꧘. ꦱꦔ꧀ꦓꦨꦺꦢꦱꦸꦠ꧀ꦠꦮꦟ꧀ꦟꦤꦴ

꧑꧘. ꦄꦛ꧀ꦜꦩꦺ ꦌꦏꦣꦩ꧀ꦩꦺꦴꦠꦶ ꦏꦠꦫꦺꦴꦪꦁ ꦱꦸꦠ꧀ꦠꦤꦶꦏ꧀ꦑꦺꦥꦺꦴ? ꦄꦛ꧀ꦜꦸꦥ꧀ꦥꦠ꧀ꦠꦶꦏꦺꦴ. ꦠꦠ꧀ꦫꦴꦪꦁ ꦱꦔ꧀ꦑꦺꦥꦏꦡꦴ – ꦢꦺꦮꦢꦠ꧀ꦠꦺꦴ ꦲꦶ ꦄꦗꦴꦠꦱꦠ꧀ꦠꦸꦁ ꦢꦸꦒ꧀ꦒꦲꦟꦁ ꦒꦴꦲꦴꦥꦺꦠ꧀ꦮꦴ ꦠꦱ꧀ꦱ ꦥꦶꦠꦫꦁ ꦫꦴꦗꦴꦤꦁ ꦧꦶꦩ꧀ꦧꦶꦱꦴꦫꦁ ꦠꦺꦤ ꦩꦴꦫꦴꦥꦺꦠ꧀ꦮꦴꦥꦶ ꦄꦨꦶꦩꦴꦫꦺ ꦥꦪꦺꦴꦗꦺꦠ꧀ꦮꦴꦥꦶ ꦱꦶꦭꦴꦥꦮꦶꦗ꧀ꦙꦤꦺꦤ ꦭꦺꦴꦲꦶꦠꦸꦥ꧀ꦥꦴꦢꦏꦩ꧀ꦩꦁ ꦏꦠ꧀ꦮꦴꦥꦶ ꦤ ꦠꦴꦮꦠꦴ ꦥꦴꦏꦛꦺꦴ ꦗꦴꦠꦺꦴ, ꦤꦴꦭ꦳ꦴꦒꦶꦫꦶꦁ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦥꦤ ꦥꦴꦏꦛꦺꦴ ꦗꦴꦠꦺꦴ. ꦄꦡ ꦩꦲꦴꦗꦤꦺꦴ ‘‘ꦌꦮꦫꦹꦥꦩ꧀ꦥꦶ ꦤꦴꦩ ꦥꦴꦥꦁ ꦒꦲꦺꦠ꧀ꦮꦴ ꦫꦴꦗꦴ ꦮꦶꦕꦫꦠꦷ’’ꦠꦶ ꦏꦺꦴꦭꦴꦲꦭꦁ ꦄꦏꦴꦱꦶ, ꦩꦲꦴꦓꦺꦴꦱꦺꦴ ꦄꦲꦺꦴꦱꦶ. ꦠꦁ ꦱꦸꦠ꧀ꦮꦴ ꦫꦴꦗꦴ ꦄꦠ꧀ꦠꦤꦴ ꦢꦷꦪꦩꦴꦤꦴꦤꦶ ꦥꦚ꧀ꦕ ꦡꦴꦭꦶꦥꦴꦏꦱꦠꦴꦤꦶ ꦥꦕ꧀ꦖꦶꦤ꧀ꦢꦴꦥꦺꦱꦶ, ꦈꦥꦛ꧀ꦜꦴꦤꦩ꧀ꦥꦶꦱ꧀ꦱ ꦤꦴꦒꦩꦴꦱꦶ. ꦤꦴꦒꦫꦴꦥꦶ ꦏꦸꦭꦁ ꦈꦥꦒꦠꦱ꧀ꦱ ꦏꦛꦕ꧀ꦖꦸꦨꦠ꧀ꦠꦩ꧀ꦥꦶꦱ꧀ꦱ ꦤꦴꦢꦁꦱꦸ. ꦱꦺꦴ ꦥꦫꦶꦲꦷꦤꦭꦴꦨꦱꦏ꧀ꦏꦴꦫꦺꦴ ꦏꦺꦴꦲꦚ꧀ꦚꦺꦤ ꦗꦷꦮꦶꦠꦸꦏꦴꦩꦺꦴ ꦱꦠ꧀ꦡꦴꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦕ ꦮꦠ꧀ꦡꦹꦤꦶ ꦪꦴꦕꦶꦠ꧀ꦮꦴ ‘‘ꦄꦭꦁ, ꦢꦺꦮꦢꦠ꧀ꦠ, ꦪꦺꦴ ꦆꦕ꧀ꦖꦠꦶ, ꦱꦺꦴ ꦄꦴꦫꦚ꧀ꦚꦶꦏꦺꦴ ꦲꦺꦴꦠꦹ’’ꦠꦶꦄꦴꦢꦶꦤꦴ (ꦥꦴꦫꦴ. ꧔꧐꧙; ꦕꦹꦭ꦳ꦮ. ꧓꧔꧓) ꦨꦒꦮꦠꦴ ꦥꦛꦶꦏ꧀ꦑꦶꦠ꧀ꦠꦺꦴ ꦠꦺꦲꦶ ꦥꦚ꧀ꦕꦲꦶ ꦮꦠ꧀ꦡꦹꦲꦶ ꦧꦴꦭꦁ ꦭꦹꦑꦥ꧀ꦥꦱꦤ꧀ꦤꦁ ꦗꦤꦁ ꦱꦚ꧀ꦚꦴꦥꦺꦤ꧀ꦠꦺꦴ ꦥꦚ꧀ꦕꦱꦠꦺ ꦮꦗ꧀ꦗꦶꦥꦸꦠ꧀ꦠꦏꦺ ꦱꦭꦴꦏꦁ ꦒꦴꦲꦴꦥꦺꦠ꧀ꦮꦴ ꦱꦔ꧀ꦓꦁ ꦨꦶꦤ꧀ꦢꦶꦠ꧀ꦮꦴꦮ ꦠꦺ ꦄꦴꦢꦴꦪ ꦒꦪꦴꦱꦷꦱꦁ ꦄꦒꦩꦴꦱꦶ. ꦄꦡ ꦢ꧀ꦮꦺ ꦄꦒ꧀ꦒꦱꦴꦮꦏꦴ ꦱꦠ꧀ꦡꦸ ꦄꦴꦟꦴꦪ ꦠꦠ꧀ꦡ ꦒꦤ꧀ꦠ꧀ꦮꦴ ꦣꦩ꧀ꦩꦁ ꦢꦺꦱꦺꦠ꧀ꦮꦴ ꦠꦺ ꦄꦫꦶꦪꦦꦭꦺ ꦥꦠꦶꦛ꧀ꦜꦴꦥꦺꦠ꧀ꦮꦴ ꦄꦴꦤꦪꦶꦁꦱꦸ. ꦪꦺ ꦥꦤꦱ꧀ꦱ ꦱꦔ꧀ꦓꦨꦺꦢꦴꦪ ꦥꦫꦏ꧀ꦏꦩꦤ꧀ꦠꦱ꧀ꦱ ꦭꦢ꧀ꦣꦶꦁ ꦫꦺꦴꦕꦺꦠ꧀ꦮꦴ ꦠꦡꦺꦮ ꦥꦒ꧀ꦒꦪ꧀ꦲ ꦜꦶꦠꦴ ꦱꦔ꧀ꦓꦺ ꦨꦶꦗ꧀ꦗꦤ꧀ꦠꦺ ꦨꦶꦤ꧀ꦤꦺ ꦕ ꦱꦩꦤꦸꦚ꧀ꦚꦴ ꦄꦲꦺꦱꦸꦁ, ꦠꦺꦱꦁ ꦠꦁ ꦢꦷꦓꦫꦠ꧀ꦠꦁ ꦄꦲꦶꦠꦴꦪ ꦢꦸꦏ꧀ꦑꦴꦪ ꦄꦲꦺꦴꦱꦶ.

