꧒꧒. ꦩꦲꦴꦤꦶꦥꦴꦠꦺꦴ

[꧕꧓꧘] ꧑. ꦩꦹꦒꦥꦏ꧀ꦑꦗꦴꦠꦏꦮꦟ꧀ꦟꦤꦴ

ꦩꦴ ꦥꦟ꧀ꦝꦶꦕ꧀ꦕꦪꦁ ꦮꦶꦨꦴꦮꦪꦴꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦩꦲꦴꦨꦶꦤꦶꦏ꧀ꦑꦩꦤꦁ ꦄꦴꦫꦧ꧀ꦨ ꦏꦡꦺꦱꦶ. ꦌꦏꦢꦶꦮꦱꦚ꧀ꦲꦶ ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦱꦤ꧀ꦤꦶꦱꦶꦤ꧀ꦤꦴ ꦨꦒꦮꦠꦺꦴ ꦤꦺꦏ꧀ꦑꦩ꧀ꦩꦥꦴꦫꦩꦶꦁ ꦮꦟ꧀ꦟꦪꦤ꧀ꦠꦴ ꦤꦶꦱꦷꦢꦶꦁꦱꦸ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ ‘‘ꦨꦶꦏ꧀ꦑꦮꦺ, ꦆꦢꦴꦤꦶ ꦩꦩ ꦥꦹꦫꦶꦠꦥꦴꦫꦩꦶꦱ꧀ꦱ ꦫꦗ꧀ꦗꦁ ꦖꦝ꧀ꦝꦺꦠ꧀ꦮꦴ ꦩꦲꦴꦨꦶꦤꦶꦏ꧀ꦑꦩꦤꦁ ꦤꦴꦩ ꦄꦤꦕ꧀ꦖꦫꦶꦪꦁ. ꦄꦲꦚ꧀ꦲꦶ ꦥꦸꦧ꧀ꦧꦺ ꦄꦥꦫꦶꦥꦏ꧀ꦏꦺ ꦚꦴꦟꦺ ꦥꦴꦫꦩꦶꦪꦺꦴ ꦥꦹꦫꦺꦤ꧀ꦠꦺꦴꦥꦶ ꦫꦗ꧀ꦗꦁ ꦖꦝ꧀ꦝꦺꦠ꧀ꦮꦴ ꦤꦶꦏ꧀ꦑꦤ꧀ꦠꦺꦴꦪꦺꦮꦴ’’ꦠꦶ ꦮꦠ꧀ꦮꦴ ꦠꦺꦲꦶ ꦪꦴꦕꦶꦠꦺꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦏꦴꦱꦶꦫꦛ꧀ꦜꦺ ꦧꦴꦫꦴꦟꦱꦶꦪꦁ ꦏꦴꦱꦶꦫꦴꦗꦴ ꦤꦴꦩ ꦣꦩ꧀ꦩꦺꦤ ꦫꦗ꧀ꦗꦁ ꦏꦴꦫꦺꦱꦶ. ꦠꦱ꧀ꦱ ꦱꦺꦴꦭ꦳ꦱꦱꦲꦱ꧀ꦱꦴ ꦆꦠ꧀ꦡꦶꦪꦺꦴ ꦄꦲꦺꦱꦸꦁ. ꦠꦴꦱꦸ ꦌꦏꦴꦥꦶ ꦥꦸꦠ꧀ꦠꦁ ꦮꦴ ꦣꦷꦠꦫꦁ ꦮꦴ ꦤ ꦭꦨꦶ. ꦤꦴꦒꦫꦴ ‘‘ꦄꦩ꧀ꦲꦴꦏꦁ ꦫꦚ꧀ꦚꦺꦴ ꦮꦁꦱꦴꦤꦸꦫꦏ꧀ꦑꦏꦺꦴ ꦌꦏꦺꦴꦥꦶ ꦥꦸꦠ꧀ꦠꦺꦴ ꦤꦠ꧀ꦡꦷ’’ꦠꦶ ꦫꦴꦗꦔ꧀ꦒꦟꦺ ꦱꦤ꧀ꦤꦶꦥꦠꦶꦠ꧀ꦮꦴ ꦏꦸꦱꦗꦴꦠꦏꦺ (ꦗꦴ. ꧒.꧒꧐.꧑ ꦄꦴꦢꦪꦺꦴ) ꦄꦴꦒꦠꦤꦪꦺꦤꦺꦮ ꦫꦴꦗꦴꦤꦁ ꦌꦮꦩꦴꦲꦁꦱꦸ ‘‘ꦢꦺꦮ, ꦥꦸꦠ꧀ꦠꦁ ꦥꦠ꧀ꦡꦺꦡꦴ’’ꦠꦶ. ꦫꦴꦗꦴ ꦠꦺꦱꦁ ꦮꦕꦤꦁ ꦱꦸꦠ꧀ꦮꦴ ꦱꦺꦴꦭ꦳ꦱꦱꦲꦱ꧀ꦱꦴ ꦆꦠ꧀ꦡꦶꦪꦺꦴ ‘‘ꦠꦸꦩ꧀ꦲꦺ ꦥꦸꦠ꧀ꦠꦁ ꦥꦠ꧀ꦡꦺꦡꦴ’’ꦠꦶ ꦄꦴꦟꦴꦥꦺꦱꦶ. ꦠꦴ ꦕꦤ꧀ꦢꦴꦢꦷꦤꦁ ꦢꦺꦮꦠꦴꦤꦁ ꦄꦴꦪꦴꦕꦤꦈꦥꦛ꧀ꦜꦴꦤꦴꦢꦷꦤꦶ ꦏꦠ꧀ꦮꦴ ꦥꦠ꧀ꦡꦺꦤ꧀ꦠꦶꦪꦺꦴꦥꦶ ꦥꦸꦠ꧀ꦠꦁ ꦮꦴ ꦣꦷꦠꦫꦁ ꦮꦴ ꦤ ꦭꦨꦶꦁꦱꦸ. ꦄꦒ꧀ꦒꦩꦲꦺꦱꦷ ꦥꦤꦱ꧀ꦱ ꦩꦢ꧀ꦢꦫꦴꦗꦣꦷꦠꦴ ꦕꦤ꧀ꦢꦴꦢꦺꦮꦷ ꦤꦴꦩ ꦱꦷꦭꦱꦩ꧀ꦥꦤ꧀ꦤꦴ ꦄꦲꦺꦴꦱꦶ. ꦫꦴꦗꦴ ‘‘ꦨꦢ꧀ꦢꦺ, ꦠ꧀ꦮꦩ꧀ꦥꦶ ꦥꦸꦠ꧀ꦠꦁ ꦥꦠ꧀ꦡꦺꦲꦷ’’ꦠꦶ ꦄꦴꦲ. ꦱꦴ ꦥꦸꦟ꧀ꦟꦩꦢꦶꦮꦱꦺ ꦈꦥꦺꦴꦱꦡꦁ ꦱꦩꦴꦢꦶꦪꦶꦠ꧀ꦮꦴ ꦕꦹꦭ꦳ꦱꦪꦤꦺ ꦤꦶꦥꦤ꧀ꦤꦴꦮ ꦄꦠ꧀ꦠꦤꦺꦴ ꦱꦷꦭꦁ ꦄꦴꦮꦗ꧀ꦗꦺꦠ꧀ꦮꦴ ‘‘ꦱꦕꦴꦲꦁ ꦄꦑꦟ꧀ꦝꦱꦷꦭꦴ ꦆꦩꦶꦤꦴ ꦩꦺ ꦱꦕ꧀ꦕꦺꦤ ꦥꦸꦠ꧀ꦠꦺꦴ ꦈꦥ꧀ꦥꦗ꧀ꦗꦠꦹ’’ꦠꦶ ꦱꦕ꧀ꦕꦏꦶꦫꦶꦪꦁ ꦄꦏꦴꦱꦶ.

ꦠꦱ꧀ꦱꦴ ꦱꦷꦭꦠꦺꦗꦺꦤ ꦱꦏ꧀ꦏꦱ꧀ꦱ ꦨꦮꦤꦁ ꦈꦟ꧀ꦲꦴꦏꦴꦫꦁ ꦢꦱ꧀ꦱꦺꦱꦶ. ꦱꦏ꧀ꦏꦺꦴ ꦄꦴꦮꦗ꧀ꦗꦺꦤ꧀ꦠꦺꦴ ꦠꦁ ꦏꦴꦫꦟꦁ ꦚꦠ꧀ꦮꦴ ‘‘ꦕꦤ꧀ꦢꦴꦢꦺꦮꦷ ꦥꦸꦠ꧀ꦠꦁ ꦥꦠ꧀ꦡꦺꦠꦶ, ꦲꦤ꧀ꦢꦴꦲꦁ ꦥꦸꦠ꧀ꦠꦁ ꦢꦱ꧀ꦱꦴꦩꦷ’’ꦠꦶ ꦠꦱ꧀ꦱꦴꦤꦸꦕ꧀ꦖꦮꦶꦏꦁ ꦥꦸꦠ꧀ꦠꦁ ꦈꦥꦣꦴꦫꦺꦤ꧀ꦠꦺꦴ ꦧꦺꦴꦣꦶꦱꦠ꧀ꦠꦁ ꦥꦱ꧀ꦱꦶ. ꦧꦺꦴꦣꦶꦱꦠ꧀ꦠꦺꦴꦥꦶ ꦠꦢꦴꦮꦷꦱꦠꦶꦮꦱ꧀ꦱꦴꦤꦶ ꦧꦴꦫꦴꦟꦱꦶꦪꦁ ꦫꦗ꧀ꦗꦁ ꦏꦴꦫꦺꦠ꧀ꦮꦴ ꦠꦠꦺꦴ ꦕꦸꦠꦺꦴ ꦈꦱ꧀ꦱꦢꦤꦶꦫꦪꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦄꦱꦷꦠꦶꦮꦱ꧀ꦱꦱꦲꦱ꧀ꦱꦴꦤꦶ ꦠꦠ꧀ꦡ ꦥꦕ꧀ꦕꦶꦠ꧀ꦮꦴ ꦠꦠꦺꦴ ꦕꦮꦶꦠ꧀ꦮꦴ ꦠꦴꦮꦠꦶꦁꦱꦨꦮꦤꦺ ꦤꦶꦧ꧀ꦧꦠ꧀ꦠꦶ. ꦠꦠ꧀ꦡꦴꦥꦶ ꦪꦴꦮꦠꦴꦪꦸꦏꦁ ꦜꦠ꧀ꦮꦴ ꦠꦠꦺꦴ ꦕꦮꦶꦠ꧀ꦮꦴ ꦈꦥꦫꦶꦢꦺꦮꦭꦺꦴꦏꦁ ꦒꦤ꧀ꦠꦸꦏꦴꦩꦺꦴ ꦄꦲꦺꦴꦱꦶ. ꦱꦏ꧀ꦏꦺꦴ ꦠꦱ꧀ꦱ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ‘‘ꦩꦴꦫꦶꦱ, ꦠꦪꦶ ꦩꦤꦸꦱ꧀ꦱꦭꦺꦴꦏꦺ ꦈꦥ꧀ꦥꦤ꧀ꦤꦺ ꦥꦴꦫꦩꦶꦪꦺꦴ ꦕ ꦠꦺ ꦥꦹꦫꦶꦱ꧀ꦱꦤ꧀ꦠꦶ, ꦩꦲꦴꦗꦤꦱ꧀ꦱ ꦮꦸꦝ꧀ꦞꦶ ꦕ ꦨꦮꦶꦱ꧀ꦱꦠꦶ, ꦄꦪꦁ ꦏꦴꦱꦶꦫꦚ꧀ꦚꦺꦴ ꦕꦤ꧀ꦢꦴꦢꦺꦮꦷ ꦤꦴꦩ ꦄꦒ꧀ꦒꦩꦲꦺꦱꦷ ꦥꦸꦠ꧀ꦠꦁ ꦥꦠ꧀ꦡꦺꦠꦶ, ꦠꦱ꧀ꦱꦴ ꦏꦸꦕ꧀ꦖꦶꦪꦁ ꦈꦥ꧀ꦥꦗ꧀ꦗꦴꦲꦷ’’ꦠꦶ ꦮꦠ꧀ꦮꦴ ꦄꦚ꧀ꦚꦺꦱꦚ꧀ꦕ ꦕꦮꦤꦣꦩ꧀ꦩꦴꦤꦁ ꦥꦚ꧀ꦕꦱꦠꦴꦤꦁ ꦢꦺꦮꦥꦸꦠ꧀ꦠꦴꦤꦁ ꦥꦛꦶꦚ꧀ꦚꦁ ꦒꦲꦺꦠ꧀ꦮꦴ ꦱꦏꦛ꧀ꦜꦴꦤꦩꦺꦮ ꦄꦒꦩꦴꦱꦶ. ꦱꦺꦴ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦥꦚ꧀ꦕꦲꦶ ꦢꦺꦮꦥꦸꦠ꧀ꦠꦱꦠꦺꦲꦶ ꦱꦢ꧀ꦣꦶꦁ ꦢꦺꦮꦭꦺꦴꦏꦠꦺꦴ ꦕꦮꦶꦠ꧀ꦮꦴ ꦱꦪꦁ ꦕꦤ꧀ꦢꦴꦢꦺꦮꦶꦪꦴ ꦏꦸꦕ꧀ꦖꦶꦩ꧀ꦲꦶ ꦥꦛꦶꦱꦤ꧀ꦣꦶꦁ ꦒꦟ꧀ꦲꦶ. ꦆꦠꦫꦺ ꦥꦤ ꦢꦺꦮꦥꦸꦠ꧀ꦠꦴ ꦄꦩꦕ꧀ꦕꦨꦫꦶꦪꦴꦤꦁ ꦏꦸꦕ꧀ꦖꦷꦱꦸ ꦥꦛꦶꦱꦤ꧀ꦣꦶꦁ ꦒꦟ꧀ꦲꦶꦁꦱꦸ.

ꦠꦢꦴ ꦕꦤ꧀ꦢꦴꦢꦺꦮꦶꦪꦴ ꦏꦸꦕ꧀ꦖꦶ ꦮꦗꦶꦫꦥꦸꦟ꧀ꦟꦴ ꦮꦶꦪ ꦄꦲꦺꦴꦱꦶ. ꦱꦴ ꦒꦧ꧀ꦨꦱ꧀ꦱ ꦥꦠꦶꦛ꧀ꦜꦶꦠꦨꦴꦮꦁ ꦚꦠ꧀ꦮꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ. ꦠꦁ ꦱꦸꦠ꧀ꦮꦴ ꦫꦴꦗꦴ ꦒꦧ꧀ꦨꦱ꧀ꦱ ꦥꦫꦶꦲꦴꦫꦁ ꦢꦴꦥꦺꦱꦶ. ꦱꦴ ꦥꦫꦶꦥꦸꦟ꧀ꦟꦒꦧ꧀ꦨꦴ ꦢꦱꦩꦴꦱꦕ꧀ꦕꦪꦺꦤ ꦣꦚ꧀ꦚꦥꦸꦚ꧀ꦚꦭꦏ꧀ꦑꦟꦱꦩ꧀ꦥꦤ꧀ꦤꦁ ꦥꦸꦠ꧀ꦠꦁ ꦮꦶꦗꦴꦪꦶ. ꦠꦁ ꦢꦶꦮꦱꦩꦺꦮ ꦄꦩꦕ꧀ꦕꦒꦺꦲꦺꦱꦸ ꦥꦚ꧀ꦕ ꦏꦸꦩꦴꦫꦱꦠꦴꦤꦶ ꦗꦴꦪꦶꦁꦱꦸ. ꦠꦱ꧀ꦩꦶꦁ ꦑꦟꦺ ꦫꦴꦗꦴ ꦄꦩꦕ꧀ꦕꦒꦟꦥꦫꦶꦮꦸꦠꦺꦴ ꦩꦲꦴꦠꦭꦺ ꦤꦶꦱꦶꦤ꧀ꦤꦺꦴ ꦄꦲꦺꦴꦱꦶ. ꦄꦡꦱ꧀ꦱ ‘‘ꦥꦸꦠ꧀ꦠꦺꦴ, ꦠꦺ ꦢꦺꦮ, ꦗꦴꦠꦺꦴ’’ꦠꦶ ꦄꦴꦫꦺꦴꦕꦪꦶꦁꦱꦸ. ꦠꦺꦱꦁ ꦮꦕꦤꦁ ꦱꦸꦠ꧀ꦮꦴ ꦫꦚ꧀ꦚꦺꦴ ꦥꦸꦠ꧀ꦠꦥꦺꦩꦁ ꦈꦥ꧀ꦥꦗ꧀ꦗꦶꦠ꧀ꦮꦴ ꦖꦮꦶꦪꦴꦢꦷꦤꦶ ꦖꦶꦤ꧀ꦢꦶꦠ꧀ꦮꦴ ꦄꦛ꧀ꦜꦶꦩꦶꦚ꧀ꦗꦁ ꦄꦴꦲꦕ꧀ꦕ ꦄꦛ꧀ꦜꦴꦱꦶ, ꦄꦧ꧀ꦨꦤ꧀ꦠꦫꦺ ꦥꦷꦠꦶ ꦈꦥ꧀ꦥꦗ꧀ꦗꦶ, ꦲꦢꦪꦁ ꦱꦷꦠꦭꦁ ꦗꦴꦠꦁ. ꦱꦺꦴ ꦄꦩꦕ꧀ꦕꦺ ꦥꦸꦕ꧀ꦖꦶ ‘‘ꦠꦸꦛ꧀ꦜꦴ ꦤꦸ ꦑꦺꦴ ꦠꦸꦩ꧀ꦲꦺ, ꦩꦩ ꦥꦸꦠ꧀ꦠꦺꦴ ꦗꦴꦠꦺꦴ’’ꦠꦶ? ‘‘ꦏꦶꦁ ꦏꦡꦺꦡ, ꦢꦺꦮ, ꦩꦪꦁ ꦥꦸꦧ꧀ꦧꦺ ꦄꦤꦴꦡꦴ, ꦆꦢꦴꦤꦶ ꦥꦤ ꦱꦤꦴꦡꦴ ꦗꦴꦠꦴ, ꦱꦴꦩꦶꦏꦺꦴ ꦤꦺꦴ ꦭꦢ꧀ꦣꦺꦴ’’ꦠꦶ ꦄꦴꦲꦁꦱꦸ. ꦫꦴꦗꦴ ꦩꦲꦴꦱꦺꦤꦒꦸꦠ꧀ꦠꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦄꦴꦟꦴꦥꦺꦱꦶ ‘‘ꦩꦩ ꦥꦸꦠ꧀ꦠꦱ꧀ꦱ ꦥꦫꦶꦮꦴꦫꦺꦴ ꦭꦢ꧀ꦣꦸꦁ ꦮꦛ꧀ꦛꦠꦶ, ꦒꦕ꧀ꦖ ꦠ꧀ꦮꦁ ꦄꦩꦕ꧀ꦕꦒꦺꦲꦺꦱꦸ ꦄꦗ꧀ꦗ ꦗꦴꦠꦴ ꦢꦴꦫꦏꦴ ꦏꦶꦠ꧀ꦠꦏꦴ ꦤꦴꦩꦴꦠꦶ ꦎꦭꦺꦴꦏꦺꦲꦷ’’ꦠꦶ. ꦱꦺꦴ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦄꦩꦕ꧀ꦕꦒꦺꦲꦴꦤꦶ ꦒꦤ꧀ꦠ꧀ꦮꦴ ꦎꦭꦺꦴꦏꦺꦤ꧀ꦠꦺꦴ ꦥꦚ꧀ꦕ ꦏꦸꦩꦴꦫꦱꦠꦴꦤꦶ ꦢꦶꦱ꧀ꦮꦴ ꦥꦸꦤꦴꦒꦤ꧀ꦠ꧀ꦮꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ.

ꦫꦴꦗꦴ ꦥꦚ꧀ꦕꦤ꧀ꦤꦁ ꦢꦴꦫꦏꦱꦠꦴꦤꦁ ꦏꦸꦩꦴꦫꦥꦱꦴꦣꦤꦴꦤꦶ ꦥꦺꦱꦺꦠ꧀ꦮꦴ ꦥꦸꦤ ꦥꦚ꧀ꦕ ꦣꦴꦠꦶꦱꦠꦴꦤꦶ ꦕ ꦢꦴꦥꦺꦱꦶ. ꦩꦲꦴꦱꦠ꧀ꦠꦱ꧀ꦱ ꦥꦤ ꦄꦠꦶꦢꦷꦓꦴꦢꦶꦢꦺꦴꦱꦮꦗ꧀ꦗꦶꦠꦴ ꦄꦭꦩ꧀ꦧꦠ꧀ꦡꦤꦶꦪꦺꦴ ꦩꦣꦸꦫꦡꦚ꧀ꦚꦴꦪꦺꦴ ꦕꦠꦸꦱꦛ꧀ꦜꦶ ꦣꦴꦠꦶꦪꦺꦴ ꦄꦢꦴꦱꦶ. ꦄꦠꦶꦢꦷꦓꦴꦪ ꦲꦶ ꦆꦠ꧀ꦡꦶꦪꦴ ꦥꦱ꧀ꦱꦺ ꦤꦶꦱꦷꦢꦶꦠ꧀ꦮꦴ ꦡꦚ꧀ꦚꦁ ꦥꦶꦮꦠꦺꦴ ꦢꦴꦫꦏꦱ꧀ꦱ ꦒꦷꦮꦴ ꦢꦷꦓꦴ ꦲꦺꦴꦠꦶ, ꦄꦠꦶꦫꦱ꧀ꦱꦴꦪ ꦥꦱ꧀ꦱꦺ ꦤꦶꦱꦷꦢꦶꦠ꧀ꦮꦴ ꦡꦚ꧀ꦚꦁ ꦥꦶꦮꦤ꧀ꦠꦺꦴ ꦢꦴꦫꦏꦺꦴ ꦤꦶꦥ꧀ꦥꦷꦭ꦳ꦶꦠꦑꦤ꧀ꦣꦛ꧀ꦜꦶꦏꦺꦴ ꦲꦺꦴꦠꦶ, ꦄꦠꦶꦏꦶꦱꦴꦪ ꦥꦱ꧀ꦱꦺ ꦤꦶꦱꦷꦢꦶꦠ꧀ꦮꦴ ꦡꦚ꧀ꦚꦁ ꦥꦶꦮꦠꦺꦴ ꦢꦴꦫꦏꦱ꧀ꦱ ꦈꦴꦫꦹ ꦫꦸꦗ꧀ꦗꦤ꧀ꦠꦶ, ꦄꦠꦶꦡꦹꦭꦴꦪ ꦥꦱ꧀ꦱꦺ ꦤꦶꦱꦷꦢꦶꦠ꧀ꦮꦴ ꦡꦚ꧀ꦚꦁ ꦥꦶꦮꦤ꧀ꦠꦺꦴ ꦢꦴꦫꦏꦺꦴ ꦥꦏ꧀ꦑꦥꦴꦢꦺꦴ ꦲꦺꦴꦠꦶ, ꦄꦠꦶꦏꦴꦭ꦳ꦶꦏꦴꦪ ꦑꦷꦫꦁ ꦄꦠꦶꦱꦷꦠꦭꦁ ꦲꦺꦴꦠꦶ, ꦄꦠꦶꦎꦢꦴꦠꦴꦪ ꦑꦷꦫꦁ ꦄꦠꦶꦈꦟ꧀ꦲꦁ ꦲꦺꦴꦠꦶ, ꦭꦩ꧀ꦧꦠ꧀ꦡꦤꦶꦪꦴ ꦥꦱ꧀ꦱꦺ ꦤꦶꦱꦷꦢꦶꦠ꧀ꦮꦴ ꦡꦚ꧀ꦚꦁ ꦥꦶꦮꦤ꧀ꦠꦺꦴ ꦢꦴꦫꦏꦺꦴ ꦤꦶꦥ꧀ꦥꦷꦭ꦳ꦶꦠꦤꦴꦱꦶꦏꦺꦴ ꦲꦺꦴꦠꦶ. ꦏꦴꦱꦴꦤꦚ꧀ꦕ ꦥꦤ ꦆꦠ꧀ꦡꦷꦤꦁ ꦑꦷꦫꦁ ꦄꦠꦶꦄꦩ꧀ꦧꦶꦭꦁ ꦲꦺꦴꦠꦶ, ꦱꦴꦱꦴꦤꦚ꧀ꦕ ꦥꦤ ꦆꦠ꧀ꦡꦷꦤꦁ ꦑꦷꦫꦁ ꦄꦠꦶꦏꦛꦸꦏꦴꦢꦶꦨꦺꦢꦁ ꦲꦺꦴꦠꦶ, ꦠꦱ꧀ꦩꦴ ꦠꦺ ꦱꦧ꧀ꦧꦺꦥꦶ ꦢꦺꦴꦱꦺ ꦮꦶꦮꦗ꧀ꦗꦺꦠ꧀ꦮꦴ ꦄꦭꦩ꧀ꦧꦠ꧀ꦡꦤꦶꦪꦺꦴ ꦩꦣꦸꦫꦡꦚ꧀ꦚꦴꦪꦺꦴ ꦕꦠꦸꦱꦛ꧀ꦜꦶ ꦣꦴꦠꦶꦪꦺꦴ ꦢꦠ꧀ꦮꦴ ꦩꦲꦤ꧀ꦠꦁ ꦱꦏ꧀ꦏꦴꦫꦁ ꦏꦠ꧀ꦮꦴ ꦕꦤ꧀ꦢꦴꦢꦺꦮꦶꦪꦴꦥꦶ ꦮꦫꦁ ꦄꦢꦴꦱꦶ. ꦱꦴꦥꦶ ꦒꦲꦶꦠꦏꦁ ꦏꦠ꧀ꦮꦴ ꦜꦥꦺꦱꦶ.

