱꦠꦷꦪꦺꦮ ꦥꦴꦥꦶꦪꦴꦠꦶ ꦪꦁ ꦮꦴ ꦠꦁ ꦮꦴ ꦭꦨꦶꦠ꧀ꦮꦴ ꦱꦫꦟꦁ ꦤꦴꦩ ꦱꦸꦤ꧀ꦢꦫꦁ, ꦭꦺꦴꦏꦱ꧀ꦩꦶꦁ ꦥꦤ ꦄꦱꦠꦶꦪꦺꦮ ꦥꦴꦥꦶꦪꦴ, ꦄꦱꦠꦶꦏꦫꦟꦁꦪꦺꦮ ꦲꦷꦤꦁ ꦭꦴꦩꦏꦁ, ꦠꦚ꧀ꦕ ꦄꦩ꧀ꦲꦴꦏꦁ ꦫꦚ꧀ꦚꦺꦴ ꦤꦠ꧀ꦡꦶ. ꦱꦫꦠꦶ ꦩꦁ ꦫꦴꦗꦴ, ꦄꦴꦒꦩꦤꦁ ꦩꦺ ꦥꦕ꧀ꦕꦴꦱꦷꦱꦠꦶ, ꦠꦱ꧀ꦩꦴ ꦒꦩꦶꦱ꧀ꦱꦴꦩꦷꦠꦶ ꦪꦴꦤꦁ ꦪꦺꦴꦗꦴꦥꦺꦠ꧀ꦮꦴ ꦒꦤ꧀ꦠ꧀ꦮꦴ ꦫꦴꦗꦴꦤꦁ ꦥꦱ꧀ꦱꦶ, ꦫꦴꦗꦴ ꦠꦸꦱ꧀ꦱꦶꦠ꧀ꦮꦴ ꦥꦸꦫꦺꦴꦲꦶꦠꦛ꧀ꦜꦴꦤꦺꦪꦺꦮ ꦥꦠꦶꦛ꧀ꦜꦴꦥꦺꦱꦶ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ – ‘‘ꦠꦢꦴ ꦫꦴꦗꦴ ꦄꦴꦤꦤ꧀ꦢꦺꦴ ꦄꦲꦺꦴꦱꦶ, ꦥꦸꦫꦺꦴꦲꦶꦠꦺꦴ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦥꦸꦟ꧀ꦟꦤꦢꦷꦗꦴꦠꦏꦮꦟ꧀ꦟꦤꦴ ꦕꦠꦸꦠ꧀ꦡꦴ.

[꧒꧑꧕] ꧕. ꦏꦕ꧀ꦖꦥꦗꦴꦠꦏꦮꦟ꧀ꦟꦤꦴ

ꦄꦮꦣꦷ ꦮꦠ ꦄꦠ꧀ꦠꦴꦤꦤ꧀ꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦏꦺꦴꦏꦴꦭꦶꦏꦁ ꦄꦴꦫꦧ꧀ꦨ ꦏꦡꦺꦱꦶ. ꦮꦠ꧀ꦡꦸ ꦩꦲꦴꦠꦏ꧀ꦏꦴꦫꦶꦗꦴꦠꦏꦺ (ꦗꦴ. ꧑.꧑꧓.꧑꧐꧔ ꦄꦴꦢꦪꦺꦴ) ꦄꦴꦮꦶ-ꦨꦮꦶꦱ꧀ꦱꦠꦶ. ꦠꦢꦴ ꦥꦤ ꦱꦠ꧀ꦡꦴ ‘‘ꦤ, ꦨꦶꦏ꧀ꦑꦮꦺ, ꦏꦺꦴꦏꦴꦭꦶꦏꦺꦴ ꦆꦢꦴꦤꦺꦮ ꦮꦴꦕꦴꦪ ꦲꦠꦺꦴ, ꦥꦸꦧ꧀ꦧꦺꦥꦶ ꦮꦴꦕꦴꦪ ꦲꦠꦺꦴꦪꦺꦮꦴ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦧꦺꦴꦣꦶꦱꦠ꧀ꦠꦺꦴ ꦄꦩꦕ꧀ꦕꦏꦸꦭꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦪꦥ꧀ꦥꦠ꧀ꦠꦺꦴ ꦠꦱ꧀ꦱ ꦄꦠ꧀ꦡꦣꦩ꧀ꦩꦴꦤꦸꦱꦴꦱꦏꦺꦴ ꦄꦲꦺꦴꦱꦶ. ꦱꦺꦴ ꦥꦤ ꦫꦴꦗꦴ ꦧꦲꦸꦨꦴꦟꦷ ꦄꦲꦺꦴꦱꦶ, ꦠꦱ꧀ꦩꦶꦁ ꦏꦡꦺꦤ꧀ꦠꦺ ꦄꦚ꧀ꦚꦺꦱꦁ ꦮꦕꦤꦱ꧀ꦱ ꦎꦏꦴꦱꦺꦴ ꦤꦴꦩ ꦤꦠ꧀ꦡꦶ. ꦧꦺꦴꦣꦶꦱꦠ꧀ꦠꦺꦴ ꦠꦱ꧀ꦱ ꦠꦁ ꦧꦲꦸꦨꦴꦟꦶꦠꦁ ꦮꦴꦫꦺꦠꦸꦏꦴꦩꦺꦴ ꦌꦏꦁ ꦈꦥꦴꦪꦁ ꦈꦥꦣꦴꦫꦺꦤ꧀ꦠꦺꦴ ꦮꦶꦕꦫꦠꦶ. ꦠꦱ꧀ꦩꦶꦚ꧀ꦕ ꦏꦴꦭꦺ ꦲꦶꦩꦮꦤ꧀ꦠꦥꦢꦺꦱꦺ ꦌꦏꦱ꧀ꦩꦶꦁ ꦱꦫꦺ ꦏꦕ꧀ꦖꦥꦺꦴ ꦮꦱꦠꦶ, ꦢ꧀ꦮꦺ ꦲꦁꦱꦥꦺꦴꦠꦏꦴ ꦒꦺꦴꦕꦫꦴꦪ ꦕꦫꦤ꧀ꦠꦴ ꦠꦺꦤ ꦱꦢ꧀ꦣꦶꦁ ꦮꦶꦱ꧀ꦱꦴꦱꦁ ꦄꦏꦁꦱꦸ. ꦠꦺ ꦢꦭ꦳꧀ꦲꦮꦶꦱ꧀ꦱꦴꦱꦶꦏꦴ ꦲꦸꦠ꧀ꦮꦴ ꦌꦏꦢꦶꦮꦱꦁ ꦏꦕ꧀ꦖꦥꦁ ꦄꦴꦲꦁꦱꦸ – ‘‘ꦱꦩ꧀ꦩ ꦏꦕ꧀ꦖꦥ, ꦄꦩ꧀ꦲꦴꦏꦁ ꦲꦶꦩꦮꦤ꧀ꦠꦺ ꦕꦶꦠ꧀ꦠꦏꦹꦛꦥꦧ꧀ꦧꦠꦠꦭꦺ ꦏꦚ꧀ꦕꦤꦒꦸꦲꦴꦪꦁ ꦮꦱꦤꦛ꧀ꦜꦴꦤꦁ ꦫꦩꦟꦷꦪꦺꦴ ꦥꦢꦺꦱꦺꦴ, ꦒꦕ꧀ꦖꦱꦶ ꦄꦩ꧀ꦲꦴꦏꦁ ꦱꦢ꧀ꦣꦶ’’ꦤ꧀ꦠꦶ. ‘‘ꦄꦲꦁ ꦏꦶꦤ꧀ꦠꦶ ꦏꦠ꧀ꦮꦴ ꦒꦩꦶꦱ꧀ꦱꦴꦩꦷ’’ꦠꦶ? ‘‘ꦩꦪꦁ ꦠꦁ ꦒꦲꦺꦠ꧀ꦮꦴ ꦒꦩꦶꦱ꧀ꦱꦴꦩ, ꦱꦕꦺ ꦠ꧀ꦮꦁ ꦩꦸꦑꦁ ꦫꦏ꧀ꦑꦶꦠꦸꦁ ꦱꦏ꧀ꦑꦶꦱ꧀ꦱꦱꦶ, ꦏꦱ꧀ꦱꦕꦶ ꦏꦶꦚ꧀ꦕꦶ ꦤ ꦏꦡꦺꦱ꧀ꦱꦱꦷ’’ꦠꦶ. ‘‘ꦫꦏ꧀ꦑꦶꦱ꧀ꦱꦴꦩꦶ, ꦱꦴꦩꦶ, ꦒꦲꦺꦠ꧀ꦮꦴ ꦩꦁ ꦒꦕ꧀ꦖꦡꦴ’’ꦠꦶ. ꦠꦺ ‘‘ꦱꦴꦣꦹ’’ꦠꦶ ꦮꦠ꧀ꦮꦴ ꦌꦏꦁ ꦢꦟ꧀ꦝꦏꦁ ꦏꦕ꧀ꦖꦥꦺꦤ ꦝꦁꦱꦴꦥꦺꦠ꧀ꦮꦴ ꦱꦪꦁ ꦠꦱ꧀ꦱ ꦈꦨꦺꦴ ꦏꦺꦴꦛꦶꦪꦺꦴ ꦝꦁꦱꦶꦠ꧀ꦮꦴ ꦄꦴꦏꦴꦱꦁ ꦥꦏ꧀ꦑꦤ꧀ꦢꦶꦁꦱꦸ. ꦠꦁ ꦠꦡꦴ ꦲꦁꦱꦺꦲꦶ ꦤꦷꦪꦩꦴꦤꦁ ꦒꦴꦩꦢꦴꦫꦏꦴ ꦢꦶꦱ꧀ꦮꦴ ‘‘ꦢ꧀ꦮꦺ ꦲꦁꦱꦴ ꦏꦕ꧀ꦖꦥꦁ ꦢꦟ꧀ꦝꦏꦺꦤ ꦲꦫꦤ꧀ꦠꦷ’’ꦠꦶ ꦄꦴꦲꦁꦱꦸ.

ꦏꦕ꧀ꦖꦥꦺꦴ ‘‘ꦪꦢꦶ ꦩꦁ ꦱꦲꦴꦪꦏꦴ ꦤꦺꦤ꧀ꦠꦶ, ꦠꦸꦩ꧀ꦲꦴꦏꦁ ꦌꦠ꧀ꦡ ꦏꦶꦁ ꦢꦸꦛ꧀ꦜꦕꦺꦛꦏꦴ’’ꦠꦶ ꦮꦠ꧀ꦠꦸꦏꦴꦩꦺꦴ ꦲꦁꦱꦴꦤꦁ ꦱꦷꦓꦮꦺꦒꦠꦴꦪ ꦧꦴꦫꦴꦟꦱꦶꦤꦒꦫꦺ ꦫꦴꦗꦤꦶꦮꦺꦱꦤꦱ꧀ꦱ ꦈꦥꦫꦶꦨꦴꦒꦁ ꦱꦩ꧀ꦥꦠ꧀ꦠꦏꦴꦭꦺ ꦢꦛ꧀ꦜꦛ꧀ꦜꦴꦤꦠꦺꦴ ꦢꦟ꧀ꦝꦏꦁ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦄꦴꦏꦴꦱꦔ꧀ꦒꦟꦺ ꦥꦠꦶꦠ꧀ꦮꦴ ꦢ꧀ꦮꦺꦨꦴꦒꦺꦴ ꦄꦲꦺꦴꦱꦶ, ‘‘ꦏꦕ꧀ꦖꦥꦺꦴ ꦄꦴꦏꦴꦱꦠꦺꦴ ꦥꦠꦶꦠ꧀ꦮꦴ ꦢ꧀ꦮꦺꦣꦴ ꦨꦶꦤ꧀ꦤꦺꦴ’’ꦠꦶ ꦌꦏꦏꦺꦴꦭꦴꦲꦭꦁ ꦄꦲꦺꦴꦱꦶ. ꦫꦴꦗꦴ ꦧꦺꦴꦣꦶꦱꦠ꧀ꦠꦁ ꦄꦴꦢꦴꦪ ꦄꦩꦕ꧀ꦕꦒꦟꦥꦫꦶꦮꦸꦠꦺꦴ ꦠꦁ ꦜꦴꦤꦁ ꦒꦤ꧀ꦠ꧀ꦮꦴ ꦏꦕ꧀ꦖꦥꦁ ꦢꦶꦱ꧀ꦮꦴ ꦧꦺꦴꦣꦶꦱꦠ꧀ꦠꦁ ꦥꦸꦕ꧀ꦖꦶ – ‘‘ꦥꦟ꧀ꦝꦶꦠ, ꦏꦶꦤ꧀ꦠꦶ ꦏꦠ꧀ꦮꦴ ꦌꦱ ꦥꦠꦶꦠꦺꦴ’’ꦠꦶ? ꦧꦺꦴꦣꦶꦱꦠ꧀ꦠꦺꦴ ‘‘ꦕꦶꦫꦥꦛꦶꦏꦔ꧀ꦑꦺꦴꦲꦁ ꦫꦴꦗꦴꦤꦁ ꦎꦮꦢꦶꦠꦸꦏꦴꦩꦺꦴ ꦈꦥꦴꦪꦁ ꦈꦥꦣꦴꦫꦺꦤ꧀ꦠꦺꦴ ꦕꦫꦴꦩꦶ, ꦆꦩꦶꦤꦴ ꦏꦕ꧀ꦖꦥꦺꦤ ꦲꦁꦱꦺꦲꦶ ꦱꦢ꧀ꦣꦶꦁ ꦮꦶꦱ꧀ꦱꦴꦱꦺꦴ ꦏꦠꦺꦴ ꦨꦮꦶꦱ꧀ꦱꦠꦶ, ꦠꦺꦲꦶ ꦆꦩꦁ ‘ꦲꦶꦩꦮꦤ꧀ꦠꦁ ꦤꦺꦱ꧀ꦱꦴꦩꦴ'ꦠꦶ ꦢꦟ꧀ꦝꦏꦁ ꦝꦁꦱꦴꦥꦺꦠ꧀ꦮꦴ ꦄꦴꦏꦴꦱꦁ ꦥꦏ꧀ꦑꦤ꧀ꦠꦺꦲꦶ ꦨꦮꦶꦠꦧ꧀ꦧꦁ, ꦄꦡ ꦆꦩꦶꦤꦴ ꦏꦱ꧀ꦱꦕꦶ ꦮꦕꦤꦁ ꦱꦸꦠ꧀ꦮꦴ ꦄꦫꦏ꧀ꦑꦶꦠꦩꦸꦑꦠꦴꦪ ꦏꦶꦚ꧀ꦕꦶ ꦮꦠ꧀ꦠꦸꦏꦴꦩꦺꦤ ꦢꦟ꧀ꦝꦏꦴ ꦮꦶꦱ꧀ꦱꦛ꧀ꦜꦺꦴ ꦨꦮꦶꦱ꧀ꦱꦠꦶ, ꦌꦮꦁ ꦄꦴꦏꦴꦱꦠꦺꦴ ꦥꦠꦶꦠ꧀ꦮꦴ ꦗꦷꦮꦶꦠꦏ꧀ꦑꦪꦁ ꦥꦠ꧀ꦠꦺꦤꦺꦮ ꦨꦮꦶꦠꦧ꧀ꦧ’’ꦤ꧀ꦠꦶ ꦕꦶꦤ꧀ꦠꦺꦠ꧀ꦮꦴ ‘‘ꦄꦴꦩ ꦩꦲꦴꦫꦴꦗ, ꦄꦠꦶꦩꦸꦑꦫꦴ ꦤꦴꦩ ꦄꦥꦫꦶꦪꦤ꧀ꦠꦮꦕꦤꦴ ꦌꦮꦫꦹꦥꦁ ꦢꦸꦏ꧀ꦑꦁ ꦥꦴꦥꦸꦟꦤ꧀ꦠꦶꦪꦺꦮꦴ’’ꦠꦶ ꦮꦠ꧀ꦮꦴ ꦆꦩꦴ ꦒꦴꦡꦴ ꦄꦮꦺꦴꦕ –

꧑꧒꧙. ‘‘ꦄꦮꦣꦷ ꦮꦠ ꦄꦠ꧀ꦠꦴꦤꦁ, ꦏꦕ꧀ꦖꦥꦺꦴ ꦧ꧀ꦪꦴꦲꦫꦁ ꦒꦶꦫꦁ;

ꦱꦸꦒ꧀ꦒꦲꦷꦠꦱ꧀ꦩꦶꦁ ꦏꦛ꧀ꦜꦱ꧀ꦩꦶꦁ, ꦮꦴꦕꦴꦪ ꦱꦏꦶꦪꦴꦮꦣꦶ.

꧑꧓꧐. ‘‘ꦌꦠꦩ꧀ꦥꦶ ꦢꦶꦱ꧀ꦮꦴ ꦤꦫꦮꦷꦫꦶꦪꦱꦺꦛ꧀ꦜ, ꦮꦴꦕꦁ ꦥꦩꦸꦚ꧀ꦕꦺ ꦏꦸꦱꦭꦁ ꦤꦴꦠꦶꦮꦺꦭꦁ;

ꦥꦱ꧀ꦱꦱꦶ ꦧꦲꦸꦨꦴꦟꦺꦤ, ꦏꦕ꧀ꦖꦥꦁ ꦧ꧀ꦪꦱꦤꦁ ꦒꦠ’’ꦤ꧀ꦠꦶ.

ꦠꦠ꧀ꦡ ꦄꦮꦣꦷ ꦮꦠꦴꦠꦶ ꦓꦴꦠꦺꦱꦶ ꦮꦠ. ꦧ꧀ꦪꦴꦲꦫꦤ꧀ꦠꦶ ꦧ꧀ꦪꦴꦲꦫꦤ꧀ꦠꦺꦴ. ꦱꦸꦒ꧀ꦒꦲꦷꦠꦱ꧀ꦩꦶꦁ ꦏꦛ꧀ꦜꦱ꧀ꦩꦶꦤ꧀ꦠꦶ ꦩꦸꦑꦺꦤ ꦱꦸꦛ꧀ꦜꦸ ꦝꦁꦱꦶꦠ꧀ꦮꦴ ꦒꦲꦶꦠꦺ ꦢꦟ꧀ꦝꦏꦺ. ꦮꦴꦕꦴꦪ ꦱꦏꦶꦪꦴꦮꦣꦷꦠꦶ ꦄꦠꦶꦩꦸꦑꦫꦠꦴꦪ ꦄꦏꦴꦭꦺ ꦮꦴꦕꦁ ꦤꦶꦕ꧀ꦖꦴꦫꦺꦤ꧀ꦠꦺꦴ ꦢꦛ꧀ꦜꦛ꧀ꦜꦴꦤꦁ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦠꦴꦪ ꦱꦏꦴꦪ ꦮꦴꦕꦴꦪ ꦄꦠ꧀ꦠꦴꦤꦁ ꦄꦮꦣꦶ ꦓꦴꦠꦺꦱꦶ. ꦌꦮꦩꦺꦱ ꦗꦷꦮꦶꦠꦏ꧀ꦑꦪꦁ ꦥꦠ꧀ꦠꦺꦴ, ꦤ ꦄꦚ꧀ꦚꦡꦴꦠꦶ. ꦌꦠꦩ꧀ꦥꦶ ꦢꦶꦱ꧀ꦮꦴꦠꦶ ꦌꦠꦩ꧀ꦥꦶ ꦏꦴꦫꦟꦁ ꦢꦶꦱ꧀ꦮꦴ. ꦤꦫꦮꦷꦫꦶꦪꦱꦺꦛ꧀ꦜꦴꦠꦶ ꦤꦫꦺꦱꦸ ꦮꦷꦫꦶꦪꦺꦤ ꦱꦺꦛ꧀ꦜ ꦈꦠ꧀ꦠꦩꦮꦷꦫꦶꦪ ꦫꦴꦗꦮꦫ. ꦮꦴꦕꦁ ꦥꦩꦸꦚ꧀ꦕꦺ ꦏꦸꦱꦭꦁ ꦤꦴꦠꦶꦮꦺꦭꦤ꧀ꦠꦶ ꦱꦕ꧀ꦕꦴꦢꦶꦥꦛꦶꦱꦁꦪꦸꦠ꧀ꦠꦁ ꦏꦸꦱꦭꦩꦺꦮ ꦥꦟ꧀ꦝꦶꦠꦺꦴ ꦥꦸꦫꦶꦱꦺꦴ ꦩꦸꦚ꧀ꦕꦺꦪ꧀ꦪ ꦤꦶꦕ꧀ꦖꦴꦫꦺꦪ꧀ꦪ, ꦠꦩ꧀ꦥꦶ ꦲꦶꦠꦁ ꦏꦴꦭꦪꦸꦠ꧀ꦠꦁ, ꦤ ꦄꦠꦶꦮꦺꦭꦁ, ꦄꦠꦶꦏ꧀ꦏꦤ꧀ꦠꦏꦴꦭꦁ ꦄꦥꦫꦶꦪꦤ꧀ꦠꦮꦴꦕꦁ ꦤ ꦨꦴꦱꦺꦪ꧀ꦪ. ꦥꦱ꧀ꦱꦱꦷꦠꦶ ꦤꦤꦸ ꦥꦕ꧀ꦕꦏ꧀ꦑꦠꦺꦴ ꦥꦱ꧀ꦱꦱꦶ. ꦧꦲꦸꦨꦴꦟꦺꦤꦴꦠꦶ ꦧꦲꦸꦨꦟꦤꦺꦤ. ꦏꦕ꧀ꦖꦥꦁ ꦧ꧀ꦪꦱꦤꦁ ꦒꦠꦤ꧀ꦠꦶ ꦌꦠꦁ ꦏꦕ꧀ꦖꦥꦁ ꦗꦷꦮꦶꦠꦏ꧀ꦑꦪꦁ ꦥꦠ꧀ꦠꦤ꧀ꦠꦶ.

