꧑꧒. ꦢ꧀ꦮꦴꦢꦱꦏꦤꦶꦥꦴꦠꦺꦴ

[꧔꧖꧔] ꧑. ꦕꦹꦭ꦳ꦏꦸꦟꦴꦭꦗꦴꦠꦏꦮꦟ꧀ꦟꦤꦴ

꧑-꧑꧒. ꦭꦸꦢ꧀ꦣꦴꦤꦁ ꦭꦲꦸꦕꦶꦠ꧀ꦠꦴꦤꦤ꧀ꦠꦶ ꦆꦢꦁ ꦗꦴꦠꦏꦁ ꦏꦸꦟꦴꦭꦗꦴꦠꦏꦺ (ꦗꦴ. ꧒.꧒꧑.ꦏꦸꦟꦴꦭꦗꦴꦠꦏ) ꦄꦴꦮꦶ ꦨꦮꦶꦱ꧀ꦱꦠꦶ;

ꦕꦹꦭ꦳ꦏꦸꦟꦴꦭꦗꦴꦠꦏꦮꦟ꧀ꦟꦤꦴ ꦥꦜꦩꦴ.

[꧔꧖꧕] ꧒. ꦨꦢ꧀ꦢꦱꦴꦭꦗꦴꦠꦏꦮꦟ꧀ꦟꦤꦴ

ꦏꦴ ꦠ꧀ꦮꦁ ꦱꦸꦢ꧀ꦣꦺꦲꦶ ꦮꦠ꧀ꦡꦺꦲꦷꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦚꦴꦠꦠ꧀ꦡꦕꦫꦶꦪꦁ ꦄꦴꦫꦧ꧀ꦨ ꦏꦡꦺꦱꦶ. ꦱꦴꦮꦠ꧀ꦡꦶꦪꦚ꧀ꦲꦶ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦤꦶꦮꦺꦱꦤꦺ ꦥꦚ꧀ꦕꦤ꧀ꦤꦁ ꦨꦶꦏ꧀ꦑꦸꦱꦠꦴꦤꦁ ꦤꦶꦧꦢ꧀ꦣꦨꦺꦴꦗꦤꦁ ꦥꦮꦠ꧀ꦠꦠꦶ, ꦠꦡꦴ ꦮꦶꦱꦴꦑꦴꦪ ꦕ ꦏꦺꦴꦱꦭꦫꦚ꧀ꦚꦺꦴ ꦕ. ꦠꦠ꧀ꦡ ꦥꦤ ꦏꦶꦚ꧀ꦕꦴꦥꦶ ꦤꦴꦤꦒ꧀ꦒꦫꦱꦨꦺꦴꦗꦤꦁ ꦢꦷꦪꦠꦶ, ꦨꦶꦏ꧀ꦑꦹꦤꦁ ꦥꦤꦺꦠ꧀ꦡ ꦏꦺꦴꦕꦶ ꦮꦶꦱ꧀ꦱꦴꦱꦶꦏꦺꦴ ꦤꦠ꧀ꦡꦶ, ꦠꦱ꧀ꦩꦴ ꦨꦶꦏ꧀ꦑꦹ ꦫꦴꦗꦤꦶꦮꦺꦱꦤꦺ ꦤ ꦨꦸꦚ꧀ꦗꦤ꧀ꦠꦶ, ꦨꦠ꧀ꦠꦁ ꦒꦲꦺꦠ꧀ꦮꦴ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦮꦴ ꦮꦶꦱꦴꦑꦴꦪ ꦮꦴ ꦄꦚ꧀ꦚꦺꦱꦁ ꦮꦴ ꦮꦶꦱ꧀ꦱꦴꦱꦶꦏꦴꦤꦁ ꦓꦫꦁ ꦒꦤ꧀ꦠ꧀ꦮꦴ ꦨꦸꦚ꧀ꦗꦤ꧀ꦠꦶ. ꦫꦴꦗꦴ ꦌꦏꦢꦶꦮꦱꦁ ꦥꦟ꧀ꦟꦴꦏꦴꦫꦁ ꦄꦴꦲꦛꦁ ‘‘ꦨꦶꦏ꧀ꦑꦹꦤꦁ ꦢꦺꦡꦴ’’ꦠꦶ ꦨꦠ꧀ꦠꦒ꧀ꦒꦁ ꦥꦺꦱꦺꦠ꧀ꦮꦴ ‘‘ꦨꦠ꧀ꦠꦒ꧀ꦒꦺ ꦨꦶꦏ꧀ꦑꦹ ꦤꦠ꧀ꦡꦷ’’ꦠꦶ ꦮꦸꦠ꧀ꦠꦺ ‘‘ꦏꦲꦁ ꦒꦠꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦄꦠ꧀ꦠꦤꦺꦴ ꦮꦶꦱ꧀ꦱꦴꦱꦶꦏꦒꦺꦲꦺꦱꦸ ꦤꦶꦱꦷꦢꦶꦠ꧀ꦮꦴ ꦨꦸꦚ꧀ꦗꦤ꧀ꦠꦷ’’ꦠꦶ ꦱꦸꦠ꧀ꦮꦴ ꦨꦸꦠ꧀ꦠꦥꦴꦠꦫꦴꦱꦺꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ‘‘ꦨꦤ꧀ꦠꦺ, ꦨꦺꦴꦗꦤꦁ ꦤꦴꦩ ꦏꦶꦁ ꦥꦫꦩ’’ꦤ꧀ꦠꦶ ꦥꦸꦕ꧀ꦖꦶ. ꦮꦶꦱ꧀ꦱꦴꦱꦥꦫꦩꦁ ꦩꦲꦴꦫꦴꦗ, ꦏꦚ꧀ꦗꦶꦏꦩꦠ꧀ꦠꦏꦩ꧀ꦥꦶ ꦮꦶꦱ꧀ꦱꦴꦱꦶꦏꦺꦤ ꦢꦶꦤ꧀ꦤꦁ ꦩꦣꦸꦫꦁ ꦲꦺꦴꦠꦷꦠꦶ. ꦨꦤ꧀ꦠꦺ, ꦏꦺꦤ ꦥꦤ ꦱꦢ꧀ꦣꦶꦁ ꦨꦶꦏ꧀ꦑꦹꦤꦁ ꦮꦶꦱ꧀ꦱꦴꦱꦺꦴ ꦲꦺꦴꦠꦷꦠꦶ? ‘‘ꦚꦴꦠꦷꦲꦶ ꦮꦴ ꦱꦺꦏ꧀ꦑꦏꦸꦭꦺꦲꦶ ꦮꦴ, ꦩꦲꦴꦫꦴꦗꦴ’’ꦠꦶ. ꦠꦠꦺꦴ ꦫꦴꦗꦴ ꦕꦶꦤ꧀ꦠꦺꦱꦶ ‘‘ꦌꦏꦁ ꦱꦏ꧀ꦪꦣꦷꦠꦫꦁ ꦄꦴꦤꦺꦠ꧀ꦮꦴ ꦄꦒ꧀ꦒꦩꦲꦺꦱꦶꦁ ꦏꦫꦶꦱ꧀ꦱꦴꦩꦶ, ꦌꦮꦁ ꦩꦪꦴ ꦱꦢ꧀ꦣꦶꦁ ꦨꦶꦏ꧀ꦑꦹꦤꦁ ꦚꦴꦠꦏꦺ ꦮꦶꦪ ꦮꦶꦱ꧀ꦱꦴꦱꦺꦴ ꦨꦮꦶꦱ꧀ꦱꦠꦷ’’ꦠꦶ. ꦱꦺꦴ ꦈꦛ꧀ꦜꦴꦪꦴꦱꦤꦴ ꦄꦠ꧀ꦠꦤꦺꦴ ꦤꦶꦮꦺꦱꦤꦁ ꦒꦤ꧀ꦠ꧀ꦮꦴ ꦏꦥꦶꦭꦮꦠ꧀ꦡꦸꦁ ꦢꦹꦠꦁ ꦥꦺꦱꦺꦱꦶ ‘‘ꦣꦷꦠꦫꦁ ꦩꦺ ꦢꦺꦡ, ꦄꦲꦁ ꦠꦸꦩ꧀ꦲꦺꦲꦶ ꦱꦢ꧀ꦣꦶꦁ ꦚꦴꦠꦶꦨꦴꦮꦁ ꦆꦕ꧀ꦖꦴꦩꦷ’’ꦠꦶ.

ꦱꦴꦏꦶꦪꦴ ꦢꦹꦠꦮꦕꦤꦁ ꦱꦸꦠ꧀ꦮꦴ ꦱꦤ꧀ꦤꦶꦥꦠꦶꦠ꧀ꦮꦴ ꦩꦤ꧀ꦠꦪꦶꦁꦱꦸ ‘‘ꦩꦪꦁ ꦏꦺꦴꦱꦭꦫꦚ꧀ꦚꦺꦴ ꦄꦴꦟꦴꦥꦮꦠ꧀ꦠꦶꦛ꧀ꦜꦴꦤꦺ ꦮꦱꦴꦩ, ꦱꦕꦺ ꦢꦴꦫꦶꦏꦁ ꦤ ꦢꦱ꧀ꦱꦴꦩ, ꦩꦲꦤ꧀ꦠꦁ ꦮꦺꦫꦁ ꦨꦮꦶꦱ꧀ꦱꦠꦶ, ꦱꦕꦺ ꦢꦱ꧀ꦱꦴꦩ, ꦏꦸꦭꦮꦁꦱꦺꦴ ꦤꦺꦴ ꦨꦶꦗ꧀ꦗꦶꦱ꧀ꦱꦠꦶ, ꦏꦶꦁ ꦤꦸ ꦑꦺꦴ ꦏꦴꦠꦧ꧀ꦧ’’ꦤ꧀ꦠꦶ. ꦄꦡ ꦤꦺ ꦩꦲꦴꦤꦴꦩꦺꦴ ꦄꦴꦲ – ‘‘ꦩꦴ ꦕꦶꦤ꧀ꦠꦪꦶꦠ꧀ꦡ, ꦩꦩ ꦣꦷꦠꦴ ꦮꦴꦱꦨꦑꦠ꧀ꦠꦶꦪꦴ ꦤꦴꦩ ꦤꦴꦒꦩꦸꦟ꧀ꦝꦴꦪ ꦤꦴꦩ ꦢꦴꦱꦶꦪꦴ ꦏꦸꦕ꧀ꦖꦶꦱ꧀ꦩꦶꦁ ꦤꦶꦧ꧀ꦧꦠ꧀ꦠꦶ. ꦱꦴ ꦱꦺꦴꦭ꦳ꦱꦮꦱ꧀ꦱꦸꦢ꧀ꦢꦺꦱꦶꦏꦴ ꦈꦠ꧀ꦠꦩꦫꦹꦥꦣꦫꦴ ꦱꦺꦴꦨꦒ꧀ꦒꦥ꧀ꦥꦠ꧀ꦠꦴ ꦥꦶꦠꦸ ꦮꦁꦱꦺꦤ ꦑꦠ꧀ꦠꦶꦪꦗꦴꦠꦶꦏꦴ, ꦠꦩꦱ꧀ꦱ ‘ꦑꦠ꧀ꦠꦶꦪꦏꦚ꧀ꦚꦴ’ꦠꦶ ꦥꦺꦱꦺꦱ꧀ꦱꦴꦩꦴ’’ꦠꦶ. ꦱꦴꦏꦶꦪꦴ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦢꦹꦠꦺ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦱꦴꦣꦸ, ꦢꦴꦫꦶꦏꦁ ꦢꦱ꧀ꦱꦴꦩ, ꦆꦢꦴꦤꦺꦮ ꦤꦁ ꦒꦲꦺꦠ꧀ꦮꦴ ꦒꦕ꧀ꦖꦡꦴ’’ꦠꦶ ꦄꦴꦲꦁꦱꦸ. ꦢꦹꦠꦴ ꦕꦶꦤ꧀ꦠꦺꦱꦸꦁ ‘‘ꦆꦩꦺ ꦱꦴꦏꦶꦪꦴ ꦤꦴꦩ ꦗꦴꦠꦶꦁ ꦤꦶꦱ꧀ꦱꦴꦪ ꦄꦠꦶꦩꦴꦤꦶꦤꦺꦴ, ‘ꦱꦢꦶꦱꦷ ꦤꦺꦴ’ꦠꦶ ꦮꦠ꧀ꦮꦴ ꦄꦱꦢꦶꦱꦶꦩ꧀ꦥꦶ ꦢꦢꦺꦪ꧀ꦪꦸꦁ, ꦌꦠꦺꦲꦶ ꦱꦢ꧀ꦣꦶꦁ ꦌꦏꦠꦺꦴ ꦨꦸꦚ꧀ꦗꦩꦴꦤꦩꦺꦮ ꦒꦟ꧀ꦲꦶꦱ꧀ꦱꦴꦩꦴ’’ꦠꦶ. ꦠꦺ ꦌꦮꦩꦴꦲꦁꦱꦸ ‘‘ꦩꦪꦁ ꦒꦲꦺꦠ꧀ꦮꦴ ꦒꦕ꧀ꦖꦤ꧀ꦠꦴ ꦪꦴ ꦠꦸꦩ꧀ꦲꦺꦲꦶ ꦱꦢ꧀ꦣꦶꦁ ꦌꦏꦠꦺꦴ ꦨꦸꦚ꧀ꦗꦠꦶ, ꦠꦁ ꦒꦲꦺꦠ꧀ꦮꦴ ꦒꦩꦶꦱ꧀ꦱꦴꦩꦴ’’ꦠꦶ. ꦱꦴꦏꦶꦪꦴ ꦠꦺꦱꦁ ꦤꦶꦮꦴꦱꦛ꧀ꦜꦴꦤꦁ ꦢꦴꦥꦺꦠ꧀ꦮꦴ ‘‘ꦏꦶꦁ ꦏꦫꦶꦱ꧀ꦱꦴꦩꦴ’’ꦠꦶ ꦕꦶꦤ꧀ꦠꦪꦶꦁꦱꦸ. ꦩꦲꦴꦤꦴꦩꦺꦴ ꦄꦴꦲ – ‘‘ꦠꦸꦩ꧀ꦲꦺ ꦩꦴ ꦕꦶꦤ꧀ꦠꦪꦶꦠ꧀ꦡ, ꦄꦲꦁ ꦈꦥꦴꦪꦁ ꦏꦫꦶꦱ꧀ꦱꦴꦩꦶ, ꦠꦸꦩ꧀ꦲꦺ ꦩꦩ ꦨꦺꦴꦗꦤꦏꦴꦭꦺ ꦮꦴꦱꦨꦑꦠ꧀ꦠꦶꦪꦁ ꦄꦭꦔ꧀ꦏꦫꦶꦠ꧀ꦮꦴ ꦄꦴꦤꦺꦠ꧀ꦮꦴ ꦩꦪꦴ ꦌꦏꦱ꧀ꦩꦶꦁ ꦏꦧꦭ꦳ꦺ ꦒꦲꦶꦠꦩꦠ꧀ꦠꦺ ‘ꦢꦺꦮ, ꦄꦱꦸꦏꦫꦴꦗꦴ ꦥꦟ꧀ꦟꦁ ꦥꦲꦶꦟꦶ, ꦆꦩꦁ ꦠꦴꦮ ꦱꦴꦱꦤꦁ ꦱꦸꦟꦴꦡꦴ’ꦠꦶ ꦥꦟ꧀ꦟꦁ ꦢꦱ꧀ꦱꦺꦪ꧀ꦪꦴꦡꦴ’’ꦠꦶ. ꦠꦺ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦠꦱ꧀ꦩꦶꦁ ꦨꦸꦚ꧀ꦗꦩꦴꦤꦺ ꦏꦸꦩꦴꦫꦶꦏꦁ ꦄꦭꦔ꧀ꦏꦫꦶꦁꦱꦸ.

ꦩꦲꦴꦤꦴꦩꦺꦴ ‘‘ꦣꦷꦠꦫꦁ ꦩꦺ ꦄꦴꦤꦺꦡ, ꦩꦪꦴ ꦱꦢ꧀ꦣꦶꦁ ꦨꦸꦚ꧀ꦗꦠꦹ’’ꦠꦶ ꦄꦴꦲ. ꦄꦡ ꦤꦁ ꦄꦭꦔ꧀ꦏꦫꦶꦠ꧀ꦮꦴ ꦠꦴꦮꦢꦺꦮ ꦡꦺꦴꦏꦁ ꦥꦥꦚ꧀ꦕꦁ ꦏꦠ꧀ꦮꦴ ꦄꦴꦤꦪꦶꦁꦱꦸ. ꦱꦴ ‘‘ꦥꦶꦠꦫꦴ ꦱꦢ꧀ꦣꦶꦁ ꦨꦸꦚ꧀ꦗꦶꦱ꧀ꦱꦴꦩꦷ’’ꦠꦶ ꦌꦏꦥꦴꦠꦶꦪꦁ ꦲꦠ꧀ꦡꦁ ꦎꦠꦴꦫꦺꦱꦶ. ꦩꦲꦴꦤꦴꦩꦺꦴꦥꦶ ꦠꦴꦪ ꦱꦢ꧀ꦣꦶꦁ ꦌꦏꦥꦶꦟ꧀ꦝꦁ ꦒꦲꦺꦠ꧀ꦮꦴ ꦩꦸꦑꦺ ꦜꦥꦺꦱꦶ. ꦢꦸꦠꦶꦪꦥꦶꦟ꧀ꦝꦴꦪ ꦲꦠ꧀ꦡꦺ ꦥꦱꦴꦫꦶꦠꦺ ‘‘ꦢꦺꦮ, ꦄꦱꦸꦏꦫꦚ꧀ꦚꦴ ꦥꦟ꧀ꦟꦁ ꦥꦲꦶꦠꦁ, ꦆꦩꦁ ꦠꦴꦮ ꦱꦴꦱꦤꦁ ꦱꦸꦟꦴꦡꦴ’’ꦠꦶ ꦥꦟ꧀ꦟꦁ ꦈꦥꦤꦴꦩꦺꦱꦸꦁ. ꦩꦲꦴꦤꦴꦩꦺꦴ ‘‘ꦄꦩ꧀ꦩ, ꦠ꧀ꦮꦁ ꦨꦸꦚ꧀ꦗꦴꦲꦷ’’ꦠꦶ ꦢꦏ꧀ꦑꦶꦟꦲꦠ꧀ꦡꦁ ꦥꦴꦠꦶꦪꦴꦪꦺꦮ ꦏꦠ꧀ꦮꦴ ꦮꦴꦩꦲꦠ꧀ꦡꦺꦤ ꦒꦲꦺꦠ꧀ꦮꦴ ꦥꦟ꧀ꦟꦁ ꦎꦭꦺꦴꦏꦺꦱꦶ. ꦠꦱ꧀ꦱ ꦠꦁ ꦱꦴꦱꦤꦁ ꦈꦥꦣꦴꦫꦺꦤ꧀ꦠꦱ꧀ꦱꦺꦮ ꦆꦠꦫꦴ ꦨꦸꦚ꧀ꦗꦶ. ꦱꦺꦴ ꦠꦱ꧀ꦱꦴ ꦨꦸꦠ꧀ꦠꦏꦴꦭꦺ ꦲꦠ꧀ꦡꦁ ꦣꦺꦴꦮꦶꦠ꧀ꦮꦴ ꦩꦸꦑꦁ ꦮꦶꦏ꧀ꦑꦴꦭꦺꦱꦶ. ꦠꦁ ꦢꦶꦱ꧀ꦮꦴ ꦢꦹꦠꦴ ‘‘ꦤꦶꦕ꧀ꦖꦪꦺꦤꦺꦱꦴ ꦌꦠꦱ꧀ꦱ ꦣꦷꦠꦴ’’ꦠꦶ ꦤꦶꦛ꧀ꦜꦩꦏꦁꦱꦸ, ꦤ ꦠꦁ ꦄꦤ꧀ꦠꦫꦁ ꦗꦴꦤꦶꦠꦸꦁ ꦱꦏ꧀ꦑꦶꦁꦱꦸ. ꦩꦲꦴꦤꦴꦩꦺꦴ ꦩꦲꦤ꧀ꦠꦺꦤ ꦥꦫꦶꦮꦴꦫꦺꦤ ꦣꦷꦠꦫꦁ ꦥꦺꦱꦺꦱꦶ. ꦢꦹꦠꦴꦥꦶ ꦤꦁ ꦱꦴꦮꦠ꧀ꦡꦶꦁ ꦤꦺꦠ꧀ꦮꦴ ‘‘ꦄꦪꦁ ꦏꦸꦩꦴꦫꦶꦏꦴ ꦗꦴꦠꦶꦱꦩ꧀ꦥꦤ꧀ꦤꦴ ꦩꦲꦴꦤꦴꦩꦱ꧀ꦱ ꦣꦷꦠꦴ’’ꦠꦶ ꦮꦢꦶꦁꦱꦸ. ꦫꦴꦗꦴ ꦠꦸꦱ꧀ꦱꦶꦠ꧀ꦮꦴ ꦱꦏꦭꦤꦒꦫꦁ ꦄꦭꦔ꧀ꦏꦴꦫꦴꦥꦺꦠ꧀ꦮꦴ ꦠꦁ ꦫꦠꦤꦫꦴꦱꦶꦩ꧀ꦲꦶ ꦜꦥꦺꦠ꧀ꦮꦴ ꦄꦒ꧀ꦒꦩꦲꦺꦱꦶꦛ꧀ꦜꦴꦤꦺ ꦄꦨꦶꦱꦶꦚ꧀ꦕꦴꦥꦺꦱꦶ. ꦱꦴ ꦫꦚ꧀ꦚꦺꦴ ꦥꦶꦪꦴ ꦄꦲꦺꦴꦱꦶ ꦩꦤꦴꦥꦴ.

ꦄꦡꦱ꧀ꦱꦴ ꦤ ꦕꦶꦫꦱ꧀ꦱꦺꦮ ꦒꦧ꧀ꦨꦺꦴ ꦥꦠꦶꦛ꧀ꦜꦲꦶ. ꦫꦴꦗꦴ ꦒꦧ꧀ꦨꦥꦫꦶꦲꦴꦫꦩꦢꦴꦱꦶ. ꦱꦴ ꦢꦱꦩꦴꦱꦕ꧀ꦕꦪꦺꦤ ꦱꦸꦮꦟ꧀ꦟꦮꦟ꧀ꦟꦁ ꦥꦸꦠ꧀ꦠꦁ ꦮꦶꦗꦴꦪꦶ. ꦄꦡꦱ꧀ꦱ ꦤꦴꦩꦒ꧀ꦒꦲꦟꦢꦶꦮꦱꦺ ꦫꦴꦗꦴ ꦄꦠ꧀ꦠꦤꦺꦴ ꦄꦪ꧀ꦪꦏꦱ꧀ꦱ ꦱꦤ꧀ꦠꦶꦏꦁ ꦥꦺꦱꦺꦱꦶ ‘‘ꦱꦏ꧀ꦪꦫꦴꦗꦣꦷꦠꦴ ꦮꦴꦱꦨꦑꦠ꧀ꦠꦶꦪꦴ ꦥꦸꦠ꧀ꦠꦁ ꦮꦶꦗꦴꦪꦶ, ꦏꦶꦩꦱ꧀ꦱ ꦤꦴꦩꦁ ꦏꦫꦺꦴꦩꦴ’’ꦠꦶ. ꦠꦁ ꦥꦤ ꦱꦴꦱꦤꦁ ꦒꦲꦺꦠ꧀ꦮꦴ ꦒꦠꦺꦴ ꦄꦩꦕ꧀ꦕꦺꦴ ꦡꦺꦴꦏꦁ ꦧꦣꦶꦫꦣꦴꦠꦸꦏꦺꦴ, ꦱꦺꦴ ꦒꦤ꧀ꦠ꧀ꦮꦴ ꦫꦚ꧀ꦚꦺꦴ ꦄꦪ꧀ꦪꦏꦱ꧀ꦱꦴꦫꦺꦴꦕꦺꦱꦶ. ꦱꦺꦴ ꦠꦁ ꦱꦸꦠ꧀ꦮꦴ ‘‘ꦮꦴꦱꦨꦑꦠ꧀ꦠꦶꦪꦴ ꦥꦸꦠ꧀ꦠꦁ ꦄꦮꦶꦗꦴꦪꦶꦠ꧀ꦮꦴꦥꦶ ꦱꦧ꧀ꦧꦁ ꦗꦤꦁ ꦄꦨꦶꦨꦮꦠꦶ, ꦆꦢꦴꦤꦶ ꦥꦤ ꦄꦠꦶꦮꦶꦪ ꦫꦚ꧀ꦚꦺꦴ ꦮꦭ꧀ꦭꦨꦴ ꦨꦮꦶꦱ꧀ꦱꦠꦷ’’ꦠꦶ ꦄꦴꦲ. ꦱꦺꦴ ꦧꦣꦶꦫꦄꦩꦕ꧀ꦕꦺꦴ ‘‘ꦮꦭ꧀ꦭꦨꦴ’’ꦠꦶ ꦮꦕꦤꦁ ꦢꦸꦱ꧀ꦱꦸꦠꦁ ꦱꦸꦠ꧀ꦮꦴ ‘‘ꦮꦶꦛꦛꦹꦨꦺꦴ’’ꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ꦫꦴꦗꦴꦤꦁ ꦈꦥꦒꦤ꧀ꦠ꧀ꦮꦴ ‘‘ꦢꦺꦮ, ꦏꦸꦩꦴꦫꦱ꧀ꦱ ꦏꦶꦫ ‘ꦮꦶꦛꦛꦹꦨꦺꦴ’ꦠꦶ ꦤꦴꦩꦁ ꦏꦫꦺꦴꦡꦴ’’ꦠꦶ ꦄꦴꦲ. ꦫꦴꦗꦴ ‘‘ꦥꦺꦴꦫꦴꦟꦏꦁ ꦤꦺꦴ ꦏꦸꦭꦢꦠ꧀ꦠꦶꦏꦁ ꦤꦴꦩꦁ ꦨꦮꦶꦱ꧀ꦱꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ‘‘ꦮꦶꦛꦛꦹꦨꦺꦴ’’ꦠꦶ ꦤꦴꦩꦁ ꦄꦏꦴꦱꦶ. ꦠꦠꦺꦴ ꦥꦛ꧀ꦜꦴꦪ ꦏꦸꦩꦴꦫꦺꦴ ꦏꦸꦩꦴꦫꦥꦫꦶꦲꦴꦫꦺꦤ ꦮꦝ꧀ꦞꦤ꧀ꦠꦺꦴ ꦱꦠ꧀ꦠꦮꦱ꧀ꦱꦶꦏꦏꦴꦭꦺ ꦄꦚ꧀ꦚꦺꦱꦁ ꦏꦸꦩꦴꦫꦴꦤꦁ ꦩꦴꦠꦴꦩꦲꦏꦸꦭꦠꦺꦴ ꦲꦠ꧀ꦡꦶꦫꦹꦥꦏꦄꦱ꧀ꦱꦫꦹꦥꦏꦴꦢꦷꦤꦶ ꦄꦴꦲꦫꦶꦪꦩꦴꦤꦴꦤꦶ ꦢꦶꦱ꧀ꦮꦴ ꦩꦴꦠꦫꦁ ꦥꦸꦕ꧀ꦖꦶ ‘‘ꦄꦩ꧀ꦩ, ꦄꦚ꧀ꦚꦺꦱꦁ ꦩꦴꦠꦴꦩꦲꦏꦸꦭꦠꦺꦴ ꦥꦟ꧀ꦟꦴꦏꦴꦫꦺꦴ ꦄꦴꦲꦫꦶꦪꦠꦶ, ꦩꦪ꧀ꦲꦁ ꦏꦺꦴꦕꦶ ꦏꦶꦚ꧀ꦕꦶ ꦤ ꦥꦺꦱꦺꦱꦶ, ꦏꦶꦁ ꦠ꧀ꦮꦁ ꦤꦶꦩ꧀ꦩꦴꦠꦴ ꦤꦶꦥ꧀ꦥꦶꦠꦴꦱꦷ’’ꦠꦶ? ꦄꦡ ꦤꦁ ꦱꦴ ‘‘ꦠꦴꦠ, ꦱꦏ꧀ꦪꦫꦴꦗꦴꦤꦺꦴ ꦩꦴꦠꦴꦩꦲꦴ ꦢꦹꦫꦺ ꦥꦤ ꦮꦱꦤ꧀ꦠꦶ, ꦠꦺꦤ ꦠꦺ ꦏꦶꦚ꧀ꦕꦶ ꦤ ꦥꦺꦱꦺꦤ꧀ꦠꦷ’’ꦠꦶ ꦮꦠ꧀ꦮꦴ ꦮꦚ꧀ꦕꦺꦱꦶ.

ꦥꦸꦤ ꦱꦺꦴꦭ꦳ꦱꦮꦱ꧀ꦱꦶꦏꦏꦴꦭꦺ ‘‘ꦄꦩ꧀ꦩ, ꦩꦴꦠꦴꦩꦲꦏꦸꦭꦁ ꦥꦱ꧀ꦱꦶꦠꦸꦏꦴꦩꦺꦴꦩ꧀ꦲꦷ’’ꦠꦶ ꦮꦠ꧀ꦮꦴ ‘‘ꦄꦭꦁ ꦠꦴꦠ, ꦏꦶꦁ ꦠꦠ꧀ꦡ ꦒꦤ꧀ꦠ꧀ꦮꦴ ꦏꦫꦶꦱ꧀ꦱꦱꦷ’’ꦠꦶ ꦮꦴꦫꦶꦪꦩꦴꦤꦺꦴꦥꦶ ꦥꦸꦤꦥ꧀ꦥꦸꦤꦁ ꦪꦴꦕꦶ. ꦄꦡꦱ꧀ꦱ ꦩꦴꦠꦴ ‘‘ꦠꦺꦤ ꦲꦶ ꦒꦕ꧀ꦖꦴꦲꦷ’’ꦠꦶ ꦱꦩ꧀ꦥꦛꦶꦕ꧀ꦖꦶ. ꦱꦺꦴ ꦥꦶꦠꦸ ꦄꦴꦫꦺꦴꦕꦺꦠ꧀ꦮꦴ ꦩꦲꦤ꧀ꦠꦺꦤ ꦥꦫꦶꦮꦴꦫꦺꦤ ꦤꦶꦏ꧀ꦑꦩꦶ. ꦮꦴꦱꦨꦑꦠ꧀ꦠꦶꦪꦴ ꦥꦸꦫꦺꦠꦫꦁ ꦥꦟ꧀ꦟꦁ ꦥꦺꦱꦺꦱꦶ ‘‘ꦄꦲꦁ ꦆꦣ ꦱꦸꦑꦁ ꦮꦱꦴꦩꦶ, ꦱꦴꦩꦶꦤꦺꦴ ꦏꦶꦚ꧀ꦕꦶ ꦄꦤ꧀ꦠꦫꦁ ꦩꦴ ꦢꦱ꧀ꦱꦪꦶꦁꦱꦹ’’ꦠꦶ. ꦱꦴꦏꦶꦪꦴ ꦮꦶꦛꦛꦹꦨꦱ꧀ꦱ ꦄꦴꦒꦩꦤꦁ ꦚꦠ꧀ꦮꦴ ‘‘ꦮꦤ꧀ꦢꦶꦠꦸꦁ ꦤ ꦱꦏ꧀ꦏꦴ’’ꦠꦶ ꦠꦱ꧀ꦱ ꦢꦲꦫꦢꦲꦫꦺ ꦏꦸꦩꦴꦫꦏꦺ ꦗꦤꦥꦢꦁ ꦥꦲꦶꦟꦶꦁꦱꦸ. ꦏꦸꦩꦴꦫꦺ ꦏꦥꦶꦭꦮꦠ꧀ꦡꦸꦁ ꦱꦩ꧀ꦥꦠ꧀ꦠꦺ ꦱꦴꦏꦶꦪꦴ ꦱꦤ꧀ꦡꦴꦒꦴꦫꦺ ꦱꦤ꧀ꦤꦶꦥꦠꦶꦁꦱꦸ. ꦏꦸꦩꦴꦫꦺꦴ ꦱꦤ꧀ꦡꦴꦒꦴꦫꦁ ꦒꦤ꧀ꦠ꧀ꦮꦴ ꦄꦛ꧀ꦜꦴꦱꦶ. ꦄꦡ ꦤꦁ ‘‘ꦄꦪꦁ ꦠꦺ, ꦠꦴꦠ, ꦩꦴꦠꦴꦩꦲꦺꦴ, ꦄꦪꦁ ꦩꦴꦠꦸꦭꦺꦴ’’ꦠꦶ ꦮꦢꦶꦁꦱꦸ ꦱꦺꦴ ꦱꦧ꧀ꦧꦺ ꦮꦤ꧀ꦢꦩꦴꦤꦺꦴ ꦮꦶꦕꦫꦶ. ꦱꦺꦴ ꦪꦴꦮꦥꦶꦛ꧀ꦜꦶꦪꦴ ꦫꦸꦗꦤꦥ꧀ꦥꦩꦴꦟꦴ ꦮꦤ꧀ꦢꦶꦠ꧀ꦮꦴ ꦌꦏꦩ꧀ꦥꦶ ꦄꦠ꧀ꦠꦴꦤꦁ ꦮꦤ꧀ꦢꦩꦴꦤꦁ ꦄꦢꦶꦱ꧀ꦮꦴ ‘‘ꦏꦶꦁ ꦤꦸ ꦑꦺꦴ ꦩꦁ ꦮꦤ꧀ꦢꦤ꧀ꦠꦴ ꦤꦠ꧀ꦡꦷ’’ꦠꦶ ꦥꦸꦕ꧀ꦖꦶ. ꦱꦴꦏꦶꦪꦴ ‘‘ꦠꦴꦠ, ꦠꦮ ꦏꦤꦶꦛ꧀ꦜꦏꦸꦩꦴꦫꦴ ꦗꦤꦥꦢꦁ ꦒꦠꦴ’’ꦠꦶ ꦮꦠ꧀ꦮꦴ ꦠꦱ꧀ꦱ ꦩꦲꦤ꧀ꦠꦁ ꦱꦏ꧀ꦏꦴꦫꦁ ꦏꦫꦶꦁꦱꦸ. ꦱꦺꦴ ꦏꦠꦶꦥꦴꦲꦁ ꦮꦱꦶꦠ꧀ꦮꦴ ꦩꦲꦤ꧀ꦠꦺꦤ ꦥꦫꦶꦮꦴꦫꦺꦤ ꦤꦶꦏ꧀ꦑꦩꦶ. ꦄꦡꦺꦏꦴ ꦢꦴꦱꦷ ꦱꦤ꧀ꦡꦴꦒꦴꦫꦺ ꦠꦺꦤ ꦤꦶꦱꦶꦤ꧀ꦤꦦꦭꦏꦁ ‘‘ꦆꦢꦁ ꦮꦴꦱꦨꦑꦠ꧀ꦠꦶꦪꦴꦪ ꦢꦴꦱꦶꦪꦴ ꦥꦸꦠ꧀ꦠꦱ꧀ꦱ ꦤꦶꦱꦶꦤ꧀ꦤꦦꦭꦏ’’ꦤ꧀ꦠꦶ ꦄꦏ꧀ꦏꦺꦴꦱꦶꦠ꧀ꦮꦴ ꦥꦫꦶꦨꦴꦱꦶꦠ꧀ꦮꦴ ꦑꦷꦫꦺꦴꦢꦏꦺꦤ ꦣꦺꦴꦮꦶ. ꦌꦏꦺꦴ ꦥꦸꦫꦶꦱꦺꦴ ꦄꦠ꧀ꦠꦤꦺꦴ ꦄꦴꦮꦸꦣꦁ ꦥꦩꦸꦱ꧀ꦱꦶꦠ꧀ꦮꦴ ꦤꦶꦮꦠ꧀ꦠꦺꦴ ꦠꦁ ꦒꦟ꧀ꦲꦤ꧀ꦠꦺꦴ ꦮꦶꦛꦛꦹꦨꦏꦸꦩꦴꦫꦱ꧀ꦱ ꦄꦏ꧀ꦏꦺꦴꦱꦤꦱꦢ꧀ꦢꦁ ꦱꦸꦠ꧀ꦮꦴ ꦠꦁ ꦄꦤ꧀ꦠꦫꦁ ꦥꦸꦕ꧀ꦖꦶꦠ꧀ꦮꦴ ‘‘ꦮꦴꦱꦨꦑꦠ꧀ꦠꦶꦪꦴ ꦢꦴꦱꦶꦪꦴ ꦏꦸꦕ꧀ꦖꦶꦱ꧀ꦩꦶꦁ ꦩꦲꦴꦤꦴꦩꦱꦏ꧀ꦏꦱ꧀ꦱ ꦗꦴꦠꦴ’’ꦠꦶ ꦚꦠ꧀ꦮꦴ ꦒꦤ꧀ꦠ꧀ꦮꦴ ꦧꦭꦏꦴꦪꦱ꧀ꦱ ꦏꦡꦺꦱꦶ. ‘‘ꦮꦴꦱꦨꦑꦠ꧀ꦠꦶꦪꦴ ꦏꦶꦫ ꦢꦴꦱꦶꦪꦴ ꦣꦷꦠꦴ’’ꦠꦶ ꦩꦲꦴꦏꦺꦴꦭꦴꦲꦭꦁ ꦄꦲꦺꦴꦱꦶ.

