꧘. ꦄꦚ꧀ꦚꦠꦫꦨꦶꦏ꧀ꦑꦸꦮꦠ꧀ꦡꦸ

ꦄꦥ꧀ꦥꦩꦴꦢꦫꦠꦺꦴ ꦨꦶꦏ꧀ꦑꦹꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦄꦚ꧀ꦚꦠꦫꦁ ꦨꦶꦏ꧀ꦑꦸꦁ ꦄꦴꦫꦧ꧀ꦨ ꦏꦡꦺꦱꦶ.

ꦱꦺꦴ ꦏꦶꦫ ꦱꦠ꧀ꦡꦸ ꦱꦤ꧀ꦠꦶꦏꦺ ꦪꦴꦮ ꦄꦫꦲꦠ꧀ꦠꦴ ꦏꦩ꧀ꦩꦛ꧀ꦜꦴꦤꦁ ꦏꦡꦴꦥꦺꦠ꧀ꦮꦴ ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ ꦓꦛꦺꦤ꧀ꦠꦺꦴ ꦮꦴꦪꦩꦤ꧀ꦠꦺꦴ ꦄꦫꦲꦠ꧀ꦠꦁ ꦥꦠ꧀ꦠꦸꦁ ꦤꦴꦱꦏ꧀ꦑꦶ. ꦱꦺꦴ ‘‘ꦮꦶꦱꦺꦱꦺꦠ꧀ꦮꦴ ꦏꦩ꧀ꦩꦛ꧀ꦜꦴꦤꦁ ꦏꦡꦴꦥꦺꦱ꧀ꦱꦴꦩꦷ’’ꦠꦶ ꦠꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦄꦴꦒꦕ꧀ꦖꦤ꧀ꦠꦺꦴ ꦄꦤ꧀ꦠꦫꦴꦩꦒ꧀ꦒꦺ ꦩꦲꦤ꧀ꦠꦁ ꦢꦴꦮꦒ꧀ꦒꦶꦁ ꦈꦛ꧀ꦜꦶꦠꦁ ꦢꦶꦱ꧀ꦮꦴ ꦮꦺꦒꦺꦤ ꦌꦏꦁ ꦩꦸꦟ꧀ꦝꦥꦧ꧀ꦧꦠꦩꦠ꧀ꦡꦏꦁ ꦄꦨꦶꦫꦸꦪ꧀ꦲ ꦤꦶꦱꦶꦤ꧀ꦤꦺꦴ ꦄꦫꦚ꧀ꦚꦁ ꦝꦪ꧀ꦲꦩꦴꦤꦁ ꦄꦒ꧀ꦒꦶꦁ ꦢꦶꦱ꧀ꦮꦴ ꦄꦴꦫꦩ꧀ꦩꦟꦁ ꦒꦟ꧀ꦲꦶ – ‘‘ꦪꦡꦴ ꦄꦪꦁ ꦄꦒ꧀ꦒꦶ ꦩꦲꦤ꧀ꦠꦴꦤꦶ ꦕ ꦑꦸꦢ꧀ꦢꦏꦴꦤꦶ ꦕ ꦈꦥꦴꦢꦴꦤꦴꦤꦶ ꦝꦲꦤ꧀ꦠꦺꦴ ꦒꦕ꧀ꦖꦠꦶ, ꦌꦮꦁ ꦄꦫꦶꦪꦩꦒ꧀ꦒꦚꦴꦟꦒ꧀ꦒꦶꦤꦴꦥꦶ ꦩꦲꦤ꧀ꦠꦴꦤꦶ ꦕ ꦑꦸꦢ꧀ꦢꦏꦴꦤꦶ ꦕ ꦱꦁꦪꦺꦴꦗꦤꦴꦤꦶ ꦝꦲꦤ꧀ꦠꦺꦤ ꦒꦤ꧀ꦠꦧ꧀ꦧꦁ ꦨꦮꦶꦱ꧀ꦱꦠꦷ’’ꦠꦶ. ꦱꦠ꧀ꦡꦴ ꦒꦤ꧀ꦣꦏꦸꦛꦶꦪꦁ ꦤꦶꦱꦶꦤ꧀ꦤꦺꦴꦮ ꦠꦱ꧀ꦱ ꦕꦶꦠ꧀ꦠꦴꦕꦴꦫꦁ ꦚꦠ꧀ꦮꦴ, ‘‘ꦌꦮꦩꦺꦮ, ꦨꦶꦏ꧀ꦑꦸ, ꦩꦲꦤ꧀ꦠꦴꦤꦶꦥꦶ ꦑꦸꦢ꧀ꦢꦏꦴꦤꦶꦥꦶ ꦈꦥꦴꦢꦴꦤꦴꦤꦶ ꦮꦶꦪ ꦆꦩꦺꦱꦁ ꦱꦠ꧀ꦠꦴꦤꦁ ꦄꦧ꧀ꦨꦤ꧀ꦠꦫꦺ ꦈꦥ꧀ꦥꦗ꧀ꦗꦩꦴꦤꦴꦤꦶ ꦄꦟꦸꦁꦡꦹꦭꦴꦤꦶ ꦱꦁꦪꦺꦴꦗꦤꦴꦤꦶ, ꦠꦴꦤꦶ ꦚꦴꦟꦒ꧀ꦒꦶꦤꦴ ꦙꦴꦥꦺꦠ꧀ꦮꦴ ꦄꦨꦧ꧀ꦧꦸꦥ꧀ꦥꦠ꧀ꦠꦶꦏꦴꦤꦶ ꦏꦴꦠꦸꦁ ꦮꦛ꧀ꦛꦠꦷ’’ꦠꦶ ꦮꦠ꧀ꦮꦴ ꦎꦨꦴꦱꦁ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦄꦨꦶꦩꦸꦑꦺ ꦤꦶꦱꦶꦤ꧀ꦤꦺꦴ ꦮꦶꦪ ꦥꦚ꧀ꦚꦴꦪꦩꦴꦤꦺꦴ ꦆꦩꦁ ꦎꦨꦴꦱꦒꦴꦡꦩꦴꦲ –

