꧑꧐. ꦱꦺꦴꦩꦤꦱ꧀ꦱꦱꦸꦠ꧀ꦠꦮꦟ꧀ꦟꦤꦴ

꧓꧗. ꦢꦱꦩꦺ ꦱꦸꦑꦱꦺꦴꦩꦤꦱ꧀ꦱꦧꦲꦸꦭꦺꦴꦠꦶ ꦌꦠ꧀ꦡ ꦱꦸꦑꦤ꧀ꦠꦶ ꦏꦴꦪꦶꦏꦁ ꦱꦸꦑꦁ, ꦱꦺꦴꦩꦤꦱ꧀ꦱꦤ꧀ꦠꦶ ꦕꦺꦠꦱꦶꦏꦁ. ꦠꦱ꧀ꦩꦴ ꦪꦱ꧀ꦱ ꦏꦴꦪꦶꦏꦁ ꦕꦺꦠꦱꦶꦏꦚ꧀ꦕ ꦱꦸꦑꦁ ꦄꦨꦶꦟ꧀ꦲꦁ ꦥꦮꦠ꧀ꦠꦠꦶ, ꦱꦺꦴ ꦱꦸꦑꦱꦺꦴꦩꦤꦱ꧀ꦱꦧꦲꦸꦭꦺꦴꦠꦶ ꦮꦸꦠ꧀ꦠꦺꦴ. ꦪꦺꦴꦤꦷꦠꦶ ‘‘ꦕꦠꦱ꧀ꦱꦺꦴ ꦑꦺꦴ ꦆꦩꦴ, ꦱꦴꦫꦶꦥꦸꦠ꧀ꦠ, ꦪꦺꦴꦤꦶꦪꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧑꧕꧒) ꦑꦤ꧀ꦣꦏꦺꦴꦛ꧀ꦜꦴꦱꦺꦴ ꦪꦺꦴꦤꦷꦠꦶ ꦄꦴꦒꦠꦺꦴ. ‘‘ꦪꦺꦴꦤꦶ ꦲꦺꦱꦴ, ꦨꦹꦩꦶꦗ, ꦦꦭꦱ꧀ꦱ ꦄꦣꦶꦒꦩꦴꦪꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧓.꧒꧒꧖) ꦏꦴꦫꦟꦁ.

‘‘ꦤ ꦕꦴꦲꦁ ꦧ꧀ꦫꦴꦲ꧀ꦩꦟꦁ ꦧ꧀ꦫꦹꦩꦶ, ꦪꦺꦴꦤꦶꦗꦁ ꦩꦠ꧀ꦠꦶꦱꦩ꧀ꦨꦮ’’ꦤ꧀ꦠꦶ ꦕ. (ꦩ. ꦤꦶ. ꧒.꧔꧕꧗; ꦣ. ꦥ. ꧓꧙꧖; ꦱꦸ. ꦤꦶ. ꧖꧒꧕);

‘‘ꦠꦩꦺꦤꦁ ꦏꦩ꧀ꦩꦗꦴ ꦮꦴꦠꦴ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦈꦢ꧀ꦣꦁꦥꦴꦢꦁ ꦄꦣꦺꦴꦱꦶꦫꦁ ꦱꦩ꧀ꦥꦫꦶꦮꦠ꧀ꦠꦺꦠ꧀ꦮꦴ ꦩꦴꦠꦸ ꦪꦺꦴꦤꦶꦩꦸꦑꦺ ꦱꦩ꧀ꦥꦛꦶꦥꦴꦢꦺꦤ꧀ꦠꦷ’’ꦠꦶ ꦕ ꦄꦴꦢꦷꦱꦸ ꦥꦱ꧀ꦱꦴꦮꦩꦒ꧀ꦒꦺꦴ. ꦆꦣ ꦥꦤ ꦏꦴꦫꦟꦁ ꦄꦣꦶꦥ꧀ꦥꦺꦠꦁ. ꦄꦱ꧀ꦱꦴꦠꦶ ꦄꦤꦺꦤ. ꦄꦴꦫꦢ꧀ꦣꦴꦠꦶ ꦥꦛ꧀ꦜꦥꦶꦠꦴ ꦥꦒ꧀ꦒꦲꦶꦠꦴ ꦥꦫꦶꦥꦸꦟ꧀ꦟꦴ ꦱꦩ꧀ꦥꦴꦢꦶꦠꦴ ꦮꦴ.