ꦏꦸꦩꦴꦫꦺꦴ ꦠꦁ ꦱꦸꦠ꧀ꦮꦴ ‘‘ꦌꦠꦺ ꦠꦴꦮ ꦩꦩ ꦤꦶꦱꦶꦤ꧀ꦤꦦꦭꦏꦁ ꦑꦷꦫꦺꦴꦢꦏꦺꦤ ꦣꦺꦴꦮꦤ꧀ꦠꦸ, ꦄꦲꦁ ꦥꦤ ꦫꦗ꧀ꦗꦺ ꦥꦠꦶꦛ꧀ꦜꦶꦠꦏꦴꦭꦺ ꦌꦠꦺꦱꦁ ꦒꦭꦭꦺꦴꦲꦶꦠꦁ ꦒꦲꦺꦠ꧀ꦮꦴ ꦩꦩ ꦤꦶꦱꦶꦤ꧀ꦤꦦꦭꦏꦁ ꦣꦺꦴꦮꦶꦱ꧀ꦱꦴꦩꦷ’’ꦠꦶ ꦕꦶꦠ꧀ꦠꦁ ꦥꦛ꧀ꦜꦥꦺꦱꦶ. ꦠꦱ꧀ꦩꦶꦁ ꦱꦴꦮꦠ꧀ꦡꦶꦁ ꦒꦠꦺ ꦄꦩꦕ꧀ꦕꦴ ꦱꦧ꧀ꦧꦁ ꦥꦮꦠ꧀ꦠꦶꦁ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦸꦁ. ꦫꦴꦗꦴ ‘‘ꦱꦧ꧀ꦧꦺ ꦩꦪ꧀ꦲꦁ ꦢꦴꦱꦶꦣꦷꦠꦫꦁ ꦄꦢꦁꦱꦹ’’ꦠꦶ ꦱꦴꦏꦶꦪꦴꦤꦁ ꦏꦸꦗ꧀ꦙꦶꦠ꧀ꦮꦴ ꦮꦴꦱꦨꦑꦠ꧀ꦠꦶꦪꦴꦪ ꦕ ꦥꦸꦠ꧀ꦠꦱ꧀ꦱ ꦕ ꦢꦶꦤ꧀ꦤꦥꦫꦶꦲꦴꦫꦁ ꦄꦕ꧀ꦖꦶꦤ꧀ꦢꦶꦠ꧀ꦮꦴ ꦢꦴꦱꦢꦴꦱꦷꦲꦶ ꦭꦢ꧀ꦣꦧ꧀ꦧꦥꦫꦶꦲꦴꦫꦩꦠ꧀ꦠꦩꦺꦮ ꦢꦴꦥꦺꦱꦶ. ꦠꦠꦺꦴ ꦏꦠꦶꦥꦴꦲꦕ꧀ꦕꦪꦺꦤ ꦱꦠ꧀ꦡꦴ ꦫꦴꦗꦤꦶꦮꦺꦱꦤꦁ ꦄꦴꦒꦤ꧀ꦠ꧀ꦮꦴ ꦤꦶꦱꦷꦢꦶ. ꦫꦴꦗꦴ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ‘‘ꦨꦤ꧀ꦠꦺ, ꦠꦸꦩ꧀ꦲꦴꦏꦁ ꦏꦶꦫ ꦚꦴꦠꦏꦺꦲꦶ ꦢꦴꦱꦶꦣꦷꦠꦴ ꦩꦪ꧀ꦲꦁ ꦢꦶꦤ꧀ꦤꦴ, ꦠꦺꦤꦱ꧀ꦱꦴ ꦄꦲꦁ ꦱꦥꦸꦠ꧀ꦠꦴꦪ ꦥꦫꦶꦲꦴꦫꦁ ꦄꦕ꧀ꦖꦶꦤ꧀ꦢꦶꦠ꧀ꦮꦴ ꦢꦴꦱꦢꦴꦱꦷꦲꦶ ꦭꦢ꧀ꦣꦧ꧀ꦧꦥꦫꦶꦲꦴꦫꦩꦠ꧀ꦠꦩꦺꦮ ꦢꦴꦥꦺꦱꦶ’’ꦤ꧀ꦠꦶ ꦄꦴꦲ. ꦱꦠ꧀ꦡꦴ ‘‘ꦄꦪꦸꦠ꧀ꦠꦁ, ꦩꦲꦴꦫꦴꦗ, ꦱꦴꦏꦶꦪꦺꦲꦶ ꦏꦠꦁ, ꦢꦢꦤ꧀ꦠꦺꦲꦶ ꦤꦴꦩ ꦱꦩꦴꦤꦗꦴꦠꦶꦏꦴ ꦢꦴꦠꦧ꧀ꦧꦴ ꦄꦱ꧀ꦱ. ꦠꦁ ꦥꦤ ꦩꦲꦴꦫꦴꦗ, ꦮꦢꦴꦩꦶ ꦮꦴꦱꦨꦑꦠ꧀ꦠꦶꦪꦴ ꦑꦠ꧀ꦠꦶꦪꦫꦴꦗꦣꦷꦠꦴ ꦑꦠ꧀ꦠꦶꦪꦱ꧀ꦱ ꦫꦚ꧀ꦚꦺꦴ ꦒꦺꦲꦺ ꦄꦨꦶꦱꦺꦏꦁ ꦭꦨꦶ, ꦮꦶꦛꦛꦹꦨꦺꦴꦥꦶ ꦑꦠ꧀ꦠꦶꦪꦫꦴꦗꦴꦤꦩꦺꦮ ꦥꦛꦶꦕ꧀ꦕ ꦗꦴꦠꦺꦴ, ꦩꦴꦠꦸꦒꦺꦴꦠ꧀ꦠꦁ ꦤꦴꦩ ꦏꦶꦁ ꦏꦫꦶꦱ꧀ꦱꦠꦶ, ꦥꦶꦠꦸꦒꦺꦴꦠ꧀ꦠꦩꦺꦮ ꦥꦩꦴꦟꦤ꧀ꦠꦶ ꦥꦺꦴꦫꦴꦟꦏꦥꦟ꧀ꦝꦶꦠꦴ ꦢꦭꦶꦢ꧀ꦢꦶꦠ꧀ꦡꦶꦪꦴ ꦏꦛ꧀ꦜꦲꦴꦫꦶꦏꦴꦪꦥꦶ ꦄꦒ꧀ꦒꦩꦲꦺꦱꦶꦛ꧀ꦜꦴꦤꦁ ꦄꦢꦁꦱꦸ, ꦠꦱ꧀ꦱꦴ ꦕ ꦏꦸꦕ꧀ꦖꦶꦩ꧀ꦲꦶ ꦗꦴꦠꦏꦸꦩꦴꦫꦺꦴ ꦢ꧀ꦮꦴꦢꦱꦪꦺꦴꦗꦤꦶꦏꦴꦪ ꦧꦴꦫꦴꦟꦱꦶꦪꦴ ꦫꦗ꧀ꦗꦁ ꦏꦠ꧀ꦮꦴ ꦏꦛ꧀ꦜꦮꦴꦲꦤꦫꦴꦗꦴ ꦤꦴꦩ ꦗꦴꦠꦺꦴ’’ꦠꦶ ꦏꦛ꧀ꦜꦮꦴꦲꦤꦗꦴꦠꦏꦁ (ꦗꦴ. ꧑.꧑.꧗) ꦏꦡꦺꦱꦶ. ꦫꦴꦗꦴ ꦱꦠ꧀ꦡꦸ ꦣꦩ꧀ꦩꦏꦡꦁ ꦱꦸꦠ꧀ꦮꦴ ‘‘ꦥꦶꦠꦸꦒꦺꦴꦠ꧀ꦠꦩꦺꦮ ꦏꦶꦫ ꦥꦩꦴꦟ’’ꦤ꧀ꦠꦶ ꦱꦸꦠ꧀ꦮꦴ ꦠꦸꦱ꧀ꦱꦶꦠ꧀ꦮꦴ ꦩꦴꦠꦴꦥꦸꦠ꧀ꦠꦴꦤꦁ ꦥꦏꦠꦶꦥꦫꦶꦲꦴꦫꦩꦺꦮ ꦢꦴꦥꦺꦱꦶ.

ꦫꦚ꧀ꦚꦺꦴ ꦥꦤ ꦧꦤ꧀ꦣꦸꦭꦺꦴ ꦤꦴꦩ ꦱꦺꦤꦴꦥꦠꦶ ꦩꦭ꧀ꦭꦶꦏꦁ ꦤꦴꦩ ꦄꦠ꧀ꦠꦤꦺꦴ ꦨꦫꦶꦪꦁ ꦮꦚ꧀ꦙꦁ ‘‘ꦠꦮ ꦏꦸꦭꦓꦫꦩꦺꦮ ꦒꦕ꧀ꦖꦴꦲꦷ’’ꦠꦶ ꦏꦸꦱꦶꦤꦴꦫꦩꦺꦮ ꦥꦺꦱꦺꦱꦶ. ꦱꦴ ‘‘ꦱꦠ꧀ꦡꦴꦫꦁ ꦢꦶꦱ꧀ꦮꦴꦮ ꦒꦩꦶꦱ꧀ꦱꦴꦩꦷ’’ꦠꦶ ꦗꦺꦠꦮꦤꦁ ꦥꦮꦶꦱꦶꦠ꧀ꦮꦴ ꦠꦡꦴꦒꦠꦁ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦜꦶꦠꦴ ‘‘ꦏꦲꦁ ꦒꦕ꧀ꦖꦱꦷ’’ꦠꦶ ꦕ ꦥꦸꦛ꧀ꦜꦴ ‘‘ꦱꦴꦩꦶꦏꦺꦴ ꦩꦺ, ꦨꦤ꧀ꦠꦺ, ꦏꦸꦭꦓꦫꦁ ꦥꦺꦱꦺꦱꦷ’’ꦠꦶ ꦮꦠ꧀ꦮꦴ ‘‘ꦏꦱ꧀ꦩꦴ’’ꦠꦶ ꦮꦸꦠ꧀ꦠꦴ ‘‘ꦮꦚ꧀ꦙꦴ ꦄꦥꦸꦠ꧀ꦠꦶꦏꦴ, ꦨꦤ꧀ꦠꦺ’’ꦠꦶ ꦮꦠ꧀ꦮꦴ ꦱꦠ꧀ꦡꦴꦫꦴ ‘‘ꦪꦢꦶ ꦌꦮꦁ ꦒꦩꦤꦏꦶꦕ꧀ꦕꦁ ꦤꦠ꧀ꦡꦶ, ꦤꦶꦮꦠ꧀ꦠꦴꦲꦷ’’ꦠꦶ ꦮꦸꦠ꧀ꦠꦴ ꦠꦸꦛ꧀ꦜꦴ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ꦤꦶꦮꦺꦱꦤꦩꦺꦮ ꦥꦸꦤ ꦄꦒꦩꦴꦱꦶ. ‘‘ꦏꦱ꧀ꦩꦴ ꦤꦶꦮꦠ꧀ꦠꦱꦷ’’ꦠꦶ ꦥꦸꦛ꧀ꦜꦴ ‘‘ꦢꦱꦧꦭꦺꦤ ꦤꦶꦮꦠ꧀ꦠꦶꦠꦴꦩ꧀ꦲꦷ’’ꦠꦶ ꦄꦴꦲ. ꦱꦺꦤꦴꦥꦠꦶ ‘‘ꦢꦶꦛ꧀ꦜꦁ ꦨꦮꦶꦱ꧀ꦱꦠꦶ ꦠꦡꦴꦒꦠꦺꦤ ꦏꦴꦫꦟ’’ꦤ꧀ꦠꦶ ꦄꦴꦲ. ꦱꦴ ꦤ ꦕꦶꦫꦱ꧀ꦱꦺꦮ ꦒꦧ꧀ꦨꦁ ꦥꦛꦶꦭꦨꦶꦠ꧀ꦮꦴ ꦈꦥ꧀ꦥꦤ꧀ꦤꦢꦺꦴꦲꦭ꦳ꦴ ‘‘ꦢꦺꦴꦲꦭ꦳ꦺꦴ ꦩꦺ ꦈꦥ꧀ꦥꦤ꧀ꦤꦺꦴ’’ꦠꦶ ꦄꦴꦫꦺꦴꦕꦺꦱꦶ. ‘‘ꦏꦶꦁ ꦢꦺꦴꦲꦭ꦳ꦺꦴ’’ꦠꦶ? ‘‘ꦮꦺꦱꦴꦭꦶꦪꦴ ꦤꦒꦫꦺ ꦭꦶꦕ꧀ꦖꦮꦶꦫꦴꦗꦴꦤꦁ ꦄꦨꦶꦱꦺꦏꦩꦔ꧀ꦒꦭꦥꦺꦴꦏ꧀ꦑꦫꦟꦶꦁ ꦎꦠꦫꦶꦠ꧀ꦮꦴ ꦤ꧀ꦲꦠ꧀ꦮꦴ ꦥꦴꦤꦷꦪꦁ ꦥꦶꦮꦶꦠꦸꦏꦴꦩꦴꦩ꧀ꦲꦶ, ꦱꦴꦩꦷ’’ꦠꦶ. ꦱꦺꦤꦴꦥꦠꦶ ‘‘ꦱꦴꦣꦹ’’ꦠꦶ ꦮꦠ꧀ꦮꦴ ꦱꦲꦱ꧀ꦱꦡꦴꦩꦣꦤꦸꦁ ꦒꦲꦺꦠ꧀ꦮꦴ ꦠꦁ ꦫꦡꦁ ꦄꦴꦫꦺꦴꦥꦺꦠ꧀ꦮꦴ ꦱꦴꦮꦠ꧀ꦡꦶꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦫꦡꦁ ꦥꦴꦗꦺꦤ꧀ꦠꦺꦴ ꦮꦺꦱꦴꦭꦶꦁ ꦥꦴꦮꦶꦱꦶ.

ꦠꦱ꧀ꦩꦶꦚ꧀ꦕ ꦏꦴꦭꦺ ꦏꦺꦴꦱꦭꦫꦚ꧀ꦚꦺꦴ ꦧꦤ꧀ꦣꦸꦭꦱꦺꦤꦴꦥꦠꦶꦤꦴ ꦱꦢ꧀ꦣꦶꦁ ꦌꦏꦴꦕꦫꦶꦪꦏꦸꦭꦺ ꦈꦒ꧀ꦒꦲꦶꦠꦱꦶꦥ꧀ꦥꦺꦴ ꦩꦲꦴꦭꦶ ꦤꦴꦩ ꦭꦶꦕ꧀ꦖꦮꦷ ꦄꦤ꧀ꦣꦺꦴ ꦭꦶꦕ꧀ꦖꦮꦷꦤꦁ ꦄꦠ꧀ꦡꦚ꧀ꦕ ꦣꦩ꧀ꦩꦚ꧀ꦕ ꦄꦤꦸꦱꦴꦱꦤ꧀ꦠꦺꦴ ꦢ꧀ꦮꦴꦫꦱꦩꦷꦥꦺ ꦮꦱꦠꦶ. ꦱꦺꦴ ꦫꦡꦱ꧀ꦱ ꦈꦩ꧀ꦩꦴꦫꦺ ꦥꦛꦶꦓꦛ꧀ꦛꦤꦱꦢ꧀ꦢꦁ ꦱꦸꦠ꧀ꦮꦴ ‘‘ꦧꦤ꧀ꦣꦸꦭꦩꦭ꧀ꦭꦱ꧀ꦱ ꦫꦡꦥꦠꦤꦱꦢ꧀ꦢꦺꦴ ꦌꦱꦺꦴ, ꦄꦗ꧀ꦗ ꦭꦶꦕ꧀ꦖꦮꦷꦤꦁ ꦨꦪꦁ ꦈꦥ꧀ꦥꦗ꧀ꦗꦶꦱ꧀ꦱꦠꦷ’’ꦠꦶ ꦄꦴꦲ. ꦥꦺꦴꦏ꧀ꦑꦫꦟꦶꦪꦴ ꦄꦤ꧀ꦠꦺꦴ ꦕ ꦧꦲꦶ ꦕ ꦄꦴꦫꦏ꧀ꦑꦴ ꦧꦭꦮꦴ, ꦈꦥꦫꦶ ꦭꦺꦴꦲꦗꦴꦭꦁ ꦥꦠ꧀ꦡꦛꦁ, ꦱꦏꦸꦟꦴꦤꦩ꧀ꦥꦶ ꦎꦏꦴꦱꦺꦴ ꦤꦠ꧀ꦡꦶ. ꦱꦺꦤꦴꦥꦠꦶ ꦥꦤ ꦫꦡꦴ ꦎꦠꦫꦶꦠ꧀ꦮꦴ ꦄꦴꦫꦏ꧀ꦑꦏꦺ ꦑꦒ꧀ꦒꦺꦤ ꦥꦲꦫꦤ꧀ꦠꦺꦴ ꦥꦭꦴꦥꦺꦠ꧀ꦮꦴ ꦭꦺꦴꦲꦗꦴꦭꦁ ꦖꦶꦤ꧀ꦢꦶꦠ꧀ꦮꦴ ꦄꦤ꧀ꦠꦺꦴꦥꦺꦴꦏ꧀ꦑꦫꦟꦶꦪꦁ ꦨꦫꦶꦪꦁ ꦎꦠꦴꦫꦺꦠ꧀ꦮꦴ ꦤ꧀ꦲꦴꦥꦺꦠ꧀ꦮꦴ ꦥꦴꦪꦺꦠ꧀ꦮꦴ ꦱꦪꦩ꧀ꦥꦶ ꦤ꧀ꦲꦠ꧀ꦮꦴ ꦩꦭ꧀ꦭꦶꦏꦁ ꦫꦡꦁ ꦄꦴꦫꦺꦴꦥꦺꦠ꧀ꦮꦴ ꦤꦒꦫꦴ ꦤꦶꦏ꧀ꦑꦩꦶꦠ꧀ꦮꦴ ꦄꦴꦒꦠꦩꦒ꧀ꦒꦺꦤꦺꦮ ꦥꦴꦪꦴꦱꦶ. ꦄꦴꦫꦏ꧀ꦑꦏꦴ ꦒꦤ꧀ꦠ꧀ꦮꦴ ꦭꦶꦕ꧀ꦖꦮꦷꦤꦁ ꦄꦴꦫꦺꦴꦕꦺꦱꦸꦁ. ꦭꦶꦕ꧀ꦖꦮꦶꦫꦴꦗꦴꦤꦺꦴ ꦏꦸꦗ꧀ꦙꦶꦠ꧀ꦮꦴ ꦥꦚ꧀ꦕ ꦫꦡꦱꦠꦴꦤꦶ ꦄꦴꦫꦸꦪ꧀ꦲ ‘‘ꦧꦤ꧀ꦣꦸꦭꦩꦭ꧀ꦭꦁ ꦒꦟ꧀ꦲꦶꦱ꧀ꦱꦴꦩꦴ’’ꦠꦶ ꦤꦶꦏ꧀ꦑꦩꦶꦁꦱꦸ. ꦠꦁ ꦥꦮꦠ꧀ꦠꦶꦁ ꦩꦲꦴꦭꦶꦱ꧀ꦱ ꦄꦴꦫꦺꦴꦕꦺꦱꦸꦁ. ꦩꦲꦴꦭꦶ ‘‘ꦩꦴ ꦒꦩꦶꦠ꧀ꦡ, ꦱꦺꦴ ꦲꦶ ꦮꦺꦴ ꦱꦧ꧀ꦧꦺ ꦓꦴꦠꦪꦶꦱ꧀ꦱꦠꦷ’’ꦠꦶ ꦄꦴꦲ. ꦠꦺꦥꦶ ‘‘ꦩꦪꦁ ꦒꦩꦶꦱ꧀ꦱꦴꦩꦪꦺꦮꦴ’’ꦠꦶ ꦮꦢꦶꦁꦱꦸ. ꦠꦺꦤ ꦲꦶ ꦕꦏ꧀ꦏꦱ꧀ꦱ ꦪꦴꦮ ꦤꦴꦨꦶꦠꦺꦴ ꦥꦡꦮꦶꦁ ꦥꦮꦶꦛ꧀ꦜꦛ꧀ꦜꦴꦤꦁ ꦢꦶꦱ꧀ꦮꦴ ꦤꦶꦮꦠ꧀ꦠꦺꦪ꧀ꦪꦴꦡ, ꦠꦠꦺꦴ ꦄꦤꦶꦮꦠ꧀ꦠꦤ꧀ꦠꦴ ꦥꦸꦫꦠꦺꦴ ꦄꦱꦤꦶꦱꦢ꧀ꦢꦁ ꦮꦶꦪ ꦱꦸꦟꦶꦱ꧀ꦱꦡ, ꦠꦩ꧀ꦲꦴ ꦜꦴꦤꦴ ꦤꦶꦮꦠ꧀ꦠꦺꦪ꧀ꦪꦴꦡ, ꦠꦠꦺꦴ ꦄꦤꦶꦮꦠ꧀ꦠꦤ꧀ꦠꦴ ꦠꦸꦩ꧀ꦲꦴꦏꦁ ꦫꦡꦣꦸꦫꦺꦱꦸ ꦖꦶꦢ꧀ꦢꦁ ꦥꦱ꧀ꦱꦶꦱ꧀ꦱꦡ, ꦠꦩ꧀ꦲꦴ ꦜꦴꦤꦴ ꦤꦶꦮꦠ꧀ꦠꦺꦪ꧀ꦪꦴꦡ, ꦥꦸꦫꦠꦺꦴ ꦩꦴꦒꦩꦶꦠ꧀ꦡꦴꦠꦶ. ꦠꦺ ꦠꦱ꧀ꦱ ꦮꦕꦤꦺꦤ ꦄꦤꦶꦮꦠ꧀ꦠꦶꦠ꧀ꦮꦴ ꦠꦁ ꦄꦤꦸꦧꦤ꧀ꦣꦶꦁꦱꦸꦪꦺꦮ.

ꦩꦭ꧀ꦭꦶꦏꦴ ꦢꦶꦱ꧀ꦮꦴ ‘‘ꦫꦡꦴ, ꦱꦴꦩꦶ, ꦥꦚ꧀ꦚꦴꦪꦤ꧀ꦠꦷ’’ꦠꦶ ꦄꦴꦲ. ꦠꦺꦤ ꦲꦶ ꦌꦏꦱ꧀ꦱ ꦫꦡꦱ꧀ꦱ ꦮꦶꦪ ꦥꦚ꧀ꦚꦴꦪꦤꦏꦴꦭꦺ ꦩꦩ ꦄꦴꦫꦺꦴꦕꦺꦪ꧀ꦪꦴꦱꦷꦠꦶ. ꦱꦴ ꦪꦢꦴ ꦱꦧ꧀ꦧꦺ ꦌꦏꦺꦴ ꦮꦶꦪ ꦲꦸꦠ꧀ꦮꦴ ꦥꦚ꧀ꦚꦴꦪꦶꦁꦱꦸ, ꦠꦢꦴ ‘‘ꦌꦏꦩꦺꦮ ꦱꦴꦩꦶ ꦫꦡꦱꦷꦱꦁ ꦥꦚ꧀ꦚꦴꦪꦠꦷ’’ꦠꦶ ꦄꦴꦲ. ꦧꦤ꧀ꦣꦸꦭꦺꦴ ‘‘ꦠꦺꦤ ꦲꦶ ꦆꦩꦴ ꦫꦱ꧀ꦩꦶꦪꦺꦴ ꦒꦟ꧀ꦲꦴꦲꦷ’’ꦠꦶ ꦠꦱ꧀ꦱꦴ ꦫꦱ꧀ꦩꦶꦪꦺꦴ ꦢꦠ꧀ꦮꦴ ꦫꦡꦺ ꦜꦶꦠꦺꦴꦮ ꦣꦤꦸꦁ ꦄꦴꦫꦺꦴꦥꦺꦠꦶ, ꦫꦡꦕꦏ꧀ꦏꦁ ꦪꦴꦮ ꦤꦴꦨꦶꦠꦺꦴ ꦥꦡꦮꦶꦁ ꦥꦴꦮꦶꦱꦶ, ꦭꦶꦕ꧀ꦖꦮꦶꦤꦺꦴ ꦠꦁ ꦜꦴꦤꦁ ꦢꦶꦱ꧀ꦮꦴꦥꦶ ꦤ ꦤꦶꦮꦠ꧀ꦠꦶꦁꦱꦸ. ꦆꦠꦫꦺꦴ ꦡꦺꦴꦏꦁ ꦒꦤ꧀ꦠ꧀ꦮꦴ ꦗꦶꦪꦁ ꦥꦺꦴꦡꦺꦱꦶ, ꦄꦱꦤꦶꦱꦢ꧀ꦢꦺꦴ ꦮꦶꦪ ꦄꦲꦺꦴꦱꦶ. ꦠꦺ ꦠꦠꦺꦴꦥꦶ ꦤ ꦤꦶꦮꦠ꧀ꦠꦶꦁꦱꦸ, ꦄꦤꦸꦧꦤ꧀ꦣꦤ꧀ꦠꦴ ꦒꦕ꧀ꦖꦤ꧀ꦠꦺꦮ. ꦧꦤ꧀ꦣꦸꦭꦺꦴ ꦫꦡꦺ ꦜꦶꦠꦏꦺꦴꦮ ꦌꦏꦁ ꦱꦫꦁ ꦑꦶꦥꦶ. ꦱꦺꦴ ꦥꦚ꧀ꦕꦤ꧀ꦤꦁ ꦫꦡꦱꦠꦴꦤꦁ ꦫꦡꦱꦷꦱꦁ ꦖꦶꦢ꧀ꦢꦁ ꦏꦠ꧀ꦮꦴ ꦥꦚ꧀ꦕ ꦫꦴꦗꦱꦠꦴꦤꦶ ꦥꦫꦶꦏꦫꦧꦤ꧀ꦣꦤꦛ꧀ꦜꦴꦤꦺ ꦮꦶꦗ꧀ꦙꦶꦠ꧀ꦮꦴ ꦥꦡꦮꦶꦁ ꦥꦴꦮꦶꦱꦶ. ꦠꦺ ꦄꦠ꧀ꦠꦤꦺꦴ ꦮꦶꦢ꧀ꦣꦨꦴꦮꦁ ꦄꦗꦴꦤꦶꦠ꧀ꦮꦴ ‘‘ꦠꦶꦛ꧀ꦜ ꦫꦺ, ꦠꦶꦛ꧀ꦜ ꦫꦺ’’ꦠꦶ ꦮꦢꦤ꧀ꦠꦴ ꦄꦤꦸꦧꦤ꧀ꦣꦶꦁꦱꦸꦪꦺꦮ. ꦧꦤ꧀ꦣꦸꦭꦺꦴ ꦫꦡꦁ ꦜꦥꦺꦠ꧀ꦮꦴ ‘‘ꦠꦸꦩ꧀ꦲꦺ ꦩꦠꦏꦴ, ꦩꦠꦏꦺꦲꦶ ꦱꦢ꧀ꦣꦶꦁ ꦩꦪ꧀ꦲꦁ ꦪꦸꦢ꧀ꦣꦁ ꦤꦴꦩ ꦤꦠ꧀ꦡꦷ’’ꦠꦶ ꦄꦴꦲ. ꦠꦺ ‘‘ꦩꦠꦏꦴ ꦤꦴꦩ ꦄꦩ꧀ꦲꦴꦢꦶꦱꦴ ꦤꦺꦮ ꦲꦺꦴꦤ꧀ꦠꦷ’’ꦠꦶ ꦮꦢꦶꦁꦱꦸ. ‘‘ꦠꦺꦤ ꦲꦶ ꦱꦧ꧀ꦧꦥꦕ꧀ꦖꦶꦩꦱ꧀ꦱ ꦥꦫꦶꦏꦫꦁ ꦩꦺꦴꦕꦺꦡꦴ’’ꦠꦶ. ꦠꦺ ꦩꦺꦴꦕꦪꦶꦁꦱꦸ. ꦱꦺꦴ ꦩꦸꦠ꧀ꦠꦩꦠ꧀ꦠꦺꦪꦺꦮ ꦩꦫꦶꦠ꧀ꦮꦴ ꦥꦠꦶꦠꦺꦴ. ꦄꦡ ꦤꦺ ‘‘ꦱꦧ꧀ꦧꦺꦥꦶ ꦠꦸꦩ꧀ꦲꦺ ꦌꦮꦫꦹꦥꦴ, ꦄꦠ꧀ꦠꦤꦺꦴ ꦓꦫꦴꦤꦶ ꦒꦤ꧀ꦠ꧀ꦮꦴ ꦱꦁꦮꦶꦣꦴꦠꦧ꧀ꦧꦁ ꦱꦁꦮꦶꦢꦲꦶꦠ꧀ꦮꦴ ꦥꦸꦠ꧀ꦠꦢꦴꦫꦺ ꦄꦤꦸꦱꦴꦱꦶꦠ꧀ꦮꦴ ꦱꦤ꧀ꦤꦴꦲꦁ ꦩꦺꦴꦕꦺꦡꦴ’’ꦠꦶ ꦄꦴꦲ. ꦠꦺ ꦠꦡꦴ ꦏꦠ꧀ꦮꦴ ꦱꦧ꧀ꦧꦺ ꦗꦷꦮꦶꦠꦏ꧀ꦑꦪꦁ ꦥꦠ꧀ꦠꦴ.

ꦧꦤ꧀ꦣꦸꦭꦺꦴꦥꦶ ꦩꦭ꧀ꦭꦶꦏꦁ ꦱꦴꦮꦠ꧀ꦡꦶꦁ ꦄꦴꦤꦺꦱꦶ. ꦱꦴ ꦱꦺꦴꦭ꦳ꦱꦏ꧀ꦑꦠ꧀ꦠꦸꦁ ꦪꦩꦏꦺ ꦥꦸꦠ꧀ꦠꦺ ꦮꦶꦗꦴꦪꦶ, ꦱꦧ꧀ꦧꦺꦥꦶ ꦱꦹꦫꦴ ꦡꦴꦩꦱꦩ꧀ꦥꦤ꧀ꦤꦴ ꦄꦲꦺꦱꦸꦁ, ꦱꦧ꧀ꦧꦱꦶꦥ꧀ꦥꦺ ꦤꦶꦥ꧀ꦦꦠ꧀ꦠꦶꦁ ꦥꦴꦥꦸꦟꦶꦁꦱꦸ. ꦌꦏꦺꦏꦱ꧀ꦱꦥꦶ ꦥꦸꦫꦶꦱꦱꦲꦱ꧀ꦱꦥꦫꦶꦮꦴꦫꦺꦴ ꦄꦲꦺꦴꦱꦶ. ꦥꦶꦠꦫꦴ ꦱꦢ꧀ꦣꦶꦁ ꦫꦴꦗꦤꦶꦮꦺꦱꦤꦁ ꦒꦕ꧀ꦖꦤ꧀ꦠꦺꦲꦶ ꦠꦺꦲꦺꦮ ꦫꦴꦗꦔ꧀ꦒꦟꦁ ꦥꦫꦶꦥꦹꦫꦶ. ꦄꦡꦺꦏꦢꦶꦮꦱꦁ ꦮꦶꦤꦶꦕ꧀ꦖꦪꦺ ꦏꦹꦛꦝ꧀ꦝꦥꦫꦴꦗꦶꦠꦴ ꦩꦤꦸꦱ꧀ꦱꦴ ꦧꦤ꧀ꦣꦸꦭꦁ ꦄꦴꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ꦩꦲꦴꦫꦮꦁ ꦮꦶꦫꦮꦤ꧀ꦠꦴ ꦮꦶꦤꦶꦕ꧀ꦖꦪꦄꦩꦕ꧀ꦕꦴꦤꦁ ꦏꦹꦛꦝ꧀ꦝꦏꦴꦫꦟꦁ ꦠꦱ꧀ꦱ ꦄꦴꦫꦺꦴꦕꦺꦱꦸꦁ. ꦱꦺꦴꦥꦶ ꦮꦶꦤꦶꦕ꧀ꦖꦪꦁ ꦒꦤ꧀ꦠ꧀ꦮꦴ ꦠꦁ ꦄꦝ꧀ꦝꦁ ꦠꦷꦫꦺꦠ꧀ꦮꦴ ꦱꦴꦩꦶꦏꦩꦺꦮ ꦱꦴꦩꦶꦏꦁ, ꦄꦱ꧀ꦱꦴꦩꦶꦏꦩꦺꦮ ꦄꦱ꧀ꦱꦴꦩꦶꦏꦁ ꦄꦏꦴꦱꦶ. ꦩꦲꦴꦗꦤꦺꦴ ꦩꦲꦴꦱꦢ꧀ꦢꦺꦤ ꦱꦴꦣꦸꦏꦴꦫꦁ ꦥꦮꦠ꧀ꦠꦺꦱꦶ. ꦫꦴꦗꦴ ‘‘ꦏꦶꦩꦶꦢ’’ꦤ꧀ꦠꦶ ꦥꦸꦕ꧀ꦖꦶꦠ꧀ꦮꦴ ꦠꦩꦠ꧀ꦡꦁ ꦱꦸꦠ꧀ꦮꦴ ꦠꦸꦱ꧀ꦱꦶꦠ꧀ꦮꦴ ꦱꦧ꧀ꦧꦺꦥꦶ ꦠꦺ ꦄꦩꦕ꧀ꦕꦺ ꦲꦴꦫꦺꦠ꧀ꦮꦴ ꦧꦤ꧀ꦣꦸꦭꦱ꧀ꦱꦺꦮ ꦮꦶꦤꦶꦕ꧀ꦖꦪꦁ ꦤꦶꦪ꧀ꦪꦴꦢꦺꦱꦶ. ꦱꦺꦴ ꦠꦠꦺꦴ ꦥꦛ꧀ꦜꦴꦪ ꦱꦩ꧀ꦩꦴ ꦮꦶꦤꦶꦕ꧀ꦖꦶꦤꦶ. ꦠꦠꦺꦴ ꦥꦺꦴꦫꦴꦟꦏꦮꦶꦤꦶꦕ꧀ꦖꦪꦶꦏꦴ ꦭꦚ꧀ꦗꦁ ꦄꦭꦨꦤ꧀ꦠꦴ ꦄꦥ꧀ꦥꦭꦴꦨꦴ ꦲꦸꦠ꧀ꦮꦴ ‘‘ꦧꦤ꧀ꦣꦸꦭꦺꦴ ꦫꦗ꧀ꦗꦁ ꦥꦠ꧀ꦡꦺꦠꦷ’’ꦠꦶ ꦫꦴꦗꦏꦸꦭꦺ ꦥꦫꦶꦨꦶꦤ꧀ꦢꦶꦁꦱꦸ. ꦫꦴꦗꦴ ꦠꦁ ꦏꦡꦁ ꦒꦲꦺꦠ꧀ꦮꦴ ꦕꦶꦠ꧀ꦠꦁ ꦤꦶꦒ꧀ꦒꦲꦺꦠꦸꦁ ꦤꦴꦱꦏ꧀ꦑꦶ, ‘‘ꦆꦩꦱ꧀ꦩꦶꦁ ꦆꦣꦺꦮ ꦓꦴꦠꦶꦪꦩꦴꦤꦺ ꦒꦫꦲꦴ ꦩꦺ ꦈꦥ꧀ꦥꦗ꧀ꦗꦶꦱ꧀ꦱꦠꦷ’’ꦠꦶ ꦥꦸꦤ ꦕꦶꦤ꧀ꦠꦺꦠ꧀ꦮꦴ ‘‘ꦥꦪꦸꦠ꧀ꦠꦥꦸꦫꦶꦱꦺꦲꦶ ꦥꦕ꧀ꦕꦤ꧀ꦠꦁ ꦥꦲꦫꦴꦥꦺꦠ꧀ꦮꦴ ꦠꦺ ꦥꦭꦴꦥꦺꦠ꧀ꦮꦴ ꦤꦶꦮꦠ꧀ꦠꦏꦴꦭꦺ ꦄꦤ꧀ꦠꦫꦴꦩꦒ꧀ꦒꦺ ꦥꦸꦠ꧀ꦠꦺꦲꦶ ꦱꦢ꧀ꦣꦶꦁ ꦩꦴꦫꦺꦠꦸꦁ ꦮꦛ꧀ꦛꦠꦷ’’ꦠꦶ ꦧꦤ꧀ꦣꦸꦭꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦥꦕ꧀ꦕꦤ꧀ꦠꦺꦴ ꦏꦶꦫ ꦏꦸꦥꦶꦠꦺꦴ, ꦠꦮ ꦥꦸꦠ꧀ꦠꦺꦲꦶ ꦱꦢ꧀ꦣꦶꦁ ꦒꦤ꧀ꦠ꧀ꦮꦴ ꦕꦺꦴꦫꦺ ꦒꦟ꧀ꦲꦴꦲꦷ’’ꦠꦶ ꦥꦲꦶꦟꦶꦠ꧀ꦮꦴ ‘‘ꦌꦠ꧀ꦡꦺꦮꦱ꧀ꦱ ꦢ꧀ꦮꦠ꧀ꦠꦶꦁꦱꦴꦪ ꦥꦸꦠ꧀ꦠꦺꦲꦶ ꦱꦢ꧀ꦣꦶꦁ ꦱꦷꦱꦁ ꦖꦶꦤ꧀ꦢꦶꦠ꧀ꦮꦴ ꦄꦴꦲꦫꦡꦴ’’ꦠꦶ ꦠꦺꦲꦶ ꦱꦢ꧀ꦣꦶꦁ ꦄꦚ꧀ꦚꦺꦥꦶ ꦱꦩꦠ꧀ꦡꦺ ꦩꦲꦴꦪꦺꦴꦣꦺ ꦥꦺꦱꦺꦱꦶ. ꦠꦱ꧀ꦩꦶꦁ ꦥꦕ꧀ꦕꦤ꧀ꦠꦁ ꦒꦕ꧀ꦖꦤ꧀ꦠꦺꦪꦺꦮ ‘‘ꦱꦺꦤꦴꦥꦠꦶ ꦏꦶꦫ ꦄꦴꦒꦕ꧀ꦖꦠꦷ’’ꦠꦶ ꦱꦸꦠ꧀ꦮꦴꦮ ꦥꦪꦸꦠ꧀ꦠꦏꦕꦺꦴꦫꦴ ꦥꦭꦴꦪꦶꦁꦱꦸ. ꦱꦺꦴ ꦠꦁ ꦥꦢꦺꦱꦁ ꦄꦴꦮꦴꦱꦴꦥꦺꦠ꧀ꦮꦴ ꦗꦤꦥꦢꦁ ꦱꦟ꧀ꦜꦥꦺꦠ꧀ꦮꦴ ꦤꦶꦮꦠ꧀ꦠꦶ.

