꧑꧐. ꦥꦢꦸꦛ꧀ꦜꦕꦶꦠ꧀ꦠꦱꦸꦠ꧀ꦠꦮꦟ꧀ꦟꦤꦴ

꧒꧐. ꦢꦱꦩꦱ꧀ꦱ ꦏꦴ ꦈꦥ꧀ꦥꦠ꧀ꦠꦶ? ꦄꦛ꧀ꦜꦸꦥ꧀ꦥꦠ꧀ꦠꦶꦪꦺꦮ. ꦌꦏꦢꦶꦮꦱꦁ ꦏꦶꦫ ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦱꦤ꧀ꦤꦶꦱꦶꦤ꧀ꦤꦴ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ – ‘‘ꦄꦴꦮꦸꦱꦺꦴ, ꦆꦣꦺꦏꦕ꧀ꦕꦺꦴ ꦧꦲꦸꦁ ꦥꦸꦚ꧀ꦚꦏꦩ꧀ꦩꦁ ꦏꦫꦺꦴꦠꦶ, ꦌꦏꦕ꧀ꦕꦺꦴ ꦧꦲꦸꦁ ꦥꦴꦥꦏꦩ꧀ꦩꦁ, ꦌꦏꦕ꧀ꦕꦺꦴ ꦈꦨꦪꦮꦺꦴꦩꦶꦱ꧀ꦱꦏꦁ ꦏꦫꦺꦴꦠꦶ. ꦠꦠ꧀ꦡ ꦮꦺꦴꦩꦶꦱ꧀ꦱꦏꦴꦫꦶꦤꦺꦴ ꦏꦷꦢꦶꦱꦺꦴ ꦄꦨꦶꦱꦩ꧀ꦥꦫꦴꦪꦺꦴ’’ꦠꦶ? ꦄꦡ ꦱꦠ꧀ꦡꦴ ꦣꦩ꧀ꦩꦱꦨꦁ ꦈꦥꦒꦤ꧀ꦮꦴ ꦥꦚ꧀ꦚꦠ꧀ꦠꦮꦫꦧꦸꦢ꧀ꦣꦴꦱꦤꦺ ꦤꦶꦱꦶꦤ꧀ꦤꦺꦴ ꦠꦁ ꦏꦡꦁ ꦱꦸꦠ꧀ꦮꦴ ‘‘ꦨꦶꦏ꧀ꦑꦮꦺ, ꦩꦫꦟꦴꦱꦤ꧀ꦤꦏꦴꦭꦺ ꦱꦁꦏꦶꦭꦶꦛ꧀ꦜꦕꦶꦠ꧀ꦠꦱ꧀ꦱ ꦢꦸꦒ꧀ꦒꦠꦶ ꦥꦴꦛꦶꦏꦔ꧀ꦑꦴ’’ꦠꦶ ꦢꦱ꧀ꦱꦺꦤ꧀ꦠꦺꦴ ꦆꦩꦴꦪ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴ ꦆꦢꦁ ꦱꦸꦠ꧀ꦠꦁ ꦢꦺꦱꦺꦱꦶ.

ꦠꦠ꧀ꦡ ꦆꦣꦴꦠꦶ ꦢꦺꦱꦴꦥꦢꦺꦱꦺ ꦤꦶꦥꦴꦠꦺꦴ. ꦱ꧀ꦮꦴꦪꦁ ꦏꦠ꧀ꦡꦕꦶ ꦥꦢꦺꦱꦁ ꦈꦥꦴꦢꦴꦪ ꦮꦸꦕ꧀ꦕꦠꦶ ‘‘ꦆꦣꦺꦮ ꦠꦶꦛ꧀ꦜꦩꦴꦤꦱ꧀ꦱ, ꦢꦺꦮꦨꦹꦠꦱ꧀ꦱ ꦩꦺ ꦱꦠꦺꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧓꧖꧙). ꦏꦠ꧀ꦡꦕꦶ ꦱꦴꦱꦤꦁ ꦈꦥꦴꦢꦴꦪ ‘‘ꦆꦣꦺꦮ, ꦨꦶꦏ꧀ꦑꦮꦺ, ꦱꦩꦟꦺꦴ ꦆꦣ ꦢꦸꦠꦶꦪꦺꦴ ꦱꦩꦟꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧑꧓꧙; ꦄ. ꦤꦶ. ꧔.