꧓꧑. ‘‘ꦄꦥ꧀ꦥꦩꦴꦢꦫꦠꦺꦴ ꦨꦶꦏ꧀ꦑꦸ, ꦥꦩꦴꦢꦺ ꦨꦪꦢꦱ꧀ꦱꦶ ꦮꦴ;

ꦱꦁꦪꦺꦴꦗꦤꦁ ꦄꦟꦸꦁ ꦡꦹꦭꦁ, ꦝꦲꦁ ꦄꦒ꧀ꦒꦷꦮ ꦒꦕ꧀ꦖꦠꦷ’’ꦠꦶ.

ꦠꦠ꧀ꦡ ꦄꦥ꧀ꦥꦩꦴꦢꦫꦠꦺꦴꦠꦶ ꦄꦥ꧀ꦥꦩꦴꦢꦺ ꦫꦠꦺꦴ ꦄꦨꦶꦫꦠꦺꦴ, ꦄꦥ꧀ꦥꦩꦴꦢꦺꦤ ꦮꦷꦠꦶꦤꦴꦩꦺꦤ꧀ꦠꦺꦴꦠꦶ ꦄꦠ꧀ꦡꦺꦴ. ꦥꦩꦴꦢꦺ ꦨꦪꦢꦱ꧀ꦱꦶ ꦮꦴꦠꦶ ꦤꦶꦫꦪꦸꦥ꧀ꦥꦠ꧀ꦠꦶꦄꦴꦢꦶꦏꦁ ꦥꦩꦴꦢꦺ ꦨꦪꦁ ꦨꦪꦠꦺꦴ ꦥꦱ꧀ꦱꦤ꧀ꦠꦺꦴ, ꦠꦴꦱꦁ ꦮꦴ ꦈꦥ꧀ꦥꦠ꧀ꦠꦷꦤꦁ ꦩꦹꦭꦠ꧀ꦠꦴ ꦥꦩꦴꦢꦁ ꦨꦪꦠꦺꦴ ꦥꦱ꧀ꦱꦤ꧀ꦠꦺꦴ. ꦱꦁꦪꦺꦴꦗꦤꦤ꧀ꦠꦶ ꦮꦛ꧀ꦛꦢꦸꦏ꧀ꦑꦺꦤ ꦱꦢ꧀ꦣꦶꦁ ꦪꦺꦴꦗꦤꦁ ꦧꦤ꧀ꦣꦤꦁ ꦥꦗꦴꦤꦁ ꦮꦛ꧀ꦛꦺ ꦎꦱꦷꦢꦴꦥꦤꦱꦩꦠ꧀ꦡꦁ ꦢꦱꦮꦶꦣꦁ ꦱꦁꦪꦺꦴꦗꦤꦁ. ꦄꦟꦸꦁ ꦡꦹꦭꦤ꧀ꦠꦶ ꦩꦲꦤ꧀ꦠꦚ꧀ꦕ ꦑꦸꦢ꧀ꦢꦏꦚ꧀ꦕ. ꦝꦲꦁ ꦄꦒ꧀ꦒꦷꦮ ꦒꦕ꧀ꦖꦠꦷꦠꦶ ꦪꦡꦴ ꦄꦪꦁ ꦄꦒ꧀ꦒꦷ ꦌꦠꦁ ꦩꦲꦤ꧀ꦠꦚ꧀ꦕ ꦑꦸꦢ꧀ꦢꦏꦚ꧀ꦕ ꦈꦥꦴꦢꦴꦤꦁ ꦝꦲꦤ꧀ꦠꦺꦴꦮ ꦒꦕ꧀ꦖꦠꦶ. ꦌꦮꦩꦺꦱꦺꦴ ꦄꦥ꧀ꦥꦩꦴꦢꦫꦠꦺꦴ ꦨꦶꦏ꧀ꦑꦸ ꦄꦥ꧀ꦥꦩꦴꦢꦴꦣꦶꦒꦠꦺꦤ ꦚꦴꦟꦒ꧀ꦒꦶꦤꦴ ꦌꦠꦁ ꦱꦁꦪꦺꦴꦗꦤꦁ ꦝꦲꦤ꧀ꦠꦺꦴ ꦄꦨꦧ꧀ꦧꦸꦥ꧀ꦥꦠ꧀ꦠꦶꦏꦁ ꦏꦫꦺꦴꦤ꧀ꦠꦺꦴ ꦒꦕ꧀ꦖꦠꦷꦠꦶ ꦄꦠ꧀ꦡꦺꦴ.

ꦒꦴꦡꦴꦥꦫꦶꦪꦺꦴꦱꦴꦤꦺ ꦱꦺꦴ ꦨꦶꦏ꧀ꦑꦸ ꦪꦡꦴꦤꦶꦱꦶꦤ꧀ꦤꦺꦴꦮ ꦱꦧ꧀ꦧꦱꦁꦪꦺꦴꦗꦤꦴꦤꦶ ꦙꦴꦥꦺꦠ꧀ꦮꦴ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦠ꧀ꦮꦴ ꦄꦴꦏꦴꦱꦺꦤꦴꦒꦤ꧀ꦠ꧀ꦮꦴ ꦠꦡꦴꦒꦠꦱ꧀ꦱ ꦱꦸꦮꦟ꧀ꦟꦮꦟ꧀ꦟꦁ ꦱꦫꦷꦫꦁ ꦡꦺꦴꦩꦺꦠ꧀ꦮꦴ ꦮꦟ꧀ꦟꦺꦠ꧀ꦮꦴ ꦮꦤ꧀ꦢꦩꦴꦤꦺꦴꦮ ꦥꦏ꧀ꦏꦴꦩꦷꦠꦶ.

ꦄꦚ꧀ꦚꦠꦫꦨꦶꦏ꧀ꦑꦸꦮꦠ꧀ꦡꦸ ꦄꦛ꧀ꦜꦩꦁ.