ꦫꦴꦗꦴ ꦏꦸꦩꦴꦫꦱ꧀ꦱ ꦤꦴꦩꦒ꧀ꦒꦲꦟꦢꦶꦮꦱꦺ ꦭꦏ꧀ꦑꦟꦥꦴꦜꦏꦺ ꦧ꧀ꦫꦴꦲ꧀ꦩꦟꦺ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦠꦺꦱꦁ ꦩꦲꦤ꧀ꦠꦁ ꦱꦏ꧀ꦏꦴꦫꦁ ꦏꦠ꧀ꦮꦴ ꦏꦸꦩꦴꦫꦱ꧀ꦱ ꦄꦤ꧀ꦠꦫꦴꦪꦴꦨꦴꦮꦁ ꦥꦸꦕ꧀ꦖꦶ. ꦠꦺ ꦠꦱ꧀ꦱ ꦭꦏ꧀ꦑꦟꦱꦩ꧀ꦥꦠ꧀ꦠꦶꦁ ꦢꦶꦱ꧀ꦮꦴ ‘‘ꦩꦲꦴꦫꦴꦗ, ꦣꦚ꧀ꦚꦥꦸꦚ꧀ꦚꦭꦏ꧀ꦑꦟꦱꦩ꧀ꦥꦤ꧀ꦤꦺꦴ ꦄꦪꦁ ꦏꦸꦩꦴꦫꦺꦴ, ꦠꦶꦛ꧀ꦜꦠꦸ ꦌꦏꦢꦷꦥꦺꦴ, ꦢ꧀ꦮꦶꦱꦲꦱ꧀ꦱꦥꦫꦶꦮꦴꦫꦴꦤꦁ ꦕꦠꦸꦤ꧀ꦤꦩ꧀ꦥꦶ ꦩꦲꦴꦢꦷꦥꦴꦤꦁ ꦫꦗ꧀ꦗꦁ ꦏꦴꦫꦺꦠꦸꦁ ꦱꦩꦠ꧀ꦡꦺꦴ ꦲꦺꦴꦠꦶ, ꦤꦴꦱ꧀ꦱ ꦏꦺꦴꦕꦶ ꦄꦤ꧀ꦠꦫꦴꦪꦺꦴ ꦥꦚ꧀ꦚꦴꦪꦠꦷ’’ꦠꦶ ꦮꦢꦶꦁꦱꦸ. ꦫꦴꦗꦴ ꦠꦺꦱꦁ ꦮꦕꦤꦁ ꦱꦸꦠ꧀ꦮꦴ ꦠꦸꦱ꧀ꦱꦶꦠ꧀ꦮꦴ ꦏꦸꦩꦴꦫꦱ꧀ꦱ ꦤꦴꦩꦁ ꦏꦫꦺꦴꦤ꧀ꦠꦺꦴ ꦪꦱ꧀ꦩꦴ ꦏꦸꦩꦴꦫꦱ꧀ꦱ ꦗꦴꦠꦢꦶꦮꦱꦺ ꦱꦏꦭꦏꦴꦱꦶꦫꦛ꧀ꦜꦺ ꦢꦺꦮꦺꦴ ꦮꦱ꧀ꦱꦶ, ꦪꦱ꧀ꦩꦴ ꦕ ꦫꦚ꧀ꦚꦺꦴ ꦕꦺꦮ ꦄꦩꦕ꧀ꦕꦴꦤꦚ꧀ꦕ ꦲꦢꦪꦁ ꦱꦷꦠꦭꦁ ꦗꦴꦠꦁ, ꦪꦱ꧀ꦩꦴ ꦕ ꦠꦺꦩꦪꦩꦴꦤꦺꦴ ꦗꦴꦠꦺꦴ, ꦠꦱ꧀ꦩꦴ ‘‘ꦠꦺꦩꦶꦪꦏꦸꦩꦴꦫꦺꦴ’’ꦠꦶꦱ꧀ꦱ ꦤꦴꦩꦁ ꦄꦏꦴꦱꦶ. ꦄꦡ ꦤꦁ ꦣꦴꦠꦶꦪꦺꦴ ꦌꦏꦩꦴꦱꦶꦏꦁ ꦄꦭꦔ꧀ꦏꦫꦶꦠ꧀ꦮꦴ ꦫꦚ꧀ꦚꦺꦴ ꦱꦤ꧀ꦠꦶꦏꦁ ꦄꦴꦤꦪꦶꦁꦱꦸ. ꦫꦴꦗꦴ ꦥꦶꦪꦥꦸꦠ꧀ꦠꦁ ꦄꦴꦭꦶꦔ꧀ꦒꦶꦠ꧀ꦮꦴ ꦱꦷꦱꦺ ꦕꦸꦩ꧀ꦧꦶꦠ꧀ꦮꦴ ꦄꦔ꧀ꦏꦺ ꦤꦶꦱꦷꦢꦴꦥꦺꦠ꧀ꦮꦴ ꦫꦩꦪꦩꦴꦤꦺꦴ ꦤꦶꦱꦷꦢꦶ.

ꦠꦱ꧀ꦩꦶꦁ ꦑꦟꦺ ꦕꦠ꧀ꦠꦴꦫꦺꦴ ꦕꦺꦴꦫꦴ ꦄꦴꦤꦷꦠꦴ. ꦫꦴꦗꦴ ꦠꦺ ꦢꦶꦱ꧀ꦮꦴ ‘‘ꦠꦺꦱꦸ ꦌꦏꦱ꧀ꦱ ꦕꦺꦴꦫꦱ꧀ꦱ ꦱꦏꦟ꧀ꦛꦏꦴꦲꦶ ꦏꦱꦴꦲꦶ ꦥꦲꦴꦫꦱꦲꦱ꧀ꦱꦁ ꦏꦫꦺꦴꦡ, ꦌꦏꦱ꧀ꦱ ꦱꦔ꧀ꦑꦭꦶꦏꦴꦪ ꦧꦤ꧀ꦣꦶꦠ꧀ꦮꦴ ꦧꦤ꧀ꦣꦤꦴꦒꦴꦫꦥꦮꦺꦱꦤꦁ ꦏꦫꦺꦴꦡ, ꦌꦏꦱ꧀ꦱ ꦱꦫꦷꦫꦺ ꦱꦠ꧀ꦠꦶꦥꦲꦴꦫꦁ ꦏꦫꦺꦴꦡ, ꦌꦏꦱ꧀ꦱ ꦱꦹꦭꦴꦫꦺꦴꦥꦤꦁ ꦏꦫꦺꦴꦡꦴ’’ꦠꦶ ꦄꦴꦟꦴꦥꦺꦱꦶ. ꦄꦡ ꦩꦲꦴꦱꦠ꧀ꦠꦺꦴ ꦥꦶꦠꦸ ꦮꦕꦤꦁ ꦱꦸꦠ꧀ꦮꦴ ꦨꦷꦠꦠꦱꦶꦠꦺꦴ ꦲꦸꦠ꧀ꦮꦴ ‘‘ꦄꦲꦺꦴ ꦩꦩ ꦥꦶꦠꦴ ꦫꦗ꧀ꦗꦁ ꦤꦶꦱ꧀ꦱꦴꦪ ꦄꦠꦶꦨꦴꦫꦶꦪꦁ ꦤꦶꦫꦪꦒꦴꦩꦶꦏꦩ꧀ꦩꦁ ꦄꦏꦴꦱꦷ’’ꦠꦶ ꦕꦶꦤ꧀ꦠꦺꦱꦶ. ꦥꦸꦤꦢꦶꦮꦱꦺ ꦥꦤ ꦠꦁ ꦱꦺꦠꦕ꧀ꦖꦠ꧀ꦠꦱ꧀ꦱ ꦲꦺꦛ꧀ꦜꦴ ꦄꦭꦔ꧀ꦏꦠꦱꦶꦫꦶꦱꦪꦤꦺ ꦤꦶꦥꦗ꧀ꦗꦴꦥꦺꦱꦸꦁ. ꦱꦺꦴ ꦡꦺꦴꦏꦁ ꦤꦶꦢ꧀ꦢꦴꦪꦶꦠ꧀ꦮꦴ ꦥꦧꦸꦢ꧀ꦣꦺꦴ ꦄꦏ꧀ꦑꦷꦤꦶ ꦈꦩ꧀ꦩꦷꦭꦺꦠ꧀ꦮꦴ ꦱꦺꦠꦕ꧀ꦖꦠ꧀ꦠꦁ ꦎꦭꦺꦴꦏꦺꦤ꧀ꦠꦺꦴ ꦩꦲꦤ꧀ꦠꦁ ꦱꦶꦫꦶꦮꦶꦨꦮꦁ ꦥꦱ꧀ꦱꦶ. ꦄꦡꦱ꧀ꦱ ꦥꦏꦠꦶꦪꦴꦥꦶ ꦨꦷꦠꦠꦱꦶꦠꦱ꧀ꦱ ꦄꦠꦶꦫꦺꦏꦠꦫꦁ ꦨꦪꦁ ꦈꦥ꧀ꦥꦗ꧀ꦗꦶ. ꦱꦺꦴ ‘‘ꦏꦸꦠꦺꦴ ꦤꦸ ꦑꦺꦴ ꦄꦲꦁ ꦆꦩꦁ ꦕꦺꦴꦫꦒꦺꦲꦁ ꦄꦴꦒꦠꦺꦴꦩ꧀ꦲꦷ’’ꦠꦶ ꦈꦥꦣꦴꦫꦺꦤ꧀ꦠꦺꦴ ꦗꦴꦠꦶꦱ꧀ꦱꦫꦚꦴꦟꦺꦤ ꦢꦺꦮꦭꦺꦴꦏꦠꦺꦴ ꦄꦴꦒꦠꦨꦴꦮꦁ ꦚꦠ꧀ꦮꦴ ꦠꦠꦺꦴ ꦥꦫꦁ ꦎꦭꦺꦴꦏꦺꦤ꧀ꦠꦺꦴ ꦈꦱ꧀ꦱꦢꦤꦶꦫꦪꦺ ꦥꦏ꧀ꦏꦨꦴꦮꦁ ꦥꦱ꧀ꦱꦶ, ꦠꦠꦺꦴ ꦥꦫꦁ ꦎꦭꦺꦴꦏꦺꦤ꧀ꦠꦺꦴ ꦠꦱ꧀ꦩꦶꦁꦪꦺꦮ ꦤꦒꦫꦺ ꦫꦴꦗꦨꦴꦮꦁ ꦄꦚ꧀ꦚꦴꦱꦶ.

ꦄꦡꦱ꧀ꦱ ‘‘ꦄꦲꦁ ꦮꦷꦱꦠꦶꦮꦱ꧀ꦱꦴꦤꦶ ꦧꦴꦫꦴꦟꦱꦶꦪꦁ ꦫꦗ꧀ꦗꦁ ꦏꦴꦫꦺꦠ꧀ꦮꦴ ꦄꦱꦷꦠꦶꦮꦱ꧀ꦱꦱꦲꦱ꧀ꦱꦴꦤꦶ ꦈꦱ꧀ꦱꦢꦤꦶꦫꦪꦺ ꦥꦕ꧀ꦕꦶꦁ, ꦆꦢꦴꦤꦶ ꦥꦸꦤꦥꦶ ꦆꦩꦱ꧀ꦩꦶꦁꦪꦺꦮ ꦕꦺꦴꦫꦒꦺꦲꦺ ꦤꦶꦧ꧀ꦧꦠ꧀ꦠꦺꦴꦩ꧀ꦲꦶ, ꦥꦶꦠꦴ ꦩꦺ ꦲꦶꦪ꧀ꦪꦺꦴ ꦕꦠꦹꦱꦸ ꦕꦺꦴꦫꦺꦱꦸ ꦄꦴꦤꦷꦠꦺꦱꦸ ꦠꦡꦴꦫꦹꦥꦁ ꦦꦫꦸꦱꦁ ꦤꦶꦫꦪꦱꦁꦮꦠ꧀ꦠꦤꦶꦏꦁ ꦏꦡꦁ ꦏꦡꦺꦱꦶ, ꦱꦕꦴꦲꦁ ꦫꦗ꧀ꦗꦁ ꦏꦴꦫꦺꦱ꧀ꦱꦴꦩꦶ, ꦥꦸꦤꦥꦶ ꦤꦶꦫꦪꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦩꦲꦴꦢꦸꦏ꧀ꦑꦁ ꦄꦤꦸꦨꦮꦶꦱ꧀ꦱꦴꦩꦷ’’ꦠꦶ ꦄꦴꦮꦗ꧀ꦗꦺꦤ꧀ꦠꦱ꧀ꦱ ꦩꦲꦤ꧀ꦠꦁ ꦨꦪꦁ ꦈꦥ꧀ꦥꦗ꧀ꦗꦶ. ꦧꦺꦴꦣꦶꦱꦠ꧀ꦠꦱ꧀ꦱ ꦏꦚ꧀ꦕꦤꦮꦟ꧀ꦟꦁ ꦱꦫꦷꦫꦁ ꦲꦠ꧀ꦡꦺꦤ ꦥꦫꦶꦩꦢ꧀ꦢꦶꦠꦁ ꦥꦢꦸꦩꦁ ꦮꦶꦪ ꦩꦶꦭꦴꦠꦁ ꦢꦸꦧ꧀ꦧꦟ꧀ꦟꦁ ꦄꦲꦺꦴꦱꦶ. ꦱꦺꦴ ‘‘ꦏꦡꦁ ꦤꦸ ꦑꦺꦴ ꦆꦩꦩ꧀ꦲꦴ ꦕꦺꦴꦫꦒꦺꦲꦴ ꦩꦸꦕ꧀ꦕꦺꦪ꧀ꦪ’’ꦤ꧀ꦠꦶ ꦕꦶꦤ꧀ꦠꦺꦤ꧀ꦠꦺꦴ ꦤꦶꦥꦗ꧀ꦗꦶ. ꦄꦡ ꦤꦁ ꦌꦏꦱ꧀ꦩꦶꦁ ꦄꦠ꧀ꦠꦨꦴꦮꦺ ꦩꦴꦠꦸꦨꦹꦠꦥꦸꦧ꧀ꦧꦴ ꦖꦠ꧀ꦠꦺ ꦄꦣꦶꦮꦠ꧀ꦡꦴ ꦢꦺꦮꦣꦷꦠꦴ ꦄꦱ꧀ꦱꦴꦱꦺꦠ꧀ꦮꦴ ‘‘ꦠꦴꦠ ꦠꦺꦩꦶꦪꦏꦸꦩꦴꦫ, ꦩꦴ ꦨꦴꦪꦶ, ꦩꦴ ꦱꦺꦴꦕꦶ, ꦩꦴ ꦕꦶꦤ꧀ꦠꦪꦶ. ꦱꦕꦺ ꦆꦠꦺꦴ ꦩꦸꦕ꧀ꦕꦶꦠꦸꦏꦴꦩꦺꦴꦱꦶ, ꦠ꧀ꦮꦁ ꦄꦥꦷꦜꦱꦥ꧀ꦥꦷꦥꦶ ꦥꦷꦜꦱꦥ꧀ꦥꦷ ꦮꦶꦪ ꦲꦺꦴꦲꦶ, ꦄꦧꦣꦶꦫꦺꦴꦥꦶ ꦧꦣꦶꦫꦺꦴ ꦮꦶꦪ ꦲꦺꦴꦲꦶ, ꦄꦩꦹꦒꦺꦴꦥꦶ ꦩꦹꦒꦺꦴ ꦮꦶꦪ ꦲꦺꦴꦲꦶ, ꦆꦩꦴꦤꦶ ꦠꦷꦟꦶ ꦄꦔ꧀ꦒꦴꦤꦶ ꦄꦣꦶꦛ꧀ꦜꦴꦪ ꦄꦠ꧀ꦠꦤꦺꦴ ꦥꦟ꧀ꦝꦶꦠꦨꦴꦮꦁ ꦩꦴ ꦥꦏꦴꦱꦺꦲꦷ’’ꦠꦶ ꦮꦠ꧀ꦮꦴ ꦥꦜꦩꦁ ꦒꦴꦡꦩꦴꦲ –

꧑. ‘‘ꦩꦴ ꦥꦟ꧀ꦝꦶꦕ꧀ꦕꦪꦁ ꦮꦶꦨꦴꦮꦪ, ꦧꦴꦭꦩꦠꦺꦴ ꦨꦮ ꦱꦧ꧀ꦧꦥꦴꦟꦶꦤꦁ;

ꦱꦧ꧀ꦧꦺꦴ ꦠꦁ ꦗꦤꦺꦴ ꦎꦕꦶꦤꦴꦪꦠꦸ, ꦌꦮꦁ ꦠꦮ ꦄꦠ꧀ꦡꦺꦴ ꦨꦮꦶꦱ꧀ꦱꦠꦷ’’ꦠꦶ.

ꦠꦠ꧀ꦡ ꦥꦟ꧀ꦝꦶꦕ꧀ꦕꦪꦤ꧀ꦠꦶ ꦥꦟ꧀ꦝꦶꦕ꧀ꦕꦁ, ꦄꦪꦩꦺꦮ ꦮꦴ ꦥꦴꦜꦺꦴ. ꦧꦴꦭꦩꦠꦺꦴꦠꦶ ꦧꦴꦭꦺꦴ ꦆꦠꦶ ꦱꦩ꧀ꦩꦠꦺꦴ. ꦱꦧ꧀ꦧꦺꦴ ꦗꦤꦺꦴꦠꦶ ꦱꦏꦭꦺꦴ ꦄꦤ꧀ꦠꦺꦴꦗꦤꦺꦴ ꦕꦺꦮ ꦧꦲꦶꦗꦤꦺꦴ ꦕ. ꦎꦕꦶꦤꦴꦪꦠꦹꦠꦶ ‘‘ꦤꦷꦲꦫꦡꦺꦠꦁ ꦏꦴꦭ꦳ꦏꦟ꧀ꦟꦶ’’ꦤ꧀ꦠꦶ ꦄꦮꦩꦚ꧀ꦚꦠꦸ, ꦄꦮꦗꦴꦤꦴꦠꦹꦠꦶ ꦄꦠ꧀ꦡꦺꦴ.

ꦱꦺꦴ ꦠꦱ꧀ꦱꦴ ꦮꦕꦤꦺꦤ ꦄꦱ꧀ꦱꦴꦱꦁ ꦥꦛꦶꦭꦨꦶꦠ꧀ꦮꦴ –

꧒. ‘‘ꦏꦫꦺꦴꦩꦶ ꦠꦺ ꦠꦁ ꦮꦕꦤꦁ, ꦪꦁ ꦩꦁ ꦨꦟꦱꦶ ꦢꦺꦮꦠꦺ;

ꦄꦠ꧀ꦡꦏꦴꦩꦴꦱꦶ ꦩꦺ ꦄꦩ꧀ꦩ, ꦲꦶꦠꦏꦴꦩꦴꦱꦶ ꦢꦺꦮꦠꦺ’’ꦠꦶ. –

ꦆꦩꦁ ꦒꦴꦡꦁ ꦮꦠ꧀ꦮꦴ ꦠꦴꦤꦶ ꦠꦷꦟꦶ ꦄꦔ꧀ꦒꦴꦤꦶ ꦄꦣꦶꦛ꧀ꦜꦴꦱꦶ. ꦱꦴ ꦕ ꦢꦺꦮꦣꦷꦠꦴ ꦄꦤ꧀ꦠꦫꦣꦴꦪꦶ. ꦫꦴꦗꦴ ꦥꦸꦠ꧀ꦠꦱ꧀ꦱ ꦄꦤꦸꦏ꧀ꦏꦟ꧀ꦜꦤꦠ꧀ꦡꦴꦪ ꦠꦴꦤꦶ ꦥꦚ꧀ꦕ ꦏꦸꦩꦴꦫꦱꦠꦴꦤꦶ ꦠꦱ꧀ꦱ ꦱꦤ꧀ꦠꦶꦏꦺꦪꦺꦮ ꦜꦥꦺꦱꦶ. ꦠꦺ ꦢꦴꦫꦏꦴ ꦡꦚ꧀ꦚꦠ꧀ꦡꦴꦪ ꦫꦺꦴꦢꦤ꧀ꦠꦶ ꦥꦫꦶꦢꦺꦮꦤ꧀ꦠꦶ. ꦩꦲꦴꦱꦠ꧀ꦠꦺꦴ ꦥꦤ ꦤꦶꦫꦪꦨꦪꦠꦗ꧀ꦗꦶꦠꦺꦴ ‘‘ꦫꦗ꧀ꦗꦠꦺꦴ ꦩꦺ ꦱꦸꦱ꧀ꦱꦶꦠ꧀ꦮꦴ ꦩꦠꦩꦺꦮ ꦱꦺꦪ꧀ꦪꦺꦴ’’ꦠꦶ ꦤ ꦫꦺꦴꦢꦠꦶ ꦤ ꦥꦫꦶꦢꦺꦮꦠꦶ. ꦄꦡꦱ꧀ꦱ ꦣꦴꦠꦶꦪꦺꦴ ꦠꦁ ꦥꦮꦠ꧀ꦠꦶꦁ ꦚꦠ꧀ꦮꦴ ꦕꦤ꧀ꦢꦴꦢꦺꦮꦶꦪꦴ ꦄꦴꦫꦺꦴꦕꦪꦶꦁꦱꦸ. ꦱꦴꦥꦶ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ. ꦫꦴꦗꦴ ꦤꦺꦩꦶꦠ꧀ꦠꦏꦺ ꦧ꧀ꦫꦴꦲ꧀ꦩꦟꦺ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦥꦸꦕ꧀ꦖꦶ. ꦄꦡ ꦧ꧀ꦫꦴꦲ꧀ꦩꦟꦴ ꦄꦴꦲꦁꦱꦸ ‘‘ꦢꦺꦮ, ꦏꦸꦩꦴꦫꦱ꧀ꦱ ꦥꦏꦠꦶꦮꦺꦭꦁ ꦄꦠꦶꦏ꧀ꦏꦩꦶꦠ꧀ꦮꦴ ꦡꦚ꧀ꦚꦁ ꦢꦴꦠꦸꦁ ꦮꦛ꧀ꦛꦠꦶ, ꦌꦮꦁ ꦱꦺꦴ ꦫꦺꦴꦢꦩꦴꦤꦺꦴ ꦡꦤꦁ ꦢꦭ꦳꧀ꦲꦁ ꦒꦲꦺꦠ꧀ꦮꦴ ꦱꦪꦩꦺꦮ ꦥꦶꦮꦶꦱ꧀ꦱꦠꦷ’’ꦠꦶ. ꦠꦠꦺꦴ ꦥꦛ꧀ꦜꦴꦪ ꦣꦴꦠꦶꦪꦺꦴ ꦏꦸꦩꦴꦫꦱ꧀ꦱ ꦥꦏꦠꦶꦮꦺꦭꦁ ꦄꦠꦶꦏ꧀ꦏꦩꦶꦠ꧀ꦮꦴ ꦡꦚ꧀ꦚꦁ ꦢꦺꦤ꧀ꦠꦶ. ꦢꦢꦩꦴꦤꦴ ꦕ ꦏꦢꦴꦕꦶ ꦌꦏꦮꦴꦫꦁ ꦄꦠꦶꦏ꧀ꦏꦩꦶꦠ꧀ꦮꦴ ꦢꦺꦤ꧀ꦠꦶ, ꦏꦢꦴꦕꦶ ꦱꦏꦭꦢꦶꦮꦱꦁ ꦑꦷꦫꦁ ꦤ ꦢꦺꦤ꧀ꦠꦶ.

ꦮꦷꦩꦁꦱꦤꦏꦟ꧀ꦝꦁ

ꦱꦺꦴ ꦤꦶꦫꦪꦨꦪꦠꦗ꧀ꦗꦶꦠꦺꦴ ꦱꦸꦱ꧀ꦱꦤ꧀ꦠꦺꦴꦥꦶ ꦡꦚ꧀ꦚꦠ꧀ꦡꦴꦪ ꦤ ꦫꦺꦴꦢꦠꦶ, ꦤ ꦥꦫꦶꦢꦺꦮꦠꦶ. ꦄꦡ ꦤꦁ ꦄꦫꦺꦴꦢꦤ꧀ꦠꦩ꧀ꦥꦶ ꦢꦶꦱ꧀ꦮꦴ ‘‘ꦥꦸꦠ꧀ꦠꦺꦴ ꦩꦺ ꦖꦴꦠꦺꦴ’’ꦠꦶ ꦩꦴꦠꦴ ꦮꦴ ꦡꦚ꧀ꦚꦁ ꦥꦴꦪꦺꦠꦶ, ꦏꦢꦴꦕꦶ ꦣꦴꦠꦶꦪꦺꦴ ꦮꦴ ꦥꦴꦪꦺꦤ꧀ꦠꦶ. ꦱꦺꦱꦢꦴꦫꦏꦴ ꦡꦚ꧀ꦚꦁ ꦄꦭꦢ꧀ꦣꦮꦺꦭꦴꦪꦩꦺꦮ ꦫꦺꦴꦢꦤ꧀ꦠꦶ ꦥꦫꦶꦢꦺꦮꦤ꧀ꦠꦶ. ꦩꦲꦴꦱꦠ꧀ꦠꦺꦴ ꦥꦤ ꦤꦶꦫꦪꦨꦪꦠꦗ꧀ꦗꦶꦠꦺꦴ ꦤ ꦫꦺꦴꦢꦠꦶ, ꦤ ꦥꦫꦶꦢꦺꦮꦠꦶ, ꦤ ꦤꦶꦢ꧀ꦢꦴꦪꦠꦶ, ꦤ ꦲꦠ꧀ꦡꦥꦴꦢꦺ ꦱꦩꦶꦚ꧀ꦗꦠꦶ, ꦤ ꦱꦢ꧀ꦢꦁ ꦏꦫꦺꦴꦠꦶ. ꦄꦡꦱ꧀ꦱ ꦣꦴꦠꦶꦪꦺꦴ ‘‘ꦥꦷꦜꦱꦥ꧀ꦥꦷꦤꦁ ꦲꦠ꧀ꦡꦥꦴꦢꦴ ꦤꦴꦩ ꦤ ꦌꦮꦫꦹꦥꦴ ꦲꦺꦴꦤ꧀ꦠꦶ, ꦩꦹꦒꦴꦤꦁ ꦲꦤꦸꦏꦥꦫꦶꦪꦺꦴꦱꦴꦤꦁ ꦤꦴꦩ ꦤ ꦌꦮꦫꦹꦥꦁ ꦲꦺꦴꦠꦶ, ꦧꦣꦶꦫꦴꦤꦁ ꦏꦟ꧀ꦟꦱꦺꦴꦠꦴꦤꦶ ꦤꦴꦩ ꦤ ꦌꦮꦫꦹꦥꦴꦤꦶ ꦲꦺꦴꦤ꧀ꦠꦶ, ꦨꦮꦶꦠꦧ꧀ꦧꦩꦺꦠ꧀ꦡ ꦏꦴꦫꦟꦺꦤ, ꦮꦷꦩꦁꦱꦶꦱ꧀ꦱꦴꦩ ꦤ’’ꦤ꧀ꦠꦶ ꦕꦶꦤ꧀ꦠꦺꦠ꧀ꦮꦴ ‘‘ꦑꦷꦫꦺꦤ ꦠꦴꦮ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦱꦏꦭꦢꦶꦮꦱꦁ ꦑꦷꦫꦁ ꦤ ꦢꦺꦤ꧀ꦠꦶ. ꦱꦺꦴ ꦱꦸꦱ꧀ꦱꦤ꧀ꦠꦺꦴꦥꦶ ꦑꦷꦫꦠ꧀ꦡꦴꦪ ꦱꦢ꧀ꦢꦁ ꦤ ꦏꦫꦺꦴꦠꦶ. ꦄꦡꦱ꧀ꦱ ꦩꦴꦠꦴ ‘‘ꦥꦸꦠ꧀ꦠꦺꦴ ꦩꦺ ꦖꦴꦠꦺꦴ’’ꦠꦶ ꦱꦪꦩꦺꦮ ꦡꦚ꧀ꦚꦁ ꦥꦴꦪꦺꦠꦶ. ꦌꦮꦁ ꦄꦤ꧀ꦠꦫꦤ꧀ꦠꦫꦴ ꦑꦷꦫꦁ ꦄꦢꦠ꧀ꦮꦴ ꦌꦏꦱꦁꦮꦕ꧀ꦖꦫꦁ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦄꦤ꧀ꦠꦫꦁ ꦤ ꦥꦱ꧀ꦱꦶꦁꦱꦸ.

ꦠꦠꦺꦴ ꦄꦩꦕ꧀ꦕꦴꦢꦪꦺꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦸꦁ ‘‘ꦌꦏꦮꦱ꧀ꦱꦶꦏꦢꦴꦫꦏꦴ ꦤꦴꦩ ꦥꦹꦮꦑꦗ꧀ꦗꦏꦁ ꦥꦶꦪꦴꦪꦤ꧀ꦠꦶ, ꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦥꦚ꧀ꦕ ꦏꦸꦩꦴꦫꦱꦠꦴꦤꦶ ꦠꦱ꧀ꦱ ꦱꦤ꧀ꦠꦶꦏꦺꦪꦺꦮ ꦤꦶꦱꦷꦢꦴꦥꦺꦠ꧀ꦮꦴ ꦤꦴꦤꦴꦥꦹꦮꦑꦗ꧀ꦗꦏꦴꦤꦶ ꦈꦥꦤꦴꦩꦺꦠ꧀ꦮꦴ ꦧꦺꦴꦣꦶꦱꦠ꧀ꦠꦱ꧀ꦱ ꦄꦮꦶꦢꦹꦫꦺ ꦜꦥꦺꦠ꧀ꦮꦴ ‘‘ꦪꦡꦴꦫꦸꦕꦶ ꦠꦴꦤꦶ ꦥꦹꦮꦑꦗ꧀ꦗꦏꦴꦤꦶ ꦒꦟ꧀ꦲꦡꦴ’’ꦠꦶ ꦥꦛꦶꦕ꧀ꦖꦤ꧀ꦤꦛ꧀ꦜꦴꦤꦺ ꦠꦶꦛ꧀ꦜꦤ꧀ꦠꦶ. ꦱꦺꦱꦢꦴꦫꦏꦴ ꦏꦭꦲꦁ ꦏꦫꦺꦴꦤ꧀ꦠꦴ ꦄꦚ꧀ꦚꦩꦚ꧀ꦚꦁ ꦥꦲꦫꦤ꧀ꦠꦴ ꦠꦁ ꦠꦁ ꦒꦲꦺꦠ꧀ꦮꦴ ꦑꦴꦢꦤ꧀ꦠꦶ. ꦩꦲꦴꦱꦠ꧀ꦠꦺꦴ ꦥꦤ ꦄꦠ꧀ꦠꦴꦤꦁ ꦎꦮꦢꦶꦠ꧀ꦮꦴ ‘‘ꦠꦴꦠ ꦠꦺꦩꦶꦪꦏꦸꦩꦴꦫ, ꦤꦶꦫꦪꦨꦪꦁ ꦆꦕ꧀ꦖꦤ꧀ꦠꦺꦴ ꦥꦹꦮꦑꦗ꧀ꦗꦏꦁ ꦆꦕ꧀ꦖꦴꦲꦷ’’ꦠꦶ ꦤꦶꦫꦪꦨꦪꦠꦗ꧀ꦗꦶꦠꦺꦴ ꦥꦹꦮꦑꦗ꧀ꦗꦏꦁ ꦤ ꦎꦭꦺꦴꦏꦺꦱꦶ. ꦌꦮꦁ ꦥꦹꦮꦑꦗ꧀ꦗꦏꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ‘‘ꦢ꧀ꦮꦶꦮꦱ꧀ꦱꦶꦏꦢꦴꦫꦏꦴ ꦤꦴꦩ ꦦꦭꦴꦦꦭꦁ ꦥꦶꦪꦴꦪꦤ꧀ꦠꦶ, ꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦤꦴꦤꦴꦦꦭꦴꦤꦶ ꦈꦥꦤꦴꦩꦺꦠ꧀ꦮꦴ ꦧꦺꦴꦣꦶꦱꦠ꧀ꦠꦱ꧀ꦱ ꦄꦮꦶꦢꦹꦫꦺ ꦜꦥꦺꦠ꧀ꦮꦴ ꦮꦷꦩꦁꦱꦶꦁꦱꦸ. ꦱꦺꦱꦢꦴꦫꦏꦴ ꦏꦭꦲꦁ ꦏꦠ꧀ꦮꦴ ꦪꦸꦗ꧀ꦙꦤ꧀ꦠꦴ ꦠꦁ ꦠꦁ ꦒꦲꦺꦠ꧀ꦮꦴ ꦑꦴꦢꦤ꧀ꦠꦶ. ꦱꦺꦴ ꦤꦶꦫꦪꦨꦪꦠꦗ꧀ꦗꦶꦠꦺꦴ ꦠꦩ꧀ꦥꦶ ꦤ ꦎꦭꦺꦴꦏꦺꦱꦶ. ꦌꦮꦁ ꦦꦭꦴꦦꦭꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ‘‘ꦠꦶꦮꦱ꧀ꦱꦶꦏꦢꦴꦫꦏꦴ ꦤꦴꦩ ꦏꦷꦭ꦳ꦤꦨꦟ꧀ꦝꦏꦁ ꦥꦶꦪꦴꦪꦤ꧀ꦠꦶ, ꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦤꦴꦤꦴꦱꦸꦮꦟ꧀ꦟꦩꦪꦴꦤꦶ ꦲꦠ꧀ꦡꦶꦄꦱ꧀ꦱꦫꦹꦥꦏꦴꦢꦷꦤꦶ ꦏꦴꦫꦴꦥꦺꦠ꧀ꦮꦴ ꦧꦺꦴꦣꦶꦱꦠ꧀ꦠꦱ꧀ꦱ ꦄꦮꦶꦢꦹꦫꦺ ꦜꦥꦺꦱꦸꦁ. ꦱꦺꦱꦢꦴꦫꦏꦴ ꦄꦚ꧀ꦚꦩꦚ꧀ꦚꦁ ꦮꦶꦭꦸꦩ꧀ꦥꦤ꧀ꦠꦴ ꦒꦟ꧀ꦲꦶꦁꦱꦸ. ꦩꦲꦴꦱꦠ꧀ꦠꦺꦴ ꦥꦤ ꦤ ꦏꦶꦚ꧀ꦕꦶ ꦎꦭꦺꦴꦏꦺꦱꦶ. ꦌꦮꦁ ꦏꦷꦭ꦳ꦤꦨꦟ꧀ꦝꦏꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ‘‘ꦕꦠꦸꦮꦱ꧀ꦱꦶꦏꦢꦴꦫꦏꦴ ꦤꦴꦩ ꦨꦺꦴꦗꦤꦁ ꦥꦶꦪꦴꦪꦤ꧀ꦠꦶ, ꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦤꦴꦤꦴꦨꦺꦴꦗꦤꦴꦤꦶ ꦈꦥꦤꦴꦩꦺꦱꦸꦁ. ꦱꦺꦱꦢꦴꦫꦏꦴ ꦠꦁ ꦥꦶꦟ꧀ꦝꦁ ꦥꦶꦟ꧀ꦝꦁ ꦏꦠ꧀ꦮꦴ ꦨꦸꦚ꧀ꦗꦤ꧀ꦠꦶ. ꦩꦲꦴꦱꦠ꧀ꦠꦺꦴ ꦥꦤ ꦄꦠ꧀ꦠꦴꦤꦁ ꦎꦮꦢꦶꦠ꧀ꦮꦴ ‘‘ꦠꦴꦠ ꦠꦺꦩꦶꦪꦏꦸꦩꦴꦫ, ꦄꦭꦢ꧀ꦣꦨꦺꦴꦗꦤꦴꦤꦁ ꦠꦺ ꦄꦠ꧀ꦠꦨꦴꦮꦴꦤꦁ ꦒꦟꦤꦴ ꦤꦴꦩ ꦤꦠ꧀ꦡꦷ’’ꦠꦶ ꦤꦶꦫꦪꦨꦪꦠꦗ꧀ꦗꦶꦠꦺꦴ ꦠꦩ꧀ꦥꦶ ꦤ ꦎꦭꦺꦴꦏꦺꦱꦶ. ꦄꦡꦱ꧀ꦱ ꦩꦴꦠꦴ ꦱꦪꦩꦺꦮ ꦲꦢꦪꦺꦤ ꦨꦶꦗ꧀ꦗꦩꦴꦤꦺꦤ ꦮꦶꦪ ꦄꦱꦲꦤ꧀ꦠꦺꦤ ꦱꦲꦠ꧀ꦡꦺꦤ ꦨꦺꦴꦗꦤꦁ ꦨꦺꦴꦗꦺꦱꦶ. ꦌꦮꦁ ꦨꦺꦴꦗꦤꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ‘‘ꦥꦚ꧀ꦕꦮꦱ꧀ꦱꦶꦏꦢꦴꦫꦏꦴ ꦤꦴꦩ ꦄꦒ꧀ꦒꦶꦤꦺꦴ ꦨꦴꦪꦤ꧀ꦠꦶ, ꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦫꦴꦗꦔ꧀ꦒꦟꦺ ꦄꦤꦺꦏꦢ꧀ꦮꦴꦫꦪꦸꦠ꧀ꦠꦁ ꦩꦲꦤ꧀ꦠꦁ ꦒꦺꦲꦁ ꦏꦴꦫꦺꦠ꧀ꦮꦴ ꦠꦴꦭꦥꦟ꧀ꦟꦺꦲꦶ ꦖꦴꦢꦺꦠ꧀ꦮꦴ ꦠꦁ ꦱꦺꦱꦢꦴꦫꦏꦺꦲꦶ ꦥꦫꦶꦮꦸꦠꦁ ꦠꦱ꧀ꦱ ꦩꦗ꧀ꦙꦺ ꦤꦶꦱꦷꦢꦴꦥꦺꦠ꧀ꦮꦴ ꦄꦒ꧀ꦒꦶꦁ ꦢꦺꦤ꧀ꦠꦶ. ꦱꦺꦱꦢꦴꦫꦏꦴ ꦄꦒ꧀ꦒꦶꦁ ꦢꦶꦱ꧀ꦮꦴ ꦮꦶꦫꦮꦤ꧀ꦠꦴ ꦥꦭꦴꦪꦶꦁꦱꦸ. ꦩꦲꦴꦱꦠ꧀ꦠꦺꦴ ꦥꦤ ꦕꦶꦤ꧀ꦠꦺꦱꦶ ‘‘ꦤꦶꦫꦪꦄꦒ꧀ꦒꦶꦱꦤ꧀ꦠꦴꦥꦤꦠꦺꦴ ꦆꦢꦩꦺꦮ ꦄꦒ꧀ꦒꦶꦱꦤ꧀ꦠꦴꦥꦤꦁ ꦱꦠꦒꦸꦟꦺꦤ ꦱꦲꦱ꧀ꦱꦒꦸꦟꦺꦤ ꦱꦠꦱꦲꦱ꧀ꦱꦒꦸꦟꦺꦤ ꦮꦫꦠꦫ’’ꦤ꧀ꦠꦶ ꦤꦶꦫꦺꦴꦣꦱꦩꦴꦥꦤ꧀ꦤꦺꦴ ꦩꦲꦴꦡꦺꦫꦺꦴ ꦮꦶꦪ ꦤꦶꦕ꧀ꦕꦭꦺꦴꦮ ꦄꦲꦺꦴꦱꦶ. ꦄꦡ ꦤꦁ ꦄꦒ꧀ꦒꦶꦩ꧀ꦲꦶ ꦄꦴꦒꦕ꧀ꦖꦤ꧀ꦠꦺ ꦒꦲꦺꦠ꧀ꦮꦴ ꦄꦥꦤꦺꦤ꧀ꦠꦶ. ꦌꦮꦁ ꦄꦒ꧀ꦒꦶꦤꦴꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ‘‘ꦖꦮꦱ꧀ꦱꦶꦏꦢꦴꦫꦏꦴ ꦤꦴꦩ ꦩꦠ꧀ꦠꦲꦠ꧀ꦡꦶꦤꦺꦴ ꦨꦴꦪꦤ꧀ꦠꦶ, ꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦌꦏꦁ ꦲꦠ꧀ꦡꦶꦁ ꦱꦸꦱꦶꦏ꧀ꦑꦶꦠꦁ ꦱꦶꦏ꧀ꦑꦴꦥꦺꦠ꧀ꦮꦴ ꦧꦺꦴꦣꦶꦱꦠ꧀ꦠꦁ ꦱꦺꦱꦢꦴꦫꦏꦺꦲꦶ ꦥꦫꦶꦮꦸꦠꦁ ꦫꦴꦗꦔ꧀ꦒꦟꦺ ꦤꦶꦱꦷꦢꦴꦥꦺꦠ꧀ꦮꦴ ꦠꦁ ꦲꦠ꧀ꦡꦶꦁ ꦩꦸꦚ꧀ꦕꦤ꧀ꦠꦶ. ꦱꦺꦴ ꦏꦺꦴꦚ꧀ꦕꦤꦴꦢꦁ ꦤꦢꦤ꧀ꦠꦺꦴ ꦱꦺꦴꦟ꧀ꦝꦴꦪ ꦨꦹꦩꦶꦪꦁ ꦥꦺꦴꦡꦺꦤ꧀ꦠꦺꦴ ꦨꦪꦁ ꦢꦱ꧀ꦱꦺꦤ꧀ꦠꦺꦴ ꦄꦴꦒꦕ꧀ꦖꦠꦶ. ꦱꦺꦱꦢꦴꦫꦏꦴ ꦠꦁ ꦢꦶꦱ꧀ꦮꦴ ꦩꦫꦟꦨꦪꦨꦷꦠꦴ ꦢꦶꦱꦴꦮꦶꦢꦶꦱꦴꦱꦸ ꦥꦭꦴꦪꦶꦁꦱꦸ. ꦩꦲꦴꦱꦠ꧀ꦠꦺꦴ ꦥꦤ ꦩꦠ꧀ꦠꦲꦠ꧀ꦡꦶꦁ ꦄꦴꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ꦕꦶꦤ꧀ꦠꦺꦱꦶ ‘‘ꦕꦟ꧀ꦝꦤꦶꦫꦪꦺ ꦥꦕ꧀ꦕꦤꦠꦺꦴ ꦕꦟ꧀ꦝꦲꦠ꧀ꦡꦶꦤꦺꦴ ꦲꦠ꧀ꦡꦺ ꦩꦫꦟꦩꦺꦮ ꦱꦺꦪ꧀ꦪꦺꦴ’’ꦠꦶ ꦤꦶꦫꦪꦨꦪꦠꦗ꧀ꦗꦶꦠꦺꦴ ꦠꦠ꧀ꦡꦺꦮ ꦤꦶꦱꦷꦢꦶ. ꦱꦸꦱꦶꦏ꧀ꦑꦶꦠꦺꦴ ꦲꦠ꧀ꦡꦷ ꦩꦲꦴꦱꦠ꧀ꦠꦁ ꦥꦸꦥ꧀ꦦꦏꦭꦴꦥꦁ ꦮꦶꦪ ꦈꦏ꧀ꦑꦶꦥꦶꦠ꧀ꦮꦴ ꦄꦥꦫꦴꦥꦫꦁ ꦏꦠ꧀ꦮꦴ ꦄꦏꦶꦭꦩꦺꦠ꧀ꦮꦴꦮ ꦒꦕ꧀ꦖꦠꦶ. ꦌꦮꦁ ꦲꦠ꧀ꦡꦶꦤꦴꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ‘‘ꦱꦠ꧀ꦠꦮꦱ꧀ꦱꦶꦏꦢꦴꦫꦏꦴ ꦤꦴꦩ ꦱꦥ꧀ꦥꦱ꧀ꦱ ꦨꦴꦪꦤ꧀ꦠꦶ, ꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦧꦺꦴꦣꦶꦱꦠ꧀ꦠꦁ ꦱꦺꦱꦢꦴꦫꦏꦺꦲꦶ ꦱꦢ꧀ꦣꦶꦁ ꦫꦴꦗꦔ꧀ꦒꦟꦺ ꦤꦶꦱꦷꦢꦴꦥꦺꦠ꧀ꦮꦴ ꦈꦢ꧀ꦣꦛꦢꦴꦜꦺ ꦏꦠꦩꦸꦑꦧꦤ꧀ꦣꦺ ꦱꦥ꧀ꦥꦺ ꦮꦶꦱ꧀ꦱꦗ꧀ꦗꦺꦱꦸꦁ. ꦱꦺꦱꦢꦴꦫꦏꦴ ꦠꦺ ꦢꦶꦱ꧀ꦮꦴ ꦮꦶꦫꦮꦤ꧀ꦠꦴ ꦥꦭꦴꦪꦶꦁꦱꦸ. ꦩꦲꦴꦱꦠ꧀ꦠꦺꦴ ꦥꦤ ꦤꦶꦫꦪꦨꦪꦁ ꦄꦴꦮꦗ꧀ꦗꦺꦠ꧀ꦮꦴ ‘‘ꦕꦟ꧀ꦝꦱꦥ꧀ꦥꦱ꧀ꦱ ꦩꦸꦑꦺ ꦮꦶꦤꦴꦱꦩꦺꦮ ꦮꦫꦠꦫ’’ꦤ꧀ꦠꦶ ꦤꦶꦫꦺꦴꦣꦱꦩꦴꦥꦤ꧀ꦤꦺꦴ ꦩꦲꦴꦡꦺꦫꦺꦴ ꦮꦶꦪ ꦤꦶꦕ꧀ꦕꦭꦺꦴꦮ ꦄꦲꦺꦴꦱꦶ. ꦄꦡꦱ꧀ꦱ ꦱꦥ꧀ꦥꦺꦴ ꦱꦏꦭꦱꦫꦷꦫꦁ ꦮꦺꦜꦺꦠ꧀ꦮꦴ ꦩꦠ꧀ꦡꦏꦺ ꦦꦟꦁ ꦏꦠ꧀ꦮꦴ ꦄꦕ꧀ꦖꦶ. ꦠꦢꦴꦥꦶ ꦱꦺꦴ ꦤꦶꦕ꧀ꦕꦭꦺꦴꦮ ꦄꦲꦺꦴꦱꦶ. ꦌꦮꦁ ꦱꦥ꧀ꦥꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ‘‘ꦄꦛ꧀ꦜꦮꦱ꧀ꦱꦶꦏꦢꦴꦫꦏꦴ ꦤꦴꦩ ꦤꦛꦱꦩꦗ꧀ꦗꦁ ꦥꦶꦪꦴꦪꦤ꧀ꦠꦶ, ꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦠꦁ ꦥꦚ꧀ꦕꦢꦴꦫꦏꦱꦠꦺꦲꦶ ꦱꦢ꧀ꦣꦶꦁ ꦫꦴꦗꦔ꧀ꦒꦟꦺ ꦤꦶꦱꦷꦢꦴꦥꦺꦠ꧀ꦮꦴ ꦤꦛꦱꦩꦗ꧀ꦗꦁ ꦏꦴꦫꦴꦥꦺꦱꦸꦁ. ꦱꦺꦱꦢꦴꦫꦏꦴ ꦠꦁ ꦤꦛꦱꦩꦗ꧀ꦗꦁ ꦢꦶꦱ꧀ꦮꦴ ‘‘ꦱꦴꦣꦸ ꦱꦴꦣꦹ’’ꦠꦶ ꦮꦢꦤ꧀ꦠꦴ ꦩꦲꦴꦲꦱꦶꦠꦁ ꦲꦱꦤ꧀ꦠꦶ. ꦩꦲꦴꦱꦠ꧀ꦠꦺꦴ ꦥꦤ ‘‘ꦤꦶꦫꦪꦺ ꦤꦶꦧ꧀ꦧꦠ꧀ꦠꦏꦴꦭꦺ ꦠꦮ ꦑꦟꦩꦠ꧀ꦠꦩ꧀ꦥꦶ ꦲꦴꦱꦺꦴ ꦮꦴ ꦱꦺꦴꦩꦤꦱ꧀ꦱꦁ ꦮꦴ ꦤꦠ꧀ꦡꦷ’’ꦠꦶ ꦤꦶꦫꦪꦨꦪꦁ ꦄꦴꦮꦗ꧀ꦗꦺꦠ꧀ꦮꦴ ꦤꦶꦕ꧀ꦕꦭꦺꦴꦮ ꦄꦲꦺꦴꦱꦶ, ꦠꦁ ꦤ ꦎꦭꦺꦴꦏꦺꦱꦶ. ꦌꦮꦁ ꦤꦛꦱꦩꦗ꧀ꦗꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ‘‘ꦤꦮꦮꦱ꧀ꦱꦶꦏꦢꦴꦫꦏꦴ ꦤꦴꦩ ꦄꦱꦶꦤꦺꦴ ꦨꦴꦪꦤ꧀ꦠꦶ, ꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦠꦁ ꦥꦚ꧀ꦕꦢꦴꦫꦏꦱꦠꦺꦲꦶ ꦱꦢ꧀ꦣꦶꦁ ꦫꦴꦗꦔ꧀ꦒꦟꦺ ꦤꦶꦱꦷꦢꦴꦥꦺꦠ꧀ꦮꦴ ꦢꦴꦫꦏꦴꦤꦁ ꦏꦷꦭ꦳ꦤꦏꦴꦭꦺ ꦌꦏꦺꦴ ꦥꦸꦫꦶꦱꦺꦴ ꦦꦭꦶꦏꦮꦟ꧀ꦟꦁ ꦄꦱꦶꦁ ꦒꦲꦺꦠ꧀ꦮꦴ ꦥꦫꦶꦧ꧀ꦨꦩꦤ꧀ꦠꦺꦴ ꦤꦢꦤ꧀ꦠꦺꦴ ꦮꦒ꧀ꦒꦤ꧀ꦠꦺꦴ ꦠꦴꦱꦺꦤ꧀ꦠꦺꦴ ꦭꦔ꧀ꦓꦤ꧀ꦠꦺꦴ ꦄꦥ꧀ꦦꦺꦴꦛꦺꦤ꧀ꦠꦺꦴ ꦩꦲꦴꦱꦢ꧀ꦢꦁ ꦏꦫꦺꦴꦤ꧀ꦠꦺꦴ ‘‘ꦏꦴꦱꦶꦫꦚ꧀ꦚꦺꦴ ꦏꦶꦫ ꦏꦴꦭ꦳ꦏꦟ꧀ꦟꦷ ꦌꦏꦺꦴ ꦥꦸꦠ꧀ꦠꦺꦴ ꦄꦠ꧀ꦡꦶ, ꦱꦺꦴ ꦏꦸꦲꦶꦁ, ꦱꦷꦱꦩꦱ꧀ꦱ ꦖꦶꦤ꧀ꦢꦶꦱ꧀ꦱꦴꦩꦷ’’ꦠꦶ ꦄꦨꦶꦣꦴꦮꦠꦶ. ꦠꦁ ꦥꦸꦫꦶꦱꦁ ꦢꦶꦱ꧀ꦮꦴ ꦱꦺꦱꦢꦴꦫꦏꦴ ꦨꦷꦠꦠꦱꦶꦠꦴ ꦲꦸꦠ꧀ꦮꦴ ꦮꦶꦫꦮꦤ꧀ꦠꦴ ꦢꦶꦱꦴꦮꦶꦢꦶꦱꦴꦱꦸ ꦥꦭꦴꦪꦶꦁꦱꦸ. ꦩꦲꦴꦱꦠ꧀ꦠꦺꦴ ꦥꦤ ꦤꦶꦫꦪꦨꦪꦁ ꦄꦴꦮꦗ꧀ꦗꦺꦠ꧀ꦮꦴ ꦄꦗꦴꦤꦤ꧀ꦠꦺꦴ ꦮꦶꦪ ꦤꦶꦱꦷꦢꦶ. ꦄꦡ ꦤꦁ ꦱꦺꦴ ꦥꦸꦫꦶꦱꦺꦴ ꦄꦱꦶꦤꦴ ꦱꦷꦱꦺ ꦥꦫꦴꦩꦱꦶꦠ꧀ꦮꦴ ‘‘ꦱꦷꦱꦁ ꦠꦺ ꦖꦶꦤ꧀ꦢꦶꦱ꧀ꦱꦴꦩꦷ’’ꦠꦶ ꦠꦴꦱꦺꦤ꧀ꦠꦺꦴꦥꦶ ꦠꦴꦱꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦄꦥꦒꦩꦶ. ꦌꦮꦁ ꦑꦒ꧀ꦒꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ꦢꦱꦮꦱ꧀ꦱꦶꦏꦏꦴꦭꦺ ꦥꦤꦱ꧀ꦱ ꦧꦣꦶꦫꦨꦴꦮꦮꦷꦩꦁꦱꦤꦠ꧀ꦡꦁ ꦱꦶꦫꦶꦱꦪꦤꦺ ꦤꦶꦱꦷꦢꦴꦥꦺꦠ꧀ꦮꦴ ꦱꦴꦟꦶꦪꦴ ꦥꦫꦶꦏ꧀ꦑꦶꦥꦴꦥꦺꦠ꧀ꦮꦴ ꦕꦠꦹꦱꦸ ꦥꦱ꧀ꦱꦺꦱꦸ ꦖꦶꦢ꧀ꦢꦴꦤꦶ ꦏꦠ꧀ꦮꦴ ꦠꦱ꧀ꦱ ꦄꦢꦱ꧀ꦱꦺꦠ꧀ꦮꦴ ꦲꦺꦛ꧀ꦜꦴꦱꦪꦤꦺ ꦱꦔ꧀ꦑꦣꦩꦏꦺ ꦤꦶꦱꦷꦢꦴꦥꦺꦠ꧀ꦮꦴ ꦌꦏꦥ꧀ꦥꦲꦴꦫꦺꦤꦺꦮ ꦱꦔ꧀ꦑꦺ ꦣꦩꦴꦥꦺꦤ꧀ꦠꦶ, ꦌꦏꦤꦶꦤ꧀ꦤꦴꦢꦁ ꦄꦲꦺꦴꦱꦶ. ꦄꦩꦕ꧀ꦕꦴ ꦕꦠꦹꦱꦸ ꦥꦱ꧀ꦱꦺꦱꦸ ꦜꦠ꧀ꦮꦴ ꦱꦴꦟꦶꦪꦴ ꦖꦶꦢ꧀ꦢꦺꦲꦶ ꦎꦭꦺꦴꦏꦺꦤ꧀ꦠꦴꦥꦶ ꦩꦲꦴꦱꦠ꧀ꦠꦱ꧀ꦱ ꦌꦏꦢꦶꦮꦱꦩ꧀ꦥꦶ ꦱꦠꦶꦱꦩ꧀ꦩꦺꦴꦱꦁ ꦮꦴ ꦲꦠ꧀ꦡꦥꦴꦢꦮꦶꦏꦴꦫꦁ ꦮꦴ ꦦꦤ꧀ꦢꦤꦩꦠ꧀ꦠꦁ ꦮꦴ ꦤ ꦥꦱ꧀ꦱꦶꦁꦱꦸ. ꦌꦮꦁ ꦌꦏꦱꦁꦮꦕ꧀ꦖꦫꦁ ꦱꦔ꧀ꦑꦱꦢ꧀ꦢꦺꦤꦥꦶ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ꦥꦫꦩ꧀ꦥꦶ ꦌꦏꦴꦢꦱꦮꦱ꧀ꦱꦶꦏꦏꦴꦭꦺ ꦌꦏꦱꦁꦮꦕ꧀ꦖꦫꦁ ꦠꦡꦺꦮ ꦨꦺꦫꦶꦱꦢ꧀ꦢꦺꦤ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ꦢ꧀ꦮꦴꦢꦱꦮꦱ꧀ꦱꦶꦏꦏꦴꦭꦺ ‘‘ꦢꦷꦥꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ‘‘ꦫꦠ꧀ꦠꦶꦨꦴꦒꦺ ꦄꦤ꧀ꦣꦏꦴꦫꦺ ꦲꦠ꧀ꦡꦁ ꦮꦴ ꦥꦴꦢꦁ ꦮꦴ ꦦꦤ꧀ꦢꦴꦥꦺꦠꦶ ꦤꦸ ꦑꦺꦴ, ꦤꦺꦴ’’ꦠꦶ ꦓꦛꦺꦱꦸ ꦢꦷꦥꦺ ꦗꦴꦭꦺꦠ꧀ꦮꦴ ꦱꦺꦱꦢꦷꦥꦺ ꦤꦶꦧ꧀ꦧꦴꦥꦺꦠ꧀ꦮꦴ ꦡꦺꦴꦏꦁ ꦄꦤ꧀ꦣꦏꦴꦫꦺ ꦱꦪꦴꦥꦺꦠ꧀ꦮꦴ ꦓꦛꦺꦲꦶ ꦢꦷꦥꦺ ꦈꦏ꧀ꦑꦶꦥꦶꦠ꧀ꦮꦴ ꦌꦏꦥ꧀ꦥꦲꦴꦫꦺꦤꦺꦮ ꦄꦴꦭꦺꦴꦏꦁ ꦏꦠ꧀ꦮꦴ ꦆꦫꦶꦪꦴꦥꦡꦁ ꦈꦥꦣꦴꦫꦺꦤ꧀ꦠꦶ. ꦌꦮꦁ ꦢꦷꦥꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦏꦶꦚ꧀ꦕꦶ ꦦꦤ꧀ꦢꦤꦩꦠ꧀ꦠꦩ꧀ꦥꦶ ꦤ ꦥꦱ꧀ꦱꦶꦁꦱꦸ.

ꦠꦠꦺꦴ ꦠꦺꦫꦱꦮꦱ꧀ꦱꦶꦏꦏꦴꦭꦺ ‘‘ꦦꦴꦟꦶꦠꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦱꦏꦭꦱꦫꦷꦫꦁ ꦦꦴꦟꦶꦠꦺꦤ ꦩꦏ꧀ꦑꦺꦠ꧀ꦮꦴ ꦧꦲꦸꦩꦏ꧀ꦑꦶꦏꦺ ꦜꦴꦤꦺ ꦤꦶꦥꦗ꧀ꦗꦴꦥꦺꦱꦸꦁ. ꦩꦏ꧀ꦑꦶꦏꦴ ꦈꦛ꧀ꦜꦲꦤ꧀ꦠꦶ, ꦠꦴ ꦠꦱ꧀ꦱ ꦱꦏꦭꦱꦫꦷꦫꦁ ꦥꦫꦶꦮꦴꦫꦺꦠ꧀ꦮꦴ ꦱꦹꦕꦷꦲꦶ ꦮꦶꦗ꧀ꦙꦩꦴꦤꦴ ꦮꦶꦪ ꦑꦴꦢꦤ꧀ꦠꦶ. ꦱꦺꦴ ꦤꦶꦫꦺꦴꦣꦱꦩꦴꦥꦤ꧀ꦤꦺꦴ ꦩꦲꦴꦡꦺꦫꦺꦴ ꦮꦶꦪ ꦤꦶꦕ꧀ꦕꦭꦺꦴꦮ ꦄꦲꦺꦴꦱꦶ. ꦌꦮꦁ ꦦꦴꦟꦶꦠꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦏꦶꦚ꧀ꦕꦶ ꦦꦤ꧀ꦢꦤꦩꦠ꧀ꦠꦩ꧀ꦥꦶ ꦤ ꦥꦱ꧀ꦱꦶꦁꦱꦸ.

ꦄꦡꦱ꧀ꦱ ꦕꦸꦢ꧀ꦢꦱꦮꦱ꧀ꦱꦶꦏꦏꦴꦭꦺ ‘‘ꦆꦢꦴꦤꦶ ꦥꦤꦺꦱ ꦩꦲꦭ꧀ꦭꦏꦺꦴ ꦗꦴꦠꦺꦴ ꦱꦸꦕꦶꦏꦴꦩꦺꦴ ꦄꦱꦸꦕꦶꦗꦶꦒꦸꦕ꧀ꦖꦏꦺꦴ, ꦄꦱꦸꦕꦶꦤꦴ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦠꦠꦺꦴ ꦥꦛ꧀ꦜꦴꦪ ꦤꦁ ꦤꦺꦮ ꦤ꧀ꦲꦴꦥꦺꦤ꧀ꦠꦶ ꦤ ꦕ ꦄꦴꦕꦩꦴꦥꦺꦤ꧀ꦠꦶ. ꦱꦺꦴ ꦈꦕ꧀ꦕꦴꦫꦥꦱ꧀ꦱꦴꦮꦁ ꦏꦠ꧀ꦮꦴ ꦠꦠ꧀ꦡꦺꦮ ꦥꦭꦶꦥꦤ꧀ꦤꦺꦴ ꦱꦪꦠꦶ. ꦢꦸꦒ꧀ꦒꦤ꧀ꦣꦨꦴꦮꦺꦤ ꦥꦤꦱ꧀ꦱ ꦄꦤ꧀ꦠꦫꦸꦣꦷꦤꦁ ꦤꦶꦏ꧀ꦑꦩꦤꦏꦴꦭꦺꦴ ꦮꦶꦪ ꦄꦲꦺꦴꦱꦶ, ꦄꦱꦸꦕꦶꦒꦤ꧀ꦣꦺꦤ ꦩꦏ꧀ꦑꦶꦏꦴ ꦑꦴꦢꦤ꧀ꦠꦶ. ꦱꦺꦴ ꦤꦶꦕ꧀ꦕꦭꦺꦴꦮ ꦄꦲꦺꦴꦱꦶ. ꦄꦡ ꦤꦁ ꦥꦫꦶꦮꦴꦫꦺꦠ꧀ꦮꦴ ꦜꦶꦠꦴ ꦣꦴꦠꦶꦪꦺꦴ ꦄꦴꦲꦁꦱꦸ ‘‘ꦠꦴꦠ ꦠꦺꦩꦶꦪꦏꦸꦩꦴꦫ, ꦠ꧀ꦮꦁ ꦩꦲꦭ꧀ꦭꦏꦺꦴ ꦗꦴꦠꦺꦴ, ꦏꦺꦴ ꦠꦁ ꦱꦧ꧀ꦧꦢꦴ ꦥꦛꦶꦗꦒ꧀ꦒꦶꦱ꧀ꦱꦠꦶ, ꦏꦶꦁ ꦤ ꦭꦗ꧀ꦗꦱꦶ, ꦏꦱ꧀ꦩꦴ ꦤꦶꦥꦤ꧀ꦤꦺꦴꦱꦶ, ꦈꦛ꧀ꦜꦴꦪ ꦠꦺ ꦱꦫꦷꦫꦁ ꦥꦛꦶꦗꦒ꧀ꦒꦴꦲꦷ’’ꦠꦶ ꦄꦏ꧀ꦏꦺꦴꦱꦤ꧀ꦠꦶ ꦥꦫꦶꦨꦴꦱꦤ꧀ꦠꦶ. ꦱꦺꦴ ꦠꦡꦴꦫꦹꦥꦺ ꦥꦛꦶꦏꦹꦭꦺ ꦒꦹꦡꦫꦴꦱꦶꦩ꧀ꦲꦶ ꦤꦶꦩꦸꦒ꧀ꦒꦺꦴꦥꦶ ꦢꦸꦒ꧀ꦒꦤ꧀ꦣꦨꦴꦮꦺꦤ ꦪꦺꦴꦗꦤꦱꦠꦩꦠ꧀ꦡꦏꦺ ꦜꦶꦠꦴꦤꦩ꧀ꦥꦶ ꦲꦢꦪꦸꦥ꧀ꦥꦠꦤꦱꦩꦠ꧀ꦡꦱ꧀ꦱ ꦒꦹꦡꦤꦶꦫꦪꦱ꧀ꦱ ꦢꦸꦒ꧀ꦒꦤ꧀ꦣꦨꦴꦮꦁ ꦄꦴꦮꦗ꧀ꦗꦺꦠ꧀ꦮꦴ ꦤꦶꦕ꧀ꦕꦭꦺꦴꦮ ꦄꦲꦺꦴꦱꦶ. ꦌꦮꦁ ꦄꦱꦸꦕꦶꦤꦴꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦠꦠꦺꦴ ꦥꦤ꧀ꦤꦫꦱꦮꦱ꧀ꦱꦶꦏꦏꦴꦭꦺ ‘‘ꦄꦔ꧀ꦒꦴꦫꦺꦤ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ ꦄꦡꦱ꧀ꦱ ꦲꦺꦛ꧀ꦜꦴꦩꦚ꧀ꦕꦏꦺ ꦄꦒ꧀ꦒꦶꦏꦥꦭ꧀ꦭꦴꦤꦶ ꦜꦥꦪꦶꦁꦱꦸ ‘‘ꦄꦥ꧀ꦥꦺꦮ ꦤꦴꦩ ꦈꦟ꧀ꦲꦺꦤ ꦥꦷꦭ꦳ꦶꦠꦺꦴ ꦢꦸꦏ꧀ꦑꦮꦺꦢꦤꦁ ꦄꦱꦲꦤ꧀ꦠꦺꦴ ꦮꦶꦥ꧀ꦦꦤ꧀ꦢꦤꦴꦏꦴꦫꦁ ꦢꦱ꧀ꦱꦺꦪ꧀ꦪꦴ’’ꦠꦶ. ꦄꦡꦱ꧀ꦱ ꦱꦫꦷꦫꦺ ꦦꦺꦴꦛꦴꦤꦶ ꦈꦛ꧀ꦜꦲꦤ꧀ꦠꦶ. ꦩꦲꦴꦱꦠ꧀ꦠꦺꦴ ‘‘ꦄꦮꦷꦕꦶꦤꦶꦫꦪꦱꦤ꧀ꦠꦴꦥꦺꦴ ꦪꦺꦴꦗꦤꦱꦠꦩꦠ꧀ꦡꦏꦺ ꦦꦫꦠꦶ, ꦠꦩ꧀ꦲꦴ ꦢꦸꦏ꧀ꦑꦠꦺꦴ ꦆꦢꦁ ꦢꦸꦏ꧀ꦑꦁ ꦱꦠꦒꦸꦟꦺꦤ ꦱꦲꦱ꧀ꦱꦒꦸꦟꦺꦤ ꦱꦠꦱꦲꦱ꧀ꦱꦒꦸꦟꦺꦤ ꦮꦫꦠꦫ’’ꦤ꧀ꦠꦶ ꦄꦣꦶꦮꦴꦱꦺꦠ꧀ꦮꦴ ꦤꦶꦕ꧀ꦕꦭꦺꦴꦮ ꦄꦲꦺꦴꦱꦶ. ꦄꦡꦱ꧀ꦱ ꦩꦴꦠꦴꦥꦶꦠꦫꦺꦴ ꦨꦶꦗ꧀ꦗꦩꦴꦤꦲꦢꦪꦴ ꦮꦶꦪ ꦩꦤꦸꦱ꧀ꦱꦺ ꦥꦛꦶꦏ꧀ꦏꦩꦴꦥꦺꦠ꧀ꦮꦴ ꦠꦁ ꦠꦠꦺꦴ ꦄꦒ꧀ꦒꦶꦱꦤ꧀ꦠꦴꦥꦤꦠꦺꦴ ꦄꦥꦤꦺꦠ꧀ꦮꦴ ‘‘ꦠꦴꦠ ꦠꦺꦩꦶꦪꦏꦸꦩꦴꦫ, ꦩꦪꦁ ꦠꦮ ꦄꦥꦷꦜꦱꦥ꧀ꦥꦶꦄꦴꦢꦶꦨꦴꦮꦁ ꦗꦴꦤꦴꦩ. ꦤ ꦲꦶ ꦌꦠꦺꦱꦁ ꦌꦮꦫꦹꦥꦴꦤꦶ ꦲꦠ꧀ꦡꦥꦴꦢꦏꦟ꧀ꦟꦱꦺꦴꦠꦴꦤꦶ ꦲꦺꦴꦤ꧀ꦠꦶ, ꦠ꧀ꦮꦁ ꦄꦩ꧀ꦲꦺꦲꦶ ꦥꦠ꧀ꦡꦺꦠ꧀ꦮꦴ ꦭꦢ꧀ꦣꦥꦸꦠ꧀ꦠꦏꦺꦴ, ꦩꦴ ꦤꦺꦴ ꦤꦴꦱꦺꦲꦶ, ꦱꦏꦭꦗꦩ꧀ꦧꦸꦢꦷꦥꦺ ꦮꦱꦤ꧀ꦠꦴꦤꦁ ꦫꦴꦗꦹꦤꦁ ꦱꦤ꧀ꦠꦶꦏꦺ ꦒꦫꦲꦠꦺꦴ ꦤꦺꦴ ꦩꦺꦴꦕꦺꦲꦷ’’ꦠꦶ ꦪꦴꦕꦶꦁꦱꦸ. ꦌꦮꦁ ꦱꦺꦴ ꦠꦺꦲꦶ ꦪꦴꦕꦶꦠꦺꦴꦥꦶ ꦄꦱꦸꦟꦤ꧀ꦠꦺꦴ ꦮꦶꦪ ꦲꦸꦠ꧀ꦮꦴ ꦤꦶꦕ꧀ꦕꦭꦺꦴꦮ ꦤꦶꦥꦗ꧀ꦗꦶ. ꦄꦡꦱ꧀ꦱ ꦩꦴꦠꦴꦥꦶꦠꦫꦺꦴ ꦫꦺꦴꦢꦩꦴꦤꦴ ꦥꦫꦶꦢꦺꦮꦩꦴꦤꦴ ꦥꦛꦶꦏ꧀ꦏꦩꦤ꧀ꦠꦶ. ꦌꦏꦢꦴ ꦩꦴꦠꦴ ꦌꦏꦶꦏꦴ ꦈꦥꦱꦔ꧀ꦏꦩꦶꦠ꧀ꦮꦴ ꦪꦴꦕꦠꦶ, ꦌꦏꦢꦴ ꦥꦶꦠꦴ ꦌꦏꦏꦺꦴꦮ ꦈꦥꦱꦔ꧀ꦏꦩꦶꦠ꧀ꦮꦴ ꦪꦴꦕꦠꦶ. ꦌꦮꦁ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦄꦡꦱ꧀ꦱ ꦱꦺꦴꦭ꦳ꦱꦮꦱ꧀ꦱꦶꦏꦏꦴꦭꦺ ꦄꦩꦕ꧀ꦕꦧ꧀ꦫꦴꦲ꧀ꦩꦟꦴꦢꦪꦺꦴ ꦕꦶꦤ꧀ꦠꦪꦶꦁꦱꦸ ‘‘ꦥꦷꦜꦱꦥ꧀ꦥꦷ ꦮꦴ ꦲꦺꦴꦠꦸ, ꦩꦹꦒꦺꦴ ꦮꦴ ꦧꦣꦶꦫꦺꦴ ꦮꦴ ꦲꦺꦴꦠꦸ, ꦮꦪꦺ ꦥꦫꦶꦟꦠꦺ ꦫꦗꦤꦷꦪꦺ ꦄꦫꦗ꧀ꦗꦤ꧀ꦠꦴ ꦤꦴꦩ ꦤꦠ꧀ꦡꦶ, ꦢꦸꦱ꧀ꦱꦤꦷꦪꦺ ꦄꦢꦸꦱ꧀ꦱꦤ꧀ꦠꦴ ꦤꦴꦩ ꦤꦠ꧀ꦡꦶ, ꦱꦩꦪꦺ ꦱꦩ꧀ꦥꦠ꧀ꦠꦺ ꦥꦸꦥ꧀ꦦꦮꦶꦏꦱꦤꦁ ꦮꦶꦪ ꦲꦶ ꦣꦩ꧀ꦩꦠꦴ ꦌꦱꦴ, ꦤꦴꦛꦏꦴꦤꦩ꧀ꦥꦶꦱ꧀ꦱ ꦥꦕ꧀ꦕꦸꦥꦛ꧀ꦜꦴꦥꦺꦠ꧀ꦮꦴ ꦠꦴꦲꦶ ꦤꦁ ꦮꦷꦩꦁꦱꦶꦱ꧀ꦱꦴꦩꦴ’’ꦠꦶ. ꦠꦠꦺꦴ ꦈꦠ꧀ꦠꦩꦫꦹꦥꦣꦫꦴ ꦢꦺꦮꦏꦚ꧀ꦚꦴꦪꦺꦴ ꦮꦶꦪ ꦮꦶꦭꦴꦱꦱꦩ꧀ꦥꦤ꧀ꦤꦴ ꦤꦴꦛꦏꦶꦠ꧀ꦡꦶꦪꦺꦴ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦪꦴ ꦏꦸꦩꦴꦫꦁ ꦲꦱꦴꦥꦺꦠꦸꦁ ꦮꦴ ꦏꦶꦭꦺꦱꦺꦲꦶ ꦧꦤ꧀ꦣꦶꦠꦸꦁ ꦮꦴ ꦱꦏ꧀ꦏꦺꦴꦠꦶ, ꦱꦴ ꦠꦱ꧀ꦱ ꦄꦒ꧀ꦒꦩꦲꦺꦱꦷ ꦨꦮꦶꦱ꧀ꦱꦠꦷ’’ꦠꦶ ꦮꦠ꧀ꦮꦴ ꦏꦸꦩꦴꦫꦁ ꦒꦤ꧀ꦣꦺꦴꦢꦏꦺꦤ ꦤ꧀ꦲꦴꦥꦺꦠ꧀ꦮꦴ ꦢꦺꦮꦥꦸꦠ꧀ꦠꦁ ꦮꦶꦪ ꦄꦭꦔ꧀ꦏꦫꦶꦠ꧀ꦮꦴ ꦢꦺꦮꦮꦶꦩꦴꦤꦱꦢꦶꦱꦺ ꦱꦶꦫꦶꦒꦧ꧀ꦨꦺ ꦱꦸꦥꦚ꧀ꦚꦠ꧀ꦠꦺ ꦱꦶꦫꦶꦱꦪꦤꦺ ꦄꦴꦫꦺꦴꦥꦺꦠ꧀ꦮꦴ ꦒꦤ꧀ꦣꦢꦴꦩꦥꦸꦥ꧀ꦦꦢꦴꦩꦣꦹꦩꦮꦴꦱꦕꦸꦟ꧀ꦟꦴꦢꦷꦲꦶ ꦄꦤ꧀ꦠꦺꦴꦒꦧ꧀ꦨꦁ ꦌꦏꦒꦤ꧀ꦣꦱꦩꦺꦴꦢꦏꦁ ꦏꦠ꧀ꦮꦴ ꦥꦛꦶꦏ꧀ꦏꦩꦶꦁꦱꦸ. ꦄꦡ ꦤꦁ ꦠꦴ ꦆꦠ꧀ꦡꦶꦪꦺꦴ ꦥꦫꦶꦮꦴꦫꦺꦠ꧀ꦮꦴ ꦤꦕ꧀ꦕꦒꦷꦠꦺꦲꦶ ꦕꦺꦮ ꦩꦣꦸꦫꦮꦕꦤꦴꦢꦷꦲꦶ ꦕ ꦤꦴꦤꦥ꧀ꦥꦏꦴꦫꦺꦲꦶ ꦄꦨꦶꦫꦩꦴꦥꦺꦠꦸꦁ ꦮꦴꦪꦩꦶꦁꦱꦸ. ꦱꦺꦴ ꦧꦸꦢ꧀ꦣꦶꦱꦩ꧀ꦥꦤ꧀ꦤꦠꦴꦪ ꦠꦴ ꦆꦠ꧀ꦡꦶꦪꦺꦴ ꦄꦤꦺꦴꦭꦺꦴꦏꦺꦠ꧀ꦮꦴ ‘‘ꦆꦩꦴ ꦆꦠ꧀ꦡꦶꦪꦺꦴ ꦩꦩ ꦱꦫꦷꦫꦱꦩ꧀ꦦꦱ꧀ꦱꦁ ꦩꦴ ꦮꦶꦤ꧀ꦢꦤ꧀ꦠꦹ’’ꦠꦶ ꦄꦣꦶꦛ꧀ꦜꦲꦶꦠ꧀ꦮꦴ ꦄꦱ꧀ꦱꦴꦱꦥꦱ꧀ꦱꦴꦱꦺ ꦱꦤ꧀ꦤꦶꦫꦸꦩ꧀ꦨꦶ, ꦄꦡꦱ꧀ꦱ ꦱꦫꦷꦫꦁ ꦡꦢ꧀ꦣꦁ ꦄꦲꦺꦴꦱꦶ. ꦠꦴ ꦠꦱ꧀ꦱ ꦱꦫꦷꦫꦱꦩ꧀ꦦꦱ꧀ꦱꦁ ꦄꦮꦶꦤ꧀ꦢꦤ꧀ꦠꦶꦪꦺꦴ ꦲꦸꦠ꧀ꦮꦴ ‘‘ꦡꦢ꧀ꦣꦱꦫꦷꦫꦺꦴ ꦌꦱ, ꦤꦴꦪꦁ ꦩꦤꦸꦱ꧀ꦱꦺꦴ, ꦪꦏ꧀ꦑꦺꦴ ꦨꦮꦶꦱ꧀ꦱꦠꦷ’’ꦠꦶ ꦨꦷꦠꦠꦱꦶꦠꦴ ꦲꦸꦠ꧀ꦮꦴ ꦄꦠ꧀ꦠꦴꦤꦁ ꦱꦤ꧀ꦣꦴꦫꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦶꦪꦺꦴ ꦥꦭꦴꦪꦶꦁꦱꦸ. ꦌꦮꦁ ꦤꦴꦛꦏꦺꦤꦥꦶ ꦌꦏꦱꦁꦮꦕ꧀ꦖꦫꦁ ꦄꦤ꧀ꦠꦫꦤ꧀ꦠꦫꦴ ꦮꦷꦩꦁꦱꦤ꧀ꦠꦴꦥꦶꦱ꧀ꦱ ꦤꦺꦮ ꦄꦤ꧀ꦠꦫꦁ ꦥꦱ꧀ꦱꦶꦁꦱꦸ.

