꧑꧔. ꦌꦏꦫꦴꦗꦕꦫꦶꦪꦴꦮꦟ꧀ꦟꦤꦴ

꧑꧑꧔. ꦕꦸꦢ꧀ꦢꦱꦩꦺ ꦌꦏꦫꦴꦗꦴꦠꦶ ꦮꦶꦱ꧀ꦱꦸꦠꦺꦴꦠꦶ ꦌꦏꦫꦴꦗꦴꦠꦶ ꦆꦩꦶꦤꦴ ꦄꦤ꧀ꦮꦠ꧀ꦡꦤꦴꦩꦺꦤ ꦗꦩ꧀ꦧꦸꦢꦷꦥꦠꦭꦺ ꦥꦴꦏꦛꦺꦴ.

ꦩꦲꦴꦱꦠ꧀ꦠꦺꦴ ꦲꦶ ꦠꦢꦴ ꦧꦴꦫꦴꦟꦱꦶꦫꦚ꧀ꦚꦺꦴ ꦥꦸꦠ꧀ꦠꦺꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶ. ꦮꦪꦥ꧀ꦥꦠ꧀ꦠꦺꦴ ꦱꦧ꧀ꦧꦱꦶꦥ꧀ꦥꦤꦶꦥ꧀ꦦꦠ꧀ꦠꦶꦁ ꦥꦠ꧀ꦠꦺꦴ ꦲꦸꦠ꧀ꦮꦴ ꦥꦶꦠꦸ ꦄꦕ꧀ꦕꦪꦺꦤ ꦫꦗ꧀ꦗꦁ ꦏꦴꦫꦺꦤ꧀ꦠꦺꦴ ꦏꦸꦱꦭꦱꦷꦭꦴꦕꦴꦫꦱꦢ꧀ꦣꦴꦱꦸꦠꦴꦢꦶꦄꦤꦚ꧀ꦚꦱꦴꦣꦴꦫꦟꦒꦸꦟꦮꦶꦱꦺꦱꦪꦺꦴꦒꦺꦤ ꦥꦴꦫꦩꦶꦥꦫꦶꦨꦴꦮꦤꦺꦤ ꦕ ꦗꦩ꧀ꦧꦸꦢꦷꦥꦠꦭꦺ ꦄꦢꦸꦠꦶꦪꦠ꧀ꦠꦴ ꦥꦣꦴꦤꦨꦴꦮꦺꦤ ꦕ ‘‘ꦌꦏꦫꦴꦗꦴ’’ꦠꦶ ꦥꦏꦴꦱꦤꦴꦩꦺꦴ ꦄꦲꦺꦴꦱꦶ. ꦥꦫꦩꦁ ꦱꦷꦭꦁ ꦄꦣꦶꦛ꧀ꦜꦴꦪꦴꦠꦶ ꦱꦸꦥꦫꦶꦱꦸꦢ꧀ꦣꦏꦴꦪꦶꦏꦮꦴꦕꦱꦶꦏꦱꦁꦮꦫꦱꦔ꧀ꦑꦴꦠꦚ꧀ꦕꦺꦮ ꦱꦸꦥꦫꦶꦱꦸꦢ꧀ꦣꦩꦤꦺꦴꦱꦩꦴꦕꦴꦫꦱꦔ꧀ꦑꦴꦠꦚ꧀ꦕ ꦥꦫꦩꦁ ꦈꦠ꧀ꦠꦩꦁ ꦢꦱꦏꦸꦱꦭꦏꦩ꧀ꦩꦥꦡꦱꦷꦭꦁ ꦱꦩꦴꦢꦴꦤꦮꦱꦺꦤ ꦕ ꦄꦮꦷꦠꦶꦏ꧀ꦏꦩꦤꦮꦱꦺꦤ ꦕ ꦄꦣꦶꦛ꧀ꦜꦲꦶꦠ꧀ꦮꦴ ꦄꦤꦸꦛ꧀ꦜꦲꦶꦠ꧀ꦮꦴ. ꦥꦱꦴꦱꦴꦩꦶ ꦩꦲꦴꦩꦲꦶꦤ꧀ꦠꦶ ꦠꦶꦪꦺꦴꦗꦤꦱꦠꦶꦏꦺ ꦏꦴꦱꦶꦫꦛ꧀ꦜꦺ ꦩꦲꦠꦶꦁ ꦩꦲꦶꦁ ꦄꦤꦸꦱꦴꦱꦴꦩꦶ ꦫꦗ꧀ꦗꦁ ꦏꦴꦫꦺꦩꦶ.

꧑꧑꧕. ꦢꦱꦏꦸꦱꦭꦏꦩ꧀ꦩꦥꦡꦺꦠꦶ ꦥꦴꦟꦴꦠꦶꦥꦴꦠꦴꦮꦺꦫꦩꦟꦶ ꦪꦴꦮ ꦱꦩ꧀ꦩꦴꦢꦶꦛ꧀ꦜꦷꦠꦶ ꦌꦠꦱ꧀ꦩꦶꦁ ꦢꦱꦮꦶꦣꦺ ꦏꦸꦱꦭꦏꦩ꧀ꦩꦥꦡꦺ, ꦌꦠꦺ ꦮꦴ ꦄꦤꦮꦱꦺꦱꦠꦺꦴ ꦱꦩꦴꦢꦴꦪ ꦮꦠ꧀ꦠꦴꦩꦶ. ꦕꦠꦹꦲꦶ ꦱꦔ꧀ꦒꦲꦮꦠ꧀ꦡꦹꦲꦷꦠꦶ ꦢꦴꦤꦁ ꦥꦶꦪꦮꦕꦤꦁ ꦄꦠ꧀ꦡꦕꦫꦶꦪꦴ ꦱꦩꦴꦤꦠ꧀ꦠꦠꦴꦠꦶ ꦆꦩꦺꦲꦶ ꦕꦠꦹꦲꦶ ꦱꦔ꧀ꦒꦲꦮꦠ꧀ꦡꦹꦲꦶ ꦱꦔ꧀ꦒꦟ꧀ꦲꦤꦏꦴꦫꦟꦺꦲꦶ ꦪꦢꦴ ꦌꦏꦫꦴꦗꦴꦠꦶ ꦮꦶꦱ꧀ꦱꦸꦠꦺꦴ ꦲꦺꦴꦩꦶ, ꦠꦢꦴ ꦪꦡꦴꦫꦲꦁ ꦩꦲꦴꦗꦤꦁ ꦱꦔ꧀ꦒꦟ꧀ꦲꦴꦩꦷꦠꦶ ꦱꦩ꧀ꦧꦤ꧀ꦣꦺꦴ.