꧒꧔꧑). ꦏꦠ꧀ꦡꦕꦶ ꦥꦢꦥꦹꦫꦟꦩꦠ꧀ꦠꦺ ‘‘ꦆꦣꦴꦲꦁ, ꦨꦶꦏ꧀ꦑꦮꦺ, ꦨꦸꦠ꧀ꦠꦴꦮꦷ ꦄꦱ꧀ꦱꦁ ꦥꦮꦴꦫꦶꦠꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧓꧐). ꦏꦠ꧀ꦡꦕꦶ ꦭꦺꦴꦏꦁ ꦈꦥꦴꦢꦴꦪ ꦮꦸꦕ꧀ꦕꦠꦶ ‘‘ꦆꦣ ꦠꦡꦴꦒꦠꦺꦴ ꦭꦺꦴꦏꦺ ꦈꦥ꧀ꦥꦗ꧀ꦗꦠꦷ’’ꦠꦶꦄꦴꦢꦷꦱꦸ (ꦄ. ꦤꦶ. ꧓.꧖꧑). ꦆꦣꦴꦥꦶ ꦭꦺꦴꦏꦺ ꦌꦮ ꦢꦛ꧀ꦜꦧ꧀ꦧꦺꦴ. ꦌꦏꦕ꧀ꦕꦤ꧀ꦠꦶ ꦌꦏꦁ, ꦄꦚ꧀ꦚꦠꦫꦤ꧀ꦠꦶ ꦄꦠ꧀ꦡꦺꦴ. ꦥꦸꦒ꧀ꦒꦭꦤ꧀ꦠꦶ ꦱꦠ꧀ꦠꦁ. ꦱꦺꦴ ꦲꦶ ꦪꦡꦴꦥꦕ꧀ꦕꦪꦁ ꦏꦸꦱꦭꦴꦏꦸꦱꦭꦴꦤꦁ ꦠꦧ꧀ꦧꦶꦥꦴꦏꦴꦤꦚ꧀ꦕ ꦥꦹꦫꦟꦠꦺꦴ ꦩꦫꦟꦮꦱꦺꦤ ꦒꦭꦤꦠꦺꦴ ꦕ ꦥꦸꦒ꧀ꦒꦭꦺꦴꦠꦶ ꦮꦸꦕ꧀ꦕꦠꦶ. ꦥꦢꦸꦛ꧀ꦜꦕꦶꦠ꧀ꦠꦤ꧀ꦠꦶ ꦥꦢꦺꦴꦱꦺꦤ ꦄꦴꦓꦴꦠꦺꦤ ꦢꦸꦛ꧀ꦜꦕꦶꦠ꧀ꦠꦁ. ꦄꦡ ꦮꦴ ꦥꦢꦸꦛ꧀ꦜꦕꦶꦠ꧀ꦠꦤ꧀ꦠꦶ ꦢꦺꦴꦱꦺꦤ ꦫꦴꦒꦴꦢꦶꦤꦴ ꦥꦢꦹꦱꦶꦠꦕꦶꦠ꧀ꦠꦁ. ꦌꦠ꧀ꦡ ꦕ ꦌꦏꦕ꧀ꦕꦤ꧀ꦠꦶ ꦆꦢꦁ ꦥꦢꦸꦛ꧀ꦜꦕꦶꦠ꧀ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦮꦶꦱꦺꦱꦤꦁ. ꦪꦱ꧀ꦱ ꦲꦶ ꦥꦛꦶꦱꦤ꧀ꦣꦶꦢꦴꦪꦏꦏꦩ꧀ꦩꦁ ꦎꦏꦴꦱꦩꦏꦴꦱꦶ, ꦱꦺꦴ ꦠꦡꦴ ꦮꦸꦠ꧀ꦠꦺꦴ. ꦪꦱ꧀ꦱ ꦕ ꦄꦏꦸꦱꦭꦥ꧀ꦥꦮꦠ꧀ꦠꦶꦠꦺꦴ ꦕꦶꦠ꧀ꦠꦁ ꦤꦶꦮꦠ꧀ꦠꦺꦠ꧀ꦮꦴ ꦏꦸꦱꦭꦮꦱꦺꦤ ꦎꦠꦴꦫꦺꦠꦸꦁ ꦤ ꦱꦏ꧀ꦏꦴ, ꦌꦮꦁ ꦄꦴꦱꦤ꧀ꦤꦩꦫꦟꦺꦴ. ꦌꦮꦤ꧀ꦠꦶ ꦆꦢꦴꦤꦶ ꦮꦠ꧀ꦠꦧ꧀ꦧꦴꦏꦴꦫꦁ ꦢꦱ꧀ꦱꦺꦠꦶ. ꦕꦺꦠꦱꦴꦠꦶ ꦄꦠ꧀ꦠꦤꦺꦴ ꦕꦶꦠ꧀ꦠꦺꦤ ꦕꦺꦠꦺꦴꦥꦫꦶꦪꦚꦴꦟꦺꦤ. ꦕꦺꦠꦺꦴꦠꦶ ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦕꦶꦠ꧀ꦠꦁ. ꦥꦫꦶꦕ꧀ꦕꦴꦠꦶ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦥꦗꦴꦤꦴꦩꦶ. ꦤꦤꦸ ꦕ ꦪꦡꦴꦏꦩ꧀ꦩꦸꦥꦒꦚꦴꦟꦱ꧀ꦱꦴꦪꦁ ꦮꦶꦱꦪꦺꦴꦠꦶ? ꦱꦕ꧀ꦕꦩꦺꦠꦁ, ꦠꦢꦴ ꦥꦮꦠ꧀ꦠꦩꦴꦤꦄꦏꦸꦱꦭꦕꦶꦠ꧀ꦠꦮꦱꦺꦤ ꦥꦤꦺꦠꦁ ꦮꦸꦠ꧀ꦠꦁ.

