꧑. ꦠꦩ꧀ꦧꦢꦴꦜꦶꦏꦕꦺꦴꦫꦓꦴꦠꦏꦮꦠ꧀ꦡꦸ

ꦱꦲꦱ꧀ꦱꦩꦥꦶ ꦕꦺ ꦮꦴꦕꦴꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦮꦺꦭ꦳ꦸꦮꦤꦺ ꦮꦶꦲꦫꦤ꧀ꦠꦺꦴ ꦠꦩ꧀ꦧꦢꦴꦜꦶꦏꦕꦺꦴꦫꦓꦴꦠꦏꦁ ꦄꦴꦫꦧ꧀ꦨ ꦏꦡꦺꦱꦶ.

ꦌꦏꦹꦤꦥꦚ꧀ꦕꦱꦠꦴ ꦏꦶꦫ ꦕꦺꦴꦫꦴ ꦒꦴꦩꦓꦴꦠꦏꦴꦢꦷꦤꦶ ꦏꦫꦺꦴꦤ꧀ꦠꦴ ꦗꦷꦮꦶꦏꦁ ꦏꦥ꧀ꦥꦺꦱꦸꦁ. ꦄꦡꦺꦏꦺꦴ ꦥꦸꦫꦶꦱꦺꦴ ꦤꦶꦧ꧀ꦧꦶꦢ꧀ꦣꦥꦶꦔ꧀ꦒꦭꦺꦴ ꦠꦩ꧀ꦧꦢꦴꦜꦶꦏꦺꦴ ꦠꦺꦱꦁ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ‘‘ꦄꦲꦩ꧀ꦥꦶ ꦠꦸꦩ꧀ꦲꦺꦲꦶ ꦱꦢ꧀ꦣꦶꦁ ꦗꦷꦮꦶꦱ꧀ꦱꦴꦩꦷ’’ꦠꦶ ꦄꦴꦲ. ꦄꦡ ꦤꦁ ꦕꦺꦴꦫꦗꦺꦛ꧀ꦜꦏꦱ꧀ꦱ ꦢꦱ꧀ꦱꦺꦠ꧀ꦮꦴ ‘‘ꦄꦪꦩ꧀ꦥꦶ ꦄꦩ꧀ꦲꦴꦏꦁ ꦱꦤ꧀ꦠꦶꦏꦺ ꦮꦱꦶꦠꦸꦁ ꦆꦕ꧀ꦖꦠꦷ’’ꦠꦶ ꦄꦴꦲꦁꦱꦸ. ꦄꦡ ꦤꦁ ꦕꦺꦴꦫꦗꦺꦛ꧀ꦜꦏꦺꦴ ꦎꦭꦺꦴꦏꦺꦠ꧀ꦮꦴ ‘‘ꦄꦪꦁ ꦩꦴꦠꦸ ꦡꦤꦁ ꦖꦶꦤ꧀ꦢꦶꦠ꧀ꦮꦴ ꦥꦶꦠꦸ ꦮꦴ ꦒꦭꦭꦺꦴꦲꦶꦠꦁ ꦤꦷꦲꦫꦶꦠ꧀ꦮꦴ ꦑꦴꦢꦤꦱꦩꦠ꧀ꦡꦺꦴ ꦄꦠꦶꦏꦏ꧀ꦑꦭ꦳ꦺꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ ‘‘ꦤꦠ꧀ꦡꦺꦠꦱ꧀ꦱ ꦄꦩ꧀ꦲꦴꦏꦁ ꦱꦤ꧀ꦠꦶꦏꦺ ꦮꦱꦤꦏꦶꦕ꧀ꦕ’’ꦤ꧀ꦠꦶ ꦥꦛꦶꦏ꧀ꦑꦶꦥꦶ. ꦱꦺꦴ ꦌꦮꦁ ꦥꦛꦶꦏ꧀ꦑꦶꦠ꧀ꦠꦺꦴꦥꦶ ꦄꦴꦒꦤ꧀ꦠ꧀ꦮꦴ ꦌꦏꦁ ꦠꦱ꧀ꦱꦺꦮ ꦄꦤ꧀ꦠꦺꦮꦴꦱꦶꦏꦁ ꦈꦥꦛ꧀ꦜꦲꦤ꧀ꦠꦺꦴ ꦄꦴꦫꦴꦣꦺꦱꦶ. ꦱꦺꦴ ꦠꦁ ꦄꦴꦢꦴꦪ ꦕꦺꦴꦫꦗꦺꦛ꧀ꦜꦏꦁ ꦈꦥꦱꦔ꧀ꦏꦩꦶꦠ꧀ꦮꦴ, ‘‘ꦱꦴꦩꦶ, ꦨꦢ꧀ꦢꦏꦺꦴ ꦌꦱ, ꦄꦩ꧀ꦲꦴꦏꦁ ꦈꦥꦏꦴꦫꦏꦺꦴ, ꦱꦔ꧀ꦒꦟ꧀ꦲꦡ ꦤ’’ꦤ꧀ꦠꦶ ꦪꦴꦕꦶꦠ꧀ꦮꦴ ꦕꦺꦴꦫꦗꦺꦛ꧀ꦜꦏꦁ ꦥꦛꦶꦕ꧀ꦖꦴꦥꦺꦱꦶ. ꦄꦡꦺꦏꦢꦶꦮꦱꦁ ꦤꦴꦒꦫꦴ ꦫꦴꦗꦥꦸꦫꦶꦱꦺꦲꦶ ꦱꦢ꧀ꦣꦶꦁ ꦌꦏꦠꦺꦴ ꦲꦸꦠ꧀ꦮꦴ ꦠꦺ ꦕꦺꦴꦫꦺ ꦒꦲꦺꦠ꧀ꦮꦴ ꦮꦶꦤꦶꦕ꧀ꦖꦪꦩꦲꦴꦩꦕ꧀ꦕꦴꦤꦁ ꦱꦤ꧀ꦠꦶꦏꦁ ꦤꦪꦶꦁꦱꦸ. ꦄꦩꦕ꧀ꦕꦴ ꦠꦺꦱꦁ ꦦꦫꦱꦸꦤꦴ ꦱꦷꦱꦕ꧀ꦖꦺꦢꦁ ꦄꦴꦟꦴꦥꦺꦱꦸꦁ. ꦠꦠꦺꦴ ‘‘ꦏꦺꦴ ꦤꦸ ꦑꦺꦴ ꦆꦩꦺ ꦩꦴꦫꦺꦱ꧀ꦱꦠꦷ’’ꦠꦶ ꦥꦫꦶꦪꦺꦱꦤ꧀ꦠꦴ ꦠꦺ ꦩꦴꦫꦺꦠꦸꦁ ꦆꦕ꧀ꦖꦤ꧀ꦠꦁ ꦏꦚ꧀ꦕꦶ ꦄꦢꦶꦱ꧀ꦮꦴ ꦕꦺꦴꦫꦗꦺꦛ꧀ꦜꦏꦁ ꦄꦴꦲꦁꦱꦸ – ‘‘ꦠ꧀ꦮꦁ ꦆꦩꦺ ꦩꦴꦫꦺꦠ꧀ꦮꦴ ꦗꦷꦮꦶꦠꦚ꧀ꦕꦺꦮ ꦭꦨꦶꦱ꧀ꦱꦱꦶ ꦱꦩ꧀ꦩꦴꦤꦚ꧀ꦕ, ꦩꦴꦫꦺꦲꦶ ꦤꦺ’’ꦠꦶ. ꦱꦺꦴꦥꦶ ꦄꦠ꧀ꦠꦴꦤꦁ ꦤꦶꦱ꧀ꦱꦴꦪ ꦮꦱꦶꦠꦠ꧀ꦠꦴ ꦠꦺ ꦩꦴꦫꦺꦠꦸꦁ ꦤ ꦆꦕ꧀ꦖꦶ. ꦌꦠꦺꦤꦹꦥꦴꦪꦺꦤ ꦌꦏꦹꦤꦥꦚ꧀ꦕꦱꦠꦺ ꦥꦸꦕ꧀ꦖꦶꦁꦱꦸ, ꦱꦧ꧀ꦧꦺꦥꦶ ꦤ ꦆꦕ꧀ꦖꦶꦁꦱꦸ. ꦱꦧ꧀ꦧꦥꦕ꧀ꦖꦴ ꦠꦁ ꦤꦶꦧ꧀ꦧꦶꦢ꧀ꦣꦥꦶꦔ꧀ꦒꦭꦁ ꦠꦩ꧀ꦧꦢꦴꦜꦶꦏꦁ ꦥꦸꦕ꧀ꦖꦶꦁꦱꦸ. ꦱꦺꦴ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦠꦺ ꦱꦧ꧀ꦧꦺꦥꦶ ꦩꦴꦫꦺꦠ꧀ꦮꦴ ꦗꦷꦮꦶꦠꦚ꧀ꦕꦺꦮ ꦱꦩ꧀ꦩꦴꦤꦚ꧀ꦕ ꦭꦨꦶ. ꦌꦠꦺꦤꦹꦥꦴꦪꦺꦤ ꦤꦒꦫꦱ꧀ꦱ ꦢꦏ꧀ꦑꦶꦟꦠꦺꦴꦥꦶ ꦥꦚ꧀ꦕ ꦕꦺꦴꦫꦱꦠꦴꦤꦶ ꦄꦴꦤꦺꦠ꧀ꦮꦴ ꦄꦩꦕ꧀ꦕꦴꦤꦁ ꦢꦱ꧀ꦱꦺꦠ꧀ꦮꦴ ꦠꦺꦲꦶ ꦠꦺꦱꦩ꧀ꦥꦶ ꦱꦷꦱꦕ꧀ꦖꦺꦢꦺ ꦄꦴꦟꦠ꧀ꦠꦺ ꦕꦺꦴꦫꦗꦺꦛ꧀ꦜꦏꦁ ꦄꦴꦢꦶꦁ ꦏꦠ꧀ꦮꦴ ꦥꦸꦕ꧀ꦖꦤ꧀ꦠꦴ ꦏꦚ꧀ꦕꦶ ꦩꦴꦫꦺꦠꦸꦁ ꦆꦕ꧀ꦖꦤ꧀ꦠꦁ ꦄꦢꦶꦱ꧀ꦮꦴ ‘‘ꦥꦸꦫꦶꦩꦢꦶꦮꦱꦺ ꦌꦏꦺꦴ ꦥꦸꦫꦶꦱꦺꦴ ꦥꦚ꧀ꦕꦱꦠꦺ ꦕꦺꦴꦫꦺ ꦩꦴꦫꦺꦱꦶ, ꦏꦲꦁ ꦤꦸ ꦑꦺꦴ ꦱꦺꦴ’’ꦠꦶ. ‘‘ꦄꦱꦸꦏꦛ꧀ꦜꦴꦤꦺ ꦄꦩ꧀ꦲꦺꦠꦶ ꦢꦶꦛ꧀ꦜꦺꦴ’’ꦠꦶ ꦮꦸꦠ꧀ꦠꦺ ꦠꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦆꦩꦺ ꦩꦴꦫꦺꦲꦶ, ꦱꦩ꧀ꦩꦴꦤꦁ ꦭꦕ꧀ꦖꦱꦷ’’ꦠꦶ ꦄꦴꦟꦴꦥꦺꦱꦸꦁ. ꦱꦺꦴ ‘‘ꦱꦴꦣꦹ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦠꦺ ꦱꦧ꧀ꦧꦺꦥꦶ ꦩꦴꦫꦺꦠ꧀ꦮꦴ ꦱꦩ꧀ꦩꦴꦤꦁ ꦭꦨꦶ. ꦄꦡ ꦤꦁ ‘‘ꦨꦢ꧀ꦢꦏꦺꦴ ꦄꦪꦁ ꦥꦸꦫꦶꦱꦺꦴ, ꦤꦶꦧꦢ꧀ꦣꦁ ꦕꦺꦴꦫꦓꦴꦠꦏꦩꦺꦮ ꦌꦠꦁ ꦏꦫꦶꦱ꧀ꦱꦴꦩꦴ’’ꦠꦶ ꦩꦤ꧀ꦠꦺꦠ꧀ꦮꦴ ꦠꦱ꧀ꦱ ꦠꦁ ꦜꦴꦤꦤ꧀ꦠꦫꦁ ꦢꦠ꧀ꦮꦴꦮ ꦱꦩ꧀ꦩꦴꦤꦁ ꦏꦫꦶꦁꦱꦸ. ꦱꦺꦴ ꦥꦕ꧀ꦖꦶꦩꦢꦶꦱꦠꦺꦴꦥꦶ ꦈꦠ꧀ꦠꦫꦢꦶꦱꦠꦺꦴꦥꦶ ꦄꦴꦤꦷꦠꦺ ꦥꦚ꧀ꦕꦱꦠꦺ ꦥꦚ꧀ꦕꦱꦠꦺ ꦕꦺꦴꦫꦺ ꦓꦴꦠꦺꦱꦶꦪꦺꦮ. ꦌꦮꦁ ꦕꦠꦹꦲꦶ ꦢꦶꦱꦴꦲꦶ ꦄꦴꦤꦷꦠꦴꦤꦶ ꦢ꧀ꦮꦺ ꦱꦲꦱ꧀ꦱꦴꦤꦶ ꦩꦴꦫꦺꦠ꧀ꦮꦴ ꦠꦠꦺꦴ ꦥꦛ꧀ꦜꦴꦪ ꦢꦺꦮꦱꦶꦏꦁ ꦌꦏꦁ ꦢ꧀ꦮꦺꦠꦶ ꦄꦴꦤꦷꦠꦺ ꦠꦺ ꦩꦤꦸꦱ꧀ꦱꦺ ꦩꦴꦫꦺꦠ꧀ꦮꦴ ꦥꦚ꧀ꦕꦥꦟ꧀ꦟꦴꦱ ꦱꦁꦮꦕ꧀ꦖꦫꦴꦤꦶ ꦕꦺꦴꦫꦓꦴꦠꦏꦏꦩ꧀ꦩꦁ ꦄꦏꦴꦱꦶ.

ꦱꦺꦴ ꦩꦲꦭ꧀ꦭꦏꦏꦴꦭꦺ ꦌꦏꦥ꧀ꦥꦲꦴꦫꦺꦤꦺꦮ ꦱꦷꦱꦁ ꦖꦶꦤ꧀ꦢꦶꦠꦸꦁ ꦤ ꦱꦏ꧀ꦏꦺꦴꦠꦶ, ꦢ꧀ꦮꦺ ꦠꦪꦺꦴ ꦮꦴꦫꦺ ꦥꦲꦫꦤ꧀ꦠꦺꦴ ꦩꦤꦸꦱ꧀ꦱꦺ ꦏꦶꦭꦩꦺꦠꦶ. ꦤꦴꦒꦫꦴ ꦕꦶꦤ꧀ꦠꦪꦶꦁꦱꦸ – ‘‘ꦄꦚ꧀ꦚꦺꦴꦥꦶ ꦕꦺꦴꦫꦓꦴꦠꦏꦺꦴ ꦈꦥ꧀ꦥꦗ꧀ꦗꦶꦱ꧀ꦱꦠꦶ, ꦄꦪꦁ ꦄꦠꦶꦮꦶꦪ ꦩꦤꦸꦱ꧀ꦱꦺ ꦏꦶꦭꦩꦺꦠꦶ, ꦏꦶꦁ ꦆꦩꦶꦤꦴ’’ꦠꦶ ꦠꦱ꧀ꦱ ꦠꦁ ꦜꦴꦤꦤ꧀ꦠꦫꦁ ꦲꦫꦶꦁꦱꦸ. ꦱꦺꦴ ꦥꦸꦧ꧀ꦧꦺ ꦕꦺꦴꦫꦓꦴꦠꦏꦏꦩ꧀ꦩꦁ ꦏꦫꦺꦴꦤ꧀ꦠꦺꦴ ‘‘ꦄꦲꦠꦱꦴꦛꦏꦺ ꦤꦶꦮꦴꦱꦺꦠꦸꦁ, ꦤꦮꦱꦥ꧀ꦥꦶꦤꦴ ꦱꦔ꧀ꦑꦠꦁ ꦑꦷꦫꦪꦴꦒꦸꦁ ꦥꦶꦮꦶꦠꦸꦁ, ꦱꦸꦩꦤꦥꦸꦥ꧀ꦦꦴꦤꦶ ꦥꦶꦭꦤ꧀ꦣꦶꦠꦸꦁ, ꦒꦤ꧀ꦣꦺ ꦮꦶꦭꦶꦩ꧀ꦥꦶꦠꦸ’’ꦤ꧀ꦠꦶ ꦆꦩꦴꦤꦶ ꦕꦠ꧀ꦠꦴꦫꦶ ꦤ ꦭꦨꦶ. ꦱꦺꦴ ꦜꦴꦤꦴ ꦕꦴꦮꦶꦠꦢꦶꦮꦱꦺ ‘‘ꦑꦷꦫꦪꦴꦒꦸꦁ ꦩꦺ ꦥꦕꦡꦴ’’ꦠꦶ ꦮꦠ꧀ꦮꦴ ꦄꦲꦠꦮꦠ꧀ꦡꦱꦸꦩꦤꦩꦴꦭꦴꦮꦶꦭꦺꦥꦤꦴꦤꦶ ꦒꦴꦲꦴꦥꦺꦠ꧀ꦮꦴ ꦤꦢꦶꦁ ꦒꦤ꧀ꦠ꧀ꦮꦴ ꦤ꧀ꦲꦠ꧀ꦮꦴ ꦄꦲꦠꦮꦠ꧀ꦡꦴꦤꦶ ꦤꦶꦮꦴꦱꦺꦠ꧀ꦮꦴ ꦩꦴꦭꦴ ꦥꦶꦭꦤ꧀ꦣꦶꦠ꧀ꦮꦴ ꦒꦤ꧀ꦣꦺꦲꦶ ꦄꦤꦸꦭꦶꦠ꧀ꦠꦒꦠ꧀ꦠꦺꦴ ꦒꦺꦲꦁ ꦄꦴꦒꦤ꧀ꦠ꧀ꦮꦴ ꦤꦶꦱꦷꦢꦶ. ꦄꦡꦱ꧀ꦱ ꦤꦮꦱꦥ꧀ꦥꦶꦤꦴ ꦱꦔ꧀ꦑꦠꦁ ꦑꦷꦫꦪꦴꦒꦸꦁ ꦥꦸꦫꦠꦺꦴ ꦜꦥꦺꦠ꧀ꦮꦴ ꦲꦠ꧀ꦡꦣꦺꦴꦮꦤꦺꦴꦢꦏꦁ ꦄꦴꦲꦫꦶꦁꦱꦸ. ꦠꦱ꧀ꦩꦶꦁ ꦑꦟꦺ ꦱꦴꦫꦶꦥꦸꦠ꧀ꦠꦠ꧀ꦡꦺꦫꦺꦴ ꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦪ ‘‘ꦏꦠ꧀ꦡ ꦤꦸ ꦑꦺꦴ ꦄꦗ꧀ꦗ ꦩꦪꦴ ꦒꦤ꧀ꦠꦧ꧀ꦧ’’ꦤ꧀ꦠꦶ ꦄꦠ꧀ꦠꦤꦺꦴ ꦨꦶꦏ꧀ꦑꦴꦕꦴꦫꦁ ꦎꦭꦺꦴꦏꦺꦤ꧀ꦠꦺꦴ ꦠꦱ꧀ꦱ ꦒꦺꦲꦺ ꦑꦷꦫꦪꦴꦒꦸꦁ ꦢꦶꦱ꧀ꦮꦴ ‘‘ꦏꦫꦶꦱ꧀ꦱꦠꦶ ꦤꦸ ꦑꦺꦴ ꦩꦺ ꦥꦸꦫꦶꦱꦺꦴ ꦱꦔ꧀ꦒꦲ’’ꦤ꧀ꦠꦶ ꦈꦥꦣꦴꦫꦺꦤ꧀ꦠꦺꦴ ‘‘ꦩꦁ ꦢꦶꦱ꧀ꦮꦴ ꦩꦩ ꦱꦔ꧀ꦒꦲꦁ ꦏꦫꦶꦱ꧀ꦱꦠꦶ, ꦏꦫꦶꦠ꧀ꦮꦴ ꦕ ꦥꦤ ꦩꦲꦴꦱꦩ꧀ꦥꦠ꧀ꦠꦶꦁ ꦭꦨꦶꦱ꧀ꦱꦠꦶ ꦄꦪꦁ ꦏꦸꦭꦥꦸꦠ꧀ꦠꦺꦴ’’ꦠꦶ ꦚꦠ꧀ꦮꦴ ꦕꦷꦮꦫꦁ ꦥꦴꦫꦸꦥꦶꦠ꧀ꦮꦴ ꦥꦠ꧀ꦠꦁ ꦄꦴꦢꦴꦪ ꦠꦱ꧀ꦱ ꦒꦺꦲꦢ꧀ꦮꦴꦫꦺ ꦜꦶꦠꦩꦺꦮ ꦄꦠ꧀ꦠꦴꦤꦁ ꦢꦱ꧀ꦱꦺꦱꦶ.