ꦫꦴꦗꦴ ‘‘ꦩꦁ ꦱꦤ꧀ꦣꦴꦪ ꦨꦴꦱꦠꦷ’’ꦠꦶ ꦚꦠ꧀ꦮꦴ ‘‘ꦄꦩ꧀ꦲꦺ ꦱꦤ꧀ꦣꦴꦪ ꦏꦡꦺꦱꦶ, ꦥꦟ꧀ꦝꦶꦠꦴ’’ꦠꦶ ꦄꦴꦲ. ꦧꦺꦴꦣꦶꦱꦠ꧀ꦠꦺꦴ ‘‘ꦩꦲꦴꦫꦴꦗ, ꦠ꧀ꦮꦁ ꦮꦴ ꦲꦺꦴꦲꦶ ꦄꦚ꧀ꦚꦺꦴ ꦮꦴ, ꦪꦺꦴ ꦏꦺꦴꦕꦶ ꦥꦩꦴꦟꦴꦠꦶꦏ꧀ꦏꦤ꧀ꦠꦁ ꦨꦴꦱꦤ꧀ꦠꦺꦴ ꦌꦮꦫꦹꦥꦁ ꦧ꧀ꦪꦱꦤꦁ ꦥꦴꦥꦸꦟꦴꦠꦷ’’ꦠꦶ ꦥꦴꦏꦛꦁ ꦏꦠ꧀ꦮꦴ ꦏꦡꦺꦱꦶ. ꦫꦴꦗꦴ ꦠꦠꦺꦴ ꦥꦛ꧀ꦜꦴꦪ ꦮꦶꦫꦩꦶꦠ꧀ꦮꦴ ꦩꦤ꧀ꦢꦨꦴꦟꦷ ꦄꦲꦺꦴꦱꦶ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ – ‘‘ꦠꦢꦴ ꦏꦕ꧀ꦖꦥꦺꦴ ꦏꦺꦴꦏꦴꦭꦶꦏꦺꦴ ꦄꦲꦺꦴꦱꦶ, ꦢ꧀ꦮꦺ ꦲꦁꦱꦥꦺꦴꦠꦏꦴ ꦢ꧀ꦮꦺ ꦩꦲꦴꦡꦺꦫꦴ, ꦫꦴꦗꦴ ꦄꦴꦤꦤ꧀ꦢꦺꦴ, ꦄꦩꦕ꧀ꦕꦥꦟ꧀ꦝꦶꦠꦺꦴ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦏꦕ꧀ꦖꦥꦗꦴꦠꦏꦮꦟ꧀ꦟꦤꦴ ꦥꦚ꧀ꦕꦩꦴ.

[꧒꧑꧖] ꧖. ꦩꦕ꧀ꦖꦗꦴꦠꦏꦮꦟ꧀ꦟꦤꦴ

ꦤ ꦩꦴꦪꦩꦒ꧀ꦒꦶ ꦠꦥꦠꦷꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦥꦸꦫꦴꦟꦢꦸꦠꦶꦪꦶꦏꦴꦥꦭꦺꦴꦨꦤꦁ ꦄꦴꦫꦧ꧀ꦨ ꦏꦡꦺꦱꦶ. ꦠꦚ꧀ꦲꦶ ꦨꦶꦏ꧀ꦑꦸꦁ ꦱꦠ꧀ꦡꦴ ‘‘ꦱꦕ꧀ꦕꦁ ꦏꦶꦫ ꦠ꧀ꦮꦁ, ꦨꦶꦏ꧀ꦑꦸ, ꦈꦏ꧀ꦏꦟ꧀ꦜꦶꦠꦺꦴꦱꦷ’’ꦠꦶ ꦥꦸꦕ꧀ꦖꦶ. ‘‘ꦱꦕ꧀ꦕꦁ, ꦨꦤ꧀ꦠꦺ’’ꦠꦶ ꦮꦸꦠ꧀ꦠꦺ ‘‘ꦏꦺꦤ ꦈꦏ꧀ꦏꦟ꧀ꦜꦴꦥꦶꦠꦺꦴꦱꦷ’’ꦠꦶ ꦥꦸꦛ꧀ꦜꦺꦴ ‘‘ꦥꦸꦫꦴꦟꦢꦸꦠꦶꦪꦶꦏꦴꦪꦴ’’ꦠꦶ ꦄꦴꦲ. ꦄꦡ ꦤꦁ ꦱꦠ꧀ꦡꦴ ‘‘ꦄꦪꦁ ꦠꦺ ꦨꦶꦏ꧀ꦑꦸ ꦆꦠ꧀ꦡꦷ ꦄꦤꦠ꧀ꦡꦏꦴꦫꦶꦏꦴ, ꦥꦸꦧ꧀ꦧꦺꦥꦶ ꦠ꧀ꦮꦁ ꦌꦠꦁ ꦤꦶꦱ꧀ꦱꦴꦪ ꦱꦹꦭꦺꦤ ꦮꦶꦗ꧀ꦙꦶꦠ꧀ꦮꦴ ꦄꦔ꧀ꦒꦴꦫꦺꦱꦸ ꦥꦕꦶꦠ꧀ꦮꦴ ꦑꦴꦢꦶꦠꦧ꧀ꦧꦠꦁ ꦥꦠ꧀ꦠꦺꦴ ꦥꦟ꧀ꦝꦶꦠꦺ ꦤꦶꦱ꧀ꦱꦴꦪ ꦗꦷꦮꦶꦠꦁ ꦄꦭꦠ꧀ꦡꦴ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦧꦺꦴꦣꦶꦱꦠ꧀ꦠꦺꦴ ꦠꦱ꧀ꦱ ꦥꦸꦫꦺꦴꦲꦶꦠꦺꦴ ꦄꦲꦺꦴꦱꦶ. ꦄꦡꦺꦏꦢꦶꦮꦱꦁ ꦏꦺꦮꦛ꧀ꦛꦴ ꦗꦴꦭꦺ ꦭꦒ꧀ꦒꦁ ꦩꦕ꧀ꦖꦁ ꦈꦢ꧀ꦣꦫꦶꦠ꧀ꦮꦴ ꦈꦟ꧀ꦲꦮꦴꦭꦸꦏꦴꦥꦶꦛ꧀ꦜꦺ ꦜꦥꦺꦠ꧀ꦮꦴ ‘‘ꦄꦔ꧀ꦒꦴꦫꦺꦱꦸ ꦤꦁ ꦥꦕꦶꦠ꧀ꦮꦴ ꦑꦴꦢꦶꦱ꧀ꦱꦴꦩꦴ’’ꦠꦶ ꦱꦹꦭꦁ ꦠꦕ꧀ꦖꦶꦁꦱꦸ. ꦩꦕ꧀ꦖꦺꦴ ꦩꦕ꧀ꦖꦶꦁ ꦄꦴꦫꦧ꧀ꦨ ꦥꦫꦶꦢꦺꦮꦩꦴꦤꦺꦴ ꦆꦩꦴ ꦒꦴꦡꦴ ꦄꦮꦺꦴꦕ –

꧑꧓꧑. ‘‘ꦤ ꦩꦴꦪꦩꦒ꧀ꦒꦶ ꦠꦥꦠꦶ, ꦤ ꦱꦹꦭꦺꦴ ꦱꦴꦣꦸꦠꦕ꧀ꦖꦶꦠꦺꦴ;

ꦪꦚ꧀ꦕ ꦩꦁ ꦩꦚ꧀ꦚꦠꦺ ꦩꦕ꧀ꦖꦷ, ꦄꦚ꧀ꦚꦁ ꦱꦺꦴ ꦫꦠꦶꦪꦴ ꦒꦠꦺꦴ.

꧑꧓꧒. ‘‘ꦱꦺꦴ ꦩꦁ ꦢꦲꦠꦶ ꦫꦴꦒꦒ꧀ꦒꦶ, ꦕꦶꦠ꧀ꦠꦁ ꦕꦹꦥꦠꦥꦺꦠꦶ ꦩꦁ;

ꦗꦴꦭꦶꦤꦺꦴ ꦩꦸꦚ꧀ꦕꦡꦴꦪꦶꦫꦴ ꦩꦁ, ꦤ ꦏꦴꦩꦺ ꦲꦚ꧀ꦚꦠꦺ ꦏ꧀ꦮꦕꦷ’’ꦠꦶ.

ꦠꦠ꧀ꦡ ꦤ ꦩꦴꦪꦩꦒ꧀ꦒꦶ ꦠꦥꦠꦷꦠꦶ ꦤ ꦩꦁ ꦄꦪꦁ ꦄꦒ꧀ꦒꦶ ꦠꦥꦠꦶ, ꦤ ꦠꦴꦥꦁ ꦗꦤꦺꦠꦶ, ꦤ ꦱꦺꦴꦕꦪꦠꦷꦠꦶ ꦄꦠ꧀ꦡꦺꦴ. ꦤ ꦱꦹꦭꦺꦴꦠꦶ ꦄꦪꦁ ꦱꦹꦭꦺꦴꦥꦶ ꦱꦴꦣꦸꦠꦕ꧀ꦖꦶꦠꦺꦴ ꦩꦁ ꦤ ꦠꦥꦠꦶ, ꦤ ꦩꦺ ꦱꦺꦴꦏꦁ ꦈꦥ꧀ꦥꦴꦢꦺꦠꦶ. ꦪꦚ꧀ꦕ ꦩꦁ ꦩꦚ꧀ꦚꦠꦺꦠꦶ ꦪꦁ ꦥꦤ ꦩꦁ ꦩꦕ꧀ꦖꦷ ꦌꦮꦁ ꦩꦚ꧀ꦚꦠꦶ ‘‘ꦄꦚ꧀ꦚꦁ ꦩꦕ꧀ꦖꦶꦁ ꦱꦺꦴ ꦥꦚ꧀ꦕꦏꦴꦩꦒꦸꦟꦫꦠꦶꦪꦴ ꦒꦠꦺꦴ’’ꦠꦶ, ꦠꦢꦺꦮ ꦩꦁ ꦠꦥꦠꦶ ꦱꦺꦴꦕꦪꦠꦶ. ꦱꦺꦴ ꦩꦁ ꦢꦲꦠꦷꦠꦶ ꦪꦺꦴ ꦥꦤꦺꦱ ꦫꦴꦒꦒ꧀ꦒꦶ, ꦱꦺꦴ ꦩꦁ ꦢꦲꦠꦶ ꦙꦴꦥꦺꦠꦶ. ꦕꦶꦠ꧀ꦠꦁ ꦕꦹꦥꦠꦥꦺꦠꦶ ꦩꦤ꧀ꦠꦶ ꦫꦴꦒꦱꦩ꧀ꦥꦪꦸꦠ꧀ꦠꦏꦁ ꦩꦩ ꦕꦶꦠ꧀ꦠꦩꦺꦮ ꦕ ꦩꦁ ꦈꦥꦠꦴꦥꦺꦠꦶ ꦏꦶꦭꦩꦺꦠꦶ ꦮꦶꦲꦺꦜꦺꦠꦶ. ꦗꦴꦭꦶꦤꦺꦴꦠꦶ ꦏꦺꦮꦛ꧀ꦛꦺ ꦄꦴꦭꦥꦠꦶ. ꦠꦺ ꦲꦶ ꦗꦴꦭꦱ꧀ꦱ ꦄꦠ꧀ꦡꦶꦠꦴꦪ ‘‘ꦗꦴꦭꦶꦤꦺꦴ’’ꦠꦶ ꦮꦸꦕ꧀ꦕꦤ꧀ꦠꦶ. ꦩꦸꦚ꧀ꦕꦡꦴꦪꦶꦫꦴ ꦩꦤ꧀ꦠꦶ ꦩꦸꦚ꧀ꦕꦡ ꦩꦁ ꦱꦴꦩꦶꦤꦺꦴꦠꦶ ꦪꦴꦕꦠꦶ. ꦤ ꦏꦴꦩꦺ ꦲꦚ꧀ꦚꦠꦺ ꦏ꧀ꦮꦕꦷꦠꦶ ꦏꦴꦩꦺ ꦥꦠꦶꦛ꧀ꦜꦶꦠꦺꦴ ꦏꦴꦩꦺꦤ ꦤꦷꦪꦩꦴꦤꦺꦴ ꦱꦠ꧀ꦠꦺꦴ ꦤ ꦏ꧀ꦮꦕꦶ ꦲꦚ꧀ꦚꦠꦶ. ꦤ ꦲꦶ ꦠꦁ ꦠꦸꦩ꧀ꦲꦴꦢꦶꦱꦴ ꦲꦤꦶꦠꦸꦁ ꦄꦤꦸꦕ꧀ꦖꦮꦶꦏꦴꦠꦶ ꦥꦫꦶꦢꦺꦮꦠꦶ. ꦄꦡ ꦮꦴ ꦏꦴꦩꦺꦠꦶ ꦲꦺꦠꦸꦮꦕꦤꦺ ꦨꦸꦩ꧀ꦩꦁ, ꦏꦴꦩꦲꦺꦠꦸ ꦩꦕ꧀ꦖꦶꦁ ꦄꦤꦸꦧꦤ꧀ꦣꦩꦴꦤꦺꦴ ꦤꦴꦩ ꦤ ꦏ꧀ꦮꦕꦶ ꦠꦸꦩ꧀ꦲꦴꦢꦶꦱꦺꦲꦶ ꦲꦚ꧀ꦚꦠꦷꦠꦶ ꦥꦫꦶꦢꦺꦮꦠꦶ. ꦠꦱ꧀ꦩꦶꦁ ꦑꦟꦺ ꦧꦺꦴꦣꦶꦱꦠ꧀ꦠꦺꦴ ꦤꦢꦷꦠꦷꦫꦁ ꦒꦠꦺꦴ ꦠꦱ꧀ꦱ ꦩꦕ꧀ꦖꦱ꧀ꦱ ꦥꦫꦶꦢꦺꦮꦶꦠꦱꦢ꧀ꦢꦁ ꦱꦸꦠ꧀ꦮꦴ ꦏꦺꦮꦛ꧀ꦛꦺ ꦈꦥꦱꦔ꧀ꦏꦩꦶꦠ꧀ꦮꦴ ꦠꦁ ꦩꦕ꧀ꦖꦁ ꦩꦺꦴꦕꦺꦱꦶ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ꦱꦕ꧀ꦕꦴꦤꦶ ꦥꦏꦴꦱꦺꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ, ꦱꦕ꧀ꦕꦥꦫꦶꦪꦺꦴꦱꦴꦤꦺ ꦈꦏ꧀ꦏꦟ꧀ꦜꦶꦠꦨꦶꦏ꧀ꦑꦸ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶ. ‘‘ꦠꦢꦴ ꦩꦕ꧀ꦖꦷ ꦥꦸꦫꦴꦟꦢꦸꦠꦶꦪꦶꦏꦴ ꦄꦲꦺꦴꦱꦶ, ꦩꦕ꧀ꦖꦺꦴ ꦈꦏ꧀ꦏꦟ꧀ꦜꦶꦠꦨꦶꦏ꧀ꦑꦸ, ꦥꦸꦫꦺꦴꦲꦶꦠꦺꦴ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦩꦕ꧀ꦖꦗꦴꦠꦏꦮꦟ꧀ꦟꦤꦴ ꦖꦛ꧀ꦜꦴ.

[꧒꧑꧗] ꧗. ꦱꦺꦒ꧀ꦒꦸꦗꦴꦠꦏꦮꦟ꧀ꦟꦤꦴ

ꦱꦧ꧀ꦧꦺꦴ ꦭꦺꦴꦏꦺꦴꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦌꦏꦁ ꦥꦟ꧀ꦟꦶꦏꦈꦥꦴꦱꦏꦁ ꦄꦴꦫꦧ꧀ꦨ ꦏꦡꦺꦱꦶ. ꦮꦠ꧀ꦡꦸ ꦌꦏꦏꦤꦶꦥꦴꦠꦺ ꦮꦶꦠ꧀ꦡꦴꦫꦶꦠꦩꦺꦮ. ꦆꦣꦴꦥꦶ ꦱꦠ꧀ꦡꦴ ꦠꦁ ‘‘ꦏꦶꦁ, ꦈꦥꦴꦱꦏ, ꦕꦶꦫꦱ꧀ꦱꦁ ꦄꦴꦒꦠꦺꦴꦱꦷ’’ꦠꦶ ꦥꦸꦕ꧀ꦖꦶ. ꦥꦟ꧀ꦟꦶꦏꦈꦥꦴꦱꦏꦺꦴ ‘‘ꦣꦷꦠꦴ ꦩꦺ, ꦨꦤ꧀ꦠꦺ, ꦤꦶꦕ꧀ꦕꦁ ꦥꦲꦁꦱꦶꦠꦩꦸꦑꦷ, ꦠꦩꦲꦁ ꦮꦷꦩꦁꦱꦶꦠ꧀ꦮꦴ ꦌꦏꦱ꧀ꦱ ꦏꦸꦭꦢꦴꦫꦏꦱ꧀ꦱ ꦄꦢꦴꦱꦶꦁ, ꦠꦠ꧀ꦡ ꦆꦠꦶꦏꦠ꧀ꦠꦧ꧀ꦧꦠꦴꦪ ꦠꦸꦩ꧀ꦲꦴꦏꦁ ꦢꦱ꧀ꦱꦤꦴꦪ ꦄꦴꦒꦤ꧀ꦠꦸꦁ ꦎꦏꦴꦱꦁ ꦤ ꦭꦨꦶ’’ꦤ꧀ꦠꦶ ꦄꦴꦲ. ꦄꦡ ꦤꦁ ꦱꦠ꧀ꦡꦴ ‘‘ꦤ ꦑꦺꦴ, ꦈꦥꦴꦱꦏ, ꦆꦢꦴꦤꦺꦮꦺꦱꦴ ꦱꦷꦭꦮꦠꦷ, ꦥꦸꦧ꧀ꦧꦺꦥꦶ ꦱꦷꦭꦮꦠꦷ, ꦠ꧀ꦮꦚ꧀ꦕ ꦤ ꦆꦢꦴꦤꦺꦮꦺꦠꦁ ꦮꦷꦩꦁꦱꦱꦶ, ꦥꦸꦧ꧀ꦧꦺꦥꦶ ꦮꦷꦩꦁꦱꦶꦪꦺꦮꦴ’’ꦠꦶ ꦮꦠ꧀ꦮꦴ ꦠꦺꦤ ꦪꦴꦕꦶꦠꦺꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦧꦺꦴꦣꦶꦱꦠ꧀ꦠꦺꦴ ꦫꦸꦏ꧀ꦑꦢꦺꦮꦠꦴ ꦄꦲꦺꦴꦱꦶ. ꦠꦢꦴ ꦄꦪꦩꦺꦮ ꦥꦟ꧀ꦟꦶꦏꦈꦥꦴꦱꦏꦺꦴ ‘‘ꦣꦷꦠꦫꦁ ꦮꦷꦩꦁꦱꦶꦱ꧀ꦱꦴꦩꦷ’’ꦠꦶ ꦄꦫꦚ꧀ꦚꦁ ꦤꦺꦠ꧀ꦮꦴ ꦏꦶꦭꦺꦱꦮꦱꦺꦤ ꦆꦕ꧀ꦖꦤ꧀ꦠꦺꦴ ꦮꦶꦪ ꦲꦠ꧀ꦡꦺ ꦒꦟ꧀ꦲꦶ. ꦄꦡ ꦤꦁ ꦥꦫꦶꦢꦺꦮꦩꦴꦤꦁ ꦥꦜꦩꦒꦴꦡꦴꦪ ꦄꦗ꧀ꦙꦨꦴꦱꦶ –

꧑꧓꧓. ‘‘ꦱꦧ꧀ꦧꦺꦴ ꦭꦺꦴꦏꦺꦴ ꦄꦠ꧀ꦠꦩꦤꦺꦴ ꦄꦲꦺꦴꦱꦶ, ꦄꦏꦺꦴꦮꦶꦢꦴ ꦒꦴꦩꦣꦩ꧀ꦩꦱ꧀ꦱ ꦱꦺꦒ꧀ꦒꦸ;

ꦏꦺꦴꦩꦴꦫꦶ ꦏꦺꦴ ꦤꦴꦩ ꦠꦮꦗ꧀ꦗ ꦣꦩ꧀ꦩꦺꦴ, ꦪꦁ ꦠ꧀ꦮꦁ ꦒꦲꦶꦠꦴ ꦥꦮꦤꦺ ꦥꦫꦺꦴꦢꦱꦷ’’ꦠꦶ.