ꦆꦩꦩ꧀ꦲꦶ ꦕꦴꦪꦁ ꦱꦩꦪꦺꦠꦶ ꦆꦩꦱ꧀ꦩꦶꦁ ꦏꦴꦭꦺ, ꦆꦩꦴꦪꦁ ꦮꦴ ꦥꦕ꧀ꦕꦪꦱꦴꦩꦒ꧀ꦒꦶꦪꦁ, ꦄꦪꦁ ꦥꦸꦒ꧀ꦒꦭꦺꦴ ꦗꦮꦤꦮꦷꦡꦶꦪꦴ ꦄꦥꦫꦨꦴꦒꦺ ꦏꦴꦭꦁ ꦏꦫꦺꦪ꧀ꦪ ꦕꦺꦠꦶ ꦄꦠ꧀ꦡꦺꦴ. ꦤ ꦲꦶ ꦗꦮꦤꦏ꧀ꦑꦟꦺ ꦏꦴꦭꦁꦏꦶꦫꦶꦪꦴ ꦄꦠ꧀ꦡꦶ. ꦪꦡꦴꦨꦠꦁ ꦤꦶꦏ꧀ꦑꦶꦠ꧀ꦠꦺꦴ ꦌꦮꦁ ꦤꦶꦫꦪꦺꦠꦶ ꦪꦡꦴ ꦄꦴꦨꦠꦁ ꦏꦶꦚ꧀ꦕꦶ ꦄꦴꦲꦫꦶꦠ꧀ꦮꦴ ꦜꦥꦶꦠꦁ, ꦌꦮꦁ ꦄꦠ꧀ꦠꦤꦺꦴ ꦏꦩ꧀ꦩꦸꦤꦴ ꦤꦶꦏ꧀ꦑꦶꦠ꧀ꦠꦺꦴ ꦤꦶꦫꦪꦺ ꦜꦥꦶꦠꦺꦴ ꦌꦮꦴꦠꦶ ꦄꦠ꧀ꦡꦺꦴ. ꦏꦴꦪꦱ꧀ꦱ ꦨꦺꦢꦴꦠꦶ ꦈꦥꦴꦢꦶꦤ꧀ꦤꦏ꧀ꦑꦤ꧀ꦣꦥꦫꦶꦕ꧀ꦕꦴꦒꦴ. ꦥꦫꦁ ꦩꦫꦟꦴꦠꦶ ꦠꦢꦤꦤ꧀ꦠꦫꦁ ꦄꦨꦶꦤꦶꦧ꧀ꦧꦠ꧀ꦠꦏ꧀ꦑꦤ꧀ꦣꦒ꧀ꦒꦲꦟꦺ. ꦄꦡ ꦮꦴ ꦏꦴꦪꦱ꧀ꦱ ꦨꦺꦢꦴꦠꦶ ꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ ꦈꦥꦕ꧀ꦖꦺꦢꦴ. ꦥꦫꦁ ꦩꦫꦟꦴꦠꦶ ꦕꦸꦠꦶꦠꦺꦴ ꦈꦢ꧀ꦣꦁ.

