꧓. ꦄꦴꦱꦮꦏ꧀ꦑꦪꦱꦸꦠ꧀ꦠꦮꦟ꧀ꦟꦤꦴ

꧑꧐꧒. ꦠꦠꦶꦪꦺ ꦗꦴꦤꦠꦺꦴꦠꦶ ꦗꦴꦤꦤ꧀ꦠꦱ꧀ꦱ. ꦥꦱ꧀ꦱꦠꦺꦴꦠꦶ ꦥꦱ꧀ꦱꦤ꧀ꦠꦱ꧀ꦱ. ꦪꦢꦶꦥꦶ ꦆꦩꦴꦤꦶ ꦢ꧀ꦮꦺꦥꦶ ꦥꦢꦴꦤꦶ ꦌꦏꦠ꧀ꦡꦴꦤꦶ, ꦧ꧀ꦪꦚ꧀ꦗꦤꦩꦺꦮ ꦤꦴꦤꦁ, ꦌꦮꦁ ꦱꦤ꧀ꦠꦺꦥꦶ ‘‘ꦗꦴꦤꦠꦺꦴ’’ꦠꦶ ꦚꦴꦟꦭꦏ꧀ꦑꦟꦁ ꦈꦥꦴꦢꦴꦪ ꦥꦸꦒ꧀ꦒꦭꦁ ꦤꦶꦢ꧀ꦢꦶꦱꦠꦶ. ꦗꦴꦤꦤꦭꦏ꧀ꦑꦟꦚ꧀ꦲꦶ ꦚꦴꦟꦁ. ‘‘ꦥꦱ꧀ꦱꦠꦺꦴ’’ꦠꦶ ꦚꦴꦟꦥ꧀ꦥꦨꦴꦮꦁ ꦈꦥꦴꦢꦴꦪ. ꦢꦱ꧀ꦱꦤꦥ꧀ꦥꦨꦴꦮꦚ꧀ꦲꦶ ꦈꦥꦴꦢꦴꦪ ꦚꦴꦟꦱꦩꦔ꧀ꦒꦷ ꦥꦸꦒ꧀ꦒꦭꦺꦴ ꦕꦏ꧀ꦑꦸꦩꦴ ꦮꦶꦪ ꦥꦸꦒ꧀ꦒꦭꦺꦴ ꦕꦏ꧀ꦑꦸꦤꦴ ꦫꦹꦥꦴꦤꦶ, ꦚꦴꦟꦺꦤ ꦮꦶꦮꦛꦺ ꦣꦩ꧀ꦩꦺ ꦥꦱ꧀ꦱꦠꦶ. ꦄꦡ ꦮꦴ ꦗꦴꦤꦠꦺꦴꦠꦶ ꦄꦤꦸꦧꦺꦴꦣꦚꦴꦟꦺꦤ ꦗꦴꦤꦠꦺꦴ. ꦥꦱ꧀ꦱꦠꦺꦴꦠꦶ ꦥꦛꦶꦮꦺꦣꦚꦴꦟꦺꦤ ꦥꦱ꧀ꦱꦠꦺꦴ. ꦥꦛꦶꦭꦺꦴꦩꦠꦺꦴ ꦮꦴ ꦢꦱ꧀ꦱꦤꦩꦒ꧀ꦒꦺꦤ ꦥꦱ꧀ꦱꦠꦺꦴ, ꦨꦴꦮꦤꦴꦩꦒ꧀ꦒꦺꦤ ꦗꦴꦤꦠꦺꦴ. ꦏꦺꦕꦶ ꦥꦤ ‘‘ꦚꦴꦠꦠꦷꦫꦟꦥꦲꦴꦤꦥꦫꦶꦚ꧀ꦚꦴꦲꦶ ꦗꦴꦤꦠꦺꦴ, ꦱꦶꦑꦴꦥ꧀ꦥꦠ꧀ꦠꦮꦶꦥꦱ꧀ꦱꦤꦴꦪ ꦥꦱ꧀ꦱꦠꦺꦴ’’ꦠꦶ ꦮꦢꦤ꧀ꦠꦶ. ꦄꦡ ꦮꦴ ꦢꦸꦏ꧀ꦑꦁ ꦥꦫꦶꦚ꧀ꦚꦴꦨꦶꦱꦩꦪꦺꦤ ꦗꦴꦤꦠꦺꦴ, ꦤꦶꦫꦺꦴꦣꦁ ꦱꦕ꧀ꦖꦶꦏꦶꦫꦶꦪꦴꦨꦶꦱꦩꦪꦺꦤ ꦥꦱ꧀ꦱꦠꦺꦴ. ꦠꦢꦸꦨꦪꦺ ꦕ ꦱꦠꦶ ꦥꦲꦴꦤꦨꦴꦮꦤꦴꦨꦶꦱꦩꦪꦴ ꦱꦶꦢ꧀ꦣꦴ ꦌꦮ ꦲꦺꦴꦤ꧀ꦠꦷꦠꦶ ꦕꦠꦸꦱꦕ꧀ꦕꦴꦨꦶꦱꦩꦪꦺꦴ ꦮꦸꦠ꧀ꦠꦺꦴ ꦲꦺꦴꦠꦶ. ꦪꦢꦴ ꦕꦺꦠ꧀ꦡ ꦮꦶꦥꦱ꧀ꦱꦤꦴꦚꦴꦟꦁ ꦄꦣꦶꦥ꧀ꦥꦺꦠꦁ, ꦠꦢꦴ ‘‘ꦗꦴꦤꦠꦺꦴ ꦥꦱ꧀ꦱꦠꦺꦴ’’ꦠꦶ ꦥꦢꦴꦤꦁ ꦲꦺꦠꦸꦄꦠ꧀ꦡꦢꦷꦥꦤꦠꦴ ꦢꦛ꧀ꦜꦧ꧀ꦧꦴ. ꦪꦢꦴ ꦥꦤ ꦩꦒ꧀ꦒꦚꦴꦟꦁ ꦄꦣꦶꦥ꧀ꦥꦺꦠꦁ, ꦠꦢꦴ ꦩꦒ꧀ꦒꦏꦶꦕ꧀ꦕꦠ꧀ꦡꦢꦷꦥꦤꦠꦴ.