ꦄꦡꦱ꧀ꦱ ꦤꦒꦫꦠꦺꦴ ꦄꦮꦶꦢꦹꦫꦺ ꦜꦴꦤꦺ ꦠꦺ ꦪꦺꦴꦣꦴ ꦥꦸꦠ꧀ꦠꦺꦲꦶ ꦱꦢ꧀ꦣꦶꦁ ꦱꦷꦱꦁ ꦖꦶꦤ꧀ꦢꦶꦁꦱꦸ. ꦠꦁ ꦢꦶꦮꦱꦁ ꦩꦭ꧀ꦭꦶꦏꦴꦪ ꦥꦚ꧀ꦕꦲꦶ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦢ꧀ꦮꦺ ꦄꦒ꧀ꦒꦱꦴꦮꦏꦴ ꦤꦶꦩꦤ꧀ꦠꦶꦠꦴ ꦲꦺꦴꦤ꧀ꦠꦶ. ꦄꦡꦱ꧀ꦱꦴ ꦥꦸꦧ꧀ꦧꦟ꧀ꦲꦱꦩꦪꦺ ‘‘ꦱꦴꦩꦶꦏꦱ꧀ꦱ ꦠꦺ ꦱꦢ꧀ꦣꦶꦁ ꦥꦸꦠ꧀ꦠꦺꦲꦶ ꦱꦷꦱꦁ ꦖꦶꦤ꧀ꦢꦶꦁꦱꦹ’’ꦠꦶ ꦥꦟ꧀ꦟꦁ ꦄꦴꦲꦫꦶꦠ꧀ꦮꦴ ꦄꦢꦁꦱꦸ. ꦱꦴ ꦠꦁ ꦥꦮꦠ꧀ꦠꦶꦁ ꦚꦠ꧀ꦮꦴ ꦏꦱ꧀ꦱꦕꦶ ꦏꦶꦚ꧀ꦕꦶ ꦄꦮꦠ꧀ꦮꦴ ꦥꦟ꧀ꦟꦁ ꦈꦕ꧀ꦖꦔ꧀ꦒꦺ ꦏꦠ꧀ꦮꦴ ꦨꦶꦏ꧀ꦑꦸꦱꦔ꧀ꦓꦩꦺꦮ ꦥꦫꦶꦮꦶꦱꦶ. ꦄꦡꦱ꧀ꦱꦴ ꦥꦫꦶꦕꦴꦫꦶꦏꦴ ꦨꦶꦏ꧀ꦑꦹꦤꦁ ꦨꦠ꧀ꦠꦁ ꦢꦠ꧀ꦮꦴ ꦱꦥ꧀ꦥꦶꦕꦴꦛꦶꦁ ꦄꦴꦲꦫꦤ꧀ꦠꦶꦪꦺꦴ ꦡꦺꦫꦴꦤꦁ ꦥꦸꦫꦠꦺꦴ ꦕꦴꦛꦶꦁ ꦨꦶꦤ꧀ꦢꦶꦁꦱꦸ. ꦣꦩ꧀ꦩꦱꦺꦤꦴꦥꦠꦶ ‘‘ꦈꦥꦴꦱꦶꦏꦺ, ꦨꦺꦢꦤꦣꦩ꧀ꦩꦁ ꦨꦶꦤ꧀ꦤꦁ, ꦤ ꦕꦶꦤ꧀ꦠꦺꦠꦧ꧀ꦧ’’ꦤ꧀ꦠꦶ ꦄꦴꦲ. ꦱꦴ ꦈꦕ꧀ꦖꦔ꧀ꦒꦠꦺꦴ ꦥꦟ꧀ꦟꦁ ꦤꦷꦲꦫꦶꦠ꧀ꦮꦴ ‘‘ꦢ꧀ꦮꦠ꧀ꦠꦶꦁꦱꦥꦸꦠ꧀ꦠꦺꦲꦶ ꦱꦢ꧀ꦣꦶꦁ ꦥꦶꦠꦸ ꦱꦷꦱꦁ ꦖꦶꦤ꧀ꦤꦤ꧀ꦠꦶ ꦩꦺ ꦆꦩꦁ ꦥꦟ꧀ꦟꦁ ꦄꦴꦲꦫꦶꦁꦱꦸ, ꦄꦲꦁ ꦆꦢꦁ ꦱꦸꦠ꧀ꦮꦴꦥꦶ ꦤ ꦕꦶꦤ꧀ꦠꦺꦩꦶ, ꦱꦥ꧀ꦥꦶꦕꦴꦛꦶꦪꦴ ꦨꦶꦤ꧀ꦤꦴꦪ ꦏꦶꦁ ꦕꦶꦤ꧀ꦠꦺꦩꦶ, ꦨꦤ꧀ꦠꦺ’’ꦠꦶ ꦄꦴꦲ. ꦣꦩ꧀ꦩꦱꦺꦤꦴꦥꦠꦶ ‘‘ꦄꦤꦶꦩꦶꦠ꧀ꦠꦩꦤꦚ꧀ꦚꦴꦠ’’ꦤ꧀ꦠꦶꦄꦴꦢꦷꦤꦶ (ꦱꦸ. ꦤꦶ. ꧕꧗꧙) ꦮꦠ꧀ꦮꦴ ꦣꦩ꧀ꦩꦁ ꦢꦺꦱꦺꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦮꦶꦲꦴꦫꦁ ꦄꦒꦩꦴꦱꦶ. ꦱꦴꦥꦶ ꦢ꧀ꦮꦠ꧀ꦠꦶꦁꦱ ꦱꦸꦟꦶꦱꦴꦪꦺꦴ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦠꦸꦩ꧀ꦲꦴꦏꦁ ꦱꦴꦩꦶꦏꦴ ꦄꦠ꧀ꦠꦤꦺꦴ ꦥꦸꦫꦶꦩꦏꦩ꧀ꦩꦦꦭꦁ ꦭꦨꦶꦁꦱꦸ, ꦠꦸꦩ꧀ꦲꦺ ꦩꦴ ꦱꦺꦴꦕꦶꦠ꧀ꦡ ꦩꦴ ꦥꦫꦶꦢꦺꦮꦶꦠ꧀ꦡ, ꦫꦚ꧀ꦚꦺꦴ ꦈꦥꦫꦶ ꦩꦤꦺꦴꦥꦢꦺꦴꦱꦁ ꦩꦴ ꦏꦫꦶꦠ꧀ꦡꦴ’’ꦠꦶ ꦎꦮꦢꦶ.

ꦫꦚ꧀ꦚꦺꦴ ꦕꦫꦥꦸꦫꦶꦱꦴ ꦠꦁ ꦏꦡꦁ ꦱꦸꦠ꧀ꦮꦴ ꦠꦺꦱꦁ ꦤꦶꦢ꧀ꦢꦺꦴꦱꦨꦴꦮꦁ ꦫꦚ꧀ꦚꦺꦴ ꦏꦡꦪꦶꦁꦱꦸ. ꦫꦴꦗꦴ ꦱꦁꦮꦺꦒꦥ꧀ꦥꦠ꧀ꦠꦺꦴ ꦠꦱ꧀ꦱꦴ ꦤꦶꦮꦺꦱꦤꦁ ꦒꦤ꧀ꦠ꧀ꦮꦴ ꦩꦭ꧀ꦭꦶꦏꦚ꧀ꦕ ꦱꦸꦟꦶꦱꦴꦪꦺꦴ ꦕꦱ꧀ꦱꦴ ꦑꦩꦴꦥꦺꦠ꧀ꦮꦴ ꦩꦭ꧀ꦭꦶꦏꦴꦪ ꦮꦫꦁ ꦄꦢꦴꦱꦶ. ꦱꦴ ‘‘ꦒꦲꦶꦠꦺꦴ ꦩꦺ ꦲꦺꦴꦠꦹ’’ꦠꦶ ꦮꦠ꧀ꦮꦴ ꦠꦱ꧀ꦩꦶꦁ ꦒꦠꦺ ꦩꦠꦏꦨꦠ꧀ꦠꦁ ꦢꦠ꧀ꦮꦴ ꦤ꧀ꦲꦠ꧀ꦮꦴ ꦫꦴꦗꦴꦤꦁ ꦈꦥꦱꦔ꧀ꦏꦩꦶꦠ꧀ꦮꦴ ꦮꦤ꧀ꦢꦶꦠ꧀ꦮꦴ ‘‘ꦢꦺꦮ, ꦠꦸꦩ꧀ꦲꦺꦲꦶ ꦩꦺ ꦮꦫꦺꦴ ꦢꦶꦤ꧀ꦤꦺꦴ, ꦩꦪ꧀ꦲꦚ꧀ꦕ ꦄꦚ꧀ꦚꦺꦤ ꦄꦠ꧀ꦡꦺꦴ ꦤꦠ꧀ꦡꦶ, ꦢ꧀ꦮꦠ꧀ꦠꦶꦁꦱꦴꦪ ꦩꦺ ꦱꦸꦟꦶꦱꦴꦤꦁ ꦩꦩ ꦕ ꦏꦸꦭꦓꦫꦒꦩꦤꦁ ꦄꦤꦸꦗꦴꦤꦴꦡꦴ’’ꦠꦶ ꦄꦴꦲ. ꦫꦴꦗꦴ ꦱꦩ꧀ꦥꦛꦶꦕ꧀ꦖꦶ. ꦱꦴ ꦢ꧀ꦮꦠ꧀ꦠꦶꦁꦱꦴꦪ ꦱꦸꦟꦶꦱꦴꦤꦁ ꦱꦏꦏꦸꦭꦁ ꦥꦺꦱꦺꦠ꧀ꦮꦴ ꦱꦪꦁ ꦏꦸꦱꦶꦤꦴꦫꦤꦒꦫꦺ ꦄꦠ꧀ꦠꦤꦺꦴ ꦏꦸꦭꦓꦫꦁ ꦄꦒꦩꦴꦱꦶ. ꦫꦴꦗꦴ ꦧꦤ꧀ꦣꦸꦭꦱꦺꦤꦴꦥꦠꦶꦤꦺꦴ ꦨꦴꦒꦶꦤꦺꦪ꧀ꦪꦱ꧀ꦱ ꦢꦷꦓꦏꦴꦫꦴꦪꦤꦱ꧀ꦱ ꦤꦴꦩ ꦱꦺꦤꦴꦥꦠꦶꦛ꧀ꦜꦴꦤꦁ ꦄꦢꦴꦱꦶ. ꦱꦺꦴ ꦥꦤ ‘‘ꦩꦴꦠꦸꦭꦺꦴ ꦩꦺ ꦆꦩꦶꦤꦴ ꦩꦴꦫꦶꦠꦺꦴ’’ꦠꦶ ꦫꦚ꧀ꦚꦺꦴ ꦎꦠꦴꦫꦁ ꦒꦮꦺꦱꦤ꧀ꦠꦺꦴ ꦮꦶꦕꦫꦠꦶ. ꦫꦴꦗꦴꦥꦶ ꦤꦶꦥ꧀ꦥꦫꦴꦣꦱ꧀ꦱ ꦧꦤ꧀ꦣꦸꦭꦱ꧀ꦱ ꦩꦴꦫꦶꦠꦏꦴꦭꦠꦺꦴ ꦥꦛ꧀ꦜꦴꦪ ꦮꦶꦥ꧀ꦥꦛꦶꦱꦴꦫꦷ ꦕꦶꦠ꧀ꦠꦱ꧀ꦱꦴꦢꦁ ꦤ ꦭꦨꦠꦶ, ꦫꦗ꧀ꦗꦱꦸꦑꦁ ꦤꦴꦤꦸꦨꦺꦴꦠꦶ.

ꦠꦢꦴ ꦱꦠ꧀ꦡꦴ ꦱꦴꦏꦶꦪꦴꦤꦁ ꦮꦺꦭ꦳ꦸꦁ ꦤꦴꦩ ꦤꦶꦒꦩꦁ ꦈꦥꦤꦶꦱ꧀ꦱꦴꦪ ꦮꦶꦲꦫꦠꦶ. ꦫꦴꦗꦴ ꦠꦠ꧀ꦡ ꦒꦤ꧀ꦠ꧀ꦮꦴ ꦄꦴꦫꦴꦩꦠꦺꦴ ꦄꦮꦶꦢꦹꦫꦺ ꦑꦤ꧀ꦣꦴꦮꦴꦫꦁ ꦤꦶꦮꦴꦱꦺꦠ꧀ꦮꦴ ‘‘ꦩꦲꦤ꧀ꦠꦺꦤ ꦥꦫꦶꦮꦴꦫꦺꦤ ꦱꦠ꧀ꦡꦴꦫꦁ ꦮꦤ꧀ꦢꦶꦱ꧀ꦱꦴꦩꦴ’’ꦠꦶ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦥꦚ꧀ꦕ ꦫꦴꦗꦏꦏꦸꦣꦨꦟ꧀ꦝꦴꦤꦶ ꦢꦷꦓꦏꦴꦫꦴꦪꦤꦱ꧀ꦱ ꦢꦠ꧀ꦮꦴ ꦌꦏꦏꦺꦴꦮ ꦒꦤ꧀ꦣꦏꦸꦛꦶꦁ ꦥꦴꦮꦶꦱꦶ. ꦱꦧ꧀ꦧꦁ ꦣꦩ꧀ꦩꦕꦺꦠꦶꦪꦱꦸꦠ꧀ꦠꦤꦶꦪꦴꦩꦺꦤꦺꦮ (ꦩ. ꦤꦶ. ꧒.꧓꧖꧔ ꦄꦴꦢꦪꦺꦴ) ꦮꦺꦢꦶꦠꦧ꧀ꦧꦁ. ꦠꦱ꧀ꦩꦶꦁ ꦒꦤ꧀ꦣꦏꦸꦛꦶꦁ ꦥꦮꦶꦛ꧀ꦜꦺ ꦢꦷꦓꦏꦴꦫꦴꦪꦤꦺꦴ ꦠꦴꦤꦶ ꦥꦚ꧀ꦕ ꦫꦴꦗꦏꦏꦸꦣꦨꦟ꧀ꦝꦴꦤꦶ ꦒꦲꦺꦠ꧀ꦮꦴ ꦮꦶꦛꦛꦹꦨꦁ ꦫꦴꦗꦴꦤꦁ ꦏꦠ꧀ꦮꦴ ꦫꦚ꧀ꦚꦺꦴ ꦌꦏꦁ ꦄꦱ꧀ꦱꦁ ꦌꦏꦚ꧀ꦕ ꦈꦥꦛ꧀ꦜꦴꦤꦏꦴꦫꦶꦏꦁ ꦩꦴꦠꦸꦒꦴꦩꦁ ꦤꦶꦮꦠ꧀ꦠꦺꦠ꧀ꦮꦴ ꦱꦴꦮꦠ꧀ꦡꦶꦁ ꦄꦒꦩꦴꦱꦶ. ꦫꦴꦗꦴ ꦱꦠ꧀ꦡꦴꦫꦴ ꦱꦢ꧀ꦣꦶꦁ ꦥꦶꦪꦏꦡꦁ ꦏꦡꦺꦠ꧀ꦮꦴ ꦤꦶꦏ꧀ꦑꦤ꧀ꦠꦺꦴ ꦱꦺꦤꦁ ꦄꦢꦶꦱ꧀ꦮꦴ ꦠꦁ ꦩꦴꦠꦸꦒꦴꦩꦁ ꦥꦸꦕ꧀ꦖꦶꦠ꧀ꦮꦴ ꦠꦁ ꦥꦮꦠ꧀ꦠꦶꦁ ꦱꦸꦠ꧀ꦮꦴ ‘‘ꦄꦲꦁ ꦨꦴꦒꦶꦤꦺꦪ꧀ꦪꦁ ꦄꦗꦴꦠꦱꦠ꧀ꦠꦸꦁ ꦄꦴꦢꦴꦪ ꦄꦴꦒꦤ꧀ꦠ꧀ꦮꦴ ꦮꦶꦛꦛꦹꦨꦁ ꦒꦲꦺꦱ꧀ꦱꦴꦩꦷ’’ꦠꦶ ꦫꦴꦗꦒꦲꦤꦒꦫꦁ ꦒꦕ꧀ꦖꦤ꧀ꦠꦺꦴ ꦮꦶꦏꦴꦭꦺ ꦢ꧀ꦮꦴꦫꦺꦱꦸ ꦥꦶꦲꦶꦠꦺꦱꦸ ꦤꦒꦫꦁ ꦥꦮꦶꦱꦶꦠꦸꦩꦱꦏ꧀ꦏꦺꦴꦤ꧀ꦠꦺꦴ ꦌꦏꦶꦱ꧀ꦱꦴꦪ ꦱꦴꦭꦴꦪ ꦤꦶꦥꦗ꧀ꦗꦶꦠ꧀ꦮꦴ ꦮꦴꦠꦴꦠꦥꦺꦤ ꦏꦶꦭꦤ꧀ꦠꦺꦴ ꦫꦠ꧀ꦠꦶꦨꦴꦒꦺ ꦠꦠ꧀ꦡꦺꦮ ꦏꦴꦭꦩꦏꦴꦱꦶ. ꦮꦶꦨꦴꦠꦴꦪ ꦫꦠ꧀ꦠꦶꦪꦴ ‘‘ꦢꦺꦮ ꦏꦺꦴꦱꦭꦤꦫꦶꦤ꧀ꦢ, ꦆꦢꦴꦤꦶ ꦄꦤꦴꦡꦺꦴꦱꦶ ꦗꦴꦠꦺꦴ’’ꦠꦶ ꦮꦶꦭꦥꦤ꧀ꦠꦶꦪꦴ ꦠꦱ꧀ꦱꦴ ꦆꦠ꧀ꦡꦶꦪꦴ ꦱꦢ꧀ꦢꦁ ꦱꦸꦠ꧀ꦮꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦸꦁ. ꦱꦺꦴ ꦩꦴꦠꦸꦭꦱ꧀ꦱ ꦩꦲꦤ꧀ꦠꦺꦤ ꦱꦏ꧀ꦏꦴꦫꦺꦤ ꦱꦫꦷꦫꦏꦶꦕ꧀ꦕꦁ ꦏꦴꦫꦺꦱꦶ.

ꦮꦶꦛꦛꦹꦨꦺꦴꦥꦶ ꦫꦗ꧀ꦗꦁ ꦭꦨꦶꦠ꧀ꦮꦴ ꦠꦁ ꦮꦺꦫꦁ ꦱꦫꦶꦠ꧀ꦮꦴ ‘‘ꦱꦧ꧀ꦧꦺꦥꦶ ꦱꦴꦏꦶꦪꦺ ꦩꦴꦫꦺꦱ꧀ꦱꦴꦩꦷ’’ꦠꦶ ꦩꦲꦠꦶꦪꦴ ꦱꦺꦤꦴꦪ ꦤꦶꦏ꧀ꦑꦩꦶ. ꦠꦁ ꦢꦶꦮꦱꦁ ꦱꦠ꧀ꦡꦴ ꦥꦕ꧀ꦕꦹꦱꦱꦩꦪꦺ ꦭꦺꦴꦏꦁ ꦮꦺꦴꦭꦺꦴꦏꦺꦤ꧀ꦠꦺꦴ ꦚꦴꦠꦶꦱꦔ꧀ꦓꦱ꧀ꦱ ꦮꦶꦤꦴꦱꦁ ꦢꦶꦱ꧀ꦮꦴ ‘‘ꦚꦴꦠꦶꦱꦔ꧀ꦒꦲꦁ ꦏꦴꦠꦸꦁ ꦮꦛ꧀ꦛꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦥꦸꦧ꧀ꦧꦟ꧀ꦲꦱꦩꦪꦺ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦒꦤ꧀ꦣꦏꦸꦛꦶꦪꦁ ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦠ꧀ꦮꦴ ꦱꦴꦪꦤ꧀ꦲꦱꦩꦪꦺ ꦄꦴꦏꦴꦱꦺꦤ ꦒꦤ꧀ꦠ꧀ꦮꦴ ꦏꦥꦶꦭꦮꦠ꧀ꦡꦸꦱꦴꦩꦤ꧀ꦠꦺ ꦌꦏꦱ꧀ꦩꦶꦁ ꦏꦧꦫꦕ꧀ꦖꦴꦪꦺ ꦫꦸꦏ꧀ꦑꦩꦹꦭꦺ ꦤꦶꦱꦷꦢꦶ. ꦠꦠꦺꦴ ꦄꦮꦶꦢꦹꦫꦺ ꦮꦶꦛꦛꦹꦨꦱ꧀ꦱ ꦫꦗ꧀ꦗꦱꦷꦩꦴꦪ ꦄꦤ꧀ꦠꦺꦴ ꦱꦤ꧀ꦢꦕ꧀ꦖꦴꦪꦺꦴ ꦤꦶꦒ꧀ꦫꦺꦴꦣꦫꦸꦏ꧀ꦑꦺꦴ ꦄꦠ꧀ꦡꦶ, ꦮꦶꦛꦛꦹꦨꦺꦴ ꦱꦠ꧀ꦡꦴꦫꦁ ꦢꦶꦱ꧀ꦮꦴ ꦈꦥꦱꦔ꧀ꦏꦩꦶꦠ꧀ꦮꦴ ꦮꦤ꧀ꦢꦶꦠ꧀ꦮꦴ ‘‘ꦨꦤ꧀ꦠꦺ, ꦏꦶꦁꦏꦴꦫꦟꦴ ꦌꦮꦫꦹꦥꦴꦪ ꦈꦟ꧀ꦲꦮꦺꦭꦴꦪ ꦆꦩꦱ꧀ꦩꦶꦁ ꦏꦧꦫꦕ꧀ꦖꦴꦪꦺ ꦫꦸꦏ꧀ꦑꦩꦹꦭꦺ ꦤꦶꦱꦷꦢꦡ, ꦌꦠꦱ꧀ꦩꦶꦁ ꦱꦤ꧀ꦢꦕ꧀ꦖꦴꦪꦺ ꦤꦶꦒ꧀ꦫꦺꦴꦣꦫꦸꦏ꧀ꦑꦩꦹꦭꦺ ꦤꦶꦱꦷꦢꦡ, ꦨꦤ꧀ꦠꦺ’’ꦠꦶ ꦮꦠ꧀ꦮꦴ ‘‘ꦲꦺꦴꦠꦸ, ꦩꦲꦴꦫꦴꦗ, ꦚꦴꦠꦏꦴꦤꦁ ꦖꦴꦪꦴ ꦤꦴꦩ ꦱꦷꦠꦭꦴ’’ꦠꦶ ꦮꦸꦠ꧀ꦠꦺ ‘‘ꦚꦴꦠꦏꦴꦤꦁ ꦫꦏ꧀ꦑꦟꦠ꧀ꦡꦴꦪ ꦱꦠ꧀ꦡꦴ ꦄꦴꦒꦠꦺꦴ ꦨꦮꦶꦱ꧀ꦱꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ꦱꦴꦮꦠ꧀ꦡꦶꦩꦺꦮ ꦥꦕ꧀ꦕꦴꦒꦩꦶ. ꦱꦠ꧀ꦡꦴꦥꦶ ꦈꦥ꧀ꦥꦠꦶꦠ꧀ꦮꦴ ꦗꦺꦠꦮꦤꦩꦺꦮ ꦒꦠꦺꦴ.

ꦫꦴꦗꦴ ꦱꦴꦏꦶꦪꦴꦤꦁ ꦢꦺꦴꦱꦁ ꦱꦫꦶꦠ꧀ꦮꦴ ꦢꦸꦠꦶꦪꦁ ꦤꦶꦏ꧀ꦑꦩꦶꦠ꧀ꦮꦴ ꦠꦡꦺꦮ ꦱꦠ꧀ꦡꦴꦫꦁ ꦥꦱ꧀ꦱꦶꦠ꧀ꦮꦴ ꦥꦸꦤ ꦤꦶꦮꦠ꧀ꦠꦶꦠ꧀ꦮꦴ ꦠꦠꦶꦪꦮꦴꦫꦺ ꦤꦶꦏ꧀ꦑꦩꦶꦠ꧀ꦮꦴ ꦠꦠ꧀ꦡꦺꦮ ꦱꦠ꧀ꦡꦴꦫꦁ ꦥꦱ꧀ꦱꦶꦠ꧀ꦮꦴ ꦤꦶꦮꦠ꧀ꦠꦶ. ꦕꦠꦸꦠ꧀ꦡꦮꦴꦫꦺ ꦥꦤ ꦠꦱ꧀ꦩꦶꦁ ꦤꦶꦏ꧀ꦑꦤ꧀ꦠꦺ ꦱꦠ꧀ꦡꦴ ꦱꦴꦏꦶꦪꦴꦤꦁ ꦥꦸꦧ꧀ꦧꦏꦩ꧀ꦩꦁ ꦎꦭꦺꦴꦏꦺꦠ꧀ꦮꦴ ꦠꦺꦱꦁ ꦤꦢꦶꦪꦁ ꦮꦶꦱꦥꦏ꧀ꦑꦶꦥꦤꦥꦴꦥꦏꦩ꧀ꦩꦱ꧀ꦱ ꦄꦥ꧀ꦥꦛꦶꦧꦴꦲꦶꦫꦨꦴꦮꦁ ꦚꦠ꧀ꦮꦴ ꦕꦠꦸꦠ꧀ꦡꦮꦴꦫꦺ ꦤ ꦄꦒꦩꦴꦱꦶ. ꦮꦶꦛꦛꦹꦨꦫꦴꦗꦴ ꦑꦷꦫꦥꦴꦪꦏꦺ ꦢꦴꦫꦏꦺ ꦄꦴꦢꦶꦁ ꦏꦠ꧀ꦮꦴ ꦱꦧ꧀ꦧꦺ ꦱꦴꦏꦶꦪꦺ ꦓꦴꦠꦺꦠ꧀ꦮꦴ ꦒꦭꦭꦺꦴꦲꦶꦠꦺꦤ ꦤꦶꦱꦶꦤ꧀ꦤꦦꦭꦏꦁ ꦣꦺꦴꦮꦶꦠ꧀ꦮꦴ ꦥꦕ꧀ꦕꦴꦒꦩꦶ. ꦱꦠ꧀ꦡꦫꦶ ꦠꦠꦶꦪꦮꦴꦫꦺ ꦒꦩꦤꦠꦺꦴ ꦥꦕ꧀ꦕꦴꦒꦤ꧀ꦠ꧀ꦮꦴ ꦥꦸꦤꦢꦶꦮꦱꦺ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦤꦶꦛ꧀ꦜꦴꦥꦶꦠꦨꦠ꧀ꦠꦏꦶꦕ꧀ꦕꦺ ꦒꦤ꧀ꦣꦏꦸꦛꦶꦪꦁ ꦥꦮꦶꦱꦤ꧀ꦠꦺ ꦢꦶꦱꦴꦲꦶ ꦱꦤ꧀ꦤꦶꦥꦠꦶꦠꦴ ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦤꦶꦱꦷꦢꦶꦠ꧀ꦮꦴ ‘‘ꦄꦴꦮꦸꦱꦺꦴ, ꦱꦠ꧀ꦡꦴ ꦄꦠ꧀ꦠꦴꦤꦁ ꦢꦱ꧀ꦱꦺꦠ꧀ꦮꦴ ꦫꦴꦗꦴꦤꦁ ꦤꦶꦮꦠ꧀ꦠꦴꦥꦺꦠ꧀ꦮꦴ ꦚꦴꦠꦏꦺ ꦩꦫꦟꦨꦪꦴ ꦩꦺꦴꦕꦺꦱꦶ, ꦌꦮꦁ ꦚꦴꦠꦏꦴꦤꦁ ꦄꦠ꧀ꦡꦕꦫꦺꦴ ꦱꦠ꧀ꦡꦴ’’ꦠꦶ ꦨꦒꦮꦠꦺꦴ ꦒꦸꦟꦏꦡꦁ ꦏꦡꦪꦶꦁꦱꦸ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ ‘‘ꦤ, ꦨꦶꦏ꧀ꦑꦮꦺ, ꦆꦢꦴꦤꦺꦮ ꦠꦡꦴꦒꦠꦺꦴ ꦚꦴꦠꦏꦴꦤꦁ ꦄꦠ꧀ꦡꦁ ꦕꦫꦠꦶ, ꦥꦸꦧ꧀ꦧꦺꦥꦶ ꦕꦫꦶꦪꦺꦮꦴ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺꦴ ꦤꦴꦩ ꦫꦴꦗꦴ ꦢꦱ ꦫꦴꦗꦣꦩ꧀ꦩꦺ ꦄꦏꦺꦴꦥꦺꦠ꧀ꦮꦴ ꦣꦩ꧀ꦩꦺꦤ ꦫꦗ꧀ꦗꦁ ꦏꦴꦫꦺꦤ꧀ꦠꦺꦴ ꦌꦏꦢꦶꦮꦱꦁ ꦕꦶꦤ꧀ꦠꦺꦱꦶ ‘‘ꦗꦩ꧀ꦧꦸꦢꦷꦥꦠꦭꦺ ꦫꦴꦗꦴꦤꦺꦴ ꦧꦲꦸꦡꦩ꧀ꦨꦺꦱꦸ ꦥꦴꦱꦴꦢꦺꦱꦸ ꦮꦱꦤ꧀ꦠꦶ, ꦠꦱ꧀ꦩꦴ ꦧꦲꦹꦲꦶ ꦡꦩ꧀ꦨꦺꦲꦶ ꦥꦴꦱꦴꦢꦏꦫꦟꦁ ꦤꦴꦩ ꦄꦤꦕ꧀ꦖꦫꦶꦪꦁ, ꦪꦁꦤꦹꦤꦴꦲꦁ ꦌꦏꦡꦩ꧀ꦨꦏꦁ ꦥꦴꦱꦴꦢꦁ ꦏꦴꦫꦺꦪ꧀ꦪꦁ, ꦌꦮꦁ ꦱꦧ꧀ꦧꦫꦴꦗꦹꦤꦁ ꦄꦒ꧀ꦒꦫꦴꦗꦴ ꦨꦮꦶꦱ꧀ꦱꦴꦩꦷ’’ꦠꦶ. ꦱꦺꦴ ꦮꦝ꧀ꦞꦏꦷ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦩꦪ꧀ꦲꦁ ꦱꦺꦴꦨꦒ꧀ꦒꦥ꧀ꦥꦠ꧀ꦠꦁ ꦌꦏꦡꦩ꧀ꦨꦏꦁ ꦥꦴꦱꦴꦢꦁ ꦏꦫꦺꦴꦡꦴ’’ꦠꦶ ꦄꦴꦲ. ꦠꦺ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ ꦈꦗꦹ ꦩꦲꦤ꧀ꦠꦺ ꦌꦏꦡꦩ꧀ꦨꦏꦥꦴꦱꦴꦢꦴꦫꦲꦺ ꦧꦲꦹ ꦫꦸꦏ꧀ꦑꦺ ꦢꦶꦱ꧀ꦮꦴ ‘‘ꦆꦩꦺ ꦫꦸꦏ꧀ꦑꦴ ꦱꦤ꧀ꦠꦶ, ꦩꦒ꧀ꦒꦺꦴ ꦥꦤ ꦮꦶꦱꦩꦺꦴ, ꦤ ꦱꦏ꧀ꦏꦴ ꦎꦠꦴꦫꦺꦠꦸꦁ, ꦫꦚ꧀ꦚꦺꦴ ꦄꦴꦕꦶꦏ꧀ꦑꦶꦱ꧀ꦱꦴꦩꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦠꦡꦴ ꦄꦏꦁꦱꦸ. ꦫꦴꦗꦴ ‘‘ꦏꦺꦤꦕꦶ ꦈꦥꦴꦪꦺꦤ ꦱꦟꦶꦏꦁ ꦎꦠꦴꦫꦺꦡꦴ’’ꦠꦶ ꦮꦠ꧀ꦮꦴ ‘‘ꦢꦺꦮ, ꦪꦺꦤ ꦏꦺꦤꦕꦶ ꦈꦥꦴꦪꦺꦤ ꦤ ꦱꦏ꧀ꦏꦴ’’ꦠꦶ ꦮꦸꦠ꧀ꦠꦺ ‘‘ꦠꦺꦤ ꦲꦶ ꦩꦩ ꦈꦪ꧀ꦪꦴꦤꦺ ꦌꦏꦁ ꦫꦸꦏ꧀ꦑꦁ ꦈꦥꦣꦴꦫꦺꦡꦴ’’ꦠꦶ ꦄꦴꦲ. ꦮꦝ꧀ꦞꦏꦷ ꦈꦪ꧀ꦪꦴꦤꦁ ꦒꦤ꧀ꦠ꧀ꦮꦴ ꦌꦏꦁ ꦱꦸꦗꦴꦠꦁ ꦈꦗꦸꦏꦁ ꦒꦴꦩꦤꦶꦒꦩꦥꦹꦗꦶꦠꦁ ꦫꦴꦗꦏꦸꦭꦠꦺꦴꦥꦶ ꦭꦢ꧀ꦣꦧꦭꦶꦏꦩ꧀ꦩꦁ ꦩꦔ꧀ꦒꦭꦱꦴꦭꦫꦸꦏ꧀ꦑꦁ ꦢꦶꦱ꧀ꦮꦴ ꦫꦚ꧀ꦚꦺꦴ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦫꦴꦗꦴ ‘‘ꦈꦪ꧀ꦪꦴꦤꦺ ꦫꦸꦏ꧀ꦑꦺꦴ ꦤꦴꦩ ꦩꦩ ꦥꦛꦶꦧꦢ꧀ꦣꦺꦴ, ꦒꦕ꧀ꦖꦡ ꦨꦺꦴ ꦠꦁ ꦖꦶꦤ꧀ꦢꦡꦴ’’ꦠꦶ ꦄꦴꦲ. ꦠꦺ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦒꦤ꧀ꦣꦩꦴꦭꦴꦢꦶꦲꦠ꧀ꦡꦴ ꦈꦪ꧀ꦪꦴꦤꦁ ꦒꦤ꧀ꦠ꧀ꦮꦴ ꦫꦸꦏ꧀ꦑꦺ ꦒꦤ꧀ꦣꦥꦚ꧀ꦕꦔ꧀ꦒꦸꦭꦶꦏꦁ ꦢꦠ꧀ꦮꦴ ꦱꦸꦠ꧀ꦠꦺꦤ ꦥꦫꦶꦏ꧀ꦑꦶꦥꦶꦠ꧀ꦮꦴ ꦥꦸꦥ꧀ꦦꦏꦟ꧀ꦟꦶꦏꦁ ꦧꦤ꧀ꦣꦶꦠ꧀ꦮꦴ ꦢꦷꦥꦁ ꦗꦴꦭꦺꦠ꧀ꦮꦴ ꦧꦭꦶꦏꦩ꧀ꦩꦁ ꦏꦠ꧀ꦮꦴ ‘‘ꦆꦠꦺꦴ ꦱꦠ꧀ꦠꦩꦺ ꦢꦶꦮꦱꦺ ꦄꦴꦒꦤ꧀ꦠ꧀ꦮꦴ ꦫꦸꦏ꧀ꦑꦁ ꦖꦶꦤ꧀ꦢꦶꦱ꧀ꦱꦴꦩ, ꦫꦴꦗꦴ ꦖꦶꦤ꧀ꦢꦴꦥꦺꦠꦶ, ꦆꦩꦱ꧀ꦩꦶꦁ ꦫꦸꦏ꧀ꦑꦺ ꦤꦶꦧ꧀ꦧꦠ꧀ꦠꦢꦺꦮꦠꦴ ꦄꦚ꧀ꦚꦠ꧀ꦡ ꦒꦕ꧀ꦖꦠꦸ, ꦄꦩ꧀ꦲꦴꦏꦁ ꦢꦺꦴꦱꦺꦴ ꦤꦠ꧀ꦡꦷ’’ꦠꦶ ꦱꦴꦮꦺꦱꦸꦁ.

ꦄꦡ ꦠꦱ꧀ꦩꦶꦁ ꦤꦶꦧ꧀ꦧꦠ꧀ꦠꦺꦴ ꦢꦺꦮꦥꦸꦠ꧀ꦠꦺꦴ ꦠꦁ ꦮꦕꦤꦁ ꦱꦸꦠ꧀ꦮꦴ ‘‘ꦤꦶꦱ꧀ꦱꦁꦱꦪꦁ ꦆꦩꦺ ꦮꦝ꧀ꦞꦏꦷ ꦆꦩꦁ ꦫꦸꦏ꧀ꦑꦁ ꦖꦶꦤ꧀ꦢꦶꦱ꧀ꦱꦤ꧀ꦠꦶ, ꦮꦶꦩꦴꦤꦁ ꦩꦺ ꦤꦱ꧀ꦱꦶꦱ꧀ꦱꦠꦶ, ꦮꦶꦩꦴꦤꦥꦫꦶꦪꦤ꧀ꦠꦶꦏꦩꦺꦮ ꦑꦺꦴ ꦥꦤ ꦩꦪ꧀ꦲꦁ ꦗꦷꦮꦶꦠꦁ, ꦆꦩꦚ꧀ꦕ ꦫꦏ꧀ꦑꦁ ꦥꦫꦶꦮꦴꦫꦺꦠ꧀ꦮꦴ ꦜꦶꦠꦺꦱꦸ ꦠꦫꦸꦟꦱꦴꦭꦫꦸꦏ꧀ꦑꦺꦱꦸ ꦤꦶꦧ꧀ꦧꦠ꧀ꦠꦴꦤꦁ ꦩꦩ ꦚꦴꦠꦶꦢꦺꦮꦠꦴꦤꦩ꧀ꦥꦶ ꦧꦲꦹꦤꦶ ꦮꦶꦩꦴꦤꦴꦤꦶ ꦤꦱ꧀ꦱꦶꦱ꧀ꦱꦤ꧀ꦠꦶ. ꦮꦶꦩꦴꦤꦥꦫꦶꦪꦤ꧀ꦠꦶꦏꦩꦺꦮ ꦩꦩ ꦚꦴꦠꦷꦤꦁ ꦢꦺꦮꦠꦴꦤꦩ꧀ꦥꦶ ꦗꦷꦮꦶꦠꦁ, ꦤ ꦑꦺꦴ ꦥꦤ ꦩꦁ ꦠꦡꦴ ꦄꦠ꧀ꦠꦤꦺꦴ ꦮꦶꦤꦴꦱꦺꦴ ꦧꦴꦣꦠꦶ, ꦪꦡꦴ ꦚꦴꦠꦷꦤꦁ, ꦠꦱ꧀ꦩꦴ ꦤꦺꦱꦁ ꦩꦪꦴ ꦗꦷꦮꦶꦠꦁ ꦢꦴꦠꦸꦁ ꦮꦛ꧀ꦛꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦄꦝ꧀ꦞꦫꦠ꧀ꦠꦱꦩꦪꦺ ꦢꦶꦧ꧀ꦧꦴꦭꦔ꧀ꦏꦴꦫꦥꦛꦶꦩꦟ꧀ꦝꦶꦠꦺꦴ ꦫꦚ꧀ꦚꦺꦴ ꦱꦶꦫꦶꦒꦧ꧀ꦨꦁ ꦥꦮꦶꦱꦶꦠ꧀ꦮꦴ ꦱꦏꦭꦒꦧ꧀ꦨꦁ ꦌꦏꦺꦴꦨꦴꦱꦁ ꦏꦠ꧀ꦮꦴ ꦈꦱ꧀ꦱꦶꦱꦏꦥꦱ꧀ꦱꦺ ꦫꦺꦴꦢꦩꦴꦤꦺꦴ ꦄꦛ꧀ꦜꦴꦱꦶ. ꦫꦴꦗꦴ ꦠꦁ ꦢꦶꦱ꧀ꦮꦴ ꦨꦷꦠꦠꦱꦶꦠꦺꦴ ꦠꦺꦤ ꦱꦢ꧀ꦣꦶꦁ ꦱꦭ꧀ꦭꦥꦤ꧀ꦠꦺꦴ ꦥꦜꦩꦁ ꦒꦴꦡꦩꦴꦲ –

꧑꧓. ‘‘ꦏꦴ ꦠ꧀ꦮꦁ ꦱꦸꦢ꧀ꦣꦺꦲꦶ ꦮꦠ꧀ꦡꦺꦲꦶ, ꦄꦓꦺ ꦮꦺꦲꦴꦪꦱꦁ ꦜꦶꦠꦴ;

ꦏꦺꦤ ꦠ꧀ꦪꦴꦱ꧀ꦱꦹꦤꦶ ꦮꦠ꧀ꦠꦤ꧀ꦠꦶ, ꦏꦸꦠꦺꦴ ꦠꦁ ꦨꦪꦩꦴꦒꦠ’’ꦤ꧀ꦠꦶ.