ꦌꦮꦁ ꦱꦺꦴꦭ꦳ꦱ ꦱꦁꦮꦕ꧀ꦖꦫꦴꦤꦶ ꦱꦺꦴꦭ꦳ꦱꦲꦶ ꦩꦲꦴꦮꦷꦩꦁꦱꦴꦲꦶ ꦕꦺꦮ ꦄꦤꦺꦏꦴꦲꦶ ꦑꦸꦢ꧀ꦢꦏꦮꦷꦩꦁꦱꦴꦲꦶ ꦕ ꦮꦷꦩꦁꦱꦩꦴꦤꦴꦥꦶ ꦠꦱ꧀ꦱ ꦕꦶꦠ꧀ꦠꦁ ꦥꦫꦶꦒ꧀ꦒꦟ꧀ꦲꦶꦠꦸꦁ ꦤꦴꦱꦏ꧀ꦑꦶꦁꦱꦸ.

ꦮꦷꦩꦁꦱꦤꦏꦟ꧀ꦝꦁ ꦤꦶꦛ꧀ꦜꦶꦠꦁ.

ꦫꦗ꧀ꦗꦪꦴꦕꦤꦏꦟ꧀ꦝꦁ

ꦠꦠꦺꦴ ꦫꦴꦗꦴ ꦮꦶꦥ꧀ꦥꦛꦶꦱꦴꦫꦷ ꦲꦸꦠ꧀ꦮꦴ ꦭꦏ꧀ꦑꦟꦥꦴꦜꦏꦺ ꦧ꧀ꦫꦴꦲ꧀ꦩꦟꦺ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦠꦸꦩ꧀ꦲꦺ ꦏꦸꦩꦴꦫꦱ꧀ꦱ ꦗꦴꦠꦏꦴꦭꦺ ‘ꦣꦚ꧀ꦚꦥꦸꦚ꧀ꦚꦭꦏ꧀ꦑꦟꦱꦩ꧀ꦥꦤ꧀ꦤꦺꦴ ꦄꦪꦁ ꦏꦸꦩꦴꦫꦺꦴ, ꦤꦴꦱ꧀ꦱ ꦏꦺꦴꦕꦶ ꦄꦤ꧀ꦠꦫꦴꦪꦺꦴ ꦥꦚ꧀ꦚꦴꦪꦠꦷ’ꦠꦶ ꦩꦺ ꦏꦡꦪꦶꦠ꧀ꦡ, ꦆꦢꦴꦤꦶ ꦥꦤ ꦱꦺꦴ ꦥꦷꦜꦱꦥ꧀ꦥꦷ ꦩꦹꦒꦧꦣꦶꦫꦺꦴ ꦗꦴꦠꦺꦴ, ꦏꦡꦴ ꦮꦺꦴ ꦤ ꦱꦩꦺꦠꦷ’’ꦠꦶ ꦄꦴꦲ. ꦧ꧀ꦫꦴꦲ꧀ꦩꦟꦴ ꦮꦢꦶꦁꦱꦸ ‘‘ꦩꦲꦴꦫꦴꦗ, ꦄꦴꦕꦫꦶꦪꦺꦲꦶ ꦄꦢꦶꦛ꧀ꦜꦏꦁ ꦤꦴꦩ ꦤꦠ꧀ꦡꦶ, ꦄꦥꦶꦕ ꦑꦺꦴ ꦥꦤ, ꦢꦺꦮ, ‘ꦫꦴꦗꦏꦸꦭꦺꦲꦶ ꦥꦠ꧀ꦡꦺꦠ꧀ꦮꦴ ꦭꦢ꧀ꦣꦥꦸꦠ꧀ꦠꦏꦺꦴ ꦏꦴꦭ꦳ꦏꦟ꧀ꦟꦷ’ꦠꦶ ꦮꦸꦠ꧀ꦠꦺ ‘ꦠꦸꦩ꧀ꦲꦴꦏꦁ ꦢꦺꦴꦩꦤꦱ꧀ꦱꦁ ꦱꦶꦪꦴ’ꦠꦶ ꦤ ꦏꦡꦪꦶꦩ꧀ꦲꦴ’’ꦠꦶ. ꦄꦡ ꦤꦺ ꦫꦴꦗꦴ ꦌꦮꦩꦴꦲ ‘‘ꦆꦢꦴꦤꦶ ꦥꦤ ꦏꦶꦁ ꦏꦴꦠꦸꦁ ꦮꦛ꧀ꦛꦠꦷ’’ꦠꦶ? ‘‘ꦩꦲꦴꦫꦴꦗ, ꦆꦩꦱ꧀ꦩꦶꦁ ꦏꦸꦩꦴꦫꦺ ꦆꦩꦱ꧀ꦩꦶꦁ ꦒꦺꦲꦺ ꦮꦱꦤ꧀ꦠꦺ ꦠꦪꦺꦴ ꦄꦤ꧀ꦠꦫꦴꦪꦴ ꦥꦚ꧀ꦚꦴꦪꦶꦱ꧀ꦱꦤ꧀ꦠꦶ – ꦗꦷꦮꦶꦠꦱ꧀ꦱ ꦮꦴ ꦄꦤ꧀ꦠꦫꦴꦪꦺꦴ, ꦱꦺꦠꦕ꧀ꦖꦠ꧀ꦠꦱ꧀ꦱ ꦮꦴ ꦄꦤ꧀ꦠꦫꦴꦪꦺꦴ, ꦄꦒ꧀ꦒꦩꦲꦺꦱꦶꦪꦴ ꦮꦴ ꦄꦤ꧀ꦠꦫꦴꦪꦺꦴ’’ꦠꦶ. ‘‘ꦠꦱ꧀ꦩꦴ, ꦢꦺꦮ, ꦥꦥꦚ꧀ꦕꦁ ꦄꦏꦠ꧀ꦮꦴ ꦄꦮꦩꦔ꧀ꦒꦭꦫꦡꦺ ꦄꦮꦩꦔ꧀ꦒꦭꦄꦱ꧀ꦱꦺ ꦪꦺꦴꦗꦺꦠ꧀ꦮꦴ ꦠꦠ꧀ꦡ ꦤꦁ ꦤꦶꦥꦗ꧀ꦗꦴꦥꦺꦠ꧀ꦮꦴ ꦥꦕ꧀ꦖꦶꦩꦢ꧀ꦮꦴꦫꦺꦤ ꦤꦷꦲꦫꦶꦠ꧀ꦮꦴ ꦄꦴꦩꦏꦱꦸꦱꦴꦤꦺ ꦕꦠꦸꦧ꧀ꦨꦶꦠ꧀ꦠꦶꦏꦁ ꦄꦴꦮꦴꦛꦁ ꦑꦟꦶꦠ꧀ꦮꦴ ꦤꦶꦑꦟꦶꦠꦸꦁ ꦮꦛ꧀ꦛꦠꦷ’’ꦠꦶ. ꦫꦴꦗꦴ ꦄꦤ꧀ꦠꦫꦴꦪꦨꦪꦺꦤ ꦨꦷꦠꦺꦴ ꦠꦺꦱꦁ ꦮꦕꦤꦁ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶ.

ꦠꦢꦴ ꦕꦤ꧀ꦢꦴꦢꦺꦮꦷ ꦠꦁ ꦥꦮꦠ꧀ꦠꦶꦁ ꦱꦸꦠ꧀ꦮꦴ ꦠꦸꦫꦶꦠꦠꦸꦫꦶꦠꦴꦮ ꦌꦏꦶꦏꦴ ꦫꦴꦗꦴꦤꦁ ꦈꦥꦱꦔ꧀ꦏꦩꦶꦠ꧀ꦮꦴ ꦮꦤ꧀ꦢꦶꦠ꧀ꦮꦴ ‘‘ꦢꦺꦮ, ꦠꦸꦩ꧀ꦲꦺꦲꦶ ꦩꦪ꧀ꦲꦁ ꦮꦫꦺꦴ ꦢꦶꦤ꧀ꦤꦺꦴ, ꦩꦪꦴ ꦕ ꦒꦲꦶꦠꦏꦺꦴ ꦏꦠ꧀ꦮꦴ ꦜꦥꦶꦠꦺꦴ, ꦆꦢꦴꦤꦶ ꦠꦁ ꦩꦺ ꦢꦺꦡꦴ’’ꦠꦶ ꦪꦴꦕꦶ. ‘‘ꦒꦟ꧀ꦲꦴꦲꦶ, ꦢꦺꦮꦷ’’ꦠꦶ. ‘‘ꦢꦺꦮ, ꦥꦸꦠ꧀ꦠꦱ꧀ꦱ ꦩꦺ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦏꦶꦁꦏꦴꦫꦟꦴ, ꦢꦺꦮꦴ’’ꦠꦶ. ‘‘ꦥꦸꦠ꧀ꦠꦺꦴ, ꦠꦺ ꦢꦺꦮꦶ, ꦏꦴꦭ꦳ꦏꦟ꧀ꦟꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦪꦴꦮꦗꦷꦮꦁ ꦄꦢꦢꦤ꧀ꦠꦴꦥꦶ ꦱꦠ꧀ꦠ ꦮꦱ꧀ꦱꦴꦤꦶ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦖ ꦮꦱ꧀ꦱꦴꦤꦶ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦥꦚ꧀ꦕ ꦮꦱ꧀ꦱꦴꦤꦶ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦕꦠ꧀ꦠꦴꦫꦶ ꦮꦱ꧀ꦱꦴꦤꦶ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦠꦷꦟꦶ ꦮꦱ꧀ꦱꦴꦤꦶ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦢ꧀ꦮꦺ ꦮꦱ꧀ꦱꦴꦤꦶ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦌꦏꦮꦱ꧀ꦱꦁ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦱꦠ꧀ꦠ ꦩꦴꦱꦴꦤꦶ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦖ ꦩꦴꦱꦴꦤꦶ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦥꦚ꧀ꦕ ꦩꦴꦱꦴꦤꦶ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦕꦠ꧀ꦠꦴꦫꦶ ꦩꦴꦱꦴꦤꦶ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦠꦷꦟꦶ ꦩꦴꦱꦴꦤꦶ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦢ꧀ꦮꦺ ꦩꦴꦱꦴꦤꦶ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦌꦏꦩꦴꦱꦁ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦄꦝ꧀ꦞꦩꦴꦱꦁ ꦫꦗ꧀ꦗꦁ ꦢꦺꦡꦴ’’ꦠꦶ. ‘‘ꦤ ꦱꦏ꧀ꦏꦴ, ꦢꦺꦮꦷ’’ꦠꦶ. ‘‘ꦠꦺꦤ ꦲꦶ, ꦢꦺꦮ, ꦱꦠ꧀ꦠ ꦢꦶꦮꦱꦴꦤꦶ ꦫꦗ꧀ꦗꦁ ꦢꦺꦡꦴ’’ꦠꦶ. ꦫꦴꦗꦴ ‘‘ꦱꦴꦣꦸ, ꦢꦺꦮꦶ, ꦒꦟ꧀ꦲꦴꦲꦷ’’ꦠꦶ ꦄꦴꦲ. ꦱꦴ ꦠꦱ꧀ꦩꦶꦁ ꦑꦟꦺ ꦥꦸꦠ꧀ꦠꦁ ꦄꦭꦔ꧀ꦏꦴꦫꦴꦥꦺꦠ꧀ꦮꦴ ‘‘ꦠꦺꦩꦶꦪꦏꦸꦩꦴꦫꦱ꧀ꦱ ꦆꦢꦁ ꦫꦗ꧀ꦗ’’ꦤ꧀ꦠꦶ ꦤꦒꦫꦺ ꦨꦺꦫꦶꦁ ꦕꦫꦴꦥꦺꦠ꧀ꦮꦴ ꦱꦏꦭꦤꦒꦫꦁ ꦄꦭꦔ꧀ꦏꦴꦫꦴꦥꦺꦠ꧀ꦮꦴ ꦥꦸꦠ꧀ꦠꦁ ꦲꦠ꧀ꦡꦶꦏ꧀ꦑꦤ꧀ꦣꦁ ꦄꦴꦫꦺꦴꦥꦺꦠ꧀ꦮꦴ ꦱꦺꦠꦕ꧀ꦖꦠ꧀ꦠꦁ ꦠꦱ꧀ꦱ ꦩꦠ꧀ꦡꦏꦺ ꦏꦴꦫꦴꦥꦺꦠ꧀ꦮꦴ ꦤꦒꦫꦁ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦸꦤ ꦄꦴꦒꦤ꧀ꦠ꧀ꦮꦴ ꦄꦤ꧀ꦠꦺꦴꦤꦒꦫꦁ ꦥꦮꦺꦱꦺꦠ꧀ꦮꦴ ꦠꦁ ꦱꦶꦫꦶꦱꦪꦤꦺ ꦤꦶꦥꦗ꧀ꦗꦴꦥꦺꦠ꧀ꦮꦴ ꦥꦶꦪꦥꦸꦠ꧀ꦠꦁ ꦱꦧ꧀ꦧꦫꦠ꧀ꦠꦶꦁ ꦪꦴꦕꦶ ‘‘ꦠꦴꦠ ꦠꦺꦩꦶꦪꦏꦸꦩꦴꦫ, ꦠꦁ ꦤꦶꦱ꧀ꦱꦴꦪ ꦱꦺꦴꦭ꦳ꦱ ꦮꦱ꧀ꦱꦴꦤꦶ ꦤꦶꦢ꧀ꦢꦁ ꦄꦭꦨꦶꦠ꧀ꦮꦴ ꦫꦺꦴꦢꦩꦴꦤꦴꦪ ꦩꦺ ꦄꦏ꧀ꦑꦷꦤꦶ ꦈꦥꦏ꧀ꦏꦴꦤꦶ, ꦱꦺꦴꦏꦺꦤ ꦩꦺ ꦲꦢꦪꦁ ꦨꦶꦗ꧀ꦗꦩꦴꦤꦁ ꦮꦶꦪ ꦄꦲꦺꦴꦱꦶ, ꦄꦲꦁ ꦠꦮ ꦄꦥꦷꦜꦱꦥ꧀ꦥꦶꦄꦴꦢꦶꦨꦴꦮꦁ ꦗꦴꦤꦴꦩꦶ, ꦩꦴ ꦩꦁ ꦄꦤꦴꦡꦁ ꦏꦫꦷ’’ꦠꦶ. ꦱꦴ ꦆꦩꦶꦤꦴ ꦈꦥꦴꦪꦺꦤꦺꦮ ꦥꦸꦤꦢꦶꦮꦱꦺꦥꦶ ꦥꦸꦤꦢꦶꦮꦱꦺꦥꦷꦠꦶ ꦥꦚ꧀ꦕ ꦢꦶꦮꦱꦴꦤꦶ ꦪꦴꦕꦶ.

ꦫꦗ꧀ꦗꦪꦴꦕꦤꦏꦟ꧀ꦝꦁ ꦤꦶꦛ꧀ꦜꦶꦠꦁ.

ꦄꦡ ꦖꦛ꧀ꦜꦺ ꦢꦶꦮꦱꦺ ꦫꦴꦗꦴ ꦱꦸꦤꦤ꧀ꦢꦁ ꦤꦴꦩ ꦱꦴꦫꦡꦶꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦠꦴꦠ, ꦱꦸꦤꦤ꧀ꦢꦱꦴꦫꦡꦶ ꦱ꧀ꦮꦺ ꦥꦴꦠꦺꦴꦮ ꦄꦮꦩꦔ꧀ꦒꦭꦫꦡꦺ ꦄꦮꦩꦔ꧀ꦒꦭꦄꦱ꧀ꦱꦺ ꦪꦺꦴꦗꦺꦠ꧀ꦮꦴ ꦏꦸꦩꦴꦫꦁ ꦠꦠ꧀ꦡ ꦤꦶꦥꦗ꧀ꦗꦴꦥꦺꦠ꧀ꦮꦴ ꦥꦕ꧀ꦖꦶꦩꦢ꧀ꦮꦴꦫꦺꦤ ꦤꦷꦲꦫꦶꦠ꧀ꦮꦴ ꦄꦴꦩꦏꦱꦸꦱꦴꦤꦺ ꦕꦠꦸꦧ꧀ꦨꦶꦠ꧀ꦠꦶꦏꦁ ꦄꦴꦮꦴꦛꦁ ꦑꦟꦶꦠ꧀ꦮꦴ ꦠꦠ꧀ꦡ ꦤꦁ ꦥꦏ꧀ꦑꦶꦥꦶꦠ꧀ꦮꦴ ꦏꦸꦢ꧀ꦢꦴꦭꦥꦶꦛ꧀ꦜꦺꦤ ꦩꦠ꧀ꦡꦏꦁ ꦨꦶꦤ꧀ꦢꦶꦠ꧀ꦮꦴ ꦗꦷꦮꦶꦠꦏ꧀ꦑꦪꦁ ꦥꦴꦥꦺꦠ꧀ꦮꦴ ꦈꦥꦫꦶ ꦥꦁꦱꦸꦁ ꦢꦠ꧀ꦮꦴ ꦥꦡꦮꦶꦮꦝ꧀ꦞꦤꦏꦩ꧀ꦩꦁ ꦏꦠ꧀ꦮꦴ ꦤ꧀ꦲꦠ꧀ꦮꦴ ꦌꦲꦷ’’ꦠꦶ ꦄꦴꦟꦴꦥꦺꦱꦶ. ꦱꦺꦴ ‘‘ꦱꦴꦣꦸ, ꦢꦺꦮꦴ’’ꦠꦶ ꦱꦩ꧀ꦥꦛꦶꦕ꧀ꦖꦶ. ꦄꦡ ꦖꦛ꧀ꦜꦩ꧀ꦥꦶ ꦫꦠ꧀ꦠꦶꦁ ꦢꦺꦮꦷ ꦏꦸꦩꦴꦫꦁ ꦪꦴꦕꦶꦠ꧀ꦮꦴ ‘‘ꦠꦴꦠ ꦠꦺꦩꦶꦪꦏꦸꦩꦴꦫ, ꦠꦮ ꦥꦶꦠꦴ ꦏꦴꦱꦶꦫꦴꦗꦴ ꦠꦁ ꦱ꧀ꦮꦺ ꦥꦴꦠꦺꦴꦮ ꦄꦴꦩꦏꦱꦸꦱꦴꦤꦺ ꦤꦶꦑꦟꦶꦠꦸꦁ ꦄꦴꦟꦴꦥꦺꦱꦶ, ꦱ꧀ꦮꦺ ꦥꦴꦠꦺꦴꦮ ꦩꦫꦟꦁ ꦥꦴꦥꦸꦟꦶꦱ꧀ꦱꦱꦶ ꦥꦸꦠ꧀ꦠꦴ’’ꦠꦶ ꦄꦴꦲ. ꦠꦁ ꦱꦸꦠ꧀ꦮꦴ ꦩꦲꦴꦱꦠ꧀ꦠꦱ꧀ꦱ ‘‘ꦠꦴꦠ ꦠꦺꦩꦶꦪꦏꦸꦩꦴꦫ, ꦱꦺꦴꦭ꦳ꦱ ꦮꦱ꧀ꦱꦴꦤꦶ ꦠꦪꦴ ꦏꦠꦺꦴ ꦮꦴꦪꦴꦩꦺꦴ ꦆꦢꦴꦤꦶ ꦩꦠ꧀ꦡꦏꦁ ꦥꦏ꧀ꦏꦺꦴ’’ꦠꦶ ꦕꦶꦤ꧀ꦠꦺꦤ꧀ꦠꦱ꧀ꦱ ꦄꦧ꧀ꦨꦤ꧀ꦠꦫꦺ ꦥꦷꦠꦶ ꦈꦥ꧀ꦥꦗ꧀ꦗꦶ. ꦩꦴꦠꦸꦪꦴ ꦥꦤꦱ꧀ꦱ ꦲꦢꦪꦁ ꦨꦶꦗ꧀ꦗꦩꦴꦤꦁ ꦮꦶꦪ ꦄꦲꦺꦴꦱꦶ, ꦌꦮꦁ ꦱꦤ꧀ꦠꦺꦥꦶ ‘‘ꦩꦤꦺꦴꦫꦡꦺꦴ ꦩꦠ꧀ꦡꦏꦁ ꦥꦴꦥꦸꦟꦶꦱ꧀ꦱꦠꦷ’’ꦠꦶ ꦩꦴꦠꦸꦪꦴ ꦱꦢ꧀ꦣꦶꦁ ꦤꦴꦭꦥꦶ.