ꦄꦥꦴꦪꦤ꧀ꦠꦶꦄꦴꦢꦶ ꦱꦧ꧀ꦧꦁ ꦤꦶꦫꦪꦱ꧀ꦱꦺꦮ ꦮꦺꦮꦕꦤꦁ. ꦤꦶꦫꦪꦺꦴ ꦲꦶ ꦄꦪꦱꦔ꧀ꦑꦴꦠꦴ ꦱꦸꦑꦴ ꦄꦥꦺꦠꦺꦴꦠꦶ ꦄꦥꦴꦪꦺꦴ; ꦱꦒ꧀ꦒꦩꦺꦴꦏ꧀ꦑꦲꦺꦠꦸꦨꦹꦠꦴ ꦮꦴ ꦥꦸꦚ꧀ꦚꦱꦩ꧀ꦩꦠꦴ ꦄꦪꦴ ꦄꦥꦺꦠꦺꦴꦠꦶꦥꦶ ꦄꦥꦴꦪꦺꦴ. ꦢꦸꦏ꧀ꦑꦱ꧀ꦱ ꦒꦠꦶ ꦥꦛꦶꦱꦫꦟꦤ꧀ꦠꦶ ꦢꦸꦒ꧀ꦒꦠꦶ; ꦢꦺꦴꦱꦧꦲꦸꦭꦠ꧀ꦠꦴ ꦮꦴ ꦢꦸꦛ꧀ꦜꦺꦤ ꦏꦩ꧀ꦩꦸꦤꦴ ꦤꦶꦧ꧀ꦧꦠ꧀ꦠꦴ ꦒꦠꦷꦠꦶꦥꦶ ꦢꦸꦒ꧀ꦒꦠꦶ. ꦮꦶꦮꦱꦴ ꦤꦶꦥꦠꦤ꧀ꦠꦶ ꦌꦠ꧀ꦡ ꦢꦸꦏ꧀ꦏꦛꦏꦩ꧀ꦩꦏꦴꦫꦶꦤꦺꦴ, ꦮꦶꦤꦱ꧀ꦱꦤ꧀ꦠꦴ ꦮꦴ ꦌꦠ꧀ꦡ ꦤꦶꦥꦠꦤ꧀ꦠꦶ ꦱꦩ꧀ꦨꦶꦗ꧀ꦗꦩꦴꦤꦔ꧀ꦒꦥꦕ꧀ꦕꦔ꧀ꦒꦴꦠꦶ ꦮꦶꦤꦶꦥꦴꦠꦺꦴ. ꦤꦠ꧀ꦡꦶ ꦌꦠ꧀ꦡ ꦄꦱ꧀ꦱꦴꦢꦱꦚ꧀ꦚꦶꦠꦺꦴ ꦄꦪꦺꦴꦠꦶ ꦤꦶꦫꦱ꧀ꦱꦴꦢꦛ꧀ꦜꦺꦤ ꦤꦶꦫꦪꦺꦴ. ꦄꦡ ꦮꦴ ꦄꦥꦴꦪꦒ꧀ꦒꦲꦟꦺꦤ ꦠꦶꦫꦕ꧀ꦖꦴꦤꦪꦺꦴꦤꦶ ꦮꦸꦕ꧀ꦕꦠꦶ. ꦠꦶꦫꦕ꧀ꦖꦴꦤꦪꦺꦴꦤꦶ ꦲꦶ ꦄꦥꦴꦪꦺꦴ ꦱꦸꦒꦠꦶꦠꦺꦴ ꦄꦥꦺꦠꦠ꧀ꦠꦴ, ꦤ ꦢꦸꦒ꧀ꦒꦠꦶ ꦩꦲꦺꦱꦏ꧀ꦑꦴꦤꦁ ꦤꦴꦒꦫꦴꦗꦴꦢꦷꦤꦁ ꦱꦩ꧀ꦨꦮꦠꦺꦴ. ꦢꦸꦒ꧀ꦒꦠꦶꦒ꧀ꦒꦲꦟꦺꦤ ꦥꦺꦠ꧀ꦠꦶꦮꦶꦱꦪꦺꦴ. ꦱꦺꦴ ꦲꦶ ꦄꦥꦴꦪꦺꦴ ꦕꦺꦮ ꦢꦸꦒ꧀ꦒꦠꦶ ꦕ ꦱꦸꦒꦠꦶꦠꦺꦴ ꦄꦥꦺꦠꦠ꧀ꦠꦴ ꦢꦸꦏ꧀ꦑꦱ꧀ꦱ ꦕ ꦒꦠꦶꦨꦹꦠꦠ꧀ꦠꦴ, ꦤ ꦮꦶꦤꦶꦥꦴꦠꦺꦴ ꦄꦱꦸꦫꦱꦢꦶꦱꦁ ꦄꦮꦶꦤꦶꦥꦴꦠꦠ꧀ꦠꦴ. ꦮꦶꦤꦶꦥꦴꦠꦒ꧀ꦒꦲꦟꦺꦤ ꦄꦱꦸꦫꦏꦴꦪꦺꦴ. ꦱꦺꦴ ꦲꦶ ꦪꦡꦴꦮꦸꦠ꧀ꦠꦺꦤ ꦄꦠ꧀ꦡꦺꦤ ꦄꦥꦴꦪꦺꦴ ꦕꦺꦮ ꦢꦸꦒ꧀ꦒꦠꦶ ꦕ, ꦱꦧ꧀ꦧꦱꦩ꧀ꦥꦠ꧀ꦠꦶꦱꦩꦸꦱ꧀ꦱꦪꦺꦲꦶ ꦮꦶꦤꦶꦥꦠꦶꦠꦠ꧀ꦠꦴ ꦮꦶꦤꦶꦥꦴꦠꦺꦴꦠꦶ ꦕ ꦮꦸꦕ꧀ꦕꦠꦶ. ꦤꦶꦫꦪꦒ꧀ꦒꦲꦟꦺꦤ ꦄꦮꦷꦕꦶꦄꦴꦢꦶꦄꦤꦺꦏꦥ꧀ꦥꦏꦴꦫꦺꦴ ꦤꦶꦫꦪꦺꦴꦮ ꦮꦸꦕ꧀ꦕꦠꦶ. ꦆꦣ ꦥꦤ ꦱꦧ꧀ꦧꦥꦢꦺꦲꦶꦥꦶ ꦤꦶꦫꦪꦺꦴꦮ ꦮꦸꦠ꧀ꦠꦺꦴ. ꦈꦥꦥꦗ꧀ꦗꦤ꧀ꦠꦷꦠꦶ ꦥꦛꦶꦱꦤ꧀ꦣꦶꦁ ꦒꦟ꧀ꦲꦤ꧀ꦠꦶ.

ꦒꦴꦡꦴꦱꦸ ꦥꦜꦩꦒꦴꦡꦴ ꦱꦔ꧀ꦒꦷꦠꦶꦏꦴꦭꦺ ꦣꦩ꧀ꦩꦱꦔ꧀ꦒꦴꦲꦏꦠ꧀ꦡꦺꦫꦺꦲꦶ ꦜꦥꦶꦠꦴ. ꦚꦠ꧀ꦮꦴꦤꦴꦠꦶ ꦥꦸꦧ꧀ꦧꦏꦴꦭꦏꦶꦫꦶꦪꦴ. ꦚꦴꦟꦥꦸꦧ꧀ꦧꦏꦚ꧀ꦲꦶ ꦧ꧀ꦪꦴꦏꦫꦟꦁ. ꦲꦺꦠꦸꦄꦠ꧀ꦡꦺꦴ ꦮꦴ ꦠ꧀ꦮꦴ-ꦱꦢ꧀ꦢꦺꦴ ꦪꦡꦴ ‘‘ꦱꦷꦲꦁ ꦢꦶꦱ꧀ꦮꦴ ꦨꦪꦁ ꦲꦺꦴꦠꦷ’’ꦠꦶ, ꦗꦴꦤꦤꦲꦺꦠꦹꦠꦶ ꦄꦠ꧀ꦡꦺꦴ. ꦧꦸꦢ꧀ꦣꦺꦴ, ꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦺꦠꦶ ꦧꦸꦢ꧀ꦣꦺꦴ ꦨꦒꦮꦴ ꦄꦠ꧀ꦠꦤꦺꦴ ꦱꦤ꧀ꦠꦶꦏꦺ ꦨꦶꦏ꧀ꦑꦹꦤꦁ ꦌꦠꦁ ꦥꦫꦠꦺꦴ ꦢ꧀ꦮꦷꦲꦶ ꦒꦴꦡꦴꦲꦶ ꦮꦸꦕ꧀ꦕꦩꦴꦤꦁ ꦄꦠ꧀ꦡꦁ ꦧ꧀ꦪꦴꦏꦴꦱꦶ. ꦱꦺꦱꦁ ꦮꦸꦠ꧀ꦠꦤꦪꦩꦺꦮ.

ꦢꦱꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦢꦸꦠꦶꦪꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.