ꦱꦺꦴ ꦡꦺꦫꦁ ꦢꦶꦱ꧀ꦮꦴ ꦥꦱꦤ꧀ꦤꦕꦶꦠ꧀ꦠꦺꦴ ꦕꦶꦤ꧀ꦠꦺꦱꦶ – ‘‘ꦩꦪꦴ ꦕꦶꦫꦁ ꦕꦺꦴꦫꦓꦴꦠꦏꦏꦩ꧀ꦩꦁ ꦏꦠꦁ, ꦧꦲꦹ ꦩꦤꦸꦱ꧀ꦱꦴ ꦩꦴꦫꦶꦠꦴ, ꦆꦢꦴꦤꦶ ꦩꦺ ꦒꦺꦲꦺ ꦑꦷꦫꦪꦴꦒꦸ ꦥꦛꦶꦪꦠ꧀ꦠꦴ, ꦡꦺꦫꦺꦴ ꦄꦴꦒꦤ꧀ꦠ꧀ꦮꦴ ꦩꦩ ꦒꦺꦲꦢ꧀ꦮꦴꦫꦺ ꦜꦶꦠꦺꦴ, ꦆꦢꦴꦤꦶ ꦩꦪꦴ ꦄꦪ꧀ꦪꦱ꧀ꦱ ꦢꦺꦪ꧀ꦪꦣꦩ꧀ꦩꦁ ꦢꦴꦠꦸꦁ ꦮꦛ꧀ꦛꦠꦷ’’ꦠꦶ ꦥꦸꦫꦠꦺꦴ ꦜꦥꦶꦠꦪꦴꦒꦸꦁ ꦄꦥꦤꦺꦠ꧀ꦮꦴ ꦡꦺꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦄꦤ꧀ꦠꦺꦴꦒꦺꦲꦺ ꦤꦶꦱꦷꦢꦴꦥꦺꦠ꧀ꦮꦴ ꦥꦠ꧀ꦠꦺ ꦑꦷꦫꦪꦴꦒꦸꦁ ꦄꦴꦏꦶꦫꦶꦠ꧀ꦮꦴ ꦤꦮꦱꦥ꧀ꦥꦶꦁ ꦄꦴꦱꦶꦚ꧀ꦕꦶꦠ꧀ꦮꦴ ꦡꦺꦫꦁ ꦧꦷꦗꦩꦴꦤꦺꦴ ꦄꦛ꧀ꦜꦴꦱꦶ. ꦄꦡꦱ꧀ꦱ ꦕ ꦢꦷꦓꦫꦠ꧀ꦠꦁ ꦄꦭꦢ꧀ꦣꦥꦸꦧ꧀ꦧꦠꦴꦪ ꦑꦷꦫꦪꦴꦒꦸꦁ ꦥꦴꦠꦸꦁ ꦧꦭꦮꦄꦗ꧀ꦙꦴꦱꦪꦺꦴ ꦄꦲꦺꦴꦱꦶ. ꦡꦺꦫꦺꦴ ꦠꦱ꧀ꦱ ꦄꦗ꧀ꦙꦴꦱꦪꦁ ꦚꦠ꧀ꦮꦴ ‘‘ꦠ꧀ꦮꦁ, ꦈꦥꦴꦱꦏ, ꦄꦠ꧀ꦠꦤꦺꦴ ꦪꦴꦒꦸꦁ ꦥꦶꦮꦴ’’ꦠꦶ ꦄꦴꦲ. ꦱꦺꦴ ꦄꦚ꧀ꦚꦱ꧀ꦱ ꦲꦠ꧀ꦡꦺ ꦧꦷꦗꦤꦶꦁ ꦢꦠ꧀ꦮꦴ ꦪꦴꦒꦸꦁ ꦥꦶꦮꦶ. ꦡꦺꦫꦺꦴ ꦧꦷꦗꦩꦴꦤꦁ ꦥꦸꦫꦶꦱꦁ ‘‘ꦒꦕ꧀ꦖ, ꦈꦥꦴꦱꦏꦩꦺꦮ ꦧꦷꦗꦴꦲꦷ’’ꦠꦶ ꦄꦴꦲ. ꦱꦺꦴ ꦧꦷꦗꦶꦪꦩꦴꦤꦺꦴ ꦏꦸꦕ꧀ꦖꦶꦥꦹꦫꦁ ꦪꦴꦒꦸꦁ ꦥꦶꦮꦶꦠ꧀ꦮꦴ ꦄꦴꦒꦤ꧀ꦠ꧀ꦮꦴ ꦡꦺꦫꦁ ꦧꦷꦗꦩꦴꦤꦺꦴ ꦜꦠ꧀ꦮꦴ ꦏꦠꦴꦲꦴꦫꦏꦶꦕ꧀ꦕꦱ꧀ꦱ ꦡꦺꦫꦱ꧀ꦱ ꦥꦠ꧀ꦠꦁ ꦄꦒ꧀ꦒꦲꦺꦱꦶ. ꦡꦺꦫꦺꦴ ꦠꦱ꧀ꦱ ꦄꦤꦸꦩꦺꦴꦢꦤꦁ ꦄꦴꦫꦨꦶ. ꦱꦺꦴ ꦄꦠ꧀ꦠꦤꦺꦴ ꦕꦶꦠ꧀ꦠꦁ ꦡꦺꦫꦱ꧀ꦱ ꦣꦩ꧀ꦩꦢꦺꦱꦤꦴꦤꦸꦒꦁ ꦏꦴꦠꦸꦁ ꦤꦴꦱꦏ꧀ꦑꦶ. ꦡꦺꦫꦺꦴ ꦱꦭ꧀ꦭꦏ꧀ꦑꦺꦠ꧀ꦮꦴ, ‘‘ꦈꦥꦴꦱꦏ, ꦏꦱ꧀ꦩꦴ ꦕꦶꦠ꧀ꦠꦁ ꦢꦺꦱꦤꦴꦤꦸꦒꦁ ꦏꦴꦠꦸꦁ ꦤ ꦱꦏ꧀ꦏꦺꦴꦱꦷ’’ꦠꦶ ꦥꦸꦕ꧀ꦖꦶ. ‘‘ꦨꦤ꧀ꦠꦺ, ꦩꦪꦴ ꦢꦷꦓꦫꦠ꧀ꦠꦁ ꦏꦏ꧀ꦑꦭ꦳ꦏꦩ꧀ꦩꦁ ꦏꦠꦁ, ꦧꦲꦹ ꦩꦤꦸꦱ꧀ꦱꦴ ꦩꦴꦫꦶꦠꦴ, ꦠꦩꦲꦁ ꦄꦠ꧀ꦠꦤꦺꦴ ꦏꦩ꧀ꦩꦁ ꦄꦤꦸꦱ꧀ꦱꦫꦤ꧀ꦠꦺꦴ ꦕꦶꦠ꧀ꦠꦁ ꦄꦪ꧀ꦪꦱ꧀ꦱ ꦢꦺꦱꦤꦴꦤꦸꦒꦁ ꦏꦴꦠꦸꦁ ꦤꦴꦱꦏ꧀ꦑꦶ’’ꦤ꧀ꦠꦶ. ꦡꦺꦫꦺꦴ ‘‘ꦮꦚ꧀ꦕꦺꦱ꧀ꦱꦴꦩꦶ ꦤ’’ꦤ꧀ꦠꦶ ꦕꦶꦤ꧀ꦠꦺꦠ꧀ꦮꦴ ‘‘ꦏꦶꦁ ꦥꦤ ꦠ꧀ꦮꦁ ꦄꦠ꧀ꦠꦤꦺꦴ ꦫꦸꦕꦶꦪꦴ ꦄꦏꦴꦱꦶ, ꦄꦚ꧀ꦚꦺꦲꦶ ꦏꦴꦫꦶꦠꦺꦴꦱꦷ’’ꦠꦶ? ‘‘ꦫꦴꦗꦴ ꦩꦁ ꦏꦴꦫꦺꦱꦶ, ꦨꦤ꧀ꦠꦺ’’ꦠꦶ. ‘‘ꦏꦶꦁ ꦤꦸ ꦑꦺꦴ ꦠꦺ, ꦈꦥꦴꦱꦏ, ꦌꦮꦁ ꦱꦤ꧀ꦠꦺ ꦄꦏꦸꦱꦭꦁ ꦲꦺꦴꦠꦷ’’ꦠꦶ? ꦩꦤ꧀ꦢꦣꦴꦠꦸꦏꦺꦴ ꦈꦥꦴꦱꦏꦺꦴ ꦡꦺꦫꦺꦤꦺꦮꦁ ꦮꦸꦠ꧀ꦠꦺ ‘‘ꦤꦠ꧀ꦡꦶ ꦩꦪ꧀ꦲꦁ ꦄꦏꦸꦱꦭ’’ꦤ꧀ꦠꦶ ꦱꦚ꧀ꦚꦷ ꦲꦸꦠ꧀ꦮꦴ ꦠꦺꦤ ꦲꦶ, ‘‘ꦨꦤ꧀ꦠꦺ, ꦣꦩ꧀ꦩꦁ ꦏꦡꦺꦡꦴ’’ꦠꦶ. ꦱꦺꦴ ꦡꦺꦫꦺ ꦄꦤꦸꦩꦺꦴꦢꦤꦁ ꦏꦫꦺꦴꦤ꧀ꦠꦺ ꦌꦏꦒ꧀ꦒꦕꦶꦠ꧀ꦠꦺꦴ ꦲꦸꦠ꧀ꦮꦴ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦱ꧀ꦱ ꦎꦫꦠꦺꦴ ꦄꦤꦸꦭꦺꦴꦩꦶꦏꦁ ꦑꦤ꧀ꦠꦶꦁ ꦤꦶꦧ꧀ꦧꦠ꧀ꦠꦺꦱꦶ. ꦡꦺꦫꦺꦴꦥꦶ ꦄꦤꦸꦩꦺꦴꦢꦤꦁ ꦏꦠ꧀ꦮꦴ ꦥꦏ꧀ꦏꦴꦩꦶ.

