꧑꧒. ꦒꦫꦲꦢꦶꦤ꧀ꦤꦮꦠ꧀ꦡꦸ

ꦪꦡꦴ ꦱꦔ꧀ꦏꦴꦫꦛ꧀ꦜꦴꦤꦱ꧀ꦩꦶꦤ꧀ꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦒꦫꦲꦢꦶꦤ꧀ꦤꦁ ꦤꦴꦩ ꦤꦶꦒꦟ꧀ꦜꦱꦴꦮꦏꦁ ꦄꦴꦫꦧ꧀ꦨ ꦏꦡꦺꦱꦶ.

ꦱꦴꦮꦠ꧀ꦡꦶꦪꦚ꧀ꦲꦶ ꦱꦶꦫꦶꦒꦸꦠ꧀ꦠꦺꦴ ꦕ ꦒꦫꦲꦢꦶꦤ꧀ꦤꦺꦴ ꦕꦴꦠꦶ ꦢ꧀ꦮꦺ ꦱꦲꦴꦪꦏꦴ ꦄꦲꦺꦱꦸꦁ. ꦠꦺꦱꦸ ꦱꦶꦫꦶꦒꦸꦠ꧀ꦠꦺꦴ ꦈꦥꦴꦱꦏꦺꦴ ꦧꦸꦢ꧀ꦣꦱꦴꦮꦏꦺꦴ, ꦒꦫꦲꦢꦶꦤ꧀ꦤꦺꦴ ꦤꦶꦒꦟ꧀ꦜꦱꦴꦮꦏꦺꦴ. ꦠꦁ ꦤꦶꦒꦟ꧀ꦜꦴ ꦄꦨꦶꦏ꧀ꦑꦟꦁ ꦌꦮꦁ ꦮꦢꦤ꧀ꦠꦶ – ‘‘ꦠꦮ ꦱꦲꦴꦪꦏꦁ ꦱꦶꦫꦶꦒꦸꦠ꧀ꦠꦁ ‘ꦏꦶꦁ ꦠ꧀ꦮꦁ ꦱꦩꦟꦁ ꦒꦺꦴꦠꦩꦁ ꦈꦥꦱꦔ꧀ꦏꦩꦱꦶ, ꦠꦱ꧀ꦱ ꦱꦤ꧀ꦠꦶꦏꦺ ꦏꦶꦁ ꦭꦨꦶꦱ꧀ꦱꦱꦷ’ꦠꦶ ꦮꦠ꧀ꦮꦴ ꦪꦡꦴ ꦄꦩ꧀ꦲꦺ ꦈꦥꦱꦔ꧀ꦏꦩꦶꦠ꧀ꦮꦴ ꦄꦩ꧀ꦲꦴꦏꦚ꧀ꦕ ꦢꦺꦪ꧀ꦪꦣꦩ꧀ꦩꦁ ꦢꦱ꧀ꦱꦠꦶ, ꦏꦶꦁ ꦌꦮꦁ ꦎꦮꦢꦶꦠꦸꦁ ꦤ ꦮꦛ꧀ꦛꦠꦷ’’ꦠꦶ. ꦒꦫꦲꦢꦶꦤ꧀ꦤꦺꦴ ꦠꦺꦱꦁ ꦮꦕꦤꦁ ꦱꦸꦠ꧀ꦮꦴ ꦄꦨꦶꦏ꧀ꦑꦟꦁ ꦒꦤ꧀ꦠ꧀ꦮꦴ ꦜꦶꦠꦤꦶꦱꦶꦤ꧀ꦤꦛ꧀ꦜꦴꦤꦴꦢꦷꦱꦸ ꦱꦶꦫꦶꦒꦸꦠ꧀ꦠꦁ ꦌꦮꦁ ꦎꦮꦢꦠꦶ – ‘‘ꦱꦩ꧀ꦩ, ꦏꦶꦁ ꦠꦺ ꦱꦩꦟꦺꦤ ꦒꦺꦴꦠꦩꦺꦤ, ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦏꦶꦁ ꦭꦨꦶꦱ꧀ꦱꦱꦶ, ꦏꦶꦁ ꦠꦺ ꦩꦩ, ꦄꦪ꧀ꦪꦺ, ꦈꦥꦱꦔ꧀ꦏꦩꦶꦠ꧀ꦮꦴ ꦠꦺꦱꦁ ꦢꦴꦤꦁ ꦢꦴꦠꦸꦁ ꦤ ꦮꦛ꧀ꦛꦠꦷ’’ꦠꦶ? ꦱꦶꦫꦶꦒꦸꦠ꧀ꦠꦺꦴ ꦠꦱ꧀ꦱ ꦏꦡꦁ ꦱꦸꦠ꧀ꦮꦴꦥꦶ ꦧꦲꦹ ꦢꦶꦮꦱꦺ ꦠꦸꦟ꧀ꦲꦷ ꦲꦸꦠ꧀ꦮꦴ ꦤꦶꦧ꧀ꦧꦶꦗ꧀ꦗꦶꦠ꧀ꦮꦴ ꦌꦏꦢꦶꦮꦱꦁ, ‘‘ꦱꦩ꧀ꦩ, ꦠ꧀ꦮꦁ ꦄꦨꦶꦏ꧀ꦑꦟꦁ ꦄꦴꦒꦤ꧀ꦠ꧀ꦮꦴ ꦩꦁ ꦜꦶꦠꦛ꧀ꦜꦴꦤꦴꦢꦷꦱꦸ ꦌꦮꦁ ꦮꦢꦺꦱꦶ, ‘ꦱꦩꦟꦁ ꦒꦺꦴꦠꦩꦁ ꦈꦥꦱꦔ꧀ꦏꦩꦶꦠ꧀ꦮꦴ ꦏꦶꦁ ꦭꦨꦶꦱ꧀ꦱꦱꦶ, ꦩꦩ, ꦄꦪ꧀ꦪꦺ, ꦈꦥꦱꦔ꧀ꦏꦩꦶꦠ꧀ꦮꦴ ꦠꦺꦱꦁ ꦢꦴꦤꦁ ꦢꦺꦲꦷ’ꦠꦶ, ꦏꦡꦺꦲꦶ ꦠꦴꦮ ꦩꦺ, ꦠꦮ, ꦄꦪ꧀ꦪꦴ, ꦏꦶꦁ ꦗꦴꦤꦤ꧀ꦠꦷ’’ꦠꦶ? ‘‘‘ꦄꦲꦺꦴ, ꦱꦴꦩꦶ, ꦩꦴ ꦌꦮꦁ ꦮꦢ, ꦩꦩ ꦄꦪ꧀ꦪꦴꦤꦁ ꦄꦚ꧀ꦚꦴꦠꦁ ꦤꦴꦩ ꦤꦠ꧀ꦡꦶ, ꦱꦧ꧀ꦧꦁ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦁ ꦱꦧ꧀ꦧꦁ ꦏꦴꦪꦮꦕꦷꦩꦤꦺꦴꦏꦩ꧀ꦩꦁ ꦆꦢꦁ ꦨꦮꦶꦱ꧀ꦱꦠꦶ, ꦆꦢꦁ ꦤ ꦨꦮꦶꦱ꧀ꦱꦠꦷ’ꦠꦶ ꦱꦧ꧀ꦧꦁ ꦨꦧ꧀ꦧꦴꦨꦧ꧀ꦧꦁ ꦗꦴꦤꦤ꧀ꦠꦷ’’ꦠꦶ? ‘‘ꦌꦮꦁ ꦮꦢꦺꦱꦷ’’ꦠꦶ. ‘‘ꦄꦴꦩ, ꦮꦢꦺꦩꦷ’’ꦠꦶ. ‘‘ꦪꦢꦶ ꦌꦮꦁ, ꦄꦠꦶꦨꦴꦫꦶꦪꦁ ꦠꦺ ꦏꦠꦁ, ꦌꦠ꧀ꦠꦏꦁ ꦏꦴꦭꦁ ꦩꦪ꧀ꦲꦁ ꦌꦠꦩꦠ꧀ꦡꦁ ꦄꦤꦴꦕꦶꦏ꧀ꦑꦤ꧀ꦠꦺꦤ, ꦄꦗ꧀ꦗ ꦩꦪꦴ ꦄꦪ꧀ꦪꦴꦤꦁ ꦚꦴꦟꦴꦤꦸꦨꦴꦮꦺꦴ ꦚꦴꦠꦺꦴ, ꦒꦕ꧀ꦖ, ꦱꦩ꧀ꦩ, ꦄꦪ꧀ꦪꦺ, ꦩꦩ ꦮꦕꦤꦺꦤ ꦤꦶꦩꦤ꧀ꦠꦺꦲꦷ’’ꦠꦶ. ꦱꦺꦴ ꦤꦶꦒꦟ꧀ꦜꦴꦤꦁ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦠꦺ ꦮꦤ꧀ꦢꦶꦠ꧀ꦮꦴ ‘‘ꦩꦪ꧀ꦲꦁ ꦱꦲꦴꦪꦏꦺꦴ ꦱꦶꦫꦶꦒꦸꦠ꧀ꦠꦺꦴ ꦱ꧀ꦮꦴꦠꦤꦴꦪ ꦠꦸꦩ꧀ꦲꦺ ꦤꦶꦩꦤ꧀ꦠꦺꦠꦷ’’ꦠꦶ ꦄꦴꦲ. ‘‘ꦱꦶꦫꦶꦒꦸꦠ꧀ꦠꦺꦤ ꦱꦴꦩꦁ ꦠ꧀ꦮꦁ ꦮꦸꦠ꧀ꦠꦺꦴ’’ꦠꦶ? ‘‘ꦄꦴꦩ, ꦄꦪ꧀ꦪꦴ’’ꦠꦶ. ꦠꦺ ꦲꦛ꧀ꦜꦠꦸꦛ꧀ꦜꦴ ꦲꦸꦠ꧀ꦮꦴ ‘‘ꦤꦶꦥ꧀ꦦꦤ꧀ꦤꦁ ꦤꦺꦴ ꦏꦶꦕ꧀ꦕꦁ, ꦱꦶꦫꦶꦒꦸꦠ꧀ꦠꦱ꧀ꦱ ꦄꦩ꧀ꦲꦺꦱꦸ ꦥꦱꦤ꧀ꦤꦏꦴꦭꦠꦺꦴ ꦥꦛ꧀ꦜꦴꦪ ꦏꦴ ꦤꦴꦩ ꦱꦩ꧀ꦥꦠ꧀ꦠꦶ ꦄꦩ꧀ꦲꦴꦏꦁ ꦤ ꦨꦮꦶꦱ꧀ꦱꦠꦷ’’ꦠꦶ ꦮꦢꦶꦁꦱꦸ.

