꧒. ꦩꦴꦫꦮꦠ꧀ꦡꦸ

ꦱꦸꦱꦸꦑꦁ ꦮꦠ ꦗꦷꦮꦴꦩꦴꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦥꦚ꧀ꦕꦱꦴꦭꦴꦪ ꦧ꧀ꦫꦴꦲ꧀ꦩꦟꦒꦴꦩꦺ ꦮꦶꦲꦫꦤ꧀ꦠꦺꦴ ꦩꦴꦫꦁ ꦄꦴꦫꦧ꧀ꦨ ꦏꦡꦺꦱꦶ.

ꦌꦏꦢꦶꦮꦱꦚ꧀ꦲꦶ ꦱꦠ꧀ꦡꦴ ꦥꦚ꧀ꦕꦱꦠꦴꦤꦁ ꦏꦸꦩꦴꦫꦶꦏꦴꦤꦁ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦱ꧀ꦱꦹꦥꦤꦶꦱ꧀ꦱꦪꦁ ꦢꦶꦱ꧀ꦮꦴ ꦠꦁ ꦒꦴꦩꦁ ꦈꦥꦤꦶꦱ꧀ꦱꦴꦪ ꦮꦶꦲꦴꦱꦶ. ꦠꦴꦥꦶ ꦏꦸꦩꦴꦫꦶꦏꦴꦪꦺꦴ ꦌꦏꦱ꧀ꦩꦶꦁ ꦤꦏ꧀ꦑꦠ꧀ꦠꦢꦶꦮꦱꦺ ꦤꦢꦶꦁ ꦒꦤ꧀ꦠ꧀ꦮꦴ ꦤ꧀ꦲꦠ꧀ꦮꦴ ꦄꦭꦔ꧀ꦏꦠꦥꦛꦶꦪꦠ꧀ꦠꦴ ꦒꦴꦩꦴꦨꦶꦩꦸꦑꦶꦪꦺꦴ ꦥꦴꦪꦶꦁꦱꦸ. ꦱꦠ꧀ꦡꦴꦥꦶ ꦠꦁ ꦒꦴꦩꦁ ꦥꦮꦶꦱꦶꦠ꧀ꦮꦴ ꦥꦶꦟ꧀ꦝꦴꦪ ꦕꦫꦠꦶ. ꦄꦡ ꦩꦴꦫꦺꦴ ꦱꦏꦭꦒꦴꦩꦮꦴꦱꦷꦤꦁ ꦱꦫꦷꦫꦺ ꦄꦣꦶꦩꦸꦕ꧀ꦕꦶꦠ꧀ꦮꦴ ꦪꦡꦴ ꦱꦠ꧀ꦡꦴ ꦏꦛꦕ꧀ꦖꦸꦨꦠ꧀ꦠꦩꦠ꧀ꦠꦩ꧀ꦥꦶ ꦤ ꦭꦨꦠꦶ, ꦌꦮꦁ ꦏꦠ꧀ꦮꦴ ꦪꦡꦴꦣꦺꦴꦠꦺꦤ ꦥꦠ꧀ꦠꦺꦤ ꦤꦶꦏ꧀ꦑꦩꦤ꧀ꦠꦁ ꦱꦠ꧀ꦡꦴꦫꦁ ꦒꦴꦩꦢ꧀ꦮꦴꦫꦺ ꦜꦠ꧀ꦮꦴ ꦄꦴꦲ – ‘‘ꦄꦥꦶ, ꦱꦩꦟ, ꦥꦶꦟ꧀ꦝꦥꦴꦠꦁ ꦭꦨꦶꦠ꧀ꦡꦴ’’ꦠꦶ. ‘‘ꦏꦶꦁ ꦥꦤ ꦠ꧀ꦮꦁ, ꦥꦴꦥꦶꦩ, ꦠꦡꦴ ꦄꦏꦴꦱꦶ, ꦪꦡꦴꦲꦁ ꦥꦶꦟ꧀ꦝꦁ ꦤ ꦭꦨꦺꦪ꧀ꦪ’’ꦤ꧀ꦠꦶ? ‘‘ꦠꦺꦤ ꦲꦶ, ꦨꦤ꧀ꦠꦺ, ꦥꦸꦤ ꦥꦮꦶꦱꦡꦴ’’ꦠꦶ. ꦌꦮꦁ ꦏꦶꦫꦱ꧀ꦱ ꦄꦲꦺꦴꦱꦶ – ‘‘ꦱꦕꦺ ꦥꦸꦤ ꦥꦮꦶꦱꦠꦶ, ꦱꦧ꧀ꦧꦺꦱꦁ ꦱꦫꦷꦫꦺ ꦄꦣꦶꦩꦸꦕ꧀ꦕꦶꦠ꧀ꦮꦴ ꦆꦩꦱ꧀ꦱ ꦥꦸꦫꦠꦺꦴ ꦥꦴꦟꦶꦁ ꦥꦲꦫꦶꦠ꧀ꦮꦴ ꦲꦱ꧀ꦱꦏꦺꦭ꦳ꦶꦁ ꦏꦫꦶꦱ꧀ꦱꦴꦩꦷ’’ꦠꦶ. ꦠꦱ꧀ꦩꦶꦁ ꦑꦟꦺ ꦠꦴ ꦏꦸꦩꦴꦫꦶꦏꦴꦪꦺꦴ ꦒꦴꦩꦢ꧀ꦮꦴꦫꦁ ꦥꦠ꧀ꦮꦴ ꦱꦠ꧀ꦡꦴꦫꦁ ꦢꦶꦱ꧀ꦮꦴ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦁꦱꦸ. ꦩꦴꦫꦺꦴꦥꦶ ꦱꦠ꧀ꦡꦴꦫꦁ ꦄꦴꦲ – ‘‘ꦄꦥꦶ, ꦨꦤ꧀ꦠꦺ, ꦥꦶꦟ꧀ꦝꦁ ꦄꦭꦨꦩꦴꦤꦴ ꦗꦶꦓꦕ꧀ꦖꦴꦢꦸꦏ꧀ꦑꦺꦤ ꦥꦷꦭ꦳ꦶꦠꦠ꧀ꦡꦴ’’ꦠꦶ. ꦱꦠ꧀ꦡꦴ ‘‘ꦄꦗ꧀ꦗ ꦩꦪꦁ, ꦥꦴꦥꦶꦩ, ꦏꦶꦚ꧀ꦕꦶ ꦄꦭꦨꦶꦠ꧀ꦮꦴꦥꦶ ꦄꦴꦨꦱ꧀ꦱꦫꦭꦺꦴꦏꦺ ꦩꦲꦴꦧ꧀ꦫꦲ꧀ꦩꦴꦤꦺꦴ ꦮꦶꦪ ꦥꦷꦠꦶꦱꦸꦑꦺꦤꦺꦮ ꦮꦷꦠꦶꦤꦴꦩꦺꦱ꧀ꦱꦴꦩꦴ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧒꧐꧐. ‘‘ꦱꦸꦱꦸꦑꦁ ꦮꦠ ꦗꦷꦮꦴꦩ, ꦪꦺꦱꦁ ꦤꦺꦴ ꦤꦠ꧀ꦡꦶ ꦏꦶꦚ꧀ꦕꦤꦁ;

