꧘. ꦠꦶꦱ꧀ꦱꦢꦲꦫꦮꦠ꧀ꦡꦸ

ꦢꦢꦴꦠꦶ ꦮꦺꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦠꦶꦱ꧀ꦱꦢꦲꦫꦁ ꦤꦴꦩ ꦄꦴꦫꦧ꧀ꦨ ꦏꦡꦺꦱꦶ.

ꦱꦺꦴ ꦏꦶꦫ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦒꦲꦥꦠꦶꦤꦺꦴ ꦮꦶꦱꦴꦑꦴꦪ ꦈꦥꦴꦱꦶꦏꦴꦪꦴꦠꦶ ꦥꦚ꧀ꦕꦤ꧀ꦤꦁ ꦄꦫꦶꦪꦱꦴꦮꦏꦏꦺꦴꦛꦷꦤꦁ ꦢꦴꦤꦁ ꦤꦶꦤ꧀ꦢꦤ꧀ꦠꦺꦴ ꦮꦶꦕꦫꦶ, ꦄꦱꦢꦶꦱꦢꦴꦤꦩ꧀ꦥꦶ ꦤꦶꦤ꧀ꦢꦶꦪꦺꦮ. ꦠꦺꦱꦁ ꦠꦺꦱꦁ ꦢꦴꦤꦒ꧀ꦒꦺ ꦱꦷꦠꦭꦁ ꦭꦨꦶꦠ꧀ꦮꦴ ‘‘ꦱꦷꦠꦭ’’ꦤ꧀ꦠꦶ ꦤꦶꦤ꧀ꦢꦶ, ꦈꦟ꧀ꦲꦁ ꦭꦨꦶꦠ꧀ꦮꦴ ‘‘ꦈꦟ꧀ꦲ’’ꦤ꧀ꦠꦶ ꦤꦶꦤ꧀ꦢꦶ. ꦄꦥ꧀ꦥꦁ ꦢꦺꦤ꧀ꦠꦺꦥꦶ ‘‘ꦏꦶꦁ ꦆꦩꦺ ꦄꦥ꧀ꦥꦩꦠ꧀ꦠꦏꦁ ꦢꦺꦤ꧀ꦠꦷ’’ꦠꦶ ꦤꦶꦤ꧀ꦢꦶ, ꦧꦲꦸꦁ ꦢꦺꦤ꧀ꦠꦺꦥꦶ ‘‘ꦆꦩꦺꦱꦁ ꦒꦺꦲꦺ ꦜꦥꦤꦛ꧀ꦜꦴꦤꦁ ꦩꦚ꧀ꦚꦺ ꦤꦠ꧀ꦡꦶ, ꦤꦤꦸ ꦤꦴꦩ ꦨꦶꦏ꧀ꦑꦹꦤꦁ ꦪꦴꦥꦤꦩꦠ꧀ꦠꦁ ꦢꦴꦠꦧ꧀ꦧꦁ, ꦌꦠ꧀ꦠꦏꦁ ꦪꦴꦒꦸꦨꦠ꧀ꦠꦁ ꦤꦶꦫꦠ꧀ꦡꦏꦩꦺꦮ ꦮꦶꦱ꧀ꦱꦗ꧀ꦗꦠꦷ’’ꦠꦶ ꦤꦶꦤ꧀ꦢꦶ. ꦄꦠ꧀ꦠꦤꦺꦴ ꦥꦤ ꦚꦴꦠꦏꦺ ꦄꦴꦫꦧ꧀ꦨ ‘‘ꦄꦲꦺꦴ ꦄꦩ꧀ꦲꦴꦏꦁ ꦚꦴꦠꦏꦴꦤꦁ ꦒꦺꦲꦁ ꦕꦠꦹꦲꦶ ꦢꦶꦱꦴꦲꦶ ꦄꦴꦒꦠꦴꦒꦠꦴꦤꦁ ꦨꦶꦏ꧀ꦑꦹꦤꦁ ꦎꦥꦴꦤꦨꦹꦠ’’ꦤ꧀ꦠꦶꦄꦴꦢꦷꦤꦶ ꦮꦠ꧀ꦮꦴ ꦥꦱꦁꦱꦁ ꦥꦮꦠ꧀ꦠꦺꦱꦶ. ꦱꦺꦴ ꦥꦤꦺꦏꦱ꧀ꦱ ꦢꦺꦴꦮꦴꦫꦶꦏꦱ꧀ꦱ ꦥꦸꦠ꧀ꦠꦺꦴ ꦗꦤꦥꦢꦁ ꦮꦶꦕꦫꦤ꧀ꦠꦺꦲꦶ ꦮꦝ꧀ꦞꦏꦷꦲꦶ ꦱꦢ꧀ꦣꦶꦁ ꦮꦶꦕꦫꦤ꧀ꦠꦺꦴ ꦱꦴꦮꦠ꧀ꦡꦶꦁ ꦥꦠ꧀ꦮꦴ ꦥꦧ꧀ꦧꦗꦶꦠꦺꦴ. ꦄꦡ ꦤꦁ ꦨꦶꦏ꧀ꦑꦹ ꦌꦮꦁ ꦩꦤꦸꦱ꧀ꦱꦴꦤꦁ ꦢꦴꦤꦴꦢꦷꦤꦶ ꦤꦶꦤ꧀ꦢꦤ꧀ꦠꦁ ꦢꦶꦱ꧀ꦮꦴ ‘‘ꦥꦫꦶꦒ꧀ꦒꦟ꧀ꦲꦶꦱ꧀ꦱꦴꦩ ꦤ’’ꦤ꧀ꦠꦶ ꦕꦶꦤ꧀ꦠꦺꦠ꧀ꦮꦴ, ‘‘ꦄꦴꦮꦸꦱꦺꦴ, ꦠꦮ ꦚꦴꦠꦏꦴ ꦏꦲꦁ ꦮꦱꦤ꧀ꦠꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦄꦱꦸꦏꦒꦴꦩꦺ ꦤꦴꦩꦴ’’ꦠꦶ ꦱꦸꦠ꧀ꦮꦴꦮ ꦏꦠꦶꦥꦪꦺ ꦢꦲꦫꦺ ꦥꦺꦱꦺꦱꦸꦁ. ꦠꦺ ꦠꦠ꧀ꦡ ꦒꦤ꧀ꦠ꧀ꦮꦴ ꦒꦴꦩꦮꦴꦱꦶꦏꦺꦲꦶ ꦄꦴꦱꦤꦱꦴꦭꦴꦪ ꦤꦶꦱꦷꦢꦴꦥꦺꦠ꧀ꦮꦴ ꦏꦠꦱꦏ꧀ꦏꦴꦫꦴ ꦥꦸꦕ꧀ꦖꦶꦁꦱꦸ – ‘‘ꦆꦩꦩ꧀ꦲꦴ ꦒꦴꦩꦴ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶꦠꦺꦴ ꦠꦶꦱ꧀ꦱꦺꦴ ꦤꦴꦩ ꦢꦲꦫꦺꦴ ꦄꦠ꧀ꦡꦶ. ꦠꦱ꧀ꦱ ꦏꦠꦩꦺ ꦚꦴꦠꦏꦴ’’ꦠꦶ? ꦩꦤꦸꦱ꧀ꦱꦴ ‘‘ꦆꦣ ꦏꦸꦭꦒꦺꦲꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶꦠꦢꦴꦫꦏꦺꦴ ꦤꦠ꧀ꦡꦶ, ꦏꦶꦁ ꦤꦸ ꦑꦺꦴ ꦆꦩꦺ ꦮꦢꦤ꧀ꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ, ‘‘ꦨꦤ꧀ꦠꦺ, ꦌꦏꦺꦴ ꦢꦺꦴꦮꦴꦫꦶꦏꦥꦸꦠ꧀ꦠꦺꦴ ꦮꦝ꧀ꦞꦏꦷꦲꦶ ꦱꦢ꧀ꦣꦶꦁ ꦮꦶꦕꦫꦶꦠ꧀ꦮꦴ ꦥꦧ꧀ꦧꦗꦶꦠꦺꦴꦠꦶ ꦱꦸꦟꦺꦴꦩ, ꦠꦁ ꦱꦤ꧀ꦣꦴꦪ ꦮꦢꦺꦡ ꦩꦚ꧀ꦚꦺ’’ꦠꦶ ꦄꦴꦲꦁꦱꦸ. ꦢꦲꦫꦨꦶꦏ꧀ꦑꦹ ꦠꦶꦱ꧀ꦱꦱ꧀ꦱ ꦠꦠ꧀ꦡ ꦆꦱ꧀ꦱꦫꦚꦴꦠꦏꦴꦤꦁ ꦄꦨꦴꦮꦁ ꦚꦠ꧀ꦮꦴ ꦱꦴꦮꦠ꧀ꦡꦶꦁ ꦒꦤ꧀ꦠ꧀ꦮꦴ ‘‘ꦄꦏꦴꦫꦟꦩꦺꦮ, ꦨꦤ꧀ꦠꦺ, ꦠꦶꦱ꧀ꦱꦺꦴ ꦮꦶꦭꦥꦤ꧀ꦠꦺꦴ ꦮꦶꦕꦫꦠꦷ’’ꦠꦶ ꦠꦁ ꦥꦮꦠ꧀ꦠꦶꦁ ꦨꦶꦏ꧀ꦑꦹꦤꦁ ꦄꦴꦫꦺꦴꦕꦺꦱꦸꦁ. ꦨꦶꦏ꧀ꦑꦹꦥꦶ ꦠꦁ ꦠꦡꦴꦒꦠꦱ꧀ꦱ ꦄꦴꦫꦺꦴꦕꦺꦱꦸꦁ.

