꧔. ꦄꦣꦺꦴꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦄꦨꦶꦨꦹ ꦤꦴꦩ ꦱꦺꦴ ꦨꦶꦏ꧀ꦑꦹꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦺꦴ ꦄꦣꦺꦴꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦄꦤꦺꦏꦺꦱꦸ ꦨꦮꦺꦱꦸ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦴꦤꦶ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦺꦴ ꦱꦶꦑꦶꦱ꧀ꦱ ꦨꦒꦮꦠꦺꦴ ꦏꦴꦭꦺ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦺꦴ ꦮꦸꦢ꧀ꦣꦶꦥ꧀ꦥꦠ꧀ꦠꦺꦴ ꦓꦫꦴꦮꦴꦱꦁ ꦱꦟ꧀ꦜꦥꦺꦠ꧀ꦮꦴ ꦄꦥꦫꦨꦴꦒꦺ ꦏꦴꦩꦺꦱꦸ ꦄꦴꦢꦷꦤꦮꦁ ꦢꦶꦱ꧀ꦮꦴ ꦠꦁ ꦥꦲꦴꦪ ꦆꦱꦶꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦥꦚ꧀ꦕꦴꦨꦶꦚ꧀ꦚꦴꦄꦛ꧀ꦜꦱꦩꦴꦥꦠ꧀ꦠꦶꦭꦴꦨꦷ ꦆꦢ꧀ꦣꦷꦱꦸ ꦕ ꦮꦱꦷꦨꦴꦮꦁ ꦥꦠ꧀ꦮꦴ ꦲꦶꦩꦮꦤ꧀ꦠꦱ꧀ꦩꦶꦁ ꦥꦛꦶꦮꦱꦠꦶ. ꦠꦱ꧀ꦱ ꦱꦶꦑꦶꦱ꧀ꦱ ꦨꦒꦮꦠꦺꦴ ꦄꦨꦶꦨꦹ ꦤꦴꦩ ꦄꦒ꧀ꦒꦱꦴꦮꦏꦺꦴ ꦮꦶꦮꦺꦏꦴꦨꦶꦫꦠꦺꦴ ꦲꦶꦩꦮꦤ꧀ꦠꦩꦒꦩꦴꦱꦶ. ꦄꦡ ꦱꦺꦴ ꦠꦴꦥꦱꦺꦴ ꦠꦁ ꦄꦒ꧀ꦒꦱꦴꦮꦏꦠ꧀ꦡꦺꦫꦁ ꦢꦶꦱ꧀ꦮꦴ ꦡꦺꦫꦱ꧀ꦱ ꦜꦶꦠꦥꦧ꧀ꦧꦠꦁ ꦄꦴꦫꦸꦲꦤ꧀ꦠꦺꦴ ꦥꦧ꧀ꦧꦠꦱ꧀ꦱ ꦲꦺꦛ꧀ꦜꦴꦠꦭꦠꦺꦴ ꦱꦸꦒꦤ꧀ꦣꦴꦤꦶ ꦮꦟ꧀ꦟꦱꦩ꧀ꦥꦤ꧀ꦤꦴꦤꦶ ꦱꦠ꧀ꦠ ꦥꦸꦥ꧀ꦦꦴꦤꦶ ꦒꦲꦺꦠ꧀ꦮꦴ ꦥꦹꦗꦺꦱꦶ. ꦄꦡ ꦱꦺꦴ ꦡꦺꦫꦺꦴ ꦠꦱ꧀ꦱꦴꦤꦸꦩꦺꦴꦢꦤꦩꦏꦴꦱꦶ. ꦱꦺꦴꦥꦶ ꦠꦴꦥꦱꦺꦴ ꦱꦏꦱ꧀ꦱꦩꦁ ꦄꦒꦩꦴꦱꦶ. ꦠꦠ꧀ꦡ ꦌꦏꦺꦤ ꦄꦗꦒꦫꦺꦤ ꦥꦷꦭ꦳ꦶꦠꦺꦴ ꦄꦥꦫꦨꦴꦒꦺ ꦄꦥꦫꦶꦲꦷꦤꦗ꧀ꦙꦴꦤꦺꦴ ꦠꦺꦤꦺꦮ ꦈꦥꦢ꧀ꦢꦮꦺꦤ ꦈꦥꦢ꧀ꦢꦸꦠꦺꦴ ꦏꦴꦭꦁ ꦏꦠ꧀ꦮꦴ ꦧ꧀ꦫꦲ꧀ꦩꦭꦺꦴꦏꦥꦫꦴꦪꦤꦺꦴ ꦲꦸꦠ꧀ꦮꦴ ꦧ꧀ꦫꦲ꧀ꦩꦱꦩ꧀ꦥꦠ꧀ꦠꦶꦁ ꦖꦏꦴꦩꦴꦮꦕꦫꦱꦩ꧀ꦥꦠ꧀ꦠꦶꦚ꧀ꦕ ꦄꦤꦸꦨꦮꦶꦠ꧀ꦮꦴ ꦩꦤꦸꦱ꧀ꦱꦺꦱꦸ ꦩꦤꦸꦱ꧀ꦱꦱꦩ꧀ꦥꦠ꧀ꦠꦶꦪꦺꦴ ꦕ ꦑꦺꦥꦺꦠ꧀ꦮꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦌꦏꦱ꧀ꦩꦶꦁ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦺꦴ ꦮꦸꦢ꧀ꦣꦶꦥ꧀ꦥꦠ꧀ꦠꦺꦴ ꦨꦒꦮꦠꦺꦴ ꦣꦩ꧀ꦩꦁ ꦱꦸꦠ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ꦥꦧ꧀ꦧꦗꦶꦠ꧀ꦮꦴ ꦤꦕꦶꦫꦱ꧀ꦱꦺꦮ ꦄꦫꦲꦴ ꦄꦲꦺꦴꦱꦶ. ꦱꦺꦴ ꦄꦥꦫꦨꦴꦒꦺ ꦄꦠ꧀ꦠꦤꦺꦴ ꦏꦠꦥꦸꦚ꧀ꦚꦤꦴꦩꦺꦤ ꦄꦣꦺꦴꦥꦸꦥ꧀ꦦꦶꦪꦠ꧀ꦡꦺꦫꦺꦴꦠꦶ ꦥꦴꦏꦛꦺꦴ.