ꦄꦴꦱꦮꦴꦤꦁ ꦑꦪꦤ꧀ꦠꦶ ‘‘ꦗꦴꦤꦠꦺꦴ, ꦄꦲꦁ ꦨꦶꦏ꧀ꦑꦮꦺ, ꦥꦱ꧀ꦱꦠꦺꦴ ꦄꦴꦱꦮꦴꦤꦁ ꦑꦪꦁ ꦮꦢꦴꦩꦷ’’ꦠꦶ (ꦩ. ꦤꦶ. ꧑.꧑꧕; ꦱꦁ. ꦤꦶ. ꧓.꧑꧐꧑; ꧕.꧑꧐꧙꧕) ꦌꦮꦩꦴꦒꦠꦺ ꦱꦧ꧀ꦧꦴꦱꦮꦱꦁꦮꦫꦥꦫꦶꦪꦴꦪꦺ ‘‘ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶ’’ꦤ꧀ꦠꦶꦄꦴꦢꦷꦱꦸ (ꦩ. ꦤꦶ. ꧑.꧔꧓꧘) ꦕ ꦱꦸꦠ꧀ꦠꦥꦢꦺꦱꦸ ꦄꦴꦱꦮꦴꦤꦁ ꦥꦲꦴꦤꦁ ꦄꦕ꧀ꦕꦤ꧀ꦠꦏ꧀ꦑꦪꦺꦴ ꦄꦱꦩꦸꦥ꧀ꦥꦴꦢꦺꦴ ꦑꦷꦟꦴꦏꦴꦫꦺꦴ ꦤꦠ꧀ꦡꦶꦨꦴꦮꦺꦴ ‘‘ꦄꦴꦱꦮꦏ꧀ꦑꦪꦺꦴ’’ꦠꦶ ꦮꦸꦠ꧀ꦠꦺꦴ. ‘‘ꦄꦴꦱꦮꦴꦤꦁ ꦑꦪꦴ ꦱꦩꦟꦺꦴ ꦲꦺꦴꦠꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧔꧓꧘) ꦦꦭꦁ.

‘‘ꦥꦫꦮꦗ꧀ꦗꦴꦤꦸꦥꦱ꧀ꦱꦶꦱ꧀ꦱ, ꦤꦶꦕ꧀ꦕꦁ ꦈꦗ꧀ꦙꦴꦤꦱꦚ꧀ꦚꦶꦤꦺꦴ;

ꦄꦴꦱꦮꦴ ꦠꦱ꧀ꦱ ꦮꦝ꧀ꦞꦤ꧀ꦠꦶ, ꦄꦴꦫꦴ ꦱꦺꦴ ꦄꦴꦱꦮꦏ꧀ꦑꦪꦴ’’ꦠꦶ. (ꦣ. ꦥ. ꧒꧕꧓); –

ꦄꦴꦢꦷꦱꦸ ꦤꦶꦧ꧀ꦧꦴꦤꦁ.

‘‘ꦱꦺꦑꦱ꧀ꦱ ꦱꦶꦏ꧀ꦑꦩꦴꦤꦱ꧀ꦱ, ꦈꦗꦸꦩꦒ꧀ꦒꦴꦤꦸꦱꦴꦫꦶꦤꦺꦴ;

ꦑꦪꦱ꧀ꦩꦶꦁ ꦥꦜꦩꦁ ꦚꦴꦟꦁ, ꦠꦠꦺꦴ ꦄꦚ꧀ꦚꦴ ꦄꦤꦤ꧀ꦠꦫꦴ;

ꦠꦠꦺꦴ ꦄꦚ꧀ꦚꦴꦮꦶꦩꦸꦠ꧀ꦠꦱ꧀ꦱ, ꦚꦴꦟꦁ ꦮꦺ ꦲꦺꦴꦠꦶ ꦠꦴꦢꦶꦤꦺꦴ’’ꦠꦶ. (ꦄ. ꦤꦶ. ꧓.꧘꧖; ꦆꦠꦶꦮꦸ. ꧖꧒) –

ꦌꦮꦩꦴꦒꦠꦺ ꦆꦤ꧀ꦢ꧀ꦫꦶꦪꦱꦸꦠ꧀ꦠꦺ ꦆꦣ ꦕ ꦩꦒ꧀ꦒꦺꦴ ‘‘ꦄꦴꦱꦮꦏ꧀ꦑꦪꦺꦴ’’ꦠꦶ ꦮꦸꦠ꧀ꦠꦺꦴ. ꦠꦱ꧀ꦩꦴ ꦪꦡꦴꦮꦸꦠ꧀ꦠꦤꦪꦺꦤ ꦗꦴꦤꦤ꧀ꦠꦱ꧀ꦱ ꦥꦱ꧀ꦱꦤ꧀ꦠꦱ꧀ꦱ ꦄꦲꦁ ꦄꦫꦶꦪꦩꦒ꧀ꦒꦴꦣꦶꦒꦩꦁ ꦮꦢꦴꦩꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦤꦺꦴ ꦄꦗꦴꦤꦠꦺꦴ ꦤꦺꦴ ꦄꦥꦱ꧀ꦱꦠꦺꦴꦠꦶ ꦪꦺꦴ ꦥꦤ ꦤ ꦗꦴꦤꦴꦠꦶ ꦤ ꦥꦱ꧀ꦱꦠꦶ, ꦠꦱ꧀ꦱ ꦤꦺꦴ ꦮꦢꦴꦩꦷꦠꦶ ꦄꦠ꧀ꦡꦺꦴ. ꦌꦠꦺꦤ ꦪꦺ ꦄꦗꦴꦤꦠꦺꦴ ꦄꦥꦱ꧀ꦱꦠꦺꦴꦥꦶ ꦱꦁꦱꦴꦫꦱꦸꦢ꧀ꦣꦶꦁ ꦮꦢꦤ꧀ꦠꦶ, ꦠꦺ ꦥꦛꦶꦏ꧀ꦑꦶꦥꦠꦶ. ꦥꦸꦫꦶꦩꦺꦤ ꦮꦴ ꦥꦢꦢ꧀ꦮꦪꦺꦤ ꦈꦥꦴꦪꦺꦴ ꦮꦸꦠ꧀ꦠꦺꦴ, ꦆꦩꦶꦤꦴ ꦄꦤꦸꦥꦴꦪꦥꦛꦶꦱꦺꦣꦺꦴ. ꦱꦔ꧀ꦑꦺꦥꦺꦤ ꦕꦺꦠ꧀ꦡ ꦚꦴꦟꦁ ꦄꦴꦱꦮꦏ꧀ꦑꦪꦏꦫꦁ, ꦱꦺꦱꦁ ꦠꦱ꧀ꦱ ꦥꦫꦶꦏ꧀ꦑꦴꦫꦺꦴꦠꦶ ꦢꦱ꧀ꦱꦺꦠꦶ.