ꦄꦴꦱꦮꦴꦤꦁ ꦑꦪꦴꦪꦴꦠꦶ ꦌꦠ꧀ꦡ ꦄꦴꦱꦮꦤ꧀ꦠꦷꦠꦶ ꦄꦴꦱꦮꦴ, ꦕꦏ꧀ꦑꦸꦠꦺꦴꦥꦶ…ꦥꦺ… ꦩꦤꦠꦺꦴꦥꦶ ꦱꦮꦤ꧀ꦠꦶ ꦥꦮꦠ꧀ꦠꦤ꧀ꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦣꦩ꧀ꦩꦠꦺꦴ ꦪꦴꦮ ꦒꦺꦴꦠ꧀ꦫꦨꦹ, ꦎꦏꦴꦱꦠꦺꦴ ꦪꦴꦮ ꦨꦮꦒ꧀ꦒꦴ ꦱꦮꦤ꧀ꦠꦷꦠꦶ ꦮꦴ ꦄꦴꦱꦮꦴ. ꦌꦠꦺ ꦣꦩ꧀ꦩꦺ ꦌꦠꦚ꧀ꦕ ꦎꦏꦴꦱꦁ ꦄꦤ꧀ꦠꦺꦴ ꦏꦫꦶꦠ꧀ꦮꦴ ꦥꦮꦠ꧀ꦠꦤ꧀ꦠꦷꦠꦶ ꦄꦠ꧀ꦡꦺꦴ. ꦄꦤ꧀ꦠꦺꦴꦏꦫꦟꦠ꧀ꦡꦺꦴ ꦲꦶ ꦄꦪꦁ ꦄꦴꦏꦴꦫꦺꦴ. ꦕꦶꦫꦥꦴꦫꦶꦮꦴꦱꦶꦪꦛ꧀ꦜꦺꦤ ꦩꦢꦶꦫꦴꦢꦪꦺꦴ ꦄꦴꦱꦮꦴ ꦮꦶꦪꦴꦠꦶꦥꦶ ꦄꦴꦱꦮꦴ. ꦭꦺꦴꦏꦺ ꦲꦶ ꦕꦶꦫꦥꦴꦫꦶꦮꦴꦱꦶꦏꦴ ꦩꦢꦶꦫꦴꦢꦪꦺꦴ ꦄꦴꦱꦮꦴꦠꦶ ꦮꦸꦕ꧀ꦕꦤ꧀ꦠꦶ. ꦪꦢꦶ ꦕ ꦕꦶꦫꦥꦴꦫꦶꦮꦴꦱꦶꦪꦛ꧀ꦜꦺꦤ ꦄꦴꦱꦮꦴ, ꦌꦠꦺ ꦌꦮ ꦨꦮꦶꦠꦸꦁ ꦄꦫꦲꦤ꧀ꦠꦶ. ꦮꦸꦠ꧀ꦠꦁ ꦲꦺꦠꦁ – ‘‘ꦥꦸꦫꦶꦩꦴ, ꦨꦶꦏ꧀ꦑꦮꦺ, ꦏꦺꦴꦛꦶ ꦤ ꦥꦚ꧀ꦚꦴꦪꦠꦶ ꦄꦮꦶꦗ꧀ꦗꦴꦪ, ꦆꦠꦺꦴ ꦥꦸꦧ꧀ꦧꦺ ꦄꦮꦶꦗ꧀ꦗꦴ ꦤꦴꦲꦺꦴꦱꦷ’’ꦠꦶꦄꦴꦢꦶ (ꦄ. ꦤꦶ. ꧑꧐.꧖꧑). ꦄꦴꦪꦠꦁ ꦱꦁꦱꦴꦫꦢꦸꦏ꧀ꦑꦁ ꦱꦮꦤ꧀ꦠꦶ ꦥꦱꦮꦤ꧀ꦠꦷꦠꦶꦥꦶ ꦄꦴꦱꦮꦴ. ꦥꦸꦫꦶꦩꦴꦤꦶ ꦕꦺꦠ꧀ꦡ ꦤꦶꦧ꧀ꦧꦕꦤꦴꦤꦶ ꦪꦠ꧀ꦡ ꦏꦶꦭꦺꦱꦴ ꦄꦴꦱꦮꦴꦠꦶ ꦄꦴꦒꦠꦴ, ꦠꦠ꧀ꦡ ꦪꦸꦗ꧀ꦗꦤ꧀ꦠꦶ; ꦥꦕ꧀ꦖꦶꦩꦁ ꦏꦩ꧀ꦩꦺꦥꦶ. ꦤ ꦏꦺꦮꦭꦚ꧀ꦕ ꦏꦩ꧀ꦩꦏꦶꦭꦺꦱꦴ ꦌꦮ ꦄꦴꦱꦮꦴ, ꦄꦥꦶꦕ ꦑꦺꦴ ꦤꦴꦤꦥ꧀ꦥꦏꦴꦫꦴ ꦈꦥꦢ꧀ꦢꦮꦴꦥꦶ. ꦄꦨꦶꦣꦩ꧀ꦩꦺ ꦲꦶ ‘‘ꦕꦠ꧀ꦠꦴꦫꦺꦴ ꦄꦴꦱꦮꦴ – ꦏꦴꦩꦴꦱꦮꦺꦴ, ꦨꦮꦴꦱꦮꦺꦴ, ꦢꦶꦛ꧀ꦜꦴꦱꦮꦺꦴ, ꦄꦮꦶꦗ꧀ꦗꦴꦱꦮꦺꦴ’’ꦠꦶ (ꦣ. ꦱ. ꧑꧑꧐꧒) ꦏꦴꦩꦫꦴꦒꦴꦢꦪꦺꦴ ꦏꦶꦭꦺꦱꦴ ꦄꦴꦱꦮꦴꦠꦶ ꦄꦴꦒꦠꦴ. ꦱꦸꦠ꧀ꦠꦺꦥꦶ ‘‘ꦤꦴꦲꦁ, ꦕꦸꦤ꧀ꦢ, ꦢꦶꦛ꧀ꦜꦣꦩ꧀ꦩꦶꦏꦴꦤꦁꦪꦺꦮ ꦄꦴꦱꦮꦴꦤꦁ ꦱꦁꦮꦫꦴꦪ ꦣꦩ꧀ꦩꦁ ꦢꦺꦱꦺꦩꦷ’’ꦠꦶ (ꦢꦷ. ꦤꦶ. ꧓.꧑꧘꧒) ꦌꦠ꧀ꦡ ꦮꦶꦮꦴꦢꦩꦹꦭꦨꦹꦠꦴ ꦏꦶꦭꦺꦱꦴ ꦄꦴꦱꦮꦴꦠꦶ ꦄꦴꦒꦠꦴ.

