꧕. ꦩꦲꦶꦁꦱꦫꦴꦗꦕꦫꦶꦪꦴꦮꦟ꧀ꦟꦤꦴ

꧓꧗. ꦥꦚ꧀ꦕꦩꦺ ꦩꦲꦶꦁꦱꦺꦴ ꦥꦮꦤꦕꦴꦫꦏꦺꦴꦠꦶ ꦩꦲꦴꦮꦤꦕꦴꦫꦷ ꦮꦤꦩꦲꦶꦁꦱꦺꦴ ꦪꦢꦴ ꦲꦺꦴꦩꦷꦠꦶ ꦪꦺꦴꦗꦤꦴ. ꦥꦮꦝ꧀ꦞꦏꦴꦪꦺꦴꦠꦶ ꦮꦪꦱꦩ꧀ꦥꦠ꧀ꦠꦶꦪꦴ ꦄꦔ꧀ꦒꦥꦕ꧀ꦕꦔ꧀ꦒꦴꦤꦚ꧀ꦕ ꦡꦹꦭꦨꦴꦮꦺꦤ ꦄꦨꦶꦮꦝ꧀ꦞꦏꦴꦪꦺꦴ. ꦧꦭꦮꦴꦠꦶ ꦩꦲꦴꦧꦭꦺꦴ ꦡꦴꦩꦱꦩ꧀ꦥꦤ꧀ꦤꦺꦴ. ꦩꦲꦤ꧀ꦠꦺꦴꦠꦶ ꦮꦶꦥꦸꦭꦱꦫꦷꦫꦺꦴ. ꦲꦠ꧀ꦡꦶꦏꦭꦨꦥ꧀ꦥꦩꦴꦟꦺꦴ ꦏꦶꦫ ꦠꦢꦴ ꦧꦺꦴꦣꦶꦱꦠ꧀ꦠꦱ꧀ꦱ ꦏꦴꦪꦺꦴ ꦲꦺꦴꦠꦶ. ꦨꦷꦩꦢꦱ꧀ꦱꦤꦺꦴꦠꦶ ꦩꦲꦴꦱꦫꦷꦫꦠꦴꦪ ꦮꦤꦩꦲꦶꦁꦱꦗꦴꦠꦶꦠꦴꦪ ꦕ ꦱꦷꦭꦁ ꦄꦗꦴꦤꦤ꧀ꦠꦴꦤꦁ ꦨꦪꦁ ꦗꦤꦤꦠꦺꦴ ꦨꦪꦴꦤꦏꦢꦱ꧀ꦱꦤꦺꦴ.

꧓꧘. ꦥꦧ꧀ꦨꦴꦫꦺꦠꦶ ꦎꦭꦩ꧀ꦧꦏꦱꦶꦭꦴꦏꦸꦕ꧀ꦖꦶꦪꦁ. ꦢꦏꦴꦱꦪꦺꦠꦶ ꦗꦭꦴꦱꦪꦱꦩꦷꦥꦺ. ꦲꦺꦴꦠꦺꦠ꧀ꦡ ꦜꦴꦤꦤ꧀ꦠꦶ ꦌꦠ꧀ꦡ ꦩꦲꦴꦮꦤꦺ ꦪꦺꦴ ꦏꦺꦴꦕꦶ ꦥꦢꦺꦱꦺꦴ ꦮꦤꦩꦲꦶꦁꦱꦴꦤꦁ ꦠꦶꦛ꧀ꦜꦤꦛ꧀ꦜꦴꦤꦁ ꦲꦺꦴꦠꦶ. ꦠꦲꦶꦁ ꦠꦲꦶꦤ꧀ꦠꦶ ꦠꦠ꧀ꦡ ꦠꦠ꧀ꦡ.