ꦠꦠ꧀ꦡ ꦱꦧ꧀ꦧꦺꦴ ꦭꦺꦴꦏꦺꦴ ꦄꦠ꧀ꦠꦩꦤꦺꦴ ꦄꦲꦺꦴꦱꦷꦠꦶ, ꦄꦩ꧀ꦩ, ꦱꦏꦭꦺꦴꦥꦶ ꦱꦠ꧀ꦠꦭꦺꦴꦏꦺꦴ ꦌꦠꦶꦱ꧀ꦱꦴ ꦏꦴꦩꦱꦺꦮꦤꦴꦪ ꦄꦠ꧀ꦠꦩꦤꦺꦴ ꦗꦴꦠꦺꦴ. ꦄꦏꦺꦴꦮꦶꦢꦴ ꦒꦴꦩꦣꦩ꧀ꦩꦱ꧀ꦱ ꦱꦺꦒ꧀ꦒꦹꦠꦶ ꦱꦺꦒ꧀ꦒꦹꦠꦶ ꦠꦱ꧀ꦱꦴ ꦤꦴꦩꦁ. ꦠꦺꦤ ꦠ꧀ꦮꦁ ꦥꦤ, ꦄꦩ꧀ꦩ, ꦱꦺꦒ꧀ꦒꦸ ꦄꦏꦺꦴꦮꦶꦢꦴ ꦒꦴꦩꦣꦩ꧀ꦩꦱ꧀ꦱ, ꦆꦩꦱ꧀ꦩꦶꦁ ꦒꦴꦩꦣꦩ꧀ꦩꦺ ꦮꦱꦭꦣꦩ꧀ꦩꦺ ꦄꦏꦸꦱꦭꦴꦱꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦏꦺꦴꦩꦴꦫꦶ ꦏꦺꦴ ꦤꦴꦩ ꦠꦮꦗ꧀ꦗ ꦣꦩ꧀ꦩꦺꦴꦠꦶ, ꦄꦩ꧀ꦩ, ꦏꦸꦩꦴꦫꦶ ꦏꦺꦴ ꦤꦴꦩꦺꦱ ꦠꦮ ꦄꦗ꧀ꦗ ꦱꦨꦴꦮꦺꦴ. ꦪꦁ ꦠ꧀ꦮꦁ ꦒꦲꦶꦠꦴ ꦥꦮꦤꦺ ꦥꦫꦺꦴꦢꦱꦷꦠꦶ ꦠ꧀ꦮꦁ ꦩꦪꦴ ꦆꦩꦱ꧀ꦩꦶꦁ ꦥꦮꦤꦺ ꦱꦤ꧀ꦡꦮꦮꦱꦺꦤ ꦲꦠ꧀ꦡꦺ ꦒꦲꦶꦠꦴ ꦥꦫꦺꦴꦢꦱꦶ ꦤ ꦱꦩ꧀ꦥꦛꦶꦕ꧀ꦖꦱꦶ, ꦏꦺꦴ ꦌꦱ ꦠꦮ ꦱꦨꦴꦮꦺꦴ, ꦏꦶꦁ ꦏꦸꦩꦴꦫꦶꦏꦴꦪꦺꦮ ꦠ꧀ꦮꦤ꧀ꦠꦶ ꦥꦸꦕ꧀ꦖꦠꦶ.

ꦠꦁ ꦱꦸꦠ꧀ꦮꦴ ꦏꦸꦩꦴꦫꦶꦏꦴ ‘‘ꦄꦴꦩ, ꦠꦴꦠ, ꦏꦸꦩꦴꦫꦶꦏꦴꦪꦺꦮꦴꦲꦁ, ꦤꦴꦲꦁ ꦩꦺꦡꦸꦤꦣꦩ꧀ꦩꦁ ꦤꦴꦩ ꦗꦴꦤꦴꦩꦷ’’ꦠꦶ ꦮꦠ꧀ꦮꦴ ꦥꦫꦶꦢꦺꦮꦩꦴꦤꦴ ꦢꦸꦠꦶꦪꦁ ꦒꦴꦡꦩꦴꦲ –

꧑꧓꧔. ‘‘ꦪꦺꦴ ꦢꦸꦏ꧀ꦑꦦꦸꦛ꧀ꦜꦴꦪ ꦨꦮꦺꦪ꧀ꦪ ꦠꦴꦟꦁ, ꦱꦺꦴ ꦩꦺ ꦥꦶꦠꦴ ꦢꦸꦧ꧀ꦨꦶ ꦮꦤꦺ ꦏꦫꦺꦴꦠꦶ;

ꦱꦴ ꦏꦱ꧀ꦱ ꦏꦤ꧀ꦢꦴꦩꦶ ꦮꦤꦱ꧀ꦱ ꦩꦗ꧀ꦙꦺ, ꦪꦺꦴ ꦠꦴꦪꦶꦠꦴ ꦱꦺꦴ ꦱꦲꦱꦁ ꦏꦫꦺꦴꦠꦷ’’ꦠꦶ.

ꦱꦴ ꦲꦺꦛ꧀ꦜꦴ ꦏꦡꦶꦠꦴꦪꦺꦮ. ꦆꦠꦶ ꦱꦺꦴ ꦥꦟ꧀ꦟꦶꦏꦺꦴ ꦠꦢꦴ ꦣꦷꦠꦫꦁ ꦮꦷꦩꦁꦱꦶꦠ꧀ꦮꦴ ꦒꦺꦲꦁ ꦤꦺꦠ꧀ꦮꦴ ꦏꦸꦭꦢꦴꦫꦏꦱ꧀ꦱ ꦢꦠ꧀ꦮꦴ ꦪꦡꦴꦏꦩ꧀ꦩꦁ ꦒꦠꦺꦴ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ꦱꦕ꧀ꦕꦴꦤꦶ ꦥꦏꦴꦱꦺꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ, ꦱꦕ꧀ꦕꦥꦫꦶꦪꦺꦴꦱꦴꦤꦺ ꦥꦟ꧀ꦟꦶꦏꦈꦥꦴꦱꦏꦺꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶ. ‘‘ꦠꦢꦴ ꦣꦷꦠꦴ ꦣꦷꦠꦴꦪꦺꦮ, ꦥꦶꦠꦴ ꦥꦶꦠꦴꦪꦺꦮ ꦄꦲꦺꦴꦱꦶ, ꦠꦱ꧀ꦱ ꦏꦴꦫꦟꦱ꧀ꦱ ꦥꦕ꧀ꦕꦏ꧀ꦑꦏꦴꦫꦶꦏꦴ ꦫꦸꦏ꧀ꦑꦢꦺꦮꦠꦴ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦱꦺꦒ꧀ꦒꦸꦗꦴꦠꦏꦮꦟ꧀ꦟꦤꦴ ꦱꦠ꧀ꦠꦩꦴ.

[꧒꧑꧘] ꧘. ꦏꦹꦛꦮꦴꦟꦶꦗꦗꦴꦠꦏꦮꦟ꧀ꦟꦤꦴ

ꦱꦜꦱ꧀ꦱ ꦱꦴꦜꦺꦪ꧀ꦪꦩꦶꦢꦤ꧀ꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦌꦏꦁ ꦏꦹꦛꦮꦴꦟꦶꦗꦁ ꦄꦴꦫꦧ꧀ꦨ ꦏꦡꦺꦱꦶ. ꦱꦴꦮꦠ꧀ꦡꦶꦮꦴꦱꦶꦤꦺꦴ ꦲꦶ ꦏꦹꦛꦮꦴꦟꦶꦗꦺꦴ ꦕ ꦥꦟ꧀ꦝꦶꦠꦮꦴꦟꦶꦗꦺꦴ ꦕ ꦢ꧀ꦮꦺ ꦮꦴꦟꦶꦗꦴ ꦩꦶꦠ꧀ꦠꦶꦏꦴ ꦲꦸꦠ꧀ꦮꦴ ꦥꦚ꧀ꦕ ꦱꦏꦛꦱꦠꦴꦤꦶ ꦨꦟ꧀ꦝꦱ꧀ꦱ ꦥꦹꦫꦴꦥꦺꦠ꧀ꦮꦴ ꦥꦸꦧ꧀ꦧꦤ꧀ꦠꦠꦺꦴ ꦄꦥꦫꦤ꧀ꦠꦁ ꦮꦶꦕꦫꦩꦴꦤꦴ ꦮꦺꦴꦲꦴꦫꦁ ꦏꦠ꧀ꦮꦴ ꦧꦲꦸꦁ ꦭꦴꦨꦁ ꦭꦨꦶꦠ꧀ꦮꦴ ꦱꦴꦮꦠ꧀ꦡꦶꦁ ꦥꦕ꧀ꦕꦴꦒꦩꦶꦁꦱꦸ. ꦥꦟ꧀ꦝꦶꦠꦮꦴꦟꦶꦗꦺꦴ ꦏꦹꦛꦮꦴꦟꦶꦗꦁ ꦄꦴꦲ – ‘‘ꦱꦩ꧀ꦩ, ꦨꦟ꧀ꦝꦁ ꦨꦴꦗꦺꦩꦴ’’ꦠꦶ. ꦏꦹꦛꦮꦴꦟꦶꦗꦺꦴ ‘‘ꦄꦪꦁ ꦢꦷꦓꦫꦠ꧀ꦠꦁ ꦢꦸꦏ꧀ꦑꦱꦺꦪ꧀ꦪꦴꦪ ꦢꦸꦧ꧀ꦨꦺꦴꦗꦤꦺꦤ ꦏꦶꦭꦤ꧀ꦠꦺꦴ ꦄꦠ꧀ꦠꦤꦺꦴ ꦓꦫꦺ ꦤꦴꦤꦒ꧀ꦒꦫꦱꦁ ꦨꦠ꧀ꦠꦁ ꦨꦸꦚ꧀ꦗꦶꦠ꧀ꦮꦴ ꦄꦗꦷꦫꦏꦺꦤ ꦩꦫꦶꦱ꧀ꦱꦠꦶ, ꦄꦡ ꦱꦧ꧀ꦧꦩ꧀ꦥꦺꦠꦁ ꦨꦟ꧀ꦝꦁ ꦩꦪ꧀ꦲꦩꦺꦮ ꦨꦮꦶꦱ꧀ꦱꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ‘‘ꦤꦏ꧀ꦑꦠ꧀ꦠꦁ ꦤ ꦩꦤꦴꦥꦁ, ꦢꦶꦮꦱꦺꦴ ꦤ ꦩꦤꦴꦥꦺꦴ, ꦱ꧀ꦮꦺ ꦗꦴꦤꦶꦱ꧀ꦱꦴꦩꦶ, ꦥꦸꦤꦢꦶꦮꦱꦺ ꦗꦴꦤꦶꦱ꧀ꦱꦴꦩꦷ’’ꦠꦶ ꦏꦴꦭꦁ ꦑꦺꦥꦺꦠꦶ. ꦄꦡ ꦤꦁ ꦥꦟ꧀ꦝꦶꦠꦮꦴꦟꦶꦗꦺꦴ ꦤꦶꦥ꧀ꦥꦷꦭ꦳ꦺꦠ꧀ꦮꦴ ꦨꦴꦗꦴꦥꦺꦠ꧀ꦮꦴ ꦒꦤ꧀ꦣꦩꦴꦭꦁ ꦄꦴꦢꦴꦪ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦱꦠ꧀ꦡꦴꦫꦁ ꦥꦹꦗꦺꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦱꦠ꧀ꦡꦴ ‘‘ꦏꦢꦴ ꦄꦴꦒꦠꦺꦴꦱꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦄꦝ꧀ꦞꦩꦴꦱꦩꦠ꧀ꦠꦺꦴ ꦩꦺ, ꦨꦤ꧀ꦠꦺ, ꦄꦴꦒꦠꦱ꧀ꦱꦴ’’ꦠꦶ ꦮꦠ꧀ꦮꦴ ‘‘ꦄꦡ ꦏꦱ꧀ꦩꦴ ꦌꦮꦁ ꦥꦥꦚ꧀ꦕꦁ ꦏꦠ꧀ꦮꦴ ꦧꦸꦢ꧀ꦣꦸꦥꦛ꧀ꦜꦴꦤꦁ ꦄꦴꦒꦠꦺꦴꦱꦷ’’ꦠꦶ ꦥꦸꦛ꧀ꦜꦺꦴ ꦠꦁ ꦥꦮꦠ꧀ꦠꦶꦁ ꦄꦴꦫꦺꦴꦕꦺꦱꦶ. ꦱꦠ꧀ꦡꦴ ‘‘ꦤ ꦑꦺꦴ, ꦈꦥꦴꦱꦏ, ꦆꦢꦴꦤꦺꦮ, ꦥꦸꦧ꧀ꦧꦺꦥꦺꦱ ꦏꦹꦛꦮꦴꦟꦶꦗꦺꦴꦪꦺꦮꦴ’’ꦠꦶ ꦮꦠ꧀ꦮꦴ ꦠꦺꦤ ꦪꦴꦕꦶꦠꦺꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦧꦺꦴꦣꦶꦱꦠ꧀ꦠꦺꦴ ꦄꦩꦕ꧀ꦕꦏꦸꦭꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦪꦥ꧀ꦥꦠ꧀ꦠꦺꦴ ꦠꦱ꧀ꦱ ꦮꦶꦤꦶꦕ꧀ꦖꦪꦴꦩꦕ꧀ꦕꦺꦴ ꦄꦲꦺꦴꦱꦶ. ꦠꦢꦴ ꦒꦴꦩꦮꦴꦱꦷ ꦕ ꦤꦒꦫꦮꦴꦱꦷ ꦕ ꦢ꧀ꦮꦺ ꦮꦴꦟꦶꦗꦴ ꦩꦶꦠ꧀ꦠꦴ ꦄꦲꦺꦱꦸꦁ. ꦒꦴꦩꦮꦴꦱꦷ ꦤꦒꦫꦮꦴꦱꦶꦱ꧀ꦱ ꦱꦤ꧀ꦠꦶꦏꦺ ꦥꦚ꧀ꦕ ꦦꦴꦭꦱꦠꦴꦤꦶ ꦜꦥꦺꦱꦶ. ꦱꦺꦴ ꦠꦺ ꦦꦴꦭꦺ ꦮꦶꦏ꧀ꦏꦶꦟꦶꦠ꧀ꦮꦴ ꦩꦹꦭꦁ ꦒꦲꦺꦠ꧀ꦮꦴ ꦦꦴꦭꦴꦤꦁ ꦜꦥꦶꦠꦛ꧀ꦜꦴꦤꦺ ꦩꦹꦱꦶꦏꦮꦕ꧀ꦕꦁ ꦄꦴꦏꦶꦫꦶꦠ꧀ꦮꦴ ꦜꦥꦺꦱꦶ. ꦄꦥꦫꦨꦴꦒꦺ ꦒꦴꦩꦮꦴꦱꦷ ꦄꦴꦒꦤ꧀ꦠ꧀ꦮꦴ ‘‘ꦦꦴꦭꦺ ꦩꦺ ꦢꦺꦲꦷ’’ꦠꦶ ꦄꦴꦲ. ꦏꦹꦛꦮꦴꦟꦶꦗꦺꦴ ‘‘ꦦꦴꦭꦴ ꦠꦺ ꦩꦹꦱꦶꦏꦴꦲꦶ ꦑꦴꦢꦶꦠꦴ’’ꦠꦶ ꦩꦹꦱꦶꦏꦮꦕ꧀ꦕꦁ ꦢꦱ꧀ꦱꦺꦱꦶ. ꦆꦠꦫꦺꦴ ‘‘ꦑꦴꦢꦶꦠꦴꦮ ꦲꦺꦴꦤ꧀ꦠꦸ, ꦩꦹꦱꦶꦏꦴꦲꦶ ꦑꦴꦢꦶꦠꦺ ꦏꦶꦁ ꦱꦏ꧀ꦏꦴ ꦏꦴꦠꦸ’’ꦤ꧀ꦠꦶ ꦤ꧀ꦲꦴꦤꦠ꧀ꦡꦴꦪ ꦠꦱ꧀ꦱ ꦥꦸꦠ꧀ꦠꦁ ꦄꦴꦢꦴꦪ ꦒꦕ꧀ꦖꦤ꧀ꦠꦺꦴ ꦌꦏꦱ꧀ꦱ ꦱꦲꦴꦪꦏꦱ꧀ꦱ ꦒꦺꦲꦺ ‘‘ꦆꦩꦱ꧀ꦱ ꦏꦠ꧀ꦡꦕꦶ ꦒꦤ꧀ꦠꦸꦁ ꦩꦴ ꦄꦢꦠ꧀ꦡꦴ’’ꦠꦶ ꦮꦠ꧀ꦮꦴ ꦄꦤ꧀ꦠꦺꦴꦒꦧ꧀ꦨꦺ ꦤꦶꦱꦷꦢꦴꦥꦺꦠ꧀ꦮꦴ ꦱꦪꦁ ꦤ꧀ꦲꦴꦪꦶꦠ꧀ꦮꦴ ꦏꦹꦛꦮꦴꦟꦶꦗꦱ꧀ꦱ ꦒꦺꦲꦁ ꦄꦒꦩꦴꦱꦶ. ꦱꦺꦴ ‘‘ꦥꦸꦠ꧀ꦠꦺꦴ ꦩꦺ ꦏꦲ’’ꦤ꧀ꦠꦶ ꦄꦴꦲ. ‘‘ꦱꦩ꧀ꦩ, ꦠꦮ ꦥꦸꦠ꧀ꦠꦁ ꦠꦷꦫꦺ ꦜꦥꦺꦠ꧀ꦮꦴ ꦩꦩ ꦈꦢꦏꦺ ꦤꦶꦩꦸꦒ꧀ꦒꦏꦴꦭꦺ ꦌꦏꦺꦴ ꦏꦸꦭꦭꦺꦴ ꦄꦴꦒꦤ꧀ꦠ꧀ꦮꦴ ꦠꦮ ꦥꦸꦠ꧀ꦠꦁ ꦤꦑꦥꦚ꧀ꦗꦫꦺꦤ ꦒꦲꦺꦠ꧀ꦮꦴ ꦄꦴꦏꦴꦱꦁ ꦥꦏ꧀ꦑꦤ꧀ꦠꦺꦴ, ꦄꦲꦁ ꦥꦴꦟꦶꦁ ꦥꦲꦫꦶꦠ꧀ꦮꦴ ꦮꦶꦫꦮꦶꦠ꧀ꦮꦴ ꦮꦴꦪꦩꦤ꧀ꦠꦺꦴꦥꦶ ꦩꦺꦴꦕꦺꦠꦸꦁ ꦤꦴꦱꦏ꧀ꦑꦶ’’ꦤ꧀ꦠꦶ. ‘‘ꦠ꧀ꦮꦁ ꦩꦸꦱꦴ ꦨꦟꦱꦶ, ꦏꦸꦭꦭꦴ ꦢꦴꦫꦏꦺ ꦒꦲꦺꦠ꧀ꦮꦴ ꦒꦤ꧀ꦠꦸꦁ ꦱꦩꦠ꧀ꦡꦴ ꦤꦴꦩ ꦤꦠ꧀ꦡꦷ’’ꦠꦶ. ‘‘ꦱꦩ꧀ꦩ, ꦲꦺꦴꦠꦸ, ꦄꦪꦸꦠ꧀ꦠꦺꦥꦶ ꦲꦺꦴꦤ꧀ꦠꦺ ꦄꦲꦁ ꦏꦶꦁ ꦏꦫꦺꦴꦩꦶ, ꦏꦸꦭꦭꦺꦤꦺꦮ ꦠꦺ ꦥꦸꦠ꧀ꦠꦺꦴ ꦤꦷꦠꦺꦴ’’ꦠꦶ. ꦱꦺꦴ ꦠꦁ ꦱꦤ꧀ꦠꦗ꧀ꦗꦺꦠ꧀ꦮꦴ ‘‘ꦄꦫꦺ ꦢꦸꦛ꧀ꦜꦕꦺꦴꦫ ꦩꦤꦸꦱ꧀ꦱꦩꦴꦫꦏ, ꦆꦢꦴꦤꦶ ꦠꦁ ꦮꦶꦤꦶꦕ꧀ꦖꦪꦁ ꦒꦤ꧀ꦠ꧀ꦮꦴ ꦏꦝ꧀ꦞꦴꦥꦺꦱ꧀ꦱꦴꦩꦷ’’ꦠꦶ ꦤꦶꦏ꧀ꦑꦩꦶ. ꦱꦺꦴ ‘‘ꦩꦩ ꦫꦸꦕ꧀ꦕꦤꦏꦩꦺꦮ ꦏꦫꦺꦴꦱꦷ’’ꦠꦶ ꦠꦺꦤꦺꦮ ꦱꦢ꧀ꦣꦶꦁ ꦮꦶꦤꦶꦕ꧀ꦖꦪꦛ꧀ꦜꦴꦤꦁ ꦄꦒꦩꦴꦱꦶ.

