꧗. ꦕꦤ꧀ꦢꦏꦸꦩꦴꦫꦕꦫꦶꦪꦴꦮꦟ꧀ꦟꦤꦴ

꧔꧕. ꦱꦠ꧀ꦠꦩꦺ ꦌꦏꦫꦴꦗꦱ꧀ꦱ ꦄꦠ꧀ꦫꦗꦺꦴꦠꦶ ꦌꦏꦫꦴꦗꦱ꧀ꦱ ꦤꦴꦩ ꦏꦴꦱꦶꦫꦚ꧀ꦚꦺꦴ ꦎꦫꦱꦥꦸꦠ꧀ꦠꦺꦴ. ꦤꦒꦫꦺ ꦥꦸꦥ꧀ꦦꦮꦠꦶꦪꦴꦠꦶ ꦥꦸꦥ꧀ꦦꦮꦠꦶꦤꦴꦩꦏꦺ ꦤꦒꦫꦺ. ꦕꦤ꧀ꦢꦱꦮ꧀ꦲꦪꦺꦴꦠꦶ ꦕꦤ꧀ꦢꦱꦢ꧀ꦢꦺꦤ ꦄꦮ꧀ꦲꦴꦠꦧ꧀ꦧꦺꦴ, ꦕꦤ꧀ꦢꦤꦴꦩꦺꦴꦠꦶ ꦄꦠ꧀ꦡꦺꦴ.

ꦄꦠꦷꦠꦺ ꦏꦶꦫ ꦄꦪꦁ ꦧꦴꦫꦴꦟꦱꦷ ꦥꦸꦥ꧀ꦦꦮꦠꦷ ꦤꦴꦩ ꦄꦲꦺꦴꦱꦶ. ꦠꦠ꧀ꦡ ꦮꦱꦮꦠ꧀ꦠꦶꦫꦚ꧀ꦚꦺꦴ ꦥꦸꦠ꧀ꦠꦺꦴ ꦌꦏꦫꦴꦗꦴ ꦤꦴꦩ ꦫꦗ꧀ꦗꦁ ꦏꦴꦫꦺꦱꦶ. ꦧꦺꦴꦣꦶꦱꦠ꧀ꦠꦺꦴ ꦠꦱ꧀ꦱ ꦒꦺꦴꦠꦩꦶꦪꦴ ꦤꦴꦩ ꦄꦒ꧀ꦒꦩꦲꦺꦱꦶꦪꦴ ꦏꦸꦕ꧀ꦖꦶꦩ꧀ꦲꦶ ꦥꦛꦶꦱꦤ꧀ꦣꦶꦁ ꦄꦒ꧀ꦒꦲꦺꦱꦶ. ‘‘ꦕꦤ꧀ꦢꦏꦸꦩꦴꦫꦺꦴ’’ꦠꦶꦱ꧀ꦱ ꦤꦴꦩꦩꦏꦁꦱꦸ. ꦠꦱ꧀ꦱ ꦥꦢꦱꦴ ꦒꦩꦤꦏꦴꦭꦺ ꦄꦥꦫꦺꦴꦥꦶ ꦥꦸꦠ꧀ꦠꦺꦴ ꦈꦥ꧀ꦥꦤ꧀ꦤꦺꦴ, ꦠꦱ꧀ꦱ ‘‘ꦱꦹꦫꦶꦪꦏꦸꦩꦴꦫꦺꦴ’’ꦠꦶ ꦤꦴꦩꦩꦏꦁꦱꦸ. ꦠꦱ꧀ꦱ ꦥꦢꦱꦴ ꦒꦩꦤꦏꦴꦭꦺ ꦌꦏꦴ ꦣꦷꦠꦴ ꦈꦥ꧀ꦥꦤ꧀ꦤꦴ, ‘‘ꦱꦺꦭꦴ’’ꦠꦶꦱ꧀ꦱꦴ ꦤꦴꦩꦩꦏꦁꦱꦸ. ꦮꦺꦩꦴꦠꦶꦏꦴ ꦕ ꦤꦺꦱꦁ ꦨꦢ꧀ꦢꦱꦺꦤꦺꦴ ꦱꦹꦫꦺꦴ ꦕꦴꦠꦶ ꦢ꧀ꦮꦺ ꦨꦴꦠꦫꦺꦴ ꦄꦲꦺꦱꦸꦁ. ꦧꦺꦴꦣꦶꦱꦠ꧀ꦠꦺꦴ ꦄꦤꦸꦥꦸꦧ꧀ꦧꦺꦤ ꦮꦸꦢ꧀ꦣꦶꦥ꧀ꦥꦠ꧀ꦠꦺꦴ ꦱꦶꦥ꧀ꦥꦺꦱꦸ ꦕ ꦮꦶꦗ꧀ꦗꦴꦛ꧀ꦜꦴꦤꦺꦱꦸ ꦕ ꦥꦴꦫꦁ ꦄꦒꦩꦴꦱꦶ. ꦠꦱ꧀ꦱ ꦫꦴꦗꦴ ꦄꦤꦸꦕ꧀ꦖꦮꦶꦏꦁ ꦕꦤ꧀ꦢꦁ ꦤꦴꦩ ꦫꦴꦗꦣꦷꦠꦫꦁ ꦄꦴꦤꦺꦠ꧀ꦮꦴ ꦈꦥꦫꦗ꧀ꦗꦁ ꦄꦢꦴꦱꦶ. ꦧꦺꦴꦣꦶꦱꦠ꧀ꦠꦱ꧀ꦱ ꦌꦏꦺꦴ ꦥꦸꦠ꧀ꦠꦺꦴ ꦈꦥ꧀ꦥꦤ꧀ꦤꦺꦴ, ꦠꦱ꧀ꦱ ‘‘ꦮꦴꦱꦸꦭꦺꦴ’’ꦠꦶ ꦤꦴꦩꦩꦏꦁꦱꦸ. ꦠꦱ꧀ꦱ ꦥꦤ ꦫꦚ꧀ꦚꦺꦴ ꦑꦟ꧀ꦝꦲꦴꦭꦺꦴ ꦤꦴꦩ ꦥꦸꦫꦺꦴꦲꦶꦠꦺꦴ, ꦠꦁ ꦫꦴꦗꦴ ꦮꦶꦤꦶꦕ꧀ꦖꦪꦺ ꦜꦥꦺꦱꦶ. ꦱꦺꦴ ꦭꦚ꧀ꦗꦮꦶꦠ꧀ꦠꦏꦺꦴ ꦲꦸꦠ꧀ꦮꦴ ꦭꦚ꧀ꦗꦁ ꦒꦲꦺꦠ꧀ꦮꦴ ꦄꦱ꧀ꦱꦴꦩꦶꦏꦺ ꦱꦴꦩꦶꦏꦺ ꦏꦫꦺꦴꦠꦶ, ꦱꦴꦩꦶꦏꦺ ꦕ ꦄꦱ꧀ꦱꦴꦩꦶꦏꦺ ꦏꦫꦺꦴꦠꦶ. ꦄꦡꦺꦏꦢꦶꦮꦱꦁ ꦄꦛ꧀ꦛꦥꦫꦴꦗꦶꦠꦺꦴ ꦌꦏꦺꦴ ꦥꦸꦫꦶꦱꦺꦴ ꦮꦶꦤꦶꦕ꧀ꦖꦪꦛ꧀ꦜꦴꦤꦺ ꦈꦥꦏ꧀ꦏꦺꦴꦱꦺꦤ꧀ꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦫꦴꦗꦹꦥꦛ꧀ꦜꦴꦤꦁ ꦒꦕ꧀ꦖꦤ꧀ꦠꦁ ꦧꦺꦴꦣꦶꦱꦠ꧀ꦠꦁ ꦢꦶꦱ꧀ꦮꦴ ꦠꦱ꧀ꦱ ꦥꦴꦢꦺꦱꦸ ꦤꦶꦥꦠꦶꦠ꧀ꦮꦴ ‘‘ꦱꦴꦩꦶ ꦑꦟ꧀ꦝꦲꦴꦭꦺꦴ ꦮꦶꦤꦶꦕ꧀ꦖꦪꦺ ꦮꦶꦭꦺꦴꦥꦁ ꦑꦴꦢꦠꦶ, ꦄꦲꦁ ꦠꦺꦤ ꦭꦚ꧀ꦗꦁ ꦒꦲꦺꦠ꧀ꦮꦴ ꦥꦫꦴꦗꦪꦁ ꦥꦴꦥꦶꦠꦺꦴ’’ꦠꦶ ꦄꦛ꧀ꦛꦱ꧀ꦱꦫꦩꦏꦴꦱꦶ. ꦧꦺꦴꦣꦶꦱꦠ꧀ꦠꦺꦴ ‘‘ꦩꦴ ꦨꦴꦪꦷ’’ꦠꦶ ꦠꦁ ꦄꦱ꧀ꦱꦴꦱꦺꦠ꧀ꦮꦴ ꦮꦶꦤꦶꦕ꧀ꦖꦪꦁ ꦤꦺꦠ꧀ꦮꦴ ꦱꦴꦩꦶꦏꦩꦺꦮ ꦱꦴꦩꦶꦏꦁ ꦄꦏꦴꦱꦶ. ꦩꦲꦴꦗꦤꦺꦴ ꦩꦲꦴꦱꦢ꧀ꦢꦺꦤ ꦱꦴꦣꦸꦏꦴꦫꦩꦢꦴꦱꦶ.

