꧒. ꦄꦚ꧀ꦚꦠꦫꦏꦸꦛꦸꦩ꧀ꦧꦶꦏꦮꦠ꧀ꦡꦸ

ꦥꦶꦪꦠꦺꦴ ꦗꦴꦪꦠꦷꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦄꦚ꧀ꦚꦠꦫꦁ ꦏꦸꦛꦸꦩ꧀ꦧꦶꦏꦁ ꦄꦴꦫꦧ꧀ꦨ ꦏꦡꦺꦱꦶ.

ꦱꦺꦴ ꦲꦶ ꦄꦠ꧀ꦠꦤꦺꦴ ꦥꦸꦠ꧀ꦠꦺ ꦏꦴꦭꦏꦠꦺ ꦥꦸꦠ꧀ꦠꦱꦺꦴꦏꦴꦨꦶꦨꦹꦠꦺꦴ ꦄꦴꦭ꦳ꦴꦲꦤꦁ ꦒꦤ꧀ꦠ꧀ꦮꦴ ꦫꦺꦴꦢꦠꦶ, ꦥꦸꦠ꧀ꦠꦱꦺꦴꦏꦁ ꦱꦤ꧀ꦣꦴꦫꦺꦠꦸꦁ ꦤ ꦱꦏ꧀ꦏꦺꦴꦠꦶ. ꦱꦠ꧀ꦡꦴ ꦥꦕ꧀ꦕꦹꦱꦏꦴꦭꦺ ꦭꦺꦴꦏꦁ ꦮꦺꦴꦭꦺꦴꦏꦺꦤ꧀ꦠꦺꦴ ꦠꦱ꧀ꦱ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦱ꧀ꦱꦹꦥꦤꦶꦱ꧀ꦱꦪꦁ ꦢꦶꦱ꧀ꦮꦴ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦌꦏꦁ ꦥꦕ꧀ꦖꦴꦱꦩꦟꦁ ꦒꦲꦺꦠ꧀ꦮꦴ ꦠꦱ꧀ꦱ ꦒꦺꦲꦢ꧀ꦮꦴꦫꦁ ꦄꦒꦩꦴꦱꦶ. ꦱꦺꦴ ꦱꦠ꧀ꦡꦸ ꦄꦴꦒꦠꦨꦴꦮꦁ ꦱꦸꦠ꧀ꦮꦴ ‘‘ꦩꦪꦴ ꦱꦢ꧀ꦣꦶꦁ ꦥꦛꦶꦱꦤ꧀ꦡꦴꦫꦁ ꦏꦴꦠꦸꦏꦴꦩꦺꦴ ꦨꦮꦶꦱ꧀ꦱꦠꦷ’’ꦠꦶ ꦱꦠ꧀ꦡꦴꦫꦁ ꦥꦮꦺꦱꦺꦠ꧀ꦮꦴ ꦒꦺꦲꦩꦗ꧀ꦙꦺ ꦄꦴꦱꦤꦁ ꦥꦚ꧀ꦚꦴꦥꦺꦠ꧀ꦮꦴ ꦱꦠ꧀ꦡꦫꦶ ꦤꦶꦱꦶꦤ꧀ꦤꦺ ꦄꦴꦒꦤ꧀ꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦄꦡ ꦤꦁ ꦱꦠ꧀ꦡꦴ ‘‘ꦏꦶꦁ ꦤꦸ ꦑꦺꦴ, ꦈꦥꦴꦱꦏ, ꦢꦸꦏ꧀ꦑꦶꦠꦺꦴꦱꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ꦠꦺꦤ ꦥꦸꦠ꧀ꦠꦮꦶꦪꦺꦴꦒꦢꦸꦏ꧀ꦑꦺ ꦄꦴꦫꦺꦴꦕꦶꦠꦺ, ‘‘ꦈꦥꦴꦱꦏ, ꦩꦴ ꦕꦶꦤ꧀ꦠꦪꦶ, ꦆꦢꦁ ꦩꦫꦟꦁ ꦤꦴꦩ ꦤ ꦌꦏꦱ꧀ꦩꦶꦁꦪꦺꦮ ꦜꦴꦤꦺ, ꦤ ꦕ ꦌꦏꦱ꧀ꦱꦺꦮ ꦲꦺꦴꦠꦶ, ꦪꦴꦮꦠꦴ ꦥꦤ ꦨꦮꦸꦥ꧀ꦥꦠ꧀ꦠꦶ ꦤꦴꦩ ꦄꦠ꧀ꦡꦶ, ꦱꦧ꧀ꦧꦱꦠ꧀ꦠꦴꦤꦁ ꦲꦺꦴꦠꦶꦪꦺꦮ. ꦌꦏꦱꦔ꧀ꦑꦴꦫꦺꦴꦥꦶ ꦤꦶꦕ꧀ꦕꦺꦴ ꦤꦴꦩ ꦤꦠ꧀ꦡꦶ. ꦠꦱ꧀ꦩꦴ ‘ꦩꦫꦟꦣꦩ꧀ꦩꦁ ꦩꦠꦁ, ꦨꦶꦗ꧀ꦗꦤꦣꦩ꧀ꦩꦁ ꦨꦶꦤ꧀ꦤ’ꦤ꧀ꦠꦶ ꦪꦺꦴꦤꦶꦱꦺꦴ ꦥꦕ꧀ꦕꦮꦺꦏ꧀ꦑꦶꦠꦧ꧀ꦧꦁ, ꦤ ꦱꦺꦴꦕꦶꦠꦧ꧀ꦧꦁ. ꦥꦺꦴꦫꦴꦟꦥꦟ꧀ꦝꦶꦠꦴꦥꦶ ꦲꦶ ꦥꦸꦠ꧀ꦠꦱ꧀ꦱ ꦩꦠꦏꦴꦭꦺ ‘ꦩꦫꦟꦣꦩ꧀ꦩꦁ ꦩꦠꦁ, ꦨꦶꦗ꧀ꦗꦤꦣꦩ꧀ꦩꦁ ꦨꦶꦤ꧀ꦤ’ꦤ꧀ꦠꦶ ꦱꦺꦴꦏꦁ ꦄꦏꦠ꧀ꦮꦴ ꦩꦫꦟꦱ꧀ꦱꦠꦶꦩꦺꦮ ꦨꦴꦮꦪꦶꦁꦱꦹ’’ꦠꦶ ꦮꦠ꧀ꦮꦴ, ‘‘ꦨꦤ꧀ꦠꦺ, ꦏꦺ ꦌꦮꦩꦏꦁꦱꦸ, ꦏꦢꦴ ꦕ ꦄꦏꦁꦱꦸ, ꦄꦴꦕꦶꦏ꧀ꦑꦡ ꦩꦺ’’ꦠꦶ ꦪꦴꦕꦶꦠꦺꦴ ꦠꦱ꧀ꦱꦠ꧀ꦡꦱ꧀ꦱ ꦥꦏꦴꦱꦤꦠ꧀ꦡꦁ ꦄꦠꦷꦠꦁ ꦄꦴꦲꦫꦶꦠ꧀ꦮꦴ –