‘‘ꦪꦺꦤ ꦢꦺꦮꦹꦥꦥꦠ꧀ꦪꦱ꧀ꦱ, ꦒꦤ꧀ꦣꦧ꧀ꦧꦺꦴ ꦮꦴ ꦮꦶꦲꦔ꧀ꦒꦩꦺꦴ;

ꦪꦏ꧀ꦑꦠ꧀ꦠꦁ ꦪꦺꦤ ꦒꦕ꧀ꦖꦺꦪ꧀ꦪ, ꦩꦤꦸꦱ꧀ꦱꦠ꧀ꦠꦚ꧀ꦕ ꦄꦧ꧀ꦧꦗꦺ;

ꦠꦺ ꦩꦪ꧀ꦲꦁ, ꦄꦴꦱꦮꦴ ꦑꦷꦟꦴ, ꦮꦶꦢ꧀ꦣꦱ꧀ꦠꦴ ꦮꦶꦤꦭ꦳ꦷꦏꦠꦴ’’ꦠꦶ. (ꦄ. ꦤꦶ. ꧔.꧓꧖) –

ꦌꦠ꧀ꦡ ꦠꦺꦨꦹꦩꦏꦁ ꦏꦩ꧀ꦩꦁ ꦄꦮꦱꦺꦱꦴ ꦕ ꦄꦏꦸꦱꦭꦴ ꦣꦩ꧀ꦩꦴ. ‘‘ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪꦴ’’ꦠꦶ (ꦥꦴꦫꦴ. ꧓꧙) ꦌꦠ꧀ꦡ ꦥꦫꦹꦥꦓꦴꦠꦮꦶꦥ꧀ꦥꦛꦶꦱꦴꦫꦮꦣꦧꦤ꧀ꦣꦴꦢꦪꦺꦴ ꦕꦺꦮ ꦄꦥꦴꦪꦢꦸꦏ꧀ꦑꦨꦹꦠꦴ ꦤꦴꦤꦥ꧀ꦥꦏꦴꦫꦴ ꦈꦥꦢ꧀ꦢꦮꦴ ꦕ.

ꦠꦺ ꦥꦤꦺꦠꦺ ꦄꦴꦱꦮꦴ ꦮꦶꦤꦪꦺ ‘‘ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ, ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪꦴ’’ꦠꦶ ꦢ꧀ꦮꦺꦣꦴ ꦄꦴꦒꦠꦴ. ꦱꦭ꦳ꦴꦪꦠꦤꦺ ‘‘ꦠꦪꦺꦴꦩꦺ, ꦄꦴꦮꦸꦱꦺꦴ, ꦄꦴꦱꦮꦴ – ꦏꦴꦩꦴꦱꦮꦺꦴ, ꦨꦮꦴꦱꦮꦺꦴ, ꦄꦮꦶꦗ꧀ꦗꦴꦱꦮꦺꦴ’’ꦠꦶ (ꦱꦁ. ꦤꦶ. ꧔.꧓꧒꧑) ꦠꦶꦣꦴ ꦄꦴꦒꦠꦴ. ꦠꦡꦴ ꦄꦚ꧀ꦚꦺꦱꦸ ꦱꦸꦠ꧀ꦠꦤ꧀ꦠꦺꦱꦸ. ꦄꦨꦶꦣꦩ꧀ꦩꦺ ꦠꦺꦪꦺꦮ ꦢꦶꦛ꧀ꦜꦴꦱꦮꦺꦤ ꦱꦢ꧀ꦣꦶꦁ ꦕꦠꦸꦣꦴ ꦄꦴꦒꦠꦴ. ꦤꦶꦧ꧀ꦧꦺꦣꦶꦏꦥꦫꦶꦪꦴꦪꦺ ꦥꦤ ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦤꦶꦫꦪꦒꦩꦤꦷꦪꦴ, ꦄꦠ꧀ꦡꦶ ꦄꦴꦱꦮꦴ ꦠꦶꦫꦕ꧀ꦖꦴꦤꦪꦺꦴꦤꦶꦒꦩꦤꦷꦪꦴ, ꦄꦠ꧀ꦡꦶ ꦄꦴꦱꦮꦴ ꦥꦺꦠ꧀ꦠꦶꦮꦶꦱꦪꦒꦩꦤꦷꦪꦴ, ꦄꦠ꧀ꦡꦶ ꦄꦴꦱꦮꦴ ꦩꦤꦸꦱ꧀ꦱꦭꦺꦴꦏꦒꦩꦤꦷꦪꦴ, ꦄꦠ꧀ꦡꦶ ꦄꦴꦱꦮꦴ ꦢꦺꦮꦭꦺꦴꦏꦒꦩꦤꦷꦪꦴ’’ꦠꦶ (ꦄ. ꦤꦶ. ꧖.꧖꧓) ꦥꦚ꧀ꦕꦣꦴ ꦄꦴꦒꦠꦴ. ꦏꦩ꧀ꦩꦩꦺꦮ ꦕꦺꦠ꧀ꦡ ꦄꦴꦱꦮꦴꦠꦶ ꦄꦣꦶꦥ꧀ꦥꦺꦠꦁ. ꦖꦏ꧀ꦏꦤꦶꦥꦴꦠꦺ ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦱꦁꦮꦫꦴ ꦥꦲꦴꦠꦧ꧀ꦧꦴ’’ꦠꦶꦄꦴꦢꦶꦤꦴ (ꦄ. ꦤꦶ. ꧖.꧕꧘) ꦤꦪꦺꦤ ꦖꦣꦴ ꦄꦴꦒꦠꦴ. ꦱꦧ꧀ꦧꦴꦱꦮꦥꦫꦶꦪꦴꦪꦺ ꦠꦺꦪꦺꦮ ꦢꦱ꧀ꦱꦤꦥꦲꦴꦠꦧ꧀ꦧꦺꦲꦶ ꦣꦩ꧀ꦩꦺꦲꦶ ꦱꦢ꧀ꦣꦶꦁ ꦱꦠ꧀ꦠꦣꦴ ꦄꦴꦒꦠꦴ. ꦆꦣ ꦥꦤ ꦄꦨꦶꦣꦩ꧀ꦩꦥꦫꦶꦪꦴꦪꦺꦤ ꦕꦠ꧀ꦠꦴꦫꦺꦴ ꦄꦴꦱꦮꦴ ꦄꦣꦶꦥ꧀ꦥꦺꦠꦴꦠꦶ ꦮꦺꦢꦶꦠꦧ꧀ꦧꦴ.

ꦑꦪꦴꦪꦴꦠꦶ ꦌꦠ꧀ꦡ ꦥꦤ ‘‘ꦪꦺꦴ ꦄꦴꦱꦮꦴꦤꦁ ꦑꦪꦺꦴ ꦮꦪꦺꦴ ꦨꦺꦢꦺꦴ ꦥꦫꦶꦨꦺꦢꦺꦴ ꦄꦤꦶꦕ꧀ꦕꦠꦴ ꦄꦤ꧀ꦠꦫꦣꦴꦤ’’ꦤ꧀ꦠꦶ ꦄꦴꦱꦮꦴꦤꦁ ꦱꦫꦱꦨꦺꦢꦺꦴ ꦄꦴꦱꦮꦴꦤꦁ ꦑꦪꦺꦴꦠꦶ ꦮꦸꦠ꧀ꦠꦺꦴ. ‘‘ꦗꦴꦤꦠꦺꦴ ꦄꦲꦁ, ꦨꦶꦏ꧀ꦑꦮꦺ, ꦥꦱ꧀ꦱꦠꦺꦴ ꦄꦴꦱꦮꦴꦤꦁ ꦑꦪꦁ ꦮꦢꦴꦩꦷ’’ꦠꦶ (ꦩ. ꦤꦶ. ꧑.꧑꧕) ꦌꦠ꧀ꦡ ꦄꦴꦱꦮꦴꦤꦁ ꦑꦷꦟꦴꦏꦴꦫꦺꦴ ꦤꦠ꧀ꦡꦶꦨꦴꦮꦺꦴ ꦄꦕ꧀ꦕꦤ꧀ꦠꦁ ꦄꦱꦩꦸꦥ꧀ꦥꦴꦢꦺꦴ ꦄꦴꦱꦮꦏ꧀ꦑꦪꦺꦴꦠꦶ ꦮꦸꦠ꧀ꦠꦺꦴ.

‘‘ꦱꦺꦑꦱ꧀ꦱ ꦱꦶꦏ꧀ꦑꦩꦴꦤꦱ꧀ꦱ, ꦈꦗꦸꦩꦒ꧀ꦒꦴꦤꦸꦱꦴꦫꦶꦤꦺꦴ;

ꦑꦪꦱ꧀ꦩꦶꦁ ꦥꦜꦩꦁ ꦚꦴꦟꦁ, ꦠꦠꦺꦴ ꦄꦚ꧀ꦚꦴ ꦄꦤꦤ꧀ꦠꦫꦴ’’ꦠꦶ. (ꦆꦠꦶꦮꦸ. ꧖꧒) –

ꦌꦠ꧀ꦡ ꦄꦫꦶꦪꦩꦒ꧀ꦒꦺꦴ ꦄꦴꦱꦮꦏ꧀ꦑꦪꦺꦴꦠꦶ ꦮꦸꦠ꧀ꦠꦺꦴ. ‘‘ꦄꦴꦱꦮꦴꦤꦁ ꦑꦪꦴ ꦱꦩꦟꦺꦴ ꦲꦺꦴꦠꦷ’’ꦠꦶ (ꦩ. ꦤꦶ. ꧑.꧔꧓꧘) ꦌꦠ꧀ꦡ ꦦꦭꦁ.

‘‘ꦥꦫꦮꦗ꧀ꦗꦴꦤꦸꦥꦱ꧀ꦱꦶꦱ꧀ꦱ, ꦤꦶꦕ꧀ꦕꦁ ꦈꦗ꧀ꦙꦴꦤꦱꦚ꧀ꦚꦶꦤꦺꦴ;

ꦄꦴꦱꦮꦴ ꦠꦱ꧀ꦱ ꦮꦝ꧀ꦞꦤ꧀ꦠꦶ, ꦄꦴꦫꦴ ꦱꦺꦴ ꦄꦴꦱꦮꦏ꧀ꦑꦪꦴ’’ꦠꦶ. (ꦣ. ꦥ. ꧒꧕꧓) –

ꦌꦠ꧀ꦡ ꦤꦶꦧ꧀ꦧꦴꦤꦁ. ꦆꦣ ꦥꦤ ꦦꦭꦁ ꦱꦤ꧀ꦣꦴꦪ ‘‘ꦄꦴꦱꦮꦴꦤꦁ ꦑꦪꦴꦪꦴ’’ꦠꦶ ꦮꦸꦠ꧀ꦠꦁ, ꦄꦫꦲꦠ꧀ꦠꦦꦭꦠ꧀ꦡꦴꦪꦴꦠꦶ ꦄꦠ꧀ꦡꦺꦴ.

