꧕. ꦧꦸꦢ꧀ꦣꦥꦶꦠꦸꦧ꧀ꦫꦴꦲ꧀ꦩꦟꦮꦠ꧀ꦡꦸ

ꦄꦲꦶꦁꦱꦏꦴ ꦪꦺꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦱꦴꦏꦺꦠꦁ ꦤꦶꦱ꧀ꦱꦴꦪ ꦄꦚ꧀ꦗꦤꦮꦤꦺ ꦮꦶꦲꦫꦤ꧀ꦠꦺꦴ ꦨꦶꦏ꧀ꦑꦹꦲꦶ ꦥꦛ꧀ꦜꦥꦚ꧀ꦲꦁ ꦄꦴꦫꦧ꧀ꦨ ꦏꦡꦺꦱꦶ.

ꦨꦒꦮꦠꦺꦴ ꦏꦶꦫ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦱ꧀ꦱ ꦱꦴꦏꦺꦠꦁ ꦥꦶꦟ꧀ꦝꦴꦪ ꦥꦮꦶꦱꦤꦏꦴꦭꦺ ꦌꦏꦺꦴ ꦱꦴꦏꦺꦠꦮꦴꦱꦷ ꦩꦲꦭ꧀ꦭꦏꦧ꧀ꦫꦴꦲ꧀ꦩꦟꦺꦴ ꦤꦒꦫꦠꦺꦴ ꦤꦶꦏ꧀ꦑꦩꦤ꧀ꦠꦺꦴ ꦄꦤ꧀ꦠꦫꦓꦫꦢ꧀ꦮꦴꦫꦺ ꦢꦱꦧꦭꦁ ꦢꦶꦱ꧀ꦮꦴ ꦥꦴꦢꦺꦱꦸ ꦤꦶꦥꦠꦶꦠ꧀ꦮꦴ ꦒꦺꦴꦥ꧀ꦦꦏꦺꦱꦸ ꦢꦭ꦳꧀ꦲꦁ ꦒꦲꦺꦠ꧀ꦮꦴ, ‘‘ꦠꦴꦠ, ꦤꦤꦸ ꦤꦴꦩ ꦥꦸꦠ꧀ꦠꦺꦲꦶ ꦗꦶꦟ꧀ꦟꦏꦴꦭꦺ ꦩꦴꦠꦴꦥꦶꦠꦫꦺꦴ ꦥꦛꦶꦗꦒ꧀ꦒꦶꦠꦧ꧀ꦧꦴ, ꦏꦱ꧀ꦩꦴ ꦌꦠ꧀ꦠꦏꦁ ꦏꦴꦭꦁ ꦄꦩ꧀ꦲꦴꦏꦁ ꦄꦠ꧀ꦠꦴꦤꦁ ꦤ ꦢꦱ꧀ꦱꦺꦱꦶ. ꦩꦪꦴ ꦠꦴꦮ ꦢꦶꦛ꧀ꦜꦺꦴꦱꦶ, ꦩꦴꦠꦫꦩ꧀ꦥꦶ ꦥꦱ꧀ꦱꦶꦠꦸꦁ ꦌꦲꦷ’’ꦠꦶ ꦱꦠ꧀ꦡꦴꦫꦁ ꦒꦲꦺꦠ꧀ꦮꦴ ꦄꦠ꧀ꦠꦤꦺꦴ ꦒꦺꦲꦁ ꦄꦒꦩꦴꦱꦶ. ꦱꦠ꧀ꦡꦴ ꦠꦠ꧀ꦡ ꦒꦤ꧀ꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤ. ꦧ꧀ꦫꦴꦲ꧀ꦩꦟꦷꦥꦶ ꦄꦴꦒꦤ꧀ꦠ꧀ꦮꦴ ꦱꦠ꧀ꦡꦸ ꦥꦴꦢꦺꦱꦸ ꦤꦶꦥꦠꦶꦠ꧀ꦮꦴ, ‘‘ꦠꦴꦠ, ꦌꦠ꧀ꦠꦏꦁ ꦏꦴꦭꦁ ꦏꦸꦲꦶꦁ ꦒꦠꦺꦴꦱꦶ, ꦤꦤꦸ ꦤꦴꦩ ꦩꦴꦠꦴꦥꦶꦠꦫꦺꦴ ꦩꦲꦭ꧀ꦭꦏꦏꦴꦭꦺ ꦈꦥꦛ꧀ꦜꦴꦠꦧ꧀ꦧꦴ’’ꦠꦶ ꦮꦠ꧀ꦮꦴ ꦥꦸꦠ꧀ꦠꦣꦷꦠꦫꦺꦴ ‘‘ꦌꦡ ꦨꦴꦠꦫꦁ ꦮꦤ꧀ꦢꦡꦴ’’ꦠꦶ ꦮꦤ꧀ꦢꦴꦥꦺꦱꦶ. ꦠꦺ ꦈꦨꦺꦴꦥꦶ ꦠꦸꦛ꧀ꦜꦩꦴꦤꦱꦴ ꦧꦸꦢ꧀ꦣꦥ꧀ꦥꦩꦸꦑꦁ ꦨꦶꦏ꧀ꦑꦸꦱꦔ꧀ꦓꦁ ꦥꦫꦶꦮꦶꦱꦶꦠ꧀ꦮꦴ, ‘‘ꦨꦤ꧀ꦠꦺ, ꦆꦣꦺꦮ ꦤꦶꦧꦢ꧀ꦣꦁ ꦨꦶꦏ꧀ꦑꦁ ꦒꦟ꧀ꦲꦡꦴ’’ꦠꦶ ꦮꦠ꧀ꦮꦴ ‘‘ꦧꦸꦢ꧀ꦣꦴ ꦤꦴꦩ ꦌꦏꦛ꧀ꦜꦴꦤꦺꦪꦺꦮ ꦤꦶꦧꦢ꧀ꦣꦁ ꦨꦶꦏ꧀ꦑꦁ ꦤ ꦒꦟ꧀ꦲꦤ꧀ꦠꦷ’’ꦠꦶ ꦮꦸꦠ꧀ꦠꦺ, ‘‘ꦠꦺꦤ ꦲꦶ, ꦨꦤ꧀ꦠꦺ, ꦪꦺ ꦮꦺꦴ ꦤꦶꦩꦤ꧀ꦠꦺꦠꦸꦁ ꦄꦴꦒꦕ꧀ꦖꦤ꧀ꦠꦶ, ꦠꦺ ꦄꦩ꧀ꦲꦴꦏꦁ ꦱꦤ꧀ꦠꦶꦏꦁ ꦥꦲꦶꦟꦺꦪ꧀ꦪꦴꦡꦴ’’ꦠꦶ ꦄꦴꦲꦁꦱꦸ. ꦱꦠ꧀ꦡꦴ ꦠꦠꦺꦴ ꦥꦛ꧀ꦜꦴꦪ ꦤꦶꦩꦤ꧀ꦠꦺꦠꦸꦁ ꦄꦴꦒꦠꦺ ‘‘ꦒꦤ꧀ꦠ꧀ꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦄꦴꦫꦺꦴꦕꦺꦪ꧀ꦪꦴꦡꦴ’’ꦠꦶ ꦥꦺꦱꦺꦱꦶ. ꦠꦺ ꦒꦤ꧀ꦠ꧀ꦮꦴ ‘‘ꦩꦪꦁ ꦱ꧀ꦮꦴꦠꦤꦴꦪ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦩꦴ’’ꦠꦶ ꦧ꧀ꦫꦴꦲ꧀ꦩꦟꦁ ꦮꦢꦤ꧀ꦠꦶ. ꦧ꧀ꦫꦴꦲ꧀ꦩꦟꦺꦴ ꦥꦸꦤꦢꦶꦮꦱꦺ ꦄꦠ꧀ꦠꦤꦺꦴ ꦒꦺꦲꦠꦺꦴ ꦨꦠ꧀ꦠꦨꦴꦗꦤꦱꦹꦥꦺꦪ꧀ꦪꦨꦴꦗꦤꦴꦤꦶ ꦄꦴꦢꦴꦪ ꦱꦠ꧀ꦡꦸ ꦤꦶꦱꦷꦢꦤꦛ꧀ꦜꦴꦤꦁ ꦒꦕ꧀ꦖꦠꦶ. ꦄꦚ꧀ꦚꦠ꧀ꦫ ꦥꦤ ꦤꦶꦩꦤ꧀ꦠꦤꦺ ꦄꦱꦠꦶ ꦱꦠ꧀ꦡꦴ ꦧ꧀ꦫꦴꦲ꧀ꦩꦟꦱ꧀ꦱꦺꦮ ꦒꦺꦲꦺ ꦨꦠ꧀ꦠꦏꦶꦕ꧀ꦕꦁ ꦏꦫꦺꦴꦠꦶ. ꦠꦺ ꦈꦨꦺꦴꦥꦶ ꦄꦠ꧀ꦠꦤꦺꦴ ꦢꦺꦪ꧀ꦪꦣꦩ꧀ꦩꦁ ꦤꦶꦕ꧀ꦕꦏꦴꦭꦁ ꦠꦡꦴꦒꦠꦱ꧀ꦱ ꦢꦺꦤ꧀ꦠꦴ ꦣꦩ꧀ꦩꦏꦡꦁ ꦱꦸꦟꦤ꧀ꦠꦴ ꦄꦤꦴꦒꦴꦩꦶꦦꦭꦁ ꦥꦴꦥꦸꦟꦶꦁꦱꦸ.

ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ, ‘‘ꦄꦴꦮꦸꦱꦺꦴ, ꦧ꧀ꦫꦴꦲ꧀ꦩꦟꦺꦴ ‘ꦠꦡꦴꦒꦠꦱ꧀ꦱ ꦱꦸꦢ꧀ꦣꦺꦴꦢꦤꦺꦴ ꦥꦶꦠꦴ, ꦩꦲꦴꦩꦴꦪꦴ ꦩꦴꦠꦴ’ꦠꦶ ꦗꦴꦤꦴꦠꦶ, ꦗꦴꦤꦤ꧀ꦠꦺꦴꦮ ꦱꦢ꧀ꦣꦶꦁ ꦧ꧀ꦫꦴꦲ꧀ꦩꦟꦶꦪꦴ ꦠꦡꦴꦒꦠꦁ ‘ꦄꦩ꧀ꦲꦴꦏꦁ ꦥꦸꦠ꧀ꦠꦺꦴ’ꦠꦶ ꦮꦢꦠꦶ, ꦱꦠ꧀ꦡꦴꦥꦶ ꦠꦡꦺꦮ ꦄꦣꦶꦮꦴꦱꦺꦠꦶ. ꦏꦶꦁ ꦤꦸ ꦑꦺꦴ ꦏꦴꦫꦟ’’ꦤ꧀ꦠꦶ? ꦱꦠ꧀ꦡꦴ ꦠꦺꦱꦁ ꦏꦡꦁ ꦱꦸꦠ꧀ꦮꦴ, ‘‘ꦨꦶꦏ꧀ꦑꦮꦺ, ꦈꦨꦺꦴꦥꦶ ꦠꦺ ꦄꦠ꧀ꦠꦤꦺꦴ ꦥꦸꦠ꧀ꦠꦩꦺꦮ ꦥꦸꦠ꧀ꦠꦺꦴꦠꦶ ꦮꦢꦤ꧀ꦠꦷ’’ꦠꦶ ꦮꦠ꧀ꦮꦴ ꦄꦠꦷꦠꦁ ꦄꦴꦲꦫꦶ.