꧑꧑꧖. ꦌꦮꦤ꧀ꦠꦶ ꦢꦱꦏꦸꦱꦭꦏꦩ꧀ꦩꦥꦡꦱꦷꦭꦥꦫꦶꦥꦹꦫꦟꦁ ꦕꦠꦹꦲꦶ ꦱꦔ꧀ꦒꦲꦮꦠ꧀ꦡꦹꦲꦶ ꦩꦲꦴꦗꦤꦱꦔ꧀ꦒꦟ꧀ꦲꦤꦤ꧀ꦠꦶ ꦪꦡꦴꦮꦸꦠ꧀ꦠꦺꦤ ꦆꦩꦶꦤꦴ ꦄꦴꦏꦴꦫꦺꦤ ꦄꦥ꧀ꦥꦩꦠ꧀ꦠꦱ꧀ꦱ. ꦆꦣꦭꦺꦴꦏꦺ ꦥꦫꦠ꧀ꦡ ꦕꦴꦠꦶ ꦆꦩꦱ꧀ꦩꦶꦁ ꦭꦺꦴꦏꦺ ꦪꦁ ꦄꦥ꧀ꦥꦩꦗ꧀ꦗꦤꦁ, ꦠꦠ꧀ꦡ ꦢꦶꦛ꧀ꦜꦣꦩ꧀ꦩꦶꦏꦺ ꦄꦠ꧀ꦡꦺ, ꦥꦫꦭꦺꦴꦏꦺ ꦪꦁ ꦄꦥ꧀ꦥꦩꦗ꧀ꦗꦤꦁ ꦠꦠ꧀ꦡ ꦱꦩ꧀ꦥꦫꦴꦪꦶꦏꦺ ꦄꦠ꧀ꦡꦺ ꦄꦥ꧀ꦥꦩꦠ꧀ꦠꦱ꧀ꦱ ꦩꦺ ꦱꦠꦺꦴꦠꦶ ꦄꦠ꧀ꦡꦺꦴ. ꦢꦧ꧀ꦧꦱꦺꦤꦺꦴꦠꦶ ꦌꦮꦁꦤꦴꦩꦏꦺꦴ ꦏꦺꦴꦱꦭꦫꦴꦗꦴ. ꦈꦥꦒꦤ꧀ꦠ꧀ꦮꦴꦠꦶ ꦕꦠꦸꦫꦔ꧀ꦒꦶꦤꦶꦁ ꦱꦺꦤꦁ ꦱꦤ꧀ꦤꦪ꧀ꦲꦶꦠ꧀ꦮꦴ ꦄꦧ꧀ꦨꦸꦪ꧀ꦪꦴꦤꦮꦱꦺꦤ ꦩꦩ ꦫꦗ꧀ꦗꦁ ꦈꦥꦒꦤ꧀ꦠ꧀ꦮꦴ. ꦄꦕ꧀ꦖꦶꦤ꧀ꦢꦤ꧀ꦠꦺꦴ ꦥꦸꦫꦁ ꦩꦩꦴꦠꦶ ꦩꦩ ꦧꦴꦫꦴꦟꦱꦶꦤꦒꦫꦁ ꦧꦭꦏ꧀ꦏꦴꦫꦺꦤ ꦒꦟ꧀ꦲꦤ꧀ꦠꦺꦴ.

