꧘. ꦱꦩ꧀ꦧꦲꦸꦭꦨꦶꦏ꧀ꦑꦸꦮꦠ꧀ꦡꦸ

ꦱꦸꦑꦺꦴ ꦧꦸꦢ꧀ꦣꦴꦤꦤ꧀ꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦱꦩ꧀ꦧꦲꦸꦭꦴꦤꦁ ꦨꦶꦏ꧀ꦑꦹꦤꦁ ꦏꦡꦁ ꦄꦴꦫꦧ꧀ꦨ ꦏꦡꦺꦱꦶ.

ꦌꦏꦢꦶꦮꦱꦚ꧀ꦲꦶ ꦥꦚ꧀ꦕꦱꦠꦨꦶꦏ꧀ꦑꦹ ꦈꦥꦛ꧀ꦜꦴꦤꦱꦴꦭꦴꦪꦁ ꦤꦶꦱꦶꦤ꧀ꦤꦴ, ‘‘ꦄꦴꦮꦸꦱꦺꦴ, ꦏꦶꦁ ꦤꦸ ꦑꦺꦴ ꦆꦩꦱ꧀ꦩꦶꦁ ꦭꦺꦴꦏꦺ ꦱꦸꦑ’’ꦤ꧀ꦠꦶ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ? ꦠꦠ꧀ꦡ ꦏꦺꦕꦶ ‘‘ꦫꦗ꧀ꦗꦱꦸꦑꦱꦢꦶꦱꦁ ꦱꦸꦑꦁ ꦤꦴꦩ ꦤꦠ꧀ꦡꦷ’’ꦠꦶ ꦄꦴꦲꦁꦱꦸ. ꦏꦺꦕꦶ ꦏꦴꦩꦱꦸꦑꦱꦢꦶꦱꦁ, ꦏꦺꦕꦶ ‘‘ꦱꦴꦭꦶꦩꦁꦱꦨꦺꦴꦗꦤꦴꦢꦶꦱꦢꦶꦱꦁ ꦱꦸꦑꦁ ꦤꦴꦩ ꦤꦠ꧀ꦡꦷ’’ꦠꦶ ꦄꦴꦲꦁꦱꦸ. ꦱꦠ꧀ꦡꦴ ꦠꦺꦱꦁ ꦤꦶꦱꦶꦤ꧀ꦤꦛ꧀ꦜꦴꦤꦁ ꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ, ‘‘ꦨꦶꦏ꧀ꦑꦮꦺ, ꦏꦶꦁ ꦏꦡꦺꦡ? ꦆꦢꦚ꧀ꦲꦶ ꦱꦧ꧀ꦧꦩ꧀ꦥꦶ ꦱꦸꦑꦁ ꦮꦛ꧀ꦛꦢꦸꦏ꧀ꦑꦥꦫꦶꦪꦴꦥꦤ꧀ꦤꦩꦺꦮ, ꦆꦩꦱ꧀ꦩꦶꦁ ꦭꦺꦴꦏꦺ ꦧꦸꦢ꧀ꦣꦸꦥ꧀ꦥꦴꦢꦺꦴ ꦣꦩ꧀ꦩꦱ꧀ꦱꦮꦤꦁ, ꦱꦔ꧀ꦓꦱꦴꦩꦒ꧀ꦒꦷ, ꦱꦩ꧀ꦩꦺꦴꦢꦩꦴꦤꦨꦴꦮꦺꦴꦠꦶ ꦆꦢꦩꦺꦮ ꦱꦸꦑ’’ꦤ꧀ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧑꧙꧔. ‘‘ꦱꦸꦑꦺꦴ ꦧꦸꦢ꧀ꦣꦴꦤꦩꦸꦥ꧀ꦥꦴꦢꦺꦴ, ꦱꦸꦑꦴ ꦱꦢ꧀ꦣꦩ꧀ꦩꦢꦺꦱꦤꦴ;

ꦱꦸꦑꦴ ꦱꦔ꧀ꦓꦱ꧀ꦱ ꦱꦴꦩꦒ꧀ꦒꦷ, ꦱꦩꦒ꧀ꦒꦴꦤꦁ ꦠꦥꦺꦴ ꦱꦸꦑꦺꦴ’’ꦠꦶ.