ꦈꦥꦴꦱꦏꦁ ꦡꦺꦫꦁ ꦄꦤꦸꦒꦤ꧀ꦠ꧀ꦮꦴ ꦤꦶꦮꦠ꧀ꦠꦩꦴꦤꦁ ꦌꦏꦴ ꦪꦏ꧀ꦑꦶꦤꦷ ꦣꦺꦤꦸꦮꦺꦱꦺꦤ ꦄꦴꦒꦤ꧀ꦠ꧀ꦮꦴ ꦈꦫꦺ ꦥꦲꦫꦶꦠ꧀ꦮꦴ ꦩꦴꦫꦺꦱꦶ. ꦱꦺꦴ ꦏꦴꦭꦁ ꦏꦠ꧀ꦮꦴ ꦠꦸꦱꦶꦠꦥꦸꦫꦺ ꦤꦶꦧ꧀ꦧꦠ꧀ꦠꦶ. ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ ‘‘ꦕꦺꦴꦫꦓꦴꦠꦏꦺꦴ ꦥꦚ꧀ꦕꦥꦟ꧀ꦟꦴꦱ ꦮꦱ꧀ꦱꦴꦤꦶ ꦏꦏ꧀ꦑꦭ꦳ꦏꦩ꧀ꦩꦁ ꦏꦠ꧀ꦮꦴ ꦄꦗ꧀ꦗꦺꦮ ꦠꦠꦺꦴ ꦩꦸꦠ꧀ꦠꦺꦴ, ꦄꦗ꧀ꦗꦺꦮ ꦡꦺꦫꦱ꧀ꦱ ꦨꦶꦏ꧀ꦑꦁ ꦢꦠ꧀ꦮꦴ ꦄꦗ꧀ꦗꦺꦮ ꦏꦴꦭꦁ ꦏꦠꦺꦴ, ꦏꦲꦁ ꦤꦸ ꦑꦺꦴ ꦤꦶꦧ꧀ꦧꦠ꧀ꦠꦺꦴ’’ꦠꦶ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ, ‘‘ꦨꦶꦏ꧀ꦑꦮꦺ, ꦠꦸꦱꦶꦠꦥꦸꦫꦺ ꦤꦶꦧ꧀ꦧꦠ꧀ꦠꦺꦴ’’ꦠꦶ ꦄꦴꦲ. ‘‘ꦏꦶꦁ, ꦨꦤ꧀ꦠꦺ, ꦮꦢꦺꦡ, ꦌꦠ꧀ꦠꦏꦁ ꦏꦴꦭꦁ ꦌꦠ꧀ꦠꦏꦺ ꦩꦤꦸꦱ꧀ꦱꦺ ꦓꦴꦠꦺꦠ꧀ꦮꦴ ꦠꦸꦱꦶꦠꦮꦶꦩꦴꦤꦺ ꦤꦶꦧ꧀ꦧꦠ꧀ꦠꦺꦴ’’ꦠꦶ. ‘‘ꦄꦴꦩ, ꦨꦶꦏ꧀ꦑꦮꦺ, ꦩꦲꦤ꧀ꦠꦺꦴ ꦠꦺꦤ ꦏꦭ꧀ꦪꦴꦟꦩꦶꦠ꧀ꦠꦺꦴ ꦭꦢ꧀ꦣꦺꦴ, ꦱꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦣꦩ꧀ꦩꦢꦺꦱꦤꦁ ꦱꦸꦠ꧀ꦮꦴ ꦄꦤꦸꦭꦺꦴꦩꦚꦴꦟꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦆꦠꦺꦴ ꦕꦸꦠꦺꦴ ꦠꦸꦱꦶꦠꦮꦶꦩꦴꦤꦺ ꦤꦶꦧ꧀ꦧꦠ꧀ꦠꦺꦴ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

‘‘ꦱꦸꦨꦴꦱꦶꦠꦁ ꦱꦸꦟꦶꦠ꧀ꦮꦴꦤ, ꦤꦒꦫꦺ ꦕꦺꦴꦫꦓꦴꦠꦏꦺꦴ;

ꦄꦤꦸꦭꦺꦴꦩꦑꦤ꧀ꦠꦶꦁ ꦭꦢ꧀ꦣꦴꦤ, ꦩꦺꦴꦢꦠꦷ ꦠꦶꦢꦶꦮꦁ ꦒꦠꦺꦴ’’ꦠꦶ.