ꦠꦠ꧀ꦫꦴꦪꦁ ꦄꦤꦸꦥꦸꦧ꧀ꦧꦶꦏꦡꦴ – ꦩꦲꦴꦱꦠ꧀ꦠꦺꦴ ꦲꦶ ꦠꦢꦴ ꦤꦒꦫꦱ꧀ꦱ ꦕꦠꦹꦱꦸ ꦢ꧀ꦮꦴꦫꦺꦱꦸ ꦕꦠꦱ꧀ꦱꦺꦴ ꦩꦗ꧀ꦙꦺ ꦌꦏꦁ ꦤꦶꦮꦺꦱꦤꦢ꧀ꦮꦴꦫꦺ ꦌꦏꦤ꧀ꦠꦶ ꦖ ꦢꦴꦤꦱꦴꦭꦴꦪꦺꦴ ꦏꦴꦫꦺꦠ꧀ꦮꦴ ꦏꦥꦟꦢ꧀ꦣꦶꦏꦴꦢꦷꦤꦁ ꦢꦴꦤꦁ ꦢꦺꦠꦶ, ꦱꦷꦭꦁ ꦫꦏ꧀ꦑꦠꦶ, ꦈꦥꦺꦴꦱꦡꦏꦩ꧀ꦩꦁ ꦏꦫꦺꦴꦠꦶ, ꦑꦤ꧀ꦠꦶꦩꦺꦠ꧀ꦠꦴꦤꦸꦢ꧀ꦢꦪꦱꦩ꧀ꦥꦤ꧀ꦤꦺꦴ ꦄꦔ꧀ꦏꦺ ꦤꦶꦱꦶꦤ꧀ꦤꦁ ꦥꦸꦠ꧀ꦠꦁ ꦥꦫꦶꦠꦺꦴꦱꦪꦩꦴꦤꦺꦴ ꦮꦶꦪ ꦱꦧ꧀ꦧꦱꦠ꧀ꦠꦺ ꦥꦫꦶꦠꦺꦴꦱꦪꦩꦴꦤꦺꦴ ꦣꦩ꧀ꦩꦺꦤ ꦫꦗ꧀ꦗꦁ ꦏꦴꦫꦺꦠꦶ. ꦠꦱ꧀ꦱꦺꦏꦺꦴ ꦄꦩꦕ꧀ꦕꦺꦴ ꦄꦤ꧀ꦠꦺꦥꦸꦫꦁ ꦥꦢꦸꦱ꧀ꦱꦶꦠ꧀ꦮꦴ ꦄꦥꦫꦨꦴꦒꦺ ꦥꦴꦏꦛꦺꦴꦮ ꦗꦴꦠꦺꦴ. ꦄꦩꦕ꧀ꦕꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦸꦁ. ꦫꦴꦗꦴ ꦥꦫꦶꦒ꧀ꦒꦟ꧀ꦲꦤ꧀ꦠꦺꦴ ꦠꦁ ꦄꦠ꧀ꦠꦤꦴ ꦥꦕ꧀ꦕꦏ꧀ꦑꦠꦺꦴ ꦚꦠ꧀ꦮꦴ ꦠꦁ ꦄꦩꦕ꧀ꦕꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ‘‘ꦄꦤ꧀ꦣꦧꦴꦭ, ꦄꦪꦸꦠ꧀ꦠꦁ ꦠꦺ ꦏꦠꦁ, ꦤ ꦠ꧀ꦮꦁ ꦩꦩ ꦮꦶꦗꦶꦠꦺ ꦮꦱꦶꦠꦸꦁ ꦄꦫꦲꦱꦶ, ꦄꦠ꧀ꦠꦤꦺꦴ ꦣꦤꦚ꧀ꦕ ꦥꦸꦠ꧀ꦠꦢꦴꦫꦚ꧀ꦕ ꦒꦲꦺꦠ꧀ꦮꦴ ꦄꦚ꧀ꦚꦠ꧀ꦡ ꦪꦴꦲꦷ’’ꦠꦶ ꦫꦛ꧀ꦜꦴ ꦥꦧ꧀ꦧꦴꦗꦺꦱꦶ.

ꦱꦺꦴ ꦏꦺꦴꦱꦭꦗꦤꦥꦢꦁ ꦒꦤ꧀ꦠ꧀ꦮꦴ ꦢꦧ꧀ꦧꦱꦺꦤꦁ ꦤꦴꦩ ꦏꦺꦴꦱꦭꦫꦴꦗꦴꦤꦁ ꦈꦥꦛ꧀ꦜꦲꦤ꧀ꦠꦺꦴ ꦄꦤꦸꦏ꧀ꦏꦩꦺꦤ ꦠꦱ꧀ꦱ ꦮꦶꦱ꧀ꦱꦴꦱꦶꦏꦺꦴ ꦲꦸꦠ꧀ꦮꦴ ꦌꦏꦢꦶꦮꦱꦁ ꦠꦁ ꦫꦴꦗꦴꦤꦁ ꦄꦴꦲ – ‘‘ꦢꦺꦮ, ꦧꦴꦫꦴꦟꦱꦶꦫꦗ꧀ꦗꦁ ꦤꦶꦩ꧀ꦩꦏ꧀ꦑꦶꦏꦩꦣꦸꦥꦛꦭꦱꦢꦶꦱꦁ, ꦄꦠꦶꦩꦸꦢꦸꦏꦺꦴ ꦫꦴꦗꦴ, ꦱꦸꦑꦺꦤꦺꦮ ꦠꦁ ꦫꦗ꧀ꦗꦁ ꦒꦟ꧀ꦲꦶꦠꦸꦁ ꦱꦏ꧀ꦏꦺꦴꦱꦷ’’ꦠꦶ. ꦢꦧ꧀ꦧꦱꦺꦤꦺꦴ ꦧꦴꦫꦴꦟꦱꦶꦫꦚ꧀ꦚꦺꦴ ꦩꦲꦴꦤꦸꦨꦴꦮꦠꦴꦪ ꦠꦱ꧀ꦱ ꦮꦕꦤꦁ ꦄꦱꦢ꧀ꦢꦲꦤ꧀ꦠꦺꦴ ꦩꦤꦸꦱ꧀ꦱꦺ ꦥꦺꦱꦺꦠ꧀ꦮꦴ ꦏꦴꦱꦶꦫꦛ꧀ꦜꦺ ꦒꦴꦩꦓꦴꦠꦴꦢꦷꦤꦶ ꦏꦴꦫꦺꦠ꧀ꦮꦴ ꦠꦺꦱꦁ ꦕꦺꦴꦫꦴꦤꦁ ꦧꦺꦴꦣꦶꦱꦠ꧀ꦠꦺꦤ ꦣꦤꦁ ꦢꦠ꧀ꦮꦴ ꦮꦶꦱ꧀ꦱꦗ꧀ꦗꦶꦠꦨꦴꦮꦁ ꦱꦸꦠ꧀ꦮꦴ ‘‘ꦄꦠꦶꦮꦶꦪ ꦣꦩ꧀ꦩꦶꦏꦺꦴ ꦫꦴꦗꦴ’’ꦠꦶ ꦚꦠ꧀ꦮꦴ ‘‘ꦧꦴꦫꦴꦟꦱꦶꦫꦗ꧀ꦗꦁ ꦒꦟ꧀ꦲꦶꦱ꧀ꦱꦴꦩꦷ’’ꦠꦶ ꦧꦭꦮꦴꦲꦤꦁ ꦄꦴꦢꦴꦪ ꦤꦶꦪ꧀ꦪꦴꦱꦶ. ꦄꦡ ꦧꦴꦫꦴꦟꦱꦶꦫꦚ꧀ꦚꦺꦴ ꦩꦲꦴꦪꦺꦴꦣꦴ ‘‘ꦏꦺꦴꦱꦭꦫꦴꦗꦴ ꦄꦴꦒꦕ꧀ꦖꦠꦷ’’ꦠꦶ ꦱꦸꦠ꧀ꦮꦴ ‘‘ꦄꦩ꧀ꦲꦴꦏꦁ ꦫꦗ꧀ꦗꦱꦷꦩꦁ ꦄꦤꦺꦴꦏ꧀ꦏꦩꦤ꧀ꦠꦩꦺꦮ ꦤꦁ ꦥꦺꦴꦡꦺꦠ꧀ꦮꦴ ꦒꦟ꧀ꦲꦴꦩꦴ’’ꦠꦶ ꦄꦠ꧀ꦠꦤꦺꦴ ꦫꦚ꧀ꦚꦺꦴ ꦮꦢꦶꦁꦱꦸ.