ꦆꦢꦴꦤꦶ ꦪꦁ ꦗꦴꦤꦠꦺꦴ ꦪꦁ ꦥꦱ꧀ꦱꦠꦺꦴ ꦄꦴꦱꦮꦏ꧀ꦑꦪꦺꦴ ꦲꦺꦴꦠꦶ, ꦠꦁ ꦢꦱ꧀ꦱꦺꦠꦸꦁ ‘‘ꦏꦶꦚ꧀ꦕ, ꦨꦶꦏ꧀ꦑꦮꦺ, ꦗꦴꦤꦠꦺꦴ’’ꦠꦶ ꦥꦸꦕ꧀ꦖꦁ ꦄꦴꦫꦨꦶ. ꦠꦠ꧀ꦡ ꦗꦴꦤꦤꦴ ꦧꦲꦸꦮꦶꦣꦴ. ꦢꦧ꧀ꦧꦗꦴꦠꦶꦏꦺꦴ ꦌꦮ ꦲꦶ ꦏꦺꦴꦕꦶ ꦨꦶꦏ꧀ꦑꦸ ꦖꦠ꧀ꦠꦁ ꦏꦴꦠꦸꦁ ꦗꦴꦤꦴꦠꦶ, ꦏꦺꦴꦕꦶ ꦕꦷꦮꦫꦴꦢꦷꦤꦁ ꦄꦚ꧀ꦚꦠꦫꦁ, ꦠꦱ꧀ꦱ ꦇꦢꦶꦱꦴꦤꦶ ꦏꦩ꧀ꦩꦴꦤꦶ ꦮꦠ꧀ꦠꦱꦷꦱꦺ ꦜꦠ꧀ꦮꦴ ꦏꦫꦺꦴꦤ꧀ꦠꦱ꧀ꦱ ꦱꦴ ꦗꦴꦤꦤꦴ ‘‘ꦩꦒ꧀ꦒꦦꦭꦴꦤꦁ ꦥꦢꦛ꧀ꦜꦴꦤꦁ ꦤ ꦲꦺꦴꦠꦷ’’ꦠꦶ ꦤ ꦮꦠ꧀ꦠꦧ꧀ꦧꦴ. ꦪꦺꦴ ꦥꦤ ꦱꦴꦱꦤꦺ ꦥꦧ꧀ꦧꦗꦶꦠ꧀ꦮꦴ ꦮꦺꦗ꧀ꦗꦏꦩ꧀ꦩꦴꦢꦷꦤꦶ ꦏꦴꦠꦸꦁ ꦗꦴꦤꦴꦠꦶ, ꦠꦱ꧀ꦱꦺꦮꦁ ꦗꦴꦤꦠꦺꦴ ꦄꦴꦱꦮꦴ ꦮꦝ꧀ꦞꦤ꧀ꦠꦶꦪꦺꦮ. ꦠꦱ꧀ꦩꦴ ꦪꦁ ꦗꦴꦤꦠꦺꦴ ꦪꦁ ꦥꦱ꧀ꦱꦠꦺꦴ ꦄꦴꦱꦮꦴꦤꦁ ꦑꦪꦺꦴ ꦲꦺꦴꦠꦶ, ꦠꦢꦺꦮ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶꦄꦴꦢꦶ. ꦠꦠ꧀ꦡ ꦪꦁ ꦮꦠ꧀ꦠꦧ꧀ꦧꦁ ꦕꦠꦸꦱꦕ꧀ꦕꦏꦩ꧀ꦩꦛ꧀ꦜꦴꦤꦁ, ꦠꦁ ꦲꦺꦛ꧀ꦜꦴ ꦪꦺꦴꦤꦶꦱꦺꦴꦩꦤꦱꦶꦏꦴꦫꦱꦸꦠ꧀ꦠꦺ ꦱꦔ꧀ꦑꦺꦥꦠꦺꦴ ꦮꦸꦠ꧀ꦠꦩꦺꦮ.