ꦢꦺꦮꦢꦠ꧀ꦠꦺꦴꦥꦶ ꦤ ꦕꦶꦫꦱ꧀ꦱꦺꦮ ꦫꦺꦴꦒꦴꦨꦶꦨꦹꦠꦺꦴ ꦧꦴꦭ꦳꧀ꦲꦒꦶꦭꦴꦤꦺꦴ ꦩꦫꦟꦏꦴꦭꦺ ‘‘ꦱꦠ꧀ꦡꦴꦫꦁ ꦮꦤ꧀ꦢꦶꦱ꧀ꦱꦴꦩꦷ’’ꦠꦶ ꦩꦚ꧀ꦕꦏꦱꦶꦮꦶꦏꦴꦪ ꦤꦷꦪꦩꦴꦤꦺꦴ ꦗꦺꦠꦮꦤꦥꦺꦴꦏ꧀ꦑꦫꦟꦶꦠꦷꦫꦺ ꦜꦥꦶꦠꦺꦴ ꦥꦡꦮꦶꦪꦴ ꦮꦶꦮꦫꦺ ꦢꦶꦤ꧀ꦤꦺ ꦥꦠꦶꦠ꧀ꦮꦴ ꦄꦮꦷꦕꦶꦩ꧀ꦲꦶ ꦤꦶꦧ꧀ꦧꦠ꧀ꦠꦶ, ꦪꦺꦴꦗꦤꦱꦠꦶꦏꦺꦴ ꦕꦱ꧀ꦱ ꦄꦠ꧀ꦠꦨꦴꦮꦺꦴ ꦄꦲꦺꦴꦱꦶ ꦏꦥ꧀ꦥꦛ꧀ꦜꦶꦪꦺꦴ ꦠꦴꦭꦏ꧀ꦑꦤ꧀ꦣꦥꦫꦶꦩꦴꦟꦺꦲꦶ ꦄꦪꦱꦹꦭꦺꦲꦶ ꦮꦶꦤꦶꦮꦶꦢ꧀ꦣꦺꦴ. ꦢꦺꦮꦢꦠ꧀ꦠꦥꦏ꧀ꦑꦶꦏꦴꦤꦶ ꦕ ꦥꦚ꧀ꦕꦩꦠ꧀ꦠꦴꦤꦶ ꦏꦸꦭꦱꦠꦴꦤꦶ ꦠꦱ꧀ꦱ ꦭꦢ꧀ꦣꦶꦪꦁ ꦜꦶꦠꦴꦤꦶ ꦱꦲ ꦧꦤ꧀ꦣꦮꦺꦲꦶ ꦤꦶꦫꦪꦺ ꦤꦶꦧ꧀ꦧꦠ꧀ꦠꦴꦤꦶ. ꦌꦏꦢꦶꦮꦱꦁ ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ ‘‘ꦄꦴꦮꦸꦱꦺꦴ, ꦢꦺꦮꦢꦠ꧀ꦠꦺꦤ ꦱꦔ꧀ꦓꦁ ꦨꦶꦤ꧀ꦢꦤ꧀ꦠꦺꦤ ꦨꦴꦫꦶꦪꦁ ꦏꦩ꧀ꦩꦁ ꦏꦠ’’ꦤ꧀ꦠꦶ. ꦄꦡ ꦱꦠ꧀ꦡꦴ ꦣꦩ꧀ꦩꦱꦨꦁ ꦈꦥꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ ꦱꦔ꧀ꦓꦨꦺꦢꦺ ꦄꦴꦢꦷꦤꦮꦁ ꦢꦱ꧀ꦱꦺꦤ꧀ꦠꦺꦴ ꦆꦩꦁ ꦱꦸꦠ꧀ꦠꦁ ꦄꦨꦴꦱꦶ. ꦏꦺꦕꦶ ꦥꦤ ꦨꦟꦤ꧀ꦠꦶ ‘‘ꦢꦺꦮꦢꦠ꧀ꦠꦱ꧀ꦱ ꦠꦥ꧀ꦥꦏ꧀ꦑꦶꦏꦴꦤꦚ꧀ꦕ ꦠꦡꦴ ꦤꦶꦫꦪꦺ ꦤꦶꦧ꧀ꦧꦠ꧀ꦠꦨꦴꦮꦁ ꦢꦶꦱ꧀ꦮꦴ ꦱꦔ꧀ꦓꦨꦺꦢꦺ ꦄꦴꦢꦷꦤꦮꦁ ꦢꦱ꧀ꦱꦺꦤ꧀ꦠꦺꦴ ꦨꦒꦮꦴ ꦄꦠ꧀ꦠꦤꦺꦴ ꦄꦗ꧀ꦙꦴꦱꦪꦺꦤꦺꦮ ꦆꦩꦁ ꦱꦸꦠ꧀ꦠꦁ ꦢꦺꦱꦺꦱꦷ’’ꦠꦶ.

