꧓. ꦕꦶꦠ꧀ꦠꦮꦒ꧀ꦒꦺꦴ

꧑. ꦩꦺꦓꦶꦪꦠ꧀ꦡꦺꦫꦮꦠ꧀ꦡꦸ

ꦦꦤ꧀ꦢꦤꦁ ꦕꦥꦭꦁ ꦕꦶꦠ꧀ꦠꦤ꧀ꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦕꦴꦭꦶꦏꦴꦪ ꦥꦧ꧀ꦧꦠꦺ ꦮꦶꦲꦫꦤ꧀ꦠꦺꦴ ꦄꦴꦪꦱ꧀ꦩꦤ꧀ꦠꦁ ꦩꦺꦓꦶꦪꦁ ꦄꦴꦫꦧ꧀ꦨ ꦏꦡꦺꦱꦶ.

ꦠꦱ꧀ꦱ ꦮꦠ꧀ꦡꦸꦁ ꦮꦶꦨꦴꦮꦤꦠ꧀ꦡꦁ ꦱꦧ꧀ꦧꦁ ꦩꦺꦓꦶꦪꦱꦸꦠ꧀ꦠꦤ꧀ꦠꦁ (ꦈꦢꦴ. ꧓꧑) ꦮꦶꦠ꧀ꦡꦴꦫꦺꦠꦧ꧀ꦧꦁ. ꦱꦠ꧀ꦡꦴ ꦥꦤ ꦠꦷꦲꦶ ꦮꦶꦠꦏ꧀ꦏꦺꦲꦶ ꦄꦤ꧀ꦮꦴꦱꦠ꧀ꦠꦠꦴꦪ ꦠꦱ꧀ꦩꦶꦁ ꦄꦩ꧀ꦧꦮꦤꦺ ꦥꦣꦴꦤꦁ ꦄꦤꦸꦪꦸꦚ꧀ꦗꦶꦠꦸꦁ ꦄꦱꦏ꧀ꦏꦸꦟꦶꦠ꧀ꦮꦴ ꦄꦴꦒꦠꦁ ꦩꦺꦓꦶꦪꦠ꧀ꦡꦺꦫꦁ ꦄꦴꦩꦤ꧀ꦠꦺꦠ꧀ꦮꦴ, ‘‘ꦄꦠꦶꦨꦴꦫꦶꦪꦁ ꦠꦺ, ꦩꦺꦓꦶꦪ, ꦏꦠꦁ ‘ꦄꦴꦒꦩꦺꦲꦶ ꦠꦴꦮ, ꦩꦺꦓꦶꦪ, ꦌꦏꦏꦺꦴꦩ꧀ꦲꦶ ꦪꦴꦮ ꦄꦚ꧀ꦚꦺꦴꦥꦶ ꦏꦺꦴꦕꦶ ꦨꦶꦏ꧀ꦑꦸ ꦄꦴꦒꦕ꧀ꦖꦠꦷ’ꦠꦶ ꦩꦁ ꦪꦴꦕꦤ꧀ꦠꦁ ꦌꦏꦏꦁ ꦥꦲꦴꦪ ꦒꦕ꧀ꦖꦤ꧀ꦠꦺꦤ ꦨꦶꦏ꧀ꦑꦸꦤꦴ ꦤꦴꦩ ꦌꦮꦁ ꦕꦶꦠ꧀ꦠꦮꦱꦶꦏꦺꦤ ꦨꦮꦶꦠꦸꦁ ꦤ ꦮꦛ꧀ꦛꦠꦶ, ꦕꦶꦠ꧀ꦠꦁ ꦤꦴꦩꦺꦠꦁ ꦭꦲꦸꦏꦁ, ꦠꦁ ꦄꦠ꧀ꦠꦤꦺꦴ ꦮꦱꦺ ꦮꦠ꧀ꦠꦺꦠꦸꦁ ꦮꦛ꧀ꦛꦠꦷ’’ꦠꦶ ꦮꦠ꧀ꦮꦴ ꦆꦩꦴ ꦢ꧀ꦮꦺ ꦒꦴꦡꦴ ꦄꦨꦴꦱꦶ –

꧓꧓. ‘‘ꦦꦤ꧀ꦢꦤꦁ ꦕꦥꦭꦁ ꦕꦶꦠ꧀ꦠꦁ, ꦢꦹꦫꦏ꧀ꦑꦁ ꦢꦸꦤ꧀ꦤꦶꦮꦴꦫꦪꦁ;

ꦈꦗꦸꦁ ꦏꦫꦺꦴꦠꦶ ꦩꦺꦣꦴꦮꦷ, ꦈꦱꦸꦏꦴꦫꦺꦴꦮ ꦠꦺꦗꦤꦁ.

꧓꧔. ‘‘ꦮꦴꦫꦶꦗꦺꦴꦮ ꦡꦭꦺ ꦑꦶꦠ꧀ꦠꦺꦴ, ꦎꦏꦩꦺꦴꦏꦠꦈꦧ꧀ꦨꦠꦺꦴ;

ꦥꦫꦶꦥ꧀ꦦꦤ꧀ꦢꦠꦶꦢꦁ ꦕꦶꦠ꧀ꦠꦁ, ꦩꦴꦫꦣꦺꦪ꧀ꦪꦁ ꦥꦲꦴꦠꦮꦺ’’ꦠꦶ.

ꦠꦠ꧀ꦡ ꦦꦤ꧀ꦢꦤꦤ꧀ꦠꦶ ꦫꦹꦥꦴꦢꦷꦱꦸ ꦄꦴꦫꦩ꧀ꦩꦟꦺꦱꦸ ꦮꦶꦥ꧀ꦦꦤ꧀ꦢꦩꦴꦤꦁ. ꦕꦥꦭꦤ꧀ꦠꦶ ꦌꦏꦆꦫꦶꦪꦴꦥꦡꦺꦤ ꦄꦱꦟ꧀ꦜꦲꦤ꧀ꦠꦺꦴ ꦒꦴꦩꦢꦴꦫꦏꦺꦴ ꦮꦶꦪ ꦌꦏꦱ꧀ꦩꦶꦁ ꦄꦴꦫꦩ꧀ꦩꦟꦺ ꦄꦱꦟ꧀ꦜꦲꦤꦠꦺꦴ ꦕꦥꦭꦁ. ꦕꦶꦠ꧀ꦠꦤ꧀ꦠꦶ ꦮꦶꦚ꧀ꦚꦴꦟꦁ, ꦨꦹꦩꦶꦮꦠ꧀ꦡꦸꦄꦴꦫꦩ꧀ꦩꦟꦏꦶꦫꦶꦪꦴꦢꦶꦮꦶꦕꦶꦠ꧀ꦠꦠꦴꦪ ꦥꦤꦺꦠꦁ ‘‘ꦕꦶꦠ꧀ꦠ’’ꦤ꧀ꦠꦶ ꦮꦸꦠ꧀ꦠꦁ. ꦢꦹꦫꦏ꧀ꦑꦤ꧀ꦠꦶ ꦏꦶꦛ꧀ꦜꦱꦩ꧀ꦧꦴꦣꦺ ꦜꦴꦤꦺ ꦏꦶꦛ꧀ꦜꦑꦴꦢꦏꦒꦺꦴꦟꦁ ꦮꦶꦪ ꦌꦏꦺꦏꦱ꧀ꦩꦶꦁ ꦱꦥ꧀ꦥꦴꦪꦴꦫꦩ꧀ꦩꦟꦺꦪꦺꦮ ꦢꦸꦛ꧀ꦜꦥꦤꦠꦺꦴ ꦢꦹꦫꦏ꧀ꦑꦁ. ꦢꦸꦤ꧀ꦤꦶꦮꦴꦫꦪꦤ꧀ꦠꦶ ꦮꦶꦱꦨꦴꦒꦴꦫꦩ꧀ꦩꦟꦁ ꦒꦕ꧀ꦖꦤ꧀ꦠꦁ ꦥꦛꦶꦱꦺꦣꦺꦠꦸꦁ ꦢꦸꦏ꧀ꦑꦠ꧀ꦠꦴ ꦢꦸꦤ꧀ꦤꦶꦮꦴꦫꦪꦁ. ꦈꦱꦸꦏꦴꦫꦺꦴꦮ ꦠꦺꦗꦤꦤ꧀ꦠꦶ ꦪꦡꦴ ꦤꦴꦩ ꦈꦱꦸꦏꦴꦫꦺꦴ ꦄꦫꦚ꧀ꦚꦠꦺꦴ ꦌꦏꦁ ꦮꦔ꧀ꦏꦢꦟ꧀ꦝꦏꦁ ꦄꦴꦲꦫꦶꦠ꧀ꦮꦴ ꦤꦶꦠ꧀ꦠꦕꦁ ꦏꦠ꧀ꦮꦴ ꦏꦚ꧀ꦗꦶꦪꦠꦺꦭꦺꦤ ꦩꦏ꧀ꦑꦺꦠ꧀ꦮꦴ ꦄꦔ꧀ꦒꦴꦫꦏꦥꦭ꧀ꦭꦺ ꦠꦴꦥꦺꦠ꧀ꦮꦴ ꦫꦸꦏ꧀ꦑꦴꦭꦏꦺ ꦈꦥ꧀ꦥꦷꦭ꦳ꦺꦠ꧀ꦮꦴ ꦤꦶꦮꦔ꧀ꦏꦁ ꦈꦗꦸꦁ ꦮꦴꦭꦮꦶꦗ꧀ꦙꦤꦪꦺꦴꦒ꧀ꦒꦁ ꦏꦫꦺꦴꦠꦶ, ꦏꦠ꧀ꦮꦴ ꦕ ꦥꦤ ꦫꦴꦗꦫꦴꦗꦩꦲꦴꦩꦠ꧀ꦠꦴꦤꦁ ꦱꦶꦥ꧀ꦥꦁ ꦢꦱ꧀ꦱꦺꦠ꧀ꦮꦴ ꦩꦲꦤ꧀ꦠꦁ ꦱꦏ꧀ꦏꦴꦫꦱꦩ꧀ꦩꦴꦤꦁ ꦭꦨꦠꦶ, ꦌꦮꦩꦺꦮ ꦩꦺꦣꦴꦮꦷ ꦥꦟ꧀ꦝꦶꦠꦺꦴ ꦮꦶꦚ꧀ꦚꦹ ꦥꦸꦫꦶꦱꦺꦴ ꦦꦤ꧀ꦢꦤꦴꦢꦶꦱꦨꦴꦮꦩꦺꦠꦁ ꦕꦶꦠ꧀ꦠꦁ ꦣꦸꦠꦔ꧀ꦒꦴꦫꦚ꧀ꦚꦴꦮꦴꦱꦮꦱꦺꦤ, ꦤꦶꦠ꧀ꦠꦕꦁ ꦄꦥꦒꦠꦎꦭ꦳ꦴꦫꦶꦏꦏꦶꦭꦺꦱꦁ ꦏꦠ꧀ꦮꦴ ꦱꦢ꧀ꦣꦴꦱꦶꦤꦺꦲꦺꦤ ꦠꦺꦩꦺꦠ꧀ꦮꦴ ꦏꦴꦪꦶꦏꦕꦺꦠꦱꦶꦏꦮꦷꦫꦶꦪꦺꦤ ꦠꦴꦥꦺꦠ꧀ꦮꦴ ꦱꦩꦡꦮꦶꦥꦱ꧀ꦱꦤꦴꦭꦏꦺ ꦈꦥ꧀ꦥꦷꦭ꦳ꦺꦠ꧀ꦮꦴ ꦈꦗꦸꦁ ꦄꦏꦸꦛꦶꦭꦁ ꦤꦶꦧ꧀ꦧꦶꦱꦺꦮꦤꦁ ꦏꦫꦺꦴꦠꦶ, ꦏꦠ꧀ꦮꦴ ꦕ ꦥꦤ ꦱꦔ꧀ꦑꦴꦫꦺ ꦱꦩ꧀ꦩꦱꦶꦠ꧀ꦮꦴ ꦩꦲꦤ꧀ꦠꦁ ꦄꦮꦶꦗ꧀ꦗꦏ꧀ꦑꦤ꧀ꦣꦁ ꦥꦢꦴꦭꦺꦠ꧀ꦮꦴ, ‘‘ꦠꦶꦱ꧀ꦱꦺꦴ ꦮꦶꦗ꧀ꦗꦴ, ꦖ ꦄꦨꦶꦚ꧀ꦚꦴ, ꦤꦮ ꦭꦺꦴꦏꦸꦠ꧀ꦠꦫꦣꦩ꧀ꦩꦺ’’ꦠꦶ ꦆꦩꦁ ꦮꦶꦱꦺꦱꦁ ꦲꦠ꧀ꦡꦒꦠꦩꦺꦮ ꦏꦠ꧀ꦮꦴ ꦄꦒ꧀ꦒꦢꦏ꧀ꦑꦶꦟꦺꦪ꧀ꦪꦨꦴꦮꦁ ꦭꦨꦠꦶ.

ꦮꦴꦫꦶꦗꦺꦴꦮꦴꦠꦶ ꦩꦕ꧀ꦖꦺꦴ ꦮꦶꦪ, ꦡꦭꦺ ꦑꦶꦠ꧀ꦠꦺꦴꦠꦶ ꦲꦠ꧀ꦡꦺꦤ ꦮꦴ ꦥꦴꦢꦺꦤ ꦮꦴ ꦗꦴꦭꦴꦢꦷꦤꦁ ꦮꦴ ꦄꦚ꧀ꦚꦠꦫꦺꦤ ꦡꦭꦺ ꦖꦝ꧀ꦝꦶꦠꦺꦴ. ꦎꦏꦩꦺꦴꦏꦠꦈꦧ꧀ꦨꦠꦺꦴꦠꦶ ‘‘ꦎꦏꦥꦸꦟ꧀ꦟꦺꦲꦶ ꦕꦷꦮꦫꦺꦲꦷ’’ꦠꦶ ꦌꦠ꧀ꦡ (ꦩꦲꦴꦮ. ꧓꧐꧖) ꦈꦢꦏꦁ ꦎꦏꦁ, ‘‘ꦎꦏꦁ ꦥꦲꦴꦪ ꦄꦤꦶꦏꦺꦠꦱꦴꦫꦷ’’ꦠꦶ ꦌꦠ꧀ꦡ (ꦱꦸ. ꦤꦶ. ꧘꧕꧐) ꦄꦴꦭꦪꦺꦴ, ꦌꦠ꧀ꦡ ꦈꦨꦪꦩ꧀ꦥꦶ ꦭꦧ꧀ꦨꦠꦶ. ‘‘ꦎꦏꦩꦺꦴꦏꦠꦈꦧ꧀ꦨꦠꦺꦴ’’ꦠꦶ ꦲꦶ ꦌꦠ꧀ꦡ ꦎꦏꦩꦺꦴꦏꦠꦺꦴꦠꦶ ꦈꦢꦏꦱꦔ꧀ꦑꦴꦠꦴ ꦄꦴꦭꦪꦴꦠꦶ ꦄꦪꦩꦠ꧀ꦡꦺꦴ. ꦈꦧ꧀ꦨꦠꦺꦴꦠꦶ ꦈꦢ꧀ꦣꦛꦺꦴ. ꦥꦫꦶꦥ꧀ꦦꦤ꧀ꦢꦠꦶꦢꦁ ꦕꦶꦠ꧀ꦠꦤ꧀ꦠꦶ ꦪꦡꦴ ꦱꦺꦴ ꦈꦢꦏꦴꦭꦪꦠꦺꦴ ꦈꦧ꧀ꦨꦠꦺꦴ ꦡꦭꦺ ꦑꦶꦠ꧀ꦠꦺꦴ ꦩꦕ꧀ꦖꦺꦴ ꦈꦢꦏꦁ ꦄꦭꦨꦤ꧀ꦠꦺꦴ ꦥꦫꦶꦥ꧀ꦦꦤ꧀ꦢꦠꦶ, ꦌꦮꦩꦶꦢꦁ ꦥꦚ꧀ꦕꦏꦴꦩꦒꦸꦟꦴꦭꦪꦴꦨꦶꦫꦠꦁ ꦕꦶꦠ꧀ꦠꦁ ꦠꦠꦺꦴ ꦈꦢ꧀ꦣꦫꦶꦠ꧀ꦮꦴ ꦩꦴꦫꦣꦺꦪ꧀ꦪꦱꦔ꧀ꦑꦴꦠꦁ ꦮꦛ꧀ꦛꦁ ꦥꦲꦴꦠꦸꦁ ꦮꦶꦥꦱ꧀ꦱꦤꦴꦏꦩ꧀ꦩꦛ꧀ꦜꦴꦤꦺ ꦑꦶꦠ꧀ꦠꦁ ꦏꦴꦪꦶꦏꦕꦺꦠꦱꦶꦏꦮꦷꦫꦶꦪꦺꦤ ꦱꦤ꧀ꦠꦴꦥꦶꦪꦩꦴꦤꦁ ꦥꦫꦶꦥ꧀ꦦꦤ꧀ꦢꦠꦶ, ꦱꦟ꧀ꦜꦴꦠꦸꦁ ꦤ ꦱꦏ꧀ꦏꦺꦴꦠꦶ. ꦌꦮꦁ ꦱꦤ꧀ꦠꦺꦥꦶ ꦣꦸꦫꦁ ꦄꦤꦶꦏ꧀ꦑꦶꦥꦶꦠ꧀ꦮꦴ ꦩꦺꦣꦴꦮꦷ ꦥꦸꦒ꧀ꦒꦭꦺꦴ ꦠꦁ ꦮꦸꦠ꧀ꦠꦤꦪꦺꦤꦺꦮ ꦈꦗꦸꦁ ꦏꦩ꧀ꦩꦤꦶꦪꦁ ꦏꦫꦺꦴꦠꦷꦠꦶ ꦄꦠ꧀ꦡꦺꦴ. ꦄꦥꦫꦺꦴ ꦤꦪꦺꦴ – ꦆꦢꦁ ꦩꦴꦫꦣꦺꦪ꧀ꦪꦁ ꦏꦶꦭꦺꦱꦮꦛ꧀ꦛꦁ ꦄꦮꦶꦗꦲꦶꦠ꧀ꦮꦴ ꦜꦶꦠꦁ ꦕꦶꦠ꧀ꦠꦁ ꦱꦺꦴ ꦮꦴꦫꦶꦗꦺꦴ ꦮꦶꦪ ꦥꦫꦶꦥ꧀ꦦꦤ꧀ꦢꦠꦶ, ꦠꦱ꧀ꦩꦴ ꦩꦴꦫꦣꦺꦪ꧀ꦪꦁ ꦥꦲꦴꦠꦮꦺ, ꦪꦺꦤ ꦏꦶꦭꦺꦱꦮꦛ꧀ꦛꦱꦔ꧀ꦑꦴꦠꦺꦤ ꦩꦴꦫꦣꦺꦪ꧀ꦪꦺꦤꦺꦮ ꦥꦫꦶꦥ꧀ꦦꦤ꧀ꦢꦠꦶ, ꦠꦁ ꦥꦲꦴꦠꦧ꧀ꦧꦤ꧀ꦠꦶ.

ꦒꦴꦡꦴꦥꦫꦶꦪꦺꦴꦱꦴꦤꦺ ꦩꦺꦓꦶꦪꦠ꧀ꦡꦺꦫꦺꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦶꦠꦺꦴ, ꦄꦚ꧀ꦚꦺꦥꦶ ꦧꦲꦹ ꦱꦺꦴꦠꦴꦥꦤ꧀ꦤꦴꦢꦪꦺꦴ ꦗꦴꦠꦴꦠꦶ.

ꦩꦺꦓꦶꦪꦠ꧀ꦡꦺꦫꦮꦠ꧀ꦡꦸ ꦥꦜꦩꦁ.

꧒. ꦄꦚ꧀ꦚꦠꦫꦨꦶꦏ꧀ꦑꦸꦮꦠ꧀ꦡꦸ

ꦢꦸꦤ꧀ꦤꦶꦒ꧀ꦒꦲꦱ꧀ꦱ ꦭꦲꦸꦤꦺꦴꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦱꦴꦮꦠ꧀ꦡꦶꦪꦁ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦄꦚ꧀ꦚꦠꦫꦁ ꦨꦶꦏ꧀ꦑꦸꦁ ꦄꦴꦫꦧ꧀ꦨ ꦏꦡꦺꦱꦶ.

ꦏꦺꦴꦱꦭꦫꦚ꧀ꦚꦺꦴ ꦏꦶꦫ ꦮꦶꦗꦶꦠꦺ ꦥꦧ꧀ꦧꦠꦥꦴꦢꦺ ꦩꦴꦠꦶꦏꦒꦴꦩꦺꦴ ꦤꦴꦩ ꦌꦏꦺꦴ ꦓꦤꦮꦴꦱꦺꦴ ꦒꦴꦩꦺꦴ ꦄꦲꦺꦴꦱꦶ. ꦄꦡꦺꦏꦢꦶꦮꦱꦁ ꦱꦛ꧀ꦜꦶꦩꦠ꧀ꦠꦴ ꦨꦶꦏ꧀ꦑꦹ ꦱꦠ꧀ꦡꦸ ꦱꦤ꧀ꦠꦶꦏꦺ ꦪꦴꦮ ꦄꦫꦲꦠ꧀ꦠꦴ ꦏꦩ꧀ꦩꦛ꧀ꦜꦴꦤꦁ ꦏꦡꦴꦥꦺꦠ꧀ꦮꦴ ꦠꦁ ꦒꦴꦩꦁ ꦒꦤ꧀ꦠ꧀ꦮꦴ ꦥꦶꦟ꧀ꦝꦴꦪ ꦥꦮꦶꦱꦶꦁꦱꦸ. ꦄꦡ ꦤꦺ ꦪꦺꦴ ꦠꦱ꧀ꦱ ꦒꦴꦩꦱ꧀ꦱ ꦱꦴꦩꦶꦏꦺꦴ ꦩꦴꦠꦶꦏꦺꦴ ꦤꦴꦩ, ꦠꦱ꧀ꦱ ꦩꦴꦠꦴ ꦢꦶꦱ꧀ꦮꦴ ꦒꦺꦲꦺ ꦤꦶꦱꦷꦢꦴꦥꦺꦠ꧀ꦮꦴ ꦤꦴꦤꦒ꧀ꦒꦫꦱꦺꦤ ꦪꦴꦒꦸꦨꦠ꧀ꦠꦺꦤ ꦥꦫꦶꦮꦶꦱꦶꦠ꧀ꦮꦴ, ‘‘ꦨꦤ꧀ꦠꦺ, ꦏꦠ꧀ꦡ ꦒꦤ꧀ꦠꦸꦏꦴꦩꦴ’’ꦠꦶ ꦥꦸꦕ꧀ꦖꦶ. ‘‘ꦪꦡꦴ ꦦꦴꦱꦸꦏꦛ꧀ꦜꦴꦤꦁ ꦩꦲꦴꦈꦥꦴꦱꦶꦏꦺ’’ꦠꦶ. ꦱꦴ ‘‘ꦮꦱ꧀ꦱꦴꦮꦴꦱꦛ꧀ꦜꦴꦤꦁ, ꦄꦪ꧀ꦪꦴ, ꦥꦫꦶꦪꦺꦱꦤ꧀ꦠꦶ ꦩꦚ꧀ꦚꦺ’’ꦠꦶ ꦚꦠ꧀ꦮꦴ ꦥꦴꦢꦩꦹꦭꦺ ꦤꦶꦥꦗ꧀ꦗꦶꦠ꧀ꦮꦴ, ‘‘ꦱꦕꦺ, ꦄꦪ꧀ꦪꦴ, ꦆꦩꦁ ꦠꦺꦩꦴꦱꦁ ꦆꦣ ꦮꦱꦶꦱ꧀ꦱꦤ꧀ꦠꦶ, ꦄꦲꦁ ꦠꦷꦟꦶ ꦱꦫꦟꦴꦤꦶ, ꦥꦚ꧀ꦕ ꦱꦷꦭꦴꦤꦶ ꦒꦲꦺꦠ꧀ꦮꦴ ꦈꦥꦺꦴꦱꦡꦏꦩ꧀ꦩꦁ ꦏꦫꦶꦱ꧀ꦱꦴꦩꦷ’’ꦠꦶ ꦄꦴꦲ. ꦨꦶꦏ꧀ꦑꦹ ‘‘ꦩꦪꦁ ꦆꦩꦁ ꦤꦶꦱ꧀ꦱꦴꦪ ꦨꦶꦏ꧀ꦑꦴꦪ ꦄꦏꦶꦭꦩꦤ꧀ꦠꦴ ꦨꦮꦤꦶꦱ꧀ꦱꦫꦟꦁ ꦏꦴꦠꦸꦁ ꦱꦏ꧀ꦑꦶꦱ꧀ꦱꦴꦩꦴ’’ꦠꦶ ꦄꦣꦶꦮꦴꦱꦪꦶꦁꦱꦸ. ꦱꦴ ꦠꦺꦱꦁ ꦮꦱꦤꦛ꧀ꦜꦴꦤꦁ ꦮꦶꦲꦴꦫꦁ ꦥꦛꦶꦗꦒ꧀ꦒꦶꦠ꧀ꦮꦴ ꦄꦢꦴꦱꦶ.

ꦠꦺ ꦠꦠ꧀ꦡꦺꦮ ꦮꦱꦤ꧀ꦠꦴ ꦌꦏꦢꦶꦮꦱꦁ ꦱꦤ꧀ꦤꦶꦥꦠꦶꦠ꧀ꦮꦴ ꦄꦚ꧀ꦚꦩꦚ꧀ꦚꦁ ꦎꦮꦢꦶꦁꦱꦸ, ‘‘ꦄꦴꦮꦸꦱꦺꦴ, ꦄꦩ꧀ꦲꦺꦲꦶ ꦥꦩꦴꦢꦕꦴꦫꦁ ꦕꦫꦶꦠꦸꦁ ꦤ ꦮꦛ꧀ꦛꦠꦶ. ꦄꦩ꧀ꦲꦴꦏꦚ꧀ꦲꦶ ꦱꦏꦒꦺꦲꦁ ꦮꦶꦪ ꦄꦛ꧀ꦜ ꦩꦲꦴꦤꦶꦫꦪꦴ ꦮꦶꦮꦛꦢ꧀ꦮꦴꦫꦴꦪꦺꦮ, ꦣꦫꦩꦴꦤꦏꦧꦸꦢ꧀ꦣꦱ꧀ꦱ ꦑꦺꦴ ꦥꦤ ꦱꦤ꧀ꦠꦶꦏꦺ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦩꦪꦁ ꦄꦴꦒꦠꦴ, ꦧꦸꦢ꧀ꦣꦴ ꦕ ꦤꦴꦩ ꦥꦢꦴꦤꦸꦥꦢꦶꦏꦁ ꦮꦶꦕꦫꦤ꧀ꦠꦺꦤꦴꦥꦶ ꦱꦜꦺꦤ ꦄꦴꦫꦴꦣꦺꦠꦸꦁ ꦤ ꦱꦏ꧀ꦏꦴ, ꦪꦡꦴꦗ꧀ꦙꦴꦱꦪꦺꦤꦺꦮ ꦄꦴꦫꦴꦣꦺꦠꦸꦁ ꦱꦏ꧀ꦏꦴ, ꦄꦥ꧀ꦥꦩꦠ꧀ꦠꦴ ꦲꦺꦴꦡ, ꦢ꧀ꦮꦷꦲꦶ ꦌꦏꦛ꧀ꦜꦴꦤꦺ ꦤ ꦜꦴꦠꦧ꧀ꦧꦁ, ꦤ ꦤꦶꦱꦷꦢꦶꦠꦧ꧀ꦧꦁ, ꦱꦴꦪꦁ ꦑꦺꦴ ꦥꦤ ꦡꦺꦫꦹꦥꦛ꧀ꦜꦴꦤꦏꦴꦭꦺ ꦥꦴꦠꦺꦴꦮ ꦨꦶꦏ꧀ꦑꦴꦕꦴꦫꦏꦴꦭꦺ ꦌꦏꦠꦺꦴ ꦨꦮꦶꦱ꧀ꦱꦴꦩ, ꦱꦺꦱꦏꦴꦭꦺ ꦢ꧀ꦮꦺ ꦌꦏꦠꦺꦴ ꦤ ꦨꦮꦶꦱ꧀ꦱꦴꦩ, ꦄꦥꦶꦕ ꦑꦺꦴ ꦥꦤ ꦄꦦꦴꦱꦸꦏꦺꦤ ꦨꦶꦏ꧀ꦑꦸꦤꦴ ꦄꦴꦒꦤ꧀ꦠ꧀ꦮꦴ ꦮꦶꦲꦴꦫꦩꦗ꧀ꦙꦺ ꦓꦟ꧀ꦝꦶꦪꦴ ꦥꦲꦠꦴꦪ ꦓꦟ꧀ꦝꦶꦱꦚ꧀ꦚꦴꦪ ꦄꦴꦒꦤ꧀ꦠ꧀ꦮꦴ ꦠꦱ꧀ꦱ ꦨꦺꦱꦗ꧀ꦗꦁ ꦏꦫꦶꦱ꧀ꦱꦴꦩꦴ’’ꦠꦶ.

ꦠꦺꦱꦸ ꦌꦮꦁ ꦏꦠꦶꦏꦁ ꦏꦠ꧀ꦮꦴ ꦮꦶꦲꦫꦤ꧀ꦠꦺꦱꦸ ꦌꦏꦢꦶꦮꦱꦁ ꦱꦴ ꦈꦥꦴꦱꦶꦏꦴ ꦱꦥ꧀ꦥꦶꦠꦺꦭꦦꦴꦟꦶꦠꦴꦢꦷꦤꦶ ꦒꦴꦲꦴꦥꦺꦠ꧀ꦮꦴ ꦢꦴꦱꦢꦴꦱꦶꦏꦩ꧀ꦩꦏꦫꦴꦢꦷꦲꦶ ꦥꦫꦶꦮꦸꦠꦴ ꦱꦴꦪꦤ꧀ꦲꦱꦩꦪꦺ ꦠꦁ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦮꦶꦲꦴꦫꦩꦗ꧀ꦙꦺ ꦨꦶꦏ꧀ꦑꦹ ꦄꦢꦶꦱ꧀ꦮꦴ, ‘‘ꦏꦲꦁ ꦤꦸ ꦑꦺꦴ, ꦄꦪ꧀ꦪꦴ, ꦒꦠꦴ’’ꦠꦶ ꦥꦸꦫꦶꦱꦺ ꦥꦸꦕ꧀ꦖꦶꦠ꧀ꦮꦴ, ‘‘ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦫꦠ꧀ꦠꦶꦛ꧀ꦜꦴꦤꦢꦶꦮꦴꦛ꧀ꦜꦴꦤꦺꦱꦸ ꦤꦶꦱꦶꦤ꧀ꦤꦴ ꦨꦮꦶꦱ꧀ꦱꦤ꧀ꦠꦶ, ꦄꦪ꧀ꦪꦺ’’ꦠꦶ ꦮꦸꦠ꧀ꦠꦺ, ‘‘ꦏꦶꦁ ꦤꦸ ꦑꦺꦴ ꦏꦠ꧀ꦮꦴ ꦢꦛ꧀ꦜꦸꦁ ꦱꦏ꧀ꦑꦶꦱ꧀ꦱꦴꦩꦷ’’ꦠꦶ ꦄꦴꦲ. ꦄꦡ ꦤꦁ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦏꦠꦶꦏꦮꦠ꧀ꦠꦁ ꦗꦴꦤꦤꦩꦤꦸꦱ꧀ꦱꦴ ꦄꦴꦲꦁꦱꦸ – ‘‘ꦓꦟ꧀ꦝꦶꦪꦴ ꦥꦲꦠꦴꦪ ꦱꦤ꧀ꦤꦶꦥꦠꦶꦱ꧀ꦱꦤ꧀ꦠꦶ, ꦄꦪ꧀ꦪꦺ’’ꦠꦶ. ꦱꦴ ꦕ ꦓꦟ꧀ꦝꦶꦁ ꦥꦲꦫꦴꦥꦺꦱꦶ. ꦨꦶꦏ꧀ꦑꦹ ꦓꦟ꧀ꦝꦶꦱꦢ꧀ꦢꦁ ꦱꦸꦠ꧀ꦮꦴ, ‘‘ꦏꦱ꧀ꦱꦕꦶ ꦄꦦꦴꦱꦸꦏꦁ ꦨꦮꦶꦱ꧀ꦱꦠꦷ’’ꦠꦶ ꦱꦏꦱꦏꦛ꧀ꦜꦴꦤꦺꦲꦶ ꦤꦶꦏ꧀ꦑꦩꦶꦠ꧀ꦮꦴ ꦮꦶꦲꦴꦫꦩꦗ꧀ꦙꦺ ꦱꦤ꧀ꦤꦶꦥꦠꦶꦁꦱꦸ. ꦢ꧀ꦮꦺꦥꦶ ꦗꦤꦴ ꦌꦏꦩꦒ꧀ꦒꦺꦤꦴꦒꦠꦴ ꦤꦴꦩ ꦤꦠ꧀ꦡꦶ. ꦈꦥꦴꦱꦶꦏꦴ ꦌꦏꦺꦏꦛ꧀ꦜꦴꦤꦠꦺꦴ ꦌꦏꦺꦏꦩꦺꦮ ꦄꦴꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ, ‘‘ꦩꦩ ꦥꦸꦠ꧀ꦠꦺꦲꦶ ꦄꦚ꧀ꦚꦩꦚ꧀ꦚꦁ ꦏꦭꦲꦺꦴ ꦏꦠꦺꦴ ꦨꦮꦶꦱ꧀ꦱꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦨꦶꦏ꧀ꦑꦸꦱꦔ꧀ꦓꦁ ꦮꦤ꧀ꦢꦶꦠ꧀ꦮꦴ ꦥꦸꦕ꧀ꦖꦶ – ‘‘ꦏꦭꦲꦁ ꦤꦸ ꦑꦺꦴ, ꦨꦤ꧀ꦠꦺ, ꦏꦫꦶꦠ꧀ꦡꦴ’’ꦠꦶ? ‘‘ꦤ ꦏꦫꦺꦴꦩ, ꦩꦲꦴꦈꦥꦴꦱꦶꦏꦺ’’ꦠꦶ. ‘‘ꦱꦕꦺ ꦮꦺꦴ, ꦨꦤ꧀ꦠꦺ, ꦏꦭꦲꦺꦴ ꦤꦠ꧀ꦡꦶ, ꦄꦡ ꦏꦱ꧀ꦩꦴ ꦪꦡꦴ ꦄꦩ꧀ꦲꦴꦏꦁ ꦒꦺꦲꦁ ꦄꦴꦒꦕ꧀ꦖꦤ꧀ꦠꦴ ꦱꦧ꧀ꦧꦺ ꦌꦏꦠꦺꦴꦮ ꦄꦴꦒꦕ꧀ꦖꦡ, ꦌꦮꦁ ꦄꦤꦴꦒꦤ꧀ꦠ꧀ꦮꦴ ꦌꦏꦺꦏꦛ꧀ꦜꦴꦤꦠꦺꦴ ꦌꦏꦺꦏꦴꦮ ꦄꦴꦒꦠꦴ’’ꦠꦶ? ‘‘ꦩꦲꦴꦈꦥꦴꦱꦶꦏꦺ, ꦌꦏꦺꦏꦱ꧀ꦩꦶꦁ ꦜꦴꦤꦺ ꦤꦶꦱꦷꦢꦶꦠ꧀ꦮꦴ ꦱꦩꦟꦣꦩ꧀ꦩꦁ ꦏꦫꦶꦩ꧀ꦲꦴ’’ꦠꦶ. ‘‘ꦏꦺꦴ ꦌꦱ, ꦨꦤ꧀ꦠꦺ, ꦱꦩꦟꦣꦩ꧀ꦩꦺꦴ ꦤꦴꦩꦴ’’ꦠꦶ? ‘‘ꦢ꧀ꦮꦠ꧀ꦠꦶꦁꦱꦴꦏꦴꦫꦺ ꦱꦗ꧀ꦙꦴꦪꦁ ꦏꦫꦺꦴꦩ, ꦄꦠ꧀ꦠꦨꦴꦮꦺ ꦕ ꦑꦪꦮꦪꦁ ꦥꦛ꧀ꦜꦥꦺꦩ, ꦩꦲꦴꦈꦥꦴꦱꦶꦏꦺ’’ꦠꦶ. ‘‘ꦏꦶꦁ ꦥꦤ, ꦨꦤ꧀ꦠꦺ, ꦢ꧀ꦮꦠ꧀ꦠꦶꦁꦱꦴꦏꦴꦫꦺ ꦱꦗ꧀ꦙꦴꦪꦁ ꦏꦴꦠꦸꦁ, ꦄꦠ꧀ꦠꦨꦴꦮꦺ ꦕ ꦑꦪꦮꦪꦁ ꦥꦛ꧀ꦜꦥꦺꦠꦸꦁ ꦠꦸꦩ꧀ꦲꦴꦏꦩꦺꦮ ꦮꦛ꧀ꦛꦠꦶ, ꦈꦢꦴꦲꦸ ꦄꦩ꧀ꦲꦴꦏꦩ꧀ꦥꦷꦠꦶ, ꦏꦱ꧀ꦱꦕꦶꦥꦶ ꦄꦮꦴꦫꦶꦠꦺꦴ ꦌꦱ ꦣꦩ꧀ꦩꦺꦴ, ꦩꦲꦴꦈꦥꦴꦱꦶꦏꦺ’’ꦠꦶ. ‘‘ꦠꦺꦤ ꦲꦶ, ꦨꦤ꧀ꦠꦺ, ꦩꦪ꧀ꦲꦩ꧀ꦥꦶ ꦢ꧀ꦮꦠ꧀ꦠꦶꦁꦱꦴꦏꦴꦫꦁ ꦢꦺꦡ, ꦄꦠ꧀ꦠꦨꦴꦮꦺ ꦕ ꦑꦪꦮꦪꦥꦛ꧀ꦜꦥꦤꦁ ꦄꦴꦕꦶꦏ꧀ꦑꦡꦴ’’ꦠꦶ. ‘‘ꦠꦺꦤ ꦲꦶ ꦈꦒ꧀ꦒꦟ꧀ꦲ, ꦩꦲꦴꦈꦥꦴꦱꦶꦏꦺ’’ꦠꦶ ꦱꦧ꧀ꦧꦁ ꦈꦒ꧀ꦒꦟ꧀ꦲꦴꦥꦺꦱꦸꦁ.