ꦱꦠ꧀ꦡꦴ ‘‘ꦤ, ꦨꦶꦏ꧀ꦑꦮꦺ, ꦆꦢꦴꦤꦺꦮ ꦮꦶꦏꦠ꧀ꦡꦺꦤ꧀ꦠꦺꦴ ꦮꦶꦕꦫꦠꦶ, ꦥꦸꦧ꧀ꦧꦺꦥꦶ ꦮꦶꦏꦠ꧀ꦡꦏꦺꦴꦮ ꦄꦲꦺꦴꦱꦷ’’ꦠꦶ ꦮꦠ꧀ꦮꦴ ꦨꦶꦏ꧀ꦑꦹꦲꦶ ꦪꦴꦕꦶꦠꦺꦴ ꦄꦠꦷꦠꦁ ꦄꦴꦲꦫꦶꦠ꧀ꦮꦴ –

‘‘ꦧꦲꦸꦩ꧀ꦥꦶ ꦱꦺꦴ ꦮꦶꦏꦠ꧀ꦡꦺꦪ꧀ꦪ, ꦄꦚ꧀ꦚꦁ ꦗꦤꦥꦢꦁ ꦒꦠꦺꦴ;

ꦄꦤ꧀ꦮꦴꦒꦤ꧀ꦠ꧀ꦮꦴꦤ ꦢꦹꦱꦺꦪ꧀ꦪ, ꦨꦸꦚ꧀ꦗ ꦨꦺꦴꦒꦺ ꦏꦛꦴꦲꦏꦴ’’ꦠꦶ. (ꦗꦴ. ꧑.꧑.꧑꧒꧕) –

ꦆꦩꦁ ꦏꦛꦴꦲꦗꦴꦠꦏꦁ ꦮꦶꦠ꧀ꦡꦴꦫꦺꦠ꧀ꦮꦴ, ‘‘ꦨꦶꦏ꧀ꦑꦮꦺ, ꦪꦺꦴ ꦲꦶ ꦥꦸꦒ꧀ꦒꦭꦺꦴ ꦥꦫꦺꦲꦶ ꦄꦥ꧀ꦥꦏꦺ ꦮꦴ ꦧꦲꦸꦏꦺ ꦮꦴ ꦭꦹꦑꦺ ꦮꦴ ꦥꦟꦷꦠꦺ ꦮꦴ ꦢꦶꦤ꧀ꦤꦺ ꦄꦚ꧀ꦚꦺꦱꦁ ꦮꦴ ꦢꦠ꧀ꦮꦴ ꦄꦠ꧀ꦠꦤꦺꦴ ꦄꦢꦶꦤ꧀ꦤꦺ ꦩꦔ꧀ꦏꦸ ꦲꦺꦴꦠꦶ, ꦠꦱ꧀ꦱ ꦙꦴꦤꦁ ꦮꦴ ꦮꦶꦥꦱ꧀ꦱꦤꦁ ꦮꦴ ꦩꦒ꧀ꦒꦦꦭꦴꦢꦷꦤꦶ ꦮꦴ ꦤ ꦈꦥ꧀ꦥꦗ꧀ꦗꦤ꧀ꦠꦷ’’ꦠꦶ ꦮꦠ꧀ꦮꦴ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦆꦩꦴ ꦒꦴꦡꦴ ꦄꦨꦴꦱꦶ –

꧒꧔꧙. ‘‘ꦢꦢꦴꦠꦶ ꦮꦺ ꦪꦡꦴꦱꦢ꧀ꦣꦁ, ꦪꦡꦴꦥꦱꦴꦢꦤꦁ ꦗꦤꦺꦴ;

ꦠꦠ꧀ꦡ ꦪꦺꦴ ꦕ ꦩꦔ꧀ꦏꦸ ꦲꦺꦴꦠꦶ, ꦥꦫꦺꦱꦁ ꦥꦴꦤꦨꦺꦴꦗꦤꦺ;

ꦤ ꦱꦺꦴ ꦢꦶꦮꦴ ꦮꦴ ꦫꦠ꧀ꦠꦶꦁ ꦮꦴ, ꦱꦩꦴꦣꦶꦩꦣꦶꦒꦕ꧀ꦖꦠꦶ.

꧒꧕꧐. ‘‘ꦪꦱ꧀ꦱ ꦕꦺꦠꦁ ꦱꦩꦸꦕ꧀ꦖꦶꦤ꧀ꦤꦁ, ꦩꦹꦭꦓꦕ꧀ꦕꦁ ꦱꦩꦹꦲꦠꦁ;

ꦱ ꦮꦺ ꦢꦶꦮꦴ ꦮꦴ ꦫꦠ꧀ꦠꦶꦁ ꦮꦴ, ꦱꦩꦴꦣꦶꦩꦣꦶꦒꦕ꧀ꦖꦠꦷ’’ꦠꦶ.

ꦠꦠ꧀ꦡ ꦢꦢꦴꦠꦶ ꦮꦺ ꦪꦡꦴꦱꦢ꧀ꦣꦤ꧀ꦠꦶ ꦭꦹꦑꦥꦟꦷꦠꦴꦢꦷꦱꦸ ꦪꦁꦏꦶꦚ꧀ꦕꦶ ꦢꦺꦤ꧀ꦠꦺꦴ ꦗꦤꦺꦴ ꦪꦡꦴꦱꦢ꧀ꦣꦁ ꦄꦠ꧀ꦠꦤꦺꦴ ꦱꦢ꧀ꦣꦴꦤꦸꦫꦹꦥꦩꦺꦮ ꦢꦺꦠꦶ. ꦪꦡꦴꦥꦱꦴꦢꦤꦤ꧀ꦠꦶ ꦡꦺꦫꦤꦮꦴꦢꦷꦱꦸ ꦕꦱ꧀ꦱ ꦪꦱ꧀ꦩꦶꦁ ꦪꦱ꧀ꦩꦶꦁ ꦥꦱꦴꦢꦺꦴ ꦈꦥ꧀ꦥꦗ꧀ꦗꦠꦶ, ꦠꦱ꧀ꦱ ꦢꦺꦤ꧀ꦠꦺꦴ ꦪꦡꦴꦥꦱꦴꦢꦤꦁ ꦄꦠ꧀ꦠꦤꦺꦴ ꦥꦱꦴꦢꦴꦤꦸꦫꦹꦥꦩꦺꦮ ꦢꦺꦠꦶ. ꦠꦠ꧀ꦡꦴꦠꦶ ꦠꦱ꧀ꦩꦶꦁ ꦥꦫꦱ꧀ꦱ ꦢꦴꦤꦺ ‘‘ꦩꦪꦴ ꦄꦥ꧀ꦥꦁ ꦮꦴ ꦭꦢ꧀ꦣꦁ, ꦭꦹꦑꦁ ꦮꦴ ꦭꦢ꧀ꦣ’’ꦤ꧀ꦠꦶ ꦩꦔ꧀ꦏꦸꦨꦴꦮꦁ ꦄꦴꦥꦗ꧀ꦗꦠꦶ. ꦱꦩꦴꦣꦶꦤ꧀ꦠꦶ ꦱꦺꦴ ꦥꦸꦒ꧀ꦒꦭꦺꦴ ꦢꦶꦮꦴ ꦮꦴ ꦫꦠ꧀ꦠꦶꦁ ꦮꦴ ꦈꦥꦕꦴꦫꦥ꧀ꦥꦤꦴꦮꦱꦺꦤ ꦮꦴ ꦩꦒ꧀ꦒꦦꦭꦮꦱꦺꦤ ꦮꦴ ꦱꦩꦴꦣꦶꦁ ꦤꦴꦣꦶꦒꦕ꧀ꦖꦠꦶ. ꦪꦱ꧀ꦱ ꦕꦺꦠꦤ꧀ꦠꦶ ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦌꦠꦁ ꦌꦏꦺꦱꦸ ꦜꦴꦤꦺꦱꦸ ꦩꦔ꧀ꦏꦸꦨꦴꦮꦱꦔ꧀ꦑꦴꦠꦁ ꦄꦏꦸꦱꦭꦁ ꦱꦩꦸꦕ꧀ꦖꦶꦤ꧀ꦤꦁ ꦩꦹꦭꦓꦕ꧀ꦕꦁ ꦏꦠ꧀ꦮꦴ ꦄꦫꦲꦠ꧀ꦠꦩꦒ꧀ꦒꦚꦴꦟꦺꦤ ꦱꦩꦹꦲꦠꦁ, ꦱꦺꦴ ꦮꦸꦠ꧀ꦠꦥ꧀ꦥꦏꦴꦫꦁ ꦱꦩꦴꦣꦶꦁ ꦄꦣꦶꦒꦕ꧀ꦖꦠꦷꦠꦶ ꦄꦠ꧀ꦡꦺꦴ.

ꦢꦺꦱꦤꦴꦮꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦴꦥꦸꦟꦶꦁꦱꦹꦠꦶ.

ꦠꦶꦱ꧀ꦱꦢꦲꦫꦮꦠ꧀ꦡꦸ ꦄꦛ꧀ꦜꦩꦁ.