꧓꧙. ꦮꦶꦕꦫꦤ꧀ꦠꦺꦴꦠꦶ ꦮꦶꦲꦴꦫꦦꦴꦱꦸꦏꦁ ꦮꦷꦩꦁꦱꦶꦠꦸꦁ ꦮꦶꦕꦫꦤ꧀ꦠꦺꦴ. ꦜꦴꦤꦁ ꦄꦢ꧀ꦢꦱ ꦨꦢ꧀ꦢꦏꦤ꧀ꦠꦶ ꦌꦮꦁ ꦮꦶꦕꦫꦤ꧀ꦠꦺꦴ ꦠꦱ꧀ꦩꦶꦁ ꦩꦲꦴꦫꦚ꧀ꦚꦺ ꦨꦢ꧀ꦢꦏꦁ ꦩꦪ꧀ꦲꦁ ꦦꦴꦱꦸꦏꦁ ꦫꦸꦏ꧀ꦑꦩꦹꦭꦛ꧀ꦜꦴꦤꦁ ꦄꦢ꧀ꦢꦏ꧀ꦑꦶꦁ. ꦢꦶꦱ꧀ꦮꦴ ꦕ ꦠꦁ ꦜꦴꦤꦁ ꦈꦥꦒꦤ꧀ꦠ꧀ꦮꦴꦤ, ꦠꦶꦛ꧀ꦜꦴꦩꦶ ꦕ ꦱꦪꦴꦩꦶ ꦕ ꦒꦺꦴꦕꦫꦁ ꦒꦲꦺꦠ꧀ꦮꦴ ꦢꦶꦮꦴ ꦠꦁ ꦫꦸꦏ꧀ꦑꦩꦹꦭꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦜꦴꦤꦱꦪꦤꦺꦲꦶ ꦮꦷꦠꦶꦤꦴꦩꦺꦩꦷꦠꦶ ꦢꦱ꧀ꦱꦺꦠꦶ.

꧔꧐. ꦠꦢꦴ ꦏꦶꦫ ꦧꦺꦴꦣꦶꦱꦠ꧀ꦠꦺꦴ ꦲꦶꦩꦮꦤ꧀ꦠꦥ꧀ꦥꦢꦺꦱꦺ ꦩꦲꦶꦁꦱꦪꦺꦴꦤꦶꦪꦁ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦪꦥ꧀ꦥꦠ꧀ꦠꦺꦴ ꦡꦴꦩꦱꦩ꧀ꦥꦤ꧀ꦤꦺꦴ ꦩꦲꦴꦱꦫꦷꦫꦺꦴ ꦲꦠ꧀ꦡꦶꦏꦭꦨꦥ꧀ꦥꦩꦴꦟꦺꦴ ꦥꦧ꧀ꦧꦠꦥꦴꦢꦥꦧ꧀ꦨꦴꦫꦒꦶꦫꦶꦢꦸꦒ꧀ꦒꦮꦤꦓꦛꦴꦢꦷꦱꦸ ꦮꦶꦕꦫꦤ꧀ꦠꦺꦴ ꦌꦏꦁ ꦦꦴꦱꦸꦏꦁ ꦩꦲꦴꦫꦸꦏ꧀ꦑꦩꦹꦭꦁ ꦢꦶꦱ꧀ꦮꦴ ꦒꦺꦴꦕꦫꦁ ꦒꦲꦺꦠ꧀ꦮꦴ ꦢꦶꦮꦴ ꦠꦠ꧀ꦡ ꦮꦱꦠꦶ. ꦄꦡꦺꦏꦺꦴ ꦭꦺꦴꦭꦩꦏ꧀ꦏꦛꦺꦴ ꦫꦸꦏ꧀ꦑꦴ ꦎꦠꦫꦶꦠ꧀ꦮꦴ ꦩꦲꦴꦱꦠ꧀ꦠꦱ꧀ꦱ ꦥꦶꦛ꧀ꦜꦶꦁ ꦄꦨꦶꦫꦸꦲꦶꦠ꧀ꦮꦴ ꦈꦕ꧀ꦕꦴꦫꦥꦱ꧀ꦱꦴꦮꦁ ꦏꦠ꧀ꦮꦴ ꦱꦶꦔ꧀ꦒꦺꦱꦸ ꦒꦟ꧀ꦲꦶꦠ꧀ꦮꦴ ꦎꦭꦩ꧀ꦧꦤ꧀ꦠꦺꦴ ꦤꦔ꧀ꦒꦸꦛ꧀ꦜꦺ ꦒꦲꦺꦠ꧀ꦮꦴ ꦢꦺꦴꦭꦴꦪꦤ꧀ꦠꦺꦴ ꦏꦷꦭ꦳ꦶ. ꦧꦺꦴꦣꦶꦱꦠ꧀ꦠꦺꦴ ꦑꦤ꧀ꦠꦶꦩꦺꦠ꧀ꦠꦴꦤꦸꦢ꧀ꦢꦪꦱꦩ꧀ꦥꦢꦴꦪ ꦠꦁ ꦠꦱ꧀ꦱ ꦄꦤꦴꦕꦴꦫꦁ ꦤ ꦩꦤꦱꦴꦏꦴꦱꦶ. ꦩꦏ꧀ꦏꦛꦺꦴ ꦥꦸꦤꦥ꧀ꦥꦸꦤꦁ ꦠꦡꦺꦮ ꦏꦫꦺꦴꦠꦶ. ꦠꦺꦤ ꦮꦸꦠ꧀ꦠꦁ ‘‘ꦄꦡꦺꦠ꧀ꦡ ꦏꦥꦶ ꦩꦴꦒꦤ꧀ꦠ꧀ꦮꦴ’’ꦠꦶꦄꦴꦢꦶ.