ꦱꦶꦫꦶꦒꦸꦠ꧀ꦠꦱ꧀ꦱꦴꦥꦶ ꦩꦲꦤ꧀ꦠꦁ ꦤꦶꦮꦺꦱꦤꦁ. ꦱꦺꦴ ꦠꦱ꧀ꦩꦶꦁ ꦢ꧀ꦮꦶꦤ꧀ꦤꦁ ꦒꦺꦲꦴꦤꦁ ꦄꦤ꧀ꦠꦫꦺ ꦈꦨꦠꦺꦴ ꦢꦷꦓꦁ ꦄꦴꦮꦴꦛꦁ ꦑꦟꦴꦥꦺꦠ꧀ꦮꦴ ꦒꦹꦡꦏꦭꦭꦱ꧀ꦱ ꦥꦹꦫꦴꦥꦺꦱꦶ. ꦧꦲꦶꦄꦴꦮꦴꦛꦺ ꦢ꧀ꦮꦷꦱꦸ ꦥꦫꦶꦪꦤ꧀ꦠꦺꦱꦸ ꦑꦴꦟꦸꦏꦺ ꦏꦺꦴꦛ꧀ꦛꦴꦥꦺꦠ꧀ꦮꦴ ꦠꦺꦱꦸ ꦫꦗ꧀ꦗꦸꦪꦺꦴ ꦧꦤ꧀ꦣꦴꦥꦺꦠ꧀ꦮꦴ ꦄꦴꦱꦤꦴꦤꦁ ꦥꦸꦫꦶꦩꦥꦴꦢꦺ ꦄꦴꦮꦴꦛꦱ꧀ꦱ ꦥꦸꦫꦶꦩꦥꦱ꧀ꦱꦺ ꦜꦥꦴꦥꦺꦠ꧀ꦮꦴ ꦥꦕ꧀ꦖꦶꦩꦥꦴꦢꦺ ꦫꦗ꧀ꦗꦸꦏꦺꦱꦸ ꦜꦥꦴꦥꦺꦱꦶ. ‘‘ꦌꦮꦁ ꦤꦶꦱꦶꦤ꧀ꦤꦏꦴꦭꦺ ꦌꦮꦁ ꦄꦮꦁꦱꦶꦫꦴ ꦥꦠꦶꦱ꧀ꦱꦤ꧀ꦠꦷ’’ꦠꦶ ꦩꦚ꧀ꦚꦩꦴꦤꦺꦴ ꦪꦡꦴ ꦄꦴꦮꦴꦛꦺꦴ ꦤ ꦥꦚ꧀ꦚꦴꦪꦠꦶ, ꦌꦮꦁ ꦄꦴꦱꦤꦴꦤꦁ ꦈꦥꦫꦶ ꦥꦕ꧀ꦕꦠ꧀ꦡꦫꦟꦴꦤꦶ ꦢꦴꦥꦺꦱꦶ. ꦩꦲꦤ꧀ꦠꦴ ꦩꦲꦤ꧀ꦠꦴ ꦕꦴꦛꦶꦪꦺꦴ ꦜꦥꦴꦥꦺꦠ꧀ꦮꦴ ꦏꦢꦭꦶꦥꦟ꧀ꦟꦺꦲꦶ ꦕ ꦱꦺꦠꦥꦶꦭꦺꦴꦠꦶꦏꦴꦲꦶ ꦕ ꦩꦸꦑꦴꦤꦶ ꦧꦤ꧀ꦣꦴꦥꦺꦠ꧀ꦮꦴ ꦠꦴ ꦠꦸꦕ꧀ꦖꦴ ꦌꦮ ꦒꦺꦲꦱ꧀ꦱ ꦥꦕ꧀ꦖꦶꦩꦨꦴꦒꦺ ꦧꦲꦶ ꦪꦴꦒꦸꦨꦠ꧀ꦠꦱꦶꦠ꧀ꦡꦱꦥ꧀ꦥꦶꦠꦺꦭꦩꦣꦸꦦꦴꦟꦶꦠꦥꦹꦮꦕꦸꦟ꧀ꦟꦩꦏ꧀ꦑꦶꦠꦴ ꦏꦠ꧀ꦮꦴ ꦜꦥꦴꦥꦺꦱꦶ. ꦒꦫꦲꦢꦶꦤ꧀ꦤꦺꦴ ꦥꦴꦠꦺꦴꦮ ꦠꦱ꧀ꦱ ꦓꦫꦁ ꦮꦺꦒꦺꦤ ꦒꦤ꧀ꦠ꧀ꦮꦴ, ‘‘ꦄꦪ꧀ꦪꦴꦤꦁ ꦱꦏ꧀ꦏꦴꦫꦺꦴ ꦱꦗ꧀ꦗꦶꦠꦺꦴ’’ꦠꦶ ꦥꦸꦕ꧀ꦖꦶ. ‘‘ꦄꦴꦩ, ꦱꦩ꧀ꦩ, ꦱꦗ꧀ꦗꦶꦠꦺꦴ’’ꦠꦶ. ‘‘ꦏꦲꦁ ꦥꦤ ꦌꦱꦺꦴ’’ꦠꦶ. ‘‘ꦌꦠꦴꦱꦸ ꦌꦠ꧀ꦠꦶꦏꦴꦱꦸ ꦕꦴꦛꦷꦱꦸ ꦪꦴꦒꦸ, ꦌꦠ꧀ꦠꦶꦏꦴꦱꦸ ꦨꦠ꧀ꦠꦁ, ꦌꦠ꧀ꦠꦶꦏꦴꦱꦸ ꦱꦥ꧀ꦥꦶꦦꦴꦟꦶꦠꦥꦹꦮꦴꦢꦷꦤꦶ ꦥꦹꦫꦶꦠꦴꦤꦶ, ꦄꦴꦱꦤꦴꦤꦶ ꦥꦚ꧀ꦚꦠ꧀ꦠꦴꦤꦷ’’ꦠꦶ. ꦱꦺꦴ ‘‘ꦱꦴꦣꦹ’’ꦠꦶ ꦮꦠ꧀ꦮꦴ ꦒꦠꦺꦴ ꦠꦱ꧀ꦱ ꦒꦠꦏꦴꦭꦺ ꦥꦚ꧀ꦕꦱꦠꦴ ꦤꦶꦒꦟ꧀ꦜꦴ ꦄꦴꦒꦩꦶꦁꦱꦸ. ꦱꦶꦫꦶꦒꦸꦠ꧀ꦠꦺꦴ ꦒꦺꦲꦴ ꦤꦶꦏ꧀ꦑꦩꦶꦠ꧀ꦮꦴ ꦥꦚ꧀ꦕꦥꦠꦶꦛ꧀ꦜꦶꦠꦺꦤ ꦤꦶꦒꦟ꧀ꦜꦺ ꦮꦤ꧀ꦢꦶꦠ꧀ꦮꦴ ꦠꦺꦱꦁ ꦥꦸꦫꦠꦺꦴ ꦄꦚ꧀ꦗꦭꦶꦁ ꦥꦒ꧀ꦒꦪ꧀ꦲ ꦜꦶꦠꦺꦴ ꦌꦮꦁ ꦕꦶꦤ꧀ꦠꦺꦱꦶ – ‘‘ꦠꦸꦩ꧀ꦲꦺ ꦏꦶꦫ ꦄꦠꦷꦠꦴꦢꦶꦨꦺꦢꦁ ꦱꦧ꧀ꦧꦁ ꦗꦴꦤꦴꦡ, ꦌꦮꦁ ꦠꦸꦩ꧀ꦲꦴꦏꦁ ꦈꦥꦛ꧀ꦜꦴꦏꦺꦤ ꦩꦪ꧀ꦲꦁ ꦏꦡꦶꦠꦁ. ꦱꦕꦺ ꦱꦧ꧀ꦧꦁ ꦠꦸꦩ꧀ꦲꦺ ꦗꦴꦤꦴꦡ, ꦩꦪ꧀ꦲꦁ ꦒꦺꦲꦁ ꦩꦴ ꦥꦮꦶꦱꦶꦠ꧀ꦡ. ꦩꦩ ꦒꦺꦲꦁ ꦥꦮꦶꦛ꧀ꦜꦴꦤꦚ꧀ꦲꦶ ꦮꦺꦴ ꦤꦺꦮ ꦪꦴꦒꦸ ꦄꦠ꧀ꦡꦶ, ꦤ ꦨꦠ꧀ꦠꦴꦢꦷꦤꦶ. ꦱꦕꦺ ꦄꦗꦴꦤꦶꦠ꧀ꦮꦴ ꦥꦮꦶꦱꦶꦱ꧀ꦱꦡ, ꦒꦹꦡꦄꦴꦮꦴꦛꦺ ꦮꦺꦴ ꦥꦴꦠꦺꦠ꧀ꦮꦴ ꦥꦺꦴꦡꦺꦱ꧀ꦱꦴꦩꦷ’’ꦠꦶ ꦌꦮꦁ ꦕꦶꦤ꧀ꦠꦺꦠ꧀ꦮꦴ ꦥꦸꦫꦶꦱꦴꦤꦁ ꦱꦚ꧀ꦚꦁ ꦄꦢꦴꦱꦶ. ꦌꦮꦁ ꦠꦺꦱꦁ ꦤꦶꦱꦷꦢꦤꦨꦴꦮꦁ ꦚꦠ꧀ꦮꦴ ꦥꦕ꧀ꦖꦶꦩꦥꦱ꧀ꦱꦺ ꦜꦠ꧀ꦮꦴ ꦄꦴꦱꦤꦴꦤꦁ ꦈꦥꦫꦶ ꦥꦕ꧀ꦕꦠ꧀ꦡꦫꦟꦴꦤꦶ ꦄꦥꦤꦺꦪ꧀ꦪꦴꦡ, ꦩꦴ ꦠꦴꦤꦶ ꦄꦱꦸꦕꦶꦤꦴ ꦩꦏ꧀ꦑꦪꦶꦁꦱꦹꦠꦶ.