ꦱꦁꦮꦺꦗꦤꦷꦪꦺꦱꦸ ꦜꦴꦤꦺꦱꦹꦠꦶ ꦱꦁꦮꦺꦒꦗꦤꦏꦺꦱꦸ ꦗꦴꦠꦶꦄꦴꦢꦷꦱꦸ ꦱꦁꦮꦺꦒꦮꦠ꧀ꦡꦹꦱꦸ. ꦗꦴꦠꦶ, ꦗꦫꦴ, ꦧ꧀ꦪꦴꦣꦶ, ꦩꦫꦟꦁ, ꦄꦥꦴꦪꦢꦸꦏ꧀ꦑꦁ, ꦄꦠꦷꦠꦺ ꦮꦛ꧀ꦛꦩꦹꦭꦏꦁ ꦢꦸꦏ꧀ꦑꦁ, ꦄꦤꦴꦒꦠꦺ ꦮꦛ꧀ꦛꦩꦹꦭꦏꦁ ꦢꦸꦏ꧀ꦑꦁ, ꦥꦕ꧀ꦕꦸꦥ꧀ꦥꦤ꧀ꦤꦺ ꦄꦴꦲꦴꦫꦥꦫꦶꦪꦺꦛ꧀ꦜꦶꦩꦹꦭꦏꦁ ꦢꦸꦏ꧀ꦑꦤ꧀ꦠꦶ ꦆꦩꦴꦤꦶ ꦲꦶ ꦱꦁꦮꦺꦒꦮꦠ꧀ꦡꦹꦤꦶ ꦱꦁꦮꦺꦗꦤꦷꦪꦛ꧀ꦜꦴꦤꦴꦤꦶ ꦤꦴꦩ. ꦄꦥꦶꦕ ‘‘ꦄꦴꦢꦶꦠ꧀ꦠꦺꦴ ꦭꦺꦴꦏꦱꦤ꧀ꦤꦶꦮꦴꦱꦺꦴ ꦈꦪ꧀ꦪꦸꦠ꧀ꦠꦺꦴ ꦥꦪꦴꦠꦺꦴ ꦏꦸꦩ꧀ꦩꦒ꧀ꦒꦥ꧀ꦥꦛꦶꦥꦤ꧀ꦤꦺꦴ, ꦈꦥꦤꦷꦪꦠꦶ ꦭꦺꦴꦏꦺꦴ ꦄꦢ꧀ꦣꦸꦮꦺꦴ, ꦄꦠꦴꦟꦺꦴ ꦭꦺꦴꦏꦺꦴ ꦄꦤꦨꦶꦱ꧀ꦱꦫꦺꦴ, ꦄꦱ꧀ꦱꦏꦺꦴ ꦭꦺꦴꦏꦺꦴ, ꦱꦧ꧀ꦧꦁ ꦥꦲꦴꦪ ꦒꦩꦤꦷꦪꦁ, ꦈꦴꦤꦺꦴ ꦭꦺꦴꦏꦺꦴ ꦄꦠꦶꦠ꧀ꦠꦺꦴ ꦠꦟ꧀ꦲꦴꦢꦴꦱꦺꦴ’’ꦠꦶꦌꦮꦩꦴꦢꦷꦤꦶ (ꦥꦛꦶ. ꦩ. ꧑.꧑꧑꧗) ꦕꦺꦠ꧀ꦡ ꦱꦁꦮꦺꦗꦤꦷꦪꦛ꧀ꦜꦴꦤꦴꦤꦷꦠꦶ ꦮꦺꦢꦶꦠꦧ꧀ꦧꦴꦤꦶ. ꦱꦁꦮꦺꦗꦤꦺꦤꦴꦠꦶ ꦗꦴꦠꦶꦄꦴꦢꦶꦱꦁꦮꦺꦒꦮꦠ꧀ꦡꦹꦤꦶ ꦥꦛꦶꦕ꧀ꦕ ꦈꦥ꧀ꦥꦤ꧀ꦤꦨꦪꦱꦔ꧀ꦑꦴꦠꦺꦤ ꦱꦁꦮꦺꦗꦤꦺꦤ. ꦄꦠ꧀ꦡꦠꦺꦴ ꦥꦤ ꦱꦲꦺꦴꦠ꧀ꦠꦥ꧀ꦥꦚꦴꦟꦁ ꦱꦁꦮꦺꦒꦺꦴ ꦤꦴꦩ.