ꦫꦴꦗꦴ ‘‘ꦧꦺꦴꦣꦶꦱꦠ꧀ꦠꦺꦤ ꦏꦶꦫ ꦄꦛ꧀ꦛꦺꦴ ꦱꦸꦮꦶꦤꦶꦕ꧀ꦖꦶꦠꦺꦴ’’ꦠꦶ ꦱꦸꦠ꧀ꦮꦴ ꦠꦁ ꦄꦴꦩꦤ꧀ꦠꦺꦠ꧀ꦮꦴ ‘‘ꦠꦴꦠ, ꦆꦠꦺꦴ ꦥꦛ꧀ꦜꦴꦪ ꦠ꧀ꦮꦩꦺꦮ ꦄꦛ꧀ꦛꦏꦫꦟꦺ ꦮꦶꦤꦶꦕ꧀ꦖꦪꦁ ꦮꦶꦤꦶꦕ꧀ꦖꦶꦤꦴꦲꦷ’’ꦠꦶ ꦮꦶꦤꦶꦕ꧀ꦖꦪꦁ ꦧꦺꦴꦣꦶꦱꦠ꧀ꦠꦱ꧀ꦱ ꦄꦢꦴꦱꦶ. ꦑꦟ꧀ꦝꦲꦴꦭꦱ꧀ꦱ ꦄꦴꦪꦺꦴ ꦥꦕ꧀ꦖꦶꦗ꧀ꦗꦶ. ꦱꦺꦴ ꦠꦠꦺꦴ ꦥꦛ꧀ꦜꦴꦪ ꦧꦺꦴꦣꦶꦱꦠ꧀ꦠꦺ ꦄꦴꦓꦴꦠꦁ ꦧꦤ꧀ꦣꦶꦠ꧀ꦮꦴ ꦎꦠꦴꦫꦴꦥꦺꦏ꧀ꦑꦺꦴ ꦮꦶꦕꦫꦶ. ꦱꦺꦴ ꦥꦤ ꦫꦴꦗꦴ ꦩꦸꦣꦥ꧀ꦥꦱꦤ꧀ꦤꦺꦴ. ꦱꦺꦴ ꦌꦏꦢꦶꦮꦱꦁ ꦱꦸꦥꦶꦤꦤ꧀ꦠꦺꦤ ꦢꦺꦮꦭꦺꦴꦏꦁ ꦥꦱ꧀ꦱꦶꦠ꧀ꦮꦴ ꦠꦠ꧀ꦡ ꦒꦤ꧀ꦠꦸꦏꦴꦩꦺꦴ ꦲꦸꦠ꧀ꦮꦴ ‘‘ꦥꦸꦫꦺꦴꦲꦶꦠꦁ ꦧ꧀ꦫꦲ꧀ꦩꦭꦺꦴꦏꦒꦴꦩꦶꦩꦒ꧀ꦒꦁ ꦄꦴꦕꦶꦏ꧀ꦑꦴ’’ꦠꦶ ꦄꦴꦲ. ꦱꦺꦴ ‘‘ꦄꦠꦶꦢꦴꦤꦁ ꦢꦢꦤ꧀ꦠꦺꦴ ꦱꦧ꧀ꦧꦕꦠꦸꦏ꧀ꦏꦺꦤ ꦪꦚ꧀ꦚꦁ ꦪꦗꦱ꧀ꦱꦹ’’ꦠꦶ ꦮꦠ꧀ꦮꦴ ꦫꦚ꧀ꦚꦴ ‘‘ꦏꦶꦁ ꦄꦠꦶꦢꦴꦤ’’ꦤ꧀ꦠꦶ ꦥꦸꦛ꧀ꦜꦺꦴ ‘‘ꦄꦠ꧀ꦠꦤꦺꦴ ꦥꦶꦪꦥꦸꦠ꧀ꦠꦴ ꦥꦶꦪꦨꦫꦶꦪꦴ ꦥꦶꦪꦣꦷꦠꦫꦺꦴ ꦩꦲꦴꦮꦶꦨꦮꦱꦺꦛ꧀ꦜꦶꦤꦺꦴ ꦩꦔ꧀ꦒꦭꦲꦠ꧀ꦡꦶꦄꦱ꧀ꦱꦴꦢꦪꦺꦴꦠꦶ ꦌꦠꦺ ꦕꦠ꧀ꦠꦴꦫꦺꦴ ꦕꦠ꧀ꦠꦴꦫꦺꦴ ꦏꦠ꧀ꦮꦴ ꦢ꧀ꦮꦶꦥꦢꦕꦠꦸꦥ꧀ꦥꦢꦺ ꦪꦚ꧀ꦚꦠ꧀ꦡꦴꦪ ꦥꦫꦶꦕ꧀ꦕꦗꦶꦠ꧀ꦮꦴ ꦠꦺꦱꦁ ꦒꦭꦭꦺꦴꦲꦶꦠꦺꦤ ꦪꦗꦤꦁ ꦄꦠꦶꦢꦴꦤꦁ ꦤꦴꦩꦴ’’ꦠꦶ ꦱꦚ꧀ꦚꦴꦥꦺꦱꦶ. ꦆꦠꦶ ꦱꦺꦴ ‘‘ꦱꦒ꧀ꦒꦩꦒ꧀ꦒꦁ ꦄꦴꦕꦶꦏ꧀ꦑꦶꦱ꧀ꦱꦴꦩꦷ’’ꦠꦶ ꦤꦶꦫꦪꦩꦒ꧀ꦒꦁ ꦄꦴꦕꦶꦏ꧀ꦑꦶ.