ꦠꦠ꧀ꦡ ꦏꦥꦶ ꦩꦴꦒꦤ꧀ꦠ꧀ꦮꦴꦠꦶ ꦏꦥꦶ ꦄꦴꦒꦤ꧀ꦠ꧀ꦮꦴ, ꦩ-ꦏꦴꦫꦺꦴ ꦥꦢꦱꦤ꧀ꦣꦶꦏꦫꦺꦴ. ꦥꦴꦥꦺꦴꦠꦶ ꦭꦴꦩꦏꦺꦴ. ꦄꦤꦫꦶꦪꦺꦴꦠꦶ ꦄꦤꦪꦺ ꦆꦫꦶꦪꦤꦺꦤ ꦄꦪꦺ ꦕ ꦤ ꦆꦫꦶꦪꦤꦺꦤ ꦄꦤꦫꦶꦪꦺꦴ, ꦤꦶꦲꦷꦤꦴꦕꦴꦫꦺꦴꦠꦶ ꦄꦠ꧀ꦡꦺꦴ. ꦭꦲꦹꦠꦶ ꦭꦺꦴꦭꦺꦴ. ꦑꦤ꧀ꦣꦺꦠꦶ ꦑꦤ꧀ꦣꦥ꧀ꦥꦢꦺꦱꦺ. ꦩꦸꦠ꧀ꦠꦺꦠꦷꦠꦶ ꦥꦱ꧀ꦱꦴꦮꦁ ꦏꦫꦺꦴꦠꦶ. ꦎꦲꦢꦺꦠꦷꦠꦶ ꦏꦫꦷꦱꦁ ꦎꦱ꧀ꦱꦗ꧀ꦗꦠꦶ. ꦠꦤ꧀ꦠꦶ ꦠꦁ ꦩꦁ, ꦠꦢꦴ ꦩꦲꦶꦁꦱꦨꦹꦠꦁ ꦩꦁ.

꧔꧑. ꦱꦏꦶꦩ꧀ꦥꦶ ꦢꦶꦮꦱꦤ꧀ꦠꦶ ꦌꦏꦢꦶꦮꦱꦩ꧀ꦥꦶ ꦢꦹꦱꦺꦠꦶ ꦩꦁ ꦱꦧ꧀ꦧꦏꦴꦭꦩ꧀ꦥꦶ. ꦠꦺꦤꦴꦲ ‘‘ꦢꦹꦱꦺꦠꦶ ꦩꦁ ꦱꦧ꧀ꦧꦏꦴꦭ’’ꦤ꧀ꦠꦶ. ꦤ ꦏꦺꦮꦭꦚ꧀ꦕ ꦢꦸꦠꦶꦪꦠꦠꦶꦪꦕꦠꦸꦠ꧀ꦡꦢꦶꦮꦱꦩꦠ꧀ꦠꦁ, ꦄꦡ ꦑꦺꦴ ꦱꦧ꧀ꦧꦏꦴꦭꦩ꧀ꦥꦶ ꦩꦁ ꦥꦱ꧀ꦱꦴꦮꦴꦢꦷꦲꦶ ꦢꦹꦱꦺꦠꦶ. ꦪꦢꦴ ꦪꦢꦴ ꦩꦸꦠ꧀ꦠꦴꦢꦷꦤꦶ ꦏꦴꦠꦸꦏꦴꦩꦺꦴ, ꦠꦢꦴ ꦠꦢꦴ ꦩꦪ꧀ꦲꦩꦺꦮ ꦈꦥꦫꦶ ꦏꦫꦺꦴꦠꦷꦠꦶ ꦢꦱ꧀ꦱꦺꦠꦶ. ꦈꦥꦢ꧀ꦢꦸꦠꦺꦴꦠꦶ ꦧꦴꦣꦶꦠꦺꦴ, ꦠꦺꦤ ꦱꦶꦔ꧀ꦒꦺꦱꦸ ꦎꦭꦩ꧀ꦧꦤꦴꦢꦶꦤꦴ ꦩꦸꦠ꧀ꦠꦴꦢꦶꦄꦱꦸꦕꦶꦩꦏ꧀ꦑꦟꦺꦤ ꦠꦱ꧀ꦱ ꦕ ꦄꦥꦲꦫꦟꦠ꧀ꦡꦁ ꦄꦤꦺꦏꦮꦴꦫꦁ ꦱꦶꦔ꧀ꦒꦏꦺꦴꦛꦷꦲꦶ ꦮꦴꦭꦒ꧀ꦒꦺꦤ ꦕ ꦄꦤꦺꦏꦮꦴꦫꦁ ꦏꦢ꧀ꦢꦩꦥꦁꦱꦸꦩꦶꦱ꧀ꦱꦏꦁ ꦈꦢꦏꦁ ꦱꦶꦚ꧀ꦕꦶꦠ꧀ꦮꦴ ꦣꦺꦴꦮꦤꦺꦤ ꦕ ꦤꦶꦥ꧀ꦥꦷꦭ꦳ꦶꦠꦺꦴ ꦲꦺꦴꦩꦷꦠꦶ ꦄꦠ꧀ꦡꦺꦴ.

