꧙. ꦣꦩ꧀ꦩꦕꦏ꧀ꦏꦶꦏꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦱꦶꦢ꧀ꦣꦠ꧀ꦡꦱ꧀ꦱ ꦨꦒꦮꦠꦺꦴꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦺꦴ ꦣꦩ꧀ꦩꦕꦏ꧀ꦏꦶꦏꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦴꦤꦶ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦺꦴ ꦱꦶꦢ꧀ꦣꦠ꧀ꦡꦱ꧀ꦱ ꦨꦒꦮꦠꦺꦴ ꦏꦴꦭꦺ ꦌꦏꦱ꧀ꦩꦶꦁ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦺꦴ ꦮꦸꦢ꧀ꦣꦶꦥ꧀ꦥꦠ꧀ꦠꦺꦴ ꦥꦸꦠ꧀ꦠꦢꦴꦫꦺꦲꦶ ꦮꦝ꧀ꦞꦶꦠꦺꦴ ꦮꦶꦨꦮꦱꦩ꧀ꦥꦤ꧀ꦤꦺꦴ ꦩꦲꦴꦨꦺꦴꦒꦺꦴ, ꦱꦺꦴ ꦫꦠꦤꦠ꧀ꦠꦪꦺ ꦥꦱꦤ꧀ꦤꦺꦴ ꦱꦢ꧀ꦣꦴꦗꦴꦠꦺꦴ ꦣꦩ꧀ꦩꦱꦨꦴꦪꦁ ꦣꦩ꧀ꦩꦴꦱꦤꦱ꧀ꦱ ꦥꦶꦛ꧀ꦜꦶꦠꦺꦴ ꦫꦠꦤꦩꦪꦁ ꦣꦩ꧀ꦩꦕꦏ꧀ꦏꦁ ꦏꦴꦫꦺꦠ꧀ꦮꦴ ꦥꦹꦗꦺꦱꦶ. ꦱꦺꦴ ꦠꦺꦤ ꦥꦸꦚ꧀ꦚꦏꦩ꧀ꦩꦺꦤ ꦢꦺꦮꦩꦤꦸꦱ꧀ꦱꦺꦱꦸ ꦤꦶꦧ꧀ꦧꦠ꧀ꦠꦛ꧀ꦜꦴꦤꦺꦱꦸ ꦱꦏ꧀ꦏꦱꦩ꧀ꦥꦠ꧀ꦠꦶꦁ ꦕꦏ꧀ꦏꦮꦠ꧀ꦠꦶꦱꦩ꧀ꦥꦠ꧀ꦠꦶꦚ꧀ꦕ ꦄꦤꦸꦨꦮꦶꦠ꧀ꦮꦴ ꦏꦩꦺꦤ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦌꦏꦱ꧀ꦩꦶꦁ ꦏꦸꦭꦒꦺꦲꦺ ꦈꦥ꧀ꦥꦤ꧀ꦤꦺꦴ ꦮꦶꦨꦮꦱꦩ꧀ꦥꦤ꧀ꦤꦺꦴ ꦱꦚ꧀ꦗꦴꦠꦱꦢ꧀ꦣꦺꦴ ꦥꦧ꧀ꦧꦗꦶꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦤꦕꦶꦫꦱ꧀ꦱꦺꦮ ꦄꦫꦲꦠ꧀ꦠꦁ ꦥꦠ꧀ꦮꦴ ꦥꦸꦧ꧀ꦧꦺ ꦏꦠꦏꦸꦱꦭꦤꦴꦩꦱꦢꦶꦱꦤꦴꦩꦺꦤ ꦣꦩ꧀ꦩꦕꦏ꧀ꦏꦶꦏꦠ꧀ꦡꦺꦫꦺꦴꦠꦶ ꦥꦴꦏꦛꦺꦴ ꦗꦴꦠꦺꦴ ꦄꦲꦺꦴꦱꦶ.