ꦱꦴ ꦠꦠꦺꦴ ꦥꦛ꧀ꦜꦴꦪ ꦢ꧀ꦮꦠ꧀ꦠꦶꦁꦱꦴꦏꦴꦫꦺ ꦱꦗ꧀ꦙꦴꦪꦁ ꦏꦠ꧀ꦮꦴ ꦄꦠ꧀ꦠꦤꦶ ꦑꦪꦮꦪꦁ ꦥꦛ꧀ꦜꦥꦺꦠ꧀ꦮꦴ ꦠꦺꦲꦶ ꦨꦶꦏ꧀ꦑꦹꦲꦶ ꦥꦸꦫꦺꦠꦫꦩꦺꦮ ꦠꦪꦺꦴ ꦩꦒ꧀ꦒꦺ, ꦠꦷꦟꦶ ꦕ ꦦꦭꦴꦤꦶ ꦥꦴꦥꦸꦟꦶ. ꦩꦒ꧀ꦒꦺꦤꦺꦮ ꦕꦱ꧀ꦱꦴ ꦕꦠꦱ꧀ꦱꦺꦴ ꦥꦛꦶꦱꦩ꧀ꦨꦶꦢꦴ ꦭꦺꦴꦏꦶꦪꦄꦨꦶꦚ꧀ꦚꦴ ꦕ ꦄꦴꦒꦩꦶꦁꦱꦸ. ꦱꦴ ꦩꦒ꧀ꦒꦦꦭꦱꦸꦑꦠꦺꦴ ꦮꦸꦛ꧀ꦜꦴꦪ ꦢꦶꦧ꧀ꦧꦕꦏ꧀ꦑꦸꦤꦴ ꦎꦭꦺꦴꦏꦺꦠ꧀ꦮꦴ, ‘‘ꦏꦢꦴ ꦤꦸ ꦑꦺꦴ ꦩꦩ ꦥꦸꦠ꧀ꦠꦺꦲꦶ ꦄꦪꦁ ꦣꦩ꧀ꦩꦺꦴ ꦄꦣꦶꦒꦠꦺꦴ’’ꦠꦶ ꦈꦥꦣꦴꦫꦺꦤ꧀ꦠꦷ ꦱꦧ꧀ꦧꦺꦥꦶꦩꦺ ꦱꦫꦴꦒꦴ ꦱꦢꦺꦴꦱꦴ ꦱꦩꦺꦴꦲꦴ ꦙꦴꦤꦮꦶꦥꦱ꧀ꦱꦤꦴꦩꦠ꧀ꦠꦩ꧀ꦥꦶ ꦠꦺꦱꦁ ꦤꦠ꧀ꦡꦶ, ‘‘ꦏꦶꦁ ꦤꦸ ꦑꦺꦴ ꦩꦪ꧀ꦲꦁ ꦥꦸꦠ꧀ꦠꦴꦤꦁ ꦄꦫꦲꦠ꧀ꦠꦱ꧀ꦱ ꦈꦥꦤꦶꦱ꧀ꦱꦪꦺꦴ ꦄꦠ꧀ꦡꦶ, ꦤꦠ꧀ꦡꦷ’’ꦠꦶ ꦄꦴꦮꦗ꧀ꦗꦺꦠ꧀ꦮꦴ, ‘‘ꦄꦠ꧀ꦡꦷ’’ꦠꦶ ꦢꦶꦱ꧀ꦮꦴ, ‘‘ꦱꦺꦤꦴꦱꦤꦱꦥ꧀ꦥꦴꦪꦁ ꦤꦸ ꦑꦺꦴ ꦄꦠ꧀ꦡꦶ, ꦤꦠ꧀ꦡꦷ’’ꦠꦶ ꦄꦴꦮꦗ꧀ꦗꦺꦠ꧀ꦮꦴ ꦠꦩ꧀ꦥꦶ ꦢꦶꦱ꧀ꦮꦴ, ‘‘ꦥꦸꦒ꧀ꦒꦭꦱꦥ꧀ꦥꦴꦪꦁ ꦤꦸ ꦑꦺꦴ ꦭꦨꦤ꧀ꦠꦶ, ꦤ ꦭꦨꦤ꧀ꦠꦷ’’ꦠꦶ ꦄꦴꦮꦗ꧀ꦗꦺꦱꦶ, ꦥꦸꦒ꧀ꦒꦭꦱꦥ꧀ꦥꦴꦪꦩ꧀ꦥꦶ ꦢꦶꦱ꧀ꦮꦴ, ‘‘ꦄꦴꦲꦴꦫꦱꦥ꧀ꦥꦴꦪꦁ ꦤꦸ ꦑꦺꦴ ꦭꦨꦤ꧀ꦠꦶ, ꦤ ꦭꦨꦤ꧀ꦠꦷ’’ꦠꦶ ꦈꦥꦣꦴꦫꦺꦤ꧀ꦠꦷ ‘‘ꦄꦴꦲꦴꦫꦱꦥ꧀ꦥꦴꦪꦁ ꦤꦺꦱꦁ ꦤꦠ꧀ꦡꦷ’’ꦠꦶ ꦢꦶꦱ꧀ꦮꦴ ꦠꦠꦺꦴ ꦥꦛ꧀ꦜꦴꦪ ꦤꦴꦤꦴꦮꦶꦣꦁ ꦪꦴꦒꦸꦁ, ꦄꦤꦺꦏꦥ꧀ꦥꦏꦴꦫꦁ ꦑꦗ꧀ꦗꦏꦁ, ꦤꦴꦤꦒ꧀ꦒꦫꦱꦚ꧀ꦕ ꦨꦺꦴꦗꦤꦁ ꦱꦩ꧀ꦥꦴꦢꦺꦠ꧀ꦮꦴ ꦒꦺꦲꦺ ꦨꦶꦏ꧀ꦑꦹ ꦤꦶꦱꦷꦢꦴꦥꦺꦠ꧀ꦮꦴ ꦢꦏ꧀ꦑꦶꦟꦺꦴꦢꦏꦁ ꦢꦠ꧀ꦮꦴ, ‘‘ꦨꦤ꧀ꦠꦺ, ꦠꦸꦩ꧀ꦲꦴꦏꦁ ꦪꦁ ꦪꦁ ꦫꦸꦕ꧀ꦕꦠꦶ, ꦠꦁ ꦠꦁ ꦒꦲꦺꦠ꧀ꦮꦴ ꦥꦫꦶꦨꦸꦚ꧀ꦗꦡꦴ’’ꦠꦶ ꦤꦶꦪ꧀ꦪꦴꦢꦺꦱꦶ. ꦠꦺ ꦪꦡꦴꦫꦸꦕꦶ ꦪꦴꦒꦸꦄꦴꦢꦷꦤꦶ ꦒꦲꦺꦠ꧀ꦮꦴ ꦥꦫꦶꦨꦸꦚ꧀ꦗꦤ꧀ꦠꦶ. ꦠꦺꦱꦁ ꦱꦥ꧀ꦥꦴꦪꦴꦲꦴꦫꦁ ꦭꦨꦤ꧀ꦠꦴꦤꦁ ꦕꦶꦠ꧀ꦠꦁ ꦌꦏꦒ꧀ꦒꦁ ꦄꦲꦺꦴꦱꦶ.

ꦠꦺ ꦌꦏꦒ꧀ꦒꦺꦤ ꦕꦶꦠ꧀ꦠꦺꦤ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦤ ꦕꦶꦫꦱ꧀ꦱꦺꦮ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦠ꧀ꦮꦴ ꦕꦶꦤ꧀ꦠꦪꦶꦁꦱꦸ – ‘‘ꦄꦲꦺꦴ ꦩꦲꦴꦈꦥꦴꦱꦶꦏꦴ ꦄꦩ꧀ꦲꦴꦏꦁ ꦥꦠꦶꦛ꧀ꦜꦴ ꦗꦴꦠꦴ, ꦱꦕꦺ ꦩꦪꦁ ꦱꦥ꧀ꦥꦴꦪꦴꦲꦴꦫꦁ ꦤ ꦭꦨꦶꦩ꧀ꦲ, ꦤ ꦤꦺꦴ ꦩꦒ꧀ꦒꦦꦭꦥꦛꦶꦮꦺꦣꦺꦴ ꦄꦨꦮꦶꦱ꧀ꦱ, ꦆꦢꦴꦤꦶ ꦮꦸꦛ꧀ꦜꦮꦱ꧀ꦱꦴ ꦥꦮꦴꦫꦺꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦩꦶꦱ꧀ꦱꦴꦩꦴ’’ꦠꦶ. ꦠꦺ ‘‘ꦱꦠ꧀ꦡꦴꦫꦁ ꦢꦛ꧀ꦜꦸꦏꦴꦩꦩ꧀ꦲꦴ’’ꦠꦶ ꦩꦲꦴꦈꦥꦴꦱꦶꦏꦁ ꦄꦴꦥꦸꦕ꧀ꦖꦶꦁꦱꦸ. ‘‘ꦩꦲꦴꦈꦥꦴꦱꦶꦏꦴ ꦱꦴꦣꦸ, ꦄꦪ꧀ꦪꦴ’’ꦠꦶ. ꦠꦺ ꦄꦤꦸꦒꦤ꧀ꦠ꧀ꦮꦴ ꦥꦸꦤꦥꦶ, ‘‘ꦨꦤ꧀ꦠꦺ, ꦄꦩ꧀ꦲꦺ ꦎꦭꦺꦴꦏꦺꦪ꧀ꦪꦴꦡꦴ’’ꦠꦶ ꦧꦲꦹꦤꦶ ꦥꦶꦪꦮꦕꦤꦴꦤꦶ ꦮꦠ꧀ꦮꦴ ꦥꦛꦶꦤꦶꦮꦠ꧀ꦠꦶ. ꦠꦺꦥꦶ ꦑꦺꦴ ꦨꦶꦏ꧀ꦑꦹ ꦱꦴꦮꦠ꧀ꦡꦶꦁ ꦒꦤ꧀ꦠ꧀ꦮꦴ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ‘‘ꦏꦕ꧀ꦕꦶ, ꦨꦶꦏ꧀ꦑꦮꦺ, ꦑꦩꦤꦷꦪꦁ, ꦏꦕ꧀ꦕꦶ ꦪꦴꦥꦤꦷꦪꦁ, ꦤ ꦕ ꦥꦶꦟ꧀ꦝꦏꦺꦤ ꦏꦶꦭꦩꦶꦠ꧀ꦡꦴ’’ꦠꦶ ꦮꦸꦠ꧀ꦠꦺ ‘‘ꦑꦩꦤꦷꦪꦁ, ꦨꦤ꧀ꦠꦺ, ꦪꦴꦥꦤꦷꦪꦁ, ꦨꦤ꧀ꦠꦺ, ꦥꦶꦟ꧀ꦝꦏꦺꦤ ꦥꦤ ꦤꦺꦮ ꦏꦶꦭꦩꦶꦩ꧀ꦲ. ꦄꦩ꧀ꦲꦴꦏꦚ꧀ꦲꦶ ꦩꦴꦠꦶꦏꦩꦴꦠꦴ ꦤꦴꦩꦺꦏꦴ ꦈꦥꦴꦱꦶꦏꦴ ꦕꦶꦠ꧀ꦠꦴꦕꦴꦫꦁ ꦚꦠ꧀ꦮꦴ, ‘ꦄꦲꦺꦴ ꦮꦠ ꦤꦺꦴ ꦌꦮꦫꦹꦥꦁ ꦤꦴꦩ ꦄꦴꦲꦴꦫꦁ ꦥꦛꦶꦪꦴꦢꦺꦪ꧀ꦪꦴ’ꦠꦶ ꦕꦶꦤ꧀ꦠꦶꦠꦺ ꦪꦡꦴꦕꦶꦤ꧀ꦠꦶꦠꦁ ꦄꦴꦲꦴꦫꦁ ꦥꦛꦶꦪꦴꦢꦺꦠ꧀ꦮꦴ ꦄꦢꦴꦱꦷ’’ꦠꦶ ꦠꦱ꧀ꦱꦴ ꦒꦸꦟꦏꦡꦁ ꦏꦡꦪꦶꦁꦱꦸ.

ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦠꦱ꧀ꦱꦴ ꦒꦸꦟꦏꦡꦁ ꦱꦸꦠ꧀ꦮꦴ ꦠꦠ꧀ꦡ ꦒꦤ꧀ꦠꦸꦏꦴꦩꦺꦴ ꦲꦸꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦺ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ, ‘‘ꦨꦤ꧀ꦠꦺ, ꦠꦁ ꦒꦴꦩꦁ ꦒꦩꦶꦱ꧀ꦱꦴꦩꦷ’’ꦠꦶ ꦱꦠ꧀ꦡꦴꦫꦁ ꦄꦴꦥꦸꦕ꧀ꦖꦶꦠ꧀ꦮꦴ ꦗꦺꦠꦮꦤꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦠꦁ ꦒꦴꦩꦁ ꦥꦠ꧀ꦮꦴ ꦮꦶꦲꦴꦫꦁ ꦥꦮꦶꦱꦤꦢꦶꦮꦱꦺꦪꦺꦮ ꦕꦶꦤ꧀ꦠꦺꦱꦶ – ‘‘ꦄꦪꦁ ꦏꦶꦫ ꦈꦥꦴꦱꦶꦏꦴ ꦕꦶꦤ꧀ꦠꦶꦠꦕꦶꦤ꧀ꦠꦶꦠꦁ ꦗꦴꦤꦴꦠꦶ, ꦄꦲꦚ꧀ꦕ ꦩꦒ꧀ꦒꦏꦶꦭꦤ꧀ꦠꦺꦴ ꦮꦶꦲꦴꦫꦁ ꦥꦛꦶꦗꦒ꧀ꦒꦶꦠꦸꦁ ꦤ ꦱꦏ꧀ꦑꦶꦱ꧀ꦱꦴꦩꦶ, ꦄꦲꦺꦴ ꦮꦠ ꦩꦺ ꦮꦶꦲꦴꦫꦥꦛꦶꦗꦒ꧀ꦒꦏꦁ ꦩꦤꦸꦱ꧀ꦱꦁ ꦥꦺꦱꦺꦪ꧀ꦪꦴ’’ꦠꦶ. ꦈꦥꦴꦱꦶꦏꦴ ꦒꦺꦲꦺ ꦤꦶꦱꦶꦤ꧀ꦤꦴꦮ ꦄꦴꦮꦗ꧀ꦗꦺꦤ꧀ꦠꦷ ꦠꦩꦠ꧀ꦡꦁ ꦚꦠ꧀ꦮꦴ, ‘‘ꦒꦕ꧀ꦖ, ꦮꦶꦲꦴꦫꦁ ꦥꦛꦶꦗꦒ꧀ꦒꦶꦠ꧀ꦮꦴ ꦌꦲꦷ’’ꦠꦶ ꦩꦤꦸꦱ꧀ꦱꦁ ꦥꦺꦱꦺꦱꦶ. ꦆꦠꦫꦺꦴꦥꦶ ꦥꦴꦤꦷꦪꦁ ꦥꦶꦮꦶꦠꦸꦏꦴꦩꦺꦴ ‘‘ꦄꦲꦺꦴ ꦮꦠ ꦩꦺ ꦱꦏ꧀ꦑꦫꦥꦴꦤꦏꦁ ꦏꦠ꧀ꦮꦴ ꦥꦺꦱꦺꦪ꧀ꦪꦴ’’ꦠꦶ ꦕꦶꦤ꧀ꦠꦺꦱꦶ. ꦈꦥꦴꦱꦶꦏꦴ ꦠꦩ꧀ꦥꦶ ꦥꦺꦱꦺꦱꦶ. ꦱꦺꦴ ꦥꦸꦤꦢꦶꦮꦱꦺ ‘‘ꦥꦴꦠꦺꦴꦮ ꦱꦶꦤꦶꦢ꧀ꦣꦪꦴꦒꦸꦁ ꦩꦺ ꦱꦈꦠ꧀ꦠꦫꦶꦨꦔ꧀ꦒꦁ ꦥꦺꦱꦺꦠꦹ’’ꦠꦶ ꦕꦶꦤ꧀ꦠꦺꦱꦶ. ꦈꦥꦴꦱꦶꦏꦴ ꦠꦡꦴ ꦄꦏꦴꦱꦶ. ꦱꦺꦴ ꦪꦴꦒꦸꦁ ꦥꦶꦮꦶꦠ꧀ꦮꦴ, ‘‘ꦄꦲꦺꦴ ꦮꦠ ꦩꦺ ꦌꦮꦫꦹꦥꦁ ꦑꦗ꧀ꦗꦏꦁ ꦥꦺꦱꦺꦪ꧀ꦪꦴ’’ꦠꦶ ꦕꦶꦤ꧀ꦠꦺꦱꦶ. ꦈꦥꦴꦱꦶꦏꦴ ꦠꦩ꧀ꦥꦶ ꦥꦺꦱꦺꦱꦶ. ꦱꦺꦴ ꦕꦶꦤ꧀ꦠꦺꦱꦶ – ‘‘ꦄꦪꦁ ꦈꦥꦴꦱꦶꦏꦴ ꦩꦪꦴ ꦱꦧ꧀ꦧꦁ ꦕꦶꦤ꧀ꦠꦶꦠꦕꦶꦤ꧀ꦠꦶꦠꦁ ꦥꦺꦱꦺꦱꦶ, ꦄꦲꦁ ꦌꦠꦁ ꦢꦛ꧀ꦜꦸꦏꦴꦩꦺꦴ, ꦄꦲꦺꦴ ꦮꦠ ꦩꦺ ꦤꦴꦤꦒ꧀ꦒꦫꦱꦨꦺꦴꦗꦤꦁ ꦒꦴꦲꦴꦥꦺꦠ꧀ꦮꦴ ꦱꦪꦩꦺꦮ ꦄꦴꦒꦕ꧀ꦖꦺꦪ꧀ꦪꦴ’’ꦠꦶ. ꦈꦥꦴꦱꦶꦏꦴ ‘‘ꦩꦩ ꦥꦸꦠ꧀ꦠꦺꦴ ꦩꦁ ꦢꦛ꧀ꦜꦸꦏꦴꦩꦺꦴ, ꦄꦴꦒꦩꦤꦁ ꦩꦺ ꦥꦕ꧀ꦕꦴꦱꦷꦱꦠꦷ’’ꦠꦶ ꦨꦺꦴꦗꦤꦁ ꦒꦴꦲꦴꦥꦺꦠ꧀ꦮꦴ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦠꦱ꧀ꦱ ꦄꦢꦴꦱꦶ. ꦱꦺꦴ ꦏꦠꦨꦠ꧀ꦠꦏꦶꦕ꧀ꦕꦺꦴ ‘‘ꦩꦴꦠꦶꦏꦩꦴꦠꦴ ꦤꦴꦩ ꦠ꧀ꦮꦁ, ꦩꦲꦴꦈꦥꦴꦱꦶꦏꦺ’’ꦠꦶ ꦥꦸꦕ꧀ꦖꦶ. ‘‘ꦄꦴꦩ, ꦠꦴꦠꦴ’’ꦠꦶ. ‘‘ꦠ꧀ꦮꦁ ꦥꦫꦕꦶꦠ꧀ꦠꦁ ꦗꦴꦤꦴꦱꦷ’’ꦠꦶ? ‘‘ꦏꦶꦁ ꦩꦁ ꦥꦸꦕ꧀ꦖꦱꦶ, ꦠꦴꦠꦴ’’ꦠꦶ? ‘‘ꦩꦪꦴ ꦕꦶꦤ꧀ꦠꦶꦠꦕꦶꦤ꧀ꦠꦶꦠꦁ ꦱꦧ꧀ꦧꦩꦏꦴꦱꦶ, ꦠꦺꦤ ꦠꦁ ꦥꦸꦕ꧀ꦖꦴꦩꦷ’’ꦠꦶ. ‘‘ꦥꦫꦕꦶꦠ꧀ꦠꦗꦴꦤꦤꦏꦨꦶꦏ꧀ꦑꦹ ꦧꦲꦹ, ꦠꦴꦠꦴ’’ꦠꦶ? ‘‘ꦤꦴꦲꦁ ꦄꦚ꧀ꦚꦺ ꦥꦸꦕ꧀ꦖꦴꦩꦶ, ꦠꦸꦮꦁ ꦥꦸꦕ꧀ꦖꦴꦩꦶ, ꦈꦥꦴꦱꦶꦏꦺ’’ꦠꦶ. ꦌꦮꦁ ꦱꦤ꧀ꦠꦺꦥꦶ ꦈꦥꦴꦱꦶꦏꦴ ‘‘ꦥꦫꦕꦶꦠ꧀ꦠꦁ ꦗꦴꦤꦴꦩꦷ’’ꦠꦶ ꦄꦮꦠ꧀ꦮꦴ ‘‘ꦥꦫꦕꦶꦠ꧀ꦠꦁ ꦗꦴꦤꦤ꧀ꦠꦴ ꦤꦴꦩ ꦌꦮꦁ ꦏꦫꦺꦴꦤ꧀ꦠꦶ ꦥꦸꦠ꧀ꦠꦴ’’ꦠꦶ ꦄꦴꦲ. ꦱꦺꦴ ‘‘ꦨꦴꦫꦶꦪꦁ ꦮꦠꦶꦢꦁ ꦏꦩ꧀ꦩꦁ, ꦥꦸꦡꦸꦗ꧀ꦗꦤꦴ ꦤꦴꦩ ꦱꦺꦴꦨꦤꦩ꧀ꦥꦶ ꦄꦱꦺꦴꦨꦤꦩ꧀ꦥꦶ ꦕꦶꦤ꧀ꦠꦺꦤ꧀ꦠꦶ, ꦱꦕꦴꦲꦁ ꦏꦶꦚ꧀ꦕꦶ ꦄꦪꦸꦠ꧀ꦠꦁ ꦕꦶꦤ꧀ꦠꦪꦶꦱ꧀ꦱꦴꦩꦶ, ꦱꦲ ꦨꦟ꧀ꦝꦏꦺꦤ ꦕꦺꦴꦫꦁ ꦕꦹꦭ꦳ꦴꦪ ꦒꦟ꧀ꦲꦤ꧀ꦠꦷ ꦮꦶꦪ ꦩꦁ ꦮꦶꦥ꧀ꦥꦏꦴꦫꦁ ꦥꦴꦥꦺꦪ꧀ꦪ, ꦩꦪꦴ ꦆꦠꦺꦴ ꦥꦭꦴꦪꦶꦠꦸꦁ ꦮꦛ꧀ꦛꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ, ‘‘ꦈꦥꦴꦱꦶꦏꦺ, ꦄꦲꦁ ꦒꦩꦶꦱ꧀ꦱꦴꦩꦷ’’ꦠꦶ ꦄꦴꦲ. ‘‘ꦏꦲꦁ, ꦄꦪ꧀ꦪꦴ’’ꦠꦶ? ‘‘ꦱꦠ꧀ꦡꦸ ꦱꦤ꧀ꦠꦶꦏꦁ, ꦈꦥꦴꦱꦶꦏꦺ’’ꦠꦶ. ‘‘ꦮꦱꦡ ꦠꦴꦮ, ꦨꦤ꧀ꦠꦺ, ꦆꦣꦴ’’ꦠꦶ. ‘‘ꦤ ꦮꦱꦶꦱ꧀ꦱꦴꦩꦶ, ꦈꦥꦴꦱꦶꦏꦺ, ꦒꦩꦶꦱ꧀ꦱꦴꦩꦺꦮꦴ’’ꦠꦶ ꦤꦶꦏ꧀ꦑꦩꦶꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦄꦒꦩꦴꦱꦶ. ꦄꦡ ꦤꦁ ꦱꦠ꧀ꦡꦴ ‘‘ꦏꦶꦁ ꦨꦶꦏ꧀ꦑꦸ ꦤ ꦠ꧀ꦮꦁ ꦠꦠ꧀ꦡ ꦮꦱꦱꦷ’’ꦠꦶ ꦥꦸꦕ꧀ꦖꦶ. ‘‘ꦄꦴꦩ, ꦨꦤ꧀ꦠꦺ, ꦤ ꦱꦏ꧀ꦏꦴ ꦠꦠ꧀ꦡ ꦮꦱꦶꦠꦸ’’ꦤ꧀ꦠꦶ. ‘‘ꦏꦶꦁ ꦏꦴꦫꦟꦴ ꦨꦶꦏ꧀ꦑꦹ’’ꦠꦶ? ‘‘ꦨꦤ꧀ꦠꦺ, ꦱꦴ ꦈꦥꦴꦱꦶꦏꦴ ꦕꦶꦤ꧀ꦠꦶꦠꦕꦶꦤ꧀ꦠꦶꦠꦁ ꦱꦧ꧀ꦧꦁ ꦗꦴꦤꦴꦠꦶ, ꦥꦸꦡꦸꦗ꧀ꦗꦤꦴ ꦕ ꦤꦴꦩ ꦱꦺꦴꦨꦤꦩ꧀ꦥꦶ ꦄꦱꦺꦴꦨꦤꦩ꧀ꦥꦶ ꦕꦶꦤ꧀ꦠꦺꦤ꧀ꦠꦶ, ꦱꦕꦴꦲꦁ ꦏꦶꦚ꧀ꦕꦶ ꦄꦪꦸꦠ꧀ꦠꦁ ꦕꦶꦤ꧀ꦠꦺꦱ꧀ꦱꦴꦩꦶ, ꦱꦲ ꦨꦟ꧀ꦝꦏꦺꦤ ꦕꦺꦴꦫꦁ ꦕꦹꦭ꦳ꦴꦪ ꦒꦟ꧀ꦲꦤ꧀ꦠꦷ ꦮꦶꦪ ꦩꦁ ꦮꦶꦥ꧀ꦥꦏꦴꦫꦁ ꦥꦴꦥꦺꦱ꧀ꦱꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦄꦴꦒꦠꦺꦴꦩ꧀ꦲꦷꦠꦶ. ‘‘ꦨꦶꦏ꧀ꦑꦸ, ꦠꦠ꧀ꦡꦺꦮ ꦠꦪꦴ ꦮꦱꦶꦠꦸꦁ ꦮꦛ꧀ꦛꦠꦷ’’ꦠꦶ, ‘‘ꦤ ꦱꦏ꧀ꦏꦺꦴꦩꦶ, ꦨꦤ꧀ꦠꦺ, ꦤꦴꦲꦁ ꦠꦠ꧀ꦡ ꦮꦱꦶꦱ꧀ꦱꦴꦩꦷ’’ꦠꦶ. ‘‘ꦠꦺꦤ ꦲꦶ ꦠ꧀ꦮꦁ, ꦨꦶꦏ꧀ꦑꦸ, ꦌꦏꦩꦺꦮ ꦫꦏ꧀ꦑꦶꦠꦸꦁ ꦱꦏ꧀ꦑꦶꦱ꧀ꦱꦱꦷ’’ꦠꦶ. ‘‘ꦏꦶꦁ, ꦨꦤ꧀ꦠꦺ’’ꦠꦶ? ‘‘ꦠꦮ ꦕꦶꦠ꧀ꦠꦩꦺꦮ ꦫꦏ꧀ꦑ, ꦕꦶꦠ꧀ꦠꦁ ꦤꦴꦩꦺꦠꦁ ꦢꦸꦫꦏ꧀ꦑꦁ, ꦠ꧀ꦮꦁ ꦄꦠ꧀ꦠꦤꦺꦴ ꦕꦶꦠ꧀ꦠꦩꦺꦮ ꦤꦶꦒ꧀ꦒꦟ꧀ꦲ, ꦩꦴ ꦄꦚ꧀ꦚꦁ ꦏꦶꦚ꧀ꦕꦶ ꦕꦶꦤ꧀ꦠꦪꦶ, ꦕꦶꦠ꧀ꦠꦁ ꦤꦴꦩꦺꦠꦁ ꦢꦸꦤ꧀ꦤꦶꦒ꧀ꦒꦲ’’ꦤ꧀ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧓꧕. ‘‘ꦢꦸꦤ꧀ꦤꦶꦒ꧀ꦒꦲꦱ꧀ꦱ ꦭꦲꦸꦤꦺꦴ, ꦪꦠ꧀ꦡꦏꦴꦩꦤꦶꦥꦴꦠꦶꦤꦺꦴ;

ꦕꦶꦠ꧀ꦠꦱ꧀ꦱ ꦢꦩꦡꦺꦴ ꦱꦴꦣꦸ, ꦕꦶꦠ꧀ꦠꦁ ꦢꦤ꧀ꦠꦁ ꦱꦸꦑꦴꦮꦲ’’ꦤ꧀ꦠꦶ.

ꦠꦠ꧀ꦡ ꦕꦶꦠ꧀ꦠꦁ ꦤꦴꦩꦺꦠꦁ ꦢꦸꦏ꧀ꦑꦺꦤ ꦤꦶꦒ꧀ꦒꦪ꧀ꦲꦠꦷꦠꦶ ꦢꦸꦤ꧀ꦤꦶꦒ꧀ꦒꦲꦁ. ꦭꦲꦸꦁ ꦈꦥ꧀ꦥꦗ꧀ꦗꦠꦶ ꦕ ꦤꦶꦫꦸꦗ꧀ꦙꦠꦶ ꦕꦴꦠꦶ ꦭꦲꦸ. ꦠꦱ꧀ꦱ ꦢꦸꦤ꧀ꦤꦶꦒ꧀ꦒꦲꦱ꧀ꦱ ꦭꦲꦸꦤꦺꦴ. ꦪꦠ꧀ꦡꦏꦴꦩꦤꦶꦥꦴꦠꦶꦤꦺꦴꦠꦶ ꦪꦠ꧀ꦡ ꦏꦠ꧀ꦡꦕꦶꦢꦺꦮ ꦤꦶꦥꦠꦤꦱꦷꦭꦱ꧀ꦱ. ꦌꦠꦚ꧀ꦲꦶ ꦭꦨꦶꦠꦧ꧀ꦧꦛ꧀ꦜꦴꦤꦁ ꦮꦴ ꦄꦭꦨꦶꦠꦧ꧀ꦧꦛ꧀ꦜꦴꦤꦁ ꦮꦴ ꦪꦸꦠ꧀ꦠꦛ꧀ꦜꦴꦤꦁ ꦮꦴ ꦄꦪꦸꦠ꧀ꦠꦛ꧀ꦜꦴꦤꦁ ꦮꦴ ꦤ ꦗꦴꦤꦴꦠꦶ, ꦤꦺꦮ ꦗꦴꦠꦶꦁ ꦎꦭꦺꦴꦏꦺꦠꦶ, ꦤ ꦒꦺꦴꦠ꧀ꦠꦁ, ꦤ ꦮꦪꦁ. ꦪꦠ꧀ꦡ ꦪꦠ꧀ꦡ ꦆꦕ꧀ꦖꦠꦶ, ꦠꦠ꧀ꦡ ꦠꦠ꧀ꦡꦺꦮ ꦤꦶꦥꦠꦠꦷꦠꦶ ‘‘ꦪꦠ꧀ꦡꦏꦴꦩꦤꦶꦥꦴꦠꦷ’’ꦠꦶ ꦮꦸꦕ꧀ꦕꦠꦶ. ꦠꦱ꧀ꦱ ꦌꦮꦫꦹꦥꦱ꧀ꦱ ꦕꦶꦠ꧀ꦠꦱ꧀ꦱ ꦢꦩꦡꦺꦴ ꦱꦴꦣꦸ ꦕꦠꦹꦲꦶ ꦄꦫꦶꦪꦩꦒ꧀ꦒꦺꦲꦶ ꦢꦤ꧀ꦠꦨꦴꦮꦺꦴ ꦪꦡꦴ ꦤꦶꦧ꧀ꦧꦶꦱꦺꦮꦤꦁ ꦲꦺꦴꦠꦶ, ꦠꦡꦴ ꦏꦠꦨꦴꦮꦺꦴ ꦱꦴꦣꦸ. ꦏꦶꦁ ꦏꦴꦫꦟꦴ? ꦆꦢꦚ꧀ꦲꦶ ꦕꦶꦠ꧀ꦠꦁ ꦢꦤ꧀ꦠꦁ ꦱꦸꦑꦴꦮꦲꦁ ꦤꦶꦧ꧀ꦧꦶꦱꦺꦮꦤꦁ ꦏꦠꦁ ꦩꦒ꧀ꦒꦦꦭꦱꦸꦑꦁ ꦥꦫꦩꦠ꧀ꦡꦤꦶꦧ꧀ꦧꦴꦤꦱꦸꦑꦚ꧀ꦕ ꦄꦴꦮꦲꦠꦷꦠꦶ.

ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦱꦩ꧀ꦥꦠ꧀ꦠꦥꦫꦶꦱꦴꦪ ꦧꦲꦹ ꦱꦺꦴꦠꦴꦥꦤ꧀ꦤꦴꦢꦪꦺꦴ ꦄꦲꦺꦱꦸꦁ, ꦩꦲꦴꦗꦤꦱ꧀ꦱ ꦱꦴꦠ꧀ꦡꦶꦏꦴ ꦣꦩ꧀ꦩꦢꦺꦱꦤꦴ ꦗꦴꦠꦴꦠꦶ.

ꦱꦠ꧀ꦡꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦆꦩꦁ ꦎꦮꦴꦢꦁ ꦢꦠ꧀ꦮꦴ, ‘‘ꦒꦕ꧀ꦖ, ꦨꦶꦏ꧀ꦑꦸ, ꦄꦚ꧀ꦚꦁ ꦏꦶꦚ꧀ꦕꦶ ꦄꦕꦶꦤ꧀ꦠꦪꦶꦠ꧀ꦮꦴ ꦠꦠ꧀ꦡꦺꦮ ꦮꦱꦴꦲꦷ’’ꦠꦶ ꦥꦲꦶꦟꦶ. ꦱꦺꦴ ꦨꦶꦏ꧀ꦑꦸ ꦱꦠ꧀ꦡꦸ ꦱꦤ꧀ꦠꦶꦏꦴ ꦎꦮꦴꦢꦁ ꦭꦨꦶꦠ꧀ꦮꦴ ꦠꦠ꧀ꦡ ꦄꦒꦩꦴꦱꦶ. ꦏꦶꦚ꧀ꦕꦶ ꦧꦲꦶꦢ꧀ꦣꦴ ꦕꦶꦤ꧀ꦠꦤꦁ ꦤꦴꦩ ꦤ ꦕꦶꦤ꧀ꦠꦺꦱꦶ. ꦩꦲꦴꦈꦥꦴꦱꦶꦏꦴꦥꦶ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦎꦭꦺꦴꦏꦺꦤ꧀ꦠꦷ ꦡꦺꦫꦁ ꦢꦶꦱ꧀ꦮꦴ, ‘‘ꦆꦢꦴꦤꦶ ꦎꦮꦴꦢꦢꦴꦪꦏꦁ ꦄꦴꦕꦫꦶꦪꦁ ꦭꦨꦶꦠ꧀ꦮꦴ ꦥꦸꦤꦴꦒꦠꦺꦴ ꦩꦩ ꦥꦸꦠ꧀ꦠꦺꦴ’’ꦠꦶ ꦄꦠ꧀ꦠꦤꦺꦴ ꦚꦴꦟꦺꦤꦺꦮ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦠꦱ꧀ꦱ ꦱꦥ꧀ꦥꦴꦪꦴꦲꦴꦫꦁ ꦥꦛꦶꦪꦴꦢꦺꦠ꧀ꦮꦴ ꦄꦢꦴꦱꦶ. ꦱꦺꦴ ꦱꦥ꧀ꦥꦴꦪꦨꦺꦴꦗꦤꦁ ꦱꦺꦮꦶꦠ꧀ꦮꦴ ꦏꦠꦶꦥꦴꦲꦺꦤꦺꦮ ꦄꦫꦲꦠ꧀ꦠꦁ ꦥꦠ꧀ꦮꦴ ꦩꦒ꧀ꦒꦦꦭꦱꦸꦑꦺꦤ ꦮꦷꦠꦶꦤꦴꦩꦺꦤ꧀ꦠꦺꦴ ‘‘ꦄꦲꦺꦴ ꦩꦲꦴꦈꦥꦴꦱꦶꦏꦴ ꦩꦪ꧀ꦲꦁ ꦥꦠꦶꦛ꧀ꦜꦴ ꦗꦴꦠꦴ, ꦄꦲꦁ ꦆꦩꦁ ꦤꦶꦱ꧀ꦱꦴꦪ ꦨꦮꦤꦶꦱ꧀ꦱꦫꦟꦁ ꦥꦠ꧀ꦠꦺꦴꦩ꧀ꦲꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ, ‘‘ꦆꦩꦱ꧀ꦩꦶꦁ ꦠꦴꦮ ꦩꦺ ꦄꦠ꧀ꦠꦨꦴꦮꦺ ꦥꦠꦶꦛ꧀ꦜꦴ ꦗꦴꦠꦴ, ꦱꦁꦱꦴꦫꦺ ꦥꦤ ꦩꦺ ꦱꦁꦱꦫꦤ꧀ꦠꦱ꧀ꦱ ꦄꦚ꧀ꦚꦺꦱꦸꦥꦶ ꦄꦠ꧀ꦠꦨꦴꦮꦺꦱꦸ ꦄꦪꦁ ꦥꦠꦶꦛ꧀ꦜꦴ ꦨꦹꦠꦥꦸꦧ꧀ꦧꦴ, ꦤꦺꦴ’’ꦠꦶ ꦈꦥꦣꦴꦫꦺꦤ꧀ꦠꦺꦴ ꦌꦏꦹꦤꦄꦠ꧀ꦠꦨꦴꦮꦱꦠꦁ ꦄꦤꦸꦱ꧀ꦱꦫꦶ. ꦱꦴꦥꦶ ꦌꦏꦹꦤꦄꦠ꧀ꦠꦨꦴꦮꦱꦠꦺ ꦠꦱ꧀ꦱ ꦥꦴꦢꦥꦫꦶꦕꦴꦫꦶꦏꦴ ꦄꦚ꧀ꦚꦺꦱꦸ ꦥꦛꦶꦧꦢ꧀ꦣꦕꦶꦠ꧀ꦠꦴ ꦲꦸꦠ꧀ꦮꦴ ꦠꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦱꦶ. ꦡꦺꦫꦺꦴ ꦠꦱ꧀ꦱꦴ ꦌꦠ꧀ꦠꦏꦁ ꦄꦒꦸꦟꦁ ꦢꦶꦱ꧀ꦮꦴ, ‘‘ꦄꦲꦺꦴ ꦩꦪꦁ ꦩꦲꦴꦈꦥꦴꦱꦶꦏꦴ ꦨꦴꦫꦶꦪꦁ ꦏꦩ꧀ꦩꦁ ꦄꦏꦴꦱꦷ’’ꦠꦶ ꦕꦶꦤ꧀ꦠꦺꦱꦶ.

ꦩꦲꦴꦈꦥꦴꦱꦶꦏꦴꦥꦶ ꦒꦺꦲꦺ ꦤꦶꦱꦶꦤ꧀ꦤꦴꦮ ‘‘ꦏꦶꦁ ꦤꦸ ꦑꦺꦴ ꦩꦪ꧀ꦲꦁ ꦥꦸꦠ꧀ꦠꦱ꧀ꦱ ꦥꦧ꧀ꦧꦗꦶꦠꦏꦶꦕ꧀ꦕꦁ ꦩꦠ꧀ꦠꦏꦁ ꦥꦠ꧀ꦠꦁ, ꦤꦺꦴ’’ꦠꦶ ꦈꦥꦣꦴꦫꦪꦩꦴꦤꦴ ꦠꦱ꧀ꦱ ꦄꦫꦲꦠ꧀ꦠꦥꦠ꧀ꦠꦶꦁ ꦚꦠ꧀ꦮꦴ ꦈꦠ꧀ꦠꦫꦶ ꦈꦥꦣꦴꦫꦶꦪꦩꦴꦤꦴ, ‘‘ꦩꦩ ꦥꦸꦠ꧀ꦠꦺꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦄꦲꦺꦴ ꦮꦠ ꦩꦺ ꦄꦪꦁ ꦈꦥꦴꦱꦶꦏꦴ ꦩꦲꦠꦷ ꦥꦠꦶꦛ꧀ꦜꦴ ꦗꦴꦠꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ, ‘‘ꦄꦠꦷꦠꦺꦥꦶ ꦤꦸ ꦑꦺꦴ ꦩꦺ ꦄꦪꦁ ꦥꦠꦶꦛ꧀ꦜꦴ ꦨꦹꦠꦥꦸꦧ꧀ꦧꦴ, ꦤꦺꦴ’’ꦠꦶ ꦈꦥꦣꦴꦫꦺꦤ꧀ꦠꦺꦴ ꦌꦏꦹꦤꦄꦠ꧀ꦠꦨꦴꦮꦱꦠꦁ ꦄꦤꦸꦱ꧀ꦱꦫꦶ, ‘‘ꦄꦲꦁ ꦑꦺꦴ ꦥꦤ ꦌꦏꦹꦤꦄꦠ꧀ꦠꦨꦴꦮꦱꦠꦺ ꦄꦚ꧀ꦚꦺꦲꦶ ꦱꦢ꧀ꦣꦶꦁ ꦌꦏꦠꦺꦴ ꦲꦸꦠ꧀ꦮꦴ ꦌꦠꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦱꦶꦁ, ꦄꦪꦁ ꦩꦺ ꦌꦠ꧀ꦠꦏꦁ ꦄꦒꦸꦟꦁ ꦢꦶꦱ꧀ꦮꦴ ‘ꦄꦲꦺꦴ ꦨꦴꦫꦶꦪꦁ ꦏꦩ꧀ꦩꦁ ꦏꦠꦁ ꦈꦥꦴꦱꦶꦏꦴꦪꦴ’’ꦠꦶ ꦕꦶꦤ꧀ꦠꦺꦱꦶ. ‘‘ꦄꦠ꧀ꦡꦶ ꦤꦸ ꦑꦺꦴ ꦌꦮꦁ ꦱꦁꦱꦴꦫꦺ ꦱꦁꦱꦫꦤ꧀ꦠꦶꦪꦴ ꦩꦩ ꦥꦸꦠ꧀ꦠꦱ꧀ꦱ ꦈꦥꦏꦴꦫꦺꦴ ꦏꦠꦥꦸꦧ꧀ꦧꦺꦴ’’ꦠꦶ ꦈꦥꦣꦴꦫꦪꦩꦴꦤꦴ ꦠꦠꦺꦴ ꦈꦠ꧀ꦠꦫꦶꦁ ꦱꦠꦩꦁ ꦄꦠ꧀ꦠꦨꦴꦮꦁ ꦄꦤꦸꦱ꧀ꦱꦫꦶꦠ꧀ꦮꦴ ꦱꦠꦩꦺ ꦄꦠ꧀ꦠꦨꦴꦮꦺ ꦩꦪꦴ ꦌꦠꦱ꧀ꦱ ꦥꦴꦢꦥꦫꦶꦕꦴꦫꦶꦏꦴꦪ ꦲꦸꦠ꧀ꦮꦴ ꦌꦠꦱ꧀ꦩꦶꦁ ꦗꦷꦮꦶꦠꦴ ꦮꦺꦴꦫꦺꦴꦥꦤꦛ꧀ꦜꦴꦤꦺ ꦗꦷꦮꦶꦠꦢꦴꦤꦁ ꦢꦶꦤ꧀ꦤꦁ, ꦄꦲꦺꦴ ꦩꦪꦴ ꦩꦩ ꦥꦸꦠ꧀ꦠꦱ꧀ꦱ ꦩꦲꦴꦈꦥꦏꦴꦫꦺꦴ ꦏꦠꦥꦸꦧ꧀ꦧꦺꦴ’’ꦠꦶ ꦒꦺꦲꦺ ꦤꦶꦱꦶꦤ꧀ꦤꦴꦮ ꦈꦠ꧀ꦠꦫꦶꦁ ꦮꦶꦱꦺꦱꦺꦠ꧀ꦮꦴ ‘‘ꦈꦥꦣꦴꦫꦺꦡꦴ’’ꦠꦶ ꦄꦴꦲ. ꦱꦺꦴ ꦢꦶꦧ꧀ꦧꦴꦪ ꦱꦺꦴꦠꦣꦴꦠꦸꦪꦴ ꦱꦢ꧀ꦢꦁ ꦱꦸꦠ꧀ꦮꦴ ꦮꦶꦱꦺꦱꦺꦠ꧀ꦮꦴ ꦱꦠꦩꦁ ꦄꦠ꧀ꦠꦨꦴꦮꦁ ꦄꦤꦸꦱ꧀ꦱꦫꦶꦠ꧀ꦮꦴ ꦠꦠ꧀ꦡ ꦠꦴꦪ ꦄꦠ꧀ꦠꦤꦺꦴ ꦗꦷꦮꦶꦠꦱ꧀ꦱ ꦢꦶꦤ꧀ꦤꦨꦴꦮꦁ ꦢꦶꦱ꧀ꦮꦴ, ‘‘ꦄꦲꦺꦴ ꦩꦩ ꦆꦩꦴꦪ ꦩꦲꦴꦈꦥꦴꦱꦶꦏꦴꦪ ꦈꦥꦏꦴꦫꦺꦴ ꦏꦠꦥꦸꦧ꧀ꦧꦺꦴ’’ꦠꦶ ꦄꦠ꧀ꦠꦩꦤꦺꦴ ꦲꦸꦠ꧀ꦮꦴ ꦠꦱ꧀ꦱꦴ ꦠꦠ꧀ꦡꦺꦮ ꦕꦠꦹꦱꦸ ꦩꦒ꧀ꦒꦦꦭꦺꦱꦸ ꦥꦚ꧀ꦲꦁ ꦏꦡꦺꦠ꧀ꦮꦴ ꦄꦤꦸꦥꦴꦢꦶꦱꦺꦱꦴꦪ ꦤꦶꦧ꧀ꦧꦴꦤꦣꦴꦠꦸꦪꦴ ꦥꦫꦶꦤꦶꦧ꧀ꦧꦴꦪꦷꦠꦶ.