ꦄꦡꦱ꧀ꦱꦴ ꦫꦠ꧀ꦠꦶꦪꦴ ꦄꦕ꧀ꦕꦪꦺꦤ ꦥꦴꦠꦺꦴꦮ ꦱꦸꦤꦤ꧀ꦢꦺꦴ ꦱꦴꦫꦡꦶ ꦫꦡꦁ ꦪꦺꦴꦗꦺꦤ꧀ꦠꦺꦴ ꦢꦺꦮꦠꦴꦤꦸꦨꦴꦮꦺꦤ ꦩꦲꦴꦱꦠ꧀ꦠꦱ꧀ꦱ ꦥꦴꦫꦩꦶꦠꦴꦤꦸꦨꦴꦮꦺꦤ ꦕ ꦩꦔ꧀ꦒꦭꦫꦡꦺ ꦩꦔ꧀ꦒꦭꦄꦱ꧀ꦱꦺ ꦪꦺꦴꦗꦺꦠ꧀ꦮꦴ ꦫꦡꦁ ꦫꦴꦗꦢ꧀ꦮꦴꦫꦺ ꦜꦥꦺꦠ꧀ꦮꦴ ꦩꦲꦴꦠꦭꦁ ꦄꦨꦶꦫꦸꦲꦶꦠ꧀ꦮꦴ ꦱꦶꦫꦶꦒꦧ꧀ꦨꦁ ꦥꦮꦶꦱꦶꦠ꧀ꦮꦴ ꦢꦺꦮꦶꦁ ꦮꦤ꧀ꦢꦶꦠ꧀ꦮꦴ ꦌꦮꦩꦴꦲ – ‘‘ꦢꦺꦮꦶ, ꦩꦪ꧀ꦲꦁ ꦩꦴ ꦏꦸꦗ꧀ꦙ, ꦫꦚ꧀ꦚꦺꦴ ꦄꦴꦟꦴ’’ꦠꦶ ꦮꦠ꧀ꦮꦴ ꦥꦸꦠ꧀ꦠꦁ ꦄꦴꦭꦶꦔ꧀ꦒꦶꦠ꧀ꦮꦴ ꦤꦶꦥꦤ꧀ꦤꦁ ꦢꦺꦮꦶꦁ ꦥꦶꦛ꧀ꦜꦶꦲꦠ꧀ꦡꦺꦤ ꦄꦥꦤꦺꦠ꧀ꦮꦴ ꦥꦸꦥ꧀ꦦꦏꦭꦴꦥꦁ ꦮꦶꦪ ꦏꦸꦩꦴꦫꦁ ꦈꦏ꧀ꦑꦶꦥꦶꦠ꧀ꦮꦴ ꦥꦴꦱꦴꦢꦴ ꦎꦠꦫꦶ. ꦠꦢꦴ ꦕꦤ꧀ꦢꦴꦢꦺꦮꦷ ꦈꦫꦁ ꦥꦲꦫꦶꦠ꧀ꦮꦴ ꦩꦲꦤ꧀ꦠꦺꦤ ꦱꦢ꧀ꦢꦺꦤ ꦥꦫꦶꦢꦺꦮꦶꦠ꧀ꦮꦴ ꦩꦲꦴꦠꦭꦺ ꦎꦲꦷꦪꦶ. ꦄꦡ ꦤꦁ ꦩꦲꦴꦱꦠ꧀ꦠꦺꦴ ꦎꦭꦺꦴꦏꦺꦠ꧀ꦮꦴ ‘‘ꦩꦪꦶ ꦄꦏꦡꦺꦤ꧀ꦠꦺ ꦩꦴꦠꦴ ꦲꦢꦪꦺꦤ ꦦꦭꦶꦠꦺꦤ ꦩꦫꦶꦱ꧀ꦱꦠꦷ’’ꦠꦶ ꦏꦡꦺꦠꦸꦏꦴꦩꦺꦴ ꦲꦸꦠ꧀ꦮꦴꦥꦶ ‘‘ꦱꦕꦺ ꦄꦲꦁ ꦏꦡꦺꦱ꧀ꦱꦴꦩꦶ, ꦱꦺꦴꦭ꦳ꦱ ꦮꦱ꧀ꦱꦴꦤꦶ ꦏꦠꦺꦴ ꦮꦴꦪꦴꦩꦺꦴ ꦩꦺ ꦩꦺꦴꦓꦺꦴ ꦨꦮꦶꦱ꧀ꦱꦠꦶ, ꦄꦏꦡꦺꦤ꧀ꦠꦺꦴ ꦥꦤꦴꦲꦁ ꦄꦠ꧀ꦠꦤꦺꦴ ꦕ ꦩꦴꦠꦴꦥꦶꦠꦹꦤꦚ꧀ꦕ ꦩꦲꦴꦗꦤꦱ꧀ꦱ ꦕ ꦥꦕ꧀ꦕꦪꦺꦴ ꦨꦮꦶꦱ꧀ꦱꦴꦩꦷ’’ꦠꦶ ꦄꦣꦶꦮꦴꦱꦺꦱꦶ.

ꦄꦡ ꦤꦁ ꦱꦴꦫꦡꦶ ꦫꦡꦁ ꦄꦴꦫꦺꦴꦥꦺꦠ꧀ꦮꦴ ‘‘ꦥꦕ꧀ꦖꦶꦩꦢ꧀ꦮꦴꦫꦴꦨꦶꦩꦸꦑꦁ ꦫꦡꦁ ꦥꦺꦱꦺꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦫꦡꦁ ꦥꦺꦱꦺꦱꦶ. ꦠꦢꦴ ꦩꦲꦴꦱꦠ꧀ꦠꦱ꧀ꦱ ꦥꦴꦫꦩꦶꦠꦴꦤꦸꦨꦴꦮꦺꦤ ꦢꦺꦮꦠꦴꦮꦶꦒ꧀ꦒꦲꦶꦠꦺꦴ ꦲꦸꦠ꧀ꦮꦴ ꦫꦡꦁ ꦤꦶꦮꦠ꧀ꦠꦴꦥꦺꦠ꧀ꦮꦴ ꦥꦴꦕꦷꦤꦢ꧀ꦮꦴꦫꦴꦨꦶꦩꦸꦑꦁ ꦫꦡꦁ ꦥꦺꦱꦺꦱꦶ, ꦄꦡ ꦫꦡꦕꦏ꧀ꦏꦁ ꦈꦩ꧀ꦩꦴꦫꦺ ꦥꦠꦶꦲꦚ꧀ꦚꦶ. ꦩꦲꦴꦱꦠ꧀ꦠꦺꦴꦥꦶ ꦠꦱ꧀ꦱ ꦱꦢ꧀ꦢꦁ ꦱꦸꦠ꧀ꦮꦴ ‘‘ꦩꦤꦺꦴꦫꦡꦺꦴ ꦩꦺ ꦩꦠ꧀ꦡꦏꦁ ꦥꦠ꧀ꦠꦺꦴ’’ꦠꦶ ꦱꦸꦛ꧀ꦜꦸꦠꦫꦁ ꦠꦸꦛ꧀ꦜꦕꦶꦠ꧀ꦠꦺꦴ ꦄꦲꦺꦴꦱꦶ. ꦫꦡꦺꦴ ꦤꦒꦫꦴ ꦤꦶꦏ꧀ꦑꦩꦶꦠ꧀ꦮꦴ ꦢꦺꦮꦠꦴꦤꦸꦨꦴꦮꦺꦤ ꦠꦶꦪꦺꦴꦗꦤꦶꦏꦁ ꦜꦴꦤꦁ ꦒꦠꦺꦴ. ꦠꦠ꧀ꦡ ꦮꦤꦓꦛꦁ ꦱꦴꦫꦡꦶꦱ꧀ꦱ ꦄꦴꦩꦏꦱꦸꦱꦴꦤꦁ ꦮꦶꦪ ꦈꦥꦛ꧀ꦜꦴꦱꦶ. ꦱꦺꦴ ‘‘ꦆꦢꦁ ꦜꦴꦤꦁ ꦦꦴꦱꦸꦏ’’ꦤ꧀ꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ꦫꦡꦁ ꦩꦒ꧀ꦒꦴ ꦎꦏ꧀ꦏꦩꦴꦥꦺꦠ꧀ꦮꦴ ꦩꦒ꧀ꦒꦥꦱ꧀ꦱꦺ ꦜꦥꦺꦠ꧀ꦮꦴ ꦫꦡꦴ ꦎꦫꦸꦪ꧀ꦲ ꦩꦲꦴꦱꦠ꧀ꦠꦱ꧀ꦱ ꦄꦴꦨꦫꦟꦨꦟ꧀ꦝꦁ ꦎꦩꦸꦚ꧀ꦕꦶꦠ꧀ꦮꦴ ꦨꦟ꧀ꦝꦶꦏꦁ ꦏꦠ꧀ꦮꦴ ꦌꦏꦩꦤ꧀ꦠꦁ ꦜꦥꦺꦠ꧀ꦮꦴ ꦏꦸꦢ꧀ꦢꦴꦭꦁ ꦄꦴꦢꦴꦪ ꦫꦡꦱ꧀ꦱ ꦄꦮꦶꦢꦹꦫꦺ ꦜꦴꦤꦺ ꦕꦠꦸꦧ꧀ꦨꦶꦠ꧀ꦠꦶꦏꦁ ꦄꦴꦮꦴꦛꦁ ꦑꦟꦶꦠꦸꦁ ꦄꦴꦫꦨꦶ.

ꦠꦠꦺꦴ ꦧꦺꦴꦣꦶꦱꦠ꧀ꦠꦺꦴ ꦕꦶꦤ꧀ꦠꦺꦱꦶ ‘‘ꦄꦪꦁ ꦩꦺ ꦮꦴꦪꦴꦩꦏꦴꦭꦺꦴ, ꦄꦲꦚ꧀ꦲꦶ ꦱꦺꦴꦭ꦳ꦱ ꦮꦱ꧀ꦱꦴꦤꦶ ꦲꦠ꧀ꦡꦥꦴꦢꦺ ꦤ ꦕꦴꦭꦺꦱꦶꦁ, ꦏꦶꦁ ꦤꦸ ꦑꦺꦴ ꦩꦺ ꦧꦭꦁ ꦄꦠ꧀ꦡꦶ, ꦈꦢꦴꦲꦸ ꦤꦺꦴ’’ꦠꦶ. ꦱꦺꦴ ꦈꦛ꧀ꦜꦴꦪ ꦮꦴꦩꦲꦠ꧀ꦡꦺꦤ ꦢꦏ꧀ꦑꦶꦟꦲꦠ꧀ꦡꦁ, ꦢꦏ꧀ꦑꦶꦟꦲꦠ꧀ꦡꦺꦤ ꦮꦴꦩꦲꦠ꧀ꦡꦁ ꦥꦫꦴꦩꦱꦤ꧀ꦠꦺꦴ ꦈꦨꦺꦴꦲꦶ ꦲꦠ꧀ꦡꦺꦲꦶ ꦥꦴꦢꦺ ꦱꦩ꧀ꦧꦴꦲꦶꦠ꧀ꦮꦴ ꦫꦡꦴ ꦎꦠꦫꦶꦠꦸꦁ ꦕꦶꦠ꧀ꦠꦁ ꦈꦥ꧀ꦥꦴꦢꦺꦱꦶ. ꦠꦴꦮꦢꦺꦮꦱ꧀ꦱ ꦥꦴꦢꦥꦠꦶꦠꦛ꧀ꦜꦴꦤꦺ ꦮꦴꦠꦥꦸꦟ꧀ꦟꦨꦱ꧀ꦠꦕꦩ꧀ꦩꦁ ꦮꦶꦪ ꦩꦲꦴꦥꦡꦮꦷ ꦄꦧ꧀ꦨꦸꦒ꧀ꦒꦤ꧀ꦠ꧀ꦮꦴ ꦫꦡꦱ꧀ꦱ ꦥꦕ꧀ꦖꦶꦩꦤ꧀ꦠꦁ ꦄꦴꦲꦕ꧀ꦕ ꦄꦛ꧀ꦜꦴꦱꦶ. ꦩꦲꦴꦱꦠ꧀ꦠꦺꦴ ꦫꦡꦴ ꦎꦠꦫꦶꦠ꧀ꦮꦴ ꦏꦠꦶꦥꦪꦺ ꦮꦴꦫꦺ ꦄꦥꦫꦴꦥꦫꦁ ꦕꦔ꧀ꦏꦩꦶꦠ꧀ꦮꦴ ‘‘ꦆꦩꦶꦤꦴꦮ ꦤꦶꦪꦴꦩꦺꦤ ꦌꦏꦢꦶꦮꦱꦁ ꦪꦺꦴꦗꦤꦱꦠꦩ꧀ꦥꦶ ꦩꦺ ꦒꦤ꧀ꦠꦸꦁ ꦧꦭꦁ ꦄꦠ꧀ꦡꦷ’’ꦠꦶ ꦚꦠ꧀ꦮꦴ ‘‘ꦱꦕꦺ, ꦱꦴꦫꦡꦶ, ꦩꦪꦴ ꦱꦢ꧀ꦣꦶꦁ ꦮꦶꦫꦸꦗ꧀ꦙꦺꦪ꧀ꦪ, ꦄꦠ꧀ꦡꦶ ꦤꦸ ꦑꦺꦴ ꦩꦺ ꦠꦺꦤ ꦱꦲ ꦥꦛꦶꦮꦶꦫꦸꦗ꧀ꦙꦶꦠꦸꦁ ꦧꦭ’’ꦤ꧀ꦠꦶ ꦈꦥꦣꦴꦫꦺꦤ꧀ꦠꦺꦴ ꦫꦡꦱ꧀ꦱ ꦥꦕ꧀ꦖꦶꦩꦤ꧀ꦠꦁ ꦒꦲꦺꦠ꧀ꦮꦴ ꦏꦸꦩꦴꦫꦏꦴꦤꦁ ꦏꦷꦭ꦳ꦤꦪꦴꦤꦏꦁ ꦮꦶꦪ ꦈꦏ꧀ꦑꦶꦥꦶꦠ꧀ꦮꦴ ꦫꦡꦁ ꦥꦫꦶꦧ꧀ꦨꦩꦺꦤ꧀ꦠꦺꦴ ꦄꦛ꧀ꦜꦴꦱꦶ. ꦄꦡꦱ꧀ꦱ ‘‘ꦄꦠ꧀ꦡꦶ ꦩꦺ ꦠꦺꦤ ꦱꦲ ꦥꦛꦶꦮꦶꦫꦸꦗ꧀ꦙꦶꦠꦸꦁ ꦧꦭ’’ꦤ꧀ꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ꦥꦱꦴꦣꦤꦠ꧀ꦡꦴꦪ ꦕꦶꦠ꧀ꦠꦁ ꦈꦥ꧀ꦥꦗ꧀ꦗꦶ.

ꦠꦁꦑꦟꦚ꧀ꦚꦺꦮ ꦱꦏ꧀ꦏꦱ꧀ꦱ ꦨꦮꦤꦁ ꦈꦟ꧀ꦲꦴꦏꦴꦫꦁ ꦢꦱ꧀ꦱꦺꦱꦶ. ꦱꦏ꧀ꦏꦺꦴ ꦄꦴꦮꦗ꧀ꦗꦺꦤ꧀ꦠꦺꦴ ꦠꦁ ꦏꦴꦫꦟꦁ ꦚꦠ꧀ꦮꦴ ‘‘ꦠꦺꦩꦶꦪꦏꦸꦩꦴꦫꦱ꧀ꦱ ꦩꦤꦺꦴꦫꦡꦺꦴ ꦩꦠ꧀ꦡꦏꦁ ꦥꦠ꧀ꦠꦺꦴ, ꦆꦢꦴꦤꦶ ꦥꦱꦴꦣꦤꦠ꧀ꦡꦴꦪ ꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ, ꦏꦶꦁ ꦌꦠꦱ꧀ꦱ ꦩꦴꦤꦸꦱꦏꦺꦤ ꦥꦱꦴꦣꦤꦺꦤꦴ’’ꦠꦶ ꦢꦶꦧ꧀ꦧꦥꦱꦴꦣꦤꦁ ꦒꦴꦲꦴꦥꦺꦠ꧀ꦮꦴ ꦮꦶꦱ꧀ꦱꦏꦩ꧀ꦩꦢꦺꦮꦥꦸꦠ꧀ꦠꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦠꦴꦠ ꦮꦶꦱ꧀ꦱꦏꦩ꧀ꦩ ꦢꦺꦮꦥꦸꦠ꧀ꦠ, ꦠ꧀ꦮꦁ ꦒꦕ꧀ꦖ, ꦏꦴꦱꦶꦫꦴꦗꦱ꧀ꦱ ꦥꦸꦠ꧀ꦠꦁ ꦠꦺꦩꦶꦪꦏꦸꦩꦴꦫꦁ ꦄꦭꦔ꧀ꦏꦫꦺꦴꦲꦷ’’ꦠꦶ ꦄꦴꦟꦴꦥꦺꦱꦶ. ꦱꦺꦴ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦠꦴꦮꦠꦶꦁꦱꦨꦮꦤꦠꦺꦴ ꦎꦠꦫꦶꦠ꧀ꦮꦴ ꦠꦱ꧀ꦱ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦢꦱꦲꦶ ꦢꦸꦱ꧀ꦱꦱꦲꦱ꧀ꦱꦺꦲꦶ ꦮꦺꦜꦤꦁ ꦏꦠ꧀ꦮꦴ ꦢꦶꦧ꧀ꦧꦺꦲꦶ ꦕꦺꦮ ꦩꦴꦤꦸꦱꦏꦺꦲꦶ ꦕ ꦄꦭꦔ꧀ꦏꦴꦫꦺꦲꦶ ꦱꦏ꧀ꦏꦁ ꦮꦶꦪ ꦠꦁ ꦄꦭꦔ꧀ꦏꦫꦶꦠ꧀ꦮꦴ ꦱꦏꦛ꧀ꦜꦴꦤꦩꦺꦮ ꦒꦠꦺꦴ. ꦱꦺꦴ ꦢꦺꦮꦫꦴꦗꦭꦷꦭꦴꦪ ꦱꦴꦫꦡꦶꦱ꧀ꦱ ꦑꦟꦤꦺꦴꦏꦴꦱꦁ ꦒꦤ꧀ꦠ꧀ꦮꦴ ꦄꦴꦮꦴꦛꦠꦷꦫꦺ ꦜꦠ꧀ꦮꦴ ꦥꦸꦕ꧀ꦖꦤ꧀ꦠꦺꦴ ꦠꦠꦶꦪꦁ ꦒꦴꦡꦩꦴꦲ –

꧓. ‘‘ꦏꦶꦁ ꦤꦸ ꦱꦤ꧀ꦠꦫꦩꦴꦤꦺꦴꦮ, ꦏꦴꦱꦸꦁ ꦑꦟꦱꦶ ꦱꦴꦫꦡꦶ;

ꦥꦸꦛ꧀ꦜꦺꦴ ꦩꦺ ꦱꦩ꧀ꦩ ꦄꦏ꧀ꦑꦴꦲꦶ, ꦏꦶꦁ ꦏꦴꦱꦸꦪꦴ ꦏꦫꦶꦱ꧀ꦱꦱꦷ’’ꦠꦶ.

ꦠꦠ꧀ꦡ ꦏꦴꦱꦸꦤ꧀ꦠꦶ ꦄꦴꦮꦴꦛꦁ.

ꦠꦁ ꦱꦸꦠ꧀ꦮꦴ ꦱꦴꦫꦡꦶ ꦄꦴꦮꦴꦛꦁ ꦑꦟꦤ꧀ꦠꦺꦴ ꦈꦢ꧀ꦣꦁ ꦄꦤꦺꦴꦭꦺꦴꦏꦺꦠ꧀ꦮꦴꦮ ꦕꦠꦸꦠ꧀ꦡꦁ ꦒꦴꦡꦴꦩꦴꦲ –

꧔. ‘‘ꦫꦚ꧀ꦚꦺꦴ ꦩꦹꦒꦺꦴ ꦕ ꦥꦏ꧀ꦑꦺꦴ ꦕ, ꦥꦸꦠ꧀ꦠꦺꦴ ꦗꦴꦠꦺꦴ ꦄꦕꦺꦠꦱꦺꦴ;

ꦱꦺꦴꦩ꧀ꦲꦶ ꦫꦚ꧀ꦚꦴ ꦱꦩꦗ꧀ꦙꦶꦛ꧀ꦜꦺꦴ, ꦥꦸꦠ꧀ꦠꦁ ꦩꦺ ꦤꦶꦑꦟꦁ ꦮꦤꦺ’’ꦠꦶ.

ꦠꦠ꧀ꦡ ꦥꦏ꧀ꦑꦺꦴꦠꦶ ꦥꦷꦜꦱꦥ꧀ꦥꦷ. ‘‘ꦩꦹꦒꦺꦴ’’ꦠꦶ ꦮꦕꦤꦺꦤꦺꦮ ꦥꦤꦱ꧀ꦱ ꦧꦣꦶꦫꦨꦴꦮꦺꦴꦥꦶ ꦱꦶꦗ꧀ꦙꦠꦶ ꦧꦣꦶꦫꦱ꧀ꦱ ꦲꦶ ꦥꦛꦶꦮꦕꦤꦁ ꦏꦡꦺꦠꦸꦁ ꦄꦱꦏ꧀ꦏꦸꦟꦺꦪ꧀ꦪꦠ꧀ꦠꦴ. ꦄꦕꦺꦠꦱꦺꦴꦠꦶ ꦄꦕꦶꦠ꧀ꦠꦏꦺꦴ ꦮꦶꦪ ꦗꦴꦠꦺꦴ. ꦱꦺꦴꦭ꦳ꦱ ꦮꦱ꧀ꦱꦴꦤꦶ ꦄꦏꦡꦶꦠꦠ꧀ꦠꦴ ꦌꦮꦩꦴꦲ. ꦱꦩꦗ꧀ꦙꦶꦛ꧀ꦜꦺꦴꦠꦶ ꦄꦴꦟꦠ꧀ꦠꦺꦴ, ꦥꦺꦱꦶꦠꦺꦴꦠꦶ ꦄꦠ꧀ꦡꦺꦴ. ꦤꦶꦑꦟꦁ ꦮꦤꦺꦠꦶ ꦮꦤꦺ ꦤꦶꦑꦟꦺꦪ꧀ꦪꦴꦱꦶ.

