꧑. ꦕꦹꦭ꦳ꦺꦏꦱꦴꦛꦏꦧ꧀ꦫꦴꦲ꧀ꦩꦟꦮꦠ꧀ꦡꦸ

ꦄꦨꦶꦠ꧀ꦡꦫꦺꦡ ꦏꦭ꧀ꦪꦴꦟꦺꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦕꦹꦭ꦳ꦺꦏꦱꦴꦛꦏꦧ꧀ꦫꦴꦲ꧀ꦩꦟꦁ ꦄꦴꦫꦧ꧀ꦨ ꦏꦡꦺꦱꦶ.

ꦮꦶꦥꦱ꧀ꦱꦶꦢꦱꦧꦭꦱ꧀ꦱ ꦏꦴꦭꦱ꧀ꦩꦶꦚ꧀ꦲꦶ ꦩꦲꦴꦌꦏꦱꦴꦛꦏꦧ꧀ꦫꦴꦲ꧀ꦩꦟꦺꦴ ꦤꦴꦩ ꦄꦲꦺꦴꦱꦶ, ꦄꦪꦁ ꦥꦤ ꦌꦠꦫꦲꦶ ꦱꦴꦮꦠ꧀ꦡꦶꦪꦁ ꦕꦹꦭ꦳ꦺꦏꦱꦴꦛꦏꦺꦴ ꦤꦴꦩ. ꦠꦱ꧀ꦱ ꦲꦶ ꦌꦏꦺꦴ ꦤꦶꦮꦴꦱꦤꦱꦴꦛꦏꦺꦴ ꦄꦲꦺꦴꦱꦶ, ꦧ꧀ꦫꦴꦲ꧀ꦩꦟꦶꦪꦴꦥꦶ ꦌꦏꦺꦴ. ꦈꦨꦶꦤ꧀ꦤꦩ꧀ꦥꦶ ꦌꦏꦩꦺꦮ ꦥꦴꦫꦸꦥꦤꦁ, ꦧꦲꦶ ꦒꦩꦤꦏꦴꦭꦺ ꦧ꧀ꦫꦴꦲ꧀ꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦷ ꦮꦴ ꦠꦁ ꦥꦴꦫꦸꦥꦠꦶ. ꦄꦡꦺꦏꦢꦶꦮꦱꦁ ꦮꦶꦲꦴꦫꦺ ꦣꦩ꧀ꦩꦱ꧀ꦱꦮꦤꦺ ꦓꦺꦴꦱꦶꦠꦺ ꦧ꧀ꦫꦴꦲ꧀ꦩꦟꦺꦴ ꦄꦴꦲ – ‘‘ꦨꦺꦴꦠꦶ ꦣꦩ꧀ꦩꦱ꧀ꦱꦮꦤꦁ ꦓꦺꦴꦱꦶꦠꦁ, ꦏꦶꦁ ꦢꦶꦮꦴ ꦣꦩ꧀ꦩꦱ꧀ꦱꦮꦤꦁ ꦒꦩꦶꦱ꧀ꦱꦱꦶ, ꦈꦢꦴꦲꦸ ꦫꦠ꧀ꦠꦶꦁ. ꦥꦴꦫꦸꦥꦤꦱ꧀ꦱ ꦲꦶ ꦄꦨꦴꦮꦺꦤ ꦤ ꦱꦏ꧀ꦏꦴ ꦄꦩ꧀ꦲꦺꦲꦶ ꦌꦏꦠꦺꦴ ꦒꦤ꧀ꦠꦸ’’ꦤ꧀ꦠꦶ. ꦧ꧀ꦫꦴꦲ꧀ꦩꦟꦷ, ‘‘ꦱꦴꦩꦶ, ꦄꦲꦁ ꦢꦶꦮꦴ ꦒꦩꦶꦱ꧀ꦱꦴꦩꦷ’’ꦠꦶ ꦱꦴꦛꦏꦁ ꦥꦴꦫꦸꦥꦶꦠ꧀ꦮꦴ ꦄꦒꦩꦴꦱꦶ. ꦧ꧀ꦫꦴꦲ꧀ꦩꦟꦺꦴ ꦢꦶꦮꦱꦨꦴꦒꦁ ꦒꦺꦲꦺ ꦮꦷꦠꦶꦤꦴꦩꦺꦠ꧀ꦮꦴ ꦫꦠ꧀ꦠꦶꦁ ꦒꦤ꧀ꦠ꧀ꦮꦴ ꦱꦠ꧀ꦡꦸ ꦥꦸꦫꦠꦺꦴ ꦤꦶꦱꦶꦤ꧀ꦤꦺꦴꦮ ꦣꦩ꧀ꦩꦁ ꦄꦱ꧀ꦱꦺꦴꦱꦶ. ꦄꦡꦱ꧀ꦱ ꦱꦫꦷꦫꦁ ꦦꦫꦩꦴꦤꦴ ꦥꦚ꧀ꦕꦮꦟ꧀ꦟꦴ ꦥꦷꦠꦶ ꦈꦥ꧀ꦥꦗ꧀ꦗꦶ. ꦱꦺꦴ ꦱꦠ꧀ꦡꦴꦫꦁ ꦥꦹꦗꦶꦠꦸꦏꦴꦩꦺꦴ ꦲꦸꦠ꧀ꦮꦴ ‘‘ꦱꦕꦺ ꦆꦩꦁ ꦱꦴꦛꦏꦁ ꦢꦱ꧀ꦱꦴꦩꦶ, ꦤꦺꦮ ꦧ꧀ꦫꦴꦲ꧀ꦩꦟꦶꦪꦴ, ꦤ ꦩꦪ꧀ꦲꦁ ꦥꦴꦫꦸꦥꦤꦁ ꦨꦮꦶꦱ꧀ꦱꦠꦷ’’ꦠꦶ ꦕꦶꦤ꧀ꦠꦺꦱꦶ. ꦄꦡꦱ꧀ꦱ ꦩꦕ꧀ꦖꦺꦫꦕꦶꦠ꧀ꦠꦴꦤꦁ ꦱꦲꦱ꧀ꦱꦁ ꦈꦥ꧀ꦥꦗ꧀ꦗꦶ, ꦥꦸꦤꦺꦏꦁ ꦱꦢ꧀ꦣꦴꦕꦶꦠ꧀ꦠꦁ ꦈꦥ꧀ꦥꦗ꧀ꦗꦶ. ꦠꦁ ꦄꦨꦶꦨꦮꦶꦠ꧀ꦮꦴ ꦥꦸꦤ ꦩꦕ꧀ꦖꦺꦫꦱꦲꦱ꧀ꦱꦁ ꦈꦥ꧀ꦥꦗ꧀ꦗꦶ. ꦆꦠꦶꦱ꧀ꦱ ꦧꦭꦮꦩꦕ꧀ꦖꦺꦫꦁ ꦧꦤ꧀ꦣꦶꦠ꧀ꦮꦴ ꦒꦟ꧀ꦲꦤ꧀ꦠꦁ ꦮꦶꦪ ꦱꦢ꧀ꦣꦴꦕꦶꦠ꧀ꦠꦁ ꦥꦛꦶꦧꦴꦲꦠꦶꦪꦺꦮ. ꦠꦱ꧀ꦱ ‘‘ꦢꦱ꧀ꦱꦴꦩꦶ, ꦤ ꦢꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦤ꧀ꦠꦱ꧀ꦱꦺꦮ ꦥꦜꦩꦪꦴꦩꦺꦴ ꦄꦥꦒꦠꦺꦴ, ꦩꦗ꧀ꦙꦶꦩꦪꦴꦩꦺꦴ ꦱꦩ꧀ꦥꦠ꧀ꦠꦺꦴ. ꦠꦱ꧀ꦩꦶꦩ꧀ꦥꦶ ꦢꦴꦠꦸꦁ ꦤꦴꦱꦏ꧀ꦑꦶ. ꦥꦕ꧀ꦖꦶꦩꦪꦴꦩꦺ ꦱꦩ꧀ꦥꦠ꧀ꦠꦺ ꦱꦺꦴ ꦕꦶꦤ꧀ꦠꦺꦱꦶ – ‘‘ꦩꦩ ꦱꦢ꧀ꦣꦴꦕꦶꦠ꧀ꦠꦺꦤ ꦩꦕ꧀ꦖꦺꦫꦕꦶꦠ꧀ꦠꦺꦤ ꦕ ꦱꦢ꧀ꦣꦶꦁ ꦪꦸꦗ꧀ꦙꦤ꧀ꦠꦱ꧀ꦱꦺꦮ ꦢ꧀ꦮꦺ ꦪꦴꦩꦴ ꦮꦷꦠꦶꦮꦠ꧀ꦠꦴ, ꦆꦢꦁ ꦩꦩ ꦌꦠ꧀ꦠꦏꦁ ꦩꦕ꧀ꦖꦺꦫꦕꦶꦠ꧀ꦠꦁ ꦮꦝ꧀ꦞꦩꦴꦤꦁ ꦕꦠꦹꦲꦶ ꦄꦥꦴꦪꦺꦲꦶ ꦱꦷꦱꦁ ꦈꦏ꧀ꦑꦶꦥꦶꦠꦸꦁ ꦤ ꦢꦱ꧀ꦱꦠꦶ, ꦢꦱ꧀ꦱꦴꦩꦶ ꦤ’’ꦤ꧀ꦠꦶ. ꦱꦺꦴ ꦩꦕ꧀ꦖꦺꦫꦱꦲꦱ꧀ꦱꦁ ꦄꦨꦶꦨꦮꦶꦠ꧀ꦮꦴ ꦱꦢ꧀ꦣꦴꦕꦶꦠ꧀ꦠꦁ ꦥꦸꦫꦺꦕꦴꦫꦶꦏꦁ ꦏꦠ꧀ꦮꦴ ꦱꦴꦛꦏꦁ ꦄꦴꦢꦴꦪ ꦱꦠ꧀ꦡꦸ ꦥꦴꦢꦩꦹꦭꦺ ꦜꦥꦺꦠ꧀ꦮꦴ ‘‘ꦗꦶꦠꦁ ꦩꦺ, ꦗꦶꦠꦁ ꦩꦺ’’ꦠꦶ ꦠꦶꦏ꧀ꦑꦠ꧀ꦠꦸꦁ ꦩꦲꦴꦱꦢ꧀ꦢꦩꦏꦴꦱꦶ.

ꦫꦴꦗꦴ ꦥꦱꦺꦤꦢꦶ ꦏꦺꦴꦱꦭꦺꦴ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦠꦁ ꦱꦢ꧀ꦢꦁ ꦱꦸꦠ꧀ꦮꦴ ‘‘ꦥꦸꦕ꧀ꦖꦡ ꦤꦁ, ꦏꦶꦁ ꦏꦶꦫ ꦠꦺꦤ ꦗꦶꦠ’’ꦤ꧀ꦠꦶ ꦄꦴꦲ. ꦱꦺꦴ ꦫꦴꦗꦥꦸꦫꦶꦱꦺꦲꦶ ꦥꦸꦕ꧀ꦖꦶꦠꦺꦴ ꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ. ꦠꦁ ꦱꦸꦠ꧀ꦮꦴ ꦫꦴꦗꦴ ‘‘ꦢꦸꦏ꧀ꦏꦫꦁ ꦏꦠꦁ ꦧ꧀ꦫꦴꦲ꧀ꦩꦟꦺꦤ, ꦱꦔ꧀ꦒꦲꦩꦱ꧀ꦱ ꦏꦫꦶꦱ꧀ꦱꦴꦩꦷ’’ꦠꦶ ꦌꦏꦁ ꦱꦴꦛꦏꦪꦸꦒꦁ ꦢꦴꦥꦺꦱꦶ. ꦱꦺꦴ ꦠꦩ꧀ꦥꦶ ꦠꦡꦴꦒꦠꦱ꧀ꦱꦺꦮ ꦄꦢꦴꦱꦶ. ꦥꦸꦤ ꦫꦴꦗꦴ ꦢ꧀ꦮꦺ ꦕꦠ꧀ꦠꦴꦫꦶ ꦄꦛ꧀ꦜ ꦱꦺꦴꦭ꦳ꦱꦴꦠꦶ ꦢ꧀ꦮꦶꦒꦸꦟꦁ ꦏꦠ꧀ꦮꦴ ꦢꦴꦥꦺꦱꦶ. ꦱꦺꦴ ꦠꦴꦤꦶꦥꦶ ꦠꦡꦴꦒꦠꦱ꧀ꦱꦺꦮ ꦄꦢꦴꦱꦶ. ꦄꦡꦱ꧀ꦱ ꦫꦴꦗꦴ ꦢ꧀ꦮꦠ꧀ꦠꦶꦁꦱ ꦪꦸꦒꦴꦤꦶ ꦢꦴꦥꦺꦱꦶ. ꦧ꧀ꦫꦴꦲ꧀ꦩꦟꦺꦴ ‘‘ꦄꦠ꧀ꦠꦤꦺꦴ ꦄꦒ꧀ꦒꦲꦺꦠ꧀ꦮꦴ ꦭꦢ꧀ꦣꦁ ꦭꦢ꧀ꦣꦁ ꦮꦶꦱ꧀ꦱꦗ꧀ꦗꦺꦱꦶꦪꦺꦮꦴ’’ꦠꦶ ꦮꦴꦢꦩꦺꦴꦕꦤꦠ꧀ꦡꦁ ꦠꦠꦺꦴ ꦌꦏꦁ ꦪꦸꦒꦁ ꦄꦠ꧀ꦠꦤꦺꦴ, ꦌꦏꦁ ꦧ꧀ꦫꦴꦲ꧀ꦩꦟꦶꦪꦴꦠꦶ ꦢ꧀ꦮꦺ ꦪꦸꦒꦴꦤꦶ ꦒꦲꦺꦠ꧀ꦮꦴ ꦠꦶꦁꦱ ꦪꦸꦒꦴꦤꦶ ꦠꦡꦴꦒꦠꦱ꧀ꦱꦺꦮ ꦄꦢꦴꦱꦶ. ꦫꦴꦗꦴ ꦥꦤ ꦠꦱ꧀ꦩꦶꦁ ꦱꦠ꧀ꦠꦏ꧀ꦑꦠ꧀ꦠꦸꦩ꧀ꦥꦶ ꦢꦢꦤ꧀ꦠꦺ ꦥꦸꦤ ꦢꦴꦠꦸꦏꦴꦩꦺꦴꦪꦺꦮ ꦄꦲꦺꦴꦱꦶ. ꦥꦸꦧ꧀ꦧꦺ ꦩꦲꦴꦌꦏꦱꦴꦛꦏꦺꦴ ꦕꦠꦸꦱꦛ꧀ꦜꦶꦪꦴ ꦱꦴꦛꦏꦪꦸꦒꦺꦱꦸ ꦢ꧀ꦮꦺ ꦄꦒ꧀ꦒꦲꦺꦱꦶ, ꦄꦪꦁ ꦥꦤ ꦢ꧀ꦮꦠ꧀ꦠꦶꦁꦱꦴꦪ ꦭꦢ꧀ꦣꦏꦴꦭꦺ ꦢ꧀ꦮꦺ ꦄꦒ꧀ꦒꦲꦺꦱꦶ. ꦫꦴꦗꦴ ꦥꦸꦫꦶꦱꦺ ꦄꦴꦟꦴꦥꦺꦱꦶ – ‘‘ꦢꦸꦏ꧀ꦏꦫꦁ ꦨꦟꦺ ꦧ꧀ꦫꦴꦲ꧀ꦩꦟꦺꦤ ꦏꦠꦁ, ꦄꦤ꧀ꦠꦺꦥꦸꦫꦺ ꦩꦩ ꦢ꧀ꦮꦺ ꦏꦩ꧀ꦧꦭꦴꦤꦶ ꦄꦴꦲꦫꦴꦥꦺꦪ꧀ꦪꦴꦡꦴ’’ꦠꦶ. ꦠꦺ ꦠꦡꦴ ꦏꦫꦶꦁꦱꦸ. ꦫꦴꦗꦴ ꦱꦠꦱꦲꦱ꧀ꦱꦒ꧀ꦓꦤꦏꦺ ꦢ꧀ꦮꦺ ꦏꦩ꧀ꦧꦭꦺ ꦢꦴꦥꦺꦱꦶ. ꦧ꧀ꦫꦴꦲ꧀ꦩꦟꦺꦴ ‘‘ꦤ ꦆꦩꦺ ꦩꦩ ꦱꦫꦷꦫꦺ ꦈꦥꦪꦺꦴꦒꦁ ꦄꦫꦲꦤ꧀ꦠꦶ, ꦧꦸꦢ꧀ꦣꦱꦴꦱꦤꦱ꧀ꦱꦺꦮ ꦌꦠꦺ ꦄꦤꦸꦕ꧀ꦖꦮꦶꦏꦴ’’ꦠꦶ ꦌꦏꦁ ꦏꦩ꧀ꦧꦭꦁ ꦄꦤ꧀ꦠꦺꦴꦒꦤ꧀ꦣꦏꦸꦛꦶꦪꦁ ꦱꦠ꧀ꦡꦸ ꦱꦪꦤꦱ꧀ꦱ ꦈꦥꦫꦶ ꦮꦶꦠꦴꦤꦁ ꦏꦠ꧀ꦮꦴ ꦧꦤ꧀ꦣꦶ, ꦌꦏꦁ ꦄꦠ꧀ꦠꦤꦺꦴ ꦓꦫꦺ ꦤꦶꦧꦢ꧀ꦣꦁ ꦨꦸꦚ꧀ꦗꦤ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦨꦠ꧀ꦠꦏꦶꦕ꧀ꦕꦛ꧀ꦜꦴꦤꦺ ꦮꦶꦠꦴꦤꦁ ꦏꦠ꧀ꦮꦴ ꦧꦤ꧀ꦣꦶ. ꦫꦴꦗꦴ ꦱꦴꦪꦤ꧀ꦲꦱꦩꦪꦺ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦠꦁ ꦏꦩ꧀ꦧꦭꦁ ꦱꦚ꧀ꦗꦴꦤꦶꦠ꧀ꦮꦴ, ‘‘ꦨꦤ꧀ꦠꦺ, ꦏꦺꦤ ꦥꦹꦗꦴ ꦏꦠꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦌꦏꦱꦴꦛꦏꦺꦤꦴ’’ꦠꦶ ꦮꦸꦠ꧀ꦠꦺ ‘‘ꦧ꧀ꦫꦴꦲ꧀ꦩꦟꦺꦴ ꦩꦩ ꦥꦱꦴꦢꦛ꧀ꦜꦴꦤꦺꦪꦺꦮ ꦥꦱꦷꦢꦠꦷ’’ꦠꦶ ꦮꦠ꧀ꦮꦴ ‘‘ꦕꦠ꧀ꦠꦴꦫꦺꦴ ꦲꦠ꧀ꦡꦷ ꦕꦠ꧀ꦠꦴꦫꦺꦴ ꦄꦱ꧀ꦱꦺ ꦕꦠ꧀ꦠꦴꦫꦶ ꦏꦲꦴꦥꦟꦱꦲꦱ꧀ꦱꦴꦤꦶ ꦕꦠꦱ꧀ꦱꦺꦴ ꦆꦠ꧀ꦡꦶꦪꦺꦴ ꦕꦠꦱ꧀ꦱꦺꦴ ꦢꦴꦱꦶꦪꦺꦴ ꦕꦠ꧀ꦠꦴꦫꦺꦴ ꦥꦸꦫꦶꦱꦺ ꦕꦠꦸꦫꦺꦴ ꦒꦴꦩꦮꦫꦺ’’ꦠꦶ ꦌꦮꦁ ꦪꦴꦮ ꦱꦧ꧀ꦧꦱꦠꦴ ꦕꦠ꧀ꦠꦴꦫꦶ ꦕꦠ꧀ꦠꦴꦫꦶ ꦏꦠ꧀ꦮꦴ ꦱꦧ꧀ꦧꦕꦠꦸꦏ꧀ꦏꦁ ꦤꦴꦩ ꦄꦱ꧀ꦱ ꦢꦴꦥꦺꦱꦶ.

ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ – ‘‘ꦄꦲꦺꦴ ꦄꦕ꧀ꦖꦫꦶꦪꦁ ꦕꦹꦭ꦳ꦺꦏꦱꦴꦛꦏꦱ꧀ꦱ ꦏꦩ꧀ꦩꦁ, ꦠꦁꦩꦸꦲꦸꦠ꧀ꦠꦩꦺꦮ ꦱꦧ꧀ꦧꦕꦠꦸꦏ꧀ꦏꦁ ꦭꦨꦶ, ꦆꦢꦴꦤꦶ ꦏꦠꦺꦤ ꦏꦭ꧀ꦪꦴꦟꦏꦩ꧀ꦩꦺꦤ ꦄꦗ꧀ꦗꦩꦺꦮ ꦮꦶꦥꦴꦏꦺꦴ ꦢꦶꦤ꧀ꦤꦺꦴ’’ꦠꦶ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ, ‘‘ꦨꦶꦏ꧀ꦑꦮꦺ, ꦱꦕꦴꦪꦁ ꦌꦏꦱꦴꦛꦏꦺꦴ ꦥꦜꦩꦪꦴꦩꦺ ꦩꦪ꧀ꦲꦁ ꦢꦴꦠꦸꦁ ꦄꦱꦏ꧀ꦑꦶꦱ꧀ꦱ, ꦱꦧ꧀ꦧꦱꦺꦴꦭ꦳ꦱꦏꦁ ꦄꦭꦨꦶꦱ꧀ꦱ. ꦱꦕꦺ ꦩꦗ꧀ꦙꦶꦩꦪꦴꦩꦺ ꦄꦱꦏ꧀ꦑꦶꦱ꧀ꦱ, ꦱꦧ꧀ꦧꦛ꧀ꦜꦏꦁ ꦄꦭꦨꦶꦱ꧀ꦱ. ꦧꦭꦮꦥꦕ꧀ꦖꦶꦩꦪꦴꦩꦺ ꦢꦶꦤ꧀ꦤꦠ꧀ꦠꦴ ꦥꦤꦺꦱ ꦱꦧ꧀ꦧꦕꦠꦸꦏ꧀ꦏꦁ ꦭꦨꦶ. ꦏꦭ꧀ꦪꦴꦟꦏꦩ꧀ꦩꦁ ꦏꦫꦺꦴꦤ꧀ꦠꦺꦤ ꦲꦶ ꦈꦥ꧀ꦥꦤ꧀ꦤꦁ ꦕꦶꦠ꧀ꦠꦁ ꦄꦲꦴꦥꦺꦠ꧀ꦮꦴ ꦠꦔ꧀ꦑꦟꦚ꧀ꦚꦺꦮ ꦏꦴꦠꦧ꧀ꦧꦁ. ꦢꦤ꧀ꦣꦁ ꦏꦠꦁ ꦏꦸꦱꦭꦚ꧀ꦲꦶ ꦱꦩ꧀ꦥꦠ꧀ꦠꦶꦁ ꦢꦢꦩꦴꦤꦁ ꦢꦤ꧀ꦣꦩꦺꦮ ꦢꦢꦴꦠꦶ, ꦠꦱ꧀ꦩꦴ ꦕꦶꦠ꧀ꦠꦸꦥ꧀ꦥꦴꦢꦱꦩꦤꦤ꧀ꦠꦫꦩꦺꦮ ꦏꦭ꧀ꦪꦴꦟꦏꦩ꧀ꦩꦁ ꦏꦴꦠꦧ꧀ꦧ’’ꦤ꧀ꦠꦶ ꦮꦠ꧀ꦮꦴ ꦄꦤꦸꦱꦤ꧀ꦣꦶꦁ ꦓꦛꦺꦠ꧀ꦮꦴ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦆꦩꦁ ꦒꦴꦡꦩꦴꦲ –

꧑꧑꧖. ‘‘ꦄꦨꦶꦠ꧀ꦡꦫꦺꦡ ꦏꦭ꧀ꦪꦴꦟꦺ, ꦥꦴꦥꦴ ꦕꦶꦠ꧀ꦠꦁ ꦤꦶꦮꦴꦫꦪꦺ;

ꦢꦤ꧀ꦣꦚ꧀ꦲꦶ ꦏꦫꦺꦴꦠꦺꦴ ꦥꦸꦚ꧀ꦚꦁ, ꦥꦴꦥꦱ꧀ꦩꦶꦁ ꦫꦩꦠꦷ ꦩꦤꦺꦴ’’ꦠꦶ.

