꧘. ꦕꦹꦭ꦳ꦱꦸꦨꦢ꧀ꦢꦴꦮꦠ꧀ꦡꦸ

ꦢꦹꦫꦺ ꦱꦤ꧀ꦠꦺꦴꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦣꦷꦠꦫꦁ ꦕꦹꦭ꦳ꦱꦸꦨꦢ꧀ꦢꦁ ꦤꦴꦩ ꦄꦴꦫꦧ꧀ꦨ ꦏꦡꦺꦱꦶ.

ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦏꦶꦫ ꦢꦲꦫꦏꦴꦭꦠꦺꦴ ꦥꦛ꧀ꦜꦴꦪ ꦈꦒ꧀ꦒꦤꦒꦫꦮꦴꦱꦷ ꦈꦒ꧀ꦒꦺꦴ ꦤꦴꦩ ꦱꦺꦛ꧀ꦜꦶꦥꦸꦠ꧀ꦠꦺꦴ ꦱꦲꦴꦪꦏꦺꦴ ꦄꦲꦺꦴꦱꦶ. ꦠꦺ ꦌꦏꦴꦕꦫꦶꦪꦏꦸꦭꦺ ꦱꦶꦥ꧀ꦥꦁ ꦈꦒ꧀ꦒꦟ꧀ꦲꦤ꧀ꦠꦴ ꦄꦚ꧀ꦚꦩꦚ꧀ꦚꦁ ꦏꦠꦶꦏꦁ ꦏꦫꦶꦁꦱꦸ ‘‘ꦄꦩ꧀ꦲꦴꦏꦁ ꦮꦪꦥ꧀ꦥꦠ꧀ꦠꦏꦴꦭꦺ ꦥꦸꦠ꧀ꦠꦣꦷꦠꦴꦱꦸ ꦗꦴꦠꦴꦱꦸ ꦪꦺꦴ ꦥꦸꦠ꧀ꦠꦱ꧀ꦱ ꦣꦷꦠꦫꦁ ꦮꦴꦫꦺꦠꦶ, ꦠꦺꦤ ꦠꦱ꧀ꦱ ꦣꦷꦠꦴ ꦢꦴꦠꦧ꧀ꦧꦴ’’ꦠꦶ. ꦠꦺ ꦈꦨꦺꦴꦥꦶ ꦮꦪꦥ꧀ꦥꦠ꧀ꦠꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦤꦒꦫꦺ ꦱꦺꦛ꧀ꦜꦶꦛ꧀ꦜꦴꦤꦺ ꦥꦠꦶꦛ꧀ꦜꦲꦶꦁꦱꦸ. ꦄꦡꦺꦏꦱ꧀ꦩꦶꦁ ꦱꦩꦪꦺ ꦈꦒ꧀ꦒꦱꦺꦛ꧀ꦜꦶ ꦮꦟꦶꦗ꧀ꦗꦁ ꦥꦪꦺꦴꦗꦺꦤ꧀ꦠꦺꦴ ꦥꦚ꧀ꦕꦲꦶ ꦱꦏꦛꦱꦠꦺꦲꦶ ꦱꦴꦮꦠ꧀ꦡꦶꦁ ꦄꦒꦩꦴꦱꦶ. ꦄꦤꦴꦡꦥꦶꦟ꧀ꦝꦶꦏꦺꦴ ꦄꦠ꧀ꦠꦤꦺꦴ ꦣꦷꦠꦫꦁ ꦕꦹꦭ꦳ꦱꦸꦨꦢ꧀ꦢꦁ ꦄꦴꦩꦤ꧀ꦠꦺꦠ꧀ꦮꦴ, ‘‘ꦄꦩ꧀ꦩ, ꦥꦶꦠꦴ ꦠꦺ ꦈꦒ꧀ꦒꦱꦺꦛ꧀ꦜꦶ ꦤꦴꦩ ꦄꦴꦒꦠꦺꦴ, ꦠꦱ꧀ꦱ ꦏꦠ꧀ꦠꦧ꧀ꦧꦏꦶꦕ꧀ꦕꦁ ꦱꦧ꧀ꦧꦁ ꦠꦮ ꦨꦴꦫꦺꦴ’’ꦠꦶ ꦄꦴꦟꦴꦥꦺꦱꦶ. ꦱꦴ ‘‘ꦱꦴꦣꦹ’’ꦠꦶ ꦥꦛꦶꦱ꧀ꦱꦸꦟꦶꦠ꧀ꦮꦴ ꦠꦱ꧀ꦱ ꦄꦴꦒꦠꦢꦶꦮꦱꦠꦺꦴ ꦥꦛ꧀ꦜꦴꦪ ꦱꦲꦠ꧀ꦡꦺꦤꦺꦮ ꦱꦹꦥꦧ꧀ꦪꦚ꧀ꦗꦤꦴꦢꦷꦤꦶ ꦱꦩ꧀ꦥꦴꦢꦺꦠꦶ, ꦩꦴꦭꦴꦒꦤ꧀ꦣꦮꦶꦭꦺꦥꦤꦴꦢꦷꦤꦶ ꦄꦨꦶꦱꦔ꧀ꦑꦫꦺꦴꦠꦶ, ꦨꦺꦴꦗꦤꦏꦴꦭꦺ ꦠꦱ꧀ꦱ ꦤ꧀ꦲꦴꦤꦺꦴꦢꦏꦁ ꦥꦛꦶꦪꦴꦢꦴꦥꦺꦠ꧀ꦮꦴ ꦤ꧀ꦲꦴꦤꦏꦴꦭꦠꦺꦴ ꦥꦛ꧀ꦜꦴꦪ ꦱꦧ꧀ꦧꦏꦶꦕ꧀ꦕꦴꦤꦶ ꦱꦴꦣꦸꦏꦁ ꦏꦫꦺꦴꦠꦶ.