꧔꧒. ꦪꦏ꧀ꦑꦺꦴꦠꦶ ꦠꦱ꧀ꦩꦶꦁ ꦫꦸꦏ꧀ꦑꦺ ꦄꦣꦶꦮꦠ꧀ꦡꦴ ꦢꦺꦮꦠꦴ. ꦩꦁ ꦆꦢꦩꦧ꧀ꦫꦮꦷꦠꦶ ꦫꦸꦏ꧀ꦑꦏ꧀ꦑꦤ꧀ꦣꦺ ꦜꦠ꧀ꦮꦴ ‘‘ꦩꦲꦶꦁꦱꦫꦴꦗ, ꦏꦱ꧀ꦩꦴ ꦆꦩꦱ꧀ꦱ ꦢꦸꦛ꧀ꦜꦩꦏ꧀ꦏꦛꦱ꧀ꦱ ꦄꦮꦩꦴꦤꦁ ꦱꦲꦱꦷ’’ꦠꦶ ꦆꦩꦩꦠ꧀ꦡꦁ ꦥꦏꦴꦱꦺꦤ꧀ꦠꦺꦴ ꦤꦴꦱꦺꦲꦺꦠꦁ ꦖꦮꦁ ꦥꦴꦥꦁ , ꦱꦶꦔ꧀ꦒꦺꦲꦶ ꦕ ꦑꦸꦫꦺꦲꦶ ꦕꦴꦠꦶ ꦆꦢꦁ ꦮꦕꦤꦁ ꦩꦁ ꦄꦨꦴꦱꦶ.

꧔꧓. ꦌꦮꦁ ꦮꦸꦠ꧀ꦠꦺ ꦠꦢꦴ ꦪꦏ꧀ꦑꦺꦠꦶ ꦠꦢꦴ ꦠꦱ꧀ꦩꦶꦁ ꦏꦴꦭꦺ ꦠꦱ꧀ꦩꦶꦁ ꦪꦏ꧀ꦑꦺ ꦌꦮꦁ ꦮꦸꦠ꧀ꦠꦺ ꦱꦠꦶ. ꦄꦲꦁ ꦠꦁ ꦆꦢꦩꦧ꧀ꦫꦮꦶꦤ꧀ꦠꦶ ꦄꦲꦁ ꦠꦁ ꦪꦏ꧀ꦑꦁ ꦆꦢꦁ ꦆꦢꦴꦤꦶ ꦮꦏ꧀ꦑꦩꦴꦤꦁ ꦄꦧ꧀ꦫꦮꦶꦁ ꦄꦨꦴꦱꦶꦁ. ꦏꦸꦟꦥꦺꦤꦴꦠꦶ ꦏꦶꦭꦺꦱꦴꦱꦸꦕꦶꦥꦒ꧀ꦓꦫꦟꦺꦤ ꦱꦸꦕꦶꦗꦴꦠꦶꦏꦴꦤꦁ ꦱꦴꦣꦹꦤꦁ ꦥꦫꦩꦗꦶꦒꦸꦕ꧀ꦖꦤꦷꦪꦠꦴꦪ ꦄꦠꦶꦢꦸꦒ꧀ꦒꦤ꧀ꦣꦮꦴꦪꦤꦺꦤ ꦕ ꦏꦸꦟꦥꦱꦢꦶꦱꦠꦴꦪ ꦏꦸꦟꦥꦺꦤ. ꦥꦴꦥꦺꦤꦴꦠꦶ ꦥꦴꦟꦴꦠꦶꦥꦴꦠꦥꦴꦥꦺꦤ. ꦄꦤꦫꦶꦪꦺꦤꦴꦠꦶ ꦄꦤꦫꦶꦪꦴꦤꦁ ꦄꦱꦴꦣꦹꦤꦁ ꦩꦴꦒꦮꦶꦏꦤꦺꦱꦴꦢꦴꦢꦷꦤꦁ ꦲꦷꦤꦥꦸꦫꦶꦱꦴꦤꦁ ꦣꦩ꧀ꦩꦠ꧀ꦠꦴ ꦄꦤꦫꦶꦪꦺꦤ, ꦏꦶꦁ ꦏꦺꦤ ꦏꦴꦫꦟꦺꦤ, ꦠ꧀ꦮꦁ ꦢꦺꦮꦠꦺ ꦩꦁ ꦩꦏ꧀ꦑꦺꦱꦶ, ꦄꦪꦸꦠ꧀ꦠꦁ ꦠꦪꦴ ꦮꦸꦠ꧀ꦠꦁ ꦩꦁ ꦥꦴꦥꦺ ꦤꦶꦪꦺꦴꦗꦺꦤ꧀ꦠꦶꦪꦴꦠꦶ ꦢꦱ꧀ꦱꦺꦠꦶ.