ꦄꦠꦷꦠꦺ, ꦨꦶꦏ꧀ꦑꦮꦺ, ꦄꦪꦁ ꦧ꧀ꦫꦴꦲ꧀ꦩꦟꦺꦴ ꦤꦶꦫꦤ꧀ꦠꦫꦁ ꦥꦚ꧀ꦕ ꦗꦴꦠꦶꦱꦠꦴꦤꦶ ꦩꦪ꧀ꦲꦁ ꦥꦶꦠꦴ ꦄꦲꦺꦴꦱꦶ, ꦥꦚ꧀ꦕ ꦗꦴꦠꦶꦱꦠꦴꦤꦶ ꦕꦹꦭ꦳ꦥꦶꦠꦴ, ꦥꦚ꧀ꦕ ꦗꦴꦠꦶꦱꦠꦴꦤꦶ ꦩꦲꦴꦥꦶꦠꦴ. ꦱꦴꦥꦶ ꦩꦺ ꦧ꧀ꦫꦴꦲ꧀ꦩꦟꦷ ꦤꦶꦫꦤ꧀ꦠꦫꦩꦺꦮ ꦥꦚ꧀ꦕ ꦗꦴꦠꦶꦱꦠꦴꦤꦶ ꦩꦴꦠꦴ ꦄꦲꦺꦴꦱꦶ, ꦥꦚ꧀ꦕ ꦗꦴꦠꦶꦱꦠꦴꦤꦶ ꦕꦹꦭ꦳ꦩꦴꦠꦴ, ꦥꦚ꧀ꦕ ꦗꦴꦠꦶꦱꦠꦴꦤꦶ ꦩꦲꦴꦩꦴꦠꦴ. ꦌꦮꦴꦲꦁ ꦢꦶꦪꦝ꧀ꦞꦗꦴꦠꦶꦱꦲꦱ꧀ꦱꦁ ꦧ꧀ꦫꦴꦲ꧀ꦩꦟꦱ꧀ꦱ ꦲꦠ꧀ꦡꦺ ꦱꦁꦮꦝ꧀ꦞꦺꦴ, ꦢꦶꦪꦝ꧀ꦞꦗꦴꦠꦶꦱꦲꦱ꧀ꦱꦁ ꦧ꧀ꦫꦴꦲ꧀ꦩꦟꦶꦪꦴ ꦲꦠ꧀ꦡꦺꦠꦶ ꦠꦷꦟꦶ ꦗꦴꦠꦶꦱꦲꦱ꧀ꦱꦴꦤꦶ ꦠꦺꦱꦁ ꦥꦸꦠ꧀ꦠꦨꦴꦮꦁ ꦢꦱ꧀ꦱꦺꦠ꧀ꦮꦴ ꦆꦩꦴ ꦒꦴꦡꦴ ꦄꦨꦴꦱꦶ –

‘‘ꦪꦱ꧀ꦩꦶꦁ ꦩꦤꦺꦴ ꦤꦶꦮꦶꦱꦠꦶ, ꦕꦶꦠ꧀ꦠꦚ꧀ꦕꦴꦥꦶ ꦥꦱꦷꦢꦠꦶ;

ꦄꦢꦶꦛ꧀ꦜꦥꦸꦧ꧀ꦧꦏꦺ ꦥꦺꦴꦱꦺ, ꦏꦴꦩꦁ ꦠꦱ꧀ꦩꦶꦩ꧀ꦥꦶ ꦮꦶꦱ꧀ꦱꦱꦺ. (ꦗꦴ. ꧑.꧑.꧖꧘);

‘‘ꦥꦸꦧ꧀ꦧꦺꦮ ꦱꦤ꧀ꦤꦶꦮꦴꦱꦺꦤ, ꦥꦕ꧀ꦕꦸꦥ꧀ꦥꦤ꧀ꦤꦲꦶꦠꦺꦤ ꦮꦴ;

ꦌꦮꦁ ꦠꦁ ꦗꦴꦪꦠꦺ ꦥꦺꦩꦁ, ꦈꦥ꧀ꦥꦭꦁꦮ ꦪꦡꦺꦴꦢꦏꦺ’’ꦠꦶ. (ꦗꦴ. ꧑.꧒.꧑꧗꧔);