ꦠꦠ꧀ꦡ ꦏꦴ ꦠ꧀ꦮꦤ꧀ꦠꦶ ꦤꦴꦒꦪꦏ꧀ꦑꦱꦸꦥꦟ꧀ꦟꦱꦏ꧀ꦏꦴꦢꦷꦱꦸ ꦏꦴ ꦤꦴꦩ ꦠ꧀ꦮꦤ꧀ꦠꦶ ꦥꦸꦕ꧀ꦖꦠꦶ. ꦮꦠ꧀ꦡꦺꦲꦷꦠꦶ ꦮꦕꦤꦩꦠ꧀ꦠꦩꦺꦮꦺꦠꦁ, ꦱꦧ꧀ꦧꦺꦥꦶ ꦥꦤ ꦢꦶꦧ꧀ꦧꦴꦭꦔ꧀ꦏꦴꦫꦺ ꦱꦤ꧀ꦣꦴꦪꦺꦮꦩꦴꦲ. ꦄꦓꦺꦠꦶ ꦄꦥ꧀ꦥꦛꦶꦓꦺ ꦄꦴꦏꦴꦱꦺ. ꦮꦺꦲꦴꦪꦱꦤ꧀ꦠꦶ ꦠꦱ꧀ꦱꦺꦮ ꦮꦺꦮꦕꦤꦁ. ꦏꦺꦤ ꦠ꧀ꦪꦴꦱ꧀ꦱꦹꦤꦶ ꦮꦠ꧀ꦠꦤ꧀ꦠꦷꦠꦶ ꦏꦺꦤ ꦏꦴꦫꦟꦺꦤ ꦠꦮ ꦄꦱ꧀ꦱꦹꦤꦶ ꦮꦠ꧀ꦠꦤ꧀ꦠꦶ. ꦏꦸꦠꦺꦴꦠꦶ ꦚꦴꦠꦶꦮꦶꦪꦺꦴꦒꦣꦤꦮꦶꦤꦴꦱꦴꦢꦷꦤꦁ ꦏꦶꦁ ꦤꦶꦱ꧀ꦱꦴꦪ ꦠꦁ ꦨꦪꦩꦴꦒꦠꦤ꧀ꦠꦶ ꦥꦸꦕ꧀ꦖꦠꦶ.

ꦠꦠꦺꦴ ꦢꦺꦮꦫꦴꦗꦴ ꦢ꧀ꦮꦺ ꦒꦴꦡꦴ ꦄꦨꦴꦱꦶ –

꧑꧔. ‘‘ꦠꦮꦺꦮ ꦢꦺꦮ ꦮꦶꦗꦶꦠꦺ, ꦨꦢ꧀ꦢꦱꦴꦭꦺꦴꦠꦶ ꦩꦁ ꦮꦶꦢꦹ;

ꦱꦛ꧀ꦜꦶ ꦮꦱ꧀ꦱꦱꦲꦱ꧀ꦱꦴꦤꦶ, ꦠꦶꦛ꧀ꦜꦠꦺꦴ ꦥꦹꦗꦶꦠꦱ꧀ꦱ ꦩꦺ.

꧑꧕. ‘‘ꦏꦴꦫꦪꦤ꧀ꦠꦴ ꦤꦒꦫꦴꦤꦶ, ꦄꦒꦴꦫꦺ ꦕ ꦢꦶꦱꦩ꧀ꦥꦠꦶ;

ꦮꦶꦮꦶꦣꦺ ꦕꦴꦥꦶ ꦥꦴꦱꦴꦢꦺ, ꦤ ꦩꦁ ꦠꦺ ꦄꦕ꧀ꦕꦩꦚ꧀ꦚꦶꦱꦸꦁ;

ꦪꦡꦺꦮ ꦩꦁ ꦠꦺ ꦥꦹꦗꦺꦱꦸꦁ, ꦠꦡꦺꦮ ꦠ꧀ꦮꦩ꧀ꦥꦶ ꦥꦹꦗꦪꦴ’’ꦠꦶ.

ꦠꦠ꧀ꦡ ꦠꦶꦛ꧀ꦜꦠꦺꦴꦠꦶ ꦱꦏꦭꦧꦴꦫꦴꦟꦱꦶꦤꦒꦫꦺꦲꦶ ꦕꦺꦮ ꦒꦴꦩꦤꦶꦒꦩꦺꦲꦶ ꦕ ꦠꦪꦴ ꦕ ꦥꦹꦗꦶꦠꦱ꧀ꦱ ꦤꦶꦕ꧀ꦕꦁ ꦧꦭꦶꦏꦩ꧀ꦩꦚ꧀ꦕ ꦱꦏ꧀ꦏꦴꦫꦚ꧀ꦕ ꦭꦨꦤ꧀ꦠꦱ꧀ꦱ ꦩꦪ꧀ꦲꦁ ꦆꦩꦱ꧀ꦩꦶꦁ ꦈꦪ꧀ꦪꦴꦤꦺ ꦠꦶꦛ꧀ꦜꦤ꧀ꦠꦱ꧀ꦱ ꦌꦠ꧀ꦠꦏꦺꦴ ꦏꦴꦭꦺꦴ ꦒꦠꦺꦴꦠꦶ ꦢꦱ꧀ꦱꦺꦠꦶ. ꦤꦒꦫꦴꦤꦷꦠꦶ ꦤꦒꦫꦥꦛꦶꦱꦔ꧀ꦑꦫꦟꦏꦩ꧀ꦩꦴꦤꦶ. ꦄꦒꦴꦫꦺꦕꦴꦠꦶ ꦨꦹꦩꦶꦒꦺꦲꦴꦤꦶ. ꦢꦶꦱꦩ꧀ꦥꦠꦷꦠꦶ ꦢꦶꦱꦴꦤꦁ ꦥꦠꦶ, ꦩꦲꦴꦫꦴꦗ. ꦤ ꦩꦁ ꦠꦺꦠꦶ ꦠꦺ ꦤꦒꦫꦥꦛꦶꦱꦔ꧀ꦑꦫꦟꦴꦢꦷꦤꦶ ꦏꦫꦺꦴꦤ꧀ꦠꦴ ꦆꦩꦱ꧀ꦩꦶꦁ ꦤꦒꦫꦺ ꦥꦺꦴꦫꦴꦟꦏꦫꦴꦗꦴꦤꦺꦴ ꦩꦁ ꦤꦴꦠꦶꦩꦚ꧀ꦚꦶꦱꦸꦁ ꦤꦴꦠꦶꦏ꧀ꦏꦩꦶꦁꦱꦸ ꦤ ꦮꦶꦲꦺꦜꦪꦶꦁꦱꦸ, ꦩꦩ ꦤꦶꦮꦴꦱꦫꦸꦏ꧀ꦑꦁ ꦖꦶꦤ꧀ꦢꦶꦠ꧀ꦮꦴ ꦄꦠ꧀ꦠꦤꦺꦴ ꦏꦩ꧀ꦩꦁ ꦤ ꦏꦫꦶꦁꦱꦸ, ꦩꦪ꧀ꦲꦁ ꦥꦤ ꦱꦏ꧀ꦏꦴꦫꦩꦺꦮ ꦏꦫꦶꦁꦱꦹꦠꦶ ꦄꦮꦕ. ꦪꦡꦺꦮꦴꦠꦶ ꦠꦱ꧀ꦩꦴ ꦪꦡꦺꦮ ꦠꦺ ꦥꦺꦴꦫꦴꦟꦏꦫꦴꦗꦴꦤꦺꦴ ꦩꦁ ꦥꦹꦗꦪꦶꦁꦱꦸ, ꦌꦏꦺꦴꦥꦶ ꦆꦩꦁ ꦫꦸꦏ꧀ꦑꦁ ꦤ ꦖꦶꦤ꧀ꦢꦴꦥꦺꦱꦶ, ꦠ꧀ꦮꦚ꧀ꦕꦴꦥꦶ ꦩꦁ ꦠꦡꦺꦮ ꦥꦹꦗꦪ, ꦩꦴ ꦩꦺ ꦫꦸꦏ꧀ꦑꦁ ꦖꦺꦢꦪꦷꦠꦶ.

ꦠꦠꦺꦴ ꦫꦴꦗꦴ ꦢ꧀ꦮꦺ ꦒꦴꦡꦴ ꦄꦨꦴꦱꦶ –

꧑꧖. ‘‘ꦠꦁ ꦆꦮꦴꦲꦁ ꦤ ꦥꦱ꧀ꦱꦴꦩꦶ, ꦡꦹꦭꦁ ꦏꦴꦪꦺꦤ ꦠꦺ ꦢꦸꦩꦁ;

ꦄꦴꦫꦺꦴꦲꦥꦫꦶꦟꦴꦲꦺꦤ, ꦄꦨꦶꦫꦹꦥꦺꦴꦱꦶ ꦗꦴꦠꦶꦪꦴ.

꧑꧗. ‘‘ꦥꦴꦱꦴꦢꦁ ꦏꦴꦫꦪꦶꦱ꧀ꦱꦴꦩꦶ, ꦌꦏꦠ꧀ꦡꦩ꧀ꦨꦁ ꦩꦤꦺꦴꦫꦩꦁ;

ꦠꦠ꧀ꦡ ꦠꦁ ꦈꦥꦤꦺꦱ꧀ꦱꦴꦩꦶ, ꦕꦶꦫꦁ ꦠꦺ ꦪꦏ꧀ꦑ ꦗꦷꦮꦶꦠ’’ꦤ꧀ꦠꦶ.

ꦠꦠ꧀ꦡ ꦏꦴꦪꦺꦤꦴꦠꦶ ꦥꦩꦴꦟꦺꦤ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦠꦮ ꦥꦩꦴꦟꦺꦤ ꦠꦁ ꦮꦶꦪ ꦡꦹꦭꦁ ꦩꦲꦤ꧀ꦠꦁ ꦄꦚ꧀ꦚꦁ ꦢꦸꦩꦁ ꦤ ꦥꦱ꧀ꦱꦴꦩꦶ, ꦠ꧀ꦮꦚ꧀ꦚꦺꦮ ꦥꦤ ꦄꦴꦫꦺꦴꦲꦥꦫꦶꦟꦴꦲꦺꦤ ꦱꦸꦗꦴꦠꦱꦔ꧀ꦑꦴꦠꦴꦪ ꦱꦩꦱꦟ꧀ꦜꦴꦤꦈꦗꦸꦨꦴꦮꦥ꧀ꦥꦏꦴꦫꦴꦪ ꦗꦴꦠꦶꦪꦴ ꦕ ꦄꦨꦶꦫꦹꦥꦺꦴ ꦱꦺꦴꦨꦒ꧀ꦒꦥ꧀ꦥꦠ꧀ꦠꦺꦴ ꦌꦏꦡꦩ꧀ꦨꦥꦴꦱꦴꦢꦴꦫꦲꦺꦴꦠꦶ. ꦥꦴꦱꦴꦢꦤ꧀ꦠꦶ ꦠꦱ꧀ꦩꦴ ꦠꦁ ꦖꦺꦢꦴꦥꦺꦠ꧀ꦮꦴ ꦄꦲꦁ ꦥꦴꦱꦴꦢꦁ ꦏꦴꦫꦴꦥꦺꦱ꧀ꦱꦴꦩꦺꦮ. ꦠꦠ꧀ꦡ ꦠꦤ꧀ꦠꦶ ꦠꦁ ꦥꦤꦴꦲꦁ ꦱꦩ꧀ꦩ ꦢꦺꦮꦫꦴꦗ, ꦠꦠ꧀ꦡ ꦥꦴꦱꦴꦢꦺ ꦈꦥꦤꦺꦱ꧀ꦱꦴꦩꦶ, ꦱꦺꦴ ꦠ꧀ꦮꦁ ꦩꦪꦴ ꦱꦢ꧀ꦣꦶꦁ ꦌꦏꦠꦺꦴ ꦮꦱꦤ꧀ꦠꦺꦴ ꦄꦒ꧀ꦒꦒꦤ꧀ꦣꦩꦴꦭꦴꦢꦷꦤꦶ ꦭꦨꦤ꧀ꦠꦺꦴ ꦱꦏ꧀ꦏꦴꦫꦥ꧀ꦥꦠ꧀ꦠꦺꦴ ꦱꦸꦑꦁ ꦗꦷꦮꦶꦱ꧀ꦱꦱꦶ, ꦤꦶꦮꦴꦱꦛ꧀ꦜꦴꦤꦴꦨꦴꦮꦺꦤ ꦩꦺ ꦮꦶꦤꦴꦱꦺꦴ ꦨꦮꦶꦱ꧀ꦱꦠꦷꦠꦶ ꦩꦴ ꦕꦶꦤ꧀ꦠꦪꦶ, ꦕꦶꦫꦁ ꦠꦺ ꦪꦏ꧀ꦑ ꦗꦷꦮꦶꦠꦁ ꦨꦮꦶꦱ꧀ꦱꦠꦷꦠꦶ.

ꦠꦁ ꦱꦸꦠ꧀ꦮꦴ ꦢꦺꦮꦫꦴꦗꦴ ꦢ꧀ꦮꦺ ꦒꦴꦡꦴ ꦄꦨꦴꦱꦶ –

꧑꧘. ‘‘ꦌꦮꦁ ꦕꦶꦠ꧀ꦠꦁ ꦈꦢꦥꦴꦢꦶ, ꦱꦫꦷꦫꦺꦤ ꦮꦶꦤꦴꦨꦴꦮꦺꦴ;

ꦥꦸꦡꦸꦱꦺꦴ ꦩꦁ ꦮꦶꦏꦤ꧀ꦠꦶꦠ꧀ꦮꦴ, ꦑꦟ꧀ꦝꦱꦺꦴ ꦄꦮꦏꦤ꧀ꦠꦡ.

꧑꧙. ‘‘ꦄꦒ꧀ꦒꦺ ꦕ ꦖꦺꦠ꧀ꦮꦴ ꦩꦗ꧀ꦙꦺ ꦕ, ꦥꦕ꧀ꦖꦴ ꦩꦹꦭꦩ꧀ꦲꦶ ꦖꦶꦤ꧀ꦢꦡ;

ꦌꦮꦁ ꦩꦺ ꦖꦶꦗ꧀ꦗꦩꦴꦤꦱ꧀ꦱ, ꦤ ꦢꦸꦏ꧀ꦑꦁ ꦩꦫꦟꦁ ꦱꦶꦪꦴ’’ꦠꦶ.

ꦠꦠ꧀ꦡ ꦌꦮꦁ ꦕꦶꦠ꧀ꦠꦁ ꦈꦢꦥꦴꦢꦷꦠꦶ ꦪꦢꦶ ꦌꦮꦁ ꦕꦶꦠ꧀ꦠꦁ ꦠꦮ ꦈꦥ꧀ꦥꦤ꧀ꦤꦁ. ꦱꦫꦷꦫꦺꦤ ꦮꦶꦤꦴꦨꦴꦮꦺꦴꦠꦶ ꦪꦢꦶ ꦠꦺ ꦩꦩ ꦱꦫꦷꦫꦺꦤ ꦨꦢ꧀ꦢꦱꦴꦭꦫꦸꦏ꧀ꦑꦺꦤ ꦱꦢ꧀ꦣꦶꦁ ꦩꦩ ꦮꦶꦤꦴꦨꦴꦮꦺꦴ ꦥꦠ꧀ꦡꦶꦠꦺꦴ. ꦥꦸꦡꦸꦱꦺꦴꦠꦶ ꦧꦲꦸꦣꦴ. ꦮꦶꦏꦤ꧀ꦠꦶꦠ꧀ꦮꦴꦠꦶ ꦖꦶꦤ꧀ꦢꦶꦠ꧀ꦮꦴ. ꦑꦟ꧀ꦝꦱꦺꦴꦠꦶ ꦑꦟ꧀ꦝꦴꦑꦟ꧀ꦝꦁ ꦏꦠ꧀ꦮꦴ ꦄꦮꦏꦤ꧀ꦠꦡ. ꦄꦒ꧀ꦒꦺ ꦕꦴꦠꦶ ꦄꦮꦏꦤ꧀ꦠꦤ꧀ꦠꦴ ꦥꦤ ꦥꦜꦩꦁ ꦄꦒ꧀ꦒꦺ, ꦠꦠꦺꦴ ꦩꦗ꧀ꦙꦺ ꦖꦺꦠ꧀ꦮꦴ ꦱꦧ꧀ꦧꦥꦕ꧀ꦖꦴ ꦩꦹꦭꦺ ꦖꦶꦤ꧀ꦢꦡ. ꦌꦮꦚ꧀ꦲꦶ ꦩꦺ ꦖꦶꦗ꧀ꦗꦩꦴꦤꦱ꧀ꦱ ꦤ ꦢꦸꦏ꧀ꦑꦁ ꦩꦫꦟꦁ ꦱꦶꦪꦴ, ꦱꦸꦑꦁ ꦤꦸ ꦑꦟ꧀ꦝꦱꦺꦴ ꦨꦮꦺꦪ꧀ꦪꦴꦠꦶ ꦪꦴꦕꦠꦶ.

ꦠꦠꦺꦴ ꦫꦴꦗꦴ ꦢ꧀ꦮꦺ ꦒꦴꦡꦴ ꦄꦨꦴꦱꦶ –

꧒꧐. ‘‘ꦲꦠ꧀ꦡꦥꦴꦢꦁ ꦪꦡꦴ ꦖꦶꦤ꧀ꦢꦺ, ꦏꦟ꧀ꦟꦤꦴꦱꦚ꧀ꦕ ꦗꦷꦮꦠꦺꦴ;

ꦠꦠꦺꦴ ꦥꦕ꧀ꦖꦴ ꦱꦶꦫꦺꦴ ꦖꦶꦤ꧀ꦢꦺ, ꦠꦁ ꦢꦸꦏ꧀ꦑꦁ ꦩꦫꦟꦁ ꦱꦶꦪꦴ.

꧒꧑. ‘‘ꦱꦸꦑꦁ ꦤꦸ ꦑꦟ꧀ꦝꦱꦺꦴ ꦖꦶꦤ꧀ꦤꦁ, ꦨꦢ꧀ꦢꦱꦴꦭ ꦮꦤꦥ꧀ꦥꦠꦶ;

ꦏꦶꦁꦲꦺꦠꦸ ꦏꦶꦁ ꦈꦥꦴꦢꦴꦪ, ꦑꦟ꧀ꦝꦱꦺꦴ ꦖꦶꦤ꧀ꦤꦩꦶꦕ꧀ꦖꦱꦷ’’ꦠꦶ.

ꦠꦠ꧀ꦡ ꦲꦠ꧀ꦡꦥꦴꦢꦤ꧀ꦠꦶ ꦲꦠ꧀ꦡꦺ ꦕ ꦥꦴꦢꦺ ꦕ. ꦠꦁ ꦢꦸꦏ꧀ꦑꦤ꧀ꦠꦶ ꦌꦮꦁ ꦥꦛꦶꦥꦴꦛꦶꦪꦴ ꦖꦶꦗ꧀ꦗꦤ꧀ꦠꦱ꧀ꦱ ꦕꦺꦴꦫꦱ꧀ꦱ ꦠꦁ ꦩꦫꦟꦁ ꦢꦸꦏ꧀ꦑꦁ ꦱꦶꦪꦴ. ꦱꦸꦑꦁ ꦤꦹꦠꦶ ꦱꦩ꧀ꦩ ꦨꦢ꧀ꦢꦱꦴꦭ, ꦮꦗ꧀ꦙꦥ꧀ꦥꦠ꧀ꦠꦴ ꦕꦺꦴꦫꦴ ꦱꦸꦑꦺꦤ ꦩꦫꦶꦠꦸꦏꦴꦩꦴ ꦱꦷꦱꦕ꧀ꦖꦺꦢꦁ ꦪꦴꦕꦤ꧀ꦠꦶ, ꦤ ꦑꦟ꧀ꦝꦱꦺꦴ ꦖꦺꦢꦤꦁ, ꦠ꧀ꦮꦁ ꦥꦤ ꦌꦮꦁ ꦪꦴꦕꦱꦶ, ꦠꦺꦤ ꦠꦁ ꦥꦸꦕ꧀ꦖꦴꦩꦶ ‘‘ꦱꦸꦑꦁ ꦤꦸ ꦑꦟ꧀ꦝꦱꦺꦴ ꦖꦶꦤ꧀ꦤ’’ꦤ꧀ꦠꦶ. ꦏꦶꦁꦲꦺꦠꦹꦠꦶ ꦑꦟ꧀ꦝꦱꦺꦴ ꦖꦶꦤ꧀ꦤꦁ ꦤꦴꦩ ꦤ ꦱꦸꦑꦁ, ꦏꦴꦫꦟꦺꦤ ꦥꦤꦺꦠ꧀ꦡ ꦨꦮꦶꦠꦧ꧀ꦧꦤ꧀ꦠꦶ ꦠꦁ ꦥꦸꦕ꧀ꦖꦤ꧀ꦠꦺꦴ ꦌꦮꦩꦴꦲ.

ꦄꦡꦱ꧀ꦱ ꦄꦴꦕꦶꦏ꧀ꦑꦤ꧀ꦠꦺꦴ ꦨꦢ꧀ꦢꦱꦴꦭꦺꦴ ꦢ꧀ꦮꦺ ꦒꦴꦡꦴ ꦄꦨꦴꦱꦶ –

꧒꧒. ‘‘ꦪꦚ꧀ꦕ ꦲꦺꦠꦸꦩꦸꦥꦴꦢꦴꦪ, ꦲꦺꦠꦸꦁ ꦣꦩ꧀ꦩꦹꦥꦱꦁꦲꦶꦠꦁ;

ꦑꦟ꧀ꦝꦱꦺꦴ ꦖꦶꦤ꧀ꦤꦩꦶꦕ꧀ꦖꦴꦩꦶ, ꦩꦲꦴꦫꦴꦗ ꦱꦸꦟꦺꦴꦲꦶ ꦩꦺ.

꧒꧓. ‘‘ꦚꦴꦠꦷ ꦩꦺ ꦱꦸꦑꦱꦁꦮꦢ꧀ꦣꦴ, ꦩꦩ ꦥꦱ꧀ꦱꦺ ꦤꦶꦮꦴꦠꦗꦴ;

ꦠꦺꦥꦶꦲꦁ ꦈꦥꦲꦶꦁꦱꦺꦪ꧀ꦪ, ꦥꦫꦺꦱꦁ ꦄꦱꦸꦑꦺꦴꦕꦶꦠ’’ꦤ꧀ꦠꦶ.

ꦠꦠ꧀ꦡ ꦲꦺꦠꦸꦁ ꦣꦩ꧀ꦩꦹꦥꦱꦁꦲꦶꦠꦤ꧀ꦠꦶ ꦩꦲꦴꦫꦴꦗ, ꦪꦁ ꦲꦺꦠꦸꦱꦨꦴꦮꦪꦸꦠ꧀ꦠꦩꦺꦮ, ꦤ ꦲꦺꦠꦸꦥꦠꦶꦫꦹꦥꦏꦁ, ꦲꦺꦠꦸꦁ ꦈꦥꦴꦢꦴꦪ ꦄꦴꦫꦧ꧀ꦨ ꦱꦤ꧀ꦣꦴꦪꦴꦲꦁ ꦑꦟ꧀ꦝꦱꦺꦴ ꦖꦶꦤ꧀ꦤꦩꦶꦕ꧀ꦖꦴꦩꦶ, ꦠꦁ ꦎꦲꦶꦠꦱꦺꦴꦠꦺꦴ ꦱꦸꦟꦺꦴꦲꦷꦠꦶ ꦄꦠ꧀ꦡꦺꦴ. ꦚꦴꦠꦷ ꦩꦺꦠꦶ ꦩꦩ ꦨꦢ꧀ꦢꦱꦴꦭꦫꦸꦏ꧀ꦑꦱ꧀ꦱ ꦖꦴꦪꦴꦪ ꦱꦸꦑꦱꦁꦮꦢ꧀ꦣꦴ ꦩꦩ ꦥꦱ꧀ꦱꦺ ꦠꦫꦸꦟꦱꦴꦭꦫꦸꦏ꧀ꦑꦺꦱꦸ ꦤꦶꦧ꧀ꦧꦠ꧀ꦠꦴ ꦩꦪꦴ ꦏꦠꦮꦴꦠꦥꦫꦶꦠ꧀ꦠꦴꦟꦠ꧀ꦠꦴ ꦤꦶꦮꦴꦠꦗꦴ ꦩꦩ ꦚꦴꦠꦏꦴ ꦢꦺꦮꦱꦔ꧀ꦓꦴ ꦄꦠ꧀ꦡꦶ, ꦠꦺ ꦄꦲꦁ ꦮꦶꦱꦴꦭꦱꦴꦑꦮꦶꦛꦥꦺꦴ ꦩꦹꦭꦺ ꦖꦶꦤ꧀ꦢꦶꦠ꧀ꦮꦴ ꦥꦠꦤ꧀ꦠꦺꦴ ꦈꦥꦲꦶꦁꦱꦺꦪ꧀ꦪꦁ, ꦱꦁꦨꦒ꧀ꦒꦮꦶꦩꦴꦤꦺ ꦏꦫꦺꦴꦤ꧀ꦠꦺꦴ ꦮꦶꦤꦴꦱꦺꦪ꧀ꦪꦤ꧀ꦠꦶ ꦄꦠ꧀ꦡꦺꦴ. ꦥꦫꦺꦱꦁ ꦄꦱꦸꦑꦺꦴꦕꦶꦠꦤ꧀ꦠꦶ ꦌꦮꦁ ꦱꦤ꧀ꦠꦺ ꦩꦪꦴ ꦠꦺꦱꦁ ꦥꦫꦺꦱꦁ ꦚꦴꦠꦶꦢꦺꦮꦱꦔ꧀ꦓꦴꦤꦁ ꦄꦱꦸꦑꦁ ꦢꦸꦏ꧀ꦑꦁ ꦎꦕꦶꦠꦁ ꦮꦝ꧀ꦞꦶꦠꦁ, ꦤ ꦕꦴꦲꦁ ꦠꦺꦱꦁ ꦢꦸꦏ꧀ꦑꦏꦴꦩꦺꦴ, ꦠꦱ꧀ꦩꦴ ꦨꦢ꧀ꦢꦱꦴꦭꦁ ꦑꦟ꧀ꦝꦱꦺꦴ ꦑꦟ꧀ꦝꦱꦺꦴ ꦖꦶꦤ꧀ꦢꦴꦥꦺꦩꦷꦠꦶ ꦄꦪꦩꦺꦠ꧀ꦡꦴꦣꦶꦥ꧀ꦥꦴꦪꦺꦴ.

ꦠꦁ ꦱꦸꦠ꧀ꦮꦴ ꦫꦴꦗꦴ ‘‘ꦣꦩ꧀ꦩꦶꦏꦺꦴ ꦮꦠꦴꦪꦁ, ꦢꦺꦮꦥꦸꦠ꧀ꦠꦺꦴ, ꦄꦠ꧀ꦠꦤꦺꦴ ꦮꦶꦩꦴꦤꦮꦶꦤꦴꦱꦠꦺꦴꦥꦶ ꦚꦴꦠꦷꦤꦁ ꦮꦶꦩꦴꦤꦮꦶꦤꦴꦱꦁ ꦤ ꦆꦕ꧀ꦖꦠꦶ, ꦚꦴꦠꦷꦤꦁ ꦄꦠ꧀ꦡꦕꦫꦶꦪꦁ ꦕꦫꦠꦶ, ꦄꦨꦪꦩꦱ꧀ꦱ ꦢꦱ꧀ꦱꦴꦩꦷ’’ꦠꦶ ꦠꦸꦱ꧀ꦱꦶꦠ꧀ꦮꦴ ꦎꦱꦴꦤꦒꦴꦡꦩꦴꦲ –

꧒꧔. ‘‘ꦕꦺꦠꦺꦪ꧀ꦪꦫꦹꦥꦁ ꦕꦺꦠꦺꦱꦶ, ꦨꦢ꧀ꦢꦱꦴꦭ ꦮꦤꦥ꧀ꦥꦠꦶ;

ꦲꦶꦠꦏꦴꦩꦺꦴꦱꦶ ꦚꦴꦠꦷꦤꦁ, ꦄꦨꦪꦁ ꦱꦩ꧀ꦩ ꦢꦩ꧀ꦩꦶ ꦠꦺ’’ꦠꦶ.

ꦠꦠ꧀ꦡ ꦕꦺꦠꦺꦪ꧀ꦪꦫꦹꦥꦁ ꦕꦺꦠꦺꦱꦷꦠꦶ ꦚꦴꦠꦷꦱꦸ ꦩꦸꦢꦸꦕꦶꦠ꧀ꦠꦠꦴꦪ ꦕꦶꦤ꧀ꦠꦺꦤ꧀ꦠꦺꦴ ꦕꦶꦤ꧀ꦠꦺꦠꦧ꧀ꦧꦪꦸꦠ꧀ꦠꦏꦩꦺꦮ ꦕꦶꦤ꧀ꦠꦺꦱꦶ. ꦖꦺꦢꦺꦪ꧀ꦪꦫꦹꦥꦁ ꦖꦺꦢꦺꦱꦷꦠꦶꦥꦶ ꦥꦴꦜꦺꦴ. ꦠꦱ꧀ꦱꦠ꧀ꦡꦺꦴ – ꦑꦟ꧀ꦝꦱꦺꦴ ꦖꦶꦤ꧀ꦤꦩꦶꦕ꧀ꦖꦤ꧀ꦠꦺꦴ ꦖꦺꦢꦺꦠꦧ꧀ꦧꦪꦸꦠ꧀ꦠꦏꦩꦺꦮ ꦖꦺꦢꦺꦱꦷꦠꦶ. ꦄꦨꦪꦤ꧀ꦠꦶ ꦌꦠꦱ꧀ꦩꦶꦁ ꦠꦺ ꦱꦩ꧀ꦩ, ꦒꦸꦟꦺ ꦥꦱꦷꦢꦶꦠ꧀ꦮꦴ ꦄꦨꦪꦁ ꦢꦢꦴꦩꦶ, ꦤ ꦩꦺ ꦥꦴꦱꦴꦢꦺꦤꦠ꧀ꦡꦺꦴ, ꦤꦴꦲꦁ ꦠꦁ ꦖꦺꦢꦴꦥꦺꦱ꧀ꦱꦴꦩꦶ, ꦒꦕ꧀ꦖ ꦚꦴꦠꦶꦱꦔ꧀ꦓꦥꦫꦶꦮꦸꦠꦺꦴ ꦱꦏ꧀ꦏꦠꦒꦫꦸꦏꦠꦺꦴ ꦱꦸꦑꦁ ꦗꦷꦮꦴꦠꦶ ꦄꦴꦲ.

ꦢꦺꦮꦫꦴꦗꦴ ꦫꦚ꧀ꦚꦺꦴ ꦣꦩ꧀ꦩꦁ ꦢꦺꦱꦺꦠ꧀ꦮꦴ ꦄꦒꦩꦴꦱꦶ. ꦫꦴꦗꦴ ꦠꦱ꧀ꦱꦺꦴꦮꦴꦢꦺ ꦜꦠ꧀ꦮꦴ ꦢꦴꦤꦴꦢꦷꦤꦶ ꦥꦸꦚ꧀ꦚꦴꦤꦶ ꦏꦠ꧀ꦮꦴ ꦱꦒ꧀ꦒꦥꦸꦫꦁ ꦥꦹꦫꦺꦱꦶ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ‘‘ꦌꦮꦁ, ꦨꦶꦏ꧀ꦑꦮꦺ, ꦥꦸꦧ꧀ꦧꦺꦥꦶ ꦠꦡꦴꦒꦠꦺꦴ ꦚꦴꦠꦠ꧀ꦡꦕꦫꦶꦪꦁ ꦄꦕꦫꦶꦪꦺꦮꦴ’’ꦠꦶ ꦮꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ – ‘‘ꦠꦢꦴ ꦫꦴꦗꦴ ꦄꦴꦤꦤ꧀ꦢꦺꦴ ꦄꦲꦺꦴꦱꦶ, ꦠꦫꦸꦟꦱꦴꦭꦺꦱꦸ ꦤꦶꦧ꧀ꦧꦠ꧀ꦠꦢꦺꦮꦠꦴ ꦧꦸꦢ꧀ꦣꦥꦫꦶꦱꦴ, ꦨꦢ꧀ꦢꦱꦴꦭꦢꦺꦮꦫꦴꦗꦴ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦨꦢ꧀ꦢꦱꦴꦭꦗꦴꦠꦏꦮꦟ꧀ꦟꦤꦴ ꦢꦸꦠꦶꦪꦴ.

[꧔꧖꧖] ꧓. ꦱꦩꦸꦢ꧀ꦢꦮꦴꦟꦶꦗꦗꦴꦠꦏꦮꦟ꧀ꦟꦤꦴ

ꦏꦱꦤ꧀ꦠꦶ ꦮꦥꦤ꧀ꦠꦶ ꦠꦺ ꦗꦤꦴꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦢꦺꦮꦢꦠ꧀ꦠꦱ꧀ꦱ ꦥꦚ꧀ꦕ ꦏꦸꦭꦱꦠꦴꦤꦶ ꦒꦲꦺꦠ꧀ꦮꦴ ꦤꦶꦫꦪꦺ ꦥꦠꦶꦠꦨꦴꦮꦁ ꦄꦴꦫꦧ꧀ꦨ ꦏꦡꦺꦱꦶ. ꦱꦺꦴ ꦲꦶ ꦄꦒ꧀ꦒꦱꦴꦮꦏꦺꦱꦸ ꦥꦫꦶꦱꦁ ꦒꦲꦺꦠ꧀ꦮꦴ ꦥꦏ꧀ꦏꦤ꧀ꦠꦺꦱꦸ ꦱꦺꦴꦏꦁ ꦱꦤ꧀ꦣꦴꦫꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦈꦟ꧀ꦲꦭꦺꦴꦲꦶꦠꦺ ꦩꦸꦑꦠꦺꦴ ꦤꦶꦏ꧀ꦑꦤ꧀ꦠꦺ ꦧꦭꦮꦮꦺꦢꦤꦴꦥꦷꦭ꦳ꦶꦠꦺꦴ ꦠꦡꦴꦒꦠꦱ꧀ꦱ ꦒꦸꦟꦁ ꦄꦤꦸꦱ꧀ꦱꦫꦶꦠ꧀ꦮꦴ ‘‘ꦄꦲꦩꦺꦮ ꦤꦮ ꦩꦴꦱꦺ ꦠꦡꦴꦒꦠꦱ꧀ꦱ ꦄꦤꦠ꧀ꦡꦁ ꦕꦶꦤ꧀ꦠꦺꦱꦶꦁ, ꦱꦠ꧀ꦡꦸ ꦥꦤ ꦩꦪꦶ ꦥꦴꦥꦕꦶꦠ꧀ꦠꦁ ꦤꦴꦩ ꦤꦠ꧀ꦡꦶ, ꦄꦱꦷꦠꦶꦩꦲꦴꦡꦺꦫꦴꦤꦩ꧀ꦥꦶ ꦩꦪꦶ ꦄꦴꦓꦴꦠꦺꦴ ꦤꦴꦩ ꦤꦠ꧀ꦡꦶ, ꦩꦪꦴ ꦏꦠꦏꦩ꧀ꦩꦺꦤ ꦄꦲꦩꦺꦮ ꦆꦢꦴꦤꦶ ꦄꦤꦴꦡꦺꦴ ꦗꦴꦠꦺꦴ, ꦱꦠ꧀ꦡꦴꦫꦴꦥꦶꦩ꧀ꦲꦶ ꦮꦶꦱ꧀ꦱꦛ꧀ꦜꦺꦴ ꦩꦲꦴꦡꦺꦫꦺꦲꦶꦥꦶ ꦚꦴꦠꦶꦱꦺꦛ꧀ꦜꦺꦤ ꦫꦴꦲꦸꦭꦠ꧀ꦡꦺꦫꦺꦤꦥꦶ ꦱꦏ꧀ꦪꦫꦴꦗꦏꦸꦭꦺꦲꦶꦥꦶ, ꦒꦤ꧀ꦠ꧀ꦮꦴ ꦱꦠ꧀ꦡꦴꦫꦁ ꦑꦩꦴꦥꦺꦱ꧀ꦱꦴꦩꦷ’’ꦠꦶ ꦥꦫꦶꦱꦴꦪ ꦱꦚ꧀ꦚꦁ ꦢꦠ꧀ꦮꦴ ꦄꦠ꧀ꦠꦴꦤꦁ ꦥꦚ꧀ꦕꦏꦺꦤ ꦒꦴꦲꦴꦥꦺꦠ꧀ꦮꦴ ꦫꦠ꧀ꦠꦶꦁ ꦫꦠ꧀ꦠꦶꦁ ꦒꦕ꧀ꦖꦤ꧀ꦠꦺꦴ ꦏꦺꦴꦱꦭꦫꦛ꧀ꦜꦁ ꦱꦩ꧀ꦥꦴꦥꦸꦟꦶ. ꦄꦴꦤꦤ꧀ꦢꦠ꧀ꦡꦺꦫꦺꦴ ꦱꦠ꧀ꦡꦸ ꦄꦴꦫꦺꦴꦕꦺꦱꦶ ‘‘ꦢꦺꦮꦢꦠ꧀ꦠꦺꦴ ꦏꦶꦫ, ꦨꦤ꧀ꦠꦺ, ꦠꦸꦩ꧀ꦲꦴꦏꦁ ꦑꦩꦴꦥꦺꦠꦸꦁ ꦄꦴꦒꦕ꧀ꦖꦠꦷ’’ꦠꦶ. ‘‘ꦄꦴꦤꦤ꧀ꦢ, ꦢꦺꦮꦢꦠ꧀ꦠꦺꦴ ꦩꦩ ꦢꦱ꧀ꦱꦤꦁ ꦤ ꦭꦨꦶꦱ꧀ꦱꦠꦷ’’ꦠꦶ.

