꧖. ꦢꦺꦮꦢꦠ꧀ꦠꦮꦠ꧀ꦡꦸ

ꦪꦱ꧀ꦱ ꦄꦕ꧀ꦕꦤ꧀ꦠꦢꦸꦱ꧀ꦱꦷꦭ꧀ꦪꦤ꧀ꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦮꦺꦭ꦳ꦸꦮꦤꦺ ꦮꦶꦲꦫꦤ꧀ꦠꦺꦴ ꦢꦺꦮꦢꦠ꧀ꦠꦁ ꦄꦴꦫꦧ꧀ꦨ ꦏꦡꦺꦱꦶ.

ꦌꦏꦱ꧀ꦩꦶꦚ꧀ꦲꦶ ꦢꦶꦮꦱꦺ ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ – ‘‘ꦄꦴꦮꦸꦱꦺꦴ, ꦢꦺꦮꦢꦠ꧀ꦠꦺꦴ ꦢꦸꦱ꧀ꦱꦷꦭꦺꦴ ꦥꦴꦥꦣꦩ꧀ꦩꦺꦴ ꦢꦸꦱ꧀ꦱꦷꦭ꧀ꦪꦏꦴꦫꦟꦺꦤ ꦮꦝ꧀ꦞꦶꦠꦴꦪ ꦠꦟ꧀ꦲꦴꦪ ꦄꦗꦴꦠꦱꦠ꧀ꦠꦸꦁ ꦱꦔ꧀ꦒꦟ꧀ꦲꦶꦠ꧀ꦮꦴ ꦩꦲꦤ꧀ꦠꦁ ꦭꦴꦨꦱꦏ꧀ꦏꦴꦫꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦄꦗꦴꦠꦱꦠ꧀ꦠꦸꦁ ꦥꦶꦠꦸꦮꦣꦺ ꦱꦩꦴꦢꦥꦺꦠ꧀ꦮꦴ ꦠꦺꦤ ꦱꦢ꧀ꦣꦶꦁ ꦌꦏꦠꦺꦴ ꦲꦸꦠ꧀ꦮꦴ ꦤꦴꦤꦥ꧀ꦥꦏꦴꦫꦺꦤ ꦠꦡꦴꦒꦠꦱ꧀ꦱ ꦮꦣꦴꦪ ꦥꦫꦶꦱꦏ꧀ꦏꦠꦷ’’ꦠꦶ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ ‘‘ꦤ, ꦨꦶꦏ꧀ꦑꦮꦺ, ꦆꦢꦴꦤꦺꦮ, ꦥꦸꦧ꧀ꦧꦺꦥꦶ ꦢꦺꦮꦢꦠ꧀ꦠꦺꦴ ꦤꦴꦤꦥ꧀ꦥꦏꦴꦫꦺꦤ ꦩꦪ꧀ꦲꦁ ꦮꦣꦴꦪ ꦥꦫꦶꦱꦏ꧀ꦏꦠꦷ’’ꦠꦶ ꦮꦠ꧀ꦮꦴ ꦏꦸꦫꦸꦔ꧀ꦒꦩꦶꦒꦗꦴꦠꦏꦴꦢꦷꦤꦶ (ꦗꦴ. ꧑.꧒.꧑꧑꧑-꧒) ꦏꦡꦺꦠ꧀ꦮꦴ, ‘‘ꦨꦶꦏ꧀ꦑꦮꦺ, ꦄꦕ꧀ꦕꦤ꧀ꦠꦢꦸꦱ꧀ꦱꦷꦭꦥꦸꦒ꧀ꦒꦭꦁ ꦤꦴꦩ ꦢꦸꦱ꧀ꦱꦷꦭ꧀ꦪꦏꦴꦫꦟꦴ ꦈꦥ꧀ꦥꦤ꧀ꦤꦴ ꦠꦟ꧀ꦲꦴ ꦩꦴꦭꦸꦮꦴ ꦮꦶꦪ ꦱꦴꦭꦁ ꦥꦫꦶꦪꦺꦴꦤꦤ꧀ꦣꦶꦠ꧀ꦮꦴ ꦱꦩ꧀ꦨꦚ꧀ꦗꦩꦴꦤꦴ ꦤꦶꦫꦪꦴꦢꦷꦱꦸ ꦥꦏ꧀ꦑꦶꦥꦠꦷ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦴꦩꦴꦲ –

꧑꧖꧒. ‘‘ꦪꦱ꧀ꦱ ꦄꦕ꧀ꦕꦤ꧀ꦠꦢꦸꦱ꧀ꦱꦷꦭ꧀ꦪꦁ, ꦩꦴꦭꦸꦮꦴ ꦱꦴꦭꦩꦶꦮꦺꦴꦠ꧀ꦡꦠꦁ;

ꦏꦫꦺꦴꦠꦶ ꦱꦺꦴ ꦠꦡꦠ꧀ꦠꦴꦤꦁ, ꦪꦡꦴ ꦤꦁ ꦆꦕ꧀ꦖꦠꦷ ꦢꦶꦱꦺꦴ’’ꦠꦶ.

