꧕. ꦢꦸꦧ꧀ꦧꦕꦨꦶꦏ꧀ꦑꦸꦮꦠ꧀ꦡꦸ

ꦏꦸꦱꦺꦴ ꦪꦡꦴꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦄꦚ꧀ꦚꦠꦫꦁ ꦢꦸꦧ꧀ꦧꦕꦨꦶꦏ꧀ꦑꦸꦁ ꦄꦴꦫꦧ꧀ꦨ ꦏꦡꦺꦱꦶ.

ꦌꦏꦺꦴ ꦏꦶꦫ ꦨꦶꦏ꧀ꦑꦸ ꦄꦱꦚ꧀ꦕꦶꦕ꧀ꦕ ꦌꦏꦁ ꦠꦶꦟꦁ ꦖꦶꦤ꧀ꦢꦶꦠ꧀ꦮꦴ ꦏꦸꦏ꧀ꦏꦸꦕ꧀ꦕꦺ ꦈꦥ꧀ꦥꦤ꧀ꦤꦺ ꦌꦏꦁ ꦨꦶꦏ꧀ꦑꦸꦁ ꦈꦥꦱꦔ꧀ꦏꦩꦶꦠ꧀ꦮꦴ, ‘‘ꦄꦴꦮꦸꦱꦺꦴ, ꦪꦺꦴ ꦠꦶꦟꦁ ꦖꦶꦤ꧀ꦢꦠꦶ, ꦠꦱ꧀ꦱ ꦏꦶꦁ ꦲꦺꦴꦠꦷ’’ꦠꦶ ꦠꦁ ꦄꦠ꧀ꦠꦤꦴ ꦏꦠꦨꦴꦮꦁ ꦄꦴꦫꦺꦴꦕꦺꦠ꧀ꦮꦴ ꦥꦸꦕ꧀ꦖꦶ. ꦄꦡ ꦤꦁ ꦆꦠꦫꦺꦴ ‘‘ꦠ꧀ꦮꦁ ꦠꦶꦟꦱ꧀ꦱ ꦖꦶꦤ꧀ꦤꦏꦴꦫꦟꦴ ꦏꦶꦚ꧀ꦕꦶ ꦲꦺꦴꦠꦷꦠꦶ ꦱꦚ꧀ꦚꦁ ꦏꦫꦺꦴꦱꦶ, ꦤ ꦌꦠ꧀ꦡ ꦏꦶꦚ꧀ꦕꦶ ꦲꦺꦴꦠꦶ, ꦢꦺꦱꦺꦠ꧀ꦮꦴ ꦥꦤ ꦩꦸꦕ꧀ꦕꦠꦷ’’ꦠꦶ ꦮꦠ꧀ꦮꦴ ꦱꦪꦩ꧀ꦥꦶ ꦈꦨꦺꦴꦲꦶ ꦲꦠ꧀ꦡꦺꦲꦶ ꦠꦶꦟꦁ ꦭꦸꦚ꧀ꦕꦶꦠ꧀ꦮꦴ ꦄꦒ꧀ꦒꦲꦺꦱꦶ. ꦨꦶꦏ꧀ꦑꦹ ꦠꦁ ꦥꦮꦠ꧀ꦠꦶꦁ ꦱꦠ꧀ꦡꦸ ꦄꦴꦫꦺꦴꦕꦺꦱꦸꦁ. ꦱꦠ꧀ꦡꦴ ꦠꦁ ꦨꦶꦏ꧀ꦑꦸꦁ ꦄꦤꦺꦏꦥꦫꦶꦪꦴꦪꦺꦤ ꦮꦶꦒꦫꦲꦶꦠ꧀ꦮꦴ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦆꦩꦴ ꦒꦴꦡꦴ ꦄꦨꦴꦱꦶ –

꧓꧑꧑. ‘‘ꦏꦸꦱꦺꦴ ꦪꦡꦴ ꦢꦸꦒ꧀ꦒꦲꦶꦠꦺꦴ, ꦲꦠ꧀ꦡꦩꦺꦮꦴꦤꦸꦏꦤ꧀ꦠꦠꦶ;

ꦱꦴꦩꦚ꧀ꦚꦁ ꦢꦸꦥ꧀ꦥꦫꦴꦩꦛ꧀ꦜꦁ, ꦤꦶꦫꦪꦴꦪꦸꦥꦏꦝ꧀ꦞꦠꦶ.

꧓꧑꧒. ‘‘ꦪꦁ ꦏꦶꦚ꧀ꦕꦶ ꦱꦶꦡꦶꦭꦁ ꦏꦩ꧀ꦩꦁ, ꦱꦁꦏꦶꦭꦶꦛ꧀ꦜꦚ꧀ꦕ ꦪꦁ ꦮꦠꦁ;

ꦱꦔ꧀ꦏꦱ꧀ꦱꦫꦁ ꦧ꧀ꦫꦲ꧀ꦩꦕꦫꦶꦪꦁ, ꦤ ꦠꦁ ꦲꦺꦴꦠꦶ ꦩꦲꦥ꧀ꦦꦭꦁ.

꧓꧑꧓. ‘‘ꦏꦪꦶꦫꦴ ꦕꦺ ꦏꦪꦶꦫꦴꦡꦺꦤꦁ, ꦢꦭ꦳꧀ꦲꦩꦺꦤꦁ ꦥꦫꦏ꧀ꦏꦩꦺ;

ꦱꦶꦡꦶꦭꦺꦴ ꦲꦶ ꦥꦫꦶꦧ꧀ꦧꦴꦗꦺꦴ, ꦨꦶꦪ꧀ꦪꦺꦴ ꦄꦴꦏꦶꦫꦠꦺ ꦫꦗ’’ꦤ꧀ꦠꦶ.