ꦱꦁꦮꦶꦒ꧀ꦒꦱ꧀ꦱꦴꦠꦶ ꦒꦧ꧀ꦨꦺꦴꦏ꧀ꦏꦤ꧀ꦠꦶꦏꦴꦢꦶꦮꦱꦺꦤ ꦄꦤꦺꦏꦮꦶꦣꦺꦲꦶ ꦗꦴꦠꦶꦄꦴꦢꦶꦢꦸꦏ꧀ꦑꦺꦲꦶ ꦱꦁꦮꦺꦒꦗꦴꦠꦱ꧀ꦱ. ‘‘ꦱꦁꦮꦺꦗꦶꦠ꧀ꦮꦴ’’ꦠꦶ ꦕ ꦥꦜꦤ꧀ꦠꦶ. ꦪꦺꦴꦤꦶꦱꦺꦴ ꦥꦣꦴꦤꦺꦤꦴꦠꦶ ꦈꦥꦴꦪꦥꦣꦴꦤꦺꦤ, ꦱꦩ꧀ꦩꦴꦮꦴꦪꦴꦩꦺꦤꦴꦠꦶ ꦄꦠ꧀ꦡꦺꦴ. ꦱꦺꦴ ꦲꦶ ꦪꦡꦴ ꦄꦏꦸꦱꦭꦴ ꦣꦩ꧀ꦩꦴ ꦥꦲꦷꦪꦤ꧀ꦠꦶ, ꦏꦸꦱꦭꦴ ꦣꦩ꧀ꦩꦴ ꦨꦴꦮꦤꦴꦥꦴꦫꦶꦥꦹꦫꦶꦁ ꦒꦕ꧀ꦖꦤ꧀ꦠꦶ, ꦌꦮꦁ ꦥꦢꦲꦤꦠꦺꦴ ꦈꦠ꧀ꦠꦩꦨꦴꦮꦱꦴꦣꦤꦠꦺꦴ ꦕ ‘‘ꦥꦣꦴꦤ’’ꦤ꧀ꦠꦶ ꦮꦸꦕ꧀ꦕꦠꦶ. ꦠꦠ꧀ꦡ ꦱꦁꦮꦺꦒꦺꦤ ꦨꦮꦴꦢꦷꦱꦸ ꦏꦶꦚ꧀ꦕꦶ ꦠꦴꦟꦁ ꦭꦺꦟꦁ ꦥꦛꦶꦱꦫꦟꦁ ꦄꦥꦱ꧀ꦱꦤ꧀ꦠꦺꦴ ꦠꦠ꧀ꦡ ꦄꦤꦺꦴꦭꦷꦪꦤ꧀ꦠꦺꦴ ꦄꦭꦒ꧀ꦒꦩꦴꦤꦱꦺꦴ ꦠꦥ꧀ꦥꦛꦶꦥꦏ꧀ꦑꦺꦤ ꦕ ꦮꦶꦤꦶꦮꦠ꧀ꦠꦶꦠꦮꦶꦱꦚ꧀ꦚꦶꦠꦺꦴ ꦄꦚ꧀ꦚꦢꦠ꧀ꦡꦸ ꦤꦶꦧ꧀ꦧꦴꦤꦤꦶꦤ꧀ꦤꦺꦴ ꦲꦺꦴꦠꦶ ꦤꦶꦧ꧀ꦧꦴꦤꦥꦺꦴꦟꦺꦴ ꦤꦶꦧ꧀ꦧꦴꦤꦥꦧ꧀ꦨꦴꦫꦺꦴ. ꦱꦺꦴ ꦏꦭ꧀ꦪꦴꦟꦩꦶꦠ꧀ꦠꦱꦤ꧀ꦤꦶꦱ꧀ꦱꦪꦺꦤ ꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦺꦴ ꦮꦶꦱꦸꦢ꧀ꦣꦴꦱꦪꦥ꧀ꦥꦪꦺꦴꦒꦺꦴ ꦱꦩꦡꦮꦶꦥꦱ꧀ꦱꦤꦴꦱꦸ ꦪꦸꦠ꧀ꦠꦥ꧀ꦥꦪꦸꦠ꧀ꦠꦺꦴ ꦱꦧ꧀ꦧꦱ꧀ꦩꦶꦩ꧀ꦥꦶ ꦱꦔ꧀ꦑꦴꦫꦒꦠꦺ ꦤꦶꦧ꧀ꦧꦶꦤ꧀ꦢꦠꦶ ꦮꦶꦫꦗ꧀ꦗꦠꦶ, ꦮꦶꦥꦱ꧀ꦱꦤꦁ ꦈꦱ꧀ꦱꦸꦏ꧀ꦏꦴꦥꦺꦠꦶ. ꦠꦠ꧀ꦡ ꦪꦢꦶꦢꦁ ꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦺꦴ ꦮꦶꦱꦸꦢ꧀ꦣꦴꦱꦪꦥ꧀ꦥꦪꦺꦴꦒꦺꦴ ꦱꦩꦡꦮꦶꦥꦱ꧀ꦱꦤꦴꦱꦸ ꦪꦸꦠ꧀ꦠꦥ꧀ꦥꦪꦸꦠ꧀ꦠꦺꦴ, ꦠꦺꦤꦱ꧀ꦱ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦸꦑꦱꦺꦴꦩꦤꦱ꧀ꦱꦧꦲꦸꦭꦠꦴ ꦮꦺꦢꦶꦠꦧ꧀ꦧꦴ. ꦪꦁ ꦥꦤꦴꦪꦁ ꦱꦩꦡꦺ ꦥꦠꦶꦛ꧀ꦜꦶꦠꦺꦴ ꦮꦶꦥꦱ꧀ꦱꦤꦴꦪ ꦪꦸꦠ꧀ꦠꦥ꧀ꦥꦪꦸꦠ꧀ꦠꦺꦴ ꦱꦧ꧀ꦧꦱ꧀ꦩꦶꦩ꧀ꦥꦶ ꦱꦔ꧀ꦑꦴꦫꦒꦠꦺ ꦤꦶꦧ꧀ꦧꦶꦤ꧀ꦢꦠꦶ ꦮꦶꦫꦗ꧀ꦗꦠꦶ, ꦮꦶꦥꦱ꧀ꦱꦤꦁ ꦈꦱ꧀ꦱꦸꦏ꧀ꦏꦴꦥꦺꦠꦶ, ꦠꦺꦤꦱ꧀ꦱ ꦪꦺꦴꦤꦶ ꦄꦴꦫꦢ꧀ꦣꦴ ꦄꦴꦱꦮꦴꦤꦁ ꦑꦪꦴꦪꦴꦠꦶ ꦮꦺꦢꦶꦠꦧ꧀ꦧꦁ.