ꦠꦠ꧀ꦡ ꦄꦨꦶꦠ꧀ꦡꦫꦺꦡꦴꦠꦶ ꦠꦸꦫꦶꦠꦠꦸꦫꦶꦠꦁ ꦱꦷꦓꦱꦷꦓꦁ ꦏꦫꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦒꦶꦲꦶꦤꦴ ꦮꦴ ꦲꦶ ‘‘ꦱꦭꦴꦏꦨꦠ꧀ꦠꦢꦴꦤꦴꦢꦷꦱꦸ ꦏꦶꦚ꧀ꦕꦶꦢꦺꦮ ꦏꦸꦱꦭꦁ ꦏꦫꦶꦱ꧀ꦱꦴꦩꦷ’’ꦠꦶ ꦕꦶꦠ꧀ꦠꦺ ꦈꦥ꧀ꦥꦤ꧀ꦤꦺ ꦪꦡꦴ ꦄꦚ꧀ꦚꦺ ꦎꦏꦴꦱꦁ ꦤ ꦭꦨꦤ꧀ꦠꦶ, ꦌꦮꦁ ‘‘ꦄꦲꦁ ꦥꦸꦫꦺ, ꦄꦲꦁ ꦥꦸꦫꦺ’’ꦠꦶ ꦠꦸꦫꦶꦠꦠꦸꦫꦶꦠꦩꦺꦮ ꦏꦴꦠꦧ꧀ꦧꦁ. ꦥꦧ꧀ꦧꦗꦶꦠꦺꦤ ꦮꦴ ꦈꦥꦗ꧀ꦙꦴꦪꦮꦠ꧀ꦠꦴꦢꦷꦤꦶ ꦏꦫꦺꦴꦤ꧀ꦠꦺꦤ ꦄꦚ꧀ꦚꦱ꧀ꦱ ꦎꦏꦴꦱꦁ ꦄꦢꦠ꧀ꦮꦴ ‘‘ꦄꦲꦁ ꦥꦸꦫꦺ, ꦄꦲꦁ ꦥꦸꦫꦺ’’ꦠꦶ ꦠꦸꦫꦶꦠꦠꦸꦫꦶꦠꦩꦺꦮ ꦏꦴꦠꦧ꧀ꦧꦁ. ꦥꦴꦥꦴ ꦕꦶꦠ꧀ꦠꦤ꧀ꦠꦶ ꦏꦴꦪꦢꦸꦕ꧀ꦕꦫꦶꦠꦴꦢꦶꦥꦴꦥꦏꦩ꧀ꦩꦠꦺꦴ ꦮꦴ ꦄꦏꦸꦱꦭꦕꦶꦠ꧀ꦠꦸꦥ꧀ꦥꦴꦢꦠꦺꦴ ꦮꦴ ꦱꦧ꧀ꦧꦡꦴꦩꦺꦤ ꦕꦶꦠ꧀ꦠꦁ ꦤꦶꦮꦴꦫꦪꦺ. ꦢꦤ꧀ꦣꦚ꧀ꦲꦶ ꦏꦫꦺꦴꦠꦺꦴꦠꦶ ꦪꦺꦴ ꦥꦤ ‘‘ꦢꦱ꧀ꦱꦴꦩꦶ, ꦤ ꦢꦱ꧀ꦱꦴꦩꦶ ꦱꦩ꧀ꦥꦗ꧀ꦗꦶꦱ꧀ꦱꦠꦶ ꦤꦸ ꦑꦺꦴ ꦩꦺ, ꦤꦺꦴ’’ꦠꦶ ꦌꦮꦁ ꦕꦶꦏ꧀ꦑꦭ꧀ꦭꦩꦒ꧀ꦒꦺꦤ ꦒꦕ꧀ꦖꦤ꧀ꦠꦺꦴ ꦮꦶꦪ ꦢꦤ꧀ꦣꦁ ꦥꦸꦚ꧀ꦚꦁ ꦏꦫꦺꦴꦠꦶ, ꦠꦱ꧀ꦱ ꦌꦏꦱꦴꦛꦏꦱ꧀ꦱ ꦮꦶꦪ ꦩꦕ꧀ꦖꦺꦫꦱꦲꦱ꧀ꦱꦁ ꦥꦴꦥꦁ ꦎꦏꦴꦱꦁ ꦭꦨꦠꦶ. ꦄꦡꦱ꧀ꦱ ꦥꦴꦥꦱ꧀ꦩꦶꦁ ꦫꦩꦠꦷ ꦩꦤꦺꦴ, ꦏꦸꦱꦭꦏꦩ꧀ꦩꦏꦫꦟꦏꦴꦭꦺꦪꦺꦮ ꦲꦶ ꦕꦶꦠ꧀ꦠꦁ ꦏꦸꦱꦭꦺ ꦫꦩꦠꦶ, ꦠꦠꦺꦴ ꦩꦸꦕ꧀ꦕꦶꦠ꧀ꦮꦴ ꦥꦴꦥꦤꦶꦤ꧀ꦤꦩꦺꦮ ꦲꦺꦴꦠꦷꦠꦶ.

ꦒꦴꦡꦴꦥꦫꦶꦪꦺꦴꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦴꦥꦸꦟꦶꦁꦱꦹꦠꦶ.

ꦕꦹꦭ꦳ꦺꦏꦱꦴꦛꦏꦧ꧀ꦫꦴꦲ꧀ꦩꦟꦮꦠ꧀ꦡꦸ ꦥꦜꦩꦁ.