ꦫꦴꦗꦴꦥꦶ ꦠꦱ꧀ꦩꦶꦁ ꦥꦟ꧀ꦝꦶꦠꦱꦚ꧀ꦚꦷ ꦲꦸꦠ꧀ꦮꦴ ‘‘ꦠꦺꦤ ꦮꦸꦠ꧀ꦠꦮꦶꦣꦶ ꦱꦒ꧀ꦒꦩꦒ꧀ꦒꦺꦴ’’ꦠꦶ ꦱꦚ꧀ꦚꦴꦪ ꦠꦁ ꦥꦛꦶꦥꦗ꧀ꦗꦶꦠꦸꦏꦴꦩꦺꦴ ꦩꦲꦤ꧀ꦠꦁ ꦪꦚ꧀ꦚꦴꦮꦴꦛꦁ ꦏꦴꦫꦴꦥꦺꦠ꧀ꦮꦴ ꦠꦠ꧀ꦡ ꦧꦺꦴꦣꦶꦱꦠ꧀ꦠꦴꦢꦶꦏꦺ ꦕꦠ꧀ꦠꦴꦫꦺꦴ ꦫꦴꦗꦏꦸꦩꦴꦫꦺ ꦄꦴꦢꦶꦁ ꦏꦠ꧀ꦮꦴ ꦑꦟ꧀ꦝꦲꦴꦭꦺꦤ ꦮꦸꦠ꧀ꦠꦁ ꦱꦧ꧀ꦧꦁ ꦢ꧀ꦮꦶꦥꦢꦕꦠꦸꦥ꧀ꦥꦢꦁ ꦪꦚ꧀ꦚꦥꦱꦸꦠꦛ꧀ꦜꦴꦤꦺ ꦤꦺꦡꦴꦠꦶ ꦄꦴꦟꦴꦥꦺꦱꦶ. ꦱꦧ꧀ꦧꦚ꧀ꦕ ꦪꦚ꧀ꦚꦱꦩ꧀ꦨꦴꦫꦁ ꦈꦥꦏ꧀ꦑꦛꦁ ꦄꦲꦺꦴꦱꦶ. ꦠꦁ ꦱꦸꦠ꧀ꦮꦴ ꦩꦲꦴꦗꦤꦺꦴ ꦩꦲꦤ꧀ꦠꦁ ꦏꦺꦴꦭꦴꦲꦭꦁ ꦄꦏꦴꦱꦶ. ꦫꦴꦗꦴ ꦮꦶꦥ꧀ꦥꦛꦶꦱꦴꦫꦷ ꦲꦸꦠ꧀ꦮꦴ ꦑꦟ꧀ꦝꦲꦴꦭꦺꦤ ꦈꦥꦠ꧀ꦡꦩ꧀ꦨꦶꦠꦺꦴ ꦥꦸꦤꦥꦶ ꦠꦡꦴ ꦠꦁ ꦄꦴꦟꦴꦥꦺꦱꦶ. ꦧꦺꦴꦣꦶꦱꦠ꧀ꦠꦺꦴ ‘‘ꦑꦟ꧀ꦝꦲꦴꦭꦺꦤ ꦮꦶꦤꦶꦕ꧀ꦖꦪꦛ꧀ꦜꦴꦤꦁ ꦄꦭꦨꦤ꧀ꦠꦺꦤ ꦩꦪꦶ ꦄꦴꦓꦴꦠꦁ ꦧꦤ꧀ꦣꦶꦠ꧀ꦮꦴ ꦩꦩꦺꦮ ꦩꦫꦟꦁ ꦆꦕ꧀ꦖꦤ꧀ꦠꦺꦤ ꦩꦲꦴꦗꦤꦱ꧀ꦱ ꦄꦤꦪꦧ꧀ꦪꦱꦤꦁ ꦈꦥ꧀ꦥꦴꦢꦶꦠ’’ꦤ꧀ꦠꦶ ꦗꦴꦤꦶꦠ꧀ꦮꦴ ꦤꦴꦤꦴꦮꦶꦣꦺꦲꦶ ꦈꦥꦴꦪꦺꦲꦶ ꦫꦴꦗꦴꦤꦁ ꦠꦠꦺꦴ ꦢꦸꦒ꧀ꦒꦲꦶꦠꦒ꧀ꦒꦴꦲꦠꦺꦴ ꦮꦶꦮꦺꦕꦺꦠꦸꦁ ꦮꦴꦪꦩꦶꦠ꧀ꦮꦴꦥꦶ ꦤꦴꦱꦏ꧀ꦑꦶ. ꦩꦲꦴꦗꦤꦺꦴ ꦥꦫꦶꦢꦺꦮꦶ, ꦩꦲꦤ꧀ꦠꦁ ꦏꦴꦫꦸꦚ꧀ꦚꦩꦏꦴꦱꦶ. ꦩꦲꦴꦗꦤꦱ꧀ꦱ ꦥꦫꦶꦢꦺꦮꦤ꧀ꦠꦱ꧀ꦱꦺꦮ ꦪꦚ꧀ꦚꦴꦮꦴꦛꦺ ꦱꦧ꧀ꦧꦏꦩ꧀ꦩꦴꦤꦶ ꦤꦶꦛ꧀ꦜꦴꦥꦺꦱꦶ. ꦫꦴꦗꦥꦸꦠ꧀ꦠꦁ ꦤꦺꦠ꧀ꦮꦴ ꦒꦷꦮꦴꦪ ꦤꦴꦩꦺꦠ꧀ꦮꦴ ꦤꦶꦱꦷꦢꦴꦥꦺꦱꦸꦁ. ꦑꦟ꧀ꦝꦲꦴꦭꦺꦴ ꦱꦸꦮꦟ꧀ꦟꦥꦴꦠꦶꦁ ꦈꦥꦤꦴꦩꦺꦠ꧀ꦮꦴ ꦑꦒ꧀ꦒꦁ ꦄꦴꦢꦴꦪ ‘‘ꦠꦱ꧀ꦱ ꦒꦷꦮꦁ ꦖꦶꦤ꧀ꦢꦶꦱ꧀ꦱꦴꦩꦷ’’ꦠꦶ ꦄꦛ꧀ꦜꦴꦱꦶ. ꦠꦁ ꦢꦶꦱ꧀ꦮꦴ ꦕꦤ꧀ꦢꦴ ꦤꦴꦩ ꦫꦴꦗꦥꦸꦠ꧀ꦠꦱ꧀ꦱ ꦢꦺꦮꦷ ‘‘ꦄꦚ꧀ꦚꦁ ꦩꦺ ꦥꦛꦶꦱꦫꦟꦁ ꦤꦠ꧀ꦡꦶ, ꦄꦠ꧀ꦠꦤꦺꦴ ꦱꦕ꧀ꦕꦧꦭꦺꦤ ꦱꦴꦩꦶꦏꦱ꧀ꦱ ꦱꦺꦴꦠ꧀ꦡꦶꦁ ꦏꦫꦶꦱ꧀ꦱꦴꦩꦷ’’ꦠꦶ ꦄꦚ꧀ꦗꦭꦶꦁ ꦥꦒ꧀ꦒꦪ꧀ꦲ ꦥꦫꦶꦱꦴꦪ ꦄꦤ꧀ꦠꦫꦺ ꦮꦶꦕꦫꦤ꧀ꦠꦷ ‘‘ꦆꦢꦁ ꦌꦏꦤ꧀ꦠꦺꦤꦺꦮ ꦥꦴꦥꦏꦩ꧀ꦩꦁ, ꦪꦁ ꦑꦟ꧀ꦝꦲꦴꦭꦺꦴ ꦱꦒ꧀ꦒꦩꦒ꧀ꦒꦺꦴꦠꦶ ꦏꦫꦺꦴꦠꦶ. ꦆꦩꦶꦤꦴ ꦩꦪ꧀ꦲꦁ ꦱꦕ꧀ꦕꦮꦕꦤꦺꦤ ꦩꦩ ꦱꦴꦩꦶꦏꦱ꧀ꦱ ꦱꦺꦴꦠ꧀ꦡꦶ ꦲꦺꦴꦠꦸ.