꧔꧔. ꦆꦢꦴꦤꦶ ꦠꦱ꧀ꦩꦶꦁ ꦥꦴꦥꦣꦩ꧀ꦩꦺ ꦄꦴꦢꦷꦤꦮꦁ ꦥꦏꦴꦱꦺꦤ꧀ꦠꦺꦴ ‘‘ꦪꦢꦶꦲ’’ꦤ꧀ꦠꦶꦄꦴꦢꦶꦩꦴꦲ. ꦠꦱ꧀ꦱꦠ꧀ꦡꦺꦴ – ꦨꦢ꧀ꦢꦺ ꦢꦺꦮꦠꦺ, ꦄꦲꦁ ꦠꦱ꧀ꦱ ꦪꦢꦶ ꦏꦸꦗ꧀ꦙꦺꦪ꧀ꦪꦁ, ꦠꦠꦺꦴꦥꦶ ꦭꦴꦩꦏꦠꦫꦺꦴ ꦨꦮꦺꦪ꧀ꦪꦁ. ꦪꦺꦤ ꦲꦶ ꦄꦣꦩ꧀ꦩꦕꦫꦟꦺꦤ ꦱꦺꦴ ꦧꦴꦭꦩꦏ꧀ꦏꦛꦺꦴ ꦤꦶꦲꦷꦤꦺꦴ ꦤꦴꦩ ꦗꦴꦠꦺꦴ, ꦱꦕꦺ ꦥꦤꦴꦲꦁ ꦠꦠꦺꦴꦥꦶ ꦧꦭꦮꦠꦫꦁ ꦥꦴꦥꦣꦩ꧀ꦩꦁ ꦕꦫꦺꦪ꧀ꦪꦁ, ꦤꦤꦸ ꦠꦺꦤ ꦠꦠꦺꦴ ꦥꦴꦥꦠꦫꦺꦴ ꦨꦮꦺꦪ꧀ꦪꦁ, ꦄꦛ꧀ꦜꦴꦤꦚ꧀ꦕꦺꦠꦁ ꦪꦢꦶꦲꦁ ꦆꦣꦭꦺꦴꦏꦥꦫꦭꦺꦴꦏꦁ ꦠꦢꦸꦠ꧀ꦠꦫꦶ ꦕ ꦗꦴꦤꦶꦠ꧀ꦮꦴ ꦜꦶꦠꦺꦴ ꦌꦏꦤ꧀ꦠꦺꦤꦺꦮ ꦥꦫꦲꦶꦠꦴꦪ ꦥꦛꦶꦥꦤ꧀ꦤꦺꦴ ꦌꦮꦫꦹꦥꦁ ꦥꦴꦥꦣꦩ꧀ꦩꦁ ꦕꦫꦺꦪ꧀ꦪꦤ꧀ꦠꦶ. ꦏꦶꦚ꧀ꦕ ꦨꦶꦪ꧀ꦪꦺꦴ – ꦱꦷꦭꦚ꧀ꦕ ꦩꦺ ꦥꦨꦶꦗ꧀ꦗꦺꦪ꧀ꦪꦴꦠꦶ ꦄꦲꦚ꧀ꦕꦺꦮ ꦑꦺꦴ ꦥꦤ ꦌꦮꦫꦹꦥꦁ ꦥꦴꦥꦁ ꦏꦫꦺꦪ꧀ꦪꦁ, ꦩꦪ꧀ꦲꦁ ꦱꦷꦭꦥꦴꦫꦩꦷ ꦑꦟ꧀ꦝꦶꦠꦴ ꦱꦶꦪꦴ. ꦮꦶꦚ꧀ꦚꦹ ꦕ ꦒꦫꦲꦺꦪ꧀ꦪꦸ ꦩꦤ꧀ꦠꦶ ꦥꦟ꧀ꦝꦶꦠꦴ ꦕ ꦢꦺꦮꦩꦤꦸꦱ꧀ꦱꦴ ꦩꦁ ꦒꦫꦲꦺꦪ꧀ꦪꦸꦁ ‘‘ꦥꦱ꧀ꦱꦡ, ꦨꦺꦴ, ꦄꦪꦁ ꦧꦺꦴꦣꦶꦱꦠ꧀ꦠꦺꦴ ꦧꦺꦴꦣꦶꦥꦫꦶꦪꦺꦱꦤꦁ ꦕꦫꦩꦴꦤꦺꦴ ꦌꦮꦫꦹꦥꦁ ꦥꦴꦥꦁ ꦄꦏꦴꦱꦷ’’ꦠꦶ.