꧒꧒. ꦱꦺꦴ ꦌꦏꦢꦶꦮꦱꦁ ꦄꦠ꧀ꦠꦤꦺꦴ ꦥꦸꦧ꧀ꦧꦏꦩ꧀ꦩꦁ ꦱꦫꦶꦠ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦄꦨꦶꦨꦹ ꦤꦴꦩ ꦱꦺꦴ ꦨꦶꦏ꧀ꦑꦹꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦷꦭꦱꦩꦴꦣꦷꦲꦶ ꦥꦫꦺ ꦄꦨꦶꦨꦮꦠꦷꦠꦶ ꦄꦨꦶꦨꦹ, ꦑꦤ꧀ꦣꦩꦴꦫꦴꦢꦶꦩꦴꦫꦺ ꦄꦨꦶꦨꦮꦠꦶ ꦄꦗ꧀ꦙꦺꦴꦠ꧀ꦡꦫꦠꦷꦠꦶ ꦮꦴ ꦄꦨꦶꦨꦹ, ꦱꦱꦤ꧀ꦠꦴꦤꦥꦫꦱꦤ꧀ꦠꦴꦤꦒꦠꦏꦶꦭꦺꦱꦺ ꦄꦨꦶꦨꦮꦠꦶ ꦮꦶꦲꦺꦱꦺꦠꦶ ꦮꦶꦢ꧀ꦣꦁꦱꦺꦠꦷꦠꦶ ꦮꦴ ꦄꦨꦶꦨꦹ. ꦨꦶꦏ꧀ꦑꦤꦱꦷꦭꦺꦴ ꦪꦴꦕꦤꦱꦷꦭꦺꦴꦠꦶ ꦨꦶꦏ꧀ꦑꦸ, ꦖꦶꦤ꧀ꦤꦨꦶꦤ꧀ꦤꦥꦛꦣꦫꦺꦴꦠꦶ ꦮꦴ ꦨꦶꦏ꧀ꦑꦸ. ꦄꦨꦶꦨꦹ ꦤꦴꦩ ꦄꦒ꧀ꦒꦱꦴꦮꦏꦺꦴ ꦱꦺꦴ ꦨꦶꦏ꧀ꦑꦹꦠꦶ ꦄꦠ꧀ꦡꦺꦴ, ꦱꦶꦑꦶꦱ꧀ꦱ ꦨꦒꦮꦠꦺꦴ ꦄꦒ꧀ꦒꦱꦴꦮꦏꦺꦴꦠꦶ ꦱꦩ꧀ꦧꦤ꧀ꦣꦺꦴ.

꧒꧗. ꦄꦗꦒꦫꦺꦴ ꦩꦁ ꦥꦷꦭ꦳ꦺꦱꦷꦠꦶ ꦠꦡꦴꦫꦹꦥꦁ ꦱꦷꦭꦱꦩ꧀ꦥꦤ꧀ꦤꦁ ꦙꦴꦤꦱꦩ꧀ꦥꦤ꧀ꦤꦁ ꦠꦴꦥꦱꦁ ꦥꦸꦧ꧀ꦧꦺ ꦏꦠꦥꦴꦥꦺꦤ ꦮꦺꦫꦺꦤ ꦕ ꦩꦲꦤ꧀ꦠꦺꦴ ꦄꦗꦒꦫꦱꦥ꧀ꦥꦺꦴ ꦥꦷꦭ꦳ꦺꦱꦶ. ꦱꦺꦴ ꦠꦺꦤꦺꦮ ꦈꦥꦢ꧀ꦢꦮꦺꦤ ꦈꦥꦢ꧀ꦢꦸꦠꦺꦴ ꦄꦥꦫꦶꦲꦷꦤꦗ꧀ꦙꦴꦤꦺꦴ ꦏꦴꦭꦁ ꦏꦠ꧀ꦮꦴ ꦧ꧀ꦫꦲ꧀ꦩꦭꦺꦴꦏꦥꦫꦴꦪꦟꦺꦴ ꦄꦴꦱꦶ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.

ꦄꦣꦺꦴꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.