‘‘ꦪꦴ ꦢꦺꦮꦠꦴ ꦆꦣ ꦭꦺꦴꦏꦺ, ꦱꦧ꧀ꦧꦴ ꦠꦴ ꦱꦫꦟꦁ ꦒꦠꦴ;

ꦄꦤꦴꦡꦁ ꦠꦴꦪꦡ ꦩꦩꦁ, ꦪꦡꦴꦲꦁ ꦥꦠꦶꦩꦴ ꦱꦶꦪ’’ꦤ꧀ꦠꦶ. –

ꦱꦕ꧀ꦕꦏꦶꦫꦶꦪꦩꦏꦴꦱꦶ. ꦱꦏ꧀ꦏꦺꦴ ꦢꦺꦮꦫꦴꦗꦴ ꦠꦱ꧀ꦱꦴ ꦥꦫꦶꦢꦺꦮꦤꦱꦢ꧀ꦢꦁ ꦱꦸꦠ꧀ꦮꦴ ꦠꦁ ꦥꦮꦠ꧀ꦠꦶꦁ ꦚꦠ꧀ꦮꦴ ꦗꦭꦶꦠꦁ ꦄꦪꦺꦴꦏꦹꦛꦁ ꦄꦴꦢꦴꦪ ꦄꦴꦒꦤ꧀ꦠ꧀ꦮꦴ ꦫꦴꦗꦴꦤꦁ ꦠꦴꦱꦺꦠ꧀ꦮꦴ ꦱꦧ꧀ꦧꦺ ꦮꦶꦱ꧀ꦱꦗ꧀ꦗꦴꦥꦺꦱꦶ. ꦱꦏ꧀ꦏꦺꦴꦥꦶ ꦠꦢꦴ ꦄꦠ꧀ꦠꦤꦺꦴ ꦢꦶꦧ꧀ꦧꦫꦹꦥꦁ ꦢꦱ꧀ꦱꦺꦠ꧀ꦮꦴ ꦱꦩ꧀ꦥꦗ꧀ꦗꦭꦶꦠꦁ ꦱꦗꦺꦴꦠꦶꦨꦹꦠꦁ ꦮꦗꦶꦫꦁ ꦥꦫꦶꦧ꧀ꦨꦩꦤ꧀ꦠꦺꦴ ‘‘ꦄꦫꦺ, ꦥꦴꦥꦫꦴꦗ ꦏꦴꦭ꦳ꦏꦟ꧀ꦟꦶ, ꦏꦢꦴ ꦠꦪꦴ ꦥꦴꦟꦴꦠꦶꦥꦴꦠꦺꦤ ꦱꦸꦒꦠꦶꦒꦩꦤꦁ ꦢꦶꦛ꧀ꦜꦥꦸꦧ꧀ꦧꦁ, ꦕꦤ꧀ꦢꦏꦸꦩꦴꦫꦁ ꦱꦧ꧀ꦧꦚ꧀ꦕ ꦆꦩꦁ ꦗꦤꦁ ꦧꦤ꧀ꦣꦤꦠꦺꦴ ꦩꦺꦴꦕꦺꦲꦶ, ꦤꦺꦴ ꦕꦺ ꦩꦺꦴꦕꦺꦱ꧀ꦱꦱꦶ, ꦌꦠ꧀ꦡꦺꦮ ꦠꦺ ꦆꦩꦱ꧀ꦱ ꦕ ꦢꦸꦛ꧀ꦜꦧ꧀ꦫꦴꦲ꧀ꦩꦟꦱ꧀ꦱ ꦱꦷꦱꦁ ꦦꦴꦭꦺꦱ꧀ꦱꦴꦩꦷ’’ꦠꦶ ꦄꦴꦏꦴꦱꦺ ꦄꦛ꧀ꦜꦴꦱꦶ. ꦠꦁ ꦄꦕ꧀ꦖꦫꦶꦪꦁ ꦢꦶꦱ꧀ꦮꦴ ꦫꦴꦗꦴ ꦧ꧀ꦫꦴꦲ꧀ꦩꦟꦺꦴ ꦕ ꦱꦷꦓꦁ ꦱꦧ꧀ꦧꦺ ꦧꦤ꧀ꦣꦤꦴ ꦩꦺꦴꦕꦺꦱꦸꦁ.

ꦄꦡ ꦩꦲꦴꦗꦤꦺꦴ ꦌꦏꦏꦺꦴꦭꦴꦲꦭꦁ ꦏꦠ꧀ꦮꦴ ꦱꦲꦱꦴ ꦪꦚ꧀ꦚꦴꦮꦴꦛꦁ ꦄꦗ꧀ꦙꦺꦴꦠ꧀ꦡꦫꦶꦠ꧀ꦮꦴ ꦑꦟ꧀ꦝꦲꦴꦭꦱ꧀ꦱ ꦌꦏꦺꦏꦁ ꦭꦺꦝ꧀ꦝꦸꦥ꧀ꦥꦲꦴꦫꦁ ꦢꦺꦤ꧀ꦠꦺꦴ ꦠꦠ꧀ꦡꦺꦮ ꦤꦁ ꦗꦷꦮꦶꦠꦏ꧀ꦑꦪꦁ ꦥꦴꦥꦺꦠ꧀ꦮꦴ ꦫꦴꦗꦴꦤꦩ꧀ꦥꦶ ꦩꦴꦫꦺꦠꦸꦁ ꦄꦴꦫꦨꦶ. ꦧꦺꦴꦣꦶꦱꦠ꧀ꦠꦺꦴ ꦥꦸꦫꦺꦠꦫꦩꦺꦮ ꦥꦶꦠꦫꦁ ꦥꦭꦶꦱ꧀ꦱꦗꦶꦠ꧀ꦮꦴ ꦜꦶꦠꦺꦴ ꦩꦴꦫꦺꦠꦸꦁ ꦤ ꦄꦢꦴꦱꦶ. ꦩꦲꦴꦗꦤꦺꦴ ‘‘ꦗꦷꦮꦶꦠꦁ ꦠꦴꦮꦱ꧀ꦱ ꦥꦴꦥꦫꦚ꧀ꦚꦺꦴ ꦢꦺꦩ, ꦖꦠ꧀ꦠꦁ ꦥꦤꦱ꧀ꦱ ꦤ ꦢꦱ꧀ꦱꦴꦩ, ꦤꦒꦫꦺ ꦮꦴꦱꦁ ꦮꦴ ꦤ ꦢꦱ꧀ꦱꦴꦩ, ꦠꦁ ꦕꦟ꧀ꦝꦴꦭꦁ ꦏꦠ꧀ꦮꦴ ꦧꦲꦶꦤꦒꦫꦺ ꦮꦴꦱꦴꦥꦺꦱ꧀ꦱꦴꦩꦴ’’ꦠꦶ ꦫꦴꦗꦮꦺꦱꦁ ꦲꦴꦫꦺꦠ꧀ꦮꦴ ꦏꦴꦱꦴꦮꦁ ꦤꦶꦮꦴꦱꦴꦥꦺꦠ꧀ꦮꦴ ꦲꦭꦶꦢ꧀ꦢꦶꦥꦶꦭꦺꦴꦠꦶꦏꦴꦪ ꦱꦷꦱꦁ ꦮꦺꦜꦺꦠ꧀ꦮꦴ ꦕꦟ꧀ꦝꦴꦭꦁ ꦏꦠ꧀ꦮꦴ ꦕꦟ꧀ꦝꦴꦭꦒꦴꦩꦁ ꦥꦲꦶꦟꦶꦁꦱꦸ. ꦪꦺ ꦥꦤ ꦠꦁ ꦥꦱꦸꦓꦴꦠꦪꦚ꧀ꦚꦁ ꦪꦗꦶꦁꦱꦸ ꦕꦺꦮ ꦪꦗꦴꦥꦺꦱꦸꦚ꧀ꦕ ꦄꦤꦸꦩꦺꦴꦢꦶꦁꦱꦸ ꦕ, ꦱꦧ꧀ꦧꦺ ꦠꦺ ꦤꦶꦫꦪꦥꦫꦴꦪꦤꦴ ꦄꦲꦺꦱꦸꦁ. ꦠꦺꦤꦴꦲ ꦨꦒꦮꦴ –