ꦄꦚ꧀ꦚꦠꦫꦨꦶꦏ꧀ꦑꦸꦮꦠ꧀ꦡꦸ ꦢꦸꦠꦶꦪꦁ.

꧓. ꦄꦚ꧀ꦚꦠꦫꦈꦏ꧀ꦏꦟ꧀ꦜꦶꦠꦨꦶꦏ꧀ꦑꦸꦮꦠ꧀ꦡꦸ

ꦱꦸꦢꦸꦢ꧀ꦢꦱꦤ꧀ꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦤ꧀ꦠꦺꦴ ꦄꦚ꧀ꦚꦠꦫꦁ ꦈꦏ꧀ꦏꦟ꧀ꦜꦶꦠꦨꦶꦏ꧀ꦑꦸꦁ ꦄꦴꦫꦧ꧀ꦨ ꦏꦡꦺꦱꦶ.

ꦱꦠ꧀ꦡꦫꦶ ꦏꦶꦫ ꦱꦴꦮꦠ꧀ꦡꦶꦪꦁ ꦮꦶꦲꦫꦤ꧀ꦠꦺ ꦌꦏꦺꦴ ꦱꦺꦛ꧀ꦜꦶꦥꦸꦠ꧀ꦠꦺꦴ ꦄꦠ꧀ꦠꦤꦺꦴ ꦏꦸꦭꦹꦥꦒꦠ꧀ꦡꦺꦫꦁ ꦈꦥꦱꦔ꧀ꦏꦩꦶꦠ꧀ꦮꦴ, ‘‘ꦨꦤ꧀ꦠꦺ, ꦄꦲꦁ ꦢꦸꦏ꧀ꦑꦴ ꦩꦸꦕ꧀ꦕꦶꦠꦸꦏꦴꦩꦺꦴ, ꦌꦏꦁ ꦩꦺ ꦢꦸꦏ꧀ꦑꦠꦺꦴ ꦩꦸꦕ꧀ꦕꦤꦏꦴꦫꦟꦁ ꦏꦡꦺꦡꦴ’’ꦠꦶ ꦄꦴꦲ. ‘‘ꦱꦴꦣꦴꦮꦸꦱꦺꦴ, ꦱꦕꦺꦱꦶ ꦢꦸꦏ꧀ꦑꦴ ꦩꦸꦕ꧀ꦕꦶꦠꦸꦏꦴꦩꦺꦴ, ꦱꦭꦴꦏꦨꦠ꧀ꦠꦁ ꦢꦺꦲꦶ, ꦥꦏ꧀ꦑꦶꦏꦨꦠ꧀ꦠꦁ ꦢꦺꦲꦶ, ꦮꦱ꧀ꦱꦴꦮꦴꦱꦶꦏꦁ ꦢꦺꦲꦶ, ꦕꦷꦮꦫꦴꦢꦪꦺꦴ ꦥꦕ꧀ꦕꦪꦺ ꦢꦺꦲꦶ, ꦄꦠ꧀ꦠꦤꦺꦴ ꦱꦴꦥꦠꦺꦪ꧀ꦪꦁ ꦠꦪꦺꦴ ꦏꦺꦴꦛ꧀ꦜꦴꦱꦺ ꦏꦠ꧀ꦮꦴ ꦌꦏꦺꦤ ꦏꦩ꧀ꦩꦤ꧀ꦠꦁ ꦥꦪꦺꦴꦗꦺꦲꦶ, ꦌꦏꦺꦤ ꦥꦸꦠ꧀ꦠꦢꦴꦫꦁ ꦥꦺꦴꦱꦺꦲꦶ, ꦌꦏꦁ ꦧꦸꦢ꧀ꦣꦱꦴꦱꦤꦺ ꦢꦺꦲꦷ’’ꦠꦶ ꦄꦴꦲ. ꦱꦺꦴ ‘‘ꦱꦴꦣꦸ, ꦨꦤ꧀ꦠꦺ’’ꦠꦶ ꦮꦸꦠ꧀ꦠꦥꦛꦶꦥꦴꦛꦶꦪꦴ ꦱꦧ꧀ꦧꦁ ꦏꦠ꧀ꦮꦴ ꦥꦸꦤ ꦡꦺꦫꦁ ꦥꦸꦕ꧀ꦖꦶ – ‘‘ꦠꦠꦺꦴ ꦈꦠ꧀ꦠꦫꦶꦁ ꦄꦚ꧀ꦚꦁ ꦏꦶꦁ ꦏꦫꦺꦴꦩꦶ, ꦨꦤ꧀ꦠꦺ’’ꦠꦶ? ‘‘ꦄꦴꦮꦸꦱꦺꦴ, ꦠꦷꦟꦶ ꦱꦫꦟꦴꦤꦶ ꦒꦟ꧀ꦲ, ꦥꦚ꧀ꦕ ꦱꦷꦭꦴꦤꦶ ꦒꦟ꧀ꦲꦴꦲꦷ’’ꦠꦶ. ꦠꦴꦤꦶꦥꦶ ꦥꦛꦶꦒ꧀ꦒꦲꦺꦠ꧀ꦮꦴ ꦠꦠꦺꦴ ꦈꦠ꧀ꦠꦫꦶꦁ ꦥꦸꦕ꧀ꦖꦶ. ‘‘ꦠꦺꦤ ꦲꦶ ꦢꦱ ꦱꦷꦭꦴꦤꦶ ꦒꦟ꧀ꦲꦴꦲꦷ’’ꦠꦶ. ‘‘ꦱꦴꦣꦸ, ꦨꦤ꧀ꦠꦺ’’ꦠꦶ ꦒꦟ꧀ꦲꦶ. ꦱꦺꦴ ꦌꦮꦁ ꦄꦤꦸꦥꦸꦧ꧀ꦧꦺꦤ ꦥꦸꦚ꧀ꦚꦏꦩ꧀ꦩꦱ꧀ꦱ ꦏꦠꦠ꧀ꦠꦴ ꦄꦤꦸꦥꦸꦧ꧀ꦧꦱꦺꦛ꧀ꦜꦶꦥꦸꦠ꧀ꦠꦺꦴ ꦤꦴꦩ ꦗꦴꦠꦺꦴ. ꦠꦠꦺꦴ ‘‘ꦈꦠ꧀ꦠꦫꦶꦩ꧀ꦥꦶ ꦏꦠ꧀ꦠꦧ꧀ꦧꦁ ꦄꦠ꧀ꦡꦶ, ꦨꦤ꧀ꦠꦺ’’ꦠꦶ ꦥꦸꦤ ꦥꦸꦕ꧀ꦖꦶꦠ꧀ꦮꦴ, ‘‘ꦠꦺꦤ ꦲꦶ ꦥꦧ꧀ꦧꦗꦴꦲꦷ’’ꦠꦶ ꦮꦸꦠ꧀ꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶ. ꦠꦱ꧀ꦱꦺꦏꦺꦴ ꦄꦴꦨꦶꦣꦩ꧀ꦩꦶꦏꦨꦶꦏ꧀ꦑꦸ ꦄꦴꦕꦫꦶꦪꦺꦴ ꦄꦲꦺꦴꦱꦶ. ꦌꦏꦺꦴ ꦮꦶꦤꦪꦣꦫꦺꦴ ꦈꦥꦗ꧀ꦙꦴꦪꦺꦴ. ꦠꦱ꧀ꦱ ꦭꦢ꧀ꦣꦹꦥꦱꦩ꧀ꦥꦢꦱ꧀ꦱ ꦄꦴꦕꦫꦶꦪꦺꦴ ꦄꦠ꧀ꦠꦤꦺꦴ ꦱꦤ꧀ꦠꦶꦏꦁ ꦄꦴꦒꦠꦏꦴꦭꦺ ꦄꦨꦶꦣꦩ꧀ꦩꦺ ꦥꦚ꧀ꦲꦁ ꦏꦡꦺꦱꦶ – ‘‘ꦧꦸꦢ꧀ꦣꦱꦴꦱꦤꦺ ꦤꦴꦩ ꦆꦢꦁ ꦏꦴꦠꦸꦁ ꦮꦛ꧀ꦛꦠꦶ, ꦆꦢꦁ ꦤ ꦮꦛ꧀ꦛꦠꦷ’’ꦠꦶ. ꦈꦥꦗ꧀ꦙꦴꦪꦺꦴꦥꦶꦱ꧀ꦱ ꦄꦠ꧀ꦠꦤꦺꦴ ꦱꦤ꧀ꦠꦶꦏꦁ ꦄꦴꦒꦠꦏꦴꦭꦺ ꦮꦶꦤꦪꦺ ꦥꦚ꧀ꦲꦁ ꦏꦡꦺꦱꦶ – ‘‘ꦧꦸꦢ꧀ꦣꦱꦴꦱꦤꦺ ꦤꦴꦩ ꦆꦢꦁ ꦏꦴꦠꦸꦁ ꦮꦛ꧀ꦛꦠꦶ, ꦆꦢꦁ ꦤ ꦮꦛ꧀ꦛꦠꦶ, ꦆꦢꦁ ꦏꦥ꧀ꦥꦠꦶ, ꦆꦢꦁ ꦤ ꦏꦥ꧀ꦥꦠꦷ’’ꦠꦶ. ꦱꦺꦴ ꦕꦶꦤ꧀ꦠꦺꦱꦶ – ‘‘ꦄꦲꦺꦴ ꦨꦴꦫꦶꦪꦁ ꦆꦢꦁ ꦏꦩ꧀ꦩꦁ, ꦄꦲꦁ ꦢꦸꦏ꧀ꦑꦴ ꦩꦸꦕ꧀ꦕꦶꦠꦸꦏꦴꦩꦺꦴ ꦥꦧ꧀ꦧꦗꦶꦠꦺꦴ, ꦆꦣ ꦕ ꦩꦩ ꦲꦠ꧀ꦡꦥꦱꦴꦫꦟꦛ꧀ꦜꦴꦤꦩ꧀ꦥꦶ ꦤ ꦥꦚ꧀ꦚꦴꦪꦠꦶ, ꦒꦺꦲꦺ ꦜꦠ꧀ꦮꦴꦮ ꦢꦸꦏ꧀ꦑꦴ ꦩꦸꦕ꧀ꦕꦶꦠꦸꦁ ꦱꦏ꧀ꦏꦴ, ꦩꦪꦴ ꦒꦶꦲꦶꦤꦴ ꦨꦮꦶꦠꦸꦁ ꦮꦛ꧀ꦛꦠꦷ’’ꦠꦶ. ꦱꦺꦴ ꦠꦠꦺꦴ ꦥꦛ꧀ꦜꦴꦪ ꦈꦏ꧀ꦏꦟ꧀ꦜꦶꦠꦺꦴ ꦄꦤꦨꦶꦫꦠꦺꦴ ꦢ꧀ꦮꦠ꧀ꦠꦶꦁꦱꦴꦏꦴꦫꦺ ꦱꦗ꧀ꦙꦴꦪꦁ ꦤ ꦏꦫꦺꦴꦠꦶ, ꦈꦢ꧀ꦢꦺꦱꦁ ꦤ ꦒꦟ꧀ꦲꦴꦠꦶ, ꦏꦶꦱꦺꦴ ꦭꦹꦑꦺꦴ ꦣꦩꦤꦶꦱꦤ꧀ꦡꦠꦒꦠ꧀ꦠꦺꦴ ꦄꦴꦭꦱ꧀ꦱꦶꦪꦴꦨꦶꦨꦹꦠꦺꦴ ꦏꦕ꧀ꦖꦸꦥꦫꦶꦏꦶꦟ꧀ꦟꦺꦴ ꦄꦲꦺꦴꦱꦶ.

ꦄꦡ ꦤꦁ ꦢꦲꦫꦱꦴꦩꦟꦺꦫꦴ, ‘‘ꦄꦴꦮꦸꦱꦺꦴ, ꦏꦶꦁ ꦠ꧀ꦮꦁ ꦜꦶꦠꦛ꧀ꦜꦴꦤꦺ ꦜꦶꦠꦺꦴꦮ ꦤꦶꦱꦶꦤ꧀ꦤꦛ꧀ꦜꦴꦤꦺ ꦤꦶꦱꦶꦤ꧀ꦤꦺꦴꦮ ꦄꦲꦺꦴꦱꦶ, ꦥꦟ꧀ꦝꦸꦫꦺꦴꦒꦴꦨꦶꦨꦹꦠꦺꦴ ꦏꦶꦱꦺꦴ ꦭꦹꦑꦺꦴ ꦣꦩꦤꦶꦱꦤ꧀ꦡꦠꦒꦠ꧀ꦠꦺꦴ ꦄꦴꦭꦱ꧀ꦱꦶꦪꦴꦨꦶꦨꦹꦠꦺꦴ ꦏꦕ꧀ꦖꦸꦥꦫꦶꦏꦶꦟ꧀ꦟꦺꦴ, ꦏꦶꦁ ꦠꦺ ꦏꦠ’’ꦤ꧀ꦠꦶ ꦥꦸꦕ꧀ꦖꦶꦁꦱꦸ. ‘‘ꦈꦏ꧀ꦏꦟ꧀ꦜꦶꦠꦺꦴꦩ꧀ꦲꦶ, ꦄꦴꦮꦸꦱꦺꦴ’’ꦠꦶ. ‘‘ꦏꦶꦁ ꦏꦴꦫꦟꦴ’’ꦠꦶ? ꦱꦺꦴ ꦠꦁ ꦥꦮꦠ꧀ꦠꦶꦁ ꦄꦴꦫꦺꦴꦕꦺꦱꦶ. ꦠꦺ ꦠꦱ꧀ꦱ ꦄꦴꦕꦫꦶꦪꦸꦥꦗ꧀ꦙꦴꦪꦴꦤꦁ ꦄꦴꦕꦶꦏ꧀ꦑꦶꦁꦱꦸ. ꦄꦴꦕꦫꦶꦪꦸꦥꦗ꧀ꦙꦴꦪꦴ ꦠꦁ ꦄꦴꦢꦴꦪ ꦱꦠ꧀ꦡꦸ ꦱꦤ꧀ꦠꦶꦏꦁ ꦄꦒꦩꦁꦱꦸ. ꦱꦠ꧀ꦡꦴ ‘‘ꦏꦶꦁ, ꦨꦶꦏ꧀ꦑꦮꦺ, ꦄꦴꦒꦠꦠ꧀ꦡꦴ’’ꦠꦶ ꦄꦴꦲ. ‘‘ꦨꦤ꧀ꦠꦺ, ꦄꦪꦁ ꦨꦶꦏ꧀ꦑꦸ ꦠꦸꦩ꧀ꦲꦴꦏꦁ ꦱꦴꦱꦤꦺ ꦈꦏ꧀ꦏꦟ꧀ꦜꦶꦠꦺꦴ’’ꦠꦶ. ‘‘ꦌꦮꦁ ꦏꦶꦫ ꦨꦶꦏ꧀ꦑꦹ’’ꦠꦶ. ‘‘ꦄꦴꦩ, ꦨꦤ꧀ꦠꦺ’’ꦠꦶ. ‘‘ꦏꦶꦁ ꦏꦴꦫꦟꦴ’’ꦠꦶ? ‘‘ꦄꦲꦁ, ꦨꦤ꧀ꦠꦺ, ꦢꦸꦏ꧀ꦑꦴ ꦩꦸꦕ꧀ꦕꦶꦠꦸꦏꦴꦩꦺꦴꦮ ꦥꦧ꧀ꦧꦗꦶꦠꦺꦴ, ꦠꦱ꧀ꦱ ꦩꦺ ꦄꦴꦕꦫꦶꦪꦺꦴ ꦄꦨꦶꦣꦩ꧀ꦩꦏꦡꦁ ꦏꦡꦺꦱꦶ, ꦈꦥꦗ꧀ꦙꦴꦪꦺꦴ ꦮꦶꦤꦪꦏꦡꦁ ꦏꦡꦺꦱꦶ, ꦱ꧀ꦮꦴꦲꦁ ‘ꦆꦣ ꦩꦺ ꦲꦠ꧀ꦡꦥꦱꦴꦫꦟꦛ꧀ꦜꦴꦤꦩ꧀ꦥꦶ ꦤꦠ꧀ꦡꦶ, ꦒꦶꦲꦶꦤꦴ ꦲꦸꦠ꧀ꦮꦴ ꦱꦏ꧀ꦏꦴ ꦢꦸꦏ꧀ꦑꦴ ꦩꦸꦕ꧀ꦕꦶꦠꦸꦁ, ꦒꦶꦲꦶ ꦨꦮꦶꦱ꧀ꦱꦴꦩꦷ’ꦠꦶ ꦱꦤ꧀ꦤꦶꦛ꧀ꦜꦴꦤꦩꦏꦴꦱꦶꦁ, ꦨꦤ꧀ꦠꦺ’’ꦠꦶ. ‘‘ꦱꦕꦺ ꦠ꧀ꦮꦁ, ꦨꦶꦏ꧀ꦑꦸ, ꦌꦏꦩꦺꦮ ꦫꦏ꧀ꦑꦶꦠꦸꦁ ꦱꦏ꧀ꦑꦶꦱ꧀ꦱꦱꦶ, ꦄꦮꦱꦺꦱꦴꦤꦁ ꦫꦏ꧀ꦑꦤꦏꦶꦕ꧀ꦕꦁ ꦤꦠ꧀ꦡꦷ’’ꦠꦶ. ‘‘ꦏꦶꦁ, ꦨꦤ꧀ꦠꦺ’’ꦠꦶ? ‘‘ꦠꦮ ꦕꦶꦠ꧀ꦠꦩꦺꦮ ꦫꦏ꧀ꦑꦶꦠꦸꦁ ꦱꦏ꧀ꦑꦶꦱ꧀ꦱꦱꦷ’’ꦠꦶ. ‘‘ꦱꦏ꧀ꦑꦶꦱ꧀ꦱꦴꦩꦶ, ꦨꦤ꧀ꦠꦺ’’ꦠꦶ. ‘‘ꦠꦺꦤ ꦲꦶ ꦄꦠ꧀ꦠꦤꦺꦴ ꦕꦶꦠ꧀ꦠꦩꦺꦮ ꦫꦏ꧀ꦑꦴꦲꦶ, ꦱꦏ꧀ꦏꦴ ꦢꦸꦏ꧀ꦑꦴ ꦩꦸꦕ꧀ꦕꦶꦠꦸ’’ꦤ꧀ꦠꦶ ꦆꦩꦁ ꦎꦮꦴꦢꦁ ꦢꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧓꧖. ‘‘ꦱꦸꦢꦸꦢ꧀ꦢꦱꦁ ꦱꦸꦤꦶꦥꦸꦟꦁ, ꦪꦠ꧀ꦡꦏꦴꦩꦤꦶꦥꦴꦠꦶꦤꦁ;

ꦕꦶꦠ꧀ꦠꦁ ꦫꦏ꧀ꦑꦺꦡ ꦩꦺꦣꦴꦮꦷ, ꦕꦶꦠ꧀ꦠꦁ ꦒꦸꦠ꧀ꦠꦁ ꦱꦸꦑꦴꦮꦲ’’ꦤ꧀ꦠꦶ.

ꦠꦠ꧀ꦡ ꦱꦸꦢꦸꦢ꧀ꦢꦱꦤ꧀ꦠꦶ ꦱꦸꦛ꧀ꦜꦸ ꦢꦸꦢ꧀ꦢꦱꦁ. ꦱꦸꦤꦶꦥꦸꦟꦤ꧀ꦠꦶ ꦱꦸꦛ꧀ꦜꦸ ꦤꦶꦥꦸꦟꦁ ꦥꦫꦩꦱꦟ꧀ꦲꦁ. ꦪꦠ꧀ꦡꦏꦴꦩꦤꦶꦥꦴꦠꦶꦤꦤ꧀ꦠꦶ ꦗꦴꦠꦶꦄꦴꦢꦷꦤꦶ ꦄꦤꦺꦴꦭꦺꦴꦏꦺꦠ꧀ꦮꦴ ꦭꦨꦶꦠꦧ꧀ꦧꦴꦭꦨꦶꦠꦧ꧀ꦧꦪꦸꦠ꧀ꦠꦴꦪꦸꦠ꧀ꦠꦛ꧀ꦜꦴꦤꦺꦱꦸ ꦪꦠ꧀ꦡ ꦏꦠ꧀ꦡꦕꦶ ꦤꦶꦥꦠꦤꦱꦷꦭꦁ. ꦕꦶꦠ꧀ꦠꦁ ꦫꦏ꧀ꦑꦺꦡ ꦩꦺꦣꦴꦮꦷꦠꦶ ꦄꦤ꧀ꦣꦧꦴꦭꦺꦴ ꦢꦸꦩ꧀ꦩꦺꦣꦺꦴ ꦄꦠ꧀ꦠꦤꦺꦴ ꦕꦶꦠ꧀ꦠꦁ ꦫꦏ꧀ꦑꦶꦠꦸꦁ ꦱꦩꦠ꧀ꦡꦺꦴ ꦤꦴꦩ ꦤꦠ꧀ꦡꦶ, ꦕꦶꦠ꧀ꦠꦮꦱꦶꦏꦺꦴ ꦲꦸꦠ꧀ꦮꦴ ꦄꦤꦪꦧ꧀ꦪꦱꦤꦁ ꦥꦴꦥꦸꦟꦴꦠꦶ. ꦩꦺꦣꦴꦮꦷ ꦥꦤ ꦥꦟ꧀ꦝꦶꦠꦺꦴꦮ ꦕꦶꦠ꧀ꦠꦁ ꦫꦏ꧀ꦑꦶꦠꦸꦁ ꦱꦏ꧀ꦏꦺꦴꦠꦶ, ꦠꦱ꧀ꦩꦴ ꦠ꧀ꦮꦩ꧀ꦥꦶ ꦕꦶꦠ꧀ꦠꦩꦺꦮ ꦒꦺꦴꦥꦺꦲꦶ. ꦆꦢꦚ꧀ꦲꦶ ꦕꦶꦠ꧀ꦠꦁ ꦒꦸꦠ꧀ꦠꦁ ꦱꦸꦑꦴꦮꦲꦁ ꦩꦒ꧀ꦒꦦꦭꦤꦶꦧ꧀ꦧꦴꦤꦱꦸꦑꦴꦤꦶ ꦄꦴꦮꦲꦠꦷꦠꦶ.

ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦱꦺꦴ ꦨꦶꦏ꧀ꦑꦸ ꦱꦺꦴꦠꦴꦥꦠ꧀ꦠꦶꦦꦭꦁ ꦥꦴꦥꦸꦟꦶ, ꦄꦚ꧀ꦚꦺꦥꦶ ꦧꦲꦹ ꦱꦺꦴꦠꦴꦥꦤ꧀ꦤꦴꦢꦪꦺꦴ ꦄꦲꦺꦱꦸꦁ, ꦢꦺꦱꦤꦴ ꦩꦲꦴꦗꦤꦱ꧀ꦱ ꦱꦴꦠ꧀ꦡꦶꦏꦴ ꦄꦲꦺꦴꦱꦷꦠꦶ.

ꦄꦚ꧀ꦚꦠꦫꦈꦏ꧀ꦏꦟ꧀ꦜꦶꦠꦨꦶꦏ꧀ꦑꦸꦮꦠ꧀ꦡꦸ ꦠꦠꦶꦪꦁ.

꧔. ꦱꦔ꧀ꦓꦫꦏ꧀ꦑꦶꦠꦨꦴꦒꦶꦤꦺꦪ꧀ꦪꦠ꧀ꦡꦺꦫꦮꦠ꧀ꦡꦸ

ꦢꦹꦫꦔ꧀ꦒꦩꦤ꧀ꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦤ꧀ꦠꦺꦴ ꦱꦔ꧀ꦓꦫꦏ꧀ꦑꦶꦠꦁ ꦤꦴꦩ ꦨꦶꦏ꧀ꦑꦸꦁ ꦄꦴꦫꦧ꧀ꦨ ꦏꦡꦺꦱꦶ.

ꦱꦴꦮꦠ꧀ꦡꦶꦪꦁ ꦏꦶꦫꦺꦏꦺꦴ ꦏꦸꦭꦥꦸꦠ꧀ꦠꦺꦴ ꦱꦠ꧀ꦡꦸ ꦣꦩ꧀ꦩꦢꦺꦱꦤꦁ ꦱꦸꦠ꧀ꦮꦴ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶꦠꦺꦴ ꦭꦢ꧀ꦣꦹꦥꦱꦩ꧀ꦥꦢꦺꦴ ꦱꦔ꧀ꦓꦫꦏ꧀ꦑꦶꦠꦠ꧀ꦡꦺꦫꦺꦴ ꦤꦴꦩ ꦲꦸꦠ꧀ꦮꦴ ꦏꦠꦶꦥꦴꦲꦺꦤꦺꦮ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦱ꧀ꦱ ꦏꦤꦶꦛ꧀ꦜꦨꦒꦶꦤꦷ ꦥꦸꦠ꧀ꦠꦁ ꦭꦨꦶꦠ꧀ꦮꦴ ꦡꦺꦫꦱ꧀ꦱ ꦤꦴꦩꦁ ꦄꦏꦴꦱꦶ. ꦱꦺꦴ ꦨꦴꦒꦶꦤꦺꦪ꧀ꦪꦱꦔ꧀ꦓꦫꦏ꧀ꦑꦶꦠꦺꦴ ꦤꦴꦩ ꦲꦸꦠ꧀ꦮꦴ ꦮꦪꦥ꧀ꦥꦠ꧀ꦠꦺꦴ ꦡꦺꦫꦱ꧀ꦱꦺꦮ ꦱꦤ꧀ꦠꦶꦏꦺ ꦥꦧ꧀ꦧꦗꦶꦠ꧀ꦮꦴ ꦭꦢ꧀ꦣꦹꦥꦱꦩ꧀ꦥꦢꦺꦴ ꦄꦚ꧀ꦚꦠꦫꦱ꧀ꦩꦶꦁ ꦒꦴꦩꦏꦴꦫꦴꦩꦺ ꦮꦱ꧀ꦱꦁ ꦈꦥꦒꦤ꧀ꦠ꧀ꦮꦴ, ‘‘ꦌꦏꦁ ꦱꦠ꧀ꦠꦲꦠ꧀ꦡꦁ, ꦌꦏꦁ ꦄꦛ꧀ꦜꦲꦠ꧀ꦡ’’ꦤ꧀ꦠꦶ ꦢ꧀ꦮꦺ ꦮꦱ꧀ꦱꦴꦮꦴꦱꦶꦏꦱꦴꦛꦏꦺ ꦭꦨꦶꦠ꧀ꦮꦴ ꦄꦛ꧀ꦜꦲꦠ꧀ꦡꦁ ‘‘ꦈꦥꦗ꧀ꦙꦴꦪꦱ꧀ꦱ ꦩꦺ ꦨꦮꦶꦱ꧀ꦱꦠꦷ’’ꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ‘‘ꦱꦠ꧀ꦠꦲꦠ꧀ꦡꦁ ꦩꦪ꧀ꦲꦁ ꦨꦮꦶꦱ꧀ꦱꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦮꦸꦛ꧀ꦜꦮꦱ꧀ꦱꦺꦴ ‘‘ꦈꦥꦗ꧀ꦙꦴꦪꦁ ꦥꦱ꧀ꦱꦶꦱ꧀ꦱꦴꦩꦷ’’ꦠꦶ ꦄꦴꦒꦕ꧀ꦖꦤ꧀ꦠꦺꦴ ꦄꦤ꧀ꦠꦫꦴꦩꦒ꧀ꦒꦺ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦄꦴꦒꦤ꧀ꦠ꧀ꦮꦴ ꦡꦺꦫꦺ ꦮꦶꦲꦴꦫꦁ ꦄꦤꦴꦒꦠꦺꦪꦺꦮ ꦮꦶꦲꦴꦫꦁ ꦥꦮꦶꦱꦶꦠ꧀ꦮꦴ ꦡꦺꦫꦱ꧀ꦱ ꦢꦶꦮꦴꦛ꧀ꦜꦴꦤꦁ ꦱꦩ꧀ꦩꦗ꧀ꦗꦶꦠ꧀ꦮꦴ ꦥꦴꦢꦺꦴꦢꦏꦁ ꦈꦥꦛ꧀ꦜꦥꦺꦠ꧀ꦮꦴ ꦄꦴꦱꦤꦁ ꦥꦚ꧀ꦚꦥꦺꦠ꧀ꦮꦴ ꦄꦴꦒꦩꦤꦩꦒ꧀ꦒꦁ ꦎꦭꦺꦴꦏꦺꦤ꧀ꦠꦺꦴ ꦤꦶꦱꦷꦢꦶ. ꦄꦡꦱ꧀ꦱꦴꦒꦩꦤꦨꦴꦮꦁ ꦢꦶꦱ꧀ꦮꦴ ꦥꦕ꧀ꦕꦸꦒ꧀ꦒꦩꦤꦁ ꦏꦠ꧀ꦮꦴ ꦥꦠ꧀ꦠꦕꦷꦮꦫꦁ ꦥꦛꦶꦒ꧀ꦒꦲꦺꦠ꧀ꦮꦴ, ‘‘ꦤꦶꦱꦷꦢꦡ, ꦨꦤ꧀ꦠꦺ’’ꦠꦶ ꦡꦺꦫꦁ ꦤꦶꦱꦷꦢꦴꦥꦺꦠ꧀ꦮꦴ ꦠꦴꦭꦮꦟ꧀ꦛꦁ ꦄꦴꦢꦴꦪ ꦧꦷꦗꦶꦠ꧀ꦮꦴ ꦥꦴꦤꦷꦪꦁ ꦢꦠ꧀ꦮꦴ ꦥꦴꦢꦺ ꦣꦺꦴꦮꦶꦠ꧀ꦮꦴ ꦠꦁ ꦱꦴꦛꦏꦁ ꦄꦴꦤꦺꦠ꧀ꦮꦴ ꦥꦴꦢꦩꦹꦭꦺ ꦜꦥꦺꦠ꧀ꦮꦴ, ‘‘ꦨꦤ꧀ꦠꦺ, ꦆꦩꦁ ꦥꦫꦶꦨꦸꦚ꧀ꦗꦡꦴ’’ꦠꦶ ꦮꦠ꧀ꦮꦴ ꦧꦷꦗꦪꦩꦴꦤꦺꦴ ꦄꦛ꧀ꦜꦴꦱꦶ.

ꦄꦡ ꦤꦁ ꦡꦺꦫꦺꦴ ꦄꦴꦲ – ‘‘ꦱꦔ꧀ꦓꦫꦏ꧀ꦑꦶꦠ, ꦩꦪ꧀ꦲꦁ ꦕꦷꦮꦫꦁ ꦥꦫꦶꦥꦸꦟ꧀ꦟꦁ, ꦠ꧀ꦮꦩꦺꦮ ꦥꦫꦶꦨꦸꦚ꧀ꦗꦴ’’ꦠꦶ. ‘‘ꦨꦤ꧀ꦠꦺ, ꦩꦪꦴ ꦭꦢ꧀ꦣꦏꦴꦭꦠꦺꦴ ꦥꦛ꧀ꦜꦴꦪ ꦄꦪꦁ ꦠꦸꦩ꧀ꦲꦴꦏꦩꦺꦮ ꦱꦭ꧀ꦭꦏ꧀ꦑꦶꦠꦺꦴ, ꦥꦫꦶꦨꦺꦴꦒꦁ ꦏꦫꦺꦴꦡꦴ’’ꦠꦶ. ‘‘ꦲꦺꦴꦠꦸ, ꦱꦔ꧀ꦓꦫꦏ꧀ꦑꦶꦠ, ꦥꦫꦶꦥꦸꦟ꧀ꦟꦁ ꦩꦺ ꦕꦷꦮꦫꦁ, ꦠ꧀ꦮꦩꦺꦮ ꦥꦫꦶꦨꦸꦚ꧀ꦗꦴ’’ꦠꦶ. ‘‘ꦨꦤ꧀ꦠꦺ, ꦩꦴ ꦌꦮꦁ ꦏꦫꦺꦴꦡ, ꦠꦸꦩ꧀ꦲꦺꦲꦶ ꦥꦫꦶꦨꦸꦠ꧀ꦠꦺ ꦩꦪ꧀ꦲꦁ ꦩꦲꦥ꧀ꦦꦭꦁ ꦨꦮꦶꦱ꧀ꦱꦠꦷ’’ꦠꦶ. ꦄꦡ ꦤꦁ ꦠꦱ꧀ꦱ ꦥꦸꦤꦥ꧀ꦥꦸꦤꦁ ꦏꦡꦺꦤ꧀ꦠꦱ꧀ꦱꦥꦶ ꦡꦺꦫꦺꦴ ꦤ ꦆꦕ꧀ꦖꦶꦪꦺꦮ.

ꦌꦮꦁ ꦱꦺꦴ ꦧꦷꦗꦪꦩꦴꦤꦺꦴ ꦜꦶꦠꦺꦴꦮ ꦕꦶꦤ꧀ꦠꦺꦱꦶ – ‘‘ꦄꦲꦁ ꦡꦺꦫꦱ꧀ꦱ ꦒꦶꦲꦶꦏꦴꦭꦺ ꦨꦴꦒꦶꦤꦺꦪ꧀ꦪꦺꦴ, ꦥꦧ꧀ꦧꦗꦶꦠꦏꦴꦭꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ, ꦌꦮꦩ꧀ꦥꦶ ꦩꦪꦴ ꦱꦢ꧀ꦣꦶꦁ ꦈꦥꦗ꧀ꦙꦴꦪꦺꦴ ꦥꦫꦶꦨꦺꦴꦒꦁ ꦤ ꦏꦠ꧀ꦠꦸꦏꦴꦩꦺꦴ. ꦆꦩꦱ꧀ꦩꦶꦁ ꦩꦪꦴ ꦱꦢ꧀ꦣꦶꦁ ꦥꦫꦶꦨꦺꦴꦒꦁ ꦄꦏꦫꦺꦴꦤ꧀ꦠꦺ ꦏꦶꦁ ꦩꦺ ꦱꦩꦟꦨꦴꦮꦺꦤ, ꦒꦶꦲꦶ ꦨꦮꦶꦱ꧀ꦱꦴꦩꦷ’’ꦠꦶ. ꦄꦡꦱ꧀ꦱ ꦌꦠꦢꦲꦺꦴꦱꦶ – ‘‘ꦢꦸꦱ꧀ꦱꦟ꧀ꦜꦴꦥꦶꦠꦺꦴ ꦓꦫꦴꦮꦴꦱꦺꦴ, ꦏꦶꦁ ꦤꦸ ꦑꦺꦴ ꦏꦠ꧀ꦮꦴ ꦒꦶꦲꦶꦨꦹꦠꦺꦴ ꦗꦷꦮꦶꦱ꧀ꦱꦴꦩꦷ’’ꦠꦶ. ꦠꦠꦺꦴ ꦕꦶꦤ꧀ꦠꦺꦱꦶ – ‘‘ꦄꦛ꧀ꦜꦲꦠ꧀ꦡꦱꦴꦛꦏꦁ ꦮꦶꦏ꧀ꦏꦶꦟꦶꦠ꧀ꦮꦴ ꦌꦏꦁ ꦌꦭ꦳ꦶꦏꦁ ꦒꦟ꧀ꦲꦶꦱ꧀ꦱꦴꦩꦶ, ꦌꦭ꦳ꦶꦏꦴ ꦤꦴꦩ ꦑꦶꦥ꧀ꦥꦁ ꦮꦶꦗꦴꦪꦠꦶ, ꦱ꧀ꦮꦴꦲꦁ ꦮꦶꦗꦴꦠꦁ ꦮꦶꦗꦴꦠꦁ ꦮꦶꦏ꧀ꦏꦶꦟꦶꦠ꧀ꦮꦴ ꦩꦹꦭꦁ ꦏꦫꦶꦱ꧀ꦱꦴꦩꦶ, ꦩꦹꦭꦺ ꦧꦲꦹ ꦏꦠ꧀ꦮꦴ ꦌꦏꦁ ꦥꦗꦴꦥꦠꦶꦁ ꦄꦴꦤꦺꦱ꧀ꦱꦴꦩꦶ, ꦱꦴ ꦌꦏꦁ ꦥꦸꦠ꧀ꦠꦁ ꦮꦶꦗꦴꦪꦶꦱ꧀ꦱꦠꦶ. ꦄꦡꦱ꧀ꦱ ꦩꦩ ꦩꦴꦠꦸꦭꦱ꧀ꦱ ꦤꦴꦩꦁ ꦏꦠ꧀ꦮꦴ ꦕꦹꦭ꦳ꦪꦴꦤꦏꦺ ꦤꦶꦱꦷꦢꦴꦥꦺꦠ꧀ꦮꦴ ꦩꦩ ꦥꦸꦠ꧀ꦠꦚ꧀ꦕ ꦨꦫꦶꦪꦚ꧀ꦕ ꦄꦴꦢꦴꦪ ꦩꦴꦠꦸꦭꦁ ꦮꦤ꧀ꦢꦶꦠꦸꦁ ꦄꦴꦒꦩꦶꦱ꧀ꦱꦴꦩꦶ, ꦄꦴꦒꦕ꧀ꦖꦤ꧀ꦠꦺ ꦄꦤ꧀ꦠꦫꦴꦩꦒ꧀ꦒꦺ ꦩꦩ ꦨꦫꦶꦪꦁ ꦌꦮꦁ ꦮꦏ꧀ꦑꦴꦩꦶ – ‘ꦄꦴꦤꦺꦲꦶ ꦠꦴꦮ ꦩꦺ ꦥꦸꦠ꧀ꦠꦁ ꦮꦲꦶꦱ꧀ꦱꦴꦩꦶꦤ’ꦤ꧀ꦠꦶ. ꦱꦴ ‘ꦏꦶꦁ ꦠꦺ ꦥꦸꦠ꧀ꦠꦺꦤ, ꦌꦲꦶ, ꦆꦩꦁ ꦪꦴꦤꦏꦁ ꦥꦴꦗꦺꦲꦷ’ꦠꦶ ꦮꦠ꧀ꦮꦴ ꦥꦸꦠ꧀ꦠꦁ ꦒꦲꦺꦠ꧀ꦮꦴ, ‘ꦄꦲꦁ ꦤꦺꦱ꧀ꦱꦴꦩꦶ ꦤ’ꦤ꧀ꦠꦶ ꦤꦺꦠ꧀ꦮꦴ ꦱꦤ꧀ꦣꦴꦫꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦷ ꦕꦏ꧀ꦏꦥꦡꦺ ꦖꦝ꧀ꦝꦺꦱ꧀ꦱꦠꦶ. ꦄꦡꦱ꧀ꦱ ꦱꦫꦷꦫꦁ ꦄꦨꦶꦫꦸꦲꦶꦠ꧀ꦮꦴ ꦕꦏ꧀ꦏꦁ ꦒꦩꦶꦱ꧀ꦱꦠꦶ, ꦄꦡ ꦤꦁ ‘ꦠ꧀ꦮꦁ ꦩꦩ ꦥꦸꦠ꧀ꦠꦁ ꦤꦺꦮ ꦩꦪ꧀ꦲꦁ ꦄꦢꦴꦱꦶ, ꦤꦁ ꦱꦤ꧀ꦣꦴꦫꦺꦠꦸꦁ ꦤꦴꦱꦏ꧀ꦑꦶ ꦤꦴꦱꦶꦠꦺꦴꦱ꧀ꦩꦶ ꦠꦪꦴ’ꦠꦶ ꦮꦠ꧀ꦮꦴ ꦥꦠꦺꦴꦢꦪꦛ꧀ꦜꦶꦪꦴ ꦥꦶꦛ꧀ꦜꦶꦪꦁ ꦥꦲꦫꦶꦱ꧀ꦱꦴꦩꦷ’’ꦠꦶ.

ꦱꦺꦴ ꦌꦮꦁ ꦕꦶꦤ꧀ꦠꦺꦤ꧀ꦠꦺꦴꦮ ꦜꦠ꧀ꦮꦴ ꦧꦷꦗꦪꦩꦴꦤꦺꦴ ꦡꦺꦫꦱ꧀ꦱ ꦱꦷꦱꦺ ꦠꦴꦭꦮꦟ꧀ꦛꦺꦤ ꦥꦲꦫꦶ. ꦡꦺꦫꦺꦴ ‘‘ꦏꦶꦁ ꦤꦸ ꦑꦺꦴ ꦄꦲꦁ ꦱꦔ꧀ꦓꦫꦏ꧀ꦑꦶꦠꦺꦤ ꦱꦷꦱꦺ ꦥꦲꦠꦺꦴ’’ꦠꦶ ꦈꦥꦣꦴꦫꦺꦤ꧀ꦠꦺꦴ ꦠꦺꦤ ꦕꦶꦤ꧀ꦠꦶꦠꦕꦶꦤ꧀ꦠꦶꦠꦁ ꦱꦧ꧀ꦧꦁ ꦚꦠ꧀ꦮꦴ, ‘‘ꦱꦔ꧀ꦓꦫꦏ꧀ꦑꦶꦠ, ꦩꦴꦠꦸꦒꦴꦩꦱ꧀ꦱ ꦥꦲꦴꦫꦁ ꦢꦴꦠꦸꦁ ꦤꦴꦱꦏ꧀ꦑꦶ, ꦏꦺꦴ ꦌꦠ꧀ꦡ ꦩꦲꦭ꧀ꦭꦏꦠ꧀ꦡꦺꦫꦱ꧀ꦱ ꦢꦺꦴꦱꦺꦴ’’ꦠꦶ ꦄꦴꦲ. ꦱꦺꦴ ‘‘ꦄꦲꦺꦴ ꦤꦛ꧀ꦜꦺꦴꦩ꧀ꦲꦶ, ꦚꦴꦠꦁ ꦏꦶꦫ ꦩꦺ ꦈꦥꦗ꧀ꦙꦴꦪꦺꦤ ꦕꦶꦤ꧀ꦠꦶꦠꦕꦶꦤ꧀ꦠꦶꦠꦁ, ꦏꦶꦁ ꦩꦺ ꦱꦩꦟꦨꦴꦮꦺꦤꦴ’’ꦠꦶ ꦠꦴꦭꦮꦟ꧀ꦛꦁ ꦖꦝ꧀ꦝꦺꦠ꧀ꦮꦴ ꦥꦭꦴꦪꦶꦠꦸꦁ ꦄꦴꦫꦢ꧀ꦣꦺꦴ.