ꦠꦠ꧀ꦡ ꦏꦸꦱꦺꦴꦠꦶ ꦪꦁ ꦏꦶꦚ꧀ꦕꦶ ꦠꦶꦑꦶꦟꦣꦴꦫꦁ ꦠꦶꦟꦁ ꦄꦤ꧀ꦠꦩꦱꦺꦴ ꦠꦴꦭꦥꦟ꧀ꦟꦩ꧀ꦥꦶ, ꦪꦡꦴ ꦱꦺꦴ ꦏꦸꦱꦺꦴ ꦪꦺꦤ ꦢꦸꦒ꧀ꦒꦲꦶꦠꦺꦴ, ꦠꦱ꧀ꦱ ꦲꦠ꧀ꦡꦁ ꦄꦤꦸꦏꦤ꧀ꦠꦠꦶ ꦦꦴꦭꦺꦠꦶ, ꦌꦮꦩꦺꦮ ꦱꦩꦟꦣꦩ꧀ꦩꦱꦔ꧀ꦑꦴꦠꦁ ꦱꦴꦩꦚ꧀ꦚꦩ꧀ꦥꦶ ꦑꦟ꧀ꦝꦱꦷꦭꦴꦢꦶꦠꦴꦪ ꦢꦸꦥ꧀ꦥꦫꦴꦩꦛ꧀ꦜꦁ ꦤꦶꦫꦪꦴꦪꦸꦥꦏꦝ꧀ꦞꦠꦶ, ꦤꦶꦫꦪꦺ ꦤꦶꦧ꧀ꦧꦠ꧀ꦠꦴꦥꦺꦠꦷꦠꦶ ꦄꦠ꧀ꦡꦺꦴ. ꦱꦶꦡꦶꦭꦤ꧀ꦠꦶ ꦎꦭꦷꦪꦶꦠ꧀ꦮꦴ ꦏꦫꦟꦺꦤ ꦱꦶꦡꦶꦭꦒꦴꦲꦁ ꦏꦠ꧀ꦮꦴ ꦏꦠꦁ ꦪꦁꦏꦶꦚ꧀ꦕꦶ ꦏꦩ꧀ꦩꦁ. ꦱꦁꦏꦶꦭꦶꦛ꧀ꦜꦤ꧀ꦠꦶ ꦮꦺꦱꦶꦪꦴꦢꦶꦏꦺꦱꦸ ꦄꦒꦺꦴꦕꦫꦺꦱꦸ ꦕꦫꦟꦺꦤ ꦱꦁꦏꦶꦭꦶꦛ꧀ꦜꦁ. ꦱꦔ꧀ꦏꦱ꧀ꦱꦫꦤ꧀ꦠꦶ ꦱꦔ꧀ꦏꦴꦲꦶ ꦱꦫꦶꦠꦧ꧀ꦧꦁ, ꦈꦥꦺꦴꦱꦡꦏꦶꦕ꧀ꦕꦴꦢꦷꦱꦸ ꦄꦚ꧀ꦚꦠꦫꦏꦶꦕ꧀ꦕꦺꦤ ꦱꦤ꧀ꦤꦶꦥꦠꦶꦠꦩ꧀ꦥꦶ ꦱꦔ꧀ꦓꦁ ꦢꦶꦱ꧀ꦮꦴ ‘‘ꦄꦢ꧀ꦣꦴ ꦆꦩꦺ ꦩꦩ ꦕꦫꦶꦪꦁ ꦚꦠ꧀ꦮꦴ ꦩꦁ ꦈꦏ꧀ꦑꦶꦥꦶꦠꦸꦏꦴꦩꦴꦮ ꦱꦤ꧀ꦤꦶꦥꦠꦶꦠꦴ’’ꦠꦶ ꦌꦮꦁ ꦄꦠ꧀ꦠꦤꦺꦴ ꦄꦴꦱꦔ꧀ꦏꦴꦲꦶ ꦱꦫꦶꦠꦁ ꦈꦱ꧀ꦱꦔ꧀ꦏꦶꦠꦁ ꦥꦫꦶꦱꦔ꧀ꦏꦶꦠꦁ. ꦤ ꦠꦁ ꦲꦺꦴꦠꦷꦠꦶ ꦠꦁ ꦌꦮꦫꦹꦥꦁ ꦱꦩꦟꦣꦩ꧀ꦩꦱꦔ꧀ꦑꦴꦠꦁ ꦧ꧀ꦫꦲ꧀ꦩꦕꦫꦶꦪꦁ ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦩꦲꦥ꧀ꦦꦭꦁ ꦤ ꦲꦺꦴꦠꦶ, ꦠꦱ꧀ꦱ ꦩꦲꦥ꧀ꦦꦭꦴꦨꦴꦮꦺꦤꦺꦮ ꦨꦶꦏ꧀ꦑꦢꦴꦪꦏꦴꦤꦩ꧀ꦥꦶꦱ꧀ꦱ ꦤ ꦩꦲꦥ꧀ꦦꦭꦁ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦏꦪꦶꦫꦴ ꦕꦺꦠꦶ ꦠꦱ꧀ꦩꦴ ꦪꦁ ꦏꦩ꧀ꦩꦁ ꦏꦫꦺꦪ꧀ꦪ, ꦠꦁ ꦏꦫꦺꦪ꧀ꦪꦴꦡꦺꦮ. ꦢꦭ꦳꧀ꦲꦩꦺꦤꦁ ꦥꦫꦏ꧀ꦏꦩꦺꦠꦶ ꦡꦶꦫꦏꦠꦩꦺꦮ ꦏꦠ꧀ꦮꦴ ꦄꦮꦠ꧀ꦠꦱꦩꦴꦢꦴꦤꦺꦴ ꦲꦸꦠ꧀ꦮꦴ ꦌꦤꦁ ꦏꦪꦶꦫꦴ. ꦥꦫꦶꦧ꧀ꦧꦴꦗꦺꦴꦠꦶ ꦱꦶꦡꦶꦭꦨꦴꦮꦺꦤ ꦏꦠꦺꦴ ꦑꦟ꧀ꦝꦴꦢꦶꦨꦴꦮꦥ꧀ꦥꦠ꧀ꦠꦺꦴ ꦱꦩꦟꦣꦩ꧀ꦩꦺꦴ. ꦨꦶꦪ꧀ꦪꦺꦴ ꦄꦴꦏꦶꦫꦠꦺ ꦫꦗꦤ꧀ꦠꦶ ꦄꦧ꧀ꦨꦤ꧀ꦠꦫꦺ ꦮꦶꦗ꧀ꦗꦩꦴꦤꦁ ꦫꦴꦒꦫꦗꦴꦢꦶꦁ ꦌꦮꦫꦹꦥꦺꦴ ꦱꦩꦟꦣꦩ꧀ꦩꦺꦴ ꦄꦥꦤꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦄꦡ ꦑꦺꦴ ꦠꦱ꧀ꦱ ꦈꦥꦫꦶ ꦄꦥꦫꦩ꧀ꦥꦶ ꦫꦴꦒꦫꦗꦴꦢꦶꦁ ꦄꦴꦏꦶꦫꦠꦷꦠꦶ ꦄꦠ꧀ꦡꦺꦴ.

ꦢꦺꦱꦤꦴꦮꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦴꦥꦸꦟꦶꦁꦱꦸ, ꦱꦺꦴꦥꦶ ꦨꦶꦏ꧀ꦑꦸ ꦱꦁꦮꦫꦺ ꦜꦠ꧀ꦮꦴ ꦥꦕ꧀ꦖꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦷꦠꦶ.

ꦢꦸꦧ꧀ꦧꦕꦨꦶꦏ꧀ꦑꦸꦮꦠ꧀ꦡꦸ ꦥꦚ꧀ꦕꦩꦁ.