‘‘ꦱꦧ꧀ꦧꦺ ꦥꦠꦶꦛ꧀ꦜꦴ ꦤꦶꦫꦪꦁ, ꦪꦡꦴ ꦠꦁ ꦥꦴꦥꦏꦁ ꦏꦫꦶꦠ꧀ꦮꦴꦤ;

ꦤ ꦲꦶ ꦥꦴꦥꦏꦩ꧀ꦩꦁ ꦏꦠ꧀ꦮꦴ, ꦭꦧ꧀ꦨꦴ ꦱꦸꦒꦠꦶꦁ ꦆꦠꦺꦴ ꦒꦤ꧀ꦠꦸ’’ꦤ꧀ꦠꦶ. (ꦗꦴ. ꧒.꧒꧒.꧑꧑꧔꧓);

ꦄꦡ ꦱꦧ꧀ꦧꦴꦥꦶ ꦫꦴꦗꦥꦫꦶꦱꦴ ꦤꦴꦒꦫꦴ ꦕꦺꦮ ꦗꦴꦤꦥꦢꦴ ꦕ ꦱꦩꦴꦒꦤ꧀ꦠ꧀ꦮꦴ ꦧꦺꦴꦣꦶꦱꦠ꧀ꦠꦁ ꦫꦗ꧀ꦗꦺ ꦄꦨꦶꦱꦶꦚ꧀ꦕꦶꦁꦱꦸ. ꦱꦺꦴ ꦣꦩ꧀ꦩꦺꦤ ꦫꦗ꧀ꦗꦁ ꦄꦤꦸꦱꦴꦱꦤ꧀ꦠꦺꦴ ꦠꦁ ꦄꦠ꧀ꦠꦤꦺꦴ ꦩꦲꦴꦗꦤꦱ꧀ꦱ ꦕ ꦄꦏꦴꦫꦟꦺꦤꦺꦮ ꦈꦥ꧀ꦥꦤ꧀ꦤꦁ ꦄꦤꦪꦧ꧀ꦪꦱꦤꦁ ꦄꦤꦸꦱ꧀ꦱꦫꦶꦠ꧀ꦮꦴ ꦱꦁꦮꦺꦒꦗꦴꦠꦺꦴ ꦥꦸꦚ꧀ꦚꦏꦶꦫꦶꦪꦴꦱꦸ ꦨꦶꦪ꧀ꦪꦺꦴꦱꦺꦴꦩꦠ꧀ꦠꦴꦪ ꦈꦱ꧀ꦱꦴꦲꦗꦴꦠꦺꦴ ꦩꦲꦴꦢꦴꦤꦁ ꦥꦮꦠ꧀ꦠꦺꦱꦶ, ꦱꦷꦭꦴꦤꦶ ꦫꦏ꧀ꦑꦶ, ꦈꦥꦺꦴꦱꦡꦏꦩ꧀ꦩꦁ ꦱꦩꦴꦢꦶꦪꦶ. ꦠꦺꦤ ꦮꦸꦠ꧀ꦠꦁ –

꧔꧖. ‘‘ꦠꦢꦴꦲꦁ ꦪꦗꦤꦴ ꦩꦸꦠ꧀ꦠꦺꦴ, ꦤꦶꦏ꧀ꦑꦤ꧀ꦠꦺꦴ ꦪꦚ꧀ꦚꦮꦴꦛꦠꦺꦴ;

ꦱꦁꦮꦺꦒꦁ ꦗꦤꦪꦶꦠ꧀ꦮꦴꦤ, ꦩꦲꦴꦢꦴꦤꦁ ꦥꦮꦠ꧀ꦠꦪꦶ’’ꦤ꧀ꦠꦶ. – ꦄꦴꦢꦶ;

ꦠꦠ꧀ꦡ ꦪꦗꦤꦴ ꦩꦸꦠ꧀ꦠꦺꦴꦠꦶ ꦑꦟ꧀ꦝꦲꦴꦭꦺꦤ ꦮꦶꦲꦶꦠꦪꦚ꧀ꦚꦮꦶꦣꦶꦠꦺꦴ ꦮꦸꦠ꧀ꦠꦤꦪꦺꦤ ꦓꦴꦠꦺꦠꦧ꧀ꦧꦠꦺꦴ ꦩꦸꦠ꧀ꦠꦺꦴ. ꦤꦶꦏ꧀ꦑꦤ꧀ꦠꦺꦴ ꦪꦚ꧀ꦚꦮꦴꦛꦠꦺꦴꦠꦶ ꦄꦨꦶꦱꦺꦏꦏꦫꦟꦠ꧀ꦡꦴꦪ ꦈꦱ꧀ꦱꦴꦲꦗꦴꦠꦺꦤ ꦩꦲꦴꦗꦤꦺꦤ ꦱꦢ꧀ꦣꦶꦁ ꦠꦠꦺꦴ ꦪꦚ꧀ꦚꦨꦹꦩꦶꦠꦺꦴ ꦤꦶꦒ꧀ꦒꦠꦺꦴ. ꦱꦁꦮꦺꦒꦁ ꦗꦤꦪꦶꦠ꧀ꦮꦴꦤꦴꦠꦶ ꦌꦮꦁ ‘‘ꦧꦲꦸꦄꦤ꧀ꦠꦫꦴꦪꦺꦴ ꦭꦺꦴꦏꦱꦤ꧀ꦤꦶꦮꦴꦱꦺꦴ’’ꦠꦶ ꦄꦠꦶꦮꦶꦪ ꦱꦁꦮꦺꦒꦁ ꦈꦥ꧀ꦥꦴꦢꦺꦠ꧀ꦮꦴ. ꦩꦲꦴꦢꦴꦤꦁ ꦥꦮꦠ꧀ꦠꦪꦶꦤ꧀ꦠꦶ ꦖ ꦢꦴꦤꦱꦴꦭꦴꦪꦺꦴ ꦏꦴꦫꦴꦥꦺꦠ꧀ꦮꦴ ꦩꦲꦠꦴ ꦣꦤꦥꦫꦶꦕ꧀ꦕꦴꦒꦺꦤ ꦮꦺꦱ꧀ꦱꦤ꧀ꦠꦫꦢꦴꦤꦱꦢꦶꦱꦁ ꦩꦲꦴꦢꦴꦤꦩꦢꦴꦱꦶꦁ. ꦌꦠꦺꦤ ꦄꦨꦶꦱꦺꦏꦏꦫꦟꦠꦺꦴ ꦥꦛ꧀ꦜꦴꦪ ꦠꦱ꧀ꦱ ꦩꦲꦴꦢꦴꦤꦱ꧀ꦱ ꦥꦮꦠ꧀ꦠꦶꦠꦨꦴꦮꦁ ꦢꦱ꧀ꦱꦺꦠꦶ.