ꦄꦡ ꦤꦁ ꦢꦲꦫꦴ ꦕ ꦱꦴꦩꦟꦺꦫꦴ ꦕ ꦄꦤꦸꦧꦤ꧀ꦣꦶꦠ꧀ꦮꦴ ꦄꦴꦢꦴꦪ ꦱꦠ꧀ꦡꦸ ꦱꦤ꧀ꦠꦶꦏꦁ ꦄꦒꦩꦁꦱꦸ. ꦱꦠ꧀ꦡꦴ ꦠꦺ ꦨꦶꦏ꧀ꦑꦹ ꦢꦶꦱ꧀ꦮꦴꦮ ‘‘ꦏꦶꦁ, ꦨꦶꦏ꧀ꦑꦮꦺ, ꦄꦴꦒꦠꦠ꧀ꦡ, ꦌꦏꦺꦴ ꦮꦺꦴ ꦨꦶꦏ꧀ꦑꦸ ꦭꦢ꧀ꦣꦺꦴ’’ꦠꦶ ꦥꦸꦕ꧀ꦖꦶ. ‘‘ꦄꦴꦩ, ꦨꦤ꧀ꦠꦺ, ꦆꦩꦁ ꦢꦲꦫꦁ ꦈꦏ꧀ꦏꦟ꧀ꦜꦶꦠ꧀ꦮꦴ ꦥꦭꦴꦪꦤ꧀ꦠꦁ ꦒꦲꦺꦠ꧀ꦮꦴ ꦠꦸꦩ꧀ꦲꦴꦏꦁ ꦱꦤ꧀ꦠꦶꦏꦁ ꦄꦴꦒꦠꦩ꧀ꦲꦴ’’ꦠꦶ. ‘‘ꦌꦮꦁ ꦏꦶꦫ ꦨꦶꦏ꧀ꦑꦹ’’ꦠꦶ? ‘‘ꦄꦴꦩ, ꦨꦤ꧀ꦠꦺ’’ꦠꦶ. ‘‘ꦏꦶꦩꦠ꧀ꦡꦁ ꦠꦺ ꦨꦶꦏ꧀ꦑꦸ ꦌꦮꦁ ꦨꦴꦫꦶꦪꦁ ꦏꦩ꧀ꦩꦁ ꦏꦠꦁ, ꦤꦤꦸ ꦠ꧀ꦮꦁ ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦥꦸꦠ꧀ꦠꦺꦴ, ꦩꦴꦢꦶꦱꦱ꧀ꦱ ꦤꦴꦩ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦥꦧ꧀ꦧꦗꦶꦠ꧀ꦮꦴ ꦄꦠ꧀ꦠꦴꦤꦁ ꦢꦩꦺꦠ꧀ꦮꦴ ꦱꦺꦴꦠꦴꦥꦤ꧀ꦤꦺꦴꦠꦶ ꦮꦴ ꦱꦏꦢꦴꦒꦴꦩꦷꦠꦶ ꦮꦴ ꦄꦤꦴꦒꦴꦩꦷꦠꦶ ꦮꦴ ꦄꦫꦲꦴꦠꦶ ꦮꦴ ꦮꦢꦴꦥꦺꦠꦸꦁ ꦤꦴꦱꦏ꧀ꦑꦶ, ꦏꦶꦩꦠ꧀ꦡꦁ ꦌꦮꦁ ꦨꦴꦫꦶꦪꦁ ꦏꦩ꧀ꦩꦩꦏꦴꦱꦷ’’ꦠꦶ? ‘‘ꦈꦏ꧀ꦏꦟ꧀ꦜꦶꦠꦺꦴꦱ꧀ꦩꦶ, ꦨꦤ꧀ꦠꦺ’’ꦠꦶ. ‘‘ꦏꦶꦁ ꦏꦴꦫꦟꦴ ꦈꦏ꧀ꦏꦟ꧀ꦜꦶꦠꦺꦴꦱꦷ’’ꦠꦶ? ꦱꦺꦴ ꦌꦮꦁ ꦮꦱ꧀ꦱꦴꦮꦴꦱꦶꦏꦱꦴꦛꦏꦴꦤꦁ ꦭꦢ꧀ꦣꦢꦶꦮꦱꦠꦺꦴ ꦥꦛ꧀ꦜꦴꦪ ꦪꦴꦮ ꦡꦺꦫꦱ꧀ꦱ ꦠꦴꦭꦮꦟ꧀ꦛꦺꦤ ꦥꦲꦴꦫꦴ ꦱꦧ꧀ꦧꦁ ꦠꦁ ꦥꦮꦠ꧀ꦠꦶꦁ ꦄꦴꦫꦺꦴꦕꦺꦠ꧀ꦮꦴ, ‘‘ꦆꦩꦶꦤꦴ ꦏꦴꦫꦟꦺꦤ ꦥꦭꦴꦠꦺꦴꦱ꧀ꦩꦶ, ꦨꦤ꧀ꦠꦺ’’ꦠꦶ ꦄꦴꦲ. ꦄꦡ ꦤꦁ ꦱꦠ꧀ꦡꦴ ‘‘ꦌꦲꦶ ꦨꦶꦏ꧀ꦑꦸ, ꦩꦴ ꦕꦶꦤ꧀ꦠꦪꦶ ꦕꦶꦠ꧀ꦠꦁ ꦤꦴꦩꦺꦠꦁ ꦢꦹꦫꦺ ꦲꦺꦴꦤ꧀ꦠꦩ꧀ꦥꦶ ꦄꦴꦫꦩ꧀ꦩꦟꦁ ꦱꦩ꧀ꦥꦛꦶꦕ꧀ꦖꦤꦏꦗꦴꦠꦶꦏꦁ, ꦫꦴꦒꦢꦺꦴꦱꦩꦺꦴꦲꦧꦤ꧀ꦣꦤꦴ ꦩꦸꦕ꧀ꦕꦤꦠ꧀ꦡꦴꦪ ꦮꦴꦪꦩꦶꦠꦸꦁ ꦮꦛ꧀ꦛꦠꦷ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧓꧗. ‘‘ꦢꦹꦫꦔ꧀ꦒꦩꦁ ꦌꦏꦕꦫꦁ, ꦄꦱꦫꦷꦫꦁ ꦒꦸꦲꦴꦱꦪꦁ;

ꦪꦺ ꦕꦶꦠ꧀ꦠꦁ ꦱꦁꦪꦩꦺꦱ꧀ꦱꦤ꧀ꦠꦶ, ꦩꦺꦴꦏ꧀ꦑꦤ꧀ꦠꦶ ꦩꦴꦫꦧꦤ꧀ꦣꦤꦴ’’ꦠꦶ.

ꦠꦠ꧀ꦡ ꦢꦹꦫꦔ꧀ꦒꦩꦤ꧀ꦠꦶ ꦕꦶꦠ꧀ꦠꦱ꧀ꦱ ꦲꦶ ꦩꦏ꧀ꦏꦛꦱꦸꦠ꧀ꦠꦩꦠ꧀ꦠꦏꦩ꧀ꦥꦶ ꦥꦸꦫꦠ꧀ꦡꦶꦩꦴꦢꦶꦢꦶꦱꦴꦨꦴꦒꦺꦤ ꦒꦩꦤꦴꦒꦩꦤꦁ ꦤꦴꦩ ꦤꦠ꧀ꦡꦶ, ꦢꦹꦫꦺ ꦱꦤ꧀ꦠꦩ꧀ꦥꦶ ꦥꦤ ꦄꦴꦫꦩ꧀ꦩꦟꦁ ꦱꦩ꧀ꦥꦛꦶꦕ꧀ꦖꦠꦷꦠꦶ ꦢꦹꦫꦔ꧀ꦒꦩꦁ ꦤꦴꦩ ꦗꦴꦠꦁ. ꦱꦠ꧀ꦠꦛ꧀ꦜꦕꦶꦠ꧀ꦠꦴꦤꦶ ꦥꦤ ꦌꦏꦠꦺꦴ ꦏꦟ꧀ꦟꦶꦏꦧꦢ꧀ꦣꦴꦤꦶ ꦌꦏꦏ꧀ꦑꦟꦺ ꦈꦥ꧀ꦥꦗ꧀ꦗꦶꦠꦸꦁ ꦱꦩꦠ꧀ꦡꦴꦤꦶ ꦤꦴꦩ ꦤꦠ꧀ꦡꦶ. ꦈꦥ꧀ꦥꦠ꧀ꦠꦶꦏꦴꦭꦺ ꦌꦏꦺꦏꦩꦺꦮ ꦕꦶꦠ꧀ꦠꦁ ꦈꦥ꧀ꦥꦗ꧀ꦗꦠꦶ, ꦠꦱ꧀ꦩꦶꦁ ꦤꦶꦫꦸꦢ꧀ꦣꦺ ꦥꦸꦤ ꦌꦏꦺꦏꦩꦺꦮ ꦈꦥ꧀ꦥꦗ꧀ꦗꦠꦷꦠꦶ ꦌꦏꦕꦫꦁ ꦤꦴꦩ ꦗꦴꦠꦁ. ꦕꦶꦠ꧀ꦠꦱ꧀ꦱ ꦱꦫꦷꦫꦱꦟ꧀ꦜꦴꦤꦁ ꦮꦴ ꦤꦷꦭꦴꦢꦶꦥ꧀ꦥꦏꦴꦫꦺꦴ ꦮꦟ꧀ꦟꦨꦺꦢꦺꦴ ꦮꦴ ꦤꦠ꧀ꦡꦷꦠꦶ ꦄꦱꦫꦷꦫꦁ ꦤꦴꦩ ꦗꦴꦠꦁ. ꦒꦸꦲꦴ ꦤꦴꦩ ꦕꦠꦸꦩꦲꦴꦨꦹꦠꦒꦸꦲꦴ, ꦆꦢꦚ꧀ꦕ ꦲꦢꦪꦫꦹꦥꦁ ꦤꦶꦱ꧀ꦱꦴꦪ ꦥꦮꦠ꧀ꦠꦠꦷꦠꦶ ꦒꦸꦲꦴꦱꦪꦁ ꦤꦴꦩ ꦗꦴꦠꦁ. ꦪꦺ ꦕꦶꦠ꧀ꦠꦤ꧀ꦠꦶ ꦪꦺ ꦏꦺꦕꦶ ꦥꦸꦫꦶꦱꦴ ꦮꦴ ꦆꦠ꧀ꦡꦶꦪꦺꦴ ꦮꦴ ꦒꦲꦛ꧀ꦜꦴ ꦮꦴ ꦥꦧ꧀ꦧꦗꦶꦠꦴ ꦮꦴ ꦄꦤꦸꦥ꧀ꦥꦗ꧀ꦗꦤꦏꦏꦶꦭꦺꦱꦱ꧀ꦱ ꦈꦥ꧀ꦥꦗ꧀ꦗꦶꦠꦸꦁ ꦄꦢꦺꦤ꧀ꦠꦴ ꦱꦠꦶꦱꦩ꧀ꦩꦺꦴꦱꦺꦤ ꦈꦥ꧀ꦥꦤ꧀ꦤꦏꦶꦭꦺꦱꦁ ꦥꦗꦲꦤ꧀ꦠꦴ ꦕꦶꦠ꧀ꦠꦁ ꦱꦁꦪꦩꦺꦱ꧀ꦱꦤ꧀ꦠꦶ ꦱꦁꦪꦠꦁ ꦄꦮꦶꦏ꧀ꦑꦶꦠ꧀ꦠꦁ ꦏꦫꦶꦱ꧀ꦱꦤ꧀ꦠꦶ. ꦩꦺꦴꦏ꧀ꦑꦤ꧀ꦠꦶ ꦩꦴꦫꦧꦤ꧀ꦣꦤꦴꦠꦶ ꦱꦧ꧀ꦧꦺꦠꦺ ꦏꦶꦭꦺꦱꦧꦤ꧀ꦣꦤꦴꦨꦴꦮꦺꦤ ꦩꦴꦫꦧꦤ꧀ꦣꦤꦱꦔ꧀ꦑꦴꦠꦴ ꦠꦺꦨꦹꦩꦏꦮꦛ꧀ꦛꦴ ꦩꦸꦕ꧀ꦕꦶꦱ꧀ꦱꦤ꧀ꦠꦷꦠꦶ.

ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦨꦴꦒꦶꦤꦺꦪ꧀ꦪꦱꦔ꧀ꦓꦫꦏ꧀ꦑꦶꦠꦠ꧀ꦡꦺꦫꦺꦴ ꦱꦺꦴꦠꦴꦥꦠ꧀ꦠꦶꦦꦭꦁ ꦥꦴꦥꦸꦟꦶ, ꦄꦚ꧀ꦚꦺꦥꦶ ꦧꦲꦹ ꦱꦺꦴꦠꦴꦥꦤ꧀ꦤꦴꦢꦪꦺꦴ ꦗꦴꦠꦴ, ꦩꦲꦴꦗꦤꦱ꧀ꦱ ꦱꦴꦠ꧀ꦡꦶꦏꦴ ꦣꦩ꧀ꦩꦢꦺꦱꦤꦴ ꦄꦲꦺꦴꦱꦷꦠꦶ.

ꦱꦔ꧀ꦓꦫꦏ꧀ꦑꦶꦠꦨꦴꦒꦶꦤꦺꦪ꧀ꦪꦠ꧀ꦡꦺꦫꦮꦠ꧀ꦡꦸ ꦕꦠꦸꦠ꧀ꦡꦁ.

꧕. ꦕꦶꦠ꧀ꦠꦲꦠ꧀ꦡꦠ꧀ꦡꦺꦫꦮꦠ꧀ꦡꦸ

ꦄꦤꦮꦛ꧀ꦜꦶꦠꦕꦶꦠ꧀ꦠꦱ꧀ꦱꦴꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦤ꧀ꦠꦺꦴ ꦕꦶꦠ꧀ꦠꦲꦠ꧀ꦡꦠ꧀ꦡꦺꦫꦁ ꦄꦴꦫꦧ꧀ꦨ ꦏꦡꦺꦱꦶ.

ꦌꦏꦺꦴ ꦏꦶꦫ ꦱꦴꦮꦠ꧀ꦡꦶꦮꦴꦱꦷ ꦏꦸꦭꦥꦸꦠ꧀ꦠꦺꦴ ꦤꦛ꧀ꦜꦒꦺꦴꦟꦁ ꦥꦫꦶꦪꦺꦱꦤ꧀ꦠꦺꦴ ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ ꦩꦗ꧀ꦙꦤ꧀ꦲꦶꦏꦺ ꦏꦴꦭꦺ ꦒꦺꦴꦟꦁ ꦢꦶꦱ꧀ꦮꦴ ꦒꦺꦴꦪꦹꦡꦺ ꦮꦶꦱ꧀ꦱꦗ꧀ꦗꦺꦠ꧀ꦮꦴ, ‘‘ꦄꦮꦱ꧀ꦱꦁ ꦄꦪ꧀ꦪꦴꦤꦁ ꦱꦤ꧀ꦠꦶꦏꦺ ꦄꦴꦲꦴꦫꦩꦠ꧀ꦠꦁ ꦭꦨꦶꦱ꧀ꦱꦴꦩꦷ’’ꦠꦶ ꦑꦸꦥ꧀ꦥꦶꦥꦴꦱꦴꦥꦷꦭ꦳ꦶꦠꦺꦴ ꦮꦶꦲꦴꦫꦁ ꦥꦮꦶꦱꦶꦠ꧀ꦮꦴ ꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦠꦱ꧀ꦩꦶꦁ ꦑꦺꦴ ꦥꦤ ꦱꦩꦪꦺ ꦨꦶꦏ꧀ꦑꦹꦤꦁ ꦄꦮꦏ꧀ꦏꦴꦫꦥꦴꦠꦶꦪꦁ ꦨꦸꦠ꧀ꦠꦴꦮꦱꦺꦱꦏꦁ ꦨꦠ꧀ꦠꦁ ꦲꦺꦴꦠꦶ, ꦠꦺ ꦠꦁ ꦖꦴꦠꦏꦥꦷꦭ꦳ꦶꦠꦁ ꦢꦶꦱ꧀ꦮꦴ, ‘‘ꦆꦠꦺꦴ ꦨꦠ꧀ꦠꦁ ꦒꦲꦺꦠ꧀ꦮꦴ ꦨꦸꦚ꧀ꦗꦴꦲꦷ’’ꦠꦶ ꦮꦢꦶꦁꦱꦸ. ꦧꦸꦢ꧀ꦣꦏꦴꦭꦺ ꦕ ꦥꦤ ꦄꦤꦺꦏꦱꦹꦥꦧ꧀ꦪꦚ꧀ꦗꦤꦁ ꦨꦠ꧀ꦠꦁ ꦈꦥ꧀ꦥꦗ꧀ꦗꦠꦶ, ꦱꦺꦴ ꦠꦠꦺꦴ ꦪꦴꦥꦤꦩꦠ꧀ꦠꦁ ꦒꦲꦺꦠ꧀ꦮꦴ ꦨꦸꦚ꧀ꦗꦶꦠ꧀ꦮꦴ ꦥꦴꦤꦷꦪꦁ ꦥꦶꦮꦶꦠ꧀ꦮꦴ ꦲꦠ꧀ꦡꦺ ꦣꦺꦴꦮꦶꦠ꧀ꦮꦴ ꦨꦶꦏ꧀ꦑꦹ ꦮꦤ꧀ꦢꦶꦠ꧀ꦮꦴ, ‘‘ꦏꦶꦁ, ꦨꦤ꧀ꦠꦺ, ꦄꦗ꧀ꦗ, ꦄꦪ꧀ꦪꦴ, ꦤꦶꦩꦤ꧀ꦠꦤꦛ꧀ꦜꦴꦤꦁ ꦄꦒꦩꦁꦱꦹ’’ꦠꦶ ꦥꦸꦕ꧀ꦖꦶ. ‘‘ꦤꦠ꧀ꦡꦶ, ꦈꦥꦴꦱꦏ, ꦨꦶꦏ꧀ꦑꦹ ꦆꦩꦶꦤꦴꦮ ꦤꦷꦲꦴꦫꦺꦤ ꦤꦶꦧꦢ꧀ꦣꦁ ꦭꦨꦤ꧀ꦠꦷ’’ꦠꦶ. ꦱꦺꦴ ‘‘ꦩꦪꦁ ꦈꦛ꧀ꦜꦴꦪ ꦱꦩꦸꦛ꧀ꦜꦴꦪ ꦫꦠ꧀ꦠꦶꦤ꧀ꦢꦶꦮꦁ ꦤꦶꦧꦢ꧀ꦣꦁ ꦏꦩ꧀ꦩꦁ ꦏꦫꦺꦴꦤ꧀ꦠꦴꦥꦶ ꦌꦮꦁ ꦩꦣꦸꦫꦧ꧀ꦪꦚ꧀ꦗꦤꦁ ꦨꦠ꧀ꦠꦁ ꦤ ꦭꦨꦴꦩ, ꦆꦩꦺ ꦏꦶꦫ ꦤꦶꦧꦢ꧀ꦣꦁ ꦨꦸꦚ꧀ꦗꦤ꧀ꦠꦶ, ꦏꦶꦁ ꦩꦺ ꦒꦶꦲꦶꦨꦴꦮꦺꦤ, ꦨꦶꦏ꧀ꦑꦸ ꦨꦮꦶꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦨꦶꦏ꧀ꦑꦹ ꦈꦥꦱꦔ꧀ꦏꦩꦶꦠ꧀ꦮꦴ ꦥꦧ꧀ꦧꦗ꧀ꦗꦁ ꦪꦴꦕꦶ. ꦄꦡ ꦤꦁ ꦨꦶꦏ꧀ꦑꦹ ‘‘ꦱꦴꦣꦸ ꦈꦥꦴꦱꦏꦴ’’ꦠꦶ ꦥꦧ꧀ꦧꦴꦗꦺꦱꦸꦁ.

ꦱꦺꦴ ꦭꦢ꧀ꦣꦹꦥꦱꦩ꧀ꦥꦢꦺꦴ ꦱꦧ꧀ꦧꦥ꧀ꦥꦏꦴꦫꦁ ꦮꦠ꧀ꦠꦥꦛꦶꦮꦠ꧀ꦠꦁ ꦄꦏꦴꦱꦶ. ꦱꦺꦴ ꦧꦸꦢ꧀ꦣꦴꦤꦁ ꦈꦥ꧀ꦥꦤ꧀ꦤꦺꦤ ꦭꦴꦨꦱꦏ꧀ꦏꦴꦫꦺꦤ ꦏꦠꦶꦥꦴꦲꦕ꧀ꦕꦪꦺꦤ ꦡꦹꦭꦱꦫꦷꦫꦺꦴ ꦄꦲꦺꦴꦱꦶ. ꦠꦠꦺꦴ ꦕꦶꦤ꧀ꦠꦺꦱꦶ – ‘‘ꦏꦶꦁ ꦩꦺ ꦨꦶꦏ꧀ꦑꦴꦪ ꦕꦫꦶꦠ꧀ꦮꦴ ꦗꦷꦮꦶꦠꦺꦤ, ꦒꦶꦲꦷ ꦨꦮꦶꦱ꧀ꦱꦴꦩꦷ’’ꦠꦶ. ꦱꦺꦴ ꦮꦶꦧ꧀ꦨꦩꦶꦠ꧀ꦮꦴ ꦒꦺꦲꦁ ꦥꦴꦮꦶꦱꦶ. ꦠꦱ꧀ꦱ ꦒꦺꦲꦺ ꦏꦩ꧀ꦩꦁ ꦏꦫꦺꦴꦤ꧀ꦠꦱ꧀ꦱ ꦏꦠꦶꦥꦴꦲꦺꦤꦺꦮ ꦱꦫꦷꦫꦁ ꦩꦶꦭꦴꦪꦶ. ꦠꦠꦺꦴ ‘‘ꦏꦶꦁ ꦩꦺ ꦆꦩꦶꦤꦴ ꦢꦸꦏ꧀ꦑꦺꦤ, ꦱꦩꦟꦺꦴ ꦨꦮꦶꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦥꦸꦤ ꦒꦤ꧀ꦠ꧀ꦮꦴ ꦥꦧ꧀ꦧꦗꦶ. ꦱꦺꦴ ꦏꦠꦶꦥꦴꦲꦁ ꦮꦷꦠꦶꦤꦴꦩꦺꦠ꧀ꦮꦴ ꦥꦸꦤ ꦈꦏ꧀ꦏꦟ꧀ꦜꦶꦠ꧀ꦮꦴ ꦮꦶꦧ꧀ꦨꦩꦶ, ꦥꦧ꧀ꦧꦗꦶꦠꦏꦴꦭꦺ ꦥꦤ ꦨꦶꦏ꧀ꦑꦹꦤꦁ ꦈꦥꦏꦴꦫꦏꦺꦴ ꦲꦺꦴꦠꦶ. ꦱꦺꦴ ꦏꦠꦶꦥꦴꦲꦺꦤꦺꦮ ꦥꦸꦤꦥꦶ ꦈꦏ꧀ꦏꦟ꧀ꦜꦶꦠ꧀ꦮꦴ, ‘‘ꦏꦶꦁ ꦩꦺ ꦒꦶꦲꦶꦨꦴꦮꦺꦤ, ꦥꦧ꧀ꦧꦗꦶꦱ꧀ꦱꦴꦩꦷ’’ꦠꦶ ꦒꦤ꧀ꦠ꧀ꦮꦴ ꦨꦶꦏ꧀ꦑꦹ ꦮꦤ꧀ꦢꦶꦠ꧀ꦮꦴ ꦥꦧ꧀ꦧꦗ꧀ꦗꦁ ꦪꦴꦕꦶ. ꦄꦡ ꦤꦁ ꦨꦶꦏ꧀ꦑꦹ ꦈꦥꦏꦴꦫꦮꦱꦺꦤ ꦥꦸꦤ ꦥꦧ꧀ꦧꦴꦗꦪꦶꦁꦱꦸ. ꦌꦮꦁ ꦱꦺꦴ ꦆꦩꦶꦤꦴ ꦤꦶꦪꦴꦩꦺꦤꦺꦮ ꦖꦏ꧀ꦑꦠ꧀ꦠꦸꦁ ꦥꦧ꧀ꦧꦗꦶꦠ꧀ꦮꦴ ꦈꦥ꧀ꦥꦧ꧀ꦧꦗꦶꦠꦺꦴ. ꦠꦱ꧀ꦱ ꦨꦶꦏ꧀ꦑꦹ ‘‘ꦌꦱ ꦕꦶꦠ꧀ꦠꦮꦱꦶꦏꦺꦴ ꦲꦸꦠ꧀ꦮꦴ ꦮꦶꦕꦫꦠꦷ’’ꦠꦶ ꦕꦶꦠ꧀ꦠꦲꦠ꧀ꦡꦠ꧀ꦡꦺꦫꦺꦴꦠꦶ ꦤꦴꦩꦁ ꦏꦫꦶꦁꦱꦸ.

ꦠꦱ꧀ꦱꦺꦮꦁ ꦄꦥꦫꦴꦥꦫꦁ ꦮꦶꦕꦫꦤ꧀ꦠꦱ꧀ꦱꦺꦮ ꦨꦫꦶꦪꦴ ꦒꦧ꧀ꦨꦶꦤꦷ ꦄꦲꦺꦴꦱꦶ. ꦱꦺꦴ ꦱꦠ꧀ꦠꦩꦺ ꦮꦴꦫꦺ ꦄꦫꦚ꧀ꦚꦠꦺꦴ ꦏꦱꦶꦨꦟ꧀ꦝꦩꦴꦢꦴꦪ ꦒꦺꦲꦁ ꦒꦤ꧀ꦠ꧀ꦮꦴ ꦨꦟ꧀ꦝꦏꦁ ꦜꦥꦺꦠ꧀ꦮꦴ ‘‘ꦄꦠ꧀ꦠꦤꦺꦴ ꦏꦴꦱꦴꦮꦁ ꦒꦟ꧀ꦲꦶꦱ꧀ꦱꦴꦩꦷ’’ꦠꦶ ꦒꦧ꧀ꦨꦁ ꦥꦴꦮꦶꦱꦶ. ꦠꦱ꧀ꦩꦶꦁ ꦑꦟꦺ ꦠꦱ꧀ꦱ ꦨꦫꦶꦪꦴ ꦤꦶꦥꦗ꧀ꦗꦶꦠ꧀ꦮꦴ ꦤꦶꦢ꧀ꦢꦴꦪꦠꦶ. ꦠꦱ꧀ꦱꦴ ꦤꦶꦮꦠ꧀ꦡꦱꦴꦛꦏꦺꦴ ꦄꦥꦒꦠꦺꦴ ꦲꦺꦴꦠꦶ, ꦩꦸꦑꦠꦺꦴ ꦕ ꦭꦴꦭꦴ ꦥꦒ꧀ꦓꦫꦠꦶ, ꦤꦴꦱꦴ ꦓꦸꦫꦓꦸꦫꦴꦪꦠꦶ, ꦩꦸꦑꦁ ꦮꦶꦮꦛ꧀ꦛꦁ, ꦢꦤ꧀ꦠꦁ ꦓꦁꦱꦠꦶ, ꦱꦴ ꦠꦱ꧀ꦱ ꦈꦢ꧀ꦣꦸꦩꦴꦠꦏꦱꦫꦷꦫꦁ ꦮꦶꦪ ꦈꦥꦛ꧀ꦜꦴꦱꦶ. ꦱꦺꦴ ‘‘ꦄꦤꦶꦕ꧀ꦕꦁ ꦢꦸꦏ꧀ꦑꦁ ꦆꦢ’’ꦤ꧀ꦠꦶ ꦱꦚ꧀ꦚꦁ ꦭꦨꦶꦠ꧀ꦮꦴ, ‘‘ꦄꦲꦁ ꦌꦠ꧀ꦠꦏꦁ ꦏꦴꦭꦁ ꦥꦧ꧀ꦧꦗꦶꦠ꧀ꦮꦴ ꦆꦩꦁ ꦤꦶꦱ꧀ꦱꦴꦪ ꦨꦶꦏ꧀ꦑꦸꦨꦴꦮꦺ ꦱꦟ꧀ꦜꦴꦠꦸꦁ ꦤꦴꦱꦏ꧀ꦑꦶ’’ꦤ꧀ꦠꦶ ꦏꦴꦱꦴꦪꦏꦺꦴꦛꦶꦪꦁ ꦒꦲꦺꦠ꧀ꦮꦴ ꦈꦢꦫꦺ ꦧꦤ꧀ꦣꦶꦠ꧀ꦮꦴ ꦒꦺꦲꦴ ꦤꦶꦏ꧀ꦑꦩꦶ.

ꦄꦡꦱ꧀ꦱ ꦄꦤꦤ꧀ꦠꦫꦒꦺꦲꦺ ꦜꦶꦠꦴ ꦱꦱ꧀ꦱꦸ ꦠꦁ ꦠꦡꦴ ꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ, ‘‘ꦄꦪꦁ ꦥꦛꦶꦈꦏ꧀ꦏꦟ꧀ꦜꦶꦠꦺꦴ ꦨꦮꦶꦱ꧀ꦱꦠꦶ, ꦆꦢꦴꦤꦺꦮ ꦄꦫꦚ꧀ꦚꦠꦺꦴ ꦄꦴꦒꦤ꧀ꦠ꧀ꦮꦴ ꦏꦴꦱꦴꦮꦁ ꦈꦢꦫꦺ ꦧꦤ꧀ꦣꦶꦠ꧀ꦮꦴꦮ ꦒꦺꦲꦴ ꦤꦶꦏ꧀ꦑꦤ꧀ꦠꦺꦴ ꦮꦶꦲꦴꦫꦴꦨꦶꦩꦸꦑꦺꦴ ꦒꦕ꧀ꦖꦠꦶ, ꦏꦶꦁ ꦤꦸ ꦑꦺꦴ’’ꦠꦶ ꦒꦺꦲꦁ ꦥꦮꦶꦱꦶꦠ꧀ꦮꦴ ꦤꦶꦢ꧀ꦢꦴꦪꦩꦴꦤꦁ ꦣꦷꦠꦫꦁ ꦥꦱ꧀ꦱꦶꦠ꧀ꦮꦴ ‘‘ꦆꦩꦁ ꦢꦶꦱ꧀ꦮꦴ ꦱꦺꦴ ꦮꦶꦥ꧀ꦥꦛꦶꦱꦴꦫꦷ ꦲꦸꦠ꧀ꦮꦴ ꦒꦠꦺꦴ’’ꦠꦶ ꦚꦠ꧀ꦮꦴ ꦣꦷꦠꦫꦁ ꦥꦲꦫꦶꦠ꧀ꦮꦴ ‘‘ꦈꦛ꧀ꦜꦺꦲꦶ ꦏꦴꦭ꦳ꦏꦟ꧀ꦟꦶ, ꦱꦴꦩꦶꦏꦺꦴ ꦠꦺ ꦠꦁ ꦤꦶꦢ꧀ꦢꦴꦪꦩꦴꦤꦁ ꦢꦶꦱ꧀ꦮꦴ ꦮꦶꦥ꧀ꦥꦛꦶꦱꦴꦫꦷ ꦲꦸꦠ꧀ꦮꦴ ꦒꦠꦺꦴ, ꦤꦠ꧀ꦡꦶ ꦱꦺꦴ ꦆꦠꦺꦴ ꦥꦛ꧀ꦜꦴꦪ ꦠꦸꦪ꧀ꦲ’’ꦤ꧀ꦠꦶ ꦄꦴꦲ. ‘‘ꦄꦥꦺꦲꦶ ꦄꦥꦺꦲꦶ, ꦄꦩ꧀ꦩ, ꦏꦸꦠꦺꦴ ꦠꦱ꧀ꦱ ꦒꦩꦤꦁ ꦄꦠ꧀ꦡꦶ, ꦏꦠꦶꦥꦴꦲꦺꦤꦺꦮ ꦥꦸꦤꦴꦒꦩꦶꦱ꧀ꦱꦠꦷ’’ꦠꦶ ꦄꦴꦲ. ꦱꦺꦴꦥꦶ ‘‘ꦄꦤꦶꦕ꧀ꦕꦁ ꦢꦸꦏ꧀ꦑ’’ꦤ꧀ꦠꦶ ꦮꦠ꧀ꦮꦴ ꦒꦕ꧀ꦖꦤ꧀ꦠꦺꦴ ꦒꦕ꧀ꦖꦤ꧀ꦠꦺꦴꦮ ꦱꦺꦴꦠꦴꦥꦠ꧀ꦠꦶꦦꦭꦁ ꦥꦴꦥꦸꦟꦶ. ꦱꦺꦴ ꦒꦤ꧀ꦠ꧀ꦮꦴ ꦨꦶꦏ꧀ꦑꦹ ꦮꦤ꧀ꦢꦶꦠ꧀ꦮꦴ ꦥꦧ꧀ꦧꦗ꧀ꦗꦁ ꦪꦴꦕꦶ. ‘‘ꦤ ꦱꦏ꧀ꦑꦶꦱ꧀ꦱꦴꦩ ꦩꦁꦪꦁ ꦠꦁ ꦥꦧ꧀ꦧꦴꦗꦺꦠꦸꦁ, ꦏꦸꦠꦺꦴ ꦠꦸꦪ꧀ꦲꦁ ꦱꦩꦟꦨꦴꦮꦺꦴ, ꦱꦠ꧀ꦡꦏꦤꦶꦱꦴꦤꦥꦴꦱꦴꦟꦱꦢꦶꦱꦁ ꦠꦮ ꦱꦷꦱ’’ꦤ꧀ꦠꦶ. ‘‘ꦨꦤ꧀ꦠꦺ, ꦆꦢꦴꦤꦶ ꦩꦁ ꦄꦤꦸꦏꦩ꧀ꦥꦴꦪ ꦌꦏꦮꦴꦫꦁ ꦥꦧ꧀ꦧꦴꦗꦺꦡꦴ’’ꦠꦶ. ꦠꦺ ꦠꦁ ꦈꦥꦏꦴꦫꦮꦱꦺꦤ ꦥꦧ꧀ꦧꦴꦗꦪꦶꦁꦱꦸ. ꦱꦺꦴ ꦏꦠꦶꦥꦴꦲꦺꦤꦺꦮ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦶ.

ꦠꦺꦥꦶ ꦤꦁ ꦄꦴꦲꦁꦱꦸ – ‘‘ꦄꦴꦮꦸꦱꦺꦴ ꦕꦶꦠ꧀ꦠꦲꦠ꧀ꦡ, ꦠꦮ ꦒꦩꦤꦱꦩꦪꦁ ꦠ꧀ꦮꦩꦺꦮ ꦗꦴꦤꦺꦪ꧀ꦪꦴꦱꦶ, ꦆꦩꦱ꧀ꦩꦶꦁ ꦮꦴꦫꦺ ꦠꦺ ꦕꦶꦫꦴꦪꦶꦠ’’ꦤ꧀ꦠꦶ. ‘‘ꦨꦤ꧀ꦠꦺ, ꦱꦁꦱꦒ꧀ꦒꦱ꧀ꦱ ꦄꦠ꧀ꦡꦶꦨꦴꦮꦏꦴꦭꦺ ꦒꦠꦩ꧀ꦲꦴ, ꦱꦺꦴ ꦤꦺꦴ ꦱꦁꦱꦒ꧀ꦒꦺꦴ ꦖꦶꦤ꧀ꦤꦺꦴ, ꦆꦢꦴꦤꦶ ꦄꦒꦩꦤꦣꦩ꧀ꦩꦴ ꦗꦴꦠꦩ꧀ꦲꦴ’’ꦠꦶ. ꦨꦶꦏ꧀ꦑꦹ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ, ‘‘ꦨꦤ꧀ꦠꦺ, ꦄꦪꦁ ꦨꦶꦏ꧀ꦑꦸ ꦄꦩ꧀ꦲꦺꦲꦶ ꦌꦮꦁ ꦮꦸꦠ꧀ꦠꦺꦴ ꦌꦮꦁ ꦤꦴꦩ ꦏꦡꦺꦱꦶ, ꦄꦚ꧀ꦚꦁ ꦧ꧀ꦪꦴꦏꦫꦺꦴꦠꦶ, ꦄꦨꦹꦠꦁ ꦮꦢꦠꦷ’’ꦠꦶ ꦄꦴꦲꦁꦱꦸ. ꦱꦠ꧀ꦡꦴ ‘‘ꦄꦴꦩ, ꦨꦶꦏ꧀ꦑꦮꦺ, ꦩꦩ ꦥꦸꦠ꧀ꦠꦺꦴ ꦄꦠ꧀ꦠꦤꦺꦴ ꦄꦤꦮꦛ꧀ꦜꦶꦠꦕꦶꦠ꧀ꦠꦏꦴꦭꦺ ꦱꦢ꧀ꦣꦩ꧀ꦩꦁ ꦄꦗꦴꦤꦤꦏꦴꦭꦺ ꦒꦩꦤꦴꦒꦩꦤꦁ ꦄꦏꦴꦱꦶ, ꦆꦢꦴꦤꦶꦱ꧀ꦱ ꦥꦸꦚ꧀ꦚꦚ꧀ꦕ ꦥꦴꦥꦚ꧀ꦕ ꦥꦲꦷꦤ’’ꦤ꧀ꦠꦶ ꦮꦠ꧀ꦮꦴ ꦆꦩꦴ ꦢ꧀ꦮꦺ ꦒꦴꦡꦴ ꦄꦴꦲ –

꧓꧘. ‘‘ꦄꦤꦮꦛ꧀ꦜꦶꦠꦕꦶꦠ꧀ꦠꦱ꧀ꦱ, ꦱꦢ꧀ꦣꦩ꧀ꦩꦁ ꦄꦮꦶꦗꦴꦤꦠꦺꦴ;

ꦥꦫꦶꦥ꧀ꦭꦮꦥꦱꦴꦢꦱ꧀ꦱ, ꦥꦚ꧀ꦚꦴ ꦤ ꦥꦫꦶꦥꦹꦫꦠꦶ.

꧓꧙. ‘‘ꦄꦤꦮꦱ꧀ꦱꦸꦠꦕꦶꦠ꧀ꦠꦱ꧀ꦱ, ꦄꦤꦤ꧀ꦮꦴꦲꦠꦕꦺꦠꦱꦺꦴ;

ꦥꦸꦚ꧀ꦚꦥꦴꦥꦥꦲꦷꦤꦱ꧀ꦱ, ꦤꦠ꧀ꦡꦶ ꦗꦴꦒꦫꦠꦺꦴ ꦨꦪ’’ꦤ꧀ꦠꦶ.