꧔꧕. ꦲꦷꦭ꦳ꦶꦠꦴ ꦗꦷꦮꦶꦠꦴ ꦮꦴꦥꦷꦠꦶ ꦮꦴ-ꦱꦢ꧀ꦢꦺꦴ ꦄꦮꦣꦴꦫꦟꦺ. ꦌꦮꦁ ꦮꦶꦚ꧀ꦚꦹꦲꦶ ꦲꦷꦭ꦳ꦶꦠꦴ ꦒꦫꦲꦶꦠꦴ ꦗꦷꦮꦶꦠꦴꦥꦶ ꦥꦫꦶꦱꦸꦢ꧀ꦣꦺꦤ ꦥꦫꦶꦱꦸꦢ꧀ꦣꦱꦷꦭꦺꦤ ꦲꦸꦠ꧀ꦮꦴ ꦩꦠꦁ ꦮꦴ ꦩꦫꦟꦩꦺꦮ ꦮꦫꦁ ꦈꦠ꧀ꦠꦩꦁ ꦱꦺꦪ꧀ꦪꦺꦴ. ꦏ꧀ꦪꦴꦲꦁ ꦗꦷꦮꦶꦠꦲꦺꦠꦸꦥꦶ, ꦏꦴꦲꦴꦩꦶ ꦥꦫꦲꦺꦜꦤꦤ꧀ꦠꦶ ꦌꦮꦁ ꦗꦴꦤꦤ꧀ꦠꦺꦴ ꦕ ꦄꦲꦁ ꦩꦪ꧀ꦲꦁ ꦗꦷꦮꦶꦠꦤꦶꦩꦶꦠ꧀ꦠꦩ꧀ꦥꦶ ꦥꦫꦱꦠ꧀ꦠꦮꦶꦲꦶꦁꦱꦤꦁ ꦏꦶꦁ ꦏꦴꦲꦴꦩꦶ ꦏꦶꦁ ꦏꦫꦶꦱ꧀ꦱꦴꦩꦶ, ꦌꦠꦱ꧀ꦱ ꦏꦫꦟꦺ ꦏꦴꦫꦟꦁ ꦤꦠ꧀ꦡꦷꦠꦶ ꦄꦠ꧀ꦡꦺꦴ.