ꦠꦠ꧀ꦡ ꦌꦏꦣꦩ꧀ꦩꦺꦴꦠꦶ ꦌꦏꦺꦴ ꦄꦏꦸꦱꦭꦺꦴ ꦩꦲꦴꦱꦴꦮꦗ꧀ꦗꦣꦩ꧀ꦩꦺꦴ. ꦭꦺꦴꦏꦺꦠꦶ ꦱꦠ꧀ꦠꦭꦺꦴꦏꦺ. ꦈꦥ꧀ꦥꦗ꧀ꦗꦩꦴꦤꦺꦴ ꦈꦥ꧀ꦥꦗ꧀ꦗꦠꦷꦠꦶ ꦌꦠ꧀ꦡ ꦨꦺꦢꦱꦁꦮꦠ꧀ꦠꦤꦶꦏꦺꦱꦸ ꦨꦟ꧀ꦝꦤꦴꦢꦷꦱꦸ ꦱꦔ꧀ꦓꦺ ꦈꦥ꧀ꦥꦤ꧀ꦤꦺꦱꦸꦥꦶ ‘‘ꦣꦩ꧀ꦩꦺꦴ ꦄꦣꦩ꧀ꦩꦺꦴ’’ꦠꦶꦄꦴꦢꦷꦱꦸ ꦄꦛ꧀ꦜꦴꦫꦱꦨꦺꦢꦏꦫꦮꦠ꧀ꦡꦹꦱꦸ ꦪꦱ꧀ꦱ ꦏꦱ꧀ꦱꦕꦶ ꦢꦷꦥꦤꦮꦱꦺꦤ ꦮꦺꦴꦲꦫꦤ꧀ꦠꦺꦱꦸꦥꦶ ꦠꦠ꧀ꦡ ꦫꦸꦕꦶꦗꦤꦤꦠ꧀ꦡꦁ ꦄꦤꦸꦱ꧀ꦱꦴꦮꦺꦤ꧀ꦠꦺꦱꦸꦥꦶ ꦄꦤꦸꦱ꧀ꦱꦴꦮꦺꦠ꧀ꦮꦴ ꦱꦭꦴꦏꦴꦪ ꦒꦴꦲꦶꦠꦴꦪꦥꦶ ꦱꦔ꧀ꦓꦨꦺꦢꦺꦴ ꦈꦥ꧀ꦥꦗ꧀ꦗꦩꦴꦤꦺꦴ ꦤꦴꦩ ꦲꦺꦴꦠꦶ, ꦱꦭꦴꦏꦴꦪ ꦥꦤ ꦒꦴꦲꦶꦠꦴꦪ ꦕꦠ꧀ꦠꦴꦫꦺꦴ ꦮꦴ ꦄꦠꦶꦫꦺꦏꦴ ꦮꦴ ꦪꦢꦴ ꦄꦴꦮꦺꦟꦶꦏꦁ ꦈꦢ꧀ꦢꦺꦱꦁ ꦮꦴ ꦱꦔ꧀ꦓꦏꦩ꧀ꦩꦁ ꦮꦴ ꦏꦫꦺꦴꦤ꧀ꦠꦶ, ꦠꦢꦴ ꦱꦔ꧀ꦓꦨꦺꦢꦺꦴ ꦈꦥ꧀ꦥꦗ꧀ꦗꦠꦶ ꦤꦴꦩ. ꦏꦠꦺ ꦥꦤ ꦠꦱ꧀ꦩꦶꦁ ꦱꦔ꧀ꦓꦨꦺꦢꦺꦴ ꦈꦥ꧀ꦥꦤ꧀ꦤꦺꦴ ꦤꦴꦩ? ꦏꦩ꧀ꦩꦁ, ꦈꦢ꧀ꦢꦺꦱꦺꦴ, ꦮꦺꦴꦲꦴꦫꦺꦴ, ꦄꦤꦸꦱ꧀ꦱꦴꦮꦤꦴ, ꦱꦭꦴꦏꦒ꧀ꦒꦴꦲꦺꦴꦠꦶ ꦆꦩꦺꦱꦸ ꦲꦶ ꦥꦚ꧀ꦕꦱꦸ ꦱꦔ꧀ꦓꦱ꧀ꦱ ꦨꦺꦢꦏꦴꦫꦟꦺꦱꦸ ꦏꦩ꧀ꦩꦁ ꦮꦴ ꦈꦢ꧀ꦢꦺꦱꦺꦴ ꦮꦴ ꦥꦩꦴꦟꦁ, ꦮꦺꦴꦲꦴꦫꦴꦤꦸꦱ꧀ꦱꦴꦮꦤꦱꦭꦴꦏꦒ꧀ꦒꦴꦲꦴ ꦥꦤ ꦥꦸꦧ꧀ꦧꦨꦴꦒꦴꦠꦶ.

ꦧꦲꦸꦗꦤꦴꦲꦶꦠꦴꦪꦴꦠꦶꦄꦴꦢꦷꦱꦸ ꧐.ꦩꦲꦴꦗꦤꦱ꧀ꦱ ꦙꦴꦤꦩꦒ꧀ꦒꦴꦢꦶꦱꦩ꧀ꦥꦠ꧀ꦠꦶꦤꦶꦮꦴꦫꦟꦺꦤ ꦄꦲꦶꦠꦴꦪ, ꦱꦒ꧀ꦒꦱꦩ꧀ꦥꦠ꧀ꦠꦶꦤꦶꦮꦴꦫꦟꦺꦤ ꦄꦱꦸꦑꦴꦪ, ꦄꦥꦴꦪꦹꦥꦥꦠ꧀ꦠꦶꦲꦺꦠꦸꦨꦴꦮꦺꦤ ꦄꦤꦠ꧀ꦡꦴꦪ. ꦄꦏꦸꦱꦭꦣꦩ꧀ꦩꦮꦱꦺꦤ ꦮꦴ ꦄꦲꦶꦠꦴꦪ, ꦲꦶꦠꦩꦠ꧀ꦠꦱ꧀ꦱꦥꦶ ꦄꦨꦴꦮꦴ ꦱꦸꦒꦠꦶꦪꦩ꧀ꦥꦶ ꦤꦶꦧ꧀ꦧꦠ꧀ꦠꦤꦏꦏꦴꦪꦶꦏꦕꦺꦠꦱꦶꦏꦢꦸꦏ꧀ꦑꦴꦪ ꦈꦥ꧀ꦥꦗ꧀ꦗꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦢꦺꦮꦩꦤꦸꦱ꧀ꦱꦴꦤꦤ꧀ꦠꦶ ꦆꦢꦁ ‘‘ꦧꦲꦸꦤꦺꦴ ꦗꦤꦱ꧀ꦱꦴ’’ꦠꦶ ꦮꦸꦠ꧀ꦠꦺꦱꦸ ꦈꦏ꧀ꦏꦛ꧀ꦜꦥꦸꦒ꧀ꦒꦭꦤꦶꦢ꧀ꦢꦺꦱꦺꦴ. ꦄꦥꦫꦺꦴ ꦤꦪꦺꦴ – ꦧꦲꦸꦗꦤꦴꦲꦶꦠꦴꦪꦴꦠꦶ ꦧꦲꦸꦗꦤꦱ꧀ꦱ ꦩꦲꦠꦺꦴ ꦱꦠ꧀ꦠꦏꦴꦪꦱ꧀ꦱ ꦄꦲꦶꦠꦠ꧀ꦡꦴꦪ, ꦢꦶꦛ꧀ꦜꦣꦩ꧀ꦩꦶꦏꦱꦩ꧀ꦥꦫꦴꦪꦶꦏꦄꦤꦠ꧀ꦡꦴꦪꦴꦠꦶ ꦄꦠ꧀ꦡꦺꦴ. ꦄꦱꦸꦑꦴꦪꦴꦠꦶ ꦢꦶꦛ꧀ꦜꦣꦩ꧀ꦩꦶꦏꦱꦩ꧀ꦥꦫꦴꦪꦶꦏꦄꦱꦸꦑꦠ꧀ꦡꦴꦪ, ꦢꦸꦮꦶꦣꦢꦸꦏ꧀ꦑꦠ꧀ꦡꦴꦪꦴꦠꦶ ꦄꦠ꧀ꦡꦺꦴ. ꦄꦤꦠ꧀ꦡꦴꦪꦴꦠꦶ ꦥꦫꦩꦠ꧀ꦡꦥꦛꦶꦏ꧀ꦑꦺꦥꦴꦪ. ꦤꦶꦧ꧀ꦧꦴꦤꦚ꧀ꦲꦶ ꦥꦫꦩꦠ꧀ꦡꦺꦴ, ꦠꦠꦺꦴ ꦈꦠ꧀ꦠꦫꦶꦁ ꦄꦠ꧀ꦡꦺꦴ ꦤꦠ꧀ꦡꦶ. ꦄꦲꦶꦠꦴꦪꦴꦠꦶ ꦩꦒ꧀ꦒꦥꦛꦶꦏ꧀ꦑꦺꦥꦴꦪ. ꦤꦶꦧ꧀ꦧꦴꦤꦱꦩ꧀ꦥꦴꦥꦏꦩꦒ꧀ꦒꦠꦺꦴ ꦲꦶ ꦈꦠ꧀ꦠꦫꦶꦁ ꦲꦶꦠꦁ ꦤꦴꦩ ꦤꦠ꧀ꦡꦶ. ꦢꦸꦏ꧀ꦑꦴꦪꦴꦠꦶ ꦄꦫꦶꦪꦱꦸꦑꦮꦶꦫꦴꦣꦤꦺꦤ ꦮꦛ꧀ꦛꦢꦸꦏ꧀ꦑꦠꦴꦪ. ꦪꦺ ꦲꦶ ꦄꦫꦶꦪꦱꦸꦑꦠꦺꦴ ꦮꦶꦫꦢ꧀ꦣꦴ ꦠꦁ ꦄꦣꦶꦒꦤ꧀ꦠꦸꦁ ꦄꦨꦧ꧀ꦧꦴ, ꦠꦺ ꦮꦛ꧀ꦛꦢꦸꦏ꧀ꦑꦺ ꦥꦫꦶꦧ꧀ꦨꦩꦤ꧀ꦠꦶ, ꦄꦫꦶꦪꦱꦸꦑꦠꦺꦴ ꦕ ꦈꦠ꧀ꦠꦫꦶꦁ ꦱꦸꦑꦁ ꦤꦴꦩ ꦤꦠ꧀ꦡꦶ. ꦮꦸꦠ꧀ꦠꦚ꧀ꦲꦺꦠꦁ ‘‘ꦄꦪꦁ ꦱꦩꦴꦣꦶ ꦥꦕ꧀ꦕꦸꦥ꧀ꦥꦤ꧀ꦤꦱꦸꦑꦺꦴ ꦕꦺꦮ ꦄꦴꦪꦠꦶꦚ꧀ꦕ ꦱꦸꦑꦮꦶꦥꦴꦏꦺꦴ’’ꦠꦶ (ꦢꦷ. ꦤꦶ. ꧓.꧓꧕꧕; ꦄ. ꦤꦶ. ꧕.꧒꧗).

ꦆꦢꦴꦤꦶ ‘‘ꦱꦔ꧀ꦓꦨꦺꦢꦺꦴ’’ꦠꦶ ꦱꦫꦹꦥꦠꦺꦴ ꦢꦱ꧀ꦱꦺꦠ꧀ꦮꦴ ꦠꦱ꧀ꦱ ꦄꦲꦶꦠꦴꦢꦷꦤꦁ ꦌꦏꦤ꧀ꦠꦲꦺꦠꦸꦨꦴꦮꦁ ꦥꦏꦴꦱꦺꦠꦸꦁ ‘‘ꦱꦔ꧀ꦓꦺ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦨꦶꦤ꧀ꦤꦺ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦨꦶꦤ꧀ꦤꦺꦠꦶ ꦤꦶꦩꦶꦠ꧀ꦠꦠ꧀ꦡꦺ ꦨꦸꦩ꧀ꦩꦁ ꦪꦡꦴ ‘‘ꦄꦣꦤꦴꦤꦁ ꦣꦤꦺ ꦄꦤꦤꦸꦥ꧀ꦥꦢꦷꦪꦩꦴꦤꦺ’’ꦠꦶ (ꦢꦷ. ꦤꦶ. ꧓.