ꦄꦡ ꦤꦶꦒꦟ꧀ꦜꦺ ‘‘ꦆꦠꦺꦴ ꦌꦡ, ꦨꦤ꧀ꦠꦺ’’ꦠꦶ ꦄꦴꦲ. ꦤꦶꦒꦟ꧀ꦜꦴ ꦥꦮꦶꦱꦶꦠ꧀ꦮꦴ ꦥꦚ꧀ꦚꦠ꧀ꦠꦴꦱꦤꦺꦱꦸ ꦤꦶꦱꦷꦢꦶꦠꦸꦁ ꦄꦴꦫꦨꦶꦁꦱꦸ. ꦄꦡ ꦤꦺ ꦩꦤꦸꦱ꧀ꦱꦴ ꦮꦢꦶꦁꦱꦸ – ‘‘ꦄꦴꦒꦩꦺꦡ, ꦨꦤ꧀ꦠꦺ, ꦩꦴ ꦠꦴꦮ ꦤꦶꦱꦷꦢꦡꦴ’’ꦠꦶ. ‘‘ꦏꦶꦁ ꦏꦴꦫꦟꦴ’’ꦠꦶ? ‘‘ꦄꦩ꧀ꦲꦴꦏꦁ ꦒꦺꦲꦁ ꦥꦮꦶꦛ꧀ꦜꦴꦤꦁ ꦄꦪ꧀ꦪꦴꦤꦁ ꦮꦠ꧀ꦠꦁ ꦚꦠ꧀ꦮꦴ ꦤꦶꦱꦷꦢꦶꦠꦸꦁ ꦮꦛ꧀ꦛꦠꦷ’’ꦠꦶ. ‘‘ꦏꦶꦁ ꦏꦴꦠꦸꦁ ꦮꦛ꧀ꦛꦠꦶ, ꦄꦴꦮꦸꦱꦺꦴ’’ꦠꦶ? ‘‘ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦥꦠ꧀ꦠꦴꦱꦤꦩꦹꦭꦺꦱꦸ ꦜꦠ꧀ꦮꦴ ꦱꦧ꧀ꦧꦺꦥꦶ ꦌꦏꦥ꧀ꦥꦲꦴꦫꦺꦤꦺꦮ ꦤꦶꦱꦷꦢꦶꦠꦸꦁ ꦮꦛ꧀ꦛꦠꦷ’’ꦠꦶ. ꦆꦢꦁ ꦏꦶꦫꦱ꧀ꦱ ꦄꦣꦶꦥ꧀ꦥꦴꦪꦺꦴ – ‘‘ꦌꦏꦱ꧀ꦩꦶꦁ ꦄꦴꦮꦴꦛꦺ ꦥꦠꦶꦠꦺ ‘ꦩꦴ, ꦄꦴꦮꦸꦱꦺꦴ, ꦄꦮꦱꦺꦱꦴ ꦄꦴꦱꦤꦺ ꦤꦶꦱꦷꦢꦤ꧀ꦠꦹ’ꦠꦶ ꦮꦠ꧀ꦠꦸꦁ ꦩꦴ ꦭꦨꦠꦹ’’ꦠꦶ. ꦠꦺ ‘‘ꦱꦴꦣꦹ’’ꦠꦶ ꦮꦠ꧀ꦮꦴ ‘‘ꦆꦩꦺꦲꦶ ꦏꦡꦶꦠꦏꦡꦁ ꦄꦩ꧀ꦲꦺꦲꦶ ꦏꦴꦠꦸꦁ ꦮꦛ꧀ꦛꦠꦷ’’ꦠꦶ ꦕꦶꦤ꧀ꦠꦪꦶꦁꦱꦸ. ꦄꦡ ꦱꦧ꧀ꦧꦺ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦥꦠ꧀ꦠꦴꦱꦤꦩꦹꦭꦺ ꦥꦛꦶꦥꦴꦛꦶꦪꦴ ꦄꦛ꧀ꦜꦁꦱꦸ. ꦄꦡ ꦤꦺ, ‘‘ꦨꦤ꧀ꦠꦺ, ꦑꦶꦥ꧀ꦥꦁ ꦌꦏꦥ꧀ꦥꦲꦴꦫꦺꦤꦺꦮ ꦤꦶꦱꦷꦢꦡꦴ’’ꦠꦶ ꦮꦠ꧀ꦮꦴ ꦠꦺꦱꦁ ꦤꦶꦱꦶꦤ꧀ꦤꦨꦴꦮꦁ ꦚꦠ꧀ꦮꦴ ꦄꦴꦱꦤꦴꦤꦁ ꦈꦥꦫꦶ ꦥꦕ꧀ꦕꦠ꧀ꦡꦫꦟꦴꦤꦶ ꦤꦷꦲꦫꦶꦁꦱꦸ. ꦤꦶꦒꦟ꧀ꦜꦴ ꦌꦏꦥ꧀ꦥꦲꦴꦫꦺꦤꦺꦮ ꦤꦶꦱꦶꦤ꧀ꦤꦴ, ꦫꦗ꧀ꦗꦹꦤꦁ ꦈꦥꦫꦶ ꦜꦥꦶꦠꦴ ꦄꦴꦱꦤꦥꦴꦢꦴ ꦨꦛ꧀ꦜꦴ, ꦤꦶꦒꦟ꧀ꦜꦴ ꦄꦮꦁꦱꦶꦫꦴ ꦄꦴꦮꦴꦛꦺ ꦥꦠꦶꦁꦱꦸ. ꦱꦶꦫꦶꦒꦸꦠ꧀ꦠꦺꦴ ꦠꦺꦱꦸ ꦥꦠꦶꦠꦺꦱꦸ ꦢ꧀ꦮꦴꦫꦁ ꦥꦶꦢꦲꦶꦠ꧀ꦮꦴ ꦠꦺ ꦈꦠ꧀ꦠꦶꦟ꧀ꦟꦸꦠ꧀ꦠꦶꦟ꧀ꦟꦺ ‘‘ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦁ ꦏꦱ꧀ꦩꦴ ꦤ ꦗꦴꦤꦴꦡꦴ’’ꦠꦶ ꦢꦟ꧀ꦝꦺꦲꦶ ꦥꦴꦡꦺꦠ꧀ꦮꦴ ‘‘ꦌꦠ꧀ꦠꦏꦁ ꦌꦠꦺꦱꦁ ꦮꦛ꧀ꦛꦶꦱ꧀ꦱꦠꦷ’’ꦠꦶ ꦢ꧀ꦮꦴꦫꦁ ꦮꦶꦮꦫꦴꦥꦺꦱꦶ. ꦠꦺ ꦤꦶꦏ꧀ꦑꦩꦶꦠ꧀ꦮꦴ ꦥꦭꦴꦪꦶꦠꦸꦁ ꦄꦴꦫꦨꦶꦁꦱꦸ. ꦒꦩꦤꦩꦒ꧀ꦒꦺ ꦥꦤ ꦠꦺꦱꦁ ꦱꦸꦣꦴꦥꦫꦶꦏꦩ꧀ꦩꦏꦠꦁ ꦨꦹꦩꦶꦁ ꦥꦶꦕ꧀ꦖꦶꦭꦁ ꦏꦴꦫꦴꦥꦺꦱꦶ. ꦠꦺ ꦠꦠ꧀ꦡ ꦄꦱꦟ꧀ꦜꦲꦶꦠ꧀ꦮꦴ ꦥꦠꦶꦠꦺ ꦥꦠꦶꦠꦺ ꦥꦸꦤ ꦥꦺꦴꦡꦴꦥꦺꦠ꧀ꦮꦴ ‘‘ꦄꦭꦁ ꦌꦠ꧀ꦠꦏꦁ ꦠꦸꦩ꧀ꦲꦴꦏ’’ꦤ꧀ꦠꦶ ꦈꦪ꧀ꦪꦺꦴꦗꦺꦱꦶ. ꦠꦺ ‘‘ꦤꦴꦱꦶꦠꦩ꧀ꦲꦴ ꦠꦪꦴ, ꦤꦴꦱꦶꦠꦩ꧀ꦲꦴ ꦠꦪꦴ’’ꦠꦶ ꦏꦤ꧀ꦢꦤ꧀ꦠꦴ ꦈꦥꦛ꧀ꦜꦴꦏꦱ꧀ꦱ ꦒꦺꦲꦢ꧀ꦮꦴꦫꦁ ꦄꦒꦩꦁꦱꦸ.

ꦒꦫꦲꦢꦶꦤ꧀ꦤꦺꦴ ꦠꦁ ꦮꦶꦥ꧀ꦥꦏꦴꦫꦁ ꦢꦶꦱ꧀ꦮꦴ ꦏꦸꦢ꧀ꦣꦺꦴ ‘‘ꦤꦴꦱꦶꦠꦩ꧀ꦲꦶ ꦱꦶꦫꦶꦒꦸꦠ꧀ꦠꦺꦤ, ꦲꦠ꧀ꦡꦁ ꦥꦱꦴꦫꦺꦠ꧀ꦮꦴ ꦮꦤ꧀ꦢꦤ꧀ꦠꦴꦤꦁ ꦱꦢꦺꦮꦏꦺ ꦭꦺꦴꦏꦺ ꦪꦡꦴꦫꦸꦕꦶꦪꦴ ꦢꦴꦠꦸꦁ ꦱꦩꦠ꧀ꦡꦺ ꦤꦴꦩ ꦥꦸꦚ꧀ꦚꦏ꧀ꦑꦺꦠ꧀ꦠꦨꦹꦠꦺ ꦩꦩ, ꦄꦪ꧀ꦪꦺ, ꦥꦺꦴꦡꦴꦥꦺꦠ꧀ꦮꦴ ꦧ꧀ꦪꦱꦤꦁ ꦥꦴꦥꦺꦱꦷ’’ꦠꦶ ꦫꦴꦗꦏꦸꦭꦁ ꦒꦤ꧀ꦠ꧀ꦮꦴ ꦠꦱ꧀ꦱ ꦏꦲꦴꦥꦟꦱꦲꦱ꧀ꦱꦁ ꦢꦟ꧀ꦝꦁ ꦏꦴꦫꦺꦱꦶ. ꦄꦡꦱ꧀ꦱ ꦫꦴꦗꦴ ꦱꦴꦱꦤꦁ ꦥꦺꦱꦺꦱꦶ. ꦱꦺꦴ ꦒꦤ꧀ꦠ꧀ꦮꦴ ꦫꦴꦗꦴꦤꦁ ꦮꦤ꧀ꦢꦶꦠ꧀ꦮꦴ, ‘‘ꦢꦺꦮ, ꦈꦥꦥꦫꦶꦏ꧀ꦑꦶꦠ꧀ꦮꦴ ꦢꦟ꧀ꦝꦁ ꦒꦟ꧀ꦲꦡ, ꦩꦴ ꦄꦤꦸꦥꦥꦫꦶꦏ꧀ꦑꦶꦠ꧀ꦮꦴ’’ꦠꦶ ꦄꦴꦲ. ‘‘ꦈꦥꦥꦫꦶꦏ꧀ꦑꦶꦠ꧀ꦮꦴ ꦒꦟ꧀ꦲꦶꦱ꧀ꦱꦴꦩꦷ’’ꦠꦶ. ‘‘ꦱꦴꦣꦸ, ꦢꦺꦮꦴ’’ꦠꦶ. ‘‘ꦠꦺꦤ ꦲꦶ ꦒꦟ꧀ꦲꦴꦲꦷ’’ꦠꦶ. ꦢꦺꦮ, ꦩꦪ꧀ꦲꦁ ꦱꦲꦴꦪꦏꦺꦴ ꦤꦶꦒꦟ꧀ꦜꦱꦴꦮꦏꦺꦴ ꦩꦁ ꦈꦥꦱꦔ꧀ꦏꦩꦶꦠ꧀ꦮꦴ ꦜꦶꦠꦤꦶꦱꦶꦤ꧀ꦤꦛ꧀ꦜꦴꦤꦴꦢꦷꦱꦸ ꦄꦨꦶꦟ꧀ꦲꦁ ꦌꦮꦁ ꦮꦢꦺꦱꦶ – ‘‘ꦱꦩ꧀ꦩ, ꦏꦶꦁ ꦠꦺ ꦱꦩꦟꦺꦤ ꦒꦺꦴꦠꦩꦺꦤ, ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦏꦶꦁ ꦭꦨꦶꦱ꧀ꦱꦱꦷ’’ꦠꦶ ꦆꦢꦁ ꦄꦴꦢꦶꦁ ꦏꦠ꧀ꦮꦴ ꦱꦶꦫꦶꦒꦸꦠ꧀ꦠꦺꦴ ꦱꦧ꧀ꦧꦁ ꦠꦁ ꦥꦮꦠ꧀ꦠꦶꦁ ꦄꦴꦫꦺꦴꦕꦺꦠ꧀ꦮꦴ ‘‘ꦢꦺꦮ, ꦱꦕꦺ ꦆꦩꦱ꧀ꦩꦶꦁ ꦏꦴꦫꦟꦺ ꦢꦟ꧀ꦝꦁ ꦒꦲꦺꦠꦸꦁ ꦪꦸꦠ꧀ꦠꦁ, ꦒꦟ꧀ꦲꦡꦴ’’ꦠꦶ. ꦫꦴꦗꦴ ꦒꦫꦲꦢꦶꦤ꧀ꦤꦁ ꦎꦭꦺꦴꦏꦺꦠ꧀ꦮꦴ ‘‘ꦱꦕ꧀ꦕꦁ ꦏꦶꦫ ꦠꦺ ꦌꦮꦁ ꦮꦸꦠ꧀ꦠ’’ꦤ꧀ꦠꦶ ꦄꦴꦲ. ‘‘ꦱꦕ꧀ꦕꦁ, ꦢꦺꦮꦴ’’ꦠꦶ. ꦠ꧀ꦮꦁ ꦌꦠ꧀ꦠꦏꦩ꧀ꦥꦶ ꦄꦗꦴꦤꦤ꧀ꦠꦺ ꦱꦠ꧀ꦡꦴꦫꦺꦴꦠꦶ ꦒꦲꦺꦠ꧀ꦮꦴ ꦮꦶꦕꦫꦤ꧀ꦠꦺꦴ ‘‘ꦱꦧ꧀ꦧꦁ ꦗꦴꦤꦤ꧀ꦠꦷ’’ꦠꦶ ꦏꦶꦁ ꦏꦴꦫꦟꦴ ꦠꦡꦴꦒꦠꦱꦴꦮꦏꦱ꧀ꦱ ꦏꦡꦺꦱꦶ. ‘‘ꦠꦪꦴ ꦄꦴꦫꦺꦴꦥꦶꦠꦢꦟ꧀ꦝꦺꦴ ꦠꦸꦪ꧀ꦲꦩꦺꦮ ꦲꦺꦴꦠꦹ’’ꦠꦶ ꦌꦮꦁ ꦱ꧀ꦮꦺꦮ ꦢꦟ꧀ꦝꦁ ꦥꦴꦥꦶꦠꦺꦴ, ꦠꦱ꧀ꦱꦺꦮ ꦏꦸꦭꦹꦥꦏꦴ ꦥꦺꦴꦡꦺꦠ꧀ꦮꦴ ꦤꦷꦲꦛꦴ.