꧔꧗. ꦢꦏ꧀ꦑꦶꦟꦺꦪ꧀ꦪꦺ ꦄꦢꦠ꧀ꦮꦴꦤꦴꦠꦶ ꦢꦏ꧀ꦑꦶꦟꦴꦫꦲꦺ ꦥꦸꦒ꧀ꦒꦭꦺ ꦢꦺꦪ꧀ꦪꦣꦩ꧀ꦩꦁ ꦄꦥꦫꦶꦕ꧀ꦕꦗꦶꦠ꧀ꦮꦴ. ꦄꦥꦶ ꦖꦥ꧀ꦥꦚ꧀ꦕ ꦫꦠ꧀ꦠꦶꦪꦺꦴꦠꦶ ꦄꦥ꧀ꦥꦺꦏꦢꦴ ꦖꦥꦶ ꦥꦚ꧀ꦕꦥꦶ ꦫꦠ꧀ꦠꦶꦪꦺꦴ ꦄꦠ꧀ꦠꦤꦺꦴ ꦥꦶꦮꦤꦑꦴꦢꦤꦨꦸꦚ꧀ꦗꦤꦴꦤꦶ ꦤ ꦏꦫꦺꦴꦩꦷꦠꦶ ꦢꦱ꧀ꦱꦺꦠꦶ.

ꦠꦢꦴ ꦏꦶꦫ ꦧꦺꦴꦣꦶꦱꦠ꧀ꦠꦺꦴ ꦱꦏꦭꦗꦩ꧀ꦧꦸꦢꦷꦥꦁ ꦈꦤ꧀ꦤꦔ꧀ꦒꦭꦁ ꦏꦠ꧀ꦮꦴ ꦩꦲꦴꦩꦺꦓꦺꦴ ꦮꦶꦪ ꦄꦨꦶꦮꦱ꧀ꦱꦤ꧀ꦠꦺꦴ ꦩꦲꦴꦢꦴꦤꦁ ꦥꦮꦠ꧀ꦠꦺꦱꦶ. ꦠꦠ꧀ꦡ ꦏꦶꦚ꧀ꦕꦴꦥꦶ ꦢꦴꦤꦱꦴꦭꦴꦱꦸ ꦄꦤ꧀ꦤꦥꦴꦤꦴꦢꦶꦈꦭ꦳ꦴꦫꦸꦭ꦳ꦴꦫꦥꦟꦷꦠꦥꦟꦷꦠꦩꦺꦮ ꦪꦴꦕꦏꦴꦤꦁ ꦪꦡꦴꦫꦸꦕꦶꦠꦁ ꦢꦶꦮꦱꦺ ꦢꦶꦮꦱꦺ ꦢꦷꦪꦠꦶ, ꦠꦡꦴꦥꦶ ꦄꦠ꧀ꦠꦤꦺꦴ ꦱꦗ꧀ꦗꦶꦠꦁ ꦄꦴꦲꦴꦫꦁ ꦫꦴꦗꦴꦫꦲꦨꦺꦴꦗꦤꦩ꧀ꦥꦶ ꦪꦴꦕꦏꦴꦤꦁ ꦄꦢꦠ꧀ꦮꦴ ꦤ ꦨꦸꦚ꧀ꦗꦠꦶ, ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦤꦴꦲꦁ ꦥꦶꦮꦴꦩꦷ’’ꦠꦶꦄꦴꦢꦶ.

꧔꧘. ꦆꦢꦴꦤꦶ ꦠꦡꦴ ꦪꦴꦕꦏꦴꦤꦁ ꦢꦴꦤꦺ ꦏꦴꦫꦟꦁ ꦢꦱ꧀ꦱꦺꦤ꧀ꦠꦺꦴ ꦈꦥꦩꦁ ꦠꦴꦮ ꦄꦴꦲꦫꦠꦶ ‘‘ꦪꦡꦴꦥꦶ ꦮꦴꦟꦶꦗꦺꦴ ꦤꦴꦩꦴ’’ꦠꦶꦄꦴꦢꦶꦤꦴ. ꦠꦱ꧀ꦱꦠ꧀ꦡꦺꦴ – ꦪꦡꦴ ꦤꦴꦩ ꦮꦴꦟꦶꦗꦺꦴ ꦨꦟ꧀ꦝꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦄꦥ꧀ꦥꦺꦤ ꦥꦴꦨꦠꦺꦤ ꦧꦲꦸꦁ ꦨꦟ꧀ꦝꦁ ꦮꦶꦏ꧀ꦏꦶꦟꦶꦠ꧀ꦮꦴ ꦮꦶꦥꦸꦭꦁ ꦨꦟ꧀ꦝꦱꦤ꧀ꦤꦶꦕꦪꦁ ꦏꦠ꧀ꦮꦴ ꦢꦺꦱꦏꦴꦭꦁ ꦗꦴꦤꦤ꧀ꦠꦺꦴ ꦪꦠ꧀ꦡꦱ꧀ꦱ ꦭꦴꦨꦺꦴ ꦈꦢꦪꦺꦴ ꦩꦲꦴ ꦲꦺꦴꦠꦶ, ꦠꦠ꧀ꦡ ꦢꦺꦱꦺ ꦏꦴꦭꦺ ꦮꦴ ꦠꦁ ꦨꦟ꧀ꦝꦁ ꦲꦫꦠꦶ ꦈꦥꦤꦺꦠꦶ ꦮꦶꦏ꧀ꦏꦶꦟꦴꦠꦶ.

