꧖. ꦧꦴꦏꦸꦭꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦖꦛ꧀ꦜꦴꦥꦢꦴꦤꦺ ꦲꦶꦩꦮꦤ꧀ꦠꦱ꧀ꦱꦴꦮꦶꦢꦹꦫꦺꦠꦶꦄꦴꦢꦶꦏꦁ ꦧꦴꦏꦸꦭꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦄꦪꦁ ꦏꦶꦫ ꦡꦺꦫꦺꦴ ꦄꦠꦷꦠꦺ ꦆꦠꦺꦴ ꦏꦥ꧀ꦥꦱꦠꦱꦲꦱ꧀ꦱꦴꦣꦶꦏꦱ꧀ꦱ ꦄꦱꦔ꧀ꦑ꧀ꦪꦺꦪ꧀ꦪꦱ꧀ꦱ ꦩꦠ꧀ꦡꦏꦺ ꦄꦤꦺꦴꦩꦢꦱ꧀ꦱꦶꦱ꧀ꦱ ꦨꦒꦮꦠꦺꦴ ꦈꦥ꧀ꦥꦠ꧀ꦠꦶꦠꦺꦴ ꦥꦸꦫꦺꦠꦫꦩꦺꦮ ꦧ꧀ꦫꦴꦲ꧀ꦩꦟꦏꦸꦭꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦮꦪꦥ꧀ꦥꦠ꧀ꦠꦺꦴ ꦠꦪꦺꦴ ꦮꦺꦢꦺ ꦈꦒ꧀ꦒꦟ꧀ꦲꦶꦠ꧀ꦮꦴ ꦠꦠ꧀ꦡ ꦱꦴꦫꦁ ꦄꦥꦱ꧀ꦱꦤ꧀ꦠꦺꦴ ‘‘ꦱꦩ꧀ꦥꦫꦴꦪꦶꦏꦠ꧀ꦡꦁ ꦒꦮꦺꦱꦶꦱ꧀ꦱꦴꦩꦷ’’ꦠꦶ ꦆꦱꦶꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦥꦧ꧀ꦧꦠꦥꦴꦢꦺ ꦮꦶꦲꦫꦤ꧀ꦠꦺꦴ ꦥꦚ꧀ꦕꦴꦨꦶꦚ꧀ꦚꦴꦄꦛ꧀ꦜꦱꦩꦴꦥꦠ꧀ꦠꦷꦤꦁ ꦭꦴꦨꦷ ꦲꦸꦠ꧀ꦮꦴ ꦮꦶꦲꦫꦤ꧀ꦠꦺꦴ ꦧꦸꦢ꧀ꦣꦸꦥ꧀ꦥꦴꦢꦁ ꦱꦸꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦣꦩ꧀ꦩꦁ ꦱꦸꦠ꧀ꦮꦴ ꦱꦫꦟꦺꦱꦸ ꦥꦠꦶꦛ꧀ꦜꦶꦠꦺꦴ ꦱꦠ꧀ꦡꦸ ꦮꦴꦠꦴꦧꦴꦣꦺ ꦈꦥ꧀ꦥꦤ꧀ꦤꦺ ꦄꦫꦚ꧀ꦚꦠꦺꦴ ꦨꦺꦱꦗ꧀ꦗꦴꦤꦶ ꦄꦴꦤꦺꦠ꧀ꦮꦴ ꦠꦁ ꦮꦹꦥꦱꦩꦺꦠ꧀ꦮꦴ ꦠꦁ ꦥꦸꦚ꧀ꦚꦁ ꦄꦴꦫꦺꦴꦒ꧀ꦪꦠ꧀ꦡꦴꦪ ꦥꦫꦶꦟꦴꦩꦺꦠ꧀ꦮꦴ ꦠꦠꦺꦴ ꦕꦸꦠꦺꦴ ꦧ꧀ꦫꦲ꧀ꦩꦭꦺꦴꦏꦺ ꦤꦶꦧ꧀ꦧꦠ꧀ꦠꦺꦴ ꦌꦏꦁ ꦄꦱꦔ꧀ꦑ꧀ꦪꦺꦪ꧀ꦪꦁ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦥꦢꦸꦩꦸꦠ꧀ꦠꦫꦧꦸꦢ꧀ꦣꦏꦴꦭꦺ ꦲꦁꦱꦮꦠꦷꦤꦒꦫꦺ ꦌꦏꦱ꧀ꦩꦶꦁ ꦏꦸꦭꦺ ꦤꦶꦧ꧀ꦧꦠ꧀ꦠꦺꦴ ꦮꦶꦚ꧀ꦚꦸꦠꦁ ꦥꦠ꧀ꦮꦴ ꦱꦠ꧀ꦡꦸ ꦣꦩ꧀ꦩꦢꦺꦱꦤꦁ ꦱꦸꦠ꧀ꦮꦴ ꦱꦠ꧀ꦡꦴꦫꦁ ꦌꦏꦁ ꦨꦶꦏ꧀ꦑꦸꦁ ꦄꦥ꧀ꦥꦴꦧꦴꦣꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦤ꧀ꦠꦁ ꦢꦶꦱ꧀ꦮꦴ ꦱꦪꦁ ꦠꦁ ꦜꦴꦤꦤ꧀ꦠꦫꦁ ꦄꦴꦏꦔ꧀ꦑꦤ꧀ꦠꦺꦴ ꦥꦟꦶꦣꦴꦤꦁ ꦏꦠ꧀ꦮꦴ ꦪꦴꦮꦗꦷꦮꦁ ꦏꦸꦱꦭꦏꦩ꧀ꦩꦁ ꦈꦥꦕꦶꦤꦶꦠ꧀ꦮꦴ ꦱꦸꦒꦠꦷꦱꦸꦪꦺꦮ ꦱꦁꦱꦫꦤ꧀ꦠꦺꦴ ꦮꦶꦥꦱ꧀ꦱꦶꦱ꧀ꦱ ꦨꦒꦮꦠꦺꦴ ꦈꦥ꧀ꦥꦠ꧀ꦠꦶꦠꦺꦴ ꦥꦸꦫꦺꦠꦫꦩꦺꦮ ꦧꦤ꧀ꦣꦸꦩꦠꦷꦤꦒꦫꦺ ꦧ꧀ꦫꦴꦲ꧀ꦩꦟꦏꦸꦭꦺ ꦤꦶꦧ꧀ꦧꦠ꧀ꦠꦺꦴ ꦱꦧ꧀ꦧꦱꦶꦥ꧀ꦥꦺꦱꦸ ꦤꦶꦥ꧀ꦦꦠ꧀ꦠꦶꦁ ꦥꦠ꧀ꦠꦺꦴ ꦠꦠ꧀ꦡ ꦱꦴꦫꦁ ꦄꦥꦱ꧀ꦱꦤ꧀ꦠꦺꦴ ꦆꦱꦶꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦙꦴꦤꦴꦨꦶꦚ꧀ꦚꦴꦭꦴꦨꦷ ꦲꦸꦠ꧀ꦮꦴ ꦥꦧ꧀ꦧꦠꦥꦴꦢꦺ ꦮꦱꦤ꧀ꦠꦺꦴ ꦧꦸꦢ꧀ꦣꦸꦥ꧀ꦥꦴꦢꦁ ꦱꦸꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦱꦫꦟꦺꦱꦸ ꦥꦠꦶꦛ꧀ꦜꦴꦪ ꦨꦶꦏ꧀ꦑꦹꦤꦁ ꦠꦶꦟꦥꦸꦥ꧀ꦦꦏꦫꦺꦴꦒꦺ ꦈꦥ꧀ꦥꦤ꧀ꦤꦺ ꦠꦁ ꦮꦹꦥꦱꦩꦺꦠ꧀ꦮꦴ ꦠꦠ꧀ꦡ ꦪꦴꦮꦠꦴꦪꦸꦏꦁ ꦜꦠ꧀ꦮꦴ ꦠꦠꦺꦴ ꦕꦸꦠꦺꦴ ꦧ꧀ꦫꦲ꧀ꦩꦭꦺꦴꦏꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦠꦠꦺꦴ ꦌꦏꦤꦮꦸꦠꦶꦏꦥ꧀ꦥꦺ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦏꦱ꧀ꦱꦥꦱ꧀ꦱ ꦨꦒꦮꦠꦺꦴ ꦏꦴꦭꦺ ꦧꦴꦫꦴꦟꦱꦶꦪꦁ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦓꦫꦴꦮꦴꦱꦁ ꦮꦱꦤ꧀ꦠꦺꦴ ꦌꦏꦁ ꦗꦶꦟ꧀ꦟꦁ ꦮꦶꦤꦱ꧀ꦱꦩꦴꦤꦁ ꦩꦲꦴꦮꦶꦲꦴꦫꦁ ꦢꦶꦱ꧀ꦮꦴ ꦠꦠ꧀ꦡ ꦈꦥꦺꦴꦱꦡꦴꦒꦴꦫꦴꦢꦶꦏꦁ ꦱꦧ꧀ꦧꦁ ꦄꦴꦮꦱꦡꦁ ꦏꦴꦫꦴꦥꦺꦠ꧀ꦮꦴ ꦠꦠ꧀ꦡ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦱꦧ꧀ꦧꦁ ꦨꦺꦱꦗ꧀ꦗꦁ ꦥꦛꦶꦪꦴꦢꦺꦠ꧀ꦮꦴ ꦪꦴꦮꦗꦷꦮꦁ ꦏꦸꦱꦭꦁ ꦏꦠ꧀ꦮꦴ ꦌꦏꦁ ꦧꦸꦢ꧀ꦣꦤ꧀ꦠꦫꦁ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦄꦩ꧀ꦲꦴꦏꦁ ꦨꦒꦮꦠꦺꦴ ꦈꦥ꧀ꦥꦠ꧀ꦠꦶꦠꦺꦴ ꦥꦸꦫꦺꦠꦫꦩꦺꦮ ꦏꦺꦴꦱꦩ꧀ꦧꦶꦪꦁ ꦱꦺꦛ꧀ꦜꦶꦏꦸꦭꦺ ꦤꦶꦧ꧀ꦧꦠ꧀ꦠꦶ.