ꦱꦺꦴ ꦠꦁ ꦏꦸꦗ꧀ꦙꦶꦠ꧀ꦮꦴ ꦠꦠꦺꦴ ꦥꦛ꧀ꦜꦴꦪ ꦄꦝ꧀ꦞꦩꦴꦱꦩꦠ꧀ꦠꦩ꧀ꦥꦶ ꦱꦶꦫꦶꦒꦸꦠ꧀ꦠꦺꦤ ꦱꦢ꧀ꦣꦶꦁ ꦄꦏꦡꦺꦠ꧀ꦮꦴ ꦕꦶꦤ꧀ꦠꦺꦱꦶ – ‘‘ꦌꦮꦁ ꦮꦶꦕꦫꦶꦠꦸꦁ ꦩꦪ꧀ꦲꦁ ꦄꦪꦸꦠ꧀ꦠꦁ, ꦌꦠꦱ꧀ꦱ ꦏꦸꦭꦹꦥꦏꦴꦤꦩ꧀ꦥꦶ ꦩꦪꦴ ꦧ꧀ꦪꦱꦤꦁ ꦏꦴꦠꦸꦁ ꦮꦛ꧀ꦛꦠꦷ’’ꦠꦶ ꦱꦶꦫꦶꦒꦸꦠ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦲ – ‘‘ꦱꦲꦴꦪ ꦱꦶꦫꦶꦒꦸꦠ꧀ꦠꦴ’’ꦠꦶ. ‘‘ꦏꦶꦁ, ꦱꦩ꧀ꦩꦴ’’ꦠꦶ? ‘‘ꦚꦴꦠꦶꦱꦸꦲꦗ꧀ꦗꦴꦤꦁ ꦤꦴꦩ ꦏꦭꦲꦺꦴꦥꦶ ꦲꦺꦴꦠꦶ ꦮꦶꦮꦴꦢꦺꦴꦥꦶ, ꦏꦶꦁ ꦠ꧀ꦮꦁ ꦏꦶꦚ꧀ꦕꦶ ꦤ ꦏꦡꦺꦱꦶ, ꦏꦱ꧀ꦩꦴ ꦌꦮꦁ ꦏꦫꦺꦴꦱꦷ’’ꦠꦶ? ‘‘ꦱꦩ꧀ꦩ, ꦠꦮ ꦩꦪꦴ ꦱꦢ꧀ꦣꦶꦁ ꦄꦏꦡꦤꦠꦺꦴ ꦤ ꦏꦡꦺꦩꦷ’’ꦠꦶ. ‘‘ꦪꦁ, ꦱꦩ꧀ꦩ, ꦏꦠꦁ, ꦏꦠꦩꦺꦮ ꦠꦁ ꦤ ꦩꦪꦁ ꦩꦺꦠ꧀ꦠꦶꦁ ꦨꦶꦤ꧀ꦢꦶꦱ꧀ꦱꦴꦩꦴ’’ꦠꦶ. ꦠꦠꦺꦴ ꦥꦛ꧀ꦜꦴꦪ ꦈꦨꦺꦴꦥꦶ ꦌꦏꦛ꧀ꦜꦴꦤꦺ ꦠꦶꦛ꧀ꦜꦤ꧀ꦠꦶ ꦤꦶꦱꦷꦢꦤ꧀ꦠꦶ. ꦄꦡꦺꦏꦢꦶꦮꦱꦁ ꦱꦶꦫꦶꦒꦸꦠ꧀ꦠꦺꦴ ꦒꦫꦲꦢꦶꦤ꧀ꦤꦁ ꦄꦴꦲ – ‘‘ꦏꦶꦁ ꦠꦺ ꦤꦶꦒꦟ꧀ꦜꦺꦲꦶ, ꦠꦺ ꦈꦥꦱꦔ꧀ꦏꦩꦶꦠ꧀ꦮꦴ ꦏꦶꦁ ꦭꦨꦶꦱ꧀ꦱꦱꦶ, ꦩꦩ ꦱꦠ꧀ꦡꦴꦫꦁ ꦈꦥꦱꦔ꧀ꦏꦩꦶꦠꦸꦁ ꦮꦴ ꦄꦪ꧀ꦪꦴꦤꦁ ꦢꦴꦤꦁ ꦢꦴꦠꦸꦁ ꦮꦴ ꦏꦶꦁ ꦠꦺ ꦤ ꦮꦛ꧀ꦛꦠꦷ’’ꦠꦶ? ꦱꦺꦴꦥꦶ ꦌꦠꦩꦺꦮ ꦥꦕ꧀ꦕꦴꦱꦷꦱꦠꦶ, ꦠꦺꦤꦱ꧀ꦱ ꦏꦟ꧀ꦝꦸꦮꦤꦛ꧀ꦜꦴꦤꦺ ꦤꦑꦺꦤ ꦮꦶꦭꦺꦑꦶꦠꦁ ꦮꦶꦪ ꦄꦲꦺꦴꦱꦶ. ꦱꦺꦴ, ‘‘ꦱꦶꦫꦶꦒꦸꦠ꧀ꦠ, ꦠꦮ ꦱꦠ꧀ꦡꦴ ꦏꦶꦁ ꦗꦴꦤꦴꦠꦷ’’ꦠꦶ ꦥꦸꦕ꧀ꦖꦶ. ‘‘ꦄꦩ꧀ꦨꦺꦴ, ꦩꦴ ꦌꦮꦁ ꦮꦢ, ꦱꦠ꧀ꦡꦸ ꦩꦺ ꦄꦗꦴꦤꦶꦠꦧ꧀ꦧꦁ ꦤꦴꦩ ꦤꦠ꧀ꦡꦶ, ꦄꦠꦷꦠꦴꦢꦶꦨꦺꦢꦁ ꦱꦧ꧀ꦧꦁ ꦗꦴꦤꦴꦠꦶ, ꦱꦺꦴꦭ꦳ꦱꦲꦴꦏꦴꦫꦺꦲꦶ ꦱꦠ꧀ꦠꦴꦤꦁ ꦕꦶꦠ꧀ꦠꦁ ꦥꦫꦶꦕ꧀ꦖꦶꦤ꧀ꦢꦠꦷ’’ꦠꦶ. ‘‘ꦄꦲꦁ ꦌꦮꦁ ꦤ ꦗꦴꦤꦴꦩꦶ, ꦏꦱ꧀ꦩꦴ ꦩꦪ꧀ꦲꦁ ꦌꦠ꧀ꦠꦏꦁ ꦏꦴꦭꦁ ꦤ ꦏꦡꦺꦱꦶ, ꦠꦺꦤ ꦲꦶ ꦠ꧀ꦮꦁ ꦒꦕ꧀ꦖ, ꦠꦮ ꦱꦠ꧀ꦡꦴꦫꦁ ꦱ꧀ꦮꦴꦠꦤꦴꦪ ꦤꦶꦩꦤ꧀ꦠꦺꦲꦶ, ꦨꦺꦴꦗꦺꦱ꧀ꦱꦴꦩꦶ, ꦥꦚ꧀ꦕꦲꦶ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦩꦩ ꦨꦶꦏ꧀ꦑꦁ ꦒꦟ꧀ꦲꦶꦠꦸꦁ ꦮꦢꦺꦲꦷ’’ꦠꦶ.