ꦠꦠ꧀ꦡ ꦥꦤ ‘‘ꦪꦺꦴꦤꦶꦱꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦩꦤꦱꦶ ꦏꦫꦺꦴꦤ꧀ꦠꦺꦴ ꦄꦏꦸꦱꦭꦁ ꦥꦗꦲꦠꦶ, ꦏꦸꦱꦭꦁ ꦨꦴꦮꦺꦠꦷ’’ꦠꦶ (ꦆꦠꦶꦮꦸ. ꧑꧖) ꦄꦴꦒꦠꦠ꧀ꦠꦴ ‘‘ꦆꦢꦁ ꦢꦸꦏ꧀ꦑꦤ꧀ꦠꦶ ꦪꦺꦴꦤꦶꦱꦺꦴ ꦩꦤꦱꦶ ꦏꦫꦺꦴꦠꦷ’’ꦠꦶꦄꦴꦢꦶꦤꦴ ꦄꦠ꧀ꦡꦮꦶꦨꦴꦮꦤꦴ ꦏꦠꦴ. ꦆꦣ ‘‘ꦆꦢꦁ ꦢꦸꦏ꧀ꦑꦤ꧀ꦠꦶ, ꦨꦶꦏ꧀ꦑꦮꦺ, ꦗꦴꦤꦠꦺꦴ ꦥꦱ꧀ꦱꦠꦺꦴ ꦄꦴꦱꦮꦴꦤꦁ ꦑꦪꦺꦴ ꦲꦺꦴꦠꦷ’’ꦠꦶ (ꦩ. ꦤꦶ. ꧑.꧑꧕; ꦱꦁ. ꦤꦶ. ꧓.꧑꧐꧑; ꧕.꧑꧐꧙꧕) ꦄꦴꦒꦠꦠ꧀ꦠꦴ ‘‘ꦆꦢꦁ ꦢꦸꦏ꧀ꦑꦤ꧀ꦠꦶ ꦥꦫꦶꦚ꧀ꦚꦴꦥꦛꦶꦮꦺꦣꦮꦱꦺꦤ ꦥꦫꦶꦚ꧀ꦚꦴꦨꦶꦱꦩꦪꦮꦱꦺꦤ ꦩꦒ꧀ꦒꦚꦴꦟꦺꦤ ꦗꦴꦤꦠꦺꦴ ꦥꦱ꧀ꦱꦠꦺꦴ ꦄꦴꦱꦮꦴꦤꦁ ꦑꦪꦺꦴ ꦲꦺꦴꦠꦷ’’ꦠꦶꦄꦴꦢꦶꦤꦴ ꦤꦪꦺꦤ ꦪꦺꦴꦗꦺꦠꦧ꧀ꦧꦁ. ꦄꦴꦱꦮꦺꦱꦸ ꦕ ꦥꦜꦩꦩꦒ꧀ꦒꦺꦤ ꦢꦶꦛ꧀ꦜꦴꦱꦮꦺꦴ ꦑꦷꦪꦠꦶ, ꦠꦠꦶꦪꦩꦒ꧀ꦒꦺꦤ ꦏꦴꦩꦴꦱꦮꦺꦴ, ꦕꦠꦸꦠ꧀ꦡꦩꦒ꧀ꦒꦺꦤ ꦨꦮꦴꦱꦮꦺꦴ ꦄꦮꦶꦗ꧀ꦗꦴꦱꦮꦺꦴ ꦕ ꦑꦷꦪꦠꦷꦠꦶ ꦮꦺꦢꦶꦠꦧ꧀ꦧꦺꦴ.

