꧑꧐. ꦕꦹꦭ꦳ꦱꦸꦒꦤ꧀ꦣꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦢꦱꦩꦴꦥꦢꦴꦤꦺ ꦆꦩꦩ꧀ꦲꦶ ꦨꦢ꧀ꦢꦏꦺ ꦏꦥ꧀ꦥꦺꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦺꦴ ꦱꦸꦒꦤ꧀ꦣꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦴꦤꦶ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦺꦴ ꦏꦱ꧀ꦱꦥꦱꦩ꧀ꦩꦴꦱꦩ꧀ꦧꦸꦢ꧀ꦣꦏꦴꦭꦺ ꦧꦴꦫꦴꦟꦱꦶꦪꦁ ꦮꦶꦨꦮꦱꦩ꧀ꦥꦤ꧀ꦤꦺ ꦏꦸꦭꦺ ꦤꦶꦧ꧀ꦧꦠ꧀ꦠꦺꦴ ꦮꦶꦚ꧀ꦚꦸꦠꦁ ꦥꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦺ ꦣꦩ꧀ꦩꦁ ꦱꦸꦠ꧀ꦮꦴ ꦱꦧ꧀ꦧꦢꦴ ꦤꦩꦱ꧀ꦱꦩꦴꦤꦺꦴ ꦩꦲꦴꦢꦴꦤꦁ ꦢꦢꦩꦴꦤꦺꦴ ꦩꦴꦱꦱ꧀ꦱ ꦱꦠ꧀ꦠꦏ꧀ꦑꦠ꧀ꦠꦸꦁ ꦨꦒꦮꦠꦺꦴ ꦒꦤ꧀ꦣꦏꦸꦛꦶꦪꦴ ꦕꦠꦸꦗ꧀ꦗꦴꦠꦶꦒꦤ꧀ꦣꦺꦤ ꦮꦶꦭꦶꦩ꧀ꦥꦺꦱꦶ. ‘‘ꦩꦩ ꦤꦶꦧ꧀ꦧꦠ꧀ꦠꦤꦶꦧ꧀ꦧꦠ꧀ꦠꦛ꧀ꦜꦴꦤꦺ ꦱꦫꦷꦫꦠꦺꦴ ꦱꦸꦒꦤ꧀ꦣꦒꦤ꧀ꦣꦺꦴ ꦤꦶꦧ꧀ꦧꦠ꧀ꦠꦠꦹ’’ꦠꦶ ꦥꦠ꧀ꦡꦤꦁ ꦄꦏꦴꦱꦶ. ꦨꦒꦮꦴ ꦠꦁ ꦧ꧀ꦪꦴꦏꦴꦱꦶ. ꦱꦺꦴ ꦪꦴꦮꦠꦴꦪꦸꦏꦁ ꦜꦠ꧀ꦮꦴ ꦥꦸꦚ꧀ꦚꦴꦤꦶ ꦏꦫꦺꦴꦤ꧀ꦠꦺꦴ ꦠꦠꦺꦴ ꦕꦸꦠꦺꦴ ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦺꦴ ꦏꦴꦩꦴꦮꦕꦫꦭꦺꦴꦏꦁ ꦱꦫꦷꦫꦒꦤ꧀ꦣꦺꦤ ꦱꦸꦒꦤ꧀ꦣꦁ ꦏꦸꦫꦸꦩꦴꦤꦺꦴ ꦱꦸꦒꦤ꧀ꦣꦢꦺꦮꦥꦸꦠ꧀ꦠꦺꦴꦠꦶ ꦥꦴꦏꦛꦺꦴ ꦄꦲꦺꦴꦱꦶ. ꦱꦺꦴ ꦢꦺꦮꦭꦺꦴꦏꦱꦩ꧀ꦥꦠ꧀ꦠꦶꦪꦺꦴ ꦄꦤꦸꦨꦮꦶꦠ꧀ꦮꦴ ꦠꦠꦺꦴ ꦕꦸꦠꦺꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦩꦲꦴꦨꦺꦴꦒꦏꦸꦭꦺ ꦤꦶꦧ꧀ꦧꦠ꧀ꦠꦶ, ꦠꦱ꧀ꦱ ꦩꦴꦠꦸꦏꦸꦕ꧀ꦖꦶꦒꦠꦱ꧀ꦱꦺꦮ ꦩꦴꦠꦸꦪꦴ ꦱꦫꦷꦫꦒꦤ꧀ꦣꦺꦤ ꦱꦏꦭꦒꦺꦲꦁ ꦱꦏꦭꦤꦒꦫꦚ꧀ꦕ ꦱꦸꦒꦤ꧀ꦣꦺꦤ ꦌꦏꦒꦤ꧀ꦣꦁ ꦄꦲꦺꦴꦱꦶ, ꦗꦴꦠꦏ꧀ꦑꦟꦺ ꦱꦏꦭꦁ ꦱꦴꦮꦠ꧀ꦡꦶꦤꦒꦫꦁ ꦱꦸꦒꦤ꧀ꦣꦏꦫꦟ꧀ꦝꦏꦺꦴ ꦮꦶꦪ ꦄꦲꦺꦴꦱꦶ, ꦠꦺꦤꦱ꧀ꦱ ꦱꦸꦒꦤ꧀ꦣꦺꦴꦠꦶ ꦤꦴꦩꦁ ꦏꦫꦶꦁꦱꦸ. ꦱꦺꦴ ꦮꦸꦢ꧀ꦣꦶꦁ ꦄꦒꦩꦴꦱꦶ. ꦠꦢꦴ ꦱꦠ꧀ꦡꦴ ꦱꦴꦮꦠ꧀ꦡꦶꦪꦁ ꦥꦠ꧀ꦮꦴ ꦗꦺꦠꦮꦤꦩꦲꦴꦮꦶꦲꦴꦫꦁ ꦥꦛꦶꦒ꧀ꦒꦲꦺꦱꦶ, ꦠꦁ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ꦨꦒꦮꦠꦺꦴ ꦱꦤ꧀ꦠꦶꦏꦺ ꦥꦧ꧀ꦧꦗꦶꦠ꧀ꦮꦴ ꦤꦕꦶꦫꦱ꧀ꦱꦺꦮ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦠꦱ꧀ꦱ ꦈꦥ꧀ꦥꦤ꧀ꦤꦢꦶꦮꦱꦠꦺꦴ ꦥꦛ꧀ꦜꦴꦪ ꦪꦴꦮ ꦥꦫꦶꦤꦶꦧ꧀ꦧꦴꦤꦴ ꦌꦠ꧀ꦡꦤ꧀ꦠꦫꦺ ꦤꦶꦥꦤ꧀ꦤꦛ꧀ꦜꦴꦤꦴꦢꦷꦱꦸ ꦱꦸꦒꦤ꧀ꦣꦩꦺꦮ ꦮꦴꦪꦶ. ꦢꦺꦮꦴꦥꦶ ꦢꦶꦧ꧀ꦧꦕꦸꦟ꧀ꦟꦢꦶꦧ꧀ꦧꦒꦤ꧀ꦣꦥꦸꦥ꧀ꦦꦴꦤꦶ ꦎꦏꦶꦫꦤ꧀ꦠꦶ.