ꦱꦠ꧀ꦡꦴ ꦠꦺꦩꦴꦱꦩꦺꦮ ꦠꦁ ꦏꦸꦭꦁ ꦤꦶꦱ꧀ꦱꦴꦪ ꦮꦶꦲꦴꦱꦶ. ꦠꦺ ꦈꦨꦺꦴꦥꦶ ꦄꦫꦲꦠ꧀ꦠꦁ ꦱꦕ꧀ꦖꦶꦏꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦶꦁꦱꦸ. ꦄꦡ ꦤꦺꦱꦁ ꦩꦲꦴꦱꦏ꧀ꦏꦴꦫꦁ ꦏꦠ꧀ꦮꦴ ꦈꦨꦺꦴꦥꦶ ꦌꦏꦏꦹꦛꦴꦒꦴꦫꦩꦺꦮ ꦄꦴꦫꦺꦴꦥꦺꦠ꧀ꦮꦴ ꦤꦷꦲꦫꦶꦁꦱꦸ. ꦱꦠ꧀ꦡꦴꦥꦶ ꦥꦚ꧀ꦕꦱꦠꦨꦶꦏ꧀ꦑꦸꦥꦫꦶꦮꦴꦫꦺꦴ ꦠꦺꦲꦶ ꦱꦢ꧀ꦣꦶꦁꦪꦺꦮ ꦄꦴꦭ꦳ꦴꦲꦤꦁ ꦄꦒꦩꦴꦱꦶ. ‘‘ꦧꦸꦢ꧀ꦣꦴꦤꦁ ꦏꦶꦫ ꦩꦴꦠꦴꦥꦶꦠꦫꦺꦴ’’ꦠꦶ ꦩꦲꦴꦗꦤꦺꦴ ꦤꦶꦏ꧀ꦑꦩꦶ. ꦱꦠ꧀ꦡꦴꦥꦶ ꦄꦴꦭ꦳ꦴꦲꦤꦱꦩꦷꦥꦺ ꦌꦏꦁ ꦱꦴꦭꦁ ꦥꦮꦶꦱꦶꦠ꧀ꦮꦴ ꦄꦛ꧀ꦜꦴꦱꦶ. ꦩꦤꦸꦱ꧀ꦱꦴ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦺ ꦜꦠ꧀ꦮꦴ, ‘‘ꦨꦤ꧀ꦠꦺ, ‘ꦩꦴꦠꦴꦥꦶꦠꦫꦺꦴ ꦮꦺꦴ ꦏꦴꦭꦏꦠꦴ’ꦠꦶ ꦩꦴ ꦕꦶꦤ꧀ꦠꦪꦶꦠ꧀ꦡꦴ’’ꦠꦶ ꦱꦠ꧀ꦡꦴꦫꦴ ꦱꦢ꧀ꦣꦶꦁ ꦥꦛꦶꦱꦤ꧀ꦡꦴꦫꦁ ꦏꦫꦺꦴꦤ꧀ꦠꦶ. ꦱꦠ꧀ꦡꦴ ꦠꦺ ‘‘ꦩꦴ ꦌꦮꦁ ꦄꦮꦕꦸꦠ꧀ꦡꦴ’’ꦠꦶ ꦄꦥ꧀ꦥꦛꦶꦏ꧀ꦑꦶꦥꦶꦠ꧀ꦮꦴ ꦥꦫꦶꦱꦴꦪ ꦄꦴꦱꦪꦁ ꦎꦭꦺꦴꦏꦺꦠ꧀ꦮꦴ ꦠꦔ꧀ꦑꦟꦴꦤꦸꦫꦹꦥꦁ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ –

‘‘ꦄꦥ꧀ꦥꦁ ꦮꦠ ꦗꦷꦮꦶꦠꦁ ꦆꦢꦁ,

ꦎꦫꦁ ꦮꦱ꧀ꦱꦱꦠꦴꦥꦶ ꦩꦶꦪ꧀ꦪꦠꦶ;