ꦈꦒ꧀ꦒꦱꦺꦛ꧀ꦜꦶ ꦠꦱ꧀ꦱꦴ ꦄꦴꦕꦴꦫꦱꦩ꧀ꦥꦠ꧀ꦠꦶꦁ ꦢꦶꦱ꧀ꦮꦴ ꦥꦱꦤ꧀ꦤꦕꦶꦠ꧀ꦠꦺꦴ ꦌꦏꦢꦶꦮꦱꦁ ꦄꦤꦴꦡꦥꦶꦟ꧀ꦝꦶꦏꦺꦤ ꦱꦢ꧀ꦣꦶꦁ ꦱꦸꦑꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦺꦴ ‘‘ꦩꦪꦁ ꦢꦲꦫꦏꦴꦭꦺ ꦌꦮꦁ ꦤꦴꦩ ꦏꦠꦶꦏꦁ ꦏꦫꦶꦩ꧀ꦲꦴ’’ꦠꦶ ꦱꦴꦫꦺꦠ꧀ꦮꦴ ꦕꦹꦭ꦳ꦱꦸꦨꦢ꧀ꦢꦁ ꦄꦠ꧀ꦠꦤꦺꦴ ꦥꦸꦠ꧀ꦠꦱ꧀ꦱꦠ꧀ꦡꦴꦪ ꦮꦴꦫꦺꦱꦶ. ꦱꦺꦴ ꦥꦤ ꦥꦏꦠꦶꦪꦴꦮ ꦩꦶꦕ꧀ꦖꦴꦢꦶꦛ꧀ꦜꦶꦏꦺꦴ. ꦠꦱ꧀ꦩꦴ ꦢꦱꦧꦭꦱ꧀ꦱ ꦠꦩꦠ꧀ꦡꦁ ꦄꦴꦫꦺꦴꦕꦺꦠ꧀ꦮꦴ ꦱꦠ꧀ꦡꦴꦫꦴ ꦈꦒ꧀ꦒꦱꦺꦛ꧀ꦜꦶꦱ꧀ꦱꦹꦥꦤꦶꦱ꧀ꦱꦪꦁ ꦢꦶꦱ꧀ꦮꦴ ꦄꦤꦸꦚ꧀ꦚꦴꦠꦺꦴ ꦨꦫꦶꦪꦴꦪ ꦱꦢ꧀ꦣꦶꦁ ꦩꦤ꧀ꦠꦺꦠ꧀ꦮꦴ ꦠꦱ꧀ꦱ ꦮꦕꦤꦁ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦢꦶꦮꦱꦁ ꦮꦮꦠ꧀ꦡꦥꦺꦠ꧀ꦮꦴ ꦣꦷꦠꦫꦁ ꦮꦶꦱꦴꦑꦁ ꦢꦠ꧀ꦮꦴ ꦈꦪ꧀ꦪꦺꦴꦗꦺꦤ꧀ꦠꦺꦴ ꦣꦤꦚ꧀ꦕꦪꦱꦺꦛ꧀ꦜꦶ ꦮꦶꦪ ꦩꦲꦤ꧀ꦠꦁ ꦱꦏ꧀ꦏꦴꦫꦁ ꦏꦠ꧀ꦮꦴ ꦱꦸꦨꦢ꧀ꦢꦁ ꦄꦴꦩꦤ꧀ꦠꦺꦠ꧀ꦮꦴ, ‘‘ꦄꦩ꧀ꦩ, ꦱꦱꦸꦫꦏꦸꦭꦺ ꦮꦱꦤ꧀ꦠꦶꦪꦴ ꦤꦴꦩ ꦄꦤ꧀ꦠꦺꦴꦄꦒ꧀ꦒꦶ ꦧꦲꦶ ꦤ ꦤꦷꦲꦫꦶꦠꦧ꧀ꦧꦺꦴ’’ꦠꦶ (ꦄ. ꦤꦶ. ꦄꦛ꧀ꦜ. ꧑.꧑.꧒꧕꧙; ꦣ. ꦥ. ꦄꦛ꧀ꦜ. ꧑.꧕꧒ ꦮꦶꦱꦴꦑꦴꦮꦠ꧀ꦡꦸ) ꦣꦤꦚ꧀ꦕꦪꦱꦺꦛ꧀ꦜꦶꦤꦴ ꦮꦶꦱꦴꦑꦴꦪ ꦢꦶꦤ꧀ꦤꦤꦪꦺꦤꦺꦮ ꦢꦱ ꦎꦮꦴꦢꦺ ꦢꦠ꧀ꦮꦴ ‘‘ꦱꦕꦺ ꦩꦺ ꦒꦠꦛ꧀ꦜꦴꦤꦺ ꦣꦷꦠꦸ ꦢꦺꦴꦱꦺꦴ ꦈꦥ꧀ꦥꦗ꧀ꦗꦠꦶ, ꦠꦸꦩ꧀ꦲꦺꦲꦶ ꦱꦺꦴꦣꦺꦠꦧ꧀ꦧꦺꦴ’’ꦠꦶ ꦄꦛ꧀ꦜ ꦏꦸꦛꦸꦩ꧀ꦧꦶꦏꦺ ꦥꦴꦛꦶꦨꦺꦴꦒꦺ ꦒꦲꦺꦠ꧀ꦮꦴ ꦠꦱ꧀ꦱꦴ ꦈꦪ꧀ꦪꦺꦴꦗꦤꦢꦶꦮꦱꦺ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦩꦲꦴꦢꦴꦤꦁ ꦢꦠ꧀ꦮꦴ ꦥꦸꦫꦶꦩꦨꦮꦺ ꦣꦷꦠꦫꦴ ꦏꦠꦴꦤꦁ ꦱꦸꦕꦫꦶꦠꦴꦤꦁ ꦦꦭꦮꦶꦨꦹꦠꦶꦁ ꦭꦺꦴꦏꦱ꧀ꦱ ꦥꦴꦏꦛꦁ ꦏꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ꦮꦶꦪ ꦩꦲꦤ꧀ꦠꦺꦤ ꦱꦏ꧀ꦏꦴꦫꦺꦤ ꦣꦷꦠꦫꦁ ꦈꦪ꧀ꦪꦺꦴꦗꦺꦱꦶ. ꦠꦱ꧀ꦱꦴ ꦄꦤꦸꦥꦸꦧ꧀ꦧꦺꦤ ꦈꦒ꧀ꦒꦤꦒꦫꦁ ꦥꦠ꧀ꦠꦏꦴꦭꦺ ꦱꦱꦸꦫꦏꦸꦭꦺꦤ ꦱꦢ꧀ꦣꦶꦁ ꦩꦲꦴꦗꦤꦺꦴ ꦥꦕ꧀ꦕꦸꦒ꧀ꦒꦩꦤꦩꦏꦴꦱꦶ.