꧙꧑), ꦨꦺꦢꦲꦺꦠꦹꦠꦶ ꦄꦠ꧀ꦡꦺꦴ. ꦄꦚ꧀ꦚꦩꦚ꧀ꦚꦁ ꦨꦟ꧀ꦝꦤꦴꦤꦷꦠꦶ ꦕꦠꦸꦤ꧀ꦤꦁ ꦥꦫꦶꦱꦴꦤꦁ ꦠꦥ꧀ꦥꦏ꧀ꦑꦶꦏꦴꦤꦚ꧀ꦕ ‘‘ꦌꦱꦺꦴ ꦣꦩ꧀ꦩꦺꦴ, ꦤꦺꦱꦺꦴ ꦣꦩ꧀ꦩꦺꦴ’’ꦠꦶ ꦄꦚ꧀ꦚꦩꦚ꧀ꦚꦁ ꦮꦶꦮꦢꦤꦴꦤꦶ. ꦨꦟ꧀ꦝꦤꦚ꧀ꦲꦶ ꦏꦭꦲꦱ꧀ꦱ ꦥꦸꦧ꧀ꦧꦨꦴꦒꦺꦴ. ꦥꦫꦶꦨꦴꦱꦴꦠꦶ ‘‘ꦆꦢꦚ꧀ꦕꦶꦢꦚ꧀ꦕ ꦮꦺꦴ ꦄꦤꦠ꧀ꦡꦁ ꦏꦫꦶꦱ꧀ꦱꦴꦩꦴ’’ꦠꦶ ꦨꦪꦸꦥ꧀ꦥꦴꦢꦤꦮꦱꦺꦤ ꦠꦗ꧀ꦗꦤꦴ. ꦥꦫꦶꦏ꧀ꦑꦺꦥꦴꦠꦶ ꦗꦴꦠꦶꦄꦴꦢꦶꦮꦱꦺꦤ ꦥꦫꦶꦠꦺꦴ ꦑꦺꦥꦴ, ꦢꦱꦲꦶ ꦄꦏ꧀ꦏꦺꦴꦱꦮꦠ꧀ꦡꦹꦲꦶ ꦑꦸꦁꦱꦤꦮꦩ꧀ꦨꦤꦴ. ꦥꦫꦶꦕ꧀ꦕꦗꦤꦴꦠꦶ ꦈꦏ꧀ꦑꦺꦥꦤꦶꦪꦏꦩ꧀ꦩꦏꦫꦟꦴꦢꦶꦮꦱꦺꦤ ꦤꦶꦱ꧀ꦱꦴꦫꦟꦴ. ꦠꦠ꧀ꦡꦴꦠꦶ ꦠꦱ꧀ꦩꦶꦁ ꦱꦔ꧀ꦓꦨꦺꦢꦺ, ꦠꦤ꧀ꦤꦶꦩꦶꦠ꧀ꦠꦺ ꦮꦴ ꦨꦟ꧀ꦝꦤꦴꦢꦶꦏꦺ. ꦄꦥ꧀ꦥꦱꦤ꧀ꦤꦴꦠꦶ ꦫꦠꦤꦠ꧀ꦠꦪꦒꦸꦟꦴꦤꦁ ꦄꦤꦨꦶꦚ꧀ꦚꦴ. ꦤ ꦥꦱꦷꦢꦤ꧀ꦠꦷꦠꦶ ‘‘ꦣꦩ꧀ꦩꦕꦴꦫꦶꦤꦺꦴ ꦱꦩꦕꦴꦫꦶꦤꦺꦴ’’ꦠꦶꦄꦴꦢꦶꦤꦴ ꦪ꧀ꦮꦴꦪꦁ ꦨꦶꦏ꧀ꦑꦹꦱꦸ ꦥꦱꦴꦢꦤꦴꦏꦴꦫꦺꦴ, ꦠꦡꦴ ꦤ ꦥꦱꦷꦢꦤ꧀ꦠꦶ, ꦠꦺꦱꦁ ꦮꦴ ꦱꦺꦴꦠꦧ꧀ꦧꦁ ꦱꦢ꧀ꦣꦴꦠꦧ꧀ꦧꦁ ꦤ ꦩꦚ꧀ꦚꦤ꧀ꦠꦶ. ꦠꦡꦴ ꦕ ꦣꦩ꧀ꦩꦺ ꦱꦠ꧀ꦡꦫꦶ ꦕ ꦄꦥ꧀ꦥꦱꦤ꧀ꦤꦴꦮ ꦲꦺꦴꦤ꧀ꦠꦶ. ꦌꦏꦕ꧀ꦕꦴꦤꦁ ꦄꦚ꧀ꦚꦡꦠ꧀ꦠꦤ꧀ꦠꦶ ꦥꦸꦡꦸꦗ꧀ꦗꦤꦴꦤꦁ ꦄꦮꦶꦫꦸꦭ꦳꧀ꦲꦱꦢ꧀ꦣꦴꦤꦁ ꦥꦱꦴꦢꦚ꧀ꦚꦡꦠ꧀ꦠꦁ.