꧔꧙. ꦱꦏꦨꦸꦠ꧀ꦠꦴꦥꦷꦠꦶ ꦱꦏꦨꦸꦠ꧀ꦠꦠꦺꦴꦥꦶ ꦄꦠ꧀ꦠꦤꦴ ꦥꦫꦶꦨꦸꦠ꧀ꦠꦠꦺꦴꦥꦶ. ‘‘ꦱꦏꦥꦫꦶꦨꦸꦠ꧀ꦠꦴꦥꦷ’’ꦠꦶꦥꦶ ꦥꦴꦜꦺꦴ. ꦥꦫꦺꦠꦶ ꦥꦫꦱ꧀ꦩꦶꦁ ꦥꦛꦶꦒ꧀ꦒꦴꦲꦏꦥꦸꦒ꧀ꦒꦭꦺ. ꦱꦠꦨꦴꦒꦺꦴꦠꦶ ꦄꦤꦺꦏꦱꦠꦨꦴꦒꦺꦴ ꦄꦴꦪꦠꦶꦁ ꦨꦮꦶꦱ꧀ꦱꦠꦶ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦪꦡꦴ ꦮꦴꦟꦶꦗꦺꦤ ꦏꦷꦠꦨꦟ꧀ꦝꦁ ꦠꦠ꧀ꦡꦺꦮ ꦄꦮꦶꦏ꧀ꦏꦶꦟꦶꦠ꧀ꦮꦴ ꦠꦡꦴꦫꦹꦥꦺ ꦢꦺꦱꦺ ꦏꦴꦭꦺ ꦕ ꦮꦶꦏ꧀ꦏꦶꦟꦶꦪꦩꦴꦤꦁ ꦧꦲꦸꦁ ꦈꦢꦪꦁ ꦮꦶꦥꦸꦭꦁ ꦦꦭꦁ ꦲꦺꦴꦠꦶ, ꦠꦡꦺꦮ ꦄꦠ꧀ꦠꦤꦺꦴ ꦱꦤ꧀ꦠꦏꦁ ꦄꦠ꧀ꦠꦤꦴ ꦄꦤꦸꦥꦨꦸꦚ꧀ꦗꦶꦠ꧀ꦮꦴ ꦥꦫꦱ꧀ꦩꦶꦁ ꦥꦛꦶꦒ꧀ꦒꦴꦲꦏꦥꦸꦒ꧀ꦒꦭꦺ ꦢꦶꦤ꧀ꦤꦁ ꦩꦲꦥ꧀ꦦꦭꦁ ꦄꦤꦺꦏꦱꦠꦨꦴꦒꦺꦴ ꦨꦮꦶꦱ꧀ꦱꦠꦶ, ꦠꦱ꧀ꦩꦴ ꦄꦠ꧀ꦠꦤꦴ ꦄꦨꦸꦚ꧀ꦗꦶꦠ꧀ꦮꦴꦥꦶ ꦥꦫꦱ꧀ꦱ ꦢꦴꦠꦧ꧀ꦧꦩꦺꦮꦴꦠꦶ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ – ‘‘ꦠꦶꦫꦕ꧀ꦖꦴꦤꦒꦠꦺ ꦢꦴꦤꦁ ꦢꦠ꧀ꦮꦴ ꦱꦠꦒꦸꦟꦴ ꦢꦏ꧀ꦑꦶꦟꦴ ꦥꦴꦛꦶꦏꦔ꧀ꦑꦶꦠꦧ꧀ꦧꦴ. ꦥꦸꦡꦸꦗ꧀ꦗꦤꦢꦸꦱ꧀ꦱꦷꦭꦺ ꦢꦴꦤꦁ ꦢꦠ꧀ꦮꦴ ꦱꦲꦱ꧀ꦱꦒꦸꦟꦴ’’ꦠꦶ (ꦩ. ꦤꦶ. ꧓.꧓꧗꧙) ꦮꦶꦠ꧀ꦡꦴꦫꦺꦴ. ꦄꦥꦫꦩ꧀ꦥꦶ ꦮꦸꦠ꧀ꦠꦁ ‘‘ꦌꦮꦁ ꦕꦺ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦗꦴꦤꦺꦪ꧀ꦪꦸꦁ ꦢꦴꦤꦱꦁꦮꦶꦨꦴꦒꦱ꧀ꦱ ꦮꦶꦥꦴꦏꦁ, ꦪꦡꦴꦲꦁ ꦗꦴꦤꦴꦩꦶ, ꦤ ꦄꦢꦠ꧀ꦮꦴ ꦨꦸꦚ꧀ꦗꦺꦪ꧀ꦪꦸꦁ, ꦤ ꦕ ꦤꦺꦱꦁ ꦩꦕ꧀ꦖꦺꦫꦩꦭꦁ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦠꦶꦛ꧀ꦜꦺꦪ꧀ꦪ. ꦪꦺꦴꦥꦶ ꦤꦺꦱꦁ ꦄꦱ꧀ꦱ ꦕꦫꦶꦩꦺꦴ ꦄꦴꦭꦺꦴꦥꦺꦴ ꦕꦫꦶꦩꦁ ꦏꦧꦭ꦳ꦁ, ꦠꦠꦺꦴꦥꦶ ꦤ ꦄꦱꦁꦮꦶꦨꦗꦶꦠ꧀ꦮꦴ ꦨꦸꦚ꧀ꦗꦺꦪ꧀ꦪꦸ’’ꦤ꧀ꦠꦶꦄꦴꦢꦶ (ꦆꦠꦶꦮꦸ. ꧒꧖).

꧕꧐. ꦌꦠꦩꦠ꧀ꦡꦮꦱꦁ ꦚꦠ꧀ꦮꦴꦠꦶ ꦌꦠꦁ ꦢꦴꦤꦱ꧀ꦱ ꦩꦲꦥ꧀ꦦꦭꦨꦴꦮꦱꦔ꧀ꦑꦴꦠꦚ꧀ꦕꦺꦮ ꦱꦩ꧀ꦩꦴꦱꦩ꧀ꦧꦺꦴꦣꦶꦪꦴ ꦥꦕ꧀ꦕꦪꦨꦴꦮꦱꦔ꧀ꦑꦴꦠꦚ꧀ꦕ ꦄꦠ꧀ꦡꦮꦱꦁ ꦏꦴꦫꦟꦁ ꦗꦴꦤꦶꦠ꧀ꦮꦴ. ꦤ ꦥꦛꦶꦏ꧀ꦏꦩꦴꦩꦶ ꦢꦴꦤꦠꦺꦴꦠꦶ ꦢꦴꦤꦥꦴꦫꦩꦶꦠꦺꦴ ꦇꦱꦏꦩ꧀ꦥꦶ ꦤ ꦤꦶꦮꦠ꧀ꦠꦴꦩꦶ ꦄꦨꦶꦏ꧀ꦏꦩꦴꦩꦶ ꦌꦮ. ꦏꦶꦩꦠ꧀ꦡꦁ? ꦱꦩ꧀ꦧꦺꦴꦣꦶꦩꦤꦸꦥꦠ꧀ꦠꦶꦪꦴꦠꦶ ꦱꦩ꧀ꦧꦺꦴꦣꦶꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦄꦤꦸꦥ꧀ꦥꦠ꧀ꦠꦶꦪꦴ ꦄꦤꦸꦥ꧀ꦥꦠ꧀ꦠꦶꦪꦠ꧀ꦡꦁ, ꦄꦣꦶꦒꦤ꧀ꦠꦸꦤ꧀ꦠꦶ ꦄꦠ꧀ꦡꦺꦴ.

ꦠꦢꦴ ꦧꦺꦴꦣꦶꦱꦠ꧀ꦠꦺꦴ ꦩꦲꦴꦗꦤꦺꦤ ꦥꦶꦠꦫꦶ ꦕꦟ꧀ꦝꦴꦭꦒꦴꦩꦁ ꦥꦮꦺꦱꦶꦠꦺ ꦢꦴꦠꦧ꧀ꦧꦪꦸꦠ꧀ꦠꦏꦁ ꦥꦫꦶꦧ꧀ꦧꦪꦁ ꦢꦴꦥꦺꦱꦶ ꦤꦶꦮꦴꦱꦤꦴꦤꦶ ꦥꦴꦫꦸꦥꦤꦴꦤꦶ ꦕ. ꦱꦺꦴꦥꦶ ꦤꦒꦫꦁ ꦥꦮꦶꦱꦶꦠꦸꦁ ꦄꦭꦨꦤ꧀ꦠꦺꦴ ꦧꦺꦴꦣꦶꦱꦠ꧀ꦠꦺ ꦈꦪ꧀ꦪꦴꦤꦏꦷꦭ꦳ꦴꦢꦶꦄꦠ꧀ꦡꦁ ꦧꦲꦶꦒꦠꦺ ꦈꦥꦱꦔ꧀ꦏꦩꦠꦶ, ꦥꦸꦠ꧀ꦠꦱꦚ꧀ꦚꦴꦪ ꦥꦤ ꦤ ꦮꦤ꧀ꦢꦠꦶ, ꦤ ꦄꦚ꧀ꦗꦭꦶꦏꦩ꧀ꦩꦁ ꦏꦫꦺꦴꦠꦶ, ‘‘ꦕꦶꦫꦁ ꦗꦷꦮ, ꦱꦴꦩꦷ’’ꦠꦶ ꦮꦢꦠꦶ. ꦧꦺꦴꦣꦶꦱꦠ꧀ꦠꦺꦴꦥꦶ ꦢꦶꦛ꧀ꦜꦢꦶꦮꦱꦺ ꦄꦠꦶꦫꦺꦏꦱꦩ꧀ꦩꦴꦤꦁ ꦏꦫꦺꦴꦠꦶ. ꦱꦺꦴ ꦌꦮꦁ ꦣꦩ꧀ꦩꦺꦤ ꦫꦗ꧀ꦗꦁ ꦏꦴꦫꦺꦠ꧀ꦮꦴ ꦄꦴꦪꦸꦥꦫꦶꦪꦺꦴꦱꦴꦤꦺ ꦱꦥꦫꦶꦱꦺꦴ ꦢꦺꦮꦭꦺꦴꦏꦁ ꦥꦹꦫꦺꦱꦶ.