ꦠꦠ꧀ꦡ ꦄꦤꦮꦛ꧀ꦜꦶꦠꦕꦶꦠ꧀ꦠꦱ꧀ꦱꦴꦠꦶ ꦕꦶꦠ꧀ꦠꦁ ꦤꦴꦩꦺꦠꦁ ꦏꦱ꧀ꦱꦕꦶ ꦤꦶꦧꦢ꧀ꦣꦁ ꦮꦴ ꦡꦴꦮꦫꦁ ꦮꦴ ꦤꦠ꧀ꦡꦶ. ꦪꦺꦴ ꦥꦤ ꦥꦸꦒ꧀ꦒꦭꦺꦴ ꦄꦱ꧀ꦱꦥꦶꦛ꧀ꦜꦺ ꦜꦥꦶꦠꦏꦸꦩ꧀ꦨꦟ꧀ꦝꦁ ꦮꦶꦪ ꦕ ꦡꦸꦱꦫꦴꦱꦶꦩ꧀ꦲꦶ ꦏꦺꦴꦛ꧀ꦛꦶꦠꦑꦴꦟꦸꦏꦺꦴ ꦮꦶꦪ ꦕ ꦑꦭ꧀ꦭꦴꦛꦱꦷꦱꦺ ꦜꦥꦶꦠꦏꦢꦩ꧀ꦧꦥꦸꦥ꧀ꦦꦁ ꦮꦶꦪ ꦕ ꦤ ꦏꦠ꧀ꦡꦕꦶ ꦱꦟ꧀ꦜꦴꦠꦶ, ꦏꦢꦴꦕꦶ ꦧꦸꦢ꧀ꦣꦱꦴꦮꦏꦺꦴ ꦲꦺꦴꦠꦶ, ꦏꦢꦴꦕꦶ ꦄꦴꦗꦷꦮꦏꦺꦴ, ꦏꦢꦴꦕꦶ ꦤꦶꦒꦟ꧀ꦜꦺꦴ, ꦏꦢꦴꦕꦶ ꦠꦴꦥꦱꦺꦴ. ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦄꦤꦮꦛ꧀ꦜꦶꦠꦕꦶꦠ꧀ꦠꦺꦴ ꦤꦴꦩ. ꦠꦱ꧀ꦱ ꦄꦤꦮꦛ꧀ꦜꦶꦠꦕꦶꦠ꧀ꦠꦱ꧀ꦱ. ꦱꦢ꧀ꦣꦩ꧀ꦩꦁ ꦄꦮꦶꦗꦴꦤꦠꦺꦴꦠꦶ ꦱꦠ꧀ꦠꦠꦶꦁꦱꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦨꦺꦢꦁ ꦆꦩꦁ ꦱꦢ꧀ꦣꦩ꧀ꦩꦁ ꦄꦮꦶꦗꦴꦤꦤ꧀ꦠꦱ꧀ꦱ ꦥꦫꦶꦠ꧀ꦠꦱꦢ꧀ꦣꦠꦴꦪ ꦮꦴ ꦈꦥ꧀ꦭꦮꦱꦢ꧀ꦣꦠꦴꦪ ꦮꦴ ꦥꦫꦶꦥ꧀ꦭꦮꦥꦱꦴꦢꦱ꧀ꦱ ꦏꦴꦩꦴꦮꦕꦫꦫꦹꦥꦴꦮꦕꦫꦴꦢꦶꦨꦺꦢꦴ ꦥꦚ꧀ꦚꦴ ꦤ ꦥꦫꦶꦥꦹꦫꦠꦶ. ꦏꦴꦩꦴꦮꦕꦫꦴꦪꦥꦶ ꦄꦥꦫꦶꦥꦹꦫꦪꦩꦴꦤꦴꦪ ꦏꦸꦠꦺꦴꦮ ꦫꦹꦥꦴꦮꦕꦫꦴꦫꦹꦥꦴꦮꦕꦫꦭꦺꦴꦏꦸꦠ꧀ꦠꦫꦥꦚ꧀ꦚꦴ ꦥꦫꦶꦥꦹꦫꦶꦱ꧀ꦱꦠꦷꦠꦶ ꦢꦷꦥꦺꦠꦶ. ꦄꦤꦮꦱ꧀ꦱꦸꦠꦕꦶꦠ꧀ꦠꦱ꧀ꦱꦴꦠꦶ ꦫꦴꦒꦺꦤ ꦄꦠꦶꦤ꧀ꦠꦕꦶꦠ꧀ꦠꦱ꧀ꦱ. ꦄꦤꦤ꧀ꦮꦴꦲꦠꦕꦺꦠꦱꦺꦴꦠꦶ ‘‘ꦄꦴꦲꦠꦕꦶꦠ꧀ꦠꦺꦴ ꦑꦶꦭꦗꦴꦠꦺꦴ’’ꦠꦶ (ꦢꦷ. ꦤꦶ. ꧓.꧓꧑꧙; ꦮꦶꦨ. ꧙꧔꧑; ꦩ. ꦤꦶ. ꧑.꧑꧘꧕) ꦄꦴꦒꦠꦛ꧀ꦜꦴꦤꦺ ꦢꦺꦴꦱꦺꦤ ꦕꦶꦠ꧀ꦠꦱ꧀ꦱ ꦥꦲꦠꦨꦴꦮꦺꦴ ꦮꦸꦠ꧀ꦠꦺꦴ, ꦆꦣ ꦥꦤ ꦢꦺꦴꦱꦺꦤ ꦄꦥ꧀ꦥꦛꦶꦲꦠꦕꦶꦠ꧀ꦠꦱ꧀ꦱꦴꦠꦶ ꦄꦠ꧀ꦡꦺꦴ. ꦥꦸꦚ꧀ꦚꦥꦴꦥꦥꦲꦷꦤꦱ꧀ꦱꦴꦠꦶ ꦕꦠꦸꦠ꧀ꦡꦩꦒ꧀ꦒꦺꦤ ꦥꦲꦷꦤꦥꦸꦚ꧀ꦚꦱ꧀ꦱ ꦕꦺꦮ ꦥꦲꦷꦤꦥꦴꦥꦱ꧀ꦱ ꦕ ꦑꦷꦟꦴꦱꦮꦱ꧀ꦱ. ꦤꦠ꧀ꦡꦶ ꦗꦴꦒꦫꦠꦺꦴ ꦨꦪꦤ꧀ꦠꦶ ꦑꦷꦟꦴꦱꦮꦱ꧀ꦱ ꦗꦴꦒꦫꦤ꧀ꦠꦱ꧀ꦱꦺꦮ ꦄꦨꦪꦨꦴꦮꦺꦴ ꦏꦡꦶꦠꦺꦴ ꦮꦶꦪ. ꦱꦺꦴ ꦥꦤ ꦱꦢ꧀ꦣꦴꦢꦷꦲꦶ ꦥꦚ꧀ꦕꦲꦶ ꦗꦴꦒꦫꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦠ꧀ꦠꦴ ꦗꦴꦒꦫꦺꦴ ꦤꦴꦩ. ꦠꦱ꧀ꦩꦴ ꦠꦱ꧀ꦱ ꦗꦴꦒꦫꦤ꧀ꦠꦱ꧀ꦱꦴꦥꦶ ꦄꦗꦴꦒꦫꦤ꧀ꦠꦱ꧀ꦱꦴꦥꦶ ꦏꦶꦭꦺꦱꦨꦪꦁ ꦤꦠ꧀ꦡꦶ ꦏꦶꦭꦺꦱꦴꦤꦁ ꦄꦥꦕ꧀ꦖꦴꦮꦠ꧀ꦠꦤꦠꦺꦴ. ꦤ ꦲꦶ ꦠꦁ ꦏꦶꦭꦺꦱꦴ ꦄꦤꦸꦧꦤ꧀ꦣꦤ꧀ꦠꦶ ꦠꦺꦤ ꦠꦺꦤ ꦩꦒ꧀ꦒꦺꦤ ꦥꦲꦷꦤꦴꦤꦁ ꦏꦶꦭꦺꦱꦴꦤꦁ ꦥꦸꦤ ꦄꦤꦸꦥꦒꦩꦤꦠꦺꦴ. ꦠꦺꦤꦺꦮꦴꦲ – ‘‘ꦱꦺꦴꦠꦴꦥꦠ꧀ꦠꦶꦩꦒ꧀ꦒꦺꦤ ꦪꦺ ꦏꦶꦭꦺꦱꦴ ꦥꦲꦷꦤꦴ, ꦠꦺ ꦏꦶꦭꦺꦱꦺ ꦤ ꦥꦸꦤꦺꦠꦶ ꦤ ꦥꦕ꧀ꦕꦺꦠꦶ ꦤ ꦥꦕ꧀ꦕꦴꦒꦕ꧀ꦖꦠꦶ, ꦱꦏꦢꦴꦒꦴꦩꦶꦄꦤꦴꦒꦴꦩꦶꦄꦫꦲꦠ꧀ꦠꦩꦒ꧀ꦒꦺꦤ ꦪꦺ ꦏꦶꦭꦺꦱꦴ ꦥꦲꦷꦤꦴ, ꦠꦺ ꦏꦶꦭꦺꦱꦺ ꦤ ꦥꦸꦤꦺꦠꦶ ꦤ ꦥꦕ꧀ꦕꦺꦠꦶ ꦤ ꦥꦕ꧀ꦕꦴꦒꦕ꧀ꦖꦠꦷ’’ꦠꦶ (ꦕꦹꦭ꦳ꦤꦶ. ꦩꦺꦠ꧀ꦠꦒꦹꦩꦴꦟꦮꦥꦸꦕ꧀ꦖꦴꦤꦶꦢ꧀ꦢꦺꦱ ꧒꧗).

ꦢꦺꦱꦤꦴ ꦩꦲꦴꦗꦤꦱ꧀ꦱ ꦱꦴꦠ꧀ꦡꦶꦏꦴ ꦱꦦꦭꦴ ꦄꦲꦺꦴꦱꦶ.

ꦄꦡꦺꦏꦢꦶꦮꦱꦁ ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ ‘‘ꦨꦴꦫꦶꦪꦴ ꦮꦠꦶꦩꦺ, ꦄꦴꦮꦸꦱꦺꦴ, ꦏꦶꦭꦺꦱꦴ ꦤꦴꦩ, ꦌꦮꦫꦹꦥꦱ꧀ꦱ ꦄꦫꦲꦠ꧀ꦠꦱ꧀ꦱ ꦈꦥꦤꦶꦱ꧀ꦱꦴꦪꦱꦩ꧀ꦥꦤ꧀ꦤꦺꦴ ꦏꦸꦭꦥꦸꦠ꧀ꦠꦺꦴ ꦏꦶꦭꦺꦱꦺꦲꦶ ꦄꦴꦭꦺꦴꦭ꦳ꦶꦠꦺꦴ ꦱꦠ꧀ꦠꦮꦴꦫꦺ ꦒꦶꦲꦷ ꦲꦸꦠ꧀ꦮꦴ ꦱꦠ꧀ꦠꦮꦴꦫꦺ ꦥꦧ꧀ꦧꦗꦶꦠꦺꦴ’’ꦠꦶ. ꦱꦠ꧀ꦡꦴ ꦠꦺꦱꦁ ꦠꦁ ꦏꦡꦴꦥꦮꦠ꧀ꦠꦶꦁ ꦱꦸꦠ꧀ꦮꦴ ꦠꦔ꧀ꦑꦟꦴꦤꦸꦫꦹꦥꦺꦤ ꦒꦩꦤꦺꦤ ꦣꦩ꧀ꦩꦱꦨꦁ ꦒꦤ꧀ꦠ꧀ꦮꦴ ꦧꦸꦢ꧀ꦣꦴꦱꦤꦺ ꦤꦶꦱꦶꦤ꧀ꦤꦺꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ, ‘‘ꦆꦩꦴꦪ ꦤꦴꦩꦴ’’ꦠꦶ ꦮꦸꦠ꧀ꦠꦺ ꦌꦮꦩꦺꦮ, ꦨꦶꦏ꧀ꦑꦮꦺ, ꦏꦶꦭꦺꦱꦴ ꦤꦴꦩ ꦨꦴꦫꦶꦪꦴ, ꦱꦕꦺ ꦌꦠꦺ ꦫꦹꦥꦶꦤꦺꦴ ꦲꦸꦠ꧀ꦮꦴ ꦏꦠ꧀ꦡꦕꦶ ꦥꦏ꧀ꦑꦶꦥꦶꦠꦸꦁ ꦱꦏ꧀ꦏꦴ ꦨꦮꦺꦪ꧀ꦪꦸꦁ, ꦕꦏ꧀ꦏꦮꦴꦭ꦳ꦁ ꦄꦠꦶꦱꦩ꧀ꦧꦴꦣꦁ, ꦧ꧀ꦫꦲ꧀ꦩꦭꦺꦴꦏꦺꦴ ꦄꦠꦶꦤꦷꦕꦏꦺꦴꦠꦶ ꦎꦏꦴꦱꦺꦴ ꦤꦺꦱꦁ ꦤ ꦨꦮꦺꦪ꧀ꦪ, ꦩꦴꦢꦶꦱꦩ꧀ꦥꦶ ꦤꦴꦩꦺꦠꦺ ꦥꦚ꧀ꦚꦴꦱꦩ꧀ꦥꦤ꧀ꦤꦁ ꦥꦸꦫꦶꦱꦴꦗꦴꦤꦺꦪ꧀ꦪꦁ ꦄꦴꦭꦺꦴꦭ꦳ꦺꦤ꧀ꦠꦶ, ꦄꦮꦱꦺꦱꦺꦱꦸ ꦏꦴ ꦏꦡꦴ? ‘‘ꦄꦲꦚ꧀ꦲꦶ ꦄꦝ꧀ꦞꦤꦴꦭ꦳ꦶꦩꦠ꧀ꦠꦁ ꦮꦫꦏꦕꦺꦴꦫꦏꦁ ꦏꦸꦟ꧀ꦜꦏꦸꦢꦴꦭꦚ꧀ꦕ ꦤꦶꦱ꧀ꦱꦴꦪ ꦖ ꦮꦴꦫꦺ ꦥꦧ꧀ꦧꦗꦶꦠ꧀ꦮꦴ ꦈꦥ꧀ꦥꦧ꧀ꦧꦗꦶꦠꦥꦸꦧ꧀ꦧꦺꦴ’’ꦠꦶ. ‘‘ꦏꦢꦴ, ꦨꦤ꧀ꦠꦺ, ꦏꦢꦴ ꦱꦸꦒꦠꦴ’’ꦠꦶ? ‘‘ꦱꦸꦟꦶꦱ꧀ꦱꦡ, ꦨꦶꦏ꧀ꦑꦮꦺ’’ꦠꦶ. ‘‘ꦄꦴꦩ, ꦨꦤ꧀ꦠꦺ’’ꦠꦶ. ‘‘ꦠꦺꦤ ꦲꦶ ꦱꦸꦟꦴꦡꦴ’’ꦠꦶ ꦄꦠꦷꦠꦁ ꦄꦴꦲꦫꦶ –

ꦄꦠꦷꦠꦺ ꦧꦴꦫꦴꦟꦱꦶꦪꦁ ꦧ꧀ꦫꦲ꧀ꦩꦢꦠ꧀ꦠꦺ ꦫꦗ꧀ꦗꦁ ꦏꦴꦫꦺꦤ꧀ꦠꦺ ꦏꦸꦢꦴꦭꦥꦟ꧀ꦝꦶꦠꦺꦴ ꦤꦴꦩ ꦧꦴꦲꦶꦫꦏꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦄꦛ꧀ꦜ ꦩꦴꦱꦺ ꦲꦶꦩꦮꦤ꧀ꦠꦺ ꦮꦱꦶꦠ꧀ꦮꦴ ꦮꦱ꧀ꦱꦴꦫꦠ꧀ꦠꦱꦩꦪꦺ ꦨꦹꦩꦶꦪꦴ ꦠꦶꦤ꧀ꦠꦴꦪ ‘‘ꦒꦺꦲꦺ ꦩꦺ ꦄꦝ꧀ꦞꦤꦴꦭ꦳ꦶꦩꦠ꧀ꦠꦺꦴ ꦮꦫꦏꦕꦺꦴꦫꦏꦺꦴ ꦕ ꦏꦸꦟ꧀ꦜꦏꦸꦢꦴꦭꦏꦺꦴ ꦕ ꦄꦠ꧀ꦡꦶ, ꦮꦫꦏꦕꦺꦴꦫꦏꦧꦷꦗꦁ ꦩꦴ ꦤꦱ꧀ꦱꦷ’’ꦠꦶ ꦈꦥ꧀ꦥꦧ꧀ꦧꦗꦶꦠ꧀ꦮꦴ ꦌꦏꦁ ꦜꦴꦤꦁ ꦏꦸꦢꦴꦭꦺꦤ ꦏꦱꦶꦠ꧀ꦮꦴ ꦠꦁ ꦧꦷꦗꦁ ꦮꦥꦶꦠ꧀ꦮꦴ ꦮꦠꦶꦁ ꦏꦠ꧀ꦮꦴ ꦥꦏ꧀ꦏꦏꦴꦭꦺ ꦈꦢ꧀ꦣꦫꦶꦠ꧀ꦮꦴ ꦤꦴꦭ꦳ꦶꦩꦠ꧀ꦠꦧꦷꦗꦁ ꦜꦥꦺꦠ꧀ꦮꦴ ꦱꦺꦱꦁ ꦑꦴꦢꦶ. ꦱꦺꦴ ‘‘ꦏꦶꦁ ꦩꦺ ꦢꦴꦤꦶ ꦒꦺꦲꦺꦤ, ꦥꦸꦤ ꦄꦛ꧀ꦜ ꦩꦴꦱꦺ ꦥꦧ꧀ꦧꦗꦶꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶ. ꦆꦩꦶꦤꦴꦮ ꦤꦷꦲꦴꦫꦺꦤ ꦤꦴꦭ꦳ꦶꦩꦠ꧀ꦠꦁ ꦮꦫꦏꦕꦺꦴꦫꦏꦚ꧀ꦕ ꦏꦸꦟ꧀ꦜꦏꦸꦢꦴꦭꦚ꧀ꦕ ꦤꦶꦱ꧀ꦱꦴꦪ ꦱꦠ꧀ꦠꦮꦴꦫꦺ ꦒꦶꦲꦷ ꦲꦸꦠ꧀ꦮꦴ ꦱꦠ꧀ꦠꦮꦴꦫꦺ ꦥꦧ꧀ꦧꦗꦶꦠ꧀ꦮꦴ ꦱꦠ꧀ꦠꦩꦺ ꦥꦤ ꦮꦴꦫꦺ ꦕꦶꦤ꧀ꦠꦺꦱꦶ – ‘‘ꦄꦲꦁ ꦖ ꦮꦴꦫꦺ ꦆꦩꦁ ꦏꦸꦟ꧀ꦜꦏꦸꦢꦴꦭꦁ ꦤꦶꦱ꧀ꦱꦴꦪ ꦒꦶꦲꦷ ꦲꦸꦠ꧀ꦮꦴ ꦥꦧ꧀ꦧꦗꦶꦠꦺꦴ, ꦏꦠ꧀ꦡꦕꦶꦢꦺꦮ ꦤꦁ ꦖꦝ꧀ꦝꦺꦱ꧀ꦱꦴꦩꦷ’’ꦠꦶ. ꦱꦺꦴ ꦒꦔ꧀ꦒꦴꦪ ꦠꦷꦫꦁ ꦒꦤ꧀ꦠ꧀ꦮꦴ, ‘‘ꦥꦠꦶꦠꦛ꧀ꦜꦴꦤꦁ ꦥꦱ꧀ꦱꦤ꧀ꦠꦺꦴ ꦎꦠꦫꦶꦠ꧀ꦮꦴ ꦒꦟ꧀ꦲꦺꦪ꧀ꦪꦁ, ꦪꦡꦴꦱ꧀ꦱ ꦥꦠꦶꦠꦛ꧀ꦜꦴꦤꦁ ꦤ ꦥꦱ꧀ꦱꦴꦩꦶ, ꦠꦡꦴ ꦤꦁ ꦖꦝ꧀ꦝꦺꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦤꦴꦭ꦳ꦶꦩꦠ꧀ꦠꦁ ꦧꦷꦗꦁ ꦥꦶꦭꦺꦴꦠꦶꦏꦴꦪ ꦧꦤ꧀ꦣꦶꦠ꧀ꦮꦴ ꦥꦶꦭꦺꦴꦠꦶꦏꦁ ꦏꦸꦢꦴꦭꦦꦭꦏꦺ ꦧꦤ꧀ꦣꦶꦠ꧀ꦮꦴ ꦏꦸꦢꦴꦭꦁ ꦄꦒ꧀ꦒꦢꦟ꧀ꦝꦏꦺ ꦒꦲꦺꦠ꧀ꦮꦴ ꦒꦔ꧀ꦒꦴꦪ ꦠꦷꦫꦺ ꦜꦶꦠꦺꦴ ꦄꦏ꧀ꦑꦷꦤꦶ ꦤꦶꦩꦷꦭꦺꦠ꧀ꦮꦴ ꦈꦥꦫꦶꦱꦷꦱꦺ ꦠꦶꦏ꧀ꦑꦠ꧀ꦠꦸꦁ ꦄꦴꦮꦶꦗ꧀ꦙꦶꦠ꧀ꦮꦴ ꦒꦔ꧀ꦒꦴꦪꦁ ꦑꦶꦥꦶꦠ꧀ꦮꦴ ꦤꦶꦮꦠ꧀ꦠꦶꦠ꧀ꦮꦴ ꦎꦭꦺꦴꦏꦺꦤ꧀ꦠꦺꦴ ꦥꦠꦶꦠꦛ꧀ꦜꦴꦤꦁ ꦄꦢꦶꦱ꧀ꦮꦴ ‘‘ꦗꦶꦠꦁ ꦩꦺ, ꦗꦶꦠꦁ ꦩꦺ’’ꦠꦶ ꦠꦶꦏ꧀ꦑꦠ꧀ꦠꦸꦁ ꦱꦢ꧀ꦢꦩꦏꦴꦱꦶ.

ꦠꦱ꧀ꦩꦶꦁ ꦑꦟꦺ ꦧꦴꦫꦴꦟꦱꦶꦫꦴꦗꦴ ꦥꦕ꧀ꦕꦤ꧀ꦠꦁ ꦮꦹꦥꦱꦩꦺꦠ꧀ꦮꦴ ꦄꦴꦒꦤ꧀ꦠ꧀ꦮꦴ ꦤꦢꦷꦠꦷꦫꦺ ꦑꦤ꧀ꦣꦴꦮꦴꦫꦁ ꦤꦶꦮꦴꦱꦺꦠ꧀ꦮꦴ ꦤ꧀ꦲꦴꦤꦠ꧀ꦡꦴꦪ ꦤꦢꦶꦁ ꦎꦠꦶꦟ꧀ꦟꦺꦴ ꦠꦁ ꦱꦢ꧀ꦢꦁ ꦄꦱ꧀ꦱꦺꦴꦱꦶ. ꦫꦴꦗꦹꦤꦚ꧀ꦕ ꦤꦴꦩ ‘‘ꦗꦶꦠꦁ ꦩꦺ’’ꦠꦶ ꦱꦢ꧀ꦢꦺꦴ ꦄꦩꦤꦴꦥꦺꦴ ꦲꦺꦴꦠꦶ, ꦱꦺꦴ ꦠꦱ꧀ꦱ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ, ‘‘ꦄꦲꦁ ꦆꦢꦴꦤꦶ ꦄꦩꦶꦠ꧀ꦠꦩꦢ꧀ꦢꦤꦁ ꦏꦠ꧀ꦮꦴ ‘ꦗꦶꦠꦁ ꦩꦺ’ꦠꦶ ꦄꦴꦒꦠꦺꦴ, ꦠ꧀ꦮꦁ ꦥꦤ ‘ꦗꦶꦠꦁ ꦩꦺ, ꦗꦶꦠꦁ ꦩꦺ’ꦠꦶ ꦮꦶꦫꦮꦱꦶ, ꦏꦶꦁ ꦤꦴꦩꦺꦠ’’ꦤ꧀ꦠꦶ ꦥꦸꦕ꧀ꦖꦶ. ꦏꦸꦢꦴꦭꦥꦟ꧀ꦝꦶꦠꦺꦴ ‘‘ꦠ꧀ꦮꦁ ꦧꦴꦲꦶꦫꦏꦕꦺꦴꦫꦺ ꦗꦶꦤꦶ, ꦠꦪꦴ ꦗꦶꦠꦁ ꦥꦸꦤ ꦄꦮꦗꦶꦠꦩꦺꦮ ꦲꦺꦴꦠꦶ, ꦩꦪꦴ ꦥꦤ ꦄꦗ꧀ꦙꦠ꧀ꦠꦶꦏꦺꦴ ꦭꦺꦴꦨꦕꦺꦴꦫꦺꦴ ꦗꦶꦠꦺꦴ, ꦱꦺꦴ ꦥꦸꦤ ꦩꦁ ꦤ ꦗꦶꦤꦶꦱ꧀ꦱꦠꦶ, ꦠꦱ꧀ꦱꦺꦮ ꦗꦪꦺꦴ ꦱꦴꦣꦹ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

‘‘ꦤ ꦠꦁ ꦗꦶꦠꦁ ꦱꦴꦣꦸ ꦗꦶꦠꦁ, ꦪꦁ ꦗꦶꦠꦁ ꦄꦮꦗꦷꦪꦠꦶ;

ꦠꦁ ꦑꦺꦴ ꦗꦶꦠꦁ ꦱꦴꦣꦸ ꦗꦶꦠꦁ, ꦪꦁ ꦗꦶꦠꦁ ꦤꦴꦮꦗꦷꦪꦠꦷ’’ꦠꦶ. (ꦗꦴ. ꧑.꧑.꧗꧐);

ꦠꦁ ꦑꦟꦁꦪꦺꦮ ꦕ ꦒꦔ꧀ꦒꦁ ꦎꦭꦺꦴꦏꦺꦤ꧀ꦠꦺꦴ ꦄꦴꦥꦺꦴꦏꦱꦶꦟꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦄꦣꦶꦒꦠꦮꦶꦱꦺꦱꦺꦴ ꦄꦴꦏꦴꦱꦺ ꦥꦭ꧀ꦭꦔ꧀ꦏꦺꦤ ꦤꦶꦱꦷꦢꦶ. ꦫꦴꦗꦴ ꦩꦲꦴꦥꦸꦫꦶꦱꦱ꧀ꦱ ꦣꦩ꧀ꦩꦏꦡꦁ ꦱꦸꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦥꦧ꧀ꦧꦗ꧀ꦗꦁ ꦪꦴꦕꦶꦠ꧀ꦮꦴ ꦱꦢ꧀ꦣꦶꦁ ꦧꦭꦏꦴꦪꦺꦤ ꦥꦧ꧀ꦧꦗꦶ. ꦪꦺꦴꦗꦤꦩꦠ꧀ꦠꦴ ꦥꦫꦶꦱꦴ ꦄꦲꦺꦴꦱꦶ. ꦄꦥꦫꦺꦴꦥꦶ ꦱꦴꦩꦤ꧀ꦠꦫꦴꦗꦴ ꦠꦱ꧀ꦱ ꦥꦧ꧀ꦧꦗꦶꦠꦨꦴꦮꦁ ꦱꦸꦠ꧀ꦮꦴ, ‘‘ꦠꦱ꧀ꦱ ꦫꦗ꧀ꦗꦁ ꦒꦟ꧀ꦲꦶꦱ꧀ꦱꦴꦩꦷ’’ꦠꦶ ꦄꦴꦒꦤ꧀ꦠ꧀ꦮꦴ ꦠꦡꦴ ꦱꦩꦶꦢ꧀ꦣꦁ ꦤꦒꦫꦁ ꦱꦸꦚ꧀ꦚꦁ ꦢꦶꦱ꧀ꦮꦴ, ‘‘ꦌꦮꦫꦹꦥꦁ ꦤꦒꦫꦁ ꦖꦝ꧀ꦝꦺꦠ꧀ꦮꦴ ꦥꦧ꧀ꦧꦗꦶꦠꦺꦴ ꦫꦴꦗꦴ ꦎꦫꦏꦺ ꦜꦴꦤꦺ ꦤ ꦥꦧ꧀ꦧꦗꦶꦱ꧀ꦱꦠꦶ, ꦩꦪꦴꦥꦶ ꦥꦧ꧀ꦧꦗꦶꦠꦸꦁ ꦮꦛ꧀ꦛꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦠꦠ꧀ꦡ ꦒꦤ꧀ꦠ꧀ꦮꦴ ꦩꦲꦴꦥꦸꦫꦶꦱꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦧ꧀ꦧꦗ꧀ꦗꦁ ꦪꦴꦕꦶꦠ꧀ꦮꦴ ꦱꦥꦫꦶꦮꦴꦫꦺꦴ ꦥꦧ꧀ꦧꦗꦶ. ꦌꦠꦺꦤꦺꦮ ꦤꦷꦲꦴꦫꦺꦤ ꦱꦠ꧀ꦠ ꦫꦴꦗꦴꦤꦺꦴ ꦥꦧ꧀ꦧꦗꦶꦁꦱꦸ. ꦱꦠ꧀ꦠꦪꦺꦴꦗꦤꦶꦏꦺꦴ ꦄꦱ꧀ꦱꦩꦺꦴ ꦄꦲꦺꦴꦱꦶ. ꦱꦠ꧀ꦠ ꦫꦴꦗꦴꦤꦺꦴ ꦨꦺꦴꦒꦺ ꦖꦝ꧀ꦝꦺꦠ꧀ꦮꦴ ꦌꦠ꧀ꦠꦏꦁ ꦗꦤꦁ ꦒꦲꦺꦠ꧀ꦮꦴ ꦥꦧ꧀ꦧꦗꦶꦁꦱꦸ. ꦩꦲꦴꦥꦸꦫꦶꦱꦺꦴ ꦧ꧀ꦫꦲ꧀ꦩꦕꦫꦶꦪꦮꦴꦱꦁ ꦮꦱꦶꦠ꧀ꦮꦴ ꦧ꧀ꦫꦲ꧀ꦩꦭꦺꦴꦏꦹꦥꦒꦺꦴ ꦄꦲꦺꦴꦱꦶ.

ꦱꦠ꧀ꦡꦴ ꦆꦩꦁ ꦣꦩ꧀ꦩꦢꦺꦱꦤꦁ ꦄꦴꦲꦫꦶꦠ꧀ꦮꦴ, ‘‘ꦄꦲꦁ, ꦨꦶꦏ꧀ꦑꦮꦺ, ꦠꦢꦴ ꦏꦸꦢꦴꦭꦥꦟ꧀ꦝꦶꦠꦺꦴ ꦄꦲꦺꦴꦱꦶꦁ, ꦏꦶꦭꦺꦱꦴ ꦤꦴꦩꦺꦠꦺ ꦌꦮꦁ ꦨꦴꦫꦶꦪꦴ’’ꦠꦶ ꦄꦴꦲ.

ꦕꦶꦠ꧀ꦠꦲꦠ꧀ꦡꦠ꧀ꦡꦺꦫꦮꦠ꧀ꦡꦸ ꦥꦚ꧀ꦕꦩꦁ.

꧖. ꦥꦚ꧀ꦕꦱꦠꦨꦶꦏ꧀ꦑꦸꦮꦠ꧀ꦡꦸ

ꦏꦸꦩ꧀ꦨꦹꦥꦩꦤ꧀ꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦤ꧀ꦠꦺꦴ ꦄꦴꦫꦢ꧀ꦣꦮꦶꦥꦱ꧀ꦱꦏꦺ ꦨꦶꦏ꧀ꦑꦹ ꦄꦴꦫꦧ꧀ꦨ ꦏꦡꦺꦱꦶ.

ꦱꦴꦮꦠ꧀ꦡꦶꦪꦁ ꦏꦶꦫ ꦥꦚ꧀ꦕꦱꦠꦴ ꦨꦶꦏ꧀ꦑꦹ ꦱꦠ꧀ꦡꦸ ꦱꦤ꧀ꦠꦶꦏꦺ ꦪꦴꦮ ꦄꦫꦲꦠ꧀ꦠꦴ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ, ‘‘ꦱꦩꦟꦣꦩ꧀ꦩꦁ ꦏꦫꦶꦱ꧀ꦱꦴꦩꦴ’’ꦠꦶ ꦪꦺꦴꦗꦤꦱꦠꦩꦒ꧀ꦒꦁ ꦒꦤ꧀ꦠ꧀ꦮꦴ ꦌꦏꦁ ꦩꦲꦴꦮꦴꦱꦒꦴꦩꦁ ꦄꦒꦩꦁꦱꦸ. ꦄꦡ ꦠꦺ ꦩꦤꦸꦱ꧀ꦱꦴ ꦢꦶꦱ꧀ꦮꦴ ꦥꦚ꧀ꦚꦠ꧀ꦠꦴꦱꦤꦺ ꦤꦶꦱꦷꦢꦴꦥꦺꦠ꧀ꦮꦴ ꦥꦟꦷꦠꦺꦲꦶ ꦪꦴꦒꦸꦨꦠ꧀ꦠꦴꦢꦷꦲꦶ ꦥꦫꦶꦮꦶꦱꦶꦠ꧀ꦮꦴ, ‘‘ꦏꦲꦁ, ꦨꦤ꧀ꦠꦺ, ꦒꦕ꧀ꦖꦡꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ, ‘‘ꦪꦡꦴꦦꦴꦱꦸꦏꦛ꧀ꦜꦴꦤ’’ꦤ꧀ꦠꦶ ꦮꦸꦠ꧀ꦠꦺ, ‘‘ꦨꦤ꧀ꦠꦺ, ꦆꦩꦁ ꦠꦺꦩꦴꦱꦁ ꦆꦣꦺꦮ ꦮꦱꦡ, ꦩꦪꦩ꧀ꦥꦶ ꦠꦸꦩ꧀ꦲꦴꦏꦁ ꦱꦤ꧀ꦠꦶꦏꦺ ꦱꦫꦟꦺꦱꦸ ꦥꦠꦶꦛ꧀ꦜꦴꦪ ꦥꦚ꧀ꦕ ꦱꦷꦭꦴꦤꦶ ꦫꦏ꧀ꦑꦶꦱ꧀ꦱꦴꦩꦴ’’ꦠꦶ ꦪꦴꦕꦶꦠ꧀ꦮꦴ ꦠꦺꦱꦁ ꦄꦣꦶꦮꦴꦱꦤꦁ ꦮꦶꦢꦶꦠ꧀ꦮꦴ, ‘‘ꦄꦮꦶꦢꦹꦫꦺ ꦜꦴꦤꦺ ꦩꦲꦤ꧀ꦠꦺꦴ ꦮꦤꦱꦟ꧀ꦝꦺꦴ ꦄꦠ꧀ꦡꦶ, ꦌꦠ꧀ꦡ ꦮꦱꦡ, ꦨꦤ꧀ꦠꦺ’’ꦠꦶ ꦮꦠ꧀ꦮꦴ ꦈꦪ꧀ꦪꦺꦴꦗꦺꦱꦸꦁ. ꦨꦶꦏ꧀ꦑꦹ ꦠꦁ ꦮꦤꦱꦟ꧀ꦝꦁ ꦥꦮꦶꦱꦶꦁꦱꦸ. ꦠꦱ꧀ꦩꦶꦁ ꦮꦤꦱꦟ꧀ꦝꦺ ꦄꦣꦶꦮꦠ꧀ꦡꦴ ꦢꦺꦮꦠꦴ ‘‘ꦱꦷꦭꦮꦤ꧀ꦠꦺꦴ, ꦄꦪ꧀ꦪꦴ, ꦆꦩꦁ ꦮꦤꦱꦟ꧀ꦝꦁ ꦄꦤꦸꦥ꧀ꦥꦠ꧀ꦠꦴ, ꦄꦪꦸꦠ꧀ꦠꦁ ꦑꦺꦴ ꦥꦤ ꦄꦱ꧀ꦩꦴꦏꦁ ꦄꦪ꧀ꦪꦺꦱꦸ ꦆꦣ ꦮꦱꦤ꧀ꦠꦺꦱꦸ ꦥꦸꦠ꧀ꦠꦢꦴꦫꦺ ꦒꦲꦺꦠ꧀ꦮꦴ ꦫꦸꦏ꧀ꦑꦺ ꦄꦨꦶꦫꦸꦪ꧀ꦲ ꦮꦱꦶꦠꦸ’’ꦤ꧀ꦠꦶ ꦫꦸꦏ꧀ꦑꦠꦺꦴ ꦎꦠꦫꦶꦠ꧀ꦮꦴ ꦨꦹꦩꦶꦪꦁ ꦤꦶꦱꦷꦢꦶꦠ꧀ꦮꦴ ꦕꦶꦤ꧀ꦠꦪꦶꦁꦱꦸ, ‘‘ꦄꦪ꧀ꦪꦴ, ꦆꦩꦱ꧀ꦩꦶꦁ ꦜꦴꦤꦺ ꦄꦗ꧀ꦗꦺꦏꦫꦠ꧀ꦠꦶꦁ ꦮꦱꦶꦠ꧀ꦮꦴ ꦄꦢ꧀ꦣꦴ ꦱ꧀ꦮꦺ ꦒꦩꦶꦱ꧀ꦱꦤ꧀ꦠꦷ’’ꦠꦶ. ꦨꦶꦏ꧀ꦑꦹꦥꦶ ꦥꦸꦤꦢꦶꦮꦱꦺ ꦄꦤ꧀ꦠꦺꦴꦒꦴꦩꦺ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦸꦤ ꦠꦩꦺꦮ ꦮꦤꦱꦟ꧀ꦝꦁ ꦄꦴꦒꦩꦶꦁꦱꦸ. ꦢꦺꦮꦠꦴ ‘‘ꦨꦶꦏ꧀ꦑꦸꦱꦔ꧀ꦓꦺꦴ ꦱ꧀ꦮꦴꦠꦤꦴꦪ ꦏꦺꦤꦕꦶ ꦤꦶꦩꦤ꧀ꦠꦶꦠꦺꦴ ꦨꦮꦶꦱ꧀ꦱꦠꦶ, ꦠꦱ꧀ꦩꦴ ꦥꦸꦤꦴꦒꦕ꧀ꦖꦠꦶ, ꦄꦗ꧀ꦗ ꦒꦩꦤꦁ ꦤ ꦨꦮꦶꦱ꧀ꦱꦠꦶ, ꦱ꧀ꦮꦺ ꦒꦩꦶꦱ꧀ꦱꦠꦶ ꦩꦚ꧀ꦚꦺ’’ꦠꦶ ꦆꦩꦶꦤꦴ ꦈꦥꦴꦪꦺꦤ ꦄꦝ꧀ꦞꦩꦴꦱꦩꦠ꧀ꦠꦁ ꦨꦹꦩꦶꦪꦩꦺꦮ ꦄꦕ꧀ꦖꦶꦁꦱꦸ.

ꦠꦠꦺꦴ ꦕꦶꦤ꧀ꦠꦪꦶꦁꦱꦸ – ‘‘ꦨꦢꦤ꧀ꦠꦴ ꦆꦩꦁ ꦠꦺꦩꦴꦱꦁ ꦆꦣꦺꦮ ꦩꦚ꧀ꦚꦺ ꦮꦱꦶꦱ꧀ꦱꦤ꧀ꦠꦶ, ꦆꦣꦺꦮ ꦑꦺꦴ ꦥꦤ ꦆꦩꦺꦱꦸ ꦮꦱꦤ꧀ꦠꦺꦱꦸ ꦄꦩ꧀ꦲꦴꦏꦁ ꦫꦸꦏ꧀ꦑꦺ ꦄꦨꦶꦫꦸꦲꦶꦠ꧀ꦮꦴ ꦤꦶꦱꦷꦢꦶꦠꦸꦩ꧀ꦥꦶ ꦤ ꦪꦸꦠ꧀ꦠꦁ, ꦠꦺꦩꦴꦱꦁ ꦥꦸꦠ꧀ꦠꦢꦴꦫꦺ ꦒꦲꦺꦠ꧀ꦮꦴ ꦨꦹꦩꦶꦪꦁ ꦤꦶꦱꦷꦢꦤꦛ꧀ꦜꦴꦤꦴꦤꦶꦥꦶ ꦢꦸꦏ꧀ꦑꦴꦤꦶ, ꦏꦶꦚ꧀ꦕꦶ ꦏꦠ꧀ꦮꦴ ꦆꦩꦺ ꦨꦶꦏ꧀ꦑꦹ ꦥꦭꦴꦥꦺꦠꦸꦁ ꦮꦛ꧀ꦛꦠꦷ’’ꦠꦶ. ꦠꦴ ꦠꦺꦱꦸ ꦠꦺꦱꦸ ꦫꦠ꧀ꦠꦶꦛ꧀ꦜꦴꦤꦢꦶꦮꦴꦛ꧀ꦜꦴꦤꦺꦱꦸ ꦕꦺꦮ ꦕꦔ꧀ꦏꦩꦤꦏꦺꦴꦛꦷꦱꦸ ꦕ ꦖꦶꦤ꧀ꦤꦱꦷꦱꦴꦤꦶ ꦏꦧꦤ꧀ꦣꦴꦤꦶ ꦢꦱ꧀ꦱꦺꦠꦸꦁ ꦄꦩꦤꦸꦱ꧀ꦱꦱꦢ꧀ꦢꦚ꧀ꦕ ꦨꦴꦮꦺꦠꦸꦁ ꦄꦴꦫꦨꦶꦁꦱꦸ. ꦨꦶꦏ꧀ꦑꦹꦤꦁ ꦑꦶꦥꦶꦠꦏꦴꦱꦴꦢꦪꦺꦴ ꦫꦺꦴꦒꦴ ꦥꦮꦠ꧀ꦠꦶꦁꦱꦸ. ꦠꦺ ꦄꦚ꧀ꦚꦩꦚ꧀ꦚꦁ ‘‘ꦠꦸꦪ꧀ꦲꦁ, ꦄꦴꦮꦸꦱꦺꦴ, ꦏꦶꦁ ꦫꦸꦗ꧀ꦗꦠꦷ’’ꦠꦶ ꦥꦸꦕ꧀ꦖꦤ꧀ꦠꦴ, ‘‘ꦩꦪ꧀ꦲꦁ ꦑꦶꦥꦶꦠꦫꦺꦴꦒꦺꦴ, ꦩꦪ꧀ꦲꦁ ꦏꦴꦱꦺꦴ’’ꦠꦶ ꦮꦠ꧀ꦮꦴ, ‘‘ꦄꦴꦮꦸꦱꦺꦴ, ꦄꦲꦁ ꦄꦗ꧀ꦗ ꦕꦔ꧀ꦏꦩꦤꦏꦺꦴꦛꦶꦪꦁ ꦖꦶꦤ꧀ꦤꦱꦷꦱꦁ ꦄꦢ꧀ꦢꦱꦁ, ꦄꦲꦁ ꦫꦠ꧀ꦠꦶꦛ꧀ꦜꦴꦤꦺ ꦏꦧꦤ꧀ꦣꦁ ꦄꦢ꧀ꦢꦱꦁ, ꦄꦲꦁ ꦢꦶꦮꦴꦛ꧀ꦜꦴꦤꦺ ꦄꦩꦤꦸꦱ꧀ꦱꦱꦢ꧀ꦢꦁ ꦄꦱ꧀ꦱꦺꦴꦱꦶꦁ, ꦥꦫꦶꦮꦗ꧀ꦗꦺꦠꦧ꧀ꦧꦪꦸꦠ꧀ꦠꦏꦩꦶꦢꦁ ꦜꦴꦤꦁ, ꦄꦩ꧀ꦲꦴꦏꦁ ꦆꦣ ꦄꦦꦴꦱꦸꦏꦁ ꦄꦲꦺꦴꦱꦶ, ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦩꦶꦱ꧀ꦱꦴꦩꦴ’’ꦠꦶ ꦤꦶꦏ꧀ꦑꦩꦶꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ.