ꦥꦷꦠꦶꦨꦏ꧀ꦑꦴ ꦨꦮꦶꦱ꧀ꦱꦴꦩ, ꦢꦺꦮꦴ ꦄꦴꦨꦱ꧀ꦱꦫꦴ ꦪꦡꦴ’’ꦠꦶ.

ꦠꦠ꧀ꦡ ꦪꦺꦱꦁ ꦤꦺꦴꦠꦶ ꦪꦺꦱꦁ ꦄꦩ꧀ꦲꦴꦏꦁ ꦥꦭꦶꦧꦸꦗ꧀ꦙꦤꦠ꧀ꦡꦺꦤ ꦫꦴꦒꦴꦢꦷꦱꦸ ꦏꦶꦚ꧀ꦕꦤꦺꦱꦸ ꦌꦏꦩ꧀ꦥꦶ ꦏꦶꦚ꧀ꦕꦤꦁ ꦤꦠ꧀ꦡꦶ. ꦥꦷꦠꦶꦨꦏ꧀ꦑꦴꦠꦶ ꦪꦡꦴ ꦄꦴꦨꦱ꧀ꦱꦫꦴ ꦢꦺꦮꦴ ꦥꦷꦠꦶꦨꦏ꧀ꦑꦴ ꦲꦸꦠ꧀ꦮꦴ ꦥꦷꦠꦶꦱꦸꦑꦺꦤꦺꦮ ꦮꦷꦠꦶꦤꦴꦩꦺꦤ꧀ꦠꦶ, ꦌꦮꦁ ꦩꦪꦩ꧀ꦥꦶ, ꦥꦴꦥꦶꦩ, ꦏꦶꦚ꧀ꦕꦶ ꦄꦭꦨꦶꦠ꧀ꦮꦴ ꦥꦷꦠꦶꦨꦏ꧀ꦑꦴ ꦨꦮꦶꦱ꧀ꦱꦴꦩꦴꦠꦶ ꦄꦠ꧀ꦡꦺꦴ.

ꦢꦺꦱꦤꦴꦮꦱꦴꦤꦺ ꦥꦚ꧀ꦕꦱꦠꦴꦥꦶ ꦏꦸꦩꦴꦫꦶꦏꦴꦪꦺꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶꦁꦱꦹꦠꦶ.

ꦩꦴꦫꦮꦠ꧀ꦡꦸ ꦢꦸꦠꦶꦪꦁ.