ꦄꦡ ꦤꦁ ꦩꦲꦴꦱꦠ꧀ꦠꦺꦴ ꦄꦴꦲ –

꧕. ‘‘ꦤ ꦧꦣꦶꦫꦺꦴ ꦤ ꦩꦹꦒꦺꦴꦱ꧀ꦩꦶ, ꦤ ꦥꦏ꧀ꦑꦺꦴ ꦤ ꦕ ꦮꦷꦏꦭꦺꦴ;

ꦄꦣꦩ꧀ꦩꦁ ꦱꦴꦫꦡꦶ ꦏꦪꦶꦫꦴ, ꦩꦁ ꦕꦺ ꦠ꧀ꦮꦁ ꦤꦶꦑꦟꦁ ꦮꦤꦺ.

꧖. ‘‘ꦈꦴꦫꦹ ꦧꦴꦲꦸꦚ꧀ꦕ ꦩꦺ ꦥꦱ꧀ꦱ, ꦨꦴꦱꦶꦠꦚ꧀ꦕ ꦱꦸꦟꦺꦴꦲꦶ ꦩꦺ;

ꦄꦣꦩ꧀ꦩꦁ ꦱꦴꦫꦡꦶ ꦏꦪꦶꦫꦴ, ꦩꦁ ꦕꦺ ꦠ꧀ꦮꦁ ꦤꦶꦑꦟꦁ ꦮꦤꦺ’’ꦠꦶ.

ꦠꦠ꧀ꦡ ꦤ ꦧꦣꦶꦫꦺꦴꦠꦶ ꦱꦩ꧀ꦩ ꦱꦴꦫꦡꦶ, ꦱꦕꦺ ꦠꦁ ꦫꦴꦗꦴ ꦌꦮꦫꦹꦥꦁ ꦥꦸꦠ꧀ꦠꦁ ꦩꦴꦫꦴꦥꦺꦠꦸꦁ ꦄꦴꦟꦴꦥꦺꦱꦶ, ꦄꦲꦁ ꦥꦤ ꦌꦮꦫꦹꦥꦺꦴ ꦤ ꦨꦮꦴꦩꦷꦠꦶ ꦢꦷꦥꦺꦠꦸꦁ ꦌꦮꦩꦴꦲ. ꦩꦁ ꦕꦺ ꦠ꧀ꦮꦁ ꦤꦶꦑꦟꦁ ꦮꦤꦺꦠꦶ ꦱꦕꦺ ꦧꦣꦶꦫꦨꦴꦮꦴꦢꦶꦮꦶꦫꦲꦶꦠꦁ ꦌꦮꦫꦹꦥꦁ ꦩꦁ ꦮꦤꦺ ꦤꦶꦑꦟꦺꦪ꧀ꦪꦴꦱꦶ, ꦄꦣꦩ꧀ꦩꦁ ꦏꦩ꧀ꦩꦁ ꦏꦫꦺꦪ꧀ꦪꦴꦱꦷꦠꦶ ꦄꦠ꧀ꦡꦺꦴ. ‘‘ꦈꦴꦫꦹ’’ꦠꦶ ꦆꦢꦁ ꦱꦺꦴ ꦥꦸꦫꦶꦩꦒꦴꦡꦁ ꦱꦸꦠ꧀ꦮꦴꦥꦶ ꦤꦁ ꦄꦤꦺꦴꦭꦺꦴꦏꦺꦤ꧀ꦠꦩꦺꦮ ꦢꦶꦱ꧀ꦮꦴ ‘‘ꦄꦭꦔ꧀ꦏꦠꦱꦫꦷꦫꦩꦱ꧀ꦱ ꦢꦱ꧀ꦱꦺꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦄꦴꦲ. ꦠꦱ꧀ꦱꦠ꧀ꦡꦺꦴ – ꦱꦩ꧀ꦩ ꦱꦴꦫꦡꦶ, ꦆꦩꦺ ꦏꦚ꧀ꦕꦤꦏꦢꦭꦶꦏ꧀ꦑꦤ꧀ꦣꦱꦢꦶꦱꦺ ꦈꦴꦫꦹ, ꦏꦤꦏꦕ꧀ꦖꦮꦶꦁ ꦧꦴꦲꦸꦚ꧀ꦕ ꦩꦺ ꦥꦱ꧀ꦱ, ꦩꦣꦸꦫꦮꦕꦤꦚ꧀ꦕ ꦩꦺ ꦱꦸꦟꦴꦲꦷꦠꦶ.

ꦠꦠꦺꦴ ꦱꦴꦫꦡꦶ ꦌꦮꦁ ꦕꦶꦤ꧀ꦠꦺꦱꦶ ‘‘ꦏꦺꦴ ꦤꦸ ꦑꦺꦴ ꦌꦱ, ꦄꦴꦒꦠꦏꦴꦭꦠꦺꦴ ꦥꦛ꧀ꦜꦴꦪ ꦄꦠ꧀ꦠꦴꦤꦩꦺꦮ ꦮꦟ꧀ꦟꦺꦠꦷ’’ꦠꦶ. ꦱꦺꦴ ꦄꦴꦮꦴꦛꦑꦟꦤꦁ ꦥꦲꦴꦪ ꦈꦢ꧀ꦣꦁ ꦎꦭꦺꦴꦏꦺꦤ꧀ꦠꦺꦴ ꦠꦱ꧀ꦱ ꦫꦹꦥꦱꦩ꧀ꦥꦠ꧀ꦠꦶꦁ ꦢꦶꦱ꧀ꦮꦴ ‘‘ꦄꦪꦁ ꦥꦸꦫꦶꦱꦺꦴ ꦏꦺꦴ ꦤꦸ ꦑꦺꦴ, ꦩꦤꦸꦱ꧀ꦱꦺꦴ ꦮꦴ ꦢꦺꦮꦺꦴ ꦮꦴ’’ꦠꦶ ꦄꦗꦴꦤꦤ꧀ꦠꦺꦴ ꦆꦩꦁ ꦒꦴꦡꦩꦴꦲ –

꧗. ‘‘ꦢꦺꦮꦠꦴ ꦤꦸꦱꦶ ꦒꦤ꧀ꦣꦧ꧀ꦧꦺꦴ, ꦄꦢꦸ ꦱꦏ꧀ꦏꦺꦴ ꦥꦸꦫꦶꦤ꧀ꦢꦢꦺꦴ;

ꦏꦺꦴ ꦮꦴ ꦠ꧀ꦮꦁ ꦏꦱ꧀ꦱ ꦮꦴ ꦥꦸꦠ꧀ꦠꦺꦴ, ꦏꦡꦁ ꦗꦴꦤꦺꦩꦸ ꦠꦁ ꦩꦪ’’ꦤ꧀ꦠꦶ.

ꦄꦡꦱ꧀ꦱ ꦩꦲꦴꦱꦠ꧀ꦠꦺꦴ ꦄꦠ꧀ꦠꦴꦤꦁ ꦄꦴꦕꦶꦏ꧀ꦑꦶꦠ꧀ꦮꦴ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦄꦴꦲ –

꧘. ‘‘ꦤꦩ꧀ꦲꦶ ꦢꦺꦮꦺꦴ ꦤ ꦒꦤ꧀ꦣꦧ꧀ꦧꦺꦴ, ꦤꦩ꧀ꦲꦶ ꦱꦏ꧀ꦏꦺꦴ ꦥꦸꦫꦶꦤ꧀ꦢꦢꦺꦴ;

ꦏꦴꦱꦶꦫꦚ꧀ꦚꦺꦴ ꦄꦲꦁ ꦥꦸꦠ꧀ꦠꦺꦴ, ꦪꦁ ꦏꦴꦱꦸꦪꦴ ꦤꦶꦲꦚ꧀ꦚꦱꦶ.

꧙. ‘‘ꦠꦱ꧀ꦱ ꦫꦚ꧀ꦚꦺꦴ ꦄꦲꦁ ꦥꦸꦠ꧀ꦠꦺꦴ, ꦪꦁ ꦠ꧀ꦮꦁ ꦱꦩ꧀ꦩꦹꦥꦗꦷꦮꦱꦶ;

ꦄꦣꦩ꧀ꦩꦁ ꦱꦴꦫꦡꦶ ꦏꦪꦶꦫꦴ, ꦩꦁ ꦕꦺ ꦠ꧀ꦮꦁ ꦤꦶꦑꦟꦁ ꦮꦤꦺ.

꧑꧐. ‘‘ꦪꦱ꧀ꦱ ꦫꦸꦏ꧀ꦑꦱ꧀ꦱ ꦖꦴꦪꦴꦪ, ꦤꦶꦱꦷꦢꦺꦪ꧀ꦪ ꦱꦪꦺꦪ꧀ꦪ ꦮꦴ;

ꦤ ꦠꦱ꧀ꦱ ꦱꦴꦑꦁ ꦨꦚ꧀ꦗꦺꦪ꧀ꦪ, ꦩꦶꦠ꧀ꦠꦢꦸꦧ꧀ꦨꦺꦴ ꦲꦶ ꦥꦴꦥꦏꦺꦴ.

꧑꧑. ‘‘ꦪꦡꦴ ꦫꦸꦏ꧀ꦑꦺꦴ ꦠꦡꦴ ꦫꦴꦗꦴ, ꦪꦡꦴ ꦱꦴꦑꦴ ꦠꦡꦴ ꦄꦲꦁ;

ꦪꦡꦴ ꦖꦴꦪꦹꦥꦒꦺꦴ ꦥꦺꦴꦱꦺꦴ, ꦌꦮꦁ ꦠ꧀ꦮꦩꦱꦶ ꦱꦴꦫꦡꦶ;

ꦄꦣꦩ꧀ꦩꦁ ꦱꦴꦫꦡꦶ ꦏꦪꦶꦫꦴ, ꦩꦁ ꦕꦺ ꦠ꧀ꦮꦁ ꦤꦶꦑꦟꦁ ꦮꦤꦺ’’ꦠꦶ.

ꦠꦠ꧀ꦡ ꦤꦶꦲꦚ꧀ꦚꦱꦷꦠꦶ ꦤꦶꦲꦤꦶꦱ꧀ꦱꦱꦶ. ꦪꦁ ꦠ꧀ꦮꦁ ꦌꦠ꧀ꦡ ꦤꦶꦲꦤꦶꦱ꧀ꦱꦴꦩꦷꦠꦶ ꦱꦚ꧀ꦚꦴꦪ ꦏꦴꦱꦸꦁ ꦑꦟꦱꦶ, ꦱꦺꦴ ꦄꦲꦤ꧀ꦠꦶ ꦢꦷꦥꦺꦠꦶ. ꦱꦺꦴ ‘‘ꦫꦴꦗꦥꦸꦠ꧀ꦠꦺꦴ ꦄꦲ’’ꦤ꧀ꦠꦶ ꦮꦸꦠ꧀ꦠꦺꦥꦶ ꦤ ꦱꦢ꧀ꦢꦲꦠꦶꦪꦺꦮ, ꦩꦣꦸꦫꦏꦡꦴꦪ ꦥꦤꦱ꧀ꦱ ꦧꦗ꧀ꦙꦶꦠ꧀ꦮꦴ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦄꦛ꧀ꦜꦴꦱꦶ. ꦩꦶꦠ꧀ꦠꦢꦸꦧ꧀ꦨꦺꦴꦠꦶ ꦥꦫꦶꦨꦸꦠ꧀ꦠꦖꦴꦪꦱ꧀ꦱ ꦫꦸꦏ꧀ꦑꦱ꧀ꦱ ꦥꦠ꧀ꦠꦁ ꦮꦴ ꦱꦴꦑꦁ ꦮꦴ ꦄꦔ꧀ꦏꦸꦫꦁ ꦮꦴ ꦨꦚ꧀ꦗꦤ꧀ꦠꦺꦴ ꦩꦶꦠ꧀ꦠꦓꦴꦠꦏꦺꦴ ꦲꦺꦴꦠꦶ ꦭꦴꦩꦏꦥꦸꦫꦶꦱꦺꦴ, ꦏꦶꦩꦔ꧀ꦒꦁ ꦥꦤ ꦱꦴꦩꦶꦥꦸꦠ꧀ꦠꦓꦴꦠꦏꦺꦴ. ꦖꦴꦪꦹꦥꦒꦺꦴꦠꦶ ꦥꦫꦶꦨꦺꦴꦒꦠ꧀ꦡꦴꦪ ꦖꦴꦪꦁ ꦈꦥꦒꦠꦺꦴ ꦥꦸꦫꦶꦱꦺꦴ ꦮꦶꦪ ꦫꦴꦗꦴꦤꦁ ꦤꦶꦱ꧀ꦱꦴꦪ ꦗꦷꦮꦩꦴꦤꦺꦴ ꦠ꧀ꦮꦤ꧀ꦠꦶ ꦮꦢꦠꦶ.

ꦱꦺꦴ ꦌꦮꦁ ꦏꦡꦺꦤ꧀ꦠꦺꦥꦶ ꦧꦺꦴꦣꦶꦱꦠ꧀ꦠꦺ ꦤ ꦱꦢ꧀ꦢꦲꦠꦶꦪꦺꦮ. ꦄꦡ ꦩꦲꦴꦱꦠ꧀ꦠꦺꦴ ‘‘ꦱꦢ꧀ꦢꦲꦴꦥꦺꦱ꧀ꦱꦴꦩꦶ ꦤ’’ꦤ꧀ꦠꦶ ꦢꦺꦮꦠꦴꦤꦁ ꦱꦴꦣꦸꦏꦴꦫꦺꦤ ꦕꦺꦮ ꦄꦠ꧀ꦠꦤꦺꦴ ꦓꦺꦴꦱꦺꦤ ꦕ ꦮꦤꦓꦛꦁ ꦈꦤ꧀ꦤꦴꦢꦺꦤ꧀ꦠꦺꦴ ꦢꦱ ꦩꦶꦠ꧀ꦠꦥꦹꦗꦒꦴꦡꦴ ꦤꦴꦩ ꦄꦴꦫꦨꦶ –

꧑꧒. ‘‘ꦥꦲꦹꦠꦨꦏ꧀ꦑꦺꦴ ꦨꦮꦠꦶ, ꦮꦶꦥ꧀ꦥꦮꦸꦛ꧀ꦜꦺꦴ ꦱꦏꦁꦓꦫꦴ;

ꦧꦲꦹ ꦤꦁ ꦈꦥꦗꦷꦮꦤ꧀ꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ.

꧑꧓. ‘‘ꦪꦁ ꦪꦁ ꦗꦤꦥꦢꦁ ꦪꦴꦠꦶ, ꦤꦶꦒꦩꦺ ꦫꦴꦗꦣꦴꦤꦶꦪꦺꦴ;

ꦱꦧ꧀ꦧꦠ꧀ꦡ ꦥꦹꦗꦶꦠꦺꦴ ꦲꦺꦴꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ.

꧑꧔. ‘‘ꦤꦴꦱ꧀ꦱ ꦕꦺꦴꦫꦴ ꦥꦱꦴꦲꦤ꧀ꦠꦶ, ꦤꦴꦠꦶꦩꦚ꧀ꦚꦤ꧀ꦠꦶ ꦑꦠ꧀ꦠꦶꦪꦴ;

ꦱꦧ꧀ꦧꦺ ꦄꦩꦶꦠ꧀ꦠꦺ ꦠꦫꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ.

꧑꧕. ‘‘ꦄꦏ꧀ꦏꦸꦢ꧀ꦣꦺꦴ ꦱꦓꦫꦁ ꦌꦠꦶ, ꦱꦨꦴꦪꦁ ꦥꦛꦶꦤꦤ꧀ꦢꦶꦠꦺꦴ;

ꦚꦴꦠꦷꦤꦁ ꦈꦠ꧀ꦠꦩꦺꦴ ꦲꦺꦴꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ.

꧑꧖. ‘‘ꦱꦏ꧀ꦏꦠ꧀ꦮꦴ ꦱꦏ꧀ꦏꦠꦺꦴ ꦲꦺꦴꦠꦶ, ꦒꦫꦸ ꦲꦺꦴꦠꦶ ꦱꦒꦴꦫꦮꦺꦴ;

ꦮꦟ꧀ꦟꦏꦶꦠ꧀ꦠꦶꦨꦠꦺꦴ ꦲꦺꦴꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ.

꧑꧗. ‘‘ꦥꦹꦗꦏꦺꦴ ꦭꦨꦠꦺ ꦥꦹꦗꦁ, ꦮꦤ꧀ꦢꦏꦺꦴ ꦥꦛꦶꦮꦤ꧀ꦢꦤꦁ;

ꦪꦱꦺꦴꦏꦶꦠ꧀ꦠꦶꦚ꧀ꦕ ꦥꦥ꧀ꦥꦺꦴꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ.

꧑꧘. ‘‘ꦄꦒ꧀ꦒꦶ ꦪꦡꦴ ꦥꦗ꧀ꦗꦭꦠꦶ, ꦢꦺꦮꦠꦴꦮ ꦮꦶꦫꦺꦴꦕꦠꦶ;

ꦱꦶꦫꦶꦪꦴ ꦄꦗꦲꦶꦠꦺꦴ ꦲꦺꦴꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ.

꧑꧙. ‘‘ꦒꦴꦮꦺꦴ ꦠꦱ꧀ꦱ ꦥꦗꦴꦪꦤ꧀ꦠꦶ, ꦑꦺꦠ꧀ꦠꦺ ꦮꦸꦠ꧀ꦠꦁ ꦮꦶꦫꦹꦲꦠꦶ;

ꦮꦸꦠ꧀ꦠꦴꦤꦁ ꦦꦭꦩꦱ꧀ꦤꦴꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ.

꧒꧐. ‘‘ꦢꦫꦶꦠꦺꦴ ꦥꦧ꧀ꦧꦠꦴꦠꦺꦴ ꦮꦴ, ꦫꦸꦏ꧀ꦑꦠꦺꦴ ꦥꦠꦶꦠꦺꦴ ꦤꦫꦺꦴ;

ꦕꦸꦠꦺꦴ ꦥꦠꦶꦛ꧀ꦜꦁ ꦭꦨꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ.

꧒꧑. ‘‘ꦮꦶꦫꦹꦭ꦳꧀ꦲꦩꦹꦭꦱꦤ꧀ꦠꦴꦤꦁ, ꦤꦶꦒ꧀ꦫꦺꦴꦣꦩꦶꦮ ꦩꦴꦭꦸꦠꦺꦴ;

ꦄꦩꦶꦠ꧀ꦠꦴ ꦤꦥ꧀ꦥꦱꦴꦲꦤ꧀ꦠꦶ, ꦪꦺꦴ ꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦷ’’ꦠꦶ.

ꦠꦠ꧀ꦡ ꦱꦏꦁ ꦓꦫꦴꦠꦶ ꦱꦏꦓꦫꦴ, ꦄꦪꦩꦺꦮ ꦮꦴ ꦥꦴꦜꦺꦴ. ꦤ ꦢꦸꦧ꧀ꦨꦠꦷꦠꦶ ꦤ ꦢꦸꦱ꧀ꦱꦠꦶ. ꦩꦶꦠ꧀ꦠꦴꦤꦤ꧀ꦠꦶ ꦧꦸꦢ꧀ꦣꦴꦢꦷꦤꦁ ꦏꦭ꧀ꦪꦴꦟꦩꦶꦠ꧀ꦠꦴꦤꦁ ꦤ ꦢꦸꦧ꧀ꦨꦠꦶ. ‘‘ꦱꦧ꧀ꦧꦠ꧀ꦡ ꦥꦹꦗꦶꦠꦺꦴ ꦲꦺꦴꦠꦷ’’ꦠꦶ ꦆꦢꦁ ꦱꦷꦮꦭꦶꦮꦠ꧀ꦡꦸꦤꦴ ꦮꦟ꧀ꦟꦺꦠꦧ꧀ꦧꦁ. ꦤ ꦥꦱꦴꦲꦤ꧀ꦠꦷꦠꦶ ꦥꦱꦪ꧀ꦲꦏꦴꦫꦁ ꦏꦴꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ. ꦆꦢꦁ ꦱꦁꦏꦶꦕ꧀ꦕꦱꦴꦩꦟꦺꦫꦮꦠ꧀ꦡꦸꦤꦴ ꦢꦷꦥꦺꦠꦧ꧀ꦧꦁ. ‘‘ꦤꦴꦠꦶꦩꦚ꧀ꦚꦤ꧀ꦠꦶ ꦑꦠ꧀ꦠꦶꦪꦴ’’ꦠꦶ ꦆꦢꦁ ꦗꦺꦴꦠꦶꦏꦱꦺꦛ꧀ꦜꦶꦮꦠ꧀ꦡꦸꦤꦴ ꦢꦷꦥꦺꦠꦧ꧀ꦧꦁ. ꦠꦫꦠꦷꦠꦶ ꦄꦠꦶꦏ꧀ꦏꦩꦠꦶ. ꦱꦓꦫꦤ꧀ꦠꦶ ꦄꦠ꧀ꦠꦓꦫꦁ. ꦩꦶꦠ꧀ꦠꦴꦤꦁ ꦢꦸꦧ꧀ꦨꦤ꧀ꦠꦺꦴ ꦄꦠ꧀ꦠꦤꦺꦴ ꦓꦫꦁ ꦄꦴꦒꦕ꧀ꦖꦤ꧀ꦠꦺꦴꦥꦶ ꦓꦛ꧀ꦛꦶꦠꦕꦶꦠ꧀ꦠꦺꦴ ꦏꦸꦢ꧀ꦣꦺꦴꦮ ꦄꦴꦒꦕ꧀ꦖꦠꦶ, ꦄꦪꦁ ꦥꦤ ꦄꦏꦸꦢ꧀ꦣꦺꦴꦮ ꦱꦏꦓꦫꦁ ꦌꦠꦶ. ꦥꦛꦶꦤꦤ꧀ꦢꦶꦠꦺꦴꦠꦶ ꦧꦲꦹꦤꦁ ꦱꦤ꧀ꦤꦶꦥꦴꦠꦛ꧀ꦜꦴꦤꦺ ꦄꦩꦶꦠ꧀ꦠꦢꦸꦧ꧀ꦨꦶꦤꦺꦴ ꦒꦸꦟꦏꦡꦁ ꦏꦡꦺꦤ꧀ꦠꦶ, ꦠꦴꦪ ꦱꦺꦴ ꦥꦛꦶꦤꦤ꧀ꦢꦶꦠꦺꦴ ꦲꦺꦴꦠꦶ ꦥꦩꦸꦢꦶꦠꦕꦶꦠ꧀ꦠꦺꦴ.