ꦒꦴꦡꦴꦱꦸ ꦮꦶꦩꦸꦠ꧀ꦠꦶꦚꦴꦟꦤ꧀ꦠꦶ ꦮꦶꦩꦸꦠ꧀ꦠꦶꦪꦁ ꦤꦶꦧ꧀ꦧꦴꦤꦺ ꦦꦭꦺ ꦕ ꦥꦕ꧀ꦕꦮꦺꦏ꧀ꦑꦟꦚꦴꦟꦁ. ꦈꦠ꧀ꦠꦩꦤ꧀ꦠꦶ ꦈꦠ꧀ꦠꦩꦣꦩ꧀ꦩꦴꦫꦩ꧀ꦩꦟꦠ꧀ꦠꦴ ꦈꦠ꧀ꦠꦩꦁ. ꦑꦪꦺ ꦚꦴꦟꦤ꧀ꦠꦶ ꦄꦴꦱꦮꦴꦤꦁ ꦱꦁꦪꦺꦴꦗꦤꦴꦤꦚ꧀ꦕ ꦑꦪꦺ ꦑꦪꦏꦫꦺ ꦄꦫꦶꦪꦩꦒ꧀ꦒꦺ ꦚꦴꦟꦁ. ‘‘ꦑꦷꦟꦴ ꦱꦁꦪꦺꦴꦗꦤꦴ ꦆꦠꦶ ꦚꦴꦟ’’ꦤ꧀ꦠꦶ ꦆꦣꦴꦥꦶ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦶꦠꦧ꧀ꦧꦁ. ꦠꦺꦤ ꦥꦲꦷꦤꦏꦶꦭꦺꦱꦥꦕ꧀ꦕꦮꦺꦏ꧀ꦑꦟꦁ ꦢꦱ꧀ꦱꦺꦠꦶ. ꦌꦮꦩꦺꦠ꧀ꦡ ꦕꦠ꧀ꦠꦴꦫꦶꦥꦶ ꦥꦕ꧀ꦕꦮꦺꦏ꧀ꦑꦟꦚꦴꦟꦴꦤꦶ ꦮꦸꦠ꧀ꦠꦴꦤꦶ ꦲꦺꦴꦤ꧀ꦠꦶ. ꦄꦮꦱꦶꦛ꧀ꦜꦏꦶꦭꦺꦱꦥꦕ꧀ꦕꦮꦺꦏ꧀ꦑꦟꦴ ꦲꦶ ꦆꦣ ꦤꦠ꧀ꦡꦶ ꦄꦫꦲꦠ꧀ꦠꦦꦭꦴꦣꦶꦒꦩꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ. ꦪꦡꦴ ꦕꦺꦠ꧀ꦡ ꦗꦴꦤꦠꦺꦴ ꦥꦱ꧀ꦱꦠꦺꦴꦠꦶ ꦤꦶꦧ꧀ꦧꦴꦤꦴꦣꦶꦒꦩꦺꦤ ꦱꦩ꧀ꦩꦴꦢꦶꦛ꧀ꦜꦶꦏꦶꦕ꧀ꦕꦁ ꦄꦣꦶꦏꦁ ꦏꦠ꧀ꦮꦴ ꦮꦸꦠ꧀ꦠꦁ, ꦌꦮꦁ ꦱꦩ꧀ꦩꦥ꧀ꦥꦣꦴꦤꦏꦶꦕ꧀ꦕꦩ꧀ꦥꦶ ꦄꦣꦶꦏꦩꦺꦮ ꦆꦕ꧀ꦖꦶꦠꦧ꧀ꦧꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦤ ꦠ꧀ꦮꦺꦮꦶꦢꦁ ꦏꦸꦱꦷꦠꦺꦤꦴ’’ꦠꦶ ꦎꦱꦴꦤꦒꦴꦡꦩꦴꦲ.