ꦠꦢꦴ ꦑꦟ꧀ꦝꦲꦴꦭꦺꦴ ꦢꦺꦮꦢꦠ꧀ꦠꦺꦴ ꦄꦲꦺꦴꦱꦶ, ꦒꦺꦴꦠꦩꦷ ꦢꦺꦮꦷ ꦩꦲꦴꦩꦴꦪꦴ, ꦕꦤ꧀ꦢꦴ ꦫꦴꦗꦣꦷꦠꦴ ꦫꦴꦲꦸꦭꦩꦴꦠꦴ, ꦮꦴꦱꦸꦭꦺꦴ ꦫꦴꦲꦸꦭꦺꦴ, ꦱꦺꦭꦴ ꦈꦥ꧀ꦥꦭꦮꦟ꧀ꦟꦴ, ꦱꦹꦫꦺꦴ ꦩꦲꦴꦏꦱ꧀ꦱꦥꦺꦴ, ꦨꦢ꧀ꦢꦱꦺꦤꦺꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ, ꦱꦹꦫꦶꦪꦏꦸꦩꦴꦫꦺꦴ ꦱꦴꦫꦶꦥꦸꦠ꧀ꦠꦺꦴ, ꦕꦤ꧀ꦢꦫꦴꦗꦴ ꦭꦺꦴꦏꦤꦴꦡꦺꦴ.

ꦠꦱ꧀ꦱ ꦆꦣꦴꦥꦶ ꦥꦸꦧ꧀ꦧꦺ ꦮꦸꦠ꧀ꦠꦤꦪꦺꦤꦺꦮ ꦪꦡꦴꦫꦲꦁ ꦱꦺꦱꦥꦴꦫꦩꦶꦪꦺꦴ ꦤꦶꦢ꧀ꦣꦴꦫꦺꦠꦧ꧀ꦧꦴ. ꦠꦢꦴ ꦑꦟ꧀ꦝꦲꦴꦭꦱ꧀ꦱ ꦏꦏ꧀ꦑꦭ꦳ꦦꦫꦸꦱꦨꦴꦮꦁ ꦗꦴꦤꦤ꧀ꦠꦺꦴꦥꦶ ꦄꦗ꧀ꦙꦸꦥꦺꦏ꧀ꦑꦶꦠ꧀ꦮꦴ ꦣꦩ꧀ꦩꦺꦤ ꦱꦩꦺꦤ ꦄꦛ꧀ꦛꦱ꧀ꦱ ꦮꦶꦤꦶꦕ꧀ꦖꦪꦺꦴ, ꦄꦠ꧀ꦠꦴꦤꦁ ꦩꦴꦫꦺꦠꦸꦏꦴꦩꦱ꧀ꦱꦺꦮ ꦑꦟ꧀ꦝꦲꦴꦭꦱ꧀ꦱ ꦠꦡꦴ ꦪꦚ꧀ꦚꦮꦶꦣꦴꦤꦁ ꦗꦴꦤꦶꦠ꧀ꦮꦴꦥꦶ ꦠꦱ꧀ꦱ ꦈꦥꦫꦶ ꦕꦶꦠ꧀ꦠꦥ꧀ꦥꦏꦺꦴꦥꦴꦨꦴꦮꦺꦴ, ꦄꦠ꧀ꦠꦤꦺꦴ ꦥꦫꦶꦱꦁ ꦒꦲꦺꦠ꧀ꦮꦴ ꦥꦶꦠꦸ ꦱꦠ꧀ꦠꦸ ꦨꦮꦶꦠꦸꦁ ꦱꦩꦠ꧀ꦡꦺꦴꦥꦶ ‘‘ꦩꦴꦢꦶꦱꦱ꧀ꦱ ꦤꦴꦩ ꦒꦫꦹꦲꦶ ꦮꦶꦫꦺꦴꦣꦺꦴ ꦤ ꦪꦸꦠ꧀ꦠꦺꦴ’’ꦠꦶ ꦄꦠ꧀ꦠꦴꦤꦁ ꦥꦸꦫꦶꦱꦥꦱꦸꦁ ꦏꦠ꧀ꦮꦴ ꦓꦴꦠꦴꦥꦺꦠꦸꦏꦴꦩꦱ꧀ꦱ ꦥꦶꦠꦸ ꦄꦴꦟꦴꦪꦁ ꦄꦮꦛ꧀ꦜꦴꦤꦁ, ꦏꦺꦴꦱꦶꦪꦴ ꦄꦱꦶꦁ ꦒꦲꦺꦠ꧀ꦮꦴ ꦱꦷꦱꦁ ꦖꦶꦤ꧀ꦢꦶꦠꦸꦁ ꦈꦥꦏ꧀ꦏꦩꦤ꧀ꦠꦺ ꦥꦸꦫꦺꦴꦲꦶꦠꦺ ꦄꦠ꧀ꦠꦤꦺꦴ ꦥꦶꦠꦫꦶ ꦥꦸꦠ꧀ꦠꦺ ꦱꦧ꧀ꦧꦱꦠ꧀ꦠꦺꦱꦸ ꦕ ꦩꦺꦠ꧀ꦠꦴꦦꦫꦟꦺꦤ ꦱꦩꦕꦶꦠ꧀ꦠꦠꦴ, ꦩꦲꦴꦗꦤꦺ ꦥꦶꦠꦫꦁ ꦩꦴꦫꦺꦠꦸꦁ ꦈꦥꦏ꧀ꦏꦩꦤ꧀ꦠꦺ ꦱꦪꦁ ꦥꦭꦶꦱ꧀ꦱꦗꦶꦠ꧀ꦮꦴ ꦠꦱ꧀ꦱ ꦗꦷꦮꦶꦠꦢꦴꦤꦚ꧀ꦕ, ꦢꦶꦮꦱꦺ ꦢꦶꦮꦱꦺ ꦮꦺꦱ꧀ꦱꦤ꧀ꦠꦫꦢꦴꦤꦱꦢꦶꦱꦁ ꦩꦲꦴꦢꦴꦤꦁ ꦢꦢꦠꦺꦴꦥꦶ ꦢꦴꦤꦺꦤ ꦄꦠꦶꦠ꧀ꦠꦨꦴꦮꦺꦴ, ꦩꦲꦴꦗꦤꦺꦤ ꦕꦟ꧀ꦝꦴꦭꦺꦱꦸ ꦮꦴꦱꦴꦥꦶꦠꦱ꧀ꦱ ꦥꦶꦠꦸ ꦢꦴꦠꦧ꧀ꦧꦪꦸꦠ꧀ꦠꦏꦁ ꦢꦠ꧀ꦮꦴ ꦥꦺꦴꦱꦤꦁ, ꦩꦲꦴꦗꦤꦁ ꦥꦸꦚ꧀ꦚꦏꦶꦫꦶꦪꦴꦱꦸ ꦥꦠꦶꦛ꧀ꦜꦴꦥꦤꦤ꧀ꦠꦶ ꦌꦮꦩꦴꦢꦪꦺꦴ ꦒꦸꦟꦴꦤꦸꦨꦴꦮꦴ ꦤꦶꦢ꧀ꦣꦴꦫꦺꦠꦧ꧀ꦧꦴꦠꦶ.

ꦕꦤ꧀ꦢꦏꦸꦩꦴꦫꦕꦫꦶꦪꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.