ꦱꦶꦫꦶꦒꦸꦠ꧀ꦠꦺꦴ ꦱꦠ꧀ꦡꦴꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦌꦮꦩꦴꦲ – ‘‘ꦨꦤ꧀ꦠꦺ, ꦩꦩ ꦱꦲꦴꦪꦏꦺꦴ ꦒꦫꦲꦢꦶꦤ꧀ꦤꦺꦴ ꦠꦸꦩ꧀ꦲꦺ ꦤꦶꦩꦤ꧀ꦠꦴꦥꦺꦠꦶ, ꦥꦚ꧀ꦕꦲꦶ ꦏꦶꦫ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦱ꧀ꦮꦺ ꦠꦱ꧀ꦱ ꦨꦶꦏ꧀ꦑꦁ ꦒꦟ꧀ꦲꦡ, ꦥꦸꦫꦶꦩꦢꦶꦮꦱꦺ ꦑꦺꦴ ꦥꦤ ꦠꦱ꧀ꦱ ꦏꦸꦭꦹꦥꦏꦴꦤꦁ ꦩꦪꦴ ꦆꦢꦁ ꦤꦴꦩ ꦏꦠꦁ, ꦩꦪꦴ ꦏꦠꦱ꧀ꦱ ꦥꦛꦶꦏꦫꦟꦩ꧀ꦥꦶ ꦤ ꦗꦴꦤꦴꦩꦶ, ꦠꦸꦩ꧀ꦲꦴꦏꦁ ꦱꦸꦢ꧀ꦣꦕꦶꦠ꧀ꦠꦺꦤ ꦨꦶꦏ꧀ꦑꦁ ꦢꦴꦠꦸꦏꦴꦩꦠꦩ꧀ꦥꦶ ꦤ ꦗꦴꦤꦴꦩꦶ, ꦄꦴꦮꦗ꧀ꦗꦺꦠ꧀ꦮꦴ ꦪꦸꦠ꧀ꦠꦁ ꦕꦺ, ꦄꦣꦶꦮꦴꦱꦺꦡ. ꦤꦺꦴ ꦕꦺ, ꦩꦴ ꦄꦣꦶꦮꦴꦱꦪꦶꦠ꧀ꦡꦴ’’ꦠꦶ. ꦱꦠ꧀ꦡꦴ ‘‘ꦏꦶꦁ ꦤꦸ ꦑꦺꦴ ꦱꦺꦴ ꦄꦩ꧀ꦲꦴꦏꦁ ꦏꦴꦠꦸ ꦏꦴꦩꦺꦴ’’ꦠꦶ ꦄꦴꦮꦗ꧀ꦗꦺꦠ꧀ꦮꦴ ꦄꦢ꧀ꦢꦱ ‘‘ꦢ꧀ꦮꦶꦤ꧀ꦤꦁ ꦒꦺꦲꦴꦤꦁ ꦄꦤ꧀ꦠꦫꦺ ꦩꦲꦤ꧀ꦠꦁ ꦄꦴꦮꦴꦛꦁ ꦑꦟꦴꦥꦺꦠ꧀ꦮꦴ ꦄꦱꦷꦠꦶꦱꦏꦛꦩꦠ꧀ꦠꦴꦤꦶ ꦑꦢꦶꦫꦢꦴꦫꦹꦤꦶ ꦄꦴꦲꦫꦴꦥꦺꦠ꧀ꦮꦴ ꦥꦹꦫꦴꦥꦺꦠ꧀ꦮꦴ ꦄꦒ꧀ꦒꦶꦁ ꦢꦠ꧀ꦮꦴ ꦄꦩ꧀ꦲꦺ ꦄꦔ꧀ꦒꦴꦫꦄꦴꦮꦴꦛꦺ ꦥꦴꦠꦺꦠ꧀ꦮꦴ ꦤꦶꦒ꧀ꦒꦟ꧀ꦲꦶꦠꦸꦏꦴꦩꦺꦴ’’ꦠꦶ. ꦥꦸꦤ ꦄꦴꦮꦗ꧀ꦗꦺꦱꦶ – ‘‘ꦏꦶꦁ ꦤꦸ ꦑꦺꦴ ꦠꦠ꧀ꦡ ꦒꦠꦥꦕ꧀ꦕꦪꦴ ꦄꦠ꧀ꦡꦺꦴ ꦄꦠ꧀ꦡꦶ, ꦤꦠ꧀ꦡꦷ’’ꦠꦶ. ꦠꦠꦺꦴ ꦆꦢꦁ ꦄꦢ꧀ꦢꦱ – ‘‘ꦄꦲꦁ ꦄꦔ꧀ꦒꦴꦫꦄꦴꦮꦴꦛꦺ ꦥꦴꦢꦁ ꦥꦱꦴꦫꦺꦱ꧀ꦱꦴꦩꦶ, ꦠꦁ ꦥꦛꦶꦕ꧀ꦖꦴꦢꦺꦠ꧀ꦮꦴ ꦜꦥꦶꦠꦏꦶꦭꦚ꧀ꦗꦁ ꦄꦤ꧀ꦠꦫꦣꦴꦪꦶꦱ꧀ꦱꦠꦶ, ꦄꦔ꧀ꦒꦴꦫꦏꦴꦱꦸꦁ ꦨꦶꦤ꧀ꦢꦶꦠ꧀ꦮꦴ ꦕꦏ꧀ꦏꦩꦠ꧀ꦠꦁ ꦩꦲꦴꦥꦢꦸꦩꦁ ꦈꦛ꧀ꦜꦲꦶꦱ꧀ꦱꦠꦶ, ꦄꦡꦴꦲꦁ ꦥꦢꦸꦩꦏꦟ꧀ꦟꦶꦏꦴ ꦄꦏ꧀ꦏꦩꦤ꧀ꦠꦺꦴ ꦄꦴꦱꦤꦺ ꦤꦶꦱꦷꦢꦶꦱ꧀ꦱꦴꦩꦶ, ꦥꦚ꧀ꦕꦱꦠꦴ ꦨꦶꦏ꧀ꦑꦹꦥꦶ ꦠꦡꦺꦮ ꦒꦤ꧀ꦠ꧀ꦮꦴ ꦤꦶꦱꦷꦢꦶꦱ꧀ꦱꦤ꧀ꦠꦶ, ꦩꦲꦴꦗꦤꦺꦴ ꦱꦤ꧀ꦤꦶꦥꦠꦶꦱ꧀ꦱꦠꦶ, ꦄꦲꦁ ꦠꦱ꧀ꦩꦶꦁ ꦱꦩꦴꦒꦩꦺ ꦢ꧀ꦮꦷꦲꦶ ꦒꦴꦡꦴꦲꦶ ꦄꦤꦸꦩꦺꦴꦢꦤꦁ ꦏꦫꦶꦱ꧀ꦱꦴꦩꦶ, ꦄꦤꦸꦩꦺꦴꦢꦤꦥꦫꦶꦪꦺꦴꦱꦴꦤꦺ ꦕꦠꦸꦫꦴꦱꦷꦠꦶꦪꦴ ꦥꦴꦟꦱꦲꦱ꧀ꦱꦴꦤꦁ ꦣꦩ꧀ꦩꦴꦨꦶꦱꦩꦪꦺꦴ ꦨꦮꦶꦱ꧀ꦱꦠꦶ, ꦱꦶꦫꦶꦒꦸꦠ꧀ꦠꦺꦴ ꦕ ꦒꦫꦲꦢꦶꦤ꧀ꦤꦺꦴ ꦕ ꦱꦺꦴꦠꦴꦥꦤ꧀ꦤꦴ ꦨꦮꦶꦱ꧀ꦱꦤ꧀ꦠꦶ, ꦄꦠ꧀ꦠꦤꦺꦴ ꦕ ꦣꦤꦫꦴꦱꦶꦁ ꦱꦴꦱꦤꦺ ꦮꦶꦏꦶꦫꦶꦱ꧀ꦱꦤ꧀ꦠꦶ, ꦆꦩꦁ ꦏꦸꦭꦥꦸꦠ꧀ꦠꦁ ꦤꦶꦱ꧀ꦱꦴꦪ ꦩꦪꦴ ꦒꦤ꧀ꦠꦸꦁ ꦮꦛ꧀ꦛꦠꦷ’’ꦠꦶ ꦨꦶꦏ꧀ꦑꦁ ꦄꦣꦶꦮꦴꦱꦺꦱꦶ.