ꦠꦠ꧀ꦡ ꦤ ꦠ꧀ꦮꦺꦮꦶꦢꦤ꧀ꦠꦶ ꦤ ꦠꦸ ꦌꦮ ꦆꦢꦁ. ꦠꦸꦱꦢ꧀ꦢꦺꦴ ꦤꦶꦥꦴꦠꦩꦠ꧀ꦠꦁ. ꦧꦴꦭꦺꦤꦩꦮꦶꦗꦴꦤꦠꦴꦠꦶ ꦩꦏꦴꦫꦺꦴ ꦥꦢꦱꦤ꧀ꦣꦶꦏꦫꦺꦴ. ꦄꦪꦚ꧀ꦲꦺꦠ꧀ꦡ ꦱꦔ꧀ꦑꦺꦥꦠ꧀ꦡꦺꦴ – ꦆꦢꦁ ꦱꦺꦏ꧀ꦑꦩꦒ꧀ꦒꦺꦤ ꦄꦱꦺꦏ꧀ꦑꦩꦒ꧀ꦒꦺꦤ ꦕ ꦥꦠ꧀ꦠꦧ꧀ꦧꦁ ꦄꦨꦶꦗ꧀ꦙꦴꦏꦴꦪꦒꦤ꧀ꦡꦴꦢꦶꦱꦧ꧀ꦧꦒꦤ꧀ꦡꦴꦤꦁ ꦥꦩꦺꦴꦕꦤꦁ ꦥꦩꦺꦴꦕꦤꦱ꧀ꦱ ꦤꦶꦩꦶꦠ꧀ꦠꦨꦹꦠꦁ ꦤꦶꦧ꧀ꦧꦴꦤꦁ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶꦄꦴꦢꦶꦤꦴ ꦕꦠ꧀ꦠꦴꦫꦶ ꦱꦕ꧀ꦕꦴꦤꦶ ꦪꦡꦴꦨꦹꦠꦁ ꦄꦮꦶꦗꦴꦤꦠꦴ ꦠꦠꦺꦴ ꦌꦮ ꦧꦴꦭꦺꦤ ꦄꦮꦶꦢ꧀ꦢꦱꦸꦤꦴ ꦪꦡꦴ ꦄꦣꦶꦒꦤ꧀ꦠꦸꦁ ꦤ ꦱꦏ꧀ꦏꦴ, ꦌꦮꦁ ꦏꦸꦱꦷꦠꦺꦤ ꦤꦶꦧ꧀ꦧꦷꦫꦶꦪꦺꦤꦴꦥꦶ, ꦠꦱ꧀ꦩꦴ ꦠꦢꦣꦶꦒꦩꦴꦪ ꦄꦴꦫꦢ꧀ꦣꦮꦷꦫꦶꦪꦺꦤ ꦨꦮꦶꦠꦧ꧀ꦧꦤ꧀ꦠꦶ. ꦠꦺꦤꦴꦲ ꦨꦒꦮꦴ ‘‘ꦄꦴꦫꦢ꧀ꦣꦮꦷꦫꦶꦪꦱ꧀ꦱꦴꦪꦁ ꦣꦩ꧀ꦩꦺꦴ, ꦤꦺꦴ ꦏꦸꦱꦷꦠꦱ꧀ꦱ’’ (ꦢꦷ. ꦤꦶ. ꧓.꧓꧕꧘).

‘‘ꦄꦴꦫꦩ꧀ꦨꦡ ꦤꦶꦏ꧀ꦏꦩꦡ, ꦪꦸꦚ꧀ꦗꦡ ꦧꦸꦢ꧀ꦣꦱꦴꦱꦤꦺ;

ꦣꦸꦤꦴꦡ ꦩꦕ꧀ꦕꦸꦤꦺꦴ ꦱꦺꦤꦁ, ꦤꦭ꦳ꦴꦒꦴꦫꦁꦮ ꦏꦸꦚ꧀ꦗꦫꦺꦴ’’ꦠꦶ. (ꦱꦁ. ꦤꦶ. ꧑.꧑꧘꧕; ꦤꦺꦠ꧀ꦠꦶ. ꧒꧙; ꦩꦶ. ꦥ. ꧕.꧑.꧔);

ꦠꦠꦶꦪꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.