ꦧꦺꦴꦣꦶꦱꦠ꧀ꦠꦺꦴ ‘‘ꦠꦴꦠꦴ, ꦩꦁ ꦤꦶꦱ꧀ꦱꦴꦪ ꦄꦚ꧀ꦚꦺꦱꦁ ꦏꦶꦭꦩꦤꦏꦶꦕ꧀ꦕꦁ ꦤꦠ꧀ꦡꦶ, ꦫꦗ꧀ꦗꦠ꧀ꦡꦶꦏꦴ ꦫꦗ꧀ꦗꦁ ꦒꦟ꧀ꦲꦤ꧀ꦠꦸ, ꦩꦴ ꦒꦩꦶꦠ꧀ꦡꦴ’’ꦠꦶ ꦤꦶꦮꦴꦫꦺꦱꦶ. ꦏꦺꦴꦱꦭꦫꦴꦗꦴ ꦗꦤꦥꦢꦩꦗ꧀ꦙꦁ ꦥꦴꦮꦶꦱꦶ. ꦩꦲꦴꦪꦺꦴꦣꦴ ꦥꦸꦤꦥꦶ ꦫꦚ꧀ꦚꦺꦴ ꦠꦡꦺꦮ ꦮꦢꦶꦁꦱꦸ. ꦫꦴꦗꦴ ꦥꦸꦫꦶꦩꦤꦪꦺꦤꦺꦮ ꦤꦶꦮꦴꦫꦺꦱꦶ. ꦢꦧ꧀ꦧꦱꦺꦤꦺꦴ ꦧꦲꦶꦤꦒꦫꦺ ꦜꦠ꧀ꦮꦴ ‘‘ꦫꦗ꧀ꦗꦁ ꦮꦴ ꦢꦺꦠꦸ ꦪꦸꦢ꧀ꦣꦁ ꦮꦴ’’ꦠꦶ ꦌꦏꦫꦴꦗꦱ꧀ꦱ ꦱꦴꦱꦤꦁ ꦥꦺꦱꦺꦱꦶ. ꦌꦏꦫꦴꦗꦴ ‘‘ꦤꦠ꧀ꦡꦶ ꦩꦪꦴ ꦪꦸꦢ꧀ꦣꦁ, ꦫꦗ꧀ꦗꦁ ꦒꦟ꧀ꦲꦴꦠꦹ’’ꦠꦶ ꦥꦛꦶꦱꦴꦱꦤꦁ ꦥꦺꦱꦺꦱꦶ. ꦥꦸꦤꦥꦶ ꦩꦲꦴꦪꦺꦴꦣꦴ ‘‘ꦢꦺꦮ, ꦤ ꦩꦪꦁ ꦏꦺꦴꦱꦭꦫꦚ꧀ꦚꦺꦴ ꦤꦒꦫꦁ ꦥꦮꦶꦱꦶꦠꦸꦁ ꦢꦺꦩ, ꦧꦲꦶꦤꦒꦫꦺꦪꦺꦮ ꦤꦁ ꦥꦺꦴꦡꦺꦠ꧀ꦮꦴ ꦒꦟ꧀ꦲꦴꦩꦴ’’ꦠꦶ ꦄꦴꦲꦁꦱꦸ. ꦫꦴꦗꦴ ꦥꦸꦫꦶꦩꦤꦪꦺꦤꦺꦮ ꦤꦶꦮꦴꦫꦺꦠ꧀ꦮꦴ ꦤꦒꦫꦢ꧀ꦮꦴꦫꦴꦤꦶ ꦄꦮꦴꦥꦸꦫꦴꦥꦺꦠ꧀ꦮꦴ ꦩꦲꦴꦠꦭꦺ ꦥꦭ꧀ꦭꦔ꧀ꦏꦩꦗ꧀ꦙꦺ ꦤꦶꦱꦷꦢꦶ. ꦢꦧ꧀ꦧꦱꦺꦤꦺꦴ ꦩꦲꦤ꧀ꦠꦺꦤ ꦧꦭꦮꦴꦲꦤꦺꦤ ꦤꦒꦫꦁ ꦥꦮꦶꦱꦶꦠ꧀ꦮꦴ ꦌꦏꦩ꧀ꦥꦶ ꦥꦛꦶꦱꦠ꧀ꦠꦸꦁ ꦄꦥꦱ꧀ꦱꦤ꧀ꦠꦺꦴ ꦱꦧ꧀ꦧꦫꦗ꧀ꦗꦁ ꦲꦠ꧀ꦡꦒꦠꦁ ꦏꦠ꧀ꦮꦴ ꦫꦴꦗꦤꦶꦮꦺꦱꦤꦁ ꦒꦤ꧀ꦠ꧀ꦮꦴ ꦩꦲꦴꦠꦭꦁ ꦄꦴꦫꦸꦪ꧀ꦲ ꦤꦶꦫꦥꦫꦴꦣꦁ ꦧꦺꦴꦣꦶꦱꦠ꧀ꦠꦁ ꦒꦟ꧀ꦲꦴꦥꦺꦠ꧀ꦮꦴ ꦄꦴꦮꦴꦛꦺ ꦤꦶꦑꦟꦴꦥꦺꦱꦶ. ꦠꦺꦤ ꦮꦸꦠ꧀ꦠꦁ –

‘‘ꦢꦧ꧀ꦧꦱꦺꦤꦺꦴ ꦈꦥꦒꦤ꧀ꦠ꧀ꦮꦴ, ꦄꦕ꧀ꦖꦶꦤ꧀ꦢꦤ꧀ꦠꦺꦴ ꦥꦸꦫꦁ ꦩꦩ.