ꦱꦴꦥꦶ ꦄꦠ꧀ꦠꦤꦺꦴ ꦱꦶꦫꦶꦮꦶꦨꦮꦁ ꦥꦴꦏꦛꦁ ꦏꦴꦠꦸꦁ ꦮꦶꦱꦴꦑꦴ ꦮꦶꦪ ꦱꦏꦭꦤꦒꦫꦱ꧀ꦱ ꦄꦠ꧀ꦠꦴꦤꦁ ꦢꦱ꧀ꦱꦺꦤ꧀ꦠꦷ ꦫꦡꦺ ꦜꦠ꧀ꦮꦴ ꦤꦒꦫꦁ ꦥꦮꦶꦱꦶꦠ꧀ꦮꦴ ꦤꦴꦒꦫꦺꦲꦶ ꦥꦺꦱꦶꦠꦺ ꦥꦟ꧀ꦟꦴꦏꦴꦫꦺ ꦒꦲꦺꦠ꧀ꦮꦴ ꦄꦤꦸꦫꦹꦥꦮꦱꦺꦤ ꦠꦺꦱꦁ ꦠꦺꦱꦁ ꦥꦺꦱꦺꦤ꧀ꦠꦷ ꦱꦏꦭꦤꦒꦫꦁ ꦄꦠ꧀ꦠꦤꦺꦴ ꦒꦸꦟꦺꦲꦶ ꦌꦏꦴꦧꦢ꧀ꦣꦩꦏꦴꦱꦶ. ꦩꦔ꧀ꦒꦭꦢꦶꦮꦱꦴꦢꦷꦱꦸ ꦥꦤꦱ꧀ꦱꦴ ꦱꦱꦸꦫꦺꦴ ꦄꦕꦺꦭꦏꦴꦤꦁ ꦱꦏ꧀ꦏꦴꦫꦁ ꦏꦫꦺꦴꦤ꧀ꦠꦺꦴ ‘‘ꦄꦴꦒꦤ꧀ꦠ꧀ꦮꦴ ꦄꦩ꧀ꦲꦴꦏꦁ ꦱꦩꦟꦺ ꦮꦤ꧀ꦢꦠꦹ’’ꦠꦶ ꦥꦺꦱꦺꦱꦶ. ꦱꦴ ꦭꦗ꧀ꦗꦴꦪ ꦤꦒ꧀ꦒꦺ ꦥꦱ꧀ꦱꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦷ ꦒꦤ꧀ꦠꦸꦁ ꦤ ꦆꦕ꧀ꦖꦠꦶ. ꦱꦺꦴ ꦥꦸꦤꦥ꧀ꦥꦸꦤꦁ ꦥꦺꦱꦺꦠ꧀ꦮꦴꦥꦶ ꦠꦴꦪ ꦥꦛꦶꦏ꧀ꦑꦶꦠ꧀ꦠꦺꦴ ꦏꦸꦗ꧀ꦙꦶꦠ꧀ꦮꦴ ‘‘ꦤꦷꦲꦫꦡ ꦤ’’ꦤ꧀ꦠꦶ ꦄꦴꦲ. ꦱꦴ ‘‘ꦤ ꦱꦏ꧀ꦏꦴ ꦩꦩ ꦄꦏꦴꦫꦟꦺꦤ ꦢꦺꦴꦱꦁ ꦄꦴꦫꦺꦴꦥꦺꦠꦸ’’ꦤ꧀ꦠꦶ ꦏꦸꦛꦸꦩ꧀ꦧꦶꦏꦺ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ. ꦠꦺ ꦠꦱ꧀ꦱꦴ ꦤꦶꦢ꧀ꦢꦺꦴꦱꦨꦴꦮꦁ ꦚꦠ꧀ꦮꦴ ꦱꦺꦛ꧀ꦜꦶꦁ ꦱꦚ꧀ꦚꦴꦥꦺꦱꦸꦁ. ꦱꦺꦴ ‘‘ꦄꦪꦁ ꦩꦩ ꦱꦩꦟꦺ ꦄꦲꦶꦫꦶꦏꦴꦠꦶ ꦤ ꦮꦤ꧀ꦢꦷ’’ꦠꦶ ꦨꦫꦶꦪꦴꦪ ꦄꦴꦫꦺꦴꦕꦺꦱꦶ. ꦱꦴ ‘‘ꦏꦷꦢꦶꦱꦴ ꦤꦸ ꦑꦺꦴ ꦆꦩꦶꦱ꧀ꦱꦴ ꦱꦩꦟꦴ, ꦄꦠꦶꦮꦶꦪ ꦠꦺꦱꦁ ꦥꦱꦁꦱꦠꦷ’’ꦠꦶ ꦠꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦄꦴꦲ –

‘‘ꦏꦷꦢꦶꦱꦴ ꦱꦩꦟꦴ ꦠꦸꦪ꧀ꦲꦁ, ꦧꦴꦭ꦳꧀ꦲꦁ ꦑꦺꦴ ꦤꦺ ꦥꦱꦁꦱꦱꦶ;

ꦏꦶꦁꦱꦷꦭꦴ ꦏꦶꦁꦱꦩꦴꦕꦴꦫꦴ, ꦠꦁ ꦩꦺ ꦄꦏ꧀ꦑꦴꦲꦶ ꦥꦸꦕ꧀ꦖꦶꦠꦴ’’ꦠꦶ. (ꦄ. ꦤꦶ. ꦄꦛ꧀ꦜ. ꧒.꧔.꧒꧔);

ꦄꦡꦱ꧀ꦱꦴ ꦱꦸꦨꦢ꧀ꦢꦴ ꦧꦸꦢ꧀ꦣꦴꦤꦚ꧀ꦕꦺꦮ ꦧꦸꦢ꧀ꦣꦱꦴꦮꦏꦴꦤꦚ꧀ꦕ ꦒꦸꦟꦺ ꦥꦏꦴꦱꦺꦤ꧀ꦠꦷ –

‘‘ꦱꦤ꧀ꦠꦶꦤ꧀ꦢ꧀ꦫꦶꦪꦴ ꦱꦤ꧀ꦠꦩꦴꦤꦱꦴ, ꦱꦤ꧀ꦠꦁ ꦠꦺꦱꦁ ꦒꦠꦁ ꦜꦶꦠꦁ;

ꦎꦏ꧀ꦑꦶꦠ꧀ꦠꦕꦏ꧀ꦑꦹ ꦩꦶꦠꦨꦴꦟꦷ, ꦠꦴꦢꦶꦱꦴ ꦱꦩꦟꦴ ꦩꦩ. (ꦄ. ꦤꦶ. ꦄꦛ꧀ꦜ. ꧒.꧔.꧒꧔);

‘‘ꦏꦴꦪꦏꦩ꧀ꦩꦁ ꦱꦸꦕꦶ ꦤꦺꦱꦁ, ꦮꦴꦕꦴꦏꦩ꧀ꦩꦁ ꦄꦤꦴꦮꦶꦭꦁ;

ꦩꦤꦺꦴꦏꦩ꧀ꦩꦁ ꦱꦸꦮꦶꦱꦸꦢ꧀ꦣꦁ, ꦠꦴꦢꦶꦱꦴ ꦱꦩꦟꦴ ꦩꦩ.

‘‘ꦮꦶꦩꦭꦴ ꦱꦔ꧀ꦑꦩꦸꦠ꧀ꦠꦴꦨꦴ, ꦱꦸꦢ꧀ꦣꦴ ꦄꦤ꧀ꦠꦫꦧꦴꦲꦶꦫꦴ;

ꦥꦸꦟ꧀ꦟꦴ ꦱꦸꦢ꧀ꦣꦺꦲꦶ ꦣꦩ꧀ꦩꦺꦲꦶ, ꦠꦴꦢꦶꦱꦴ ꦱꦩꦟꦴ ꦩꦩ.