꧒꧗꧒. ꦱꦺꦴꦥꦶ ꦡꦺꦫꦺꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦄꦠ꧀ꦠꦤꦺꦴ ꦥꦸꦧ꧀ꦧꦏꦩ꧀ꦩꦁ ꦱꦫꦶꦠ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦆꦩꦩ꧀ꦲꦶ ꦨꦢ꧀ꦢꦏꦺ ꦏꦥ꧀ꦥꦺꦠꦶꦄꦴꦢꦶꦩꦴꦲ. ꦠꦁ ꦱꦧ꧀ꦧꦁ ꦲꦺꦛ꧀ꦜꦴ ꦮꦸꦠ꧀ꦠꦤꦪꦠ꧀ꦠꦴ ꦈꦠ꧀ꦠꦴꦤꦠ꧀ꦡꦠ꧀ꦠꦴ ꦕ ꦱꦸꦮꦶꦚ꧀ꦚꦺꦪ꧀ꦪꦩꦺꦮ, ꦏꦺꦮꦭꦁ ꦥꦸꦚ꧀ꦚꦤꦴꦤꦠ꧀ꦠꦁ ꦤꦴꦩꦤꦴꦤꦠ꧀ꦠꦚ꧀ꦕ ꦮꦶꦱꦺꦱꦺꦴ.

ꦕꦹꦭ꦳ꦱꦸꦒꦤ꧀ꦣꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.

ꦥꦚ꧀ꦕꦥꦚ꧀ꦚꦴꦱꦩꦮꦒ꧀ꦒꦮꦟ꧀ꦟꦤꦴ ꦱꦩꦠ꧀ꦠꦴ.