꧙. ꦧꦺꦴꦣꦶꦱꦶꦚ꧀ꦕꦏꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦮꦶꦥꦱ꧀ꦱꦶꦱ꧀ꦱ ꦨꦒꦮꦠꦺꦴꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦺꦴ ꦧꦺꦴꦣꦶꦱꦶꦚ꧀ꦕꦏꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦄꦤꦺꦏꦴꦱꦸ ꦗꦴꦠꦷꦱꦸ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦴꦤꦶ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦺꦴ ꦮꦶꦥꦱ꧀ꦱꦶꦱ꧀ꦱ ꦨꦒꦮꦠꦺꦴ ꦏꦴꦭꦺ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦺꦴ ꦱꦴꦱꦤꦺ ꦥꦧ꧀ꦧꦗꦶꦠ꧀ꦮꦴ ꦮꦠ꧀ꦠꦥꦛꦶꦥꦠ꧀ꦠꦶꦪꦴ ꦱꦴꦱꦤꦁ ꦱꦺꦴꦨꦪꦤ꧀ꦠꦺꦴ ꦩꦲꦴꦗꦤꦺ ꦧꦺꦴꦣꦶꦥꦹꦗꦁ ꦏꦸꦫꦸꦩꦴꦤꦺ ꦢꦶꦱ꧀ꦮꦴ ꦄꦤꦺꦏꦴꦤꦶ ꦥꦸꦥ꧀ꦦꦴꦤꦶ ꦱꦸꦒꦤ꧀ꦣꦺꦴꦢꦏꦴꦤꦶ ꦕ ꦒꦴꦲꦴꦥꦺꦠ꧀ꦮꦴ ꦥꦹꦗꦺꦱꦶ. ꦱꦺꦴ ꦠꦺꦤ ꦥꦸꦚ꧀ꦚꦺꦤ ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦺꦴ ꦖ ꦏꦴꦩꦴꦮꦕꦫꦱꦩ꧀ꦥꦠ꧀ꦠꦶꦪꦺꦴ ꦄꦤꦸꦨꦮꦶꦠ꧀ꦮꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦺꦴ ꦮꦸꦢ꧀ꦣꦶꦩꦤ꧀ꦮꦴꦪ ꦱꦢ꧀ꦣꦴꦗꦴꦠꦺꦴ ꦥꦧ꧀ꦧꦗꦶꦠ꧀ꦮꦴ ꦤꦕꦶꦫꦱ꧀ꦱꦺꦮ ꦄꦫꦲꦴ ꦄꦲꦺꦴꦱꦶ.

꧔꧖. ꦱꦺꦴ ꦄꦫꦲꦴ ꦲꦸꦠ꧀ꦮꦴ ꦙꦴꦤꦦꦭꦱꦸꦑꦺꦤ ꦮꦷꦠꦶꦤꦴꦩꦺꦠ꧀ꦮꦴ ꦥꦸꦧ꧀ꦧꦏꦩ꧀ꦩꦁ ꦱꦫꦶꦠ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦮꦶꦥꦱ꧀ꦱꦶꦱ꧀ꦱ ꦨꦒꦮꦠꦺꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦮꦶꦱꦺꦱꦁ ꦥꦫꦩꦠ꧀ꦡꦁ ꦤꦶꦧ꧀ꦧꦴꦤꦁ ꦥꦱ꧀ꦱꦠꦷꦠꦶ ꦮꦶꦥꦱ꧀ꦱꦷ, ꦮꦶꦱꦺꦱꦺꦤ ꦨꦧ꧀ꦧꦴꦨꦧ꧀ꦧꦗꦤꦺ ꦥꦱ꧀ꦱꦠꦷꦠꦶ ꦮꦴ ꦮꦶꦥꦱ꧀ꦱꦷ, ꦮꦶꦥꦱ꧀ꦱꦤ꧀ꦠꦺꦴ ꦕꦠꦸꦱꦕ꧀ꦕꦁ ꦥꦱ꧀ꦱꦤꦢꦏ꧀ꦑꦤꦱꦷꦭꦺꦴꦠꦶ ꦮꦴ ꦮꦶꦥꦱ꧀ꦱꦷ, ꦠꦱ꧀ꦱ ꦮꦶꦥꦱ꧀ꦱꦶꦱ꧀ꦱ ꦨꦒꦮꦠꦺꦴ ꦩꦲꦴꦧꦺꦴꦣꦶꦩꦲꦺꦴ ꦄꦲꦹꦠꦶ ꦱꦩ꧀ꦧꦤ꧀ꦣꦺꦴ. ꦠꦠ꧀ꦫꦴꦥꦶ ꦩꦲꦴꦧꦺꦴꦣꦷꦠꦶ ꦧꦺꦴꦣꦶ ꦮꦸꦕ꧀ꦕꦠꦶ ꦕꦠꦹꦱꦸ ꦩꦒ꧀ꦒꦺꦱꦸ ꦚꦴꦟꦁ, ꦠꦩꦺꦠ꧀ꦡ ꦤꦶꦱꦶꦤ꧀ꦤꦺꦴ ꦨꦒꦮꦴ ꦥꦛꦶꦮꦶꦗ꧀ꦙꦠꦷꦠꦶ ꦏꦟꦶꦏꦴꦫꦥꦴꦢꦥꦫꦸꦏ꧀ꦑꦺꦴꦥꦶ ꦧꦺꦴꦣꦶꦕ꧀ꦕꦺꦮ ꦮꦸꦕ꧀ꦕꦠꦶ, ꦩꦲꦶꦠꦺꦴ ꦕ ꦱꦺꦴ ꦢꦺꦮꦧ꧀ꦫꦲ꧀ꦩꦤꦫꦴꦱꦸꦫꦺꦲꦶ ꦧꦺꦴꦣꦶ ꦕꦺꦠꦶ ꦩꦲꦴꦧꦺꦴꦣꦶ, ꦩꦲꦠꦺꦴ ꦧꦸꦢ꧀ꦣꦱ꧀ꦱ ꦨꦒꦮꦠꦺꦴ ꦧꦺꦴꦣꦷꦠꦶ ꦮꦴ ꦩꦲꦴꦧꦺꦴꦣꦶ, ꦠꦱ꧀ꦱ ꦩꦲꦺꦴ ꦥꦹꦗꦴ ꦄꦲꦺꦴꦱꦷꦠꦶ ꦄꦠ꧀ꦡꦺꦴ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮꦴꦠꦶ.

ꦧꦺꦴꦣꦶꦱꦶꦚ꧀ꦕꦏꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.