ꦄꦡ ꦠꦱ꧀ꦩꦶꦁ ꦱꦴꦮꦠ꧀ꦡꦶꦤꦒꦫꦢ꧀ꦮꦴꦫꦁ ꦱꦩ꧀ꦥꦠ꧀ꦠꦺ ꦥꦸꦤ ꦡꦺꦫꦺꦴ ꦄꦴꦫꦺꦴꦕꦺꦱꦶ, ꦨꦒꦮꦴꦥꦶ ꦠꦡꦺꦮ ꦄꦮꦕ. ꦠꦱ꧀ꦱ ꦗꦺꦠꦮꦤꦺ ꦥꦺꦴꦏ꧀ꦑꦫꦟꦶꦪꦴ ꦱꦩꦷꦥꦁ ꦄꦴꦒꦠꦱ꧀ꦱ ꦥꦴꦥꦁ ꦩꦠ꧀ꦡꦏꦁ ꦥꦴꦥꦸꦟꦶ, ꦱꦫꦷꦫꦺ ꦝꦴꦲꦺꦴ ꦈꦥ꧀ꦥꦗ꧀ꦗꦶ, ꦤ꧀ꦲꦠ꧀ꦮꦴ ꦥꦴꦤꦷꦪꦁ ꦥꦶꦮꦶꦠꦸꦏꦴꦩꦺꦴ ꦲꦸꦠ꧀ꦮꦴ ‘‘ꦩꦚ꧀ꦕꦏꦠꦺꦴ ꦩꦁ ꦄꦴꦮꦸꦱꦺꦴ ꦎꦠꦴꦫꦺꦡ, ꦥꦴꦤꦷꦪꦁ ꦥꦶꦮꦶꦱ꧀ꦱꦴꦩꦷ’’ꦠꦶ ꦄꦴꦲ. ꦠꦱ꧀ꦱ ꦎꦠꦴꦫꦺꦠ꧀ꦮꦴ ꦨꦹꦩꦶꦪꦁ ꦜꦥꦶꦠꦩꦠ꧀ꦠꦱ꧀ꦱ ꦕꦶꦠ꧀ꦠꦱ꧀ꦱꦴꦢꦺ ꦄꦭꦢ꧀ꦣꦺꦪꦺꦮ ꦩꦲꦴꦥꦡꦮꦷ ꦮꦶꦮꦫꦩꦢꦴꦱꦶ. ꦠꦴꦮꦢꦺꦮ ꦠꦁ ꦄꦮꦷꦕꦶꦠꦺꦴ ꦄꦒ꧀ꦒꦶꦗꦴꦭꦴ ꦈꦛ꧀ꦜꦴꦪ ꦥꦫꦶꦏ꧀ꦑꦶꦥꦶꦠ꧀ꦮꦴ ꦒꦟ꧀ꦲꦶ. ꦱꦺꦴ ‘‘ꦥꦴꦥꦏꦩ꧀ꦩꦁ ꦩꦺ ꦩꦠ꧀ꦡꦏꦁ ꦥꦠ꧀ꦠ’’ꦤ꧀ꦠꦶ ꦠꦡꦴꦒꦠꦱ꧀ꦱ ꦒꦸꦟꦺ ꦄꦤꦸꦱ꧀ꦱꦫꦶꦠ꧀ꦮꦴ –

‘‘ꦆꦩꦺꦲꦶ ꦄꦛ꧀ꦜꦷꦲꦶ ꦠꦩꦒ꧀ꦒꦥꦸꦒ꧀ꦒꦭꦁ, ꦢꦺꦮꦴꦠꦶꦢꦺꦮꦁ ꦤꦫꦢꦩ꧀ꦩꦱꦴꦫꦡꦶꦁ;

ꦱꦩꦤ꧀ꦠꦕꦏ꧀ꦑꦸꦁ ꦱꦠꦥꦸꦚ꧀ꦚꦭꦏ꧀ꦑꦟꦁ, ꦥꦴꦟꦺꦲꦶ ꦧꦸꦢ꧀ꦣꦁ ꦱꦫꦟꦁ ꦈꦥꦺꦩꦷ’’ꦠꦶ. (ꦩꦶ. ꦥ. ꧔.꧑.꧓) –

ꦆꦩꦴꦪ ꦒꦴꦡꦴꦪ ꦱꦫꦟꦺ ꦥꦠꦶꦛ꧀ꦜꦲꦤ꧀ꦠꦺꦴ ꦄꦮꦷꦕꦶꦥꦫꦴꦪꦟꦺꦴ ꦄꦲꦺꦴꦱꦶ. ꦠꦱ꧀ꦱ ꦥꦤ ꦥꦚ꧀ꦕ ꦈꦥꦛ꧀ꦜꦴꦏꦏꦸꦭꦱꦠꦴꦤꦶ ꦄꦲꦺꦱꦸꦁ. ꦠꦴꦤꦶꦥꦶ ꦠꦥ꧀ꦥꦏ꧀ꦑꦶꦏꦴꦤꦶ ꦲꦸꦠ꧀ꦮꦴ ꦢꦱꦧꦭꦁ ꦄꦏ꧀ꦏꦺꦴꦱꦶꦠ꧀ꦮꦴ ꦄꦮꦷꦕꦶꦩ꧀ꦲꦶꦪꦺꦮ ꦤꦶꦧ꧀ꦧꦠ꧀ꦠꦶꦁꦱꦸ. ꦌꦮꦁ ꦱꦺꦴ ꦠꦴꦤꦶ ꦥꦚ꧀ꦕ ꦏꦸꦭꦱꦠꦴꦤꦶ ꦒꦟ꧀ꦲꦶꦠ꧀ꦮꦴ ꦄꦮꦷꦕꦶꦩ꧀ꦲꦶ ꦥꦠꦶꦛ꧀ꦜꦶꦠꦺꦴ.

ꦄꦡꦺꦏꦢꦶꦮꦱꦁ ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ ‘‘ꦄꦴꦮꦸꦱꦺꦴ, ꦢꦺꦮꦢꦠ꧀ꦠꦺꦴ ꦥꦴꦥꦺꦴ ꦭꦴꦨꦱꦏ꧀ꦏꦴꦫꦒꦶꦢ꧀ꦣꦠꦴꦪ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺ ꦄꦛ꧀ꦜꦴꦤꦺ ꦏꦺꦴꦥꦁ ꦧꦤ꧀ꦣꦶꦠ꧀ꦮꦴ ꦄꦤꦴꦒꦠꦨꦪꦩꦤꦺꦴꦭꦺꦴꦏꦺꦠ꧀ꦮꦴ ꦥꦚ꧀ꦕꦲꦶ ꦏꦸꦭꦱꦠꦺꦲꦶ ꦱꦢ꧀ꦣꦶꦁ ꦄꦮꦷꦕꦶꦥꦫꦴꦪꦟꦺꦴ ꦗꦴꦠꦺꦴ’’ꦠꦶ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ ‘‘ꦤ ꦨꦶꦏ꧀ꦑꦮꦺ, ꦆꦢꦴꦤꦺꦮ ꦢꦺꦮꦢꦠ꧀ꦠꦺꦴ ꦭꦴꦨꦱꦏ꧀ꦏꦴꦫꦒꦶꦢ꧀ꦣꦺꦴ ꦲꦸꦠ꧀ꦮꦴ ꦄꦤꦴꦒꦠꦨꦪꦁ ꦤ ꦎꦭꦺꦴꦏꦺꦱꦶ, ꦥꦸꦧ꧀ꦧꦺꦥꦶ ꦄꦤꦴꦒꦠꦨꦪꦁ ꦄꦤꦺꦴꦭꦺꦴꦏꦺꦠ꧀ꦮꦴ ꦥꦕ꧀ꦕꦸꦥ꧀ꦥꦤ꧀ꦤꦱꦸꦑꦒꦶꦢ꧀ꦣꦺꦤ ꦱꦢ꧀ꦣꦶꦁ ꦥꦫꦶꦱꦴꦪ ꦩꦲꦴꦮꦶꦤꦴꦱꦁ ꦥꦠ꧀ꦠꦺꦴ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦧꦴꦫꦴꦟꦱꦶꦠꦺꦴ ꦄꦮꦶꦢꦹꦫꦺ ꦏꦸꦭꦱꦲꦱ꧀ꦱꦤꦶꦮꦴꦱꦺꦴ ꦩꦲꦴꦮꦝ꧀ꦞꦏꦷꦒꦴꦩꦺꦴ ꦄꦲꦺꦴꦱꦶ. ꦠꦠ꧀ꦡ ꦮꦝ꧀ꦞꦏꦷ ‘‘ꦠꦸꦩ꧀ꦲꦴꦏꦁ ꦩꦚ꧀ꦕꦁ ꦏꦫꦶꦱ꧀ꦱꦴꦩ, ꦥꦷꦜꦁ ꦏꦫꦶꦱ꧀ꦱꦴꦩ, ꦒꦺꦲꦁ ꦏꦫꦶꦱ꧀ꦱꦴꦩꦴ’’ꦠꦶ ꦮꦠ꧀ꦮꦴ ꦩꦤꦸꦱ꧀ꦱꦴꦤꦁ ꦲꦠ꧀ꦡꦠꦺꦴ ꦧꦲꦸꦁ ꦆꦟꦁ ꦒꦲꦺꦠ꧀ꦮꦴ ꦏꦶꦚ꧀ꦕꦶ ꦏꦴꦠꦸꦁ ꦤ ꦱꦏ꧀ꦑꦶꦁꦱꦸ. ꦩꦤꦸꦱ꧀ꦱꦴ ꦢꦶꦛ꧀ꦜꦢꦶꦛ꧀ꦜꦺ ꦮꦝ꧀ꦞꦏꦷ ꦕꦺꦴꦢꦺꦤ꧀ꦠꦶ ꦥꦭꦶꦧꦸꦢ꧀ꦣꦤ꧀ꦠꦶ. ꦠꦺ ꦆꦟꦴꦪꦶꦏꦺꦲꦶ ꦈꦥꦢ꧀ꦢꦸꦠꦴ ꦱꦸꦑꦁ ꦮꦱꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦴ ‘‘ꦮꦶꦢꦺꦱꦁ ꦒꦤ꧀ꦠ꧀ꦮꦴ ꦪꦠ꧀ꦡ ꦏꦠ꧀ꦡꦕꦶ ꦮꦱꦶꦱ꧀ꦱꦴꦩꦴ’’ꦠꦶ ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ ꦫꦸꦏ꧀ꦑꦺ ꦖꦶꦤ꧀ꦢꦶꦠ꧀ꦮꦴ ꦩꦲꦠꦶꦁ ꦤꦴꦮꦁ ꦧꦤ꧀ꦣꦶꦠ꧀ꦮꦴ ꦤꦢꦶꦁ ꦎꦠꦴꦫꦺꦠ꧀ꦮꦴ ꦄꦴꦲꦫꦶꦠ꧀ꦮꦴ ꦒꦴꦩꦠꦺꦴ ꦒꦴꦮꦸꦠꦝ꧀ꦞꦪꦺꦴꦗꦤꦩꦠ꧀ꦠꦺ ꦜꦴꦤꦺ ꦜꦥꦺꦠ꧀ꦮꦴ ꦄꦝ꧀ꦞꦫꦠ꧀ꦠꦱꦩꦪꦺ ꦒꦴꦩꦁ ꦄꦴꦒꦤ꧀ꦠ꧀ꦮꦴ ꦥꦸꦠ꧀ꦠꦢꦴꦫꦩꦴꦢꦴꦪ ꦤꦴꦮꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦤꦴꦮꦁ ꦄꦴꦫꦸꦪ꧀ꦲ ꦄꦤꦸꦏ꧀ꦏꦩꦺꦤ ꦩꦲꦴꦱꦩꦸꦢ꧀ꦢꦁ ꦥꦮꦶꦱꦶꦠ꧀ꦮꦴ ꦮꦴꦠꦮꦺꦒꦺꦤ ꦮꦶꦕꦫꦤ꧀ꦠꦴ ꦱꦩꦸꦢ꧀ꦢꦩꦗ꧀ꦙꦺ ꦌꦏꦁ ꦢꦷꦥꦏꦁ ꦥꦴꦥꦸꦟꦶꦁꦱꦸ. ꦠꦱ꧀ꦩꦶꦁ ꦥꦤ ꦢꦷꦥꦏꦺ ꦱꦪꦁꦗꦴꦠꦱꦴꦭꦶꦈꦕ꧀ꦖꦸꦏꦢꦭꦶꦄꦩ꧀ꦧꦗꦩ꧀ꦧꦸꦥꦤꦱꦠꦴꦭꦤꦴꦭ꦳ꦶꦏꦺꦫꦴꦢꦷꦤꦶ ꦮꦶꦮꦶꦣꦦꦭꦴꦤꦶ ꦄꦠ꧀ꦡꦶ, ꦄꦚ꧀ꦚꦠꦫꦺꦴ ꦥꦨꦶꦤ꧀ꦤꦤꦴꦮꦺꦴ ꦥꦸꦫꦶꦱꦺꦴ ꦥꦜꦩꦠꦫꦁ ꦠꦁ ꦢꦷꦥꦏꦁ ꦥꦠ꧀ꦮꦴ ꦱꦴꦭꦶꦨꦠ꧀ꦠꦁ ꦨꦸꦚ꧀ꦗꦩꦴꦤꦺꦴ ꦈꦕ꧀ꦖꦸꦄꦴꦢꦷꦤꦶ ꦑꦴꦢꦩꦴꦤꦺꦴ ꦡꦹꦭꦱꦫꦷꦫꦺꦴ ꦤꦒ꧀ꦒꦺꦴ ꦥꦫꦹꦭ꦳꧀ꦲꦏꦺꦱꦩꦱ꧀ꦱꦸ ꦠꦱ꧀ꦩꦶꦁ ꦢꦷꦥꦏꦺ ꦥꦛꦶꦮꦱꦠꦶ.

ꦮꦝ꧀ꦞꦏꦷ ꦕꦶꦤ꧀ꦠꦪꦶꦁꦱꦸ ‘‘ꦱꦕꦺ ꦄꦪꦁ ꦢꦷꦥꦏꦺꦴ ꦫꦏ꧀ꦑꦱꦥꦫꦶꦒ꧀ꦒꦲꦶꦠꦺꦴ ꦨꦮꦶꦱ꧀ꦱꦠꦶ, ꦱꦧ꧀ꦧꦺꦥꦶ ꦄꦩ꧀ꦲꦺ ꦮꦶꦤꦴꦱꦁ ꦥꦴꦥꦸꦟꦶꦱ꧀ꦱꦴꦩ, ꦥꦫꦶꦒ꧀ꦒꦟ꧀ꦲꦶꦱ꧀ꦱꦴꦩ ꦠꦴꦮ ꦤ’’ꦤ꧀ꦠꦶ. ꦄꦡ ꦱꦠ꧀ꦠꦛ꧀ꦜ ꦥꦸꦫꦶꦱꦴ ꦱꦹꦫꦴ ꦧꦭꦮꦤ꧀ꦠꦺꦴ ꦱꦤ꧀ꦤꦢ꧀ꦣꦥꦚ꧀ꦕꦴꦮꦸꦣꦴ ꦲꦸꦠ꧀ꦮꦴ ꦎꦠꦫꦶꦠ꧀ꦮꦴ ꦢꦷꦥꦏꦁ ꦥꦫꦶꦒ꧀ꦒꦟ꧀ꦲꦶꦁꦱꦸ. ꦠꦱ꧀ꦩꦶꦁ ꦑꦟꦺ ꦱꦺꦴ ꦥꦸꦫꦶꦱꦺꦴ ꦨꦸꦠ꧀ꦠꦥꦴꦠꦫꦴꦱꦺꦴ ꦈꦕ꧀ꦖꦸꦫꦱꦁ ꦥꦶꦮꦶꦠ꧀ꦮꦴ ꦱꦸꦑꦥ꧀ꦥꦠ꧀ꦠꦺꦴ ꦫꦩꦟꦷꦪꦺ ꦥꦢꦺꦱꦺ ꦫꦗꦠꦥꦛ꧀ꦛꦱꦢꦶꦱꦺ ꦮꦴꦭꦸꦏꦠꦭꦺ ꦱꦷꦠꦕ꧀ꦖꦴꦪꦴꦪ ꦈꦠ꧀ꦠꦴꦤꦏꦺꦴ ꦤꦶꦥꦗ꧀ꦗꦶꦠ꧀ꦮꦴ ‘‘ꦗꦩ꧀ꦧꦸꦢꦷꦥꦮꦴꦱꦶꦤꦺꦴ ꦏꦱꦤ꧀ꦠꦴ ꦮꦥꦤ꧀ꦠꦴ ꦌꦮꦫꦹꦥꦁ ꦱꦸꦑꦁ ꦤ ꦭꦨꦤ꧀ꦠꦶ, ꦗꦩ꧀ꦧꦸꦢꦷꦥꦠꦺꦴ ꦩꦪ꧀ꦲꦁ ꦄꦪꦩꦺꦮ ꦢꦷꦥꦏꦺꦴ ꦮꦫ’’ꦤ꧀ꦠꦶ ꦒꦴꦪꦩꦴꦤꦺꦴ ꦈꦢꦴꦤꦁ ꦈꦢꦴꦤꦺꦱꦶ. ꦄꦡ ꦱꦠ꧀ꦡꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦠ꧀ꦮꦴ ‘‘ꦱꦺꦴ ꦨꦶꦏ꧀ꦑꦮꦺ ꦥꦸꦫꦶꦱꦺꦴ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦷ’’ꦠꦶ ꦢꦱ꧀ꦱꦺꦤ꧀ꦠꦺꦴ ꦥꦜꦩꦁ ꦒꦴꦡꦩꦴꦲ –

꧒꧕. ‘‘ꦏꦱꦤ꧀ꦠꦶ ꦮꦥꦤ꧀ꦠꦶ ꦠꦺ ꦗꦤꦴ, ꦩꦤꦸꦗꦴ ꦏꦩ꧀ꦩꦦꦭꦹꦥꦗꦷꦮꦶꦤꦺꦴ;

ꦤꦪꦶꦩꦱ꧀ꦱ ꦢꦷꦥꦏꦱ꧀ꦱ ꦨꦴꦒꦶꦤꦺꦴ, ꦗꦩ꧀ꦧꦸꦢꦷꦥꦴ ꦆꦢꦩꦺꦮ ꦤꦺꦴ ꦮꦫ’’ꦤ꧀ꦠꦶ.

ꦠꦠ꧀ꦡ ꦠꦺ ꦗꦤꦴꦠꦶ ꦠꦺ ꦗꦩ꧀ꦧꦸꦢꦷꦥꦮꦴꦱꦶꦤꦺꦴ ꦗꦤꦴ. ꦏꦩ꧀ꦩꦦꦭꦹꦥꦗꦷꦮꦶꦤꦺꦴꦠꦶ ꦤꦴꦤꦴꦏꦩ꧀ꦩꦴꦤꦁ ꦦꦭꦹꦥꦗꦷꦮꦶꦤꦺꦴ ꦱꦠ꧀ꦠꦴ.

ꦄꦡ ꦠꦺ ꦢꦷꦥꦏꦁ ꦥꦫꦶꦒ꧀ꦒꦟ꧀ꦲꦤ꧀ꦠꦴ ꦥꦸꦫꦶꦱꦴ ꦠꦱ꧀ꦱ ꦒꦷꦠꦱꦢ꧀ꦢꦁ ꦱꦸꦠ꧀ꦮꦴ ‘‘ꦩꦤꦸꦱ꧀ꦱꦱꦢ꧀ꦢꦺꦴ ꦮꦶꦪ ꦱꦸꦪ꧀ꦪꦠꦶ, ꦗꦴꦤꦶꦱ꧀ꦱꦴꦩ ꦤ’’ꦤ꧀ꦠꦶ ꦱꦢ꧀ꦢꦴꦤꦸꦱꦴꦫꦺꦤ ꦒꦤ꧀ꦠ꧀ꦮꦴ ꦠꦁ ꦥꦸꦫꦶꦱꦁ ꦢꦶꦱ꧀ꦮꦴ ‘‘ꦪꦏ꧀ꦑꦺꦴ ꦨꦮꦶꦱ꧀ꦱꦠꦷ’’ꦠꦶ ꦨꦷꦠꦠꦱꦶꦠꦴ ꦱꦫꦺ ꦱꦤ꧀ꦤꦲꦶꦁꦱꦸ. ꦱꦺꦴꦥꦶ ꦠꦺ ꦢꦶꦱ꧀ꦮꦴ ꦄꦠ꧀ꦠꦤꦺꦴ ꦮꦣꦨꦪꦺꦤ ‘‘ꦤꦴꦲꦁ, ꦱꦴꦩꦶ, ꦪꦏ꧀ꦑꦺꦴ, ꦥꦸꦫꦶꦱꦺꦴꦩ꧀ꦲꦶ, ꦗꦷꦮꦶꦠꦁ ꦩꦺ ꦢꦺꦡꦴ’’ꦠꦶ ꦪꦴꦕꦤ꧀ꦠꦺꦴ ‘‘ꦥꦸꦫꦶꦱꦴ ꦤꦴꦩ ꦠꦸꦩ꧀ꦲꦴꦢꦶꦱꦴ ꦤꦒ꧀ꦒꦴ ꦤ ꦲꦺꦴꦤ꧀ꦠꦷ’’ꦠꦶ ꦮꦸꦠ꧀ꦠꦺ ꦥꦸꦤꦥ꧀ꦥꦸꦤꦁ ꦪꦴꦕꦶꦠ꧀ꦮꦴ ꦩꦤꦸꦱ꧀ꦱꦨꦴꦮꦁ ꦮꦶꦚ꧀ꦚꦴꦥꦺꦱꦶ. ꦠꦺ ꦠꦁ ꦥꦸꦫꦶꦱꦁ ꦈꦥꦱꦔ꧀ꦏꦩꦶꦠ꧀ꦮꦴ ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦸꦠ꧀ꦮꦴ ꦠꦱ꧀ꦱ ꦠꦠ꧀ꦡ ꦄꦴꦒꦠꦤꦶꦪꦴꦩꦁ ꦥꦸꦕ꧀ꦖꦶꦁꦱꦸ. ꦱꦺꦴꦥꦶ ꦱꦧ꧀ꦧꦁ ꦠꦺꦱꦁ ꦏꦡꦺꦠ꧀ꦮꦴ ‘‘ꦠꦸꦩ꧀ꦲꦺ ꦄꦠ꧀ꦠꦤꦺꦴ ꦥꦸꦚ꧀ꦚꦱꦩ꧀ꦥꦠ꧀ꦠꦶꦪꦴ ꦆꦣꦴꦒꦠꦴ, ꦄꦪꦁ ꦈꦠ꧀ꦠꦩꦢꦷꦥꦺꦴ, ꦤ ꦌꦠ꧀ꦡ ꦱꦲꦠ꧀ꦡꦺꦤ ꦏꦩ꧀ꦩꦁ ꦏꦠ꧀ꦮꦴ ꦗꦷꦮꦤ꧀ꦠꦶ, ꦱꦪꦁꦗꦴꦠꦱꦴꦭꦷꦤꦚ꧀ꦕꦺꦮ ꦈꦕ꧀ꦖꦸꦄꦴꦢꦷꦤꦚ꧀ꦕꦺꦠ꧀ꦡ ꦄꦤ꧀ꦠꦺꦴ ꦤꦠ꧀ꦡꦷꦠꦶ ꦄꦤꦸꦏ꧀ꦏꦟ꧀ꦜꦤ꧀ꦠꦴ ꦮꦱꦡꦴ’’ꦠꦶ ꦄꦴꦲ. ꦆꦣ ꦥꦤ ꦮꦱꦤ꧀ꦠꦴꦤꦁ ꦄꦩ꧀ꦲꦴꦏꦁ ꦄꦚ꧀ꦚꦺꦴ ꦥꦫꦶꦥꦤ꧀ꦡꦺꦴ ꦤꦠ꧀ꦡꦶ, ꦄꦚ꧀ꦚꦁ ꦨꦪꦁ ꦌꦠ꧀ꦡ ꦤꦠ꧀ꦡꦶ, ꦄꦪꦁ ꦥꦤ ꦄꦩꦤꦸꦱ꧀ꦱꦥꦫꦶꦒ꧀ꦒꦲꦶꦠꦺꦴ, ꦄꦩꦤꦸꦱ꧀ꦱꦴ ꦠꦸꦩ꧀ꦲꦴꦏꦁ ꦈꦕ꧀ꦕꦴꦫꦥꦱ꧀ꦱꦴꦮꦁ ꦢꦶꦱ꧀ꦮꦴ ꦏꦸꦗ꧀ꦙꦺꦪ꧀ꦪꦸꦁ, ꦠꦱ꧀ꦩꦴ ꦠꦁ ꦏꦫꦺꦴꦤ꧀ꦠꦴ ꦮꦴꦭꦸꦏꦁ ꦮꦶꦪꦹꦲꦶꦠ꧀ꦮꦴ ꦮꦴꦭꦸꦏꦴꦪ ꦥꦛꦶꦕ꧀ꦖꦴꦢꦺꦪ꧀ꦪꦴꦡ, ꦌꦠ꧀ꦠꦏꦁ ꦆꦣ ꦨꦪꦁ, ꦄꦚ꧀ꦚꦁ ꦤꦠ꧀ꦡꦶ, ꦤꦶꦕ꧀ꦕꦁ ꦄꦥ꧀ꦥꦩꦠ꧀ꦠꦴ ꦨꦮꦺꦪ꧀ꦪꦴꦡꦴꦠꦶ. ꦠꦺ ꦠꦠ꧀ꦡ ꦮꦴꦱꦁ ꦈꦥꦒꦕ꧀ꦖꦶꦁꦱꦸ. ꦠꦱ꧀ꦩꦶꦁ ꦥꦤ ꦏꦸꦭꦱꦲꦱ꧀ꦱꦺ ꦥꦚ꧀ꦕꦤ꧀ꦤꦁ ꦥꦚ꧀ꦕꦤ꧀ꦤꦁ ꦏꦸꦭꦱꦠꦴꦤꦁ ꦗꦺꦛ꧀ꦜꦏꦴ ꦢ꧀ꦮꦺ ꦮꦝ꧀ꦞꦏꦷ ꦄꦲꦺꦱꦸꦁ. ꦠꦺꦱꦸ ꦌꦏꦺꦴ ꦧꦴꦭꦺꦴ ꦄꦲꦺꦴꦱꦶ ꦫꦱꦒꦶꦢ꧀ꦣꦺꦴ, ꦌꦏꦺꦴ ꦥꦟ꧀ꦝꦶꦠꦺꦴ ꦫꦱꦺꦱꦸ ꦄꦤꦭ꧀ꦭꦷꦤꦺꦴ.

ꦄꦥꦫꦨꦴꦒꦺ ꦱꦧ꧀ꦧꦺꦥꦶ ꦠꦺ ꦠꦠ꧀ꦡ ꦱꦸꦑꦁ ꦮꦱꦤ꧀ꦠꦴ ꦡꦹꦭꦱꦫꦷꦫꦴ ꦲꦸꦠ꧀ꦮꦴ ꦕꦶꦤ꧀ꦠꦪꦶꦁꦱꦸ ‘‘ꦕꦶꦫꦁ ꦥꦷꦠꦴ ꦤꦺꦴ ꦱꦸꦫꦴ, ꦈꦕ꧀ꦖꦸꦫꦱꦺꦤ ꦩꦺꦫꦪꦁ ꦏꦠ꧀ꦮꦴ ꦥꦶꦮꦶꦱ꧀ꦱꦴꦩꦴ’’ꦠꦶ. ꦠꦺ ꦩꦺꦫꦪꦁ ꦏꦴꦫꦺꦠ꧀ꦮꦴ ꦥꦶꦮꦶꦠ꧀ꦮꦴ ꦩꦢꦮꦱꦺꦤ ꦒꦴꦪꦤ꧀ꦠꦴ ꦤꦕ꧀ꦕꦤ꧀ꦠꦴ ꦏꦷꦭ꦳ꦤ꧀ꦠꦴ ꦥꦩꦠ꧀ꦠꦴ ꦠꦠ꧀ꦡ ꦠꦠ꧀ꦡ ꦈꦕ꧀ꦕꦴꦫꦥꦱ꧀ꦱꦴꦮꦁ ꦏꦠ꧀ꦮꦴ ꦄꦥ꧀ꦥꦛꦶꦕ꧀ꦖꦴꦢꦺꦠ꧀ꦮꦴ ꦢꦷꦥꦏꦁ ꦗꦺꦒꦸꦕ꧀ꦖꦁ ꦥꦛꦶꦏꦹꦭꦁ ꦏꦫꦶꦁꦱꦸ. ꦢꦺꦮꦠꦴ ‘‘ꦆꦩꦺ ꦄꦩ꧀ꦲꦴꦏꦁ ꦏꦷꦭ꦳ꦴꦩꦟ꧀ꦝꦭꦁ ꦥꦛꦶꦏꦹꦭꦁ ꦏꦫꦺꦴꦤ꧀ꦠꦷ’’ꦠꦶ ꦏꦸꦗ꧀ꦙꦶꦠ꧀ꦮꦴ ‘‘ꦩꦲꦴꦱꦩꦸꦢ꧀ꦢꦁ ꦈꦠ꧀ꦠꦫꦴꦥꦺꦠ꧀ꦮꦴ ꦢꦷꦥꦏꦣꦺꦴꦮꦤꦁ ꦏꦫꦶꦱ꧀ꦱꦴꦩꦴ’’ꦠꦶ ꦩꦤ꧀ꦠꦺꦠ꧀ꦮꦴ ‘‘ꦄꦪꦁ ꦏꦴꦭ꦳ꦥꦏ꧀ꦑꦺꦴ, ꦄꦗ꧀ꦗ ꦄꦩ꧀ꦲꦴꦏꦁ ꦱꦩꦴꦒꦩꦺꦴ ꦕ ꦨꦶꦤ꧀ꦤꦺꦴ, ꦆꦠꦺꦴ ꦢꦴꦤꦶ ꦥꦤ꧀ꦤꦫꦱꦩꦺ ꦢꦶꦮꦱꦺ ꦥꦸꦟ꧀ꦟꦩꦷꦈꦥꦺꦴꦱꦡꦢꦶꦮꦱꦺ ꦕꦤ꧀ꦢꦱ꧀ꦱꦸꦒ꧀ꦒꦩꦤꦮꦺꦭꦴꦪ ꦱꦩꦸꦢ꧀ꦢꦁ ꦈꦧ꧀ꦧꦠ꧀ꦠꦺꦠ꧀ꦮꦴ ꦱꦧ꧀ꦧꦺꦥꦶꦩꦺ ꦓꦴꦠꦺꦱ꧀ꦱꦴꦩꦴ’’ꦠꦶ ꦢꦶꦮꦱꦁ ꦜꦥꦪꦶꦁꦱꦸ. ꦄꦡ ꦤꦺꦱꦁ ꦄꦤ꧀ꦠꦫꦺ ꦌꦏꦺꦴ ꦣꦩ꧀ꦩꦶꦏꦺꦴ ꦢꦺꦮꦥꦸꦠ꧀ꦠꦺꦴ ‘‘ꦩꦴ ꦆꦩꦺ ꦩꦩ ꦥꦱ꧀ꦱꦤ꧀ꦠꦱ꧀ꦱ ꦤꦱ꧀ꦱꦶꦁꦱꦹ’’ꦠꦶ ꦄꦤꦸꦏꦩ꧀ꦥꦴꦪ ꦠꦺꦱꦸ ꦱꦴꦪꦩꦴꦱꦁ ꦨꦸꦚ꧀ꦗꦶꦠ꧀ꦮꦴ ꦓꦫꦢ꧀ꦮꦴꦫꦺ ꦱꦸꦑꦏꦡꦴꦪ ꦤꦶꦱꦶꦤ꧀ꦤꦺꦱꦸ ꦱꦧ꧀ꦧꦴꦭꦔ꧀ꦏꦴꦫꦥꦛꦶꦩꦟ꧀ꦝꦶꦠꦺꦴ ꦱꦏꦭꦢꦷꦥꦁ ꦌꦏꦺꦴꦨꦴꦱꦁ ꦏꦠ꧀ꦮꦴ ꦈꦠ꧀ꦠꦫꦴꦪ ꦢꦶꦱꦴꦪ ꦄꦴꦏꦴꦱꦺ ꦜꦠ꧀ꦮꦴ ‘‘ꦄꦩ꧀ꦨꦺꦴ ꦮꦝ꧀ꦞꦏꦷ, ꦢꦺꦮꦠꦴ ꦠꦸꦩ꧀ꦲꦴꦏꦁ ꦏꦸꦢ꧀ꦣꦴ. ꦆꦩꦱ꧀ꦩꦶꦁ ꦜꦴꦤꦺ ꦩꦴ ꦮꦱꦶꦠ꧀ꦡ, ꦆꦠꦺꦴ ꦄꦝ꧀ꦞꦩꦴꦱꦕ꧀ꦕꦪꦺꦤ ꦲꦶ ꦢꦺꦮꦠꦴ ꦱꦩꦸꦢ꧀ꦢꦁ ꦈꦧ꧀ꦧꦠ꧀ꦠꦺꦠ꧀ꦮꦴ ꦱꦧ꧀ꦧꦺꦮ ꦠꦸꦩ꧀ꦲꦺ ꦓꦴꦠꦺꦱ꧀ꦱꦤ꧀ꦠꦶ, ꦆꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦥꦭꦴꦪꦡꦴ’’ꦠꦶ ꦮꦠ꧀ꦮꦴ ꦢꦸꦠꦶꦪꦁ ꦒꦴꦡꦩꦴꦲ –

꧒꧖. ‘‘ꦠꦶꦥꦚ꧀ꦕꦫꦠ꧀ꦠꦹꦥꦒꦠꦩ꧀ꦲꦶ ꦕꦤ꧀ꦢꦺ, ꦮꦺꦒꦺꦴ ꦩꦲꦴ ꦲꦺꦲꦶꦠꦶ ꦱꦴꦒꦫꦱ꧀ꦱ;

ꦈꦥ꧀ꦭꦮꦶꦱ꧀ꦱꦁ ꦢꦷꦥꦩꦶꦩꦁ ꦈꦭ꦳ꦴꦫꦁ, ꦩꦴ ꦮꦺꦴ ꦮꦣꦷ ꦒꦕ꧀ꦖꦡ ꦭꦺꦟꦩꦚ꧀ꦚ’’ꦤ꧀ꦠꦶ.

ꦠꦠ꧀ꦡ ꦈꦥ꧀ꦭꦮꦶꦱ꧀ꦱꦤ꧀ꦠꦶ ꦆꦩꦁ ꦢꦷꦥꦏꦁ ꦈꦥ꧀ꦭꦮꦤ꧀ꦠꦺꦴ ꦄꦗ꧀ꦙꦺꦴꦠ꧀ꦡꦫꦤ꧀ꦠꦺꦴ ꦄꦨꦶꦨꦮꦶꦱ꧀ꦱꦠꦶ. ꦩꦴ ꦮꦺꦴ ꦮꦣꦷꦠꦶ ꦱꦺꦴ ꦱꦴꦒꦫꦮꦺꦒꦺꦴ ꦠꦸꦩ꧀ꦲꦺ ꦩꦴ ꦮꦣꦶ.

ꦆꦠꦶ ꦱꦺꦴ ꦠꦺꦱꦁ ꦎꦮꦴꦢꦁ ꦢꦠ꧀ꦮꦴ ꦄꦠ꧀ꦠꦤꦺꦴ ꦜꦴꦤꦩꦺꦮ ꦒꦠꦺꦴ. ꦠꦱ꧀ꦩꦶꦁ ꦒꦠꦺ ꦄꦥꦫꦺꦴ ꦱꦴꦲꦱꦶꦏꦺꦴ ꦏꦏ꧀ꦑꦭ꦳ꦺꦴ ꦢꦺꦮꦥꦸꦠ꧀ꦠꦺꦴ ‘‘ꦆꦩꦺ ꦆꦩꦱ꧀ꦱ ꦮꦕꦤꦁ ꦒꦲꦺꦠ꧀ꦮꦴ ꦥꦭꦴꦪꦺꦪ꧀ꦪꦸꦁ, ꦄꦲꦁ ꦤꦺꦱꦁ ꦒꦩꦤꦁ ꦤꦶꦮꦴꦫꦺꦠ꧀ꦮꦴ ꦱꦧ꧀ꦧꦺꦥꦶꦩꦺ ꦩꦲꦴꦮꦶꦤꦴꦱꦁ ꦥꦴꦥꦺꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦢꦶꦧ꧀ꦧꦴꦭꦔ꧀ꦏꦴꦫꦥꦛꦶꦩꦟ꧀ꦝꦶꦠꦺꦴ ꦱꦏꦭꦢꦷꦥꦁ ꦌꦏꦺꦴꦨꦴꦱꦁ ꦏꦫꦺꦴꦤ꧀ꦠꦺꦴ ꦄꦴꦒꦤ꧀ꦠ꧀ꦮꦴ ꦢꦏ꧀ꦑꦶꦟꦴꦪ ꦢꦶꦱꦴꦪ ꦄꦴꦏꦴꦱꦺ ꦜꦠ꧀ꦮꦴ ‘‘ꦌꦏꦺꦴ ꦢꦺꦮꦥꦸꦠ꧀ꦠꦺꦴ ꦆꦣꦴꦒꦠꦺꦴ, ꦤꦺꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦄꦴꦒꦠꦺꦴ’’ꦠꦶ ꦮꦸꦠ꧀ꦠꦺ ‘‘ꦱꦺꦴ ꦮꦺꦴ ꦏꦶꦁ ꦏꦡꦺꦱꦷ’’ꦠꦶ ꦮꦠ꧀ꦮꦴ ‘‘ꦆꦩꦁ ꦤꦴꦩ, ꦱꦴꦩꦷ’’ꦠꦶ ꦮꦸꦠ꧀ꦠꦺ ‘‘ꦱꦺꦴ ꦠꦸꦩ꧀ꦲꦴꦏꦁ ꦆꦣ ꦤꦶꦮꦴꦱꦁ ꦤ ꦆꦕ꧀ꦖꦠꦶ, ꦢꦺꦴꦱꦺꦤ ꦏꦡꦺꦠꦶ, ꦠꦸꦩ꧀ꦲꦺ ꦄꦚ꧀ꦚꦠ꧀ꦡ ꦄꦒꦤ꧀ꦠ꧀ꦮꦴ ꦆꦣꦺꦮ ꦮꦱꦡꦴ’’ꦠꦶ ꦮꦠ꧀ꦮꦴ ꦢ꧀ꦮꦺ ꦒꦴꦡꦴ ꦄꦨꦴꦱꦶ –

꧒꧗. ‘‘ꦤ ꦗꦴꦠꦸꦪꦁ ꦱꦴꦒꦫꦮꦴꦫꦶꦮꦺꦒꦺꦴ, ꦈꦥ꧀ꦭꦮꦶꦱ꧀ꦱꦁ ꦢꦷꦥꦩꦶꦩꦁ ꦈꦭ꦳ꦴꦫꦁ;

ꦠꦁ ꦩꦺ ꦤꦶꦩꦶꦠ꧀ꦠꦺꦲꦶ ꦧꦲꦹꦲꦶ ꦢꦶꦛ꧀ꦜꦁ, ꦩꦴ ꦨꦺꦡ ꦏꦶꦁ ꦱꦺꦴꦕꦡ ꦩꦺꦴꦢꦡꦮ꧀ꦲꦺꦴ.

꧒꧘. ‘‘ꦥꦲꦹꦠꦨꦏ꧀ꦑꦁ ꦧꦲꦸꦄꦤ꧀ꦤꦥꦴꦤꦁ, ꦥꦠ꧀ꦠꦠ꧀ꦡ ꦄꦴꦮꦴꦱꦩꦶꦩꦁ ꦈꦭ꦳ꦴꦫꦁ;

ꦤ ꦮꦺꦴ ꦨꦪꦁ ꦥꦛꦶꦥꦱ꧀ꦱꦴꦩꦶ ꦏꦶꦚ꧀ꦕꦶ, ꦄꦴꦥꦸꦠ꧀ꦠꦥꦸꦠ꧀ꦠꦺꦲꦶ ꦥꦩꦺꦴꦢꦡꦮ꧀ꦲꦺꦴ’’ꦠꦶ.