ꦱꦶꦫꦶꦒꦸꦠ꧀ꦠꦺꦴ ꦒꦤ꧀ꦠ꧀ꦮꦴ ꦱꦠ꧀ꦡꦸ ꦄꦣꦶꦮꦴꦱꦤꦁ ꦒꦫꦲꦢꦶꦤ꧀ꦤꦱ꧀ꦱ ꦄꦴꦫꦺꦴꦕꦺꦠ꧀ꦮꦴ ‘‘ꦭꦺꦴꦏꦗꦺꦛ꧀ꦜꦱ꧀ꦱ ꦱꦏ꧀ꦏꦴꦫꦁ ꦏꦫꦺꦴꦲꦷ’’ꦠꦶ ꦄꦴꦲ. ꦒꦫꦲꦢꦶꦤ꧀ꦤꦺꦴ ‘‘ꦆꦢꦴꦤꦶꦱ꧀ꦱ ꦏꦠ꧀ꦠꦧ꧀ꦧꦪꦸꦠ꧀ꦠꦏꦁ ꦗꦴꦤꦶꦱ꧀ꦱꦴꦩꦷ’’ꦠꦶ ꦢ꧀ꦮꦶꦤ꧀ꦤꦁ ꦒꦺꦲꦴꦤꦁ ꦄꦤ꧀ꦠꦫꦺ ꦩꦲꦤ꧀ꦠꦁ ꦄꦴꦮꦴꦛꦁ ꦑꦟꦴꦥꦺꦠ꧀ꦮꦴ ꦄꦱꦷꦠꦶꦱꦏꦛꦩꦠ꧀ꦠꦴꦤꦶ ꦑꦢꦶꦫꦢꦴꦫꦹꦤꦶ ꦄꦴꦲꦫꦴꦥꦺꦠ꧀ꦮꦴ ꦥꦹꦫꦴꦥꦺꦠ꧀ꦮꦴ ꦄꦒ꧀ꦒꦶꦁ ꦢꦠ꧀ꦮꦴ ꦑꦢꦶꦫꦔ꧀ꦒꦴꦫꦫꦴꦱꦷꦤꦁ ꦪꦺꦴꦗꦴꦥꦺꦠ꧀ꦮꦴ ꦱꦧ꧀ꦧꦫꦠ꧀ꦠꦶꦁ ꦣꦩꦴꦥꦺꦠ꧀ꦮꦴ ꦑꦢꦶꦫꦔ꧀ꦒꦴꦫꦫꦴꦱꦶꦁ ꦏꦴꦫꦴꦥꦺꦠ꧀ꦮꦴ ꦄꦴꦮꦴꦛꦩꦠ꧀ꦡꦏꦺ ꦫꦸꦏ꧀ꦑꦥꦢꦫꦴꦤꦶ ꦜꦥꦴꦥꦺꦠ꧀ꦮꦴ ꦏꦶꦭꦚ꧀ꦗꦺꦤ ꦥꦛꦶꦕ꧀ꦖꦴꦢꦺꦠ꧀ꦮꦴ ꦒꦺꦴꦩꦪꦺꦤ ꦭꦶꦩ꧀ꦥꦴꦥꦺꦠ꧀ꦮꦴ ꦌꦏꦺꦤ ꦥꦱ꧀ꦱꦺꦤ ꦢꦸꦧ꧀ꦧꦭꦢꦟ꧀ꦝꦏꦺ ꦄꦠ꧀ꦡꦫꦶꦠ꧀ꦮꦴ ꦒꦩꦤꦩꦒ꧀ꦒꦁ ꦏꦴꦫꦺꦱꦶ, ‘‘ꦌꦮꦁ ꦄꦏ꧀ꦏꦤ꧀ꦠꦄꦏ꧀ꦏꦤ꧀ꦠꦏꦴꦭꦺ ꦢꦟ꧀ꦝꦏꦺꦱꦸ ꦨꦒ꧀ꦒꦺꦱꦸ ꦥꦫꦶꦮꦛ꧀ꦛꦺꦠ꧀ꦮꦴ ꦄꦔ꧀ꦒꦴꦫꦏꦴꦱꦸꦪꦁ ꦥꦠꦶꦱ꧀ꦱꦤ꧀ꦠꦷ’’ꦠꦶ ꦩꦚ꧀ꦚꦩꦴꦤꦺꦴ ꦒꦺꦲꦥꦕ꧀ꦖꦴꦨꦴꦒꦺ ꦱꦶꦫꦶꦒꦸꦠ꧀ꦠꦺꦤ ꦜꦥꦶꦠꦤꦶꦪꦴꦩꦺꦤꦺꦮ ꦕꦴꦛꦶꦪꦺꦴ ꦜꦥꦴꦥꦺꦱꦶ, ꦄꦴꦱꦤꦴꦤꦶꦥꦶ ꦠꦡꦺꦮ ꦥꦚ꧀ꦚꦴꦥꦺꦱꦶ. ꦱꦶꦫꦶꦒꦸꦠ꧀ꦠꦺꦴ ꦥꦴꦠꦺꦴꦮ ꦠꦱ꧀ꦱ ꦒꦺꦲꦁ ꦒꦤ꧀ꦠ꧀ꦮꦴ ‘‘ꦏꦠꦺꦴ ꦠꦺ, ꦱꦩ꧀ꦩ, ꦱꦏ꧀ꦏꦴꦫꦺꦴ’’ꦠꦶ ꦄꦴꦲ. ‘‘ꦄꦴꦩ, ꦱꦩ꧀ꦩꦴ’’ꦠꦶ. ‘‘ꦏꦲꦁ ꦥꦤ ꦱꦺꦴ’’ꦠꦶ? ‘‘ꦌꦲꦶ, ꦥꦱ꧀ꦱꦴꦩꦴ’’ꦠꦶ ꦱꦧ꧀ꦧꦁ ꦱꦶꦫꦶꦒꦸꦠ꧀ꦠꦺꦤ ꦢꦱ꧀ꦱꦶꦠꦤꦪꦺꦤꦺꦮ ꦢꦱ꧀ꦱꦺꦱꦶ. ꦱꦶꦫꦶꦒꦸꦠ꧀ꦠꦺꦴ ‘‘ꦱꦴꦣꦸ, ꦱꦩ꧀ꦩꦴ’’ꦠꦶ ꦄꦴꦲ. ꦩꦲꦴꦗꦤꦺꦴ ꦱꦤ꧀ꦤꦶꦥꦠꦶ. ꦩꦶꦕ꧀ꦖꦴꦢꦶꦛ꧀ꦜꦶꦏꦺꦤ ꦲꦶ ꦤꦶꦩꦤ꧀ꦠꦶꦠꦺ ꦩꦲꦤ꧀ꦠꦺꦴ ꦱꦤ꧀ꦤꦶꦥꦴꦠꦺꦴ ꦄꦲꦺꦴꦱꦶ. ꦩꦶꦕ꧀ꦖꦴꦢꦶꦛ꧀ꦜꦶꦏꦴꦥꦶ ‘‘ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦮꦶꦥ꧀ꦥꦏꦴꦫꦁ ꦥꦱ꧀ꦱꦶꦱ꧀ꦱꦴꦩꦴ’’ꦠꦶ ꦱꦤ꧀ꦤꦶꦥꦠꦤ꧀ꦠꦶ, ꦱꦩ꧀ꦩꦴꦢꦶꦛ꧀ꦜꦶꦏꦴꦥꦶ ‘‘ꦄꦗ꧀ꦗ ꦱꦠ꧀ꦡꦴ ꦩꦲꦴꦣꦩ꧀ꦩꦢꦺꦱꦤꦁ ꦢꦺꦱꦺꦱ꧀ꦱꦠꦶ, ꦧꦸꦢ꧀ꦣꦮꦶꦱꦪꦁ ꦧꦸꦢ꧀ꦣꦭꦷꦭꦁ ꦈꦥꦣꦴꦫꦺꦱ꧀ꦱꦴꦩꦴ’’ꦠꦶ ꦱꦤ꧀ꦤꦶꦥꦠꦤ꧀ꦠꦶ.

ꦥꦸꦤꦢꦶꦮꦱꦺ ꦱꦠ꧀ꦡꦴ ꦥꦚ꧀ꦕꦲꦶ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦒꦫꦲꦢꦶꦤ꧀ꦤꦱ꧀ꦱ ꦒꦺꦲꦢ꧀ꦮꦴꦫꦁ ꦄꦒꦩꦴꦱꦶ. ꦱꦺꦴ ꦒꦺꦲꦴ ꦤꦶꦏ꧀ꦑꦩꦶꦠ꧀ꦮꦴ ꦥꦚ꧀ꦕꦥꦠꦶꦛ꧀ꦜꦶꦠꦺꦤ ꦮꦤ꧀ꦢꦶꦠ꧀ꦮꦴ ꦥꦸꦫꦠꦺꦴ ꦄꦚ꧀ꦗꦭꦶꦁ ꦥꦒ꧀ꦒꦪ꧀ꦲ ꦜꦶꦠꦺꦴ ꦕꦶꦤ꧀ꦠꦺꦱꦶ – ‘‘ꦨꦤ꧀ꦠꦺ, ‘ꦠꦸꦩ꧀ꦲꦺ ꦏꦶꦫ ꦄꦠꦷꦠꦴꦢꦶꦨꦺꦢꦁ ꦱꦧ꧀ꦧꦁ ꦗꦴꦤꦴꦡ, ꦱꦠ꧀ꦠꦴꦤꦁ ꦱꦺꦴꦭ꦳ꦱꦲꦴꦏꦴꦫꦺꦲꦶ ꦕꦶꦠ꧀ꦠꦁ ꦥꦫꦶꦕ꧀ꦖꦶꦤ꧀ꦢꦡꦴ’ꦠꦶ ꦌꦮꦁ ꦠꦸꦩ꧀ꦲꦴꦏꦁ ꦈꦥꦛ꧀ꦜꦴꦏꦺꦤ ꦩꦪ꧀ꦲꦁ ꦏꦡꦶꦠꦁ. ꦱꦕꦺ ꦗꦴꦤꦴꦡ, ꦩꦪ꧀ꦲꦁ ꦒꦺꦲꦁ ꦩꦴ ꦥꦮꦶꦱꦶꦠ꧀ꦡ. ꦥꦮꦶꦛ꧀ꦜꦴꦤꦚ꧀ꦲꦶ ꦮꦺꦴ ꦤꦺꦮ ꦪꦴꦒꦸ ꦄꦠ꧀ꦡꦶ, ꦤ ꦨꦠ꧀ꦠꦴꦢꦷꦤꦶ, ꦱꦧ꧀ꦧꦺ ꦑꦺꦴ ꦥꦤ ꦠꦸꦩ꧀ꦲꦺ ꦄꦔ꧀ꦒꦴꦫꦏꦴꦱꦸꦪꦁ ꦥꦴꦠꦺꦠ꧀ꦮꦴ ꦤꦶꦒ꧀ꦒꦟ꧀ꦲꦶꦱ꧀ꦱꦴꦩꦷ’’ꦠꦶ. ꦌꦮꦁ ꦕꦶꦤ꧀ꦠꦺꦠ꧀ꦮꦴ ꦱꦠ꧀ꦡꦸ ꦥꦠ꧀ꦠꦁ ꦒꦲꦺꦠ꧀ꦮꦴ ‘‘ꦆꦠꦺꦴ ꦌꦡ ꦨꦒꦮꦴ’’ꦠꦶ ꦮꦠ꧀ꦮꦴ, ‘‘ꦨꦤ꧀ꦠꦺ, ꦄꦩ꧀ꦲꦴꦏꦁ ꦒꦺꦲꦁ ꦄꦴꦒꦠꦴꦤꦁ ꦮꦠ꧀ꦠꦁ ꦚꦠ꧀ꦮꦴ ꦄꦴꦒꦤ꧀ꦠꦸꦁ ꦮꦛ꧀ꦛꦠꦷ’’ꦠꦶ ꦄꦴꦲ. ‘‘ꦏꦶꦁ ꦏꦴꦠꦸꦁ ꦮꦛ꧀ꦛꦠꦶ, ꦄꦴꦮꦸꦱꦺꦴ’’ꦠꦶ? ‘‘ꦌꦏꦺꦏꦱ꧀ꦱ ꦥꦮꦶꦱꦶꦠ꧀ꦮꦴ ꦥꦸꦫꦠꦺꦴ ꦒꦤ꧀ꦠ꧀ꦮꦴ ꦤꦶꦱꦶꦤ꧀ꦤꦏꦴꦭꦺ ꦥꦕ꧀ꦖꦴ ꦄꦚ꧀ꦚꦺꦤ ꦄꦴꦒꦤ꧀ꦠꦸꦁ ꦮꦛ꧀ꦛꦠꦷ’’ꦠꦶ. ꦌꦮꦁ ꦏꦶꦫꦱ꧀ꦱ ꦄꦲꦺꦴꦱꦶ – ‘‘ꦥꦸꦫꦠꦺꦴ ꦒꦕ꧀ꦖꦤ꧀ꦠꦁ ꦄꦔ꧀ꦒꦴꦫꦏꦴꦱꦸꦪꦁ ꦥꦠꦶꦠꦁ ꦢꦶꦱ꧀ꦮꦴ ꦄꦮꦱꦺꦱꦴ ꦤ ꦄꦴꦒꦕ꧀ꦖꦶꦱ꧀ꦱꦤ꧀ꦠꦶ, ꦌꦏꦺꦏꦩꦺꦮ ꦥꦴꦠꦺꦠ꧀ꦮꦴ ꦤꦶꦒ꧀ꦒꦟ꧀ꦲꦶꦱ꧀ꦱꦴꦩꦷ’’ꦠꦶ. ꦱꦠ꧀ꦡꦴ ‘‘ꦱꦴꦣꦹ’’ꦠꦶ ꦮꦠ꧀ꦮꦴ ꦌꦏꦏꦺꦴꦮ ꦥꦴꦪꦴꦱꦶ. ꦒꦫꦲꦢꦶꦤ꧀ꦤꦺꦴ ꦄꦔ꧀ꦒꦴꦫꦏꦴꦱꦸꦁ ꦥꦠ꧀ꦮꦴ ꦄꦥꦱꦏ꧀ꦏꦶꦠ꧀ꦮꦴ ꦜꦶꦠꦺꦴ ‘‘ꦥꦸꦫꦠꦺꦴ ꦪꦴꦡ, ꦨꦤ꧀ꦠꦺ’’ꦠꦶ ꦄꦴꦲ. ꦄꦡ ꦱꦠ꧀ꦡꦴ ꦄꦔ꧀ꦒꦴꦫꦏꦴꦱꦸꦩꦠ꧀ꦡꦏꦺ ꦥꦴꦢꦁ ꦥꦱꦴꦫꦺꦱꦶ, ꦏꦶꦭꦚ꧀ꦗꦁ ꦄꦤ꧀ꦠꦫꦣꦴꦪꦶ, ꦄꦔ꧀ꦒꦴꦫꦏꦴꦱꦸꦁ ꦨꦶꦤ꧀ꦢꦶꦠ꧀ꦮꦴ ꦕꦏ꧀ꦏꦩꦠ꧀ꦠꦴꦤꦶ ꦥꦢꦸꦩꦴꦤꦶ ꦈꦛ꧀ꦜꦲꦶꦁꦱꦸ. ꦱꦠ꧀ꦡꦴ ꦥꦢꦸꦩꦏꦟ꧀ꦟꦶꦏꦴ ꦄꦏ꧀ꦏꦩꦤ꧀ꦠꦺꦴ ꦒꦤ꧀ꦠ꧀ꦮꦴ ꦥꦚ꧀ꦚꦠ꧀ꦠꦺ ꦧꦸꦢ꧀ꦣꦴꦱꦤꦺ ꦤꦶꦱꦷꦢꦶ, ꦨꦶꦏ꧀ꦑꦹꦥꦶ ꦠꦡꦺꦮ ꦒꦤ꧀ꦠ꧀ꦮꦴ ꦤꦶꦱꦷꦢꦶꦁꦱꦸ. ꦒꦫꦲꦢꦶꦤ꧀ꦤꦱ꧀ꦱ ꦏꦴꦪꦠꦺꦴ ꦝꦴꦲꦺꦴ ꦈꦛ꧀ꦜꦲꦶ.