ꦏꦹꦛꦮꦴꦟꦶꦗꦺꦴ ꦧꦺꦴꦣꦶꦱꦠ꧀ꦠꦁ ꦄꦴꦲ – ‘‘ꦄꦪꦁ, ꦱꦴꦩꦶ, ꦩꦩ ꦥꦸꦠ꧀ꦠꦁ ꦒꦲꦺꦠ꧀ꦮꦴ ꦤ꧀ꦲꦴꦪꦶꦠꦸꦁ ꦒꦠꦺꦴ, ‘ꦏꦲꦁ ꦩꦺ ꦥꦸꦠ꧀ꦠꦺꦴ’ꦠꦶ ꦮꦸꦠ꧀ꦠꦺ ‘ꦏꦸꦭꦭꦺꦤ ꦲꦛꦺꦴ’ꦠꦶ ꦄꦴꦲ, ꦮꦶꦤꦶꦕ꧀ꦖꦶꦤꦡ ꦩꦺ ꦄꦝ꧀ꦝ’’ꦤ꧀ꦠꦶ. ꦧꦺꦴꦣꦶꦱꦠ꧀ꦠꦺꦴ ‘‘ꦱꦕ꧀ꦕꦁ ꦨꦟꦺ’’ꦠꦶ ꦆꦠꦫꦁ ꦥꦸꦕ꧀ꦖꦶ. ꦱꦺꦴ ꦄꦴꦲ – ‘‘ꦄꦴꦩ, ꦱꦴꦩꦶ, ꦄꦲꦁ ꦠꦁ ꦄꦴꦢꦴꦪ ꦒꦠꦺꦴ, ꦱꦺꦤꦺꦤ ꦥꦲꦛꦨꦴꦮꦺꦴ ꦱꦕ꧀ꦕꦩꦺꦮ, ꦱꦴꦩꦷ’’ꦠꦶ. ‘‘ꦏꦶꦁ ꦥꦤ ꦭꦺꦴꦏꦺ ꦏꦸꦭꦭꦴ ꦤꦴꦩ ꦢꦴꦫꦏꦺ ꦲꦫꦤ꧀ꦠꦷ’’ꦠꦶ? ‘‘ꦱꦴꦩꦶ, ꦄꦲꦩ꧀ꦥꦶ ꦠꦸꦩ꧀ꦲꦺ ꦥꦸꦕ꧀ꦖꦴꦩꦶ – ‘‘ꦏꦸꦭꦭꦴ ꦢꦴꦫꦏꦺ ꦒꦲꦺꦠ꧀ꦮꦴ ꦄꦴꦏꦴꦱꦺ ꦒꦤ꧀ꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ, ꦩꦹꦱꦶꦏꦴ ꦥꦤ ꦄꦪꦦꦴꦭꦺ ꦑꦴꦢꦤ꧀ꦠꦷ’’ꦠꦶ. ‘‘ꦆꦢꦁ ꦏꦶꦁ ꦤꦴꦩꦴ’’ꦠꦶ? ‘‘ꦱꦴꦩꦶ, ꦩꦪꦴ ꦌꦠꦱ꧀ꦱ ꦓꦫꦺ ꦥꦚ꧀ꦕ ꦦꦴꦭꦱꦠꦴꦤꦶ ꦜꦥꦶꦠꦴꦤꦶ, ꦱ꧀ꦮꦴꦪꦁ ‘ꦦꦴꦭꦴ ꦠꦺ ꦩꦹꦱꦶꦏꦴꦲꦶ ꦑꦴꦢꦶꦠꦴ’ꦠꦶ ꦮꦠ꧀ꦮꦴ ‘ꦆꦢꦁ ꦠꦺ ꦦꦴꦭꦺ ꦑꦴꦢꦶꦠꦩꦹꦱꦶꦏꦴꦤꦁ ꦮꦕ꧀ꦕ’ꦤ꧀ꦠꦶ ꦮꦕ꧀ꦕꦁ ꦢꦱ꧀ꦱꦺꦠꦶ, ꦱꦴꦩꦶ, ꦩꦹꦱꦶꦏꦴ ꦕꦺ ꦦꦴꦭꦺ ꦑꦴꦢꦤ꧀ꦠꦶ, ꦏꦸꦭꦭꦴꦥꦶ ꦢꦴꦫꦏꦺ ꦲꦫꦶꦱ꧀ꦱꦤ꧀ꦠꦶ. ꦱꦕꦺ ꦤ ꦑꦴꦢꦤ꧀ꦠꦶ, ꦱꦺꦤꦴꦥꦶ ꦠꦁ ꦤ ꦲꦫꦶꦱ꧀ꦱꦤ꧀ꦠꦶ. ꦌꦱꦺꦴ ꦥꦤ ‘ꦦꦴꦭꦴ ꦠꦺ ꦩꦹꦱꦶꦏꦴꦲꦶ ꦑꦴꦢꦶꦠꦴ’ꦠꦶ ꦮꦢꦠꦶ, ꦠꦺꦱꦁ ꦑꦴꦢꦶꦠꦨꦴꦮꦁ ꦮꦴ ꦄꦑꦴꦢꦶꦠꦨꦴꦮꦁ ꦮꦴ ꦗꦴꦤꦴꦡ, ꦄꦝ꧀ꦝꦁ ꦩꦺ ꦮꦶꦤꦶꦕ꧀ꦖꦶꦤꦡꦴ’’ꦠꦶ. ꦧꦺꦴꦣꦶꦱꦠ꧀ꦠꦺꦴ ‘‘ꦱꦜꦱ꧀ꦱ ꦥꦛꦶꦱꦴꦜꦺꦪ꧀ꦪꦁ ꦏꦠ꧀ꦮꦴ ꦗꦶꦤꦶꦱ꧀ꦱꦴꦩꦷꦠꦶ ꦆꦩꦶꦤꦴ ꦕꦶꦤ꧀ꦠꦶꦠꦁ ꦨꦮꦶꦱ꧀ꦱꦠꦷ’’ꦠꦶ ꦚꦠ꧀ꦮꦴ ‘‘ꦱꦸꦛ꧀ꦜꦸ ꦠꦺ ꦕꦶꦤ꧀ꦠꦶꦠ’’ꦤ꧀ꦠꦶ ꦮꦠ꧀ꦮꦴ ꦆꦩꦴ ꦒꦴꦡꦴ ꦄꦮꦺꦴꦕ –

꧑꧓꧕. ‘‘ꦱꦜꦱ꧀ꦱ ꦱꦴꦜꦺꦪ꧀ꦪꦩꦶꦁꦢ ꦱꦸꦕꦶꦤ꧀ꦠꦶꦠꦁ, ꦥꦕ꧀ꦕꦺꦴꦝ꧀ꦝꦶꦠꦁ ꦥꦛꦶꦏꦹꦛꦱ꧀ꦱ ꦏꦹꦛꦁ;

ꦦꦴꦭꦁ ꦕꦺ ꦑꦴꦢꦺꦪ꧀ꦪꦸꦁ ꦩꦹꦱꦶꦏꦴ, ꦏꦱ꧀ꦩꦴ ꦏꦸꦩꦴꦫꦁ ꦏꦸꦭꦭꦴ ꦤ ꦲꦫꦺꦪ꧀ꦪꦸꦁ.

꧑꧓꧖. ‘‘ꦏꦹꦛꦱ꧀ꦱ ꦲꦶ ꦱꦤ꧀ꦠꦶ ꦏꦹꦛꦏꦹꦛꦴ, ꦨꦮꦠꦶ ꦕꦴꦥꦶ ꦤꦶꦏꦠꦶꦤꦺꦴ ꦤꦶꦏꦠ꧀ꦪꦴ;

ꦢꦺꦲꦶ ꦥꦸꦠ꧀ꦠꦤꦛ꧀ꦜ ꦦꦴꦭꦤꦛ꧀ꦜꦱ꧀ꦱ ꦦꦴꦭꦁ, ꦩꦴ ꦠꦺ ꦥꦸꦠ꧀ꦠꦩꦲꦴꦱꦶ ꦦꦴꦭꦤꦛ꧀ꦜꦺꦴ’’ꦠꦶ.

ꦠꦠ꧀ꦡ ꦱꦜꦱ꧀ꦱꦴꦠꦶ ꦱꦜꦨꦴꦮꦺꦤ ꦏꦺꦫꦴꦛꦶꦏꦺꦤ ‘‘ꦌꦏꦁ ꦈꦥꦴꦪꦁ ꦏꦠ꧀ꦮꦴ ꦥꦫꦱꦤ꧀ꦠꦏꦁ ꦑꦴꦢꦶꦠꦸꦁ ꦮꦛ꧀ꦛꦠꦷ’’ꦠꦶ ꦱꦜꦱ꧀ꦱ. ꦱꦴꦜꦺꦪ꧀ꦪꦩꦶꦢꦁ ꦱꦸꦕꦶꦤ꧀ꦠꦶꦠꦤ꧀ꦠꦶ ꦆꦢꦁ ꦥꦛꦶꦱꦴꦜꦺꦪ꧀ꦪꦁ ꦕꦶꦤ꧀ꦠꦺꦤ꧀ꦠꦺꦤ ꦠꦪꦴ ꦱꦸꦛ꧀ꦜꦸ ꦕꦶꦤ꧀ꦠꦶꦠꦁ. ꦥꦕ꧀ꦕꦺꦴꦝ꧀ꦝꦶꦠꦁ ꦥꦛꦶꦏꦹꦛꦱ꧀ꦱ ꦏꦹꦛꦤ꧀ꦠꦶ ꦏꦹꦛꦱ꧀ꦱ ꦥꦸꦒ꧀ꦒꦭꦱ꧀ꦱ ꦠꦪꦴ ꦥꦛꦶꦏꦹꦛꦁ ꦱꦸꦛ꧀ꦜꦸ ꦥꦕ꧀ꦕꦺꦴꦝ꧀ꦝꦶꦠꦁ, ꦥꦛꦶꦨꦴꦒꦁ ꦏꦠ꧀ꦮꦴ ꦎꦝ꧀ꦝꦶꦠꦱꦢꦶꦱꦩꦺꦮ ꦏꦠꦤ꧀ꦠꦶ ꦄꦠ꧀ꦡꦺꦴ. ꦦꦴꦭꦁ ꦕꦺ ꦑꦴꦢꦺꦪ꧀ꦪꦸꦁ ꦩꦹꦱꦶꦏꦴꦠꦶ ꦪꦢꦶ ꦩꦹꦱꦶꦏꦴ ꦦꦴꦭꦁ ꦑꦴꦢꦺꦪ꧀ꦪꦸꦁ. ꦏꦱ꧀ꦩꦴ ꦏꦸꦩꦴꦫꦁ ꦏꦸꦭꦭꦴ ꦤ ꦲꦫꦺꦪ꧀ꦪꦸꦤ꧀ꦠꦶ ꦩꦹꦱꦶꦏꦴꦱꦸ ꦦꦴꦭꦺ ꦑꦴꦢꦤ꧀ꦠꦷꦱꦸ ꦏꦸꦭꦭꦴ ꦏꦶꦁ ꦏꦴꦫꦟꦴ ꦏꦸꦩꦴꦫꦁ ꦤꦺꦴ ꦲꦫꦺꦪ꧀ꦪꦸꦁ.

ꦏꦹꦛꦱ꧀ꦱ ꦲꦶ ꦱꦤ꧀ꦠꦶ ꦏꦹꦛꦏꦹꦛꦴꦠꦶ ꦠ꧀ꦮꦁ ‘‘ꦄꦲꦩꦺꦮ ꦩꦹꦱꦶꦏꦴꦲꦶ ꦦꦴꦭꦺ ꦑꦴꦢꦴꦥꦶꦠꦥꦸꦫꦶꦱꦺꦴ ꦏꦹꦛꦺꦴ’’ꦠꦶ ꦩꦚ꧀ꦚꦱꦶ, ꦠꦴꦢꦶꦱꦱ꧀ꦱ ꦥꦤ ꦏꦹꦛꦱ꧀ꦱ ꦆꦩꦱ꧀ꦩꦶꦁ ꦭꦺꦴꦏꦺ ꦧꦲꦹ ꦏꦹꦛꦴ ꦱꦤ꧀ꦠꦶ, ꦏꦹꦛꦱ꧀ꦱ ꦏꦹꦛꦴꦠꦶ ꦏꦹꦛꦥꦛꦶꦏꦹꦛꦴꦤꦁ ꦌꦠꦁ ꦤꦴꦩꦁ, ꦏꦹꦛꦱ꧀ꦱ ꦥꦛꦶꦏꦹꦛꦴ ꦤꦴꦩ ꦱꦤ꧀ꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦨꦮꦠꦶ ꦕꦴꦥꦶ ꦤꦶꦏꦠꦶꦤꦺꦴ ꦤꦶꦏꦠ꧀ꦪꦴꦠꦶ ꦤꦶꦏꦠꦶꦤꦺꦴ ꦤꦺꦏꦠꦶꦏꦱ꧀ꦱ ꦮꦚ꧀ꦕꦤꦏꦥꦸꦒ꧀ꦒꦭꦱ꧀ꦱ ꦤꦶꦏꦠ꧀ꦪꦴ ꦄꦥꦫꦺꦴ ꦤꦶꦏꦠꦶꦏꦴꦫꦏꦺꦴ ꦮꦚ꧀ꦕꦤꦏꦥꦸꦫꦶꦱꦺꦴ ꦨꦮꦠꦶꦪꦺꦮ. ꦢꦺꦲꦶ ꦥꦸꦠ꧀ꦠꦤꦛ꧀ꦜ ꦦꦴꦭꦤꦛ꧀ꦜꦱ꧀ꦱ ꦦꦴꦭꦤ꧀ꦠꦶ ꦄꦩ꧀ꦨꦺꦴ ꦤꦛ꧀ꦜꦥꦸꦠ꧀ꦠ ꦥꦸꦫꦶꦱ, ꦌꦠꦱ꧀ꦱ ꦤꦛ꧀ꦜꦦꦴꦭꦱ꧀ꦱ ꦦꦴꦭꦁ ꦢꦺꦲꦶ. ꦩꦴ ꦠꦺ ꦥꦸꦠ꧀ꦠꦩꦲꦴꦱꦶ ꦦꦴꦭꦤꦛ꧀ꦜꦺꦴꦠꦶ ꦱꦕꦺ ꦲꦶꦱ꧀ꦱ ꦦꦴꦭꦁ ꦤ ꦢꦱ꧀ꦱꦱꦶ, ꦥꦸꦠ꧀ꦠꦁ ꦠꦺ ꦲꦫꦶꦱ꧀ꦱꦠꦶ, ꦠꦁ ꦠꦺ ꦌꦱ ꦩꦴ ꦲꦫꦠꦸ, ꦦꦴꦭꦩꦱ꧀ꦱ ꦢꦺꦲꦷꦠꦶ. ‘‘ꦢꦺꦩꦶ, ꦱꦴꦩꦶ, ꦱꦕꦺ ꦩꦺ ꦥꦸꦠ꧀ꦠꦁ ꦢꦺꦠꦷ’’ꦠꦶ. ‘‘ꦢꦺꦩꦶ, ꦱꦴꦩꦶ, ꦱꦕꦺ ꦩꦺ ꦦꦴꦭꦺ ꦢꦺꦠꦷ’’ꦠꦶ. ꦌꦮꦁ ꦤꦛ꧀ꦜꦥꦸꦠ꧀ꦠꦺꦴ ꦥꦸꦠ꧀ꦠꦁ, ꦤꦛ꧀ꦜꦦꦴꦭꦺꦴ ꦕ ꦦꦴꦭꦁ ꦥꦛꦶꦭꦨꦶꦠ꧀ꦮꦴ ꦈꦨꦺꦴꦥꦶ ꦪꦡꦴꦏꦩ꧀ꦩꦁ ꦒꦠꦴ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ – ‘‘ꦠꦢꦴ ꦏꦹꦛꦮꦴꦟꦶꦗꦺꦴ ꦆꦢꦴꦤꦶ ꦏꦹꦛꦮꦴꦟꦶꦗꦺꦴꦮ, ꦥꦟ꧀ꦝꦶꦠꦮꦴꦟꦶꦗꦺꦴ ꦥꦟ꧀ꦝꦶꦠꦮꦴꦟꦶꦗꦺꦴꦪꦺꦮ, ꦮꦶꦤꦶꦕ꧀ꦖꦪꦴꦩꦕ꧀ꦕꦺꦴ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦏꦹꦛꦮꦴꦟꦶꦗꦗꦴꦠꦏꦮꦟ꧀ꦟꦤꦴ ꦄꦛ꧀ꦜꦩꦴ.

[꧒꧑꧙] ꧙. ꦒꦫꦲꦶꦠꦗꦴꦠꦏꦮꦟ꧀ꦟꦤꦴ

ꦲꦶꦫꦚ꧀ꦚꦁ ꦩꦺ ꦱꦸꦮꦟ꧀ꦟꦁ ꦩꦺꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦌꦏꦁ ꦄꦤꦨꦶꦫꦠꦶꦪꦴ ꦈꦏ꧀ꦏꦟ꧀ꦜꦶꦠꦨꦶꦏ꧀ꦑꦸꦁ ꦄꦴꦫꦧ꧀ꦨ ꦏꦡꦺꦱꦶ. ꦌꦠꦱ꧀ꦱ ꦲꦶ ꦥꦕ꧀ꦕꦺꦏꦁ ꦒꦲꦶꦠꦁ ꦄꦴꦫꦩ꧀ꦩꦟꦁ ꦤꦴꦩ ꦤꦠ꧀ꦡꦶ, ꦄꦤꦨꦶꦫꦠꦶꦮꦴꦱꦁ ꦮꦱꦤ꧀ꦠꦁ ꦥꦤ ꦠꦁ ꦱꦠ꧀ꦡꦸ ꦱꦤ꧀ꦠꦶꦏꦁ ꦄꦴꦤꦺꦱꦸꦁ. ꦱꦺꦴ ꦱꦠ꧀ꦡꦴꦫꦴ ‘‘ꦱꦕ꧀ꦕꦁ ꦏꦶꦫ ꦠ꧀ꦮꦁ, ꦨꦶꦏ꧀ꦑꦸ, ꦈꦏ꧀ꦏꦟ꧀ꦜꦶꦠꦺꦴꦱꦷ’’ꦠꦶ ꦥꦸꦛ꧀ꦜꦺꦴ ‘‘ꦱꦕ꧀ꦕ’’ꦤ꧀ꦠꦶ ꦮꦠ꧀ꦮꦴ ‘‘ꦏꦶꦁꦏꦴꦫꦟꦴ’’ꦠꦶ ꦮꦸꦠ꧀ꦠꦺ ‘‘ꦏꦶꦭꦺꦱꦮꦱꦺꦤꦴ’’ꦠꦶ ꦄꦴꦲ. ꦄꦡ ꦤꦁ ꦱꦠ꧀ꦡꦴ ‘‘ꦄꦪꦁ, ꦨꦶꦏ꧀ꦑꦸ, ꦏꦶꦭꦺꦱꦺꦴ ꦤꦴꦩ ꦥꦸꦧ꧀ꦧꦺ ꦠꦶꦫꦕ꧀ꦖꦴꦤꦺꦲꦶꦥꦶ ꦒꦫꦲꦶꦠꦺꦴ, ꦠ꧀ꦮꦁ ꦌꦮꦫꦹꦥꦺ ꦱꦴꦱꦤꦺ ꦥꦧ꧀ꦧꦗꦶꦠꦺꦴ ꦏꦱ꧀ꦩꦴ ꦠꦶꦫꦕ꧀ꦖꦴꦤꦺꦲꦶꦥꦶ ꦒꦫꦲꦶꦠꦏꦶꦭꦺꦱꦮꦱꦺꦤ ꦈꦏ꧀ꦏꦟ꧀ꦜꦶꦠꦺꦴ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦧꦺꦴꦣꦶꦱꦠ꧀ꦠꦺꦴ ꦲꦶꦩꦮꦤ꧀ꦠꦥꦢꦺꦱꦺ ꦮꦴꦤꦫꦪꦺꦴꦤꦶꦪꦁ ꦤꦶꦧ꧀ꦧꦠ꧀ꦠꦶ. ꦠꦩꦺꦤꦁ ꦌꦏꦺꦴ ꦮꦤꦕꦫꦏꦺꦴ ꦒꦲꦺꦠ꧀ꦮꦴ ꦄꦴꦤꦺꦠ꧀ꦮꦴ ꦫꦚ꧀ꦚꦺꦴ ꦄꦢꦴꦱꦶ. ꦱꦺꦴ ꦕꦶꦫꦁ ꦫꦴꦗꦒꦺꦲꦺ ꦮꦱꦩꦴꦤꦺꦴ ꦮꦠ꧀ꦠꦱꦩ꧀ꦥꦤ꧀ꦤꦺꦴ ꦄꦲꦺꦴꦱꦶ, ꦩꦤꦸꦱ꧀ꦱꦭꦺꦴꦏꦺ ꦮꦠ꧀ꦠꦩꦴꦤꦁ ꦏꦶꦫꦶꦪꦁ ꦪꦺꦨꦸꦪ꧀ꦪꦺꦤ ꦄꦚ꧀ꦚꦴꦱꦶ. ꦫꦴꦗꦴ ꦠꦱ꧀ꦱ ꦮꦠ꧀ꦠꦺ ꦥꦱꦷꦢꦶꦠ꧀ꦮꦴ ꦮꦤꦕꦫꦏꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦆꦩꦁ ꦮꦴꦤꦫꦁ ꦒꦲꦶꦠꦛ꧀ꦜꦴꦤꦺꦪꦺꦮ ꦮꦶꦱ꧀ꦱꦗ꧀ꦗꦺꦲꦷ’’ꦠꦶ ꦄꦴꦟꦴꦥꦺꦱꦶ, ꦱꦺꦴ ꦠꦡꦴ ꦄꦏꦴꦱꦶ. ꦮꦴꦤꦫꦒꦟꦺꦴ ꦧꦺꦴꦣꦶꦱꦠ꧀ꦠꦱ꧀ꦱ ꦄꦴꦒꦠꦨꦴꦮꦁ ꦚꦠ꧀ꦮꦴ ꦠꦱ꧀ꦱ ꦢꦱ꧀ꦱꦤꦠ꧀ꦡꦴꦪ ꦩꦲꦤ꧀ꦠꦺ ꦥꦴꦱꦴꦟꦥꦶꦛ꧀ꦜꦺ ꦱꦤ꧀ꦤꦶꦥꦠꦶꦠ꧀ꦮꦴ ꦧꦺꦴꦣꦶꦱꦠ꧀ꦠꦺꦤ ꦱꦢ꧀ꦣꦶꦁ ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦏꦠ꧀ꦮꦴ ‘‘ꦱꦩ꧀ꦩ, ꦏꦲꦁ ꦌꦠ꧀ꦠꦏꦁ ꦏꦴꦭꦁ ꦮꦸꦠ꧀ꦡꦺꦴꦱꦷ’’ꦠꦶ ꦄꦴꦲ. ‘‘ꦧꦴꦫꦴꦟꦱꦶꦪꦁ ꦫꦴꦗꦤꦶꦮꦺꦱꦤꦺ’’ꦠꦶ. ‘‘ꦄꦡ ꦏꦡꦁ ꦩꦸꦠ꧀ꦠꦺꦴꦱꦷ’’ꦠꦶ? ‘‘ꦫꦴꦗꦴ ꦩꦁ ꦏꦺꦭ꦳ꦶꦩꦏ꧀ꦏꦛꦁ ꦏꦠ꧀ꦮꦴ ꦩꦩ ꦮꦠ꧀ꦠꦺ ꦥꦱꦤ꧀ꦤꦺꦴ ꦩꦁ ꦮꦶꦱ꧀ꦱꦗ꧀ꦗꦺꦱꦷ’’ꦠꦶ.

ꦄꦡ ꦤꦁ ꦠꦺ ꦮꦴꦤꦫꦴ ‘‘ꦩꦤꦸꦱ꧀ꦱꦭꦺꦴꦏꦺ ꦮꦠ꧀ꦠꦩꦴꦤꦏꦶꦫꦶꦪꦁ ꦤꦴꦩ ꦠꦸꦩ꧀ꦲꦺ ꦗꦴꦤꦶꦱ꧀ꦱꦡ, ꦄꦩ꧀ꦲꦴꦏꦩ꧀ꦥꦶ ꦠꦴꦮ ꦏꦡꦺꦡ, ꦱꦺꦴꦠꦸꦏꦴꦩꦩ꧀ꦲꦴ’’ꦠꦶ ꦄꦴꦲꦁꦱꦸ. ‘‘ꦩꦴ ꦩꦁ ꦩꦤꦸꦱ꧀ꦱꦴꦤꦁ ꦏꦶꦫꦶꦪꦁ ꦥꦸꦕ꧀ꦖꦡꦴ’’ꦠꦶ. ‘‘ꦏꦡꦺꦡ ꦱꦺꦴꦠꦸꦏꦴꦩꦩ꧀ꦲꦴ’’ꦠꦶ. ꦧꦺꦴꦣꦶꦱꦠ꧀ꦠꦺꦴꦥꦶ ‘‘ꦩꦤꦸꦱ꧀ꦱꦴ ꦤꦴꦩ ꦑꦠ꧀ꦠꦶꦪꦴꦥꦶ ꦧ꧀ꦫꦴꦲ꧀ꦩꦟꦴꦥꦶ ‘ꦩꦪ꧀ꦲꦁ ꦩꦪ꧀ꦲ’ꦤ꧀ꦠꦶ ꦮꦢꦤ꧀ꦠꦶ, ꦲꦸꦠ꧀ꦮꦴ ꦄꦨꦴꦮꦛ꧀ꦜꦺꦤ ꦄꦤꦶꦕ꧀ꦕꦠꦁ ꦤ ꦗꦴꦤꦤ꧀ꦠꦶ, ꦱꦸꦟꦴꦡ ꦢꦴꦤꦶ ꦠꦺꦱꦁ ꦄꦤ꧀ꦣꦧꦴꦭꦴꦤꦁ ꦏꦴꦫꦟ’’ꦤ꧀ꦠꦶ ꦮꦠ꧀ꦮꦴ ꦆꦩꦴ ꦒꦴꦡꦴ ꦄꦮꦺꦴꦕ –

꧑꧓꧗. ‘‘ꦲꦶꦫꦚ꧀ꦚꦁ ꦩꦺ ꦱꦸꦮꦟ꧀ꦟꦁ ꦩꦺ, ꦌꦱꦴ ꦫꦠ꧀ꦠꦶꦁ ꦢꦶꦮꦴ ꦏꦡꦴ;

ꦢꦸꦩ꧀ꦩꦺꦣꦴꦤꦁ ꦩꦤꦸꦱ꧀ꦱꦴꦤꦁ, ꦄꦫꦶꦪꦣꦩ꧀ꦩꦁ ꦄꦥꦱ꧀ꦱꦠꦁ.

꧑꧓꧘. ‘‘ꦢ꧀ꦮꦺ ꦢ꧀ꦮꦺ ꦒꦲꦥꦠꦪꦺꦴ ꦒꦺꦲꦺ, ꦌꦏꦺꦴ ꦠꦠ꧀ꦡ ꦄꦩꦱ꧀ꦱꦸꦏꦺꦴ;

ꦭꦩ꧀ꦧꦠ꧀ꦡꦤꦺꦴ ꦮꦺꦟꦶꦏꦠꦺꦴ, ꦄꦡꦺꦴ ꦄꦔ꧀ꦏꦶꦠꦏꦟ꧀ꦟꦏꦺꦴ;

ꦏꦷꦠꦺꦴ ꦣꦤꦺꦤ ꦧꦲꦸꦤꦴ, ꦱꦺꦴ ꦠꦁ ꦮꦶꦠꦸꦢꦠꦺ ꦗꦤ’’ꦤ꧀ꦠꦶ.

ꦠꦠ꧀ꦡ ꦲꦶꦫꦚ꧀ꦚꦁ ꦩꦺ ꦱꦸꦮꦟ꧀ꦟꦁ ꦩꦺꦠꦶ ꦢꦺꦱꦤꦴꦱꦷꦱꦩꦠ꧀ꦠꦩꦺꦠꦁ, ꦆꦩꦶꦤꦴ ꦥꦤ ꦥꦢꦢ꧀ꦮꦪꦺꦤ ꦢꦱꦮꦶꦣꦩ꧀ꦥꦶ ꦫꦠꦤꦁ ꦱꦧ꧀ꦧꦁ, ꦥꦸꦧ꧀ꦧꦟ꧀ꦟꦴꦥꦫꦟ꧀ꦟꦁ ꦑꦺꦠ꧀ꦠꦮꦠ꧀ꦡꦸꦁ ꦢ꧀ꦮꦶꦥꦢꦕꦠꦸꦥ꧀ꦥꦢꦚ꧀ꦕ ꦱꦧ꧀ꦧꦁ ꦢꦱ꧀ꦱꦺꦤ꧀ꦠꦺꦴ ‘‘ꦆꦢꦁ ꦩꦺ ꦆꦢꦁ ꦩꦺ’’ꦠꦶ ꦄꦴꦲ. ꦌꦱꦴ ꦫꦠ꧀ꦠꦶꦁ ꦢꦶꦮꦴ ꦏꦡꦴꦠꦶ ꦌꦱꦴ ꦩꦤꦸꦱ꧀ꦱꦴꦤꦁ ꦫꦠ꧀ꦠꦶꦚ꧀ꦕ ꦢꦶꦮꦴ ꦕ ꦤꦶꦕ꧀ꦕꦏꦴꦭꦁ ꦏꦡꦴ. ꦄꦚ꧀ꦚꦁ ꦥꦤ ꦠꦺ ‘‘ꦥꦚ꧀ꦕꦏ꧀ꦑꦤ꧀ꦣꦴ ꦄꦤꦶꦕ꧀ꦕꦴ’’ꦠꦶ ꦮꦴ ‘‘ꦲꦸꦠ꧀ꦮꦴ ꦤ ꦨꦮꦤ꧀ꦠꦷ’’ꦠꦶ ꦮꦴ ꦤ ꦗꦴꦤꦤ꧀ꦠꦶ, ꦌꦮꦩꦺꦮ ꦥꦫꦶꦢꦺꦮꦤ꧀ꦠꦴ ꦮꦶꦕꦫꦤ꧀ꦠꦶ. ꦢꦸꦩ꧀ꦩꦺꦣꦴꦤꦤ꧀ꦠꦶ ꦄꦥ꧀ꦥꦥꦚ꧀ꦚꦴꦤꦁ. ꦄꦫꦶꦪꦣꦩ꧀ꦩꦁ ꦄꦥꦱ꧀ꦱꦠꦤ꧀ꦠꦶ ꦄꦫꦶꦪꦴꦤꦁ ꦧꦸꦢ꧀ꦣꦴꦢꦷꦤꦁ ꦣꦩ꧀ꦩꦁ, ꦄꦫꦶꦪꦁ ꦮꦴ ꦤꦶꦢ꧀ꦢꦺꦴꦱꦁ ꦤꦮꦮꦶꦣꦁ ꦭꦺꦴꦏꦸꦠ꧀ꦠꦫꦣꦩ꧀ꦩꦁ ꦄꦥꦱ꧀ꦱꦤ꧀ꦠꦴꦤꦁ ꦌꦱꦴꦮ ꦏꦡꦴ. ꦄꦚ꧀ꦚꦴ ꦥꦤ ‘‘ꦄꦤꦶꦕ꧀ꦕꦁ ꦮꦴ ꦢꦸꦏ꧀ꦑꦁ ꦮꦴ’’ꦠꦶ ꦠꦺꦱꦁ ꦏꦡꦴ ꦤꦴꦩ ꦤꦠ꧀ꦡꦶ.

ꦒꦲꦥꦠꦪꦺꦴꦠꦶ ꦒꦺꦲꦺ ꦄꦣꦶꦥꦠꦶꦨꦹꦠꦴ. ꦌꦏꦺꦴ ꦠꦠ꧀ꦡꦴꦠꦶ ꦠꦺꦱꦸ ꦢ꧀ꦮꦷꦱꦸ ꦓꦫꦱꦴꦩꦶꦏꦺꦱꦸ ‘‘ꦌꦏꦺꦴ’’ꦠꦶ ꦩꦴꦠꦸꦒꦴꦩꦁ ꦱꦤ꧀ꦣꦴꦪ ꦮꦢꦠꦶ. ꦠꦠ꧀ꦡ ꦮꦺꦟꦶꦏꦠꦺꦴꦠꦶ ꦏꦠꦮꦺꦟꦷ, ꦤꦴꦤꦥ꧀ꦥꦏꦴꦫꦺꦤ ꦱꦟ꧀ꦜꦴꦥꦶꦠꦏꦺꦱꦏꦭꦴꦥꦺꦴꦠꦶ ꦄꦠ꧀ꦡꦺꦴ. ꦄꦡꦺꦴ ꦄꦔ꧀ꦏꦶꦠꦏꦟ꧀ꦟꦏꦺꦴꦠꦶ ꦄꦡ ꦱ꧀ꦮꦺꦮ ꦮꦶꦢ꧀ꦣꦏꦟ꧀ꦟꦺꦴ ꦖꦶꦢ꧀ꦢꦏꦟ꧀ꦟꦺꦴꦠꦶ ꦭꦩ꧀ꦧꦏꦟ꧀ꦟꦠꦁ ꦱꦤ꧀ꦣꦴꦪꦴꦲ. ꦏꦷꦠꦺꦴ ꦣꦤꦺꦤ ꦧꦲꦸꦤꦴꦠꦶ ꦱꦺꦴ ꦥꦤꦺꦱ ꦄꦩꦱ꧀ꦱꦸꦏꦺꦴ ꦭꦩ꧀ꦧꦠ꧀ꦡꦤꦺꦴ ꦮꦺꦟꦶꦏꦠꦺꦴ ꦄꦔ꧀ꦏꦶꦠꦏꦟ꧀ꦟꦺꦴ ꦩꦴꦠꦴꦥꦶꦠꦹꦤꦁ ꦧꦲꦸꦁ ꦣꦤꦁ ꦢꦠ꧀ꦮꦴ ꦏꦷꦠꦺꦴ, ꦩꦟ꧀ꦝꦺꦠ꧀ꦮꦴ ꦥꦱꦴꦣꦺꦠ꧀ꦮꦴ ꦪꦴꦤꦁ ꦄꦴꦫꦺꦴꦥꦺꦠ꧀ꦮꦴ ꦩꦲꦤ꧀ꦠꦺꦤ ꦥꦫꦶꦮꦴꦫꦺꦤ ꦓꦫꦁ ꦄꦴꦤꦷꦠꦺꦴ. ꦱꦺꦴ ꦠꦁ ꦮꦶꦠꦸꦢꦠꦺ ꦗꦤꦤ꧀ꦠꦶ ꦱꦺꦴ ꦒꦲꦥꦠꦶ ꦄꦴꦒꦠꦏꦴꦭꦠꦺꦴ ꦥꦛ꧀ꦜꦴꦪ ꦠꦱ꧀ꦩꦶꦁ ꦒꦺꦲꦺ ꦢꦴꦱꦏꦩ꧀ꦩꦏꦫꦴꦢꦶꦨꦺꦢꦁ ꦗꦤꦁ ‘‘ꦄꦫꦺ ꦢꦸꦛ꧀ꦜꦢꦴꦱ ꦢꦸꦛ꧀ꦜꦢꦴꦱꦶ, ꦆꦩꦁ ꦤ ꦏꦫꦺꦴꦱꦷ’’ꦠꦶ ꦩꦸꦑꦱꦠ꧀ꦠꦷꦲꦶ ꦮꦶꦠꦸꦢꦠꦶ, ꦱꦴꦩꦶꦏꦺꦴ ꦮꦶꦪ ꦲꦸꦠ꧀ꦮꦴ ꦩꦲꦴꦗꦤꦁ ꦮꦶꦕꦴꦫꦺꦠꦶ. ꦌꦮꦁ ꦠꦴꦮ ‘‘ꦩꦤꦸꦱ꧀ꦱꦭꦺꦴꦏꦺ ꦄꦠꦶꦮꦶꦪ ꦄꦪꦸꦠ꧀ꦠ’’ꦤ꧀ꦠꦶ ꦩꦤꦸꦱ꧀ꦱꦭꦺꦴꦏꦁ ꦒꦫꦲꦶ.

ꦠꦁ ꦱꦸꦠ꧀ꦮꦴ ꦱꦧ꧀ꦧꦺ ꦮꦴꦤꦫꦴ ‘‘ꦩꦴ ꦏꦡꦺꦡ, ꦩꦴ ꦏꦡꦺꦡ, ꦄꦱꦺꦴꦠꦧ꧀ꦧꦪꦸꦠ꧀ꦠꦏꦁ ꦄꦱ꧀ꦱꦸꦩ꧀ꦲꦴ’’ꦠꦶ ꦈꦨꦺꦴꦲꦶ ꦲꦠ꧀ꦡꦺꦲꦶ ꦏꦟ꧀ꦟꦺ ꦢꦭ꦳꧀ꦲꦁ ꦥꦶꦢꦲꦶꦁꦱꦸ. ‘‘ꦆꦩꦱ꧀ꦩꦶꦁ ꦜꦴꦤꦺ ꦄꦩ꧀ꦲꦺꦲꦶ ꦆꦢꦁ ꦄꦪꦸꦠ꧀ꦠꦁ ꦱꦸꦠ’’ꦤ꧀ꦠꦶ ꦠꦁ ꦜꦴꦤꦩ꧀ꦥꦶ ꦒꦫꦲꦶꦠ꧀ꦮꦴ ꦄꦚ꧀ꦚꦠ꧀ꦡ ꦄꦒꦩꦁꦱꦸ. ꦱꦺꦴ ꦥꦶꦛ꧀ꦜꦶꦥꦴꦱꦴꦟꦺꦴ ꦒꦫꦲꦶꦠꦥꦶꦛ꧀ꦜꦶꦥꦴꦱꦴꦟꦺꦴꦪꦺꦮ ꦏꦶꦫ ꦤꦴꦩ ꦗꦴꦠꦺꦴ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ꦱꦕ꧀ꦕꦴꦤꦶ ꦥꦏꦴꦱꦺꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ, ꦱꦕ꧀ꦕꦥꦫꦶꦪꦺꦴꦱꦴꦤꦺ ꦱꦺꦴ ꦨꦶꦏ꧀ꦑꦸ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶ. ‘‘ꦠꦢꦴ ꦮꦴꦤꦫꦒꦟꦺꦴ ꦧꦸꦢ꧀ꦣꦥꦫꦶꦱꦴ ꦄꦲꦺꦴꦱꦶ, ꦮꦴꦤꦫꦶꦤ꧀ꦢꦺꦴ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦒꦫꦲꦶꦠꦗꦴꦠꦏꦮꦟ꧀ꦟꦤꦴ ꦤꦮꦩꦴ.