‘‘ꦭꦴꦨꦺꦤ ꦈꦤ꧀ꦤꦠꦺꦴ ꦭꦺꦴꦏꦺꦴ, ꦄꦭꦴꦨꦺꦤ ꦕ ꦎꦤꦠꦺꦴ;

ꦭꦴꦨꦴꦭꦴꦨꦺꦤ ꦌꦏꦛ꧀ꦜꦴ, ꦠꦴꦢꦶꦱꦴ ꦱꦩꦟꦴ ꦩꦩ.

‘‘ꦪꦱꦺꦤ ꦈꦤ꧀ꦤꦠꦺꦴ ꦭꦺꦴꦏꦺꦴ, ꦄꦪꦱꦺꦤ ꦕ ꦎꦤꦠꦺꦴ;

ꦪꦱꦴꦪꦱꦺꦤ ꦌꦏꦛ꧀ꦜꦴ, ꦠꦴꦢꦶꦱꦴ ꦱꦩꦟꦴ ꦩꦩ.

‘‘ꦥꦱꦁꦱꦴꦪꦸꦤ꧀ꦤꦠꦺꦴ ꦭꦺꦴꦏꦺꦴ, ꦤꦶꦤ꧀ꦢꦴꦪꦴꦥꦶ ꦕ ꦎꦤꦠꦺꦴ;

ꦱꦩꦴ ꦤꦶꦤ꧀ꦢꦴꦥꦱꦁꦱꦴꦱꦸ, ꦠꦴꦢꦶꦱꦴ ꦱꦩꦟꦴ ꦩꦩ.

‘‘ꦱꦸꦑꦺꦤ ꦈꦤ꧀ꦤꦠꦺꦴ ꦭꦺꦴꦏꦺꦴ, ꦢꦸꦏ꧀ꦑꦺꦤꦴꦥꦶ ꦕ ꦎꦤꦠꦺꦴ;

ꦄꦏꦩ꧀ꦥꦴ ꦱꦸꦑꦢꦸꦏ꧀ꦑꦺꦱꦸ, ꦠꦴꦢꦶꦱꦴ ꦱꦩꦟꦴ ꦩꦩꦴ’’ꦠꦶ. –

ꦌꦮꦩꦴꦢꦷꦲꦶ ꦮꦕꦤꦺꦲꦶ ꦱꦱ꧀ꦱꦸꦁ ꦠꦺꦴꦱꦺꦱꦶ.