꧑꧑꧗. ‘‘ꦫꦴꦗꦹꦥꦗꦷꦮꦺ ꦤꦶꦒꦩꦺ, ꦱꦧꦭꦛ꧀ꦜꦺ ꦱꦫꦛ꧀ꦜꦏꦺ;

ꦱꦧ꧀ꦧꦁ ꦲꦠ꧀ꦡꦒꦠꦁ ꦏꦠ꧀ꦮꦴ, ꦏꦴꦱꦸꦪꦴ ꦤꦶꦑꦟꦷ ꦩꦩ’’ꦤ꧀ꦠꦶ.

ꦠꦠ꧀ꦡ ꦫꦴꦗꦹꦥꦗꦷꦮꦺꦠꦶ ꦄꦩꦕ꧀ꦕꦥꦴꦫꦶꦱꦗ꧀ꦗꦧ꧀ꦫꦴꦲ꧀ꦩꦟꦒꦲꦥꦠꦶꦄꦴꦢꦶꦏꦺ ꦫꦴꦗꦴꦤꦁ ꦈꦥꦤꦶꦱ꧀ꦱꦴꦪ ꦗꦷꦮꦤ꧀ꦠꦺ. ꦤꦶꦒꦩꦺꦠꦶ ꦤꦺꦒꦩꦺ. ꦱꦧꦭꦛ꧀ꦜꦺꦠꦶ ꦱꦺꦤꦴꦥꦫꦶꦪꦴꦥꦤ꧀ꦤꦠꦴꦪ ꦧꦭꦺ ꦠꦶꦛ꧀ꦜꦤ꧀ꦠꦷꦠꦶ ꦧꦭꦛ꧀ꦜꦴ, ꦲꦠ꧀ꦡꦴꦫꦺꦴꦲꦴꦢꦪꦺꦴ, ꦧꦭꦛ꧀ꦜꦺꦲꦶ ꦱꦲꦴꦠꦶ ꦱꦧꦭꦛ꧀ꦜꦺ. ꦱꦫꦛ꧀ꦜꦏꦺꦠꦶ ꦱꦗꦤꦥꦢꦺ, ꦫꦴꦗꦹꦥꦗꦷꦮꦺ ꦤꦶꦒꦩꦺ ꦕ ꦄꦚ꧀ꦚꦚ꧀ꦕ ꦱꦧ꧀ꦧꦁ ꦲꦠ꧀ꦡꦒꦠꦁ ꦏꦠ꧀ꦮꦴ. ꦏꦴꦱꦸꦪꦴ ꦤꦶꦑꦟꦷ ꦩꦩꦤ꧀ꦠꦶ ꦱꦧꦭꦮꦴꦲꦤꦁ ꦱꦏꦭꦁ ꦩꦩ ꦫꦗ꧀ꦗꦁ ꦒꦲꦺꦠ꧀ꦮꦴ ꦩꦩ꧀ꦥꦶ ꦒꦭꦥ꧀ꦥꦩꦴꦟꦺ ꦄꦴꦮꦴꦛꦺ ꦤꦶꦑꦟꦴꦥꦺꦱꦶ. ꦗꦴꦠꦏꦺꦥꦶ –

‘‘ꦄꦤꦸꦠ꧀ꦠꦫꦺ ꦏꦴꦩꦒꦸꦟꦺ ꦱꦩꦶꦢ꧀ꦣꦺ, ꦨꦸꦠ꧀ꦮꦴꦤ ꦥꦸꦧ꧀ꦧꦺ ꦮꦱꦶ ꦌꦏꦫꦴꦗꦴ;

ꦱꦺꦴ ꦢꦴꦤꦶ ꦢꦸꦒ꧀ꦒꦺ ꦤꦫꦏꦩ꧀ꦲꦶ ꦑꦶꦠ꧀ꦠꦺꦴ, ꦤꦥ꧀ꦥꦗ꧀ꦗꦲꦺ ꦮꦟ꧀ꦟꦧꦭꦁ ꦥꦸꦫꦴꦟ’’ꦤ꧀ꦠꦶ. (ꦗꦴ. ꧑.꧔.꧙) –

ꦄꦴꦮꦴꦛꦺ ꦑꦶꦠ꧀ꦠꦨꦴꦮꦺꦴ ꦄꦴꦒꦠꦺꦴ. ꦗꦴꦠꦏꦛ꧀ꦜꦏꦡꦴꦪꦁ (ꦗꦴ. ꦄꦛ꧀ꦜ. ꧓.꧔.꧙) ꦥꦤ ‘‘ꦱꦶꦏ꧀ꦏꦴꦪ ꦥꦏ꧀ꦑꦶꦥꦴꦥꦺꦠ꧀ꦮꦴ ꦈꦠ꧀ꦠꦫꦸꦩ꧀ꦩꦴꦫꦺ ꦲꦺꦛ꧀ꦜꦴꦱꦷꦱꦏꦁ ꦎꦭꦩ꧀ꦧꦺꦱꦷ’’ꦠꦶ ꦮꦸꦠ꧀ꦠꦁ.