[꧒꧒꧐] ꧑꧐. ꦣꦩ꧀ꦩꦣꦗꦗꦴꦠꦏꦮꦟ꧀ꦟꦤꦴ

ꦱꦸꦑꦁ ꦗꦷꦮꦶꦠꦫꦹꦥꦺꦴꦱꦷꦠꦶ ꦆꦢꦁ ꦱꦠ꧀ꦡꦴ ꦮꦺꦭ꦳ꦸꦮꦤꦺ ꦮꦶꦲꦫꦤ꧀ꦠꦺꦴ ꦢꦺꦮꦢꦠ꧀ꦠꦱ꧀ꦱ ꦮꦣꦴꦪ ꦥꦫꦶꦱꦏ꧀ꦏꦤꦁ ꦄꦴꦫꦧ꧀ꦨ ꦏꦡꦺꦱꦶ. ꦠꦢꦴ ꦲꦶ ꦱꦠ꧀ꦡꦴ ‘‘ꦤ, ꦨꦶꦏ꧀ꦑꦮꦺ, ꦆꦢꦴꦤꦺꦮ, ꦥꦸꦧ꧀ꦧꦺꦥꦶ ꦢꦺꦮꦢꦠ꧀ꦠꦺꦴ ꦩꦪ꧀ꦲꦁ ꦮꦣꦴꦪ ꦥꦫꦶꦱꦏ꧀ꦏꦶꦪꦺꦮ, ꦱꦤ꧀ꦠꦴꦱꦩꦠ꧀ꦠꦩ꧀ꦥꦶ ꦥꦤ ꦏꦴꦠꦸꦁ ꦤꦴꦱꦏ꧀ꦑꦷ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦪꦱꦥꦴꦟꦶ ꦤꦴꦩ ꦫꦴꦗꦴ ꦫꦗ꧀ꦗꦁ ꦏꦴꦫꦺꦱꦶ, ꦏꦴꦭ꦳ꦏꦺꦴ ꦤꦴꦩꦱ꧀ꦱ ꦱꦺꦤꦴꦥꦠꦶ ꦄꦲꦺꦴꦱꦶ. ꦠꦢꦴ ꦧꦺꦴꦣꦶꦱꦠ꧀ꦠꦺꦴ ꦠꦱ꧀ꦱꦺꦮ ꦥꦸꦫꦺꦴꦲꦶꦠꦺꦴ ꦄꦲꦺꦴꦱꦶ ꦤꦴꦩꦺꦤ ꦣꦩ꧀ꦩꦣꦗꦺꦴ ꦤꦴꦩ, ꦫꦚ꧀ꦚꦺꦴ ꦥꦤ ꦱꦷꦱꦥ꧀ꦥꦱꦴꦣꦤꦏꦥ꧀ꦥꦏꦺꦴ ꦖꦠ꧀ꦠꦥꦴꦟꦶ ꦤꦴꦩ. ꦫꦴꦗꦴ ꦣꦩ꧀ꦩꦺꦤ ꦫꦗ꧀ꦗꦁ ꦏꦴꦫꦺꦠꦶ, ꦱꦺꦤꦴꦥꦠꦶ ꦥꦤꦱ꧀ꦱ ꦮꦶꦤꦶꦕ꧀ꦖꦪꦁ ꦏꦫꦺꦴꦤ꧀ꦠꦺꦴ ꦭꦚ꧀ꦗꦁ ꦑꦴꦢꦠꦶ ꦥꦫꦥꦶꦛ꧀ꦜꦶꦩꦁꦱꦶꦏꦺꦴ, ꦭꦚ꧀ꦗꦁ ꦒꦲꦺꦠ꧀ꦮꦴ ꦄꦱ꧀ꦱꦴꦩꦶꦏꦺ ꦱꦴꦩꦶꦏꦺ ꦏꦫꦺꦴꦠꦶ. ꦄꦡꦺꦏꦢꦶꦮꦱꦁ ꦮꦶꦤꦶꦕ꧀ꦖꦪꦺ ꦥꦫꦴꦗꦶꦠꦺꦴ ꦩꦤꦸꦱ꧀ꦱꦺꦴ ꦧꦴꦲꦴ ꦥꦒ꧀ꦒꦪ꧀ꦲ ꦏꦤ꧀ꦢꦤ꧀ꦠꦺꦴ ꦮꦶꦤꦶꦕ꧀ꦖꦪꦴ ꦤꦶꦏ꧀ꦑꦤ꧀ꦠꦺꦴ ꦫꦴꦗꦸꦥꦛ꧀ꦜꦴꦤꦁ ꦒꦕ꧀ꦖꦤ꧀ꦠꦁ ꦧꦺꦴꦣꦶꦱꦠ꧀ꦠꦁ ꦢꦶꦱ꧀ꦮꦴ ꦠꦱ꧀ꦱ ꦥꦴꦢꦺꦱꦸ ꦥꦠꦶꦠ꧀ꦮꦴ ‘‘ꦠꦸꦩ꧀ꦲꦴꦢꦶꦱꦺꦱꦸ ꦤꦴꦩ, ꦱꦴꦩꦶ, ꦫꦚ꧀ꦚꦺꦴ ꦄꦠ꧀ꦡꦚ꧀ꦕ ꦣꦩ꧀ꦩꦚ꧀ꦕ ꦄꦤꦸꦱꦴꦱꦤ꧀ꦠꦺꦱꦸ ꦏꦴꦭ꦳ꦏꦱꦺꦤꦴꦥꦠꦶ ꦭꦚ꧀ꦗꦁ ꦒꦲꦺꦠ꧀ꦮꦴ ꦄꦱ꧀ꦱꦴꦩꦶꦏꦺ ꦱꦴꦩꦶꦏꦺ ꦏꦫꦺꦴꦠꦷ’’ꦠꦶ ꦄꦠ꧀ꦠꦤꦺꦴ ꦥꦫꦴꦗꦶꦠꦨꦴꦮꦁ ꦧꦺꦴꦣꦶꦱꦠ꧀ꦠꦱ꧀ꦱ ꦏꦡꦺꦱꦶ. ꦧꦺꦴꦣꦶꦱꦠ꧀ꦠꦺꦴ ꦏꦴꦫꦸꦚ꧀ꦚꦁ ꦈꦥ꧀ꦥꦴꦢꦺꦠ꧀ꦮꦴ ‘‘ꦌꦲꦶ ꦨꦟꦺ, ꦄꦝ꧀ꦝꦁ ꦠꦺ ꦮꦶꦤꦶꦕ꧀ꦖꦶꦤꦶꦱ꧀ꦱꦴꦩꦷ’’ꦠꦶ ꦠꦁ ꦒꦲꦺꦠ꧀ꦮꦴ ꦮꦶꦤꦶꦕ꧀ꦖꦪꦛ꧀ꦜꦴꦤꦁ ꦄꦒꦩꦴꦱꦶ. ꦩꦲꦴꦗꦤꦺꦴ ꦱꦤ꧀ꦤꦶꦥꦠꦶ, ꦧꦺꦴꦣꦶꦱꦠ꧀ꦠꦺꦴ ꦠꦁ ꦄꦝ꧀ꦝꦁ ꦥꦛꦶꦮꦶꦤꦶꦕ꧀ꦖꦶꦤꦶꦠ꧀ꦮꦴ ꦱꦴꦩꦶꦏꦚ꧀ꦚꦺꦮ ꦱꦴꦩꦶꦏꦁ ꦄꦏꦴꦱꦶ.

ꦩꦲꦴꦗꦤꦺꦴ ꦱꦴꦣꦸꦏꦴꦫꦁ ꦄꦢꦴꦱꦶ, ꦱꦺꦴ ꦱꦢ꧀ꦢꦺꦴ ꦩꦲꦴ ꦄꦲꦺꦴꦱꦶ. ꦫꦴꦗꦴ ꦠꦁ ꦱꦸꦠ꧀ꦮꦴ ‘‘ꦏꦶꦁ ꦱꦢ꧀ꦢꦺꦴ ꦤꦴꦩꦺꦱꦺꦴ’’ꦠꦶ ꦥꦸꦕ꧀ꦖꦶ. ‘‘ꦢꦺꦮ, ꦣꦩ꧀ꦩꦣꦗꦥꦟ꧀ꦝꦶꦠꦺꦤ ꦢꦸꦧ꧀ꦧꦶꦤꦶꦕ꧀ꦖꦶꦠꦺꦴ ꦄꦝ꧀ꦝꦺꦴ ꦱꦸꦮꦶꦤꦶꦕ꧀ꦖꦶꦠꦺꦴ, ꦠꦠ꧀ꦫꦺꦱ ꦱꦴꦣꦸꦏꦴꦫꦱꦢ꧀ꦢꦺꦴ’’ꦠꦶ. ꦫꦴꦗꦴ ꦠꦸꦛ꧀ꦜꦺꦴ ꦧꦺꦴꦣꦶꦱꦠ꧀ꦠꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦄꦝ꧀ꦝꦺꦴ ꦏꦶꦫ ꦠꦺ ꦄꦴꦕꦫꦶꦪ ꦮꦶꦤꦶꦕ꧀ꦖꦶꦠꦺꦴ’’ꦠꦶ ꦥꦸꦕ꧀ꦖꦶ. ‘‘ꦄꦴꦩ, ꦩꦲꦴꦫꦴꦗ, ꦏꦴꦭ꦳ꦏꦺꦤ ꦢꦸꦧ꧀ꦧꦶꦤꦶꦕ꧀ꦖꦶꦠꦁ ꦄꦝ꧀ꦝꦁ ꦮꦶꦤꦶꦕ꧀ꦖꦶꦤꦶ’’ꦤ꧀ꦠꦶ ꦮꦸꦠ꧀ꦠꦺ ‘‘ꦆꦠꦺꦴ ꦢꦴꦤꦶ ꦥꦛ꧀ꦜꦴꦪ ꦠꦸꦩ꧀ꦲꦺꦮ ꦄꦝ꧀ꦝꦁ ꦮꦶꦤꦶꦕ꧀ꦖꦶꦤꦡ, ꦩꦪ꧀ꦲꦚ꧀ꦕ ꦏꦟ꧀ꦟꦱꦸꦑꦁ ꦨꦮꦶꦱ꧀ꦱꦠꦶ ꦭꦺꦴꦏꦱ꧀ꦱ ꦕ ꦮꦸꦝ꧀ꦞꦷ’’ꦠꦶ ꦮꦠ꧀ꦮꦴ ꦄꦤꦶꦕ꧀ꦖꦤ꧀ꦠꦩ꧀ꦥꦶ ꦠꦁ ‘‘ꦱꦠ꧀ꦠꦴꦤꦸꦢ꧀ꦢꦪꦴꦪ ꦮꦶꦤꦶꦕ꧀ꦖꦪꦺ ꦤꦶꦱꦷꦢꦡꦴ’’ꦠꦶ ꦪꦴꦕꦶꦠ꧀ꦮꦴ ꦱꦩ꧀ꦥꦛꦶꦕ꧀ꦖꦴꦥꦺꦱꦶ. ꦠꦠꦺꦴ ꦥꦛ꧀ꦜꦴꦪ ꦧꦺꦴꦣꦶꦱꦠ꧀ꦠꦺꦴ ꦮꦶꦤꦶꦕ꧀ꦖꦪꦺ ꦤꦶꦱꦷꦢꦠꦶ, ꦱꦴꦩꦶꦏꦺꦪꦺꦮ ꦱꦴꦩꦶꦏꦺ ꦏꦫꦺꦴꦠꦶ.

ꦏꦴꦭ꦳ꦏꦺꦴ ꦠꦠꦺꦴ ꦥꦛ꧀ꦜꦴꦪ ꦭꦚ꧀ꦗꦁ ꦄꦭꦨꦤ꧀ꦠꦺꦴ ꦭꦴꦨꦠꦺꦴ ꦥꦫꦶꦲꦴꦪꦶꦠ꧀ꦮꦴ ꦧꦺꦴꦣꦶꦱꦠ꧀ꦠꦱ꧀ꦱ ꦄꦴꦓꦴꦠꦁ ꦧꦤ꧀ꦣꦶꦠ꧀ꦮꦴ ‘‘ꦩꦲꦴꦫꦴꦗ, ꦣꦩ꧀ꦩꦣꦗꦥꦟ꧀ꦝꦶꦠꦺꦴ ꦠꦮ ꦫꦗ꧀ꦗꦁ ꦥꦠ꧀ꦡꦺꦠꦷ’’ꦠꦶ ꦧꦺꦴꦣꦶꦱꦠ꧀ꦠꦁ ꦫꦚ꧀ꦚꦺꦴ ꦄꦤ꧀ꦠꦫꦺ ꦥꦫꦶꦨꦶꦤ꧀ꦢꦶ. ꦫꦴꦗꦴ ꦄꦱꦢ꧀ꦢꦲꦤ꧀ꦠꦺꦴ ‘‘ꦩꦴ ꦌꦮꦁ ꦄꦮꦕꦴ’’ꦠꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ꦥꦸꦤ ꦠꦺꦤ ‘‘ꦱꦕꦺ ꦩꦺ ꦤ ꦱꦢ꧀ꦢꦲꦡ, ꦠꦱ꧀ꦱꦴꦒꦩꦤꦏꦴꦭꦺ ꦮꦴꦠꦥꦴꦤꦺꦤ ꦎꦭꦺꦴꦏꦺꦡ. ꦄꦡꦴꦤꦺꦤ ꦱꦏꦭꦤꦒꦫꦱ꧀ꦱ ꦄꦠ꧀ꦠꦤꦺꦴ ꦲꦠ꧀ꦡꦺ ꦏꦠꦨꦴꦮꦁ ꦥꦱ꧀ꦱꦶꦱ꧀ꦱꦡꦴ’’ꦠꦶ ꦮꦸꦠ꧀ꦠꦺ ꦫꦴꦗꦴ ꦠꦱ꧀ꦱ ꦄꦝ꧀ꦝꦏꦴꦫꦏꦥꦫꦶꦱꦁ ꦢꦶꦱ꧀ꦮꦴ ‘‘ꦌꦠꦱ꧀ꦱꦺꦮ ꦥꦫꦶꦱꦴ’’ꦠꦶ ꦱꦚ꧀ꦚꦴꦪ ꦨꦶꦗ꧀ꦗꦶꦠ꧀ꦮꦴ ‘‘ꦏꦶꦁ ꦏꦫꦺꦴꦩ ꦱꦺꦤꦴꦥꦠꦷ’’ꦠꦶ ꦥꦸꦕ꧀ꦖꦶ. ‘‘ꦢꦺꦮ, ꦌꦠꦁ ꦩꦴꦫꦺꦠꦸꦁ ꦮꦛ꧀ꦛꦠꦷ’’ꦠꦶ. ‘‘ꦎꦭ꦳ꦴꦫꦶꦏꦢꦺꦴꦱꦁ ꦄꦥꦱ꧀ꦱꦤ꧀ꦠꦴ ꦏꦡꦁ ꦩꦴꦫꦺꦱ꧀ꦱꦴꦩꦴ’’ꦠꦶ? ‘‘ꦄꦠ꧀ꦡꦺꦏꦺꦴ ꦈꦥꦴꦪꦺꦴ’’ꦠꦶ. ‘‘ꦏꦠꦫꦹꦥꦴꦪꦺꦴ’’ꦠꦶ. ‘‘ꦄꦱꦪ꧀ꦲꦩꦱ꧀ꦱ ꦏꦩ꧀ꦩꦁ ꦄꦴꦫꦺꦴꦥꦺꦠ꧀ꦮꦴ ꦠꦁ ꦏꦴꦠꦸꦁ ꦄꦱꦏ꧀ꦏꦺꦴꦤ꧀ꦠꦁ ꦠꦁ ꦠꦺꦤ ꦢꦺꦴꦱꦺꦤ ꦩꦴꦫꦺꦱ꧀ꦱꦴꦩꦴ’’ꦠꦶ. ‘‘ꦏꦶꦁ ꦥꦤ ꦄꦱꦪ꧀ꦲꦏꦩ꧀ꦩ’’ꦤ꧀ꦠꦶ? ‘‘ꦩꦲꦴꦫꦴꦗ, ꦈꦪ꧀ꦪꦴꦤꦁ ꦤꦴꦩ ꦱꦴꦫꦨꦹꦩꦶꦪꦁ ꦫꦺꦴꦥꦶꦠꦁ ꦥꦛꦶꦗꦒ꧀ꦒꦶꦪꦩꦴꦤꦁ ꦠꦷꦲꦶ ꦕꦠꦹꦲꦶ ꦱꦁꦮꦕ꧀ꦖꦫꦺꦲꦶ ꦦꦭꦁ ꦢꦺꦠꦶ. ꦠꦸꦩ꧀ꦲꦺ ꦠꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘ꦱ꧀ꦮꦺ ꦈꦪ꧀ꦪꦴꦤꦁ ꦏꦷꦭ꦳ꦶꦱ꧀ꦱꦴꦩ, ꦈꦪ꧀ꦪꦴꦤꦁ ꦩꦺ ꦩꦴꦥꦺꦲꦷ’ꦠꦶ ꦮꦢꦡ, ꦱꦺꦴ ꦩꦴꦥꦺꦠꦸꦁ ꦤ ꦱꦏ꧀ꦑꦶꦱ꧀ꦱꦠꦶ. ꦄꦡ ꦤꦁ ꦠꦱ꧀ꦩꦶꦁ ꦢꦺꦴꦱꦺ ꦩꦴꦫꦺꦱ꧀ꦱꦴꦩꦴ’’ꦠꦶ.

ꦫꦴꦗꦴ ꦧꦺꦴꦣꦶꦱꦠ꧀ꦠꦁ ꦄꦴꦩꦤ꧀ꦠꦺꦠ꧀ꦮꦴ ‘‘ꦥꦟ꧀ꦝꦶꦠ, ꦩꦪ꧀ꦲꦁ ꦥꦸꦫꦴꦟꦈꦪ꧀ꦪꦴꦤꦺ ꦕꦶꦫꦁ ꦏꦷꦭ꦳ꦶꦩ꧀ꦲ, ꦆꦢꦴꦤꦶ ꦤꦮꦈꦪ꧀ꦪꦴꦤꦺ ꦏꦷꦭ꦳ꦶꦠꦸꦏꦴꦩꦩ꧀ꦲ, ꦱ꧀ꦮꦺ ꦏꦷꦭ꦳ꦶꦱ꧀ꦱꦴꦩ, ꦈꦪ꧀ꦪꦴꦤꦁ ꦤꦺꦴ ꦩꦴꦥꦺꦲꦶ, ꦱꦕꦺ ꦩꦴꦥꦺꦠꦸꦁ ꦤ ꦱꦏ꧀ꦑꦶꦱ꧀ꦱꦱꦶ, ꦗꦷꦮꦶꦠꦁ ꦠꦺ ꦤꦠ꧀ꦡꦷ’’ꦠꦶ. ꦧꦺꦴꦣꦶꦱꦠ꧀ꦠꦺꦴ ‘‘ꦏꦴꦭ꦳ꦏꦺꦤ ꦭꦚ꧀ꦗꦁ ꦄꦭꦨꦩꦴꦤꦺꦤ ꦫꦴꦗꦴ ꦄꦤ꧀ꦠꦫꦺ ꦥꦫꦶꦨꦶꦤ꧀ꦤꦺꦴ ꦨꦮꦶꦱ꧀ꦱꦠꦷ’’ꦠꦶ ꦚꦠ꧀ꦮꦴ ‘‘ꦱꦏ꧀ꦏꦺꦴꦤ꧀ꦠꦺꦴ ꦗꦴꦤꦶꦱ꧀ꦱꦴꦩꦶ, ꦩꦲꦴꦫꦴꦗꦴ’’ꦠꦶ ꦮꦠ꧀ꦮꦴ ꦒꦺꦲꦁ ꦒꦤ꧀ꦠ꧀ꦮꦴ ꦱꦸꦨꦺꦴꦗꦤꦁ ꦨꦸꦚ꧀ꦗꦶꦠ꧀ꦮꦴ ꦕꦶꦤ꧀ꦠꦪꦩꦴꦤꦺꦴ ꦱꦪꦤꦺ ꦤꦶꦥꦗ꧀ꦗꦶ, ꦱꦏ꧀ꦏꦱ꧀ꦱ ꦨꦮꦤꦁ ꦈꦟ꧀ꦲꦴꦏꦴꦫꦁ ꦢꦱ꧀ꦱꦺꦱꦶ. ꦱꦏ꧀ꦏꦺꦴ ꦄꦴꦮꦗ꧀ꦗꦺꦤ꧀ꦠꦺꦴ ꦧꦺꦴꦣꦶꦱꦠ꧀ꦠꦱ꧀ꦱ ꦕꦶꦠ꧀ꦠꦁ ꦚꦠ꧀ꦮꦴ ꦮꦺꦒꦺꦤꦴꦒꦤ꧀ꦠ꧀ꦮꦴ ꦱꦶꦫꦶꦒꦧ꧀ꦨꦁ ꦥꦮꦶꦱꦶꦠ꧀ꦮꦴ ꦄꦴꦏꦴꦱꦺ ꦜꦠ꧀ꦮꦴ ‘‘ꦏꦶꦁ ꦕꦶꦤ꧀ꦠꦺꦱꦶ ꦥꦟ꧀ꦝꦶꦠꦴ’’ꦠꦶ ꦥꦸꦕ꧀ꦖꦶ. ‘‘ꦏꦺꦴꦱꦶ ꦠ꧀ꦮ’’ꦤ꧀ꦠꦶ? ‘‘ꦱꦏ꧀ꦏꦺꦴꦲꦩꦱ꧀ꦩꦷ’’ꦠꦶ. ‘‘ꦫꦴꦗꦴ ꦩꦁ ‘ꦈꦪ꧀ꦪꦴꦤꦁ ꦩꦴꦥꦺꦲꦷ’ꦠꦶ ꦄꦴꦲ, ꦠꦁ ꦕꦶꦤ꧀ꦠꦺꦩꦷ’’ꦠꦶ. ‘‘ꦥꦟ꧀ꦝꦶꦠ, ꦩꦴ ꦕꦶꦤ꧀ꦠꦪꦶ, ꦄꦲꦁ ꦠꦺ ꦤꦤ꧀ꦢꦤꦮꦤꦕꦶꦠ꧀ꦠꦭꦠꦴꦮꦤꦱꦢꦶꦱꦁ ꦈꦪ꧀ꦪꦴꦤꦁ ꦩꦴꦥꦺꦱ꧀ꦱꦴꦩꦶ, ꦏꦠꦫꦱ꧀ꦩꦶꦁ ꦜꦴꦤꦺ ꦩꦴꦥꦺꦩꦷ’’ꦠꦶ? ‘‘ꦄꦱꦸꦏꦛ꧀ꦜꦴꦤꦺ ꦩꦴꦥꦺꦲꦷ’’ꦠꦶ. ꦱꦏ꧀ꦏꦺꦴ ꦩꦴꦥꦺꦠ꧀ꦮꦴ ꦢꦺꦮꦥꦸꦫꦩꦺꦮ ꦒꦠꦺꦴ.

ꦥꦸꦤꦢꦶꦮꦱꦺ ꦧꦺꦴꦣꦶꦱꦠ꧀ꦠꦺꦴ ꦈꦪ꧀ꦪꦴꦤꦁ ꦥꦕ꧀ꦕꦏ꧀ꦑꦠꦺꦴ ꦢꦶꦱ꧀ꦮꦴ ꦒꦤ꧀ꦠ꧀ꦮꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ – ‘‘ꦤꦶꦛ꧀ꦜꦶꦠꦁ ꦠꦺ, ꦩꦲꦴꦫꦴꦗ, ꦈꦪ꧀ꦪꦴꦤꦁ, ꦏꦷꦭ꦳ꦱ꧀ꦱꦹ’’ꦠꦶ. ꦫꦴꦗꦴ ꦒꦤ꧀ꦠ꧀ꦮꦴ ꦄꦛ꧀ꦜꦴꦫꦱꦲꦠ꧀ꦡꦺꦤ ꦩꦤꦺꦴꦱꦶꦭꦴꦮꦟ꧀ꦟꦺꦤ ꦥꦴꦏꦴꦫꦺꦤ ꦥꦫꦶꦏ꧀ꦑꦶꦠ꧀ꦠꦁ ꦢ꧀ꦮꦴꦫꦛ꧀ꦛꦴꦭꦏꦱꦩ꧀ꦥꦤ꧀ꦤꦁ ꦥꦸꦥ꧀ꦦꦦꦭꦨꦴꦫꦨꦫꦶꦠꦤꦴꦤꦴꦫꦸꦏ꧀ꦑꦥꦛꦶꦩꦟ꧀ꦝꦶꦠꦁ ꦈꦪ꧀ꦪꦴꦤꦁ ꦢꦶꦱ꧀ꦮꦴ ꦏꦴꦭ꦳ꦏꦁ ꦥꦸꦕ꧀ꦖꦶ – ‘‘ꦥꦟ꧀ꦝꦶꦠꦺꦤ ꦄꦩ꧀ꦲꦴꦏꦁ ꦮꦕꦤꦁ ꦏꦠꦁ, ꦆꦢꦴꦤꦶ ꦏꦶꦁ ꦏꦫꦺꦴꦩꦴ’’ꦠꦶ. ‘‘ꦩꦲꦴꦫꦴꦗ, ꦌꦏꦫꦠ꧀ꦠꦺꦤ ꦈꦪ꧀ꦪꦴꦤꦁ ꦩꦴꦥꦺꦠꦸꦁ ꦱꦏ꧀ꦏꦺꦴꦤ꧀ꦠꦺꦴ ꦫꦗ꧀ꦗꦁ ꦒꦲꦺꦠꦸꦁ ꦏꦶꦁ ꦤ ꦱꦏ꧀ꦏꦺꦴꦠꦷ’’ꦠꦶ? ‘‘ꦆꦢꦴꦤꦶ ꦏꦶꦁ ꦏꦫꦺꦴꦩꦴ’’ꦠꦶ? ‘‘ꦄꦥꦫꦩ꧀ꦥꦶ ꦤꦁ ꦄꦱꦪ꧀ꦲꦏꦩ꧀ꦩꦁ ꦏꦴꦫꦺꦩꦴ’’ꦠꦶ. ‘‘ꦏꦶꦁ ꦏꦩ꧀ꦩꦁ ꦤꦴꦩꦴ’’ꦠꦶ? ‘‘ꦱꦠ꧀ꦠꦫꦠꦤꦩꦪꦁ ꦥꦺꦴꦏ꧀ꦑꦫꦟꦶꦁ ꦩꦴꦥꦺꦩꦴ’’ꦠꦶ. ꦫꦴꦗꦴ ‘‘ꦱꦴꦣꦹ’’ꦠꦶ ꦧꦺꦴꦣꦶꦱꦠ꧀ꦠꦁ ꦄꦴꦩꦤ꧀ꦠꦺꦠ꧀ꦮꦴ ‘‘ꦄꦴꦕꦫꦶꦪ, ꦈꦪ꧀ꦪꦴꦤꦁ ꦠꦴꦮ ꦠꦺ ꦩꦴꦥꦶꦠꦁ, ꦌꦠꦱ꧀ꦱ ꦥꦤ ꦄꦤꦸꦕ꧀ꦖꦮꦶꦏꦁ ꦱꦠ꧀ꦠꦫꦠꦤꦩꦪꦁ ꦥꦺꦴꦏ꧀ꦑꦫꦟꦶꦁ ꦩꦴꦥꦺꦲꦶ. ꦱꦕꦺ ꦩꦴꦥꦺꦠꦸꦁ ꦤ ꦱꦏ꧀ꦑꦶꦱ꧀ꦱꦱꦶ, ꦗꦷꦮꦶꦠꦁ ꦠꦺ ꦤꦠ꧀ꦡꦷ’’ꦠꦶ ꦄꦴꦲ. ꦧꦺꦴꦣꦶꦱꦠ꧀ꦠꦺꦴ ‘‘ꦱꦴꦣꦸ, ꦩꦲꦴꦫꦴꦗ, ꦱꦏ꧀ꦏꦺꦴꦤ꧀ꦠꦺꦴ ꦩꦴꦥꦺꦱ꧀ꦱꦴꦩꦷ’’ꦠꦶ ꦄꦴꦲ. ꦄꦡꦱ꧀ꦱ ꦱꦏ꧀ꦏꦺꦴ ꦥꦺꦴꦏ꧀ꦑꦫꦟꦶꦁ ꦩꦴꦥꦺꦱꦶ ꦱꦺꦴꦨꦒ꧀ꦒꦥ꧀ꦥꦠ꧀ꦠꦁ ꦱꦠꦠꦶꦠ꧀ꦡꦁ ꦱꦲꦱ꧀ꦱꦮꦔ꧀ꦏꦁ ꦥꦚ꧀ꦕꦮꦟ꧀ꦟꦥꦢꦸꦩꦱꦚ꧀ꦖꦤ꧀ꦤꦁ ꦤꦤ꧀ꦢꦤꦥꦺꦴꦏ꧀ꦑꦫꦟꦶꦱꦢꦶꦱꦁ.

ꦥꦸꦤꦢꦶꦮꦱꦺ ꦧꦺꦴꦣꦶꦱꦠ꧀ꦠꦺꦴ ꦠꦩ꧀ꦥꦶ ꦥꦕ꧀ꦕꦏ꧀ꦑꦁ ꦏꦠ꧀ꦮꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ – ‘‘ꦩꦴꦥꦶꦠꦴ, ꦢꦺꦮ, ꦥꦺꦴꦏ꧀ꦑꦫꦟꦷ’’ꦠꦶ. ꦫꦴꦗꦴ ꦠꦩ꧀ꦥꦶ ꦢꦶꦱ꧀ꦮꦴ ‘‘ꦆꦢꦴꦤꦶ ꦏꦶꦁ ꦏꦫꦺꦴꦩꦴ’’ꦠꦶ ꦏꦴꦭ꦳ꦏꦁ ꦥꦸꦕ꧀ꦖꦶ. ‘‘ꦈꦪ꧀ꦪꦴꦤꦱ꧀ꦱ ꦄꦤꦸꦕ꧀ꦖꦮꦶꦏꦁ ꦒꦺꦲꦁ ꦩꦴꦥꦺꦠꦸꦁ ꦄꦴꦟꦴꦥꦺꦲꦶ, ꦢꦺꦮꦴ’’ꦠꦶ. ꦫꦴꦗꦴ ꦧꦺꦴꦣꦶꦱꦠ꧀ꦠꦁ ꦄꦴꦩꦤ꧀ꦠꦺꦠ꧀ꦮꦴ ‘‘ꦆꦢꦴꦤꦶ, ꦄꦴꦕꦫꦶꦪ, ꦆꦩꦱ꧀ꦱ ꦈꦪ꧀ꦪꦴꦤꦱ꧀ꦱ ꦕꦺꦮ ꦥꦺꦴꦏ꧀ꦑꦫꦟꦶꦪꦴ ꦕ ꦄꦤꦸꦕ꧀ꦖꦮꦶꦏꦁ ꦱꦧ꧀ꦧꦢꦤ꧀ꦠꦩꦪꦁ ꦒꦺꦲꦁ ꦩꦴꦥꦺꦲꦶ, ꦤꦺꦴ ꦕꦺ ꦩꦴꦥꦺꦱ꧀ꦱꦱꦶ, ꦗꦷꦮꦶꦠꦁ ꦠꦺ ꦤꦠ꧀ꦡꦷ’’ꦠꦶ ꦄꦴꦲ. ꦄꦡꦱ꧀ꦱ ꦱꦏ꧀ꦏꦺꦴ ꦒꦺꦲꦩ꧀ꦥꦶ ꦩꦴꦥꦺꦱꦶ. ꦧꦺꦴꦣꦶꦱꦠ꧀ꦠꦺꦴ ꦥꦸꦤꦢꦶꦮꦱꦺ ꦠꦩ꧀ꦥꦶ ꦥꦕ꧀ꦕꦏ꧀ꦑꦁ ꦏꦠ꧀ꦮꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ. ꦫꦴꦗꦴ ꦠꦩ꧀ꦥꦶ ꦢꦶꦱ꧀ꦮꦴ ‘‘ꦆꦢꦴꦤꦶ ꦏꦶꦁ ꦏꦫꦺꦴꦩꦴ’’ꦠꦶ ꦏꦴꦭ꦳ꦏꦁ ꦥꦸꦕ꧀ꦖꦶ. ‘‘ꦒꦺꦲꦱ꧀ꦱ ꦄꦤꦸꦕ꧀ꦖꦮꦶꦏꦁ ꦩꦟꦶꦁ ꦩꦴꦥꦺꦠꦸꦁ ꦄꦴꦟꦴꦥꦺꦲꦶ, ꦩꦲꦴꦫꦴꦗꦴ’’ꦠꦶ ꦄꦴꦲ. ꦫꦴꦗꦴ ꦧꦺꦴꦣꦶꦱꦠ꧀ꦠꦁ ꦄꦴꦩꦤ꧀ꦠꦺꦠ꧀ꦮꦴ ‘‘ꦥꦟ꧀ꦝꦶꦠ, ꦆꦩꦱ꧀ꦱ ꦢꦤ꧀ꦠꦩꦪꦒꦺꦲꦱ꧀ꦱ ꦄꦤꦸꦕ꧀ꦖꦮꦶꦏꦁ ꦩꦟꦶꦁ ꦩꦴꦥꦺꦲꦶ, ꦩꦟꦶꦄꦴꦭꦺꦴꦏꦺꦤ ꦮꦶꦕꦫꦶꦱ꧀ꦱꦴꦩ. ꦱꦕꦺ ꦩꦴꦥꦺꦠꦸꦁ ꦤ ꦱꦏ꧀ꦏꦺꦴꦱꦶ, ꦗꦷꦮꦶꦠꦁ ꦠꦺ ꦤꦠ꧀ꦡꦷ’’ꦠꦶ ꦄꦴꦲ. ꦄꦡꦱ꧀ꦱ ꦱꦏ꧀ꦏꦺꦴ ꦩꦟꦶꦩ꧀ꦥꦶ ꦩꦴꦥꦺꦱꦶ.

ꦧꦺꦴꦣꦶꦱꦠ꧀ꦠꦺꦴ ꦥꦸꦤꦢꦶꦮꦱꦺ ꦠꦁ ꦥꦕ꧀ꦕꦏ꧀ꦑꦁ ꦏꦠ꧀ꦮꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ. ꦫꦴꦗꦴ ꦠꦩ꧀ꦥꦶ ꦢꦶꦱ꧀ꦮꦴ ‘‘ꦆꦢꦴꦤꦶ ꦏꦶꦁ ꦏꦫꦶꦱ꧀ꦱꦴꦩꦴ’’ꦠꦶ ꦏꦴꦭ꦳ꦏꦁ ꦥꦸꦕ꧀ꦖꦶ. ‘‘ꦩꦲꦴꦫꦴꦗ, ꦣꦩ꧀ꦩꦣꦗꦧ꧀ꦫꦴꦲ꧀ꦩꦟꦱ꧀ꦱ ꦆꦕ꧀ꦖꦶꦠꦶꦕ꧀ꦖꦶꦠꦢꦴꦪꦶꦏꦴ ꦢꦺꦮꦠꦴ ꦄꦠ꧀ꦡꦶ ꦩꦚ꧀ꦚꦺ, ꦆꦢꦴꦤꦶ ꦪꦁ ꦢꦺꦮꦠꦴꦥꦶ ꦩꦴꦥꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦠꦁ ꦄꦴꦟꦴꦥꦺꦲꦶ. ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦁ ꦤꦴꦩ ꦩꦤꦸꦱ꧀ꦱꦁ ꦢꦺꦮꦠꦴꦥꦶ ꦩꦴꦥꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦠꦱ꧀ꦩꦴ ‘ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦁ ꦩꦺ ꦈꦪ꧀ꦪꦴꦤꦥꦴꦭꦁ ꦩꦴꦥꦺꦲꦷ’ꦠꦶ ꦠꦁ ꦮꦢꦴꦲꦷ’’ꦠꦶ. ꦫꦴꦗꦴ ꦧꦺꦴꦣꦶꦱꦠ꧀ꦠꦁ ꦄꦴꦩꦤ꧀ꦠꦺꦠ꧀ꦮꦴ ‘‘ꦄꦴꦕꦫꦶꦪ, ꦠꦪꦴ ꦄꦩ꧀ꦲꦴꦏꦁ ꦈꦪ꧀ꦪꦴꦤꦁ, ꦥꦺꦴꦏ꧀ꦑꦫꦟꦷ, ꦢꦤ꧀ꦠꦩꦪꦥꦴꦱꦴꦢꦺꦴ, ꦠꦱ꧀ꦱ ꦄꦴꦭꦺꦴꦏꦏꦫꦟꦠ꧀ꦡꦴꦪ ꦩꦟꦶꦫꦠꦤꦚ꧀ꦕ ꦩꦴꦥꦶꦠꦁ, ꦆꦢꦴꦤꦶ ꦩꦺ ꦈꦪ꧀ꦪꦴꦤꦫꦏ꧀ꦑꦏꦁ ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦁ ꦈꦪ꧀ꦪꦴꦤꦥꦴꦭꦁ ꦩꦴꦥꦺꦲꦶ, ꦤꦺꦴ ꦕꦺ ꦩꦴꦥꦺꦱ꧀ꦱꦱꦶ, ꦗꦷꦮꦶꦠꦁ ꦠꦺ ꦤꦠ꧀ꦡꦷ’’ꦠꦶ ꦄꦴꦲ. ꦧꦺꦴꦣꦶꦱꦠ꧀ꦠꦺꦴ ‘‘ꦲꦺꦴꦠꦸ, ꦭꦨꦩꦴꦤꦺꦴ ꦗꦴꦤꦶꦱ꧀ꦱꦴꦩꦷ’’ꦠꦶ ꦒꦺꦲꦁ ꦒꦤ꧀ꦠ꧀ꦮꦴ ꦱꦸꦨꦺꦴꦗꦤꦁ ꦨꦸꦚ꧀ꦗꦶꦠ꧀ꦮꦴ ꦤꦶꦥꦤ꧀ꦤꦺꦴ ꦥꦕ꧀ꦕꦹꦱꦏꦴꦭꦺ ꦥꦧꦸꦗ꧀ꦙꦶꦠ꧀ꦮꦴ ꦱꦪꦤꦥꦷꦜꦺ ꦤꦶꦱꦶꦤ꧀ꦤꦺꦴ ꦕꦶꦤ꧀ꦠꦺꦱꦶ – ‘‘ꦱꦏ꧀ꦏꦺꦴ ꦢꦺꦮꦫꦴꦗꦴ ꦪꦁ ꦄꦠ꧀ꦠꦤꦴ ꦱꦏ꧀ꦏꦴ ꦩꦴꦥꦺꦠꦸꦁ, ꦠꦁ ꦩꦴꦥꦺꦱꦶ, ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦁ ꦥꦤ ꦈꦪ꧀ꦪꦴꦤꦥꦴꦭꦁ ꦤ ꦱꦏ꧀ꦏꦴ ꦩꦴꦥꦺꦠꦸꦁ, ꦌꦮꦁ ꦱꦤ꧀ꦠꦺ ꦥꦫꦺꦱꦁ ꦲꦠ꧀ꦡꦺ ꦩꦫꦟꦠꦺꦴ ꦄꦫꦚ꧀ꦚꦺ ꦄꦤꦴꦡꦩꦫꦟꦩꦺꦮ ꦮꦫꦠꦫ’’ꦤ꧀ꦠꦶ. ꦱꦺꦴ ꦏꦱ꧀ꦱꦕꦶ ꦄꦤꦴꦫꦺꦴꦕꦺꦠ꧀ꦮꦴ ꦥꦴꦱꦴꦢꦴ ꦎꦠꦫꦶꦠ꧀ꦮꦴ ꦄꦒ꧀ꦒꦢ꧀ꦮꦴꦫꦺꦤꦺꦮ ꦤꦒꦫꦴ ꦤꦶꦏ꧀ꦑꦩꦶꦠ꧀ꦮꦴ ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦱꦠꦁ ꦣꦩ꧀ꦩꦁ ꦄꦴꦮꦗ꧀ꦗꦩꦴꦤꦺꦴ ꦤꦶꦱꦷꦢꦶ.