ꦄꦡ ꦤꦺ ꦱꦠ꧀ꦡꦴ ꦄꦴꦲ – ‘‘ꦏꦶꦁ, ꦨꦶꦏ꧀ꦑꦮꦺ, ꦠꦱ꧀ꦩꦶꦁ ꦜꦴꦤꦺ ꦮꦱꦶꦠꦸꦁ ꦤ ꦱꦏ꧀ꦑꦶꦱ꧀ꦱꦡꦴ’’ꦠꦶ? ‘‘ꦄꦴꦩ, ꦨꦤ꧀ꦠꦺ, ꦄꦩ꧀ꦲꦴꦏꦁ ꦠꦱ꧀ꦩꦶꦁ ꦜꦴꦤꦺ ꦮꦱꦤ꧀ꦠꦴꦤꦁ ꦌꦮꦫꦹꦥꦴꦤꦶ ꦨꦺꦫꦮꦴꦫꦩ꧀ꦩꦟꦴꦤꦶ ꦈꦥꦛ꧀ꦜꦲꦤ꧀ꦠꦶ, ꦌꦮꦫꦹꦥꦁ ꦄꦦꦴꦱꦸꦏꦁ ꦲꦺꦴꦠꦶ, ꦠꦺꦤ ꦩꦪꦁ ‘ꦮꦗ꧀ꦗꦺꦠꦧ꧀ꦧꦪꦸꦠ꧀ꦠꦏꦩꦶꦢꦁ ꦜꦴꦤ’ꦤ꧀ꦠꦶ ꦠꦁ ꦖꦝ꧀ꦝꦺꦠ꧀ꦮꦴ ꦠꦸꦩ꧀ꦲꦴꦏꦁ ꦱꦤ꧀ꦠꦶꦏꦁ ꦄꦴꦒꦠꦴ’’ꦠꦶ. ‘‘ꦨꦶꦏ꧀ꦑꦮꦺ, ꦠꦠ꧀ꦡꦺꦮ ꦠꦸꦩ꧀ꦲꦴꦏꦁ ꦒꦤ꧀ꦠꦸꦁ ꦮꦛ꧀ꦛꦠꦷ’’ꦠꦶ. ‘‘ꦤ ꦱꦏ꧀ꦏꦴ, ꦨꦤ꧀ꦠꦺ’’ꦠꦶ. ‘‘ꦨꦶꦏ꧀ꦑꦮꦺ, ꦠꦸꦩ꧀ꦲꦺ ꦄꦴꦮꦸꦣꦁ ꦄꦒ꧀ꦒꦲꦺꦠ꧀ꦮꦴ ꦒꦠꦴ, ꦆꦢꦴꦤꦶ ꦄꦴꦮꦸꦣꦁ ꦒꦲꦺꦠ꧀ꦮꦴ ꦒꦕ꧀ꦖꦡꦴ’’ꦠꦶ. ‘‘ꦏꦠꦫꦴꦮꦸꦣꦁ, ꦨꦤ꧀ꦠꦺ’’ꦠꦶ? ꦱꦠ꧀ꦡꦴ ‘‘ꦄꦲꦁ ꦄꦴꦮꦸꦣꦁ ꦮꦺꦴ ꦢꦱ꧀ꦱꦴꦩꦶ, ꦩꦪꦴ ꦢꦶꦤ꧀ꦤꦁ ꦄꦴꦮꦸꦣꦁ ꦒꦲꦺꦠ꧀ꦮꦴ ꦒꦕ꧀ꦖꦡꦴ’’ꦠꦶ ꦮꦠ꧀ꦮꦴ –

‘‘ꦏꦫꦟꦷꦪꦩꦠ꧀ꦡꦏꦸꦱꦭꦺꦤ, ꦪꦤ꧀ꦠ ꦱꦤ꧀ꦠꦁ ꦥꦢꦁ ꦄꦨꦶꦱꦩꦺꦕ꧀ꦕ;

ꦱꦏ꧀ꦏꦺꦴ ꦈꦗꦹ ꦕ ꦱꦸꦲꦸꦗꦹ ꦕ, ꦱꦸꦮꦕꦺꦴ ꦕꦱ꧀ꦱ ꦩꦸꦢꦸ ꦄꦤꦠꦶꦩꦴꦤꦷ’’ꦠꦶ. (ꦑꦸ. ꦥꦴ. ꧙.꧑; ꦱꦸ. ꦤꦶ. ꧑꧔꧓) –

ꦱꦏꦭꦁ ꦩꦺꦠ꧀ꦠꦱꦸꦠ꧀ꦠꦁ ꦏꦡꦺꦠ꧀ꦮꦴ, ‘‘ꦨꦶꦏ꧀ꦑꦮꦺ, ꦆꦩꦁ ꦠꦸꦩ꧀ꦲꦺ ꦧꦲꦶ ꦮꦶꦲꦴꦫꦱ꧀ꦱ ꦮꦤꦱꦟ꧀ꦝꦠꦺꦴ ꦥꦛ꧀ꦜꦴꦪ ꦱꦗ꧀ꦙꦴꦪꦤ꧀ꦠꦴ ꦄꦤ꧀ꦠꦺꦴꦮꦶꦲꦴꦫꦁ ꦥꦮꦶꦱꦺꦪ꧀ꦪꦴꦡꦴ’’ꦠꦶ ꦈꦪ꧀ꦪꦺꦴꦗꦺꦱꦶ. ꦠꦺ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ꦤꦶꦏ꧀ꦑꦩꦶꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦠꦁ ꦜꦴꦤꦁ ꦥꦠ꧀ꦮꦴ ꦧꦲꦶꦮꦶꦲꦴꦫꦺ ꦒꦟꦱꦗ꧀ꦙꦴꦪꦁ ꦏꦠ꧀ꦮꦴ ꦱꦗ꧀ꦙꦴꦪꦩꦴꦤꦴ ꦮꦤꦱꦟ꧀ꦝꦁ ꦥꦮꦶꦱꦶꦁꦱꦸ. ꦱꦏꦭꦮꦤꦱꦟ꧀ꦝꦺ ꦢꦺꦮꦠꦴ ꦩꦺꦠ꧀ꦠꦕꦶꦠ꧀ꦠꦁ ꦥꦛꦶꦭꦨꦶꦠ꧀ꦮꦴ ꦠꦺꦱꦁ ꦥꦕ꧀ꦕꦸꦒ꧀ꦒꦩꦤꦁ ꦏꦠ꧀ꦮꦴ ꦥꦠ꧀ꦠꦕꦷꦮꦫꦥꦛꦶꦒ꧀ꦒꦲꦟꦁ ꦄꦴꦥꦸꦕ꧀ꦖꦶꦁꦱꦸ, ꦲꦠ꧀ꦡꦥꦴꦢꦱꦩ꧀ꦧꦴꦲꦤꦁ ꦄꦴꦥꦸꦕ꧀ꦖꦶꦁꦱꦸ, ꦠꦺꦱꦁ ꦠꦠ꧀ꦡ ꦠꦠ꧀ꦡ ꦄꦴꦫꦏ꧀ꦑꦁ ꦱꦁꦮꦶꦢꦲꦶꦁꦱꦸ, ꦥꦏ꧀ꦏꦣꦹꦥꦤꦠꦺꦭꦁ ꦮꦶꦪ ꦱꦤ꧀ꦤꦶꦱꦶꦤ꧀ꦤꦴ ꦄꦲꦺꦱꦸꦁ. ꦏꦠ꧀ꦡꦕꦶ ꦄꦩꦤꦸꦱ꧀ꦱꦱꦢ꧀ꦢꦺꦴ ꦤꦴꦩ ꦤꦴꦲꦺꦴꦱꦶ. ꦠꦺꦱꦁ ꦨꦶꦏ꧀ꦑꦹꦤꦁ ꦕꦶꦠ꧀ꦠꦁ ꦌꦏꦒ꧀ꦒꦁ ꦄꦲꦺꦴꦱꦶ. ꦠꦺ ꦫꦠ꧀ꦠꦶꦛ꧀ꦜꦴꦤꦢꦶꦮꦴꦛ꧀ꦜꦴꦤꦺꦱꦸ ꦤꦶꦱꦶꦤ꧀ꦤꦴ ꦮꦶꦥꦱ꧀ꦱꦤꦴꦪ ꦕꦶꦠ꧀ꦠꦁ ꦎꦠꦴꦫꦺꦠ꧀ꦮꦴ ꦄꦠ꧀ꦠꦤꦶ ꦑꦪꦮꦪꦁ ꦥꦛ꧀ꦜꦥꦺꦠ꧀ꦮꦴ, ‘‘ꦄꦪꦁ ꦄꦠ꧀ꦠꦨꦴꦮꦺꦴ ꦤꦴꦩ ꦨꦶꦗ꧀ꦗꦤꦏꦛ꧀ꦜꦺꦤ ꦄꦡꦴꦮꦫꦛ꧀ꦜꦺꦤ ꦏꦸꦭꦴꦭꦨꦴꦗꦤꦱꦢꦶꦱꦺꦴ’’ꦠꦶ ꦮꦶꦥꦱ꧀ꦱꦤꦁ ꦮꦝ꧀ꦞꦪꦶꦁꦱꦸ. ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦒꦤ꧀ꦣꦏꦸꦛꦶꦪꦴ ꦤꦶꦱꦶꦤ꧀ꦤꦺꦴꦮ ꦠꦺꦱꦁ ꦮꦶꦥꦱ꧀ꦱꦤꦴꦪ ꦄꦴꦫꦢ꧀ꦣꦨꦴꦮꦁ ꦚꦠ꧀ꦮꦴ ꦠꦺ ꦨꦶꦏ꧀ꦑꦹ ꦄꦴꦩꦤ꧀ꦠꦺꦠ꧀ꦮꦴ, ‘‘ꦌꦮꦩꦺꦮ, ꦨꦶꦏ꧀ꦑꦮꦺ, ꦄꦪꦁ ꦄꦠ꧀ꦠꦨꦴꦮꦺꦴ ꦤꦴꦩ ꦨꦶꦗ꧀ꦗꦤꦏꦛ꧀ꦜꦺꦤ ꦄꦡꦴꦮꦫꦛ꧀ꦜꦺꦤ ꦏꦸꦭꦴꦭꦨꦴꦗꦤꦱꦢꦶꦱꦺꦴ ꦌꦮꦴ’’ꦠꦶ ꦮꦠ꧀ꦮꦴ ꦎꦨꦴꦱꦁ ꦦꦫꦶꦠ꧀ꦮꦴ ꦪꦺꦴꦗꦤꦱꦠꦺ ꦜꦶꦠꦺꦴꦥꦶ ꦄꦨꦶꦩꦸꦑꦺ ꦤꦶꦱꦶꦤ꧀ꦤꦺꦴ ꦮꦶꦪ ꦖꦧ꧀ꦧꦟ꧀ꦟꦫꦁꦱꦶꦪꦺꦴ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦢꦶꦱ꧀ꦱꦩꦴꦤꦺꦤ ꦫꦹꦥꦺꦤ ꦆꦩꦁ ꦒꦴꦡꦩꦴꦲ –

꧔꧐. ‘‘ꦏꦸꦩ꧀ꦨꦹꦥꦩꦁ ꦏꦴꦪꦩꦶꦁꦩ ꦮꦶꦢꦶꦠ꧀ꦮꦴ, ꦤꦒꦫꦹꦥꦩꦁ ꦕꦶꦠ꧀ꦠꦩꦶꦢꦁ ꦜꦥꦺꦠ꧀ꦮꦴ;

ꦪꦺꦴꦣꦺꦡ ꦩꦴꦫꦁ ꦥꦚ꧀ꦚꦴꦮꦸꦣꦺꦤ, ꦗꦶꦠꦚ꧀ꦕ ꦫꦏ꧀ꦑꦺ ꦄꦤꦶꦮꦺꦱꦤꦺꦴ ꦱꦶꦪꦴ’’ꦠꦶ.

ꦠꦠ꧀ꦡ ꦏꦸꦩ꧀ꦨꦹꦥꦩꦤ꧀ꦠꦶ ꦄꦧꦭꦢꦸꦧ꧀ꦧꦭꦛ꧀ꦜꦺꦤ ꦄꦤꦢ꧀ꦣꦤꦶꦪꦠꦴꦮꦏꦴꦭꦶꦏꦛ꧀ꦜꦺꦤ ꦆꦩꦁ ꦏꦺꦱꦴꦢꦶꦱꦩꦹꦲꦱꦔ꧀ꦑꦴꦠꦁ ꦏꦴꦪꦁ ꦏꦸꦩ꧀ꦨꦹꦥꦩꦁ ꦏꦸꦭꦴꦭꦨꦴꦗꦤꦱꦢꦶꦱꦁ ꦮꦶꦢꦶꦠ꧀ꦮꦴ. ꦤꦒꦫꦹꦥꦩꦁ ꦕꦶꦠ꧀ꦠꦩꦶꦢꦁ ꦜꦥꦺꦠ꧀ꦮꦴꦠꦶ ꦤꦒꦫꦁ ꦤꦴꦩ ꦧꦲꦶꦢ꧀ꦣꦴ ꦡꦶꦫꦁ ꦲꦺꦴꦠꦶ, ꦒꦩ꧀ꦨꦷꦫꦥꦫꦶꦑꦁ ꦥꦴꦏꦴꦫꦥꦫꦶꦏ꧀ꦑꦶꦠ꧀ꦠꦁ ꦢ꧀ꦮꦴꦫꦛ꧀ꦛꦴꦭꦏꦪꦸꦠ꧀ꦠꦁ, ꦄꦤ꧀ꦠꦺꦴꦱꦸꦮꦶꦨꦠ꧀ꦠꦮꦷꦡꦶꦕꦠꦸꦏ꧀ꦏꦱꦶꦔ꧀ꦓꦴꦛꦏꦱꦩ꧀ꦥꦤ꧀ꦤꦁ ꦄꦤ꧀ꦠꦫꦴꦥꦟꦁ, ꦠꦁ ‘‘ꦮꦶꦭꦸꦩ꧀ꦥꦶꦱ꧀ꦱꦴꦩꦴ’’ꦠꦶ ꦧꦲꦶꦢ꧀ꦣꦴ ꦕꦺꦴꦫꦴ ꦄꦴꦒꦤ꧀ꦠ꧀ꦮꦴ ꦥꦮꦶꦱꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦴ ꦥꦧ꧀ꦧꦠꦁ ꦄꦴꦱꦗ꧀ꦗ ꦥꦛꦶꦲꦠꦴ ꦮꦶꦪ ꦒꦕ꧀ꦖꦤ꧀ꦠꦶ, ꦌꦮꦩꦺꦮ ꦥꦟ꧀ꦝꦶꦠꦺꦴ ꦏꦸꦭꦥꦸꦠ꧀ꦠꦺꦴ ꦄꦠ꧀ꦠꦤꦺꦴ ꦮꦶꦥꦱ꧀ꦱꦤꦴꦕꦶꦠ꧀ꦠꦁ ꦡꦶꦫꦁ ꦤꦒꦫꦱꦢꦶꦱꦁ ꦏꦠ꧀ꦮꦴ ꦜꦥꦺꦠ꧀ꦮꦴ ꦤꦒꦫꦺ ꦜꦶꦠꦺꦴ ꦌꦏꦠꦺꦴꦣꦴꦫꦴꦢꦶꦤꦴꦤꦥ꧀ꦥꦏꦴꦫꦴꦮꦸꦣꦺꦤ ꦕꦺꦴꦫꦒꦟꦁ ꦮꦶꦪ ꦮꦶꦥꦱ꧀ꦱꦤꦴꦩꦪꦺꦤ ꦕ ꦄꦫꦶꦪꦩꦒ꧀ꦒꦩꦪꦺꦤ ꦕ ꦥꦚ꧀ꦚꦴꦮꦸꦣꦺꦤ ꦠꦁꦠꦁꦩꦒ꧀ꦒꦮꦗ꧀ꦙꦁ ꦏꦶꦭꦺꦱꦩꦴꦫꦁ ꦥꦛꦶꦧꦴꦲꦤ꧀ꦠꦺꦴ ꦠꦁ ꦠꦁ ꦏꦶꦭꦺꦱꦩꦴꦫꦁ ꦪꦺꦴꦣꦺꦡ, ꦥꦲꦫꦺꦪ꧀ꦪꦴꦡꦴꦠꦶ ꦄꦠ꧀ꦡꦺꦴ. ꦗꦶꦠꦚ꧀ꦕ ꦫꦏ꧀ꦑꦺꦠꦶ ꦗꦶꦠꦚ꧀ꦕ ꦈꦥ꧀ꦥꦴꦢꦶꦠꦁ ꦠꦫꦸꦟꦮꦶꦥꦱ꧀ꦱꦤꦁ ꦄꦴꦮꦴꦱꦱꦥ꧀ꦥꦴꦪꦈꦠꦸꦱꦥ꧀ꦥꦴꦪꦨꦺꦴꦗꦤꦱꦥ꧀ꦥꦴꦪꦥꦸꦒ꧀ꦒꦭꦱꦥ꧀ꦥꦴꦪꦣꦩ꧀ꦩꦱ꧀ꦱꦮꦤꦱꦥ꧀ꦥꦴꦪꦴꦢꦷꦤꦶ ꦄꦴꦱꦺꦮꦤ꧀ꦠꦺꦴ ꦄꦤ꧀ꦠꦫꦤ꧀ꦠꦫꦴ ꦱꦩꦴꦥꦠ꧀ꦠꦶꦁ ꦱꦩꦴꦥꦗ꧀ꦗꦶꦠ꧀ꦮꦴ ꦠꦠꦺꦴ ꦮꦸꦛ꧀ꦜꦴꦪ ꦱꦸꦢ꧀ꦣꦕꦶꦠ꧀ꦠꦺꦤ ꦱꦔ꧀ꦑꦴꦫꦺ ꦱꦩ꧀ꦩꦱꦤ꧀ꦠꦺꦴ ꦫꦏ꧀ꦑꦺꦪ꧀ꦪ.

ꦄꦤꦶꦮꦺꦱꦤꦺꦴ ꦱꦶꦪꦴꦠꦶ ꦄꦤꦴꦭꦪꦺꦴ ꦨꦮꦺꦪ꧀ꦪ. ꦪꦡꦴ ꦤꦴꦩ ꦪꦺꦴꦣꦺꦴ ꦱꦔ꧀ꦒꦴꦩꦱꦷꦱꦺ ꦧꦭꦏꦺꦴꦛ꧀ꦜꦏꦁ ꦏꦠ꧀ꦮꦴ ꦄꦩꦶꦠ꧀ꦠꦺꦲꦶ ꦱꦢ꧀ꦣꦶꦁ ꦪꦸꦗ꧀ꦙꦤ꧀ꦠꦺꦴ ꦖꦴꦠꦺꦴ ꦮꦴ ꦥꦶꦥꦴꦱꦶꦠꦺꦴ ꦮꦴ ꦲꦸꦠ꧀ꦮꦴ ꦱꦤ꧀ꦤꦴꦲꦺ ꦮꦴ ꦱꦶꦡꦶꦭꦺ ꦄꦴꦮꦸꦣꦺ ꦮꦴ ꦥꦠꦶꦠꦺ ꦧꦭꦏꦺꦴꦛ꧀ꦜꦏꦁ ꦥꦮꦶꦱꦶꦠ꧀ꦮꦴ ꦮꦶꦱ꧀ꦱꦩꦶꦠ꧀ꦮꦴ ꦨꦸꦚ꧀ꦗꦶꦠ꧀ꦮꦴ ꦥꦶꦮꦶꦠ꧀ꦮꦴ ꦱꦤ꧀ꦤꦲꦶꦠ꧀ꦮꦴ ꦄꦴꦮꦸꦣꦁ ꦒꦲꦺꦠ꧀ꦮꦴ ꦥꦸꦤ ꦤꦶꦏ꧀ꦑꦩꦶꦠ꧀ꦮꦴ ꦪꦸꦗ꧀ꦙꦤ꧀ꦠꦺꦴ ꦥꦫꦱꦺꦤꦁ ꦩꦢ꧀ꦢꦠꦶ, ꦄꦗꦶꦠꦁ ꦗꦶꦤꦴꦠꦶ, ꦗꦶꦠꦁ ꦫꦏ꧀ꦑꦠꦶ. ꦱꦺꦴ ꦲꦶ ꦱꦕꦺ ꦧꦭꦏꦺꦴꦛ꧀ꦜꦏꦺ ꦜꦶꦠꦺꦴ ꦌꦮꦁ ꦮꦶꦱ꧀ꦱꦩꦤ꧀ꦠꦺꦴ ꦠꦁ ꦄꦱ꧀ꦱꦴꦢꦺꦤ꧀ꦠꦺꦴ ꦄꦕ꧀ꦖꦺꦪ꧀ꦪ, ꦫꦗ꧀ꦗꦁ ꦥꦫꦲꦠ꧀ꦡꦒꦠꦁ ꦏꦫꦺꦪ꧀ꦪ, ꦌꦮꦩꦺꦮ, ꦨꦶꦏ꧀ꦑꦸ, ꦥꦛꦶꦭꦢ꧀ꦣꦁ ꦠꦫꦸꦟꦮꦶꦥꦱ꧀ꦱꦤꦁ ꦥꦸꦤꦥ꧀ꦥꦸꦤꦁ ꦱꦩꦴꦥꦠ꧀ꦠꦶꦁ ꦱꦩꦴꦥꦗ꧀ꦗꦶꦠ꧀ꦮꦴ ꦠꦠꦺꦴ ꦮꦸꦛ꧀ꦜꦴꦪ ꦱꦸꦢ꧀ꦣꦕꦶꦠ꧀ꦠꦺꦤ ꦱꦔ꧀ꦑꦴꦫꦺ ꦱꦩ꧀ꦩꦱꦤ꧀ꦠꦺꦴ ꦫꦏ꧀ꦑꦶꦠꦸꦁ ꦱꦏ꧀ꦏꦺꦴꦠꦶ, ꦈꦠ꧀ꦠꦫꦶꦩꦒ꧀ꦒꦦꦭꦥꦛꦶꦭꦴꦨꦺꦤ ꦏꦶꦭꦺꦱꦩꦴꦫꦁ ꦗꦶꦤꦴꦠꦶ. ꦱꦕꦺ ꦥꦤ ꦱꦺꦴ ꦱꦩꦴꦥꦠ꧀ꦠꦶꦩꦺꦮ ꦄꦱ꧀ꦱꦴꦢꦺꦠꦶ, ꦱꦸꦢ꧀ꦣꦕꦶꦠ꧀ꦠꦺꦤ ꦥꦸꦤꦥ꧀ꦥꦸꦤꦁ ꦱꦔ꧀ꦑꦴꦫꦺ ꦤ ꦱꦩ꧀ꦩꦱꦠꦶ, ꦩꦒ꧀ꦒꦦꦭꦥꦛꦶꦮꦺꦣꦁ ꦏꦴꦠꦸꦁ ꦤ ꦱꦏ꧀ꦏꦺꦴꦠꦶ. ꦠꦱ꧀ꦩꦴ ꦫꦏ꧀ꦑꦶꦠꦧ꧀ꦧꦪꦸꦠ꧀ꦠꦏꦁ ꦫꦏ꧀ꦑꦤ꧀ꦠꦺꦴ ꦄꦤꦶꦮꦺꦱꦤꦺꦴ ꦱꦶꦪꦴ, ꦱꦩꦴꦥꦠ꧀ꦠꦶꦁ ꦤꦶꦮꦺꦱꦤꦁ ꦏꦠ꧀ꦮꦴ ꦠꦠ꧀ꦡ ꦤ ꦤꦶꦮꦺꦱꦺꦪ꧀ꦪ, ꦄꦴꦭꦪꦁ ꦤ ꦏꦫꦺꦪ꧀ꦪꦴꦠꦶ ꦄꦠ꧀ꦡꦺꦴ. ‘‘ꦄꦢ꧀ꦣꦴ ꦠꦸꦩ꧀ꦲꦺꦥꦶ ꦌꦮꦁ ꦏꦫꦺꦴꦡꦴ’’ꦠꦶ ꦌꦮꦁ ꦱꦠ꧀ꦡꦴ ꦠꦺꦱꦁ ꦨꦶꦏ꧀ꦑꦹꦤꦁ ꦣꦩ꧀ꦩꦁ ꦢꦺꦱꦺꦱꦶ.

ꦢꦺꦱꦤꦴꦮꦱꦴꦤꦺ ꦥꦚ꧀ꦕꦱꦠꦴ ꦨꦶꦏ꧀ꦑꦹ ꦤꦶꦱꦶꦤ꧀ꦤꦛ꧀ꦜꦴꦤꦺ ꦤꦶꦱꦶꦤ꧀ꦤꦴꦪꦺꦮ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦠ꧀ꦮꦴ ꦠꦡꦴꦒꦠꦱ꧀ꦱ ꦱꦸꦮꦟ꧀ꦟꦮꦟ꧀ꦟꦁ ꦱꦫꦷꦫꦁ ꦮꦟ꧀ꦟꦪꦤ꧀ꦠꦴ ꦡꦺꦴꦩꦺꦤ꧀ꦠꦴ ꦮꦤ꧀ꦢꦤ꧀ꦠꦴꦮ ꦄꦴꦒꦕ꧀ꦖꦶꦁꦱꦹꦠꦶ.

ꦥꦚ꧀ꦕꦱꦠꦨꦶꦏ꧀ꦑꦸꦮꦠ꧀ꦡꦸ ꦖꦛ꧀ꦜꦁ.

꧗. ꦥꦹꦠꦶꦒꦠ꧀ꦠꦠꦶꦱ꧀ꦱꦠ꧀ꦡꦺꦫꦮꦠ꧀ꦡꦸ

ꦄꦕꦶꦫꦁ ꦮꦠꦪꦁ ꦏꦴꦪꦺꦴꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦤ꧀ꦠꦺꦴ ꦥꦹꦠꦶꦒꦠ꧀ꦠꦠꦶꦱ꧀ꦱꦠ꧀ꦡꦺꦫꦁ ꦄꦴꦫꦧ꧀ꦨ ꦏꦡꦺꦱꦶ.

ꦌꦏꦺꦴ ꦏꦶꦫ ꦱꦴꦮꦠ꧀ꦡꦶꦮꦴꦱꦷ ꦏꦸꦭꦥꦸꦠ꧀ꦠꦺꦴ ꦱꦠ꧀ꦡꦸ ꦱꦤ꧀ꦠꦶꦏꦺ ꦣꦩ꧀ꦩꦁ ꦱꦸꦠ꧀ꦮꦴ ꦱꦴꦱꦤꦺ ꦈꦫꦁ ꦢꦠ꧀ꦮꦴ ꦥꦧ꧀ꦧꦗꦶꦠꦺꦴ, ꦱꦺꦴ ꦭꦢ꧀ꦣꦹꦥꦱꦩ꧀ꦥꦢꦺꦴ ꦠꦶꦱ꧀ꦱꦠ꧀ꦡꦺꦫꦺꦴ ꦤꦴꦩ ꦄꦲꦺꦴꦱꦶ. ꦒꦕ꧀ꦖꦤ꧀ꦠꦺ ꦒꦕ꧀ꦖꦤ꧀ꦠꦺ ꦏꦴꦭꦺ ꦠꦱ꧀ꦱ ꦱꦫꦷꦫꦺ ꦫꦺꦴꦒꦺꦴ ꦈꦢꦥꦴꦢꦶ. ꦱꦴꦱꦥꦩꦠ꧀ꦠꦶꦪꦺꦴ ꦥꦶꦭ꦳ꦏꦴ ꦈꦛ꧀ꦜꦲꦶꦁꦱꦸ. ꦠꦴ ꦄꦤꦸꦥꦸꦧ꧀ꦧꦺꦤ ꦩꦸꦒ꧀ꦒꦩꦠ꧀ꦠꦴ ꦏꦭꦴꦪꦩꦠ꧀ꦠꦴ ꦏꦺꦴꦭꦛ꧀ꦜꦶꦩꦠ꧀ꦠꦴ ꦄꦴꦩꦭꦏꦩꦠ꧀ꦠꦴ ꦧꦺꦭ꦳ꦸꦮꦱꦭꦴꦛꦸꦩꦠ꧀ꦠꦴ ꦧꦺꦭ꦳ꦸꦮꦩꦠ꧀ꦠꦴ ꦲꦸꦠ꧀ꦮꦴ ꦥꦨꦶꦗ꧀ꦗꦶꦁꦱꦸ, ꦱꦏꦭꦱꦫꦷꦫꦁ ꦖꦶꦢ꧀ꦢꦴꦮꦖꦶꦢ꧀ꦢꦁ ꦄꦲꦺꦴꦱꦶ. ꦥꦹꦠꦶꦒꦠ꧀ꦠꦠꦶꦱ꧀ꦱꦠ꧀ꦡꦺꦫꦺꦴꦠ꧀ꦮꦺꦮꦱ꧀ꦱ ꦤꦴꦩꦁ ꦈꦢꦥꦴꦢꦶ. ꦄꦡꦱ꧀ꦱ ꦄꦥꦫꦨꦴꦒꦺ ꦄꦛ꧀ꦜꦷꦤꦶ ꦨꦶꦗ꧀ꦗꦶꦁꦱꦸ. ꦱꦺꦴ ꦄꦥ꧀ꦥꦛꦶꦗꦒ꧀ꦒꦶꦪꦺꦴ ꦄꦲꦺꦴꦱꦶ. ꦤꦶꦮꦴꦱꦤꦥꦴꦫꦸꦥꦤꦁ ꦥꦸꦧ꧀ꦧꦭꦺꦴꦲꦶꦠꦩꦏ꧀ꦑꦶꦠꦁ ꦗꦴꦭꦥꦹꦮꦱꦢꦶꦱꦁ ꦄꦲꦺꦴꦱꦶ. ꦱꦢ꧀ꦣꦶꦮꦶꦲꦴꦫꦶꦏꦴꦢꦪꦺꦴ ꦥꦛꦶꦗꦒ꧀ꦒꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦴ ꦖꦝ꧀ꦝꦪꦶꦁꦱꦸ. ꦱꦺꦴ ꦄꦤꦴꦡꦺꦴ ꦲꦸꦠ꧀ꦮꦴ ꦤꦶꦥꦗ꧀ꦗꦶ.

ꦧꦸꦢ꧀ꦣꦴꦤꦚ꧀ꦕ ꦤꦴꦩ ꦢ꧀ꦮꦺ ꦮꦴꦫꦺ ꦭꦺꦴꦏꦮꦺꦴꦭꦺꦴꦏꦤꦁ ꦄꦮꦶꦗꦲꦶꦠꦁ ꦲꦺꦴꦠꦶ. ꦥꦕ꧀ꦕꦹꦱꦏꦴꦭꦺ ꦭꦺꦴꦏꦁ ꦮꦺꦴꦭꦺꦴꦏꦺꦤ꧀ꦠꦴ ꦕꦏ꧀ꦏꦮꦴꦭ꦳ꦩꦸꦑꦮꦛ꧀ꦛꦶꦠꦺꦴ ꦥꦛ꧀ꦜꦴꦪ ꦒꦤ꧀ꦣꦏꦸꦛꦶꦄꦨꦶꦩꦸꦑꦁ ꦚꦴꦟꦁ ꦏꦠ꧀ꦮꦴ ꦎꦭꦺꦴꦏꦺꦤ꧀ꦠꦶ, ꦱꦴꦪꦁ ꦎꦭꦺꦴꦏꦺꦤ꧀ꦠꦴ ꦒꦤ꧀ꦣꦏꦸꦛꦶꦠꦺꦴ ꦥꦛ꧀ꦜꦴꦪ ꦧꦴꦲꦶꦫꦴꦨꦶꦩꦸꦑꦁ ꦚꦴꦟꦁ ꦏꦠ꧀ꦮꦴ ꦎꦭꦺꦴꦏꦺꦤ꧀ꦠꦶ. ꦠꦱ꧀ꦩꦶꦁ ꦥꦤ ꦱꦩꦪꦺ ꦨꦒꦮꦠꦺꦴ ꦚꦴꦟꦗꦴꦭꦱ꧀ꦱ ꦄꦤ꧀ꦠꦺꦴ ꦥꦹꦠꦶꦒꦠ꧀ꦠꦠꦶꦱ꧀ꦱꦠ꧀ꦡꦺꦫꦺꦴ ꦥꦚ꧀ꦚꦴꦪꦶ. ꦱꦠ꧀ꦡꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦄꦫꦲꦠ꧀ꦠꦱ꧀ꦱ ꦈꦥꦤꦶꦱ꧀ꦱꦪꦁ ꦢꦶꦱ꧀ꦮꦴ, ‘‘ꦄꦪꦁ ꦱꦢ꧀ꦣꦶꦮꦶꦲꦴꦫꦶꦏꦴꦢꦷꦲꦶ ꦖꦝ꧀ꦝꦶꦠꦺꦴ, ꦆꦢꦴꦤꦶꦱ꧀ꦱ ꦩꦁ ꦜꦥꦺꦠ꧀ꦮꦴ ꦄꦚ꧀ꦚꦁ ꦥꦛꦶꦱꦫꦟꦁ ꦤꦠ꧀ꦡꦷ’’ꦠꦶ ꦒꦤ꧀ꦣꦏꦸꦛꦶꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦮꦶꦲꦴꦫꦕꦴꦫꦶꦏꦁ ꦕꦫꦩꦴꦤꦺꦴ ꦮꦶꦪ ꦄꦒ꧀ꦒꦶꦱꦴꦭꦁ ꦒꦤ꧀ꦠ꧀ꦮꦴ ꦈꦏ꧀ꦑꦭꦶꦁ ꦣꦺꦴꦮꦶꦠ꧀ꦮꦴ ꦈꦢꦏꦁ ꦢꦠ꧀ꦮꦴ ꦈꦢ꧀ꦣꦤꦁ ꦄꦴꦫꦺꦴꦥꦺꦠ꧀ꦮꦴ ꦈꦢꦏꦱ꧀ꦱ ꦠꦠ꧀ꦠꦨꦴꦮꦁ ꦄꦴꦒꦩꦪꦩꦴꦤꦺꦴ ꦄꦒ꧀ꦒꦶꦱꦴꦭꦴꦪꦩꦺꦮ ꦄꦛ꧀ꦜꦴꦱꦶ. ꦠꦠ꧀ꦠꦨꦴꦮꦁ ꦗꦴꦤꦶꦠ꧀ꦮꦴ ꦒꦤ꧀ꦠ꧀ꦮꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦤꦶꦥꦤ꧀ꦤꦩꦚ꧀ꦕꦏꦺꦴꦛꦶꦪꦁ ꦒꦟ꧀ꦲꦶ, ꦠꦢꦴ ꦨꦶꦏ꧀ꦑꦹ ‘‘ꦄꦥꦺꦡ, ꦨꦤ꧀ꦠꦺ, ꦩꦪꦁ ꦒꦟ꧀ꦲꦶꦱ꧀ꦱꦴꦩꦴ’’ꦠꦶ ꦩꦚ꧀ꦕꦏꦁ ꦒꦲꦺꦠ꧀ꦮꦴ ꦄꦒ꧀ꦒꦶꦱꦴꦭꦁ ꦄꦴꦤꦪꦶꦁꦱꦸ. ꦱꦠ꧀ꦡꦴ ꦄꦩ꧀ꦧꦟꦁ ꦄꦴꦲꦫꦴꦥꦺꦠ꧀ꦮꦴ ꦈꦟ꧀ꦲꦺꦴꦢꦏꦁ ꦄꦴꦱꦶꦚ꧀ꦕꦶꦠ꧀ꦮꦴ ꦠꦺꦲꦶ ꦨꦶꦏ꧀ꦑꦹꦲꦶ ꦠꦱ꧀ꦱ ꦥꦴꦫꦸꦥꦤꦁ ꦒꦴꦲꦴꦥꦺꦠ꧀ꦮꦴ ꦈꦟ꧀ꦲꦺꦴꦢꦏꦺ ꦩꦢ꧀ꦢꦴꦥꦺꦠ꧀ꦮꦴ ꦩꦤ꧀ꦢꦴꦠꦥꦺ ꦮꦶꦱ꧀ꦱꦗ꧀ꦗꦴꦥꦺꦱꦶ. ꦄꦡꦱ꧀ꦱ ꦱꦤ꧀ꦠꦶꦏꦺ ꦜꦠ꧀ꦮꦴ ꦱꦫꦷꦫꦁ ꦈꦟ꧀ꦲꦺꦴꦢꦏꦺꦤ ꦠꦺꦩꦺꦠ꧀ꦮꦴ ꦓꦁꦱꦶꦠ꧀ꦮꦴ ꦤ꧀ꦲꦴꦥꦺꦱꦶ, ꦠꦱ꧀ꦱ ꦤꦲꦴꦤꦥꦫꦶꦪꦺꦴꦱꦴꦤꦺ ꦥꦴꦫꦸꦥꦤꦁ ꦱꦸꦏ꧀ꦑꦶ. ꦄꦡ ꦤꦁ ꦠꦁ ꦤꦶꦮꦴꦱꦴꦥꦺꦠ꧀ꦮꦴ ꦤꦶꦮꦠ꧀ꦡꦏꦴꦱꦴꦮꦁ ꦈꦢꦏꦺ ꦩꦢ꧀ꦢꦴꦥꦺꦠ꧀ꦮꦴ ꦄꦴꦠꦥꦺ ꦮꦶꦱ꧀ꦱꦗ꧀ꦗꦴꦥꦺꦱꦶ. ꦄꦡꦱ꧀ꦱ ꦒꦠ꧀ꦠꦺ ꦈꦢꦏꦺ ꦖꦶꦤ꧀ꦤꦩꦠ꧀ꦠꦺ ꦠꦩ꧀ꦥꦶ ꦱꦸꦏ꧀ꦑꦶ. ꦱꦺꦴ ꦌꦏꦁ ꦏꦴꦱꦴꦮꦁ ꦤꦶꦮꦴꦱꦺꦠ꧀ꦮꦴ ꦌꦏꦁ ꦥꦴꦫꦸꦥꦶꦠ꧀ꦮꦴ ꦱꦭ꧀ꦭꦲꦸꦏꦱꦫꦷꦫꦺꦴ ꦌꦏꦒ꧀ꦒꦕꦶꦠ꧀ꦠꦺꦴ ꦩꦚ꧀ꦕꦏꦺ ꦤꦶꦥꦗ꧀ꦗꦶ. ꦱꦠ꧀ꦡꦴ ꦠꦱ꧀ꦱ ꦈꦱ꧀ꦱꦷꦱꦏꦺ ꦜꦠ꧀ꦮꦴ, ‘‘ꦨꦶꦏ꧀ꦑꦸ ꦄꦪꦁ ꦠꦮ ꦏꦴꦪꦺꦴ ꦄꦥꦺꦠꦮꦶꦚ꧀ꦚꦴꦟꦺꦴ ꦤꦶꦫꦸꦥꦏꦴꦫꦺꦴ ꦲꦸꦠ꧀ꦮꦴ ꦏꦭꦶꦔ꧀ꦒꦫꦁ ꦮꦶꦪ ꦥꦡꦮꦶꦪꦁ ꦱꦺꦱ꧀ꦱꦠꦷ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧔꧑. ‘‘ꦄꦕꦶꦫꦁ ꦮꦠꦪꦁ ꦏꦴꦪꦺꦴ, ꦥꦡꦮꦶꦁ ꦄꦣꦶꦱꦺꦱ꧀ꦱꦠꦶ;

ꦖꦸꦢ꧀ꦣꦺꦴ ꦄꦥꦺꦠꦮꦶꦚ꧀ꦚꦴꦟꦺꦴ, ꦤꦶꦫꦠ꧀ꦡꦁꦮ ꦏꦭꦶꦔ꧀ꦒꦫ’’ꦤ꧀ꦠꦶ.