ꦠꦠ꧀ꦡ ꦤ ꦗꦴꦠꦸꦪꦤ꧀ꦠꦶ ꦤ ꦗꦴꦠꦸ ꦄꦪꦁ. ꦩꦴ ꦨꦺꦡꦴꦠꦶ ꦩꦴ ꦨꦴꦪꦶꦠ꧀ꦡ. ꦩꦺꦴꦢꦡꦮ꧀ꦲꦺꦴꦠꦶ ꦥꦩꦺꦴꦢꦶꦠꦴ ꦥꦷꦠꦶꦱꦺꦴꦩꦤꦱ꧀ꦱꦗꦴꦠꦴ ꦲꦺꦴꦡ. ꦄꦴꦥꦸꦠ꧀ꦠꦥꦸꦠ꧀ꦠꦺꦲꦷꦠꦶ ꦪꦴꦮ ꦥꦸꦠ꧀ꦠꦴꦤꦩ꧀ꦥꦶ ꦥꦸꦠ꧀ꦠꦺꦲꦶ ꦥꦩꦺꦴꦢꦡ, ꦤꦠ꧀ꦡꦶ ꦮꦺꦴ ꦆꦩꦱ꧀ꦩꦶꦁ ꦜꦴꦤꦺ ꦨꦪꦤ꧀ꦠꦶ.

ꦌꦮꦁ ꦱꦺꦴ ꦆꦩꦴꦲꦶ ꦢ꧀ꦮꦷꦲꦶ ꦒꦴꦡꦴꦲꦶ ꦠꦺ ꦄꦱ꧀ꦱꦴꦱꦺꦠ꧀ꦮꦴ ꦥꦏ꧀ꦏꦴꦩꦶ. ꦠꦱ꧀ꦱ ꦥꦏ꧀ꦏꦤ꧀ꦠꦏꦴꦭꦺ ꦣꦩ꧀ꦩꦶꦏꦢꦺꦮꦥꦸꦠ꧀ꦠꦱ꧀ꦱ ꦮꦕꦤꦁ ꦄꦤꦴꦢꦶꦪꦤ꧀ꦠꦺꦴ ꦧꦴꦭꦮꦝ꧀ꦞꦏꦷ ‘‘ꦱꦸꦟꦤ꧀ꦠꦸ ꦩꦺ, ꦨꦺꦴꦤ꧀ꦠꦺꦴ, ꦮꦕꦤ’’ꦤ꧀ꦠꦶ ꦱꦺꦱꦮꦝ꧀ꦞꦏꦷ ꦄꦴꦩꦤ꧀ꦠꦺꦠ꧀ꦮꦴ ꦥꦚ꧀ꦕꦩꦁ ꦒꦴꦡꦩꦴꦲ –

꧒꧙. ‘‘ꦪꦺꦴ ꦢꦺꦮꦺꦴꦪꦁ ꦢꦏ꧀ꦑꦶꦟꦴꦪꦁ ꦢꦶꦱꦴꦪꦁ, ꦑꦺꦩꦤ꧀ꦠꦶ ꦥꦏ꧀ꦏꦺꦴꦱꦠꦶ ꦠꦱ꧀ꦱ ꦱꦕ꧀ꦕꦁ;

ꦤ ꦈꦠ꧀ꦠꦫꦺꦴ ꦮꦺꦢꦶ ꦨꦪꦴꦨꦪꦱ꧀ꦱ, ꦩꦴ ꦨꦺꦡ ꦏꦶꦁ ꦱꦺꦴꦕꦡ ꦩꦺꦴꦢꦡꦮ꧀ꦲꦺꦴ’’ꦠꦶ.

ꦠꦠ꧀ꦡ ꦢꦏ꧀ꦑꦶꦟꦴꦪꦤ꧀ꦠꦶ ꦢꦏ꧀ꦑꦶꦟꦴꦪ, ꦄꦪꦩꦺꦮ ꦮꦴ ꦥꦴꦜꦺꦴ.

ꦠꦁ ꦱꦸꦠ꧀ꦮꦴ ꦫꦱꦒꦶꦢ꧀ꦣꦴ ꦥꦚ꧀ꦕꦱꦠꦴ ꦮꦝ꧀ꦞꦏꦷ ꦠꦱ꧀ꦱ ꦧꦴꦭꦱ꧀ꦱ ꦮꦕꦤꦁ ꦄꦴꦢꦶꦪꦶꦁꦱꦸ. ꦆꦠꦫꦺꦴ ꦥꦤ ꦥꦟ꧀ꦝꦶꦠꦮꦝ꧀ꦞꦏꦷ ꦠꦱ꧀ꦱ ꦮꦕꦤꦁ ꦄꦤꦴꦢꦶꦪꦤ꧀ꦠꦺꦴ ꦠꦺ ꦮꦝ꧀ꦞꦏꦷ ꦄꦴꦩꦤ꧀ꦠꦺꦠ꧀ꦮꦴ ꦕꦠꦱ꧀ꦱꦺꦴ ꦒꦴꦡꦴ ꦄꦨꦴꦱꦶ –

꧓꧐. ‘‘ꦪꦡꦴ ꦆꦩꦺ ꦮꦶꦥ꧀ꦥꦮꦢꦤ꧀ꦠꦶ ꦪꦏ꧀ꦑꦴ, ꦌꦏꦺꦴ ꦨꦪꦁ ꦱꦁꦱꦠꦶ ꦑꦺꦩꦩꦺꦏꦺꦴ;

ꦠꦢꦶꦔ꧀ꦓ ꦩꦪ꧀ꦲꦁ ꦮꦕꦤꦁ ꦱꦸꦟꦴꦡ, ꦑꦶꦥ꧀ꦥꦁ ꦭꦲꦸꦁ ꦩꦴ ꦮꦶꦤꦱ꧀ꦱꦶꦩ꧀ꦲ ꦱꦧ꧀ꦧꦺ.

꧓꧑. ‘‘ꦱꦧ꧀ꦧꦺ ꦱꦩꦴꦒꦩ꧀ꦩ ꦏꦫꦺꦴꦩ ꦤꦴꦮꦁ, ꦢꦺꦴꦟꦶꦁ ꦢꦭ꦳꧀ꦲꦁ ꦱꦧ꧀ꦧꦪꦤ꧀ꦠꦹꦥꦥꦤ꧀ꦤꦁ;

ꦱꦕꦺ ꦄꦪꦁ ꦢꦏ꧀ꦑꦶꦟꦺꦴ ꦱꦕ꧀ꦕꦩꦴꦲ, ꦩꦺꦴꦓꦁ ꦥꦛꦶꦏ꧀ꦏꦺꦴꦱꦠꦶ ꦈꦠ꧀ꦠꦫꦺꦴꦪꦁ;

ꦱꦴ ꦕꦺꦮ ꦤꦺꦴ ꦲꦺꦲꦶꦠꦶ ꦄꦴꦥꦢꦠ꧀ꦡꦴ, ꦆꦩꦚ꧀ꦕ ꦢꦷꦥꦁ ꦤ ꦥꦫꦶꦕ꧀ꦕꦗꦺꦩ.

꧓꧒. ‘‘ꦱꦕꦺ ꦕ ꦑꦺꦴ ꦈꦠ꧀ꦠꦫꦺꦴ ꦱꦕ꧀ꦕꦩꦴꦲ, ꦩꦺꦴꦓꦁ ꦥꦛꦶꦏ꧀ꦏꦺꦴꦱꦠꦶ ꦢꦏ꧀ꦑꦶꦟꦺꦴꦪꦁ;

ꦠꦩꦺꦮ ꦤꦴꦮꦁ ꦄꦨꦶꦫꦸꦪ꧀ꦲ ꦱꦧ꧀ꦧꦺ, ꦌꦮꦁ ꦩꦪꦁ ꦱꦺꦴꦠ꧀ꦡꦶ ꦠꦫꦺꦩꦸ ꦥꦴꦫꦁ.

꧓꧓. ‘‘ꦤ ꦮꦺ ꦱꦸꦒꦟ꧀ꦲꦁ ꦥꦜꦩꦺꦤ ꦱꦺꦛ꧀ꦜꦁ, ꦏꦤꦶꦛ꧀ꦜꦩꦴꦥꦴꦡꦒꦠꦁ ꦒꦲꦺꦠ꧀ꦮꦴ;

ꦪꦺꦴ ꦕꦷꦣ ꦠꦕ꧀ꦖꦁ ꦥꦮꦶꦕꦺꦪ꧀ꦪ ꦒꦟ꧀ꦲꦠꦶ, ꦱ ꦮꦺ ꦤꦫꦺꦴ ꦱꦺꦛ꧀ꦜꦩꦸꦥꦺꦠꦶ ꦜꦴꦤ’’ꦤ꧀ꦠꦶ.

ꦠꦠ꧀ꦡ ꦮꦶꦥ꧀ꦥꦮꦢꦤ꧀ꦠꦷꦠꦶ ꦄꦚ꧀ꦚꦩꦚ꧀ꦚꦁ ꦮꦶꦫꦸꦢ꧀ꦣꦁ ꦮꦢꦤ꧀ꦠꦶ. ꦭꦲꦸꦤ꧀ꦠꦶ ꦥꦸꦫꦶꦩꦱ꧀ꦱ ꦄꦠ꧀ꦡꦢꦷꦥꦤꦁ. ꦢꦺꦴꦟꦶꦤ꧀ꦠꦶ ꦒꦩ꧀ꦨꦷꦫꦁ ꦩꦲꦴꦤꦴꦮꦁ. ꦱꦧ꧀ꦧꦪꦤ꧀ꦠꦹꦥꦥꦤ꧀ꦤꦤ꧀ꦠꦶ ꦱꦧ꧀ꦧꦺꦲꦶ ꦦꦶꦪꦴꦫꦶꦠ꧀ꦠꦴꦢꦷꦲꦶ ꦪꦤ꧀ꦠꦺꦲꦶ ꦈꦥꦥꦤ꧀ꦤꦁ. ꦱꦴ ꦕꦺꦮ ꦤꦺꦴ ꦲꦺꦲꦶꦠꦶ ꦄꦴꦥꦢꦠ꧀ꦡꦴꦠꦶ ꦱꦴ ꦕ ꦤꦺꦴ ꦤꦴꦮꦴ ꦥꦕ꧀ꦖꦴꦥꦶ ꦈꦥ꧀ꦥꦤ꧀ꦤꦴꦪ ꦄꦴꦥꦢꦴꦪ ꦄꦠ꧀ꦡꦴ ꦨꦮꦶꦱ꧀ꦱꦠꦶ, ꦆꦩꦚ꧀ꦕ ꦢꦷꦥꦁ ꦤ ꦥꦫꦶꦕ꧀ꦕꦗꦶꦱ꧀ꦱꦴꦩ. ꦠꦫꦺꦩꦹꦠꦶ ꦠꦫꦶꦱ꧀ꦱꦴꦩ. ꦤ ꦮꦺ ꦱꦸꦒꦟ꧀ꦲꦤ꧀ꦠꦶ ꦤ ꦮꦺ ꦱꦸꦑꦺꦤ ꦒꦟ꧀ꦲꦶꦠꦧ꧀ꦧꦁ. ꦱꦺꦛ꧀ꦜꦤ꧀ꦠꦶ ꦈꦠ꧀ꦠꦩꦁ ꦠꦡꦁ ꦱꦕ꧀ꦕꦁ. ꦏꦤꦶꦛ꧀ꦜꦤ꧀ꦠꦶ ꦥꦜꦩꦮꦕꦤꦁ ꦈꦥꦴꦢꦴꦪ ꦥꦕ꧀ꦖꦶꦩꦮꦕꦤꦁ ꦏꦤꦶꦛ꧀ꦜꦁ ꦤꦴꦩ. ꦆꦣꦴꦥꦶ ‘‘ꦤ ꦮꦺ ꦱꦸꦒꦟ꧀ꦲ’’ꦤ꧀ꦠꦶ ꦄꦤꦸꦮꦠ꧀ꦠꦠꦺꦮ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦄꦩ꧀ꦨꦺꦴ ꦮꦝ꧀ꦞꦏꦷ, ꦪꦺꦤ ꦏꦺꦤꦕꦶ ꦥꦜꦩꦺꦤ ꦮꦸꦠ꧀ꦠꦮꦕꦤꦁ ‘‘ꦆꦢꦩꦺꦮ ꦱꦺꦛ꧀ꦜꦁ ꦠꦡꦁ ꦱꦕ꧀ꦕ’’ꦤ꧀ꦠꦶ ꦱꦸꦑꦁ ꦤ ꦒꦟ꧀ꦲꦶꦠꦧ꧀ꦧꦩꦺꦮ, ꦪꦡꦴ ꦕ ꦠꦁ, ꦌꦮꦁ ꦏꦤꦶꦛ꧀ꦜꦁ ꦒꦕ꧀ꦖꦴ ꦮꦸꦠ꧀ꦠꦮꦕꦤꦩ꧀ꦥꦶ ‘‘ꦆꦢꦩꦺꦮ ꦠꦡꦁ ꦱꦕ꧀ꦕ’’ꦤ꧀ꦠꦶ ꦤ ꦒꦟ꧀ꦲꦶꦠꦧ꧀ꦧꦁ. ꦪꦁ ꦥꦤ ꦱꦺꦴꦠꦮꦶꦱꦪꦁ ꦄꦴꦥꦴꦡꦒꦠꦁ ꦲꦺꦴꦠꦶ, ꦠꦁ ꦄꦴꦥꦴꦡꦒꦠꦁ ꦒꦲꦺꦠ꧀ꦮꦴ ꦪꦺꦴ ꦆꦣ ꦥꦟ꧀ꦝꦶꦠꦥꦸꦫꦶꦱꦺꦴ ꦥꦸꦫꦶꦩꦮꦕꦤꦚ꧀ꦕ ꦥꦕ꧀ꦖꦶꦩꦮꦕꦤꦚ꧀ꦕ ꦥꦮꦶꦕꦺꦪ꧀ꦪ ꦮꦶꦕꦶꦤꦶꦠ꧀ꦮꦴ ꦠꦷꦫꦺꦠ꧀ꦮꦴ ꦈꦥꦥꦫꦶꦏ꧀ꦑꦶꦠ꧀ꦮꦴ ꦠꦕ꧀ꦖꦁ ꦒꦟ꧀ꦲꦴꦠꦶ, ꦪꦁ ꦠꦡꦁ ꦱꦕ꧀ꦕꦁ ꦱꦨꦴꦮꦨꦹꦠꦁ, ꦠꦢꦺꦮ ꦥꦕ꧀ꦕꦏ꧀ꦑꦁ ꦏꦠ꧀ꦮꦴ ꦒꦟ꧀ꦲꦴꦠꦶ. ꦱ ꦮꦺ ꦤꦫꦺꦴ ꦱꦺꦛ꧀ꦜꦩꦸꦥꦺꦠꦶ ꦜꦴꦤꦤ꧀ꦠꦶ ꦱꦺꦴ ꦈꦠ꧀ꦠꦩꦁ ꦜꦴꦤꦁ ꦈꦥꦺꦠꦶ ꦄꦣꦶꦒꦕ꧀ꦖꦠꦶ ꦮꦶꦤ꧀ꦢꦠꦶ ꦭꦨꦠꦷꦠꦶ.

ꦱꦺꦴ ꦌꦮꦚ꧀ꦕ ꦥꦤ ꦮꦠ꧀ꦮꦴ ꦄꦴꦲ – ‘‘ꦄꦩ꧀ꦨꦺꦴ, ꦩꦪꦁ ꦢ꧀ꦮꦶꦤ꧀ꦤꦩ꧀ꦥꦶ ꦢꦺꦮꦠꦴꦤꦁ ꦮꦕꦤꦁ ꦏꦫꦶꦱ꧀ꦱꦴꦩ, ꦤꦴꦮꦁ ꦠꦴꦮ ꦱꦗ꧀ꦗꦺꦪ꧀ꦪꦴꦩ. ꦱꦕꦺ ꦥꦜꦩꦱ꧀ꦱ ꦮꦕꦤꦁ ꦱꦕ꧀ꦕꦁ ꦨꦮꦶꦱ꧀ꦱꦠꦶ, ꦠꦁ ꦤꦴꦮꦁ ꦄꦨꦶꦫꦸꦲꦶꦠ꧀ꦮꦴ ꦥꦭꦴꦪꦶꦱ꧀ꦱꦴꦩ, ꦄꦡ ꦆꦠꦫꦱ꧀ꦱ ꦮꦕꦤꦁ ꦱꦕ꧀ꦕꦁ ꦨꦮꦶꦱ꧀ꦱꦠꦶ, ꦤꦴꦮꦁ ꦌꦏꦩꦤ꧀ꦠꦺ ꦜꦥꦺꦠ꧀ꦮꦴ ꦆꦣꦺꦮ ꦮꦱꦶꦱ꧀ꦱꦴꦩꦴ’’ꦠꦶ. ꦌꦮꦁ ꦮꦸꦠ꧀ꦠꦺ ꦧꦴꦭꦮꦝ꧀ꦞꦏꦷ ‘‘ꦄꦩ꧀ꦨꦺꦴ, ꦠ꧀ꦮꦁ ꦈꦢꦏꦥꦴꦠꦶꦪꦁ ꦱꦸꦱꦸꦩꦴꦫꦁ ꦥꦱ꧀ꦱꦱꦶ, ꦄꦠꦷꦮ ꦢꦷꦓꦁ ꦥꦱ꧀ꦱꦱꦶ, ꦥꦜꦩꦢꦺꦮꦥꦸꦠ꧀ꦠꦺꦴ ꦄꦩ꧀ꦲꦺꦱꦸ ꦢꦺꦴꦱꦮꦱꦺꦤ ꦏꦡꦺꦱꦶ, ꦥꦕ꧀ꦖꦶꦩꦺꦴ ꦱꦶꦤꦺꦲꦺꦤꦺꦮ, ꦆꦩꦁ ꦌꦮꦫꦹꦥꦁ ꦮꦫꦢꦷꦥꦁ ꦥꦲꦴꦪ ꦏꦸꦲꦶꦁ ꦒꦩꦶꦱ꧀ꦱꦴꦩ, ꦱꦕꦺ ꦥꦤ ꦠ꧀ꦮꦁ ꦒꦤ꧀ꦠꦸꦏꦴꦩꦺꦴ, ꦠꦮ ꦥꦫꦶꦱꦁ ꦒꦟ꧀ꦲꦶꦠ꧀ꦮꦴ ꦤꦴꦮꦁ ꦏꦫꦺꦴꦲꦶ, ꦄꦩ꧀ꦲꦴꦏꦁ ꦤꦴꦮꦴꦪ ꦏꦶꦕ꧀ꦕꦁ ꦤꦠ꧀ꦡꦷ’’ꦠꦶ ꦄꦴꦲ. ꦥꦟ꧀ꦝꦶꦠꦺꦴ ꦄꦠ꧀ꦠꦤꦺꦴ ꦥꦫꦶꦱꦁ ꦒꦲꦺꦠ꧀ꦮꦴ ꦤꦴꦮꦁ ꦱꦗ꧀ꦗꦺꦠ꧀ꦮꦴ ꦤꦴꦮꦴꦪ ꦱꦧ꧀ꦧꦹꦥꦏꦫꦟꦴꦤꦶ ꦄꦴꦫꦺꦴꦥꦺꦠ꧀ꦮꦴ ꦱꦥꦫꦶꦱꦺꦴ ꦤꦴꦮꦴꦪ ꦄꦛ꧀ꦜꦴꦱꦶ.

ꦠꦠꦺꦴ ꦥꦸꦟ꧀ꦟꦩꦢꦶꦮꦱꦺ ꦕꦤ꧀ꦢꦱ꧀ꦱ ꦈꦒ꧀ꦒꦩꦤꦮꦺꦭꦴꦪ ꦱꦩꦸꦢ꧀ꦢꦠꦺꦴ ꦈꦴꦩꦶ ꦈꦠ꧀ꦠꦫꦶꦠ꧀ꦮꦴ ꦗꦴꦟꦸꦏꦥꦩꦴꦟꦴ ꦲꦸꦠ꧀ꦮꦴ ꦢꦷꦥꦏꦁ ꦣꦺꦴꦮꦶꦠ꧀ꦮꦴ ꦒꦠꦴ. ꦥꦟ꧀ꦝꦶꦠꦺꦴ ꦱꦩꦸꦢ꧀ꦢꦱ꧀ꦱ ꦈꦠ꧀ꦠꦫꦟꦨꦴꦮꦁ ꦚꦠ꧀ꦮꦴ ꦤꦴꦮꦁ ꦮꦶꦱ꧀ꦱꦗ꧀ꦗꦺꦱꦶ. ꦧꦴꦭꦮꦝ꧀ꦞꦏꦶꦥꦏ꧀ꦑꦶꦏꦴꦤꦶ ꦥꦚ꧀ꦕ ꦏꦸꦭꦱꦠꦴꦤꦶ ‘‘ꦱꦩꦸꦢ꧀ꦢꦠꦺꦴ ꦈꦴꦩꦶ ꦢꦷꦥꦣꦺꦴꦮꦤꦠ꧀ꦡꦴꦪ ꦄꦴꦒꦠꦴ, ꦌꦠ꧀ꦠꦏꦩꦺꦮ ꦌꦠ’’ꦤ꧀ꦠꦶ ꦏꦡꦺꦤ꧀ꦠꦴ ꦤꦶꦱꦷꦢꦶꦁꦱꦸ. ꦠꦠꦺꦴ ꦥꦛꦶꦥꦴꦛꦶꦪꦴ ꦏꦛꦶꦥ꧀ꦥꦩꦴꦟꦴ ꦥꦸꦫꦶꦱꦥ꧀ꦥꦩꦴꦟꦴ ꦠꦴꦭꦥ꧀ꦥꦩꦴꦟꦴ ꦱꦠ꧀ꦠꦠꦴꦭꦥ꧀ꦥꦩꦴꦟꦴ ꦱꦴꦒꦫꦈꦴꦩꦶ ꦢꦷꦥꦏꦩ꧀ꦥꦶ ꦮꦸꦪ꧀ꦲꦩꦴꦤꦴ ꦄꦴꦒꦚ꧀ꦖꦶ. ꦥꦟ꧀ꦝꦶꦠꦺꦴ ꦈꦥꦴꦪꦏꦸꦱꦭꦠꦴꦪ ꦫꦱꦺ ꦄꦭꦒ꧀ꦒꦺꦴ ꦱꦺꦴꦠ꧀ꦡꦶꦤꦴ ꦒꦠꦺꦴ, ꦧꦴꦭꦮꦝ꧀ꦞꦏꦷ ꦫꦱꦒꦶꦢ꧀ꦣꦺꦤ ꦄꦤꦴꦒꦠꦨꦪꦁ ꦄꦤꦺꦴꦭꦺꦴꦏꦺꦤ꧀ꦠꦺꦴ ꦥꦚ꧀ꦕꦲꦶ ꦏꦸꦭꦱꦠꦺꦲꦶ ꦱꦢ꧀ꦣꦶꦁ ꦮꦶꦤꦴꦱꦁ ꦥꦠ꧀ꦠꦺꦴ.

ꦆꦠꦺꦴ ꦥꦫꦴ ꦱꦴꦤꦸꦱꦴꦱꦤꦷ ꦠꦩꦠ꧀ꦡꦁ ꦢꦷꦥꦪꦩꦴꦤꦴ ꦠꦶꦱ꧀ꦱꦺꦴ ꦄꦨꦶꦱꦩ꧀ꦧꦸꦢ꧀ꦣꦒꦴꦡꦴ ꦲꦺꦴꦤ꧀ꦠꦶ –

꧓꧔. ‘‘ꦪꦡꦴꦥꦶ ꦠꦺ ꦱꦴꦒꦫꦮꦴꦫꦶꦩꦗ꧀ꦙꦺ, ꦱꦏꦩ꧀ꦩꦸꦤꦴ ꦱꦺꦴꦠ꧀ꦡꦶ ꦮꦲꦶꦁꦱꦸ ꦮꦴꦟꦶꦗꦴ;

ꦄꦤꦴꦒꦠꦠ꧀ꦡꦁ ꦥꦛꦶꦮꦶꦗ꧀ꦙꦶꦪꦴꦤ, ꦄꦥ꧀ꦥꦩ꧀ꦥꦶ ꦤꦴꦕ꧀ꦕꦺꦠꦶ ꦱ ꦨꦹꦫꦶꦥꦚ꧀ꦚꦺꦴ.

꧓꧕. ‘‘ꦧꦴꦭꦴ ꦕ ꦩꦺꦴꦲꦺꦤ ꦫꦱꦴꦤꦸꦒꦶꦢ꧀ꦣꦴ, ꦄꦤꦴꦒꦠꦁ ꦄꦥ꧀ꦥꦛꦶꦮꦶꦗ꧀ꦙꦶꦪꦠ꧀ꦡꦁ;

ꦥꦕ꧀ꦕꦸꦥ꧀ꦥꦤ꧀ꦤꦺ ꦱꦷꦢꦤ꧀ꦠꦶ ꦄꦠ꧀ꦡꦗꦴꦠꦺ, ꦱꦩꦸꦢ꧀ꦢꦩꦗ꧀ꦙꦺ ꦪꦡꦴ ꦠꦺ ꦩꦤꦸꦱ꧀ꦱꦴ.

꧓꧖. ‘‘ꦄꦤꦴꦒꦠꦁ ꦥꦛꦶꦏꦪꦶꦫꦴꦡ ꦏꦶꦕ꧀ꦕꦁ, ‘ꦩꦴ ꦩꦁ ꦏꦶꦕ꧀ꦕꦁ ꦏꦶꦕ꧀ꦕꦏꦴꦭꦺ ꦧ꧀ꦪꦣꦺꦱꦶ’;

ꦠꦁ ꦠꦴꦢꦶꦱꦁ ꦥꦛꦶꦏꦠꦏꦶꦕ꧀ꦕꦏꦴꦫꦶꦁ, ꦤ ꦠꦁ ꦏꦶꦕ꧀ꦕꦁ ꦏꦶꦕ꧀ꦕꦏꦴꦭꦺ ꦧ꧀ꦪꦣꦺꦠꦷ’’ꦠꦶ.

ꦠꦠ꧀ꦡ ꦱꦏꦩ꧀ꦩꦸꦤꦴꦠꦶ ꦄꦤꦴꦒꦠꦨꦪꦁ ꦢꦶꦱ꧀ꦮꦴ ꦥꦸꦫꦺꦠꦫꦁ ꦏꦠꦺꦤ ꦄꦠ꧀ꦠꦤꦺꦴ ꦏꦩ꧀ꦩꦺꦤ. ꦱꦺꦴꦠ꧀ꦡꦶ ꦮꦲꦶꦁꦱꦹꦠꦶ ꦑꦺꦩꦺꦤ ꦒꦩꦶꦁꦱꦸ. ꦮꦴꦟꦶꦗꦴꦠꦶ ꦱꦩꦸꦢ꧀ꦢꦺ ꦮꦶꦕꦫꦟꦨꦴꦮꦺꦤ ꦮꦝ꧀ꦞꦏꦷ ꦮꦸꦠ꧀ꦠꦴ. ꦥꦛꦶꦮꦶꦗ꧀ꦙꦶꦪꦴꦤꦴꦠꦶ ꦌꦮꦁ, ꦨꦶꦏ꧀ꦑꦮꦺ, ꦥꦜꦩꦠꦫꦁ ꦏꦠ꧀ꦠꦧ꧀ꦧꦁ ꦄꦤꦴꦒꦠꦁ ꦄꦠ꧀ꦡꦁ ꦥꦛꦶꦮꦶꦗ꧀ꦙꦶꦠ꧀ꦮꦴ ꦆꦣꦭꦺꦴꦏꦺ ꦨꦹꦫꦶꦥꦚ꧀ꦚꦺꦴ ꦏꦸꦭꦥꦸꦠ꧀ꦠꦺꦴ ꦄꦥ꧀ꦥꦩꦠ꧀ꦠꦏꦩ꧀ꦥꦶ ꦄꦠ꧀ꦠꦤꦺꦴ ꦄꦠ꧀ꦡꦁ ꦤ ꦄꦕ꧀ꦕꦺꦠꦶ ꦤꦴꦠꦶꦮꦠ꧀ꦠꦠꦶ, ꦤ ꦲꦴꦥꦺꦠꦷꦠꦶ ꦄꦠ꧀ꦡꦺꦴ. ꦄꦥ꧀ꦥꦛꦶꦮꦶꦗ꧀ꦙꦶꦪꦠ꧀ꦡꦤ꧀ꦠꦶ ꦄꦥ꧀ꦥꦛꦶꦮꦶꦗ꧀ꦙꦶꦠ꧀ꦮꦴ ꦄꦠ꧀ꦡꦁ, ꦥꦜꦩꦩꦺꦮ ꦏꦠ꧀ꦠꦧ꧀ꦧꦁ ꦄꦏꦠ꧀ꦮꦴꦠꦶ ꦄꦠ꧀ꦡꦺꦴ. ꦥꦕ꧀ꦕꦸꦥ꧀ꦥꦤ꧀ꦤꦺꦠꦶ ꦪꦢꦴ ꦠꦁ ꦄꦤꦴꦒꦠꦁ ꦄꦠ꧀ꦡꦗꦴꦠꦁ ꦈꦥ꧀ꦥꦗ꧀ꦗꦠꦶ, ꦠꦢꦴ ꦠꦱ꧀ꦩꦶꦁ ꦥꦕ꧀ꦕꦸꦥ꧀ꦥꦤ꧀ꦤꦺ ꦱꦷꦢꦤ꧀ꦠꦶ, ꦄꦠ꧀ꦡꦺ ꦗꦴꦠꦺ ꦄꦠ꧀ꦠꦤꦺꦴ ꦥꦠꦶꦛ꧀ꦜꦁ ꦤ ꦭꦨꦤ꧀ꦠꦶ, ꦱꦩꦸꦢ꧀ꦢꦺ ꦠꦺ ꦧꦴꦭꦮꦝ꧀ꦞꦏꦷ ꦩꦤꦸꦱ꧀ꦱꦴ ꦮꦶꦪ ꦮꦶꦤꦴꦱꦁ ꦥꦴꦥꦸꦟꦤ꧀ꦠꦶ.

ꦄꦤꦴꦒꦠꦤ꧀ꦠꦶ ꦨꦶꦏ꧀ꦑꦮꦺ, ꦥꦟ꧀ꦝꦶꦠꦥꦸꦫꦶꦱꦺꦴ ꦄꦤꦴꦒꦠꦁ ꦥꦜꦩꦠꦫꦁ ꦏꦠ꧀ꦠꦧ꧀ꦧꦏꦶꦕ꧀ꦕꦁ ꦱꦩ꧀ꦥꦫꦴꦪꦶꦏꦁ ꦮꦴ ꦢꦶꦛ꧀ꦜꦣꦩ꧀ꦩꦶꦏꦁ ꦮꦴ ꦥꦛꦶꦏꦪꦶꦫꦴꦡ, ꦥꦸꦫꦺꦠꦫꦩꦺꦮ ꦏꦫꦺꦪ꧀ꦪ. ꦏꦶꦁꦏꦴꦫꦟꦴ? ꦩꦴ ꦩꦁ ꦏꦶꦕ꧀ꦕꦁ ꦏꦶꦕ꧀ꦕꦏꦴꦭꦺ ꦧ꧀ꦪꦣꦺꦱꦶ, ꦥꦸꦫꦺ ꦏꦠ꧀ꦠꦧ꧀ꦧꦚ꧀ꦲꦶ ꦥꦸꦫꦺ ꦄꦏꦪꦶꦫꦩꦴꦤꦁ ꦥꦕ꧀ꦖꦴ ꦥꦕ꧀ꦕꦸꦥ꧀ꦥꦤ꧀ꦤꦨꦴꦮꦥ꧀ꦥꦠ꧀ꦠꦁ ꦄꦠ꧀ꦠꦤꦺꦴ ꦏꦶꦕ꧀ꦕꦏꦴꦭꦺ ꦏꦴꦪꦕꦶꦠ꧀ꦠꦴꦧꦴꦣꦺꦤ ꦧ꧀ꦪꦣꦺꦠꦶ, ꦠꦁ ꦩꦁ ꦩꦴ ꦧ꧀ꦪꦣꦺꦱꦷꦠꦶ ꦥꦜꦩꦩꦺꦮ ꦤꦁ ꦥꦟ꧀ꦝꦶꦠꦺꦴ ꦏꦫꦺꦪ꧀ꦪ. ꦠꦁ ꦠꦴꦢꦶꦱꦤ꧀ꦠꦶ ꦪꦡꦴ ꦥꦟ꧀ꦝꦶꦠꦁ ꦥꦸꦫꦶꦱꦁ. ꦥꦛꦶꦏꦠꦏꦶꦕ꧀ꦕꦏꦴꦫꦶꦤ꧀ꦠꦶ ꦥꦛꦶꦏꦕ꧀ꦕꦺꦮ ꦏꦠ꧀ꦠꦧ꧀ꦧꦏꦶꦕ꧀ꦕꦏꦴꦫꦶꦤꦁ. ꦠꦁ ꦏꦶꦕ꧀ꦕꦁ ꦏꦶꦕ꧀ꦕꦏꦴꦭꦺꦠꦶ ꦄꦤꦴꦒꦠꦁ ꦏꦶꦕ꧀ꦕꦁ ꦏꦪꦶꦫꦩꦴꦤꦁ ꦥꦕ꧀ꦖꦴ ꦥꦕ꧀ꦕꦸꦥ꧀ꦥꦤ꧀ꦤꦨꦴꦮꦥ꧀ꦥꦠ꧀ꦠꦁ ꦄꦠ꧀ꦠꦤꦺꦴ ꦏꦶꦕ꧀ꦕꦏꦴꦭꦺ ꦏꦴꦪꦕꦶꦠ꧀ꦠꦴꦧꦴꦣꦏꦴꦭꦺ ꦠꦴꦢꦶꦱꦁ ꦥꦸꦫꦶꦩꦁ ꦤ ꦧ꧀ꦪꦣꦺꦠꦶ ꦤ ꦧꦴꦣꦠꦶ. ꦏꦱ꧀ꦩꦴ? ꦥꦸꦫꦺꦪꦺꦮ ꦏꦠꦠ꧀ꦠꦴꦠꦶ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ ‘‘ꦤ, ꦨꦶꦏ꧀ꦑꦮꦺ, ꦆꦢꦴꦤꦺꦮ, ꦥꦸꦧ꧀ꦧꦺꦥꦶ ꦢꦺꦮꦢꦠ꧀ꦠꦺꦴ ꦥꦕ꧀ꦕꦸꦥ꧀ꦥꦤ꧀ꦤꦱꦸꦑꦺ ꦭꦒ꧀ꦒꦺꦴ ꦄꦤꦴꦒꦠꦨꦪꦁ ꦄꦤꦺꦴꦭꦺꦴꦏꦺꦠ꧀ꦮꦴ ꦱꦥꦫꦶꦱꦺꦴ ꦮꦶꦤꦴꦱꦁ ꦥꦠ꧀ꦠꦺꦴ’’ꦠꦶ ꦮꦠ꧀ꦮꦴ ꦗꦴꦠꦏꦁ ꦱꦩꦺꦴꦣꦴꦤꦺꦱꦶ – ‘‘ꦠꦢꦴ ꦧꦴꦭꦮꦝ꧀ꦞꦏꦷ ꦢꦺꦮꦢꦠ꧀ꦠꦺꦴ ꦄꦲꦺꦴꦱꦶ, ꦢꦏ꧀ꦑꦶꦟꦢꦶꦱꦴꦪ ꦜꦶꦠꦺꦴ ꦄꦣꦩ꧀ꦩꦶꦏꦢꦺꦮꦥꦸꦠ꧀ꦠꦺꦴ ꦏꦺꦴꦏꦴꦭꦶꦏꦺꦴ, ꦈꦠ꧀ꦠꦫꦢꦶꦱꦴꦪ ꦜꦶꦠꦺꦴ ꦣꦩ꧀ꦩꦶꦏꦢꦺꦮꦥꦸꦠ꧀ꦠꦺꦴ ꦱꦴꦫꦶꦥꦸꦠ꧀ꦠꦺꦴ, ꦥꦟ꧀ꦝꦶꦠꦮꦝ꧀ꦞꦏꦷ ꦥꦤ ꦄꦲꦩꦺꦮ ꦄꦲꦺꦴꦱꦶ’’ꦤ꧀ꦠꦶ.

ꦱꦩꦸꦢ꧀ꦢꦮꦴꦟꦶꦗꦗꦴꦠꦏꦮꦟ꧀ꦟꦤꦴ ꦠꦠꦶꦪꦴ.