‘‘ꦨꦤ꧀ꦠꦺ, ꦄꦤꦸꦩꦺꦴꦢꦤꦏꦡꦴ ꦤꦴꦩ ꦤ ꦧꦭꦮꦴ, ꦠꦺꦤ ꦏꦠꦁ ꦄꦏꦸꦱꦭꦏꦩ꧀ꦩꦁ ꦩꦲꦤ꧀ꦠꦁ, ꦏꦡꦁ ꦌꦠ꧀ꦠꦏꦺꦤ ꦮꦶꦱꦺꦱꦁ ꦤꦶꦧ꧀ꦧꦠ꧀ꦠꦺꦱꦷ’’ꦠꦶ. ꦱꦠ꧀ꦡꦴ ‘‘ꦏꦶꦁ, ꦨꦶꦏ꧀ꦑꦮꦺ, ‘ꦩꦪꦴ ꦢꦺꦱꦶꦠꦣꦩ꧀ꦩꦱ꧀ꦱ ꦄꦥ꧀ꦥꦁ ꦮꦴ ꦧꦲꦸꦁ ꦮꦴ’ꦠꦶ ꦩꦴ ꦥꦩꦴꦟꦁ ꦒꦟ꧀ꦲꦡ. ꦌꦏꦮꦴꦕꦴꦥꦶ ꦲꦶ ꦄꦠ꧀ꦡꦤꦶꦱ꧀ꦱꦶꦠꦴ ꦱꦺꦪ꧀ꦪꦴꦮꦴ’’ꦠꦶ ꦮꦠ꧀ꦮꦴ ꦄꦤꦸꦱꦤ꧀ꦣꦶꦁ ꦓꦛꦺꦠ꧀ꦮꦴ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦆꦩꦁ ꦒꦴꦡꦩꦴꦲ –

꧑꧐꧐. ‘‘ꦱꦲꦱ꧀ꦱꦩꦥꦶ ꦕꦺ ꦮꦴꦕꦴ, ꦄꦤꦠ꧀ꦡꦥꦢꦱꦁꦲꦶꦠꦴ;

ꦌꦏꦁ ꦄꦠ꧀ꦡꦥꦢꦁ ꦱꦺꦪ꧀ꦪꦺꦴ, ꦪꦁ ꦱꦸꦠ꧀ꦮꦴ ꦈꦥꦱꦩ꧀ꦩꦠꦷ’’ꦠꦶ.

ꦠꦠ꧀ꦡ ꦱꦲꦱ꧀ꦱꦩꦥꦷꦠꦶ ꦥꦫꦶꦕ꧀ꦖꦺꦢꦮꦕꦤꦁ, ꦌꦏꦁ ꦱꦲꦱ꧀ꦱꦁ ꦢ꧀ꦮꦺ ꦱꦲꦱ꧀ꦱꦴꦤꦷꦠꦶ ꦌꦮꦁ ꦱꦲꦱ꧀ꦱꦺꦤ ꦕꦺꦥꦶ ꦥꦫꦶꦕ꧀ꦖꦶꦤ꧀ꦤꦮꦴꦕꦴ ꦲꦺꦴꦤ꧀ꦠꦶ, ꦠꦴ ꦕ ꦥꦤ ꦄꦤꦠ꧀ꦡꦥꦢꦱꦁꦲꦶꦠꦴ ꦄꦴꦏꦴꦱꦮꦟ꧀ꦟꦤꦴꦥꦧ꧀ꦧꦠꦮꦟ꧀ꦟꦤꦴꦮꦤꦮꦟ꧀ꦟꦤꦴꦢꦷꦤꦶ ꦥꦏꦴꦱꦏꦺꦲꦶ ꦄꦤꦶꦪ꧀ꦪꦴꦤꦢꦷꦥꦏꦺꦲꦶ ꦄꦤꦠ꧀ꦡꦏꦺꦲꦶ ꦥꦢꦺꦲꦶ ꦱꦁꦲꦶꦠꦴ ꦪꦴꦮ ꦧꦲꦸꦏꦴ ꦲꦺꦴꦠꦶ, ꦠꦴꦮ ꦥꦴꦥꦶꦏꦴ ꦌꦮꦴꦠꦶ ꦄꦠ꧀ꦡꦺꦴ. ꦌꦏꦁ ꦄꦠ꧀ꦡꦥꦢꦤ꧀ꦠꦶ ꦪꦁ ꦥꦤ ‘‘ꦄꦪꦁ ꦏꦴꦪꦺꦴ, ꦄꦪꦁ ꦏꦴꦪꦒꦠꦴꦱꦠꦶ, ꦠꦶꦱ꧀ꦱꦺꦴ ꦮꦶꦗ꧀ꦗꦴ ꦄꦤꦸꦥ꧀ꦥꦠ꧀ꦠꦺꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤ’’ꦤ꧀ꦠꦶ ꦌꦮꦫꦹꦥꦁ ꦌꦏꦁ ꦄꦠ꧀ꦡꦥꦢꦁ ꦱꦸꦠ꧀ꦮꦴ ꦫꦴꦒꦴꦢꦶꦮꦹꦥꦱꦩꦺꦤ ꦈꦥꦱꦩ꧀ꦩꦠꦶ, ꦠꦁ ꦄꦠ꧀ꦡꦱꦴꦣꦏꦁ ꦤꦶꦧ꧀ꦧꦴꦤꦥ꧀ꦥꦛꦶꦱꦁꦪꦸꦠ꧀ꦠꦁ ꦑꦤ꧀ꦣꦣꦴꦠꦸꦄꦴꦪꦠꦤꦆꦤ꧀ꦢ꧀ꦫꦶꦪꦧꦭꦧꦺꦴꦗ꧀ꦙꦔ꧀ꦒꦱꦠꦶꦥꦛ꧀ꦜꦴꦤꦥꦫꦶꦢꦷꦥꦏꦁ ꦌꦏꦩ꧀ꦥꦶ ꦥꦢꦁ ꦱꦺꦪ꧀ꦪꦺꦴꦪꦺꦮꦴꦠꦶ ꦄꦠ꧀ꦡꦺꦴ.

ꦢꦺꦱꦤꦴꦮꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦴꦥꦸꦟꦶꦁꦱꦹꦠꦶ.

ꦠꦩ꧀ꦧꦢꦴꦜꦶꦏꦕꦺꦴꦫꦓꦴꦠꦏꦮꦠ꧀ꦡꦸ ꦥꦜꦩꦁ.