ꦠꦠ꧀ꦡ ꦄꦕꦶꦫꦁ ꦮꦠꦴꦠꦶ ꦨꦶꦏ꧀ꦑꦸ ꦤ ꦕꦶꦫꦱ꧀ꦱꦺꦮ ꦄꦪꦁ ꦏꦴꦪꦺꦴ ꦥꦡꦮꦶꦁ ꦄꦣꦶꦱꦺꦱ꧀ꦱꦠꦶ, ꦆꦩꦶꦱ꧀ꦱꦴ ꦥꦏꦠꦶꦱꦪꦤꦺꦤ ꦱꦪꦶꦠꦴꦪ ꦥꦡꦮꦶꦪꦴ ꦈꦥꦫꦶ ꦱꦪꦶꦱ꧀ꦱꦠꦶ. ꦖꦸꦢ꧀ꦣꦺꦴꦠꦶ ꦄꦥꦮꦶꦢ꧀ꦣꦺꦴ, ꦄꦥꦒꦠꦮꦶꦚ꧀ꦚꦴꦟꦠꦴꦪ ꦠꦸꦕ꧀ꦖꦺꦴ ꦲꦸꦠ꧀ꦮꦴ ꦱꦺꦱ꧀ꦱꦠꦷꦠꦶ ꦢꦱ꧀ꦱꦺꦠꦶ. ꦪꦡꦴ ꦏꦶꦁ? ꦤꦶꦫꦠ꧀ꦡꦁꦮ ꦏꦭꦶꦔ꧀ꦒꦫꦁ ꦤꦶꦫꦸꦥꦏꦴꦫꦁ ꦤꦶꦫꦠ꧀ꦡꦏꦁ ꦏꦛ꧀ꦜꦑꦟ꧀ꦝꦁ ꦮꦶꦪ. ꦢꦧ꧀ꦧꦱꦩ꧀ꦨꦴꦫꦠ꧀ꦡꦶꦏꦴ ꦲꦶ ꦩꦤꦸꦱ꧀ꦱꦴ ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ ꦈꦗꦸꦏꦁ ꦈꦗꦸꦏꦱꦟ꧀ꦜꦴꦤꦺꦤ ꦮꦔ꧀ꦏꦁ ꦮꦔ꧀ꦏꦱꦟ꧀ꦜꦴꦤꦺꦤ ꦖꦶꦤ꧀ꦢꦶꦠ꧀ꦮꦴ ꦢꦧ꧀ꦧꦱꦩ꧀ꦨꦴꦫꦁ ꦒꦟ꧀ꦲꦤ꧀ꦠꦶ, ꦄꦮꦱꦺꦱꦁ ꦥꦤ ꦱꦸꦱꦶꦫꦚ꧀ꦕ ꦥꦹꦠꦶꦏꦚ꧀ꦕ ꦄꦱꦴꦫꦏꦚ꧀ꦕ ꦒꦟ꧀ꦜꦶꦗꦴꦠꦚ꧀ꦕ ꦖꦶꦤ꧀ꦢꦶꦠ꧀ꦮꦴ ꦠꦠ꧀ꦡꦺꦮ ꦖꦝ꧀ꦝꦺꦤ꧀ꦠꦶ. ꦄꦚ꧀ꦚꦺ ꦢꦧ꧀ꦧꦱꦩ꧀ꦨꦴꦫꦠ꧀ꦡꦶꦏꦴ ꦄꦴꦒꦤ꧀ꦠ꧀ꦮꦴ ꦠꦁ ꦒꦲꦺꦠꦴꦫꦺꦴ ꦤꦴꦩ ꦤꦠ꧀ꦡꦶ, ꦎꦭꦺꦴꦏꦺꦠ꧀ꦮꦴ ꦄꦠ꧀ꦠꦤꦺꦴ ꦈꦥꦏꦴꦫꦏꦩꦺꦮ ꦒꦟ꧀ꦲꦤ꧀ꦠꦶ, ꦆꦠꦫꦁ ꦥꦡꦮꦷꦒꦠꦩꦺꦮ ꦲꦺꦴꦠꦶ. ꦠꦁ ꦥꦤ ꦠꦺꦤ ꦠꦺꦤ ꦈꦥꦴꦪꦺꦤ ꦩꦚ꧀ꦕꦥꦛꦶꦥꦴꦢꦏꦁ ꦮꦴ ꦥꦴꦢꦏꦡꦭꦶꦏꦁ ꦮꦴ ꦦꦭꦏꦥꦷꦜꦁ ꦮꦴ ꦏꦴꦠꦸꦁ ꦱꦏ꧀ꦏꦴꦥꦶ ꦨꦮꦺꦪ꧀ꦪ. ꦆꦩꦱ꧀ꦩꦶꦁ ꦥꦤ ꦄꦠ꧀ꦠꦨꦴꦮꦺ ꦢ꧀ꦮꦠ꧀ꦠꦶꦁꦱꦴꦪ ꦏꦺꦴꦛ꧀ꦜꦴꦱꦺꦱꦸ ꦌꦏꦏꦺꦴꦛ꧀ꦜꦴꦱꦺꦴꦥꦶ ꦩꦚ꧀ꦕꦥꦛꦶꦥꦴꦢꦏꦴꦢꦶꦮꦱꦺꦤ ꦄꦚ꧀ꦚꦺꦤ ꦮꦴ ꦈꦥꦏꦴꦫꦩꦸꦑꦺꦤ ꦒꦪ꧀ꦲꦹꦥꦒꦺꦴ ꦤꦴꦩ ꦤꦠ꧀ꦡꦶ, ꦏꦺꦮꦭꦁ ꦤꦶꦫꦠ꧀ꦡꦁꦮ ꦏꦭꦶꦔ꧀ꦒꦫꦁ ꦄꦪꦁ ꦏꦴꦪꦺꦴ ꦄꦥꦒꦠꦮꦶꦚ꧀ꦚꦴꦟꦺꦴ ꦏꦠꦶꦥꦴꦲꦺꦤꦺꦮ ꦥꦡꦮꦶꦪꦁ ꦱꦺꦱ꧀ꦱꦠꦷꦠꦶ.

ꦢꦺꦱꦤꦴꦮꦱꦴꦤꦺ ꦥꦹꦠꦶꦒꦠ꧀ꦠꦠꦶꦱ꧀ꦱꦠ꧀ꦡꦺꦫꦺꦴ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦶ, ꦄꦚ꧀ꦚꦺꦥꦶ ꦧꦲꦹ ꦱꦺꦴꦠꦴꦥꦤ꧀ꦤꦴꦢꦪꦺꦴ ꦄꦲꦺꦱꦸꦁ. ꦡꦺꦫꦺꦴꦥꦶ ꦄꦫꦲꦠ꧀ꦠꦁ ꦥꦠ꧀ꦮꦴꦮ ꦥꦫꦶꦤꦶꦧ꧀ꦧꦴꦪꦶ. ꦱꦠ꧀ꦡꦴ ꦠꦱ꧀ꦱ ꦱꦫꦷꦫꦏꦶꦕ꧀ꦕꦁ ꦏꦴꦫꦴꦥꦺꦠ꧀ꦮꦴ ꦣꦴꦠꦸꦪꦺꦴ ꦒꦲꦺꦠ꧀ꦮꦴ ꦕꦺꦠꦶꦪꦁ ꦏꦴꦫꦴꦥꦺꦱꦶ. ꦨꦶꦏ꧀ꦑꦹ ꦱꦠ꧀ꦡꦴꦫꦁ ꦥꦸꦕ꧀ꦖꦶꦁꦱꦸ – ‘‘ꦨꦤ꧀ꦠꦺ, ꦥꦹꦠꦶꦒꦠ꧀ꦠꦠꦶꦱ꧀ꦱꦠ꧀ꦡꦺꦫꦺꦴ ꦏꦸꦲꦶꦁ ꦤꦶꦧ꧀ꦧꦠ꧀ꦠꦺꦴ’’ꦠꦶ. ‘‘ꦥꦫꦶꦤꦶꦧ꧀ꦧꦸꦠꦺꦴ, ꦨꦶꦏ꧀ꦑꦮꦺ’’ꦠꦶ. ‘‘ꦨꦤ꧀ꦠꦺ, ꦌꦮꦫꦹꦥꦱ꧀ꦱ ꦥꦤ ꦄꦫꦲꦠ꧀ꦠꦹꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦱ꧀ꦱ ꦨꦶꦏ꧀ꦑꦸꦤꦺꦴ ꦏꦶꦁ ꦏꦴꦫꦟꦴ ꦒꦠ꧀ꦠꦁ ꦥꦸꦠꦶꦏꦁ ꦗꦴꦠꦁ, ꦏꦶꦁ ꦏꦴꦫꦟꦴ ꦄꦛ꧀ꦜꦷꦤꦶ ꦨꦶꦤ꧀ꦤꦴꦤꦶ, ꦏꦶꦩꦱ꧀ꦱ ꦏꦴꦫꦟꦁ ꦄꦫꦲꦠ꧀ꦠꦱ꧀ꦱ ꦈꦥꦤꦶꦱ꧀ꦱꦪꦨꦴꦮꦁ ꦥꦠ꧀ꦠ’’ꦤ꧀ꦠꦶ? ‘‘ꦨꦶꦏ꧀ꦑꦮꦺ, ꦱꦧ꧀ꦧꦩꦺꦠꦁ ꦌꦠꦱ꧀ꦱ ꦄꦠ꧀ꦠꦤꦴ ꦏꦠꦏꦩ꧀ꦩꦺꦤꦺꦮ ꦤꦶꦧ꧀ꦧꦠ꧀ꦠ’’ꦤ꧀ꦠꦶ. ‘‘ꦏꦶꦁ ꦥꦤ ꦠꦺꦤ, ꦨꦤ꧀ꦠꦺ, ꦏꦠ’’ꦤ꧀ꦠꦶ? ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦱꦸꦟꦴꦡꦴ’’ꦠꦶ ꦄꦠꦷꦠꦁ ꦄꦴꦲꦫꦶ –

ꦄꦪꦁ ꦏꦱ꧀ꦱꦥꦱꦩ꧀ꦩꦴꦱꦩ꧀ꦧꦸꦢ꧀ꦣꦏꦴꦭꦺ ꦱꦴꦏꦸꦟꦶꦏꦺꦴ ꦲꦸꦠ꧀ꦮꦴ ꦧꦲꦹ ꦱꦏꦸꦟꦺ ꦮꦣꦶꦠ꧀ꦮꦴ ꦆꦱ꧀ꦱꦫꦗꦤꦁ ꦈꦥꦛ꧀ꦜꦲꦶ. ꦠꦺꦱꦁ ꦢꦶꦤ꧀ꦤꦴꦮꦱꦺꦱꦺ ꦮꦶꦏ꧀ꦏꦶꦟꦴꦠꦶ, ‘‘ꦮꦶꦏ꧀ꦏꦶꦠꦴꦮꦱꦺꦱꦴ ꦩꦴꦫꦺꦠ꧀ꦮꦴ ꦜꦥꦶꦠꦴ ꦥꦹꦠꦶꦏꦴ ꦨꦮꦶꦱ꧀ꦱꦤ꧀ꦠꦷ’’ꦠꦶ ꦪꦡꦴ ꦈꦥ꧀ꦥꦠꦶꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ, ꦠꦡꦴ ꦠꦺꦱꦁ ꦗꦔ꧀ꦓꦛ꧀ꦜꦷꦤꦶ ꦕ ꦥꦏ꧀ꦑꦛ꧀ꦜꦷꦤꦶ ꦕ ꦨꦶꦤ꧀ꦢꦶꦠ꧀ꦮꦴ ꦫꦴꦱꦶꦁ ꦏꦠ꧀ꦮꦴ ꦜꦥꦺꦠꦶ, ꦠꦺ ꦥꦸꦤꦢꦶꦮꦱꦺ ꦮꦶꦏ꧀ꦏꦶꦟꦴꦠꦶ. ꦄꦠꦶꦧꦲꦹꦤꦁ ꦥꦤ ꦭꦢ꧀ꦣꦏꦴꦭꦺ ꦄꦠ꧀ꦠꦤꦺꦴꦥꦶ ꦄꦠ꧀ꦡꦴꦪ ꦥꦕꦴꦥꦺꦠꦶ. ꦠꦱ꧀ꦱꦺꦏꦢꦶꦮꦱꦁ ꦫꦱꦨꦺꦴꦗꦤꦺ ꦥꦏ꧀ꦏꦺ ꦌꦏꦺꦴ ꦑꦷꦟꦴꦱꦮꦺꦴ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦒꦺꦲꦢ꧀ꦮꦴꦫꦺ ꦄꦛ꧀ꦜꦴꦱꦶ. ꦱꦺꦴ ꦡꦺꦫꦁ ꦢꦶꦱ꧀ꦮꦴ ꦕꦶꦠ꧀ꦠꦁ ꦥꦱꦴꦢꦺꦠ꧀ꦮꦴ, ‘‘ꦩꦪꦴ ꦧꦲꦹ ꦥꦴꦟꦴ ꦩꦴꦫꦺꦠ꧀ꦮꦴ ꦑꦴꦢꦶꦠꦴ, ꦄꦪ꧀ꦪꦺꦴ ꦕ ꦩꦺ ꦒꦺꦲꦢ꧀ꦮꦴꦫꦺ ꦜꦶꦠꦺꦴ, ꦄꦤ꧀ꦠꦺꦴꦒꦺꦲꦺ ꦕ ꦫꦱꦨꦺꦴꦗꦤꦁ ꦱꦁꦮꦶꦗ꧀ꦗꦠꦶ, ꦥꦶꦟ꧀ꦝꦥꦴꦠꦩꦱ꧀ꦱ ꦢꦱ꧀ꦱꦴꦩꦷ’’ꦠꦶ ꦠꦱ꧀ꦱ ꦥꦠ꧀ꦠꦁ ꦄꦴꦢꦴꦪ ꦥꦹꦫꦺꦠ꧀ꦮꦴ ꦫꦱꦥꦶꦟ꧀ꦝꦥꦴꦠꦁ ꦢꦠ꧀ꦮꦴ ꦡꦺꦫꦁ ꦥꦚ꧀ꦕꦥꦠꦶꦛ꧀ꦜꦶꦠꦺꦤ ꦮꦤ꧀ꦢꦶꦠ꧀ꦮꦴ, ‘‘ꦨꦤ꧀ꦠꦺ, ꦠꦸꦩ꧀ꦲꦺꦲꦶ ꦢꦶꦛ꧀ꦜꦣꦩ꧀ꦩꦱ꧀ꦱ ꦩꦠ꧀ꦡꦏꦁ ꦥꦴꦥꦸꦟꦺꦪ꧀ꦪ’’ꦤ꧀ꦠꦶ ꦄꦴꦲ. ꦡꦺꦫꦺꦴ ‘‘ꦌꦮꦁ ꦲꦺꦴꦠꦹ’’ꦠꦶ ꦄꦤꦸꦩꦺꦴꦢꦤꦁ ꦄꦏꦴꦱꦶ. ‘‘ꦨꦶꦏ꧀ꦑꦮꦺ, ꦠꦢꦴ ꦏꦠꦏꦩ꧀ꦩꦮꦱꦺꦤꦺꦠꦁ ꦠꦶꦱ꧀ꦱꦱ꧀ꦱ ꦤꦶꦥ꧀ꦦꦤ꧀ꦤꦁ, ꦱꦏꦸꦟꦴꦤꦁ ꦄꦛ꧀ꦜꦶꦨꦺꦢꦤꦤꦶꦱ꧀ꦱꦤ꧀ꦢꦺꦤ ꦠꦶꦱ꧀ꦱꦱ꧀ꦱ ꦒꦠ꧀ꦠꦚ꧀ꦕ ꦥꦹꦠꦶꦏꦁ ꦗꦴꦠꦁ, ꦄꦛ꧀ꦜꦷꦤꦶ ꦕ ꦨꦶꦤ꧀ꦤꦴꦤꦶ, ꦑꦷꦟꦴꦱꦮꦱ꧀ꦱ ꦫꦱꦥꦶꦟ꧀ꦝꦥꦴꦠꦢꦴꦤꦤꦶꦱ꧀ꦱꦤ꧀ꦢꦺꦤ ꦄꦫꦲꦠ꧀ꦠꦁ ꦥꦠ꧀ꦠꦺꦴ’’ꦠꦶ.

ꦥꦹꦠꦶꦒꦠ꧀ꦠꦠꦶꦱ꧀ꦱꦠ꧀ꦡꦺꦫꦮꦠ꧀ꦡꦸ ꦱꦠ꧀ꦠꦩꦁ.

꧘. ꦤꦤ꧀ꦢꦒꦺꦴꦥꦴꦭꦏꦮꦠ꧀ꦡꦸ

ꦢꦶꦱꦺꦴ ꦢꦶꦱꦤ꧀ꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦏꦺꦴꦱꦭꦗꦤꦥꦢꦺ ꦤꦤ꧀ꦢꦒꦺꦴꦥꦴꦭꦏꦁ ꦄꦴꦫꦧ꧀ꦨ ꦏꦡꦺꦱꦶ.

ꦱꦴꦮꦠ꧀ꦡꦶꦪꦁ ꦏꦶꦫ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦒꦲꦥꦠꦶꦤꦺꦴ ꦤꦤ꧀ꦢꦺꦴ ꦤꦴꦩ ꦒꦺꦴꦥꦴꦭꦏꦺꦴ ꦒꦺꦴꦪꦹꦡꦁ ꦫꦏ꧀ꦑꦠꦶ ꦄꦝ꧀ꦞꦺꦴ ꦩꦲꦢ꧀ꦣꦤꦺꦴ ꦩꦲꦴꦨꦺꦴꦒꦺꦴ. ꦱꦺꦴ ꦏꦶꦫ ꦪꦡꦴ ꦏꦺꦟꦶꦪꦺꦴ ꦗꦛꦶꦭꦺꦴ ꦥꦧ꧀ꦧꦗ꧀ꦗꦴꦮꦺꦱꦺꦤ, ꦌꦮꦁ ꦒꦺꦴꦥꦴꦭꦏꦠ꧀ꦠꦺꦤ ꦫꦴꦗꦧꦭꦶꦁ ꦥꦫꦶꦲꦫꦤ꧀ꦠꦺꦴ ꦄꦠ꧀ꦠꦤꦺꦴ ꦏꦸꦛꦸꦩ꧀ꦧꦁ ꦫꦏ꧀ꦑꦠꦶ. ꦱꦺꦴ ꦏꦴꦭꦺꦤ ꦏꦴꦭꦁ ꦥꦚ꧀ꦕ ꦒꦺꦴꦫꦱꦺ ꦄꦴꦢꦴꦪ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦱꦤ꧀ꦠꦶꦏꦁ ꦄꦴꦒꦤ꧀ꦠ꧀ꦮꦴ ꦱꦠ꧀ꦡꦴꦫꦁ ꦥꦱ꧀ꦱꦠꦶ, ꦣꦩ꧀ꦩꦁ ꦱꦸꦟꦴꦠꦶ, ꦄꦠ꧀ꦠꦤꦺꦴ ꦮꦱꦤꦛ꧀ꦜꦴꦤꦁ ꦄꦴꦒꦩꦤꦠ꧀ꦡꦴꦪ ꦱꦠ꧀ꦡꦴꦫꦁ ꦪꦴꦕꦠꦶ. ꦱꦠ꧀ꦡꦴ ꦠꦱ꧀ꦱ ꦚꦴꦟꦥꦫꦶꦥꦴꦏꦁ ꦄꦴꦒꦩꦪꦩꦴꦤꦺꦴ ꦄꦴꦒꦤ꧀ꦠ꧀ꦮꦴ ꦥꦫꦶꦥꦏ꧀ꦏꦨꦴꦮꦁ ꦚꦠ꧀ꦮꦴ ꦌꦏꦢꦶꦮꦱꦁ ꦩꦲꦴꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ ꦕꦴꦫꦶꦏꦁ ꦕꦫꦤ꧀ꦠꦺꦴ ꦩꦒ꧀ꦒꦴ ꦎꦏ꧀ꦏꦩ꧀ꦩ ꦠꦱ꧀ꦱ ꦮꦱꦤꦛ꧀ꦜꦴꦤꦴꦱꦤ꧀ꦤꦺ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦤꦶꦱꦷꦢꦶ. ꦤꦤ꧀ꦢꦺꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦄꦒꦤ꧀ꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦥꦛꦶꦱꦤ꧀ꦡꦴꦫꦁ ꦏꦠ꧀ꦮꦴ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦠ꧀ꦮꦴ ꦱꦠ꧀ꦡꦴꦲꦁ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦥꦟꦷꦠꦁ ꦥꦚ꧀ꦕꦒꦺꦴꦫꦱꦢꦴꦤꦁ ꦄꦢꦴꦱꦶ. ꦱꦠ꧀ꦠꦩꦺ ꦢꦶꦮꦱꦺ ꦱꦠ꧀ꦡꦴ ꦄꦤꦸꦩꦺꦴꦢꦤꦁ ꦏꦠ꧀ꦮꦴ ꦢꦴꦤꦏꦡꦴꦢꦶꦨꦺꦢꦁ ꦄꦤꦸꦥꦸꦧ꧀ꦧꦶꦁ ꦏꦡꦁ ꦏꦡꦺꦱꦶ. ꦏꦡꦴꦥꦫꦶꦪꦺꦴꦱꦴꦤꦺ ꦤꦤ꧀ꦢꦒꦺꦴꦥꦴꦭꦏꦺꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦪ ꦱꦠ꧀ꦡꦸ ꦥꦠ꧀ꦠꦁ ꦒꦲꦺꦠ꧀ꦮꦴ ꦱꦠ꧀ꦡꦴꦫꦁ ꦄꦤꦸꦒꦕ꧀ꦖꦤ꧀ꦠꦺꦴ ꦢꦹꦫꦁ ꦒꦤ꧀ꦠ꧀ꦮꦴ, ‘‘ꦠꦶꦛ꧀ꦜ, ꦈꦥꦴꦱꦏꦴ’’ꦠꦶ ꦤꦶꦮꦠ꧀ꦠꦶꦪꦩꦴꦤꦺꦴ ꦮꦤ꧀ꦢꦶꦠ꧀ꦮꦴ ꦤꦶꦮꦠ꧀ꦠꦶ. ꦄꦡ ꦤꦁ ꦌꦏꦺꦴ ꦭꦸꦢ꧀ꦢꦏꦺꦴ ꦮꦶꦗ꧀ꦙꦶꦠ꧀ꦮꦴ ꦩꦴꦫꦺꦱꦶ. ꦥꦕ꧀ꦖꦠꦺꦴ ꦄꦴꦒꦕ꧀ꦖꦤ꧀ꦠꦴ ꦨꦶꦏ꧀ꦑꦹ ꦤꦁ ꦢꦶꦱ꧀ꦮꦴ ꦒꦤ꧀ꦠ꧀ꦮꦴ ꦱꦠ꧀ꦡꦴꦫꦁ ꦄꦴꦲꦁꦱꦸ – ‘‘ꦤꦤ꧀ꦢꦺꦴ, ꦨꦤ꧀ꦠꦺ, ꦒꦺꦴꦥꦴꦭꦏꦺꦴ ꦠꦸꦩ꧀ꦲꦴꦏꦁ ꦆꦣꦴꦒꦠꦠ꧀ꦠꦴ ꦩꦲꦴꦢꦴꦤꦁ ꦢꦠ꧀ꦮꦴ ꦄꦤꦸꦒꦤ꧀ꦠ꧀ꦮꦴ ꦤꦶꦮꦠ꧀ꦠꦺꦤ꧀ꦠꦺꦴ ꦩꦴꦫꦶꦠꦺꦴ, ꦱꦕꦺ ꦠꦸꦩ꧀ꦲꦺ ꦤꦴꦒꦕ꧀ꦖꦶꦱ꧀ꦱꦡ, ꦤꦴꦱ꧀ꦱ ꦩꦫꦟꦁ ꦄꦨꦮꦶꦱ꧀ꦱꦴ’’ꦠꦶ. ꦱꦠ꧀ꦡꦴ, ‘‘ꦨꦶꦏ꧀ꦑꦮꦺ, ꦩꦪꦶ ꦄꦴꦒꦠꦺꦥꦶ ꦄꦤꦴꦒꦠꦺꦥꦶ ꦠꦱ꧀ꦱ ꦕꦠꦱ꧀ꦱꦺꦴ ꦢꦶꦱꦴ ꦕꦠꦱ꧀ꦱꦺꦴ ꦄꦤꦸꦢꦶꦱꦴ ꦕ ꦒꦕ꧀ꦖꦤ꧀ꦠꦱ꧀ꦱꦴꦥꦶ ꦩꦫꦟꦠꦺꦴ ꦩꦸꦕ꧀ꦕꦤꦹꦥꦴꦪꦺꦴ ꦤꦴꦩ ꦤꦠ꧀ꦡꦶ. ꦪꦚ꧀ꦲꦶ ꦤꦺꦮ ꦕꦺꦴꦫꦴ, ꦤ ꦮꦺꦫꦶꦤꦺꦴ ꦏꦫꦺꦴꦤ꧀ꦠꦶ, ꦠꦁ ꦆꦩꦺꦱꦁ ꦱꦠ꧀ꦠꦴꦤꦁ ꦄꦤ꧀ꦠꦺꦴꦥꦢꦸꦛ꧀ꦜꦁ ꦩꦶꦕ꧀ꦖꦴꦥꦟꦶꦲꦶꦠꦁ ꦕꦶꦠ꧀ꦠꦩꦺꦮ ꦏꦫꦺꦴꦠꦷ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧔꧒. ‘‘ꦢꦶꦱꦺꦴ ꦢꦶꦱꦁ ꦪꦁ ꦠꦁ ꦏꦪꦶꦫꦴ, ꦮꦺꦫꦷ ꦮꦴ ꦥꦤ ꦮꦺꦫꦶꦤꦁ;

ꦩꦶꦕ꧀ꦖꦴꦥꦟꦶꦲꦶꦠꦁ ꦕꦶꦠ꧀ꦠꦁ, ꦥꦴꦥꦶꦪꦺꦴ ꦤꦁ ꦠꦠꦺꦴ ꦏꦫꦺ’’ꦠꦶ.

ꦠꦠ꧀ꦡ ꦢꦶꦱꦺꦴ ꦢꦶꦱꦤ꧀ꦠꦶ ꦕꦺꦴꦫꦺꦴ ꦕꦺꦴꦫꦁ. ‘‘ꦢꦶꦱ꧀ꦮꦴ’’ꦠꦶ ꦥꦴꦜꦱꦺꦱꦺꦴ. ꦪꦁ ꦠꦁ ꦏꦪꦶꦫꦴꦠꦶ ꦪꦁ ꦠꦁ ꦠꦱ꧀ꦱ ꦄꦤꦪꦧ꧀ꦪꦱꦤꦁ ꦏꦫꦺꦪ꧀ꦪ. ꦢꦸꦠꦶꦪꦥꦢꦺꦥꦶ ꦌꦱꦺꦮ ꦤꦪꦺꦴ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦌꦏꦺꦴ ꦌꦏꦱ꧀ꦱ ꦩꦶꦠ꧀ꦠꦢꦸꦧ꧀ꦨꦷ ꦕꦺꦴꦫꦺꦴ ꦥꦸꦠ꧀ꦠꦢꦴꦫꦑꦺꦠ꧀ꦠꦮꦠ꧀ꦡꦸ ꦒꦺꦴꦩꦲꦶꦁꦱꦴꦢꦷꦱꦸ ꦄꦥꦫꦗ꧀ꦙꦤ꧀ꦠꦺꦴ ꦪꦱ꧀ꦱ ꦄꦥꦫꦗ꧀ꦙꦠꦶ, ꦠꦩ꧀ꦥꦶ ꦠꦡꦺꦮ ꦄꦠ꧀ꦠꦤꦶ ꦄꦥꦫꦗ꧀ꦙꦤ꧀ꦠꦁ ꦕꦺꦴꦫꦁ ꦢꦶꦱ꧀ꦮꦴ, ꦮꦺꦫꦶ ꦮꦴ ꦥꦤ ꦏꦺꦤꦕꦶꦢꦺꦮ ꦏꦴꦫꦟꦺꦤ ꦧꦢ꧀ꦣꦮꦺꦫꦁ ꦮꦺꦫꦶꦁ ꦢꦶꦱ꧀ꦮꦴ ꦄꦠ꧀ꦠꦤꦺꦴ ꦏꦏ꧀ꦑꦭ꦳ꦠꦴꦪ ꦢꦴꦫꦸꦟꦠꦴꦪ ꦪꦁ ꦠꦁ ꦠꦱ꧀ꦱ ꦄꦤꦪꦧ꧀ꦪꦱꦤꦁ ꦏꦫꦺꦪ꧀ꦪ, ꦥꦸꦠ꧀ꦠꦢꦴꦫꦁ ꦮꦴ ꦥꦷꦭ꦳ꦺꦪ꧀ꦪ, ꦑꦺꦠ꧀ꦠꦴꦢꦷꦤꦶ ꦮꦴ ꦤꦴꦱꦺꦪ꧀ꦪ, ꦗꦷꦮꦶꦠꦴ ꦮꦴ ꦥꦤ ꦤꦁ ꦮꦺꦴꦫꦺꦴꦥꦺꦪ꧀ꦪ, ꦢꦱꦱꦸ ꦄꦏꦸꦱꦭꦏꦩ꧀ꦩꦥꦡꦺꦱꦸ ꦩꦶꦕ꧀ꦖꦴꦜꦥꦶꦠꦠ꧀ꦠꦴ ꦩꦶꦕ꧀ꦖꦴꦥꦲꦶꦟꦶꦠꦁ ꦕꦶꦠ꧀ꦠꦁ ꦥꦴꦥꦶꦪꦺꦴ ꦤꦁ ꦠꦠꦺꦴ ꦏꦫꦺ ꦠꦁ ꦥꦸꦫꦶꦱꦁ ꦠꦠꦺꦴ ꦥꦴꦥꦠꦫꦁ ꦏꦫꦺꦪ꧀ꦪ. ꦮꦸꦠ꧀ꦠꦥ꧀ꦥꦏꦴꦫꦺꦲꦶ, ꦢꦶꦱꦺꦴ ꦢꦶꦱꦱ꧀ꦱ ꦮꦴ ꦮꦺꦫꦷ ꦮꦺꦫꦶꦤꦺꦴ ꦮꦴ ꦆꦩꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ ꦢꦸꦏ꧀ꦑꦁ ꦮꦴ ꦈꦥ꧀ꦥꦴꦢꦺꦪ꧀ꦪ, ꦗꦷꦮꦶꦠꦏ꧀ꦑꦪꦁ ꦮꦴ ꦏꦫꦺꦪ꧀ꦪ. ꦆꦢꦁ ꦥꦤ ꦄꦏꦸꦱꦭꦏꦩ꧀ꦩꦥꦡꦺꦱꦸ ꦩꦶꦕ꧀ꦖꦴꦜꦥꦶꦠꦁ ꦕꦶꦠ꧀ꦠꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦄꦤꦪꦧ꧀ꦪꦱꦤꦁ ꦥꦴꦥꦺꦠꦶ, ꦄꦠ꧀ꦠꦨꦴꦮꦱꦠꦱꦲꦱ꧀ꦱꦺꦱꦸꦥꦶ ꦕꦠꦹꦱꦸ ꦄꦥꦴꦪꦺꦱꦸ ꦑꦶꦥꦶꦠ꧀ꦮꦴ ꦱꦷꦱꦁ ꦈꦏ꧀ꦑꦶꦥꦶꦠꦸꦁ ꦤ ꦢꦺꦠꦷꦠꦶ.

ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦠ꧀ꦠꦴ. ꦩꦲꦴꦗꦤꦱ꧀ꦱ ꦱꦴꦠ꧀ꦡꦶꦏꦴ ꦢꦺꦱꦤꦴ ꦗꦴꦠꦴ. ꦈꦥꦴꦱꦏꦺꦤ ꦥꦤ ꦨꦮꦤ꧀ꦠꦫꦺ ꦏꦠꦏꦩ꧀ꦩꦁ ꦨꦶꦏ꧀ꦑꦹꦲꦶ ꦤ ꦥꦸꦕ꧀ꦖꦶꦠꦁ, ꦠꦱ꧀ꦩꦴ ꦱꦠ꧀ꦡꦴꦫꦴ ꦤ ꦏꦡꦶꦠꦤ꧀ꦠꦶ.

ꦤꦤ꧀ꦢꦒꦺꦴꦥꦴꦭꦏꦮꦠ꧀ꦡꦸ ꦄꦛ꧀ꦜꦩꦁ.

꧙. ꦱꦺꦴꦫꦺꦪ꧀ꦪꦠ꧀ꦡꦺꦫꦮꦠ꧀ꦡꦸ

ꦤ ꦠꦁ ꦩꦴꦠꦴ ꦥꦶꦠꦴ ꦏꦪꦶꦫꦴꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦱꦴꦮꦠ꧀ꦡꦶꦪꦁ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦱꦺꦴꦫꦺꦪ꧀ꦪꦠ꧀ꦡꦺꦫꦁ ꦄꦴꦫꦧ꧀ꦨ ꦏꦡꦺꦱꦶ.

ꦮꦠ꧀ꦡꦸ ꦱꦺꦴꦫꦺꦪ꧀ꦪꦤꦒꦫꦺ ꦱꦩꦸꦛ꧀ꦜꦶꦠꦁ, ꦱꦴꦮꦠ꧀ꦡꦶꦪꦁ ꦤꦶꦛ꧀ꦜꦴꦥꦺꦱꦶ. ꦱꦩ꧀ꦩꦴꦱꦩ꧀ꦧꦸꦢ꧀ꦣꦺ ꦱꦴꦮꦠ꧀ꦡꦶꦪꦁ ꦮꦶꦲꦫꦤ꧀ꦠꦺ ꦱꦺꦴꦫꦺꦪ꧀ꦪꦤꦒꦫꦺ ꦱꦺꦴꦫꦺꦪ꧀ꦪꦱꦺꦛ꧀ꦜꦶꦥꦸꦠ꧀ꦠꦺꦴ ꦌꦏꦺꦤ ꦱꦲꦴꦪꦏꦺꦤ ꦱꦢ꧀ꦣꦶꦁ ꦱꦸꦑꦪꦴꦤꦏꦺ ꦤꦶꦱꦷꦢꦶꦠ꧀ꦮꦴ ꦩꦲꦤ꧀ꦠꦺꦤ ꦥꦫꦶꦮꦴꦫꦺꦤ ꦤ꧀ꦲꦴꦤꦠ꧀ꦡꦴꦪ ꦤꦒꦫꦴ ꦤꦶꦏ꧀ꦑꦩꦶ. ꦠꦱ꧀ꦩꦶꦁ ꦑꦟꦺ ꦩꦲꦴꦏꦕ꧀ꦕꦴꦪꦤꦠ꧀ꦡꦺꦫꦺꦴ ꦱꦺꦴꦫꦺꦪ꧀ꦪꦤꦒꦫꦁ ꦥꦶꦟ꧀ꦝꦴꦪ ꦥꦮꦶꦱꦶꦠꦸꦏꦴꦩꦺꦴ ꦲꦸꦠ꧀ꦮꦴ ꦧꦲꦶꦤꦒꦫꦺ ꦱꦔ꧀ꦓꦴꦛꦶꦁ ꦥꦴꦫꦸꦥꦠꦶ. ꦡꦺꦫꦱ꧀ꦱ ꦕ ꦱꦸꦮꦟ꧀ꦟꦮꦟ꧀ꦟꦁ ꦱꦫꦷꦫꦁ. ꦱꦺꦴꦫꦺꦪ꧀ꦪꦱꦺꦛ꧀ꦜꦶꦥꦸꦠ꧀ꦠꦺꦴ ꦠꦁ ꦢꦶꦱ꧀ꦮꦴ ꦕꦶꦤ꧀ꦠꦺꦱꦶ – ‘‘ꦄꦲꦺꦴ ꦮꦠ ꦄꦪꦁ ꦮꦴ ꦡꦺꦫꦺꦴ ꦩꦩ ꦨꦫꦶꦪꦴ ꦨꦮꦺꦪ꧀ꦪ, ꦩꦩ ꦮꦴ ꦨꦫꦶꦪꦴꦪ ꦱꦫꦷꦫꦮꦟ꧀ꦟꦺꦴ ꦌꦠꦱ꧀ꦱ ꦱꦫꦷꦫꦮꦟ꧀ꦟꦺꦴ ꦮꦶꦪ ꦨꦮꦺꦪ꧀ꦪꦴ’’ꦠꦶ. ꦠꦱ꧀ꦱ ꦕꦶꦤ꧀ꦠꦶꦠꦩꦠ꧀ꦠꦺꦪꦺꦮ ꦥꦸꦫꦶꦱꦭꦶꦔ꧀ꦒꦁ ꦄꦤ꧀ꦠꦫꦣꦴꦪꦶ, ꦆꦠ꧀ꦡꦶꦭꦶꦔ꧀ꦒꦁ ꦥꦴꦠꦸꦫꦲꦺꦴꦱꦶ. ꦱꦺꦴ ꦭꦗ꧀ꦗꦩꦴꦤꦺꦴ ꦪꦴꦤꦏꦴ ꦎꦫꦸꦪ꧀ꦲ ꦥꦭꦴꦪꦶ. ꦥꦫꦶꦗꦤꦺꦴ ꦠꦁ ꦄꦱꦚ꧀ꦗꦴꦤꦤ꧀ꦠꦺꦴ ‘‘ꦏꦶꦩꦺꦠ’’ꦤ꧀ꦠꦶ ꦄꦴꦲ. ꦱꦴꦥꦶ ꦠꦏ꧀ꦏꦱꦶꦭꦩꦒ꧀ꦒꦁ ꦥꦛꦶꦥꦗ꧀ꦗꦶ. ꦱꦲꦴꦪꦏꦺꦴꦥꦶꦱ꧀ꦱꦴ ꦆꦠꦺꦴ ꦕꦶꦠꦺꦴ ꦕ ꦮꦶꦕꦫꦶꦠ꧀ꦮꦴꦥꦶ ꦤꦴꦢ꧀ꦢꦱ. ꦱꦧ꧀ꦧꦺ ꦤ꧀ꦲꦴꦪꦶꦠ꧀ꦮꦴ ꦒꦺꦲꦁ ꦄꦒꦩꦶꦁꦱꦸ. ‘‘ꦏꦲꦁ ꦱꦺꦛ꧀ꦜꦶꦥꦸꦠ꧀ꦠꦺꦴ’’ꦠꦶ ꦕ ꦮꦸꦠ꧀ꦠꦺ, ‘‘ꦤ꧀ꦲꦠ꧀ꦮꦴ ꦄꦴꦒꦠꦺꦴ ꦨꦮꦶꦱ꧀ꦱꦠꦷꦠꦶ ꦩꦚ꧀ꦚꦶꦩ꧀ꦲꦴ’’ꦠꦶ ꦮꦢꦶꦁꦱꦸ. ꦄꦡꦱ꧀ꦱ ꦩꦴꦠꦴꦥꦶꦠꦫꦺꦴ ꦠꦠ꧀ꦡ ꦠꦠ꧀ꦡ ꦥꦫꦶꦪꦺꦱꦶꦠ꧀ꦮꦴ ꦄꦥꦱ꧀ꦱꦤ꧀ꦠꦴ ꦫꦺꦴꦢꦶꦠ꧀ꦮꦴ ꦥꦫꦶꦢꦺꦮꦶꦠ꧀ꦮꦴ, ‘‘ꦩꦠꦺꦴ ꦨꦮꦶꦱ꧀ꦱꦠꦷ’’ꦠꦶ ꦩꦠꦏꦨꦠ꧀ꦠꦁ ꦄꦢꦁꦱꦸ. ꦱꦴ ꦌꦏꦁ ꦠꦏ꧀ꦏꦱꦶꦭꦒꦴꦩꦶꦁ ꦱꦠ꧀ꦡꦮꦴꦲꦁ ꦢꦶꦱ꧀ꦮꦴ ꦪꦴꦤꦏꦱ꧀ꦱ ꦥꦕ꧀ꦖꦠꦺꦴ ꦥꦕ꧀ꦖꦠꦺꦴ ꦄꦤꦸꦧꦤ꧀ꦣꦶ.

ꦄꦡ ꦤꦁ ꦩꦤꦸꦱ꧀ꦱꦴ ꦢꦶꦱ꧀ꦮꦴ, ‘‘ꦄꦩ꧀ꦲꦴꦏꦁ ꦪꦴꦤꦏꦱ꧀ꦱ ꦥꦕ꧀ꦖꦠꦺꦴ ꦥꦕ꧀ꦖꦠꦺꦴ ꦄꦤꦸꦒꦕ꧀ꦖꦠꦶ, ꦩꦪꦁ ‘ꦏꦱ꧀ꦱꦺꦱꦴ ꦢꦴꦫꦶꦏꦴ’ꦠꦶ ꦠꦁ ꦤ ꦗꦴꦤꦴꦩꦴ’’ꦠꦶ ꦮꦢꦶꦁꦱꦸ. ꦱꦴꦥꦶ ‘‘ꦠꦸꦩ꧀ꦲꦺ ꦄꦠ꧀ꦠꦤꦺꦴ ꦪꦴꦤꦏꦁ ꦥꦴꦗꦺꦡ, ꦄꦲꦁ ꦥꦢꦱꦴ ꦒꦩꦶꦱ꧀ꦱꦴꦩꦷ’’ꦠꦶ ꦒꦕ꧀ꦖꦤ꧀ꦠꦷ ꦄꦔ꧀ꦒꦸꦭꦶꦩꦸꦢ꧀ꦢꦶꦏꦁ ꦢꦠ꧀ꦮꦴ ꦌꦏꦱ꧀ꦩꦶꦁ ꦪꦴꦤꦏꦺ ꦎꦏꦴꦱꦁ ꦏꦴꦫꦺꦱꦶ. ꦩꦤꦸꦱ꧀ꦱꦴ ꦕꦶꦤ꧀ꦠꦪꦶꦁꦱꦸ – ‘‘ꦠꦏ꧀ꦏꦱꦶꦭꦤꦒꦫꦺ ꦄꦩ꧀ꦲꦴꦏꦁ ꦱꦺꦛ꧀ꦜꦶꦥꦸꦠ꧀ꦠꦱ꧀ꦱ ꦨꦫꦶꦪꦴ ꦤꦠ꧀ꦡꦶ, ꦠꦱ꧀ꦱ ꦄꦴꦕꦶꦏ꧀ꦑꦶꦱ꧀ꦱꦴꦩ, ꦩꦲꦴꦥꦟ꧀ꦟꦴꦏꦴꦫꦺꦴ ꦤꦺꦴ ꦨꦮꦶꦱ꧀ꦱꦠꦷ’’ꦠꦶ. ꦠꦺ ꦒꦺꦲꦁ ꦒꦤ꧀ꦠ꧀ꦮꦴ, ‘‘ꦱꦴꦩꦶ, ꦄꦩ꧀ꦲꦺꦲꦶ ꦠꦸꦩ꧀ꦲꦴꦏꦁ ꦌꦏꦁ ꦆꦠ꧀ꦡꦶꦫꦠꦤꦁ ꦄꦴꦤꦷꦠ’’ꦤ꧀ꦠꦶ ꦄꦴꦲꦁꦱꦸ. ꦱꦺꦴ ꦠꦁ ꦱꦸꦠ꧀ꦮꦴ ꦠꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦄꦠ꧀ꦠꦤꦺꦴ ꦮꦪꦴꦤꦸꦫꦹꦥꦁ ꦄꦨꦶꦫꦹꦥꦁ ꦥꦴꦱꦴꦢꦶꦏꦁ ꦢꦶꦱ꧀ꦮꦴ ꦈꦥ꧀ꦥꦤ꧀ꦤꦱꦶꦤꦺꦲꦺꦴ ꦒꦺꦲꦺ ꦄꦏꦴꦱꦶ. ꦥꦸꦫꦶꦱꦴ ꦲꦶ ꦆꦠ꧀ꦡꦶꦪꦺꦴ, ꦆꦠ꧀ꦡꦶꦪꦺꦴ ꦮꦴ ꦥꦸꦫꦶꦱꦴ ꦄꦨꦹꦠꦥꦸꦧ꧀ꦧꦴ ꦤꦴꦩ ꦤꦠ꧀ꦡꦶ. ꦥꦸꦫꦶꦱꦴ ꦲꦶ ꦥꦫꦱ꧀ꦱ ꦢꦴꦫꦺꦱꦸ ꦄꦠꦶꦕꦫꦶꦠ꧀ꦮꦴ ꦏꦴꦭꦁ ꦏꦠ꧀ꦮꦴ ꦧꦲꦹꦤꦶ ꦮꦱ꧀ꦱꦱꦠꦱꦲꦱ꧀ꦱꦴꦤꦶ ꦤꦶꦫꦪꦺ ꦥꦕ꧀ꦕꦶꦠ꧀ꦮꦴ ꦩꦤꦸꦱ꧀ꦱꦗꦴꦠꦶꦁ ꦄꦴꦒꦕ꧀ꦖꦤ꧀ꦠꦴ ꦄꦠ꧀ꦠꦨꦴꦮꦱꦠꦺ ꦆꦠ꧀ꦡꦶꦨꦴꦮꦁ ꦄꦴꦥꦗ꧀ꦗꦤ꧀ꦠꦶ.