ꦄꦪꦁ ꦥꦤ ꦄꦚ꧀ꦚꦺꦥꦶ ꦩꦁ ꦮꦶꦪ ꦩꦚ꧀ꦚꦩꦴꦤꦺꦴ ꦌꦮꦁ ꦄꦤꦴꦕꦴꦫꦁ ꦏꦫꦶꦱ꧀ꦱꦠꦶ, ꦠꦠꦺꦴ ꦪꦺꦱꦁ ꦕꦟ꧀ꦝꦩꦲꦶꦁꦱꦴꦤꦁ ꦌꦮꦁ ꦏꦫꦶꦱ꧀ꦱꦠꦶ, ꦠꦺ ꦌꦮ ꦌꦠꦁ ꦮꦣꦶꦱ꧀ꦱꦤ꧀ꦠꦶ, ꦱꦴ ꦌꦠꦱ꧀ꦱ ꦄꦚ꧀ꦚꦺꦲꦶ ꦩꦴꦫꦟꦴ ꦩꦪ꧀ꦲꦁ ꦢꦸꦏ꧀ꦑꦠꦺꦴ ꦕ ꦥꦴꦟꦴꦠꦶꦥꦴꦠꦠꦺꦴ ꦕ ꦩꦸꦠ꧀ꦠꦶ ꦨꦮꦶꦱ꧀ꦱꦠꦷꦠꦶ ꦄꦴꦲ. ꦠꦺꦤ ꦮꦸꦠ꧀ꦠꦁ –

꧔꧖. ‘‘ꦩꦩꦺꦮꦴꦪꦁ ꦩꦚ꧀ꦚꦩꦴꦤꦺꦴ, ꦄꦚ꧀ꦚꦺꦥꦺꦮꦁ ꦏꦫꦶꦱ꧀ꦱꦠꦶ;

ꦠꦺꦮ ꦠꦱ꧀ꦱ ꦮꦣꦶꦱ꧀ꦱꦤ꧀ꦠꦶ, ꦱꦴ ꦩꦺ ꦩꦸꦠ꧀ꦠꦶ ꦨꦮꦶꦱ꧀ꦱꦠꦷ’’ꦠꦶ.

ꦠꦠ꧀ꦡ ꦩꦩꦺꦮꦴꦪꦤ꧀ꦠꦶ ꦩꦁ ꦮꦶꦪ ꦄꦪꦁ. ꦄꦚ꧀ꦚꦺꦥꦷꦠꦶ ꦄꦚ꧀ꦚꦺꦱꦩ꧀ꦥꦶ. ꦱꦺꦱꦁ ꦮꦸꦠ꧀ꦠꦠ꧀ꦡꦩꦺꦮ.

꧔꧗. ꦲꦷꦤꦩꦗ꧀ꦙꦶꦩꦈꦏ꧀ꦏꦛ꧀ꦜꦺꦠꦶ ꦲꦷꦤꦺ ꦕ ꦩꦗ꧀ꦙꦶꦩꦺ ꦕ ꦈꦏ꧀ꦏꦛ꧀ꦜꦺ ꦕ ꦤꦶꦩꦶꦠ꧀ꦠꦨꦹꦠꦺ. ꦱꦲꦤ꧀ꦠꦺꦴ ꦄꦮꦩꦴꦤꦶꦠꦤ꧀ꦠꦶ ꦮꦶꦨꦴꦒꦁ ꦄꦏꦠ꧀ꦮꦴ ꦠꦺꦲꦶ ꦥꦮꦠ꧀ꦠꦶꦠꦁ ꦄꦮꦩꦴꦤꦁ ꦥꦫꦶꦨꦮꦁ ꦱꦲꦤ꧀ꦠꦺꦴ ꦑꦩꦤ꧀ꦠꦺꦴ. ꦌꦮꦁ ꦭꦨꦠꦶ ꦱꦥ꧀ꦥꦚ꧀ꦚꦺꦴꦠꦶ ꦌꦮꦁ ꦲꦷꦤꦴꦢꦷꦱꦸ ꦮꦶꦨꦴꦒꦁ ꦄꦏꦠ꧀ꦮꦴ ꦑꦤ꧀ꦠꦶꦩꦺꦠ꧀ꦠꦴꦤꦸꦢ꧀ꦢꦪꦁ ꦈꦥꦛ꧀ꦜꦥꦺꦠ꧀ꦮꦴ ꦠꦢꦥꦫꦴꦣꦁ ꦱꦲꦤ꧀ꦠꦺꦴ ꦱꦷꦭꦴꦢꦶꦥꦴꦫꦩꦶꦪꦺꦴ ꦧ꧀ꦫꦹꦲꦺꦠ꧀ꦮꦴ ꦩꦤꦱꦴ ꦪꦡꦴꦥꦠ꧀ꦡꦶꦠꦁ ꦪꦡꦶꦕ꧀ꦖꦶꦠꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦭꦨꦠꦶ ꦥꦛꦶꦮꦶꦗ꧀ꦙꦠꦶ, ꦠꦱ꧀ꦱ ꦠꦁ ꦤ ꦢꦹꦫꦺꦠꦶ.