ꦩꦲꦴꦱꦠ꧀ꦠꦺꦴ ꦕꦺꦴꦫꦫꦴꦗꦴꦤꦁ ꦄꦴꦫꦧ꧀ꦨ ꦩꦺꦠ꧀ꦠꦁ ꦨꦴꦮꦺꦠ꧀ꦮꦴ ꦏꦱꦶꦟꦥꦫꦶꦏꦩ꧀ꦩꦁ ꦏꦠ꧀ꦮꦴ ꦙꦴꦤꦴꦨꦶꦚ꧀ꦚꦴꦪꦺꦴ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦏꦴꦱꦸꦠꦺꦴ ꦈꦒ꧀ꦒꦤ꧀ꦠ꧀ꦮꦴ ꦄꦴꦏꦴꦱꦺ ꦥꦭ꧀ꦭꦔ꧀ꦏꦺꦤ ꦤꦶꦱꦷꦢꦶ. ꦠꦺꦤ ꦮꦸꦠ꧀ꦠꦁ –

꧑꧑꧘. ‘‘ꦄꦩꦕ꧀ꦕꦩꦟ꧀ꦝꦭꦁ ꦫꦗ꧀ꦗꦁ, ꦦꦷꦠꦁ ꦄꦤ꧀ꦠꦺꦥꦸꦫꦁ ꦩꦩ;

ꦄꦕ꧀ꦖꦶꦤ꧀ꦢꦶꦠ꧀ꦮꦴꦤ ꦒꦲꦶꦠꦁ, ꦥꦶꦪꦥꦸꦠ꧀ꦠꦁꦮ ꦥꦱ꧀ꦱꦲ’’ꦤ꧀ꦠꦶ.

ꦠꦠ꧀ꦡ ꦄꦩꦕ꧀ꦕꦩꦟ꧀ꦝꦭꦤ꧀ꦠꦶ ꦠꦱ꧀ꦩꦶꦁ ꦠꦱ꧀ꦩꦶꦁ ꦫꦴꦗꦏꦶꦕ꧀ꦕꦺ ꦫꦚ꧀ꦚꦴ ꦄꦩꦴ ꦱꦲ ꦮꦠ꧀ꦠꦤ꧀ꦠꦷꦠꦶ ꦄꦩꦕ꧀ꦕꦴ, ꦱꦢ꧀ꦣꦶꦁ ꦮꦴ ꦠꦺꦱꦁ ꦩꦟ꧀ꦝꦭꦁ ꦱꦩꦹꦲꦁ. ꦦꦷꦠꦤ꧀ꦠꦶ ꦧꦭꦮꦴꦲꦤꦺꦤ ꦤꦒꦫꦗꦤꦥꦢꦴꦢꦷꦲꦶ ꦱꦩꦶꦢ꧀ꦣꦁ ꦫꦗ꧀ꦗꦁ. ꦆꦠ꧀ꦡꦴꦒꦴꦫꦢꦴꦱꦶꦢꦴꦱꦥꦫꦶꦗꦤꦺꦲꦶ ꦕꦺꦮ ꦮꦠ꧀ꦡꦴꦨꦫꦟꦴꦢꦶꦈꦥꦨꦺꦴꦒꦹꦥꦏꦫꦟꦺꦲꦶ ꦕ ꦱꦩꦶꦢ꧀ꦣꦁ ꦩꦩ ꦄꦤ꧀ꦠꦺꦥꦸꦫꦚ꧀ꦕ ꦄꦕ꧀ꦖꦶꦤ꧀ꦢꦶꦠ꧀ꦮꦴ ꦒꦲꦶꦠꦏꦁ ꦒꦟ꧀ꦲꦤ꧀ꦠꦁ ꦄꦩꦶꦠ꧀ꦠꦫꦴꦗꦴꦤꦁ ꦪꦴꦪ ꦄꦠ꧀ꦠꦤꦺꦴ ꦥꦶꦪꦥꦸꦠ꧀ꦠꦁꦮ ꦥꦱ꧀ꦱꦶꦁ ꦄꦲꦁ, ꦠꦴꦪ ꦌꦮꦁꦨꦹꦠꦴꦪ ꦩꦺꦠ꧀ꦠꦴꦪ ꦩꦺ ꦱꦩꦺꦴ ꦱꦏꦭꦭꦺꦴꦏꦺ ꦤꦠ꧀ꦡꦶ, ꦠꦱ꧀ꦩꦴ ꦌꦮꦁꦨꦹꦠꦴ ꦌꦱꦴ ꦩꦺ ꦩꦺꦠ꧀ꦠꦴꦥꦴꦫꦩꦷ ꦥꦫꦩꦠ꧀ꦡꦥꦴꦫꦩꦶꦨꦴꦮꦁ ꦥꦠ꧀ꦠꦴꦠꦶ ꦄꦣꦶꦥ꧀ꦥꦴꦪꦺꦴ.