‘‘ꦈꦫꦒꦺꦴꦮ ꦠꦕꦁ ꦗꦶꦟ꧀ꦟꦁ, ꦲꦶꦠ꧀ꦮꦴ ꦒꦕ꧀ꦖꦠꦶ ꦱꦁ ꦠꦤꦸꦁ;

ꦌꦮꦁ ꦱꦫꦷꦫꦺ ꦤꦶꦧ꧀ꦨꦺꦴꦒꦺ, ꦥꦺꦠꦺ ꦏꦴꦭꦏꦠꦺ ꦱꦠꦶ.

‘‘ꦝꦪ꧀ꦲꦩꦴꦤꦺꦴ ꦤ ꦗꦴꦤꦴꦠꦶ, ꦚꦴꦠꦷꦤꦁ ꦥꦫꦶꦢꦺꦮꦶꦠꦁ;

ꦠꦱ꧀ꦩꦴ ꦌꦠꦁ ꦤ ꦱꦺꦴꦕꦴꦩꦶ, ꦒꦠꦺꦴ ꦱꦺꦴ ꦠꦱ꧀ꦱ ꦪꦴ ꦒꦠꦷ’’ꦠꦶ. (ꦗꦴ. ꧑.꧕.꧑꧙-꧒꧐) –

ꦆꦩꦁ ꦥꦚ꧀ꦕꦏꦤꦶꦥꦴꦠꦺ ꦈꦫꦒꦗꦴꦠꦏꦁ ꦮꦶꦠ꧀ꦡꦴꦫꦺꦠ꧀ꦮꦴ ‘‘ꦌꦮꦁ ꦥꦸꦧ꧀ꦧꦺ ꦥꦟ꧀ꦝꦶꦠꦴ ꦥꦶꦪꦥꦸꦠ꧀ꦠꦺ ꦏꦴꦭꦏꦠꦺ ꦪꦡꦴ ꦌꦠꦫꦲꦶ ꦠ꧀ꦮꦁ ꦏꦩ꧀ꦩꦤ꧀ꦠꦺ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦤꦶꦫꦴꦲꦴꦫꦺꦴ ꦫꦺꦴꦢꦤ꧀ꦠꦺꦴ ꦮꦶꦕꦫꦱꦶ, ꦠꦡꦴ ꦄꦮꦶꦕꦫꦶꦠ꧀ꦮꦴ ꦩꦫꦟꦱ꧀ꦱꦠꦶꦨꦴꦮꦤꦴꦧꦭꦺꦤ ꦱꦺꦴꦏꦁ ꦄꦏꦠ꧀ꦮꦴ ꦄꦴꦲꦴꦫꦁ ꦥꦫꦶꦨꦸꦚ꧀ꦗꦶꦁꦱꦸ, ꦏꦩ꧀ꦩꦤ꧀ꦠꦚ꧀ꦕ ꦄꦣꦶꦛ꧀ꦜꦲꦶꦁꦱꦸ. ꦠꦱ꧀ꦩꦴ ‘ꦥꦶꦪꦥꦸꦠ꧀ꦠꦺꦴ ꦩꦺ ꦏꦴꦭꦏꦠꦺꦴ’ꦠꦶ ꦩꦴ ꦕꦶꦤ꧀ꦠꦪꦶ. ꦈꦥ꧀ꦥꦗ꧀ꦗꦩꦴꦤꦺꦴ ꦲꦶ ꦱꦺꦴꦏꦺꦴ ꦮꦴ ꦨꦪꦁ ꦮꦴ ꦥꦶꦪꦩꦺꦮ ꦤꦶꦱ꧀ꦱꦴꦪ ꦈꦥ꧀ꦥꦗ꧀ꦗꦠꦷ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧒꧑꧒. ‘‘ꦥꦶꦪꦠꦺꦴ ꦗꦴꦪꦠꦷ ꦱꦺꦴꦏꦺꦴ, ꦥꦶꦪꦠꦺꦴ ꦗꦴꦪꦠꦷ ꦨꦪꦁ;

ꦥꦶꦪꦠꦺꦴ ꦮꦶꦥ꧀ꦥꦩꦸꦠ꧀ꦠꦱ꧀ꦱ, ꦤꦠ꧀ꦡꦶ ꦱꦺꦴꦏꦺꦴ ꦏꦸꦠꦺꦴ ꦨꦪ’’ꦤ꧀ꦠꦶ.

ꦠꦠ꧀ꦡ ꦥꦶꦪꦠꦺꦴꦠꦶ ꦮꦛ꧀ꦛꦩꦹꦭꦏꦺꦴ ꦲꦶ ꦱꦺꦴꦏꦺꦴ ꦮꦴ ꦨꦪꦁ ꦮꦴ ꦈꦥ꧀ꦥꦗ꧀ꦗꦩꦴꦤꦁ ꦥꦶꦪꦩꦺꦮ ꦱꦠ꧀ꦠꦁ ꦮꦴ ꦱꦔ꧀ꦑꦴꦫꦁ ꦮꦴ ꦤꦶꦱ꧀ꦱꦴꦪ ꦈꦥ꧀ꦥꦗ꧀ꦗꦠꦶ, ꦠꦠꦺꦴ ꦥꦤ ꦮꦶꦥ꧀ꦥꦩꦸꦠ꧀ꦠꦱ꧀ꦱ ꦈꦨꦪꦩ꧀ꦥꦺꦠꦁ ꦤꦠ꧀ꦡꦷꦠꦶ ꦄꦠ꧀ꦡꦺꦴ.

ꦢꦺꦱꦤꦴꦮꦱꦴꦤꦺ ꦏꦸꦛꦸꦩ꧀ꦧꦶꦏꦺꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶ, ꦱꦩ꧀ꦥꦠ꧀ꦠꦴꦤꦩ꧀ꦥꦶ ꦱꦴꦠ꧀ꦡꦶꦏꦴ ꦣꦩ꧀ꦩꦢꦺꦱꦤꦴ ꦄꦲꦺꦴꦱꦷꦠꦶ.

ꦄꦚ꧀ꦚꦠꦫꦏꦸꦛꦸꦩ꧀ꦧꦶꦏꦮꦠ꧀ꦡꦸ ꦢꦸꦠꦶꦪꦁ.