ꦱꦏ꧀ꦏꦠ꧀ꦮꦴ ꦱꦏ꧀ꦏꦠꦺꦴ ꦲꦺꦴꦠꦷꦠꦶ ꦥꦫꦁ ꦱꦏ꧀ꦏꦠ꧀ꦮꦴ ꦱꦪꦩ꧀ꦥꦶ ꦥꦫꦺꦲꦶ ꦱꦏ꧀ꦏꦠꦺꦴ ꦲꦺꦴꦠꦶ. ꦒꦫꦸ ꦲꦺꦴꦠꦶ ꦱꦒꦴꦫꦮꦺꦴꦠꦶ ꦥꦫꦺꦱꦸ ꦱꦒꦴꦫꦮꦺꦴ ꦱꦪꦩ꧀ꦥꦶ ꦥꦫꦺꦲꦶ ꦒꦫꦸꦏꦺꦴ ꦲꦺꦴꦠꦶ. ꦮꦟ꧀ꦟꦏꦶꦠ꧀ꦠꦶꦨꦠꦺꦴꦠꦶ ꦨꦠꦮꦟ꧀ꦟꦏꦶꦠ꧀ꦠꦶ, ꦒꦸꦟꦚ꧀ꦕꦺꦮ ꦏꦶꦠ꧀ꦠꦶꦱꦢ꧀ꦢꦚ꧀ꦕ ꦈꦏ꧀ꦑꦶꦥꦶꦠ꧀ꦮꦴ ꦕꦫꦤ꧀ꦠꦺꦴ ꦤꦴꦩ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦥꦹꦗꦏꦺꦴꦠꦶ ꦩꦶꦠ꧀ꦠꦴꦤꦁ ꦥꦹꦗꦏꦺꦴ ꦲꦸꦠ꧀ꦮꦴ ꦱꦪꦩ꧀ꦥꦶ ꦥꦹꦗꦁ ꦭꦨꦠꦶ. ꦮꦤ꧀ꦢꦏꦺꦴꦠꦶ ꦧꦸꦢ꧀ꦣꦴꦢꦷꦤꦁ ꦏꦭ꧀ꦪꦴꦟꦩꦶꦠ꧀ꦠꦴꦤꦁ ꦮꦤ꧀ꦢꦏꦺꦴ ꦲꦸꦠ꧀ꦮꦴ ꦥꦸꦤꦧ꧀ꦨꦮꦺ ꦥꦛꦶꦮꦤ꧀ꦢꦤꦁ ꦭꦨꦠꦶ. ꦪꦱꦺꦴꦏꦶꦠ꧀ꦠꦶꦚ꧀ꦕꦴꦠꦶ ꦆꦱ꧀ꦱꦫꦶꦪꦥꦫꦶꦮꦴꦫꦚ꧀ꦕꦺꦮ ꦒꦸꦟꦏꦶꦠ꧀ꦠꦶꦚ꧀ꦕ ꦥꦥ꧀ꦥꦺꦴꦠꦶ. ꦆꦩꦴꦪ ꦒꦴꦡꦴꦪ ꦕꦶꦠ꧀ꦠꦒꦲꦥꦠꦶꦤꦺꦴ ꦮꦠ꧀ꦡꦸ (ꦣ. ꦥ. ꧗꧓-꧗꧔) ꦏꦡꦺꦠꦧ꧀ꦧꦁ.

ꦥꦗ꧀ꦗꦭꦠꦷꦠꦶ ꦆꦱ꧀ꦱꦫꦶꦪꦥꦫꦶꦮꦴꦫꦺꦤ ꦥꦗ꧀ꦗꦭꦠꦶ. ꦱꦶꦫꦶꦪꦴ ꦄꦗꦲꦶꦠꦺꦴ ꦲꦺꦴꦠꦷꦠꦶ ꦌꦠ꧀ꦡ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦮꦠ꧀ꦡꦸ (ꦣ. ꦥ. ꧑꧑꧙-꧑꧒꧐) ꦏꦡꦺꦠꦧ꧀ꦧꦁ. ꦄꦱ꧀ꦤꦴꦠꦷꦠꦶ ꦥꦫꦶꦨꦸꦚ꧀ꦗꦠꦶ. ‘‘ꦥꦠꦶꦛ꧀ꦜꦁ ꦭꦨꦠꦷ’’ꦠꦶ ꦆꦢꦁ ꦕꦹꦭ꦳ꦥꦢꦸꦩꦗꦴꦠꦏꦺꦤ (ꦗꦴ. ꧑.꧒.꧘꧕-꧘꧖) ꦢꦷꦥꦺꦠꦧ꧀ꦧꦁ. ꦮꦶꦫꦹꦭ꦳꧀ꦲꦩꦹꦭꦱꦤ꧀ꦠꦴꦤꦤ꧀ꦠꦶ ꦮꦝ꧀ꦞꦶꦠꦩꦹꦭꦥꦴꦫꦺꦴꦲꦁ. ꦄꦩꦶꦠ꧀ꦠꦴ ꦤꦥ꧀ꦥꦱꦴꦲꦤ꧀ꦠꦷꦠꦶ ꦌꦠ꧀ꦡ ꦏꦸꦫꦫꦓꦫꦶꦪꦱꦺꦴꦟꦠ꧀ꦡꦺꦫꦱ꧀ꦱ ꦩꦴꦠꦸ ꦒꦺꦲꦁ ꦥꦮꦶꦛ꧀ꦜꦕꦺꦴꦫꦮꦠ꧀ꦡꦸ ꦏꦡꦺꦠꦧ꧀ꦧꦁ.

ꦱꦸꦤꦤ꧀ꦢꦺꦴ ꦱꦴꦫꦡꦶ ꦌꦠ꧀ꦠꦏꦴꦲꦶ ꦒꦴꦡꦴꦲꦶ ꦣꦩ꧀ꦩꦁ ꦢꦺꦱꦺꦤ꧀ꦠꦩ꧀ꦥꦶ ꦠꦁ ꦄꦱꦚ꧀ꦗꦴꦤꦶꦠ꧀ꦮꦴ ‘‘ꦏꦺꦴ ꦤꦸ ꦑꦺꦴ ꦄꦪ’’ꦤ꧀ꦠꦶ ꦄꦴꦮꦴꦛꦑꦟꦤꦁ ꦥꦲꦴꦪ ꦫꦡꦱꦩꦷꦥꦁ ꦒꦤ꧀ꦠ꧀ꦮꦴ ꦠꦠ꧀ꦡ ꦠꦚ꧀ꦕ ꦥꦱꦴꦣꦤꦨꦟ꧀ꦝꦚ꧀ꦕ ꦈꦨꦪꦁ ꦄꦢꦶꦱ꧀ꦮꦴ ꦥꦸꦤ ꦄꦴꦒꦤ꧀ꦠ꧀ꦮꦴ ꦎꦭꦺꦴꦏꦺꦤ꧀ꦠꦺꦴ ꦠꦁ ꦱꦚ꧀ꦗꦴꦤꦶꦠ꧀ꦮꦴ ꦠꦱ꧀ꦱ ꦥꦴꦢꦺꦱꦸ ꦥꦠꦶꦠ꧀ꦮꦴ ꦄꦚ꧀ꦗꦭꦶꦁ ꦥꦒ꧀ꦒꦪ꧀ꦲ ꦪꦴꦕꦤ꧀ꦠꦺꦴ ꦆꦩꦁ ꦒꦴꦡꦩꦴꦲ –

꧒꧒. ‘‘ꦌꦲꦶ ꦠꦁ ꦥꦛꦶꦤꦺꦱ꧀ꦱꦴꦩꦶ, ꦫꦴꦗꦥꦸꦠ꧀ꦠ ꦱꦏꦁ ꦓꦫꦁ;

ꦫꦗ꧀ꦗꦁ ꦏꦴꦫꦺꦲꦶ ꦨꦢ꧀ꦢꦤ꧀ꦠꦺ, ꦏꦶꦁ ꦄꦫꦚ꧀ꦚꦺ ꦏꦫꦶꦱ꧀ꦱꦱꦷ’’ꦠꦶ.

ꦄꦡ ꦤꦁ ꦩꦲꦴꦱꦠ꧀ꦠꦺꦴ ꦄꦴꦲ –

꧒꧓. ‘‘ꦄꦭꦁ ꦩꦺ ꦠꦺꦤ ꦫꦗ꧀ꦗꦺꦤ, ꦚꦴꦠꦏꦺꦲꦶ ꦣꦤꦺꦤ ꦮꦴ;

ꦪꦁ ꦩꦺ ꦄꦣꦩ꧀ꦩꦕꦫꦶꦪꦴꦪ, ꦫꦗ꧀ꦗꦁ ꦭꦧ꧀ꦨꦺꦡ ꦱꦴꦫꦡꦷ’’ꦠꦶ.

ꦠꦠ꧀ꦡ ꦄꦭꦤ꧀ꦠꦶ ꦥꦛꦶꦏ꧀ꦑꦺꦥꦮꦕꦤꦁ.

ꦱꦴꦫꦡꦶ ꦄꦴꦲ –

꧒꧔. ‘‘ꦥꦸꦟ꧀ꦟꦥꦠ꧀ꦠꦁ ꦩꦁ ꦭꦴꦨꦺꦲꦶ, ꦫꦴꦗꦥꦸꦠ꧀ꦠ ꦆꦠꦺꦴ ꦒꦠꦺꦴ;

ꦥꦶꦠꦴ ꦩꦴꦠꦴ ꦕ ꦩꦺ ꦢꦗ꧀ꦗꦸꦁ, ꦫꦴꦗꦥꦸꦠ꧀ꦠ ꦠꦪꦷ ꦒꦠꦺ.

꧒꧕. ‘‘ꦎꦫꦺꦴꦣꦴ ꦕ ꦏꦸꦩꦴꦫꦴ ꦕ, ꦮꦺꦱꦶꦪꦴꦤꦴ ꦕ ꦧ꧀ꦫꦴꦲ꧀ꦩꦟꦴ;

ꦠꦺꦥꦶ ꦄꦠ꧀ꦠꦩꦤꦴ ꦢꦗ꧀ꦗꦸꦁ, ꦫꦴꦗꦥꦸꦠ꧀ꦠ ꦠꦪꦷ ꦒꦠꦺ.

꧒꧖. ‘‘ꦲꦠ꧀ꦡꦴꦫꦺꦴꦲꦴ ꦄꦤꦷꦏꦛ꧀ꦜꦴ, ꦫꦡꦶꦏꦴ ꦥꦠ꧀ꦠꦶꦏꦴꦫꦏꦴ;

ꦠꦺꦥꦶ ꦄꦠ꧀ꦠꦩꦤꦴ ꦢꦗ꧀ꦗꦸꦁ, ꦫꦴꦗꦥꦸꦠ꧀ꦠ ꦠꦪꦷ ꦒꦠꦺ.

꧒꧗. ‘‘ꦧꦲꦸꦣꦚ꧀ꦚꦴ ꦗꦴꦤꦥꦢꦴ, ꦤꦺꦒꦩꦴ ꦕ ꦱꦩꦴꦒꦠꦴ;

ꦈꦥꦴꦪꦤꦴꦤꦶ ꦩꦺ ꦢꦗ꧀ꦗꦸꦁ, ꦫꦴꦗꦥꦸꦠ꧀ꦠ ꦠꦪꦷ ꦒꦠꦺ’’ꦠꦶ.

ꦠꦠ꧀ꦡ ꦥꦸꦟ꧀ꦟꦥꦠ꧀ꦠꦤ꧀ꦠꦶ ꦠꦸꦛ꧀ꦜꦶꦢꦴꦪꦁ. ꦢꦗ꧀ꦗꦸꦤ꧀ꦠꦶ ꦱꦠ꧀ꦠꦫꦠꦤꦮꦱ꧀ꦱꦁ ꦮꦱ꧀ꦱꦤ꧀ꦠꦴ ꦮꦶꦪ ꦩꦩ ꦄꦗ꧀ꦙꦴꦱꦪꦥꦹꦫꦟꦁ ꦠꦸꦛ꧀ꦜꦶꦢꦴꦪꦁ ꦢꦢꦺꦪ꧀ꦪꦸꦁ. ꦆꦢꦁ ꦱꦺꦴ ‘‘ꦄꦥ꧀ꦥꦺꦮ ꦤꦴꦩ ꦩꦪꦶ ꦄꦤꦸꦏꦩ꧀ꦥꦴꦪ ꦒꦕ꧀ꦖꦺꦪ꧀ꦪꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦄꦴꦲ. ꦮꦺꦱꦶꦪꦴꦤꦴ ꦕꦴꦠꦶ ꦮꦺꦱ꧀ꦱꦴ ꦕ. ꦈꦥꦴꦪꦤꦴꦤꦷꦠꦶ ꦥꦟ꧀ꦟꦴꦏꦴꦫꦴꦤꦶ.

ꦄꦡ ꦤꦁ ꦩꦲꦴꦱꦠ꧀ꦠꦺꦴ ꦄꦴꦲ –

꧒꧘. ‘‘ꦥꦶꦠꦸ ꦩꦴꦠꦸ ꦕꦲꦁ ꦕꦠ꧀ꦠꦺꦴ, ꦫꦛ꧀ꦜꦱ꧀ꦱ ꦤꦶꦒꦩꦱ꧀ꦱ ꦕ;

ꦄꦡꦺꦴ ꦱꦧ꧀ꦧꦏꦸꦩꦴꦫꦴꦤꦁ, ꦤꦠ꧀ꦡꦶ ꦩꦪ꧀ꦲꦁ ꦱꦏꦁ ꦓꦫꦁ.

꧒꧙. ‘‘ꦄꦤꦸꦚ꧀ꦚꦴꦠꦺꦴ ꦄꦲꦁ ꦩꦠ꧀ꦪꦴ, ꦱꦚ꧀ꦕꦠ꧀ꦠꦺꦴ ꦥꦶꦠꦫꦴ ꦩꦲꦁ;

ꦌꦏꦺꦴꦫꦚ꧀ꦚꦺ ꦥꦧ꧀ꦧꦗꦶꦠꦺꦴ, ꦤ ꦏꦴꦩꦺ ꦄꦨꦶꦥꦠ꧀ꦡꦪꦺ’’ꦠꦶ.

ꦠꦠ꧀ꦡ ꦥꦶꦠꦸ ꦩꦴꦠꦸ ꦕꦴꦠꦶ ꦥꦶꦠꦫꦴ ꦕ ꦩꦴꦠꦫꦴ ꦕ ꦄꦲꦁ ꦕꦠ꧀ꦠꦺꦴ. ꦆꦠꦫꦺꦱꦸꦥꦶ ꦌꦱꦺꦮ ꦤꦪꦺꦴ. ꦩꦠ꧀ꦪꦴꦠꦶ ꦱꦩ꧀ꦩ ꦱꦴꦫꦡꦶ, ꦄꦲꦁ ꦱꦠ꧀ꦠꦴꦲꦁ ꦫꦗ꧀ꦗꦁ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦮꦫꦁ ꦒꦟ꧀ꦲꦤ꧀ꦠꦶꦪꦴ ꦩꦴꦠꦫꦴ ꦄꦤꦸꦚ꧀ꦚꦴꦠꦺꦴ ꦤꦴꦩ. ꦱꦚ꧀ꦖꦠ꧀ꦠꦺꦴꦠꦶ ꦱꦸꦛ꧀ꦜꦸ ꦕꦠ꧀ꦠꦺꦴ. ꦥꦧ꧀ꦧꦗꦶꦠꦺꦴꦠꦶ ꦥꦧ꧀ꦧꦗꦶꦠ꧀ꦮꦴ ꦄꦫꦚ꧀ꦚꦺ ꦮꦱꦤꦠ꧀ꦡꦴꦪ ꦤꦶꦏ꧀ꦑꦤ꧀ꦠꦺꦴꦠꦶ ꦄꦠ꧀ꦡꦺꦴ.

ꦌꦮꦁ ꦩꦲꦴꦱꦠ꧀ꦠꦱ꧀ꦱ ꦄꦠ꧀ꦠꦤꦺꦴ ꦒꦸꦟꦺ ꦏꦡꦺꦤ꧀ꦠꦱ꧀ꦱ ꦥꦷꦠꦶ ꦈꦥ꧀ꦥꦗ꧀ꦗꦶ, ꦠꦠꦺꦴ ꦥꦷꦠꦶꦮꦺꦒꦺꦤ ꦈꦢꦴꦤꦁ ꦈꦢꦴꦤꦺꦤ꧀ꦠꦺꦴ ꦄꦴꦲ –

꧓꧐. ‘‘ꦄꦥꦶ ꦄꦠꦫꦩꦴꦤꦴꦤꦁ, ꦦꦭꦴꦱꦴꦮ ꦱꦩꦶꦗ꧀ꦙꦠꦶ;

ꦮꦶꦥꦏ꧀ꦏꦧ꧀ꦫꦲ꧀ꦩꦕꦫꦶꦪꦺꦴꦱ꧀ꦩꦶ, ꦌꦮꦁ ꦗꦴꦤꦴꦲꦶ ꦱꦴꦫꦡꦶ.

꧓꧑. ‘‘ꦄꦥꦶ ꦄꦠꦫꦩꦴꦤꦴꦤꦁ, ꦱꦩ꧀ꦩꦢꦠ꧀ꦡꦺꦴ ꦮꦶꦥꦕ꧀ꦕꦠꦶ;

ꦮꦶꦥꦏ꧀ꦏꦧ꧀ꦫꦲ꧀ꦩꦕꦫꦶꦪꦺꦴꦱ꧀ꦩꦶ, ꦤꦶꦏ꧀ꦑꦤ꧀ꦠꦺꦴ ꦄꦏꦸꦠꦺꦴꦨꦪꦺꦴ’’ꦠꦶ.

ꦠꦠ꧀ꦡ ꦦꦭꦴꦱꦴꦮꦴꦠꦶ ꦄꦠꦫꦩꦴꦤꦱ꧀ꦱ ꦩꦩ ꦱꦺꦴꦭ꦳ꦱꦮꦱ꧀ꦱꦺꦲꦶ ꦏꦠꦮꦴꦪꦴꦩꦱ꧀ꦱ ꦱꦩꦶꦢ꧀ꦣꦁ ꦄꦗ꧀ꦙꦴꦱꦪꦦꦭꦁ ꦢꦱ꧀ꦱꦺꦠꦸꦁ ꦌꦮꦩꦴꦲ. ꦮꦶꦥꦏ꧀ꦏꦧ꧀ꦫꦲ꧀ꦩꦕꦫꦶꦪꦺꦴꦱ꧀ꦩꦷꦠꦶ ꦤꦶꦛ꧀ꦜꦥ꧀ꦥꦠ꧀ꦠꦩꦤꦺꦴꦫꦡꦺꦴ. ꦱꦩ꧀ꦩꦢꦠ꧀ꦡꦺꦴ ꦮꦶꦥꦕ꧀ꦕꦠꦷꦠꦶ ꦱꦩ꧀ꦩꦴ ꦈꦥꦴꦪꦺꦤ ꦏꦴꦫꦟꦺꦤ ꦏꦠ꧀ꦠꦧ꧀ꦧꦏꦶꦕ꧀ꦕꦁ ꦱꦩ꧀ꦥꦗ꧀ꦗꦠꦶ.

ꦱꦴꦫꦡꦶ ꦄꦴꦲ –

꧓꧒. ‘‘ꦌꦮꦁ ꦮꦒ꧀ꦒꦸꦏꦡꦺꦴ ꦱꦤ꧀ꦠꦺꦴ, ꦮꦶꦱꦛ꧀ꦜꦮꦕꦤꦺꦴ ꦕꦱꦶ;

ꦏꦱ꧀ꦩꦴ ꦥꦶꦠꦸ ꦕ ꦩꦴꦠꦸꦕ꧀ꦕ, ꦱꦤ꧀ꦠꦶꦏꦺ ꦤ ꦨꦟꦷ ꦠꦢꦴ’’ꦠꦶ.

ꦠꦠ꧀ꦡ ꦮꦒ꧀ꦒꦸꦏꦡꦺꦴꦠꦶ ꦱꦑꦶꦭꦏꦡꦺꦴ.

ꦠꦠꦺꦴ ꦩꦲꦴꦱꦠ꧀ꦠꦺꦴ ꦄꦴꦲ –

꧓꧓. ‘‘ꦤꦴꦲꦁ ꦄꦱꦤ꧀ꦣꦶꦠꦴ ꦥꦏ꧀ꦑꦺꦴ, ꦤ ꦧꦣꦶꦫꦺꦴ ꦄꦱꦺꦴꦠꦠꦴ;

ꦤꦴꦲꦁ ꦄꦗꦶꦮ꧀ꦲꦠꦴ ꦩꦹꦒꦺꦴ, ꦩꦴ ꦩꦁ ꦩꦹꦒꦩꦣꦴꦫꦪꦶ.

꧓꧔. ‘‘ꦥꦸꦫꦶꦩꦁ ꦱꦫꦴꦩꦲꦁ ꦗꦴꦠꦶꦁ, ꦪꦠ꧀ꦡ ꦫꦗ꧀ꦗꦩꦏꦴꦫꦪꦶꦁ;

ꦏꦴꦫꦪꦶꦠ꧀ꦮꦴ ꦠꦲꦶꦁ ꦫꦗ꧀ꦗꦁ, ꦥꦴꦥꦠ꧀ꦡꦁ ꦤꦶꦫꦪꦁ ꦨꦸꦱꦁ.

꧓꧕. ‘‘ꦮꦷꦱꦠꦶꦚ꧀ꦕꦺꦮ ꦮꦱ꧀ꦱꦴꦤꦶ, ꦠꦲꦶꦁ ꦫꦗ꧀ꦗꦩꦏꦴꦫꦪꦶꦁ;

ꦄꦱꦷꦠꦶꦮꦱ꧀ꦱꦱꦲꦱ꧀ꦱꦴꦤꦶ, ꦤꦶꦫꦪꦩ꧀ꦲꦶ ꦄꦥꦕ꧀ꦕꦶꦱꦁ.

꧓꧖. ‘‘ꦠꦱ꧀ꦱ ꦫꦗ꧀ꦗꦱ꧀ꦱꦲꦁ ꦨꦷꦠꦺꦴ, ꦩꦴ ꦩꦁ ꦫꦗ꧀ꦗꦴꦨꦶꦱꦺꦕꦪꦸꦁ;

ꦠꦱ꧀ꦩꦴ ꦥꦶꦠꦸ ꦕ ꦩꦴꦠꦸꦕ꧀ꦕ, ꦱꦤ꧀ꦠꦶꦏꦺ ꦤ ꦨꦟꦶꦁ ꦠꦢꦴ.

꧓꧗. ‘‘ꦈꦕ꧀ꦖꦔ꧀ꦒꦺ ꦩꦁ ꦤꦶꦱꦴꦢꦺꦠ꧀ꦮꦴ, ꦥꦶꦠꦴ ꦄꦠ꧀ꦡꦴꦤꦸꦱꦴꦱꦠꦶ;

ꦌꦏꦁ ꦲꦤꦡ ꦧꦤ꧀ꦣꦡ, ꦌꦏꦁ ꦑꦴꦫꦴꦥꦠꦕ꧀ꦖꦶꦏꦁ;

ꦌꦏꦁ ꦱꦹꦭꦱ꧀ꦩꦶꦁ ꦈꦥ꧀ꦥꦺꦡ, ꦆꦕ꧀ꦕꦱ꧀ꦱ ꦩꦤꦸꦱꦴꦱꦠꦶ.

꧓꧘. ‘‘ꦠꦴꦪꦴꦲꦁ ꦦꦫꦸꦱꦁ ꦱꦸꦠ꧀ꦮꦴ, ꦮꦴꦕꦴꦪꦺꦴ ꦱꦩꦸꦢꦷꦫꦶꦠꦴ;

ꦄꦩꦹꦒꦺꦴ ꦩꦹꦒꦮꦟ꧀ꦟꦺꦤ, ꦄꦥꦏ꧀ꦑꦺꦴ ꦥꦏ꧀ꦑꦱꦩ꧀ꦩꦠꦺꦴ;

ꦱꦏꦺ ꦩꦸꦠ꧀ꦠꦏꦫꦷꦱꦱ꧀ꦩꦶꦁ, ꦄꦕ꧀ꦖꦴꦲꦁ ꦱꦩ꧀ꦥꦫꦶꦥ꧀ꦭꦸꦠꦺꦴ.

꧓꧙. ‘‘ꦏꦱꦶꦫꦚ꧀ꦕ ꦥꦫꦶꦠ꧀ꦠꦚ꧀ꦕ, ꦠꦚ꧀ꦕ ꦢꦸꦏ꧀ꦑꦺꦤ ꦱꦁꦪꦸꦠꦁ;

ꦏꦺꦴꦩꦁ ꦗꦷꦮꦶꦠꦩꦴꦒꦩ꧀ꦩ, ꦮꦺꦫꦁ ꦏꦪꦶꦫꦴꦡ ꦏꦺꦤꦕꦶ.

꧔꧐. ‘‘ꦥꦚ꧀ꦚꦴꦪ ꦕ ꦄꦭꦴꦨꦺꦤ, ꦣꦩ꧀ꦩꦱ꧀ꦱ ꦕ ꦄꦢꦱ꧀ꦱꦤꦴ;

ꦏꦺꦴꦩꦁ ꦗꦷꦮꦶꦠꦩꦴꦒꦩ꧀ꦩ, ꦮꦺꦫꦁ ꦏꦪꦶꦫꦴꦡ ꦏꦺꦤꦕꦶ.

꧔꧑. ‘‘ꦄꦥꦶ ꦄꦠꦫꦩꦴꦤꦴꦤꦁ, ꦦꦭꦴꦱꦴꦮ ꦱꦩꦶꦗ꧀ꦙꦠꦶ;