꧑꧐꧒. ꦱꦺꦴ ꦥꦸꦚ꧀ꦚꦱꦩ꧀ꦨꦴꦫꦴꦤꦸꦫꦹꦥꦺꦤ ꦥꦠ꧀ꦠꦄꦫꦲꦠ꧀ꦠꦦꦭꦺꦴ ꦄꦠ꧀ꦠꦤꦺꦴ ꦥꦸꦧ꧀ꦧꦏꦩ꧀ꦩꦁ ꦱꦫꦶꦠ꧀ꦮꦴ ꦗꦴꦠꦱꦺꦴꦩꦤꦱ꧀ꦱꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦱꦶꦢ꧀ꦣꦠ꧀ꦡꦱ꧀ꦱ ꦨꦒꦮꦠꦺꦴꦠꦶꦄꦴꦢꦶꦩꦴꦲ. ꦱꦷꦲꦴꦱꦤꦱ꧀ꦱ ꦱꦩ꧀ꦩꦸꦑꦴꦠꦶ ꦱꦷꦲꦱ꧀ꦱ ꦨꦒꦮꦠꦺꦴ ꦤꦶꦱꦶꦤ꧀ꦤꦱ꧀ꦱ ꦱꦩ꧀ꦩꦸꦑꦴ ꦧꦸꦢ꧀ꦣꦴꦱꦤꦱ꧀ꦱ ꦄꦨꦶꦩꦸꦑꦛ꧀ꦜꦴꦤꦺꦠꦶ ꦄꦠ꧀ꦡꦺꦴ, ꦣꦩ꧀ꦩꦕꦏ꧀ꦏꦁ ꦩꦺ ꦜꦥꦶꦠꦤ꧀ꦠꦶ ꦩꦪꦴ ꦣꦩ꧀ꦩꦕꦏ꧀ꦏꦴꦏꦴꦫꦺꦤ ꦈꦨꦠꦺꦴ ꦱꦷꦲꦫꦹꦥꦁ ꦢꦱ꧀ꦱꦺꦠ꧀ꦮꦴ ꦩꦗ꧀ꦙꦺ ꦄꦴꦢꦴꦱꦱꦢꦶꦱꦁ ꦏꦴꦫꦺꦠ꧀ꦮꦴ ꦏꦠꦁ ꦣꦩ꧀ꦩꦕꦏ꧀ꦏꦁ ꦜꦥꦶꦠꦁ ꦥꦹꦗꦶꦠꦁ. ꦏꦶꦁ ꦨꦹꦠꦁ? ꦮꦶꦚ꧀ꦚꦹꦲꦶ ꦩꦺꦣꦴꦮꦷꦲꦶ ‘‘ꦄꦠꦷꦮ ꦱꦸꦤ꧀ꦢꦫ’’ꦤ꧀ꦠꦶ ꦮꦟ꧀ꦟꦶꦠꦁ ꦡꦺꦴꦩꦶꦠꦁ ꦱꦸꦏꦠꦁ ꦣꦩ꧀ꦩꦕꦏ꧀ꦏꦤ꧀ꦠꦶ ꦱꦩ꧀ꦧꦤ꧀ꦣꦺꦴ.

꧑꧐꧓. ꦕꦴꦫꦸꦮꦟ꧀ꦟꦺꦴꦮ ꦱꦺꦴꦨꦴꦩꦷꦠꦶ ꦱꦸꦮꦟ꧀ꦟꦮꦟ꧀ꦟꦺꦴ ꦆꦮ ꦱꦺꦴꦨꦴꦩꦶ ꦮꦶꦫꦺꦴꦕꦴꦩꦷꦠꦶ ꦄꦠ꧀ꦡꦺꦴ. ‘‘ꦕꦠꦸꦮꦟ꧀ꦟꦺꦲꦶ ꦱꦺꦴꦨꦴꦩꦷ’’ꦠꦶꦥꦶ ꦥꦴꦜꦺꦴ, ꦠꦱ꧀ꦱ ꦑꦠ꧀ꦠꦶꦪꦧ꧀ꦫꦴꦲ꧀ꦩꦟꦮꦺꦱ꧀ꦱꦱꦸꦢ꧀ꦢꦗꦴꦠꦶꦱꦔ꧀ꦑꦴꦠꦺꦲꦶ ꦕꦠꦹꦲꦶ ꦮꦟ꧀ꦟꦺꦲꦶ ꦱꦺꦴꦨꦴꦩꦶ ꦮꦶꦫꦺꦴꦕꦴꦩꦷꦠꦶ ꦄꦠ꧀ꦡꦺꦴ. ꦱꦪꦺꦴꦒ꧀ꦒꦧꦭꦮꦴꦲꦤꦺꦴꦠꦶ ꦱꦸꦮꦟ꧀ꦟꦱꦶꦮꦶꦏꦴꦢꦷꦲꦶ ꦪꦺꦴꦒ꧀ꦒꦺꦲꦶ ꦕ ꦱꦺꦤꦴꦥꦠꦶꦩꦲꦴꦩꦠ꧀ꦠꦴꦢꦷꦲꦶ ꦱꦺꦮꦏꦺꦲꦶ ꦧꦭꦺꦲꦶ ꦕ ꦲꦠ꧀ꦡꦶꦄꦱ꧀ꦱꦫꦡꦱꦔ꧀ꦑꦴꦠꦺꦲꦶ ꦮꦴꦲꦤꦺꦲꦶ ꦕ ꦱꦲꦶꦠꦺꦴꦠꦶ ꦄꦠ꧀ꦡꦺꦴ. ꦧꦲꦸꦗ꧀ꦗꦤꦴ ꦧꦲꦮꦺꦴ ꦩꦤꦸꦱ꧀ꦱꦴ ꦄꦤꦸꦪꦤ꧀ꦠꦴ ꦩꦩꦴꦤꦸꦮꦠ꧀ꦠꦤ꧀ꦠꦴ ꦤꦶꦕ꧀ꦕꦁ ꦤꦶꦕ꧀ꦕꦏꦴꦭꦁ ꦥꦫꦶꦮꦴꦫꦺꦤ꧀ꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮꦴꦠꦶ.

ꦣꦩ꧀ꦩꦕꦏ꧀ꦏꦶꦏꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.