ꦄꦡ ꦤꦁ ‘‘ꦱꦏ꧀ꦏꦴ ꦠꦮ ꦱꦩꦟꦺ ꦄꦩ꧀ꦲꦴꦏꦩ꧀ꦥꦶ ꦢꦱ꧀ꦱꦺꦠꦸ’’ꦤ꧀ꦠꦶ ꦮꦠ꧀ꦮꦴ ‘‘ꦱꦏ꧀ꦏꦴ’’ꦠꦶ ꦮꦸꦠ꧀ꦠꦺ ‘‘ꦠꦺꦤ ꦲꦶ ꦪꦡꦴ ꦩꦪꦁ ꦠꦺ ꦥꦱ꧀ꦱꦴꦩ, ꦠꦡꦴ ꦏꦫꦺꦴꦲꦷ’’ꦠꦶ ꦮꦸꦠ꧀ꦠꦺ ꦱꦴ ‘‘ꦱꦴꦣꦹ’’ꦠꦶ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦩꦲꦴꦢꦴꦤꦁ ꦱꦗ꧀ꦗꦺꦠ꧀ꦮꦴ ꦈꦥꦫꦶꦥꦴꦱꦴꦢꦠꦭꦺ ꦜꦠ꧀ꦮꦴ ꦗꦺꦠꦮꦤꦴꦨꦶꦩꦸꦑꦷ ꦱꦏ꧀ꦏꦕ꧀ꦕꦁ ꦥꦚ꧀ꦕꦥꦠꦶꦛ꧀ꦜꦶꦠꦺꦤ ꦮꦤ꧀ꦢꦶꦠ꧀ꦮꦴ ꦧꦸꦢ꧀ꦣꦒꦸꦟꦺ ꦄꦴꦮꦗ꧀ꦗꦺꦠ꧀ꦮꦴ ꦒꦤ꧀ꦣꦮꦴꦱꦥꦸꦥ꧀ꦦꦣꦸꦩꦺꦲꦶ ꦥꦹꦗꦁ ꦏꦠ꧀ꦮꦴ, ‘‘ꦨꦤ꧀ꦠꦺ, ꦱ꧀ꦮꦴꦠꦤꦴꦪ ꦧꦸꦢ꧀ꦣꦥ꧀ꦥꦩꦸꦑꦁ ꦨꦶꦏ꧀ꦑꦸꦱꦔ꧀ꦓꦁ ꦤꦶꦩꦤ꧀ꦠꦺꦩꦶ, ꦆꦩꦶꦤꦴ ꦩꦺ ꦱꦚ꧀ꦚꦴꦟꦺꦤ ꦱꦠ꧀ꦡꦴ ꦤꦶꦩꦤ꧀ꦠꦶꦠꦨꦴꦮꦁ ꦗꦴꦤꦴꦠꦹ’’ꦠꦶ ꦱꦸꦩꦤꦥꦸꦥ꧀ꦦꦴꦤꦁ ꦄꦛ꧀ꦜ ꦩꦸꦛ꧀ꦜꦶꦪꦺꦴ ꦄꦴꦏꦴꦱꦺ ꦑꦶꦥꦶ. ꦥꦸꦥ꧀ꦦꦴꦤꦶ ꦒꦤ꧀ꦠ꧀ꦮꦴ ꦕꦠꦸꦥꦫꦶꦱꦩꦗ꧀ꦙꦺ ꦣꦩ꧀ꦩꦁ ꦢꦺꦱꦺꦤ꧀ꦠꦱ꧀ꦱ ꦱꦠ꧀ꦡꦸꦤꦺꦴ ꦈꦥꦫꦶ ꦩꦴꦭꦴꦮꦶꦠꦴꦤꦁ ꦲꦸꦠ꧀ꦮꦴ ꦄꦛ꧀ꦜꦁꦱꦸ. ꦠꦱ꧀ꦩꦶꦁ ꦑꦟꦺ ꦄꦤꦴꦡꦥꦶꦟ꧀ꦝꦶꦏꦺꦴꦥꦶ ꦣꦩ꧀ꦩꦏꦡꦁ ꦱꦸꦠ꧀ꦮꦴ ꦱ꧀ꦮꦴꦠꦤꦴꦪ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦱꦶ. ꦱꦠ꧀ꦡꦴ ‘‘ꦄꦣꦶꦮꦸꦠ꧀ꦡꦁ ꦩꦪꦴ, ꦒꦲꦥꦠꦶ, ꦱ꧀ꦮꦴꦠꦤꦴꦪ ꦨꦠ꧀ꦠ’’ꦤ꧀ꦠꦶ ꦮꦠ꧀ꦮꦴ, ‘‘ꦨꦤ꧀ꦠꦺ, ꦩꦪꦴ ꦥꦸꦫꦺꦠꦫꦁ ꦄꦴꦒꦠꦺꦴ ꦤꦠ꧀ꦡꦶ, ꦏꦱ꧀ꦱ ꦤꦸ ꦑꦺꦴ ꦮꦺꦴ ꦄꦣꦶꦮꦸꦠ꧀ꦡ’’ꦤ꧀ꦠꦶ ꦮꦸꦠ꧀ꦠꦺ ‘‘ꦕꦹꦭ꦳ꦱꦸꦨꦢ꧀ꦢꦴꦪ, ꦒꦲꦥꦠꦶ, ꦤꦶꦩꦤ꧀ꦠꦶꦠꦺꦴ’’ꦠꦶ ꦮꦠ꧀ꦮꦴ ‘‘ꦤꦤꦸ, ꦨꦤ꧀ꦠꦺ, ꦕꦹꦭ꦳ꦱꦸꦨꦢ꧀ꦢꦴ ꦢꦹꦫꦺ ꦮꦱꦠꦶ ꦆꦠꦺꦴ ꦮꦷꦱꦠꦶꦪꦺꦴꦗꦤꦱꦠꦩꦠ꧀ꦡꦏꦺ’’ꦠꦶ ꦮꦸꦠ꧀ꦠꦺ, ‘‘ꦄꦴꦩ ꦒꦲꦥꦠꦶ, ꦢꦹꦫꦺ ꦮꦱꦤ꧀ꦠꦴꦥꦶ ꦲꦶ ꦱꦥ꧀ꦥꦸꦫꦶꦱꦴ ꦄꦨꦶꦩꦸꦑꦺ ꦜꦶꦠꦴ ꦮꦶꦪ ꦥꦏꦴꦱꦺꦤ꧀ꦠꦷ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧓꧐꧔. ‘‘ꦢꦹꦫꦺ ꦱꦤ꧀ꦠꦺꦴ ꦥꦏꦴꦱꦺꦤ꧀ꦠꦶ, ꦲꦶꦩꦮꦤ꧀ꦠꦺꦴꦮ ꦥꦧ꧀ꦧꦠꦺꦴ;

ꦄꦱꦤ꧀ꦠꦺꦠ꧀ꦡ ꦤ ꦢꦶꦱ꧀ꦱꦤ꧀ꦠꦶ, ꦫꦠ꧀ꦠꦶꦁ ꦑꦶꦠ꧀ꦠꦴ ꦪꦡꦴ ꦱꦫꦴ’’ꦠꦶ.