ꦱꦺꦴ ꦮꦺꦒꦺꦤ ꦒꦤ꧀ꦠ꧀ꦮꦴ ꦱꦶꦫꦶꦒꦸꦠ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ, ‘‘ꦱꦴꦩꦶ, ꦩꦺ ꦠꦴꦟꦁ ꦲꦺꦴꦲꦷ’’ꦠꦶ ꦄꦴꦲ. ‘‘ꦏꦶꦁ ꦌꦠ’’ꦤ꧀ꦠꦶ? ‘‘ꦥꦚ꧀ꦕꦤ꧀ꦤꦁ ꦨꦶꦏ꧀ꦑꦸꦱꦠꦴꦤꦁ ꦒꦺꦲꦺ ꦪꦴꦒꦸ ꦮꦴ ꦨꦠ꧀ꦠꦴꦢꦷꦤꦶ ꦮꦴ ꦤꦠ꧀ꦡꦶ, ꦏꦶꦁ ꦤꦸ ꦑꦺꦴ ꦏꦫꦺꦴꦩꦷ’’ꦠꦶ? ‘‘ꦏꦶꦁ ꦥꦤ ꦠꦪꦴ ꦏꦠ’’ꦤ꧀ꦠꦶ ꦄꦴꦲ. ꦄꦲꦁ ꦢ꧀ꦮꦶꦤ꧀ꦤꦁ ꦒꦺꦲꦴꦤꦁ ꦄꦤ꧀ꦠꦫꦺ ꦩꦲꦤ꧀ꦠꦁ ꦄꦴꦮꦴꦛꦁ ꦄꦔ꧀ꦒꦴꦫꦱ꧀ꦱ ꦥꦹꦫꦁ ꦏꦴꦫꦺꦱꦶꦁ – ‘‘ꦠꦠ꧀ꦡ ꦥꦴꦠꦺꦠ꧀ꦮꦴ ꦤꦶꦒ꧀ꦒꦟ꧀ꦲꦶꦱ꧀ꦱꦴꦩꦷ’’ꦠꦶ. ‘‘ꦄꦡ ꦤꦁ ꦨꦶꦤ꧀ꦢꦶꦠ꧀ꦮꦴ ꦩꦲꦴꦥꦢꦸꦩꦴꦤꦶ ꦈꦛ꧀ꦜꦲꦶꦁꦱꦸ. ꦱꦧ꧀ꦧꦺ ꦥꦢꦸꦩꦏꦟ꧀ꦟꦶꦏꦴ ꦄꦏ꧀ꦏꦩꦶꦠ꧀ꦮꦴ ꦒꦤ꧀ꦠ꧀ꦮꦴ ꦥꦚ꧀ꦚꦠ꧀ꦠꦴꦱꦤꦺꦱꦸ ꦤꦶꦱꦶꦤ꧀ꦤꦴ, ꦆꦢꦴꦤꦶ ꦏꦶꦁ ꦏꦫꦺꦴꦩꦶ, ꦱꦴꦩꦷ’’ꦠꦶ? ꦤꦤꦸ ꦠ꧀ꦮꦁ ꦆꦢꦴꦤꦺꦮ ꦩꦪ꧀ꦲꦁ ‘‘‘ꦌꦠ꧀ꦠꦶꦏꦴ ꦕꦴꦛꦶꦪꦺꦴ, ꦌꦠ꧀ꦠꦶꦏꦴ ꦪꦴꦒꦸ, ꦌꦠ꧀ꦠꦏꦴꦤꦶ ꦱꦠ꧀ꦠꦴꦢꦷꦤꦷ’ꦠꦶ ꦢꦱ꧀ꦱꦺꦱꦷ’’ꦠꦶ. ‘‘ꦩꦸꦱꦴ ꦠꦁ, ꦱꦴꦩꦶ, ꦠꦸꦕ꧀ꦖꦴꦮ ꦕꦴꦛꦶꦪꦺꦴ’’ꦠꦶ. ꦲꦺꦴꦠꦸ, ‘‘ꦒꦕ꧀ꦖ, ꦠꦴꦱꦸ ꦕꦴꦛꦷꦱꦸ ꦪꦴꦒꦸꦄꦴꦢꦷꦤꦶ ꦎꦭꦺꦴꦏꦺꦲꦷ’’ꦠꦶ. ꦠꦁ ꦑꦟꦚ꧀ꦚꦺꦮ ꦠꦺꦤ ꦪꦴꦱꦸ ꦕꦴꦛꦷꦱꦸ ‘‘ꦪꦴꦒꦹ’’ꦠꦶ ꦮꦸꦠ꧀ꦠꦁ, ꦠꦴ ꦪꦴꦒꦸꦪꦴ ꦥꦹꦫꦪꦶꦁꦱꦸ, ꦪꦴꦱꦸ ‘‘ꦨꦠ꧀ꦠꦴꦢꦷꦤꦷ’’ꦠꦶ ꦮꦸꦠ꧀ꦠꦁ, ꦠꦴ ꦨꦠ꧀ꦠꦴꦢꦷꦤꦁ ꦥꦫꦶꦥꦸꦟ꧀ꦟꦴꦮ ꦄꦲꦺꦱꦸꦁ. ꦠꦁ ꦱꦩ꧀ꦥꦠ꧀ꦠꦶꦁ ꦢꦶꦱ꧀ꦮꦴꦮ ꦒꦫꦲꦢꦶꦤ꧀ꦤꦱ꧀ꦱ ꦱꦫꦷꦫꦁ ꦥꦷꦠꦶꦥꦴꦩꦺꦴꦗ꧀ꦗꦺꦤ ꦥꦫꦶꦥꦹꦫꦶꦠꦁ, ꦕꦶꦠ꧀ꦠꦁ ꦥꦱꦤ꧀ꦤꦁ. ꦱꦺꦴ ꦱꦏ꧀ꦏꦕ꧀ꦕꦁ ꦧꦸꦢ꧀ꦣꦥ꧀ꦥꦩꦸꦑꦁ ꦨꦶꦏ꧀ꦑꦸꦱꦔ꧀ꦓꦁ ꦥꦫꦶꦮꦶꦱꦶꦠ꧀ꦮꦴ ꦏꦠꦨꦠ꧀ꦠꦏꦶꦕ꧀ꦕꦱ꧀ꦱ ꦱꦠ꧀ꦡꦸꦤꦺꦴ ꦄꦤꦸꦩꦺꦴꦢꦤꦁ ꦏꦴꦫꦺꦠꦸꦏꦴꦩꦺꦴ ꦥꦠ꧀ꦠꦁ ꦒꦟ꧀ꦲꦶ. ꦱꦠ꧀ꦡꦴ ꦄꦤꦸꦩꦺꦴꦢꦤꦁ ꦏꦫꦺꦴꦤ꧀ꦠꦺꦴ ‘‘ꦆꦩꦺ ꦱꦠ꧀ꦠꦴ ꦥꦚ꧀ꦚꦴꦕꦏ꧀ꦑꦸꦤꦺꦴ ꦄꦨꦴꦮꦺꦤꦺꦮ ꦩꦩ ꦱꦴꦮꦏꦴꦤꦁ ꦧꦸꦢ꧀ꦣꦱꦴꦱꦤꦱ꧀ꦱ ꦒꦸꦟꦁ ꦤ ꦗꦴꦤꦤ꧀ꦠꦶ. ꦥꦚ꧀ꦚꦴꦕꦏ꧀ꦑꦸꦮꦶꦫꦲꦶꦠꦴ ꦲꦶ ꦄꦤ꧀ꦣꦴ ꦤꦴꦩ, ꦥꦚ꧀ꦚꦮꦤ꧀ꦠꦺꦴ ꦱꦕꦏ꧀ꦑꦸꦏꦴ ꦤꦴꦩꦴ’’ꦠꦶ ꦮꦠ꧀ꦮꦴ ꦆꦩꦴ ꦒꦴꦡꦴ ꦄꦨꦴꦱꦶ –

꧕꧘. ‘‘ꦪꦡꦴ ꦱꦔ꧀ꦏꦴꦫꦣꦴꦤꦱ꧀ꦩꦶꦁ, ꦈꦗ꧀ꦙꦶꦠꦱ꧀ꦩꦶꦁ ꦩꦲꦴꦥꦡꦺ;

ꦥꦢꦸꦩꦁ ꦠꦠ꧀ꦡ ꦗꦴꦪꦺꦡ, ꦱꦸꦕꦶꦒꦤ꧀ꦣꦁ ꦩꦤꦺꦴꦫꦩꦁ.