ꦌꦮꦁ ꦥꦤ ꦩꦲꦴꦱꦠ꧀ꦠꦺ ꦠꦁ ꦕꦺꦴꦫꦫꦴꦗꦴꦤꦁ ꦄꦴꦫꦧ꧀ꦨ ꦩꦺꦠ꧀ꦠꦁ ꦦꦫꦶꦠ꧀ꦮꦴ ꦄꦴꦏꦴꦱꦺ ꦥꦭ꧀ꦭꦔ꧀ꦏꦺꦤ ꦤꦶꦱꦶꦤ꧀ꦤꦺ ꦠꦱ꧀ꦱ ꦱꦫꦷꦫꦺ ꦢꦴꦲꦺꦴ ꦈꦥ꧀ꦥꦗ꧀ꦗꦶ. ꦱꦺꦴ ‘‘ꦝꦪ꧀ꦲꦴꦩꦶ ꦝꦪ꧀ꦲꦴꦩꦷ’’ꦠꦶ ꦨꦹꦩꦶꦪꦁ ꦄꦥꦫꦴꦥꦫꦁ ꦥꦫꦶꦮꦠ꧀ꦠꦠꦶ. ‘‘ꦏꦶꦩꦺꦠ’’ꦤ꧀ꦠꦶ ꦮꦸꦠ꧀ꦠꦺ, ꦩꦲꦴꦫꦴꦗ, ꦠꦸꦩ꧀ꦲꦺ ꦤꦶꦫꦥꦫꦴꦣꦁ ꦣꦩ꧀ꦩꦶꦏꦫꦴꦗꦴꦤꦁ ꦄꦴꦮꦴꦛꦺ ꦤꦶꦑꦟꦴꦥꦪꦶꦠ꧀ꦡꦴꦠꦶ. ‘‘ꦠꦺꦤ ꦲꦶ ꦮꦺꦒꦺꦤ ꦒꦤ꧀ꦠ꧀ꦮꦴ ꦠꦁ ꦈꦢ꧀ꦣꦫꦡꦴ’’ꦠꦶ ꦄꦴꦲ. ꦥꦸꦫꦶꦱꦴ ꦒꦤ꧀ꦠ꧀ꦮꦴ ꦠꦁ ꦫꦴꦗꦴꦤꦁ ꦄꦴꦏꦴꦱꦺ ꦥꦭ꧀ꦭꦔ꧀ꦏꦺꦤ ꦤꦶꦱꦶꦤ꧀ꦤꦁ ꦢꦶꦱ꧀ꦮꦴ ꦄꦴꦒꦤ꧀ꦠ꧀ꦮꦴ ꦢꦧ꧀ꦧꦱꦺꦤꦱ꧀ꦱ ꦄꦴꦫꦺꦴꦕꦺꦱꦸꦁ. ꦱꦺꦴ ꦮꦺꦒꦺꦤ ꦒꦤ꧀ꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦑꦩꦴꦥꦺꦠ꧀ꦮꦴ ‘‘ꦠꦸꦩ꧀ꦲꦴꦏꦁ ꦫꦗ꧀ꦗꦁ ꦠꦸꦩ꧀ꦲꦺꦮ ꦏꦴꦫꦺꦡ, ꦄꦲꦁ ꦮꦺꦴ ꦕꦺꦴꦫꦺ ꦥꦛꦶꦧꦴꦲꦺꦱ꧀ꦱꦴꦩꦷ’’ꦠꦶ ꦮꦠ꧀ꦮꦴ ꦠꦱ꧀ꦱ ꦢꦸꦛ꧀ꦜꦴꦩꦕ꧀ꦕꦱ꧀ꦱ ꦫꦴꦗꦴꦟꦁ ꦏꦴꦫꦺꦠ꧀ꦮꦴ ꦥꦏ꧀ꦏꦴꦩꦶ. ꦧꦺꦴꦣꦶꦱꦠ꧀ꦠꦺꦴꦥꦶ ꦫꦗ꧀ꦗꦁ ꦄꦩꦕ꧀ꦕꦴꦤꦁ ꦤꦶꦪ꧀ꦪꦴꦠꦺꦠ꧀ꦮꦴ ꦆꦱꦶꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦩꦲꦴꦗꦤꦁ ꦱꦷꦭꦴꦢꦶꦒꦸꦟꦺꦱꦸ ꦥꦠꦶꦛ꧀ꦜꦴꦥꦺꦠ꧀ꦮꦴ ꦄꦴꦪꦸꦥꦫꦶꦪꦺꦴꦱꦴꦤꦺ ꦧ꧀ꦫꦲ꧀ꦩꦭꦺꦴꦏꦥꦫꦴꦪꦤꦺꦴ ꦄꦲꦺꦴꦱꦶ.

ꦠꦢꦴ ꦢꦧ꧀ꦧꦱꦺꦤꦺꦴ ꦄꦴꦤꦤ꧀ꦢꦠ꧀ꦡꦺꦫꦺꦴ ꦄꦲꦺꦴꦱꦶ, ꦌꦏꦫꦴꦗꦴ ꦭꦺꦴꦏꦤꦴꦡꦺꦴ.