ꦠꦠ꧀ꦡ ꦱꦤ꧀ꦠꦺꦴꦠꦶ ꦫꦴꦒꦴꦢꦷꦤꦁ ꦱꦤ꧀ꦠꦠꦴꦪ ꦧꦸꦢ꧀ꦣꦴꦢꦪꦺꦴ ꦱꦤ꧀ꦠꦴ ꦤꦴꦩ. ꦆꦣ ꦥꦤ ꦥꦸꦧ꧀ꦧꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦴ ꦈꦱ꧀ꦱꦤ꧀ꦤꦏꦸꦱꦭꦩꦹꦭꦴ ꦨꦴꦮꦶꦠꦨꦴꦮꦤꦴ ꦱꦠ꧀ꦠꦴ ꦱꦤ꧀ꦠꦺꦴꦠꦶ ꦄꦣꦶꦥ꧀ꦥꦺꦠꦴ. ꦥꦏꦴꦱꦺꦤ꧀ꦠꦷꦠꦶ ꦢꦹꦫꦺ ꦜꦶꦠꦴꦥꦶ ꦧꦸꦢ꧀ꦣꦴꦤꦁ ꦚꦴꦟꦥꦡꦁ ꦄꦴꦒꦕ꧀ꦖꦤ꧀ꦠꦴ ꦥꦴꦏꦛꦴ ꦲꦺꦴꦤ꧀ꦠꦶ. ꦲꦶꦩꦮꦤ꧀ꦠꦺꦴ ꦮꦴꦠꦶ ꦪꦡꦴ ꦲꦶ ꦠꦶꦪꦺꦴꦗꦤꦱꦲꦱ꧀ꦱꦮꦶꦠ꧀ꦡꦠꦺꦴ ꦥꦚ꧀ꦕꦪꦺꦴꦗꦤꦱꦠꦸꦧ꧀ꦧꦺꦣꦺꦴ ꦕꦠꦸꦫꦴꦱꦷꦠꦶꦪꦴ ꦏꦹꦛꦱꦲꦱ꧀ꦱꦺꦲꦶ ꦥꦛꦶꦩꦟ꧀ꦝꦶꦠꦺꦴ ꦲꦶꦩꦮꦤ꧀ꦠꦥꦧ꧀ꦧꦠꦺꦴ ꦢꦹꦫꦺ ꦜꦶꦠꦴꦤꦩ꧀ꦥꦶ ꦄꦨꦶꦩꦸꦑꦺ ꦜꦶꦠꦺꦴ ꦮꦶꦪ ꦥꦏꦴꦱꦺꦠꦶ, ꦌꦮꦁ ꦥꦏꦴꦱꦺꦤ꧀ꦠꦷꦠꦶ ꦄꦠ꧀ꦡꦺꦴ. ꦄꦱꦤ꧀ꦠꦺꦠ꧀ꦡꦴꦠꦶ ꦢꦶꦛ꧀ꦜꦣꦩ꧀ꦩꦒꦫꦸꦏꦴ ꦮꦶꦠꦶꦟ꧀ꦟꦥꦫꦭꦺꦴꦏꦴ ꦄꦴꦩꦶꦱꦕꦏ꧀ꦑꦸꦏꦴ ꦗꦷꦮꦶꦏꦠ꧀ꦡꦴꦪ ꦥꦧ꧀ꦧꦗꦶꦠꦴ ꦧꦴꦭꦥꦸꦒ꧀ꦒꦭꦴ ꦄꦱꦤ꧀ꦠꦺꦴ ꦤꦴꦩ, ꦠꦺ ꦌꦠ꧀ꦡ ꦧꦸꦢ꧀ꦣꦴꦤꦁ ꦢꦏ꧀ꦑꦶꦟꦱ꧀ꦱ ꦗꦴꦟꦸꦩꦟ꧀ꦝꦭꦱ꧀ꦱ ꦱꦤ꧀ꦠꦶꦏꦺ ꦤꦶꦱꦶꦤ꧀ꦤꦴꦥꦶ ꦤ ꦢꦶꦱ꧀ꦱꦤ꧀ꦠꦶ ꦤ ꦥꦚ꧀ꦚꦴꦪꦤ꧀ꦠꦶ. ꦫꦠ꧀ꦠꦶꦁ ꦑꦶꦠ꧀ꦠꦴꦠꦶ ꦫꦠ꧀ꦠꦶꦁ ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦺ ꦄꦤ꧀ꦣꦏꦴꦫꦺ ꦑꦶꦠ꧀ꦠꦱꦫꦴ ꦮꦶꦪ ꦠꦡꦴꦫꦹꦥꦱ꧀ꦱ ꦈꦥꦤꦶꦱ꧀ꦱꦪꦨꦹꦠꦱ꧀ꦱ ꦥꦸꦧ꧀ꦧꦲꦺꦠꦸꦤꦺꦴ ꦄꦨꦴꦮꦺꦤ ꦤ ꦥꦚ꧀ꦚꦴꦪꦤ꧀ꦠꦷꦠꦶ ꦄꦠ꧀ꦡꦺꦴ.

ꦢꦺꦱꦤꦴꦮꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦴꦥꦸꦟꦶꦁꦱꦹꦠꦶ.