꧕꧙. ‘‘ꦌꦮꦁ ꦱꦔ꧀ꦏꦴꦫꦨꦹꦠꦺꦱꦸ, ꦄꦤ꧀ꦣꦨꦹꦠꦺ ꦥꦸꦡꦸꦗ꧀ꦗꦤꦺ;

ꦄꦠꦶꦫꦺꦴꦕꦠꦶ ꦥꦚ꧀ꦚꦴꦪ, ꦱꦩ꧀ꦩꦴꦱꦩ꧀ꦧꦸꦢ꧀ꦣꦱꦴꦮꦏꦺꦴ’’ꦠꦶ.

ꦠꦠ꧀ꦡ ꦱꦔ꧀ꦏꦴꦫꦣꦴꦤꦱ꧀ꦩꦶꦤ꧀ꦠꦶ ꦱꦔ꧀ꦏꦴꦫꦜꦴꦤꦱ꧀ꦩꦶꦁ, ꦏꦕꦮꦫꦫꦴꦱꦶꦩ꧀ꦲꦷꦠꦶ ꦄꦠ꧀ꦡꦺꦴ. ꦈꦗ꧀ꦙꦶꦠꦱ꧀ꦩꦶꦁ ꦩꦲꦴꦥꦡꦺꦠꦶ ꦩꦲꦴꦩꦒ꧀ꦒꦺ ꦖꦝ꧀ꦝꦶꦠꦱ꧀ꦩꦶꦁ. ꦱꦸꦕꦶꦒꦤ꧀ꦣꦤ꧀ꦠꦶ ꦱꦸꦫꦨꦶꦒꦤ꧀ꦣꦁ. ꦩꦤꦺꦴ ꦌꦠ꧀ꦡ ꦫꦩꦠꦷꦠꦶ ꦩꦤꦺꦴꦫꦩꦁ. ꦱꦔ꧀ꦏꦴꦫꦨꦹꦠꦺꦱꦹꦠꦶ ꦱꦔ꧀ꦏꦴꦫꦩꦶꦮ ꦨꦹꦠꦺꦱꦸ. ꦥꦸꦡꦸꦗ꧀ꦗꦤꦺꦠꦶ ꦥꦸꦡꦹꦤꦁ ꦏꦶꦭꦺꦱꦴꦤꦁ ꦗꦤꦤꦠꦺꦴ ꦌꦮꦁꦭꦢ꧀ꦣꦤꦴꦩꦺ ꦭꦺꦴꦏꦶꦪꦩꦲꦴꦗꦤꦺ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦪꦡꦴ ꦤꦴꦩ ꦩꦲꦴꦥꦡꦺ ꦖꦝ꧀ꦝꦶꦠꦺ ꦱꦔ꧀ꦏꦴꦫꦫꦴꦱꦶꦩ꧀ꦲꦶ ꦄꦱꦸꦕꦶꦗꦺꦒꦸꦕ꧀ꦖꦶꦪꦥꦛꦶꦏꦹꦭꦺꦥꦶ ꦱꦸꦕꦶꦒꦤ꧀ꦣꦁ ꦥꦢꦸꦩꦁ ꦗꦴꦪꦺꦡ, ꦠꦁ ꦫꦴꦗꦫꦴꦗꦩꦲꦴꦩꦠ꧀ꦠꦴꦢꦷꦤꦁ ꦩꦤꦺꦴꦫꦩꦁ ꦥꦶꦪꦁ ꦩꦤꦴꦥꦁ ꦈꦥꦫꦶꦩꦠ꧀ꦡꦏꦺ ꦥꦠꦶꦛ꧀ꦜꦴꦤꦴꦫꦲꦩꦺꦮ ꦨꦮꦺꦪ꧀ꦪ, ꦌꦮꦩꦺꦮ ꦱꦔ꧀ꦏꦴꦫꦨꦹꦠꦺꦱꦸꦥꦶ ꦥꦸꦡꦸꦗ꧀ꦗꦤꦺꦱꦸ ꦗꦴꦠꦺꦴ ꦤꦶꦥ꧀ꦥꦚ꧀ꦚꦱ꧀ꦱ ꦩꦲꦴꦗꦤꦱ꧀ꦱ ꦄꦕꦏ꧀ꦑꦸꦏꦱ꧀ꦱ ꦄꦤ꧀ꦠꦫꦺ ꦤꦶꦧ꧀ꦧꦠ꧀ꦠꦺꦴꦥꦶ ꦄꦠ꧀ꦠꦤꦺꦴ ꦥꦚ꧀ꦚꦴꦧꦭꦺꦤ ꦏꦴꦩꦺꦱꦸ ꦄꦴꦢꦷꦤꦮꦁ, ꦤꦺꦏ꧀ꦑꦩ꧀ꦩꦺ ꦕ ꦄꦴꦤꦶꦱꦁꦱꦁ ꦢꦶꦱ꧀ꦮꦴ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶꦠꦺꦴ ꦥꦧ꧀ꦧꦗ꧀ꦗꦴꦩꦠ꧀ꦠꦺꦤꦥꦶ, ꦏꦠꦺꦴ ꦈꦠ꧀ꦠꦫꦶꦁ ꦱꦷꦭꦱꦩꦴꦣꦶꦥꦚ꧀ꦚꦴꦮꦶꦩꦸꦠ꧀ꦠꦶꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦴꦤꦶ ꦄꦴꦫꦴꦣꦺꦠ꧀ꦮꦴꦥꦶ ꦄꦠꦶꦫꦺꦴꦕꦠꦶ. ꦱꦩ꧀ꦩꦴꦱꦩ꧀ꦧꦸꦢ꧀ꦣꦱꦴꦮꦏꦺꦴ ꦲꦶ ꦑꦷꦟꦴꦱꦮꦺꦴ ꦨꦶꦏ꧀ꦑꦸ ꦄꦤ꧀ꦣꦨꦹꦠꦺ ꦥꦸꦡꦸꦗ꧀ꦗꦤꦺ ꦄꦠꦶꦏ꧀ꦏꦩꦶꦠ꧀ꦮꦴ ꦫꦺꦴꦕꦠꦶ ꦮꦶꦫꦺꦴꦕꦠꦶ ꦱꦺꦴꦨꦠꦷꦠꦶ.

ꦢꦺꦱꦤꦴꦮꦱꦴꦤꦺ ꦕꦠꦸꦫꦴꦱꦷꦠꦶꦪꦴ ꦥꦴꦟꦱꦲꦱ꧀ꦱꦴꦤꦁ ꦣꦩ꧀ꦩꦴꦨꦶꦱꦩꦪꦺꦴ ꦄꦲꦺꦴꦱꦶ. ꦒꦫꦲꦢꦶꦤ꧀ꦤꦺꦴ ꦕ ꦱꦶꦫꦶꦒꦸꦠ꧀ꦠꦺꦴ ꦕ ꦱꦺꦴꦠꦴꦥꦠ꧀ꦠꦶꦦꦭꦁ ꦥꦴꦥꦸꦟꦶꦁꦱꦸ. ꦠꦺ ꦱꦧ꧀ꦧꦁ ꦄꦠ꧀ꦠꦤꦺꦴ ꦣꦤꦁ ꦧꦸꦢ꧀ꦣꦱꦴꦱꦤꦺ ꦮꦶꦥ꧀ꦥꦏꦶꦫꦶꦁꦱꦸ. ꦱꦠ꧀ꦡꦴ ꦈꦛ꧀ꦜꦴꦪꦴꦱꦤꦴ ꦮꦶꦲꦴꦫꦩꦒꦩꦴꦱꦶ. ꦨꦶꦏ꧀ꦑꦹ ꦱꦴꦪꦤ꧀ꦲꦱꦩꦪꦺ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ – ‘‘ꦄꦲꦺꦴ ꦄꦕ꧀ꦖꦫꦶꦪꦴ ꦧꦸꦢ꧀ꦣꦒꦸꦟꦴ ꦤꦴꦩ, ꦠꦡꦴꦫꦹꦥꦁ ꦤꦴꦩ ꦑꦢꦶꦫꦔ꧀ꦒꦴꦫꦫꦴꦱꦶꦁ ꦨꦶꦤ꧀ꦢꦶꦠ꧀ꦮꦴ ꦥꦢꦸꦩꦴꦤꦶ ꦈꦛ꧀ꦜꦲꦶꦁꦱꦹ’’ꦠꦶ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ, ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ – ‘‘ꦄꦤꦕ꧀ꦖꦫꦶꦪꦁ, ꦨꦶꦏ꧀ꦑꦮꦺ, ꦪꦁ ꦩꦩ ꦌꦠꦫꦲꦶ ꦧꦸꦢ꧀ꦣꦨꦹꦠꦱ꧀ꦱ ꦄꦔ꧀ꦒꦴꦫꦫꦴꦱꦶꦩ꧀ꦲꦴ ꦥꦢꦸꦩꦴꦤꦶ ꦈꦛ꧀ꦜꦶꦠꦴꦤꦶ, ꦄꦥꦫꦶꦥꦏ꧀ꦏꦺ ꦚꦴꦟꦺ ꦮꦠ꧀ꦠꦩꦴꦤꦱ꧀ꦱ ꦧꦺꦴꦣꦶꦱꦠ꧀ꦠꦨꦹꦠꦱ꧀ꦱꦥꦶ ꦩꦺ ꦈꦛ꧀ꦜꦲꦶꦁꦱꦹ’’ꦠꦶ ꦮꦠ꧀ꦮꦴ, ‘‘ꦏꦢꦴ, ꦨꦤ꧀ꦠꦺ, ꦄꦴꦕꦶꦏ꧀ꦑꦡ ꦤꦺꦴ’’ꦠꦶ ꦪꦴꦕꦶꦠꦺꦴ ꦄꦠꦷꦠꦁ ꦄꦴꦲꦫꦶꦠ꧀ꦮꦴ –

‘‘ꦏꦴꦩꦁ ꦥꦠꦴꦩꦶ ꦤꦶꦫꦪꦁ, ꦈꦢ꧀ꦣꦁꦥꦴꦢꦺꦴ ꦄꦮꦁꦱꦶꦫꦺꦴ;

ꦤꦴꦤꦫꦶꦪꦁ ꦏꦫꦶꦱ꧀ꦱꦴꦩꦶ, ꦲꦤ꧀ꦢ ꦥꦶꦟ꧀ꦝꦁ ꦥꦛꦶꦒ꧀ꦒꦲꦴ’’ꦠꦶ. (ꦗꦴ. ꧑.꧑.꧔꧐) –

ꦆꦢꦁ ꦑꦢꦶꦫꦔ꧀ꦒꦴꦫꦗꦴꦠꦏꦁ ꦮꦶꦠ꧀ꦡꦴꦫꦺꦠ꧀ꦮꦴ ꦏꦡꦺꦱꦷꦠꦶ.

ꦒꦫꦲꦢꦶꦤ꧀ꦤꦮꦠ꧀ꦡꦸ ꦢ꧀ꦮꦴꦢꦱꦩꦁ.

ꦥꦸꦥ꧀ꦦꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦕꦠꦸꦠ꧀ꦡꦺꦴ ꦮꦒ꧀ꦒꦺꦴ.