ꦪꦺꦴ ꦕꦺꦥꦶ ꦄꦠꦶꦕ꧀ꦕ ꦗꦷꦮꦠꦶ,

ꦄꦡ ꦱꦺꦴ ꦗꦫꦱꦴꦥꦶ ꦩꦶꦪ꧀ꦪꦠꦷ’’ꦠꦶ. (ꦱꦸ. ꦤꦶ. ꧘꧑꧐; ꦩꦲꦴꦤꦶ. ꧓꧙) –

ꦆꦢꦁ ꦗꦫꦴꦱꦸꦠ꧀ꦠꦁ ꦏꦡꦺꦱꦶ. ꦢꦺꦱꦤꦴꦮꦱꦴꦤꦺ ꦕꦠꦸꦫꦴꦱꦷꦠꦶꦪꦴ ꦥꦴꦟꦱꦲꦱ꧀ꦱꦴꦤꦁ ꦣꦩ꧀ꦩꦴꦨꦶꦱꦩꦪꦺꦴ ꦄꦲꦺꦴꦱꦶ. ꦨꦶꦏ꧀ꦑꦹ ꦧ꧀ꦫꦴꦲ꧀ꦩꦟꦱ꧀ꦱ ꦕ ꦧ꧀ꦫꦴꦲ꧀ꦩꦟꦶꦪꦴ ꦕ ꦥꦫꦶꦤꦶꦧ꧀ꦧꦸꦠꦨꦴꦮꦁ ꦄꦗꦴꦤꦤ꧀ꦠꦴ, ‘‘ꦨꦤ꧀ꦠꦺ, ꦠꦺꦱꦁ ꦏꦺꦴ ꦄꦨꦶꦱꦩ꧀ꦥꦫꦴꦪꦺꦴ’’ꦠꦶ ꦥꦸꦕ꧀ꦖꦶꦁꦱꦸ. ꦱꦠ꧀ꦡꦴ, ‘‘ꦨꦶꦏ꧀ꦑꦮꦺ, ꦌꦮꦫꦹꦥꦴꦤꦁ ꦄꦱꦺꦑꦩꦸꦤꦷꦤꦁ ꦄꦨꦶꦱꦩ꧀ꦥꦫꦴꦪꦺꦴ ꦤꦴꦩ ꦤꦠ꧀ꦡꦶ. ꦌꦮꦫꦹꦥꦴ ꦲꦶ ꦄꦕ꧀ꦕꦸꦠꦁ ꦄꦩꦠꦁ ꦩꦲꦴꦤꦶꦧ꧀ꦧꦴꦤꦩꦺꦮ ꦥꦴꦥꦸꦟꦤ꧀ꦠꦷ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧒꧒꧕. ‘‘ꦄꦲꦶꦁꦱꦏꦴ ꦪꦺ ꦩꦸꦤꦪꦺꦴ, ꦤꦶꦕ꧀ꦕꦁ ꦏꦴꦪꦺꦤ ꦱꦁꦮꦸꦠꦴ;

ꦠꦺ ꦪꦤ꧀ꦠꦶ ꦄꦕ꧀ꦕꦸꦠꦁ ꦜꦴꦤꦁ, ꦪꦠ꧀ꦡ ꦒꦤ꧀ꦠ꧀ꦮꦴ ꦤ ꦱꦺꦴꦕꦫꦺ’’ꦠꦶ.

ꦠꦠ꧀ꦡ ꦩꦸꦤꦪꦺꦴꦠꦶ ꦩꦺꦴꦤꦺꦪ꧀ꦪꦥꦛꦶꦥꦢꦴꦪ ꦩꦒ꧀ꦒꦦꦭꦥꦠ꧀ꦠꦴ ꦄꦱꦺꦑꦩꦸꦤꦪꦺꦴ. ꦏꦴꦪꦺꦤꦴꦠꦶ ꦢꦺꦱꦤꦴꦩꦠ꧀ꦠꦩꦺꦮꦺꦠꦁ, ꦠꦷꦲꦶꦥꦶ ꦢ꧀ꦮꦴꦫꦺꦲꦶ ꦱꦸꦱꦁꦮꦸꦠꦴꦠꦶ ꦄꦠ꧀ꦡꦺꦴ. ꦄꦕ꧀ꦕꦸꦠꦤ꧀ꦠꦶ ꦱꦱ꧀ꦱꦠꦁ. ꦜꦴꦤꦤ꧀ꦠꦶ ꦄꦏꦸꦥ꧀ꦥꦛ꧀ꦜꦴꦤꦁ ꦣꦸꦮꦛ꧀ꦜꦴꦤꦁ. ꦪꦠ꧀ꦡꦴꦠꦶ ꦪꦱ꧀ꦩꦶꦁ ꦤꦶꦧ꧀ꦧꦴꦤꦺ ꦒꦤ꧀ꦠ꧀ꦮꦴ ꦤ ꦱꦺꦴꦕꦫꦺ ꦤ ꦱꦺꦴꦕꦤ꧀ꦠꦶ ꦤ ꦮꦶꦲꦚ꧀ꦚꦤ꧀ꦠꦶ, ꦠꦁ ꦜꦴꦤꦁ ꦒꦕ꧀ꦖꦤ꧀ꦠꦷꦠꦶ ꦄꦠ꧀ꦡꦺꦴ.

ꦢꦺꦱꦤꦴꦮꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦴꦥꦸꦟꦶꦁꦱꦹꦠꦶ.

ꦧꦸꦢ꧀ꦣꦥꦶꦠꦸꦧ꧀ꦫꦴꦲ꧀ꦩꦟꦮꦠ꧀ꦡꦸ ꦥꦚ꧀ꦕꦩꦁ.