꧓. ꦩꦺꦴꦲꦱꦸꦠ꧀ꦠꦮꦟ꧀ꦟꦤꦴ

꧓. ꦠꦠꦶꦪꦺ ꦩꦺꦴꦲꦤ꧀ꦠꦶ ꦄꦚ꧀ꦚꦴꦟꦁ. ꦠꦚ꧀ꦲꦶ ꦢꦸꦏ꧀ꦑꦺ ꦄꦚ꧀ꦚꦴꦟꦁ, ꦢꦸꦏ꧀ꦑꦱꦩꦸꦢꦪꦺ ꦄꦚ꧀ꦚꦴꦟꦁ, ꦢꦸꦏ꧀ꦑꦤꦶꦫꦺꦴꦣꦺ ꦄꦚ꧀ꦚꦴꦟꦁ, ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦪꦴ ꦥꦛꦶꦥꦢꦴꦪ ꦄꦚ꧀ꦚꦴꦟꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦮꦶꦨꦴꦒꦺꦤ ꦄꦤꦺꦏꦥ꧀ꦥꦨꦺꦢꦩ꧀ꦥꦶ ꦩꦸꦪ꧀ꦲꦤ꧀ꦠꦶ. ꦠꦺꦤ ꦱꦪꦁ ꦮꦴ ꦩꦸꦪ꧀ꦲꦠꦶ ꦩꦸꦪ꧀ꦲꦤꦩꦠ꧀ꦠꦩꦺꦮ ꦮꦴ ꦠꦤ꧀ꦠꦶ ꦩꦺꦴꦲꦺꦴꦠꦶ ꦮꦸꦕ꧀ꦕꦠꦶ. ꦱꦺꦴ ꦕꦶꦠ꧀ꦠꦱ꧀ꦱ ꦄꦤ꧀ꦣꦨꦴꦮꦭꦏ꧀ꦑꦟꦺꦴ, ꦄꦚ꧀ꦚꦴꦟꦭꦏ꧀ꦑꦟꦺꦴ ꦮꦴ, ꦄꦱꦩ꧀ꦥꦛꦶꦮꦺꦣꦫꦱꦺꦴ, ꦄꦴꦫꦩ꧀ꦩꦟꦱꦨꦴꦮꦕ꧀ꦖꦴꦢꦤꦫꦱꦺꦴ ꦮꦴ, ꦄꦱꦩ꧀ꦩꦴꦥ꧀ꦥꦛꦶꦥꦠ꧀ꦠꦶꦥꦕ꧀ꦕꦸꦥꦛ꧀ꦜꦴꦤꦺꦴ, ꦄꦤ꧀ꦣꦏꦴꦫꦥꦕ꧀ꦕꦸꦥꦛ꧀ꦜꦴꦤꦺꦴ ꦮꦴ, ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦥꦢꦛ꧀ꦜꦴꦤꦺꦴ, ꦱꦧ꧀ꦧꦴꦏꦸꦱꦭꦴꦤꦁ ꦩꦹꦭꦤ꧀ꦠꦶ ꦢꦛ꧀ꦜꦧ꧀ꦧꦺꦴ. ꦆꦣꦴꦥꦶ ꦥꦗꦲꦡꦴꦠꦶ ꦥꦢꦱ꧀ꦱ –

‘‘ꦩꦹꦭ꦳꧀ꦲꦺꦴ ꦄꦠ꧀ꦡꦁ ꦤ ꦗꦴꦤꦴꦠꦶ, ꦩꦹꦭ꦳꧀ꦲꦺꦴ ꦣꦩ꧀ꦩꦁ ꦤ ꦥꦱ꧀ꦱꦠꦶ;

ꦄꦤ꧀ꦣꦠꦩꦁ ꦠꦢꦴ ꦲꦺꦴꦠꦶ, ꦪꦁ ꦩꦺꦴꦲꦺꦴ ꦱꦲꦠꦺ ꦤꦫꦁ’’. (ꦆꦠꦶꦮꦸ. ꧘꧘);

‘‘ꦄꦤꦠ꧀ꦡꦗꦤꦤꦺꦴ ꦩꦺꦴꦲꦺꦴ…ꦥꦺ…. (ꦆꦠꦶꦮꦸ. ꧘꧘);

‘‘ꦄꦮꦶꦗ꧀ꦗꦴ, ꦨꦶꦏ꧀ꦑꦮꦺ, ꦥꦸꦧ꧀ꦧꦔ꧀ꦒꦩꦴ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦱꦩꦴꦥꦠ꧀ꦠꦶꦪꦴ’’ (ꦆꦠꦶꦮꦸ. ꧔꧐);