ꦱꦏ꧀ꦏꦺꦴ ꦢꦺꦮꦫꦴꦗꦴ ‘‘ꦱꦠ꧀ꦡꦴꦫꦴ ꦱꦸꦨꦢ꧀ꦢꦴꦪ ꦤꦶꦩꦤ꧀ꦠꦤꦁ ꦄꦣꦶꦮꦴꦱꦶꦠ’’ꦤ꧀ꦠꦶ ꦚꦠ꧀ꦮꦴ ꦮꦶꦱ꧀ꦱꦏꦩ꧀ꦩꦢꦺꦮꦥꦸꦠ꧀ꦠꦁ ꦄꦴꦟꦴꦥꦺꦱꦶ – ‘‘ꦥꦚ꧀ꦕ ꦏꦹꦛꦴꦒꦴꦫꦱꦠꦴꦤꦶ ꦤꦶꦩ꧀ꦩꦶꦤꦶꦠ꧀ꦮꦴ ꦱ꧀ꦮꦺ ꦧꦸꦢ꧀ꦣꦥ꧀ꦥꦩꦸꦑꦁ ꦨꦶꦏ꧀ꦑꦸꦱꦔ꧀ꦓꦁ ꦈꦒ꧀ꦒꦤꦒꦫꦁ ꦤꦺꦲꦷ’’ꦠꦶ. ꦱꦺꦴ ꦥꦸꦤꦢꦶꦮꦱꦺ ꦥꦚ꧀ꦕꦱꦠꦴꦤꦶ ꦏꦹꦛꦴꦒꦴꦫꦴꦤꦶ ꦤꦶꦩ꧀ꦩꦶꦤꦶꦠ꧀ꦮꦴ ꦗꦺꦠꦮꦤꦢ꧀ꦮꦴꦫꦺ ꦄꦛ꧀ꦜꦴꦱꦶ. ꦱꦠ꧀ꦡꦴ ꦈꦕ꧀ꦕꦶꦤꦶꦠ꧀ꦮꦴ ꦮꦶꦱꦸꦢ꧀ꦣꦑꦷꦟꦴꦱꦮꦴꦤꦁꦪꦺꦮ ꦥꦚ꧀ꦕꦱꦠꦴꦤꦶ ꦄꦴꦢꦴꦪ ꦱꦥꦫꦶꦮꦴꦫꦺꦴ ꦏꦹꦛꦴꦒꦴꦫꦺꦱꦸ ꦤꦶꦱꦷꦢꦶꦠ꧀ꦮꦴ ꦈꦒ꧀ꦒꦤꦒꦫꦁ ꦄꦒꦩꦴꦱꦶ. ꦈꦒ꧀ꦒꦱꦺꦛ꧀ꦜꦶꦥꦶ ꦱꦥꦫꦶꦮꦴꦫꦺꦴ ꦱꦸꦨꦢ꧀ꦢꦴꦪ ꦢꦶꦤ꧀ꦤꦤꦪꦺꦤꦺꦮ ꦠꦡꦴꦒꦠꦱ꧀ꦱ ꦄꦴꦒꦠꦩꦒ꧀ꦒꦁ ꦎꦭꦺꦴꦏꦺꦤ꧀ꦠꦺꦴ ꦱꦠ꧀ꦡꦴꦫꦁ ꦩꦲꦤ꧀ꦠꦺꦤ ꦱꦶꦫꦶꦮꦶꦨꦮꦺꦤ ꦄꦴꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ꦩꦴꦭꦴꦢꦷꦲꦶ ꦩꦲꦤ꧀ꦠꦁ ꦱꦏ꧀ꦏꦴꦫꦁ ꦏꦫꦺꦴꦤ꧀ꦠꦺꦴ ꦱꦥꦫꦶꦮꦴꦫꦺꦴ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦩꦲꦴꦢꦴꦤꦁ ꦢꦠ꧀ꦮꦴ ꦥꦸꦤꦥ꧀ꦥꦸꦤꦁ ꦤꦶꦩꦤ꧀ꦠꦺꦠ꧀ꦮꦴ ꦱꦠ꧀ꦠꦴꦲꦁ ꦩꦲꦴꦢꦴꦤꦁ ꦄꦢꦴꦱꦶ. ꦱꦠ꧀ꦡꦴꦥꦶꦱ꧀ꦱ ꦱꦥ꧀ꦥꦴꦪꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦣꦩ꧀ꦩꦁ ꦢꦺꦱꦺꦱꦶ. ꦠꦁ ꦄꦴꦢꦶꦁ ꦏꦠ꧀ꦮꦴ ꦕꦠꦸꦫꦴꦱꦷꦠꦶꦪꦴ ꦥꦴꦟꦱꦲꦱ꧀ꦱꦴꦤꦁ ꦣꦩ꧀ꦩꦴꦨꦶꦱꦩꦪꦺꦴ ꦄꦲꦺꦴꦱꦶ. ꦱꦠ꧀ꦡꦴ ‘‘ꦕꦹꦭ꦳ꦱꦸꦨꦢ꧀ꦢꦴꦪ ꦄꦤꦸꦒ꧀ꦒꦲꦟꦠ꧀ꦡꦁ ꦠ꧀ꦮꦁ ꦆꦣꦺꦮ ꦲꦺꦴꦲꦷ’’ꦠꦶ ꦄꦤꦸꦫꦸꦢ꧀ꦣꦠ꧀ꦡꦺꦫꦁ ꦤꦶꦮꦠ꧀ꦠꦴꦥꦺꦠ꧀ꦮꦴ ꦱꦴꦮꦠ꧀ꦡꦶꦩꦺꦮ ꦄꦒꦩꦴꦱꦶ. ꦠꦠꦺꦴ ꦥꦛ꧀ꦜꦴꦪ ꦠꦁ ꦤꦒꦫꦁ ꦱꦢ꧀ꦣꦴꦱꦩ꧀ꦥꦤ꧀ꦤꦁ ꦄꦲꦺꦴꦱꦷꦠꦶ.

ꦕꦹꦭ꦳ꦱꦸꦨꦢ꧀ꦢꦴꦮꦠ꧀ꦡꦸ ꦄꦛ꧀ꦜꦩꦁ.