ꦌꦮꦁ ꦩꦲꦴꦱꦠ꧀ꦠꦺꦴ ꦄꦠ꧀ꦠꦤꦺꦴ ꦄꦗ꧀ꦙꦴꦱꦪꦁ ꦥꦏꦴꦱꦺꦤ꧀ꦠꦺꦴ ꦢꦺꦮꦠꦴꦪ ꦣꦩ꧀ꦩꦁ ꦢꦺꦱꦺꦱꦶ. ꦱꦺꦴ ꦏꦠꦶꦥꦴꦲꦕ꧀ꦕꦪꦺꦤ ꦄꦚ꧀ꦚꦠ꧀ꦡ ꦒꦠꦺꦴ. ꦄꦚ꧀ꦚꦺꦴ ꦕꦟ꧀ꦝꦩꦲꦶꦁꦱꦺꦴ ꦤꦶꦮꦴꦱꦦꦴꦱꦸꦠꦴꦪ ꦠꦁ ꦜꦴꦤꦁ ꦒꦤ꧀ꦠ꧀ꦮꦴ ꦄꦛ꧀ꦜꦴꦱꦶ. ꦢꦸꦛ꧀ꦜꦩꦏ꧀ꦏꦛꦺꦴ ‘‘ꦱꦺꦴ ꦌꦮ ꦄꦪ’’ꦤ꧀ꦠꦶ ꦱꦚ꧀ꦚꦴꦪ ꦠꦱ꧀ꦱ ꦥꦶꦛ꧀ꦜꦶꦁ ꦄꦨꦶꦫꦸꦲꦶꦠ꧀ꦮꦴ ꦠꦡꦺꦮ ꦄꦤꦴꦕꦴꦫꦁ ꦄꦏꦴꦱꦶ. ꦄꦡ ꦤꦁ ꦱꦺꦴ ꦮꦶꦣꦸꦤꦤ꧀ꦠꦺꦴ ꦨꦹꦩꦶꦪꦁ ꦥꦴꦠꦺꦠ꧀ꦮꦴ ꦱꦶꦔ꧀ꦒꦺꦤ ꦲꦢꦪꦺ ꦮꦶꦗ꧀ꦙꦶꦠ꧀ꦮꦴ ꦥꦴꦢꦺꦲꦶ ꦩꦢ꧀ꦢꦶꦠ꧀ꦮꦴ ꦱꦚ꧀ꦕꦸꦟ꧀ꦟꦺꦱꦶ.

ꦠꦢꦴ ꦱꦷꦭꦮꦴ ꦩꦲꦶꦁꦱꦫꦴꦗꦴ ꦭꦺꦴꦏꦤꦴꦡꦺꦴ.

ꦠꦱ꧀ꦱ ꦆꦣꦴꦥꦶ ꦲꦺꦛ꧀ꦜꦴ ꦮꦸꦠ꧀ꦠꦤꦪꦺꦤꦺꦮ ꦪꦡꦴꦫꦲꦁ ꦱꦺꦱꦥꦴꦫꦩꦶꦪꦺꦴ ꦤꦶꦢ꧀ꦣꦴꦫꦺꦠꦧ꧀ꦧꦴ. ꦠꦡꦴ ꦲꦠ꧀ꦡꦶꦤꦴꦒ- (ꦕꦫꦶꦪꦴ. ꧒.꧑ ꦄꦴꦢꦪꦺꦴ) ꦨꦹꦫꦶꦢꦠ꧀ꦠ- (ꦕꦫꦶꦪꦴ. ꧒.꧑꧑ ꦄꦴꦢꦪꦺꦴ) ꦕꦩ꧀ꦥꦺꦪ꧀ꦪꦤꦴꦒꦫꦴꦗ- (ꦕꦫꦶꦪꦴ. ꧒.꧒꧐ ꦄꦴꦢꦪꦺꦴ) ꦕꦫꦶꦪꦴꦱꦸ ꦮꦶꦪ ꦆꦣ ꦩꦲꦴꦱꦠ꧀ꦠꦱ꧀ꦱ ꦒꦸꦟꦴꦤꦸꦨꦴꦮꦴ ꦮꦺꦢꦶꦠꦧ꧀ꦧꦴ.

ꦩꦲꦶꦁꦱꦫꦴꦗꦕꦫꦶꦪꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.