‘‘ꦩꦺꦴꦲꦱꦩ꧀ꦧꦤ꧀ꦣꦤꦺꦴ ꦭꦺꦴꦏꦺꦴ, ꦨꦧ꧀ꦧꦫꦹꦥꦺꦴꦮ ꦢꦶꦱ꧀ꦱꦠꦶ’’; (ꦈꦢꦴ. ꧗꧐);

‘‘ꦩꦺꦴꦲꦺꦴ ꦤꦶꦢꦴꦤꦁ ꦏꦩ꧀ꦩꦴꦤꦁ ꦱꦩꦸꦢꦪꦴꦪ’’ (ꦄ. ꦤꦶ. ꧓.꧓꧔);

‘‘ꦩꦹꦭ꦳꧀ꦲꦺꦴ ꦑꦺꦴ, ꦧ꧀ꦫꦴꦲ꧀ꦩꦟ, ꦩꦺꦴꦲꦺꦤ ꦄꦨꦶꦨꦹꦠꦺꦴ ꦥꦫꦶꦪꦴꦢꦶꦤ꧀ꦤꦕꦶꦠ꧀ꦠꦺꦴ ꦢꦶꦛ꧀ꦜꦣꦩ꧀ꦩꦶꦏꦩ꧀ꦥꦶ ꦨꦪꦁ ꦮꦺꦫꦁ ꦥꦱꦮꦠꦶ, ꦱꦩ꧀ꦥꦫꦴꦪꦶꦏꦩ꧀ꦥꦶ ꦨꦪꦁ ꦮꦺꦫꦁ ꦥꦱꦮꦠꦷ’’ꦠꦶ ꦕ –

ꦄꦴꦢꦶꦤꦴ ꦤꦪꦺꦤ ‘‘ꦪꦺꦴ ꦏꦺꦴꦕꦶ ꦣꦩ꧀ꦩꦺꦴ ꦏꦴꦩꦕ꧀ꦖꦤ꧀ꦢꦴꦢꦶꦱꦁꦏꦶꦭꦺꦱꦣꦩ꧀ꦩꦺꦲꦶ ꦤꦶꦧ꧀ꦧꦠ꧀ꦠꦺꦠꦧ꧀ꦧꦺꦴ, ꦄꦠ꧀ꦡꦠꦺꦴ ꦱꦧ꧀ꦧꦺꦴ ꦱꦺꦴ ꦩꦺꦴꦲꦲꦺꦠꦸꦏꦺꦴ’’ꦠꦶ ꦕ ꦩꦺꦴꦲꦺ ꦄꦴꦢꦷꦤꦮꦁ ꦠꦥ꧀ꦥꦛꦶꦥꦏ꧀ꦑꦠꦺꦴ ꦩꦺꦴꦲꦥ꧀ꦥꦲꦴꦤꦺ ꦄꦴꦤꦶꦱꦁꦱꦚ꧀ꦕ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ ꦏꦴꦩꦕ꧀ꦖꦤ꧀ꦢꦴꦢꦶꦥ꧀ꦥꦲꦴꦤꦏ꧀ꦏꦩꦺꦤꦺꦮ ꦥꦸꦧ꧀ꦧꦨꦴꦒꦺ ꦠꦢꦔ꧀ꦒꦴꦢꦶꦮꦱꦺꦤ ꦩꦺꦴꦲꦁ ꦥꦗꦲꦤ꧀ꦠꦴ ꦠꦠꦶꦪꦩꦒ꧀ꦒꦺꦤ ꦪꦡꦴꦮꦸꦠ꧀ꦠꦭꦺꦴꦨꦢꦺꦴꦱꦺꦏꦛ꧀ꦜꦁ ꦩꦺꦴꦲꦁ ꦱꦩꦸꦕ꧀ꦖꦺꦢꦮꦱꦺꦤ ꦥꦗꦲꦡꦴꦠꦶ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦄꦤꦴꦒꦴꦩꦶꦩꦒ꧀ꦒꦮꦗ꧀ꦙꦺꦴ ꦌꦮ ꦲꦶ ꦩꦺꦴꦲꦺꦴ ꦆꦣꦴꦣꦶꦥ꧀ꦥꦺꦠꦺꦴꦠꦶ. ꦩꦹꦭ꦳꧀ꦲꦴꦱꦺꦠꦶ ꦏꦸꦱꦭꦴꦏꦸꦱꦭꦱꦴꦮꦗ꧀ꦗꦴꦤꦮꦗ꧀ꦗꦴꦢꦶꦨꦺꦢꦺ ꦄꦠ꧀ꦠꦤꦺꦴ ꦲꦶꦠꦴꦲꦶꦠꦺ ꦱꦩ꧀ꦩꦹꦭ꦳꧀ꦲꦴ. ꦱꦺꦱꦁ ꦮꦸꦠ꧀ꦠꦤꦪꦩꦺꦮ.

ꦠꦠꦶꦪꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.