ꦒꦴꦡꦴꦱꦸ ꦱꦁꦮꦶꦗ꧀ꦗꦺꦡꦺꦮꦴꦠꦶ ꦱꦁꦮꦶꦗ꧀ꦗꦺꦪ꧀ꦪ ꦌꦮ ꦱꦁꦮꦺꦒꦁ ꦏꦫꦺꦪ꧀ꦪ ꦌꦮ. ‘‘ꦱꦁꦮꦶꦗ꧀ꦗꦶꦠ꧀ꦮꦴꦤꦴ’’ꦠꦶ ꦕ ꦥꦜꦤ꧀ꦠꦶ. ꦮꦸꦠ꧀ꦠꦤꦪꦺꦤ ꦱꦁꦮꦶꦒ꧀ꦒꦺꦴ ꦲꦸꦠ꧀ꦮꦴꦠꦶ ꦄꦠ꧀ꦡꦺꦴ. ꦥꦟ꧀ꦝꦶꦠꦺꦴꦠꦶ ꦱꦥ꧀ꦥꦚ꧀ꦚꦺꦴ, ꦠꦶꦲꦺꦠꦸꦏꦥꦛꦶꦱꦤ꧀ꦣꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦥꦚ꧀ꦚꦴꦪ ꦱꦩꦮꦺꦏ꧀ꦑꦶꦪꦴꦠꦶ ꦱꦁꦮꦺꦒꦮꦠ꧀ꦡꦹꦤꦶ ꦱꦁꦮꦶꦗ꧀ꦗꦤꦮꦱꦺꦤ ꦥꦚ꧀ꦚꦴꦪ ꦱꦩ꧀ꦩꦴ ꦄꦮꦺꦏ꧀ꦑꦶꦪ. ꦄꦡ ꦮꦴ ꦥꦚ꧀ꦚꦴꦪ ꦱꦩ꧀ꦩꦴ ꦄꦮꦺꦏ꧀ꦑꦶꦠ꧀ꦮꦴꦠꦶ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮ.

ꦢꦱꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦆꦠꦶ ꦥꦫꦩꦠ꧀ꦡꦢꦷꦥꦤꦶꦪꦴ ꦆꦠꦶꦮꦸꦠ꧀ꦠꦏ-ꦄꦛ꧀ꦜꦏꦡꦴꦪ

ꦢꦸꦏꦤꦶꦥꦴꦠꦺ ꦥꦜꦩꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.