ꦱꦺꦴ ꦩꦴꦠꦸꦏꦸꦕ꧀ꦖꦶꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦣꦴꦠꦷꦲꦶ ꦄꦫꦺꦴꦒꦨꦴꦮꦴꦪ ꦪꦩꦸꦤꦴꦪꦁ ꦤ꧀ꦲꦴꦥꦶꦪꦩꦴꦤꦺꦴ ꦠꦴꦱꦁ ꦲꦠ꧀ꦡꦠꦺꦴ ꦩꦸꦕ꧀ꦕꦶꦠ꧀ꦮꦴ ꦩꦕ꧀ꦖꦺꦤ ꦒꦶꦭꦶꦠꦺꦴ ꦄꦲꦺꦴꦱꦶ. ꦏꦺꦮꦛ꧀ꦛꦴ ꦠꦁ ꦩꦕ꧀ꦖꦁ ꦗꦴꦭꦴꦪ ꦒꦲꦺꦠ꧀ꦮꦴ ꦧꦴꦫꦴꦟꦱꦶꦪꦁ ꦱꦺꦛ꧀ꦜꦶꦨꦫꦶꦪꦴꦪ ꦮꦶꦏ꧀ꦏꦶꦟꦶꦁꦱꦸ. ꦱꦴ ꦠꦁ ꦒꦲꦺꦠ꧀ꦮꦴ ꦦꦴꦭꦪꦩꦴꦤꦴ ꦥꦸꦧ꧀ꦧꦺ ꦏꦠꦥꦸꦚ꧀ꦚꦦꦭꦺꦤ ꦄꦫꦺꦴꦒꦁ ꦢꦴꦫꦏꦁ ꦢꦶꦱ꧀ꦮꦴ ‘‘ꦥꦸꦠ꧀ꦠꦺꦴ ꦩꦺ ꦭꦢ꧀ꦣꦺꦴ’’ꦠꦶ ꦒꦲꦺꦠ꧀ꦮꦴ ꦥꦺꦴꦱꦺꦱꦶ. ꦱꦺꦴ ꦗꦤꦏꦺꦲꦶ ꦩꦴꦠꦴꦥꦶꦠꦹꦲꦶ ꦠꦁ ꦥꦮꦠ꧀ꦠꦶꦁ ꦱꦸꦠ꧀ꦮꦴ ꦄꦴꦒꦤ꧀ꦠ꧀ꦮꦴ ‘‘ꦄꦪꦁ ꦄꦩ꧀ꦲꦴꦏꦁ ꦥꦸꦠ꧀ꦠꦺꦴ, ꦢꦺꦡ ꦤꦺꦴ ꦥꦸꦠ꧀ꦠ’’ꦤ꧀ꦠꦶ ꦄꦤꦸꦪꦺꦴꦒꦺ ꦏꦠꦺ ꦫꦚ꧀ꦚꦴ ‘‘ꦈꦨꦪꦺꦱꦩ꧀ꦥꦶ ꦱꦴꦣꦴꦫꦟꦺꦴ ꦲꦺꦴꦠꦹ’’ꦠꦶ ꦢ꧀ꦮꦶꦤ꧀ꦤꦁ ꦏꦸꦭꦴꦤꦁ ꦢꦴꦪꦴꦢꦨꦴꦮꦺꦤ ꦮꦶꦤꦶꦕ꧀ꦖꦪꦁ ꦏꦠ꧀ꦮꦴ ꦜꦥꦶꦠꦠ꧀ꦠꦴ ꦧꦴꦏꦸꦭꦺꦴꦠꦶ ꦭꦢ꧀ꦣꦤꦴꦩꦺꦴ ꦮꦪꦥ꧀ꦥꦠ꧀ꦠꦺꦴ ꦩꦲꦴꦱꦩ꧀ꦥꦠ꧀ꦠꦶꦁ ꦄꦤꦸꦨꦮꦤ꧀ꦠꦺꦴ ꦢ꧀ꦮꦷꦱꦸ ꦱꦺꦛ꧀ꦜꦶꦏꦸꦭꦺꦱꦸ ꦌꦏꦺꦏꦱ꧀ꦩꦶꦁ ꦖꦩꦴꦱꦁ ꦖꦩꦴꦱꦁ ꦮꦱꦠꦶ. ꦠꦺ ꦄꦠ꧀ꦠꦤꦺꦴ ꦮꦴꦫꦺ ꦱꦩ꧀ꦥꦠ꧀ꦠꦺ ꦤꦴꦮꦴꦱꦔ꧀ꦓꦴꦛꦁ ꦧꦤ꧀ꦣꦶꦠ꧀ꦮꦴ ꦠꦠ꧀ꦫꦹꦥꦫꦶ ꦫꦠꦤꦩꦟ꧀ꦝꦥꦁ ꦏꦴꦫꦺꦠ꧀ꦮꦴ ꦥꦚ꧀ꦕꦔ꧀ꦒꦶꦏꦠꦹꦫꦶꦪꦺ ꦤꦶꦥ꧀ꦦꦴꦢꦺꦠ꧀ꦮꦴ ꦏꦸꦩꦴꦫꦁ ꦠꦠ꧀ꦡ ꦤꦶꦱꦷꦢꦴꦥꦺꦠ꧀ꦮꦴ ꦈꦨꦪꦤꦒꦫꦩꦗ꧀ꦙꦛ꧀ꦜꦴꦤꦁ ꦒꦔ꧀ꦒꦴꦪ ꦄꦴꦒꦕ꧀ꦖꦤ꧀ꦠꦶ, ꦄꦥꦫꦱꦺꦛ꧀ꦜꦶꦩꦤꦸꦱ꧀ꦱꦴꦥꦶ ꦌꦮꦩꦺꦮ ꦱꦗ꧀ꦗꦺꦠ꧀ꦮꦴ ꦠꦁ ꦜꦴꦤꦁ ꦒꦤ꧀ꦠ꧀ꦮꦴ ꦏꦸꦩꦴꦫꦁ ꦠꦠ꧀ꦡ ꦄꦴꦫꦺꦴꦥꦺꦠ꧀ꦮꦴ ꦒꦕ꧀ꦖꦤ꧀ꦠꦶ. ꦱꦺꦴ ꦌꦮꦁ ꦮꦝ꧀ꦞꦩꦴꦤꦺꦴ ꦄꦴꦱꦷꦠꦶꦏꦺꦴ ꦲꦸꦠ꧀ꦮꦴ ꦈꦨꦪꦱꦺꦛ꧀ꦜꦶꦥꦸꦠ꧀ꦠꦺꦴꦠꦶ ꦥꦴꦏꦛꦺꦴ. ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦣꦩ꧀ꦩꦁ ꦱꦸꦠ꧀ꦮꦴ ꦥꦛꦶꦭꦢ꧀ꦣꦱꦢ꧀ꦣꦺꦴ ꦥꦧ꧀ꦧꦗꦶꦠ꧀ꦮꦴ ꦱꦠ꧀ꦠꦴꦲꦁ ꦮꦴꦪꦩꦤ꧀ꦠꦺꦴ ꦄꦛ꧀ꦜꦩꦺ ꦢꦶꦮꦱꦺ ꦱꦲ ꦥꦛꦶꦱꦩ꧀ꦨꦶꦢꦴꦪ ꦄꦫꦲꦠ꧀ꦠꦁ ꦥꦴꦥꦸꦟꦶ.

꧓꧘꧖. ꦱꦺꦴ ꦄꦫꦲꦴ ꦲꦸꦠ꧀ꦮꦴ ꦄꦠ꧀ꦠꦤꦺꦴ ꦥꦸꦧ꧀ꦧꦏꦩ꧀ꦩꦁ ꦱꦫꦶꦠ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦲꦶꦩꦮꦤ꧀ꦠꦱ꧀ꦱꦴꦮꦶꦢꦹꦫꦺꦠꦶꦄꦴꦢꦶꦩꦴꦲ. ꦠꦱ꧀ꦱꦠ꧀ꦡꦺꦴ ꦲꦺꦛ꧀ꦜꦴ ꦮꦸꦠ꧀ꦠꦺꦴꦮ. ꦄꦥꦢꦴꦤꦥꦴꦭ꦳ꦶꦄꦠ꧀ꦡꦺꦴꦥꦶ ꦱꦸꦮꦶꦚ꧀ꦚꦺꦪ꧀ꦪꦺꦴꦮ. ꦱꦺꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦮꦶꦩꦸꦠ꧀ꦠꦶꦱꦸꦑꦺꦤ ꦮꦶꦲꦫꦤ꧀ꦠꦺꦴ ꦱꦛ꧀ꦜꦶꦮꦱ꧀ꦱꦱꦠꦴꦪꦸꦏꦺꦴ ꦲꦸꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦷꦠꦶ.

ꦧꦴꦏꦸꦭꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.