ꦒꦴꦡꦴꦪꦁ ꦄꦴꦥꦴꦪꦶꦏꦺꦴꦠꦶꦄꦴꦢꦷꦱꦸ ꦄꦥꦴꦪꦺ ꦤꦶꦧ꧀ꦧꦠ꧀ꦠꦤꦴꦫꦲꦠꦴꦪ ꦄꦴꦥꦴꦪꦶꦏꦺꦴ. ꦠꦠ꧀ꦡꦥꦶ ꦄꦮꦷꦕꦶꦱꦔ꧀ꦑꦴꦠꦺ ꦩꦲꦴꦤꦶꦫꦪꦺ ꦈꦥ꧀ꦥꦗ꧀ꦗꦠꦷꦠꦶ ꦤꦺꦫꦪꦶꦏꦺꦴ. ꦌꦏꦁ ꦄꦤ꧀ꦠꦫꦏꦥ꧀ꦥꦁ ꦥꦫꦶꦥꦸꦟ꧀ꦟꦩꦺꦮ ꦏꦠ꧀ꦮꦴ ꦠꦠ꧀ꦡ ꦠꦶꦛ꧀ꦜꦠꦷꦠꦶ ꦏꦥ꧀ꦥꦛ꧀ꦜꦺꦴ. ꦱꦔ꧀ꦓꦨꦺꦢꦱꦔ꧀ꦑꦴꦠꦺ ꦮꦒ꧀ꦒꦺ ꦫꦠꦺꦴꦠꦶ ꦮꦒ꧀ꦒꦫꦠꦺꦴ. ꦄꦣꦩ꧀ꦩꦶꦪꦠꦴꦪ ꦄꦣꦩ꧀ꦩꦺꦴ. ꦨꦺꦢꦏꦫꦮꦠ꧀ꦡꦹꦲꦶ ꦱꦔ꧀ꦓꦨꦺꦢꦱꦔ꧀ꦑꦴꦠꦺ ꦌꦮ ꦕ ꦄꦣꦩ꧀ꦩꦺ ꦜꦶꦠꦺꦴꦠꦶ ꦄꦣꦩ꧀ꦩꦛ꧀ꦜꦺꦴ. ꦪꦺꦴꦒꦏ꧀ꦑꦺꦩꦴ ꦥꦣꦁꦱꦠꦷꦠꦶ ꦪꦺꦴꦒꦏ꧀ꦑꦺꦩꦠꦺꦴ ꦲꦶꦠꦠꦺꦴ ꦥꦣꦁꦱꦠꦶ ꦥꦫꦶꦲꦴꦪꦠꦶ, ꦕꦠꦹꦲꦶ ꦮꦴ ꦪꦺꦴꦒꦺꦲꦶ ꦄꦤꦸꦥꦢ꧀ꦢꦸꦠꦠ꧀ꦠꦴ ꦪꦺꦴꦒꦏ꧀ꦑꦺꦩꦁ ꦤꦴꦩ ꦄꦫꦲꦠ꧀ꦠꦁ ꦤꦶꦧ꧀ꦧꦴꦤꦚ꧀ꦕ, ꦠꦠꦺꦴ ꦥꦤꦱ꧀ꦱ ꦣꦁꦱꦤꦺ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦶ. ꦢꦶꦛ꧀ꦜꦶꦱꦷꦭꦱꦴꦩꦚ꧀ꦚꦠꦺꦴ ꦱꦁꦲꦠꦛ꧀ꦜꦺꦤ ꦱꦔ꧀ꦓꦁ, ꦠꦠꦺꦴ ꦌꦮ ꦌꦏꦏꦩ꧀ꦩꦴꦢꦶꦮꦶꦣꦴꦤꦪꦺꦴꦒꦺꦤ ꦱꦩꦒ꧀ꦒꦁ ꦱꦲꦶꦠꦁ. ꦨꦺꦠ꧀ꦮꦴꦤꦴꦠꦶ ꦥꦸꦧ꧀ꦧꦺ ꦮꦸꦠ꧀ꦠꦭꦏ꧀ꦑꦟꦺꦤ ꦱꦔ꧀ꦓꦨꦺꦢꦺꦤ ꦨꦶꦤ꧀ꦢꦶꦠ꧀ꦮꦴ. ꦏꦥ꧀ꦥꦤ꧀ꦠꦶ ꦄꦴꦪꦸꦏꦥ꧀ꦥꦁ. ꦱꦺꦴ ꦥꦤꦺꦠ꧀ꦡ ꦄꦤ꧀ꦠꦫꦏꦥ꧀ꦥꦺꦴꦮ. ꦤꦶꦫꦪꦩ꧀ꦲꦷꦠꦶ ꦄꦮꦷꦕꦶꦩꦲꦴꦤꦶꦫꦪꦩ꧀ꦲꦶ.

ꦄꦛ꧀ꦜꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.