[꧔꧖꧗] ꧔. ꦏꦴꦩꦗꦴꦠꦏꦮꦟ꧀ꦟꦤꦴ

ꦏꦴꦩꦁ ꦏꦴꦩꦪꦩꦴꦤꦱ꧀ꦱꦴꦠꦶ ꦆꦢꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦄꦚ꧀ꦚꦠꦫꦁ ꦧ꧀ꦫꦴꦲ꧀ꦩꦟꦁ ꦄꦴꦫꦧ꧀ꦨ ꦏꦡꦺꦱꦶ. ꦌꦏꦺꦴ ꦏꦶꦫ ꦱꦴꦮꦠ꧀ꦡꦶꦮꦴꦱꦷ ꦧ꧀ꦫꦴꦲ꧀ꦩꦟꦺꦴ ꦄꦕꦶꦫꦮꦠꦷꦠꦷꦫꦺ ꦑꦺꦠ꧀ꦠꦏꦫꦟꦠ꧀ꦡꦴꦪ ꦄꦫꦚ꧀ꦚꦁ ꦏꦺꦴꦛꦺꦱꦶ. ꦱꦠ꧀ꦡꦴ ꦠꦱ꧀ꦱ ꦈꦥꦤꦶꦱ꧀ꦱꦪꦁ ꦢꦶꦱ꧀ꦮꦴ ꦱꦴꦮꦠ꧀ꦡꦶꦁ ꦥꦶꦟ꧀ꦝꦴꦪ ꦥꦮꦶꦱꦤ꧀ꦠꦺꦴ ꦩꦒ꧀ꦒꦴ ꦎꦏ꧀ꦏꦩ꧀ꦩ ꦠꦺꦤ ꦱꦢ꧀ꦣꦶꦁ ꦥꦛꦶꦱꦤ꧀ꦡꦴꦫꦁ ꦏꦠ꧀ꦮꦴ ‘‘ꦏꦶꦁ ꦏꦫꦺꦴꦱꦶ ꦧ꧀ꦫꦴꦲ꧀ꦩꦟꦴ’’ꦠꦶ ꦮꦠ꧀ꦮꦴ ‘‘ꦑꦺꦠ꧀ꦠꦛ꧀ꦜꦴꦤꦁ ꦏꦺꦴꦛꦴꦥꦺꦩꦶ ꦨꦺꦴ, ꦒꦺꦴꦠꦩꦴ’’ꦠꦶ ꦮꦸꦠ꧀ꦠꦺ ‘‘ꦱꦴꦣꦸ, ꦧ꧀ꦫꦴꦲ꧀ꦩꦟ, ꦏꦩ꧀ꦩꦁ ꦏꦫꦺꦴꦲꦷ’’ꦠꦶ ꦮꦠ꧀ꦮꦴ ꦄꦒꦩꦴꦱꦶ. ꦌꦠꦺꦤꦺꦮ ꦈꦥꦴꦪꦺꦤ ꦖꦶꦤ꧀ꦤꦫꦸꦏ꧀ꦑꦺ ꦲꦴꦫꦺꦠ꧀ꦮꦴ ꦑꦺꦠ꧀ꦠꦱ꧀ꦱ ꦱꦺꦴꦣꦤꦏꦴꦭꦺ ꦏꦱꦤꦏꦴꦭꦺ ꦏꦺꦢꦴꦫꦧꦤ꧀ꦣꦤꦏꦴꦭꦺ ꦮꦥꦤꦏꦴꦭꦺꦠꦶ ꦥꦸꦤꦥ꧀ꦥꦸꦤꦁ ꦒꦤ꧀ꦠ꧀ꦮꦴ ꦠꦺꦤ ꦱꦢ꧀ꦣꦶꦁ ꦥꦛꦶꦱꦤ꧀ꦡꦴꦫꦩꦏꦴꦱꦶ. ꦮꦥꦤꦢꦶꦮꦱꦺ ꦥꦤ ꦱꦺꦴ ꦧ꧀ꦫꦴꦲ꧀ꦩꦟꦺꦴ ‘‘ꦄꦗ꧀ꦗ, ꦨꦺꦴ ꦒꦺꦴꦠꦩ, ꦩꦪ꧀ꦲꦁ ꦮꦥ꧀ꦥꦩꦔ꧀ꦒꦭꦁ, ꦄꦲꦁ ꦆꦩꦱ꧀ꦩꦶꦁ ꦱꦱ꧀ꦱꦺ ꦤꦶꦥ꧀ꦦꦤ꧀ꦤꦺ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦩꦲꦴꦢꦴꦤꦁ ꦢꦱ꧀ꦱꦴꦩꦷ’’ꦠꦶ ꦄꦴꦲ. ꦱꦠ꧀ꦡꦴ ꦠꦸꦟ꧀ꦲꦷꦨꦴꦮꦺꦤ ꦄꦣꦶꦮꦴꦱꦺꦠ꧀ꦮꦴ ꦥꦏ꧀ꦏꦴꦩꦶ. ꦥꦸꦤꦺꦏꦢꦶꦮꦱꦁ ꦧ꧀ꦫꦴꦲ꧀ꦩꦟꦺꦴ ꦱꦱ꧀ꦱꦁ ꦎꦭꦺꦴꦏꦺꦤ꧀ꦠꦺꦴ ꦄꦛ꧀ꦜꦴꦱꦶ. ꦱꦠ꧀ꦡꦴꦥꦶ ꦠꦠ꧀ꦡ ꦒꦤ꧀ꦠ꧀ꦮꦴ ‘‘ꦏꦶꦁ ꦏꦫꦺꦴꦱꦶ ꦧ꧀ꦫꦴꦲ꧀ꦩꦟꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦱꦱ꧀ꦱꦁ ꦎꦭꦺꦴꦏꦺꦩꦶ ꦨꦺꦴ ꦒꦺꦴꦠꦩꦴ’’ꦠꦶ ꦮꦸꦠ꧀ꦠꦺ ‘‘ꦱꦴꦣꦸ ꦧ꧀ꦫꦴꦲ꧀ꦩꦟꦴ’’ꦠꦶ ꦮꦠ꧀ꦮꦴ ꦥꦏ꧀ꦏꦴꦩꦶ. ꦠꦢꦴ ꦧ꧀ꦫꦴꦲ꧀ꦩꦟꦺꦴ ꦕꦶꦤ꧀ꦠꦺꦱꦶ ‘‘ꦱꦩꦟꦺꦴ ꦒꦺꦴꦠꦩꦺꦴ ꦄꦨꦶꦟ꧀ꦲꦁ ꦄꦴꦒꦕ꧀ꦖꦠꦶ, ꦤꦶꦱ꧀ꦱꦁꦱꦪꦁ ꦨꦠ꧀ꦠꦺꦤ ꦄꦠ꧀ꦡꦶꦏꦺꦴ, ꦢꦱ꧀ꦱꦴꦩꦲꦁ ꦠꦱ꧀ꦱ ꦨꦠ꧀ꦠ’’ꦤ꧀ꦠꦶ. ꦠꦱ꧀ꦱꦺꦮꦁ ꦕꦶꦤ꧀ꦠꦺꦠ꧀ꦮꦴ ꦒꦺꦲꦁ ꦒꦠꦢꦶꦮꦱꦺ ꦱꦠ꧀ꦡꦴꦥꦶ ꦠꦠ꧀ꦡ ꦄꦒꦩꦴꦱꦶ. ꦄꦡ ꦧ꧀ꦫꦴꦲ꧀ꦩꦟꦱ꧀ꦱ ꦄꦠꦶꦮꦶꦪ ꦮꦶꦱ꧀ꦱꦴꦱꦺꦴ ꦄꦲꦺꦴꦱꦶ. ꦄꦥꦫꦨꦴꦒꦺ ꦥꦫꦶꦟꦠꦺ ꦱꦱ꧀ꦱꦺ ‘‘ꦱ꧀ꦮꦺ ꦑꦺꦠ꧀ꦠꦁ ꦭꦴꦪꦶꦱ꧀ꦱꦴꦩꦷ’’ꦠꦶ ꦱꦤ꧀ꦤꦶꦛ꧀ꦜꦴꦤꦁ ꦏꦠ꧀ꦮꦴ ꦤꦶꦥꦤ꧀ꦤꦺ ꦧ꧀ꦫꦴꦲ꧀ꦩꦟꦺ ꦄꦕꦶꦫꦮꦠꦶꦪꦴ ꦈꦥꦫꦶ ꦱꦧ꧀ꦧꦫꦠ꧀ꦠꦶꦁ ꦏꦫꦏꦮꦱ꧀ꦱꦁ ꦮꦱ꧀ꦱꦶ. ꦩꦲꦺꦴꦓꦺꦴ ꦄꦴꦒꦤ꧀ꦠ꧀ꦮꦴ ꦌꦏꦤꦴꦭ꦳ꦶꦩꦠ꧀ꦠꦩ꧀ꦥꦶ ꦄꦤꦮꦱꦺꦱꦁ ꦏꦠ꧀ꦮꦴ ꦱꦧ꧀ꦧꦁ ꦱꦱ꧀ꦱꦁ ꦱꦩꦸꦢ꧀ꦢꦁ ꦥꦮꦺꦱꦺꦱꦶ. ꦧ꧀ꦫꦴꦲ꧀ꦩꦟꦺꦴ ꦎꦓꦩ꧀ꦲꦶ ꦥꦠꦶꦠꦺ ꦱꦱ꧀ꦱꦮꦶꦤꦴꦱꦁ ꦎꦭꦺꦴꦏꦺꦠ꧀ꦮꦴ ꦱꦏꦨꦴꦮꦺꦤ ꦱꦟ꧀ꦜꦴꦠꦸꦁ ꦤꦴꦲꦺꦴꦱꦶ, ꦧꦭꦮꦱꦺꦴꦏꦴꦨꦶꦨꦹꦠꦺꦴ ꦲꦠ꧀ꦡꦺꦤ ꦈꦫꦁ ꦥꦲꦫꦶꦠ꧀ꦮꦴ ꦥꦫꦶꦢꦺꦮꦩꦴꦤꦺꦴ ꦫꦺꦴꦢꦤ꧀ꦠꦺꦴ ꦤꦶꦥꦗ꧀ꦗꦶ.

ꦱꦠ꧀ꦡꦴ ꦥꦕ꧀ꦕꦹꦱꦱꦩꦪꦺ ꦱꦺꦴꦏꦴꦨꦶꦨꦹꦠꦁ ꦧ꧀ꦫꦴꦲ꧀ꦩꦟꦁ ꦢꦶꦱ꧀ꦮꦴ ‘‘ꦧ꧀ꦫꦴꦲ꧀ꦩꦟꦱ꧀ꦱꦴꦮꦱ꧀ꦱꦪꦺꦴ ꦨꦮꦶꦱ꧀ꦱꦴꦩꦷ’’ꦠꦶ ꦥꦸꦤꦢꦶꦮꦱꦺ ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦨꦶꦏ꧀ꦑꦹ ꦮꦶꦲꦴꦫꦁ ꦥꦺꦱꦺꦠ꧀ꦮꦴ ꦥꦕ꧀ꦖꦴꦱꦩꦟꦺꦤ ꦱꦢ꧀ꦣꦶꦁ ꦠꦱ꧀ꦱ ꦒꦺꦲꦢ꧀ꦮꦴꦫꦁ ꦄꦒꦩꦴꦱꦶ. ꦧ꧀ꦫꦴꦲ꧀ꦩꦟꦺꦴ ꦱꦠ꧀ꦡꦸ ꦄꦴꦒꦠꦨꦴꦮꦁ ꦱꦸꦠ꧀ꦮꦴ ‘‘ꦥꦛꦶꦱꦤ꧀ꦡꦴꦫꦠ꧀ꦡꦴꦪ ꦩꦺ ꦱꦲꦴꦪꦺꦴ ꦄꦴꦒꦠꦺꦴ ꦨꦮꦶꦱ꧀ꦱꦠꦷ’’ꦠꦶ ꦥꦛꦶꦭꦢ꧀ꦣꦱ꧀ꦱꦴꦱꦺꦴ ꦄꦴꦱꦤꦁ ꦥꦚ꧀ꦚꦥꦺꦱꦶ. ꦱꦠ꧀ꦡꦴ ꦥꦮꦶꦱꦶꦠ꧀ꦮꦴ ꦥꦚ꧀ꦚꦠ꧀ꦠꦴꦱꦤꦺ ꦤꦶꦱꦷꦢꦶꦠ꧀ꦮꦴ ‘‘ꦧ꧀ꦫꦴꦲ꧀ꦩꦟ, ꦏꦱ꧀ꦩꦴ ꦠ꧀ꦮꦁ ꦢꦸꦩ꧀ꦩꦤꦺꦴꦱꦶ, ꦏꦶꦁ ꦠꦺ ꦄꦦꦴꦱꦸꦏ’’ꦤ꧀ꦠꦶ ꦥꦸꦕ꧀ꦖꦶ. ꦨꦺꦴ ꦒꦺꦴꦠꦩ, ꦄꦕꦶꦫꦮꦠꦷꦠꦷꦫꦺ ꦩꦪꦴ ꦫꦸꦏ꧀ꦑꦕ꧀ꦖꦺꦢꦤꦠꦺꦴ ꦥꦛ꧀ꦜꦴꦪ ꦏꦠꦁ ꦏꦩ꧀ꦩꦁ ꦠꦸꦩ꧀ꦲꦺ ꦗꦴꦤꦴꦡ, ꦄꦲꦁ ‘‘ꦆꦩꦱ꧀ꦩꦶꦁ ꦱꦱ꧀ꦱꦺ ꦤꦶꦥ꧀ꦦꦤ꧀ꦤꦺ ꦠꦸꦩ꧀ꦲꦴꦏꦁ ꦢꦴꦤꦁ ꦢꦱ꧀ꦱꦴꦩꦷ’’ꦠꦶ ꦮꦶꦕꦫꦴꦩꦶ, ꦆꦢꦴꦤꦶ ꦩꦺ ꦱꦧ꧀ꦧꦁ ꦠꦁ ꦱꦱ꧀ꦱꦁ ꦩꦲꦺꦴꦓꦺꦴ ꦱꦩꦸꦢ꧀ꦢꦩꦺꦮ ꦥꦮꦺꦱꦺꦱꦶ, ꦏꦶꦚ꧀ꦕꦶ ꦄꦮꦱꦶꦛ꧀ꦜꦁ ꦤꦠ꧀ꦡꦶ, ꦱꦏꦛꦱꦠꦩꦠ꧀ꦠꦁ ꦣꦚ꧀ꦚꦁ ꦮꦶꦤꦛ꧀ꦜꦁ, ꦠꦺꦤ ꦩꦺ ꦩꦲꦴꦱꦺꦴꦏꦺꦴ ꦈꦥ꧀ꦥꦤ꧀ꦤꦺꦴꦠꦶ. ‘‘ꦏꦶꦁ ꦥꦤ, ꦧ꧀ꦫꦴꦲ꧀ꦩꦟ, ꦱꦺꦴꦕꦤ꧀ꦠꦱ꧀ꦱ ꦤꦛ꧀ꦜꦁ ꦥꦸꦤꦴꦒꦕ꧀ꦖꦠꦷ’’ꦠꦶ. ‘‘ꦤꦺꦴ ꦲꦺꦠꦁ ꦨꦺꦴ ꦒꦺꦴꦠꦩꦴ’’ꦠꦶ. ‘‘ꦌꦮꦁ ꦱꦤ꧀ꦠꦺ ꦏꦱ꧀ꦩꦴ ꦱꦺꦴꦕꦱꦶ, ꦆꦩꦺꦱꦁ ꦱꦠ꧀ꦠꦴꦤꦁ ꦣꦤꦣꦚ꧀ꦚꦁ ꦤꦴꦩ ꦈꦥ꧀ꦥꦗ꧀ꦗꦤꦏꦴꦭꦺ ꦈꦥ꧀ꦥꦗ꧀ꦗꦠꦶ, ꦤꦱ꧀ꦱꦤꦏꦴꦭꦺ ꦤꦱ꧀ꦱꦠꦶ, ꦏꦶꦚ꧀ꦕꦶ ꦱꦔ꧀ꦑꦴꦫꦒꦠꦁ ꦄꦤꦱ꧀ꦱꦤꦣꦩ꧀ꦩꦁ ꦤꦴꦩ ꦤꦠ꧀ꦡꦶ, ꦩꦴ ꦕꦶꦤ꧀ꦠꦪꦷ’’ꦠꦶ. ꦆꦠꦶ ꦤꦁ ꦱꦠ꧀ꦡꦴ ꦱꦩꦱ꧀ꦱꦴꦱꦺꦠ꧀ꦮꦴ ꦠꦱ꧀ꦱ ꦱꦥ꧀ꦥꦴꦪꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦏꦴꦩꦱꦸꦠ꧀ꦠꦁ (ꦱꦸ. ꦤꦶ. ꧗꧗꧒ ꦄꦴꦢꦪꦺꦴ) ꦏꦡꦺꦱꦶ. ꦱꦸꦠ꧀ꦠꦥꦫꦶꦪꦺꦴꦱꦴꦤꦺ ꦱꦺꦴꦕꦤ꧀ꦠꦺꦴ ꦧ꧀ꦫꦴꦲ꧀ꦩꦟꦺꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶ. ꦱꦠ꧀ꦡꦴ ꦠꦁ ꦤꦶꦱ꧀ꦱꦺꦴꦏꦁ ꦏꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦮꦶꦲꦴꦫꦁ ꦄꦒꦩꦴꦱꦶ. ‘‘ꦱꦠ꧀ꦡꦴ ꦄꦱꦸꦏꦁ ꦤꦴꦩ ꦧ꧀ꦫꦴꦲ꧀ꦩꦟꦁ ꦱꦺꦴꦏꦱꦭ꧀ꦭꦱꦩꦥ꧀ꦥꦶꦠꦁ ꦤꦶꦱ꧀ꦱꦺꦴꦏꦁ ꦏꦠ꧀ꦮꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦥꦺꦱꦷ’’ꦠꦶ ꦱꦏꦭꦤꦒꦫꦁ ꦄꦚ꧀ꦚꦴꦱꦶ. ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ ‘‘ꦄꦴꦮꦸꦱꦺꦴ, ꦢꦱꦧꦭꦺꦴ ꦧ꧀ꦫꦴꦲ꧀ꦩꦟꦺꦤ ꦱꦢ꧀ꦣꦶꦁ ꦩꦶꦠ꧀ꦠꦁ ꦏꦠ꧀ꦮꦴ ꦮꦶꦱ꧀ꦱꦴꦱꦶꦏꦺꦴ ꦲꦸꦠ꧀ꦮꦴ ꦈꦥꦴꦪꦺꦤꦺꦮ ꦠꦱ꧀ꦱ ꦱꦺꦴꦏꦱꦭ꧀ꦭꦱꦩꦥ꧀ꦥꦶꦠꦱ꧀ꦱ ꦣꦩ꧀ꦩꦁ ꦢꦺꦱꦺꦠ꧀ꦮꦴ ꦠꦁ ꦤꦶꦱ꧀ꦱꦺꦴꦏꦁ ꦏꦠ꧀ꦮꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦥꦺꦱꦷ’’ꦠꦶ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ ‘‘ꦤ, ꦨꦶꦏ꧀ꦑꦮꦺ, ꦆꦢꦴꦤꦺꦮ, ꦥꦸꦧ꧀ꦧꦺꦥꦴꦲꦁ ꦌꦠꦁ ꦤꦶꦱ꧀ꦱꦺꦴꦏꦩꦏꦴꦱꦶ’’ꦤ꧀ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦱ꧀ꦱ ꦫꦚ꧀ꦚꦺꦴ ꦢ꧀ꦮꦺ ꦥꦸꦠ꧀ꦠꦴ ꦄꦲꦺꦱꦸꦁ. ꦱꦺꦴ ꦗꦺꦛ꧀ꦜꦏꦱ꧀ꦱ ꦈꦥꦫꦗ꧀ꦗꦁ ꦄꦢꦴꦱꦶ, ꦏꦤꦶꦛ꧀ꦜꦱ꧀ꦱ ꦱꦺꦤꦴꦥꦠꦶꦛ꧀ꦜꦴꦤꦁ. ꦄꦥꦫꦨꦴꦒꦺ ꦧ꧀ꦫꦲ꧀ꦩꦢꦠ꧀ꦠꦺ ꦏꦴꦭꦏꦠꦺ ꦄꦩꦕ꧀ꦕꦴ ꦗꦺꦛ꧀ꦜꦏꦱ꧀ꦱ ꦄꦨꦶꦱꦺꦏꦁ ꦥꦛ꧀ꦜꦥꦺꦱꦸꦁ. ꦱꦺꦴ ‘‘ꦤ ꦩꦪ꧀ꦲꦁ ꦫꦗ꧀ꦗꦺꦤꦠ꧀ꦡꦺꦴ, ꦏꦤꦶꦛ꧀ꦜꦱ꧀ꦱ ꦩꦺ ꦢꦺꦡꦴ’’ꦠꦶ ꦮꦠ꧀ꦮꦴ ꦥꦸꦤꦥ꧀ꦥꦸꦤꦁ ꦪꦴꦕꦶꦪꦩꦴꦤꦺꦴꦥꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ꦏꦤꦶꦛ꧀ꦜꦱ꧀ꦱ ꦄꦨꦶꦱꦺꦏꦺ ꦏꦠꦺ ‘‘ꦤ ꦩꦺ ꦆꦱ꧀ꦱꦫꦶꦪꦺꦤꦠ꧀ꦡꦺꦴ’’ꦠꦶ ꦈꦥꦫꦗ꧀ꦗꦴꦢꦷꦤꦶꦥꦶ ꦤ ꦆꦕ꧀ꦖꦶ. ‘‘ꦠꦺꦤ ꦲꦶ ꦱꦴꦢꦹꦤꦶ ꦨꦺꦴꦗꦤꦴꦤꦶ ꦨꦸꦚ꧀ꦗꦤ꧀ꦠꦺꦴ ꦆꦣꦺꦮ ꦮꦱꦴꦲꦷ’’ꦠꦶ ꦮꦸꦠ꧀ꦠꦺꦥꦶ ‘‘ꦤ ꦩꦺ ꦆꦩꦱ꧀ꦩꦶꦁ ꦤꦒꦫꦺ ꦏꦶꦕ꧀ꦕꦁ ꦄꦠ꧀ꦡꦷ’’ꦠꦶ ꦧꦴꦫꦴꦟꦱꦶꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦥꦕ꧀ꦕꦤ꧀ꦠꦁ ꦒꦤ꧀ꦠ꧀ꦮꦴ ꦌꦏꦁ ꦱꦺꦛ꧀ꦜꦶꦏꦸꦭꦁ ꦤꦶꦱ꧀ꦱꦴꦪ ꦱꦲꦠ꧀ꦡꦺꦤ ꦏꦩ꧀ꦩꦁ ꦏꦫꦺꦴꦤ꧀ꦠꦺꦴ ꦮꦱꦶ. ꦠꦺ ꦄꦥꦫꦨꦴꦒꦺ ꦠꦱ꧀ꦱ ꦫꦴꦗꦏꦸꦩꦴꦫꦨꦴꦮꦁ ꦚꦠ꧀ꦮꦴ ꦏꦩ꧀ꦩꦁ ꦏꦴꦠꦸꦁ ꦤꦴꦢꦁꦱꦸ, ꦏꦸꦩꦴꦫꦥꦫꦶꦲꦴꦫꦺꦤꦺꦮ ꦠꦁ ꦥꦫꦶꦲꦫꦶꦁꦱꦸ. ꦄꦥꦫꦨꦴꦒꦺ ꦫꦴꦗꦏꦩ꧀ꦩꦶꦏꦴ ꦑꦺꦠ꧀ꦠꦥ꧀ꦥꦩꦴꦟꦒ꧀ꦒꦲꦟꦠ꧀ꦡꦴꦪ ꦠꦁ ꦒꦴꦩꦁ ꦄꦒꦩꦁꦱꦸ. ꦱꦺꦛ꧀ꦜꦶ ꦫꦴꦗꦏꦸꦩꦴꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦱꦴꦩꦶ, ꦩꦪꦁ ꦠꦸꦩ꧀ꦲꦺ ꦥꦺꦴꦱꦺꦩ, ꦏꦤꦶꦛ꧀ꦜꦨꦴꦠꦶꦏꦱ꧀ꦱ ꦥꦟ꧀ꦟꦁ ꦥꦺꦱꦺꦠ꧀ꦮꦴ ꦄꦩ꧀ꦲꦴꦏꦁ ꦧꦭꦶꦁ ꦲꦴꦫꦺꦡꦴ’’ꦠꦶ ꦄꦴꦲ. ꦱꦺꦴ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ‘‘ꦄꦲꦁ ꦄꦱꦸꦏꦱꦺꦛ꧀ꦜꦶꦏꦸꦭꦁ ꦤꦴꦩ ꦈꦥꦤꦶꦱ꧀ꦱꦴꦪ ꦮꦱꦴꦩꦶ, ꦩꦁ ꦤꦶꦱ꧀ꦱꦴꦪ ꦌꦠꦺꦱꦁ ꦧꦭꦶꦁ ꦮꦶꦱ꧀ꦱꦗ꧀ꦗꦺꦲꦷ’’ꦠꦶ ꦥꦟ꧀ꦟꦁ ꦥꦺꦱꦺꦱꦶ. ꦫꦴꦗꦴ ‘‘ꦱꦴꦣꦹ’’ꦠꦶ ꦮꦠ꧀ꦮꦴ ꦠꦡꦴ ꦏꦴꦫꦺꦱꦶ.

ꦄꦡ ꦤꦁ ꦱꦏꦭꦒꦴꦩꦮꦴꦱꦶꦤꦺꦴꦥꦶ ꦗꦤꦥꦢꦮꦴꦱꦶꦤꦺꦴꦥꦶ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦩꦪꦁ ꦠꦸꦩ꧀ꦲꦴꦏꦚ꧀ꦚꦺꦮ ꦧꦭꦶꦁ ꦢꦱ꧀ꦱꦴꦩ, ꦄꦩ꧀ꦲꦴꦏꦩ꧀ꦥꦶ ꦱꦸꦔ꧀ꦏꦁ ꦮꦶꦱ꧀ꦱꦗ꧀ꦗꦴꦥꦺꦲꦷ’’ꦠꦶ ꦄꦴꦲꦁꦱꦸ. ꦱꦺꦴ ꦠꦺꦱꦩ꧀ꦥꦶ ꦄꦠ꧀ꦡꦴꦪ ꦥꦟ꧀ꦟꦁ ꦥꦺꦱꦺꦠ꧀ꦮꦴ ꦮꦶꦱ꧀ꦱꦗ꧀ꦗꦴꦥꦺꦱꦶ. ꦠꦠꦺꦴ ꦥꦛ꧀ꦜꦴꦪ ꦠꦺ ꦠꦱ꧀ꦱꦺꦮ ꦧꦭꦶꦁ ꦄꦢꦁꦱꦸ. ꦄꦡꦱ꧀ꦱ ꦩꦲꦴꦭꦴꦨꦱꦏ꧀ꦏꦴꦫꦺꦴ ꦄꦲꦺꦴꦱꦶ, ꦠꦺꦤ ꦱꦢ꧀ꦣꦶꦚ꧀ꦚꦺꦮꦱ꧀ꦱ ꦠꦟ꧀ꦲꦴꦥꦶ ꦩꦲꦠꦷ ꦗꦴꦠꦴ. ꦱꦺꦴ ꦄꦥꦫꦨꦴꦒꦺꦥꦶ ꦱꦧ꧀ꦧꦁ ꦗꦤꦥꦢꦁ ꦪꦴꦕꦶ, ꦈꦥꦝ꧀ꦞꦫꦗ꧀ꦗꦁ ꦪꦴꦕꦶ, ꦏꦤꦶꦛ꧀ꦜꦺꦴꦥꦶ ꦠꦱ꧀ꦱ ꦄꦢꦴꦱꦶꦪꦺꦮ. ꦱꦺꦴ ꦠꦟ꧀ꦲꦴꦪ ꦮꦝ꧀ꦞꦩꦴꦤꦴꦪ ꦈꦥꦝ꧀ꦞꦫꦗ꧀ꦗꦺꦤꦥꦶ ꦄꦱꦤ꧀ꦠꦸꦛ꧀ꦜꦺꦴ ‘‘ꦫꦗ꧀ꦗꦁ ꦒꦟ꧀ꦲꦶꦱ꧀ꦱꦴꦩꦷ’’ꦠꦶ ꦗꦤꦥꦢꦥꦫꦶꦮꦸꦠꦺꦴ ꦠꦁ ꦤꦒꦫꦁ ꦒꦤ꧀ꦠ꧀ꦮꦴ ꦧꦲꦶꦤꦒꦫꦺ ꦜꦠ꧀ꦮꦴ ‘‘ꦫꦗ꧀ꦗꦁ ꦮꦴ ꦩꦺ ꦢꦺꦠꦸ ꦪꦸꦢ꧀ꦣꦁ ꦮꦴ’’ꦠꦶ ꦏꦤꦶꦛ꧀ꦜꦱ꧀ꦱ ꦥꦟ꧀ꦟꦁ ꦥꦲꦶꦟꦶ. ꦏꦤꦶꦛ꧀ꦜꦺꦴ ꦕꦶꦤ꧀ꦠꦺꦱꦶ ‘‘ꦄꦪꦁ ꦧꦴꦭꦺꦴ ꦥꦸꦧ꧀ꦧꦺ ꦫꦗ꧀ꦗꦩ꧀ꦥꦶ ꦈꦥꦫꦗ꧀ꦗꦴꦢꦷꦤꦶꦥꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ꦆꦢꦴꦤꦶ ‘ꦪꦸꦢ꧀ꦣꦺꦤ ꦒꦟ꧀ꦲꦴꦩꦷ’ꦠꦶ ꦮꦢꦠꦶ, ꦱꦕꦺ ꦑꦺꦴ ꦥꦤꦴꦲꦁ ꦆꦩꦁ ꦪꦸꦢ꧀ꦣꦺꦤ ꦩꦴꦫꦺꦱ꧀ꦱꦴꦩꦶ, ꦒꦫꦲꦴ ꦩꦺ ꦨꦮꦶꦱ꧀ꦱꦠꦶ, ꦏꦶꦁ ꦩꦺ ꦫꦗ꧀ꦗꦺꦤꦴ’’ꦠꦶ. ꦄꦡꦱ꧀ꦱ ‘‘ꦄꦭꦁ ꦪꦸꦢ꧀ꦣꦺꦤ, ꦫꦗ꧀ꦗꦁ ꦒꦟ꧀ꦲꦠꦹ’’ꦠꦶ ꦥꦺꦱꦺꦱꦶ. ꦱꦺꦴ ꦫꦗ꧀ꦗꦁ ꦒꦟ꧀ꦲꦶꦠ꧀ꦮꦴ ꦏꦤꦶꦛ꧀ꦜꦱ꧀ꦱ ꦈꦥꦫꦗ꧀ꦗꦁ ꦢꦠ꧀ꦮꦴ ꦠꦠꦺꦴ ꦥꦛ꧀ꦜꦴꦪ ꦫꦗ꧀ꦗꦁ ꦏꦴꦫꦺꦤ꧀ꦠꦺꦴ ꦠꦟ꧀ꦲꦴꦮꦱꦶꦏꦺꦴ ꦲꦸꦠ꧀ꦮꦴ ꦌꦏꦺꦤ ꦫꦗ꧀ꦗꦺꦤ ꦄꦱꦤ꧀ꦠꦸꦛ꧀ꦜꦺꦴ ꦢ꧀ꦮꦺ ꦠꦷꦟꦶ ꦫꦗ꧀ꦗꦴꦤꦶ ꦥꦠ꧀ꦡꦺꦠ꧀ꦮꦴ ꦠꦟ꧀ꦲꦴꦪ ꦏꦺꦴꦛꦶꦁ ꦤꦴꦢ꧀ꦢꦱ.

ꦠꦢꦴ ꦱꦏ꧀ꦏꦺꦴ ꦢꦺꦮꦫꦴꦗꦴ ‘‘ꦏꦺ ꦤꦸ ꦑꦺꦴ ꦭꦺꦴꦏꦺ ꦩꦴꦠꦴꦥꦶꦠꦫꦺꦴ ꦈꦥꦛ꧀ꦜꦲꦤ꧀ꦠꦶ, ꦏꦺ ꦢꦴꦤꦴꦢꦷꦤꦶ ꦥꦸꦚ꧀ꦚꦴꦤꦶ ꦏꦫꦺꦴꦤ꧀ꦠꦶ, ꦏꦺ ꦠꦟ꧀ꦲꦴꦮꦱꦶꦏꦴ’’ꦠꦶ ꦎꦭꦺꦴꦏꦺꦤ꧀ꦠꦺꦴ ꦠꦱ꧀ꦱ ꦠꦟ꧀ꦲꦴꦮꦱꦶꦏꦨꦴꦮꦁ ꦚꦠ꧀ꦮꦴ ‘‘ꦄꦪꦁ ꦧꦴꦭꦺꦴ ꦧꦴꦫꦴꦟꦱꦶꦫꦗ꧀ꦗꦺꦤꦥꦶ ꦤ ꦠꦸꦱ꧀ꦱꦠꦶ, ꦄꦲꦁ ꦱꦶꦏ꧀ꦑꦴꦥꦺꦱ꧀ꦱꦴꦩꦶ ꦤ’’ꦤ꧀ꦠꦶ ꦩꦴꦟꦮꦏꦮꦺꦱꦺꦤ ꦫꦴꦗꦢ꧀ꦮꦴꦫꦺ ꦜꦠ꧀ꦮꦴ ‘‘ꦌꦏꦺꦴ ꦈꦥꦴꦪꦏꦸꦱꦭꦺꦴ ꦩꦴꦟꦮꦺꦴ ꦢ꧀ꦮꦴꦫꦺ ꦜꦶꦠꦺꦴ’’ꦠꦶ ꦄꦴꦫꦺꦴꦕꦴꦥꦺꦠ꧀ꦮꦴ ‘‘ꦥꦮꦶꦱꦠꦹ’’ꦠꦶ ꦮꦸꦠ꧀ꦠꦺ ꦥꦮꦶꦱꦶꦠ꧀ꦮꦴ ꦫꦴꦗꦴꦤꦁ ꦗꦪꦴꦥꦺꦠ꧀ꦮꦴ ‘‘ꦏꦶꦁꦏꦴꦫꦟꦴ ꦄꦴꦒꦠꦺꦴꦱꦷ’’ꦠꦶ ꦮꦸꦠ꧀ꦠꦺ ‘‘ꦩꦲꦴꦫꦴꦗ ꦠꦸꦩ꧀ꦲꦴꦏꦁ ꦏꦶꦚ꧀ꦕꦶ ꦮꦠ꧀ꦠꦧ꧀ꦧꦁ ꦄꦠ꧀ꦡꦶ, ꦫꦲꦺꦴ ꦥꦕ꧀ꦕꦴꦱꦷꦱꦴꦩꦷ’’ꦠꦶ ꦄꦴꦲ. ꦱꦏ꧀ꦏꦴꦤꦸꦨꦴꦮꦺꦤ ꦠꦴꦮꦢꦺꦮ ꦩꦤꦸꦱ꧀ꦱꦴ ꦥꦛꦶꦏ꧀ꦏꦩꦶꦁꦱꦸ. ꦄꦡ ꦤꦁ ꦩꦴꦟꦮꦺꦴ ‘‘ꦄꦲꦁ, ꦩꦲꦴꦫꦴꦗ, ꦦꦷꦠꦴꦤꦶ ꦄꦴꦏꦶꦟ꧀ꦟꦩꦤꦸꦱ꧀ꦱꦴꦤꦶ ꦱꦩ꧀ꦥꦤ꧀ꦤꦧꦭꦮꦴꦲꦤꦴꦤꦶ ꦠꦷꦟꦶ ꦤꦒꦫꦴꦤꦶ ꦥꦱ꧀ꦱꦴꦩꦶ, ꦄꦲꦁ ꦠꦺ ꦄꦠ꧀ꦠꦤꦺꦴ ꦄꦴꦤꦸꦨꦴꦮꦺꦤ ꦠꦺꦱꦸ ꦫꦗ꧀ꦗꦁ ꦒꦲꦺꦠ꧀ꦮꦴ ꦢꦱ꧀ꦱꦴꦩꦶ, ꦥꦥꦚ꧀ꦕꦁ ꦄꦏꦠ꧀ꦮꦴ ꦱꦷꦓꦁ ꦒꦤ꧀ꦠꦸꦁ ꦮꦛ꧀ꦛꦠꦷ’’ꦠꦶ ꦄꦴꦲ. ꦱꦺꦴ ꦠꦟ꧀ꦲꦴꦮꦱꦶꦏꦺꦴ ꦫꦴꦗꦴ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦱꦏ꧀ꦏꦴꦤꦸꦨꦴꦮꦺꦤ ‘‘ꦏꦺꦴ ꦮꦴ ꦠ꧀ꦮꦁ, ꦏꦸꦠꦺꦴ ꦮꦴ ꦄꦴꦒꦠꦺꦴ, ꦏꦶꦁ ꦮꦴ ꦠꦺ ꦭꦢ꧀ꦣꦸꦁ ꦮꦛ꧀ꦛꦠꦷ’’ꦠꦶ ꦤ ꦥꦸꦕ꧀ꦖꦶ. ꦱꦺꦴꦥꦶ ꦌꦠ꧀ꦠꦏꦁ ꦮꦠ꧀ꦮꦴ ꦠꦴꦮꦠꦶꦁꦱꦨꦮꦤꦩꦺꦮ ꦄꦒꦩꦴꦱꦶ.

ꦫꦴꦗꦴ ꦄꦩꦕ꧀ꦕꦺ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦌꦏꦺꦴ ꦩꦴꦟꦮꦺꦴ ‘ꦄꦩ꧀ꦲꦴꦏꦁ ꦠꦷꦟꦶ ꦫꦗ꧀ꦗꦴꦤꦶ ꦒꦲꦺꦠ꧀ꦮꦴ ꦢꦱ꧀ꦱꦴꦩꦷ’ꦠꦶ ꦄꦴꦲ, ꦠꦁ ꦥꦏ꧀ꦏꦺꦴꦱꦡ, ꦤꦒꦫꦺ ꦨꦺꦫꦶꦁ ꦕꦫꦴꦥꦺꦠ꧀ꦮꦴ ꦧꦭꦏꦴꦪꦁ ꦱꦤ꧀ꦤꦶꦥꦴꦠꦴꦥꦺꦡ, ꦥꦥꦚ꧀ꦕꦁ ꦄꦏꦠ꧀ꦮꦴ ꦠꦷꦟꦶ ꦫꦗ꧀ꦗꦴꦤꦶ ꦒꦟ꧀ꦲꦶꦱ꧀ꦱꦴꦩꦷ’’ꦠꦶ ꦮꦠ꧀ꦮꦴ ‘‘ꦏꦶꦁ ꦥꦤ ꦠꦺ, ꦩꦲꦴꦫꦴꦗ, ꦠꦱ꧀ꦱ ꦩꦴꦟꦮꦱ꧀ꦱ ꦱꦏ꧀ꦏꦴꦫꦺꦴ ꦮꦴ ꦏꦠꦺꦴ, ꦤꦶꦮꦴꦱꦛ꧀ꦜꦴꦤꦁ ꦮꦴ ꦥꦸꦕ꧀ꦖꦶꦠ’’ꦤ꧀ꦠꦶ ꦮꦸꦠ꧀ꦠꦺ ‘‘ꦤꦺꦮ ꦱꦏ꧀ꦏꦴꦫꦁ ꦄꦏꦴꦱꦶꦁ, ꦤ ꦤꦶꦮꦴꦱꦛ꧀ꦜꦴꦤꦁ ꦥꦸꦕ꧀ꦖꦶꦁ, ꦒꦕ꧀ꦖꦡ ꦤꦁ ꦈꦥꦣꦴꦫꦺꦡꦴ’’ꦠꦶ ꦄꦴꦲ. ꦈꦥꦣꦴꦫꦺꦤ꧀ꦠꦴ ꦤꦁ ꦄꦢꦶꦱ꧀ꦮꦴ ‘‘ꦩꦲꦴꦫꦴꦗ, ꦱꦏꦭꦤꦒꦫꦺ ꦩꦴꦟꦮꦁ ꦤ ꦥꦱ꧀ꦱꦴꦩꦴ’’ꦠꦶ ꦄꦴꦫꦺꦴꦕꦺꦱꦸꦁ. ꦠꦁ ꦱꦸꦠ꧀ꦮꦴ ꦫꦴꦗꦴ ꦢꦺꦴꦩꦤꦱ꧀ꦱꦗꦴꦠꦺꦴ ‘‘ꦠꦷꦱꦸ ꦤꦒꦫꦺꦱꦸ ꦫꦗ꧀ꦗꦁ ꦤꦛ꧀ꦜꦁ, ꦩꦲꦤ꧀ꦠꦺꦤꦩ꧀ꦲꦶ ꦪꦱꦺꦤ ꦥꦫꦶꦲꦷꦤꦺꦴ, ‘ꦤꦺꦮ ꦩꦺ ꦥꦫꦶꦧ꧀ꦧꦪꦁ ꦄꦢꦴꦱꦶ, ꦤ ꦕ ꦥꦸꦕ꧀ꦖꦶ ꦤꦶꦮꦴꦱꦛ꧀ꦜꦴꦤ’ꦤ꧀ꦠꦶ ꦩꦪ꧀ꦲꦁ ꦏꦸꦗ꧀ꦙꦶꦠ꧀ꦮꦴ ꦩꦴꦟꦮꦺꦴ ꦄꦤꦴꦒꦠꦺꦴ ꦨꦮꦶꦱ꧀ꦱꦠꦷ’’ꦠꦶ ꦥꦸꦤꦥ꧀ꦥꦸꦤꦁ ꦕꦶꦤ꧀ꦠꦺꦱꦶ. ꦄꦡꦱ꧀ꦱ ꦠꦟ꧀ꦲꦴꦮꦱꦶꦏꦱ꧀ꦱ ꦱꦫꦷꦫꦺ ꦝꦴꦲꦺꦴ ꦈꦥ꧀ꦥꦗ꧀ꦗꦶ, ꦱꦫꦷꦫꦺ ꦥꦫꦶꦝꦪ꧀ꦲꦤ꧀ꦠꦺ ꦈꦢꦫꦁ ꦑꦺꦴꦨꦺꦠ꧀ꦮꦴ ꦭꦺꦴꦲꦶꦠꦥꦏ꧀ꦑꦤ꧀ꦢꦶꦏꦴ ꦈꦢꦥꦴꦢꦶ. ꦌꦏꦁ ꦨꦴꦗꦤꦁ ꦥꦮꦶꦱꦠꦶ, ꦌꦏꦁ ꦤꦶꦏ꧀ꦑꦩꦠꦶ, ꦮꦺꦗ꧀ꦗꦴ ꦠꦶꦏꦶꦕ꧀ꦖꦶꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ, ꦫꦴꦗꦴ ꦏꦶꦭꦩꦠꦶ. ꦄꦡꦱ꧀ꦱ ꦧ꧀ꦪꦴꦣꦶꦠꦨꦴꦮꦺꦴ ꦱꦏꦭꦤꦒꦫꦺ ꦥꦴꦏꦛꦺꦴ ꦄꦲꦺꦴꦱꦶ.