ꦠꦱ꧀ꦱ ꦢꦶꦮꦱꦺ ꦢꦶꦮꦱꦺ ꦖꦱꦸ ꦢꦴꦤꦱꦴꦭꦴꦱꦸ ꦖꦱꦠꦱꦲꦱ꧀ꦱꦮꦶꦱ꧀ꦱꦗ꧀ꦗꦤꦺꦤ ꦥꦕ꧀ꦕꦠ꧀ꦡꦶꦏꦫꦚ꧀ꦚꦺꦴ ꦱꦏꦭꦫꦗ꧀ꦗꦥꦫꦶꦕ꧀ꦕꦴꦒꦺꦤ ꦕ ꦢꦴꦤꦥꦴꦫꦩꦷ, ꦤꦶꦕ꧀ꦕꦱꦷꦭꦈꦥꦺꦴꦱꦡꦏꦩ꧀ꦩꦮꦱꦺꦤ ꦥꦧ꧀ꦧꦗꦶꦠꦱ꧀ꦱ ꦄꦤꦮꦱꦺꦱꦱꦷꦭꦱꦁꦮꦫꦮꦱꦺꦤ ꦕ ꦱꦷꦭꦥꦴꦫꦩꦷ, ꦥꦧ꧀ꦧꦗ꧀ꦗꦴꦮꦱꦺꦤ ꦙꦴꦤꦴꦣꦶꦒꦩꦮꦱꦺꦤ ꦕ ꦤꦺꦏ꧀ꦑꦩ꧀ꦩꦥꦴꦫꦩꦷ, ꦱꦠ꧀ꦠꦴꦤꦁ ꦲꦶꦠꦴꦲꦶꦠꦮꦶꦕꦴꦫꦟꦮꦱꦺꦤ ꦢꦴꦤꦱꦷꦭꦴꦢꦶꦱꦁꦮꦶꦢꦲꦤꦮꦱꦺꦤ ꦕ ꦥꦚ꧀ꦚꦴꦥꦴꦫꦩꦷ, ꦢꦴꦤꦴꦢꦶꦥꦸꦚ꧀ꦚꦱꦩ꧀ꦨꦴꦫꦱ꧀ꦱ ꦄꦧ꧀ꦨꦸꦱ꧀ꦱꦲꦤꦮꦱꦺꦤ ꦏꦴꦩꦮꦶꦠꦏ꧀ꦏꦴꦢꦶꦮꦶꦤꦺꦴꦢꦤꦮꦱꦺꦤ ꦕ ꦮꦷꦫꦶꦪꦥꦴꦫꦩꦷ, ꦢꦸꦛ꧀ꦜꦴꦩꦕ꧀ꦕꦱ꧀ꦱ ꦢꦧ꧀ꦧꦱꦺꦤꦫꦚ꧀ꦚꦺꦴ ꦕ ꦄꦥꦫꦴꦣꦱꦲꦤꦮꦱꦺꦤ ꦑꦤ꧀ꦠꦶꦥꦴꦫꦩꦷ, ꦪꦡꦴꦥꦛꦶꦚ꧀ꦚꦁ ꦢꦴꦤꦴꦢꦶꦤꦴ ꦄꦮꦶꦱꦁꦮꦴꦢꦤꦮꦱꦺꦤ ꦕ ꦱꦕ꧀ꦕꦥꦴꦫꦩꦷ, ꦢꦴꦤꦴꦢꦷꦤꦁ ꦄꦕꦭꦱꦩꦴꦢꦴꦤꦴꦣꦶꦛ꧀ꦜꦴꦤꦮꦱꦺꦤ ꦄꦣꦶꦛ꧀ꦜꦴꦤꦥꦴꦫꦩꦷ, ꦥꦕ꧀ꦕꦠ꧀ꦡꦶꦏꦺꦥꦶ ꦌꦏꦤ꧀ꦠꦺꦤ ꦲꦶꦠꦹꦥꦱꦁꦲꦴꦫꦮꦱꦺꦤ ꦩꦺꦠ꧀ꦠꦴꦙꦴꦤꦤꦶꦧ꧀ꦧꦠ꧀ꦠꦤꦺꦤ ꦕ ꦩꦺꦠ꧀ꦠꦴꦥꦴꦫꦩꦷ, ꦢꦸꦛ꧀ꦜꦴꦩꦕ꧀ꦕꦺꦤ ꦢꦧ꧀ꦧꦱꦺꦤꦺꦤ ꦕ ꦏꦠꦴꦥꦫꦴꦣꦺ ꦲꦶꦠꦺꦱꦷꦲꦶ ꦄꦠ꧀ꦠꦤꦺꦴ ꦄꦩꦕ꧀ꦕꦴꦢꦷꦲꦶ ꦤꦶꦧ꧀ꦧꦠ꧀ꦠꦶꦠꦺ ꦈꦥꦏꦴꦫꦺ ꦕ ꦄꦗ꧀ꦙꦸꦥꦺꦏ꧀ꦑꦟꦺꦤ ꦫꦗ꧀ꦗꦱꦸꦑꦥ꧀ꦥꦠ꧀ꦠꦏꦴꦭꦺ ꦥꦕ꧀ꦕꦠ꧀ꦡꦶꦏꦫꦚ꧀ꦚꦴ ꦤꦫꦏꦺ ꦑꦶꦠ꧀ꦠꦏꦴꦭꦺ ꦱꦩꦴꦤꦕꦶꦠ꧀ꦠꦠꦴꦪ ꦕ ꦈꦥꦺꦏ꧀ꦑꦴꦥꦴꦫꦩꦷ ꦮꦺꦢꦶꦠꦧ꧀ꦧꦴ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦥꦤꦸꦗ꧀ꦗ ꦢꦸꦏ꧀ꦑꦺꦤ ꦱꦸꦑꦁ ꦗꦤꦶꦤ꧀ꦢ, ꦱꦸꦑꦺꦤ ꦮꦴ ꦢꦸꦏ꧀ꦑꦩꦱꦪ꧀ꦲꦱꦴꦲꦶ;

ꦈꦨꦪꦠ꧀ꦡ ꦱꦤ꧀ꦠꦺꦴ ꦄꦨꦶꦤꦶꦧ꧀ꦧꦸꦠꦠ꧀ꦠꦴ, ꦱꦸꦑꦺ ꦕ ꦢꦸꦏ꧀ꦑꦺ ꦕ ꦨꦮꦤ꧀ꦠꦶ ꦠꦸꦭ꧀ꦪꦴ’’ꦠꦶ. (ꦗꦴ. ꧑.꧔.꧑꧒);

ꦪꦱ꧀ꦩꦴ ꦥꦤꦺꦠ꧀ꦡ ꦩꦺꦠ꧀ꦠꦴꦥꦴꦫꦩꦷ ꦄꦠꦶꦱꦪꦮꦠꦷ, ꦠꦱ꧀ꦩꦴ ꦠꦢꦠ꧀ꦡꦢꦷꦥꦤꦠ꧀ꦡꦁ ꦱꦴ ꦌꦮ ꦥꦴꦭ꦳ꦶ ꦄꦴꦫꦸꦭ꦳꧀ꦲꦴ. ꦠꦡꦴ ꦆꦣ ꦩꦲꦴꦱꦠ꧀ꦠꦱ꧀ꦱ ꦱꦧ꧀ꦧꦱꦠ꧀ꦠꦺꦱꦸ ꦎꦫꦱꦥꦸꦠ꧀ꦠꦺ ꦮꦶꦪ ꦱꦩꦴꦤꦸꦏꦩ꧀ꦥꦠꦴꦢꦪꦺꦴ ꦒꦸꦟꦮꦶꦱꦺꦱꦴ ꦤꦶꦢ꧀ꦣꦴꦫꦺꦠꦧ꧀ꦧꦴꦠꦶ.

ꦌꦏꦫꦴꦗꦕꦫꦶꦪꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦩꦺꦠ꧀ꦠꦴꦥꦴꦫꦩꦷ ꦤꦶꦛ꧀ꦜꦶꦠꦴ.