ꦠꦠ꧀ꦡ ꦄꦕ꧀ꦕꦤ꧀ꦠꦢꦸꦱ꧀ꦱꦷꦭ꧀ꦪꦤ꧀ꦠꦶ ꦌꦏꦤ꧀ꦠꦢꦸꦱ꧀ꦱꦷꦭꦨꦴꦮꦺꦴ. ꦒꦶꦲꦷ ꦮꦴ ꦗꦴꦠꦶꦠꦺꦴ ꦥꦛ꧀ꦜꦴꦪ ꦢꦱ ꦄꦏꦸꦱꦭꦏꦩ꧀ꦩꦥꦡꦺ ꦏꦫꦺꦴꦤ꧀ꦠꦺꦴ, ꦥꦧ꧀ꦧꦗꦶꦠꦺꦴ ꦮꦴ ꦈꦥꦱꦩ꧀ꦥꦤ꧀ꦤꦢꦶꦮꦱꦠꦺꦴ ꦥꦛ꧀ꦜꦴꦪ ꦒꦫꦸꦏꦴꦥꦠ꧀ꦠꦶꦁ ꦄꦴꦥꦗ꧀ꦗꦩꦴꦤꦺꦴ ꦄꦕ꧀ꦕꦤ꧀ꦠꦢꦸꦱ꧀ꦱꦷꦭꦺꦴ ꦤꦴꦩ. ꦆꦣ ꦥꦤ ꦪꦺꦴ ꦢ꧀ꦮꦷꦱꦸ ꦠꦷꦱꦸ ꦄꦠ꧀ꦠꦨꦴꦮꦺꦱꦸ ꦢꦸꦱ꧀ꦱꦷꦭꦺꦴ, ꦌꦠꦱ꧀ꦱ ꦒꦠꦶꦪꦴ ꦄꦴꦒꦠꦁ ꦢꦸꦱ꧀ꦱꦷꦭꦨꦴꦮꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ. ꦢꦸꦱ꧀ꦱꦷꦭꦨꦴꦮꦺꦴꦠꦶ ꦕꦺꦠ꧀ꦡ ꦢꦸꦱ꧀ꦱꦷꦭꦱ꧀ꦱ ꦖ ꦢ꧀ꦮꦴꦫꦴꦤꦶ ꦤꦶꦱ꧀ꦱꦴꦪ ꦈꦥ꧀ꦥꦤ꧀ꦤꦴ ꦠꦟ꧀ꦲꦴ ꦮꦺꦢꦶꦠꦧ꧀ꦧꦴ. ꦩꦴꦭꦸꦮꦴ ꦱꦴꦭꦩꦶꦮꦺꦴꦠ꧀ꦡꦠꦤ꧀ꦠꦶ ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦠꦁ ꦠꦟ꧀ꦲꦴꦱꦔ꧀ꦑꦴꦠꦁ ꦢꦸꦱ꧀ꦱꦷꦭ꧀ꦪꦁ ꦪꦡꦴ ꦤꦴꦩ ꦩꦴꦭꦸꦮꦴ ꦱꦴꦭꦁ ꦎꦠ꧀ꦡꦫꦤ꧀ꦠꦷ ꦢꦺꦮꦺ ꦮꦱ꧀ꦱꦤ꧀ꦠꦺ ꦥꦠ꧀ꦠꦺꦲꦶ ꦈꦢꦏꦁ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦱꦩ꧀ꦨꦚ꧀ꦗꦤꦮꦱꦺꦤ ꦱꦧ꧀ꦧꦠ꧀ꦡꦏꦩꦺꦮ ꦥꦫꦶꦪꦺꦴꦤꦤ꧀ꦣꦠꦶ, ꦌꦮꦁ ꦄꦠ꧀ꦠꦨꦴꦮꦁ ꦎꦠ꧀ꦡꦠꦁ ꦥꦫꦶꦪꦺꦴꦤꦤ꧀ꦣꦶꦠ꧀ꦮꦴ ꦜꦶꦠꦁ. ꦱꦺꦴ ꦩꦴꦭꦸꦮꦴꦪ ꦱꦩ꧀ꦨꦚ꧀ꦗꦶꦠ꧀ꦮꦴ ꦨꦹꦩꦶꦪꦁ ꦥꦴꦠꦶꦪꦩꦴꦤꦺꦴ ꦫꦸꦏ꧀ꦑꦺꦴ ꦮꦶꦪ ꦠꦴꦪ ꦢꦸꦱ꧀ꦱꦷꦭ꧀ꦪꦱꦔ꧀ꦑꦴꦠꦴꦪ ꦠꦟ꧀ꦲꦴꦪ ꦱꦩ꧀ꦨꦚ꧀ꦗꦶꦠ꧀ꦮꦴ ꦄꦥꦴꦪꦺꦱꦸ ꦥꦴꦠꦶꦪꦩꦴꦤꦺꦴ, ꦪꦡꦴ ꦤꦁ ꦄꦤꦠ꧀ꦡꦏꦴꦩꦺꦴ ꦢꦶꦱꦺꦴ ꦆꦕ꧀ꦖꦠꦶ, ꦠꦡꦴ ꦄꦠ꧀ꦠꦴꦤꦁ ꦏꦫꦺꦴꦠꦶ ꦤꦴꦩꦴꦠꦶ ꦄꦠ꧀ꦡꦺꦴ.

ꦢꦺꦱꦤꦴꦮꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦴꦥꦸꦟꦶꦁꦱꦹꦠꦶ.

ꦢꦺꦮꦢꦠ꧀ꦠꦮꦠ꧀ꦡꦸ ꦖꦛ꧀ꦜꦁ.