ꦄꦴꦤꦤ꧀ꦢꦠ꧀ꦡꦺꦫꦺꦴꦥꦶ ꦏꦥ꧀ꦥꦱꦠꦱꦲꦱ꧀ꦱꦁ ꦥꦹꦫꦶꦠꦥꦴꦫꦩꦷ ꦄꦫꦶꦪꦱꦴꦮꦏꦺꦴ ꦱꦁꦱꦴꦫꦺ ꦱꦁꦱꦫꦤ꧀ꦠꦺꦴ ꦌꦏꦱ꧀ꦩꦶꦁ ꦄꦠ꧀ꦠꦨꦴꦮꦺ ꦏꦩ꧀ꦩꦴꦫꦏꦸꦭꦺ ꦤꦶꦧ꧀ꦧꦠ꧀ꦠꦺꦴ. ꦥꦫꦢꦴꦫꦏꦩ꧀ꦩꦁ ꦏꦠ꧀ꦮꦴ ꦤꦶꦫꦪꦺ ꦥꦕ꧀ꦕꦶꦠ꧀ꦮꦴ ꦥꦏ꧀ꦏꦴꦮꦱꦺꦱꦺꦤ ꦕꦸꦢ꧀ꦢꦱꦱꦸ ꦄꦠ꧀ꦠꦨꦴꦮꦺꦱꦸ ꦥꦸꦫꦶꦱꦱ꧀ꦱ ꦥꦴꦢꦥꦫꦶꦕꦴꦫꦶꦏꦴ ꦆꦠ꧀ꦡꦷ ꦄꦲꦺꦴꦱꦶ, ꦱꦠ꧀ꦠꦱꦸ ꦄꦠ꧀ꦠꦨꦴꦮꦺꦱꦸ ꦧꦷꦗꦸꦢ꧀ꦣꦫꦟꦁ ꦥꦴꦥꦸꦟꦶ. ꦆꦠ꧀ꦡꦶꦪꦺꦴ ꦥꦤ ꦢꦴꦤꦴꦢꦷꦤꦶ ꦥꦸꦚ꧀ꦚꦴꦤꦶ ꦏꦠ꧀ꦮꦴ ꦆꦠ꧀ꦡꦶꦨꦴꦮꦺ ꦖꦤ꧀ꦢꦁ ꦮꦶꦫꦴꦗꦺꦠ꧀ꦮꦴ, ‘‘ꦆꦢꦁ ꦤꦺꦴ ꦥꦸꦚ꧀ꦚꦁ ꦥꦸꦫꦶꦱꦠ꧀ꦠꦨꦴꦮꦥꦛꦶꦭꦴꦨꦴꦪ ꦱꦁꦮꦠ꧀ꦠꦠꦹ’’ꦠꦶ ꦕꦶꦠ꧀ꦠꦁ ꦄꦣꦶꦛ꧀ꦜꦲꦶꦠ꧀ꦮꦴ ꦏꦴꦭꦁ ꦏꦠ꧀ꦮꦴ ꦥꦸꦫꦶꦱꦠ꧀ꦠꦨꦴꦮꦁ ꦥꦛꦶꦭꦨꦤ꧀ꦠꦶ, ꦥꦠꦶꦢꦺꦮꦠꦴ ꦲꦸꦠ꧀ꦮꦴ ꦱꦴꦩꦶꦏꦺ ꦱꦩ꧀ꦩꦴꦥꦛꦶꦥꦠ꧀ꦠꦶꦮꦱꦺꦤꦴꦥꦶ ꦥꦸꦫꦶꦱꦠ꧀ꦠꦨꦴꦮꦁ ꦥꦛꦶꦭꦨꦤ꧀ꦠꦺꦮ.

ꦄꦪꦁ ꦥꦤ ꦱꦺꦛ꧀ꦜꦶꦥꦸꦠ꧀ꦠꦺꦴ ꦡꦺꦫꦺ ꦄꦪꦺꦴꦤꦶꦱꦺꦴ ꦕꦶꦠ꧀ꦠꦁ ꦈꦥ꧀ꦥꦴꦢꦺꦠ꧀ꦮꦴ ꦆꦩꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ ꦆꦠ꧀ꦡꦶꦨꦴꦮꦁ ꦥꦛꦶꦭꦨꦶ. ꦠꦏ꧀ꦏꦱꦶꦭꦴꦪꦁ ꦱꦺꦛ꧀ꦜꦶꦥꦸꦠ꧀ꦠꦺꦤ ꦱꦢ꧀ꦣꦶꦁ ꦱꦁꦮꦴꦱꦩꦤ꧀ꦮꦴꦪ ꦥꦤ ꦠꦱ꧀ꦱꦴ ꦏꦸꦕ꧀ꦖꦶꦪꦁ ꦒꦧ꧀ꦨꦺꦴ ꦥꦠꦶꦛ꧀ꦜꦴꦱꦶ. ꦱꦴ ꦢꦱꦩꦴꦱꦕ꧀ꦕꦪꦺꦤ ꦥꦸꦠ꧀ꦠꦁ ꦭꦨꦶꦠ꧀ꦮꦴ ꦠꦱ꧀ꦱ ꦥꦢꦱꦴ ꦒꦩꦤꦏꦴꦭꦺ ꦄꦥꦫꦩ꧀ꦥꦶ ꦥꦸꦠ꧀ꦠꦁ ꦥꦛꦶꦭꦨꦶ. ꦌꦮꦩꦱ꧀ꦱꦴ ꦏꦸꦕ꧀ꦖꦶꦪꦁ ꦮꦸꦠ꧀ꦡꦴ ꦢ꧀ꦮꦺ, ꦱꦺꦴꦫꦺꦪ꧀ꦪꦤꦒꦫꦺ ꦠꦁ ꦥꦛꦶꦕ꧀ꦕ ꦤꦶꦧ꧀ꦧꦠ꧀ꦠꦴ ꦢ꧀ꦮꦺꦠꦶ ꦕꦠ꧀ꦠꦴꦫꦺꦴ ꦥꦸꦠ꧀ꦠꦴ ꦄꦲꦺꦱꦸꦁ. ꦠꦱ꧀ꦩꦶꦁ ꦏꦴꦭꦺ ꦱꦺꦴꦫꦺꦪ꧀ꦪꦤꦒꦫꦠꦺꦴ ꦠꦱ꧀ꦱꦴ ꦱꦲꦴꦪꦏꦺꦴ ꦱꦺꦛ꧀ꦜꦶꦥꦸꦠ꧀ꦠꦺꦴ ꦥꦚ꧀ꦕꦲꦶ ꦱꦏꦛꦱꦠꦺꦲꦶ ꦠꦏ꧀ꦏꦱꦶꦭꦁ ꦒꦤ꧀ꦠ꧀ꦮꦴ ꦱꦸꦑꦪꦴꦤꦏꦺ ꦤꦶꦱꦶꦤ꧀ꦤꦺꦴ ꦤꦒꦫꦁ ꦥꦴꦮꦶꦱꦶ. ꦄꦡ ꦤꦁ ꦱꦴ ꦈꦥꦫꦶꦥꦴꦱꦴꦢꦠꦭꦺ ꦮꦴꦠꦥꦴꦤꦁ ꦮꦶꦮꦫꦶꦠ꧀ꦮꦴ ꦄꦤ꧀ꦠꦫꦮꦷꦡꦶꦁ ꦎꦭꦺꦴꦏꦪꦩꦴꦤꦴ ꦜꦶꦠꦴ ꦢꦶꦱ꧀ꦮꦴ ꦱꦚ꧀ꦗꦴꦤꦶꦠ꧀ꦮꦴ ꦢꦴꦱꦶꦁ ꦥꦺꦱꦺꦠ꧀ꦮꦴ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦩꦲꦴꦠꦭꦺ ꦤꦶꦱꦷꦢꦴꦥꦺꦠ꧀ꦮꦴ ꦩꦲꦤ꧀ꦠꦁ ꦱꦏ꧀ꦏꦴꦫꦱꦩ꧀ꦩꦴꦤꦁ ꦄꦏꦴꦱꦶ. ꦄꦡ ꦤꦁ ꦱꦺꦴ ꦄꦴꦲ – ‘‘ꦨꦢ꧀ꦢꦺ, ꦠ꧀ꦮꦁ ꦆꦠꦺꦴ ꦥꦸꦧ꧀ꦧꦺ ꦄꦩ꧀ꦲꦺꦲꦶ ꦤ ꦢꦶꦛ꧀ꦜꦥꦸꦧ꧀ꦧꦴ, ꦄꦡ ꦕ ꦥꦤ ꦤꦺꦴ ꦩꦲꦤ꧀ꦠꦁ ꦱꦏ꧀ꦏꦴꦫꦁ ꦏꦫꦺꦴꦱꦶ, ꦗꦴꦤꦴꦱꦶ ꦠ꧀ꦮꦁ ꦄꦩ꧀ꦲꦺ’’ꦠꦶ. ‘‘ꦄꦴꦩ, ꦱꦴꦩꦶ, ꦗꦴꦤꦴꦩꦶ, ꦤꦤꦸ ꦠꦸꦩ꧀ꦲꦺ ꦱꦺꦴꦫꦺꦪ꧀ꦪꦤꦒꦫꦮꦴꦱꦶꦤꦺꦴ’’ꦠꦶ? ‘‘ꦄꦴꦩ, ꦨꦢ꧀ꦢꦺ’’ꦠꦶ. ꦱꦴ ꦩꦴꦠꦴꦥꦶꦠꦹꦤꦚ꧀ꦕ ꦨꦫꦶꦪꦴꦪ ꦕ ꦥꦸꦠ꧀ꦠꦴꦤꦚ꧀ꦕ ꦄꦫꦺꦴꦒꦨꦴꦮꦁ ꦥꦸꦕ꧀ꦖꦶ. ꦆꦠꦫꦺꦴ ‘‘ꦄꦴꦩ, ꦨꦢ꧀ꦢꦺ, ꦄꦫꦺꦴꦒꦴ’’ꦠꦶ ꦮꦠ꧀ꦮꦴ ‘‘ꦗꦴꦤꦴꦱꦶ ꦠ꧀ꦮꦁ ꦌꦠꦺ’’ꦠꦶ ꦄꦴꦲ. ‘‘ꦄꦴꦩ ꦱꦴꦩꦶ, ꦗꦴꦤꦴꦩꦶ. ꦠꦺꦱꦁ ꦌꦏꦺꦴ ꦥꦸꦠ꧀ꦠꦺꦴ ꦄꦠ꧀ꦡꦶ, ꦱꦺꦴ ꦏꦲꦁ, ꦱꦴꦩꦷ’’ꦠꦶ? ‘‘ꦨꦢ꧀ꦢꦺ, ꦩꦴ ꦌꦠꦁ ꦏꦡꦺꦲꦶ, ꦩꦪꦁ ꦠꦺꦤ ꦱꦢ꧀ꦣꦶꦁ ꦌꦏꦢꦶꦮꦱꦁ ꦱꦸꦑꦪꦴꦤꦏꦺ ꦤꦶꦱꦷꦢꦶꦠ꧀ꦮꦴ ꦤ꧀ꦲꦴꦪꦶꦠꦸꦁ ꦤꦶꦏ꧀ꦑꦤ꧀ꦠꦴ ꦤꦺꦮꦱ꧀ꦱ ꦒꦠꦶꦁ ꦗꦴꦤꦴꦩ, ꦆꦠꦺꦴ ꦕꦶꦠꦺꦴ ꦕ ꦮꦶꦕꦫꦶꦠ꧀ꦮꦴ ꦠꦁ ꦄꦢꦶꦱ꧀ꦮꦴ ꦩꦴꦠꦴꦥꦶꦠꦹꦤꦁ ꦄꦴꦫꦺꦴꦕꦪꦶꦩ꧀ꦲꦴ, ꦠꦺꦥꦶꦱ꧀ꦱ ꦫꦺꦴꦢꦶꦠ꧀ꦮꦴ ꦏꦤ꧀ꦢꦶꦠ꧀ꦮꦴ ꦥꦺꦠꦏꦶꦕ꧀ꦕꦁ ꦏꦶꦫꦶꦁꦱꦹ’’ꦠꦶ. ‘‘ꦄꦲꦁ ꦱꦺꦴ, ꦱꦴꦩꦷ’’ꦠꦶ. ‘‘ꦄꦥꦺꦲꦶ, ꦨꦢ꧀ꦢꦺ, ꦏꦶꦁ ꦏꦡꦺꦱꦶ ꦩꦪ꧀ꦲꦁ ꦱꦲꦴꦪꦺꦴ ꦢꦺꦮꦏꦸꦩꦴꦫꦺꦴ ꦮꦶꦪ ꦌꦏꦺꦴ ꦥꦸꦫꦶꦱꦺꦴ’’ꦠꦶ? ‘‘ꦲꦺꦴꦠꦸ, ꦱꦴꦩꦶ, ꦄꦲꦁ ꦱꦺꦴ’’ꦠꦶ. ‘‘ꦄꦡ ꦆꦢꦁ ꦏꦶꦁ ꦤꦴꦩꦴ’’ꦠꦶ? ‘‘ꦠꦁ ꦢꦶꦮꦱꦁ ꦠꦺ ꦄꦪ꧀ꦪꦺꦴ ꦩꦲꦴꦏꦕ꧀ꦕꦴꦪꦤꦠ꧀ꦡꦺꦫꦺꦴ ꦢꦶꦛ꧀ꦜꦺꦴ’’ꦠꦶ? ‘‘ꦄꦴꦩ, ꦢꦶꦛ꧀ꦜꦺꦴ’’ꦠꦶ. ꦄꦲꦁ ꦄꦪ꧀ꦪꦁ ꦩꦲꦴꦏꦕ꧀ꦕꦴꦪꦤꦠ꧀ꦡꦺꦫꦁ ꦎꦭꦺꦴꦏꦺꦠ꧀ꦮꦴ, ‘‘ꦄꦲꦺꦴ ꦮꦠ ꦄꦪꦁ ꦮꦴ ꦡꦺꦫꦺꦴ ꦩꦩ ꦨꦫꦶꦪꦴ ꦨꦮꦺꦪ꧀ꦪ, ꦌꦠꦱ꧀ꦱ ꦮꦴ ꦱꦫꦷꦫꦮꦟ꧀ꦟꦺꦴ ꦮꦶꦪ ꦩꦩ ꦨꦫꦶꦪꦴꦪ ꦱꦫꦷꦫꦮꦟ꧀ꦟꦺꦴ ꦨꦮꦺꦪ꧀ꦪꦴ’’ꦠꦶ ꦕꦶꦤ꧀ꦠꦺꦱꦶꦁ. ꦕꦶꦤ꧀ꦠꦶꦠꦏ꧀ꦑꦟꦺꦪꦺꦮ ꦩꦺ ꦥꦸꦫꦶꦱꦭꦶꦔ꧀ꦒꦁ ꦄꦤ꧀ꦠꦫꦣꦴꦪꦶ, ꦆꦠ꧀ꦡꦶꦭꦶꦔ꧀ꦒꦁ ꦥꦴꦠꦸꦨꦮꦶ. ꦄꦡꦴꦲꦁ ꦭꦗ꧀ꦗꦩꦴꦤꦴ ꦏꦱ꧀ꦱꦕꦶ ꦏꦶꦚ꧀ꦕꦶ ꦮꦠ꧀ꦠꦸꦁ ꦄꦱꦏ꧀ꦏꦸꦟꦶꦠ꧀ꦮꦴ ꦠꦠꦺꦴ ꦥꦭꦴꦪꦶꦠ꧀ꦮꦴ ꦆꦣꦴꦒꦠꦴ, ꦱꦴꦩꦷꦠꦶ.

‘‘ꦄꦲꦺꦴ ꦮꦠ ꦠꦺ ꦨꦴꦫꦶꦪꦁ ꦏꦩ꧀ꦩꦁ ꦏꦠꦁ, ꦏꦱ꧀ꦩꦴ ꦩꦪ꧀ꦲꦁ ꦤꦴꦕꦶꦏ꧀ꦑꦶ, ꦄꦥꦶꦕ ꦥꦤ ꦠꦺ ꦡꦺꦫꦺꦴ ꦑꦩꦴꦥꦶꦠꦺꦴ’’ꦠꦶ? ‘‘ꦤ ꦑꦩꦴꦥꦶꦠꦺꦴ, ꦱꦴꦩꦶ. ꦗꦴꦤꦴꦱꦶ ꦥꦤ ꦠ꧀ꦮꦁ ꦏꦲꦁ ꦡꦺꦫꦺꦴ’’ꦠꦶ? ‘‘ꦆꦩꦩꦺꦮ ꦤꦒꦫꦁ ꦈꦥꦤꦶꦱ꧀ꦱꦴꦪ ꦮꦶꦲꦫꦠꦷ’’ꦠꦶ. ‘‘ꦱꦕꦺ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦆꦣꦴꦒꦕ꧀ꦖꦺꦪ꧀ꦪ, ꦄꦲꦁ ꦩꦩ ꦄꦪ꧀ꦪꦱ꧀ꦱ ꦨꦶꦏ꧀ꦑꦴꦲꦴꦫꦁ ꦢꦢꦺꦪ꧀ꦪꦁ, ꦱꦴꦩꦷ’’ꦠꦶ. ‘‘ꦠꦺꦤ ꦲꦶ ꦱꦷꦓꦁ ꦱꦏ꧀ꦏꦴꦫꦁ ꦏꦫꦺꦴꦲꦶ, ꦄꦩ꧀ꦲꦴꦏꦁ ꦄꦪ꧀ꦪꦁ ꦑꦩꦴꦥꦺꦱ꧀ꦱꦴꦩꦴ’’ꦠꦶ ꦱꦺꦴ ꦡꦺꦫꦱ꧀ꦱ ꦮꦱꦤꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ, ‘‘ꦨꦤ꧀ꦠꦺ, ꦱ꧀ꦮꦺ ꦩꦪ꧀ꦲꦁ ꦨꦶꦏ꧀ꦑꦁ ꦒꦟ꧀ꦲꦡꦴ’’ꦠꦶ ꦄꦴꦲ. ‘‘ꦤꦤꦸ ꦠ꧀ꦮꦁ, ꦱꦺꦛ꧀ꦜꦶꦥꦸꦠ꧀ꦠ, ꦄꦴꦒꦤ꧀ꦠꦸꦏꦺꦴꦱꦷ’’ꦠꦶ. ‘‘ꦨꦤ꧀ꦠꦺ, ꦩꦴ ꦄꦩ꧀ꦲꦴꦏꦁ ꦄꦴꦒꦤ꧀ꦠꦸꦏꦨꦴꦮꦁ ꦥꦸꦕ꧀ꦖꦡ, ꦱ꧀ꦮꦺ ꦩꦺ ꦨꦶꦏ꧀ꦑꦁ ꦒꦟ꧀ꦲꦡꦴ’’ꦠꦶ. ꦡꦺꦫꦺꦴ ꦄꦣꦶꦮꦴꦱꦺꦱꦶ, ꦒꦺꦲꦺꦥꦶ ꦡꦺꦫꦱ꧀ꦱ ꦩꦲꦴꦱꦏ꧀ꦏꦴꦫꦺꦴ ꦥꦛꦶꦪꦠ꧀ꦠꦺꦴ. ꦡꦺꦫꦺꦴ ꦥꦸꦤꦢꦶꦮꦱꦺ ꦠꦁ ꦒꦺꦲꦢ꧀ꦮꦴꦫꦁ ꦄꦒꦩꦴꦱꦶ. ꦄꦡ ꦤꦁ ꦤꦶꦱꦷꦢꦴꦥꦺꦠ꧀ꦮꦴ ꦥꦟꦷꦠꦺꦤꦴꦲꦴꦫꦺꦤ ꦥꦫꦶꦮꦶꦱꦶꦠ꧀ꦮꦴ ꦱꦺꦛ꧀ꦜꦶꦥꦸꦠ꧀ꦠꦺꦴ ꦠꦁ ꦆꦠ꧀ꦡꦶꦁ ꦒꦲꦺꦠ꧀ꦮꦴ ꦡꦺꦫꦱ꧀ꦱ ꦥꦴꦢꦩꦹꦭꦺ ꦤꦶꦥꦗ꧀ꦗꦴꦥꦺꦠ꧀ꦮꦴ, ‘‘ꦨꦤ꧀ꦠꦺ, ꦩꦪ꧀ꦲꦁ ꦱꦲꦴꦪꦶꦏꦴꦪ ꦑꦩꦡꦴ’’ꦠꦶ ꦄꦴꦲ. ‘‘ꦏꦶꦩꦺꦠ’’ꦤ꧀ꦠꦶ? ‘‘ꦄꦪꦁ, ꦨꦤ꧀ꦠꦺ, ꦥꦸꦧ꧀ꦧꦺ ꦩꦪ꧀ꦲꦁ ꦥꦶꦪꦱꦲꦴꦪꦏꦺꦴ ꦲꦸꦠ꧀ꦮꦴ ꦠꦸꦩ꧀ꦲꦺ ꦎꦭꦺꦴꦏꦺꦠ꧀ꦮꦴ ꦌꦮꦁ ꦤꦴꦩ ꦕꦶꦤ꧀ꦠꦺꦱꦶ, ꦄꦡꦱ꧀ꦱ ꦥꦸꦫꦶꦱꦭꦶꦔ꧀ꦒꦁ ꦄꦤ꧀ꦠꦫꦣꦴꦪꦶ, ꦆꦠ꧀ꦡꦶꦭꦶꦔ꧀ꦒꦁ ꦥꦴꦠꦸꦨꦮꦶ, ꦑꦩꦡ, ꦨꦤ꧀ꦠꦺ’’ꦠꦶ. ‘‘ꦠꦺꦤ ꦲꦶ ꦈꦛ꧀ꦜꦲꦡ, ꦑꦩꦴꦩꦶ ꦮꦺꦴ ꦄꦲ’’ꦤ꧀ꦠꦶ. ꦡꦺꦫꦺꦤ ‘‘ꦑꦩꦴꦩꦷ’’ꦠꦶ ꦮꦸꦠ꧀ꦠꦩꦠ꧀ꦠꦺꦪꦺꦮ ꦆꦠ꧀ꦡꦶꦭꦶꦔ꧀ꦒꦁ ꦄꦤ꧀ꦠꦫꦣꦴꦪꦶ, ꦥꦸꦫꦶꦱꦭꦶꦔ꧀ꦒꦁ ꦥꦴꦠꦸꦨꦮꦶ.

ꦥꦸꦫꦶꦱꦭꦶꦔ꧀ꦒꦺ ꦥꦴꦠꦸꦨꦹꦠꦩꦠ꧀ꦠꦺꦪꦺꦮ ꦠꦁ ꦠꦏ꧀ꦏꦱꦶꦭꦴꦪ ꦱꦺꦛ꧀ꦜꦶꦥꦸꦠ꧀ꦠꦺꦴ ꦄꦴꦲ – ‘‘ꦱꦩ꧀ꦩ ꦱꦲꦴꦪꦏ, ꦆꦩꦺ ꦢ꧀ꦮꦺ ꦢꦴꦫꦏꦴ ꦠꦮ ꦏꦸꦕ꧀ꦖꦶꦪꦁ ꦮꦸꦠ꧀ꦡꦠ꧀ꦠꦴ ꦩꦁ ꦥꦛꦶꦕ꧀ꦕ ꦤꦶꦧ꧀ꦧꦠ꧀ꦠꦠ꧀ꦠꦴ ꦈꦨꦶꦤ꧀ꦤꦩ꧀ꦥꦶꦤꦺꦴ ꦥꦸꦠ꧀ꦠꦴ ꦌꦮ, ꦆꦣꦺꦮ ꦮꦱꦶꦱ꧀ꦱꦴꦩ, ꦩꦴ ꦈꦏ꧀ꦏꦟ꧀ꦜꦷ’’ꦠꦶ. ‘‘ꦱꦩ꧀ꦩ, ꦄꦲꦁ ꦌꦏꦺꦤꦠ꧀ꦠꦨꦴꦮꦺꦤ ꦥꦜꦩꦁ ꦥꦸꦫꦶꦱꦺꦴ ꦲꦸꦠ꧀ꦮꦴ ꦆꦠ꧀ꦡꦶꦨꦴꦮꦁ ꦥꦠ꧀ꦮꦴ ꦥꦸꦤ ꦥꦸꦫꦶꦱꦺꦴ ꦗꦴꦠꦺꦴꦠꦶ ꦮꦶꦥ꧀ꦥꦏꦴꦫꦥ꧀ꦥꦠ꧀ꦠꦺꦴ, ꦥꦜꦩꦁ ꦩꦁ ꦥꦛꦶꦕ꧀ꦕ ꦢ꧀ꦮꦺ ꦥꦸꦠ꧀ꦠꦴ ꦤꦶꦧ꧀ꦧꦠ꧀ꦠꦴ, ꦆꦢꦴꦤꦶ ꦩꦺ ꦏꦸꦕ꧀ꦖꦶꦠꦺꦴ ꦢ꧀ꦮꦺ ꦥꦸꦠ꧀ꦠꦴ ꦤꦶꦏ꧀ꦑꦤ꧀ꦠꦴ, ꦱ꧀ꦮꦴꦲꦁ ꦌꦏꦺꦤꦠ꧀ꦠꦨꦴꦮꦺꦤ ꦮꦶꦥ꧀ꦥꦏꦴꦫꦥ꧀ꦥꦠ꧀ꦠꦺꦴ, ꦥꦸꦤ ‘ꦒꦺꦲꦺ ꦮꦱꦶꦱ꧀ꦱꦠꦷ’ꦠꦶ ꦱꦚ꧀ꦚꦁ ꦩꦴ ꦏꦫꦶ, ꦄꦲꦁ ꦩꦩ ꦄꦪ꧀ꦪꦱ꧀ꦱ ꦱꦤ꧀ꦠꦶꦏꦺ ꦥꦧ꧀ꦧꦗꦶꦱ꧀ꦱꦴꦩꦶ. ꦆꦩꦺ ꦢ꧀ꦮꦺ ꦢꦴꦫꦏꦴ ꦠꦮ ꦨꦴꦫꦴꦠꦶ, ꦆꦩꦺꦱꦸ ꦩꦴ ꦥꦩꦗ꧀ꦗꦷ’’ꦠꦶ ꦮꦠ꧀ꦮꦴ ꦥꦸꦠ꧀ꦠꦺ ꦱꦷꦱꦺ ꦥꦫꦶꦕꦸꦩ꧀ꦧꦶꦠ꧀ꦮꦴ ꦥꦫꦶꦩꦗ꧀ꦗꦶꦠ꧀ꦮꦴ ꦈꦫꦺ ꦤꦶꦥꦗ꧀ꦗꦴꦥꦺꦠ꧀ꦮꦴ ꦥꦶꦠꦸ ꦤꦶꦪ꧀ꦪꦴꦢꦺꦠ꧀ꦮꦴ ꦤꦶꦏ꧀ꦑꦩꦶꦠ꧀ꦮꦴ ꦡꦺꦫꦱ꧀ꦱ ꦱꦤ꧀ꦠꦶꦏꦺ ꦥꦧ꧀ꦧꦗ꧀ꦗꦁ ꦪꦴꦕꦶ. ꦡꦺꦫꦺꦴꦥꦶ ꦤꦁ ꦥꦧ꧀ꦧꦴꦗꦺꦠ꧀ꦮꦴ ꦈꦥꦱꦩ꧀ꦥꦴꦢꦺꦠ꧀ꦮꦴ ꦒꦟ꧀ꦲꦶꦠ꧀ꦮꦴꦮ ꦕꦴꦫꦶꦏꦁ ꦕꦫꦩꦴꦤꦺꦴ ꦄꦤꦸꦥꦸꦧ꧀ꦧꦺꦤ ꦱꦴꦮꦠ꧀ꦡꦶꦁ ꦄꦒꦩꦴꦱꦶ. ꦠꦱ꧀ꦱ ꦱꦺꦴꦫꦺꦪ꧀ꦪꦠ꧀ꦡꦺꦫꦺꦴꦠꦶ ꦤꦴꦩꦁ ꦄꦲꦺꦴꦱꦶ. ꦗꦤꦥꦢꦮꦴꦱꦶꦤꦺꦴ ꦠꦁ ꦥꦮꦠ꧀ꦠꦶꦁ ꦚꦠ꧀ꦮꦴ ꦱꦔ꧀ꦑꦸꦨꦶꦠ꧀ꦮꦴ ꦏꦺꦴꦠꦹꦲꦭꦗꦴꦠꦴ ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦸꦕ꧀ꦖꦶꦁꦱꦸ – ‘‘ꦌꦮꦁ ꦏꦶꦫ, ꦨꦤ꧀ꦠꦺ’’ꦠꦶ? ‘‘ꦄꦴꦩ, ꦄꦴꦮꦸꦱꦺꦴ’’ꦠꦶ. ‘‘ꦨꦤ꧀ꦠꦺ, ꦌꦮꦫꦹꦥꦩ꧀ꦥꦶ ꦏꦴꦫꦟꦁ ꦤꦴꦩ ꦲꦺꦴꦠꦶ’’? ‘‘ꦠꦸꦩ꧀ꦲꦴꦏꦁ ꦏꦸꦕ꧀ꦖꦶꦪꦁ ꦏꦶꦫ ꦢ꧀ꦮꦺ ꦥꦸꦠ꧀ꦠꦴ ꦤꦶꦧ꧀ꦧꦠ꧀ꦠꦴ, ꦠꦸꦩ꧀ꦲꦺ ꦥꦛꦶꦕ꧀ꦕ ꦢ꧀ꦮꦺ ꦗꦴꦠꦴ, ꦠꦺꦱꦁ ꦮꦺꦴ ꦏꦠꦫꦺꦱꦸ ꦧꦭꦮꦱꦶꦤꦺꦲꦺꦴ ꦲꦺꦴꦠꦷ’’ꦠꦶ? ‘‘ꦏꦸꦕ꧀ꦖꦶꦪꦁ ꦮꦸꦠ꧀ꦡꦏꦺꦱꦸ, ꦄꦴꦮꦸꦱꦺꦴ’’ꦠꦶ. ꦄꦴꦒꦠꦴꦒꦠꦴ ꦤꦶꦧꦢ꧀ꦣꦁ ꦠꦡꦺꦮ ꦥꦸꦕ꧀ꦖꦶꦁꦱꦸ.

ꦡꦺꦫꦺꦴ ‘‘ꦏꦸꦕ꧀ꦖꦶꦪꦁ ꦮꦸꦠ꧀ꦠꦏꦺꦱꦸ ꦌꦮ ꦱꦶꦤꦺꦲꦺꦴ ꦧꦭꦮꦴ’’ꦠꦶ ꦥꦸꦤꦥ꧀ꦥꦸꦤꦁ ꦏꦡꦺꦤ꧀ꦠꦺꦴ ꦲꦫꦴꦪꦩꦴꦤꦺꦴ ꦌꦏꦺꦴꦮ ꦤꦶꦱꦷꦢꦠꦶ, ꦌꦏꦺꦴꦮ ꦠꦶꦛ꧀ꦜꦠꦶ. ꦱꦺꦴ ꦌꦮꦁ ꦌꦏꦠ꧀ꦠꦹꦥꦒꦠꦺꦴ ꦄꦠ꧀ꦠꦨꦴꦮꦺ ꦑꦪꦮꦪꦁ ꦱꦩꦸꦛ꧀ꦜꦴꦥꦺꦠ꧀ꦮꦴ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦄꦡ ꦤꦁ ꦄꦴꦒꦠꦴꦒꦠꦴ ꦥꦸꦕ꧀ꦖꦤ꧀ꦠꦶ – ‘‘ꦨꦤ꧀ꦠꦺ, ꦌꦮꦁ ꦏꦶꦫ ꦤꦴꦩ ꦄꦲꦺꦴꦱꦷ’’ꦠꦶ? ‘‘ꦄꦴꦩꦴꦮꦸꦱꦺꦴ’’ꦠꦶ. ‘‘ꦏꦠꦫꦺꦱꦸ ꦱꦶꦤꦺꦲꦺꦴ ꦧꦭꦮꦴ’’ꦠꦶ? ‘‘ꦩꦪ꧀ꦲꦁ ꦏꦠ꧀ꦡꦕꦶ ꦱꦶꦤꦺꦲꦺꦴ ꦤꦴꦩ ꦤꦠ꧀ꦡꦷ’’ꦠꦶ. ꦨꦶꦏ꧀ꦑꦹ ‘‘ꦄꦪꦁ ꦄꦨꦹꦠꦁ ꦏꦡꦺꦱꦶ, ꦥꦸꦫꦶꦩꦢꦶꦮꦱꦺꦱꦸ ‘ꦏꦸꦕ꧀ꦖꦶꦪꦁ ꦮꦸꦠ꧀ꦡꦥꦸꦠ꧀ꦠꦺꦱꦸ ꦱꦶꦤꦺꦲꦺꦴ ꦧꦭꦮꦴ’ꦠꦶ ꦮꦠ꧀ꦮꦴ ꦆꦢꦴꦤꦶ ‘ꦩꦪ꧀ꦲꦁ ꦏꦠ꧀ꦡꦕꦶ ꦱꦶꦤꦺꦲꦺꦴ ꦤꦠ꧀ꦡꦷ’ꦠꦶ ꦮꦢꦠꦶ, ꦄꦚ꧀ꦚꦁ ꦧ꧀ꦪꦴꦏꦫꦺꦴꦠꦶ, ꦨꦤ꧀ꦠꦺ’’ꦠꦶ ꦄꦴꦲꦁꦱꦸ. ꦱꦠ꧀ꦡꦴ ‘‘ꦤ, ꦨꦶꦏ꧀ꦑꦮꦺ, ꦩꦩ ꦥꦸꦠ꧀ꦠꦺꦴ ꦄꦚ꧀ꦚꦁ ꦧ꧀ꦪꦴꦏꦫꦺꦴꦠꦶ, ꦩꦩ ꦥꦸꦠ꧀ꦠꦱ꧀ꦱ ꦱꦩ꧀ꦩꦴꦥꦟꦶꦲꦶꦠꦺꦤ ꦕꦶꦠ꧀ꦠꦺꦤ ꦩꦒ꧀ꦒꦱ꧀ꦱ ꦢꦶꦛ꧀ꦜꦏꦴꦭꦠꦺꦴ ꦥꦛ꧀ꦜꦴꦪ ꦤ ꦏꦠ꧀ꦡꦕꦶ ꦱꦶꦤꦺꦲꦺꦴ ꦗꦴꦠꦺꦴ, ꦪꦁ ꦱꦩ꧀ꦥꦠ꧀ꦠꦶꦁ ꦤꦺꦮ ꦩꦴꦠꦴ, ꦤ ꦥꦶꦠꦴ ꦏꦴꦠꦸꦁ ꦱꦏ꧀ꦏꦺꦴꦠꦶ, ꦠꦁ ꦆꦩꦺꦱꦁ ꦱꦠ꧀ꦠꦴꦤꦁ ꦄꦧ꧀ꦨꦤ꧀ꦠꦫꦺ ꦥꦮꦠ꧀ꦠꦁ ꦱꦩ꧀ꦩꦴꦥꦟꦶꦲꦶꦠꦁ ꦕꦶꦠ꧀ꦠꦩꦺꦮ ꦢꦺꦠꦷ’’ꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

꧔꧓. ‘‘ꦤ ꦠꦁ ꦩꦴꦠꦴ ꦥꦶꦠꦴ ꦏꦪꦶꦫꦴ, ꦄꦚ꧀ꦚꦺ ꦮꦴꦥꦶ ꦕ ꦚꦴꦠꦏꦴ;

ꦱꦩ꧀ꦩꦴꦥꦟꦶꦲꦶꦠꦁ ꦕꦶꦠ꧀ꦠꦁ, ꦱꦺꦪ꧀ꦪꦱꦺꦴ ꦤꦁ ꦠꦠꦺꦴ ꦏꦫꦺ’’ꦠꦶ.

ꦠꦠ꧀ꦡꦤ ꦠꦤ꧀ꦠꦶ ꦠꦁ ꦏꦴꦫꦟꦁ ꦤꦺꦮ ꦩꦴꦠꦴ ꦏꦫꦺꦪ꧀ꦪ, ꦤ ꦥꦶꦠꦴ, ꦤ ꦄꦚ꧀ꦚꦺ ꦚꦴꦠꦏꦴ. ꦱꦩ꧀ꦩꦴꦥꦟꦶꦲꦶꦠꦤ꧀ꦠꦶ ꦢꦱꦱꦸ ꦏꦸꦱꦭꦏꦩ꧀ꦩꦥꦡꦺꦱꦸ ꦱꦩ꧀ꦩꦴ ꦜꦥꦶꦠꦁ. ꦱꦺꦪ꧀ꦪꦱꦺꦴ ꦤꦁ ꦠꦠꦺꦴ ꦏꦫꦺꦠꦶ ꦠꦠꦺꦴ ꦏꦴꦫꦟꦠꦺꦴ ꦱꦺꦪ꧀ꦪꦱꦺꦴ ꦤꦁ ꦮꦫꦠꦫꦁ ꦈꦠ꧀ꦠꦫꦶꦠꦫꦁ ꦏꦫꦺꦪ꧀ꦪ, ꦏꦫꦺꦴꦠꦷꦠꦶ ꦄꦠ꧀ꦡꦺꦴ. ꦩꦴꦠꦴꦥꦶꦠꦫꦺꦴ ꦲꦶ ꦥꦸꦠ꧀ꦠꦴꦤꦁ ꦣꦤꦁ ꦢꦢꦩꦴꦤꦴ ꦌꦏꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ ꦏꦩ꧀ꦩꦁ ꦄꦏꦠ꧀ꦮꦴ ꦱꦸꦑꦺꦤ ꦗꦷꦮꦶꦏꦏꦥ꧀ꦥꦤꦁ ꦣꦤꦁ ꦢꦴꦠꦸꦁ ꦱꦏ꧀ꦏꦺꦴꦤ꧀ꦠꦶ. ꦮꦶꦱꦴꦑꦴꦪ ꦩꦴꦠꦴꦥꦶꦠꦫꦺꦴꦥꦶ ꦠꦴꦮ ꦩꦲꦢ꧀ꦣꦤꦴ ꦩꦲꦴꦨꦺꦴꦒꦴ, ꦠꦱ꧀ꦱꦴ ꦌꦏꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ ꦱꦸꦑꦺꦤ ꦗꦷꦮꦶꦏꦏꦥ꧀ꦥꦤꦁ ꦣꦤꦁ ꦄꦢꦁꦱꦸ. ꦕꦠꦹꦱꦸ ꦥꦤ ꦢꦷꦥꦺꦱꦸ ꦕꦏ꧀ꦏꦮꦠ꧀ꦠꦶꦱꦶꦫꦶꦁ ꦢꦴꦠꦸꦁ ꦱꦩꦠ꧀ꦡꦴ ꦩꦴꦠꦴꦥꦶꦠꦫꦺꦴꦥꦶ ꦤꦴꦩ ꦥꦸꦠ꧀ꦠꦴꦤꦁ ꦤꦠ꧀ꦡꦶ, ꦥꦒꦺꦮ ꦢꦶꦧ꧀ꦧꦱꦩ꧀ꦥꦠ꧀ꦠꦶꦁ ꦮꦴ ꦥꦜꦩꦗ꧀ꦙꦴꦤꦴꦢꦶꦱꦩ꧀ꦥꦠ꧀ꦠꦶꦁ ꦮꦴ, ꦭꦺꦴꦏꦸꦠ꧀ꦠꦫꦱꦩ꧀ꦥꦠ꧀ꦠꦶꦢꦴꦤꦺ ꦏꦡꦴꦮ ꦤꦠ꧀ꦡꦶ, ꦱꦩ꧀ꦩꦴꦥꦟꦶꦲꦶꦠꦁ ꦥꦤ ꦕꦶꦠ꧀ꦠꦁ ꦱꦧ꧀ꦧꦩ꧀ꦥꦺꦠꦁ ꦱꦩ꧀ꦥꦠ꧀ꦠꦶꦁ ꦢꦴꦠꦸꦁ ꦱꦏ꧀ꦏꦺꦴꦠꦶ. ꦠꦺꦤ ꦮꦸꦠ꧀ꦠꦁ ‘‘ꦱꦺꦪ꧀ꦪꦱꦺꦴ ꦤꦁ ꦠꦠꦺꦴ ꦏꦫꦺ’’ꦠꦶ.

ꦢꦺꦱꦤꦴꦮꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦠ꧀ꦠꦴ. ꦢꦺꦱꦤꦴ ꦩꦲꦴꦗꦤꦱ꧀ꦱ ꦱꦴꦠ꧀ꦡꦶꦏꦴ ꦗꦴꦠꦴꦠꦶ.

ꦱꦺꦴꦫꦺꦪ꧀ꦪꦠ꧀ꦡꦺꦫꦮꦠ꧀ꦡꦸ ꦤꦮꦩꦁ.

ꦕꦶꦠ꧀ꦠꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦠꦠꦶꦪꦺꦴ ꦮꦒ꧀ꦒꦺꦴ.