ꦠꦠ꧀ꦡ ꦧꦸꦢ꧀ꦣꦴꦤꦩꦸꦥ꧀ꦥꦴꦢꦺꦴꦠꦶ ꦪꦱ꧀ꦩꦴ ꦧꦸꦢ꧀ꦣꦴ ꦈꦥ꧀ꦥꦗ꧀ꦗꦩꦴꦤꦴ ꦩꦲꦴꦗꦤꦁ ꦫꦴꦒꦏꦤ꧀ꦠꦴꦫꦴꦢꦷꦲꦶ ꦠꦴꦫꦺꦤ꧀ꦠꦶ, ꦠꦱ꧀ꦩꦴ ꦧꦸꦢ꧀ꦣꦴꦤꦁ ꦈꦥ꧀ꦥꦴꦢꦺꦴ ꦱꦸꦑꦺꦴ ꦈꦠ꧀ꦠꦩꦺꦴ. ꦪꦱ꧀ꦩꦴ ꦱꦢ꧀ꦣꦩ꧀ꦩꦢꦺꦱꦤꦁ ꦄꦴꦒꦩ꧀ꦩ ꦗꦴꦠꦶꦄꦴꦢꦶꦣꦩ꧀ꦩꦴ ꦱꦠ꧀ꦠꦴ ꦗꦴꦠꦶꦄꦴꦢꦷꦲꦶ ꦩꦸꦕ꧀ꦕꦤ꧀ꦠꦶ, ꦠꦱ꧀ꦩꦴ ꦱꦢ꧀ꦣꦩ꧀ꦩꦢꦺꦱꦤꦴ ꦱꦸꦑꦴ. ꦱꦴꦩꦒ꧀ꦒꦷꦠꦶ ꦱꦩꦕꦶꦠ꧀ꦠꦠꦴ, ꦱꦴꦥꦶ ꦱꦸꦑꦴ ꦌꦮ. ꦱꦩꦒ꧀ꦒꦴꦤꦁ ꦥꦤ ꦌꦏꦕꦶꦠ꧀ꦠꦴꦤꦁ ꦪꦱ꧀ꦩꦴ ꦧꦸꦢ꧀ꦣꦮꦕꦤꦁ ꦮꦴ ꦈꦒ꧀ꦒꦟ꧀ꦲꦶꦠꦸꦁ ꦣꦸꦠꦔ꧀ꦒꦴꦤꦶ ꦮꦴ ꦥꦫꦶꦲꦫꦶꦠꦸꦁ ꦱꦩꦟꦣꦩ꧀ꦩꦁ ꦮꦴ ꦏꦴꦠꦸꦁ ꦱꦏ꧀ꦏꦴ, ꦠꦱ꧀ꦩꦴ ꦱꦩꦒ꧀ꦒꦴꦤꦁ ꦠꦥꦺꦴ ꦱꦸꦑꦺꦴꦠꦶ ꦮꦸꦠ꧀ꦠꦁ. ꦠꦺꦤꦺꦮꦴꦲ – ‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦱꦩꦒ꧀ꦒꦴ ꦱꦤ꧀ꦤꦶꦥꦠꦶꦱ꧀ꦱꦤ꧀ꦠꦶ, ꦱꦩ꧀ꦩꦒ꧀ꦒꦴ ꦮꦸꦛ꧀ꦜꦲꦶꦱ꧀ꦱꦤ꧀ꦠꦶ, ꦱꦩꦒ꧀ꦒꦴ ꦱꦔ꧀ꦓꦏꦫꦟꦷꦪꦴꦤꦶ ꦏꦫꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦷ’’ꦠꦶ (ꦢꦷ. ꦤꦶ. ꧒.꧑꧓꧖).

ꦢꦺꦱꦤꦴꦮꦱꦴꦤꦺ ꦠꦺ ꦨꦶꦏ꧀ꦑꦹ ꦄꦫꦲꦠ꧀ꦠꦺ ꦥꦠꦶꦛ꧀ꦜꦲꦶꦁꦱꦸ, ꦩꦲꦴꦗꦤꦱ꧀ꦱꦴꦥꦶ ꦱꦴꦠ꧀ꦡꦶꦏꦴ ꦣꦩ꧀ꦩꦢꦺꦱꦤꦴ ꦄꦲꦺꦴꦱꦷꦠꦶ.

ꦱꦩ꧀ꦧꦲꦸꦭꦨꦶꦏ꧀ꦑꦸꦮꦠ꧀ꦡꦸ ꦄꦛ꧀ꦜꦩꦁ.