ꦱꦏ꧀ꦏꦺꦴ ꦠꦁ ꦏꦴꦫꦟꦁ ꦚꦠ꧀ꦮꦴ ꦮꦤꦕꦫꦏꦺꦴ ꦮꦶꦪ ꦲꦸꦠ꧀ꦮꦴ ꦧꦺꦴꦣꦶꦱꦠ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦧ꧀ꦫꦴꦲ꧀ꦩꦟ, ꦠ꧀ꦮꦁ ꦱꦸꦑꦸꦩꦴꦭꦺꦴ, ꦄꦢꦶꦛ꧀ꦜꦥꦸꦧ꧀ꦧꦢꦸꦏ꧀ꦑꦫꦹꦥꦺꦴ ꦮꦶꦪ ꦆꦩꦁ ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ ꦏꦶꦁ ꦏꦫꦺꦴꦤ꧀ꦠꦺꦴ ꦤꦶꦱꦶꦤ꧀ꦤꦺꦴꦱꦷ’’ꦠꦶ ꦆꦩꦩꦠ꧀ꦡꦁ ꦥꦸꦕ꧀ꦖꦤ꧀ꦠꦺꦴ ꦥꦜꦩꦁ ꦒꦴꦡꦩꦴꦲ –

꧑꧓꧖. ‘‘ꦱꦸꦑꦁ ꦗꦷꦮꦶꦠꦫꦹꦥꦺꦴꦱꦶ, ꦫꦛ꧀ꦜꦴ ꦮꦶꦮꦤꦩꦴꦒꦠꦺꦴ;

ꦱꦺꦴ ꦌꦏꦏꦺꦴ ꦫꦸꦏ꧀ꦑꦩꦹꦭꦺ, ꦏꦥꦟꦺꦴ ꦮꦶꦪ ꦙꦴꦪꦱꦷ’’ꦠꦶ.

ꦠꦠ꧀ꦡ ꦱꦸꦑꦁ ꦗꦷꦮꦶꦠꦫꦹꦥꦺꦴꦱꦷꦠꦶ ꦠ꧀ꦮꦁ ꦱꦸꦑꦺꦤ ꦗꦷꦮꦶꦠꦱꦢꦶꦱꦺꦴ ꦱꦸꦑꦺꦣꦶꦠꦺꦴ ꦱꦸꦑꦥꦫꦶꦲꦠꦺꦴ ꦮꦶꦪ. ꦫꦛ꧀ꦜꦴꦠꦶ ꦄꦴꦏꦶꦟ꧀ꦟꦩꦤꦸꦱ꧀ꦱꦛ꧀ꦜꦴꦤꦴ. ꦮꦶꦮꦤꦩꦴꦒꦠꦺꦴꦠꦶ ꦤꦶꦫꦸꦢꦏꦛ꧀ꦜꦴꦤꦁ ꦄꦫꦚ꧀ꦚꦁ ꦥꦮꦶꦛ꧀ꦜꦺꦴ. ꦫꦸꦏ꧀ꦑꦩꦹꦭꦺꦠꦶ ꦫꦸꦏ꧀ꦑꦱꦩꦷꦥꦺ. ꦏꦥꦟꦺꦴ ꦮꦶꦪ ꦙꦴꦪꦱꦷꦠꦶ ꦏꦥꦟꦺꦴ ꦮꦶꦪ ꦌꦏꦏꦺꦴ ꦤꦶꦱꦶꦤ꧀ꦤꦺꦴ ꦙꦴꦪꦱꦶ ꦥꦗ꧀ꦙꦴꦪꦱꦶ, ꦏꦶꦁ ꦤꦴꦩꦺꦠꦁ ꦕꦶꦤ꧀ꦠꦺꦱꦷꦠꦶ ꦥꦸꦕ꧀ꦖꦶ.

ꦠꦁ ꦱꦸꦠ꧀ꦮꦴ ꦧꦺꦴꦣꦶꦱꦠ꧀ꦠꦺꦴ ꦢꦸꦠꦶꦪꦁ ꦒꦴꦡꦩꦴꦲ –

꧑꧔꧐. ‘‘ꦱꦸꦑꦁ ꦗꦷꦮꦶꦠꦫꦹꦥꦺꦴꦱ꧀ꦩꦶ, ꦫꦛ꧀ꦜꦴ ꦮꦶꦮꦤꦩꦴꦒꦠꦺꦴ;

ꦱꦺꦴ ꦌꦏꦏꦺꦴ ꦫꦸꦏ꧀ꦑꦩꦹꦭꦺ, ꦏꦥꦟꦺꦴ ꦮꦶꦪ ꦙꦴꦪꦴꦩꦶ;

ꦱꦠꦁ ꦣꦩ꧀ꦩꦁ ꦄꦤꦸꦱ꧀ꦱꦫ’’ꦤ꧀ꦠꦶ.

ꦠꦠ꧀ꦡ ꦱꦠꦁ ꦣꦩ꧀ꦩꦁ ꦄꦤꦸꦱ꧀ꦱꦫꦤ꧀ꦠꦶ, ꦱꦩ꧀ꦩ, ꦱꦕ꧀ꦕꦩꦺꦠꦁ, ꦄꦲꦁ ꦱꦸꦑꦁ ꦗꦷꦮꦶꦠꦫꦹꦥꦺꦴ ꦫꦛ꧀ꦜꦴ ꦕ ꦮꦶꦮꦤꦩꦴꦒꦠꦺꦴ, ꦱꦺꦴꦲꦁ ꦌꦏꦏꦺꦴꦮ ꦆꦩꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦤꦶꦱꦷꦢꦶꦠ꧀ꦮꦴ ꦏꦥꦟꦺꦴ ꦮꦶꦪ ꦙꦴꦪꦴꦩꦶ. ꦪꦁ ꦥꦤ ꦮꦢꦺꦱꦶ ‘‘ꦏꦶꦁ ꦤꦴꦩꦺꦠꦁ ꦕꦶꦤ꧀ꦠꦺꦱꦷ’’ꦠꦶ, ꦠꦁ ꦠꦺ ꦥꦮꦺꦢꦺꦩꦶ ‘‘ꦱꦠꦁ ꦣꦩ꧀ꦩ’’ꦤ꧀ꦠꦶ. ꦄꦲꦚ꧀ꦲꦶ ꦱꦠꦁ ꦣꦩ꧀ꦩꦁ ꦄꦤꦸꦱ꧀ꦱꦫꦤ꧀ꦠꦺꦴ ꦆꦣ ꦤꦶꦱꦶꦤ꧀ꦤꦺꦴ. ꦱꦠꦁ ꦣꦩ꧀ꦩꦤ꧀ꦠꦶ ꦧꦸꦢ꧀ꦣꦥꦕ꧀ꦕꦺꦏꦧꦸꦢ꧀ꦣꦧꦸꦢ꧀ꦣꦱꦴꦮꦏꦴꦤꦁ ꦱꦠꦁ ꦱꦥ꧀ꦥꦸꦫꦶꦱꦴꦤꦁ ꦥꦟ꧀ꦝꦶꦠꦴꦤꦁ ꦣꦩ꧀ꦩꦁ. ꦭꦴꦨꦺꦴ ꦄꦭꦴꦨꦺꦴ ꦪꦱꦺꦴ ꦄꦪꦱꦺꦴ ꦤꦶꦤ꧀ꦢꦴ ꦥꦱꦁꦱꦴ ꦱꦸꦑꦁ ꦢꦸꦏ꧀ꦑꦤ꧀ꦠꦶ ꦄꦪꦚ꧀ꦲꦶ ꦄꦛ꧀ꦜꦮꦶꦣꦺꦴ ꦭꦺꦴꦏꦣꦩ꧀ꦩꦺꦴ. ꦆꦩꦶꦤꦴ ꦥꦤ ꦄꦧ꧀ꦨꦴꦲꦠꦴ ꦱꦤ꧀ꦠꦺꦴ ꦤ ꦏꦩ꧀ꦥꦤ꧀ꦠꦶ ꦤ ꦥꦮꦺꦣꦺꦤ꧀ꦠꦶ, ꦄꦪꦩꦺꦠ꧀ꦡ ꦄꦏꦩ꧀ꦥꦤꦱꦔ꧀ꦑꦴꦠꦺꦴ ꦱꦠꦁ ꦣꦩ꧀ꦩꦺꦴ ꦆꦩꦁ ꦄꦤꦸꦱ꧀ꦱꦫꦤ꧀ꦠꦺꦴ ꦤꦶꦱꦶꦤ꧀ꦤꦺꦴꦩ꧀ꦲꦷꦠꦶ ꦢꦷꦥꦺꦠꦶ.

ꦄꦡ ꦤꦁ ꦱꦏ꧀ꦏꦺꦴ ‘‘ꦌꦮꦁ ꦱꦤ꧀ꦠꦺ, ꦧ꧀ꦫꦴꦲ꧀ꦩꦟ, ꦆꦩꦱ꧀ꦩꦶꦁ ꦜꦴꦤꦺ ꦏꦱ꧀ꦩꦴ ꦤꦶꦱꦶꦤ꧀ꦤꦺꦴꦱꦷ’’ꦠꦶ. ‘‘ꦫꦴꦗꦴ ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦁ ꦈꦪ꧀ꦪꦴꦤꦥꦴꦭꦁ ꦄꦴꦲꦫꦴꦥꦺꦠꦶ, ꦠꦴꦢꦶꦱꦁ ꦤ ꦱꦏ꧀ꦏꦺꦴꦩꦶ ꦭꦢ꧀ꦣꦸꦁ, ꦱꦺꦴꦲꦁ ‘ꦏꦶꦁ ꦩꦺ ꦥꦫꦱ꧀ꦱ ꦲꦠ꧀ꦡꦺ ꦩꦫꦟꦺꦤ, ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ ꦄꦤꦴꦡꦩꦫꦟꦁ ꦩꦫꦶꦱ꧀ꦱꦴꦩꦷ’ꦠꦶ ꦕꦶꦤ꧀ꦠꦺꦠ꧀ꦮꦴ ꦆꦣꦴꦒꦤ꧀ꦠ꧀ꦮꦴ ꦤꦶꦱꦶꦤ꧀ꦤꦺꦴ’’ꦠꦶ. ‘‘ꦧ꧀ꦫꦴꦲ꧀ꦩꦟ, ꦄꦲꦁ ꦱꦏ꧀ꦏꦺꦴ ꦢꦺꦮꦫꦴꦗꦴ, ꦩꦪꦴ ꦠꦺ ꦈꦪ꧀ꦪꦴꦤꦴꦢꦷꦤꦶ ꦩꦴꦥꦶꦠꦴꦤꦶ, ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦁ ꦈꦪ꧀ꦪꦴꦤꦥꦴꦭꦁ ꦩꦴꦥꦺꦠꦸꦁ ꦤ ꦱꦏ꧀ꦏꦴ, ꦠꦸꦩ꧀ꦲꦴꦏꦁ ꦫꦚ꧀ꦚꦺꦴ ꦱꦷꦱꦥ꧀ꦥꦱꦴꦣꦤꦏꦥ꧀ꦥꦏꦺꦴ ꦖꦠ꧀ꦠꦥꦴꦟꦶ ꦤꦴꦩ, ꦱꦺꦴ ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦺꦴ, ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦺꦤ ꦈꦪ꧀ꦪꦴꦤꦥꦴꦭꦺꦤ ꦄꦠ꧀ꦡꦺ ꦱꦠꦶ ꦌꦠꦁ ꦏꦥ꧀ꦥꦏꦁ ꦈꦪ꧀ꦪꦴꦤꦥꦴꦭꦁ ꦏꦴꦠꦸꦁ ꦮꦢꦺꦲꦷ’’ꦠꦶ. ꦆꦠꦶ ꦱꦏ꧀ꦏꦺꦴ ꦧꦺꦴꦣꦶꦱꦠ꧀ꦠꦱ꧀ꦱ ꦎꦮꦴꦢꦁ ꦢꦠ꧀ꦮꦴ ‘‘ꦩꦴ ꦨꦴꦪꦷ’’ꦠꦶ ꦱꦩꦱ꧀ꦱꦴꦱꦺꦠ꧀ꦮꦴ ꦄꦠ꧀ꦠꦤꦺꦴ ꦢꦺꦮꦥꦸꦫꦩꦺꦮ ꦒꦠꦺꦴ.

ꦧꦺꦴꦣꦶꦱꦠ꧀ꦠꦺꦴ ꦒꦺꦲꦁ ꦒꦤ꧀ꦠ꧀ꦮꦴ ꦨꦸꦠ꧀ꦠꦥꦴꦠꦫꦴꦱꦺꦴ ꦫꦴꦗꦢ꧀ꦮꦴꦫꦁ ꦒꦤ꧀ꦠ꧀ꦮꦴ ꦖꦠ꧀ꦠꦥꦴꦟꦶꦩ꧀ꦥꦶ ꦠꦠ꧀ꦡꦺꦮ ꦢꦶꦱ꧀ꦮꦴ ꦲꦠ꧀ꦡꦺ ꦒꦲꦺꦠ꧀ꦮꦴ ‘‘ꦠ꧀ꦮꦁ ꦏꦶꦫ, ꦱꦩ꧀ꦩ ꦖꦠ꧀ꦠꦥꦴꦟꦶ, ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦺꦴꦱꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦏꦺꦴ ꦠꦺ ꦩꦪ꧀ꦲꦁ ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦨꦴꦮꦁ ꦄꦴꦕꦶꦏ꧀ꦑꦷ’’ꦠꦶ ꦮꦸꦠ꧀ꦠꦺ ‘‘ꦱꦏ꧀ꦏꦺꦴ, ꦢꦺꦮꦫꦴꦗꦴ’’ꦠꦶ ꦮꦠ꧀ꦮꦴ ‘‘ꦏꦶꦁꦏꦴꦫꦟꦴ ꦄꦴꦕꦶꦏ꧀ꦑꦷ’’ꦠꦶ ꦥꦸꦛ꧀ꦜꦺꦴ ‘‘ꦆꦩꦶꦤꦴ ꦤꦴꦩ ꦏꦴꦫꦟꦺꦤꦴ’’ꦠꦶ ꦱꦧ꧀ꦧꦁ ꦄꦴꦕꦶꦏ꧀ꦑꦶ. ꦱꦺꦴ ‘‘ꦄꦴꦩ, ꦄꦲꦁ ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦺꦴ’’ꦠꦶ ꦄꦴꦲ. ꦄꦡ ꦤꦁ ꦧꦺꦴꦣꦶꦱꦠ꧀ꦠꦺꦴ ꦲꦠ꧀ꦡꦺ ꦒꦲꦺꦠ꧀ꦮꦴꦮ ꦫꦚ꧀ꦚꦺꦴ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ‘‘ꦄꦪꦁ, ꦩꦲꦴꦫꦴꦗ, ꦖꦠ꧀ꦠꦥꦴꦟꦶ, ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦺꦴ, ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦺꦤ ꦈꦪ꧀ꦪꦴꦤꦥꦴꦭꦺꦤ ꦄꦠ꧀ꦡꦺ ꦱꦠꦶ ꦆꦩꦁ ꦈꦪ꧀ꦪꦴꦤꦥꦴꦭꦁ ꦏꦫꦺꦴꦡꦴ’’ꦠꦶ ꦄꦴꦲ. ꦄꦡ ꦤꦁ ꦫꦴꦗꦴ ‘‘ꦠ꧀ꦮꦁ ꦏꦶꦫ ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦺꦴꦱꦷ’’ꦠꦶ ꦥꦸꦕ꧀ꦖꦶ. ‘‘ꦄꦴꦩ, ꦩꦲꦴꦫꦴꦗꦴ’’ꦠꦶ. ‘‘ꦏꦠꦩꦺꦲꦶ ꦕꦠꦸꦫꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴꦱꦷ’’ꦠꦶ?

‘‘ꦄꦤꦸꦱꦹꦪꦏꦺꦴ ꦄꦲꦁ ꦢꦺꦮ, ꦄꦩꦗ꧀ꦗꦥꦴꦪꦏꦺꦴ ꦄꦲꦁ;

ꦤꦶꦱ꧀ꦤꦺꦲꦏꦺꦴ ꦄꦲꦁ ꦢꦺꦮ, ꦄꦏ꧀ꦏꦺꦴꦣꦤꦁ ꦄꦣꦶꦛ꧀ꦜꦶꦠꦺꦴ’’ꦠꦶ.

‘‘ꦩꦪ꧀ꦲꦚ꧀ꦲꦶ, ꦩꦲꦴꦫꦴꦗ, ꦈꦱꦹꦪꦴ ꦤꦴꦩ ꦤꦠ꧀ꦡꦶ, ꦩꦗ꧀ꦗꦁ ꦩꦺ ꦤ ꦥꦶꦮꦶꦠꦥꦸꦧ꧀ꦧꦁ, ꦥꦫꦺꦱꦸ ꦩꦺ ꦱ꧀ꦤꦺꦲꦺꦴ ꦮꦴ ꦏꦺꦴꦣꦺꦴ ꦮꦴ ꦤ ꦨꦹꦠꦥꦹꦧ꧀ꦧꦺꦴ. ꦆꦩꦺꦲꦶ ꦕꦠꦹꦲꦶ ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴꦩ꧀ꦲꦷ’’ꦠꦶ.

ꦄꦡ ꦤꦁ ꦫꦴꦗꦴ, ꦨꦺꦴ ꦖꦠ꧀ꦠꦥꦴꦟꦶ, ‘‘ꦄꦤꦸꦱꦹꦪꦏꦺꦴꦱ꧀ꦩꦷ’’ꦠꦶ ꦮꦢꦱꦷꦠꦶ. ‘‘ꦄꦴꦩ, ꦢꦺꦮ, ꦄꦤꦸꦱꦹꦪꦏꦺꦴꦩ꧀ꦲꦷ’’ꦠꦶ. ‘‘ꦏꦶꦁ ꦄꦴꦫꦩ꧀ꦩꦟꦁ ꦢꦶꦱ꧀ꦮꦴ ꦄꦤꦸꦱꦹꦪꦏꦺꦴ ꦗꦴꦠꦺꦴꦱꦷ’’ꦠꦶ? ‘‘ꦱꦸꦟꦴꦲꦶ ꦢꦺꦮꦴ’’ꦠꦶ ꦄꦠ꧀ꦠꦤꦺꦴ ꦄꦤꦸꦱꦹꦪꦏꦏꦴꦫꦟꦁ ꦏꦡꦺꦤ꧀ꦠꦺꦴ ꦆꦩꦁ ꦒꦴꦡꦩꦴꦲ –

‘‘ꦆꦠ꧀ꦡꦶꦪꦴ ꦏꦴꦫꦟꦴ ꦫꦴꦗ, ꦧꦤ꧀ꦣꦴꦥꦺꦱꦶꦁ ꦥꦸꦫꦺꦴꦲꦶꦠꦁ;

ꦱꦺꦴ ꦩꦁ ꦄꦠ꧀ꦡꦺ ꦤꦶꦮꦺꦢꦺꦱꦶ, ꦠꦱ꧀ꦩꦴꦲꦁ ꦄꦤꦸꦱꦹꦪꦏꦺꦴ’’ꦠꦶ.

ꦠꦱ꧀ꦱꦠ꧀ꦡꦺꦴ – ꦄꦲꦁ, ꦢꦺꦮ, ꦥꦸꦧ꧀ꦧꦺ ꦆꦩꦱ꧀ꦩꦶꦁꦪꦺꦮ ꦧꦴꦫꦴꦟꦱꦶꦤꦒꦫꦺ ꦠꦴꦢꦶꦱꦺꦴꦮ ꦫꦴꦗꦴ ꦲꦸꦠ꧀ꦮꦴ ꦆꦠ꧀ꦡꦶꦪꦴ ꦏꦴꦫꦟꦴ ꦥꦸꦫꦺꦴꦲꦶꦠꦁ ꦧꦤ꧀ꦣꦴꦥꦺꦱꦶꦁ.

‘‘ꦄꦧꦢ꧀ꦣꦴ ꦠꦠ꧀ꦡ ꦧꦗ꧀ꦙꦤ꧀ꦠꦶ, ꦪꦠ꧀ꦡ ꦧꦴꦭꦴ ꦥꦨꦴꦱꦫꦺ;

ꦧꦢ꧀ꦣꦴꦥꦶ ꦠꦠ꧀ꦡ ꦩꦸꦕ꧀ꦕꦤ꧀ꦠꦶ, ꦪꦠ꧀ꦡ ꦣꦷꦫꦴ ꦥꦨꦴꦱꦫꦺ’’ꦠꦶ. (ꦗꦴ. ꧑.꧑.꧑꧒꧐) –