ꦠꦢꦴ ꦧꦺꦴꦣꦶꦱꦠ꧀ꦠꦺꦴ ꦠꦏ꧀ꦏꦱꦶꦭꦠꦺꦴ ꦱꦧ꧀ꦧꦱꦶꦥ꧀ꦥꦴꦤꦶ ꦈꦒ꧀ꦒꦟ꧀ꦲꦶꦠ꧀ꦮꦴ ꦧꦴꦫꦴꦟꦱꦶꦤꦒꦫꦺ ꦩꦴꦠꦴꦥꦶꦠꦹꦤꦁ ꦱꦤ꧀ꦠꦶꦏꦁ ꦄꦴꦒꦠꦺꦴ ꦠꦁ ꦫꦚ꧀ꦚꦺꦴ ꦥꦮꦠ꧀ꦠꦶꦁ ꦱꦸꦠ꧀ꦮꦴ ‘‘ꦄꦲꦁ ꦠꦶꦏꦶꦕ꧀ꦖꦶꦱ꧀ꦱꦴꦩꦷ’’ꦠꦶ ꦫꦴꦗꦢ꧀ꦮꦴꦫꦁ ꦒꦤ꧀ꦠ꧀ꦮꦴ ‘‘ꦌꦏꦺꦴ ꦏꦶꦫ ꦠꦫꦸꦟꦩꦴꦟꦮꦺꦴ ꦠꦸꦩ꧀ꦲꦺ ꦠꦶꦏꦶꦕ꧀ꦖꦶꦠꦸꦁ ꦄꦴꦒꦠꦺꦴ’’ꦠꦶ ꦄꦴꦫꦺꦴꦕꦴꦥꦺꦱꦶ. ꦫꦴꦗꦴ ‘‘ꦩꦲꦤ꧀ꦠꦩꦲꦤ꧀ꦠꦴ ꦢꦶꦱꦴꦥꦴꦩꦺꦴꦏ꧀ꦑꦮꦺꦗ꧀ꦗꦴꦥꦶ ꦩꦁ ꦠꦶꦏꦶꦕ꧀ꦖꦶꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ, ꦏꦶꦁ ꦠꦫꦸꦟꦩꦴꦟꦮꦺꦴ ꦱꦏ꧀ꦑꦶꦱ꧀ꦱꦠꦶ, ꦥꦫꦶꦧ꧀ꦧꦪꦁ ꦢꦠ꧀ꦮꦴ ꦮꦶꦱ꧀ꦱꦗ꧀ꦗꦺꦡ ꦤ’’ꦤ꧀ꦠꦶ ꦄꦴꦲ. ꦠꦁ ꦱꦸꦠ꧀ꦮꦴ ꦩꦴꦟꦮꦺꦴ ‘‘ꦩꦪ꧀ꦲꦁ ꦮꦺꦗ꧀ꦗꦏꦩ꧀ꦩꦺꦤ ꦮꦺꦠꦤꦁ ꦤꦠ꧀ꦡꦶ, ꦄꦲꦁ ꦠꦶꦏꦶꦕ꧀ꦖꦴꦩꦶ, ꦏꦺꦮꦭꦁ ꦨꦺꦱꦗ꧀ꦗꦩꦹꦭꦩꦠ꧀ꦠꦁ ꦢꦺꦠꦹ’’ꦠꦶ ꦄꦴꦲ. ꦠꦁ ꦱꦸꦠ꧀ꦮꦴ ꦫꦴꦗꦴ ‘‘ꦱꦴꦣꦹ’’ꦠꦶ ꦥꦏ꧀ꦏꦺꦴꦱꦴꦥꦺꦱꦶ. ꦩꦴꦟꦮꦺꦴ ꦫꦴꦗꦴꦤꦁ ꦮꦤ꧀ꦢꦶꦠ꧀ꦮꦴ ‘‘ꦩꦴ ꦨꦴꦪꦶ, ꦩꦲꦴꦫꦴꦗ, ꦄꦲꦁ ꦠꦺ ꦠꦶꦏꦶꦕ꧀ꦖꦴꦩꦶ, ꦄꦥꦶꦕ ꦑꦺꦴ ꦥꦤ ꦩꦺ ꦫꦺꦴꦒꦱ꧀ꦱ ꦱꦩꦸꦛ꧀ꦜꦴꦤꦁ ꦄꦴꦕꦶꦏ꧀ꦑꦴꦲꦷ’’ꦠꦶ ꦄꦴꦲ. ꦫꦴꦗꦴ ꦲꦫꦴꦪꦩꦴꦤꦺꦴ ‘‘ꦏꦶꦁ ꦠꦺ ꦱꦩꦸꦛ꧀ꦜꦴꦤꦺꦤ, ꦨꦺꦱꦗ꧀ꦗꦁ ꦌꦮ ꦏꦫꦺꦴꦲꦷ’’ꦠꦶ ꦄꦴꦲ. ꦩꦲꦴꦫꦴꦗ, ꦮꦺꦗ꧀ꦗꦴ ꦤꦴꦩ ‘‘ꦄꦪꦁ ꦧ꧀ꦪꦴꦣꦶ ꦆꦩꦁ ꦤꦶꦱ꧀ꦱꦴꦪ ꦱꦩꦸꦛ꧀ꦜꦶꦠꦺꦴ’’ꦠꦶ ꦚꦠ꧀ꦮꦴ ꦄꦤꦸꦕ꧀ꦖꦮꦶꦏꦁ ꦨꦺꦱꦗ꧀ꦗꦁ ꦏꦫꦺꦴꦤ꧀ꦠꦷꦠꦶ. ꦫꦴꦗꦴ ‘‘ꦱꦴꦣꦸ ꦠꦴꦠꦴ’’ꦠꦶ ꦱꦩꦸꦛ꧀ꦜꦴꦤꦁ ꦏꦡꦺꦤ꧀ꦠꦺꦴ ‘‘ꦌꦏꦺꦤ ꦩꦴꦟꦮꦺꦤ ꦄꦴꦒꦤ꧀ꦠ꧀ꦮꦴ ꦠꦷꦱꦸ ꦤꦒꦫꦺꦱꦸ ꦫꦗ꧀ꦗꦁ ꦒꦲꦺꦠ꧀ꦮꦴ ꦢꦱ꧀ꦱꦴꦩꦷ’’ꦠꦶꦄꦴꦢꦶꦁ ꦏꦠ꧀ꦮꦴ ꦱꦧ꧀ꦧꦁ ꦏꦡꦺꦠ꧀ꦮꦴ ‘‘ꦆꦠꦶ ꦩꦺ ꦠꦴꦠ, ꦠꦟ꧀ꦲꦁ ꦤꦶꦱ꧀ꦱꦴꦪ ꦧ꧀ꦪꦴꦣꦶ ꦈꦥ꧀ꦥꦤ꧀ꦤꦺꦴ, ꦱꦕꦺ ꦠꦶꦏꦶꦕ꧀ꦖꦶꦠꦸꦁ ꦱꦏ꧀ꦏꦺꦴꦱꦶ, ꦠꦶꦏꦶꦕ꧀ꦖꦴꦲꦷ’’ꦠꦶ ꦄꦴꦲ. ꦏꦶꦁ ꦥꦤ ꦩꦲꦴꦫꦴꦗ, ꦱꦺꦴꦕꦤꦴꦪ ꦠꦴꦤꦶ ꦤꦒꦫꦴꦤꦶ ꦱꦏ꧀ꦏꦴ ꦭꦢ꧀ꦣꦸꦤ꧀ꦠꦶ? ‘‘ꦤ ꦱꦏ꧀ꦏꦴ ꦠꦴꦠꦴ’’ꦠꦶ. ‘‘ꦌꦮꦁ ꦱꦤ꧀ꦠꦺ ꦏꦱ꧀ꦩꦴ ꦱꦺꦴꦕꦱꦶ, ꦩꦲꦴꦫꦴꦗ, ꦱꦧ꧀ꦧꦩꦺꦮ ꦲꦶ ꦱꦮꦶꦚ꧀ꦚꦴꦟꦏꦴꦮꦶꦚ꧀ꦚꦴꦟꦏꦮꦠ꧀ꦡꦸꦁ ꦄꦠ꧀ꦠꦤꦺꦴ ꦏꦴꦪꦁ ꦄꦴꦢꦶꦁ ꦏꦠ꧀ꦮꦴ ꦥꦲꦴꦪ ꦒꦩꦤꦷꦪꦁ, ꦕꦠꦹꦱꦸ ꦤꦒꦫꦺꦱꦸ ꦫꦗ꧀ꦗꦁ ꦒꦲꦺꦠ꧀ꦮꦴꦥꦶ ꦠ꧀ꦮꦁ ꦌꦏꦥ꧀ꦥꦲꦴꦫꦺꦤꦺꦮ ꦤ ꦕꦠꦱ꧀ꦱꦺꦴ ꦨꦠ꧀ꦠꦥꦴꦠꦶꦪꦺꦴ ꦨꦸꦚ꧀ꦗꦶꦱ꧀ꦱꦱꦶ, ꦤ ꦕꦠꦹꦱꦸ ꦱꦪꦤꦺꦱꦸ ꦱꦪꦶꦱ꧀ꦱꦱꦶ, ꦤ ꦕꦠ꧀ꦠꦴꦫꦶ ꦮꦠ꧀ꦡꦪꦸꦒꦴꦤꦶ ꦄꦕ꧀ꦖꦴꦢꦺꦱ꧀ꦱꦱꦶ, ꦠꦟ꧀ꦲꦴꦮꦱꦶꦏꦺꦤ ꦤꦴꦩ ꦨꦮꦶꦠꦸꦁ ꦤ ꦮꦛ꧀ꦛꦠꦶ, ꦄꦪꦚ꧀ꦲꦶ ꦠꦟ꧀ꦲꦴ ꦤꦴꦩ ꦮꦝ꧀ꦞꦩꦴꦤꦴ ꦕꦠꦹꦲꦶ ꦄꦥꦴꦪꦺꦲꦶ ꦩꦸꦕ꧀ꦕꦶꦠꦸꦁ ꦤ ꦢꦺꦠꦷꦠꦶ.

ꦆꦠꦶ ꦤꦁ ꦩꦲꦴꦱꦠ꧀ꦠꦺꦴ ꦎꦮꦢꦶꦠ꧀ꦮꦴ ꦄꦡꦱ꧀ꦱ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦆꦩꦴ ꦒꦴꦡꦴ ꦄꦨꦴꦱꦶ –

꧓꧗. ‘‘ꦏꦴꦩꦁ ꦏꦴꦩꦪꦩꦴꦤꦱ꧀ꦱ, ꦠꦱ꧀ꦱ ꦕꦺ ꦠꦁ ꦱꦩꦶꦗ꧀ꦙꦠꦶ;

ꦄꦢ꧀ꦣꦴ ꦥꦷꦠꦶꦩꦤꦺꦴ ꦲꦺꦴꦠꦶ, ꦭꦢ꧀ꦣꦴ ꦩꦕ꧀ꦕꦺꦴ ꦪꦢꦶꦕ꧀ꦖꦠꦶ.

꧓꧘. ‘‘ꦏꦴꦩꦁ ꦏꦴꦩꦪꦩꦴꦤꦱ꧀ꦱ, ꦠꦱ꧀ꦱ ꦕꦺ ꦠꦁ ꦱꦩꦶꦗ꧀ꦙꦠꦶ;

ꦠꦠꦺꦴ ꦤꦁ ꦄꦥꦫꦁ ꦏꦴꦩꦺ, ꦓꦩ꧀ꦩꦺ ꦠꦟ꧀ꦲꦁꦮ ꦮꦶꦤ꧀ꦢꦠꦶ.

꧓꧙. ‘‘ꦒꦮꦁꦮ ꦱꦶꦔ꧀ꦒꦶꦤꦺꦴ ꦱꦶꦔ꧀ꦒꦁ, ꦮꦝ꧀ꦞꦩꦴꦤꦱ꧀ꦱ ꦮꦝ꧀ꦞꦠꦶ;

ꦌꦮꦁ ꦩꦤ꧀ꦢꦱ꧀ꦱ ꦥꦺꦴꦱꦱ꧀ꦱ, ꦧꦴꦭꦱ꧀ꦱ ꦄꦮꦶꦗꦴꦤꦠꦺꦴ;

ꦨꦶꦪ꧀ꦪꦺꦴ ꦠꦟ꧀ꦲꦴ ꦥꦶꦥꦴꦱꦴ ꦕ, ꦮꦝ꧀ꦞꦩꦴꦤꦱ꧀ꦱ ꦮꦝ꧀ꦞꦠꦶ.

꧔꧐. ‘‘ꦥꦡꦧ꧀ꦪꦴ ꦱꦴꦭꦶꦪꦮꦏꦁ, ꦒꦮꦴꦱ꧀ꦱꦁ ꦢꦴꦱꦥꦺꦴꦫꦶꦱꦁ;

ꦢꦠ꧀ꦮꦴ ꦕ ꦤꦴꦭꦩꦺꦏꦱ꧀ꦱ, ꦆꦠꦶ ꦮꦶꦢ꧀ꦮꦴ ꦱꦩꦁ ꦕꦫꦺ.

꧔꧑. ‘‘ꦫꦴꦗꦴ ꦥꦱꦪ꧀ꦲ ꦥꦡꦮꦶꦁ ꦮꦶꦗꦶꦠ꧀ꦮꦴ, ꦱꦱꦴꦒꦫꦤ꧀ꦠꦁ ꦩꦲꦶꦩꦴꦮꦱꦤ꧀ꦠꦺꦴ;

ꦎꦫꦁ ꦱꦩꦸꦢ꧀ꦢꦱ꧀ꦱ ꦄꦠꦶꦠ꧀ꦠꦫꦹꦥꦺꦴ, ꦥꦴꦫꦁ ꦱꦩꦸꦢ꧀ꦢꦱ꧀ꦱꦥꦶ ꦥꦠ꧀ꦡꦪꦺꦡ.

꧔꧒. ‘‘ꦪꦴꦮ ꦄꦤꦸꦱ꧀ꦱꦫꦁ ꦏꦴꦩꦺ, ꦩꦤꦱꦴ ꦠꦶꦠ꧀ꦠꦶ ꦤꦴꦗ꧀ꦙꦒꦴ;

ꦠꦠꦺꦴ ꦤꦶꦮꦠ꧀ꦠꦴ ꦥꦛꦶꦏ꧀ꦏꦩ꧀ꦩ ꦢꦶꦱ꧀ꦮꦴ, ꦠꦺ ꦮꦺ ꦱꦸꦠꦶꦠ꧀ꦠꦴ ꦪꦺ ꦥꦚ꧀ꦚꦴꦪ ꦠꦶꦠ꧀ꦠꦴ.

꧔꧓. ‘‘ꦥꦚ꧀ꦚꦴꦪ ꦠꦶꦠ꧀ꦠꦶꦤꦁ ꦱꦺꦛ꧀ꦜꦁ, ꦤ ꦱꦺꦴ ꦏꦴꦩꦺꦲꦶ ꦠꦥ꧀ꦥꦠꦶ;

ꦥꦚ꧀ꦚꦴꦪ ꦠꦶꦠ꧀ꦠꦁ ꦥꦸꦫꦶꦱꦁ, ꦠꦟ꧀ꦲꦴ ꦤ ꦏꦸꦫꦸꦠꦺ ꦮꦱꦁ.

꧔꧔. ‘‘ꦄꦥꦕꦶꦤꦺꦡꦺꦮ ꦏꦴꦩꦴꦤꦁ, ꦄꦥ꧀ꦥꦶꦕ꧀ꦖꦱ꧀ꦱ ꦄꦭꦺꦴꦭꦸꦥꦺꦴ;

ꦱꦩꦸꦢ꧀ꦢꦩꦠ꧀ꦠꦺꦴ ꦥꦸꦫꦶꦱꦺꦴ, ꦤ ꦱꦺꦴ ꦏꦴꦩꦺꦲꦶ ꦠꦥ꧀ꦥꦠꦶ.

꧔꧕. ‘‘ꦫꦡꦏꦴꦫꦺꦴꦮ ꦕꦩ꧀ꦩꦱ꧀ꦱ, ꦥꦫꦶꦏꦤ꧀ꦠꦁ ꦈꦥꦴꦲꦤꦁ;

ꦪꦁ ꦪꦁ ꦕꦗꦠꦶ ꦏꦴꦩꦴꦤꦁ, ꦠꦁ ꦠꦁ ꦱꦩ꧀ꦥꦗ꧀ꦗꦠꦺ ꦱꦸꦑꦁ;

ꦱꦧ꧀ꦧꦚ꧀ꦕꦺ ꦱꦸꦑꦩꦶꦕ꧀ꦖꦺꦪ꧀ꦪ, ꦱꦧ꧀ꦧꦺ ꦏꦴꦩꦺ ꦥꦫꦶꦕ꧀ꦕꦗꦺ’’ꦠꦶ.

ꦠꦠ꧀ꦡ ꦏꦴꦩꦤ꧀ꦠꦶ ꦮꦠ꧀ꦡꦸꦏꦴꦩꦩ꧀ꦥꦶ ꦏꦶꦭꦺꦱꦏꦴꦩꦩ꧀ꦥꦶ. ꦏꦴꦩꦪꦩꦴꦤꦱ꧀ꦱꦴꦠꦶ ꦥꦠ꧀ꦡꦪꦩꦴꦤꦱ꧀ꦱ. ꦠꦱ꧀ꦱ ꦕꦺ ꦠꦁ ꦱꦩꦶꦗ꧀ꦙꦠꦷꦠꦶ ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦠꦁ ꦏꦴꦩꦶꦠꦮꦠ꧀ꦡꦸ ꦱꦩꦶꦗ꧀ꦙꦠꦶ ꦕꦺ, ꦤꦶꦥ꧀ꦦꦗ꧀ꦗꦠꦶ ꦕꦺꦠꦶ ꦄꦠ꧀ꦡꦺꦴ. ꦠꦠꦺꦴ ꦤꦁ ꦄꦥꦫꦁ ꦏꦴꦩꦺꦠꦶ ꦌꦠ꧀ꦡ ꦤꦤ꧀ꦠꦶ ꦤꦶꦥꦴꦠꦩꦠ꧀ꦠꦁ. ꦄꦥꦫꦤ꧀ꦠꦶ ꦥꦫꦨꦴꦒꦢꦷꦥꦤꦁ. ꦏꦴꦩꦺꦠꦶ ꦈꦥꦪꦺꦴꦒꦧꦲꦸꦮꦕꦤꦁ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦱꦕꦺ ꦏꦴꦩꦁ ꦏꦴꦩꦪꦩꦴꦤꦱ꧀ꦱ ꦠꦁ ꦏꦴꦩꦶꦠꦮꦠ꧀ꦡꦸ ꦱꦩꦶꦗ꧀ꦙꦠꦶ, ꦠꦱ꧀ꦩꦶꦁ ꦱꦩꦶꦢ꧀ꦣꦺ ꦠꦠꦺꦴ ꦥꦫꦁ ꦱꦺꦴ ꦥꦸꦒ꧀ꦒꦭꦺꦴ ꦏꦴꦩꦪꦩꦴꦤꦺꦴ ꦪꦡꦴ ꦤꦴꦩ ꦓꦩ꧀ꦩꦺ ꦒꦶꦩ꧀ꦲꦏꦴꦭꦺ ꦮꦴꦠꦴꦠꦥꦺꦤ ꦏꦶꦭꦤ꧀ꦠꦺꦴ ꦠꦟ꧀ꦲꦁ ꦮꦶꦤ꧀ꦢꦠꦶ, ꦥꦴꦤꦷꦪꦥꦶꦥꦴꦱꦁ ꦥꦛꦶꦭꦨꦠꦶ, ꦌꦮꦁ ꦨꦶꦪ꧀ꦪꦺꦴ ꦏꦴꦩꦠꦟ꧀ꦲꦴꦱꦔ꧀ꦑꦴꦠꦺ ꦏꦴꦩꦺ ꦮꦶꦤ꧀ꦢꦠꦶ ꦥꦛꦶꦭꦨꦠꦶ, ꦫꦹꦥꦠꦟ꧀ꦲꦴꦢꦶꦏꦴ ꦠꦟ꧀ꦲꦴ ꦕꦱ꧀ꦱ ꦮꦝ꧀ꦞꦠꦶꦪꦺꦮꦴꦠꦶ. ꦒꦮꦁꦮꦴꦠꦶ ꦒꦺꦴꦫꦹꦥꦱ꧀ꦱ ꦮꦶꦪ. ꦱꦶꦔ꧀ꦒꦶꦤꦺꦴꦠꦶ ꦩꦠ꧀ꦡꦏꦁ ꦥꦢꦴꦭꦺꦠ꧀ꦮꦴ ꦈꦛ꧀ꦜꦶꦠꦱꦶꦔ꧀ꦒꦱ꧀ꦱ. ꦩꦤ꧀ꦢꦱ꧀ꦱꦴꦠꦶ ꦩꦤ꧀ꦢꦥꦚ꧀ꦚꦱ꧀ꦱ. ꦧꦴꦭꦱ꧀ꦱꦴꦠꦶ ꦧꦴꦭꦣꦩ꧀ꦩꦺ ꦪꦸꦠ꧀ꦠꦱ꧀ꦱ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦪꦡꦴ ꦮꦕ꧀ꦖꦏꦱ꧀ꦱ ꦮꦝ꧀ꦞꦤ꧀ꦠꦱ꧀ꦱ ꦱꦫꦷꦫꦺꦤꦺꦮ ꦱꦢ꧀ꦣꦶꦁ ꦱꦶꦔ꧀ꦒꦁ ꦮꦝ꧀ꦞꦠꦶ, ꦌꦮꦁ ꦄꦤ꧀ꦣꦧꦴꦭꦱ꧀ꦱꦥꦶ ꦄꦥ꧀ꦥꦠ꧀ꦠꦏꦴꦩꦠꦟ꧀ꦲꦴ ꦕ ꦥꦠ꧀ꦠꦏꦴꦩꦥꦶꦥꦴꦱꦴ ꦕ ꦄꦥꦫꦴꦥꦫꦁ ꦮꦝ꧀ꦞꦠꦷꦠꦶ.

ꦱꦴꦭꦶꦪꦮꦏꦤ꧀ꦠꦶ ꦱꦴꦭꦶꦑꦺꦠ꧀ꦠꦪꦮꦑꦺꦠ꧀ꦠꦁ. ꦌꦠꦺꦤ ꦱꦴꦭꦶꦪꦮꦴꦢꦶꦏꦁ ꦱꦧ꧀ꦧꦁ ꦣꦚ꧀ꦚꦁ ꦢꦱ꧀ꦱꦺꦠꦶ, ꦢꦸꦠꦶꦪꦥꦢꦺꦤ ꦱꦧ꧀ꦧꦁ ꦢ꧀ꦮꦶꦥꦢꦕꦠꦸꦥ꧀ꦥꦢꦁ ꦢꦱ꧀ꦱꦺꦠꦶ. ꦥꦜꦩꦥꦢꦺꦤ ꦮꦴ ꦱꦧ꧀ꦧꦁ ꦄꦮꦶꦚ꧀ꦚꦴꦟꦏꦁ, ꦆꦠꦫꦺꦤ ꦱꦮꦶꦚ꧀ꦚꦴꦟꦏꦁ. ꦢꦠ꧀ꦮꦴ ꦕꦴꦠꦶ ꦢꦠ꧀ꦮꦴꦥꦶ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦠꦶꦛ꧀ꦜꦤ꧀ꦠꦸ ꦠꦷꦟꦶ ꦫꦗ꧀ꦗꦴꦤꦶ, ꦱꦕꦺ ꦱꦺꦴ ꦩꦴꦟꦮꦺꦴ ꦄꦚ꧀ꦚꦁ ꦮꦴ ꦱꦏꦭꦩ꧀ꦥꦶ ꦥꦡꦮꦶꦁ ꦱꦮꦶꦚ꧀ꦚꦴꦟꦏꦴꦮꦶꦚ꧀ꦚꦴꦟꦏꦫꦠꦤꦥꦹꦫꦁ ꦏꦱ꧀ꦱꦕꦶ ꦢꦠ꧀ꦮꦴ ꦒꦕ꧀ꦖꦺꦪ꧀ꦪ, ꦆꦢꦩ꧀ꦥꦶ ꦌꦠ꧀ꦠꦏꦁ ꦮꦠ꧀ꦡꦸ ꦌꦏꦱ꧀ꦱꦺꦮ ꦄꦥꦫꦶꦪꦤ꧀ꦠꦁ, ꦌꦮꦁ ꦢꦸꦥ꧀ꦥꦹꦫꦴ ꦌꦱꦴ ꦠꦟ꧀ꦲꦴ ꦤꦴꦩ. ꦆꦠꦶ ꦮꦶꦢ꧀ꦮꦴ ꦱꦩꦁ ꦕꦫꦺꦠꦶ ꦌꦮꦁ ꦗꦴꦤꦤ꧀ꦠꦺꦴ ꦥꦸꦫꦶꦱꦺꦴ ꦠꦟ꧀ꦲꦴꦮꦱꦶꦏꦺꦴ ꦄꦲꦸꦠ꧀ꦮꦴ ꦏꦴꦪꦱꦩꦴꦕꦴꦫꦴꦢꦷꦤꦶ ꦥꦹꦫꦺꦤ꧀ꦠꦺꦴ ꦕꦫꦺꦪ꧀ꦪ.

ꦎꦫꦤ꧀ꦠꦶ ꦎꦫꦶꦩꦏꦺꦴꦛ꧀ꦜꦴꦱꦁ ꦥꦠ꧀ꦮꦴ ꦠꦺꦤ ꦄꦠꦶꦠ꧀ꦠꦫꦹꦥꦺꦴ ꦥꦸꦤ ꦱꦩꦸꦢ꧀ꦢꦥꦴꦫꦩ꧀ꦥꦶ ꦥꦠ꧀ꦡꦪꦺꦡ. ꦌꦮꦁ ꦠꦟ꧀ꦲꦴꦮꦱꦶꦏꦱꦠ꧀ꦠꦴ ꦤꦴꦩ ꦢꦸꦥ꧀ꦥꦹꦫꦴꦠꦶ ꦢꦱ꧀ꦱꦺꦠꦶ. ꦪꦴꦮꦴꦠꦶ ꦄꦤꦶꦪꦴꦩꦶꦠꦥꦫꦶꦕ꧀ꦖꦺꦢꦺꦴ. ꦄꦤꦸꦱ꧀ꦱꦫꦤ꧀ꦠꦶ ꦄꦤꦸꦱ꧀ꦱꦫꦤ꧀ꦠꦺꦴ. ꦤꦴꦗ꧀ꦙꦒꦴꦠꦶ ꦤ ꦮꦶꦤ꧀ꦢꦠꦶ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦩꦲꦴꦫꦴꦗ, ꦥꦸꦫꦶꦱꦺꦴ ꦄꦥꦫꦶꦪꦤ꧀ꦠꦺꦥꦶ ꦏꦴꦩꦺ ꦩꦤꦱꦴ ꦄꦤꦸꦱ꧀ꦱꦫꦤ꧀ꦠꦺꦴ ꦠꦶꦠ꧀ꦠꦶꦁ ꦤ ꦮꦶꦤ꧀ꦢꦠꦶ, ꦥꦠ꧀ꦠꦸꦏꦴꦩꦺꦴꦮ ꦲꦺꦴꦠꦶ, ꦌꦮꦁ ꦏꦴꦩꦺꦱꦸ ꦱꦠ꧀ꦠꦴꦤꦁ ꦠꦟ꧀ꦲꦴ ꦮꦝ꧀ꦞꦠꦺꦮ. ꦠꦠꦺꦴ ꦤꦶꦮꦠ꧀ꦠꦴꦠꦶ ꦠꦠꦺꦴ ꦥꦤ ꦮꦠ꧀ꦡꦸꦏꦴꦩꦏꦶꦭꦺꦱꦏꦴꦩꦠꦺꦴ ꦕꦶꦠ꧀ꦠꦺꦤ ꦤꦶꦮꦠ꧀ꦠꦶꦠ꧀ꦮꦴ ꦏꦴꦪꦺꦤ ꦥꦛꦶꦏ꧀ꦏꦩ꧀ꦩ ꦚꦴꦟꦺꦤ ꦄꦴꦢꦷꦤꦮꦁ ꦢꦶꦱ꧀ꦮꦴ ꦪꦺ ꦥꦚ꧀ꦚꦴꦪ ꦠꦶꦠ꧀ꦠꦴ ꦥꦫꦶꦥꦸꦟ꧀ꦟꦴ, ꦠꦺ ꦠꦶꦠ꧀ꦠꦴ ꦤꦴꦩ.

ꦥꦚ꧀ꦚꦴꦪ ꦠꦶꦠ꧀ꦠꦶꦤꦁ ꦱꦺꦛ꧀ꦜꦤ꧀ꦠꦶ ꦥꦚ꧀ꦚꦴꦪ ꦠꦶꦠ꧀ꦠꦷꦤꦁ ꦄꦪꦁ ꦥꦫꦶꦥꦸꦟ꧀ꦟꦱꦺꦛ꧀ꦜꦺꦴ, ꦄꦪꦩꦺꦮ ꦮꦴ ꦥꦴꦜꦺꦴ. ꦤ ꦱꦺꦴ ꦏꦴꦩꦺꦲꦶ ꦠꦥ꧀ꦥꦠꦷꦠꦶ ‘‘ꦤ ꦲꦷ’’ꦠꦶꦥꦶ ꦥꦴꦜꦺꦴ. ꦪꦱ꧀ꦩꦴ ꦥꦚ꧀ꦚꦴꦪ ꦠꦶꦠ꧀ꦠꦺꦴ ꦥꦸꦫꦶꦱꦺꦴ ꦏꦴꦩꦺꦲꦶ ꦤ ꦥꦫꦶꦝꦪ꧀ꦲꦠꦷꦠꦶ ꦄꦠ꧀ꦡꦺꦴ. ꦤ ꦏꦸꦫꦸꦠꦺ ꦮꦱꦤ꧀ꦠꦶ ꦠꦴꦢꦶꦱꦚ꧀ꦲꦶ ꦥꦸꦫꦶꦱꦁ ꦠꦟ꧀ꦲꦴ ꦮꦱꦺ ꦮꦠ꧀ꦠꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦱ꧀ꦮꦺꦮ ꦥꦤ ꦠꦟ꧀ꦲꦴꦪ ꦄꦴꦢꦷꦤꦮꦁ ꦢꦶꦱ꧀ꦮꦴ ꦱꦫꦨꦔ꧀ꦒꦩꦴꦟꦮꦺꦴ ꦮꦶꦪ ꦕ ꦄꦝ꧀ꦞꦩꦴꦱꦏꦫꦴꦗꦴ ꦮꦶꦪ ꦕ ꦠꦟ꧀ꦲꦴꦮꦱꦺ ꦤ ꦥꦮꦠ꧀ꦠꦠꦷꦠꦶ ꦄꦠ꧀ꦡꦺꦴ. ꦄꦥꦕꦶꦤꦺꦡꦺꦮꦴꦠꦶ ꦮꦶꦢ꧀ꦣꦁꦱꦺꦡꦺꦮ. ꦱꦩꦸꦢ꧀ꦢꦩꦠ꧀ꦠꦺꦴꦠꦶ ꦩꦲꦠꦶꦪꦴ ꦥꦚ꧀ꦚꦴꦪ ꦱꦩꦤ꧀ꦤꦴꦒꦠꦠ꧀ꦠꦴ ꦱꦩꦸꦢ꧀ꦢꦥ꧀ꦥꦩꦴꦟꦺꦴ. ꦱꦺꦴ ꦩꦲꦤ꧀ꦠꦺꦤ ꦄꦒ꧀ꦒꦶꦤꦴꦥꦶ ꦱꦩꦸꦢ꧀ꦢꦺꦴ ꦮꦶꦪ ꦏꦶꦭꦺꦱꦏꦴꦩꦺꦲꦶ ꦤ ꦠꦥ꧀ꦥꦠꦶ ꦤ ꦝꦪ꧀ꦲꦠꦶ.

ꦫꦡꦏꦴꦫꦺꦴꦠꦶ ꦕꦩ꧀ꦩꦏꦴꦫꦺꦴ. ꦥꦫꦶꦏꦤ꧀ꦠꦤ꧀ꦠꦶ ꦥꦫꦶꦏꦤ꧀ꦠꦤ꧀ꦠꦺꦴ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦪꦡꦴ ꦕꦩ꧀ꦩꦏꦴꦫꦺꦴ ꦈꦥꦴꦲꦤꦁ ꦥꦫꦶꦏꦤ꧀ꦠꦤ꧀ꦠꦺꦴ ꦪꦁ ꦪꦁ ꦕꦩ꧀ꦩꦱ꧀ꦱ ꦄꦒꦪ꧀ꦲꦹꦥꦒꦛ꧀ꦜꦴꦤꦁ ꦲꦺꦴꦠꦶ, ꦠꦁ ꦠꦁ ꦕꦗꦶꦠ꧀ꦮꦴ ꦈꦥꦴꦲꦤꦁ ꦏꦠ꧀ꦮꦴ ꦈꦥꦴꦲꦤꦩꦹꦭꦁ ꦭꦨꦶꦠ꧀ꦮꦴ ꦱꦸꦑꦶꦠꦺꦴ ꦲꦺꦴꦠꦶ, ꦌꦮꦩꦺꦮ ꦥꦟ꧀ꦝꦶꦠꦺꦴ ꦕꦩ꧀ꦩꦏꦴꦫꦱꦠ꧀ꦡꦱꦢꦶꦱꦴꦪ ꦥꦚ꧀ꦚꦴꦪ ꦏꦤ꧀ꦠꦤ꧀ꦠꦺꦴ ꦪꦁ ꦪꦁ ꦎꦣꦶꦁ ꦏꦴꦩꦴꦤꦁ ꦕꦗꦠꦶ, ꦠꦺꦤ ꦠꦺꦤꦱ꧀ꦱ ꦏꦴꦩꦺꦴꦣꦶꦤꦴ ꦫꦲꦶꦠꦁ ꦠꦁ ꦠꦁ ꦏꦴꦪꦏꦩ꧀ꦩꦁ ꦮꦕꦷꦏꦩ꧀ꦩꦁ ꦩꦤꦺꦴꦏꦩ꧀ꦩꦚ꧀ꦕ ꦱꦸꦑꦁ ꦱꦩ꧀ꦥꦗ꧀ꦗꦠꦶ ꦮꦶꦒꦠꦢꦫꦡꦁ, ꦱꦕꦺ ꦥꦤ ꦱꦧ꧀ꦧꦩ꧀ꦥꦶ ꦏꦴꦪꦏꦩ꧀ꦩꦴꦢꦶꦱꦸꦑꦁ ꦮꦶꦒꦠꦥꦫꦶꦭ꦳ꦴꦲꦩꦺꦮ ꦆꦕ꧀ꦖꦺꦪ꧀ꦪ, ꦏꦱꦶꦟꦁ ꦨꦴꦮꦺꦠ꧀ꦮꦴ ꦙꦴꦤꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦱꦧ꧀ꦧꦺ ꦏꦴꦩꦺ ꦥꦫꦶꦕ꧀ꦕꦗꦺꦠꦶ.

ꦧꦺꦴꦣꦶꦱꦠ꧀ꦠꦱ꧀ꦱ ꦥꦤ ꦆꦩꦁ ꦒꦴꦡꦁ ꦏꦡꦺꦤ꧀ꦠꦱ꧀ꦱ ꦫꦚ꧀ꦚꦺꦴ ꦱꦺꦠꦕ꧀ꦖꦠ꧀ꦠꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦎꦢꦴꦠꦏꦱꦶꦟꦗ꧀ꦙꦴꦤꦁ ꦈꦢꦥꦴꦢꦶ, ꦫꦴꦗꦴꦥꦶ ꦄꦫꦺꦴꦒꦺꦴ ꦄꦲꦺꦴꦱꦶ. ꦱꦺꦴ ꦠꦸꦛ꧀ꦜꦺꦴ ꦱꦪꦤꦴ ꦮꦸꦛ꧀ꦜꦲꦶꦠ꧀ꦮꦴ ‘‘ꦌꦠ꧀ꦠꦏꦴ ꦮꦺꦗ꧀ꦗꦴ ꦩꦁ ꦠꦶꦏꦶꦕ꧀ꦖꦶꦠꦸꦁ ꦤꦴꦱꦏ꧀ꦑꦶꦁꦱꦸ, ꦥꦟ꧀ꦝꦶꦠꦩꦴꦟꦮꦺꦴ ꦥꦤ ꦄꦠ꧀ꦠꦤꦺꦴ ꦚꦴꦟꦺꦴꦱꦣꦺꦤ ꦩꦁ ꦤꦶꦫꦺꦴꦒꦁ ꦄꦏꦴꦱꦷ’’ꦠꦶ ꦠꦺꦤ ꦱꦢ꧀ꦣꦶꦁ ꦱꦭ꧀ꦭꦥꦤ꧀ꦠꦺꦴ ꦢꦱꦩꦁ ꦒꦴꦡꦩꦴꦲ –

꧔꧖. ‘‘ꦄꦛ꧀ꦜ ꦠꦺ ꦨꦴꦱꦶꦠꦴ ꦒꦴꦡꦴ, ꦱꦧ꧀ꦧꦴ ꦲꦺꦴꦤ꧀ꦠꦶ ꦱꦲꦱ꧀ꦱꦶꦪꦴ;